ལྷག་པའི་ལྷ་མཆོག་འཇམ་དཔལ་དཔའ་བོའི་སྒྲུབ་ཐབས་རྒྱུན་ཁྱེར་ཉུང་བསྡུས་ཤེས་རབ་མཆོག་སྦྱིན།
རྒྱལ་ཀུན་མཁྱེན་པའི་རང་གཟུགས་ལྷག་པའི་ལྷ།།
ཡེ་ཤེས་སྐུ་ཅན་འཕགས་མཆོག་འཇམ་དཔལ་དབྱངས།།
སྙིང་དབུས་མི་ཤིགས་དྭངས་མའི་ཐིག་ལེ་རུ།།
འཕོ་མེད་མཉམ་ཉིད་བཞུགས་ལ་གསོལ་བ་འདེབས།།
ཡུན་རིང་སྙིང་ལ་ཉལ་བ་ཡི།།
རྨོངས་པའི་དགྲ་ཆེན་གཞོམ་འདོད་པས།།
མཁྱེན་རབ་ནང་གི་ཉི་མ་ཆེ།།
ལྷ་མཆོག་འཇམ་དཔལ་དཔའ་བོ་བསྙེན།།
ན་མོ་མཉྫུ་ཤྲཱི་ཡེ།
བདག་དང་མཁའ་མཉམ་ཡིད་ཅན་འགྲོ་བའི་ཚོགས།།
མཆོག་གསུམ་ངོ་བོ་འཇམ་དཔལ་དོན་གྱི་ལྷར།།
གུས་པས་སྐྱབས་མཆི་མཐའ་མེད་འཁོར་བ་ལས།།
མ་ལུས་འགྲོ་ཀུན་སྒྲོལ་བར་སེམས་བསྐྱེད་དོ།།
ཨཱཿ སྣང་སྟོང་སྐྱེ་མེད་སྒྱུ་འཕྲུལ་དྲྭ་བའི་སྤྲིན།།
འགག་མེད་རང་ཤར་ལྷུན་གྲུབ་འབྱམས་ཀླས་པའི།།
མདུན་མཁར་དྷཱིཿཡིག་དམར་སེར་ཡོངས་གྱུར་ལས།།
མཁྱེན་རབ་ཡེ་ཤེས་སྐུ་ཅན་ལྷག་པའི་ལྷ།།
རྒྱལ་ཀུན་གསུང་གི་དབང་ཕྱུག་འཇམ་པའི་དབྱངས།།
གུར་གུམ་གསར་པའི་མདངས་འཛིན་གཞོན་ཚུལ་མཛེས།།
མཐོན་མཐིང་དབུ་སྐྲ་ཟུར་ཕུད་ལྔ་ལྡན་འཁྱིལ།།
ཨུཏྤལ་སྔོན་པོའི་ཐོད་ཀྱིས་སྙན་གོང་བརྒྱན།།
ཕྱག་གཡས་ཤེས་རབ་རལ་གྲི་མཁའ་ལ་གདེངས།།
གཡོན་པས་ཨུཏྤལ་སྡོང་བུར་པོ་སྟི་བསྣམས།།
ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས།།
སྣ་ཚོགས་དར་དང་རིན་ཆེན་རྒྱན་དག་གིས།།
ཀུན་ནས་སྤྲས་ཤིང་འོད་སྟོང་འཕྲོ་བ་ཡི།།
གནས་གསུམ་འབྲུ་གསུམ་ཐུགས་དབུས་པད་ཟླའི་སྟེང་།།
དམར་སེར་དྷཱིཿཡིག་འབར་བའི་འོད་ཟེར་གྱིས།།
མ་ལུས་ཕྱོགས་དུས་སྤྲུལ་པའི་ཞིང་ཀུན་ནས།།
མཁའ་ཁྱབ་ཡེ་ཤེས་རྡོ་རྗེ་འཇམ་པའི་དཔལ།།
འཁོར་དང་བཅས་པ་སྤྱན་དྲངས་གཉིས་མེད་བསྟིམ།།
ཨོཾ། མ་ཆགས་བདེ་ཆེན་སྟོང་པའི་རང་རྩལ་ལས།།
གང་ཤར་རོལ་བ་སྣ་ཚོགས་མཆོད་པའི་སྤྲིན།།
དཔག་ཡས་ནམ་མཁའ་གང་བར་ཡོངས་འབུལ་ན།།
བརྩེ་ཆེན་ཐུགས་རྗེས་དགོངས་ཕྱིར་བཞེས་སུ་གསོལ།།
ཨོཾ་ཨཱརྱ་མཉྫུ་ཤྲཱི་ས་པ་རི་སོགས།
རྒྱལ་ཀུན་གསུང་གི་རྡོ་རྗེ་མདའ་རྣོན་འཆང་།།
མཁྱེན་རབ་ཡེ་ཤེས་མེ་ལོང་འོད་ཆེན་ལྡན།།
མཁའ་ལྟར་མཉམ་ཉིད་མཆོག་གི་སྐུ་མངའ་བ།།
བཅོམ་ལྡན་སྨྲ་བའི་རྒྱལ་པོ་ཁྱེད་ལ་བསྟོད།།
སླར་ཡང་ཡི་གེ་བདུན་པའི་སྔགས་ཕྲེང་གིས།།
བསྐོར་བའི་ཐུགས་སྲོག་དྷཱིཿལས་འོད་འཕྲོས་ཏེ།།
བདག་སོགས་སྙིང་ཁར་ཐིམ་པས་རྨོངས་པའི་མུན།།
གཅིག་ཆར་གཞོམ་པའི་སྣང་བ་རབ་རྒྱས་པའི།།
ཏིང་འཛིན་གཡོ་མེད་སྔགས་ཀྱི་བྱེད་པ་ལས།།
སྣང་སྟོང་སྐུ་དང་གསལ་སྟོང་གསུང་རྡོ་རྗེ།།
བདེ་སྟོང་ཐུགས་ཀྱི་ངོ་བོར་ཉེར་འགྲུབ་ནས།།
རིག་སྟོང་ཡེ་ཤེས་རྡོ་རྗེ་འཇམ་པའི་དབྱངས།།
སྲས་བཅས་རྒྱལ་བའི་ཐུགས་དང་གཉིས་མེད་པའི།།
རང་བྱུང་ཡེ་ཤེས་ཆེན་པོར་རོ་གཅིག་གྱུར།།
ཨོཾ་ཨ་ར་པ་ཙ་ན་དྷཱིཿ
རིག་སྔགས་རྒྱལ་པོ་འབྲུ་བདུན་པ།།
ཏིང་འཛིན་གསང་བའི་མན་ངག་དང་།།
གཟེར་བཞིའི་གནད་བསྟུན་མང་བཟླས་མཐར།།
ཤེས་རབ་བློ་འཕེལ་གཟུངས་ཡང་བགྲང་།།
ན་མོ་མཉྫུ་ཤྲཱི་ཡེ་ཀུ་མཱ་ར་བྷཱུ་ཏཱ་ཡ། ཏདྱ་ཐཱ། ཨོཾ་ཨ་ར་ཛེ། བི་ར་ཛེ། ཤུདྷེ་བི་ཤུདྷེ། ཤོ་དྷ་ནི་བི་ཤོ་དྷ་ནི། ཤོ་དྷ་ཡ་བི་ཤོ་དྷ་ཡ། ཨ་མ་ལེ། བི་མ་ལེ། ཛ་ཡ་བ་ཏི་རུ་རུ་ཙ་ལེ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་སྭཱ་ཧཱ།
ཡང་སྙིང་ཐིག་ལེ་ཉག་གཅིག་སྒོ།།
ཡིག་འབྲུ་གཅིག་པ་འཇམ་དབྱངས་སྒྲ།།
སྐྱེ་མེད་རྡོ་རྗེའི་བཟླས་པ་ཡིས།།
མཆོག་ཐུན་ལས་ཀྱི་ལྡེ་ཁ་བསྒྱུར།།
དྷཱིཿདྷཱིཿདྷཱིཿགྲངས་མང་བསགས།
མཐར་ནི་སྣང་སྲིད་འཁོར་འདས་ཀུན།།
དམར་སེར་འོད་ཀྱི་ཕུང་པོར་འཁྱིལ།།
གསང་གསུམ་འཇམ་དཔལ་དཔའ་བོ་ཡི།།
རིག་སྟོང་གཉུག་མའི་རང་ཞལ་བལྟ།།
བསྐྱེད་རིམ་ལམ་གྱི་གསལ་སྣང་ཏིང་འཛིན་ལྷ།།
གནས་ལུགས་གཞི་ཡི་ངོ་བོར་ཡེ་རྫོགས་པས།།
ཆོས་དབྱིངས་སྒྱུ་མ་མཐར་ཐུག་འབྲས་བུའི་ལྷར།།
ཡེ་དག་མཉམ་པ་ཆེན་པོར་རོ་གཅིག་ཨ།།
ཨེ་མ་ཆོས་ཀུན་སྟོང་ཞིང་སྤྲོས་པ་བྲལ།།
མ་འགག་རྟེན་འབྲེལ་རོལ་རྩལ་ཅིར་ཡང་སྣང་།།
བདེན་གཉིས་དབྱེར་མེད་ཟུང་འཇུག་འཇམ་པའི་ལྷས།།
དགྱེས་བཞིན་རྗེས་སུ་བཟུང་བའི་སྐབས་ཕྱེས་ཤིག།
བདག་བློ་རྩེ་གཅིག་ཁྱེད་ལ་ཕྱོགས་གྱུར་ཅིང་།།
གཡོ་མེད་གུས་པས་འདུད་པའི་བརྟུལ་ཞུགས་བཅས།།
ཟུམ་པའི་ཐལ་མོ་སྙིང་གར་ཉེར་བཀོད་ན།།
རྣམ་གཉིས་དངོས་གྲུབ་དམ་པའི་མཆོག་སྩོལ་ཅིག།
རབ་གསལ་ཡིད་ཀྱི་མེ་ལོང་དྭངས་པའི་ངོས།།
མཚན་དཔེའི་གཟུགས་བརྙན་རི་མོ་སྟོང་འབར་བ།།
ཏིང་འཛིན་པིར་གྱིས་བྲིས་པའི་སྣང་སྟོང་སྐུ།།
གསལ་སྣང་ཚད་དུ་ཕྱིན་པའི་མཐུ་བརྟས་ཤོག།
འབྱུང་འཇུག་གཡོ་བའི་རླུང་སྔགས་རྡོ་རྗེའི་སྒྲ།།
འཕོ་བྲལ་བདེ་ཆེན་གདངས་སུ་གནས་གྱུར་པར།།
ཤེས་རབ་དྷཱིཿཡིག་འབར་བའི་སྲོག་ཞུགས་ནས།།
རྣོ་མྱུར་མཚུངས་མེད་སྨྲ་བའི་ལྗགས་ཐོབ་ཤོག།
སྤྲིན་བྲལ་ཟླ་བ་སྟོང་གི་མཛེས་པའི་ཆ།།
གཅིག་ཏུ་བསྡམས་འདྲའི་ངག་དབང་དབྱངས་ཅན་ལྷ།།
བདེ་ཆེན་དགའ་བཞིའི་རོལ་མོར་རྟག་འགྲོགས་པས།།
མི་ཟད་སྙན་ངག་སྨྲ་བའི་ནུས་བྱིན་སྩོལ།།
སྙིང་ལ་འཇམ་དཔལ་དཔའ་བོའི་མཐུ་ཐོབ་པས།།
ཕས་རྒོལ་དྲེགས་པས་བསྒྱིངས་པའི་ལོག་སྨྲ་ཀུན།།
བདེན་ཚིག་རྡོ་རྗེའི་ཐོག་མདས་སྤ་བཀོང་བའི།།
འཇིགས་བྲལ་སྤོབས་པའི་རུ་མཚོན་བདག་ལ་སྩོལ།།
ཐོག་མེད་སྲིད་པའི་སྨག་དང་འགྲོགས་པ་ལས།།
ཡང་དག་ལྟ་བའི་དམིགས་རྣམ་ལོག་པ་ཡི།།
ཐར་ལམ་གཞན་དུ་རེ་བའི་དམུས་ལོང་འགྲོ།།
རྒྱལ་བའི་ཉེ་ལམ་མཆོག་ལ་བཀྲི་ནུས་ཤོག།
འདིར་སྣང་སོ་ཚིས་སྒྱུ་མའི་རྩེད་འཇོ་ལ།།
གཡེངས་བ་མེད་པའི་ཆོས་ཉིད་རང་བབ་བློས།།
འཇམ་དཔལ་གདོད་མའི་གཞི་ཀློང་རྫོགས་པ་ཆེར།།
རང་བཞག་ཆོས་སྐུའི་གཏན་སྲིད་ཟིན་པར་ཤོག།
དགེ་བ་འདི་ཡིས་མཐའ་ཡས་འགྲོ་ཚོགས་ཀྱིས།།
ཡང་དག་བདེ་གཤེགས་ཤེས་རབ་ཐོབ་གྱུར་ནས།།
སྒྲིབ་གཉིས་མུན་པ་དྲུང་ནས་འབྱིན་བྱས་ཏེ།།
ནང་གི་ཉི་མ་སྙིང་ལ་ཤར་གྱུར་ཅིག།
མི་ཟད་གཟུངས་སྤོབས་བློ་གྲོས་ནོར་བུའི་མཛོད།།
སྙན་འཇེབས་ངག་གི་དཔལ་དང་རྣམ་དཔྱོད་གཏེར།།
མ་ལུས་རབ་འབྱམས་ཕྲིན་ལས་ཀུན་འགྲུབ་སྟེ།།
རང་རིག་འཇམ་དཔལ་དཔའ་བོ་མྱུར་འགྲུབ་ཤོག།
སྐྱེ་བ་སྐྱེ་བ་རྣམས་སུ་དམ་ཆོས་འཛིན།།
ཚེ་རབས་ཚེ་རབས་ཀུན་ཏུ་གཞན་ཕན་སྤྱོད།།
འཇམ་པའི་དཔལ་དང་ངག་དབང་དབྱངས་ཅན་ལྷས།།
འབྲལ་མེད་རྗེས་སུ་འཛིན་པའི་བཀྲ་ཤིས་ཤོག།
ཅེས་པའང་རབ་རྒྱན་མེ་གླང་གནམ་ལོ་གསར་ཚེས་ཀྱི་ཡར་ཚེས་བཅུ་ཡི་ཉིན་རྫོགས་ཆེན་འབྲུག་ཆེན་རིན་པོ་ཆེའི་བཞེད་སྐོང་དུ། པདྨ་ཀཱ་རའི་བསྟན་ཞབས་སུ་སྐྱེས་ཤིང་པདྨ་བཛྲའི་སྐྱེ་མིང་དུ་སྒྲོ་བཏགས་པ་པདྨ་སྐལ་བཟང་དུ་འབོད་པ་དེས། གངས་ལྗོངས་མཁས་པ་འབྱུང་བའི་བསྟི་གནས་ཐེག་གསུམ་ཆོས་སྒྲས་ཁེངས་པའི་རིགས་གྲྭ་ཤྲཱི་སེང་ཆོས་གྲྭ་ཆེན་པོའི་ཤར་ཐོས་བསམ་ནོར་བུའི་གླིང་གི་ཉེ་ཞོལ་རང་སྤྱིལ་གྱི་མཚམས་མལ་ནས་གུང་ཐུན་གྱི་བར་སེང་ཞིག་ལ་བྲིས་པའོ།།