ཕ༽ཉིན་བཅུ་བཞི་བར་འཇུག་པའི་བསླབ་བྱ་ཕྱིན་དྲུགཆོས་ཁྲིད།

མཆོད་བརྗོད་སོགས་གསུངས་ནས།

ཨ༽མཚམས་སྦྱོར་གྱི་གདམས་ངག

ད་ལྟ་ནི་ཐེག་པ་ཆེན་པོའི་ཆོས་སྒོ་ལ་ཞུགས་གསང་སྔགས་རྫོགས་ཆེན་གྱི་ཁྲིད་ཞུས་ནས། ཚེ་ལུས་འདིའི་སྟེང་ནས་ཐོད་པ་བོར་ཆོག་མ་ཞིག་བྱ་བསམ་པའི་ཆོས་པ་ཞིག་ཡིན་ནས་བཟུང་། ཐོས་བསམ་སྒོམ་པ་གོ་མ་ལོག་པའི་སྒོ་ནས་དང་པོ་ཐོས་དོན་བསམ། དེ་ནས་བསམ་དོན་བསྒོམ། མཐའ་མ་བསྒོམས་པས་རང་རྒྱུད་གྲོལ་བ་ཞིག་དགོས་པས། ཐོག་མར་ཆོས་ཐོས་པ་དེ་ལ་ཡང་ཆོས་ཞུ་བ་གལ་མི་ཆེ་ཞུ་ལུགས་ཤེས་པ་གལ་ཆེ། དང་པོ་ཆོས་ཞུ་བའི་སྐབས་སུ་སྔར་ཡང་བཤད་པ་ལྟར་མེད་དུ་མི་རུང་བ་སྦྱོར་བ་སེམས་བསྐྱེད་དམ་པ་དེ་ཡིན། དེ་ཡང་མགོན་པོ་བྱམས་པས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པ་ལྟར་བྱང་ཆུབ་སྨོན་པ་སེམས་བསྐྱེད་དེ་དོན་གཉིས་སམ་ཟུར་གཉིས་དང་ལྡན་པ། སྙིང་རྗེས་སེམས་ཅན་ལ་དམིགས་པའི་ཟུར་དང་ཤེས་རབ་ཀྱིས་རྫོགས་བྱང་ལ་དམིགས་པའི་ཟུར་རྣམ་པ་གཉིས་ཚང་དགོས།

ནམ་མཁའི་མཐའ་དང་མཉམ་པའི་ཕ་མར་མ་གྱུར་བ་མེད་པའི་རིགས་དྲུག་གི་སེམས་ཅན། རྟག་ཏུ་སྡུག་བསྔལ་རྣམ་པ་གསུམ་གྱིས་མནར་བ། སྐྱབས་མེད་མགོན་བྲལ། བཤེས་མེད་ཐང་འཕྱན། ཕ་མ་མེད་པའི་དྭ་ཕྲུག་ལོང་བ་ཞིག་མི་མེད་ལུང་སྟོང་མྱ་ངམ་གྱི་ཐང་དཀྱིལ་དུ་ལུས་པ་ལྟ་བུ་ཡིན་པས་ཞེ་ཐག་པ་ནས་སྙིང་རྗེ་བསྒོམ། སྙིང་རྗེ་བ་ཙམ་གྱིས་མི་ཕན་འདི་ཐམས་ཅད་བདེ་བ་དང་ལྡན་སྡུག་བསྔལ་དང་བྲལ་བའི་ཐབས་ཤིག་ངས་བྱ་དགོས། འོན་ཀྱང་བདག་རང་ཡང་འཁོར་བའི་སྡུག་བསྔལ་མྱོང་བཞིན་པས་གཞན་སྐྱོབ་པ་ལ་ད་ལྟ་ནུས་པ་མེད་པས་གཞན་སྐྱོབ་མི་ཐུབ། ཡིན་ནའང་ད་ལྟ་ང་རང་ཆོས་དང་ལྡན་པའི་མི་ཡུལ་ལ་སྐྱེས། སངས་རྒྱས་བསྟན་པའི་སྒོར་ཞུགས། ལམ་སྟོན་དགེ་བའི་བཤེས་གཉེན་དང་འཕྲད། རང་ལ་ལས་འབྲེལ་ཡོད་པའི་དམ་ཆོས་རྫོགས་པ་ཆེན་པོ་དང་མཇལ་ཡོད་པས། ངས་མ་རྒན་སེམས་ཅན་ཐམས་ཅད་བདེ་བ་དང་ལྡན་ཞིང་སྡུག་བསྔལ་དང་བྲལ་བར་བྱེད་པའི་ལམ་མ་ནོར་བ་ཞིག་སྟོན་ཐུབ་པའི་ཆེད་དུ། ཆོས་ཟབ་མོ་ཉམས་སུ་བླངས་ནས་སྐྱབས་བྲལ་མགོན་མེད་ཀྱི་སེམས་ཅན་གཅིག་ཀྱང་མ་ལུས་པ་གཏན་གྱི་བདེ་བའི་མཆོག་དམ་པ་ལ་འགོད་མ་ཐུབ་ཀྱི་བར་དུ། འབད་པ་མི་འདོར་བའི་དམ་བཅའ་སྙིང་ནས་ལེན་པར་སྦྱོར་བ་སེམས་བསྐྱེད་དམ་པའམ་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་ཟེར་བས་འདི་ཡོད་དགོས། གསང་སྔགས་དག་སྣང་གི་ལམ་དོན་ལ་གནས་པ་བཞིན་ལས་དག་པའི་ངོར་སྣང་བ་ཡང་ཡིན་པ་ལྟར། རང་རེ་མ་དག་པའི་ངོར་སྣང་དཀའ་ནའང་ལམ་རྫོགས་སྨིན་སྦྱོང་གསུམ་ལ་བརྟེན་ནས་ཞིང་ཁམས་སྦྱོང་དགོས་པས། འདི་ལྟར་སྣང་བའི་བརྟན་གཡོ་སྣོད་བཅུད་ཀྱི་སྣང་བ་ཐམས་ཅད་དག་པ་ཡེ་ཤེས་ཀྱི་སྣང་ངོར། སྣང་སྲིད་སྐུ་དང་ཞིང་ཁམས། སྒྲ་གྲགས་སྔགས་དང་ཆོས་སྒྲ། དྲན་རྟོག་ཆོས་ཉིད་ཀྱི་རོལ་བ་ཡིན་པ་ལ་ཡིན་པའི་འདུ་ཤེས་བསྐྱེད་དགོས། དངོས་གཞི་དམིགས་མེད་དམ་པ་ནི། འདི་ལྟར་སྣང་བའི་ཆོས་ཐམས་ཅད་གནས་ལུགས་རང་གི་ངོས་ནས་གྲུབ་པ་རྡུལ་ཙམ་ཡང་མེད་པ། སྨྲ་བསམ་བརྗོད་པ་དང་བྲལ་བ་སྤྲོས་བྲལ་མཉམ་པ་ཆེན་པོ་ལས་མ་འདས་པ་ཞིག་ཡིན་ཡང་། སྣང་སྟོང་སྒྱུ་མའི་རོལ་གར་སྟོང་དང་རྟེན་འབྱུང་དབྱེར་མེད་པ། མ་བརྟག་འཁྲུལ་བའི་སྣང་ངོ་ན་རྨི་ལམ་དང་སྒྱུ་མ་ལྟར་དུ་སྣང་བ་འདི་ཐམས་ཅད་དོན་ལ་བདེན་པ་མེད་པར་སྒྱུ་མའི་དཔེ་བརྒྱད་ཀྱི་ཚུལ་དུ་བསམ་པ་དང་མ་བྲལ་བཞིན་དུ། ཆོས་ཉན་པའི་སྐབས་སུ་བདེན་ཞེན་ཨ་འཐས་ཀྱི་འཛིན་པ་དང་བྲལ་བའི་ངང་ནས་ཆོས་ཀྱི་ཚིག་དོན་ལ་བློ་སྦྱོར་ནས། ལུས་ངག་ཡིད་གསུམ་ཆུན་གཅིག་ཏུ་དྲིལ་ཏེ་ཉན་དགོས། རྗེས་བསྔོ་བ་དམ་པ་ནི། གང་བསྔོ་བྱ། བསྔོ་བྱེད། བསྔོ་ཡུལ་དང་བཅས་པའི་འཁོར་གསུམ་པོ་སྣང་ལ་རང་བཞིན་མ་གྲུབ་པར་ཤེས་པའི་ངང་ནས། རང་ཉིད་ཀྱིས་ཆོས་ཞུས་པ་འདིས་མཚོན་པའི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་དང་། ཕྱོགས་བཅུའི་སངས་རྒྱས་སྲས་བཅས་ཀྱི་ཟག་མེད་ཀྱི་དགེ་བ་དང་། མཐའ་ཡས་པའི་སེམས་ཅན་རྣམས་ཀྱི་ཟག་བཅས་ཀྱི་དགེ་རྩ་ཐམས་ཅད་བློས་གཅིག་ཏུ་བསྡུས་ཏེ་རང་ཉིད་ཀྱི་དགེ་རྩ་དང་བསྡོམས་ཏེ། སེམས་ཅན་ཐམས་ཅད་རྫོགས་སངས་རྒྱས་ཏེ་བླ་མེད་བྱང་ཆུབ་ཆེན་པོར་རྒྱ་མཚོར་ཆུ་ཐིགས་བསྲེས་པ་བཞིན་འདྲེས་པར་བྱས་ཏེ་བསྔོ་བ་བྱ་ཞིང་སྦྱིན་པ་བྱ་བསམ་ནས་སེམས་རྣམ་པར་དག་པ་དང་བཅས་ཏེ། བྱང་ཆུབ་སེམས་དཔའ་ཀུན་ཏུ་བཟང་པོ་དང་འཇམ་དཔལ་དཔའ་བོ་སོགས་ཀྱིས་ཇི་ལྟར་བསྔོས་པ་བཞིན་དུ་བསྔོ་བར་བྱ། ཞེས་ངག་འདོན་དང་སྦྲེལ་ཏེ་བསྔོ་བར་བྱེད་དགོས། དེ་ལྟར་སྦྱོར་དངོས་རྗེས་གསུམ་དམ་པ་གསུམ་དང་འབྲེལ་ཏེ་ཆོས་བསྒྲུབས་ན། རང་གཞན་ཐར་བའི་ལམ་ལ་འགོད་པའི་ཆོས་ཐར་བ་ཆ་མཐུན་གྱི་དགེ་རྩ་སངས་རྒྱས་འགྲུབ་པའི་རྒྱུ་རུ་འགྲོ་ཐུབ་པ་ཡིན། དམ་པ་གསུམ་དང་མ་འབྲེལ་ན་སྦྱོར་དངོས་རྗེས་གསུམ་མ་ཚང་བ་ཡིན་པས་ཆོས་ཀྱི་གཟུགས་བརྙན། གལ་ཏེ་བཟང་ན་བསོད་ནམས་ཆ་མཐུན་གནས་སྐབས་ཀྱི་བདེ་འབྲས་ལྷ་མིའི་ལུས་ཐོབ་པའི་རྒྱུ་རུ་འགྲོ་བ་ཙམ་མ་གཏོགས་མེད། བསམ་པ་མ་དག་ན་དུག་དང་འདྲེས་པའི་ཁ་ཟས་ལྟར་རང་གཞན་སྡུག་ལ་སྦྱོར་བའི་ངན་འགྲོའི་གནས་སུ་འཁྱམས་པའི་རྒྱུ་རེད་སྲིད། དེས་ན་མང་པོ་ཞིག་མ་ཤེས་རུང་མདོར་དྲིལ་ན་བསམ་པ་བཟང་པོ་དང་མི་འབྲལ་བ་ནི་ཆོས་ཉན་དུས་སྒྲུབ་དུས་གང་གི་སྐབས་ཡིན་ན་གལ་ཆེ་བ་ཡིན། རང་རེ་མང་ཆེ་བ་སྔ་འགྱུར་གྲུབ་དབང་རྫོགས་ཆེན་པའི་ཆོས་བརྒྱུད་འཛིན་པའམ་དེ་དང་འབྲེལ་བ་ཡོད་པའི་འཁོར་ཤ་སྟག ཆོས་གསན་མཁན་མཆོག་དམན་བར་གསུམ་ཡོད་ན། འགའ་ཞིག་བསྟན་འཛིན་གྱི་སྐྱེས་ཆེན་ཡིན་ཞིང་། དེང་སང་གི་དུས་ཀྱི་བསྟན་པ་དར་ཞིང་རྒྱས་པའི་སྟངས་འཛིན་མཁན་དང་། བླ་གྲྭ་དགེ་འདུན་པ་མང་པོ་ཡོད་པ་འདི་དག་ནི་བསྟན་པའི་གཞི་མ་དགེ་འདུན་པ་རེད། དེ་མིན་མི་སྐྱ་ཕོ་མོ་ལ་མཚོན་ན་དགེ་བསྙེན་ཁྱིམ་པའི་རྟེན་ཅན་ཡིན་རུང་། འཇིག་རྟེན་ཡང་དག་གི་ལྟ་ལ་དད་པ་བྱེད་ནི། མཐོ་རིས་དང་ཐར་པ་དོན་གཉེར་ཡོད་པ་དང་། བསྟན་ལ་ལྷག་བསམ་རྣམ་དག་ཡོད་མཁན་ཡིན་ན་བསྟན་པའི་སྦྱིན་བདག་ཅིས་མིན། དེས་ན་བསྟན་འཛིན་གྱི་སྐྱེས་བུ་ཡིན། བསྟནཔའི་གཞི་མ་ཡིན། བསྟན་པའི་སྦྱིན་བདག་ཡིན་ཟེར་ནས་རང་གར་བསྡད་པས་མི་ཕན། གདན་ས་ཆོས་འཁོར་ཆེན་པོའི་འདབ་ལ་སྐྱེས་པས་མ་ཚད་རྒྱ་གར་རྡོ་རྗེའི་གདན་བསྐལ་བ་བཟང་པོའི་སངས་རྒྱས་སྟོང་རྩ་གཉིས་སངས་རྒྱས་པའི་གནས་སུ་སོང་ནས་ལོ་མང་ཉལ་ཡང་། དམ་པའི་ཆོས་རང་ཉིད་ཀྱིས་མི་སྒྲུབ་ཅིང་ཚོགས་བསགས་སྒྲིབ་སྦྱོང་མ་ཐུབ་ན་རང་རྒྱུད་ལ་སོར་གང་གིས་ཡར་བསྐྱེད་མི་འོང་། དེས་ན་རང་གི་ཉམས་ལ་ཕན་པ་དང་རང་རྒྱུད་གྱོང་པོ་འདུལ་བའི་གཉེན་པོར་འགྲོ་ངེས་པའི་སྙིང་རྗེ་བཅོས་མ་མ་ཡིན་པ། སེམས་ཅན་མིག་གིས་མཐོང་ན་མིག་ནས་མཆི་མ་འཆོར་ཐུབ་པ་ཞིག་རང་རྒྱུད་ལ་སྐྱེས་པ་དེ་ལྟ་བུས་དྲངས་ཏེ། སེམས་བསྐྱེད་ཀྱི་ཆོ་ག་ངག་འདོན་ཙམ་གྱིས་ཆོག་པ་མ་ཡིན་པ་ཀུན་རྫོབ་བྱང་ཆུབ་ཀྱི་སེམས་སྨོན་པ་དང་འཇུག་པའི་བདག་ཉིད་ཅན་རྒྱུད་ལ་སྐྱེས་ནས་རིམ་གྱིས་གོམས་པ་གྱུར་ན། མཐར་ཐུག་མཐོང་ལམ་རྣམ་པར་མི་རྟོགས་པའི་ཡེ་ཤེས་དོན་དམ་བྱང་ཆུབ་ཀྱི་སེམས་རྒྱུད་ལ་སྐྱེས་ནས་རྫོགས་སྨིན་སྦྱོང་གསུམ་མཐར་ཕྱིན་ནས། རང་དོན་དུ་ཆོས་སྐུ་འགྲུབ་གཞན་དོན་དུ་གཟུགས་སྐུ་རྣམ་གཉིས་ཀྱིས་ཇི་སྲིད་འཁོར་བ་མ་སྟོང་གི་བར་དུ་འགྲོ་དོན་མཛད་ཐུབ་པ་ཡིན། དེ་ལྟར་མ་ཡིན་པར་ང་དེ་དང་དེའི་སྐྱེ་སྤྲུལ་ཡིན་ཟེར་བའམ། ངས་གཞུང་བཀའ་པོད་ལྔས་ཚིག་འགྲེལ་ནུས་ཞེས་པའམ། ཤི་བོ་མང་པོའི་མགོར་བུམ་རིལ་གཡུག་མྱོང་བའམ། མ་ཎི་ཡིག་དྲུག་བྱེ་ཆུང་འགའི་ཁ་བུད་ཚར་ཟེར་བ་སོགས་ཀྱིས་མི་ཕན། ཆོས་ཅི་ཙམ་ཞུས་རུང་འབུམ་ལྔ་མང་པོ་བསགས་ཀྱང་མི་ཕན། གཙོ་བོ་ཆོས་དང་རང་རྒྱུད་འདྲེས་དགོས། ཆོས་ཕ་ཀིའི་ཐད་ལ་བཞག་རང་རྒྱུད་ཚུར་ན་ལུས་སོང་ན་ཆོས་ཀྱིས་རང་རྒྱུད་ལ་ཕན་མི་ཐོགས། གནད་ལ་མ་སྨིན་པའི་ཆོས་ཞུས་པ་རྣམས་དུས་ཚོད་འཕྲོ་བརླག་ཡིན། ཆོས་ཐོས་པའི་ཕན་ཡོན་མང་བས། ཆོས་སྒྲ་རྣ་བས་གོ་ཡང་ཐར་བའི་རིང་རྒྱུ་ཙམ་གལ་ཏེ་རེད་སྲིད་ན་ཐང་། སྐྱེ་ལུས་འདིའི་ཐོག་སྨིན་ཅིང་གྲོལ་བ་ཞིག་ཐོབ་དགོས་ན་ཆོས་དང་རང་རྒྱུད་འདྲེས་དགོས་པར་གནད་ཆེ། ཆོས་ཚིག་གཅིག་ཐོས་ཀྱང་ད་ལྟ་ནས་བེད་སྤྱད་དེ་ལག་ལེན་ལ་ཨེ་ཐུབ་བལྟ་དགོས། འདིའི་ནང་གི་ཐམས་ཅད་ལ་ཞུ་ནི་མིན་ཏེ། ཐུགས་རྗེས་ཡས་སྤྲུལ་གྱི་སྐྱེས་ཆེན་མཚན་གྱི་གསལ་ཁ་ཡོད་མཁན་མ་ཟད། ད་དུང་འདིའི་ནང་སངས་རྒྱས་བྱང་སེམས་ཀྱི་སྤྲུལ་པ་ཅིའི་ཕྱིར་མེད། དེ་མིན་རང་རེ་ལྟ་བུའི་སོ་སྐྱེས་ལམ་ཞུགས་པ་ཐམས་ཅད་ཐར་ལམ་རྣམ་དག་གི་སྣེ་ཨེ་ཟིན་བསམས་ནས་དམ་པའི་ཆོས་ལ་འཇུག་ཁུལ་བྱེད་པ་ཡིན་ན། རང་རེའི་བར་ལོ་རྒས་གཞོན། མི་རབས་སྔོན་རྗེས་ཀྱི་ཁྱད་པར་ཙམ་གྱིས་དམ་པ་གོང་མ་སངས་རྒྱས་དངོས་བྱོན་དེ་རྣམས་ཞལ་མཇལ་མྱོང་མི་མྱོང་གི་ཁྱད་པར་དང་། ཆོས་ཐོབ་མྱོང་མི་མྱོང་གི་ཁྱད་པར་ཞིག་ཡོད་པ་དང་། ཆོས་ཀྱི་བརྒྱུད་པ་ལ་ཐག་ཉེ་རིང་གི་ཁྱད་པར་ཙམ་ལས། ང་རང་ཉིད་ལ་མཚོན་ན་སོ་སོའི་སྐྱེ་བོ་ལམ་ཞུགས་པ་མོས་པ་ཆོས་ཕྱོགས་སུ་སྒྱུར་མཁན་ཙམ་མ་གཏོགས་ཁྱད་ཆོས་གཞན་ཅི་ཡང་མེད་ཁི། འོན་ཀྱང་རྟེན་ལ་རབ་གནས་བྱེད་ཚེ་བྱིན་རླབས་ཞུགས་པ་ལྟར། དམ་པ་གོང་མ་སངས་རྒྱས་དངོས་བྱོན་དེ་ཚོའི་ཐུགས་བསྐྱེད་སྨོན་ལམ་གྱི་སྟོབས་ཀྱིས་བྱིན་རླབས་གྱི་ཕ་ཕོགས་རེ་ལྷག་བསམ་དད་གུས་འབྲལ་མེད་ཀྱི་སྟོབས་ཀྱིས་འདྲེན་ནུས་པའི་གདེང་ཚོད་ངང་། རང་རེ་ཀུན་ཆོས་ར་གཅིག་ཏུ་དུས་ཀྱི་ཐ་མར་ཆོས་ཀྱི་གྲུ་ཆེན་པོ་ལ་མཉམ་དུ་ཞུགས་ན། རང་རེས་ཆོས་ཞུས་ཞུས་ཐོབ་ཐོབ་གཟུགས་བརྙན་ཙམ་དུ་མ་སོང་བར། རང་རྒྱུད་ཉོན་མོངས་ཀྱི་གཉེན་པོ་རྒྱུད་ལ་སྦྱར་ནས། ཆོས་འཁོར་གདན་ས་ཆེན་པོའི་འགྲམ་དུ་སྐྱེས་པ་དེ་ཚོ་གཞན་དང་མི་འདྲ་འདུག་བསམ་རྒྱུའི་ཆོས་ཐོས་པའི་ལག་རྗེས། སྒོམ་པའི་ཉམས་མྱོང་གང་ལ་བསམ་ཡང་། རང་མཐོང་གི་མི་ཕལ་བ་ལ་ཁའི་རི་དྭགས་མིན་ཙམ་རྣམས་དང་མི་འདྲ་ཙམ་རེ། སེམས་ཀྱི་ནང་ནེམ་ཞིག་ཕོག་ནས་རང་རྒྱུད་ཆོས་ཀྱིས་དུལ་བ། གཞན་ལ་ཕན་པའི་བསམ་སྦྱོར་ཅན་ངང་རྒྱུད་རིང་བ། ཞི་ཞིང་དུལ་བ། ང་རྒྱལ་དང་ཁེངས་སེམས་ཆུང་བ། གཞན་གྱི་སྡུག་བསྔལ་རང་གིས་ལེན་མ་ཐུབ་ཀྱང་། རང་གི་སྡུག་བསྔལ་གཞན་ལ་སྤོ་བསམ་པའི་ངན་སེམས་མེད་ནི། རང་གཅེས་པ་རྒྱུ་མཚན་དུ་བྱས་ནས་གཞན་ལ་གནོད་པ་མི་བྱེད་པའི་མགོ་བརྩམས་ནས་བསམ་པ་བཟང་པོའི་རྨང་གཞི་འདིའི་ཐོག་ནས། རྒྱལ་སྲས་བྱང་ཆུབ་སེམས་དཔའི་ཕྱིན་དྲུག་གི་སྤྱོད་པ་ལ་རིམ་གྱིས་བསླབ་དགོས་བསམ་པའི་ཆོད་སེམས་བརྟན་པོ་ཞིག དགྲ་ནག་པོ་ཐད་ནས་བུད་ཀྱང་མི་ལྡོག་པ་དང་། དྲིན་ཕ་མས་སྔོན་ནས་བཀག་ཀྱང་མི་ཁོག་པ་ཞིག་དགོས། དེ་ལྟ་བུའི་ཆོད་སེམས་དང་ལྡན་པས་སྐབས་སུ་བབས་པ་གང་ཞིག་གསན་པར་བྱ་བ་ནི། གསུམ་པ་སྨོན་འཇུག་གི་བསླབ་བྱ་བསྟན་པ་ལ་གཉིས་ཡོད་པ་ལས། དང་པོ་སྨོན་པའི་བསླབ་བྱ་གོང་དུ་སོང་ནས་དེ་རིང་འཇུག་པའི་བསླབ་བྱ་ལ་ཁེལ་ཡོད།

༢༽འཇུག་པའི་བསླབ་བྱ་ཕྱིན་དྲུག

དོན་གཉིས་པ་འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་ནི། རྒྱལ་སྲས་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུ་མང་པོ་ཡོད་ཀྱང་དེ་ཐམས་ཅད་བསྡུ་ན་ཕ་རོལ་ཏུ་ཕྱིན་པ་དྲུག་གི་ནང་འདུ། དྲུག་པོ་གང་ཡིན་ན། སྦྱིན་པ་ཚུལ་ཁྲིམས་བཟོད་པ་བརྩོན་འགྲུས་བསམ་གཏན་ཏེ། ཐབས་སྤྱོད་པའི་ཕྱོགས་ཀྱི་ཕ་རོལ་ཏུ་ཕྱིན་པ་ལྔ། ཤེས་རབ་ཡེ་ཤེས་ཀྱི་ཚོགས་ཏེ་དྲུག་ཡིན། བསྡུ་ན། སྦྱིན་སོགས་སྔ་མ་ལྔ་དམིགས་བཅས་བསོད་ནམས་ཀྱི་ཚོགས་ཐབས་སྤྱོད་པའི་ཕྱོགས་དང་། ཤེས་རབ་དམིགས་མེད་ཡེ་ཤེས་ཀྱི་ཚོགས་ལྟ་བའི་ཕྱོགས་ཏེ་ཚོགས་གཉིས་ལ་འདུས་པ་ཡིན། ཕར་ཕྱིན་གྱི་ངེས་ཚིག་ནི། འཁོར་བའི་ཕ་རོལ་མྱ་ངན་ལས་འདས་པའི་ས་ལ་ཕྱིན་པར་བྱེད་པའི་ཐབས་སུ་གྱུར་བས་ན་ཕར་ཕྱིན་གསུངས། ཕ་རོལ་མྱ་ངན་ལས་འདས་པའི་ས་ཞེས་པ་ལ་ཡང་ཞི་བ་ཉན་རང་གི་ས་དང་། རྫོགས་པའི་སངས་རྒྱས་ཀྱི་ས་རྣམ་པ་གཉིས་ཡོད། ཕར་ཕྱིན་དྲུག་པོ་དེར་ངེས་འབྱུང་གི་བསམ་པས་ཟིན། བདག་མེད་གཉིས་རྟོགས་ཀྱི་ཤེས་རབ་ཀྱིས་མ་ཟིན། སྟོང་ཉིད་རྫོགས་པར་རྟོགས་པའི་ལྟ་བས་མ་ཟིན་ན་ཕར་ཕྱིན་ཉི་ཚེ་བ་ཟེར། ཞི་བ་ཉན་རང་གི་གོ་འཕང་ཐོབ་པའི་རྒྱུ་ཡིན། དེ་ལས་འདས་པའི་སངས་རྒྱས་ཀྱི་གོ་འཕང་ནི་ལྟ་བས་སྲིད་པའི་མཐའ་མནན། སྙིང་རྗེས་ཞི་བའི་མཐའ་མནན་ནས། སྲིད་ཞི་གཉིས་ཀའི་མཐའ་ལ་མི་གནས་པའི་ཕ་རོལ་ཏུ་ཕྱིན་པར་བྱེད་པས་ན་ཕ་རོལ་ཏུ་ཕྱིན་པ་དྲུག་ཡིན།

༡༽སྦྱིན་པ།

དེ་ལས་དང་པོ་སྦྱིན་པའི་ཕ་རོལ་ཏུ་ཕྱིན་པ་ལ། ཟང་ཟིང་གི་སྦྱིན་པ། ཆོས་ཀྱི་སྦྱིན་པ། མི་འཇིགས་པ་སྐྱབས་ཀྱི་སྦྱིན་པ་དང་གསུམ་ཡིན། ཟང་ཟིང་གི་སྦྱིན་པ་དེ་ལ་གཏོང་བ་དང་། གཏོང་བ་ཆེན་པོ། ཤིན་ཏུ་གཏོང་བ་དང་གསུམ་ཡོད། གཏོང་བ་ནི་སློང་བ་པོས་བྱིན་ཅིག་ཅེས་པའི་སྒྲ་དེ་ཐོས་པ་དང་མི་དགའ་བ་མི་བྱེད་པར་ཆུང་ས་ནས་ཐ་ན་ཇ་ཐེབ་དང་། ནས་ཕོར་གང་ཡན་ཆད་རྒྱུ་རྫས་གཞན་ལ་སྦྱིན་པ་དེ་ཡིན། དེ་ལ་རང་གི་བསམ་པ་སེར་སྣ་དང་ལན་དང་རྣམ་སྨིན་ལ་མི་རེ་བ་རྣམ་པར་དག་ན་སྦྱིན་རྒྱུའི་དངོས་པོ་ལ་ཆེ་ཆུང་མེད་དེ། གལ་ཏེ་བསམ་པ་མ་དག་ན་སྦྱིན་རྒྱུའི་དངོས་པོ་ཆེ་ཡང་མི་ཕན་པ་ཤུགས་ཀྱིས་བསྟན། ལྟུང་བཤགས་ལས་ཀྱང་ཐ་ན་དུད་འགྲོའི་སྐྱེས་གནས་སུ་སྐྱེས་པ་ལ་ཟས་ཁམ་གཅིག་ཙམ་བསྩལ་བའི་དགེ་བའི་རྩ་བ་ཞེས་གསུངས་པས་རང་གི་འབྱོར་ཚད་ཀྱི་དངོས་པོ་དེ་བསམ་པ་རྣམ་པར་དག་པས་ད་ལྟ་བདག་ལ་འདི་ལས་མེད་ཀྱང་ཕྱིན་ཆད་ལུས་ལོངས་སྤྱོད་དགེ་རྩ་དང་བཅས་པ་སྦྱིན་ཡུལ་འདིས་གཙོས་པའི་སེམས་ཅན་ཐམས་ཅད་ལ་སྦྱིན་ནུས་པར་ཤོག་བསམས་ནས་བཞིན་འཛུམ་པ་དང་བཅས་ལག་གཉིས་ཀྱིས་གུས་པས་སྦྱིན་དགོས། ཡང་སློང་ན་ཡོད་ན་སྦྱིན། གལ་ཏེ་མེད་ན་དེའི་ཚུལ་བཤད་ནས་བཏང་། དེ་ནས་སྦྱིན་པའི་དགེ་རྩ་རྒྱུ་འབྲས་དང་བཅས་པ་སྦྱིན་ཡུལ་འདིའི་གཙོས་སེམས་ཅན་ཐམས་ཅད་ལ་བསྔོ་བསམས་ནས་བསྔོ་བ་དང་སྨོན་ལམ་བྱེད་དགོས། མཆོད་པ་ལྟ་བུའི་སྐབས་ལ་མཚོན་ན་མཆོད་ཡུལ་གྱི་དམིགས་རྟེན་སངས་རྒྱས་ཀྱི་སྐུ་གཟུགས་ལྟ་བུ་ལ་སྐྱབས་གནས་རྒྱ་མཚོ་ཐམས་ཅད་མངོན་སུམ་དུ་བཞུགས་ཡོད་བསམས་ནས་མཆོད་རྒྱུའི་དངོས་པོ་མར་མེ་རྡོག་པོ་གཅིག་ཡིན་ཡང་མཆོད་ལུགས་སྦྱོར་དངོས་རྗེས་གསུམ་ཚང་བའི་སྒོ་ནས་མཆོད་དགོས། ཁྱད་པར་དངོས་གཞི་ལ་འཁོར་གསུམ་པོ་སྣང་ལ་རང་བཞིན་མེད་པ་སྟོང་པའི་ངེས་ཤེས་དྲངས། ཚེ་འདི་དང་ཕྱི་མར་ལན་དང་རྣམ་སྨིན་ལ་རེ་བ་མེད་པའི་མཆོད་སྦྱིན་བྱེད་དགོས། རྒྱལ་བ་ཐབས་མཁས་ལ་ཐུགས་རྗེ་ཆེ་བའི་མངའ་བདག་ཡིན་པས་གཟུངས་སྔགས་དང་རིགས་སྔགས་དང་ཏིང་ངེ་འཛིན་ལ་སོགས་པའི་མཐུ་ལ་བརྟེན་ནས་དངོས་པོ་ཆུང་ངུ་ཆུ་ཐིགས་དང་ནས་འབྲུ་ཙམ་གྱི་སྦྱིན་པས་ཀྱང་། ལྟོགས་སྐོམ་གྱིས་མནར་ནས་ཟས་སྐོམ་གྱི་མིང་ཙམ་ཡང་ལོ་ཟླ་མང་པོར་ཐོས་མ་མྱོང་བའི་ཡི་དྭགས་ཀྱི་རིགས་གངྒཱའི་ཀླུང་གི་བྱེ་མ་སྙེད་མང་པོ་ལ་ཕན་ཐོགས་པར་གསུངས། དཀར་གསུར་དམར་གསུར་ལ་སོགས་པ་འདི་དག་ཀྱང་མཁའ་ལ་རྒྱུ་བའི་ཡི་དྭགས་ཀྱི་རིགས་ལ་ཕན་ལྷག་པར་ཆེ་ཞིང་། སྦྱིན་པ་དེ་ལ་བརྟེན་ནས་སེམས་ཅན་གྱི་སྲོག་ལ་ཟ་བའི་འབྱུང་པོ་མི་མ་ཡིན་པ་རྣམས། གནས་སྐབས་སྔགས་དང་ཏིང་ངེ་འཛིན་གྱིས་མང་པོ་སྤེལ་བའི་དྲི་གསུར་གྱི་ཟས་ཀྱིས་ཚིམས་པ་དང་། དེ་དང་མཉམ་དུ་ཆོས་ཀྱི་སྦྱིན་པ་ཐོས་པས་དེ་དག་གི་རྒྱུད་གྲོལ་བ་སོགས་ལ་བརྟེན་ནས་སེམས་ཅན་གྱི་སྲོག་ལ་མི་འཚེ་བར་འགྱུར་བ་ཡིན་པས་སེམས་ཅན་མང་པོ་འཆི་བའི་འཇིགས་པ་ལས་སྐྱོབ་པས། མི་འཇིགས་པ་སྐྱབས་ཀྱི་སྦྱིན་པ་ཡང་ཡིན་ཏེ། དོན་དུ་སྦྱིན་པ་རྣམ་པ་གསུམ་ཀ་ཚང་། དེས་ན་ཆུ་སྦྱིན་དང་གསུར་བསྔོ་ལ་སོགས་པ་བྱེད་པ་ནི། སྟབས་བདེ་ཞིང་བྱ་སླ་ལ་དགེ་རྩ་ཆེན་པོར་འགྱུར་བས་ཆོད་ཆེ་བའི་ཆོས་ཡིན་པས། ལོ་རེ་བཞིན་ཆུ་གཏོར་འབུམ་ཐེར་རེ་ཙམ་བསྔོ་བ་དང་། དུས་རྒྱུན་ཆད་མེད་དུ་ཁྱིམ་པས་ཀྱང་ཉིན་བཞིན་དུ་ཡང་གསུར་བསྔོ་རེ་དང་ཆུ་གཏོར་མ་ཆགས་པར་བྱེད་པ་གལ་ཆེ་བ་ཡིན། ཆོས་ཀྱི་སྦྱིན་པ་འདིའི་ཐད་ནས་སྨིན་བྱེད་ཀྱི་དབང་དང་གྲོལ་བྱེད་ཀྱི་གདམས་པའི་སྒོ་ནས་ཡང་དག་པའི་དོན་སྟོན་པར་བྱེད་པ་དང་། ལུང་དང་བསླབ་པ་འབོག་པ་དང་། དབང་པོ་དང་འཚམས་པའི་ཆོས་ཀྱི་སྦྱིན་པ་བྱེད་པ་ནི་སྦྱིན་པ་ཐམས་ཅད་ཀྱི་ནང་ནས་མཆོག་ཏུ་གྱུར་བ་ཡང་ཡིན། དེ་བཞིན་དུ་རང་ལ་རྒྱུ་རྫས་ལོངས་སྤྱོད་ཅུང་ཟད་རེ་འབྱོར་པ་བྱུང་ན་ཡང་། དེ་ལ་ཤི་སྤར་འཐམས་ནས་ཚེ་འདི་ཕྱི་གཉིས་ཀའི་དོན་དུ་བེད་སྤྱོད་མི་བྲ་བར། ཟང་ཟིང་གི་ནོར་རྫས་ཅི་ཙམ་ཞིག་ཡོད་ཀྱང་མེད་སྙམ་ནས་མུག་སྐད་འདོན་པ་ནི་ད་ལྟ་མ་ཤི་གོང་ཉིད་ནས་ཡི་དྭགས་ཀྱི་རྒྱུ་མཐུན་སླེབ་པ་ཡིན་པས། དེ་ལྟར་མི་བྱེད་པར་ཡར་དཀོན་མཆོག་ལ་མཆོད་པ། མར་ངན་སློང་ལ་སྦྱིན་གཏོང་ལ་སོགས་པ་མཆོད་སྦྱིན་གྱི་ཕྱོགས་ལ་འབད་དགོས་ཏེ། འབད་རྩོལ་རི་རབ་ཙམ་བྱེད་པ་བས། །བསོད་ནམས་མེ་སྟག་ཙམ་བསགས་ན་བཟང་། །ཞེས་དང་། བསོད་ནམས་ཤུགས་ཀྱིས་དོན་འགྲུབ་པ། །ཉི་མའི་འོད་བཞིན་ལྟོས་པ་མེད། །འབད་པའི་ཤུགས་ཀྱིས་དོན་འགྲུབ་པ། །མར་མེའི་འོད་བཞིན་ཀུན་ལ་ལྟོས། །ཞེས་གསུངས་པ་དང་། རྗེ་མི་ལའི་ཞལ་ནས་ཀྱང་། ལྟོ་ཁ་ནས་བྲུས་ལ་སྦྱིན་པ་ཐོང་། །ཞེས་དང་། ས་པཎ་གྱིས། མཁས་པ་ལོངས་སྤྱོད་འོང་འདོད་ན། །ཆ་ཤས་སྦྱིན་པ་གཏོང་བ་གནད། །ཁྲོན་པའི་ཆུ་ནི་འཕེལ་འདོད་ན། འཆུ་བ་ཡི་ནི་གདམས་ངག་ཡིན། །གསུངས། དེ་ལྟར་བསོད་ནམས་བསགས་པའི་ཕན་ཡོན་གྱི་གནད་ཤེས་པ་མ་ཡིན་པར་རང་འདོད་ཀྱི་དབང་དུ་བཏང་ན། ལྷོ་འཛམ་བུ་གླིང་གི་རྒྱུ་རྫས་ལོངས་སྤྱོད་ཐམས་ཅད་མི་གཅིག་ལ་ཡོད་ཀྱང་ཆོག་མི་ཤེས། བརྒྱ་ཡོད་ན་བརྒྱ་ཁ་བཤིག་མི་བྲ། སྟོང་ཡོད་ན་ད་དུང་སྟོང་ཁ་གཅིག་བཀང་བསམ། ཁྲི་ཡོད་ན་ཁྲི་ཆག་བཤིག་མི་ཉན་བསམ། རང་ལ་ཡོད་པ་དེ་ཁ་ནས་འབུད་མི་བྲ་བར་ཡར་མཆོད་མར་སྦྱིན་བྱེད་རྒྱུ་དེ་ད་གཟོད་ཤ་རྐང་ལི་མི་སྣད་ཤ་ཁུ་ཨེ་རག་ཟེར་བ་ལྟར། གཞན་ཞིག་ནས་ཨེ་རྙེད་སྙམ་པ་ལྟ་བུ་ཞིག་འཆར་འོང་བ་ཡིན། ལར་ཟང་ཟིང་གི་སྦྱིན་པ་ལ་སོགས་རྒྱུ་རྫས་ཀྱི་དངོས་པོས་ཆོས་བྱེད་པ་འདི་བྱང་ཆུབ་སེམས་དཔའ་ཁྱིམ་པ་ལ་གཙོ་བོར་གསུངས་པ་ཡིན་པ་ལས། རབ་ཏུ་བྱུང་བ་རྣམས་ཀྱིས་སྦྱང་བའི་ཡོན་ཏན་ལ་གནས་ནས། འདོད་པ་ཆུང་ཞིང་ཆོག་ཤེས་པ་ཁོ་ན་ལ་བསླབ། རི་ཁྲོད་དང་དགོན་པ་བརྟེན་ཏེ་དཀའ་སྤྱད་དང་སྙིང་རུས་ཀྱི་སྒོ་ནས་ལམ་ལྷག་པའི་བསླབ་པ་གསུམ་ཉམས་སུ་ལེན་པ་དེ་གལ་ཆེ་བ་ཡིན། ཆོས་སྤྱོད་བཅུ་ལ་སོགས་པ། རང་གི་རྒྱུན་གྱི་དགེ་སྦྱོར་བཅག་ནས་ཚོང་དང་སོ་ནམ་ལ་སོགས་གཡོ་སྒྱུ་དང་ལོག་འཚོ་སྡིག་པའི་སྒོ་ནས་རྒྱུ་རྫས་བསགས་ཏེ། དེས་ཡར་མཆོད་མར་སྦྱིན་བྱེད་པ་སོགས་ཆོས་བྱེད་པར་རློམ་པ་རྣམས་ནི། ཆོས་ཆོས་བཞིན་མ་བྱས་ན་ཆོས་ཀྱིས་སླར་ངན་སོང་གི་རྒྱུ་བྱེད་བྱ་བ་དེ་ཡིན་པས། དེ་ལ་སྙིང་པོ་ཅི་ཡང་མེད། དེས་ན་རབ་ཏུ་བྱུང་བ་ཞིག་ཡིན་ནས་བཟུང་སྟེ། དུས་དང་རྣམ་པ་ཐམས་ཅད་དུ་འདོད་ཆུང་ཆོག་ཤེས་ཁོ་ན་ལ་བསྟེན་པ་འདི་གལ་ཆེ་བ་ཡིན་ནོ། །དེ་ཡང་སྦྱིན་པ་གཏོང་བའི་སྐབས་སུ་གཙོ་བོ་སེར་སྣ་མེད་པ་ཞིག་དང་སེར་སྣའི་གཉེན་པོར་འགྲོ་བ་ཞིག་དགོས། དེ་ལྟ་བུའི་སེར་སྣའི་གཉེན་པོར་འགྲོ་བའི་སྦྱིན་པ་དང་། ལན་དང་རྣམ་སྨིན་ལ་རེ་བ་མེད་པའི་ཟང་ཟིང་གི་སྦྱིན་པ་ནི་ཚོགས་ལམ་དང་། གཏོང་བ་ཆེན་པོ་སྦྱོར་ལམ་དང་། ཤིན་ཏུ་གཏོང་བ་མཐོང་ལམ་གཙོ་བོ་བཞག་པ་ཡིན། ལས་དང་པོ་བའི་སྐབས་སུ་བསམ་པས་གཏོང་སྦྱོར་བས་བསྲུང་དགོས་གསུངས། ལོངས་སྤྱོད་སེར་སྣའི་གཉེན་པོ་འགྲོ་ཚད་གཏོང་དགོས། དེ་ཡང་དགེ་རྩ་འབྲས་བུ་དང་བཅས་པ་གཏོང་དགོས། གཏོང་བ་ཆེན་པོ་ཞེས་བྱ་བ་ནི། རྟ་དང་གླང་པོ་བུ་དང་བུ་མོ་ལ་སོགས་རང་ལ་ལྷག་པར་རྩིས་ཆེ་བའི་ནོར་རྫས་དང་གཉེན་འཁོར་དང་། དཀོན་པའི་རིགས་གཞན་ལ་སྦྱིན་པ་དེ་ཡིན། ཤིན་ཏུ་གཏོང་བ་ནི། རང་གི་ལུས་དང་སྲོག་དང་ཡན་ལག་ལ་སོགས་པ་སྦྱིན་པར་གཏོང་བ་སྟེ། དཔེར་ན་རྒྱལ་བུ་སྙིང་སྟོབས་ཆེན་པོས་སྟག་མོར་ལུས་སྦྱིན་བཏང་བ་དང་། ཞེས་པ་འདིའི་ལོ་རྒྱུས་ཞུས་ན། སྔོན་འཛམ་གླིང་འདི་ན་རྒྱལ་པོ་ཤིང་རྟ་ཆེན་པོ་བྱ་བ་ལ་སྲས་གསུམ་ཡོད། ཆེ་བ་སྒྲ་ཆེན་པོ། འབྲིང་བ་ལྷ་ཆེན་པོ། ཆུང་བ་སེམས་བསྐྱེད་ཆེན་པོའོ། །ཐ་ཆུང་སེམས་བསྐྱེད་ཆེན་པོ་ནི་བྱམས་པ་དང་སྙིང་རྗེ་ཆེན་པོ་ཡོད་པ་སེམས་ཅན་སུ་མཐོང་ཡང་རང་གི་བུ་གཅིག་པུ་བཞིན་བརྩེ་བ་ཆེན་པོ་ཡོད་པ་ཞིག་ཡོད། སྐབས་ཤིག་རྒྱལ་པོ་ཡབ་ཡུམ་སྲས་འཁོར་དང་བཅས་པ་ཕྱི་རོལ་ཏུ་ལྗོངས་རྒྱུ་ལ་སྐྱོ་སངས་ཀྱི་ཚུལ་དུ་ཕེབས་ནས་ས་ཆ་ཞིག་ཏུ་བསྡད་ཚེ། སྲས་གསུམ་པོ་ནགས་གསེབ་ཏུ་སོང་སོང་བས་མཐར་སྟག་མོ་ཕྲུ་གུ་སྐྱེས་ནས་ཞག་དྲུག་ཙམ་ཕྱིན་པས་བཀྲེས་སྐོམ་གྱིས་གདུང་ནས་ཤི་ལ་ཉེ་བ་སྟག་ཕྲུག་རྣམས་ཀྱིས་མའི་ནུ་མར་འབྲད་པ་ཞིག་དང་ཐུག སྲས་ཐ་ཆུང་ན་རེ། སྟག་མོ་འདིའི་ཟས་ཅི་ཟ་བ་ཡིན་ཟེར། དེ་གཉིས་ཀྱིས་བསད་མ་ཐག་པའི་ཤ་དང་ཁྲག་དྲོན་མོ་ལ་དགའ་བ་ལས་གཞན་མི་ཟ་སྨྲས། འོ་ན་ཤ་ཁྲག་དྲོན་མོ་སྦྱིན་ནུས་པ་ཡོད་དམ་བྱས་པས་དེ་དཀའ་བ་ཡིན་ཟེར། དེ་ནས་སྲས་ཐ་ཆུང་གིས་ཞེ་འདང་འདི་ལྟར་བརྒྱབ་ཏེ། བདག་ཡུན་རིང་པོར་འཁོར་བར་འཁོར་ནས་ད་ལ་ཐུག་ཚེ། ལུས་སྲོག་གྲངས་མེད་པ་བཏང་ཡང་དོན་ཡོད་པ་གཅིག་ཀྱང་མེད། ད་རེས་ལུས་གཏོང་བའི་དུས་ལ་བབ་བོ་དགོངས་ནས་སྨྲས་པ། ཁྱོད་གཉིས་སྔོན་ལ་སོང་། ང་ལ་དོན་འགའ་སྒྲུབ་རྒྱུ་ཡོད་པས་རྗེས་ནས་འོང་ཟེར་ནས་དེ་གཉིས་སྔོན་ལ་བཏང་། དེ་ནས་སྟག་མོའི་དྲུང་དུ་སོང་ནས་ཉལ་ཡང་སྟག་མོས་ཡུན་རིང་ཟས་སྐོམ་མ་ལོན་པས་ཁ་འཐམས་ནས་ཟ་མ་ནུས། དེ་ནས་རྒྱལ་སྲས་ཀྱིས་ཤིང་གི་ཚེར་མ་རྣོན་པོ་ཞིག་བླངས་ནས་རང་ལུས་ལ་རྨ་ཁ་གཏོད་དེ་ཁྲག་འཐུང་དུ་བཅུག དེས་རྐྱེན་གྱི་རིམ་བཞིན་ཁ་གདངས་ནས་ལུས་ཀྱི་ཤ་ཐམས་ཅད་ལྷག་མ་མེད་པར་ཟོས་སོང་། ཕུ་བོ་གཉིས་ཀྱིས་ས་ཆ་གཞན་ནས་ཡུན་རིང་བསྒུགས་ཀྱང་མ་བྱུང་། དེ་གཉིས་སྟག་མོས་ཟོས་པ་དོགས་ནས་ལྟར་ཕྱིན་པས་སྟག་གིས་ཟོས་ཚར་ནས་ཤ་རྗེས་ཁྲག་རྗེས་ཙམ་ཡང་མ་མཐོང་། དེའི་སྐབས་སུ་རྒྱལ་པོའི་བཙུན་མོས་རྨི་ལམ་དུ་ཕུག་རོན་གསུམ་ནམ་མཁའ་ནས་འཕུར་ཏེ་རྩེ་བ་ལ། ཆུང་བ་དེ་ཁྲས་ཁྱེར་བ་རྨིས། གཉིད་སངས་ཚེ་སེམས་མ་བདེ་ནས་སྲས་གསུམ་ཚོལ་བས། ཕུ་བོ་གཉིས་ཕེབས་ཏེ་ལོ་རྒྱུས་བཤད་པས་བཙུན་མོ་བརྒྱལ་ཏེ་འགྱེལ། ཅུང་ཙམ་ན་བརྒྱལ་སངས་ཏེ་ཐམས་ཅད་ལྟར་ཕྱིན་པས་ཁྲག་རྗེས་ཙམ་ལ་བལྟས་ནས་མྱ་ངན་དུ་གྱུར། རྒྱལ་བུ་ཚེ་འཕོས་མ་ཐག་དགའ་ལྡན་ལྷ་ཡུལ་དུ་སྐྱེས། ནམ་མཁའི་ཐད་དུ་འོང་ནས་སེམས་གསོ་མཛད་དེ་སྤྲོ་བ་བསྐྱེད། དེ་ནས་ཀུན་མྱ་ངན་སངས་ནས་རིན་པོ་ཆེ་སྣ་བདུན་གྱི་སྒྲོམ་བུའི་ནང་ཤ་རུས་ཙམ་ལུས་པ་བཅུག་ནས་མཆོད་རྟེན་བྱས་སོ། །སློབ་དཔོན་ཀླུ་སྒྲུབ་ཀྱིས་རྒྱལ་པོ་བདེ་སྤྱོད་ཀྱི་བུ་ལ་དབུ་སྦྱིན་པར་བཏང་བ་དང་། ལྷ་ལྕམ་མནྡྷ་བཟང་མོས་སྟག་མོར་ལུས་སྦྱིན་བཏང་བའི་ལོ་རྒྱུས་ནི། ལྷ་ལྕམ་མནྡྷ་བཟང་མོ་ནི་ཟ་ཧོར་གྱི་རྒྱལ་པོ་གཙུག་ལག་འཛིན་ཚེ་འཕོས་པའི་སྐྱེ་བ་འགའ་བླངས་པའི་རྗེས་སུ་ཀོ་ཏ་ལའི་རྒྱལ་པོའི་སྲས་མོ་དེ་ཡིན། དེ་ནས་སློབ་དཔོན་ཆེན་པོས་གསུངས་ལས། ཁ་བ་ཅན་དུ་གནམ་རི་ཞེས་བྱའི་སྲས། །སྲོང་བཙན་སྒམ་པོ་ཞེས་བྱའི་རྒྱལ་པོ་སྐྱེ། །ཞེས་སློབ་དཔོན་ཆེན་པོས་ལུང་བསྟན་པ་ལྟར་ཕྱིས་སུ་བོད་རྒྱལ་སྲོང་བཙན་སྒམ་པོ་ལ་སོགས་པ་སྐྱེས་པ་དེ་ལྟ་བུ་ཡིན་ཏེ། ཤིན་ཏུ་གཏོང་བ་ཆེན་པོའི་དཀའ་བའི་མཛད་པ་འདི་དག་ས་ཐོབ་པའི་བྱང་ཆུབ་སེམས་དཔའ་མཐོང་ལམ་པ་ཡན་ཆད་རྣམས་མ་གཏོགས་སོ་སོའི་སྐྱེ་བོ་ཕལ་གྱིས་ཉམས་སུ་བླང་མི་ནུས་པས། ད་ལྟ་སོ་སྐྱེས་སྐབས་སུ་བློ་ཡིས་ལུས་སྲོག་ལོངས་སྤྱོད་དགེ་ཚོགས་དང་བཅས་པ་ཡོངས་སུ་བཟུང་བའི་གཞི་གསུམ་པོ་ཐམས་ཅད་ལ་ཆགས་པ་མེད་པར་སེམས་ཅན་གྱི་དོན་དུ་བསྔོ་ཞིང་། ཕྱིས་ནས་དངོས་སུ་གཏོང་ནུས་པར་སྨོན་ལམ་འདེབས་པ་ཡིན། ཆོས་ཀྱི་སྦྱིན་པ་ནི། གཞན་ལ་དབང་བསྐུར། ཆོས་བཤད། ལུང་འབོགས་པ་སོགས་རང་རྒྱུད་སྨིན་ནས་གཞན་རྒྱུད་དགེ་བ་ལ་སྦྱོར་བའི་ཐབས་བྱེད་པ་དེ་ཡིན། འོན་ཀྱང་བདག་མེད་རྟོགས་ཏེ་རང་འདོད་ཀྱི་འཁྲིས་རྩ་བ་ནས་མ་ཟད་ཀྱི་བར་དུ་རང་མ་སྨིན་པས་གཞན་དོན་སྒྲུབ་ལོ་བྱས་ཀྱང་གཟུགས་བརྙན་ཙམ་ལས་མི་འོང་སྟེ། ཇོ་བོ་ལ་འཁོར་སློབ་རྣམས་ཀྱིས། ཚོགས་པ་སྐྱོང་བའི་དུས་ནམ་ཡིན། གཞན་དོན་བྱེད་པའི་དུས་ནམ་ཡིན། གཤིན་པོ་ལ་འཕོ་བ་འདེབས་པའི་དུས་ནམ་ཡིན་ཞུས་པས། ཚོགས་པ་སྐྱོང་བའི་དུས་མཐོང་ལམ་ས་དང་པོ་ན་སྟོང་ཉིད་རྟོགས་ཤིང་མངོན་ཤེས་ཐོགས་མེད་དུ་སྐྱེས་པའི་དུས་ན་ཚོགས་པ་སྐྱོང་དགོས་པ་ཡིན། གཞན་དོན་བྱེད་པའི་དུས་རང་དོན་གྱི་འཁྲི་བ་ཟད་ཙ་ན་ཡིན། གཤིན་པོ་ལ་འཕོ་བ་འདེབས་པའི་དུས་མཐོང་ལམ་ཐོབ་ནས་ཡིན་གསུངས། ཡང་ཇོ་བོའི་ཞལ་ནས། ད་ལྟ་སྙིགས་མའི་དུས་སུ་མེད་ན་ཡོད་མདོག་བྱས་ནས་ཕོ་ཟོ་འདོན་པའི་དུས་མ་ཡིན། སྙིང་རུས་འདོན་ཅིང་སྒྲུབ་ལ་འབད་པའི་དུས་ཡིན། ཆེ་ས་བཟུང་ནས་ང་ཆེ་ང་བཙན་བྱེད་པའི་དུས་མ་ཡིན། དམན་ས་གོང་མའི་གདན་ས་ཡིན་པས་དམན་ས་བཟུང་བའི་དུས་ཡིན། འཁོར་གཡོག་བསྟེན་ནས་རྒྱས་སྤྲོས་བྱེད་པའི་དུས་མ་ཡིན། དབེན་པའི་གནས་སུ་གཅིག་པུར་སྒྲུབ་ལ་བསྟེན་པའི་དུས་ཡིན། སློབ་མ་མང་པོ་བསྡུས་ནས་འདུ་འཛི་བསྲེལ་བའི་དུས་མ་ཡིན། རང་ཉིད་དང་ཉམས་ལེན་བསྲེལ་བའི་དུས་ཡིན། ཚིག་རྗེས་བསྲུང་བའི་དུས་མ་ཡིན། དོན་ལ་བསམ་པའི་དུས་ཡིན། ཕན་ཚུན་འགྲོ་བའི་དུས་མ་ཡིན། ས་གཅིག་གནས་གཅིག་ཏུ་སྡོད་ཚུགས་དགོས་པའི་དུས་ཡིན་གསུངས། ཡང་དགེ་བཤེས་སྟོན་པ་ལ། སྐུ་མཆེད་གསུམ་གྱིས། དབེན་པར་གཅིག་པུས་ཉམས་སུ་ལེན་པ་དང་། སེམས་ཅན་ལ་དབང་བསྐུར་ཆོས་བཤད་བྱས་ནས་ཆོས་ཀྱིས་ཕན་འདོགས་པ་གཉིས་ཁེབས་གང་ཆེ་ལགས་ཞུས་པས། སྟོན་པའི་ཞལ་ནས། རང་རྒྱུད་ལ་ཉམས་དང་རྟོགས་པའི་ཡོན་ཏན་ཅི་ཡང་མེད་པའི་ལས་དང་པོ་པའི་གང་ཟག་སོ་སྐྱེས་ཤིག་གིས་སེམས་ཅན་ལ་ཆོས་ཀྱིས་ཕན་བཏགས་ཀྱང་མི་ཐོགས་ཏེ། སྨིན་གླིང་གཏེར་ཆེན་གྱིས། རྫིང་ན་མེད་པ་ཡུར་བར་ཅི་ཞིག་འདྲེན། །རང་གིས་མ་བསྒོམས་གཞན་ལ་ཅི་ཞིག་གདམས། །ཞེས་གསུངས་པ་ལྟར། བྱིན་རླབས་སྣོད་སྟོང་པ་བྱོ་བ་དང་འདྲ་སྟེ། རང་ལ་བྱིན་རླབས་མེད་པས་གཞན་བྱིན་རླབས་ལ་འོང་རྒྱུ་མེད། གདམས་ངག་སྦང་མ་མ་མནན་པར་བཅུད་མེད་བསིང་བའི་ཆང་དང་འདྲ་སྟེ། གདམས་ངག་ལ་རོ་བཅུད་མེད། དྲོད་ཙམ་ཐོབ་པ་ལ་བརྟན་པ་མ་ཐོབ་པའི་ལས་དང་པོ་བ་མོས་པས་སྤྱོད་པའི་གང་ཟག་གིས་སེམས་ཅན་གྱི་དོན་བྱར་མི་བཏུབ་སྟེ། བྱིན་རླབས་བུམ་པ་གང་བྱོ་དང་འདྲ་སྟེ། གཞན་གང་ཙམ་ན་རང་ཉིད་སྟོང་པར་འགྱུར། གདམས་ངག་སྒྲོན་མེ་ལག་བརྒྱུད་དང་འདྲ་སྟེ། གཞན་གསལ་ཙམ་ན་རང་ཉིད་འགྲིབ་པར་འགྱུར། ས་ཐོབ་ན་མར་སེམས་ཅན་གྱི་དོན་གྲུབ་ཚད་བྱ་བ་ཡིན་ཏེ། བྱིན་རླབས་བུམ་བ་བཟང་པོའི་དངོས་གྲུབ་དང་འདྲ་སྟེ། གཞན་ཐམས་ཅད་སྨིན་པར་བྱས་ཀྱང་། རང་ཉིད་ལ་གང་སྟོང་མེད། གདམས་ངག་མར་མེ་སྦར་སའི་གཞི་མ་དང་འདྲ་སྟེ། གཞན་གསལ་བར་བྱས་ཀྱང་། རང་ལ་འགྲིབ་པ་མེད་པར་སྔར་བཞིན་གསལ་བ་ཡིན། དེས་ན་ད་ལྟ་སྙིགས་མའི་དུས་འདིར་སོ་སོའི་སྐྱེ་བོས་དབེན་པར་བྱམས་སྙིང་རྗེ་བྱང་ཆུབ་གྱི་སེམས་ལ་བློ་གོམས་པར་བྱ་བ་མ་ཡིན་པར། སེམས་ཅན་ལ་དངོས་སུ་ཕན་གདགས་པའི་དུས་མ་ཡིན། རང་རྒྱུད་ཀྱི་ཉོན་མོངས་པ་སྲུང་ཞིང་སྨིན་པར་བྱེད་པའི་དུས་ཡིན། དཔེར་ན་སྨན་ཆེན་པོའི་ལྗོན་ཤིང་གི་མྱུ་གུ་དེ་བཅད་ནས་མེད་པར་བྱེད་པའི་དུས་མ་ཡིན། སྲུང་བའི་དུས་ཡིན་གསུངས། དེས་ན་དངོས་སུ་སེམས་ཅན་ལ་ཆོས་ཀྱི་སྦྱིན་པ་གཏོང་བ་ནི་རང་ཉིད་ཉམས་ལེན་གྱི་ཚད་མཐོན་པོ་མ་ཐོན་བར་ཅུང་ཟད་དཀའ། རང་མགོ་མི་ཐོན་རོ་མགོར་ཅ་ཅོ་སྒྲོགས། །གསུངས་པ་ལྟར། རང་གིས་ཉམས་སུ་མ་བླངས་པར་ཆོས་གཞན་ལ་བཤད་ཁུལ་བྱེད་པ་འདིས་ནི་གཞན་ལ་ཕན་ཅི་ཡང་མི་ཐོགས། ཆོས་བཤད་པ་ལ་བརྟེན་ནས་འབུལ་བ་དང་རྙེད་ནོར་བསྡུ་བ་ནི། རྒྱ་གར་དམ་པས། ནོར་སྒྲུབ་པའི་ཟོང་ཆོས་ལ་བྱེད་གསུངས་པ་དེ་ཡིན་པས། རང་འདོད་མ་ཟད་ཀྱི་བར་དུ། གཞན་དོན་བྱེད་པ་ལ་མི་རིངས་པར་རང་གིས་ཁ་ཏོན་དང་བཟླས་བརྗོད། རྒྱལ་བའི་བཀའ་གསུང་རབ་བཀླག་པ་སོགས་དཀར་ཕྱོགས་ཀྱི་ལྷ་འདྲེ་རྣམས་ཀྱིས་ཉན་ནས་རྒྱུད་གྲོལ་བའི་སྨོན་ལམ་བྱེད། ཆུ་གཏོར་དང་ལུས་སྦྱིན་ལ་སོགས་པའི་མཇུག་ཏུ། སྡིག་པ་ཅི་ཡང་མི་བྱ་སོགས་ཆོས་སྦྱིན་ཡོད་པ་དེ་ཙམ་གྱིས་འཐུས་པར་བྱ། ངར་འཛིན་ཞིག་སྟེ་རང་འདོད་ཀྱི་འཁྲི་བ་རྩ་བ་ནས་ཟད་པའི་དུས་སུ། རང་དོན་ཞི་བདེ་དང་སྙོམས་ལས་སོས་དལ་གྱི་དབང་དུ་སྐད་ཅིག་ཀྱང་མི་ལུས་པར་གཞན་དོན་ཁོ་ན་གཙོ་བོར་བྱ་བའི་དུས་ལ་བབ་པ་ཡིན་པས་དེ་ལྟར་བྱ། དངོས་སུ་ཆོས་སྦྱིན་བྱས་ནས་ཕན་ཐོགས་པ་ས་དང་པོ་ནས་གཙོ་བོ་ཡིན། དེ་ཚུན་ཆད་རི་མཐོན་པོའི་རྩེ་སོགས་ནས་མདོ་འདོན་པ་དང་བསང་ཕུད་པ་དང་གསུར་དང་ཆུ་གཏོར་དང་ལུས་སྦྱིན་རྣམས་ཀྱིས་རྗེས་སུ་སྡིག་པ་ཅི་ཡང་སོགས་ཀྱིས་ཆོས་སྦྱིན་བྱེད་པ་དེས་འབྱུང་པོ་དཔག་ཏུ་མེད་པའི་རྒྱུད་གྲོལ་བར་བསམ་ན་ལས་དང་པོ་བའི་ཆོས་སྦྱིན་གྱི་གོ་དེས་ཆོད་པ་ཡིན། མི་འཇིགས་པ་སྐྱབས་ཀྱི་སྦྱིན་པ་ནི། སེམས་ཅན་སྐྱབས་མེད་པའི་སྡུག་བསྔལ་ཅན་རྣམས་ལ་སྐྱབས། མགོན་མེད་པ་ལ་མགོན། དཔུང་གཉེན་མེད་པ་ལ་དཔུང་གཉེན་བྱེད་པ་ཐམས་ཅད་དང་། ཁྱད་པར་བཅོམ་ལྡན་འདས་ཀྱིས་འདུས་བྱས་ཀྱི་དགེ་བ་ཐམས་ཅད་ལས། སེམས་ཅན་གྱི་སྲོག་སྐྱབས་པ་ཕན་ཡོན་ཆེ་བར་གསུངས་པས། མི་ལ་ཁ་གྲགས་དབང་ཆ་ཡོད་མཁན་རྣམས་ནས། རི་རྒྱ་རྔོན་ཁྲིམས་དང་ཀླུང་རྒྱ་སྡོམ་ན་དེང་སང་གི་འཁོར་ཡུག་སྲུང་སྐྱོབས་སོགས་དང་ཡང་མཐུན་པ་དང་ཕན་ཡོན་བསམ་གྱིས་མི་ཁྱབ་པར་ཡོད་པ་རེད། མདོར་ན་དབང་ཡོད་རྣམས་ཀྱིས་དགེ་བཅུའི་ཁྲིམས་བསྡམ་རྒྱུ་ནི་ཆོས་དང་འཇིག་རྟེན་གང་ནས་བསམས་ཀྱང་ཤིན་ཏུ་ཡ་མཚན་ཆེ་བ་རེད། དེས་ན་མི་ཕལ་བ་གཞན་དག་རྣམས་ནས་ཀྱང་། གསོད་སར་ཁྲིད་པའི་བཤས་ལུག་བསླུ་བ་དང་། འཆི་བར་ཉེ་བའི་ཉ་དང་འབུ་སྦྲང་གི་སྐྱབས་བྱེད་པ་ལ་སོགས་དངོས་སུ་ཐབས་སྣ་ཚོགས་པའི་སྒོ་ནས་སེམས་ཅན་ལ་ཕན་འདོགས་པ་ལྷུར་ལེན་པར་ཡིན་ནོ། །དེ་ལྟར་སྦྱིན་པ་རྣམ་པ་འདི་དག་ནི། གསང་སྔགས་ཀྱི་དམ་ཚིག་གི་ཡང་གཙོ་ཆེ་ཤོས་ཡིན་ཏེ། རིགས་ལྔའི་སྡོམ་བཟུང་ལས། རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །ཞེས་གསུངས་པ་ལྟར་རོ། །སྦྱིན་པ་ལ་བསླབ་དུས་གཙོ་བོ་གཏོང་སེམས་གོམས་དགོས། གཏོང་རྒྱུ་ནི་ཡོངས་སུ་བཟུང་བའི་གཞི་གསུམ་པོ་ཡིན། དེ་ཡང་ཐུན་གྱི་སྐབས་སུ་དང་པོ་སེམས་ཅན་ཐམས་ཅད་མར་ཤེས་དྲིན་དྲན་དྲིན་ལན་གཟོ་འདོད་ཀྱི་རྟོག་པ་ཞིག་བསྐྱེད། བདག་གིས་ཉི་མ་དེ་རིང་ནས་བཟུང་མཐར་ཐུག་སངས་རྒྱས་མ་ཐོབ་ཀྱི་བར་དུ་ལུས་ལོངས་སྤྱོད་དགེ་རྩ་དང་བཅས་པ། མ་སེམས་ཅན་ཐམས་ཅད་ལ་གནས་སྐབས་དང་མཐར་ཐུག་གི་བདེ་བ་རྒྱུུ་འབྲས་གཉིས་ཐོབ་པ་དང་། སྡུག་བསྔལ་རྒྱུ་འབྲས་གཉིས་དང་བྲལ་བའི་ཆེད་དུ་བཏང་བ་ཡིན། བསྔོས་པ་ཡིན། བྱིན་པ་ཡིན་བསམ། ཇི་ལྟར་སྦྱིན་ན་ཚེ་འདིའི་ལན་དང་ཕྱི་མའི་རྣམ་སྨིན་ལ་རེ་བ་མེད་པར་སྦྱིན། བདག་ལ་བསམ་ངན་སྦྱོར་རྩུབ་འཆང་བའི་ངན་པ་ཆགས་སྡང་རྨོངས་གསུམ་གྱིས་འབྲེལ་བ་དང་། ཆོས་དང་བཤེས་ཀྱིས་འབྲེལ་བའི་བཟང་པོ་དད་པ་དག་སྣང་གིས་འབྲེལ་བའི་སེམས་ཅན་ཐམས་ཅད། མདོར་ན་འབྲེལ་ཚད་དོན་ལྡན་དུ་འོང་བར་ཤོག་བསམས་ནས་ཐུན་ནང་གཏོང་སེམས་གོམས་པར་བྱ་བ་དང་། ཐུན་མཚམས་རྣམས་སུ་རང་ནུས་ལྟར་སྦྱོར་བ་ལག་ལེན་ཆུང་རིམ་ནས་རིམ་པར་བསླབ་དགོས། མཆོད་སྦྱིན་གཉིས་ཀ་སྦྱིན་པའི་ཕར་ཕྱིན་དུ་འགྲོ་བ་ཡིན། དེ་ཡང་སེར་སྣའི་གཉེན་པོར་འགྲོ་བའི་སྦྱིན་པ་གཏོང་བ་ལ་གོམས་པར་བྱ་བ་གལ་ཆེ་སྟེ། སེར་སྣ་ཅན་ནི་ཡི་དྭགས་གནས་སུ་སྐྱེ། །གལ་ཏེ་མི་སྐྱེ་ནའང་དབུལ་པོར་སྐྱེ། །ཞེས་གསུངས། སྔར་སྦྱིན་པ་མ་བཏང་བས་ད་ལྟ་ནོར་དབུལ་བའི་སྡུག་བསྔལ་མྱོང་། ད་ལྟ་སྦྱིན་པ་མ་བཏང་ནས་སེར་སྣ་བྱས་ན་ཕྱི་མར་ཡི་དྭགས་སུ་སྐྱེ་བ་ཡིན། གལ་ཏེ་མི་ལུས་ཐོབ་ཀྱང་དབུལ་པོར་སྐྱེ་བར་གསུངས་པས་བསོད་ནམས་བསགས་པ་ཤིན་ཏུ་གལ་ཆེའོ།།

༢༽ཚུལ་ཁྲིམས།

གཉིས་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ། སྡོམ་པའི་ངོ་བོ་སྤོང་སེམས་རྒྱུན་ཆགས་ས་བོན་དང་བཅས་པ་ལ་འདོད། སྤོང་སེམས་ཡོད་ན་ཚུལ་ཁྲིམས་ཡིན། སྤོང་སེམས་མེད་ན་ཚུལ་ཁྲིམས་མིན་བས་ན་སེམས་ཀྱི་སྟེང་ནས་སྤོང་སེམས་ཡོད་པ་དང་། སྤོང་སེམས་དེ་ལ་དམ་བཅའི་ལྕགས་ཀྱུ་གཉིས་པ་ཞིག་གིས་ཟིན་དགོས། དབྱེ་ན་ཉེས་སྤྱོད་སྡོམ་པའི་ཚུལ་ཁྲིམས། དགེ་བ་ཆོས་སྡུད་ཀྱི་ཚུལ་ཁྲིམས། སེམས་ཅན་དོན་བྱེད་ཀྱི་ཚུལ་ཁྲིམས་དང་གསུམ་ཡོད། དང་པོ་ཉེས་སྤྱོད་སྡོམ་པའི་ཚུལ་ཁྲིམས་ནི། ལུས་ངག་ཡིད་གསུམ་གྱི་སྒོ་ནས་གཞན་དོན་དུ་མི་འགྱུར་བའི་སྲོག་གཅོད་མ་བྱིན་ལེན་ལ་སོགས་མི་དགེ་བ་བཅུ་པོ་ཐམས་ཅད་དུག་བཞིན་དུ་སྤོང་བ་དེ་ཡིན། འདི་ནས་ཉེས་སྤྱོད་སྡོམ་པའི་ཚུལ་ཁྲིམས་འདི་རྟེན་སོ་ཐར་རིགས་བདུན་གྱི་ནང་ནས་ཁྱིམ་པའི་རྟེན་ཅན་གྱི་དགེ་བསྙེན་དང་ཐུན་མོང་དུ་གསུངས་ཡོད་པ་ལྟ་བུ་ཞིག་ཡིན། ཚུལ་ཁྲིམས་ཀྱི་ཕར་ཕྱིན་སྒོམ་སྐབས་ཀྱང་ཐོག་མར། མར་ཤེས་དྲིན་དྲན་དྲིན་ལན་གཟོ་འདོད་འདི་མན་ཆད་ཚང་མ་འདྲ་བར་སྦྱར་དགོས། སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ་དེའི་ཆེད་དུ། ངས་ཉི་མ་དེ་རིང་ནས་རྫོགས་པའི་སངས་རྒྱས་མ་ཐོབ་ཀྱི་བར་དུ་སེམས་ཅན་གཅིག་གི་སྲོག་ཀྱང་མི་གཅོད། དེ་ལ་རྗེས་སུ་ཡི་རང་ཡང་མི་བྱེད་སྙམ་པའི་སྤོང་སེམས་རེ་དང་། དེ་ལྟ་བུའི་དམ་བཅའ་དེ་ལས་ལྡོག་པ་ནི་སྲོག་དམར་པོ་ལ་བབས་ཀྱང་མི་བྱེད་སྙམ་པའི་དམ་བཅའི་ལྕགས་ཀྱུ་གཉིས་པ་རེས་ངེས་པར་དུ་ཟིན་དགོས། དེ་བཞིན་དུ་མ་བྱིན་ལེན་པ་དང་། རབ་ཏུ་བྱུང་བ་ཡིན་ན་མི་ཚངས་སྤྱོད་དང་ཁྱིམ་པ་ཡིན་ན་འདོད་ལོག་ལ་སོགས་ཐམས་ཅད་དེ་འདྲ་སྤོང་དགོས། ཉེས་སྤྱོད་སྡོམ་པའི་ཚུལ་ཁྲིམས་འདི་སྡོམ་པ་གསུམ་པོ་ཐོབ་པའི་གང་ཟག་གིས་སོར་བྱང་སྔགས་གསུམ་གྱི་ཉེས་སྤྱོད་ཐམས་ཅད་སྡོམ་དགོས་པ་རེད། མདོར་བསྡུ་ན་གཞན་གནོད་གཞི་དང་བཅས་པ་སྤོང་བ་དེ་སོར་ཐར། གཞན་ཕན་གཞི་དང་བཅས་པ་སྒྲུབ་པ་དེ་བྱང་སེམས། སྒོ་གསུམ་རྡོ་རྗེ་གསུམ་གྱི་རང་བཞིན་དུ་ཤེས་པ་དེ་སྔགས་ཀྱི་སྡོམ་པ་ཡིན། མདོར་ན་ལུས་ངག་ཡིད་གསུམ་གྱིས་སེམས་ཅན་ལ་གནོད་པའི་ལས་ཕྲ་མོ་ཙམ་ཡང་སྤོང་བ་དེ་ཉེས་སྤྱོད་སྡོམ་པ་ཡིན། དགེ་བ་ཆོས་སྡུད་ཀྱི་ཚུལ་ཁྲིམས་ནི། དགེ་རྩ་ཆུང་ཡང་སེམས་རྣམ་པར་དག་ན་འབྲས་བུ་ཆེན་པོ་འབྱིན་པས་དགེ་བའི་རྩ་བ་ཆ་ཕྲ་མོ་རེ་ཡན་ཆད་ལའང་བརྙས་པར་མི་བྱེད་པ་དུས་དང་རྣམ་པ་ཐམས་ཅད་དུ་ཅི་འགྲུབ་གང་འགྲུབ་དུ་རང་རྒྱུད་ལ་སྒྲུབ་པར་བྱེད་པ་དེ་ཡིན། ལར་འཇིག་རྟེན་པ་ཕལ་པའི་ཁ་སྐད་ལ་ཡང་། དགེ་བ་ཁ་ཞོར་ལག་ཞོར། སྡིག་པ་འགྲོ་ཞོར་འདུག་ཞོར་ཟེར་བ་ལྟར། རང་གི་དུས་དང་རྣམ་པ་ཐམས་ཅད་དུ་སྤྱོད་ལམ་དང་འདུ་ཤེས་ཐམས་ཅད་དྲན་ཤེས་དང་བག་ཡོད་ཀྱི་སྒོ་ནས་བརྟགས་ཏེ། སྤང་བླང་འདོར་ལེན་གྱི་གནས་ལ་མ་འབད་ན། ཐ་ན་ཁ་དང་ལག་པས་རྩེད་མོ་ཙམ་གྱི་ཞོར་ལའང་སྡིག་པ་ཚབས་པོ་ཆེ་དུ་མ་སོག་འགྲོ་བ་ཡིན་པས། ཇི་སྐད་དུ། སྡིག་པ་ཆུང་ངུ་ཙམ་ལ་ཡང་། །མི་གནོད་སྙམ་དུ་བརྙས་མི་བྱ། །མེ་སྟག་ཕྲ་མོ་གཅིག་གིས་ཀྱང་། རྩྭ་ཕུང་རི་ཙམ་སྲེག་པར་བྱེད། །ཞེས་གསུངས། དེ་བཞིན་དུ་དུས་དང་རྣམ་པ་ཐམས་ཅད་དུ། རང་གིས་རང་ལ་བརྟགས་ཏེ་དྲན་དང་ཤེས་བཞིན་གྱིས་བཟུང་ནས་དགེ་ཆོས་ཐམས་ཅད་ཉམས་སུ་བླངས་ན། ཆུ་ཐིགས་བསགས་པས་རྒྱ་མཚོ་བཞིན་དུ་དགེ་བའི་ཚོགས་བསམ་གྱིས་མི་ཁྱབ་པ་ཡང་ཞར་དང་ཞོར་ལ་འགྲུབ་འགྲོ་བ་ཡིན་ཏེ། ཐ་ན་ལམ་ཁ་ཞིག་ན་མ་ཎི་རྡོ་མཁར་ཞིག་ཡོད་ཀྱང་དེ་ལ་དང་བའི་ཡིད་ཀྱིས་ཞྭ་ཕུད་པ་དང་གུས་པ་དང་ཞེ་ས་བྱ། རྡོ་མཁར་དང་མཆོད་རྟེན་སོགས་དཀོན་མཆོག་གི་རྟེན་དེ་ཉིད་རང་གི་ལག་པ་གཡས་ཕྱོགས་སུ་བཞག་སྟེ་བསྐོར་བའི་ཚུལ་གྱིས་འགྲོ། དེ་ཡང་དམ་པ་གསུམ་གྱིས་ཟིན་པར་བྱས་ན། རྫོགས་པའི་བྱང་ཆུབ་ཀྱི་རྒྱུ་མ་ནོར་བར་འགྲོ་བས། ཇི་སྐད་དུ། དགེ་བ་ཕྲ་མོ་ཙམ་ལ་ཡང་། །མི་ཕན་སྙམ་དུ་བརྙས་མི་བྱ། །ཆུ་ཡི་ཐིགས་པ་བསགས་པ་ཡིས། །སྣོད་ཆེན་རིམ་གྱིས་གང་བར་འགྱུར། ཞེས་པ་ལྟར། སྔོན་གྱི་དུས་སུ་ཕག་གཅིག་ཁྱིས་དེད་དེ་མཆོད་རྟེན་ལ་བསྐོར་བ་བྱས་པ་དེའི་བསྐོར་བའི་ཕན་ཡོན་ཐོབ་ཏེ་ཐར་བའི་ས་བོན་རྒྱུད་ལ་བཞག་པ་དང་། ཡང་སྲིན་འབུ་བདུན་ཤིང་ལོའི་སྟེང་ནས་ཆུར་ལྷུངས་པ་ཆུ་ཡི་འཁོར་ཕྱོགས་ཀྱིས་ཆུ་ནང་དུ་ཡོད་པའི་མཆོད་རྟེན་ལ་བསྐོར་བ་བདུན་བྱས་པ་ཡང་དེ་བཞིན་དུ་གྱུར་བ་སོགས་ཀྱང་དགེ་རྩ་ཆུང་ངུ་ཡིན་ཡང་ཐར་པའི་རྒྱུར་གྱུར་པའི་ལོ་རྒྱུས་ལྟ་བུ་ཡིན་པས། དུས་དང་རྣམ་པ་ཐམས་ཅད་དུ་སྡིག་པ་ཆེ་ཆུང་ལ་མ་ལྟོས་པའི་སྣ་རེ་ཡན་ཆད་སྤང་། དགེ་བ་སྣ་རེ་ཡན་ཆད་ཅི་འགྲུབ་འགྲུབ་ཏུ་བསྒྲུབ། དེ་དག་སེམས་ཅན་གྱི་དོན་དུ་བསྔོ་བ་ལ་བྱང་ཆུབ་སེམས་དཔའི་བསླབ་བྱ་དང་སྡོམ་པ་ཐམས་ཅད་འདུས་པ་ཡིན་ནོ། །སྤྱིར་དགེ་བ་ཆོས་སྡུད་ཀྱི་ཚུལ་ཁྲིམས་ནི་ཕར་ཕྱིན་དྲུག་ལ་བསླབ་པ་ཡིན། འོན་ཀྱང་ལས་དང་པོ་བ་ལ་མཚོན་ན་ལུས་ཀྱིས་ཕྱག་དང་སྐོར་བ་ལ་སོགས། ངག་གིས་གཟུངས་སྔགས་བཟླ་བ་ལ་སོགས། སེམས་ཀྱིས་དགེ་སེམས་སྐད་ཅིག་མ་སྐྱེས་པ་ཚུན་ཆད་དགེ་བ་ཆོས་སྡུད་ཀྱི་ཚུལ་ཁྲིམས་ཡིན། སེམས་ཅན་དོན་བྱེད་ཀྱི་ཚུལ་ཁྲིམས་ནི། སྔར་བཤད་པ་ལྟར་མཐོང་ལམ་ཆོས་ཉིད་ཀྱི་བདེན་པ་མཐོང་ནས་རང་འདོད་རྩ་བ་ནས་ཟད་པའི་དུས་སུ། སྦྱིན་དང་སྙན་སྨྲ་དོན་མཐུན་དོན་སྤྱོད་དེ་བསྡུ་བའི་དངོས་པོ་བཞི་ལ་བརྟེན་ནས་སེམས་ཅན་གྱི་དོན་དངོས་སུ་བསྒྲུབ་པ་ལ་འབད་པ་མི་འདོར་པ་དེ་ཉིད་ཡིན་ལ་། ལས་དང་པོ་བའི་དུས་སུ། ཆེ་ཆུང་ལ་མ་ལྟོས་པའི་དགེ་སྒྲུབ་སྡིག་སྤང་གི་བསླབ་བྱ་གང་ཉམས་སུ་ལེན་ཡང་སྦྱོར་དངོས་རྗེས་གསུམ་དམ་པ་གསུམ་གྱིས་ཟིན་པའི་སྒོ་ནས་སེམས་ཅན་ཐམས་ཅད་ཀྱི་དོན་དུ་བསྔོ་བ་དེ་ལ་འདུས་པ་ཡིན་ནོ། །འདི་དག་གི་གནང་བཀག་གི་ཁྱད་པར་ནི། སོར་ཐར་བའི་སྡོམ་པའི་རང་དུས་བརྩིས་ན་མི་དགེ་བཅུ་རང་བཞིན་གྱི་ཁ་ན་མ་ཐོ་བ་ཡིན་པས་གནང་བའི་སྐབས་མེད་པ་དང་། བྱང་ཆུབ་སེམས་དཔའ་ལ་ནི་ལུས་ངག་གི་མི་དགེ་བ་བདུན་གཞན་དོན་དུ་གནང་བ་དང་། སྔགས་ལ་མི་སྤོང་བར་ཐབས་ཀྱི་ཆར་བསྟེན་ཏེ་ཤིང་ལས་མེ་བཞིན་ཡེ་ཤེས་སྐྱེ་བའི་རྒྱུར་ལམ་ཟབ་པའི་ཁྱད་པར་དུ་བྱས་པ་ཡིན་ཏེ། སྤོང་སྒྱུར་ལམ་དུ་བྱེད་པའི་ཁྱད་པར་རང་ལམ་སོ་སོའི་ཐོག་ནས་མི་འདྲ་བ་ཡོད། མདོར་ན་རང་ནུས་གང་ཡོད་ཀྱིས་གཞན་གནོད་གཞི་དང་བཅས་པ་དེ་སྤོང་། གཞན་ཕན་གཞི་དང་བཅས་པ་དེ་སྒྲུབ། སྒོ་གསུམ་རྡོ་རྗེ་གསུམ་དུ་ཤེས་ཤིང་དགེ་ཚོགས་ཆེ་འགྲུབ་ཆུང་འགྲུབ་བསྒྲུབས་པ་ཐམས་ཅད་སྦྱོར་དངོས་རྗེས་གསུམ་དམ་པ་གསུམ་གྱིས་ཟིན་པར་བྱེད་པ་ལ་དགེ་བ་ཆོས་སྡུད་སོགས་ཚུལ་ཁྲིམས་ཐམས་ཅད་འདུས། རྗེས་ཐོབ་ཐུན་མཚམས་རྣམས་སུ་ཡང་ལུས་ངག་ཡིད་གསུམ་གྱི་མི་དགེ་བ་སྣ་རེ་ཡང་སྤོང་། དགེ་བ་སྣ་རེ་ཡན་སྒྲུབ་དེ་ཐམས་ཅད་དམ་པ་གསུམ་གྱིས་ཟིན་པ་དང་། འཁོར་གསུམ་པོ་སྣང་ལ་རང་བཞིན་མེད་པའི་ངེས་ཤེས་དྲངས་པ་སོགས་ཐམས་ཅད་འདྲ་བ་ཡིན།

༣༽བཟོད་པ།

གསུམ་པ་བཟོད་ནི། བཟོད་པའི་ངོ་བོ་མི་འཁྲུགས་པའི་བདག་ཉིད་ཅན་ཞིག་ཡིན། དེ་ལྟ་བུའི་སེམས་ཚིག་པ་མེད་པའི་བཟོད་པའི་ཕ་རོལ་ཏུ་ཕྱིན་པ་ལ་གསུམ་སྟེ། གཞན་གྱི་ལོག་སྒྲུབ་བཟོད་པའི་བཟོད་པ། ཆོས་ཕྱིར་དཀའ་སྤྱད་བཟོད་པའི་བཟོད་པ། ཟབ་མོའི་དོན་ལ་མི་སྐྲག་པའི་བཟོད་པ་དང་གསུམ་ཡོད། དང་པོ་གཞན་གྱི་ལོག་སྒྲུབ་བཟོད་པའི་བཟོད་པ་ནི། ཕ་རོལ་པོ་གཞན་གྱིས་རྒྱུ་མཚན་ཡོད་དམ་མེད་ཀྱང་རུང་མདོར་ན་རང་ལ་དངོས་སུ་ལུས་ཀྱིས་རྡུང་རྡེག་དང་། རྒྱུ་ནོར་འཕྲོག་བཅོམ་ངག་གིས་ཚིག་ངན་སྨྲ་བ་དང་མཚང་འབྲུ་བ་ལ་སོགས་དང་། ལྐོག་ནས་མི་སྙན་པར་བརྗོད་པ་སོགས་ལ་ཞེ་སྡང་དང་ཁོང་ཁྲོ་མི་བྱ་བར་མ་ཟད་སླར་དེ་ལ་ཡིད་འོང་གི་བྱམས་པ་དང་བརྩེ་བའི་སྙིང་རྗེ་བསྐྱེད་ནས་དེ་དག་ལ་གནོད་ལན་དུ་ཕན་འདོགས་པ་དེ་ཡིན། དེ་ལྟར་མ་བྱས་པར་ཚུར་གནོད་བསྐྱལ་བའི་ལན་དུ་ཕར་ལ་ཁོང་ཁྲོའི་དབང་དུ་བཏང་ན། བསྐལ་པ་སྟོང་གི་ཚོགས་བསགས་ཁོང་ཁྲོ་གཅིག་གིས་འཇོམས། ཟེར་བ་ལྟར་ཡིན་ཏེ། སྤྱོད་འཇུག་ལས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང་། །ཁོང་ཁྲོ་གཅིག་གིས་འཇོམས་པར་འགྱུར། །ཞེས་གསུངས། འཇོམས་རྒྱུ་བསོད་ནམས་ཆ་མཐུན་གྱི་དགེ་རྩ་འཛོམས་པ་ཡིན། དམ་པ་གསུམ་དང་ལྡན་པའི་དགེ་རྩ་ཡིན་ན་འཇོམས་མི་ཐུབ། ཅིའི་ཕྱིར་ན་བསྔོ་བས་རྒྱས་ཐེབས་ཟིན་པས་བྱང་ཆུབ་མ་ཐོབ་བར་དུ་མི་འཛད་གསུངས་པས་སོ། །འཇིག་རྟེན་པའི་དགེ་རྩ་དམ་པ་གསུམ་གྱིས་རྩིས་མ་ཟིན་པ་ཞིག་ཡིན་ན། མགལ་དུམ་སོགས་ལ་ཁྲོས་ནའང་འཇོམས་པར་གསུངས། ཐེག་དམན་ཐར་བ་ཆ་མཐུན་གྱི་དགེ་རྩ་ཡིན་ན། ཉན་རང་ནང་ཕན་ཚུན་ཁྲོས་ན་འཇོམས་པ་མ་གཏོགས། སོ་སྐྱེས་ཐ་མལ་པ་ལ་ཁྲོས་ན་དགེ་རྩ་རྩ་བ་ནས་འཇོམས་མི་འགྲོ་ཡང་ཉམས་སྨད་པ་ཡིན། བྱང་ཆུབ་སེམས་དཔའ་ཞིག་གིས་ཉན་རང་ལ་ཁྲོས་ན་དགེ་རྩ་ཉམས་སྨད་པ་ཙམ་ལས་རྩ་བ་ནས་འཇོམས་མི་འགྲོ་བར་གསུངས། བྱང་ཆུབ་སེམས་དཔའ་ནང་ཕན་ཚུན་ཁྲོས་ན་ལྕགས་ཀྱིས་ལྕགས་བཅད་པ་བཞིན་དགེ་རྩ་མ་ལུས་པ་འཇོམས་འགྲོ་བ་ཡིན། ཁྱད་པར་བྱང་སེམས་ཚོགས་སྦྱོར་ལམ་པ་ཞིག་གིས་མཐོང་ལམ་པ་སོགས་ས་ཐོབ་པའི་བྱང་ཆུབ་སེམས་དཔའ་ཞིག་ལ་ཁྲོས་ན། དགེ་བའི་རྩ་བ་ཐམས་ཅད་ལྷག་མ་ཙམ་ཡང་མི་ལུས་པར་ཚིག་འགྲོ་བ་ཡིན་པས་ན་སླར་ཚོགས་ལམ་ཆུང་ངུ་ནས་འཇུག་སྟེ་སེམས་བསྐྱེད་དགོས་པ་ཡིན་གསུངས། དེས་ན་ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །དེ་བས་བཟོད་ལ་ནན་ཏན་ཏུ། །སྣ་ཚོགས་ཚུལ་གྱིས་བསྒོམ་པར་བྱ། །ཞེས་གསུངས་པ་ལྟར། བཟོད་པ་སྒོམ་པ་དེ་ལ་ཁོང་ཁྲོའི་ཉེས་དམིགས་དྲན་ནས་དུས་དང་རྣམ་པ་ཐམས་ཅད་དུ་བཟོད་པ་སྒོམ་པ་ལ་འབད་དགོས་ཏེ། རྒྱ་གར་དམ་པས། དགྲ་སྡང་ལས་ཀྱི་འཁྲུལ་སྣང་ཡིན་པ་ལ། །ཞེ་སྡང་གདུག་སེམས་སྐྱུར་ཅིག་དིང་རི་བ། །ཞེས་དང་། ཇོ་བོ་རྗེ་ལྷ་གཅིག་གི་ཞལ་ནས་ཀྱང་། གནོད་པ་བྱེད་པ་ལ་ཁོང་མ་ཁྲོ། གནོད་པ་བྱེད་པ་ལ་ཁོང་ཁྲོ་ན། བཟོད་པ་ཅི་ཙམ་ན་བསྒོམ། ཞེས་གསུངས། དེས་ན་རང་ལ་ཚུར་ངན་སྨྲས་དང་གནོད་པ་མ་ཉེས་པའི་ཁ་ཡོག་ལ་སོགས་པ་བྱུང་ན་དེ་ལ་ཐད་ཀར་ཁོང་ཁྲོ་དང་ཡུན་རིང་ཞེ་ལ་བཟུང་ནས་འཁོན་དུ་འཛིན་པ་སྤངས་ན། དེས་རང་ཉིད་ཀྱི་སྡིག་པ་དང་དེ་ལས་བྱུང་བའི་སྒྲིབ་པ་མང་དུ་འཛད་ཅིང་། བཟོད་པ་ལ་བརྟེན་ནས་ཚོགས་རླབས་པོ་ཆེ་རྫོགས་པ་ཡིན་པས། གནོད་པ་བྱེད་པ་ལ་འཁོན་འཛིན་མི་བྱེད་པར་བླ་མ་ལྟར་བལྟ་དགོས་ཏེ། ཞེ་སྡང་སྐྱེ་ཡུལ་མེད་ན་བཟོད་བ་སུ་ལ་བསྒོམ་ཟེར་བ་དེ་ཡིན། ལར་ད་ལྟའི་དུས་ན་དེ་བླ་མའམ་དགེ་སློང་བཟང་པོ་ཞིག་ཡིན་ཏེ་ཁོང་ཁྲོ་ཆེ་ཟེར། འཇིག་རྟེན་གྱི་ཁམས་ན་སྐྱོན་གཅིག་ལ་ཁོང་ཁྲོ་ལས་ཐུ་བ་མེད་ན། ཁོང་ཁྲོ་ཆེ་བཞིན་ཏུ་བཟང་པོ་ཞིག་ཇི་ལྟར་ཡིན། རྒྱ་གར་དམ་པའི་ཞལ་ནས་ཀྱང་། འདོད་ཆགས་ཀྱི་ལས་བརྒྱ་བས། ཞེ་སྡང་གི་ལས་སྐད་ཅིག་མ་གཅིག་སྡིག་པ་ཆེ་བ་ཡིན་ཏེ་མ་གོ་ཞེས་གསུངས། ཆོས་ཐོས་པ་རྒྱུད་ལ་སྦྱར་ནས་སྐྱེས་པའི་གང་ཟག་དེ། ལུས་ངག་ཡིད་གསུམ་རས་བལ་རྡོག་པས་མནན་པའམ། ཕྱེ་ཐུག་ལ་ཟོ་མར་བཏབ་པ་ལྟར་འཇམ་ལྷན་གྱིས་སོང་བ་ཞིག་དགོས། དེ་ལྟར་མ་ཡིན་པར་དགེ་སྦྱོར་ཅུང་ཟད་རེ་འགྲུབ་པའམ། སྲུང་སྡོམ་སྣ་རེ་ཙམ་དག་པ་ལ། ང་ནི་དེ་དང་དེ་ལྟ་བུ་ཡིན་ནོ། །སྙམ་དུ་དུས་རྟག་ཏུ་ང་རྒྱལ་གྱིས་རྒྱུད་ཁེངས་ནས། གཞན་ཕ་རོལ་པོའི་ཚིག་གཅིག་གི་སྨྲ་ལུགས་ལེགས་ཉེས་ལའང་ང་ལ་བརྙས་བྱུང་། ང་ལ་སྨད་བྱུང་ཟེར་ནས་རྒྱུད་ཁྲོ་ལིང་ངེ་ཡོད་པ་དེ་ཆོས་དང་རང་རྒྱུད་སོ་སོར་སོང་ནས་ཆོས་ཀྱིས་སེམས་ལ་ཅུང་ཟད་ཀྱང་མ་ཕན་པའི་རྟགས་ཡིན། དགེ་བའི་བཤེས་གཉེན་སྤྱན་སྔ་བའི་ཞལ་ནས། འོ་ཅག་ཐོས་བསམ་སྒོམ་གསུམ་བྱས་ཀྱིན། ང་བདག་ཇེ་ཆེར་སོང་ནས་བཟོད་སྲན་ཤའུ་བས་ཆུང་བ། ཕྲག་དོག་གམ་ཀོ་ལོང་གཙང་གི་བཙན་བས་དམ་པར་འདུག་པ་འདི་ཐོས་བསམ་སྒོམ་གསུམ་ལོག་བར་སོང་བའི་རྟགས་ཡིན། ཞེས་གསུངས། དེས་ན་དུས་དང་རྣམ་པ་ཐམས་ཅད་དུ་དམའ་མོའི་ས་བཟུང་། ཧྲུལ་པོའི་གོས་གྱོན། བཟང་ངན་འབྲིང་གསུམ་གོང་དུ་ཁུར་ནས་བྱམས་སྙིང་རྗེ་བྱང་ཆུབ་སེམས་ལ་གཞི་བཅོལ་ཏེ་རང་རྒྱུད་ཆོས་ཀྱིས་འདུལ་བ་ནི་ཉམས་ལེན་གྱི་གནད་མ་ནོར་བ་ཡིན་པས། སེམས་ལ་མི་ཕན་པའི་ལྟ་བ་མཐོ་མཐོ་དང་སྒོམ་པ་ཟབ་ཟབ་མོ་སྟོང་ལས་ཀྱང་རང་རྒྱུད་ཆོས་ཀྱིས་འདུལ་བ་འདི་དགའ་བ་ཡིན། ཆོས་ཕྱིར་དཀའ་སྤྱད་བཟོད་པའི་བཟོད་པ་ནི། དམ་པའི་ཆོས་སྒྲུབ་པའི་ཆེད་དུ་དཀའ་ཚེགས་ཚ་གྲང་ཐམས་ཅད་ཁྱད་དུ་བསད་ནས་བསྒྲུབ་དགོས་ཏེ། རྒྱུད་ལས་ཀྱང་། མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་བཙལ། །ཞེས་གསུངས། སྔོན་གྱི་ཇོ་བོ་བཀའ་གདམས་པ་དག་གི་གཏད་ས་བཞི་ཞེས་བྱ་བ། བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྦྲང་ཕུགས་ཤི་ལ་གཏད། ཤི་ཕུགས་གྲོག་སྟོང་ལ་གཏད་ཅེས་གསུངས། ད་ལྟ་རང་རེ་རྣམས་ནས་དམ་པའི་ཆོས་སྒྲུབ་པ་ལ་དཀའ་སྤྱད་དང་སྙིང་རུས་ཅུང་ཟད་ཀྱང་མི་དགོས་བར། འཇིག་རྟེན་ཚེ་འདིའི་བྱ་བ་བསྒྲུབ་པའི་ཞོར་ཙམ་ཞིག་ལ་བདེ་སྐྱིད་སྙན་གསུམ་དང་ལྡན་པའི་འཇིག་རྟེན་ཆོས་བརྒྱད་དང་མ་བྲལ་བའི་ངང་ནས་ཆོས་འགྲུབ་ཏུ་རེ། གཞན་ལ་ཡང་ཆོས་བརྒྱད་སྒྲུབ་ཞོར་ཆོས་འགྲུབ་པ་དེ་ལྟར་ཡོད་པར་རློམ་ནས། དེ་བླ་མ་བཟང་པོ་ཞིག་ཡིན་ཆོས་འཇིག་རྟེན་གཉིས་ཀ་འཛོམས་ཡོད་ཟེར་ཏེ། ཆོས་འཇིག་རྟེན་གཉིས་ཀ་འཛོམས་ཐབས་ག་ལ་ཡོད། ཆོས་འཇིག་རྟེན་གཉིས་ཀ་འཛོམས་པར་རློམ་པ་དེ་ལ། འཇིག་རྟེན་གྱི་ལུགས་བཟང་པོ་རེ་འཛོམས་ཡོད་ཤས་ཆེ་མ་གཏོགས་ཆོས་ཡང་དག་པ་དེ་མེད་ཐག་ཆོད། ཆོས་དང་འཇིག་རྟེན་གཉིས་ཀ་མཉམ་དུ་སྒྲུབ་པར་རློམ་པ་དེ། ཁབ་རྩེ་གཉིས་ཀྱིས་བཟོ་དྲུབ་པ་དང་། མེ་ཆུ་གཉིས་སྣོད་གཅིག་ཏུ་འཇོག་པ་དང་། རྟ་གཉིས་ཁ་ཡར་མར་དུ་བསྐོར་ནས་མཉམ་དུ་བཞོན་ནས་འགྲོ་བར་རློམ་པ་དང་འདྲ་སྟེ་འགྲུབ་ཐབས་གཏན་ནས་མེད། གང་ཟག་གཅིག་ལ་བདག་ཅག་གི་སྟོན་པ་སངས་རྒྱས་ཤཱཀྱ་ཐུབ་པ་ལས་ལྷག་པ་ཞིག་ཡོད་ཐབས་མེད་དེ། དེས་ཀྱང་ཆོས་འཇིག་རྟེན་གཉིས་ཀ་མཉམ་དུ་འགྲུབ་པའི་ཐབས་མ་དགོངས་ནས་འཁོར་ལོས་སྒྱུར་བའི་རྒྱལ་སྲིད་ཀྱང་མཆིལ་མའི་ཐལ་བ་བཞིན་དུ་བོར་ནས་ཆུ་བོ་ནེེ་རཉྫ་ནའི་དྲུང་དུ་ལོ་དྲུག་གི་བར་དུ་ལོ་རེ་ལ་ཆུ་ཐིགས་པ་རེ་དང་ནས་འབྲུ་རེ་གསོལ་ནས་དཀའ་སྤྱད་དང་སྙིང་རུས་མཛད་པ་ཡིན། རྗེ་བཙུན་མི་ལ་རས་པ་ལྟ་བུས་ཀྱང་། སྒྲུབ་པ་ཉམས་སུ་ལེན་པའི་དུས་ཁ་ཟས་མེད། རྒྱབ་གོས་མེད་མཛད་ནས། ཟ་ཁོ་ན་གསོལ་ཏེ་སྒྲུབ་པ་མཛད་པས་ལུས་ཐམས་ཅད་ཀེང་རུས་ལྟར་སོང་། ལུས་ལ་སྤུ་སྔོ་ཞོ་ལེ་བ་སྐྱེས། གཞན་དག་གིས་མཐོང་ཚེ་མི་ཡིན་ནམ་འདྲེ་ཡིན་ངོ་མི་ཤེས་པར་མ་གྱུར་བར་དཀའ་སྤྱད་དང་སྙིང་རུས་མཛད་དེ་ཆོས་ཉམས་སུ་ལེན་པ་དེ། ཆོས་དང་འཇིག་རྟེན་མཉམ་དུ་སྒྲུབ་པའི་ཐབས་མེད་པའི་དོན་ཡིན་གྱི། མི་ལ་རས་པ་ཐབས་རྡུགས་ནས་ཆོས་དང་འཇིག་རྟེན་མཉམ་དུ་སྒྲུབ་མ་ཤེས་པ་ག་ལ་ཡིན། དེ་བཞིན་དུ་གྲུབ་ཆེན་མེ་ལོང་རྡོ་རྗེས་ཀྱང་གླ་ཁེའི་ཤུན་པ་ཁོ་ན་གསོལ་ཏེ། ལོ་དགུའི་བར་དུ་སྒྲུབ་པ་མཛད་པས་གྲུབ་པ་ཐོབ་པ་དང་། ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་པས་ཀྱང་། དངུལ་ཆུ་རིལ་བུ་ཉི་ཤུ་རྩ་གཅིག་གིས་ཟླ་བ་མང་པོའི་འཚོ་བ་མཛད་པ་དང་། ཁ་བ་བབ་དུས་སྒྱེ་ཞིག་གི་ནང་དུ་འཛུལ་ནས་གོས་གདན་གཉིས་ཀའི་གོ་བཅད་དེ་ཆོས་ཕྱོགས་སུ་དཀའ་བ་སྤྱད་པ་སོགས། སྔོན་གྱི་གྲུབ་ཐོབ་ཐམས་ཅད་འཇིག་རྟེན་ཚེ་འདིའི་བྱ་བ་ཐམས་ཅད་རྒྱབ་ཏུ་བསྐྱུར་ནས་དཀའ་སྤྱད་དང་སྙིང་རུས་ཀྱི་སྒོ་ནས་བསྒྲུབས་ཏེ་གྲུབ་པ་ཐོབ་པ་ཤ་སྟག་ཡིན་གྱི། འཇིག་རྟེན་ཚེ་འདིའི་བྱ་བ་སྒྲུབ་པའི་ཞོར་ལ་བདེ་སྐྱིད་སྙན་གསུམ་འཛོམས་པའི་ངང་ནས་ཆོས་བསྒྲུབས་ཏེ་གྲུབ་པ་སུ་ཡང་མེད། རིག་འཛིན་འཇིགས་མེད་གླིང་པའི་ཞལ་ནས་ཀྱང་། ལྟོ་འབོལ་བ་སྟེ་ཟས་བཟང་པོ་དང་གོས་དྲོ་བ་སྡོད་གནས་སྐྱིད་པ། མཐུན་རྐྱེན་འབུལ་མཁན་སྦྱིན་བདག་ལེགས་པ་ཞིག་གི་སྟ་གོན་བྱས་ཕྱིན་ཆད་ཆོས་མ་འགྲུབ་གོང་དུ་བདུད་འགྲུབ་ཚར་བ་ཡིན། ཞེས་གསུངས། དགེ་བཤེས་ཤ་བོ་པའི་ཞལ་ནས་ཀྱང་། སྙིང་ནས་ཆོས་བྱེད་ན་བློ་རྩེ་སྤྲང་པོ་ལ་གཏད་དགོས། སྤྲང་པོའི་ཐ་མ་འཆིར་འཇུག་ནུས་པ་ཞིག་དགོས་པ་ཡིན། བློ་སྣ་དེ་ལྟ་བུ་ཞིག་སྐྱེས་ན། ལྷ་འདྲེ་མི་གསུམ་གྱིས་འོ་བརྒྱལ་དུ་མི་འཇུག་ངེས་པ་ཡིན། ཞེས་གསུངས། རྗེ་མི་ལའི་ཞལ་ནས་ཀྱང་། ང་ན་ན་དྲི་མི་མེད་པ་དང་། །ཤི་ན་ངུ་མི་མེད་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །སྒོ་ན་མི་རྗེས་མེད་པ་དང་། །ནང་ན་ཁྲག་རྗེས་མེད་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །གར་སོང་དྲི་མི་མེད་པ་དང་། །འདིར་སོང་གཏད་སོ་མེད་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །རོ་རུལ་འབུ་ཡིས་ཟ་བ་དང་། །རྩ་རྒྱུས་སྦྲང་བུས་འཇིབས་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །ཞེས་གསུངས། དེས་ན་འཇིག་རྟེན་ཚེ་འདིའི་ཞེན་པ་ཐམས་ཅད་རླུང་ལ་བསྐུར་ནས་དཀའ་ཚེགས་དང་ཚ་གྲང་ཐམས་ཅད་ཁྱད་དུ་བསད་དེ་ཆོས་སྒྲུབ་པ་ཞིག་ཅིས་ཀྱང་དགོས་པ་ཡིན་ནོ། །ཟབ་མོའི་དོན་ལ་མི་སྐྲག་པའི་བཟོད་པ་ནི། ཟབ་མོ་སྟོང་པ་ཉིད་ཀྱི་གནས་ལུགས་སྤྱི་དང་། ཁྱད་པར་རང་བཞིན་རྫོགས་པ་ཆེན་པོའི་གནས་ལུགས་བྱ་རྩོལ་དང་བྲལ་བའི་གནད། དགེ་སྡིག་རྒྱུ་འབྲས་ལས་འདས་པའི་རྡོ་རྗེའི་གད་མོ་བཅུ་གཉིས་དང་། ངོ་མཚར་བའི་ཚིག་ཆེན་བརྒྱད་ལ་སོགས་པ་རྒྱུད་ལས་བྱུང་བ་རྣམས་ཐོས་པ་ན། ཐེག་དམན་གྱི་རིགས་ཅན་ལྟར་དེ་དག་ལ་སྐྲག་ཅིང་ལོག་ལྟ་མི་སྐྱེ་ཞིང་དེ་དག་གི་དགོངས་པ་ཕྱིན་ཅི་མ་ལོག་པ་ལོན་པའི་ཐབས་ལ་དཀའ་སྤྱད་སྙིང་རུས་ཀྱིས་འབད་པར་བྱ། དེ་ལྟར་མ་ཡིན་པར་གསང་སྔགས་ཀྱི་ཆོས་ཟབ་མོ་དེ་དག་ལ་ལོག་ལྟ་སྐྱེས་པའམ། སྐུར་པ་བཏབ་ན་ཆོས་སྤོང་བའི་ལས་ངན་པ་ཞེས་བྱ་སྟེ། བསྐལ་པ་གྲངས་མེད་པའི་བར་ཏུ་དམྱལ་བའི་གཏིང་ནས་མི་ཐར་བའི་རྒྱུ་ཡིན། དེ་སྐད་དུ་ཡང་། མཁས་གྲུབ་ཀརྨ་ཆགས་མེད་ཀྱིས། མཚམས་མེད་ལྔ་ལས་ཐུ་བའི་ལས་ངན་པ། །ཆོས་སྤོང་ལས་ངན་བསགས་པ་མཐོལ་ལོ་བཤགས། །ཞེས་གསུངས། ཇོ་བོ་རྗེ་ལྷ་གཅིག་གི་དྲུང་དུ་རྒྱ་གར་གྱི་དགེ་སློང་གོས་ཕྱགས་དར་ཁྲོད་པ། ཆོས་གོས་གསུམ་པ། ཕྱིང་པ་བ། སྟན་གཅིག་པ། བསོད་སྙོམས་པ། ཕྱིས་མི་ལེན་པ། དགོན་པ་བ། ཤིང་དྲུང་བ། བླ་གབ་མེད་པ། དུར་ཁྲོད་པ། ཙོག་བུ་བ། གཞི་ཇི་བཞིན་པ་སྟེ་སྦྱངས་པའི་ཡོན་ཏན་བཅུ་གཉིས་ལ་གནས་པ་གཉིས་བྱུང་། ཇོ་བོས་གང་ཟག་གི་བདག་མེད་གསུངས་པས་ཁོང་གཉིས་དགའ། ཆོས་ཀྱི་བདག་མེད་གསུངས་པའི་ཚེ་འཇིགས་འཇིགས་དེ་ལྟར་མི་གསུང་བར་ཞུ་ཟེར། ཟབ་མདོ་འདོན་པ་ཐོས་པའི་ཚེ་རྣ་བ་འགེབས་པས། ཇོ་བོ་ཐུགས་ཆད་དེ་བྱམས་སྙིང་རྗེ་བྱང་ཆུབ་ཀྱི་སེམས་ལ་ཐོག་མར་བློ་སྦྱངས་ནས་ཆོས་ཟབ་མོ་ལ་ཡིད་ཆེས་པ་ཞིག་མེད་ན། སོར་ཐར་གྱི་སྲུང་སྡོམ་དག་པ་གཅིག་པུས་གར་ཡང་མི་ཕྱིན་པར་འདུག་གསུངས། སྔོན་སངས་རྒྱས་བཞུགས་པའི་དུས་ཀྱང་སྟོང་པ་ཉིད་ཟབ་མོའི་དོན་བསྟན་པ་ཐོས་པས། དགེ་སློང་མངོན་པའི་ང་རྒྱལ་ཅན་མང་པོའི་ཁ་ནས་ཁྲག་ཚ་བ་བསྐྱུགས་ཏེ་ཤི་བ་དང་། དམྱལ་བར་སྐྱེས་པ་ལ་སོགས་པའི་ལོ་རྒྱུས་ཡོད་པ་ལྟ་བུ་ཡིན་པས། ཟབ་མོའི་ཆོས་དང་ཟབ་མོའི་ཆོས་དེ་སྟོན་པའི་གང་ཟག་ལ་སྙིང་ཐག་པ་ནས་མོས་གུས་བྱ་ཞིང་། གལ་ཏེ་རང་ཉིད་བློ་ཆུང་བའི་སྐྱོན་གྱིས་མོས་པར་མ་གྱུར་ཀྱང་། སྐུར་པ་འདེབས་པ་སྤང་བར་བྱ་བ་ནི་ཅི་ནས་གལ་ཆེའོ། །དཔལ་སྤྲུལ་རིན་པོ་ཆེས། བྱེད་མི་ཉན་པ་གསུམ་ལས། རྒྱུས་མེད་ཀྱི་བླ་མ་བསྟོད་སྨད་གཉིས་ཀ་མ་བྱེད་གསུངས་པ་ལྟར་ཡིན། བཟོད་པ་བསྒོམ་པ་ནི་ལས་སླ་མོ་མ་ཡིན་པས་དཀའ་ཐུབ་རྣམས་ཀྱི་ནང་ནས་མཆོག་ཡིན་གསུངས། ཕ་རོལ་པོས་རང་ལ་གནོད་པ་བྱེད་པའི་ཚེ་ན་ཞེ་སྡང་མི་སྐྱེ་བར་ཐབས་སྣ་ཚོགས་ཀྱིས་བཟོད་པ་བསྒོམ། ཐུན་མཚམས་རྣམས་སུ་བཟོད་པའི་དབྱེ་བ་རྣམས་བསྒོམ་དགོས་སོ།།

༤༽བརྩོན་འགྲུས།

བཞི་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་ངོ་བོ། བརྩོན་གང་དགེ་ལ་སྤྲོ་བའོ། །ཞེས་གསུངས་པ་ལྟར་སེམས་དགེ་བ་ལ་སྤྲོ་བ་བརྩོན་འགྲུས་ཡིན། དེའི་ལྡོག་ཟླ་དགེ་བ་ལ་མི་སྤྲོ་བ་ལེ་ལོ་རེད། དེས་ན་དགེ་བའི་ཕན་ཡོན་དང་སྡིག་པའི་ཉེས་དམིགས་དྲན་ནས་བརྩོན་འགྲུས་དགེ་བའི་ཕྱོགས་ལ་འབད་དགོས་དེ་ལའང་དབྱེ་ན། གོ་ཆའི་བརྩོན་འགྲུས། སྦྱོར་བའི་བརྩོན་འགྲུས། ཆོག་པར་མི་འཛིན་པའི་བརྩོན་འགྲུས་དང་གསུམ་ཡིན། དང་པོ་གོ་ཆའི་བརྩོན་འགྲུས་ནི། སྔོན་གྱི་དམ་པ་གོང་མ་རྣམས་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་རྣམ་ཐར་དང་མཛད་སྤྱོད། ཆོས་ཕྱིར་དུ་དཀའ་བ་མང་པོ་སྤྱད་པའི་ལོ་རྒྱུས་སོགས་ཇི་དང་ཇི་ལྟ་བུ་ཞིག་ཐོས་ཀྱང་ཁོང་རྣམས་སངས་རྒྱས་དང་བྱང་སེམས་ཡིན་པས་དེ་ལྟར་མཛད་པ་ཡིན། དགེ་བ་འགྲུབ་ཅིང་བདུད་བཞི་འཇོམས་པའི་རྒྱུ་གོ་ཆའི་བརྩོན་འགྲུས་ཡིན་པས་ན་རང་རེ་སོ་སོའི་སྐྱེ་བོས་དེ་ལྟ་བུ་ཞིག་ག་ལ་ནུས་སྙམ་དུ་སྒྱིད་མི་ལུག་པར་ཁོང་རྣམ་པས་དེ་ལྟར་མཛད་པས་གྲུབ་པ་ཐོབ་པར་འདུག ང་ཡང་དེ་དག་གི་རྗེས་འཇུག་པ་ཡིན་པས་དེ་ལས་ལྷག་པ་ཞིག་མ་ཐོན་ཡང་། དེ་ལྟ་བུ་ཞིག་མ་འགྲུབ་བར་འདུག་ཐབས་མི་འདུག་སྙམ་པ་དང་། དམ་པ་གོང་མ་སྐྱེས་ཆེན་ཁོང་རྣམ་པས་ཀྱང་དེ་ལྟ་བུའི་དཀའ་སྤྱད་དང་སྙིང་རུས་དགོས་ན། རང་རེ་ལས་ངན་གྱི་ཁུར་གྱིས་ནོན། ཐོག་མ་མེད་པའི་དུས་ནས་ཆོས་ལ་སྦྱངས་འཕྲོ་མེད་པ་ཞིག་གིས་བྱང་ཆུབ་མཆོག་ཏུ་སེམས་བསྐྱེད་པ་ཞིག་ལ་གཞི་ནས་མགོ་རྩོམ་དགོས་ན་དཀའ་སྤྱད་དང་སྙིང་རུས་ཅིའི་ཕྱིར་མི་དགོས། གོ་ཆའི་བརྩོན་འགྲུས་འདི་ནི་ལེ་ལོ་སོགས་ཀྱིས་གནོད་པ་མི་ཚུགས་པར་དཔེར་ན་གོ་ཆ་སྲ་མོས་མདའ་མཚོན་སོགས་འགོག་ནུས་པ་ལྟར་ཡིན། འདི་གཙོ་བོ་སྒྱིད་ལུག་བདག་ཉིད་བརྙས་པའི་ལེ་ལོའི་གཉེན་པོ་ཡིན། དེས་ན་ཕལ་བས་དྲན་ཡུལ་ལས་འདས་པའི་བསམ་པ་རྒྱ་ཆེན་བསྐྱེད་དགོས། རྒྱལ་བ་སྲས་དང་བཅས་པས་དུས་བསྐལ་བ་གྲངས་མེད་མང་པོར་རྫོགས་སྨིན་སྦྱོང་གསུམ་རྒྱ་མཚོ་ལྟ་བུ་མཛད་པ་ཐམས་ཅད་གཅིག་ཏུ་བསྡུས་པ་ཙམ་ཞིག་བདག་གིས་དུས་སྐད་ཅིག་མ་རེ་རེ་ལའང་བསྒྲུབ་པར་བྱའོ་སྙམ་པའི་བསམ་པ་གོ་ཆ་ཆེ་བ་ཞིག་བསྒོམ་དགོས། བདག་གིས་སེམས་ཅན་ཐམས་ཅད་ཀྱི་སྡུག་བསྔལ་བསལ་ནས་སངས་རྒྱས་ཀྱི་གོ་འཕང་ལ་འགོད་རྒྱུ་དམ་བཅས་ཟིན་པས། སེམས་ཅན་རེ་རེ་ནས་ཆོས་ཐེག་པ་ཆེན་པོའི་ཆོས་སྒོར་བཙུད། བྱང་ཆུབ་མཆོག་ཏུ་སེམས་བསྐྱེད་བཅུག དེའི་བསླབ་པ་ལ་སྦྱོར་བ་སོགས་སེམས་ཅན་རེ་རེའི་དོན་དུ་བསྐལ་བ་མང་པོར་འབད་དགོས་ཀྱང་བཟོད་ནུས་བསམ་པ་མ་གཏོགས། སྐྱོ་བ་དང་སྒྱིད་ལུག་ཀྱི་སེམས་སྐད་ཅིག་མ་ཙམ་ཡང་སྐྱེ་མི་ཉན། དེས་ན་ད་རེས་བདག་གིས་དལ་འབྱོར་གྱི་མི་ལུས་ཐོབ། མཚན་ལྡན་གྱི་བླ་མ་མཇལ། ཟབ་མོའི་གདམས་ངག་ཐོབ། ཡང་དག་པའི་ཆོས་ཚུལ་བཞིན་སྒྲུབ་པའི་སྐལ་པ་ཡོད་པའི་དུས་འདིར་དཀའ་བ་དང་དུ་བླང་། ལྕི་བ་རྒྱབ་ཏུ་ཁུར། ལུས་སྲོག་འབེན་དུ་བཙུག ཤ་ཁྲག་གཟན་དུ་བོར་ཏེ། སྙིང་ཐག་པ་ནས་ཆོས་ཤིག་མི་སྒྲུབ་རེ་སྙམ་དུ་དམ་བཅའ་བ་དེ་གོ་ཆའི་བརྩོན་འགྲུས་ཡིན། དེ་ལྟར་དུ་སྲིད་པ་མ་སྟོངས་བར་དུ་བསྒྲུབ་དགོས་ཀྱང་སྡུག་བསྔལ་མེད་དེ། བསོད་ནམས་ཀྱིས་ནི་ལུས་བདེ་ལ། །མཁས་པ་ཡིས་ནི་སེམས་བདེ་ན། །གཞན་དོན་འཁོར་བར་གནས་ཀྱང་ནི། །སྙིང་རྗེ་ཅན་དག་ཅི་སྟེ་སྐྱོ། །ཞེས་གསུངས་པ་ལྟར། སྣང་བཅས་བསོད་ནམས་ཀྱི་ཚོགས་ཀྱིས་མཐོ་རིས་ཀྱི་དཔལ་ཕུན་སུམ་ཚོགས་པར་ཐོབ་པས་ལུས་བདེ་ལ། བདག་མེད་རྟོགས་པའི་ཤེས་རབ་ཀྱིས་སྲིད་པ་གསུམ་པོ་དོན་དམ་སྤྲོས་པ་བྲལ་བ་དང་། ཀུན་རྫོབ་སྒྱུ་མ་ཙམ་གྱི་རང་བཞིན་དུ་རྟོགས་པས་སྐྱེ་འཆི་བདེ་སྡུག་ཐམས་ཅད་བཟོད་ཐུབ་པས་ན་སེམས་ལ་སྡུག་བསྔལ་རང་མཚན་པ་མེད་པ་ཡིན། གཞན་དོན་འཁོར་བར་གནས་ཀྱང་སྐྱོ་བའི་འདུ་ཤེས་སྐད་ཅིག་མ་ཡང་མི་སྐྱེ་བའོ། །སྦྱོར་བའི་བརྩོན་འགྲུས་ནི། ཆོས་ལ་བྱེད་བློ་དང་སྒྲུབ་བློ་ཞིག་ཡོད་ཀྱང་། ད་ལྟ་འཕྲལ་དུ་སྒྲུབ་པའི་སེམས་སྟོབས་མེད་པར་སང་བྱ་དང་གནངས་བྱའི་ངང་དུ་ལེ་ལོ་སྙོམས་ལས་ཀྱིས་མི་ཚེའི་ཉི་མ་ཟད་ནས། ཆོས་སྒྲུབ་འདོད་ཀྱི་ངང་ནས་མི་ཚེ་འཛད་པ་དེ་སྤང་དགོས་ཏེ། འབྲུག་པདྨ་དཀར་བོས། མི་ཚེ་འདི་བཤས་རའི་དུད་འགྲོ་དང་འདྲ། །ཡུད་ཙམ་རེ་སོང་ཡང་འཆི་ལ་ཉེ། །དེ་རིང་དང་སང་གི་ངང་རིང་འདིས། །མལ་མཐའ་ནས་འོ་དོད་འཆོར་རོ་ཨང་། །ཞེས་གསུངས། དེས་ན་ཆོས་ཕྱི་བཤོལ་གྱི་ངང་དུ་སྐད་ཅིག་ཀྱང་མི་བཞག་པར། སྡར་མའི་པང་དུ་སྦྲུལ་ཞུགས་པའམ། སྒེག་མོའི་མགོ་ལ་མེ་ཤོར་བ་ལྟར། འཇིག་རྟེན་ཚེ་འདིའི་བྱ་བ་ཐམས་ཅད་བྱས་ན་མི་ཟིན་བཞག་ན་ཟིན་པས་ཅོག་གིས་བཞག ལིང་གིས་བསྐྱུར་ནས་འཕྲལ་དང་འཕྲལ་དུ་དམ་པའི་ཆོས་ལ་དངོས་སུ་ལག་ལེན་བྱེད་དེ་འབད་དགོས། དེ་ལྟར་མ་བྱས་ན་འཇིག་རྟེན་གྱི་བྱ་བ་ཟིན་དུས་མེད་པ་གཅིག་རྗེས་གཅིག་ནོན་དུ་འོང་བ་ཆུའི་གཉེར་མ་ལྟ་བུ་ཡིན་པས་ཆོས་སྒྲུབ་པའི་ལོང་སྐབས་མི་འོང་། རང་གིས་བློ་ཐག་ཆོད་ནས་འཇིག་རྟེན་གྱི་བྱ་བ་ནམ་བསྐྱུར་ཀྱང་དེའི་དུས་སུ་ཟིན་པ་ཡིན་ཏེ། ཀུན་མཁྱེན་ཆེན་པོས། འཇིག་རྟེན་བྱ་བ་ཤི་ཤིར་ཟིན་དུས་མེད། །ནམ་བཞག་དུས་ན་ཟིན་པ་ཆོས་ཉིད་ཡིན། །ཞེས་དང་བྱ་བྱེད་བྱིས་པའི་རྩེད་མོ་འདྲ། །བྱས་ན་མི་ཟིན་བཞག་ན་ཟིན། །ཞེས་གསུངས། དེས་ན་དམ་པའི་ཆོས་ལ་སྒྲུབ་འདོད་ཀྱི་བློ་ཞིག་སྐྱེས་པའི་ཚེ། མི་རྟག་པས་སྐུལ་མ་བཏབ་སྟེ། ཆོས་ལེ་ལོ་དང་ཕྱི་བཤོལ་གྱི་དབང་དུ་སྐད་ཅིག་ཀྱང་མི་ལུས་པར་འཕྲལ་དང་འཕྲལ་དུ་ཆོས་ལ་འཇུག་པ་དེ་སྦྱོར་བའི་བརྩོན་འགྲུས་ཡིན། མཐར་ཐུག་སངས་རྒྱས་ཀྱི་གོ་འཕང་མ་ཐོབ་བར་དུ་རྟོགས་བྱ་གོང་མ་གོང་མར་རྟོགས་རྒྱུ་དང་། སྤང་བྱ་གོང་མ་གོང་མར་སྤོང་རྒྱུ་ཡོད་པས་ཕར་ཕྱིན་དྲུག་ལ་བསླབ་དགོས། དེས་ན་བསམ་སྦྱོར་གཉིས་ཀས་ཉིན་མཚན་ཀུན་ཏུ་སྒོ་གསུམ་ཆོས་མེད་ཀྱི་ངང་དུ་སྐད་ཅིག་ཀྱང་མི་སྡོད་པར། དུས་རྟག་ཏུ་ཆོས་ལ་བརྩོན་འགྲུས་དགེ་བའི་ལས་ལ་སྦྱོར་དགོས་པ་རྟག་སྦྱོར་དང་། གུས་སྦྱོར་ལ་ཕྱིའི་ཡོངས་འཛིན་བླ་མ་དགེ་བའི་བཤེས་གཉེན་བསྟེན། དེས་བསྟན་པའི་ཆོས་ཐེག་པ་ཆེན་པོ་དང་། རང་གི་རྒྱུད་ཀྱི་བྱང་ཆུབ་ཀྱི་སེམས་ལ་གུས་པ་དང་སྤྲོ་བ་བསྐྱེད་དེ་དམ་པའི་ཆོས་སྒྲུབ་པ་དེ་ཡིན། ཆོག་པར་མི་འཛིན་པའི་བརྩོན་འགྲུས་ནི། རང་གིས་མཚམས་དང་བསྙེན་སྒྲུབ་ཁ་ཏོན་དང་དགེ་སྦྱོར་ལ་སོགས་པ་ཅུང་ཟད་རེ་འགྲུབ་པའི་ཚེ། དེ་ཙམ་གྱིས་ཆོག་ཤེས་མི་བྱ་བར་ཚེ་དང་སྒྲུབ་པ་སྙོམས་པའི་དམ་བཅའ་བླངས་ནས་ཇི་སྲིད་རྫོགས་པའི་སངས་རྒྱས་ཀྱི་གོ་འཕང་མ་ཐོབ་བར་དུ་བརྩོན་པ་རྒྱུན་རིང་ལ་ཤུགས་དྲག་པོ་ཆུ་བོའི་རྒྱུན་ལྟ་བུ་ཞིག་དགོས་ཏེ། དམ་པ་གོང་མ་དག་གི་གསུངས་ལས་ཆོས་སྒྲུབ་པའི་དུས་གཡག་ལྟོག་གིས་རྩྭ་ཟ་བ་ལྟ་བུ་ཞིག་དགོས། ཞེས་གསུངས། གཡག་ལྟོག་གིས་རྩྭ་ཟ་བའི་ཚེ། ཁམ་སྔོན་མ་གཅོད་པའི་དུས་ནས་ཕྱི་མ་མིག་གིས་བལྟས་ནས་ཟ་བ་ལྟར། ཆོས་ཀྱི་བྱ་བ་སྔོན་མ་སྒྲུབ་པའི་དུས་ནས་ད་ལྟ་སྒྲུབ་བཞིན་པའི་ཆོས་འདི་འགྲུབ་པ་དང་མཉམ་དུ་ཡང་གཞན་འདི་བསྒྲུབ་དགོས་སྙམ་དུ་བློས་བླངས་ཏེ། སྒོ་གསུམ་སོས་དལ་དང་ཆོས་མེད་དུ་སྐད་ཅིག་ཀྱང་མ་ལུས་པ་ཞིག་གི་ངང་ནས་ཉིན་རེ་བཞིན་ཡང་ཆོས་ལ་བརྩོན་པ་ཇེ་ཆེར་འབད་དགོས་ཏེ། རིག་འཛིན་འཇིགས་མེད་གླིང་པའི་ཞལ་ནས་ཀྱང་། འཆི་བ་ལ་ཇི་ཙམ་བཅར་བཞིན་དགེ་སྦྱོར་ལ་སྙིང་རུས་ཇེ་ཆེར་འགྲོ་བ་འདི་ཆོས་པ་སད་ཀྱིས་མ་ཁྱེར་བའི་རྟགས་ཡིན། ཞེས་གསུངས། ད་ལྟ་སྒོམ་ཆེན་དང་བླ་མ་བཟང་པོར་གྲགས་པ་དག་ལ། རྒྱུ་མཚན་མི་ཤེས་པའི་མི་གཞན་དག་ན་རེ། ད་ཁྱོད་ཚོ་གྲུབ་པའི་ས་མཐོ་ཆེན་པོར་སླེབས་ཡོད་ཚོད་ཡིན་པས་ཕྱག་དང་ཁ་ཏོན་ཚོགས་བསགས་སྒྲིབ་སྦྱོང་སོགས་དགོས་དོགས་མེད་ཟེར་ཞིང་ངོ་བསྟོད་བྱེད་ལ། རང་རང་ནས་ཀྱང་ང་དེ་དང་དེ་ལྟ་བུ་ཡིན་པས་གང་ཡང་མི་དགོས་སྙམ་པ་འདུག་སྟེ། མཉམ་མེད་དྭགས་པོའི་ཞལ་ནས། མི་དགོས་སྙམ་པ་དེ་དགོས་བདོ་ཡིན་པའི་རྟགས་ཡིན་གསུངས། རྒྱ་གར་ཇོ་བོ་དཱི་པཾ་ཀ་ར་སྐུ་དངོས་ཀྱིས་ཀྱང་ཉིན་རེ་བཞིན་ཕྱག་ས་ཁ་ལེ་སཱཙྪ་འདེབས་པ་ལ་བརྩོན། འཁོར་རྣམས་ཀྱིས་ཁྱེད་བླ་མ་ཆེན་པོ་ཞིག་ས་ལས་མཛད་པ་མིས་ཀྱང་འཕྱ་ཞིང་། རང་ལ་ཡང་འོ་བརྒྱལ་བར་འདུག་པས་ངེད་འཁོར་རྣམས་ཀྱིས་བྱེད་པར་ཞུ་ཞུས་པས། ཅི་ཟེར་འོ་ན་ངའི་ཟན་ཀྱང་ཁྱེད་རྣམས་ཀྱིས་ཟའམ་གསུངས། དེས་ན་རྫོགས་པའི་སངས་རྒྱས་མ་ཐོབ་ཀྱི་བར་དུ་སྦྱང་བྱ་ལས་དང་བག་ཆགས་ཡོད་ཅིང་། ཐོབ་བྱ་གོང་མ་གོང་མའི་ཡོན་ཏན་ཡོད་པ་ཡིན་པས་དལ་ཁོམས་དང་རེས་འགའི་ཆོས་སུ་མ་སོང་བར་སྙིང་ཐག་པ་ནས་ཆོས་ལ་ཆོག་ཤེས་མེད་པར་འབད་དགོས་ཏེ། རྒྱལ་སྲས་ཐོགས་མེད་ཀྱིས། རང་དོན་འབའ་ཞིག་སྒྲུབ་པའི་ཉན་རང་ཡང་། །མགོ་ལ་མེ་ཤོར་བཟློག་ལྟར་བརྩོན་མཐོང་ན། །འགྲོ་ཀུན་དོན་དུ་ཡོན་ཏན་འབྱུང་གནས་ཀྱི། །བརྩོན་འགྲུས་རྩོམ་པ་རྒྱལ་སྲས་ལག་ལེན་ཡིན། །ཞེས་གསུངས། ལར་སངས་རྒྱས་ཀྱི་གོ་འཕང་ཐོབ་མི་ཐོབ་བརྩོན་འགྲུས་འདི་ཁོ་ན་ལ་རག་ལས་པ་ཡིན་པས། བརྩོན་འགྲུས་རྣམ་པ་གསུམ་པོ་འདི་ལ་འབད་དགོས་པ་ཡིན་ཏེ། ཤེས་རབ་རབ་ཅིག་ཡོད་ཀྱང་བརྩོན་འགྲུས་ཐ་མ་ཞིག་ལས་མེད་ན་ཆོས་པ་ཐ་མ་ཞིག་ལས་མི་འོང་། ཤེས་རབ་ཐ་མ་ཞིག་ལས་མེད་ཀྱང་། བརྩོན་འགྲུས་རབ་ཅིག་ཡོད་ན་ཆོས་པ་ཡང་རབ་ཅིག་འོང་། བརྩོན་འགྲུས་མེད་ན་ཡོན་ཏན་གཞན་ཡོད་ཀྱང་མི་ཕན་པ། ཀུན་མཁྱེན་འཇིགས་མེད་གླིང་པའི་ཞལ་ནས། བརྩོན་འགྲུས་མེད་པའི་གང་ཟག་ལ། །ཤེས་རབ་དང་ནི་དབང་འབྱོར་སྟོབས། །གང་གིས་སྐྱོབ་པར་མི་ནུས་ཏེ། །གྲུ་གཟིངས་ཡོད་པའི་དེད་དཔོན་ལ། །སྐྱ་བས་རྡུགས་པ་ཇི་བཞིན་ནོ། །ཞེས་གསུངས། དེས་ན་དུས་དང་གནས་སྐབས་ཐམས་ཅད་དུ། ལྟོ་ཟ་མ་ཡིན་ན་ཚད་གཅིག་གི་ཐོག་ལ་ཕབ། གཉིད་ཚད་ཀྱི་སྲང་ལ་གཅུར། རིག་པ་གཞུར་ལ་དྲངས་ནས། ཐང་ལྷོད་མེད་པའི་བརྩོན་འགྲུས་གཞུ་བརྡུངས་པ་ལྟ་བུ་ཞིག་མེད་ན། ཁོམས་དུས་སྒྲུབ་མི་ཁོམས་དུས་སྐྱུར་བ་ལྟ་བུའི་དལ་ཁོམ་རེ་འགའི་ཆོས་ཀྱིས་ནི་གར་ཡང་མི་ཕྱིན་པས་ཆོག་ཤེས་མེད་པའི་བརྩོན་འགྲུས་དེ་རྒྱུན་རིང་ལ་ཤུགས་དྲག་པ་ཞིག་དགོས་པ་ཡིན་ནོ།།

༥༽བསམ་གཏན།

ལྔ་པ་བསམ་གཏན་གྱི་ཕ་རོལ་ཏུ་ཕྱིན་པ་ནི། ཀུན་མཁྱེན་ཆེན་པོས། ཇི་སྲིད་སེམས་ལ་བརྟེན་པ་མ་ཐོབ་བར། །ཕྱི་རོལ་ཡུལ་གྱི་རབ་ཏུ་བསླུ་བས་ན། །དབེན་པའི་གནས་སུ་སྤྲོ་བར་གནས་པར་བྱ། །ཞེས་གསུངས་པ་ལྟར། སེམས་ཞི་ལྷག་གི་ངང་ལ་རྩེ་གཅིག་པར་འཇོག་པ་ཞིག་ལ་བསམ་གཏན་གཙོ་བོ་ཡིན། བསམ་གཏན་བསྒྲུབ་པ་ལ་རྒྱུ་དབེན་པ་གཉིས་དང་པོ་བསྟེན་དགོས། དབེན་པ་གཉིས་ནི་ལུས་འདུ་འཛི་ལས་དབེན་པ། སེམས་རྣམ་རྟོག་ལས་དབེན་པ་སྟེ་ཕྱི་ནང་གི་དབེན་པ་གཉིས་བསྟེན་དགོས་ཏེ། དང་པོ་འདུ་འཛི་དང་རྣམ་གཡེང་ཐམས་ཅད་སྤངས་ནས་གནས་དབེན་པ་ཞིག་མ་བརྟེན་ན། བསམ་གཏན་རྒྱུད་ལ་སྐྱེ་མི་ནུས་པས། དང་པོ་རྣམ་གཡེང་སྤང་བ་གལ་ཆེ། དེ་ཡང་འདུས་པ་ནི་འབྲལ་བའི་ཆོས་ཅན་ཡིན་ཏེ། ཕ་མ་དང་། སྤུན་ཟླ། བཟའ་མི་དང་། གཉེན་གྲོགས། ཐ་ན་ལྷན་ཅིག་སྐྱེས་པའི་ང་ཞེས་པའི་གདགས་གཞི་ལུས་ཀྱི་ཤ་རུས་ཀྱང་མཐར་འཆི་བའི་ཚེ་སོ་སོར་འབྲལ་ཞིང་རྡུལ་ཕྲན་དུ་འགྲོ་བའི་ཆོས་ཅན་ཡིན་ན། བསམ་རྒྱུ་དང་སྒྲུབ་རྒྱུ་ཆོས་མ་གཏོགས་མེད་པར་བྱས་ཏེ་རྟག་པ་མེད་པའི་མཛའ་བཤེས་ལ་ཆགས་ནས་ཅི་བྱེད་སྙམ་དུ་བསམས་ནས། རྟག་ཏུ་གཅིག་པུར་གནས་པར་བྱ་དགོས་ཏེ། རས་པ་ཞི་བ་འོད་ཀྱིས། རང་ཉིད་གཅིག་པུ་སངས་རྒྱས་ཀྱི་ངང་། །ཆོས་མཐུན་གྲོགས་པོ་དགེ་སྦྱོར་གྱི་རྟེན། །གསུམ་བཞི་ཕན་ཆད་ཆགས་སྡང་གི་རྒྱུ། །བདག་དེས་ཀྱང་གཅིག་པུར་བསྡད་པ་ཞིག་ལགས། །ཞེས་གསུངས། འདོད་པའི་ཡོན་ཏན་ལ་ཆགས་པ་ནི་ཉེས་པ་ཐམས་ཅད་ཀྱི་འབྱུང་ཁུངས། ཇི་ཙམ་ཡོད་ཀྱང་དེ་ཙམ་ཆོག་མི་ཤེས་པ། ཁྱད་པར་དུ་ལོངས་སྤྱོད་དང་འབྱོར་པ་ཇི་ཙམ་ཡོད་བཞིན་སེར་སྣ་ངང་གིས་འཕེལ་བ་ཡིན་ཏེ། ཇི་སྐད་དུ། གང་ལ་ནོར་ཡོད་དེ་ལ་སེར་སྣ་ཡོད། །ཅེས་དང་། ཡོད་ཀྱིན་ཇེ་དགོས་ཕྱུག་པོ་འདྲ། །ཞེས་གསུངས། ནོར་མེད་ཙ་ན་དགྲ་དང་བྲལ། །ཞེས་པ་ལྟར། རང་ལ་ཟས་ནོར་དང་ལོངས་སྤྱོད་ལ་སོགས་པ་ཇི་ཙམ་འབྱོར་པ་དེ་ཙམ་དུ་དགྲ་དང་རྐུན་པོ་ལ་སོགས་པས་ཡང་འཚེ་ཞིང་། དེ་ལ་བརྟེན་ནས་དུས་དང་རྣམ་པ་ཐམས་ཅད་དུ། ནོར་རྫས་དེ་ཉིད་ཡོད་ཀྱང་ད་དུང་གསོག་འདོད་པ་དང་། ནོར་རྫས་དེ་ཉིད་བོར་སྟོར་ཆུད་ཟོས་སུ་མི་འགྲོ་བའི་ཕྱིར་བསྲུང་བ་དང་། ཡོད་པ་དེ་ཉིད་གཅིག་བཅུ་སོགས་ཇེ་མང་གཏོང་ཕྱིར་སྤེལ་བ་གསུམ་གྱིས་མི་ཚེ་ཟད་ལ། གསོག་སྲུང་སྤེལ་བ་དེ་ཡང་སྡུག་བསྔལ་དང་སྡིག་པ་ཁོ་ན་མ་གཏོགས་མེད་པས་ན། འཕགས་པ་ཀླུ་སྒྲུབ་ཀྱིས་ཀྱང་། གསོག་དང་སྲུང་དང་སྤེལ་བས་ཉམ་ཐག་པས། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། །ཞེས་གསུངས། ལྷོ་འཛམ་བུའི་གླིང་གི་རྒྱུ་རྫས་དང་ལོངས་སྤྱོད་ཐམས་ཅད་མི་གཅིག་ལ་ཡོད་ཀྱང་། དོན་དུ་ནི་མི་གཅིག་གི་ལྟོ་གོས་གཉིས་ལས་བྱེད་རྒྱུ་གཞན་མེད། འོན་ཀྱང་ཅི་ཙམ་འབྱོར་བཞིན་རང་གཅིག་པུ་ཙམ་གྱིས་ཀྱང་ཁ་ལ་ཟ་མི་བྲ། རྒྱབ་ལ་གྱོན་མི་བྲ་བར་སྡིག་སྡུག་གཏམ་ངན་ཐམས་ཅད་ཁྱད་དུ་བསད་དེ་ཕྱི་མ་རླུང་ལ་བསྐུར། ཚེ་འདི་སྲོག་དང་བསྡོས། རྒྱུ་རྫས་ཕྲ་མོ་རེའི་ཆེད་དུ་ཁྲེལ་དང་ངོ་ཚ་གཞུང་དང་ཕྱི་ཐག་ཆོས་དང་དམ་ཚིག་ཐམས་ཅད་ཁྱད་དུ་གསོད། ཟ་རློམ། རྙེད་རློམ། ཐོབ་རློམ་ཁོ་ནས་དུས་འདའ་བ་འབྱུང་པོས་གཏོར་མ་ཚོལ་བ་ལྟ་བུ་དོན་མེད་བྲེལ་བའི་ངང་དུ་ཉིན་གཅིག་གི་དལ་ཁོམ་དང་བདེ་སྐྱིད་ཀྱང་ཉམས་སུ་མ་མྱོངས་བཞིན་དུ་མི་ཚེ་ཟད། མཐར་ལོངས་སྤྱོད་བསགས་བསགས་རང་གི་སྲོག་གི་གཤེད་མ་ལ་བབས་ནས། དེ་ཁོ་ནའི་ཆེད་དུ་གྲི་ཁ་དང་མཚོན་ཁར་འཆི། ཚེ་གཅིག་ཏུ་བསགས་པའི་རྒྱུ་རྫས་ལོངས་སྤྱོད་ནི། དགྲ་ལ་སོགས་པ་གཞན་གྱིས་ལོངས་སྤྱོད་དེ་ཆུད་ཟོས་ཁོ་ནར་འགྱུར། དེའི་ཆེད་དུ་བསགས་པའི་སྡིག་པའི་ཕུང་པོ་རི་རབ་ཙམ་ཞིག་ནི། རང་ཉིད་ཁོ་ནའི་སྐལ་པར་ཐོབ་སྟེ་ངན་སོང་ངན་འགྲོའི་གནས་སྡུག་བསྔལ་བཟོད་པར་དཀའ་བའི་གཏིང་ནས་ཐར་པའི་དུས་མེད་པར་འཁྱམས་པ་དེ་ལྟ་བུ་ཡིན་པས། འབྱོར་བ་ཅུང་ཟད་རེ་ཡོད་ན་ད་ལྟ་རང་དབང་ཡོད་ཚེ་འདིར་ཕྱི་མའི་རྒྱགས་ཕྱེ་བཟང་པོ་རེ་ཚགས་སུ་ཚུད་པར་བྱས་ནས། ལྟོ་གྱི་ན་དང་གོས་ལྷགས་སྐྱོབ་ཙམ་གྱིས་ཆོག་ཤེས་བར་བྱ། དེ་ལས་ཀྱང་རབ་ཏུ་བྱུང་བའི་ཆོས་པ་ཚད་ལྡན་ཞིག་ཡིན་ན། ཕྱི་ཡོ་བྱད་དང་ནང་སེམས་ཅན་ལ་ཆགས་ཞེན་སྤངས་ནས། རི་ཁྲོད་དབེན་པར་བརྟེན་ཏེ་ཡོ་བྱད་ཀྱང་མཐའ་གཉིས་སུ་མ་ལྷུང་བར་བྱ་དགོས། དེ་ཡང་གནས་ངན་ངོན་རི་ཕུག་དང་བྲག་ཕུག གོས་ངན་ངོན་ཕྱགས་དར་ཁྲོད་པ། ཟས་ངན་ངོན་བསོད་སྙོམས་ཀྱིས་འཚོ་བ་སོགས། འདོད་པ་བསོད་སྙོམས་ཀྱི་མཐའ་དང་། ངལ་ཞིང་དུབ་པའི་མཐའ་གཉིས་སུ་མ་ལྷུངས་པ་ཞིག་གི་དཀའ་སྤྱད་ཀྱིས་ཆོས་སྒྲུབ་དགོས། དེ་བཞིན་དུ་ཚེ་འདི་ཁོ་ན་དོན་དུ་གཉེར་ནས་ཕྱི་མ་མི་དྲན་བའི་མི་རྣམས་ནི་བློ་ཆུང་བྱིས་པའི་གྲོགས་པོ་ཞེས་བྱ་བ་ཡིན་ཏེ། བྱིས་པའི་གྲོགས་པོ་དེ་དག་གི་རང་གཤིས་ནི་ཕར་ལ་ཕན་པར་བྱས་ཀྱང་། ཚུར་ལ་ལན་དུ་གནོད་པ་བྱེད་པ་ཡིན་པས་བྱས་པ་མི་གཟོ་བ། ཇི་ལྟར་བྱས་ཀྱང་འཐད་པའི་དུས་མེད་པས་མགུ་བར་དཀའ་བ། སྙིགས་མའི་སྐྱེ་བོ་ཤིན་ཏུ་བརྟེན་དཀའ་ལ། །སྲིན་པོ་བཞིན་དུ་ཁྲོ་བའི་ངང་ཚུལ་ཅན། །གང་དང་འགྲོགས་ན་ཉོན་མོངས་ཚོགས་འཕེལ་བ། །དུས་ངན་གྲོགས་ཀྱིས་སུ་ཞིག་སྐྱོ་མི་འགྱུར། །ཞེས་གསུངས་པ་ལྟར། ཁོ་བས་རང་ལྷག་ན་ནི་ཕྲག་དོག་བྱེད། རང་བས་ཁོ་ལྷག་ན་ནི་ཁྱད་དུ་གསོད་པ། ཇི་ཙམ་འགྲོགས་བཞིན་དེས་ཤུགས་ཀྱིས་མི་དགེ་བ་འཕེལ་ཞིང་དེའི་ཚད་ཀྱིས་དགེ་བ་མར་འགྲིབ་པ་ཡིན་པས་གྲོགས་ངན་དེ་དག་རིང་དུ་སྤངས་ཏེ་དབེན་པ་གཉིས་བརྟེན་དགོས། ཚོང་དང་སོ་ནམ་བཟོ་དང་རིག་ཤེས་ལ་སོགས་པ་ལ་བརྟེན་ནས་མི་མང་པོ་དང་འབྲེལ་ཞིང་དོན་བྱ་བ་མང་པོས་རྣམ་པར་གཡེང་བ་ནི། འདུ་འཛི་ཡིན་ཏེ། དེ་ཡང་རྟག་ཏུ་བྲེལ་ཞིང་དོན་ཆུང་བ། ཇི་ཙམ་ཡུན་རིང་བརྩོན་ཀྱང་སྙིང་པོ་མེད་པ། དགྲ་བཏུལ་ཀྱང་ཟད་པའི་མཐའ་མེད་པ། གཉེན་བསྐྱངས་ཀྱང་ཟད་པའི་མཐའ་མེད་པ། ཟིན་པའི་དུས་མེད་པའི་བྱ་བྱེད་དང་རྣམ་གཡེང་ཐམས་ཅད་མཆིལ་མའི་ཐལ་བ་བཞིན་དོར་ཏེ། ཕ་ཡུལ་རྒྱབ་ཏུ་བསྐྱུར། མི་ཡུལ་དང་དུ་བླངས། གནས་བྲག་རྩ་རུ་བསྡད། གྲོགས་རི་དྭགས་དང་འགྲོགས། བབ་ལུས་སེམས་ལ་བསྐུར། གྱོང་ལྟོ་གོས་གཏམ་གསུམ་ལ་བཏད་ནས། མི་མེད་ལུང་སྟོང་ཁོ་ནར་མི་ཚེ་བསྐྱལ་ཏེ། ཇི་སྐད་དུ། རྗེ་བཙུན་མི་ལ་རས་པའི་ཞལ་ནས། མི་མེད་ལུང་པའི་བྲག་ཕུག་ན། །སྐྱོ་ཆད་དེ་བ་ལ་སངས་དུས་མེད། །བླ་མ་དུས་གསུམ་སངས་རྒྱས་ལ། །ཡིད་དུང་ངེ་བ་ལ་འབྲལ་བ་མེད། །ཅེས་གསུངས་པ་ལྟར་བྱས་ན། ཡིད་སྐྱོ་བའི་གནས་སུ་བསམ་གཏན་འཁོར། ཟེར་བ་ཡིན་པས་ངེས་འབྱུང་དང་སྐྱོ་ཤས། དད་པ་དང་དག་སྣང་། བསམ་གཏན་དང་ཏིང་འཛིན་ལ་སོགས་ལམ་གྱི་ཡོན་ཏན་ཐམས་ཅད་མི་མེད་དབེན་པའི་གནས་ནས་རང་ཤུགས་ཀྱིས་སྐྱེ་བ་ཡིན་པས། དེ་ལྟ་བུ་ལ་ཅི་ནས་ཀྱང་འབད། དེ་བས་ན་དབེན་པའི་ནགས་ཁྲོད་ནི། སྔོན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཀྱང་ཞི་བ་བརྙེས་པའི་གནས། འདུ་འཛི་དང་རྣམ་གཡེང་མེད་པ། ཚོང་དང་སོ་ནམ་མེད་པ། བྱིས་པ་སོ་སོའི་སྐྱེ་བོའི་གྲོགས་དང་བྲལ་བ། བྱ་དང་རི་དྭགས་འགྲོགས་ན་བདེ་ཞིང་འཁོན་སེམས་དང་ཕྲག་དོག་མེད་པ། ཆུ་དང་ལོ་མ་ལ་རྩོལ་བ་མི་དགོས་པས་དཀའ་ཐུབ་ཀྱི་ཟས་དང་མཐུན་པ། རིག་པ་རྐྱེན་བྲལ་ངང་གིས་དྭངས་ཤིང་། ཏིང་ངེ་འཛིན་དང་ཉམས་རྟོགས་ཀྱི་ཡོན་ཏན་ཐམས་ཅད་རང་ཤུགས་ཀྱིས་འཕེལ་བའི་གནས། དེ་ན་སྡང་བའི་དགྲ་མེད། བྱམས་པའི་གཉེན་མེད། ཆགས་སྡང་གི་སྒྲོག་ལས་གྲོལ་བ་ཡོན་ཏན་དུ་མ་དང་ལྡན་པའི་གནས་ཡིན་ཏེ། སྣ་ཚོགས་བྲག་རིའི་བ་གམ་མཛེས་པ་ན། །ཡིད་འོང་བདེ་བའི་མལ་སྟན་གཏིང་བཞིན་པར། །ཐུབ་བསྟན་རིན་ཆེན་འབར་བའི་སྟེགས་སྦྱིན་པ། །སྐལ་བཟང་སྐྱེས་བུའི་བསྟི་གནས་ཁོ་ན་ཡིན། །ཞེས་གསུངས། དེ་ལྟ་བུའི་དབེན་པའི་གནས་སུ་དངོས་སུ་ཕྱིན་ནས་སྡོད་པ་ལྟ་ཡང་ཅི་སྨོས། ཐ་ན་དབེན་པའི་གནས་དེར་འགྲོ་བསམས་ནས། དེའི་ཕྱོགས་སུ་དང་བའི་ཡིད་ཀྱིས་གོམ་པ་བདུན་བོར་ཡང་། བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཕྱོགས་བཅུའི་སངས་རྒྱས་ཐམས་ཅད་ལ་མཆོད་པ་ཕུལ་བ་ལས་ཀྱང་བསོད་ནམས་དང་ཕན་ཡོན་ཆེ་བར་སངས་རྒྱས་བཅོམ་ལྡན་འདས་ཀྱི་ཟླ་བ་སྒྲོན་མེའི་མདོ་ལ་སོགས་པ་ལས་གསུངས། དེ་ལྟ་བུའི་གནས་སུ་ཇི་སྐད་དུ། རི་ཁྲོད་དབེན་པའི་གནས་མཆོག་ན། །སྤྱོད་ལམ་ཐམས་ཅད་དགེ་བ་ཡིན། །ཞེས་པ་ལྟར། ཆེད་དུ་བརྩོན་འགྲུས་བརྩམས་ནས་དགེ་བ་མ་བསྒྲུབས་ཀྱང་། ངེས་འབྱུང་དང་སྐྱོ་ཤས། བྱམས་དང་སྙིང་རྗེ་ལ་སོགས་པ་ལམ་གྱི་ཡོན་ཏན་ཐམས་ཅད་ངམ་ངམ་ཤུགས་ཀྱིས་སྐྱེ་བས། འགྲོ་འདུག་སོགས་སྤྱོད་ལམ་ཐམས་ཅད་ཀྱང་རང་བཞིན་གྱིས་དགེ་བ་འབའ་ཞིག་ཏུ་འགྱུར། མ་གྲངས་དྲོལ་བའི་ཁྲོད་འདུ་འཛིའི་གནས་སུ་འབད་ནས་བཀག་ཀྱང་མི་ཁེགས་པའི་ཆགས་སྡང་དང་ཉོན་མོངས་པ་ཐམས་ཅད་ཀྱང་། དབེན་པའི་གནས་སུ་སླེབ་པ་ཙམ་གྱིས་རང་ཤུགས་ཀྱིས་ཆུང་དུ་འགྲོ་ཞིང་ལམ་གྱི་ཡོན་ཏན་ཐམས་ཅད་རང་རྒྱུད་ལ་སྐྱེད་པར་སླ་བ་ཡིན་ཏེ། ཕྱི་ནང་གིས་དབེན་པའི་ཡོན་ཏན་འདི་དག་ནི་བསམ་གཏན་གྱི་སྔོན་དུ་འགྲོ་བའི་ཆོས་ཡིན་པས་ཅི་ནས་ཀྱང་གལ་ཆེ་བས་མེད་ཐབས་མེད་དོ། །བསམ་གཏན་དངོས་ལ། བསམ་གཏན་གྱི་ངོ་བོ་མི་གཡེང་བ་ཡིན་ཏེ། རྣམ་པ་གཡེང་བའི་སེམས་དེ་དྲན་པས་ཆོས་ཀྱི་ཀ་ཆེན་ལ་བཏགས་ཏེ་བསྒོམ་དགོས། སྤྱོད་འཇུག་ལས། ཆོས་ལ་སེམས་པའི་ཀ་ཆེན་ལ། །ཇི་ལྟར་བཏགས་བཞིན་མི་འཆོར་བར་། །ཞེས་གསུངས་པས་དམིགས་པའི་ཆོས་ཀ་བ་ལྟ་བུ་དེ་ལ་དྲན་པ་ཐག་པ་ལྟ་བུ་དེས་མི་འཆོར་བར་བཏགས་དགོས། ཤེས་བཞིན་བྱ་ར་བ་ལྟ་བུ་དེས་སེམས་དེ་གནས་སམ་མི་གནས་བརྟག་དགོས། དེ་ནས་འཇུག་ལྡོག་གི་གནས་ལ་གཟོབ་པ་ལྷུར་ལེན་པ་བག་ཡོད་བག་མ་ལྟ་བུ་དེས་སེམས་གཡེང་ན་སྔ་མའི་ཡུལ་ལ་སེམས་བླན་ཏེ་འཇོག་དགོས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པ་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་གསུངས་པས། གཞི་ཚུལ་ཁྲིམས་དག་ན་བདུད་ཀྱི་རྒྱལ་མཚན་བསྙིལ་ཐུབ། བསྟན་པའི་རྒྱལ་མཚན་སྒྲེང་ཐུབ། དེའི་ཐོག་ལ་རིམ་གཉིས་ཀྱི་ལམ་ལ་སློབ་པ་ལ་དམ་ཚིག་གཙང་བ་སྡོམ་གསུམ་རྣམ་པར་དག་པ་ཞིག་གིས་བསམ་གཏན་བསྒོམ་པའི་ཚེ་ན། ཐོག་མ་ཞི་གནས་ལ་གནས་དགོས། དེ་ལའང་དམིགས་བཅས་དང་དམིགས་མེད་གཉིས་ཡོད། དམིགས་བཅས་ནི་བྱམས་པ་དང་བྱམས་པའི་ཏིང་ངེ་འཛིན་ལྟ་བུ་བསྒོམ་པའི་ཚེ་ན་སེམས་དགེ་བའི་དམིགས་རྣམ་ལ་བཟུང་ནས་དྲན་ཤེས་བག་ཡོད་རྣམས་བརྟེན་དགོས། ནང་གི་སེམས་མི་གཡེང་བའི་རྒྱུ། སྔོན་སོང་གི་རྗེས་མི་གཅོད། མ་འོངས་པའི་མདུན་མི་བསུ། ད་ལྟ་ཚོགས་དྲུག་གི་ཡུལ་དུ་གཡེང་མི་འཇུག་པར་གྲིམ་ལྷོད་གང་དགའ་ཁམས་དང་བསྟུན་ནས་བཅས་བཅོས་མེད་པར་འཇོག་དགོས། དམིགས་མེད་ནི་བྱམས་སོགས་གཅིག་གི་སྟེང་དུ་ཅེར་ཟིན་མི་བྱ་བར། སེམས་བཅས་བཅོས་མེད་པར་ཅོག་གེ་ལྷུག་པར་སེམས་ལྷོད་ལ་བཞགསྐབས་སྐབས་སུ་དྲན་ཤེས་བག་ཡོད་རྣམས་ཀྱིས་ཟིན་པར་བྱ། དེ་ལྟར་སེམས་ཇེ་གནས་ཇེ་གནས་ལ་འོངས་དུས། གཟོད་བསམ་གཏན་གྱི་དབྱེ་བ་བྱེད་དགོས་པས། དབྱེ་ན། བྱིས་པ་ཉེར་སྤྱོད་ཀྱི་བསམ་གཏན། དོན་རབ་འབྱེད་པའི་བསམ་གཏན། དེ་བཞིན་གཤེགས་དགེའི་བསམ་གཏན་དང་གསུམ་ཡིན། དེ་ཡང་བདེ་གསལ་མི་རྟོག་པའི་ཉམས་ལ་ཞེན་ནས། དེ་ཉིད་ལ་ཆེད་དུ་གཉེར་ཏེ་ཉམས་ཞེན་གྱི་རྩི་དང་བཅས་པར་སྒོམ་པའི་དུས་ན། ཞེས་བསྒོམ་པའི་ཉམས་ཇེ་ཆགས་ལ་འོངས་ཏེ། སེམས་དགའ་དོན་ཅི་ཡང་མེད་ཀྱང་སེམས་དགའ་ཡལ་ལེ་དང་སྨྲ་མེད་པའི་བདེ་བ་ལྟ་བུ་ཤར་ནས་དེ་དང་འབྲལ་བར་མི་འདོད་པ་དེ་ལ་བདེ་ཉམས་ཟེར། སེམས་རྣམ་རྟོག་གི་རྙོག་མ་དྭངས་ནས་ཤིན་ཏུ་གསལ་ཞིང་དྭངས་པའི་ཉམས། མཚམས་རེར་ཁང་པ་སོགས་ཀྱིས་མི་སྒྲིབ་པ་ཕྱི་ནང་ཀུན་མཐོང་བའི་ཉམས་ཤར་བ་ལྟ་བུ་གསལ་ཉམས་དང་། སེམས་ལ་རྣམ་རྟོག་ཨེ་སྐྱེ་བལྟས་ན་སྐྱེ་རྒྱུ་མི་འདུག་སྙམ་པ་ལྟ་བུ་རྟོག་བྲལ་གནས་པ་མི་རྟོག་པའི་ཉམས་ཡིན། ངའི་བདེ་གསལ་མི་རྟོག་པ་ཞེས་གང་ཟག་གི་བདག་དང་། ཉམས་གསུམ་ལ་ཞེན་པ་ཆོས་ཀྱི་བདག་འཛིན་ཡིན་པས། ཐར་བའི་རྒྱུ་བདག་མེད་རྟོགས་པ་དང་འགལ་བས། དེ་ཡོད་བཞིན་ཐར་བ་མཆོག་གི་གོ་འཕང་སྒྲུབ་མི་ཐུབ་པ་ཡིན། དེ་དག་ནི་ཞི་གནས་རྐྱང་པ་ཡིན་པས་དེ་གསུམ་ལ་ཉམས་ཞེན་དང་བཅས་པས་བྱིས་པ་ཉེར་སྤྱོད་ཀྱི་བསམ་གཏན་ཞེས་བྱ། དེ་ལྟར་གོམས་པས་བསམ་གཟུགས་བསྒོམས་པས་སྤྱན་དང་མངོན་ཤེས་རྫུ་འཕྲུལ་ལ་སོགས་ཐོབ་པ་བསམ་གཏན་གྱི་ཡོན་ཏན་ཡིན། དེ་ནས་དོན་རབ་འབྱེད་པ་དེའི་སྟེང་གང་ཟག་གི་བདག་དང་ཆོས་ཀྱི་བདག་གཉིས་རིགས་པས་དཔྱད་ནས། སྟོང་པ་ཞི་གནས་དང་ཟུང་འཇུག་ཏུ་གོམས་པ་དེ་དོན་རབ་འབྱེད་པའི་བསམ་གཏན་ཡིན། འདིའི་དུས་སུ་བློས་འཛིན་སྟངས་སྔ་མ་བྱིས་པ་ཉེར་སྤྱོད་ཀྱི་སྐབས་དང་མི་འདྲ་བ་ཉམས་ཀྱི་ཞེན་པ་དང་བྲལ་ནས་བསམ་གཏན་གྱི་རོ་མྱོང་མེད་ཀྱང་སྟོང་འཛིན་གཉེན་པོའི་ཕྱོགས་ད་དུང་མ་དོར་བས་དེ་ལ་ཞེན་ནས་སྒོམ་པའི་དུས་ན། དོན་རབ་འབྱེད་པའི་བསམ་གཏན་ཞེས་བྱ། སྔ་མ་ཚོགས་ལམ་དང་། འདི་ནི་སྦྱོར་ལམ་གྱི་སྐབས་སུ་སྒོམ་པ་གཙོ་ཆེ། མཐོང་ལམ་གྱི་དུས་སུ་སྟོང་འཛིན་གཉེན་པོའི་བློ་དང་བྲལ་ཏེ། ཞི་ལྷག་རོ་གཅིག་ཏུ་གྱུར་ནས་དངོས་འཛིན་དང་སྟོང་འཛིན་གཉིས་ཀ་བྲལ་ནས་ཆོས་ཉིད་རྣམ་པར་མི་རྟོག་པའི་ཏིང་ངེ་འཛིན་དངོས་པོའི་ཡིན་ལུགས་ཇི་ལྟ་བ་སྤྲོས་པའི་ཁས་ལེན་ཐམས་ཅད་དང་བྲལ་བའི་ངང་ལ་གནས་པ་ནི། དེ་བཞིན་གཤེགས་པའི་བསམ་གཏན་དང་ཆ་འདྲ་བ་ཡིན་པས་དེ་བཞིན་གཤེགས་དགེའི་བསམ་གཏན་ཟེར་བ་ཡིན། ཡང་ན་ལམ་ཞུགས་ལས་དང་པོ་བའི་རྒྱུད་ཀྱི་ཏིང་ངེ་འཛིན་བསམ་གཟུགས་སྒོམ་པ་རྣམས་ལ་བྱིས་པ་ཉེར་སྤྱོད་ཀྱི་བསམ་གཏན་དང་། ལམ་དུ་ཞུགས་པ་ཚོགས་སྦྱོར་གྱི་ཏིང་ངེ་འཛིན་གྱིས་ཐར་བའི་ལམ་དུ་བྱེད་ཅིང་དོན་རབ་འབྱེད་པས་ན་དོན་རབ་འབྱེད་པའི་བསམ་གཏན་དང་། ས་དང་པོ་ཡན་ཆད་ཀྱི་འཕགས་པའི་ཏིང་ངེ་འཛིན་རྣམས་ལ་ཟག་པ་མེད་པའི་ཏིང་ངེ་འཛིན་ནམ་དེ་བཞིན་གཤེགས་དགེའི་བསམ་གཏན་གསུངས། རྒྱལ་སྲས་ཐོགས་མེད་ཀྱིས། བསམ་གཏན་མེད་པར་ཆོས་ཉིད་མི་མཐོང་བས། །རྣམ་རྟོག་མཚན་མ་མེད་པའི་ཏིང་ངེ་འཛིན་བསྒོམ། །ཞེས་གསུངས། དེ་ལྟར་བསམ་གཏན་སྒོམ་པའི་དུས་ཐམས་ཅད་དུ་བསམ་གཏན་གྱི་འབོལ་ཆུང་ཕྱོགས་རེ་རེ་ལ་གྲུ་དོ་རེ་བ་ཡོད་པ་ཕྱི་མཐོ་བ་སྔོན་ཅུང་ཟད་དམའ་བའི་གདན་ལ་བསྡད་ནས། ལུས་ཀྱི་གནད་དུ་རྣམ་སྣང་ཆོས་བདུན་བྱེད་པ་དང་། མིག་གི་གནད་དུ་ལྟ་སྟངས་བྱེད་པ་སོགས་གལ་ཆེ་སྟེ། ལུས་དྲང་ན་རྩ་དྲང་། རྩ་དྲང་ན་རླུང་དྲང་། རླུང་དྲང་ན་སེམས་དྲང་ཟེར་བ་ཡིན་པས། བསམ་གཏན་བསྒོམ་པའི་དུས་སུ་ཉལ་བ་འཁྲས་པ་ལ་སོགས་མི་བྱེད་པར་ལུས་དྲང་པོར་བསྲངས་ཏེ་ཡིད་གང་དུའང་མི་རྟོག སེམས་ཅིར་ཡང་མི་འཛིན་པའི་ངང་ལ་མཉམ་པར་འཇོག་པ་ནི། བསམ་གཏན་གྱི་ཕ་རོལ་ཏུ་ཕྱིན་པའི་ངོ་བོ་ཡིན་ནོ།།

༦༽ཤེས་རབ།

དྲུག་པ་ཤེས་རབ་ཀྱི་ཕ་རོལ་ཏུ་པ་ལ། ངོ་བོ་ཆོས་ཐམས་ཅད་རབ་ཏུ་འབྱེད་པ་ཡིན། འདི་ལྟར་ཤེས་བྱ་འཁོར་འདས་ལམ་གསུམ་གྱི་བསྡུས་པ་ཐམས་ཅད་ལ་ཆོས་ཟེར། དེ་ཇི་ལྟར་གཏན་ལ་དབབ་ན། ཀུན་རྫོབ་དང་དོན་དམ་པའི་བདེན་པ་གཉིས་ཀྱིས་གཏན་ལ་འབེབས་པ་ཡིན། ཀུན་རྫོབ་ནི་མི་བདེན་བསླུ་བའི་ཆོས་ཅན་ལ་ཟེར་ཏེ། དཔལ་སྤྲུལ་རིན་པོ་ཆེས། བློ་འཁྲུལ་བ་ཡུལ་དང་བཅས་པ་ཀུན་རྫོབ་བདེན་པའི་མཚན་ཉིད་གསུངས། དོན་དམ་ནི། ཆོས་ཐམས་ཅད་ཀྱི་གནས་ལུགས་མི་བསླུ་བའི་བདག་ཉིད་ཅན་ཏེ། བློ་འདས་སྨྲ་བསམ་བརྗོད་མེད་དོན་དམ་བདེན་པའི་མཚན་ཉིད་དུ་གསུངས། དེ་གཉིས་ལ་བདེན་པ་གཉིས་ཟེར། ཀུན་རྫོབ་བདེན་པ་ནི་བྱིས་པ་སོ་སོའི་སྐྱེ་བོའི་བློ་འཁྲུལ་བའི་ངོ་ལ་བདེན་པ་ལྟར་སྣང་བ་སྟེ་མེ་ཚ་བ་ལྟ་བུ་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་ཟེར་བ་ལྟར་ཡིན། དོན་དམ་བདེན་པ་ནི་འཕགས་པ་རྣམས་ཀྱི་སོ་སོ་རང་རིག་པའི་ཡེ་ཤེས་ཀྱི་ཡུལ་དུ་བདེན་པ་སྟེ། སྟོང་ཉིད་སྐྱེ་འགག་གནས་གསུམ་དང་བྲལ་བའི་ཡང་དག་མཐའ་དེ་ལ་ཆོས་ཉིད་རང་བཞིན་གྱིས་རྣམ་པར་དག་པའི་བདེན་པ་ཟེར་བ་རེད། དེ་ལྟ་བུའི་གཟུགས་ནས་རྣམ་མཁྱེན་གྱི་བར་གྱི་བདེན་གཉིས་ཀྱིས་བསྡུས་པའི་ཆོས་ཐམས་ཅད་གནས་ལུགས་སོ་སོར་མ་འདྲེས་པར་འབྱེད་པ་དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ། དེ་ལྟ་བུའི་ཐབས་བྱུང་ཤེས་རབ་དེ་ལ། དབྱེ་ན་ཐོས་པའི་ཤེས་རབ། བསམ་པའི་ཤེས་རབ། སྒོམ་པའི་ཤེས་རབ་དང་གསུམ། དང་པོ་ཐོས་པའི་ཤེས་རབ་ནི། རྗོད་བྱེད་སྡེ་སྣོད་གསུམ་གྱིས་བརྗོད་བྱ་བསླབ་པ་གསུམ་གྱི་དོན་སྟོན་པར་བྱེད་པའི་ཆོས་ཀྱི་ཚིག་དོན་ཐམས་ཅད་བླ་མའི་ཞལ་ནས་གསུངས། སློབ་མ་རང་གིས་ཉན་ཏེ་བླ་མས་གསུངས་པ་བཞིན་གོ་བ་དེ་ཐོས་པའི་ཤེས་རབ་ཡིན། བསམ་པའི་ཤེས་རབ་ནི། བླ་མས་གསུངས་པའི་ཆོས་ཀྱི་དོན་དེ་དག་ཐམས་ཅད་ཀྱང་གོ་ལོ་དང་ཐོས་ལོར་མི་བཞག་པར། རང་རྒྱུད་ལ་ཡང་ནས་ཡང་དུ་གཤར་སྦྱངས་བྱས་ཏེ་རྟོག་དཔྱོད་དང་བསམ་གཞིག་གི་སྒོ་ནས་གཏན་ལ་ཕབ། མ་ཤེས་པ་གཞན་ལ་དྲི། དྲིས་པའི་དོན་དེ་ཡང་མི་ཤེས་ཤེས་ལོ་དང་མ་ཡིན་ཡིན་ལོ་ཙམ་གྱིས་ཆོག་ཤེས་མི་བྱ་བར་ཐོས་བསམ་གྱི་སྐབས་དོགས་པ་བཅད་ནས། ངེས་པར་དབེན་པའི་རི་ཁྲོད་བཟུང་ནས་རང་ཉིད་གཅིག་པུར་ཟབ་དོན་ཉམས་སུ་ལེན་པའི་དུས་སུ་ཉམས་ལེན་གྱི་གནད་གཞན་ལ་དྲི་མི་དགོས་པར་ཉམས་ལེན་རང་རྐྱ་ཐུབ་ངེས་སུ་ཐོས་བསམ་གྱིས་ཞུན་མཐར་བཅད་པ་དེ་ཡིན། སྒོམ་པའི་ཤེས་རབ་ནི། དེ་ལྟར་ཐོས་བསམ་གྱིས་མདོ་རྒྱུད་བསྟན་བཅོས་ཀྱི་སྙིང་པོའི་མན་ངན་གཅིག་ཏུ་དྲིལ་སོང་བ་རྣམས་ཤེས་ནས་ཉམས་སུ་བླངས་ཏེ་བསྒོམས་པས་ཆོས་ཉིད་སྤྲོས་པ་དང་བྲལ་བའི་གནས་ལུགས་དོན་གྱི་རྟོགས་པ་མ་ནོར་པར་སྨྲ་བསམ་བརྗོད་པ་དང་བྲལ་བ་དེ་ཉིད་རང་རྒྱུད་ལ་སྐྱེས། ཡིད་ཆེས་ཀྱི་ཁོ་ཐག་ནང་ནས་ཆོད། ཡིན་མིན་ཐེ་ཚོམ་གྱི་སྒྲོག་ལས་གྲོལ་ཏེ་སྤྲོས་མེད་དོན་གྱི་གནས་ལུགས་ཀྱི་རང་ཞལ་མངོན་སུམ་མཐོང་བ་དེ་ཡིན། མདོར་ན་ཆོས་རྣམས་ཀྱི་རང་བཞིན་ནམ་གནས་ལུགས་ཇི་ལྟ་བ་བཞིན་ཤེས་པ་བྱེད་པར་དེ་ཐོས་པ་ཡིན། ཐོས་དོན་དེ་བསམ་པས་ངེས་པ་བྱས་ནས་བསྒོམས་པས་སྲིད་པའི་རྒྱ་མཚོ་ལས་སྒྲོལ་བར་བྱེད་པ་དེ་ཤེས་རབ་ཀྱི་རང་བཞིན་དུ་འདོད། གཞན་ཡང་རིག་པའི་གནས་ལྔ་ལ་མཁས་པའི་ཤེས་རབ་དེ་ཀུན་རྫོབ་རྟོགས་པའི་ཤེས་རབ་ཡིན་ལ། བདག་མེད་དོན་སྤྱིའམ་མངོན་དུ་གྱུར་བའི་སྒོ་ནས་འཇལ་བའི་ཤེས་རབ་དེ་དོན་དམ་པའི་ཤེས་རབ་ཟེར་ཡང་ཆོག་སྙམ། དེ་ཡང་དང་པོ་ཐོས་བསམ་སྒོམ་གསུམ་གོ་མ་ལོག་པར་ཐོས་བསམ་གྱིས་སྒྲོ་འདོགས་བཅད་ནས། སྒོམ་པས་ཉམས་སུ་ལེན་པའི་དུས་སུ། འདི་ལྟར་ཕྱི་ཡུལ་ལྔའི་སྣང་བ་ཐམས་ཅད་དོན་ལ་མེད་བཞིན་འཁྲུལ་ངོ་ལ་སྣང་བ་མདང་གི་རྨི་ལམ་ལྟ་བུ། རྒྱུ་རྐྱེན་རྟེན་འབྲེལ་ཚོགས་པ་ལས་གློ་བུར་དུ་སྣང་དུ་རུང་བ་སྒྱུ་མ་ལྟ་བུ། མེད་པ་ལ་ཡོད་པར་སྣང་བ་ཐོ་ཡོར་མིར་སྣང་བའི་མིག་ཡོར་ལྟ་བུ། སྣང་བཞིན་བདེན་པར་མ་གྲུབ་པ་སྨིག་རྒྱུ་ཆུ་རུ་མཐོང་བ་ལྟ་བུ། ཕྱི་ནང་གང་ལ་ཡང་མེད་བཞིན་སྣང་བ་བྲག་ཆའི་སྒྲ་སྐད་ལྟ་བུ། རྟེན་དང་བརྟེན་པ་མེད་པས་ཕྱི་ནང་གང་དུ་མེད་པ་དྲི་ཟའི་གྲོང་ཁྱེར་ལྟ་བུ། འཁྲུལ་ངོར་སྣང་ཡང་སྣང་ལ་རང་བཞིན་མེད་པས་གཟུགས་བརྙན་གྱི་སྣང་བ་ལྟ་བུ། མེད་སྣང་ཅིར་ཡང་འཆར་དུ་རུང་བ་སྤྲུལ་པའི་གྲོང་ཁྱེར་ལྟ་བུ་སྟེ། དངོས་པོ་མེད་པའི་སྟོང་གཟུགས་སྒྱུ་མའི་དཔེ་བརྒྱད་དུ་བལྟས་པས་ཡུལ་གྱི་སྣང་བ་རྫུན་པའི་རང་བཞིན་དུ་གོ་ལ། དེ་ལྟར་སྣང་བའི་མཁན་པོ་ཡུལ་ཅན་སེམས་ཀྱི་གཤིས་ལུགས་ལ་ཚུར་བརྟགས་ནའང་སེམས་ནི་སྐྱེ་འགག་གནས་གསུམ་དང་བྲལ་བ། སྟོང་རྟེན་འབྱུང་དབྱེ་བསལ་མེད་པ་ཆུ་ཟླ་ལྟ་བུ། སེམས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་སེམས་གཞན་མ་ཡིན་པ་སྟོང་ཉིད་བཞི་སྦྱོར་གྱི་ངེས་ཤེས། བློ་བཞན་གྱིས་མི་འཕྲོག་པ་ལ་ངེས་པ་རྙེད་དུས། སྟོང་ཉིད་ཅི་ཡང་མ་ཡིན་པ་ལས་རྟེན་འབྱུང་འགག་པ་མེད་པ་འཆར་བས། ཡུལ་སྣང་ཤར་བའི་སྣང་ཡུལ་མ་འགགས་ལ་ཡུལ་གྱི་འཛིན་རྟོག་ཞི། ཆོས་ཉིད་མཐའ་དབུས་དང་བྲལ་བ་སྟོང་གསལ་ནམ་མཁའ་ལྟ་བུར་རྟོགས་པའི་ངང་དུ་སྒོམ་དུ་མེད་པ་སྒོམ་དུ་ཤར་བའི་ཚུལ་གྱིས་འཇོག་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ། །རྒྱས་སྲས་རིན་པོ་ཆེས། ཤེས་རབ་མེད་ན་ཕ་རོལ་ཕྱིན་ལྔ་ཡིས། རྫོགས་པའི་བྱང་ཆུབ་ཐོབ་པར་མི་ནུས་པས། ཐབས་དང་ལྡན་ཞིང་འཁོར་གསུམ་མི་རྟོག་པར། །ཤེས་རབ་སྒོམ་པ་རྒྱལ་སྲས་ལག་ལེན་ཡིན་། །ཞེས་གསུངས་པ་དང་། སྡུད་པ་ལས། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་ནུས། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་ཡིས། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །ཞེས་གསུངས་པ་ལྟར། མདོར་ན་ཤེས་རབ་ཀྱི་ཕ་རོལ་ཏུ་ཕྱིན་པ་མིག་ལྟ་བུ་འདི་མེད་ན། ལོང་བའི་ཚོགས་ལྟ་བུ་སྦྱིན་པ་ལ་སོགས་པ་ལྔ་པོ་ཡིས་རྣམ་པ་ཐམས་ཅད་མཁྱེན་པའི་སར་འགྲོ་མི་ནུས་གསུངས། ཕར་ཕྱིན་མཚན་ཉིད་པ་མཐོང་ལམ་ཆོས་ཉིད་ཀྱི་བདེན་པ་མཐོང་ནས་བཟུང་ས་བཅུའི་རྒྱུན་མཐའི་བར་གྱི་ཕར་ཕྱིན་ཐམས་ཅད་མཚན་ཉིད་པ་ཡིན་ཏེ། ཚོགས་གཉིས་ཟུང་འཇུག མཉམ་བཞག་སྣང་མེད་སྤྲོས་བྲལ་དང་། རྗེས་ཐོབ་སྣང་བཅས་ཕར་ཕྱིན་བཅུ་རྫོགས་ཡོད། དེའི་དུས་སུ་ངོ་བོས་སྟོང་ཡང་རྣམ་པའི་ཆ་ནས་རྣམ་ཀུན་མཆོག་ལྡན་གྱི་སྟོང་ཉིད་དུ་ཤར་ནས་མཉམ་བཞག་སྣང་མེད། རྗེས་ཐོབ་སྒྱུ་མའི་དཔེ་བརྒྱད་ཀྱི་རྣམ་པས་ཕར་ཕྱིན་རྣམས་རྫོགས་པར་བྱེད་པ་དང་། ཕར་ཕྱིན་དྲུག་གི་སྒོ་ནས་ཚོགས་གཉིས་རྒྱ་མཚོ་ལྟ་བུ་ཡོངས་སུ་རྫོགས་པར་བྱེད་པ་དང་། སེམས་ཅན་རྒྱ་མཚོ་ལྟ་བུ་ཡོངས་སུ་སྨིན་པར་བྱེད་པ་དང་། ཞིང་ཁམས་རྒྱ་མཚོ་ལྟ་བུ་ཡོངས་སུ་སྦྱོང་བར་བྱེད་པ་སྟེ་རྫོགས་སྨིན་སྦྱོང་གསུམ་མཐར་ཕྱིན་དགོས་པ་རེད། སྤྱིར་ཕྱི་ནང་གི་ཆོས་ཐམས་ཅད་ལ་ཁ་ཕར་འཁོར་ནས་ཡུལ་ལ་དཔྱད་པ་བྱེད་ནས་ངེས་ཤེས་དྲངས་པའི་བློ་དེ་ལ་རྣམ་དཔྱོད་ཀྱི་ཤེས་རབ་བམ། ཡིད་དཔྱོད་ཀྱི་ལྟ་བ་ཟེར། ཁ་ནང་དུ་འཁོར་བའི་ནང་ཡུལ་ཅན་སེམས་ཀྱི་གཤིས་ལུགས་ལ་བརྟགས་པའི་སོ་སོ་རང་རིག་པའི་ཡེ་ཤེས་ནང་མཉམ་པར་བཞག་པ་དེ་ལ་བློ་འདས་ཡེ་ཤེས་ཀྱི་ལྟ་བ་ཞེས་བྱ་བ་ཡིན་པས། སྔ་མ་བློ་རྣམ་རྟོག་དང་ཕྱི་མ་བློ་འདས་ཡེ་ཤེས་ཡིན་པས་ཁྱད་གནམ་ས་བས་ཆེ། དེ་ལྟ་ན་སེམས་ཉིད་བདེ་གཤེགས་སྙིང་པོ་ལ་གཞི་མ་འཁྲུལ་བའི་གནས་སྐབས་དང་། མཐར་མངོན་པར་རྫོགས་པར་སངས་རྒྱས་པའི་དུས་གཉིས་ཀར་འཁྲུལ་སྣང་སྒྱུ་མ་ལྟ་བུ་དེ་མ་གྲུབ་ནའང་། འོན་ཀྱང་གློ་བུར་འཁྲུལ་བའི་དབང་གིས་འཁྲུལ་སྣང་སྒྱུ་མ་ལྟ་བུ་འདི་ཤར་བ་ཡིན་པས། ལམ་གྱི་སྐབས་འདི་འཁྲུལ་སྣང་འདི་དག་ཐམས་ཅད་སྒྱུ་མའི་དཔེ་བརྒྱད་དུ་བསམ་ཞིང་ཡང་དང་ཡང་དུ་དཔྱད་འཇོག་སྤེལ་མ་བྱས་ཏེ་བསྒོམ་དགོས། ཐུན་གྱི་རྗེས་འདྲ། ཐུན་མཚམས་རྣམས་སུ་ཕྱིན་དྲུག་གི་དབྱེ་བ་དང་དཔེ་བལྟས་དང་བསམ་དཔྱོད་ཀྱང་གལ་ཆེ། དེ་ལྟར་ཕ་རོལ་ཏུ་ཕྱིན་པ་དྲུག་པོ་དེ་དག་ཀྱང་ཕར་བཀྲལ་ན་ཕ་རོལ་ཏུ་ཕྱིན་པ་རེ་རེ་ལ་ཡང་གསུམ་གསུམ་དུ་ཕྱེ་བའི་བཅོ་བརྒྱད་དེ་ལས་ཀྱང་ཟང་ཟིང་གི་སྦྱིན་པ་ལ་གསུམ་དུ་དབྱེ་བས་ཉི་ཤུ། དེའི་སྟེང་དུ་བདག་གཞན་གྱི་དོན་རྩོལ་མེད་དུ་བྱེད་པ་ཐབས་ཀྱི་ཕ་རོལ་ཏུ་ཕྱིན་པ་དང་ཉེར་གཅིག མི་མཐུན་ཕྱོགས་ཀྱི་ཡོངས་སུ་རྫི་བ་མེད་པ་སྟོབས་ཀྱི་ཕ་རོལ་ཏུ་ཕྱིན་པ་དང་ཉེར་གཉིས། ཞིང་དང་སྤྱོད་ཡུལ་ཐམས་ཅད་ཡོངས་སུ་དག་པ་སྨོན་ལམ་གྱི་ཕ་རོལ་ཏུ་ཕྱིན་པ་དང་ཉེར་གསུམ། དོན་ཇི་ལྟ་བ་བཞིན་རྟོགས་པས་གཉིས་ཆོས་ཀྱི་འཛིན་པ་ཀུན་དང་བྲལ་ཏེ་གཉིས་སུ་མེད་པ་རྟོགས་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་དང་ཉེར་བཞི་ཡིན་ལ། དེ་ལས་ཀྱང་རྒྱས་པར་དབྱེ་ན་ཕ་རོལ་ཏུ་ཕྱིན་པ་རེ་རེ་ལ་ཡང་སྦྱིན་པའི་སྦྱིན་པ་སོགས་དྲུག་དྲུག་ཏུ་དབྱེ་བས་སུམ་ཅུ་རྩ་དྲུག་ཏུ་འགྱུར་བ་ཡིན་ཏེ། དེ་ཡང་དཔེར་ན་སྦྱིན་པའི་ཕ་རོལ་ཏུ་ཕྱིན་པ་ལ་ཡང་ཆོས་ཀྱི་སྦྱིན་པ་ལྟ་བུ་ལ་མཚོན་ན། བཤད་མཁན་བླ་མ། བཤད་རྒྱུའི་ཆོས། བཤད་ཡུལ་སློབ་མ་དང་གསུམ་འཛོམས་ནས་ཆོས་བཤད་པ་དེ་སྦྱིན་པའི་ཕ་རོལ་ཏུ་ཕྱིན་པ། དེ་ལྟར་བཤད་པའི་དུས་ན་འབུལ་བ་ཕུལ་བ་སོགས་རྙེད་པ་དང་གུས་པ་དང་བཀུར་སྟི་ལ་སོགས་པ་མི་འདོད་ཅིང་། རང་གི་མཁས་ཉམས་ཀྱི་ཆེ་བ་འབྱིན་པ་དང་། གཞན་ལ་ཟུར་ཟ་བ་དང་ཟུར་གྱིས་སྨད་པ་སོགས་ཉོན་མོངས་པའི་དྲི་མ་དང་མ་འདྲེས་པར་འཆད་པ་དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། ཚིགས་གཅིག་གི་དོན་ཡང་སློབ་མའི་མ་གོ་ན་ལན་གྲངས་མང་པོའི་བར་དུ་བསྐྱར་ཏེ་དཀའ་ཚེགས་དང་ངལ་བ་ཐམས་ཅད་ཁྱད་དུ་བསད་ནས་འཆད་པ་དེ་བཟོད་པའི་ཕ་རོལ་ཏུ་ཕྱིན་པ། ལེ་ལོ་དང་ཕྱི་བཤོལ་གྱི་དབང་དུ་མི་གཏོང་བར་བཤད་པའི་དུས་ལས་མི་ཡོལ་བར་འཆད་པ་དེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ། གང་བཤད་རྒྱུའི་ཚིག་དོན་ལ་བློ་རིག་དྲང་པོས་བཤད་ནས་དེ་ལས་སེམས་གཞན་དུ་མི་ཡེངས་པར་ཚིག་ལ་ནོར་བ་དང་དོན་ལ་འཁྲུལ་དང་ལྷག་ཆད་སྤངས་ནས་འཆད་པ་དེ་བསམ་གཏན་གྱི་ཕ་རོལ་ཏུ་ཕྱིན་པ། དེ་ལྟར་བཤད་པའི་དུས་ན་གང་འཆད་བྱ་འཆད་བྱེད་འཆད་ཡུལ་དང་བཅས་པ་འཁོར་གསུམ་རྣམ་པར་མི་རྟོག་པའི་ཤེས་རབ་ཀྱི་རྩིས་ཟིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ་ཕར་ཕྱིན་དྲུག་ཀ་ཚང་བ་ཡིན། ཡང་ཟང་ཟིང་གི་སྦྱིན་པ་མར་སྤྲང་པོ་ལ་བཟའ་བཏུང་སྦྱིན་པ་ལྟ་བུར་མཚོན་ན། སྦྱིན་རྒྱུ་སྦྱིན་མཁན་སྦྱིན་ཡུལ་གསུམ་འཛོམས་ནས་སྦྱིན་པ་དེ་སྦྱིན་པ། དེ་ཡང་དངོས་པོ་ངན་པ་དང་སྐྱོན་ཅན་སོགས་མི་སྦྱིན་པར་ཟས་ལྟ་བུ་ལ་མཚོན་ན་རང་གི་ཟ་རྒྱུའི་བཟའ་བཏུང་ནས་སྦྱིན་པ་ཚུལ་ཁྲིམས། སློང་མོ་བས་ཡང་དང་ཡང་དུ་བསླངས་ཀྱང་ཁོང་མི་ཁྲོ་བ་བཟོད་པ། དཀའ་ཚེགས་དང་ངལ་བ་ལ་མི་བསམ་ཞིང་ཡུན་དུ་མི་འགོར་བར་སྦྱིན་པ་དེ་བརྩོན་འགྲུས། དེ་ལས་སེམས་གཞན་དུ་མི་ཡེངས་པ་བསམ་གཏན། འཁོར་གསུམ་བདེན་མེད་དུ་ཤེས་པ་ཤེས་རབ་སྟེ། སྦྱིན་པ་ཆུང་ངུ་དེ་ལའང་ཕ་རོལ་ཏུ་ཕྱིན་པ་དྲུག་ཀ་ཚང་ཞིང་དེ་བཞིན་དུ་ཚུལ་ཁྲིམས་ལ་སོགས་གཞན་རེ་རེ་ལ་ཡང་དྲུག་དྲུག་ཚང་བ་དེས་རིགས་འགྲེའོ། ཡང་ཕ་རོལ་ཏུ་ཕྱིན་པ་དེ་དག་ཚུར་བསྡུ་ན། རྗེ་མི་ལས། བདག་འཛིན་སྤངས་པའི་ཕ་རོལ་ན། །སྦྱིན་པ་བྱ་བ་ལོགས་ན་མེད། །གཡོ་སྒྱུ་སྤངས་པའི་ཕ་རོལ་ན། །ཚུལ་ཁྲིམས་བྱ་བ་ལོགས་ན་མེད། དོན་ལ་མི་སྐྲག་ཕ་རོལ་ན། །བཟོད་པ་བྱ་བ་ལོགས་ན་མེད། །ཉམས་ལེན་འབྲལ་མེད་ཕ་རོལ་ན། །བརྩོན་འགྲུས་བྱ་བ་ལོགས་ན་མེད། །ངང་ལ་གནས་པའི་ཕ་རོལ་ན། །བསམ་གཏན་བྱ་བ་ལོགས་ན་མེད། །གནས་ལུགས་རྟོགས་པའི་ཕ་རོལ་ན། །ཤེས་རབ་བྱ་བ་ལོགས་ན་མེད། །བྱས་ཚད་ཆོས་ཀྱི་ཕ་རོལ་ན། །ཐབས་ཞེས་བྱ་བ་ལོགས་ན་མེད། །བདུད་བཞི་བཅོམ་པའི་ཕ་རོལ་ན། །སྟོབས་ཞེས་བྱ་བ་ལོགས་ན་མེད། །དོན་གཉིས་འགྲུབ་པའི་ཕ་རོལ་ན། སྨོན་ལམ་བྱ་བ་ལོགས་ན་མེད། །ཉོན་མོངས་རང་མཚང་རིག་པ་ན། །ཡེ་ཤེས་བྱ་བ་ལོགས་ན་མེད། །ཞེས་གསུངས། ཡང་ཁུ་རྔོག་འབྲོམ་གསུམ་གྱིས། །ཇོ་བོ་ལ། །ལམ་གྱི་ཆོས་ཐམས་ཅད་ཀྱི་མཆོག་གང་ལགས་ཞུས་པས། ཇོ་བོའི་ཞལ་ནས། མཁས་པའི་མཆོག་བདག་མེད་རྣམ་གཉིས་ཀྱི་དོན་རྟོགས་པ་ཡིན། བཙུན་པའི་མཆོག་སེམས་རྒྱུད་དུལ་བ་ཡིན། ཡོན་ཏན་གྱི་མཆོག་ཕན་སེམས་ཆེ་བ་ཡིན། གདམས་ངག་གི་མཆོག་རྟག་ཏུ་རང་སེམས་ལ་ལྟ་བ་ཡིན། གཉེན་པོའི་མཆོག་གང་ཡང་རང་བཞིན་མེད་པར་ཤེས་པ་ཡིན། སྤྱོད་པའི་མཆོག་འཇིག་རྟེན་དང་མི་མཐུན་པ་ཡིན། དངོས་གྲུབ་ཀྱི་མཆོག་ཉོན་མོངས་པ་ཇེ་ཆུང་ལ་སོང་བ་ཡིན། གྲུབ་རྟགས་ཀྱི་མཆོག་འདོད་པ་ཇེ་ཆུང་ལ་སོང་བ་ཡིན། སྦྱིན་པའི་མཆོག་མ་ཆགས་པ་ཡིན། ཚུལ་ཁྲིམས་ཀྱི་མཆོག་སེམས་ཞི་བ་ཡིན། བཟོད་པའི་མཆོག་དམན་ས་བཟུང་བ་ཡིན། བརྩོན་འགྲུས་ཀྱི་མཆོག་བྱ་བ་ཐོང་བ་ཡིན། བསམ་གཏན་གྱི་མཆོག་བློ་མ་བཅོས་པ་ཡིན། ཤེས་རབ་ཀྱི་མཆོག་གང་ལ་ཡང་དེར་འཛིན་མེད་པ་ཡིན། ཞེས་སོགས་གསུངས། ཡང་རིག་འཛིན་འཇིགས་མེད་གླིང་པའི་ཞལ་ནས་ཀྱང་། ཆོག་ཤེས་ལ་སྦྱིན་པའི་ཕར་ཕྱིན་གནས། །དེ་ཡི་ངོ་བོ་གཏོང་སེམས་ཡིན། །དཀོན་ཅོག་གིས་མ་ཁྲེལ་ན་ཚུལ་ཁྲིམས་ཡོད། །དྲན་རིག་མ་ཉམས་པ་བཟོད་པའི་མཆོག །ཀུན་ཀྱི་གྲོགས་སུ་བརྩོན་འགྲུས་དགོས། །སྣང་ཞེན་ལྷར་སྒོམ་བསམ་གཏན་ཏེ། །འཛིན་ཞེན་རང་གྲོལ་ཤེས་རབ་བོ། །དེ་ལ་བསམ་དང་བསམ་བྱེད་མེད། །ཐ་མལ་མ་ཡིན་ངེས་ཤེས་བྲལ། །མྱ་ངན་འདས་ཞི་དམ་པའོ། །འདི་ནི་ཀུན་ལ་བརྗོད་མི་བྱ། །སེམས་ཀྱིས་དམ་པར་ཟུང་ཞིག་གུ། །ཞེས་གསུངས། དེ་ལྟར་ཕ་རོལ་ཏུ་ཕྱིན་པ་དྲུག་ལ་སོགས་པ་བྱང་ཆུབ་སེམས་དཔའི་གཞུང་ལམ་རྒྱ་ཆེན་པོ་དེ་ཐམས་ཅད་མདོ་ཧྲིལ་གྱིས་དྲིལ་ན་སྟོང་ཉིད་སྙིང་རྗེའི་སྙིང་པོ་ཅན་ཞིག་ལ་འུབ་ཀྱིས་འདུས་པ་ཡིན་ཏེ། དཔལ་ས་ར་ཧ་པའི་དོ་ཧ་ལས་ཀྱང་། སྙིང་རྗེ་དང་བྲལ་སྟོང་པ་ཉིད་ལྟ་བ། །དེས་ནི་ལམ་མཆོག་རྙེད་པ་མ་ཡིན་ཏེ། །གལ་ཏེ་སྙིང་རྗེ་འབའ་ཞིག་བསྒོམ་ན་ཡང་། །འཁོར་བ་འདིར་གནས་ཐར་བ་ཡོད་དམ་ཅི། །གང་ལ་གཉིས་པོ་ཡོད་པར་གྱུར་བ་དེ། །སྲིད་པར་མི་གནས་མྱ་ངན་འདས་མི་གནས། །ཞེས་གསུངས། ཤེས་རབ་ཀྱིས་སྲིད་པ་ལ་མི་གནས་པ་དང་སྙིང་རྗེས་མྱ་ངན་ལས་འདས་པ་གཉིས་ཀར་མི་གནས་པ་ནི། མི་གནས་པའི་མྱང་འདས་རྫོགས་པའི་སངས་རྒྱས་ཀྱི་གོ་འཕང་ཡིན་ནོ། །དེ་བཞིན་དུ་མགོན་པོ་ཀླུ་སྒྲུབ་ཀྱི་ཞལ་ནས། སྟོང་ཉིང་སྙིང་རྗེའི་སྙིང་པོ་ཅན། བྱང་ཆུབ་སྒྲུབ་པ་ཁ་གཅིག་ལའོ། །ཞེས་དང་། ཇོ་བོ་རྗེ་ལྷ་གཅིག་ལ་འབྲོམ་སྟོན་པས་ཆོས་ཐམས་ཅད་ཀྱི་མཐར་ཐུག་གང་ལགས། ཞུས་པས། ཆོས་ཐམས་ཅད་ཀྱི་མཐར་ཐུག་སྟོང་ཉིད་སྙིང་རྗེ་སྙིང་པོ་ཅན་མེ་དང་ཚ་བ་ལྟར་འབྲལ་མི་ཤེས་པ་ཡིན་གསུངས། དཔེར་ན་འཇིག་རྟེན་ན་སྨན་དཔའ་བོ་ཆིག་ཐུབ་བྱ་བ་ནད་ཐམས་ཅད་ཀྱི་གཉེན་པོར་འགྲོ་བ་ཞིག་ཡོད་པ་ཡིན། དཔེ་དེ་བཞིན་དུ་སྨན་དཔའ་བོ་ཆིག་ཐུབ་ལྟ་བུ། ཆོས་ཉིད་སྟོང་པ་ཉིད་ཀྱི་དོན་རྟོགས་ན་ཉོན་མོངས་པ་ཐམས་ཅད་ཀྱི་གཉེན་པོར་འགྲོ་བ་ཡིན་གསུངས། འོ་ན་སྟོང་ཉིད་རྟོགས་ཟེར་བའི་སྒོམ་ཆེན་དུ་ཁས་འཆེ་བ་ཀུན་ཀྱི་ཆགས་སྡང་གཉིས་སྔར་བཞིན་ཁ་མ་བྲི་བར་གདའ་བ་ཅི་ལགས་ཞུས་པས། ཇོ་བོའི་ཞལ་ནས་དེ་ཀུན་ཁ་སྟོང་དུ་སོང་བ་ཡིན། སྟོང་པ་ཉིད་ཀྱི་དོན་གཤའ་མར་ཇི་བཞིན་རྟོགས་ན། ལུས་ངག་ཡིད་གསུམ་གྱི་བསམ་སྤྱོད་ཐམས་ཅད་རས་བལ་རྡོག་པས་མནན་པའམ། ཕྱེ་ཐུག་ལ་ཟོ་མར་སྐྱུར་བ་བཞིན་དུ་འགྲོ། སློབ་དཔོན་ཨཱརྱ་དེ་བའི་ཞལ་ནས། ཆོས་རྣམས་ཀུན་ཀྱི་གནས་ལུགས་སྟོང་པར་འདུག་གམ་མི་འདུག་སྙམ་དུ་དོན་འགྱུར་གྱི་ཐེ་ཚོམ་ཟོས་པ་ཙམ་གྱིས་ཀྱང་སྲིད་པ་ཧྲུལ་པོར་འགྲོ་བར་གསུངས། དེས་ན་སྟོང་པ་ཉིད་ཀྱི་དོན་ཕྱིན་ཅི་མ་ལོག་པ་བླ་མའི་གདམས་ངག་ཇི་བཞིན་པ་ཞིག་རྟོགས་ན་སྨན་དཔའ་བོ་ཆིག་ཐུབ་དང་མཚུངས་ཏེ། སྦྱིན་སོགས་ཐར་བ་སྒྲུབ་པའི་ལམ་གྱི་ཆོས་ཐམས་ཅད་སྟོང་ཉིད་རྟོགས་པ་དེའི་ཁོང་ན་ཡོད་གསུངས། སྟོང་པ་ཉིད་རྟོགས་པའི་ཁོང་ན་ཐར་བ་སྒྲུབ་པའི་ལམ་གྱི་ཆོས་ཐམས་ཅད་ཇི་ལྟར་ཡོད་ཞུས་པས། ཇོ་བོའི་ཞལ་ནས། ལམ་གྱི་ཆོས་ཐམས་ཅད་ཕ་རོལ་ཏུ་ཕྱིན་པ་དྲུག་ཏུ་འདུས་ཏེ། སྟོང་པ་ཉིད་ཀྱི་དོན་ཕྱིན་ཅི་མ་ལོག་པ་ཞིག་རྟོགས་ན། ཕྱི་ནང་གི་དངོས་པོ་མཐའ་དག་ལ་ཞེ་འདོད་འཛིན་ཆགས་མེད་པས་སྦྱིན་པའི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། འཛིན་ཆགས་མེད་པ་ལ་མི་དགེ་བའི་དྲི་མས་མི་གོས་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། དེ་ལ་ང་དང་ང་ཡིར་འཛིན་པའི་ཁོང་ཁྲོ་མེད་པས་བཟོད་པའི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། དེ་རྟོགས་པའི་དོན་ལ་སེམས་མངོན་པར་སྤྲོ་བ་དང་ལྡན་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། སྟོང་པ་ཉིད་ཀྱི་དོན་ལ་རྩེ་གཅིག་ཏུ་སེམས་པ་དེ་ལ་དབང་པོ་ཡུལ་ཀུན་ལ་འཇུག་ཀྱང་མཉམ་ཉིད་ལས་མི་གཡོ་བར་དངོས་པོར་འཛིན་པའི་གཡེང་བ་དང་བྲལ་བས་ཆོས་ཀུན་ཀྱི་རང་བཞིན་མཐོང་བ་ལ་གནས་པས་བསམ་གཏན་གྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། ཐབས་ཀྱི་སྤྱོད་པ་གང་ལ་ཡང་རང་བཞིན་ཕྱིན་ཅི་མ་ལོག་པ་འཁོར་གསུམ་དུ་རྟོག་པའི་ཡིད་དང་བྲལ་བས་ཆོས་ཀུན་མ་བཀག་པ་གསལ་ཞིང་དངོས་པོ་མཚན་མ་ལས་ཡོངས་སུ་འདས་པ་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད་གསུངས། འོ་ན་དོན་རྟོགས་པ་གཅིག་ལ་སྟོང་པ་ཉིད་ཀྱི་ལྟ་སྒོམ་ཁོ་ནས་འཚང་རྒྱ་བ་ལགས་སམ་ཞུས་པས། འདི་ལྟར་སྣང་ཚོད་གྲགས་ཚོད་ཕྱི་ནང་དངོས་པོ་འདི་ཐམས་ཅད་རང་གི་སེམས་ལས་མ་བྱུང་བ་མེད། སེམས་ཀྱི་ངོ་བོ་རིག་པ་དང་སྟོང་པ་གཉིས་མེད་དུ་རྟོགས་པ་དེ་ལྟ་བ་ཡིན། དེ་ལ་མ་ཡེངས་པར་དྲན་པ་རྒྱུན་ཆགས་སུ་གནས་པ་དེ་སྒོམ་པ་ཡིན། དེའི་ངང་ནས་སྒྱུ་མ་ལྟ་བུའི་བསོད་ནམས་དང་ཡེ་ཤེས་ཀྱི་ཚོགས་གཉིས་གསོག་པ་དེ་སྤྱོད་པ་ཡིན། དེ་དེ་ལྟར་ཉམས་འོག་ཏུ་ཚུད་ནས་ཉམས་སུ་ལེན་ཤེས་པ་ཞིག་ཡོད་ན་སྒོམ་དེ་ཉིད་རྨི་ལམ་དུ་འོང་། རྨི་ལམ་དུ་བྱུང་ན་འཆི་ཁར་འོང་། འཆི་ཁར་བྱུང་ན་དེའི་མཚམས་སྦྱར་ནས་བར་དོར་འོང་། བར་དོར་བྱུང་ན་དེས་གྲོལ་ཏེ་འཁོར་བར་ཕྱི་ཕྱག་འཚལ་བས་མཆོག་གི་དངོས་གྲུབ་ཐོབ་ངེས་པ་ཡིན་གསུངས། དེས་ན་རྒྱལ་བ་རྫོགས་པའི་སངས་རྒྱས་བཅོམ་ལྡན་འདས་ཀྱིས་དུག་གསུམ་འདུལ་བའི་གཉེན་པོ་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་ཐམས་ཅད་ཀྱང་། བྱང་ཆུབ་ཀྱི་སེམས་སམ་ཡང་ན་སྟོང་ཉིད་སྙིང་རྗེའི་སྙིང་པོ་ཅན་འདི་རྒྱུད་ལ་སྐྱེ་བའི་ཐབས་སུ་གསུངས་པ་ཡིན། བྱང་ཆུབ་ཀྱི་སེམས་རིན་པོ་ཆེ་སྟོང་ཉིད་སྙིང་རྗེའི་སྙིང་པོ་ཅན་འདི་དང་བྲལ་སོང་ན། ལྟ་སྒོམ་གྱི་ཆོས་ཅི་ཙམ་ཟབ་ཟབ་འདྲ་ཡང་འཁོར་བ་ལས་ཐར་བ་དང་རྫོགས་པའི་སངས་རྒྱས་ཐོབ་པ་ལ་ཅི་ཡང་མི་ཕན། ཐབས་བསྐྱེད་པའི་རིམ་པ་ལྷ་སྒོམ་པ་དང་ཤེས་རབ་རྫོགས་རིམ་ལ་རླུང་གི་བྱེད་རྩོལ་སོགས་གསང་སྔགས་ཀྱི་ཉམས་ལེན་དེ་དག་རྣམས་ཀྱང་། བྱང་ཆུབ་ཀྱི་སེམས་ཀྱིས་ཟིན་ན་ཚེ་འདིར་རྫོགས་པའི་སངས་རྒྱས་ཐོབ་པའི་རྒྱུར་འགྲོ་བ་ཡིན་ཡང་། བྱང་ཆུབ་ཀྱི་སེམས་དང་བྲལ་ན་མུ་སྟེགས་པའི་ལམ་དང་ཁྱད་པར་མེད། ཕྱི་རོལ་མུ་སྟེགས་པ་རྣམས་ལའང་ལྷ་བསྒོམ་པ་སྔགས་བཟླ་བ། རྩ་རླུང་སྒོམ་པ། རྒྱུ་འབྲས་ལ་སྤང་བླང་བྱེད་པ་སོགས་དུ་མ་ཡོད་ཀྱང་། དཀོན་མཆོག་གསུམ་ལ་སྐྱབས་འགྲོ་དང་བྱང་ཆུབ་མཆོག་ཏུ་སེམས་བསྐྱེད་གཉིས་པོ་འདི་མེད་པས་འཁོར་བའི་གནས་ལས་ཐར་མི་ནུས་པ་ཡིན། དེས་ན་དགེ་བཤེས་ཁ་རག་སྒོམ་ཆུང་གི་ཞལ་ནས་ཀྱང་། སྐྱབས་འགྲོ་ནས་བཟུང་སྟེ་སྔགས་ཀྱི་བར་དུ་སོར་བྱང་སྔགས་གསུམ་གྱི་སྡོམ་པ་ཐམས་ཅད་བླངས་ཀྱང་འཇིག་རྟེན་པའི་ཆོས་ལ་བློ་མ་ལོག་ན་ཕན་མེད། དུས་རྒྱུན་དུ་གཞན་སློབ་མ་ལ་ཆོས་འཆད་ཀྱང་རང་གི་ང་རྒྱལ་ནང་ནས་མ་ཞི་ན་ཕན་མེད། ལམ་གཞན་ནས་ཅི་འདྲ་ཡར་སྐྱེད་བཏོན་ཀྱང་སྐྱབས་འགྲོའི་ཆོས་གཞུག་ཤོར་ན་ཕན་མེད། ཉིན་མཚན་མེད་པར་ཁ་ཏོན་དགེ་སྦྱོར་ལ་འབད་ཀྱང་བྱང་ཆུབ་སེམས་ཀྱིས་མ་ཟིན་ན་ཕན་མེད། ཅེས་གསུངས། སྐྱབས་འགྲོ་དང་སེམས་བསྐྱེད་གཉིས་པོ་འདིའི་གཞི་ལེགས་པར་མ་ཟིན་པར་ཆོས་ལ་ཐོས་བསམ་སྒོམ་གསུམ་རྒྱ་གང་ཆེ་བྱེད་ལོ་བྱས་ཀྱང་། དཔེར་ན་དགུན་ཁའི་འཁྱགས་རོམ་གྱི་སྟེང་དུ་མཁར་བརྩེགས་དགུ་ཡོད་པ་བཞེངས་ཏེ། དེ་ལ་ཞལ་བ་དང་རི་མོ་ལ་སོགས་པའི་རྣམ་འགྱུར་བྱས་པ་དང་འདྲ་སྟེ་ཕུགས་སུ་སྙིང་པོ་ཅི་ཡང་མེད། དེས་ན་སྐྱབས་འགྲོ་དང་སེམས་བསྐྱེད་གཉིས་པོ་འདི་ཆོས་གནད་ཆུང་དང་ངན་པའམ། ལས་དང་པོ་བའི་ཆོས་ཡིན་སྙམ་དུ་གལ་ཆུང་མི་བྱེད་པར། ལམ་ཐམས་ཅད་ཀྱི་སྦྱོར་དངོས་རྗེས་གསུམ་སྐྱབས་འགྲོ་དང་སེམས་བསྐྱེད་འདི་གཉི་གའི་ཁོངས་ནས་རྫོགས་པ་ཞིག་བྱེད་དགོས་པས། ལམ་ལ་སློབ་པ་པོ་གང་ཟག་བཟང་ངན་མཐོ་དམན་ཐམས་ཅད་ནས་འདི་ཁོ་ན་ལ་རྩལ་དུ་བཏོན་ནས་སྦྱང་བར་བྱེད་པ་གལ་ཆེའོ། །ཁྱད་པར་བླ་མ་དང་སེར་མོ་བ་ལྟ་བུ་མཆོད་གནས་ཀྱི་གྲལ་ན་བཞུགས་པའི་དད་ཟས་དང་གཤིན་དཀོར་ཟ་བ་དང་། ཤི་བོའི་ཡར་འདྲེན་བྱེད་པ་རྣམས་ལ་ནི། རྒྱུད་ན་བྱང་ཆུབ་ཀྱི་སེམས་བཅོས་མ་མ་ཡིན་པ་ཞིག་མེད་པའི་ཐབས་མེད། བྱང་ཆུབ་ཀྱི་སེམས་དང་བྲལ་ན་ཆོ་ག་དང་སྒྲིབ་སྦྱོང་སོགས་ཇི་ལྟར་བྱས་ཀྱང་ཤི་གསོན་སུ་ལ་ཡང་ཕན་མི་ཐོགས། གཞན་དོན་ལྟར་སྣང་བ་དེ་ཡང་ཕུགས་སུ་རང་འདོད་ཁོ་ན་དང་འདྲེས་པས། རང་ལ་ཡང་དཀོར་སྒྲིབ་དང་ཉེས་པ་མི་ཟད་པ་བསྐྱེད་ཅིང་ཕྱི་མ་ངན་སོང་དུ་འགྲོ་བ་ལས་འོས་མེད་པ་ཡིན། དེས་ན་གང་ཟག་ཞིག་ལ་ཡང་། རྩལ་གྲུབ་རྟགས་ཀྱིས་ནམ་མཁའ་ལ་བྱ་ལྟར་འཕུར་བ། ས་འོག་ཏུ་བྱི་ལྟར་འཛུལ་བ། རི་བྲག་ལ་ཟང་ཐལ་དུ་འགྲོ་བ། ཆུ་ནང་ལ་ཉ་ལྟར་འཕྱོ་བ། མངོན་ཤེས་ཐོགས་པ་མེད་པ། རྡོ་ལ་ཕྱག་ཞབས་ཀྱི་རྗེས་འཇོག་པ་ལ་སོགས་ངོ་མཚར་གྱི་རྣམ་གྲངས་ཇི་ལྟ་བུ་ཡོད་ཀྱང་རྒྱུད་ལ་བྱང་ཆུབ་ཀྱི་སེམས་མེད་པར་འདུག་ན། དེ་ཐུན་མོང་གི་གྲུབ་པ་ཐོབ་པའི་མུ་སྟེགས་པའམ་ཡང་ན་གདོན་ཆེན་པོ་ཞིག་གིས་རྒྱུད་བརླམས་པ་གཉིས་ལས་འགྲོ་ས་མེད། དེ་ལྟ་བུ་དེ་ལ་དང་པོ་བླུན་དད་ཀྱིས་རྗེས་སུ་འབྲངས་ནས་མོས་གུས་དང་འབུལ་བ་སོགས་བྱས་ཀྱང་། དེ་ལ་བྱང་ཆུབ་ཀྱི་སེམས་མེད་པས་ཐར་ལམ་རྣམ་དག་སྟོན་མི་ནུས་པས་མཐར་རང་གཞན་གཉིས་ཀ་ཕུང་བ་ལས་མེད། གང་ལ་བྱང་ཆུབ་ཀྱི་སེམས་རིན་པོ་ཆེ་ཡང་དག་པ་ཞིག་རྒྱུད་ལ་ཡོད་པར་འདུག་ན། རྩལ་གྲུབ་རྟགས་སོགས་ཡོན་ཏན་གཞན་ཅི་ཡང་མེད་ཀྱང་དེ་ལ་གང་འབྲེལ་དོན་དང་ལྡན་པ་ཡིན། འོན་ཀྱང་བྱང་ཆུབ་སེམས་དཔའ་གང་ན་ཡོད་མི་ཤེས། ཤན་པ་དང་སྨད་འཚོང་མ་ལ་སོགས་རིགས་ངན་པའི་ཁྲོད་ན་ཡང་ཐབས་ལ་མཁས་པའི་མཛད་པའི་སྒོ་ནས་བྱང་ཆུབ་སེམས་དཔའ་དུ་མ་ཡོད་པར་གསུངས། དེས་ན་གང་ཟག་གཞན་གྱི་རྒྱུད་ན་བྱང་ཆུབ་ཀྱི་སེམས་ཡོད་པ་དང་མེད་པ་ཤེས་དཀའ་བས། བཅོམ་ལྡན་འདས་ཀྱིས་ཀྱང་། ང་དང་ང་འདྲ་བ་མ་གཏོགས་གང་ཟག་གི་ཚོད་གང་ཟག་གིས་མི་བཟུང་། ཞེས་གསུངས། དེས་ན་རང་རྒྱུད་ལ་བྱང་ཆུབ་ཀྱི་སེམས་རིན་པོ་ཆེ་གང་གིས་སྐྱེད་པའི་ལྷ་དང་བླ་མ་དགེ་བའི་གྲོགས་པོ་ལ་སོགས་པ་དེ་ལ་སངས་རྒྱས་དངོས་ཀྱི་འདུ་ཤེས་བཞགརང་རྒྱུད་ལ་ཡང་གནས་ལུགས་ཀྱི་དོན་རྟོགས་སྙམ་པ་དང་། མངོན་ཤེས་དང་། ཏིང་ངེ་འཛིན་ཐོབ་པ། ཡི་དམ་ལྷའི་ཞལ་མཐོང་བ་ལ་སོགས་པ་ལམ་རྟགས་ཀྱི་ཡོན་ཏན་ལྟར་སྣང་བ་ཅི་ལྟ་བུ་བྱུང་ཡང་དེ་ལ་བརྟེན་ནས་འཕོ་འགྱུར་མེད་པའི་བྱམས་སྙིང་རྗེ་བྱང་ཆུབ་ཀྱི་སེམས་གོང་འཕེལ་དུ་འགྲོ་བར་འདུག་ན། དེ་ཉིད་ཡོན་ཏན་ཡིན་པར་ཐག་བཅད། གལ་ཏེ་དེ་དག་ལ་བརྟེན་ནས་བྱམས་སྙིང་རྗེ་བྱང་ཆུབ་ཀྱི་སེམས་འགྲིབ་པར་འདུག་ན། ལམ་རྟགས་བཟང་པོ་ལྟར་དུ་སྣང་བ་དེ་དག་ཀྱང་བདུད་ཀྱི་བར་ཆད་དམ་ཕྱིན་ཅི་ལོག་གི་ལམ་ཡིན་པར་གདོན་མི་ཟ། ཁྱད་པར་གནས་ལུགས་ཀྱི་རྟོགས་པ་བཅོས་མ་མ་ཡིན་པ་དེ་རྒྱུད་ལ་སྐྱེས་ན། ཡུལ་གོང་མ་ལ་དད་པ་དང་དག་སྣང་། འོག་མ་ལ་བྱམས་དང་སྙིང་རྗེ་ལ་སོགས་པ་ཐུན་མོངས་མ་ཡིན་པ་ཞིག་སྐྱེ་མི་འོང་བའི་ཐབས་མེད་དེ། མཉམ་མེད་དྭགས་པོ་རིན་པོ་ཆེས། རྗེ་བཙུན་མི་ལ་ལ། ཚོགས་པ་སྐྱོང་བའི་དུས་ནམ་ཡིན་ཞུས་པས། ཇི་ཞིག་ན་ཁྱེད་རང་གི་སེམས་ཀྱི་ངོ་བོ་ད་ལྟའི་འདི་མ་ཡིན་པ་ཐེ་ཚོམ་ཐམས་ཅད་དང་བྲལ་བ་ཞིག་ལྷག་གེར་མཐོང་འོང་སྟེ། དེའི་དུས་སུ་ཕ་རྒན་ང་ལ་ཡང་སངས་རྒྱས་དངོས་ཀྱི་འདུ་ཤེས་ཐུན་མོངས་མ་ཡིན་པ་ཞིག་སྐྱེ་ཞིང་། སེམས་ཅན་ལ་བྱམས་སྙིང་རྗེ་ཡང་བཅོས་མ་མ་ཡིན་པ་ཞིག་སྐྱེ་ངེས་པས། དེའི་དུས་སུ་ཚོགས་པ་སྐྱོངས་ཤིག་གསུངས། དེས་ན་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ལ་གཞི་བཅོལ་ནས་ཆོས་ལ་ཐོས་བསམ་སྒོམ་གསུམ་ཡ་མ་བྲལ་བར་ཉམས་སུ་ལེན་དགོས། དང་པོ་ཐོས་དགོས་མ་ཐོས་ན་ཤེས་པའི་དུས་མི་འོང་། བར་དུ་ཤེས་དགོས་མ་ཤེས་ན་སྒོམ་འོང་རྒྱུ་མེད། ཐ་མ་སྒོམ་དགོས་མ་བསྒོམས་ན་གྲོལ་འོང་རྒྱུ་ཞིག་མེད། དེས་ན་དང་པོ་ཐོས་པས་སྒྲོ་འདོགས་མ་བཅད་ན་ཉམས་སུ་ལེན་མི་ཤེས་པས། ཇི་སྐད་དུ། ཐོས་པ་མེད་པའི་སྒོམ་པ་དེ། །ལག་རྡུམ་བྲག་ལ་འཛེགས་བ་འདྲ། །ཞེས་གསུངས། ཐོས་པས་སྒྲོ་འདོགས་གཅོད་ཟེར་བ་དེ་ཡང་ཤེས་བྱའི་ཆོས་རྒྱ་ཆེ་ཞིང་གྲངས་མང་བ་ཐམས་ཅད་ཤེས་པར་བྱ་མི་དགོས་ཏེ། དུས་ནི་ཡུན་ཐུང་རིག་པའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པས་ཆུ་ལས་འོ་མ་ལེན་པ་བཞིན། །གང་ཞིག་གཅེས་པ་དེ་ནི་ལེན་པ་གྱིས། །གསུངས་པ་ལྟར། ཤེས་བྱ་རིག་པའི་གནས་དེ་ཐམས་ཅད་སྙིགས་དུས་ཚེ་ཐུང་གཅིག་ལ་ཤེས་ཀྱང་མི་ནུས། དེས་ན་རང་གིས་གང་ཉམས་སུ་བླང་བར་བྱ་རྒྱུའི་གང་ཟག་གཅིག་འཚང་རྒྱ་བའི་ལམ་གྱི་རིམ་པའི་ཆོས་དེ་ཐོག་མཐའ་བར་གསུམ་དུ་སྒྲུབ་པའི་ཚུལ་ཐམས་ཅད་མ་ནོར་བར་ཤེས་ཤིང་། དེ་ལ་བསམ་པས་སྒྲོ་འདོགས་ཐམས་ཅད་ཆོད་དགོས་པ་ཡིན། སྔོན་ཇོ་བོ་རྗེ་སྙེ་ཐང་ན་བཞུགས་པའི་ཚེ། ཞང་སྣ་ཆུང་སྟོན་པ་དང་། ཀྱུང་སྟོན་པ་དང་། ལྷང་ཚང་སྟོན་པ་གསུམ་གྱིས་ཚད་མའི་གྲུབ་མཐའ་ཞུས་པས། ཇོ་བོའི་ཞལ་ནས། ཕྱི་རོལ་མུ་སྟེགས་པ་དང་། ནང་པ་སངས་རྒྱས་པའི་གྲུབ་མཐའ་མང་དུ་ཡོད། དེ་ཐམས་ཅད་རྣམ་པར་རྟོག་པའི་ཕྲེང་བ་ཡིན། རྣམ་རྟོག་བགྲང་གིས་མི་ལང་དགོས་པ་མེད། ཚེ་ལ་ལོངས་མེད་པས་སྙིང་པོའི་དོན་བསྡུ་བའི་དུས་ཡིན་གསུངས། ཞང་སྣ་ཆུང་སྟོན་པས། སྙིང་པོའི་དོན་ཇི་ལྟར་བསྡུ་ཞུས་པས། ཇོ་བོའི་ཞལ་ནས། ནམ་མཁའ་དང་མཉམ་པའི་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་བྱང་ཆུབ་ཀྱི་སེམས་སྦྱོང་། དེ་རྣམས་ཀྱི་དོན་དུ་ཚོགས་གཉིས་གསོག་པ་ལ་དུས་རྒྱུན་དུ་འབད་པར་གྱིས། ཚོགས་གཉིས་བསགས་པ་དེ་ལས་བྱུང་བའི་དགེ་བའི་རྩ་བ་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་རྫོགས་པའི་བྱང་ཆུབ་ཏུ་བསྔོས། དེ་ཐམས་ཅད་ཀྱི་རང་བཞིན་འཁོར་གསུམ་གྱི་འཛིན་པ་དང་བྲལ་བའི་སྟོང་པ་མཚན་ཉིད་རྨི་ལམ་སྒྱུ་མ་ལྟ་བུར་ཤེས་པར་གྱིས་གསུངས། དེ་ལྟར་ཉམས་ལེན་སྙིང་པོའི་གནད་དུ་བསྡུ་མ་ཤེས་ན་ཤེས་ཤེས་གོ་གོ་རིག་རིག་མང་པོས་ཕན་པ་ཅི་ཡང་མེད་དེ། སྔོན་ཇོ་བོ་རྗེ་ལྷ་གཅིག་བོད་དུ་ཕེབས་པའི་ཚེ། ལོ་ཆེན་རིན་ཆེན་བཟང་པོ་ཁོང་གིས་ཐུགས་དགོངས་ལ་ཡང་ཇོ་བོ་ལ་ཆོས་ཞུ་རྒྱུ་མེད། ཐེག་ཆེན་གསང་སྔགས་ཀྱི་ཆོས་ལའང་ང་རང་མཁས། འོན་ཀྱང་ང་བོད་ཀྱི་མཁས་ཆེན་ཞིག་ཡིན། ཁོང་རྒྱ་གར་གྱི་པཎྜི་ཏ་རྩོད་མེད་ཡིན་པས་སྣེ་ལེན་བཟང་བ་ཞིག་བྱ་སྙམ་དུ་དགོངས་ནས། ཁོ་རང་གིས་མཐོ་ལྡིང་དུ་གསང་སྔགས་ཀྱི་ལྷ་ཁང་སུམ་ཐོག་ཅིག་བཞེངས་པ་དེ་ཇོ་བོ་ལ་གཟིགས་སུ་ཕུལ་ཞིང་སྣེ་ལེན་བྱས་ནས་ཇོ་བོ་གདན་དྲངས་པས། ཇོ་བོས་ལྷ་དེ་རྣམས་ལ་རང་རང་གི་རྒྱུད་དང་། སྒྲུབ་ཐབས་དང་མཐུན་པའི་བསྟོད་པ་ཚིག་བཞི་པ་རེ་འཕྲལ་ལ་མཛད་ཅིང་དབུ་བཏུད་པ་རེ་མཛད། ལོ་ཙཱ་བ་རིན་ཆེན་བཟང་པོས་བསྟོད་པ་དེ་རྣམས་ཟིན་ནས་རྟོག་དཔྱོད་མཛད་པས་འདི་ནི་གསང་སྔགས་ཀྱི་བདག་པོ་ཆེན་པོ་ཞིག་འདུག་སྙམ་ནས་ཆོས་ཀྱི་དྲི་གཏུགས་མཛད་པས་། ཇོ་བོས་ལོ་ཙཱ་བ་ལ། ཆོས་འདི་དང་འདི་ལྟ་བུ་མཁྱེན་ནམ་ཞེས་རིམ་པར་དྲིས་པས་མི་མཁྱེན་པ་མེད་པ་ལྟར་འདུག་པས། ཇོ་བོ་མགུ་སྟེ་ངོ་མཚར་ཆེ། ཁྱེད་ལྟ་བུའི་མཁས་པ་བོད་ན་བཞུགས་བཞིན་དུ་ཁོ་བོ་བོད་དུ་འོང་མི་དགོས་པར་འདུག་གསུངས། དེ་ནས་དེའི་ནུབ་མོ་ཡང་ལྷ་ཁང་དེར་བཞུགས། ལོ་ཙཱ་བ་རིན་ཆེན་བཟང་པོས་སྲོད་ལ་འོག་ཁང་དུ་བསྐྱེད་རྫོགས་བསྒོམས། གུང་ལ་བར་ཁང་དུ་བསྒོམས། ཐོ་རང་སྟེང་ཁང་དུ་བསྒོམས་པས། དེ་ལ་ཡང་ཅུང་ཟད་མ་མཉེས། ནང་པར་ཡང་ཆོས་ཀྱི་དྲི་བ་མང་དུ་མཛད་པས། ཇོ་བོའི་ཞལ་ནས། སླར་ཡང་ལོ་ཙཱ་བ་ཆོས་ཀྱི་མཁྱེན་པ་ཆེ་བར་གདའ་ཡིས་ཆོས་དེ་ཐམས་ཅད་སྟན་ཐོག་གཅིག་ཏུ་ཉམས་སུ་ལེན་ན་ཅི་ལྟར་བྱེད་གསུངས་པས། ལོ་ཙཱ་བས་རང་རང་གི་གཞུང་སྒྲུབ་ཐབས་ནས་ཇི་ལྟར་བཤད་པ་ལྟར་ཉམས་སུ་ལེན་པ་ཡིན་ཞུས་པས། ཇོ་བོ་མ་དགྱེས་ཏེ། ལོ་ཙཱ་བ་རུལ། ང་བོད་དུ་འོང་དགོས་པར་འདུག་གསུངས། ཞལ་འཛུམ་ནག་ཏིང་གིས་སོང་། འོ་ན་ཇི་ལྟར་བྱེད་ཞུས་པས། ཆོས་ཐམས་ཅད་གནད་ཀྱི་མན་ངག་གཅིག་ཏུ་བསྡུས་ནས་ཐབས་གཅིག་གི་སྟེང་དུ་ཐབས་མ་ཚང་བ་མེད་པས་ཉམས་སུ་ལེན་དགོས་པ་ཡིན་གསུངས། དེས་ན་བླ་མའི་མན་ངག་གི་སྟེང་དུ་ཉམས་ལེན་གྱི་གནད་དྲིལ་བ་དེ་མ་ཤེས་པའི་ཐབས་མེད། དེ་ལྟར་ཤེས་ནས་ཉམས་སུ་མ་བླངས་ན་ཅི་ཡང་མི་ཕན་ཏེ། རྗེ་མི་ལའི་ཞལ་ནས་ཀྱང་། མི་ལྟོག་པ་ལ་ཟན་གོ་བས་མི་ཆོག་ཟ་དགོས་པ་ལྟར། ཆོས་ཤེས་པས་མི་ཕན་ཉམས་སུ་བླང་དགོས། ཞེས་གསུངས། དེ་ལྟར་ཆོས་ཉམས་སུ་བླངས་པའི་དོན་པོ་རང་རྒྱུད་ཀྱི་ཉོན་མོངས་པ་དང་བདག་འཛིན་གྱི་གཉེན་པོར་སོང་བ་ཞིག་ཡོད་དགོས་ཏེ། རྗེ་མི་ལའི་ཞལ་ནས། ཟོས་མ་ཟོས་དམར་ཆུང་བྱད་ལ་ཤེས། །ཟེར་བ་ལྟར། ཆོས་ཤེས་མ་ཤེས་དང་ཉམས་སུ་བླངས་མ་བླངས་བདག་འཛིན་དང་། ཉོན་མོངས་པའི་གཉེན་པོར་སོང་མ་སོང་གིས་ཤེས་གསུངས། དེ་བཞིན་དུ་དགེ་བཤེས་སྟོན་པ་ལ། པུ་ཏོ་བས། ཆོས་དང་ཆོས་མ་ཡིན་པའི་གནམ་ཐིག་གང་ལགས་ཞུས་པས། སྟོན་པའི་ཞལ་ནས། ཉོན་མོངས་པའི་གཉེན་པོ་འགྲོ་ན་ཆོས་ཡིན་མི་འགྲོ་ན་ཆོས་མིན། འཇིག་རྟེན་པ་ཀུན་དང་མི་མཐུན་ན་ཆོས་ཡིན། མཐུན་ན་ཆོས་མིན། རྒྱལ་བའི་བཀའ་ལུང་དང་མཐུན་ན་ཆོས་ཡིན། མི་མཐུན་ན་ཆོས་མིན། བྱ་བའི་རྗེས་བཟང་ན་ཆོས་ཡིན། རྗེས་ངན་ན་ཆོས་མིན། གསུངས། ཡང་སློབ་དཔོན་ལྕེ་སྒོམ་གྱི་ཞལ་ནས། ལས་རྒྱུ་འབྲས་ལ་ཡིད་ཆེས་པ་ནི། དབང་པོ་ཐ་མའི་ཡང་དག་པའི་ལྟ་བ་ཡིན། ཕྱི་ནང་གི་ཆོས་ཐམས་ཅད་སྣང་བ་དང་སྟོང་པ་སྣང་སྟོང་ཟུང་དུ་འཇུག་པ་དང་རིག་པ་དང་སྟོང་པ་རིག་སྟོང་ཟུང་དུ་འཇུག་པ་སྟེ་ཟུང་འཇུག་བཞིར་རྟོགས་པ་ནི། དབང་པོ་འབྲིང་གི་ཡང་དག་པའི་ལྟ་བ་ཡིན། བལྟ་བྱ་ལྟ་བྱེད་རྟོགས་པ་སྟེ་འཁོར་གསུམ་པོ་དབྱེར་མེད་པར་རྟོགས་པ་ནི། དབང་པོ་རབ་ཀྱི་ཡང་དག་པའི་ལྟ་བ་ཡིན། དམིགས་པ་རྩེ་གཅིག་པའི་ཏིང་ངེ་འཛིན་ལ་གནས་པ་ནི། དབང་པོ་ཐ་མའི་ཡང་དག་པའི་སྒོམ་པ་ཡིན། ཟུང་འཇུག་བཞིའི་ཏིང་ངེ་འཛིན་ལ་གནས་པ་ནི། དབང་པོ་འབྲིང་གི་ཡང་དག་པའི་སྒོམ་པ་ཡིན། བསྒོམ་བྱ་སྒོམ་བྱེད་ཉམས་མྱོང་གསུམ་མེད་ཅིང་མི་དམིགས་པ་ནི། དབང་པོ་རབ་ཀྱི་ཡང་དག་པའི་སྒོམ་པ་ཡིན། ལས་རྒྱུ་འབྲས་མིག་གི་འབྲས་བུ་ལྟར་སྲུང་བ་ནི། དབང་པོ་ཐ་མའི་ཡང་དག་པའི་སྤྱོད་པ་ཡིན། ཆོས་ཐམས་ཅད་རྨི་ལམ་སྒྱུ་མ་ལྟ་བུའི་ཚུལ་གྱིས་སྤྱོད་པ་ནི། དབང་པོ་འབྲིང་གི་ཡང་དག་པའི་སྤྱོད་པ་ཡིན། གཉིས་འཛིན་ཞིག་ནས་གང་ཅི་ལ་ཡང་མི་སྤྱོད་པ་ནི། དབང་པོ་རབ་ཀྱི་ཡང་དག་པའི་སྤྱོད་པ་ཡིན། བདག་འཛིན་ཉོན་མོངས་རྣམ་རྟོག་སོགས་ཇེ་ཆུང་ཇེ་ཆུང་ལ་སོང་བ་ནི། དབང་པོ་རབ་འབྲིང་ཐ་མ་གསུམ་ཀའི་ཡང་དག་པའི་དྲོད་རྟགས་ཡིན། ཞེས་གསུངས་ཤིང་། མཉམ་མེད་དྭགས་པོའི་ལམ་མཆོག་རིན་པོ་ཆེར་ཡང་འདི་དང་མཐུན་པར་གསུངས། དེས་ན་ཆོས་ཐོས་པའི་དུས་སྙིང་པོའི་གནད་བསྡུ་ཤེས་དགོས་ཏེ། ཀུན་མཁྱེན་ཆེན་པོས། ཤེས་བྱ་ནམ་མཁའི་གཟའ་སྐར་འདྲ། །བསླབ་དགོས་གནས་ལ་ཟད་པ་མེད། །ད་རེས་ཆོས་སྐུ་སྙིང་པོའི་དོན། །འགྱུར་མེད་བཙན་ས་བཟུང་ན་ལེགས། །ཞེས་གསུངས། བསམ་པའི་དུས་སྒྲོ་འདོགས་ཆོད་པ་དགོས་ཏེ། རྒྱ་གར་དམ་པ་སངས་རྒྱས་གྱི་ཞལ་ནས། བླ་མའི་གདམས་ངག་ཚོལ་བ་ལ་ཁྲ་ཚང་ནས་གཟན་ཚོལ་བ་ལྟ་བུ་ཞིག་དགོས། ཆོས་ཉན་པའི་དུས་སེམས་གཞན་དུ་མི་ཡེངས་པ་རི་དྭགས་སྒྲ་ལ་ཉན་པ་ལྟ་བུ་ཞིག་དགོས། སྒོམ་པའི་དུས་ལྐུགས་པས་རོ་མྱང་བ་ལྟ་བུ་སྨྲ་བསམ་བརྗོད་བྲལ་གྱི་དོན་ལ་གནས་པ་ཞིག་དགོས། བསམ་པའི་དུས་བྱང་བས་ལུག་འབྲེག་པ་ལྟ་བུ་ཞིག་དགོས། འབྲས་བུའི་དུས་ཉི་ཟླ་སྤྲིན་ལས་གྲོལ་བ་ལྟ་བུ་བྲི་གང་དང་བྲལ་བ་ཞིག་དགོས་གསུངས། དེས་ན་ཆོས་ལ་ཐོས་བསམ་སྒོམ་གསུམ་ཡ་མ་བྲལ་བ་དགོས་ཏེ། མཉམ་མེ་དྭགས་པོ་རིན་པོ་ཆེའི་ཞལ་ནས། ཆོས་ལ་ཐོས་བསམ་སྒོམ་གསུམ་དཀྲུག་མར་བྱེད་པ་ནི་གནད་མ་ནོར་བ་ཡིན་གསུངས། དེ་ལྟར་ཐོས་བསམ་སྒོམ་གསུམ་བྱས་པའི་འབྲས་བུ་ཡང་བྱམས་སྙིང་རྗེ་བྱང་ཆུབ་ཀྱི་སེམས་གོང་ནས་གོང་དུ་འཕེལ་ཞིང་། བདག་འཛིན་དང་ཉོན་མོངས་པ་ཇེ་ཆུང་ཇེ་ཆུང་ལ་སོང་བ་ཞིག་ནི་ངེས་པར་དགོས་པ་ཡིན་ནོ། །དེ་ལྟར་བྱང་ཆུབ་ཏུ་སེམས་བསྐྱེད་པའི་ཁྲིད་འདི་ནི་ཆོས་ཐམས་ཅད་ཀྱི་ཉིང་ཁུ། ཡོད་ན་སངས་རྒྱས་སྒྲུབ་ལ་དེས་ཆོག་ཅིང་། །མེད་ན་སངས་རྒྱས་སྒྲུབ་ལ་ཐབས་ཆགས་པ། །སངས་རྒྱས་སྒྲུབ་པའི་ས་བོན་མ་ནོར་བ། །རྣམ་དག་བྱང་ཆུབ་སེམས་མཆོག་བསྐྱེད་པར་ཤོག །ཅེས་གསུངས་པ་ལྟར་དུ། ལམ་ཐམས་ཅད་ཀྱི་སྙིང་པོ་ཡོད་ན་གཅིག་པུ་དེས་ཆོག་ངེས་པ་དང་། མེད་ན་ཐབས་ཆགས་ངེས་པའི་ཆོས་ཡིན་པས་གོ་ལོ་དང་ཐོས་ལོར་མི་བཞག་པར་སྙིང་ཐག་པ་ནས་ཉམས་སུ་ལེན་པ་གལ་ཆེའོ། །སེམས་མཆོག་བསྐྱེད་པར་རློམ་ཡང་སྐྱེས་པ་མེད། །ཕྱིན་དྲུག་ལམ་ལ་བསླབས་ཀྱང་རང་འདོད་བཅས། །བདག་དང་བདག་འདྲ་བློ་ཆུང་སེམས་ཅན་རྣམས། །བྱང་ཆུབ་སེམས་མཆོག་འབྱོངས་པར་བྱིན་གྱིས་རློབས། །ལམ་ཐམས་ཅད་ཀྱི་རྩ་བ་ཐེག་པ་ཆེན་པོ་བྱང་ཆུབ་མཆོག་ཏུ་སེམས་བསྐྱེད་པའི་ཁྲིད་དོ།། །།ཞེས་གསུངས་ཤིང་བསྔོ་བས་མཐའ་བརྒྱན་ཏེ་ཆོས་ཁྲིད་གྲོལ་སོང་ངོ་།།