འདུས་བྱས་མི་རྟག་པར་བསྟན་པའི་ལེའུ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ ཡོ་འབོག་ལྕམ་མིའི་ཐད་ལ་ཁྲི་བཤམས་ནསཿ བཀའ་དྲིན་གསོབ་ཕྱིར་ལོ་པཎ་བྲལ་ལ་བཀོདཿ གསོལ་ཟས་ན་བཟའ་ལུས་གང་འཐེབ་རེ་ཕུལཿ ཕོ་མཛེ་མོ་མཛོ་རྟ་རེ་དྲེའུ་རེཿ གསེར་ཕྱེ་བྲེ་རེ་གསེར་གྱི་པ་ཏྲ་རེཿ ཇ་རེ་ཁྲབ་རེ་གོས་ཡུག་དར་ཡུག་རེཿ ཕྲུགས་ཆེན་ངོས་རེ་ཐེར་སྲབ་ངོས་རེ་ཕུལཿ རྒྱལ་པོའི་མངའ་འོག་བློན་འབངས་ཐམས་ཅད་ཀྱིསཿ ཆེ་འབྱོར་ཆུང་འབྱོར་
༼༢༠༣ན༽ནོར་སྤུས་དག་པར་ཕུལཿ ལོ་ཙཱ་རྣམས་ལ་ཆོས་རྩིས་བྱར་དགའ་གནང་ཿ གཙུག་གི་ནོར་བུར་འགྱུར་བའི་བླ་མར་བཏོནཿ རྒྱལ་པོས་སྐུ་དྲིན་ཆེ་བའི་ལོ་རྒྱུས་གསུངསཿ པཎ་ཆེན་བརྒྱ་རྩ་བརྒྱད་ཀྱི་མཆོག་གྱུར་པཿ སློབ་དཔོན་པདྨས་གཏམ་ལན་མདོ་བསྔོ་གསུངསཿ དེ་གོང་གཏམ་མེད་དེ་ནས་གཏམ་གཏད་བྱུང་ཿ ཡས་གཏམ་མས་གཏམ་གཉིས་ཀ་དེ་ནས་དརཿ བི་མ་མི་ཏྲ་རྒྱ་ནག་ཡུལ་དུ་བཞུདཿ རྒྱ་གར་པཎྜི་ཏ་རྣམས་རང་ཡུལ་གཤེགསཿ གཞན་ཡང་པཎྜི་ཏ་རྣམས་རང་ཡུལ་ལཿ ལོ་ཙཱ་བ་དང་འབངས་ཀྱིས་སོ་སོར་བསྐྱལཿ རྒྱ་གར་ཆོས་མི་སྡོམ་པར་བཀའ་བཀྲོལ་ཕུལཿ སངས་རྒྱས་གཉིས་པ་སློབ་དཔོན་པདྨ་དང་ཿ བྱང་ཆུབ་སེམས་དཔའ་བོ་དྷི་ས་ཏྭ་གཉིསཿ སྐྱེ་བ་སྔ་མའི་ལས་འབྲེལ་སྤུན་ཡིན་པསཿ བཞུད་པར་མ་གནང་བཞུགས་པར་ཞལ་གྱིས་བཞེསཿ མཁན་ཆེན་བྱང་ཆུབ་གླིང་དུ་དགོངས་བར་བཞུགསཿ སློབ་དཔོན་བསམ་ཡས་མཆིམས་ཕུར་དགོངས་པར་བཞུགསཿ དེ་ནས་རྒྱལ་པོས་ཆོས་ལ་ཉམས་ལེན་ཞུསཿ བྱིན་རླབས་བརྒྱུད་པ་མ་ཆད་ལོ་རྒྱུས་དང་ཿ དབང་བསྐུར་ཆུ་བོ་མ་ནུབ་བསྐུར་བའི་ཐབསཿ གདམས་ངག་གཟེར་ཁ་མ་ལོག་ཁྲིགས་ཆགས་དང་ཿ སྲིད་སྡེ་དགྲ་ལ་མ་ཤོར་ཉམས་ལེན་གནང་ཿ སྒོ་རླུང་ཕུགས་ནས་མ་ལངས་ཆོས་ཀྱི་བདགཿ
༼༢༠༣བ༽ལྷ་འདྲེ་འདྲེ་རུ་མི་གནོད་བསྟན་པའི་དབྱེཿ སློབ་དཔོན་བདུད་དུ་མ་བབས་ལུང་དུ་བསྟནཿ སྨན་འཐུངས་དུག་ཏུ་མ་སོང་སྒྲུབ་པའི་ཐབསཿ བློ་ཁེལ་ངེས་པ་མང་པོ་རྒྱལ་པོར་གསུངསཿ སྒྲ་བསྒྱུར་ཕུལ་ཕྱིན་བཻ་རོ་ཙ་ན་དང་ཿ ཡིག་རིགས་ཉེར་གཅིག་ཤེས་པའི་ལེགས་སྦྱིན་ཉིཿ ཡིག་སྐྱེན་མཐར་ཕྱིན་ལྡན་མ་རྩེ་མང་དང་ཿ ནམ་མཁའི་སྙིང་པོ་ཨཱ་ཙ་ར་ཡེ་ཤེས་དབྱངསཿ སྙིང་སྟོབས་དང་ལྡན་རྒྱས་བསྡུས་མང་ཞིག་བསྒྱུརཿ སྨན་རྩིས་ཕོ་མདོས་མོ་མདོས་ཀླུ་ཆོག་དང་ཿ སྲུང་བའི་ཡན་ལག་བརྒྱ་དང་རྩ་བརྒྱད་བསྒྱུརཿ དེ་དུས་རྒྱལ་པོ་ཁྲི་སྲོང་ལྡེའུ་བཙན་གྱིསཿ ཚོགས་འཁོར་བརྒྱ་དང་རྩ་བརྒྱད་བྱས་པའི་དུསཿ རྒྱལ་པོའི་སྲས་མོ་པདྨ་གསལ་ན་སྟེཿ ནམ་དགུང་རྒྱལ་པོ་གདན་འདྲེན་ཕོ་ཉ་བྱུང་ཿ རྒྱལ་པོས་བྱོན་པས་སྲིན་ནད་ཕོ་ལང་འདུགཿ བྱིན་རླབས་ཞུ་དགོངས་རྒོད་མ་དཀར་མོར་བཀལཿ གུ་རུའི་དྲུང་དུ་བྱིན་རླབས་ཞུ་རུ་འོང་ཿ དེ་དུས་ཡེ་ཤེས་མཚོ་རྒྱལ་སྒོམ་བྱེད་པའིཿ མཁུར་ཚོས་གཡས་པར་ཁུ་འཕངས་འཇའ་འོད་ཕོགཿ ལུས་པོ་འདར་ཡེང་བྱུང་ནས་སྒོམ་བཤིག་བལྟསཿ རྣ་བར་རྟ་གཉིས་ཁྲོག་ཁྲོག་སོང་བ་ཐོསཿ མཉམ་གཞག་ལྟ་སྟངས་བྱས་ནས་བསྒོམས་པའི་དུསཿ གསེར་སྦྲམ་རྡོག་པོ་མགོ་ལ་ཕོག་ནས་བྱུང་ཿ སློབ་དཔོན་དྲུང་གི་མཎྜལ་རྒྱན་དེར་འདུགཿ ང་ལ་ཤོག་གསུང་ཡིན་འདུག་སྙམ་ནས་ཕྱིནཿ ཕུག་པའི་སྒོ་
༼༢༠༤ན༽འགྲམ་གཡས་གཡོན་རྟ་རེ་བཏགསཿ སློབ་དཔོན་དྲུང་ན་ལྷ་ལྕམ་པདྨ་གསལཿ དགུང་ལོ་བརྒྱད་ལོན་པ་དེ་ཤི་ནས་འདུགཿ དེ་ན་རྒྱལ་པོ་ཉིད་ཀྱང་རྒྱལ་འདུག་པསཿ བློ་དམན་བུད་མེད་ཡེ་ཤེས་མཚོ་རྒྱལ་གྱིསཿ ནད་གདོན་ཉེན་ནམ་ཡབ་སྲས་ཅི་བྱུང་ཞུསཿ སློབ་དཔོན་ཞལ་ནས་དེ་ཙམ་མི་ཡང་བརཿ མངའ་བདག་རྒྱལ་པོ་ཡར་ལ་སློང་དང་གསུང་ཿ མཚོ་རྒྱལ་དར་དཀར་སླེ་འུས་དབུ་ནས་བསླང་ཿ རྗེ་ལགས་བཞེངས་དང་ཞེས་པས་ཐུགས་བསོས་སོཿ རྒྱལ་པོ་བརྒྱལ་སངས་ལྷ་ལྕམ་རོ་ལ་གཟིགསཿ མཆི་མས་གདོང་དག་བཤུམ་ཞིང་སྨྲེ་སྔགས་འདོནཿ སློབ་དཔོན་རྒྱལ་པོ་ཉིད་ལ་བཀའ་སྩལ་པཿ འདུས་བྱས་རྟག་པ་མ་ཡིན་རྐྱེན་གྱིས་འཇིགཿ སྐྱེས་པའི་མཐའ་འཆི་འདུས་པའི་མཐའ་མ་འབྲལཿ ས་སྟེང་འདུས་བྱས་ཐམས་ཅད་འདི་དང་འདྲཿ ཉམས་ལེན་རང་ཐོག་དྲན་པ་གསལ་ཐོབ་མཛོདཿ སང་རེད་རྒྱལ་པོ་ཉིད་ཀྱང་གཤེགས་ན་གསུངསཿ དེ་ནས་རྒྱལ་པོས་ཨམ་གཙིགས་བསྡམས་ནས་བཞེངསཿ གསེར་སྐྱོགས་གཡུས་བཀང་སློབ་དཔོན་ཕྱག་ཏུ་ཕུལཿ ཕྱག་ནི་དབུ་ཐོད་བུད་བུད་བཙལ་ནས་ཞུསཿ ཀྱེ་མ་རིག་འཛིན་སློབ་དཔོན་ཆེན་པོ་ལགསཿ འདུས་བྱས་ཆོས་རྣམས་ཐམས་ཅད་མི་རྟག་ནཿ བསྟན་གཞི་གཙུག་ལག་ཁང་ནི་ཇི་ལྟ་བུཿ སྡུག་བསྔལ་འབྱུང་ཁུངས་རྒྱལ་ས་སུ་ཡིས་འཛིནཿ ང་ཡི་བུ་
༼༢༠༤བ༽མོ་ལྷ་ལྷ་ལྕམ་པདྨ་གསལཿ ཚེ་སྔོན་བསོད་ནམས་བསགས་ཏེ་ང་དང་འཕྲདཿ ཉིད་སོགས་ལོ་པཎ་མཁས་གྲུབ་རྣམས་དང་མཇལཿ མ་བསགས་ཚེ་མཐར་མ་ཕྱིན་འགྲོགས་ཡུན་ཐུང་ཿ ཚེ་དུས་བྱེད་པའི་རྒྱུ་རྐྱེན་ཅི་ལས་བྱུང་ཿ ང་དང་ཕ་སྤང་ལས་འབྲེལ་ཇི་ལྟར་ལགསཿ ཕྱི་མའི་དུས་ན་སྐྱེ་བ་གང་དུ་ལེནཿ མཐོ་རིས་བྱང་ཆུབ་སྐབས་ནི་མཆིས་མ་མཆིསཿ མ་ཧཱ་གུ་རུ་རཏྣ་ས་གསུང་བར་ཞུཿ སློབ་དཔོན་དར་ཅིག་ཅི་ཡང་མ་གསུང་བཞུགསཿ དེ་ནས་མངའ་བདག་རྒྱལ་པོ་གསོན་ཅིག་གསུངསཿ རྒྱལ་པོས་བཞེངས་པའི་གཙུག་ལག་ཁང་འདི་ལཿ ཞིག་རལ་བདག་ཏུ་འཛིན་པ་མང་དུ་འབྱུང་ཿ དགག་སྒྲུབ་སྡུག་བསྔལ་མ་མཛད་ཡལ་དུ་ཆུགཿ མངའ་བདག་རྒྱལ་པོ་ཉིད་ཀྱི་རྒྱལ་ས་ཡང་ཿ ད་ནས་གདུང་རྒྱུད་མི་རབས་གཉིས་སོང་ནསཿ བོད་ཁམས་ཡོངས་ཀྱི་བསོད་ནམས་ཟད་པ་དང་ཿ སྔོན་གྱི་གནོད་སྦྱིན་སྤུན་གསུམ་ཚེ་འཕོས་ནསཿ རྒྱལ་པོ་སེང་གེའི་མགོ་ཅན་དུད་འགྲོའི་མིང་ཿ བློན་པོ་ཐེའུ་རང་སྤྲུལ་པ་སྤྲེ་མགོ་ཅནཿ ཞང་བློན་ཁྲ་ཡི་མགོ་ཅན་ཕུང་གསུམ་འབྱུང་ཿ གཅེན་བཀྲོངས་གཅུང་སྤྱུགས་དམ་པའི་ལྷ་ཆོས་བསྣུབསཿ ཆོས་པ་རབ་གསོད་འབྲིང་སྤྱུགས་ཐ་མ་འཁོལཿ གཙུག་ལག་ཁང་ཀུན་ཤ་ཁྲག་དམར་ལོང་འགེངསཿ ལྷ་ཡི་ཕྱག་ལ་པགས་པ་ནང་ཆ་དགེལཿ བཟང་པོའི་སྤྱོད་ལམ་ན་བུན་བཞིན་དུ་ཡལཿ ངན་པའི་སྤྱོད་ལམ་
༼༢༠༥ན༽འཚུབ་མ་བཞིན་དུ་ལངསཿ རྒྱལ་ཁྲིམས་མདང་གི་རྨི་ལམ་བཞིན་དུ་སང་ཿ སྤྱི་གཅེས་དཀོན་ཅོག་མི་རོ་བཞིན་དུ་བོརཿ སྒོས་གཅེས་ཕ་མ་གྲི་མདུང་རྩེ་ལ་བསྐྱོནཿ སྤྱོད་ངན་རང་གིས་བྱས་ནས་དུས་ངན་ཟེརཿ རྗེ་ཡིས་བཞེངས་པའི་ཆོས་འཁོར་ཐམས་ཅད་འཇིགཿ མ་ཉེས་པ་ལ་སྐྱོན་འབེབས་མི་དགེ་སྤྱོདཿ མི་མགོ་བྲན་བྱེད་ཇག་ཆོམ་རྐུན་མ་དརཿ རི་ཀླུང་མེད་པའི་སེམས་ཅན་མི་སྐྱིད་སྡུགཿ སྐྱིད་མེད་གཤེད་མ་སྲོག་གི་སག་བདར་འབྱུང་ཿ བདུད་ཀྱི་རྒྱལ་པོས་རྒྱལ་སྲིད་ལོ་ཟླ་གཅིགཿ བྱང་ཆུབ་སེམས་དཔས་ཐུགས་བསྐྱེད་གྲི་རུ་བཀུམསཿ གདུང་བརྒྱུད་འོད་སྲུང་ཡུམ་བརྟན་གྲགས་པ་འབྱུང་ཿ གཙོན་ལ་མི་འཆམ་དབུ་རུ་གཡོ་རུ་འཁྲུགཿ ཉིན་འཁྲུག་མཚན་འཁྲུག་ལོ་ནི་བཅུ་གཉིས་འཁྲུགཿ མི་ལ་བསད་ཤི་གཉིས་ལས་མེད་པ་འབྱུང་ཿ ཅན་དགུ་ཡུམ་བརྟན་ཁྱེར་ཏེ་འབངས་རྣམས་འཁོལཿ རྒྱལ་པོའི་གདུང་རབས་དགུ་བཅུ་གོ་བརྒྱད་ནཿ བསོད་ནམས་ཟད་པའི་རྒྱལ་པོ་ཞིག་ཀྱང་འབྱུང་ཿ འབངས་རྣམས་ཁེངས་ལོག་རྗེ་ཡི་ལ་ཡོགས་འབྱུང་ཿ སྟེང་ན་རྗེ་མེད་འོག་ན་འབངས་མེད་པཿ མཐའ་ཤོར་དཀྱིལ་རྡོར་འགྲིམ་འགྲུལ་སྐྱེལ་མ་དགོསཿ ལོ་ནི་བརྒྱའམ་བདུན་ཅུ་རྩ་ལྷག་འབྱུང་ཿ ཁ་བ་ཅན་གྱི་བོད་ཡུལ་རྒྱལ་ཁམས་འདིརཿ གདུང་རབས་དྲུག་ཅུ་དམ་ཆོས་སྒྲ་མི་གྲགསཿ ད་ལྟ་བསྒྱུར་བའི་མདོ་སྔགས་
༼༢༠༥བ༽ཆོས་སོ་ཅོགཿ བརྒྱ་ཚར་སྟོང་ཚར་མང་པོ་བཞེངས་བྱས་ནསཿ ལ་ལ་གཏེར་སྦོས་ལ་ལ་མཐའ་ལ་སྤྱུགསཿ དེ་ལྟར་མཛད་ན་ཕྱི་རབས་ཕན་ཆེར་ཐོགསཿ ལན་ཅིག་དམ་ཆོས་འདུལ་བའི་བསྟན་པ་ནིཿ མི་རོ་ཙམ་ཞིག་མདོ་ཁམས་སྨད་ནས་འབྱུང་ཿ འབྲས་བུ་གསང་སྔགས་ཆོས་ཀྱི་བསྟན་པ་ནིཿ གཞུ་རྒྱུད་ཙམ་ཞིག་སྟོད་ཀྱི་ཕྱོགས་ནས་འབྱུང་ཿ དེ་ནས་མདོ་སྔགས་གཉིས་ཀྱི་བསྟན་པ་ནིཿ མ་ནུབ་ཙམ་ཞིག་མཐའ་ནས་དབུས་སུ་འབྱུང་ཿ རྗེ་ཡི་གདུང་བརྒྱུད་མི་རབས་བརྒྱ་སོང་ནསཿ མངའ་རིས་སྐོར་གསུམ་མང་ཡུལ་པུ་རངས་སུཿ གདུང་བརྒྱུད་རྒྱལ་པོ་མགོན་གསུམ་ཞེས་བྱ་འབྱུང་ཿ དེ་འདས་ཕན་ཆད་རྒྱལ་ཁམས་མི་བདེ་སྟེཿ རྩི་ཤིང་ནགས་བསྐམས་མི་ཡི་ཟ་ཐང་བྲིཿ བཅུད་རྣམས་སས་འཐུངས་སྨན་རྣམས་ནུས་པ་ཡལཿ འབྲས་བུ་མི་སྨིན་ཆར་ཆུ་དུས་མི་འབབཿ སྐྱེ་ཁུངས་ཞན་ཅིང་ཕྱུགས་རྣམས་ཞོ་ཤེ་ཆུང་ཿ ནད་མང་ཚེ་ཐུང་མུ་གེ་སྐབས་སུ་འབྱུང་ཿ དེ་ནས་མི་རབས་བདུན་བརྒྱད་ཚུན་ཆད་དུཿ མིས་དབོན་རྣམ་གསུམ་བཞེངས་པའི་གཙུག་ལག་ཁང་ཿ མཐའ་ཉམས་དབུས་ཀྱི་ལྟེ་བ་ལུས་པ་ལཿ མངའ་ཐང་ཉམས་པས་ལྷ་ཁང་ཕུག་རོན་འཛིནཿ ལྷ་ཁང་ནང་དུ་བྱ་བྲུན་མང་པོ་འབྱུང་ཿ ལྷ་ལ་ཕུག་རན་ཚང་འཆའ་བྱ་སྐྱགས་འབྱུགཿ སྐབས་ཤིག་གཙུག་ལག་ཁང་སྒོ་བརྩིག་པ་འབྱུང་ཿ སྐབས་འགར་སྤྲང་པོའི་
༼༢༠༦ན༽ཚང་བཅས་འཛིན་པ་དང་ཿ ལྷ་ཡི་ཕྱག་ལ་སྤྲང་པོའི་ཟོ་བ་འདོགསཿ ཆོས་ལ་སྤྲང་སྤྲུག་ཤོག་འབག་བྱེད་པ་འབྱུང་ཿ གཙུག་ལག་ཁང་ལ་ཞབས་ཏོག་མེད་པ་ཡིསཿ དཀར་པོའི་ཕྱོགས་ཕམ་ནག་པོ་རྒྱལ་གྱུར་པསཿ ཧོར་ཡུལ་ཤིང་ཁུན་ཏའི་ཏུར་གྲགས་པ་འབྱུང་ཿ གནམ་ཐེའུ་དཀར་པོའི་སྤྲུལ་པའི་རྒྱལ་པོ་ཞིགཿ ལྕགས་ཕོ་ཁྱི་ལ་འགོད་པོའི་སྤྲུལ་པ་འགྱེདཿ བོད་ཡུལ་མི་བདེ་མཚོན་གྱི་ཆར་པ་འབེབསཿ བོད་རྣམས་ཀྱེ་མ་ཀྱེ་ཧུད་སྙིང་རེ་རྗེཿ བཅུ་ལོན་ཡན་ཆད་མགོ་མེད་ཇ་སིག་འདྲཿ རྨོས་བསྐོ་ཐོང་མཁན་མི་རྙེད་མོ་གླིང་འདྲཿ ཤ་མཁར་བརྩིག་ཅིང་ཁྲག་གི་རྫིང་བུ་བསྐྱིལཿ ན་ཆུང་སྤྱོད་ཅིང་བུད་མེད་བྲན་དུ་བཀོལཿ མཐའ་མི་དབུས་རྡིབ་བོད་ཁམས་སིལ་བུར་འགྲོཿ དབུས་གཙང་ཁམས་གསུམ་ཐམས་ཅད་ཧོར་ཚང་འཆའཿ གསེར་ཡིག་དངུལ་ཡིག་ཁ་བྱང་བཏབ་ནས་འགྲོཿ དེར་ནི་རྒྱལ་པོ་ཐུགས་མུག་མང་དུ་བཤུམཿ སློབ་དཔོན་སེམས་ཅན་ལས་ཡིན་མ་བཤུམས་གསུངསཿ མངའ་བདག་རྒྱལ་པོས་ཕྱག་བཙལ་ཞུས་པ་ནིཿ ཧོར་ཁྲིམས་ཙམ་གནས་ཇི་ཙམ་ན་འཇིག་ཞུསཿ སློབ་དཔོན་པདྨའི་ཞལ་ནས་རྒྱལ་པོ་ལགསཿ ཧོར་ཁྲིམས་བརྒྱ་དང་ཉི་ཤུ་རྩ་ལྷག་གནསཿ ཇིང་གིར་རྒྱལ་པོའི་ཁྲིམས་ཞེས་ཡུན་རིང་འབྱུང་ཿ ཇིང་ནང་གྲུམ་ནས་རྒྱ་ནག་ཡུལ་ནས་འཇིགཿ སྨད་གྱི་ཡུལ་ནས་འཇམ་དཔལ་སྤྲུལ་པ་འབྱུང་ཿ
༼༢༠༦བ༽ས་ནང་གྲུམ་ནས་ཕག་གིས་ས་སློག་འཇིགཿ ཡར་ཀླུང་ནང་ནས་ཕྱག་རྡོར་སྤྲུལ་པ་འབྱུང་ཿ ལྕགས་ཕོ་ཁྱི་ལ་ཧོར་དམག་བོད་དུ་ཡོདཿ མདོ་སྟོད་མདོ་སྨད་སོག་ཆུར་བྲག་སོགསཿ ཞིབ་པར་མི་བཀོང་སྐྱོ་བ་སྐྱེ་བའི་རྒྱུཿ ཡུལ་གྲུ་བཅུ་དྲུག་བཅོམ་ནས་ཅུང་ཟད་བདེཿ ཏའི་ཤའི་ཕོ་བྲང་འབྱུང་བཞིའི་འཇིགས་པས་འཇོམསཿ མི་ལ་ཚེ་མེད་སོས་ཀའི་སྦྲང་མ་འདྲཿ ནོར་ལ་བདག་མེད་ཚོང་དུས་འགྲོན་ཁང་འདྲཿ དེ་ལྟ་བཞིན་དུ་ཧོར་རྣམས་བོད་འོག་འཁོལཿ མི་རབས་བཅོ་བརྒྱད་བར་དུ་བརྟེན་པར་འགྱུརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ འདུས་བྱས་མི་རྟག་པར་བསྟན་པའི་ལེའུ་སྟེ་གྱ་དགུ་པའོཿ ཿཐ་ཐ་ཉྲ་རྒྱ་རྒྱཿ ཿ