ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་བཤད་པ།
དེའི་ཐོག་ནས་ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ཟེར་རྒྱུ་དེ། སྤྱིར་ན་མདོ་སྔགས་གཉིས་ཀའི་ལུགས་ཀྱི་བསྒྲུབ་བྱ་མཐར་ཐུག་དེ་རྫོགས་པའི་སངས་རྒྱས་ཀྱི་གོ་འཕང་ཡིན་པ་ལ་མི་འདྲ་བ་མེད་མོད། འོན་ཀྱང་སྒྲུབ་ཚུལ་གྱི་དབང་དུ་བྱས་ན། ཐེག་པ་གོང་འོག་དང་། མདོ་སྔགས་ཀྱི་ལམ་ལ་ཁྱད་པར་ཡོད་པ་རེད། ཁྱད་པར་ཇི་ལྟ་བུ་ཞིག་གིས་གང་ལས་གང་འཕགས་པ་རེད་ཅེ་ན། ཐེག་པ་ཆེན་པོ་དེ་ཉིད། དམིགས་པ་ཆེ་དང་སྒྲུབ་པ་ཆེ་བ་ལ་སོགས་པ་ཁྱད་པར་བདུན་གྱིས་ཐེག་དམན་ལས་འཕགས་ཞེས་གསུངས་ཡོད་པ་རེད། མདོ་ལམ་ལས་སྔགས་ལམ་དེ་གང་གིས་འཕགས་པ་ཡིན་ཞེ་ན། ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པ་ལྟར། མ་རྨོངས་པ་དང་། ཐབས་མང་བ། དཀའ་བ་མེད་པ། དབང་པོ་རྣོན་པོའི་དབང་དུ་བྱས་པ་ཡིན་པ་སོགས་ཁྱད་པར་བཞིའམ་དྲུག་གིས་འཕགས་པ་ཡིན་པས་ན། སྐབས་སུ་བབས་པ་གསང་སྔགས་ཀྱི་ཆོས་འཆད་ཉན་སྒོམ་སྒྲུབ་ཀྱི་དབང་དུ་བཏང་དུས། གནས་དང་དུས་དང་སྟོན་པ། ཆོས་དང་འཁོར་ཏེ་ལྔ་བོ་དེ་ཉིད། ཐ་མལ་མ་དག་པའི་སྣང་བ་རུ་མི་འཛིན་པར། ཕུན་སུམ་ཚོགས་པ་ལྔ་རུ་གསལ་འདེབས་དགོས་པ་རེད། ཕུན་སུམ་ཚོགས་པ་ལྔ་རུ་གསལ་འདེབས་པ་དེ་ཡང་མ་ཡིན་པ་ལ་ཡིན་པར་བཙན་གྱིས་བསྒྱུར་ནས། མིན་པ་ཞིག་ལ་ཡིན་མདོག་བྱེད་དགོས་པ་མ་རེད། ཡིན་པ་ལ་ཡིན་པར་འདུ་ཤེས་པ་ཞིག་རེད། དེ་ཉིད་ཇི་ལྟ་བུ་ཞིག་ཡིན་པ་རེད་ཟེར་ན། གཞི་ཆོས་ཉིད་རང་མལ་ནས་གཡོས་མ་མྱོང་པའི་གནད་ཀྱིས། དེའི་རྩལ་སྣང་ཐམས་ཅད་སྣང་སྲིད་དག་པ་རབ་འབྱམས། ཕུང་ཁམས་གཤེགས་པ་གཤེགས་མ། དབང་ཡུལ་སེམས་དཔའ་སེམས་མ། ཡན་ལག་ཁྲོ་བོ་ཁྲོ་མོ་སྟེ། གདན་གསུམ་ཚང་པའི་དཀྱིལ་འཁོར་དུ་ཡེ་ནས་ཡིན་པ་ལ་ཡིན་པར་འདུ་ཤེས་པ་ཞིག་ཡིན་པ་རེད། དེས་ན་ཆོས་འཆད་པའི་གནས་དེ་ཉིད་གནས་ཕུན་སུམ་ཚོགས་པ་འོག་མིན་ཆོས་ཀྱི་དབྱིངས་ཀྱི་ཕོ་བྲང་རྒྱ་ཆད་ཕྱོགས་ལྷུང་དང་བྲལ་བ། དུས་ཕུན་སུམ་ཚོགས་པ། དུས་གསུམ་དུས་མེད་ཀ་ནས་དག་པ་རྟག་པ་རྒྱུན་གྱི་འཁོར་ལོ། ཆོས་འཆད་པ་པོའི་སློབ་དཔོན་དེ། སྟོན་པ་ཕུན་སུམ་ཚོགས་པ་ཆོས་སྐུ་ཀུན་ཏུ་བཟང་པོའམ་དྲུག་པ་རྡོ་རྗེ་འཆང་ཆེན་པོ། ཆོས་ཉན་པའི་འཁོར་ཐམས་ཅད་ཀྱང་། འཁོར་ཕུན་སུམ་ཚོགས་པ་ཉིད་ལས་མི་གཞན་པའི་འཁོར་ཚོགས་རྒྱལ་བ་དགོངས་བརྒྱུད་དང་། རིག་འཛིན་བརྡ་བརྒྱུད། གང་ཟག་སྙན་བརྒྱུད། གང་འཆད་བྱའི་ཆོས་དེའང་། ཆོས་ཕུན་སུམ་ཚོགས་པ་རྒྱལ་བ་ཐམས་ཅད་ཀྱི་དགོངས་པའི་མཛོད། གདུལ་བྱ་སོ་སོའི་བློ་དང་འཚམ་པ། ཆོས་ཉན་པའི་འཁོར་ཐམས་ཅད་ཀྱང་། གཞི་རྒྱུད་བདེ་གཤེགས་སྙིང་པོས་ཏིལ་ལ་མར་བཞིན་ཀུན་ལ་ཁྱབ་པ་སྟེ། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་རྒྱུད་བླ་མ་ལས་གསུངས་པ་ལྟར་དང་། ད་དུང་མདོ་སྡེ་རྒྱན་ལས་ཀྱང་། དེ་བཞིན་ཉིད་ནི་ཐམས་ཅད་ལ། །ཁྱད་པར་མེད་ཅིང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་གསུངས་པ་ལྟར། ངོ་བོ་ཡེ་དག་ཡོན་ཏན་ལྷུན་གྲུབ་ཀྱི་སངས་རྒྱས་ཡིན་ཡང་། གློ་བུར་འབྲལ་རུང་གི་དྲི་མས་བསྒྲིབས་ནས་ཡོད་ན་དྲི་མ་དེ་ཉིད་བསལ་བས་སངས་རྒྱས་པར་འགྱུར་བ་དེ་དོན་གྱི་སངས་རྒྱས་སམ། ལམ་རྟོགས་པ་མངོན་འགྱུར་མ་འོངས་པའི་སངས་རྒྱས་ཡིན་པས་ན། འཁོར་ཕུན་སུམ་ཚོགས་པ་རིགས་གང་རུང་གི་དཔའ་བོ་དང་། མཁའ་འགྲོ་མར་གསལ་གདབ་ནས། སྣང་སྲིད་གཞིར་བཞུགས་ཡེ་ནས་ཡིན་པ་ལ། མོས་པ་ལམ་བྱེད་ཀྱི་ཐོག་ནས་གཞིར་བཞེངས་སུ་གསལ་འདེབས་དགོས་པ་རེད། དེ་ལྟ་བུའི་ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་རྣམ་པར་དག་པ་དང་ལྡན་པའི་ཐོག་ལ། ཆོས་ཉན་པའི་སྐབས་སུ་ཀུན་སློང་འཆོས་དགོས་པས་མ་ཚད་པར་ཀུན་སྤྱོད་ཀྱང་འཆོས་དགོས་པ་རེད། །