མཁན་ཆེན་ཆོས་དབྱིངས་ཁྱབ་བདལ་རིན་པོ་ཆེའི་ཞབས་བརྟན་གསོལ་འདེབས་བདེན་པའི་མགྲིན་གླུ།
འཆི་མེད་ཐོག་མའི་མགོན་པོ་འོད་མཐའ་ཡས།།
རབ་འབྱམས་ཚེ་ལྷ་ཕོ་ཉ་མགྱོགས་མའི་ཚོགས།།
རྩ་གསུམ་སྲུང་མ་ཡེ་ཤེས་སྤྱན་ལྡན་གྱིས།།
དེང་འདིར་བདེན་ཚིག་གྲུབ་པའི་དགེ་ལེགས་སྩོལ།།
རྒྱལ་དབང་པདྨ་ཀཱ་རའི་སྒྱུ་འཕྲུལ་གར།།
ཆོས་དབྱིངས་མི་གཡོ་ལྷུན་མཉམ་ཡེ་རྫོགས་གཞིར།།
ཁྱབ་བདལ་གཟུང་འཛིན་རེ་དོགས་མདུད་གྲོལ་བ།།
རིགས་བདག་དཔལ་ལྡན་བླ་མ་ཞབས་བརྟན་གསོལ།།
འཇམ་དབྱངས་སྨྲ་བའི་ལྷ་ཡིས་རྗེས་བཟུང་བས།།
མི་ཟད་གཟུངས་དང་སྤོབས་པའི་གཏེར་གྲོལ་བ།།
རྨད་བྱུང་མཁས་པའི་དབང་ཕྱུག་སྨྲ་བའི་ཉི།།
ལྔ་རིག་སྣང་བའི་མཛོད་དུ་རྟག་པར་བཞུགས།།
ཐོས་བསམ་སྒྲུབ་ལ་གཞོལ་བའི་ཐུགས་སྟོབས་དང་།།
དཀའ་ཐུབ་བཟོད་ལ་གོམས་པའི་དམ་བཅའ་བརྟན།།
རྩེ་གཅིག་མཉམ་པར་བཞག་པའི་ཐུགས་རྗེའི་རྒྱུན།།
གསང་གསུམ་རྡོ་རྗེའི་ཆོས་སུ་རྟག་བརྟན་གསོལ།།
མ་བཅོས་དྲང་པོའི་ཡོན་ཏན་གསེར་བཟང་ཁམས།།
ཆོས་བརྒྱད་གཡའ་ཡི་དྲི་མར་མཛའ་མིན་པའི།།
རྣམ་ཐར་གཙང་མའི་རང་བཞིན་དབྱིག་གི་མཆོག།
རྒྱལ་བསྟན་མཆོད་སྡོང་རྒྱན་དུ་རྟག་མཛེས་ཤོག།
འཆད་ལ་ཐོགས་མེད་ཆོས་སྤྱན་རྡུལ་དང་བྲལ།།
རྩོད་པའི་ལྗགས་ལ་བརྒལ་བརྟག་གློག་དམར་གཡོ།།
རྩོམ་པས་ཡང་དག་ལམ་སྟོན་དགེ་བའི་བཤེས།།
གཡོ་མེད་འགྲོ་བའི་མགོན་དུ་རྟག་པར་བཞུགས།།
གང་ཁྱོད་ཆོས་བརྒྱད་ཞེན་ལས་རིང་གྲོལ་བའི།།
མཚན་སྙན་ལྷ་ཡིས་བྱིན་པའི་རྣ་ལོང་གིས།།
བསྟན་འཛིན་ཟོལ་མའི་གསེར་ཁྲི་མཐོན་པོའང་།།
མོག་པོར་བགྱིད་པའི་གཏམ་རྒྱུད་རྫོགས་མ་གྱུར།།
གང་སྐུ་དམར་སེར་གཞོན་ནུར་རྟག་བརྟན་ཞིང་།།
ལེགས་གསུང་མིག་མི་འཛུམ་པའི་སྒྱུ་འཕྲུལ་བརྟན།།
ཐུགས་གསང་ལག་ན་རྡོ་རྗེའི་རོལ་བར་བརྗིད།།
རིགས་གསུམ་སེམས་དཔའི་ངོ་བོར་རྟག་ཏུ་བཞུགས།།
ཆོས་ཉིད་ཆོས་ཅན་རྣམ་དག་བསླུ་མེད་དང་།།
ལྷག་བསམ་རྣམ་པར་དཀར་བའི་རྟེན་འབྱུང་གིས།།
གསོལ་བཏབ་སྨོན་པའི་འབྲས་བུ་བདེ་བླག་ཏུ།།
ཡིད་བཞིན་འགྲུབ་པའི་དགེ་ལེགས་འབར་གྱུར་ཅིག།
མི་ཤིགས་ཁ་སྦྱོར་བདུན་ལྡན་ཚེ་མཐའ་ཡས།།
ཚེ་ཡི་དཔལ་འཛིན་ལྷ་མོ་རྣམ་པར་རྒྱལ།།
ཡིད་བཞིན་འཁོར་ལོའི་ཕྱག་རྒྱར་ལེགས་བཞེངས་ཏེ།།
དབྱེར་མེད་རྟག་པ་དམ་པར་འཚོ་གཞེས་གསོལ།།
ཀ་དག་གཞི་དབྱིངས་ཆོས་སྐུའི་དགོངས་པའི་ཀློང་།།
ལྷུན་གྲུབ་སྣང་བཞི་མཐར་ཕྱིན་ལོངས་སྤྱོད་རྫོགས།།
ཡོངས་གྲུབ་འགྱུར་མེད་རྡོ་རྗེའི་ཆོས་བདུན་དུ།།
ཞིང་འདིའི་འགྲོ་བའི་མགོན་པོར་བརྟན་བཞུགས་གསོལ།།
ཅེས་པའང་དམ་པ་གང་གི་ཞལ་སློབ་ཀྱི་ཐུ་བོ་སྡེ་སྣོད་འཛིན་པ་བདེ་གསལ་མཆོག་གིས་བསྐུལ་བ་བཞིན་རྫོགས་ཆེན་པདྨ་སྐལ་བཟང་དེས་བྲིས་པའོ།།