བོད་དུ་གཏེར་སྦས་པའི་ལེའུ།
དེ་ནས་སློབ་དཔོན་མངའ་བདག་བཀའ་བགྲོས་ནསཿ ཡ་ཐོག་རིང་མོ་མ་ཐོག་ཐུང་ངུ་གཉིསཿ ཁུག་པ་བཅོ་བརྒྱད་སྐྱོ་ཤས་ཅན་ལ་གཟིགསཿ ཕུན་སུམ་ཚོགས་པ་ལྔ་ལྔ་འཇོམ་པའི་གཏེརཿ གཏེར་གྱི་རྩ་བ་མ་འཕྱུག་ས་གཞི་མཆེ་སྟེཿ མིས་གཏེར་སྲས་གཏེར་དབོན་གཏེར་ཡང་གཏེར་བཞིཿ བཞི་པོ་རེ་རེར་བཅོ་བརྒྱད་བཅོ་བརྒྱད་བསྡུསཿ བཅོ་བརྒྱད་རེ་རེར་ཕུན་ཚོགས་ས་ལྔ་ལྔ་བསྟནཿ དེ་ཡང་གཏེར་རྒྱཿསྦས་རྒྱཿགསང་རྒྱཿདང་ཿགཏེར་གནས་ཟབ་རྒྱཿགཏད་རྒྱཿརྣམ་པ་ལྔཿགཏེར་རྒྱཿགཏེར་སྟོན་ཕུན་སུམ་ཚོགས་པ་ནིཿ ཆེ་བའི་ཡོན་ཏན་དགུ་དང་ལྡན་པ་སྟེཿ རིགས་ཀྱིས་ཆེ་བ་རྒྱལ་རིགས་རྗེའུར་འཁྲུངསཿ སྐུ་ཡི་ཆེ་བ་མཚན་བཟང་དཔེ་བྱད་ལྡནཿ ཡོན་ཏན་ཆེ་བ་ཤེས་བྱ་ཀུན་ལ་སྦྱངསཿ ཐོས་པ་ཆེ་བ་མདོ་སྔགས་ཐམས་ཅད་མཁྱེནཿ བསམ་གཞིག་ཆེ་བ་ཚིག་རྗེས་
༼༢༠༩ན༽དོན་གྱིས་གསོབཿ བསྒོམས་པས་ཆེ་བ་རྟོགས་པའི་ལྟ་བ་མཐོཿ སྤོབས་པ་ཆེ་བ་གཞན་དག་ཟིལ་གྱིས་གནོནཿ རྩོད་བློ་ཆེ་བ་རྒོལ་བའི་ཚིག་རྣམས་འཇོམསཿ འཛིན་བློ་ཆེ་བ་ཆོས་དང་ཆོས་མིན་ཕྱེདཿ བསྲན་ཐུབ་རྒྱུད་དུལ་ཆེ་བ་ཕུན་སུམ་ཚོགསཿ སྦས་རྒྱཿ དམ་ཆོས་ཕུན་སུམ་ཚོགས་པ་ནིཿ རྒྱལ་བའི་བཀའ་གནང་འཕགས་པའི་ལུང་གིས་གྲུབཿ རིག་པ་འཐད་ཅིང་གཏན་ཚིགས་རྒྱ་ཡིས་ཐེབསཿ མདོ་ཡིན་དགོངས་པ་ཉི་ཤུ་རྗེས་དོན་བཅུཿ སྤྱི་མདོ་ཡིན་ནམ་སྒོས་མདོ་ཁྱད་པར་མདོཿ རྒྱུད་ཡིན་དངོས་པོ་བཅུའམ་ལྔ་བཅུ་སྟེཿ ལུང་ཡིན་མཐའ་བཞི་མན་ངག་དཔེ་དོན་རྟོགསཿ གསང་རྒྱཿགཏེར་སློབ་དག་པའི་ཡོན་ཏན་བཅུཿ རིགས་དག་འབྱོར་པ་ལང་ཚོ་འདྲི་ཀློག་མཁསཿ རྒྱུད་དག་དད་པ་ཤེས་རབ་སྙིང་རྗེ་ཆེཿ ལས་དག་ཆོས་ཕྱིར་བརྩོན་འགྲུས་དཀའ་བ་སྤྱོདཿ འདྲིས་དག་སྒོ་གསུམ་རྐྱེན་ཁྱག་དམ་ཚིག་གནསཿ རྟེན་དག་གཞན་དང་མ་འཁོན་སེལ་མ་ཞུགསཿ གཏོང་དག་སྣ་ཚོགས་ཐབས་ཀྱིས་བདག་གཞན་བསྐུལཿ སེམས་བསྐྱེད་དག་པས་ལུས་སྲོག་དོན་མི་གཉེརཿ དངོས་པོ་དག་པས་སྨར་བཞུན་སེར་སྣ་མེདཿ དབང་པོ་དག་པས་གཞན་གྱི་སེམས་མི་དཀྲུགཿ འཕུན་པ་དག་པས་ཟོལ་འགྲོགས་ངོ་ཞལ་མེདཿ བཅུ་པ་མ་ཚང་ཁ་ནི་ཐུར་ལ་སྦུབཿ སྟོབས་དང་ལྡན་ཡང་དུག་གི་མེ་ཏོག་ཡིནཿ ཟབ་རྒྱཿགཏེར་
༼༢༠༩བ༽གནས་ཕུན་སུམ་ཚོགས་པ་ནིཿ གནས་ཀྱི་ཟབ་ཁྱད་ཐུན་མོང་ཁྱད་བར་ལྔཿ ཐུན་མོང་ལྔ་ལ་ས་ལ་ཟབ་པ་དང་ཿ དེ་བཞིན་ཆུ་ལ་ཟབ་པ་བྲག་ལ་ཟབཿ གཙུག་ལག་ཁང་ཟབ་ཤིང་ལ་ཟབ་པའོཿ ཁྱད་པར་ལྔ་ལ་དབུས་གནས་ཟབ་པ་དང་ཿ དེ་བཞིན་ཤར་གནས་ཟབ་དང་ལྷོ་གནས་ཟབཿ ནུབ་གནས་ཟབ་དང་བྱང་གནས་ཟབ་པའོཿ གཏད་རྒྱཿའདོན་དུས་ཕུན་སུམ་ཚོགས་པ་ནིཿ ས་རྟགས་གཡོ་འགུལ་སྐྱོ་ཤས་མར་འགྲིབ་གསུམཿ ཞེ་སྡང་ལས་གྱུར་དམག་འཁྲུག་འབྱུང་བ་དང་ཿ འདོད་ཆགས་ལས་གྱུར་མུ་གེ་འབྱུང་བ་དང་ཿ གཏི་མུག་ལས་གྱུར་ནད་ཡམས་འབྱུང་བ་དང་ཿ མི་རྣམས་སྐྱོ་ཤས་ཆེ་བས་གདུལ་བའི་ཞིང་ཿ མི་འདོད་བཞིན་དུ་ཁབ་ལེན་རྡོ་ཉུལ་བཞིནཿ གཏད་རྒྱཿ འབྱིན་པའི་གཏེར་སྟོན་གཅིག་བྱུང་ཞིང་ཿ ཆོས་དང་ངན་སྔགས་རྩིས་སྨན་ལ་སོགས་རྣམསཿ དབུ་གཏེར་ལྷོ་གཏེར་བྱང་གཏེར་ཤར་ནུབ་གཏེརཿ གཏེར་ཀ་བརྒྱ་དང་རྩ་བརྒྱད་བོད་དུ་སྦསཿ རྒྱལ་པོའི་བླ་གཏེར་དབུ་རྩེ་རིགས་གསུམ་དུཿ རྗེ་ཡི་བླ་གཏེར་གཏེར་མཛོད་རེ་རེ་སྦསཿ ཁམས་གསུམ་ཟངས་ཁང་དབུ་ཚལ་གསེར་ཁང་གླིང་ཿ དགེ་རྒྱས་བྱེ་མ་ཇོ་མོ་གླིང་གསུམ་དུཿ རྒྱལ་པོའི་བླ་གཏེར་གཏེར་ཀ་རེ་རེ་སྦསཿ ཡཀྵ་ལྟག་འོག་གླིང་བཞི་གླིང་ཕྲན་བརྒྱདཿ ཁྲུས་ཁང་གླིང་དང་ཆོད་མེད་ཀེང་རུའི་གླིང་ཿ མཐུ་རྩལ་གླིང་དང་སྒོ་བཞིའི་མགོན་ཁང་བཞིརཿ སློབ་དཔོན་པདྨའི་ཐུགས་
༼༢༡༠ན༽གཏེར་རེ་རེ་སྦསཿ མཆོད་རྟེན་དཀར་པོར་དམ་པའི་ཆོས་གཏེར་སྦསཿ མཆོད་རྟེན་དམར་པོར་རྩིས་སྨན་མདོས་ཆོག་སྦསཿ མཆོད་རྟེན་ནག་པོར་མཐུ་དང་ངན་སྔགས་སྦསཿ མཆོད་རྟེན་སྔོན་པོར་བཟོ་གཏེར་རིག་གནས་སྦསཿ ལར་གྱི་གཙུག་ལག་ཁང་གི་སྐོར་འདི་ལཿ ཛམ་གླིང་སྤྱི་ལ་དགོས་པའི་གཏེར་ཁ་ལྔཿ བོད་ཁམས་སྤྱི་ལ་དགོས་པའི་གཏེར་ཀ་ལྔཿ འདོན་དུ་མི་བཏུབ་བཅུད་ལ་དགོངས་པ་ལྔཿ གཏོན་ནས་གཏེར་ཚབ་འཇུག་དགོས་གཏེར་ཀ་ལྔཿ མ་བཏོན་དངོས་གྲུབ་ཡལ་བའི་གཏེར་ཀ་ལྔཿ མིང་ཅན་ཉེར་ལྔ་མིང་མེད་མང་དུ་སྦསཿ མཆིམས་ཕུའི་ཡང་དཔོན་སློབ་དཔོན་ཐུགས་གཏེར་སྦསཿ གཡའ་མ་ལུང་དུ་ཚེ་སྒྲུབ་ཚེ་ཆུ་སྦསཿ རྡོ་ཡི་མཆོད་རྟེན་གསང་གཏེར་རེ་རེ་སྦསཿ པདྨ་ཅན་ལ་སྐོར་བཅུ་ཚེ་ཆུ་སྦསཿ རྣམ་སྣང་རྒྱབ་ཏུ་བཀའ་གཏད་རབ་འབྱམས་སྦསཿ ལྷོ་ཡི་སྐྱེར་ཆུ་ལྷ་ཁང་ཟབ་གཏེར་སྦསཿ བུམ་ཐང་རྩི་ལུང་རྗེ་གཏེར་སེམས་ཕྱོགས་སྦསཿ བུམ་ཐང་དགེ་གནས་ཡུམ་གཏེར་མ་མོ་སྦསཿ གློ་བོ་དགེ་ཀེར་དགོངས་གཏེར་བསྟན་བཅོས་དང་ཿ བཀའ་འགྱུར་བསྟན་འགྱུར་རྒྱུད་འབུམ་མགུར་འབུམ་དང་ཿ ལུང་འབུམ་སྒྲུབ་འབུམ་གཟུངས་འབུམ་སྔགས་འབུམ་སྦསཿ གཙང་འཕྲང་ལྷ་ཁང་ཡབ་གཏེར་གཤིན་རྗེ་སྦསཿ གཡས་རུ་གཙང་འགྲམ་རྫས་གཏེར་སྣ་ཚོགས་སྦསཿ རྩིས་ཀྱི་ལྷ་ཁང་ཕྱི་
༼༢༡༠བ༽གཏེར་མདོ་སྔགས་སྦསཿ བྱང་གི་བྲ་བུན་རྩེ་ཡི་ལྷ་ཁང་དུཿ ནང་གཏེར་ངན་སྔགས་བརྒྱ་དང་རྩ་བརྒྱད་སྦསཿ ཁམས་ཀྱི་ཀློང་ཐང་སྒྲོལ་མའི་གཙུག་ལག་ཏུཿ བར་གཏེར་མི་འདྲ་རྒྱུད་ལུང་བཅུ་གསུམ་སྦསཿ ཤར་ཀོང་བུ་ཆུ་མཐར་ལེགས་ལྷ་ཁང་དུཿ རྒྱ་གཏེར་རྫུ་འཕྲུལ་སྒྱུ་མ་སྣ་ཚོགས་སྦསཿ རྒྱལ་རྩེ་རྡུམ་གཤིན་རྗེ་དོང་ཁ་དང་ཿ སེ་མོ་ཕུད་ལུང་བྲག་གསུམ་ཉོས་བྷ་གཿ མདོར་ན་ལྷོ་ཀོང་བྱང་ཀོང་ཤར་ནུབ་ཀོང་ཿ ཀོང་པོའི་ཡུལ་འདི་པད་འབྱུང་འདུལ་ཞིང་སྟེཿ གཏེར་ཀ་ཆེན་པོ་བརྒྱ་དང་རྩ་བརྒྱད་སྦསཿ གཏེར་ཕྲན་སྟོང་ཕྲག་བདུན་ཅུ་རྩ་གཉིས་སྦསཿ སྦས་པའི་རྩྭ་ཆུ་ཡུལ་དགུ་དབེན་གནས་བརྒྱདཿ དེ་དག་རེ་རེར་བོད་གཏེར་བརྒྱ་རྩ་བརྒྱདཿ གཏེར་ཕྲན་བྱེ་བ་དགུ་ཁྲི་གཏེར་ཏུ་སྦསཿ གཡོ་རུ་ཁྲ་འབྲུག་རྫས་གཏེར་སྦུབས་གཅིག་སྦསཿ ཤེལ་གྱི་བྲག་ཕུག་གསང་གཏེར་བཀའ་འདུས་སྦསཿ ལྷོ་བྲག་ཁོ་མཐིང་བདེ་གཤེགས་འདུས་པ་སྦསཿ མཁར་ཆུ་གནམ་སྐས་ཅན་ལ་ཡོངས་རྫོགས་སྦསཿ གཏམ་ཤུལ་སྲིན་མོ་སྦར་རྗེས་གསང་གཏེར་སྦསཿ སྟག་ཚང་སེང་ཕུག་ཐུགས་གཏེར་སྐོར་དགུ་སྦསཿ མོན་ཁ་སྣ་རིང་སེང་གེ་རྫོང་གསུམ་ལཿ མ་ནིང་གཏེར་ཀ་ཕྲ་གཏེར་བཅོ་ལྔ་སྦསཿ སྤ་གྲོ་གནམ་ཐང་དཀར་པོ་ནས་འབྲི་མཚམསཿ མངའ་བདག་རྒྱལ་པོའི་ནོར་གཏེར་མང་དུ་སྦསཿ ཕོ་མ་རྫོང་ཕུག་གསང་གཏེར་ངན་སྔགས་སྦསཿ
༼༢༡༡ན༽གཙང་གི་ཕུག་མོ་ཆེ་རུ་ཚེ་བདག་སྦསཿ ཡང་ཕུག་རིང་མོར་ཀླུ་བདུད་སྤུ་གྲི་སྦསཿ བསྒྲགས་ཀྱི་ཡང་རྫོང་ཕུར་པ་ཐམས་ཅད་སྦསཿ གྲ་ཡི་གཡུ་སྒོང་བྲག་ལ་གཏེར་སྨྱོན་སྦསཿ མུ་ཏིག་སྦ་མ་གང་ལ་གསང་གཏེར་སྦསཿ ཟར་པོ་ཟངས་ཀྱི་མཚོ་བྲག་གཏེར་བྲན་སྦསཿ འཕྱོང་རྒྱས་བང་སོར་ནོར་གཏེར་ཆོས་གཏེར་སྦསཿ འཕྱིང་བར་སྟག་རྩེར་དགོངས་གཏེར་ཟུར་ཞིག་སྦསཿ ཤམ་པོའི་གངས་ལ་གསང་གཏེར་གཏེར་སྨྱོན་སྦསཿ གཉལ་གྱི་དོང་ཁ་བྲག་ནག་མདའ་སྒྲོ་ལཿ སྨན་དཔྱད་གཙུག་ལག་བསྟན་སྲུང་མང་དུ་སྦསཿ གཉལ་སྨད་དགེ་རི་ནག་པོའི་བྲག་ལོགས་ལཿ ནོར་དང་གཏེར་གྱི་ཁ་བྱང་མང་པོ་སྦསཿ གསལ་རྗེ་གངས་མཐར་ཕྲ་མེན་སྤུ་གྲི་སྦསཿ ཆོས་སྒྲོ་ཐོད་དཀར་སྦེ་གསང་ལུང་པ་ལཿ དངུལ་སྤྱད་གསེར་སྤྱད་གསེར་སྦྲམ་སིལ་མ་སྦསཿ ཟ་ཆུ་འདུས་ལ་གཤིན་རྗེའི་ངན་སྔགས་སྦསཿ གཉལ་རང་འདོམ་མཁར་གཡུ་དང་བྱུ་རུ་སོགསཿ ཕོ་གྱོང་བཟའ་ཡི་མགོ་རྒྱན་ཐམས་ཅད་སྦསཿ ལུག་སྟོང་བྲག་དཀར་གདོད་ལ་ནོར་གཡུ་སྦསཿ ཀོ་རོ་ངམ་གྲོག་ཐུགས་གཏེར་བརྒྱ་རྩ་སྦསཿ མཁལ་དཀར་ལྷ་ཡུལ་ཕུག་པར་གཏེར་ཕྲན་སྦསཿ བྱར་གྱི་སྟག་ཆུང་གཏེར་ཕྲན་གཏེར་སྨྱོན་སྦསཿ ཁྲ་མོ་ལྡང་ལྷར་ཟབ་གཏེར་ངེས་དོན་སྦསཿ བྱར་དྭགས་ཀོང་གསུམ་སློབ་དཔོན་དགོངས་གཏེར་སྦསཿ ལྷོ་མོན་ལོར་གཉལ་སློབ་དཔོན་
༼༢༡༡བ༽གསང་གཏེར་སྦསཿ ཙཱ་རིའི་གནས་ལ་གསང་གཏེར་མ་བུ་སྦསཿ འོལ་ཀའི་མགར་ཕུག་ཡུམ་གཏེར་སྐོར་བཞི་སྦསཿ འོན་ཕུ་སྟག་ཚང་བསྟན་གཉིས་རྒྱ་མཚོ་སྦསཿ བྱ་ཕོ་ཟི་བ་བྲ་དང་བྲག་རྣམས་ལཿ ལྷ་བཟང་ཀླུ་དཔལ་ཕོ་ཆས་ཆ་ཅིག་དང་ཿ ཟངས་སྤྱད་ལྕགས་ཆ་སྡེར་མ་བརྒྱ་ཙམ་སྦསཿ ཁྲབ་ལར་ནོར་གཏེར་ཆོས་གཏེར་མང་དུ་སྦསཿ ཕུག་པའི་ནང་དུ་ཐུགས་རྗེ་ཆེན་པོ་སྦསཿ ལོང་མོ་ལོ་ཆུང་ནོར་གཏེར་རྐྱང་པ་སྦསཿ ཡར་ཀླུང་ཁྲ་འབྲུག་མཆོད་རྟེན་མགོ་ལྔ་ལཿ ཟབ་གཏེར་རྫས་གཏེར་སྤེལ་མ་མང་དུ་སྦསཿ དགོན་ཐང་གཙུག་ལག་ཁང་གི་བྲག་རི་ལཿ ནོར་གཏེར་ཆོས་གཏེར་དམ་རྫས་མང་དུ་སྦསཿ འཕང་ཐང་གཙུག་ལག་ཁང་གི་རྒྱབ་རི་ལཿ རྣམ་སྲས་ཡོན་ཏན་འབྱུང་བའི་རྒྱུད་སྐོར་སྦསཿ ཡུམ་བུ་བླ་སྒང་སྐོར་ལ་གསང་གཏེར་སྦསཿ བཙན་ཐང་གཡུ་ཡི་ལྷ་ཁང་བྲག་རི་ལཿ གཏེར་ཆེན་ལྔ་དང་གཏེར་ཆུད་དགུ་སྦས་སོཿ ཿམོན་མཁར་མགོན་པོ་གདོང་ལ་ཐུགས་གཏེར་ལྔཿ ནོར་གཏེར་གཡུ་ཁྲབ་དངུལ་དང་བྲལ་བ་སྦསཿ གྲ་ཕྱིའི་བྲག་པོ་ཆེ་ལ་བོད་གཏེར་སྦསཿ གྲ་ཡི་སྣེ་གདོང་ཟུར་ལ་རལ་གྲི་སྦསཿ དོལ་གྱི་ལྕེ་ཏེའི་ཟུར་ལ་ཁྲབ་རྨོག་སྦསཿ གཞུང་གི་ར་སྐོར་རྒྱབ་ལ་གསེར་ཀ་སྦསཿ གཅོང་གི་སིལ་མ་བྲག་ཕུག་སྤྱི་ཏི་སྦསཿ གཙང་གི་མང་མཁར་བྲག་ལ་མཐུ་འབུམ་སྦསཿ མང་ཡུལ་དཔལ་མོ་ཐང་གི་འདྲེ་ཕུག་ཏུཿ བཀའ་
༼༢༡༢ན༽སྲུང་འདུས་པ་ངན་སྔགས་སྐོར་ལྔ་སྦསཿ བྱམས་པ་སྤྲིན་དུ་སྒྲུབ་ཐབས་ཉི་ཤུ་སྦསཿ གཞུ་སྙེ་མཁར་དུ་མདོ་གཅོད་རྒྱུན་གཅོད་སྦསཿ ལ་སྟོད་སྲིན་པོ་རྫོང་ལ་ཞི་བྱེད་སྦསཿ ལ་སྟོད་དིང་རི་དིང་ཆུང་ཡོ་ག་སྦསཿ ལྷ་རྩེའི་བྲག་ལ་ཨ་ནུ་ཡོ་ག་སྦསཿ རྒྱང་པོ་ལུང་ལ་ཨུ་རྒྱན་རྣམ་ཐར་སྦསཿ ར་སོགས་ཀླུ་གྲུར་ལུང་བསྟན་མང་དུ་སྦསཿ རྡོ་རྗེ་གངས་ཀྱི་དངུལ་ཕུག་གསང་གཏེར་སྦསཿ གྲོམ་པ་རྒྱང་དུ་ཕྱི་གཏེར་ནང་གཏེར་སྦསཿ ཟུམ་བུ་ལུང་དུ་གསང་གཏེར་དགོངས་གཏེར་དང་ཿ ཐུགས་གཏེར་གཏེར་ཀ་བརྒྱ་དང་རྩ་བརྒྱད་སྦསཿ འོ་ཡུག་གཡག་སྡིར་གཏེར་གྱི་ཡན་ལག་སྦསཿ སྤ་གྲོ་ཆུ་མོ་ཕུག་ཏུ་ཐུགས་གཏེར་སྦསཿ གཡུ་ཕུག་རྫ་ལྷུང་གཏེར་ཕྲན་རྫས་གཏེར་སྦསཿ ཡེར་པ་ཟླ་བ་ཕུག་ཏུ་ཟབ་གཏེར་སྦསཿ ཟང་ཡག་བྲག་ལ་ཐང་ཡིག་གསང་གཏེར་སྦསཿ གཞོ་སྟོད་དེ་སྒྲོལ་མཁའ་འགྲོའི་སྐོར་རྣམས་སྦསཿ སྟོད་ཀླུང་འཕར་བ་ཚད་དུ་ཕྱག་ཆེན་སྦསཿ ཤ་འུག་སྟག་སྒོར་མ་ནིང་གཏེར་བཅུ་སྦསཿ ངོ་མཚར་རོང་དུ་གཏེར་ཕྲན་འདྲེས་མ་སྦསཿ ལྷ་སར་གསང་གཏེར་གཏེར་ཕྲན་ཟུང་ཞིག་སྦསཿ མཆིམས་ཕུ་བློན་པོ་མགུལ་དུ་བཅུད་ལེན་སྦསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ བོད་དུ་གཏེར་སྦས་པའི་ལེའུ་སྟེ་གོ་གཅིག་པའོཿ ཿཐ་ཐ་ཉྲ་རྒྱ་རྒྱཿ ཿ