བོད་དུ་གསུང་རབ་དམ་ཆོས་དག་ཐར་བཏོན་པའི་ལེའུ།

དེ་ནས་ བྱམས་པ་གླིང ་དུ་འཆད་ཉན་བྱསཿ ཤར་སྒོ་འཇམ་དཔལ་གླིང་དུ་རྩིས་སྨན་བསྒྱུརཿ རྒྱ་ནག་སློབ་དཔོན་ཧ་ར་ནག་པོ་དང་ཿ ཧྭ་ཤང་མཧཱ་ཡཱ་ན་སཱུ་ཏྲ་དང་ཿ མཧཱ་རཱ་ཛ་མཧཱ་དེ་བ་དང་ཿ ལོ་ཙཱ་བི་རྗེ་བཙན་པོ་ཤི་

༼༡༨༩ན༽ལ་སོགསཿ བོད་ཀྱི་མཁས་པ་མི་བཞིས་ནག་རྩིས་བསྒྱུརཿ སྔ་འགྱུར་རྒྱ་མོ་ཀང་ཇོས་བསྒྱུར་བ་ཡིནཿ སྤང་རྒྱན་བླ་མའི་གཙུག་ལག་ལྷག་མ་བསྒྱུརཿ ཕྱི་འགྱུར་རྒྱལ་པོ་ཁྲི་ལྡེ་གཙུག་བརྟན་གྱིསཿ བི་རྗེ་བཙན་པོ་ཤི་ལ་གདན་དྲངས་ནསཿ རྒྱ་ཡི་བསྟན་པ་བཅོ་བརྒྱད་བསྒྱུར་འཕྲོ་བསྒྱུརཿ བར་འགྱུར་ཕྱི་རྒྱུད་ནང་རྒྱུད་གསང་རྒྱུད་དང་ཿ ཡང་གསང་ཐུགས་རྒྱུད་སྡེ་རུ་ལོངས་པའི་རྒྱུདཿ སྔན་ཆད་མ་འགྱུར་འཕྲོ་རྣམས་ཐམས་ཅད་བསྒྱུརཿ ཡང་འགྱུར་སྣང་གསལ་མ་བུ་ཆ་ལྔ་དང་ཿ སྡོང་པོ་དགུ་འདུས་གབ་པ་མངོན་ཕྱུང་དང་ཿ ཚངས་པ་བཞི་འདུས་ལ་སོགས་མང་བསྒྱུར་བཿ ལེའུ་སོ་ལྔ་པ་རུ་གསལ་ལྟར་བསྒྱུརཿ དེ་ཡིས་དུས་ན་ལོ་པཎ་ཐམས་ཅད་ལཿ བློན་པོ་མགོས་ཀྱིས་ཟ་འགྱོགས་བྱས་པའི་གྲལཿ མདོ་སྔགས་རྩིས་སྨན་ཆོས་ཀྱི་བགྲོ་གླིང་མཛོདཿ ཨུ་རྒྱན་སློབ་དཔོན་པདྨའི་ཞལ་སྔ་ནསཿ རྒྱ་ནག་ཡུལ་བྱོན་པཎྜི་ཏ་རྣམས་ལཿ རྒྱ་ནག་རི་བོ་རྩེ་ལྔ་བྱ་བ་དེའིཿ རེ་རེའི་མིང་རེ་ཡོད་པ་ཤོད་དང་གསུངསཿ སློབ་དཔོན་ཧ་ར་ནག་པོའི་ཞལ་ན་རེཿ རྒྱ་ནག་གྷིའུ་དེ་ཤན་བྱ་བ་ལཿ རི་བོ་རྩེ་མོ་ལྔ་རུ་ཡོད་པ་ལསཿ དབུས་ཀྱི་རི་ལ་པོ་ཧ་རྩེ་ཞེས་ཟེརཿ དེ་ན་འཇམ་དཔལ་གཞོན་ནུར་གྱུར་པ་བཞུགསཿ ཤར་ཕྱོགས་ཨ་ཁྲ་དྷ་རི་རྩེ་ཞེས་ཟེརཿ དེ་ན་འཇམ་དཔལ་ཡེ་ཤེས་སེམས་དཔའ་

༼༡༨༩བ༽བཞུགསཿ ལྷོ་ཕྱོགས་གྷ་ན་རི་ཡི་རྩེ་ཞེས་ཟེརཿ དེ་ཡི་རྩེ་ལ་འཇམ་དཔལ་སྔོན་པོ་བཞུགསཿ ནུབ་ཕྱོགས་ཨ་པ་ར་ཡི་རྩེ་ཞེས་ཟེརཿ དེ་ན་འཇམ་དཔལ་སྨྲ་བའི་སེང་གེ་བཞུགསཿ བྱང་ཕྱོགས་སིག་ཏ་ཨ་ཁྲོ་རི་ཡི་རྩེཿ དེ་ན་འཇམ་དཔལ་དྲི་མ་མེད་པ་བཞུགསཿ རྩིས་འདི་འཇམ་དཔལ་གཞོན་ནུར་གྱུར་པས་གསུངསཿ འཇིག་རྟེན་ཆོས་འཛུད་ཀུན་རྫོབ་ཐེག་པ་ཡིནཿ དེ་སྐད་གསུངས་པས་དེ་ཡིན་ལེགས་སོ་གསུངསཿ དེ་ནས་རྒྱ་ནག་ཧ་ར་ནག་པོ་ལཿ པ་གོར་བཻ་རོ་ཙ་ནས་བོད་ཕན་ཕྱིརཿ ཤམ་ཐབས་བར་ནས་གསེར་སྲང་གང་ཕྱུང་ཕུལཿ དམངས་པོ་སྲིད་ཀྱི་ཆབ་ཀ་སླད་དང་གཅིགཿ དབུལ་པོ་མི་ཟད་གཏེར་ལ་སྤྱོད་དང་གཉིསཿ ཚེ་ཟད་སྲོག་གི་ཀ་བ་འཛུགས་དང་གསུམཿ མཛེ་ཤུད་མེ་འཕྲོ་གཅོད་དང་བཞི་ཞུས་སོཿ གཞན་ཡང་སྨེ་བའི་སྒོ་བཞི་སྤར་ཁའི་སྐོརཿ གཙུག་ལག་རྩིས་ཀྱི་གནད་འགག་མང་པོ་ཞུསཿ རྒྱ་ནག་སྨན་པ་ཧ་ཤང་དེ་བ་དང་ཿ བླ་སྨན་ཉང་བཙན་ཤི་ལ་ལ་སོགས་པསཿ ཡན་ལག་བརྒྱད་པ་བདུད་རྩི་སྙིང་པོ་དང་ཿ སྨན་གྱི་བཅུད་ལེན་བྱེད་ཐབས་མང་པོ་བསྒྱུརཿ དེ་ནས་ཨུ་རྒྱན་པདྨ་འབྱུང་གནས་དང་ཿ བོད་ཀྱི་ལོ་ཙཱ་མཁས་པ་བཅོ་ལྔ་ཡིསཿ ཨཱརྻ་པ་ལོའི་གླིང་དུ་ལུང་བསྟན་བསྒྱུརཿ འདས་དང་མ་འོངས་ད་ལྟར་བཞུགས་པ་ཡིཿ གང་ཟག་བཟང་ངན་འབྱུང་ཚུལ་

༼༡༩༠ན༽ལུང་དུ་བསྟནཿ རྒྱ་བོད་ལོ་པཎ་མཁས་པ་ཐམས་ཅད་ཀྱིསཿ ཉི་མ་སྟེང་འོག་སྔ་དྲོ་ཕྱི་མ་ཟད་བྱསཿ འཇམ་དཔལ་གླིང་དུ་མདོ་སྔགས་འཆད་ཉན་བཙུགསཿ ཨཱརྻ་པ་གླིང་སྒྲིབ་སྦྱོང་ཚོགས་གཉིས་སྤེལཿ  བྱམས་པ་གླིང ་དུ་ལུང་བསྟན་དབུགས་དབྱུང་མཛདཿ བྱང་ཆུབ་གླིང་དུ་ཐེག་ཆེན་སེམས་གཉིས་བསྐྱེདཿ རྣམ་དག་ཁྲིམས་ཁང་གླིང་དུ་ཆོས་ཁྲིམས་བཅསཿ བརྡ་སྦྱོར་ཚང་མང་གླིང་དུ་རབ་ཏུ་བྱུང་ཿ སྔགས་པ་གླིང་དུ་འགལ་རྐྱེན་བར་ཆད་བསྲུང་ཿ སྒྲ་བསྒྱུར་གླིང་དུ་མདོ་སྔགས་ཆོས་རྣམས་བསྒྱུརཿ བཻ་རོའི་གླིང་དུ་སྡེ་སྣོད་ཞུ་དག་བྱེདཿ བསམ་གཏན་གླིང་དུ་མི་གཡོ་ཏིང་འཛིན་བསྒོམཿ སྣ་ཚོགས་གླིང་དུ་ཐེག་པའི་གོ་རིམ་འབྱེདཿ དཀོར་མཛོད་ཉི་ཤུ་ཆོས་ནོར་བཙས་ཀྱིས་གཏམསཿ དག་བྱེད་ཁྲུས་ཁང་དྲི་བཟང་ཁྲུས་ནས་འདོནཿ ཚང་མང་ཀེ་རུར་དགེ་འདུན་གདུགས་ཚོད་སྦྱོརཿ མཐུ་རྩལ་ཀླུ་གླིང་མཐུ་གཏད་ངན་སྔགས་བསྒྱུརཿ དེ་དུས་སྔགས་དང་མཚན་ཉིད་ལོ་ཙཱ་བཿ ཆེ་གསུམ་ཆུང་གསུམ་འབྲིང་གསུམ་དགུ་རུ་ཕྱེཿ རྒན་གསུམ་གཞོན་གསུམ་དྲུག་ཏུ་ཕྱེ་བ་ལཿ བཻ་རོ་ཙ་ན་ཀླུའི་དབང་མེས་བཀོལ་གསུམཿ ལོ་ཙཱ་ཆེ་གསུམ་ཡིན་ཏེ་ཆུང་གསུམ་ནིཿ སྐ་བ་རྨ་རིན་སྦ་མི་ཁྲི་གཞེར་གསུམཿ འབྲིང་གསུམ་གཉགས་བན་ཛྙཱ་ན་ཀུ་མཱ་རཿ ཞང་ལོ་སེ་བཙན་ཤུད་བུ་ཁོད་

༼༡༩༠བ༽སླེབ་གསུམཿ རྒན་པ་གསུམ་ནི་ལྷ་ལུང་ཡུལ་སྐོང་དང་ཿ ཡེ་ཤེས་སྡེ་དང་ཅོག་རོ་ཀླུའི་རྒྱལ་མཚནཿ གཞོན་པ་གསུམ་ནི་གཡུ་སྒྲ་སྙིང་པོ་དང་ཿ ལེགས་སྦྱིན་ཉི་མ་ནམ་མཁའི་སྙིང་པོའོཿ མཚན་བུ་ཡོན་ཏན་སྙིང་པོ་རྩེ་མང་དང་ཿ དེ་བ་བྱང་སྙིང་དམ་པ་འདུལ་ལ་སོགསཿ འདིར་མ་བཀོད་པ་གཞན་དག་ཐམས་ཅད་དོཿ རྒྱ་ནས་བྱོན་པའི་པཎ་ཆེན་ཐམས་ཅད་གྱིསཿ བཻ་རོ་ཙ་ནའི་གླིང་དུ་བྱོན་པའི་ཚེཿ འདས་དང་མ་འོངས་ད་ལྷ་ཐམས་ཅད་དུཿ བཻ་རོ་ཙ་ན་འདྲ་བའི་ལོ་ཙཱ་བཿ སྔར་ཡང་བྱོན་རེ་ད་ཡང་འབྱོན་དེ་སྐནཿ མ་འོངས་རྒྱ་གར་འཕྲལ་སྐད་ཤེས་ཙམ་ལཿ ལོ་ཙཱར་བཞེད་སྲིད་བཻ་རོའི་ཆར་མི་ཉེཿ ལོ་ཙཱར་བཏགས་ཀྱང་དོན་ལ་པཎྜི་ཏཿ འདི་ཡི་ཆོས་དྲིན་ཡོད་དོ་ཕྱི་རབས་རྣམསཿ དེ་ནས་ཆོས་ཀྱི་རབ་གནས་བྱས་པའི་ཚེཿ གླེགས་བམ་ཐམས་ཅད་ཚེ་དང་ལྡན་པས་ཁུརཿ ལྔ་ལྔའི་བར་དུ་མཆོད་ལྔ་འཁྱེར་མཁན་རེཿ གདུགས་དང་རྒྱལ་མཚན་འོག་ལ་ཆོས་སྦྲེངས་བྱསཿ བསམ་ཡས་དབུ་རྩེ་གླིང་གསུམ་ལན་གསུམ་བསྐོརཿ རྔ་ཤོན་གར་འཆམས་འབག་པ་མི་རེ་རེཿ ཕྱོགས་བཞི་མཚམས་བརྒྱད་ལྟད་མོས་རི་མགོ་ནོནཿ ལོ་པཎ་རེ་རེས་ཆོ་ག་མི་འདྲ་རེསཿ རབ་ཏུ་གནས་ཤིང་མེ་ཏོག་འཐོར་བར་གྱུརཿ རྒྱལ་པོ་ནམ་སྙིང་ལྟད་མོའི་གསེབ་བྱོན་པསཿ ཡོན་མཆོད་གཉིས་ནི་ཕྱག་ལ་མ་འཆམ་སྟེཿ རྗེ་ནི་འགྲེང་

༼༡༩༡ན༽བ་མགོ་ནག་ཡོངས་རྗེ་ཡིནཿ བདུད་རྡོག་ཆགས་ཀྱི་རྐྱེན་བྱང་ང་ཡིན་པསཿ ནམ་མཁའི་སྙིང་པོས་ང་ལ་ཕྱག་འཚོལ་གསུངསཿ སློབ་དཔོན་ཆེན་པོ་ནམ་མཁའི་སྙིང་པོ་ཡིསཿ ང་ནི་རྣལ་འབྱོར་ཡོངས་ཀྱི་དབང་ཕྱུག་ཆེཿ སྐུ་དང་ཡེ་ཤེས་བདག་ཉིད་དང་ཡིན་ཞིང་ཿ རྒྱལ་བ་ཉིད་ཀྱིས་ང་ལ་དབང་ཞུས་པསཿ བདག་ལ་ཕྱག་འཚོལ་གསུངས་ནས་མ་འཆམ་སྟེཿ གནུབས་བན་ནམ་མཁའི་སྙིང་པོའི་ཞལ་སྔ་ནསཿ སངས་རྒྱས་བསྟན་པའི་རྩ་བ་མ་འཆུགས་པཿ དམ་ཆོས་འདུལ་བའི་སྡེ་སྣོད་བོད་དུ་བསྒྱུརཿ སངས་རྒྱས་བསྟན་པའི་སྙེ་མ་མ་བསྐམས་པཿ དམ་ཆོས་ཕ་རོལ་ཕྱིན་པ་བོད་དུ་བསྒྱུརཿ སངས་རྒྱས་བསྟན་པའི་ཉིང་ཁུ་མ་བསླད་པཿ གསང་སྔགས་ཕྱི་ནང་རྒྱུད་རྣམས་བོད་དུ་བསྒྱུརཿ བསྟན་གཉིས་ཉི་ཟླ་ཟུང་ཞིག་ཤར་བར་བྱསཿ རྒྱ་བོད་བསགས་པ་ཅན་གྱི་ལོ་པཎ་ལཿ རྒྱལ་པོས་ཕྱག་མི་འཚལ་ན་དབང་ཡོད་མོདཿ ཅེས་གསུངས་ཡིད་ལ་མི་འཆམ་ཐུགས་མུག་སྟེཿ དེང་ནས་གཟུང་སྟེ་སྒྲུབ་པ་འབའ་ཞིག་ལསཿ རྒྱལ་པོའི་སློབ་དཔོན་དག་ནི་མི་ཕྱེད་དོཿ ཞེས་གསུངས་ཐུགས་ཀྱི་དམ་བཅས་ཅི་བདེར་གནསཿ ལྷོ་བྲག་མཁར་ཆུར་འབྱོན་དུ་ཆས་པ་ལཿ པཎ་ཆེན་རྣམས་ཀྱིས་རྒྱལ་པོར་མཚམས་སྦྱར་བཿ རྗེ་ཉིད་དངོས་གྲུབ་ཐོབ་ཀར་དམ་མ་ཉམསཿ ནམ་མཁའི་སྙིང་པོ་བླ་

༼༡༩༡བ༽མར་ཁུར་ཅིག་གསུངསཿ དེ་ཚེ་མི་རྣམས་ཐམས་ཅད་ཧ་ལས་ནསཿ ཕྱི་བློན་ནང་བློན་གྲོས་དབང་མ་ལུས་ཚོགསཿ ནམ་མཁའི་སྙིང་པོ་གསོད་པའི་ནང་ཁྲིམས་བཅསཿ བློན་པོ་རྣམས་ཀྱིས་ལྷོ་སྒོར་ཁྲི་གཉིས་བརྩིགསཿ གཅིག་ལ་རྗེ་བཞུགས་གཅིག་ལ་སློབ་དཔོན་བཞུགསཿ བློན་པོ་རྣམས་ཀྱིས་མདའ་རྩེ་མདུང་རྩེ་བདརཿ རྗེ་ཉིད་སྤྱང་ཀི་ལྟར་འདར་ཕཊ་ཕཊ་གསུང་ཿ སློབ་དཔོན་གྷ་ཊ་ཤག་གསུངས་ཐལ་མོ་ཕྲལཿ བློན་པོ་རྣམས་ཀྱིས་མཚོན་བྲུལ་ཧང་ཧང་ལུསཿ སློབ་དཔོན་ལྷ་མགོན་གཉིས་ཀྱི་དྲུང་དུ་བྱོནཿ ཞབས་རྡོ་བརྒྱབ་ནས་ཕར་ལོངས་འདོད་དོ་གསུངསཿ རྟེན་གཉིས་ལངས་ཏེ་སློབ་དཔོན་ཕྱི་ལ་ཁྲིདཿ ཧཱུཾ་ཧཱུཾ་དྲག་པོ་གསུངས་ནས་ཐོག་ཕབ་སྟེཿ མཛུབ་མོ་ལ་དཀྲིས་བར་སྣང་དམར་ཧྲིལ་བྱུང་ཿ འུར་ཤང་རྡོ་ཡི་བྲག་ལ་བརྒྱབ་པ་ཡིསཿ བྲག་ཀྱང་ཆོ་ལོ་ཙམ་དུ་བཏང་ངོ་སྐདཿ སློབ་དཔོན་རྗེ་ལགས་མ་བསྙེམས་སམ་ཞུས་པསཿ འཇིགས་དང་འཇིགས་ཆེ་གནམ་ལྕགས་ཐོག་བས་ཀྱང་ཿ བནྡེའི་ཧཱུཾ་སྒྲ་དེ་རང་འཇིགས་གསུངས་ནསཿ སློབ་དཔོན་ཉིད་ལ་རྒྱལ་པོས་ཕྱག་བཙལ་ལོཿ མི་རྣམས་ཀུན་གྱིས་ཞལ་ཆེ་བཅད་ནས་ནིཿ སློབ་དཔོན་ནམ་མཁའི་སྙིང་པོས་ཕྱག་བོར་ལཿ རྒྱལ་པོས་བླ་མ་རྡོ་རྗེ་སློབ་དཔོན་དུཿ བདག་ལ་ཡོན་ཏན་ཐམས་ཅད་སྐྱེད་བྱེད་པཿ འདི་དག་ཕྱག་འཚལ་ཡུལ་གྱུར་ཡིན་སྙམ་དུཿ

༼༡༩༢ན༽རྗེ་ཡིས་ལྟད་མོའི་གསེབ་ཏུ་ཕྱག་ཚོལ་ཟེརཿ རྒྱལ་པོས་དུམ་ཞིག་ཐུགས་དགོངས་གཏད་མཛད་ནསཿ ལོ་ཙཱ་ཐམས་ཅད་ང་ལ་སྐུ་དྲིན་ཆེཿ གཙུག་ལག་ཁང་དང་དཔེས་པའི་ཆོས་འགྱུར་སྙམཿ རྒྱལ་པོ་དགྱེས་མཛད་བཤད་ཉན་གྲ་ཡང་བཙུགསཿ ལྷ་སར་དམ་ཆོས་འདུལ་བའི་སྟོན་མོ་བཙུགསཿ ཁྲ་འབྲུག་མངོན་པ་གསང་སྔགས་སྟོན་མོ་མཛདཿ མཐའ་འདུལ་ཡང་དངུལ་གཙུག་ལག་བརྒྱ་རྩ་བརྒྱདཿ འཆད་ཉན་དུས་སྟོན་ལྟད་མོ་རེ་རེ་མཛདཿ བསམ་ཡས་མཆིམས་ཕུ་ཡར་ཀླུངས་ཤེལ་གྱི་བྲགཿ ཡེར་པ་ཟླ་བ་ཕུག་སོགས་སྒྲུབ་གནས་ཀུནཿ སྒྲུབ་གྲ་སྒྲུབ་མཆོད་རྒྱུད་སྟོན་ཚེས་བཅུ་བཙུགསཿ སྒོམ་གྲ་བརྒྱ་དང་རྩ་བརྒྱད་བསྒོམ་ས་ལཿ ཆོས་འཁོར་སྟོད་སྨད་ཆུ་ལ་དགེ་གྲུ་བཙུགསཿ སློབ་འཆད་གྲ་ལ་རྗེ་ཡིས་མཐུན་རྐྱེན་སྦྱོརཿ བོད་ཀྱི་བན་སྔགས་དབུ་ཟླུམ་ལྕང་ལོ་ཅནཿ དབང་ཆེ་ཁ་དྲག་ཤེ་མོ་ཡོད་དུ་བཅུགཿ གྲུ་ལ་གྲུ་བཅས་མི་དགོས་ལམ་འཕྲང་བདེཿ ཕྱུག་པོ་ཐམས་ཅད་ཆོས་འདྲིའི་ཁྲིམས་ལ་བཙུདཿ ལྟོགས་པ་ཐམས་ཅད་འདྲི་ཀློག་ཁྲིམས་ལ་བཀོདཿ དགེ་བ་མཆོད་རྟེན་བརྒྱ་རྩ་བཞེང་དུ་བཅུགཿ མདོ་རྣམས་གཙུག་ལག་ཁང་དུ་བཞུགས་སུ་གསོལཿ རྒྱུད་རྣམས་སྔགས་པའི་གླིང་དུ་བཞུགས་སུ་བཅུགཿ འཁོར་བའི་སྡུག་བསྔལ་སེལ་བ་དམ་པའི་ཆོསཿ བྱ་བ་ལེགས་འཆོས་

༼༡༩༢བ༽ཉེས་སྤང་གཙུག་ལག་རྩིསཿ ནད་པའི་ཟུག་གཟེར་གཅོག་པ་ཐུགས་རྗེའི་སྨནཿ ཐམས་ཅད་མ་ལུས་བོད་དུ་སྣང་བར་བྱསཿ མི་ལོ་བཅུ་གསུམ་བར་དུ་ཆོས་བསྒྱུར་རོཿ འདི་དག་ཁྲི་སྲོང་ལྡེའུ་བཙན་ལག་རིས་ཡིནཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བོད་དུ་གསུང་རབ་དམ་ཆོས་དག་ཐར་བཏོན་པའི་ལེའུ་སྟེ་གྱ་ལྔ་པའོཿ ཿཐ་ཐ་ཉྲ་རྒྱ་རྒྱཿ ཿ