གཏེར་བྱང་།
དབྱངས་ཅན་སྤྲུལ་པ་ཡེ་ཤེས་མཚོ་རྒྱལ་གྱིསཿ མི་བརྗེད་གཟུངས་ཐོབ་མ་འོངས་ཕྱི་རབས་དོནཿ པདྨ་བཀའ་ཡི་ཐང་ཡི་ཅེས་ཀྱང་བྱཿ རྣམ་ཐར་སྐྱེས་རབས་རྒྱས་པ་ཞེས་ཀྱང་བྱཿ ཁྲི་སྲོང་ལྡེའུ་བཙན་བཀའ་ཆིམས་ཞེས་ཀྱང་བྱཿ ལོ་པང་དཀར་ཆག་ཆོས་ཀྱི་འགྱུར་བྱང་འདིཿ ཡི་གེར་བཏབ་ནས་རིན་ཆེན་གཏེར་དུ་སྦསཿ སྐལ་ལྡན་ལས་འཕྲོ་ཅན་དང་འཕྲད་པར་ཤོགཿ ཿཐ་ཐ་ཉྲ་རྒྱ་རྒྱཿ སཱ་མཱ་ཡཱཿ རྒྱ་རྒྱ་རྒྱཿ གཏེར་རྒྱཿ སྦས་རྒྱཿ གསང་རྒྱཿ ཟབ་རྒྱཿ གཏད་རྒྱཿ རྒྱ་རྒྱ་རྒྱཿ ཝ་བཊ་ཐབ་ཀུད་ཐ་ཏྲ་ཐ་ཀཾ་རཾ་ཀཾ་རཾ་ཐ་ཐཿ ཆུ་འབྲུག་ཟླ་བཞི་པའི་ཚེས་བརྒྱད་གཟའ་ཟླ་བ་དང་སྐར་མ་དབོ་འཛོམ་པའི་ཉིན་ཡར་ཀླུངས་ཤེལ་གྱི་བྲག་རྫོང་པདྨ་བརྩེགས་པའི་ངོས་པདྨ་ཤེལ་ཕུག་གི་སྒོ་སྲུང་ཁྱབ་འཇུག་ཆེན་པོའི་ཐུགས་ཀ་ནས་གུ་རུ་ཨུ་རྒྱན་གླིང་པསཿ ལས་ལྡན་གྱི་གྲོགས་གཞུ་ཀུན་རབ་ཧོར་པ་སྒོམ་ཤཱཀ་དང་བཅས་གཏེར་ནས་སྤྱན་དྲངས་པའོཿ ཿཤོག་སེར་ཤོག་དྲིལ་ཞིག་འདུག་ཅིང་ཿ ཡི་གེ་སཾ་སྐྲྀ་ཏའི་ལུགས་སུ་འདུག་པ་ལས་མ་དག་པ་ཚིག་གཅིག་ཀྱང་མེད་པར་ཕབ་ཡོདཿ དཔལ་ཨོ་ཌི་ཡ་ནའི་སློབ་དཔོན་ཆེན་པོ་པདྨ་འབྱུང་གནས་དེ་
༼༢༧༡བ༽ཉིད་ཀྱི་ངོ་མཚར་རྨད་དུ་བྱུང་བའི་རྣམ་པར་ཐར་པ་གདུལ་བྱའི་སྣང་ངོ་དང་མཐུན་པར་མཛད་པའི་ཚུལ་བསམ་གྱིས་མི་ཁྱབ་པ་ཞིག་མཆིས་པ་ལས། བྱེ་བྲག་ཏུ་པདྨ་བཀའི་ཐང་ཡིག་ཅེས་ཡོངས་སུ་གྲགས་པ། ཟ་ཧོར་གྱི་རྒྱལ་པོ་གཙུག་ལག་འཛིན་གྱི་སྐུའི་སྐྱེ་བ་གཏེར་གཏོན་ཨུ་རྒྱན་གླིང་པས། ལས་ལྡན་གྱི་སྐྱེས་བུ་ས་ཧོ་རའི་རྒྱལ་བརྒྱུད་འདི་ཉིད་གཞུ་ཀུན་དཀའ་ར་བར་བཞུགས་པའི་སྐབས་ཧོར་སྒོམ་པ་ཤཱཀྱ་ཞེས་བྱ་བ་དང་བཅས་ཏེ། ཡར་ཀླུངས་ཤེལ་གྱི་བྲག་རིའི་རྫོང་པདྨ་བརྩེགས་པའི་ངོས་ཕོ་བྲང་པདྨ་ཤེལ་གྱི་ཕུག་པ་ནས་གདན་དྲངས་པ་འདི་ཉིད་དར་རྒྱས་ཆེ་བར་འདུག་པས། རིག་འཛིན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱི་འཕྲིན་ལས་དང༌། གསང་ཆེན་རྡོ་རྗེ་ཐེག་པ་སྔ་འགྱུར་གྱི་བསྟན་པ་རིན་པོ་ཆེ་ཕྱོགས་ཀུན་ཏུ་དར་ཞིང་རྒྱས་པ་དང་སྐྱེ་དགུ་རྣམས་ལ་ཕན་བདེ་འབྱུང་བའི་ཕྱིར། ཟ་ཧོར་མི་དབང་བསོད་ནམས་སྟོབས་ཀྱི་རྒྱལ་པོས་ཆོས་སྦྱིན་མི་ཟད་པའི་བར་དུ་སྤེལ་བ་ལ། ཡིད་ཆེས་པའི་ཕྱི་མོ་ནི་ཚིགས་སུ་བཅད་པ་ཁོ་ན་ཡིན་པ་ལས། ཕལ་ཆེར་གྱིས་ཡིག་ཆ་ཆོད་གང་ཆེ་བྱས་པས་གོང་འོག་གི་གཅོད་མཚམས་ཉམས་པ་དང༌། གོ་བ་ཕྱིན་ཅི་ལོག་ཏུ་སོང་བ་དང༌། བྲིས་ནོར་གྱི་རྒྱུན་འབྱམས་པ་དང༌། ལ་ལ་རོ་བླུན་པོ་གཟུ་ལུམས་ཅན་གྱི་རང་བཟོའི་ལྷད་བཅུག་པ་ཡང་འགའ་རེ་སྣང་བས། ཕྱི་མོའི་རིགས་ཇི་སྙེད་པ་བསགས། ཁྱད་པར་དུ་གཏེར་སྟོན་གྱི་ཕྱག་བྲིས་ལས་
༼༢༧༢ན༽བཤུས་ཟེར་བ་ཞིག་དང༌། ཡི་གེ་རྙིང་བལ་རིས་ཀྱི་དབུ་ལྷ་ཡོད་པ་ཞིག་དང༌། ཨུ་རྒྱན་གླིང་པའི་གདུང་བརྒྱུད་ཀྱིས་བཞེངས་པ་ཨེའི་པར་མ་གསུམ་ཅུང་ཟད་དག་པར་འདུག་པས་ག་བསྟུན། བརྡ་རྙིང་དང་ཡུལ་གྲུ་ཐ་དད་པའི་སྐད་བག་ཙམ་སྣང་བ་རང་སོར་བཞག །སྐབས་འགར་གོ་བ་ཕྱིན་ཅི་ལོག་ཅི་རིགས་འདུག་པས། མངའ་བདག་ཉང་གི་གཏེར་མ་རྣམ་ཐར་ཟངས་གླིང་མར་གྲགས་པ་སོགས་དང་ཡང་བསྟུན་ནས་གྱ་ཚོམས་སུ་མ་བརྒལ་བར་ནན་གྱིས་ཞུས་ཏེ་དག་པར་བྱས་ཡོད་པས་རྣམ་དཔྱོད་ཀྱི་བློ་གྲོས་དང་ལྡན་པ་རྣམས་ཀྱིས་ཡིད་ཆེས་པའི་གནས་སུ་རིག་པར་བྱའོ།། །།སྦྱར་བྱང་། སངས་རྒྱས་ཀུན་འདུས་པདྨ་འབྱུང་གནས་ལ་ཕྱག་འཚལ་ལོ། །ཡེ་ནས་ཀ་དག་ངོ་བོ་ཀུན་བཟང་འོད་མཐའ་ཡས་པ་ཆོས་ཀྱི་སྐུ། །ལྷུན་གྲུབ་རང་བཞིན་རིགས་བརྒྱའི་རང་སྣང་སྤྱན་རས་གཟིགས་མགོན་ལོངས་སྤྱོད་རྫོགས། །འགག་མེད་ཐུགས་རྗེ་ཅིར་ཡང་ལེགས་བསྒྱུར་པདྨ་འབྱུང་གནས་སྤྲུལ་པའི་སྐུ། །ཨ་ཧོ་ཞབས་སེན་དམར་བའི་རྡུལ་དེ་རྣམ་མཁྱེན་ཐོབ་པར་གཅུག་འབབ་མཛོད། །ཨེ་དབྱིངས་སྟོང་པ་ཤེས་རབ་མཚོ་རྒྱལ་དང༌། །ཝཾ་ཡིག་བདེ་ཆེན་ཐབས་ཀྱིས་མཉམ་སྦྱོར་བ། །ཁྱབ་བདག་རྡོ་རྗེ་འཆང་དབང་ཐོད་འཕྲེང་རྩལ། །དཀྱིལ་འཁོར་རྒྱ་མཚོའི་འཁོར་ལོས་སྒྱུར་བའི་གཙོ། །གཅིག་ལས་དུ་མར་བསྟན་པའི་གར་མཁན་བཞིན། །མཚན་བརྒྱད་སྐུ་ཡི་བཀོད་པ་གདུལ་བྱའི་ངོར། །སྣ་ཚོགས་ཚོན་དང་འཕྲད་པའི་
༼༢༧༢བ༽ཤེལ་དཀར་མདངས། །མ་འདྲེས་གསལ་བར་ཤར་བའི་ཚུལ་དེ་རྨད། །འཁོར་བར་འཁྱམས་སོ་ཅོག་གི་འགྲོ་རྒྱུད་ཀྱི། །སྡིག་སྒྲིབ་དྲ་བ་གཅོད་པའི་ཐབས་ཤེས་མཚོན། །སྙིང་རྗེའི་ཕྱག་གིས་བཟུང་ནས་ཡོངས་དབྲལ་བར། །ནམ་ཡང་མི་དལ་མགོན་ཁྱོད་མཛད་པའི་དཔྱིད། །ཁྱད་པར་རྒྱ་བལ་པཎ་གྲུབ་ངང་ཚུལ་གྱིས། །རྣམ་འདྲེན་བཞི་པའི་བསྟན་པ་རིན་པོ་ཆེ། །འཛིན་སྤེལ་བསྲུང་བའི་ཀུན་ཁྱབ་ཐུགས་རྗེ་ཆེ། །སྟོང་ཕྲག་ཉི་མའི་འོད་ཀྱི་གཟི་བྱིན་འཕྲོག །ཡང་སྒོས་གར་དབང་དྲི་མེད་གཟིགས་པ་ཡིས། །ཆུ་སྐྱེས་ལས་འཁྲུངས་འཛམ་གླིང་འདིར་ཆེ་བའི། །རིག་སྔགས་འཆང་བའི་བརྟུལ་ཞུགས་ནུས་རྩལ་གྱིས། །གངས་ཅན་འགྲོ་ལ་བཀའ་དྲིན་ཕ་མཐའ་ཡས། །གངྒཱའི་ཀླུང་རྡུལ་གྲངས་སུ་འདྲེན་སླ་ཡང༌། །མགོན་ཁྱོད་ངོ་མཚར་མཛད་པའི་ཚད་འདི་ཞེས། །མ་འདྲེས་གསལ་བར་འཆར་བའི་ཨཱ་དཱར་ཤ། །ཀུན་མཁྱེན་ཡེ་ཤེས་ལས་གཞན་དམིགས་སུ་མེད། །སྐད་ཅིག་བསྐལ་པ་བསྐལ་པ་སྐད་ཅིག་ཏུ། །བསྒྱུར་ནུས་འགྲོ་རེའི་སྣང་ངོར་མཛད་པ་རེ། །སྟོན་ལ་མཁས་གྲུབ་ཕལ་གྱི་རྣམ་ཐར་བཞིན། །ལོ་ཟླ་དུས་ཀྱི་ངེས་འཚོལ་བཞད་གད་གནས། །ལོ་རྒྱུས་གཞན་ལ་གོམས་པའི་བག་ཆགས་མཐུ་ལྡན་ཀྱང༌། །བརྟས་པས་མང་དུ་ཐོས་པའི་དཔྱོད་ལྷོ་བྲག་སྤྲུལ་སྐུ་གཙུག་ལག་འཕྲེང་བ། ཕྱི་རབས་རྩོམ་རིགས་ཁོ་ནར་སྣང་ཞེས་པ། །སྒྲིབ་རྒྱུན་སྤེལ་ལས་ད་དུང་ཆོས་མི་བསྒྲུབས། །རྟོག་གེའི་ཚིག་ལ་འཆོལ་བའི་ལོག་སྨྲའི་མིས། །བློ་དམན་དགེ་བའི་ལྗོན་ཤིང་
༼༢༧༣ན༽བསྲེག་ནུས་མཁན། །⁽1763⁾རྟག་བརྟན་སྤྲུལ་སྐུ་ཀུན་དགའ་སྙིང་པོ། རྒྱ་མ་གཅོད་གཏུན་རབ་འབྱམས་པ། བྲག་སྒོ་རབ་འབྱམས་པ་ལྟ་བུ། འབྲས་བུ་ཡིད་མི་འོང་བའི་གནས་ངན་ཡུལ། །མྱུར་བར་སྤྲོ་བས་སྤྲོན་པའི་བྱེད་པོ་བཞིན། །མགོན་དེར་སྙིང་ནས་མོས་པས་རྟོགས་བརྗོད་ཚོགས། །ཀློག་འཆང་འདྲི་རྣམས་མཐོ་རིས་ཐར་པའི་སར། །བགྲོད་པར་མ་ཟད་འདོད་ལྷ་ལྔ་བརྒྱད་ཀྱི། །གནོད་པ་མངོན་སུམ་སྤེལ་ལ་སུ་ཞིག་བསྙོན། །དེ་ཕྱིར་ཅལ་སྒྲོག་གྲགས་རྗེས་འབྲང་བ་དང༌། །རྨོངས་ཞེན་ཁ་ཕོར་གཙང་བ་མ་ཡིན་པའི། །དབང་རྣོན་ཁྱོད་རྗེས་འབྲང་བའི་དད་པ་ཡིས། །འཛད་མེད་ཆོས་སྦྱིན་པར་དུ་བསྐྲུན་ལ་སྤྲོ། །སྙིང་དབུས་གཞོན་ནུ་བུམ་སྐུར་གདོད་མ་ནས། །ཞུགས་པའི་རང་རིག་དོན་གྱི་པདྨ་འབྱུང༌། །རང་ངོ་འཕྲོད་པས་ལོགས་སུ་བླ་མ་གཞན། །མི་འཚོལ་དབྱེར་མེད་ངོ་བོ་གཅིག་ཕྱག་འཚལ། །མཆོད་བྱ་མཆོད་བྱེད་མཆོད་པའི་ཡུལ་རྣམས་ཀུན། །སེམས་ཉིད་གཅིག་པུའི་རྣམ་པར་གྲུབ་པ་རུ། །ཐག་ཆོད་ངེས་པ་རྙེད་པས་ཕྱི་དང་ནང༌། །གསང་མཆོད་རང་གི་རང་ལ་སྟོབས་ཚུལ་དབུལ། །ཉི་མའི་སྙིང་པོ་ཡེ་ནས་མུན་པ་དང༌། །བྲལ་བ་ལྟ་བུར་རང་རིག་སྒྲིབ་གཉིས་ཀྱིས། །དོན་ལ་གོས་པ་མེད་ཕྱིར་རྨི་ལམ་ལྟར། །རྨིས་བཞིན་ཀུན་རྫོབ་ངང་དུ་མཐོལ་ཞིང་བཤགས། །མཐའ་ཀླས་བགྲང་བར་དཀའ་བའི་ཞིང་ཁམས་སུ། །པདྨ་ཐོད་འཕྲེང་ཉིད་ལས་གཞན་མིན་པ། །ཕྱོགས་བཅུ་དུས་བཞིའི་བདེར་གཤེགས་མ་ལུས་པའི། །འཛད་མེད་གདུལ་བྱར་འཇུག་པའི་མཛད་
༼༢༧༣བ༽པར་རངས། །སྟོང་གསུམ་འཇིག་རྟེན་འདིའི་ཕྱི་ཕྱོགས་མཚམས་སོགས། །བརྗོད་དཀའ་རྡུལ་སྙེད་ཞིང་གི་སངས་རྒྱས་དང༌། །གུ་རུ་པདྨ་ཟུང་འབྲེལ་མདོ་སྔགས་ཆོས། །འཁོར་ལོ་གདུལ་བྱ་དང་འཚམ་སྐོར་བར་བསྐུལ། །མྱ་ངན་འདར་བཞེད་རྣམ་འདྲེན་མང་པོ་ཡང༌། །འཇའ་ལུས་འཕོ་བ་ཆེན་པོའི་སྐུ་འགྲུབ་པ། །ཁྱེད་ཀྱི་ངང་ཚུལ་དང་མཚུངས་མི་གཡོ་བར། །ངེས་པ་ལྔ་ལྡན་སྐུ་ལྟར་བརྟན་པར་གསོལ། །ལེགས་བྱས་བསགས་པ་འདིས་མཚོན་དུས་གསུམ་གྱི། །བསོད་ནམས་བྱས་སུ་ཅོག་འབྲས་གངས་ལྗོངས་འདིར། །མཚོ་སྐྱེས་རྡོ་རྗེའི་འཕྲིན་ལས་ཡོངས་ཁྱབ་པས། །འགྲོ་རྣམས་བདེ་སྐྱིད་དཔལ་ལ་སྤྱོད་པར་བསྔོ། །པར་འདིའི་ཆེད་དུ་སྒོ་གསུམ་འབད་པ་དང༌། །བཀླགས་ཤིང་འཆང་ཀུན་ཡང་སྲིད་ཐམས་ཅད་དུ། །དགྲ་གདོན་བགེགས་ཀྱི་གཡུལ་ལས་རབ་རྒྱལ་ཞིང༌། །ཚེ་འབྱོར་དབང་ཐང་རྣམ་ཐོས་བུར་འདྲར་ཤོག །ཉོན་མོངས་དེས་བསྐྱེད་སྒྲིབ་འབྲས་རིམ་སྲབ་ནས། །སྐྱེ་བར་པད་འབྱུང་ཞལ་མཐོང་གསུང་ཐོས་ཏེ། །རིང་མིན་རྔ་ཡབ་དཔལ་རིར་རིག་འཛིན་གྱི། །གྲལ་ཞུགས་བསྐྱེད་རྫོགས་རྫོགས་ཆེན་གྱིས་གྲོལ་ཤོག །བསོད་ནམས་ཡོངས་འདུ་སར་པའི་འཁྲི་ཤིང་གི །ཕང་ཕུང་ལོ་འདབ་རྒྱས་པའི་གྲིབ་བསིལ་དུ། །འཇིག་རྟེན་སྤྱི་དང་ཁྱད་པར་བོད་ཡུལ་འགྲོ། །བདེ་ཞིང་བརྟན་པའི་འབྲས་བུ་མྱོང་བར་ཤོག སྭ་སྟི་པྲ་ཛཱ་བྷྱཿཡི་སྒྲར་དྲངས་པའི། ཕུན་ཚོགས་དཔྱིད་ཀྱི་རྒྱལ་མོའི་གླུ་དབྱངས་ཀྱིས། དགའ་སྐྱིད་དབྱར་གྱི་ལང་ཚོ་ཉེར་བཀུག་སྟེ། ཐོག་མཐའ་བར་དགེའི་ཤིས་པས་ཁྱབ་གྱུར་ཅིག སརྦ་མངྒ་ལཾ། དགེའོ།