སྨོན་ཚིག་བསྟན་དར་མ།

མཆོག་གསུམ་ཟླ་བ་བདུད་རྩིའི་ཐིག་ལེ།།
མི་འབྲལ་གདུལ་བྱའི་མཁའ་ལ་ཤར་ནས།།
འོད་དཀར་ཕན་བདེའི་སྣང་བ་དམ་པས།།
འགྲོ་ཀུན་བདེ་བའི་བཀྲ་ཤིས་འཕེལ་ཤོག།
ལུགས་ཟུང་དགའ་བ་གཡས་སུ་འཁྱིལ་བའི།།
གདེངས་ཅན་འཇོག་པོའི་གཙུག་གི་ནོར་བུ།།
བསིལ་ལྡན་ཡངས་པའི་མགྲོན་དུ་ཁུག་ནས།།
མ་སྨད་བསོད་ནམས་དཔལ་གྱིས་འབྱོར་ཤོག།
སྔ་འགྱུར་རྫོགས་ཆེན་ཤྲཱི་སེང་ཆོས་གྲྭ།།
ཐུབ་བསྟན་ཉིན་མོར་བྱེད་པའི་ཕོ་བྲང་།།
བཤད་སྒྲུབ་མདོ་སྔགས་ཆོས་ཀྱི་དགའ་ཚལ།།
འཛམ་གླིང་མཛེས་པའི་རྒྱན་དུ་བརྟན་ཤོག།
ལྷ་མཆོག་འཇམ་དཔལ་གཞོན་ནུའི་མཐུ་ཡིས།།
ཤེས་རབ་གསར་པའི་འོད་སྣང་འབར་ཏེ།།
སྙིང་གི་མུན་པ་ནང་ནས་སེལ་བའི།།
བཀྲ་ཤིས་མཆོག་གིས་བསྟན་པ་དར་ཤོག།