གཏེར་སྟོན་པ་བརྟག་པའི་ལེའུ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ བྲག་དམར་ལྷུན་གྲུབ་དཔལ་གྱི་བསམ་ཡས་སུཿ མི་འཇིགས་སེང་གེ་བསྣོལ་བ་གསེར་ཁྲིའི་སྟེང་ཿ བཀྲག་གསལ་ཟ་འོག་པཉྩའི་གདན་སྟེངས་སུཿ འཇའ་རིས་འཕན་གདུགས་བྲེས་པའི་བསིལ་གྲིབ་ལཿ རིན་ཆེན་སྤྱན་གཟིགས་བཀྲམ་པའི་སྟ་ཟུར་གྱིཿ ཕྱི་ནང་མཆོད་པ་བཤམས་པའི་མདུན་རོལ་དུཿ ལྷ་མིའི་སྤྲིན་ཕུང་འཁྲིགས་པའི་དཀྱིལ་དབུས་ནཿ སངས་རྒྱས་གཉིས་པ་འགྲོ་བའི་དོན་བྱོན་པའིཿ སློབ་དཔོན་ཆེན་པོ་པད་འབྱུང་འཛུམ་བཅས་བཞུགསཿ དེ་དུས་འཛམ་གླིང་རྒྱལ་པོ་མངའ་བདག་གིསཿ གསེར་གྱི་མཎྜལ་གཡུ་ཡི་མེ་ཏོག་བཀོདཿ གཟི་དང་མུ་མེན་སྐྱོགས་སུ་འབྲས་ཆང་དང་ཿ རྒུན་འབྲུམ་ཆང་བླུག་སློབ་དཔོན་ཞལ་དུ་དྲངསཿ བཟའ་བཅའ་ཕྱི་ནང་མཆོད་པ་མང་ཕུལ་ནསཿ ཨེ་མ་ཧོཿ སྤྲུལ་སྐུའི་མཆོག་གྱུར་འགྲོ་མགོན་པདྨ་འབྱུང་ཿ བདག་གི་བོད་ཡུལ་མཐའ་འཁོབ་ཁ་བ་ཅནཿ གཅོང་རོང་གྲོག་པོ་མཚོན་ཆ་གཟིངས་པ་འདྲཿ མ་རུངས་བློན་པོ་གདོང་དམར་སྲིན་པོའི་རིགསཿ དཀར་པོའི་སེམས་མེད་སྡིག་སྤྱོད་སེམས་ཅན་མང་ཿ ཐུགས་རྗེས་གཟིགས་ནས་བཀའ་
༼༢༢༢ན༽ལུང་མན་ངག་གནང་ཿ ཕྱི་རབས་དོན་དུ་རིན་ཆེན་གཏེར་མང་སྦསཿ མ་འོངས་དོན་དུ་གཏེར་སྟོན་མང་འབྱུང་ནཿ སློབ་མའི་ཡིད་ཆེས་བཀུར་གནས་གང་ལ་བགྱིཿ ལས་ཅན་དོན་དུ་རི་བྲག་ལུང་པ་རྣམསཿ ཨོ་རྒྱན་ཉིད་ཀྱིས་སྒྲུབ་རིར་བྱིན་གྱིས་བརླབསཿ ཐུགས་རྗེས་བཟུང་བས་བར་ཆད་མི་འབྱུང་ཞིང་ཿ གནས་རྣམས་ཀུན་ཏུ་སྒྲུབ་པ་འཕེལ་མོད་ཀྱང་ཿ ཁྱད་པར་འཕགས་པའི་སྒྲུབ་གནས་གང་ལ་བགྱིཿ ཐམས་ཅད་མཁྱེན་པ་པདྨ་འབྱུང་གནས་ཀྱིསཿ ཕྱི་རབས་དོན་དུ་བདག་ལ་གསུང་བར་ཞུཿ ཞེས་གསོལ་དབུ་ཐོད་བུད་བུད་ཕྱག་འཚལ་བསཿ སློབ་དཔོན་ཆེན་པོ་པདྨས་བཀའ་སྩལ་པཿ གསོན་ཅིག་མངའ་བདག་འཛམ་གླིང་ཆོས་ཀྱི་རྒྱལཿ རྒྱ་ཆེ་གྲངས་མང་ཆོས་རྣམས་གསུངས་པ་ཀུནཿ ཀུན་རྫོབ་དོན་དམ་གཉིས་སུ་ཤེས་པ་ཡིསཿ མདོ་སྔགས་སྤྱི་ལུང་ཡིད་ཆེས་དཔང་དུ་ཚུགསཿ གཏེར་སྟོན་རྣམ་ཐར་ཆ་ལུགས་ཅི་འདུག་དྲིསཿ ཆོས་རྣམས་ཐམས་ཅད་སྒྲིབ་པ་མེད་པའི་སྤྱནཿ མདོ་རྒྱུད་ཡིན་པས་ཚད་བཟུང་དབང་པོ་བཏུབཿ བསྟན་བཅོས་རྣམས་དང་གང་ཟག་ཚད་མི་གཟུང་ཿ དབང་པོ་མི་བཏུབ་ཁ་འཛིན་ཕྱོགས་ཆ་ཡིནཿ ཆོས་དང་ཆོས་མིན་གཉིས་ཕྱེ་བརྟག་པར་བྱཿ ས་རྟགས་གང་ཤར་རྒྱལ་ཁམས་ཡོངས་སུ་ཉནཿ མང་པོའི་ནང་ནས་གཅིག་ནི་ཡིན་པར་གཟུང་ཿ འགལ་བ་གཏེར་གཉིས་དུས་གཅིག་མི་འབྱུང་སྟེཿ
༼༢༢༢བ༽རིམ་པར་བྱུང་ན་མདོ་སྔགས་ལུང་གིས་ཟིནཿ དེ་ཡང་མྱ་ངན་འདས་པའི་མདོ་སྡེ་ལསཿ ཡུལ་གཅིག་འཁོར་ལོ་སྒྱུར་རྒྱལ་གཉིས་མི་འབྱུང་ཿ འཇིག་རྟེན་ཁམས་ན་སངས་རྒྱས་གཉིས་མི་འབྱུང་ཿ ཞེས་གསུངས་ང་ཡི་གཏེར་འབྱིན་དེ་འདྲའོཿ བླ་མེད་དོན་རྫོགས་འདུས་པའི་རྩ་རྒྱུད་ལསཿ གསང་སྔགས་དར་དུས་སྔགས་པ་བདུད་ལས་བྱེདཿ བདེན་པ་མཐོང་བའི་སྤྲུལ་སྐུ་གཉིས་མི་འབྱུང་ཿ འབྱུང་ན་མི་སྲིད་མདོ་རྒྱུད་ཀུན་དང་འགལཿ ཞེས་གསུངས་ཇི་སྲིད་ཉིན་མོར་གྱུར་པའི་དུསཿ ཕྱོགས་བཞི་མཚམས་བརྒྱད་ཉི་མ་ཤར་བྱུང་ནཿ དེ་བཞིན་ང་ཡི་གཏེར་འབྱིན་དེ་འདྲའོཿ གཞན་ཡང་སོ་སོ་འབྲང་པའི་མདོ་ལས་ཀྱང་ཿ མེ་ལས་པདྨོ་སྐྱེ་བ་ངོ་མཚར་ཞིང་ཿ འཇིག་རྟེན་སངས་རྒྱས་གཉིས་སྟོན་མཆོག་དེ་འདྲཿ ཞེས་དང་ཇི་སྲིད་མཚན་མོར་གྱུར་པ་ནཿ ཕྱོགས་བཞི་མཚམས་བརྒྱད་ཟླ་བ་ཤར་བྱུང་ནཿ དེ་བཞིན་ང་ཡི་གཏེར་འབྱིན་དེ་འདྲའོཿ བྱེ་བྲག་མ་འདྲེས་པ་ཡི་མདོ་ལས་ཀྱང་ཿ ཡར་སྐྱེ་གཅིག་དང་མར་འགྲིབ་བཅོ་བརྒྱད་དེཿ འཕེལ་འགྲིབ་གཉིས་ཀ་དུས་གཅིག་བྱེད་མི་སྲིདཿ མི་སྲིད་སྲིད་པའི་ཁྱད་འཕགས་དེ་འདྲ་བཿ ས་སྟེང་བྱུང་ན་འཕགས་པའི་ལུང་གིས་བཀགཿ ཅེས་གསུངས་ཡུལ་གཅིག་འཁོར་ལོ་སྒྱུར་རྒྱལ་གཉིསཿ དེ་བཞིན་ང་ཡི་གཏེར་འབྱིན་དེ་འདྲའོཿ འཕགས་པ་ཡོངས་སུ་མྱ་ངན་འདས་པ་ལསཿ ཁ་ཟས་བཟང་པོ་དུག་དང་
༼༢༢༣ན༽འདྲེས་པ་ལཿ ཡོན་ཏན་རོ་ཞིམ་འགྲངས་པ་སོགས་ཡོད་ལཿ སྐྱོན་ནི་འཆི་བ་ཡོད་ཅེས་འཚོད་པ་ནཿ གླེན་པ་གཏི་མུག་ཅན་གྱིས་དེ་ཉོ་ཞིང་ཿ མཁས་པ་ཤེས་རབ་ཅན་རྣམས་མི་ཉོ་ཞེསཿ དམ་ཚིག་ཉམས་པའི་བརྫུན་གཏེར་ཟང་མ་ལཿ ཉོ་བཙོང་བྱེད་པ་བསྟན་པའི་ལག་དམར་ཏེཿ སྤེལ་སྒྲོགས་བྱེད་པ་ཤོ་གམ་ཅན་གྱི་གནསཿ དམ་པའི་ཆོས་མཆོག་པདྨ་དཀར་པོ་ལསཿ དེ་བས་འཇིག་རྟེན་སློབ་དཔོན་སངས་རྒྱས་ཀྱིཿ སྐྱོབ་པ་ལྡེམ་པོའི་ངག་ནི་ཤེས་པར་གྱིསཿ ཐེ་ཚོམ་ཆོད་ལས་སོམ་ཉི་རྣམ་སྤངས་ཏེཿ སངས་རྒྱས་འགྱུར་གྱིས་དགའ་བ་རབ་ཏུ་བསྐྱེདཿ ཅེས་གསུངས་ཡིན་མིན་ཐེ་ཚོམ་སྒྲོ་འདོགས་ཆོདཿ འདམ་སེང་མང་སྟེ་གངས་ཀྱི་སེང་གེ་དཀོནཿ མེ་ཏོག་མང་སྟེ་ཨུ་དུམ་ཝཱ་ར་དཀོནཿ ནགས་ཚལ་མང་སྟེ་བྱང་ཆུབ་ལྗོན་ཤིང་དཀོནཿ རྒྱ་མཚོ་མང་སྟེ་འོ་མ་ཅན་ནི་དཀོནཿ འདབ་ཆགས་མང་སྟེ་མཁའ་ལྡིང་ཁྱུང་ནི་དཀོནཿ རྒྱལ་པོ་མང་སྟེ་འཁོར་ལོ་སྒྱུར་རྒྱལ་དཀོནཿ བརྫུས་སྐྱེས་མང་སྟེ་པད་སྡོང་སྐྱེས་པ་དཀོནཿ བདུད་རྩི་འབྱུང་བ་རྩ་བའི་རྒྱུད་ཆེན་ལསཿ ང་ཡི་བསྟན་པ་སྙིགས་མར་གྱུར་པ་ནཿ ཆོས་རྣམས་ཚོང་དུས་འོ་མ་ཇི་བཞིན་དུཿ ངན་པས་བསླད་ནས་ཐུར་དུ་ལྟུང་བར་བྱེདཿ དེ་བཞིན་ལུང་པ་རེ་ན་གཏེར་སྟོན་རེཿ ཡུལ་གྲུ་རེ་ན་གྲུབ་ཐོབ་གྲགས་འདོད་རེཿ བསྟན་པའི་ཆོས་བཤད་ལག་དམར་ཁྲག་ཅན་རེཿ ཀུན་རྫོབ་གཏེར་
༼༢༢༣བ༽འདྲ་གཏེར་མའི་སེལ་བྱེད་རེཿ ཡོན་ཏན་ཆེ་སྟེ་སྐྱོན་གྱི་གོང་པོ་རེཿ ཡིན་ཡིན་མང་སྟེ་ཡིད་སྐྱོ་ཐེ་ཚོམ་མེདཿ དེ་ལ་མཁའ་འགྲོ་མ་དགྱེས་མི་དགེའི་རྟགསཿ མི་འཚམ་རྣམ་པ་མང་དུ་འབྱུང་བར་འགྱུརཿ དེ་དུས་བཀུར་གནས་ས་རྟགས་ཤར་ལ་བྱེདཿ གཏེར་ཀ་མ་མཐུན་ལུང་བསྟན་ཟིན་ལ་བྱེདཿ ཆང་དང་ཆུ་གཉིས་ངོས་རྟགས་འདྲ་བས་གསལཿ ཆོས་ལ་རྣོ་བའི་ནུས་པ་འདུག་ལ་བྱེདཿ ཆོས་དེས་འདུལ་ཞིང་ཉམས་སུ་ལེན་པ་བྱེདཿ ལྷ་དང་འདྲེ་གཉིས་བསྲེས་ཀྱང་མི་འདྲ་སྟེཿ ང་ཡི་བཤད་དང་མཐུན་པ་ཞིག་ལ་བྱེདཿ ས་འོག་གསེར་སྦ་ས་འོད་ནི་མཁའ་ལ་ལྡིང་ཿ མདོ་སྔགས་ལུང་དང་མཐུན་པ་ཞིག་ལ་བྱེདཿ ང་ཡི་སྤྲུལ་པར་ཟོག་པོ་ཟེར་ཞིང་གཤེཿ ཟོག་པོ་རྣམས་ལ་འདི་ཕྱིའི་བློ་རྟེན་འཆའཿ དྲན་པ་གསལ་ཏེ་དགེ་སྡིག་ངོ་མི་ཤེསཿ ཤེས་པ་ཞིབ་སྟེ་ཆོས་ཀྱི་མ་ཚང་མི་ལོནཿ དེ་ཕྱིར་བདུད་ཀྱི་བསྟན་པ་དར་བ་ཡིནཿ ང་ལ་རྣམ་ཐར་འདྲ་མིན་མང་པོ་ཡོདཿ པདྨ་འབྱུང་གནས་ཆུང་བས་བསམ་ཡས་ཡོངསཿ ཆེན་པོས་མ་བྱོན་ཟེར་ནས་གྲུབ་མཐའ་རྩོདཿ ང་འདི་པདྨ་འབྱུང་ཆེན་པོའི་ཆོས་ཡིན་ཟེརཿ བརྒྱུད་པ་དེ་ནས་བྱས་ཏེ་མི་མགོ་བསྐོརཿ དེ་བཞིན་ཀླུ་སྒྲུབ་ཨཱརྻ་གཉིས་གསུམ་ཟེརཿ མི་འདྲ་མང་པོ་ཡི་གེར་འདུག་པ་ནིཿ ཞི་དུལ་ཤེས་རབ་ཅན་གྱིས་གོ་བར་བྱཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ
༼༢༢༤ན༽གཏེར་སྟོན་པ་བབརྟག་པའི་ལེའུ་སྟེ་གོ་བཞི་པའོཿ ཿཐ་ཐ་ཉྲ་རྒྱ་རྒྱཿ ཿ