གཏེར་བདག་གསོལ་བསྡུས་དངོས་གྲུབ་ཆར་འབེབས།

ཧྲཱིཿ ཀུན་ཁྱབ་རིག་སྟོང་ཀ་དག་གདོད་མའི་ངང་།།

ལྷུན་གྲུབ་སྣང་བ་འགག་མེད་རྒྱན་གྱི་གཞི།།

མདུན་མཁར་རིན་ཆེན་བཻཌཱུར་བརྩེགས་པའི་མཁར།།

སྣ་ཚོགས་ནོར་བུའི་མཛོད་ཀྱིས་ཡོངས་གང་དབུས།།

གཏེར་བདག་ཆེན་པོ་ཀླུ་སྲིན་གནོད་སྦྱིན་གཟུགས།།

དཀར་ཕྱོགས་དགྲ་ལྷའི་དཔུང་གི་རུ་སྣ་འདྲེན།།

རེས་འགའ་ནོར་ལྷའི་ཚུལ་གྱིས་དངོས་སྒྲུབ་སྟེར།།

ཐོགས་མེད་མཐུ་ལྡན་སྣང་སྲིད་འཕྲུལ་གྱི་ལྷ།།

པདྨའི་བཀའ་ཉན་ཡུལ་སྐྱོང་ཟོ་དོར་གཙོ།།

ལྷ་ཡི་དམག་དཔོན་རྡོ་རྗེ་ཐོགས་མེད་རྩལ།།

སྲས་བློན་མཆེད་ཟླ་འཁོར་དང་བཅས་པ་ཡིས།།

བདུད་རྩི་གསེར་སྐྱེམས་ཕུད་ཀྱི་མཆོད་པ་དང་།།

སྣ་ཚོགས་ཤིང་སྣ་ཚོགས་པའི་བསང་གསུར་སྤྲིན།།

རོ་བརྒྱའི་ཟས་མཆོག་ལྷ་མིའི་ནོར་སྣ་སོགས།།

མི་ཟད་ནམ་མཁའ་མཛོད་ལ་དགྱེས་རོལ་ནས།།

ཐུབ་པའི་བསྟན་དང་དེ་འཛིན་སྐྱོང་བ་དང་།།

པདྨའི་རིང་ལུགས་འཛིན་པའི་སྔགས་འཆང་བདག།

ཡོན་བདག་བུ་སློབ་བརྒྱུད་འཛིན་བཅས་པ་ཡི།།

ཁ་རྗེ་ཚེ་བསོད་རླུང་རྟ་ཡར་ལ་སྦོར།།

མི་ནོར་ཟས་གཡང་འདོད་རྒུའི་དངོས་གྲུབ་སྩོལ།།

མཐུ་རྩལ་སྟོབས་སྐྱེད་ལེགས་ཚོགས་སྤྲིན་བཞིན་སྤེལ།།

བསམ་དོན་འབད་མེད་ཆོས་བཞིན་འགྲུབ་པ་སོགས།།

ཅི་བཅོལ་ལས་ཀུན་མ་ཐོགས་མྱུར་བསྒྲུབ་མཛོད།།

ཅེས་རྫོགས་ཆེན་པ་པདྨའི་མིང་ཅན་དེས་སོ།།