གཏེར་དང་འཕྲད་པའི་གང་ཟག་རྣམས་ལ་ཞལ་གདམས་སྙིང་གཏམ་བཞག་པའི་ལེའུ།
དེ་ནས་ཨུ་རྒྱན་པདྨ་འབྱུང་གནས་ཀྱིསཿ གཏེར་དང་འཕྲད་པའི་སྐལ་ལྡན་ལས་ཅན་ལཿ ཤ་ཚ་སྙིང་གཏམ་ཞལ་ཆེམས་ཞིབ་གསུངས་པཿ ལས་འཕྲོས་ང་ཡི་གཏེར་དང་འཕྲད་པའི་ཚེཿ ལྷ་འདྲེ་མི་གསུམ་འཇམ་རྩུབ་གཉིས་སུ་འོང་ཿ རྒྱ་བོད་ལྷ་འདྲེ་མ་རུངས་ཐམས་ཅད་ཚོགསཿ ལེགས་པ་ལྟར་བྱས་ཉེས་པ་སྣ་ཚོགས་གཏོང་ཿ མི་མཐུན་པ་ཡི་རྟེན་འབྲེལ་མང་འཇོམ་པསཿ རིག་པར་བཅག་ཆུག་ཁ་སྡོ་མ་ཆད་མ་འཐུང་ཿ བདག་གིས་བདག་ཉིད་འཁོར་བར་མ་བསྐྱུར་བཿ བརྩེ་བརྩེ་དུང་དུང་ཆོས་བཤོལ་སྒྲུབ་གཅོག་པའིཿ ཉེ་འདུ་འབྲེལ་པ་ཐམས་ཅད་འགལ་རྐྱེན་ཡིནཿ ཕ་ཡུལ་མ་སྡོད་གར་སོང་ཆ་མེད་སོང་ཿ འགལ་རྐྱེན་མེད་པའི་གནས་སུ་སྒྲུབ་པ་གྱིསཿ འགལ་རྐྱེན་ཀུན་དང་འབྲེལ་བ་བཙན་ཐབས་མཆོདཿ རང་གིས་རང་ཕུང་མ་འཇུག་སྙིང་གཏམ་ཡིནཿ བདེ་ཞིང་སྐྱིད་པ་མི་འདོད་གཅིག་ཀྱང་མེདཿ རང་ཉིད་དམར་འགྱུར་རྔན་ཅན་ནང་ནས་ཡོང་ཿ མི་ཡང་གཞན་དོན་བོར་ལ་རང་དོན་ཚོལཿ བློ་སྣ་ནང་བསྟུངས་ལྟ་བའི་ཤོར་ཡངས་བསྐྱེདཿ སྣ་ཚོགས་འཆར་བའི་སེམས་ཉིད་ཚད་ལ་ཕོབཿ རི་རབ་ལྟ་བུར་བློ་བརྟན་བསྒོམ་པར་གྱིསཿ བརྟན་པ་ཐོབ་ཅིང་འོད་གསལ་
༼༢༡༩བ༽གཡོ་འགུལ་མེདཿ སུ་འགྲོགས་ཡོན་ཏན་མི་འབྱུང་གཅིག་པུར་སྡོདཿ ཡུན་རིང་འགྲོ་དོན་དངོས་གྲུབ་ངང་གིས་འབྱུང་ཿ ལྟོ་གོས་གཡོག་བྱེད་ཕོངས་པ་ཞེར་མ་བཞགཿ ཕྱི་ན་སྲོག་འཚོ་ལྷག་སྐྱོབ་ཙམ་ལ་བརྟེནཿ ནོར་གཏེར་ཐོན་ནས་ཆོས་གཏེར་སྐལ་པ་མེདཿ ཆོས་གཏེར་ཐོན་ནས་ནོར་གཏེར་སྐལ་པ་མེདཿ རྟོག་གཉིས་དུས་གཅིག་སྐྱེ་བ་མི་སྲིད་མདོཿ གཏེར་ནས་ཁྱི་རོ་མིན་པ་གང་ཡང་འབྱུང་ཿ མི་ཚེ་རིང་ན་གང་ཡང་ཆ་མི་ཆོདཿ གོ་ཆ་ཆེར་བགོས་ཤེས་པ་ཞིབ་ཏུ་གྱིསཿ མི་སླུ་ངེས་པར་པད་འབྱུང་བཀའ་ཡིན་གྱིཿ བདག་ཅན་བུད་མེད་མ་འཐུལ་ནོར་མ་བསྲེཿ མི་ཡི་མཛོངས་སྣོན་མ་བྱེད་མགོ་མ་སྟོང་ཿ ཆོས་ཚུགས་མ་ཞིག་བྱེད་པ་སྙིང་གཏམ་ཡིནཿ མི་ཞེས་རི་མགོ་གང་མཐོའི་ཉི་མ་ཡིནཿ བློ་གཏད་ཁེལ་བ་སུ་ལའང་མེད་པས་ནཿ གཏེར་འཚོ་མ་ཤེས་འཕྲལ་རྐྱེན་ངན་དགུ་འོང་ཿ མི་སེམས་འདྲེ་བས་སྤྱང་སྟེ་ཚོར་བ་རགསཿ གྱོང་ཞིང་ཡོད་ན་ཐོ་ཕྱིར་བསྟེན་དོགས་མེདཿ སངས་རྒྱས་བཀའ་ཡིས་སླུ་བ་ཅང་སྲིད་དམཿ དྲོད་རྟགས་མ་ཐོན་བར་དུ་སྒྲུབ་ལ་འབུངསཿ ཆོས་ཟབ་ཙ་ན་ནག་པོའི་བདུད་ཟབ་པསཿ རང་གིས་ཉམས་སུ་མ་བླངས་ཆོས་མ་བསྟནཿ དམ་པ་སྔས་ན་གཞན་གྱི་ཕྲག་དོག་འོང་ཿ སུ་ངོ་ཆེ་ཡང་མི་སྟོན་སྙིང་གཏམ་ཡིནཿ བསྒྲུབ་པའི་དུས་སུ་ལོ་གསུམ་མ་འབུངས་པརཿ གཏེར་ཆོས་ཐོན་ནས་བཅལ་དུ་བཀྲམ་པ་
༼༢༢༠ན༽ནཿ སློབ་མ་མགོ་ལོག་མངོན་བགྲང་སྐུར་འདེབས་འོང་ཿ མི་ཟེར་བྲོང་ཁར་མ་ཉན་བློ་མ་བསྟུནཿ རང་མནོ་བཞིན་དུ་གཞན་མི་མནོ་བ་ཡིནཿ བཟོ་མ་ཚར་ལ་ཆག་ཆོད་གཏན་ལ་ཕོབཿ རྐྱེན་ཐེག་འདུན་མ་གཟབས་པ་སྙིང་གཏམ་ཡིནཿ བར་གཅོད་ཡིན་ཟེར་སྐད་ལོག་འདོན་མི་ཡོང་ཿ བྱར་ཡོད་དུས་སུ་འཕེན་པའི་སྟོབས་མ་བྱསཿ རློམ་པ་མཚོར་ཆེས་གཞན་གྱི་ཚུལ་ངན་ཡོང་ཿ དམ་ཚིག་མ་བསྲུངས་དམ་ཉམས་བློ་སེམས་བསྲེསཿ བྱེད་བློ་བྱས་པས་བསྟན་བླ་རིན་མེད་འཚོང་ཿ མེད་དང་མི་ཤེས་རྒྱུད་མེད་ཚིག་གསུམ་པོཿ བསྐོར་ལྡབ་བྱས་ནས་སྨྲ་བ་སྙིང་གཏམ་ཡིནཿ ཀུ་སྒྲ་དི་རི་ཧབ་ཤ་བྱེད་པ་འོང་ཿ བརྟན་པ་མ་ཐོབ་དཔའ་གདེང་མི་ལྡན་པརཿ མེད་ན་མེད་དེ་ཡོད་ན་ཡོད་ཚད་བསྟནཿ ཞིམ་པོ་མི་ལ་བྱིན་ན་སྐྱུག་ཏུ་འོང་ཿ གདམས་ངག་ཟགས་སུ་མ་འཇུག་སྙིང་གཏམ་ཡིནཿ དད་པ་དུད་དུད་མི་སྐྱེ་ངན་སྨྲས་ལྡིརཿ གསོལ་བ་ལྷང་ལྷང་མི་འདེབས་སྐོག་ཤུབ་ཡོདཿ སུ་དང་ལྟ་སྤྱོད་མ་བསྟུན་སྙིང་གཏམ་ཡིནཿ དམ་ཚིག་ཐུབ་ན་སུ་མ་མགུ་ཡང་ཆོགཿ ཚུལ་འཆོས་ལོ་འདོད་བྱས་པས་སྣང་མི་འགྱུརཿ མོས་གུས་ཁ་ཅམ་ཚིག་ཙམ་མ་ཡིན་པསཿ ཨུ་རྒྱན་བདག་ལ་སྙིང་ནས་གསོལ་བ་ཐོབཿ བར་གཅོད་བདུད་ནི་ཅིར་ཡང་བརྫུས་འོང་བསཿ མི་ངོམ་བསྲུངས་བཤད་པའི་དམ་ཚིག་སྲུངསཿ གཏེར་སྟོན་ལྟ་བ་ཁལ་མ་
༼༢༢༠བ༽འབྱམས་གྱིསཿ ལྟ་སྤྱོད་རྩིངས་ན་ཆོས་ལ་བར་ཆད་འོང་ཿ སྔོན་ལ་རང་སྨིན་གོ་ཆ་རྩིས་སུ་ཆེཿ བློ་གཏད་བླ་མ་ལ་བྱེད་བརྒྱུད་པ་འཛིནཿ ལོ་གསུམ་དུས་བོར་མཚམས་སྤྱོད་སྦྱིན་པར་བྱཿ ཆོས་ནི་སྤེལ་མ་དྲགས་ལ་བསྡམས་མ་དྲགསཿ སེམས་ལ་ཕྲ་མོ་དབབ་པ་སྙིང་གཏམ་ཡིནཿ ཆོས་ལ་རང་གིས་ཉམས་ལེན་མ་བྱས་ནཿ གཞན་མ་ཡིད་མི་ཆེས་ཤིང་རྩིས་མི་ཡོང་ཿ མི་ཆོ་ཉམས་ལེན་ཆོས་ལ་དྲིལ་ལ་ཞོགཿ གཏེར་ཆོས་འདི་ཉིད་ཤིན་ཏུ་གཉན་པས་ཏེཿ དཔེར་ན་དུག་སྤྲུལ་མགོ་ཡི་ནོར་བུ་འདྲཿ ཐབས་ལ་མཁས་ན་ནོར་བུ་ལོན་པས་འཆོངསཿ ཐབས་མ་མཁས་ན་དུག་གིས་འཆི་བར་བྱེདཿ དེ་བཞིན་ཡང་ན་འཚོངས་ལ་ཡང་ཕུང་ཿ ཕུང་འཆོངས་ནུས་པ་རིན་ཆེན་ས་ཡི་གཏེརཿ ཁ་འོག་ལུས་ཆུག་ལུས་པོ་དབེན་པར་འདུགཿ ལས་སུ་དཔེ་བྲིས་ནོར་བུ་སྣ་གཤོག་བསྟེནཿ སངས་རྒྱས་རང་རྙེད་དགོས་དགུ་མི་ཡིས་སྟེརཿ བཀུར་སྟི་རྗེད་བྱེད་འཚོ་བ་ལྷ་ཡིས་སྦྱོརཿ བསམ་པ་ཡིད་འགྲུབ་སངས་རྒྱས་བརྒྱུད་པ་ཟིནཿ དཀོན་ཅོག་དབུ་བསྟོད་བསྟན་པའི་རྐང་ཡང་ཚུགསཿ གདུལ་བྱ་ཆུད་མི་ཟ་ཞིང་གཏམ་རེ་སྙནཿ ཨུ་རྒྱན་སྙིང་གཏམ་ཤ་ཚ་མི་ཆུད་ཅིང་ཿ ཚེ་འདིའི་དབང་གྱུར་ཁ་གྲགས་ལོ་འདོད་སྒྲུབསཿ མི་ངོ་དཀར་ནག་བལྟ་ཞིང་ངོ་སྲུང་བྱེདཿ ཆོས་ཉམས་མི་ལེན་ནོར་དང་ཟས་ངོར་གཏོང་ཿ ཁ་མཚོན་འདོན་ཅིང་ཚོང་དུས་བཙོང་ས་འགྲིམཿ རྨོངས་པ་འདུ་ཞིང་མཁས་
༼༢༢༡ན༽པའི་ཟེར་མི་ཐུབཿ བསྟན་པའི་ཚོམ་པོ་གཞན་ན་མི་བདོག་སྟེཿ དམ་ཉམས་བཀའ་ལོག་བྱ་བ་སུ་ལ་ཟེརཿ དམ་ཅན་རྒྱ་མཚོས་ཁྲེལ་བའི་ཞལ་གདམས་ཡིནཿ བསྟན་པའི་བླ་འཚོང་དཀོན་ཅོག་རྐང་འདྲེན་པོཿ སྤྱི་བཙན་ངན་དཔེ་སྡིག་པའི་སློབ་དཔོན་པཿ དམྱལ་བའི་གྲོས་མཁན་ངན་སོང་ལམ་རྒྱུས་མཁནཿ རང་དོན་རྒྱབ་བསྐྱུར་དལ་འབྱོར་ཆུད་གསན་མཁནཿ རབ་ཏུ་འཚོ་མ་ཤེས་པས་ཕུང་བར་འགྱུརཿ དེ་བས་ང་ཡི་གཏེར་ཆོས་ཤིན་ཏུ་གཉནཿ དུག་གི་ལྟོ་ཡོང་རྨ་བྱ་ཙམ་ལས་མེདཿ ཚོད་ཡོད་ཚོད་ཆུང་ཅུང་ཟད་བྱར་མི་གཏུབཿ མི་དགའ་མ་ཆེ་བྲེ་མོའི་གཏམ་མ་མང་ཿ དམའ་ས་གཟུང་ལ་མི་ལ་འཇིགས་པར་གྱིསཿ གཏེར་བདག་ཨེ་ཡོད་གང་ཟག་ཁྱད་ལ་རགཿ ཨུ་རྒྱན་སློབ་དཔོན་པདྨ་འབྱུང་གནས་ངསཿ སྙིང་གི་ཁུ་བ་བཀའ་རྒྱས་བཏབ་ནས་སྦསཿ དགོས་འདོད་འབྱུང་བའི་ཡིད་བཞིན་ནོར་བུ་ལཿ གསོལ་བ་ཐོབ་ཅིག་སྙིང་གཏམ་སྨྲས་པ་རྣམསཿ ང་ཡིས་བོད་ཁམས་གཏེར་གྱིས་བཀང་ནས་ཡོདཿ དངོས་གྲུབ་འདོད་ན་གཏེར་གནས་ཀུན་ནས་ལོངསཿ ང་ནི་མི་སྡོད་སྲིན་པོའི་ཡུལ་དུ་འགྲོཿ གསོལ་བ་སྙིང་ནས་འདེབས་པའི་གང་ཟག་ལཿ ང་ལ་འགྲོ་སྡོད་གཉིས་སུ་ག་ལ་ཡོདཿ ཨོ་རྒྱན་སྤྲུལ་པ་འབུམ་ཕྲག་འབུམ་ཡང་འབྱུང་ཿ སྔར་ཡོད་ཕྱིས་མི་ཡོད་པའི་གུ་རུ་མིནཿ ང་འགྲོ་ལྷོ་ནུབ་སྲིན་པོ་འདུལ་དུ་འགྲོཿ
༼༢༢༡བ༽ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ གཏེར་དང་འཕྲད་པའི་གང་ཟག་རྣམས་ལ་ཞལ་གདམས་སྙིང་གཏམ་བཞག་པའི་ལེའུ་སྟེ་གོ་གསུམ་པའོཿ ཿཐ་ཐ་ཉྲ་རྒྱ་རྒྱཿཿ