སངས་རྒྱས་བསྟན་པའི་འཕེལ་འགྲིབ་བསྟན་པའི་ལེའུ།
དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ སློབ་དཔོན་ཆེན་པོ་པདྨ་འབྱུང་གནས་ལཿ བསྟན་པའི་འགྲིབ་ཚུལ་ཇི་ལྟར་འགྲིབ་ཅེས་ཞུསཿ སློབ་དཔོན་ཆེན་པོ་པདྨས་བཀའ་སྩལ་པཿ བསྐལ་པ་རྫོགས་ལྡན་གཉིས་ལྡན་གསུམ་ལྡན་དང་ཿ རྩོད་ལྡན་ཡན་ཆད་སངས་རྒྱས་རེ་རེ་བྱོནཿ ཐུབ་པའི་བསྟན་པ་ལྔ་སྟོང་ལྔ་བརྒྱ་གནསཿ སྐྱེ་དགུའི་བདག་མོ་རབ་ཏུ་བྱུང་བ་ཡིསཿ བུད་མེད་བསོད་ནམས་ཆུང་བས་ལྔ་བརྒྱ་ནུབཿ ལྷག་མ་བསྐལ་པ་ལྔ་སྟོང་གནས་པ་ལཿ ལོ་ནི་བརྒྱ་བརྒྱ་དག་ལ་ལན་རེ་བྲིཿ ཚེ་ལོ་བཅུ་པ་དག་ལ་མཐིལ་དུ་ཐུགཿ དང་པོ་ཚེ་ལོ་བརྒྱ་ནས་དགུ་བཅུའི་བརཿ ལོ་ནི་སྟོང་དུ་སྟོན་པའི་བསྟན་པ་གནསཿ དེ་ནས་བསྟན་པའི་གཟུགས་བརྙན་འབྱུང་པ་ནིཿ ཚེ་ལོ་བརྒྱད་ཅུ་པ་ལ་མདོ་སྡེ་འབྱུང་ཿ བདུན་
༼༢༢༥བ༽ཅུ་པ་ལ་འདུལ་བའི་སྡེ་སྣོད་འབྱུང་ཿ དྲུག་ཅུ་པ་ལ་མདུན་པའི་སྡེ་སྣོད་འབྱུང་ཿ སྣང་སྲིད་ལྷ་འདྲེ་འཁྲུགས་ནས་མི་རུང་ལྟསཿ བསྟན་པའི་སྟོད་སྟོངས་སྨད་སྟོངས་བར་སྟོངས་འབྱུང་ཿ བསྐལ་པ་ཕྲན་བུ་འཚེ་བ་མང་དུ་འབྱུང་ཿ ལྔ་བརྒྱ་ཕྲག་བདུན་རྗེས་ནས་ལོ་བདུན་ནཿ རྟགས་ཙམ་འཛིན་གྱི་བསྟན་པའི་མགོ་གཡོ་འཛུགསཿ བེ་གྲུམ་དར་ཞིང་རྨོངས་པའི་ཁྱུ་གླིང་འབྱུང་ཿ ཆོས་ཀྱི་ཐེ་རལ་ཁ་འཛིན་བསྟན་གཉིས་འཁྲུགཿ ལྔ་བརྒྱ་ཕྲག་གསུམ་རྟགས་ཙམ་འཛིན་གྱི་དུསཿ ཚེ་ལོ་ལྔ་བཅུ་པ་ལ་བཀའ་འདུས་འབྱུང་ཿ ལོ་ཡི་སྙིགས་མ་གཉིས་ནག་མེ་ཕོ་སྟགཿ ཟླ་བའི་སྙིགས་མ་བདུན་དམར་ས་མོ་ཡོསཿ ཞག་གི་སྙིགས་མ་དྲུག་དཀར་ལྕགས་ཕོ་འབྲུགཿ དུས་ཚད་སྙིགས་མ་གསུམ་མཐོན་ལྕགས་ཕོ་ཁྱིཿ མི་ཡི་སྙིགས་མ་ལྔ་བཅུ་ཁ་རལ་མིཿ མཐའ་དབུས་འཁྲུག་ཅིག་མ་སྨད་ཡིད་མི་ཆེསཿ ལུགས་བླུག་བྲིས་བྲིས་གླེགས་བམ་མཆོད་རྟེན་འཇིགཿ ཆར་ཆུ་མི་སྙོམས་འབྲས་བུ་དུས་མི་སྨིནཿ གོས་རུ་མི་བཏུབ་ནད་ཡམས་མང་པོ་ཡོང་ཿ མུ་གེ་རབས་ཆད་ཡུགས་ས་མང་དུ་འབྱུང་ཿ གྲོས་ནི་རང་གི་སྙིང་ལའང་ཡིད་མི་ཆེསཿ ཉེ་བ་འཐབ་ཅིང་སོ་ཁ་ཐེམ་པར་གཏོདཿ གདོན་དུ་ཕོ་གདོན་བདུད་དང་ཁྱབ་འཇུག་དརཿ འདྲེ་རུ་གསོན་འདྲེ་མོ་གདོན་ཤི་ཚད་གནོདཿ མི་དགེའི་ལས་ཀྱི་ལམ་རྣམས་འཕེལ་བ་འབྱུང་ཿ
༼༢༢༦ན༽སྦྱང་གི་རྒྱབ་སེར་དགེ་སློང་ཚུལ་འཆོས་རྣམསཿ བདུད་དབང་གྱུར་པས་ཆས་གསུམ་བསྟན་པ་འབྱུང་ཿ དེ་ནས་བསྟན་པའི་གཟུགས་བརྙན་བརྗེས་པ་དང་ཿ ཚེ་ལོ་བཞི་བཅུ་པ་ལ་དགྲའི་བསྐལ་པཿ མི་རྣམས་བློ་བུར་ཡེ་འབྲོག་གླང་ཐབས་འཆིཿ གདོན་དུ་ས་བདག་ཀླུ་ནད་གཉན་ནད་འབྱུང་ཿ བུད་མེད་མོ་ལུས་ཐོབ་ཚད་གསོན་འདྲེར་གདོནཿ ཐོག་དང་ས་གཡོས་དམག་དང་མུ་གེ་འབྱུང་ཿ པད་འབྱུང་སྤྲུལ་པ་ཤར་གྱི་ཕྱོགས་ནས་འོང་ཿ ཚེ་ལོ་སུམ་ཅུ་བ་ལ་མུ་གེ་འབྱུང་ཿ མཉམ་ལས་ཚེ་སྟོད་བཟང་པོས་ངན་པ་བསྟོདཿ ནང་དུ་འདུ་བ་མཐའ་དག་འཁྲུག་པ་འབྱུང་ཿ གདོན་དུ་ཀླུ་བདུད་དམ་སྲི་འབྱུང་པོ་དང་ཿ འདྲེ་རུ་བྱིས་པ་ཐམས་ཅད་ཐེའུ་རང་གནོདཿ ཁྲིམས་འཇིག་ཡུལ་འཆུགས་གནམ་ས་གོ་ལོག་འོང་ཿ པད་འབྱུང་སྤྲུལ་པ་ལྷོ་ནུབ་མཚམས་ནས་འབྱུང་ཿ ཉི་ཤུ་པ་ལ་ནད་ཀྱི་བསྐལ་པ་འབྱུང་ཿ མི་དང་ལྷ་བྱེ་སྡེ་བར་བུད་མེད་འོང་ཿ ལོ་གཅིག་བར་དུ་ཆར་པ་ཐུལ་ཙམ་མེདཿ སྐབས་སྐབས་མུ་གེ་ཟླ་བ་དགུ་དགུ་འབྱུང་ཿ ནད་དུ་འཆི་ནད་རིམས་ལྷོག་གག་གཟེར་འབྱུང་ཿ གདོན་དུ་དམ་ལོག་རྒྱུ་བ་རྣམ་བཞི་དརཿ ཉི་མ་གཟས་ཟིན་ལ་མ་མི་མཐོང་བ་འབྱུང་ཿ འདྲེ་རུ་གནམ་ནད་སྨྱོ་འབོག་བརྒྱལ་ནད་གདོནཿ པད་འབྱུང་སྤྲུལ་པ་བྱང་གི་ཕྱོགས་ནས་འོང་ཿ ཚེ་ལོ་བཅུ་པར་མཚོན་གྱི་བསྐལ་པ་
༼༢༢༦བ༽འབྱུང་ཿ སྙིགས་མའི་མཐར་ཐུག་བསྐལ་པ་ངན་པ་སྟེཿ བུ་ཚས་ལོ་བཅུ་ལོན་པ་སྨོན་ལམ་འདེབསཿ བུ་མོ་བཙས་པ་ལོ་ལྔར་ཁྱིམ་ཐབ་གཏོང་ཿ ལུས་ཀྱི་ཚད་ནི་མཐོ་གང་ཆག་གང་པཿ ཁ་ཟས་མཆོག་གྱུར་ཀོ་ཊ་དཔའ་བོ་ཟཿ ར་ལུག་འབྲི་གནག་གཅིག་ཀྱང་མི་འབྱུང་སྟེཿ གོས་ཀྱི་མཆོག་གྱུར་སྐྲ་ཡི་ལྭ་བ་གྱོནཿ རྒྱན་ཆའི་མཆོག་གྱུར་མཚོན་ཆ་དག་ལ་བྱེདཿ དེ་དུས་རོ་མཆོག་རྣམ་པ་ལྔ་ནུབ་འགྱུརཿ སྦྲང་མ་ཡོད་ཀྱང་སྦྲང་རྩི་མི་འབྱུང་ཞིང་ཿ འོ་ཞོ་ཡོད་ཀྱང་དཀྲོགས་ན་མར་མི་འབྱུང་ཿ ཡུངས་ཀར་ཏིར་ཡོད་བཙིར་ཀྱང་སྣུམ་མི་འབྱུང་ཿ བུར་ཤིང་ཀར་ཞིང་ཡོད་ཀྱང་བཅུད་མི་འབྱུང་ཿ ལན་ཚྭ་གཏན་ནས་མ་བསྐམས་མེད་པར་འགྲོཿ དེ་དུས་ངན་བྱེད་བསྟོད་ཅིང་བཟང་བྱེད་སྨོདཿ ཕ་མ་དགེ་སློང་བྲམ་ཟེ་དག་ཏུ་ནིཿ མི་འཛིན་ཀུན་གྱིས་སྐུར་པ་འདེབས་ཤིང་སྨོདཿ ཚེ་ལོ་བཅུ་པ་བྱེད་པའི་རྐྱེན་ངན་གསུམཿ མཚོན་དང་ནད་དང་མུ་གེས་བྱེད་པ་ཡིནཿ དང་པོ་མི་རྣམས་གནོད་སེམས་སྐྱེས་པས་ཏེཿ སེམས་ཅན་གཅིག་གིས་གཅིག་མཐོང་ནས་ཆེར་གསོདཿ གསོད་སེམས་སྐྱེས་པས་རྔོན་པས་དགོན་མཐོང་བཞིནཿ རྡོ་དང་ཤིང་དང་བོང་མ་གང་དག་བླངསཿ མཚོན་རྣམ་གྱུར་ནས་གཅིག་གིས་གཅིག་གསོད་ཅིང་ཿ གང་དག་ཤི་བ་ཐམས་ཅད་དམྱལ་བར་ལྟུང་ཿ དེ་དུས་སེམས་ཅན་དམྱལ་བ་ཤིན་ཏུ་མང་ཿ མཚོན་གྱི་བསྐལ་པས་མཐའ་རུ་སྟོངས་པར་
༼༢༢༧ན༽བྱེདཿ བསྟན་པའི་དམ་ཆོས་ནུབ་པར་གྱུར་ནས་ནིཿ བོད་ཀྱི་བསྟན་པ་ལི་ཡི་ཡུལ་དུ་སྡུདཿ རྟགས་ཙམ་འཛིན་གྱིས་བསྟན་པ་ཉམས་པའི་དུསཿ ལི་ཡུལ་རྒྱལ་པོ་ཆོས་སྐྱོང་རྨེ་བ་ཅནཿ རྒྱལ་པོ་དེ་ཡི་བླ་མཆོད་ལྔ་བརྒྱ་པོཿ དྲོ་དུས་ཆོས་ཀྱི་རྒོལ་རྩོད་ཐེ་ཚོམ་གཅོདཿ གཅིག་ལ་གཅིག་རྒོལ་བཟོད་པའི་གོ་ཆ་ཤོརཿ དུག་ལྔ་རགས་པས་ཞེ་སྡང་རྦ་ཀློང་འཁྲུགསཿ མཐོ་དམན་ཚིག་གིས་ཀུན་བསླངས་ཁ་ལག་ཤོརཿ ཀུན་གྱིས་སྐ་རགས་གསེབ་ནས་གྲི་གུ་བཏོནཿ གཅིག་ལ་གཅིག་ཐེབས་བླ་མཆོད་ལྔ་བརྒྱ་པོཿ མཚོན་གྱིས་གྲི་རུ་ཁྲག་གིས་འདམ་དུ་ཚུདཿ རྒྱལ་པོ་མྱ་ངན་ཁང་པར་ཞུགས་པའི་དུསཿ ཕྱི་བློན་ནང་བློན་རིག་པ་ཅན་རྣམས་ཀྱིསཿ བ་དམར་གླང་དམར་ཀོ་བ་ལུས་ལ་གྱོནཿ གྲོད་པས་མགོ་གཏུམས་གསེག་ཤང་ལག་ན་ཐོགསཿ རྒྱལ་པོའི་སྤྱན་གྱིས་ནོན་པའི་ས་ལ་རྒྱུཿ ནད་བློན་ཕྱག་ཚང་རྒྱལ་མོ་ལ་སོགས་ཀྱིསཿ རྗེ་གཅིག་བཞེངས་དང་བླ་མཆོད་ས་མ་སྟོངསཿ རི་བྲག་སྐྱིབས་སུལ་སྒོམ་ཆེན་ཐེམ་སྤངས་རྣམསཿ རི་ཁྲོད་དབེན་པ་བསྟེན་པའི་ས་སྡེ་ཡོདཿ དེ་ཉིད་རྒྱལ་པོས་གཟིགས་པས་མྱ་ངན་ཞིཿ བཙུན་པ་གླང་དམར་ཤཱཀྱའི་ཚུལ་འཆོས་རྣམསཿ རྒྱལ་པོས་གཟིགས་ཕྱིར་ཆོས་གཉིས་བསྟན་པ་འབྱུང་ཿ ས་ཡི་བཅུད་ཤོར་བཙོད་དང་ཆུ་སྦུན་རུལཿ གོས་མདོག་བསྒྱུར་བའི་ཆོས་ལ་ནུས་པ་མེདཿ སྐྲ་འབྲག་མི་འདོད་རབ་འབྱུང་མཁན་སློབ་
༼༢༢༧བ༽སྟོངསཿ གླེགས་བམ་ཐམས་ཅད་ཡི་གེ་རང་བྱིར་འགྲོཿ སྔ་མ་བྱི་ནས་ཕྱི་མ་འབྲི་མ་བཏུབཿ ཆོས་ཀྱི་ཉན་བཤད་ན་བུན་བཞིན་དུ་ཡལཿ སྒོམ་དང་སྒྲུབ་པ་ནམ་ལངས་སྐར་མ་བཞིནཿ གཅིག་ཀྱང་མེད་ཅིང་མི་དགེ་བཅུ་ལ་སྤྱོདཿ གཉིས་པ་ནད་ཀྱི་བསྐལ་པ་འབྱུང་བ་ནིཿ མི་རྣམས་མི་དགེ་ལོག་པར་སྤྱད་པ་ཡིསཿ ལྷ་འདྲེ་འཁྲུགས་ནས་ནད་རིམས་དུ་མ་གཏོང་ཿ བཅོས་ཐབས་མེད་པའི་ནད་ཀྱིས་མང་པོ་འཆིཿ སྔ་དྲོ་ཕྱི་མ་རེད་རོ་ལ་གྲངས་མི་ལང་ཿ མ་ཤི་བ་རྣམས་མིག་དྲེད་མྱ་ངན་ཚུདཿ གསུམ་པ་མུ་གེའི་བསྐྲལ་པ་འབྱུང་བ་ནིཿ སེར་སྣས་ཀུན་བསླངས་མི་དགེ་སྤྱད་པ་ཡིསཿ ལྷ་ཀླུ་འཁྲུགས་ནས་ཆར་ཆུ་དུས་མི་ཕེབསཿ ལོ་ནི་བཅོ་བརྒྱད་ཐན་པ་འབྱུང་བར་འགྱུརཿ འབུ་སྲིན་བཙའ་དང་སད་སེར་གྲ་སྐྱ་དང་ཿ ལྗང་པ་ལེགས་རྣམས་སྣེ་ནག་ངུར་སྐྱར་འགྲོཿ དེ་དག་རྐྱེན་བྱས་མུ་གེ་རྣམས་གསུམ་འབྱུང་ཿ གབ་རྩེ་བ་དང་རུས་གོང་དཀར་པོ་དང་ཿ ཐུར་མས་ཚོལ་བ་ཞེས་བྱ་འབྱུང་བར་འགྱུརཿ དང་པོ་གབ་རྩེ་པ་ནི་འདི་ལྟ་སྟེཿ འབྲས་སམ་ནས་སམ་སྲན་མ་ལ་སོགས་པཿ འབྲུ་རྙེད་གྱུར་ན་ཟ་མ་ཏོག་ཏུ་བཅུགཿ ཉིན་མཚན་མེད་པར་དེ་ལ་མེལ་ཚེ་བྱེདཿ བཀྲས་པས་ཉམས་སྟོབས་ཆུང་བས་ས་ལ་འགྱེལཿ ལྡད་པར་མི་ནུས་གཞན་གྱིས་སློང་ནུས་མེདཿ གང་ཞིག་དེ་ཉིད་དུ་ནི་འཆི་བ་ཡིནཿ གཉིས་པ་རུས་གོང་དཀར་པོ་བསྟན་པ་ནིཿ སྔོན་དུས་ཤི་བའི་རུས་པ་མང་པོ་བསྡུསཿ འདི་ནི་
༼༢༢༨ན༽ཁ་ཟས་ཟོས་པའི་རུས་པ་ཡིནཿ ཆུ་མང་ནང་དུ་བསྐོལ་ནས་ཁུ་བ་འཐུང་ཿ གསུམ་པ་ཐུར་མས་འཚོལ་བ་བསྟན་པ་ནིཿ བང་བར་འབྲུ་བླུག་ཤུལ་གྱི་ལུས་པ་བྲུསཿ ཆུ་མང་ནང་དུ་གདུ་ནས་ཁུ་བ་འཐུང་ཿ འབྲུ་ནི་ཐུར་མས་སུས་ལོན་ཟ་བར་བྱེདཿ ལྟོགས་དྲེགས་བུ་ཚ་བསད་ནས་ཟ་བ་དང་ཿ མི་བདག་ངན་པ་བརྐུས་ནས་ཟ་བྱེད་ཅིང་ཿ ས་ཟ་རྡོ་ཟ་ཤིང་ཟ་སྔོ་སྡད་ཟཿ དེ་ཡང་མཚོན་གྱིས་གསོད་པ་ལོ་བདུན་འབྱུང་ཿ ནད་ཀྱིས་གསོད་པ་ཟླ་བདུན་ཞག་བདུན་འབྱུང་ཿ མུ་གེས་གསོད་པ་ལོ་བདུན་ཟླ་བདུན་འབྱུང་ཿ འགའ་ཞིག་ལུས་པ་རེ་རེ་ཆུ་གླིང་ངམཿ རི་བོའི་ལྗོངས་སམ་ཤིང་གི་ཁང་གསེང་ཞུགསཿ ཞག་བདུན་བར་དུ་ཆུ་ཡིས་འཚོ་ཞིང་འདུགཿ དེ་ནས་གྲོང་ཡུལ་ཀུན་ཏུ་ཕྱིར་ལོག་ནསཿ གཅིག་གིས་གཅིག་མཐོང་བརྩེ་སེམས་ཉེ་བར་ལྡནཿ མ་ཤི་གསོན་པ་མཐོང་ཟེར་ཡ་མཚན་བྱེདཿ རབ་ཏུ་དགའ་བས་ཁ་གཏུགས་སྐེ་ལ་འཁྱུདཿ དེ་ནས་རྒྱལ་བ་བྱམས་པའི་སྤྲུལ་པ་ནིཿ བོངས་ཚད་ཁྲུ་དོ་ཡོད་པ་ཞིག་བྱུང་ནསཿ དེ་ལ་ངོ་མཚར་སྟས་ནས་གཏམ་དྲིས་པསཿ ངས་ནི་དགེ་བཅུ་བླངས་ཤིང་སྡིག་བཅུ་སྤངསཿ འདོད་ཆགས་སྦྲང་མ་ལྟ་བུར་ཆོག་ཤེས་མེདཿ ཞེ་སྡང་སེང་གེ་ལྟ་བུར་ལྡོག་རྒྱུ་མེདཿ གཏི་མུག་ཁྱི་སྣ་བཞིན་དུ་མྱུར་མྱུལ་པོཿ དེ་གསུམ་སྤངས་པས་བསྟན་པ་ཡར་ལ་འཕེལཿ ཞེས་
༼༢༢༨བ༽གསུངས་བློ་སེམས་དགེ་ལ་གཞོལ་བར་མཛོདཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ སངས་རྒྱས་བསྟན་པའི་འཕེལ་འགྲིབ་བསྟན་པའི་ལེའུ་སྟེ་གོ་དྲུག་པའོཿ ཿཐ་ཐ་ཉྲ་རྒྱ་རྒྱཿ ཿ