བ༽ཉིན་བཅོ་ལྔ་པར་༼ཧ༽རྡོར་སེམས་སྒོམ་བཟླས་ཀྱི་ཆོས་ཁྲིད།
མཆོད་བརྗོད་སོགས་གསུངས་ནས།
ཨ༽མཚམས་སྦྱོར་གྱི་གདམས་ངག
ནམ་མཁའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པའི་ཆེད་དུ། བདག་གིས་དམ་པའི་ཆོས་ཟབ་མོ་ཉན་པར་བྱ་བསམ་པའི་ཀུན་སློང་སྔོན་དུ་གཏོང་དགོས། དེ་ལྟ་བུའི་བསམ་པ་དེ་ཉིད་ཀྱིས་མ་རྒན་སེམས་ཅན་ཐམས་ཅད་ལ་མར་ཤེས་དྲིན་དྲན་དྲིན་ལན་གཟོ་འདོད་ཀྱི་བློ་སྔོན་དུ་འགྲོ་བས། སེམས་ཅན་ཐམས་ཅད་རྫོགས་བྱང་ལ་འགོད་པའི་ཕྱིར་དུ་སེམས་བསྐྱེད་པའི་དམ་བཅའ་མི་ལྷོད་པ་དེ་བྱང་ཆུབ་སྨོན་པའི་སེམས་བསྐྱེད་ཡིན། དེ་ཡང་དོན་གཉིས་སམ་ཟུར་གཉིས་ཚང་བ་ཞིག་ཡིན་དགོས་པ་ཉིན་བཞིན་ཞུས་པ་ལྟར་རེད། དེའི་ཐོག་བྱང་ཆུབ་འཇུག་པའི་སེམས་བསྐྱེད། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་པ་ལྟར། བསམ་པ་བཟང་པོ་སྨོན་སེམས་ཙམ་གྱིས་མི་ཆོག རྒྱལ་
བའི་སྲས་ཀྱི་སྤྱོད་པ་རྒྱ་མཚོ་ལྟ་བུ་ལ་བསླབ་དགོས། དེ་ཐམས་ཅད་ཚུར་བསྡུ་ན་ཕྱིན་དྲུག་གི་ནང་དུ་འདུས་པ་ཡིན། དེས་ན་ཕ་རོལ་ཏུ་ཕྱིན་པ་དྲུག་ལ་བྱ་བ་ལག་ལེན་གྱི་སྟེང་ནས་དངོས་སུ་འཇུག་སྟེ་མ་སེམས་ཅན་ཐམས་ཅད་ལ་ཕན་བདེ་བསྒྲུབ་དགོས་ན། གཞན་ཕན་གཞི་བཅས་སྒྲུབ་པའི་བྱང་ཆུབ་སེམས་བསྐྱེད་ཐོབ་ལ་མ་ཉམས་པར། སེམས་མཆོག་བསྐྱེད་པ་མི་གཙོ་སྐྱེས་པ་གཙོ། །གསུངས་པ་ལྟར་སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་དང་། མི་འབྲལ་བའི་ཐོག་ནས་ཕྱིན་དྲུག་གི་སྤྱོད་པ་ལ་བསླབ་དགོས་པ་རེད་མ་གཏོགས། རྒྱལ་བ་སྲས་དང་བཅས་པ་བསླུས་ཤིང་རིགས་དྲུག་གི་སེམས་ཅན་ཀྱང་མགོ་གཡོག་པ་རེད། དེས་ན་རྒྱལ་བ་སྲས་དང་བཅས་པ་རྣམས་ཀྱི་མཛད་པ་རྒྱ་མཚོའི་འཇིངས་ལྟ་བུ་དཔག་པར་དཀའ་བ་ཞིག་ཡིན་ནའང་། ལམ་ལ་སློབ་པའི་གང་ཟག་ལས་དང་པོ་བས་བསམ་པ་བཟང་པོ་ནས་མགོ་བརྩམས་ཏེ། སྒོ་གསུམ་གྱི་མི་དགེ་བ་རྣམས་སྤོང་ཅི་ཐུབ་ཀྱི་སྒོ་ནས། བླང་བྱ་དཀར་པོའི་ཆོས་སྦྱིན་པ་ལ་སོགས་པ་ཕར་ཕྱིན་བཅུ་ལ་རིམ་བཞིན་བསླབས་ནས་ཚོགས་ལམ་ཆུང་ངུ་སོགས་ལམ་གྱི་རིམ་པ་ལ་ཞུགས་དགོས། དེ་ལྟ་ན་ཡང་ཐོས་བསམ་ཤེས་རབ་ཀྱི་མིག་རྒྱ་ཆེ་བ་ཞིག་མ་བསྐྱེད་ན་སྦྱིན་པ་ལ་སོགས་པ་སྔ་མ་ལྔ་ཡང་ལམ་མིན་དུ་འཕྱན་པའི་ཉེན་ཁ་ཡོད་པ་ཁར་སང་གོང་དུ་སོང་བའི་སྡུད་པའི་ལུང་དོན་ལྟར་རེད། དེས་ན་དང་པོ་ཐོས་པ་གསོག་དགོས་ཏེ། ཐོས་པ་མ་རིག་མུན་སེལ་སྒྲོན་མེ་ཡིན། །རྐུན་པོ་ལ་སོགས་མི་ཁྱེར་ནོར་གྱི་མཆོག །ཀུན་ཏུ་རྨོངས་པའི་དགྲ་འཇོམས་མཚོན་ཆ་བཞིན། །ཐབས་ཚུལ་མན་ངག་སྟོན་པ་གྲོགས་ཀྱི་མཆོག །ཅེས་གསུངས་པ་ལྟར་ཐོས་པ་གལ་ཆེ། འོན་ཀྱང་ཐོས་དོན་བསམ་དགོས་པས་གང་ཞིག་ཐོས་པ་དེའི་དོན་མ་གོ་ན། ཐོས་པ་དོན་མེད་དུ་འགྱུར་བ་ཡིན་པས་དོན་ཕྱིན་ཅི་མ་ལོག་པར་བསམ་ཞིང་ངེས་ཤེས་རང་རྒྱུད་ལ་སྐྱེས་པ་དང་། དེ་ནས་བསམ་དོན་སྒོམ་དགོས། བསམ་དོན་སྒོམ་པར་མ་བྱས་ན་ཐོས་བསམ་གཉིས་ཀ་གནས་མིན་དུ་འཁྱམས་པའི་ཉེན་ཡོད། སྒོམ་པ་མཐར་ཕྱིན་པ་ལ་གྲོལ་བ་ཐོབ་པར་དོན་གཉེར་བྱ་དགོས། དེས་ན་དང་པོ་ཉིད་ནས་མེད་ཐབས་མེད་པའི་ལམ་སྟོན་དགེ་བའི་བཤེས་གཉེན་ལ་བསྟེན་ནས་ཆོས་འཆད་ཉན་ལ་ཞུགས་དགོས་ན། བསམ་པ་རྒྱ་ཆེ་བ་བྱང་ཆུབ་ཀྱི་ཀུན་སློང་བསྐྱེད་དགོས་པར་མ་ཟད། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ཆོས་འཆད་པའི་གནས་དུས་སྟོན་འཁོར་སོགས་ཕུན་སུམ་ཚོགས་པ་ལྔ་རུ་གསལ་གདབ། དེ་ཡང་མ་ཡིན་པ་ཞིག་འདུ་ཤེས་བཙན་གྱིས་བསྒྱུར་བ་ལྟ་བུ་མ་ཡིན་པར། ཡིན་པ་ལ་ཡིན་པར་ཤེས་པའི་ངེས་ཤེས་བསྐྱེད། དེའི་ཐོག་ནས་ལམ་སྟོན་དགེ་བའི་བཤེས་གཉེན་ཞིག་བཙལ་ནས། དམ་པའི་ཆོས་ཟབ་མོ་ཉན་པའང་། དལ་འབྱོར་ཐོབ་པའི་དོན་སྒོ་རིན་ཐང་གཞལ་མེད་ཀྱི་བྱ་བ་ཞིག་ཡིན་པས་ཆོས་ཞུ་དུས་ཞུ་ལུགས་ཤེས་དགོས། གོང་དུ་བཤད་པ་ལྟར་ཆོས་ཉན་པའི་ཚེ་དུག་ལྟར་སྤང་བྱའི་ཀུན་སྤྱོད་དང་། སྨན་ལྟར་བླང་བྱའི་ཀུན་སྤྱོད་རྣམ་པ་གཉིས་ཡོད། སྤང་བྱའི་ཀུན་སྤྱོད་ལ། སྣོད་ཀྱི་སྐྱོན་གསུམ། དྲི་མ་དྲུག མི་འཛིན་པ་ལྔ། སྣོད་ཀྱི་སྐྱོན་གསུམ་ནི། ཆོས་ཐོས་པ་ཡིད་ལ་མི་འཛིན་པ་དེ་ཞབས་རྡོལ་ལྟ་བུའི་སྐྱོན། རྣ་བ་གཏད་ནས་མི་ཉན་པ་དེ་ཁ་སྦུབས་ལྟ་བུའི་སྐྱོན། ཉོན་མོངས་པ་དང་འདྲེས་བཞིན་ཉན་པ་དེ་དུག་ཅན་ལྟ་བུའི་སྐྱོན་དང་གསུམ་མོ། །དྲི་མ་དྲུག་ནི། ང་རྒྱལ་དང་མ་དད་པ་དང་དོན་གཉེར་མེད་པ་ལ་སོགས་པ་དྲི་མ་དྲུག མི་འཛིན་པ་ལྔ་ནི། ཚིག་འཛིན་ལ་དོན་མི་འཛིན་པ་ལ་སོགས་པ་སྤང་བྱའི་ཕྱོགས་མཐའ་དག་སྤངས་ནས། བླང་བྱའི་ཀུན་སྤྱོད་འདུ་ཤེས་བཞི་བསྟེན་པ་དང་། ཐབས་ཕ་རོལ་ཏུ་ཕྱིན་པ་དྲུག་དང་ལྡན་པ་དང་། སྤྱོད་ལམ་གཞན་བསྟེན་པ་ལ་སོགས་པ་དང་བཅས་ཏེ་གུས་པའི་ཚུལ་གྱིས་ཆོས་ཀྱི་ཚིག་དོན་ལ་བློ་གཞོལ་ཏེ་ཉན་དགོས། མི་ཚེ་གཅིག་གི་ནང་ལ་བསམ་ན་གཞོན་ནས་རྒས་པའི་ལོ་ཚོད་ལ་མ་ཐོན་གྱི་བར། ལས་འདི་མ་ལས་བསམ་པ་ཅི་ཡོད། གཏམ་འདི་མ་བཤད་བསམ་པ་ཅི་ཡོད། མི་ཚེ་གང་པོར་བརྒྱུགས་བརྒྱུགས་འདུར་འདུར་བའི་མཐར་སྡུག་སྡིག་པ་གཉིས་ཀྱི་ཁུར་པོ། ཕྱི་མའི་རྣམ་སྨིན་ལྕི་སྣོན་མ་གཏོགས་འདི་འགྲུབ་ནས་འདི་ཐོན་ཐལ་ཟེར་རྒྱུ་ཞིག་རང་གཞན་སུ་ལའང་མེད། དེས་ན་ད་རེས་ཆོས་ཉན་པའི་སྐལ་བ་ཐོབ་ཅིང་། གྲོལ་བ་དོན་དུ་གཉེར་བའི་ལམ་སྣེ་རྙེད་པ་འདི་ནི་མི་ཚེའི་བྱ་བ་ཐམས་ཅད་ཀྱི་ནང་གི་གལ་ཆེ་བ་བརྗོད་དུ་མེད་པ་ཞིག་ཡིན། དེ་ཡང་ཆོས་དང་འཕྲད་པ་ཙམ་གྱིས་མི་ཆོག་མི་ཚེ་ལ་རྟག་བརྟན་མེད་ཅིང་། འགལ་རྐྱེན་གྱི་འཚེ་བ་མང་བ་ཡིན་ན་དལ་རྟེན་རྙེད་པར་བཀའ་ལུགས། རྙེད་ན་ཕན་པ་ཆེ་ལུགས། ཚེ་ལ་རྟག་པ་མེད་ལུགས། འཆི་བདག་བཟློག་ཐབས་བྲལ་ཚུལ། ཤི་ཚེ་དམ་པའི་ཆོས་མ་གཏོགས་ལོངས་སྤྱོད་དང་ཉེ་དུ་གང་གིས་ཀྱང་སྐྱོབ་མི་ནུས་པ་སོགས་ལ་བསམ་ནས། རང་གི་འཁྲུལ་བ་རང་གིས་བརྟགས་ཏེ་རང་མགོ་ཆོས་ཀྱི་ཉི་མ་རང་གིས་ཐོན་པ་ཞིག་མ་བྱས་ན་གཞན་ནས་འོང་རྒྱུ་མེད་པར་ཤེས་ཏེ་དམ་པའི་ཆོས་སྒྲུབ་དགོས། སྔོན་ཆོས་རང་གིས་ཕར་བསྐྱུར་ནས་མ་བསྒྲུབས་པ་རེད་མ་གཏོགས་བསྒྲུབས་ནས་མ་འགྲུབ་པ་དང་། སྦྱངས་ནས་མ་ཤེས་པ་ཞིག་ཤེས་བྱའི་ནང་ན་མི་སྲིད། ཤེས་ནས་བསྒྲུབ་ན་ཉི་མ་རེ་རེ་ལའང་དམ་པའི་ཆོས་མང་པོ་འགྲུབ་རེད། དེས་ན་རང་གིས་མ་བསྒྲུབས་ན་ཚེ་གཅིག་གི་མི་ཚེ་སོང་ཡང་ཆོས་སྣ་གཅིག་ཀྱང་མི་འགྲུབ། དམ་ཆོས་དྲན་པ་མང་ཡང་ཤེས་པ་དཀོན། །ཐེག་མཆོག་འདོད་པ་མང་སྟེ་ཞུ་མཁན་དཀོན། །གདམས་ངག་ཞུ་མཁན་མང་སྟེ་སྒྲུབ་མཁན་ཉུང་། །ཅེས་གསུངས་པ་ལྟར་ཡིན། དེས་ན་ཐོས་པའི་ཆོས་ལ་དངོས་པོ་སྟོབས་ཞུགས་ཀྱི་རིགས་པ་ཡང་དག་གི་ལམ་ནས་ངེས་ཤེས་བསྐྱེད་ཅིང་། གང་ལ་ངེས་ཤེས་འདྲོངས་པའི་དོན་དེ་སྒོམ་པའི་ཕྱིར་དུ། ཚེ་འདི་བློས་གཏོང་ཆོས་བརྒྱད་རྡོག་པས་གནོན་པར། མི་མེད་ལུང་སྟོང་གི་རི་ཁྲོད་དེར་ཞི་བའི་ཏིང་ངེ་འཛིན་བླ་མའི་མན་ངག་ལྟར་དུ་བསྒོམས་ནས་ཆོས་སྒྲུབ་དགོས། སྤྱིར་ཆོས་སྒྲུབ་ལུགས་ལ་སོང་ནས་ལྷམ་ཕིགས་ཁ་འཇོག་པ་ཞིག་དང་། བསྡད་ནས་གདན་ཕིགས་ཁ་འཇོག་པ་གཉིས་ཡོད། གནས་སྐོར་མཆོད་མཇལ་སོང་ན་ལོས་བཟང་ཚོགས་བསགས་སྒྲིབ་སྦྱོང་གི་ཐབས་ལམ་རེད། གནས་འབྲེལ་ཙམ་གྱིས་རིག་འཛིན་གྱི་ཚོགས་གྲལ་ལ་སྙེག་ཐུབ་པའི་བྱིན་རླབས་ཅན་གྱི་གནས་ཡོད་པ་རེད། འོན་ཀྱང་སེམས་རྣམ་པར་མ་དག་ན་ས་འགྲོ་རྡོ་འགྲོ་རེད་འགྲོ་བ་དང་། སོང་ཞིང་སོང་ན་འགྲོ་སྙིང་ཇེ་འདོད། འགྲོ་ཆེ་ན་རྐང་སྣེ་རྡོ་ལ་ཐུག་པའི་ཉེན་ཁ་ཆེན་པོ་དང་ཡང་འཕྲོད་སྲིད། དེས་ན་ལུས་ངག་གི་དགེ་སྦྱོར་ལོས་བཟང་སྟེ། དེ་བས་སེམས་ཀུན་བྱེད་ཀྱི་རྒྱལ་པོ་འདི་དགེ་སྡིག་ཀུན་ཀྱི་བྱེད་པོ་ཡིན་པས། ལུས་ངག་ཡིད་གསུམ་ལས་སེམས་གཙོ་བས་སེམས་ཀྱི་བྱ་བ་ནི་ཆོད་ཆེ་བ་ཡིན། དེས་ན་སྒོམ་བསམ་གཏན་གྱི་ངང་ལ་བསྡད་ནས་སྒོམ་རབ་ཉིན་མཚན་ཕྱམ་གདལ་ཚོ་མ་ཐུབ་རུང་། རང་སེམས་རང་གིས་ལམ་ལ་འཇོག་རྒྱུའི་བསམ་བློ་རེ་བཏང་ནས། བླ་མའི་མན་ངག་གིས་ལག་ཁྲིད་གནང་བའི་ཞི་ལྷག་ཟུང་འབྲེལ་གྱི་ལྟ་བའི་ཐོག་མཉམ་བཞག་ཐུན་རེ་གཅོད་རྒྱུ་ཙམ་དང་། རྗེས་ཐོབ་ཐུན་མཚམས་ཀྱི་སྐབས་སུའང་མེད་སྣང་སྒྱུ་མ་དང་རྨི་ལམ་ལྟ་བུ་མཐོང་ནས། ཚེ་འདིའི་ཆོས་བརྒྱད་ལ་གཉེར་ཁ་དང་ཆགས་ཞེན་ཇེ་ཆུང་རེད་འོང་ན་བློ་ཆོས་སུ་འགྲོ་ཞིང་། ཆོས་ལམ་དུ་སོང་ནས་འབྲེལ་ཚད་ཐར་ལམ་འགོད་པ་ལ་དེ་བས་བཟང་ཞིག་མེད་ངེས། དེས་ན་རང་སེམས་རང་ལ་རྒྱུས་ཆེ་བས་རང་སེམས་ནང་དུ་དཀུག་སྟེ་རང་རྒྱུད་ཆོས་དང་འདྲེས་པའི་ཐབས་ལ་འབད་དགོས། སྐབས་སུ་བབས་པ་གང་ཞིག་གསན་པར་བྱ་བའི་ཆོས་ཀྱི་རིམ་པ་ནི། ཐུན་མིན་ནང་གི་སྨོན་འགྲོའི་ནང་ནས་སྐྱབས་སུ་འགྲོ་བའི་ཁྲིད་དང་སེམས་བསྐྱེད་པ་གཉིས་སོང་ནས། དེ་རིང་སྡིག་སྒྲིབ་སྦྱོང་བ་རྡོ་རྗེ་སེམས་པའི་སྒོམ་བཟླས་ཀྱི་སྐབས་ཡིན་ཏེ། ཉོན་མོངས་པ་དང་ཤེས་བྱའི་སྒྲིབ་པ་གཉིས་ཀྱི་དྲི་མ་ཐམས་ཅད་སྔ་ནས་དག་ཅིང་དབེན་པ་ཡིན་ཡང་། ད་དུང་སྒྲིབ་པ་སྦྱོང་བའི་ཚུལ་སྟོན། ཐར་བ་སྒྲུབ་པའི་ལམ་མཆོག་མཐར་ཕྱིན་ནས་བསྐལ་བ་མང་པོའི་སྔོན་རོལ་ནས་རྫོགས་སངས་རྒྱས་ཟིན་པ་ངེས་ཀྱང་། ད་དུང་གདུལ་བྱ་འདུལ་བའི་ཕྱིར་དུ་ལམ་ལ་སློབ་པའི་ཚུལ་མཛད་པ་དང་། སྲིད་དང་ཞི་བའི་མཐའ་གཉིས་ལས་འདས་ཀྱང་མ་དག་བའི་སྣང་ངོར་སྲིད་ན་སྣང་བའི་ཚུལ་མཛད་པ་མཚུངས་མེད་བླ་མའི་ཞབས་ལ་ཕྱག་འཚལ་ལོ། །ཞེས་སྐབས་ཀྱི་ཕྱག་འཚལ་བ་དང་བཅས། དོན་གསུམ་པ་སྒྲིབ་པ་སྦྱོང་བ་བླ་མ་རྡོ་རྗེ་སེམས་དཔའི་སྒོམ་བཟླས་ལ། ཆོས་གསན་པའི་ཚུལ་ཀུན་སློང་དང་ཀུན་སྤྱོད་ལ་སོགས་པ་སྤྱི་དང་འདྲ།
༼༡སྡིག་པ་བཤགས་ན་འདག་ཚུལ།
དངོས་གཞི་གསན་པར་བྱ་བའི་ཆོས་ལ། སྡིག་པ་བཤགས་ན་འདག་པའི་ཚུལ་དང་། གཉེན་པོ་སྟོབས་བཞིས་བཤགས་པ་དངོས་གཉིས། དང་པོ་ནི། ཟབ་མོའི་ལམ་གྱི་ཉམས་རྟོགས་ཁྱད་པར་ཅན་སྐྱེ་བ་ལ་བར་དུ་གཅོད་པའི་གཙོ་བོ་ནི་སྡིག་སྒྲིབ་བག་ཆགས་ཡིན། སྤྱིར་སྡིག་སྒྲིབ་ཅེས་པ་ནི་སྒྲིབ་པ་སྤྱིའི་མིང་ཡིན། དབྱེ་ན་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ། ཤེས་བྱའི་སྒྲིབ་པ། བག་ཆགས་ཀྱི་སྒྲིབ་པ་དང་བཞི་ཡོད། ལས་ཀྱི་སྒྲིབ་པ་ལའང་རང་བཞིན་དང་བཅས་པའི་ཁ་ན་མ་ཐོ་བ་གཉིས་ཡོད། དང་པོ་ནི་སྟོན་པས་བཅས་པ་དང་མ་འབྲེལ་བ་ལས་དེ་བྱས་ནས་བཟུང་སྡིག་པ་ཡིན་པ་རྣམས་ཏེ་སྲོག་གཅོད་པ་ལྟ་བུ་དང་། བཅས་ལྟུང་ནི། སངས་རྒྱས་ཀྱི་གླེང་གཞི་གང་ཞིག་ལ་བརྟེན་ནས་བཅས་པའི་ལྟུང་བ་དཔེར་ན་ཕམ་པ་བཞི་ལ་སོགས་པ་ལྟ་བུ་སྟེ། བཅས་པ་རྐྱང་པ་རྩྭ་སྔོན་གཅོད་པ་ལྟ་བུ་མི་ཕལ་བས་བྱེད་ན་སྡིག་པར་མི་འགྱུར་བ་ཡིན། བཅས་རང་གཉིས་ཀ་ཡིན་པའང་ཡོད། དཔེར་ན་སྲོག་གཅོད་པའི་ཕམ་པ་ལྟ་བུ་ཡིན། བཅས་པའི་ལྟུང་བ་ལ་ཕྱི་སོར་ཐར། ནང་བྱང་སེམས། གསང་བ་སྔགས་ཀྱི་དམ་ཚིག་དང་འགལ་བའི་སྡོམ་པ་གསུམ་གྱི་མི་མཐུན་ཕྱོགས་ཐམས་ཅད་ཡིན། ལས་གཅིག་ཡིན་ཡང་ལམ་གོང་མ་གོང་མར་ཇེ་ཆེ་ཇེ་ཆེར་འགྲོ་བ་ཡོད། དཔེར་ན་སོ་ཐར་སྐབས་ཀྱི་ཉེས་བྱས་གཅིག བྱང་སེམས་སྐབས་ཀྱི་ཉེས་སྤྱོད་སྡོམ་པའི་མི་མཐུན་ཕྱོགས་ཀྱི་རྩ་ལྟུང་དུ་འགྱུར་བ་དང་། སྔགས་ཀྱི་སྐབས་དེ་ཉིད་བདེ་གཤེགས་བཀའ་འདས་ཀྱི་རྩ་བའི་ལྟུང་བར་འགྱུར་བ་ལྟ་བུའང་ཡོད། ལས་ཀྱི་སྒྲིབ་པ་དེས་ཅི་ལ་སྒྲིབ་ན་ལྷ་མིའི་གོ་འཕང་ཐོབ་པ་ལ་སྒྲིབ་པ་ཡིན། ཉོན་མོངས་པའི་སྒྲིབ་པ་ནི། ལས་དེ་དག་ཀུན་ནས་སློང་བར་བྱེད་པའི་ཉོན་མོངས་པ་བརྒྱད་ཁྲི་བཞི་སྟོང་ཡིན། དེ་དག་བསྡུ་ན་དུག་ལྔ་དུག་གསུམ། དེ་ཡང་བསྡུ་ན་ཚུལ་མིན་ཡིད་བྱེད་ཀྱི་རྟོག་པ་གཅིག་ལ་འདུ། ཉོན་མོངས་པ་དེས་གང་ལ་སྒྲིབ་ན། ཐར་བ་ཉན་རང་གི་གོ་འཕང་ཐོབ་པ་ལ་སྒྲིབ་པ་ཡིན། ཤེས་བྱའི་སྒྲིབ་པ་ནི། འཁོར་གསུམ་ལ་བདེན་པར་ཞེན་པ་སོགས་མཐའ་བཞི་ལ་འཛིན་པའི་རྟོག་པ་ཞིག་ཡིན་དགོས། བག་ཆགས་ཀྱི་སྒྲིབ་པ་ནི། མདོ་ལྟར་ན་ཤེས་སྒྲིབ་ཤིན་ཏུ་ཕྲ་བའི་གནས་སྐབས་དང་། སྔགས་ལྟར་ན་སྣང་སྲིད་འཕོ་བའི་བག་ཆགས་གསུངས། དེ་གཉིས་ཀས་གང་ལ་སྒྲིབ་ན་རྣམ་པ་ཐམས་ཅད་མཁྱེན་པའི་ཡེ་ཤེས་ལ་སྒྲིབ་པ་ཡིན། སྒྲིབ་པ་དེ་དག་གིས་སྤྱིར་ན་ཆོས་ཐམས་ཀྱི་གནས་ལུགས་དེ་བཞིན་ཉིད་མཐོང་བ་ལ་སྒྲིབ་པ་དང་། བྱེ་བྲག་གོང་དུ་བཤད་པ་ལྟར་མཐོ་རིས་ལ་སོགས་པ་ལ་སྒྲིབ་པ་ཡིན། དེ་ཡང་ཀུན་གཞིའི་མེ་ལོང་ལ་རྟོགས་པའི་གཟུགས་བརྙན་འཆར་བར་བྱེད་པ་ལ་སྒྲིབ་པ་སྦྱོང་བ་གལ་ཆེ་སྟེ། དཔེར་ན་མེ་ལོང་ལ་གཟུགས་བརྙན་འཆར་བར་བྱེད་པ་ལ་བྱི་དོར་བྱེད་པ་གལ་ཆེ་བ་ལྟར་ཡིན་གསུངས། ཀུན་གཞི་ཞེས་པ་འདི་ལ་སྒྲ་ཡི་དབྱེ་བ་ཕྱེ་ན། ཡེ་དོན་གྱི་ཀུན་གཞི། སྦྱོར་བ་དོན་གྱི་ཀུན་གཞི། བག་ཆགས་ལས་ཀྱི་ཀུན་གཞི། བག་ཆགས་སྣ་ཚོགས་པའི་ཀུན་གཞི་བཅས་པའི་དབྱེ་བ་ཡོད། སྐབས་འདིའི་གོ་དོན་གནས་ལུགས་ངོ་བོ་ཉིད་ཀྱི་གཞི། ཧེ་རུ་ཀ་གལྤོ་ལས། ལྷག་པའི་ཆོས་སྐུ་བཅིངས་གྲོལ་མེད། །ཅེས་གསུངས་པ་ལྟར། སེམས་ཀྱི་གཤིས་ལུགས་དབྱིངས་དང་ཡེ་ཤེས་འདུ་འབྲལ་མེད་པར་ལས་ཉོན་གྱི་དྲི་མ་གཤིས་ལ་ཞུགས་མ་མྱོང་བ། རྒྱལ་བ་སྐུ་གསུམ་གྱི་ཡོན་ཏན་ཐམས་ཅད་མ་བཙལ་ཡེ་རྫོགས་སུ་གནས་པ། གཞི་སེམས་ཅན་གྱི་དུས་ན་ངན་དུ་མ་སོང་། འབྲས་བུ་སངས་རྒྱས་ཀྱི་དུས་ན་བཟང་དུ་མ་སོང་། ཡོན་ཏན་འཕེལ་འགྲིབ་དང་བྲལ་བ་གློ་བུར་གྱི་དྲི་མ་གཤིས་ལ་མ་ཞུགས་པར་རང་གི་ངོ་བོ་ཡེ་ནས་དག་པའི་རང་བཞིན་ཅན་བཅིངས་གྲོལ་ལས་འདས་པའི་ཡེ་ཤེས་དེ་ལ་གནས་ལུགས་ངོ་བོ་ཉིད་ཀྱི་གཞིའམ། ཡང་ན་ཡེ་དོན་གྱི་ཀུན་གཞི་ཟེར། དེ་ལ་གཞི་ཞེས་པ་ཡང་རྟོགས་ན་མྱ་ངན་ལས་འདས་པའི་གཞི་ཡིན་ལ། མ་རྟོགས་ན་འཁོར་བའི་འཁྲུལ་གཞི་ཡིན་པས་ན་གཞི་ཞེས་བྱ། དེས་ན་ཀུན་གཞིའི་མེ་ལོང་ལ་རྟོགས་པའི་གཟུགས་བརྙན་འཆར་བར་བྱེད་པ་ལ་སྒྲིབ་བྱེད་ཀྱི་དྲི་མ་རྣམས་དག་དགོས། འོ་ན་ཡེ་ནས་སངས་རྒྱས་པའི་རང་བཞིན་ཅན་ཞིག་ཡིན་ན་ད་ལྟ་སེམས་ཅན་སངས་རྒྱས་མིན་པ་འདི་ཅིའི་ཕྱིར་ཞེ་ན། རྒྱུད་བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབ། །ཅེས་གསུངས་པས་སྒྲིབ་པ་དག་ན་རྟོགས་པ་ངང་གིས་འཆར་འོང་བ་ཡིན་པས། དྲི་མ་དེ་བསལ་སངས་རྒྱས་དངོས། །ཞེས་གསུངས། དེས་ན་ངོ་བོ་ཡེ་དག་ལ་གློ་བུར་བྲལ་དག་གི་སྒོ་ནས་དྲི་མ་དག་དགོས། དེའི་ཕྱིར་སྒྲིབ་པ་སྦྱོང་བའི་ཐབས་གྲངས་མེད་པ་ཞིག་རྒྱལ་བ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས། སོར་ཐར་གྱི་ལྟུང་བ་དེ་དག་ཕྱིར་བཅོས་ཐབས་ལྟུང་བ་སོ་སོའི་སྐབས་སུ་བཤད་པ་དང་། བྱང་སེམས་ཕུང་པོ་གསུམ་པའི་མདོ་དང་ཐར་བ་ཆེན་པོའི་མདོ་ལ་སོགས་ལས་བཤགས་ཐབས་མང་པོ་བསྟན་པ་ལས། མདོ་སྔགས་ཀྱི་སྡིག་པ་བཤགས་པའི་ཐབས་བསྟན་པ་དེ་དག་ཐམས་ཅད་ཀྱི་ནང་ནས་མཆོག་ཏུ་གྱུར་པ་ནི། བླ་མ་རྡོ་རྗེ་སེམས་དཔའི་སྒོམ་བཟླས་འདི་ཡིན་ཏེ། རྡོ་རྗེ་སེམས་དཔས་སྔོན་སློབ་པ་ལམ་གྱི་གནས་སྐབས་སུ། མ་འོངས་པ་ན་བདག་གི་མཚན་ཙམ་འཛིན་པ་ཐམས་ཅད་ཀྱི་སྡིག་ལྟུང་ཉམས་ཆག་ཐམས་ཅད་དག་པ་ཞིག་འོང་བར་ཤོག དེ་ལྟར་མ་བྱུང་ན་བདག་འཚང་མི་རྒྱ་བར་ཤོག་ཅེས། བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་བསགས་ཅིང་སྨོན་ལམ་བཏབ་པས་སྨོན་ལམ་ཐམས་ཅད་ཡོངས་སུ་གྲུབ་ནས་བླ་མ་རྡོ་རྗེ་སེམས་དཔར་སངས་རྒྱས་པ་ཡིན་པས་ན། ཕྱོགས་བཅུའི་སངས་རྒྱས་རེ་རེའི་མདུན་དུ་ཕྱིན་ནས་སྡིག་པ་བཤགས་པའི་ཐབས་ལ་འབད་པ་ལས། དཀྱིལ་འཁོར་ཐམས་ཅད་ཀྱི་སྤྲོ་དང་སྡུད་པའི་བྱེད་པོ་བླ་མ་དང་རྡོ་རྗེ་སེམས་དཔའ་གཉིས་སུ་མེད་པ་ཀུན་འདུས་ནོར་བུའི་ལུགས་སུ་བསྒོམས་ནས་བཤགས་པ་བྱེད་ན། བཤགས་སྟོབས་ཆེ་བ་དང་། དག་སྟོབས་ཆེ་བས་ཉེས་པ་བཤགས་ཐུབ་པའི་ཁྱད་ཆོས་ཁྱད་པར་འཕགས་པ་ཡིན། དེ་ཡང་སྤྱིར་སྡིག་པའི་ལས་ཆེ་ཆུང་གང་ཡང་སྟོབས་བཞི་ཚང་བས་བཤགས་ན་བཤགས་པས་མི་འདག་པ་མེད་དེ། རྒྱུད་ལས། དུས་གསུམ་རྒྱལ་བའི་ཡང་སྙིང་འདིས། །མཚམས་མེད་ཉེས་བྱས་རྣམ་སྨིན་བྱང་། །གསང་སྔགས་དམ་ཚིག་སོ་རུ་ཆུད། །མི་དགེ་ཕལ་བར་སྨོས་ཅི་དགོས། ཞེས་གསུངས། སྔོན་གྱི་དམ་པ་དག་གི་ཞལ་ནས། སྤྱིར་སྡིག་པ་ལ་ཡོན་ཏན་མེད་ཀྱང་། བཤགས་པས་འདག་པ་སྡིག་པའི་ཡོན་ཏན་ཡིན་གསུངས། དེས་ན་ཕྱི་སོ་ཐར་གྱི་སྡོམ་པ་ཉིས་བརྒྱ་ལྔ་བཅུའི་འདུལ་ཁྲིམས་དང་འགལ་བ། ནང་བྱང་ཆུབ་སེམས་ཀྱི་བསླབ་བྱ་རྩ་ལྟུང་བཅོ་བརྒྱད་སོགས་དང་འགལ་བ། གསང་བ་སྔགས་ཀྱི་དམ་ཚིག་ས་མ་ཡ་འབུམ་སྡེ་ལས་ཉམས་པ་སོགས་སྡིག་པའི་ལས་ཅི་ཙམ་ཚབས་ཆེ་ཡང་། སྙིང་ནས་བཤགས་ན་བཤགས་པས་མི་འདག་པ་མེད་དེ། བྲམ་ཟེའི་ཁྱེའུ་མི་གདུང་བའམ་སོར་མོའི་ཕྲེང་བ་ཅན་གྱི་མི་སྟོང་དགུ་བརྒྱ་གོ་དགུ་བསད་པའི་སྡིག་པ་ཡང་། བཤགས་པས་ཉེས་པ་སོར་ཆུད་དེ་ཚེ་དེ་ལ་དགྲ་བཅོམ་པའི་གོ་འཕང་ཐོབ། གཞན་ཡང་ལྷས་སྦྱིན་གྱིས། རྒྱལ་པོ་མ་སྐྱེས་དགྲ་ལ། ཁྱོད་ཀྱིས་ཡབ་རྒྱལ་པོ་གཟུགས་ཅན་སྙིང་པོ་ནི་ད་དུང་རྒྱལ་སྲིད་ལ་ཞེན་འདུག་པས་དེ་སོད། ངས་ཀྱང་གོའུ་ཏ་མ་གསད། དེ་ནས་འོ་ཅག་གཉིས་གཅིག་གིས་རྒྱལ་པོ་གསར་པ་དང་། གཅིག་ཤོས་ཀྱིས་སངས་རྒྱས་གསར་པ་བྱས་ན་མི་སྐྱིད་དམ་ཟེར་བ་ཉན་ཏེ། རྒྱལ་པོ་མ་སྐྱེས་དགྲས་རང་གི་ཕ་གཟུགས་ཅན་སྙིང་པོ་བསད་པ་ཡང་ཕྱིས་བཤགས་པས་སོར་ཆུད་དེ། དམྱལ་བར་དར་གྱི་ཕོ་ལང་བརྡབས་པ་ཙམ་མྱོངས་ནས་ཐར་པ་སོགས་དུ་མ་རྫོགས་པའི་སངས་རྒྱས་ཀྱིས་མདོ་སྡེ་རྣམས་ལས་གསུངས། དེས་ན་མགོན་པོ་ཀླུ་སྒྲུབ་ཀྱི་ཞལ་ནས་ཀྱང་། གང་ཞིག་སྔོན་ཆད་བག་མེད་གྱུར་པ་ལ། །ཕྱིས་ནས་བག་དང་ལྡན་པར་གྱུར་པ་དེ། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས། དེ་ཡང་འོག་ནས་འཆད་འགྱུར་གྱི་གཉེན་པོ་སྟོབས་བཞི་ཚང་བའི་སྒོ་ནས། སྙིང་ཐག་པ་ནས་འགྱོད་པ་དང་བཅས་ཏེ་ལེགས་པར་བཤགས་ན་འདག་པ་ཡིན་གྱི། དེ་ལྟར་མ་ཡིན་པར་རང་བཞིན་དུ་ཁ་ཡེངས་མིག་ཡེངས། སེམས་རྣམ་རྟོག་གཞན་གྱི་རྗེས་སུ་འབྲངས་བཞིན་དུ། ངག་ནས་མཐོལ་ལོ་བཤགས་སོ་སོགས་བཤགས་ཚིག་ཙམ་ཁ་ཏོན་བྱེད་པ་དང་། ད་དུང་ཉེས་པ་ཤོར་ན་ཕྱིས་ཀྱང་བཤགས་པས་ཆོག་པས་ཕྱིན་ཆད་སྡིག་པའི་ལས་བྱས་ཀྱང་མི་གནོད་དོ་སྙམ་པ་སོགས་ཀྱི་སྒོ་ནས་རྣམ་པར་མ་དག་པའི་བཤགས་པ་བྱས་ཀྱང་སྡིག་པ་མི་འདག་སྟེ། རྗེ་མི་ལའི་ཞལ་ནས། སྡིག་བཤགས་པས་ཨེ་འདག་སྙམ་པ་ན། །དགེ་བ་དྲན་ན་འདག་པ་ཡིན། །ཞེས་གསུངས། དེས་ན་བཅས་དང་རང་བཞིན་སོར་བྱང་སྔགས་གསུམ་གྱི་སྡོམ་དང་དམ་ཚིག་ཉམས་པའི་སྡིག་པ་ཐམས་ཅད་བཤགས་པ་གང་ལ་ཡང་གཉེན་པོ་སྟོབས་བཞི་ཚང་བ་ནི། ཅི་ནས་ཀྱང་གལ་ཆེ།
༼༢གཉེན་པོ་སྟོབས་བཞི།
དེ་ལ་སྟོབས་བཞི་ནི། རྟེན་གྱི་སྟོབས། ཉེས་བྱས་སུན་འབྱིན་གྱི་སྟོབས། སྡོམ་པའི་སྟོབས། གཉེན་པོ་ཀུན་སྤྱོད་པའི་སྟོབས་དང་བཞི་ཡིན། དང་པོ་རྟེན་གྱི་སྟོབས་ནི། སྤྱིར་སྡིག་པ་བཤགས་པའི་ཡུལ་སོ་ཐར་གྱི་མཁན་སློབ་དགེ་འདུན་དང་བཅས་པ། བྱང་སེམས་ཀྱི་སྐབས་སུ་བླ་མ་དགེ་བའི་བཤེས་གཉེན་ནམ་གྲོགས་ཚངས་པ་མཚུངས་པར་སྤྱོད་པ། གཞན་ཡང་ལྟུང་བཤགས་ཀྱི་བདེ་གཤེགས་སོ་ལྔ་ལྟ་བུ། ཐར་མདོའི་ཕྱོགས་བཅུའི་སངས་རྒྱས་ལྟ་བུ། གསང་སྔགས་ཀྱི་བླ་མ་དང་དཀྱིལ་འཁོར་གྱི་ལྷ་ཚོགས་དེ་དག་བཤགས་ཡུལ་ཡིན། འོན་ཀྱང་ཕྱིའི་རྟེན་གྱི་སྟོབས། སྐབས་འདིར་བླ་མ་དང་རྡོ་རྗེ་སེམས་དཔའ་དབྱེར་མེད་པ་བསྒོམ་པ་དེ་ཡིན་ལ། ནང་གི་རྟེན་གྱི་སྟོབས་ནི། སྐྱབས་སུ་བཟུང་ནས་དང་སྨོན་འཇུག་གི་བྱང་ཆུབ་མཆོག་ཏུ་སེམས་བསྐྱེད་པ་དང་ཁྱད་པར་སྙིང་རྗེ་ཆེན་པོ་དང་ལྡན་པ་དེ་ཡིན་པས་ཀུན་སློང་བཅོས་པ་གལ་ཆེ་། སྐབས་གཞན་དུ་ཡང་སྡིག་པ་བཤགས་པའི་ཡུལ་དེ་ཉིད་རྟེན་ཡིན་ཏེ། དཔེར་ན་གོང་ལྟར་ཕུང་པོ་གསུམ་པའི་དུས་སངས་རྒྱས་སོ་ལྔ་དང་། དེ་བཞིན་དུ་དགེ་བའི་བཤེས་གཉེན་ནམ། བདེ་བར་གཤེགས་པའི་སྐུ་གསུང་ཐུགས་རྟེན་ལ་སོགས་པ་གང་གི་དྲུང་ནས་བཤགས་པ་བྱེད་ཀྱང་བཤགས་ཡུལ་དེ་ཉིད་རྟེན་གྱི་སྟོབས་ཡིན། དེ་བཞིན་དུ་སྨོན་འཇུག་བྱང་ཆུབ་ཀྱི་སེམས་བསྐྱེད་པ་ནི། དུས་དང་རྣམ་པ་ཐམས་ཅད་དུ་སྡིག་པ་བཤགས་པ་ཐམས་ཅད་ལ་མེད་དུ་མི་རུང་། བྱང་ཆུབ་ཏུ་སེམས་བསྐྱེད་པ་དེ་ཉིད་མེད་ན་སྡིག་ལྟུང་སྟོབས་བཞི་ཚང་བའི་བསམ་པས་བཤགས་ཀྱང་ཅུང་ཟད་སྲབ་ཏུ་འགྲོ་བ་ཙམ་ལས་སྡིག་ལྟུང་རྩ་བ་ནས་འདག་པར་མ་གསུངས། སྨོན་དང་འཇུག་པའི་བྱང་ཆུབ་ཀྱི་སེམས་བཅོས་མ་མ་ཡིན་པ་དེ་རྒྱུད་ལ་སྐྱེས་ན། སྔོན་ཆད་སྡིག་པའི་ལས་ཅི་ཙམ་བྱས་པ་ཐམས་ཅད་བཤགས་ཐབས་གཞན་ལ་མ་བརྟེན་པར་རང་བཞིན་གྱིས་དག་པར་གསུངས་ཏེ། སྤྱོད་འཇུག་ལས། སྡིག་པ་ཤིན་ཏུ་མི་བཟད་བྱས་ན་ཡང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བསྟེན་ནས་ཡུད་ཀྱིས་གྲོལ་འགྱུར་ན། །དེ་ལ་བག་ཅན་རྣམས་ཀྱིས་ཅིས་མི་བསྟེན། །དེས་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གཅིག་གིས་ངེས་པར་སྲེག་པར་འགྱུར། །ཞེས་གསུངས། ཉེས་བྱས་སུན་འབྱིན་པའི་སྟོབས་ནི། སུན་འབྱིན་པའི་སྟོབས་ཀྱི་ངོ་བོ་འགྱོད་པ་ཡིན་པས་སྔར་བྱས་ཀྱི་སྡིག་པ་མི་དགེ་བའི་ལས་ཐམས་ཅད་ལ་འགྱོད་སེམས་བྱེད་པ་དེ་ཡིན། དེ་ལྟར་རང་ཉིད་ཀྱིས་སྡིག་པ་བྱས་པ་ལ་སྡིག་ཏུ་མཐོང་ཞིང་། ངོ་ཤེས་ནས་དེ་ལ་འགྱོད་སེམས་དྲག་པོའི་སྒོ་ནས་མི་འཆབ་པར་བཤགས་པ་མེད་ན་མི་འདག་སྟེ། ཕུང་པོ་གསུམ་པ་ལས་ཀྱང་། མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །ཞེས་གསུངས། དེ་བཞིན་དུ་མཁས་གྲུབ་ཀརྨ་ཆགས་མེད་ཀྱིས་ཀྱང་། འགྱོད་པ་མེད་ན་བཤགས་པས་མི་འདག་པས། །སྔར་བྱས་སྡིག་པ་ཁོག་ཏུ་དུག་སོང་ལྟར། །ངོ་ཚ་འཇིགས་སྐྲག་འགྱོད་པ་ཆེན་པོས་བཤགས། །ཞེས་གསུངས། སྡོམ་པའི་སྟོབས་ནི། ངོ་བོ་སྡོམ་སེམས་ཡིན་པས་རང་གིས་སྔར་བྱས་པའི་སྡིག་པའི་ལས་དེ་ཉིད་དྲན་ཏེ། ད་ཉི་མ་ཕྱིན་ཆད་སྲོག་དམར་པོ་འདི་ལ་བབ་ཀྱང་། དེ་ལྟ་བུའི་སྡིག་པའི་ལས་ད་ནི་མི་བགྱིད་དོ་སྙམ་པ་དེ་ཡིན། ཕུང་པོ་གསུམ་པ་ལས་ཀྱང་། སླན་ཆད་ཀྱང་གཅོད་ཅིང་སྡོམ་པར་བགྱིའོ། །ཞེས་གསུངས་པ་དང་། དེ་བཞིན་དུ་བདེ་སྨོན་ལས་ཀྱང་། ཕྱིན་ཆད་སྡོམ་སེམས་མེད་ན་མི་དག་པས། །ཕྱིན་ཆད་སྲོག་ལ་བབ་ཀྱང་མི་དགེའི་ལས། །ད་ནས་མི་བགྱི་སེམས་ལ་དམ་བཅའ་བཟུང་། །ཞེས་གསུངས། གཉེན་པོ་ཀུན་ཏུ་སྤྱོད་པའི་སྟོབས་ནི། ངོ་བོ་ཆོས་ལ་དོན་གཉེར་གྱི་འདུན་པ་བྱེད་པ་དེ་ཡིན་སྔར་བྱས་ཀྱི་སྡིག་པའི་གཉེན་པོར་རྣམ་དཀར་དགེ་བའི་ལས་གང་འགྲུབ་སྒྲུབ་པ་དང་། ཁྱད་པར་རྒྱལ་བ་སྲས་དང་བཅས་པ་ལ་སྒོ་གསུམ་གུས་པས་ཕྱག་འཚལ་བ། གཞན་གྱིས་བསགས་པའི་བསོད་ནམས་ལ་རྗེས་སུ་ཡི་རང་བ། དགེ་བའི་རྩ་བ་བྱང་ཆུབ་མཆོག་ཏུ་བསྔོ་བ། སྨོན་པ་དང་འཇུག་པའི་བྱང་ཆུབ་ཏུ་སེམས་བསྐྱེད་པ། གནས་ལུགས་མ་བཅོས་པའི་ངོ་བོ་སྐྱོང་བ་སོགས་ཡིན་ཏེ། སྔོན་མཉམ་མེ་དྭགས་པོ་རིན་པོ་ཆེའི་སློབ་མ་སྒོམ་པ་ཞིག་གིས། སྔར་གསུང་རབ་ཀྱི་བླུས་ཟོས་པ་དྲན་ནས་འགྱོད་དེ་ཞུས་པས། གསུང་རབ་དེ་ཉིད་བཞེངས་ཤིག་གསུངས། གསུང་རབ་དེ་བཞེངས་པར་བརྩམས་པས་རྣམ་གཡེང་མང་དུ་བྱུང་། དེས་སུན་ནས་སྐུ་མདུན་དུ་ཕྱིན་ཏེ། གསུང་རབ་བཞེངས་པ་ལ་ཡང་རྣམ་གཡེང་མང་པོ་རང་བྱུང་། སྡིག་པ་བཤགས་པ་ལ་ཡང་གནས་ལུགས་མ་བཅོས་པའི་ངོ་བོ་སྐྱོང་བ་རང་ལས་ཟབ་པ་མེད་དམ་ཞུས་པས། དྭགས་པོ་རིན་པོ་ཆེ་དགྱེས་ཏེ། དོན་དུ་དེ་ག་རང་ཡིན། སྔར་བྱས་པའི་སྡིག་པའི་ཕུང་པོ་རི་རབ་ཙམ་ཡོད་ཀྱང་། མ་བཅོས་དོན་གྱི་ངོ་བོ་མཐོང་བའི་སྐད་ཅིག་ལ་འདག་པ་ཡིན་གསུངས། དེས་ན་སྡིག་པ་སྦྱོང་བ་ལ་བྱང་ཆུབ་ཀྱི་སེམས་སྒོམ་པ་དང་གནས་ལུགས་མ་བཅོས་པའི་རྒྱུན་སྐྱོང་བ་གཉིས་ལས་ཟབ་པ་མེད་པས་འདིར་ཡང་དེ་གཉིས་དང་མ་བྲལ་བའི་སྒོ་ནས་རྡོ་རྗེ་སེམས་དཔའ་བསྒོམས་ཏེ་བདུད་རྩི་འབེབས་སྦྱོང་བྱེད་པ་དང་། ཡིག་བརྒྱ་བཟླ་བ་སོགས་ཡིན། དེ་ལྟར་གཉེན་པོ་སྟོབས་བཞིའི་དག་པ་དྲན་པའི་ངང་ནས།
༼༣རྡོར་སེམས་སྒོམ་བཟླས་དངོས།
རྡོར་སེམས་སྒོམ་བཟླས་བྱེད་པ་དངོས་ནི། རང་ཉིད་ལྷ་རུ་གསལ་ནས་སྤྱི་བོར་ལྷ་བསྒོམ་པ་དང་། རང་ལུས་འཛིན་མེད་ཀྱི་སྤྱིར་ལྷ་བསྒོམ་པ་སོགས་ཡོད་ཀྱང་། འདིར་ནི་རང་ཉིད་ལས་ངན་སྐྱོན་ཅན་གྱི་གོང་བུ་ལུས་ཐ་མལ་པ་ལྟར་དུ་གནས་པའི་སྤྱི་བོར་མདའ་གང་ཙམ་གྱི་སྟེང་གི་ནམ་མཁར་མེ་ཏོག་པདྨ་དཀར་པོ་འདབ་མ་སྟོང་བརྡལ་ཞིག་བསྒོམ། དེའི་སྟེང་དུ་ཟེའུ་འབྲུ་དམར་སེར་གྱེས་པའི་སུམ་ཆ་གཉིས་ནོན་པའི་ཟླ་བའི་དཀྱིལ་འཁོར་ཆ་ཤས་ཡོངས་སུ་རྫོགས་པའི་ཉ་གང་བ་ཞིག་བསྒོམ། ཉ་གང་ཟེར་བ་དེ་ཆེ་ཆུང་གི་ཚད་མ་ཡིན་གྱི། ཟླ་བའི་ཆ་ཤས་ཐམས་ཅད་ཁ་གང་བའི་ཚེས་བཅོ་ལྔའི་ཟླ་བ་ལྟ་བུ་ཕྱོགས་ཐམས་ཅད་ལ་ཡ་ཡོ་འཁྱག་འཁྱོག་མེད་པར་ཀྱི་ལེར་ཡོད་པའི་དོན་ཡིན། དེའི་སྟེང་དུ་ངོ་བོ་མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ་རྣམ་པ་ཧཱུྃ་ཡིག་དཀར་པོ་ཚོན་གང་བ་འོད་ཟེར་བཀྲག་མདངས་དང་ལྡན་པ་ཞིག་སྒོམ། གཞན་མའི་ལུགས་ལ་ཧཱུྃ་ཡིག་དེ་ལས་འོད་ཟེར་སྤྲོ་བསྡུས་དོན་གཉིས་བྱས་པ་སོགས་ཡོད་ཀྱང་རང་ལུགས་ལ་མེད། དེ་ནས་བླ་མ་སངས་རྒྱས་སུ་ཤེས་པ་སོགས་ཤེས་པ་ལྔའི་སྒོ་ནས་གསོལ་བ་དུང་དུང་བ་ཞིག་བཏབ་པས། བླ་མའི་ཐུགས་སྙིང་རྗེ་ཆེན་པོས་མ་བཟོད་ནས་བདེ་བ་ཆེན་པོའི་ངོ་བོར་སྐད་ཅིག་གིས་ཧཱུྃ་ཡིག་དེ་ཉིད་འགུལ་བ་ལྟར་གནས་འགྱུར་ནས། ཆུ་ལས་ཉ་ལྡང་བའི་ཚུལ་གྱིས་ངོ་བོ་དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ། རྣམ་པ་ལོངས་སྤྱོད་རྫོགས་པའི་སྐུ་སྟོན་པ་རྡོ་རྗེ་སེམས་དཔའ་སྐུ་མདོག་དཀར་པོ་གངས་རིའི་ཕུང་པོ་ལ་ཉི་མ་འབུམ་གྱི་གཟི་བྱིན་གྱིས་འཁྱུད་པ་ལྟ་བུ། ཞལ་གཅིག་ཕྱག་གཉིས་ཕྱག་གཡས་རིག་སྟོང་གི་རྡོ་རྗེ་རྩེ་ལྔ་པ་ཐུགས་ཀར་གཏོད་པའི་ཚུལ་གྱིས་འཛིན་པ། གཡོན་སྣང་སྟོང་གི་དྲིལ་བུ་དཀུ་ལ་བརྟེན་ནས་འཛིན་པ། སྲིད་ཞི་གཉིས་ཀྱི་མཐའ་ལ་མི་གནས་པའི་བརྡ་ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། སྐུ་ལ་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་པ། དེ་ཡང་དར་གྱི་ཆས་གོས་ལྔ་དང་། རིན་པོ་ཆེའི་རྒྱན་བརྒྱད་ལས། དང་པོ་ཉོན་མོངས་པའི་གདུང་བ་སེལ་བའི་བརྡར་ལྷ་རྫས་ལས་གྲུབ་པའི་དར་གྱི་ཆས་གོས་ལྔ་ནི། སྙན་གོང་དུ་དབུ་རྒྱན་ལ་དཔྱང་པའི་དར་སྣ་ལྔ་ཡི་ཅོད་པཎ་དང་གཅིག དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་དང་གཉིས། མགུལ་ནས་ཐུར་དུ་དཔུང་པ་གཡས་གཡོན་འཁྱུད་དེ་ཡོད་པའི་དར་དཔྱངས་དང་གསུམ། སྐེད་ལ་འཆིང་བར་བྱེད་པའི་སྐུ་རེགས་དང་བཞི། ཁ་དོག་སྣ་ཚོགས་པ་ཅན་གྱི་སྨད་དཀྲིས་དང་ལྔའོ། །རིན་པོ་ཆེའི་རྒྱན་བརྒྱད་ནི། རིན་པོ་ཆེའི་དབུ་རྒྱན་ནོར་བུའི་རྩེ་བྲན་ཅན་དང་གཅིག རིན་པོ་ཆེའི་སྙན་རྒྱན་ནོར་བུར་ཕྲ་ཚོམ་ཅན་གཡས་གཡོན་གཉིས་གཅིག་ཏུ་བརྩིས་པ་དང་གཉིས། རིན་པོ་ཆེ་སྣ་ཚོགས་སྤེལ་མར་བརྒྱུས་པའི་མགུལ་རྒྱན་ཐུང་ངུ་དང་གསུམ། རིན་པོ་ཆེའི་ཕྲ་ཚོམ་ཅན་གྱི་དཔུང་རྒྱན་གཉིས་གཅིག་ཏུ་བརྩིས་དང་བཞི། རིན་པོ་ཆེའི་རྒྱན་ལྟེ་འོག་སླེབས་པའི་དོ་ཤལ་དང་། ནུ་སྟེང་ཙམ་དུ་སླེབ་པའི་སེ་མོ་དོ་གཉིས་གཅིག་ཏུ་བརྩིས་པས་ལྔ། ཕྱག་གདུབ་གཉིས་གཅིག་ཏུ་བརྩིས་པས་དྲུག སོར་གདུབ་རྣམས་གཅིག་ཏུ་བརྩིས་པས་བདུན། ཞབས་གདུབ་གཉིས་གཅིག་ཏུ་བརྩིས་པས་བརྒྱད་དོ། །བྱང་ཆུབ་ཡན་ལག་བདུན་ལ་མཚོན་ན། རིན་པོ་ཆེའི་དོ་ཤལ་དྲན་པ། དབུ་རྒྱན་ཆོས་རབ་རྣམ་འབྱེད་ཀྱི་ཤེས་རབ། གདུ་བུ་བརྩོན་འགྲུས། སྙན་ཆ་ཤིན་སྦྱངས། དཔུང་རྒྱན་ཏིང་ངེ་འཛིན། སེ་མོ་དོ་བཏང་སྙོམས། མེ་ཏོག་གི་ཕྲེང་བ་དགའ་བ་ཡིན་ནོ། །ཡུམ་སྙེམས་མ་དཀར་མོ་ཕྱག་གཡས་ན་སྐྱེ་ཤི་རྩད་ནས་གཅོད་པའི་གྲུ་གུག་དང་གཡོན་ན་བདེ་ཆེན་སྦྱོར་བའི་བརྡ་ཐོད་པ་ཡེ་ཤེས་ཀྱི་བདུད་རྩི་གང་བ་འཛིན་པ་དང་གཉིས་མེད་དུ་འཁྲིལ་བ། སྐུ་སྣང་ལ་རང་བཞིན་མ་གྲུབ་པ་སྣང་སྟོང་ཆུ་ཟླ་ལྟ་བུའམ། སྣང་ཆ་ནས་སྤྱན་གྱི་དཀར་ནག་རྒྱན་གྱི་བྱེ་བྲག་ཐམས་ཅད་མ་འདྲེས་པར་གསལ་བ། སྟོང་ཆ་ནས་དངོས་པོ་གདོས་བཅས་ཀྱི་རྣམ་པ་མ་གྲུབ་པར་ནམ་མཁའ་ལ་འཇའ་ཚོན་ཤར་བའམ། མེ་ལོང་དུ་གཟུགས་བརྙན་ཤར་བ་ལྟ་བུ་བཀྲ་ལམ་མེ་ཡོད་པ། རང་གི་སྤྱི་བོར་རང་གི་ཁ་ལྟ་ཕྱོགས་སུ་ཞལ་གྱུ་ནས་བདེ་སྟོང་གཉིས་མེད་དུ་བཞུགས་ཡོད་པ་དེ་ལྟ་བུ་ཞིག་བསྒོམ་པ་དེ་རྟེན་གྱི་སྟོབས་ཡིན། དེ་ནས་དེ་ལྟར་གསལ་བཏབ་པ་དེ་ཡང་རས་གཞི་ལ་བྲིས་པའི་ཐང་སྐུ་དང་གྱང་སྐུ་ལྟ་བུའི་ལེབས་ལ་བཅར་བཅར་པོ་ཡང་མ་ཡིན། ས་སྐུ་དང་གསེར་སྐུ་ལྟ་བུའི་དངོས་པོ་གདོས་བཅས་ཀྱི་རང་བཞིན་སེམས་མེད་བེམས་པོའི་རྣམ་པ་ལྟ་བུའང་མ་ཡིན། གསལ་བའི་སྣང་ཆ་ནས་སྤྱན་གྱི་དཀར་ནག་ཚུན་ཆད་མ་འདྲེས་པར་གསལ་བ་ལ། ངོ་བོའི་སྟོང་ཆ་ནས་དངོས་པོ་གདོས་བཅས་ཤ་ཁྲག་ནང་ཁྲོལ་ལ་སོགས་པའི་རྣམ་པར་གྲུབ་པ་སྤུ་ཙམ་ཡང་མེད་པ། ནམ་མཁར་འཇའ་ཚོན་ཤར་བའམ། ཤེལ་བུམ་དྲི་མ་མེད་པ་ལྟ་བུ། རང་གི་བཀའ་དྲིན་སུམ་ལྡན་གྱི་དྲིན་ཆེན་རྩ་བའི་བླ་མ་དང་མགོན་པོ་རྡོ་རྗེ་སེམས་དཔའ་གཉིས་སུ་མེད་པའི་རང་བཞིན་ཐུགས་ཡེ་ཤེས་ཀྱི་མཁྱེན་ཆ་དང་བཅས་པས། བདག་དང་སེམས་ཅན་ཐམས་ཅད་ལ་མི་ལས་འདས་པའི་སྤྱན་གྱིས་གཟིགས། མི་ལས་འདས་པའི་སྙན་གྱིས་གསན། མི་ལས་འདས་པའི་རྣམ་པ་ཐམས་ཅད་མཁྱེན་པའི་ཐུགས་བརྩེ་བ་ཆེན་པོས་རྗེས་སུ་དགོངས་ཏེ་བདག་ལ་ཞལ་གྱིས་ཕྱོགས་ཏེ་རྣམ་པ་ཐུགས་མ་དགྱེས་པའི་ཚུལ་གྱིས་བཞུགས་པ་དེ་ལྟ་བུ་ཕྱིའི་རྟེན་གྱི་སྟོབས་ཡུལ་བླ་མ་དང་རྡོར་སེམས་གཉིས་སུ་མེད་པ་ལ། ཡིད་ཁྱེད་ཤེས་ཀྱིས་མོས་གུས་དང་། དད་པ་སྔོན་དུ་འགྲོ་བའི་སྒོ་ནས་ནང་གི་རྟེན་གྱི་སྟོབས་སྐྱབས་འགྲོ་སེམས་བསྐྱེད་དང་བཅས་པའི་སྤྱན་སྔར། སུན་འབྱིན་པའི་སྟོབས་རང་གི་ཚེ་རབས་འཁོར་བ་ཐོག་མ་མེད་པ་ནས་བཟུང་སྟེ་དུས་ད་ལྟ་ལ་ཐུག་གི་བར་དུ། སྦྱང་བྱ་སྡིག་པའི་སྒོ་དྲུག་དང་འབྲེལ་བ་ལུས་ངག་ཡིད་གསུམ་གྱི་སྒོ་ནས་སྡིག་པ་མི་དགེ་བ་བཅུ། ཕ་བསད་པ་དང་མ་བསད་པ་དང་དགྲ་བཅོམ་པ་བསད་པ་དང་དེ་བཞིན་གཤེགས་པའི་སྐུ་ལ་ངན་སེམས་ཀྱི་ཁྲག་འབྱིན་པ་དང་དགེ་འདུན་འཁོར་ལོའི་དབྱེན་བྱས་པ་སྟེ་མཚམས་མེད་པ་ལྔ། མཁས་པའི་གྲལ་གོང་། སྔགས་པའི་ནོར། དགེ་སློང་གི་ཕྱག སྒྲུབ་པ་པོའི་ཟས་དང་བཅས་ལྕི་བ་བཞི། སྒྲུབ་བྱ་དཀར་པོའི་ཆོས་ལ་སྨད་ཅིང་། སྤང་བྱ་ནག་པོའི་ཕྱོགས་ལ་བསྟོད་པ། དགེ་བ་ཅན་གྱི་ཚོགས་བཅག་པ། དད་པ་ཅན་གྱི་ཐུགས་དཀྲུགས་པ། བླ་མ་ལྷ་དང་མཆེད་ལྕམ་སྤངས་པ། དཀྱིལ་འཁོར་གཉེན་པོ་བྲལ་བ་སྟེ་ལོག་པ་བརྒྱད། ཕྱི་མ་འདི་བཞི་ནི་གསང་སྔགས་རྡོ་རྗེ་ཐེག་པའི་དཀྱིལ་འཁོར་ཞལ་ཕྱེས་ནས་དེའི་ཚོགས་གྲལ་འཐབ་མོ་དང་ངན་ཤག་དང་རྩོད་པ་སོགས་ལས་འབྱུང་བ་ཡིན་པས་ཤེས་ནས་སྤོང་དགོས། ཕྱི་སོ་སོར་ཐར་པའི་སྡོམ་པ་དང་འགལ་བ། ནང་བྱང་ཆུབ་སེམས་དཔའི་བསླབ་བྱ་དང་འགལ་བ། གསང་བ་རིག་འཛིན་སྔགས་ཀྱི་དམ་ཚིག་དང་འགལ་བ། གསུངས་ན། ཕྱི་སོ་སོར་ཐར་བའི་སྤང་བའི་བསླབ་བྱ་དགེ་བསྙེན་གྱི་རྩ་བཞི་ཆང་ལྔ། དགེ་ཚུལ་གྱི་རགས་པ་བཅུ་བླངས་འདས་སོ་གསུམ། དགེ་སློང་གི་ཕམ་པ་བཞི། ལྷག་མ་བཅུ་གསུམ། སྤོང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་དང་བཅུ་གཉིས་ཏེ་གཉིས་བརྒྱ་ལྔ་བཅུ་རྩ་གསུམ། བྱང་ཆུབ་སེམས་དཔའི་ཟབ་མོ་ལྟ་ལུགས་ཀྱི་རྩ་ལྟུང་བཅོ་བརྒྱད། སྨོན་འཇུག་གི་བསླབ་བྱ་གཉིས་དང་ཉི་ཤུ། ཉེས་བྱས་བརྒྱད་ཅུ། རྒྱ་ཆེན་སྤྱོད་ལུགས་ཀྱི་ཀུན་སློང་བཞི་སྦྱོར་བ་བརྒྱད། ཉེས་བྱས་ཞེ་དྲུག་ལ་སོགས་པ། སྔགས་ཀྱི་བརྟུལ་ཞུགས་ཀྱི་ཐོགས་ནས་བཤད་ན། ཐུན་མོང་ཕྱི་ནང་གི་རིགས་ལྔའི་སྡོམ་པ་ཕྱི་ནང་གཉིས། རྩ་ལྟུང་བཅུ་བཞི། ཡན་ལག་གི་སྦོམ་པོ་བརྒྱད། རྫོགས་པ་ཆེན་པོ་ལ་རྩ་བའི་དམ་ཚིག་ཉེར་བདུན། ཡན་ལག་ཉེར་ལྔ། མེད་པ་ཕྱལ་བ་ལྷུན་གྲུབ་གཅིག་པུ་ལ་སོགས་པ་དམ་ཚིག་ས་མ་ཡ་འབུམ་སྡེ་སོགས་དང་། འཇིག་རྟེན་པའི་མནའ་ཟོས་པ། རྫུན་བཤད་པ། ཁྲེལ་དང་ངོ་ཚ་ཉམས་པ་ལ་སོགས་སྡིག་པའི་ལས་བདག་གིས་བགྱིས་པ་དང་། གཞན་ལ་བྱེད་བཅུག་པ་དང་། བྱས་པ་ལ་རྗེས་སུ་ཡི་རང་བ་ལ་སོགས་པ་སྡིག་པ་བསགས་ཚད་རྣམས་དངོས་སུ་དྲན་པ་ཐམས་ཅད་བློ་ལ་བླངས་ཏེ། བླ་མ་རྡོ་རྗེ་སེམས་དཔའི་སྤྱན་སྔར་རང་ཉིད་ངོ་ཚ་འཇིགས་སྐྲག་འགྱོད་པ་དང་བཅས་པས་ཤ་ཟིང་སྤུ་ཟིང་བྱེད་ཅིང་མཐོལ་ལོ་བཤགས་སོ་སྙམ་པ་དང་། དེ་བཞིན་དུ་རང་གི་ཡིད་ལ་མི་དྲན་པའང་ཚེ་རབས་འཁོར་བ་ཐོག་མ་མེད་པའི་དུས་ཚུན་ཆད་ནས་བསགས་པ་དུ་མ་ཞིག་ཡོད་ངེས་པས། དེ་དག་ཐམས་ཅད་སེམས་ཀྱི་སྒོ་ནས་མི་འཆབ་བོ། །ཡིད་ཀྱི་སྒོ་ནས་མི་སྦེད་དོ། །ངག་གི་སྒོ་ནས་མཐོལ་ལོ་སྒོ་གསུམ་གྱིས་བཤགས་སོ། །ཐུགས་བརྩེ་བ་ཆེན་པོས་བཟོད་པར་གསོལ་ལོ། །སྡིག་པ་དང་སྒྲིབ་པ་དེ་དག་ཐམས་ཅད་ཡུན་དུ་མི་འགོར་བར་དུས་ད་ལྟ་ཉིད་དུ། མྱུར་བ་ཉིད་དུ། འདུག་ས་འདི་རུ་སྡིག་ལྟུང་གི་ལྷག་མ་ཙམ་ཡང་མེད་པར་བྱང་ཞིང་དག་ནས་སོར་ཆུད་པ་ཞིག་ཐུགས་རྗེ་མ་ཆུང་སྙམ་པ་ནི་སུན་འབྱིན་པའི་སྟོབས། སྔོན་ཆད་ནི་བདག་མི་ཤེས་རྨོངས་པའི་གཞན་དབང་གིས་སྡིག་པ་དང་མི་དགེ་བའི་ལས་དེ་དང་དེ་དག་བསགས་པ་ལགས་ཀྱི། ད་ནི་དྲིན་ཆེན་གྱི་བླ་མའི་ཐུགས་རྗེ་ལ་བརྟེན་ནས་ཁེ་ཉེན་ཤེས་པའི་རང་བཞིན་ཅན་ཡིན་པས། ད་ཕྱིན་ཆད་ནི་སྲོག་ལ་བབ་ཀྱང་སྡིག་པའི་ལས་ལྟ་བུ་མི་བགྱིད་དོ། །སྙམ་པ་ནི་སྡོམ་པའི་སྟོབས་ཏེ། དེ་ལྟ་བུའི་དག་པ་དྲན་པའི་ངང་ནས། ཨཱཿབདག་ཉིད་ཐ་མལ་སྤྱི་བོ་རུ། སོགས་ནས། མ་ལུས་བྱང་པར་མཛད་དུ་གསོལ། །ཞེས་བརྗོད། དེ་ནས་རྡོར་སེམས་ཡབ་ཡུམ་གཉིས་སུ་མེད་པའི་ཐུགས་ཀར་ཟླ་བའི་དཀྱིལ་འཁོར་ཡུངས་ཀར་གླེབས་བ་ཙམ་གྱི་སྟེང་དུ་ཧཱུྃ་ཡིག་དཀར་པོ་སྤུས་བྲིས་པ་ལྟ་བུ་ཞིག་གསལ་ལ། ཨོཾ་བཛྲ་ས་ཏྭ་ས་མ་ཡ་སོགས། ཡི་གེ་བརྒྱ་པ་ཚར་གཅིག་བརྗོད་པས། ཧཱུྃ་གི་མཐའ་སྐོར་དུ་ཡི་གེ་བརྒྱ་པོ་ཡིག་མགོ་གནམ་ལ་བསྟན་ནས་རྭ་ལངས་པ་ལྟ་བུ་གཅིག་ལ་གཅིག་མ་རེག་ཙམ་དུ་བསྐོར་བར་བསམ། ཡི་གེ་བརྒྱ་བ་འདི་ནི་དུས་གསུམ་སངས་རྒྱས་ཐམས་ཅད་ཀྱི་ཡང་སྙིང་། གསང་སྔགས་ཀྱི་རྒྱུད་སྡེ་ཀུན་ཀྱི་སྙིང་པོ། བཀླག་པ་ཙམ་གྱིས་དོན་ཐམས་ཅད་བདེ་བླག་ཏུ་འགྲུབ་པར་བྱེད་པའི་རིགས་སྔགས་ཀྱི་རྒྱལ་པོ་རྨད་དུ་བྱུང་བ་ཡིན། དེ་ལ་ཨོཾ་ནི་དམ་བཅའ་བ་དང་། བདེ་ལེགས་དང་། བཀྲ་ཤིས་པའི་དོན་ཏེ་སྔགས་ཀྱི་མགོ་འདྲེན་ཕྱིར་ཐོག་མར་བཞག་གོ། བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། ཀྱེ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་དམ་ཚིག་གསང་བ་ཟབ་མོའི་དུས་གསུམ་གནས་སྐབས་དེ་ལས་ནམ་ཡང་མི་འདའ་བར་རྗེས་སུ་ཁྱེད་ཀྱིས་སྐྱོངས་ཤིག་ཅེས་སྐུལ་བའི་དོན་དང་། བཛྲ་ས་ཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་ཝ། ཀྱེ་རྡོ་རྗེ་སེམས་དཔའ་ཁྱེད་བདག་ལ་ཉེ་བར་བསྟན་པས་བཞུགས་པར་མཛོད་ཅིག་ཅེས་སྐུལ་བའོ། །སུ་ཏོཥྱོ་མེ་བྷ་ཝ། བདག་ཟག་མེད་བདེ་བ་ཆེན་པོའི་རོས་ཚིམ་པར་མཛོད་ཅིག་ཅེས་པའོ། །སུ་པོཥྱོ་མེ་བྷ་ཝ། བདག་ལ་བདེ་སྟོང་གཉིས་མེད་ཀྱི་ཡེ་ཤེས་རྒྱས་པར་མཛོད་ཅིག་ཅེས་པ་དང་། ཨ་ནུ་རཀྟོ་མེ་བྷ། བདག་ལ་རྗེས་སུ་བརྩེ་བར་མཛོད་ཅིག་ཅེས་དང་། སརྦ་སིདྡྷི་མྨེ་པྲ་ཡཙྪ། མཆོག་དང་ཐུན་མོང་གི་དངོས་གྲུབ་ཐམས་ཅད་བདག་ལ་དུས་ད་ལྟ་ཉིད་དུ་སྩོལ་ཅིག་ཅེས་པ་དང་། སརྦ་ཀརྨ་སུ་ཙ་མེ་ཙིཏྟཾ་ཤྲི་ཡཾ་ཀུ་རུ། ལས་ཐམས་ཅད་ལའང་བདག་གི་སེམས་དགེ་བར་མཛོད་ཅིག་ཅེས་དང་། ཧཱུྃ་ཐུགས་རྡོ་རྗེའི་རང་བཞིན་རྡོ་རྗེ་སེམས་དཔའི་ས་བོན་ཏེ་ཡེ་ཤེས་ལྔ་དང་དེ་བཞིན་གཤེགས་པ་རིགས་ལྔ་ཡི་རང་བཞིན་གཅིག་ཏུ་བསྡུས་པར་རྒྱས་འདེབས་པའོ། །ཧ་ཧ་ཧ་ཧ་ཧོ། ཞེས་ཧ་བཞི་ནི་དགའ་བ་བཞིའི་རྣམ་པར་དག་པའི་རང་བཞིན། ཧོཿཡིག་ནི་ཡུལ་གཟུགས་སོགས་དང་། ཡུལ་ཅན་མིག་སོགས་རྣམ་པར་དག་པའི་རང་བཞིན་ཏེ། དེ་དག་ཡོངས་སུ་རྫོགས་པ་ནི་བཅོམ་ལྡན་འདས་རྡོ་རྗེ་དེ་བཞིན་གཤེགས་པ་ཐམས་ཅད་དོ། །མདོར་ན་དགའ་བཞི་རྣམ་པ་དག་པའི་རང་བཞིན་གསང་གསུམ་ཡེ་ཤེས་ཀྱི་བདུད་རྩི་ཆར་རྒྱུན་ཕབ་པས་སྒོ་གསུམ་ཤེས་བྱའི་སྒྲིབ་པ་དང་བཅས་པ་སྦྱངས་ཤིང་དབང་བཞིའི་ཡེ་ཤེས་མངོན་དུ་གྱུར་བར་གསོལ་བ་འདེབས་པའི་དོན། བྷ་ག་ཝན་སརྦ་ཏ་ཐཱ་ག་ཏ་བཛྲ་མ་མེ་མུཉྩ། ཀྱེ་བཅོམ་ལྡན་འདས་དེ་བཞིན་གཤེགས་ཐམས་ཅད་ཅེས་བོས་ནས་། རྡོ་རྗེ་གསུམ་གྱི་ཡེ་ཤེས་ཐབས་སྙིང་རྗེ་ཆེན་པོ་དང་ཟུང་དུ་འཇུག་པའི་ར་བ་ལས་བདག་ནམ་ཡང་མི་འདའ་བར་མཛོད་ཅིག་ཅེས་སོ། །བཛྲི་བྷ་ཝ། གསང་སྔགས་རྡོ་རྗེ་ཐེག་པའི་མཐུ་ནུས་རྨད་དུ་བྱུང་བས་སྒྲིབ་པ་མ་སྤངས་རང་སར་གྲོལ་བའི་ཚུལ་གྱིས་སྒོ་གསུམ་རྡོ་རྗེ་གསུམ་གྱི་བདག་ཉིད་ཅན་དུ་སངས་རྒྱས་པར་མཛོད་ཅིག་ཅེས་སྐུལ་ལོ། །མ་ཧཱ་ས་མ་ཡ་ས་ཏྭ། ཀྱེ་དུས་གསུམ་ལས་འདས་པའི་དུས་ཆེན་པོ་ལས་ནམ་ཡང་མི་འདའ་བའི་དམ་ཚིག་གི་སེམས་དཔའ་ཆེན་པོ་ཞེས་བོས་ལ། ཅི་ཞུ་ན་ཨཱཿཞེས་ཡེ་ཤེས་ལྔ་ཡི་རང་བཞིན་དང་ཆོས་དབྱིངས་སྐྱེ་བ་མེད་པའི་ཡེ་ཤེས་འབའ་ཞིག་པ་ནི་དུས་གསུམ་རྒྱལ་བ་ཐམས་ཅད་དགོངས་པ་རོ་གཅིག་ཏུ་བཞུགས་པའི་གནས་ཏེ་བདག་ཉིད་ཀྱང་ཨཱཿདེ་ཉིད་དུ་བྱང་ཆུབ་པར་མཛོད་ཅིག་ཅེས་སྐུལ་བ་ཡིན་ནོ། །དེ་ལྟ་བུའི་དོན་ཡིད་ལ་དྲན་པ་དང་བཅས་བཞིན། དེ་ནས་རང་གི་ངག་ནས་ཡི་གེ་བརྒྱ་པ་གསོལ་འདེབས་ཀྱི་ཚུལ་དུ་བཟླས་པས། ཡིག་འབྲུ་རྣམས་ལས་བླ་མ་རྡོ་རྗེ་སེམས་དཔའ་དང་གཉིས་སུ་མེད་པའི་ཐུགས་རྗེ་ཡེ་ཤེས་ཀྱི་བདུད་རྩི་འཁྱགས་རོམ་མེས་ཞུ་བ་ལས་ཆུ་འཐིགས་པ་ལྟར། ཐིག་ཐིག་ཧྲམ་ཧྲམ་དུ་བབས་པ། སྐུའི་དབྱིབས་བརྒྱུད་ཡབ་ཡུམ་བདེ་རོལ་སྙོམས་པར་ཞུགས་པའི་སྦྱོར་མཚམས་ནས་ཐོན་པདྨའི་སྡོང་པོ་ལ་འཁྲིས་ནས་བྱང་ཆུབ་སེམས་ཀྱི་སྤྲིན་ཆེན་པོ་དེ་རང་གཞན་སེམས་ཅན་ཐམས་ཅད་ཀྱི་སྤྱི་བོ་ཚངས་པའི་བུ་ག་ནས་ཞུགས། བདག་དང་སེམས་ཅན་ཐམས་ཅད་ཀྱི་མི་དགེ་སྡིག་པའི་ལས་དང་ཉོན་མོངས་པ་སྡུག་བསྔལ་གྱི་རྒྱུ་དང་དེ་དག་གི་འབྲས་བུ་ལུས་ཀྱི་ནང་གི་ནད་ཐམས་ཅད་ཁྲག་རུལ་རྣག་རུལ་ལ་སོགས་མི་གཙང་བའི་རྫས་ཀྱི་རྣམ་པ། གདོན་ཐམས་ཅད་སྲོག་ཆགས་སྡོམ་སྡིག་པ་སྦལ་པ་ཉ་སྦྲུལ་ལྕོང་མོ་ཤིག་ལ་སོགས་པ་ཡིད་དུ་མི་འོང་བའི་སྲོག་ཆགས་ཀྱི་རྣམ་པ། སྡིག་སྒྲིབ་ཐམས་ཅད་དུད་ཁུ་སོལ་ཁུ་ཐལ་དུད་སྤྲིན་པ་རླངས་པ་ལ་སོགས་སྙིགས་མའི་རྣམ་པར་ཆུ་སྣ་རྒྱུག་པས་ས་རྡུལ་དེད་པ་ལྟར་བདུད་རྩིའི་རྒྱུན་གྱིས་མི་གཙང་བ་དེ་དག་ཐོགས་པ་མེད་པར་དེད་དེ་རྐང་མཐིལ་འོག་སྒོ་བ་སྤུ་བུ་ག་རྣམས་ནས་ཤྭ་འོད་ཆེན་པོའི་སྣ་ལ་སྦུར་མ་མི་ཆགས་པ་ལྟར་དུ་ནག་ཉིལ་གྱིས་ཕྱིར་ཐོན། རང་གི་འོག་ཏུ་ས་གས་པའི་མར་ཞབས་ན། འཆི་བདག་ལས་ཀྱི་གཤིན་རྗེ་ལ་འཁོར་ལན་ཆགས་བུ་ལོན་ཤ་འཁོན་གྱི་བདག་པོ་བདག་མོ་ཐམས་ཅད་ཀྱིས་བསྐོར་ཏེ་ཁ་ལག་སྦར་གསུམ་ཟེད་ནས་ཡོད་པའི་ནང་དུ་སོང་བར་བསམས་ལ་ཡིག་བརྒྱ་བཟླ། སྡིག་པ་དག་ཅིང་སྒྲིབ་པ་བྱང་བའི་རྟགས་སུ་ཆུ་ཆེན་པོར་བརྒལ་བའི་ཆེད་དུ་ཟམ་པའི་སྟེང་ནས་འགྲོ་བའམ། གཞན་གྱིས་བདག་ལ་ཁྲུས་བྱེད་པ་དང་། དགེ་འདུན་མང་པོའི་གྲལ་ཞུགས་ནས་བསྡད་པ་དང་། རང་ཉིད་མཆོད་རྟེན་དང་གཙུག་ལག་ཁང་དུ་ཞུགས་ཏེ་སངས་རྒྱས་བྱང་སེམས་ཀྱི་སྐུ་བརྙན་མཐོང་བ་དང་། ཤིང་ཏོག་རྙེད་ཅིང་ཟ་བ་ལ་སོགས་པ་རྨིས་ན་སངས་རྒྱས་དང་ཆོས་ཀྱི་རྗེས་སུ་ཞུགས་པའི་མཚན་མ་དང་ཚེ་འདི་ཡོན་ཏན་རྗེས་སུ་ཐོབ་པའི་མཚན་མ་ཡིན་པའང་གསུངས། དེ་ཡང་དམིགས་པ་ཐམས་ཅད་གཅིག་ཆར་དུ་གསལ་ནུས་ན་དེ་ལྟར་བྱ། དེ་ལྟར་མི་ནུས་ན་རེས་འགའ་རྡོ་རྗེ་སེམས་དཔའི་སྐུ་ཞལ་ཕྱག་སོགས་ལ་དམིགས་པ་གཏད་དེ་བཟླ། རེས་འགའ་རྒྱན་ཆ་ལུགས་ལ་དམིགས་པ་གཏད་དེ་བཟླ། རེས་འགའ་བདུད་རྩིའི་རྒྱུན་གྱིས་ནད་གདོན་སྡིག་སྒྲིབ་བཀྲུ་བ་ལ་དམིགས་པ་གཏད་དེ་བཟླ། རེས་འགའ་འགྱོད་པ་དང་སྡོམ་སེམས་དྲན་པར་བྱས་ཏེ་སྟོབས་བཞི་ཚང་བའི་ངང་ནས་ཡིག་བརྒྱ་བཟླ། དེ་ནས་མཐར་ས་འོག་ན་འཁོད་པའི་འཆི་བདག་ལས་ཀྱི་གཤིན་རྗེ་ལ་སོགས་ལན་ཆགས་བུ་ལོན་ཤ་འཁོན་གྱི་བདག་པོ་བདག་མོ་རྣམས་ཀྱང་ངོམས་ཤིང་ཚིམས། ཤ་ལན་ཁྲག་ལན་སོགས་ལན་ཆགས་འཁོར། ཚེ་རབས་ནས་བསགས་པའི་བུ་ལོན་སོད། བསད་བསད་གཏུབས་གཏུབས་ཀྱི་ཤ་འཁོན་བྱང་། ཐོགས་མེད་ནས་བསགས་པའི་སྡིག་སྒྲིབ་དག་གཤིན་རྗེ་དེའི་ཁ་ལག་སྦར་གསུམ་ཡང་ཟུམ། ས་གས་པ་ཡང་སོས་ཏེ་དུས་མིན་གྱི་འཆི་བ་བསླུས་པར་བསམ་དགོས། རང་གི་ལུས་འདི་ཡང་ཕྱི་གསལ་ནང་གསལ་སྒྲིབ་གཡོགས་དང་བྲལ་བ་འོད་ཀྱི་རང་བཞིན་དུ་ཡོད་པའི་ལུས་དབུས་སུ་རྩ་དབུ་མ་དང་། དེ་ལས་གྱེས་པའི་འཁོར་ལོ་བཞི་པོ་གདུགས་ཀྱི་རྩིབས་མ་ལྟ་བུ། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་ཁ་ཡར་གྱུ་བ། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཁ་མར་གྱུ་བ། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་ཁ་ཡར་གྱུ་བ། སྤྱི་བོར་བདེ་ཆེན་གྱི་འཁོར་ལོ་རྩ་འདབ་སུམ་ཅུ་རྩ་གཉིས་ཁ་མར་གྱུ་བ་དེ་ལྟར་གསལ་གདབ། སླར་ཡང་རྡོ་རྗེ་སེམས་དཔའི་སྐུ་ལས་བདུད་རྩིའི་རྒྱུན་སྔར་ལྟར་བབས་པས། རང་གི་ལུས་སྤྱི་བོར་བདེ་ཆེན་གྱི་འཁོར་ལོ་ནས་བཟུང་སྟེ་རྩ་འཁོར་ལོ་བཞི་པོ་ཐམས་ཅད་དང་། དེ་ལས་གྱེས་པའི་ལུས་ཀྱི་ནང་ཐམས་ཅད་རྐང་ལག་གི་སོར་མོའི་རྩེ་ཚུན་ཆད། ཤེལ་བུམ་འོ་མས་གང་བ་ལྟར་བདུད་རྩིའི་རྒྱུན་གྱིས་སྐྱ་ལྟེམ་མེ་གང་། བུམ་པའི་དབང་། གསང་བའི་དབང་། ཤེས་རབ་ཡེ་ཤེས་ཀྱི་དབང་། ཚིག་དབང་རིན་པོ་ཆེ་སྟེ་དབང་བཞི་ཐོབ། ལས་ཀྱི་སྒྲིབ་པ། ཉོན་མོངས་པའི་སྒྲིབ་པ། ཤེས་བྱའི་སྒྲིབ་པ། བག་ཆགས་ཀྱི་སྒྲིབ་པ་སྟེ་སྒྲིབ་པ་བཞི་དག དགའ་བ། མཆོག་དགའ། ཁྱད་པར་གྱི་དགའ་བ། ལྷན་ཅིག་སྐྱེས་པའི་དགའ་བ་སྟེ་དགའ་བ་བཞིའི་ཡེ་ཤེས་རྒྱུད་ལ་སྐྱེས། སྤྲུལ་སྐུ། ལོངས་སྐུ། ཆོས་སྐུ། ངོ་བོ་ཉིད་སྐུ་སྟེ་སྐུ་བཞིའི་གོ་འཕང་རྒྱུད་ལ་བཞག་པར་བསམ། དེ་ནས། མགོན་པོ་བདག་ནི་མི་ཤེས་རྨོངས་པ་ཡིས་སོགས་ནས། བྱང་ཞིང་དག་པར་མཛད་དུ་གསོལ། ཞེས་གནོང་ཚིག་བརྗོད་མ་ཐག་ཏུ། ད་ནི་ཉེས་པ་བཤགས་ཟིན་པས་བླ་མ་རྡོ་རྗེ་སེམས་དཔའ་དགྱེས་བཞིན་ཞལ་འཛུམ་པ་དང་བཅས་ཏེ། རིགས་ཀྱི་བུ་ཁྱོད་ཀྱི་སྡིག་སྒྲིབ་ཉམས་ཆག་ཐམས་ཅད་དག་པ་ཡིན་ནོ། །ཞེས་གསུང་གིས་གནང་པ་དངོས་སུ་བྱིན་ཏེ་བདེ་སྟོང་ཡེ་ཤེས་ཆེན་པོའི་ངོ་བོ་འོད་དུ་ཞུ་ནས་རང་ལ་ཐིམ་པའི་རྐྱེན་གྱིས་རང་ཉིད་ཀྱང་སྔར་བསྐྱེད་ཅིང་བསྒོམས་པ་དང་འདྲ་བའི་རྡོ་རྗེ་སེམས་དཔའ་ཡབ་ཡུམ་སྐུ་མདོག་ཕྱག་མཚན་རྒྱན་ཆ་ལུགས་མ་འདྲེས་ཤིང་ཡོངས་སུ་རྫོགས་པར་སྣང་སྟོང་མེ་ལོང་ནང་གི་གཟུགས་བརྙན་ལྟ་བུ་ལ་གནས་འགྱུར། དེའི་ཐུགས་ཀར་ཟླ་བའི་དཀྱིལ་འཁོར་ཡུངས་འབྲུ་གླེབས་པ་ཙམ་གྱི་སྟེང་དུ། དབུས་སུ་ཧཱུྃ་མཐིང་གདེའི་མདུན་དུ་ཨོཾ་དཀར་པོ། གཡས་སུ་བཛྲ་སེར་པོ། རྒྱབ་ཏུ་ས་དམར་པོ། གཡོན་དུ་ཏྭ་ལྗང་གུ་རྣམས་གསལ་ནས། ཨོཾ་བཛྲ་ས་ཏྭ་ཧཱུྃ། ཞེས་བཟླས་པ་དང་མཉམ་དུ་ཡིག་འབྲུ་ལྔ་པོ་ལས། འོད་ཟེར་ཁ་དོག་དཀར་སེར་དམར་ལྗང་མཐིང་ག་ལྔ་ཡར་འཕྲོས་པའི་རྩེ་ལ་སྒེག་པ་མ་དང་གླུ་མ་ལ་སོགས་འདོད་ཡོན་གྱི་ལྷ་མོ་རྣམས་ཀྱི་ཕྱག་ན་བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། འཕེན་གདུགས། རྒྱལ་མཚན། བླ་རེ། གསེར་གྱི་འཁོར་ལོ་རྩིབས་སྟོང་། དུང་དཀར་གཡས་སུ་འཁྱིལ་བ་ལ་སོགས་ལྷ་དང་མི་ཡི་དངོས་པོ་མཆོད་རྫས་དཔག་ཏུ་མེད་པ་སྤྲོས་ནས། ཕྱོགས་བཅུའི་ཞིང་ཁམས་རབ་འབྱམས་བསམ་གྱིས་མི་ཁྱབ་པ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་ལ་ཐུགས་མཉེས་པའི་མཆོད་པ་ཕུལ། བསོད་ནམས་དང་ཡེ་ཤེས་ཀྱི་ཚོགས་རྫོགས་སྒྲིབ་པ་བཞི་པོ་དག་རྒྱལ་བ་སྲས་དང་བཅས་པའི་ཐུགས་རྗེ་དང་བྱིན་རླབས་ཐམས་ཅད་འོད་ཟེར་ཁ་དོག་སྣ་ཚོགས་པའི་རྣམ་པར་བྱུང་ནས་རང་ལ་ཐིམ་པས། ཐུན་མིན་མཆོག་གི་དངོས་གྲུབ་ཟུང་འཇུག་སྐུ་བཞིའི་གོ་འཕང་དང་། ཐུན་མོང་གི་གྲུབ་པ་བརྒྱད་ལ་སོགས་པའི་དངོས་གྲུབ་དང་། ལམ་དང་འབྲེལ་པ་རིག་འཛིན་བཞི་སྟེ་རྣམ་སྨིན་རིག་འཛིན། ཚེ་དབང་རིག་འཛིན། ཕྱག་ཆེན་རིག་འཛིན། ལྷུན་གྲུབ་རིག་འཛིན་བཅས་དང་། མཐར་ཐུག་གི་འབྲས་བུ་མི་སློབ་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་གྱུར་པར་བསམ་པ་དེ། རང་དོན་ཆོས་སྐུའི་རྟེན་འབྲེལ་བསྒྲིགས་པ་ཡིན། ཡང་ཡིག་འབྲུ་ལྔ་པོ་ལས་འོད་ཟེར་ཁ་དོག་སྣ་ཚོགས་བརྒྱ་སྟོང་གྲངས་མེད་པ་མར་འཕྲོས། ཁམས་གསུམ་རིགས་དྲུག་གི་སེམས་ཅན་ཐམས་ཅད་ལ་ཕོག སེམས་ཅན་དེ་རྣམས་ཀྱི་རྒྱུད་ལ་ཡོད་པའི་ཚེ་རབས་ཐོགས་མེད་ནས་བསགས་པའི་སྡིག་སྒྲིབ་སྡུག་བསྔལ་བག་ཆགས་དང་བཅས་པ་ཐམས་ཅད་མུན་པར་ཉི་མ་ཤར་ནས་བསལ་བ་ལྟར་སང་སང་དག འགྲོ་བ་རིགས་དྲུག་གི་གནས་རིས་ཕྱི་སྣོད་ཀྱི་འཇིག་རྟེན་ཐམས་ཅད་ཤར་ཕྱོགས་མངོན་པར་དགའ་བའི་ཞིང་ཁམས་དང་། ནང་བཅུད་ཀྱི་རིགས་དྲུག་གི་སེམས་ཅན་ཐམས་ཅད་རྡོ་རྗེ་སེམས་དཔའ་དཀར་སེར་དམར་ལྗང་མཐིང་ག་སྟེ་རྡོ་སེམས་རིགས་ལྔའི་རང་བཞིན་དུ་གྱུར་ནས། ནམ་མཁའ་གང་བའི་རྡོ་རྗེ་སེམས་དཔའ་དེ་ཐམས་ཅད་ཀྱི་ཞལ་ནས། ཨོཾ་བཛྲ་སཏྭ་ཧཱུྃ། ཞེས་འུར་དི་རི་རི་སྒྲོགས་པར་བསམ་ནས་བཟླ་བ་ནི། གཞན་དོན་གཟུགས་སྐུའི་རྟེན་འབྲེལ་བསྒྲིགས་པ་ཡིན། དེ་ལྟར་ཡང་ཆོས་སྤྱོད་བག་ཆགས་རང་གྲོལ་ལས། འཕྲོ་འདུས་དོན་གཉིས་བྱས་ནས་རྟོག་སྒྲིབ་སྦྱངས། །ཞེས་གསུངས་པ་ཡང་གོང་གི་འོད་ཟེར་སྤྲོ་བསྡུ་འདི་ལྟ་བུའི་དམིགས་གནད་ལ་ཟེར་བ་ཡིན། དམིགས་པའི་གནད་འདི་ལྟ་བུ་ལ་བརྟེན་ནས་གསང་སྔགས་རྡོ་རྗེ་ཐེག་པ་ཐབས་མང་བ་དང་ཐབས་མཁས་པའི་གནད་ཀྱིས་བསོད་ནམས་དང་ཡེ་ཤེས་ཀྱི་ཚོགས་བསམ་གྱིས་མི་ཁྱབ་པ་ཡང་སྐད་ཅིག་མ་རེ་ལ་རྫོགས་ཤིང་འདུམ་པར་ནུས་པས། དེ་དང་མཉམ་དུ་ནམ་མཁས་གར་ཁྱབ་ཀྱི་སེམས་ཅན་གྱི་ཚོགས་མཐའ་ཡས་པའི་དོན་ཡང་མཉམ་དུ་སྒྲུབ་ནུས་པ་ཡིན། རང་ཉིད་རྡོར་སེམས་ཡབ་ཡུམ་གསལ་དག་བརྟན་གསུམ་ཚང་བ་སྒོམ་པ་དེ་ཏིང་འཛིན་ལྷ་ཡི་གཟེར་དང་། ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ཡིག་གི་མཐར་ཡི་གེ་བརྒྱ་པས་བསྐོར་ནས་ཡིག་བརྒྱ་བཟླ་བར་སྙིང་པོ་སྔགས་ཀྱི་གཟེར་དང་། འོད་ཟེར་འཕྲོ་འདུས་དོན་གཉིས་བྱས་པ་དེ་ཉིད་འཕྲོ་འདུ་ཕྲིན་ལས་ཀྱི་གཟེར་དང་། དེ་ལྟར་སྒོམ་པའི་སྐབས་ཀུན་ཏུ་བདེན་མེད་སྒྱུ་མ་ལྟ་བུའི་ཏིང་འཛིན་དང་ནམ་ཡང་མི་འབྲལ་ཞིང་མཐར་ལྷར་སྣང་མི་དམིགས་སྤྲོས་པ་དང་བྲལ་བའི་ངང་དུ་མཉམ་པར་འཇོག་པ་དེ་དགོངས་པ་མི་འགྱུར་བའི་གཟེར་ཡིན་པས་གཟེར་བཞིའི་མན་ངག་ཀྱང་ཚང་བ་ཡིན། དེ་ལྟར་བཟླས་པ་ཅི་རིགས་པར་བྱས་པའི་རྗེས་སུ་ཐུན་བསྡུ་རན་པ་ན། ཕྱི་སྣོད་ཀྱི་འཇིག་རྟེན་མངོན་དགའི་ཞིང་དུ་སྣང་བ་ཐམས་ཅད་ནང་བཅུད་ཀྱི་རྡོར་སེམས་རིགས་ལྔའི་ལྷ་ཚོགས་ལ་བསྡུ། དེ་རྣམས་ཀྱང་རིམ་གྱིས་འོད་དུ་ཡལ་ནས་རང་ལ་བསྡུ། རང་ཡང་མཐའ་ནས་རིམ་གྱིས་འོད་དུ་ཡལ་ནས་ཐུགས་ཀའི་ཨོཾ་ལ་ཐིམ། ཨོཾ་བཛྲ་ལ། བཛྲ་ས་ལ། སཏྭ་ལ། ཏྭ་ཧཱུཾ་གི་ཞབས་ཀྱུ། འ་ཆུང་ཧ་ཁོག མགོ་བོ་ཟླ་ཚེས་ཐིག་ལེ་ནཱ་དའི་བར་རིམ་བཞིན་ཐིམ་ནས། ནཱ་ད་ཡང་ནམ་མཁར་འཇའ་ཚོན་ཡལ་བ་ལྟར་མི་དམིགས་སྤྲོས་པ་དང་བྲལ་བའི་ངང་ལ་དར་ཅིག་ལྷོད་དེ་མཉམ་པར་བཞག དེ་ནས་ཡང་རྣམ་རྟོག་ཅིག་འཆར་བ་རྩོམ་པ་ན། སླར་ཡང་སྣོད་བཅུད་ཐམས་ཅད་རྡོ་རྗེ་སེམས་དཔའི་ཞིང་ཁམས་སུ་སྣང་ལ་རང་བཞིན་མེད་པ་བཀྲ་ལམ་གྱིས་གསལ་ལ། དགེ་བ་འདི་ཡིས་མྱུར་དུ་བདག །རྡོ་རྗེ་སེམས་དཔའ་འགྲུབ་གྱུར་ནས། །སོགས་བསྔོ་བ་དང་སྨོན་ལམ་བྱ། ཡང་སྙིང་ཡི་གེ་བརྒྱ་བ་དང་ས་ཏྭ་ཅི་ནུས་སུ་བཟླས་པ་འདི་བསྐྱེད་རིམ་ལ་བརྟེན་པའི་སྒྲིབ་སྦྱོང་དང་། མཐར་ཐུག་ལྷ་སྔགས་ཀྱི་སྤྲོས་པ་འོད་གསལ་གཉུག་མའི་ངང་དུ་བསྡུས་ཏེ་སྦྱང་བྱ་དང་སྦྱོང་བྱེད་ཀྱི་རྟོག་ཚོགས་ཐམས་ཅད་གཟོད་མ་ཉིད་ནས་རང་བཞིན་གྱིས་མ་གྲུབ་པ་རིག་སྟོང་དོན་གྱི་རྡོ་རྗེ་སེམས་དཔའི་རང་ཞལ་ལྟ་ཞིང་མཉམ་པར་འཇོག་པ་ནི་དོན་དམ་རྫོགས་རིམ་ལ་བརྟེན་ནས་སྒྲིབ་པ་སྦྱོང་ཚུལ་ཡིན། ཨ་ཡིག་སྐྱེ་བ་མེད་པའི་ཆོས་ཉིད་དུ། །གཞི་ལམ་འབྲས་བུ་དབྱེར་མེད་བྱང་ཆུབ་སེམས། །སྦྱང་བྱ་སྦྱོང་བྱེད་ལས་འདས་རྫོགས་པ་ཆེ། །རྣལ་གྲོལ་རིག་སྟོང་སོར་བཞག་བཤགས་པའི་རྒྱལ། །ཞེས་གསུངས། དེ་ལྟར་རྡོར་སེམས་སྒོམ་བཟླས་བྱེད་པ་འདི་ལ་སོགས་པ་བཟླས་བརྗོད་གང་བྱེད་ཀྱི་དུས་སུ་སེམས་དམིགས་པ་ལས་གཞན་དུ་མ་ཡེངས་པ་དང་། བཟླས་བརྗོད་གཏམ་ཉོབ་མི་ཚིག་གིས་བར་མ་ཆོད་པ་ནི་ཅི་ནས་ཀྱང་གལ་ཆེ་སྟེ། རྒྱུད་ལས་ཀྱང་། གལ་ཏེ་ཏིང་འཛིན་འདི་མེད་ན། །རྒྱ་མཚོའི་འཇིང་གི་ཕ་བོང་བཞིན། །བསྐལ་པར་བཟླས་ཀྱང་འབྲས་མི་འབྱིན། །ཞེས་དང་། དེ་བཞིན་དུ་དག་དང་མ་དག་སྟོང་འགྱུར་ཡིན། །ཏིང་འཛིན་ཡོད་མེད་འབུམ་འགྱུར་ཡིན། །ཞེས་གསུངས། སྔགས་དང་བསྙེན་པ་བཟླ་བའི་དུས་སུ་ཐ་མལ་མ་དག་པའི་ལོང་གཏམ་ཆགས་སྡང་གི་གཏམ་གཞན་དང་བསྲེས་ནས་བཟླ་བ་ནི། སྔགས་མ་དག་པ་ཡིན་ཏེ། དཔེར་ན་གསེར་དང་དངུལ་ལ་ར་གན་ནམ་ཟངས་ལ་སོགས་པ་སླད་ཅུང་ཟད་འདྲེས་ཀྱང་། གསེར་མིན་ནམ་དངུལ་ལོག་ཏུ་གྲགས་ཏེ། དེས་གསེར་དངུལ་གྱི་གོ་མི་ཆོད་པ་དང་འདྲ་བ་ཡིན། དེས་ན་ཨོ་རྒྱན་ཆེན་པོའི་ཞལ་ནས་ཀྱང་། ལོ་གཅིག་འབག་བསྙེན་བྱས་པ་བས། །ཟླ་གཅིག་སྨྲ་བཅད་བྱས་པ་དགའ། །ཞེས་གསུངས། དེས་ན་ད་ལྟའི་དུས་གྲོང་ཆོག་པ་རྣམས་ཀྱང་ཞེས་ཕྱག་བླ་མར་འཚལ་ན་ཕྱི་མར་ཨེ་ཕན། །ལྟོ་སྡར་ལིར་བླུད་ན་བདག་པོར་ཨེ་ཕན། །བསམ་ནས་དྲངས་འོང་བའི་ཚོགས་གྲལ་སོགས་སུ་འདོན་པ་དང་བཟླས་བརྗོད་ཀྱི་དུས་སྨྲ་བཅད་བྱེད་པ་ནི་ཅི་ནས་ཀྱང་གལ་ཆེ། ཐ་མལ་པའི་ངག་འཁྱལ་དང་འདྲེས་པའི་འདོན་ཟློས་སོགས་བྱས་ན་དེ་ལ་ཡོན་བདག་དད་པ་ལོག་བྱེད། གཤིན་པོའི་རྣམ་ཤེས་ངན་སོང་འཕེན་བྱེད་ལས་སྙིང་པོ་ཅི་ཡང་མེད་པ་དང་། ཁྱད་པར་གཤིན་པོ་སོགས་ཀྱི་དོན་ཡིན་ན། བར་དོ་ན་གནས་པའི་སེམས་ཅན་དེ། འཇིགས་པའི་སྒྲ་བཞི་དང་ཡ་ང་བའི་གཡང་ས་གསུམ་ལ་སོགས་པ་འཇིགས་སྐྲག་དང་སྡུག་བསྔལ་ལ་སོགས་པས་གདུང་བའི་ཚེ་ཕན་དུ་རེ་ནས་ཡོན་གནས་དང་བླ་མཆོད་ལ་སོགས་པའི་དྲུང་དུ་རྒྱུག དེའི་ཚེ་དེ་དག་གི་ཏིང་ངེ་འཛིན་མི་གསལ་བ་དང་། སྡོམ་པ་འཆལ་བ་དང་དམ་ཚིག་མི་དག་པ་དང་ཆགས་སྡང་གི་གཏམ་དང་རྟོག་པ་ལ་སོགས་པ་འཆར་གྱིན་ཡོད་ན། བར་དོའི་འགྲོ་བ་དེ་རྣམ་རིག་དགུ་འགྱུར་གྱིས་གསལ་ཞིང་མངོན་ཤེས་ཕྲ་མོ་དང་ལྡན་པ་ཡིན་པས། དེ་དག་ཤེས་ནས་བླ་མཆོད་ལ་ལོག་ལྟའམ་ཞེ་སྡང་སྐྱེས་ནས་ཆུ་ནང་གི་ཀོ་གྲུ་ལྟར་རྐྱེན་ཆུང་ངུ་དེས་བསྒྱུར་ནས་ངན་སོང་དུ་འགྲོ་བར་བཤད་པས། དེ་ལྟ་བུའི་བླ་མཆོད་མ་དག་པ་ནི། ཡོད་པ་ལས་ཀྱང་མེད་པ་དགའ། ཁྱད་པར་གསང་སྔགས་རྡོ་རྗེ་ཐེག་པའི་ཆོ་ག་རྣམས་ནི། བསྐྱེད་རིམ་གསལ་འདེབས་བརྗོད་པ་ཚིག་གི་སྒོ། །ཞེས་བསྐྱེད་རིམ་གྱི་གནད་དེ་དག་སེམས་ལ་གསལ་འདེབས་པའི་ཚིག་ཙམ་ཡིན་པ་ལ། གསལ་འདེབས་རྒྱུའི་བསྐྱེད་རྫོགས་ཀྱི་དོན་སྐོར་ལ་བློ་ཁ་ཙམ་ཡང་མི་ཕྱོགས་པར་སེམས་གཞན་དུ་གཡེངས་ནས་ཁ་ཚིག་སྟོང་པ་ཞིག་གིས་གསལ་གསལ་བསྒོམ་བསྒོམ་དམིགས་དམིགས་ལ་སོགས་པ་ཆོ་གའི་ཚིག་རིགས་མང་པོ་ཞིག་གྱར་མ་གྱེར་ཁུག་རྔ་སིལ་རོལ་གླིང་རྣམས་འུར་འུར་ཆེམ་ཆེམ་དུ་གྱེར་ཏེ། དོན་གྱི་སྙིང་པོ་བསྙེན་སྒྲུབ་ཡན་ལག་བཞིའི་དོན་ངག་གི་བཟླས་བརྗོད་བསྙེན་པ་སེམས་ཀྱི་བསྐྱེད་རིམ་དངོས་ལ་ཐུག་ཙ་ན། བློ་བག་གིས་ལྷོད་ཐ་ན་ལུས་ཚུགས་དྲང་པོ་ཞིག་ཡོད་པ་ཡན་ཆད་ཤིག་གིས་བཤིག མི་དགེ་བ་བརྒྱ་ཕྲག་གི་འབྱུང་ཁུངས་ཉེས་པ་ཤིན་ཏུ་ཆེ་བའི་ཐ་མ་ཁ་ལ་སོགས་པ་གཞིབ། ད་ལྟ་ཕྱོགས་གཅིག་ནས་སྐྱེ་བོ་ཕལ་བས་ཀྱང་དུག་བཞིན་སྤངས་ན་བན་སེར་མོ་རྣམས་ཀྱིས་མི་སྤྱོད་པར་སྨོས་ཀྱང་ཅི་དགོས་ཞེས་པའི་དོན་དུ་གནས། ཕུ་མདའ་ལ་ཤོད་ཀྱི་གཏམ་འབྲེལ་བ་མེད་པའི་ངག་འཁྱལ་མང་པོའི་གཏེར་སྒོ་ཕྱེ། གཏམ་ཉོབ་དང་བཟླས་པ་བསྲེས་ཏེ་ཕྲེང་བ་སྟོང་བགྲང་རྒྱུ་ནག་བདའ་བདའ་བྱེད་པས་དུས་འདའ། ཕྱི་འཕྲེད་ཙམ་ན་གནམ་ལ་གཅིག་བལྟས་ནས། བཛྲ་པུཥྤེ་དྷཱུ་པེ་ཟེར་ཞིང་རོལ་མོ་འུར་ཆེམས་སེ་གཏོང་བ་ནི། གསང་སྔགས་ཀྱི་ཆོ་གའི་གཟུགས་བརྙན་ལས་ཀྱང་ཡང་བརྙན་ཐ་ཆད་པ་ཡིན་པས། དེ་ལྟ་བུའི་ཆོ་ག་ཞལ་ཕྱེ་བ་ལས་ནི་བསམ་པ་རྣམ་པར་དག་པའི་སྒོ་ནས་ལྟུང་བཤགས་སམ་བཟང་སྤྱོད་ཚར་རེ་ཙམ་བཏོན་ན་རང་གཞན་ཀུན་ལ་དེ་དགའ་ངེས་སོ། །དེ་ལྟ་བུ་མ་དག་པའི་བཟླས་བརྗོད་དང་ཆོ་གའི་གཟུགས་བརྙན་ལ་བརྟེན་ནས་གཤིན་པོ་ངན་སོང་དུ་འཕེན་པའི་བླ་མཆོད་དེས་ནི། གསོན་པོའི་སྐུ་རིམ་བྱས་ཀྱང་ཕན་ལས་གནོད་པ་ཆེ་བ་དེ་དང་འདྲ། དེ་ལྟ་བུ་དེས་དཀོར་ཟོས་པ་ཡང་ལྕགས་ཀྱི་ཐོ་ལུམ་མེ་འབར་བ་ཟོས་པ་དང་འདྲ་བར་རང་ཉིད་མ་རུང་བར་བྱེད་ངེས་པ་ཡིན་ནོ། །དེས་ན་གསོན་པོའི་དད་ཟས་དང་གཤིན་དཀོར་ཟ་བ་རྣམས་ནི་བླ་མའམ་གྲྭ་བ་སུ་ཡིན་ཡང་འདྲ་སྟེ། ཤ་ཆེ་ཆུང་ཐུད་སྲབ་འཐུག་ཡོན་བདག་གི་འབུལ་བ་བཟང་ངན་ཁོ་ན་ལ་ཐུགས་དམ་གྱི་མཐིལ་དུ་མི་བྱ་བར། ནད་པའམ་ཤི་པོ་སུ་ཡིན་ཡང་འདྲ་སྟེ་གལ་འགགས་ལ་བབ་སྟེ་སྡུག་ཐུག་པའི་སེམས་ཅན་སྐྱབས་དང་བྲལ་བ་དེ་ལ་ཕན་འདོད་ཀྱི་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ཀྱིས་ཟིན་པར་བྱས་ནས། བསྐྱེད་རྫོགས་རང་གིས་གང་ཤེས་སྙིང་ཐག་པ་ནས་མ་ཡེངས་པར་འབད། དེ་ལྟར་བསྐྱེད་རྫོགས་རྒྱ་ཆེར་མི་ཤེས་པ་རྣམས་ཀྱང་འདོན་བྱ་གང་ཡིན་གྱི་ཚིག་རྗེས་དོན་དྲན་ཙམ་མམ། ཐ་ན་ཡང་ཉམ་ཐག་པའི་སེམས་ཅན་ཧུ་ཐུག་དེ་ལ་བྱམས་པ་དང་སྙིང་རྗེ་བསྐྱེད་པ་དང་དཀོན་མཆོག་གསུམ་གྱི་བདེན་མཐུ་བསླུ་བ་མེད་པ་ལ་དད་པ་ངེས་ཤེས་སོགས་སྒོ་ལུས་ངག་ཡིད་གསུམ་ཆུན་གཅིག་དྲིལ་གྱིས་འབད་དེ། ཆོ་ག་དང་བཟླས་བརྗོད་སོགས་མ་མཐའ་ཡང་སྒྲ་དག་སྒྲོས་གཙང་བ་རེ་འགྲུབ་ངེས་བྱས་ན། སྐྱབས་གནས་དཀོན་མཆོག་གསུམ་གྱི་ཐུགས་རྗེ་དང་རྒྱུ་འབྲས་བསླུ་བ་མེད་པའི་ནུས་མཐུ་དང་བྱང་ཆུབ་སེམས་ཀྱི་ཕན་ཡོན་ཚད་མེད་པ་རྣམས་ལ་བརྟེན་ནས། ནད་པ་དང་ཤི་པོ་གང་ཡིན་དེ་ལ་ཕན་ཐོགས་ངེས་ཤིང་། མིའི་སྟན་ཐོག་ནས་རང་གི་སྒྲིབ་པ་སྦྱོང་ཟེར་བ་ལྟར། རང་གཞན་གྱི་ཚོགས་གཉིས་མཉམ་དུ་རྫོགས། འབྲེལ་ཚད་ཐར་པའི་ལམ་ལ་འགོད་པ་ཡིན་པས་དེ་ལྟ་བུ་རེ་ལ་ཅི་ནས་ཀྱང་འབད་དགོས་སོ། །ལར་ད་ལྟའི་དུས་ན་བླ་མའམ་སེར་མོ་ཅུང་ཟད་བཟང་དུ་རེ་བ་རྒྱུ་འབྲས་ཀྱི་གནད་ཤེས་པ་རྣམས་ནི། རང་ཉིད་ལ་དཀོར་གྱི་ཉེས་དམིགས་ཙམ་ལ་འཇིགས་ནས་ནད་པ་དང་ཤི་པོ་སྡུག་ཐུག་པའི་སེམས་ཅན་དེ་ལ། བྱིན་རླབས་དང་བསྔོ་སྨོན་ཙམ་ཡང་མི་བྱེད་པར་བྱམས་སྙིང་རྗེ་བྱང་ཆུབ་སེམས་ཀྱི་རྩ་བ་བཅད་དེ་ཕ་རོལ་པོ་བློས་གཏོང་། ཕལ་ཆེར་ནི་ཧ་ཅང་རང་འདོད་ཆེ་ཆེས་པས་སྦྱིན་བདག་གི་ཚོགས་གྲལ་དུ་འོང་། དེ་ཚང་ལ་དགོས་རྒྱུའི་འདོན་པ་དེ་མི་འདོན་པར། རང་གི་ཁ་ཏོན་ནག་ལྕིབས་ལྕིབས་ཤིག་བླངས་ཏེ་དེ་ཆགས་མི་ཉན་པའི་ཁུལ་གྱིས་འདོན་ཚུལ་བྱེད། དེ་ལྟ་བུའི་གང་ཟག་དེ་དག་སུ་ཡིན་ཡང་འདྲ་སྟེ་རང་དོན་གྱི་འདོན་པ་དང་བཟླས་བརྗོད་སོགས་ཅུང་ཟད་རེ་བྱེད་པ་དེ་ལ་གཟབ་གཟབ་ལྟ་བུ་རེ་བྱེད་ཅིང་། དེ་རང་གི་སྒྲིབ་སྦྱོང་ངམ་དཀོར་སྦྱོང་ཡིན་ཁུལ་བྱེད། སྦྱིན་བདག་གི་འདོན་པ་མང་ཚོགས་ཀྱི་གྲལ་དུ་བྱེད་པ་དེ་ལ་ནི་ཁ་ཡེངས་མིག་ཡེངས་ཁྲལ་རྒྱུག་མ་བྱེད། གང་བསྐྱབ་པར་བྱ་རྒྱུའི་སེམས་ཅན་ཤི་གསོན་སུ་ཡིན་ཡང་། དེའི་དོན་ནི་བློ་ལ་མི་འཆར་བ་དེ་རྣམས་ནི་བྱམས་སྙིང་རྗེ་བྱང་ཆུབ་སེམས་ཀྱི་རྩ་བ་ཆད་པ་ཡིན་པས། རྗེས་ནས་དཀོར་སྦྱོང་བྱས་ཀྱང་རང་འདོད་ཡིད་བྱེད་ཀྱི་བློ་ངན་དེས་དཀོར་སྒྲིབ་སྦྱོང་བ་ཡང་དཀའ། དང་པོ་ཉིད་ནས་དད་པ་དང་དག་སྣང་བྱམས་སྙིང་རྗེ་བྱང་ཆུབ་ཀྱི་སེམས་ལ་གཞི་བཅོལ། བསྐྱེད་རྫོགས་སོགས་ཅི་ཤེས་ཅི་ནུས་ལ་སྙིང་ཐག་པ་ནས་འབད། སྙིང་རྗེའི་ཡུལ་སེམས་ཅན་ལ་ཕན་འདོད་ཀྱི་ཀུན་སློང་དང་མ་བྲལ་བར་བྱས་ན། རང་གི་ཁྱིམ་ནས་བསྐྱེད་རྫོགས་བསྒོམས་ཏེ་བཟླས་བརྗོད་བྱས་པ་དང་། ཡོན་བདག་སོགས་གཞན་གྱི་ཁྱིམ་ནས་བསྐྱེད་རྫོགས་བསྒོམས་ཏེ་བཟླས་བརྗོད་བྱས་པ་ལ་ནི་ཁྱད་པར་སྤུ་ཙམ་ཡང་མེད་ཅིང་། ཐེག་ཆེན་བྱང་ཆུབ་སེམས་ཀྱིས་ཟིན་པའི་དགེ་རྩ་ཞིག་སྒྲུབ་ཚེ་གང་ལྟར་ཡང་རང་འདོད་ཀྱི་བློ་དང་བྲལ་ཏེ། གཞན་དོན་ལ་དམིགས་དགོས་པ་ནི་འདྲ་འདྲ་ཡིན་པས་རང་གཞན་གཉིས་ཀའི་མགོ་མི་སྐོར་བ་དེ་ལྟ་བུ་རེ་ངེས་པར་དགོས་སོ། །དེ་ལྟར་སེམས་དམིགས་པ་ཏིང་འཛིན་གྱི་གནད་ལས་གཞན་དུ་མི་ཡེངས་ཤིང་ཐ་མལ་ངག་འཁྱལ་གྱི་སྨྲ་བ་དང་མ་འདྲེས་པར། དུས་གཅིག་ལ་ཡི་གེ་བརྒྱ་པ་ལན་བརྒྱ་རྩ་བརྒྱད་བཟླས་ན་སྔར་བྱས་ཀྱི་སྡིག་སྒྲིབ་དང་ཉམས་ཆག་ཐམས་ཅད་ངེས་པར་དག་པ་ཡིན་ཏེ། དཔེར་ན་ཁང་སྟོང་དུ་ལོ་སྟོང་གནས་པའི་མུན་པ་ཡང་མར་མེ་གཅིག་གིས་སྐད་ཅིག་ལ་སེལ་ནུས་པ་བཞིན། སེམས་ལ་ངོ་བོ་ཉིད་མེད་པར་སྤྲོས་བྲལ་ཡང་དག་པའི་བདེན་པ་ཤེས་དུས་བསྐལ་བ་གྲངས་མེད་པའི་སྡིག་པ་སྐད་ཅིག་མ་གཅིག་ལ་བྱང་བ་ཡིན་པས། སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་འབྲེལ་བའི་གཉེན་པོ་སྟོབས་བཞིའི་སྒོ་ནས་བཤགས་ན་མི་འདག་པ་མེད་དེ། ཀླུ་སྒྲུབ་ཀྱིས། གང་ཞིག་སྔོན་ཆད་བག་མེད་གྱུར་བ་ལ། །ཕྱིས་ནས་བག་དང་ལྡན་པར་གྱུར་པ་དེ། །ཟླ་བ་སྤྲིན་བྲལ་ལྟ་བུ་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས་པ་ལྟར་དེ་དག་གི་སྡིག་པ་ཚབས་པོ་ཆེ་བསགས་པའང་དག་པ་ཡིན། དེ་ཡང་འདོད་འདུན་ཆེ་བ་གཅུང་དགའ་བོ་དང་། ཞེ་སྡང་ཅན་སོར་མོའི་ཕྲེང་བ་ཅན་དང་། མཐོང་ལྡན་ཏེ་རྒྱལ་པོ་མ་སྐྱེས་དགྲས་སྡིག་གྲོགས་ལྷས་སྦྱིན་གྱི་དབང་གིས་ཆོས་ལྡན་གྱི་རྒྱལ་པོ་ཕ་གཟུགས་ཅན་སྙིང་པོ་བསད་པ་དང་། གཞན་གྱི་ཆུང་མ་ལ་འདོད་ལོག་སྤྱོད་པའི་བདེ་བྱེད་ཀྱིས་རང་གི་མ་ཡང་བསད་པའི་སྡིག་སྒྲིབ་ཅན་རྣམས་ཀྱིས་བཤགས་པ་བྱས་པས་སོར་ཆུད་པའི་ལོ་རྒྱུས་ཡོད་པ་དང་། དེ་ལྟར་བླ་མ་རྡོ་རྗེ་སེམས་དཔའི་ཞལ་གྱིས་བཞེས་པ་ཡིན་ཏེ། དྲི་མེད་བཤགས་རྒྱུད་ལས་ཀྱང་། བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་ཡང་སྙིང་ཉམས་ཆག་དང་རྟོག་སྒྲིབ་ཐམས་ཅད་སྦྱོང་བར་བྱེད་པ། ཡི་གེ་བརྒྱ་པ་ཞེས་བྱ་བ་བཤགས་པ་ཐམས་ཅད་ཀྱི་རྒྱལ་པོ་འདི་དུས་གཅིག་ལ་ལན་བརྒྱ་རྩ་བརྒྱད་དུ་བཟླས་ན་ཉམས་ཆག་ཐམས་ཅད་བསྐངས་ཏེ། ངན་སོང་གསུམ་དུ་ལྟུང་པ་ལས་ཐར་བར་འགྱུར་རོ། །རྣལ་འབྱོར་པ་གང་ཞིག་གིས་ཡི་དམ་དུ་བཅས་ནས་འདོན་ན། མི་དེ་ཚེ་འདི་ལའང་དུས་གསུམ་གྱིས་སངས་རྒྱས་ཐམས་ཅད་ཀྱི་སྲས་ཀྱི་དམ་པར་དགོངས་ནས་སྲུང་སྐྱོབ་མཛད་ལ། ཤི་འཕོས་ནས་ཀྱང་བདེ་བར་གཤེགས་པ་རྣམས་ཀྱི་སྲས་ཀྱི་ཐུ་བོར་འགྱུར་པར་གདོན་མི་ཟའོ། །ཞེས་གསུངས། དེ་བཞིན་དུ་གསང་སྔགས་རྡོ་རྗེ་ཐེག་པའི་ཆོས་སྒོར་ཞུགས་ནས་རྩ་བ་ཡན་ལག་གི་དམ་ཚིག་ཉམས་ཆག་ཆེ་ཆུང་གང་བྱུང་ཡང་། ཉིན་རེ་བཞིན་རྡོ་རྗེ་སེམས་དཔའ་སྤྱི་བོར་བསྒོམས་ནས་སྙིང་པོ་ཡི་གེ་བརྒྱ་པ་ཉི་ཤུ་རྩ་གཅིག་རེ་བཟླས་ན། དེས་ལྟུང་བ་བྱིན་གྱིས་བརླབས་པ་ཞེས་བྱ་སྟེ། ལྟུང་བ་བྱུང་བའི་རྣམ་སྨིན་ངན་པ་གོང་དུ་འཕེལ་འགྲོ་རྒྱུ་མེད་པ་དང་། ཡི་གེ་བརྒྱ་པ་འབུམ་ཕྲག་གཅིག་བཟླས་ན་ལྟུང་བ་ཐམས་ཅད་རྩ་བ་ནས་དག་པར་སྙིང་པོ་རྒྱན་ལས་གསུངས་ཏེ། པད་དཀར་ཟླ་བའི་གདན་གནས་པའི། །རྡོ་རྗེ་སེམས་དཔའ་ལེགས་དམིགས་ཏེ། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་རེ་བཟླས་གྱུར་ན། །ལྟུང་སོགས་བྱིན་གྱིས་བརླབས་འགྱུར་ཕྱིར། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །རྟག་པར་དུ་ནི་ཉམས་སུ་བླང་། །འབུམ་ཕྲག་གཅིག་ཏུ་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་གསུངས། དེའི་ཕྱིར་ན་སྙིགས་མ་ལྔ་བདོ་བའི་ད་ལྟའི་དུས་འདིར་བོད་གངས་ཅན་གྱི་ཡུལ་འདི་ན་བླ་མ་སེར་མོ་མི་སྐྱ་ཕོ་མོ་ཡན་ཆད་གསང་སྔགས་ཀྱི་དཀྱིལ་འཁོར་རེ་ལས་དབང་རེ་ཐོབ་མ་མྱོང་བ་ནི་སུ་ཡང་མེད། དེས་ན་གསང་སྔགས་ཀྱི་སྒོར་མ་ཞུགས་པ་སུ་ཡང་མེད་པ་ཡིན་ལ། གསང་སྔགས་ཀྱི་སྒོར་ཞུགས་ཕྱིན་ཆད་ནི། དམ་ཚིག་མ་བསྲུངས་ན་མར་དམྱལ་བ་དང་། བསྲུངས་ན་ཡར་རྫོགས་པའི་སངས་རྒྱས་ཀྱི་གོ་འཕང་ཐོབ་པ་གཉིས་པོ་དེ་ལས་འགྲོ་ས་གསུམ་པ་གཞན་མེད་པ་ཡིན་ཏེ། དཔེར་ན་སྦྲུལ་སྙུག་དོང་དུ་བཅུག་པ་ལྟ་བུར་གསུངས། སྦྲུལ་ཞིག་སྙུག་དོང་དུ་བཅུག་ན། ཡང་ན་དེ་ཡར་ཁ་དང་ཡང་ན་མར་ཞབས་གཉིས་ལས་འགྲོ་ས་མེད་པ་ལྟ་བུ་ཡིན། ཡོན་ཏན་མཛོད་ལས་ཀྱང་། སྔགས་ལ་ཞུགས་པའི་སྐྱེས་བུ་ངན་སོང་དང་། །སངས་རྒྱས་གཉིས་ལས་འགྲོ་ས་གསུམ་པ་མེད། །ཅེས་གསུངས། དེས་ན་གསང་སྔགས་ཀྱི་དམ་ཚིག་ནི། ཕྲ་ཞིང་ཞིབ་ཅིང་གྲངས་མང་ལ་དམ་ཚིག་དེ་དག་སྲུང་དཀའ་བ་ཡིན་པས། ཇོ་བོ་རྗེ་ལྷ་ཅིག་ལྟ་བུས་ཀྱང་། སྔགས་ལ་ཞུགས་པའི་དུས་ཉེས་པ་ཅར་རྒྱག་ཉར་རྒྱག་བྱུང་གསུངས་ན། ད་ལྟ་རང་རེ་གཉེན་པོ་ཆུང་བ། མི་བརྗེད་པའི་དྲན་པ་ཉམས་པ། བག་ཡོད་པའི་ཤེས་བཞིན་མེད་པ། ལྟུང་བའི་རྣམ་གྲངས་ལེགས་པར་མི་ཤེས་པ་རྣམས་ལ་ནི། བསྲུང་བྱ་མི་ཤེས་སྲུང་བ་རློམ་པ་མཚར། །གསུངས་པ་ལྟར། ལྟུང་བའི་རྣམ་གྲངས་ཆར་པ་བཞིན་འབབ་པར་གདོན་མི་ཟ་བས། ལྟུང་བ་དེ་དག་གི་གཉེན་པོར་དུས་དང་རྣམ་པ་ཉིན་མཚན་དུས་དྲུག་ཐམས་ཅད་དུ་རྡོར་སེམས་སྒོམ་བཟླས་འདི་ལ་ཡི་དམ་དུ་བཟུང་ནས་ཐ་ན་ཡང་ཉིན་རེར་ཡིག་བརྒྱ་ཉེར་གཅིག་རེ་མ་ཆག་པར་བྱེད་པ་ནི་ཤིན་ཏུ་གལ་ཆེའོ། །གལ་ཏེ་སྐྱེས་བུ་དམ་པ་རང་ངོས་ནས་བསྐྱེད་རྫོགས་ཀྱི་གནད་ལ་མཁས་པ། དྲན་པ་དང་ཤེས་བཞིན་གསལ་བ་སོགས་ལ་བརྟེན་དམ་ཚིག་ཉམས་པའི་སྐྱོན་མ་བྱུང་ཡང་། གཞན་རྩ་བའི་དམ་ཚིག་ཉམས་པ་དག་དང་གཏམ་བསྲེ་ཞིང་འདྲེས་པ་དང་འགྲོ་འདུག་སོགས་སྤྱོད་ལམ་གྱིས་འབྲེལ་བ། ཐ་ན་ལུང་པ་གཅིག་གི་ཆུ་ལ་མཉམ་དུ་བཏུང་བས་ཀྱང་ཟླས་ཉམས་ཏེ་གྲོགས་ཀྱིས་ཉམས་པ་དང་ཞོར་ཉམས་ཀྱི་ཉེས་པ་སྐྱེད་པ་ཡིན་པས་བཤགས་སྦྱོང་ལ་འབད་དགོས་ཏེ། རྒྱུད་ལས་ཀྱང་། ཉམས་ལ་འགྲོགས་ཤིང་ཉམས་པ་སྐོང་བ་དང་། །ཉམས་དང་སྣོད་མིན་རྣམས་ལ་ཆོས་བཤད་དང་། །ཉམས་ལ་མི་འཛེམ་ཉམས་པ་དེ་དག་གི། །ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཕྱི་མའི་སྒྲིབ་གྱུར་རྣམས། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །ཞེས་གསུངས། དཔེར་ན་སྒྲུབ་པ་སྒྲུབ་ཆེན་ཞིག་གི་ཚོགས་གྲལ་གཅིག་ན་དམ་ཚིག་ཉམས་པའི་མི་གཅིག་ཡོད་ཀྱང་། དེའི་ཉམས་གྲིབ་ཀྱིས་ཐམས་ཅད་ལ་ཕོག་སྟེ་དམ་ལྡན་བརྒྱ་སྟོང་ཡོད་ཀྱང་སྒྲུབ་པའི་འབྲས་བུ་ཅུང་ཟད་ཀྱང་མི་འབྱིན་པ་འོ་མ་རུལ་པ་ཐིགས་པ་གཅིག་གིས་མ་རུལ་བ་ཟངས་གང་ཡང་རུལ་བར་བྱེད་པ་དང་། སྦལ་པ་རྨ་ཅན་གཅིག་གིས་སྦལ་བ་ཐམས་ཅད་རྨ་ཅན་དུ་བྱེད་པ་ལྟ་བུ་ཡིན་ཏེ། ཇི་སྐད་དུ། ཇི་ལྟར་འོ་མ་ཐིགས་པ་གཅིག །རུལ་བས་ཐམས་ཅད་རུལ་བ་ལྟར། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུངས་བྱེད། །ཅེས་གསུངས། རང་རེ་སོ་སྐྱེས་རང་ག་མ་རྣམས་ཉམས་གྲིབ་ཀྱིས་གོས་པ་ལྟ་ཅི་སྨོས་དེར་མ་ཟད་བླ་མ་སྐྱེས་བུ་དམ་པ་གྲུབ་པ་ཐོབ་པ་ཞིག་ཡིན་ཡང་ཉམས་གྲིབ་ཀྱིས་མི་གོས་པ་ནི་སུ་ཡང་མེད་དེ། འགྲོ་མགོན་གླིང་རྗེ་རས་པ་ལྟ་བུ་ཡང་ཙཱ་རིའི་གནས་ནང་དུ་གནས་དག་པ་ཤེལ་རིའི་གནས་བདག་ཞིང་སྐྱོང་གི་མཁའ་འགྲོས་བར་ཆད་བརྩམས་ནས་ཉི་མའི་གུང་ལ་མུན་རུབ་སྟེ་གནམ་ལ་སྐར་མ་ཁྲ་ཀྱི་ལེར་འཆར་བའི་མུན་པ་བྱུང་ཡང་། ཁོང་ཐོགས་པ་མེད་པར་དམར་ནག་རཀྟའི་མཚོ་འགྲམ་དུ་ཕྱིན་ནས་རྡོ་རྗེའི་གླུ་བླངས་ཏེ་བྲོ་བརྡུངས་རྡོ་ལ་ཞབས་རྗེས་བཞག་པ་ད་ལྟ་ཡང་མཇལ་དུ་ཡོད་པ་དེ་ལྟ་བུའི་གྲུབ་ཐོབ་ཡིན་ཡང་། ཕྱིས་སློབ་མ་དམ་ཚིག་ཉམས་པ་ཞིག་མདུན་དུ་བྱུང་བས་ཉམས་གྲིབ་ཀྱིས་ཐུགས་མྱོས་ཏེ་གསུང་སྨྲ་མི་ཤེས་པར་གྱུར་པའི་ལོ་རྒྱུས་ཡོད། དེ་བཞིན་དུ་གྲུབ་ཐོག་ཨུ་རྒྱན་པའི་མགུར་ལས་ཀྱང་། གངས་ཅན་གྱི་སྤྲང་པོ་རིན་ཆེན་དཔལ། །དགྲ་ཉམས་གྲིབ་མིན་པས་ཐུབ་མ་མྱོང་། །གྲོགས་བླ་མ་མིན་པས་སྐྱོབ་མ་མྱོང་། །ཞེས་གསུངས། གྲུབ་ཐོབ་ཨུ་རྒྱན་པ་ནི། སྔོན་མདོ་སྨད་གཡའ་མོ་ཐང་དུ་བྱང་ཆུབ་གཞོན་ནུ་བྱ་བ་བྱུང་། དེ་སློབ་དཔོན་པདྨ་བོད་དུ་བྱོན་སྐབས་ཀྱི་དངོས་སློབ་དང་། རྒྱལ་པོ་ཁྲི་སྲོང་ལྡེའུ་བཙན་གྱི་མཆོད་གནས་སུ་གྱུར་པ་ཞིག་གོ། །དེའི་གདུང་རབ་མང་པོའི་མཐར། སྲས་དབོན་ཇོ་འཕན་གྱི་སྲས་སུ་ལྕགས་ཕོ་སྟག་གི་ལོར་འཁྲུངས་པར་མཚན་སེང་གེ་དཔལ་དུ་གསོལ། ཆོས་རྗེ་རིན་ཆེན་རྩེ་མོ་དང་རྗེ་རྒོད་ཚང་བ་སོགས་བླ་མར་བསྟེན་ནས་འཆད་རྩོད་རྩོམ་གསུམ་གྱི་གྲགས་པ་ཐོབ། རོ་གཅིག་གི་རྟོགས་པས་རྒྱུད་གྲོལ། རྒོད་ཚང་བ་ལ་ཤམྦྷ་ལ་རུ་དུས་འཁོར་ཞུ་རུ་འགྲོ་ཞུས་པས། རྒོད་ཚང་བས་ཁྱོད་ཤམྦྷ་ལར་ལས་འབྲེལ་མེད། ཁྱོད་ཨུ་རྒྱན་ཡུལ་དུ་ལས་འབྲེལ་ཡོད་པས་དེར་བྱོན་གསུངས། དེ་ནས་གངས་ཏི་སེ་དང་ཛ་ལནྡྷ་རར་བརྒྱུད་ནས་བྱོན་ཚེ་ལམ་བར་འཇིགས་པའི་འཕྲང་མང་པོ་སོགས་བརྟུལ་ཞུགས་ཀྱི་སྤྱོད་པས་ཟིལ་གྱིས་ནོན་ནས། ཨུ་རྒྱན་དྷུ་མ་ཐ་ལར་བྱོན། དེར་རྡོ་རྗེ་རྣལ་འབྱོར་མས་ཞལ་མཇལ་ནས་གདམས་པ་ཡང་གནང་། རྡོ་རྗེ་གསུམ་གྱི་དོན་ཇི་ལྟ་བ་ཐུགས་ལ་འཁྲུངས་པར་གསུངས་པའི་ལོ་རྒྱུས་ཅན་གྱི་བླ་མ་དེ་རེད། སྒྲུབ་བརྒྱུད་འབྲུག་པའི་བསྟན་པ་གནམ་དུ་འདེགས་པའི་དམ་པའི་སྐྱེས་ཆེན་ཞིག་ཡིན། དེས་ན་གསང་སྔགས་རྡོ་རྗེ་ཐེག་པའི་དམ་ཚིག་འདི་ནི་ཉམས་ན་ཉེས་པ་ཆེ་ཞིང་སྲུང་བར་ཡང་ཤིན་ཏུ་དཀའ་བས། རང་གིས་རང་རྒྱུད་ལ་མི་བརྟགས་བར་ང་དམ་ལྡན་ཡིན་ནོ་སྙམ་ནས་ང་རྒྱལ་བྱས་པས་ནི་ཅི་ཡང་མི་འོང་སྟེ། སྔགས་གཞུང་དག་ལས། སྒོ་གསུམ་དཀྱིལ་འཁོར་གསུམ་གྱི་ཁྱེར་སོ་དང་སྐད་ཅིག་མ་གཅིག་བྲལ་ཀྱང་། གསང་སྔགས་ཀྱི་དམ་ཚིག་ལས་འདས་པར་བཤད་པ་ཡང་ཡོད་པས། བསྲུང་དཀའ་ཞིང་རྒྱས་པར་དབྱེ་ན་ས་མ་ཡ་འབུམ་སྡེའི་གྲངས་སུ་གསུངས་པས་རྣམ་གྲངས་མང་བ་ས་སངས་རྒྱས་སྤྱན་མ་མཐོང་ན་དམ་ལྡན། ས་ལ་ས་རུ་མཐོང་ན་དམ་ཉམས་ལྟ་བུ་བཤད་ན་ཤིན་ཏུ་དཀའ་ལ་ཉམས་པའི་ཉེས་པ་ཡང་། རྒྱུད་ལས། རྡོ་རྗེ་སྲིན་པོས་སྙིང་ཁྲག་འཐུང་བ་དང་། །ཚེ་ཐུང་ནད་མང་ནོར་ཡལ་དགྲས་འཇིགས་དང་། །མནར་མེད་དམྱལ་བ་ཤིན་ཏུ་སྐྱི་གཡའ་བར། །སྡུག་བསྔལ་མི་བཟད་ཡུན་རིང་གནས་པར་འགྱུར། །ཞེས་གསུངས་པ་ལྟར་ཡིན་པས། ང་རང་ཉམས་མེད་སྙམ་དཀའ་སྟེ་གོང་དུ་བཤད་པའི་ཟླས་ཉམས་སོགས་ཀྱིས་ཉམས་ཆག་ཉེས་ལྟུང་འབྱུང་སླ་བ་ཡིན་པས། ས་འདི་ཕྱོགས་ལ་བསམ་ན་གཅིག་དགུ་ལྔ་བཅུ་ང་དགུ་ལོ་ཚོ་རང་དབང་མེད་པར་ཡིན་པས་ཆུང་ཆུང་རེད་བསམ་འདུག རང་གི་བློ་ལ་མངོན་པ་དང་མི་མངོན་པའི་ཉམས་ཆག་ཉེས་ལྟུང་ཐམས་ཅད་ཀྱི་གཉེན་པོར་དུས་དང་རྣམ་པ་ཐམས་ཅད་དུ་རྡོར་སེམས་སྒོམ་བཟླས་དང་ཡིག་བརྒྱའི་བཤགས་པ་བྱེད་པ་ལ་འབད་དགོས་ཏེ། སྔོན་གྱི་དམ་པ་དག་གི་ཞལ་ནས་ཀྱང་། དང་པོ་ནས་སྡིག་གིས་མ་གོས་པ་དང་། གལ་སྲིད་གོས་ན་བཤགས་པ་བྱེད་པ་གཙོ་ཆེ་བ་ཡིན་གསུངས། བཤགས་ན་འདག་པ་ཡང་གསང་སྡགས་ཀྱི་དམ་ཚིག་ཉམས་པ་འདི་སླ་བ་ཡིན་ཏེ། ཉན་ཐོས་ཀྱི་ལུགས་ལ་རྩ་ལྟུང་སྐོར་གཅིག་བྱུང་ན་ཤིང་ཏ་ལའི་མགོ་བོ་བཅད་པའམ་རྫ་བེའུ་ཆག་པ་དང་འདྲ་སྟེ་སླར་གསོ་རུང་བའི་ཐབས་མེད་པར་གསུངས། བྱང་སྡོམ་རིན་པོ་ཆེའི་ཉེར་སྤྱད་ཆག་པ་དང་འདྲ་སྟེ། དཔེར་ན་རིན་པོ་ཆེའི་ཉེར་སྤྱད་ཆག་ན་མགར་བ་མཁས་པ་ལ་བརྟེན་ནས་བཅོས་སུ་ཡོད་པ་ལྟར། གཞན་རྐྱེན་དགེ་བའི་བཤེས་གཉེན་ལ་བརྟེན་ནས་གསོ་རུང་བར་གསུངས། གསང་སྔགས་ཀྱི་སྡོམ་པ་ནི་རིན་པོ་ཆེའི་ཉེར་སྤྱད་ཅུང་ཟད་ཞོམ་པ་དང་འདྲ་སྟེ། ཉམས་པ་པོ་རང་ཉིད་ཀྱིས་ཀྱང་ལྷ་སྔགས་ཏིང་འཛིན་ལ་བརྟེན་ནས་སྟོབས་བཞི་ཚང་བའི་བཤགས་པ་བྱས་ཀྱང་ལྷག་མ་མེད་པར་དག་པར་གསུངས་པ་ཡིན། དེ་ཡང་དུས་ཡུན་རིང་པོ་མི་འགོར་བར་འཕྲལ་དང་འཕྲལ་དུ་བཤགས་ན་འདག་སླ་སྟེ། ཡུན་རིང་པོ་ལོན་ནས་ནི་ཉེས་པ་ཉིན་རེ་བཞིན་གོང་ནས་གོང་དུ་འཕེལ་བ་ཡིན་པས་བཤགས་ལྷག་པར་དཀའ་ཞིང་། ལོ་གསུམ་འདས་ན་གསོ་མི་རུང་བ་ཡིན། །ཅེས་པ་ལྟར། ལོ་གསུམ་འདས་ཕན་ཆད་བཤགས་པའི་ཡུལ་ལས་འདས་པས་དེའི་དུས་སུ་བཤགས་པ་བྱས་ཀྱང་མི་འདག་པར་གསུངས་སོ། །གཞན་ཡང་ངག་ནུས་དང་བྱིན་རླབས་ཀྱི་སྒོ་ནས་གཞན་གྱི་སྲུང་སྐྱོབ་བྱེད་པ་དང་། སད་སེར་དང་ནད་ཡམས་གཅོད་པ། ནད་པ་དང་མིའི་ཕྲུ་གུའི་ཆུང་སྲི་གཅོད་པ་ལ་སྲིའུ་གསོ་བ་ཟེར་བ་སོགས་རང་དོན་དང་གཞན་དོན་སྦྲེལ་མར་བྱེད་པ་རྣམས་ཀྱང་། ངག་ནུས་དང་བྱིན་རླབས་ཡོད་པར་བྱེད་པ་ལ། ངག་གི་སྒྲིབ་པ་དག་དགོས་ཤིང་། ངག་གི་སྒྲིབ་པ་མ་དག་ན་མི་ཕན་པ་དང་ངག་གི་སྒྲིབ་པ་དག་པར་བྱེད་པ་ལ་སྙིང་པོ་ཡི་གེ་བརྒྱ་པ་ལས་ལྷག་པ་གང་ཡང་མེད་པས། དུས་དང་རྣམ་པ་ཐམས་ཅད་དུ་ཡིག་བརྒྱའི་བཟླས་པ་ལ་འབད་པ་གལ་ཆེ་སྟེ། རྗེ་བླ་མ་འཇིགས་མེད་རྒྱལ་བའི་མྱུ་གུའི་ཞལ་ནས་ཀྱང་། ཞལ་བཀྱལ་གྱི་ཚུལ་དུ། གཞན་ལ་སྲུང་སྐྱོབ་བྱེད་པ་དང་། གཤིན་གསོན་གྱི་དཀོར་ཟ་བ་རྣམས་ཀྱིས་དང་པོ་རང་གི་ངག་སྒྲིབ་སྦྱོང་བ་ལ་ཡིག་བརྒྱ་འབུམ་ཐེར་བརྒྱ་རེ་མ་ཐོན་པའི་ཐབས་མེད་ཅེས་གསུངས་ཏེ། རྗེའི་ཞལ་སློབ་ཏུ་གྱུར་པ་ལ། ཡིག་བརྒྱ་འབུམ་ཕྲག་ཉིས་བརྒྱ་རེ་དང་བརྒྱ་རེ་ཐུབ་པ་དུ་མ་ཡོད་ཅིང་། ཐ་མ་རྣམས་ཀྱང་ཡིག་བརྒྱ་འབུམ་ཕྲག་གཉིས་གསུམ་རེ་མ་སོང་བ་ནི་སུ་ཡང་མེད་པ་ལྟ་བུ་ཡིན་ནོ། །དེས་ན་བླ་མ་རྡོ་རྗེ་སེམས་དཔའ་ནི། རིགས་བརྒྱ་ཞི་ཁྲོའི་ལྷ་ཚོགས་རིགས་གཅིག་ཏུ་ཀུན་འདུས་རྡོ་རྗེ་སེམས་དཔའ་ལ་འདུས་པའི་རང་བཞིན། གསང་ཆེན་རིགས་གཅིག་རྡོ་རྗེ་སེམས་དཔའ་ཞེས་བྱ་སྟེ། ཡི་དམ་གྱི་ལྷ་ཞི་ཁྲོ་རབ་འབྱམས་བསམ་གྱིས་མི་ཁྱབ་པ་དག་ཀྱང་། རྡོ་རྗེ་སེམས་དཔའ་གཅིག་ལ་མ་འདུས་པ་མེད། ངོ་བོ་རྩ་བའི་བླ་མ་དང་དབྱེར་མེད་དུ་བསྒོམས་པས། བླ་མའི་རྣལ་འབྱོར་ཀྱང་ཀུན་འདུས་ནོར་བུའི་ལུགས་སུ་བསྒོམ་པ་ཞེས་ཤིན་ཏུ་ཟབ་པའི་མཐར་ཐུག་པ་ཡིན། སྔགས་ཀྱང་སྙིང་པོ་ཡི་གེ་བརྒྱ་པ་ལས་ལྷག་པ་མེད་ཚུལ་སྔར་བཤད་པ་ལྟར་ཡིན་པས། འདི་ལས་ཟབ་པའི་ཆོས་ནི་སྟོང་གསུམ་བསྐོར་ནས་བཙལ་ཀྱང་གང་ན་ཡང་མེད་པར་ཤེས་པར་བྱའོ། །ཕན་པའི་གདམས་ངག་ཐོས་ཀྱང་དོན་གྱི་ཉམས་ལེན་མ་ནུས་པ་ཚིག་གི་ཐོག་ཏུ་ལུས་སོང་། ཅུང་ཟད་ཅིག་ཉམས་སུ་བླངས་ཁུལ་བྱས་ཀྱང་རྣམ་པར་གཡེང་བ་བདུད་ཀྱི་བསླུ་ཁྲིད་ཀྱིས་བསླུས་ནས་འཁྲུལ་བས་འཁོར་བར་འཕྱན་པ། བདག་དང་བདག་འདྲར་འཁྲུལ་གཟུགས་ཅན་དུ་གྱུར་བའི་སེམས་ཅན་རྣམས། གསང་སྔགས་ཀྱི་ལམ་ལ་ཞུགས་ནས་བསྐྱེད་རྫོགས་རིམ་གཉིས་ཀྱི་ལམ་གྱིས་དལ་འབྱོར་སྙིང་པོ་ལོན་པར་བྱིན་གྱིས་རློབས་ཤིག་ཅེས་གསུངས། སྒྲིབ་པ་སྦྱོང་བ་བླ་མ་རྡོ་རྗེ་སེམས་དཔའི་སྒོམ་བཟླས་ཀྱི་ཁྲིད་དོ།། །།ཞེས་གསུངས་ཤིང་བསྔོ་བས་མཐའ་བརྒྱན་ཏེ་ཆོས་ཁྲིད་གྲོལ་སོང་ངོ་། །