རྗེས་འཇུག་བདེ་སྟོང་ལ་སྤྲོད་པའི་ལེའུ།
ལུས་ཕུང་བདེ་བའི་མེ་ཏོག་གང་འབུལ་བཿ བདེ་སྟོང་གཉིས་མེད་བསྒོམ་པའི་པད་འབྱུང་སྐུཿ གཡོ་འཁྲུག་མེད་པའི་བདེ་སྟོང་ལྷ་མོ་ཁྱོདཿ རང་བཞིན་མེད་པར་རང་ལུས་ཡབ་ཡུམ་གསལཿ འཁོར་བ་མི་བདེའི་སྡུག་བསྔལ་བྱུང་ཚོར་ལཿ སྡུག་བསྔལ་ཤེས་པས་བདེ་བ་བཙལ་དུ་ཡོང་ཿ ལམ་ལ་གསལ་ཡོང་འབྲས་བུ་བསྒྲུབ་ཏུ་ཡོདཿ གསང་སྔགས་ཡོན་ཏན་ཐམས་ཅད་དེ་ལས་འབྱུང་ཿ བཟོད་པའི་བསྲན་ཅན་གཉེན་པོ་གང་བསྟེན་པཿ དོན་གཉིས་མཐར་ཕྱིན་ཚོགས་གཉིས་རྫོགས་རེ་སྐནཿ འཁྲུལ་པའི་བློ་ཡིས་འཁོར་བའི་ས་བོན་འདེབསཿ ཕྱིན་ཅི་ལོག་སྤྱོད་ལས་སྤྱོད་ཀུན་སྤངས་ནསཿ དགའ་བའི་མདངས་ཕྱུང་སྙན་པའི་གསུང་བསྒྲགས་ཀུནཿ སྨིན་ཅིང་དྲོད་འབེབས་འཇུ་དང་བསྲེག་ཅིང་དཀྲུགཿ གསོ་བསྐྱེད་བརྟན་དང་མཐའ་ལ་སྟོབ་པར་བྱེདཿ ཡོན་ཏན་ཟག་མེད་སྟོང་པ་ཉིད་དུ་གསལཿ བརྩོན་འགྲུས་གཡལ་མེད་བཏང་སྙོམས་ལེ་ལོ་མེདཿ འདོད་ཆགས་ལས་ཀྱི་དུག་མཚོ་ཁོལ་མའི་ནང་ཿ སྟོང་ཉིད་ཡེ་ཤེས་བདེ་བ་རྙེད་པར་འགྱུརཿ ཆགས་མེད་སྦྱིན་པ་ཡོངས་སུ་གཏང་དུ་ཡོདཿ འགྲོ་དོན་མ་འགགས་རྣམ་ཀུན་ལམ་བགྲོད་འགྲོཿ ཐབས་ཆེན་སྟོབས་
༼༢༤༠ན༽ཀྱིས་བླ་མེད་དོན་ཐོབ་ནསཿ དབྱིངས་ལ་རོལ་ཞིང་ཐབས་ཀྱིས་གང་འདུལ་བཿ མཚན་མ་ཐམས་ཅད་ཤེས་རབ་ཉིད་ལ་གསལཿ དེ་ཕྱིར་གསང་སྔགས་བླ་མེད་སྤྱོད་པ་ཕུལཿ གང་ལ་དང་བཞིན་མེད་པའི་དོན་ཤེས་པཿ ཉེས་སྤངས་ལས་སྤྱོད་འབྲས་བུ་དེ་ཉིད་དོཿ སྤྱོད་ཡུལ་སྦྱོར་སྒྲོལ་མཚན་མེད་འཁོར་ལོ་སྒྱུརཿ བླ་མེད་རྫོགས་པའི་འབྲས་བུ་དེ་ལ་ཕུལཿ སྤུངས་ཆུད་ཉོན་མོངས་ལྔ་ཡིས་དབང་བྱས་ལཿ བདེ་སྟོང་ཐབས་ཀྱིས་ལོག་པ་ཟིལ་གྱིས་ནོནཿ དབང་རྒྱ་མ་ཆད་ལས་རྒྱ་སྦྱོར་སྒྲོལ་རིགཿ སྒྲོ་སྐུར་ཐམས་ཅད་ཡོན་ཏན་འབྱུང་ལ་ཕུལཿ ཤེས་རབ་དད་སྟོབས་ལྡན་པའི་སྐྱེས་བུ་ལཿ འདི་ལྟར་ཅི་ཡང་མེད་པར་གཏོང་ཤེས་ནཿ སྙིང་པོ་འོད་ཟེར་རང་ལ་ཤར་བ་བཞིནཿ རང་རིག་རྩལ་གྱི་བོགས་ཐོན་དེ་ལ་ཕུལཿ བདེ་ཆེན་རྣམ་དག་འབྲས་བུའི་དྲོད་ཚད་རྙེདཿ དཀའ་བ་སྣ་ཚོགས་སྟོབས་ཀྱིས་དོན་ཆེད་དུཿ གཉིས་མཐར་མ་ལྷུང་ཀློང་དུ་ཡེ་སངས་རྒྱསཿ ཤོང་ཡངས་དགོས་མེད་བརྟུལ་ཞུགས་ཅན་ལ་ཕུལཿ པད་འབྱུང་བརྒྱུད་འཛིན་ཁྱད་པར་མི་ཡི་མཆོགཿ ཅི་མཛད་ཐབས་མཁས་འགྲོ་བ་འདྲེན་པའི་དཔལཿ བཅིངས་དགྲོལ་སྒྲོར་པས་མཚན་མའི་དྲོད་ཚད་རྙེདཿ མྱ་ངན་འདས་པ་ཕྱིར་མི་ལྡོག་ལ་ཕུལཿ དུག་ལྔའི་ནད་སེལ་སྐྱེས་བུ་སྨན་པའི་མཆོགཿ ཐིག་ལེ་བདེ་ཆེན་ཀློང་དུ་ཡེ་སངས་རྒྱསཿ མ་རིག་མུན་སེལ་སྣང་གསལ་སྒྲོན་མའི་འོདཿ
༼༢༤༠བ༽མཛེས་པའི་ཆ་ལུགས་བསྟན་གཉིས་མཐུན་ལ་ཕུལཿ རྒོལ་བ་ཚར་གཅོད་སྨྲ་བའི་སེང་གེའི་སྒྲཿ བྱེད་པའི་སྟོབས་ལྡན་ཁྱུ་མཆོག་རླབས་པོ་ཆེཿ ཉི་ཟླའི་ཞལ་ནི་ཀུན་ལ་མཛེས་པར་སྟེནཿ བདེན་པའི་ཚིག་ནི་རང་བཞིན་མེད་པར་སྒྲོགཿ ཡི་དག་ཐུགས་ཉིད་ཆུ་ཟླ་བཞིན་དུ་གསལཿ དོགས་པའི་སྐྱོན་མེད་ཡོན་ཏན་རྫོགས་ལ་ཕུལཿ མུན་པའི་གླིང་འཇོམས་སྒྲོན་མེ་གསལ་བའི་འོདཿ ཏིང་འཛིན་བརྒྱ་བཅུ་བསམ་གཏན་བྱམས་སྙོམས་ལྡནཿ ནམ་མཁའི་ཀློང་བཞིན་ཁྱབ་གདལ་ཟག་མེད་ཐུགསཿ མཁྱེན་པའི་ཡེ་ཤེས་ཉི་ཟླ་གསལ་བའི་འོདཿ ཞིང་མཆོག་དེ་འདྲ་མི་གཟུགས་བྱོན་ལ་ཕུལཿ བདེ་སྟོང་གསང་སྔགས་བརྒྱུད་པ་དེ་ཡིས་འཛིནཿ ནམ་མཁའི་དབྱིངས་དང་རྒྱ་མཚོའི་ཚུལ་བཞིན་དུཿ གཏིང་དཔག་བརྟག་དཀའ་ཤིན་ཏུ་ཚོད་མི་ཟིནཿ སྐལ་ལྡན་སྣོད་བཟང་སྦྱངས་པའི་ལས་འཕྲོ་ཅནཿ འདི་ཐོས་འདི་ཡི་ཡོན་ཏན་ལ་སྤྱད་ནསཿ བྱི་དོར་དག་ཅིང་གཙང་མའི་དངོས་གྲུབ་གཏེརཿ ཆེ་བའི་ཡོན་ཏན་ཁྱད་པར་འཕགས་ལ་ཕུལཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ རྗེས་འཇུག་བདེ་སྟོང་ལ་སྤྲོད་པའི་ལེའུ་སྟེ་བརྒྱ་དང་གཅིག་པའོཿ ཿཐ་ཐ་ཉྲ་རྒྱ་རྒྱཿ ཿ