མཁའ་འགྲོ་རྗེ་བཙུན་མ་ཟླ་གསལ་དབང་མོའི་ཞབས་བརྟན་གསོལ་འདེབས་བར་ཆད་བདུད་ལས་རྒྱལ་བའི་དབྱངས་སྙན།
སྭ་སྟི་སིདྡྷི།
ཀུན་ཁྱབ་མི་ཤིགས་སྟོང་ཆེན་ཕྱག་རྒྱའི་གར།།
བདེ་མཆོག་དགའ་བཞིའི་རོལ་མོར་རྟག་བསྒྱུར་བ།།
མཐའ་ཡས་རབ་འབྱམས་ཚེ་ལྷའི་དཀྱིལ་འཁོར་གྱིས།།
དེང་འདིར་བདེན་ཚིག་གྲུབ་པའི་ཤིས་པ་སྩོལ།།
འོད་མཚན་སྟོང་འབར་དཔག་མེད་ཚེ་ཡི་ལྷ།།
འཆི་མེད་མཆོག་གྲུབ་རྒྱལ་དབང་པདྨ་འབྱུང་།།
འཚོ་མཛད་སྨན་གྱི་བླ་མ་བཻཌཱུརྱས།།
བླ་ཚེའི་ལྗོན་པར་འཆི་མེད་སྲོག་བྱིན་ཅིག།
བདེ་ཆེན་ཆོས་སྐུའི་ཀློང་ན་ཤེར་ཕྱིན་ཡུམ།།
ལོངས་སྤྱོད་རྫོགས་སྐུའི་ཞིང་ན་ཁྲོས་མ་དཀར།།
གང་འདུལ་སྤྲུལ་སྒྱུར་ལབ་ཀྱི་སྒྲོལ་མ་སྟེ།།
དེང་འདིར་གཟུགས་སྐུར་སྣང་མཆོག་རྟག་བརྟན་གསོལ།།
མཚན་བཟང་ཟླ་བའི་དཀྱིལ་འཁོར་ཆ་རྫོགས་ཤིང་།།
ཟབ་གསལ་ནང་གི་ཉི་མ་ཁོང་ནས་འཆར།།
བདེ་སྟོང་དབང་མཛད་སྤྲིན་གྱི་གར་སྒྱུར་མ།།
མཁའ་མཉམ་བདེ་ཆེན་དཔལ་མོ་ཞབས་བརྟན་གསོལ།།
ཨེ་ཝཾ་ཟུང་འཇུག་མཉམ་ཉིད་རོལ་བའི་འཕྲུལ།།
བརྡ་ཐབས་གསང་བའི་ངོ་མཚར་སྣང་བརྙན་འབུམ།།
མངོན་གྱུར་རྟགས་ཀྱི་ཕྱག་རྒྱར་ཡོངས་སྒྱུར་བའི།།
གྲུབ་རིགས་ལས་ཀྱི་དབང་མོ་འཚོ་གཞེས་གསོལ།།
དགྲ་འདུལ་གེ་སར་རྡོ་རྗེ་ཚེ་ཡི་རྒྱལ།།
ཚེ་འཛིན་དང་སྨན་དགྲ་བླ་ཝེར་མ་ཡིས།།
ཁམས་གསུམ་བརྟན་གཡོའི་དྭངས་མ་ཚེ་ཡི་བཅུད།།
གཅིག་བསྡུས་སྲོག་གི་སྙིང་པོས་ཁྱོད་འཚོ་ཤོག།
རིགས་བཞིའི་མཁའ་འགྲོ་ཚེ་རིང་མཆེད་སྡེ་ལྔ་།།
གནས་ཡུལ་ཞིང་སྐྱོང་ཌཱཀྐི་བྱེ་བ་ཡིས།།
ཕྱོགས་བཞིའི་དར་ཐག་སྡུས་ལ་འགྱུར་མེད་ཁམས།།
མི་འདའ་རྟག་ཏུ་བརྟན་པའི་ཆོ་ག་སྒྲུབས།།
ས་སྤྱོད་དགའ་བ་ཡར་འཁྱིལ་ལྷའི་ཕོ་བྲང་།།
བཀྲ་ཤིས་ཚེ་ཡི་བཅུད་འདྲིལ་དགའ་བའི་ཚལ།།
པདྨས་བསྲུངས་པའི་ངེས་དོན་ཆོས་གླིང་ཆེར།།
གཡུང་དྲུང་རེ་ཁས་ཁྱེད་ཞབས་རྟག་མཛེས་ཤོག།
སྣ་ཚོགས་ཞིང་དང་སྐུ་ཡི་བཀོད་པ་ཡིས།།
མི་མཇེད་ཞིང་ཀུན་ཁྱབ་པའི་སྒྱུ་འཕྲུལ་མ།།
ནམ་མཁའ་ཇི་སྲིད་འཁོར་བ་སྟོངས་ཀྱི་བར།།
འབྲལ་མེད་བསྙེན་པའི་སྨོན་པ་འགྲུབ་གྱུར་ཅིག།
ཡང་གསང་ཐུགས་ཀྱི་ཐིག་ལེ་ལུས་མེད་ཀྱི།།
མཁའ་འགྲོའི་ཆོས་སྐོར་འཛིན་པ་རང་གྲོལ་གྱི།།
ཆོས་འཁོར་རྟག་ཏུ་བསྐོར་ཞིང་བཞུགས་པ་ཡི།།
བཀྲ་ཤིས་དགེ་བས་ཞབས་པད་བརྟན་གྱུར་ཅིག།
དགུ་བདུན་གསང་བའི་བར་ཆད་དབྱིངས་སུ་ཞི།།
བདུད་བགེགས་འབྱུང་པོའི་གཡུལ་ལས་རྣམ་པར་རྒྱལ།།
སྣ་ཚོགས་མཛད་པས་གདུལ་བྱའི་རེ་བ་སྐོང་།།
ཕུན་ཚོགས་སྡེ་བཞིའི་དཔལ་གྱིས་འབྱོར་གྱུར་ཅིག།
ཅེས་པའང་གངས་ལྗོངས་མཁས་པའི་འབྱུང་གནས་རྫོགས་ཆེན་ཤྲཱི་སེང་ཆོས་གྲྭའི་བྱང་བཤད་སྒྲུབ་རྣམ་ངེས་གླིང་གི་སྐུ་ཞབས་ཞལ་ཟུར་པ་རིག་པ་འོད་ཟེར་མཆོག་གི་ངོར་རྫོགས་ཆེན་པདྨ་སྐལ་བཟང་དེས་རབ་གནས་ས་སྟག་ཧོར་ཟླ་༤པའི་ཚེས་༡༣ལ། མདོ་སྨད་ཙོང་ཁའི་ཆུ་འགྲམ་གནའ་མཁར་ཟི་ལིང་གྲོང་ཁྱེར་གྱི་རང་སྤྱིལ་ནས་སྨོན་པ་འདིས་ཀྱང་ཞབས་པད་བརྟན་པའི་རྟེན་འབྱུང་གི་སྒོ་འཕར་འབྱེད་པར་གྱུར་ཅིག།