མང་ཡུལ་གུང་ཐང་ལ་ཀར་སྔ་འགྲོས་བཏང་བའི་ལེའུ།
དེ་ནས་བསམ་ཡས་དབུ་རྩེ་ཆེན་མོར་བྱོནཿ སློབ་དཔོན་ཞལ་ནས་ལྷ་སྲས་བཙན་པོ་གསུངསཿ ཁོ་ཐག་མ་ཆོད་པད་འབྱུང་དྲུང་དུ་བཞུགསཿ ནན་ཏན་དྲི་བ་ད་ལྟའི་དུས་སུ་གྱིསཿ ནན་ཆགས་མཛད་ན་
༼༢༥༢ན༽ཁོ་ཐག་ཆོད་དེ་མཆིཿ བློ་སྙིང་བྲང་གསུམ་པད་འབྱུང་ང་ལ་གཏོདཿ བསླུས་ན་པདྨ་ཞན་ནོ་རྗེ་
འབངས་རྣམསཿ དྲང་པོར་སྨྲས་ན་ཡིད་མི 
་ཆེས་པ་སྐྱེཿ ཚིག་གྲོན་བཅུག་ནས་ཆོས་མིན་ལས་མང་གསོགཿ བླ་མ་བསྟེན་ཡུན་སྟིངས་ཤིག་རྗེ་འབངས་རྣམསཿ ན་སོ་གཞོན་དུས་དམ་ཆོས་རེམ་ལ་གྱིསཿ རྒས་ནས་བྱེད་འདོད་འབྱུང་བས་འཆུན་པར་དཀའཿ ད་ལྟ་སྐད་ཅིག་ཡིན་ནོ་རྗེ་འབངས་རྣམསཿ རྟོག་པ་རགས་དུས་ནང་དུ་མཁན་པོ་ཚོལཿ ཆེད་དུ་སྤང་བླང་ མི་དགོས་རང་སར་ཞོགཿ ལྟ་བ་ཐག་ཆོད་དགོས་སོ་རྗེ་འབངས ་རྣམསཿ ཉོན་མོངས་ཟད་ན་ཆོས་ལ་བྱ་རྒྱུ་མེདཿ སྙིང་རྗེ་མེད་ན་ཆོས་ཀྱི་རྩ་བ་རུལཿ འཁོར་བའི་སྡུག་བསྔལ་ཡང་ནས་ཡང་དུ་སོམསཿ ཆོས་ལ་ཕྱི་བཤོལ་མ་མཛད་རྗེ་འབངས་རྣམསཿ མོས་གུས་ཅན་གྱིས་རང་དོན་འགྲུབ་པ་ཡིནཿ གཞན་ལ་ཆོས་ཡུས་དྲིན་བཞག་བྱ་རུ་མེདཿ སྙིང་རུས་མ་ཆུང་སྒྲུབ་པ་རེ་མ་ལ་གྱིསཿ ཚེ་གང་དུས་བརྒྱའི་ཟ་མ་ལན་ཅིག་ཡིནཿ ལོ་རེ་བཞིན་དུ་དབང་བསྐུར་བྱིན་རླབས་ཞུསཿ ལོ་བརྒྱ་ལོན་ན་དབང་བརྒྱ་ཐོབ་པ་ཡིནཿ ཕྱི་མ་དུད་འགྲོར་སྐྱེས་ཀྱང་དབང་ཆེར་སྐྱེཿ དྲི་གོས་མདུན་དུ་ཆོས་བཤད་ཅི་ལ་ཕནཿ བེམ་རིག་མ་བྲལ་ཆོས་ལ་ཉན་བཤད་གྱིསཿ མཚན་བྱང་མགོ་ལ་དབང་བསྐུར་བྱེད་ཙ་འཕྱིསཿ རྣམ་ཤེས་བར་དོར་ཁྱི་གླེན་བཞིན་དུ་འཁྱམཿ མཐོ་
༼༢༥༢བ༽རིས་འདྲེན་ཧེ་དེ་ལ་དཀའ་ལས་ཡོདཿ གཟུགས་མེད་བག་ཆགས་ལུས་དེ་རྐྱེན་ཁར་ཡང་ཿ གར་འཁྱོག་མི་ཤེས་བྲང་འོག་བསམ་གཞིག་ཐོང་ཿ སྒྲུབ་པ་ལོ་རུ་བསགས་ན་དངོས་གྲུབ་འབྱུང་ཿ དམ་བཅའ་གྱིས་ལ་ཆོས་ཕྱོགས་འབད་པ་ཐོནཿ བོད་ཡུལ་ཕྱོགས་ཀྱི་ཉི་མ་ཟེར་ལ་ཁདཿ བརྡ་དེ་གོ་བར་གྱིས་ཤིག་རྗེ་འབངས་རྣམསཿ གདུང་སེམས་ཅན་ལ་པད་འབྱུང་འཕགས་པ་མེདཿ གསོལ་བ་འདེབས་ལ་པད་འབྱུང་སྒོ་ཉལ་ཡོདཿ ཚེ་ཟད་ནད་ལ་སྨན་པས་ཕན་པར་དཀའཿ ཞག་ནི་གཅིག་སོང་གཉིས་སོང་མི་ཚེ་སོང་ཿ ལོང་ཡོད་པོ་ཚོ་འཆི་ཀར་ཕྲས་ཕྲས་བྱེདཿ ཨ་རེ་འགྱོད་དེ་བག་ཙམ་འཕྱིས་པ་འདྲཿ སྡིག་པའི་བསུན་མ་སྔོན་ལ་སོང་ཉེན་ཡོདཿ དུས་པས་མི་ཕན་སྙིང་ལ་རུས་པ་གྱིསཿ འཁོར་བའི་སྐྱོན་མཐོང་དམ་ཆོས་ མི་བྱེད་པཿ དོན་སྙིང་ནང་ཁྲོལ་རུལ་ལོ་རྗེ་འབངས ་རྣམསཿ ལམ་འགྲུལ་ལུས་པ་ཟླ་བོ་བསྙེག་པ་བཞིནཿ པད་འབྱུང་འགྲོ་ས་ལྷོ་ནུབ་རྔ་ཡབ་གླིང་ཿ གོས་ཟད་དུག་པོ་གསར་བར་མི་འགྲོ་བཞིནཿ པདྨ་འབྱུང་གནས་བཤོལ་ཀྱང་བཤོལ་མི་ཐེབསཿ འཆི་ཀའི་ནད་པ་སྣུམ་ཟད་མར་མེ་འདྲཿ ཚེ་ཡི་འཕེལ་སྐྱེན་ཟད་པས་བསྡད་དབང་མེདཿ དང་མོ་བསྐམས་པའི་ཡུར་བ་བཞིན་དུ་ནིཿ བོད་དུ་མི་སྡོད་པད་འབྱུང་སྲིན་ཡུལ་འགྲོཿ ལྗོན་ཤིང་ཁ་ནས་བྱ་ཚོགས་འཕུར་བ་བཞིནཿ
༼༢༥༣ན༽སྐད་ཅིག་མི་སྟོད་པད་འབྱུང་སྐྱེས་ཤིག་འདེགསཿ ཡོན་མཆོད་དགྱེས་སོ་ལྷ་སྲས་བཙན་པོ་གསུངསཿ དེ་ནས་རྒྱལ་སྲས་མུ་ཏིག་བཙན་པོ་ཡིསཿ སློབ་དཔོན་སྲིན་པོའི་ཡུལ་དུ་བཞུད་པ་ལཿ གསེར་སོགས་ནོར་སྣ་མང་པོ་ཕུལ་བ་རྣམསཿ རྟ་ཁལ་དྲེའུ་ཁལ་མཛོ་ཁལ་མང་པོ་བཀལཿ གྱད་ཀྱི་མི་བརྒྱ་རྟ་བརྒྱ་ཁྲལ་བཅུག་ནསཿ མང་ཡུལ་གུང་ཐང་ལ་ཀར་སྡོད་ཅིག་གསུངསཿ སྒྲ་དང་ཆ་ཐེར་ཕུབ་ལ་ཐབ་ཀ་ཚུགསཿ བཟའ་བཏུང་གཡོས་ལ་ཆེ་རུ་ཤོམས་ཤིག་གསུངསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ མང་ཡུལ་གུང་ཐང་ལ་ཀར་སྔ་འགྲོས་བཏང་བའི་ལེའུ་སྟེ་བརྒྱ་དང་ལྔ་པའོཿ ཿཐ་ཐ་ཉྲ་རྒྱ་རྒྱཿ ཿ