མ་འོངས་སྒྲུབ་གནས་བསྟན་པའི་ལེའུ།
དེ་ནས་སྒྲུབ་པ་བྱེད་པའི་གནས་གསུངས་པཿ སྒྲུབ་གནས་ཀུན་གྱི་རྒྱལ་པོ་ཁྱད་འཕགས་ནིཿ མཁའ་འགྲོ་མ་བསྒྲུབས་རང་བཞིན་འདུ་བའི་གནསཿ སྐུ་ཡི་དབེན་གནས་བསྒྲགས་ཀྱི་ཡང་རྫོང་ཡིནཿ གསུང་གི་དབེན་གནས་བསམ་ཡས་མཆི་མས་ཕུ་སྟེཿ ཐུགས་ཀྱི་དབེན་གནས་ལྷོ་བྲག་མཁར་ཆུ་ཡིནཿ ཡོན་ཏན་དབེན་གནས་ཡར་ཀླུངས་ཤེལ་གྱི་བྲགཿ འཕྲིན་ལས་དབེན་གནས་མོན་ཁ་སེང་གེ་རྫོང་ཿ ཁྱད་པར་ཡར་ཀླུངས་ཤེལ་བྲག་མཆི་མས་ཕུ་གཉིསཿ རྒྱ་གར་དུར་ཁྲོད་བསིལ་བའི་ཚལ་དང་མཚུངསཿ ལུང་ལྔ་གླིང་གཅིག་ལྗོངས་གསུམ་གངས་ཉི་ཤུཿ དེ་ཡང་དབུས་ན་ཤངས་ཀྱི་ཟམ་བུ་ལུང་ཿ ཤར་ཕྱོགས་ཀོང་པོའི་ཡུལ་ན་ལྗོན་པ་ལུང་ཿ ལྷོ་ཡི་ཕྱོགས་ན་མིན་གྱི་སྲིབས་བཙན་ལུང་ཿ ནུབ་ཀྱི་ཕྱོགས་ན་འོགས་ཀྱི་ཕག་རི་ལུང་ཿ བྱང་གི་ཕྱོགས་ན་སྐྱིད་ཀྱི་གྲོ་མ་ལང་ཿ ཤར་ལྷོ་མཚམས་ན་སྦས་ཡུལ་པདྨ་གླིང་ཿ ལྷོ་ནུབ་མཚམས་ན་སྦས་ཡུལ་འབྲས་མོ་ལྗོངསཿ ནུབ་བྱང་མཚམས་ན་སྦས་ཡུལ་མཁན་པ་ལྗོངསཿ བྱང་ཤར་མཚམས་ན་སྦས་ཡུལ་ལུང་གསུམ་ལྗོངསཿ ཐང་ལྷ་ཏི་སེ་མང་མཁར་བུ་ལེ་གངསཿ སྟར་སྒོ་ཕོ་མ་མཁའ་རི་རྡོ་རྗེ་གངསཿ ཇོ་མོ་ཁ་རག་གང་བཟང་རྩེ་དུམ་གངསཿ ལ་ཕྱི་ཚེ་རིང་སྣ་ནམ་ཏེ་སྒོ་གངསཿ འོ་དི་གུང་རྒྱལ་
༼༢༢༤བ༽ཤམ་པོ་གསལ་རྗེ་གངསཿ ཧ་འོ་གངས་བཟང་ཙཱ་རི་ང་ལའི་གངསཿ ང་ཡི་ཞབས་ཀྱིས་བཅགས་པའི་གནས་ཆེན་དུཿ ཁྱད་པར་འཕགས་པའི་སྒྲུབ་གནས་དེ་དག་ཀུནཿ དེ་ཡང་གང་ཟག་རབ་འབྲིང་ཐ་མ་གསུམཿ གང་ཟག་དབང་པོ་རབ་ཀྱིས་བསྟེན་པ་ལཿ བསམ་ཡས་མ་ཆིམས་ཕུ་ཡར་ཀླུངས་ཤེལ་གྱི་བྲགཿ ཡེར་པ་ཟླ་བ་ཕུག་གི་གནས་འདི་གསུམཿ བསམ་ཡས་ཁྲ་འབྲུག་ར་སའི་གཙུག་ལག་དང་ཿ ཟུང་ངུ་འབྲེལ་བའི་གནས་ཆེན་སྒྲུབ་པའི་གནསཿ ཞིང་མཆོག་དམ་པ་ཀུན་ལའང་དེ་ལས་མེདཿ འདི་གསུམ་གནས་ལ་མཆོག་ཐུན་གང་བསྒྲུབ་པཿ སྒྲུབ་པ་བྱས་ན་མི་འགྲུབ་གང་ཡང་མེདཿ གནས་འབྲེལ་ཙམ་ཡང་རིག་འཛིན་གྲལ་ལ་ཆུདཿ ཕུང་པོ་བོར་ནས་མཁའ་སྤྱོད་གནས་སུ་འགྲོཿ ཁྱད་པར་ཡར་ཀླུངས་ཤེལ་གྱི་བྲག་ཕུག་འདིཿ བདུད་རྩི་སྨན་སྒྲུབ་བྱས་པའི་གནས་ཡིན་པསཿ གསང་སྔགས་མཐར་ཕྱིན་ཨུ་རྒྱན་ཡུལ་ལྟ་བུཿ ཡ་མཚན་སྒྲུབ་ཁང་བྲག་ཕུག་ཁྱད་འཕགས་ཡོདཿ ཞི་ཁྲོ་སོགས་ཀྱི་གཞལ་ཡས་ཁང་མང་བཞུགསཿ བོད་འབངས་དགའ་དད་སྤྲོ་བར་ཡར་བའི་བྲགཿ ཡོན་ཏན་བརྒྱ་ལྡན་བསམ་ལས་འདས་པར་བརྗོདཿ དེ་ལ་གནས་ཚད་དུ་རུཥྐས་མི་ཕེབསཿ གངས་དཀར་ཏི་སེ་ཙཱ་རི་ཟམ་བུ་ལུང་ཿ གནས་གཞན་ལ་ཡང་ཡོན་ཏན་ཡོད་མོད་ཀྱང་ཿ བསམ་གྲུབ་ཤེལ་གྱི་བྲག་ཕུག་ཆར་མི་ཉེཿ ཨུ་རྒྱན་ཧེ་རུ་ཀ་དང་
༼༢༢༥ན༽མཚུངས་དཔར་བཞགཿ འབྲིང་དང་ཐ་མས་སྦས་ཡུལ་གངས་ལ་བསྒྲུབཿ སྒྲུབ་གནས་རི་བྲག་མང་པོ་བསམ་འདས་ཀྱང་ཿ སྒྲུབ་གནས་གཙུག་ལག་ཁང་དང་ཟུང་འབྲེལ་བཿ འདི་གསུམ་དགེ་བ་བརྒྱ་འགྱུར་འཐོབ་པའི་གནསཿ ཚོགས་འཁོར་བྱས་ཚད་ཆུད་ཟོས་སོང་རེ་སྐནཿ ཞེས་གསུངས་འཛམ་གླིང་རྒྱལ་པོ་དགྱེས་པར་གྱུརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ མ་འོངས་སྒྲུབ་གནས་བསྟན་པའི་ལེའུ་སྟེ་གོ་ལྔ་པའོཿ ཿཐ་ཐ་ཉྲ་རྒྱ་རྒྱཿ ཿ