བསམ་ཡས་སྐུ་རྟེན་ལྷའི་བཞུགས་བྱང་དཀར་ཆག་ཏུ་བཀོད་པའི་ལེའུ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ བསམ་ཡས་སྐུ་རྟེན་བཞུགས་བྱང་ཡི་གེར་བཏབཿ དཀར་ཆག་རྒྱས་བསྡུས་གསུམ་ལས་འདི་རུ་བསྡུསཿ མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཿ གཞི་ཆེ་དཔངས་མཐོ་རྒྱུ་བཟང་བཀོད་པ་ལེགསཿ འདུལ་བ་ལྟར་ན་གཙུག་ལག་ཁང་དུ་བཞེངསཿ མདོ་སྡེ་ལྟར་ན་ཞིང་ཁམས་གཅིག་གི་ཚུལཿ མངོན་པ་ལྟར་ན་སྣོད་བཅུད་གཅིག་ཏུ་གྲུབཿ གསང་སྔགས་ལྟར་ན་དཀྱིལ་འཁོར་གཅིག་ཏུ་རྫོགསཿ དབུ་རྩེ་རིགས་གསུམ་བཀོད་པའི་ཁྱད་པར་ནིཿ འོག་ཁང་རྒྱ་ནག་བར་ཁང་རྒྱ་གར་ལུགསཿ སྟེང་ཁང་ལི་ཡི་ལུགས་སུ་བཞེངས་པ་ཡིནཿ ཕྱོགས་བཞིར་སངས་རྒྱས་དགའ་བའི་རྒྱུད་རིས་བྲིསཿ ཆོས་སྐྱོང་ལག་ན་རྡོ་རྗེ་བཞི་ལ་གཏདཿ སྟེང་ཁང་གཙོ་བོ་རྣམ་སྣང་ཀུན་ཏུ་ཞལཿ བྱམས་པ་སྤྱན་རས་གཟིགས་དང་ཀུན་ཏུ་བཟང་ཿ འཇམ་དབྱངས་
༼༡༩༣ན༽ནམ་མཁའི་སྙིང་པོ་རྡོ་རྗེ་འཛིནཿ ས་ཡི་སྙིང་པོ་སྒྲིབ་པ་རྣམ་པར་སེལཿ ཉེ་བའི་སྲས་བརྒྱད་འཁོར་གྱིས་རབ་ཏུ་བསྐོརཿ ཕྱོགས་བཅུ་ནས་བྱོན་སེམས་དཔའ་ཉི་ཤུ་བཞིཿ སྒོ་སྲུང་བརྒྱད་དེ་བཞི་བཅུ་རྩ་གཅིག་བཞུགསཿ རི་མོར་རྡོ་རྗེ་དབྱིངས་ཀྱི་ལྷ་ཚོགས་བཀོདཿ ཆོས་སྐྱོང་གནོད་སྦྱིན་ཟངས་ཀྱི་འབེ་ལོག་ཅནཿ བར་ཁང་གཙོ་བོ་དུས་གསུམ་སངས་རྒྱས་ལཿ ས་བཅུའི་བྱང་ཆུབ་སེམས་དཔའ་བཅུ་ཡིས་བསྐོརཿ ཀང་ཀིང་གཉིས་ཏེ་ལྷ་ཚོགས་བཅོ་ལྔ་བཞུགསཿ རི་མོར་རྒྱས་པ་འབུམ་གྱི་གླེང་གཞི་བྲིསཿ སྐོར་ཁང་ཕྱི་ལྟས་མཆོད་རྟེན་བརྒྱད་པ་སྟེཿ ནང་ལྟས་སྤྲིན་ཆེན་སྙིང་པོའི་རི་མོ་བྲིསཿ སྐོར་ཁང་གདོང་ལ་རྒྱལ་ཆེན་རྣམ་གཉིས་བཞུགསཿ སྔ་ཁང་སྡོང་ལ་ཕྱོགས་བཅུའི་སངས་རྒྱས་དང་ཿ རྡོ་རྗེ་སེམས་དཔའ་གཤིན་རྗེའི་གཤེད་ཀྱི་ལྷཿ ཆོས་སྐྱོང་རྣམས་ཀྱི་འབག་དང་བཅས་པ་བྲིསཿ ཆོས་སྐྱོང་རྒྱལ་པོ་ཤིང་བྱ་ཅ་ལ་གཏདཿ འོག་ཁང་གཙོ་བོ་དུས་གསུམ་སངས་རྒྱས་ཀྱིསཿ བྱིན་གྱིས་བརླབས་པའི་རྡོ་སྐུ་རང་བྱོན་ནིཿ བསྟན་པའི་བདག་པོ་བྱང་ཆུབ་ཆེན་པོ་ལཿ བསྐལ་པ་བཟང་པོའི་སངས་རྒྱས་བཅུ་ཡིས་བསྐོརཿ ཁམས་གསུམ་རྣམ་རྒྱལ་ཁྲོ་བོ་མི་གཡོ་མགོནཿ སྒོ་སྲུང་བཅས་ཏེ་ལྷ་ཚོགས་བཅུ་གསུམ་བཞུགསཿ རི་མོར་སྙིང་པོ་ཕྱོགས་
༼༡༩༣བ༽བཅུའི་སངས་རྒྱས་དང་ཿ སྐོར་ཁང་ཕྱི་ལྟས་པདྨ་དཀར་པོ་ལཿ ནང་ལྟས་འདུས་པ་རིན་ཆེན་ཏོག་ཏུ་བྲིསཿ ཆོས་སྐྱོང་སེང་གེ་ཁྲི་ཡི་རལ་པ་ཅནཿ སྔ་ཁང་མདོ་སྡེ་དཀོན་ཅོག་སྤྲིན་དུ་བྲིསཿ འཁོར་ས་བར་རྒྱ་ཆེར་རོལ་པ་དང་ཿ ལྷོ་ཕྱོགས་མཛོད་གསུམ་རོལ་ཁང་ནོར་གྱི་མཛོདཿ ཆོས་སྐྱོང་གཤིན་རྗེ་ནག་པོ་མཆེད་གསུམ་གཏང་ཿ ནུབ་ཕྱོགས་མཛོད་གསུམ་གསུང་རབ་རྒྱུད་ཀྱི་མཛོདཿ ཆོས་སྐོང་ཨཱ་ཙར་ནག་པོ་མཆེན་གསུམ་ཡིནཿ བྱང་ཕྱོགས་མཛོད་གསུམ་རིན་ཆེན་གཏེར་གྱི་མཛོདཿ ཆོས་སྐྱོང་གནོད་སྦྱིན་ནག་པོ་མཆེད་གསུམ་བསྐོསཿ འཁོར་ས་ཆེན་མོར་སྡོང་པོ་རྒྱན་པ་བྲིསཿ ཆོས་སྐྱོང་རྒྱལ་པོ་ཨཱ་ནན་ཨུ་ལི་ཀཿ དེ་ལྟར་ལྷ་ཚོགས་དྲུག་ཅུ་རྩ་དགུ་བཞུགསཿ མདོ་སྡེའི་རྒྱུད་རིས་དག་ནི་བཅུ་བཞིས་བསྐོརཿ དེ་དག་དབུ་རྩེ་རིགས་གསུམ་བཞུགས་བྱང་ཡིནཿ ཉི་ཟླ་ལྷ་ཁང་གཉིས་ན་ལྷ་ཚོགས་ནིཿ བྱང་ཆུབ་ཆེན་པོ་གཙོ་འཁོར་ལྔ་ལྔ་བཞུགསཿ རི་མོར་བསྐལ་པ་བཟང་པོའི་སངས་རྒྱས་སྟོང་ཿ ཆོས་སྐྱོང་གནོད་སྦྱིན་གང་བཟང་ནོར་བུ་བཟང་ཿ གླིང་བཞི་གླིང་ཕྲན་སྐུ་རྟེན་བཞུགས་པ་ལཿ ཤར་གྱི་འཇམ་དཔལ་གླིང་ན་ལྷ་ཚོགས་ནིཿ འཇམ་དཔལ་གཙོ་འཁོར་ལྔ་དང་སྒོ་སྲུང་ནིཿ གཤིན་རྗེ་ནག་པོ་གཉིས་ཏེ་རྣམ་པ་བདུནཿ རི་མོར་འཇམ་དཔལ་ཞིང་གི་ཡོན་ཏན་བཀོདཿ འཁོར་བྱམས་ཕལ་པོ་
༼༡༩༤ན༽ཆེ་ཡི་རྒྱུད་རིས་བྲིསཿ ཆོས་སྐྱོང་གཤིན་རྗེ་མོ་ཡི་འཁོར་ལོ་ཅནཿ ཆོས་རྣམས་ཉན་དང་བཤད་པར་བྱེད་པའི་གླིང་ཿ ཨཱརྻ་པ་ལོའི་གླིང་ན་ལྷ་ཚོགས་ནིཿ ཐུགས་རྗེ་ཆེན་པོ་གཙོ་འཁོར་རྣམ་པ་བདུནཿ གློ་འབུར་གཡས་ན་སྐུ་གསུང་ཐུགས་ཀྱི་རྟེནཿ རྒྱལ་པོའི་སྐུ་ཚབ་དངུལ་ལས་བཞེངས་པ་དང་ཿ གསུང་གི་རྟེན་ལ་ཀླུ་འབུམ་བོད་བཞི་མཿ ཐུགས་ཀྱི་རྟེན་ལ་ཕྲ་མེན་མཆོད་རྟེན་བཞུགསཿ གཡོན་ན་སེང་གེ་སྒྲ་ཡི་ལྷ་ཚོགས་བཞུགསཿ སྟེང་ན་ཨ་མི་ཏཱ་བྷའི་ལྷ་ཚོགས་ལྔཿ སྔ་ཁང་ཟ་མ་ཏོག་གི་བཀོད་པ་དང་ཿ བསེ་ཡི་ལྷ་མོ་སྟོང་དང་རྩ་གཉིས་བྲིསཿ འཁོར་སར་ས་ཡི་སྙིང་པོ་འཁོར་ལོ་བཅུཿ གློ་འབུར་ནུབ་ན་རིགས་གསུམ་མགོན་པོ་བཞུགསཿ ཆོས་སྐྱོང་དབང་ཆེན་ཕོ་ཉ་རྣམས་ལ་གཏདཿ གང་ཟག་སྡིག་པ་བཤགས་པར་བྱེད་པའི་གླིང་ཿ དགའ་ལྡན་
བྱམས་པ་གླིང ་ན་ལྷ་ཚོགས་ནིཿ བྱམས་པ་གཙོ་འཁོར་ལྔ་དང་སྒོ་སྲུང་གཉིསཿ སྟེང་ན་སངས་རྒྱས་སྣང་མཐའ་གཙོ་འཁོར་ལྔཿ ལྟེ་བའི་ལོག་ལ་སངས་རྒྱས་སུམ་ཅུ་ལྔཿ སྒྲོལ་མའི་ལྷ་ཚོགས་ཉི་ཤུ་རྩ་གཅིག་བཞུགསཿ སྐོར་ཁང་ཕྱི་ལྟ་ནང་ལྟ་གཉིས་ལ་ནིཿ གནས་བརྟན་བཅུ་དྲུག་བསམ་ཡས་ཉིད་ཀྱི་དཔེཿ སྔ་ཁང་ལ་ནི་ཡ་ཐོག་རིང་མོ་དང་ཿ མ་ཐོག་ཐུང་དུ་ཁུག་པ་བཅོ་བརྒྱད་དང་ཿ རྒྱ་ཆེ་ལྷས་གནང་སྐྱེས་པའི་རབས་ཀྱང་བཀོདཿ འཁོར་
༼༡༩༤བ༽ཁྱམས་ཕལ་པོ་ཆེ་ཡི་རྒྱུད་རིས་བྲིསཿ ཆོས་སྐྱོང་མཁའ་འགྲོ་གུ་ལི་བེ་ཅོན་ཅནཿ གང་ཟག་ཁྱད་འཕགས་ལུང་རྣམས་སྟོན་པའི་གླིང་ཿ བྱང་ཆུབ་སེམས་བསྐྱེད་གླིང་གི་ལྷ་ཚོགས་ནིཿ གཙོ་བོ་སངས་རྒྱས་མ་ཆགས་པདྨ་ཅནཿ ཕྱག་ན་རྡོ་རྗེ་སྒྲིབ་པ་རྣམ་པར་སེལཿ ཁྲོ་བོ་བདུད་རྩི་འཁྱིལ་དང་ཀཱི་ལ་ཡཿ ཕྱོགས་བཅུ་ནས་བྱོན་སེམས་དཔའ་བཞི་བཅུ་གཉིསཿ དེ་ལྟར་ལྷ་ཚོགས་བཞི་བཅུ་རྩ་བདུན་བཞུགསཿ རྒྱུད་རིས་མདོ་སྡེ་དཀོན་ཅོག་སྤྲིན་དང་ནིཿ འཁོར་ས་ལ་ནི་འཕགས་པ་རྟག་ཏུ་དུཿ ཤེས་རབ་ཕ་རོལ་ཕྱིན་པ་འཚོལ་བ་བྲིསཿ ཆོས་སྐྱོང་རྒྱལ་པོ་བསེ་ཡི་ཁྲབ་ཅན་དང་ཿ མཁའ་འགྲོ་སེང་གེའི་གདོང་ཅན་མ་ལ་གཏདཿ དེ་དག་གླིང་བཞིའི་ལྷ་ཡི་བཞུགས་བྱང་ཡིནཿ གླིང་ཕྲན་བརྒྱད་ལ་རྣམ་དག་ཁྲིམས་ཁང་གླིང་ཿ ལྷ་ཚོགས་བྱང་ཆུབ་ཆེན་པོ་གཙོ་འཁོར་ལྔཿ རི་མོར་ཏིང་འཛིན་རྒྱལ་པོའི་རྒྱུད་རིས་བྲིསཿ ཆོས་སྐྱོང་ཚངས་པ་དུང་གི་ཐོར་ཚུགས་ཅནཿ དད་ལྡན་འདུལ་ཁྲིམས་ལེན་པར་བྱེད་པའི་གླིང་ཿ བརྡ་སྦྱོར་ཚང་མང་གླིང་ན་ལྷ་ཚོགས་ནིཿ ཤཱཀྱ་ཐུབ་པ་གཙོ་འཁོར་རྣམ་པ་བདུནཿ མདོ་སྡེ་རིན་ཆེན་སྣ་ཚོགས་རྒྱུད་རིས་བྲིསཿ འཁོར་ཁྱམས་བཙུན་པའི་གཡོས་ཁང་དག་ཏུ་བྱསཿ ཆོས་སྐྱོང་རྒྱལ་པོ་འབྲུག་གི་སློག་པ་ཅནཿ དགེ་འདུན་ཟས་ཀྱིས་འཚོ་བར་བྱེད་པའི་གླིང་ཿ བདུད་འདུལ་སྔགས་པ་གླིང་ན་ལྷ་ཚོགས་ནིཿ བྱང་
༼༡༩༥ན༽ཆུབ་ཆེན་པོ་ལུགས་མ་གཙོ་འཁོར་ལྔཿ རི་མོར་ནམ་སྙིང་གཙུག་ན་རིན་ཆེན་མདོཿ ཆོས་སྐྱོང་དབང་ཕྱུག་ཉི་ཤུ་བརྒྱད་ལ་གཏདཿ ཐོས་བསམ་སྒོམ་གསུམ་བར་ཆད་བསྲུང་བའི་གླིང་ཿ སྒྲ་བསྒྱུར་རྒྱ་གར་གླིང་ན་ལྷ་ཚོགས་ནིཿ ཇོ་བོ་ཤཱཀྱ་ལུགས་མ་གཙོ་འཁོར་ལྔཿ རྒྱུད་རིས་འདུལ་བ་རྣམ་དག་ཚེ་དཔག་མེདཿ མདུན་ན་ལོ་པཎ་བཞུགས་པའི་གཙང་ཁང་ཡོདཿ ཆོས་སྐྱོང་གནོད་སྦྱིན་ར་ཐོད་ཅན་ལ་གཏདཿ སྡེ་སྣོད་ཆོས་ཀྱི་སྒྲ་བསྒྱུར་བྱེད་པའི་གླིང་ཿ ལུང་བསྟན་བཻ་ཙའི་གླིང་ན་ལྷ་ཚོགས་ནིཿ ཟངས་ཀྱི་རྣམ་པར་སྣང་མཛད་གཙོ་བོ་ལཿ འཁོར་ནི་གསང་བའི་ཡུམ་བཞི་དག་གིས་བསྐོརཿ རི་མོར་རྣམ་སྣང་མངོན་པར་བྱང་ཆུབ་པཿ ཆོས་རྣམས་ཐེག་པ་རིམ་པར་འབྱེད་པའི་གླིང་ཿ མི་གཡོ་བསམ་གཏན་གླིང་ན་ལྷ་ཚོགས་ནིཿ རྣམ་པར་སྣང་མཛད་ཡབ་ཀྱི་ཐུགས་དམ་ནིཿ གཉན་པོ་བྱིན་ཅན་ཞེས་ནི་གྲགས་པ་ཡིསཿ གཙོ་བོ་མཛད་པའི་རྒྱལ་བ་རིགས་ལྔ་ལཿ བསྐལ་པ་བཟང་པོའི་སེམས་དཔའ་བཅུ་དྲུག་བསྐོརཿ རི་མོར་ངན་སོང་སྦྱོང་བའི་རྒྱུད་རིས་བྲིསཿ འཁོར་ཁྱམས་ཕལ་པོ་ཆེ་ཡི་རྒྱུད་རིས་བཀོདཿ ཆོས་སྐྱོང་རྒྱལ་པོ་དངུལ་གྱི་མགོ་ཅན་ཡིནཿ ཏིང་འཛིན་བསམ་གཏན་སྒོམ་པར་བྱེད་པའི་གླིང་ཿ མི་ནུབ་རྒྱལ་མཚན་རིན་ཆེན་འཕྲེང་བ་བཀོདཿ རིན་ཆེན་སྣ་ཚོགས་གླིང་ན་ལྷ་ཚོགས་ནིཿ ཤཱཀྱ་ཐུབ་པ་གཙོ་འཁོར་རྣམ་པ་
༼༡༩༥བ༽ལྔཿ རྒྱུད་རིས་གསེར་འོད་དམ་པའི་མདོ་སྡེ་དང་ཿ དགའ་ལྡན་ཡུལ་དུ་ཡུམ་ལ་ཆོས་གསུངས་ཚུལཿ དྲིན་ལན་བསབ་པའི་མདོ་དང་རྣམ་གསུམ་བྲིསཿ ཆོས་སྐྱོང་རྒྱལ་པོ་གཡི་ཡི་སྦད་པ་ཅནཿ བྱང་ཆུབ་སྨན་པ་སེམས་བསྐྱེད་བྱེད་པའི་གླིང་ཿ པེ་ཀར་དཀོར་མཛོད་གླིང་ན་ལྷ་ཚོགས་ནིཿ གཙོ་བོ་རྫོགས་པའི་སངས་རྒྱས་དགའ་བའི་དཔལཿ འཁོར་ནི་ཉེ་བའི་སྲས་བརྒྱད་འཛུམ་བཅས་བཞུགསཿ རི་མོར་ཡབ་སྲས་མཇལ་བའི་རྒྱུད་རིས་བྲིསཿ སྔ་གདོང་གཉིས་ལ་རྒྱལ་ཆེན་རྣམ་གཉིས་བཀོདཿ དཀོར་མཛོད་རེ་ལ་ནོར་སྣ་རེ་རེ་བཞགཿ ཆོས་སྐྱོང་ཡང་ནི་ཟུད་རེ་དག་ལ་གཏདཿ དགྲ་བླ་ཆེན་པོ་འཁོར་དང་བཅས་པ་ཡིནཿ རྒྱལ་བློན་རྗེ་འབངས་འཚོ་བ་ནོར་གྱི་མཛོདཿ དེ་དག་གླིང་ཕྲན་བརྒྱད་ཀྱི་དཀར་ཆག་ཡིནཿ བཅུ་གཉིས་གླིང་ལ་མི་ཐེ་ཁྲུས་ཁང་གླིང་ཿ འོག་ཁང་སོ་ཕག་ཐང་ལ་ཁྲུས་བྱེད་སཿ སྟེང་ཁང་མི་རྟག་སྟོན་པའི་རྒྱུད་རིས་བྲིསཿ ཆོས་སྐྱོང་རྒྱལ་པོ་ལག་ན་བུམ་ཐོགས་ཡིནཿ གང་ཟག་ཁྲུས་ཀྱིས་དག་པར་བྱེད་པའི་གླིང་ཿ ཚད་མར་ཀེ་རུའི་གླིང་གི་འོག་ཁང་ནིཿ སློབ་དཔོན་ཆོས་སྟོན་གསོལ་བའི་ཚང་མང་སྟེཿ སྟེང་ཁང་ནང་ན་བ་སོའི་ལྷ་ཁང་བཞུགསཿ ལོགས་ལ་སློབ་དཔོན་པདྨའི་རྣམ་ཐར་བྲིསཿ ཆོས་སྐྱོང་གནོད་སྦྱིན་ལག་ན་དབྱིག་ཐོགས་ཡིནཿ མཁན་སློབ་ཆོས་སྟོན་གསོལ་བར་བྱེད་པའི་གླིང་ཿ མཐུ་རྩལ་ཀླུ་གླིང་སོ་ཕག་ཁང་པའི་ནང་ཿ མཚོ་ཐབས་ཆུ་ནི་
༼༡༩༦ན༽རྟག་ཏུ་མེར་བ་འདྲཿ པདྨའི་སྡོང་པོ་སྐྱེས་པའི་སྙིང་པོའི་དབུསཿ ཕྱག་ན་རྡོ་རྗེ་སྐུ་མདོག་དཀར་པོ་ནིཿ ཞི་བའི་ཚུལ་དུ་བཞུགས་པའི་ཡལ་ག་ལཿ ཀླུ་ཆེན་བརྒྱད་ནི་འདུད་པའི་ཚུལ་དུ་བཞུགསཿ རྩིག་པའི་ལོགས་ལ་ཀླུ་དང་ས་བདག་གཉནཿ རི་མོར་བྲིས་པ་ཆུ་ནང་འགུལ་པ་བཞིནཿ ཆོས་སྐྱོང་རང་ཆགས་ས་བདག་རྒྱུ་འདལ་ཡིནཿ མཆོད་རྟེན་དཀར་པོ་སེང་གེ་གཞི་ཡིས་བརྒྱནཿ ཆོས་སྐྱོང་གནོད་སྦྱིན་སྐར་མདའ་གདོང་ལ་གཏདཿ མཆོད་རྟེན་དམར་པོ་པདྨ་སྟོང་གིས་བརྒྱནཿ ཆོས་སྐྱོང་སྲུང་མ་གཟའ་རྒོད་མིག་དམར་ཡིནཿ མཆོད་རྟེན་ནག་པོ་སྐུ་གདུང་དག་གིས་བརྒྱནཿ ཆོས་སྐྱོང་མཁའ་འགྲོ་ལྕགས་མཆུ་ཅན་ལ་གཏདཿ མཆོད་རྟེན་སྔོན་པོ་ལྷ་ཁང་བཅུ་དྲུག་བརྒྱནཿ ཆོས་སྐྱོང་གནོད་སྦྱིན་ཉི་མའི་གདོང་ལ་གཏདཿ ལྕགས་རི་ནག་པོའི་སྒོ་བཞིའི་མགོན་ཁང་ནཿ ཤཱཀྱ་ཐུབ་པ་གཙོ་འཁོར་ལྔ་ལྔ་བཞུགསཿ སྒོ་འགྲམ་ཕྱི་གཉིས་རྒྱལ་ཆེན་རིགས་བཞི་དང་ཿ ནང་མ་གཉིས་ན་ལྷ་མགོན་ཟུང་རི་བཞུགསཿ རེ་མོར་བསྐལ་པ་བཟང་པོའི་སངས་རྒྱས་སྟོང་ཿ ཆོས་སྐྱོང་རྒྱལ་པོ་ཆེན་པོ་བཞི་ལ་གཏདཿ ཕྱི་ཡི་ལྕགས་རི་ནག་པོའི་རྩེ་ལ་ནིཿ མཆོད་རྟེན་སྟོང་དང་རྩ་བརྒྱད་བསྐོར་བར་བྱསཿ ཆོས་སྐྱོང་རྒྱལ་པོ་ཉི་ཁྲི་ཆིག་སྟོང་དང་ཿ དྲེགས་བྱེད་སྟོང་སྡེ་བཅོ་བརྒྱད་དག་ལ་གཏདཿ ལྕགས་རི་གཅིག་བསྐོར་ནང་གི་བཞུགས་བྱང་ཡིནཿ
༼༡༩༦བ༽སྒོ་བཞིའི་མདུན་ན་རྡོ་རིང་ཆེན་པོ་བཞིཿ ལོ་པཎ་རྗེ་བློན་མཛད་པ་ཡི་གེར་བཀོདཿ བཙུན་མོས་བཞེངས་པའི་ལྷ་ཁང་རྣམ་གསུམ་ལཿ ཚེ་སྤོང་བཟའ་ནི་སྟོང་དཀར་མས་བཞེངས་པཿ ཁམས་གསུམ་མེ་ཏོག་སྒྲོལ་གྱི་བཀོད་པ་ནིཿ ཆེ་ཆུང་དབུ་རྩེ་ཉིད་ལས་ཆུང་བ་ལཿ བཀོད་པ་དབུ་རྩེ་ཁོ་ན་འདྲ་བར་བཞེངསཿ དེ་ན་ལྷ་ཚོགས་བཀོད་པའི་བཞུགས་བྱང་ནིཿ འོག་ཁང་གཙོ་བོ་བྱང་ཆུབ་ཆེན་པོ་ལཿ ས་ཡི་སྙིང་པོ་བྱམས་པ་སྤྱན་རས་གཟིགསཿ ནམ་མཁའི་སྙིང་པོ་ཀུན་བཟང་རྡོ་རྗེ་འཛིནཿ འཇམ་དབྱངས་སྒྲིབ་པ་རྣམ་པར་སེལ་བ་དང་ཿ ཉེ་བའི་སྲས་བརྒྱད་འཁོར་ནི་འཛུམ་བཅས་གཟིགསཿ ཁམས་གསུམ་རྣམ་རྒྱལ་ཁྲོ་བོ་མི་གཡོ་མགོནཿ སྒོ་སྲུང་གཉིས་ཏེ་ལྷ་ཚོགས་བཅུ་གཅིག་བཞུགསཿ ལྟེ་བའི་རྒྱུད་རིས་སངས་རྒྱས་ལྔ་སྟོང་དང་ཿ བཞི་བརྒྱ་ལྔ་བཅུ་རྩ་གསུམ་བྲིས་པ་ཡིནཿ སྐོར་ཁང་ཕྱི་ལྟས་མདོ་སྡེ་དཀོན་ཅོག་སྤྲིནཿ ནང་ལྟས་ལངྐར་གཤེགས་པའི་རྒྱུད་རིས་བྲིསཿ སྔ་ཁང་ལ་ནི་ཕྱོགས་བཅུའི་སངས་རྒྱས་དང་ཿ དྲི་མ་མེད་པར་གྲགས་པའི་རྒྱུད་རིས་བྲིསཿ ཆོས་སྐྱོང་དཔལ་ལྡན་ལྷ་མོ་ཉིད་ལ་གཏདཿ འཁོར་ས་བར་མ་དཀོར་མཛོད་དགུ་ཡིས་བརྒྱནཿ རྒྱུད་རིས་བྱང་ཆུབ་སེམས་དཔའི་སྡེ་སྣོད་བྲིསཿ ཆོས་སྐྱོང་ས་བདག་ཀླུ་གཉན་དག་ལ་གཏདཿ འཁོར་ས་ཆེན་མོ་གློ་འབུར་བཞི་ཡིས་བརྒྱནཿ རྒྱུད་རིས་སྡོང་པོ་བརྒྱན་པའི་མདོ་
༼༡༩༧ན༽སྡེ་བྲིསཿ སྒོ་འགྲམ་གཉིས་ལ་རབ་གནས་མཛད་པའི་ཚེཿ རྒྱལ་བློན་དགུང་བཞུགས་གླུ་གར་རོལ་མོ་དང་ཿ སྒྱུ་མ་མཁན་དང་གྱད་ཀྱི་འགྲན་སྟོབས་དང་ཿ བྲག་དམར་མཚོ་མོ་མགུལ་གྱི་དཀྱིལ་དུ་ནིཿ རང་བྱུང་པདྨའི་སྡོང་པོ་སྐྱེས་པ་སོགསཿ ཡ་མཚན་ཆེ་བའི་རྟགས་མཚན་མང་པོ་དང་ཿ བོད་དུ་ངོ་མཚར་སྣ་ཚོགས་བྱུང་ཚུལ་བྲིསཿ སྐྱིད་པའི་བྲོ་མོ་ཆེ་དང་ཀླུ་མོ་ཆེཿ ལོ་ནི་བཅུ་གཉིས་བར་དུ་བླངས་པ་བྲིསཿ ཆོས་སྐྱོང་རྒྱལ་པོ་འོད་ཅན་མཆེད་གསུམ་ཡིནཿ ཙོང་ཁང་ཆོས་སྐྱོང་གཟའ་དང་ཀླུ་ལ་གཏདཿ བར་ཁང་གཙོ་བོ་སངས་རྒྱས་མར་མེ་མཛདཿ ཉེ་བའི་སྲས་བརྒྱད་འཁོར་ལ་འཛུམ་བཅས་གཟིགསཿ ཀིང་ཀང་གཉིས་ཏེ་ལྷ་ཚོགས་བཅུ་གཅིག་བཞུགསཿ ལྟེ་བའི་ནང་གཟིགས་བུད་མེད་བུར་འགྱུར་བརཿ ལུང་དུ་བསྟན་པ་མདོ་ཡི་རྒྱུད་རིས་བྲིསཿ སྐོར་ཁང་ཕྱི་ལྟས་གཙུག་ན་རིན་ཆེན་མདོཿ ནང་ལྟས་ཕྱིར་མི་ལྡོག་པའི་འཁོར་ལོ་བྲིསཿ སྐོར་ཁང་གདོང་ལ་རྒྱལ་ཆེན་རྣམ་གཉིས་བཀོདཿ སྟེང་ཁང་གཙོ་བོ་རྣམ་སྣང་ཀུན་ཏུ་ཞལཿ ཉེ་བའི་སྲས་བརྒྱད་འཁོར་གྱིས་རབ་ཏུ་མཛེསཿ ཕྱོགས་བཅུ་ནས་བྱོན་སེམས་དཔའ་བཅུ་དྲུག་དང་ཿ སྒོ་སྲུང་བརྒྱད་དེ་ལྷ་ཚོགས་སུམ་ཅུ་གསུམཿ ལྟེ་བའི་ལོགས་ལ་རི་མོ་བཀོད་པ་ནིཿ རིགས་ལྔའི་སངས་རྒྱས་ཕྱོགས་ཚོན་དག་དང་བསྟུནཿ སྒོ་བ་བཞི་དང་
༼༡༩༧བ༽མཆོད་པའི་ལྷ་མོ་བྲིསཿ རིན་ཆེན་སྣ་ཚོགས་སྤྱི་གདུགས་མཛེས་པ་ལཿ གསེར་གྱི་དྲིལ་ཆེན་ཕྱང་འཕྲུལ་རྣམས་ཀྱིས་བརྒྱནཿ བར་ཁང་དང་ནི་སྟེང་ཁང་སྲུང་མ་ནིཿ ཆོས་སྐྱོང་རྒྱལ་པོ་གནོད་སྦྱིན་མཆེད་གསུམ་ཡིནཿ ལྕོག་བཞི་ལག་ན་རྡོ་རྗེ་བཞི་ལ་གཏདཿ ཁམས་གསུམ་མེ་ཏོག་སྒྲོལ་གྱི་དཀར་ཆག་ཡིནཿ ཕན་ཡུལ་གྲུ་གསུམ་ཕོ་གྱོང་རྒྱལ་མོ་བཙུནཿ ཡུམ་ནས་སྐྱེ་བ་བཞེས་པས་ཁྱད་དུ་འཕགསཿ དེ་ཡི་ཐུགས་དམ་དགའ་ལྡན་བྱང་ཆུབ་སྒྲོལཿ དབུ་ཚལ་གསེར་ཁང་བཞེངས་པའི་བཞུགས་བྱང་ནིཿ ལྷ་སྲས་མི་མངའ་ལྷ་ཁང་ཉིས་ཐོག་བཞེངསཿ ཟས་སྣ་བཅུ་གསུམ་བཟོ་བོ་རྣམས་ལ་དྲངསཿ བཟོ་སྣ་བཅུ་གསུམ་ཁྱད་དུ་འཕགས་ཟེར་ཏེཿ བདུན་གྱིས་ཁྱད་དུ་འཕགས་པ་ཡིན་ནོ་སྐདཿ ཕྱི་ན་རྩིག་མེད་ནང་ན་ཀ་བ་མེདཿ མཐིང་གི་རྒྱ་ཕིབས་ཕྱི་ལྟ་ནང་ལྟ་དང་ཿ གསེར་གྱི་རྟ་དང་སེང་གེ་གླང་ཆེན་སོགསཿ རྒྱ་བྱ་སྣ་ཚོགས་དག་གིས་ལེགས་པར་བརྒྱནཿ གླ་གོར་སྒོ་ལ་གསེར་གྱི་བྱེའུ་ཆུང་ནིཿ སྙན་པའི་སྒྲ་སྐད་ཡིད་འོང་སྒྲོག་པར་བྱེདཿ ཐད་དང་བར་ནི་སོ་ཕག་བཻ་ཌཱུརྻཿ ཆུ་སྲིན་ཁ་ནས་དྲི་ཞིམ་སྤོས་ཀྱི་ཆུསཿ སྐུ་ཁྲུས་གསོལ་ཏེ་རུས་སྦལ་སྟེང་དུ་འབབཿ མཛད་པ་བཅུ་གཉིས་གཙོ་བོ་འབུར་དུ་དོདཿ གཙོ་བོ་དང་ནི་སེམས་དཔའ་ཐམས་ཅད་ལཿ སྤྱི་གདུགས་སྒོས་གདུགས་དག་གིས་ལེགས་པར་བརྒྱནཿ གསེར་གྱི་
༼༡༩༨ན༽གདུགས་ལ་མཆོད་པའི་ལྷ་མོ་ནིཿ ཉི་ཤུ་རྩ་བརྒྱད་དག་གིས་མཛེས་པར་བྲིསཿ ལྷ་ཡི་བུ་ནི་ཁྱུང་གི་སྒོ་ང་ནསཿ དེ་བཞིན་གཤེགས་པ་རྣམས་ལ་སྐུ་ཁྲུས་གསོལཿ ཟུར་བཞི་དག་ན་གསེར་གྱི་སེང་གེ་ནིཿ ལུག་ཐོད་ཙམ་པ་བརྒྱད་ཀྱིས་ལེགས་པར་བརྒྱནཿ དེ་ལྟར་བཟོ་ཁྱད་བཅུ་གསུམ་ཁྱོད་དུ་འཕགསཿ འོག་ཁོང་གཙོ་བོ་རྒྱལ་བ་རིགས་ལྔ་ལཿ གསུམ་ནི་གསེར་སྐུ་གཉིས་ནི་རི་མོར་བྲིསཿ ཉེ་བའི་སྲས་བརྒྱད་གཙོ་ལ་འཛུམ་བཅས་གཟིགསཿ རྡོ་རྗེ་གཏུམ་པོ་ཁྲོ་རྒྱལ་མི་གཡོ་མགོནཿ དེ་ལྟར་ལྷ་ཚོགས་བཅོ་ལྔ་བཞུགས་པ་ཡིནཿ ལྟེ་བའི་སྔ་གདོང་གཉིས་ལ་རྒྱུད་རིས་ནིཿ རྒྱལ་ཆེན་ཡུལ་འཁོར་སྲུང་དང་སྦྱིན་མི་བཟང་ཿ བཙུན་མོ་སྲས་དང་བློན་པོར་བཅས་པ་བྲིསཿ སྐོར་ཁང་ཞལ་ནི་ཕྱི་རུ་གཟིགས་པ་ལཿ འབུམ་གྱི་གླེང་བཞི་ཕྱོགས་བཅུའི་སངས་རྒྱས་བཀོདཿ སྒོ་འགྲམ་གདུར་མཚམས་གཉིས་ཀྱི་གཡས་གཡོན་དུཿ བཀའ་འདུས་དང་ནི་བླ་མེད་དོན་རྫོགས་ཀྱིཿ དཀྱིལ་འཁོར་སྒོ་རྫོགས་ཕོ་བྲང་རེ་རེ་བྲིསཿ སྐོར་ཁང་ཞལ་ནི་ནང་དུ་གཟིགས་པ་ཡིསཿ བར་གྱི་ཁྱམས་ལ་མཛད་པ་བཅུ་གཉིས་ནིཿ འབུར་དང་རི་མོ་བསྲེས་ནས་རྒྱས་པར་བྲིསཿ བར་ཁྱམས་སྔ་གདོང་དག་ལ་དགེ་བསྙེན་ནིཿ ལིཙྪ་བྱི་དང་འཇམ་དཔལ་བགྲོ་མཛད་བྲིསཿ འཁོར་ཁྱམས་ཆེན་མོར་ཕལ་ཆེན་རྒྱུད་རིས་དང་ཿ རཱུ་ཏྲ་ཐར་
༼༡༩༨བ༽པ་ནག་པོའི་སྐྱེ་རྒྱུད་བྲིསཿ སྒོ་ཁང་ལ་ནི་གང་བ་བཟང་པོ་དང་ཿ ནོར་བུ་བཟང་པོ་སྲིད་པའི་འཁོར་ལོ་ཅནཿ འཇིག་རྟེན་གདགས་པའི་དཔེའུ་ཆུང་དག་ཏུ་བྲིསཿ དཀོར་མཛོད་དྲུག་དང་ཇོ་མོའི་ཁང་པ་དང་ཿ གློ་འབུར་དག་གིས་འཁོར་ས་ཆེན་མོ་བརྒྱནཿ སྟེང་ཁང་གཙོ་བོ་རྣམ་སྣང་ཀུན་ཏུ་ཞལཿ སེམས་དཔའ་བཅུ་དྲུག་དག་གིས་བསྐོར་ནས་བཞུགསཿ སྟེང་ཁང་རྒྱ་ཕིབས་འོག་ནི་རི་མོ་ནིཿ བུ་མོ་བདུན་གྱི་རྟོགས་པ་བརྗོད་པ་དང་ཿ འཕགས་པ་དགེ་འདུན་སྐྱོང་གི་རྟོགས་བརྗོད་བྲིསཿ སྟེང་ཁང་བར་འཁྱམས་དག་ལ་རི་མོ་ནིཿ མདོ་སྡེ་པདྨ་དཀར་པོའི་རྒྱུད་རིས་བྲིསཿ སྤྱི་ཡི་ཆོས་སྐྱོང་མ་མགོན་ལྕམ་དྲལ་དང་ཿ ཀླུ་རྒྱལ་ས་བདག་རུས་སྦལ་དག་ལ་གཏདཿ གློ་འབུར་བདུན་གྱི་ཆོས་སྐྱོང་སྲུང་མ་ནིཿ རྒྱལ་པོ་རྟ་མགོ་གནོད་སྦྱིན་ཀུཎྜ་ལིཿ གང་བ་བཟང་དང་ནོར་བུ་བཟང་ལ་གཏདཿ དེ་དག་དབུ་ཚལ་གསེར་ཁང་དཀར་ཆག་ཡིནཿ འབྲོ་བཟའ་བྱང་ཆུབ་རྗེ་ཡི་བཙུན་མོ་ཡིཿ ཐུགས་དམ་དགེ་བ་རྒྱས་པའི་ལྷ་ཁང་ནིཿ སྲས་དང་སྲས་མོ་མི་མངའ་ཐོག་གཅིག་མཿ སོ་ཕག་ཁྲོ་ཆུས་ལེགས་པར་སྦྱར་བྱས་བཞེངསཿ སྣང་བ་མཐའ་ཡས་གཙོ་མཛད་ལུགས་མ་བདུནཿ འཇམ་དབྱངས་སྤྱན་རས་གཟིགས་དང་ཀུན་ཏུ་བཟང་ཿ སྨན་པའི་རྒྱལ་པོ་དང་ནི་སེམས་དཔའ་བཞིཿ ཁྲོ་རྒྱལ་ཕྱག་ན་རྡོ་རྗེ་མི་གཡོ་མགོནཿ ལྡེར་ཚོ་རྡོ་རྗེ་སེམས་དཔའ་བྱམས་པ་སྟེཿ
༼༡༩༩ན༽དེ་ལྟར་གཙོ་འཁོར་རྣམ་པ་དགུ་བཞུགས་སོཿ ལྟེ་བའི་སྔ་གདོང་གཉིས་ལ་རྒྱུད་རིས་ནིཿ གཡས་ན་དམ་པ་རིགས་བརྒྱའི་དཀྱིལ་འཁོར་དང་ཿ གཡོན་ན་སྒྲུབ་པ་བཀའ་བརྒྱད་ཕོ་བྲང་བྲིསཿ སྐོ་ཁང་ཞལ་ནི་ཕྱི་རུ་ལྟ་བ་ལཿ རིགས་ལྔའི་སྐྱེ་རྒྱུད་བོད་དུ་ཆོས་བྱུང་ཚུལཿ ལོ་པཎ་གདན་དྲངས་ཆོས་ཀྱི་བསྒྱུར་ཚུལ་དང་ཿ ཆོས་ཁྲིམས་བསྡམས་ཚུལ་ལོ་ཙཱ་བསླབས་པའི་ཚུལཿ པཎྜི་ཏ་དང་རྒྱལ་པོ་མཇལ་ཚུལ་དང་ཿ བོན་ཆོས་གྲུབ་མཐའ་འགེགས་རེས་བྱས་པའི་ཚུལཿ བོན་བསྣུབས་ཆོས་ལ་དག་ཐེར་བྱས་ལུགས་དང་ཿ བཻ་རོ་ཙ་ན་ནམ་སྙིང་རྣམ་ཐར་བྲིསཿ ལྟེ་བའི་ཕྱེད་ནི་མན་ཆད་མ་བྲིས་སོཿ སྐོར་ཁང་ཞལ་ནི་ནང་དུ་གཟིགས་པ་ལཿ ཨུ་རྒྱན་པདྨའི་རྣམ་ཐར་འདི་ཉིད་དང་ཿ གསང་སྔགས་བོད་དུ་འགྱུར་ཆད་ཐམས་ཅད་ཀྱིཿ དཀྱིལ་འཁོར་སྒོ་རྫོགས་ལྷ་དང་བཅས་པ་བྲིསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བསམ་ཡས་སྐུ་རྟེན་ལྷའི་བཞུགས་བྱང་དཀར་ཆག་ཏུ་བཀོད་པའི་ལེའུ་སྟེ་གྱ་དྲུག་པའོཿ ཿཐ་ཐ་ཉྲ་རྒྱ་རྒྱཿ ཿ