ཙ༽ཉིན་བཅུ་བདུན་པར་༼མ༽བླ་མའི་རྣལ་འབྱོར་གྱི་ཆོས་ཁྲིད།
མཆོད་བརྗོད་སོགས་གསུངས་ནས།
ཨ༽མཚམས་སྦྱོར་གྱི་གདམས་ངག
རང་ཅག་ཐམས་ཅད་ཀྱིས་དུས་ཚེ་རབས་ཐོག་མ་མེད་པ་ནས་ད་ལྟའི་བར་དུ། སྲིད་རྩེ་ནས་མནར་མེད་ཀྱི་བར་ལ། ལུས་འདི་བླངས་དང་འདི་མ་བླངས་བྱ་བ་མེད་པའི་སྒོ་ནས་གནས་འདི་ན་མ་འཁོར་བྱ་བ་ཞིག་ཀྱང་མེད་ལ། དེ་ཡང་ཐེངས་གཅིག་འཁོར་བས་མ་ཚད་འཁོར་བའི་འཁོར་ལོར་ཚད་བཟུང་དུ་མེད་པས། རང་རེ་སེམས་ཅན་རེ་རེས་སྐྱེ་ཤི་བདེ་སྡུག་མྱོང་བའི་གྲངས་ཀྱང་གཞལ་དུ་མེད། འོན་ཀྱང་ད་རེས་ཀྱི་སྐབས་འདི་ནི་ཚེ་སྔོན་དམ་པའི་སྐྱེས་བུ་ཞིག་དང་བཟང་འབྲེལ་གྱི་སྐལ་བའམ། མིན་ན་ངན་འབྲེལ་འཁོར་བ་མཐའ་ཅན། སྤྱིར་འཁོར་བ་དགོས་ངན་སོང་གི་དུཿ་ཁ་མང་པོར་བརྒྱུད་བརྒྱུད་དེ་མཐར་གཞུག་ཐར་བའི་ས་བོན་ལ་གསོས་ཐེབས་པ་ཞིག་ཡིན་ནའང་འདྲ། གང་ལྟར་ཡང་ད་རེས་དལ་འབྱོར་དང་ལྡན་པའི་མི་ལུས་ཤིག་ཐོབ་པ་འདི། ཨུ་དུམ་ཝཱ་རའི་མེ་ཏོག་ལྟར་རྙེད་པར་དཀའ་བ་རྙེད་ན་དོན་ཆེན་པོ་དང་ལྡན་པ་ཡིན་པར་ཤེས་བཞིན་དུ། འདིའི་ཐད་ནས་བསམ་བློ་ཞིག་
བཏང་ན་དལ་བརྒྱད་འབྱོར་བཅུའི་ནང་གིམི་ཁོམས་པའི་གནས་ཡུལ་མཐའ་འཁོབ་ལྟ་བུ་ནི་སངས་རྒྱས་མི་འབྱོན་པ་མ་ཟད་འཁོར་རྣམ་བཞི་མི་རྒྱུ་བའི་ས་ཆ་ཞིག་ལ་ཡུལ་མཐའ་འཁོབ་ཟེར། དེ་ལྟ་བུ་ཞིག་ཏུ་སྐྱེས་ན་ཆོས་ཀྱི་སྒྲ་ཙམ་ཡང་མི་ཐོས་པས། ད་རེས་དེ་ལྟ་བུ་ལ་ཡང་མ་སྐྱེས། འོན་ལོང་ཞ་བོ་ལྐུགས་པ་ལྟ་བུ་ཞིག་ཏུ་སྐྱེས་ན་ཆོས་མི་འགྲུབ་པས་དེ་འདྲའི་ལུས་རྟེན་ཡང་མ་བླངས། ཚེ་སྔ་ཕྱི་ལས་རྒྱུ་འབྲས་བདེན་བཞི་དཀོན་མཆོག་ལ་ལོག་པར་ལྟ་བའི་ལོག་ལྟ་ཅན་དུ་སྐྱེས་ན་ཆོས་ལ་མི་དད་པས་དེ་ལྟ་བུ་ཡང་མ་སྐྱེས། དེ་དག་ལ་སོགས་པ་མིའི་མི་ཁོམས་བ་བཞི་དང་བྲལ། མ་ཚད་ངན་སོང་གསུམ་དང་ལྷ་ཚེ་རིང་པོ་སྟེ་མི་མ་ཡིན་པའི་མི་ཁོམས་བཞི་དང་བྲལ་བས་དལ་བ་བརྒྱད་པོ་ཚང་། དེ་སྟེང་མི་ཉིད་དབུས་སྐྱེས་དབང་པོ་ཚང་བ་སོགས་རང་འབྱོར་ལྔ། སངས་རྒྱས་བྱོན་དང་དམ་ཆོས་བསྟན་པ་སོགས་གཞན་འབྱོར་ལྔ་སྟེ་འབྱོར་བ་བཅུ་ཡང་ཚང་བས་དལ་འབྱོར་བཅོ་བརྒྱད་ཚང་བའི་མི་ལུས་རིན་པོ་ཆེ་ཐོབ་ཡོད་ན། དལ་བ་བརྒྱད་བྲལ་བའི་སྒོ་ནས་དང་། འབྱོར་བ་བཅུ་ལྡན་པའི་སྒོ་ནས་བཞག་ཁི་ཡོད། དལ་བརྒྱད་ཚང་ན་འབྱོར་བཅུ་ཚང་བས་མ་ཁྱབ་ཀྱང་འབྱོར་བཅུ་ཚང་ན་དལ་བརྒྱད་ཚང་བས་ཁྱབ་ནི་རེད། དེས་ན་དམ་པའི་ཆོས་སྒྲུབ་པ་ལ་ཁོམས་པ་ཡིན་པས་དལ་བ་དང་། ཆོས་སྒྲུབ་པའི་ཕྱི་ནང་གི་མཐུན་རྐྱེན་ཚང་བས་འབྱོར་བ་ཞེས་བྱ། དེའི་ཐོག་ཀུན་མཁྱེན་ཆེན་པོས་གསུངས་པའི་འཕྲལ་བྱུང་རྐྱེན་གྱི་མི་ཁོམས་པ་བརྒྱད་དང་། རིས་ཆད་བློ་ཡི་མི་ཁོམས་པ་བརྒྱད་དེ་བརྒྱད་གཉིས་བཅུ་དྲུགམདོར་ན་དལ་འབྱོར་གྱི་ཆོས་སུམ་ཅུ་རྩ་བཞི་པོ་ཚང་བའི་དབང་དུ་བྱས་ནས། འདི་ལྟ་བུ་དལ་འབྱོར་ཐོབ་པ་ལ་དགའ་ཞིང་སྤྲོ་བའི་ཐོག་ནས་འདི་ཆུད་ཟོས་སུ་མི་འགྲོ་བའི་ཕྱིར་སྙིང་པོ་ཞིག་ལོན་དགོས། དེ་ལོན་ཚུལ་ལ་རབ་འབྲིང་ཐ་གསུམ་ཡོད། དཔེར་ན་རྒྱ་མཚོ་ནོར་བུ་ལེན་དུ་སོང་ན་ལོན་རྒྱུའི་ནོར་བུ་ལ་ནོར་བུ་འཆིང་བུ་ལ་སོགས་རིན་ཐང་ཆུང་བ་ནས། དགོས་འདོད་འབྱུང་བའི་ནོར་བུ་རིན་པོ་ཆེ་རིན་ཐང་གཞལ་དུ་མེད་པའི་བར་རྣམ་གྲངས་མང་པོ་མཆིས་པ་བཞིན། ད་རེས་འོ་ཅག་གིས་ཡུན་ཐུང་གི་དལ་རྟེན་འདི་རྙེད་པའི་ཚེ་སྙིང་པོ་ལོན་ལུགས་ཞིང་དང་བསམ་པ་དངོས་པོ་སོགས་ཀྱི་སྒོ་ནས་བསོད་ནམས་བསགས་སྟོབས་ཆེ་ཆུང་གིས་རབ་འབྲིང་སོགས་ཤོར་བ་ཡིན། ཞིང་ལ་བསམ་ན་ཕྱོགས་བཅུའི་སེམས་ཅན་ཐམས་ཅད་ཀྱི་མིག་བཏོན་ནས་བཙོན་དུ་བཙུད་ཡོད་ན། མི་ཞིག་གིས་སེམས་ཅན་དེ་ཐམས་ཅད་ལ་མིག་སྔ་བས་ལྷག་པ་རེ་བྱིན་པས་མ་ཚད་བཙོན་ནས་བླངས་ཏེ་ཚངས་པའི་བདེ་བ་ལ་བཀོད་ན་ཕན་ཡོན་ཅི་འདྲ་ཡོད། དེ་བས་ཀྱང་བྱང་ཆུབ་སེམས་དཔའ་ཞིག་ལ་དད་ཅིང་དང་བའི་སྒོ་ནས་མིག་གིས་ལན་གཅིག་མཇལ་བ་ཕན་ཡོན་ཆེ་བར་གསུངས། དེ་ལྟ་བུའི་བྱང་ཆུབ་སེམས་དཔའ་ཐམས་ཅད་ལ་མཆོད་པ་བྱས་པ་བས་ཀྱང་སངས་རྒྱས་ཀྱི་བ་སྤུའི་ཁུང་བུ་གཅིག་ལ་མཆོད་ན་བསོད་ནམས་ཆེ་བར་གསུངས། དེ་ལྟ་བུའི་སངས་རྒྱས་ཐམས་ཅད་མཆོད་པ་བས་ཀྱང་བླ་མའི་བ་སྤུའི་ཁུང་བུ་གཅིག་ལ་མཆོད་ན་བསོད་ནམས་ཆེ་བར་གསུངས། དེས་ན་ད་རེས་ཀྱི་ལུས་རྟེན་འདིའི་ཐོག་ནས་དེ་ཙམ་རེ་སྒྲུབ་ཐུབ་པ་ཡིན་པས་གལ་ཆེ། བསམ་པའི་སྒོ་ནས་ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་ལ་དམིགས་ནས། རྗོགས་པའི་བྱང་ཆུབ་ཐོབ་པར་བྱ་བསམ་པའི་ཀུན་ནས་བསླང་སྟེ་ཐ་ན་དུད་འགྲོ་ཞིག་ལ་ཟས་ཁམ་གང་བྱིན་ནའང་ཕན་ཡོན་ཤིན་ཏུ་ཆེ་བས། དེ་ཙམ་རེ་ནི་མི་ལུས་འདིས་སྒྲུབ་མི་ཐུབ་རྒྱུ་ཞིག་མ་རེད། དངོས་པོའི་ཐོག་ནས་བསམ་ན་རྒྱུ་ནོར་ཟང་ཟིང་གི་སྦྱིན་པ་དཔག་ཏུ་མེད་པ་ཞིག་བྱིན་པ་བས། ཆོས་ཀྱི་སྦྱིན་པ་ཚིགས་སུ་བཅད་པ་གཅིག་ཙམ་བྱིན་པ་བསོད་ནམས་ཆེ་བ་ཡིན། ཁྱད་པར་རང་རེ་གནས་པའི་ཡུལ་འདི་ནི་འཛམ་གླིང་ལས་ཀྱི་ས་བ་ཡིན་པས་ལས་ཀྱི་འབྲས་བུ་སྨིན་སླ་བ་ཡིན། ལས་སྟོབས་ལྡན་བསགས་ན་རིང་ན་ལས་ཚེ་སྟོད་བསགས་པ་ཚེ་སྨད་སྨིན་ས་དང་། ཐུང་ན་ལས་སྔ་དྲོ་བསགས་པ་ཕྱི་དྲོ་སྨིན་ས་ཡིན་ནི་རེད། དེས་ན་ད་རེས་མྱུར་ལམ་འོད་གསལ་རྗོགས་ཆེན་གྱི་ལམ་ལ་ཞུགས་ནས་རིང་ན་སྙིགས་དུས་ཀྱི་ཚེ་ཐུང་གཅིག་གི་ཚེ། ཐུང་ན་ལོ་དང་ཟླ་བས་ཀྱང་བརྩོན་འགྲུས་ཡོད་ན་སངས་རྒྱས་ནུས་པའི་ཆོས་ཡིན། རང་རེས་བདེ་བ་ཅན་དུ་སྐྱེ་བའི་ཕྱིར་སྨོན་ལམ་འདེབས་པ་ཡིན་ཡང་། བདེ་བ་ཅན་ན་སྐྱེས་པའི་བྱང་ཆུབ་སེམས་དཔའ་རྣམས་ཀྱིས་འདི་ནས་ཤར་ཕྱོགས་ཀྱི་ཞིང་མི་མཇེད་འཇིག་རྟེན་གྱི་ཞིང་ཁམས་ན་སྙིགས་དུས་ཚེ་ཐུང་གཅིག་གི་ཡུན་ལ་སངས་རྒྱས་ཀྱི་གོ་འཕང་བདེ་བླག་ཏུ་སྒྲུབ་ཐུབ་པའི་ལུས་རྟེན་དང་ཆོས་ཁྱད་པར་ཅན་ཡོད་པས་དེར་སྐྱེ་བར་ཤོག་ཅེས་སྨོན་ལམ་ཚུར་བརྒྱབ་ཁི་ཡོད། དེ་ལྟ་བུའི་དལ་རྟེན་རིན་ཐང་ཅན་ལན་གཅིག་ཐོབ་ཡོད་པ་འདི་ཆུད་ཟོས་སུ་མི་གཏོང་བར་སྙིང་པོ་ལོན་རྒྱུར་ཕྱི་བཞག་གི་ལེ་ལོ་སྒྱིད་ལུག་བདུད་ཀྱི་དབང་དུ་མི་ཤོར་ནས་རང་གཞན་གྱི་དོན་ཆེན་བསྒྲུབ་པ་ལ་མགོ་ལ་མེ་ཤོར་འཕྲལ་དུ་བཟློག་པར་བརྩོན་པ་ལྟར་བརྩོན་འགྲུས་མ་བསྐྱེད་ན་སྙིང་མེད་ཡིན། ཁེ་ཆེན་པོ་ཡོད་ས་ལ་ཉེན་ཆེན་པོ་ཡང་ཡོད་པ་ལྟར་དགེ་བའི་བཤེས་གཉེན་དང་དགེ་བའི་གྲོགས་པོ་ཡོད་སར་སྡིག་པའི་བཤེས་གཉེན་དང་སྡིག་པའི་གྲོགས་པོ་ཡང་དེ་ལྟར་ཡོད། ཆོས་སྒྲུབ་པ་ལ་བར་ཆད་བྱེད་མཁན་དངོས་ཡོད་དང་དངོས་མེད་མང་དུ་ཡོད་སྲིད། དེས་ན་བར་ཆད་ཀྱི་བདུད་ནི་ཁ་གདངས་མིག་བགྲད་པའི་མི་ནག་མགོ་དགུ་པ་ཞིག་ཡིན་དགོས་པའི་ངེས་པ་མེད། བདུད་སྡིག་ཅན་ལ་གནོད་པ་སྐྱེལ་བྱེད་ཀྱི་ཐབས་མང་པོ་དང་། བདུད་ཀྱི་སྤྲུལ་པ་སྣ་ཚོགས་བྱེད་པས་ན། དཔེར་ན་གཡེང་བར་བྱེད་པའི་བདུད་ཀྱིས་གཡེང་བ་དང་འདུ་འཛི་ཇེ་ཆེ་གཏོང་། ཐོས་བསམ་སྒོམ་པ་བྱེད་པའི་སྐབས་སུ་གཉིད་དང་རྨུགས་པ་ལྷག་པར་འཕེལ་བའི་བར་ཆད་བྱེད། འཐབ་པར་བྱེད་པའི་བདུད་ཀྱིས་ལམ་སྒྲུབ་པའི་གང་ཟག་དེས་ཆོས་ཉམས་སུ་ལེན་དུས་གཞན་དང་འཐབ་ཅིང་རྩོད་དགོས་པའི་རྐྱེན་ངན་བྱེད། ཆགས་པར་བྱེད་པའི་བདུད་ཀྱིས་མཆོད་སྦྱིན་གཉིས་ཀ་བྱེད་མི་བྲ་བ་ནོར་རྫས་གཏོང་བ་དེ་རང་ཤ་བཅད་པ་ལྟ་བུའི་སྣང་བ་འབྱུང་བ་བྱེད། འདུ་ཤེས་ལོག་པར་སྒྱུར་བའི་བདུད་ཀྱིས་རབ་བྱུང་སོགས་ཀྱི་སྡོམ་དམ་ཚིག་སྲུང་རྒྱུར་གནོད་པ་བྱེད་ཅིང་གླུ་གར་རོལ་རྩེད་ཚང་སོགས་ལ་བློ་ཁ་ཕྱོགས་བཅུགགཞན་ཡང་ཟས་ནོར་གཉེན་གྲོགས་ཕ་མ་སོགས་ལ་རྫུ་བ་དང་། དེ་དག་གི་བློ་ཁ་སྒྱུར་ནས་ཆོས་ལ་བཤོལ་འདེབས་བྱེད་པ། བཟང་སེམས་ཡིན་མདོག་གི་ཐོག་ནས་ངན་པ་སློབ་སྟེ་དོན་ལ་གནོད་ཡིན་པ་དེ་ཚོ་ཡང་བདུད་ཀྱི་བར་ཆད་ཡིན། བདུད་ནི་ཕྱི་ན་ཡོད་པས་མི་ཚད་ནང་ན་ཡང་ཡོད་དེ། ཉོན་མོངས་དུག་རྒྱས་ཀྱི་བདུད། རྣམ་རྟོག་འཁུ་འཕྲིག་གི་བདུད། ཐེ་ཚོམ་ཡིད་གཉིས་ཀྱི་བདུད། གཉིས་འཛིན་འཁྲུལ་བའི་བདུད་ལ་སོགས་པ་མང་། དེས་ན་དུས་ངན་སྙིགས་མའི་སྐབས་འདིར་ཕྱི་ནང་གི་བདུད་ཀྱི་དབང་དུ་མི་ཤོར་བ་བློ་ཆོས་ཕྱོགས་སུ་འགྲོ། ཆོས་ཆོས་ལམ་དུ་འགྲོ་བ་ལ་གེགས་སེལ་དང་བོགས་འདོན་ཞབས་རིམ་ཐམས་ཅད་ཀྱི་རྩ་བ་ནི་བླ་མ་དཀོན་མཆོག་ལ་བློ་ཁྱེད་ཤེས་ཀྱི་དད་པ་བརྟན་པོས་གསོལ་བ་གདབ་པ་དང་།བླ་མའི་རྣལ་འབྱོར་སྒོམ་རྒྱུ་ནི་ཐོག་མཐའ་བར་གསུམ་དུ་མེད་ན་ཐབས་ཆགས་ཡོད་ན་དེས་ཆོག་ཡིན་པས་འབད་དགོས། རང་ཉིད་ལམ་ཕྱིན་ཅི་ལོག་ཏུ་མ་སོང་ན། གཞན་ངན་རུང་བདག་ལ་མི་གནོད་པས་ཁ་ཕྱིར་འཁོར་ནས་བདག་བསྟོད་གཞན་སྨོད་ཀྱི་བདུད་ལས་བརྩམ་མི་འདུག་པར། ཁ་ནང་དུ་ཚུར་འཁོར་ནས་རང་གི་ལྟ་སྤྱོད་གཉིས་ཀ་གཙང་མར་འོང་རྒྱུ་བོ་གནད་ཤིན་ཏུ་ཆེ། དེས་ན་སྣང་སྲིད་དག་པ་རབས་འབྱམས་ལྷ་སྔགས་ཆོས་ཉིད་ཀྱི་རོལ་བ་རུ་ཤར་མ་ཐུབ་རུང་འདི་སྣང་འཁྲུལ་བའི་བྱ་སྤྱོད་ལ་བློ་གཏད་མེད་པ་དང་། ངེས་འབྱུང་རྣམ་དག་མ་སྐྱེས་རུང་ཐ་ན་བདུད་ཀྱི་དབང་དུ་སོང་ནས་རྨོངས་ལས་ཚབ་ཆེན་མི་བྱེད་རྒྱུ་བོ། སྔ་དྲོ་འོ་མ་ཚ་མོས་ཁ་བསྲེགས་པས། །ཕྱི་དྲོ་ཞོ་འཁྱག་འཐུང་དུས་ཚ་སུབས་ཤོར། །ཟེར་བ་ལྟར་འཁོར་བའི་སྡུག་བསྔལ་གྱི་མཚང་ལ་འདང་རེ་བརྒྱབས་ནས། ཆོས་བསྒྲུབ་རྒྱུ་གནད་ལ་ཁེལ་ཤག་ཤག་གི་ཆོས་དམ་པའི་རྗེས་ཟིན་དངོས་གྲུབ་རྣམ་གཉིས་ཐོབ། རང་གཞན་གྱི་དོན་འགྲུབ་འབྲེལ་ཚད་བདེ་ལ་འགོད་པ་ཞིག་མ་བྱུང་གི་བར་དུ་མི་འདུག་བསམ་པའི་ཆོད་སེམས་བློ་ཐག་གཙང་བཅད་དགྲ་ནག་པོས་སྔོན་ནས་བཀག་ཀྱང་མི་ཁོག་པའི་དམ་བཅའ་བརྟན་པོ་ཞིག་མེད་ན། རྒྱག་སྐྱིད་ཉི་མའི་དྲོས་དུས་ཆོས་པའི་གཟུགས་བརྙན། །རྐྱེན་ངན་ཐོག་ཏུ་བབས་དུས་ཐ་མལ་བ། །རེད་སོང་ན། ཆོས་བྱེད་པ་དེ་གལ་འགག་ལ་ཐུག་དུས་བེད་སྤྱོད་རྒྱུ་མེད་ན་མེད་སོང་ནི་རེད། དེ་ལྟར་ཐུགས་བསམ་སྔོན་ལ་བཏང་ནས། སྐྱབས་སུ་བབས་པ་གང་ཞིག་གསན་པར་བྱ་བའི་ཆོས་ཀྱི་རིམ་པ་ནི། དྲུག་པ་རྟོགས་པའི་ཡེ་ཤེས་རང་རྒྱུད་ལ་སྐྱེད་པར་བྱེད་པའི་ཐབས་ཐམས་ཅད་ཀྱི་མཐར་ཐུག་པ་བླ་མའི་རྣལ་འབྱོར་གྱི་སྐབས་རེད།
༼༡བླ་མའི་རྣལ་འབྱོར་བསྒོམ་དགོས་པའི་རྒྱུ་མཚན།
དང་པོ་བླ་མ་བརྟག་ལ་མཁས་པའི་སྒོ་ནས་བླ་མ་མཆོག་བསྟེན་ནས་དེའི་བཀའ་བཞིན་བསྒྲུབས། བར་དུ་ཐོས་དོན་གྱི་གདམས་ངག་དེ་དཀའ་བ་སྤྱད་དེ་ཉམས་སུ་བླངས་ནས། ཐ་མ་བླ་མའི་དགོངས་སྤྱོད་བསླབ་པ་ལ་མཁས་པས་བླ་སློབ་དགོངས་པ་དབྱེར་མེད་ཀྱིས་བརྒྱུད་པའི་དཀའ་སྲོལ་ཟིན་སོང་ནི། མཚུངས་མེད་བླ་མ་ཞབས་ལ་ཕྱག་འཚལ་ལོ། །ཞེསཕྱག་འཚལ་བ་སྔོན་དུ་སོང་ནས། དྲུག་པ་རྟོགས་པའི་ཡེ་ཤེས་རང་རྒྱུད་ལ་སྐྱེད་པའི་ཐབས་ཐམས་ཅད་ཀྱི་མཐར་ཐུག་པ། བྱིན་རླབས་ཀྱི་འཇུག་སྒོ་བླ་མའི་རྣལ་འབྱོར་གྱི་ཁྲིད་ཡིན། སྤྱིར་རྣམ་གྲོལ་གྱི་ལམ་ཐེག་པ་ཀུན་ཀྱང་རྟོགས་པའི་ཡེ་ཤེས་རང་རྒྱུད་ལ་བསྐྱེད་ནས་འབྲས་བུ་ཐོབ་དགོས་པ་ཐམས་ཅད་འདྲ། འོན་ཀྱང་གསར་མ་བས་ལྟ་བ་ལ་མཐོ་དམན་མེད་པར་བཞེད། རྙིང་མ་བས་ལྟ་བ་ལ་མཐོ་དམན་ཡོད་པས་ཉན་རང་བྱང་སེམས་རྣམས་ཡེ་ཤེས་ལ་ཡང་ཁྱད་པར་ཤིན་ཏུ་ཆེན་པོ་ཡོད་པར་བཞེད། དེ་ལ་དང་པོ་ཉན་རང་གིས་མཚན་ཉིད་ཚང་བའི་སློབ་དཔོན་ཞིག་བཙལ་ནས། ངེས་འབྱུང་གི་བསམ་པས་ཀུན་ནས་བསླངས་ཏེ་སོར་ཐར་གྱི་སྡོམ་པ་བླངས་ནས་ལམ་ལྷག་པའི་བསླབ་པ་རིན་པོ་ཆེ་རྣམ་པ་གསུམ་པོ་ཉམས་སུ་བླངས་ན་ཐར་བ་དགྲ་བཅོམ་གྱི་གོ་འཕང་ཐོབ་པ་ཡིན། དེ་ཡང་ལམ་གྱི་ངོ་བོ་ཤེས་རབ་ཡིན་ལ། ཚུལ་ཁྲིམས་དང་ཏིང་འཛིན་གཉིས་འཁོར་ཡིན་པས་ལམ་བདེན་འཁོར་བཅས་ཉམས་སུ་ལེན་པ་ལས་མཁན་སློབ་ལ་དད་པ་ཁོ་ནས་འབྲས་བུ་ཐོབ་པ་མ་གསུངས། ཐེག་ཆེན་བྱང་ཆུབ་སེམས་དཔའ་རྣམས་ཀྱིས་ཕྱིའི་ཡོངས་འཛིན་བླ་མ་དགེ་བའི་བཤེས་གཉེན་མ་བསྟེན། ནང་གི་ཡོངས་འཛིན་བྱམས་སྙིང་རྗེ་བྱང་ཆུབ་སེམས་ལ་བློ་མ་སྦྱངས་ན་བདེན་པ་མི་མཐོང་བས། བཤེས་གཉེན་ཞི་བ་དུལ་བ་ཉེར་ཞི་བ་སོགས་གསུངས་པའི་བླ་མ་བྱམས་སྙིང་རྗེ་བྱང་ཆུབ་སེམས་ལ་བློ་འབྱོངས་པའི་དགེ་བའི་བཤེས་གཉེན་ཞིག་དད་པའི་སྒོ་ནས་བསྟེན་ཅིང་བྱང་ཆུབ་མཆོག་ཏུ་སེམས་བསྐྱེད། ཕྱིན་དྲུག་གིས་བསྡུས་པའི་སྤྱོད་པ་རྒྱ་མཚོ་ལྟ་བུའི་ལམ་རྫོགས་སྨིན་སྦྱོང་བ་མ་བྱས་ཀྱི་བར་དུ་དད་པ་ཁོ་ནས་མཐོང་ལམ་ཆོས་ཉིད་ཀྱི་བདེན་པ་མཐོང་བ་མ་གསུངས། བླ་མ་ལ་གནོད་པ་བྱེད་ཅིང་དད་པ་ལོག་ན་སྡིག་པ་ཚབས་པོ་ཆེ་བསགས་ནས་དམྱལ་བར་སྐྱེ་བ་ཡིན་ཏེ། གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །གལ་ཏེ་ངན་སེམས་སྐྱེད་པར་བྱེད་པ་ན། །ངན་སེམས་སྐྱེ་བའི་གྲངས་བཞིན་བསྐལ་བ་རུ། །དམྱལ་བར་གནས་པར་འགྱུར་ཞེས་ཐུབ་པས་གསུངས། །ཞེས་དང་། འོན་ཏེ་གང་ཞིག་ཡིད་རབ་དང་བྱེད་ན། དེ་ཡི་འབྲས་བུ་དེ་ལས་ལྷག་པར་འཕེལ། །ཞེས་གསུངས་པ་ཙམ་ལས་དགེ་བའི་བཤེས་གཉེན་དེ་ལ་སངས་རྒྱས་དངོས་མཐོང་གི་དད་པ་བྱས་ནས་གསོལ་བ་བཏབ་ན་རྟོགས་པའི་ཡེ་ཤེས་རྒྱུད་ལ་སྐྱེ་ཞེས་ཡོངས་སུ་མ་གྲགས། བྱང་སེམས་སྔགས་ལ་ཞུགས་པའི་རིག་པ་འཛིན་པས་དང་པོ་རྡོ་རྗེ་སློབ་དཔོན་མཚན་ཉིད་ལྡན་པ་ཞིག་གི་མདུན་དུ་སྔགས་ཕྱི་རྒྱུད་སྡེ་གསུམ་གྱི་རང་ལམ་གྱི་དབང་ཆུ་དང་ཅོད་པན་སོགས་ཐུན་མོང་རིག་པའི་དབང་ལྔ་ཐོབ། དམ་ཚིག་རྣམ་པར་དག་པས་རྒྱུད་བསྡམས་ནས་མཚན་བཅས་དང་མཚན་མེད་ཀྱི་ལམ་ཉམས་སུ་བླངས་ཏེ་རྟགས་བྱུང་ཚེ་དངོས་གྲུབ་བླངས་པས་ཐུན་མོང་གི་དངོས་གྲུབ་ཐོབ་ནས། ལུས་མ་སྤངས་པར་རི་བོ་ཏ་ལ་སོགས་ཕྱིན་ནས་སྤྱན་རས་གཟིགས་སོགས་ཀྱི་ཞལ་མཐོང་མ་ཐག་མཆོག་གི་དངོས་གྲུབ་ཐོབ་ནས་མི་ཚེ་ལྔའམ་བདུན་ནམ་བཅུ་དྲུག་གི་མཐར་རིགས་གསུམ་རིགས་བཞི་རིགས་ལྔ་རྡོ་རྗེ་འཛིན་པ་གང་རུང་གི་གོ་འཕང་ཐོབ་པ་ཡིན་ལ། བླ་མ་རྡོ་རྗེ་འཛིན་པ་དང་འགལ་ན་དངོས་གྲུབ་ཀྱི་གེགས་བྱེད་ལ། མ་འགལ་ཞིང་སངས་རྒྱས་དངོས་མཐོང་གི་དད་པས་གསོལ་བ་བཏབ་ན་རྟོགས་པའི་ཡེ་ཤེས་རྒྱུད་ལ་སྐྱེ་ཞེས་ཡོངས་སུ་མ་གྲགས་ལ། སྔགས་ནང་པ་རྒྱུད་སྡེ་གསུམ་གྱིས། དང་པོ་མ་ཧཱ་ཡོ་གའི་ལམ་རིམ་པ་གཉིས་ཀྱི་རྣལ་འབྱོར་བསྒོམས་ནས་དཔེ་དོན་གྱི་འོད་གསལ་ལ་སྦྱོར་ཏེ་སློབ་པའི་ཟུང་འཇུག་གི་སྐུར་ལྡང་བ་ཡིན་ལ། བླ་མ་དང་འགལ་ན་མགོ་ཆད་ན་གསོ་མི་རུང་བ་བཞིན་དངོས་གྲུབ་ཐམས་ཅད་ཀྱི་གེགས་བྱེད་པ་དང་། ཚེ་འདིར་ཚེ་ཐུང་ནད་མང་བ་སོགས་འབྱུང་ལ། ཕྱི་མ་རྡོ་རྗེའི་དམྱལ་བར་སྡུག་བསྔལ་མྱོང་བ་གསུངས་པ་མ་གཏོགས། རྡོ་རྗེ་སློབ་དཔོན་སངས་རྒྱས་སུ་མཐོང་བའི་སྒོ་ནས་གསོལ་བ་བཏབ་ན་མཆོག་གི་དངོས་གྲུབ་ལ་སྦྱོར་བ་ཡིན་ཡང་། རྟོགས་པའི་ཡེ་ཤེས་རྒྱུད་ལ་འཕོ་ཞེས་རྩལ་ཏུ་བཏོན་ཏེ་མ་གསུངས་ཤིང་། ཨ་ནུའི་སྐབས་རིམ་གཉིས་ཀྱི་ལམ་སྤྱི་དང་ཁྱད་པར་རྫོགས་རིམ་ཐིག་ལེའི་རྣལ་འབྱོར་གཙོ་བོ་བསྒོམས་ཏེ་དགའ་བཞིས་དྲངས་པའི་དཔེའི་འོད་གསལ་རྒྱུད་ལ་སྐྱེས་ཏེ་དོན་གྱི་ཡེ་ཤེས་ལ་སྦྱོར་བ་གཙོ་བོ་གསུངས་པ་ལས་བླ་མ་ལ་དད་པ་དང་མོས་གུས་ཁོ་ནས་རྟོགས་པའི་ཡེ་ཤེས་རྒྱུད་ལ་སྐྱེ་བ་དངོས་སུ་མ་གསུངས། ཁྱད་པར་ཨ་ཏི་ཡོ་གའི་ལུགས་ལ་བླ་མ་མཚན་ཉིད་དང་ལྡན་པ་ཞིག་གི་མདུན་ནས་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་རབ་ཏུ་སྤྲོས་མེད་ཀྱི་དབང་བཞི་ཐོབ། བསྲུང་དུ་ཡོད་པ་རིམ་གྱིས་པའི་དམ་ཚིག་རྩ་བ་བླ་མའི་སྐུ་གསུང་ཐུགས་ལ་དབྱེ་བ་ཉི་ཤུ་རྩ་བདུན་དང་། ཡན་ལག་གི་དམ་ཚིག་ཉི་ཤུ་རྩ་ལྔ། སྲུང་དུ་མེད་པ་གཅིག་ཆར་བའི་དམ་ཚིག་མེད་པ་གཅིག་པུ་ཕྱལ་བ་ལྷུན་གྱིས་གྲུབ་པ་སྟེ་དམ་ཚིག་རྣམ་པར་དག་པས་རྒྱུད་བསྡམས་པའི་དམིགས་པ་ཡུལ་གྱི་བློ་ཅན་དང་རིག་པ་རང་སྣང་གི་བློ་ཅན་གྱི་གདུལ་བྱའི་ལམ་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་ལམ་ཉམས་སུ་ལེན་པའི་ཚེ་ན་ཉེ་རྒྱུའི་སྤྱོད་པ་ལ་ཐེག་རིམ་འོག་མ་གཉིས་ལྟར་དུ་ཚོམ་བུ་ཚོགས་སྒྲུབ་དང་གཞན་ལུས་ཕྱག་རྒྱའི་རྫོགས་རིམ་གཙོ་བོ་མ་གསུངས། གང་གཙོ་ཆེ་བ་གསུངས་ན་བླ་མ་སངས་རྒྱས་སུ་མཐོང་བའི་མོས་གུས་ཀྱིས་གསོལ་བ་བཏབ་ན་རྟོགས་པའི་ཡེ་ཤེས་རྒྱུད་ལ་སྐྱེ་བ་བཤད་ཡོད་དེ། གཡོ་མེད་མོས་གུས་ཟླ་དྲུག་གིས། །རྡོ་རྗེ་འཆང་གི་ས་ཐོབ་འགྱུར། །ཞེས་སོགས་གསུངས་སོ། །དེ་ཡང་སྤྱིར་ཆོས་ཡང་དག་པ་ཞིག་ཉམས་སུ་ལེན་ན། དང་པོ་མཚན་ཉིད་ཐམས་ཅད་དང་ལྡན་པའི་བླ་མ་དགེ་བའི་བཤེས་གཉེན་ཡང་དག་པ་ཞིག་བཙལ་ཏེ། རྙེད་ནས་བླ་མ་དེས་ཅི་གསུང་གི་བཀའ་བཞིན་སྒྲུབ་པ་དང་བླ་མ་དེ་ལ་སངས་རྒྱས་དངོས་ཀྱི་འདུ་ཤེས་ཀྱིས་སྙིང་ཐག་པ་ནས་གསོལ་བ་འདེབས་པ་ནི་གལ་ཆེ་སྟེ། མདོ་ལས་ཀྱང་། དོན་དམ་པ་ནི་དད་པས་ཆོས་ཀྱི་སྒོ་ཕྱེས་ཏེ་རྟོགས་པར་བྱ་བ་ཡིན་ནོ། །ཞེས་གསུངས། དེ་བཞིན་དུ་ཇོ་བོ་རྗེ་ལྷ་ཅིག་གི་ཞལ་ནས་ཀྱང་། ཐར་ལམ་གཉེར་བའི་གྲོགས་དག་ཅེས་བོས་ནས་བྱང་ཆུབ་ཆེན་པོ་སངས་རྒྱས་ཀྱི་གོ་འཕང་མ་ཐོབ་བར་དུ་བླ་མ་དགོས་པས་མཚན་ཉིད་ཚང་བའི་བཤེས་གཉེན་དམ་པ་བསྟེན་པར་བྱ་དགོས། གནས་ལུགས་དེ་ཁོ་ན་ཉིད་མ་རྟོགས་བར་དུ་དང་པོར་ཐོས་པ་ཚོལ་དགོས་པས་བླ་མའི་གདམས་ངག་ཉོན། བར་དུ་བསམ་དོན་སྒོམ་ཞིང་ཉམས་རྟོགས་སྐྱེ་བའི་ཐབས་སུ་བདེ་བ་ཐམས་ཅད་བླ་མའི་བྱིན་རླབས་ལས་ཐོབ་པ་ལགས་པས་དྲིན་དུ་གཟོ་བར་མཛོད། །ཅེས་དང་། དགེ་བཤེས་ཁ་རག་སྒོམ་ཆུང་གི་ཞལ་ནས་ཀྱང་། བླ་མ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་ཀྱི་བྱེད་པ་པོར་ངོ་ཤེས་དགོས་ཞེས་དང་། སྡེ་སྣོད་གསུམ་བློ་ཐོག་ནས་འཆད་ཤེས་ཀྱང་བླ་མ་ལ་མོས་གུས་མེད་ན་ཕན་མེད། ཅེས་གསུངས། ཁྱད་པར་གསང་སྔགས་རྡོ་རྗེ་ཐེག་པའི་ལམ་ཐམས་ཅད་ནི། བླ་མ་ཁོ་ན་གལ་ཆེ་བ་ཡིན་པས། བླ་མའི་རྣལ་འབྱོར་སྒོམ་པ་ཡང་རྒྱུད་སྡེ་ཐམས་ཅད་ནས་གསུངས་ཤིང་། དེ་ཉིད་བསྐྱེད་རྫོགས་སྒོམ་པ་སོགས་ལམ་ཐམས་ཅད་ལས་ཀྱང་ལྷག་པར་གསུངས་ཏེ། རྒྱུད་ལས། གང་གིས་བསྐལ་པ་བྱེ་བ་རུ། །ལྷ་སྐུ་འབུམ་ཕྲག་བསྒོམས་པ་ལས། །བླ་མ་སྐད་ཅིག་དྲན་པ་མཆོག །ཅེས་གསུངས། ཡང་དགོས་ཐེག་རྩེ་འབྲས་བུ་ཐེག་པ་རང་བཞིན་རྫོགས་པ་ཆེན་པོ་མན་ངག་སྙིང་ཐིག་རྡོ་རྗེ་སྙིང་པོའི་ཐེག་པ་འདི་ལས་ནི། ཐེག་པ་འོག་མ་ལྟར་ཡིད་དཔྱོད་ཀྱི་རྟོག་དཔྱོད་དང་གཏན་ཚིགས་ལ་སོགས་པའི་སྒོ་ནས་ཟབ་མོའི་དོན་གཏན་ལ་འབེབས་པ་ཡང་མ་གསུངས། རྒྱུད་སྡེ་འོག་མ་ཀྲི་ཡོག་སྡེ་གསུམ་ལྟར་ཐུན་མོང་གི་དངོས་གྲུབ་ལ་བརྟེན་ནས་མཐར་ཐུག་མཆོག་ལ་སྦྱོར་བར་ཡང་མ་གསུངས། རྒྱུད་སྡེ་གོང་མ་གཞན་མ་ཧཱ་དང་ཨ་ནུ་ལྟར་དབང་གསུམ་པའི་དཔེའི་ཡེ་ཤེས་ལ་བརྟེན་ནས་དོན་གྱི་ཡེ་ཤེས་ངོ་སྤྲོད་པ་ཡང་རྩལ་དུ་བཏོན་ནས་མ་གསུངས་ཏེ། བརྒྱུད་པ་གསེར་གྱི་ཉག་ཐག་བསླད་མེད་པ་ལྟ་བུ་ལ་དམ་སེལ་གྱི་གཡའ་ཡིས་མ་གོས་པའི་རྟོགས་པ་མཆོག་ལྡན་གྱི་བླ་མ་ཁོ་ན་ལ། སངས་རྒྱས་དངོས་ཀྱི་འདུ་ཤེས་བཞག་ནས་བླ་མ་དེ་ལ་ཡིད་ཁྱེད་ཤེས་ཀྱིས་མོས་གུས་དྲག་པོས་གསོལ་བ་འདེབས་པ་གཅིག་པུ་ལ་བརྟེན་ཏེ་རྐྱེན་མོས་གུས་ཀྱིས་བྱས་ནས་ཐུགས་ཡིད་དབྱེར་མེད་དུ་འདྲེས་ཏེ། བླ་མའི་ཐུགས་རྒྱུད་ཀྱི་བྱིན་རླབས་འཕོ་བའི་སྟོབས་ཀྱིས་རྟོགས་པའི་ཡེ་ཤེས་དེ་ཉིད་རང་གི་རྒྱུད་ལ་སྐྱེ་བར་བཞེད་པ་ཡིན་ཏེ་སྔར་དྲངས་པ་ལྟར། དོན་དམ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་པ་རྨོངས་པར་ཤེས་པར་བྱ། །ཞེས་དང་། ས་ར་ཧས་ཀྱང་། བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་འདྲ། །ཞེས་གསུངས། དེ་བཞིན་དུ་ཀུན་མཁྱེན་ཆོས་ཀྱི་རྒྱལ་པོས་སྒྱུ་མ་ངལ་གསོ་ལས་ཀྱང་། བསྐྱེད་རིམ་དང་རྫོགས་རིམ་སྒོམ་པ་ལ་སོགས་པ་རྣམས་ནི་རང་རང་གི་ལམ་གྱི་ངོ་བོ་དེས་མི་གྲོལ་ཏེ། དེ་ཡང་སྤྱོད་པ་ཁྱད་པར་ཅན་དང་ཉམས་ལེན་བོགས་འདོན་སོགས་ལ་བརྟེན་པ་ཡིན། བླ་མའི་རྣལ་འབྱོར་ནི་རང་གི་ལམ་གྱི་ངོ་བོ་འདི་ཁོ་ནས་གནས་ལུགས་ཀྱི་རྟོགས་པ་རྒྱུད་ལ་སྐྱེས་ཏེ་གྲོལ་བ་ཡིན་པས་ན། ལམ་གཞན་ཐམས་ཅད་ལས་ཀྱང་བླ་མའི་རྣལ་འབྱོར་འདི་ཉིད་ཟབ་པ་ཡིན། ཞེས་གསུངས། དེ་སྐད་དུ། དམ་ཚིག་བཀོད་པའི་རྒྱུད་ལས་ཀྱང་། མཚན་དང་དཔེ་བྱད་ལྡན་པའི་ལྷ། །བསྐལ་པ་འབུམ་དུ་བསྒོམ་པ་བས། །བླ་མ་སྐད་ཅིག་དྲན་པ་མཆོག །བསྙེན་སྒྲུབ་བཟླས་པ་ས་ཡ་བས། །བླ་མའི་གསོལ་འདེབས་ལན་གཅིག་མཆོག །ཅེས་དང་། ཨ་ཏི་བཀོད་པ་ལས། དྲིན་དང་ལྡན་པའི་བླ་མ་དེ། །སྤྱི་བོའི་གཙུག་གམ་སྙིང་གི་དཀྱིལ། །ཡན་ལག་མཐིལ་དུ་གང་བསྒོམས་པ། །སངས་རྒྱས་སྟོང་གི་དངོས་གྲུབ་ཀྱང་། །གང་ཟག་དེ་ཡིས་འཛིན་པར་འགྱུར། །ཞེས་དང་། རྗེ་རྒོད་ཚང་བའི་ཞལ་ནས། བླ་མའི་རྣལ་འབྱོར་བསྒོམ་པ་ན། །སྐྱོན་ཟད་ཡོན་ཏན་རྫོགས་པར་འགྱུར། །ཞེས་དང་། བསྐྱེད་རིམ་བསྒོམ་པ་མང་ལགས་ཀྱང་། །བླ་མ་སྒོམ་པའི་གོང་ན་མེད། །རྫོགས་རིམ་བསྒོམ་པ་མང་ལགས་ཀྱང་། །བློ་ཁེལ་ལིང་བསྐྱུར་གོང་ན་མེད། །ཅེས་གསུངས། དེ་བཞིན་དུ་འབྲི་གུང་སྐྱོབ་པའི་རིན་པོ་ཆེས་ཀྱང་། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབེབས་པས། །སེམས་མོས་གུས་འདི་ལ་ནན་ཏན་མཛོད། །ཅེས་དང་། རྗེ་བཙུན་རང་རིག་རས་པའི་ཞལ་ནས་ཀྱང་། རྗེ་ལ་གསོལ་བ་མི་འདེབས་པའི། །མི་རྟོག་ཡེ་ཤེས་འདོད་པ་དེ། །བྱང་བསྟན་ཕུག་པར་ཉི་སྒུག་འདྲ། །སྣང་སེམས་འདྲེས་དུས་དེ་ལ་མེད། །ཅེས་གསུངས། དེས་ན་གནས་ལུགས་མ་བཅོས་པའི་རྟོགས་པ་དེ་ཁོ་ན་ཉིད་རྒྱུད་ལ་སྐྱེ་བ་ནི། མོས་གུས་བླ་མའི་རྣལ་འབྱོར་ཁོ་ན་ལ་བརྟེན་ནས་རྒྱུད་ལ་སྐྱེ་བ་མ་གཏོགས་ཐབས་དང་ལམ་གཞན་གང་གིས་ཀྱང་རྟོགས་མི་ནུས་པས་ན། རྗེ་ནཱ་རོ་པ་ཡང་། ཐེག་པ་གསུམ་ཀྱི་མཚན་ཉིད་ལ་མཁས་པའི་པཎྜི་ཏར་གྱུར། མུ་སྟེགས་ཀྱི་རྒོལ་བ་ཐབས་ཅད་ཚར་བཅད་དེ། བི་ཀྲ་མ་ཤཱི་ལའི་བྱང་སྒོ་སྲུང་བའི་པཎྜི་ཏ་མཛད་པའི་དུས་སུ་ཡང་། ཡེ་ཤེས་ཀྱི་མཁའ་འགྲོ་མས་ཁྱོད་ཚིག་ལ་མཁས་པ་ཡིན་གྱི། དོན་ལ་མཁས་པ་མ་ཡིན་པས་ན། ད་དུང་ཡང་བླ་མ་བསྟེན་དགོས་སོ་ཞེས་ལུང་བསྟན་པ་ལྟར། དཀའ་བ་དུ་མའི་སྒོ་ནས་ཏེ་ལོ་པ་བསྟེན་པའི་ཚེ། ཏེ་ལོ་པའི་ཞལ་ནས། འདི་ཙམ་བསྟན་ཡང་མི་གོ་བ་ཞེས་གསུངས་ཏེ་མཆིལ་ལྷྭམ་གྱིས་དཔྲལ་བར་བསྣུན་པས་གནས་ལུགས་ཀྱི་རྟོགས་པ་མ་བཅོས་པ་རྒྱུད་ལ་སྐྱེས་ཏེ་བླ་མ་དང་དགོངས་པ་མཉམ་པར་གྱུར་པ་དང་། སློབ་དཔོན་འཕགས་པ་ཀླུ་སྒྲུབ་ཀྱིས་ངར་སྣབས་ཅིག་དོར་བ་སློབ་མ་ཀླུའི་བྱང་ཆུབ་ཀྱིས་ཙེན་གྱིས་བླངས་ནས་གསོལ་ཏེ་ལོངས་སྤྱད་པས་མཆོག་གི་དངོས་གྲུབ་ཐོབ་པར་བཤད་པ་དང་། དེ་བཞིན་དུ་རིག་འཛིན་འཇིགས་མེད་གླིང་པའི་ཞལ་ནས་ཀྱང་། ཁོ་བོས་ཀྱང་རྒྱལ་བ་གཉིས་པ་ཀློང་ཆེན་པའི་གསུང་རབ་མཐོང་ནས། བླ་མ་སངས་རྒྱས་དངོས་ཀྱི་འདུ་ཤེས་བཅོས་མ་མ་ཡིན་པ་རྒྱུད་ལ་སྐྱེས་ཏེ་བློ་ཁྱེད་ཤེས་ཀྱི་དད་པས་སྙིང་ཁུང་རུས་པའི་གཏིང་ནས་ཕུར་ཚུགས་སུ་གསོལ་བ་བཏབ་པས། རྒྱལ་བ་ཀློང་ཆེན་པའི་ཡེ་ཤེས་ཀྱི་སྐུས་ལན་གསུམ་རྗེས་སུ་བཟུང་སྟེ་རང་བྱུང་གི་རྟོགས་པ་བཅོས་མ་མ་ཡིན་པ་རྒྱུད་ལ་སྐྱེས། དུས་དེ་ནས་བཟུང་སྟེ་ཞུ་བ་པོའི་སློབ་མ་བརྒྱ་ཕྲག་ཐལ་བ་ལ་ཁྲིད་བཏབ་པ་ཡིན་ཏེ། བརྩོན་འགྲུས་ཅན་འཇིག་རྟེན་པའི་བསམ་གཏན་ལས་ན་མི་འཕར། ཤེས་རབ་ཅན་རྟོག་དཔྱོད་ཀྱི་ཕྱོགས་སུ་མི་འཆོར། དོན་དམ་པའི་གནས་ལུགས་ཕྱིན་ཅི་མ་ལོག་པར་རྟོགས་ཚུལ་དད་པ་དང་མོས་གུས་ཀྱི་སྲང་ལ་ཐེབ་པ་ཤ་སྟག་བྱུང་ངོ་། །ཞེས་གསུངས། དེ་བཞིན་དུ་ལོ་ཆེན་བཻ་རོ་ཙ་ན་རྒྱལ་མོ་ཚ་བའི་རོང་དུ་སྤྱུགས་པའི་ཚེ། སྤང་རྒན་མི་ཕམ་མགོན་པོ་ཞེས་བྱ་བ་རྒན་པོ་ལོ་བརྒྱད་ཅུ་འགྲོ་བ་ཤིན་ཏུ་རྒས་ཤིང་འཁོགས་པ་ཞིག་ལ། ལུས་ཚུགས་མ་ཟིན་པས་སྒོམ་ཐག་ལུས་ལ་བཅིངས། སྒོམ་རྟེན་སྐེད་ལ་བཙུགས་ཏེ་བྱིན་རླབས་བླ་མའི་ལམ་ཁྱེར་འདི་བསྟན་པས། ཀ་དག་ཁྲེགས་ཆོད་ཀྱི་དགོངས་པ་མ་ནོར་བ་རྒྱུད་ལ་སྐྱེས་ཏེ་མཐར་ལུས་རྡུལ་ཕྲན་དུ་དེངས་ནས་སངས་རྒྱས་པ་སོགས་ཡིན་པས། བྱིན་རླབས་བླ་མའི་རྣལ་འབྱོར་འདི་ལས་ལྷག་པའི་ཟབ་ལམ་ནི་ཐེག་པ་རིམ་པ་དགུའི་གདམས་ངག་གི་ཆོས་ཐམས་ཅད་ཞལ་བསྡུར་ཀྱང་སྔར་མ་རྙེད་ཅིང་ཕྱིས་ཀྱང་མི་རྙེད་དེ་མིང་དུ་སྔོན་འགྲོར་བཏགས་ཀྱང་། དོན་དུ་དངོས་གཞིའི་ལམ་ཐམས་ཅད་ཀྱི་གནད་འགག་མཐར་ཐུག་པ་དེ་ཡིན་པས། དུས་དང་རྣམ་པ་ཐམས་ཅད་དུ་བླ་མའི་རྣལ་འབྱོར་འདི་ཁོ་ན་ལ་ཉམས་ལེན་གྱི་མཐིལ་བཅོལ་ན། ཉམས་ལེན་གཞན་ཅི་ཡང་མེད་ཀྱང་རུང་བ་ཡིན་པས་སྙིང་ཐག་པ་ནས་འབད་པ་ཅི་ནས་ཀྱང་གལ་ཆེའོ། །དེ་ལྟ་བུའི་ཟབ་ལམ་བླ་མའི་རྣལ་འབྱོར་དེ་ཉིད་ཉམས་སུ་བླང་བ་ལ་དོན་གསུམ་སྟེ། ཚོགས་ཞིང་གསལ་གདབ་པ། ཡན་ལག་བདུན་པ་འབུལ་བ། ཕུར་ཚུགས་སུ་གསོལ་བ་གདབ་པ་ལས།
༡༽ཚོགས་ཞིང་གསལ་གདབ་པ།
དང་པོ་ཚོགས་ཞིང་གསལ་འདེབས་པ་ནི། ཞིང་ཁམས་སྦྱོང་བ་སེམས་སྟོབས་ཆེན་པོའི་སྤྱོད་ཡུལ་ཡིན་པས་ནམ་མཁས་གར་ཁྱབ་སྣང་བས་ཁྱབ་སྣང་བས་གར་ཁྱབ་ཞིང་ཁམས་ཀྱི་ཁྱབ་པས་མ་དག་པའི་སྣང་བ་ཐམས་ཅད་དབྱིངས་སུ་ནུབ་ཏེ་རང་ཉིད་ཀྱི་སྣང་བ་སེམས་ཀྱིས་གར་ཁྱབ་ཐམས་ཅད་པདྨ་འོད་ཀྱི་ཕོ་བྲང་རྒྱན་བཀོད་པ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པར་གསལ་བའི་དབུས་སུ། རང་ཉིད་དབང་གི་སྣོད་དུ་རུང་བའི་རྟེན་འབྲེལ་དང་། བདེ་སྟོང་གི་ཡེ་ཤེས་སྐྱེད་པའི་དགོས་པ་ཡོད་པ་དང་། རྗེས་སུ་འཛིན་པའི་རྟེན་འབྲེལ་གྱི་ཁྱད་པར་ལས། ངོ་བོ་མཁའ་འགྲོ་ཡེ་ཤེས་མཚོ་རྒྱལ་ཡིན་པ་ལ། རྣམ་པ་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་བླ་མའི་ཐུགས་ཀར་རིངས་པའི་ཚུལ་གྱིས་གཟིགས་པ། དེ་ཡང་རིངས་པའི་ཚུལ་ཟེར་བ་དེ་བླ་མ་མཇལ་བ་ལ་གཅིག་ཏུ་དགའ་བའི་བྲེལ་ལངས་པ་ལྟ་བུའི་རྣམ་འགྱུར་ལ་ཟེར་བ་ཡིན། ཕྱག་གཡས་ན་མ་རིག་གཏི་མུག་གི་གཉིད་ལས་སློང་བར་མཚོན་པར་བྱེད་པའི་ཐོད་པའི་ཌ་མ་རུ་ནམ་མཁའི་དབྱིངས་སུ་འཁྲོལ་བ། གཡོན་དུག་གསུམ་རྩད་ནས་གཅོད་པའི་བརྡ་རྟགས་གྲི་གུག་དཀུར་བརྟེན་པ། སྐུ་གཅེར་མོ་རུས་པའི་རྒྱན་དྲུག་གིས་རྒྱན་པ་སྟེ། རྒྱབ་གཞུང་རུས་པའི་རྡོ་རྗེ། སོག་པར་རུས་པའི་འཁོར་ལོ། ཕྲག་པར་རུས་པའི་ནོར་བུ། ནུ་མར་རུས་པའི་པདྨ། སྐེད་པར་རུས་པའི་དཔལ་བེའུ། ལྟེ་བར་རུས་པའི་རྒྱ་གྲམ་དྲུག་གིས་རྒྱན་ཅན་མེ་ཏོག་གི་ཆུན་པོའི་འཕྱང་འཕྲུལ་ཅན་མཚན་མའི་རྟོག་པའི་སྒྲིབ་གཡོགས་དང་བྲལ་བ་མཚོན་བྱེད་སྐུ་གཅེར་བུ། མི་འགྱུར་བའི་བདེ་བ་ཆེན་པོ་དགའ་བ་བཅུ་དྲུག་དང་ལྡན་པ་མཚོན་བྱེད་བཅུ་དྲུག་ལོན་པའི་ན་ཚོད་ཅན། དབྱིངས་དང་ཡེ་ཤེས་ཕྱོགས་མེད་དུ་རྒྱས་པ་མཚོན་བྱེད་དབུ་སྐྲ་གྲོལ་བ། ཆོས་དབྱིངས་མཚོན་བྱེད་རུས་པའི་འཁོར་ལོ། མགུལ་རྒྱན་མཉམ་ཉིད། རྣ་ཆ་སོར་རྟོགས། གདུ་བུ་མེ་ལོང་། སྐ་རགས་བྱ་གྲུབ་སོགས་དག་དྲན་བྱས་ནས། སྐུ་སྣང་ལ་རང་བཞིན་མེད་པ་ནམ་མཁར་འཇའ་ཚོན་ཤར་བ་ལྟ་བུ་ཞིག་བསྒོམ། རང་ཉིད་རྡོ་རྗེ་རྣལ་འབྱོར་མ་སྒོམ་པ་དེའི་སྤྱི་བོར་མདའ་གང་ཙམ་གྱི་ཐད་ཀའི་སྟེང་གི་མདུན་གྱི་ནམ་མཁར་རིན་པོ་ཆེ་སྣ་ཚོགས་ལས་གྲུབ་པའི་པདྨ་འདབ་མ་འབུལ་བརྡལ་ཞིག་བསྒོམ། དེའི་སྟེང་དུ་ཉི་མའི་དཀྱིལ་འཁོར། དེའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་ངོ་བོ་དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ། བླ་མ་མི་རུ་བཟུང་བའི་ལོག་ལྟ་སྤོང་ཕྱིར། རྣམ་པ་ཨོ་རྒྱན་རྡོ་རྗེ་འཆང་ཆེན་པོ་སྐུ་མདོག་དཀར་ལ་དམར་བའི་མདངས་ཆགས་པ། ཞལ་གཅིག་ཕྱག་གཉིས་ཞབས་གཉིས་རྒྱལ་པོ་རོལ་པའི་སྟབས་སུ་བཞུགས་པ། སྐུ་ལ་བྱང་སེམས་ཀྱི་ཐེག་པ་རྫོགས་པའི་རྟགས་རྡོ་རྗེའི་གསང་གོས་དཀར་མོ་ནང་ལ་གསོལ་བ། དེའི་སྟེང་ཟ་འོག་གི་བེར་དུང་མ་དང་སོར་ཐར་གྱི་ཆོས་གོས་དམར་པོ་དང་། སྔགས་ཀྱི་ཐེག་པ་རྫོགས་པའི་བརྡ་རྟགས་སུ་ཕོད་ཆེན་མཐིང་ག་གསོལ་བ། དབུ་ལ་པད་ཞུ་མནབས་པ། དེ་ཡང་ཨོ་རྒྱན་རིན་པོ་ཆེའི་དབུ་ཞྭ་འདི་ལ་མི་འདྲ་བ་གསུམ་ཡོད་དེ། ཨོ་རྒྱན་སངས་རྒྱས་གཉིས་པ་དེ་ཉིད་ལྷོ་ནུབ་འོ་མ་ཅན་གྱི་རྒྱ་མཚོ་ལས་ཕ་ཡི་རྒྱུ་ལས་མ་བསྐྱེད། མ་ཡི་རྐྱེན་ལས་མ་གྲུབ། པདྨ་གེ་སར་གྱི་སྡོང་པོའི་རྩེར་རིག་པ་ཐོལ་སྐྱེས་སུ་རྫུས་ཏེ་འཁྲུངས་ནས་སྣང་སྲིད་གཞིར་བཞེངས་སུའམ་དག་མཉམ་བདེ་བ་ཆེན་པོར་རྟོགས་དུས། མཁའ་འགྲོ་མ་རྣམས་ཀྱིས་རིགས་བདག་གི་ཚུལ་དུ་གསོལ་བ་ལ་པདྨ་ཁ་འབུས་ཞེས་བྱ། རྒྱལ་སྲིད་སྤངས་ནས་རྒྱ་གར་གྱི་དུར་ཁྲོད་ཆེན་པོ་བརྒྱད་དུ་བརྟུལ་ཞུགས་ཀྱི་སྤྱོད་པ་མཛད་དེ། སྤྱོད་པ་ལེགས་ཉེས་ཀྱི་མཐའ་སྟོང་སྟེ་རོ་མཉམ་ཆེན་པོའི་བརྟུལ་ཞུགས་ལ་སྤྱོད་པའི་དུས་སུ་མཁའ་འགྲོ་མ་རྣམས་ཀྱིས་ཆེ་རྟགས་ཀྱི་ཚུལ་དུ་གསོལ་བ་ལ་ཤྭ་བའི་མཉེན་ཞུ་ཞེས་བྱ། ཟ་ཧོར་རྒྱལ་པོ་གཙུག་ལག་འཛིན་གྱིས་གསོན་བསྲེགས་མཛད་པའི་ཚེ། རྡོ་རྗེའི་སྐུ་ལ་འབྱུང་བ་མེ་ཡི་གནོད་པས་མ་ཚུགས་ཏེ་ངོ་མཚར་པདྨའི་དབུས་ན་སྐུ་གཅེར་བུ་གྲང་གྲང་བསིལ་བསིལ་ལྟར་བཞུགས་ནས་རྫུ་འཕྲུལ་བསྟན་པའི་ཚེ། ཟ་ཧོར་རྒྱལ་པོ་ངོ་མཚར་དང་དད་པ་སྐྱེས་ནས། ཟ་འོག་བེར་མཛོད་གསར་པའི་སྒོ་ཕྱེས་ལ། །ང་ཡི་ཞྭ་གོས་ཐམས་ཅད་ཁྱེར་ལ་ཤོག །ཅེས་ཟེར་ཏེ་རྒྱལ་པོ་རང་གི་སྐུ་ཆས་ཐམས་ཅད་དང་རྒྱལ་སྲིད་འབངས་འཁོར་དང་བཅས་པ་འབུལ་དུས་ཀྱི་དབུ་ཞྭ་དེ་ལ་པདྨ་མཐོང་གྲོལ་ཟེར་བ་ལས། འདིར་པདྨ་མཐོང་གྲོལ་ལམ་འདབ་ལྡན་རིགས་ལྔ་འདི་ཉིད་ཡིན་ཏེ། དེ་ཡང་བསྐྱེད་རྫོགས་ཟུང་འཇུག་མཚོན་པས་ཕྱི་ནང་རིམ་པ་གཉིས། སྐུ་གསུམ་མཚོན་པས་ཡར་རྩེ་གསུམ། སྐུ་ལྔའི་འགྲོ་དོན་མཛད་པ་མཚོན་པས་ཁ་དོག་ལྔ། ཐབས་དང་ཤེས་རབ་མཚོན་པས་ཉི་མ་དང་ཟླ་བས་བརྒྱན་པ། དམ་ཚིག་ལ་མུ་མཐའ་མེད་པས་མུ་ཁྱུད་མཐིང་ག་ནམ་མཁའི་མདོག་ཅན། ཏིང་ངེ་འཛིན་གཡོ་འགུལ་མེད་པས་རྡོ་རྗེའི་ཏོགལྟ་བའི་ཡང་རྩེ་རྟོགས་ཤིང་སྒྲུབ་པའི་དམ་ཚིག་མཐའ་རུ་ཕྱིན་པས་རྩེ་མོར་བྱ་རྒྱལ་རྒོད་ཀྱི་རྩེ་སྒྲོས་བརྒྱན་པ། དེ་ལྟ་བུ་ཞིག་ཡིན། ཕྱག་གཡས་གསེར་གྱི་རྡོ་རྗེ་ཐུགས་ཀར་སྡིགས་མཛུབ་ཀྱིས་འཛིན་པ། གཡོན་མཉམ་བཞག་གི་སྟེང་ན་ཀ་པཱ་ལ་འཆི་མེད་ཡེ་ཤེས་ཀྱི་བདུད་རྩིས་བཀང་བའི་ཚེའི་བུམ་པ་དཔག་བསམ་ལྗོན་ཤིང་གི་ཁ་རྒྱན་དང་བཅས་པའི་འཛིན་པ། མཆན་ཁུང་གཡོན་ན་ཡུམ་ལྷ་ལྕམ་མཁའ་འགྲོའི་དབང་ཕྱུག་སྦས་པའི་ཚུལ་གྱི་ཁ་ཊྭཱཾ་ག་འཛིན་པ། ཁ་ཊྭཱཾ་དེ་ཡང་གཞི་དུས་ཀྱི་ངོ་བོ་རང་བཞིན་ཐུགས་རྗེ་གསུམ་མཚོན་པའི་ཡར་རྩེ་གསུམ། འབྲལ་དུས་ཀྱི་ཆོས་སྐུ་ལོངས་སྐུ་སྤྲུལ་སྐུ་གསུམ་མཚོན་པའི་ཐོད་པ་སྐམ་རློན་རྙིད་གསུམ། ཐེག་པ་རིམ་པ་དགུ་མཚོན་པའི་རྭ་ལ་ལྕགས་ལུང་དགུ། ཡེ་ཤེས་ལྔ་མཚོན་ཕྱིར་དར་ཚོན་སྣ་ལྔ། དུར་ཁྲོད་ཆེན་པོ་བརྒྱད་དུ་བརྟུལ་ཞུགས་ཀྱི་སྤྱོད་པ་མཛད་དེ་མ་མོ་དང་མཁའ་འགྲོ་དབང་དུ་བསྡུས་པའི་བརྡར་ཤི་སྐྲ་དང་གསོན་སྐྲ་ལ་སོགས་པས་བརྒྱན་པ་དེ་ལྟ་བུ་ཞིག་གསལ་བཏབ། དེའི་ཕྱི་རོལ་འཇའ་ཚོན་གྱི་གུར་ཕུབ་ཅིང་མཐའ་སྐོར་དུ་འོད་ལྔའི་ཟེར་ཐག་གི་དྲྭ་བ་མིག་མང་རིས་སུ་ཤར་བའི་ནང་ཁོང་འཇའ་འོད་ཟླུམ་འཁྱིལ་གྱི་དབུས་ན། རྒྱ་གར་གྱི་རིག་འཛིན་བརྒྱད་བོད་ཀྱི་རྗེ་འབངས་ཉེར་ལྔ་ལ་སོགས་རྩ་གསུམ་དམ་ཅན་རྒྱ་མཚོ་སྤྲིན་འཐིབས་པ་ལྟར་ཐ་མལ་གྱི་སྣང་བ་རང་འགགས་སུ་འགྲོ་བ་ཞིག་གསལ་གདབ། སྤྱིར་བླ་མའི་རྣལ་འབྱོར་བསྒོམ་པ་འདི་ལ་སྒོམ་ལུགས་མི་འདྲ་བ་གསུམ་ཡོད་པ་ལས། སྐྱབས་འགྲོའི་དུས་ཚོགས་ཞིང་དེ་བླ་མ་ཐོ་བརྩེགས་སུ་བསྒོམ་པར་བྱ་བ་ཡིན་ཏེ། ཨོ་རྒྱན་ཆེན་པོའི་དབུ་གཙུག་ན་རྫོགས་ཆེན་བརྒྱུད་པའི་བླ་མ་ཐམས་ཅད་ཐོ་བརྩེགས་སུ་གསལ་འདེབས་པ་ཡིན། རྡོར་སེམས་སྒོམ་བཟླས་ཀྱི་དུས་ཀྱི་དེ་ཀུན་འདུས་ནོར་བུའི་ལུགས་སུ་བསྒོམ་པར་བྱ་བ་ཡིན་ཏེ། རྩ་བརྒྱུད་ཀྱི་བླ་མ་ཐམས་ཅད་བླ་མ་རྡོ་རྗེ་སེམས་དཔའ་གཅིག་ལ་འདུས་པར་སྒོམ་པ་ཡིན། བླ་མའི་རྣལ་འབྱོར་གྱི་སྐབས་འདི་བླ་མ་ཁྲོམ་ཚོགས་སུ་སྒོམ་པར་བྱ་བ་ཡིན་ཏེ། རྫོགས་ཆེན་བརྒྱུད་པའི་བླ་མ་ཐམས་ཅད་དང་། རྩ་བ་གསུམ་གྱི་ལྷ་ཚོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་ཐམས་ཅད་ཨོ་རྒྱན་ཆེན་པོའི་སྐུའི་མཐའ་སྐོར་ན་ཁྲོམ་ཚོགས་པ་ལྟར་བཞུགས་པ་ཡིན། དེ་ནས། ཨེ་མ་ཧོ། རང་སྣང་ལྷུན་གྲུབ་དག་པ་རབ་འབྱམས་ཞིང་། །སོགས་ནས། གསལ་སྟོང་མཉམ་གནས་ཆེན་པོའི་ངང་དུ་གསལ། །ཞེས་ཚིག་འདོན་པ་དང་མཉམ་དུ་དོན་ཡིད་ལ་དྲན་བཞིན་ཚིག་དོན་འབྲེལ་ཆགས་པར་ཡིད་ཀྱིས་དམིགས་པ་གསལ་བཏབ་ནས་བསྒོམ་པ་ལ། ཨེ་མ་ཧོ་ནི་ངོ་མཚར་བའི་ཚིག་ཡིན་པས་དེས་སྣ་དྲངས་ནས། འདི་ལྟར་ནམ་མཁས་གར་ཁྱབ་ཐམས་ཅད་རང་གི་སྣང་བས་ཁྱབ་ཚད་ཀྱི་ཞིང་ཁམས་ཐམས་ཅད་ལ་ཐ་མལ་གྱི་འཛིན་སྟངས་དབྱིངས་སུ་ཐིམ་པ་ལས། རང་བྱུང་ལྷུན་གྲུབ་ཏུ་ཤར་བའི་དག་པ་རབ་འབྱམས་ཀྱི་ཞིང་། དབྱིབས་དང་རྒྱན་དང་བཀོད་པ་ཐམས་ཅད་རབ་ཏུ་རྫོགས་པ་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་ཆེན་པོ་སྟེང་འོག་བར་གསུམ་སྤྲུལ་བའི་གཞལ་ཡས་ཁང་གི་དབུས་སུ། རང་ཉིད་སྒྱུ་ལུས་ཀྱི་དངོས་པོ་དེ་ཉིད་དཔལ་རིའི་ཞིང་གི་གཙོ་མོ་མཁའ་འགྲོ་ཡེ་ཤེས་མཚོ་རྒྱལ་ཡིན་པས། རང་ཉིད་དེར་བྱིན་གྱིས་བརླབས་ན་གུ་རུའི་ཐུགས་རྒྱུད་བསྐུལ་བ་དང་པདྨ་འོད་ཀྱི་ཞིང་ལ་དབང་བསྒྱུར་བའི་རྟེན་འབྲེལ་གྱི་གནད་ཆེ་བ་ཡིན་པས་ངོ་བོ་ཡེ་ཤེས་མཚོ་རྒྱལ་ཡིན་པ་ལ། རྣམ་པ་རྡོ་རྗེ་རྣལ་འབྱོར་མ་ཞལ་གཅིག་ཕྱག་གཉིས། སྐུ་མདོག་དམར་གསལ་གཡས་གྲི་གུག་དང་། གཡོན་ཐོད་པ་ཁྲག་གི་གང་བ་འཛིན་ཅིང་། གྲུ་མོ་གཡོན་ན་ཁ་ཊྭཱཾ་ག་འཆང་བ། པད་ཉི་བམ་རོའི་གདན་ལ་ཞབས་གཡས་བརྐྱང་ཞིང་། གཡོན་ཅུང་ཟད་བརྐུམ་པའི་ཞབས་གཉིས་དོར་སྟབས་ཀྱིས་བཞུགས་པ། མོས་གུས་ཀྱི་སྤྱན་གསུམ་མདུན་གྱི་ནམ་མཁའ་བླ་མའི་ཐུགས་དཀར་རིངས་པའི་ཚུལ་གྱིས་གཟིགས་པ། སྤྱི་བོའི་ཐད་ཀར། མདུན་གྱི་ནམ་མཁའི་གནས་སུ་སྣ་ཚོགས་པདྨ་འབུམ་བརྡལ། དེའི་ཟེའུ་འབྲུ་དང་ཚད་མཉམ་པའི་ཉི་ཟླའི་དཀྱིལ་འཁོར་གྱི་སྟེང་དུ་སྐྱབས་གནས་ཀུན་འདུས་ཀྱི་ངོ་བོ་རྩ་བའི་བླ་མ་དང་དབྱེར་མེད་པའི་རྣམ་པ་ཨོ་རྒྱན་མཚོ་སྐྱེས་རྡོ་རྗེ་སྤྲུལ་པའི་སྐུ་དེ་ཉིད་ཀྱི་སྐུ་མདོག་དཀར་ལ་དམར་བའི་མདངས་དང་ལྡན་པ་གཞོན་ནུ་ལོ་བརྒྱད་ལོན་པའི་ཤ་ཚུགས་ཅན། སྤྱན་གཉིས་ལྟ་སྟངས་ཧྲིག་གེར་གཟིགས་པ། སྐུ་ལ་ནང་དུ་རྡོ་རྗེའི་གསང་གོས་དཀར་པོ་དང་། ཕྱི་ནས་རིམ་པར་སྔགས་ཀྱི་ཕོད་ཆེན་མཐིང་གསོར་ཐར་གྱི་ཆོས་གོས་དམར་པོ་ངུར་སྨྲིག་གསེར་གྱི་མེ་ཏོག་གི་རི་མོས་སྤྲས་པ་དང་། ཟ་འོག་གི་བེར་དམར་སྨུག་རྣམས་བརྩེགས་མར་གསོལ་བ། ཞལ་གཅིག་ཕྱག་གཉིས་པ། ཞབས་གཉིས་རྒྱལ་པོ་རོལ་པའི་སྟངས་སྟབས་ཀྱིས་བཞུགས་པ། ཕྱག་གཡས་རྡོ་རྗེ་རྩེ་ལྔ་པ་ནམ་མཁར་འཕྱར་བའི་ཚུལ་དང་། གཡོན་པས་མཉམ་བཞག་གི་སྟེང་ན་ཐོད་པའམ་ཀ་པཱ་ལའི་དབུས་སུ་འཆི་མེད་ཡེ་ཤེས་ཀྱི་བདུད་རྩིས་གང་བའི་ཚེའི་བུམ་པ་བསྣམས་པ་དང་། དབུ་ལ་འདབ་མ་ལྔ་པ་དང་ལྡན་པའི་པདྨའི་མཉེན་ཞུ་གསོལ་ཞིང་ཁྲོ་འཛུམ་མཚན་དཔེའི་གཟི་བྱིན་མཆོག་ཏུ་འབར་བ། མཆན་ཁུང་གཡོན་ན་བདེ་སྟོང་ཡུམ་མཆོག་མ་མནྡཱ་ར་བ་སྦས་པའི་ཚུལ་གྱིས་ཁ་ཊྭཱཾ་རྩེ་གསུམ་གྱི་རྣམ་པར་བསྣམས་པ། འཇའ་ཟེར་དང་ཐིག་ལེ་ཟླུམ་པོར་འཁྱིལ་བའི་འོད་ཀྱི་ཕུང་པོའི་ཀློང་ན་བཞུགས་པའི་ཕྱི་འཁོར། འོད་ལྔའི་ཟེར་ཐག་གི་དྲཱ་བ་མིག་མང་རིས་སུ་འབྲེལ་བས་མཛེས་པའི་ཀློང་དུ། རྩ་བའི་བླ་མའི་ཐུགས་ཡེ་ཤེས་ཆེན་པོའི་རྣམ་རོལ་ལས་ཤར་བའི་རྒྱ་གར་གྱི་རིག་འཛིན་བརྒྱད། རྣལ་འབྱོར་གྱི་དབང་ཕྱུག་བརྒྱད་ཅུ་རྩ་བཞི། བོད་ཀྱི་གྲུབ་ཆེན་སྤྲུལ་པའི་རྗེ་འབངས་ཉི་ཤུ་རྩ་ལྔ་དང་། རྒྱ་བོད་ཀྱི་པཎ་གྲུབ་རིག་པ་འཛིན་པའི་ས་ལ་བཞུགས་པ་རྣམས་དང་། རྒྱུད་སྡེ་ཆེན་པོ་དྲུག་དང་འབྲེལ་བའི་ཡི་དམ་ཞི་ཁྲོ་རབ་འབྱམས་ཀྱི་ལྷ་ཚོགས། གནས་ཉེར་བཞི། ཡུལ་སོ་གཉིས། དུར་ཁྲོད་ཆེན་པོ་བརྒྱད་ན་བཞུགས་པའི་གནས་གསུམ་གྱི་དཔའ་བོ་མཁའ་འགྲོ་ཆོས་སྐྱོང་དམ་ཅན་སྲུང་མ་ནོར་ལྷ་གཏེར་བདག་གི་ཚོགས་དང་བཅས་པ་སྤྲིན་གྱི་ཕུང་པོ་ལྟར་གཏིབ་པ་བཞུགས་ཤིང་། དེ་ཐམས་ཅད་ཀྱང་གསལ་སྟོང་ཟུང་འཇུག་ཆུ་ཟླ་དང་འཇའ་ཚོན་ལྟ་བུ་མཉམ་གནས་ཆེན་པོའི་ངང་དུ་ཐ་མལ་གྱི་ཤེས་པ་རང་འགགས་སུ་འགྲོ་བར་གསལ་བཏབ་ཏེ་བླ་མའི་རྣལ་འབྱོར་གྱི་ཚོགས་ཞིང་དེ་ཉིད་བསྒོམ་པ་དང་འདོན་པ་སྦྲགས་མ་བྱེད་དགོས། དེ་ནས་མོས་གུས་ཀྱི་དད་པ་དང་སྙིང་ནས་གདུང་བ་དྲག་པོ་བསྐྱེད་དེ། ཧཱུྃ། ཨུ་རྒྱན་ཡུལ་གྱི་ནུབ་བྱང་མཚམས། སོགས་ནས། གུ་རུ་པདྨ་སིདྡྷི་ཧཱུྃ། ཞེས་པ་འདི་ནི་རྡོ་རྗེའི་མཁའ་འགྲོ་མ་རྣམས་ཀྱི་རྡོ་རྗེའི་དབྱངས་ཀྱིས་བསྟོད་པའི་རྡོ་རྗེའི་རང་སྒྲ་ཡིན་གྱི་གང་ཟག་ཞིག་གིས་བརྩམས་པ་དེ་འདྲ་མིན། ཞེས་བརྗོད་མ་ཐག་ཏུ་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་རྟེན་གཞལ་ཡས་ཁང་དང་བརྟེན་པར་ལྷ་ཚོགས་གཙོ་འཁོར་དང་བཅས་པའི་ཡེ་ཤེས་པ་ཐམས་ཅད་དངོས་སུ་བྱོན་ཏེ། རང་གིས་བསྐྱེད་པའི་དམ་ཚིག་པ་ལ་ཆུ་ལ་ཆུ་བཞག་ན་ཐ་དད་མེད་པ་ལྟར་གཉིས་སུ་མེད་པར་ཐིམ་པར་བསམ། ཧཱུྃ་ནི་རང་བྱུང་ཐུགས་ཀྱི་ས་བོན་རྒྱལ་བ་ཐམས་ཅད་ཀྱི་ཐུགས་ཀྱི་ངོ་བོ་ཡིག་འབྲུ་གཅིག་ཏུ་བསྡུས་པ། གནས་ཕུན་སུམ་ཚོགས་པ་ལྷོ་འཛམ་བུ་གླིང་འདི་ལ་ཡུལ་དྲུག་སོགས་ཀྱི་རྣམ་པར་ཕྱེ་བ་ཡོད་པའི་ཨུ་རྒྱན་གྱི་ཡུལ་ནི་རིག་པ་འཛིན་པའི་གནས་ཨུ་རྒྱན་མཁའ་འགྲོའི་ཡུལ་གྱི་ནུབ་བྱང་གི་མཚམས་ཤིག་ན། དྲི་མེད་ཡན་ལག་བརྒྱད་དང་ལྡན་པའི་དྷ་ན་ཀོ་ཤའི་གཡུ་ཡི་རྒྱ་མཚོའི་མེ་ཏོག་དམར་པོ་ཁ་ཕྱེ་བའི་དབུས་སུ་གནས་ཕུན་སུམ་ཚོགས་པ། གསུང་པདྨའི་རིགས་སངས་རྒྱས་སྣང་བ་མཐའ་ཡས་ཀྱི་ཐུགས་ཀ་ནས་ཡི་གེ་དམར་པོ་བབས་པ་འོད་དུ་ཞུ་བ་ལས། ཕ་ཡི་རྒྱུ་ལས་མ་བྱུང་། མ་ཡི་རྐྱེན་གྱིས་མ་བསྐྱེད། རིག་པ་ཐོལ་སྐྱེས་སུ་རྫུས་ཏེ་འཁྲུངས་པའི་མེ་ཏོག་པདྨའི་ལོ་འདབ་དང་གེ་སར་གྱི་ཡོངས་སུ་མཛེས་པའི་སྡོང་པོ་ལས། ཡེ་ཤེས་ལྔ་མཚོན་ཕྱིར་ཁ་དོག་རིགས་ལྔ་ཡོད་པ་ལས་དབུས་མ་དམར་པོ་པདྨའི་རིགས་ཀྱི་ལྟེ་བ་ལ། ཆོས་ཕུན་སུམ་ཚོགས་པ་ཡ་མཚན་རྨད་དུ་བྱུང་བ་སྣང་སྲིད་གཞིར་གཞེངས་སུ་རྟོགས་ཏེ་མཆོག་གི་དངོས་གྲུབ་བརྙེས་པ་དང་། སྟོན་པ་ཕུན་སུམ་ཚོགས་པ་པདྨ་འབྱུང་གནས་ཞེས་བྱ་ཕྱོགས་བཅུའི་ནམ་མཁའི་མཐས་གཏུགས་པའི་ཞིང་ཁམས་རབ་འབྱམས་སུ་མངོན་དུ་གྲགས་པ་དེ་ཉིད། འཁོར་ཕུན་སུམ་ཚོགས་པ་འཁོར་དུ་དཔའ་བོ་དང་མཁའ་འགྲོ་མ་མང་པོས་བསྐོར་བ། དུས་ཕུན་སུམ་ཚོགས་པ་དུས་གསུམ་མཉམ་ཉིད་ཆེན་པོ་ལ། མཆོག་གསུམ་རྩ་གསུམ་ཀུན་འདུས་ཀྱི་ངོ་བོ་སྐྱབས་མཆོག་ཁྱེད་ཀྱི་རྗེས་སུ་འབྲངས་ཏེ་བདག་ཀྱང་རྒྱལ་བའི་དབང་པོ་ཁྱེད་ལྟར་སྒྲུབ་པའི་དམ་བཅའ་འབུལ་ལགས་ཀྱི། ཁྱེད་ཀྱི་གསང་གསུམ་ནུས་པའི་བྱིན་རླབས་བདག་གི་སྒོ་གསུམ་བྱིན་གྱིས་བརླབ་པར་བྱ་བའི་ཕྱིར་དུ་སྒྲུབ་པའི་གནས་མཆོག་འདི་རུ་གཤེགས་སུ་གསོལ་ཞེས་ཐུགས་དམ་གནད་ནས་བསྐུལ་ལོ། །གུ་རུ་ཡོན་ཏན་ཐམས་ཅད་ཀྱིས་ལྕི་བ་བླ་མ་སྟེ་གོང་ན་མེད་པ། པདྨ་ནི་ཨོ་རྒྱན་ཆེན་པོའི་མཚན་གྱི་ཐོག་མ། །སིདྷི་ནི་དོན་དུ་གཉེར་བྱ་མཆོག་ཐུན་གྱི་དངོས་གྲུབ། ཧཱུྃ་ནི་དངོས་གྲུབ་དེ་ལྟ་བུ་སྩོལ་ཅིག་ཅེས་དོན་གྱིས་སྐུལ་བ་བསྟན། གཞན་ཡང་སློབ་དཔོན་ཆེན་པོའི་གཟུངས་སྔགས་ཡིག་འབྲུ་བཅུ་གཉིས་པའི་དོན། ཐོག་མར་རྡོ་རྗེ་གསུམ་གྱི་ས་བོན་ཨོཾ་ཨཱཿཧཱུྃ་གསུམ་གྱི་ཐོགས་དྲངས་ནས། བཛྲ་ནི་རྡོ་རྗེ་སྟེ་ཆོས་ཉིད་མཚན་རྟོག་གི་སྤྲོས་པས་མི་ཕྱེད་པ་ཡིན་པའི་ཕྱིར་ཆོས་ཀྱི་སྐུ་དང་། གུ་རུ་ནི་དེའི་ངང་ལས་ཁ་སྦྱོར་ཡན་ལག་བདུན་དང་ལྡན་པའི་ཡོན་ཏན་གྱི་ཁུར་གྱི་ལྕི་བས་ན་ལོངས་སྐུ། པདྨ་ནི་དེའང་སོ་སོར་རྟོགས་པའི་ཡེ་ཤེས་ཀྱི་རིག་གདངས་གསུང་པདྨའི་རིགས་སུ་ཤར་བས་ན་སྤྲུལ་བའི་སྐུ་སྟེ། དེ་ལྟ་བུའི་སྐུ་གསུམ་དབྱེར་མེད་པའི་བླ་མ་ཨོ་རྒྱན་ཆེན་པོར་གསང་གསུམ་གྱི་ཡོན་ཏན་རྗེས་སུ་དྲན་པས། སེམས་ཀྱི་གཤིས་སྤྲོས་པ་དང་བྲལ་བའི་རང་རྩལ་མོས་གུས་སུ་དུང་ངེ་ཤར་བའི་ངང་ནས་གསོལ་བ་གདབ་པའི་མཐུ་ལས། སིདྡྷི་སྟེ་མཆོག་ཐུན་མོང་གི་དངོས་གྲུབ་ཐམས་ཅད། ཧཱུྃ༔ཞེས་བདག་གི་ཤེས་རྒྱུད་ལ་དུས་ད་ལྟ་ཉིད་དུ་སྩོལ་ཅིག་སྙམ་པའི་དོན་དྲན་པར་བྱ་བ་ཡིན།
༢༽ཡན་ལག་བདུན་པ་འབུལ་བ། གཉིས་པ་ཡན་ལག་བདུན་པ་འབུལ་བ་ནི། དེ་ཡང་ཚོགས་བསགས་པའི་སྒོ་ཐམས་ཅད་བསྡུ་ན་ཡན་ལག་བདུན་ལ་འདུ་ལ། དེ་ཡང་བསྡུ་ན་བསགས་སྦྱངས་སྤེལ་གསུམ་ལ་འདུ་སྟེ། ཕྱག་འཚལ་དང་བཤགས་པ་གཉིས་སྡིག་པ་སྦྱངས་པའི་ཡན་ལག་དང་། ཡི་རང་དང་བསྔོ་བ་གཉིས་སྤེལ་བའི་ཡན་ལགགཞན་གསུམ་པོ་ཚོགས་བསགས་པའི་ཡན་ལག་ཡིན་ལ། ཚོགས་བསགས་པ་ལ་ཞིང་དག་པ་དང་། བསམ་པ་དག་པ་དང་། དངོས་པོ་དག་པ་གསུམ་ཚོགས་དགོས། དེ་ཡང་མདོ་ལམ་བསྐལ་བ་གྲངས་མེད་མང་པོའི་ཚོགས་བསགས་དགོས་པ་དེ་སྔགས་ལམ་ནས་སྐད་ཅིག་མ་རེ་རེ་ལ་རྫོགས་འགྲོ་བའི་གནད་ཞིང་དང་བསམ་པ་དང་དངོས་པོ་དག་པ་ལ་ཐུག་པ་ཡིན། ཡུལ་ཡི་དམ་དང་མཁའ་འགྲོ་ལ་སོགས་ལས་ཀྱང་བླ་མ་ཉིད་ཚོགས་བསགས་པའི་ཞིང་ཁྱད་པར་ཅན་རབ་དང་ཕུལ་དུ་ཕྱིན་པ་ཡིན་པས་ཞིང་དག་པ་དང་། གཞན་དོན་དུ་ཚེ་གཅིག་ལུས་གཅིག་གིས་ཟུང་འཇུག་རྡོ་རྗེ་འཆང་གི་གོ་འཕང་སྒྲུབ་འདོད་པའི་བསམ་པ་དག་པ་དང་གཉིས། ལྷ་སྔགས་ཏིང་ངེ་འཛིན་ལས་སྤྲུལ་བའི་མཆོད་པའི་ཁྱད་པར་དངོས་པོ་དག་པ་གསུམ་དང་འབྲེལ་བའི་ཚོགས་ཁྱད་པར་ཅན་རྫོགས་པ་ཡིན། འདི་ལྟར་གསང་སྔགས་རྡོ་རྗེ་ཐེག་པའི་ལམ་འདི་ལ་ཐབས་མང་བ་དང་། དཀའ་བ་མེད་པ་དང་། དབང་པོ་རྣོན་པོའི་སྤྱོད་ཡུལ་དུ་གྱུར་བ་ཡིན་པས། སེམས་སྟོབས་ཆེན་པོས་ཚོགས་བསགས་པ་ལ་རྒྱུན་ཆགས་སུ་བསླབས་པས། མདོ་ལམ་ཕ་རོལ་ཏུ་ཕྱིན་པའི་སྐབས་སུ་བསྐལ་པ་ཆེན་པོ་མང་པོའི་ཚོགས་སྔགས་ལམ་འདིར་སྐད་ཅིག་མ་ལ་འདུམ་ནས་ཚེ་གཅིག་དང་ལོ་ཟླ་ལ་སོགས་པར་གྲོལ་བ་ཡིན་ནོ། །དེའི་ཕྱིར་ཡུལ་གཉན་པོ་གསང་བ་བླ་ན་མེད་པའི་ཚོགས་ཞིང་གི་རབ་དང་ཕུལ་ཏུ་གྱུར་པ་ཡང་རྡོ་རྗེ་སློབ་དཔོན་ཉག་གཅིག་ཏུ་ངེས་པས་བླ་མའི་རྣལ་འབྱོར་དང་རྗེས་སུ་འབྲེལ་བར་བྱུང་ལ། དེ་ལ་ཚོགས་གསོག་པའི་སྒོ་མཐའ་ཡས་པ་ཡན་ལག་བདུན་དུ་འདུ་པ་ལས། དང་པོ་ང་རྒྱལ་གྱི་གཉེན་པོ་ཕྱག་འཚལ་བའི་ཡན་ལག་ནི། དེ་ཡང་། ང་རྒྱལ་ལྕགས་ཀྱི་གོང་བུ་ལ། །ཡོན་ཏན་གྱི་ཆུ་མི་ཆགས། །ཟེར་བས་རང་རྒྱུད་ལ་ང་རྒྱལ་ཡོད་ནས་བཟུང་རང་རྒྱུད་ཀྱི་སྐྱོན་དང་གཞན་རྒྱུད་ཀྱི་ཡོན་ཏན་མི་མཐོང་བས་དེའི་གཉེན་པོ་ཕྱག་འཚལ་བ་ཡིན། དེས་ན་གྲལ་མགོ་མི་རྩོད་པ་དམ་ཉམས་དང་ཚུལ་ཁྲིམས་འཆལ་བ་ཐམས་ཅད་ཀྱང་རང་ངོས་ནས་གོང་དུ་བསྐུར། ཕྱག་དང་ཞེ་སའི་གནས་སུ་བཞགཕྱག་ལ་དབྱེ་ན་གསུམ་ཡོད། རབ་ལྟ་བ་མཇལ་བའི་ཕྱག་ནི་ཕྱག་འཚལ་བའི་ཡུལ། འཚལ་བ་པོའི་གང་ཟགའཚལ་བའི་བྱ་བ་དང་གསུམ་པོ་མི་དམིགས་པར་ཤེས་པ་དེ་ཡིན། འབྲིང་སྒོམ་པ་གོམས་པའི་ཕྱག་རང་ཉིད་ཀྱིས་ལུས་དཔག་ཏུ་མེད་པ་སྤྲུལ་ནས་བསྟོད་དབྱངས་དཔག་ཏུ་མེད་པ་དང་བཅས་ཏེ་ཕྱག་འཚལ་བ་དེ་ཡིན། ཐ་མལ་བ་སྤྱོད་པ་མོས་གུས་ཀྱི་ཕྱག་ནི་ལུས་ཀྱི་ཕྱག་འཚལ། ངག་གི་བསྟོད་པའི་ཚིག་འདོན། ཡིད་ཀྱིས་མོས་གུས་ཀྱི་སྒོ་ནས་ཕྱག་འཚལ་བ་དེ་ཡིན། དེའི་ནང་ནས་ཡིད་ཀྱི་མོས་གུས་གཙོ་ཆེ་བས་སྐྱབས་གནས་རྒྱ་མཚོའི་ཡོན་ཏན་དྲན་པའི་སྒོ་ནས་ཕྱག་འཚལ་བ་དེ་ཡིན། དེ་ལྟ་ན་རང་གི་ལུས་བརྒྱ་སྟོང་གྲངས་མེད་པ་ཞིང་གི་རྡུལ་གྱི་གྲངས་སྙེད་ཅིག་སྤྲུལ་ཏེ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱང་རང་དང་ལྷན་དུ་ཕྱག་འཚལ་བར་བསམ་ཞིང་། ཧྲཱིཿབདག་ལུས་ཞིང་གི་རྡུལ་སྙེད་དུ། །རྣམ་པར་འཕྲུལ་པས་ཕྱག་འཚལ་ལོ། །ཞེས་གསུངས་པའི་དོན་བདག་ཉིད་རྡོ་རྗེ་རྣལ་འབྱོར་མ་གསལ་བའི་ཐུགས་ཀ་ནས་སྤྲུལ་བའི་ལུས་ཐ་མལ་བའི་ཚུལ་གྱིས་ཞིང་གི་རྡུལ་རྙེད་ཙམ་དུ་ཤིན་ཏུ་མང་པོ་རྣམ་པར་འཕྲུལ་བ་དེ་རྣམས་དང་ཁམས་གསུམ་གྱི་སེམས་ཅན་ཐམས་ཅད་མིའི་གཟུགས་སུ་གྱུར་ཏེ་རང་དང་མཉམ་དུ་སྒོ་གསུམ་གུས་པ་ཆེན་པོས་ཕྱག་འཚལ་བཞིན་ཡོད་པ་བསྒོམས་ནས་ངག་ཏུ་ཚིག་འདོན་པའམ་བརྗོད། དེ་ཡང་སྤྱིར་ཁྲིད་སྦྱང་འབུམ་ལྔ་མ་ཚང་ཙམ་བྱེད་པ་རྣམས་ནས་སྐྱབས་འགྲོ་སོགས་དང་སྦྲེལ་ཏེ་ཕྱག་འཚལ་ཀྱང་རུང་བས་དེ་ལྟར་བྱེད་པའི་ཕྱག་ལེན་ཀྱང་ཡོད་མོད། འོན་ཀྱང་ཕྱག་གི་ཁྲིད་དངོས་འདི་ཡིན་པས་བླ་མའི་རྣལ་འབྱོར་དང་འབྲེལ་བར་ཕྱག་འཚལ་ན་ནི་ཕུན་སུམ་ཚོགས་པར་འགྱུར་རོ། །དེ་ཡང་ཕྱག་འཚལ་བའི་ཚེ་ལུས་ཀྱི་སྒོ་ནས་ཕྱག་འཚལ་བ། ངག་གིས་ཕྱག་འཚལ་དང་གསོལ་འདེབས་ཀྱི་ཚིག་འདོན་པ། ཡིད་ཀྱིས་ཅི་མཛད་ཁྱེད་ཤེས་དང་བློ་གཏད་ལིང་བསྐྱུར་གྱི་མོས་གུས་དང་བཅས། བདག་དང་སེམས་ཅན་ཐམས་ཅད་ལྷན་ཅིག་ཕྱག་འཚལ་བའི་དམིགས་པ་སོགས་ལུས་ངག་ཡིད་གསུམ་ཆུན་གཅིག་དྲིལ་དུ་བྱེད་པ་ནི་གནད་ཆེ་ལ། དེ་ལྟར་མ་ཡིན་པར་ལུས་ཀྱིས་ཕྱག་འཚལ་བ་དང་ངག་གིས་འཁྱལ་གཏམ་བཤད་པ་དང་ཡིད་གཞན་དུ་གཡེང་བཞིན་ཕྱག་འཚལ་བ་ལ་དགོས་པ་མེད་པས་ཁ་ཡེངས་མིག་ཡེངས་སེམས་ཕྱི་རོལ་གྱི་ཡུལ་གྱི་རྗེས་སུ་འབྲངས། གཡས་ཕྱོགས་ནས་འགྲོ་འདུག་དང་སྨྲ་བརྗོད་བྱེད་པ་བྱུང་ན་མིག་དང་ཤེས་པ་དེ་ཕྱོགས་སུ་གཡེང་ཞིང་ཐལ་མོ་འགྲམ་པ་གཡོན་གྱི་སྟེང་དུ་སྦྱར། གཡོན་ཕྱོགས་སུ་དེ་བཞིན་བྱུང་ན་མིག་དང་ཤེས་པ་དེ་ཕྱོགས་སུ་གཡེང་ཞིང་འགྲམ་པ་གཡས་གྱི་སྟེང་དུ་ཐལ་མོ་སྦྱར་བ་ལྟ་བུ། སེམས་རྣམ་གཡེང་གི་དབང་དུ་བཏང་། ལུས་དེ་ཁོ་ནས་ཁྱོ་རོ་རོ་ཕྱག་འཚལ་འདོགས་བྱེད་པ་ལ་ནི། རང་གི་གཟུགས་པོར་སྡུག་གཏད་པ་ཙམ་ལས་སྙིང་པོ་ཅི་ཡང་མེད་པར་ཤེས་པར་བྱའོ། །དེ་མ་ཟད་ཕྱག་འཚལ་ཚེ་ཡང་ཐལ་མོ་ཁོང་སྟོང་དུ་པདྨ་ཁ་འབུས་པ་ལྟ་བུར་སྦྱར་དགོས་ཀྱི། ཐལ་མོ་ལ་ནང་ཁོང་སྟོང་མེད་པར་ལག་མཐིལ་གཉིས་སྤྲད་དེ་བཅའ་བ་དང་། སོར་རྩེ་ཐུག་ཙམ་བྱེད་པ་སོགས་ནི་མི་རུང་སྟེ། ཐར་པ་ཆེན་པོའི་ཕྱོགས་སུ་རྒྱས་པའི་མདོ་ལས། པདྨ་ཁ་འབུས་ཕྱེ་འདྲ་བ། །ལག་གཉིས་སྤྱི་བོར་ཐལ་སྦྱར་ཏེ། །ལུས་དཔག་མེད་པའི་སྤྲིན་ཚོགས་བཅས། །ཕྱོགས་བཅུའི་སངས་རྒྱས་ལ་ཕྱག་འཚལ། །ཞེས་དང་། ཡོན་ཏན་མཛོད་ལས་ཀྱང་། བབ་ཅོལ་གོམས་པ་མིན་པའི་ལུས་བཏུད་ནས། །སྙིང་གར་གུས་བཅས་མངོན་རྟོགས་ངོམ་པ་ལ། །མེ་ཏོག་དོགས་པས་རབ་བཟུང་སྙིམ་པའི་སྣོད། །ག་བུ་ཆུང་གི་བརྟུལ་ཞུགས་འཛིན་པ་ཡིན། །ཞེས་གསུངས། དེ་ནས་རིམ་བཞིན་ཐལ་མོ་སྤྱི་བོར་སྦྱར་བས་རྒྱལ་བ་སྲས་དང་བཅས་པའི་སྐུའི་ཡོན་ཏན་དྲན་ཞིང་། བླ་མའི་སྐུ་སྤྲུལ་སྐུ་ལ་ཕྱག་འཚལ་བས། རང་བཞིན་སེམས་ཅན་ཐམས་ཅད་ཀྱི་ལུས་ཀྱི་སྒྲིབ་པ་འདགམཐར་ཐུགས་སངས་རྒྱས་རྣམས་ཀྱི་དབུའི་གཙུག་ཏོར་བལྟར་མི་མངོན་པར་ཐོབ་པར་ཤོག་ཅིག་བསམ། ཡང་ཐལ་མོ་མགྲིན་པར་སྦྱར་བས་རྒྱལ་བ་སྲས་བཅས་གྱི་གསུང་གི་ཡོན་ཏན་དྲན་ཏེ་བླ་མའི་གསུང་ལོངས་སྤྱོད་རྫོགས་སྐུ་ལ་ཕྱག་འཚལ་བས་རང་གཞན་སེམས་ཅན་ཐམས་ཅད་ཀྱི་ངག་གི་སྒྲིབ་པ་འདགམཐར་ཐུག་གསུང་ཚངས་པའི་དབྱངས་ཡན་ལག་དྲུག་བཅུ་དང་ལྡན་པ་ཐོབ་པར་ཤོག་ཅིག་ཅེས་སྨོན་པ་དང་། དེ་ནས་ཐལ་མོ་སྙིང་གར་སྦྱར་བས་རྒྱལ་བ་སྲས་བཅས་ཀྱི་ཐུགས་ཀྱི་ཡོན་ཏན་དྲན་བླ་མའི་ཐུགས་ཆོས་ཀྱི་སྐུ་ལ་ཕྱག་འཚལ་བས། རང་བཞིན་སེམས་ཅན་ཐམས་ཅད་ཀྱི་ཡིད་ཀྱི་སྒྲིབ་པ་འདགམཐར་ཐུག་རྒྱལ་བ་ཐམས་ཅད་ཀྱི་ཐུགས་གཏིང་དཔག་དཀའ་བའི་ཇི་ལྟ་ཇི་སྙེད་མཁྱེན་པའི་ཡེ་ཤེས་ཐོབ་པར་ཤོག་ཅིག་བསམ། དེ་ནས་ལུས་ཀྱི་མ་ལྔ་ས་ལ་ཕབ་ཞེས་བྱ་བ། དཔྲལ་བ་དང་གཅིགལག་མཐིལ་གཉིས། པུས་མོ་གཉིས་དང་ལྔ་པོ་ས་ལ་ཕབ་སྟེ་ཕྱག་བྱས་པས། འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་སྟེ་ཉོན་མོངས་པ་དུག་ལྔའི་སྒྲིབ་པ་འདག་པ་དང་། བླ་མ་རྒྱལ་བ་སྲས་བཅས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་བྱིན་རླབས་དང་དངོས་གྲུབ་ཐམས་ཅད་ཐོབ་པ་དང་འགྲོ་ལྔའི་སེམས་ཅན་ཐམས་ཅད་དག་པ་སྐུ་ལྔའི་ཞིང་དུ་འདྲེན་ནུས་པར་ཤོག་ཅིག་བསམ་པས་དེ་ལྟར་ཐོབ་པ་ལ་སོགས་པའི་དགོས་པ་ཡོད་པས་དེ་ལྟར་བྱ། དེ་ནས་ཡར་ལངས་པའི་ཚེ་ཡང་རྐེད་པ་དྲང་པོར་བསྲངས་ཏེ་ཐལ་མོ་བཅས་ནས་ཡང་སྔར་ལྟར་གནས་གསུམ་ཐལ་མོ་སྦྱར་མ་ལྔ་ས་ལ་ཕབ་ཏེ་ལུས་ཀྱི་སྒོ་ནས་ཕྱག་འཚལ་བ། ངག་གིས་ཕྱག་འཚལ་དང་གསོལ་འདེབས་ཀྱི་ཚིག་འདོན། ཡིད་ཀྱིས་ཅི་མཛད་ཁྱེད་ཤེས་བློ་གཏོད་ལིང་བསྐྱུར་གྱི་མོས་གུས་དང་བཅས། བདག་དང་སེམས་ཅན་ཐམས་ཅད་ལྷན་གཅིག་ཏུ་ལོ་ཡག་གི་སྙེ་མ་རླུང་གིས་ཕྱོགས་གཅིག་བསྐྱོད་པ་བཞིན་དུ་དམིགས་པ་དང་བཅས་ཕྱག་འཚལ་དགོས་པ་ཡིན་གྱི། ཐལ་མོ་ལེགས་པར་མི་བཅའ་བར་ལག་པ་གཡུག་ཙམ་བྱེད་པ་དང་། པུས་མོ་དང་དཔྲལ་བ་ས་ལ་མི་རེག་པར་སྒུར་ཙམ་སྒུར་ཙམ་བྱེད་པ་དང་། ཡར་ལྡང་བའི་ཚེ་སྐེད་པ་ལེགས་པོར་མི་བསྲང་བར་སྒུར་ཕྱག་བྱེད་པ་སོགས་ནི་མ་གུས་པའི་རྣམ་འགྱུར་ཡིན་པས་གཏན་ནས་མི་རུང་། སྒུར་ཕྱག་བྱས་པའི་རྣམ་སྨིན་གྱིས་གྱང་རོ་ཁུར་ཞེས་བྱ་བ་རྒྱབ་ཏུ་ལྦ་བ་ཆེན་པོ་ཡོད་པའི་མིའུ་ཐུང་སྒུར་ཏེ་འགྲོ་བ་དེ་ལྟ་བུའི་ལུས་ལེན་པར་གསུངས་པས་ན། ཕན་ཡོན་ཡོད་དུ་རེ་ནས་ཕྱག་འཚལ་བ་ཡིན་གྱི། ལུས་ངན་ལེན་བྱེད་དུ་ཕྱག་འཚལ་ཀྱང་མི་དགོས་པར་འདུག་པས། ཁ་གྲངས་མང་པོ་རང་མ་ཐུབ་རུང་གང་ཐུབ་དེ་དངོས་གཙང་ཞིང་རྣམ་པར་དག་པ་རང་ཡིད་ཆེས་པ་རེ་ཨེ་ཐོན་ལྟ་བ་ལ་འབད་དགོས། དེས་ན་འཚལ་སླ་བ་ལ་བསམས་ནས་རི་ངོས་ལྟ་བུའི་གཟར་ས་ལ་གཏད་པ་དང་། གད་འཁྲིས་ལ་སོགས་པ་ནས་ཕྱག་འཚལ་བ་ལ་ནི་སྙིང་པོ་ཅུང་ཟད་ཀྱང་མེད་དོ། །དེར་མ་ཟད་ད་ལྟའི་དུས་བླ་མ་ལ་སོགས་པའི་དྲུང་དུ་མཇལ་བའི་ཚེ། དང་པོ་ཕྱག་ཅུང་ཟད་ལེགས་པ་གཅིག་འཚལ་ནས་དེ་ནས་སྒུར་ཙམ་གཉིས་བྱེད་ཅིང་། དེ་ཉིད་མི་དྲག་གི་ཕྱག་ཡིན་པ་སྐད་བྱེད་དེ། ཤེས་མེད་ཕལ་མོ་ཆེས་དེའི་རྗེས་སུ་སློབ་པ་ནི་ཤིན་ཏུ་ཐ་ཆད་པ་ཡིན། ཆོས་ཞུས་ཞུས་ཐོབ་ཐོབ་པའི་དོན་པོ་ཐ་ན་ཕྱག་གཅིག་གི་འཚལ་ལུགས་ཚུན་ཆད་མ་ཤེས་པ་ཐམས་ཅད་དམ་པའི་གཞུང་ལུགས་དང་བླ་མའི་ཞལ་ལས་ཉན་ནས་ཤེས་པར་བྱ་ཞིང་། གང་ཤེས་དེ་དུས་དང་རྣམ་པ་ཐམས་ཅད་དུ་མ་བརྗེད་པར་ཉམས་སུ་ལེན་དགོས་རྒྱུ་ཡིན་པ་ལ། བྱ་སླ་བ་དང་ཤེས་སླ་བ་དེ་ཙམ་ཡང་ཉམས་སུ་མི་ལེན་ན་ཆོས་ཞུས་པ་ལ་དོན་འབྲས་ཅི་ཡང་མེད་པའི་ཕྱིར་རོ། །དེས་ན་ཆོས་ཞུས་པའི་དོན་པོ་ཕྱག་རྡོག་གཅིག་གི་འཚལ་ལུགས་ཚུན་ཆད་ཆོས་མི་ཤེས་པ་རྣམས་ལས་ཁྱད་པར་འཕགས་པ་ཞིག་དགོས་ཏེ། སྔོན་རྗེ་བཙུན་མི་ལ་བླ་མ་རྔོག་པའི་དྲུང་དུ་ཆོས་ཞུར་ཕེབས་པའི་ཚེ། བླ་མ་རྔོག་པས་གྲྭ་པ་མང་པོ་ལ་རྒྱུད་བརྟགས་གཉིས་གསུང་གིན་འདུག་པ་རྗེ་བཙུན་གྱིས་རྒྱང་རིང་པོ་ནས་མཇལ་ཏེ་ཕྱག་འཚལ་བས། བླ་མ་རྔོག་པ་ཡང་དགྱེས་ཏེ། དབུ་ཞྭ་ཕུད་ནས་ཕྱག་ལན་མཛད་ཅིང་། ཆོས་མཚམས་ཀྱི་རྟེན་འབྲེལ་ཀྱང་ལེགས། ཕ་གི་ན་ཕྱག་འཚལ་བ་འདི་ལྷོ་བྲག་མར་པའི་སློབ་བརྒྱུད་ཀྱི་ཕྱག་འཚལ་ལུགས་སུ་འདུག་པས་ཁོང་སུ་ཡིན་དྲིས་ཤོག་གསུངས། ལར་བླ་མ་བརྟེན་ནས་ཆོས་ཞུས་པ་དེ་སྣམ་བུ་ཚོས་ལ་འཕངས་པ་ལྟར་སྔར་གྱི་དེ་དང་ཡེ་མི་འདྲ་བ། སཱཙྪ་བརྐོས་ཕོར་ནས་ཕྱུངས་པ་ལྟ་བུ་མ་ཐུབ་རུང་སྣམ་བུ་ཚོས་ལ་བཅུག་པ་ལྟ་བུ་ཅུང་ཟད་རེ་བཟང་དུ་ཡོད་དགོས་པས་བླ་མ་དམ་པ་དེའི་མཛད་སྤྱོད་ཅི་འདྲ་བ་དེ་འདྲ་བའི་རྗེས་སུ་སློབ་པ་ཞིག་དགོས་རྒྱུ་ཡིན། དཔེར་ན་སྣམ་བུ་ཚོས་སུ་བཅུག་པ་དེ་ལ་ཚོས་ཁ་ལེགས་ཉེས་ཙམ་ཡོད་པ་སྲིད་ཀྱང་། སྔར་ཚོས་སུ་མ་བཅུག་པའི་དུས་ལས་མདོག་གཞན་དུ་གཏན་ནས་མ་འགྱུར་བ་ག་ལ་སྲིད། ད་ལྟའི་དུས་ན་ཆོས་ལན་གྲངས་བརྒྱར་ཞུས་ཀྱང་ཤེས་རྒྱུད་སྔར་གྱི་དེ་ལས་སྤུ་གང་གིས་བཟང་དུ་མ་སོང་ཞིང་བྱ་བྱེད་སྤྱོད་པ་ཐམས་ཅད་འཇིག་རྟེན་པ་ལས་ཅུང་ཟད་ཀྱང་མ་ལོག་པ་ནི་ཆོས་དྲེད་དམ་ཉམས་ཀྱི་རྒྱུར་སོང་བ་ཞེས་བྱ། དེ་འདྲ་དེ་ནི་སྡིག་ཅན་ཆོས་ཀྱིས་ཐུལ་ཀྱང་ཆོས་དྲེད་ཆོས་ཀྱིས་མི་ཐུལ། གྱོང་པོ་སྣུམ་གྱིས་ཐུལ་ཀྱང་མར་ལྐོག་སྣུམ་གྱིས་མི་ཐུལ། གསུངས་པ་ལྟར། དགེ་བའི་ཕན་ཡོན། སྡིག་པའི་ཉེས་དམིགས། སངས་རྒྱས་ཀྱི་ཡོན་ཏན་ཅི་ལྟ་བུ་ཐོས་ཀྱང་། དེ་འདྲ་ཟེར་དར་སྙམ་བ་ཙམ་ལས་བློ་སྣ་འགྱུར་བའི་ངེས་ཤེས་དང་དད་པ་ཅུང་ཟད་ཀྱང་སྐྱེར་མི་བཏུབ་པས་ན། རྫོགས་པའི་སངས་རྒྱས་དངོས་སུ་བྱོན་ཀྱང་དེ་ལ་ཕན་གདགས་མི་ནུས་ཏེ། ཨོ་རྒྱན་ཆེན་པོའི་ཞལ་ནས་ཀྱང་། ཆོས་སྨྲས་གོ་དྲེད་ཁྱེར་བའི་འཁོར་མི་བརྟེན། །དམ་ཚིག་ཚོད་ཡོད་བྱེད་པའི་གྲོགས་མི་འགྲོགས། །ཞེས་གསུངས། དེས་ན་ཆོས་ཚིག་གཅིག་གི་དོན་ཤེས་ཀྱང་དེ་ཉིད་རང་གི་རྒྱུད་ལ་འདྲེས་ངོ་ཤེས་པར་ཉམས་སུ་ལེན་དགོས། བླ་མ་བསྟེན་པའི་དོན་པོ་བླ་མ་དེའི་སྐུ་གསུང་ཐུགས་ཀྱི་མཛད་སྤྱོད་ལ་བལྟ་ཞིང་དེའི་རྗེས་སུ་སློབ་དགོས་ཏེ། འཇིག་རྟེན་པའི་ཁ་སྐད་ཡང་། བྱ་བ་ཐམས་ཅད་ལད་མོ་ཡིན། །ལད་མོ་ནང་གི་གང་མཁས་ཡིན། །ཟེར་བ་ལྟར་བླ་མ་དེའི་ཕྱི་ནང་གསང་གསུམ་གྱི་ཡོན་ཏན་གང་ཡོད་པ་རང་རྒྱུད་ལ་བླངས་ནས། དཔེར་ན་སཱཙྪ་བརྐོས་ཕོར་ནས་བཏོན་པ་ལྟ་བུ་ཞིག་དགོས་པ་ཡིན་ནོ། །སྤྱིར་ཕྱག་འཚལ་ཞེས་པ་ཞེ་ས་དང་གུས་པའི་རྣམ་འགྱུར་ཙམ་ཡིན་པས། ཕྱག་འཚལ་ཚུལ་ཀྱང་མང་ཞིང་ཡུལ་སོ་སོའི་ཡུལ་སྲོལ་ལ་ངེས་པ་མེད་ཀྱང་། འདིར་རྒྱལ་བའི་བཀའ་ལུང་དང་མཐུན་པའི་ཕྱག་གི་འཚལ་ལུགས་བླ་མས་གསུངས། རང་གིས་གོ་ཞིང་ཤེས་བཞིན་དུ་སླ་ཆོས་སམ། ཆེ་འགྱིང་གི་དབང་གིས་ལེགས་པར་མི་འཚལ་བ་ནི། ཕྱག་འཚལ་ཡུལ་ལ་མ་གུས་པའི་བརྙས་བཅོས་ཀྱི་རྣམ་འགྱུར་ཡིན་པས། ཁྲལ་ཕྱག་དེ་འདྲས་ནི་ཉེས་པ་སྐྱེད་པ་ཙམ་ལས་དགོས་དོན་ཅི་ཡང་མེད་པར་ཤེས་དགོས་སོ། །དེ་ལྟར་མ་ཡིན་པར་ཚུལ་བཞིན་དུ་ཕྱག་འཚལ་བ་ནི། ཕན་ཡོན་ཚད་མེད་དེ། སྔོན་དགེ་སློང་ཞིག་བཅོམ་ལྡན་འདས་ཀྱི་དབུ་སྐྲ་དང་སེན་མོ་མཆོད་རྟེན་ལ་ཕྱག་འཚལ་བ་ལ། ཀུན་དགའ་བོས་དེའི་ཕན་ཡོན་བཅོམ་ལྡན་འདས་ལ་ཞུས་པས། ཕྱག་ལན་ཅིག་འཚལ་པས་རང་གི་ལུས་ཀྱིས་ཅི་ཙམ་ནོན་པའི་དབང་ཆེན་གསེར་གྱི་ས་གཞི་ལ་མ་ཐུག་གི་བར་དུ་ས་ཆེན་འདིའི་རྡུལ་ཅི་ཙམ་ཡོད་པ་དེའི་གྲངས་ཀྱི་འཁོར་ལོས་སྒྱུར་བའི་རྒྱལ་སྲིད་ཉམས་སུ་མྱོང་ཡང་ད་དུང་དེའི་ཕན་ཡོན་གྱི་མཐའ་མི་ཐུག་པར་གསུངས། དེ་བཞིན་དུ་མདོ་ལས། བཅོམ་ལྡན་འདས་ཀྱི་དབུ་གཙུག་ཏོར་བལྟར་མི་མངོན་པ་ནི། བླ་མར་བྱ་བའི་སྐྱེ་བོ་ལ་གུས་པར་བཏུད་དེ་ཕྱག་འཚལ་བ་ལས་བྱུང་ངོ་། །ཞེས་གསུངས་ཏེ། མཐར་ཐུག་རྫོགས་པའི་སངས་རྒྱས་ཀྱི་དབུའི་གཙུག་ཏོར་བལྟར་མི་མངོན་པ་འགྲུབ་པའི་རྒྱུར་འགྱུར་བ་ཡིན་ནོ། །
གཉིས་པ་མཆོད་པ་འབུལ་བའི་ཡན་ལག་ནི། མཆོད་སྦྱིན་གཉིས་ཀ་མཆོད་པའི་ཕྱོགས་སུ་བསྡུ་དགོས་དེ་ཡང་གཙོ་བོ་སེར་སྣའི་གཉེན་པོ་ཡིན། མཆོད་པའི་སྡོམ་ནི། ་ཞིང་དང་བསམ་པ་དངོས་པོ་དག་པ་གསུམ་ཡིན། དངོས་པོ་དག་པ་ལ་བདག་པོས་ཡོངས་སུ་བཟུང་མ་བཟུང་གཉིས། མ་བཟུང་བའི་དངོས་པོ་མཆོད་པར་གསང་ཆེན་ཐབས་ལ་མཁས་པའི་མདོ་ལས་གསུངས་པ་ཡིན། དེས་ན་བྱང་ཆུབ་མ་ཐོབ་ཀྱི་བར་དུ་ཡོངས་སུ་བཟུང་བའི་གཞི་གསུམ་པོ་ཐམས་ཅད་མཆོད་དགོས། དེ་དག་ལ་སྔགས་དང་ཕྱག་རྒྱ་ཏིང་ངེ་འཛིན་གསུམ་པོ་རྡོ་རྗེ་འཆང་གིས་བྱིན་གྱིས་བརླབས་པ་འདྲ་བས་དེ་དག་གསུམ་པོ་ཚང་བའི་སྒོ་ནས་བདག་པོས་ཡོངས་སུ་བཟུང་དང་མ་བཟུང་གི་དངོས་པོ་ཐམས་ཅད་དང་། དངོས་སུ་འབྱོར་བས་མཚོན་ཏེ། ཡིད་སྤྲུལ་ཀུན་ཏུ་བཟང་པོའི་རྣམ་ཐར་ལས་བྱུང་བའི་མཆོད་པ་རྒྱ་ཆེ་བ་ནམ་མཁའ་དང་མཉམ་པ། རྒྱུན་རིང་བ་ཇི་སྲིད་འཁོར་བ་མ་སྟོང་གི་བར་དུ། བྱེད་ལས་བླ་མ་རྒྱལ་བ་སྲས་དང་བཅས་པའི་དབང་པོ་དྲུག་གི་སྤྱོད་ཡུལ་དུ་གྱུར་བའི་ཕྱི་ནང་གསང་བའི་མཆོད་པ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པའི་མཆོད་སྤྲིན་དུ་དམིགས་ནས་མཆོད་དགོས། ཁྱད་པར་ཡིད་ཀྱིས་སྤྲུལ་བའི་མཆོད་པ་འདི་སེམས་ཉིད་ཡིད་བཞིན་རིན་པོ་ཆེའི་འཆར་ཚུལ་ཡིན་པས་གཞན་ལས་ཁྱད་པར་དུ་འཕགས་པ་ཡིན། དེ་ཡང་དངོས་སུ་རང་གིས་ཅི་འབྱོར་པའི་མཆོད་པ་བདག་པོས་ཡོངས་སུ་བཟུང་བ་སྔར་མཎྜལ་གྱི་དུས་བཤད་པ་ལྟར་དངོས་གཙང་ཞིང་རྣམ་པར་དག་པ་སེར་སྣས་མ་བཅིངས་ཤིང་ཚུལ་འཆོས་དང་ངོམ་ཆོས་སུ་མ་སོང་བར་བཤམས་ལ་དེས་དམིགས་རྟེན་ཙམ་བྱས་ཏེ། ཀུན་མཁྱེན་ཆེན་པོས། སྟོན་ཀའི་མཚན་མོ་དཀར་བའི་རི་བོང་འཛིན། །གཟའ་བྲལ་རྒྱུ་སྐར་ཕྲེང་བས་བསྐོར་བ་དང་། །ཉིན་བྱེད་འོད་སྟོང་དྲ་བས་མཛེས་འབར་བ། །གླིང་བཞིའི་འཇིག་རྟེན་རྒྱན་གྱུར་རྣམས་ཀྱིས་མཆོད། །ཅེས་གསུངས་པ་ལྟར། གླིང་བཞི་སྣོད་བཅུད་དང་བཅས་མཆོད་པའི་ཡོ་བྱད་དུ་དམིགས་ཏེ་མཆོད་ཆོག ཤར་ཉི་ཟླའི་སྒྲོན་མེ། ལྷོ་ཙནྡ་ནགས་ཀྱི་གདུག་སྤོས། ནུབ་གངས་དཀར་མར་གྱི་ལྷ་བཤོས། བྱང་རྫ་ཆབ་སྔོན་སྔོན་མོའི་མཆོད་ཡོན། འོག་གསེར་གྱི་ས་གཞིའི་མེ་ཏོག སྟེང་གཡུ་འབྲུག་སྒྲ་ཡི་རོལ་མོ་ལ་སོགས་པས་མཆོད། དེ་ཡང་ཡིད་ཀྱིས་ནམ་མཁའ་དང་ས་གཞི་ཐམས་ཅད་ལྷ་མིའི་མཆོད་རྫས། མེ་ཏོག བདུག་སྤོས། མར་མེ། དྲི་ཆབ་ཞལ་ཟས་ལ་སོགས་པ་དང་། གཞལ་མེད་ཁང་དང་། ཡུལ་མཁར། ཀུན་དགའ་ར་བ། རྒྱལ་སྲིད་བདུན། བཀྲ་ཤིས་རྟགས་བརྒྱད། རྡོ་རྗེའི་ལྷ་མོ་བཅུ་དྲུག་ལ་སོགས་པས་གླུ་གར་དང་རོལ་མོའི་ཁྱད་པར་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་པའི་རྗེས་སུ་འགྲོ་བ་སྤྲུལ་དགོས་ཏེ། དེ་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་གྱི་མཐུ་ལས། རང་གི་ཐུགས་ཀ་ནས་འོད་ཟེར་ཁ་དོག་མི་འདྲ་བ་བྱེ་བ་བརྒྱ་སྟོང་སངས་རྒྱས་ཀྱི་ཞིང་གྲངས་མེད་པའི་རྡུལ་དང་མཉམ་པར་སྤྲོས། འོད་ཟེར་དེ་རེ་རེའི་རྩེར་ཡང་བྱང་ཆུབ་སེམས་དཔའ་ཀུན་ཏུ་བཟང་པོ་རང་འདྲ་བ་རེ་རེ་སྤྲུལ། དེ་རེ་རེའི་ཐུགས་ཀ་ནས་སྔར་དང་འདྲ་བའི་འོད་ཟེར་སྤྲོ་ཞིང་། དེའི་རྩེར་ཀུན་ཏུ་བཟང་པོ་སྤྲུལ་པ་སོགས་གྲངས་མེད་བསམ་གྱིས་མི་ཁྱབ་པའི་བར་སྤྲོས་ཏེ། དེ་དག་རེ་རེས་ཀྱང་དཔག་ཏུ་མེད་པའི་མཆོད་རྫས་ཀྱི་རྣམ་གྲངས་བསམ་གྱིས་མི་ཁྱབ་པས་ཕྱོགས་བཅུའི་རྒྱལ་བ་སྲས་དང་བཅས་པ་ལ་མཆོད་པ་ནི། འཕགས་པ་ཀུན་ཏུ་བཟང་པོའི་མཆོད་པའི་སྤྲིན་ཕུང་ཞེས་བྱ་བ་སྟེ། དེ་འདྲ་བ་རང་གི་བློས་ཅི་ལྕོག་ཏུ་སྤྲུལ་ཏེ་འབུལ་ཞིང་། དངོས་བཤམས་ཡིད་སྤྲུལ་ཏིང་འཛིན་གྱིས། །སྣང་སྲིད་མཆོད་པའི་ཕྱག་རྒྱར་འབུལ། །ཞེས་བརྗོད། ཀུན་མཁྱེན་ཆེན་པོས། ཏིང་འཛིན་ཡིད་ཀྱིས་ནམ་མཁའི་དབྱིངས་ཁྱབ་པར། །ཕྱི་ནང་གསང་བའི་མཆོད་སྤྲིན་རྒྱ་མཚོས་མཆོད། །ཅེས་གསུངས་པ་ལྟར། །དེ་ཡང་རང་འབུལ་བའི་ནུས་པ་ཡོད་ན། རྒྱལ་བ་སྲས་བཅས་ལ་བཞེས་པའི་ནུས་པ་ཡོད་པ་ཡིན་པས། འཇིག་རྟེན་གྱི་ཁམས་ན་བདག་པོས་མ་བཟུང་བའི་ལྷ་དང་མིའི་ལོངས་སྤྱོད་ཇི་སྙེད་ཡོད་པ་ཐམས་ཅད་ཀྱང་བློས་བླངས་ནས་འབུལ་ཞིང་། ཡིད་ཀྱིས་ཅི་ཙམ་སྤྲུལ་ནུས་པ་དེ་ཙམ་དུ་སྤྲུལ་ནས་ཕུལ་ན་ཚོགས་རྫོགས་པ་ལ་དངོས་སུ་འབྱོར་པ་དང་ཁྱད་པར་སྤུ་ཙམ་ཡང་མེད་པས། མཆོད་པ་འབུལ་བ་ལ་ཡོ་བྱད་མེད་སྙམ་མི་དགོས་ཤིང་། དེས་ན་དུས་དང་རྣམ་པ་ཐམས་ཅད་དུ་རང་དང་གཞན་གྱི་ཡོ་བྱད་ཅི་ཡོད་པ་དང་ཅི་མཐོང་བ་ཐམས་ཅད་ལ་དང་པོར་དཀོན་མཆོག་གསུམ་མཆོད། རྩ་བརྒྱུད་ཀྱི་བླ་མ་མཆོད་སྙམ་པའི་བློ་སྔོན་དུ་གཏོང་ཞིང་། ཐ་ན་ལམ་ཀ་ཞིག་ན་ཆུ་དྭངས་མོ་ཡིད་དུ་འོང་བ་ཞིག་འབབ་པའམ། མེ་ཏོག་གི་ཐང་ཡིད་དུ་འོང་བ་ཞིག་འདུག་པ་ཚུན་ཆད་མདོར་ན་ཡིད་ལ་འབབས་པའི་དངོས་པོ་གང་མཐོང་ཐམས་ཅད་རང་གི་བློས་བླངས་ཏེ། དཀོན་མཆོག་གསུམ་མཆོད་སྙམ་པ་ཡིད་ལ་བྱས་ན་ཚོགས་ཞར་དང་ཞོར་ལ་རྫོགས་པ་ཡིན་ཏེ། འཇིག་རྟེན་དག་ན་བདེ་ཞིང་སྐྱིད་པ་གང་། །དེ་ཀུན་དཀོན་མཆོག་མཆོད་ལས་བྱུང་བས་ན། རྟག་ཏུ་དཀོན་མཆོག་མཆོད་ལ་བརྩོན་པར་གྱིས། །ཞེས་གསུངས། དཀོན་མཆོག་གསུམ་ཡིད་ལ་བྱས་ནས་གསོལ་འདེབས་ལན་གཅིག་བྱས་པ་དང་། ཕྱག་གཅིག་འཚལ་བ་དང་། མེ་ཏོག་གཅིག་ཙམ་ཕུལ་བ་དང་། ཐ་ན་གཡེང་བའི་སེམས་ཀྱིས་ཀྱང་མཚན་ལན་གཅིག་བརྗོད་པ་སོགས་ལ་བསོད་ནམས་དཔག་ཏུ་མེད་པར་ཡོད་པས་དེ་ལྟར་བྱ་དགོས་སོ། །གསུམ་པ་སྡིག་པ་བཤགས་པའི་ཡན་ལག་ནི། བཤགས་པ་ནི་གཙོ་ཆེར་ཞེ་སྡང་གི་གཉེན་པོ་ཡིན། གོང་དུ་བཤད་པ་ལྟར་གཉེན་པོ་སྟོབས་བཞི་ཚང་དགོས་པས་དང་པོ་རྟེན་གྱི་སྟོབས་ལ་ཕྱི་ནང་གི་རྟེན་གྱི་སྟོབས་གཉིས་ལས་དང་པོ་ནི་ཚོགས་ཞིང་གསལ་འདེབས་པ་དང་། ནང་གི་རྟེན་གྱི་སྟོབས་སྐྱབས་སེམས་ཡིན་ཡང་དོན་བསམ་པ་ལས་ཚིག་འདོན་མི་དགོས། གཉིས་པ་སུན་འབྱིན་པའི་སྟོབས་ནི། སུན་འབྱིན་གྱི་སྟོབས་ལ། སྦྱང་བྱ་སྡིག་པའི་སྒོ་དྲུག་ལ་འགྱོད་སེམས་བསྐྱེད་དགོས། དྲུག་པོ་གང་ཞེ་ན། དུས་ཀྱི་སྒོ། ཀུན་སློང་གི་སྒོ། འགྲིམས་པའི་སྒོ། ངོ་བོའི་སྒོ། ཡུལ་གྱི་སྒོ། བྱེད་ལས་ཀྱི་སྒོ་དང་དྲུག་ཡོད། དང་པོ་ནི་དུས་ནམ་སྡིག་པ་གང་ཞིག་བསགས་པ་དེ་ཡིན། གཉིས་པ་ནི། དུག་གསུམ་གང་རུང་གིས་ཀུན་ནས་བསླངས་ཏེ་སྡིག་པ་བསགས་པ་དེ་ཉིད་ཡིན། གསུམ་པ་ནི་ལུས་ངག་ཡིད་གསུམ་གང་གིས་བསགས་པ་དེའོ། བཞི་པ་ནི་མི་དགེ་བཅུ་དང་མཚམས་མེད་སོགས་ཀྱི་བྱེ་བྲག་རྣམས་སོ། ལྔ་པ་ནི། འཁོར་འདས་གཉིས་གང་ལ་བརྟེན་ནས་བསགས་པ་དང་། དྲུག་པ་ནི། ཚེ་ཐུང་བ། ནད་མང་བ། ཕྱི་མར་དམྱལ་བའི་སྡུག་བསྔལ་སྐྱེད་བྱེད་ལྟ་བུའི་སྒོ་དྲུག་ལ་འགྱོད་སེམས་བསྐྱེད་དགོས། གསུམ་པ་སོར་ཆུད་པའི་སྟོབས་ཕྱིན་ཆད་མི་བགྱིད་སྙམ་པའི་དམ་བཅའ་དགོས། བཞི་པ་གཉེན་པོ་ཀུན་ཏུ་སྤྱོད་པའི་སྟོབས་སྐབས་འདིར་བསྟན་གྱི་སྡིག་པའི་གཉེན་པོ་ཐམས་ཅད་ཡིན། ཚེ་འཁོར་བ་ཐོག་མ་མེད་པ་ནས་དེ་རིང་ཡན་ཆད་དུ་དྲན་པ་དང་མི་དྲན་པའི་སྡིག་ལྟུང་། ལུས་ངག་ཡིད་གསུམ་གྱི་སྒོ་ནས་མི་དགེ་བ་བཅུ་མཚམས་མེད་པ་ལྔ་། དེ་དང་ཉེ་བ་ལྔ་། ལྕི་བ་བཞི། ལོག་པ་བརྒྱད། དཀོན་མཆོག་གི་དཀོར་ལ་འབག་པ་སོགས་ཁ་ན་མ་ཐོ་བའི་ལས་ཅི་བསགས་པ་ཐམས་ཅད་གནོང་ཞིང་འགྱོད་པ་དྲག་པོས་མི་གསང་མི་སྦེད་པ་མཐོལ་ལོ་བཤགས་སོ། །སླན་ཆད་མི་བྱེད་པའི་སྡོམ་པ་བགྱིད་དོ་སྙམ་པ་ལ་སོགས་སྔར་རྡོར་སེམས་སྒོམ་བཟླས་ཀྱི་དུས་སུ་བཤད་པ་ལྟར་གཉེན་པོ་སྟོབས་བཞིའི་དག་པ་དྲན་པའི་ངང་ནས་བཤགས་པས། སྡིག་སྒྲིབ་ཐམས་ཅད་རང་གི་ལྕེ་ཐོག་ཏུ་ནག་ཕུང་གིས་འདུས་པ་ལ། ཚོགས་ཞིང་ལྷ་ཚོགས་ཀྱི་སྐུ་གསུང་ཐུགས་ལས་འོད་ཟེར་བྱུང་བ་ཕོག་པས་དྲི་མ་བཀྲུས་པ་བཞིན་དག་པར་བསམས་ནས། སྒོ་གསུམ་མི་དགེའི་ལས་རྣམས་ཀུན། །འོད་གསལ་ཆོས་སྐུའི་ངང་དུ་བཤགས། །ཞེས་བརྗོད། དེའི་དོན་ཚེ་རབས་ཐོགས་མེད་ནས་བསགས་པའི་སྒོ་གསུམ་མི་དགེ་བའི་ལས་རྣམས་ཀུན་གནོང་འགྱོད་དྲག་པོས་སྡིག་པ་དེ་བཤགས་པ་ཀུན་རྫོབ་ཀྱི་བཤགས་པ་དང་། རྗེས་ལ་སྡིག་པ་རང་བཞིན་གྱིས་མ་གྲུབ་པ་ཤེས་ནས་འོད་གསལ་ཆོས་སྐུའི་ངང་དུ་སྡིག་ལྟུང་དབྱིངས་སུ་བཤགས་པ་ནི་དོན་དམ་པའི་བཤགས་པ་ཡིན། བཞི་པ་ཕྲག་དོག་གི་གཉེན་པོ་རྗེས་སུ་ཡི་རང་བའི་ཡན་ལག་ནི། དེ་ཡང་གཞན་གྱིས་དགེ་བ་སྒྲུབ་པ་མཐོང་ཐོས་དྲན་པ་ཐམས་ཅད་ལ་འགྲན་སེམས་དང་ཕྲག་དོག་མེད་པར། རྒྱལ་བ་སྲས་དང་སློབ་མ་ཉན་རང་རིག་པ་འཛིན་པའི་ཚོགས་དང་། གཞན་སོ་སོའི་སྐྱེ་བོའི་དགེ་རྩ་ནས་བཟུང་སྟེ་དགེ་རྩ་ཐམས་ཅད་ལ་རྗེས་སུ་ཡི་རང་བྱེད་དགོས། གང་ལ་ཡི་རང་བྱེད་ཡུལ་གྱི་དགེ་རྩ་ལ་རྣམ་གྲངས་མང་ཡང་ཟག་བཅས་དང་ཟག་མེད་གཉིས་ལ་མ་འདུས་པ་མེད། ངོ་བོའི་དབང་དུ་བྱས་ན་བདེན་པ་གཉིས་ཀྱི་ནང་འདུས། དེ་ཡང་དོན་དམ་གྱི་དགེ་རྩ་ཐམས་ཅད་ཟག་མེད་དང་ཀུན་རྫོབ་ཀྱི་དགེ་རྩ་ཐམས་ཅད་ཟག་བཅས་དང་། ལམ་གྱི་དབང་དུ་བྱས་ན་ཚོགས་སྦྱོར་གྱི་དགེ་རྩ་ཐམས་ཅད་ཟག་བཅས་དང་། མཐོང་སྒོམ་གྱི་དགེ་རྩ་ཐམས་ཅད་ཟག་མེད་ཡིན། དགེ་རྩའི་དབང་དུ་བྱས་ན། བསོད་ནམས་ཀྱི་ཚོགས་ཐམས་ཟག་བཅས་དང་། ཡེ་ཤེས་ཀྱི་ཚོགས་ཐམས་ཅད་ཟག་མེད་ཡིན། མཉམ་རྗེས་ཀྱི་དབང་དུ་བྱས་ན། འཕགས་པའི་མཉམ་བཞག་ཟག་མེད་དང་། རྗེས་ཐོབ་ཀྱི་དགེ་རྩ་ཐམས་ཅད་ཟག་བཅས་ཡིན། མདོར་ན་གནས་ཚུལ་མཉམ་རྗེས་དབྱེར་མེད་སྲིད་ཞི་དབྱེར་མེད་ཀྱི་ལྟ་བ་ཕྱག་རྫོགས་དབུ་གསུམ་གྱི་ལྟ་སྒོམ་སྤྱོད་པ་ཐམས་ཅད་ངོ་བོ་ཟག་མེད་དང་། སྣང་ཚུལ་ཟག་བཅས་ཀྱི་དགེ་རྩ་ཡིན། རྒྱལ་བ་རྣམས་ཀྱིས་སེམས་ཅན་གྱི་དོན་དུ་ཆོས་ཀྱི་འཁོར་ལོ་ཆེན་པོ་བསྐོར་པ་དང་། བྱང་ཆུབ་སེམས་དཔའ་རྣམས་ཀྱི་སྤྱོད་པ་རླབས་པོ་ཆེ། སེམས་ཅན་རྣམས་ཀྱི་བསོད་ནམས་དང་ཐར་པ་ཆ་མཐུན་གྱི་དགེ་བ། རང་གིས་སྔར་བྱས་པ། ད་ལྟ་བྱེད་བཞིན་པ། ཕྱིས་བྱེད་པ་ངེས་པ་ཐམས་ཅད་ལ་སྙིང་ཐག་པ་ནས་དགའ་བ་ཆེན་པོས་རྗེས་སུ་ཡི་རང་བ་བསྒོམ་ཞིང་། བདེན་པ་གཉིས་ཀྱིས་བསྡུས་པ་ཡིས། །དགེ་ཚོགས་ཀུན་ལ་རྗེས་ཡི་རང་། །ཞེས་བརྗོད། དེ་ཡང་ཀུན་རྫོབ་ཀྱི་བདེན་པ་དང་དོན་དམ་གྱི་བདེན་པ་གཉིས་ལ་མ་འདུས་པའི་ཆོས་ནི་ཐེག་པ་རིམ་པ་དགུ་ལ་སོགས་པ་གང་ན་ཡང་མེད་པས། དེ་གཉིས་ཀྱིས་བསྡུས་པའི་རང་གཞན་ཐམས་ཅད་ཀྱི་འཁོར་འདས་ལམ་གསུམ་གྱི་དགེ་བ་ཟག་བཅས་དང་ཟག་པ་མེད་པ་ཐམས་ཅད་ལ་ཕྲག་དོག་མེད་པས་རྗེས་སུ་ཡི་རང་བ་ཡིན་ནོ། །དེ་ལྟ་བུའི་རྗེས་སུ་ཡི་རང་ནི་ཕན་ཡོན་ཚད་མེད་དེ། སྔོན་རྒྱལ་པོ་གསལ་རྒྱལ་གྱིས་བཅོམ་ལྡན་འདས་འཁོར་དང་བཅས་པ་ལ་ཟླ་བ་བཞིར་གདུགས་ཚོད་ལ་སྤྱན་དྲངས་ཏེ་ལོངས་སྤྱོད་ཐམས་ཅད་ཀྱིས་མཆོད་པའི་ཚེ། སློང་མོ་བྱེད་པའི་དབུལ་མོ་ཞིག་ཡོད་པ་དེས་བསམ་པ་ལ། རྒྱལ་པོ་གསལ་རྒྱལ་འདི་སྔོན་ཡང་བསོད་ནམས་བསགས་པའི་མཐུས་ལོངས་སྤྱོད་དང་འབྱོར་པ་འདི་ཙམ་གྱི་བདག་པོར་གྱུར། སྟོན་པ་ཁྱད་པར་ཅན་འདི་འདྲ་བའི་བསོད་ནམས་ཀྱི་ཞིང་དང་མཇལ། ད་དུང་ཡང་བསོད་ནམས་ཀྱི་ཚོགས་རྒྱ་ཆེན་པོ་འདི་ལྟ་བུ་བསགས་པ་ནི་ངོ་མཚར་ཆེའོ་སྙམ་དུ་སྙིང་ཐག་པ་ནས་དབུལ་མོས་རྗེས་སུ་ཡི་རང་བ་ཁོ་ན་བསྒོམས་པས་བསོད་ནམས་ཚད་མེད་པ་ཐོབ་པ་བཅོམ་ལྡན་འདས་ཀྱིས་མཁྱེན་ནས། དགོང་མོ་ཡོན་བསྔོ་མཛད་པའི་ཚེ། རྒྱལ་པོ་ལ་ཁྱོད་ཀྱིས་བསོད་ནམས་བསགས་པའི་དགེ་རྩ་འདི་ཁྱེད་རང་ལ་བསྔོའམ། ཁྱོད་ལས་ཆེས་བསོད་ནམས་ཐོབ་པ་དེ་ལ་བསྔོ་གསུངས་པས། རྒྱལ་པོས་དགེ་རྩ་སུ་ཆེ་ཡང་དེ་ལ་བསྔོ་བ་མཛད་པར་ཞུས་པས། དབུལ་མོ་དེའི་མིང་ནས་བཟུང་སྟེ་ཡོན་བསྔོ་བར་མཛད། ཞག་གསུམ་གྱི་བར་དུ་དེ་ལྟར་མཛད་པས་རྒྱལ་པོ་མ་དགའ་སྟེ། དེ་ལྟར་མི་མཛད་པའི་ཐབས་བློན་པོ་རྣམས་དང་བགྲོས་པས་སང་ཉིན་ཐུབ་པ་འཁོར་བཅས་ལ་བསོད་སྙོམས་འདྲེན་པའི་ཚེ། བཟའ་བ་དང་བཅའ་བ་ལ་སོགས་སྣོད་ཀྱི་ཕྱི་རོལ་དུ་མང་པོ་ཕོ་ནས། དེ་དག་སློང་མོ་བ་རྣམས་ཀྱིས་ལེན་པ་ན་རྒྱབ་རྡུང་མང་པོ་བྱས་ཏེ་ལེན་མ་བཅུག་ན། དེས་ཕན་ནམ་ཟེར། དེས་ལྟར་བྱས་པས་སྔ་སོར་རྗེས་སུ་ཡི་རང་འབུལ་མཁན་གྱི་དབུལ་མོ་དེ་ཡང་ཁ་ཟས་བོ་བ་རྣམས་ལེན་དུ་འོང་བ་ལ་ལེན་མ་བཅུག་པར་རྒྱབ་རྡུང་བྱས་པས། དབུལ་མོ་ཁོང་ཁྲོ་སྐྱེས་པས་དགེ་རྩ་འཇོམས་ཏེ། དེ་ཉིན་རྒྱལ་པོའི་མིང་ནས་བཟུང་སྟེ་ཡོན་བསྔོ་མཛད་པ་ཡིན། དེས་ན་མི་དགེ་བ་དང་དགེ་བའི་རྣམ་གྲངས་ལུས་ངག་གི་ལག་ལེན་གྱི་སྟེང་ན་ཅུང་ཟད་ཀྱང་མེད་དེ་རང་གི་བསམ་པ་ཁོ་ནས་བཞག་པ། སྔར་བསམ་པ་དགེ་དང་མི་དགེའི་བྱེ་བྲག་ལས། །དགེ་སྡིག་གཟུགས་བརྙན་ཆེ་ཆུང་རྗེས་མི་འགྲོ། །སོགས་ཡང་ནས་ཡང་དུ་སྨོས་པ་ལྟར་ཡིན་པས་ན། གཞན་གྱི་དགེ་བ་བྱེད་པ་ལ་འགྲན་སེམས་དང་། ངས་དེ་ལྟ་བུའི་དགེ་བ་བྱས་སོ་སྙམ་དུ་ང་རྒྱལ་བ་ལ་སོགས་པ་འཇིག་རྟེན་ཚེ་འདིའི་ལོ་འདོད་དང་ཆོས་བརྒྱད་ཀྱི་དུག་གིས་ཁྱབ་པའི་དགེ་བ་རྒྱ་གང་ཆེ་བྱེད་ཁུལ་བྱེད་པ་ལས། བསམ་པ་རྣམ་པར་དག་པའི་སྒོ་ནས་གཞན་གྱི་དགེ་བ་བྱེད་པ་ཐམས་ཅད་ལ་བལྟས་ཏེ་སྙིང་ཐག་པ་ནས་རྗེས་སུ་ཡི་རང་བ་སྒོམ་ཞིང་དེའི་དགེ་རྩ་རྫོགས་པའི་བྱང་ཆུབ་ཏུ་བསྔོས་ན་དེ་ཁོ་ན་ཚོགས་གསོག་སྟོབས་ཆེ་བ་ཡིན་ཏེ་བཅོམ་ལྡན་འདས་ཀྱིས་རྒྱལ་པོ་ལ་གདམས་པའི་མདོ་ལས་རྒྱས་པར་གསུངས་སོ། །དེ་བཞིན་དུ་ཆགས་མེད་རིན་པོ་ཆེས་ཀྱང་། གཞན་གྱི་དགེ་བ་བྱེད་པ་ཐོས་པའི་ཚེ། །དེ་ལ་ཕྲག་དོག་མི་དགེའི་སེམས་སྤངས་ནས། །སྙིང་ནས་དགའ་བས་རྗེས་སུ་ཡི་རང་ན། །དེ་ཡི་བསོད་ནམས་མཉམ་དུ་ཐོབ་པར་གསུངས། །ཞེས་དང་། སྡུད་པ་ལས་ཀྱང་། །སྟོང་གསུམ་རི་རབ་བསྲང་ལ་གཞལ་བས་ཚད་གཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ཞེས་སོགས་གསུངས་པས་ན་རྗེས་སུ་ཡི་རང་བ་འདི་བྱ་སླ་ལ་ཆོད་ཆེ་བའི་ཆོས་ཡིན་པས་དུས་དང་རྣམ་པ་ཐམས་ཅད་དུ་ཉམས་སུ་བླང་ངོ་། །ལྔ་པ་ཆོས་ཀྱི་འཁོར་ལོ་བསྐོར་བར་སྐུལ་བའི་ཡན་ལག་ནི། འདི་གཏི་མུག་གི་གཉེན་པོ་ཡིན། གང་བསྐོར་བར་བསྐུལ་བའི་ཆོས་འཁོར་ནི། གདུལ་བྱ་རྣམས་ཀྱི་ཁམས་དང་དབང་པོ་དང་བསམ་པའི་བྱེ་བྲག་དང་མཐུན་པ་ཕྱི་ཀུན་འབྱུང་འདྲེན་པའི་ཐེག་པ་གསུམ། ནང་དཀའ་ཐུབ་རིག་བྱེད་ཀྱི་ཐེག་པ་གསུམ། གསང་བ་དབང་བསྒྱུར་ཐབས་ཀྱི་ཐེག་པ་གསུམ་སྟེ་ཐེག་པ་རིམ་པ་དགུ་ཡི་ཆོས་ཀྱི་འཁོར་ལོ་བསྐོར་པར་གསོལ་བ་འདེབས་པ་ཞིག་ཡིན་ཏེ། སྔོན་བདག་ཅག་གི་སྟོན་པ་ཐུགས་རྗེ་ཅན་མངོན་པར་རྫོགས་པར་སངས་རྒྱས་ཏེ་བདག་གི་རྟོགས་པའི་ཆོས་ཟབ་མོ་འདི་གཞན་གྱི་ཁོང་དུ་ཆུད་དཀའ་བས་གལ་ཏེ་བདག་གིས་བསྟན་ཀྱང་རྟོགས་པར་མི་འགྱུར་བས། དེ་བས་བདག་ཉིད་གཅིག་པུ་དགོན་པར་གནས་པ་བྱ་དགོངས་ཏེ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་འདབ་ཉིད་དུ་གནས་པར་བྱ། །ཞེས་གསུངས་ནས་ཆོས་མི་གསུངས་པར་བཞུགས་པའི་ཚེ། ལྷ་ཚངས་པས་གསེར་གྱི་འཁོར་ལོ་རྩིབས་སྟོང་དང་ལྡན་པ་དང་། བརྒྱ་བྱིན་གྱིས་དུང་དཀར་པོ་གཡས་སུ་འཁྱིལ་བ་ཕུལ་ནས་ཆོས་འཁོར་བསྐོར་བར་བསྐུལ་བ་ཡིན། དེ་ལྟ་བུའི་སངས་རྒྱས་དང་བྱང་ཆུབ་སེམས་དཔའ་བླ་མ་དགེ་བའི་བཤེས་གཉེན་ལ་སོགས་པ་གཞན་དོན་རླབས་པོ་ཆེའི་ཁུར་བཟོད་པ་རྣམས། གདུལ་བྱའི་འགྲོ་བ་རྨོངས་པས་དྲིན་ལན་ལོག་འཇལ་བྱེད་པའི་ལོག་སྒྲུབ་དང་སྐྱོ་ངལ་གྱིས་ཐུགས་སུན་ནས་ཆོས་མི་གསུང་བར་ཞི་བདེར་གཞོལ་བ་དག་གི་དྲུང་དུ། སྔར་ཚངས་པ་དང་བརྒྱ་བྱིན་གྱིས་ཆོས་ཀྱི་འཁོར་ལོ་བསྐོར་བ་བསྐུལ་བ་བཞིན་དུ་བདག་ཉིད་ཀྱི་ལུས་ཀྱང་ཚངས་པ་དང་བརྒྱ་བྱིན་ལུས་བྱེ་བ་བརྒྱ་སྟོང་གྲངས་མེད་པར་སྤྲུལ་ནས། འཁོར་ལོ་དང་ནོར་བུ་ལ་སོགས་པ་ཕུལ་ནས་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པར་བསམ་ཞིང་། འདིར་རྒྱལ་སྲས་གཞན་ཕན་མཐའ་ཡས་ཀྱིས་ཁ་བསྐང་ནས། རིགས་ཅན་གསུམ་གྱི་གདུལ་བྱ་ལ། །ཐེག་གསུམ་ཆོས་འཁོར་བསྐོར་བར་བསྐུལ། །ཞེས་བརྗོད། དེ་ཡང་སྤྱིར་ཉན་ཐོས་རང་རྒྱལ་བྱང་ཆུབ་སེམས་དཔའི་ཐེག་པ་གསུམ་དུ་རྒྱལ་བའི་ཆོས་ཐམས་ཅད་འདུས་པས་དེའམ། ཡང་ན་ཕྱི་ཀུན་འབྱུང་འདྲེན་པའི་ཐེག་པ་ཉན་ཐོས་རང་རྒྱལ་བྱང་སེམས་གསུམ། ནང་དཀའ་ཐུབ་རིག་བྱེད་ཀྱི་ཐེག་པ་ཀྲི་ཡ་ཨུ་པ་ཡོ་ག་གསུམ། གསང་བ་དབང་སྒྱུར་ཐབས་ཀྱི་ཐེག་པ་མ་ཧཱ་ཨ་ནུ་ཨ་ཏི་གསུམ་སྟེ། ཐེག་པ་གསུམ་ལ་ནང་གསེས་དགུར་དབྱེ་བ་དེ་དག་གདུལ་བྱ་གང་ལ་ཆོས་གང་གིས་འདུལ་བ་དེ་ལྟ་བུའི་ཆོས་འཁོར་བསྐོར་བར་གསོལ་བ་འདེབས་པ་ཡིན་ནོ། །དྲུག་པ་མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག་ནི། འདི་ལོག་ལྟའི་གཉེན་པོ་ཡིན། ནམ་མཁའི་མཐས་གཏུགས་པའི་ཞིང་ཁམས་རབ་འབྱམས་ན་བཞུགས་པའི་རྒྱལ་བ་རྫོགས་པའི་སངས་རྒྱས་རྣམས་མཛད་པ་བཅུ་གཅིག་མཐར་ཕྱིན། བཅུ་གཉིས་པ་མྱ་ངན་ལས་འདའ་བར་བཞེད་པ་རྣམས་དང་། རྒྱལ་སྲས་བྱང་ཆུབ་སེམས་དཔའ་སློབ་མ་ཉན་རང་། རིག་པ་འཛིན་པའི་ཚོགས་དང་བཅས་པ་རྣམས་ཞིང་ཁམས་གཞན་དུ་གཤེགས་པར་དགོངས་པ་ཐམས་ཅད་ལ། ཞུ་རྟེན་དུ་ལྷ་མིའི་དཔལ་འབྱོར་ཐམས་ཅད་ཕྱོགས་གཅིག་ཏུ་སྤུངས་ཏེ་ཕུལ་བའི་འདུན་པ་དང་བཅས་ཏེ། སྲིད་པ་ཇི་སྲིད་ཀྱི་བར་དུ་བཞུགས་པར་གསོལ་བ་འདེབས་པ་དང་། གསོལ་བ་བཏབ་པ་དེ་བཞིན་དུ་ཞལ་བཞེས་གནང་བའི་འདུན་མ་དང་བཅས་པས་ཚིག་རྗེས་དོན་དྲན་གྱིས་ངག་འདོན་བྱེད་དགོས། ཞིང་ཁམས་འདི་དང་གཞན་དག་ཏུ་བླ་མ་དང་སངས་རྒྱས་བྱང་ཆུབ་སེམས་དཔའ་གང་དག་སེམས་ཅན་གྱི་དོན་མཛད་ཟིན་ནས་མྱ་ངན་ལས་འདའ་བར་བཞེད་པ་དག་གི་མདུན་དུ། སྔོན་དགེ་བསྙེན་ཙུན་དས་གསོལ་བ་བཏབ་པ་ལྟར། བདག་གི་ལུས་མང་པོར་སྤྲུལ་ཏེ་གསོལ་བ་བཏབ་པས། འཁོར་བ་མ་སྟོང་གི་བར་དུ་བཞུགས་ནས་སེམས་ཅན་གྱི་དོན་མཛད་པར་བསམས་ལ། ཇི་སྲིད་འཁོར་བ་མ་སྟོངས་བར། །མྱ་ངན་མི་འདའ་བཞུགས་གསོལ་འདེབས། །ཞེས་བརྗོད་པའི་དོན། ཇི་སྲིད་འཁོར་བ་འདི་ཡོངས་སུ་མ་སྟོང་ཀྱི་བར་དུ་དེ་སྲིད་དུ་མྱ་ངན་ལས་མི་འདའ་བར་ཆོས་སྟོན་ཅིང་བཞུགས་པ་གསོལ་བ་འདེབས་དགོས་པ་ཡིན། བདུན་པ་བསྔོ་བའི་ཡན་ལག་ནི། འདི་ཐེ་ཚོམ་གྱི་གཉེན་པོ་ཡིན། བསྔོ་བའི་དཔང་པོ་རྒྱལ་བ་སྲས་བཅས། བསྔོ་རྒྱུའི་དངོས་པོ་རང་གཞན་དུས་གསུམ་བསགས་ཡོད་ཀྱི་ཟག་བཅས་ཟག་མེད་ཀྱི་དགེ་རྩ་ཐམས་ཅད་བསྡོམས་ཏེ། གང་ལ་བསྔོ་ན་དགྲ་བགེགས་གཉིས་ཀྱིས་གཙོ་བྱས་པའི་སེམས་ཅན་ཐམས་ཅད། ནད་པ་ནད་བདག ཤི་བོ་གཤེད་མ་དང་བཅས་པ་ཐམས་ཅད་ལ། གང་གི་ཆེད་དུ་བསྔོ་ན། ཟུར་གཉིས་སམ་དོན་གཉིས་དང་ཁྱད་པར་ཟུར་ཕྱི་མ་འབྲས་བུ་རྣམ་མཁྱེན་ལ་གཙོ་བོ་དམིགས་དགོས་ཤིང་། ཇི་ལྟར་བསྔོ་ན་བསྔོ་བ་མཚན་ཉིད་པ་འཁོར་གསུམ་དུ་ཞེན་པ་དང་འཛིན་པའི་བློ་མེད་པར་རྣམ་ཀུན་མཆོག་ལྡན་གྱི་སྟོང་ཉིད་བསྔོ་བ་དང་སྨོན་ལམ་གྱི་རྣམ་པར་ཤར་བ་དང་། རྗེས་མཐུན་པ་འཁོར་གསུམ་པོ་སྣང་ལ་རང་བཞིན་མེད་པའི་ངེས་ཤེས་དྲངས་པའམ། ཡང་ན་རྒྱལ་སྲས་འཇམ་དཔལ་དཔའ་བོ་སོགས་ཀྱིས་ཇི་ལྟར་བསྔོས་པ་བཞིན་དུ་བསྔོ་བའི་འདུན་པ་བྱ། དགེ་རྩ་གང་བྱས་ཀྱང་བསྔོ་བ་དང་སྨོན་ལམ་གྱིས་འདུན་པ་མ་བསྒྱུར་ན་དགེ་རྩའི་འབྲས་བུ་ལུང་མ་བསྟན་དུ་གྱུར་བའམ་གང་དུ་འགྱུར་མི་ཤེས་གསུངས་པའི་ཞལ་རྒྱུན་ཡང་ཡོད་པས་བསྔོ་བ་གནད་ཆེ། ད་ལྟར་གྱི་དགེ་བས་མཚོན་ནས་རང་གཞན་གྱི་དུས་གསུམ་དང་འབྲེལ་བར་བསགས་པའི་དགེ་བ་ཐམས་ཅད་སེམས་ཅན་ཐམས་ཅད་ཀྱི་དོན་དུ་འཇམ་དཔལ་གཞོན་ནུས་ཡོངས་བསྔོ་ལྟར་འཁོར་གསུམ་དམིགས་པ་མེད་པའི་ཤེས་རབ་ཀྱི་རྒྱས་འདེབས་པ་དང་བཅས། དུས་གསུམ་བསགས་པའི་དགེ་རྩ་ཀུན། བྱང་ཆུབ་ཆེན་པོའི་རྒྱུ་རུ་བསྔོ། ཞེས་བརྗོད། དེ་ལྟ་བུའི་བསྔོ་བ་འདི་ནི་དུས་དང་རྣམ་པ་ཐམས་ཅད་དུ་དགེ་རྩ་ཆེ་ཕྲ་གང་བྱས་ཀྱི་མཇུག་ཏུ་མ་བརྗེད་པར་ཉམས་སུ་ལེན་དགོས་ཏེ། དེ་ལྟར་མ་བསྔོས་ན་དགེ་བའི་རྩ་བ་གང་འགྲུབ་དེ་དགེ་འབྲས་ལན་ཅིག་སྨིན་ནས་ཟད་པར་འགྱུར་ལ། མཐར་ཐུག་བྱང་ཆུབ་ཐོབ་པའི་རྒྱུར་བསྔོས་ན། དགེ་འབྲས་ལན་བརྒྱར་མྱངས་ཀྱང་དགེ་རྩ་དེ་རྫོགས་པའི་སངས་རྒྱས་ཀྱི་གོ་འཕང་མ་ཐོབ་བར་མི་ཟད་ཅིང་གོང་ནས་གོང་དུ་འཕེལ་བར་འགྱུར་བ་ཡིན་ཏེ། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་གསུངས། དེ་བཞིན་དུ་རང་གིས་མཐར་ཐུག་ཉན་ཐོས་རང་རྒྱལ་རྫོགས་པའི་བྱང་ཆུབ་ལ་སོགས་པའི་གོ་འཕང་ཐོབ་པ་འདོད་པའམ། དེ་བཞིན་དུ་མངོན་མཐོ་ལྷ་མིའི་ལུས་རྟེན་ཐོབ་པར་འདོད་པའམ། གཞན་ཡང་ཚེ་རིང་བ་དང་གཟུགས་བཟང་བ་ལ་སོགས་པ་གནས་སྐབས་ཀྱི་འབྲས་བུ་རྣམས་གང་རུང་ལ་དམིགས་ནས་དགེ་རྩ་ཞིག་བསྒྲུབས་ཀྱང་། དེ་ཉིད་དེའི་ཆེད་དུ་བསྔོ་དགོས་ཏེ། འབྲི་གུང་སྐྱོབ་པ་རིན་པོ་ཆེའི་ཞལ་ནས། ཚོགས་གཉིས་ཡིད་བཞིན་ནོར་བུ་ལ། །སྨོན་ལམ་གྱི་བྱི་དོར་མ་བྱས་ན། །དགོས་འདོད་ཀྱི་འབྲས་བུ་མི་འབྱུང་བས། །མཇུག་བསྔོ་བ་འདི་ལ་ནན་ཏན་མཛོད། །ཅེས་གསུངས། བསྔོ་བ་དང་སྨོན་ལམ་གྱི་ཁྱད་པར་ནི། རྒྱུ་དགེ་རྩ་བསྔོ་རྒྱུ་ཡོད་ན་བསྔོ་བ་དང་། བསྔོ་རྒྱུ་མེད་ན་འབྲས་བུ་ལ་སྨོན་པ་སྨོན་ལམ་ཡིན་གསུངས། དེས་ན་རང་གི་དགེ་བ་བྱས་པ་རྫོགས་པའི་བྱང་ཆུབ་ཀྱི་རྒྱུར་འགྱུར་མི་འགྱུར་བསྔོ་བའི་དབང་ལས་འབྱུང་བ་ཡིན། འདུས་བྱས་ཀྱི་དགེ་བ་ཅི་ཙམ་རྒྱ་ཆེ་བ་བསགས་ཀྱང་བསྔོ་བས་ཁ་མ་བསྒྱུར་ན་ཐར་བའི་ལམ་དུ་མི་འགྲོ་སྟེ། དགེ་བཤེས་ཁམས་པ་ལུང་པའི་ཞལ་ནས། འདུས་བྱས་ཀྱི་དགེ་བ་ཐམས་ཅད་ལུང་མ་བསྟན་ཡིན་པས། སེམས་ཅན་གྱི་དོན་དུ་སྨོན་ལམ་རྒྱ་ཆེན་པོ་ཐོབ། ཅེས་གསུངས། དེ་བཞིན་དུ་རང་གི་ཕ་མ་དང་ཉེ་འབྲེལ་ལ་སོགས་པའི་ཆེད་དུ་དགེ་བ་བྱེད་པ་དང་། ཤི་བོ་ལ་སོགས་པའི་དོན་དུ་དགེ་བ་བྱེད་པ་ཡང་མ་བསྔོས་ན་མི་ཐོབ་ལ། བསྔོས་ན་ཇི་ལྟར་བསྔོས་པ་དེ་ལྟར་ཐོབ་སྟེ། སྔོན་ཡངས་པ་ཅན་གྱི་གྲོང་ཁྱེར་ན་ཡོད་པའི་སྐྱེ་བོ་རྣམས་ཀྱིས་བཅོམ་ལྡན་འདས་སང་ཉིན་ཀྱི་གདུགས་ཚོད་ལ་སྤྱན་དྲངས་ཏེ། སྤྱན་འདྲེན་པ་དག་སླར་སོང་བའི་རྗེས་སུ་ཡི་དྭགས་ལྔ་བརྒྱ་འོང་ནས། བཅོམ་ལྡན་འདས་ལ་སང་ཉིན་ཡངས་པ་ཅན་པ་དག་གིས་བཅོམ་ལྡན་འཁོར་བཅས་ལ་བསོད་སྙོམས་ཕུལ་བའི་དགེ་རྩ་དེ་ངེད་རྣམས་ལ་བསྔོ་བར་ཞུ་ཟེར། བཅོམ་ལྡན་འདས་ཀྱིས་མཁྱེན་བཞིན་དུ་ཁྱེད་རྣམས་སུ་ཡིན། ཡངས་པ་ཅན་པའི་དགེ་རྩ་དག་ཁྱོད་རྣམས་ལ་ཅིའི་ཕྱིར་བསྔོ་གསུངས་པས། ངེད་རྣམས་ཡངས་པའི་གྲོང་གི་སྐྱེ་བོ་འདི་དག་གི་ཕ་མ་རྣམས་ཡིན་ཏེ། སེར་སྣའི་ལས་ཀྱིས་ཡི་དྭགས་སུ་སྐྱེས་པ་ཡིན་ཟེར། འོ་ན་སང་ཉིན་བསྔོ་བ་བྱེད་པའི་དུས་སུ་ཁྱོད་རྣམས་ཀྱང་ཤོག་ཅིག་དང་བསྔོ་བར་བྱའོ་གསུངས་པས། ངེད་རྣམས་ལུས་ངན་འདི་ལྟ་བུ་བླངས་པས་ངོ་ཚ་ནས་འོང་མི་ཕོད་པར་འདུག་ཟེར། བཅོམ་ལྡན་འདས་ཀྱི་ཞལ་ནས། ཁྱེད་རྣམས་ལས་ངན་བསགས་པའི་དུས་སུ་ངོ་ཚ་དགོས་རྒྱུ་ཡིན་པ་ལ། དེ་དུས་ངོ་མ་ཚ་ནས་ད་ལུས་ངན་བླངས་ཚར་སྟེང་ངོ་ཚ་བས་ཅི་ཕན། མི་འོང་ན་བསྔོ་བའི་ཐབས་མེད་གསུངས། འོ་ན་འོང་ལགས་ཟེར་ནས་སོང་། སང་ཉིན་བསྔོ་བའི་དུས་ཡི་དྭགས་རྣམས་བསྔོ་བ་ཞུ་བ་ལ་འོང་བས། ཡངས་པ་ཅན་གྱི་སྐྱེ་བོ་རྣམས་སྐྲག་ནས་བྲོས་པ་ན། བཅོམ་ལྡན་འདས་ཀྱི་ཞལ་ནས་ཁྱོད་རྣམས་སྐྲག་མི་དགོས། འདི་དག་ཁྱོད་རང་ཚོའི་ཕ་མ་རྣམས་ཡི་དྭགས་སུ་སྐྱེས་པ་ཡིན་ཏེ། འདི་དག་གིས་འདི་ལྟར་ཟེར་བར་འདུག་པས། དགེ་རྩ་བསྔོའམ་མི་བསྔོ་གསུངས། འོ་ན་ཅིས་ཀྱང་བསྔོ་བར་ཞུས་པས། བཅོམ་ལྡན་འདས་ཀྱིས། སྦྱིན་པ་འདི་ཡི་དགེ་རྩ་གང་། །དེ་དག་ཡི་དྭགས་རྗེས་སུ་སོང་། །ཡི་དྭགས་ལུས་ངན་མེད་པ་དང་། །མཐོ་རིས་བདེ་བ་ཐོབ་པར་ཤོག །གསུངས་པས་ཡི་དྭགས་དེ་དག་ཚེ་འཕོས་ཏེ། སུམ་ཅུ་རྩ་གསུམ་གྱི་ལྷ་ཡུལ་དུ་སྐྱེས་པར་གསུངས། དེ་བཞིན་དུ་རྗེ་བཙུན་མི་ལའི་ཞལ་ནས་ཀྱང་། རི་ལ་སྒོམ་པའི་སྒོམ་ཆེན་དང་། །འཚོ་བ་སྦྱོར་བའི་ཡོན་བདག་གཉིས། །སངས་མཉམ་པོར་རྒྱ་བའི་རྟེན་འབྲེལ་ཡོད། །རྟེན་འབྲེལ་གྱི་སྙིང་པོ་བསྔོ་བ་ཡིན། །ཞེས་གསུངས། དེ་ལྟར་བསྔོ་བ་བྱེད་པ་དེ་ཡང་རྫོགས་པའི་བྱང་ཆུབ་ཀྱི་རྒྱུར་བསྔོ་བ་བྱེད་པ་ལ་ནི། འཁོར་གསུམ་དམིགས་པ་མེད་པའི་ཤེས་རབ་ཀྱི་རྩིས་ཟིན་དགོས་ཏེ། དེ་ལྟར་མ་ཡིན་པར་འཁོར་གསུམ་ལ་བདེན་ཞེན་གྱི་དྲི་མས་བསླད་ན་བསྔོ་བ་དུག་ཅན་པ་ཞེས་བྱ་སྟེ། སྡུད་པ་ལས། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་སོ། །དེ་ཡང་འཁོར་གསུམ་ནི། གང་བསྔོ་རྒྱུའི་དགེ་རྩ། སུའི་ཆེད་དུ་བསྔོ་བའི་གང་ཟག །ཅིའི་ཕྱིར་བསྔོ་བའི་དམིགས་ཡུལ་དང་གསུམ་ཡིན་ཏེ། དེ་གསུམ་ལ་བདེན་མེད་རྟོགས་པའི་ཤེས་རབ་ཀྱིས་ཟིན་པའི་བསྔོ་བ་དུག་མེད་དངོས་དེ་སོ་སོའི་སྐྱེ་བོའི་ས་འདིར་མི་འོང་བས་ན། སྔོན་གྱི་སངས་རྒྱས་དང་བྱང་ཆུབ་སེམས་དཔའ་དག་གིས་ཇི་ལྟར་བསྔོས་པ་དེ་ལྟར་བསྔོའོ་སྙམ་ནས་བསྔོས་ན། འཁོར་གསུམ་ཡོངས་དག་གི་བསྔོ་བའི་གོ་ཆོད་དེ། ལྟུང་བཤགས་ལས་ཀྱང་། ཇི་ལྟར་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་པ་དང་། ཇི་ལྟར་མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་འགྱུར་བ་དང་། ཇི་ལྟར་ད་ལྟར་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་མཛད་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ། །ཞེས་དང་། བཟང་སྤྱོད་ལས་ཀྱང་། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་ཀྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །ཞེས་གསུངས། དེ་བས་ན་དགེ་བ་རྫོགས་པའི་བྱང་ཆུབ་ཀྱི་རྒྱུར་འགྱུར་བའི་གནད་མ་འཆུག་པ་ནི་མཇུག་བསྔོ་བའི་རྒྱས་ཡོངས་སུ་ཐེབས་པ་འདི་ཁོ་ན་ལ་རག་ལས་པ་ཡིན་པས་ན་རྣམ་པ་ཀུན་ཏུ་འབད་པར་བྱའོ།།
༣༽ཕུར་ཚུགས་སུ་གསོལ་བ་གདབ་པ།
གསུམ་པ་བེ་ཕུར་སྲ་མོ་ཞིག་སྤང་ལ་གདབ་པ་བཞིན་སྙིང་ཁོང་རུས་པའི་སྟེང་ནས་ཕུར་ཚུགས་སུ་གསོལ་བ་འདེབས་ཤིང་རྒྱུ་རྡོ་རྗེ་བཞིའི་ངོ་བོར་དངོས་གྲུབ་སྒྲུབ་པ་ནི། དངོས་གྲུབ་སྒྲུབ་པ་ལ། དབྱེ་ན་སྒྲུབ་གཞི། བསྒྲུབ་བྱ། སྒྲུབ་ཐབས། སྒྲུབ་ཚུལ། གྲུབ་པའི་འབྲས་བུ་དང་ལྔ་ལས། སྒྲུབ་གཞི་གཞི་བདེ་གཤེགས་སྙིང་པོ་དོན་དམ་ལྷན་སྐྱེས་གཉུག་མའི་སྒོ་གསུམ། དབང་གིས་སྨིན་བྱ། ལྟ་བས་རྟོགས་བྱ། ལམ་གྱི་ཐོབ་བྱ་སྟེ་བསྒྲུབ་བྱ་དང་གྲུབ་པའི་འབྲས་བུ་གཞི་འབྲས་དབྱེར་མེད་དང་དོན་གཅིག་པས། རགས་པ་སྒོ་གསུམ་ཆོས་ཉིད་དང་བཅས་པ་རགས་པའི་རྡོ་རྗེ་བཞི། ཕྲ་བ་རྩ་རླུང་ཐིག་ལེ་བརྟེན་པ་ཆོས་ཉིད་དང་བཅས་པ། ཤིན་ཏུ་ཕྲ་བ་ཡེ་ཤེས་གསུམ་ལྡན་གྱི་རང་བཞིན་སྒྲུབ་གཞི་ཡིན། བསྒྲུབ་བྱ་རྡོ་རྗེ་བཞིའི་གོ་འཕང་དེ་ཡིན། དེ་ཡང་རྩ་དག་པ་སྐུ་རྡོ་རྗེའམ་སྤྲུལ་བའི་སྐུ་ཡིན། རླུང་དག་པ་གསུང་རྡོ་རྗེའམ་ལོངས་སྤྱོད་རྫོགས་པའི་སྐུ། སེམས་དག་པ་ཐུགས་རྡོ་རྗེའམ་ཆོས་ཀྱི་སྐུ་ཡིན། ཆོས་ཉིད་དག་པ་དབྱེར་མེད་རྡོ་རྗེའམ་ངོ་བོ་ཉིད་སྐུ་ཡིན། སྒྲུབ་ཐབས་ལ་རྩ་གསུམ་གྱི་སྒྲུབ་ཐབས་ཀྱི་ནང་ནས་འདིར་ཁྱད་པར་འཕགས་པ་བླ་མའི་སྒྲུབ་པ་ཡིན། སྒྲུབ་ཚུལ་ཡིད་མོས་གུས་དང་ངག་གསོལ་འདེབས་གཉིས་ཀྱིས་སྒྲུབ་པ་ཡིན། སྒྲུབ་པའི་འབྲས་བུ་གནས་སྐབས་རིག་འཛིན་བཞི་དང་མཐར་ཐུག་རྡོ་རྗེ་བཞིའི་གོ་འཕང་མངོན་དུ་འགྱུར་བ་རྣམས་ཡིན་ཡང་། སྐབས་འདིར་དེ་ལྟར་སྒྲུབ་ཅིང་གསོལ་བ་བཏབ་པའི་བྱིན་རླབས་ཀྱིས་དོན་བརྒྱུད་ཀྱི་དགོངས་པ་འཕོ་བ་སེམས་ལ་ཞུགས་ཏེ་གནས་ལུགས་རང་ངོ་མཐོང་བ་ཡིན་པས། དེ་ཡང་རྟོགས་པ་སྐྱེ་བའི་རྟགས་བྱམས་དང་སྙིང་རྗེ་བྱང་ཆུབ་ཀྱི་སེམས་དད་པ་དང་ངེས་འབྱུང་རྣམས་སྔར་མེད་རྒྱུད་ལ་སྐྱེ་བ་དང་། ཁྱད་པར་དུ་ཆོས་རབ་རྣམ་འབྱེད་ཀྱི་ཤེས་རབ་ཁྱད་པར་ཅན་རྒྱུད་ལ་སྐྱེ་བ་དེ་རྟགས་དངོས་ཡིན་ཡང་། རྟོགས་པ་སྐྱེས་རྟགས་ཡོན་ཏན་སྔོན་ལ་འོང་བ་དང་། དང་པོ་རྟོགས་པ་སྐྱེས་ནས་ཡོན་ཏན་ཕྱི་ནས་འབྱུང་བ་གཉིས་ཡོད་པས། ཉམས་དང་རྟོགས་པ་ཤན་ཕྱེས་ནས། ཆོས་ཉིད་ཀྱི་རྟོགས་པ་སྐྱེ་བ་ནི་སྒྲུབ་པའི་འབྲས་བུ་ཡིན་ཏེ། ཀུན་མཁྱེན་ཆེན་པོས། ཉམས་དང་རྟོགས་པའི་དབྱེ་བ་མ་ཤེས་ན། །གོམས་པའི་ཉམས་ལ་རྟོགས་པར་འཛིན་ནས་འཁྲུལ། །རྟོགས་ན་དུས་ཀུན་བཟང་ངན་འཕོ་འགྱུར་མེད། །དེ་ཉིད་གོམས་པས་ཡོན་ཏན་ཉམས་རྣམས་འབྱུང་། །ཞེས་གསུངས། འདི་ལྟར་དཔལ་མགོན་བླ་མ་དམ་པ་ནི། དཀྱིལ་འཁོར་གང་དུ་ཧེ་རུ་ཀའི་ཞེས་ཧེ་དབྱིངས་དང་ཀ་ཡེ་ཤེས་དང་ཟུང་དུ་འཇུག་པ་ཡིན་པས་ཧེ་རུ་ཀའི་ངོ་བོར་དབང་རྫོགས། བླ་མ་དམ་པ་དེའི་ཞལ་མཐོང་བ་དང་གསུང་ཐོས་པ་དང་ཡིད་ལ་དྲན་པ་དང་སྐུ་ལ་རེག་པ་ཙམ་གྱིས་ཐར་པའི་ས་བོན་འདེབས་ཤིང་། དུས་གསུམ་སངས་རྒྱས་ཐམས་ཅད་དང་ཕྲིན་ལས་ཀྱི་བྱེད་པ་གཅིག་པས་དཀོན་མཆོག་བཞི་པར་བྱོན། རང་ངོར་ཚེ་གཅིག་ལུས་གཅིག་ལ་སྨིན་གྲོལ་ཟབ་མོའི་ལམ་ལ་བཀོད་པ་དང་ཐུགས་རྗེ་བྱིན་རླབས་འཇུག་པ་ཁོ་ནས་རྡོ་རྗེ་འཆང་གི་སར་བཙན་ཐབས་སུ་བཀོད་པས་སངས་རྒྱས་ལས་ཀྱང་བཀའ་དྲིན་མཆོག་ཏུ་ལྷག་ཅིང་། ཡོན་ཏན་གྱི་སྒོ་ནས་གཞལ་ན་གསང་བ་བསམ་གྱིས་མི་ཁྱབ་པའི་ཡེ་ཤེས་དགོངས་པ་ནམ་མཁའ་ལྟར་རྒྱ་ཆེ། མཁྱེན་བརྩེ་རྒྱ་མཚོ་ལྟར་ཚད་མེད། ཐུགས་རྗེ་ཆུ་ཀླུང་ལྟར་ཤུགས་དྲགརང་བཞིན་རི་རྒྱལ་ལྟར་ཐུགས་བརྟན། འགྲོ་བར་ཕ་མ་ལྟར་ཐུགས་སྙོམས་ཤིང་། ཡོན་ཏན་རེ་རེའི་ཆ་ཡང་དཔག་ཏུ་མི་ནུས་ལ། གསོལ་བ་བཏབ་པ་ཙམ་གྱིས་ཅི་འདོད་ཀྱི་དངོས་གྲུབ་ཐམས་ཅད་འབད་མེད་དུ་འབྱུང་བ་ཡིད་བཞིན་གྱི་ནོར་བུ་རིན་པོ་ཆེ་ཁྱེད་ལ་བརྟེན། ཁྱེད་ལ་རེ། ཁྱེད་གཅིག་བསྒྲུབ་སྙམ་པའི་མོས་གུས་མཆི་མ་འཁྲུགས་པ་དང་བཅས། དང་པོ་དངོས་གྲུབ་སྒྲུབ་པའི་དུས་སུ། རྗེ་བཙུན་གུ་རུ་རིན་པོ་ཆེ། །ཁྱེད་ནི་སངས་རྒྱས་ཐམས་ཅད་ཀྱི། །སོགས་ནས། རྗེ་བཙུན་ཆེན་པོ་པད་འབྱུང་མཁྱེན། །བར་སོགས་ནས། གསོལ་འདེབས་རྒྱུད་བསྐུལ་གྱི་འཛབ་བཛྲ་གུ་རུ་ཁོ་ན་ལ་འབད། སིདྡྷི་བརྒྱ་རེ་སོང་མཚམས། རྗེ་བཙུན་གུ་རུ་རིན་པོ་ཆེ། །ལ་སོགས་པ་སྔར་ལྟར་བྱ། དེ་ལྟར་བསྙེན་པ་ཅི་ཙམ་བཟླས་པའི་ཕྱེད་ཙམ་སོང་ནས། དངོས་གྲུབ་སྐུལ་བའི་དུས་སུ། སིདྡྷི་ཕྲེང་སྐོར་རེའི་མཚམས་སུ། བདག་ལ་རེ་ས་གཞན་ན་མེད། །སོགས་ནས། སྒྲུབ་གཉིས་སྦྱོངས་ཤིག་ནུས་མཐུ་ཅན། །ཡན་ཆད་ཚར་རེ་བྱ། འདི་དག་གི་སྐབས་སུ་སྣང་གྲགས་རིག་གསུམ་ལྷ་སྔགས་ཆོས་སྐུའི་རང་བཞིན་དུ་གསལ་ཏེ། ཕྱི་སྣོད་ཀྱི་འཇིག་རྟེན་དཔལ་རི་པདྨ་འོད་ཀྱི་ཞིང་ཁམས། ནང་བཅུད་ཀྱི་སེམས་ཅན་ཐམས་ཅད་ཨོ་རྒྱན་དཔའ་བོ་མཁའ་འགྲོའི་ཚོམ་བུ། སྒྲ་གྲགས་པ་ཐམས་ཅད་གྲགས་སྟོང་སྔགས་ཀྱི་རང་སྒྲ། གསང་བ་སེམས་ཀྱི་རྟོག་ཚོགས་ཐམས་ཅད་རང་ཤར་རང་གྲོལ་རང་ཡལ་རྗེས་མེད་དུ་འབྱམས་ཀླས་པའི་ངང་ནས་རྩ་བརྒྱུད་བླ་མ་ཐམས་ཅད་ཀྱི་ཡོན་ཏན་དང་བཀའ་དྲིན་དྲན་བཞིན་དུ་ཨེ་མ་ཧོ་རྒྱ་ཆད་ཕྱོགས་ལྷུང་བྲལ་བའི་ཞིང་ཁམས་ནས། །སོགས་ནས། རྟེན་འབྲེལ་མངོན་གྱུར་སངས་རྒྱས་ཐོབ་པར་ཤོག །ཅེས་སྨོན་ལམ་དང་བཅས་པ་མོས་གུས་གདུང་ཤུགས་དྲག་པོའི་གསོལ་བ་བཏབ་པས་འཁོར་རྣམས་ཐམས་ཅད་རྩ་བའི་བླ་མ་ལ་ཐིམ། བླ་མ་སྐྱབས་གནས་ཀུན་འདུས་ཀྱི་ངོ་བོ་སྐུ་གཟི་བྱིན་འོད་དུ་འབར་ཞིང་ཡེ་ཤེས་ཀྱི་དབང་མཆོག་བསྐུར་བའི་བདག་ཉིད་ཆེན་པོར་བཞུགས་པར་གསལ་འདེབས་དགོས་པ་ཡིན་ནོ། །དེ་ནས་དངོས་གྲུབ་ཞུ་བའི་དུས་སུ་དབང་བཞི་ལེན་པའི་དམིགས་པ་བྱ་བ་ནི། གུ་རུའི་སྨིན་མཚམས་ནས་སྐུའི་ངོ་བོ་ཡེ་ཤེས་ཀྱི་རང་བཞིན་ཨོཾ་ཡིག་དཀར་པོ་ཆུ་ཤེལ་ལྟ་བུ་འཚེར་བ་ལས་འོད་ཟེར་དཀར་པོ་འཕྲོས། རང་གི་སྤྱི་བོ་ནས་ཞུགས། ལུས་ཀྱི་ལས་སྲོག་གཅོད་མ་བྱིན་ལེན་པ་འདོད་པས་ལོག་པར་གཡེམས་པ་གསུམ་དང་། ལུས་སྐྱེད་བྱེད་རྩ་ཡིན་པས་རྩའི་སྒྲིབ་པ་དག སྐུ་རྡོ་རྗེའི་བྱིན་རླབས་ཞུགས་པ་སོགས་ནས། དབང་དོན་སྣང་སྟོང་གི་ཡེ་ཤེས་རྒྱུད་ལ་སྐྱེས། སྣང་གྲགས་རིག་གསུམ་ལྷ་སྔགས་ཡེ་ཤེས་ཀྱི་འཁོར་ལོ་གྲོལ། ལམ་བསྐྱེད་རིམ་བསྒོམ་པ་ལ་དབང་། འབྲས་བུ་གནས་སྐབས་རྣམ་སྨིན་རིག་འཛིན་དང་མཐར་ཐུག་སྤྲུལ་སྐུའི་གོ་འཕང་ཐོབ་པའི་སྐལ་བ་རྒྱུད་ལ་བཞག་པར་བསམ། ཡང་མགྲིན་པ་མགུལ་གྱི་བུམ་པ་ནས་གསུང་གི་ངོ་བོ་ཡེ་ཤེས་ཀྱི་ཨཿ་ཡིག་དམར་པོ་པདྨ་རཱ་ག་ལྟར་འབར་བ་ལས་འོད་ཟེར་དམར་པོ་འཕྲོས། རང་གི་མགྲིན་པ་ནས་ཞུགས། ངག་གི་ལས་རྫུན་ཕྲ་མ་ཚིག་རྩུབ་ངག་བཀྱལ་བཞི་དང་། ངག་འཕེལ་བྱེད་རླུང་ཡིན་པས་རླུང་གི་སྒྲིབ་པ་དག གསུང་རྡོ་རྗེའི་བྱིན་རླབས་ཞུགས། སོགས་ནས། དབང་དོན་གསལ་སྟོང་གི་ཡེ་ཤེས་རྒྱུད་ལ་སྐྱེས། རླུང་འབྱུང་འཇུག་གནས་གསུམ་སྔགས་སུ་གྲོལ། ལོངས་སྤྱོད་རྫོགས་སྐུའི་གོ་འཕང་གི་སྐལ་བ་རྒྱུད་ལ་བཞག་པར་བསམ། ཡང་བླ་མའི་ཐུགས་ཀ་དཔལ་གྱི་བེའུའི་ཐུགས་ཡེ་ཤེས་ཀྱི་ངོ་བོ་ཧཱུཾ་ཡིག་མཐིང་ག་ནམ་མཁའི་མདོག་ཅན་ལས་འོད་ཟེར་འཕྲོས། རང་གི་སྙིང་ག་ནས་ཞུགས། ཡིད་ཀྱི་ལས་བརྣབ་སེམས་གནོད་སེམས་ལོག་ལྟ་གསུམ་དང་། ཡིད་འཕེལ་བྱེད་ཐིག་ལེ་ཡིན་པས་ཐིག་ལེའི་སྒྲིབ་པ་དག ཐུགས་རྡོ་རྗེའི་བྱིན་རླབས་ཞུགས་སོགས་ནས། དབང་དོན་གྱི་ཡེ་ཤེས་བདེ་སྟོང་གི་ཡེ་ཤེས་རྒྱུད་ལ་སྐྱེས། རྟོག་ཚོགས་བདེ་སྟོང་གི་ངང་དུ་གྲོལ་ཏེ། ཆོས་སྐུའི་གོ་འཕང་གི་སྐལ་རྒྱུད་ལ་བཞག་པར་བསམ། སླར་ཡང་སྐུ་གསུང་ཐུགས་ཀྱི་ངོ་བོ་ཡེ་ཤེས་གསུམ་གྱི་རང་བཞིན་དུ་གསལ་བ། ཐུགས་ཀའི་ཧཱུྃ་ཡིག་གཉིས་པ་ཞིག་སྐར་མདའ་འཕངས་པ་བཞིན་དུ་ཆད། རང་སེམས་དང་ཐ་དད་མེད་པར་འདྲེས། སྒོ་གསུམ་གྱི་རྟེན་གཞི་ཀུན་གཞིའི་ལས་དང་ཤེས་བྱའི་སྒྲིབ་པ་དག ཡེ་ཤེས་རྡོ་རྗེ་བྱིན་རླབས་ཞུགས་སོགས་ནས། དབང་དོན་རང་བྱུང་གི་ཡེ་ཤེས་རྒྱུད་ལ་སྐྱེས། སྒོ་གསུམ་ཐ་དད་དུ་འཛིན་པའི་རྟོག་པ་ཆོས་ཉིད་ཀྱི་ཀློང་དུ་གྲོལ་ཏེ། མཐར་ཐུག་གི་འབྲས་བུ་ངོ་བོ་ཉིད་སྐུའི་གོ་འཕང་གི་སྐལ་བ་རྒྱུད་ལ་བཞག་གོ། །ཞེས་བརྗོད་ཅིང་བསམས་ཏེ། བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་མཐར་ཐུགས་ཡིད་དབྱེར་མེད་དུ་བསྲེས་ནས་རིག་སྟོང་རྗེན་པའི་ངང་ལ་མཉམ་པར་བཞག སྤྱིར་དབང་ལ་གཞི་ལམ་འབྲས་གསུམ་གྱི་དབང་གི་དབྱེ་བ་ཡོད། གཞི་དབང་ནི་སེམས་ཀྱི་ཆོས་ཉིད་བདེ་གཤེགས་སྙིང་པོ་དེ་རྟོགས་ན་མྱ་ངན་ལས་འདས་པ་ལ་དབང་བྱེད། མ་རྟོགས་ན་ཁམས་གསུམ་འཁོར་བར་དབང་བྱེད་པའི་སྒོ་ནས་གཞི་དབང་ཡིན། ལམ་དབང་གི་གཞི་དབང་བསྐུར་བའི་སྨིན་བྱ་དངོས་དེ་ཡིན། ལམ་དབང་ལ་གསུམ། ལམ་དབང་གི་གཞི་དབང་ནི་མཚན་ལྡན་བླ་མས་རྒྱུད་སྡེ་དང་སྒྲུབ་སྡེའི་དཀྱིལ་འཁོར་གང་རུང་ཞལ་ཕྱེས་ནས་བླ་མའི་དབང་སྐུར་བའི་སྐབས་སུ་སློབ་མས་རབ་དབང་དོན་གྱི་ལྟ་བ་རྟོགས། འབྲིང་བདེ་གསལ་མི་རྟོག་གསུམ་གྱི་ཉམས་སྐྱེས། ཐ་ན་ཡང་སྒོ་གསུམ་རྡོ་རྗེ་གསུམ་གྱི་ངེས་ཤེས་ཀྱི་བློ་གཞན་གྱིས་མི་འཕྲོག་པ་སྐྱེ་དགོས་པས། དེ་འདྲའི་དབང་ཞིག་ཐོབ་ན་དབང་གི་གོ་ཆོད་ལ། དེ་མིན་ཐོབ་ཐོབ་ཞུས་ཞུས་མང་པོ་སོང་ཡང་དབང་གི་གོ་མི་ཆོད། ལམ་དབང་གི་ལམ་དབང་ནི། དེ་ལྟ་བུའི་དབང་དེ་ཐོབ་ནས་བཟུང་གཞན་ལས་དབང་ཞུས་ཀྱང་རུང་། རང་གིས་བདག་འཇུག་སོགས་བླངས་ཀྱང་རུང་། ཐམས་ཅད་སྔགས་ཀྱི་གསོ་སྦྱོང་དང་ལམ་དབང་ཡིན། ལམ་དབང་གི་འབྲས་དབང་འོད་ཟེར་ཆེན་པོའི་དབང་ངམ་སྔགས་ཀྱི་ཟབ་གསལ་གཉིས་སུ་མེད་པའི་དབང་གསུམ་བསྐུར་ནས་དབང་དོན་གྱི་ཡེ་ཤེས་དེས་བག་ཆགས་ཀྱི་སྒྲིབ་པའམ་སྣང་གསུམ་འཕོ་བའི་བག་ཆགས་ཐམས་ཅད་བཅོམ་བྱེད་ཀྱི་དབང་དེ་ཡིན། གཞི་ལམ་འབྲས་གསུམ་གྱི་འབྲས་དབང་ནི། ལམ་གྱི་འབྲས་དབང་དེའི་སྐད་ཅིག་ཕྱི་མར་རྣམ་པ་ཐམས་ཅད་མཁྱེན་པའི་ཡེ་ཤེས་ལ་མངའ་བརྙེས་ནས་ཤེས་བྱ་འཁོར་འདས་ཀྱི་བསྡུས་པའི་ཆོས་ཐམས་ཅད་ལ་དབང་བསྒྱུར་ནུས་པ་ཟུང་འཇུག་རྡོ་རྗེ་འཆང་གི་གོ་འཕང་བརྙེས་པ་དེ་འབྲས་དབང་ཡིན། སྐབས་འདིར་བཤད་པའི་ལམ་དབང་འདི་ལམ་དབང་གི་གཞི་དབང་ཐོབ་ནས། ལམ་དབང་གི་ལམ་དབང་རང་ཉིད་ཀྱིས་ལེན་པ་དེ་ཡིན། དེ་ལྟར་ལམ་དབང་བླངས་ནས་རྫོགས་རིམ་ཐུན་མོང་གི་ཕྲ་བའི་རྣལ་འབྱོར་དང་མཐུན་པར་བྱས་ཏེ། ཐུན་བསྡུ་བའི་ཚེ། འདུན་པའི་འཕོ་བ་དང་གནད་གཅིག་པས་ནམ་ཞིག་ཚེ་ཡི་དུས་བྱས་ཚེ། །སོགས་ནས། བསམ་དོན་འགྲུབ་པར་མཛད་དུ་གསོལ། །ཞེས་བརྗོད་པ་དང་མཉམ་དུ་བླ་མ་དེ་ཉིད་སྐྱབས་གསུམ་ཀུན་འདུས་ཀྱི་ངོ་བོར་ངེས་ཤེས་སྐྱེས་ནས་སྐྱོན་རྟོག་གི་བློ་ངན་ཐམས་ཅད་སྤངས་ཏེ་ཡོན་ཏན་རྗེས་སུ་དྲན་པའི་སྒོ་ནས་ཚད་མེད་པའི་དད་པ་དང་། མོས་གུས་དུང་དུང་བ་ཞིག་བྱས་པས། བླ་མ་གུ་རུ་རིན་པོ་ཆེའི་རྣམ་པ་ཡོད་པ་དེ་ཉིད་ཀྱིས་བདག་ཉིད་ལ་ཐུགས་བརྩེ་བ་ཆེན་པོས་ལྷག་པར་དགོངས་ཏེ་ཞལ་འཛུམ་པ་དང་སྤྱན་རྗེས་ཆགས་སུ་གཡོ་བའི་ངང་ནས་ཐུགས་ཀ་ནས་འོད་ཟེར་དམར་པོ་དྲོད་ཚ་ལམ་གྱིས་འབར་བ་ཞིག་ཝལ་གྱིས་འཐོན། རང་རྡོ་རྗེ་རྣལ་འབྱོར་མར་གསལ་པའི་སྙིང་གར་རེག་པའི་མོད་ལ་རང་ཉིད་འོད་ཀྱི་གོང་བུ་སྲན་མ་ཙམ་དུ་གྱུར། དེ་ཉིད་མཐར་མེ་སྟག་ཡར་བ་བཞིན་དུ་ཐག་སྒྲ་དང་བཅས་གུ་རུ་རིན་པོ་ཆེའི་ཐུགས་ཀར་འདྲེས་པ་མི་དམིགས་སྤྲོས་བྲལ་ཆོས་སྐུའི་ངང་ལ་མཉམ་པར་བཞག རྗེས་སུ་སྔར་བཞིན་དང་བའི་མཚོ་ལས་ཉ་ལྡང་བ་ལྟར་གཞི་དང་ལུས་དང་ཞིང་ཁམས་ཀྱི་བཀོད་པ་སྣང་སྲིད་ཐམས་ཅད་བླ་མའི་རྣམ་རོལ་དུ་གསལ་ཞིང་། དགེ་བ་འདི་ཡིས་མྱུར་དུ་བདག །དཔལ་མགོན་བླ་མ་འགྲུབ་གྱུར་ནས། །སོགས་བསྔོ་བ་དང་། ཟངས་མདོག་དཔལ་རིའི་སྨོན་ལམ་འདོན་པར་བྱའོ། །རྗེས་ཐོབ་ཟ་ཉལ་འགྲོ་འདུག་ལ་སོགས་པ་དག་པའི་སྣང་བ་འབའ་ཞིག་ལམ་དུ་ཁྱེར་དགོས། དེས་ན་སྐྱིད་རྒྱུ་འབྲས་གཉིས་གང་བྱུང་ན་བླ་མའི་བཀའ་དྲིན་དྲན་ནས་གསོལ་བ་འདེབས། སྡུག་རྒྱུ་འབྲས་གཉིས་པོ་གང་བྱུང་ན་བླ་མའི་མོས་གུས་ཀྱིས་ལམ་དུ་ཁྱེར། དད་དང་མོས་གུས་སོགས་མ་འོང་ན་བླ་མ་ལ་གསོལ་བ་འདེབས། བྱིང་རྒོད་བྱུང་ན་བླ་མ་ལ་གསོལ་བ་འདེབས། ལྟ་བར་ཐེ་ཚོམ་བྱུང་ན་བླ་མ་ལ་གསོལ་བ་འདེབས། སྒོམ་པ་ལ་བཟང་ངན་བྱུང་ན་བླ་མ་ལ་གསོལ་བ་འདེབས། སྤྱོད་པ་ལ་བླང་དོར་བྱུང་ན་ཡང་བླ་མ་ལ་གསོལ་བ་འདེབས། མདོར་ན་སྐྱིད་སྡུག་སོགས་གང་བྱུང་ཡང་སྐྱིད་ཁྱག་སྡུག་ཁྱག་གི་སྒོ་ནས་ཐམས་ཅད་བླ་མའི་རང་བཞིན་དུ་བལྟས་ནས་མོས་གུས་དང་གསོལ་འདེབས་བྱ་དགོས་སོ། །དེ་ལྟ་བུའི་བླ་མའི་རྣལ་འབྱོར་དེ་ཡང་འགྲོ་བའི་ཚེ་བླ་མ་ཕྲག་པ་གཡས་ཀྱི་ནམ་མཁར་བསྒོམ། དེ་བསྐོར་བ་བྱེད་པའི་རྟེན་ཡིན། འདུག་པའི་ཚེ་སྤྱི་བོའི་གཙུག་གི་ནམ་མཁའ་ལ་བསྒོམ། དེ་གསོལ་བ་འདེབས་པའི་རྟེན་ཡིན། ཟ་འཐུང་བྱེད་པའི་ཚེ་མགྲིན་པའི་དབུས་སུ་བསྒོམ། དེ་ཅི་ཟ་ཅི་འཐུང་གི་ཕུད་མཆོད་ས་ཡིན། ཉལ་བའི་ཚེ་སྙིང་པདྨ་འདབ་བཞིའི་རྣམ་པ་གནས་པའི་སྟེང་གི་དབུས་སུ་བྱོན་ནས་བཞུགས་ཡོད་པ་བསྒོམ། དེའི་འོད་ཟེར་གྱིས་རང་གི་ལུས་ཀྱི་ནང་ཐམས་ཅད་གང་བའི་གསལ་ལམ་མེ་བ་ལ་སེམས་གཏད་དེ། བླ་མའི་ཐུགས་དང་རང་སེམས་དབྱེར་མེད་བསྲེས་པའི་ངང་ལ་ཉམས་ལེན་གྱི་རྒྱུན་བསྐྱངས་ཏེ་གཉིད་ལོག་པའམ། ཡང་ན་འོད་ཟེར་དེས་ཕྱི་སྣོད་ཀྱི་འཇིག་རྟེན་གཞལ་ཡས་ཁང་དུ་གསལ་བ་ལ་ཕོག་པས་ལན་ཚྭ་ཆུར་བཅུག་པ་བཞིན་འོད་དུ་ཞུ། ནང་བཅུད་ཀྱི་སེམས་ཅན་ལྷར་གསལ་བ་ལ་ཐིམ། དེ་རང་ལ་ཐིམ། རང་ཡང་སྙིང་གའི་བླ་མ་ལ་ཐིམ། དེ་ཡང་མི་དམིགས་པ་འོད་གསལ་དུ་སྦྱངས་པའི་སྣང་བ་ནང་གསལ་རིག་སྟོང་རྗེན་པ་ཐིམ་ལ་མ་རྨུགས་པའི་ངང་དུ་རྣམ་རྟོག་གཞན་གྱིས་བར་མ་ཆོད་པར་ཁམས་གསོ། གལ་ཏེ་སད་ན་འཕྲོ་རྒོད་རྒྱ་འབྱམས་རྨི་ལམ་སོགས་བསམ་གཞིག་གི་འཕྲོ་བཅད་དེ་འོད་གསལ་གྱི་ངང་མདངས་ཁྱབ་གདལ་དུ་བསྐྱངས་པས་གཉིད་ཀྱི་འོད་གསལ་དང་རྨི་ལམ་ཟིན་པའི་དགོས་པ་ཡོད། དེ་གཉིད་ཀྱི་འོད་གསལ་ཤེས་བྱ་བུམ་འཇུག་གི་གནད་བསྡུས་པ་ཡིན། གཞན་ཡང་ནམ་འཆི་བའི་དུས་ལ་བབ་པའི་ཚེ། རྫོགས་རིམ་བསྡུ་བའི་དམིགས་པ་དང་བཅས་དབྱིངས་རིག་བསྲེ་ཞིང་མཉམ་པར་བཞག་པ་ནི་འཕོ་བ་ཐམས་ཅད་ཀྱི་རྒྱལ་པོ་ཡིན་ཅིང་། གལ་ཏེ་འཕོ་བ་མ་ཐེབས་ན་བར་དོར་ལམ་འཁྱེར་སྒོ་གསུམ་གྱི་རྣལ་འབྱོར་དྲན་པས་གྲོལ་བར་འགྱུར་བའི་གདམས་ངག་ཟབ་མོ་ཡིན། མདོར་ན་དུས་དང་རྣམ་པ་ཐམས་ཅད་དུ་རང་ཉིད་གང་དུ་འདུག་པའི་གནས་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་དངོས་ཡིན་སྙམ་པའི་དྲན་འཛིན་དང་། བཅུད་སེམས་ཅན་གྱི་སྣང་བ་ཐམས་ཅད་བླ་མའི་སྐུར་སྦྱངས་ཏེ་མོས་གུས་བྱ། ན་ཚ་དང་གདོན་བགེགས་མི་འདོད་པ་ལ་སོགས་པ་བྱུང་ན་བདག་གི་ལས་ངན་འཛད་པའི་ཐབས་སུ་བླ་མའི་ཐུགས་རྗེས་གནང་པ་ཡིན་སྙམ་དུ་དགའ་བ་བསྒོམ་ཞིང་གཞན་ཡང་ན་ཚ་དང་གདོན་བགེགས་ལ་སོགས་མི་འདོད་པ་ཅི་བྱུང་བ་ཐམས་ཅད་བླ་མའི་ཐུགས་ཡེ་ཤེས་ཀྱི་རྣམ་རོལ་དུ་ཤར་བའི་དག་སྣང་གིས་འདྲེ་དང་རྒྱལ་འགོང་ལ་སོགས་པ་བླ་མར་བསྒོམ་སྟེ་གསོལ་བ་བཏབ་ན། ཁམས་འདུས་དད་པས་གསོ། །རྐྱེན་ངན་ལམ་དུ་འཁྱེར། །གསུངས་པ་བཞིན་གནོད་པ་ལས་གྲོལ་བའི་དགོས་པ་ཡོད་པས་སྤང་བློ་མི་བྱ། སྐྱིད་ལ་ཟོས་བདེ་དགེ་སྦྱོར་འཕེལ་བ་ལ་སོགས་བྱུང་ན། དེ་དག་ཀྱང་བླ་མའི་ཐུགས་རྗེར་ཤེས་ཏེ། ང་རྒྱལ་དང་དགའ་བྲོད་མེད་པར་བྱ། ཏིང་ངེ་འཛིན་བསྒོམ་པས་སྐྱོ་དུབ་དང་བྱིང་རྒོད་ལ་སོགས་པ་བྱུང་ན། བླ་མའི་ཐུགས་དང་རང་གི་རིག་པ་དབྱེར་མེད་དུ་བསྲེས་ཏེ་གནས་ལུགས་ལྟ་བའི་རང་མདངས་བསྐྱངས་ཤིང་སྣང་སྲིད་བླ་མའི་དཀྱིལ་འཁོར། སྒྲ་གྲགས་གསུང་གི་རང་བཞིན། དྲན་རྟོག་ཐུགས་ཀྱི་རོལ་བ་སྟེ་ཁྱེར་སོ་གསུམ་གྱི་རྣལ་འབྱོར་ལ་བསླབ་དགོས། གསོལ་འདེབས་བསྙེན་པ་བཛྲ་གུ་རུ་ལ་ཆིག་དྲིལ་བྱ། དེ་ལྟར་བྱས་ན་སྣང་བ་ཐམས་ཅད་ལྷ་དང་བླ་མར་འཆར་ཞིང་། སྤྱོད་ལམ་ཐམས་ཅད་དགེ་བར་འགྱུར་བ་ཡིན་ཏེ། རྗེ་མི་ལའི་ཞལ་ནས། ང་འགྲོ་ན་སྣང་བ་ལམ་དུ་འཁྱེར། །ཚོགས་དྲུག་རང་གྲོལ་ཀྱི་འགྲོ་ལུགས་ཡིན། །སྡོད་ན་མ་བཅོས་རྣལ་མར་སྡོད། །སྙིང་པོ་དོན་གྱི་སྡོད་ལུགས་ཡིན། །ཟ་ན་སྟོང་ཉིད་ཀྱི་ཟས་ལ་ཟ། །གཟུང་འཛིན་སྤངས་པའི་ཟ་ལུགས་ཡིན། །འཐུང་ན་དྲན་ཤེས་ཀྱི་ཆབ་ལ་འཐུང་། །རྒྱུན་ཆད་མེད་པའི་འཐུང་ལུགས་ཡིན། །ཞེས་གསུངས། དེར་མ་ཟད་གསང་སྔགས་རྡོ་རྗེ་ཐེག་པའི་ལམ་ལ་ཞུགས་ནས། དམ་ཚིག་ཉམས་ཆག་བྱུང་ན་གསོ་བ་དང་། བསྐྱེད་རྫོགས་རྫོགས་ཆེན་ལ་སོགས་པའི་ལམ་ཐམས་ཅད་བསྒོམ་བ་ལ་དབང་བ་དང་། གེགས་དང་གོལ་ས་མི་འབྱུང་བ་དང་། ཡོན་ཏན་གྱི་ཚོགས་གོང་ནས་གོང་དུ་འཕེལ་པ་ལ་སོགས་པ་ཐམས་ཅད་ཀྱང་རྩ་བ་སྨིན་བྱེད་ཀྱི་དབང་ལ་ཐུག་པ་ཡིན་ཏེ། ཇི་སྐད་དུ། གསང་སྔགས་དབང་ལ་མ་བསྟེན་འགྲུབ་པར་མི་འགྱུར་ཏེ། དཔེར་ན་མཉན་པ་ལག་སྐྱ་མེད་པ་བཞིན། ཞེས་དང་། དབང་མ་བསྐུར་ལ་དངོས་གྲུབ་མེད། །བྱེ་མ་བརྩིར་ལ་མར་མི་འབྱུང་། །ཞེས་གསུངས། དེ་ཡང་དང་པོ་མཚན་ཉིད་ལྡན་པའི་རྡོ་རྗེ་སློབ་དཔོན་གྱིས། དཀྱིལ་འཁོར་དུ་བཅུག་ནས་དབང་བསྐུར་བ་དེ་ལམ་གྱི་གཞིའི་དབང་ཡིན་ལ། བླ་མའི་རྣལ་འབྱོར་ལ་བརྟེན་ནས་གཞན་རྐྱེན་ལ་ལྟོས་པ་མེད་པར་རང་ཉིད་ཀྱིས་དབང་བཞི་ལེན་པ་ནི་ལམ་གྱི་ལམ་དབང་ཡིན། ལམ་གྱི་འབྲས་དབང་མཐར་ཐུག་འབྲས་དུས་འོད་ཟེར་ཆེན་པོའི་དབང་ངམ་ཟབ་གསལ་གཉིས་མེད་ཀྱི་དབང་བསྐུར་ཐོབ་ནས། མངོན་པར་རྫོགས་པ་སངས་རྒྱས་པ་འབྲས་བུའི་དབང་ངོ་། །བླ་མའི་རྣལ་འབྱོར་བསྒོམ་པ་དེ་ལ་ཡང་བསྐྱེད་རིམ་དག་རྫོགས་སྨིན་གསུམ་གྱི་ཟབ་གནད་བསམ་གྱིས་མི་ཁྱབ་པ་དང་འཁོར་བ་དང་རྣམ་པར་མཐུན་པས་སྲིད་པ་སྦྱོང་ཞིང་དག མྱང་འདས་དང་བཞུགས་ཚུལ་མཐུན་པས་འབྲས་བུ་གཞི་ལ་རྫོགས། གཉིས་ཀ་རྫོགས་རིམ་གྱི་སྨིན་བྱེད་དུ་འགྲོ་བས་སྨིན་པ་སྟེ་དག་རྫོགས་སྨིན་གསུམ་དང་ལྡན་པ་ཡིན་པས་ན། དངོས་གཞི་ཉམས་སུ་ལེན་པའི་ཚེ་ཡང་སྤྱིར་སྔོན་འགྲོའི་ཆོས་ཐམས་ཅད་འདོར་དུ་མི་རུང་མོད་ཀྱང་། ཁྱད་པར་བསྐྱེད་རྫོགས་སོགས་སྒོམ་པའི་ཚེ་བླ་མའི་རྣལ་འབྱོར་ལ་བརྟེན་ནས་ལམ་དབང་བླང་བ་འདི་ཐུན་རེའི་མགོར་ཡང་མ་ཆག་པར་བྱ་བ་ནི་གནད་དམ་པའོ། །དེ་ལྟར་བསྒོམ་པས་བྱིན་རླབས་རང་རྒྱུད་ལ་ཞུགས་པའི་རྟགས་རབ་སྣང་སྲིད་ཆོས་སྐུར་འཆར། འབྲིང་སྣང་བ་བླ་མར་ཤར། ཐ་མ་འཁོར་བ་ལས་བློ་ལྡོག་ནས་བླ་མ་ལ་སངས་རྒྱས་དངོས་མཐོང་གི་འདུ་ཤེས་སྐྱེ། དེ་ལྟར་ན་མོས་གུས་དང་དམ་ཚིག་རྣམ་པར་དག་པ་གང་ཞིག་འདི་ཡན་ཆད་ཀྱི་ལམ་མཐར་ཕྱིན་པས་ཀྱང་དངོས་གཞི་ལ་མི་ལྟོས་པར་རྔ་ཡབ་དཔལ་གྱི་རི་བོར་དབུགས་དབྱུང་། དག་པའི་ཞིང་ཁམས་དེར་རིག་འཛིན་རྣམ་པ་བཞིའི་ལམ་ཉི་ཟླའི་བགྲོད་པ་ལས་ཀྱང་མྱུར་བས་ཀུན་ཏུ་བཟང་པོའི་ས་ལ་ཕྱིན་པར་འགྱུར་རོ། །ཞེས་གསུངས་ན་རིག་འཛིན་བཞིའི་ས་མཚམས་ནི། སེམས་ལྷ་སྐུར་སྨིན་ཀྱང་ཐ་མལ་གྱི་ལུས་སྦྱངས་མ་ནུས་པས་སྐྱེ་འཆི་ལ་རང་དབང་མ་ཐོབ་བར་རྣམ་སྨིན་རིག་འཛིན། དེ་ཉིད་ཚོགས་སྦྱོར་གཉིས་སུ་བསྐྱེད་རྫོགས་ལ་གོམས་པ་བྱས་ནས་བར་དོ་ཕྱག་རྒྱ་ཆེན་པོའི་དངོས་གྲུབ་ཐོབ་པ་ཡིན། ཏིང་ངེ་འཛིན་གྱི་མེས་ཐ་མལ་གྱི་ལུས་སྦྱངས་ནུས་ཤིང་དྭངས་མར་གྱུར་ཏེ་སྐྱེ་འཆི་ལ་རང་དབང་ཅན་སྐྱེ་འཆི་མེད་པའི་ཚེ་དབང་བརྙེས་པ་དེ་ལ་ཚེ་དབང་རིག་འཛིན་ཏེ་པད་འབྱུང་དང་བི་མ་ལ་ལྟ་བུ། ཆོས་མཆོག་ཆེན་པོ་མཐར་ཕྱིན་ནས་མཐོང་ལམ་སྒོམ་སྟེ་སྐྱེ་ཤིའི་མིང་མེད་པར་བྱས་པ་དང་། ཕྱག་ཆེན་རིག་འཛིན་ས་གཉིས་པ་ནས་བཅུ་བའི་བར་གྱི་སྒོམ་ལམ་དུ་ལམ་ཉམས་སུ་བླངས་ནས་དྲི་མ་ཕྲ་མོ་སྦྱོང་བ་དང་། མཐར་ཕྱིན་ལྷུན་གྲུབ་རིག་འཛིན་སངས་རྒྱས་ཡིན། འདིར་ལྟར་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་པ་ནི་རང་སེམས་ལྷན་ཅིག་སྐྱེས་པའི་ཡེ་ཤེས་རྟོགས་པ་ལ་རག་ལས་ཤིང་། རྟོགས་པ་སྐྱེ་བ་བླ་མའི་བྱིན་རླབས་དང་། བྱིན་རླབས་འཇུག་པ་མོས་གུས་ཀྱི་རྟེན་འབྲེལ་ཁོ་ན་ལ་རག་ལས་པས་ན། རྫོགས་པ་ཆེན་པོའི་དོན་བརྒྱུད་དང་ལྡན་པའི་བླ་མ། སེམས་ཉིད་ཆོས་སྐུར་ངོ་སྤྲོད་པའི་མན་ངག་སྙན་ཁུང་དུ་བརྒྱུད་ནུས་པ། རང་དང་སྐལ་བ་མཉམ་པའི་མི་ཡི་ཚུལ་དུ་བསྟན་པའི་བཤེས་གཉེན་ཆེན་པོ་ནི། ཡོན་ཏན་གྱི་ངོས་ནས་སངས་རྒྱས་ཀུན་དང་མཉམ་ཞིང་། བཀའ་དྲིན་གྱི་ངོས་ནས་སངས་རྒྱས་ལས་ཀྱང་ཆེས་ཆེར་ལྷག་པར་ཐག་བཅད། ངེས་ཤེས་བསྐྱེད་དེ་ཐོབ་གྲངས་དང་བཟླས་གྲངས་བླ་མ་མང་པོ་བསྟེན་པའི་གྲངས་ཀ་ཙམ་ཞིག་ལ་བློ་གདེང་མི་འཆའ་བར། རང་སེམས་ཆོས་སྐུར་ངོ་སྤྲོད་པའི་མན་ངག་ཟབ་མོ་དཔལ་ལྡན་བླ་མའི་ཞལ་ནས་མཉན་ཏེ། དེ་ལ་ནན་ཏན་སྙིང་པོར་བྱ་བ་འདི་ཁོ་ན། བཤད་བཤད་ཀྱི་སྙིང་པོ། སྒྲུབ་སྒྲུབ་ཀྱི་འབྲས་བུ། བཙལ་བཙལ་གྱི་དོན་པོ་ཡིན་པས་གནད་འདི་མི་སྟོང་བར་ཞིག་ཅི་ནས་ཀྱང་གལ་ཆེའོ།། །།ཞེས་གསུངས་ཤིང་བསྔོ་བས་མཐའ་བརྒྱན་ཏེ་ཆོས་ཁྲིད་གྲོལ་སོང་ངོ་། །