སྐུ་ཚབ་ལ་གསོལ་བ་བཏབ་པའི་ཕན་ཡོན་བསྟན་པའི་ལེའུ།
དེ་ནས་ལྷ་ལྕམ་མནྡཱ་ར་བ་ཡིསཿ མཚན་བཟང་སུམ་ཅུ་རྩ་གཉིས་བསྟོད་པ་མཛདཿ ཨེ་མ་ཧོཿ ལེགས་པའི་དཔེ་བྱད་མཚན་བཟང་སུམ་ཅུ་གཉིསཿ དུས་གསུམ་སངས་རྒྱས་པད་འབྱུང་སྐུ་ལ་རྫོགསཿ རི་རབ་ལྟ་བུར་སྐུན་
༼༢༣༦ན༽ལྷུན་མདངས་མཐོཿ རི་རྒྱལ་བུམ་པ་ལྟ་བུར་དབུ་ནི་ཟླུམཿ བུང་བ་ཨུཏྤལ་ལྟ་བུར་དབུ་སྐྲ་མཛེསཿ ཟླ་བ་རྒྱས་པ་ལྟ་བུར་དཔྲལ་བའི་དབྱེསཿ སྐར་ཆེན་ཤར་འདྲ་སྤྱན་གཉིས་ནག་ལ་རིང་ཿ འདི་ཡི་སྨིན་མ་ཁྱུང་ཆེན་ལྡིང་བ་འདྲཿ ཁྲ་གཤོག་བརྒྱངས་པ་ལྟ་བུར་རྫི་མ་ལེགསཿ སྙན་ནི་གྲོག་གཅས་པ་ལྟ་བུ་འདྲཿ ཤངས་ནི་ལེགས་ཤིང་བལྟ་ན་སྡུག་པའི་ཤངསཿ ཡ་མཆུ་མ་མཆུ་པདྨའི་ཟེ་བ་འདྲཿ ལྗགས་རིང་སྲབ་མཉེན་པདྨའི་མདོག་ལྟར་དམརཿ དཀར་ཚེམས་ཐགས་བཟང་དུང་མདོག་གངས་རི་འདྲཿ ཚེམས་འཕྲེང་ལྔ་བཅུ་རྩ་བརྒྱད་ཞལ་ལ་མཛེསཿ ཞི་བའི་ཞལ་མཐོང་ཨོས་ཀོ་ལྷམ་མེ་བཿ ཀ་ལ་པིངྐ་ལྟ་བུར་ཚངས་པའི་དབྱངསཿ ཞལ་ཚོམས་དམ་ནག་དཀྱུས་འདྲ་ལྟ་བུར་རིང་ཿ སྐུ་མདོག་དུང་ལ་ཕོ་ཚོས་བསྐུས་པ་འདྲཿ མགུལ་ནི་བུམ་པའི་མགྲིན་པ་ལྟ་བུར་ལེགསཿ འདི་ཡི་སྐུ་སྟོད་སེང་གེ་འགྱིང་བ་འདྲཿ དཔུང་པའི་མགོ་ཟླུམ་ཕྲག་པ་རབ་ཏུ་རྒྱསཿ ཕྱག་ཞབས་སོར་རིང་དྲ་བས་འབྲེལ་བ་དང་ཿ སེན་མོའི་མདོག་ནི་ཟངས་དམར་ཤེལ་འོད་དཀརཿ པདྨའི་སྦུ་གུ་ལྟ་བུར་ལྟེ་བ་མཛེསཿ སྦ་བ་སྦུབ་སུ་རྟ་གླང་ལྟ་བུར་ནུབཿ བྱིན་པ་ཨེ་ན་ཡ་འདྲ་ཞབས་ལོང་འབུརཿ མཁའ་ལ་འཇའ་འགྱུས་ལྟ་བུར་འཕུར་རྩལ་འགྲོསཿ གཞོན་ནུའི་རྩལ་ལྡན་སྐུ་ལུས་ཡན་ལག་རྒྱསཿ འཛུམ་ཞིང་
༼༢༣༦བ༽ཤིན་ཏུ་མཛེས་པའི་དྲི་མེད་ཞལཿ གཟུགས་བལྟས་མི་ངོམས་སྐྱེ་བོས་ལྟ་ན་སྡུགཿ འོད་ཟེར་དུ་མ་འབར་བས་འོད་ཁྱིམ་འདྲཿ རོ་མཆོག་འཇམ་ཞིང་དམ་པ་མཆོག་རབ་འཕགསཿ མི་ཤིགས་རྡོ་རྗེ་ལྟ་བུར་ཟག་པ་མེདཿ འདྲ་བ་འདི་དག་པད་འབྱུང་མཚན་བཟང་པོཿ སུམ་ཅུ་རྩ་གཉིས་རྒྱལ་སྲས་སྐུ་ལ་བསྟོདཿ མོས་པའི་མ་ཕྱིར་བུ་འབྲང་ལྟ་བུ་ཡིཿ སུན་པ་མེད་པའི་ལྷ་ལྕམ་མནྡཱ་རསཿ སྐྱོ་ངལ་མེད་པར་སྤྲུལ་སྐུའི་ཡོན་ཏན་ཞུསཿ ཉིད་དང་མ་མཇལ་མ་འོངས་སེམས་ཅན་རྣམསཿ མ་རིག་མུན་པའི་སྒྲོན་མེ་གང་གིས་བྱེདཿ དེ་བཞིན་སྦྱིན་པའི་བསོད་ནམས་གང་ལ་གསོགཿ ལུས་ཕུང་བདེ་བའི་མེ་ཏོག་གང་ལ་འབུལཿ འཇིག་རྟེན་དག་ན་བདེ་བ་སྦྱིན་པའི་མཆོགཿ འཁོར་བའི་སྡུག་བསྔལ་རྒྱ་མཚོ་གང་གིས་སྐོམཿ བདེ་སྟོང་བླ་མེད་བརྒྱུད་པ་སུ་ཡིས་འཛིནཿ པད་སྡོང་ལས་འཁྲུངས་དཀར་ལ་དམར་མདངས་ཅནཿ བཟང་པོའི་མཚན་གྱིས་སྐུ་ལ་བརྒྱན་པས་གསུངསཿ ཞེས་ཞུས་དེ་ནས་ཨུ་རྒྱན་བཀའ་སྩལ་པཿ ཉོན་ཅིག་ལྷ་མོའི་གཟུགས་ཅན་ཡིད་འོང་མཿ ང་དང་མ་འཕྲད་མ་འོངས་སེམས་ཅན་རྣམསཿ མ་རིག་མུན་པའི་སྒྲོན་མེ་སྐུ་འདྲས་བྱེདཿ པད་འབྱུང་སྐུ་ཚབ་མཆོད་པའི་རྟེན་བཞེངས་པཿ སྐུ་གསུམ་དོན་ལྡན་བསྟན་པའི་རྒྱལ་མཚན་འཛུགསཿ དེ་ལ་འདུན་ཅིང་མོས་གུས་སུ་བྱེད་པཿ འདོད་པ་ཀུན་ཚོགས་རིན་ཆེན་ཕུང་པོ་
༼༢༣༧ན༽འདྲཿ འཕེལ་འགྲིབ་མེད་པར་འགྱུར་མེད་བདེ་བའི་ཞིང་ཿ སྙིང་པོ་རྒྱུན་དུ་བཟླ་བར་གང་བྱེད་པཿ མི་རྣམས་སྨོན་ལམ་ཇི་ལྟར་བཏབ་པ་བཞིནཿ རིགས་པ་ཀུན་འབྱུང་ཨེ་མ་ངོ་མཚར་ཆེཿ འབྱུང་བའི་བཅུད་ལས་བསམ་འཕེལ་ནོར་འབྱུང་བཞིནཿ ཇི་ལྟར་ཚོགས་པར་བཤམས་པའི་འདོད་ཡོན་ལྔཿ བྱི་དོར་ལྡན་པས་བཀྲ་ཤིས་འཕེལ་བར་འགྱུརཿ སྨོན་ལམ་དག་པས་སྨན་ཆབ་ལྔ་གསོལ་བཿ ཐུན་མོང་འདུ་བ་རྣམ་བཞིའི་ནད་ལས་གྲོལཿ ཁྱད་པར་ཉོན་མོངས་འཁོར་བའི་གཙོད་ནད་ཞིཿ སྐྱོན་གྱི་གོང་པོ་རིགས་དྲུག་སེམས་ཅན་ལཿ དར་ཅིག་བདེ་བའི་སྐབས་མེད་མི་ཡི་ལུསཿ པད་འབྱུང་སྐུ་ཚབ་དཀོན་གཉེར་སུས་བྱེད་པཿ ངན་སོང་གསུམ་ལས་གཏན་དུ་ཐར་བ་དང་ཿ ཕུན་སུམ་ཚོགས་པའི་ཡོན་ཏན་ཐོབ་པར་འགྱུརཿ པད་འབྱུང་སྐུ་ཚབ་གཞལ་ཡས་ཁང་བཞེངས་པཿ ལྷ་ཡི་ཕོ་བྲང་ནང་དུ་སྐྱེ་བར་འགྱུརཿ པད་འབྱུང་སྐུ་བཞེང་ལས་དཔོན་སུས་བྱེད་པཿ ཆོས་སྨྲའི་འཁོར་ལོ་སྒྱུར་མཆོག་ཐོབ་པར་འགྱུརཿ པད་འབྱུང་སྐུ་འདྲའི་བཟོ་གནས་སུས་བྱས་པཿ འདི་ཕྱིར་རིག་པའི་གནས་ལྔར་མཁས་པར་འགྱུརཿ པད་འབྱུང་སྐུ་བཞེང་འདམ་རྫབ་སུས་སྦྱོར་བཿ ས་ཡི་འབྲུ་བཞིན་བསོད་ནམས་འཕེལ་བར་འགྱུརཿ པད་འབྱུང་སྐུ་འདྲར་ན་བཟའ་གང་འབུལ་བཿ ཡེ་ཤེས་རྒྱན་
༼༢༣༧བ༽ལྡན་རང་བཅས་ཐོབ་པར་འགྱུརཿ པད་འབྱུང་སྐུ་འདྲར་པད་གདན་སུས་ཕུལ་བཿ རེག་འཇམ་མཛེས་པའི་གདན་དང་ལྡན་པར་འགྱུརཿ པད་འབྱུང་སྐུ་འདྲར་རྡུལ་བྱིས་སུས་བྱས་པཿ གཟུགས་བཟང་ཆས་ལེགས་མདོག་སྡུག་ཐོབ་པར་འགྱུརཿ པད་འབྱུང་སྐུ་འདྲར་མར་མེ་སུས་ཕུལ་བཿ མུན་པ་མེད་ཅིང་བློ་རིག་གསལ་བར་འགྱུརཿ པད་འབྱུང་སྐུ་འདྲར་རིན་ཆེན་སུས་ཕུལ་བཿ དབུལ་ཕོངས་ཀུན་བྲལ་དཀོར་ནོར་ཚོགས་པར་འགྱུརཿ པད་འབྱུང་སྐུ་འདྲར་སྤོས་ལྔ་སུས་ཕུལ་བཿ དྲི་ཞིམ་ངད་ལྡན་ཡིད་དུ་འོང་བར་འགྱུརཿ པད་འབྱུང་སྐུ་འདྲར་སྨན་ལྔ་སུས་ཕུལ་བཿ གདུག་པའི་ནད་ཞི་བདུད་རྩི་ཐོབ་པར་འགྱུརཿ པད་འབྱུང་སྐུ་འདྲར་སྙིང་པོ་ལྔ་ཕུལ་བཿ སྡུག་བསྔལ་མེད་ཅིང་བདེ་བའི་མཆོག་ཐོབ་འགྱུརཿ པད་འབྱུང་སྐུ་འདྲར་དྲི་བཟང་སུས་ཕུལ་བཿ གདུག་པའི་ནད་ཞི་བདུད་རྩི་ཐོབ་པར་འགྱུརཿ པད་འབྱུང་སྐུ་འདྲར་སྙིང་པོ་ལྔ་ཕུལ་བཿ སྡུག་བསྔལ་མེད་ཅིང་བདེ་བའི་མཆོག་ཐོབ་འགྱུརཿ པད་འབྱུང་སྐུ་འདྲར་དྲི་བཟང་སུས་ཕུལ་བཿ གནས་གཙང་ཐོབ་ཅིང་དྲི་མ་མེད་པར་འགྱུརཿ པད་འབྱུང་སྐུ་འདྲར་ཚོགས་འཁོར་སུས་ཕུལ་བཿ བཀྲེས་པ་མེད་ཅིང་བདེ་ལེགས་ཐོབ་པར་འགྱུརཿ པད་འབྱུང་སྐུ་འདྲར་དྲི་བཟང་སུས་ཕུལ་བཿ གནས་གཙང་ཐོབ་ཅིང་དྲི་མ་མེད་པར་འགྱུརཿ པད་འབྱུང་སྐུ་འདྲར་ཚོགས་འཁོར་སུས་ཕུལ་བཿ བཀྲེས་པ་མེད་ཅིང་བདེ་ལེགས་ཐོབ་པར་འགྱུརཿ པད་འབྱུང་སྐུ་འདྲར་འབྲུ་བཅུད་ལུས་ཕུལ་བཿ བདུད་རྩིའི་རྒྱ་མཚོ་མཆོག་ལ་སྤྱོད་པར་འགྱུརཿ པད་
༼༢༣༨ན༽འབྱུང་སྐུ་འདྲར་མེ་ཏོག་སུས་ཕུལ་བཿ སྒྲིབ་པ་བྱང་ཞིང་ཉོན་མོངས་ལྔ་ཞི་འགྱུརཿ པད་འབྱུང་སྐུ་འདྲར་དཀར་གསུམ་སུས་ཕུལ་བཿ འདོད་འཇོའི་བ་དང་རྐང་བགྲོས་སྤྱོད་པར་འགྱུརཿ པད་འབྱུང་སྐུ་འདྲར་མངར་གསུམ་སུས་ཕུལ་བཿ ཞལ་ཟས་བདའ་དགུའི་ལོངས་སྤྱོད་ཐོབ་པར་འགྱུརཿ པད་འབྱུང་སྐུ་འདྲར་སྤྱན་གཟིགས་སུས་ཕུལ་བཿ བསོད་ནམས་ལོངས་སྤྱོད་ཡོ་བྱད་འཕེལ་བར་འགྱུརཿ པད་འབྱུང་སྐུ་འདྲར་འབྲུ་ལྔ་སུས་ཕུལ་བཿ མ་རྨོས་བཏབ་མེད་ལོ་ཐོག་བཙའ་བར་འགྱུརཿ པད་འབྱུང་སྐུ་འདྲར་འཕན་གདུགས་སུས་ཕུལ་བཿ ཆོས་བཤད་བླ་མེད་དོན་ཀུན་ཐོབ་པར་འགྱུརཿ པད་འབྱུང་སྐུ་འདྲར་དར་དབྱངས་སུས་ཕུལ་བཿ ལྷ་ཡི་ན་བཟའ་རྒྱན་བཟང་ཐོབ་པར་འགྱུརཿ པད་འབྱུང་སྐུ་འདྲར་སིལ་སྙན་སུས་ཕུལ་བཿ དབྱངས་སྙན་ངག་བདེ་དབང་པོ་གསལ་བར་འགྱུརཿ པད་འབྱུང་སྐུ་འདྲར་རོལ་མོ་སུས་ཕུལ་བཿ སྟོབས་ཆེ་གཟུགས་བཟང་ཡན་ལག་བདེ་བར་འགྱུརཿ པད་འབྱུང་སྐུ་འདྲར་བསྐོར་ཕྱག་སུས་བྱས་པཿ འཁོར་བ་མེད་ཅིང་མྱ་ངན་འདས་པར་འགྱུརཿ སྐྱེས་བུ་བཟོ་ལ་རིག་པའི་རྩལ་རྫོགས་པསཿ པད་འབྱུང་སྐུ་ལ་གསེར་ཆབ་སུས་གསོལ་བཿ རྒྱལ་པོ་རིན་ཆེན་ལྟ་བུ་ཐོབ་པར་འགྱུརཿ པད་འབྱུང་སྐུ་འདྲར་གཡུ་ཆབ་སུས་གསོལ་བཿ བཙུན་མོ་རིན་ཆེན་ལྟ་བུ་
༼༢༣༨བ༽ཐོབ་པར་འགྱུརཿ པད་འབྱུང་སྐུ་འདྲར་དངུལ་ཆབ་སུས་གསོལ་བཿ བློན་པོ་རིན་ཆེན་ལྟ་བུ་ཐོབ་པར་འགྱུརཿ པད་འབྱུང་སྐུ་འདྲར་ལྕགས་ཆབ་སུས་གསོལ་བཿ དམག་དཔོན་རིན་ཆེན་ལྟ་བུ་ཐོབ་པར་འགྱུརཿ པད་འབྱུང་སྐུ་འདྲར་དུང་ཆབ་སུས་གསོལ་བཿ རྟ་མཆོག་རིན་ཆེན་ལྟ་བུ་ཐོབ་པར་འགྱུརཿ པད་འབྱུང་སྐུ་འདྲར་ཟངས་ཆབ་སུས་གསོལ་བཿ གླང་པོ་རིན་ཆེན་ལྟ་བུ་ཐོབ་པར་འགྱུརཿ པད་འབྱུང་སྐུ་འདྲར་མཚལ་ཆབ་སུས་གསོལ་བཿ ནོར་བུ་རིན་ཆེན་ལྟ་བུ་ཐོབ་པར་འགྱུརཿ སྐུ་འདྲར་ཤིང་ཕུང་སྣག་ཚ་སུས་གསོལ་བཿ འཁོར་ལོ་རིན་ཆེན་ལྟ་བུ་ཐོབ་པར་འགྱུརཿ རིན་ཆེན་སྣ་བདུན་སྐུ་འདྲར་སུས་གསོལ་བཿ ལོངས་སྤྱོད་རྫོགས་པའི་ཞིང་ཁམས་ཐོབ་པར་འགྱུརཿ པད་འབྱུང་རྣམ་ཐར་རི་མོར་སུས་བཀོད་པཿ དབྱིངས་རིག་དོན་ལ་མ་ཡེངས་གནས་པར་འགྱུརཿ པད་འབྱུང་སྐུ་འདྲར་སྤྱན་འབྱེད་སུས་བྱས་པཿ ཡེ་ཤེས་སྤྱན་གྱིས་སྣོད་བཅུད་གསལ་བར་འགྱུརཿ པད་འབྱུང་སྙན་ཤལ་དར་དབྱངས་སུས་ཕུལ་བཿ ལྷ་སྙན་དར་བུ་ཁས་ལ་གསང་བར་འགྱུརཿ པད་འབྱུང་ཤངས་ལ་དྲི་ཞིམ་རྒྱུན་མཆོད་པཿ དྲི་ཞིམ་ངད་ལྡན་རྒྱན་ལ་གནས་པར་འགྱུརཿ པད་འབྱུང་ཚེམས་ལ་དཀར་མདངས་སུས་བཏོན་པཿ འཁོར་བ་དུག་གསུམ་རྩད་ནས་ཆོད་པར་འགྱུརཿ པད་འབྱུང་ལྗགས་ལ་རོ་མཆོག་སུས་ཕུལ་བཿ ཐམས་ཅད་སྒྲོལ་བྱེད་
༼༢༣༩ན༽ལྗགས་དང་ལྡན་པར་འགྱུརཿ པད་འབྱུང་སྐུ་ཚབ་རབ་གནས་སུས་སྐྱོར་བཿ དམག་འཁྲུག་མུ་གེ་ནད་ཡམས་ཞི་བར་འགྱུརཿ པད་འབྱུང་སྐུ་ཚབ་རྟེན་བཤད་སུས་བྱས་པཿ སེམས་བསྐྱེད་ཏིང་ངེ་འཛིན་ལ་གནས་པར་འགྱུརཿ དེ་ལྟར་གཞན་ལ་སྐུལ་བྱེད་སུས་འདེབས་པཿ འགྲོ་བ་མང་པོའི་ལས་སྒྲིབ་དག་པར་འགྱུརཿ སྐྱེ་དགུའི་ཚེ་འཕེལ་པད་འབྱུང་སྐུ་འདྲ་འདིཿ ང་ཡི་ཐུགས་ལས་ཡེ་ཤེས་འོད་འཕྲོས་ནསཿ མ་འོངས་མོས་པའི་རྟེན་དུ་གཏད་པ་ཡིནཿ འདོད་དགུ་འབྱུང་བའི་ཡིད་བཞིན་ནོར་བུ་འདྲཿ དམངས་པོ་བུ་མེད་ང་ལ་གསོལ་བ་ཐོབཿ ལུས་སེམས་དཔང་ཚུགས་རྐང་པས་བསྐོར་བ་གྱིསཿ ལོག་འདྲེན་བར་གཅོད་དཔག་ཚད་རྒྱང་གྲགས་འཕྲོསཿ ཡིད་འོང་ཉམས་དགའི་དངོས་པོ་པོང་དུ་སྐྱེཿ དབུལ་པོ་ནོར་མེད་ང་ལ་གསོལ་བ་ཐོབཿ གསང་སྔགས་གསུང་རབ་པད་འབྱུང་བཀོད་པ་ལསཿ རོ་འབྱུང་བཅུད་བསྡུས་དོན་ལ་ཐིམ་པར་སྒོམསཿ འཇིག་རྟེན་ཟང་ཟིང་ནོར་གྱིས་ལག་མི་འབོརཿ དོན་དང་མི་ལྡན་ང་ལ་གསོལ་བ་ཐོབཿ རིག་པའི་སེམས་ལ་འཁོར་བའི་སྐྱོན་མེད་དེཿ ནོར་བུ་རིན་ཆེན་རང་ལ་ཡོད་མོད་ཀྱང་ཿ བཀུར་སྟི་རིམ་གྲོ་མཆོད་པ་མ་བྱས་པསཿ འདོད་པའི་ཡོན་ཏན་གང་ཡང་འཕེལ་མ་གྱུརཿ སྨོན་ལམ་གང་བཏབ་དེ་ཡིས་དེ་ཐོབ་བྱེདཿ གསོལ་བཏབ་པད་འབྱུང་ང་ལ་དགོས་འདོད་འབྱུང་ཿ ཨུ་རྒྱན་
༼༢༣༩བ༽གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ སྐུ་ཚབ་ལ་གསོལ་བ་བཏབ་པའི་ཕན་ཡོན་བསྟན་པའི་ལེའུ་སྟེ་བརྒྱ་ཐམ་པའོཿ ཿཐ་ཐ་ཉྲ་རྒྱ་རྒྱཿ ཿ