དཔལ་གྱི་བསམ་ཡས་འབྱོངས་པའི་ལེའུ།
༼༡༤༣ན༽དེ་ནས་རྒྱལ་པོ་ཁྲི་སྲོང་ལྡེའུ་བཙན་གྱིསཿ མནོང་ཞིང་འགྱོད་པས་གུས་པའི་ལྷ་ཕྱག་བཙལཿ བཀུར་གནས་ཁྱོད་ལྟ་བུ་ལ་ཕྱག་མ་བྱསཿ བདག་གི་སྒྲིབ་པ་ཇི་ལྟར་བྱས་ན་འདགཿ སློབ་དཔོན་ཞལ་ནས་གསོན་ཅིག་མངའ་བདག་གསུང་ཿ སྐུ་ཡི་དམ་ཚིག་ཉམས་ཆག་སྐོང་བ་ལཿ ངོ་མཚར་རྡོ་ཡི་མཆོད་རྟེན་ལྔ་བཞེངས་འདགཿ ཅེས་གསུངས་དབུས་སུ་པདྨས་བརྒྱན་པ་བཞེངསཿ ཨུ་རྒྱན་ཆེན་པོས་གཏེར་ཀ་རེ་རེ་སྦསཿ དེ་ནས་སྟོན་ཟླ་ར་བའི་ཚེས་གཅིག་ལཿ བསམ་ཡས་ཕྱགས་ཕེབ་ཕོ་བྲང་གདན་དྲངས་ནསཿ རིན་ཆེན་གསེར་གྱི་ཁྲི་ལ་བཞུགས་སུ་གསོལཿ མཁན་སློབ་གྲལ་ནི་ཞལ་སྤྲོད་བྱས་ནས་སུཿ འཇིག་རྟེན་འདོད་ཡོན་སྣ་ཚོགས་མཉེས་པར་བྱསཿ ཕྱག་རྟེན་མང་པོ་ཕུལ་ནས་ཞུས་པ་ནིཿ བདག་ནི་མི་དགེའི་དཔོན་པོ་གདོང་དམར་རྗེཿ བོད་ཀྱི་མི་ནི་ཉོན་མོངས་རགས་ཤིང་གྱོང་ཿ གདུལ་དཀའ་འདུལ་ཞིང་ཆོས་ཀྱི་རྟེན་འཛུགས་པསཿ སྤྲུལ་སྐུས་ས་གཞི་བྱིན་གྱིས་བརླབ་ཏུ་གསོལཿ ཅེས་གསོལ་སློབ་དཔོན་དགྱེས་པས་འདི་སྐད་གསུངསཿ བོད་ཁམས་སྐྱོང་བའི་མངའ་བདག་ཆེན་པོ་ལགསཿ མཐའ་འཁོབ་བོད་འདི་འདྲེ་ཡི་ཡུལ་དུ་འདུགཿ ལམ་ལ་ལྷ་འདྲེ་གདུག་པ་མང་ཞིག་བཏུལཿ བོད་སྤྲུག་སྤྲེའུའི་ཚ་རྣམས་འདུལ་བའི་ཕྱིརཿ ལྷ་ཁང་བཞེངས་པ་རྒྱལ་པོ་ངོ་མཚར་ཆེཿ གློ་བོ་སྲིན་མོ་གན་རྐྱལ་བཞག་འདྲ་བའིཿ སྙིང་གར་གཙུག་
༼༡༤༣བ༽ལག་ཁང་ནི་དགུ་ཐོག་དགོསཿ ལྟེ་བའི་སྟེང་དུ་མཆོད་རྟེན་བཞེང་དགོས་སོཿ སྲིན་པོའི་མགོ་ལ་དེའུ་ནག་པོ་དགོསཿ རྐང་ལག་བཞི་ལ་མཆོད་རྟེན་བརྒྱ་རྩ་བརྒྱདཿ མལ་གྲོའི་ནང་ན་བོད་ཁམས་དབང་བྱེད་པའིཿ ཀླུ་ཡི་རྒྱལ་པོ་མལ་གྲོ་གཟི་ཅན་ཞེསཿ དེ་ལ་ཀླུ་གཏེར་འཇུག་ཅིང་སྲོག་ཆུ་དགོསཿ དེ་ནས་སློབ་དཔོན་མལ་གྲོའི་ནང་དུ་བྱོནཿ དམ་སྐོང་དོང་སྤྲུགས་འདུས་པའི་བཤགས་པ་མཛདཿ ཀླུ་གཏེར་ཀླུ་རྟེན་བཅུག་ནས་སྲོག་ཆུ་བླངསཿ ཀླུ་ཡིད་དམ་ལ་མ་ཐོགས་ཁ་གནོན་ལཿ གླ་བོ་དགེ་ཀར་གཙུག་ལག་ཁང་བཞེངས་ནསཿ དེ་ནས་ཧས་པོ་རི་ཡི་རྩེ་མོར་བྱོནཿ སྐམ་ཆས་རློན་ཆས་རྫས་ལ་འདུ་རུ་བཅུགཿ སྦོས་པ་བཞི་ལ་གཏེར་ཀ་བཞི་བྱས་ཏེཿ འགྲམ་པ་བཞི་ལ་མེ་བཙའ་བཞི་བརྒྱབ་ནསཿ རུས་སྦལ་མགོ་ལ་རྟ་མགྲིན་བཞེངས་སུ་བཅུགཿ
ཧཱུཾཿ ཉོན་ཅིག་པད་འབྱུང་བཀའ་ལ་ལྷ་འདྲེ་ཉོནཿ འཇིག་རྟེན་ཁམས་ན་མཚུངས་མེད་སྤྲུལ་པའི་སྐུཿ མངལ་གྱིས་མ་གོས་མཚོ་སྐྱེས་རྡོ་རྗེ་ཡིནཿ ལུས་ལ་གང་གིས་མི་ཚུགས་འཆི་མེད་ཐོབཿ འགྲོ་དྲུག་འཁོར་བའི་སྡུག་བསྔལ་འཇིགས་སུ་རུང་ཿ དམུ་རྒོད་སེམས་ཅན་ཚེ་ཐུང་གཡེང་བ་ཆེཿ ཁྲི་སྲོང་ལྡེའུ་བཙན་ལྷ་ཁང་བཞེངས་པ་འདིཿ རྒྱལ་མཚན་རྩེ་ལ་ནོར་བུ་ཕྱར་བ་འདྲཿ བོད་དུ་དམ་ཆོས་བསྟན་པ་ཚུགས་པ་ནཿ ལྷ་འདྲེ་སུ་མ་མགུ་ཡང་རག་མ་ལུསཿ མགྲོན་པོར་རྒྱ་གར་པཎ་ཆེན་
༼༡༤༤ན༽འབོད་པ་འདིཿ མུན་པའི་དཀྱིལ་དུ་སྒྲོན་མེ་ཁྱེར་བ་འདྲཿ བོད་དུ་བདེ་སྐྱིད་དམ་ཆོས་དར་བ་ནཿ ལྷ་འདྲེ་ཡུལ་བུད་སོང་ཡང་རག་མ་ལུསཿ དེ་བས་ཡོན་བཞེས་ས་གཞི་གནང་བ་བྱིནཿ རྒྱལ་པོ་ཁྲི་སྲོང་ལྡེའུ་བཙན་བསམ་པ་སྒྲུབསཿ ལྷ་ཁང་བརྩིགས་ཤིང་ལྷ་འདྲེ་ལས་ལ་འདུཿ སྔགས་འཆང་པདྨ་འབྱུང་གནས་བཀའ་མ་བཅོགཿ ཅེས་གསུངས་ནམ་མཁའ་དག་ལ་འཕུར་ནས་སུཿ རྡོ་རྗེའི་འགྲོས་མཛད་གྲིབ་མ་གར་བྱུང་དུཿ མི་མིན་དགེ་བསྙེན་ཉི་ཤུ་རྩ་གཅིག་དང་ཿ བརྟན་མ་བཅུ་གཉིས་གངས་རི་མོ་དང་ནིཿ གཡའ་རི་མོ་ལ་སོགས་པའི་ལྷ་འདྲེ་དང་ཿ དྲི་ཟ་གྲུལ་བུམ་ཀླུ་དབང་གནོད་སྦྱིན་རྣམསཿ གཟའ་ཆེན་བརྒྱད་དང་རྒྱུ་སྐར་ཉི་ཤུ་བརྒྱདཿ རི་ཀླུང་ཀུན་ནས་ས་རྡོ་མང་པོ་བསྡུསཿ ས་ཕོ་སྟག་ལོ་སྟོན་ཟླ་འབྲིང་པོ་ཡིཿ ཆོས་བརྒྱད་ཕུར་བུ་དར་བ་འབྲུག་གི་ཉིནཿ སྐར་མ་ལག་སོར་ཉིན་པར་རྩིག་རྨང་བཅུགཿ རྒྱལ་པོ་ཉིད་ཀྱིས་བཞེངས་པའི་གཙུག་ལག་ཁང་ཿ དབུ་རྩེ་རིགས་གསུམ་རི་རབ་ཚུལ་དུ་བྱསཿ འཁོར་ས་གསེར་གྱི་རི་བདུན་ཚུལ་དུ་བཀོདཿ ཡཀྵ་ལྟག་འོག་ཉི་མ་ཟླ་བའི་ཚུལཿ གླིང་བཞི་གླིང་ཕྲན་བརྒྱད་ཀྱིས་ལེགས་བསྐོར་བའིཿ མཐའ་མར་ལྕགས་རི་ཆེན་པོ་གཅིག་གིས་བསྐོརཿ ལས་མི་ཁྲི་ཕྲག་དྲུག་གིས་གྱང་བཏང་བསཿ གྱང་འཁོར་གཅིག་ལས་མ་ཐོངས་ངལ་དུབ་ནསཿ སློབ་དཔོན་ལྔ་
༼༡༤༤བ༽འདྲེ་དབང་བསྡུས་ལས་ཀ་བཅོལཿ ཚངས་པ་དང་ནི་བརྒྱ་བྱིན་གྱང་མཁན་བྱསཿ རྒྱལ་ཆེན་བཞི་ཡིས་ལས་དཔོན་བྱས་ནས་སུཿ ཕོ་རྒྱུད་མོ་རྒྱུད་ལྷ་འདྲེ་ཐམས་ཅད་ཀྱིསཿ ཀུ་ཅོའི་སྒྲ་དང་བཅས་ནས་གྱད་བཏང་བསཿ ཉིན་པར་གཟུགས་ཅན་མི་ཡིས་བརྩིགས་པ་བསཿ མཚན་མོ་ལྷ་སྲིན་སྡེ་བརྒྱད་བརྩིགས་པ་མཐོཿ སློབ་དཔོན་མཆིམས་ཕུར་ཀླུ་འདུལ་དགོངས་པར་བཞུགསཿ ཀླུ་ཡིས་མ་བཟོད་ཐབས་ཀྱིས་རྒྱུད་བསྐུར་ནསཿ ཤིང་བཟོ་བ་རྣམས་ཤིང་གིས་ལག་བརྡུགས་ཟེརཿ རྒྱལ་པོ་འདི་ཙམ་ཤིང་ནི་གར་འཆོལ་སྙམཿ དེ་ནས་ཟུལ་ཕུག་རྒྱང་ཆུང་ཚལ་གྱི་ཀླུསཿ བར་ཚོད་བྱེད་དུ་རྒྱལ་པོའི་དྲུང་དུ་བྱོནཿ བདག་གིས་ཤིང་སྦྱིན་སློབ་དཔོན་དགོངས་པ་གློདཿ མནའ་བཀག་མཆིམས་ཕུ་གྲི་གུ་དགེའུ་ར་བཏང་ཿ སློབ་དཔོན་མ་མཐོང་ཁྱུང་ཆེན་སྦྲུལ་ཟ་མཐོང་ཿ དགོངས་པ་གློད་དང་དངོས་གྲུབ་བདོག་ཅེས་སྨྲསཿ ཁྱུང་གི་ཁ་ནས་སྦྲུལ་ཤོར་སློབ་དཔོན་གྱུརཿ དེ་ཙམ་སྐད་སྒྲོག་དངོས་གྲུབ་ཅི་བདོག་གསུངསཿ རྒྱལ་པོས་ཤིང་གི་དངོས་གྲུབ་བདོག་ཅེས་ཞུསཿ སློབ་དཔོན་ཞལ་ནས་ཤིང་གིས་ག་ལ་འཐོགཿ ཀླུ་ཡིད་དམ་ལ་མ་ཐོགས་གནོད་པ་བྱེདཿ ནད་དུ་མཛེ་འོང་དགྲ་རུ་ཀླུ་ལྡང་གསུང་ཿ ཀླུ་འདུལ་བསྐྱར་ནས་མ་ཞུས་རྒྱལ་པོ་འགྱོདཿ གཙུག་ལག་ཁང་ནི་ཕྱེད་ཙམ་འབྱོངས་པ་དང་ཿ རྒྱལ་པོའི་ནོར་ཟད་ཇི་ལྟར་བྱ་ན་ཞུསཿ སློབ་དཔོན་
༼༡༤༥ན༽ཞལ་ནས་ཐབས་ཤིག་ཡོད་ཀྱི་གསུང་ཿ མི་ཡི་རྒྱལ་པོ་ཁྲི་སྲོང་ལྡེའུ་བཙུན་དང་ཿ ཀླུ་ཡི་རྒྱལ་པོ་གྲོགས་པོ་བྱེད་དགོས་གསུང་ཿ ང་ཡིས་ཁྱོད་གཉིས་སྦྲེལ་བའི་འཕྲིན་པ་བྱེདཿ མཚོ་ཆེན་མལ་གྲོའི་འགྲམ་དུ་ཁྲིད་ནས་བྱོནཿ རྒྱལ་པོ་བློན་འབངས་ལུང་པ་ཡ་ཅིག་སྦསཿ སློབ་དཔོན་མཚོ་ཁར་དར་གྱི་སྦྲ་ཕུབ་ནསཿ ཞག་གསུམ་དགོངས་པ་མཛད་ཅིང་བཞུགས་པ་ལསཿ ནང་པར་བུད་མེད་ཤིན་ཏུ་མཛེས་པ་ཞིགཿ མཚོ་ཁར་བྱུང་ནས་སློབ་དཔོན་ཅི་མཛད་ཟེརཿ མི་ཡི་རྒྱལ་པོ་ཁྲི་སྲོང་ལྡེའུ་བཙན་དང་ཿ ཀླུ་ཡི་རྒྱལ་པོ་དགའ་བའི་གྲོགས་པོ་བྱེདཿ རྒྱལ་པོའི་གཙུག་ལག་ཁང་ན་མ་འབྱོངས་བསཿ ཀླུ་ལ་ནོར་སློང་གསུངས་ནས་འཕྲིན་བསྐུར་བསཿ གནངས་ཀྱི་ནངས་པར་སྦྲུལ་ཆེན་ཞིག་བྱུང་ནསཿ ཆུ་ཡི་འགྲམ་དུ་གསེར་ཕྱི་ཉིལ་གྱིས་བྱུང་ཿ རྗེ་འབངས་སྒྲན་ནས་གསེར་ཕྱེ་སྡུད་དུ་བཅུགཿ དེ་དུས་བྱང་ཁམས་སྣ་བརྒྱད་མི་དམངས་ཚོགསཿ ཡུལ་དེར་མི་རྣམས་ཐམས་ཅད་ལྟད་མོར་འདུསཿ ཚོགས་པའི་གསེབ་དུ་བུ་མོ་བཅུ་དྲུག་མཿ ཡིད་འོང་ཤིན་ཏུ་མཛེས་པ་ཞིག་འདུག་ནསཿ རྒྱལ་པོ་འདི་ཉིད་བཙུན་མོར་ཁབ་ན་ཟེརཿ སྐྱེ་བ་སྔ་མའི་མ་ཡིན་རིགས་ངན་གསུངསཿ རིགས་ངན་བུ་མོ་ཕོ་གྱོང་བཟའ་ཞེས་ཟེརཿ འདི་ནི་ཕོ་གྱོང་བཟའ་བས་ཅི་ཡིན་ཀྱང་ཿ ཁབ་ཏུ་བཞེས་དགོས་ཟེར་ནས་བཙུན་མོར་བསྐུརཿ མོ་ལ་གསེར་གྱི་བདག་
༼༡༤༥བ༽མོར་བསྐོས་པ་ལསཿ དེ་ནས་མོ་ཡིས་གསེར་གྱི་བྱིན་བྱས་ནསཿ དབུ་ཚོལ་གསེར་ཁང་བཞེངས་ཏེ་གསེར་ཕྱེ་བཟང་ཿ བཟོ་སྣ་བདུན་གྱིས་ཁྱད་འཕགས་དོ་ཙུག་ལགསཿ ཁམས་གསུམ་ཟངས་ཁང་དམར་རྒྱན་བཟའ་ཡིས་བཞེངསཿ དགེ་རྒྱས་འབྲོ་བཟའ་བྱང་ཆུབ་མ་ཡིས་བཞེངསཿ གླིང་བཞི་ཤར་སྒོ་འཕགས་པ་འཇམ་དཔལ་གླིང་ཿ ལྷོ་ཕྱོགས་ཨཱཪྱ་ པ་ལོ་ནུབ་བྱམས་གླིང 
་ཿ བྱང་གི་ཕྱོགས་ན་བྱང་ཆུབ་སེམས་བསྐྱེད་གླིང་ཿ དེ་དག་འཁོར་དུ་གླིང་ཕྲན་བརྒྱད་ཀྱིས་བསྐོརཿ དག་བྱེད་ཁྲུས་ཁང་བརྡ་སྦྱོར་ཚང་མང་གླིང་ཿ བདུད་འདུལ་སྔགས་པ་སྒྲ་བསྒྱུར་རྒྱ་གར་གླིང་ཿ དཔའ་བོ་བི་ཙ་མི་གཡོ་བསམ་གཏན་གླིང་ཿ རིན་ཆེན་སྣ་ཚོགས་པེ་ཀར་དཀོར་མཛོད་གླིང་ཿ ཟུར་བཞིར་རྡོ་རྗེ་ཕུར་པའི་མཆོད་རྟེན་བཞིཿ དབུ་རྩེ་སུམ་ཐོག་ལུགས་ནི་གསུམ་དང་ལྡནཿ ཀ་བ་སྟོང་དང་རྩ་གཉིས་སྒོ་སོ་དྲུགཿ སྤྱི་རྩེ་ཞེ་གཉིས་སེང་གེ་བརྒྱ་རྩ་བརྒྱདཿ ལྕོག་ཆེན་བརྒྱད་དང་གྲུ་སྐས་ཆེན་པོ་དྲུགཿ མཆོད་རྟེན་དཀར་པོ་ཤུད་བུ་དཔལ་སེང་བཞེངསཿ དེ་ཡང་སེང་གེ་བཞི་ཡིས་ལེགས་པར་བརྒྱནཿ མཆོད་རྟེན་དམར་པོ་རྒྱལ་ཚེ་ལྷས་གནང་བཞེངསཿ དེ་ཡང་པདྨ་སྟོང་གིས་ལེགས་པར་བརྒྱནཿ མཆོད་རྟེན་ནག་པོ་ཏ་ར་ཀླུ་གོང་བཞེངསཿ དེ་ཡང་སྐུ་གདུང་དག་གིས་ལེགས་པར་བརྒྱནཿ མཆོད་རྟེན་སྔོན་པོ་རྡོ་རྗེ་སྤྲེའུ་ཆུང་བཞེངསཿ
༼༡༤༦ན༽དེ་ཡང་ལྷ་ཁང་བཅུ་དྲུག་དག་གིས་བརྒྱནཿ ཀླུ་བཏུལ་སྲོག་ཆུ་བུམ་གཏེར་རེ་རེ་སྦསཿ ལྕགས་རི་ནག་པོ་སྒོ་བཞི་མགོན་ཁང་བཞིཿ སྒོ་བཞིའི་མདུན་ན་རྡོ་རིང་ཆེན་པོ་བཞིཿ ལྕགས་རིའི་རྩེ་ལ་མཆོད་རྟེན་སྟོང་རྩ་བརྒྱདཿ རྡོ་རིང་སྟེང་ན་ཟངས་ཀྱི་ཁྱི་མོ་བཞིཿ སྟག་ནས་ལོ་ལྔ་ཤིང་ཕོ་རྟ་ལ་འབྱོངསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ དཔལ་གྱི་བསམ་ཡས་འབྱོངས་པའི་ལེའུ་སྟེ་རེ་གཉིས་པའོཿ ཿཐ་ཐ་ཉྲ་རྒྱ་རྒྱཿ