ཀ༽ ཉིན་དང་པོར་བསྟན་བཅོས་ལ་འཇུག་པའི་ཆོས་ཁྲིད།
༼ཨོཾ༽ ཐོག་མར་དགེ་བ་ཀླད་ཀྱི་དོན།
གང་བློ་མ་དང་བརྩེ་ལྡན་ཁྱེད་ཀྱི་སོགས་ཚར་གཅིག་སྔོན་ལ་གསུངས་ནས། བརྩེ་ཆེན་ཡེ་ཤེས་ཀྱི་བརྡ་རྟགས་ཞལ་མདངས་བཞད་འཛུམ་གྱི་ཉམས་རྒྱས་ཤིང་། ཆོས་ཉིད་མཉམ་པའི་ཀློང་ནས་མ་གཡོས་བཞིན་དུ། སྤྲོ་ཉམས་དང་སྤོབས་ཉམས་ཚད་མེད་པའི་ངང་ནས་སྤྱན་ལོངས་སྐུའི་གཟིགས་སྟངས་ཀྱིས་ཐད་ལ་གཟིགས་ཤིང་། ཕྱག་གཉིས་པདྨ་ཁ་འབུས་ཐལ་མོ་ཐུགས་ཀར་སྦྱར་ཅིང་བསྟན་དང་འགྲོ་ལ་སྨན་པའི་ཐུགས་བསྐྱེད་བླ་ན་མེད་པས། གསུང་དལ་ལ་བརྗིད་ཆགས་པའི་ཚངས་དབྱངས་སྙན་མོས་འཁོར་གྱི་གདུལ་བྱའི་ཡིད་དབང་ཆོས་ལ་སྒྱུར་ནུས་པའི་མཆོད་བརྗོད་ཀྱི་གདུང་དབྱངས་ཟབ་མོ། སྔར་གྲུབ་དབང་རྒྱལ་བ་རྫོགས་ཆེན་པའི་དམ་པ་གོང་མ་རྣམས་ཀྱི་སྲོལ་རྒྱུན་བཞིན་གསུངས་པ་འདི་ལྟར།།
དྷཱི༽ ནར་མའི་མཆོད་བརྗོད།
དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་ཁྱབ་བདག བཀའ་དྲིན་མཚུངས་ཟླ་མ་མཆིས་པར་དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་འཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ།
གང་གི་ཞལ་བཟང་ལྟ་བས་མི་ངོམས་གེ་སར་འཛུམ་པའི་མདངས་བཀྲ་ཞིང་།།
མཚན་དཔེའི་གཟི་འོད་ཟེའུ་འབྲུ་གསལ་བས་འགྲོ་ཀུན་མིག་གི་བདུད་རྩིར་གྱུར།།
ཐུགས་རྗེའི་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་ པའི།།
ཐུབ་དབང་པདྨ་དཀར་པོའི་ཞབས་པད་དེ་རིང་བདག་བློའི་ཡིད་མཚོར་སྐྱོངས།།
བདེ་བ་ཅན་ན་འོད་དཔག་མེད་དེ་རི་བོ་ཏ་ལར་སྤྱན་རས་གཟིགས།།
འཛམ་བུའི་གླིང་དུ་པདྨ་རྒྱལ་པོ་འགྲོ་ལ་ཐ་དད་སྣང་གྱུར་ཀྱང་།།
སྐུ་གསུམ་མཛད་པའི་ངོ་བོ་གཅིག་བསྡུས་དཔལ་ལྡན་སངས་རྒྱས་པདྨ་སྐྱེས།།
གངས་ལྗོངས་འགྲོ་ལ་ལྷག་པར་བརྩེ་བའི་ཐུགས་བརྩེའི་འོད་ཟེར་ཅན་ལ་འདུད།།
འཛམ་གླིང་མཛེས་པའི་རྒྱན་དྲུག་མཆོག་གཉིས་དང་།།
ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང་།།
ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས།།
འཁོར་འདས་ཆོས་སྐུར་རྟོགས་པའི་ཀློང་ཆེན་པ།།
དྲི་མེད་འོད་ཟེར་ཞབས་ལ་གསོལ་བ་འདེབས།།
ཤེས་བྱ་ཀུན་མཁྱེན་འགྲོ་ལ་རྗེས་བརྩེའི་གཏེར།།
དྲི་མེད་འོད་ཟེར་ཡང་སྤྲུལ་ཐུགས་གཏེར་མཛོད།།
འོད་གསལ་ཀློང་ཆེན་ནམ་མཁའི་རྣལ་འབྱོར་བ།།
འཇིགས་མེད་གླིང་བའི་ཞབས་ལ་གསོལ་བ་འདེབས།།
འཕགས་པ་འཇིག་རྟེན་དབང་ཕྱུག་ཐུགས་རྗེའི་འཕྲུལ།།
འགྲོ་བ་ཐར་གླིང་བགྲོད་པའི་དེད་དཔོན་མཆོག།
འབྲེལ་ཚད་དོན་ལྡན་ཀློང་ཆེན་རྣལ་འབྱོར་པ།།
འཇིགས་མེད་རྒྱལ་བའི་མྱུ་གུར་གསོལ་བ་འདེབས།།
ཕྱི་ལྟར་རྒྱལ་བའི་སྲས་པོ་ཞི་བ་ལྷ།།
ནང་ལྟར་གྲུབ་པའི་དབང་ཕྱུག་ཤ་བཱ་རི།།
གསང་བ་འཕགས་མཆོག་སྡུག་བསྔལ་རང་གྲོལ་དངོས།།
འཇིགས་མེད་ཆོས་ཀྱི་དབང་པོར་གསོལ་བ་འདེབས།།
ཨོ་རྒྱན་རིག་འཛིན་ཆེན་པོའི་རིང་ལུགས་ཀྱི།།
བཤད་སྒྲུབ་བསྟན་པའི་རྒྱལ་མཚན་འཛིན་མཛད་ཅིང་།།
ཡོན་ཏན་ནོར་བུའི་མཛོད་མངའ་ཆོས་ཀྱི་རྗེ།།
དཔལ་ལྡན་བླ་མའི་ཞབས་ལ་གསོལ་བ་འདེབས།།
འཕགས་ཡུལ་མཁས་པའི་དབང་ཕྱུག་ཟླ་བ་གྲགས།།
གངས་ལྗོངས་འཇམ་པའི་དབྱངས་དངོས་ཀུན་མཁྱེན་རྗེ།།
དབྱེར་མེད་ཐུགས་རྗེ་ཡས་སྤྲུལ་དགེ་བའི་བཤེས།།
གཞན་ཕན་ཆོས་ཀྱི་སྣང་བར་གསོལ་བ་འདེབས།།
བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས།།
སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས།།
གདོད་མའི་མགོན་པོ་མི་ཡི་རྫུར་ཞུགས་པ།།
འཇིགས་མེད་ཡོན་ཏན་མགོན་པོར་གསོལ་བ་འདེབས།།
དགོངས་བརྒྱུད་རྟོགས་པ་འཕོ་བར་བྱིན་གྱིས་རློབས།།
ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས།།
དུས་གསུམ་སངས་རྒྱས་ཀུན་ཀྱི་ངོ་བོ་ཉིད།།
རང་སེམས་ཆོས་སྐུ་མངོན་སུམ་སྟོན་མཛད་པའི།།
རྩ་བའི་བླ་མ་མཆོག་ལ་གསོལ་བ་འདེབས།།
བདག་གཞན་འགྲོ་བའི་བློ་སྣ་ཆོས་ལ་སྒྱུར།།
གང་ཞིག་གསེར་མཆོག་རང་བཞིན་རི་རབ་ལ་གནས་མནྡཱ་ར་དང་ལྷར་བཅས་གནོད་སྦྱིན་དང་།།
ལྡེང་ཀ་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་།།
གངས་ཅན་རིར་ནི་དཔལ་གྱིས་རོལ་ཞིང་རབ་ཏུ་དགའ་བའི་རིག་པ་འཛིན་པ་གང་ཡིན་པ།།
དེ་དག་ཐམས་ཅད་ཐར་བ་དམ་པའི་སྒོར་གྱུར་ཐུབ་པའི་གསུང་ཉན་ཕྱིར་ན་འདིར་གཤེགས་ཤིག།
གང་དག་ཕྱོགས་བཅུའི་སྟོང་གི་འཇིག་རྟེན་ན།།
བདེ་གཤེགས་སློབ་མར་གྱུར་བར་གང་སུ་དག།
དེང་འདིར་དམ་པའི་ཆོས་ཀྱི་ཆར་འབེབས་ཀྱིས།།
གསན་པ་འདོད་པར་ཐམས་ཅད་འདིར་གཤེགས་ཤིག།
ནམ་མཁའི་མཐས་གཏུགས་འཇིག་རྟེན་ཐམས་ཅད་ན།།
ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན།།
གྲུལ་བུམ་མིའམ་ཅི་དང་ལྟོ་འཕྱེ་སོགས།།
རྫུ་འཕྲུལ་ཡིད་ལྡན་ཐམས་ཅད་འདིར་ཤོག་ཅིག།
བསྐལ་བ་སྟོང་དུ་ཐོས་པ་རབ་དཀའ་ཞིང་།།
གང་ཞིག་ཐོས་ན་གཏན་དུ་བདེ་བྱེད་པ།།
བདེ་གཤེགས་གསུང་སྙན་བདུད་རྩི་ཆོས་ཀྱི་སྒྲ།།
བདག་གིས་སྦྱིན་གྱིས་དད་ཅིང་གུས་པས་ཉོན།།
གང་ཞིག་གཏན་གྱི་སྐྱབས་གནས་མཆོག་གྱུར་པ།།
དཀོན་མཆོག་གསུམ་གྱི་ཡོན་ཏན་བསམ་མི་ཁྱབ།།
དེ་ལ་དེར་ཤེས་རྣམ་སྨིན་ཡང་དེ་བཞིན་ཏེ།
བསྐལ་བ་བྱེ་བ་ཁྲག་ཁྲིག་བགྲང་ན་ཡང་།།
དཀོན་མཆོག་མཚན་ཐོས་ཙམ་ཡང་རྙེད་དཀའ་ཞིང་།།
རྣམ་པར་གྲོལ་བ་རིན་ཆེན་སྣ་ཚོགས་དང་།།
ཟབ་མོ་རྒྱལ་བའི་བཀའ་འདི་གུས་པས་ཉོན།།
ལྷ་ཡི་སྐད་དང་ཀླུ་དང་གནོད་སྦྱིན་སྐད།།
གྲུལ་བུམ་དག་དང་མི་ཡི་སྐད་རྣམས་དང་།།
འགྲོ་བ་ཀུན་ཀྱི་སྒྲ་རྣམས་ཇི་ཙམ་པ།།
ཐམས་ཅད་སྐད་དུ་ཆོས་འདི་འགྱུར་བར་ཤོག།
ཨ༽ མཚམས་སྦྱོར་གྱི་གདམས་ངག
ད་ལམ་རང་རེ་ཁམས་གསུམ་འཁོར་བའི་གནས་སུ་འཁྱམས་ཤིང་སྡུག་བསྔལ་བའི་སེམས་ཅན་འདི་ཐམས་ཅད། འཁོར་བ་ཐོག་མ་མེད་པ་ནས་ད་ལྟའི་བར་དུ་འཁྲུལ་ནས་འགྲོ་བ་རིགས་དྲུག་གི་གནས་མང་པོ་ཞིག་ཏུ་ཁ་བརྒྱུད། སྐབས་རེར་དམྱལ་བ་ཡི་དྭགས་ལ་སོགས་ངན་སོང་གི་གནས་སུ་ལྷུངས་ནས་སྡུག་བསྔལ་བཟོད་དཀའ་བ་མང་པོ་ཞིག་མྱོང་། ཡང་སྐབས་རེར་ལྷ་དང་མི་ཡི་གནས་སུ་སྐྱེས་ནས་འཕྲལ་ལྟར་སྣང་ཉམས་དགའ་བ་ཙམ་ཡིན་ཡང་ཕུགས་སྡུག་བསྔལ་བའི་ལུས་རྟེན་མང་པོ་ཞིག་བླངས། ཁྱད་པར་ད་ལྟ་རང་རེས་ཐོབ་པའི་མི་ལུས་འདི་ལ་མཚོན་ན་སྐྱིད་མ་སྡུག་གི་འཇིག་རྟེན་མི་ཡུལ་ཟེར་བ་ལྟར། སྐྱིད་སྡུག་འདྲེས་མར་མཚམས་རེ་ཁ་ཟ་རྒྱུས་འདངས། རྒྱབ་གྱོན་རྒྱུས་དྲོས། ཕོ་ལུ་བརྒྱགས་སྣང་ལུ་མཐོ་བས་ལུས་ལ་ན་ཚ་དང་སེམས་ལ་སྡུག་བསྔལ་མེད་པའི་སྐབས་སུ། གསོན་འདི་གང་གི་སྣང་བ་འདི་སྐྱིད་ཁི་ཆོག་ཁི་བསམ་པ་རེད། འོན་ཀྱང་འདི་ལ་རྟག་བརྟན་ཞིག་གཏན་ནས་ཡོད་པ་མ་ཡིན། སྐྱིད་མཐའ་སྡུག་གིས་བཟུང་ནས་སྐྱིད་སྡུག་མི་རྟག་ཁྲ་མ་ཁྲས་རྒ་ན་འཆི་བའི་སྡུག་བསྔལ་དང་། དེ་མིན་ནད་གདོན་བར་ཆད་ལ་སོགས་པའི་སྡུག་བསྔལ་མང་པོ་ཡོད་པས་མ་ཚད། བསམ་པའི་མཐར། མ་བསམ་པས་བསྐོར་བའི་སྡུག་བསྔལ་དྲག་པོ་རེ་ཐོག་ལ་བབ་དུས་རང་སྲོག་རང་གིས་གཅོད་ལ་ཁད་ཐུག་རྒྱུའི་སྡུག་བསྔལ་བསམ་གྱིས་མི་ཁྱབ་པར་འོང་རྒྱུ་ཡོད། རང་ཅག་འཁོར་བའི་སེམས་ཅན་འདི་རྣམས་ད་སྔོན་སྡུག་བསྔལ་མྱོང་ལོབས་མ་ཡིན་ཞིང་སྡུག་བསྔལ་མ་གཏོགས་བདེ་བ་མཐོང་མ་མྱོང་བའི་སྟབས་ཀྱིས་མཐོ་རིས་ལྷ་མིའི་ཟག་བཅས་ཀྱི་བདེ་བ་ཆུང་ཆུང་འདི་ལ་བདེ་བ་ཡིན་སྣང་ཤར་བ་རེད་མ་གཏོགས་དོན་ལ་བདེ་བ་ཅུང་ཡིན་པ་མ་ཡིན། དཔེར་ན་རྔོ་ནད་ཅན་གྱི་ཟ་འཕྲུག་དེ་ཕྲུག་ན་བདེ་སྣང་ཤར་ཡང་དོན་ལ་ཟ་འཕྲུག་མེད་ན་བདེ་བ་ལྟར་ཡིན། དེས་ན་ཁམས་གསུམ་འཁོར་བའི་གནས་འདི་མཐོ་དམན་གང་དུ་སྐྱེས་ཀྱང་སྡུག་བསྔལ་འབའ་ཞིག་མ་གཏོགས་བདེ་བའི་གོ་སྐབས་མེད་དེ། དཔེར་ན་མེ་ཡི་འོབས། སྲིན་མོའི་གླིང་། དུག་སྦྲུལ་གདུག་པ་ཅན་གྱི་ཚང་། རལ་གྲིའི་སོ་དང་འདྲ་བའི་དཔེ་གསུངས་པ་ལྟར་ཡིན་ཏེ། མེ་མ་མུར་གྱི་འོབས་དོང་ཆེན་པོ་ཞིག་གི་ནང་མི་གསོན་པོ་ཞིག་འཕངས་ན། དེར་མྱེས་ཚིག་ནས་ན་ཚ་དང་སྡུག་བསྔལ་བཟོད་དུ་མེད་པར་མ་ཤི་དམྱལ་ཁམས་འདྲ་བ་ཞིག་གིས་ལུས་སེམས་གཉིས་མནར་བ་དང་འཁོར་བ་ཆོས་མཚུངས། སྲིན་མོའི་གླིང་ནི་སྔོན་ཆད་རྒྱ་མཚོའི་ནང་ནོར་བུ་ལེན་དུ་ཚོང་ལ་འགྲོ་སྐབས་གྲུ་ནང་བསྡད་ནས་འགྲོ་དགོས་ལ། སོང་ནས་ལམ་ལ་མ་སོང་ན་མི་མཐུན་པའི་རླུང་གིས་ཕྱིན་ཅི་ལོག་ཏུ་དེད་ནས་སྲིན་མོའི་གླིང་དུ་ཕྱིན་འགྲོ། དེར་སྲིན་མོ་ཐམས་ཅད་བསླུ་ཐབས་མཁས་པས་དང་པོ་ཁྱིམ་ཐབ་བཟུང་། མཐའ་མར་ཤ་ཚལ་བ་དང་ཁྲག་ཐིགས་པ་བྱས་ནས་ཟོས་འགྲོ་བ་ཡིན། དེ་བཞིན་དུ་འཁོར་བའི་གནས་འདིར་འཕྲལ་ལྟར་སྣང་ཉམས་དགའ་བ་ལྟ་བུ་ཞིག་ཡོད་ཀྱང་། འདོད་ཡོན་གྱི་བསླུ་ཁྲིད་དེས་ཕུགས་སྡུག་བསྔལ་སྣ་ཚོགས་མྱོང་བའི་དཔེ་སྲིན་མོའི་གླིང་ལྟ་བུ་ཞིག་ཡིན། དུག་སྦྲུལ་གདུག་པ་ཅན་གྱི་ཚང་ནང་མི་ཞིག་ལྷུང་སོང་ན་དུག་གི་ཁ་རླངས་ཕོག་ནས། གསོན་པོའི་སྲོག་ད་ལྟ་ཉིད་དུ་གཞོམ་འགྲོ་བ་བཞིན་དུ་ཉོན་མོངས་པ་དུག་ལྔའི་མཆེ་བ་རྣོན་པོ་དང་ལྡན་ཞིང་གཏི་མུག་མ་རིག་པའི་ཁ་རླངས་གདུག་པ་ཅན་གྱིས་འཁོར་བའི་གནས་འདི་ནས་ཐར་བའི་སྲོག་རྩ་ཕྲ་མོ་བྱས་ཏེ་དྲུངས་ནས་འབྱིན་འགྲོ་བ་ཡིན་པས་དཔེ་དུག་སྦྲུལ་གདུག་པའི་ཚང་བྱས་པ་དང་། གཞན་ཡང་རལ་གྲི་རྣོན་པོ་ཞིག་གི་སོ་ཁར་ལུས་ཀྱིས་རེག་ཉེས་ཤོར་ན་ལུས་ལ་རྨ་ཆེན་པོ་ཞིག་ངེས་པར་འབྱུང་བ་བཞིན་དུ་འཁོར་བའི་ལས་ལམ་འདི་དག་དང་འབྲེལ་ན། སྡུག་བསྔལ་གྱི་ཟུག་རྔུ་བཟོད་ཐབས་མེད་པ་ཞིག་མྱོང་ངེས་ཅན་ཡིན། དེའི་ཐོག་ལ་འཁོར་བ་ཐོག་མེད་ནས་མཐའ་མེད་ལ་རང་རེ་འཁྱམས་ཁི་འདུག་རྒྱུ་འདི། རྒྱ་མཚོ་ཆེན་པོ་ཞིག་ལ་རླུང་དང་རླབས་དྲག་པོ་མུ་མེད་པར་འཕྱོ་ཞིང་མཐའ་དང་དབུས་དང་ཕྱོགས་གང་ཡིན་དང་གར་འགྲོ་ངོ་མི་ཤེས་པར་ཞིག་གི་ནང་ལྷུངས་ཡོད་ཅིང་། རྒྱ་མཚོ་དེའི་ནང་ད་དུང་གསོན་པོ་ཟ་བར་བྱེད་པའི་ཆུ་སྲིན་གདུག་པ་ཅན་ལ་སོགས་པའི་སྲོག་ཆགས་མ་རུངས་པ་གནོད་པ་ཅན་མང་པོས་བསྐོར་ནས་ཡོད་ན་དེ་ཅི་འདྲ་ཞིག་ཡོད། དཔེ་དེ་བཞིན་དུ་རང་རེ་ལྷུངས་སའི་འཁོར་བ་འདིར་གནོད་པ་ནི་མང་། ཐར་བར་ནི་བཀའ་བས་འོ་ཅག་ད་རེས་ནག་ཅན་བཙོན་དོང་ནས་ཐར་ཏེ་བྲོས་པ་བཞིན་འཁོར་བའི་གནས་ནས་བྲོས་ཏེ་ཐར་བའི་ཐབས་ཤིག་ལ་བསམ་བློ་གཏོང་དགོས། དེ་ཡང་འདི་ནས་ཐར་སོང་ན་འདི་ན་ཐར་དགོས་བསམ་སའི་དམིགས་ཡུལ་སྡུག་བསྔལ་ཐམས་ཅད་དང་བྲལ་ཏེ་བདེ་བ་ཐམས་ཅད་དང་ལྡན་པའི་གནས་དང་། ཐར་སོང་བ་པོ་དེ་སུ་རེད་ཡོད་ཁི་འདེང་རྒྱག་དགོས། འཁོར་བ་སྡུག་བསྔལ་གྱི་རྒྱ་མཚོ་ནས་ཐར་བའི་སྟོབས་ཤུགས་རང་ལ་མེད་ངེས། དེ་མེད་ན་རོགས་ཤིག་གམ། མགོན་སྐྱབས་ཤིག་གམ། མགོ་བཏགས་ས་ཞིག་ངེས་པར་བཙལ་དགོས་བསམས་ནས་འདེང་ཞིག་བརྒྱབ་ན་གཟོད་ཤེས་རྒྱུ་ཞིག་ཡོད་ངེས་རེད། ང་རང་ཚོས་སང་ཉིན་གྱི་ཟ་རྒྱུ། གནངས་ཉིན་གྱི་འདུག་ཐབས། ད་ལོ་དགུན་ཁའི་གྲོ་ཆས། སང་ཕོད་ཀྱི་སྔོན་འཆར། དབྱར་དགུན་གཉིས་ཀྱི་ཟ་གྱོན། ཁ་གསོ་རྒྱབ་འགེབས་ཀྱི་དོན་སོགས་འཇིག་རྟེན་གྱི་བྱ་བཞག་ཕྲན་ཚེགས་དེ་ཚོ་ལའང་འདེང་རྒྱག་དགོས་ན། ནམ་ཞག་གཏན་གྱི་འདུན་མ་སྡུག་བསྔལ་གཏན་ནས་མྱོང་མི་དགོས་པའི་ཐབས་ཀྱི་མཐར་ཐུག་པ། ཚེ་འདི་ཕྱི་གཉིས་ཀ་བདེ་ནས་བདེ་བའི་ལམ་ལ་འགྲོ་རྒྱུའི་ཆེད་དུ་འདེང་ཞིག་ཅིའི་ཕྱིར་མི་རྒྱག དེ་ལ་འདེང་ཞིག་མ་བརྒྱབ་ན། ཞ་ཞི་བསམ་མེད། སྨྱོན་པ་སྨྱོ་ནག་ཅིག་དང་འདྲ་ངེས་རེད། དེ་འདྲའི་བསམ་བློ་ལེགས་པོ་ཞིག་བཏང་ནས་དམ་པའི་གཞུང་ལུགས་དང་། མཁས་པའི་ལེགས་བཤད་ལ་ཞིབ་མོར་ལྟོས་དང་། ད་སྔ་རང་གཞན་བདེ་ལ་འགོད་ཕྱིར་འཇིག་རྟེན་གྱི་ཁམས་ན་བྱོན་མྱོང་བའི་དམ་པའི་སྐྱེས་ཆེན་ཐམས་ཅད་ཀྱི་རྣམ་ཐར་ཞིག་མཇལ་ན། འཁོར་བ་ལས་ཐར་བའི་ཐབས་དེ་ཅི་འདྲས་ཐོབ་དགོས། ད་སྔ་འོ་ཅག་གིས་གོ་མ་མྱོང་བ་དང་། ཤེས་མ་མྱོང་བའི་ཤེས་རབ་ཀྱི་མིག་གསར་བ་ཞིག་ཅི་འདྲས་ཐོབ་དགོས་པ་དང་། དེ་ཐབས་གང་ལ་བརྟེན་ནས་ཐོབ། སྐྱབས་སུ་འདྲ་ཞིག་ལ་བསྟེན་དགོས་སོགས་ཤེས་འོང་རྒྱུ་ཡོད། དཔེར་ན་བྲག་རི་གཡང་ས་གཟར་མོ་ཞིག་གི་ངོས་ནས་མི་ཞིག་ལྷུང་བཞིན་ཡོད་ན། ཀླད་ནས་མར་ལག་པ་ཡར་རྐྱོངས་དང་ངས་ཁྱོད་ཡར་འཐེན་འོང་ཟེར་བའི་མི་ཞིག་བྱུང་ན་དེ་ལ་ལག་པ་མི་རྐྱོང་པ་ཞིག་ག་ལ་སྲིད། དེས་ན་སྐྱབས་ཀྱི་མཐར་ཐུག་བསླུ་བ་མེད་པ་ནི་དཀོན་མཆོག་རིན་པོ་ཆེ་རྣམ་པ་གསུམ་པོ་ཡིན། དེ་ཡན་གྱི་སྐྱབས་ཤིག་གང་ནའང་མེད་པས་དེ་ལ་སྐྱབས་སུ་སོང་ནས་འཁོར་བ་ལས་ཐར་ཐབས་བྱེད་དགོས། དེ་ལས་སུ་ཐར་དགོས་ན་ཁྱོད་གཅིག་པུ་ཐར་སོང་ན་ཨེ་ཆོག་གི་ཆོག་ནི་ཨེ་རེད། ཁྱོད་ཀྱི་ཚེ་འདིའི་ཕ་མ་མིང་སྲིང་དང་ཁྱིམ་བཟའ་ཚང་ཐམས་ཅད་མ་ཐར་ན་ཁྱོད་བློ་ཨེ་བདེ། དེ་འདྲའི་འདེང་ཞིག་བརྒྱབ་ན་ཚེ་འདིའི་ཕ་མ་གཉེན་ཉེ་ཀུན་སྙིང་ཉེ་ཞིང་འདང་རྩིས་ཆེ་བ་ལྟར་སྐྱེ་བ་སྔོན་མའི་ཕ་མས་ཀྱང་ལུས་ཀྱི་དྲོད་ཀྱིས་བསྲོས། བརྩེ་བའི་སེམས་ཀྱིས་བསྐྱངས། འཛུམ་པའི་མདངས་ཀྱིས་བསུས། བྱམས་པས་བསྐྱེད་བསྲིངས། ཤེས་བྱའི་ཡོན་ཏན་བསླབས། བདེ་སྐྱིད་ལོངས་སྤྱོད་ཅི་ཡོད་ཐམས་ཅད་བུ་ལ་སྤྲད། སྡུག་བསྔལ་དང་དཀའ་ལས་ཅི་ཡོད་ཐམས་ཅད་མ་རང་གིས་མྱོང་ནི་ཡིན་ན། ཚེ་འདིའི་ཕ་མ་དང་ཁྱད་པར་ཅི་ཞིག་ཡོད། དེ་བཞིན་དུ་འཁོར་བ་ཐོག་མེད་ནས་ད་ལྟའི་བར་དུ་ལུས་འདི་མ་བླངས་བསམ་པ་མེད་པས་སེམས་ཅན་ཐམས་ཅད་ཕ་མར་བྱེད་མ་མྱོང་བ་ཁེ་རུ་མ་ཞིག་མེད་ལ། མ་ཚད་སེམས་ཅན་རེ་རེའི་ངོས་ནས་བསམ་ན་ཡང་ལན་གྲངས་མང་པོ་བགྲང་གིས་མི་ལངས་པ་ཞིག་ལ་ཕ་མ་བྱེད་མྱོང་ཡོད། དེས་ན་རང་ཅག་རྣམས་ཐེག་པ་ཆེན་པོའི་ཆོས་སྒོར་ཞུགས་ནས་དམ་ཆོས་རྫོགས་པ་ཆེན་པོ་དང་མཇལ་བའི་སྐབས་འདིར། ངས་ཕ་མར་གྱུར་བའི་སེམས་ཅན་ཐམས་ཅད་ཀྱི་དོན་དུ་དམ་པའི་ཆོས་བསྒྲུབ་དགོས་བསམ་རྒྱུའི་བསམ་པ་དེ་ཐོག་མ་ཞིག་ནས་ཡོད་དགོས་ནི་རེད། རང་ཅག་རྣམས་ཀྱིས་ཆོས་བསྒྲུབ། ཆོས་བྱེད། ཆོས་འདོན་ཟེར་རྒྱུའི་ཆོས་ཀྱི་སྒྲའི་ཐོག་ནས་བཤད་ན། ཆོས་འདི་ལ་འཇུག་ཡུལ་མང་པོ་ཞིག་ཡོད་དེ། རྣམ་བཤད་རིག་པ་ལས། ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །བསོད་ནམས་ཚེ་དང་གསུང་རབ་དང་། །འབྱུང་འགྱུར་ངེས་དང་ཆོས་ལུགས་ལའོ། །ཞེས་དོན་བཅུ་ལ་འཇུག་པར་གསུངས། དེ་ལས་ད་རེས་སྐབས་འདིར་རང་ཅག་རྣམས་ཀྱིས་ཆོས་བསྒྲུབ་རྒྱུ་བོ་གང་ཡིན་ཞེ་ན། ནད་སྨན་གྱིས་བཅོས་དགོས་པ་བཞིན་དུ་སེམས་མི་དགེ་བ་ལོག་པའི་ལམ་ནས་འཆོས་པའི་དོན་གྱིས། ཆོས་ཞེས་པ་དང་། བཅོས་ཞེས་པ་དང་། འཆོས་ཞེས་པ་རྣམས་དོན་གཅིག་ཡིན། འཆོས་བྱེད་ཀྱི་ཆོས་དེ་ལ་རྒྱ་གར་སྐད་དུ་དྷརྨ་ཞེས་པའི་སྒྲ་ལས་དྲངས་ན་ཆོས་ལ་འཇུག་པས་སྐབས་འདིར་དམ་པའི་ཆོས་ཞེས་དམ་སྒྲ་སྦྱར་ས་དེ་ལ་གོ་དགོས། དེ་ལྟ་བུའི་དམ་པའི་ཆོས་དེ་སྒྲུབ་པ་ལ་ཕྱི་ལུས་ངག་གི་ཐོག་ནས་ཚུགས་ཉམས་ཤིག་གཏོད་ནས། ཆས་ཆ་ལུགས་ཀྱི་ཐོག་དང་བྱ་བ་སྤྱོད་པའི་ཐོག་སོགས་གང་ཅིའི་ཐད་ནས་འདི་ཆོས་པ་ཞིག་རེད་ཟེར་བྱེད་ཙམ་གྱིས་ཆོས་པ་རུ་འགྲོ་བའི་ངེས་པ་ག་ལ་ཡོད། ཆོས་པ་ངོ་མ་ཞིག་འགྱུར་དགོས་ན་བསྟན་པ་དམ་པའི་ཆོས་དངོས་སུ་སྒྲུབ་པ་ལ་ཞུགས་དགོས། དེ་ཡང་རྒྱ་ཆེ་ས་ནས་བཤད་ན་བཀའ་བསྟན་བཅོས་ལུང་མན་ངག་མང་པོ་ཡོད་ཀྱང་མདོར་བསྡུས་ནས་བཤད་ན། རང་གི་སེམས་རྒྱུད་འདི་རང་གིས་འདུལ་དགོས་ཏེ། སངས་རྒྱས་བཅོམ་ལྡན་འདས་ཀྱིས། རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་པས་འདི་ནི་སངས་རྒྱས་བསྟན་པའང་ཡིན་ལ་དམ་པའི་ཆོས་ཀྱང་ཡིན་ནོ། །གཞན་ཡང་དེ་ཉིད་ཀྱིས། སེམས་དག་པས་ནི་ལུས་དག་པར་འགྱུར་གྱི། །ལུས་དག་པས་ནི་སེམས་དག་པ་མ་ཡིན་ནོ། །ཞེས་གསུངས། འོ་ན་རང་གི་སེམས་རྒྱུད་ཇི་ལྟར་འདུལ་དགོས་ཤེ་ན། རང་སེམས་འདི་རང་གིས་ཆོས་ལམ་ལ་འཇོག་དགོས། དེ་འཇོག་པ་ལ་ད་སྔ་ཉི་མ་ཡན་ཆད་ལ་སེམས་ཟེར་རྒྱུ་འདི་རྟ་རྒོད་རི་ཤན་བརྒྱབ་འདྲ་ཁ་ལོ་དང་སྣ་ལོ་ལོབས་མི་དགོས། སྔར་བསམ་ཕྱི་འདེང་ཙམ་ཡང་རྒྱག་མ་མྱོང་བར་མ་ཟད་ངན་པ་ལང་ཤོར་དུ་མངགས་པའི་རི་ཤོར་མ་ཞིག་རེད། ད་ནི་སེམས་རྟ་རྒོད་འདྲ་བོའི་སྔུན་ཚུར་ལ་བསྐོར་ཏེ་འདེང་ཞིག་རྒྱག་མགོ་བརྩམས་ནས། རང་གིས་རང་རྒྱུད་ལ་བརྟག་དཔྱད་ཅིག་གཏོང་སར་ཐུག་ཡོད། མྱི་ཞིག་ཡིན་ཕྱིན་དེ་ལ་སེམས་ཤིག་ཡོད། སེམས་ཤིག་ཡོད་ཕྱིན་དེར་བརྟགས་ཤིང་དཔྱད་པ་ཞིག་བཏང་ན། སེམས་འདི་མི་དྲན་དགུ་དྲན་སྣ་ཚོགས་དྲན་ནི་རླུང་འཚུབ་འདྲ་མོ་ཞིག་ཡིན། དྲན་རྟོག་སྣ་ཚོགས་འཆར་བའི་བློ་སྣ་ཐམས་ཅད་རིགས་འདྲ་སྡེ་ཚན་དུ་ཕྱེས་ན། ཡང་ན་མི་དགེ་བའི་རྣམ་རྟོག་ཆགས་སྡང་རྨོངས་གསུམ་ཞིག་གམ། ཡང་ན་དགེ་བའི་རྣམ་རྟོག་དད་པ་དང་ངེས་འབྱུང་བྱང་སེམས་ཤིག་ཨེ་ཡིན། དེ་གཉིས་ཀ་མིན་ན་དགེ་མི་དགེ་གཉིས་ཀའི་ནང་མ་འདུས་པ། དེ་གཉིས་གང་ཡང་མིང་བཏགས་ནས་ལུང་བསྟན་རྒྱུ་མེད་པའི་ལུང་མ་བསྟན་གྱི་རྣམ་རྟོག་ཅིག་དང་གསུམ་པོ་གང་རུང་ནང་མ་འདུས་པ་མེད་དེ། རྣམ་རྟོག་ཇི་ཙམ་མང་ཡང་དེ་གསུམ་པོའི་ཕན་ལ་འགྲོ་ས་མེད་དོ། །དེས་ན་ད་སྔོན་ཉི་མ་ཡན་ཆད་མ་རིག་རྨོངས་པའི་དབང་གིས་ཆགས་སྡང་གི་རྟོག་པ་སྐྱེས། ཉོན་མོངས་པ་འདོད་ཆགས་ཞེ་སྡང་གཏི་མུག་སྟེ་དུག་གསུམ་དང་དེའི་སྟེང་ང་རྒྱལ་དང་ཕྲག་དོག་གཉིས་བསྣན་པས་དུག་ལྔས་ལས་བསགས་ནས། ཁམས་གསུམ་འཁོར་བའི་སྡུག་བསྔལ་མཐའ་མེད་དུ་མྱོང་བ་ཡིན་ན། ད་ཕྱིན་ཆད་འཁོར་བའི་སྡུག་བསྔལ་གཏན་ནས་མྱོང་མི་དགོས་པའི་ཐབས་ཆོས་ཤིག་སྒྲུབ་པ་ཡིན་པས་ཆོས་ཨེ་འགྲུབ་མི་འགྲུབ་ནང་རང་གི་ཀུན་སློང་ངམ་བསམ་བློ་གཏོང་ལུགས་ལ་ཐུག་ཡོད། དེས་ན་ད་ནི་ཁ་ཕྱི་རུ་བསྐོར་ནས་གཞན་སྐྱོན་འབའ་ཞིག་བཤད་བསྡད་པས་མི་ཕན་པ་མ་ཟད། རང་སྐྱོན་ངོས་བཟུང་ནས་བློ་སྣ་དགེ་བའི་ཕྱོགས་ལ་སྒྱུར་རྒྱུ་འདི་ཆོས་འགྲུབ་དང་མི་འགྲུབ་ཀྱི་རྩ་བ་ཡིན། འོན་ཀྱང་འཁོར་བ་ཐོག་མེད་ནས་ད་ལྟའི་བར་དུ་གོམས་གཤིས་ངན་པའི་དབང་གིས་ཤོག་གུ་དྲིལ་ལམ་ལ་རྒྱུག་འདྲའི་བློ་ངན་འདི། འཕྲལ་དང་འཕྲལ་དུ་བཅོས་མི་ཐུབ་ཀྱང་། རིམ་གྱིས་རིམ་གྱིས་ཆོས་ལམ་ལ་བཞག་ནས་དམ་པ་གོང་མའི་རྣམ་ཐར་རྗེས་འཇུག་སློབ་མའི་ཉམས་ལེན་དུ་བཟུང་ནས་ཉིན་རེ་བཞིན་མི་དགེ་བའི་རྟོག་པ་ཇེ་ཉུང་དུ་གཏོང་དགོས། དེའི་ཚེ་མི་དགེ་བའི་རྟོག་པ་རེ་སྐྱེས་ན་རང་གིས་རང་ལ་ཞེ་ཁྲེལ་བདས་ནས་དགེ་བའི་རྟོག་པ་ཇེ་མང་དུ་ཐོངས། ལུང་མ་བསྟན་གྱི་རྟོག་པའང་དགེ་བའི་ཕྱོགས་སུ་སྒྱུར་དགོས། དམ་པའི་ཆོས་ནི་འཁོར་བ་དང་ངན་སོང་མཐའ་དག་གི་སྡུག་བསྔལ་ལས་སྐྱོབ་པ་དང་། ཚེ་འདི་ཕྱི་གཉིས་ཀྱི་ཕན་བདེ་མཐའ་དག་གི་འབྱུང་ཁུངས་ཡིན་པས་ཡིད་ཆེས་བརྟན་པོར་ཡོད་དགོས། དམ་པའི་ཆོས་དེ་ཉིད་སྒྲུབ་པ་ལ་ཨེ་འགྲུབ་མི་འགྲུབ་གཙོ་ཆེར་ཡིད་ཆེས་ཀྱི་དད་པ་ཡོད་མེད་འདི་ལ་ཐུག་ཡོད། ཇི་སྐད་དུ། དད་པ་འཁོར་ལོ་རིན་པོ་ཆེ། །ཉིན་མཚན་དགེ་བའི་ལས་ལ་སྦྱོར། །ཞེས་དང་། གཞན་ཡང་། དད་པ་སྔོན་འགྲོ་མ་ལྟར་སྐྱེད་པ་སྟེ། །ཆོས་རྣམས་ཀུན་ཀྱི་རྩ་བ་དད་པའོ། །ཞེས་གསུངས་པ་ལྟར་ཡིན་ནོ། །ད་ལྟ་རང་ཅག་རྣམས་ཀྱིས་འདེང་ཞིག་བརྒྱབ་ན་ང་ཚོ་ཆགས་སའི་འཇིག་རྟེན་ནམ་འཛམ་གླིང་ལས་ཀྱི་ས་ཆ། མདོར་ན་ས་སྒང་གོ་ལ་འདིའི་ཐོག་ལ། ཆོས་ལུགས་འདྲ་མི་འདྲ་མང་པོ་ཞིག་དར་མྱོང་ལ། ད་ལྟའི་གནས་སྐབས་ཡིན་ནའང་འཛམ་གླིང་གི་མི་གྲངས་ནང་ནས་བརྒྱ་ཆ་མང་ཆེ་བ་ཆོས་ལུགས་འདྲ་མི་འདྲ་སྒྲུབ་མཁན་རེད། ཆོས་ལུགས་དེ་དག་རེ་རེ་ལའང་ཆོས་དེ་སྟོན་མཁན་གྱི་སྟོན་པ་རེ་དང་། ཆོས་དེ་ལ་ཁུངས་ལུང་རྒྱུ་མཚན་རེ་རེ་བཤད་རྒྱུ་ཡོད་པ་ཤ་སྟག་ཡིན། འོན་ཀྱང་དེ་དག་གི་ནང་ནས་ནང་པ་སངས་རྒྱས་པའི་ཆོས་འདི་ནི་འདྲ་འདྲའི་ནང་གི་མི་འདྲ་བ་ཞིག་ཡིན་ཏེ། སྤྱིར་ན་ཐེག་པའི་རིམ་པ། སྒོས་སུ་མདོ་སྔགས་ཀྱི་གཞུང་ལུགས། རྒྱུད་སྡེ་དང་སྒྲུབ་སྡེ། ལྟ་སྒོམ་སྤྱོད་འབྲས་གང་གི་ཐད་ནས་ཡིན་ན་གཞན་དང་མི་འདྲ་བ་ཁྱད་པར་དུ་མས་འཕགས་པའི་ཁྱད་ཆོས་དང་ལྡན་པ་ཞིག་ཡིན། དེ་ཡིན་པས་ནང་པ་སངས་རྒྱས་པའི་བསྟན་པ་འདི་ས་ཆ་ཡུལ་གྲུ་མང་པོ་ཞིག་ལ་སྔར་དར་བས་མ་ཚད། ད་ལྟ་ཡང་བསྟན་པ་མ་ནུབ་ཙམ་རེ་ཡོད་སའི་ས་ཆ་ཡང་མང་པོ་རེད། ད་སྐབས་འཛམ་གླིང་གི་ཆོས་ལུགས་མང་པོའི་ཁྲོད་ནས་ནང་པ་སངས་རྒྱས་པའི་ཆོས་ལུགས་འདི་ནི་བླ་ན་མེད་པའི་ཆོས་ལུགས་ཁྱད་ཆོས་དང་ལྡན་པ་ཞིག་ལ་ཕྱི་ནང་གི་མཁས་པ་མང་པོས་ཁས་ལེན་བཞིན་ཡོད། ཡིན་ན་ཡང་ཐུབ་བསྟན་ལུང་རྟོགས་ཀྱི་བདག་ཉིད་ཅན་མདོ་སྔགས་ཟུང་དུ་འབྲེལ་བ། ཁྲིད་རྒྱུན་དང་ཉམས་མྱོང་ལག་ལེན་དང་བཅས་པ་ཆ་ཚང་ཡོད་པའི་ས་ཆ་ནི་ད་ལྟ་བོད་གངས་ཅན་གྱི་ལྗོངས་འདི་ཉིད་ཁོ་ན་ཡིན་ལ། དེ་ཡིན་པས་མ་ཚད་ད་ལྟ་སངས་རྒྱས་ཀྱི་བསྟན་པ་རིན་པོ་ཆེ་འདི་ཉིད་སྤྱིར་བོད་མིའི་ལག་ན་ཡོད་པ་དང་། ཡང་སྒོས་བོད་ཀྱི་ཆོས་པ་དགེ་འདུན་པ་རྣམས་ཀྱི་ལག་ན་གཙོ་བོ་ཡོད། འོན་ཀྱང་འདི་ལ་བྱི་དོར་བཟང་པོ་ཞིག་མ་ཐུབ་ན་ནོར་བུ་འདམ་རྙོག་གི་ཁྲོད་དུ་གཡུག་འདྲ་ཞིག་འོང་མི་སྲིད་པ་ཡང་མ་རེད། དམ་པའི་ཆོས་སྒྲུབ་པ་དེ་འགའ་རེས་ཟེར་ན་རྨོངས་དད་རེད་ཟེར་གི་ཡོད། དེ་ནི་ངེས་པར་བརྟག་དཔྱད་ཞིབ་འཇུག་གཏན་ནས་མེད་པའི་སྐད་ཆ་ཞིག་རེད། ཟབ་ཅིང་རྒྱ་ཆེ་བའི་དམ་པའི་ཆོས་ཀྱི་ནང་དོན་ཆ་ཚང་བ་ཞིག་འགོ་མཇུག་མེད་པར་ཞིབ་འཇུག་དབྱེ་ཞིབ་རབ་གཅིག་བྱས་ནས་དོན་ཡང་དག་པ་ཞིག་གོ་ཐུབ་ན། ད་གཟོད་མཇུག་སྡོམ་བྱེད་རྒྱུའི་དབང་ཆ་དེ་ཡོད་པ་རེད་མ་གཏོགས་གནས་སྐབས་ཀྱི་དགོས་མཁོ་ཕྱོགས་རེ་བ་ཞིག་དང་བསྟུན་ནས་རང་སྣང་གང་ཤར་གྱིས་འདི་རེད་དེ་མ་རེད་ཟེར་ན། བདེན་དོན་དངོས་རྗེས་ནས་ར་སྤྲོད་བྱེད་འོང་བས་དམ་པའི་ཆོས་ཀྱི་ནང་དོན་རྣམས་སླ་མོ་ཞིག་གིས་ཤེས་ག་ལ་ནུས། ཡིན་ན་ཡང་རྨོངས་དད་ཅེས་པའི་ཐ་སྙད་དེ་བེད་སྤྱོད་གཏན་ནས་མེད་པ་ཞིག་ཀྱང་མ་རེད། རྒྱུ་མཚན་བསམ་བློ་ཞིབ་ཏུ་མ་བཏང་བས་བླ་མར་བསྟེན་ཁུལ། དམ་ཆོས་སྒྲུབ་ཁུལ་བྱས་ཀྱང་དོན་ངོ་མའི་ཐོག་ནས་ཅི་ཡིན་འདི་ཡིན་མ་ཤེས་པ་དེ་ཚོ་ལ་རྨོངས་དད་ཟེར་བ་རེད། དེས་ན་རང་རེ་རྣམས་ཆོས་སྒོར་ཞུགས་དུས་རྨོངས་དད་ཀྱིས་འུར་ཞོགས་དང་འུར་འགྲོག་གཏན་ནས་བྱེད་མི་ཉན། འུར་ཞོགས་ནི་དཔེར་ན་བྱེའུ་ཁྱུ་མ་རྣམས་གཅིག་ཕར་འཕུར་ན་ཚང་མ་ཕར་འཕུར་བ་དང་། གཅིག་ཚུར་འཕུར་ན་ཚང་མ་ཚུར་རྗེས་དེད་འགྲོ་བ་དེ་འདྲ་དེ་ལ་ཟེར་བས་དེ་ནི་དུད་འགྲོའི་སྤྱོད་པ་ཡིན། འུར་འགྲོག་ཀྱང་གཏམ་དཔེ་ལ། ཤྭ་འདྲོག་རྒོ་འདྲོག་རྐྱང་ལ་འདྲོག །རྒོ་ཞར་མ་ནི་རྒེའུ་ལ་འདྲོགས། །ཞེས་པ་ལྟར་ཡིན་པས་སྤོང་དགོས། དེས་ན་བླ་མ་བསྟེན་ཚུལ་གྱི་ཐད་ལ་བསམ་ན་འོག་ནས་འཆད་འགྱུར་ལྟར། དང་པོ་བླ་མ་བརྟག་ལ་མཁས་པ་དང་། །བར་དུ་བླ་མ་བསྟེན་ལ་མཁས་པ་དང་། །ཐ་མར་དགོངས་སྤྱོད་བསླབ་ལ་མཁས་པ་ཡི། །སྐྱེས་བུ་དེ་ནི་ཡང་དག་ལམ་ལ་འགྲོ། །ཞེས་གསུངས་པ་ལྟར་བྱེད་པ་མ་གཏོགས་དང་པོ་ནས་ཁྱི་དང་གློ་བ་འཕྲད་པ་ལྟར་བསྟེན་ན་དེ་ལ་འུར་ཞོགས་ཟེར། རྗེས་ནས་བླ་མ་ལ་བརྟག་དཔྱད་བཏང་ནས་བློ་ལོག་ན་དེ་ལ་འུར་འདྲོག་ཟེར་བས་དེ་དག་ལས་ཀའི་འགོ་མཇུག་ནོར་བ་ཡིན། ཆོས་ལ་ཡང་བརྟགས་ཤིང་དཔྱད་པ་སྔོན་ལ་གཏོང་དགོས། དེ་གཏོང་བའི་སྐབས་སུ་དང་པོ་ཐེ་ཚོམ་ཞིག་འོང་སྲིད། དེའི་མིང་ལ་ལོག་ལྟ་ཟེར་ནི་མ་རེད། ཐེ་ཚོམ་དེ་ཡོད་དུས་དྲི་བ་ཞིག་འོང་བས་དྲི་བ་དེ་ལ་ལན་ཞིག་རང་ཤུགས་ཀྱིས་ཐོན་ནས་འོང་། ལན་དེས་བདེན་རྫུན་གཉིས་ཀྱི་ཤན་མཐོང་ཕྱེས་ནས་རང་ལ་རྒྱུ་མཚན་ཤེས་པའི་ངེས་ཤེས་གསར་བ་ཞིག་ཀྱང་འཁྲུངས་སྲིད། རྒྱུ་མཚན་ཤེས་ནས་དད་པ་འཇོག་རྒྱུ་འདི་ཤིན་ཏུ་གལ་ཆེ། རྒྱུ་མཚན་ཤེས་པ་ལ་དང་པོ་ཐོས་པ་འཚོལ་དགོས། དེ་ཡང་དམ་པའི་གཞུང་ལུགས་དྲི་མ་མེད་པ་རྣམས་ལ་བལྟ་དགོས་ལ། དེར་ལྟ་བ་ལ་རང་སྟོབས་ཀྱིས་ལྟ་མ་ཤེས་ན་གཞན་དགེ་བའི་བཤེས་གཉེན་གྱིས་བཤད་པ་ལ་ཉན་དགོས་པ་ཡིན། མ་ཐོས་ན་གོ་འོང་རྒྱུ་མེད་པས། དབང་དང་ཕྱག་དབང་ལ་སོགས་པ་ཡང་ཐོབ་ན་བྱིན་རླབས་ཆེ་བ་ཡིན་ཡང་། དོན་མ་གོ་རྒྱུ་མཚན་མ་ཤེས་ན་རྡོ་ལ་དབང་བསྐུར་ལྟ་བུ་རེད་འགྲོ་བ་ཡིན། བར་དུ་ཐོས་དོན་བསམ་དགོས། མ་བསམས་ན་རྒྱུད་ལ་སྦྱར་འོང་རྒྱུ་ཞིག་ཡོད་མ་རེད། ཐ་མར་བསམ་དོན་བསྒོམ་དགོས། མ་བསྒོམས་ན་གྲོལ་འོང་རྒྱུ་ཞིག་དང་འཁོར་བ་ནས་ཐར་བའི་ཐབས་ཤིག་ལག་ལ་འོང་རྒྱུ་ཡོད་མ་རེད། དེས་ན་གདན་ས་ཆོས་འཁོར་ཆེན་པོའི་འདབ། རྔ་བརྡ་དུང་སྐད་གོ་སར་སྐྱེས་ན་ཡང་ཆོས་རང་གིས་གོ་རང་གིས་ཉམས་སུ་བླངས་ནས་འཁོར་བ་ལས་ཐར་དགོས་ནི་རེད་མ་གཏོགས། བླ་མ་གཞན་ལྟ་ཅི་སངས་རྒྱས་དངོས་སུ་བྱོན་ཀྱང་ཐར་བའི་ལམ་ལ་རྡོ་འཕེན་འཕེན་བྱས་ནས་འཕེན་གཏོང་རྒྱུ་མེད། ཇི་སྐད་དུ། ཐུབ་རྣམས་སྡིག་པ་ཆུ་ཡིས་མི་འཁྲུད་ཅིང་། །འགྲོ་བའི་སྡུག་བསྔལ་ཕྱག་གིས་སེལ་མིན་ལ། །ཉིད་ཀྱི་རྟོགས་པ་གཞན་ལ་སྤོ་མིན་ཡང་། །ཆོས་ཉིད་ཞི་བ་བསྟན་པས་གྲོལ་བར་འགྱུར། །ཞེས་གསུངས་པས་སེམས་ཅན་གྱི་སྡུག་བསྔལ་རྣམས་སངས་རྒྱས་ཀྱིས་ཆུ་ཁྱེར་ནས་བཀྲུ་གཏོང་བ་དང་། འགྲོ་བའི་སྡུག་བསྔལ་ཕྱག་གིས་སེལ་བའམ་བསལ་རྒྱུ་ཞིག་ཡོད་པ་མ་རེད། ཉིད་ཀྱི་རྟོགས་པ་ཐད་ཀ་ཐད་སྤོ་གཏོང་ཐབས་ཤིག་ཀྱང་དཀའ་ནི་རེད། དེས་ན་ཅི་འདྲས་ཕན་གདགས་དགོས་སྙམ་ན་ཆོས་ཉིད་ཞི་བ་འདུས་མ་བྱས་བདུད་རྩི་ལྟ་བུའི་ཆོས་སེམས་ཅན་ལ་བསྟན། སེམས་ཅན་གྱིས་ཀྱང་དེ་བཞིན་བསྒྲུབས་ནས་འབྲས་བུ་ཐོབ་དགོས་ཏེ། སངས་རྒྱས་ཉིད་ཀྱིས། ངས་ནི་ཁྱོད་ལ་ཐར་བའི་ཐབས་སྟོན་གྱིས། །ཐར་བ་རང་ལ་རག་ལས་བརྩོན་པར་གྱིས། །ཞེས་གསུངས། དད་པའི་ཨ་ལོང་མེད་ན་ཐུགས་རྗེ་ལྕགས་ཀྱུས་བཟུང་ཐབས་མེད་ཅེས་པའི་དོན་རེད། དེས་ན་སངས་རྒྱས་ཀྱི་བསྟན་པའི་ཆོས་སྒོར་ཞུགས་ནས་ཐར་ལམ་ཐོབ་ཐབས་རང་ཉིད་ཀྱི་བརྩོན་པ་ལ་རག་ལས་ཡོད་པ་ཡིན། ཆོས་ཞུ་ཟེར་རྒྱུ་དེ་ཆོས་ཚིག་རྣ་བས་གོ་ཙམ་གྱིས་མི་ཆོག་པར་དོན་རང་གི་རྒྱུད་ཐོག་ཏུ་སྦྱར་ཤེས་དགོས། དམ་པའི་ཆོས་དེ་སྨན་དང་། འཁོར་བའི་སྡུག་བསྔལ་དེ་ནད་ཆེན་ཞིག་ཡིན་ལ། སྨན་ཡོད་པ་རྐྱང་བས་མི་ཆོག་གི་སྨན་དེ་ནད་པའི་ཁོག་ལ་མ་སོང་ན་ནད་དྲགས་ཐབས་ལ་ཕན་མི་ཐོགས་པ་ལྟར། དམ་པའི་ཆོས་ཀྱི་སྨན་རང་རྒྱུད་ལ་བསྟེན་ནས་ནད་ཀྱི་རྩ་བ་ཉོན་མོངས་པ་དེ་དུག་ལྟ་བུ་ཡིན་ན་དུག་དེ་སེལ་ཐབས་བྱས་ནས་སྡུག་བསྔལ་གྱི་ཟུག་རྔུ་ཐམས་ཅད་ཞི་བར་བྱེད་དགོས། དམ་པའི་ཆོས་ཀྱི་སྒོར་ཞུགས་པ་ལ་ཡང་བསྟན་པའི་རྣམ་བཞག་དང་ཐེག་པའི་འཇུག་སྒོ་མང་དུ་ཡོད་དེ། བསྟན་པའི་རྣམ་བཞག་ཀྱང་ལུང་དང་རྟོགས་པའི་བདག་ཉིད་ཅན་ཞིག་ལ་བསྟན་པ་ཟེར་བ་ཡིན། དེ་ནི་བཤད་དང་སྒྲུབ་པས་འཛིན་དགོས་པས་ཐོས་བསམ་སྒོམ་གསུམ་གོ་མ་ལོག་པ་ཞིག་གི་ཐོག་ནས་ཉམས་སུ་ལེན་དགོས། ཉམས་སུ་ལེན་པ་དེ་ཡང་རྒྱ་གང་ཆེ་གང་ཟབ་འབའ་ཞིག་བཤད་ནས་འགྲུབ་རྒྱུ་དང་ལག་ཏུ་ལོན་རྒྱུ་མེད་པ་ཞིག་གི་མི་ཕན་ལ། དེས་ན་དཔལ་སྤྲུལ་རིན་པོ་ཆེས། ཐུབ་པའི་སྲས་ཀྱི་སྡེ་སྣོད་གསུམ། །ཐམས་ཅད་ཤེས་པ་ཡོད་མིན་ཡང་། །ཚིག་འབྲུ་གཅིག་གི་དོན་ཤེས་ན། །དེ་ཡང་ལུང་གི་བསྟན་པ་ཡིན། །རྒྱལ་བའི་སྲས་ཀྱི་བསླབ་པ་གསུམ། །ཐམས་ཅད་སྒྲུབ་པ་དཀའ་ན་ཡང་། །དགེ་སེམས་སྐད་ཅིག་གཅིག་སྐྱེས་ཀྱང་། །དེ་ཡང་རྟོགས་པའི་བསྟན་པ་ཡིན། །ཞེས་གསུངས་པ་ལྟར་ཆོས་རྒྱ་ཆེར་རྒྱང་རིང་མ་ཤེས་མ་གོ་ཡང་ཚིག་འབྲུ་གཅིག་གི་དོན་ཤེས་ན་དེ་ཡང་ལུང་གི་བསྟན་པ་ཡིན། དགེ་སེམས་སྐད་ཅིག་མ་ཙམ་ཞིག་སྐྱེས་ཀྱང་དེ་ཡང་རྟོགས་པའི་བསྟན་པ་ཡིན་གསུངས་སོ། །ཐེག་པའི་འཇུག་སྒོ་ཡང་ཐུན་མོང་གི་ཐེག་པ་སྐྱེས་བུ་ཆེ་འབྲིང་ཆུང་གསུམ་གྱི་ལམ་གྱི་རིམ་པ་དང་། ཐུན་མིན་གསང་ཆེན་སྔ་འགྱུར་བའི་ལུགས་ལ་ཐེག་པ་རིམ་པ་དགུར་ཕྱེས་ཡོད་དེ། ཕྱི་ཀུན་འབྱུང་འདྲེན་པའི་ཐེག་པ་ཉན་ཐོས་རང་རྒྱལ་བྱང་ཆུབ་སེམས་དཔའ་གསུམ། ནང་དཀའ་ཐུབ་རིག་བྱེད་ཀྱི་ཐེག་པ་ཀྲི་ཡ་ཨུ་པ་ཡོ་ག་རྣམ་པ་གསུམ། གསང་བ་དབང་སྒྱུར་ཐབས་ཀྱི་ཐེག་པ་མ་ཧཱ་ཨ་ནུ་ཨ་ཏི་གསུམ་སྟེ་མདོ་སྔགས་ཀྱི་ཐེག་རིམ་དགུ་ཡི་རྣམ་བཞག་ཡོད་པ་དང་། གང་ཟག་གཅིག་གི་དབང་དུ་བྱས་ན་ཐེག་པ་རིམ་རྫོགས་སྐས་ཀྱི་བང་རིམ་ལྟ་བུར་སྐས་ཐེམ་དང་པོ་ནས་གཉིས་པ་སོགས་རིམ་གྱིས་བརྒྱུད་དེ་ཁང་ཐོག་ཕྱིན་དགོས་པ་ལྟར། སོར་བྱང་སྔགས་གསུམ་གྱི་སྡོམ་དང་བསླབ་བྱ་དམ་ཚིག་ལ་གནས་པའི་ཐོག་ནས་ཡོན་ཏན་ཡར་ལྡན་དུ་བསླབ་དགོས་པ་ཡིན། དེས་ན་རང་རེ་འདི་ན་ཡོད་པའི་ནང་ནས་མང་ཆེ་བ་ཞིག་ནི། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་པ་ལ་མེད། །ཅེས་གསུངས་པ་ལྟར་སྡོམ་པ་ཀུན་ཀྱི་གཞི་རྟེན་སྐྱབས་གསུམ་འཛིན་པའི་སྡོམ་པ་བླངས་པ་ནས་བཟུང་། སོ་ཐར་རིགས་བདུན་ལས་དགེ་ཚུལ་སློང་གི་བར་དུ་སྡོམ་པ་བླངས་ཤིང་། དེའི་སྟེང་ཟབ་མོ་ལྟ་ལུགས་ཀྱི་བྱང་སྡོམ་ཡང་མང་ཆེ་བས་བླངས། ད་དེ་རིང་ནས་གསང་སྔགས་རྫོགས་པ་ཆེན་པོའི་ཆོས་སྒོ་ལ་ཞུགས་ཏེ་སྔོན་འགྲོའི་ཁྲིད་ཞུ་བའི་སྐབས་ཡིན།
༡༽ རྩིས་འགོ་ཡན་ལག་ལྔ།
ད་རེས་འཆད་བྱའི་ཆོས་ཀྱི་རིམ་པ་འདི་གང་ཡིན་སྙམ་ན། རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་ཞེས་བྱ་བ་འདི་ཉིད་འཆད་པ་ལ། ཐོག་མར་རྩིས་འགོ་ཡན་ལག་ལྔས་འཆད་དགོས། དེ་ཡང་དང་པོ་གཞུང་འདི་ཉིད་མཛད་པ་པོ་སུ་ཡིན་ཤེས་དགོས་པས་དེ་བཤད་པར་བྱ་སྟེ། མཛད་པ་པོ་ནི། བདག་ཅག་གི་སྟོན་མཆོག་མཉམ་མེད་ཤཱཀྱ་སེངྒེའི་བསྟན་པ་འཛིན་སྲུང་སྤེལ་བའི་བྱེད་པོ། འཕགས་པའི་ཡུལ་གྱི་རྒྱན་དྲུག་མཆོག་གཉིས། རྨད་དུ་བྱུང་བའི་སློབ་དཔོན་རྣམ་གཉིས་ཞེས་མཚན་ཉི་ཟླ་ལྟར་ཡོངས་སུ་གྲགས་པའི་རྨད་བྱུང་གི་སློབ་དཔོན་ཆེན་པོ་རྣམ་གཉིས་ཀྱི་ནང་ཚན་རྒྱལ་སྲས་ཆེན་པོ་ཞི་བ་ལྷ་དེ་ཉིད། སྙིགས་དུས་དགེ་བའི་བཤེས་གཉེན་གྱི་རྣམ་པར་བྱོན་པ་རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོའམ་རྫོགས་ཆེན་དཔལ་དགེ་སྤྲུལ་སྐུ་རིན་པོ་ཆེ་ཁོང་གིས་མཛད་པ་ཡིན། ཁོང་གི་འཁྲུངས་ཡུལ་རྫ་ཆུ་ཁ་ཡིན་པས་རྫ་དཔལ་སྤྲུལ་དང་། ཁོང་གིས་ཐོས་བསམ་སྒྲུབ་པ་ཉམས་ལེན་དང་གཞན་དོན་བསྟན་པའི་ཁུར་བཞེས་གཙོ་བོར་མཛད་གནས་གྲུབ་དབང་རྫོགས་ཆེན་པའི་གདན་ས་འདི་ཉིད་ཡིན་པས་རྫོགས་ཆེན་དཔལ་སྤྲུལ་ཡང་ཞུ་བ་རེད། རྫ་དཔལ་དགེ་བླ་མ་བསམ་གཏན་ཕུན་ཚོགས་ཀྱི་སྤྲུལ་སྐུ་ཡིན་པས་ན་དཔལ་དགེ་སྤྲུལ་སྐུ་ཞེས་ཡོངས་སུ་གྲགས། དཔལ་དགེ་བསམ་གཏན་ཕུན་ཚོགས་ནི། དམ་པ་མང་པོས་སྔར་གྱི་ལུང་བསྟན་ནང་བསྟན་པ་ལྟར་འཕགས་པ་སྤྱན་རས་གཟིགས་ཀྱི་སྤྲུལ་པ་ཡུལ་རྫ་སྟོད་དུ་འཁྲུངས་ནས་རྫ་མ་མོའི་མཁར་མདོ་རུ་རྡོ་མཁར་རིང་མོ་བཞེངས་རྒྱུའི་དབུ་བརྩམས། འཕགས་པ་འཇམ་དཔལ་དབྱངས་ཐུགས་དམ་གྱི་ལྷ་བསྙེན་པ་སོགས་སྔོན་གྱི་ལུང་བསྟན་དང་མཐུན་པའི་རྣམ་དཀར་གྱི་མཛད་པ་ཅན་སྐྱེས་ཆེན་དམ་པ་ཞིག་བྱོན། དེ་ཉིད་དགོངས་པ་ཆོས་ཉིད་དུ་ཐིམས་ནས་དེའི་ཡང་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་ནི། དགེ་རྩེ་རྫ་ཆུ་ཁའི་སྡེར་གཏོགས་རྒྱལ་ཐོག་ཅེས་པའི་རིགས་རྒྱུད་དུ་སྐུ་འཁྲུངས། འཁྲུངས་མ་ཐག་ཡིག་དྲུག་མ་ཎི་ཞལ་འདོན་མཛད་པ་དང་། ཕྱག་ལ་མ་ཎིའི་རང་བྱོན་དང་། ལྗགས་ལ་དྷཱི་ཡིག་རང་འཁྲུངས་སོགས་ངོ་མཚར་བའི་མཚན་ལྟས་མང་པོ་དང་བཅས་པ་ཞིག་ཡིན། དེང་སང་གི་མ་ཁ་མཁས་དང་ཕ་ཁ་མཁས་ཀྱིས་བུ་སྤྲུལ་སྐུ་འདྲ་བོ་མ་ཡིན། འཁྲུངས་དུས་ཡ་མཚན་གྱི་རྟགས་མ་འདྲ་བ་ཡོད་ནི། འཁྲུངས་ཚར་ནས་མ་རབས་ཀྱི་ཆ་ཚད་ཐམས་ཅད་རྫོགས་སོང་ནི་དེ་འདྲ་ཡང་མ་རེད། རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་གྱིས་དཔལ་དགེ་བླ་མའི་ཡང་སྲིད་དུ་ངོས་འཛིན་མཛད་ཅིང་། སྙིང་རྗེ་དང་མཁྱེན་རབ་གཞན་ལས་ཁྱད་པར་དུ་འཕགས་པ་ཤིན་ཏུ་ངོ་མཚར་ཅན་ཞིག་ཡིན། ཀུན་མཁྱེན་འཇིགས་མེད་གླིང་པའི་དངོས་སློབ་འཇིགས་མེད་ཕྲིན་ལས་འོད་ཟེར་དང་། འཇིགས་མེད་ངོ་མཚར་རྒྱ་མཚོ་གཉིས་དང་། རྫོགས་ཆེན་མི་འགྱུར་ནམ་མཁའི་རྡོ་རྗེ། རྒྱལ་སྲས་གཞན་ཕན་མཐའ་ཡས། རྡོ་བླ་འཇིགས་མེད་སྐལ་བཟང་། སེང་ཕྲུག་པདྨ་བཀྲ་ཤིས་ལ་སོགས་བླ་མ་མང་པོར་བསྟེན་ནས་ཐོས་བསམ་ཕྱོགས་མེད་མཛད་པས་མཁས་པའི་དབང་པོ་ཆེན་པོར་གྱུར། ཁྱད་པར་དུ་འཇིགས་མེད་རྒྱལ་བའི་མྱུ་གུའི་མདུན་ནས་སྙིང་ཐིག་གོང་འོག་གི་ཆོས་སྐལ་གདམས་ཟབ་བདུད་རྩིའི་ཉིང་ཁུ་བུམ་པ་གང་བྱོས་ཚུལ་དུ་གསན་ནས་ཁོང་གི་དོན་བརྒྱུད་ཀྱི་བསྟན་པ་འཛིན་པའི་རྒྱལ་ཚབ་ཏུ་དབང་བསྐུར། མདོ་མཁྱེན་བརྩེ་ཡེ་ཤེས་རྡོ་རྗེས་རིག་པ་བཅར་ཕོག་ཏུ་ངོ་སྤྲད་པས་གྲུབ་པའི་རྒྱལ་སར་གཤེགས་པའི་དམ་པའི་སྐྱེས་ཆེན་ཞིག་ཡིན། ཁོང་གིས་སྔོན་འགྲོ་ཀུན་བཟང་བླ་མའི་ཞལ་ལུང་འདི་རྫོགས་ཆེན་གཤིན་རྗེའི་སྒྲུབ་ཕུག་འདི་ནས་བརྩམས་མཛད་པ་རེད། དེ་བརྩམ་གཞིའི་ཕྱག་བྲིས་ཕྱག་བསྟར་མ་ད་ལྟ་པདྨ་ཐང་གི་ནང་རྟེན་ནང་ཡོད་པར་ད་ཞག་སྔོན་མ་རྟེན་དབང་བསྐུར་ནས་མཇལ་ཁ་ཞུས་མ་ཐག་པ་དེ་རེད། དེའི་མཛད་བྱང་གི་ནང་དུ། རུ་དམ་ཨོ་རྒྱན་བསམ་གཏན་ཆོས་གླིང་གི་ཡང་དབེན་འཇིགས་བྱེད་དུས་དགྲའི་དབང་པོའི་ཕོ་བྲང་ནས་སོགས་ཁོང་གིས་བརྩམས་ཚུལ་གསུངས་པ་སྟེ། འཇིགས་བྱེད་དུས་དགྲའི་དབང་པོའི་ཕོ་བྲང་ཞེས་པ་ནི་འཇམ་དཔལ་དབྱངས་དྲག་ཏུ་ཁྲོས་པ་འཇམ་དཔལ་ཡ་མནྟ་ཀ་གཤིན་རྗེ་གཤེད་པོ་ལ་གོ། ཡང་དབེན་པའི་ཡོན་ཏན་མ་ཚང་བ་མེད་པའི་རྒྱན་གྱིས་བརྗིད་ཆགས་པར་སྤྲས་ཤིང་། དྲོད་བཅུད་ཉི་ཟེར་གྱི་འོད་སྣང་སྤྱི་བོས་ལེན་ལ། བསིལ་བཅུད་བདུད་རྩིའི་ཐིགས་པ་རྐང་པས་འཐུངས་པའི་ལྗོན་ཤིང་དང་འཁྲི་ཤིང་དང་ལྕུག་མ་དང་ཞེས་སོགས་ནས་ དྲ་བ་དང་དྲ་བ་ཕྱེད་པར་བྲེས་པའི་ཁོང་སེང་ནས་སྔོ་བསངས་ནམ་མཁའི་བུ་མོའི་འཛུམ་ཟེར་གྱི་བདུད་རྩིས་སྙིང་ལ་སིམ་པ་ཅིར་ཡང་སྦྱིན་པའི་གནས་སུ་སོགས་སྙན་ངག་གི་རྒྱན་གྱིས་སྤྲས་ནས་མཇུག་བྱང་ནང་གསུངས་པ་ལྟར་གཤིན་རྗེའི་སྒྲུབ་ཕུག་འདི་ནས་བརྩམས་སོ། །ཁོང་གིས་གདན་ས་ཆོས་འཁོར་འདིའི་ཕྱོགས་ནས་སྒྲུབ་པ་ཉམས་ལེན་ཡང་ལོ་མང་པོར་མཛད་པ་ཡིན་ཏེ། ཚེ་རིང་ལྗོངས་ཀྱི་དཔལ་སྤྲུལ་སྒྲུབ་ཕུག་དང་། ཚེ་རིང་སྒྲུབ་ཕུག་དང་། ཤྲཱི་སེང་གི་རི་ངོས་དཔལ་སྤྲུལ་ཕུག་པ་སོགས་ལ་ཡུན་རིང་བཞུགས། ཤྲཱི་སེང་ཆོས་གྲྭ་སོགས་སུ་འཆད་ཁྲིད་མཛད་ནས་ཡུན་དུ་བཞུགས་པ་སོགས་སྔོན་རྗེས་ཚང་མ་བསྡོམས་ན་རྫོགས་ཆེན་གདན་ས་རང་ལ་ཡང་ལོ་ཉི་ཤུ་ལྷག་བཞུགས་མྱོང་རབས་ཡོད། སྤྱོད་འཇུག་རྐྱང་བ་ཚར་གྲངས་ཉི་ཤུ་ལྷག་གསུངས་པའི་ལོ་རྒྱུས་སྣང་བ་མ་ཟད་སྤྱོད་འཇུག་གི་སེམས་བསྐྱེད་མཆོད་པའི་སྐབས། སྤྱོད་འཇུག་མེ་ཏོག་ཟེར་བའི་སེར་ཆེན་འདབ་མ་མང་པོ་ཅན་ཞིག་ཡོད་པ་དེ་དུས་དེ་ནས་བཟུང་ས་ཆ་འདི་ན་འཁྲུངས་དར་ནི་རེད། གཞན་ཡང་སྒྲུབ་པ་ཉམས་ལེན་མཛད་སྐབས་དཀའ་ཐུབ་བསྟེན་པའི་ལོ་རྒྱུས་ཀྱང་མང་སྟེ། དབྱར་གའི་དུས་འབུ་སྦྲང་ལ་སྐུ་ལུས་སྦྱིན་པ་གཏོང་མཛད་དར་ནི་རེད། གཤིན་རྗེ་སྒྲུབ་ཕུག་གི་ཐད་ཀའི་གླང་གསེབ་ན་རྡོ་ཕ་བོང་ཆེན་པོ་ཞིག་ཡོད་པ་དེའི་ཐོག་ཀྱང་སྐུ་ལུས་སྦྱིན་པ་གཏོང་ས་རེད་གསུངས་དར། ངེད་ཚོས་ཤེས་ཚོད་ཨ་བུ་ལྷ་སྒང་ཚང་གིས་འབུ་སྦྲང་ལ་སྐུ་ལུས་སྦྱིན་པ་གཏོང་ས་རེད། ཡང་རྫ་ཆུ་ཁའི་ལྕང་མའི་ཆོས་སྒར་གྱི་ཀླད་སའི་གླང་གསེབ་ཅིག་ན་དཔལ་སྤྲུལ་རིན་པོ་ཆེས་སྐུ་ལུས་སྦྱིན་པ་གཏོང་ས་རེད་ཟེར་སའི་ཕ་བོང་ཆེན་པོ་ཞིག་ཡོད་ཅིང་། སྐུ་ཚེའི་སྨད་ཙམ་ལ་ས་ཕྱོགས་མང་པོར་ཕེབས་ནས་སྒྲུབ་པ་ཉམས་ལེན་མཛད་རབས་ཀྱི་ལོ་རྒྱུས་ཀྱང་མང་པོར་མཆིས། ཁོང་གིས་ལྗགས་རྩོམ་མཛད་པའི་གསུང་ཆོས་ཀྱང་ད་བཞུགས་པོ་ཏི་ཕྱིན་དྲུག་གི་གྲངས་ལྡན་དྲུག་ཡོད་པ་འདི་ཡིན་ལ། འོན་ཀྱང་འདིས་མི་ཚད་པ་མང་པོ་ཡོད་སྲིད་ཀྱང་ཁོང་བྱ་བཏང་སྦས་པའི་རྣལ་འབྱོར་པ་ཡིན་པས་གཏན་བཞུགས་ཀྱི་ཉེ་གནས་དང་ཞབས་འབྲིང་བ་མེད་སྟབས་གསུང་ཆོས་ཉར་ཚགས་བྱེད་མཁན་དང་བཀའ་ཡི་བསྡུ་བ་བྱེད་རྒྱུས་མ་འདངས་པས་དུས་མཐའ་མའི་གདུལ་བྱ་རང་རེ་རྣམས་ཀྱི་བསོད་ནམས་ཀྱི་བགོ་སྐལ་མ་གྱུར་ནས་གསུང་ཆོས་ཆ་ཚང་དེང་སང་མེད། ཁོང་གི་གསུང་ཆོས་ཚང་མ་གང་ཟག་ཕལ་བའི་བློས་རྟོག་བཟོ་བྱས་ཏེ་བཙན་སྒྲིག་གིས་བརྩམས་པའི་བསྟན་བཅོས་ལྟ་བུ་མ་ཡིན་པ། ཚངས་པའི་དབྱངས་ཀྱི་ཡན་ལག་རྫོགས་པའི་ནུས་པ་དང་ལྡན་པ་ཞིག་ཡིན་པས་ན། སྙན་ལ་རོ་ཉམས་ལྡན་པ། མཚར་ལ་བཞད་གད་ཐོན་པ། མཁས་པས་བརྟག་ན་དོན་བཟང་བ། བླུན་པོས་ཉན་ཡང་གོ་བདེ་བ་ཞིག་ཡིན་གསུངས་ཡོད། གསུང་ཆོས་འདི་དག་ནི་ཆོས་སྐུའི་རིང་བསྲེལ་གྱི་ཕུང་པོ། བཀའ་གཙིགས་བཀའ་ཆེམས་ཀྱི་ཚུལ་དུ་ཕྱི་རབས་གདུལ་བྱའི་བགོ་སྐལ་དུ་བཞག་ནས་སྐུ་ཚེ་དང་མཛད་པ་གཉིས་ཀ་མཐར་ཕྱིན་ཏེ། དགུང་གྲངས་བདུན་ཅུའི་ནང་མ་ཕེབས་བར་དུ་བཞུགས་ནས་མཐར་མཇུག་རྫ་ཆུ་ཁའི་ག་ལུང་དཀར་ཆུང་ཀོར་མོ་འོབས་ཀྱི་སྒྲུབ་གནས་སུ་དགོངས་པ་རྫོགས་སོང་བ་རེད། ཁོང་གི་ཞལ་སློབ་ཀྱི་ཐུ་བོ་ཡང་། ལྟ་བ་རང་ལས་ལྷག་པ་སྨྱོ་ཤུལ་ལུང་རྟོགས། སྤྱོད་པ་རང་ལས་ལྷག་པ་ཨོ་རྒྱན་བསྟན་འཛིན་ནོར་བུ། ཚད་མ་རང་ལས་མཁས་པ་རས་པ་བསྟན་འཛིན་གྲགས་པ། བཤད་པ་རང་ལས་མཁས་པ་མི་ཉག་ཀུན་བཟང་བསོད་ནམས་སོགས་རྒྱལ་བསྟན་རིས་སུ་མ་ཆད་པའི་བསྟན་འཛིན་མང་དུ་བྱོན་ཅིང་། དེ་དག་གི་སློབ་མ་དང་ཡང་སློབ་ཀྱིས་དེང་གི་སྐབས་སུ་འཛམ་གླིང་གི་ས་གཞི་ཡོངས་ལ་ཁྱབ་ཡོད་པ་འདི་ལྟར་རེད། འཆད་བྱའི་སྔོན་འགྲོ་འདི་ལུང་གང་ལས་བཏུས་ན། རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་ཉིང་ཁུ། རྫོགས་ཆེན་བཅུ་བདུན་རྒྱུད་ཀྱི་སྙིང་པོ། པདྨ་འབྱུང་གནས་དང་བཱི་མ་ལ་མི་ཏྲ་གཉིས་ཀྱིས་བཀྲལ་བའི་བཤད་བརྒྱུད་དང་སྙན་བརྒྱུད་ཀྱི་དགོངས་དོན་རྒྱ་ཆེ་བ་པཎྜི་ཏའི་ལུགས་དང་། ཟབ་པ་ཀུ་སཱ་ལིའི་ལུགས་གཉིས་ཀྱི་སྙིང་བཅུད་ཐམས་ཅད་ཕྱོགས་གཅིག་ཏུ་བསྡུས་པའི་སྙིང་ཐིག་གོང་འོག་སྤྱི་དང་མདོ་རྒྱུད་ཀྱི་ཟབ་གནད་ཐམས་ཅད། ཁྱད་པར་ཀློང་ཆེན་སྙིང་གི་ཐིག་ལེའི་ཆོས་བཀའ་ལས་བཏུས་སོ། །མན་ངག་གི་གཞུང་འདི་ཕྱོགས་གང་དུ་གཏོགས་ན། ཐེག་ཆེན་རིག་པ་འཛིན་པའི་སྡེ་སྣོད་ལ་གཏོགས་ཤིང་། སྔགས་གསར་རྙིང་གཉིས་ཀྱི་ནང་ནས་སྔ་འགྱུར། ཐེག་རྩེ་རྫོགས་ཆེན་སྡེ་གསུམ་ནང་གི་མན་ངག་སྡེ། དེ་ལ་ཡང་སྔོན་འགྲོ་དང་དངོས་གཞིའི་རིམ་པ་མང་དུ་ཡོད་པའི་ནང་ནས་འདི་སྔོན་འགྲོའི་ཁྲིད་ཡིག་ཡིན་ནོ། །འདིའི་དབུ་ཞབས་ཀྱི་དོན་གང་ཡིན་ཞེ་ན། གང་ཟག་གཅིག་ཚེ་ལུས་གཅིག་ལ་འཚང་རྒྱ་བའི་ལམ་གྱི་རིམ་པ་སྔོན་འགྲོ་ཕྱི་ནང་གིས་རྒྱུད་སྦྱངས་ཏེ་སྣོད་ལྡན་དུ་སྒྱུར་བར་བྱེད་པའི་ལམ་གྱི་ལུས་ཆ་ཚང་བ་ཞིག་བསྟན་ཏོ། །འདི་དགོས་ཆེད་སུ་ཞིག་གི་དོན་དུ་མཛད་ཅེ་ན། རྫོགས་པ་ཆེན་པོའི་གདུལ་བྱར་གྱུར་བའི་གང་ཟག་དེ་ལ་སྣང་བ་ཡུལ་གྱི་བློ་ཅན་དང་། རིག་པ་རང་སྣང་གི་བློ་ཅན་ཞེས་དབང་པོ་རྣོ་རྟུལ་གྱི་སྒོ་ནས་གཉིས་སུ་ཡོད། དེ་གཉིས་རིམ་དང་གཅིག་ཆར་གྱིས་ཚེ་ལུས་གཅིག་ལ་མགོན་པོ་རྡོ་རྗེ་འཆང་གི་གོ་འཕང་བཀོད་པའི་ཆེད་དུ་མཛད་པའོ།།
༢༽ དགོས་སོགས་ཆོས་བཞི།
གཞན་ཡང་འདི་ལ་བརྗོད་བྱ་དང་། དགོས་པ་དང་། ཉིང་དགོས་དང་། འབྲེལ་བ་སྟེ་དགོས་སོགས་ཆོས་བཞི་ཡང་ཚང་བས་བཤད་པར་བྱ་སྟེ། བརྗོད་བྱ་ནི། ཁྲིད་ཡིག་འདིར་གང་ཟག་གཅིག་ཚེ་ལུས་གཅིག་ལ་གྲོལ་བའི་མྱུར་ལམ། ཐུན་མོང་དང་ཐུན་མིན་གྱི་སྔོན་འགྲོ་བསྟན་པ་རྣམས་འདིའི་བརྗོད་བྱ་ཡིན། ཐུན་མོང་དང་ཐུན་མིན་གྱི་དོན་ནི། ཐེག་པ་གསུམ་དང་སྐྱེས་བུ་གསུམ་ཀའི་བསམ་བྱ་ཡིན་པས་ཐུན་མོང་གི་སྔོན་འགྲོ་བློ་ལྡོག་རྣམ་པ་བཞི། དེའི་སྟེང་དུ་ཐར་བའི་ཕན་ཡོན་དང་བཤེས་གཉེན་བསྟེན་པ་གཉིས་བསྣན་པས་དྲུག་འདི་ལ་ཐུན་མོང་ཕྱི་ཡི་སྔོན་འགྲོ་ཡིན། ཐུན་མིན་ནི་འཇིག་རྟེན་པའི་ཐེག་པ་དང་ཐེག་དམན་ཉན་རང་དང་སྐྱེས་བུ་ཆུང་འབྲིང་གཉིས་ཀྱི་ཐུན་མོང་མིན་ལ། ཐེག་ཆེན་མདོ་སྔགས་ཀྱི་སྐྱེས་བུ་ཆེན་པོ་དང་མཐུན་པའི་སྐྱབས་འགྲོ་དང་སེམས་བསྐྱེད། ཚོགས་བསགས་པ་མཎྜལ་གྱི་ཁྲིད། ཐེག་ཆེན་གསང་སྔགས་དང་མཐུན་པའི་རྡོར་སེམས་བསྒོམ་བཟླས་དང་བླ་མའི་རྣལ་འབྱོར། དེ་ཡང་བསྐྱེད་རིམ་དང་གཙོ་བོར་མཐུན་པ་རྡོར་སེམས་བསྒོམ་བཟླས། རྫོགས་རིམ་དང་གཙོ་བོར་མཐུན་པ་བླ་མའི་རྣལ་འབྱོར་ཡིན། དེའི་ཐོག་དངོས་གཞི་གདམས་པའི་ཆ་ལག་ཉེ་ལམ་འཕོ་བའི་ཁྲིད་དང་བཅས་པའི་ཁྲིད་རྐང་དྲུག་འདི་ཐུན་མིན་ནང་གི་སྔོན་འགྲོ་ཡིན་ལ། དེ་དག་ནི་གཞུང་འདིའི་བརྗོད་བྱ་ཡིན་ནོ། །དགོས་པ་ནི། འདི་ལྟ་བུའི་སྔོན་འགྲོའི་ཁྲིད་རིམ་ལ་སྐལ་བ་དང་ལྡན་པའི་སློབ་མ་རྣམས་ཚུལ་བཞིན་ཞུགས་ནས། འབུམ་ལྔའི་བསགས་སྦྱངས་སྔོན་དུ་བཏང་ཞིང་། བྱིན་རླབས་འཇུག་པ་བླ་མའི་རྣལ་འབྱོར་ཉམས་སུ་བླངས་པ་དང་བཅས་པས་བྱིན་བརྒྱུད་རྟོགས་པའི་ཕ་ཕོགས་ཐོབ་པ་ནི་འདིའི་དགོས་པ་ཡིན་ནོ། །ཉིང་དགོས་ནི། དེ་ལྟ་བུའི་ཐུན་མོང་དང་ཐུན་མིན་གྱི་སྔོན་འགྲོ་སྔོན་དུ་སོང་ཞིང་། དངོས་གཞི་ཁྲེགས་ཆོད་དང་ཐོད་རྒལ་གྱི་ལམ་ཉམས་སུ་བླངས་ནས་ཚེ་ལུས་གཅིག་ལ་གྲོལ་བར་མངོན་དུ་གྱུར་པར་དེ་ཉིད་ཉིང་དགོས་སམ་དགོས་པའི་དགོས་པ་ཡིན་ནོ། །འབྲེལ་བ་ནི། དེ་གསུམ་གཅིག་ལ་གཅིག་ལྟོས་སྔོན་མ་ཡོད་ན་རྗེས་མ་འབྱུང་བའི་འབྲེལ་བ་ཡོད་པའི་སྔོན་འགྲོའི་གཞུང་འདི་ཉིད་འཆད་ཉན་བྱེད་པ་ལ་དགོས་སོགས་ཆོས་བཞི་འདི་དང་པོ་ཤེས་པར་བྱེད་དགོས་སོ། །ད་ནི་ཀུན་བཟང་བླ་མའི་ཞལ་ལུང་གི་གཞུང་དངོས་འཆད་པ་ལ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ་ཡོད་པ་ལས།
༼༡༽ ཀླད་དོན་དངོས་ལ་གསུམ།
༡༽ མཚན་སྨོས་པ།
དང་པོ་ལའང་མཚན་སྨོས་པ། ཕྱག་འཚལ་བ། རྩོམ་པར་དམ་བཅའ་བ་གསུམ་ལས། དང་པོ་ནི། རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་ཞེས་བྱ་བ་བཞུགས་སོ། །ཞེས་མན་ངག་གི་གཞུང་འདི་ཉིད་ཀྱི་མཚན་དུ་བྱས། སྤྱིར་མཚན་སྨོས་པའི་དགོས་པ་ནི། ཇི་སྐད་དུ། མིང་དུ་གདགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་མགོན་པོ་ཐབས་མཁས་པས། །ཆོས་རྣམས་མིང་དུ་བཏགས་པར་མཛད། །ཅེས་གསུངས་པ་ལྟར་གཞུང་ལུགས་རེ་ལ་མཚན་རེ་བཏགས་ཡོད་པས། དེ་ཡང་དབང་པོ་ཡང་རབ་རྣམས་ཀྱིས་གླེགས་བམ་གྱི་མཚན་མཐོང་བ་ཙམ་གྱིས་དབུ་ཞབས་ཀྱི་དོན་ཐམས་ཅད་རྟོགས་པའི་དགོས་པ་དང་། དབང་པོ་འབྲིང་རྣམས་ཀྱིས་དམག་མི་ལ་མདའ་བྱང་བཏགས་པ་ལྟར་མདོ་སྔགས་ཀྱི་ཕྱོགས་གང་གཏོགས་ཤེས་པའི་དགོས་པ་དང་། དབང་པོ་ཐ་མས་ཀྱང་སྨན་སྣོད་ལ་ཁ་བྱང་བཏགས་པ་ལྟར་གླེགས་བམ་བཙལ་སླ་བའི་དགོས་པ་ཡོད་དོ། །སྤྱིར་མཚན་འདོགས་ཚུལ་ལ་བརྗོད་བྱ་དོན་གྱི་སྒོ་ནས་བཏགས་པ། རྗོད་བྱེད་ཚིག་གི་སྒོ་ནས་བཏགས་པ། མཚོན་བྱེད་དཔེ་ཡི་སྒོ་ནས་བཏགས་པ། ཞུ་བ་པོ་འཁོར་གྱི་སྒོ་ནས་བཏགས་པ་སོགས་མང་པོ་ཡོད་ན། འདི་ནི་བརྗོད་བྱ་དོན་གྱི་སྒོ་ནས་མཚན་བཏགས་པ་ཡིན་ཏེ། རྫོགས་པ་ཆེན་པོ་ཀློང་ཆེན་སྙིང་ཐིག་གི་དངོས་གཞིའི་སྔོན་དུ་འགྲོ་བའི་ཁྲིད་ཡིག་ཡིན་པས་ན་སྔོན་འགྲོ་ཞེས་བྱ། ཁྲིད་ཡིག་འདི་ཉིད་ཆོས་སྐུ་ཀུན་ཏུ་བཟང་པོ་དང་རྣམ་དབྱེར་མ་མཆིས་ཤིང་དགོངས་ཀློང་རོ་གཅིག་པའི་བླ་མ་དམ་པའི་ཞལ་གྱི་ལུང་ཡིན་པས་ན་ཀུན་བཟང་བླ་མའི་ཞལ་ལུང་ཞེས་གསུངས། འདིའི་མཚན་དོན་འབྲེལ་བ་ལ་ཐོག་མ་རྫོགས་པ་ཆེན་པོའི་དོན་ནི། འགྲེལ་སླ་བ་ཞིག་མིན་ལ་འགྲེལ་ཤེས་པ་ཞིག་ཀྱང་དཀའ། མ་འགྲེལ་སྐྱུར་ནའང་མི་འོས་པས། དེས་ན་འདིར་རྫོགས་པ་ཆེན་པོ་ནི་རྫོགས་ཆེན་ལ་གོ། དེ་ཡང་རྫོགས་ཆེན་འབྲོག་རུའི་སྡེ་ལྟ་བུ་ཞིག་མ་ཡིན་ཡང་། སྔོན་ཆད་རྫོགས་པ་ཆེན་པོའི་ཆོས་འདི་སྒོམ་མཁན་གྱི་བླ་མ་ཞིག་ཡོད། དེའི་ཆོས་ཀྱི་མིང་གང་ཟག་ལ་ཐོགས་ནས་མཚན་ལ་རྫོགས་ཆེན་གྲུབ་ཐོབ་པ་པདྨ་རིག་འཛིན་གསོལ། ཁོང་འདིར་བྱོན་ནས་གདན་ས་བཏབ་པས་གང་ཟག་གི་མིང་འབྲེལ་བ་རྒྱུ་མཚན་དུ་བྱས་ནས་དགོན་པ་ལ་རྫོགས་ཆེན་ཞེས་ཐོགས་པ་དང་། མ་ཚད་དེའི་སྐབས་ས་ཆའི་ཡུལ་སྡེ་ལ་ཡང་རྫོགས་ཆེན་སྡེ་བ་ཞེས་ཐོགས། དེས་ཀྱང་མ་ཚད་ད་སྐབས་ས་གནས་སྲིད་གཞུང་ལའང་རྫོགས་ཆེན་ཡུལ་ཚོ་ཞེས་ཐོགས་ནས་ཡོད་པ་དེ་ཐམས་ཅད་ཡི་གེ་བྲི་ལུགས་གཅིག་རེད། འདིར་རྫོགས་པའི་དོན་ནི་མ་ཚང་བ་མེད་པའམ་ཆ་ཚང་བ་ཞིག་གཅིག་གི་ནང་དུ་འདུས་ཡོད་པ་ལྟ་བུའི་དོན་ལ་གོ་དགོས། འོ་ན་ཅི་ཞིག་གང་དུ་མ་འདུས་པ་མེད་པའམ་རྫོགས་པ་ཡིན་ཞེ་ན། འཁོར་འདས་སྣང་བཏགས་ཀྱིས་བསྡུས་པའི་ཆོས་ཐམས་ཅད་ཆོས་ཉིད་རིག་པ་ཁྱབ་གདལ་ཆེན་པོ་གཅིག་གི་ཁོངས་སུ་འདུས་པའི་དོན་ཡིན། ཡང་ཁ་ཚུར་བསྐོར་ནས་བཤད་ན་རིག་པ་ཆོས་དབྱིངས་ཆེན་པོའི་ཡེ་ཤེས་ཀྱིས་འཁོར་འདས་ཀྱི་ཆོས་ཀུན་ལ་མ་ཁྱབ་པར་མེད་པ་དེ་ལྟ་བུ་ཞིག་ལ་གོ་དགོས། འདི་ཁུག་མ་ཆེན་པོ་ཞིག་གི་ནང་ཅ་ལག་ཆབ་བེ་ཆོབ་བེ་རྡོ་རྭ་ཅོ་མིན་པ་བཅུག་བཞག་འདྲ་ཞིག་ཀྱང་མ་རེད། ཅ་ལག་ཆབ་བེ་ཆོབ་བེ་མང་པོའི་ཐོག་ཕྱ་ར་ཆེན་པོ་བཀབ་པ་ལྟ་བུ་ཡང་མ་ཡིན། འདིའི་གོ་དོན་ནི་གཞི་གཉུག་མའི་ཡེ་ཤེས་ཆེན་པོའི་ཀློང་དུ་འཁོར་བའི་འཁྲུལ་སྣང་གི་ཆོས་ཐམས་ཅད་རྫོགས་པ་ཞིག་ལ་གོ། རྫོགས་ཚུལ་འཁྲུལ་བའི་སྣང་བ་རྨི་ལམ་དང་སྒྱུ་མ་ལྟ་བུ་འདི་ཐམས་ཅད་རིག་པའི་རྩལ་ལས་ཤར་བ། དཔེར་ན་མཚོ་ལས་རྦ་རླབས་བྱུང་བའམ། མཁའ་ལས་རླངས་པ་བྱུང་བ་ལྟ་བུ་ཞིག་ཡིན་པས་མར་མ་དག་འཁོར་བའི་སྣང་སེམས་ཐམས་ཅད་འདིའི་ནང་ལ་རྫོགས་པ་དང་། ཡར་མྱ་ངན་ལས་འདས་པའི་ཆོས་ཐམས་ཅད་རིག་པའི་ངོ་བོར་ལྷུན་གྲུབ་རང་ཆས་སུ་ཡོད་པ་དཔེར་ན་ཉི་མ་དང་དེའི་འོད་ཟེར་བཞིན་དུ་རྫོགས་པས་ན། ཡར་མྱ་ངན་ལས་འདས་པའི་ཕྱོགས་ཀྱི་འབྲས་ཆོས་ཉེར་ལྔ་དང་བཅས་པ་ཐམས་ཅད་ཡང་དེ་ལ་རྫོགས་ཡོད། དེ་ལྟ་བུའི་འཁོར་འདས་ཀྱི་ཆོས་ཐམས་ཅད་རྫོགས་པའི་ཡེ་ཤེས་དེ་ཉིད་ནི་སྲིད་ཞི་ཀུན་ལ་ཁྱབ་པའི་ཡེ་ཤེས་ཡིན་པས་ན་ཆེན་པོ་ཞེས་བརྗོད། དེ་ལྟ་བུའི་རྫོགས་པ་ཆེན་པོ་དེ་ནི་བརྗོད་བྱ་དོན་གྱི་རྫོགས་ཆེན་ཡིན་ནོ། །རྗོད་བྱེད་ཚིག་གི་རྫོགས་ཆེན་ནི་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི། དེའི་དགོངས་བཅུད་ཐམས་ཅད་ཡོངས་སུ་བསྡུས་པ་རྒྱུད་ཆེན་བཅུ་བདུན། དེའི་ཡང་སྙིང་ཟབ་པ་པོད་བཞིའམ་སྙིང་ཐིག་མ་བུ་བཞི་ལ་དྲིལ་ཡོད་པ་འདི་ནི་ཀུན་མཁྱེན་ཀློང་ཆེན་རབ་འབྱམས་ལ་བཀའ་བབ་པའི་ཟབ་དང་རྒྱ་ཆེའི་སྙིང་ཐིག་གི་ཆོས་སྐལ་འདི་ཉིད་ཡིན། དེ་ནས་ཀུན་མཁྱེན་ཀློང་ཆེན་རབ་འབྱམས་ཀྱི་ཡེ་ཤེས་ཀྱི་སྐུས་ལན་གསུམ་རྗེས་སུ་བཟུང་བ། བརྒྱུད་གསུམ་རིག་འཛིན་གཅིག་ལ་འདུས་པ་ཀུན་མཁྱེན་འཇིགས་བྲལ་གླིང་པ་མཆོག་ཡིན། བརྒྱུད་པ་གསུམ་ནི་རྒྱལ་བ་དགོངས་པའི་བརྒྱུད་པ། རིག་འཛིན་བརྡ་ཡི་བརྒྱུད་པ། གང་ཟག་སྙན་ཁུང་གི་བརྒྱུད་པ་གསུམ་མོ། །དེའི་བཀའ་སྲོལ་གྱི་ཤིང་རྟའི་ལམ་ཆེན་པོར་ཕྱེས་པ་དེ་ལ་ཀློང་ཆེན་སྙིང་ཐིག་ཅེས་ཡོངས་སུ་གྲགས་པ་ཡིན། འདི་དེའི་སྔོན་འགྲོའི་ཁྲིད་ཡིག་ཡིན་པས་ན་ཀློང་ཆེན་སྙིང་ཐིག་གི་སྔོན་འགྲོའི་ཁྲིད་ཡིག་ཅེས་གསུངས། ཀུན་བཟང་ནི་ཡེ་ཐོག་དང་པོའི་སྔོན་རོལ་འཁོར་འདས་གང་དུ་ཡང་མ་གྲུབ་པའི་ཐོག་མར་བྱང་ཆུབ་ཏེ་སངས་རྒྱས་པ། ལྷུན་གྲུབ་སྐུ་དང་ཡེ་ཤེས་ཡོན་ཏན་རྒྱ་མཚོ་རབ་ཏུ་རྫོགས་པའི་དཔལ་མངའ་བ་ཐོག་མའི་སངས་རྒྱས་ཀུན་ཏུ་བཟང་པོ་དེ་ཉིད་ཡིན། དེ་དང་གཉིས་སུ་མ་མཆིས་པར་དཔལ་མགོན་བླ་མ་དམ་པ། ཡོན་ཏན་སངས་རྒྱས་ཀུན་དང་མཉམ་ན་ཡང་། །བཀའ་དྲིན་སངས་རྒྱས་སྟོང་ལས་ལྷག་པའི་མགོན། །ཞེས་གསུངས་པ་ལྟར། དཔལ་སྤྲུལ་རིན་པོ་ཆེ་ཁོང་གི་རིགས་བདག་མཚུངས་པ་མེད་པ་འཇིགས་མེད་རྒྱལ་བའི་མྱུ་གུ་ཡིན། དེའི་ཐུགས་ཀྱི་དཔལ་བེའུ་རུ་འཁྱིལ། མགུལ་གྱི་བུམ་བཟང་ནས་བརྒྱུད། དུང་གི་ཚེམས་བར་ནས་ཕྱུངས་པའི་ཞལ་ཆབ་གཙང་མའི་མན་ངག་གི་ལུང་། དེ་ཡང་གཞན་ཟེར་རྗེས་ཟློས་དང་བསྲེ་བསླད་རྟོག་བཟོ་བྱས་པའི་རྟོག་གེའི་བསྟན་བཅོས་ལྟ་བུ་མ་ཡིན་པར། བླ་མའི་ཞལ་ལུང་དྲོན་མོ་ལས་བྱུང་བའི་གསུང་དྲི་མ་མེད་པ་ཇི་བཞིན་འདི་ན་བཀོད་པ་ཡིན་པས་ཀུན་བཟང་བླ་མའི་ཞལ་ལུང་ཞེས་བྱ་བ་བཞུགས་སོ་ཞེས་དོན་དེ་ལྡན་གྱི་མཚན་སྨོས་པ་ཡིན་ནོ།།
༢༽ ཕྱག་འཚལ་བ།
གཉིས་པ་ཕྱག་འཚལ་བ་ལ། བོད་བཙད་པོ་རྣམས་ཀྱི་སྐུ་དུས་རྒྱ་གར་གྱི་པཎྜི་ཏ་མང་པོ་བོད་དུ་བྱོན། ཀ་ཅོག་ཞང་གསུམ་བཻ་རོ་ཙཱ་ན་སོགས་ཀྱིས་རྒྱ་ཆོས་བོད་དུ་བསྒྱུར་བའི་དུས་སུ་ལོ་ཙཱ་བ་རྣམས་ཀྱིས་འགྱུར་ཕྱག་གམ་སྡེ་སྣོད་ངོས་འཛིན་གྱི་ཕྱག་མཛད་སྲོལ་ཡོད་པ་དང་ཕྱོགས་མཐུན་པ་འདི་ལ། སྤྱི་དང་བྱེ་བྲག་དམིགས་བསལ་གྱི་ཕྱག་འཚལ་བ་གསུམ་ལས། དང་པོ་ནི། རྗེ་བཙུན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་རྣམས་ལ་ཕྱག་འཚལ་ལོ། ཞེས་གསུངས་པའི་དོན་ནི་མཆོད་འོས་མཆོག་གྱུར་བཀུར་སྟི་དང་ཕུ་དུད་གྱི་ཡུལ་དུ་གྱུར་བའི་རྗེ་བོ་དམ་པ་འཇིག་རྟེན་ན་ཆོ་རིགས་བཙུན་པའམ་ཤེས་བྱའི་གནས་ལ་མཁས་མཛངས་ཅན་ཡོན་ཏན་དང་ལྡན་པར་རྗེ་བོ་བཀུར་བ་ལྟར། དཀོན་མཆོག་གི་གདུང་འཛིན་པའི་ཆོ་རིགས་བཙུན་པ་ཡིན་ཞིང་། ཕྱི་ནང་གསང་བའི་ཡོན་ཏན་གཞན་མཚུངས་དང་བྲལ་བ་མངའ་བ་གང་ཉིད་ཀུན་ཀྱི་བླ་རུ་མཐོ་བས་ན་བླ་མ་ཞེས་བྱ་སྟེ། ཇི་སྐད་དུ། །བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །བསྐལ་བ་སྟོང་གི་སངས་རྒྱས་ཀྱང་། །བླ་མ་དག་ལ་བསྟེན་ནས་འབྱུང་། །ཞེས་དང་། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་ཀྱི་བྱེད་པོ་བླ་མ་ཡིན། །ཞེས་གསུངས་པ་ལྟར་རོ། །དེ་ལ་དབྱེ་ན་མཚོན་བྱེད་རྟགས་ཀྱི་བླ་མ་དང་མཚོན་བྱ་དོན་གྱི་བླ་མ་གཉིས་ཡོད། དང་པོ་ནི་སྙིགས་དུས་དགེ་བའི་བཤེས་གཉེན་མིའི་ཤ་ཚུགས་སུ་བྱོན་པའི་བཀའ་དྲིན་སུམ་ལྡན་གྱི་བླ་མ་དེ་ཉིད་ཡིན་ནོ། །གཉིས་པ་ནི་རང་ཉིད་ཀྱི་སྙིང་དབུས་སུ་བཞུགས་པའི་ཆོས་ཉིད་འོད་གསལ་བའི་ཡེ་ཤེས་དེ་ཉིད། བླ་མའི་མན་ངག་གིས་སད་པར་བྱས་པའི་སྐྱེ་མེད་དོན་གྱི་བླ་མ་དེ་ཡིན་པས་རྗེ་བཙུན་བླ་མ་ཞེས་གསུངས། སྐྱེ་འགག་རྟག་ཆད་ཡོད་མེད་ཡོད་མིན་ལ་སོགས་སྤྲོས་པའི་མཚན་མ་འཛིན་པའི་དམིགས་པའི་གཏད་སོ་འཁོར་བའི་རྣམ་རྟོག་ཐམས་ཅད་ཞི་ཞིང་མེད་པར་གྱུར་པའི་ཐུགས་རྗེ་ཆེན་པོ་མཁྱེན་གཉིས་ཡེ་ཤེས་ཀྱི་ཡོན་ཏན་རྒྱ་མཚོ་དང་ལྡན་པ། དེ་ལ་དབྱེ་ན་སྨིན་པར་བྱེད་པ་དབང་གི་བླ་མ། གྲོལ་བར་བྱེད་པ་ཁྲིད་ཀྱི་བླ་མ། བརྒྱུད་པའི་བླ་མ་བྱིན་རླབས་དང་ལྡན་པ། འདྲེན་པའི་བླ་མ་ཐུགས་རྗེ་དང་ལྡན་པ་ལ་སོགས་དབྱེར་ཡོད་པས་རྣམས་ཞེས་མང་ཚིག་སྦྱར་བའི་ཡུལ་དུ་གྱུར་བའི་བླ་མ་དེ་རྣམས་ནི་རྩ་བའི་བླ་མ་གཅིག་ལ་ཚང་བའམ་འདུས་ཡོད་དེ། རྩ་བའི་བླ་མ་དེ་ཉིད་ནི་དཀོན་མཆོག་ཀུན་འདུས་ཀྱི་ངོ་བོ། རྩ་གསུམ་ཀུན་འདུས་ཀྱི་ངོ་བོ། སྐུ་གསུམ་ཀུན་འདུས་ཀྱི་ངོ་བོ་ཡིན་པས་ཐམས་ཅད་ཀུན་འདུས་རྩ་བའི་བླ་མ་ལ་ཕྱག་འཚལ་ལོ་ཞེས་གསུངས། སྤྱིར་ཕྱག་འཚལ་བ་འདི་ལ་འཚལ་ལུགས་རབ་ལྟ་བ་མཇལ་བའི་ཕྱག འབྲིང་སྒོམ་པ་གོམས་པའི་ཕྱག ཐ་མར་སྤྱོད་པ་མོས་གུས་ཀྱི་ཕྱག་དང་རྣམ་གྲངས་གསུམ་གྱི་དབྱེ་བ་ཡོད། འདི་ནི་མཆོག་གསུམ་རྩ་གསུམ་སྐུ་གསུམ་ཀུན་འདུས་ཀྱི་ངོ་བོ་བླ་མ་དམ་པ་དེ་ལ་རང་རིག་སྐྱེ་མེད་དོན་གྱི་བླ་མ་དེ་ཉིད་དང་དབྱེར་མེད་པར་རང་ངོ་ཤེས་པའི་ངང་ནས་ཕྱག་འཚལ་བ་ཡིན་པས་རབ་ལྟ་བ་མཇལ་བའི་ཕྱག་གོ། །གཉིས་པ་བྱེ་བྲག་བརྒྱུད་གསུམ་བླ་མ་རྣམས་ལ་ཕྱག་འཚལ་བ་ནི། རྒྱལ་བའི་དགོངས་པ་རིག་འཛིན་བརྡ་ཡིས་བརྒྱུད། །གང་ཟག་མི་ལས་སྐལ་པ་རབ་གྱུར་པས། །དམ་པའི་རྗེས་ཟིན་དོན་གཉིས་མཐར་ཕྱིན་པ། །བརྒྱུད་གསུམ་བླ་མ་རྣམས་ལ་ཕྱག་འཚལ་ལོ། །ཞེས་པའི་དོན་རྒྱལ་བ་དགོངས་བརྒྱུད་ནི། ཡེ་གདོད་མ་དང་པོའི་གཞི་ནས་མངོན་པར་རྫོགས་པ་རང་བྱུང་གི་སངས་རྒྱས། ཐོག་མའི་མགོན་པོ་འོད་མི་འགྱུར་བ་སྟོན་པ་ཀུན་ཏུ་བཟང་པོ་ཉིད་ཀྱིས་ཐུགས་རྗེའི་རྣམ་པར་འཕྲུལ་བ་ཚད་བཟུང་རིས་ཀྱིས་གཞལ་དུ་མེད་པའི་ངང་ནས། ཉིད་ལས་མི་གཞན་པའི་འཁོར་སྐུ་ལྔ་ལྷུན་གྲུབ་རྒྱལ་བ་རྒྱ་མཚོའི་ཚོགས་དང་བཅས་པ་རྣམས་ལ། གསུང་སྒྲ་ཚིག་ལས་ཤིན་ཏུ་འདས་པ། རང་རིག་པ་ཡེ་ཤེས་ཀྱི་རང་མདངས་འགག་མེད་རང་ཤར་དུ་གསལ་བ་དེ་ཉིད་ཅི་ཡང་མི་གསུངས་པའི་ཚུལ་གྱིས་གསུངས། མདོར་ན་ནང་གསལ་ཕྲ་བའི་ཡེ་ཤེས་ཐུགས་རྣམ་པར་མི་རྟོག་པའི་རང་མདངས་རྒྱལ་བ་ཉིད་ཀྱི་སྤྱོད་ཡུལ་དུ་གྱུར་པ་ཞིག་ལ་གོ་དགོས། །རིག་འཛིན་བརྡ་བརྒྱུད་ནི། དུས་གསུམ་སངས་རྒྱས་ཐམས་ཅད་ཀྱི་དགོངས་པས་དཔལ་རྡོ་རྗེ་སེམས་དཔའ་ལ་བསྐུལ། དཔལ་རྡོ་རྗེ་སེམས་དཔའ་དེ་ཉིད་ཀྱི་ཐུགས་ཀ་ནས་རིན་པོ་ཆེ་རང་འབར་གྱི་འཁོར་ལོ་བྱུང་ནས་སེམས་དཔའ་རྡོ་རྗེ་ལ་བསྐུལ། དེ་ཉིད་ཀྱིས་བཤད་པར་དམ་བཅས། ཕྱག་ན་རྡོ་རྗེས་རྨད་བྱུང་བསྟན་པའི་སྙིང་པོ་རྒྱལ་བ་ཐམས་ཅད་ཀྱི་དགོངས་པའི་བཅུད་རྩོལ་མེད་རང་བྱུང་གི་དགོངས་པ། རྒྱུ་འབྲས་རྩོལ་སྒྲུབ་ལས་འདས་པ། ཨ་ཏི་རྩོལ་མེད་རང་བྱུང་རྫོགས་པ་ཆེན་པོའི་ཆོས་འདི་ལྷའི་བུ་སེམས་ལྷག་ཅན་ལ་གཏད་ཅིང་རྒྱལ་ཐབས་སྤྱི་བླུགས་ཀྱི་བརྡ་དབང་བསྐུར། དེའི་རྗེས་མི་ཡུལ་དུ་སེམས་ལྷག་ཅན་གྱི་སྤྲུལ་པ་དགའ་རབ་རྡོ་རྗེ་ལ་སླར་ཡང་ཕྱག་ན་རྡོ་རྗེས་རྒྱལ་ཐབས་སྤྱི་བླུགས་ཀྱི་བརྡ་དབང་ཡོངས་རྫོགས་བསྐུར་ཅིང་རྫོགས་པ་ཆེན་པོའི་རྒྱུད་ལུང་མན་ངག་ཐམས་ཅད་ཐུགས་རྒྱུད་ལ་རྫོགས་པར་མཛད། དགའ་རབ་རྡོ་རྗེས་རྒྱ་གར་གྱི་སློབ་དཔོན་འཇམ་དཔལ་བཤེས་གཉེན་ལ་རྟོགས་པ་དོན་བརྒྱུད་ཀྱི་ཚུལ་དུ་གཏད། དེས་རྒྱ་ནག་པོའི་སློབ་དཔོན་ཤྲཱི་སེངྷ་ལ་གསུངས། ཤྲཱི་སེངྷ་ལས་ཨོ་རྒྱན་སངས་རྒྱས་གཉིས་པ། མཁས་པ་ཛྙཱ་ན་སུ་ཏྲ། པཎ་ཆེན་བཱི་མ་མི་ཏྲ་། ལོ་ཆེན་བཻ་རོ་ཙཱ་ན་བཅས་ལ་བརྒྱུད་པ་དེ་ཡན་ཆད་རྣམས་ལ་རིག་འཛིན་བརྡ་བརྒྱུད་ཡིན། གང་ཟག་སྙན་བརྒྱུད་ནི་བདག་ཅག་གི་སྟོན་པ་བཅོམ་ལྡན་འདས་སྐུ་མྱ་ངན་ལས་འདའ་ཁར། ང་ཡི་བསྟན་པ་བྱང་ནས་བྱང་དུ་དར་ཞེས་ལུང་བསྟན་པ་ལྟར། རྒྱ་གར་རྡོ་རྗེ་གདན་དབུས་སུ་བྱས་པའི་བྱང་ཕྱོགས་བོད་གྱི་ཡུལ་དུ་ཆོས་མདོ་སྔགས་གཉིས་ལྡན་གྱི་བསྟན་པ་དར་བའི་སྐབས་སུ། ཨོ་རྒྱན་སངས་རྒྱས་གཉིས་པ་དང་། སློབ་དཔོན་བཱི་མ་ལ་མི་ཏྲ་རྣམ་གཉིས་ཀྱིས་ཐུགས་སྲས་རྗེ་འབངས་གྲོགས་གསུམ་སོགས་གང་ཟག་མིའི་འགྲོ་བ། ལས་དང་སྐལ་པ་རབ་ཏུ་གྱུར་བ་རྣམས་ཀྱི་བགོ་སྐལ་དུ་གནང་ཞིང་ནང་རྒྱུད་ཡོ་ག་གསུམ་གྱི་ཆོས་འཁོར་བསྐོར་བ་ནས་རིམ་པར་བརྒྱུད་པའི་བླ་མ་དེ་དག་གིས་དམ་པ་གོང་མའི་ཞབས་རྗེས་ཟིན་ཅིང་གདུང་འཚོབས་པ་ཡིན་པས། རང་དང་གཞན་གྱི་དོན་གཉིས་རླབས་པོ་ཆེ་མཐར་ཕྱིན་པ་དེ་རྣམས་ཀྱིས་ཞལ་ནས་སྙན་དུ་བརྒྱུད་པ་ལ་གང་ཟག་སྙན་ཁུང་གི་བརྒྱུད་པ་ཞེས་བྱ་སྟེ། གོང་དུ་བཤད་པ་ལྟར་རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་ཁུང་གིས་བརྒྱུད་པ། མདོར་ན་བརྒྱུད་པ་དེ་གསུམ་གྱི་བླ་མ་རྣམས་ལ་ཕྱག་འཚལ་ལོ་ཞེས་རྐང་པ་རྗེས་མ་འདིས་བརྗོད་བྱའི་དོན་ཐམས་ཅད་བསྡུས་ནས་བསྟན་པ་ཡིན་ནོ། །གསུམ་པ་དམིགས་ཀྱིས་བཀར་ཏེ་སྙིང་ཐིག་གོང་འོག་གི་ཉེ་བརྒྱུད་ཁྱད་པར་ཅན་གྱི་བླ་མ་རྣམས་ལ་ཕྱག་འཚལ་བ་ལ་གསུམ་ལས། དང་པོ་ཀུན་མཁྱེན་དྲི་མེད་འོད་ཟེར་ལ་ཕྱག་འཚལ་བ་ནི། ཆོས་ཟད་ཀློང་དུ་ཆོས་སྐུའི་དགོངས་པ་བརྙེས། །འོད་གསལ་དབྱིངས་སུ་ལོངས་སྐུའི་ཞིང་སྣང་གཟིགས། །གདུལ་བྱའི་སྣང་ངོར་སྤྲུལ་སྐུའི་འགྲོ་དོན་མཛད། །ཀུན་མཁྱེན་ཆོས་ཀྱི་རྒྱལ་པོ་ལ་ཕྱག་འཚལ། །ཞེས་པའི་དོན། རྫོགས་ཆེན་ཡང་གསང་མན་ངག་སྡེ་འདིའི་ཀ་དག་ཁྲེགས་ཆོད་དང་ལྷུན་འགྲུབ་ཐོད་རྒལ་གཉིས་ཀྱི་ལམ་མཆོག་མཐར་ཕྱིན་ནས། ཕྱི་ཉམས་སྣང་གི་འཕེལ་ཟད། ནང་སྒྱུ་ལུས་ཀྱི་ཆོས་ཟད། གསང་བ་རྟོག་ཚོགས་འཁྲུལ་བའི་སེམས་ཟད། སྣང་དང་མི་སྣང་དུ་འཛིན་པའི་བློ་ཟད་ཆོས་ཟད་སྤྲོས་བྲལ་གྱི་ཀློང་དུ་ཆོས་སྐུའི་དགོངས་པ་ནང་གསལ་སྐུ་དང་ཡེ་ཤེས་ཀྱི་བདག་ཉིད་མངོན་དུ་བརྙེས་ཀྱང་། གདུལ་བྱ་གཞན་གྱི་ངོ་ལ་དེ་ཉིད་ལུགས་ལྡོག་ཏུ་ཤར་བ། གསལ་ལ་དེར་འཛིན་མེད་པ། སྤྲོས་བྲལ་འོད་གསལ་བསམ་གྱིས་མི་ཁྱབ་པའི་ནང་དབྱིངས་སུ། ལྔ་ཚན་ལྔ་ཡི་བདག་ཉིད་ཚད་མེད་ལོངས་སྐུའི་ཞིང་སྣང་ཁ་སྦྱོར་བདུན་གྱི་བདག་ཉིད་དུ་གཟིགས་ཤིང་། སྣ་ཚོགས་སྣང་བའི་འཆར་གཞི་མ་འགགས་པ་དེ་ལས། ལས་དག་དང་མ་དག་གི་སྣ་ཚོགས་གདུལ་བྱའི་སྣང་ངོར་སྤྲུལ་པ་སྐུ་ཡི་འགྲོ་དོན་ནམ་མཁའ་མ་སྟོངས་འཁོར་བ་མ་ཞིག་གི་བར་དུ་མཛད་པ། སྐུ་གསུམ་ཀུན་འདུས་ཀྱི་བདག་ཉིད་མཐའ་ཡས་ཤེས་བྱའི་ཆོས་ཀུན་ཐོགས་མེད་དུ་མཁྱེན་པའི་ཡེ་ཤེས་གཏིང་དཔོག་དཀའ་བར་མངའ་བརྙེས་པའི་ཀུན་མཁྱེན། འཇིག་རྟེན་གྱི་རྒྱལ་པོ་ཆེན་པོས་ཁམས་ཀྱི་རྒྱལ་ཕྲན་རྣམས་དབང་དུ་འདུ་བ་ལྟར་དམ་པ་ཆོས་ཀྱི་རྒྱལ་སྲིད་ཡོངས་རྫོགས་ལ་མངའ་དབང་འབྱོར་བའི་ཀུན་མཁྱེན་ཆོས་ཀྱི་རྒྱལ་པོ་ལ་ཕྱག་འཚལ་ལོ་ཞེས་གསུངས། དཔལ་སྤྲུལ་རིན་པོ་ཆེའི་གསུང་གཞན་དུ་ཡང་། གཞི་དབྱིངས་མི་འགྱུར་འཁོར་འདས་དབྱེར་མེད་ཀྱི་ཞིང་ཁམས། །ཆོས་ཟད་མ་བཅོས་རིག་སྟོང་ཐིག་ལེ་ཡི་ཀློང་ན། །གདོད་མའི་སངས་རྒྱས་བདེ་གཤེགས་དཀྱིལ་འཁོར་གྱི་ཁྱབ་བདག །ཆོས་སྐུའི་བླ་མ་དྲི་མེད་འོད་ཟེར་དེ་མཁྱེན་ནོ། །ཞེས་གསུངས་སོ། །ཀུན་མཁྱེན་བླ་མ་རྫོགས་པའི་སངས་རྒྱས་ཀྱི་ཡེ་ཤེས་སྐུས་ལན་གསུམ་རྗེས་སུ་བཟུང་། དགོངས་རྒྱུད་རྟོགས་པའི་ཕ་ཕོགས་ཐོབ། ཞལ་གཟིགས་ལུང་བསྟན་གྱི་དབུགས་དབྱུང་མཛད་པས། བརྒྱུད་གསུམ་རིག་འཛིན་གཅིག་ལ་རྫོགས་པ་དེ་སུ་ཡིན་ན། ཀུན་མཁྱེན་ཕྱི་མ་རིག་འཛིན་འཇིགས་མེད་གླིང་པ་ཡིན་པས། གཉིས་པ་དེ་ལ་ཕྱག་འཚལ་བ་ནི། མཁྱེན༵་པས་ཤེས་བྱ་ཀུན་ཀྱི་དེ་ཉིད་གཟིགས། །ཐུགས་བ༵རྩེའི་འོད༵་ཟེར༵་གདུལ་བྱའི་དཔལ་དུ་ཤར། །ཟབ་ལམ་ཐེག་རྩེའི་བསྟན་པ་གསལ་མཛད་པ། །རིག་འཛིན་འཇིགས་མེད་གླིང་པ་ལ་ཕྱག་འཚལ། །ཞེས་གསུངས་པའི་དོན་ཆོས་ཐམས་ཅད་ཀྱི་ཆོས་ཉིད་གནས་ལུགས་དོན་དམ་པའི་བཞུགས་ཚུལ་མངོན་སུམ་དུ་གཟིགས་པ་ནི་ཇི་ལྟ་མཁྱེན་པའི་ཡེ་ཤེས་དང་། མཁྱེན་ཆ་འགག་མེད་ཆོས་ཅན་ཀུན་རྫོབ་ཀྱི་དངོས་པོ་ཀུན་མ་འདྲེས་པར་མཁྱེན་པ་ནི་ཇི་སྙེད་མཁྱེན་པའི་ཡེ་ཤེས་ཡིན་ལ། དེ་ལྟ་བུའི་མཁྱེན་གཉིས་ཀྱི་ཡེ་ཤེས་དང་ལྡན་པས་ཤེས་བྱ་འཁོར་འདས་ལམ་གསུམ་གྱིས་བསྡུས་པའི་ཆོས་ཀུན་ཀྱི་ཆོས་ཉིད་དེ་ཁོ་ན་ཉིད་ཇི་བཞིན་དུ་གཟིགས་ཤིང་། ཐུགས་མཁྱེན་ཆ་འགག་པ་མེད་པས་འགྲོ་བའི་ཁམས་ལ་བརྩེ་བ་སྙིང་རྗེ་ཆེན་པོའི་འོད་ཟེར་གདུལ་བར་བྱ་བའི་སེམས་ཅན་སོ་སོའི་དཔལ་ལམ། མགོན་ནམ། དཔུང་གཉེན་དུ་ཤར་བ་ཡིན་ལ། ཟབ་མོའི་ལམ་མཐར་ཐུག་པ་ཐེག་རྩེ་ཨ་ཏི་རྫོགས་པ་ཆེན་པོའི་བསྟན་པ་རིན་པོ་ཆེ་འདི་ཉིད་ཕྱི་མའི་དུས་འདིར་འཛམ་གླིང་སྲིད་པའི་ཁྱོན་ཀུན་ཏུ་ཉི་ཟླ་ལྟར་གསལ་བ་མཛད་པ་པོ། ཀློང་ཆེན་སྙིང་ཐིག་གི་བཀའ་བབ་སྲོལ་འབྱེད་ཀྱི་ཤིང་རྟ་བ་ཆེན་པོ་གོང་དུ་མཁྱེན་བརྩེའི་འོད་ཟེར་ཞེས་པའི་མཚན་གྱི་རྣམ་གྲངས་ཀྱིས་དོན་གསལ་བར་བྱས་པ། རིག་འཛིན་འཇིགས་མེད་གླིང་པ་དེ་ཉིད་ལ་ཕྱག་འཚལ་ལོ་ཞེས་གསུངས། གཞན་ཡང་དཔལ་སྤྲུལ་རིན་པོ་ཆེས། །བསྐྱེད་རྫོགས་ཟུང་འཇུག་སྣང་སྟོང་དབྱེར་མེད་ཀྱི་ཞིང་ཁམས། །ཕྱག་རྒྱ་ཆེན་པོ་ས་ལམ་གཞི་རྫོགས་ཀྱི་ཀློང་ན། །ཡེ་ཤེས་སྒྱུ་མ་ལྷུན་གྲུབ་འོད་གསལ་གྱི་བདག་ཉིད། །ལོངས་སྐུའི་བླ་མ་མཁྱེན་བརྩེ་འོད་ཟེར་དེ་མཁྱེན་ནོ། །ཞེས་ཀྱང་གསུངས། །མཚམས་འདིར་དཔལ་སྤྲུལ་འཇིགས་མེད་ཆོས་ཀྱི་དབང་པོ་ཁོང་རང་ཉིད་ཀྱིས་དངོས་སུ་ཞལ་མཇལ་ཞིང་བྱིན་བརྒྱུད་ཐོབ་པའི་དངོས་བརྒྱུད་བྱིན་རླབས་ལྡན་པའི་བླ་མ་རྫ་མཚམས་པ་འཇིགས་མེད་རྒྱལ་བའི་མྱུ་གུ་ལ་ཕྱག་འཚལ་བ་ནི། སྤྱན་རས་གཟིགས་དབང་བཤེས་གཉེན་ཚུལ་བཟུང་ནས། །གསུང་གི་སྣང་བས་འབྲེལ་ཚད་ཐར་ལམ་དགོད། །གང་ལ་གང་འདུལ་མཛད་པ་མཐའ་ཡས་པ། །དྲིན་ཆེན་རྩ་བའི་བླ་མ་ལ་ཕྱག་འཚལ། །ཞེས་གསུངས་པའི་དོན་རྒྱལ་ཀུན་སྙིང་རྗེའི་རང་གཟུགས་འཕགས་མཆོག་སྤྱན་རས་གཟིགས་འཇིག་རྟེན་དབང་ཕྱུག་སླར་ཡང་ཕྱི་མའི་དུས་འདིར། མིའི་ཤ་ཚུགས་སུ་བྱོན་ཅིང་དགེ་བའི་བཤེས་གཉེན་གྱི་ཚུལ་བཟུང་ནས། གསུང་ཟབ་རྒྱས་ཆོས་ཀྱི་སྣང་བ་དཀར་པོས་འབྲེལ་བ་ཐོགས་ཚད་ཀྱི་འགྲོ་བ་ཐམས་ཅད་ཐར་བའི་ལམ་མཆོག་ལ་བཀོད་པ། གདུལ་བྱའི་ཁམས་དབང་མོས་པ་དང་བསྟུན་ནས་གང་ལ་གང་གིས་འདུལ་བ་དེ་ལ་དེར་བསྟན་གྱི་མཛད་པ་མཐའ་ཡས་པ། དཔེར་ན་དཔག་བསམ་གྱི་ཤིང་དང་། འདོད་འཇོའི་བ། ཡིད་བཞིན་གྱི་ནོར་བུ་དགོས་འདོད་ཀུན་འབྱུང་ལྟར་འདོད་པའི་རེ་བ་ཐམས་ཅད་འབད་མེད་དུ་སྐོང་བ་མཛད་པ། དྲིན་ཆེན་རྩ་བའི་བླ་མ་རྫ་ཁྲ་མའི་བླ་མ་འཇིགས་མེད་རྒྱལ་བའི་མྱུ་གུ་ལ་ཕྱག་འཚལ་ལོ་ཞེས་གསུངས་པ་དང་། ཡང་དཔལ་སྤྲུལ་རིན་པོ་ཆེའི་གསུང་གཞན་དུ། །དམིགས་མེད་སྙིང་རྗེའི་བདེ་ཆེན་ཡེ་ཤེས་དང་རོ་གཅིག །ཐབས་མཁས་རྣམ་རོལ་གང་འདུལ་དེར་སྣང་གི་ཀློང་ན། །ཐུགས་རྗེའི་རང་གཟུགས་རྒྱལ་བ་སྲས་བཅས་ཀྱི་མངའ་བདག །སྤྲུལ་སྐུའི་སངས་རྒྱས་རྩ་བའི་བླ་མ་དེ་མཁྱེན་ནོ། །ཞེས་ཡབ་སྲས་གསུམ་ལ་ཆོས་ལོངས་སྤྲུལ་གསུམ་དང་སྦྱར་ནས་གསུངས་སོ། །དེ་ལྟར་གཞུང་གི་ཕྱག་འཚལ་ཤྭ་ལོ་ཀ་གསུམ་གྱིས་གཞི་འབྲས་དབྱེར་མེད་པར་ཆོས་ཟད་ཆོས་སྐུའི་དགོངས་པ་སྐུ་གསུམ་རང་ཆས་ཀྱི་འཆར་གཞི་ཀུན་མཁྱེན་ཆོས་ཀྱི་རྒྱལ་པོ་དང་། དེའི་དགོངས་པའི་ཀློང་ཆེན་པོ་ནས་དགོངས་པ་དོན་བརྒྱུད་ཀྱི་རྟོགས་པ་འཕོས་པ་མཁྱེན་དང་བརྩེ་བའི་འོད་ཟེར་གདུལ་བྱའི་དཔལ་དུ་ཤར་བ་རིག་འཛིན་འཇིགས་མེད་གླིང་པ་ཞེས་བརྒྱུད་གསུམ་རིག་འཛིན་ཀུན་འདུས་དང་། དེའི་གསུང་གི་གསང་བ་ཟབ་མོ་སླར་ཡང་ཕྱི་མའི་དུས་འདིར་འབྲེལ་ཚད་ཐར་ལམ་ལ་བཀོད་པའི་སྤྱན་རས་གཟིགས་དབང་མིའི་ཤ་ཚུགས་སུ་བཟུང་བ་འཇིགས་མེད་རྒྱལ་བའི་མྱུ་གུ་དང་བཅས་པ་ཡབ་སྲས་གསུམ་པོ་དེ་ལ་བསྟན་བཅོས་རྩོམ་པའི་ཐོག་མར་ཕྱག་འཚལ་བ་ཡིན་ནོ། །གཞན་ཡང་ཚིགས་གསུམ་གནད་དུ་བསྡེབས་པའི་མན་ངག་ལས། ལྟ་བ་ཀློང་ཆེན་རབ་འབྱམས་ཡིན། །སྒོམ་པ་མཁྱེན་བརྩེ་འོད་ཟེར་ཡིན། །སྤྱོད་པ་རྒྱལ་བའི་མྱུ་གུ་ཡིན། །ཞེས་རྫོགས་ཆེན་གཞི་ལམ་འབྲས་གསུམ་གྱི་ལྟ་སྒོམ་སྤྱོད་གསུམ་པོའི་དོན་ཐམས་ཅད་རྩ་བརྒྱུད་ཀྱི་བླ་མ་གསུམ་གྱི་མཚན་ཐོག་ནས་གསལ་བར་བྱས་པ་བཞིན་དུ་འདི་ཡང་ཤུགས་ཀྱིས་གོ་དགོས་སོ།།
༣༽ རྩོམ་པར་དམ་བཅའ་པ།
གསུམ་པ་རྩོམ་པར་དམ་བཅའ་བ་ནི། ཤྭ་ལོ་ཀ་གཉིས་ཀྱིས་བསྟན་ཏེ། བསྟན་པ་ཡོངས་རྫོགས་ཀུན་མཁྱེན་བརྒྱུད་པའི་གཞུང་། །མན་ངག་སྙིང་པོ་ཚེ་གཅིག་སངས་རྒྱས་ཆོས། །ལམ་གྱི་སྔོན་འགྲོ་ཐུན་མོང་ཕྱི་དང་ནང་། །གདམས་པའི་ཆ་ལག་ཉེ་ལམ་འཕོ་བ་བཅས། །གསལ་ལ་གོ་བདེ་དོན་ཟབ་རྨད་དུ་བྱུང་། །མཚུངས་མེད་བླ་མའི་བཀའ་ལུང་མ་ནོར་བ། །རང་བློར་ཇི་བཞིན་ངེས་བཞིན་འདིར་བཤད་ཀྱིས། །ལྷ་དང་བླ་མས་བདག་རྒྱུད་བྱིན་གྱིས་རློབས། །ཞེས་གསུངས་པའི་དོན་ཐུབ་པ་བུ་རམ་ཤིང་པའི་བསྟན་པའི་སྙིང་པོ་ནི་ལུང་དང་རྟོགས་པའི་བདག་ཉིད་ཅན་ཡིན་ཏེ། རྗོད་བྱེད་སྡེ་སྣོད་རྣམ་གསུམ་ལུང་གི་ཆོས་ལ་བརྟེན་ནས་བརྗོད་བྱ་བསླབ་པ་རྣམ་གསུམ་རྟོགས་པའི་ཆོས་ཉམས་སུ་ལེན་པ་གང་ཡིན་པ་དེ་ལ་སངས་རྒྱས་ཀྱི་བསྟན་པ་ཟེར་ནས་ངོས་འཛིན་དགོས། བསྟན་པ་ཡོངས་སུ་རྫོགས་པ་གཙོ་བོ་ཐེག་པ་གསུམ་གྱི་ལམ་ལ་ཞུགས་པའི་སྐྱེས་བུའི་བློ་རིམ་ལ་ལྟོས་ནས་འཇོག་དགོས། དེ་ཡང་ཆོས་འདི་བ་ལས་ཕྱི་རོལ་ཏུ་གྱུར་བ་དེ་ཚོ་ལ་ཡང་མེ་ལྔ་བསྟེན་པ་ལ་སོགས་པའི་བརྟུལ་ཞུགས་དང་། རང་རང་གི་ལམ་གྱི་ཏིང་ངེ་འཛིན་རེ་བསྒོམ་རྒྱུ་དང་། དེ་དང་འབྲེལ་བའི་ལོག་པའི་ཤེས་རབ་རེ་རྒྱུད་ལ་བསྟེན་རྒྱུ་ཡོད་ཀྱང་། ཐར་པ་དང་ཐམས་ཅད་མཁྱེན་པ་ཐོབ་པའི་ལམ་ནི་དེ་དག་ལ་མེད། དེས་ན་ནང་པ་སངས་རྒྱས་པའི་ཆོས་སྒོ་ལ་ཞུགས་ནས་རྗོད་བྱེད་སྡེ་སྣོད་གསུམ་ལ་འཆད་ཉན་དང་། བརྗོད་བྱ་བསླབ་པ་རྣམ་གསུམ་ཉམས་སུ་བླངས་ན་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་ཐུབ་པས་ན། ལམ་ལྷག་པའི་བསླབ་པ་རིན་པོ་ཆེ་རྣམ་པ་གསུམ་ཞེས་ཡོངས་སུ་གྲགས། དེས་ན་ནང་པ་སངས་རྒྱས་པའི་མདོ་སྔགས་གཉིས་ཀྱིས་བསྡུས་པའི་བསྟན་པ་དམ་པའི་ཆོས་ཐམས་ཅད། སྡེ་སྣོད་རིན་པོ་ཆེ་རྣམ་པ་གསུམ་དང་ལམ་ལྷག་པའི་བསླབ་པ་རིན་པོ་ཆེ་རྣམ་པ་གསུམ་གྱི་ཁོངས་སུ་མ་འདུས་པ་ཞིག་མེད་དེ། རྒྱུ་མཚན་ཅིའི་ཕྱིར་ན་རིགས་ཅན་གསུམ་གྱི་ནང་ནས་ཉན་རང་གི་ལམ་དུ། འདུལ་བ་མདོ་སྡེ་མངོན་པ་གསུམ་པོའི་བསྟན་དོན་རིམ་པར་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ཀྱི་བསླབ་པ་གསུམ་པོ་ཡིན་པ་དང་། བྱང་ཆུབ་སེམས་དཔའི་ལམ་ལ་ཡང་རྩ་ལྟུང་གི་རབ་དབྱེ་བསྟན་པའི་བཀའ་ཐམས་ཅད་འདུལ་བ་ཡིན་ལ། དེའི་བསྟན་དོན་གྱི་བསླབ་པ་ཐམས་ཅད་ཚུལ་ཁྲིམས་ཡིན། ཏིང་ངེ་འཛིན་གྱི་སྒོ་ཇི་སྙེད་ཅིག་སྟོན་པའི་མདོ་ཐམས་ཅད་མདོ་སྡེ་ཡིན་ལ། དེའི་བསྟན་དོན་བསམ་གཏན་སྒོམ་པ་ལ་སོགས་ཏིང་ངེ་འཛིན་གྱི་བསླབ་པ་ཡིན། སྟོང་ཉིད་གཏན་ལ་འབེབས་པའི་རྗོད་བྱེད་ཐམས་ཅད་མངོན་པའི་སྡེ་སྣོད་ཀྱི་ཁོངས་སུ་གཏོགས་ན། དེའི་བརྗོད་བྱ་ཐམས་ཅད་ཤེས་རབ་ཀྱི་བསླབ་པ་ཡིན། གསང་སྔགས་རྡོ་རྗེའི་ཐེག་པ་ལ་མཚོན་ན། རྒྱུད་སྡེ་སོ་སོའི་སྐབས་ཀྱི་དམ་ཚིག་གི་རྣམ་བཞག་སྟོན་པར་བྱེད་པའི་རྒྱུད་སྡེ་ཀུན་འདུལ་བའི་སྡེ་སྣོད་དང་། དེའི་བསྟན་དོན་ཐམས་ཅད་ཚུལ་ཁྲིམས་ཀྱི་བསླབ་པ། བསྐྱེད་རྫོགས་ཐུན་མོང་གི་རྗོད་བྱེད་ཐམས་ཅད་མདོ་སྡེའི་ཁོངས་སུ་གཏོགས་ན། དེའི་བསྟན་དོན་ཐམས་ཅད་ཏིང་ངེ་འཛིན་གྱི་བསླབ་པ། ཟབ་གསང་རྫོགས་པ་ཆེན་པོའི་རྗོད་བྱེད་ཐམས་ཅད་མངོན་པའི་སྡེ་སྣོད་དང་། དེའི་བསྟན་དོན་ཐམས་ཅད་ཤེས་རབ་ཀྱི་བསླབ་པ་ཡིན་ནོ། །དེས་ན་རྗོད་བྱེད་སྡེ་སྣོད་གསུམ་དང་བརྗོད་བྱ་བསླབ་པ་གསུམ་གྱི་ནང་དུ་མ་འདུས་པའི་བསྟན་པ་དམ་པའི་ཆོས་ཞིག་མེད་ཅིང་། དེ་དག་གིས་བསྡུས་པའི་ཐེག་རིམ་མཐའ་དག་གི་ལམ་གནད་ཡོངས་སུ་རྫོགས་པའམ་ཆ་ཚང་བ་ནི་ཀུན་མཁྱེན་ཀློང་ཆེན་པ་ཡབ་སྲས་བརྒྱུད་པ་དང་བཅས་པའི་གཞུང་ལུགས་འདི་ཉིད་ལ་འདུས་པ་ཡིན་ལ། ཐེག་བརྒྱད་མདོ་སྔགས་ཀྱི་ལམ་རིམ་ཐམས་ཅད་ཨ་ཏི་རྫོགས་པ་ཆེན་པོའི་ལམ་འདིའི་ལམ་སྟེགས་སམ་སྔོན་འགྲོ་ཡིན་པས། རྫོགས་ཆེན་ཡང་གསང་བླ་མེད་སྡེའི་མན་ངག་གི་སྙིང་པོ་ཀློང་ཆེན་སྙིང་གི་ཐིག་ལེ་འདི་ནི། མ་མཁའ་འགྲོ་འབུམ་གྱི་སྙིང་ཁྲག རིག་འཛིན་བྱེ་བ་ས་ཡའི་ཐུགས་ཐིག ཀུན་ཏུ་བཟང་པོའི་ཐུགས་ཀྱི་ཏི་ལ་ཀ གང་ཟག་བརྩོན་འགྲུས་ཅན་ཚེ་གཅིག་གམ་ལོ་དང་ཟླ་བས་གདོད་མའི་གཞི་ཐོག་ཏུ་སངས་རྒྱས་པའི་ཆོས་ཟབ་མོ་ཡིན་ལ། དེ་ལྟ་བུའི་ལམ་ལ་ཞུགས་པ་ན་ལམ་གྱི་སྔོན་འགྲོ་སྔོན་ལ་འགྲོ་དགོས་ཏེ། བྱ་བ་གང་ཞིག་བསྒྲུབ་དགོས་ཀྱང་གྲ་སྒྲིག་སྔོན་དུ་འགྲོ་དགོས་པའམ་ཡིག་སྐད་ལྟར་བཤད་ན་ཉེར་བསྡོགས་སྔོན་ལ་འགྲོ་དགོས་པ་ལྟ་བུའོ། །དཔེར་ན་ཁང་པ་མཐོན་པོ་དང་མཛེས་པ་ཞིག་སྐྲུན་དགོས་ན་དང་པོ་ཁང་པའི་རྩིག་རྨང་བརྟན་པོ་ཞིག་བརྐོ་དགོས་ཀྱི། དེ་མ་བརྐོས་ན་ཁང་པའི་གོ་མི་ཆོད་ནས་མཐར་ཞིག་རལ་དུ་ངེས་པར་འགྲོ་བས་རྨང་གལ་ཆེ་བ་ལྟར་དང་། ཡང་གྱང་ལ་ལོག་རིས་ཤིག་འབྲི་དགོས་ན་དང་པོ་གྱང་ལེགས་པོ་ཡོད་དགོས་ཀྱི། དེ་མེད་ན་རི་མོ་བྲི་ས་མེད་པ་ལྟ་བུ་ཡིན། དཔེ་དེ་བཞིན་ཆོས་ཡང་དག་པ་ཞིག་སྒྲུབ་དུས་སྔོན་འགྲོ་ཚད་ལྡན་ཞིག་སྔོན་ལ་མ་སོང་ན། དངོས་གཞི་ཡག་པོ་ཞིག་མི་འོང་བས་སྔོན་འགྲོ་ནམ་ཡང་གལ་ཆུང་བྱེད་མི་ཉན་ཞིང་ཤིན་ཏུ་གལ་ཆེན་བྱེད་དགོས། དེས་ན་སྙིང་ཐིག་རྫོགས་པ་ཆེན་པོ་ཟབ་མོའི་ལམ་གྱི་སྔོན་འགྲོ་འདི་ལ་ཐུན་མོང་ཕྱི་ཡི་སྔོན་འགྲོ་དལ་འབྱོར་རྙེད་དཀའ་སོགས་དང་། ཐུན་མིན་ནང་གི་སྔོན་འགྲོ་སྐྱབས་འགྲོ་ལ་སོགས་རྣམ་པ་གཉིས་སུ་ཡོད་པ་དང་། མ་ཚད་དངོས་གཞིའི་ཁྲིད་ཀྱི་སྐབས་སུ་ཡང་ཐུན་མིན་ཁྱད་པར་གྱི་སྔོན་འགྲོ་འཁོར་འདས་རུ་ཤན་ལ་སོགས་པ་ཡོད་ཅིང་། དེ་དག་ལ་ལྟོས་ན་འདི་དག་ཐུན་མོང་གི་དོན་ལ་སོང་ཡོད་པས་ཐུན་མོང་ཕྱི་ནང་ཞེས་གཅིག་ཏུ་བསྡུས་པའམ་ཡང་ན་གོ་དོན་གོང་བཤད་ལྟར་ཡིན། དངོས་གཞི་གདམས་པའི་ཆ་ལག་ཉེ་ལམ་འཕོ་བ་ལ་མཚོན་ན་ཨོ་རྒྱན་ཆེན་པོས། བསྒོམས་ཏེ་སངས་རྒྱས་ཀུན་ལ་ཡོད། །མ་བསྒོམས་སངས་རྒྱས་ང་ལ་ཡོད། །ཅེས་གསུངས་པ་ལྟར་མ་བསྒོམས་སངས་རྒྱས་ཆོས་ལྔའི་ནང་ཚན་འཕོ་བ་མ་བསྒོམས་སངས་རྒྱས་ཀྱང་དཀའ་ཚེགས་ཀྱི་ངལ་བ་ཆེན་པོ་ལ་ལྟོས་མི་དགོས་པས་མ་བསྒོམས་པའི་ཆོས་ཞེས་གསུངས། ལམ་ལ་ཞུགས་པའི་གང་ཟག་ལམ་སྦྱོང་བ་དམན་ན་འཕོ་བས་བསུ་གསུངས་པ་ལྟར། ལམ་བརྟན་པ་མ་ཐོབ་པ་རྣམས་ངན་འགྲོ་ལས་སྐྱོབ་པར་བྱེད་པའི་ཉེ་ལམ་མམ་ཉེན་སྲུང་ལྟ་བུ་ཡིན་པས་སྔོན་འགྲོའི་ཆ་ལག་ལ་བཞག་པ་ཡིན་པར་ང་རང་ཉིད་ཀྱིས་གོ་བ་བླངས་ནི་ཡིན། འཕོ་བའི་དོན་ནི། རྩ་དབུ་མ་དར་དཀར་གྱི་ལམ་ལ་བརྟེན་ནས། གནས་བདེ་ཆེན་དག་པའི་ཞིང་ཁམས་སུ། སེམས་རྣམ་ཤེས་ཀྱི་མགྲོན་པོ་ཐོགས་མེད་དུ་འགྲོ་བའི་འཕོ་བ་མ་བསྒོམས་སངས་རྒྱས་དང་བཅས་པ་ཀུན་ཀྱང་། ཚིག་གི་གསལ་ཁ་ལ་ནག་གེ་ནོག་གེ་མེད་པར་མ་ཟད་ཕལ་བས་ཉན་ནའང་ཤིན་ཏུ་གོ་བདེ་བ་དང་། བརྗོད་བྱའི་དོན་ཟབ་པ་ངོ་མཚར་རྨད་དུ་བྱུང་བའི་ཆོས་ཡིན་པས་ན། ཁྲིད་ཡིག་གི་གཞུང་འདི་ཉིད་སྡེབ་སྦྱོར་དང་མངོན་བརྗོད་སོགས་ཀྱིས་བཅིངས་ནས་མཁས་པ་མ་གཏོགས་མི་གོ་བ་དེ་འདྲ་ཡང་མིན་ཏེ། དཔལ་སྤྲུལ་རིན་པོ་ཆེའི་གསུང་ནི། ཕལ་བས་ཉན་ན་གོ་བདེ་བ། མཁས་པས་བརྟག་ན་དོན་ཟབ་པ་ཡིན་པས་མ་ཚད། ཁ་སྐད་ལ། ས་ཐོག་བླ་མ་བརྒྱ་ཡོད་ཀྱང་། །སེམས་ཐོག་བླ་མ་གཅིག་ཡིན། །བླ་མ་མི་འདྲ་རྩ་ཆེན་ཡིན་ཟེར་བ་ལྟར། བཀའ་དྲིན་མཚུངས་ཟླ་མེད་པ་ཐུགས་རྗེ་གཞན་ལས་ལྷག་ཏུ་མྱུར་བ་པོ། ཇི་སྐད་དུ། ཡོན་ཏན་སངས་རྒྱས་ཀུན་དང་མཉམ་ན་ཡང་། །བཀའ་དྲིན་སངས་རྒྱས་སྟོང་ལས་ལྷག་པའི་མགོན། །ཞེས་གསུངས་པ་ལྟར་དྲིན་ལྡན་བླ་མའི་བཀའ་ལུང་མ་ནོར་མ་འཁྲུལ་བ་གང་དང་གང་གསུངས་པའི་དོན་རྣམས་རང་ཉིད་ཀྱི་བློའམ་ཡིད་ངོར་ཇི་བཞིན་ངེས་པ་དེ་དེ་བཞིན་ལས། རང་བཟོ་ལ་སོགས་པས་བསྲེ་བསླད་མེད་ཅིང་ཞལ་རྒྱུན་དྲི་མ་མེད་པ་ཤ་སྟག་གཞུང་འདིར་བཤད་ཀྱིས་ཞེས་བསྟན་བཅོས་འདིའི་ལུས་རྣམ་བཞག་བསྟན་པ་དང་བཅས་ཏེ་རྩོམ་པར་དམ་བཅའ་བ་སོང་། དམ་བཅའ་བའི་དགོས་པ་ནི་རྩོམ་པ་མཐར་ཕྱིན་པའི་ཆེད་དུ་ཡིན་ཏེ། སྐྱེས་བུ་དམ་པ་ཞིག་ཡིན་ནས་བཟུང་མ་བརྟགས་པར་ཁས་མི་ལེན། གལ་ཏེ་ཁས་བླངས་ཚར་ནས་བྱ་བ་དེ་མ་འགྲུབ་པར་མི་གཏོང་བ་ཡིན། དཔེར་ན་མྱི་ཡ་རབས་ཤིག་ལ་བློ་གང་གཏད་ན་ཁས་བླངས་ཚར་དུས་ཚིག་ཐོག་ལ་གཡོ་མེད་དུ་འདུག་པ་ལྟར་ཡིན། དེ་མིན་མྱི་སྡུག་པོ་བློ་སྣ་ཐུང་ཐུང་ཅན་ཞིག་གིས་རྩོམ་པར་དམ་བཅས་པས་མ་ཚད་ཅི་བྱས་ཀྱང་། དེ་རིང་བཤད་ཐོག་སང་ཉིན་མེད་པས་རྩོམ་པ་མཐར་ཕྱིན་པ་མ་ཡིན་ཏེ། ཡ་ཐའི་མགོ་ལ་ཙིག་ཙིག མ་ཐའི་མགོར་ཡང་ཙིག་ཙིག འགོ་མ་བཟུང་བ་ཁེ་རུ་མ་ཞིག་མེད་ཀྱང་། མཐའ་འབུད་རྒྱུ་ཁེ་རུ་མ་ཞིག་མེད་པ་ཡིན། དེས་ན་དཔལ་དགེ་རིན་པོ་ཆེས་དམ་བཅས་པ་འདི་ནི། ཇི་སྐད་དུ། དམ་པས་མང་པོ་ཁས་འཆེ་མི་བྱ་ཞིང་། །གལ་ཏེ་དཀའ་བས་ཁས་ནི་བླངས་གྱུར་ན། །རྡོ་ལ་རི་མོ་བྲིས་པ་ཇི་བཞིན་དུ། །ཤི་ཡང་གཞན་དུ་འགྱུར་བ་མ་ཡིན་ནོ། །ཞེས་གསུངས་པ་ལྟར་ཡིན་ནོ། །དེ་ལྟར་དམ་བཅས་ཟིན་ནས་ལྷག་པའི་ལྷ་དང་བླ་མས་བདག་དང་གཞན་གྱི་རྒྱུད་ལ་བྱིན་གྱིས་རློབས་ཤིག་ཅེས་ཁོང་དང་འབྲེལ་ཚད་ཐར་བའི་ལམ་ལ་འགོད་པའི་ཐུགས་བསྐྱེད་དམ་བཅས་སྨོན་པ་དུས་སུ་སྨིན་པར་བསྐུལ་ཞིང་གསོལ་བ་བཏབ་པ་ཡིན་ནོ། །སྤྱིར་རྫོགས་པ་ཆེན་པོའི་ཁྲིད་ཁ་ལ་སྔོན་འགྲོ་དང་དངོས་གཞི་གཉིས་ཡོད། སྔོན་འགྲོ་སྔོན་ལ་སོང་ནས་རྗེས་སུ་དངོས་གཞི་ལ་འཇུག་དགོས། སྔོན་འགྲོ་ལེགས་པོ་ཞིག་སྔོན་ལ་མ་སོང་བར་དངོས་གཞི་ལ་འཇུག་ཀྱང་གྱང་མེད་པའི་རི་མོ་དང་རྨང་མེད་པའི་ཁང་པ་ལྟ་བུ་ཡིན། ལར་འཇིག་རྟེན་མི་ལ་སོགས་པའི་སྐྱེ་འགྲོ་མཐའ་དག་གིས་ཉིན་མི་ཁོམ་མཚན་མི་གཉིད་པར་རྒྱུག་ཅིང་བྲེལ་བ་འདི་དག དམིགས་ཡུལ་འདོད་པའི་ཁ་མི་གང་ནས་བདེ་བ་ཞིག་ཨེ་ཐོབ་བསམ་སྟེ་རྒྱུག་ཅིང་བྲེལ་བ་རེད། ད་སྔ་ཡན་ཆད་ས་སྟེང་རྐང་རྗེས་བཞག་ནས་འདས་ཟིན་གྱི་མི་ཐམས་ཅད་ཀྱང་བདེ་བ་དོན་གཉེར་ལ་བརྒྱུགས་ནས་སོ་སོའི་ཚེ་ཅི་ཡོད་ལ་འབད་ཀྱང་འཆི་ཁར་བདེ་བ་སེམས་ཁ་གང་བ་ཞིག་མ་རྙེད་ནས་བློ་ལྷག་དང་བཅས་ཚེ་རྫོགས་ཏེ་མིང་མེད་དུ་ཆས་སོང་། ད་ལྟ་རང་རེ་ས་སྟེང་རྐང་པ་བཙུགས་ནས་འགྲོ་མཁན་ཚང་མས་སྔ་ཕྱི་དྲོ་ཙམ་ལ་ཡང་མི་ཁོམ་པར་བྲེལ་དོ་དེའི་ངང་རྒྱུག་པ་ཀུན་ཀྱང་བདེ་བ་ཞིག་གི་དོན་དུ་རྒྱུག་འདུར་གཉིས་ཀ་བྱས་ནས་མི་ཚེ་འཛད་བཞིན་ཡོད་པ་རེད། མི་རབས་རྗེས་མ་ཐམས་ཅད་ཀྱང་འདི་བཞིན་བརྒྱུགས་ནས་ཚེ་ཚད་རྫོགས་ཤིང་མེད་པར་འགྱུར་བ་ཡིན། དེས་ན་འདས་མ་འོངས་ད་ལྟ་སྟེ་དུས་གསུམ་གྱི་སྲོག་ལྡན་ཚང་མས་དོན་དུ་གཉེར་བྱ་བདེ་བ་འབའ་ཞིག་ཡིན་ལ། བདེ་བ་དེ་ལ་དབྱེ་བ་ཞིབ་ཏུ་བྱེད་ན་རྣམ་གྲངས་ཀྱི་ཐོག་ནས་ལུས་དང་སེམས་ཀྱི་བདེ་བ་གཉིས། དུས་ཀྱིས་དབྱེ་ན་འཕྲལ་དང་ཡུན་གྱི་བདེ་བ་གཉིས་སམ་གནས་སྐབས་དང་མཐར་ཐུག་གི་བདེ་བ་གཉིས། ཁྱབ་ཚད་ཀྱིས་དབྱེ་ན་རང་ཁོ་ནའི་བདེ་བ་དང་། རང་གཞན་གཉིས་ཀའི་བདེ་བ་དང་། གཞན་ཁོ་ནའི་བདེ་བ་དོན་གཉེར་གྱི་སྒོ་ནས་དམིགས་འདུན་ཆེ་ཆུང་གི་ཁྱབ་ཚད་དང་ལྡན་པ་ཞིག་ཡིན། ད་དུང་ཞིབ་ཕྲས་དབྱེ་ན་ཟག་བཅས་དང་ཟག་མེད་ཀྱི་བདེ་བ་ལ་སོགས་པ་ངོ་བོའི་ཐོག་ནས་ཁྱད་པར་ཆེན་པོ་ཡོད། དེང་སྐབས་རང་ཅག་རྣམས་ཀྱིས་ཟབ་མོའི་གདམས་ངག་ཉན་པ་འདི་ཡང་རང་གཞན་གྱི་ཁྱད་པར་མི་སོ་སོ་ལ་བསམ་པའི་ཀུན་སློང་ཐ་དད་ཡོད་ཀྱང་དོན་དངོས་ཐམས་ཅད་བདེ་བའི་དོན་ཡིན་པར་འདྲ་བ་ཡིན། དམ་པའི་ཆོས་བསྒྲུབས་ཏེ་བདེ་བ་དོན་གཉེར་བྱེད་རྒྱུ་འདི་ནི་ལུས་སེམས་གཉིས་ཀའི་ནང་ནས་གཙོ་བོ་སེམས་ཀྱི་བདེ་བ་དང་། འདི་ཕྱི་གཉིས་ཀྱི་ནང་ནས་ཕྱི་མའི་བདེ་བ་དང་། འཕྲལ་ཡུན་གཉིས་ཀྱི་ནང་ནས་ཡུན་གྱི་བདེ་བ་དེ་ཉིད་དོན་གཉེར་བྱེད་པ་རེད། དེས་ན་རང་རེ་རྣམས་ཐེག་པ་ཆེན་པོའི་ལམ་ལ་ཞུགས་ཏེ་སེམས་ཅན་ཐམས་ཅད་ཕ་མ་ཡིན་པར་ཤེས་པའི་ཐོག་ནས། ད་རེས་ལུས་རྟེན་འདིའི་ཐོག་ཏུ་དམ་པའི་ཆོས་ཤིག་བསྒྲུབས་ནས་ཡོན་ཏན་ཁྱད་པར་ཅན་ཞིག་ཨེ་ཐོབ་བལྟ་དགོས་ཏེ། མ་རྒན་སེམས་ཅན་ཐམས་ཅད་འཁོར་བའི་སྡུག་བསྔལ་འདི་ལས་བསྒྲལ་ཐུབ་པ་ཞིག་བྱེད་དགོས་བསམ་པའི་བསམ་པ་ཞིག་སྔོན་ལ་བཏང་སྟེ། ལམ་ཁྱད་པར་ཅན་ཞིག་ལ་བརྟེན། ཐབས་ཁྱད་པར་ཅན་ཞིག་གི་སྒོ་ནས་ལམ་ཁྲིད་དགེ་བའི་བཤེས་གཉེན་མཚན་ཉིད་དང་ལྡན་པ་ཞིག་གི་རྗེས་སུ་ཞུགས་ནས་བརྩོན་འགྲུས་ཐང་གློད་མེད་པ་ཞིག་གིས་དམིགས་འདུན་དེ་འགྲུབ་ངེས་ཨེ་ཐུབ་ལྟ་དགོས། དེ་ཡང་ལམ་མྱུར་བ་རྫོགས་པ་ཆེན་པོ་མི་རང་ཉིད་ལ་བརྩོན་འགྲུས་ཡོད་ན་ཚེ་ལུས་འདིའི་སྟེང་ནས་སངས་རྒྱས་ཐོབ་ཆོག་པའི་ཆོས་དང་འཕྲད་དུས། ཆོས་ཆོས་བཞིན་དུ་སྒྲུབ་ནུས་པའི་གང་ཟག་ཞིག་གིས་ཐོག་མར་སྔོན་འགྲོ་འདི་ལ་གནད་ཆེན་བརྩི་དགོས་པ་ནི་གལ་ཆེན་ནང་གི་དོན་ཆེན་རེད། སྔོན་འགྲོའི་དོན་གནད་ནི་བསགས་སྦྱངས་གཉིས་ཀའི་ཆེད་དུ་ཡིན་པས། འབུམ་ལྔ་གསོག་པའམ་ཀུན་བཟང་ཞལ་ལུང་ཉན་པ་སོགས་གང་ཡིན་ཡང་དགོས་པ་དང་དམིགས་ཡུལ་ནི་བསགས་སྦྱངས་གཉིས་ཀའི་ཕྱིར་དུ་འབད་པར་ཡིན། ད་སྔོན་ཉི་མ་ཡན་ཆད་འཁོར་བའི་གནས་འདིར་སྡུག་བསྔལ་འབའ་ཞིག་ལས་བདེ་བའི་གོ་སྐབས་ཐོབ་མ་མྱོང་བ་འདི། ཚོགས་མ་བསགས་སྒྲིབ་པ་མ་སྦྱངས་པས་ལན་པ་ཡིན་ཏེ། ཇི་སྐད་དུ། དོན་དམ་ལྷན་གཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བརྟེན་པ་རྨོངས་པར་ཤེས་པར་བྱ། །ཞེས་གསུངས་པ་ལྟར་དོན་དམ་གྱི་རྟོགས་པ་ཁྱད་པར་ཅན་ཞིག་སྐྱེ་དགོས་ན་ཚོགས་བསགས་སྒྲིབ་སྦྱོང་གི་སྟེང་། ཉམས་རྟོགས་ལྡན་པའི་བླ་མ་ཞིག་ལ་བསྟེན་ནས་དེའི་དགོངས་བརྒྱུད་རྟོགས་པའི་བྱིན་རླབས་འཕོ་ཐབས་བྱེད་པ་མ་གཏོགས་ཐབས་གཞན་རྒྱལ་བས་བཙལ་ཀྱང་མི་རྙེད། དེས་ན་སྔོན་འགྲོ་བསགས་སྦྱངས་ཀྱི་སྐོར་འདི་གནད་ཤིན་ཏུ་ཆེ་སྟེ། གྱང་གི་རི་མོ་དང་ཁང་པའི་རྩིག་རྨང་ལྟར་གལ་ཆེ་བ་གོང་ཞུས་བཞིན་ནོ། །ད་སྐབས་བཤད་རྒྱུའི་ཀུན་བཟང་ཞལ་ལུང་གི་ཁྲིད་ཀ་འདི་ལ་ཁྲིད་རྐང་བཅུ་གཉིས་ཀྱིས་ལུས་ཡོངས་རྫོགས་བསྟན་ཡོད་ལ། སྔོན་འགྲོའི་ཁྲིད་དེ་ལ་མོས་ཁྲིད་དང་སྨིན་ཁྲིད་གཉིས་ཡོད། མོས་ཁྲིད་ཀྱི་དོན་ནི། སློབ་མ་སྣོད་ལྡན་ཆོས་ལ་དོན་གཉེར་ཅན་ཐར་པ་བྱང་ཆུབ་ཀྱི་གོ་འཕང་ཚེ་ལུས་འདི་ལ་བསྒྲུབ་དགོས་བསམ་པའི་སྒོ་ནས། བླ་མ་ཚད་ལྡན་ཞིག་ལ་བསྟེན་ཅིང་བླ་མ་དེས་ཀྱང་སློབ་མའི་རྒྱུད་ཚོད་དང་འཚམས་པའི་སྔོན་འགྲོའི་ཁྲིད་ཡིག་གི་ནང་དོན་ཀུན་ཚིག་གི་བརྡ་འཕྲོད་ཅིང་། དོན་གྱི་གོ་བ་ལོན་པ་ཞིག་བཤད་པས་སློབ་མས་ཚིག་དོན་གཉིས་ཀའི་ཆ་གོ་ནས་སྐབས་ཀྱི་བཤད་བྱ་འདི་དང་འདི་ལྟ་བུའོ་སྙམ་པའི་ངེས་ཤེས་བསྐྱེད་ནུས་པ་དེ་ལ་མོས་ཁྲིད་ཟེར། སྨིན་ཁྲིད་ནི་སྔ་མ་མོས་ཁྲིད་ཀྱི་རྨང་གཞིའི་སྟེང་གོ་བ་ཙམ་དང་ཤེས་པ་ཙམ་གྱིས་མི་ཕན་ཞིང་། རྒྱང་ནས་ལྟད་མོ་བལྟས་པ་ལྟ་བུ་དང་རྒན་པོས་གནའ་གཏམ་ཉན་པ་ལྟ་བུ་མ་ཡིན་པར། དངོས་སུ་རང་རྒྱུད་ལ་བླངས་ནས་བསྟན་བྱའི་དོན་དེ་རང་ཉིད་ཀྱི་ལུས་སེམས་གཉིས་ཀྱི་སྟེང་དུ་ཕབ་ནས་བསྒོམ་དགོས། དཔེར་ན་ལྷ་ས་རྣ་བས་གོ་བ་དང་མིག་གིས་མཐོང་བ་གཉིས་མི་འདྲ་བ་བཞིན། དོན་ལ་ངེས་ཤེས་སྐྱེ་བ་དང་གོ་བ་མྱོང་ནས་ལོན་ལུགས་གཉིས་མི་འདྲ་བའི་ཁྱད་པར་ཆེ་བས་ཁ་དོན་གཉིས་ཀྱི་ཐོག་ལ་ཁྱད་པར་ཆེན་པོ་ཡོང་། དེས་ན་རང་ཅག་ཀློང་ཆེན་སྙིང་ཐིག་གི་ཆོས་བརྒྱུད་འདི་ལ་སྨིན་ཁྲིད་ཀྱི་ཕྱག་ལེན་ཡོད་པས་ཁྲིད་མ་ཞུས་ན་མ་ཞུས་རེད་མ་གཏོགས། གཅིག་ཞུས་ནས་བཟུང་ཁྱོད་ཚོས་ཀྱང་ལེགས་པོ་ཞིག་ཞུའོ་བསམ་དགོས། ངས་ཀྱང་མ་བཤད་ན་མ་བཤད་མ་གཏོགས་གཅིག་བཤད་ཕྱིན་ཆད་ཉན་པ་པོའི་རྒྱུད་ལ་ཕན་འདོགས་གང་འཚམས་རེ་འོང་པའི་ཆེད་དུ་སྨིན་ཁྲིད་ཞིག་འགྱུར་ན་བསམས་ནས་བཤད་པ་ཡིན་པས་ཆོས་ཁྲིད་འདིའི་ཚེ་ཐུན་བཞི་ཆགས་མེད་བསྡོམས་ནས་ཉམས་ལེན་བྱེད་དགོས། དེ་ལྟར་མ་ཡིན་པར་རྩེ་ཞོར་རྒོད་ཞོར་འགྲོ་ཞོར་འདུག་ཞོར་ཆོས་ཞུས་པས་ནི། ཧོར་སེར་པོས་ཆོས་ཞུས་པ་དང་འདྲ་བ་ཞིག་འོང་སྟེ། ཧོར་སེར་པོས་བླ་མ་གསེར་ཞུ་ཅན་ལས་ཅི་ཡིན་འདི་ཡིན་མེད་པར་ཧོར་ཤན་པ་མ་གཏོགས་ཀུན་ཀྱིས་ཆོས་ཤིག་ཞུས་པས་ཧོར་མི་རེའི་མགོ་ལ་འཇའ་རེ་ཤར་ནས། བླ་མ་གསེར་ཞུ་ཅན་མཐོ་ནམ་མཁའི་དབྱིངས་སུ་ཇེ་མཐོ་ཇེ་མཐོ་རུ་སོང་དུས། ཤན་པ་ཆགས་ཆེ་སྙམ་ཡང་འགྱོད་པ་ཤོར་བ་ཡིན་ཏེ། སྡེ་ཧོར་ཡུལ་ཆོས་ཀྱི་ཉི་མ་ཤར། །ནག་ཙིག་གེ་ཤན་པ་ཆོས་སྐལ་ཆད། །ཅེས་གླུ་བླངས་པས་བླ་མ་མར་ཇེ་དམའ་བྱོན་ནས་ཤན་པ་ལ་དབང་ཚིག་རྩ་ཅན་ཞིག་བསྐུར་དུས་ཤན་པའི་མགོ་ལའང་གཞན་ལས་ལྷག་པའི་འཇའ་དགུ་རྩེགས་ཤིག་ཤར་སོང་བ་དང་འདྲ་བས་མི་འོང་བས། ཆོས་ཞུ་དུས་བྱིས་པས་རྩེད་མོ་རྩེ་འདྲ་རེད་མི་ཉན། ད་རེས་ཐ་ན་མོས་ཁྲིད་ལྟ་བུ་ཡིན་ཡང་སྐྱོར་སྦྱོང་བྱེད་དགོས། ཁྲིད་གང་ཞུས་ཀྱང་ཉིན་རེའི་ཆོས་ཁྲིད་དེ་མ་མཐའ་ཡང་ཚར་བཅུ་རེ་བཅོ་ལྔ་རེ་ལྟ་ཨེ་ཐུབ་བལྟ་དགོས། དེ་ལྟར་མ་ཡིན་པར་ཉན་ཙམ་བྱས་ནས་བསྐྱུར་བཏང་ན་འཁྱག་ཤུད་བརྒྱབ་པ་ལྟ་བུ། འདི་གོ་དེ་གོ་མེད་པའི་ངང་ནས་མཇུག་བུད་ཤོར་ན་རང་རྒྱུད་སོར་གང་གིས་ཡར་སྐྱེད་མེད་པས། མཐར་ཆོས་དྲེད་ཆོས་ཀྱིས་མི་ཐུལ། མར་ལྐོག་སྣུམ་གྱིས་མི་ཐུལ་ཟེར་བ་ལྟར་དྲེད་པོ་ཆོས་རྒྱུས་ཅན་དུ་གྱུར་ཅིང་། ནམ་ཞིག་ལས་མཐའ་ལོག་པ་ནགས་མཐའི་མི་རྒོད་ལྟ་བུ་ཞིག་གྱུར་ན། འདི་ཕྱི་གཉིས་མེད་ལ་ཐུག་ཚར་བས་དེ་དུས་འགྱོད་པ་སྐྱེས་ཀྱང་། ཨ་རེ་འགྱོད་དེ་བག་ཙམ་ཕྱིས་པ་འདྲ། །ཟེར་བ་ལྟར་རོ། །དེས་ན་ད་ལྟ་རང་དབང་རང་ལག་ཡོད་དུས། ངོས་པདྨ་ཐང་གི་སྨིན་ཁྲིད་ཀྱི་འཆར་གཞི་ཉིན་རེ་ཐུན་བཞི་བཅད་ཅིང་སྔ་མོ་དུས་ཚོད་ལྔའི་ཐོག་ཡར་བཞེངས་ནས་རླུང་རོ་བསལ། རླུང་བྱིན་རླབས་དང་ངག་བྱིན་རླབས་བྱས་ཐོག སྙིང་ཐིག་སྔོན་འགྲོའི་ངག་འདོན་ཆ་ཚང་ཚིག་རྗེས་དོན་དྲན་གྱིས་འདོན། དེའི་བར་ཡིག་བརྒྱ་དང་སིདྡྷི་སོགས་གང་འཚམས་རེ་སོག བླ་མའི་རྣལ་འབྱོར་སྐབས་དབང་གཞི་ལེན་ཅིང་། མཐར་བླ་མ་དང་ཐུགས་ཡིད་དབྱེར་མེད་བསྲེས་ཏེ་མཉམ་པར་ཞོག དེ་ལས་ལངས་ནས་རྗེས་ཐོབ་བསྔོ་བ་སྨོན་ལམ་གྱིས་མཐའ་བརྒྱན་ནས་སྤྱོད་ལམ་ལ་འཇུག དུས་ཚོད་བདུན་ཐོག་ནངས་ཇ་གསོལ། སྔ་ཐུན་ཆོས་ཁྲིད་ཡོད་ཚེ་ཐུན་ཚབ་ཆོས་ཁྲིད་ཀྱིས་འཐུས། ཕྱི་ཐུན་ཆུ་ཚོད་གཉིས་ནས་ཕྱི་ཐུན་ལ་འཇུག དགོང་མོ་ཡང་བདུན་ནས་ཐུན་ལ་འཇུག་རྒྱུའི་འཆར་གཞི་ཡིན། ཐུན་ཐམས་ཅད་ནང་བླ་མའི་རྣལ་འབྱོར་དབང་བཞི་བླངས་ནས་ཐུགས་ཡིད་བསྲེས་རྗེས་སྐབས་ཐོབ་ཁྲིད་རྐང་གང་ཡིན་གྱི་དམིགས་རིམ་རྣམས་བསྒོམ་དགོས། དཔེར་ན་འཁོར་བའི་ཉེས་དམིགས་བཤད་སྐབས་ངན་སོང་གི་གནས་དམྱལ་བ་ཚ་གྲང་གི་སྡུག་བསྔལ་རང་གི་ལུས་ཐོག་ལ་དངོས་སུ་མྱོང་གི་ཡོད་པ་ལྟ་བུ་ཞིག་བསྒོམ་དགོས། ཡང་མཚམས་རེར་རང་གི་ཨ་མ་རྒན་མོ་དྲིན་ཅན་མ་དེས་སྡུག་བསྔལ་དེ་དག་མྱོང་གི་ཡོད་པར་བསམས་ནས་དེའི་ཐོག་ཉམས་ལེན་བྱེད་དགོས། ད་ལྟ་དངོས་སུ་སྡུག་བསྔལ་མྱོང་བཞིན་པའི་དམྱལ་བའི་སེམས་ཅན་དེ་དག་ད་ལྟའི་མ་དངོས་མིན་ཡང་ཚེ་རབས་སྔོན་མའི་མ་ཡིན་ངེས་པའི་དོན་ལ་བསམས་ནས་བསྒོམ། མཇུག་ཏུ་སེམས་ཅན་ཐམས་ཅད་ལ་སྡུག་བསྔལ་འདི་དང་འདི་འདྲ་བ་དངོས་སུ་ལུས་ཀྱིས་མྱོང་མི་དགོས་སེམས་ཀྱིས་མི་བཟོད་པས། སྡུག་བསྔལ་འདི་ལྟ་བུ་མྱོང་གི་ཡོད་པ་རྣམས་ལ་དམིགས་ནས་སྙིང་རྗེ་བསྐྱེད་ཅིང་། སྙིང་རྗེས་དྲངས་པའི་མར་གྱུར་སེམས་ཅན་ཐམས་ཅད་སྡུག་བསྔལ་འདི་ལས་བསྐྱབ་པར་བྱ་དགོས། འཁོར་བའི་རྒྱ་མཚོ་ལས་བསྒྲལ་བར་བྱ་དགོས། དུས་གཏན་དུ་བདེ་བ་རྫོགས་པའི་བྱང་ཆུབ་ཀྱི་གོ་འཕང་ལ་འགོད་པར་བྱ་དགོས་བསམ་རྒྱུའི་ཆོད་སེམས། བྱང་ཆུབ་ཀྱི་སེམས་སྐད་ཅིག་མ་རེ་རེ་ཡང་སྐྱེ་བའི་ཐབས་ལ་དམིགས་ནས་བློ་སྦྱོང་དགོས། འདིའི་ནང་སེར་སྐྱ་དང་ཕོ་མོ་ལ་མ་ལྟོས་པར་སྨིན་ཁྲིད་ཉམས་ལེན་བྱེད་མཁན་ཡོད་ན་ཐང་། དེ་ཚོའི་དགོས་མཁོ་དང་བསྟུན་ངས་འདི་ནས་རླུང་རོ་བསལ་ཚུལ་དང་ངག་བྱིན་རླབས་བྱེད་ཚུལ་རགས་ཙམ་ཞིག་བཤད་ན། ནངས་སྔ་མོ་ཡར་སད་དུས་ནམ་མཁའི་དབྱིངས་ནས་དཔའ་བོ་དང་མཁའ་འགྲོ་མའི་ཚོགས་མང་པོ་བྱོན་ནས་ཕྱག་གིས་ཌཱ་མ་རུ་དང་དྲིལ་བུའི་སྒྲས་རང་ཉིད་གཉིད་ལས་བསླང་བར་བསམས་ནས། ཡར་ལངས་མལ་དུ་དལ་མོ་སྐྱིལ་ཀྲུང་ཞིག་བཅས། ལུས་ཚུགས་དྲང་པོར་སྲོང་། སྔོན་འགྲོ་དང་དངོས་གཞི་གང་སྒོམ་ཡང་གྲོལ་ལམ་ཆོས་བདུན་དང་མ་བྲལ་བ་ཞིག་དགོས། བདུན་པོ་གང་ཞེ་ན་རྐང་པ་རྡོ་རྗེའི་སྐྱིལ་ཀྲུང་། སྒལ་ཚིགས་དྲང་པོར་སྲོང་། དཔུང་པ་ལྷོད་དེ་བརྒྱང་གསུངས་པས་ཧ་ཅང་སྡོམ་པ་ཡང་མ་ཡིན། ཧ་ཅང་ལྷོད་ཆེ་བ་ཡང་མ་ཡིན་ཏེ། སྤྱིར་རྫོགས་པ་ཆེན་པོའི་སྔོན་འགྲོ་དང་དངོས་གཞི་གང་སྒོམ་ན་ལུས་སེམས་གཉིས་ཀ་ལྷོད་དེ་འཇོག་རྒྱུ་གནད་ཆེ། མགྲིན་པ་ཨེན་ཙམ་མར་དགུག་དགོས། མཆུ་སོ་གཉིས་མ་རེག་ཙམ་གྱི་བར་ནས་དབུགས་ལེན་དགོས་པ་དང་། ལྕེ་ཡ་རྐན་ལ་སྦྱར་ཞིང་། མིག་མདུན་ཐད་གཉའ་ཤིང་གང་ཙམ་གྱི་བར་སྣང་ལ་ལྟོས། ལག་པ་གཉིས་མཉམ་བཞག་གམ་གཙོ་ཆེར་སེམས་ཉིད་ངལ་གསོའི་བཞུགས་སྟངས་ཀུན་མཁྱེན་ཆེན་པོ་ལྟར་པུས་མོ་གཉིས་ཀྱི་ཐོག་ལག་པས་བཀབ་ནས་འཇོག་དགོས། དེ་ནས་རླུང་གི་སྙིགས་མ་བསལ་ཕྱིར་རླུང་རོ་འབུད་དགོས་ཏེ། དེ་ཡང་ལག་གཉིས་ཀྱི་སྲིན་མཛུབ་སྟེང་མཐེ་བོང་གཉིས་ཀྱིས་མནན་ནས་རྡོ་རྗེའི་ཁུར་ཚུར་བྱས་ཏེ་བརླའི་རྩ་ཆེན་གཉིས་མནན། དེ་ནས་ལག་པ་གཡས་པའི་སྲིན་མཛུབ་ཀྱིས་སྣ་བུག་གཡས་པ་བཀག་ནས་སྣ་བུག་གཡོན་པའི་ནང་ནས་ཉོན་མོངས་པ་འདོད་ཆགས་ཀྱི་རླུང་ཁ་དོག་དམར་སྐྱ་མི་གཙང་བའི་རྣམ་པ་ཅན་ཞིག་ཕྱིར་སོང་བར་བསམ་ལ་རླུང་རོ་གསུམ་འབུད། ཡང་ལག་པ་བརྗེས་ནས་གཡོན་པའི་སྲིན་མཛུབ་ཀྱིས་སྣ་བུག་གཡོན་པར་མནན་ནས་གཡས་པའི་ནང་ནས་ཞེ་སྡང་གི་རླུང་དཀར་སྐྱ་མི་གཙང་བའི་རྣམ་པ་ཅན་ཞིག་ཕྱིར་སོང་བར་བསམ་ལ་རླུང་གསུམ་འབུད། ཡང་ལག་གཉིས་ཀྱིས་བརླའི་རྩར་མནན་ནས་སྣ་བུག་གཉིས་ནས་གཏི་མུག་གི་རླུང་ནག་པོ་མི་གཙང་བའི་རྣམ་པ་ཅན་ཞིག་ཕྱིར་སོང་བར་བསམ་ལ་གཉིས་མཉམ་གྱི་རླུང་གསུམ་འབུད། མདོར་ན་གཡས་ནས་གསུམ། གཡོན་ནས་གསུམ། མཉམ་པར་གསུམ་སྟེ་གསུམ་གསུམ་དགུ་ཕྲུགས་སུ་འབུད་དགོས། རྩ་རོ་རྐྱང་གཉིས་ཕོ་མོ་ལ་ཆགས་ལུགས་མི་འདྲ་བས་གཡས་གཡོན་གོ་ལྡོག་ནས་བསྒོམ། དེ་ནས་ཅུང་ཟད་ངལ་གསོ། རླུང་བྱིན་རླབས་བྱ་བ་ནི། འབྲུ་གསུམ་རྡོ་རྗེའི་བཟླས་པ་བྱེད་དགོས། འབྲུ་གསུམ་ནི་ཨོཾ་ཨཱཿཧཱུཾ་གསུམ་ཡིན། ངག་ཐོག་ནས་མ་ཡིན་པ་སྐབས་འདིར་རླུང་བཟླས་ཡིན་པས་དབུགས་ནང་དུ་རྔུབ་དུས་ཨོཾ་དཀར་པོའི་རྣམ་པས་རྔུབ། གནས་ཚེ་ཨཱཿདམར་པོའི་རྣམ་པ་སྒོམ། ཕྱིར་དབྱུང་དུས་ཧཱུཾ་སྔོན་པོའི་རྣམ་པ་བསམ་པ་དེར་ཚར་གཅིག་ཡིན། དེ་འདྲའི་ཚར་ཉི་ཤུ་རྩ་གཅིག་ཙམ་བྱ་དགོས། དེ་ནས་ངག་བྱིན་རླབས་ལྕེ་དབང་རཾཿཡིག་ལས་བྱུང་སོགས་ཚིག་རྗེས་དོན་དྲན་དམིགས་པ་དང་མ་བྲལ་བའི་ངང་ནས་འདོན་སྒོམ་ཟུང་འབྲེལ་བྱ་དགོས། སྤྱིར་ཁས་འདོན་པ་འདོན་རྒྱུ་དེ་སེམས་ལ་དམིགས་པ་འོང་བའི་ཆེད་ཡིན། དེས་ན་དམིགས་རིམ་དང་བསྟུན་ནས་འདོན་དགོས། སེམས་གཞན་དུ་གཡེངས་ནས་ཁས་འདོན་པ་བཏོན་པ་ནི་ནཻ་ཙོའི་འདོན་པ་ལྟ་བུ་རེད། མདོར་ན་ཆོས་ཞུས་པའི་དོན་པོ་རྣ་རྒྱབ་རླུང་སྒྲར་མི་འགྲོ་བའི་ཆེད། ཚིག་རེ་ཡིན་ཡང་རང་གི་རྒྱུད་ལ་ཕན་པའི་དོན་དུ་ཉམས་སུ་ལེན་ཅི་ཐུབ་ཀྱིས་སྦྱོང་དགོས། ལས་དང་པོ་བ་རྣམས་ལ་ཅི་གོ་འདི་གོ་མེད་པ་ལྟ་བུ་ཞིག་ཐོག་མར་ཡོང་སྲིད་ཀྱང་། ཉི་མ་རེ་རེ་བཞིན་ཚིག་རེ་ཡིན་ཡང་བསགས་ནས་ཀུན་ཀྱིས་སྦྱོངས་དང་རིམ་གྱིས་རིམ་གྱིས་ཤེས་འོང་ངེས་ཏེ། ཤེས་བྱ་ཡིན་པའི་ཕྱིར། དཔེར་ན། གྲོགས་མཁར་དང་ནི་སྦྲང་རྩི་བཞིན། །རིང་པོར་མི་ཐོགས་མཁས་པར་འགྱུར། །ཞེས་པ་ལྟར་རོ། །དེས་ན་མི་ཀུན་ཀྱང་སྤྱིར་འདྲ་བ་ཡིན་པས་ཡུན་རིང་སྦྱོང་ན་ཤེས་འོང་བ་ཡིན། དེ་ཡན་ཆད་ཀྱིས་ཐོག་མར་དགེ་བ་ཀླད་ཀྱི་དོན་ཡོངས་རྫོགས་སོང་བས་དེ་རིང་ཁྲིད་སྦྱང་ཟུར་བ་མེད་ཀྱང་དོན་གྱི་གོ་བ་ལོན་པར་བྱེད་དགོས། དེ་རིང་གི་ཆོས་མཚམས་འདི་ནས་འཇོག་གསུངས་ནས་བསྔོ་བས་མཐའ་བརྒྱན་ཏེ་ཆོས་ཁྲིད་གྲོལ་སོང་ངོ་།། །།