ལྷ་རྗེ་ལུང་བསྟན་ཅིང་སྐྱེ་བདུན་ཤའི་ཕན་ཡོན་བསྟན་པའི་ལེའུ།
དེ་ནས་ནངས་པེར་སྒྲུབ་པ་ཐོན་པའི་ཚེཿ སློབ་དཔོན་ཞལ་ནས་ལྷ་སྲས་བཙན་པོ་ལགསཿ རྒྱལ་སྲས་ལྷ་རྗེ་སྔོན་དུ་ཁྲིད་ཤོག་གསུངསཿ སྲས་འདི་སྐྱེ་བ་ཡང་སྔ་ད་བར་དུཿ
༼༢༤༡ན༽བདག་གིས་བྱིན་གྱིས་བརླབས་པའི་སྲས་ཡིན་གསུངསཿ ལྟ་བ་རྫོགས་ཆེན་པདྨ་སྙིང་ཐིག་དང་ཿ ཡི་དམ་བཀའ་འདུས་ཆོས་ཀྱི་རྒྱ་མཚོ་དང་ཿ བླ་མ་བསྟན་གཉིས་སྐོར་གསུམ་ལ་སོགས་པཿ རྩིས་སྨན་ཀུན་གྱི་བདག་པོ་འདི་ཡིན་པསཿ ཡར་ཀླུངས་གཏེར་ཀ་འདི་ལ་གཏད་དོ་གསུངསཿ གསང་མཚན་སྔགས་པ་མཆོག་གྲུབ་རྒྱལ་པོར་གསོལཿ བཟོད་སེམས་ཆེ་ཞིང་ཀུན་ལ་བྱམས་པའི་བུཿ དུག་ལྔ་མི་རགས་འཁོར་བར་མི་རྒྱུ་ཡང་ཿ བསྟན་གཉིས་གུས་ཤིང་འགྲོ་ལ་བརྩེ་བའི་ཕྱིརཿ ང་དང་གདན་འཛོམ་ལུང་ནི་ཡང་ཡང་བསྟནཿ ཆོས་ལས་འདས་པ་ངེས་པའི་དོན་འདི་གསུངསཿ དེ་ནས་སངས་རྒྱས་མཛད་སྲོལ་མཁྱེན་པར་མཛོདཿ སྟོབས་མེད་མུན་པ་ནང་གི་མཛུབ་གཡུགས་བཞིནཿ ཕལ་པ་རྣམས་ཀྱང་འགྲོ་དོན་བྱ་བློ་རྩོམཿ བསྟན་པ་བྱེར་ཟུག་སྐབས་སུ་ངའི་སྤྲུལ་པཿ ཟ་ཧོར་རྒྱལ་པོ་གཙུག་ལག་འཛིན་རྗེས་བཟུང་ཿ སེམས་ཅན་གང་གི་དོན་བྱེད་མ་འོངས་དུསཿ དེ་བ་ཨ་ཀར་ཙནྡྲ་རི་རྒྱལ་གླིང་ཿ དེ་ནས་ཚེ་འཕོས་ཡིད་གཉིས་ཆ་མ་མཆིསཿ ཕྱི་རབས་འབྱུང་འགྱུར་སངས་རྒྱས་བླ་མ་སྟེཿ དེ་ནས་ཚེ་འཕོས་རྒྱ་ཡི་ལོ་ཙཱ་ཞེསཿ དེ་ནས་ཉི་མ་སེང་གེ་སྟོད་གཏེར་དབང་ཿ གཤེད་མ་བརྒྱ་ཡིས་མཐའ་བསྐོར་ཉམ་མི་ང་ཿ གཏེར་སྟོན་རྐྱང་པའི་སྐྱེ་བ་བཅུ་གསུམ་འབྱུང་ཿ འཇམ་པའི་གོས་གྱོན་སྔོ་སྨིན་གསེབ་ཕྱིན་བཞིནཿ མ་རིག་འཁྲུལ་པའི་སེམས་ཅན་གདུལ་
༼༢༤༡བ༽དཀའ་བའིཿ འགྲོ་བ་མང་པོ་སངས་རྒྱས་ཞིང་དུ་འཁྲིདཿ སྙན་པས་ས་སྟེང་ཐམས་ཅད་ཁྱབ་པར་འགྱུརཿ སྐྱེ་བ་གཅིག་ནི་བོད་ཡུལ་གྲྭ་ནུབ་མདའཿ རྒྱལ་སྲས་ལུང་པ་འདི་ནས་ནུབ་ཏུ་སྐྱེཿ སྔགས་པ་མཐུ་མཁན་སྔགས་རྩིས་སྨན་སྐྱོང་རིགསཿ ཆོས་དབྱིངས་མདངས་ཅན་ཡེ་ཤེས་ཁ་དོག་ཅནཿ ཡར་རྗེ་ཨུ་རྒྱན་གླིང་པ་ཞེས་བྱ་བཿ མེ་ཁམས་ཆུ་མོ་ཕག་གམ་ཁྱི་ལོ་པཿ སྤྲུལ་པའི་སྲས་འདི་འདམ་སྐྱེས་པདྨ་འདྲཿ ཕ་ཤི་མས་བོར་དམྱལ་བའི་སེམས་ཅན་འདྲཿ ལྟོ་གོས་མ་ཁྱོགས་ཡི་དྭགས་ལམ་ཟན་འདྲཿ བཀོལ་སྤྱོད་མི་ཁེངས་བསམ་མེད་དུད་འགྲོ་འདྲཿ གང་ཉེ་ངོ་ཚ་མཛེ་ཕོ་ཁྱུ་བུད་འདྲཿ མི་ལ་བདག་མེད་རི་ཤོ་རླུང་ཁྱེར་འདྲཿ མཉམ་པོས་ཁྱད་གསོད་ཁ་ཉེན་ལྷ་མིན་འདྲཿ བསོད་ནམས་ཆུང་ཞིང་སྙིང་རུས་སྡུག་སྲན་ཅནཿ བརྩོན་འགྲུས་ཤེས་རབ་ཆེ་ཞིང་ཆགས་སེམས་ཆུང་ཿ ང་ལ་མོས་ཤིང་འགྲོ་ལ་ཕན་སེམས་ཆེཿ དད་པ་ཆེ་ཞིང་པོ་བརྟན་སྤོབས་པ་མཐོཿ དུག་ལྔ་མི་རགས་སྒྲུབ་ལ་རབ་ཏུ་བརྩོནཿ བློ་གསལ་རྟོགས་པ་མཐོ་ཞིང་རྒྱུ་འབྲས་ཞིབཿ ཞི་དུལ་ཆེ་ཞིང་མདོ་སྔགས་ཆོས་རྒྱས་ཆེཿ སྐྱོ་ཤས་ཆེ་ཞིང་སྤྱོད་ལམ་གཞན་མི་བསྲེཿ བློ་སྣ་ཐུང་ཞིང་སེམས་དཔངས་རིག་པ་གཡེལཿ མདོག་དཀར་དྲི་ཞིམ་བལྟ་སྡུག་ཁྲོ་བོའི་དབྱིབསཿ གཟུགས་མཛེས་བོངས་འཚམས་ལྕེ་རིང་གདོང་བར་ཚུགསཿ མང་ཚོགས་གསེབ་ཏུ་གཟི་མདངས་
༼༢༤༢ན༽གཞན་ལས་ཆེཿ སྐྱེ་མཆེད་དངས་ཤིང་ཆོས་ཕྱིར་དཀའ་སྤྱད་ནུསཿ སྤྲུལ་པའི་སྐུ་མཆོག་ཉ་རྒྱས་ཟླ་བ་འདྲཿ གཏེར་ཀ་ཉེར་བརྒྱད་གཞན་ཡང་འབྱེད་པར་འགྱུརཿ དེ་དུས་བསྲུང་བའི་དམ་ཚིག་འདི་ཡང་གནང་ཿ ཕ་ཡུལ་མ་སྡོད་བུ་ལོན་སྐྱེད་མ་སྤེལཿ དགོས་དུས་མི་བསྟོངས་གཉེན་ཚན་དགྲ་ཡིན་པསཿ ལོང་བའི་མིག་བཞིན་མི་མཐོང་ཡུལ་དུ་གྱིསཿ དགྲ་ཡ་མ་སྲོང་གཉེན་ལ་སྐྱོངས་མ་བྱེདཿ རྨོ་རྐོ་མ་བྱེད་ཚོང་ཁེ་འབྲོག་མ་བསྟེནཿ གྲོང་ཆོག་མ་བྱེད་སྔས་སྲུང་སྲི་མ་གསོཿ ཆོས་ལུགས་མི་མཐུན་པ་དང་གྲོགས་མ་འགྲོགསཿ འགལ་རྐྱེན་བྱེད་པའི་བུད་མེད་རྩར་མ་བསྟེནཿ ཉིན་པར་མང་གསེབ་བག་མེད་ཆང་མ་འཐུང་ཿ སྲོད་འགྲོས་ཐོ་རངས་མ་འགྲིམ་རྐང་མ་ཡང་ཿ མངོན་མཚན་མ་ཆེ་གཏེར་འདྲ་སློབ་མ་བསྟེནཿ ཆོས་ཀྱི་ཁ་འཛིན་མ་བྱེད་མཐུ་མ་ངོམཿ སྤྱོད་ལམ་ཤུགས་འགོ་ཐ་མལ་གསེབ་མ་སྡོདཿ རི་དྭགས་བཞིན་དུ་རི་སུལ་བཙན་སར་སྡོདཿ མི་ཚེ་ཆོས་དྲིལ་ཚེ་འདིའི་འཁྲི་བ་ཆོདཿ སུ་ངོ་ཆེ་ཡང་མ་བསྲུངས་སྟབས་མ་བཏང་ཿ ཏུག་ཏུག་མ་བྱེད་སྙུགས་བསྲིངས་ཆམ་མེར་ཞོགཿ རྒྱབ་རྟེན་སྲུང་མ་མཐུ་དང་ཆོས་ལ་གྱིསཿ ཚེས་བཅུ་བྱུང་རེས་ང་ཉིད་བོད་དུ་འོང་ཿ རླུང་ཁྱེར་རྫས་བཞིན་ཅི་ཡོད་ཚོགས་སུ་བསྐོརཿ མི་རྗེས་མི་སློབ་ཆོས་བརྒྱུད་མི་འཛིན་པའིཿ བུ་ཚ་ཡོད་ཀྱང་རང་ཕུང་མིས་འཕྱ་བསཿ ཞ་འཕྱིའི་མི་བཞིན་འགྲོ་འདུག་
༼༢༤༢བ༽ཉུང་དུ་གྱིསཿ མི་མཛའ་མཐོ་འགྲོགས་བར་ཆད་ལོགས་ན་མེདཿ ཕུང་འདྲེའི་ནང་དབྱེན་གར་ཡོང་ཆ་མེད་པསཿ ལྐུགས་པའི་ཁ་བཞིན་སྨྲ་བ་ཉུང་དུ་གྱིསཿ བྱ་བྱེད་སྤྱོད་པ་བདུན་མ་མ་མཁས་ནཿ དགྲ་རུ་སུ་ཡོང་མི་ཤེས་སྲིད་དེ་ཡང་ཿ ཁ་ཉེན་མི་བཞིན་སྡོད་ལུགས་མཁས་སུ་གྱིསཿ མི་ཡི་བརྒྱུད་རིགས་མ་བརྟགས་བློ་མ་གཏོདཿ མ་བཅོལ་རྟོག་ཅན་མ་ཆེ་བཞག་སར་སྡོདཿ ཆེ་གཏོད་བྲོད་ཁར་མ་ཉན་སླུ་བ་ཡོང་ཿ ཕ་བོང་བཞིན་དུ་སྒྱུར་ཁ་ལྗི་རུ་གྱིསཿ ཁྱོད་ཀྱི་གདུང་བརྒྱུད་བརྒྱ་དང་ཉེར་གཅིག་བརཿ ཆོས་མ་བྱས་ཀྱང་སངས་རྒྱས་ཐེ་ཚོམ་མེདཿ ཅེས་གསུངས་བཀའ་གཏད་གཟིངས་བསྟོད་ལུང་བསྟན་པསཿ རྒྱལ་སྲས་ལྷ་རྗེས་མང་དུ་བཤུམ་སྟེ་བརྒྱལཿ ཡུན་ཅིག་དྲན་པ་རྙེད་ནས་ཕྱག་བཙལ་ཏེཿ འཁོར་བའི་སྡུག་བསྔལ་དེ་ཙམ་དང་ལེན་པསཿ སྐྱེ་བ་འདི་ཡིས་ཆོད་པར་ཐུགས་རྗེས་གཟུང་ཿ ཞེས་གསོལ་ཡབ་ཡུམ་སྲས་གསུམ་ཕྱག་བཙལ་བསཿ སློབ་དཔོན་པདྨའི་ཞལ་ནས་འདི་སྐད་གསུངསཿ ཁྱོད་ཀྱིས་ང་ལ་སེམས་བསྐྱེད་ཉམས་འཇུག་གམཿ མི་དགའ་མི་དགོས་དམྱལ་བ་ངོ་མཚར་ཆེཿ སངས་རྒྱས་ཀུན་གྱི་བླ་མ་དམྱལ་བ་ཡིནཿ བསྟན་པའི་བདག་པོ་ཤཱཀྱ་ཐུབ་པས་ཀྱང་ཿ དག་པའི་སྐྱེ་བ་ལྔ་བརྒྱ་བླངས་པ་དང་ཿ མ་དག་སྐྱེ་བ་ལྔ་བརྒྱ་བླངས་ཚུལ་བསྟནཿ བྱང་ཆུབ་སེམས་དཔའ་སྤྱན་རས་གཟིགས་ཀྱིས་ཀྱང་ཿ འཁོར་བ་མ་སྟོངས་བར་དུ་སེམས་བསྐྱེད་ནསཿ
༼༢༤༣ན༽སེམས་སྐྱེད་ཉམས་པས་དབུ་ཚལ་སྟོང་དུ་གསཿ འོད་དཔག་མེད་པས་བཅུ་གཅིག་ཞལ་བྱིན་བརླབསཿ སངས་རྒྱས་བྱང་ཆུབ་སེམས་དཔའི་མཛད་པ་ནིཿ རང་གི་གདུག་སར་ཞི་བདེ་མི་སྒྲུབ་ཅིང་ཿ འགྲོ་བ་མང་པོའི་དོན་དུ་དཀའ་བ་སྤྱདཿ ཐུབ་པའི་སྐྱེས་རབས་པད་འབྱུང་རྣམ་ཐར་ལྟོསཿ སེམས་ཅན་ཐུགས་རྗེས་མི་འཛིན་བློས་གཏོང་ངམཿ དད་པ་ཚོལ་ཕྱིར་སྡུག་བསྔལ་བཟོད་པར་གྱིསཿ མི་མཇེད་འཇིག་རྟེན་བྱེ་བ་ཕྲག་ས་ཡའིཿ ཞིང་ཁམས་ཀུན་ཏུ་མཆོག་གྲུབ་དེ་བཞིན་ནོཿ ལེགས་སོ་ལེགས་སོ་ཡེ་ཤེས་མཆོག་གྲུབ་རྒྱལཿ ཀུན་དང་ཡིད་མཐུན་འགྲོ་ཀུན་བསམ་པ་འགྲུབཿ སྐྱེ་བ་མི་བགྲང་མངོན་པར་རྫོགས་འཚང་རྒྱཿ དེ་དུས་སེམས་ཅན་ལས་འཕྲོ་བཟང་པོ་རྣམསཿ སྲིད་པ་མི་ཡི་བུ་རུ་སྐྱེས་པ་ལཿ ཨུ་རྒྱན་ངས་ཀྱང་ཕྱིར་མི་ལྡོག་ལུང་བསྟནཿ ཞིང་ཁམས་འདི་ཡི་སྐྱེས་རབས་མང་ན་ཡང་ཿ བོད་དུ་འབྱུང་ཚུལ་ཟུར་ཙམ་བསྟན་པ་ཡིནཿ རྒྱལ་སྲས་ཕུང་པོ་འདི་ཡང་དོན་ཆེན་ཏེཿ དབང་པོ་ལྔ་དང་ཟག་ཆུ་ཤ་ཁྲག་རུསཿ ཤིག་གི་སྙིང་ཙམ་སུ་ཡི་ལྟོར་སོང་བཿ དམངས་པོའི་ལྟོར་སོང་མི་ཡི་དངོས་གྲུབ་འབྱུང་ཿ དབུལ་པོའི་ལྟོར་སོང་ཟས་ནོར་དངོས་གྲུབ་འབྱུང་ཿ འཆི་འཕྲོའི་ལྟོར་སོང་ཚེ་ཡི་དངོས་གྲུབ་འབྱུང་ཿ དད་ཅན་ལྟོར་སོང་ཆོས་ཀྱི་དངོས་གྲུབ་འབྱུང་ཿ དེ་ལ་སོགས་པའི་ཡོན་ཏན་མང་ཡོད་ཀྱང་ཿ ལོག་ལྟ་ཅན་གྱིས་ཡོན་ཏན་སྐྱོན་དུ་མཐོང་ཿ དེ་ཡང་
༼༢༤༣བ༽འབྲེལ་པ་སྣེ་གཅིག་ཐོགས་པ་ཡིསཿ སྒྲིབ་པ་དག་སྟེ་ཆོས་ཀྱི་ལས་སད་འགྱུརཿ དེ་ཕྱིར་མཆོག་གྲུབ་སྐྱེ་བ་བཅུ་གསུམ་བརཿ མཐོང་ཐོས་དྲན་རེག་དོན་དང་ལྡན་པ་སྟེཿ གྲིབ་མས་རེག་གམ་ཏིལ་འབྲུ་ཙམ་ཞིག་ཉེཿ ངན་སོང་འགྲོ་ངེས་ཤེས་ཀྱང་མཐོ་རིས་སྐྱེཿ དགེ་རྒྱུ་ཉུང་འབྲུ་ཙམ་ཞིག་ས་བོན་ཐེབསཿ དྲང་སྲོང་གཟའ་ནད་གདོན་བགེགས་འབྱུང་པོའི་ནདཿ འདྲེ་ཡི་གཙེར་བ་རྣམས་ཀྱང་སྒྲིབ་པར་འགྱུརཿ མཚམས་མེད་ལྔ་སྤྱད་ལྟོར་སོད་རིག་འཛིན་བྲལཿ ལས་ཀྱིས་དུད་འགྲོའི་ལུས་སུ་སྐྱེས་གྱུར་ཀྱང་ཿ ཡུལ་བདག་བྱམས་ཤིང་བརྡུང་བཙོག་མེད་པར་འགྱུརཿ དེ་སོགས་ཡོན་ཏན་མོང་ཡོད་ཟུར་ཙམ་ཡིནཿ ད་ལྟའི་ཡེ་ཤེས་མཆོག་གྲུབ་རྒྱལ་པོ་ཁྱོདཿ བཅོ་ལྔའི་ལོ་ལ་ཚེ་དུས་བྱས་པའི་ཚེཿ ཕུང་པོ་འདི་ཉིད་གཏེར་དུ་སྦོས་ཤིག་གསུངསཿ འདི་ཉིད་ས་ཡི་སྟེང་དུ་ཐོན་པའི་ཚེཿ བསོད་ནམས་ཆུང་བའི་དུད་འགྲོ་ཡིན་ཀྱང་རུང་ཿ མི་ཚེ་སྡིག་བསྒྲིལ་བཤན་པ་ཡིན་ཀྱང་རུང་ཿ སྐྱེ་བ་དམན་པའི་བུད་མེད་ཡིན་ཀྱང་རུང་ཿ ལས་ཀྱི་འཕྲོ་མེད་མི་ལུས་ཙམ་ཡང་རུང་ཿ ཆུ་ལ་གནས་པའི་སེམས་ཅན་ཡིན་ཀྱང་རུང་ཿ མཁའ་ལ་གནས་པའི་འདབ་ཆགས་ཡིན་ཀྱང་རུང་ཿ སྡིག་པ་དག་ཅིང་མི་ལུས་གཙང་མ་ཐོབཿ དད་དང་ཤེས་རབ་བརྩོན་འགྲུས་སྤོབས་པ་འབྱུང་ཿ སྐྱེ་བདུན་ཤ་ཡིས་འདུལ་བའི་དུས་ཚོད་ཀྱང་ཿ སངས་རྒྱས་བསྟན་པ་ལྔ་བརྒྱ་ཕྲག་གསུམ་ནུབཿ དུས་
༼༢༤༤ན༽མ་འགྱུར་ཏེ་ས་སྟེང་མི་སྤྱོད་འགྱུརཿ རྒྱལ་ཁྲིམས་ཞིག་པས་བོད་ཁྲིམས་རྒྱ་ཆེ་ཆདཿ སི་ལུ་ནི་ལུར་སོང་ནས་འཁྲུག་འཐབ་བྱེདཿ ཁྱད་པར་ཉོན་མོངས་དུག་ལྔ་རང་དགར་སྤྱོདཿ ཐམས་ཅད་འཁྲུགས་ནས་མཚོན་གྱི་བསྐལ་པ་དང་ཿ རྟགས་ཙམ་འཛིན་གྱི་བསྟན་པའི་མགོར་ཉེ་སྟེཿ བཙུན་པ་ཁྲིམས་མེད་སྡོམ་པ་རྒྱབ་ཏུ་བོརཿ བུ་སྤྲུག་མདུན་དུ་བླངས་ནས་སྔགས་པ་ཟེརཿ སྔགས་པས་མགོ་སྤུ་བྲེགས་ནས་བཙུན་ཆས་བྱེདཿ དགེ་བཤེས་ཧོར་ལས་གྲི་མདུང་དམག་དཔོན་བྱེདཿ གཏམ་དུ་དམག་ལ་བགོས་སུ་གོ་མཚོན་གྱོནཿ ལས་སུ་རྫོང་རྩིག་ནོར་དུ་སྡིག་པ་གསོགཿ ལྷ་ཆོས་མི་བྱེད་སྡིག་པ་མཆོར་དུ་བྱེདཿ དམག་དང་མུ་གེ་ནད་ཡམས་དུས་གཅིག་འབྱུང་ཿ བཀའ་ཁྲིམས་ཞིག་པས་བདུན་མ་བུད་མེད་བཟང་ཿ མཚོན་ཁ་ནང་བསྟན་སྤྱི་བདུན་ཆེན་མོ་ཞིགཿ ཤེས་པ་ཕྱིར་ལོག་གསལ་བས་གླིང་ལོག་འབྱུང་ཿ གནག་པའི་ལས་དུབ་ལུས་སེམས་གཉིས་ཀ་བྲེལཿ གནས་གཞི་ལྷ་ཁང་བཤུས་ནས་རྫོང་ལ་འགེབསཿ རིགས་མི་མཐུན་པ་ཀུན་དང་འགྲོགས་དགོས་འབྱུང་ཿ སྐྱེ་འགྲོ་མི་བཟད་ཟུག་རྔུ་སུས་མི་བཟློགཿ ལས་སུ་ཤེས་པའི་སེམས་ཅན་ཨ་རེ་སྡུགཿ གཏེར་ལ་མོས་ཤིང་འདྲི་བ་མང་དུ་འབྱུང་ཿ དེ་དུས་སྐྱེ་བདུན་ཤ་འདི་ལྟོར་སོང་བསཿ དུག་གསུམ་ནད་ཞི་བདུད་རྩིའི་མཆོག་ཏུ་གསུངསཿ ལྷ་སྲས་ཡབ་ཡུམ་སྲས་གསུམ་དགྱེས་པར་གྱུརཿ ཨུ་རྒྱན་
༼༢༤༤བ༽གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པ་བཀོད་པ་ལསཿ ལྷ་རྗེ་ལུང་བསྟན་ཅིང་སྐྱེ་བདུན་ཤའི་ཕན་ཡོན་བསྟན་པའི་ལེའུ་སྟེ་བརྒྱ་དང་གཉིས་པའོཿ ཿཐ་ཐ་ཉྲ་རྒྱ་རྒྱཿ