ན༽ཉིན་བཅུ་གཉིས་པར་༼ཨ༽སེམས་བསྐྱེད་ཀྱི་ཆོས་ཁྲིད།

མཆོད་བརྗོད་སོགས་གསུངས་ནས།

ཨ༽མཚམས་སྦྱོར་གྱི་གདམས་ངག

འོ་སྐོལ་རྣམས་འཁོར་བ་ཐོག་མ་མེད་པ་ནས་ད་ལྟའི་བར་དུ་ཡ་ཀི་སྲིད་པའི་རྩེ་མོ་མན་ཆད་ནས་མ་ཀི་མནར་མེད་ཀྱི་དམྱལ་ཁམས་ཡན་ཆད། འགྲོ་བ་རིགས་དྲུག་ཏུ་ཁ་བརྒྱུད་དེ་སྐྱེ་ཤི་གཉིས་ཀའི་འཕྲང་ལ་བཅར། སྡུག་བསྔལ་གསུམ་གྱི་ཚང་རྡོལ་ནས་ལུས་འདི་བླངས་དང་འདི་མ་བླངས་བསམ་པ་ཅི་ཡོད། ས་ཐུ་བ་ཙམ་ཞིག་གི་སྟེང་ནས་སྐྱེ་གྲངས་ཤི་གྲངས་གཉིས་བརྩིས་ན་བགྲང་གིས་མི་ལངས་ཏེ། སེམས་ཅན་རེ་རེའི་ངོས་ནས་བསམ་ན་ཤི་བའི་ཤ་རུས་ཐམས་ཅད་སྤུངས་ཡོད་ན་རིའི་རྒྱལ་པོ་རི་རབ་བས་ཀྱང་མཐོ་བ་ཞིག་དང་། ངུས་པའི་མཆི་མ་ཐམས་ཅད་བསགས་ཡོད་ན་རྒྱ་མཚོ་ཆེན་པོ་བཞི་ལས་ཀྱང་མང་བ་ཞིག་ཡིན་པ་ནི། རྒྱལ་བ་བདེན་པར་སྨྲ་བའི་བཀའ་ཚད་མ། བླ་མ་དམ་པའི་ལུང་ཚད་མ། ད་ལྟར་སྐྱེ་ཤི་དང་སྡུག་བསྔལ་མྱོང་བཞིན་པའི་མཐོང་ཆོས་མངོན་སུམ་ཚད་མ་འདིས་ཀྱང་དཔོག་ཐུབ་པ་ཞིག་ཡིན། འོན་ཀྱང་ད་རེས། མེད་པའི་ཚད་ཀྱིས་བསོད་ནམས། །ཐལ་ཕུང་མགོ་ཡི་མེ་

ཏོག །ཟེར་བ་ལྟར་ཆོས་ས་ཆོས་ཡུལ་ལ་སྐྱེས་ཏེ། ཆོས་ཐོས་པའི་སྐལ་བ་དང་ལྡན། ཆོས་མཐུན་གྱི་གྲོགས་དང་མཉམ་དུ་འགྲོགས་ནས། ཆོས་ར་གཅིག་གི་ནང་དུ་ཐེག་ཆེན་མདོ་སྔགས་ཀྱི་ཆོས་ལ་ལོངས་སུ་སྤྱོད་དུ་ཡོད་པའི་སྐལ་བ་བཟང་པོ་འདི་ཐོབ་པ་ཡིན་པས། རང་ངོས་ནས་བཤད་ན་སྐལ་བ་རེ་བཟང་གི་བསམ་ནི་ཡིན། འདི་སྔོན་བསགས་བསོད་ནམས་ཀྱི་མཐུ་ལས་བྱུང་བ་ཞིག་ཡིན་པས་ད་རེས་ཀྱི་ལུས་རྟེན་འདིའི་སྟེང་ནས། གྲལ་འདྲ་འདྲའི་ནང་གི་སྟོན་སྐལ་ཆད་ན་མི་ཕན་པས། ཆོས་རྣམ་པར་དག་པ་ཞིག་རང་གིས་བསྒྲུབས་ནས། དྲིན་ཕ་མའི་དྲིན་ལེན་སོད་ཅིང་། ཚེ་རབས་གྲངས་མེད་ཀྱི་སྡིག་སྒྲིབ་དག་པ་དང་། ཕྱི་མར་རང་གཞན་གཉིས་ཀ་སྡུག་བསྔལ་ཅན་གྱི་འཁོར་བ་དང་ངན་འགྲོའི་གནས་ལས་དུས་གཏན་དུ་ཐར་བའི་ཐབས་ཤིག་ལ་ཁ་བཤད་ཙམ་མ་ཡིན་པར་སྙིང་ནས་བསམ་དགོས། རང་གིས་རང་ལ་འདང་ཞིག་བརྒྱབ་ན་ད་རེས་དལ་འབྱོར་ཆོས་ལྡན་ཞིག་ཐོབ་ཀྱང་ཡུན་རིང་མི་བརྟན་པར་མྱུར་དུ་བསྐྱུར་བར་ངེས། ལུས་རྟེན་འདི་བརྗེས་སོང་དུས་ཚེ་འདིའི་ཕ་མས་གཙོས་བྱས་པའི་གཉེན་ཉེ་སྙིང་དང་འདྲ་བ་འདི་རྣམས་དང་གཏན་དུ་བྲལ་ནས། སྐྱེ་བ་རྗེས་མ་ལ་ལུས་རྟེན་གཞན་ཞིག་བླངས་སྐབས་གཉེན་ཉེ་འདི་རྣམས་གར་ཡོད་ཙམ་ཡང་མི་ཤེས། གལ་ཏེ་རང་ཉིད་དེ་དུས་མི་ལུས་ཤིག་བླངས་ཡོད་ན་ཕ་མ་གཉེན་ཉེ་གཞན་ཞིག་ཡིན་ངེས་པས། སྐྱེ་བ་རེ་ལ་ཕ་མ་རེ་རེ་ཡོད་ཕྱིར་སྐྱེ་ལུས་བགྲང་གིས་མི་ལངས་པ་ཡིན། དེས་ན་དེ་དག་གི་ཚུལ་ལ་ཡང་དང་ཡང་དུ་བསམས་ན། སྐྱེ་བའི་ཡ་མཐའ་ཐུག་མེད་དུ་གྲུབ་པས་སེམས་ཅན་ཐམས་ཅད་ཕ་མ་ཡིན་པར་རིགས་པས་གྲུབ་པའི་ངེས་པ་ཞིག་འོང་། སེམས་ཅན་དེ་ཐམས་ཅད་པོ་བདེ་བ་འདོད་མཉམ་དང་སྡུག་བསྔལ་མི་འདོད་མཉམ་པ་ཤ་སྟག་ཡིན་ཡང་། བདེ་བའི་རྒྱུ་སྒྲུབ་མི་ཤེས་ནས་སྡུག་བསྔལ་གྱི་རྒྱུ་འབའ་ཞིག་སྒྲུབ། དེས་ན་འཁོར་ངན་སྡུག་བསྔལ་གྱི་གནས་འདི་ལས་ཐར་བའི་དུས་མེད་པར་ཉེས་ཅན་བཙོན་དོང་དུ་ཚུད་པ་ལྟ་བུ་འདི་འདྲ་ཞིག་ཏུ་གྱུར་ཡོད་ན། ད་རེས་ངས་མ་རྒན་སེམས་ཅན་དེ་དག་ཐམས་ཅད་བདེ་བ་ལ་འགོད་དགོས་བསམ་པའི་བསམ་པ་བཟང་པོས་ཀུན་ནས་བསླང་པའི་སྙིང་རྗེ་ལ་བསླབས་ཏེ། དེས་དྲངས་པའི་བྱང་ཆུབ་སེམས་ཀྱི་ཀུན་སློང་དོན་གཉིས་སམ་ཟུར་གཉིས་ཚང་བའི་སྒོ་ནས་ཆོས་ཉན་དགོས་ལ། དེ་ཡང་དམ་པ་གསུམ་དང་མི་འབྲལ་བར་བྱེད་པ་ནི་གལ་ཤིན་ཏུ་ཆེ། ཐར་མེད་འཁོར་བའི་ཆོས་ལ་སྐྱོ་ཤས་དང་ངེས་འབྱུང་ཞིག་སྐྱེས་ནས་བློ་ཁ་དམ་པའི་ཆོས་ལ་ཕྱོགས་མཁན་ཞིག་ཡིན་ཚེ། དུས་དང་གནས་སྐབས་ཐམས་ཅད་དུ་རང་རྒྱུད་ལ་འཕྲལ་དང་འཕྲལ་དུ་བརྟགས་ནས། སེམས་ལ་དགེ་མི་དགེའི་རྣམ་རྟོག་གང་སྐྱེས་ཐམས་ཅད་དྲན་པ་དང་ཤེས་བཞིན་གྱིས་ངོས་ཟིན་པར་བྱས་ནས། མི་དགེ་བའི་རྣམ་རྟོག་རེ་སྐྱེས་ན་དེ་མ་ཐག་ཉེས་དམིགས་དྲན་ནས་གདོང་ཟློག་བྱེད་དགོས། གལ་ཏེ་ཉོན་མོངས་པའི་དབང་གིས་སྡིག་པའི་ལས་སྒྲུབ་ཤོར་ན་མི་ཚེ་སྐྱོན་ཅན་དུ་དུས་ནམ་འགྱུར་དང་གང་ཟག་སུ་འགྱུར་ཆ་མེད། དེས་ན་གནས་སྐབས་མཁས་པ་དང་བླ་ཆེན་དང་མི་ཆེན་གྱི་གོ་ས་དང་མིང་བཟང་མ་ཐོབ་ཀྱང་དཀོན་མཆོག་གསུམ་ལ་དད་པ་བརྟན་པོ་ཡོད་ཅིང་གཞན་ལ་ཕན་སེམས་བསམ་པ་བཟང་པོ་རེ་རྒྱུན་དུ་རྒྱུད་ལ་ཡོད་ཅིང་མཐུན་པར་གྱུར་པའི་ཡུལ་ལ་གནས་པ་དང་སྐྱེས་བུ་དམ་པ་ལ་བསྟེན་པ་ཞིག་ཡིན་ན་ཐར་བའི་ལམ་སྣེ་རང་ལག་རེད། ཚེ་འདི་བས་ཕྱི་མ་ཡུན་རིང་བས་ཚེ་འདིའི་ཆེ་འདོད་གྲགས་འདོད་སོགས་དང་ཚེ་ཕྱི་མའི་བདེ་སྐྱིད་གཉི་ག་བརྗེ་མི་ཉན། འདུན་མ་གཏན་ལེགས་དང་གཏན་ཉེས་ཞེས་པ་ནི་གཅིག་ན་ཚེ་འདི་དང་དེའི་ནང་ནས་ཚེ་མཇུག་འདི་ལ་ཐུག་ཡོད་པས་རང་རྒྱུད་ཉོན་མོངས་པ་རྣམས་དམ་པའི་ཆོས་ཀྱིས་ཨེ་ཐུལ་བལྟ་རྒྱུ་འདི་གནད་ཆེན་པོ་ཡིན། ཡར་འགྲོ་མར་འགྲོའི་ས་མཚམས་ཀྱི་ལམ་སྣེ་གདམ་རྒྱུ་ནི་མ་ཤི་ཚེ་འདིའི་སྐབས་ཡིན་གྱི། རོ་མགོ་ནས་ཡར་འགྲོ་མར་འགྲོའི་ས་མཚམས་རེད་ཟེར་དུས་ཕྱི་སོང་བ་རེད། ཐ་ན་དགེ་བ་རྒྱ་ཆེན་པོ་ཞིག་མ་འགྲུབ་རུང་སྡིག་ལས་ཚབ་ཆེན་ཞིག་མ་བསགས། ཆོས་ལ་དད་པ་མ་ལོག་ནས་ཆོས་སྒྲུབ་འདོད་ཞེ་ལ་ཡོད་ཀྱང་། ཆོས་དངོས་སུ་ལག་ཏུ་ལེན་རྒྱུའི་བསམ་པའི་ཐོག་ཏུ་མི་ཁེལ་འདུག་རྒྱུ་འདི་ཅི་ལ་ཐུག་པ་རེད་ཟེར་ན། བློ་ཐག་གདིང་ནས་ཆོད་ངེས་ཤེས་སྙིང་ནས་སྐྱེས་མེད་པའི་རྟགས་རེད། དེས་ན་བློ་ཐག་རང་གིས་བཅད་ནས་མཚན་ལྡན་བླ་མ་མ་གཏོགས་གཞན་སུ་ཡི་ཁ་ལ་མི་ཉན་པ་སྨྱོན་པ་འུར་ལངས་པ་ལྟ་བུ་ཞིག་དགོས། འོན་ཀྱང་བློ་ལྡོག་རྣམ་བཞིས་རང་རྒྱུད་གྱོང་པོ་ལེགས་པར་ཐུལ་ནས་འཁོར་བའི་བྱ་བཞག་ཐམས་ཅད་ལ་སྙིང་པོ་མེད་པར་ཤེས་པ། དཔེར་ན་འཁྲིས་ནད་ཅན་ལ་བཙོ་ཟན་བྱིན་པ་ལྟ་བུའི་ཞེན་ལོག་གཏིང་ནས་སྐྱེས་མེད་ན་གློ་བུར་གྱི་ངེས་འབྱུང་སད་སུད་ལ་བརྟེན་ནས་བྱ་བྲལ་བྱེད་སྔ་བྱས་ཀྱང་། ཀོ་གྱོང་མཉེ་ངན་ཤོར་བ་ལྟར། བྱ་བྲལ་བྱ་བྱེད་མང་བ། གླང་མཇུག་སྐར་ཁུང་ཐོགས་པའི་དཔེ་ཡོད། ཡང་ངེས་འབྱུང་སྤུ་སུད་མས་དུས་མ་རན་གོང་ལ་རི་ཁྲོད་མཐོ་སར་སྙེགས་མདོག་བྱེད་ཀྱང་། ཉིན་གཅིག་རྟོགས་ལྡན་རྒས་ཁར་བཟའ་གཡོག་དང་། སྒོམ་ཆེན་ཕྱིར་ལྡོག་གིས་ལྷམ་ཀྲད་མཆིལ་རྡོག་ཟེར་བའི་དཔེ་ལྟར་ལས་མཐའ་ལོག་པའི་མཚོན་གཞི་ཡང་མང་པོ་ཡོད། མདོར་ན་དང་པོ་བློ་ལྡོག་རྣམ་བཞིས་རྒྱུད་ལེགས་པོ་ཞིག་སྦྱངས་ནས་ངེས་འབྱུང་དང་སྐྱོ་ཤེས་ཞེན་ལོག་དང་མོས་གུས་འགྱུར་བར་མེད་པར་སྙིང་ཐག་པ་ནས་རང་གིས་རང་ལ་ཡིད་ཆེས་གཏིང་ཚུགས་པ་ཞིག་རྒྱུད་ལ་སྐྱེས་ཏེ། གོང་དཔོན་པོའི་ཁ་ལ་མི་ཉན། འོག་སྡེ་བའི་མྱི་ཁར་མི་ཉུག དགྲ་འདུལ་འཕྲོ་དང་གཉེན་སྐྱོང་འཕྲོ་རུ་བསྐྱུར་ནས་རང་ཐག་རང་གིས་བཅད། སྣ་ཐག་མགོ་ལ་དཀྲིས་ནས་རི་དྭགས་སྙི་ནས་ཤོར་འདྲས། བསམ་རྒྱུ་བླ་མ་དང་དྲན་རྒྱུ་ཆོས་དང་སྡོད་གནས་དབེན་པ་མིན་མེད་པ་ཞིག་བྱེད་ནུས་ན་ལས་ཀ་ཐམས་ཅད་ཀྱི་ནང་གི་མཆོག་ཡིན། དེ་ལྟར་བྱས་ཚེ་མཐུན་རྐྱེན་ལྷ་དང་མིས་སྦྱར་བས་ཆོས་པ་མུ་གེས་ཤི་བའི་དཔེ་མེད། ལར་ཆོས་ཕྱིར་དཀའ་བ་སྤྱད་ནས་ཤི་ཐུབ་ན་བུ་དཔའ་བོའི་ནང་གི་ཡང་རབ་རེད། ལུས་ངག་གཉིས་པོ་གཡོག་པོ་དང་འདྲ་བ་ཡིན་པས་གོ་ཆེན་པོ་མི་ཆོད་ཀྱང་སེམས་རྒྱལ་པོ་འདྲ་བ་ཆོས་ལ་ཕྱོགས་ནས་ཡང་དག་པར་བསྒྲུབ་དགོས། སྤྱིར་འཇིག་རྟེན་གྱི་བྱ་བ་ཙམ་ལ་ཡང་མྱི་དྲ་མ་ཞིག་མེད་ན་མི་འགྲུབ་ན། ཆོས་སྒྲུབ་པ་ལ་དེ་ལས་ཀྱང་བུ་བཟང་སྙིང་སྟོབས་ཅན་བསམ་ཚར་ནས་ཕྱིར་ལྡོག་མེད་པ་ཞིག་ཡིན་ན་ཆོས་འགྲུབ་སྲིད། དེས་ན་ཆོས་སྒྲུབ་པའི་ཆ་རྐྱེན་ཚང་བའི་སྐབས་སུ་བློ་ཐག་རང་གིས་བཅད་ནས་ཆོས་མགོ་རྔ་ཚང་བ་ཞིག་སྒྲུབ་དགོས། སྐྱབས་འགྲོ་དང་སེམས་བསྐྱེད་གཉིས་པོ་འདི་ཆོས་ཐམས་ཅད་ཀྱི་རྩ་བ་ལྟ་བུ་ཡིན་ལ། སྐྱབས་སེམས་གཉིས་ཀྱི་སྡོམ་པ་དེ་ཡང་བླངས་པ་ཙམ་གྱིས་མི་ཆོག་པར་བསྲུང་བྱ་སྡོང་པོ་ལྟ་བུ་དེ་སྲུང་དགོས། བསྲུང་སྡོམ་སྡོང་པོ་ལྟ་བུ་དེ་མེད་ན་ལྟ་སྤྱོད་མེ་ཏོག་ལྟ་བུའི་དེ་མི་སྐྱེ། དེ་མ་སྐྱེས་ན་བསྐྱེད་རྫོགས་འབྲས་བུ་ལྟ་བུའི་ཆོས་དེ་མི་སྨིན་པ་ཡིན་པས་ལམ་ཐམས་ཅད་ཀྱི་རྩ་བ་སྐྱབས་འགྲོ་སེམས་བསྐྱེད་འདི་གཉིས་ལ་ཐུག་ཡོད་པས་ཤིན་ཏུ་ནན་ཏན་བྱེད་དགོས། འདི་གཉིས་ནི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གི་སྙིང་པོ་དྲིལ་དྲིལ་བ་ཡིན་ཞིང་། ཐེག་པ་རིམ་པ་དགུའི་རྩ་བའང་ཡིན་པ་རེད། སྐྱབས་སེམས་གཉིས་དང་མ་འབྲེལ་བའི་ཆོས་ཐམས་ཅད་ཤི་བའི་རོ་དང་འདྲ་བ་ཡིན་གསུངས་ཡོད། མདོར་ན་དཀོན་མཆོག་གསུམ་ལ་ཡིད་ཁྱེད་ཤེས་ཀྱི་དད་པས་བློ་གཏད། སེམས་ཅན་ཐམས་ཅད་ཕ་མ་ཡིན་པར་ཤེས་ནས་གནས་སྐབས་ཀྱི་ཕན་པ་དང་། མཐར་ཐུག་གི་བདེ་བ་སངས་རྒྱས་ཀྱི་ས་ལ་བཀོད་འདོད་ཀྱི་བློ་དང་མི་འབྲལ་བ་འདི་སྐྱབས་འགྲོ་སེམས་བསྐྱེད་གཉིས་ཀྱི་ནང་དོན་དངོས་ཡིན། དེས་ན་སྐྱབས་འགྲོ་སེམས་བསྐྱེད་ལ་སྦྱོང་བའི་སྐབས་སུ་ཚིག་གི་སྤུ་ལ་མི་འཇུ་བ་དོན་གྱི་རྐང་པ་ནས་བཟུང་སྟེ། རང་གི་རྒྱུད་ལ་སྦྱར་ནས་ཉམས་སུ་ལེན་དགོས་གསུངས་པ་རེད། ཉམས་སུ་ལེན་པར་བྱེད་པ་ལ་ཐུན་སྡོམ་རྒྱུ་གནད་ཆེའོ། །དེ་ཡང་ཐུན་སྡོམ་པ་སོགས་ཆོས་སྒྲུབ་པ་རྣམས་ལ་ངོ་ཚ་མི་དགོས་ཏེ། གཞན་དུ་མནའ་ཟ་ཁྲེལ་འགམ་རྒྱུ་འབྲས་སྣོག་པ་སོགས་ལ་ངོ་མ་ཚ་ན། རང་གཞན་གཉིས་ཀའི་དོན་དུ་དམ་པའི་ཆོས་སྒྲུབ་པ་ལ་ངོ་ཚ་དགོས་དོན་མེད་ལ། དེ་བས་ཆོས་མེད་གཅེར་བུ་ལག་སྟོང་ཤི་ཁར་བྲང་ལག་འཐབ་དུས། ངོ་ཚ་ནི་སྡུག་ནི་གཉི་ག ཡི་མུག་ནི་ཞིག་དང་སུམ་འཛོམས་རེད་འོང་བས། ཐོག་མར་བློ་ལྡོག་རྣམ་བཞིས་རྒྱུད་ལེགས་པོ་སྦྱངས། དེ་ནས་སྐྱབས་འགྲོ་དང་སེམས་བསྐྱེད་གཉིས་ལ་གོ་བ་བཟང་པོ་ཞིག་སྐྱེས་པ་དང་ཚད་མེད་བཞིས་རང་གི་རྒྱུད་སྦྱངས་ནས་སྐྱབས་སེམས་གཉིས་ཀྱི་སྡོམ་པ་ལེན་དགོས། གཞན་ཡང་ཚོགས་བསགས་སྒྲིབ་སྦྱོང་ལ་བརྟེན་ཏེ་བླ་མའི་རྣལ་འབྱོར་དང་འཕོ་ལུང་ལ་སོགས་པ་མྱུར་ལམ་ཁྱད་པར་ཅན་གྱིས་རང་གཞན་གཉིས་ཀྱི་དོན་སྒྲུབས་དང་། སྐྱེ་བ་སྐྱེད་མོའི་ཚལ་འགྲོ་ལྟར་རྟོགས་ཏེ། །ཟེར་བ་ལྟར་བྱ་ངང་པའི་རྒྱལ་པོ་པདྨའི་མཚོ་ནས་པདྨའི་མཚོ་གཞན་དུ་འགྲོ་བ་ལྟ་བུ་ཞིག་རེད་རྒྱུར། མ་མཐོང་རྒྱང་གི་གཏམ་རྒྱུད་དང་ནམ་མཁའི་འཇའ་ལྟ་བུ་མ་ཡིན་པར་ལག་ལ་ལེན་ཐུབ་པ་ནི་ནམ་ཡང་བསླུ་བ་མེད། དེས་ན་ཆོས་སྒྲུབ་པ་ལ་བརྩོན་འགྲུས་སྲོག་དང་བསྡོས་ནས་ཉམས་ལེན་རྒྱུན་མ་ཆད་པར་བྱེད་རྒྱུ་གལ་ཤིན་ཏུ་ཆེ་བ་ཡིན་ནོ། །ད་ལྟ་སྐབས་སུ་བབས་པ་གང་གསན་པར་བྱ་བའི་ཆོས་ཀྱི་རིམ་པ་ནི། ཐུན་མིན་ནང་གི་སྔོན་འགྲོའི་དང་པོ་ལམ་ཐམས་ཅད་ཀྱི་རྨང་རྡོ་སྐྱབས་སུ་འགྲོ་བའི་ཁྲིད་གོང་དུ་སོང་ནས། དེ་རིང་གཉིས་པ་ཐེག་ཆེན་ལམ་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་པ་དངོས་འཆད་པ་ཡིན་ལ། དམིགས་པ་མེད་པའི་ཤེས་རབ་ཆེན་པོས་ཞི་བ་མྱ་ངན་ལས་འདས་པའི་གོ་འཕང་མངོན་དུ་མཛད་དེ་ཡེ་ནས་རྫོགས་སངས་རྒྱས་ཟིན་ཀྱང་། ཐབས་བརྩེ་བར་སྙིང་རྗེ་ཆེན་པོས་འཁོར་བའི་སེམས་ཅན་ཀུན་ཡལ་བར་མི་འདོར་ཞིང་གཞན་དོན་རླབས་ཆེན་དང་དུ་བླངས་པར་མཛད་ནས། ཐབས་ལ་མཁས་པས་འཁོར་འདས་དབྱེར་མེད་རོ་མཉམ་ཆེན་པོ་རྟོགས་པ། མཚུངས་མེད་བླ་མའི་ཞབས་ལ་ཕྱག་འཚལ་ལོ་ཞེས་ཕྱག་འཚལ་སྔོན་དུ་གསུངས་ནས། སྤྱིར་ཐེག་ཆེན་ལམ་གྱི་རྩ་བ་གཅིག་པུ་གང་ཡིན་ན་བྱང་ཆུབ་མཆོག་ཏུ་སེམས་བསྐྱེད་པ་འདི་ཉིད་ཡིན། དེ་ལ་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་ཡོད། ལས་དང་པོ་བས་ཀུན་རྫོབ་བྱང་ཆུབ་སེམས་ཀྱིས་ཟིན་ན་ཐེག་པ་ཆེ་ཆུང་གི་ཆོས་གང་བསྒྲུབས་ཀྱང་ཐེག་ཆེན་གྱི་ཆོས་སུ་འགྲོ་བ་ཡིན། དཔེར་ན་སོར་སྡོམ་ལྟ་བུ་ཞུ་བའི་སྐབས་ལ་མཚོན་ན། ཆོ་ག་ཐེག་དམན་གྱི་ལུགས་ཡིན་ཡང་བསམ་པ་སེམས་བསྐྱེད་ཀྱིས་ཟིན་ན་ཐེག་ཆེན་སོ་ཐར་དུ་འགྱུར་བ་ལྟ་བུ་ཡིན། དེས་ན་ལས་དང་པོ་བ་ལ་ཀུན་རྫོབ་བྱང་ཆུབ་ཀྱི་སེམས་གཙོ་ཆེ་ཞིང་ལྟ་བ་གྲོགས་ལ་ཡོད་དགོས་པས་ཐོག་མར་བསམ་པ་བཟང་པོ་ཞིག་ཡོད་དགོས་པ་གལ་ཤིན་ཏུ་ཆེ། བསམ་པ་བཟང་ན་ས་དང་ལམ་ཡང་བཟང་། །བསམ་པ་ངན་ན་ས་དང་ལམ་ཡང་ངན། །ཞེས་གསུངས་པ་ལྟར་ཟིན་བྲིས་ལས། བསམ་པ་བཟང་ན་ས་བཟང་པོ་ས་བཅུ། ལམ་བཟང་པོ་ལམ་ལྔ། བསམ་པ་ངན་ན་ས་ངན་པ་ཁམས་གསུམ་ས་དགུ། ལམ་ངན་པ་ལམ་རྒྱུད་ལྔའི་འགྲོ་བ་ལ་འགྲོ་གསུངས། ལས་དང་པོ་བ་ལ་ལྟ་སྒོམ་གཉིས་ལས་ཀྱང་དང་པོ་བསམ་པ་བཟང་པོ་ཞིག་ཡོད་པ་གལ་ཆེ། དེ་དང་བྲལ་ན་སྟོང་ཉིད་ཉི་ཚེ་བ་ཞིག་རྟོགས་ཀྱང་ཕན་པ་མེད་དེ། སྟོང་ཉིད་ཉན་ཐོས་རྣམས་ཀྱིས་བསྒོམས། །དེ་ཡི་འབྲས་བུ་འགོགས་པ་ཡིན། །ཞེས་གསུངས་པ་ལྟར་རོ། །ངེས་དོན་མཐར་ཐུག་གི་སྐྱེལ་སོ་ལ་དོན་དམ་བྱང་ཆུབ་སེམས་ཀྱིས་མཐར་ཐུག་གི་འབྲས་བུ་ཐོབ་དགོས་ཀྱང་། ལམ་ལ་སློབ་པའི་གང་ཟག་གིས་ཐོག་མར་བསམ་པ་བཟང་པོ་ཞིག་གིས་འགོ་བརྩམས་ནས་ཚད་མེད་བཞིས་བློ་སྦྱངས་ཏེ་རིམ་གྱིས་སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་རང་རྒྱུད་ལ་སྐྱེ་བའི་ཐབས་ལ་འབད་དགོས། གཉིས་པ་ཐེག་ཆེན་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་པའི་ཁྲིད་ལ་གསུམ། བྱང་ཆུབ་སེམས་རིན་པོ་ཆེ་མ་སྐྱེས་པ་སྐྱེད་པར་བྱེད་པ་ཚད་མེད་བཞིས་བློ་སྦྱོང་བ། སྐྱེས་པ་མི་ཉམས་པར་གོང་ནས་གོང་དུ་འཕེལ་བར་བྱེད་པ་བྱང་ཆུབ་མཆོག་ཏུ་སེམས་བསྐྱེད་པ། སྨོན་འཇུག་གི་བསླབ་བྱ་བཟུང་བའོ།།

༼༡ཚད་མེད་བཞིའི་བློ་སྦྱོང་བ།

དང་པོ་ཚད་མེད་བཞིའི་བློ་སྦྱོང་བ་ལ། སྤྱིར་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་བཞི་ལས། སེམས་ཅན་ཐམས་ཅད་བདེ་བ་རྒྱུ་འབྲས་གཉིས་དང་ལྡན་འདོད་བྱམས་པ་དང་། སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་འདོད་སྙིང་རྗེ་དང་། སེམས་ཅན་ཐམས་ཅད་བདེ་དང་མི་འབྲལ་བར་འདོད་པ་དགའ་བ་ཡིན། སེམས་ཅན་ཐམས་ཅད་ཆགས་སྡང་གཉིས་དང་བྲལ་བ་འདོད་པ་བཏང་སྙོམས་ཡིན་ཏེ། བྱམས་པས་ས་གཞི་སྙིང་རྗེའི་མེ་ཏོག་བཀྲམ། །དགའ་བས་གྲིབ་བསིལ་བཏང་སྙོམས་ཆུ་གཙང་གིས། །འགྲོ་ལ་ཕན་ཕྱིར་རང་གི་སེམས་སྦྱོང་ངོ་། །ཞེས་གསུངས་པ་ལྟར་གཞུང་བཤད་པའི་གོ་རིམ། ཐོག་མར་བྱམས་པ་ནས་སྨོས་ཀྱང་། འདིར་མན་ངག་གི་ལུགས་ལྟར་ཉམས་སུ་བླངས་ནས་རིམ་པ་བཞིན་བློ་སྦྱོང་བའི་ཚེ། དང་པོ་བཏང་སྙོམས་ནས་མ་སྦྱངས་ན། བྱམས་པ་དང་སྙིང་རྗེ་སོགས་བསྒོམ་ཡང་ཚད་མེད་མ་ཡིན་པར་དམིགས་རྣམ་ཁོལ་བུ་བ་ཕྱོགས་རིས་ཅན་དུ་ཤོར་ནས་རྣམ་པར་དག་པ་ཞིག་མི་འོང་བ་ཡིན་པས། དེས་ན་དང་པོ་བཏང་སྙོམས་ནས་བློ་སྦྱོང་བ་ཡིན། སེམས་ཅན་ཆགས་སྡང་གཉིས་དང་བྲལ་བར་འདོད་པ་བཏང་སྙོམས་ཀྱི་ངོ་བོ་ཡིན། དེ་ལའང་དམིགས་བཅས་ཀྱི་ཚད་མེད་དང་དམིགས་མེད་ཀྱི་ཚད་མེད་གཉིས་ཡོད། དམིགས་བཅས་ཀྱི་ཚད་མེད་སྒོམ་དུས་དམིགས་རྣམ་སྤྲད་ནས་སྒོམ་དགོས། དམིགས་རྣམ་གྱི་དོན་ནི་དམིགས་པ་ཡུལ་དང་རྣམ་པ་བློ་གཉིས་ཀྱི་ཐོག་ནས་གསུངས། བཏང་སྙོམས་ཀྱི་དམིགས་ཡུལ་ནི། རང་རྒྱུད་ཀྱི་ཆགས་སྡང་གཉིས་དང་གཞན་རྒྱུད་ཀྱི་ཆགས་སྡང་གཉིས་ཡིན། རྣམ་པ་བློ་ནི་དེ་གཉིས་ཀ་སྙོམས་པར་འདོད་པ་ཞིག་ཡིན། ཆགས་སྡང་གི་བློ་ཞི་ནས་ཕན་འདོགས་པར་འདོད་པ་ཡིན། དམིགས་མེད་ནི། ལས་དང་པོ་བས་སྒྱུ་མ་དང་རྨི་ལམ་ལྟ་བུ་བློ་སྦྱངས་ནས་བསྒོམ་དགོས། རྟོགས་པ་མཆོག་ལྡན་ཞིག་ཡིན་ན། རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །ཅེས་གསུངས་པ་ལྟར་མཉམ་བཞག་དེའི་རྩལ་ཚད་མེད་བཞི་བསྒོམ་པ་ཡིན་ནོ།།

༡༽བཏང་སྙོམས་ཚད་མེད།

བཏང་སྙོམས་ཞེས་བྱ་བ་ནི། དགྲ་ལ་ཞེ་སྡང་མི་བྱེད་པར་ཆགས་སྡང་གི་སེམས་བཏང་། གཉེན་ལ་དགའ་གདུང་མི་བྱེད་པར་དགའ་གདུང་གི་སེམས་བཏང་། སེམས་ཅན་ཐམས་ཅད་ལ་ཕྱོགས་དང་རིས་སུ་ཆད་པའི་ཉེ་རིང་དང་དགའ་སྡུག་གི་ཆགས་སྡང་མེད་པར་ཐམས་ཅད་སྙོམས་པ་ལ་བཏང་སྙོམས་ཞེས་བྱ། ད་ལྟ་སོ་སོའི་སྐྱེ་བོའི་གནས་སྐབས་ན་རང་ཉིད་ཀྱི་ཕ་མ་དང་གཉེན་འདུན་ལ་སོགས་རང་ཕྱོགས་ལ་ཤིན་ཏུ་ཆགས་ཤིང་དགའ་གདུང་ཡོད་པ་དང་། དགྲ་དང་དགྲ་དེའི་ཕྱོགས་སུ་གཏོགས་པ་རྣམས་ལ་སྡང་ཞེན་མི་བཟད་པར་བྱེད་པ་འདི་ཡང་ཞིབ་ཏུ་མ་བརྟགས་པའི་སྐྱོན་ཡིན། འདི་ལྟར་ནམ་མཁས་གར་ཁྱབ་སེམས་ཅན་གྱི་ཁྱབ། སེམས་ཅན་གྱིས་གར་ཁྱབ་ལས་སྣང་དང་སྡུག་བསྔལ་བསམ་གྱིས་མི་ཁྱབ་པའི་ཁྱབ་ཡོད། ལས་སྣང་སྡུག་བསྔལ་གྱིས་མནར་བའི་སེམས་ཅན་འདི་དག་ཐམས་ཅད་ཐོག་མ་མེད་པའི་དུས་ནས་ཕ་མ་དང་གཉེན་བཤེས་ལ་སོགས་པ་མ་བྱས་པ་གཅིག་ཀྱང་མེད། དེའི་ནང་ནས་སྙིང་ཉེ་བའི་ད་ལྟའི་མ་འདི་བཞིན་ཚེ་རབས་སྔ་མ་རྣམས་སུ་ད་ལྟའི་དགྲ་འདི་རྣམས་ཀྱིས་ཀྱང་རང་གི་གཉེན་བྱས་ནས་བརྩེ་བས་འགྲོགས། ཕན་ཚུན་མཐུན་པས་བསྐྱངས། ཕན་བཏགས་པ་ཡང་བསམ་གྱིས་མི་ཁྱབ། ད་ལྟ་ཕ་མ་དང་གཉེན་ཉེ་རིང་དུ་བརྩི་བ་འདི་རྣམས་ཀྱང་ཚེ་རབས་སྔ་མ་ལ་རང་གི་དགྲར་གྱུར་ཏེ་ནོར་དང་སྲོག་འཕྲོག་པ་དང་མགོ་དང་ཡན་ལག་བཅད་པ་ལ་སོགས་གྲངས་ཀྱིས་མི་ཆོད་པ་ཡིན་པས་ན་འདི་དག་གིས་གནོད་པ་བྱས་པ་ཡང་དུ་མ་ཡོད་པ་སྔར་བཤད་པ་ལྟར། འཕགས་པ་ཀ་ཏྱཱ་ནས། ཕ་ཤ་ཟ་ཞིང་མ་ལ་རྡེག །ལས་ངན་དགྲ་བོ་པང་ན་བཟུང་། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་བྲོ། །ཞེས་གསུངས་པ་ལྟར་དང་། དེར་མ་ཟད་སྔོན་ཆོས་རྒྱལ་ཁྲི་སྲོང་ལྡེའུ་བཙན་གྱི་སྲས་མོ་ལྷ་ལྕམ་པདྨ་གསལ་ཞེས་བྱ་བ་དགུང་ལོ་བཅུ་བདུན་ལོན་པ་ཞིག་འདས་སྐབས། ཆོས་རྒྱལ་གྱིས་སློབ་དཔོན་རིན་པོ་ཆེ་ལ་ཞུས་ཏེ། བདག་གི་སྲས་མོ་ལྷ་ལྕམ་འདི་ལས་དག་པ་ཞིག་ཀྱང་ཡིན་པ་འདྲ་སྟེ། བདག་རྒྱལ་པོ་ཁྲི་སྲོང་ལྡེའུ་བཙན་གྱི་བུ་མོར་སྐྱེས། ཁྱེད་ལོ་པཎ་སངས་རྒྱས་དངོས་ལྟ་བུ་འདི་ཙམ་གྱི་ཞལ་མཇལ་བ་ཡིན། འོན་ཀྱང་ལས་མ་དག་པ་ཞིག་ཀྱང་འདྲ་སྟེ་ཚེ་ཐུང་ངུ་འདི་ལྟ་བུ་འབྱུང་བ་འདི་རྒྱུ་མཚན་ཇི་ལྟར་ལགས། ཞུས་པས། སློབ་དཔོན་དུས་གསུམ་མཁྱེན་པ་པདྨ་འབྱུང་གནས་གྱི་ཞལ་ནས་ཁྱེད་ཀྱི་སྲས་མོ་ལྷ་ལྕམ་འདི་ལས་དག་པས་ཁྱེད་ཀྱི་སྲས་མོར་སྐྱེས་པ་ཅི་ཡང་མིན། སྔོན་པདྨ་འབྱུང་གནས་བདག་དང་ཆོས་རྒྱལ་ཆེན་པོ་ཁྱེད་རང་དང་། མཁན་ཆེན་བོ་དྷི་ས་ཏྭ་རྣམས་རྟ་རྫི་ཁྱི་རྫི་ཕག་རྫིས་བཤོས་པའི་རིགས་ངན་གྱི་བུ་གསུམ་དུ་སྐྱེས་ནས། འོ་ཅག་མཉམ་དུ་བལ་ཡུལ་གྱི་མཆོད་རྟེན་ཆེན་པོ་བྱ་རུང་ཁ་ཤོར་བཞེངས་པའི་སྐབས་སུ་ལྷ་ལྕམ་འདི་སྦྲང་བུ་ཏྲེ་མ་ཞིག་གི་ལུས་བླངས་ནས་ཡོད་པས། རྒྱལ་པོ་ཉིད་ཀྱི་རྩེའུ་ཆུང་སྟེ་སྒྲོག་རུས་ནས་གྱེན་དུ་སོར་བཞི་གཞལ་བའི་གནས་སུ་རྣ་ཤལ་གྱི་རྗེས་སུ་འབྲངས་པའི་གཏར་རྩ་ལ་ཟོས་པའི་ཚེ། རྒྱལ་པོས་དྲན་མེད་དུ་ཕྱག་གིས་བྱབས་པས་སྦྲང་བུ་ཤི་བར་གྱུར་པ་དེའི་ཚེ་སྲོག་གི་ལན་ཆགས་ཀྱིས་ཁྱེད་ཀྱི་སྲས་མོ་སྐྱེས་པ་ཡིན་གསུངས། ཆོས་རྒྱལ་ཁྲི་སྲོང་ལྡེའུ་བཙན་རྗེ་བཙུན་འཇམ་དཔལ་དབྱངས་དངོས་ཀྱི་སྤྲུལ་པ་ལ་ཡང་དེ་ལྟ་བུའི་ལན་ཆགས་ཀྱི་བུ་རྒྱུད་ཡོད་ན་སོ་སོའི་སྐྱེ་བོ་ལས་ཉོན་གྱིས་འཕངས་པ་གཞན་ལ་ལྟ་ཡང་ཅི་སྨོས། དེས་ན་ད་ལྟ་རང་རེ་ཕ་མ་དང་བུ་རྒྱུད་དུ་འབྲེལ། གཞན་དང་མི་འདྲ་བའི་བརྩེ་གདུང་དང་སྙིང་ཉེ་བའི་འདུན་པ་བསམ་གྱིས་མི་ཁྱབ་པ་བྱེད། ཕ་མ་དང་གཉེན་གྲོགས་སོགས་དེ་དག་ལ་སྡུག་བསྔལ་དང་མི་འདོད་པ་བྱུང་ན་རང་ལ་བྱུང་བ་ལས་ཀྱང་ཐུ་བའི་མྱ་ངན་དང་སྡུག་བསྔལ་འབྱུང་བ་རྣམས་ཀྱང་། སྐྱེ་བའི་ཚེ་རབས་སྔོན་མ་ལ་གཅིག་གིས་གཅིག་ལ་གནོད་པ་བསྐྱལ་བའི་ལས་ཀྱི་ལན་ཆགས་འཁོར་བ་ཤ་སྟག་ཡིན་པ་གདོན་མི་ཟ། ད་ལྟ་རང་གི་ཞེ་སྡང་གི་ཡུལ་དགྲ་རུ་གྱུར་པ་འདི་རྣམས་ཀྱང་ཚེ་རབས་སྔ་མ་རྣམས་སུ་ཕ་མ་དང་གཉེན་ཉེ་མ་བྱས་པ་ནི་སུ་ཡང་མེད། ད་ལྟ་ཡང་དགྲ་ལ་དགྲར་བཟུང་ཡང་། གཟུར་བ་སོགས་ཀྱིས་མཁོན་པ་བསྡུམས་ནས་གཉེན་དུ་སྦྲེལ་བའམ། ཡང་ན་ནོར་དང་ཚིག་གིས་ཤད་སྦྱངས་ཏེ་ཕན་ཚུན་ནང་འགྲིགས་ཏེ་མཐུན་པོ་འོང་སྲིད་པས་དེས་རང་ལ་མཐའ་གཅིག་ཏུ་གནོད་པ་བྱེད་པའི་ངེས་པའང་མེད་དེ། རང་གིས་ཕར་དགྲར་བཟུང་ཡང་དེས་ཚུར་ལ་དགྲར་མི་འཛིན་པ་དང་། དགྲར་འཛིན་ཀྱང་གནོད་པ་སྐྱེལ་མི་ནུས་པ་ཡང་ཡོད་ལ། འཕྲལ་དུ་གནོད་པ་བསྐྱལ་ཡང་དེའི་རྒྱུས་དཔའ་ཁ་དང་རྒྱལ་ཁ་སོགས་ཐོབ་ནས་རང་གི་ཚེ་འདིའི་སྙན་གྲགས་འཕེལ་བ་དང་། དགྲས་གནོད་པ་བྱས་པའི་རྐྱེན་གྱི་ངེས་པར་འབྱུང་བའི་བློ་སྐྱེས་ཏེ། དམ་པའི་ཆོས་དང་མཇལ་བ་སོགས་མཐར་ཐུག་རང་གི་ཕན་བདེའི་རྒྱུར་འགྱུར་བ་ཡང་ཡོད། རང་གི་ཐབས་ཀྱིས་དེའི་ཡིད་དང་བསྟུན་ནས་འཇམ་པོའི་ཚིག་གིས་ཤད་སྤྱངས་ཏེ་མཐུན་པར་བྱས་ན། དགྲ་ཡིན་ཡང་གཉེན་དུ་འགྱུར་བ་ལ་ཡང་ཚེགས་མེད། དེ་བཞིན་དུ་ད་ལྟ་གཉེན་དུ་བཟུང་བ་རྣམས་ཀྱང་བུ་ཚས་ཕ་མ་བསླུས་པ་དང་གསོད་པ་སོགས་བྱེད་པ་ཡང་ཡོད་ཅིང་། རང་དང་མི་མཐུན་པའི་འགལ་ཟླ་རྣམས་དང་བསྡོངས་ནས། དེའི་ཕྱོགས་བཟུང་སྟེ་ནོར་འཕྲོག་རྩོད་པ་འགྱེད་པ་སོགས་དུ་མ་ཡོད་པ་དང་། གལ་ཏེ་མཐུན་པ་ལྟར་ཡོད་ན་ནི། དེ་ལ་སྡུག་བསྔལ་དང་མི་འདོད་པ་སོགས་བྱུང་ན་རང་ལ་བྱུང་བ་ལས་ཀྱང་ཐུ་བའི་སྡུག་བསྔལ་མྱོང་བ་དང་། གཉེན་དང་བུ་ཚ་ལ་སོགས་པ་དེ་དག་གི་ཆེད་དུ་སྡིག་རླབས་པོ་ཆེ་བསགས་ནས་ཕྱི་མ་དམྱལ་བར་འཕེན་པ་དང་། རང་གི་ཆོས་ཡང་དག་པ་ཞིག་བསྒྲུབ་པར་འདོད་ཀྱང་དེ་དག་གིས་བཤོལ་འདེབས་པ་དང་། ཕ་མ་དང་བུ་བརྒྱུད་སོགས་བློས་མ་ཐོང་བས་ཆོས་ཕྱི་བཤོལ་དུ་ལུས་ནས་བསྒྲུབ་ལོང་མི་འབྱུང་བ་སོགས་དགྲ་ལས་ཀྱང་ཐུ་བའི་གནོད་པ་སྐྱེལ་བ་ཡིན། དེ་བཞིན་དུ་སྐྱེ་བ་ཕྱི་མ་ཕན་ཆད་ལ་ཡང་ད་ལྟ་རང་གིས་དགྲར་འཛིན་པ་འདི་དག་རང་གི་བུ་རྒྱུད་དུ་སྐྱེ་བ་དང་། གཉེན་རྣམས་དགྲར་སྐྱེ་བ་སོགས་ངེས་པ་མེད། དེས་ན་དགྲ་གཉེན་གྱི་སྣང་བ་སྐད་ཅིག་མ་འདི་ལ་བདེན་པར་བཟུང་ནས་ཆགས་སྡང་གིས་ལས་ངན་བསགས། རང་ཉིད་ངན་སོང་གི་གཏིང་རྡོ་བྱེད་པ་ཞིག་བྱས་པ་ལ་དགོས་པ་ཅི་ཡོད། དེས་ན་རང་གིས་མཐའ་ཡས་པའི་སེམས་ཅན་ཐམས་ཅད་ལ་ཕ་མ་དང་བུ་ཚའི་འདུ་ཤེས་ཉེ་བར་བཞག་སྟེ། སྔོན་གྱི་དམ་པ་གོང་མའི་རྣམ་ཐར་བཞིན་དགྲ་གཉེན་མཉམ་པ་ཉིད་དུ་བལྟ་བར་བྱའོ་སྙམ་དུ་བསམ་ཞིང་། ཞེས་ཚད་མེད་བཞི་འདི་སྒོམ་པའི་སྐབས་སུ་སྒོམ་ཚུལ་ལ་དཔྱད་སྒོམ་དང་འཇོག་སྒོམ་གཉིས་ཀ་བྱེད་དགོས། བྱམས་པ་དང་བྱམས་པའི་ཏིང་ངེ་འཛིན། སྙིང་རྗེ་དང་སྙིང་རྗེའི་ཏིང་ངེ་འཛིན། དགའ་བ་དང་དགའ་བའི་ཏིང་ངེ་འཛིན། བཏང་སྙོམས་དང་བཏང་སྙོམས་ཀྱི་ཏིང་ངེ་འཛིན་རྣམས་དཔྱད་འཇོག་གཉིས་ཀྱི་སྒོ་ནས་བསྒོམ་དགོས། འདིའི་སྒོམ་འདི་ཞི་ལྷག་གཉིས་ཀྱི་ནང་ནས་གཙོ་ཆེར་ཞི་གནས་ཟེར་དགོས། སྒོམ་ལུགས་དེ་ལ་ཡང་གཞུང་དང་མན་ངག་གི་ལུགས་གཉིས་ཡོད་ན་འདི་ནི་མན་ངག་ལྟར་སྒོམ་པ་ཡིན། དངོས་གཞི་བསྒོམ་པའི་སྐབས་སུ་རང་གི་གཡས་སུ་དགྲ་དང་། གཡོན་དུ་གཉེན་བསམས་ནས་དང་པོ་དགྲ་གཉེན་གཉིས་ལ་ཆགས་སྡང་སློང་ངེས་པ་རེ་བྱས་ཏེ། དེ་ནས་དུས་གསུམ་ལ་བསམ་ནས་དགྲ་གཉེན་ངེས་པ་མེད་ཚུལ་ལ་བློ་སྦྱོང་། དེ་ཡང་དང་པོ་རང་གི་ཡིད་ལ་ཤིན་ཏུ་མི་དགའ་ཞིང་ཁོང་ཁྲོ་དང་ཞེ་སྡང་དྲག་པོ་སྐྱེ་བའི་ཡུལ་རྣམས་ལ་ཐབས་དང་རྣམ་པ་དུ་མའི་སྒོ་ནས་ཁོང་ཁྲོ་དང་ཞེ་སྡང་མི་སྐྱེ་བའི་ཚུལ་ལ་བློ་སྦྱངས་ནས། དེ་དག་རང་བཞིན་གྱི་མི་ཕན་གནོད་གང་ཡང་མེད་པའི་བར་མ་རྣམས་དང་འདྲ་ཞིང་སྙོམས་པར་བྱ། དེ་ནས་བར་མ་རྣམས་ཀྱང་ཚེ་རབས་ཐོག་མ་མེད་པའི་དུས་ནས་རང་གི་ཕ་མ་དང་གཉེན་ཚན་བྱས་པ་ལ་གྲངས་ཀྱིས་མི་ཆོད་པ་སོགས་ལ་བསམས་ནས། ད་ལྟ་སྐྱེ་བ་འདིའི་ཕ་མ་གཉེན་ཚན་དངོས་དང་འདྲ་བར་བརྩེ་གདུང་གི་བློ་མ་སྐྱེས་བར་དུ་བློ་སྦྱང་ཞིང་རིམ་གྱིས་བསྒོམ། མཐར་དགྲ་གཉེན་བར་མ་གསུམ་གང་རུང་དུ་སྣང་བའི་སེམས་ཅན་ཐམས་ཅད་རང་གི་ཚེ་འདིའི་ཕ་མ་དང་ཁྱད་མེད་དུ་སྙིང་རྗེའི་བློ་མ་སྐྱེས་བར་དུ་བསྒོམ། དེ་ལྟར་མ་བྱུང་ན་ད་ལྟའི་གཉེན་ཡང་སྔོན་ཆད་ཀྱི་དགྲ་རེད། ད་ལྟའི་དགྲ་ཡང་སྔོན་ཆད་ཀྱི་གཉེན་རེད་འདུག་པས་གཉེན་གྱིས་ཀྱང་ཕན་གནོད་གཉིས་ཀ་བྱས་དགྲས་ཀྱང་ཕན་གནོད་གཉིས་ཀ་བྱས་པས་དགྲ་ལ་གནོད་མི་སྐྱེལ། གཉེན་ལ་ཕན་མི་བཏགས་བསམ་ནས་རང་བཞིན་དུ་དགྲ་གཉེན་གང་ལ་ཡང་སྙིང་རྗེ་དང་ཞེ་སྡང་སོགས་མི་སྐྱེ་བར་སྙོམས་པ་ཙམ་བྱུང་ཡང་། དེ་ནི་ཕན་མེད་གནོད་མེད་གཏི་མུག་བཏང་སྙོམས་པ་ཞེས་བྱ་སྟེ་བཏང་སྙོམས་ཚད་མེད་པའི་གོ་མི་ཆོད་ཀྱང་དང་པོ་འདི་ལྟ་བུ་ལ་བརྟེན་ནས་བཏང་སྙོམས་ཚད་མེད་སྐྱེ་དགོས་པ་ཞིག་ཀྱང་ཡིན་པས་འདི་ཡང་བསྒོམ་དགོས། དེས་ན་བཏང་སྙོམས་ཚད་མེད་པ་དྲང་སྲོང་གིས་མགྲོན་འགྱེད་པ་ལྟ་བུ་ཞེས་བྱ་བ། དཔེར་ན་དྲང་སྲོང་རྣམས་ཀྱིས་མགྲོན་ནམ་སྟོན་མོ་འགྱེད་པའི་ཚེ། ཡུལ་མཐོ་དམན་དྲག་ཞན་བཟང་ངན་རབ་འབྲིང་ཐམས་ཅད་ལ་ཁྱད་མེད་པར་འགྱེད་པ་དང་མཚུངས་པར། ནམ་མཁས་གར་ཁྱབ་ཀྱི་སེམས་ཅན་ཐམས་ཅད་སྙིང་རྗེ་ཆེན་པོའི་ཡུལ་དུ་མཉམ་ཞིང་སྙོམས་པ་ཞིག་དགོས་པ་ཡིན་པས། དེ་ལྟར་མ་བྱུང་གི་བར་དུ་ཡང་ཡང་བློ་སྦྱོང་། དེ་འདྲ་འོང་བར་བྱེད་པ་ལ་སེམས་ཅན་ཐམས་ཅད་མར་ཤེས་དྲིན་དྲན་དྲིན་ལན་གཟོ་འདོད་རྣམས་ལ་བསྒོམས་ནས་ཡང་དག་པ་སྐྱེས་ཚེ་སེམས་ཐང་ཆད་དེ་འཕྲོ་མི་འདོད་པའི་ཚེ་འཇོག་སྒོམ་བྱེད་ཅིང་། འདས་པའི་རྗེས་མི་འབྲང་། མ་འོངས་པའི་མདུན་མི་བསུ། ད་ལྟའི་རྟོག་པ་འཕྲོ་མི་མཐུད་ཅིང་བཅས་བཅོས་མི་བྱེད་པར་ཅི་ནུས་སུ་བཞག་པ་ལ་བཏང་སྙོམས་ཀྱི་ཏེང་ངེ་འཛིན་ཟེར། ཡང་འཕྲོ་ན་དཔྱད་པ་བྱེད། དེ་ལྟར་དཔྱད་འཇོག་རེ་མོས་བྱས་ནས་ཞི་གནས་བསྒོམ་དགོས་པ་ཡིན། ཐུན་དང་ཐུན་མཚམས་ཐམས་ཅད་ལ་སེམས་ཅན་ཆགས་སྡང་རྩོད་པ་ཅན་རྣམས་ལ་དམིགས་ནས་འདི་དག་གི་ཆགས་སྡང་གཉིས་པོ་དུས་དང་རྣམ་པ་ཐམས་ཅད་དུ་བྲལ་བ་གྱུར་ཅིག་སྙམ་པ་སྨོན་པ་དང་འབྲེལ་བ། བྲལ་ན་ཅི་མ་རུང་སྙམ་པ་འདུན་པ་དང་འབྲེལ་བ། བྲལ་བ་ཞིག་ངས་བྱ་སྙམ་པ་དམ་བཅའ་དང་འབྲེལ་བ། དེ་ལྟར་འགྲུབ་པར་དཀོན་མཆོག་གསུམ་ལ་གསོལ་བ་འདེབས་པ་དང་འབྲེལ་བ་བཞི་ལྡན་གྱི་ཐོག་ནས་ཐུན་ནང་མ་ཟད་ཐུན་མཚམས་སུའང་ཡང་དང་ཡང་དུ་བསྒོམ་དགོས། ཐུན་ནང་སྒོམ་ཐུན་མཚམས་རལ་ན་ལྕགས་མེ་ནང་དམར་འབར་བ་ཡིན་ཡང་ཕྱིར་ཕྱུང་ཚེ་འགྱུར་བ་ལྟར་ཡིན་པས། ཐུན་དང་ཐུན་མཚམས་ཐམས་ཅད་དུ་སེམས་ཅན་ཆགས་སྡང་ཅན་ཀུན་ལ་རང་གི་ཕ་མའི་ཡུལ་དུ་སྙོམས་པར་བསྒོམ་དགོས་པ་འདི་ནི་གནད་ཤིན་ཏུ་ཆེའོ།།

༢༽བྱམས་པ་ཚད་མེད།

དེ་ནས་བྱམས་པ་བསྒོམ་པ་ནི། དེ་ལྟར་བཏང་སྙོམས་ཚད་མེད་པ་བསྒོམས་པས་ཁམས་གསུམ་གྱི་སེམས་ཅན་ཐམས་ཅད་ཕ་མ་དང་མཉམ་པ་བྱམས་པ་ཆེན་པོའི་ཡུལ་དུ་སྙོམས་པར་བྱས་པ་དེ་དག་ཐམས་ཅད་ལ་དམིགས་ནས། ཐུན་གྱི་མགོར་ཁོལ་བུ་ཁོལ་བུ་བསྒོམས་ནས་མཇུག་ཏུ་སེམས་ཅན་ཐམས་ཅད་ལ་བསྒོམས་ཏེ་རིམ་བཞིན་སྦྱོང་དགོས། དང་པོ་རང་གི་རྩ་བའི་མ་དེ་མདུན་དུ་དམིགས་རྟེན་བྱས་ནས་དེ་ལ་མར་ཤེས་དྲིན་དྲན་དྲིན་ལན་གཟོ་འདོད་ཀྱི་སྒོ་ནས་ད་ལྟ་སྡུག་བསྔལ་རྒྱུ་འབྲས་གཉིས་ལ་སྤྱོད་བཞིན་པ་དེ་དམིགས་པ་ཡུལ་དུ་བྱས། རྣམ་པ་བློ་ནི་འདི་སྐྱེ་དང་ཚེ་རབས་ཐམས་ཅད་དུ་བདེ་བའི་རྒྱུ་དད་པ་དང་ངེས་འབྱུང་དང་བྱང་ཆུབ་སེམས་རིན་པོ་ཆེ་རྣམ་པ་གསུམ་དང་ལྡན་པར་གྱུར་ཅིག ལྡན་ན་ཅི་མ་རུང་། ལྡན་པ་ཞིག་ངས་བྱ། དེ་ལྟར་ལྡན་པ་ཞིག་དཀོན་མཆོག་རིན་པོ་ཆེ་རྣམ་པ་གསུམ་ལ་གསོལ་བ་འདེབས་དགོས། བདེ་བའི་འབྲས་བུ་མངོན་མཐོ་ནས་ངེས་ལེགས་མཆོག་གི་བར་གྱི་བདེ་བ་ཐམས་ཅད་དང་ལྡན་པར་གྱུར་ཅིག་སོགས་སྔར་ལྟར་འབྲེལ་བ་བཞི་ལྡན་བསྒོམ། དཔེར་ན་བུ་ཚ་ཆུང་ངུ་ཕ་མས་སྐྱོང་བ་ན། བུ་དེས་ཚུར་ལ་ཁ་ལན་ལག་ལན་སོགས་ཀྱིས་ལོགས་སྒྲུབ་ཅི་དང་ཅི་བྱས་པ་དང་དེའི་ཆེད་དུ་རང་གི་དཀའ་ཚེགས་ཐམས་ཅད་ཁྱད་དུ་བསད་དེ། བུ་དེ་སེམས་བདེ་ཐབས་ལུས་སྐྱིད་ཐབས་གོས་ཀྱིས་འཇམ་ཐབས་སོགས་མདོར་ན་བུ་དེ་ཁོ་ན་ལ་ལུས་ངག་ཡིད་གསུམ་གྱི་སྒོ་ནས་བརྩོན་པ་ལྟར་དུ། སེམས་ཅན་དེ་དག་ཚེ་འདི་དང་ཕྱི་མར་བདེ་བ་དང་ལེགས་པའི་ཐབས་སྣ་ཚོགས་ལ་རང་གི་ལུས་ངག་ཡིད་གསུམ་གྱི་འབད་པ་འདོན། སེམས་ཅན་དེ་དག་ཐམས་ཅད་ཀྱང་རང་བདེ་ན་སྐྱིད་ན་སྙམ་དུ་རང་གི་བདེ་སྐྱིད་ཁོ་ན་དོན་དུ་གཉེར་བ་ལས། མི་བདེ་བ་དང་སྡུག་བསྔལ་འདོད་པ་ནི་སུ་ཡང་མེད། འོན་ཀྱང་བདེ་བའི་རྒྱུ་དད་དང་ངེས་འབྱུང་བྱང་སེམས་ལ་སོགས་པ་དགེ་བ་ནི་སྒྲུབ་མི་ཤེས་པར། ལུས་ངག་ཡིད་ཀྱི་མི་དགེ་བ་བཅུ་ལ་ལོངས་སྤྱོད་པས་སེམས་ཀྱི་ཞེ་འདོད་དང་ལག་གི་ལག་ལེན་གཉི་ག་ཕྱིན་ཅི་ལོག་ཏུ་གྱུར་ནས་འདོད་པ་ཐ་ན་ཉིན་གཅིག་གི་ཉི་མ་དྲོ་པོ་འདེ་རྒྱུ་དང་ཇ་ཞིམ་པོ་ཕོར་གང་འཐུང་རྒྱུའི་བདེ་བ་ཙམ་ཡན་ཆད་འདོད་ཀྱང་འོང་བ་སྡུག་བསྔལ་ཁོ་ན་འོང་བའི་སེམས་ཅན་འདི་ཐམས་ཅད། རང་རང་སོ་སོའི་འདོད་པ་ལྟར་བདེ་བ་དང་སྐྱིད་པ་ཁོ་ན་བྱུང་ན་ཅི་མ་རུང་སྙམ་དུ་འབྲེལ་བ་བཞི་ལྡན་གྱི་སྒོ་ནས་ཡང་དང་ཡང་དུ་བསྒོམ་ཞིང་། མཐར་རང་ལ་བདེ་བ་འདོད་པ་ཇི་ལྟ་བ་སེམས་ཅན་ཐམས་ཅད་ལ་ཡང་བདེ་བ་ཁོ་ན་འདོད་པར་རང་དང་ཁྱད་མེད་དུ་མ་བྱུང་གི་བར་དུ་བསྒོམ། དེ་བཞིན་དུ་མདོ་སྡེ་དག་ལས། བྱམས་པའི་ལུས་ཀྱི་ལས་དང་། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཞེས་གསུངས་པ་ལྟར། ཁ་ཡིས་ཚིག་བཤད་ཀྱང་། ལག་གིས་བྱ་བ་བྱེད་ཀྱང་། སེམས་ཅན་གཞན་ལ་གནོད་པ་མེད་པར་དྲངས་ཤིང་བྱམས་པའི་ཚུལ་ཁོ་ན་བྱ། སྤྱོད་འཇུག་ལས། མིག་གིས་སེམས་ཅན་ལྟ་ན་ཡང་། །འདི་དག་ཉིད་ལ་བརྟེན་ནས་བདག །སངས་རྒྱས་ཉིད་དུ་འགྱུར་རོ་ཞེས། །དྲང་ཞིང་བྱམས་པའི་ཚུལ་གྱིས་བལྟ། །ཞེས་གསུངས་པ་ལྟར་ཐ་ན་མིག་གིས་མི་དང་དུད་འགྲོ་ལ་སོགས་སེམས་ཅན་གཞན་ལ་ལྟ་ན་ཡང་། འཛུམ་ཞིང་ཡིད་དུ་འོང་བའི་ཚུལ་གྱིས་ལྟ་བ་ལས། སྡང་མིག་སོགས་ཁྲོ་བའི་ཚུལ་གྱིས་མི་བལྟ་སྟེ། སྔོན་མི་དཔོན་བཙན་པོ་གཞན་ལ་མིག་ལོག་ཁོ་ན་ལྟ་བ་ཞིག་ཡོད་པ། ཕྱིས་དུད་གཅིག་གི་མ་སྒྱེད་འོག་ཏུ་ལྷག་མ་ཟ་བའི་ཡི་དྭགས་སུ་སྐྱེས་པ་དང་། འཕགས་པའི་གང་ཟག་ཁྱད་པར་ཅན་ས་ཐོབ་ཀྱི་བྱང་ཆུབ་སེམས་དཔའ་ལ་མིག་ལོག་བལྟས་པས། དམྱལ་བར་སྐྱེས་པར་གསུངས་པ་སོགས་ཡོད་པས། ལུས་ཀྱི་སྤྱོད་ལམ་ཐམས་ཅད་ཀྱང་འཇམ་ཞིང་ཡིད་དུ་འོང་བའི་སྒོ་ནས་གཞན་ལ་མི་གནོད་ཅིང་ཕ་ཁུ་རྒན་རབས་ནས་དམན་དང་སྤྲང་པོ་ཐ་ན་སྒོ་ཟོག་ཁྱི་ལྡོམ་ཚུན་ཆད་ལ་བརྡུང་རྡེག་སོགས་སྤངས་ནས་ཕན་གདགས་པ་ལྷུར་ལེན་དགོས། ངག་གིས་ཚིག་གཅིག་སྨྲ་ཡང་། དེ་གཞན་ལ་ཁྱད་གསོད་སུན་འབྱིན་ཟུར་ཟ་སོགས་ཚིག་རྩུབ་དང་མི་སྙན་པ་བརྗོད་པ་སོགས་མི་བྱ་བར། བདེན་པ་དང་སྙན་པར་སྨྲ། ཡིད་ཀྱི་སྒོ་ནས་ཀྱང་གཞན་ལ་ཕན་པའི་སེམས་བཟང་པོར་བྱས་ན། དེའི་བཟང་ལན་འོང་དུ་རེ་བ་དང་། སྤྱོད་ལམ་དང་ངག་འཇམ་སྨྲ་བ་སོགས་ཀྱིས། གཞན་གྱི་རང་ལ་བྱང་ཆུབ་སེམས་དཔར་མཐོང་ཐབས་ཀྱི་ཚུལ་འཆོས་བྱེད་པ་སོགས་མ་ཡིན་པར། སྙིང་ཐག་པ་ནས་གཞན་ལ་ཕན་པར་འདོད་པ་དང་། བདེ་བ་འདོད་པའི་ཀུན་སློང་ཁོ་ནས་བྱ། བདག་སྐྱེ་བ་ནས་སྐྱེ་བ། ཚེ་རབས་ནས་ཚེ་རབས་ཐམས་ཅད་དུ་སེམས་ཅན་གཞན་གྱི་ཐ་ན་བ་སྤུའི་ཁུང་བུ་གཅིག་ཙམ་ལ་གནོད་པ་བྱེད་པར་མ་གྱུར་ཅིག་ཟེར་སྨོན་ལམ་གདབ། བདག་གིས་ཚེ་རབས་ཐམས་ཅད་དུ་སེམས་ཅན་གཞན་ལ་ཕན་འདོགས་པར་གྱུར་ཅིག་སྙམ་དུ་ཡང་ནས་ཡང་དུ་སྨོན་ལམ་གདབ། ཁྱད་པར་རང་ལ་བསྟེན་པའི་དུད་འགྲོ་རྟ་ཟོག་སོགས་དང་འཁོར་གཡོག་ཐ་ན་སྒོ་ཁྱི་ཡན་ཆད་ལ་བརྡུང་རྡེག་དང་བཀོལ་སྤྱོད་ཀྱིས་ཧ་ཅང་མནར་བ་སོགས་མི་བྱ་བར། དུས་དང་རྣམ་པ་ཐམས་ཅད་དུ་ལུས་ངག་ཡིད་གསུམ་གྱི་སྒོ་ནས་བྱམས་པར་བྱ། ད་ལྟ་བྲན་ཁོལ་དང་སྒོ་ཁྱི་སོགས་སུ་སྐྱེས་ནས་ཐམས་ཅད་ཀྱིས་བརྙས་བཅོས་དང་སྡང་བ་སོགས་བྱེད་པ་འདི་རྣམས་ཀྱང་སྐྱེ་བ་སྔོན་མའི་དུས་སྐབས་སུ་རང་ཉིད་དབང་ཡོད་རེར་སྐྱེས་སྐབས་གཞན་ལ་ཁྱད་གསོད་དང་། བརྙས་བཅོས་སོགས་བྱས་པའི་ལས་འབྲས་སྨིན་པ་དང་ལས་ཀྱི་ལན་ཆགས་འཁོར་བ་ཡིན། ད་ལྟ་རང་ལ་ཐོབ་ཐང་དང་ལོངས་སྤྱོད་ཅུང་ཟད་ཙམ་རེ་ཡོད་པ་རྒྱུ་མཚན་དུ་བྱས་ནས་གཞན་ལ་བརྙས་པར་བྱས་ན། སྐྱེ་བ་ཕྱི་མ་ལ་དེའི་ལན་ཆགས་འཁོར་ནས་རང་ཡང་གཞན་གྱི་བྲན་ཁོལ་སོགས་བྱེད་དགོས་པར་འགྱུར་བ་ཡིན་པས་རང་ལས་དམན་པ་རྣམས་ལ་ལྷག་པར་ཡང་བྱམས་པར་བྱ། ཁྱད་པར་དུ་རང་གི་ཕ་མ་དང་གཞན་ཡུན་རིང་གི་ནད་པ་སོགས་ལ་སྒོ་གསུམ་གྱིས་ཕན་པར་བྱས་ཚད་ཕན་ཡོན་བསམ་གྱིས་མི་ཁྱབ་སྟེ། ཇོ་བོ་རྗེ་ལྷ་གཅིག་གི་ཞལ་ནས། ཐག་རིང་གི་མགྲོན་པོ། ཡུན་རིང་གི་ནད་པ། ཕ་མ་རྒས་འཁོགས་སོགས་ལ་བྱམས་པར་བྱས་ན་སྟོང་ཉིད་སྙིང་རྗེའི་སྙིང་པོ་ཅན་བསྒོམ་པ་དང་འདྲ་བར་གསུངས། ཇི་སྐད་དུ། ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པ་ཡིན། །ཞེས་གསུངས། ཁྱད་པར་ཕ་མ་ནི་བུ་ལ་ལྷག་པར་བརྩེ་ཞིང་དྲིན་ཆེ་བས་རྒས་པའི་དུས་ཕ་མའི་ཞེ་གཅོད་ཅིང་སེམས་དཀྲུག་པ་ནི་སྡིག་པ་ལྷག་པར་དུ་ལྕི་ཞིང་། བཅོམ་ལྡན་འདས་ཀྱིས་ཀྱང་ཡུམ་གྱི་དྲིན་ལན་བསབ་པའི་ཕྱིར་སུམ་ཅུ་རྩ་གསུམ་གྱི་ལྷ་ཡུལ་དུ་བྱོན་ནས་ཆོས་གསུངས། བུས་ཕྲག་པ་གཡས་གཡོན་གཉིས་སུ་ཕ་མ་གཉིས་ཁུར་ཏེ་ས་ཆེན་པོ་ལ་བསྐོར་བ་བྱེད་པ་ཙམ་གྱི་ཞབས་ཏོག་བསྒྲུབས་ཀྱང་ཕ་མའི་དྲིན་ལན་མི་འཁོར་ཞིང་ཕ་མ་དམ་པའི་ཆོས་ལ་བཙུད་ན་དྲིན་ལན་འཁོར་བར་གསུངས་པས། དུས་རྟག་ཏུ་ལུས་དང་ངག་དང་ཡིད་ཀྱི་སྒོ་ནས་ཕ་མའི་ཞབས་ཏོག་བསྒྲུབ། ཁྱད་པར་དུ་བློ་ཆོས་ལ་འགྱུར་བའི་ཐབས་ལ་འབད། གཞན་ཡང་ཨོ་རྒྱན་ཆེན་པོས། རྒས་པ་ཡི་མུག་མ་འཇུག་བཀུར་སྟིས་སྐྱོངས། །ཞེས་གསུངས་པ་ལྟར། རང་ལས་རྒན་པ་ཐམས་ཅད་ལ་ལུས་ངག་གི་བྱམས་པ་བྱེད་ཅིང་ཡིད་ལ་ཅི་འཐད་ཀྱིས་སྐྱོངས། ལར་དེང་སང་རང་རེ་རྣམས་ནས་འབུ་ཚང་ལྟ་བུའི་འཁོར་བ་འདིའི་འདུག་ཆུས་སྒྲུབ་པ་ལ་སེམས་ཅན་ལ་གནོད་མི་བྱེད་པའི་ཐབས་མི་འདུག་ཟེར་ཀྱང་ཐབས་ཡོད་དེ། སྔོན་ལི་ཡུལ་དུ་དགེ་ཚུལ་གཉིས་ཀྱིས་འཕགས་པ་འཇམ་དཔལ་བསྒྲུབས་པས། འཇམ་དཔལ་གྱི་ཞལ་མཇལ་ཏེ། ང་དང་ཁྱེད་གཉིས་ལ་ལས་འབྲེལ་མེད། ཁྱེད་གཉིས་ཀྱི་ཚེ་རབས་ལས་ཀྱི་ལྷ་སྐལ་ནི་འཕགས་པ་སྤྱན་རས་གཟིགས་ཡིན། སྤྱན་རས་གཟིགས་དེ་ད་ལྟ་བོད་ན་རྒྱལ་པོ་བྱེད་ཅིང་བཞུགས་ཡོད་པས་དེར་སོང་ཞིག་གསུངས། ཁོང་གཉིས་བོད་དུ་འོང་བས་ལྷ་སའི་ལྕགས་རིའི་རྒྱབ་ན། མི་མང་པོ་བསད་པ་དང་མིག་བཏོན་པ་དང་བཙོན་དུ་བཟུང་བ་མཐོང་ནས་མི་འདི་རྣམས་ཅི་ཡིན་དྲིས་པས། རྒྱལ་པོས་ཆད་པ་བཅད་པ་ཡིན་ཟེར། རྒྱལ་པོ་དེ་སྤྱན་རས་གཟིགས་ཡིན་ན་སྙིང་རྗེའི་རང་བཞིན་ཅན་ཡིན་པས་འདི་འདྲ་མི་བྱེད་པས་དེ་མིན་པར་འདུག ངེད་གཉིས་ལ་ཡང་ཆད་པ་གཅོད་ལས་ཆེ་བས་བྲོས་པ་དྲག་སྙམ། ཁོང་གཉིས་བྲོས་འོང་བ་རྒྱལ་པོས་མཁྱེན་ནས་འབོད་མི་བཏང་ནས་མདུན་དུ་བོས། ཁྱེད་གཉིས་འཇིགས་མི་དགོས། བོད་དམུ་རྒོད་ཀྱི་སེམས་ཅན་གདུལ་དཀའ་བས་དྲག་པོས་ལས་ཀྱིས་ངས་ཆད་པས་བཅད་པའི་མི་བསད་པ་དང་གཏུབ་པ་སོགས་སྤྲུལ་པ་བྱས་པ་ཡིན་གྱི། དངོས་སུ་ང་རང་གིས་སེམས་ཅན་གཅིག་གི་བ་སྤུའི་ཁུང་བུ་ཙམ་ལ་ཡང་གནོད་པ་བསྐྱལ་བ་མེད་གསུངས། ཆོས་རྒྱལ་སྲོང་བཙན་སྒམ་པོ་ཁོང་བོད་ཁ་བ་ཅན་གྱི་རྒྱལ་སྲིད་སྐྱོང་ཞིང་ཕྱོགས་ཀྱི་རྒྱལ་པོ་སྡེ་བཞི་མངའ་འོག་ཏུ་བསྡུས། མཐའ་ཡི་དམག་དཔུང་ཐམས་ཅད་བཏུལ་ཏེ་ཕྱོགས་ཀྱི་སོ་ཁ་བསྲུངས། དགྲ་འདུལ་གཉེན་སྐྱོང་གི་མཛད་པ་རྒྱ་ཆེན་པོ་དེ་ལྟ་བུ་མཛད་དགོས་ཀྱང་དོན་དུ་སེམས་ཅན་གཅིག་གི་བ་སྤུའི་ཁུང་བུ་ལ་ཡང་གནོད་པ་མ་བསྐྱལ་ན། ད་ལྟ་རང་རེའི་དགོན་གཞི་དང་ཁྱིམ་གྱི་གཞིས་ངན་འབུ་ཚང་ལྟ་བུ་འདི་འཛིན་པ་ལ་སེམས་ཅན་ལ་གནོད་པ་མ་བསྐྱལ་བའི་ཐབས་མེད་པ་ག་ལ་ཡིན། རང་འདོད་ཁོ་ནས་སེམས་ཅན་གཞན་ལ་གནོད་པ་བསྐྱལ་བས་གནོད་ལན་རང་ལ་འཁོར་ནས་ཚེ་འདི་དང་ཕྱི་མར་སྡུག་བསྔལ་མུ་མཐའ་མེད་པ་ལ་སྤྱོད་པའི་རྒྱུ་རང་གིས་བྱེད་པ་ལས། གནོད་པ་བྱས་པས་ཚེ་འདི་ཙམ་དུ་ཡང་ཕན་པ་མི་འགྲུབ་སྟེ། དགྲ་ལན་ལ་དགྲ་ཡོད། གྱོད་ལན་ལ་གྱོད་ཡོད། མི་བསད་པ་ལ་སྟོང་དང་། རྐུ་བྱས་པ་ལ་འཇལ་སྤྲོད་པ་སོགས་རང་གི་ནོར་དང་ལོངས་སྤྱོད་ཆུད་གཟན་པ་མ་གཏོགས། གཞན་གནོད་བྱས་པའི་ལས་དེ་དག་ལ་བརྟེན་ནས་ལོངས་སྤྱོད་འགྲུབ་པ་ནི་སུ་ཡང་མི་འདུག་པའི་ཕྱིར་རོ། །དེས་ན་བྱམས་པ་ཚད་མེད་པ་བྱ་མས་བྱེའུ་གསོ་བ་ལྟ་བུ་ཞེས་བྱ་སྟེ། བྱ་མས་བྱེའུ་གསོ་ཚེ། དང་པོ་ཚང་འཇམ་ཞིང་བདེ་བར་བཅས་དེ་ནས་ཀྱང་གཤོག་པས་བཀབ། ལུས་ཀྱི་དྲོད་ལ་བཅར། སྤྱོད་ལམ་ཐམས་ཅད་འཇམ་པོའི་སྒོ་ནས་བྱེའུ་དེ་འཕུར་ཐུབ་མ་སོང་གི་བར་དུ་སྐྱོང་བ་དང་འདྲ་བར། ཁམས་གསུམ་གྱི་སེམས་ཅན་ཐམས་ཅད་ལ་ལུས་ངག་ཡིད་གསུམ་གྱི་སྒོ་ནས་བྱམས་པར་བྱ་བ་ལ་བསླབ་པར་བྱའོ། །དེ་ལྟར་ཐུན་གྱི་མཇུག་ཏུ་འཁོར་གསུམ་པོ་སྣང་ལ་རང་བཞིན་མེད་པའི་དམིགས་མེད་ཀྱི་ངེས་ཤེས་དྲངས། ཐུན་མཚམས་རྣམས་སུ་ཡང་བྱམས་པ་དེ་དང་མི་འབྲལ་བར་བྱ་བ་གནད་དུ་ཆེ་བ་ཡིན་ནོ།།

༣༽སྙིང་རྗེ་ཚད་མེད།

དེ་ནས་སྙིང་རྗེ་བསྒོམ་པ་ནི། ཇོ་བོ་རྗེ་དང་དཔལ་སྤྲུལ་རིན་པོ་ཆེའི་ལུགས་ལ་དམིགས་རྟེན་གཙོ་བོ་ཚེ་འདིའི་རྩ་བའི་མ་ནས་བསྒོམ་པ་དང་། རིག་འཛིན་འཇིགས་གླིང་གིས་ཤན་པའི་མདུན་སར་བཤའ་ལུག་སོགས་གསོད་དུ་ཉེ་བའི་སེམས་ཅན་ཞིག་ལ་བསྒོམ་པར་གསུངས། གང་ལྟར་སྒོམ་ཡང་ཆོག གསོད་ལ་ཉེ་བའི་འཇིགས་སྐྲག་དང་སྡུག་བསྔལ་དྲག་པོས་མནར་བའི་སེམས་ཅན་གང་རུང་ཞིག་ལ་དམིགས་ནས་དེ་སྡུག་བསྔལ་གྱི་གནས་དེ་དང་བྲལ་བར་འདོད་པ་སྙིང་རྗེ་ཡིན། མི་གང་ཞིག་ནག་ཅན་བཙོན་དོང་དུ་བཅུག་པ་དེ་ཉིད་མཐར་གསོད་དུ་ཉེ་བའམ། ཤན་པའི་མདུན་སར་ཁྲིད་པའི་བཤའ་ལུག་སོགས་དུད་འགྲོ་འཆི་ཁ་མ་ལྟ་བུའི་སེམས་ཅན་སྡུག་བསྔལ་དྲག་པོས་གདུང་བ་ཞིག་བློ་ཡུལ་དུ་བསམས་ལ། དེ་ལ་བརྩེ་བའི་ཡུལ་མ་དང་བུའི་འདུ་ཤེས་བསྐྱེད། ཅེས་གསུངས་པས། དཔེར་ན་ནག་ཅན་གྱི་བཙོན་པ་ཞིག་རྒྱལ་པོས་གསོད་སར་ཁྲིད་པའམ། བཤའ་ལུག་ཤན་པས་བཟུང་སྟེ་བཀྱིག་བཞིན་པ་སོགས་ལ་བལྟས་ནས། སེམས་ཅན་གཞན་བཤའ་ལུག་སོགས་དེ་དང་དེ་ཡིན་སྙམ་པའི་བློ་དེ་བོར་ནས། དེ་ང་རང་ཡིན་ན་ཇི་ལྟར་བྱེད་སྙམ་དུ་ཕ་རོལ་སྡུག་བསྔལ་མྱོང་བའི་སེམས་ཅན་དེ་ལ་རང་ཉིད་ཡིན་པའི་བློ་བཞག ད་ཅི་བྱེད་བྲོས་ས་དང་གབ་ས་ནི་མེད་སྐྱབས་དང་སྐྱོབ་པ་ནི་མེད། འབྲོས་ནི་མི་ནུས། འཕུར་ནི་མི་ཤེས། ཤེད་དང་དཔུང་གིས་རྒོལ་ནི་མི་ཐུབ། ད་ལྟ་སྐད་ཅིག་མ་འདིའི་བར་ལ་ཚེ་འདིའི་སྣང་བ་ཐམས་ཅད་དང་འབྲལ། ཐ་ན་གཅེས་པར་བསྐྱངས་པའི་ལུས་ཀྱང་ཤུལ་དུ་བཞག་ནས། ཚེ་ཕྱི་མའི་ལམ་པོ་ཆེར་ད་ལྟ་ཉིད་དུ་འགྲོ་དགོས་པ་འདི་ཡ་རེ་ང་ཡིད་རེ་སྐྱོ་སྙམ་པ་ལ་སོགས་དེ་དག་གི་སྡུག་བསྔལ་རང་ཐོག་ཏུ་བླངས་ནས་བློ་སྦྱང་། ཡང་ན་བཤའ་ལུག་གསོད་སར་ཁྲིད་པ་ལྟ་བུ་ལ་དངོས་སུ་བལྟས་ནས། འདི་ངའི་ཨ་མ་རྒན་མོ་དེ་ཡིན་ན་ཇི་ལྟར་བྱེད་སྙམ་དུ་བཤའ་ལུག་དེ་ལ་ལུག་ཡིན་པའི་བློ་དེ་བོར་ནས། སྙིང་ཐག་པ་ནས་རང་གི་ཚེ་འདིའི་རྩ་བའི་མ་རྒན་དེ་ཡིན་པར་བསྒོམ། ངའི་མ་རྒན་མོ་དེ་ཉེས་པ་ཅུང་ཟད་ཀྱང་མེད་པར་གཞན་གྱིས་འདི་ལྟར་གསོད་ན་ད་ཅི་བྱེད། ངའི་མ་རྒན་ད་ལྟ་གསོད་སར་ཁྲིད་པ་འདི་ལ་སྡུག་བསྔལ་ཅི་ལྟ་བུ་ཞིག་ཡོད་སྙམ་དུ་སྙིང་ཐག་པ་ནས་རང་རྒྱུད་ལ་བླང་།དེ་མ་རྒན་མོ་དེ་འཕྲལ་དུ་ཤན་པས་གསོད་པའི་སྡུག་བསྔལ་ལས་ཐར་འདོད་དང་སྙིང་བརྩེ་དུང་དུང་པ་སྐྱེས་ཙ་ན་འདི་སྙམ་དུ། ད་ལྟ་སྡུག་བསྔལ་མྱོང་བའི་སེམས་ཅན་འདི་རང་གི་ད་ལྟའི་ཕ་མ་མིན་ཡང་། སྐྱེ་བ་ནས་ཚེ་རབས་ཀྱི་ཕ་མ་ནི་ངེས་པར་ཡིན། ཕ་མར་གྱུར་ནས་ད་ལྟའི་ཕ་མ་བཞིན་དུ་དྲིན་ཆེན་པོས་བསྐྱངས་པ་ཤ་སྟག་ཡིན་པས་ད་ལྟའི་ཕ་མ་དང་ཁྱད་ཅི་ཡང་མི་འདུག འདི་ལྟ་བུའི་སྡུག་བསྔལ་དྲག་པོས་མནར་བའི་ཕ་མ་འདི་སྙིང་རེ་རྗེ། འདི་ད་ལྟ་ཉིད་དུ་མྱུར་བ་ཉིད་དུ་སྐད་ཅིག་ཉིད་དུ་སྡུག་བསྔལ་འདི་ལས་ཐར་ན་ཅི་མ་རུང་སྙམ་དུ་སྙིང་རྗེ་དྲག་པོ་ཤས་མི་བཟོད་པ་མཆི་མ་ཐོན་ཐོན་དུ་བསྒོམ། དེར་སྙིང་རྗེ་སྐྱེ་བར་འདུག་ན། སྡུག་བསྔལ་འདི་ལྟ་བུ་མྱོང་བ་ནི། རྒྱུ་གང་ལས་བྱུང་ན་སྔོན་མི་དགེ་བ་བྱས་པའི་ལས་འབྲས་ཡིན། ད་ལྟ་མི་དགེ་བའི་ལས་ལ་སྤྱོད་པ་རྣམས་ཀྱང་ཕྱི་ནས་འདི་ལྟ་བུའི་སྡུག་བསྔལ་མྱོང་བར་ངེས་པས་སྙིང་རེ་རྗེ་སྙམ་དུ། སྲོག་གཅོད་བྱེད་པ་སོགས་སྡུག་བསྔལ་གྱི་རྒྱུ་བསྒྲུབ་པ་རྣམས་ལ་དམིགས་ནས་སྙིང་རྗེ་སྒོམ། དེ་ནས་དམྱལ་བ་དང་ཡི་དྭགས་སོགས་སུ་སྐྱེས་པའི་སེམས་ཅན་རྣམས་ཀྱི་སྡུག་བསྔལ་ལ་དམིགས་ནས། དེ་དག་རང་ཡིན་པ་དང་། ཕ་མ་ཡིན་པ་སོགས་ཀྱི་བློ་རིམ་པ་བཞིན་དུ་བཞག་སྟེ། ཡང་སྙིང་རྗེ་བསྒོམ་པ་ལ་འབད། མཐར་ཁམས་གསུམ་གྱི་སེམས་ཅན་འདི་ཐམས་ཅད། ནམ་མཁས་གར་ཁྱབ་སེམས་ཅན་གྱིས་ཁྱབ་ཅིང་། སེམས་ཅན་གྱིས་གར་ཁྱབ་ལས་ངན་དང་སྡུག་བསྔལ་གྱིས་ཁྱབ་པས། ལས་ངན་དང་སྡུག་བསྔལ་ཁོ་ན་ལ་སྤྱོད་པའི་སེམས་ཅན་འདི་རྣམས་སྙིང་རེ་རྗེ། འདི་ཐམས་ཅད་རིགས་དྲུག་སོ་སོའི་ལས་སྣང་སྡུག་བསྔལ་བག་ཆགས་ཐམས་ཅད་དང་བྲལ་ནས། གཏན་གྱི་བདེ་བ་རྫོགས་བའི་སངས་རྒྱས་ཀྱི་གོ་འཕང་ཐོབ་ན་ཅི་མ་རུང་སྙམ་དུ་སྙིང་ཐག་པ་ནས་བསྒོམ། ཚད་མེད་ཅེས་པའི་དོན་ནི། དམིགས་པའི་ཡུལ་ཚད་མེད་པ། རྣམ་པའི་བློ་ཚད་མེད་པ། དེའི་འབྲས་བུ་ཚད་མེད་པ་ཞིག་ལ་གོ་དགོས། འོན་ཀྱང་སྤྱི་འབྱམས་གོ་ཡུལ་དུ་མི་ཤོར་བར་གནད་ལ་ཁེལ་བའི་ཕྱིར། དང་པོ་ཁོལ་བུ་ཁོལ་བུ་རང་གི་རྩ་བའི་མ་ལྟ་བུ་ནས་བསྒོམ་པའམ། རང་གི་ད་ལྟའི་དགྲ་ནས་བསྒོམ་པ་ལྟ་བུ་དེ་དག་ནི་མན་ངག་གི་ལུགས་ཡིན། དེས་ན་དེ་ལྟར་སྙིང་རྗེ་བསྒོམ་པ་དེ་ཡང་དང་པོའི་གནས་སྐབས་སུ་སྡུག་བསྔལ་གྱིས་ཉམ་ཐག་པའི་སེམས་ཅན་གང་རུང་རེ་རེ་དམིགས་ཡུལ་དུ་བྱས་ནས་དེ་ཁོ་ན་ལ་བསྒོམ། དེ་ནས་རིམ་པ་བཞིན་དུ་བློ་སྦྱང་སྟེ། མཐར་སེམས་ཅན་ཐམས་ཅད་ལ་སྤྱི་ཁྱབ་ཏུ་བསྒོམ་པ་སོགས་མ་བྱས་ན། སྙིང་རྗེ་བསྒོམ་པ་དེ་ཡང་སྤྱི་འབྱམས་གོ་ཡུལ་ལྟ་བུར་ཤོར་ནས་གནད་དུ་ཁེལ་བ་ཇི་བཞིན་པ་མི་འོང་། ཁྱད་པར་རང་ལ་བསྟེན་པའི་ཕྱུགས་ལུག་དང་ཁྱེར་རྟ་སོགས་ཀྱི་སྡུག་བསྔལ་དང་དཀའ་ལས་ལ་བལྟས་ནས་སྙིང་རྗེ་བསྒོམ། དེ་ཡང་ད་ལྟ་རང་རེ་རྣམས་ནས་རང་གི་སྒོ་ཕྱུགས་ཀྱི་དུད་འགྲོ་རྣམས་ལ་སྣ་འབིགས་པ་དང་། བྱ་གཅོད་པ། སྤུ་བཏོག་པ། གསོན་ཁྲག་འབྱིན་པ་སོགས་མ་ཤི་དམྱལ་བ་དང་འདྲ་བའི་སྡུག་བསྔལ་དུ་མ་གཏད་ནས། དེ་དག་ལ་སྡུག་བསྔལ་ཡོད་སྙམ་པའི་སྣང་བ་ཙམ་ཡང་མི་བྱེད་པར་འདུག་པ་འདི། ལེགས་པར་བརྟགས་ན་སྙིང་རྗེ་མ་བསྒོམས་པའི་སྐྱོན་ཡིན་ཏེ། དེ་རྣམས་ཀྱང་སྲོག་ཆགས་དབུགས་ཅན་ཡིན་གྱི་ས་རྡོ་ལྟ་བུ་མ་ཡིན་པས་སྡུག་བསྔལ་ཡོད་ངེས་ཏེ། ལེགས་པར་བརྟགས་ན་ད་ལྟ་རང་གི་སྐྲ་ཉག་མ་གཅིག་འཐེན་ནས་བཏོག་ན་ཨ་ཚ་ཚ་ཟེར་ཞིང་བཟོད་མི་ནུས་པ་ལྟ་བུའི་ཟུག་རྔུ་ཡོད། དེ་བཞིན་དུ་གནག་ཕྱུགས་རྣམས་ལུས་ཀྱི་རྩིད་པ་ཅི་ཡོད་ཐམས་ཅད་གཅུས་ཕུར་བརྒྱབ་ནས་ཤེད་ཀྱིས་འཐེན། ཤུལ་དམར་རྗེན་དུ་ཕུད། སྤུ་ཉག་མ་རེ་རེའི་ཤུལ་ནས་ཁྲག་ཐིགས་པ་རེ་འབབས། ཕྱུགས་ཟོག་དེ་དག་གིས་ན་ཚ་དང་སྡུག་བསྔལ་མ་བཟོད་པར་འཁུན་བུ་བྱེད་ཀྱང་དེ་ལ་སྡུག་བསྔལ་ཡོད་སྙམ་པ་མི་བྱེད་པར། རང་གི་ལག་ངོར་ཆུ་བུར་དུ་སོང་བ་ལ་མི་བཟོད་བ་སྐྱེ། དེ་བཞིན་དུ་རྟ་ཁལ་སོགས་བཞོན་ནས་འགྲོ་བའི་ཚེ་ཡང་རང་གི་འཕོང་ན་ནས་སྒ་ཐོག་ཏུ་སྡོད་མི་ནུས་པར་བཟུར་ཏེ་སྡོད་དགོས་སྐབས་ཀྱང་། རྟ་ཁལ་དེ་ལ་ནི་དཀའ་ལས་སམ་སྡུག་བསྔལ་ཅུང་ཟད་ཀྱང་ཡོད་སྙམ་པ་མི་བྱེད། ཅིས་ཀྱང་འགྲོ་མི་ནུས་པར་ཧུ་ཐུག་གོམ་རྡུགས་པའི་སྐབས་སུ། ད་རུང་ཡང་འདིས་ངན་གཤིས་བྱས་ནས་མི་འགྲོ་བ་ཡིན་སྙམ་སྟེ། ཞེ་སྡང་ལངས་ནས་རྟ་གཡག་གང་ཡིན་ལ་རྡེག་བཙོག་བྱེད་པ་ལས་དེ་ལ་ཤ་ཚ་སྐད་ཅིག་ཀྱང་མི་སྐྱེ། ཁྱད་པར་བཤའ་ལུག་སོགས་གསོད་པའི་སྐབས། དང་པོ་མང་པོའི་ཁྱུ་ནས་བཟུང་བའི་ཚེ། དེ་ལ་འཇིགས་སྐྲག་གི་སྣང་བ་བསམ་གྱིས་མི་ཁྱབ་པ་ཡོད་པས། དང་པོ་གང་དུ་བཟུང་ས་དེར་ཤ་ལ་ཁྲག་ཚོམ་འབྱུང་། དེ་རྗེས་ལུས་གནམ་ས་བསྒྱུར་ཡན་ལག་འབྲེང་བས་བཀྱིག མཆུ་ཐ་གུས་དཀྲིས། དབུགས་ཕྱི་ནང་གི་རྒྱུ་འགྲུལ་བཅད་དེ་གནད་གཅོད་ཀྱི་སྡུག་བསྔལ་དོས་དྲག་པོ་མྱོང་བའི་སྐབས་སུ་ཡང་ད་དུང་ཅུང་ཟད་འཆི་བ་འགོར་ན་ཤན་པ་ལས་ངན་ཕལ་ཆེར་ཞེ་སྡང་ལངས་ནས་སེམས་ཅན་འདི་ལ་འཆི་རྒྱུ་མི་འདུག་ཟེར་ཏེ་བརྡུང་རྡེག་སོགས་བྱེད། ཤི་མ་ཐག་སེམས་ཅན་དེ་དང་དེའི་པགས་པ་བཤུས་ནང་ལྟོ་རྒྱུ་མ་སོགས་ཕྱིར་ཕྱུང་། དེ་མ་ཐག་གནག་ཕྱུགས་གཞན་ཞིག་ལ་ཁོང་ཁྲག་བཏོན་ཏེ། དེ་ཡང་ལུས་གོམ་ཚུགས་མི་ཐུབ་པར་འཁྱོར་རོ་རོ་འགྲོ་བ་ཞིག་བྱས། ཤི་ཤ་དང་གསོན་ཁྲག་གཉིས་བསྲེས་ནས་སྔར་བསད་པ་དེའི་ནང་ལྟོ་གཡོས་ནས་ཟ་ཕོད་པ་འདི་ལས་ཀྱི་སྲིན་པོ་དངོས་སུ་འདུག ད་ལེགས་པར་བསམ་ན་དུད་འགྲོ་དེ་དག་རྣམས་ཀྱི་སྡུག་བསྔལ་ལ་བལྟས་ནས། དེ་རང་ཡིན་པར་བསྒོམས་ན་ཅི་འདྲ་ཞིག་འདུག རང་གི་མཆུ་ལག་པས་བཀབ་ནས་དབུགས་བགགས་ཏེ་ཅུང་ཟད་སྡོད་དང་། དེ་ལ་ན་ཚ་དང་འཇིགས་སྐྲག་ཅི་ལྟ་བུ་ཞིག་འདུག དེ་ལྟར་ལེགས་པར་བརྟགས་ནས་དེ་ལྟ་བུའི་སྡུག་བསྔལ་དྲག་པོ་ལ་བར་མེད་དུ་ཁོར་མོར་སྤྱོད་པའི་སེམས་ཅན་དེ་ཐམས་ཅད་སྙིང་རེ་རྗེ། དེ་ཐམས་ཅད་སྡུག་བསྔལ་གྱི་རྣམ་གྲངས་དེ་དག་ལས་སྐྱོབ་པའི་ནུས་པ་ད་ལྟ་བདག་ལ་ཡོད་ན་ཅི་མ་རུང་སྙམ་དུ་ཡང་དང་ཡང་དུ་བསྒོམ། ཁྱད་པར་བྱམས་པ་དང་སྙིང་རྗེའི་མངའ་བདག་བླ་མ་སེར་མོ་བ་རྣམས་ཡིན་དགོས་པ་ལས། བླ་མ་དང་སེར་མོ་བ་རྣམས་ལ་བྱམས་པ་དང་སྙིང་རྗེ་སྤུ་ཙམ་ཡང་མེད་པར་སེམས་ཅན་སྡུག་ལ་གཏད་པ་ཁྱིམ་པ་མི་ནག་པ་རྣམས་ལས་ཀྱང་ཐུ་བ་འདི་སངས་རྒྱས་ཀྱི་བསྟན་པ་མཐའ་ལ་ཐུག་སྟེ། ཤ་ཟ་དང་སྲིན་པོ་མཆོད་གནས་སུ་བྱེད་པའི་སྐབས་ལ་བབས་པ་ཡིན། སྔོན་བདག་ཅག་གི་སྟོན་པ་ཤཱཀྱ་ཐུབ་པ་ཡང་འཁོར་ལོས་སྒྱུར་བའི་རྒྱལ་སྲིད་མཆིལ་མའི་ཐལ་བ་བཞིན་དུ་བོར་ཏེ་རབ་ཏུ་བྱུང་། འཁོར་དགྲ་བཅོམ་པའི་ཚོགས་དང་བཅས་པ་ཐམས་ཅད་ལྷུང་བཟེད་དང་འཁར་གསིལ་བསྣམས་ཏེ་ཞབས་ཐང་དུ་བསོད་སྙོམས་ལ་ཕེབས་པ་ལས། རྟ་ཁལ་དང་དྲེའུ་སོགས་ཡོད་པ་ལྟ་ཅི། བཅོམ་ལྡན་འདས་ཉིད་ལ་ཆིབས་པ་ཞིག་ཀྱང་ཆིབས་རྒྱུ་མེད་པ་དེ། སེམས་ཅན་སྡུག་ལ་གཏད་པ་སངས་རྒྱས་པའི་ཆོས་ལུགས་མིན་པར་དགོངས་ནས་མ་ཆིབས་པ་ཡིན་གྱི། བཅོམ་ལྡན་འདས་ཐབས་རྡུགས་ནས་རྟ་རྒན་ཞིག་ཆིབས་རྒྱུ་མ་རྙེད་པ་ག་ལ་ཡིན། ད་ལྟ་རང་རེའི་སེར་མོ་བ་རྣམས་གྲོང་ཆོག་སོགས་ལ་འབྱོན་སྐབས་གཡག་རྒན་རེའི་སྣ་ཨ་ལུང་དུ་ཕུག་ནས་དེར་རྔ་མའི་ཐག་པ་རྩུབ་ངེས་པ་རེ་དྲངས། དེའི་རྒྱབ་ཏུ་བཞོན་ནས་ཕྱག་གཉིས་ཀྱིས་ཤེད་ཕྱུང་སྟེ་ཐག་པ་འཐེན་རེས་ཀྱིས་སྣ་ནང་དུ་དྲུད་པས་གཡག་རྒན་སྣའི་ན་ཚ་མ་བཟོད་པར་སྐོར་ལིང་བྱེད་པ་ན་ཤེད་ཕྱུང་སྟེ་ལྕག་རྒྱུན་གྱིས་བྲབ། དེར་འཕོངས་ལ་ལྕག་གིས་བྲབས་པའི་ན་ཚ་མ་བཟོད་པར་རྒྱུག་ཙ་ན་ཡང་སྣ་ནས་འཐེན། ཡང་སྣའི་ན་ཚ་མ་བཟོད་པར་བསྡད་ཙ་ན་ལྕག་གིས་བྲབ། དེ་གཉིས་རེས་མོས་ཀྱིས་སོང་སོང་བས་ལུས་ངལ་དུབ་དང་སྡུག་བསྔལ་དུ་གྱུར། སྤུ་ཉག་མ་རེ་ནས་རྔུལ་ཆུ་ཐིགས་པ་རེ་འབབས། ལྕེ་དོས་ཕྱར་ཙམ་དྲུད་དེ་འགྲོ་མི་ནུས་པར་དབུགས་ཧར་སྒྲ་འདོན་པའི་ཚེ། ད་དུང་ཡང་འདི་ལེགས་པར་མི་འགྲོ་བ་ཅི་ཡིན་ན་སྙམ་ཞེ་སྡང་ལངས་ནས་ལྕག་ཡུ་དབྱུག་པ་དེས་འཕོངས་ལ་བྲབ། དེ་ཡང་ཞེ་སྡང་གིས་ཤེད་ཕྱུང་ཆེས་བས་དབྱུག་པ་དེ་དུམ་བུ་གཉིས་བྱས། ཆག་འཕྲོ་དེ་སྐེད་གསེབ་དུ་དྲངས། རྡོ་མདུང་ཞིག་བླངས། སྒ་ཐོག་ནས་ཕྱིར་ལ་འཁོར་ཏེ་གཡག་རྒན་གྱི་ཚང་ར་ལ་བརྡུང་གྱིན་འགྲོ་བ་དེ་སྙིང་རྗེ་ཅུང་ཟད་ཀྱང་རྒྱུད་ལ་མ་སྐྱེས་པས་ལན། ད་དེ་ཙ་ན་གཡག་རྒན་དེ་ལ་རང་ཉིད་ཡིན་པའི་བློ་ཞིག་བཞག རང་གི་རྒྱབ་ཏུ་མི་ཐེག་པའི་ཁུར་ཆེན་པོ་ཞིག་བསྐུར། སྣ་ཐག་པས་དྲངས་འཕོངས་ལྕག་གིས་བྲབ། རྩིབ་མ་ཡོབ་ཆེན་གྱིས་བཅོམ་པས་མདུན་རྒྱབ་དང་གཡས་གཡོན་ཐམས་ཅད་ན་ཟུག་ཚ་ཟུག་གི་ངང་ལ་སྐད་ཅིག་ཙམ་ཡང་ངལ་གསོ་ལོང་མེད་པར་གྱེན་མཐོན་པོ་ལ་ཡར་འཛེགས། ཐུར་གཟར་མོ་ལ་མར་བབས། ཆུ་ཆེན་པོ་ལ་འབོག ཐང་ཆེན་པོ་ལ་བགྲོད། ཟས་ཁམ་གཅིག་ཀྱང་ཟ་ལོང་མེད་པར་ད་ནངས་ནམ་ལངས་ནས་དོ་དགོང་ཉི་མ་དམར་ཐག་མ་ཆད་བར་མི་འདོད་བཞིན་དུ་འགྲོ་དགོས་བྱུང་ན། དེ་ལ་དཀའ་ཚེགས་དང་ངལ་དུབ་ཅི་ལྟ་བུ་ཞིག་ཡོད། ན་ཚ་དང་བཀྲེས་སྐོམ་ཅི་ལྟ་བུ་ཞིག་མྱོང་སྙམ་ནས་སྡུག་བསྔལ་རང་ཐོག་ཏུ་བླངས་ན། སྙིང་རྗེ་དྲག་པོ་ཤས་མི་བཟོད་པ་ཞིག་མི་སྐྱེས་བའི་ཐབས་མེད། དེ་བཞིན་དུ་སྤྱིར་བླ་མ་དང་སེར་མོ་བ་ཞེས་བྱ་བ་རིས་མེད་པའི་སེམས་ཅན་ཐམས་ཅད་ཀྱི་སྐྱབས་དང་སྐྱོབ་པ་མགོན་དང་དཔུང་གཉེན་ཡིན་དགོས་པ་ལ། རང་ལ་བཟའ་བཏུང་དང་འབུལ་བ་བྱེད་པའི་ཡོན་བདག་དེ་རང་ཕྱོགས་སུ་བཟུང་ནས་དེ་ལ་སྲུངས་ཤིག་དང་སྐྱོབས་ཤིག་ཟེར་ཞིང་དབང་སྐུར་དང་བྱིན་རླབས་བྱེད། ལས་ངན་གྱི་རྒྱུས་འཕངས་པས་ལུས་ངན་བླངས་བའི་ཡི་དྭགས་དང་འབྱུང་པོ་གནོད་བྱེད་ཀྱི་འདྲེ་དེ་གཞན་ཕྱོགས་སུ་བཟུང་། དེ་ལ་ཞེ་སྡང་སྐྱེས་ཏེ་སོད་སོད་དང་རྒྱོབ་རྒྱོབ་ཟེར་ནས་བརྡུང་རྡེག་གི་སྟངས་ཀ་བྱེད། ལྷ་འདྲེ་གནོད་བྱེད་དེ་གསོད་རྒྱུ་དང་བརྡུང་རྒྱུ་ཞིག་ཏུ་འཛིན་བ་དེ་ཡང་རང་རྒྱུད་ཆགས་སྡང་གི་དབང་དུ་ཤོར་ནས་བཏང་སྙོམས་ཚད་མེད་དང་མཉམ་པའི་སྙིང་རྗེ་ཆེན་པོ་མ་སྐྱེས་པས་ལན། དེ་ལེགས་པར་བརྟགས་ན་ཡོན་བདག་ལས་ཀྱང་གནོད་བྱེད་དེ་སྙིང་རྗེ་བའི་ཡུལ་དུ་གྱུར་བ་སྟེ། གནོད་བྱེད་ཀྱི་ལྷ་འདྲེ་དེ་ལས་ངན་གྱི་རྒྱུས་འཕངས། ལུས་ངན་ཡི་དྭགས་སུ་སྐྱེས་པས། དུས་རྒྱུན་མྱོང་བ་རྒྱུ་མཐུན་གྱི་ལས་ཀྱི་དབང་གིས་ན་ཚ་དང་འཇིགས་སྐྲག་གི་སྣང་བ་དཔག་ཏུ་མེད་པ་མྱོང་། རྟག་ཏུ་བཀྲེས་སྐོམ་དང་ངལ་དུབ་ཁོ་ན་ལ་སྤྱོད། སྣང་བ་ཐམས་ཅད་དོགས་པར་འཆར་རྒྱུད་ཞེ་སྡང་དང་གདུག་རྩུབ་ཆེ་བས་ཤི་མ་ཐག་དམྱལ་བར་འགྲོ་བ་མང་བས་དེ་ལས་སྙིང་རྗེ་བ་སུ་ཡོད། ཡོན་བདག་དེ་ལ་ན་ཚ་དང་ཟུག་རྔུ་སྐྱེས་ཀྱང་དེས་སྔར་གྱི་ལས་ངན་འཛད་པ་མ་གཏོགས་ལས་ངན་མི་སོག གནོད་བྱེད་དེས་བསམ་ངན་གྱིས་གཞན་ལ་གནོད་པ་བྱས་པས་ལས་ངན་གྱི་རྒྱུ་དེ་ཡིས་དབང་གིས་ངན་སོང་གི་གཏིང་དུ་འཕེན་པ་ཡིན། དེས་ན་རྒྱལ་བ་ཐབས་མཁས་ལ་ཐུགས་རྗེ་ཆེ་བས་དྲག་ཤུལ་དང་མངོན་སྤྱོད་ཀྱི་ལས་ཀྱིས་ལྷ་འདྲེ་མ་རུངས་བ་བསྐྲད་པ་དང་བསྡིགས་པ་སོགས་གསུངས་པ་དེ་ཡང་། ལྷ་འདྲེ་དེ་ཁོ་རང་སྙིང་རྗེ་བས། དཔེར་ན་བྱིས་པ་ཆུང་ངུ་ཉན་དུ་མ་བཏུབ་པ་ལ་མས་བསམ་བཟང་གི་ཐོག་བརྡུང་རྡེག་ཅུང་ཟད་བྱེད་པ་ལྟ་བུ་དང་། སྡིག་པ་དང་མི་དགེ་བ་ཁོ་ན་ལ་ལོངས་སྦྱོད་པའི་སེམས་ཅན་དེ་ལས་ངན་གྱི་རྒྱུན་བཅད་ནས་རྣམ་ཤེས་དག་པའི་ཞིང་དུ་འཕེན་ནུས་ན་བསྒྲལ་ལས་བྱེད་པ་སོགས་གནང་བ་ཡིན་གྱི། ཡོན་བདག་དང་གྲྭ་འཁོར་སོགས་རང་ཕྱོགས་སུ་བཟུང་ནས་དེ་ལ་ཆགས། ལྷ་འདྲེ་དང་གནོད་བྱེད་དེ་གཞན་ཕྱོགས་སུ་བཟུང་ནས་དེ་ལ་སྡང་། ཆགས་སྡང་གི་དབང་གིས་རང་ཕྱོགས་སྲུང་བ་དང་གཞན་ཕྱོགས་བརྡུང་བའི་ཐབས་དེ་འདྲ་བ་རྒྱལ་བས་གསུངས་པ་ག་ལ་ཡིན། དེ་ལྟ་བུའི་ཆགས་སྡང་གི་བློ་དང་ལྡན་ཕྱིན་ཆད་ལྷ་འདྲེ་ཡིད་ཀྱི་གཟུགས་ཅན་ལ་མངོན་ཤེས་ཕྲ་མོ་ཡོད་པས། དེ་དག་བསྐྲད་པ་དང་བརྡུངས་པ་སོགས་བྱས་ཀྱང་ཉན་དུ་མི་བཏུབ་ཅིང་སླར་རང་ལ་གནོད་པ་བྱེད་པ་ཡིན། ཆགས་སྡང་གི་བློ་ཅན་ལྟ་ཅི། ལྷ་འདྲེ་རང་རྒྱུད་དུ་བཟུང་ནས་སོང་ན་དགའ་བ་ཙམ་གྱི་བློ་ཡོད་ཀྱང་ལྷ་འདྲེ་མི་ཐུལ་བ། སྔོན་རྗེ་བཙུན་མི་ལ་མཆོང་ལུང་ཁྱུང་གི་རྫོང་ན་བཞུགས་སྐབས། བགེགས་ཀྱི་རྒྱལ་པོ་བི་ནཱ་ཡ་ཀས་ཆོ་འཕྲུལ་བྱུང་སྟེ། ཨ་ཙ་ར་མིག་ཕོར་ཁོག་ཙམ་བསྒྲད་པ་ལྔ་གཟིམ་ཁང་དུ་འདུག་པ། བླ་མ་དང་ཡི་དམ་ལ་གསོལ་བ་བཏབ་རུང་མ་སོང་། ཡི་དམ་གྱི་བསྐྱེད་རིམ་བསྒོམས་ནས་དྲག་སྔགས་བཟླས་ཀྱང་འགྲོར་མ་འདོད་པའི་ཚེ། ང་ལ་ལྷོ་བྲག་མར་པས། སྣང་སྲིད་སེམས་སུ་ངོ་སྤྲད་ཅིང་། སེམས་ཉིད་འོད་གསལ་སྟོང་པར་ངོ་སྤྲད་པ་ཡིན་པས། གདོན་བགེགས་ཕྱི་རོལ་དུ་བཟུང་ནས་སོང་ན་དགའ་བ་འདི་བྱེད་དོན་མི་འདུག་དགོངས་ཏེ། ལྷ་འདྲེ་རང་སྣང་དུ་ཤེས་པའི་ལྟ་བའི་ངར་གདེངས་སྐྱེས་ནས་ནང་དུ་འཚངས་ཀྱིས་བྱོན་པས། ཁོང་རྣམས་སྐྲག་ནས་མིག་རིག་རིག་བྱེད་ཅིང་མི་སྣང་བར་གྱུར། དེ་བཞིན་དུ་བྲག་སྲིན་མོའི་གླུ་ལས་ཀྱང་། ལར་བག་ཆགས་བདུད་འདི་སེམས་ལས་བྱུང་། །སེམས་ཀྱི་དེ་ཉིད་མ་ཤེས་ན། །ཁྱོད་སོང་ཞིག་བྱས་པས་ང་མི་འགྲོ། །རང་སེམས་སྟོང་པར་མ་རྟོགས་ན། །འདྲེ་ང་ཡིས་མི་ཚད་གཞན་ཡང་ཡོད། །རང་སེམས་རང་གིས་ངོ་ཤེས་ན། །མི་མཐུན་རྐྱེན་རྣམས་གྲོགས་སུ་འཆར། །ང་བྲག་སྲིན་མོ་ཡང་འབངས་སུ་མཆི། །ཞེས་པ་ལྟར། ལྷ་འདྲེ་རང་སེམས་སུ་ཤེས་པའི་ལྟ་བའི་གདེངས་དང་མ་ལྡན་ན། ཞེ་སྡང་གིས་ལྷ་འདྲེ་འདུལ་ག་ལ་ནུས། དེ་བཞིན་དུ་སྦྱིན་བདག་གི་ཁྱིམ་དུ་འབྱོན་སྐབས་ཀྱང་ཡོན་བདག་དེས་བཤས་ལུག་ཅི་ཙམ་ཞིག་བསད་ནས་དྲངས་ཀྱང་ཐུགས་ལ་དོགས་པ་ཙམ་ཡང་མེད་པར་དགྱེས་བཞིན་དུ་གསོལ། ཁྱད་པར་སྲུང་བ་དང་གསོལ་མཆོད་སོགས་བྱེད་པའི་སྐབས་སུ་རྫས་ཤ་གཙང་མ་ཞིག་དགོས་ཟེར་ནས། ད་ལྟ་འཕྲལ་དུ་བསད་པའི་ཤ་ཚིལ་ཁྲག་ཙ་རེ་རླངས་པ་ཕལ་ལེ་བ་དེ་ལ་གཙང་མར་འཛིན་ཞིང་། དེ་དག་གིས་གཏོར་མ་དང་མཆོད་རྫས་ཐམས་ཅད་བརྒྱན་ཏེ་རྔམ་རྔམ་དང་རྫིག་རྫིག་བྱེད་པ་དེ་དག་བོན་དང་མུ་སྟེགས་པ་ལྟ་བུ་ཞིག་གི་ཆོས་ལུགས་ཡིན་ན་མ་གཏོགས་ནང་པ་སངས་རྒྱས་པའི་ཆོས་ལུགས་ནི་མིན། ནང་པ་སངས་རྒྱས་པའི་ཆོས་ལུགས་ཡིན་ན་ཆོས་ལ་སྐྱབས་སུ་སོང་ནས་སེམས་ཅན་ལ་འཚེ་བ་སྤང་དགོས་རྒྱུ་ཡིན་པ་ལ། གང་དུ་འགྲོ་ཡང་དེར་སེམས་ཅན་རེའི་སྲོག་ལ་འཚེ་བ་བྱེད་ནས་བསད་དེ། ཤ་ཁྲག་ལ་ལོངས་སྤྱོད་ན་སྐྱབས་འགྲོའི་བསླབ་བྱ་དང་ཅིའི་ཕྱིར་མི་འགལ། ཁྱད་པར་ཐེག་པ་ཆེན་པོའི་བྱང་ཆུབ་སེམས་དཔའི་ལུགས་ལ་མཐའ་ཡས་པའི་སེམས་ཅན་ཐམས་ཅད་ཀྱི་སྐྱབས་དང་སྐྱོབ་པ་བྱེད་དགོས་རྒྱུ་ལ། གང་བསྐྱབ་པར་བྱ་རྒྱུའི་སེམས་ཅན་ལས་ངན་དེ་ལ་སྙིང་རྗེ་སྤུ་ཙམ་ཡང་མེད་པར། བསྐྱབ་བྱ་སེམས་ཅན་དེ་བསད་ནས་ཤ་ཁྲག་གཡོས་སུ་བྱས། སྐྱོབ་པ་པོ་བྱང་ཆུབ་སེམས་དཔའ་དེའི་དྲུང་དུ་བཞག་ཙ་ན་དགྱེས་བཞིན་དུ་རྐན་སྒྲ་ཐག་གེ་གསོལ་འགྲོ་ན་དེ་ལས་ཐུ་བ་དང་སྡུག་པ་ཅི་ཡོད། གསང་སྔགས་རྡོ་རྗེ་ཐེག་པའི་གཞུང་རྣམས་ལས། ཤ་ཁྲག་མཆོད་པ་གཞུང་བཞིན་མ་ཚོགས་ཏེ། །སིཾ་ཧ་ཕྲ་མེན་ཐུགས་དང་ཅི་འགལ་བ། །ཡུལ་གྱི་མཁའ་འགྲོའི་སྐུ་ལ་བཟོད་པར་གསོལ། །ཞེས་གསུངས་ཏེ། ཤ་ཁྲག་གི་མཆོད་པ་གཞུང་བཞིན་དུ་ཚོགས་པ་ཞེས་བྱ་བ་དེ། གསང་སྔགས་ཀྱི་རྒྱུད་སྡེའི་གཞུང་ནས་བཤད་པ་བཞིན་དུ་ཚོགས་དགོས་པ་ལ་ཟེར་བ་ཡིན། གསང་སྔགས་ཀྱི་གཞུང་ནས་ཇི་ལྟར་བཤད་ན། ཤ་ལྔ་བདུད་རྩི་རྣམ་པ་ལྔ། །བཟའ་བཅའ་བཏུང་བ་ཕྱི་ཡི་ཚོགས། །ཞེས་བྱ་སྟེ། གསང་སྔགས་ཀྱི་དམ་རྫས་སུ་འོས་པའི་ཤ་ལྔ་པོ། མི་ཤ་དང་། རྟ་ཤ་དང་། ཁྱི་ཤ་དང་། གླང་པོ་ཆེའི་ཤ་ལ་སོགས་པ་ཁ་ཟས་ཀྱི་ཆེད་དུ་གསོད་པར་མི་འགྱུར་བའི་སྡིག་མེད་ཀྱི་ཤ་ལྔ་པོ་ཚོགས་རྫས་སུ་བཤམས་པ་ལ་ཤ་ཁྲག་མཆོད་པ་གཞུང་བཞིན་དུ་ཚོགས་པ་ཡིན་གསུངས་ཀྱི། དེ་ལྟར་མ་ཡིན་པར་གཙང་དམེའི་གཉིས་རྟོག་གིས་བཅིངས་ནས། མི་ཤ་དང་། ཁྱི་ཤ་སོགས་ལ་མི་གཙང་བ་དང་དམན་པར་འཛིན་ཞིང་ཁ་ཟས་ཀྱི་ཆེད་དུ་འཕྲལ་ལ་བསད་པའི་ཤ་ཞིམ་པ་དང་ཚོ་བ་ལ་གཙང་མར་འཛིན་ན། དང་དུ་བླང་བའི་དམ་ཚིག་ལྔ། །གཙང་དམེར་བལྟས་དང་བག་མེད་སྤྱད། །ཅེས་བྱ་བའི་གཙང་དམེར་ལྟ་བ་ཡིན་པས་དང་དུ་བླང་བའི་དམ་ཚིག་དང་འགལ། རུང་བའི་ཤ་ལྔ་པོ་ཡིན་ཡང་ཁ་ཟས་བདུད་རྩིར་སྒྱུར་ནུས་པ་དང་། དབེན་པར་དངོས་གྲུབ་སྒྲུབ་པའི་ཚེ་མ་ཡིན་པར། ཤའི་རོ་ལ་སྲེད་པས་གྲོང་ཡུལ་དུ་བག་མེད་དུ་ཟོས་ན། དང་བླང་གི་དམ་ཚིག་བག་མེད་དུ་སྤྱད་པ་ཞེས་བྱ་སྟེ། དེ་ལ་ཡང་འགལ། དེས་ན་རྫས་ཤ་གཙང་མ་ཞེས་བྱ་བ་དེ་ཡང་ཁ་ཟས་ཀྱི་དོན་དུ་བསད་པ་མ་ཡིན་ཞིང་། རང་གི་ལས་ཀྱིས་ཤི་བའི་ཤ་ཞེས་སེམས་ཅན་རང་གི་ལས་ཀྱི་དབང་གིས་རྒས་ནས་ཚེ་ཟད་པའམ། ནད་ཀྱིས་ཤི་བ་ལ་སོགས་པའི་ཤ་ལ་ཟེར་བ་ཡིན། དེ་ལྟར་མ་ཡིན་པར་འཕྲལ་དུ་བསད་པའི་ཤ་ཁྲག་དྲོན་མོ་དཀྱིལ་འཁོར་དུ་བཞག་ན་ལྷ་ཡེ་ཤེས་པ་ཐམས་ཅད་བརྒྱལ་འགྲོ་བར་མཉམ་མེད་དྭགས་པོ་རིན་པོ་ཆེས་གསུངས། གཞན་ཡང་ལྷ་ཡེ་ཤེས་པ་སྤྱན་དྲངས་ནས། བསད་པའི་ཤ་ཁྲག་གིས་མཆོད་ན་མ་སྔོན་དུ་བུ་བཤས་པ་དང་འདྲ་ཞེས་གསུངས་ཏེ། དཔེར་ན་མ་མགྲོན་དུ་བོས་ནས་དེའི་སྔོན་དུ་བུ་བསད་པའི་ཤ་བཞགས་ན་མ་དེ་དགའམ་མི་དགའ། དེ་བཞིན་དུ་རྒྱལ་བ་སྲས་དང་བཅས་པ་ཐམས་ཅད་ཁམས་གསུམ་གྱི་སེམས་ཅན་ཐམས་ཅད་ལ་བུ་གཅིག་པའི་མ་བཞིན་དུ་བརྩེ་བས་དགོངས་ཏེ་བཞུགས་པ་ལ། ལས་ངན་གྱི་གཞན་དབང་དུ་གྱུར་པའི་དུད་འགྲོ་བསམ་མེད་ཅིག་བསད་ནས་ཤ་ཁྲག་གི་མཆོད་པ་བྱས་པས་རྒྱལ་བ་དགྱེས་པའི་ཐབས་མེད་དེ། རྒྱལ་སྲས་ཞི་བ་ལྷས། གང་ཞིག་ལུས་ལ་ཀུན་ནས་མེ་འབར་བ། །འདོད་པ་ཀུན་ཀྱིས་ཡིད་བདེར་མི་འགྱུར་ལྟར། །དེ་བཞིན་སེམས་ཅན་གནོད་པ་བྱས་ན་ཡང་། །ཐུགས་རྗེ་ཆེ་རྣམས་དགྱེས་པའི་ཐབས་མེད་དོ། །ཞེས་གསུངས། དེས་ན་བསད་པའི་ཤ་ཁྲག་ཁོ་ན་ལ་ལོངས་སྤྱོད་བཞིན་ཤ་མཆོད་དང་ཁྲག་མཆོད་བྱས་ཏེ་སྲུང་མ་གསོལ་མཆོད་སོགས་བྱས་ཚེ། ལྷ་ཡེ་ཤེས་པ་རྣམས་དང་། རྒྱལ་བསྟན་སྲུང་བའི་ཆོས་སྐྱོང་རྣམས་ཀྱང་བྱང་ཆུབ་སེམས་དཔའ་ཤ་སྟག་ཡིན་པས། དེ་དག་གིས་ཤན་པའི་འདུན་ས་ལྟ་བུས་སེམས་ཅན་བསད་པའི་མཆོད་རྫས་ལ་བཞེས་པ་ལྟ་ཅི། དེའི་ཕྱོགས་ཙམ་དུ་ཉེ་མི་ནུས། ནག་ཕྱོགས་ཀྱི་ལྷ་འདྲེ་མཐུ་བོ་ཆེ་བསད་པའི་ཤ་དྲོན་མོ་དང་། ཁྲག་དྲོན་མོ་ལ་དགའ་བ། སེམས་ཅན་ལ་གནོད་པའི་ལས་ལ་རྟག་པར་བརྩོན་པ་དེ་དག་དེར་འདུས་ནས་དེའི་ཤ་ཁྲག་གི་མཆོད་པ་བྱས་པ་ལ་ལོངས་སྤྱད་དེ། གནས་སྐབས་སུ་དམར་ཆོག་བྱེད་པ་དེའི་རྗེས་སུ་འབྲང་ཞིང་མཐུན་རྐྱེན་ཕྲན་བུ་རེ་སྒྲུབ། རྟག་པར་སེམས་ཅན་ལ་གནོད་པ་འབའ་ཞིག་བྱེད་པས། ན་ཚ་དང་ཡེ་འདྲོག་གློ་བུར་དུ་གཏོང་ཞིང་དེར་ཡང་དམར་ཆོག་བྱེད་པ་དེ་འོང་ནས་ཤ་མཆོད་དང་ཁྲག་མཆོད་བྱས་པས་ནག་ཕྱོགས་ཀྱི་ལྷ་འདྲེ་དང་དམར་ཆོག་མཁན་གཉིས་བསྡོངས་པས་རེ་ཞིག་ཕན་པ་ལྟར་བྱེད། ཁོང་གཉིས་གཅིག་གྲོགས་གཅིག་གིས་བྱེད་དེ་རྟག་ཏུ་འབྲལ་བ་མེད་པར་ཤ་ཟ་སོ་ལ་ཆས་པ་ལྟར། ཟ་རློམ། འཆའ་རློམ། རྙེད་རློམ་ཁོ་ནས་རྒྱུ། དམར་ཆོག་མཁན་པོ་དེ་ཡང་ལྷ་འདྲེ་མ་རུངས་པ་དེ་དག་གིས་རྒྱུད་བརླམས་པས་སྔར་ངེས་འབྱུང་དང་སྐྱོ་ཤས། དད་པ་དང་དག་སྣང་། ཆོས་ཀྱི་སྣང་བ་ཡོད་པ་དེ་དག་ཐམས་ཅད་འགྲིབ་ཅིང་མེད་པར་གྱུར་ཏེ། སངས་རྒྱས་ནམ་མཁར་འཕུར་ཡང་དད་པ་མེད་པ་དང་།སེམས་ཅན་རྒྱུ་མ་ལུག་ཀྱང་སྙིང་རྗེ་མེད་པར་ལས་ཀྱི་སྲིན་པོ་དམག་ལ་ཆས་པ་ལྟར།གདོང་དམར་ཕྱུར་རེ།ཤེས་པ་ཁྲོ་ལིང་ངེ་། རྒྱུད་རྩུབ་ཧྲག་གེ།རྟག་ཏུ་གཟེར་གུར་རེ་བ་ཞིག་བྱས། ལྷ་འདྲེའི་སྡོང་གྲོགས་བྱས་པས་ངག་ནུས་དང་བྱིན་རླབས་ཡོད་པའི་སྙེམས་པ་དང་ང་རྒྱལ་འཆང་ཞིང་། ཤི་མ་ཐག་དམྱལ་བར་རྡོ་འཕངས་པ་ལྟར་འགྲོ་བའམ། ཡང་ན་ལས་ངན་གྱི་ཁ་ཅུང་ཟད་མ་གང་བས། ལྷ་འདྲེ་མ་རུངས་པའི་འཁོར་དུ་སྐྱེས་ཏེ་སེམས་ཅན་གྱི་སྲོག་ལ་དབང་བའམ། ཡང་ན་ཁྲ་དང་སྤྱང་ཀི་ལ་སོགས་པ་སེམས་ཅན་གྱི་སྲོག་གཅོད་ལ་དགའ་བར་སྐྱེ་བར་འགྱུར་པ་ཡིན། སྔོན་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐུ་རིང་ལ་རྒྱལ་པོའི་སྐུའི་རིམ་གྲོར། བོན་པོ་རྣམས་ཀྱིས་ཤ་མཆོད་དང་ཁྲག་མཆོད་བྱས་པའི་ཚེ། ཨོ་རྒྱན་སངས་རྒྱས་གཉིས་པ། པཎ་ཆེན་བི་མ་མི་ཏྲ། མཁན་ཆེན་བྱང་ཆུབ་སེམས་དཔའ་ལ་སོགས་ལོ་པཎ་རྣམས་ཀྱིས་བོན་པོའི་ཡས་ལ་གཟིགས་ནས་ཐུགས་ཤིན་ཏུ་མ་དགའ་སྟེ། བསྟན་པ་གཅིག་ལ་སྟོན་པ་གཉིས་མི་འོང་། །ཆོས་ལུགས་གཅིག་ལ་བྱེད་ལུགས་གཉིས་མི་འབྱུང་། །ཆོས་ཀྱི་ཁྲིམས་དང་མི་མཐུན་བོན་ལུགས་འདི། །སྡིག་པ་ཕལ་གྱི་ཐུན་མོངས་མ་ཡིན་པས། །འདི་འདྲ་བྱེད་བཅུག་ངེད་རྣམས་རང་ཡུལ་འགྲོ། །ཞེས་གསུངས་ཤིང་པཎྜི་ཏ་ཐམས་ཅད་གྲོས་མེད་པར་ཐུགས་བློ་གཅིག་ཏུ་གྱུར་ཏེ། རྒྱལ་པོས་ཆོས་གསུང་བར་ཞུས་ཀྱང་ཆོས་མི་གསུངས་བཞེས་པ་དྲངས་ཀྱང་མི་བཞེས་པར་བཞུགས་པ་ཡིན། ད་ལྟ་རང་རེ་སྔོན་གྱི་པཎ་གྲུབ་བྱང་ཆུབ་སེམས་དཔའ་དེ་དག་གི་རྗེས་འཇུག་ཡིན་པར་རློམ་ཞིང་། གསང་སྔགས་ཀྱི་ཆོ་ག་ཟབ་མོ་ཐམས་ཅད་བོན་དུ་གྱེར་ཏེ་སེམས་ཅན་ལ་གནོད་པ་བྱས་ན། བསྟན་པའི་བླ་བཙོང་དཀོན་མཆོག་གི་རྐང་འདྲེན། རང་གཞན་དམྱལ་བར་འཕེན་པ་ཡིན་པས། དུས་རྟག་ཏུ་དམན་པའི་ས་བཟུང་། ཧྲུལ་པོའི་གོས་གྱོན། སེམས་ཅན་ཐམས་ཅད་ལ་ཕན་ཅི་ཐོགས་བྱེད་ཅིང་བྱམས་པ་དང་སྙིང་རྗེ་གཉིས་པོ་འདི་ཁོ་ན་རྒྱུད་ལ་སྐྱེ་ངེས་ཀྱི་བར་དུ་ཆིག་སྒྲིལ་དུ་འབད་ན་ཁ་ཏོན་དང་དགེ་སྦྱོང་། སེམས་ཅན་གྱི་འགྲོ་དོན་སོགས་གཡེར་པོ་ཆེའི་ཆོས་ཤིག་མ་འགྲུབ་ཀྱང་རུང་སྟེ། ཆོས་ཡང་དག་བར་སྡུད་པའི་མདོ་ལས། སངས་རྒྱས་ཐོབ་པར་འདོད་པས་ཆོས་མང་པོ་ལ་བསླབ་པར་མི་བགྱི་ཡི། ཆོས་གཅིག་ལ་བསླབ་པར་བགྱིའོ། །དེ་གང་ཞེ་ན་སྙིང་རྗེ་ཆེན་པོའོ། །གང་ལ་སྙིང་རྗེ་ཆེན་པོ་ཡོད་པ་དེ་ལ་སངས་རྒྱས་ཀྱི་ཆོས་ཐམས་ཅད་ལག་མཐིལ་དུ་ཡོད་པ་ལྟར་འགྱུར་རོ། །ཞེས་གསུངས། སྔོན་དགེ་བཤེས་སྟོན་པའི་དྲུང་དུ་སྐུ་མཆེད་གསུམ་དང་ཁམས་ལུང་པའི་སློབ་མ་ཡིན་པའི་བཙུན་པ་ཞིག་མཇལ་དུ་བྱུང་བ་ལ། སྐུ་མཆེད་གསུམ་ནི། འབྲོམ་སྟོན་པ་ལ་སློབ་མའི་སྲས་ཀྱི་ཐུ་བོ་འཇམ་དབྱངས་ཀྱི་སྤྲུལ་པ་པུ་ཏོ་བ་རིན་ཆེན་དཔལ་དང་། སྤྱན་རས་གཟིགས་ཀྱི་སྤྲུལ་པ་ཕུ་ཆུང་བ་གཞོན་ནུ་བསྟན་པའི་རྒྱལ་མཚན་དང་། ཕྱག་ན་རྡོ་རྗེའི་སྤྲུལ་པ་སྤྱན་སྔ་བ་ཚུལ་ཁྲིམས་འབར་ཟེར་བ་གསུམ་ཡོད། དེ་གསུམ་འབྲོམ་སྟོན་པ་དང་ཚེ་རབས་མང་པོར་འབྲལ་མ་མྱོངས་པའི་ཡབ་སྲས་ཡིན། འབྲོམ་སྟོན་པས་པུ་ཏོ་བ་ཁོང་ཅི་མཛད་ཀྱིན་གདའ་གསུངས་པས། ཁོང་གིས་དགེ་འདུན་བརྒྱ་ཕྲག་མང་པོ་ལ་ཆོས་གསུང་གི་གདའ་ཞུས་པས། ངོ་མཚར་ཆེ། དེ་ཡང་ཆོས་ཕྱོགས་ཀྱི་བྱ་བ་གཅིག་ཡིན་གསུངས། དགེ་བཤེས་ཕུ་ཆུང་བ་ཁོང་ཅི་མཛད་ཀྱིན་གདའ་གསུངས་པས། རང་གཞན་གྱི་ཡོ་བྱད་མང་པོས་རྟེན་གསུམ་འབའ་ཞིག་བཞེངས་ཤིང་གདའ་ཞུས་པས་སྔར་བཞིན་གསུངས། དགོན་པ་བ་ཁོང་ཅི་མཛད་ཀྱིན་གདའ་གསུངས་པས། ཁོང་སྒོམ་འབའ་ཞིག་མཛད་ཀྱིན་གདའ་ཞུས་པས། སྔར་བཞིན་གསུངས། ཁམས་པ་ལུང་པ་ཁོང་ཅི་མཛད་ཀྱི་གདའ་གསུངས་པས། ཁོང་གྲོག་ཁ་རེ་རུ་བཞུགས། དབུ་བཏུམས་ཏེ་བཤུམ་པ་འབའ་ཞིག་མཛད་ཅིང་གདའ་ཞུས་པས། སྟོན་པས་དབུ་ཞྭ་ཕུད། ཐུགས་ཀར་ཐལ་མོ་སྦྱར། སྤྱན་ཆབ་མང་པོ་ཕྱུང་ནས་ཤིན་ཏུ་ངོ་མཚར་ཆེ། ཆོས་བྱ་བ་ཁོང་གིས་བྱས་པ་ཡིན། འདིའི་ཡོན་ཏན་མང་པོ་བཤད་རྒྱུ་ཡོད་དེ། ད་ལྟ་བཤད་ན་ཁོང་མི་མཉེས་པར་འདུག་གསུངས། ཁམས་པ་ལུང་པ་ཁོང་དབུ་བཏུམས་ནས་བཤུམས་པ་འབའ་ཞིག་མཛད་པའི་ཚེ། འཁོར་བ་ན་སྡུག་བསྔལ་གྱིས་མནར་བའི་སེམས་ཅན་རྣམས་ལ་དགོངས་ནས་སྙིང་རྗེ་ཁོ་ན་བསྒོམས་ཏེ་བཤུམ་པ་ཡིན། དེ་བཞིན་དུ་བྱམས་པ་དང་སྙིང་རྗེ་གཉིས་པོ་འདི་གལ་ཆེ་བའི་རྒྱུ་མཚན་མང་པོ་སྤྱན་སྔ་བས་གསུངས་བའི་ཚེ། གླང་ཐང་པས་ཕྱག་མཛད་དེ། བདག་དུས་འདི་ནས་བཟུང་སྟེ་བྱམས་སྙིང་རྗེ་འབའ་ཞིག་སྒོམ་པར་ཞུ་ཞུས་པས། དགེ་བའི་བཤེས་གཉེན་པས་དབུ་ཞྭ་ཕུད། ཤིན་ཏུ་ཡང་ཆ་བཟང་ལགས་ཞེས་ལན་གསུམ་གསུངས། རང་རྒྱུད་ཀྱི་སྡིག་སྒྲིབ་སྦྱོང་བ་ལ་ཡང་སྙིང་རྗེ་ལས་ལྷག་པ་མེད་དེ། སྔོན་རྒྱ་གར་དུ་དམ་པའི་ཆོས་མངོན་པ་ལ་དགྲ་ལན་གསུམ་བྱུང་བས་ནུབ་པ་ན། ཞེས་པའི་དོན་ནཱ་ལེནྡྲར་གཎྜི་བརྡུང་བའི་སྒྲ་ལ་ཕཊ་ཊཱ་ཡ་ཞེས་པའི་སྒྲར་བྱུང་། མུ་སྟེགས་ཀྱི་རྒན་མོ་ཞིག་ན་རེ། ནང་པའི་གཎྜིའི་སྒྲ་ལ། འགེམས་ཞེས་པ་ཞིག་སྣང་སྟེ་འོ་སྐོལ་ལ་གནོད་མི་གནོད་བརྟག་པར་རིགས་སོ། །ཞེས་ཟེར། དེ་བྲམ་ཟེ་སྒྲ་མཁན་རྣམས་ཀྱིས་བརྟགས་པས་མུ་སྟེགས་ངན་པ་རྣམས་ཀྱི་ཀླད་པ་འགེམས་ཞེས་བྱ་བའི་སྒྲར་འདུག་གོ། ལྷ་དང་ཀླུ་དང་དྲང་སྲོང་གིས་མཆོད་པའི། །དཀོན་མཆོག་གསུམ་གྱི་ཏོག་སྟེ་འདི་བརྡུང་བས། །མུ་སྟེགས་འཆལ་བ་རྣམས་ཀྱི་ཀླད་པ་འགེམས། །ཞེས་བྱུང་བར་གྲགས་ལ། དེར་བྲམ་ཟེའི་རྒྱལ་པོ་རྒྱལ་བཤེས་ལ་སོགས་པ་མུ་སྟེགས་རྣམས་ཀྱིས་དམག་བྱས་ཏེ། ཡུལ་དབུས་ནས་ཛ་ལནྡྷ་རའི་བར་གྱི་གཙུག་ལག་ཁང་མང་པོ་མེ་ལ་བསྲེགས་པ་སོགས་བྱས་ནས། ཕྱིས་དཔལ་ནཱ་ལེནྡྲར་རྒྱལ་པོའི་བློན་པོ་ཀ་ཀུ་ཏ་སེངྷ་ཞེས་བྱ་བས་ལྷ་ཁང་ཞིག་བཞེངས་པའི་ཚེ། སྐྱེ་བོ་ཐམས་ཅད་ལ་སྟོན་མོ་ཆེར་བྱས་པ་ལས། མུ་སྟེགས་ཀྱི་གྲུབ་མཐའ་འཛིན་པའི་མུ་ཏོ་བ་གཉིས་སློང་དུ་ཡོང་བ་ལས། དགེ་ཚུལ་གཏུམ་པོ་རྣམས་ཀྱིས་ཁྲུས་ཁུ་གཏོར། སྒོ་གླེགས་ཀྱི་བར་དུ་བཙིར། ཁྱི་གཏུམ་པོ་དག་རྦད་པས། དེ་གཉིས་ཤིན་ཏུ་ཁྲོས་ཏེ། གཅིག་གིས་འཚོ་བ་སྦྱར་ཞིང་། གཅིག་ཤོས་ཀྱིས་ཉི་མ་སྒྲུབ་པར་དམ་བཅས་ནས། སའི་དོང་གཏིང་རིང་པོར་ཞུགས་ཏེ། ལོ་དགུའི་བར་དུ་བསྒྲུབས་ཀྱང་མ་འགྲུབ་ནས་ཕྱིར་འགྲོ་བར་བརྩམས་པས། གྲོགས་པོ་ན་རེ། ཁྱོད་ཀྱིས་སྔགས་གྲུབ་བམ་ཟེར་རོ། །མ་འགྲུབ་བྱས་པ་ན། དེ་ན་རེ། ཕྱོགས་ཐམས་ཅད་དུ་མུ་གེ་ཉམ་ང་བས་ཁྱབ་པ་ལ་ངས་དཀའ་བ་འདི་སྙེད་ཀྱིས་འཚོ་བ་སྦྱར་ན། ཁྱེད་སྔགས་མ་གྲུབ་པར་ཕྱིར་ནམ་བྱུང་བའི་ཚེ། མགོ་དྲུང་ནས་གཅོད་དོ་བྱས་ནས། ཆུ་གྲི་རྣོན་པོ་བསྲེལ་བས། དེ་འཇིགས་ཏེ་སླར་ཡང་ལོ་གསུམ་བསྒྲུབ་བོ། །དེ་ལྟར་ལོ་བཅུ་གཉིས་ན་གྲུབ་ནས། དེས་སྦྱིན་སྲེག་བྱས་ཏེ་སྦྱིན་སྲེག་གི་ཐལ་བ་ལ་སྔགས་བཟླས་ཏེ་གཏོར་བ་ཙམ་གྱིས་མེ་རང་འབར་དུ་བྱུང་བ་དང་། གཙུག་ལག་ཁང་ལ་བལྟས་པས་མིག་ལས་མེ་བྱུང་སྟེ་ལྷ་ཁང་བརྒྱད་ཅུ་རྩ་བཞི་རྣམས་ཚིག་ནས་མངོན་པའི་སྡེ་སྣོད་མང་པོ་ཡང་བསྲེགས་སོ། །དེའི་ཚེ་བྲམ་ཟེའི་དགེ་སློང་མ་གསལ་བའི་ཚུལ་ཁྲིམས་ཞེས་བྱ་བས་བདག་བུད་མེད་དུ་གྱུར་པ། སྐྱེ་བ་དམན་པས་སངས་རྒྱས་ཀྱི་བསྟན་པ་གསལ་བར་བྱེད་མི་ནུས་པས་སྐྱེས་པ་དང་འགྲོགས་ཏེ་བུ་བསྐྱེད་ལ། དམ་པའི་ཆོས་མངོན་པ་དར་དུ་གཞུག་གོ་དགོངས་ནས། གསུངས་ན་དེའི་རྨི་ལམ་དུ་ཚུལ་ཁྲིམས་བསྲུང་བ་བས་ཁྱིམ་ཐབས་བྱས་ན་སངས་རྒྱས་ཀྱི་བསྟན་པ་དར་ཞིང་སེམས་ཅན་ལ་ཕན་པ་གཅིག་ཡོང་ཞེས་ཐོས་ནས། རྒྱལ་རིགས་ཤིག་དང་འདུས་པ་ལས་འཕགས་པ་ཐོགས་མེད་དང་། བྲམ་ཟེ་ཞིག་དང་འདུས་པས་དབྱིག་གཉེན་འཁྲུངས། སྲས་གཉིས་ཀ་ཆེར་སྐྱེས་ནས་ཕའི་ལས་དྲི་བ་ལ་མ་ན་རེ། ཁྱེད་གཉིས་ཕའི་ལས་ཀྱི་དོན་དུ་བསྐྱེད་པ་མ་ཡིན་གྱི། སངས་རྒྱས་ཀྱི་བསྟན་པ་དར་བར་བྱ་བའི་དོན་དུ་བསྐྱེད་པ་ཡིན་པས་ཆོས་སློབ་ལ། དམ་པའི་ཆོས་མངོན་པའི་བསྟན་པ་དར་བ་ཞིག་གྱིས་ཤིག་ཟེར་བས། དབྱིག་གཉེན་ཁ་ཆེའི་འདུས་བཟང་གི་དྲུང་དུ་མངོན་པ་སློབ་པ་ལ་སོང་ནས་། ཐེག་ཆུང་གི་མངོན་པ་སྡེ་བདུན་དང་བྱེ་བྲག་བཤད་མཛོད་ཆེན་མོ་ལ་སོགས་པ་ལེགས་པར་བསླབ་སྟེ། བསྟན་བཅོས་མཛོད་རྩ་འགྲེལ་ལ་སོགས་པ་མཛད་པའོ། །ཐོགས་མེད་ཀྱིས་རི་བོ་བྱ་རྐང་ཅན་དུ་ཕྱིན་ནས་རྒྱལ་བ་བྱམས་པའི་ཞལ་མཇལ་ཏེ་གདམས་ངག་ཞུས་ཆོག་པ་བྱ་དགོངས་ནས་བྱམས་པ་བསྒྲུབ། ལོ་དྲུག་གི་བར་དུ་དཀའ་བ་སྤྱད་དེ་བསྒོམས་པས་རྨི་ལམ་བཟང་པོ་ཙམ་ཡང་མ་བྱུང་། དེར་ཁོང་གིས་ད་མི་འགྲུབ་པ་ཡིན་པ་འདྲ་དགོངས་ཡི་ཆད་དེ་བྱོན་པས། ལམ་ཀ་ཞིག་ན་མི་ཞིག་གིས་ལྕགས་ཀྱི་སྡོང་པོ་ཆེན་པོ་ཞིག་རས་འཇམ་པོས་ཕྱི་གྱིན་འདུག ཁྱོད་ཀྱིས་འདི་འདི་ལྟར་ཕྱིས་ནས་ཅི་བྱེད་པ་ཡིན་དྲིས་པས། ང་ལ་ཁབ་མེད་པས། ངས་འདི་ཟད་ནས་ཁབ་ཅིག་བྱེད་འདོད་པ་ཡིན་ཟེར། ཁོང་གི་ཐུགས་དགོངས་ལ་ལྕགས་སྡོང་པོ་ཆེན་པོ་འདི་རས་འཇམ་པོ་འདིས་ཕྱིས་པས་ཟད་ནས་ཁབ་ཏུ་གྱུར་པའི་དུས་མི་འོང་། བརྒྱ་ལ་འོང་ཡང་དེའི་ཚེ་ཁོ་ག་ལ་ཡོད། འཇིག་རྟེན་པ་རྣམས་དོན་མེད་པའི་ལས་ཀ་ཁབ་གཅིག་གི་དོན་ལ་འདི་ཙམ་དཀའ་ལས་བྱེད་པ་ལ་བལྟས་ན། ངས་དམ་པའི་ཆོས་བསྒྲུབ་པ་ལ་སྙིང་རུས་ཡེ་མ་ནུས་པར་འདུག་དགོངས་ཕྱིར་ལོག་ནས་བྱོན་ཏེ། སླར་ཡང་ལོ་གསུམ་གྱི་བར་དུ་བསྒྲུབས་ཀྱང་རྟགས་ཙམ་ཡང་མ་བྱུང་། ད་ནི་ངེས་པར་མི་འགྲུབ་པ་འདྲ་དགོངས་ནས་བྱོན་པས། ཡང་ལམ་ཁ་ཞིག་ན་བྲག་རི་ཆེན་པོ་དགུང་ལ་རེག་པ་ཞིག་གི་དྲུང་ན་མི་ཞིག་གིས་བྱ་སྒྲོ་ཞིག་ཆུ་ནང་དུ་ཤན་ནས་བྲག་དེ་ལ་བྱབ་ཅིང་འདུག ཁྱོད་ཅི་བྱེད་པ་ཡིན་དྲིས་པས། འདིའི་བྲག་འདི་མཐོ་ཆེས་ནས་ང་རང་གི་ཁང་པ་བྲག་འདིའི་ནུབ་ན་ཡོད་པའི་སྟེང་དུ་ཉི་མ་མི་འཆར་བར་འདུག་པས། བྲག་འདི་ཟད་ནས་མེད་པར་བྱེད་པ་ཡིན་ཟེར། ཁོང་གི་ཐུགས་ལ་ཡང་སྔར་ལྟར་འདི་འདྲ་བྱེད་པ་ལ་བསམ་ན་ངས་སྙིང་རུས་ཡེ་མ་ནུས་པར་འདུག་དགོངས་ནས་སླར་ལོག་སྟེ་ལོ་གསུམ་དུ་བསྒྲུབས་ཀྱང་རྨི་ལམ་བཟང་པོ་ཙམ་ཡང་མ་བྱུང་བས་ཁོང་ཡི་ཆད་དེ་ད་ནི་ཅིས་ཀྱང་མི་འགྲུབ་པར་འདུག་དགོངས་བྱོན་འོངས་པས། ལམ་ཁ་ཞིག་ན་ཁྱི་མོ་རྐང་པ་གཉིས་ཞ་བ་ཞིག་ཁོག་སྨད་ཐམས་ཅད་འབུས་གཡེངས་རུང་ད་དུང་གཞན་ལ་ཞེ་སྡང་སྐྱེས་ནས་ཁོག་སྟོད་ཁོང་གི་སྟེང་དུ་ཟུག་ཅིང་ཁོག་སྨད་དྲུད་ནས་འཛིན་དུ་འོང་བ་ལྟར་བྱེད་པ་ལ། ཁོང་སྙིང་རྗེ་དྲག་པོ་ཤས་མི་བཟོད་པ་ཞིག་སྐྱེས། སྐུ་ལུས་ཀྱི་ཤ་བཅད་དེ་བྱིན་ནས་ཁོག་སྨད་ཀྱི་འབུ་བསལ་བར་འདོད་པ་ལ་ཕྱག་གིས་བསལ་ན་འབུ་བསད་ཀྱིས་དོགས། འབུ་འདི་རྣམས་ལྕེས་བླངས་ཏེ་བསལ་དགོས་དགོངས་ཀྱང་ཁྱིའི་ལུས་ཐམས་ཅད་རུལ་བ་དང་རྣག་གིས་གང་བས་མཐོང་བཞིན་དུ་ལྕེས་རེག་མ་ནུས་ཏེ་སྤྱན་བཙུམ་ནས་ལྗགས་བརྐྱངས་པས། ལྗགས་ཁྱི་རོ་ལ་མ་ཐུག་པར་ས་ལ་ཐུག་སོང་། སྤྱན་ཡར་ཕྱེས་ནས་བལྟས་པས་ཁྱི་རོ་མི་སྣང་བར་རྗེ་བཙུན་བྱམས་པ་འོད་ཀོར་རེ་བཞུགས་འདུག ཐུགས་རྗེ་རེ་ཆུང་དེ་ཙམ་དུ་ཞལ་མི་སྟོན་པ་ཞུས་པས། ངས་ཁྱོད་ལ་ཞལ་མ་བསྟན་པ་མིན། ང་དང་ཁྱོད་ལ་འབྲལ་བ་མེད་ཀྱང་། ཁྱོད་སྡིག་སྒྲིབ་ཆེས་པས་མ་མཐོང་བ་ཡིན། ཁྱོད་ཀྱི་ལོ་བཅུ་གཉིས་སུ་སྒྲུབ་པ་བྱས་པས་སྡིག་སྒྲིབ་ཅུང་སྲབ་པས་ཁྱི་མོ་རུ་མཐོང་ཞིང་། ད་ལྟ་སྙིང་རྗེ་ཆེན་པོ་གློ་བུར་དུ་སྐྱེས་པས་སྒྲིབ་པ་ལྷག་མ་མེད་པར་དག་སྟེ་ང་རང་དངོས་སུ་མཐོང་བ་ཡིན། དེ་ཡིད་མི་ཆེས་ན་ང་རང་ཕྲག་པར་ཐོགས་ལ་མི་ཐམས་ཅད་ལ་སྟོན་དང་ཤེས་འོང་གསུངས། ཐོགས་མེད་ཀྱིས་བྱམས་པ་ཕྲག་པ་གཡས་སུ་ཐོགས་ཏེ། ཚོང་འདུས་སུ་ཕྱིན་ནས་མི་ཐམས་ཅད་ལ་ངའི་ཕྲག་པ་ན་ཅི་འདུག་གསུངས་པས། ཐམས་ཅད་ཀྱིས་ཅི་ཡང་མི་འདུག་ཟེར། ཅུང་ཟད་བག་ཆགས་སྲབ་པའི་རྒན་མོ་ཞིག་གིས་ཁྱོད་ཀྱི་ཕྲག་པ་ན་ཁྱི་རོ་རུལ་པ་ཞིག་འདུག་ཟེར། དེར་ཐོགས་མེད་ཆོས་རྒྱུན་གྱི་ཏིང་ངེ་འཛིན་ལ་བརྟེན་པའམ་མགོན་པོ་བྱམས་པས་དགའ་ལྡན་ལྷ་ཡུལ་དུ་ཁྲིད་དེ་བྱམས་ཆོས་སྡེ་ལྔ་དང་། མངོན་པ་སྟོང་ཕྲག་བརྒྱ་བ་ལ་སོགས་ཐེག་ཆེན་ཤིན་ཏུ་རྒྱས་པའི་སྡེ་སྣོད་རྣམས་བསྟན་ཅིང་། ཐོགས་མེད་ཀྱིས་གསན་ནས་སླར་མི་ཡུལ་དུ་བྱོན་ཏེ་དེའི་དོན་རྒྱ་ཆེན་སྟོན་པ་ས་སྡེ་ལྔ་དང་། བསྡུས་ཏེ་བསྟན་པ་ཐེག་པ་ཐུན་མོང་བའི་སྡོམ་མངོན་པ་ཀུན་ལས་བཏུས་པ་དང་། ཐེག་ཆེན་ཐུན་མོང་མིན་པའི་སྡོམ་ཐེག་བསྡུས་ལ་སོགས་མཛད་དེ། འཛམ་བུའི་གླིང་དུ་སྤྱིར་ཐེག་པ་ཆེན་པོའི་བསྟན་པ་དང་ཁྱད་པར་བྱམས་པའི་ཆོས་སྡེ་ལྔ་དང་བཅས་པ་དར་བར་མཛད་པ་ཡིན། དེས་ན་སྡིག་པ་སྦྱོང་བ་ལ་ཡང་སྙིང་རྗེ་ལས་ལྷག་པའི་ཆོས་མེད་ཅིང་། བྱང་ཆུབ་ཀྱི་སེམས་ཐུན་མོང་མ་ཡིན་བ་རྒྱུད་ལ་སྐྱེ་བའི་རྒྱུ་མ་ནོར་བ་ཡིན་པས་ཐབས་དུ་མའི་སྒོ་ནས་སྙིང་རྗེ་འདི་བསྒོམ་པ་ལ་འབད་དགོས། དེ་ལྟར་སྙིང་རྗེ་བསྒོམ་པ་དེ་ཡང་མ་ལག་རྡུམ་མའི་བུ་ཆུས་ཁུར་བ་ལྟ་བུ་ཞེས་བྱ་སྟེ། མ་ལག་པ་མེད་པ་ཞིག་གི་བུ་ཆུས་ཁྱེར་སོང་ན། བུ་ལ་སྙིང་བརྩེ་བའི་སྡུག་བསྔལ་དྲག་པོ་ཤས་མི་བཟོད་པ་སྐྱེ། རང་ལ་ལག་པ་མེད་པས་ཆུ་ནང་ནས་འདོན་ནི་མི་ནུས། ད་ཅི་དྲག་ན་སྙམ་དུ་ཐབས་ཁོ་ན་སེམས་ཤིང་སྙིང་ནས་མི་བཟོད་པར་འོ་དོད་འབོད་ཅིང་རྒྱུག་པ་དང་འདྲ་བར་ཁམས་གསུམ་གྱི་སེམས་ཅན་ཐམས་ཅད་སྡུག་བསྔལ་གྱི་ཆུ་བོས་ཁྱེར། འཁོར་བའི་རྒྱ་མཚོར་བྱིང་བ་ལ་ཤས་མི་བཟོད་པའི་སྙིང་རྗེ་སྐྱེ་ཡང་རང་ལ་དེ་དག་སྡུག་བསྔལ་ལས་སྐྱོབ་པའི་ནུས་པ་མེད་པས། ད་ཅི་བྱེད་སྙམ་དུ་སྙིང་ཐག་པ་ནས་བླ་མ་དང་དཀོན་མཆོག་ལ་གསོལ་བ་འདེབས་ཤིང་སྙིང་རྗེ་བསྒོམ་པར་བྱའོ། །སྙིང་རྗེ་ཚད་མེད་བསྒོམ་སྐབས་དམིགས་ཡུལ་རང་གི་རྩ་བའི་མའམ། བཤའ་ལུག་ལྟ་བུའི་སེམས་ཅན་གཞན་ཤན་པའི་མདུན་སར་ཁྲིད་དེ་ད་ལྟ་ཉིད་དུ་གསོད་རན་པ་སྐྱབས་དང་སྐྱོབ་པ། མགོན་དང་དཔུང་གཉེན་བྲོས་ས་དང་གབ་ས་མེད་པའི་སེམས་ཅན་ཁོལ་བུ་ཁོལ་བུ་བ་ཞིག་ལ་བསྒོམ། དེ་ནས་རིམ་གྱིས་རིམ་གྱིས་མཐར་སེམས་ཅན་ཐམས་ཅད་ཀྱི་བར་བསྒོམ་དགོས། དང་པོ་ནས་རྒྱ་ཆེན་པོ་ཞིག་ལ་དམིགས་པ་གཏད་ན་གོང་བཤད་ལྟར་སྤྱི་འབྱམས་གོ་ཡུལ་དུ་ཤོར་བའི་ཉེན་ཡོད་པས་དེ་ལྟར་བྱ། གང་ལྟར་ཡང་མ་རྒན་འདི་སྔོན་ཆད་ཐོག་མེད་ནས་མ་བྱས་པའི་གྲངས་ས་ཆེན་པོའི་རྡུལ་ལས་མང་བའི་ཚུལ་ཤེས་པ་ནི་མར་ཤེས་པ་ཡིན་ལ། ཚེ་རབས་མང་པོར་མ་བྱས་པའི་སྐབས་སུ་དང་པོ་ལུས་སྲོག་བསྐྱེད་པའི་དྲིན། བར་དུ་གསོ་སྐྱོང་བྱེད་པའི་དྲིན། ཐ་མར་ཆོས་དང་མཇལ་བའི་དྲིན་ལ་སོགས་པ་སེམས་ཐོག་ལ་དྲངས་ཏེ་དྲིན་ཅན་ཡིན་པ་ཤེས་པ་དེ་དྲིན་དྲན་པ་ཡིན། མ་དྲིན་མོ་ཆེ་འདིས་འདོད་རྒྱུ་བདེ་བ་འདོད་ཀྱང་བདེ་བའི་རྒྱུ་དགེ་བ་སྒྲུབ་མི་ཤེས། སྡུག་བསྔལ་མི་འདོད་ཀྱང་སྡུག་བསྔལ་གྱི་རྒྱུར་ངམ་ངམ་ཤུགས་ཤུགས་ཀྱིས་ཞུགས་པ་སྟེ། སྡུག་བསྔལ་འདོར་འདོད་སེམས་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །ཞེས་གསུངས་པ་ལྟར་དུ་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་བས། སྡུག་བསྔལ་གྱི་བདེན་པས་དངོས་སུ་གནོད་ཅིང་ཀུན་འབྱུང་གི་བདེན་པས་བརྒྱུད་ནས་གནོད་པ་སྟེ་ཚེ་འདིའི་སྡུག་བསྔལ་གྱིས་སྐྱེལ་མ་བྱས། ཕྱི་མའི་སྡུག་བསྔལ་གྱིས་བསུ་མ་བྱས། བར་དོའི་སྡུག་བསྔལ་གྱིས་མཚམས་སྦྱོར་བའི་སྡུག་བསྔལ་རྒྱུ་འབྲས་གཉིས་དང་ལྡན་པ་དེ་ལ་ཤ་ཚ་སྙིང་རྗེ་བསམ་པ་དེ་སྙིང་རྗེའི་དམིགས་པ་ཡིན། དེའི་སྐབས་སུ་བློའི་རྣམ་པ་དྲིན་གཟོ་འདོད་ཀྱི་སེམས་ཁྱད་པར་ཅན་གྱིས་སྡུག་བསྔལ་གྱི་འབྲས་བུ་སྲིད་པ་ཁམས་གསུམ་འཁོར་བའི་སྡུག་བསྔལ་དང་བྲལ་བར་གྱུར་ཅིག་སྙམ་པའི་སྨོན་པ་དང་འབྲེལ་བ། བྲལ་ན་ཅི་མ་རུང་སྙམ་པའི་འདུན་པ་དང་འབྲེལ་བ། བྲལ་བ་ཞིག་ངས་བྱའོ་སྙམ་དམ་བཅའ་དང་འབྲེལ་བ། སྡུག་བསྔལ་དེ་དང་བྲལ་བ་ཞིག་སྐྱབས་གནས་བསླུ་བ་མེད་པ་དཀོན་མཆོག་རིན་པོ་ཆེ་ཁྱེད་ཀྱིས་ཐུགས་རྗེ་དང་ནུས་པ་མ་ཆུང་སྙམ་པ་གསོལ་འདེབས་དང་འབྲེལ་བ་སྟེ་འབྲེལ་བ་བཞི་ལྡན་གྱིས་བློའི་རྣམ་པས་དམིགས་རྣམ་སྤྲད་དགོས། དེ་ལྟར་དཔྱད་འཇོག་སྤེལ་མ་བྱས་ཏེ། མཐར་ཕ་དང་སྲིང་མོ་གཉེན་ཚན་ཕུ་ནུ་སོགས་ནས་རིམ་གྱིས་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་དུས་རྟག་ཏུ་སྡུག་བསྔལ་གྱིས་གདུང་བ་རྣམས་སྡུག་བསྔལ་རྒྱུ་འབྲས་གཉིས་དང་བྲལ་བར་གྱུར་ཅིག བྲལ་ན་ཅི་མ་རུང་། བྲལ་བ་ཞིག་ངས་བྱ། བྲལ་བར་བླ་མ་དཀོན་མཆོག་གིས་ཐུགས་རྗེ་མ་ཆུང་ཞེས་གསོལ་བ་འདེབས་པ་དང་། འཁོར་གསུམ་པོ་སྣང་ལ་རང་བཞིན་མ་གྲུབ་པའི་ངེས་ཤེས་དྲངས་ཏེ། ཐུན་མཚམས་རྣམས་སུ་སེམས་ཅན་ཀུན་ལ་སྙིང་རྗེ་བསྒོམ་པ་སྟེ་ཚད་མེད་བཞི་པོ་རེ་རེ་བཞིན་དུ་རང་ཐོག་ལ་ལེན་ཅིང་ཐུན་བཅད་ནས་བསྒོམ་དགོས་པ་རེད། དེ་ཡང་དཔྱད་འཇོག་སྤེལ་མ་བྱེད། ཐུན་མཚམས་སུ་ཡང་དམིགས་མེད་ཀྱི་ལྟ་བས་རྩིས་ཟིན་པ་སོགས་ཉམས་ལེན་གྱི་གནད་དང་མ་བྲལ་བ་དགོས། ཡོད་ན་སངས་རྒྱས་སྒྲུབ་ལ་དེས་ཆོག་ཅིང་། །མེད་ན་སངས་རྒྱས་སྒྲུབ་ལ་ཐབས་ཆགས་པ། །སངས་རྒྱས་སྒྲུབ་པའི་ས་བོན་མ་ནོར་བ། །རྣམ་དག་བྱང་ཆུབ་སེམས་མཆོག་བསྐྱེད་པར་ཤོག །ཅེས་གསུངས་པ་ལྟར་དོན་གཉིས་འགྲུབ་པའི་སངས་རྒྱས་ཀྱི་གོ་འཕང་སྒྲུབ་པ་ལ་བྱང་ཆུབ་ཀྱི་སེམས་རིན་པོ་ཆེ་བསྐྱེད་དགོས། བྱང་ཆུབ་སེམས་དེ་ཉིད་སྙིང་རྗེས་དྲངས་དགོས་པས། བྱང་ཆུབ་ཀྱི་སེམས་མ་སྐྱེས་པ་སྐྱེ་བའི་ཐབས་ཚད་མེད་བཞིས་བློ་སྦྱོང་བ་འདི་ཡིན་པས་ལེགས་པར་སྦྱངས་ནས་མི་ཉམས་པ་གོང་ནས་གོང་དུ་འཕེལ་བའི་ཐབས་བྱང་ཆུབ་མཆོག་ཏུ་སེམས་བསྐྱེད་པ་དངོས་དང་། དེའི་བསླབ་བྱ་ལ་བསླབ་པ་སོགས་ཡིན་ནོ། །མང་དུ་བཤད་ན་ཚད་མེད་བཞི། འབྲིང་དུ་བསྡུས་ན་བྱམས་སྙིང་རྗེ་གཉིས། གཅིག་ཏུ་དྲིལ་ན་སྙིང་རྗེ་ཉག་མ་གཅིག་པོ་འདི་ཐོག་མཐའ་བར་གསུམ་མི་འབྲལ་ཞིང་བསྒོམ་དགོས་པ་གལ་ཤིན་ཏུ་ཆེའོ།།

༤༽དགའ་བ་ཚད་མེད།

དེ་ནས་དགའ་བ་བསྒོམ་པ་ནི། སྐྱེ་བོ་གང་ཞིག་རིགས་རུས་སྟོབས་འབྱོར་མངའ་ཐང་དང་ལྡན་བ་ལ་སོགས་མཐོ་རིས་ཀྱི་ཡུལ་ན་ད་ལྟ་ལུས་བདེ་ཞིང་སེམས་སྐྱིད་པ། ཚེ་རིང་བ། འཁོར་མང་བ། ལོངས་སྤྱོད་དང་ལྡན་པ་ཞིག་དམིགས་ཡུལ་དུ་བསམས་ནས། རྣམ་པའི་བློ་དེ་ལ་ཁོ་ལས་ང་ལྷག་ན་ཨང་བསམ་པའི་འགྲན་སེམས་དང་ཕྲག་དོག་མེད་པར། སྐྱེ་བོ་བདེ་བ་དང་ལྡན་པ་འདི་ད་རུང་འདི་བས་ཀྱང་བདེ་ཞིང་སྐྱིད་པའི་མངོན་མཐོ་ལྷ་མིའི་དཔལ་ཡོན་གྱི་ལོངས་སྤྱོད་ཕུན་སུམ་ཚོགས་པས་འབྱོར་ཞིང་། འདི་ལ་དགྲ་དང་ནད་སོགས་ཀྱིས་འཚེ་བ་མེད་པ། ཤེས་རབ་ཆེ་བ་ལ་སོགས་ནང་གི་ཡོན་ཏན་ཐམས་ཅད་ཕུན་སུམ་ཚོགས་པ་དུ་མས་འབྱོར་པར་ཤོག་ཅིག སེམས་ཅན་གཞན་རྣམས་ཀྱང་འདི་ལྟ་བུའི་གོ་འཕང་ལ་གནས་ན་ང་རེ་དགའ་སྙམ་དུ་ཡང་དང་ཡང་དུ་དགའ་བ་བསྒོམ། དེ་ཡང་ལས་དང་པོ་བས་གང་ལ་དགའ་བ་སྐྱེ་སླ་བའི་ཡུལ་རང་གི་རྩ་བའི་མ་ལྟ་བུ་ཞིག་ལ་མར་ཤེས་དྲིན་དྲན་དྲིན་ལན་གཟོ་འདོད་ཀྱི་བསམ་པ་དང་། དེ་ཐོག་བདེ་བ་དང་ལྡན་འདོད་ཀྱི་བྱམས་པ་དང་། སྡུག་བསྔལ་དང་བྲལ་འདོད་ཀྱི་སྙིང་རྗེ་གཉིས་བསྒོམ། དེ་ནས་མ་དེ་ལ་ད་ལྟ་ཟས་གོས་ལོངས་སྤྱོད་མངའ་ཐང་འབྱོར་བ་ནད་མེད་གཟུགས་བཟང་ལ་སོགས་པ། བདེ་ཞིང་སྐྱིད་པ་ཅུང་ཟད་རེ་ཡོད་པའི་ཚུལ་ལ་དམིགས་ནས། མ་རྒན་ལ་འབྱོར་བ་ཕུན་སུམ་ཚོགས་པ་ཡོད་པ་དེ་ལ་དགའ་བར་བལྟ་དགོས་པ་བལྟ་མེད་ཐབས་མེད་པ་བལྟ། མདོར་ན་མ་རྒན་གྱི་སྐྱིད་ཀྱི་འབྲས་བུ་དང་། དེའི་རྒྱུ་དགེ་བའི་དངོས་པོ་ཡོད་པ་རྣམས་མི་ཉམས་གོང་ནས་གོང་དུ་འཕེལ་ཞིང་བདེ་བ་རྒྱུ་འབྲས་གཉིས་པོ་དེ་དང་མི་འབྲལ་བ་ཞིག་ཅི་མ་རུང་། མི་འབྲལ་བར་གྱུར་ཅིག མི་འབྲལ་བར་བདག་གིས་བྱ། དེ་ལྟར་མི་འབྲལ་བར་བླ་མ་དཀོན་མཆོག་མཁྱེན་སྙམ་པའི་གསོལ་འདེབས་དང་འབྲེལ་བ་སྟེ་འབྲེལ་བ་བཞི་དང་། བདེ་བའི་རྒྱུ་འབྲས་དེ་གོང་ནས་གོང་དུ་འཕེལ་ཏེ་གནས་སྐབས་མངོན་མཐོ། མཐར་ཐུག་ངེས་ལེགས་ཀྱི་བར་དུ་འཕེལ་བར་གྱུར་ཅིག་སོགས་འབྲེལ་བ་གསུམ་ལྡན་ནམ་བཞི་ལྡན་གྱི་ཐོག་ནས་དཔྱད་འཇོག་སྤེལ་མ་བྱེད་དགོས། འཁོར་གསུམ་པོ་སྣང་ལ་རང་བཞིན་མེད་པའི་ངེས་ཤེས་དྲངས་ཏེ་ཐུན་མཚམས་ལ་སོགས་པ་དུས་དང་རྣམ་པ་ཐམས་ཅད་དུ་སེམས་ཅན་བདེ་སྐྱིད་ཅན་རྣམས་ལ་ཕྲག་དོགས་མི་བྱེད་པར་དགའ་བ་བསྒོམ། སེམས་ཅན་ཐམས་ཅད་མ་ཡིན་པ་ཤེས་ཟིན་ནས། མ་ལ་བདེ་སྐྱིད་བདེ་བའི་དངོས་པོ་ཚོགས་ན་བུས་ཕྲག་དོག་བྱེད་མི་སྲིད་པ་ལྟ་བུ་ཞིག་མ་བྱུང་གི་བར་དུ་བསྒོམ། མ་ལ་དགའ་བ་དེ་རྒྱུད་ལ་སྐྱེས་ནས་དེ་ནས་ཉེ་བ་དང་མཛའ་བཤེས་ལ་སོགས་པ་ལ་ཡོན་ཏན་དང་བདེ་སྐྱིད་ཡོད་པ་ལ་དམིགས་ནས་དགའ་བ་བསྒོམ། དེ་རྒྱུད་ལ་སྐྱེས་ནས་བར་མ་རྣམས་ལ་བསྒོམ། དེ་དག་ཀྱང་རང་ཉིད་ཀྱི་མ་ཡིན་པར་གོམས་ནས་ད་ལྟའི་མ་དང་ཁྱད་མེད་པར་བྱུང་བའི་དུས་སུ། དེ་ནས་རང་ལ་གནོད་བྱེད་ཀྱི་དགྲ་དང་ཁྱད་པར་ཕྲག་དོག་གི་གནས་སུ་གྱུར་པ་ཐམས་ཅད་ལ། གཞན་སྐྱིད་ན་མི་དགའ་སྡུག་ན་དགའ་བའི་གཞན་འབྱོར་ཕུན་ཚོགས་ལ་མི་བཟོད་པའི་བློ་ངན་ཕྲག་དོག་འགྲན་སེམས་ཀྱི་རྩ་བ་དྲུངས་ནས་ཕྱུང་སྟེ། གཞན་བདེ་བ་དང་ལྡན་པའི་ཆ་ཐམས་ཅད་ལ་དགའ་བ་དམིགས་བཅས་ཁྱད་པར་ཅན་དུ་བསྒོམ་ཞིང་མཐར་འདས་པའི་རྣམ་རྟོག་གི་རྗེས་མི་འབྲང་། མ་འོངས་པའི་རྣམ་རྟོག་གིས་མདུན་མི་བསུ། ད་ལྟའི་རྟོག་པ་འཕྲོ་མི་འཐུད་པར་ཅི་གནས་སུ་དམིགས་པ་མེད་པའི་ངང་ལ་བཞག དེ་ལྟ་བུའི་དཔྱད་འཇོག་སྤེལ་མ་བྱ། དེ་ཡང་དགའ་བ་ནི་ཕྲག་དོག་མེད་པའི་བློ་ཡིན་པས་དཔྱད་འཇོག་སོགས་ཐབས་སྣ་ཚོགས་པས་བློ་སྦྱངས་ཏེ་ཕྲག་དོག་གི་བློ་ངན་འདི་རྒྱུད་ལ་མི་སྐྱེ་བའི་ཐབས་ལ་འབད་དགོས། ཁྱད་པར་རྒྱལ་བའི་སྲས་པོ་བྱང་ཆུབ་སེམས་དཔའ་རྣམས་ཀྱིས་ཐོག་མ་ཉིད་ནས་སེམས་ཅན་ཐམས་ཅད་ཀྱི་དོན་དུ་བྱང་ཆུབ་མཆོག་ཏུ་སེམས་བསྐྱེད་ནས་སེམས་ཅན་དེ་དག་ཐམས་ཅད་གཏན་དུ་བདེ་བ་རྫོགས་པའི་སངས་རྒྱས་ཀྱི་གོ་འཕང་དང་། འཕྲལ་དུ་བདེ་བ་མངོན་མཐོ་ལྷ་མིའི་གོ་འཕང་ལ་བཀོད་དགོས་རྒྱུའི་འོས་འགན་ཡིན་པ་ལ། སེམས་ཅན་རང་རང་གི་སྔར་བསགས་བསོད་ནམས་ཀྱི་ལས་དབང་གིས་ཡོན་ཏན་ནམ་འབྱོར་པ་ཕྲ་མོ་རེ་ཐོབ་པ་ལ། མི་དགའ་བའི་བློ་ངན་སྐྱེ་བའི་ཐབས་ཅི་ལ་ཡོད། འོན་ཀྱང་རང་རྒྱུད་ཀྱི་ཉོན་མོངས་པ་ཕྲག་དོག་གིས་བསླད་ཕྱིན་ཆད་གཞན་གྱི་ཡོན་ཏན་མི་མཐོང་ཞིང་། རང་གི་སྡིག་ཚབས་པོ་ཆེ་གསོག་པ་ཡིན་ཏེ། སྔོན་རྗེ་བཙུན་མི་ལ་སྐུ་བསོད་དང་ཕྲིན་ལས་རྒྱས་པའི་སྐབས། མཚན་ཉིད་ཀྱི་སྟོན་པ་དར་བློ་ཞེས་བྱ་བ་རྗེ་བཙུན་གྱི་སྐུ་བསོད་ལ་ཕྲག་དོག་སྐྱེས་ནས་རྒོལ་དུ་བྱུང་བ་ལ། ཞེས་པའི་དོན། ལོ་སྟོན་དགེ་འདུན་འབུམ་དང་། ར་སྟོན་དར་མ་བློ་གྲོས་སོགས་ཀྱིས་གྲོས་ལ། མི་ལ་རས་པ་ས་མ་ཕུད་ན་ཡུལ་འདིར་འོ་སྐོལ་གྱི་བསྟན་པ་མི་དར་བས། སྟོན་པ་སྒྲ་ཚད་ལུང་རིགས་ལ་མཁས་པ་གསུམ་སོང་ལ་སུན་དབྱུངས་ཤོག་ཅིག་ཅེས་སྨྲས་པ་ལྟར་སྟོན་པ་གསུམ་སོང་ཡང་རྒོལ་མ་ནུས་པའི་མཐར་རང་དབང་མེད་པར་དད་པ་སྐྱེས་ཏེ་རྗེ་བཙུན་གྱི་སློབ་མར་གྱུར་ཏེ། སྟོན་སྒོམ་གངས་ཀྱི་སེང་གེ་འདྲ་བའི་རྟོགས་ལྡན་གསུམ་བྱུང་བ་ཡིན་ནོ། །ནམ་ཞིག་གི་ཚེ་སྟོན་ཆེན་ཞིག་བྱེད་པའི་སར་རྗེ་བཙུན་དཔོན་སློབ་དང་། ལོ་སྟོན་དང་དར་བློ་ཀུན་སྤྱན་དྲངས་པར། རྗེ་བཙུན་ལ་ལོ་སྟོན་ན་རེ། རྣལ་འབྱོར་པ་ཚད་མའི་གྲུབ་མཐའ་ཞིག་ཞོག་ཟེར་བས་རྗེ་བཙུན་གྱིས། བླ་མ་ཚད་མ་ལ་གདམས་ངག་ཚད་མ་ཞུས། སྙིང་རུས་ཚད་མས་རི་ཁྲོད་ཚད་མར་བསྒོམ་པས་རང་རྒྱུད་ལ་དྲོད་རྟགས་ཚད་མ་སྐྱེས། ཡོན་བདག་ཚད་མས་མཆོད་གནས་ཚད་མར་ཁུར། ཁྱོད་ལོ་འདོད་ཀྱི་སྟོན་པ་ཚད་མས་ཕྲག་དོག་ཚད་མ་སྐྱེས། དམྱལ་བ་ཚད་མར་སྡུག་བསྔལ་ཚད་མ་མྱོང་དགོས་ཞེས་མགུར་གསུངས། དེ་ནས་རྗེ་བཙུན་ལ། དར་བློས། འགལ་རྟགས་དང་འབྲེལ་རྟགས། སྣང་ལ་མ་ངེས་པའི་རྟགས་ཀྱི་གྲུབ་མཐའ་ཞོག་ཟེར་བྱུང་བས། རྗེ་བཙུན་གྱི་ཞལ་ནས། སྟོན་པའི་ཤེས་རྒྱུད་དམ་པའི་ཆོས་དང་འགལ་བ་དེ་འགལ་རྟགས་ཡིན། འགལ་རྟགས་དེ་ཀ་ཉོན་མོངས་པ་དང་འབྲེལ་བ་དེ་འབྲེལ་རྟགས་ཡིན་ཞིང་། ཆོས་པའི་གཟུགས་བརྙན་དུ་སྣང་ལ། འགལ་འབྲེལ་གཉིས་ཀའི་རྟགས་ཚང་བ་དེ་སྣང་ལ་མ་ངེས་པའི་རྟགས་ཡིན་ནོ་གསུངས་པས། ལོ་སྟོན་མགོ་གོས་ཀྱིས་བཏུམས་ནས་དགོད་ཅིང་འདུག ཕྱིས་སུ་རྗེ་བཙུན་ལ་དབང་དང་གདམས་པ་ཞུས་ནས་རྟོགས་པ་ངོ་འཕྲོད་དེ་སྟོན་སྒོམ་གངས་ཀྱི་སེང་གེ་འདྲ་བ་ཉེ་བའི་སྲས་གཅིག་བྱུང་བ་ཡིན་ནོ། །སྟོན་པ་དར་བློ་ལ་རྗེ་བཙུན་གྱིས་མངོན་མཁྱེན་དང་རྫུ་འཕྲུལ་ཅི་ཙམ་ཞིག་བསྟན་ཀྱང་ཡིད་མི་ཆེས་ཤིང་ལོག་ལྟ་དང་སྐུར་འདེབས་ཁོ་ན་བྱེད་པས་ཕྱིས་གདོན་ཆེན་པོ་ཞིག་ཏུ་སྐྱེས་པའི་ལོ་རྒྱུས་ཡོད་པ་དང་། ཡང་དགེ་བཤེས་རྩག་ཕུ་བ་ཞེས་བྱ་བའི་མཚན་ཉིད་པ་ཞིག་གིས་རྗེ་བཙུན་ལ་དུག་དྲངས་པ་སོགས་ཀྱང་གཞན་གྱི་ཕུན་ཚོགས་ལ་སྡང་བའི་ཉོན་མོངས་པ་ཕྲག་དོག་ཁོ་ནའི་དབང་གིས་ཡིན། དེས་ན་ཕྲག་དོག་ཅན་གྱི་གང་ཟག་དེ་ལ། ཇི་ལྟར་བྱས་ཀྱང་རེད་དུས་མེད་དེ། སངས་རྒྱས་དངོས་སུ་བྱོན་ཀྱང་འདྲེན་མི་ནུས་ཏེ་རང་རྒྱུད་ཕྲག་དོག་གིས་བསླད་པས་གཞན་གྱི་ཡོན་ཏན་མི་མཐོང་། ཡོན་ཏན་མ་མཐོང་བས་ཅི་ལྟ་བུའི་གང་ཟག་ཁྱད་པར་འཕགས་པ་ཞིག་ཡིན་ཡང་དེ་ལ་དད་པ་སྤུ་ཙམ་ཡང་མི་སྐྱེ། དད་པ་དང་མོས་གུས་མ་སྐྱེས་པས་ཐུགས་རྗེ་དང་བྱིན་རླབས་ཀྱི་སྣོད་དུ་མི་རུང་སྟེ། ལྷས་བྱིན་དང་ལེགས་སྐར་གཉིས་ཀྱང་བཅོམ་ལྡན་འདས་ཀྱི་གཅུང་ཡིན་པས་ཀྱང་མ་ཕན་མཉམ་འགྲོགས་ཀྱི་བདུད་ཞུགས་ནས་སངས་རྒྱས་བཅོམ་ལྡན་འདས་ཀྱི་ཡོན་ཏན་ལ་ཁོང་གཉིས་ཕྲག་དོག་གིས་རྒྱུད་འཁྲུགས་ཏེ། བཅོམ་ལྡན་འདས་ལ་དད་པ་ཅུང་ཟད་སྐྱེར་མ་འདོད་པས་ཚེ་གཅིག་ཏུ་སྟོན་པའི་དྲུང་ན་གནས་ཀྱང་སྟོན་པས་འདུལ་བའི་ཐབས་མེད་པ་ཡིན། དེར་མ་ཟད་གཞན་ལེགས་ན་མི་དགའ་ཉེས་ན་དགའ་བ་ལ་སོགས་བསམ་པ་ངན་པ་ཁོ་ན་བཟུང་བས་ཕ་རོལ་པོ་དེ་ལ་ཅུང་ཟད་ཀྱང་མི་གནོད་ཀྱང་ཕྲག་དོག་བྱེད་མཁན་རང་གི་སྡིག་ཚབས་པོ་ཆེ་སོག་པ་ཡིན་ཏེ། སྔོན་དགེ་བཤེས་ཆེ་རབ་གཉིས་གཅིག་གིས་གཅིག་གོང་ལ་ཤོར་དོག་གི་འགྲན་ཟླ་ཡོད་པ་ལ། གཅིག་ལ་བུད་མེད་ཡོད་ཟེར་བ་གཅིག་གིས་ཐོས་པས། ཉེ་གནས་ལ་ཇ་ཞིམ་པོ་ཞིག་སྐོལ་ཅིག གཏམ་སྙན་ཐོས་ཟེར། ཇ་བསྐོལ་ནས་དྲངས་ཏེ་གཏམ་སྙན་ཅི་གསན་ཞུས་པས། རང་རེའི་འགྲན་ཟླ་དེ་ལ་བུད་མེད་བྱུང་ཟེར་ལོ། དེ་ཀུན་སྤངས་གྲགས་རྒྱལ་གྱིས་གསན་པས། ཞལ་ནག་ཏིང་སོང་ནས་དེ་གཉིས་སྡིག་པ་གང་ཆེའམ། གསུངས་ཟེར། དེ་ལྟར་ཕྲག་དོག་དང་འགྲན་སེམས་སོགས་རྟག་ཏུ་ཡིད་ལ་སྒོམ་པ་དེ་རང་ལ་མི་ཕན་གཞན་ལ་མི་གནོད། དོན་མེད་དུ་རང་གིས་སྡིག་སོག་པའི་འབྲས་བུ་སྡུག་བསྔལ་ཡིན་པས་དེ་ལྟ་བུའི་བསམ་པ་ངན་པ་དེ་སྤངས་ཏེ་དུས་རྟག་ཏུ་གཞན་ལ་རིགས་མཐོ་བ་དང་གཟུགས་མཛེས་པ་དང་ནོར་མང་བ་དང་ཐོས་པ་ཆེ་བ་ལ་སོགས་ཡོན་ཏན་དང་མཐུན་རྐྱེན་ཅི་ཙམ་འབྱོར་པ་ལ་སྙིང་ཐག་པ་ནས་དེ་ལ་ཕྲག་དོག་མེད་པར་དགའ་བ་བསྒོམ་ཞིང་། འདི་ལ་འདི་ལྟ་བུའི་ཡོན་ཏན་དང་འབྱོར་པ་སོགས་ཡོད་པར་ང་རེ་དགའ། ད་དུང་འདི་ལ་འདི་དག་ལས་ལྷག་པའི་སྟོབས་དང་འབྱོར་པ་ཐོས་པ་ཡོན་ཏན་ལ་སོགས་པའི་དཔལ་གྱིས་འབྱོར་ཞིང་ཕུན་སུམ་ཚོགས་པར་གྱུར་ཅིག་ཅེས་སྨོན་ལམ་དང་འབྲེལ་བ། དེ་ལྟར་གྱུར་ན་ཅི་མ་རུང་སྙམ་དུ་འདུན་པ་དང་འབྲེལ་བ། དེ་ལྟར་འགྱུར་བ་ཞིག་ངས་བྱ་སྙམ་པ་དམ་བཅའ་དང་འབྲེལ་བ། དེ་ལྟར་འགྱུར་བར་བླ་མ་དཀོན་མཆོག་གི་ཐུགས་རྗེ་མ་ཆུང་བསམས་ཏེ་སྙིང་ཐག་པ་ནས་བསྒོམ། དགའ་བ་ཚད་མེད་པ་རྔ་མོས་རྔེའུ་སྟོར་ནས་རྙེད་པ་ལྟ་བུ་ཞེས་བྱ་སྟེ། རྔ་མོ་དེ་སེམས་ཅན་གཞན་ལས་ཀྱང་བུ་ལ་ལྷག་པར་བརྩེ་བ་ཡིན་པས། དེའི་རྔེའུ་དེ་སྟོར་ན་སེམས་ཅན་གཞན་དང་མི་འདྲ་བ་དེ་ཙམ་གྱི་མྱ་ངན་ཆེ་ཞིང་། གལ་ཏེ་ཚུར་རྙེད་ན་བསམ་གྱིས་མི་ཁྱབ་པའི་དགའ་བ་སྐྱེ་བ་དེ་ལྟ་བུར་བསླབ་བོ། །དེ་ལྟར་བྱང་ཆུབ་ཀྱི་སེམས་མ་སྐྱེས་པ་སྐྱེ་བར་བྱེད་པའི་ཐབས་སམ་ཚད་མེད་པ་བཞི་པོ་དེ་དག་བྱང་ཆུབ་ཀྱི་སེམས་རིན་པོ་ཆེ་མཚན་ཉིད་པ་རང་རྒྱུད་ལ་སྐྱེ་བའི་རྒྱུ་མ་ནོར་བ་ཡིན་པས། ཅི་ནས་ཀྱང་ཚད་མེད་བཞི་འདི་རང་རྒྱུད་ལ་མ་སྐྱེས་བར་དུ་བསྒོམ་དགོས། དེ་ལྟར་ཚད་མེད་པ་བཞི་པོ་དེ་ཡང་དོན་ཚུར་བསྡུས་ཏེ་གོ་སླ་བར་བྱས་ན། བསམ་པ་བཟང་པོ་ཞིག་ལ་འདུ་བ་ཡིན་པས་དུས་དང་རྣམ་པ་ཐམས་ཅད་དུ་བསམ་པ་བཟང་པོ་ཁོ་ན་ལ་བསླབ་དགོས། སྔོན་ཇོ་བོ་རྗེ་ལྷ་གཅིག་ཕྱག་བསྙུང་བ་ལ་འབྲོམ་སྟོན་གྱི་པང་དུ་བཞག་ནས་འདི་ལ་ཁྱོད་ཀྱིས་བྱིན་རླབས་ཤིག་གྱིས་དང་། ཁྱོད་ལ་བསམ་པ་བཟང་པོ་ཡོད་པ་ཡིན་གསུངས། ཇོ་བོ་རྗེས་རྒྱུན་དུ་བསམ་པ་བཟང་པོ་ཁོ་ན་གཙིགས་སུ་མཛད། ཁམས་བདེ་བྱེད་པ་ལ་ཡང་བསམ་པ་བཟང་པོ་བྱུང་ངམ་གསུངས། ཞལ་ཏ་སློབ་སྟོན་མཛད་བ་ཐམས་ཅད་ལ་ཡང་བསམ་པ་བཟང་པོ་གྱིས་ཨང་གསུངས་པ་ཡིན། བསམ་པ་བཟང་ངན་འདིའི་དབང་གིས་ལས་དཀར་ནག་ཕྱེ་བ་དང་ལས་དེའི་སྟོབས་ཆེ་ཆུང་ཐམས་ཅད་ཀྱང་བསྒྱུར་འགྲོ་བ་ཡིན། བསམ་པ་བཟང་ན་ལུས་ངག་གི་ལས་གང་བྱས་དགེ་བར་འགྱུར་བ་ཡིན་ཏེ། སྔར་སཱཙྪའི་སྟེང་དུ་ལྷམ་ཀྲད་བཞག་པའི་ལོ་རྒྱུས་ལྟ་བུ་དང་། བསམ་པ་ངན་ན་རྣམ་པ་དགེ་བ་ལྟར་སྣང་བ་རྣམས་ཀྱང་དོན་དུ་མི་དགེ་བར་འགྱུར་བས། དུས་དང་རྣམ་པ་ཐམས་ཅད་དུ་བསམ་པ་བཟང་པོ་ལ་བསླབ་དགོས་ཏེ། ཇི་སྐད་དུ། བསམ་པ་བཟང་ན་ས་དང་ལམ་ཡང་བཟང་། །བསམ་པ་ངན་ན་ས་དང་ལམ་ཡང་ངན། །ཐམས་ཅད་བསམ་པ་དག་ལ་རག་ལས་པས། །རྟག་པར་བསམ་པ་བཟང་ལ་འབད་པར་བྱ། །ཞེས་གསུངས། བསམ་པ་བཟང་ན་ས་དང་ལམ་ཡང་ཇི་ལྟར་བཟང་ན། སྔོན་རྒན་མོ་མ་བུ་གཉིས་ལག་སྦྲེལ་བྱས་ནས་ཆུ་ཆེན་པོ་ཞིག་ལ་འབོག་པས། མ་བུ་གཉིས་ཀ་ཆུས་ཁྱེར་སོང་། མས་བསམ་པ་ལ་བུ་མོ་འདི་ཆུས་མི་ཁྱེར་བ་ཞིག་བྱུང་ན་ང་རང་ཆུས་ཁྱེར་ཀྱང་ཁྱེར་སྙམ། བུ་མོས་བསམ་པ་ལ། ཨ་མ་ཆུས་མ་ཁྱེར་ན་ང་རང་ཁྱེར་ཀྱང་ཁྱེར་སྙམ། གཉིས་ཀས་གཅིག་གིས་གཅིག་ལ་བསམ་པ་བཟང་པོ་བྱེད་བཞིན། ཆུ་ནང་དུ་ཤི་བས་ཤི་མ་ཐག་གཉིས་ཀ་བསམ་པ་བཟང་པོས་ཚངས་པའི་འཇིག་རྟེན་དུ་སྐྱེས་པ་ཡིན། ཡང་སྔོན་བྱ་ས་ཀོ་ཁར། ཞེས་པའི་དོན། ཡུལ་ཡར་ཀླུང་གི་ས་ཆའི་སྨད་ཞིག་ན་བྱའི་རྒྱལ་པོ་གཤོག་བཟང་དང་འདབ་བཟང་གཉིས་ཀྱི་རིགས་ལས་འཆེད་པའི་བྱ་ས་ཁྲི་དཔོན་ཞེས་པའི་སྡེ་བ་ཞིག་ཆགས་པར་བཤད། བྱ་ཆོས་ཀྱི་ཀ་བ་དང་། གཅུང་ཐོད་པ་གཡུའི་སྨིན་མ་ཅན་ཏེ་སྐུ་མཆེད་གཉིས་འཁྲུངས་པ་སོགས་ཀྱི་ས་དེ་ཡིན། ཀོ་ཁར་ནི་གྲུ་ཁར། ཞེས་པའི་དོན་ཡིན་པས་དེའི་གྲུ་ཞིག་གི་ནང་དུ་བཙུན་པ་དྲུག་བང་ཆེན་པ་ཞིག་དང་བདུན་ཞུགས་ནས་ཕྱིན་པས། གྲུ་བཏང་ནས་ཆུའི་བཞི་ཆ་ཙམ་སོང་བ་དང་གྲུ་པ་ན་རེ་གྲུ་ལྕི་འདུག་པས་ཆུ་རྐྱལ་ཤེས་པ་ཞིག་ཡོད་ན་བོབ་ཡང་ན་ང་ཆུ་ནང་དུ་འབབ་པ་ཡིན་པས་ཁྱེད་ཚོའི་གཅིག་གིས་སྐྱ་བ་ཟུང་ཟེར་བ་ལ། ཐམས་ཅད་ཀྱིས་ཆུ་ལ་རྐྱལ་བ་དང་། སྐྱ་བ་འཛིན་པ་གཉིས་ཀ་མི་ཤེས་པར་འདུག་པས། བང་ཕྱིན་པས་ཐམས་ཅད་འཆི་བ་བས་ང་གཅིག་པུ་ཤི་བ་དྲག་ཟེར་ནས་ཆུ་ལ་མཆོངས་པས། དེ་མ་ཐག་འཇའ་ཟུག་མེ་ཏོག་གི་ཆར་བབས། ངོ་མཚར་བའི་ལྟས་དང་བཅས་ཏེ་རྐྱལ་མི་ཤེས་ཀྱང་ཆུའི་ཕ་རི་ལ་སླེབ་ནས་མ་ཤི་བ་ཡིན། མི་དེ་སྔོན་དམ་པའི་ཆོས་བྱས་པ་ཞིག་མིན་ཡང་འཕྲལ་དུ་བསམ་པ་བཟང་པོ་གཅིག་སྐྱེས་པ་ལ་ཡང་དེ་ལྟ་བུའི་ཕན་ཡོན་ཡོད་པ་ཡིན། བསམ་པ་ངན་ན་ས་དང་ལམ་ཡང་ཇི་ལྟར་ངན་ན། སྔོན་སྦྲང་པོ་ཞིག་རྒྱ་སྒོའི་འགགས་སུ་ཉལ་ནས་རྒྱལ་པོ་འདི་མགོ་ཆད་ནས་ཤི་སྟེ་ང་རང་རྒྱལ་པོ་བྱས་ན་ཇི་མ་རུང་སྙམ་པ་ཡང་དང་ཡང་དུ་བློ་ལ་སྐྱེས། ནངས་པར་གཉིད་དུ་ཤོར་ནས་ཉལ་ཡོད་བའི་ཚེ་རྒྱལ་པོ་ཤིང་རྟ་ལ་བཞོན་ནས་ཕེབས་འོང་བས་ཤིང་རྟའི་འཁོར་ལོས་ཁོའི་རྐེ་ལ་བརྒྱབ་སྟེ་བསམ་པ་ངན་པའི་རྣམ་སྨིན་འཕྲལ་དུ་སྨིན་ནས་མགོ་བཅད་པ་ཡིན། ལར་རང་གིས་ཆོས་ཞུས་པའི་དོན་པོ་དུས་དང་རྣམ་པ་ཐམས་ཅད་དུ་མི་བརྗེད་པའི་དྲན་པ་དང་མ་ཡེངས་པའི་ཤེས་བཞིན་གྱིས་བཟུང་ནས་རང་རྒྱུད་ལ་བརྟག་དཔྱད་མ་བྱས་ན་དོན་མེད་དུ་ཆགས་སྡང་གི་བློ་དྲག་པོ་སྐྱེས་ནས་ལས་ངན་ཚབས་པོ་ཆེ་དོན་མེད་དུ་སོག་འགྲོ་བ་ལ་ཚེགས་མེད་པ་ཡིན། སྤྲང་རྒན་དེ་ཡང་འགྲུབ་མི་སྲིད་པའི་བསམ་བློ་ངན་པ་དེ་ལྟ་བུ་ཞིག་སྐྱེས་པས་འབྲས་བུ་འཕྲལ་དུ་སྨིན་པ་ཡིན་ཏེ། རྒྱལ་པོ་བསོད་ནམས་ཅན་ཕོ་བྲང་གི་དབུས་ན་རིན་པོ་ཆེའི་ཁྲི་ལ་བདེ་སྐྱིད་དང་ལྡན་པར་གཟིམས་ནས་བཞུགས་ཡོད་པའི་དབུ་ཆད་དོན་ཀྱང་མེད། གལ་ཏེ་ཆད་ནས་རྒྱལ་པོ་གྲོང་སོང་ཡང་རྒྱལ་པོའི་སྲས་ཀྱིས་རྒྱལ་སྲིད་མི་བྱེད། ཕྱི་ནང་གི་བློན་པོ་སྟག་གཟིག་དོམ་དྲེད་ལྟ་བུ་ཡོད་པ་དེ་དག་གིས་རྒྱལ་ས་མི་འཛིན་པར། སྤྲང་རྒན་ཁོ་སེར་ཁ་སེ་རྒྱལ་ས་ལ་འགོད་དོན་ཅི་ལ་ཡོད། དེས་ན་རང་རྒྱུད་ལ་ལེགས་པར་མ་བརྟགས་ན། དོན་མེད་དུ་དེ་ལྟ་བུའི་བསམ་པ་ངན་པ་ཡང་སྐྱེ་སྲིད་པ་ཡིན་པས། དགེ་བཤེས་ཤ་བོ་པའི་ཞལ་ནས། འཁོར་བའི་སྡུག་བསྔལ་མང་པོ་མྱོང་བའི་རྐྱེན་བྱེད་པ་ཡིན་པས་ན། སྲིད་པ་མང་པོ་འཕེལ་གྱི་ཡིད་ཀྱིས་རྒྱལ་སྲིད་མ་སྐྱོངས། །ཞེས་གསུངས། ཁྱད་པར་ངན་སེམས་དང་བཅས་པས་འདི་བྱ་འདི་བྱེད་བསམ་རྒྱུའི་སྤྲང་པོས་ཉལ་བསམ་བཏང་ནས། །རྒྱ་ར་རྟས་བཀང་རྒྱུ་དེ་འདྲ་བསམ་མི་ཉན། གཞན་ཡང་སྔོན་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་སྦྱིན་བདག་ཅིག་གི་ཁྱིམ་དུ་བསོད་སྙོམས་ལ་སྤྱན་དྲངས་པའི་ཚེ། སློང་མོ་བ་རྒྱལ་རིགས་ཀྱི་ཁྱེའུ་ཞིག་དང་། བྲམ་ཟེའི་ཁྱེའུ་ཞིག་སྟེ་གཉིས་ཡོད་པ། བྲམ་ཟེའི་རིགས་ཀྱི་ཁྱེའུ་དེས་སངས་རྒྱས་འཁོར་བཅས་ཀྱིས་བསོད་སྙོམས་མ་བཞེས་གོང་བསླངས་པས་ཅི་ཡང་མ་རྙེད། རྒྱལ་རིགས་ཀྱི་ཁྱེའུ་དེས་བཞེས་པ་ཟིན་ནས་བསླངས་པས་ལྷུང་བཟེད་ཀྱི་ལྷག་མ་ཁ་ཟས་བཟང་པོ་མང་པོ་རྙེད། དེ་གཉིས་ཕྱི་དྲོ་ལམ་བར་ཞིག་ཏུ་གཏམ་བྱས་པས། རྒྱལ་རིགས་ཀྱི་ཁྱེའུ་དེ་ན་རེ། གལ་ཏེ་ང་ལ་ནོར་དང་ལོངས་སྤྱོད་ཞིག་ཡོད་ན་ངས་བཅོམ་ལྡན་འདས་འཁོར་དང་བཅས་པ་ལ་ཇི་སྲིད་འཚོ་བའི་བར་དུ་ན་བཟའ་དང་། བསོད་སྙོམས་ཀྱིས་མཆོད་དེ། ཡོ་བྱད་ཐམས་ཅད་ཀྱིས་བསྟབས་ནས་བསྙེན་བཀུར་བགྱིད་དོ་ཟེར། བྲམ་ཟེའི་ཁྱེའུ་ན་རེ། གལ་ཏེ་ང་ལ་དབང་ཞིག་ཡོད་ནས་ཡུལ་གྱི་རྒྱལ་པོ་ཡིན་ན་ངས་དགེ་སྦྱོང་མགོ་རེག་དེ་འཁོར་དང་བཅས་པའི་མགོ་དྲུངས་ནས་བཅད་དོ་ཟེར། དེར་རྒྱལ་རིགས་ཀྱི་ཁྱེའུ་དེ་ཡུལ་གཞན་ཏུ་ཕྱིན་ནས་ཤིང་སྡོང་ཆེན་པོ་ཞིག་གི་གྲིབ་མ་ལ་བསྡད་པས། ཤིང་གཞན་གྱི་གྲིབ་མ་ཡོལ་ནས་སོང་ཡང་ཁྱེའུ་ཡོད་པའི་གྲིབ་མ་དེ་ཉི་མ་ཡོལ་ཡང་གྲིབ་མ་མ་ཡོལ་བར་བསྡད། ཡུལ་དེའི་རྒྱལ་པོ་ཤི་ནས་སྲས་མེད་པས། མི་བསོད་ནམས་དང་དབང་ཐང་གང་ཆེ་བ་དེ་རྒྱལ་པོ་བྱེད་དོ་ཟེར་ནས་ཐམས་ཅད་ཀྱིས་བཙལ་བས། ཁྱེའུ་དེ་གུང་ཡོལ་ཀྱང་གྲིབ་མས་མ་བཏང་བར་གཉིད་ལོག་པ་མཐོང་བས་བསླངས་ནས་རྒྱལ་སྲིད་ལ་བཀོད། ཕྱིས་ཁོ་རང་གི་འདོད་པ་ལྟར་སངས་རྒྱས་འཁོར་བཅས་ལ་ཡང་མཆོད་པ་ཡིན། བྲམ་ཟེའི་ཁྱེའུ་དེ་ལམ་འགགས་ཤིག་ཏུ་ཉལ་བསྡད་པས། ཤིང་རྟ་འཁྱམས་པས་རྐེ་ལ་ཕོག་སྟེ་མགོ་བཅད་པའི་ལོ་རྒྱུས་ཀྱང་ཡོད། དེས་ན་རྟག་ཏུ་གཞན་ལ་ཕན་སེམས་བསམ་པ་བཟང་པོ་ཁོ་ན་ལ་བསླབས་ན་ཚེ་འདིར་ཡང་རང་ཉིད་ཀྱི་བསམ་པའི་དོན་ཐམས་ཅད་ཡིད་བཞིན་དུ་འགྲུབ། དཀར་ཕྱོགས་ཀྱི་ལྷ་རྣམས་ཀྱིས་སྲུང་ཞིང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་རློབ། ཅི་བྱས་དགེ་བར་འགྱུར་ཞིང་འཆི་ཁ་གནད་གཅོད་མི་འབྱུང་། ཕྱི་མ་ལྷ་དང་མི་ཡི་གོ་འཕང་ཐོབ་ཅིང་། མཐར་ཐུག་རྫོགས་པའི་སངས་རྒྱས་ཀྱི་གོ་འཕང་མངོན་དུ་འགྱུར་བ་ཡིན་པས། ཙབ་ཙོབ་ཏུ་རང་རྒྱུད་ལ་མི་རྟོག་པར་ཕྱག་དང་བསྐོར་བ་ཁ་ཏོན་དང་བཟླས་བརྗོད་སོགས་དགེ་བ་རྒྱ་ཆེན་པོ་བྱེད་ཁུལ་ལས། རྟག་ཏུ་རང་གི་རྒྱུད་ལ་བརྟགས་ནས་བསམ་པ་བཟང་པོ་ལ་བསླབ་པ་གལ་ཆེའོ།། །།ཞེས་གསུངས་ནས་བསྔོ་བས་མཐའ་བརྒྱན་ཏེ་ཆོས་ཁྲིད་གྲོལ་སོང་ངོ་། །