ལྷ་ལྕམ་པདྨ་གསལ་ལུང་བསྟན་པའི་ལེའུ།
དེ་ནས་སློབ་དཔོན་པདྨ་འབྱུང་གནས་ཀྱིསཿ རྒྱལ་པོ་ཁྲི་སྲོང་ཉིད་ལ་བཀའ་སྩལ་པཿ ཁྱེད་ཀྱི་ལྷ་ལྕམ་ཚེ་དུས་བྱེད་པ་ནིཿ སྐྱེ་བ་འདི་གོང་རྒྱ་གར་ཡུལ་གྱི་ཤརཿ ཀ་མ་ཤི་ཏ་ཞེས་བྱའི་གྲོང་ཁྱེར་དུཿ རྒྱལ་པོ་བྷི་ལ་ཀུ་ཏའི་བཙུན་མོར་སྐྱེསཿ ཆུན་མོར་བུ་ཡོད་ཆེན་མར་བུ་མེད་ནསཿ ཆུན་མའི་བུ་ལ་ཕྲག་དོག་བྱས་ཏེ་བསདཿ དེ་ཡི་རྣམ་སྨིན་ཚེ་མཐར་མ་ཕྱིན་ཡིནཿ སྐྱེ་བ་འདི་ལ་ཡབ་སྲས་འབྲེལ་བ་ནིཿ སྐྱེ་བ་འདི་ཡི་ཡང་སྔ་བལ་པོའི་ཡུལཿ པདྨ་བདག་དང་མངའ་བདག་རྒྱལ་པོ་དང་ཿ བོ་དྷི་སཏྭ་འོ་སྐོལ་མཆེད་གསུམ་གྱིསཿ མ་གུ་ཏ་ཡི་མཆོད་རྟེན་
༼༢༠༧ན༽བྱ་རུང་ཁརཿ བུམ་པ་བཏགས་ནས་སྨོན་ལམ་སོ་སོར་བཏབཿ དེ་དུས་ལྷ་ལྕམ་སྦྲང་བུ་ཏྲེ་མའི་ལུསཿ རྒྱལ་པོ་ཉིད་ཀྱི་རྩེའུ་ཆུང་ལ་ཟོསཿ དྲན་མེད་ཕྱག་གིས་ཤད་པས་སྦྲང་བུ་ཤིཿ རྒྱལ་པོ་ཉིད་འགྱོད་སྙིང་རྗེ་རབ་ཏུ་སྐྱེསཿ དེ་ལ་དམིགས་པའི་སྨོན་ལམ་དྲག་པོ་བཏབཿ དེ་ཡི་ཕྱི་མར་ལོ་སྟོང་དུཿཁ་སྤྱདཿ དེ་ཚོ་བཤད་ན་རྒྱལ་པོ་ཐུགས་ཁྲལ་འགྱུརཿ རྒྱལ་པོས་ཅིས་ཀྱང་གསུང་བར་ཞུ་གསོལ་པསཿ རྒྱལ་པོ་དགྱེས་ན་ལྷ་ལྕམ་པདྨ་འདིཿ སྐྱེ་བ་བདུན་གྱི་གོང་དུ་རྒྱ་གར་ཡུལཿ ཀོ་ཏ་ལ་ཡི་གཙུག་ལག་ཁང་ཞེས་པརཿ བྲམ་ཟེའི་ཕྲུག་གུ་བྱ་ཏ་ལ་ཞེས་སྐྱེསཿ དགེ་སློང་བྱས་ནས་འཚོ་བ་ཀློག་འདོན་འཚོཿ ཀོ་ཏ་ལ་ཡི་རྒྱལ་པོའི་བརྒྱ་ཚར་བཏོནཿ ཉི་མ་དུ་ཤར་ཕྱི་དྲོ་རྒྱལ་པོ་དང་ཿ གཙུག་ལག་ཁང་གི་ཕྱི་རོལ་སྐུ་བསངས་འགྲོཿ མེ་ཏོག་སྡུམ་རར་ཀུཀྐུ་འཁྲིད་པ་མཐོང་ཿ དགེ་སློང་ཆགས་པ་སྐྱེས་ནས་ཕོ་བྲང་ལོགཿ རྒྱལ་པོའི་བཙུན་མོར་སྤྱད་པས་ཚུལ་ཁྲིམས་ཉམསཿ ཆོས་ཀྱི་ཞལ་ཕྱེ་འདོན་གྱི་ཡོད་པའི་དུསཿ རྒྱལ་པོའི་སྤྱན་གཉིས་བླ་མཆོད་དག་ལ་གཟིགསཿ དུས་ངན་དགེ་སློང་སྤྱོད་པ་འདི་འདྲ་གསུངསཿ དགེ་སློང་ཀུཀྐུར་ལ་ཞེ་སྡང་སྐྱེསཿ འབྲས་བགྲུའི་ཐོ་བས་ཀུཀྐུའི་རྡོ་རྗེ་བརྡུངསཿ ཀུཀྐུ་ཤི་བས་དགེ་སློང་མི་ཡིས་འཕྱསཿ ཁམས་འདུས་ཕོ་བྲང་རྩེ་ནས་ཕྱི་ལ་ལྕེབསཿ བྱོལ་སོང་མོ་ལུས་སྐྱེ་བ་ལྔ་བརྒྱ་བླངསཿ
༼༢༠༧བ༽དུཿཁ་དཔག་ཏུ་མེད་པ་མྱོང་བར་གྱུརཿ གཙུག་ལག་ཁང་དེའི་མར་ཁུ་བརྐུས་བཙོངས་བསཿ ཡི་དྭགས་སྐྱེ་བ་ལྔ་བརྒྱ་དུཿཁ་མྱོང་ཿ སྲོག་བཅད་དམྱལ་བའི་སྐྱེ་བ་ལྔ་བརྒྱ་བླངསཿ ཆོས་འཆད་པ་ལ་ཚིག་རྩུབ་སྨྲས་པ་ཡིསཿ ལྷ་མ་ཡིན་གྱི་སྐྱེ་བ་བརྒྱ་བླངས་གྱུརཿ གཙུག་ལག་ཁང་ལ་མེ་ཏོག་བསྐོར་བ་བྱསཿ ལྷ་ཡི་སྐྱེ་བ་བརྒྱ་བླངས་དུཿཁ་སྤྱོདཿ གྲུབ་ཐོབ་གཏེར་སྟོན་རྣལ་འབྱོར་པ་ཞིག་ལཿ བཀའ་རྒྱ་དབང་མེད་ནན་ཞུས་ཆོས་ཕྲོགས་པསཿ སྤྲིན་ཀྲ་མེ་འཁོར་སྐྱེ་བ་བརྒྱ་བླངས་ནསཿ དེ་ནས་པདྨ་གསལ་དུ་སྐྱེས་པ་ཡིནཿ སྐྱེ་བ་འདི་ཡི་ཕྱི་མར་ཡར་ཀླུངས་སུཿ བུ་མོ་གཟུགས་མི་སྡུག་ཅིང་བསོད་ནམས་ཆུང་ཿ སྦྲང་མོའི་རིགས་ཀྱི་སྐྱེ་བ་བཅུ་ལེན་གསུངསཿ དེ་ནས་འཕོས་ཏེ་བསམ་ཡས་མཐིལ་འདི་རུཿ ཁྱི་མོ་དཀར་མོ་ལོང་མ་སྨད་འབུ་ཞུགསཿ ནུབ་ཀྱི་རེས་ལ་ཀེང་ཀེང་འདྲེ་ཟ་བྱེདཿ སྨད་ཁོག་འདྲད་པ་ཞིག་གི་སྐྱེ་བ་ལེནཿ དེ་ནས་འཕོས་ནས་ལྷ་སའི་ཚོང་འདུས་སུཿ ལུག་མ་སྨད་ཁོག་འདྲེད་ཅིང་སྤྲང་བར་སྐྱེཿ དེ་ནས་འཕོས་ནས་བསྒྲགས་ཀྱི་གྲོང་གསར་དུཿ བུད་མེད་དབང་པོ་མ་ཚང་ལི་མགོ་མཿ སྣ་ཉག་ཁ་ཆེ་ཤ་རྩུབ་མཆུ་ཤོར་བཿ ཤིག་སྲོ་མང་ཞིང་བསྲེ་དྲི་མནོམ་པར་སྐྱེཿ ལྷ་ས་བསམ་ཡས་གཉིས་བསྐོར་འབྲེལ་ཙམ་ཐོགསཿ དེ་ནས་འཕོས་ཏེ་ལྷོ་ནུབ་ལ་ཡག་ཏུཿ བུ་མོ་སྤྲེའུའི་ལོ་པ་ཤེས་རབ་ཅནཿ སྐྱེས་མ་ཐག་ཏུ་ཕ་
༼༢༠༨ན༽མ་གཉིས་ཀ་འཆིཿ ང་ཡི་སྤྲུལ་པ་ཉང་རལ་ཞེས་དང་འཕྲདཿ དེ་ལ་མོས་གུས་བྱས་ཏེ་ལམ་སྣ་ཟིནཿ དེ་ནས་གཙང་གི་གཡས་རུ་གྲོང་དམར་དུཿ བན་སྒོམ་ཕོ་མོ་གཉིས་ཀྱི་བུ་རུ་སྐྱེཿ དེ་ཡང་བཞིན་མི་སྡུག་ཅིང་གཤེས་ངན་ཁྲོཿ རབ་ཏུ་བྱུང་བའི་ཆ་ལུགས་ལོག་ལྟ་ཅནཿ ང་ཡི་སྤྲུལ་པ་ཆོས་དབང་ཞེས་དང་འཕྲདཿ གདམས་པ་སྦྱིན་པས་རིག་པའི་ངོ་བོ་མཐོང་ཿ ཌཱ་ཀི་མ་ཡིས་རྗེས་སུ་འཛིན་པར་འགྱུརཿ སྐྱེ་བ་དེ་འཕོས་འདི་ནས་ཤར་ལྷོ་མཚམསཿ རྡོ་བོད་མཚམས་ཀྱི་འབྲན་ཐང་ཞེས་བྱ་བརཿ སྔགས་བཙུན་ཕོ་མོ་གཉིས་ཀྱི་བུ་རུ་སྐྱེཿ ལྕགས་མོ་ཡོས་ཀྱི་ལོ་པ་མི་གཅིག་པུཿ སྒོ་བཟང་སྐྱེ་མཆེད་དངས་པ་ཤེས་རབ་ཅནཿ ཕ་མེད་མ་མེད་ཤིན་ཏུ་དབུལ་ཉོན་མོངསཿ གང་ན་ཉེ་བ་ཐམས་ཅད་དགྲ་བྱེད་པཿ སྐྱེ་བ་སྔ་མའི་བག་ཆགས་རབ་ཏུ་འབྱུང་ཿ ཆུ་མོ་གླང་ལོར་ང་ཡི་ཟབ་གཏེར་འཕྲདཿ གཏེར་སྒོ་གསུམ་བཞི་འབྱེད་དེ་དོན་མི་འབྱུང་ཿ སྦས་པའི་ཚུལ་དུ་ཉམས་ལེན་དུས་ཡིན་པསཿ ཨུ་རྒྱན་ང་ཡི་ཟབ་གཏེར་བདག་པོར་འགྱུརཿ དེ་ནས་ཚེ་འཕོས་མོན་ཡུལ་བུམ་ཐང་དུཿ དགེ་གནས་རྩི་ལུང་ཐོ་སྐོར་སྐྱེ་བར་འགྱུརཿ སྤྲེའུའི་ལོ་པ་ཤེས་རབ་བློ་བསྲེལ་ཅནཿ ང་སྤྲུལ་རིན་ཆེན་གླིང་འཕྲད་རྗེས་སུ་འཛིནཿ ཚེ་སྒྲུབ་རྡོ་རྗེ་རྒྱ་མདུད་ཉམས་བླངས་པསཿ ཚེ་ཡང་མཐར་ཕྱིན་སྐུ་ཚེའི་སྨད་ཉིད་ལཿ བ་མ་ཐད་སྨད་
༼༢༠༨བ༽ནས་གཏེར་གྱི་སྒོ་ཡང་འབྱེདཿ དེ་དུས་དྲི་མེད་འོད་ཟེར་ཞེས་བྱར་གྲགསཿ གཏེར་སྒོ་ལྔ་འབྱེད་འགྲོ་དོན་དཔག་མེད་མཛདཿ དེ་ཕྱིར་མཚོ་རྒྱལ་དཀར་ཆག་ཡི་གེར་ཐོབཿ ཞིབ་པར་ལོགས་སུ་ཐོབ་ལ་སྦོས་ཤིག་གསུངསཿ མངའ་བདག་དགྱེས་ནས་ཕྱག་བསྐོར་གྲངས་མེད་མཛདཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ལྷ་ལྕམ་པདྨ་གསལ་ལུང་བསྟན་པའི་ལེའུ་སྟེ་དགུ་བཅུ་པའོཿ ཿཐ་ཐ་ཉྲ་རྒྱ་རྒྱཿ ཿ