སྐལ་ལྡན་བུད་མེད་གསུམ་ལ་ཞལ་གདམས་གསུངས་པའི་ལེའུ།
དེ་ནས་ངང་བྱུང་དཔལ་གྱི་རྒྱལ་མོ་བཙུནཿ ཐུགས་དམ་བཞེངས་པ་གཡུ་ཡི་ལྷ་ཁང་དུཿ སློབ་དཔོན་སངས་རྒྱས་གཉིས་པ་སྤྱན་དྲངས་ནསཿ རིན་ཆེན་ཁྲི་ལ་དར་ཟབ་གབ་རྩེ་བརྩེགསཿ དགྱེས་པའི་འདོད་ཡོན་མང་པོ་ཞལ་དུ་དྲངསཿ གུས་པའི་ཕྱག་བཙལ་བཙུན་མོས་ཞུས་པ་ནིཿ བདག་ལ་ཚིག་ཉུང་དོན་ཆེ་ཉམས་ལེན་བདེཿ འཇིག་རྟེན་མ་སྤངས་ཕྱི་མ་འཚང་རྒྱ་བའིཿ ཆོས་ཤིག་ཐུགས་ལ་འཇོགས་པ་ཞུ་ཞུས་པསཿ སློབ་དཔོན་ངང་བྱུང་རྒྱལ་མོ་ཉིན་ཅིག་གསུངསཿ དང་པོར་མི་རྟག་པ་ནི་ནན་ཆེར་སྒོམསཿ དེ་ནས་སྐྱབས་འགྲོ་སེམས་བསྐྱེད་རིམ་དུ་གྱིསཿ དེ་ནས་བླ་མ་རྣམས་ལ་གསོལ་བ་ཐོབཿ དེ་དག་སྔོན་འགྲོ་ཡིན་པས་མེད་ཐབས་མེདཿ དེ་ནས་ལུས་ཀྱིས་མཉམ་བཞག་ལྟ་སྟངས་ཀྱིསཿ ཡུན་ཐུང་གྲངས་མང་ཁང་སྟོང་ཐིགས་པ་བཞིནཿ ལུས་སེམས་མ་བསྒྲིམ་ལྷོད་དེ་ཤིག་གེ་ཞོགཿ མ་གཞི་སྟོང་པ་ཉིད་ཀྱི་ཞི་གནས་སུཿ རྣམ་རྟོག་མཐར་འདོད་སྟོད་སྐོར་རེམ་ལ་གྱིསཿ ཉམས་ལ་འདི་འབྱུང་བྱ་བ་མེད་དེ་འབྱུང་ཿ སྒོམ་ལ་མ་ཞེན་ཡང་ནས་ཡང་དུ་ཤིགཿ བཟང་རྟོག་ངན་རྟོག་གང་ཤར་གཅེར་གཅེར་ལྟོསཿ བུ་ལམ་རིག་པ་མ་ཚུགས་སྣ་ཚོགས་པཿ
༼༢༤༥ན༽སྐྱོན་དུ་མི་བལྟ་ཐུག་ཕྲད་ལམ་དུ་ཁྱེརཿ མ་བུ་གཉིས་མེད་ལྷག་མཐོང་འཇམ་སྐོར་དུཿ ཚོགས་དྲུག་སྐྱར་ཐོན་སྣང་སྟོང་གཉིས་མེད་བསྲེསཿ དེ་དག་དངོས་གཞི་ཡིན་པས་མེད་ཐབས་མེདཿ སྒོམ་ཚེ་ཅི་ཡང་མེད་དེ་སྟོང་པ་ཡིནཿ ཡེངས་ན་སྣང་ཕྱིར་ཞེན་པ་འབྲངས་པས་འཁྲུལཿ བརྟགས་ཤིང་དཔྱད་ནས་བླང་དོར་མེད་པར་སྐྱོངསཿ གང་བྱུང་གང་བབས་བདེ་བ་ཁོང་དུ་འབརཿ བསྒོམ་དུ་མེད་དེ་རྩལ་སྦྱོང་བསྟན་དུ་ཡོང་ཿ དེ་ནི་བྱས་ཤིང་གྲུབ་པ་མི་གདའ་སྟེཿ ཡེ་ནས་ཐོག་མར་རང་ལ་གནས་པར་གདའཿ དེའི་ངང་ཅི་བྱེད་སེམས་ཅན་དོན་དུ་གྱིསཿ བྱ་ཅ་ཆོས་སྤྱོད་རྒྱུན་མི་འཆད་པར་སྟེནཿ སྒྲིབ་པ་དག་ནས་རྟོགས་པ་ངང་གིས་འཆརཿ གཞན་དོན་བསྔོ་བ་སྨོན་ལམ་རྒྱས་གདབ་བྱཿ རྗེས་ཀྱི་བྱ་བ་ཡིན་པས་མེད་ཐབས་མེདཿ བྱིང་རྒོད་སྐྱོན་དུ་མ་བཏང་བློ་གཏད་གྱིསཿ ཚིག་ཉུང་དོན་ཆེ་སྦྱོར་དངོས་རྗེས་གསུམ་ཚང་ཿ འདི་ཕྱི་གཉིས་དོན་བསྟན་པའི་ཉིང་ཁུ་ཡིནཿ ཞེས་གསུངས་ངང་བྱུང་རྒྱལ་མོ་གྲོལ་བར་གྱུརཿ དེ་ནས་ཡར་ཀླུངས་ཤེར་གྱི་བྲག་ཕུག་ཏུཿ མིན་གྱི་བུ་མོ་བཀྲ་ཤིས་ཁྱེ་འདྲེན་དང་ཿ བདེ་ཆེན་མཁའ་འགྲོ་ཡེ་ཤེས་མཚོ་རྒྱལ་གྱིསཿ སློབ་དཔོན་སྤྱན་དྲངས་ཚོགས་འཁོར་བརྒྱ་རྩ་བསྐོརཿ རྗེ་ཉིད་སྲིན་པོའི་ཡུལ་དུ་བཞུད་ཙ་ནཿ བདག་ཅག་གཉིས་ནི་ཇི་ལྟར་བྱེད་ན་ཞུསཿ སློབ་དཔོན་ཞལ་ནས་འདི་ལྟར་
༼༢༤༥བ༽གྱིས་ཤིག་གསུངསཿ ལུས་ངག་ཡིད་གསུམ་ཞེན་པ་ནང་དུ་ལོགཿ མི་མི་མགུ་ལ་རང་སྡུག་སློབ་དཔོན་བཏང་ཿ ཉམས་སུ་མི་ལེན་ཡིག་རིས་དཔེ་ཆ་བཏང་ཿ འགྲན་སེམས་ཟག་པ་གསོག་པའི་འཁོར་སློབ་བཏང་ཿ སེམས་དཀྲུག་དགྲ་སེམས་འཛིན་པའི་བུད་མེད་བཏང་ཿ འཕྲལ་ཕུགས་གཉིས་ཀ་མི་ལྟར་ཞེན་པ་ལོགཿ མི་ཡི་གྲལ་ནས་ཅི་བུད་ཅི་དོན་གྱིསཿ ཡོངས་སུ་འཛིན་པ་ཁབ་སྐུད་ཅིག་མི་བྱཿ ཕྱི་རུ་མཆོག་གསུམ་རྩ་བ་གསུམ་ལ་ཕུལཿ ནང་དུ་ཞིང་ས་དག་ལ་བརྒྱ་འབུལ་གྱིསཿ བར་དུ་ཚོགས་ཀྱི་འཁོར་ལོ་ཅི་མང་བསྐོརཿ མ་ནུས་མ་ལྕོགས་སྙིང་རྗེའི་ཡུལ་ལ་བྱིནཿ འཁོར་བའི་སྡུག་བསྔལ་ཁམ་པོ་ཆེ་ལ་སོམསཿ བདུད་དབང་མ་གཏོང་གཞན་བསྐུལ་རང་ལ་ཐོབཿ ཡི་ནི་ནང་གསོད་ཞེན་པ་ཕྱི་ནས་ལྡོགཿ མགོ་ཐོན་བྱ་རྒྱུ་དམ་པའི་ཆོས་ལས་མེདཿ སུས་ཀྱང་མི་བསྟོངས་གཅིག་པུར་འགྲོ་བ་སོམསཿ ཤོམ་ར་བློ་སྣ་མ་མང་རི་ལ་བརྟེནཿ མཛའ་བཤེས་ཉེ་དུ་བྱ་ལས་ལྟོ་གོས་རྣམསཿ ཕྱི་ནང་བར་གསུམ་ཞེན་ལོག་བྱས་ནསཿ ལྷག་ནོར་མེད་ཅིང་རང་འཚོ་གྱི་ནར་བརྟེནཿ མཛེ་ཕོ་བཞིན་དུ་དམའ་ས་བཟུང་ལ་སྒོམསཿ ཆོས་རྣམས་ཀུན་ལ་བློ་གཏད་མི་ཐུབ་པསཿ མཛའ་བོ་གཡོ་རྒྱུ་ཅན་གྱིས་བསླུས་པ་འདྲཿ མ་ཤིའི་བར་དུ་དགོས་པ་མིན་པ་མེདཿ མི་དགོས་པ་ནི་གཅིག་ཀྱང་མི་ཡོང་བསཿ སེམས་ནི་སྤོས་རྒྱའི་རི་མོ་མཐའ་ལ་བརྒྱུགཿ
༼༢༤༦ན༽འཕངས་རུལ་གདན་རྡོལ་ཤི་ཡང་རྫོགས་ཆེན་སྒོམསཿ ང་དང་གཏན་དུ་མཇལ་གྱིས་ཡི་མ་མུགཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ སྐལ་ལྡན་བུད་མེད་གསུམ་ལ་ཞལ་གདམས་གསུངས་པའི་ལེའུ་སྟེ་བརྒྱ་དང་གསུམ་པའོཿ ཿཐ་ཐ་ཉྲ་རྒྱ་རྒྱཿ ཿ