ངེས་གསང་བསྟན་པའི་གཙུག་རྒྱན་མཆོག་སྤྲུལ་ཐུབ་བསྟན་ཉི་མ་རིན་པོ་ཆེའི་ཞབས་བརྟན་གསོལ་འདེབས་བདེན་ཚིག་རྡོ་རྗེའི་སྒྲ་དབྱངས།
རབ་འབྱམས་ཕྱོགས་དུས་ཀུན་ན་རྟག་བཞུགས་པའི།།
མཆོག་གསུམ་ལྷ་དང་བདེན་ཚིག་གྲུབ་པའི་གཙོ།།
མ་ལུས་ཚེ་ལྷའི་དཀྱིལ་འཁོར་ཡོངས་རྫོགས་པས།།
དེང་འདིར་བདེན་ཚིག་འགྲུབ་པའི་མཆོག་སྩོལ་ཅིག།
རྨད་བྱུང་ཐུབ་པ་མཆོག་དང་དེ་ཡི་སྲས།།
ས་ཆེན་སེམས་དཔའ་རིགས་གསུམ་སྤྲུལ་པའི་གར།།
བསྟན་པའི་སྲོག་འཛིན་མཆོག་གི་སྤྲུལ་པའི་སྐུའི།།
ཞབས་པད་ཡོངས་སུ་བརྟན་པའི་མཐུན་འགྱུར་མཛོད།།
མཁྱེན་པའི་ཉི་མ་ཐུགས་ཀྱི་ཀློང་ནས་ཤར།།
སྨྲ་བའི་ཟླ་བ་ངག་གི་དཔལ་དུ་བཀོད།།
བསྟན་པའི་སྒྲོན་མེ་སྲིད་པའི་མིག་གཅིག་པུའི།།
གྲགས་པའི་དགེ་མཚན་སྲིད་ན་རྟག་འཆར་ཤོག།
རིམ་གཉིས་སྨིན་གྲོལ་གདམས་ཟབ་དགོངས་པའི་བཅུད།།
ལས་ཅན་དག་པའི་འཁོར་ལ་འགྲེམ་མཁས་པའི།།
རིགས་ཀུན་འདུས་པའི་ཁྱབ་བདག་དཀྱིལ་འཁོར་གཙོ།།
མཆོག་གི་རྡོ་རྗེ་སློབ་དཔོན་ཞབས་བརྟན་གསོལ།།
གང་སྐུ་དཔག་བསམ་ཤིང་དང་བུམ་བཟང་བཞིན།།
ཆོས་ཀྱི་མཛོད་ཀྱིས་འགྲོ་བའི་དབུལ་སེལ་བའི།།
གསང་གསུམ་མི་ནུབ་ནོར་བུའི་རྒྱལ་མཚན་དུ།།
དཔག་མེད་ཚེ་ལྷས་རྟག་ཏུ་བསྲུང་གྱུར་ཅིག།
ཨེ་དབྱིངས་སྟོང་ཆེན་མི་འགྱུར་བདེ་བ་ཆེར།།
ཝཾ་ཡིག་འཕོ་ཆགས་མཚན་མའི་སྤྲོས་ཀུན་བྲལ།།
ཡོངས་གྲུབ་འགྱུར་མེད་སྲོག་གི་སྙིང་པོ་རུ།།
མི་ཤིགས་དྭངས་མའི་ཐིག་ལེར་རྟག་བརྟན་ཤོག།
མཐོ་རིས་ལྷ་མང་དབུས་ན་ལྷ་དབང་དང་།།
མཁའ་ལམ་རྒྱུ་སྐར་ཁྲོད་ན་ཉི་ཟླ་བཞིན།།
ས་སྟེང་བསྟན་འཛིན་ཚོགས་ན་ལྷམ་མེ་བ།།
མི་ཉམས་རྡོ་རྗེའི་ཁྲི་ལ་རྟག་པར་བཞུགས།།
དགའ་རབ་དཔའ་བོ་པད་འབྱུང་བཱི་མ་ལ།།
ཐ་དད་མ་ཡིན་འཇིགས་བྲལ་རྒྱལ་བའི་འཕྲུལ།།
ཡང་ཟབ་མཁའ་འགྲོའི་སྙིང་བཅུད་གདམས་པའི་མཛོད།།
གསང་འཛིན་གསང་བའི་བདག་པོར་འཚོ་གཞེས་གསོལ།།
གང་ཁྱོད་ཡོན་ཏན་མཆོག་ལྡན་སའི་ཟླ་བ།།
ཆོས་བརྒྱད་གཡའ་ཡི་དྲི་མས་རིང་སྤངས་པས།།
སྦས་པའི་ཟོལ་འཆང་ས་གསུམ་འགྲོ་བའི་མགོན།།
མི་འདའ་རྡོ་རྗེའི་ཁམས་སུ་བརྟན་པར་བཞུགས།།
མཁྱེན་རབ་སྤོབས་པའི་རྩལ་གསུམ་ནང་ནས་རྫོགས།།
རྣམ་དཔྱོད་ལུང་རིགས་སྡེར་མོ་ཕྱི་རུ་བགྲད།།
མི་ཡི་སེངྒེ་སྙེམ་བྲལ་གདོང་ལྔ་པ།།
སྔ་འགྱུར་གངས་རིའི་སྤོ་ན་རྟག་བརྗིད་ཤོག།
ལྷག་བསམ་རབ་དཀར་དྲི་མེད་སྟོན་ཟླའི་ཞལ།།
རེ་བའི་ཆ་ཤས་རྫོགས་པའི་གོང་བུ་ཆེ།།
འགྲིབ་མེད་རྡོ་རྗེའི་ཚིག་གི་རྒྱས་བརྟན་པ།།
བཀྲ་ཤིས་སྣང་བའི་འོད་དང་འབྲལ་མ་གྱུར།།
བདག་སོགས་དེང་ནས་སྐྱེ་བའི་རབས་ཀུན་ཏུ།།
གང་ཁྱོད་དམ་པའི་མགོན་དང་མི་འབྲལ་ཞིང་།།
མཐའ་ཡས་འགྲོ་བ་སྒྲོལ་ལ་ཆེས་དཔའ་བ།།
མཆོག་གི་རྣམ་ཐར་གཙང་མའི་རྗེས་འགྲོ་ཤོག།
ཅེས་པའང་ལྕགས་ལའི་མཆོག་སྤྲུལ་བུ་ཕྲུག་རིན་པོ་ཆེ་དང་། གནས་ལྔ་རིག་པའི་མཛོད་འཆང་ཚང་སྦོ་དང་། བཀྲ་ཤིས། རྡོ་རྗེ་ལགས་བཅས་ཀྱི་གསུང་བསྐུལ་བཞིན། པདྨ་བཛྲའི་སྐྱེ་མིང་གསུམ་པར་སྒྲོ་བཏགས་པ་པདྨ་སྐལ་བཟང་གིས་རྒྱ་ནག་པོའི་གྲོང་ཁྱེར་པེ་ཅིང་གི་ནུབ་ཕྱོགས་ཀྱི་དགའ་བའི་ཚལ་ནས། རབ་རྒྱན་ས་སྦྲུལ་ཆོ་འཕྲུལ་ཟླ་བའི་ཉའི་སྲོད་འཁོར་ལ་བྲིས་པ་སྨོན་པ་དེ་བཞིན་འགྲུབ་པའི་རྒྱུར་གྱུར་ཅིག།