དཔའ་དར་དགྲ་ལྷའི་གཙོ་བོ་གཟི་བྱིན་སྟོབས་ཀྱི་རྒྱལ་པོ་སྣང་རིག་འོད་འབུམ་གྱི་ཝེར་མ་གསེར་པའི་ཉི་འབུམ་དར་ཡག་གི་གཡང་བསང་དགོས་འདོད་ཆར་འབེབ།
ཧཱུྃ་ཧྲཱིཿ རིག་སྟོང་ཀ་ནས་དག་པ་སྤྲོས་བྲལ་དབྱིངས།།
མཁའ་ཁྱབ་འོད་གསལ་བསམ་མི་ཁྱབ་པའི་གདངས།།
འགག་མེད་ལྷུན་གྲུབ་སྣང་ཆར་ཡོངས་ཤར་བ།།
ཟུང་འཇུག་མཁའ་ཡི་རྡོ་རྗེ་འཕོ་ཆགས་བྲལ།།
སོར་རྟོགས་ཡེ་ཤེས་མདངས་དམར་ཧྲཱིཿཡིག་ལས།།
ཉི་མ་འོད་ཟེར་འཕྲུལ་མཚན་སྤྲུལ་པའི་གར།།
མ་རུངས་བདུད་སྡེའི་གཤེད་གྱུར་ལྷའི་དམག་དཔོན།།
ཆེ་རྒྱུད་གསེར་པའི་རུ་འདྲེན་དགྲ་ལྷའི་གཙོ།།
ཉི་འབུམ་དར་ཡག་སྣང་རིག་འོད་ཀྱི་ལྷ།།
གསེར་མདངས་དགྱེས་པའི་ཞལ་མཛེས་གཟི་བརྗིད་ཅན།།
དབང་མདོག་དབང་གི་འོད་དམར་དང་འགྲོག་པས།།
སྲིད་ཞི་བརྟན་གཡོའི་ཚེ་གཡང་གཅིག་ཆར་སྡུད།།
སྐུ་ཆས་དགྲ་ལྷའི་གོ་མཚོན་བཅོ་བརྒྱད་ལ།།
གཡུལ་རྒྱལ་ཝེར་མའི་སྤྲིན་ཕུང་མི་འབྲལ་ཞིང་།།
དབུ་རྨོག་དར་འཕྲུ་མི་ནུབ་རྒྱལ་མཚན་གྱིས།།
ཕྱོགས་ལས་རྣམ་པར་རྒྱལ་བའི་ཀླུང་སྟོབས་སྐྱེད།།
མགྱོགས་ཆེན་ཅང་ཤེས་གསེར་མདངས་སྨུག་པོ་ཡིས།།
སྲིད་གསུམ་ཡུད་ཀྱིས་བསྐོར་བའི་རྩལ་ཤུགས་འཆང་།།
འཁོར་གྱི་དཔའ་བརྟུལ་རྟ་དམག་ཁྲི་འབུམ་ལ།།
གཉན་དམག་བྱེ་བ་དགུ་ཁྲི་འབྲལ་མེད་འགྲོག།
དེང་འདིར་དམ་ལྡན་བདག་གིས་ཁྱེད་གསོལ་ན།།
མ་ཐོགས་མྱུར་བའི་ཤུགས་ཀྱིས་འདིར་གཤེགས་ལ།།
གཙང་མའི་བསང་གི་མཆོད་སྤྲིན་ཏིང་འཛིན་འཕྲུལ།།
ཡིད་འོང་འདོད་ཡོན་སྲིད་འབྱོར་བདོག་དགུས་མཆོད།།
རྣལ་འབྱོར་བདག་གི་ཡུལ་གཞིས་ཕོ་བྲང་ལ།།
འབྲལ་མེད་ཡུན་དུ་འཁོར་བའི་རྟེན་མཁར་ཆོས།།
མི་ཤིགས་རྡོ་རྗེའི་སྐུ་ཡི་རྫོང་ཆེན་ནས།།
གཟི་བརྗིད་ཉི་མ་འབུམ་གྱི་ཟིལ་དབྱངས་ཕོབས།།
འགག་མེད་ནྭ་དའི་གསུང་གི་གསང་བ་ནས།།
སྙན་འཇེབས་སྒྲ་དབྱངས་གཏམ་གྱི་མཁས་གཡང་ཕོབས།།
གསལ་སྟོང་འགྱུར་མེད་ཐུགས་ཀྱི་དཀྱིལ་འཁོར་ནས།།
ཟབ་བརླིང་བརྟན་མཛངས་བློ་གྲོས་གཡང་ཆེན་ཕོབས།།
དཔའ་རྔམ་སྟོབས་ཆེན་གྱད་ཀྱི་དཔུང་ཤུགས་ཀྱི།།
འགྲན་མེད་མཐུ་སྟོབས་ནུས་པའི་རྩལ་གཡང་ཕོབས།།
ཕྱག་མཚན་མདུང་ཞགས་རལ་གྲིའི་སྒྱུར་ཐབས་ཀྱི།།
མི་ཐུབ་གཡུལ་ལས་རྒྱལ་བའི་དཔའ་གཡང་ཕོབས།།
ཁྱད་པར་གངས་ལྡན་ཆོས་ཀྱི་ཞིང་ཁམས་ཆེར།།
སྡེ་བཞིའི་དཔལ་གྱི་འབྱོར་བས་ཕྱུག་པ་དང་།།
ཆོས་སྲིད་བསྟན་པ་དར་ཞིང་བསྟན་འཛིན་མཐུན།།
སྐྱེ་དགུའི་བདེ་སྐྱིད་འཕེལ་བའི་ཕྱྭ་གཡང་ཁུག།
བསྟན་སེལ་དམ་སྲིས་རྒྱུད་དཀྲུག་ལོག་སྦྱོར་མཁན།།
དྲག་ཤུགས་རལ་གྲི་ངར་མས་ཚར་ཆོད་ལ།།
དགྲ་ཁྲག་སྙིང་གི་དྭངས་མ་དཔའ་བའི་སྐྱེམས།།
མ་ལུས་ལྷག་མེད་རོལ་ཞིང་དགྱེས་པར་མཛོད།།
མཐར་ཐུག་འོད་གསལ་ཆོས་སྐུའི་གཞི་དབྱིངས་ཆེར།།
ཁམས་གསུམ་ཡིད་ཅན་སྦྱོར་བའི་འཕྲིན་ལས་ཀྱི།།
རྒྱལ་རྔ་གསར་པ་རྡུང་བའི་བྱེད་པོ་རུ།།
ཁྱེད་ཉིད་དཔུང་དང་བཅས་པས་མཐུ་སྐྱེད་ཅིག།
ཡིད་གཅུག་མཛའ་བ་མི་ཕྱེད་རྡོ་རྗེའི་མདུད།།
དམ་ཚིག་སྲོག་གི་ཕྱག་རྒྱར་ཡོངས་བཞེས་པས།།
དགྲ་བླ་མི་དང་འབྲལ་མེད་འགྲོག་པ་ཡི།།
མགོན་སྐྱབས་ལུས་དང་གྲིབ་བཞིན་མ་གཡེལ་ཅིག།
སྐྱེ་དང་སྐྱེ་བར་འབྲེལ་བའི་ཝེར་མ་ཆེ།།
ཚེ་དང་ཚེ་རབས་ཀུན་ཏུ་ཡོངས་འགོ་བའི།།
བཀྲ་ཤིས་རྟགས་ཀྱི་དགེ་མཚན་དཀར་པོ་ཡིས།།
སྲིད་གསུམ་འགྲོ་བའི་རྒུད་མུན་རྟག་སེལ་ཤོག།
ཅེས་པའང་ཤྲཱི་སེང་ཆོས་གྲྭ་ཆེན་མོའི་ཞལ་ཟུར་ཆོས་གྲྭའི་ཛམྦྷ་ལ་ནོར་དོན་ཁང་གི་འགན་འཛིན་སྐུ་ཞབས་སྡེ་སྣོད་འཛིན་པ་ཕྱག་ཚའི་གསེར་འོད་ཀྱི་ངོར།
གང་གི་སྐྱེ་བའི་ཕྲེང་བར་གླིང་གསེར་པའི་ཉི་འབུམ་དར་ཡག་ཏུ་སྐྱེ་བ་བཞེས་པར་ཞལ་འཆེས་པ་རྫོགས་ཆེན་པདྨ་བཛྲ་གྱི་སྐྱེ་སྲིད་དུ་སྒྲོ་བཏགས་པ། བསྟི་གནས་ཉམས་པར་དོགས་པའི་གཡར་ཁྲལ་གྱི་ཆོས་གཟུགས་འཛིན་པ་པདྨ་སྐལ་བཟང་གིས།
ཡང་རྫོང་པདྨ་དགྱེས་པའི་ཤེལ་ཕུག་ནས་ཤིང་སྤྲེལ་ཧོར་ཟླ་ཚེས་ཡི་མཚམས་མལ་ཐོར་ཐུན་གྱི་བར་གསེང་ཞིག་ལ་གང་ཤར་བྲིས།།