སྲུང་མའི་སྙན་ཤལ་འདོད་གསོལ།
བདག་སོགས་རྨོངས་པར་གྱུར་པའི་གཞན་དབང་གིས།།
འགལ་ཉེས་འཁྲུགས་པར་གྱུར་པའི་ལས་བསགས་པ།།
དམིགས་མེད་ཆོས་དབྱིངས་བདེ་བ་ཆེན་པོའི་ཀློང་།།
རོ་གཅིག་དག་མཉམ་ཆེན་པོར་བཤགས་བགྱིད་ན།།
གཉིས་མེད་ཚངས་པའི་དགྱེས་ཞལ་ད་ངོམ་ལ།།
བྱང་ཆུབ་བར་དུ་བུ་བཞིན་སྐྱོང་མཛོད་ཅིག།
ཅེས་པེ་ཧར་དཀོར་མཛོད་གླིང་དུ་སྲུང་མའི་འཁུ་ལྡོག་ཞི་ཕྱིར་སྙན་ཤལ་ཞིག་གི་ལོགས་སུ་པདྨ་སྐལ་བཟང་དེས་བྲིས་པའོ།།
བདག་ཅག་མ་རིག་རྨོངས་པའི་དབང་གྱུར་པས།།
ལྷ་ཁྱོད་སྐུ་གསུང་ཐུགས་དང་འགལ་གྱུར་པའི།།
བག་མེད་ནོངས་པར་གྱུར་པ་ཅི་བགྱིས་པ།།
དག་མཉམ་དབྱིངས་ཀྱི་ངོ་བོར་བཤགས་བགྱིད་ན།།
མི་དམིགས་ཚངས་པ་མཆོག་གི་དངོས་གྲུབ་ཀྱིས།།
རེ་བའི་འབྲས་བུ་ཡོངས་སུ་བཀང་བ་དང་།།
ཐོགས་མེད་རྣམས་བཞིའི་ཕྲིན་ལས་རབ་འབྱམས་ཀྱིས།།
རྣལ་འབྱོར་བུ་བཞིན་སྐྱོང་བའི་གདོང་གྲོགས་མཛོད།།
ཅེས་པ་འདིའང་པེ་ཧར་གྱི་སྙན་ཤལ་ཞིག་གི་ངོར་བྲིས་པའོ།།