མ་བཅོས་གཟུགས་བརྙན།

མཁའ་དཀྱིལ་རླུང་ལ་བརྟེན་པའི་ཆུ་ཡི་ཕུང་པོ།།
མཚོ་ཆེན་རྣམ་བཞིས་བཏེགས་པའི་ས་གཞིའི་རྩེ་མོ།།
དཀར་གསལ་གངས་རིས་མཚན་པའི་ངོ་མཚར་བསིལ་ལྗོངས།།
འཛམ་གླིང་མཛེས་པའི་རྒྱན་དུ་མ་བཅོས་ལྷམ་མེ།།
མགོ་ནག་འཕྱེ་བོའི་རིགས་ཀྱི་གཡོ་ཡིས་མ་སྦགས།།
སྐྲ་སེར་མཐིང་མིག་ཅན་གྱི་སྒྱུ་ཡིས་མ་ལྷད།།
དྲང་བདེན་རང་བཞིན་གཙང་མའི་གཤིས་སྤྱོད་བཟང་པོ།།
ནམ་ཡང་འགྱུར་མེད་བོད་མིའི་མ་བཅོས་གཤིས་ཀ།
ལྐོག་གྱུར་ལྷག་བསམ་དག་པ་གནམ་སྟོང་ཟླ་བ།།
རེ་སྨོན་ཚེས་གསུམ་ཚེས་རུའི་ལུས་སྟོབས་རྒྱས་ནས།།
བཟང་གསུམ་ཆ་ཤས་རྫོགས་པའི་བཅོ་ལྔའི་དུང་ཟླ།།
སྐྱེ་རྒུའི་མིག་ལ་མཛེས་པ་མ་བཅོས་གཟུགས་བརྙན།།
སློབ་ཕྲུག་ན་གཞོན་ཕོ་མོ་འགའི་ངོར་མདོ་སྟོད་ནས་བྲིས།།