རྗེ་འབངས་རྣམས་ལ་འཁོར་བའི་ཉེས་དམིགས་དང་བླ་མའི་རྣལ་འབྱོར་གསུངས་པའི་ལེའུ།
དེ་ནས་ལྷ་སྲས་མུ་ཏིག་བཙན་པོ་ཡིསཿ སྤྲེའུ་ལོ་སྤྲེའུ་ཟླ་བའི་ཚེས་བཅུའི་ཉིནཿ ཆིབས་པ་ཅང་ཤེས་རྟ་ཕོ་ནག་པོ་ལཿ སེང་ལྡེང་སྒ་ཆས་གཏད་གསེར་སྲབ་གཡུ་མཐུར་བཅུགཿ སློབ་དཔོན་པདྨ་འབྱུང་གནས་ཆིབས་ཁར་ཐོནཿ བསམ་ཡས་ཟུར་མཁར་བར་གྱི་ནེའུ་ཚལཿ རྒྱལ་སྲས་མུ་ཏིག་བཙན་པོ་རྗེ་འབངས་དང་ཿ བོད་ཀྱི་ཕོ་ལུས་མོ་ལུས་ཐོབ་ཚད་རྣམསཿ སློབ་དཔོན་བཞུད་པའི་སྐྱེལ་ཐུང་ལ་འོངས་ནསཿ ཆིབས་པ་བབས་ནས་རྡོ་ཡི་མཆོད་རྟེན་བཞུགསཿ ཕྱག་རྟེན་འབུལ་བ་བཞེས་ཤིང་བྱིན་རླབས་མཛདཿ རྒྱལ་སྲས་
༼༢༥༣བ༽མུ་ཏིག་བཙན་པོས་ཞུ་ཕུལ་བཿ སློབ་དཔོན་བཞུད་པས་རྗེ་འབངས་སེམས་མ་དགའཿ ཉིད་ལ་གསོལ་འདེབས་ཉིད་ལ་མོས་གུས་བྱེདཿ བོད་ཡུལ་ཤཱཀྱ་ཐུབ་ཞབས་ཀྱིས་མ་བཅགས་ཤིང་ཿ བོད་ཀྱི་བླ་མའི་སྐལ་པ་གུ་རུ་ཉིདཿ ཆོས་སྐལ་ཇོ་བོ་ཐུགས་རྗེ་ཆེན་པོར་འདུགཿ ཚོགས་པ་རྣམས་ལ་ཆོས་ཤིག་གསུངས་བར་ཞུཿ གསེར་གྱི་མཎྜལ་ཕུལ་ནས་ཕྱག་བཙལ་ཞུསཿ སློབ་དཔོན་པདྨའི་ཞལ་ནས་འདི་སྐད་གསུངསཿ ད་ལྟ་བཞུགས་དང་མ་འོངས་འབྱོན་པ་ཡིཿ པད་འབྱུང་ང་ལ་མོས་གུས་བྱེད་པ་རྣམསཿ ཐམས་ཅད་ཐུགས་ལ་འདི་བཞིན་བཞག་པར་ཞུཿ དོན་མེད་ལས་ལ་སྡུག་བསྒུར་མ་འཛུགས་པརཿ འདི་ཕྱི་གཉིས་གར་བདེ་སྐྱིད་ཆོས་མཛོད་ཅིགཿ སྡིག་པ་མི་དགེས་ངན་སོང་གསུམ་དུ་སྐྱེཿ དགེ་བ་བྱས་པས་མཐོ་རིས་གནས་སུ་སྐྱེཿ སངས་རྒྱས་མ་ཐོབ་བདེ་བ་གང་ནའང་མེདཿ དམྱལ་བའི་གནས་ནི་འཛམ་གླིང་ས་ཡི་འོགཿ ཏི་སའི་ཐད་ནས་དཔག་ཚད་ཉི་ཁྲི་ནཿ སེམས་ཅན་དམྱལ་བ་ཆེན་པོའི་གནས་ཡོད་དེཿ ལྕགས་ཀྱི་ཁང་པ་དཔངས་དང་རྒྱ་རུ་ནིཿ དཔག་ཚད་ཉི་ཁྲི་ཡོད་པ་ལཿ དེ་སྟེང་ཚ་དམྱལ་བརྒྱད་ཀྱི་ས་གཞི་ཡོདཿ རབ་ཏུ་ཚབ་དང་ནི་ཚ་བ་དང་ཿ ངུ་འབོད་ཆེན་པོ་ངུ་འབོད་ཆུང་ངུ་དང་ཿ བསྡུས་འཇོམས་ཐིག་ནག་ཡང་སོས་མནར་མེད་རྣམསཿ རིམ་པར་བར་བར་དཔག་ཚད་བཞི་སྟོང་ཡོདཿ རབ་ཏུ་ཚ་ན་གནོད་པའི་
༼༢༥༤ན༽སྡུག་བསྔལ་གསོམཿ གསལ་ཤིང་བཤད་པའི་གླང་རྗེས་རྫ་བུམ་ཡོདཿ ཚ་བ་ན་ནི་གནོད་པའི་སྡུག་བསྔལ་བཞིཿ དོང་དང་ལྕགས་དང་དབུག་དང་འཚེད་པ་དང་ཿ དུ་འབོད་ཆེན་པོར་གནོད་པའི་སྡུག་བསྔལ་གསུམཿ ཤལ་མ་ལི་དང་ཐག་རྒྱངས་ཨ་ཧུ་དང་ཿ དུ་འབོད་ཆུང་ངུར་གནོད་པའི་སྡུག་བསྔལ་ལྔཿ ཕུར་རྒྱངས་ཤིང་རྟ་ཁྲབ་དང་ཁྲབ་རི་དང་ཿ བསྡུས་འཇོམས་ན་ནི་གནོད་པའི་སྡུག་བསྔལ་བརྒྱདཿ ས་གཞི་མཐོ་བ་གཞོང་ཁུ་ནགས་ཚལ་དང་ཿ རི་སུལ་དབང་དང་འཛིན་འཆང་བྱེད་དང་རིཿ ཐིག་ནག་ན་ནི་གནོད་པའི་སྡུག་བསྔལ་དགུཿ རལ་གྲི་ཤང་ལང་ཆུ་གྲི་སོན་མོ་དང་ཿ མདུང་ཐུང་སྟེའུ་སྟ་རེ་སོག་ལེས་འཇིགཿ ཡང་སོས་ན་ནི་གནོད་པའི་སྡུག་བསྔལ་ལྔཿ མནན་བཙིར་བཅར་དང་ཡང་ཤི་ཡང་སོས་དང་ཿ མནར་མེད་ན་ནི་གནོད་པའི་སྡུག་བསྔལ་གསུམཿ ལྤགས་བཤུ་ནུ་མ་གཅན་གཟན་འདྲད་པ་དང་ཿ གློང་སྙིང་དག་ལ་མེ་ཆེན་འབར་བ་ཡོདཿ གྲང་དམྱལ་བརྒྱད་ནི་དམྱལ་བ་ཡང་སོས་ནསཿ བྱང་དུ་དཔག་ཚད་ཉི་ཤུ་གཞལ་བ་ནཿ ཆུ་བུར་ཅན་དང་ཆུ་བུར་རྡོལ་པ་དང་ཿ སོ་འཐམས་པ་དང་ཀྱི་ཧུད་ཟེར་བ་དང་ཿ ཨ་ཆུ་ཟེར་དང་ཨུཏྤལ་ལྟར་གས་པཿ ཆེར་གས་པ་དང་པདྨ་ལྟར་ཆེར་གསཿ རིམ་པར་བར་བར་དཔག་ཚད་ཉིས་བརྒྱ་ཡོདཿ ཆུ་བུར་ཅན་ན་གནོད་པའི་སྡུག་བསྔལ་གསུམཿ འཁྱགས་
༼༢༥༤བ༽དང་ཆུ་བུར་ཆུ་བུར་ཐུག་ཐུག་གསུམཿ ཆུ་བུར་རྡོལ་ན་གནོད་པའི་སྡུག་བསྔལ་བཞིཿ གས་དང་ཆུ་སེར་རྨ་དར་ཕྱིད་པའོཿ ཿསོ་འཐམས་པ་ན་གནོད་པའི་སྡུག་བསྔལ་ལྔཿ སྐད་མི་ཐོན་དང་སོ་སྒྲ་འདོན་པ་དང་ཿ མཁྲེགས་དང་རེངས་དང་ཡན་ལག་འདར་བའོཿ ཀྱི་ཧུད་ཟེར་ན་གནོད་པའི་སྡུག་བསྔལ་གསུམཿ ལུས་འཁྱགས་སེམས་དུབ་དག་ཏུ་སྨྲེ་སྔགས་འདོནཿ ལུས་འཁྱགས་སེམས་དུབ་དག་ཏུ་སྨྲེ་སྔགས་འདོནཿ ཨ་ཆུ་ཟེར་ན་གནོད་པའི་སྡུག་བསྔལ་གཉིསཿ ལུས་བསྐམས་དབང་པོ་ལྔ་ནས་ཆུ་སེར་འཛགཿ ཨུཏྤལ་ལྟར་གས་གནོད་པའི་སྡུག་བསྔལ་བཞིཿ ལུས་ནི་ཚལ་བ་བཞི་རུ་གས་པའོཿ ཆེར་གས་པ་ན་གནོད་པའི་སྡུག་བསྔལ་བརྒྱདཿ ལུས་ནི་ཚལ་པ་བརྒྱད་དུ་གས་པའོཿ པདྨ་ལྟར་གས་སྡུག་བསྔལ་བཅུ་དྲུག་སྟེཿ ལུས་ནི་ཚལ་པ་བཅུ་དྲུག་གས་པའོཿ ཿཉི་ཚེར་ཉིན་རེ་ལན་རེ་འཆི་བ་དང་ཿ འགའ་ཞིག་ཉིན་བརྒྱ་མཚན་བརྒྱ་སྐྱེ་བ་སྟེཿ སྐྱེ་དང་འཆི་སོགས་སྡུག་བསྔལ་ཡུན་དུ་སོང་ཿ ཉེ་འཁོར་དམྱལ་ཁམས་བཅོ་བརྒྱད་བར་མཚམས་རེརཿ འདོད་ཆགས་ཚ་མྱོང་དམྱལ་བ་ཞེས་བྱ་དང་ཿ སྤྲིན་ཀྲ་མེ་འཁོར་ཅན་གྱི་དམྱལ་བ་ཞེསཿ མེ་འབར་འོབས་ལ་པུས་ནུབ་འགྲོ་བ་དང་ཿ རོ་མྱགས་འདམ་ལ་རྗེས་ནུབ་འགྲོ་བ་དང་ཿ སྤུ་གྲིའི་ལམ་གྱིས་ཤ་རུས་བཅོད་པ་དང་ཿ རལ་གྲིའི་ཆར་འབབ་ལྕགས་ཀྱི་ཤལ་མ་ལིཿ ཐལ་ཆེན་ཆུ་བོ་རབ་མེད་ནང་དུ་ནིཿ ཤ་རུས་ཚིག་ཅིང་ཁར་
༼༢༥༥ན༽འགྲོ་གཏིང་འགྲོ་བྱེདཿ ཁྲོ་ཆུ་ཁོལ་མ་བྷ་གའི་ནང་དུ་ལྗུགསཿ ཕོ་མཚན་ལྕགས་སྲེག་དམར་པོའི་བར་དུ་འཚིརཿ དེ་དག་ཐུན་མོང་སྤྱི་ཡི་དམྱལ་ཁམས་བརྒྱདཿ དེ་ལས་སྡུག་བསྔལ་བདུན་འགྱུར་ཆེ་བ་ནིཿ ཁྱད་པར་སྒོས་ཀྱི་རྡོ་རྗེའི་དམྱལ་བ་ཞེསཿ པདྨ་ལྟ་བུར་གས་པའི་ལྷོ་ནུབ་ཏུཿ དཔག་ཚད་བརྒྱ་འཇལ་ལྕགས་སྲེག་ས་གཞི་ཡོདཿ མི་ཤིགས་རྡོ་རྗེ་ཚ་བའི་དམྱལ་ཁམས་བརྒྱདཿ ཚ་དམྱལ་བརྒྱད་པས་བདུན་འགྱུར་ཚ་བ་ལྔཿ རིམ་པར་བར་བར་དཔག་ཚད་ལྔ་སྟོང་ཡོདཿ ཤར་ལྷོ་མཚམས་ན་རྡོ་རྗེའི་གྲང་དམྱལ་བརྒྱདཿ གྲང་དམྱལ་བརྒྱད་ཀྱི་བདུན་འགྱུར་གྲང་བ་ལཿ རིམ་པར་བར་བར་དཔག་ཚད་བཞི་སྟོང་ཡོདཿ ནུབ་བྱང་མཚམས་ན་ཉི་ཚེ་ཉི་འཁོར་བཿ དམྱལ་བ་གོང་མས་བདུན་འགྱུར་མང་བ་ལཿ རིམ་པར་བར་བར་དཔག་ཚད་སུམ་སྟོང་ཡོདཿ བྱང་ཤར་དམྱལ་བ་ཤམ་པ་ལ་ཞེས་པཿ དམྱལ་བ་གཞན་གྱི་བདུན་འགྱུར་གནོད་པ་ལཿ སྤྲུལ་པའི་དམྱལ་བ་ཚ་གྲང་འཐབ་པ་ཡོདཿ ཇི་སྲིད་ནམ་མཁའ་མ་ཞིག་བར་དུ་ནིཿ མི་འཇིག་པ་ནི་རྡོ་རྗེའི་དམྱལ་བ་སྟེཿ དེ་དག་སེམས་ཅན་དམྱལ་བའི་སྡུག་བསྔལ་ཡིནཿ ཡི་དྭགས་ལ་ཡང་བསྡུ་ན་རྣམ་པ་གཉིསཿ འཇིག་རྟེན་དག་ན་རྒྱུ་བའི་ཡི་དྭགས་དང་ཿ ཡི་དྭགས་ཡུལ་ན་གནས་པའི་ཡི་དྭགས་སོཿ འཇིག་རྟེན་དག་ན་རྒྱུ་བའི་ཡི་དྭགས་ནིཿ མཚན་མོ་རྒྱུ་
༼༢༥༥བ༽བ་མི་འགའ་ཞིག་གིས་མཐོང་ཿ རང་དབང་མེད་པར་མི་ལ་ཅི་གནོད་བྱེདཿ འདྲེ་འདུལ་མཁན་གྱིས་བསྲུང་མནན་སྡུག་བསྔལ་ཡོདཿ རྒྱབ་རྟེན་སྔོན་ལ་རྫོང་ཞིང་འདྲེ་རུ་བརྡུང་ཿ སྐྱབས་གནས་འཁྲིས་བྱེད་ཟས་གོས་མི་ལ་འཚོལཿ དམ་སྲི་འདྲེ་རྒོད་ལས་ཀྱི་སྡུག་བསྔལ་ཡོདཿ ཡི་དྭགས་ཡུལ་ན་གནས་པའི་ཡི་དྭགས་ནིཿ ས་འོག་དཔག་ཚད་ལྔ་བརྒྱ་འདས་པ་ནཿ ཡི་དྭགས་ཁང་པ་ཡངས་པ་ཅན་ཞེས་པཿ དཔག་ཚད་སུམ་སྟོང་དྲུག་བརྒྱ་ཡོད་པ་ནཿ ཡི་དྭགས་ཕྱི་ཡི་སྒྲིབ་པ་ཅན་ཞེས་པཿ ཟས་ལ་མེ་དཔུང་མེ་མདག་མེ་དམར་མཐོང་ཿ སྐོམ་ནི་རྣག་ཁྲག་མི་གཙང་ཁྲོ་ཆུར་མངོནཿ དེ་དག་དབང་ཕྱུག་ཏོ་ཅན་གྱིས་བསྲུང་བར་མཐོང་ཿ རྒྱ་མཚོ་དག་ལ་བསྲུང་བ་ཡེ་མེད་དེཿ སྐྱེས་བུ་གོ་མཚོན་ཅན་གྱིས་བསྲུང་བར་མཐོང་ཿ རི་བོ་དག་ལ་གཡོ་འགུལ་ཡེ་མེད་དེཿ འགུལ་ཞིང་རྒྱུག་དང་ཕྱི་ནས་འདྲེད་པར་མཐོང་ཿ ཡི་དྭགས་ནང་གི་སྒྲིབ་པ་ཅན་ཞེས་པཿ མགོ་བོ་རྒྱ་རྫ་ཁ་ནི་ཁབ་མིག་ཙམཿ མགྲིན་པ་རྟ་རྔ་གསུས་པ་ཡུལ་ལྗངས་ཙོམཿ རྐང་ལག་རྒྱ་ཁབ་ཙམ་གྱིས་མི་ཐེག་ཡོདཿ དང་པོར་ཟས་སྐོམ་བཙལ་གྱིས་མི་རྙེད་དང་ཿ རྙེད་ཀྱང་ཁ་ཡི་ནང་དུ་མི་ཚུད་དང་ཿ ཚུད་ཀྱང་མགྲིན་པའི་ལམ་ལ་མི་ཤོང་དང་ཿ ཤོང་ཡང་ལྟོ་བ་ཡུལ་ལྗོངས་མི་ཁེངས་ཡོདཿ ཡི་དྭགས་བར་གྱི་སྒྲིབ་པ་ཅན་ཞེས་པཿ ཤིན་ཏུ་བཀྲེས་སྐོམ་སྡུག་བསྔལ་མ་བཟོད་ནསཿ མི་གཙང་བ་དང་
༼༢༥༦ན༽སྣབས་ལུད་རྙེད་གྱུར་ཀྱང་ཿ གཞན་གྱིས་ཕྲོགས་ནས་སྤྱོད་དབང་མེད་པ་དང་ཿ ཆུ་ཡི་མིང་ཡང་མི་གྲག་སྨིག་རྒྱུ་ལཿ སྐོམ་ནས་ཆུ་ཡིན་སྙམ་ནས་འཐུང་ངུ་འགྲོཿ ཤ་ལྤགས་མེད་པའི་ཀེང་རུས་སྐོམ་པོ་ནིཿ ཉི་མའི་གྲིབ་སོ་ནག་དམ་བྱུང་བ་དང་ཿ དགོངས་ཀས་གཞི་ཁེངས་སྙམ་བྱེད་པ་ཡོདཿ ཡི་དྭགས་སྒོས་ཁུར་སྒྲིབ་པ་ཅན་ཞེས་པཿ ཟས་སྐོམ་འཚོལ་ཕྱིར་བཀོལ་བའི་ཁར་མེ་འབརཿ ཟས་ཟོས་ཁྲོ་ཆུ་ཁོལ་མར་སོང་ནས་ནིཿ ཁང་པ་བསྲེགས་ནས་ལུས་ལས་མེ་སྟག་འཕྲོཿ ཡི་དྭགས་སྤྱི་མཐུན་སྒྲིབ་པ་ཅན་ཞེས་པཿ ཟས་སྐོམ་ཕུན་སུམ་ཚོགས་པས་མཐའ་བསྐོར་ནསཿ རང་ལ་སྤྱོད་དབང་མེད་པར་བཀྲེས་སྐོམ་ཉེནཿ གཞན་གྱིས་ཁྱེར་དོགས་གྲིམས་པར་བསྲུང་བ་ཡོདཿ ཡི་དྭགས་བྱིན་བུ་སྐྱེས་ཞེས་བྱ་བ་ནིཿ ལོངས་སྤྱོད་དཀྱིལ་དུ་རྐང་པ་ནུབ་བྱས་ནསཿ སྐྱེས་བུ་གོ་མཚོན་ཐོགས་པས་བསྲུང་བར་མཐོང་ཿ ཡི་དྭགས་མེ་ལྕེ་འཁོར་ལོ་ཅན་ཞེས་པཿ ཟོས་ཚད་འཐུངས་ཚད་མེ་ལྕེར་འགྲོ་བ་དང་ཿ རུས་པ་འཁྲོགས་ནས་མེ་རུ་འབར་བ་ཡོདཿ དེ་དག་སེམས་ཅན་ཡི་དྭགས་སྡུག་བསྔལ་ཡིནཿ དུད་འགྲོ་ལ་ཡང་མདོར་བསྡུས་རྣམ་པ་བཞིཿ གཉའ་ཤིང་འཛིན་རེ་ཡན་ཆད་ཉི་ཟླ་མེདཿ གླིང་བར་དག་ན་གནས་པའི་དུད་འགྲོ་ནིཿ སོས་ཀའི་ཉི་རྡུལ་བས་ཀྱང་མང་བ་ཡོདཿ རང་གཟུགས་མི་མཐོང་ཉིད་ཤ་ཉིང་གིས་
༼༢༥༦བ༽ཟཿ གཡང་དང་རྦབ་ཏུ་ལྷུང་བའི་སྡུག་བསྔལ་ཡོདཿ གཉིས་པ་བྱིངས་གནས་ཕྱི་ཡི་རྒྱ་མཚོ་ནཿ ཆད་འགགས་སྦྲང་མ་བཞིན་དུ་གནས་པ་སྟེཿ ཆེ་ཆེས་ཆུང་ཆུང་ཐམས་ཅད་ཟ་བ་དང་ཿ གཅིག་ལ་གཅིག་གིས་གཤེད་མའི་སྡུག་བསྔལ་ཡོདཿ གསུམ་པ་སྐྱབས་མེད་དུད་འགྲོ་ཕྲན་བུ་ནིཿ སྐྱེ་བ་རྣམ་པ་བཞི་ལས་སྐྱེས་པ་ཡིཿ རི་དྭགས་གཅན་གཟན་གྲོག་སྤུར་སྲིན་བུ་དང་ཿ རྐང་མང་རྐང་མེད་འདབ་ཆགས་སྡེར་ཆགས་དང་ཿ ཀླུ་ཡི་རིགས་བྱེད་དུད་འགྲོ་ཕྲ་སྦོམ་སོགསཿ ས་ཡི་སྟེང་ན་བསམ་གྱིས་མི་ཁྱབ་སྟེཿ གཅིག་ལ་གཅིག་གིས་ཟ་བའི་སྡུག་བསྔལ་ཡོདཿ རྔོན་པས་རྒྱ་དང་འགག་རྙི་བཙུགས་པ་ཡིསཿ རྒྱུ་ཤེ་སྐྱེ་ཚད་ལོག་པར་འགྲོ་བ་དང་ཿ འགའ་ཞིག་ཞོར་ལ་འགའ་ཞིག་འཆི་བ་ཡོདཿ བཞི་པ་དུད་འགྲོ་ཁ་འཐོར་སྡུག་བསྔལ་ནིཿ མི་ལ་བརྟེན་པའི་དུད་འགྲོ་འདི་དག་ནིཿ ལས་སུ་ཁལ་འགེལ་རྨོས་རྨོ་ཞོ་བཞོས་དང་ཿ སྤུ་འདྲེག་ཤ་འབྱིན་ཁྲག་འདོན་བཙོག་པ་དང་ཿ ཞོ་ཤ་མི་བསྲེ་སྒལ་པ་རྡོལ་རྡོལ་འཁུརཿ ཁོལ་ཙེ་མ་ལུས་རྭ་ཅོ་བྱང་བྱང་འདྲདཿ པགས་པ་བཤུ་བར་འདུག་ཀྱང་ན་ཚ་བསྲནཿ ལུས་པོ་འགས་པར་མཆིས་ཀྱང་སྙིང་རུས་བྱེདཿ སྐྲོད་གཟིར་གསོད་པའི་སྡུག་བསྔལ་དཔག་མེད་ཡོདཿ དེ་དག་སེམས་ཅན་དུད་འགྲོའི་སྡུག་བསྔལ་ཡིནཿ མཐོ་རིས་རྣམ་གསུམ་བདེ་འོ་སྐད་དེ་ཡང་ཿ དངོས་ལ་མཐོ་རིས་ན་ཡང་བདེ་བ་མེདཿ
༼༢༥༧ན༽དགེ་བཅུ་སྤྱད་པས་ལྷ་ལུས་ལེན་ན་ཡང་ཿ སྔ་ལྟས་ལོག་པ་བཅུ་གསུམ་སྡུག་བསྔལ་ཡོདཿ གཞལ་ཡས་ཁང་གི་འོད་ཤོར་ཁ་དོག་ཉམསཿ དཔག་བསམ་ཤིང་འགྱེལ་ཁྲུས་ཀྱི་རྫིང་བུ་བསྐམསཿ མེ་ཏོག་སད་ཁྱེར་མ་རྨོས་ལོ་ཐོག་མེདཿ ཅང་ཤེས་རྟ་ཤི་འདོད་འཇོའི་བ་ཡང་སྟོརཿ ལུས་ཀྱི་འོད་ཉམས་དྲི་མི་ཞིམ་པ་ལྡང་ཿ རྒྱན་ཆ་མེ་ཏོག་འཕྲེང་བ་རྣམས་ཀྱང་བརྙིངསཿ མཆན་ཁུང་གཉིས་རུལ་ཆུང་མས་ཀླས་ལ་བོརཿ ལྷ་གྲོགས་མི་ཉེ་རིང་དུ་གནས་པ་དང་ཿ འཆི་བར་ཤེས་ནས་སྡུག་བསྔལ་དཔག་ཏུ་མེདཿ མི་ལོ་ལྔ་བཅུ་ཕྲག་གཅིག་ལྟས་བྱུང་འཆིཿ ཕྱི་མ་གར་སྐྱེ་ལྷ་ཡི་མིག་གིས་མཐོང་ཿ བསགས་པའི་བསོད་ཟད་སྡིག་འཕེལ་ངན་སོང་ལྟུང་ཿ སྡུག་བསྔལ་ལྔ་མ་མ་སངས་ཕྱི་མས་ནོནཿ གར་སྐྱེ་ལུས་ཀྱི་སྡུག་བསྔལ་མངོན་ཤེས་ཡོདཿ ལྷ་མ་ཡིན་གྱི་གནས་སུ་སྐྱེས་ན་ཡང་ཿ འཐབ་རྩོད་སྡུག་བསྔལ་བརྗོད་ཀྱིས་མི་ལང་སྟེཿ ཕྲག་དོག་ཀུན་བསླངས་མི་དགེ་བཅུ་སྤྱད་པསཿ ལྷ་མ་ཡིན་དུ་མཚམས་སྦྱོར་སྐྱེ་བ་ལེནཿ ལྷ་རྣམས་བསོད་ནམས་ལོངས་སྤྱོད་ཆེ་བ་ལཿ ལྷ་མ་ཡིན་རྣམས་ཕྲག་དོག་སྐྱེས་ནས་འཐབཿ ལྷ་དང་ལྷ་མིན་གཡུལ་གཤོམ་འཁྲུག་པའི་དུསཿ ཕན་ཚུན་འཐབ་རྩོད་ལས་སུ་གོ་མཚོན་བསྟེནཿ མཚོན་ཆའི་འཁོར་ལོས་གནོད་པ་འབའ་ཞིག་སྐྱེལཿ ལུས་ནི་སྨས་ནས་
༼༢༥༧བ༽འདྲད་དང་ཤི་བ་དང་ཿ ངག་ཏུ་མི་སྙན་རྒྱོབ་སོང་སྒྲ་མང་སྒྲོགཿ མ་ཤི་བ་ལ་མེར་བསྲེག་ཆུ་ལ་བསྒྱུརཿ མགོ་འདྲེག་སྙིང་འདོན་ནང་ལྟོ་བླུག་པ་དང་ཿ ཉིན་འཁྲུག་མཚན་འཁྲུག་ལས་ཀ་དམག་ལ་བྱེདཿ འཐབ་རྩོད་སྡུག་ལ་མི་བཟད་དཔག་མེད་ཡོདཿ མི་ཡི་གནས་འདི་སྐྱིད་ཤོས་ཡིན་གྱུར་ཀྱང་ཿ བརྒྱད་དང་འགྱུར་བའི་སྡུག་བསྔལ་དཔག་མེད་ཡོདཿ དང་པོ་ཕོ་མོ་རྒྱུ་རྐྱེན་ཕྲད་པའི་ཚེཿ ཕ་མའི་ས་བོན་ཁུ་ཁྲག་འདྲེས་པ་དེཿ རུལ་སངས་མི་སྡོད་སྟོབས་ལྡན་འཕེལ་བར་བྱེདཿ རིམ་པར་ཆགས་ནས་ལྟེ་བའི་རྩ་མདུད་ནིཿ གྲུ་གསུམ་མ་རྩ་རྒྱལ་པོ་བ་ལང་མིགཿ སྦལ་པའི་སྒོ་ང་ཙམ་ཞིག་ཆགས་པའི་དུསཿ མ་ལ་ལྟོ་ན་དམིག་ལོའི་ན་ཚ་ནིཿ སྙིང་རུས་ཅན་ལ་སྦྲང་སྨྱོན་བླུད་པ་འདྲཿ མགོ་བོ་ལྗི་ལ་ལུས་པོ་གཙེ་ཤུམ་བྱེདཿ ཡར་ཀླུངས་མར་འབྱངས་སྐད་འགགས་མི་ཡིད་འདོདཿ ཟླ་བ་དགུ་ན་ལུས་ཟུངས་བདུན་རྫོགས་ཏེཿ མ་ཉིད་ལྟོགས་པས་གཡང་ལ་བཏང་བ་ལྟརཿ ལུས་འདར་ལང་ལིང་ཕྱང་ཕྱོང་སྡངས་སྐྲག་ཡོདཿ འགྲངས་བའི་དུས་ན་བྲག་ལ་བཅར་བ་ལྟརཿ བསྐུལ་བསྐྱོད་མི་ཤེས་ལུས་པོ་ཆ་ཆར་བསྡམསཿ ཕོ་མོ་འཁྲིག་དུས་མེ་ཉེར་བཙོས་པ་ལྟརཿ ལུས་པོ་ཆེ་ཡལ་གཙོ་ཞུམ་ཚ་ཙག་བྱེདཿ མ་ཡིས་ཕྱིན་དུས་རླུང་གིས་བསྐྱོད་པ་ལྟརཿ མཐོ་ལིང་དམའ་ལིང་བསྒོར་བསྒོར་ཐོམ་ཐོམ་བྱེདཿ མ་ཡིས་ཉལ་དུས་
༼༢༥༨ན༽རི་བོས་མནན་པ་ལྟརཿ ཁོལ་ཙེ་མ་ལུས་གང་ན་འདིར་ན་མེདཿ མ་ཡིས་ལྟོ་ཟོས་ཐིབས་འོག་ཚུད་པ་ལྟརཿ ནག་ཐོམ་བྱེད་ཅིང་དབང་པོ་ལུས་སྐྱོན་ཡོདཿ མ་ཡི་དྲག་ཤུལ་ལྡང་འདུག་བྱས་ཙ་ནཿ ལུས་འགག་སྙིང་བཏོན་རྦབ་ལ་བསྐྱུར་སྙམ་བྱེདཿ མ་ལ་བཟའ་མེད་ལྷད་ཟས་འབག་འབོག་ཟོསཿ གོས་མེད་མལ་གྲང་སྡུག་བསྔལ་དམྱལ་བ་འདྲཿ ཟླ་ངོ་བཅུ་སོང་ལུས་ཟུངས་རྫོགས་གྱུར་ཏེཿ མགོ་ཞབས་ལོག་ནས་སྐྱེ་བར་གྱུར་པའི་ཚེཿ བཙའ་སྒོ་ཡངས་དོག་བྱེ་བྲག་ཐ་དད་ཀྱིསཿ མ་དང་བུ་གཉིས་གཤིན་ཡུལ་གོ་མ་ཕྱེད་བོརཿ མ་བུ་གཉིས་ཀ་ན་ཚེའི་སྡུག་བསྔལ་ཆེཿ མ་ཡི་ཁ་རུས་མ་གཏོགས་རུས་མཚམས་བྱེཿ ལུས་ནི་ཚལ་པ་སྟོང་དུ་གས་སྙམ་བྱེདཿ བུ་ཆུང་སུབས་ཁར་པགས་པ་བཤུས་པ་ཙམཿ ནུས་པ་ཡོད་ཚད་ཕྱི་རུ་བསྐྱེད་པ་ཡིསཿ སེམས་དང་ལུས་དུབ་གཏུན་ཁུང་བརྡུངས་པ་འདྲཿ སྟན་ཁར་བྲུལ་དུས་ཚེར་ཕུང་གསེབ་བསྐྱུར་ལྟརཿ གོས་སུ་དྲོ་འཇམ་པགས་པ་བསྐོན་གྱུར་ཀྱང་ཿ མ་ཡི་མངལ་གནས་དྲོ་འཇམ་མ་ལགས་ཏེཿ ལུས་ལ་འབྲད་དང་ཟུག་དང་ན་ཚ་འོདཿ མ་ཡིས་པད་བླངས་བྱ་ཕྲུག་ཁྲས་ཁྱེར་ལྟརཿ ལྟེ་བ་བྲེགས་པས་སྙིང་ལ་ཚེར་ཟུག་འདྲཿ དེ་ནས་ཞག་སྐྱེད་ཟླ་སྐྱེད་ཆེར་གྱུར་ཀྱང་ཿ འོག་ན་དྲི་ཆུ་འབྱིན་དང་སྟབས་མ་བདེཿ ཁ་སྐོམ་གྲོད་ལྟོགས་
༼༢༥༨བ༽ལུས་འཁྱགས་ཡན་ལག་སྤྲིདཿ དབང་པོ་ལྔ་རུ་རྡུལ་དང་སེམས་ཅན་ཞུགསཿ པུ་རྫིས་ཉར་ཆག་མ་བྱས་ཉེན་གྱུར་རྣམསཿ འདི་བྱུང་འཆད་པར་མི་ཤེས་དུ་བ་ལསཿ མ་དེ་བརྩེ་ཞིང་བུ་ལ་བྱམས་ན་ཡང་ཿ ནུ་སྒོགས་དེ་ཉིད་ཁར་བརྫངས་ཨ་བོ་ལསཿ ཁོ་ཡི་རེ་བ་སྐོང་བར་མི་འགྱུར་རོཿ དེ་ནས་ཆེར་སོང་ལང་ཚོ་ངར་ལ་བབཿ ཡོད་པ་སྣ་ལེན་མེལ་ཚེ་བྱེད་བྱེད་ནསཿ བྲེལ་ལ་ཁ་སྐོམ་ལུས་སེམས་གཉིས་ཀ་དུབཿ དོགས་ཆུང་ཚི་སྦྱར་བསྲུངས་ཀྱིས་མི་ལང་སྟེཿ དགྲ་མང་གཉེན་ཉུང་སྙིང་ན་གཉིད་ཡར་ནསཿ བལྟོས་པ་མ་འཁྱོངས་དོགས་ནས་སེམས་ཁྲལ་བྱེདཿ ཉེ་འབྲེལ་རགས་ཤིང་མཐུན་དང་བྲལ་གྱིས་དོགསཿ ཐག་རིང་ཞག་གསུམ་སྡོད་ཀྱང་གློ་མི་བདེཿ ཞག་གཅིག་ན་ཡང་སེམས་འཚུབ་སྙིང་མི་དགའཿ ཤི་ན་གསོན་པོ་མྱ་ངན་ཡུས་ཀྱིས་བརྒྱལཿ དྭ་ཕྲུག་ཡུགས་ས་བཅོས་མེད་སྡུག་བསྔལ་ཆེཿ ཟས་གོས་ནོར་མེད་ཐ་མ་བུ་ལོན་འཁོརཿ སྔ་མའི་སྡུག་བསྔལ་ཕྱི་མ་ཕྱི་མས་ལེནཿ སྡུག་བསྔལ་གྲ་རྒྱས་དང་བླངས་སྦྱིན་སྦྱར་དམཿ མི་འཆམ་ཉེ་འབྲེལ་གཅིག་ཡུས་གཅིག་ལ་ཆེཿ འགྲོགས་ཤེས་མེད་པའི་འགྲས་ཡུས་ཆེན་པོས་འཁོནཿ ནང་འཐབ་ནུབ་འཐབ་ཁང་ན་སུན་ཚིག་འབྱིནཿ རང་ལ་མེད་པས་གཞན་ཡོད་སྡུག་བསྔལ་ཆེཿ ལ་ལའི་ནོར་རྫས་ལ་ལས་ཧབ་ཐོབ་བྱེདཿ མེད་པར་དབུལ་ཕོངས་ཡོ་བྱད་ལག་བོར་ཏེཿ ནོར་གྱིས་ཤེད་བསྐྱངས་
༼༢༥༩ན༽ཟས་ཀྱིས་གཉའ་བཅག་ནསཿ བཙལ་གྱིས་མི་རྙེད་ལྟོགས་ལ་ཐང་ཆད་ནསཿ མཉམ་པོས་མཉམ་པོའི་ཁ་རོ་བལྟ་དགོས་ལཿ གོས་ངན་ལྷད་ཟས་བྲེན་གཡོག་རང་ཡི་མུགཿ བཟའ་མེད་གོས་མེད་སྤྲུག་མང་བསྙས་པས་སྡུགཿ རང་མགོ་དྲག་ན་རྒྱལ་པོའི་འཇིགས་པས་སྡུགཿ རང་མགོ་ངན་ན་ཁ་ཉེན་དབང་ཆུང་སྡུགཿ ཞ་འཐེང་འོན་ལོང་ལྐུགས་གླེན་ལུས་ཉམས་སྡུགཿ འགའ་ཞིག་མི་ལ་ཕྱུགས་བཞིན་ཉོ་བཙོང་སྡུགཿ འཇིག་རྟེན་པ་རྣམས་བོད་འབྲོག་སོ་ནམ་སྡུགཿ ཨར་ཇག་རྐུན་མ་སྲོག་དང་ནོར་བསྔོ་སྡུགཿ འགའ་ཞིག་རྗེ་ཡི་དབང་དུ་སོང་ནས་སྡུགཿ ཁ་མང་རང་གི་ཁ་ཡིས་ཕུང་ནས་སྡུགཿ ཁྱོ་ཆུན་བར་སེར་བཟའ་འཐབ་ཀླེས་པོར་སྡུགཿ ལ་ལ་ནད་ལ་ཕན་མེད་བཅོས་ཀྱིས་སྡུགཿ ནད་དུ་མཛེ་བྱུང་མི་ཁྱུ་བུད་པས་སྡུགཿ ཉམ་ཐག་སྤྲང་པོ་རྒྱལ་ཁམས་བསྐོར་བས་སྡུགཿ ལ་ལ་འདྲེ་རྒོད་མི་མ་ཡིན་བཙེར་སྡུགཿ ལ་ལ་
མི་དབང་འབངས 
་ཆོད་ཤོར་དོགས་སྡུགཿ མཁས་བཙུན་ཆོས་ལ་དྲག་ཞན་བྱུང་དོགས་སྡུགཿ དགོན་ཆུང་སློབ་དཔོན་མི་ཆོས་བྱེད་དགོས་སྡུགཿ བན་སྔགས་བོན་པོ་ཕྱ་རིས་ཤོར་དོགས་སྡུགཿ ལ་ལ་མཐུ་བྱེད་དྲག་དང་མི་འབྲལ་སྡུགཿ བན་བཙུན་ཕོ་མོ་བུ་ཆུད་ཆེ་དོགས་སྡུགཿ འཕྱོན་མ་སྒེག་མོ་གུན་སེམས་འཛིན་དོགས་སྡུགཿ ན་ཆུང་བུ་མོ་གོ་རྒས་ལུས་དོགས་སྡུགཿ ཁྱོ་ཆུང་མ་རྙེད་ཕོ་རེང་མོ་རེང་
༼༢༥༩བ༽སྡུགཿ ཁ་དྲག་པོ་རྣམས་ཁ་ཉེན་སོང་དོགས་སྡུགཿ ཁ་ཉན་པོ་རྣམས་ཁ་དྲག་རེ་བས་སྡུགཿ བུད་མེད་པོ་རྣམས་བུ་ཡོད་རེ་བས་སྡུགཿ བུ་ཡོད་པོ་རྣམས་ཉན་དུ་མ་བཏུབ་སྡུགཿ ཁྲིམས་མ་ཆགས་ལ་ཐུ་ཐུམ་ཤེས་སྡུགཿ ཁྲིམས་ཆགས་པ་ལ་སྤུ་ལོ་བཟང་ངན་སྡུགཿ ཕོ་མོ་སྒོ་ཐལ་བ་ལ་མིག་སེར་སྡུགཿ ཡང་སྒོས་སྤྱི་ལ་དམག་དང་མུ་གེས་སྡུགཿ ཆར་ཆེས་ཐན་པ་མི་ནད་ཕྱུགས་ནད་སྡུགཿ མེས་འཇིགས་ཆུས་འཇིགས་གཅན་གཟན་དུག་སྦྲུལ་དང་ཿ དུས་འགྱུར་ལིང་ལོག་གང་སྟོངས་ཡུལ་འཁྲུག་སྡུགཿ གཉིས་པ་རྒས་པའི་སྡུག་བསྔལ་བསྟན་པ་ཡང་ཿ ལོ་མང་ལོན་པས་འབྱུང་བ་བརྙིངས་ཏེ་སྡུགཿ མཛེས་པའི་བཀྲག་ཤོར་སྡུག་པའི་མདངས་ཡལ་ཉམསཿ དྲང་པོར་སྐྱེས་པའི་ལུས་ནི་སྒུར་པོར་སོང་ཿ ཡན་ལག་ཚིགས་ཀྱོག་རྩ་དང་ཆུ་རྒྱུས་གསལཿ ལུས་ཀྱི་སྟོབས་ཤོར་སེམས་ཀྱི་དཔའ་ཞི་ཞིང་ཿ བསོད་ནམས་འཕེན་པ་ཟད་པས་མི་མི་བྱམསཿ ལེགས་པའི་ལང་ཚོ་རྒུད་པས་སྐྱུག་བྲོ་ལྟཿ གཟིར་བའི་ནུས་པ་མེད་པས་རྔན་ཅན་བྱེདཿ མཐོང་བྱེད་ཀྱིས་མ་ཁྱོགས་པས་མིག་མི་གསལཿ འབྱུང་བའི་དངས་མ་རུལ་བས་རྣ་བ་འོནཿ ཤ་གྲོས་མཁུར་ཚོས་ཁྲག་གི་མེ་ཏོག་ཡལཿ རྩ་ཞར་འབུར་སར་འབུར་དོད་ཁུང་སར་ཁུང་ཿ འགྲིག་པོར་སྐྱེས་པའི་སོ་དོན་ཁ་ལྕེ་ལྡིབཿ མགོ་བོ་དཀར་མདོག་ཐོན་ཞིང་གདོང་སྤུ་སྐྱེསཿ ཁ་མ་ཚུལ་བཞིན་ནག་སྤོས་རྒྱའི་
༼༢༦༠ན༽རི་མོ་ཤརཿ བྲང་ལ་སྡོང་སྐས་བྱུང་བས་སྐེ་རྩ་ཁྲེདཿ རྐང་ལག་ཐང་ཤིང་བཞིན་དུ་སྦོམ་འཕྲ་བྱེདཿ ལུས་ལ་གར་བལྟས་ཧེལ་གེ་གཅུས་བཞིན་སོང་ཿ ནོམ་ཞིང་ཁ་མི་གཙོ་བས་ངོ་ཚ་བྱེདཿ ལངས་པས་མི་ཐེག་སྡོད་ན་ལུས་ནི་རྡེབཿ བཤུས་འདེབས་ཧུས་འདེབས་ཡ་ཡ་ཕ་མ་འབོདཿ མཚན་མོ་གཉིད་ཡལ་ནམ་ལ་ལངས་དུས་མེདཿ ཉིན་པར་བྱིང་རྨུགས་ཚ་གྲང་རྐྱེན་མི་ཐེགཿ བདེ་བར་བཞག་ཀྱང་ལྷུ་ཚིགས་ཁོལ་བུར་ནཿ དྲི་ཆུ་མདོ་རུ་མི་འཁྱོལ་གདན་ཁར་འཆོརཿ མི་སྙིང་མི་སྡུག་གཞོན་པས་བརྙས་བཅོས་བྱེདཿ གོས་བུད་གྱོན་པར་མི་ནུས་འཁྱགས་པ་བསྲནཿ ངོ་ཚའི་གནས་རྣམས་སྦེད་པར་མི་ཤེས་སྟོནཿ གཞོན་ནུ་ཀུན་གྱིས་ལྟད་མོ་ཆེ་ཞིང་དགོདཿ བསགས་པའི་ཟས་ནོར་མནའ་མའི་དབང་དུ་ཤོརཿ སྐོམ་ལྟོགས་འོ་དོད་བོས་ཀྱང་བཅོས་མ་ཟེརཿ སྤྱིར་གྱིས་སྡུག་རྒན་ཕུང་རྒན་ཅེས་མིང་འདོགསཿ འཆི་དུས་མི་འདུག་ཟེར་གྱིན་བློས་མི་ལོནཿ བརྩེ་བ་རྣམས་ཀྱང་སུན་ནས་འཆིར་ན་ཟེརཿ རྒན་འཁོགས་ཡི་མུག་ག་ཆད་ལྕེབ་སྙིང་འདོདཿ སེམས་ལ་མ་ལྡན་པ་རྣམས་མི་ལ་འཆདཿ ངུ་ཞིང་ཡི་མུག་ལྟོ་དང་གོས་ཀྱིས་བཀྲེནཿ མེ་ཆུ་མི་འདུས་ལྟོ་གོས་གཡོག་མི་སོསཿ རྒས་པའི་སྡུག་བསྔལ་སྨོན་ནེ་འཆི་བར་འདེབསཿ གསུམ་པ་ན་བའི་སྡུག་བསྔལ་བསྟན་པ་ནིཿ ལུས་ཀྱི་འབྱུང་བཞི་ཆ་མ་སྙོམས་པ་ཡིསཿ རླུང་དང་མཁྲིས་པ་བན་ཀན་
༼༢༦༠བ༽འདུས་པའི་ནདཿ མ་རིག་པས་ནི་རྒྱུ་བྱས་ཡི་དྭགས་རྐྱེནཿ འབྲུམ་པ་རིམས་དང་རྒྱུ་གཟེར་གག་ལྷོག་དང་ཿ མཚོན་གྱིས་གཙེས་དང་གཅོད་ནད་སྡེ་བཞི་སོགསཿ བརྗོད་ཀྱིས་མི་ལང་ན་ཚའི་རིགས་བྱེད་རྣམསཿ ཚབས་ཆེན་བཏབ་པས་ཉམ་ཐག་ནད་པ་དེཿ ན་ཚའི་ཟུག་གཟེར་བསྲན་ཐབས་མ་ཚུགས་པསཿ སོ་དྲེག་མཆུ་དྲེག་རྐང་དྲེག་ལག་དྲེག་ཆགསཿ མིག་ཕུགས་རྡིབ་ཅིང་བ་སྤུ་གྱེན་ལ་གཟིངསཿ འཁུན་འརྒྱངས་སྐད་ངན་འདོན་ཅིང་ལམ་ཚིག་ཟཿ མཛེས་པའི་བཞིན་མདངས་ཉམས་པས་ཡི་དྭགས་འདྲཿ རྒྱུ་མ་སྒལ་འབྱར་ཤ་ཁྲག་རུས་མིག་དི་མཿ ཟས་སྐོམ་ཁར་བཅུག་ལྕེ་ལ་བྲོ་བ་མེདཿ ལུས་ཀྱི་ཟུངས་ཟད་ཡིད་ཀྱི་དྲན་པ་སྟོརཿ ལྡང་དང་རྒྱུ་བར་མི་ནུས་གདན་ལ་འབྱརཿ འབོལ་བར་བཏིང་བའི་གདན་ནི་རྡོ་བས་འཁྲེགསཿ བདེ་མོར་བཅུག་པའི་སྔས་ནི་ཤིང་བས་རེངསཿ འཇམ་པོར་གཡོགས་པའི་གོས་ནི་ཆོར་ལས་རྩུབཿ བསླང་ན་ཉལ་ཟེར་བསྙལ་ན་ཡར་སློང་ཟེརཿ ནད་དབང་སོང་བས་ངོ་ཚ་ཁྲེལ་འཛེམ་ཤོརཿ སྐྲ་ཉག་རེ་ལས་རྡུལ་ཐིགས་རེ་རེ་འཛགཿ ཉིན་མོ་ཉིན་རིང་མཚན་མོ་མཚན་ཡང་རིང་ཿ ཉི་མར་རྒས་དུས་ནམ་ལ་ལངས་དུས་མེདཿ ཟས་སྐོམ་མ་བྱིན་མཐོང་བ་ཙམ་གྱིས་སྐྱུགཿ ཟས་དང་བྲལ་བས་མནམ་ཞིང་ཡིད་མི་འོང་ཿ སྨན་དཔྱད་མི་འཇུག་ཅི་བྱས་གནོད་པར་འགྱུརཿ འདྲེ་བཅོས་རིམ་གྲོ་བྱས་ཀྱང་ནད་མི་སོསཿ སྐོམ་ཡང་
༼༢༦༡ན༽ཟས་ཚོད་འཐུངས་ཚོད་སྨན་པས་འཛིནཿ གཉིད་བསྲུངས་ཟས་བསྲུངས་འགྲུལ་བསྲུངས་རེམ་མ་ཤོརཿ རྒན་པས་གཡོག་བྱས་གཞོན་པས་འདྲེ་བརྡུངས་གཟིརཿ ནད་ཉམས་ཅན་གྱིས་ནད་ཀྱི་མཚང་བཤད་ནསཿ བྱ་ཐབས་འདྲེག་ཚད་མ་ལན་མི་འགྱོད་བྱསཿ ཆོས་ཀྱི་ཐུན་བསྲུང་བན་ཆོག་བོན་ཆོག་གྱེརཿ སྔས་སྲུང་སྨན་པ་མོ་མ་མགྲོན་དུ་བསགསཿ གཉེན་བཤེས་གྲོགས་པོ་མང་པོས་མཐའ་མ་བསྐོརཿ ན་ཚ་འགོགས་དང་བགོ་རུ་མ་བཏུབ་སྟེཿ སུས་ཀྱང་མི་སྟོངས་སྡུག་བསྔལ་གཅིག་པུས་མྱོང་ཿ གཏར་སྲེག་དཔྱད་བྱས་འཆི་ཡང་ན་ཚ་བསྲནཿ སེམས་ཅན་ན་བའི་སྡུག་བསྔལ་བསམ་མི་ཁྱབཿ བཞི་པ་འཆི་བའི་སྡུག་བསྔལ་བསྟན་པ་ནིཿ ཞག་རེ་སོང་ཞིང་ན་ལུགས་ཇེ་མི་མགུཿ རྩ་སྡོད་དབུགས་རྒོད་ཅིས་ཀྱང་མ་ཕན་ནསཿ སྨན་པ་ངོ་ནག་འཆི་དུས་འདིངས་སུ་ཡོང་ཿ སྒོས་སུ་མི་གཅེས་མི་ནི་མི་འབྱུང་སྟེཿ རང་བས་ཤུལ་དུ་དྲན་གསལ་སྡུག་བསྔལ་ཆེཿ གཅེས་དགུ་བཞག་ནས་འགྲོལ་ཐུག་ཙ་གཿ འཆི་བ་མ་བཤོལ་ཚེ་ལ་གདན་འདྲེན་བྱུང་ཿ མགོ་མི་ཐེག་ཅིང་རྐང་པས་ལུས་མི་ཐེགཿ ལག་པས་ཟས་སྣོད་མི་ཐོག་འོར་དུ་ལྷུང་ཿ ནམ་རིང་ཉི་མ་ཤར་བར་ངང་ཐུང་སྐྱེཿ ནད་པ་གོས་སེལ་ལག་པ་ཕྱ་རུ་འདོནཿ ང་ཐེག་སློང་ཟེར་མིག་ནི་མཐོང་སྐར་ལྟཿ སུ་ཞིག་ཉོག་གེ་མོ་ལ་ཤོག་གྱིས་དང་ཿ ང་འཆི་
༼༢༦༡བ༽བསླབ་བྱ་ཚིག་གསུམ་བྱའོ་ཟེརཿ རང་རེ་འཆི་ཡང་བློ་སོ་ཕར་ལ་བྱེདཿ བརྒྱ་ལ་ཤི་དོགས་ཡིན་མེད་དགའ་རབ་ཡོདཿ ལག་པ་བཅངས་ནས་མ་ངུ་སྙིང་རུས་གྱིསཿ ཁ་སྐོམ་ང་ལ་སྐོམ་ཞིག་བསླང་དང་ཟེརཿ ཁ་རུ་བཏུངས་པས་སྣ་བུག་ནང་ལ་ལོགཿ ཞག་མིག་སྔོ་ལིང་མཆི་མ་ཕྲོམ་ཕྲོམ་འདོནཿ གཅེས་པར་བྱས་པའི་ལུས་པོ་འབོར་བའི་རྟགསཿ བྱད་ཀྱི་མདངས་ཡལ་ཧམ་པ་རིང་གི་འགྲོཿ སོ་དྲེག་ནག་པོ་ཆགས་ཏེ་ལྕེ་གཞུང་ནགཿ ལུས་ལྕི་ཤེས་པ་གཏིང་བྱིང་གྲང་ཤུམ་བྱེདཿ ཁ་ཆུ་སྣ་ཆུ་འཛག་ཅིང་ཡར་ཐེན་ཟེརཿ མལ་ཆུགས་མ་ཐུང་ཡར་སློང་མར་སྙོལ་ཟེརཿ ས་ཆུ་མེ་རླུང་འགྱུང་བ་ཐིམ་པའི་རྟགསཿ ཤེས་པ་བྱིང་ནས་དམའ་དིམ་ཡར་ཁྱོག་ཟེརཿ རིག་པ་འཁྲུལ་ནས་ཁ་འཆལ་བླ་བརྡོལ་སྨྲཿ དབུགས་ནི་ཁར་འཚངས་ཕྱི་ནང་འཕུལ་མི་ནུསཿ རྩ་ཞིག་འབྱུང་བ་ཐིམ་པས་རྐན་ལྟོ་ལྡིབཿ བཞིན་མདངས་ཉམས་ཤིང་ཁ་སྣ་གྲེ་ཕུགས་བསྐམསཿ སྣ་ཞོམ་ནག་ཧམས་བལ་དུད་ཚངས་ཀྱི་འགྲོཿ རྣམ་ཤེས་སྙིང་འཐུམས་མི་ངོ་མི་ཤེས་ཤིང་ཿ དབུགས་སྡུད་མི་ཤེས་བོས་ཀྱང་ལན་མི་ཡོང་ཿ ཕྱི་རྒྱུ་ནང་བརྒྱུ་ངར་ངར་ཁག་ཁག་ཟེརཿ ལྕེ་བསྐམས་ཕུགས་བྲོས་སེམས་ནི་ཚིག་པ་ཟཿ སྣ་སྒོ་ཕྱི་ནང་དབུགས་ནི་རྒྱུ་འཕྲུལ་ཆདཿ ནད་པ་ཤོར་ཟེར་བྲང་བརྡུང་འོ་དོད་འབོདཿ ལུས་ལ་འཇུས་ནས་བརྩེ་བས་ཁ་གཏུགས་ཀྱང་ཿ ཁོ་ལ་ཉན་དང་ལྟ་བའི་དབང་མེད་པརཿ རྣམ་པར་
༼༢༦༢ན༽ཤེས་པ་སྙིང་གི་དཀྱིལ་དུ་བརྒྱལཿ གློ་བས་སྙིང་གཡོག་དབུགས་ནི་ཕྱི་རུ་ཤོརཿ ཞག་གསུམ་ནག་ཐུམ་དྲན་མེད་བྱ་བཞིན་བརྒྱལཿ མཆན་འོག་གཉིས་ན་དྲོད་ནི་ཨེན་ཙམཿ གཞན་རྣམས་གྲང་ཐག་ཆད་དེ་ས་རྡོ་བཞིནཿ ནད་གཡོག་ཉེ་འཁོར་སྡུག་བསྔལ་རོས་ནོན་ནསཿ ཤི་བར་བྱེད་ཅིང་གྲོས་འདུན་བློ་སྡུར་བྱེདཿ རོ་དེ་མ་མཁོ་ཅི་བྱེད་ལ་དོར་ནསཿ སར་སྦེད་རིར་སྐྱེལ་མེར་བསྲེག་ཆུ་ལ་བསྐྱུརཿ མེད་པར་བྱས་ནས་བློ་ཡི་བདེ་ཤོས་བྱེདཿ བླ་སློབ་ཟབ་མོ་གཏམ་གླེང་ མི་ཡི་མཐའཿ རྗེ་འབངས ་དགའ་བའི་མཐུན་འཇུག་མི་ཡི་མཐའཿ ཁྱོ་ཆུང་མཐུན་པོར་འགྲོགས་པ་མི་ཡི་མཐའཿ སྨན་པའི་རྒྱལ་པོ་དངོས་སུ་བྱོན་གྱུར་ཀྱང་ཿ ཚེ་ཡི་འཕན་ཟད་སྲོག་ལ་འཐུད་མི་ཤེསཿ དབང་པོ་ཆི་ཡིས་ཁྲིམས་ལ་གཏུག་ཏུ་མེདཿ མི་ལག་རགས་པས་ར་མདའ་བྱ་རྒྱུ་མེདཿ ངག་ནུས་ཅན་གྱིས་མཐུ་གཏད་བརྡེག་ཏུ་མེདཿ མི་ཕངས་ནོར་གྱིས་བླུས་མ་བཏང་དུ་མེདཿ སྔར་མས་ཡུལ་ཕྱོགས་གཞན་ལ་འབྲོས་སུ་མེདཿ སྨྲ་ཚན་ཅན་གྱིས་ཡུས་གཤགས་འདེབས་སུ་མེདཿ མི་འཐེབ་ཡོད་པས་བླུས་མ་གཏང་དུ་མེདཿ ཟས་ནོར་དྲོ་གཟན་གཅིག་དང་འགྲོགས་སུ་མེདཿ མར་གྱི་དཀྱིལ་ནས་སྤུ་བཏོན་བཞིན་དུ་འགྲོཿ གནས་སྐབས་སུ་ཡང་འགྱུར་བའི་སྡུག་བསྔལ་ཏེཿ དགྲ་སྡང་ཕྲད་ཀྱིས་དོགས་པའི་སྡུག་བསྔལ་ཆེཿ གཉེན་བྱམས་བྲལ་གྱིས་དོགས་པའི་སྡུག་
༼༢༦༢བ༽བསྔལ་ཆེཿ ཡོད་པ་མེ་ལ་ཚེ་མེད་པ་ཚོལ་སྐྱོག་སྡུགཿ བུ་འདོགས་བུ་མོ་རྫོང་བས་སེམས་ཁྲལ་ཆེཿ དེ་ལྟར་འགྲོ་བ་རིགས་དྲུག་སེམས་ཅན་རྣམསཿ སྡུག་བསྔལ་རང་བཞིན་ལས་ནི་མ་འདས་པསཿ ཅིས་ཀྱང་དགོས་མེད་བླ་མའི་རྣལ་འབྱོར་སྒོམསཿ སྙིང་པོ་གུ་རུ་པདྨ་སིདྡྷི་གྲོངསཿ གུ་རུ་དམྱལ་བའི་གུ་རུ་རྣམ་པར་གནོནཿ སྐུ་མདོག་དམར་ནག་སྡིག་པ་རྡོ་རྗེ་བསྣམསཿ དམྱལ་བ་ཚ་གྲང་སྡུག་བསྔལ་སྐྱོབ་པར་བྱེདཿ པད་ནི་ཡི་དྭགས་གུ་རུ་རྣམ་སྣང་བྱེདཿ སྐུ་མདོག་སྨུག་ནག་རྡོ་རྗེ་ལྕགས་ཕུར་བསྣམསཿ ཡི་དྭགས་བཀྲེས་སྐོམ་སྡུག་བསྔལ་སྐྱོབ་པར་བྱེདཿ མ་ནི་བྱོལ་སོང་གུ་རུ་སེང་རབ་བརྟནཿ སྐུ་མདོག་མཐིང་ནག་ནག་ཅང་ཏིའུ་དྲིལ་བུ་བསྣམསཿ བྱོལ་སོང་བཀོལ་སྤྱོད་སྡུག་བསྔལ་ཞི་བར་བྱེདཿ སིད་ནི་མི་ཡི་གུ་རུ་པདྨ་འབྱུང་ཿ སྐུ་མདོག་དཀར་དམར་རྡོ་རྗོ་བནྡྷ་བསྣམསཿ མི་རྣམས་སྐྱེ་རྒས་ན་འཆིའི་སྡུག་བསྔལ་སྐྱོབཿ དྷི་ནི་ལྷ་མིན་གུ་རུ་རྣམ་པར་རྒྱལཿ སྐུ་མདོག་དུད་ཁ་ཁ་ཊྭཱཾ་ཀ་ཝི་བསྣམསཿ ལྷ་མིན་འཐབ་རྩོད་སྡུག་བསྔལ་སྐྱོབ་པར་བྱེདཿ ཧཱུཾ་ནི་ལྷ་ཡི་གུ་རུ་སྲིད་ཐུབ་འཛིནཿ སྐུ་མདོག་དཀར་སེར་རྡོར་དྲིལ་ཕྱག་ན་བསྣམསཿ ལྷ་རྣམས་ལྟུང་བའི་སྡུག་བསྔལ་སྐྱོབ་པར་བྱེདཿ རིགས་དྲུག་སྡུག་བསྔལ་གུ་རུ་དྲུག་གིས་སྐྱོབཿ སྒྲུབ་ཐག་ཉེ་ཞིང་བྱིན་རླབས་མྱུར་བ་ཡིནཿ དད་པ་ཅན་གྱི་གང་ཟག་
༼༢༦༣ན༽ཕོ་མོ་ལཿ པད་འབྱུང་གང་དུའང་མ་བཞུད་སྒོ་ཉལ་ཡོདཿ ཆོས་ལུགས་པདྨ་འབྱུང་གནས་ལུགས་སུ་གྱིསཿ ལྟ་བ་ཡས་ཕུབ་སྤྱོད་པ་མས་ནས་འཇོགསཿ ཡིད་ཆེས་དཔང་པོ་མདོ་སྔགས་ལུང་ལ་ཆོསཿ དབེན་གནས་རི་ཐང་མཚམས་སུ་མ་བྱེད་པརཿ ང་ཡིས་བསྒྲུབས་པའི་སྒྲུབ་གནས་ཀུན་ཏུ་གྱིསཿ པདྨ་འབྱུང་གནས་བདག་ནི་ད་འགྲོ་བསཿ ང་དང་མ་མཇལ་མོས་གུས་བྱེད་པ་རྣམསཿ གསེར་དངུལ་སྣག་ཚས་པད་འབྱུང་རྣམ་ཐར་བྲིསཿ སྐྱིད་སྡུག་གང་བྱུང་བདག་གཞན་འགྲོ་དོན་མཛོདཿ ཉམས་དགའ་དལ་བ་མི་ཡི་ལུས་སྐྱེས་ནསཿ གོ་ལྟ་མེད་པའི་བ་ལ་ཁྱུ་མ་ཆེཿ ལྷ་ས་བསམ་ཡས་ཁྲ་འབྲུག་རྩར་སྐྱེས་ཀྱང་ཿ གཙུག་ལག་མི་མཐོང་བསྐོར་བ་མི་བསྐོར་ནཿ དུས་དང་རྣམ་པར་ཤིན་ཏུ་སྡུག་བསྔལ་ཡོང་ཿ ལུས་ངག་ཐ་མལ་མ་བསྡད་ཆོས་གྱིས་དང་ཿ ངན་སོང་སྐྱེས་ཀྱང་ང་རང་བླུ་རུ་ཡོང་ཿ ང་ཡི་ཚེ་ལ་འདས་གྲོངས་ཡོད་མ་ཡིནཿ དད་ལྡན་ མི་རེའི་མདུན་དུ་པད་འབྱུང་རེཿ ཞེས་གསུངས་རྗེ་འབངས ་རྣམས་ཀྱིས་དུད་མོ་ལྡིརཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམས་པར་ཐར་པ་རྒྱས་པར་བཀོད་པ་ལསཿ རྗེ་འབངས་རྣམས་ལ་འཁོར་བའི་ཉེས་དམིགས་དང་བླ་མའི་རྣལ་འབྱོར་གསུངས་པའི་ལེའུ་སྟེ་བརྒྱ་དང་དྲུག་པའོཿ ཿཐ་ཐ་ཉྲ་རྒྱ་རྒྱཿ ཿ