ཆ༽ ཉིན་དྲུག་པར་དུད་འགྲོའི་སྡུག་བསྔལ་སོགས་ཀྱི་ཆོས་ཁྲིད།
མཆོད་བརྗོད་སོགས་གསུངས་ནས།
ཨ༽ མཚམས་སྦྱོར་གྱི་གདམས་ངག
འདི་ལྟར་ནམ་མཁའ་ཞེས་བར་སྣང་སྟོང་པ་གོ་འབྱེད་པའི་ཆ་འདི་ལ་ཡས་མས་མཐོ་དམན་དང་ཕྱོགས་མཚམས་ལ་སོགས་གང་ནས་གཞལ་ཡང་ཡོངས་སུ་མཐས་གཏུགས་པ་མེད་པར། མི་མཇེད་འཇིག་རྟེན་གྱི་ཁམས་བྱེ་བྲག་ས་ཡ་གྲངས་མེད་པ། དེ་རེ་རེའི་རྡུལ་རྙེད་ཀྱི་གྲངས་དང་མཉམ་པའི་བྱེ་བྲག་ས་ཡ་བགྲང་གིས་མི་ལངས་པའི་འཇིག་རྟེན་གྱི་ཁམས་ཆགས་ཀྱང་། ད་དུང་ནམ་མཁའ་ལ་མི་ཤོང་བ་མེད་པ་སྔར་བཞིན་མཐའ་ཡས་མུ་མེད་པར་ཚད་ཀྱིས་གཞལ་དུ་མེད་པ་ཞིག་ཡིན་ནི་རེད། དེ་བཞིན་ནམ་མཁས་གར་ཁྱབ་སེམས་ཅན་གྱིས་ཁྱབ་པའི་སེམས་ཅན་གྱི་མཐའ་ལ་ཡང་ཚད་བཟུང་རིས་ཀྱིས་གཞལ་དུ་མེད་པ་ཞིག་ཡིན་ན། འདི་བཞིན་དུ་ཐོག་མ་མེད་པ་ནས་ད་ལྟའི་བར་དུ་འཁོར་བར་འཁྱམས་ཀྱང་། ད་དུང་ཕྱི་མའི་མཐའ་མི་མངོན་པར་སྐྱེ་ཤི་གཉིས་ཀྱིས་ཁ་བརྒྱུད་དེ་ཡང་ནས་ཡང་དུ་སྐྱེ་བ་ལེན་པ་དང་ནི། ཡང་ནས་ཡང་དུ་ཤི་བའི་སྡུག་བསྔལ་མྱོང་བ། སྐྱེས་ཚད་སྡུག་བསྔལ་གྱི་
བསུ་མ། བསགས་ཚད་ཁུར་བོ་ཡི་སྣོན་མ། འབྲེལ་ཚད་ཚོགས་ངན་གྱི་གཞི་མ། གནས་རིས་མཐོ་དམན་གང་དུ་སྐྱེས་ཀྱང་སྡུག་བསྔལ་མེད་པའི་གནས་ཅུང་ཟད་ཀྱང་མེད་པས་ན། འཁོར་བ་འདི་སྡུག་བསྔལ་གྱི་རྒྱ་མཚོ་ལྟ་བུ་ཡིན། འཁོར་བ་འདི་སྲིན་མོའི་གླིང་ལྟ་བུ་ཡིན། འཁོར་བ་འདི་དུག་སྦྲུལ་གདུག་པ་ཅན་གྱི་ཚང་ལྟ་བུ་ཡིན། འཁོར་བ་འདི་མེ་མ་མུར་གྱི་འོབས་ལྟ་བུ་ཡིན་གསུངས་ཁི་འདུག་རྒྱུ་དེ་རྒྱལ་བ་བདེན་པར་སྨྲ་བའི་བཀའ་ལ་བསླུ་བ་མེད་ནི་བོ་ལྐོག་གྱུར་ཞིག་ཡིན་ནི་མ་རེད། རང་རང་སོ་སོའི་ལུས་ཐོག་ནས་བསམ་ན་སྐྱེས་ནས་མ་ཤིའི་བར་དུ་སྡུག་བསྔལ་ཤ་སྟག་གི་བརྒྱུད་རིམ་འདི་ལ་བལྟས་ནའང་མི་ཤེས་པ་ཞིག་མེད། དེ་ལྟ་བུའི་སྡུག་བསྔལ་མཐའ་ཡས་མུ་མེད་པར་ཚུད་པའི་མར་གྱུར་འགྲོ་བ་ནམ་མཁའི་ཁྱོན་དང་མཉམ་པ་འདི་དག་ཐམས་ཅད་སྙིང་རེ་རྗེ། འདི་ཐམས་ཅད་ཀྱིས་བསམ་རྒྱུ་འདོད་རྒྱུ་བདེ་བ་དང་མི་བསམ་མི་འདོད་རྒྱུ་སྡུག་བསྔལ་ཤ་སྟག་ཡིན། བདེ་བ་ཐོབ་ཅིང་སྡུག་བསྔལ་མི་འབྱུང་བའི་ཆེད་དུ་ཉིན་མི་དལ་མཚན་མི་ཁོམ་ནས་རྒྱུག་ཁི་ཡོད་ནི་རེད། འབད་རྩོལ་དོན་གཉེར་གཉིས་ཀ་དེ་ལ་བྱེད་ཁི་ཡོད་ཀྱང་ལས་རྒྱུ་དང་འགྲུབ་རྒྱུ་ཚང་མ་ནི་སྡུག་བསྔལ་རྒྱུ་འབྲས་གཉིས་པོ་ཁོ་ན་ཡིན། མི་རྙེད་མི་ཐོབ་རྒྱུ་ནི་བདེ་བ་རྒྱུ་འབྲས་གཉིས་པོ་ཁོ་ན་ཡིན། བདེ་བ་དོན་དུ་གཉེར་བའི་བསམ་པས་བདེ་བ་སྒྲུབ་རྒྱུའི་དོད་པོ་སྡུག་བསྔལ་གྱི་རྒྱུ་འབའ་ཞིག་སྒྲུབ་པ་དཔེར་ན་སེམས་ཀྱིས་སྨན་ཤིང་གི་ས་བོན་འདེབས་བསམ་ནའང་ལག་གིས་དུག་གི་ས་བོན་ཞིག་བཏབ་བཏང་ན། འབྲས་བུ་དུག་ཤིང་གི་སྡོང་པོ་རང་གཞན་གཉིས་གནོད་ཅན་ཞིག་སྐྱེ་མི་འོང་བའི་ཐབས་མེད། དེ་ལྟ་བུའི་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་བའི་སེམས་ཅན་ཐམས་ཅད། ལམ་ལོག་མགོ་རྨོངས་སུ་གྱུར་ནས་དཔེར་ན་དམུས་ལོང་ཐང་སྟོང་དུ་འཁྱམས་པ་ལྟ་བུ་འདི་རྣམས་ལ། ད་རེས་ངས་ཐར་ལམ་གསལ་བའི་མིག་ཅིག་བསྒྲུབས་ནས་མ་རྒན་སེམས་ཅན་འདི་དག་ཐམས་ཅད་ལ་ཕན་ཐོགས་པ་ཞིག་ཅི་ནས་ཀྱང་བྱ་དགོས། ཕན་འདོགས་བྱེད་ཀྱི་མཐུ་དང་ནུས་པ་རང་ལ་མེད་པ་ཞིག་ཡིན་ན་རྒན་མོ་བསམ་བཟང་གི་སྙིང་རྗེ་ཙམ་གྱིས་ཕན་ཆེན་པོ་ཞིག་མི་ཐོགས་པས། རང་ཉིད་ལ་མཐུ་དང་ནུས་པ་ཁྱད་པར་ཅན་ཡོད་དགོས་ན་ཐོག་མར་ཤེས་རབ་ཁྱད་པར་ཅན་ཞིག་ཡོད་ཐབས་བྱེད་དགོས། སྤྱིར་ཆོས་དང་འཇིག་རྟེན་གང་བསྒྲུབ་དགོས་ཀྱང་ཤེས་རབ་མེད་ན་འགྲུབ་ཐུབ་ནི་མ་རེད། ཡུལ་སྡེ་བ་གཅིག་གི་མྱི་ཡིན་ཡང་འགའ་རེ་ཡར་ཡར་ཇེ་ཕྱུག་ཇེ་དར། ཇེ་མཁས་ཇེ་བཟང་། འགའ་རེ་མར་མར་ཇེ་སྡུག་ཇེ་མཐའ་རེད་འགྲོ་རྒྱུ་འདི། ལམ་ལེགས་ཉེས་དཔྱད་པའི་ཤེས་རབ་ཡོད་མེད་ལ་གཙོ་བོར་ཐུག་སོང་ནི་རེད། དེས་ན་ལེགས་ཉེས་འབྱེད་པའི་ཤེས་རབ་མྱིག་ལྟ་བུ་དེ་མེད་ནས་ལམ་ལོག་སོང་ན། ཆུང་ན་རང་གི་མྱི་ཚེ་སྣད་གཏང་བ་དང་། ཆེ་ན་ཡུལ་ཁམས་ལ་ཕུང་དཀྲུག་གཏང་ཐུབ་ནི་རེད། ལེགས་ཉེས་འབྱེད་པའི་རྣམ་དཔྱད་ཤེས་རབ་ཅིག་རང་ལ་ཡོད་པའམ། ཡང་ན་དམ་པའི་བཀའ་དྲིན་ལས་གསར་དུ་ཐོབ་ནས། དེའི་སྟེང་ལ་མཁས་པའི་ལེགས་བཤད་དང་བློ་འདྲིས། སྨོན་ལམ་བཟང་པོས་མཚམས་སྦྱོར་དང་ལྡན་ན། ཡ་རབས་ཀྱི་ལམ་ལ་ཞུགས་པའི་མི་ཡ་རབས་དེ་འདྲས་སྤྱི་ཆུས་མ་གཏོགས་རང་དོན་སྒྲུབ་ནི་མ་རེད། རང་དོན་མ་བསྒྲུབས་ཀྱང་རང་ཆུས་ཞོར་དུ་འབྱུང་གི་འདུག་ནི་རེད། ཇི་སྐད་དུ། རང་དོན་ཁོ་ན་གཙོར་བྱེད་པ། །དེ་ཡིས་རང་དོན་འགྲུབ་མི་སྲིད། །ཅེས་གསུངས་། མདོར་ན་མི་ཡ་རབས་རེ་རེས་ཀྱང་ཡུལ་ཁམས་བདེ་ལ་བཀོད། རང་གཞན་གཉིས་ཀའི་ཚེ་འདི་ཕྱིའི་དོན་ཆེན་འགྲུབ་པ་ཡིན། ཕ་རུས་མ་ཁོངས་མཐུན་པའི་ཁྱིམ་གཅིག་གི་བུ་སྤུན་ཡིན་ཡང་ཆོས་འཇིག་རྟེན་གཉི་ག་གང་ཐད་ནས་བཟང་ངན་ཤོར་ཁི་འདུག་རྒྱུ་འདི། རྩ་བ་ཤེས་རབ་ཡོད་མེད་ལ་ཐུག་ནི་རེད། ཚེ་ཕྱི་མའི་དོན་ཆེན་སྒྲུབ་པའི་ཐད་ནས་རང་མགོ་རང་གིས་ཐོན། མ་ཚད་གཞན་མགོ་བཏོན་ནས་མཐའ་ཡས་པའི་སེམས་ཅན་ཐམས་ཅད་འཁོར་བའི་གནས་ལས་སྒྲོལ་བའི་དམ་བཅའ་བྱེད་མཁན་ཞིག་གིས། ཐོག་མ་ཉིད་ནས་ཤེས་རབ་ཀྱི་མིག་ཁྱད་པར་ཅན་ཞིག་ཡང་དུ་བསྒྲུབ་དགོས་ནི་རེད། འོ་ན་དེ་ཇི་ལྟར་བསྒྲུབ་དགོས་ཤེ་ན། ཐོས་པའི་ཤེས་རབ་དང་། བསམ་པའི་ཤེས་རབ་དང་། སྒོམ་པ་ལས་བྱུང་བའི་ཤེས་རབ་གསུམ་ལ་བསླབ་དགོས། དང་པོ་ཐོས་པའི་ཤེས་རབ་ལ། ཐོས་རྒྱུ་དམ་པའི་གཞུང་ལུགས་དང་། རྐྱེན་དགེ་བའི་བཤེས་གཉེན་ཁྱད་པར་ཅན་ཞིག་རྙེད་དགོས། དེ་ཡང་ཐོས་པའི་ཤེས་རབ་སྒྲུབ་རྒྱུའི་གཞུང་ལུགས་ལ་བསམ་ན། སྤྱི་དང་བྱེ་བྲག་གི་རིག་པའི་གནས་སྣ་ཚོགས། དུས་རབས་གསར་རྙིང་གི་དགོས་མཁོ་དང་བསྟུན་ན་འཕྲལ་མཁོ་འཇིག་རྟེན་གྱི་བྱ་བ་སྒྲུབ་ཐབས་དང་། ཕུགས་བསམ་འདི་ཕྱིའི་དོན་ཆེན་སྒྲུབ་བྱེད་ཀྱི་གཙུག་ལག་གཉིས་ཀྱི་རྣམ་བཞག་དེ་ཉིད་ཆེས་ཤིན་ཏུ་མང་བ་ཡིན། ཡིན་ན་ཡང་ཤེས་བྱ་བསླབ་དགོས་ཀྱི་གནས་ལ་ཟད་པ་མེད་ན། གཅིག་མ་ཤེས་གོང་ནས་གཉིས་ལ་འཐམ་ཁ་བྱེད་ན། ཕུ་ནས་ཤ་ཤོར། །མདའ་ནས་ཤེའུ་ཤོར། །ཟེར་བ་ལྟར། ཐ་མར་དོན་ཆེ་ཆུང་གཉིས་ཀ་ལག་ཏུ་མ་ལོན་པའི་མཚན་གཞི་མང་པོར་ཡོད། དེས་ན་ཞེ་སྙིང་ནས་དམ་ཆོས་དོན་གཉེར་བྱེད་མཁན་གྱིས་མ་གྱུར་མཁའ་ཁྱབ་ཀྱི་སེམས་ཅན་ཐམས་ཅད་ལ་མར་ཤེས་དྲིན་དྲན་དྲིན་ལེན་གཟོ་འདོད་ཀྱི་བསམ་པ་དེའི་ཐོག་ནས། ཚེ་གཅིག་ལ་བྱང་ཆུབ་དོན་གཉེར་མ་གཏོགས་བསམ་རྒྱུ་གཞན་མེད་ནི་ཆོས་པ་ཞིག་གིས། ཚེ་གཅིག་ལུས་གཅིག་ལ་གྲོལ་བ་ཐོབ་པའི་གདམས་ཟབ་ཁྱད་པར་ཅན་ཞིག་བཙལ་རྒྱུ་དེ་གནད་ཆེན་ཡིན་པས་མ་ཚད། གདམས་ཟབ་དེ་ཉིད་ལག་ཁྲིད་གནང་མཁན་གྱི་ལམ་སྟོན་དགེ་བའི་བཤེས་གཉེན་དང་མཇལ་རྒྱུ་དེ་བས་ཀྱང་གལ་ཆེ་བ་ཡིན། འོན་ཀྱང་གདམས་པ་ཟབ་མོ་སྟོན་པའི་བླ་མ་དེ་ཉིད་སུ་བྱུང་བྱུང་གང་ཐུག་ཐུག་ཅིག་ཡོད་པ་ཙམ་གྱིས་མི་འོང་བས། མཚན་ཉིད་དང་ལྡན་པའི་ལམ་སྟོན་གྱི་བླ་མ་རང་རྒྱུད་ཆོས་ཀྱིས་དུལ་བ། གཞན་རྒྱུད་དགེ་བ་ལ་སྦྱོར་ནུས་ནི། འབྲེལ་ཚད་ལོག་ལམ་དུ་མི་གཏོང་བ། ཇི་སྐད་དུ། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པ་བརྩོན་ལྡན་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། །ཞེས་གསུངས་པ་ལྟར། ཚུལ་ཁྲིམས་དག་པས་ལུས་ངག་དུལ་བ། ཏིང་ངེ་འཛིན་དག་པས་ཐུགས་རྒྱུད་དུལ་བ། ཤེས་རབ་དག་པས་ཉེ་བར་ཞི་བ། ཡོན་ཏན་གཞན་ལས་ལྷག་པ། ཕྲིན་ལས་གཞན་དོན་ལ་ལེ་ལོ་མེད་པའི་བརྩོན་འགྲུས་ཅན། ཁྱད་པར་དུ་ཐོས་པ་ཆེ་བས་ལུང་གིས་ཕྱུག་ཅིང་། བཤད་པར་བྱ་བའི་དོན་གྱི་དེ་ཉིད་རབ་ཏུ་རྟོགས་པས། འཆད་བྱེད་ཚིག་ལ་མཁས་པ། གདུལ་བྱ་གང་ལ་གང་དགོས་ཀྱི་ཆོས་འཆད་པ་ལ་ཐོགས་པ་མེད་པའི་མཁྱེན་རབ་ལྡན་ཞིང་། འབུལ་བ་ཟང་ཟིང་གི་དངོས་པོ་མེད་ཀྱང་བརྩེ་བ་ཆེན་པོས་སློབ་མར་ཆོས་སྟོན་པ་དེ་ལྟ་བུ་ཞིག་ཡོད་དགོས། ཁྱད་པར་གསང་སྔགས་ཀྱི་གདམས་ཟབ་སྟོན་པའི་བླ་མ་ནི། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་དང་བརྒྱད་འཆང་བ། །གསང་སྔགས་བླ་མའི་མཚན་ཉིད་དོ། །ཞེས་གསུངས་པ་ལྟར། བསྐྱེད་རྫོགས་རྫོགས་ཆེན་གསུམ་གྱི་དོན་ལ་མཁས་པའི་གསང་བའི་མཛོད་གསུམ་དང་ལྡན་པ། དབང་བཞིའི་ཆུ་བོ་རྫོགས་པ། གསང་བ་གཉེར་དུ་གཏད་ན་མི་སླུ་བའི་སློབ་མ་སྣོད་ལྡན་ཡལ་བ་མི་འདོར་བའི་གཉེར་དང་ལྡན་པ། རྒྱུད་ཀྱི་དོན་ལ་མཁས་པས་སློབ་མའི་ཤེས་རྒྱུད་གྲོལ་ནུས་ནི། དཀྱིལ་འཁོར་དབང་བསྐུར་སོགས་ཞི་རྒྱས་ཀྱི་ལས་རབ་འབྱམས་སྒྲུབ་པ་ལ་མཁས་པ། སྙན་བརྒྱུད་ཉམས་མྱོང་དང་ལྡན་པས་མན་ངག་གི་དྲོད་འཆང་བ་ཞིག་དགོས་གསུངས་ནི་རེད། ཁྱད་པར་རྫོགས་ཆེན་མན་ངག་སྟོན་པའི་བླ་མ་ནི། ཚིག་གིས་གདམས་པའི་སྒྲོ་འདོགས་གཅོད་ནུས་པ། དོན་གྱི་ངོ་སྤྲོད་ཀྱིས་རྟོགས་པ་སྐྱེད་ནུས་པ། བྱིན་རླབས་ཀྱི་ཟིལ་གྱིས་སྣང་བ་སྒྱུར་ནུས་པ། ཉམས་མྱོང་གི་ཐབས་མཁས་ཀྱིས་གེགས་སེལ་ནུས་པ་དེ་འདྲ་ཞིག་ཡིན་དགོས། འོན་ཀྱང་ད་ལྟ་སྙིགས་མའི་དུས་སུ་བླ་མ་ལྟ་ཅི་སངས་རྒྱས་བྱོན་ཀྱང་ཡིད་མི་ཆེས་པའི་དུས་སུ་གདུལ་བྱའི་སེམས་ཅན་བསོད་ནམས་དམན་པས་བླ་མ་མཚན་ཉིད་ཀུན་ལྡན་ཞིག་རྙེད་དཀའ་ན་ཡང་། མ་མཐའ་ཡང་རང་ལས་ལྷག་པར་ཞིག་བསྟེན་རྒྱུ་བོ་གལ་ཆེན་པོའི་ནང་གི་དོན་ཆེན་པོ་ཡིན། དེ་ལྟར་ན་ཡང་དེང་སྐབས་ཀྱི་དུས་འདིར། སློབ་དཔོན་དབྱིག་གཉེན་གྱིས། སྟོན་པ་འཇིག་རྟེན་མིག་ནི་ཟུམ་གྱུར་ཅིང་། །དཔང་གྱུར་སྐྱེ་བོ་ཕལ་ཆེར་ཟད་པ་ན། །དེ་ཉིད་མ་རྟོགས་རང་གར་གྱུར་བ་ཡི། །ངན་རྟོག་རྣམས་ཀྱིས་བསྟན་པ་འདི་དཀྲུགས་སོ། །ཞེས་གསུངས་པ་ལྟར་བདག་དང་བདག་འདྲས་ཆོས་བཤད་ཁ་བྱེད་རྒྱུ་འདི་ནི། བརྒྱུད་པ་གོང་མ་གསེར་རིའི་ཕྲེང་ཚར་ལྟ་བུ་ལ་ལྟོས་ན་གསེར་ལ་སྔོ་ནེའི་རྒྱན་ཆ་བཏགས་པ་ལྟར་ཆོས་ལ་དབང་ཟ་བ་ལྟ་བུ་ཞིག་མ་གཏོགས་མེད་ཀྱང་། དམ་པ་གོང་མའི་བཀའ་ལུང་ཞལ་ཆེམས་ལ་ཕུགས་བཅོལ། བསྟན་པ་སྲོག་གིས་གསོ་བའི་ལྷག་བསམ་ལྷད་མེད་ལ་གཞི་བཟུང་ན། དབྱིངས་ན་བཞུགས་པའི་མཆོག་གསུམ་རྩ་གསུམ། ཁྱད་པར་དུ་ཆོས་བརྒྱུད་འདིའི་བརྒྱུད་གསུམ་བླ་མའི་བྱིན་ནུས་ལ་བརྟེན་ཏེ། ཁྱེད་སློབ་ཚོགས་ཚང་མས་གདམས་ངག་ཟབ་ཆོས་ཉམས་སུ་ལེན་པའི་བརྩོན་འགྲུས་མ་ཞན་ན། རྒན་མོ་ཁྱི་སོས་སངས་རྒྱས་པའི་དཔེ་ལྟར། རྟོགས་པའི་བྱིན་རླབས་འདྲ་འདྲ་ཞིག་འཕོ་རྒྱུ་དང་ཐོབ་རྒྱུ་ཡོད་རྒྱུ་རེད་བསམས་ནས་ཡིད་ཆེས་གདེང་ཚོད་དེ་འདྲ་འཇོག་ཁི་ཡོད། ཆོས་ཞུ་མཁན་སློབ་མ་ཡང་སུ་ཡིན་གང་ཡིན་མིང་གྲངས་རྩི་བྱེད་ཙམ་སྔ་དྲོ་ར་མའི་ནང་ན་ཡོད་ནི། ཕྱི་དྲོ་ལུག་གི་གྲལ་ལ་ཐེ་ནི། ར་མིན་ལུག་མིན། སྒོ་ཕྱི་ནང་བར་གྱི་རིས་རྡོག བྱང་ཐང་གི་འཇག་མ་ལྟ་བུས་མི་འོང་། མཆོག་གསུམ་སྐྱབས་ཀྱི་དྭངས་མ་འཛིན་ནི། ལས་རྒྱུ་འབྲས་ལ་ཡིད་ཆེས་ཀྱི་ངེས་ཤེས་ཡོད་པ། དེའི་ཐོག་གཞན་ཕན་སྙིང་རྗེའི་སོ་རྩ་མ་ཉམས་ཤིང་། དམ་ཚིག་ཐང་ལ་འཕེན་མི་གཏོང་བ་ཞིག་མ་མཐའ་ཡང་ཡིན་དགོས་ནི་རེད། གང་ལྟར་བཤད་རུང་འུ་ཅག་རྣམས་ས་དང་ལུང་པའི་དོད་གནས། བྲག་དང་ཤུག་པའི་སྐྱེ་ལེན། སྔོན་སྨོན་ཐུགས་བསྐྱེད་བཟང་པོས་ཟེར་ན་ཆེ་ནི་ཨེ་ཡིན་ན། སྔ་འགྱུར་བསྟན་པའི་བསྟི་གནས་གྲུབ་དབང་རྫོགས་ཆེན་པའི་གདན་སའི་ཡང་དབེན། གནའ་མཁན་ཆེན་པདྨ་བཛྲ་མཚན་བཏགས་པ་ལྟར་ན། ཐེག་མཆོག་འོད་གསལ་ཉི་ཟླའི་གླིང་། དེང་སྐབས་གངས་ལྗོངས་བསྟན་འགྲོའི་དཔལ་མགོན་ཆེན་པོས་མཚན་བཏགས་པ་ལྟར་ན། རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་འདི་ན་འཛོམས་ནས། ཟབ་ཁྲིད་ཀྱི་གདམས་པ་གསང་ཆེན་རྡོ་རྗེ་ཐེག་པའི་ཆོས་འཆད་ཉན་བྱ་རྒྱུ་འདི། བྱིས་པས་རྩེ་རྡོ་སྒྲིག་ནི་འདྲ་ཞིག་མ་རེད། ལས་སྨོན་གཅིག་ཏུ་མཐུན་པ་མི་ཟེར་ཀ་མེད་ཀྱི་ཐོག་ནས། ཁྱོད་འདི་ཡོད་སེར་སྐྱ་མཆོག་དམན་བར་གསུམ་ཐམས་ཅད་ཀྱིས་བསམ་བློ་ནང་དུ་སྐོར་དང་དལ་འབྱོར་ཚང་བའི་དལ་རྟེན་འདི་རྙེད་པར་དཀའ་བ་མ་ཟད། ཚེ་མི་རྟག་པའི་ཁྲིད་ནས་གསུངས་པ་ལྟར་ཚེ་འདི་སྣང་གི་མི་ཚེ་འདི་སྐད་ཅིག་མི་བརྟན་འགྱུར་བའི་ཆོས་ཅན། འཆི་བའི་རྐྱེན་མང་། འཚོ་བའི་རྐྱེན་ཉུང་བ་རླུང་གསེབ་ཀྱི་མར་མེ་ལྟ་བུ་ཡིན་ནི་རེད། གལ་ཏེ་འགལ་རྐྱེན་སད་ཀྱིས་མ་ཁྱེར་ནས་རྟབས་ལེགས་ལྟས་དབང་གིས་ཚེ་མཐར་ཕྱིན་ན་ཡང་། ལང་ཚོ་དར་ལ་བབ་པ་འདི། ནམ་མཁའི་འཇའ་ཚོན་གྱི་རི་མོ་དང་འདྲ་བ་ཡུན་རིང་མི་གནས། ན་ཚོད་ཕྱེད་ཡོལ་གྱི་ཐོག་ལ་ཐོན་དུས་དགོང་ཕྱི་དྲོའི་གྲིབ་ཆེན་དགུག་ནི་འདྲ་བ། ཉེར་འབྱུང་འཆི་བདག་གི་བསུ་མ་དང་ཐག་ཇེ་ཉེ་ཡིན་ན། འཆི་བདག་གཤིན་རྗེའི་གདོང་དང་ཐུག་དུས་ཆོས་སྔོན་སོང་གི་བསགས་རྒྱབ་ཅིག་དང་ཉམས་ལེན་གྱི་དཔའ་གདེང་ཞིག་མེད་ན། དེ་དུས་བླ་མ་རྐྱང་བས་སྐྱོབས་ཟེར་ན་དཀའ་ནི་རེད། སྐྱབས་གནས་ལ་ཐུགས་རྗེ་མེད་ནི་མ་རེད་གདའ། དད་པའི་ཨ་ལུང་མེད་ན་ཐུགས་རྗེའི་ལྕགས་ཀྱུས་བཟུང་ཐབས་མེད་པས། འུ་ཅག་དུས་སྙིགས་མའི་དམུ་རྒོད་ཀྱི་སེམས་ཅན་འདི་དག་སངས་རྒྱས་བཅོམ་ལྡན་འདས་ཀྱིས་ཀྱང་འདུལ་མ་ནུས་ནས་ལྷག་སོང་ནི་ཡིན་ན། ད་ལྟ་རང་དབང་རང་ལག་ཡོད་དུས་དམ་པའི་ལྷ་ཆོས་སྒྲུབ་རྒྱུ་རེ་མ་འཁྱུགས་ཟེར་རྒྱུ་ནི་ཆོས་ཁྲིད་ནམ་ཚོགས་ཆོས་དུང་ནམ་བུས་སྐབས་བཤད་ནི་ཡིན། དམ་པའི་ལྷ་ཆོས་སྒྲུབ་པ་དེའང་ལྟར་སྣང་བ་དང་། སླ་ཆོས་དང་། འགྲོ་ཞོར་འདུག་ཞོར། ལས་ཀའི་ནང་གི་གནད་ཆུང་ཞར་དང་ཞོར་ལ་ལས་རྒྱུ་ལྟ་བུ་དང་། སྒྲུབ་མཁན་མྱིའི་ནང་ནས་ཡིན་ན་ལས་མེད་ཉི་ཁུག་ལ་བསྡད་པའི་ཨ་ཕྱི་ཨ་མྱེ་རྣམས་དང་། གཏོང་ཕོད་རྒྱུ་འགྲོས་ཀྱི་ཐད་ནས་ཡིན་ན་ཁ་ཚར་རྣ་ཚར་ཙམ་ཞིག་ལས་མེད་ན། དཔལ་སྤྲུལ་རིན་པོ་ཆེས། ཐུད་ཀྱི་སྔོ་ས་མར་གྱི་ཁ་ས་ནས་དཀོན་མཆོག་ལ་མཆོད་ན་ལོ་ནི་མ་རེད་གསུངས་ཡོད་པས། མདོར་ན་གང་ཐད་ནས་ཡིད་ཆེས་མ་ཆེས་ཙམ་ཞིག་གི་ཐོག་ནས་ཆོས་འཇིག་རྟེན་གཉིས་འདྲེས་མ་ཞིག་གིས་ཆོས་རྣམ་པར་དག་པ་ཞིག་འགྲུབ་ཐུབ་དཀའ། སྤྱིར་ཆོས་ལ་ཞུགས་དུས་དང་པོ་ཐེ་ཚོམ་ཞིག་ཤར་རྒྱུ་ཡོད་དེ་ལོག་རྟོག་དོན་འགྱུར་གྱི་ཐེ་ཚོམ་ཞིག་ཡིན་ནི་མ་རེད། བླང་དོར་གྱི་མིག་འབྱེད་པའི་རྣམ་དཔྱོད་ཀྱི་སྔོན་ལྟས་ཤིག་ཡིན་ནི་རེད། ཐེ་ཚོམ་དེ་ལས་དྲི་བ་ཞིག་རང་ཤུགས་ཀྱིས་འབྱུང་བ་ཡིན་ན། དེའི་དྲིས་ལན་དུ་རྒྱལ་གསུང་བཀའ་དང་བསྟན་བཅོས་ཀྱི་དགོངས་དོན། ཚད་མ་གསུམ་གྱིས་བརྟགས་ཤིང་དཔྱད་ཏེ་རྙེད་པའི་རྙེད་ནོར་ཞིག་རང་གིས་ལོན་དགོས་ནི་རེད། དེ་རང་གིས་མ་ཤེས་ན་གཞན་ལ་འདྲི་དགོས། དེའི་ཚེ་ཡིད་མི་ཆེས་པའི་དོན་འགྱུར་གྱི་ཐེ་ཚོམ་ཞིག་སྐྱེ་བྱུང་ན་རྗེས་ནས་ལོག་ལྟར་འགྱུར་ཉེན་ཡོད། དེའི་ཚེ་བློ་ཐག་ནང་ནས་ཆོད་པའི་ངེས་ཤེས་ཀྱི་དད་པ་ཞིག་འབྲང་ན་ཡིད་ཆེས་ཕྱིར་མི་ལྡོག་པའི་དད་པ་ཡིན་ནི་རེད། དེས་ན་ཆོས་ལམ་ལ་ཞུགས་པའི་ཐོག་མར་དད་དང་སྙིང་རྗེ་གཉིས་ཀྱི་གཞི་བཟུང་། ཆོས་བསྒྲུབ་དགོས་པའི་རྒྱུ་མཚན་དང་ཇི་ལྟར་སྒྲུབ་པའི་ཚུལ་ལ་སོགས་གནད་ཁ་དང་རྒྱུ་མཚན་ཚང་མ་རང་གིས་ངེས་པར་བྱས་ནས། དམ་པའི་ཆོས་གཞི་ནས་ལག་ལེན་ལ་བསྟར་ན་ཆོས་རང་རྒྱུད་ལ་འབྱོར་བ་དང་། བརྩོན་འགྲུས་ཀྱི་སྐུལ་འདེབས་རང་ཤུགས་ཀྱིས་འོང་བའི་གནད་ཡོད། ད་སྐབས་སུ་བབས་པའི་འཆད་བྱ་གང་ཡིན་ན། དེ་རིང་དུད་འགྲོའི་སྡུག་བསྔལ་བཤད་པའི་སྐབས་ཏེ།
༣༽ དུད་འགྲོའི་སྡུག་བསྔལ།
ངན་སོང་གི་གནས་གསུམ་པ་དུད་འགྲོ་ལའང་བྱིངས་ན་གནས་པ་དང་ཁ་འཐོར་བ་གཉིས་ལས། དང་པོ་ནི་མཐའི་རྒྱ་མཚོ་ཆེན་པོའི་ནང་ན་སྐྱོབས་པའི་རྟེན་དང་གནས་མེད་པས་ན་རླབས་ཀྱིས་བརྡས་ཏེ་ངེས་མེད་འཁྱམས་པའི་ཉ་དང་། ཆུ་སྲིན་དང་། དུང་དང་། སྦལ་པ་དང་། འབུ་སྲིན་ལ་སོགས་པ་ཆང་བཙོ་ཤུལ་གྱི་འབྲས་སྙིགས་མའམ་ཆང་འགག་གི་སྦང་མ་བཞིན་བར་མཚམས་མེད་པར་ལྕིག་ལྕིག་ཡོད་པ་ལ་ཆུ་ནང་གནས་པའི་ཆུའི་སྦྲུལ་དང་ཆུ་སྲིན་ལ་སོགས་པ་ལུས་བོང་ཆེ་བ་འགའ་རི་རབ་ལ་ལན་མང་པོའི་བར་དཀྲིས་ཐུབ་པའི་དེ་འདྲའི་རིང་པོ་དང་། ཡང་ལུས་བོང་ཆུང་བ་འགའ་ཞིག་ཤིན་ཏུ་ཕྲ་བའི་མཐར་ཐུག་པ་རྡུལ་ཕྲན་དང་དེ་ལས་ཅུང་ཟད་ཆེ་བ་ཁབ་རྩེ་ལྟ་བུའི་བར་དུ་ཡོད་ཅིང་། སྲོག་ཆགས་དེ་དག་ཆེ་ཆེས་ཆུང་ཆུང་རྣམས་གྱུར་མིད་བྱེད་པ་དང་། དུང་ལ་སོགས་པ་ཆུང་ཆུང་གིས་ཆེན་པོ་རྣམས་ཀྱི་ལུས་ཐལ་མར་འབིགས་ཤིང་ཟ་བ། སྲོག་ཆགས་ཆེ་བ་རེ་རེའི་ལུས་ལ་ཆུང་བ་དུ་མས་ཚང་བཅས་ནས་ཁ་ཟས་སུ་བྱེད་པ་དང་། གླིང་བར་ཉི་མ་མི་འཆར་བའི་མུན་པའི་གླིང་གི་གནས་སུ་སྐྱེས་པས་ན་རང་གི་ཡན་ལག་དང་ཉིང་ལག་བརྐྱང་བསྐུམ་བྱེད་པ་ཙམ་ཡང་མི་མཐོང་བར་མུན་ནག་འཐིབས་པས་ཤིན་ཏུ་སྡུག་བསྔལ་བ། དུད་འགྲོ་རིགས་སྤྱི་ལ་བླུན་ཞིང་གཏི་མུག་པ་ཤེས་རབ་ཀྱི་སྣང་བ་གཏན་ནས་མེད་པས་དགེ་སྡིག་སྤང་བླང་གི་བླང་དོར་གྱི་གནས་ཐམས་ཅད་ལ་རྨོངས་ཏེ་སྐྱེ་བ་ཚེ་རབས་མང་པོ་སྡུག་བསྔལ་མུ་མཐའ་མེད་པའི་ཀློང་དུ་འཁྱམས་ཏེ་ངན་སོང་གི་གནས་སུ་སྐྱེ་བ་ཡིན། གཉིས་པ་ཁ་འཐོར་བའི་དུད་འགྲོ་ནི། ལྷ་དང་མི་ཡི་ཡུལ་ན་ཡོད་པ་རྣམས་ཡིན་དེ་དག་ཀྱང་དུད་འགྲོ་གཞན་དང་འདྲ་བ་བླུན་ཞིང་རྨོངས་པ་དང་གཞན་མི་ལ་སོགས་པས་བཀོལ་སྤྱོད་ཀྱི་སྡུག་བསྔལ་ཁོ་ན་ལ་དུས་རྟག་ཏུ་སྤྱོད་པ་ཡིན། ཀླུ་སོགས་ལ་མཁའ་ལྡིང་སྟེ་བྱ་རྒྱལ་ཁྱུང་གི་གནོད་པ་དང་། སྐབས་སྐབས་སུ་བྱེ་ཚན་གྱི་ཆར་འབབས་པས་ཉམ་ཐག དེ་དག་ཀྱང་བླུན་ཞིང་གཏི་མུག་པ། ཀླུ་རིགས་དེ་དག་གདུག་རྩུབ་ལྷག་པར་ཆེ་བ་དང་དུག་སོགས་ཡོད་པས་རང་གིས་གཞན་ལ་གནོད་པ་དང་རང་ལ་སྡུག་བསྔལ་གྱིས་ཉམ་ཐག་པའོ། །ཁྱད་པར་མི་ཡུལ་གྱི་དུད་འགྲོའི་རིགས་མིས་བདག་ཏུ་མ་བཟུང་བའི་རི་ལ་གནས་པའི་རི་དྭགས་གཅན་གཟན་ལ་སོགས་པ་རྣམས་ནི་དུས་རྟག་ཏུ་འཇིགས་སྐྲག་གི་སྣང་བ་ཁོ་ན་ལ་སྤྱོད། རྩྭ་སོགས་ཟས་ཁམ་གང་ཟ་ཡང་བག་མི་ཕེབ་བཞིན་དུ་ཟ། གཅིག་གིས་གཅིག་བསད་ཅིང་དེའི་ཤ་ཟ་ཞིང་། རྔོན་པ་དང་གཅན་གཟན་ལ་སོགས་གསོད་པ་པོ་གྲངས་མང་། ཁྲས་བྱེའུ་དང་བྱེའུས་འབུ་གསོད་ནས་ཟ་བས་མཚོན། གཅིག་གིས་གཅིག་གསོད་པའི་ལས་ངན་པ་ཁོ་ན་རྟག་ཏུ་གསོག་པ་ཡིན། མིའི་རིགས་ཀྱི་རྔོན་པ་ལ་སོགས་པ་རྣམས་ནི་སེམས་ཅན་དུད་འགྲོ་དེ་དག་ཐབས་སྣ་ཚོགས་ཀྱི་སྒོ་ནས་མནར་ཞིང་གསོད་པའི་སྡིག་པའི་ལས་ཐབས་ལ་མཁས་པས། རྒྱ་དང་སྙི་དང་གོག་ཚེ་དང་མེ་མདའ་ལ་སོགས་གནོད་པ་བྱེད་པའི་ཐབས་འཕྲུལ་གྱི་ལག་ཆ་དུ་མས་སྟོབས་ཅན་གྱི་གཅན་གཟན་རྣམས་ཀྱང་འཕྲལ་དང་འཕྲལ་དུ་སྲོག་ལ་རྒོལ་ནས་བསད། རི་དྭགས་དང་གཅན་གཟན་ཁ་ཅིག་རང་གི་ལུས་ལ་སྐྱེས་པའི་རྭ་དང་སྤུ་དང་པགས་པ་དང་ཤ་རྭ་དང་གླ་རྩི་དང་དོམ་མཁྲིས་དང་ཤ་དང་ཁྲག་ལ་སོགས་པའི་ཆེད་དུ་གསོད་དེ། ཚོང་པས་མུ་ཏིག་གི་ཆེད་དུ་ཉ་ཕྱིས་གསོད་པ་དང་། མཆེ་བ་དང་རུས་པ་ལ་སོགས་པའི་ཆེད་དུ་གླང་པོ་ཆེ་གསོད་པ་དང་། པགས་པའི་ཆེད་དུ་སྟག་གཟིག་དང་། སྲམ་དང་ཝ་སོགས་གསོད་པ་དང་། གླ་རྩིའི་ཆེད་དུ་གླ་བ་དང་། ཤ་དང་ཁྲག་གི་ཆེད་དུ་རྐྱང་འབྲོང་ལ་སོགས་པ་གསོད་པ་སོགས་དུད་འགྲོ་དེ་དག་གི་རང་གི་ལུས་ཉིད་ཀྱང་རང་ཉིད་གསོད་པའི་རྒྱུའམ་རྐྱེན་དུ་འགྱུར་བར་སྐྱེས་པས་ན་རྣམ་པ་ཀུན་ཏུ་ཤིན་ཏུ་སྡུག་བསྔལ་བ་ཡིན་ནི་རེད། གཡུང་དྭགས་མི་ལ་བརྟེན་པའི་དུད་འགྲོ་རྟ་ཟོག་ར་ལུག་རྣམས་ནི་བླུན་ཞིང་གཏི་མུག་རྨོངས་པ་ཡིན་པས་གསོད་པའི་གཤེད་མས་རལ་གྲི་ཐོགས་ཏེ་དྲུང་དུ་སླེབ་ཀྱང་མིག་སྔོ་ཅེ་རེ་ལྟ་བ་ལས་བྲོས་པ་ཙམ་ཡང་མི་ཤེས། དེ་བཞིན་དུ་མ་འབྲི་སོགས་རྒས་མ་སོང་གི་བར་དུ་ཞོ་བཞོ་བ་དང་། རྟ་དྲེལ་མཛོ་ཁལ་སོགས་ལ་ཁལ་འགེལ་བ་དང་། བྱ་གཅོད་པ་དང་། སྣ་འབིགས་པ་དང་། རྨོས་རྨོ་བ་སོགས་མདོར་ན་བཀོལ་སྤྱོད་ཀྱི་རྣམ་གྲངས་འདི་མྱོང་དང་འདི་མ་མྱོང་སྙམ་པ་གཅིག་ཀྱང་མེད། རྟ་ཁལ་སོགས་རྒྱབ་ཆད་ནས་ཐམས་ཅད་རྨར་སོང་ཡང་ད་དུང་ཡང་ཁལ་འགེལ་བ་དང་། བཞོན་ནས་འགྲོ་བ་སོགས་བྱེད། ལུས་ཤུགས་ཟད་ནས་འགྲོ་མ་ནུས་ཙ་ན་ད་དུང་ལྕག་གིས་བྲབ་ཅིང་རྡོས་ཚང་ར་ལ་རྡེག དུད་འགྲོ་རྟ་ཁལ་སོགས་དེ་རྣམས་ལ་དཀའ་ཚེགས་དང་ན་ཚ་ཡོད་སྙམ་པའི་སྣང་བ་ཙམ་ནི་མི་བྱེད། གནག་ཕྱུགས་དང་ར་ལུག་རྣམས་ནི་རྒས་ནས་འཆི་བ་ལ་མ་ཐུག་གི་བར་དུ་ཁལ་འགེལ་བ་དང་ཞོ་བཞོ་བ་སོགས་ཀྱི་བེད་བཅད། རྒས་ཙ་ན་བདག་པོ་རང་གིས་བསད་ནས་ཤ་ཁྲག་གི་བེད་གཅོད་པའམ་ཡང་ན་མི་གཞན་ལ་འཚོངས་པ་གང་ཡིན་གྱི་སྒོ་ནས་མདོར་ན་སྒོ་ཕྱུགས་ཐམས་ཅད་ཀྱང་སྒས་པའི་དུས་སུ་བཤས་སུ་ཕབ་ནས་གསོད་དམ་གསོད་དུ་འཇུག་པ་མ་གཏོགས་རང་བཞིན་གྱིས་རྒས་ནས་འཆི་རུ་བཅུག་པ་ནི་ཕལ་ཆེར་གཅིག་ཀྱང་མེད་པ་ཡིན། དེ་ལྟ་བུའི་དུད་འགྲོའི་སྡུག་བསྔལ་བསམ་གྱིས་མི་ཁྱབ་པ་ལ་དུས་རྟག་ཏུ་སྤྱོད་པ་ཡིན་པས། གོང་དུ་བཤད་པ་དེ་ལྟར་སྡུག་བསྔལ་བའི་སེམས་ཅན་རྟ་གཡག་ལ་སོགས་པ་མཐོང་ཙ་ན་སྡུག་བསྔལ་མྱོང་བཞིན་པའི་སེམས་ཅན་དེ་དག་རང་ཉིད་ཡིན་པའི་བློ་བཞག་ནས་དེའི་སྡུག་བསྔལ་རང་ཐོག་ཏུ་མྱོང་བཞིན་པ་ཡིན་ན། སྡུག་བསྔལ་ཆེ་ཆུང་ཇི་ཙམ་འདུག་ལ་སོགས་པ་ཞིབ་ཏུ་བསམས་ནས་བསྒོམ། དུད་འགྲོའི་གནས་སུ་སྐྱེས་པའི་སེམས་ཅན་སྤྱི་ལ་སྙིང་རྗེ་དྲག་པོ་བསྒོམ་ཞིང་ཁྱད་པར་རང་ལ་བསྟེན་པའི་དུད་འགྲོ་སྒོ་ཕྱུགས་འོག་རྟ་སོགས་ཡོད་ན་བྱམས་པ་དང་བརྩེ་བས་སྐྱོང་བ་དང་། ཐ་ན་འབུ་སྦྲང་དང་སྲོག་ཆགས་ཕྲ་མོ་ཚུན་ཆད་ལའང་རང་རང་ལ་སྲོག་དང་ལུས་ཡོད་པས་དེ་གཅེས་ཤིང་བདེ་སྡུག་གི་ཚོར་བ་མེད་པ་ནི་གཅིག་ཀྱང་མེད་ལ། ཇི་སྐད་དུ། རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་བྱེད་ཅིག །གསུངས་པ་ལྟར། རང་ལ་མི་འདོད་པ་རྒྱུ་མཚན་དུ་བྱས་ནས་གཞན་ལ་གནོད་པ་བསྐྱལ་མི་རུང་། དུད་འགྲོ་དེ་དག་གི་ཚེ་ཚད་ཀྱང་རིང་བ་བསྐལ་བར་ཐུབ་པ་དང་། ཐུང་བ་ངེས་མེད་དུ་བཤད་པ་དུ་མ་ཡོད། ངན་འགྲོའི་སྡུག་བསྔལ་དེ་དག་བསམ་ན་ད་ལྟ་རང་རེས་ལག་པ་མེ་སྟག་གིས་ཚིག་ན་མི་བཟོད་པ་དང་། དགུན་གྲང་དུས་གོས་མེད་སྐར་མ་གཅིག་ཙམ་ཡང་མི་བཟོད་པ་དང་། ཉིན་ཞག་རེ་ཙམ་བཟའ་བཏུང་མེད་པ་ལྟ་བུ་དང་། ལུས་ལ་ཚེར་མ་ཟུག་པའམ་སྦྲང་བུས་ཟོས་པ་ཙམ་ཡང་བཟོད་དཀའ་ན། དམྱལ་བ་ཡི་དྭགས་དུད་འགྲོ་གསུམ་གྱི་སྡུག་བསྔལ་ཅི་ལྟར་བཟོད་བསམས་ནས་ད་ལྟ་རང་ཉམས་ལ་ཕབས་ཏེ་འཇིགས་སྐྲག་གི་སྐྱོ་ཤས་དང་ངེས་འབྱུང་དྲག་པོས་བསྐུལ་ནས་དལ་འབྱོར་དོན་ཡོད་བྱ་དགོས། དུད་འགྲོ་ལ་སོགས་པ་དེ་ཐམས་ཅད་ཀྱང་ཚེ་རབས་ཐོག་མ་མེད་པ་ནས་རང་གི་ཕ་མ་མ་བྱས་པའང་གཅིག་ཀྱང་མེད་པས་ན་དུད་འགྲོའི་གཙོས་པའི་སེམས་ཅན་ཐམས་ཅད་ལ་ཡིད་འོང་གི་བྱམས་པ་དང་བརྩེ་བའི་སྙིང་རྗེ་བསྒོམ་པ་སོགས་སྦྱོར་དངོས་རྗེས་གསུམ་ཚང་བར་ཉམས་སུ་བླང་ངོ་། །དེ་ལྟར་ངན་སོང་གི་གནས་གསུམ་པོ་ནི་གང་དུ་སྐྱེས་ཀྱང་སྡུག་བསྔལ་གྱི་ཚོར་བ་དང་རྣམ་གྲངས་གང་གི་ཐད་ནས་བཤད་ཀྱང་དོས་དྲག་ལ་རྒྱུན་རིང་། བླུན་ཞིང་གཏི་མུག་ལ་དམ་པའི་ཆོས་ཀྱི་སྣང་བ་མེད་པས་ན་བདེ་བའི་རྒྱུ་སྒྲུབ་པའི་སྐལ་བ་མེད་པ། ལས་སྔ་མའི་འབྲས་བུ་སྡུག་བསྔལ་མི་བཟོད་པ་མྱོང་བཞིན་སླར་ཡང་ལས་ཕྱི་མ་བསགས་པས་ངན་སོང་གི་རྒྱུ་སྒྲུབ་པ་ཁོ་ན་ལས་མེད། དེ་དག་ཏུ་སྐྱེས་ཤོར་ན་ཚེ་ཚད་ལ་མཐའ་མེད་པས་ཕྱི་ནས་ཐར་བར་དཀའ་ཞིང་། ད་ལྟ་རང་རྒྱུད་ལ་ངན་སོང་དེ་དག་ཏུ་སྐྱེ་ངེས་པའི་ལས་ཚེ་རབས་འདི་དང་གཞན་དུ་བྱས་པ་དུ་མ་ཡོད་པ་ཡིན་པས། སྔར་བྱས་ཀྱི་ལས་ལ་དུག་འཐུང་བ་ལྟ་བུའི་འགྱོད་པ་དང་ཕྱིན་ཆད་ཀྱི་བཤགས་སྡོམ་སྲོག་ལ་བབས་ཀྱང་མི་བགྱིད་པའི་དམ་བཅའ་སོགས་གཉེན་པོ་སྟོབས་བཞི་ཚང་བའི་བཤགས་པ་ལ་སྙིང་ཐག་པ་ནས་རང་དབང་ཡོད་པའི་དུས་འདིར་འབད་དགོས་ནི་རེད། ངན་སོང་གི་གནས་དེར་སྐྱེས་པའི་སེམས་ཅན་རྣམས་ལ་སྙིང་རྗེ་དྲག་པོ་བསྒོམ། རང་གིས་དུས་གསུམ་དུ་བསགས་པའི་དགེ་འབྲས་ཐམས་ཅད་རྒྱལ་བ་སྲས་བཅས་ཀྱིས་ཇི་ལྟར་བསྔོས་པ་ལྟར་དུ་ངན་སོང་དེ་དག་ཏུ་སྐྱེས་པའི་སེམས་ཅན་རྣམས་ཀྱི་ཆེད་དུ་བསྔོ་བ་བྱ། སེམས་ཅན་དེ་དག་ངན་སོང་གི་གནས་ངན་དེ་དག་ལས་མྱུར་དུ་ཐར་བའི་སྨོན་ལམ་ཟབ་མོ་གདབ། བདག་གིས་ད་རེས་ཀྱི་ལུས་རྟེན་འདིར་ཐེག་པ་ཆེན་པོའི་ཆོས་དང་མཇལ་ནས། རང་གཞན་གྱི་དོན་གཉིས་འགྲུབ་པའི་ལམ་སྒྲུབ་ཏུ་ཡོད་པའི་སྐལ་བ་བཟང་པོ་ཐོབ་པ་ཡིན་པས་ན་ཆོས་ཕྱིར་དཀའ་བ་སྤྱད་ཅིང་བརྩོན་པས་ཉམས་སུ་བླངས་ཏེ། ངན་སོང་གི་སེམས་ཅན་དེ་དག་ཐམས་ཅད་དག་པའི་ཞིང་དུ་དྲང་བར་བྱའོ་སྙམ་པའི་བྱང་ཆུབ་མཆོག་ཏུ་སེམས་བསྐྱེད། དེ་ལྟར་བྱེད་ནུས་པར་བླ་མ་དང་དཀོན་མཆོག་གིས་བྱིན་གྱིས་རློབས་ཤིག་སྙམ་དུ་མཆོག་གསུམ་ལྷ་དང་བླ་མ་ལ་གསོལ་བ་འདེབས་པ་དང་། རམ་ཟླར་སྦྲན་པ་སོགས་ཀྱི་ཞལ་འདོན་དང་དམིགས་པ་ཡང་བྱ་དགོས་ནི་རེད། དེ་ལྟར་བྱས་པའི་དགེ་བའང་སེམས་ཅན་གྱི་དོན་དུ་བསྔོ་བ་སོགས་དམ་པ་གསུམ་གྱིས་ཟིན་པར་ཉམས་སུ་བླང་ངོ་། །དེ་ལྟར་ན་ངན་སོང་གསུམ་དུ་སྐྱེས་ན་སྡུག་བསྔལ་གྱི་རང་བཞིན་ཡིན་ཡང་མཐོ་རིས་ལྷ་དང་མི་དང་ལྷ་མིན་རྣམ་གསུམ་ནི་བདེ་ཞིང་སྐྱིད་པ་ཡིན་ནམ་སྙམ་ན། བསོད་ནམས་ཆ་མཐུན་གྱི་དགེ་བའི་ལས་ལམ་ཆུང་འབྲིང་ཆེན་པོ་བསགས་སྟོབས་ཀྱིས། མི་དང་འདོད་ལྷ་ཁམས་གོང་མའི་ལྷར་རིམ་བཞིན་སྐྱེས་པ་ཡིན་ལ། དེས་ན་དེ་དང་དེའི་གནས་སྐབས་ཀྱི་བདེ་བ་ལ་སྤྱོད་ཁི་ཡོད་ནི་རེད། འོན་ཀྱང་འཁོར་བ་ཐམས་ཅད་སྡུག་བསྔལ་གྱི་རང་བཞིན་ཡིན་པས་སྙིང་པོ་མེད་དེ། ངན་འགྲོར་སྐྱེས་ན་བདེ་བ་མེད་པས་མ་ཚད། མཐོ་རིས་ནའང་བདེ་བ་མེད་དེ།
༤༽ མིའི་སྡུག་བསྔལ།
དང་པོ་མིའི་སྡུག་བསྔལ་ནི། མི་རྣམས་ལ་རྩ་བའི་སྡུག་བསྔལ་ཆེན་པོ་འགྱུར་བའི་སྡུག་བསྔལ། སྡུག་བསྔལ་གྱི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་གསུམ་ཡོད། དེའི་ཐོག་ལ་སྐྱེ་རྒ་ན་འཆིའི་སྡུག་བསྔལ་གྱི་ཆུ་བོ་ཆེན་པོ་བཞི། དེས་ཀྱང་མི་ཚད་པར་དགྲ་སྡང་བ་དང་ཕྲད་ནས་གསོད་པ་སོགས་ཀྱི་དོགས་པའི་སྡུག་བསྔལ། ཞག་གཅིག་ཙམ་ཡང་འབྲལ་མི་ཕོད་པའི་གཉེན་བྱམས་པ་རྣམས་དང་གཏན་བྲལ་རེད་རྒྱུ་ལ་དོགས་པའི་སྡུག་བསྔལ། མ་བསམ་མ་དྲན་ས་ནས་མི་འདོད་པ་ཐོག་ཏུ་འབབ་པའི་སྡུག་བསྔལ། བསམ་བསམ་ལས་ལས་བརྒྱུགས་བརྒྱུགས་བསྒྲུབས་བསྒྲུབས་ཀྱང་མ་འགྲུབ་ནས་འདོད་པ་ཐོག་ཏུ་མི་ཁེལ་བའི་སྡུག་བསྔལ་རྣམས་ཡོད་པ་ལས་ཞེས་མདོར་བསྟན། རྒྱས་པར་བཤད་པ་ནི། རྩ་བའི་སྡུག་བསྔལ་གསུམ་གྱི་དང་པོ་འགྱུར་བའི་སྡུག་བསྔལ་ནི། ད་ལྟ་སྐད་ཅིག་མར་བདེ་ཞིང་སྐྱིད་པར་ཡོད་འཕྲོ་ལ་སྡུག་བསྔལ་དུ་འགྱུར་བ་སྟེ། ལུས་ལ་ཕན་པའི་ཟས་ཟོས་ནས་ངོམས་ཤིང་འགྲངས་ཏེ་སྐྱིད་པར་ཡོད་པ་ལས་དེས་རྐྱེན་བྱས་ཏེ་སྲིན་ཕོ་བར་ལངས་པའི་ནད་བསྐྱེད་ནས། གླང་ཐབས་ཀྱི་ནད་དྲག་པོ་གློ་བུར་དུ་བྱུང་སྟེ་ན་ཚ་ཟུག་གཟེར་གྱི་སྡུག་བསྔལ་དྲག་པོ་བྱུང་བ་དང་། ད་ལྟར་བཟའ་ཚང་མགོ་འཛོམས་བྱས་ནས་བདེ་ཞིང་སྐྱིད་པར་ཡོད་འཕྲོ་ལ། གློ་བུར་དུ་ནོར་ཕྱུགས་དང་རྟ་ཁྱུ་ལ་སོགས་དགྲས་དེད་པ་དང་། ཁང་པ་དང་ཁྱིམ་གཞི་མེས་ཚིག་པ། མི་ལ་ནད་གདོན་དྲག་པོ་གློ་བུར་དུ་བྱུང་བ། ཕྱི་རོལ་གྱི་གཏམ་ངན་གློ་བུར་དུ་ཐོས་ནས་ཡིད་མི་བདེ་བའི་ཟས་རྙེད་པ་སོགས་རྐྱེན་ངན་སྣ་ཚོགས་པས་འཕྲལ་དུ་སྡུག་བསྔལ་བར་གྱུར་པ་རྣམས་ཏེ། སྤྱིར་ཁམས་གསུམ་འཁོར་བའི་གནས་རིས་འདིའི་ལྷ་ཡུལ་མན་ཆད་ཀྱི་བདེ་སྐྱིད་སྙན་གསུམ་ལྟར་སྣང་བ་ཡིན་པས། དེ་དག་གང་ལ་ཡང་རྟག་པ་དང་བརྟན་པ་སྤུ་ཙམ་ཡང་མེད་ཅིང་མཐར་སྡུག་བསྔལ་བ་ཁོ་ན་ལས་མ་འདས་པ་ཡིན་པས་ན། རང་གིས་རང་ལ་འཁོར་བ་ལ་བདེ་བ་མེད་པའི་སྐྱོ་བ་བསྐྱེད་དོ། །མིའི་སྡུག་བསྔལ་གཉིས་པ་སྡུག་བསྔལ་གྱི་སྡུག་བསྔལ་ནི། སྡུག་བསྔལ་སྔ་མ་མ་སངས་བཞིན་དུ་སྡུག་བསྔལ་ཕྱི་མས་ནོན་པ། དཔེར་ན་མཛེ་ནད་ན་བའི་ཐོག་ཏུ་ད་དུང་ཕོལ་བྱུང་བ། ཕོལ་ཐོག་ཏུ་རྨ་གཏུགས་པ། ཕ་ཤི་བའི་སྟེང་དུ་མ་ཤི་བ། དགྲས་དེད་པའི་སྟེང་དུ་མི་གཅེས་པ་ཤི་བ་ལྟ་བུ་སྟེ། འཁོར་བའི་གནས་འདི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་སྟེང་དུ་སྡུག་བསྔལ་བརྩེགས་པ་ཁོ་ནས་དུས་འདའ་བ་ལས་བདེ་བའི་གོ་སྐབས་སྐད་ཅིག་མ་ཙམ་ཡང་མེད་པ་ཡིན་ནོ། །མིའི་སྡུག་བསྔལ་གསུམ་པ་ཁྱབ་པ་འདུ་བྱེད་ཀྱི་སྡུག་བསྔལ་ནི། འོ་ཅག་འཁོར་བ་ལས་ཐར་མ་མྱོང་པས་བདེ་བ་དངོས་ཇི་ལྟར་ཡིན་རང་རེས་མི་ཤེས་པས་ལན་ནི་རེད་མ་གཏོགས་འཁོར་བའི་གནས་ན་བདེ་བ་གཏན་ནས་ཡོད་པ་མིན། དེས་ན་ད་ལྟ་རང་རེས་བདེ་བར་རློམ་པ་རྣམས་ཀྱང་དངོས་སུ་སྡུག་བསྔལ་ལྟར་མི་མངོན་ཀྱང་དོན་དུ་ལས་ཚད་བྱས་ཚད་བསགས་ཚད་ཐམས་ཅད་སྡུག་བསྔལ་གྱི་རྒྱུ་ཁོ་ན་ལས་མ་འདས་ཏེ། རྒྱུན་དུ་ཟས་ཟོས་པ་གོས་གྱོན་པ་གནས་ཁང་དང་ལོངས་སྤྱོད་རྒྱན་དང་སྟོན་མོ་ལ་སོགས་པ་ཐམས་ཅད་ཀྱང་དང་པོ་སྡིག་པའི་རྒྱུས་སྒྲུབ་པ། ད་ལྟ་བྱེད་བཞིན་པའི་བྱ་བྱེད་ཐམས་ཅད་ཀྱང་སྡིག་པའི་གསོག་སྐྲུན་བྱེད་པའི་གཡོ་བཀོལ་གྱི་ལས་ཐབས་འབའ་ཞིག་ལས་མི་འདུག་པས་ན། ལས་འདི་ཐམས་ཅད་ཀྱི་འབྲས་བུ་ནི་མཐར་སྡུག་བསྔལ་མྱོང་རྒྱུ་ཁོ་ན་ཡིན། གནའ་གི་དུས་རབས་དང་ས་ཆའི་ཡུལ་བབ་དང་བསྟུན་ནས་གསུངས་པ་དཔེར་ན་ཇ་དང་རྩམ་པ་ལྟ་བུ་ལ་མཚོན་ན། ཇ་ནི་རྒྱ་ཡུལ་དུ་བཏབ་པའི་ལྡུམ་བུ་ཡིན་ཏེ། མིས་འདེབས་དགོས་པས་ཇ་དེའི་ས་བོན་འདེབས་པ་དང་། སྐྱེས་ནས་ལོ་མ་འབྲེག་པ་སོགས་ཀྱི་དུས་སུ་ཞོར་དུ་སྲོག་ཆགས་ཕྲ་མོ་བསད་པ་ཡང་གྲངས་ཀྱིས་མི་ཆོད། དར་རྩེ་མདོ་མན་ཆད་གཡག་རྔ་ཡན་དུ་སྔོན་ཆད་འཁོར་ལམ་མེད་པས་དེའི་བར་ནས་མི་ཡི་ཁུར་རྡལ་བྱས་འོངས་སྐབས་རྒྱ་ཨ་ལས་ཇ་ཁུར་ཟེར་བའི་མི་རེ་རེས་ཀྱང་ཇ་ཁག་དྲུག་བཅུ་གཉིས་རེ་ཁུར་ཐག་ཐོད་པ་ལ་བཅིངས་ཏེ་ཁུར་ནས་འོང་། དེ་ཐམས་ཅད་ཀྱང་མགོ་ལ་བརྟེན་ནས་ཁུར་བས་དཔྲལ་བའི་པགས་པ་ཟད་དེ་རུས་པ་སྐྱ་སང་ངེ་མཐོངས་ཀྱང་ད་དུང་ཡང་ཁུར། དར་རྩེ་མདོ་ཐོག་ཡན་ཆད་དུ་བོད་རང་གི་མཛོ་གཡག་དྲེའུ་སོགས་ལ་བཀལ་ནས་འོངས་སྐབས། མཛོ་གཡག་སོགས་དེ་དག་ཐམས་ཅད་ཀྱང་སྒལ་བར་རྨ་རེད་ནས་རྒྱབ་ཆད་གློ་བུག་སྤུ་བྱི་བཀོལ་སྤྱོད་ཀྱི་སྡུག་བསྔལ་དམྱལ་གནས་སྐྱེས་པ་ལྟ་བུའི་བསམ་གྱིས་མི་ཁྱབ་པ་གཏད། དེ་ལྟ་བུའི་སྡིག་སྡུག་གིས་ཐོབ་པའི་ཇ་དེ་ཉོ་ཚོང་གི་དུས་ཀྱང་མནའ་དང་ཁྲེལ་ལ་མི་བརྩི་གཡོ་སྒྱུ་དང་རྩོད་པ་ཁོ་ནས་ཚོང་བྱས། ཇ་དང་བརྗེ་རྒྱུའི་ཚོང་ཟོང་ཡང་ཕལ་ཆེར་དེའི་དུས་འབྲོག་པ་རང་རང་གི་ས་གནས་ཀྱི་ཚོང་རྫས་ལུག་གི་བལ་དང་ཚ་རུ་ལ་སོགས་པ་ལ་བྱས་པ་ཡིན་ན། བལ་དེ་ཡང་དབྱར་ཁའི་དུས་ལུག་ཤིག་དང་ཞོ་སྐྱེས་སོགས་སྲོག་ཆགས་དང་སྤུ་ཉག་མང་ཉུང་མེད་པར་ཡོད་པ་ལ། དེ་དག་ལས་ཕལ་ཆེར་ནི་བལ་གྲིས་བལ་འབྲེག་པའི་དུས་སུ་དེ་དག་མགོ་བཅད་སྐེད་པ་རྡུམ། ནང་ཆ་ཕྱུང་སྟེ་བསད། མ་ཤི་བ་རྣམས་ཀྱང་བལ་དང་ལྷན་དུ་གཅུས་པས་དབུགས་འཐུམ་ལ་བཏང་ནས་ངན་བསད་ཁོ་ན་བྱས་པ་ཡིན། ཚ་རུ་ཡང་ལུ་གུ་འཕྲལ་དུ་སྐྱེས་པ་དེ་དབང་པོ་ཐམས་ཅད་ཡོངས་སུ་རྫོགས། བདེ་སྡུག་གི་ཚོར་བ་དང་ལྡན། ལུས་ཀྱང་ཉམས་བརྟས། གསོན་པའི་དང་པོ་སྤང་མེ་ཏོག་གི་ནང་ན་རྩེ་ཞིང་མ་དང་ལྷན་དུ་སྐྱིད་པར་ཡོད་པའི་དུས་སུ་འཕྲལ་དུ་མ་དང་ཁ་བྲལ་ནས་བསད་པ་ཡིན། རྨོངས་པ་དུད་འགྲོ་ཡིན་ཡང་འཆི་བ་ལ་ནི་འཚེར་སྣང་ཡོད་པ་དང་། གསོན་པ་ལ་ནི་དགའ་སྣང་ཡོད་པ་ཡིན་ཀྱང་། གཞན་དབང་དུ་གྱུར་ནས་དབང་མེད་དུ་གསོད་སྐབས་གནད་གཅོད་ཀྱི་སྡུག་བསྔལ་ནི་མྱོང་དགོས་ཐུག ཕྲུ་གུ་བསད་པའི་ལུག་གི་མ་རྒན་རྣམས་ཀྱང་སྡུག་བསྔལ་ནི་མིའི་བུ་གཅིག་པུ་ཤི་བའི་མ་ཇི་ལྟར་མཐོང་ཆོས་སུ་གྱུར་བ་དེ་ཡིན། དེ་ལྟ་བུའི་བལ་དང་ཚ་རུ་སོགས་སྡིག་པའི་རྒྱུ་རྩས་ཉོས་པ་སོགས་ལ་བསམས་ན་ཇ་ཁམ་གཅིག་ཙམ་བཏུང་ཡང་ངན་སོང་གི་རྒྱུ་བྱེད་པ་ལས་མི་འདུག་པས་འཐུང་མི་ཕོད་པ་ལྟ་བུ་ཡིན་རེད་གསུངས། བོད་ཀྱི་ཟ་མའི་གཙོ་བོ་རྩམ་པ་ལ་བརྩི་བ་དེ་ཡང་། དང་པོ་ནས་འདེབས་དུས་ཞིང་ལ་སློག་བརྒྱབ་པའི་གནས་སྐབས། ས་འོག་གི་འབུ་ཐམས་ཅད་ས་སྟེང་དུ་ཕྱུང་། ས་སྟེང་གི་འབུ་ཐམས་ཅད་ས་འོག་མནན། རྨོས་གླང་གར་སོང་གི་རྗེས་སུ་བྱ་རོག་དང་བྱེའུ་སོགས་འབུ་ཟན་གྱི་སྲོག་ཆགས་རྣམས་རྗེས་དེད་ནས་ཁ་དལ་ཁོམ་མེད་པར་འབུ་རྒུམ་གྱིན་འགྲོ་བ་དེ་ལྟ་བུའི་སྲོག་བཅད་པ་ཡིན། དེ་བཞིན་དུ་ཞིང་ལ་ཆུ་ཡུར་བ་ནས་འདྲེན་སྐབས། རླན་ལ་གནས་པའི་སྲོག་ཆགས་ཐམས་ཅད་སྐམ་ལ་བཀྲམ། སྐམ་ལ་གནས་པའི་སྲོག་ཆགས་ཐམས་ཅད་གཤེར་གྱིས་བསད་པ་སོགས་སྲོག་ཆགས་མང་པོའི་སྲོག་བཅད། དེ་བཞིན་དུ་དང་པོ་ས་བོན་འདེབས་པ་དང་། བར་དུ་ལོ་ཏོག་འབྲེག་པ་དང་། མཐར་བརྡུང་བ་སོགས་ཀྱི་དུས་ཞོར་དུ་བསད་པའང་གྲངས་ཀྱིས་མི་ཆོད། དེ་དག་ལ་བསམས་ན་འབུ་སྦྲང་ཁོ་ན་ཕྱེ་བྱས་པ་འགམ་པ་དང་འདྲ། དེ་བཞིན་དུ་མར་དང་འོ་མ་ཞོ་སོགས་ཀྱང་དཀར་གསུམ་དང་མངར་གསུམ་ཞེས་སྡིག་མེད་དང་གཙང་མ་བརྩི་ཡང་། མཛོ་མོའི་རྟོ་ལེ་དང་འབྲིའི་བེའུ་དང་ལུག་གི་ལུ་གུ་སོགས་ཕལ་ཆེ་བ་ནི་མུ་གེའམ་ལག་པས་བསད། མ་བསད་པ་རྣམས་ཀྱང་། སྐྱེས་མ་ཐག་ནས་མ་འོ་མངར་མོ་ཁམ་གང་ཡང་ནུ་ལོང་མེད་པར་རྐེ་ལ་ཐག་པ་བཞག་ནས། སྡོད་ན་གདང་ལ་བཏགས། འགྲོ་ན་ཕན་ཚུན་སྦྲེལ། བེའུ་ལུག་དེ་ཐམས་ཅད་ཀྱི་ཟས་སྐལ་དང་འཐུང་སྐལ་སྲོག་གི་ཟུངས་མ་ཡི་འོ་མ་ཁམ་གང་ཡོད་པ་དེ་ཡང་འཕྲོག་ནས་ཉིང་ཁུར་བྱས་ཏེ། མའི་ལུས་ཀྱི་བཅུད། བུའི་སྲོག་གི་ཟུངས་ཕྲོགས་པས་བེའུ་ལུག་དེ་དག་ཐམས་ཅད་མ་ཤི་མ་གསོན་ཙམ་དུ་གྱུར་ཏེ། མ་འབྲི་རྒོད་པོ་དག་ཀྱང་དཔྱིད་ཀའི་དུས་ཉལ་མལ་ནས་ལྡང་མི་ནུས་པ་ཙམ་དུ་ཟུངས་ཟད། བེའུ་ལུག་རྣམས་ཀྱང་ཕལ་ཆེར་ནི་མུ་གེ་ཁོ་ནས་ལྟོགས་གྲིར་འཆི། མ་ཤི་བ་རྣམས་ཀྱང་རྐེམ་སྐེམ་པ་ཉམ་ཆུང་བ། སྒྱིད་པས་སྒྱིད་པར་བརྡར་ནས་འགྲོས་གུམ་གུམ་པ་ཤི་ལ་ཁད་པ་ཡོག་ཐོད་ཙམ་རེ་ལས་མེད་པའི་བར་མནར་བར་བྱས་པ་དེ་ཡིན། དེ་བཞིན་དུ་ད་ལྟ་རང་རེས་སྐྱིད་པོར་བརྩི་བའི་མི་ཐམས་ཅད་ཁ་ལ་ཟ་རྒྱུའི་ཟས། རྒྱབ་ལ་གྱོན་རྒྱུའི་གོས། རྒྱན་དང་ཡོ་བྱད་ཁང་ཁྱིམ་ལ་སོགས་པ་རྒྱུ་ཟས་དང་ལོངས་སྤྱོད་ཐམས་ཅད་ཀྱི་འབྱུང་ཁུངས་སོགས་གང་ལ་བསམས་ཀྱང་སྲོག་གཅོད་དང་རྐུ་རྫུན་གཡོ་སྒྱུ་ལ་སོགས་སྡིག་པ་ཁོ་ནའི་ལོག་འཚོས་བསྒྲུབས་པ་ཞིག་མ་གཏོགས་མེད་པ་ཡིན་པས་ན། སྡིག་པའི་ལས་ལམ་འདི་ཐམས་ཅད་ཀྱི་འབྲས་བུ་མཐར་ནི་ངན་སོང་གི་སྡུག་བསྔལ་མུ་མཐའ་མེད་པ་ལ་སྤྱོད་དགོས་པ་ཡིན་པས། ད་ལྟ་འཕྲལ་སྣང་སྐྱིད་པོར་སྣང་བ་ཐམས་ཅད་ཀྱང་འདུ་བྱེད་ཀྱི་སྡུག་བསྔལ་ལས་མ་འདས་པ་ཡིན་ནོ། །སྐྱེ་རྒ་ན་འཆི་བཞི་ལས། དང་པོ་སྐྱེ་བའི་སྡུག་བསྔལ་ནི། འདི་ལྟར་འཛམ་བུ་གླིང་པའི་མི་རྣམས་ནི། སྤྱིར་སྐྱེ་བ་རྣམ་པ་བཞི་ལས་མངལ་ནས་སྐྱེ་བ་གཙོ་ཆེ་བ་ཡིན་པས། ཕ་མའི་ཁུ་ཁྲག་གི་རྒྱུ་རྐྱེན་གྱི་དབུས་སུ་དྲི་ཟ་ཉེ་བར་ལེན་པའི་བར་སྲིད་ཀྱི་རྣམ་ཤེས་ལས་ཀྱིས་འབྲེལ་བ་དེར་ཞུགས་ཏེ། ཞག་བདུན་ཕྲག་རེའི་མཚམས་ནས་མེར་མེར་དང་། ནུར་ནུར་དང་། ལྟར་ལྟར་དང་། མཁྲང་གྱུར་དང་། གོར་མོ་ལ་སོགས་ཇེ་ཆེ་ཇེ་ཆེར་འཕེལ་ནས་འགྱུར་བའི་གནས་སྐབས་ཀྱི་སྡུག་བསྔལ་གྱི་ཚོར་བ་རྣམས་ཉམས་སུ་མྱོང་། དེ་ནས་རིམ་གྱིས་རྐང་ལག་ལྟ་བུ་ཡན་ལག་དང་མཛུ་གུ་སོགས་ཉིང་ལག་དང་ཁ་མིག་རྣ་བ་སོགས་དབང་པོ་ཐམས་ཅད་རྫོགས་པའམ་ཚང་འོང་བའི་གནས་སྐབས་ན། མའི་མངལ་གྱི་ནང་དོག་ཅིང་དྲི་ང་བ་མུན་ནག་གི་ནང་། བཙོན་ཁང་དུ་ཚུད་པ་ལྟ་བུའི་སྡུག་བསྔལ་མྱོང་། མས་ཁ་ཟས་ཚ་མོ་ཟོས་པས་མེ་ནང་དུ་བསྲེགས་པ་ལྟ་བུའི་ཚ་བའི་སྡུག་བསྔལ། ཡང་མ་ཡིས་གྲང་མོ་ཟོས་པས་ཆུ་གྲང་དུ་བསྐྱུར་བ་ལྟ་བུའི་གྲང་བའི་སྡུག་བསྔལ་མྱོང་། མ་ཉལ་བ་ན་རིས་ནོན་པ་ལྟ་བུའི་སྡུག་བསྔལ། མ་ལྟོ་བ་འགྲངས་ཆེ་པ་ན་བྲག་གི་བར་དུ་བཅར་པ་ལྟ་བུའི་སྡུག་བསྔལ། མ་བཀྲེས་པ་ན་གཡང་ལ་ལྷུང་བ་ལྟ་བུའི་སྡུག་བསྔལ། འགྲོ་འདུག་གི་བསྒུལ་བསྐྱོད་བྱས་པ་ན་རླུང་གིས་ཁྱེར་བ་ལྟ་བུའི་སྡུག་བསྔལ་དཔག་ཏུ་མེད་པ་དེ་ལ་སོགས་པ་ཡོད་པ་ཡིན། དེ་ནས་ཟླ་བའི་གྲངས་རྫོགས་ནས། བཙའ་བའི་དུས་སུ་སྲིད་པ་ལས་ཀྱི་རླུང་གིས་མགོ་མཇུག་བསྒྱུར་ཏེ། བཙའ་སྒོར་དྲངས་པ་ན་གྱད་སྟོབས་པོ་ཆེ་ཞིག་གིས་རྐང་པ་ནས་བཟུང་སྟེ་རྩིག་ངོར་བརྒྱབ་པ་ལྟ་བུའི་སྡུག་བསྔལ་ཡོད། རུས་པའི་འཁྲུལ་འཁོར་གྱི་བར་ནས་འབྱུང་བའི་ཚེ། ལྕགས་ཀྱི་འཇུར་མིག་ནས་དྲངས་པ་ལྟ་བུའི་སྡུག་བསྔལ་ཡོད། བཙའ་སྒོ་དོགས་པ་རྣམས་བཙའ་མི་ནུས་པར་དེ་ཉིད་དུ་འཆི་བའམ། ཡང་ན་མ་བུ་གཉིས་ཀ་འཆི་བ་དང་། མིན་ཡང་ཤི་ལ་ཐུག་པའི་སྡུག་བསྔལ་མྱོང་སྟེ། ཨོ་རྒྱན་ཆེན་པོས། མ་བུ་གཉིས་ཀ་གཤིན་ཡུལ་གོམ་ཕྱེད་བོར། །མ་ཡི་ཁ་རུས་མ་གཏོགས་རུས་ཚིགས་བྱེ། །ཞེས་གསུངས་པ་ལྟར་ཡིན། བཙས་ནས་ཀྱང་སྟན་གྱི་སྟེང་དུ་ལྷུང་དུས་ཚེར་མའི་དོང་དུ་ལྷུང་བ་ལྟ་བུའི་ན་ཚ་ཟུག་རྔུ་མྱོང་བའི་སྡུག་བསྔལ། རྒྱབ་ཀྱི་ཕྲུ་མ་བཤུ་དུས་གསོན་པོར་པགས་པ་བཤུས་པ་ལྟ་བུ། མི་གཙང་བ་བྱི་དོར་བྱས་དུས་ཚེར་མའི་ལྕག་གིས་བྲབས་པ་ལྟ་བུ། མའི་པང་དུ་བླངས་དུས་བྱེའུ་ཕྲུག་ཁྲས་ཁྱེར་བ་ལྟ་བུའི་སྐྲག་སྔངས་ཀྱི་སྡུག་བསྔལ་ཡོད། སྤྱི་བོར་མར་བྱུག་དུས་བཀྱིགས་ནས་དོང་དུ་འཕང་བ་ལྟ་བུ་ལ་སོགས་པའི་སྡུག་བསྔལ་མྱོང་། དེ་ནས་བྱིས་པ་བསམ་མེད་ཙོག་པུར་བསྙལ་ཏེ་འཇོག་པའི་དུས་སུ། མི་གཙང་བའི་འདམ་དུ་ཚུད། ལྟོག་སྐོམ་ན་ཚ་ལ་སོགས་པའི་སྡུག་བསྔལ་ཅི་ལྟ་བུ་བྱུང་ཡང་ངུ་བ་ཁོ་ན་ལས་ཁ་གྲག་མི་ཤེས་པས་ཐབས་གཞན་མེད། དེ་ལྟར་སྐྱེས་ནས་དར་ལ་བབས་ཏེ་ལང་ཚོ་སྨིན་པའི་ཚེ་ན་མ་བརྟགས་མ་དཔྱད་པའི་ངོར་རེ་ཞིག་འཕེལ་བ་ལྟར་སྣང་ཡང་། དོན་དུ་བྱིས་པ་ཡིན་ཡང་ཚེ་ནི་སྐྱེས་པའི་ནུབ་མོ་ནས་ཉིན་རེ་བཞིན་ཟད་ཅིང་འཆི་བ་ལ་ཐག་ཇེ་ཉེར་འགྲོ་བ་ཡིན་ཏེ། དེ་ཡང་མི་ཆེར་སྐྱེས་ནས་འཇིག་རྟེན་ཚེ་འདིའི་བྱ་གཞག་གྲུབ་པ་དང་ཟིན་པའི་དུས་མེད་པ་དཔེར་ན་ཆུའི་གཉེར་མ་ལྟ་བུ་གཅིག་རྗེས་སུ་གཅིག་འབྱུང་བ་ལ་དལ་མེད་དུ་སྤྱོད་དེ། འཇིག་རྟེན་གྱི་བྱ་གཞག་དེ་དག་ཐམས་ཅད་ཀྱང་སྡིག་པ་འབའ་ཞིག་དང་འབྲེལ་བས་ངན་སོང་གི་རྒྱུ་བྱེད་པ་ཡིན་པས་གནས་སྐབས་དང་མཐར་ཐུག་ཀུན་ཏུ་ཤིན་ཏུ་སྡུག་བསྔལ་ལོ། །དེ་ནས་གཉིས་པ་རྒས་པའི་སྡུག་བསྔལ་ནི། དེ་ལྟར་བྱིས་པ་ནས་གཞོན་པ། གཞོན་པ་ནས་དར་མ། དར་མ་ནས་ན་ཚོད་ཡོལ་གྱི་བར་དུ་འཁོར་བའི་བྱ་གཞག་སྙིང་པོ་མེད་ཅིང་འགྲུབ་པའི་དུས་དང་ཟིན་པའི་དུས་མེད་པ་ལ་སྤྱོད་པའི་ངང་དུ་མ་ཚོར་བཞིན་དུ་རྒས་པའི་སྡུག་བསྔལ་གྱིས་གཏུགས། ལུས་ཀྱི་སྟོབས་ཐམས་ཅད་རིམ་གྱིས་འབྱུང་བ་རྣམས་རང་ཤུགས་ཀྱིས་རྒུད་ནས་ཉམས་འགྲོ་བ་ཡིན། ཁ་ཟས་ཉུང་ན་ལྟོགས་མང་ན་ཞིམ་པོར་ཟོས་པའི་ཁ་ཟས་ཐམས་ཅད་ཀྱང་མི་འཇུ་བར་ནད་དུ་འགྱུར། མིག་གི་དབང་པོ་ཉམས་པས་ཐག་རིང་རྒྱང་མྱིག་དང་ཕྲ་ཞིང་ཆུང་བའི་གཟུགས་མི་མཐོང་། རྣ་བའི་དབང་པོ་ཉམས་པས་གཞན་གྱིས་བཤད་པའི་སྒྲ་སྐད་རྣམས་ཇི་བཞིན་པ་མི་ཐོས་ཏེ་འོན་པས་ཅི་གོ་སྒྲ་ལོག་ཟེར་བ་ལྟར་ཡིན། ལྕེའི་དབང་པོ་ཉམས་པས་བཟའ་བཏུང་ཟོས་ན་གང་གི་རོ་མི་ཚོར་ཞིང་སྐད་ཆ་བཤད་ན་སྨྲ་བ་ངག་གི་སྡེབ་མི་ཐོན། ཡིད་ཀྱི་དབང་པོ་ཉམས་པས་བློ་རིག་རྒུད་ནས་དྲན་པ་རྨོངས་ཤིང་བརྗེད་ངས་དང་བྱིང་འཐིབ་ཆེ། ཁའི་གྲལ་འགྲིག་པའི་སོ་ཕྲེང་ཡང་ལྷུངས་པས་སྲ་བའི་ཟས་མི་ཆོམས་ཤིང་ཚིག་ལྡབ་ལྡིབ་ཏུ་སྨྲ། ལུས་ཀྱི་དྲོད་ཀྱང་ཤོར་བས་གོས་སྲབ་ན་མི་དྲོས་ཤིང་རྐང་ལག་སོགས་ལ་ནད་ཀྱིས་བཟུང་། འདེགས་བྱེད་ཀྱི་སྟོབས་ཉམས་པས་ལྗི་ན་མི་ཐེག འདོད་པའི་ལོངས་སྤྱོད་ལ་སྔར་ལྟར་དགའ་ཡང་སྤྱོད་པའི་མཐུ་མེད་པས་གནའ་ལུས་དང་ད་སེམས་གཉི་ག་མི་འཕྲོད། ལུས་ཀྱི་རྩ་རླུང་ཐམས་ཅད་རྒུད་པས་བློ་སྲབ་ཅིང་སེམས་ཁོག་རྒྱ་ཇེ་ཆུང་དུ་སོང་ནས་བཟོད་སྲན་ཆུང་། མི་ཆེ་ཆུང་ཀུན་ཀྱིས་མཐོང་མི་འདོད་ཅིང་བརྙས་བཅོས་བྱེད་དེ། མྱི་རྒན་རྟ་རྒན་ཁྱི་རྒན་གསུམ། །ལས་བྱས་པ་མེད་དེ་ཀུན་ཀྱིས་བརྙས། །ཟེར་སའི་ཐོག་ཐོན་འོང་དུས་རྒས་པ་དེ་ཡི་མུག་དང་སྡུག་བསྔལ་ཆེ། ལུས་ཀྱི་འབྱུང་བ་འཁྲུགས་པས་ནད་དང་གདོན་དང་ཡེ་འདྲོག་སོགས་གནོད་པ་མང་། འགྲོ་འདུག་དང་བསྒུལ་བསྐྱོད་ཐམས་ཅད་ཀྱང་སེམས་ཀྱིས་བསམ་པ་ལྟར་ལུས་ཀྱིས་མི་ནུས་བཞིན་དུ་མ་ཤི་བར་དུ་ལུས་སེམས་དཀའ་བའི་ངང་ནས་བྱེད་དགོས་པ་ཡིན་ཏེ། རྗེ་མི་ལས། ཡར་ལངས་དུས་རྐང་ལག་གི་ཤུགས་ཟད་པས་ལུས་མི་ཐེག་ནས་ལྗིད་རྐང་ལག་བཞི་ག་ལ་བརྟེན་པས་རྟ་རྟོད་བྱེད་ཀྱི་བརྟོད་ཕུར་ས་ནས་འདོན་པ་ལྟར་ལངས་དགོས་པའི་ལྡངས་ལུགས་དང་གཅིག འགྲོ་དུས་རྒུར་རྒུར་བྱས་ནས་བྱིས་པ་བྱ་ལ་འཇབ་པའི་འགྲོ་ལུགས་དང་གཉིས། མར་འདུག་དུས་ས་དོ་ལུང་ཆད་པ་ལྟ་བུའི་སྡོད་ལུགས་དང་གསུམ། གསུམ་འདི་གསུམ་འཛོམ་པའི་དུས་ཚོད་ན། ཨ་ཕྱི་སྒྱུ་ལུས་རྒུད་པའི་ཡིད་ཕམ་མ། ཕྱི་པགས་པ་ཚག་དམ་པོ་མ་ཡིན་ལྷོད་ནས་འདུས་པའི་གཉེར་མ་དང་གཅིག ནང་ཤ་ཁྲག་གི་ཟུངས་ཟད་པའི་དབང་གིས་ལུས་ཀྱི་ཕྱི་རུ་འབུར་ས་ལ་འབུར་གོབ་ས་ལ་གོབ་སོང་བ་དང་གཉིས། སྔར་དང་མི་འདྲ་བར་དབང་པོའི་སྟོབས་ཤོར་ཏེ་བར་གླེན་ལྐུགས་འོན་ལོང་ཐོམ་ཡོར་བཅོས་རྨུགས་འཐུམ་གསུམ་འཛོམས་པ་དང་གསུམ། གསུམ་འདི་གསུམ་འཛོམ་པའི་དུས་ཚོད་ན། ཨ་ཕྱི་མཐོང་ན་མི་སྡུག་སྟོན་པའི་ཁྲོ་གཉེར་ཅན། གོས་ལྕི་ལ་ཧྲུལ་བའི་དུགས་པོ་འཐུག་པོ་དང་གཅིག གང་འཐུང་གང་ཟོས་ཀྱང་གྲང་ལ་ཉོག་པའི་བཟའ་བཏུང་དང་གཉིས། པགས་པོ་བཞི་སྦྱོར་གྱི་མལ་ས་དང་གསུམ། །གསུམ་འདི་གསུམ་འཛོམ་པའི་དུས་ཚོད་ན། །ཨ་ཕྱི་མིས་འགོམ་ཁྱིས་འགོམ་གྱི་རྟོགས་ལྡན་མ། །ཞེས་གསུངས་པ་ལྟར། ལྡངས་བསམ་པའི་ཚེ་རང་བཞིན་གྱིས་འཕྲལ་དུ་ལྡང་མི་ནུས་པར་ལག་པ་གཉིས་ཀ་ས་ལ་བཙུགས་ནས་ས་སྲ་བ་ལས་བརྟོད་ཕུར་འདོན་པ་ལྟར་ལྡངས། འགྲོ་བའི་ཚེ་རྐེད་པ་སྒུར་བས་མགོ་བོ་བཏེག་མི་ནུས་ཤིང་རྐང་པ་གཉིས་ཀྱིས་གོམ་པའི་འདེགས་འཇོག་ཀྱང་མྱུར་དུ་བྱེད་མི་ནུས་པར་དལ་བུས་བྱིས་པ་བྱ་ལ་འཇབས་པ་ལྟར་འགྲོ། སྡོད་པའི་ཚེ་པུས་མོ་སོགས་རྐང་ལག་གི་ལྷུ་ཚིགས་ཐམས་ཅད་ན་བས་དལ་བུས་སྡོད་མི་ནུས་པར་ལུས་ཀྱི་ལྗིད་ཕབ་སྟེ་ས་དོ་ལུང་ཆད་པ་བཞིན་ལྷུངས་ནས་སྡོད། ལུས་ཀྱི་ཤ་ནང་ནས་ཟད་པས་པགས་པའི་སྐྱི་ཕྱི་ནས་འདུས་ཏེ་ལུས་དང་ཁ་ངོ་ཐམས་ཅད་གཉེར་མས་གང་ནས། ནང་གི་ཤ་ཁྲག་རྒུད་དེ་མར་ལ་བྲི་བས་རུས་པའི་ཚིགས་ཐམས་ཅད་མངོན་ཏེ་འགྲམ་རུས་དང་ལྷུ་མགོ་ཐམས་ཅད་ཕྱི་ལ་འབུར། ཡིད་ཀྱི་དྲན་པ་ཉམས་པས་གླེན་ལྐུགས་དང་འོན་ལོང་ཅན་དུ་གྱུར་ནས་སེམས་ཀྱི་རྣམ་རིག་མི་གསལ་ཞིང་ཐོམ་ཡོར་རེ་སྡོད། ལུས་ཀྱི་སྟོབས་ཉམས་ཤིང་མཛེས་འདོད་ཀྱི་གནས་སྐབས་ཉམས་པས་གོས་ཐམས་ཅད་ལྕི་ལ་ཧྲུལ། ཟས་སྐོམ་གྱི་ལྷག་ཞབས་ཏེ་ལྷག་འཕྲོ་ལ་སྤྱོད་ཅིང་ལྕེའི་རོ་ཞིམ་པ་མི་ཚོར་བས་ཟས་ཐམས་ཅད་གྲང་ལ་ཉོག ལུས་ལྕི་བས་གང་ལྟར་བྱས་ནས་བསྡད་ཀྱང་ཉལ་ན་ཉལ་མི་བདེ་ལངས་ན་ལངས་མི་བདེ་བས་ཕྱོགས་བཞིར་རྟེན་པར་བྱས་ཤིང་དུས་རྒྱུན་དུ་མལ་ནས་ལྡང་མི་ནུས། དེའི་ཚེ་ཕྱིའི་སྒྱུ་ལུས་རྒུད་པས་ནང་དུ་ཡིད་ཕམ་ཞིང་སེམས་ཆུང་བས་སྡུག་བསྔལ་ཤིན་ཏུ་ཆེ། བཞིན་རས་སྔར་གྱི་མཛེས་མདངས་དང་བརྗིད་བཀྲག་ཉམས་ནས་པགས་པའི་གཉེར་མ་མང་པས་བཞིན་མི་སྡུག་པའི་ཁྲོ་གཉེར་སྟོན། དེ་དུས་མི་ཀུན་ཀྱིས་བརྙས་བཅོས་བྱེད་ཅིང་མགོ་ཐོག་ཏུ་འགོམ་ནས་སོང་ཡང་ལྡང་མི་ནུས་པས་གཙང་བཙོག་མེད་པར་རྟོགས་ལྡན་ལྟར་སྡོད་པ་སོགས་ཡིན་ཞིང་། རྒས་པའི་སྡུག་བསྔལ་མི་བཟོད་པར་འཆི་བར་སྨོན་ཡང་། དོན་དུ་འཆི་བ་ལ་ཉེ་བས་ཤིན་ཏུ་སྐྲག་པ་སོགས་རྒས་པའི་ལུས་སེམས་གཉིས་ཀྱི་སྡུག་བསྔལ་ངན་སོང་གི་འགྲོ་བ་དང་འདྲ་བར་མྱོང་བ་ཡིན་ནོ། །ན་བའི་སྡུག་བསྔལ་ནི། ལུས་འདི་ཉིད་འབྱུང་བཞི་འདུས་པའི་བདག་ཉིད་ཅན་ཡིན་པས། འབྱུང་བ་དེ་དག་ཕན་ཚུན་ཆ་མ་མཉམ་པ་ལས་རླུང་དང་མཁྲིས་པ་དང་བད་ཀན་དང་འདུས་པ་ལ་སོགས་པའི་ནད་རིགས་སྣ་ཚོགས་པ་བཞི་བརྒྱ་རྩ་བཞིའི་ནང་ནས་གང་དང་གང་གིས་གཟིར་བའི་སྡུག་བསྔལ་གྱི་ཚོར་བ་འཆར། ལུས་དང་དབང་པོ་ཐམས་ཅད་དར་ལ་བབས་ཏེ་སྟོབས་དང་གཟི་མདངས་རྒྱས་པའི་མི་རྒོད་དར་མ་ཇི་ལྟ་བུ་ཞིག་ཡིན་ཡང་ན་བའི་ཟུག་གཟེར་ཚབས་ཆེན་གྱིས་གློ་བུར་དུ་བཏབ་མ་ཐག་ནས་བྱེའུ་ལ་རྡོ་ཕོག་པ་བཞིན་ཕོ་རྒོད་པོ་གཉའ་ལག་བཀུག་ནས་ལུས་སྟོབས་དང་མདངས་ཤོར། འབྱུང་བ་རང་དགྲ་རང་གིས་བྱས་ནས་མལ་གྱི་གཏིང་དུ་ལྷུངས་ཏེ། ཐ་ན་ལུས་བསྒུལ་བསྐྱོད་ཙམ་བྱེད་པ་ཡང་དཀའ། ཁྱོད་ཅི་ན་ཞེས་དྲིས་པའི་ལན་ཙམ་ཡང་མྱུར་དུ་བཤད་པའི་ནུས་པ་མེད་པར་ཁོག་པའི་གཏིང་ནས་སྐད་མི་ཐོནབཞིན་དུ་སྨྲ། གཡས་གཡོན་མདུན་རྒྱབ་གང་དུ་ཉལ་ཡང་བདེ་བའི་དུས་མེད། ཟས་སྐོམ་གྱི་ཞེན་པ་དང་བྲལ་ནས་ཡི་ག་ཆད། མཚན་མོ་གཉིད་མི་འོང་། ཉིན་པར་ཉིན་རིང་། མཚན་མོ་མཚན་རིང་། སྨན་གྱི་རོ་ཁ་ཚ་སྐྱུར་གསུམ་དང་། གཏར་སྲེག་གི་སྡུག་བསྔལ་ལ་སོགས་མི་འདོད་བཞིན་དུ་མ་ཤི་གསོན་དུ་རེ་ནས་དེ་ལྟ་བུ་ལ་སྤྱོད་དགོས། ན་བ་ལ་བརྟེན་ནས་མཐའ་འཆི་བ་ཡང་གློ་བུར་དུ་འོང་སྙམ་ནས་འཇིགས་ཤིང་སྐྲག འདྲེ་གདོན་དང་བགེགས་རིགས་དང་རྒྱབ་བརྟེན་གྱི་སྲུང་མ་ངན་པའི་དབང་གིས་ལུས་སེམས་ལ་རང་དབང་མི་འདུས། འཁྲུལ་སྣང་ལས་ཀྱང་འཁྲུལ་སྣང་ཁོ་ན་ལ་སྤྱོད། ནད་པ་སྡུག་ཅན་འགས་མཚོན་ལ་སོགས་པས་རང་གིས་རང་གསོད་པ་དང་། གཡང་ལ་ལྕེབ་པ་སོགས་ཀྱང་བྱེད་པ་ཡོད་རེད། མཛེ་ནད་དང་གཟའ་གྲིབ་ལ་སོགས་པས་ཉེན་ན། གསོན་པ་ཉིད་ནས་ཤི་བ་དང་འདྲ་བ། མ་ཤི་གོང་ནས་ནད་ངན་འགོས་དོགས་ཀྱིས་མིའི་ཁྱུ་ནས་བུད། རང་ངོ་རང་གིས་མཐོང་། སྤྱིར་ནད་པ་ཐམས་ཅད་ལུས་སྟོབས་ནད་ཀྱིས་བཅོམ་པས་རང་གཡོག་རང་གིས་མི་ནུས། ནད་ཀྱིས་གདུང་ཡུན་རིང་ནས་ནད་ཚིག་ཟོས་པས་གཞན་གྱིས་བྱ་བ་གང་བྱེད་ཀྱང་ཐམས་ཅད་མིག་སྔར་མི་འབབས། མ་ན་བའི་སྐབས་དང་མི་འདྲ་བ་རྒྱུད་སྔར་ལས་གྱོང་། ལོ་ནད་ཟླ་འཁོར་སོང་སྟེ་ནད་ཡུན་རིང་དྲག་ན། ནད་གཡོག་བྱེད་པ་ཡང་སུན་ནས་ནད་པས་ཟེར་ཚད་ཇི་བཞིན་མི་ཉན་ཅིང་དྲུང་དུ་མི་འདུག དུས་རྟག་ཏུ་ན་བའི་ཚོར་བས་ཉེན་ནས་སྡུག་བསྔལ་བའོ། །འཆི་བའི་སྡུག་བསྔལ་ནི། དེ་ལྟར་ཡུན་རིང་ན་བས་ལུས་མལ་དུ་ལྷུང་ནས་ལྡང་མི་ཤེས། ཟས་སྐོམ་མཐོང་ཡང་ཡི་གར་མི་འོང་། འཆི་བའི་ཉེན་ཁ་མདུན་དུ་གནས་པའི་ཚོར་བས་གདུངས་པས་སྙིང་མི་དགའ། སྔར་མ་ན་བའི་སྐབས་ཀྱི་ཕོ་ཚོད་དང་སྙེམས་པའི་དཔའ་གདེང་ཤོར། འཁྲུལ་སྣང་གི་སུན་མ་སྔོན་མས་ཟུར་དུ་བཅར་ནས་གཏུགས། སྤྱིར་ན་རུ་ཁྱིམ་སྤོ་བ་ལ་སྐྱས་འདེགས་པ་ཟེར་ཡང་འདིར་སྐྱས་ཆེན་པོ་འདེགས་པ་ཞེས་པས་ཕྱི་མའི་ཡུལ་ལ་འགྲོ་བའི་དུས་ལ་ཐུག་ཚར་བ་ལ་གསུངས་ཀྱིན་ཡོད་པས། ཁྱིམ་ཕ་མ་པང་བུ་རྒྱུད་གཉེན་ཉེ་རིང་སོགས་གཉེན་བཤེས་ཀུན་ཀྱིས་མཐའ་བསྐོར་ཀྱང་ཆུ་ཚོད་སྐར་མ་ཙམ་ཡང་འགྲོ་མི་དགོས་པའི་བཤོལ་ནི་མི་ཐེབས། ཤི་ཁའི་གནད་གཅོད་ཀྱི་སྡུག་བསྔལ་ནི་རང་གཅིག་པོས་མྱོང་། རྒྱུ་ཟས་ལོངས་སྤྱོད་དཔག་ཏུ་མེད་པ་འཛམ་གླིང་གི་རྒྱུ་ནོར་མི་གཅིག་ལ་ཡོད་ཀྱང་དེ་དུས་ཏིལ་འབྲུ་ཙམ་ཡང་ཁྱེར་དབང་ནི་མེད། སྐྱུར་བར་བློས་ནི་མི་ཐོང་། རྗེས་སུ་ནི་མི་འབྲང་། སྔར་བྱས་ཀྱི་སྡིག་པ་དྲན་པས་ད་རྗེས་ནས་འགྱོད་པ་སྐྱེ། ཕྱི་མ་ངན་སོང་གི་སྡུག་བསྔལ་དྲན་ནས་འཇིགས་ཤིང་སྐྲག ཡུན་རིང་སྡོད་པའི་གྲབས་བྱེད་ཀྱང་འཆི་བ་གློ་བུར་དུ་སླེབ་པས་ཉམ་ང་། གསོན་པོའི་སྣང་བ་ད་ལྟ་ནུབ་པས་བག་གྲང་། མི་སྡིག་པ་ཅན་འཆི་བ་ན་འཆི་ཁར་བྲང་ལག་འཐབ་ཅིང་བྲང་སེན་རྗེས་ཀྱིས་བཀང་ནས་འཆི་སྟེ། སྔར་སྡིག་པ་བྱས་པའི་ལས་རྣམས་དྲན་ཏེ་འབྲས་བུ་ངན་སོང་དུ་སྐྱེ་བའི་སྡུག་བསྔལ་ལ་འཇིགས་ཤིང་སྐྲག་ནས་རང་ལ་རང་དབང་ཡོད་པའི་དུས་སུ་འཆི་ཁ་ཕན་པའི་ཆོས་ཤིག་ད་སྔར་མ་བསྒྲུབས་སྙམ་དུ་འགྱོད་ནས་སྙིང་ལ་ཟུག་གཟེར་སྐྱེས་ཏེ། བྲང་ལ་ལག་པའི་སྤར་མོས་འཐབ་ཅིང་བྲང་སེན་རྗེས་ཀྱིས་བཀང་ནས་འཆི་བ་ཡིན་ཏེ། ཇི་སྐད་དུ། མི་སྡིག་ཅན་འཆི་བ་མཐོང་ཙ་ན། །ལས་རྒྱུ་འབྲས་སྟོན་པའི་སློབ་དཔོན་ཡིན། །ཞེས་གསུངས། དེ་ལྟ་བུ་སྡིག་ཅན་དེ་དག་མ་ཤི་བའི་གོང་ནས་ངན་སོང་གི་སུན་མའམ་སྣང་བས་སླེབ་སྟེ། སྣང་བ་གང་བྱུང་ཐམས་ཅད་འཇིགས་སྐྲག་ཅན་དང་། ཚོར་བ་གང་བྱུང་ཐམས་ཅད་སྡུག་བསྔལ་ཅན་དུ་སྐྱེས། ལུས་ཀྱི་འབྱུང་བ་མཐའ་ནས་ཚུར་སྡུད། གཅིག་ཐོག་གཅིག་བརྩེགས་ལྟ་བུའི་དབུགས་ནི་ངར། ལག་པ་སོགས་ཡན་ལག་ནི་གཡོབ། འདུ་ཤེས་དང་སྣང་བ་ཐམས་ཅད་འཁྲུལ་བའམ་སེམས་རང་ཐོག་མེད། མིག་སྐྱ་ལོག་གེ་ཚེ་ཕ་རོལ་དུ་འཇིག་རྟེན་ཕྱི་མའི་ལམ་ལ་འགྲོ། གཤིན་རྗེའི་སུན་མས་སླེབ། བར་དོའི་སྣང་བ་རྣམས་རིམ་བཞིན་དུ་ཤར། དེའི་སྐབས་སུ་མགོན་དང་སྐྱབས་སུ་གྱུར་བ་ནི་སུ་ཡང་མེད། རང་གི་གཅེས་པའི་སྒྱུ་ལུས་ཤ་ཁྲག་ཀྱང་ཤུལ་དུ་བཞག་ནས་གཅེར་བུ་ལག་སྟོང་དུ་འགྲོ་བའི་དུས་དེ་དེ་རིང་གི་ཉི་མ་ཙམ་ལའང་རང་ཐོག་མི་འོང་བའི་གདེང་མེད་པར་ཤེས་དགོས། འཆི་བ་ཞེས་བྱ་བ་ཐོག་ཏུ་བབས་པ་དེའི་དུས་སུ་ཕན་ངེས་པ་ནི་དམ་པའི་ཆོས་ཁོ་ན་ལས་སུ་ཡང་སྐྱབས་སུ་འགྱུར་བ་མེད་པས་ན། ཇི་སྐད་དུ། ཆོས་སེམས་ཨ་མའི་མངལ་ནས་སྐྱེས། །སྐྱེས་མ་ཐག་ཏུ་འཆི་ཆོས་དྲན། །ཞེས་གསུངས་པ་ལྟར། རྒས་གཞོན་ལ་མ་ལྟོས་པའི་སེམས་ཅན་ཀུན་ལ་འཆི་བ་གློ་བུར་དུ་འོང་བ་ཡིན་པས་ན་སྐྱེས་པ་ཙམ་ནས་འཆི་ཆོས་སྒྲུབ་ཐུབ་ན་ཡང་སྔ་ཆེ་མེད་པས་འཆི་ཁར་ཕན་པའི་ཆོས་ཐོག་མ་ནས་བསྒྲུབ་དགོས་པ་ཡིན་པ་ལ། ད་ལྟ་ནས་མ་བསྒྲུབས་ན་འགག་ལ་ཐུག་དུས་འགྲུབ་དཀའ་ནི་རེད། དེས་ན་ལོ་ཆེ་ཆུང་ལ་མ་ལྟོས་པར་འཆི་སུ་སྔ་སུས་ཤེས། གཅོང་ཆེན་གཅིག་གི་ཚེ་ནད་མེད་བརྒྱ་ཤི་ཟེར་བའི་དཔེ་ལྟར། ད་ལྟ་ང་རང་ཚོས་མཐོང་ས་དང་གོ་ས་ཡུལ་ལུང་འདི་ནས་ཟླ་བ་སྔ་མའི་ནང་སུ་ཤི་དང་ཟླ་བ་འདིའི་ནང་སུ་ཤི་སོང་ལོས་ཤེས། རང་རོགས་ཐམས་ཅད་ཀྱང་སང་ཕོད་ད་ཚོད་ཅི་རེད་ཡོད་བསམ་བློ་བཏང་ན་ཤེས་རྒྱུ་ཞིག་ཡོད། ད་ལྟ་ཕན་ཆད་འཆི་བ་མ་དྲན་པས་དགྲ་འདུལ་ལུགས་དང་གཉེན་སྐྱོང་ལུགས་ཁྱིམ་གནས་མལ་དང་རྒྱུ་ནོར་གསོག་སྐྲུན་ཟང་ཟིང་གི་བྱ་བ་ལ་ཕྱི་ཚིས་ཀྱི་གྲབས་ཤོམས་བྱེད། ཉེ་དུ་དང་འབྲེལ་ཅན་ལ་སོགས་པའི་དོན་དུ་གཉེན་ལ་ཆགས་པ་དང་དགྲ་ལ་སྡང་བ་དང་གཉིས་མཉམ་གྱི་རྨོངས་པ་གསུམ་གྱིས་དུས་འདའ་བ་འདི་རང་གིས་རང་ལ་བལྟས་ན་མཚང་རེ་ཆེ་སྙམ་དུ་བསམ་མོ། །དེ་བཞིན་དུ་དགྲ་སྡང་བ་དང་འཕྲད་ནས་རྐུ་འཕྲོག་བཅོམ་གསུམ་སོགས་ཀྱིས་དོགས་ཏེ། ཉིན་གྱི་བྱ་ར་མཚན་གྱི་མེལ་ཚེ་རྒྱུན་གྱི་འཚོ་སྐྱོང་སོགས་བྲེལ་དོ་ཁོ་ནའི་ངང་དུ་ཉིན་མཚན་གྱི་དུས་འདའ་ཡང་། ཕན་པ་མེད་པ་ཡིད་དུ་མི་འོང་བའི་རྐྱེན་དང་འཕྲད་ནས། ལོངས་སྤྱོད་དང་འབྱོར་པ་བསགས་ཚད་ཐམས་ཅད་ཀྱང་མཐར་དགྲ་དང་ཐུན་མོང་དུ་འགྱུར། ཕྱུག་པོའི་རྟ་ཟོག་སོགས་ལ་མཚོན་ན་ཉིན་གྱི་ཇག་པས་བཅོམ་དོགས། མཚན་གྱི་རྐུན་མས་རྐུ་དོགས། འཕར་སྤྱང་དང་གཅན་གཟན་ལ་སོགས་པས་གསོད་དོགས་སོགས། དགྲ་དེ་དག་གློ་བུར་གློ་བུར་དུ་འོངས་ནས་འཚེ་བར་བགྱིད་པ་ཡིན་པ་རེད་དེ། སྤྱིར་ལོངས་སྤྱོད་དང་འབྱོར་པ་ནི་ཅི་ཙམ་ཡོད་པ་དེ་ཙམ་དུ་དེ་ཐོག་མར་སྦྲང་མས་སྦྲང་རྩི་བཞིན་བསགས་པ་དང་། བར་དུ་ཆུད་ཟ་དོགས་ཀྱིས་བསྲུང་བ་དང་། མཐའ་མ་ཇེ་མང་དུ་སྤེལ་བ་སོགས་སྡུག་བསྔལ་མཐའ་ཡས་པའི་རང་བཞིན་ཡིན་ཏེ། མགོན་པོ་གླུ་སྒྲུབ་ཀྱིས། བསགས་དང་བསྲུང་དང་སྤེལ་བས་ཉམ་ཐག་པས། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། །ཞེས་དང་། རྗེ་མི་ལས་ཀྱང་། ནོར་དང་པོ་བདག་སྐྱིད་གཞན་སྨོན་པོ། །ཅི་ཙམ་ཡོད་ཀྱང་ཆོག་ཤེས་མེད། །བར་དུ་སེར་སྣའི་མདུད་པས་བཅིངས། །དགེ་བའི་ཕྱོགས་སུ་གཏོང་མི་ཕོད། །དགྲ་འདྲེ་གཉིས་ཀྱི་གཡབ་མོ་ཡིན། །རང་གིས་བསགས་པ་མི་ཡིས་སྤྱོད། །ཐ་མ་སྲོག་གི་བདུད་དུ་འོང་། །དགྲ་བོའི་ནོར་གཉེར་སེམས་ལ་གཟན། །འཁོར་བའི་བསླུ་རྡོ་སྤངས་པ་ཡིན། །བདུད་ཀྱི་མགོ་སྐོར་དེ་ང་མི་འདོད། །ཅེས་གསུངས་པ་ལྟར། འབྱོར་པ་ཅི་ཙམ་དུ་ཆེ་བ་དེ་ཙམ་དུ་སྡུག་བསྔལ་ཆེ་ཞིང་། དཔེར་ན་རྟ་གཅིག་ཡོད་ཀྱང་། དེ་དགྲས་ཁྱེར་གྱི་དོགས། རྐུན་མས་རྐུ་ཡི་དོགས། རྟ་དེ་གསོ་བྱེད་ཀྱི་རྩྭ་གཟན་པ་མ་འཁྱོང་གིས་དོགས་པ་སོགས་སྡུག་བསྔལ་རྟ་ཙམ་པ་མང་པོ་ཡོད། དེ་བཞིན་དུ་ལུག་གཅིག་ཡོད་ཀྱང་སྡུག་བསྔལ་ལུག་ཙམ། ཐ་ན་ཇ་འཁོར་ཞིག་ཡོད་ཀྱང་། སྡུག་བསྔལ་ཇ་འཁོར་ཙམ་ཞིག་ངེས་པར་ཡོད། མདོར་ན་རྒྱུ་ཆེ་ན་ཆེ་བའི་ཚད་ཀྱི་སྡུག་བསྔལ། ཆུང་ན་ཆུང་བའི་ཚད་ཀྱི་སྡུག་བསྔལ་ཡོད། ནོར་མེད་ཙ་ན་དགྲ་དང་བྲལ། ཞེས་པ་ལྟར། འབྱོར་པ་མེད་ན་དགྲ་དང་བྲལ་ཏེ། སྐྱིད་པ་ཡིན་པས་སྔོན་བྱོན་རྒྱལ་བ་གོང་མའི་རྣམ་ཐར་བཞིན་ལོངས་སྤྱོད་ནོར་གྱི་ཆགས་ཞེན་ཐམས་ཅད་རྩ་བ་ནས་བཅད། འཚོ་བ་བྱ་ཚོལ་བྱིའུ་ཚོལ་ཀྱི་འདོད་ཆུང་ཆོག་ཤེས་ལ་བརྟེན་ནས་དམ་པའི་ཆོས་ཁོ་ན་བསྒྲུབ་དགོས་སྙམ་དུ་བསྒོམ་མོ། །གཉེན་གྲོགས་འཁོར་འདབ་ལོངས་སྤྱོད་སོགས་བྱམས་པ་དགའ་བདེ་སྐྱིད་པའི་དཔལ་དང་བྲལ་གྱི་དོགས་པའི་སྡུག་བསྔལ་ནི། འཇིག་རྟེན་འཁོར་བའི་སེམས་ཅན་ཐམས་ཅད་རང་ཕྱོགས་ཀྱི་གཉེན་ཉེ་རིང་ཤ་ཕུ་ནུ་གྲོགས་དགའ་མཛའ་སོགས་དེའི་ཕྱོགས་ལ་ཆགས། དེ་མིན་རང་ཉིད་མི་དགའ་པའི་གཞན་ཕྱོགས་ལ་སྡང་བར་བྱས། རང་ཉིད་ཀྱི་ཉེ་དུ་འཁོར་འབངས་གཉེན་དང་མཛའ་བཤེས་ཀྱི་ཕྱོགས་སུ་ལྷུང་བ་ཡིན་པས། དེ་དག་གི་ཆེད་དུ་སྡུག་བསྔལ་དུ་མ་ལ་སྤྱོད། ཉེ་དུ་དང་གཉེན་བཤེས་སུ་འབྲེལ་པ་དེ་དག་ཀྱང་མི་རྟག་པ་སོ་སོར་འབྲལ་བའི་ཆོས་ཅན་ཡིན་པས་ན། ཕལ་ཆེར་ཤི་པའམ་ཡུལ་ཕྱོགས་གཞན་དུ་འཁྱར་བ་དང་དགྲ་དང་གནོད་པ་ལ་སོགས་པས་ཉེན་པ་ན། དེ་དག་གི་སྡུག་བསྔལ་དེ་རང་གི་ལུས་ཐོག་ལ་བྱུང་བ་ལས་ཀྱང་ཐུ་གིན་ཡོད་པ་རེད། ཁྱད་པར་དུ་ཕ་མ་ནི་བུ་ལ་བརྩེ་ཞིང་གདུང་བས། བུ་རྒྱུད་དེ་དག་འཁྱགས་ཀྱིས་དོགས་ལྟོགས་ཀྱིས་དོགས། སྐོམ་གྱིས་དོགས་ན་ཡིས་དོགས། ཤི་ཡིས་དོགས། བུ་ན་བ་ལས་རང་ཉིད་འཆི་བ་འདོམ་ནུས་པ་ཙམ་དུ་སྙིང་བརྩེ་ཞིང་བུ་དང་བུ་མོ་དེའི་ཆེད་དུ་རྒྱུན་དུ་སེམས་ནད་ཁོ་ན་བྱེད་པས་སྡུག་བསྔལ། དེ་བཞིན་དུ་གཉེན་དང་ཉེ་འབྲེལ་བརྩེ་བ་ལ་སོགས་པ་དེ་རྣམས་དང་བྲལ་དུ་དོགས་པའི་སྡུག་བསྔལ་སྤྱོད་པ་ཡིན་ཡང་། ལེགས་པར་བརྟགས་ན་གཉེན་ཀྱང་གཏན་དུ་གཉེན་དུ་མ་ངེས་ཏེ། ཕ་མ་སོགས་བུ་ལ་བརྩེ་བར་རློམ་ཡང་བརྩེ་ལུགས་ཕྱིན་ཅི་ལོག་ཏུ་གྱུར་ནས་ཕུགས་སུ་གནོད་པ་བསྐྱལ་བ་ཡིན་ཏེ། རྒྱུ་ཟས་དང་ལོངས་སྤྱོད་གང་གཅེས་དང་གང་དམར་ཐམས་ཅད་བྱིན། གཏན་གྲོགས་ཀྱི་ཆུང་མ་བསུས་ནས་འཁོར་བའི་འཆིང་ཐག་དང་སྦྲེལ་ནས་གཞི་འཁོར་བ་བཟུང་བཅུག དགྲ་འདུལ་ལུགས། གཉེན་སྐྱོང་ལུགས། ལོངས་སྤྱོད་སྤེལ་ལུགས་སོགས་མི་དགེ་བའི་ལས་ཐབས་དུ་མ་བསླབས། ངན་སོང་གི་གཏིང་ནས་མི་ཐར་བ་ཞིག་བྱེད་པ་ཡིན་པས་དེ་དག་ལས་གནོད་ཚབས་ཆེ་བ་མེད། བུ་དང་བུ་མོ་ལ་སོགས་པ་ཡང་དང་པོ་ལུས་ཀྱི་བཅུད་འཕྲོག་སྟེ་ཁ་ནུ་ཞོས་གསོས། བར་དུ་ཁ་ཡི་ཟས་ཞིམ་པོ་ཡང་འཕྲོག ཐ་མ་ལག་གི་ནོར་ལོངས་སྤྱོད་གང་བཟང་ཐམས་ཅད་བྱིན་པའམ་ཁྱེར་ནས་འཕྲོག ཕ་སེམས་བུ། བུ་སེམས་རྡོ། ཟེར་བ་ལྟར། ཕར་ལ་བརྩེ་བར་བྱས་ཀྱང་ཚུར་ལ་རྒོལ། ཕ་མ་རང་གིས་ཚེ་གང་སྡིག་སྡུག་གཏམ་ངན་ཐམས་ཅད་ཁྱད་དུ་བསད་དེ་བསགས་པའི་རྒྱུ་ཟས་ལོངས་སྤྱོད་ཐམས་ཅད་ཕངས་པ་མེད་པར་བྱིན་ཀྱང་ལོས་བབ་བསམ་པ་མ་གཏོགས་ངོ་སོ་ཅུང་ཟད་ཀྱང་མེད། མི་ཕལ་བ་ཞིག་ལ་ཇ་འདེབས་གཅིག་བྱིན་པའི་དགའ་སྤྲོ་ཙམ་རང་གི་བུ་ལ་རྒྱ་དངུལ་རྡིལ་ཚད་བྱིན་ཀྱང་མེད་དེ། ང་རང་གི་ཨ་ཕའི་རྒྱུ་རྫས་ང་རང་གི་ལོས་ཡིན་སྙམ་པ་ལས་མེད། བུ་སྲིང་དང་བུ་མོ་སོགས་ཀྱང་རང་ནོར་ལ་ཧབ་ཐོབ་བྱེད། བྱིན་པ་ལ་ངོ་སོ་མེད། ཡང་བྱིན་ཀྱང་ཡང་སློང་། ཐ་ན་ཕྲེང་བའི་གྲངས་འཛིན་གྱི་སྔོ་ནེ་ལེགས་པོ་ཞིག་ཡོད་ཀྱང་བསླངས་ནས་ཁྱེར། ལེགས་ན་གཞན་ཁྱིམ་གྱི་དཔལ་བསྐྱེད་དེ་ཁྱིམ་གཞན་གྱི་རྒྱན་བྱེད་ཅིང་། རང་ཕྱོགས་ལ་ཕན་པ་མེད། ཉེས་ཏེ་རེད་མི་རེད་བྱུང་ན་ཕ་མིང་གི་གོ་ཁར་ལྷུང་ནས་སྡུག་ལ་སྦྱོར། གཉེན་ཉེ་རིང་གཞན་ཐམས་ཅད་ཀྱང་། རང་ལ་རྒྱུ་ནོར་གྱིས་འབྱོར་ཞིང་སྐྱིད་ལ་ཕུན་སུམ་ཚོགས་པའི་དུས་ན་ནི་ཐམས་ཅད་ཀྱང་ལྷ་བཞིན་དུ་ལྟ། ཕན་ཇི་ཐོགས་བྱེད། མི་དགོས་ཀྱང་རྒྱུ་ཟས་དང་ལོངས་སྤྱོད་མི་དགོས་ཟེར་ཡང་སྟེར། མི་ཟ་ཟེར་ཡང་ཟོས་ཞེས་དང་། མི་ཁུར་ཟེར་ཡང་ཁུར་ཟེར། རང་རྒུད་ནས་ཧུ་ཐུག་པའི་ཉི་མ་ཤར་ནས་དམན་སར་ལྷུང་བར་གྱུར་ན་ནི་ཉེས་པ་ཅུང་ཟད་ཀྱང་ཕར་ལ་མ་བྱས་པའི་གཉེན་ཡིན་ཡང་དེ་དུས་ཚུར་ལ་དགྲ་བཞིན་དུ་ལྟ་བ་རེད། སྔར་ཕར་ཕན་བཏགས་པའི་ལན་དུ་ད་ཚུར་ལ་གནོད་པ་སྐྱེལ། དེ་ལྟར་བུ་དང་། བུ་མོ་གཉེན་དང་ཉེ་བ་རྣམས་ལ་སྙིང་པོ་ཅུང་ཟད་ཀྱང་མེད་པ་ཡིནཏེ། རྗེ་མི་ལས། བུ་དང་པོ་ལྷ་བུ་ཡིད་འོང་པོ། །སྙིང་བརྩེ་བའི་སེམས་ལ་བཟོད་གླགས་མེད། །བར་དུ་བུ་ལོན་འདེད་དྲགས་པོ། །ཐམས་ཅད་བྱིན་ཀྱང་མགུ་དུས་མེད། མི་ཡི་བུ་མོ་ནང་དུ་བཅུག །དྲིན་ཆེན་ཕ་མ་ཕྱི་རུ་ཕུད། །ཕ་ཡིས་བོས་ཀྱང་ལན་མི་སྟེར། །མ་ཡིས་བོས་ཀྱང་ཨང་མི་ཁུག །ཐ་མ་ཁྱིམ་མཚེས་སྙིང་རིང་པོ། །ཁྲམ་པའི་ཁ་ཚེས་བྱས་པས་ཕུང་། །རང་སྐྱེས་ཀྱི་དགྲ་བོ་སེམས་ལ་གཟན། །འཁོར་བའི་བཤལ་ཐག་སྤངས་པ་ཡིན། །འཇིག་རྟེན་གྱི་བུ་ཚ་ང་མི་འདོད། །ཅེས་དང་། བུ་མོ་དང་པོ་ལྷ་ཕྲུག་འཛུམ་ཁ་མོ། །ནོར་གང་དམར་ཁྱེར་བའི་དབང་མོ་ཆེ། །བར་དུ་ལན་ཆགས་འཁོར་མེད་མ། །ཕ་ལ་དངོས་སུ་བསླངས་ནས་ཁྱེར། །མ་ལ་ལྐོག་ཏུ་བརྐུས་ནས་ཁྱེར། །བྱིན་པ་ངོ་སོ་མི་བྱེད་པ། །དྲིན་ཆེན་ཕ་མ་སྙིང་རླུང་སློང་། །ཐ་མ་སྲིན་མོ་གདོང་དམར་མ། །ལེགས་ན་གཞན་གྱི་དཔལ་སྐྱེད་མ། །ཉེས་ན་རང་གི་བྱུར་སྡུད་མ། །ཕུང་བྱེད་ཀྱི་སྲིན་མོ་སེམས་ལ་གཟན། །སངས་མེད་ཀྱི་མྱ་ངན་སྤངས་པ་ཡིན། །ཕུང་གཞིའི་བུ་མོ་ང་མི་འདོད། །ཅེས་དང་། གཉེན་དང་པོ་འཕྲད་དགའ་མཐོང་འཛུམ་པོ། །འདིར་བྱོན་དང་འདིར་བཞུགས་ཀྱིས་ལུང་པ་འགེངས། །བར་དུ་ཤ་ཆང་གི་ཟས་ལན་ཅན། །ཕར་གཅིག་ལན་དུ་ཚུར་གཅིག་སྟེར། །ཐ་མ་ཆགས་སྡང་གི་གྱོད་གཞི་ཅན། །སྡུག་གྲོགས་ཀྱི་གྱོད་རྩ་སེམས་ལ་གཟན། །སྐྱིད་ཚེའི་ཟ་གྲོགས་དེ་སྤངས་པ་ཡིན། །འཇིག་རྟེན་གྱི་ཉེ་དུ་ང་མི་འདོད། །ཅེས་གསུངས་པ་ལྟར་ཡིན་ནོ། །དེ་བཞིན་དུ་འདོད་པ་ཐོག་ཏུ་མི་ཁེལ་བའི་སྡུག་བསྔལ་ནི། འཇིག་རྟེན་གྱི་ཁམས་འདི་ན་རང་བདེ་ཞིང་སྐྱིད་པ་དང་། དགའ་བ་དང་། ཡག་པ་དང་། རྒྱན་མཛེས་སོགས་མི་འདོད་པ་ནི་གཅིག་ཀྱང་མེད་མོད་དེ། དེ་ལྟར་ཅི་བསམ་གང་འདོད་པ་ལྟར་བསམ་ཚད་འོང་བ་ནི་སུ་ཡང་མེད། སྐྱིད་དུ་རེ་ནས་མཁར་བརྩིགས་པ་ཡང་ཞིག་ནས་རང་གསོད་པའི་རྒྱུར་གྱུར་ནས་བསད་པ་དང་། ལྟོ་ཕོ་བར་འགྲངས་སུ་རེ་ནས་ཟས་ཟོས་པ་ཡང་ནད་ཀྱི་རྐྱེན་དུ་གྱུར་ཏེ་ཐ་མར་སྲོག་ལ་རྒོལ་བའི་རྐྱེན་དུ་གྱུར་པ་དང་། རྒྱལ་ཁ་ཐོབ་ཏུ་རེ་ནས་གཡུལ་ངོར་ཕྱིན་པས་འཕྲལ་དུ་བསད་པ་དང་། ཚོང་ཁེ་སྤོགས་འདོད་པས་ཚོང་ལ་ཕྱིན་པ་ན་བར་ནས་དགྲས་བཅོམ་སྟེ་མ་དངུལ་གྱི་གཞི་རྩ་ཡང་མེད་པའི་སྤྲང་པོར་གྱུར་པ་དང་། ཤྭ་དང་ཆང་དང་བུན་སྐྱེད་ལེན་པ་སོགས་ཚེ་འདིའི་བདེ་སྐྱིད་དང་ལོངས་སྤྱོད་འབྱུང་དུ་རེ་བས་འབད་རྩོལ་དང་རྩོལ་སྒྲུབ་ཇི་ཙམ་བྱས་ཀྱང་། རང་ལ་སྔོན་བསགས་ཀྱི་སྦྱིན་འབྲས་སྔོན་གྱི་ལས་དབང་ཞིག་མེད་ན་འཕྲལ་དུ་ལྟོ་འགྲངས་པ་ཙམ་ཡང་མི་འོང་ཞིང་བསོད་ནམས་མ་བསགས་པའི་འབད་བརྩོན་གྱིས་རང་གཞན་སྡུག་ལ་སྦྱར། འགྲུབ་ངེས་པ་ངན་སོང་གི་གཏིང་ནས་མི་ཐར་བ་ཞིག་གྲུབ་པ་མ་གཏོགས་ཅི་ཡང་མེད། དེས་ན་འབད་རྩོལ་རི་བོ་ཙམ་བྱེད་པ་ལས་བསོད་ནམས་མེ་སྟག་ཙམ་བསགས་པ་དགའ་བ་ཡིན་པས་ན་གྲུབ་དུས་ཚར་དུས་མེད་པ་འཁོར་བའི་བྱ་བྱེད་ཀྱིས་ཅི་བྱ། དེ་ལྟ་བུའི་ལས་ལ་འཁོར་བ་ཐོག་མ་མེད་པའི་དུས་ནས་ད་ལྟའི་བར་དུ་ཅི་ཙམ་འབད་པ་ཡིན་ཡང་འབྲས་བུ་སྡུག་བསྔལ་བ་ཁོ་ན་ལས་མི་འདུག་པ་འདི་རེད། དེ་སྔོན་འཇིག་རྟེན་ཚེ་འདིའི་ཆེད་དུ་མི་ཚེ་གཅིག་གི་སྟོད་སྨད་གཉི་ག་ལ་འབད་བརྩོན་བྱས་པ་ཙམ་ཞིག དམ་པའི་ཆོས་ལ་འབད་ཡོད་ན་ད་ཙམ་རབ་ན་སངས་རྒྱ་བའམ་དེ་ལྟར་མིན་ཡང་ངན་སོང་གི་སྡུག་བསྔལ་གཏན་ནས་མྱོང་མི་དགོས་པ་ཞིག་ནི་འགྲུབ་ངེས་པ་ཡིན་པ་རེད། ད་རེས་དམ་པའི་ཆོས་ཐོས་ནས་དགེ་ངོ་སྡིག་ངོ་ཙམ་སྤང་བླང་གི་ས་མཚམས་ཤེས་པའི་སྐབས་འདིར། འགྲུབ་དུས་མེད་པ་འཁོར་བའི་བྱ་བཞག་ལ་རེ་བ་མི་ཆེ་བར་འགྲུབ་པར་ངེས་པའི་དམ་པའི་ལྷ་ཆོས་གཤའ་མ་ཞིག་བསྒྲུབ་དགོས་སྙམ་དུ་བསྒོམ་མོ། །མི་འདོད་པ་ཐོག་ཏུ་འབབས་པའི་སྡུག་བསྔལ་ནི། གོང་དུ་བཤད་པ་དེ་ལྟ་བུའི་སྡུག་བསྔལ་གྱི་རྣམ་གྲངས་དེ་དག་ཐམས་ཅད་འདོད་པའི་གང་ཟག་ནི་གཅིག་ཙམ་ཡང་འཇིག་རྟེན་གྱི་ཁམས་འདི་ན་མེད། འོན་ཀྱང་མི་འདོད་བཞིན་དུ་སྡུག་བསྔལ་དེ་དག་ཁོ་ན་ལ་ལོངས་སྤྱོད་དགོས་ཐུག་ནི་རེད། སྔོན་གྱི་ལས་དབང་ལས་རྒྱལ་པོའི་འོག་གི་སྡེ་མངའ་རིས་དང་། ཕྱུག་པོ་ཆེན་པོའི་བྲན་འཁོར་ལྟ་བུ་རྣམས་རང་དབང་སྐད་ཅིག་ཀྱང་མེད་པར་ཞེ་མི་དགའ་མི་འདོད་བཞིན་དུ་དེ་དག་གི་དབང་དུ་གྱུར། ཉེས་པ་ཅུང་ཟད་རེའི་ཕྱིར་དུ་སྡུག་བསྔལ་དུ་མ་གཏད་ཀྱང་བྱ་ཐབས་བྲལ། རང་དབང་མེད་པས་ད་ལྟ་གསོད་པའི་ས་རུ་ཁྲིད་ཀྱང་། རང་བསམ་གྱིས་འགྲོ་བ་ལས་འབྲོས་པ་ཙམ་ཡང་མི་ནུས་པས་མཚོན་ཏེ། མི་འདོད་པ་ཁོ་ན་ཐོག་ཏུ་འབབས་ཏེ། ཀུན་མཁྱེན་ཆེན་པོས། བཟའ་ཚང་ཉེ་འབྲེལ་འདི་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་བར་ངེས། །བཟང་པོའི་གནས་མལ་འདི་རུ་དུས་རྟག་ཏུ། །མི་འབྲལ་འདུག་པར་འདོད་ཀྱང་འགྲོ་བར་ངེས། །བདེ་སྐྱིད་ལོངས་སྤྱོད་འདི་དང་དུས་རྟག་ཏུ། །མི་འབྲལ་སྤྱོད་པར་འདོད་ཀྱང་བོར་བར་ངེས། །དལ་འབྱོར་མི་ལུས་མཆོག་འདི་དུས་རྟག་ཏུ། །མི་འབྲལ་རྟག་པར་འདོད་ཀྱང་འཆི་བར་ངེས། །བཟང་པོའི་བླ་མ་འདི་དང་དུས་རྟག་ཏུ། །མི་འབྲལ་ཆོས་ཉན་འདོད་ཀྱང་བྲལ་བར་ངེས། །དམ་པའི་གྲོགས་བཟང་རྣམས་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་ངེས་པས། །དེ་རིང་ཉིད་ནས་བརྩོན་པའི་གོ་བགོས་ཏེ། །འབྲལ་མེད་བདེ་ཆེན་གླིང་དུ་བགྲོད་རེ་རན། །སྐྱོ་ཤེས་གཏིང་ནས་སྐྱེ་བའི་གྲོགས་རྣམས་ལ། །ཆོས་མེད་སྤྲང་པོ་བདག་གིས་དེ་སྐད་བསྐུལ། །ཞེས་གསུངས། དེས་ན་ནོར་དང་ལོངས་སྤྱོད་བདེ་སྐྱིད་དང་སྙན་གྲགས་ལ་སོགས་འབྱུང་བའི་རྒྱུ་གང་ཡིན་ན། རང་ལ་ཚེ་སྔོན་བསགས་སྟོབས་ཀྱི་དགེ་འབྲས་ཤིག་ཡོད་ན་ནི་དོན་གཉེར་མ་བྱས་ནས་མི་འདོད་ཀྱང་ཤུགས་ཀྱིས་འབྱུང་། དེ་མེད་ན་ཅི་ཙམ་འབད་རྩོལ་དང་རྩོལ་སྒྲུབ་བྱས་ཀྱང་འདོད་པ་མི་འགྲུབ་ཅིང་མི་འདོད་པ་ཁོ་ན་འདུ་བ་ཡིན་པས་ན། ནོར་ཟད་པ་མེད་པ་ཆོག་ཤེས་ཀྱི་ནོར་ལ་བརྟེན་ནས་ཡང་དག་པའི་དམ་ཆོས་མ་བསྒྲུབས་ན། ཆོས་སྒོར་ཞུགས་ནས་འཇིག་རྟེན་ཆོས་བརྒྱད་ཀྱི་དབང་དུ་སོང་སྟེ་འཇིག་རྟེན་ཚེ་འདིའི་བྱ་གཞག་ཁོ་ན་སྒྲུབ་པ་ནི་རང་སྡུག་ལ་དམ་པས་ཁྲེལ་བའི་གནས་སུ་གྱུར་བར་ཡིན་ཏེ། རྗེ་མི་ལས། སྤྱིར་རྒྱལ་བ་མི་ཡི་དབང་པོ་དེས། །ཆོས་རྣམས་ཆོས་བརྒྱད་འཇོམས་ཕྱིར་གསུངས། །ད་ལྟ་མཁས་པར་རློམ་པ་རྣམས། །ཆོས་བརྒྱད་ཆེ་རུ་མ་སོང་ངམ། །རྒྱལ་བས་ཚུལ་ཁྲིམས་བསྲུང་བ་དེ། །འཇིག་རྟེན་བྱ་བ་སྤང་ཕྱིར་གསུངས། །ད་ལྟའི་ཁྲིམས་སྲུང་བཙུན་པ་རྣམས། །བྱ་བཞག་མང་དུ་མ་སོང་ངམ། །སྔོན་དུས་དྲང་སྲོང་ཆ་ལུགས་དེ། །ཉེ་དུའི་འབྲེལ་ཐག་བཅད་ཕྱིར་གསུངས། །ད་ལྟའི་དྲང་སྲོང་ཆ་ལུགས་རྣམས། །ངོ་བསྲུང་ཆེ་རུ་མ་སོང་ངམ། །མདོར་ན་འཆི་བ་མ་དྲན་པའི། །དམ་ཆོས་ཅི་བྱེད་གྱི་ནར་གདའ། །ཞེས་གསུངས་པ་དང་། མདོར་ན་ཕྱུག་པོ་རྣམས་འཁོར་དང་ལོངས་སྤྱོད་ཇི་ཙམ་ཆེ་བ་ལྟར་དུ་དེ་དག་བསྲུང་བ་ལ་སོགས་པའི་སྡུག་བསྔལ་དེ་འདྲ་ཆེ་ནི་རེད། དབུལ་པོ་རྣམས་ཟས་གོས་སོགས་འདོད་པའི་ལོངས་སྤྱོད་བཙལ་ཀྱང་མི་རྙེད་པར་ཕོངས་པའི་སྡུག་བསྔལ་ཡོད་རེད། སྐྱེས་རབས་ལས། གཅིག་ནི་བསྲུང་བས་ཉོན་མོངས་ལ། །གཉིས་པ་འཚོ་བས་ཤ་ཐང་ངོ་། །ཕྱུག་གམ་ཡང་ན་དབུལ་ཡང་རུང་། །གང་ནའང་དགའ་བ་མེད་པར་འགྱུར། །ཞེས་དང་། བཞི་བརྒྱ་བ་ལས། མཆོག་ལ་ཡིད་ཀྱི་སྡུག་བསྔལ་དང་། ཐ་མ་རྣམས་ལ་ལུས་ཀྱིས་སོ། །སྡུག་བསྔལ་གཉིས་ཀྱིས་འཇིག་རྟེན་འདི། །ཉིན་མཚན་ཀུན་ཏུ་འཇོམས་པར་བྱེད། །ཅེས་གསུངས་པ་ལྟར་རང་རེ་ལ་མངོན་དུ་གྱུར་ཡོད་པ་འདི་ལྟ་བུས་མཚོན་ནུས་སོ། །ད་ལྟ་མི་ཡུལ་གླིང་བཞིའི་འཇིག་རྟེན་སྤྱི་དང་བྱེ་བྲག་རང་རེ་འཛམ་བུའི་གླིང་པར་སྐྱེས་པ་རྣམས་ད་ལྟ་དུས་སྙིགས་མ་ལྔ་བདོ་བའི་དུས་འདིར་ལུས་སེམས་གཉིས་ཀར་བདེ་བའི་གནས་སྐབས་སྤུ་ཙམ་ཡང་མེད་པར་སྡུག་བསྔལ་ཁོ་ན་ལ་སྤྱོད་པ་མ་ཟད། ད་དུང་ཡང་ལོ་དང་ཟླ་བ་ཞག་དང་ཟ་མ་སྔ་དྲོ་དང་ཕྱི་འཕྲེད་ཙམ་སོང་བཞིན་དུ་དུས་ཇེ་སྙིགས་དང་། བསྐལ་པ་ཇེ་ངན། སངས་རྒྱས་ཀྱི་བསྟན་པ། སེམས་ཅན་གྱི་བདེ་སྐྱིད་ཐམས་ཅད་རིམ་པ་བཞིན་དུ་ཉམས་དམའ་བ་ལ་བསམས་ནས་འཁོར་བའི་གནས་འདི་ལ་སྐྱོ་བ་བསྐྱེད་པར་བྱ་དགོས་པ་ཡིན། གཞན་ཡང་འཛམ་གླིང་ལས་ཀྱི་ས་པ་ལས་སྔ་དྲོར་བསགས་ན་ཕྱི་དྲོ་སྨིན་པ་ཡིན་ཕྱིར། བཟང་ངན། སྐྱིད་སྡུག ལེགས་ཉེས། མཐོ་དམན་ཆོས་དང་ཆོས་མིན་ཐམས་ཅད་མཐའ་གཅིག་ཏུ་མ་ངེས་པ་ཡིན་པས་ན། གཅིག་ཏུ་བརྟན་པ་མིན་པ་དེ་དག་གི་གནས་ཚུལ་མངོན་སུམ་དུ་མཐོང་བ་ལ་བལྟས་ནས་དེ་ལུགས་ཀྱིས་རང་རྒྱུད་ལ་སྤང་བླང་འདོར་ལེན་བྱེད་དགོས་པ་ཡིན་ཏེ། ཀུན་མཁྱེན་བླ་མས། སྐབས་སུ་རང་སྣང་མཐུན་པའི་རྐྱེན་གྲོགས་ལྟོས། །རང་སྣང་ཤེས་པས་ཉམས་སྣང་གྲོགས་སུ་འཆར། །སྐབས་སུ་མི་མཐུན་གནོད་པའི་རྐྱེན་སྣང་ལྟོས། །འཁྲུལ་བ་ཞེན་ལོག་གནད་དུ་ཆེ་བ་ཡིན། །སྐབས་སུ་གྲོགས་དང་གཞན་གྱི་བླ་མར་ལྟོས། །བཟང་ངན་ཤེས་པའི་ཉམས་ལེན་བསྐུལ་མ་ཡིན། །སྐབས་སུ་མཁའ་ལ་འབྱུང་བཞིའི་ཆོ་འཕྲུལ་ལྟོས། །སེམས་ཉིད་ངང་དུ་འབད་རྩོལ་ཞིག་པ་ཤེས། །སྐབས་སུ་རང་གི་ཡུལ་མཁར་ལོངས་སྤྱོད་ལྟོས། །སྒྱུ་མར་ཤེས་པས་འཁྲུལ་སྣང་ཞེན་པ་ལོག །སྐབས་སུ་གཞན་གྱི་ནོར་དང་ལོངས་སྤྱོད་ལྟོས། །སྙིང་རྗེ་ཤེས་པས་འཁོར་བའི་འདོད་པ་སྤོངས། །མདོར་ན་སྣ་ཚོགས་སྣང་བའི་ཆོས་རྣམས་ལ། །རང་བཞིན་བརྟགས་པས་བདེན་ཞེན་འཁྲུལ་བ་འཇིག །ཅེས་གསུངས་པ་ལྟར་ཉམས་སུ་བླང་ངོ།།
༥༽ ལྷ་མིན་གྱི་སྡུག་བསྔལ།
མཐོ་རིས་ཀྱི་གནས་གཉིས་པ། ལྷ་མིན་གྱི་སྡུག་བསྔལ་ནི། གནས་ལྷུན་པོའི་ཆུ་མཚམས་མན་ཆད་རི་རབ་ཀྱི་ཁོང་གསེང་ནས་གསེར་གྱི་ས་གཞིའི་བར་དུ་གནས་པའི་རིམ་པས་སྒྲ་གཅན་དང་། སྐར་ཕྲེང་དང་། མགུལ་ཕྲེང་དང་། ཐག་བཟང་རིས་ཀྱི་གནས་ཆགས་ཡོད། སྤྱིར་ལྷ་མ་ཡིན་གྱི་ལུས་དང་རྫུ་འཕྲུལ་དཔལ་འབྱོར་ལོངས་སྤྱོད་ལྷ་རྣམས་ལ་འགྲན་ནུས་པ་ཙམ་ཡོད་ཀྱང་། རིགས་དང་སྐལ་བ་ལྷ་དང་མི་འདྲ་བའི་ཕྱིར་ལྷ་མ་ཡིན་ཞེས་བྱའོ། འདི་དག་ལ་རིགས་ཀྱང་ལྔ་སྟེ། ཚེ་དཔལ་ལྷའི་རིགས་ནི་སུམ་ཅུ་རྩ་གསུམ་པ་དང་ཚེ་ལུས་དང་སྐལ་བ་མཉམ། སྟོབས་ཆེན་གནོད་སྦྱིན་གྱི་རིགས་ནི་རྒྱལ་ཆེན་སྡེ་བཞི་པ་དང་ལོངས་སྤྱོད་མཉམ། རྩུབ་འགྱུར་བདུད་ཀྱི་རིགས་ནི་ནག་པོའི་ཕྱོགས་ལ་དགའ་བ་ཐག་བཟང་རིས་ལ་སོགས་པ་གཞན་འཕྲུལ་དབང་བྱེད་དང་ལོངས་སྤྱོད་མཉམ་ཞིང་ཚེ་སུམ་ཅུ་རྩ་གསུམ་དང་མཉམ། གསོད་བྱེད་སྲིན་པོའི་རིགས་ནི་སེམས་ཅན་གྱི་སྲོག་ལ་འཚེ་ཞིང་མཁའ་ལ་རྒྱུ་བའི་ཡི་དྭགས་དང་ཕྱོགས་མཐུན། གདུག་པ་ཀླུའི་རིགས་ནི་ཕྱེད་མར་གྱུར་བའི་ལུས་དང་། ལོངས་སྤྱོད་དང་བདེ་སྡུག་འདྲེས་ཤིང་བླུན་པར་གནས་པའོ། །ཁ་འཐོར་བ་ནི། མི་ཡི་ཡུལ་དང་། རྒྱ་མཚོ་དང་། ཁ་ཅིག་དུད་འགྲོ་དང་མཉམ་པའོ། །སྔོན་མི་དགེ་ཕྲག་དོག་དང་འཐབ་རྩོད་ལ་གོམས་ཤིང་ལས་དེས་འཕངས་པས་ན་ལྷ་མིན་གྱི་ལུས་རྟེན་དེ་བཟུང་བ་ཙམ་ནས་ཕྲག་དོག་གི་འདུ་ཤེས་རགས་པ་ཡིན་པས། རང་གི་གནས་ནའང་གནས་དང་སྡེ་རིས་དེ་དག་རྩོད་པར་བྱེད་ཅིང་། ཕན་ཚུན་མི་མཐུན་པས་ན་གཅིག་གིས་གཅིག་ལ་འཐབ་ཅིང་རྩོད་པ་ཁོ་ནས་དུས་འདའ། རང་རེ་འཇིག་རྟེན་མི་ཡུལ་འདི་ནས་ཀྱང་ད་ལྟ་མི་རྣམས་གཅིག་གིས་གཅིག་ལ་དོན་ཁབ་ཅིག་གི་རྩོད་གཞི་མེད་བཞིན་གནོད་པ་བྱེད་ཅིང་གློ་བུར་དུ་གྲི་མཚོན་སོགས་ལ་འཇུས་ནས་བྱ་ངན་ཚབས་ཆེན་གྱི་གྱོད་གཞི་བྱེད་པ་དེ་ཚོས་ལྷ་མ་ཡིན་གྱི་སྡུག་བསྔལ་ད་ལྟ་ནས་རང་གི་ཐོག་ལ་འདྲེན་ཁི་ཡོད་ནི་རེད། ཡར་ལྷ་ལ་བལྟས་པས་དཔལ་འབྱོར་དང་ལོངས་སྤྱོད་ཕུན་སུམ་ཚོགས་པར་མཐོང་ཞིང་། དགོས་འདོད་ཐམས་ཅད་ཡིད་ལ་བསམ་པ་ཙམ་གྱིས་དཔག་བསམ་གྱི་ཤིང་ལས་འབྱུང་བར་མཐོང་བས་ན། གཞན་འབྱོར་ལ་སྡང་ལྷ་མ་ཡིན་གྱི་སེམས། །ཞེས་པ་ལྟར་ཤིང་དེའི་རྩ་བ་ལྷ་མིན་གྱི་ཡུལ་ན་ཡོད་པ་སོགས་ལ་བལྟས་ནས་ཞེ་སྡང་གི་མེ་འབར། ཕྲག་དོག་གི་རླུང་འཚུབས་ནས་སེམས་མི་བཟོད་པ་སྐྱེས་ཏེ། ལུས་སྲུང་བར་བྱེད་པའི་གོ་ཆ་གྱོན། དགྲ་གསོད་པར་བྱེད་པའི་མཚོན་ཆ་ཐོགས་ནས་ལྷ་རྣམས་དང་འཐབ་ཏུ་འགྲོ། དེའི་ཚེ་ལྷ་རྣམས་ནི་གཤིས་འཇམ་པས་རྒྱུད་ཁྲོ་དཀའ་ཡང་དམག་འཁྲུགས་རན་ཚེ་རྩུབ་འགྱུར་གྱི་ཚལ་དུ་སོང་སྟེ་སེམས་འཁྲུགས་པས་གོ་མཚོན་དག་བླངས་ནས། ལྷའི་གླང་པོ་ཆེ་རབ་བརྟན་གྱི་མགོ་བོ་སུམ་ཅུ་རྩ་གཉིས་ལ་ཉེ་དབང་སུམ་ཅུ་རྩ་གཉིས་དང་། དབུས་ཀྱི་མགོ་བོ་ལ་ལྷའི་དབང་པོ་བརྒྱ་བྱིན་ཞོན། ལྷ་ཡི་དམག་ཚོགས་བསམ་གྱིས་མི་ཁྱབ་པས་བསྐོར་ནས་ཀུ་བསོ་ཆ་སྒྲ་སྒྲོགས་ཤིང་གཟི་བྱིན་བཟོད་པར་དཀའ་བ་ཙམ་དུ་འོང་བ་དང་། ལྷ་དང་ལྷ་མིན་གཉིས་གཡུལ་སྤྲད་ནས་འཐབ་པའི་ཚེ་ལྷ་རྣམས་ཀྱི་ལག་ཆ་རྡོ་རྗེ་དང་། འཁོར་ལོ་དང་། མདུང་ཐུང་དང་། མདའ་བོ་ཆེ་ལ་སོགས་པ་ཆར་བཞིན་དུ་འབེབས་ཤིང་། ལྷ་རྫུ་འཕྲུལ་དང་ལྡན་པས་རི་ཆེན་པོ་རྣམས་ཀྱང་པང་པས་བཏེགས་ནས་འཕེན་པར་བྱེད། སྔོན་གྱི་ལས་དབང་ལས་ལྷ་རྣམས་ནི་མི་འགྲེང་བདུན་ཙམ་གྱིས་མཐོ་ལ། ལྷ་མ་ཡིན་རྣམས་ནི་དམའ་ཞིང་། ལྷ་རྣམས་ནི་མགོ་བོ་བཅད་པ་མ་གཏོགས་ལུས་ལ་རྨ་ཅི་ཙམ་བྱས་ཀྱང་དེ་མ་ཐག་ལྷའི་བདུད་རྩིས་གསོ་བས་མི་འཆི་ལ། ལྷ་མ་ཡིན་རྣམས་ནི་མི་ལ་སོགས་པ་བཞིན་དུ་གནད་ཆེ་ས་གཉན་ས་གང་དུ་ཕོག་ཀྱང་འཆི་བ་ཡིན་པས་ན་ལྷ་མ་ཡིན་རྣམས་དུས་རྟག་ཏུ་གཡུལ་ཕམ་པ་མང་། ལྷ་མིན་མང་པོ་བསད་པའི་ཚེ་དེ་དང་དེར་ཤི་བའི་གཟུགས་བརྙན་གསེར་གྱི་ས་གཞིའི་སྟེང་དུ་ཀུན་སྣང་ཞེས་པའི་མཚོ་ལ་ཤར་བས་དམག་མ་ལོག་གོང་ནས་ཉེ་དུ་རྣམས་མྱ་ངན་གྱིས་གདུང་བར་བྱེད། དེ་དག་ཕལ་ཆེར་ནག་ཕྱོགས་ཡིན་པས་ཆོས་ལ་མི་དགའ། འགའ་རེ་ལ་མོས་པ་ཅུང་ཟད་ཙམ་ཡོད་ཀྱང་ཆོས་ཀྱི་ཁྱད་པར་རྟོགས་པ་དང་འབྲས་བུ་ཐོབ་པའི་སྐལ་བ་མེད་པ་ཡིན་ནོ། །དེ་ལྟར་ལྷ་དང་གཡུལ་འཐབ་པའི་ཚེ་ན་ལྷའི་གླང་པོ་ཀུན་སྐྱོང་མྱོས་པའི་སྣ་ལ་རལ་གྲིའི་འཁོར་ལོ་བཏགས་ཏེ་མངགས་པ་སོགས་ཀྱིས་ལྷ་མ་ཡིན་འབུམ་ཕྲག་དུ་མ་གསོད་ཅིང་། དེ་དག་གི་རོ་རི་རབ་ཀྱི་ངོས་ནས་རྦབ་ཏུ་བསྒྲིལ་སྟེ་རོལ་པའི་མཚོ་ཆེན་རྣམས་ཀྱི་ནང་དུ་ལྷུངས་པས། མཚོ་རྣམས་ཁྲག་གི་མདོག་ཏུ་སྣང་བ་སོགས་དུས་རྟག་པར་འཐབ་རྩོད་ཁོ་ན་ལ་སྤྱོད་པས། ལྷ་མ་ཡིན་གྱི་གནས་ན་ཡང་འཐབ་རྩོད་གཙོ་བོར་གྱུར་བའི་སྡུག་བསྔལ་གྱི་རང་བཞིན་ལས་མ་འདས་པའི་ཚུལ་སྙིང་ཐག་པ་ནས་བསྒོམ་མོ།། །།ཞེས་གསུངས་ནས་བསྔོ་བས་མཐའ་བརྒྱན་ཏེ་ཆོས་ཁྲིད་གྲོལ་སོང་ངོ་།།