ལྷག་པའི་ལྷ་མཆོག་འཇམ་དཔལ་དཔའ་བོའི་གསོལ་སྨོན་རྨོངས་མུན་སེལ་བའི་ཉིན་བྱེད།
ཨོཾ། དཔལ་ལྡན་གསུང་གི་དབང་ཕྱུག་འཇམ་པའི་ལྷ།།
དམར་སེར་ཉིན་བྱེད་འབུམ་གྱི་གཟི་འོད་འཕྲོ།།
མཚན་རྫོགས་གཞོན་ནུའི་སྐུ་ཅན་ཟུར་ཕུད་འཆང་།།
མཁྱེན་པའི་ཡེ་ཤེས་འབར་ལ་གསོལ་བ་འདེབས།།
བདག་བློའི་སྒྲིབ་གཉིས་མུན་པ་ཡོངས་བསལ་ནས།།
ཆོས་རབ་རྣམ་འབྱེད་སྣང་བ་ཐོབ་པ་དང་།།
མི་ཟད་གཟུངས་དང་སྤོབས་པའི་གཏེར་གྲོལ་ཏེ།།
རྨད་བྱུང་ཆོས་མཛོད་འཛིན་པའི་དཔལ་སྩོལ་ཅིག།
རྒྱལ་བ་བྱེ་བས་རབ་བསྔགས་རྒྱལ་བའི་སྲས།།
གང་ཁྱེད་སྙིང་དབུས་རྒྱན་དུ་རྟག་མཆོད་པས།།
ཟབ་ཡངས་བློ་གྲོས་གསར་པའི་ལྡེ་མིག་གིས།།
གཞུང་ལུགས་སྒོ་བརྒྱ་འབྱེད་པའི་མཐུ་ནུས་བྱིན།།
གུས་ལྡན་སྤྱི་བོར་ཟུམ་པའི་ཐལ་སྦྱར་གྱིས།།
བཏུད་བཅས་གདུང་བའི་ངག་གིས་ཁྱེད་འབོད་ན།།
མཁྱེན་རབ་མཆོག་ཐོབ་མགྲིན་པའི་གཡས་འཁྱིལ་དུང་།།
ཚངས་དབྱངས་ཆོས་ཀྱི་སྒྲ་ཆེན་གྱིས་མཛེས་ཤོག།
ཚིག་ལ་ངག་གི་འདོད་འཇོ་སྨྲ་བའི་དབང་།།
དོན་ལ་འཁྲུལ་བ་ཀུན་སེལ་ནང་གི་ཉི།།
མཁའ་མཉམ་རྒྱལ་བའི་གསང་གསུམ་གཅིག་བསྡུས་དཔལ།།
ཁྱབ་བདག་ལྷག་པའི་ལྷ་དང་དབྱེར་མེད་ཤོག།
ཅེས་པའང་རྫོགས་ཆེན་ཤྲཱི་སེང་ཆོས་གྲྭའི་སྡེ་སྣོད་འཛིན་པ་ཞིག་གི་ངོར་པདྨ་སྐལ་བཟང་དེས་རྫོགས་ཆེན་ཡང་དབེན་འདབ་བརྒྱད་པདྨའི་སྤྱིལ་ཆུང་ནས་བྲིས།།