ཁྲ་འབྲུག་ཏུ་བཀའ་འདུས་སྒྲུབ་ཆེན་མཛད་དུས་མཁའ་འགྲོས་བརྡའ་བསྟོད་མཛད་པའི་ལེའུ།
དེ་ནས་སློབ་དཔོན་པདྨ་འབྱུང་གནས་ཀྱིསཿ ལྷ་སྲས་དབུ་མཛད་རྗེ་འབངས་ཉི་ཤུ་གཅིགཿ ལོ་ཙཱ་དེ་བ་སམྦྷས་དབུ་མཛོད་ནསཿ ལོ་ཙཱ་ཉི་ཤུ་རྩ་གཅིག་བཙུན་མོ་གསུམཿ
༼༢༣༤ན༽ཡོན་བདག་ཕོ་མོ་འབངས་འཁོར་ཐམས་ཅད་ལཿ ཁྲ་འབྲུག་གཙུག་ལག་ཁང་གི་ཁྱམས་སྟོད་དུཿ གསང་སྔགས་བཀའ་འདུས་དཀྱིལ་འཁོར་ཞལ་ཕྱེ་ནསཿ སྒྲུབ་པའི་དབང་ཟབ་ཉི་ཤུ་རྩ་གཅིག་མཛདཿ ནམ་ཕྱེད་སློབ་དཔོན་ལྷོ་ནུབ་མཁའ་ལ་གཟིགསཿ ལྕགས་ཀྱུའི་ཕྱག་རྒྱ་མཛད་ནས་ཛཿཧཱུཾ་གསུངསཿ དཀྱིལ་འཁོར་མདུན་དུ་འཇའ་སྣ་ཟུག་པ་ལཿ ལྷ་ལྕམ་མནྡཱ་ར་བ་ཡིན་ཟེར་བའིཿ བུ་མོ་དཀར་མོ་རས་སྔོན་སྨད་གཡོགས་ཅནཿ ཐོད་པ་སྐམ་པོ་ལྔ་ཡི་དབུ་རྒྱན་གྱོནཿ ལག་གཡོན་བན་དྷ་ལྕང་ལོ་འགྲོན་རྒྱན་ཅནཿ གཡས་ན་ལྕགས་ཕུར་མགོ་ལ་དར་སྣ་བཏགསཿ མི་ལྤགས་གཡང་གཞིས་སྟོད་གཡོགས་བྱས་པ་ཞིགཿ དཀྱིལ་འཁོར་བསྐོར་བ་བྱེད་པ་ཀུན་གྱིས་མཐོང་ཿ དཔལ་ཆེན་ལྷ་ཚོགས་རྣམས་ཀྱི་ཞལ་བསྟན་ནསཿ ཁུ་སྒྲ་ཀུ་ཅོ་ཏུག་ཚོམ་འུར་རྒྱངས་གང་ཿ ལ་ལ་བརྒྱལ་ཞིང་ལ་ལ་མགོ་ལྤགས་འདུསཿ བྱིན་ཆེ་དབྱངས་སྙན་སློབ་དཔོན་འདི་སྐད་བསྟོདཿ ཧཱུཾཿགུ་རུའི་ཐུགས་རྗེས་འགྲོ་དོན་མཛད་ཙ་ནཿ འདབ་ལྡན་རིགས་ལྔ་དབུ་ལ་གསོལ་བ་ནིཿ སྐུ་ལྔའི་དབང་རྫོགས་ཡེ་ཤེས་ལྔ་ལྡན་བརྡཿ དེ་ལ་དབུས་མཐིང་ཕྱོགས་ཚོན་བརྒྱན་པ་ནིཿ འཕྲིན་ལས་རྣམ་གཞིས་འགྲོ་དོན་མཛད་པའི་བརྡཿ ཐོད་སྐོམ་སུམ་བརྩེགས་ཐེག་པ་བརྩེགས་པ་ནིཿ ཆོས་ཀུན་མ་འདྲེས་ཕྱི་ནང་སྟོན་པའི་
༼༢༣༤བ༽བརྡཿ དེ་ལ་རིན་ཆེན་དྲ་བས་བརྒྱན་པ་ནིཿ ཁམས་གསུམ་མ་ལུས་དབང་དུ་སྡུད་པའི་བརྡཿ དེ་ལ་གསེར་གྱི་རྡོ་རྗེ་བཙུགས་པ་ནིཿ རྡོ་རྗེ་ལྟ་བུའི་ཏིང་འཛིན་བརྙེས་པའི་བརྡཿ དར་སྣ་ལྔ་ཡི་ཅོད་པཎ་འཕུར་རེ་ནིཿ རིག་པའི་གནས་ལྔས་འགྲོ་བ་འདུལ་བའི་བརྡཿ གཡས་གཡོན་རྒོད་ཀྱི་ཐེའུ་ཆུང་སྤྲས་པ་ནིཿ ཐབས་དང་ཤེས་རབ་ཟུང་དུ་འབྲེལ་བའི་བརྡཿ རྩེ་དབུས་རྨ་བྱའི་མདོངས་མདངས་གསལ་བ་ནིཿ སྣང་སེམས་དབྱིངས་རིག་འོད་དུ་འཁྱིལ་བའི་བརྡཿ རིན་ཆེན་གསེར་གྱི་ཉི་ཟླ་གསལ་བ་ནིཿ འགྲོ་བའི་མ་རིག་མུན་པ་སེལ་བའི་བརྡཿ གཡི་དཀར་པགས་པས་ཁ་འགྲིལ་བྱས་པ་ནིཿ བསྟན་གཉིས་ཟུང་འཇུག་གཏེར་གྱིས་སྐྱོང་བའི་བརྡཿ མཛེས་པའི་སྣ་ལེན་ཐུར་དུ་འཕྱང་བ་ནིཿ སྦྱོར་སྒྲོལ་ལྟ་བ་དབྱིངས་སུ་དག་པའི་བརྡཿ རྗེ་ཉིད་སྐུ་ལུས་བཀོད་པ་བསྟན་པ་ནིཿ ཞལ་གྱི་དཀྱིལ་འཁོར་ཆོག་མི་ཤེས་པ་ནིཿ དེ་བཞིན་གཤེགས་པའི་སྐུ་དངོས་བསྟན་པའི་བརྡཿ རྡོ་རྗེའི་སྐུ་ལུས་དྲང་པོར་བཞུགས་པ་ནིཿ ཏིང་འཛིན་རྩེ་གཅིག་གཡོ་བ་མེད་པའི་བརྡཿ སྐུ་མདོག་དཀར་ལ་དམར་མདངས་ལྡན་པ་ནིཿ བདེ་བ་ཐམས་ཅད་སྐུ་ལ་རྫོགས་པའི་བརྡཿ ཡེ་ཤེས་སྤྱན་གཉིས་ཐད་དཀར་གཟིགས་པ་ནིཿ ཆོས་དབྱིངས་འོད་གསལ་མཆོག་ཏུ་སྦོར་བའི་བརྡཿ འཛུམ་པའི་མདངས་ལྡན་ཞལ་ཚོམས་མཛེས་པ་ནིཿ གསང་སྔགས་མཛད་
༼༢༣༥ན༽པ་མཐའ་རུ་ཕྱིན་པའི་བརྡཿ ཚངས་པའི་གསུང་གིས་ཆོས་སྒྲ་སྒྲོགས་པ་ནིཿ འགྲོ་དྲུག་སེམས་ཅན་བདེ་ལ་བཀོད་པའི་བརྡཿ ཤངས་ནས་ཡེ་ཤེས་རླུང་ལྔ་རྒྱུ་བ་ནིཿ སྤྲོས་མེད་ལྟ་བ་ཡོངས་སུ་དག་པའི་བརྡཿ སྙན་ཆ་གསེར་གྱི་དྲིལ་ཆུང་བརྒྱན་པ་ནིཿ སངས་རྒྱས་རྣམས་དང་གསུང་གླེང་མཛད་པའི་བརྡཿ དབུ་སྐྲ་ཁམས་ནག་ལྕང་ལོ་འཁྱིལ་བ་ནིཿ མ་ལུས་དགོངས་པའི་དོན་རྣམས་འགྲུབ་པའི་བརྡཿ ཞབས་གཉིས་མཉམ་པའི་སྐྱིལ་ཀྲུང་བཞུགས་པ་ནིཿ ལམ་ལྔ་ས་བཅུ་སྐད་ཅིག་རྫོགས་པའི་བརྡཿ ཕྱག་གཡོན་མཉམ་བཞག་བནྡྷ་འཛིན་པ་ནིཿ འདོད་ཡོན་ལྔ་ལ་ལོངས་སྤྱོད་རོལ་པའི་བརྡཿ གཡས་པའི་ཕྱག་ན་རྡོ་རྗེ་བསྣམས་པ་ནིཿ བདེ་སྟོང་སྒོམ་ལ་རྒྱུན་ཆད་མེད་པའི་བརྡཿ ཆུ་ཤིང་ནག་པོའི་ཕྱག་མཁར་བསྣམས་པ་ནིཿ ཆོས་རྣམས་ཐེག་པ་གཅིག་ཏུ་རྫོགས་པའི་བརྡཿ དེ་ལ་ཆུ་སྲིན་རྒྱ་མདུད་བཅིངས་བ་ནིཿ བསྡུ་བ་རྣམས་གཞིས་བསྟན་པ་བསྲུང་བའི་བརྡཿ དེ་ལ་རྡོ་རྗེ་རྩེ་ལྔ་བསྐྱོན་པ་ནིཿ སྐྱེ་བ་རྣམ་བཞི་སྦྱོར་བ་ལྔ་ལྡན་བརྡཿ དེ་ལ་ཐོད་མཁར་དགུ་བརྩེགས་བསྐྱོན་པ་ནིཿ འཇིག་རྟེན་དུར་ཁྲོད་གླིང་དགུར་མཁྱེན་པའི་བརྡཿ དར་སྣ་ལྔ་ཡིས་མགུལ་ཆིངས་བྱས་པ་ནིཿ སྟོང་གཟུགས་ཡེ་ཤེས་ལྔ་ལྡན་སྦྱོར་བའི་བརྡཿ གསེར་དངུལ་ཟངས་ལྕགས་ཁྲོ་ཞལ་ལྡན་པ་ནིཿ
༼༢༣༥བ༽གསང་སྔགས་སྒོ་མོ་བཞི་ནི་འབྱེད་པའི་བརྡཿ དེ་ལ་ཁ་ཊྭཱཾ་རྩེ་གསུམ་སྐྱེས་པ་ནིཿ དུག་གསུམ་སྐུ་གསུང་ཐུགས་དང་སྦྱོར་བའི་བརྡཿ རྭ་ལ་ལྕགས་ལུང་དགུ་ཡིས་བརྒྱན་པ་ནིཿ ཐེག་པའི་འཇུག་སྒོ་མ་ནོར་སྟོན་པའི་བརྡཿ རྩེ་ལ་ལྕགས་ལུང་བརྒྱད་ཀྱིས་བརྒྱན་པ་ནིཿ རྣམ་ཤེས་ཚོགས་བརྒྱད་སྦྱོར་མཚམས་དག་པའི་བརྡཿ ཟ་འོག་བེར་བརྩེགས་སྐུ་ལ་གསོལ་བ་ནིཿ སྣང་སྲིད་འཇའ་འོད་ཟེར་གསུམ་འཕྲོ་བའི་བརྡཿ དམར་སེར་མཐིང་ནག་བེར་ཕྱམ་སྤྲུགས་པ་ནིཿ སྣ་ཚོགས་ཆོས་སྒུ་རང་ལ་ཤར་བའི་བརྡཿ རྒྱ་མཚོར་པད་སྡོང་རྩེ་ལ་བཞུགས་པ་ནིཿ འཁོར་བའི་སྐྱོན་གྱིས་མ་གོས་བསྟན་པའི་བརྡཿ ཕྱོགས་བཞི་མཚམས་བརྒྱད་འཇའ་འོད་འཁྲིགས་པ་ནིཿ ཕུང་པོ་ལྷག་མེད་ཡེ་སངས་རྒྱས་པའི་བརྡཿ འཁོར་དུ་བཀའ་བརྒྱུད་བླ་མས་བསྐོར་བ་ནིཿ སྐལ་ལྡན་བུ་ལ་བྱིན་རླབས་འབེབས་པའི་བརྡཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ ཁྲ་འབྲུག་ཏུ་བཀའ་འདུས་སྒྲུབ་ཆེན་མཛད་དུས་མཁའ་འགྲོས་བརྡ་བསྟོད་མཛད་པའི་ལེའུ་སྟེ་གོ་དགུ་པའོཿ ཿཐ་ཐ་ཉྲ་རྒྱ་རྒྱཿ