ཕྱི་མཚན་ཉིད་ཐེག་པའི་བཀའ་དང་བསྟན་བཅོས་འགྱུར་བྱང་གི་ལེའུ།
དེ་ནས་གསུང་རྟེན་ཆོས་ཀྱི་འགྱུར་བྱང་ནིཿ དང་པོ་ཉན་རང་ཆོས་ཀྱི་འགྱུར་བྱང་ལཿ མདོ་སྡེ་ལེགས་ཉེས་བསྟན་དང་ལས་བརྒྱ་པཿ རྣམ་འབྱེད་རྣམ་པར་འཐག་པ་ལས་རྣམ་བརྗོདཿ གང་པོའི་རྟོགས་བརྗོད་བྲམ་ཟེ་ཚོམས་ཀྱི་མདོཿ དྲིན་ལན་
༼༡༩༩བ༽བསབ་མདོ་མཛངས་བླུན་དྲན་ཉེར་བཞགཿ ཚུལ་ཁྲིམས་ངན་པ་ཚར་གཅོད་པ་ཡིས་མདོཿ དེ་ལྟར་དྲང་དོན་བསྟན་པའི་མདོ་བཅུ་དང་ཿ གཞན་ཡང་ཐེག་དམན་མདོ་སྡེ་དཔག་མེད་འགྱུརཿ འདུལ་བ་ལུང་གཞི་རྣམ་འབྱེད་གཞུང་བླ་མཿ ཕྲན་ཚོགས་དང་ནི་སོ་ཐར་མདོ་གཉིས་སོཿ བར་པ་བྱང་སེམས་ཆོས་ཀྱི་འགྱུར་བྱང་ལཿ ཕ་རོལ་ཕྱིན་པ་ཡུམ་སྲས་བཅུ་བདུན་དང་ཿ ཤེར་ཕྱིར་སྟོང་ཉིད་གཙོར་སྟོན་མདོ་མང་འགྱུརཿ ཐ་མ་ངེས་དོན་སྙིང་པོ་བསྟན་པའི་མདོཿ སའི་སྙིང་འཁོར་ལོ་བཅུ་པ་ཡོན་ཏན་མདོཿ ཕལ་ཆེན་དཀོན་བརྩེགས་ལང་གཤེགས་པདྨ་དཀརཿ མྱང་འདས་དགོངས་པ་ངེས་འགྲེལ་རྒྱུན་སྟུག་པོཿ གསེར་འོད་དམ་པ་ལ་སོགས་དཔག་མེད་འགྱུརཿ འཁོར་ལོ་གསུམ་གྱི་དགོངས་པ་འགྲིལ་བའི་ཕྱིརཿ མདོ་དང་མཐུན་པའི་བསྟན་བཅོས་འགྱུར་བྱང་ལཿ བདེན་བཞི་ཉན་རང་ཐེག་པའི་བསྟན་བཅོས་ནིཿ འདུལ་བའི་གཞུང་འགྲེལ་རྣམ་པ་མང་པོ་དང་ཿ དེ་དང་མཐུན་པའི་མདོ་འགྲེལ་མང་དུ་འགྱུརཿ བྱེ་བྲག་བཤད་མཛོད་ཆེན་མོའི་རྒྱ་དཔེ་བཞུགསཿ ཆོས་ཀྱི་ཕུང་པོ་གནས་བརྟན་ཤཱ་རིའི་བུསཿ གདགས་པའི་བསྟན་བཅོས་མཽ་གལ་གྱི་བུསཿ ཁམས་ཀྱི་ཚོགས་ནི་དགྲ་བཅོམ་གང་པོས་བྱསཿ རྣམ་པར་ཤེས་པའི་ཚོགས་ནི་ལྷ་སྐྱིད་ཀྱིསཿ སྒྲོལ་བའི་རྣམ་གྲངས་གསུངས་པོ་ཆེ་ཡིས་བྱསཿ ཡེ་ཤེས་
༼༢༠༠ན༽འཇུག་པ་ཀཱ་ཏྱཱ་ཡ་ནའི་བུསཿ དེ་ལྟར་ཆོས་མངོན་བསྟན་བཅོས་སྡེ་བདུན་དང་ཿ དབྱིག་གཉེན་གྱིས་མཛད་ཕུང་པོའི་རབ་བྱེད་དང་ཿ ཉི་ཤུ་པ་ཡི་རབ་ཏུ་བྱེད་པ་དང་ཿ སུམ་ཅུ་པ་ཡི་རབ་ཏུ་བྱེད་པ་དང་ཿ ལས་རྣམས་གྲུབ་པའི་རབ་ཏུ་བྱེད་པ་དང་ཿ རྣམ་པར་བཤད་པ་རིག་པས་རང་རྒྱུད་ལྔཿ ཆོས་མངོན་མཛོད་སོགས་གཞུང་འགྲེལ་མཐའ་ཡས་འགྱུརཿ ཐམས་ཅད་སྤྲོས་ན་ཡི་གེ་མང་པོས་བསྡུསཿ བྱང་ཆུབ་སེམས་དཔའི་ཐེག་པའི་བསྟན་བཅོས་ནིཿ དཔལ་མགོན་ཀླུ་སྒྲུབ་དབུ་མ་རིག་པའི་ཚོགསཿ བསྟོད་པའི་ཚོགས་དང་གཏམ་ཚོགས་ལ་སོགས་དང་ཿ ཨཱརྻ་དེ་བའི་དབུ་མ་བཞི་བརྒྱ་པཿ སློབ་དཔོན་བྷ་བྱའི་རྟོག་གེ་འབར་བ་དང་ཿ སངས་རྒྱས་བསྐྱངས་ཀྱི་བུདྡྷ་པ་ལ་དང་ཿ ཟླ་བ་གྲགས་པའི་དབུ་མ་ལ་འཇུག་པཿ ཡེ་ཤེས་སྙིང་པོའི་བདེན་གཉིས་རྣམ་འབྱེད་དང་ཿ སློབ་དཔོན་ཞི་བ་ལྷ་ཡི་དབུ་མ་རྒྱནཿ ཀ་མ་ཤཱི་ལའི་དབུ་མ་སྣང་བ་སོགསཿ རྟ་དབྱངས་མདོ་སྡེའི་སྐྱེས་རབས་སྙན་ངག་བཅསཿ དགྲ་བཅོམ་ཆོས་སྐྱབས་ཆེད་དུ་བརྗོད་པའི་ཚོམསཿ ཕྱོགས་ཀྱི་གླང་པོའི་རབ་བྱེད་བརྒྱ་རྩ་བརྒྱདཿ ཆོས་ཀྱི་གྲགས་པའི་སྡེ་བདུན་རྣམ་འགྲེལ་སོགསཿ དབང་སྡེ་རབ་ཏུ་འབྱེད་པའི་གཏན་ཚིགས་དང་ཿ ཞི་བ་ལྷ་ཡི་སྤྱོད་འཇུག་བསླབ་བཏུས་སོགསཿ ཐོགས་མེད་ཀྱིས་བླངས་བྱམས་
༼༢༠༠བ༽པའི་ཆོས་ལྔ་དང་ཿ ས་སྡེ་ལྔ་དང་སྡོམ་གསུམ་ལ་སོགས་པཿ ཐེག་པ་ཆེན་པོའི་བསྟན་བཅོས་མང་དུ་འགྱུརཿ ངེས་པ་དོན་གྱི་མདོ་སྡེའི་འགྲེལ་བཤད་ནིཿ ས་བཅུའི་འགྲེལ་པ་དབྱིག་གཉེན་མཛད་པ་དང་ཿ པད་དཀར་འགྲེལ་པས་ཡི་རྩ་ལག་དང་ཿ དགོངས་འགྲེལ་ཊཱི་ཀ་བམ་པོ་དྲུག་ཅུ་སོགསཿ ཚད་ལྡན་མཁས་པའི་གཞུང་ལུགས་མང་དུ་འགྱུརཿ དེ་ལྟར་བསྟན་བཅོས་རབ་ཏུ་མང་པོ་བཞུགསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ཕྱི་མཚན་ཉིད་ཐེག་པའི་བཀའ་དང་བསྟན་བཅོས་འགྱུར་བྱང་གི་ལེའུ་སྟེ་གྱ་བདུན་པའོཿ ཿཐ་ཐ་ཉྲ་རྒྱ་རྒྱཿ ཿ