ཚ༽ཉིན་བཅོ་བརྒྱད་པར་བརྒྱུད་གསུམ་བྱུང་ཚུལ་གྱི་ཆོས་ཁྲིད།
མཆོད་བརྗོད་སོགས་གསུངས་ནས།
ཨ༽མཚམས་སྦྱོར་གྱི་གདམས་ངག
དེ་ཡང་ཇི་སྐད་དུ། རྫ་དཔལ་སྤྲུལ་རིན་པོ་ཆེ་འཇིགས་མེད་ཆོས་ཀྱི་དབང་པོའི་ཞལ་ནས། བློ་སྦྱོངས་བློ་སྦྱོངས་རང་གི་བློ་འདི་སྦྱོངས། །བྱང་ཆུབ་སེམས་ཀྱིས་རང་གི་བློ་སྦྱངས་ན། །ལུས་ངག་དགེ་བ་སྣ་གཅིག་མ་འགྲུབ་ཀྱང་། །རང་གཞན་དོན་གཉིས་མ་འབད་ཤུགས་ཀྱིས་འགྲུབ། །ཅེས་གསུངས་པའི་དོན་ནི། བློ་སྦྱོངས་བློ་སྦྱོངས་ཅི་ནས་ཀྱང་རང་གི་བློ་འདི་སྦྱོངས་ཤིག་གསུངས་ནས་ལན་གསུམ་གྱི་བར་དུ་ཡང་ནས་ཡང་དུ་ནན་ཏན་ཆེན་པོའི་སྒོ་ནས། དུས་སྙིགས་མའི་གདུལ་བྱ་རང་ཅག་རྣམས་ལ་གདམས་ངག་ཞལ་ཆེམས་ཀྱི་ཚུལ་དུ་གསུངས་ལ། འོ་ན་བློ་ཅིས་སྦྱོང་དགོས་ཤེ་ན། སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་སྨོན་དང་འཇུག་པའི་བདག་ཉིད་ཅན་དེ་ཉིད་རང་རྒྱུད་ལ་སྦྱར་བའི་སྒོ་ནས་བློ་སྦྱངས་ཐུབ་ན། གཞན་ལུས་ངག་གཉིས་ཀྱིས་དགེ་བ་སྣ་གཅིག་མ་འགྲུབ་ན་ཡང་། བདག་རང་གི་
དོན་དང་སེམས་ཅན་གཞན་གྱི་དོན་གཉིས་པོ་མ་འབད་ཀྱང་མཉམ་དུ་རང་བཞིན་ཤུགས་ཀྱིས་འགྲུབ་འོང་བ་ཡིན་གསུངས་སོ། །དེའི་ཤུགས་ལ་གལ་ཏེ་བློ་ལྡོག་རྣམ་བཞིས་རང་གི་བློ་ལེགས་པོ་ཞིག་སྦྱོང་མ་ཐུབ་ནས་འཁོར་བ་ལས་ངེས་པར་མ་འབྱུང་ཞིང་། སེམས་ཅན་ལ་སྙིང་རྗེ་མེད་པས་སྨོན་དང་འཇུག་པའི་བྱང་ཆུབ་ཀྱི་སེམས་རིན་པོ་ཆེ་རང་རྒྱུད་ལ་སྐྱེས་མེད་ན། ལུས་ངག་གཉིས་ཀྱིས་དགེ་བ་ཅི་ཙམ་བསྒྲུབས་ཀྱང་རང་གཞན་གཉིས་ཀའི་དོན་འགྲུབ་པ་མ་ཡིན་གསུངས། དེས་ན་རང་རེ་རྣམས་ཀྱིས་ཆོས་ཞུས་པའི་ཐོག་མར་རང་རྒྱུད་ཀྱི་ཀུན་སློང་ལ་བརྟག་དཔྱད་གཏོང་རྒྱུ་གལ་ཤིན་ཏུ་ཆེ། ངས་ད་རེས་དམ་པའི་ཆོས་ཤིག་ཞུ་རྒྱུ་འདི་ཅིའི་ཕྱིར་ཞུ་བ་རེད་ཡོད་ཁི། རང་ཉིད་ཀྱི་ཚེ་འདིའི་ཆེ་འདོད་དང་གྲགས་འདོད་རྙེད་བཀུར་སྙན་གྲགས་འདོད་ནས་འཇིག་རྟེན་ཆོས་བརྒྱད་ཀྱི་ཆེད་དུ་ཆོས་ཞུ་བའམ། ཚེ་ཕྱི་མར་བྱང་ཆུབ་ཆེན་པོའི་གོ་འཕང་དོན་དུ་གཉེར་ནས། ཆོས་ཞུས་ནི་ཨེ་རེད་ཁི་བསམ་ནས་རང་གི་ཀུན་སློང་ལ་ཡང་ནས་ཡང་དུ་བརྟག་དགོས། ཚེ་འདིའི་བདེ་སྐྱིད་སྙན་གྲགས་ཀྱི་ཆེད་དུ་ཆོས་ཞུས་པ་རེད་ཡོད་ན། ཚེ་འདིར་འབད་པར་གྱུར་པ་ལ། །འཇིག་རྟེན་ཕ་རོལ་དོན་མི་འགྱུར། །ཞེས་གསུངས་པས་ཚེ་འདིར་དོན་གཉེར་བྱས་ནས་ཆོས་ཞུས་པ་ཡིན་ན་འཇིག་རྟེན་ཕ་རོལ་གྱི་དོན་མི་འགྲུབ་གསུངས་ལ། འཇིག་རྟེན་ཕ་རོལ་དོན་གཉེར་གྱིས། །འཇིག་རྟེན་འདི་ཡི་འབྲས་བུ་རྒྱས། །གསུངས་པས་འཇིག་རྟེན་ཕ་རོལ་ཚེ་ཕྱི་མར་བྱང་ཆུབ་དོན་གཉེར་གྱིས་ཆོས་ཞུས་ན། འཇིག་རྟེན་འདི་ཡི་དོན་ཙམ་ནི་མ་འབད་ཀྱང་ངམ་ངམ་ཤུགས་ཤུགས་ཀྱིས་འབྱུང་བའམ་རྒྱས་པ་ཡིན། ཞེས་གསུངས། དེ་ལྟར་ཚེ་འདིའི་དོན་ཁོ་ན་ལ་དམིགས་ནས་ལས་བྱ་བ་གང་བསྒྲུབས་ཐམས་ཅད་ཕལ་ཆེར་ངན་སོང་གི་རྒྱུ་རུ་འགྱུར་འགྲོ་བར་ཡིན་ཞིང་། ཚེ་ཕྱི་མ་དོན་གཉེར་གྱིས་ཆོས་ཞུས་པ་ཡིན་ན་ཡང་དེ་ལའང་རྣམ་གྲངས་ཀྱི་ཁྱད་པར་ཡོད་དེ། ཕྱི་མར་ལྷ་མིའི་བདེ་འབྲས་འདོད་པས་ཡིན་ན་དེའི་འབྲས་བུ་འཁོར་བ་འབའ་ཞིག་གི་རྒྱུར་འགྱུར་བ་དང་། རང་ཉིད་གཅིག་པུར་ཞི་བདེ་ཐོབ་པའི་ཕྱིར་ཐར་བ་ཞིག་བསྒྲུབས་ཀྱང་ཞི་བ་ཕྱོགས་གཅིག་པའི་མཐར་ལྷུངས་ནས་མ་སེམས་ཅན་ཐམས་ཅད་ཀྱི་དོན་མི་འགྲུབ་ཅིང་མཐའ་གཉིས་ལ་མི་གནས་པའི་རྫོགས་པའི་བྱང་ཆུབ་ཆེན་པོར་ཐོབ་པའི་རྒྱུར་མི་འགྱུར། དེས་ན་ཀུན་སློང་ཡང་དག་པ་ནི། སྔོན་ནས་ད་བར་རང་ཉིད་ཀྱིས་འཁོར་བའི་གནས་སུ་སྡུག་བསྔལ་མྱོངས་པ་ལ་བསམ་བློ་ཞིག་བཏང་ན། སེམས་ཅན་ཐམས་ཅད་ཀྱང་རང་དང་འདྲ་བར་སྡུག་བསྔལ་གྱིས་མནར་ནས་ཡོད་པར་ཤེས་ཐུབ། མ་ཚད་སེམས་ཅན་ཐམས་ཅད་ཚེ་རབས་ཐོག་མེད་ནས་ད་ལྟའི་བར་དུ་མ་བྱས་པའི་དྲིན་ཅན་ཤ་སྟག་ཡིན་པར་སེམས་ལ་ཤར་ནས་སེམས་ཅན་དེ་དག་ཐམས་ཅད་སྙིང་རེ་རྗེ་སྙམ་པ་ཞིག་མི་དྲན་མི་སྲིད་པ་འདྲ། སྙིང་རྗེ་བ་ཙམ་གྱིས་མི་ཕན་དེ་རྣམས་ཐམས་ཅད་སྡུག་བསྔལ་ལས་ཐར་བ་ཞིག་བྱ་དགོས། ལས་དེ་ད་ལྟ་ངའི་རེས་ལ་བབས་ཡོད་དེ། ང་ནི་དལ་འབྱོར་བཅོ་བརྒྱད་ཚང་བའི་མི་ལུས་རིན་པོ་ཆེ་ཐོབ། དམ་པའི་ཆོས་དང་མཇལ། རང་གཞན་ཐམས་ཅད་ལ་ཕན་ཐོགས་པའི་ཐར་ལམ་ཞིག་རྙེད་ཡོད་པས། གཞན་སེམས་ཅན་ཐམས་ཅད་པོ་སྡུག་བསྔལ་མི་འདོད་པ་ང་རང་ཉིད་དང་མཚུངས་པར། བསམ་རྒྱུ་བདེ་བ་ཡིན་ཡང་སྒྲུབ་རྒྱུ་སྡུག་བསྔལ་གྱི་རྒྱུ་མ་གཏོགས་བདེ་བའི་རྒྱུ་སྒྲུབ་མི་ཤེས། དེས་ན་སེམས་ཅན་དེ་དག་ཐམས་ཅད་ཀྱིས་ལམ་སྟོན་དགེ་བའི་བཤེས་གཉེན་དང་བྲལ་བས་ལམ་དང་ལམ་མིན་མི་ཤེས་པས་ལམ་ཡང་དག་ཅིག་རྙེད་མེད། ང་རང་གིས་ཀྱང་བསམ་པ་བཟང་པོ་བྱས་པ་ཙམ་གྱིས་མི་ཕན་ཏེ་ད་དུང་འདི་བཞིན་གནས་ན་རང་ཉིད་ལ་སེམས་ཅན་གཞན་ལ་ཕན་འདོགས་བྱེད་ཀྱི་ནུས་པ་མེད་ནི། སེམས་ཅན་རྨོངས་པའི་གཞན་དབང་ཅན་རྣམས་དང་འདྲ་བ་ཡིན་པས་སེམས་ཅན་གཅིག་གི་དོན་ཙམ་ཡང་བྱེད་མི་ནུས། དེས་ན་སེམས་ཅན་གཞན་ལ་ཕན་བཏགས་པའི་ནུས་པ་ཡོད་པ་ཞིག་རང་ཉིད་ཀྱིས་ཐོག་མར་འབད་ནས་སྒྲུབ་དགོས་འདུག དེ་ལྟ་བུ་ནུས་པ་ཡོད་པ་དེ་སུ་ལ་ཡོད་ན་རྗོགས་པའི་སངས་རྒྱས་སྐྱོན་ཀུན་ཟད་ཡོན་ཏན་ཀུན་ལྡན་མཁྱེན་བརྩེ་ནུས་གསུམ་གྱི་བདག་ཉིད་ཅན་དེ་ཉིད་རེད། དེས་ན་ངེས་པར་དུ་གོ་འཕང་དེ་བསྒྲུབས་ནས་མ་སེམས་ཅན་ཐམས་ཅད་གཅིག་ཀྱང་མ་ལུས་པ་རྫོགས་པའི་སངས་རྒྱས་ཀྱི་སར་འགོད་ཐུབ་པ་ཞིག་བྱ་དགོས། དེའི་ཆེད་དུ་ད་རེས་བདག་གིས་དམ་པའི་ཆོས་ཟབ་མོ་ཉན་ནས་ཆོས་ཀྱི་ནང་དོན་ལ་བསམ་བློ་བཏང་དགོས། བསམ་དོན་དེ་ཉིད་བསྒོམས་ནས་སྙིགས་དུས་ཚེ་ཐུང་ཡིན་ཡང་རྟེན་འདིར་བྱང་ཆུབ་ཐོབ་པ་ཞིག་བྱ། དེ་ལྟར་འགྲུབ་པར་བླ་མ་དཀོན་མཆོག་གི་ཐུགས་རྗེས་གཟིགས་སྙམ་ནས་གསོལ་འདེབས་དང་སྨོན་ལམ་བྱེད་དགོས། དེ་ལྟ་བུའི་ཀུན་སློང་ཡང་དག་པ་ཞིག་གིས་གཞན་དོན་འབའ་ཞིག་སྔོན་དུ་འགྲོ་བའི་ཆོས་སྒྲུབ་ན་ཚེ་འདིའི་རང་དོན་ཞོར་འབྱུང་དུ་འགྲུབ་པ་ཡིན་ཏེ། དཔེར་ན་ལོ་ལེགས་ཀྱི་སྟོན་ཐོག་བསྡུ་ཚེ་རྩྭ་སོག་ཞོར་དུ་འབྱུང་བ་བཞིན་ནོ། །ཆོས་ཞུ་བའི་ཐོག་མར་ཚེ་རབས་ལས་ཀྱིས་འབྲེལ་བའི་བླ་མ་མཚན་ཉིད་དང་ལྡན་པ་ཞིག་ལ་བསྟེན་ཅིང་མཉེས་པ་གསུམ་གྱིས་ཞབས་ཏོག་བསྒྲུབས་ནས་དད་དང་མོས་གུས་བྱེད་པ་ནི་རང་རྒྱུད་ལ་བྱིན་རླབས་འཇུག་པའི་རྒྱུ་མ་ནོར་བ་ཡིན། ཁྱད་པར་ཉན་ན་ཚིག་མི་ཟིན། བསམ་ན་དོན་མི་གོ སྒོམ་ན་རྟོགས་པ་རྒྱུད་ལ་མི་སྐྱེ་བའི་རིགས་དག་ནི་བློ་གྲོས་ཤིན་ཏུ་དམན་པའི་རིགས་ཅན་ཡིན་པས། ཞིང་དག་པའི་མཐུ་ལ་བརྟེན་རྒྱུ་བོ་ཐབས་ལམ་ཉག་གཅིག་གམ་མན་ངག་ཡིན་པར་གསུངས། བླ་མ་མཚན་ཉིད་དང་ལྡན་པ་བསྟེན་པའི་ཕན་ཡོན་ནི། བཤེས་གཉེན་བཟང་པོ་དེ་བསྟེན་པ་ཙམ་གྱིས་ངན་འགྲོར་སྐྱེ་བའི་ལས་ངན་བསགས་ཡོད་ཀྱང་། ཚེ་འདི་ལ་གནོད་པ་ཕྲ་མོ་རེ་ལུས་ཐོག་ཏུ་བྱུང་བ་ཙམ་གྱིས་གོ་ཆོད་པ་དང་། རྨི་ལམ་ཙམ་གྱིས་ཀྱང་ལས་བསགས་པ་མྱོང་བའི་གོ་ཆོད་ནས་ལས་ངན་གྱི་སྒྲིབ་པ་འཛད་པར་འགྱུར་བ་ལའང་ཕན་པ་དང་། གཞན་ཡང་གནས་སྐབས་དང་མཐར་ཐུག་གི་དོན་ཐམས་ཅད་རང་ཤུགས་ཀྱིས་འགྲུབ་པ་ཡིན་ཏེ། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་ལ་ཡང་དག་བརྩོན། དེ་མཉེས་པས་ནི་ཀུན་མཁྱེན་གྱི། །ཡེ་ཤེས་དམ་པ་ཐོབ་པར་འགྱུར། །ཞེས་མགོན་པོ་ཀླུ་སྒྲུབ་ཀྱིས་གསུངས། བླ་མའི་ཐུགས་མཉེས་ནས་དམ་ཚིག་ཉམས་ཆག་མ་སོང་ན། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་ཡུལ་དུ་སྤྱན་དྲངས་པ་ལས་ཀྱང་བླ་མ་མཆོད་པ་ལྷག་པ་ཡིན། དེ་དག་སྤྱན་མ་དྲངས་ཀྱང་དགྱེས་བཞིན་བྱོན་ཏེ་བླ་མ་དེ་དང་གཉིས་སུ་མེད་པར་བཞུགས་ནས་མཆོད་པ་བཞེས་པར་འགྱུར་རོ། །གལ་ཏེ་བླ་མ་ལ་དམ་ཚིག་ཉམས་ཆག་ཡོད་བཞིན་དུ་སངས་རྒྱས་བྱང་སེམས་ལ་མཆོད་པ་ཕུལ་ཀྱང་ཕུལ་བའི་ཕན་ཡོན་ཙམ་ལས་བཞེས་པའི་ཕན་ཡོན་མེད། རྒྱུད་ལས། གང་ཕྱིར་ཕྱོགས་བཅུའི་སངས་རྒྱས་དང་། །བྱང་ཆུབ་སེམས་དཔའི་བསོད་ནམས་པས། །སློབ་དཔོན་བ་སྤུ་ཁུང་གཅིག་མཆོད། །དེའི་ཕྱིར་སློབ་དཔོན་མཆོད་བྱེད་པ། །སངས་རྒྱས་བྱང་ཆུབ་སེམས་དཔས་གཟིགས། །ཞེས་པའི་གོ་དོན་གྱི་ཤུགས་ལ། གལ་ཏེ་སློབ་དཔོན་ལ་མཆོད་པ་མ་བྱས་ན། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་མི་གཟིགས་ཞེས་པའི་དོན་དུ་གནས། དེ་ལྟ་བུའི་དགེ་བའི་བཤེས་གཉེན་ལ་བསྟེན་ཚུལ་ཕྱིན་ཅི་ལོག་ཏུ་གྱུར་ནས་ཐུགས་དང་འགལ་བར་གྱུར་ཤོར་ན། ཚེ་འདི་ཕྱི་གཉིས་ཀའི་མི་འདོད་སྡུག་བསྔལ་འབྱུང་བའི་རྒྱུ་རུ་འགྱུར་བ་ཡིན། ཚིགས་བཅད་གཅིག་ཙམ་ཉན་པ་ལ། །གང་གིས་བླ་མར་མི་འཛིན་པ། །ཁྱི་ཡི་སྐྱེ་བ་བརྒྱར་བླངས་ནས། །སྨེ་ཤ་ཅན་དུ་སྐྱེ་བར་འགྱུར། །ཞེས་གསུངས་པ་ལྟར་ཡིན། དེས་ན་མཚམས་མེད་ཀྱི་ལས་བྱས་པ་དང་། ཆོས་སྤོང་གི་ལས་བསགས་པ། སོར་ཐར་གྱི་ཕམ་པ་བཞི་བྱུང་བ་ལ་སོགས་པ། སྡིག་པ་ཆེན་པོར་བྱས་པ་རྣམས་ཀྱང་གསང་སྔགས་རྡོ་རྗེ་ཐེག་པའི་ལམ་ནས་སྡིག་པ་བཤགས་པའི་ཐབས་རྒྱ་ཆེ། ཚོགས་བསགས་པའི་སྒོ་གྲངས་མང་བ་ཡིན་པས་མཆོག་གི་དངོས་གྲུབ་འགྲུབ་རྒྱུ་ཡོད་པ་རེད། འོན་ཀྱང་སྙིང་ནས་བླ་མ་སློབ་དཔོན་སྨོད་ནས་ལོ་གསུམ་འདས་ཟིན་ན་བཤགས་མི་ནུས་ཏེ་བསྐལ་བ་སྟོང་དུ་གསང་སྔགས་སྒྲུབ་ཀྱང་འགྲུབ་མི་ཐུབ། བླ་མ་སློབ་དཔོན་ལ་དམ་ཚིག་ཉམས་ཚར་ནས་ཡོན་ཏན་མ་སྐྱེས་པ་མི་སྐྱེ་ཞིང་། སྐྱེས་པ་ཐམས་ཅད་ཉམས་འགྲོ་བ་ཡིན། དེས་ན་རང་ཉིད་དམ་ཚིག་མ་ཉམས་ཀྱང་མི་དགེའི་བཤེས་གཉེན་དང་སྡིག་པའི་གྲོགས་པོ་དམ་ཚིག་ཉམས་པ་དེ་དག་དང་འགྲོགས་ན་ཉེས་པ་འགོས་པས་ཡོན་ཏན་མི་སྐྱེ་ཞིང་ཉམས་པར་འགྱུར་བ་ཡིན། དམ་ཉམས་སྡིག་གྲོགས་ལ་འཛེམ་པ་དེ་བླ་མའི་ཞལ་ངོ་འཛེམ་པ་གཅིག་པུའི་དོན་མ་ཡིན་པར་རང་ཉིད་ཀྱི་ཐར་པའི་སྲོག་རྩ་ཆད་མི་ཆད་ཀྱི་དོན་ལ་ཐུག་ཡོད། དེས་ན་དམ་ཉམས་ཞེས་པ་ནི་བླ་མའི་སྐུ་གསུང་ཐུགས་དང་འགལ་བ་བྱེད་མཁན་འགལ་ཉམས་འདས་རལ་ཅན་དེ་ཚོ་ཡིན་པ་རེད། སྡིག་པའི་གྲོགས་པོ་དེ་ཅི་ལྟ་བུ་ཡིན་ཞེ་ན། གང་དང་འགྲོགས་ན་དུག་གསུམ་འཕེལ་འགྱུར་ཞིང་། །ཐོས་བསམ་སྒོམ་པའི་བྱ་བ་ཉམས་གྱུར་ལ། །བྱམས་དང་སྙིང་རྗེ་མེད་པར་སྒྱུར་བྱེད་པས། །གྲོགས་ངན་སྤོང་བ་རྒྱལ་སྲས་ལག་ལེན་ཡིན། །ཞེས་གསུངས་པ་ལྟར་གང་ཞིག་དང་འགྲོགས་ན་བྱང་ཆུབ་སེམས་ཀྱིས་འཕངས་པའི་བསླབ་པ་གསུམ་གྱི་ཉམས་ལེན་ཐོས་བསམ་སྒོམ་གསུམ་ཉམས་པར་བྱེད་པ་དེར་སྡིག་པའི་གྲོགས་པོ་ཟེར་བ་ཡིན། དེ་ལས་ལྡོག་པ་གང་དང་འགྲོགས་ན་བྱང་ཆུབ་སེམས་ཀྱིས་འཕངས་པའི་བསླབ་པ་གསུམ་གྱི་ཉམས་ལེན་ཐོས་བསམ་སྒོམ་གསུམ་གོང་ནས་གོང་དུ་འཕེལ་བར་འགྱུར་བ་དེར་དགེ་བའི་བཤེས་དང་དགེ་བའི་གྲོགས་པོ་ཟེར་བ་རེད། འཇིག་རྟེན་དཔེ་ལ། སྡིག་ཅན་ཤ་བོའི་གྲོད་ཁྲག་དེ། གང་དུ་འགོས་ན་དམར་པོ་དང་། །ནག་ཅན་རྫ་མའི་དྲི་མ་དེ། །གང་དུ་འགོས་ན་ནག་པོ་ཡིན། །ཟེར་བ་ལྟར་གྲོགས་གཏི་མུག་ཅན་དང་འགྲོགས་ན་ཤེས་རབ་འགྲིབ། གྲོགས་ཞེ་སྡང་ཅན་དང་འགྲོགས་ན་རྒྱུད་གཤིས་ངན་ཅན་དུ་འགྱུར། གྲོགས་སེར་སྣ་ཅན་དང་འགྲོགས་ན་སེར་སྣ་ཇེ་ཆེར་འགྲོ། གྲོགས་ང་རྒྱལ་ཅན་དང་འགྲོགས་ན། འགྱིང་ཚུགས་དང་ཆེ་མདོག་ཇེ་ཆེ་རུ་འགྲོ། དེས་ན་སྡིག་པའི་གྲོགས་པོ་དེ་རྒྱང་ལ་ཡོད་ན་གཟུར་དགོས། རྒྱུད་ལ་ཡོད་ན་འབྲོས་རན། སྡིག་པའི་གྲོགས་པོ་ཟེར་བའི་ངོ་ལ་རྫ་ནག་བྱུག་པ་དང་། གོས་སུ་རེ་ནག་གྱོན་པའི་འཇིགས་སུ་རུང་བ་ཞིག་མེད། ཤ་ཚ་དང་སྙིང་ཉེའི་ཚུལ་ཅན་དོན་དུ་དེ་དང་འགྲོགས་ན་མཐའ་ཐུར་དུ་འཁྲིད་པའི་མི་ལ་སྡིག་པའི་གྲོགས་པོ་ཟེར། སྐབས་འགའ་ཕ་མ་ཡིན་ཡང་སེམས་དཀར་མི་ཤེས་ནས་བདུད་ལས་སྡིག་གྲོགས་སུ་འགྱུར་བའང་ཡོད། གང་ལ་བརྟེན་ན་གནས་སྐབས་མཐར་ཐུག་ཏུ། །ཕུང་བར་འགྱུར་བ་ཁྱིམ་དང་སྡིག་གྲོགས་དང་། འདོད་པའི་ཡུལ་བཅས་ངེས་པར་ཐག་བསྲིངས་པས། །ཉོན་མོངས་ཚོགས་ཀུན་ཤུགས་ཀྱིས་བྲི་བར་འགྱུར། །ཞེས་གསུངས་པས་བདུད་ཀྱི་སྡིག་གྲོགས་དང་རྒྱང་རིང་བའི་དབེན་པའི་གནས་སུ་རང་གཅིག་པུར་བསྡད་ན་ཉམས་རྟོགས་དང་ཡོན་ཏན་ལྷག་པར་སྐྱེ་བ་ཡིན། དེས་ན་གོང་དུ་བཤད་མ་ཐག་པ་བཞིན་རྟག་ཏུ་བླ་མ་བསྒོམ། རྟག་ཏུ་བླ་མར་མཆོད། བླ་མ་སངས་རྒྱས་དབྱེར་མེད་ལྟ་བ་ལས། བླ་མ་ལས་ལྷག་པའི་སངས་རྒྱས་ཟུར་བ་དང་། བླ་མ་མ་ཡིན་པའི་ཡི་དམ་ལོགས་སུ་ཡོད་པར་བཟུང་ན་དངོས་གྲུབ་མི་ཐོབ། འོ་ན་སངས་རྒྱས་ནི་སྐྱོན་ཀུན་ཟད་ཡོན་ཏན་ཀུན་ལྡན་ཞིག་ཡིན་ན། ངའི་བླ་མ་ཐར་བའི་ལམ་སྟོན་དང་དགེ་བའི་བཤེས་གཉེན་ཡིན་རུང་གང་ལྟར་ཡང་མི་ཡིན་པས། གཞན་དང་འདྲ་བའི་དུག་གསུམ་གྱིས་ཀུན་ནས་བསླང་བའི་མཛད་པ་དེ་དང་དེར་ཡོད་པས་སངས་རྒྱས་དངོས་དང་ཇི་ལྟར་འདྲ་བསམ་མི་རུང་། རྣམ་རྟོག་དབང་གིས་བླ་མ་གཅིག །བཟང་ངན་སྤྱོད་ཡུལ་དུ་མར་སྣང་། ལས་ཀྱི་དབང་གིས་ཟླ་བ་གཅིག །བསིལ་བྱེད་གདུང་བྱེད་སོ་སོར་སྣང་། །གསུངས་པ་ལྟར། ལོག་པར་མཐོང་བ་ནི་རང་སྣང་མ་དག་པའི་དབང་གིས་ཡིན། དཔེར་ན་ཟླ་བ་བསིལ་བའི་རང་བཞིན་ཅན་ལ་ཡང་ཡི་དྭགས་འགའ་ལ་ཚ་བ་མེ་ལྟ་བུའི་རང་བཞིན་སྣང་བ་བཞིན། དགེ་སློང་ལེགས་སྐར་གྱིས་སྟོན་པ་སངས་རྒྱས་ཀྱི་མཛད་པ་ཐམས་ཅད་རྫུན་མར་མཐོང་བ་དང་། ཐོགས་མེད་ཀྱིས་རྗེ་བཙུན་བྱམས་མགོན་ཁྱི་མོར་མཐོང་བ་ལ་སོགས་པ་ལྟ་བུ་ཡིན། དེས་ན་དད་པ་དང་དག་སྣང་སྦྱངས་ཏེ་བླ་མ་སངས་རྒྱས་སུ་མཐོང་བ་ནི་གསང་སྔགས་ལམ་གྱི་གཞུང་ཤིང་ཡིན་པར་ཤེས་པ་གལ་ཆེ། བླ་མའི་རྣལ་འབྱོར་བསྒོམ་པ་དེ་མཐར་ཐུག་སངས་རྒྱས་སྒྲུབ་པའི་ཉེ་ལམ་སྔོན་འགྲོ་དང་དངོས་གཞིའི་དོན་ཐམས་ཅད་འུབ་ཆུབ་པར་ཤེས་པའི་ཐོག་ནས། དེ་རིང་དེ་དང་འབྲེལ་བའི་གསང་སྔགས་སྤྱི་དང་ཁྱད་པར་ནང་རྒྱུད་ཡོ་ག་གསུམ་གྱི་བསྟན་པའི་བབས་ཚུལ་བཤད་པའི་སྐབས་ཡིན། བླ་མའི་རྣལ་འབྱོར་བྱིན་རླབས་འཕོ་ཚུལ་བཤད་པ་འདི་དག་གི་སྐབས་སུ་ཉན་པ་པོ་དད་གུས་དང་ཡིད་ཆེས་ཀྱི་སྤྲོ་བ་སྐྱེད་པ་ལ་སོགས་པ་བསྐྱེད་པའི་ཆེད་དུ་ནང་རྒྱུད་ཡོ་ག་གསུམ་གཙོ་བོར་གྱུར་པའི་བསྟན་པའི་བྱུང་ཚུལ་ལོ་རྒྱུས་ཀྱི་སྒོ་ནས་རྒྱས་བསྡུས་འཚམས་པ་རེ་གསུང་སྲོལ་ཡོད་པ་འདིར་ཡང་ཅུང་ཟད་འགོད་ན། དེ་ཡང་སྔ་འགྱུར་ནང་པ་བསྐྱེད་རྫོགས་རྫོགས་ཆེན་གསུམ་སྟེ། བསྐྱེད་པ་མ་ཧཱ་ཡོ་གརྫོགས་པ་ཨ་ནུ་ཡོ་གརྫོགས་ཆེན་ཨ་ཏི་ཡོ་ག་གསུམ་དུ་གྲགས་པའི་རྒྱུད་སྡེ་འདི་དག་གི་བསྟན་པའི་བབས་ཚུལ་ལ་གསུམ་སྟེ། རྒྱལ་བ་དགོངས་པའི་བརྒྱུད་པ། རིག་འཛིན་བརྡ་ཡི་བརྒྱུད་པ། གང་ཟག་སྙན་ཁུང་དུ་བརྒྱུད་པ་དང་གསུམ་མོ།།
༡༽རྒྱལ་བ་དགོངས་བརྒྱུད།
དང་པོ་རྒྱལ་བ་དགོངས་པས་བརྒྱུད་པ་ནི། ཆོས་ཀྱི་དབྱིངས་སྤྲོས་པ་དང་བྲལ་བའི་ངང་དུ་གདོད་ནས་ཡེ་སངས་རྒྱས་པའི་གཞི་ཡི་སངས་རྒྱས་སྟོན་པ་ཀུན་ཏུ་བཟང་པོ་ཉིད་ཀྱི་ཐུགས་རྗེའི་རྣམ་པར་འཕྲུལ་པ་ཚད་མེད་པ་ལས། སངས་རྒྱས་ཐམས་ཅད་ཀྱི་ཞིང་ཁམས་དང་གནས་དང་སྟོན་པ་སྐུ་བཞིར་སྣང་སྟེ། ཉིད་ལས་མི་གཞན་པའི་འཁོར་ལོངས་སྤྱོད་རྫོགས་པའི་སྐུ་རིགས་ལྔ་ཡབ་ཡུམ་དང་། རིགས་ཀུན་འདུས་པ་དྲུག་པ་རྡོ་རྗེ་འཆང་ཆེན་པོ་ལྷུན་གྲུབ་ཀྱི་རིག་འཛིན་དང་། རྒྱལ་བ་རྒྱ་མཚོའི་ཚོགས་བསམ་གྱིས་མི་ཁྱབ་པ་རྣམས་ལ་ངོ་བོ་ཉིད་སྐུས་རང་གསལ་མངོན་སུམ་དུ་གསུངས་པའི་ཆོས་ཐམས་ཅད་ཚིག་དང་བརྡའི་སྒོ་ནས་མ་གསུངས་ཀྱང་། རང་བཞིན་བྱིན་གྱིས་རླབས་ཀྱིས་ཐུགས་རྗེ་ཆེན་པོ་རང་རིག་པ་ཡེ་ཤེས་ཀྱི་རང་གདངས་འབད་མེད་ལྷུན་གྲུབ་ཏུ་གསལ་བ་རང་གྲོལ་མངོན་སུམ་དུ་གསུངས་པ་ཉིད་ལས་སྟོན་པས་མི་གསུང་བར་གསུངས་པ་ན། ཉིད་ལས་མི་གཞན་པའི་འཁོར་རྣམས་ཀྱིས་དོན་གྱི་དགོངས་པ་ཕྱིན་ཅི་མ་ལོག་པའི་དོན་མངོན་དུ་གྱུར་ཏེ་སྤངས་རྟོགས་ཀྱི་ཡོན་ཏན་སྟོན་པ་ཉིད་དང་དབྱེར་མེད་པར་གྱུར་པའོ། །དེ་ཉིད་དགོངས་པ་གཅིག་པའི་གོ་རྟོགས་ཀྱི་སྐལ་བ་དང་མི་ལྡན་པ་རྣམས་ལ་ལམ་སྟེགས་ཀྱི་ཐེག་པ་གཞན་གསུངས་པའི་ཚུལ་ནི། སྤྱིར་འཇིག་རྟེན་གྱི་ཁམས་བསམ་གྱིས་མི་ཁྱབ་པར་གང་ལ་གང་འདུལ་གྱི་སྤྲུལ་པ་གྲངས་མེད་དུ་སྤྲུལ་ནས་འགྲོ་བའི་དོན་མཛད་ལ། བྱེ་བྲག་ཏུ་རིགས་དྲུག་གི་གདུལ་བྱ་རྣམས་ཀྱི་ངོ་ལ་སྤྲུལ་སྐུ་ཐུབ་པ་དྲུག་གི་ཚུལ་གྱིས་འདུལ་བར་མཛད། ཁྱད་པར་འཛམ་བུའི་གླིང་འདིར་སངས་རྒྱས་ཤཱཀྱ་ཐུབ་པ་དེ་ཉིད་ཀྱིས་ལྷ་དང་མིའི་ཡུལ་དུ་ཆོས་མདོ་སྔགས་ཀྱི་འཁོར་ལོ་རིམ་པ་གསུམ་བསྐོར་ཏེ། རྒྱུ་མཚན་ཉིད་ཀྱི་ཐེག་པ་འདུལ་བ་མདོ་སྡེ་མངོན་པ་སྟེ་སྡེ་སྣོད་རིན་པོ་ཆེ་རྣམ་པ་གསུམ་པོ་རྣམས་དང་། སྔགས་ཕྱི་པ་ཀྲི་ཡ་ཨུ་པ་ཡོ་ག་སྟེ་བྱ་སྤྱོད་རྣལ་འབྱོར་རྒྱུད་ལ་སོགས་པ་གསུངས་པ་སྟེ། དེ་ཡང་ཇི་སྐད་དུ། ཉོན་མོངས་འདོད་ཆགས་འདུལ་བའི་གཉེན་པོ་རུ། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་ཞེ་སྡང་འདུལ་བའི་གཉེན་པོ་རུ། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་གཏི་མུག་འདུལ་བའི་གཉེན་པོ་རུ། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །དུག་གསུམ་ཆ་མཉམ་འདུལ་བའི་གཉེན་པོ་རུ། སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །ཞེས་པ་ལྟར་རོ།།
༢༽རིག་འཛིན་བརྡ་བརྒྱུད།
གཉིས་པ་རིག་འཛིན་བརྡ་ཡིས་བརྒྱུད་པ་ཇི་ལྟར་བྱུང་བ་ནི། བཅོམ་ལྡན་འདས་ཤཱཀྱ་ཐུབ་པ་ཉིད་ཀྱིས་སྐུ་དང་གསུང་གི་གདུལ་བྱ་རྣམས་བཏུལ་ཟིན་ནས་། ཐུགས་ཀྱི་གདུལ་བྱ་རྣམས་འདུལ་བའི་དུས་ལ་བབས་པ་ན་མྱ་ངན་ལས་འདའ་ཁར་གསང་སྔགས་བླ་ན་མེད་པའི་བསྟན་པ་ཕྱིས་འབྱུང་བར་ལུང་བསྟན་ཏེ། གྲོང་ཁྱེར་རྩྭ་མཆོག་གྱད་སྟོབས་པོ་འབྱུང་བའི་གནས། ཤིང་སཱ་ལ་ཟུང་ཞིག་གི་དྲུང་དུ། སེང་གེའི་ཁྲི་ལ་གཟིམས་ཏེ། འཁོར་རྣམས་བསྡུས་པའི་ཚེ་རིགས་ཅན་དྲྭ་བ་ལྔ་ནི། སྟོན་པ་རྡོ་རྗེའི་སྐུ་ལ་སྐྱེ་འཆི་མེད་ཀྱིས། སྤྲུལ་པ་དབྱིངས་སུ་ཞི་བ་ཙམ་ལས། མྱ་ངན་ལས་མི་འདའ་བར་ཁོང་དུ་ཆུད་ནས། ནང་དུ་ཡང་དག་པར་འཇོག་གོ། །དེ་ལས་གཞན་པའི་འཁོར་ཕལ་ཆེར་འདུས་པ་ལ། སྟོན་པས་ཐེ་ཚོམ་ཡོད་ན་ད་ཆོད་ཅིག་ཅེས་བསྐུལ་བས། འཁོར་གྱི་ནང་ནས་རིག་འཛིན་གྱི་རྒྱལ་པོ་ཀུ་ཛ་ར་ཞེས་བྱ་བ་སྟན་ལས་ལངས་ཏེ་གསོལ་བ། ཁྱོད་ནི་ནམ་མཁའི་རང་བཞིན་ཏེ། །འདའ་དང་མི་འདའ་ཡོངས་མི་མངའ། །ཞེས་པ་ནས། མཉམ་པའི་ཐེག་པ་ཡོངས་མ་གསུངས། ཞེས་སྔར་འཁོར་གྱི་ནང་དུ་གསང་སྔགས་མ་གསུངས་པས། འཇིག་རྟེན་དུ་གསང་སྔགས་འབྱུང་ངམ་ཞེས་ཞུས་པའི་ལན་དུ་གསང་སྔགས་འབྱུང་བར་ལུང་བསྟན་པ་སྟེ། ང་ནི་འདི་ནས་མི་སྣང་ནས། །ལོ་ནི་བརྒྱད་དང་ཉི་ཤུའི་ཚེ། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་ཏེ། །རྒྱལ་པོ་ཛ་ཞེས་བྱ་བ་ལ། །སྔོན་ལྟས་བཟང་པོ་སྣང་བར་འགྱུར། དྲག་ཤུལ་ཅན་ཞེས་བྱ་བའི་རིར། །གྲོགས་ཀྱི་སེམས་ཅན་དམན་པའི་རིགས། །ལང་ཀའི་བདག་པོ་ལ་སོགས་པར། །ལག་ན་རྡོ་རྗེས་སྣང་བར་འགྱུར། །ཞེས་ལུང་བསྟན་ནས་སྐུ་མྱ་ངན་ལས་འདའ་ཚུལ་བསྟན། དེ་ནས་ལུང་བསྟན་པ་དང་མཐུན་པར་ནང་པ་བླ་མེད་ཀྱི་བསྟན་པ་བསྐྱེད་པ་མ་ཧཱ་ཡོ་གརྫོགས་པ་ཨ་ནུ་ཡོ་གརྫོགས་ཆེན་ཨ་ཏི་ཡོ་ག་གསུམ་བྱུང་སྟེ། ཆོས་མ་ཧཱ་ཡོ་གའི་རྒྱུད་རྣམས་སྟོན་པ་གཤེགས་ནས་ལོ་ཉི་ཤུ་རྩ་བརྒྱད་ན། རྒྱལ་པོ་ཛ་ཞེས་བྱ་བས་ཨ་སུ་ར་ཡི་བྲག་ཕུག་ཏུ་སྒྲུབ་པར་མཛད་ནས་བཞུགས་པ་ལ་རྨིས་ལྟས་བདུན་བྱུང་སྟེ། སྲོད་ཐུན་དང་པོ་ལ་རི་མ་ལ་ཡའི་རྩེ་ན་གསང་བའི་བདག་པོ་བྱོན་ཏེ་སྐུ་ལས་འོད་ཟེར་འཕྲོས་གདུལ་བྱའི་སེམས་ཅན་གྱི་སྒྲིབ་པ་སྦྱོང་། གསུང་ལས་ཆོས་ཀྱི་རང་སྒྲ་གྲགས། ཐུགས་ལས་རྡོ་རྗེ་འོདའཕྲོ་བ་ཞིག་བྱུང་བས་རྒྱལ་པོའི་ཐུགས་ཀར་ཐིམ་པ་དང་། ཉི་མའི་འོད་སྤྱི་བོ་ནས་ཐིམ། ཟླ་བའི་འོད་རྐང་པར་ཐིམ་པ། སྣང་སྲིད་ཐམས་ཅད་ལྟོ་བའི་ནང་དུ་ཆུད་པ་རྨིས། སྲོད་ཐུན་གཉིས་པ་ལ་དེ་བཞིན་གཤེགས་པ་ཐམས་ཅད་བཀའ་བགྲོས་མཛད་ཅིང་། ཉི་ཟླ་ལ་ཞོན་ནས་གསེར་གྱི་འཁོར་ལོ་བསྐོར་བ་རྨིས་པ་སོགས་རྨི་ལམ་ངོ་མཚར་བ་བདུན་རྨིས། དེའི་ཕྱི་ཉིན་རང་གི་ཁང་སྟེང་དུ་རིན་པོ་ཆེ་གསེར་གྱི་གླེགས་བམ་ལ་བཻཌཱུརྱ་ཞུན་མས་ཡི་གེར་བྲིས་པའི་གསང་སྔགས་རྒྱུད་སྡེའི་པུ་སྟི་མང་པོ་དང་། ཕྱག་རྡོར་གྱི་སྐུ་ཁྲུ་གང་པ་ཞིག་རྙེད་དོ། །དེར་གཟིགས་ཀྱང་དང་པོ་མ་མཁྱེན་ནས་གསོལ་བ་ཉིན་བདུན་བཏབ་པས་རྡོ་རྗེ་སེམས་དཔའ་ཞལ་མཐོང་གི་ལེའུ་ཤེས་ནས་དེ་དང་ཕྱག་རྡོར་གྱི་སྐུ་ལ་བརྟེན་ཏེ་སླར་ཡང་ཟླ་བ་དྲུག་ཏུ་བསྒྲུབས་པས། རྡོ་རྗེ་སེམས་དཔའི་ཞལ་དངོས་སུ་མཇལ་ནས་བྱིན་གྱིས་བརླབས་པས། ཏནྟྲ་ཆེན་པོ་སྡེ་བཅོ་བརྒྱད་པོའི་དོན་ཁོང་དུ་ཆུད་ནས་གསང་སྔགས་ཀྱི་དོན་ལ་མཁས་པར་གྱུར། ཕྱི་ནང་གསང་བའི་དོན་དབང་ཡང་ཐོབ་པས་རྒྱལ་པོ་འཁོར་དང་བཅས་པ་རྡོ་རྗེ་ལྟ་བུའི་ལུས་སུ་གྱུར། བཅོ་བརྒྱད་པོ་གང་ཞེ་ན། སྐུ་གསུང་ཐུགས་ཡོན་ཏན་ཕྲིན་ལས་ལྔའི་གཞི་དང་རྩ་བར་གྱུར་བའི་རྒྱུད་སྡེ་ཆེན་པོ་ལྔ་དང་། སྒྲུབ་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ་དང་། སྤྱོད་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ་དང་། མ་ཚང་བ་ཁ་སྐོང་བ་ཕྱི་མའི་རྒྱུད་གཉིས་དང་། ཐམས་ཅད་ཀྱི་བསྡུས་དོན་ལྟ་བུའི་རྒྱུད་སྡེ་གཅིག་དང་བཅོ་བརྒྱད་དོ། །དེ་ལྟ་བུའི་གླེགས་བམ་རྣམས་ཀྱི་དོན་མ་ལུས་པ་མཁྱེན་ཏེ་དེ་ལས་རིམ་པར་བརྒྱུད་ནས་རིམ་གྱིས་དར་རོ། །ལུང་ཨ་ནུ་ཡོ་གའི་བྱུང་ཚུལ་ནི། ཡང་དུས་དེའི་ཚེ་མི་དང་མི་མིན་གྱི་དམ་པའི་རིགས་ཅན་དྲ་མ་ལྔ་སྟེ་ལྷ་གྲགས་ལྡན་མཆོག་སྐྱོང་། ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། མི་ལིཙྪ་བཱི་དྲི་མེད་གྲགས་རྣམས་ཀྱིས་རི་མ་ལ་ཡའི་རྩེ་མོར་ཕྱོགས་བཅུའི་བུདྡྷཱ་ཐམས་ཅད་ཡིད་ལ་བྱས་ཏེ། ཀྱེ་མ་ཀྱི་ཧུད་ཀྱེ་མ་ཀློང་། །སྟོན་པའི་གསལ་བྱེད་འོད་ནུབ་ན། །འཇིག་རྟེན་མུན་པ་གང་གིས་སེལ། །ཞེས་པ་ལ་སོགས་པའི་གདུང་ཚིག་ཉེར་གསུམ་བཏོན་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་གསང་བའི་བདག་པོ་ཕྱག་ན་རྡོ་རྗེ་ལ་བསྐུལ་ཏེ། གསང་བའི་བདག་པོ་ཁྱོད་ཉོན་ཅིག །སྔོན་གྱི་གོ་ཆ་ཡལ་ལམ་ཅི། །ལོ་ཀའི་སྡུག་བསྔལ་མི་ཤེས་སམ། །སྙིང་རྗེས་ས་ལ་བབས་ནས་ཀྱང་། །ལོ་ཀའི་གདུང་བ་སེལ་བར་གྱིས། །ཞེས་བསྐུལ་བས། གསང་བདག་གིས་གསུངས་པར་ཞལ་གྱིས་བཞེས་ཏེ། ཐོག་མ་ཐ་མ་མེད་པ་རུ། །བདག་གིས་དམ་བཅའ་མི་འདོར་བའི། །སྐུལ་བའི་དུས་ནི་གང་བྱུང་བ། །བདག་ཀྱང་དེ་བཞིན་ཆོ་འཕྲུལ་སྣང་། །ཞེས་གསུངས་ནས་རི་མ་ལ་ཡའི་རྩེར་དམ་པའི་རིགས་ཅན་ལྔ་ལ་མདོ་དགོངས་པར་འདུས་པ་ལ་སོགས་པ་གསུངས། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་དུ་ལག་ན་རྡོ་རྗེའི་སྤྲུལ་པའི་སྐུ་དགའ་རབ་རྡོ་རྗེ་ནི། སྒྲ་ཐལ་འགྱུར་རྩ་བའི་རྒྱུད་ལས། ང་ནི་མྱ་ངན་འདས་འོག་ཏུ། །ནུབ་ཕྱོགས་ཨོ་རྒྱན་དག་གི་ཡུལ། །དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་སྟེ་བཛྲ་ཧེ། །འདིས་ནི་དམ་པའི་བསྟན་པ་འཛིན། །ཞེས་ལུང་བསྟན་པ་ལྟར་སྲས་མོ་མེ་ཏོག་གསལ་ཞེས་དགེ་སློང་མ་སྐྱོན་བྲལ་ཞིག་ཡོད་པ་ལ་དགའ་རབ་རྡོ་རྗེ་འཁྲུངས་པས། དགེ་སློང་མས་ཤིན་ཏུ་མི་རིགས་པར་མཐོང་ནས། ཕ་མེད་བུ་འདི་འཇིག་རྟེན་འདྲེ་བས་སུ། །འཇིག་རྟེན་བདུད་དམ་ཚངས་པ་ལ་སོགས་སམ། །སོགས་ནས། རྒྱལ་ཁམས་ཆོས་མེད་འདི་ནི་སུ་ལ་སྲིད། །ཅེས་སོགས་སྨྲེ་སྔགས་བཏོན་ནས་ཐལ་དོང་དུ་བསྐྱུར་ཀྱང་མ་ཉེས་པ་ལ་ངོ་མཚར་བས་རོ་ལང་ཐལ་མདོག་ཏུ་མཚན་གསོལ། ལོ་བདུན་ལོན་པ་ན་རྒྱལ་པོའི་མཆོད་གནས་སུ་པཎྜི་ཏ་ལྔ་བརྒྱ་ཡོད་པ་ལ་ཕྱག་མཛད་ཅིང་བགྲོ་གླེང་དང་བརྒལ་བརྟག་གི་རིམ་པ་མང་དུ་མཛད་པས། པཎྜི་ཏ་རྣམས་ཀྱི་སྤོབས་པ་བཅོམ་པས་ཞབས་སྤྱི་བོར་བླངས་ཤིང་བཀུར་སྟི་རྒྱ་ཆེན་པོས་མཆོད་ནས་པྲཛྙཱ་བྷ་བ་ཞེས་མཚན་གསོལ། རྒྱལ་པོ་དགའ་བས་དགའ་རབ་རྡོ་རྗེ་ཞེས་མཚན་བཏགས། དེ་ནས་ཐེག་པ་ཕྱི་ནང་གི་སྡེ་སྣོད་རྣམས་དང་། ཁྱད་པར་རང་བཞིན་རྫོགས་པ་ཆེན་པོ་ཤྭ་ལོ་ཀ་འབུམ་ཕྲག་དྲུག་ཅུ་རྩ་བཞི་ཐུགས་ལ་བཞུགས་པ་དེ་རྣམས་རྡོ་རྗེ་སེམས་དཔས་མངོན་སུམ་དུ་ཞལ་བསྟན་ནས་རིག་པ་སྤྱི་བླུགས་ཀྱི་དབང་གིས་མི་སློབ་པའི་ཡེ་ཤེས་མངོན་དུ་མཛད་པའི་ཚུལ་བསྟན་པ་སོགས་རྒྱས་པར་འོག་ནས་འབྱུང་། དེ་ལྟ་བུའི་དགའ་རབ་རྡོ་རྗེ་ལ་དཔལ་གསང་བའི་རྒྱུད་དང་མན་ངག་དང་། ཕུར་བ་དང་། མ་མོའི་རྒྱུད་ལ་སོགས་པ་གསུངས་ཏེ། ཨོ་རྒྱན་པདྨ་ཐོད་ཕྲེང་ཡིན་པ་དེ་ལ་བཀའ་བབས་ནས་རིམ་པར་དར། སློབ་དཔོན་པདྨ་འབྱུང་གནས་ནི། སྤྱིར་སངས་རྒྱས་ཀྱི་ཞིང་ཁམས་གྲངས་མེད་པ་ན། མདོ་སྟོན་པའི་སྟོན་པ་རེ་དང་། སྔགས་སྟོན་པའི་སློབ་དཔོན་རེར། སྤྲུལ་པ་ཡང་སྤྲུལ་དང་བཅས་པ་འབྱུང་བ་ཡིན། སངས་རྒྱས་བཅོམ་ལྡན་འདའ་སྐུ་མྱ་ངན་ལས་འདས་ཁར་ང་ནི་ཡོངས་སུ་མྱ་ངན་འདས་འདའོ། །ཁྱོད་རྣམས་མྱ་ངན་མ་བྱེད་ཅིག །མདངས་ལྡན་དྲི་མེད་མཚོ་དཀྱིལ་ནས། །ང་ལས་ལྷག་པའི་སྐྱེས་བུ་འབྱུང་། །ཞེས་དང་། དབུས་འགྱུར་འཆང་ལུང་བསྟན་པའི་མདོ་ལས། ང་ནི་འདི་ནས་མི་སྣང་ནས། །ལོ་ནི་བཞི་གཉིས་ལོན་པ་ན། །དྷ་ན་ཀོ་ཤའི་མཚོ་གླིང་དུ། །པདྨ་གེ་སར་སྡོང་པོ་ལས། །ཀུན་ལས་ལྷག་པའི་སྐྱེས་བུ་འབྱུང་། །ཞེས་དང་། བླ་མེད་དོན་རྫོགས་འདུས་པའི་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་བཅུ་རུ་གཉིས་ཆད་ན། །ཨོ་རྒྱན་ཡུལ་དུ་ང་ཉིད་འབྱུང་། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པའི་བདག་པོར་འགྱུར། །ཞེས་དང་། འཇམ་དཔལ་སྒྱུ་འཕྲུལ་དྲྭ་བ་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །ཞེས་སོགས་མདོ་རྒྱུད་དུ་མ་ནས་ལུང་བསྟན་པ་ལྟར། ལྷོ་ནུབ་འོ་མ་ཅན་གྱི་མཚོ་ནས། པདྨའི་སྡོང་པོ་ལས་རྫུས་ཏེ་འཁྲུངས་ཤིང་། སྐུ་གཅིག་ལ་མཚན་དང་དོན་ཐ་དད་པའི་མཛད་པ་རྣམ་གྲངས་བརྒྱད་དུ་སྟོན་པར་མཛད་ནས། རྒྱུད་སྡེ་སྤྱི་དང་ཁྱད་པར་ཡོ་ག་རྣམ་པ་གསུམ་གྱི་རྒྱུད་སྡེའི་ངེས་གསང་ཐམས་ཅད་ཐུགས་ཀྱི་དཔལ་བེའུ་ལ་འཁྱིལ་ནས། སྒྲུབ་ཐབས་དང་མན་ངག་གི་ནུས་པ་ཐམས་ཅད་དྭངས་བཅུད་དུ་དྲིལ་ནས་མ་འོངས་པའི་གདུལ་བྱར་རྗེས་སུ་དགོངས་ནས་ཟད་མེད་གཏེར་གྱི་བསྟན་པ་དར་བར་མཛད་པ་དེ་ཉིད་ཡིན། ཁྱད་པར་མན་ངག་ཨ་ཏི་ཡོ་གའི་བསྟན་པ་བྱུང་ཚུལ་ནི། དང་པོ་ལྷའི་ཡུལ་དུ་དར་ཏེ། དེ་ཡང་སུམ་ཅུ་རྩ་གསུམ་ལྷའི་གནས་ན་ལྷ་དེ་བ་བཟང་སྐྱོང་ལ་ཡིད་ལས་སྐྱེས་པའི་བུ་ལྔ་བརྒྱ་ཙམ་ཡོད་པའི། ཆེ་བ་ཀུན་དགའ་སྙིང་པོ་ཞེས་བྱ་བ་སྐྱེས་ཟླ་གཞན་ལས་བློ་གྲོས་དང་སྒྱུ་རྩལ་ཁྱད་པར་འཕགས་པ་ཞིག་བྱུང་སྟེ། བསམ་གཏན་གྱི་ཁང་པ་ན་གཅིག་པུར་སྡོད་ཅིང་རྡོ་རྗེའི་བཟླས་པ་བྱེད་པ་ལ་དགའོ། །དེ་ལ་ལྷའི་བུ་སེམས་ལྷག་ཅན་ཞེས་གྲགས་སོ། །ལྷའི་བུ་དེ་ལ་ཆུ་མོ་གླང་གི་ལོར་རྨི་ལྟས་རྣམ་པ་བཞི་རྨིས་ཏེ། སངས་རྒྱས་ཐམས་ཅད་དམ་སརྦ་བུདྡྷས་འོད་ཟེར་ཕྱོགས་བཅུར་འཕྲོས་ཏེ། འོད་ཟེར་གནས་འགྱུར་བའི་རིགས་དྲུག་འདུལ་བའི་བཅོམ་ལྡན་འདས་ཐུབ་པ་དྲུག་གིས་སེམས་ཅན་ལ་བསྐོར་བ་བྱས་ཏེ་དབུ་གཙུག་ཏུ་ཐིམ་པ་རྨིས། གཉིས་པ་ལ་ཚངས་པ་དང་། ཁྱབ་འཇུག་དང་། གུ་ལང་སྟེ་ལྷ་དབང་ཕྱུག་ཆེན་པོ་དང་གསུམ་ཁྱུར་མིད་བྱས་པ་རྨིས། གསུམ་པ་ལ་ནམ་མཁའི་ཉི་ཟླ་གཉིས་རང་གི་ལག་ཏུ་བྱུང་ནས་འཇིག་རྟེན་ཐམས་ཅད་དམ་ལོ་ཀ་སརྦ་འོད་ཀྱིས་གང་བ་རྨིས། བཞི་པ་ལ་ནམ་མཁར་སྤྲིན་རཏྣའི་ཁ་དོག་ཅན་ལས་བདུད་རྩིའི་ཆར་བབས་ཏེ་རྩི་ཐོག་དང་། ནགས་ཚལ་དང་། རིན་པོ་ཆེའི་མྱུ་གུ་དང་། མེ་ཏོག་དང་། འབྲས་བུ་ཐམས་ཅད་དུས་གཅིག་ལ་རྒྱས་པ་རྨིས། ནངས་པར་ལྷའི་དབང་པོ་ལ་བཟླས་པས། ལྷའི་དབང་པོ་ཀོའུ་ཤི་ཀ་སྟེ་བརྒྱ་བྱིན་གྱིས་བསྟོད་པ། ཨེ་མ་ཧོ། སྙིང་པོ་རྩོལ་མེད་བསྟན་པ་འབྱུང་བའི་དུས། །རྒྱལ་བའི་སྤྲུལ་པ་དུས་གསུམ་བྱང་ཆུབ་སེམས། །ས་བཅུའི་དབང་ཕྱུག་ལོ་ཀའི་སྒྲོན་མེ་མཆོག །ལྷ་གནས་རྒྱན་གྱུར་ཁྱེད་ནི་ངོ་མཚར་ཆེ། །ཞེས་གསུངས་སོ། །རྨི་ལམ་དང་པོ་ནི། སངས་རྒྱས་ཐམས་ཅད་ཀྱི་དགོངས་པ་ལོན་ཏེ་རྒྱལ་བའི་རྒྱལ་ཚབ་བྱེད་པའི་རྟགས་སོ། །གཉིས་པ་ནི་བདུད་ཐམས་ཅད་དབང་དུ་བསྡུས་ཤིང་དུག་གསུམ་རྩད་ནས་གཅོད་པའི་རྟགས་སོ། །གསུམ་པ་ནི་གདུལ་བྱའི་བློ་མུན་སེལ་ཞིང་བསྟན་པའི་སྒྲོན་མེ་བྱེད་པའི་རྟགས་སོ། །བཞི་པ་ནི་རང་བྱུང་ཨ་ཏིའི་ཆོས་ཀྱི་བདུད་རྩིའི་ཆུས་ཉོན་མོངས་པའི་ཚ་གདུང་སེལ་ཞིང་། རྩོལ་མེད་འབྲས་བུ་ཨ་ཏིའི་ཐེག་པ་ལྷུན་གྱིས་གྲུབ་པའི་རྟགས་སོ། །ཡང་ཕྱོགས་བཅུའི་དུས་གསུམ་སངས་རྒྱས་ཐམས་ཅད་འདུས་ནས། དེ་ཐམས་ཅད་ཀྱི་གཉིས་སུ་མེད་པའི་གསུང་གིས་དཔལ་རྡོ་རྗེ་སེམས་དཔའ་ལ་བསྐུལ་ལོ། །ཇི་ལྟར་བསྐུལ་ན་རིན་ཆེན་འཕྲུལ་གྱི་ཐབས་ལྡན་པ། །གདུལ་བྱའི་གང་འདོད་སྒོ་ཕྱེ་ནས། །རྩོལ་མེད་དབྱིག་དང་ལྡན་པར་མཛོད། །ཅེས་བསྐུལ་བས་ཤྲཱི་བཛྲ་ས་ཏྭའམ་དཔལ་རྡོ་རྗེ་སེམས་དཔའི་ཐུགས་ཀ་ནས་རིན་པོ་ཆེ་རང་འབར་གྱི་འཁོར་ལོ་བྱུང་སྟེ། སེམས་དཔའ་རྡོ་རྗེ་ལ་གཏད་དེ་དཔལ་རྡོ་རྗེ་སེམས་དཔས་འདི་སྐད་དོ། །གཉིས་མེད་ཡེ་ཤེས་གསང་བའི་དོན། །བྱར་མེད་རྩོལ་མེད་ཡེ་སངས་རྒྱས། །དབུ་མ་ཆེན་པོ་གྲགས་པའི་ལམ། །འདུས་པའི་འཁོར་ལ་བསྟན་པར་གྱིས། །ཞེས་བསྐུལ་བས་སེམས་དཔའ་རྡོ་རྗེས་བཤད་པར་དམ་བཅས་པ། བཛྲ་ས་ཏྭ་ནམ་མཁའ་ཆེ། །ཚིག་སྤྱོད་ཡུལ་མ་ཡིན་པ་ལ། །བདག་གིས་སྒྲོགས་པར་ཤིན་ཏུ་དཀའ། །མ་རྟོགས་པ་ལ་ཚིག་སྒོ་ནས། །མཚོན་པས་རྟོགས་པར་བྱ་བའི་ཕྱིར། །ཅི་རིགས་པ་ཡིས་རྣལ་འབྱོར་སྒྲོལ། །ཞེས་ཞལ་གྱིས་བཞེས་ནས། དེའི་ཚེ་ཕྱག་ན་རྡོ་རྗེས་དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་དང་མི་འགལ་བར་བྱ་བའི་ཕྱིར། དུས་གསུམ་སངས་རྒྱས་ཐམས་ཅད་རིགས་ལྔའི་ངོ་བོར་བཞུགས་པ་ལ། གཞི་འབྲས་ཀྱི་དོན་ཐམས་ཅད་ཐེ་ཚོམ་བཅད་དེ་རིགས་ལྔའི་དགོངས་པ་ཉམས་སུ་བླངས་པའི་ཕྱིར་དུ་ཤར་ཕྱོགས་སུ་རྡོ་རྗེ་སྣང་བའི་ཞིང་དུ་དེ་བཞིན་བཤེགས་པ་རྡོ་རྗེ་གསང་བ་ཞེས་བྱ་བ་རྡོ་རྗེའི་བྲག་སྟེང་ན་བཞུགས་པ་དེ་ལ་སོགས་པ་རྡོ་རྗེའི་རིགས་མི་ཕྱེད་པའི་འཁོར་རྣམས་དང་། ལྷོ་ཕྱོགས་ལོ་ཀའི་ཁམས་རིན་པོ་ཆེའི་སྣང་བར་ཏ་ཐཱ་ག་ཏ་སྟེ་དེ་བཞིན་གཤེགས་པ་རིན་པོ་ཆེའི་ཞབས་རིན་ཆེན་འབྱུང་ལྡན་ཞེས་བྱ་བ། རིན་པོ་ཆེ་རང་སྣང་འབར་བའི་ཁྲི་ལ་བཞུགས་ཏེ་ཉིད་ཀྱི་འཁོར་ལ་སོགས་པ་རཏྣའི་རིགས་རྣམས་དང་། ནུབ་ཕྱོགས་པདྨ་བརྩེགས་པའི་ཞིང་ཁམས་ཞེས་བྱ་བ་ན་བྷ་ག་ཝཱན་ཏེ་བཅོམ་ལྡན་འདས་པདྨའི་འོད་ཅེས་བྱ་བ། དྲི་མ་མེད་པ་པདྨའི་གདན་ལ་བཞུགས་པ་ལ་སོགས་པདྨའི་རིགས་འཁོར་ཚོགས་བསམ་གྱིས་མི་ཁྱབ་པ་དང་བཅས་པ་རྣམས་དང་། བྱང་ཕྱོགས་རྣམ་དག་གྲུབ་པ་ཞེས་བྱ་བའི་འཇིག་རྟེན་ན། ཏ་ཐཱ་ག་ཏ་སྟེ་དེ་བཞིན་གཤེགས་པ་དོན་ཡོད་གྲུབ་པར་སྣང་བ་ཞེས་བྱ་བ། རྒྱ་གྲམ་གྱི་རང་བཞིན་སྣང་བ་ཞེས་བྱ་བའི་གདན་ལ་བཞུགས་པ་ལ་སོགས་པ་ལས་ཀྱི་རིགས་མཐའ་ཡས་པ་དང་། དབུས་ཕྱོགས་མཐའ་དང་བྲལ་བའི་ཞིང་ཁམས་སུ། ཏ་ཐཱ་ག་ཏ་ཤྲཱི་བེེ་རོ་ཙ་ན་སྟེ་དེ་བཞིན་གཤེགས་པ་རྣམ་པར་སྣང་མཛད་དེ་ཉིད། འཁོར་ལོའི་གདན་ལ་བཞུགས་པ་ལ་སོགས་པ་དེ་བཞིན་རིགས་ཀྱི་རྒྱལ་བ་མང་པོ་རྣམས་ལས། རྨད་བྱུང་བསྟན་པའི་སྙིང་པོ་རྩོལ་མེད་རང་བྱུང་གི་དགོངས་པ་རྒྱུ་འབྲས་ལས་འདས་པའི་ཆོས་ཨ་ཏི་ཡོ་གའི་དོན་རྣམས་སྒྲོ་འདོགས་བཅད་ཅིང་། ཐེ་ཚོམ་དང་བྲལ་བའི་ལྟ་བའི་གདེང་རྙེད། སྤྱོད་པའི་ཐབས་ཤེས། སྒོམ་པའི་ཀློང་དུ་གྱུར། འབྲས་བུ་ལ་རག་མ་ལུས། ལམ་ལ་རིམ་པ་མེད་པའི་གདེང་རྙེད་དེ་རྒྱལ་བ་ཐམས་ཅད་ཀྱི་དགོངས་པའི་བཅུད་བླངས་ནས། སུམ་ཅུ་རྩ་གསུམ་གྱི་གནས་རྣམ་པར་རྒྱལ་བའི་ཁང་བཟང་གི་དབུ་རྩེའི་སྲོག་ཤིང་རྡོ་རྗེ་རྩེ་དགུ་པ་དང་བཅས་པའི་དབུས་ཁང་ན་ལྷའི་བུ་སེམས་ལྷག་ཅན་ཡོད་པ་དེ་ལས་དང་སྐལ་བར་ལྡན་པར་མཁྱེན་ཏེ་མདུན་དུ་བྱོན། སྲོག་ཤིང་གི་རྡོ་རྗེ་རྩེ་དགུ་པའི་སྟེང་དུ་རིན་པོ་ཆེར་འབར་བའི་ཁྲི་བཤམས་པའི་ཁར་ཕྱག་ན་རྡོ་རྗེ་བཞུགས། རཏྣ་སྣ་ཚོགས་ལས་གྲུབ་པའི་གདུགས་ཕུབ། ལྷ་རྫས་ཀྱི་མཆོད་པ་མང་པོས་མཆོད་དེ། ལྷའི་བུ་སེམས་ལྷག་ཅན་ལ་རྒྱལ་ཐབས་སྤྱི་བླུགས་རྫོགས་པའི་དབང་བརྡའི་སྒོ་ནས་བསྐུར། མན་ངག་འཕྲུལ་གྱི་ལུང་བཅུ་ཕོགལྷུན་གྲུབ་གསུམ་གྱི་དབང་བསྐུར་ནས། སྐུ་གསུམ་ཐུགས་ཕྲད་ཀྱི་མན་ངག་བྱིན། སྐུ་གསུམ་མམ། ཐིག་ལེ་ཆེན་པོའི་དབང་བསྐུར་ནས། །སེམས་ཉིད་འགྱུར་མེད་ཀྱི་མན་ངག་བྱིན། །མི་འགྱུར་བརྟན་པའི་དབང་སྐུར་ནས། །སྤྱོད་ལམ་རིག་པའི་མན་ངག་བྱིན། །རིག་པ་སྤྱི་བླུགས་ཀྱི་དབང་བསྐུར་ནས། །ཡེ་ཤེས་ངོས་བཟུང་གི་མན་ངག་བྱིན། །གཉིས་མེད་འབྲེལ་བའི་དབང་བསྐུར་ནས། །ཕྱག་རྒྱ་ཆེན་པོའི་མན་ངག་བྱིན། རྡོ་རྗེ་ལུང་གི་དབང་བསྐུར་ནས། །རྒྱལ་ཚབ་བསྒོམ་པའི་མན་ངག་བྱིན་པ་ལ་སོགས་གཞན་དབང་བདུན་མན་ངག་ལྔ་དང་། ཏནྟྲ་སྟེ་རྒྱུད་སྡེ་དང་མན་ངག་མང་པོ་དུས་མཐའི་སྐད་ཅིག་ལ་རྫོགས་པར་བསྟན་ནས། རྒྱལ་ཚབ་དམ་པར་དབང་བསྐུར་ཏེ། ལྷའི་བུ་སེམས་ལྷག་ཅན་ལ། གཡས་སུ་རྡོ་རྗེ་རྩེ་ལྔ་གཏད། གཡོན་དུ་གསེར་གྱི་ཕྱག་ཤིང་རིན་པོ་ཆེའི་འཁོར་ལོ་ཅན་གཏད། སྤྱི་བོར་རིན་པོ་ཆེའི་དབུ་རྒྱན་བསྐོན་ནས། གསང་མཚན་རྡོ་རྗེ་བཞེད་པ་རྩལ་དུ་གསོལ་ཏེ། ཁྱེད་ཀྱིས་རྒྱལ་ཐེབས་གྱིས་ལ་གསང་སྔགས་ཨ་ཏིའི་ཆོས་འདི་མི་ཡུལ་དུ་སྒྲོགས་གསུངས་ཏེ། རྨད་བྱུང་བསྟན་པའི་སྙིང་པོ་འདི། །ལྷ་གནས་གསུམ་དུ་གྲགས་གྱུར་ནས། །ཡང་སྤྲུལ་གང་ཟག་ཐུགས་སྲས་ཀྱིས། །འཛམ་གླིང་དབུས་སུ་རྒྱས་པར་ཤོགཅེས་གསུངས་ཏེ་བསྟན། དེ་ནས་ལྷའི་བུ་སེམས་ལྷག་ཅན་གྱིས་ཕྱོགས་བཅུའི་སངས་རྒྱས་ཐམས་ཅད་ཀྱི་དགོངས་པ་དང་མི་འགལ་བའི་ཕྱིར་དུ་ཐེ་ཚོམ་གྱི་དྲ་བ་ཐམས་ཅད་བཅད་ནས། དེ་ལྟར་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱི་ངེས་དོན་གྱི་གདམས་ངག་ཁོང་དུ་ཆུད་ཅིང་། རྟོགས་པ་མངོན་དུ་གྱུར་ཏེ་སངས་རྒྱས་པ་ཡིན། དེ་ནས་སྔོན་གྱི་གནས་རྗེས་སུ་དྲན་ནས། སུམ་ཅུ་རྩ་གསུམ་ལྷའི་གནས་ཀྱི་ཤར་ཕྱོགས་མངོན་པར་དགའ་བའི་ཕུག་ཏུ་ཕྱིན་པ་སོགས་མཛད་ནས། བསྟན་པ་ལྷ་གནས་གསུམ་དུ་རྒྱས་པར་གྱུར་ཏོ། །དེ་ནས་མི་ཡུལ་དུ་བྱུང་བའི་ལོ་རྒྱུས་ནི། ལྷའི་དབང་པོ་བརྒྱ་བྱིན་གྱིས་འཛམ་གླིང་དུ་འབྱོན་དགོས་ཚུལ་ཞུས་པ་ལྟར་བྱ་ངང་པ་གསེར་གྱི་མདོག་ཅན། ལྕགས་ཀྱི་སྡེར་མོ་ཅན། དངུལ་གྱི་གཤོག་པ་ཅན། གཡུའི་སྨིན་མ་ཅན། རིན་པོ་ཆེ་སྣ་ཚོགས་ཀྱི་མིག་ཅན་གཅིག་ཏུ་སྤྲུལ་ནས་གཤེགས་པའི་ལོ་རྒྱུས་ཡོད་དེ། རྒྱ་གར་ནུབ་ཕྱོགས་ཨོ་རྒྱན་མཁའ་འགྲོ་མའི་ཡུལ། དྷ་ན་ཀོ་ཤའི་གླིང་། མཚོ་ཀུ་ཏྲའི་འགྲམ། རྡོ་རྗེ་གླིང་ཕུག་གི་གནས། མེ་ཏོག་བཀྲ་བའི་ཚལ་ཉམས་དགའ་བ་དེ་ན། ཡབ་རྒྱལ་པོ་ཨུ་པ་རཱ་ཛ་དང་། ཡུམ་སྣང་གསལ་འོད་ལྡན་མ་གཉིས་ལ། སྲས་མོ་མེ་ཏོག་གསལ་ཞེས་བྱ་བ་མཚན་དང་ལྡན་པ། དགེ་སེམས་དང་བྱང་སེམས་ལྷག་པར་ཆེ་བ། གཡོ་སྒྱུ་དང་བག་མེད་སྤངས་ཏེ་རབ་ཏུ་བྱུང་བ་དགེ་སློང་མའི་ཁྲིམས་སྐྱོན་བྲལ་རྣམ་པར་དག་པ་སྲུང་ཞིང་དགེ་སློང་མ་ལྔ་བརྒྱའི་འཁོར་དང་བཅས་ནས་གནས་པ་ལ། ཤིང་མོ་གླང་གི་ལོ་དབྱར་ཟླ་ར་པའི་ཚེས་བརྒྱད་ཀྱི་ཐོ་རེངས་རྨི་ལམ་ན། ཏ་ཐཱ་ག་ཏ་ཐམས་ཅད་ལས་འོད་ཟེར་འཕྲོས་ཏེ་ཉི་ཟླ་གཉིས་སུ་གྱུར་པ། ཉི་མ་སྤྱི་བོ་ནས་མར་ཐིམ། ཟླ་བ་རྐང་མཐིལ་ནས་ཡར་ཐིམ་པ་རྨིས། ནངས་པར་རྟོགས་པ་སྐྱེས་ཏེ་མཚོ་ཀུ་ཏྲའི་འགྲམ་དུ་ཁྲུས་བྱས་ནས་འདུག་པ་ལ། ཕྱག་ན་རྡོ་རྗེ་བྱའི་རྒྱལ་པོ་ངང་པ་ཞིག་ཏུ་སྤྲུལ་ནས་སེམས་ལྷག་ཅན་ཡི་གེ་ཧཱུྃ་དུ་བསྡུས་ནས་སྤྲུལ་པ་ལ་ངང་པ་བཞིར་སྤྲུལ། ནམ་མཁའ་ལས་བབས་ཏེ་ཁྲུས་བྱས་ནས་གསུམ་སླར་ནམ་མཁའ་ལ་འཕུར། གསང་བདག་གི་སྤྲུལ་པའི་བྱ་དེས་སྲས་མོའི་ཐུགས་ཀར་མཆུ་ལན་གསུམ་གཏུགས་ནས་ཧཱུྃ་འོད་འབར་བ་ཞིག་ཐུགས་ཀར་བསྟིམས་ཏེ་འཕུར་སོང་། དེར་མོ་ཡ་མཚན་སྐྱེས་ཏེ་ཡབ་དང་འཁོར་རྣམས་ལ་ལོ་རྒྱུས་བསྙད་པས། ཡབ་རྒྱལ་པོ་ཡ་མཚན་ཞིང་དགྱེས་ཏེ་སངས་རྒྱས་ཀྱི་སྤྲུལ་པ་ཞིག་འབྱུང་ངམ་གསུངས། བྱ་དགའ་དང་རིམ་གྲོ་ཆེར་མཛད། དེར་སྦྲུམ་པའི་རྣམ་པ་མེད་པར་ལོ་དུས་ན་ཡུམ་གྱི་ཐུགས་ཀ་ནས་རྡོ་རྗེ་རྩེ་དགུ་འོད་འབར་བ་ཞིག་བྱུང་སྟེ་ཞུ་བ་ལས་ཁྱེའུ་ཆུང་མཚན་དཔེས་བརྒྱན་པ་ཕྱག་གཡས་པ་རྡོ་རྗེ་དང་གཡོན་རིན་པོ་ཆེའི་ཕྱག་ཤིང་ཐོགས་པ། རྡོ་རྗེ་སེམས་དཔའ་ནམ་མཁའ་ཆེ་ལ་སོགས་པ་རྒྱུད་སྡེ་མང་པོ་རང་བྱུང་གིས་ཞལ་འདོན་དུ་མཛད་པ་ཞིག་བྱུང་ངོ་། །དེར་ཐམས་ཅད་དགྱེས་ནས་བྲམ་ཟེ་མཚན་མཁན་ལ་བསྟན་པས། བྲམ་ཟེ་ཤིན་ཏུ་ངོ་མཚར་བར་གྱུར་ཏེ། འདི་ནི་སྤྲུལ་པའི་སྐུ་ཐེག་པ་མཆོག་གི་བསྟན་པའི་བདག་པོ་ཞིག་འབྱུང་བར་འདུག་ཟེར་རོ། །ཐམས་ཅད་དགའ་བའི་རབ་ཏུ་གྱུར་ཅིང་ཕྱག་ན་རྡོ་རྗེ་བསྣམས་པས་མཚན་ཡང་དགའ་རབ་རྡོ་རྗེ་ཞེས་བཏགས། ཐམས་ཅད་ཀུན་དགྱེས་པས་དགྱེས་པ་རྡོ་རྗེ། བཞད་པས་བཞད་པ་རྡོ་རྗེར་བཏགས། ཆོས་ཀྱི་རྒྱལ་སྲིད་བཟུང་བ་ལ་ཕྱག་ན་རྡོ་རྗེ་མངོན་སུམ་དུ་བྱོན་ཏེ། རྒྱལ་ཐབས་སྤྱི་བླུགས་རྫོགས་པ་ལ་སོགས་པའི་དབང་རྣམས་བསྐུར། ཀློང་དགུ་བམ་པོ་ཉི་ཁྲི་ལ་སོགས་པ་རྒྱུད་དང་མན་ངག་ཐམས་ཅད་དུས་མཐའི་སྐད་ཅིག་ལ་རྫོགས་པར་མཛད། དགའ་རབ་རྡོ་རྗེ་དེ་ཉིད་ལ་བསྟན་པའི་བདག་པོར་དབང་བསྐུར། དམ་ཅན་ཆོས་སྐྱོང་བའི་སྲུང་མ་རྣམས་ལ་སྤྲུལ་བའི་སྐུ་འདི་ཡི་གྲོགས་མཛོད་ཅིག་ཅེས་བསྟན་པའི་སྲུང་མར་གཉེར་གཏད་ཅིང་བསྐོས་སོ། །དེར་དགའ་རབ་རྡོ་རྗེ་ཉིད་རྩོལ་མེད་རྫོགས་པ་ཆེན་པོའི་ས་ལ་སྐད་ཅིག་གིས་སངས་རྒྱས་སོ། །དེ་ནས་ཡང་། སྒྲ་ཐལ་འགྱུར་རྩ་བའི་རྒྱུད་ལས། །དེ་ཡི་རྗེས་འཛིན་ནུབ་ཀྱི་ཕྱོགས། །བྲམ་ཟེའི་ཕྲུ་གུ་སྐལ་ལྡན་པ། །མཉྫུ་ཤྲཱི་པ་ཏི་ཞེས། །ལོ་ནི་བདུན་བཅུ་རྩ་ལྔར་འཛིན། །ཞེས་པ་ལྟར། དེའི་དུས་ན་རྒྱ་གར་འཕགས་པའི་ཡུལ་མ་གྷ་དྷ་རྡོ་རྗེ་གདན་གྱི་ནུབ་ཕྱོགས་ན་ཕ་ཡབ་བྲམ་ཟེ་བདེ་སྐྱོང་དང་མ་ཡུམ་བྲམ་ཟེ་མོ་ཀུ་ཧ་ན་ཞེས་བྱ་བ་གཉིས་ལ་འཕགས་པ་འཇམ་དཔལ་གྱི་སྤྲུལ་པའི་བུ་བྲམ་ཟེ་སྙིང་པོ་གྲུབ་པའམ་བདེ་མཆོག་སྙིང་པོ་ཞེས་བྱ་བ་ཞིག་ཡོད་པ་ཕྱིས་ནང་བའི་ཆོས་སྒོར་ཞུགས་ཏེ་རབ་ཏུ་བྱུང་ནས་པཎྜི་ཏ་ལྔ་བརྒྱའི་གཙོ་བོར་གྱུར་ཅིང་། སློབ་དཔོན་འཇམ་དཔལ་བཤེས་གཉེན་ཞེས་གྲགས་པ་ལ། འཕགས་པ་འཇམ་དཔལ་གྱིས་ལུང་བསྟན་ཏེ་འདི་ནས་ནུབ་ཕྱོགས་ཨོ་རྒྱན་གྱི་ཡུལ་མཚོ་ཀུ་ཏྲའི་འགྲམ་དུར་ཁྲོད་གསེར་གླིང་ཧེ་ཆེན་བརྡལ་བའི་དབུས་རྡོ་རྗེ་གླིང་ཕུག་གི་གནས་ན། རྡོ་རྗེ་སེམས་དཔའི་སྤྲུལ་པས་སངས་རྒྱས་ཐམས་ཅད་ཀྱི་རྩོལ་མེད་བསྟན་པའི་བདག་པོ། རྒྱལ་བ་ཐམས་ཅད་ཀྱིས་དབང་བསྐུར་བ། སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བ་བཞུགས་ཀྱི། ཁྱོད་དེ་རུ་སོང་ལ་རྨད་བྱུང་བསྟན་པའི་སྙིང་པོ་ཨ་ཏི་ཡོ་ག་ཞེས་བྱ་བ་རྩོལ་མེད་དུ་འཚང་རྒྱ་བའི་ཆོས་ཡོད་པ་དེ་ཞུས་ལ་སྤྲུལ་བའི་སྡུད་པ་པོ་ཡང་གྱིས་ཤིག་ཅེས་ལུང་བསྟན་པས། འཇམ་དཔལ་བཤེས་གཉེན་གྱིས་པཎྜི་ཏ་གཞན་རྣམས་ལ། ནུབ་ཕྱོགས་ཨོ་རྒྱན་གྱི་ཡུལ་ན་རྒྱུ་འབྲས་ལས་འདས་པའི་ཆོས་སྟོན་པ་ཞིག་ཡོད་པར་འདུག་པས་དེ་ཚར་གཅོད་པ་ལ་འདོང་དགོས་གསུངས་ནས་གྲོས་བྱས་ཏེ། ཐུ་བོ་རཱ་ཛ་ཧསྟི་ལ་སོགས་པ་བདུན་གྱིས་ཨོ་རྒྱན་གྱི་གནས་བགྲོད་དཀའ་བར་བྱོན། རྒྱུ་དང་འབྲས་བུ་གསང་སྔགས་ཕྱི་ནང་གི་ཆོས་གང་ནས་བརྩད་ཅིང་བགྲོ་གླེང་བྱས་ཀྱང་དགའ་རབ་རྡོ་རྗེ་མ་ཐུབ་ནས། འཇམ་དཔལ་བཤེས་གཉེན་གྱིས་གྲོགས་རྣམས་ལ་སྤྲུལ་པའི་སྐུ་ལ་རྒྱུ་འབྲས་ལས་འདས་པའི་ཆོས་ཞུའམ་ཞེས་དྲིས་པས། ཐུ་བོ་རཱ་ཛ་ཧསྟིས་ནི་ཞུ་བར་སྙམ་ཡང་འོ་སྐོལ་གྱིས་བརྙས་པ་བྱས་པས་ཞུ་མི་སྤོབས་ཟེར། ལ་ལ་ནི་འོ་ཅག་ཀྱང་ངེས་པར་འགྱུར་བས་ཞུའོ་ཟེར། བཤགས་པ་བྱེད་པར་གྲོས་བྱས་ནས། ལ་ལས་ནི་ཕྱག་དང་བསྐོར་བ་བྱས། ལ་ལས་ནི་ངུ་ཞིང་མཆི་མ་བྱུང་། འཇམ་དཔལ་བཤེས་གཉེན་གྱིས་ཕྱག་བཙལ་ནས་སྨྲེ་སྔགས་བཏོན། སྤྲུལ་བའི་སྐུ་ལ་བདག་གིས་བརྙས་པ་ཤོར། རྩོད་པའི་ཚིག་མང་པོ་བྱུང་རྒྱལ་དུ་སྨྲས་པས། རང་གི་ལྕེ་འདི་བཅད་ལ་བཤགས་པ་བྱ་དགོས་སྙམ་སྤུ་གྲི་བཙལ་བ་ན། སྤྲུལ་པའི་སྐུས་དགོངས་ཏེ་ཁྱོད་ཀྱི་ལྕེ་བཅད་པས་སྡིག་པ་མི་འདག་གིས་རྒྱུ་འབྲས་ཀྱི་ཆོས་ལས་ཁྱད་པར་དུ་འཕགས་པའི་ཆོས་ཞིག་རྩོམས་ཤིགདེས་འདག་པར་འགྱུར་རོ་གསུངས་ཏེ། ལས་དང་སྐལ་བར་མི་ལྡན་པ་རྣམས་ནི་སླར་ལོགའཇམ་དཔལ་བཤེས་གཉེན་ནི་བརྡ་བསྟན་པ་ཙམ་ལ་སྐད་ཅིག་གིས་རྟོགས་གྲོལ་དུས་མཉམ་པར་གྱུར་ནས་རྟོགས་པས་ཆོས་ཐམས་ཅད་ཁོང་དུ་ཆུད། བསྟན་པ་ཡོངས་སུ་རྫོགས་ཕྱིར་རྒྱལ་ཐབས་སྤྱི་བླུགས་ཀྱི་དབང་བསྐུར། ཀློང་དགུ་བམ་པོ་ཉི་ཁྲི་ལ་སོགས་པ་རྒྱུད་དང་མན་ངག་ཐམས་ཅད་ཡོངས་སུ་རྫོགས་པར་གཏད། འཇམ་དཔལ་བཤེས་གཉེན་ཞེས་མཚན་བཏགས། དེ་ནས་སྤྲུལ་པའི་སྐུ་དགའ་རབ་རྡོ་རྗེས་གདམས་པའི་དོན་རྣམས་བྲིས་ནས་བཀའ་སྩལ་པ། སེམས་ཀྱི་རང་བཞིན་ཡེ་ནས་བུདྡྷ་སྟེ། །སེམས་ལ་སྐྱེ་འགགས་མེད་པ་ནམ་མཁའ་འདྲ། །ཆོས་ཀུན་མཉམ་ཉིད་ཡང་དག་དོན་རྟོགས་ན། །དེ་ཉིད་མ་བཙལ་བཞག་ན་སྒོམ་པ་ཡིན། །ཞེས་གསུངས། སླར་ཆུ་བོ་དན་ཏིག་བྱ་བར་དགའ་རབ་རྡོ་རྗེ་འོད་ཕུང་དུ་ཡལ་བའི་ཚེ། འཇམ་དཔལ་བཤེས་གཉེན་གྱིས་གདུང་ཚིག་ལན་གསུམ་བཏོན་པས། ནམ་མཁའ་འོད་ཕུང་གི་དཀྱིལ་ནས་སྐུ་མངོན་སུམ་སྣང་བར་མཛད་དེ། གསེར་གྱི་ཟ་མ་ཏོག་སེན་གང་བ་ཞིག་ཕྱག་ཏུ་བབས་པས་ཚིག་གསུམ་གནད་དུ་བསྡེབས་པའི་མན་ངག་འདས་རྗེས་སུ་འདུག་པར་གཟིགས་པ་ཙམ་གྱིས་རྟོགས་པའི་དོན་ཁོང་དུ་ཆུད་ནས་དགའ་རབ་རྡོ་རྗེ་དང་དགོངས་པ་མཉམ་པར་བྱུང་བས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིར་སྡེ་གསུམ་དུ་ཕྱེས་ཏེ། སེམས་གནས་རྣམས་ལ་སེམས་ཀྱི་སྡེ། །བྱ་བྲལ་རྣམས་ལ་ཀློང་གི་སྡེ། །གནད་གཙོ་བ་ལ་མན་ངག་སྡེ། །ཞེས་པ་ལྟར་དང་། །གནད་ཟབ་པ་སྙིང་ཐིག་གི་སྐོར་ལ་བཤད་རྒྱུད་དང་སྙན་རྒྱུད་གཉིས་སུ་ཕྱེས་ནས། སྙན་རྒྱུད་རྣམས་མཆན་དུ་བཏབ། བཤད་རྒྱུད་རྣམས་རེ་ཞིག་སྤེལ་བའི་སྣོད་མ་རྙེད་པས་རྡོ་རྗེ་གདན་གྱི་བྱང་ཤར་ཕ་བོང་རྡོ་རྗེ་རྒྱ་གྲམ་གྱིས་བཏབ་པའི་འོག་ཏུ་གཏེར་དུ་སྦས་ཏེ། འཇམ་དཔལ་བཤེས་གཉེན་གྱིས་རྟོགས་པ་བརྗོད་པ། བདག་ནི་འཇམ་དཔལ་བཤེས་གཉེན་ཏེ། །གཤིན་རྗེ་གཤེད་ཀྱི་དངོས་གྲུབ་ཐོབ། །འཁོར་འདས་མཉམ་པ་ཆེན་པོར་རྟོགས། །སརྦ་ཛྙཱ་ནའི་ཡེ་ཤེས་ཤར། །ཞེས་གསུངས། བྱང་སེམས་རྡོ་ལ་གསེར་ཞུན་བཤགས་པར་བརྩམས། སྤྲུལ་པའི་བཀའི་སྡུད་པ་པོའང་མཛད་དོ། །འཇམ་དཔལ་བཤེས་གཉེན་ལ་ཤྲཱི་སེང་ཧས་ཞུས་ཏེ། དེ་ཡང་ཐལ་འགྱུར་ལས། དེ་ཡི་རྗེས་སུ་སྐལ་ལྡན་པ། །སོ་ས་གླིང་ཞེས་བྱ་བ་རུ། །ཁྱིམ་བདག་རིགས་སྐྱེས་ཤྲཱི་སེང་། །ཞེས་བྱ་བ་ཡིས་འཛིན་པར་འགྱུར། །ཞེས་ལུང་བསྟན་པ་ལྟར། རྒྱ་ནག་ཤོ་ཤའི་གླིང་དུ་ཡབ་དགེ་ལྡན་དང་ཡུམ་སྣང་གསལ་མའི་སྲས་སུ་འཁྲུངས། ལོ་བཅོ་ལྔ་ནས་སློབ་དཔོན་ཧསྟི་བྷ་ལ་ལས་སྒྲ་ཚད་རྩིས་སོགས་རིག་གནས་ལྔ་ལ་ལོ་གསུམ་ལ་མཁས་པར་སྦྱངས། སྐབས་ཤིག་ནུབ་ཕྱོགས་ཀྱི་གྲོང་ཁྱེར་གསེར་གླིང་བྱ་བར་འགྲོ་བའི་ལམ་བར་ནས་འཕགས་མཆོག་སྤྱན་རས་གཟིགས་ནམ་མཁར་བྱོན་ཏེ་སྐལ་ལྡན་འབྲས་བུ་ངེས་པར་འདོད་ན་རྒྱ་གར་གྱི་དུར་ཁྲོད་སོ་ས་གླིང་དུ་སོང་ཞིག་ཅེས་སྔ་ཕྱི་ལན་གཉིས་སུ་བསྐུལ་བས་ལོ་ཉི་ཤུ་རྩ་ལྔ་ལ་རྒྱ་གར་བགྲོད་པའི་ལམ་བར་དཀའ་བ་མེད་པར་ཞབས་ས་ལ་ཁྲུ་གང་ཙམ་གྱིས་མ་རེག་པར་དུར་ཁྲོད་སོ་ས་གླིང་དུ་བྱོན་ནས་སློབ་དཔོན་འཇམ་དཔལ་བཤེས་གཉེན་དང་འཇལ་ཏེ། ཟབ་མོ་ཨ་ཏིའི་བསྟན་པ་རྒྱུད་ལུང་མན་ངག་དང་བཅས་པ་རྫོགས་པར་ལོ་མང་པོར་ཞུས་ཏེ། མཐར་སློབ་དཔོན་ཉིད་སྐུ་འོད་ཕུང་དུ་ཡལ། དེའི་ཚེ་ཤྲཱི་སེངྷས་སྨྲེ་སྔགས་བཏོན་པས་ནམ་མཁའ་ནས་སློབ་དཔོན་གྱིས་སྐུ་དངོས་སུ་བསྟན་ཏེ་རིན་པོ་ཆེའི་ཟ་མ་ཏོག་སེན་གང་བ་ཞིག་ཕྱག་ཏུ་གཏད་པར་སྒོམ་ཉམས་དྲུག་པ་ཞེས་བྱ་བའི་འདས་རྗེས་བབ་པར་གཟིགས་པས་སྤྲོས་བྲལ་མཆོག་གི་རྟོགས་པ་མངོན་ཏུ་གྱུར། དེ་ནས་ཤྲཱི་སེངྷས་རྡོ་རྗེ་གདན་གྱི་འོག་ནས་སྔར་སྦས་པའི་རྒྱུད་རྣམས་བཏོན་ཏེ་རྫོགས་ཆེན་མན་ངག་སྡེ་ལ། ཕྱི་སྐོར། ནང་སྐོར། གསང་སྐོར། ཡང་གསང་བླ་ན་མེད་པའི་སྐོར་བཞིར་ཕྱེས་ནས་སྐོར་སྔ་མ་གསུམ་བྱང་ཆུབ་ཤིང་གི་ལྷ་ཁང་གི་བྱ་འདབས་སུ་གཏེར་དུ་སྦས། གསང་བ་བླ་ན་མེད་པའི་སྐོར་བཀྲ་ཤིས་ཁྲི་སྒོའི་ཀ་བར་སྨོན་ལམ་གྱི་རྒྱས་བཏབ་ནས་གཏེར་དུ་སྦས་སོ། །དེ་ནས་ཤྲཱི་སེང་ཧ་ལས། ཨོ་རྒྱན་སངས་རྒྱས་གཉིས་པ། མཁས་པ་ཛྙཱ་ན་སུ་ཏྲ། པཎ་ཆེན་བི་མ་ལ་མི་ཏྲ། ལོ་ཆེན་བེེ་རོ་ཙ་ན་རྣམས་ཀྱིས་ཞུས་པ་སྟེ། དེ་ཡན་ཆད་ནི་རིག་འཛིན་བརྡའི་བརྒྱུད་པའོ།།
༣༽གང་ཟག་སྙན་བརྒྱུད།
དེ་ནས་བོད་ཁ་བ་ཅན་གྱི་ཡུལ་འདིར་སྙིང་པོའི་བསྟན་པ་ཇི་ལྟར་དར་ན། སྔོན་བཅོམ་ལྡན་འདས་ཞལ་བཞུགས་པའི་ཚེ་བོད་ཡུལ་འདིར་མིའི་འགྲོ་བ་མེད་པ་ལ་ཕྱིས་སུ་འཕགས་པ་སྤྱན་རས་གཟིགས་ཀྱིས་སྤྲུལ་པའི་སྤྲེའུ་བྲག་སྲིན་གཉིས་ལས་མིའི་འགྲོ་བ་མཆེད། དེ་ཡང་ཆོས་མེད་ཁྲིམས་མེད་གོང་ན་དཔོན་མེད་མགོ་མེད་ཇ་སིག་ཏུ་ཡོད་དུས། རྒྱ་གར་གྱི་རྒྱལ་པོ་དམག་བརྒྱ་པ་ལ་སྲས་གཅིག་འཁྲུངས་པ་དེ། རྐང་ལག་ཐམས་ཅད་ངང་པ་བཞིན་འབྲེལ་པ། སྤྱན་བྱ་མིག་ལྟར་ཡས་འགེབས་པ། དེ་ལྟ་བུ་ཞིག་འདུག་ནས་ཡབ་ཀྱིས་འདི་མི་མ་ཡིན་གྱི་བུ་ཞིག་ཡིན་འདུག་པས་སྤྱུགས་བཏང་བ་གྲགས་ཟེར་ནས་སྲས་ཅུང་ཟད་ནར་སོན་པ་ན་སྤྱུགས་བཏང་བས་ལས་དབང་གིས་རྐང་འཁྱར་ཏེ་བོད་ཡུལ་དུ་ཕེབས། ཕྱུགས་རྫི་འགའ་ཞིག་དང་འཕྲད་དེ། གང་ནས་འོང་སུ་ཡིན་དྲིས་པས་གནམ་ལ་མཛུབ་མོ་བསྒྲེངས་པས། གནམ་གྱི་ལྷ་ཡིན་སྙམ་ནས་ཐམས་ཅད་ཀྱི་གཉའ་བར་ས་རྡོ་ཁུར་ནས་ཁྲི་བརྩིགས་ཏེ་དཔོན་དུ་མངའ་གསོལ་བ་དེ་རྒྱལ་པོ་ལ་སྔ་བ་གཉའ་ཁྲི་བཙན་པོ་ཞེས་གྲགས་ཏེ་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་སྤྲུལ་པ་ཡིན། དེ་ནས་རྒྱལ་རབས་མང་ཞིག་སོང་བའི་ཚེ། འཕགས་པ་ཀུན་ཏུ་བཟང་པོའི་སྤྲུལ་པ་ལྷ་ཐོ་ཐོ་རི་སྙན་བཙན་གྱི་རིང་ལ་ཕོ་བྲང་གི་ཐོག་མར་ཡུམ་བུ་བླ་མཁར་གྱི་སྟེང་དུ་སྐུའི་རྟེན་ཙིནྟ་མ་ཎིའི་སྐུ་སྟེ་གཟུངས་ཀྱི་བརྐོས་ཕོར་དང་། གསུང་གི་རྟེན་མདོ་སྡེ་ཟ་མ་ཏོག་བཀོད་པ་དང་། སྤང་སྐོང་ཕྱག་བརྒྱ་པ་རྣམས་དང་། ཐུགས་ཀྱི་རྟེན་ཤེལ་གྱི་མཆོད་རྟེན་ཁྲུ་གང་པ་རྣམས་བྱུང་སྟེ། དམ་པ་ཆོས་ཀྱི་དབུ་བརྙེས། དེ་ནས་འཇམ་དཔལ་རྩ་རྒྱུད་ལས། ལྷ་ཡུལ་ལྡན་ཞེས་བྱ་བ་ཡི། །གངས་ཅན་རི་ཡི་ནང་གནས་པའི། །རྒྱལ་པོ་མི་ཡི་ལྷ་ཞེས་པ། །ལི་ཙ་བཱི་རྣམས་རིགས་སུ་འཁྲུངས། །ཞེས་ལུང་བསྟན་པ་ལྟར། རྒྱལ་རབས་ལྔ་ན་འཕགས་པ་སྤྱན་རས་གཟིགས་ཀྱི་སྤྲུལ་པ་རྒྱལ་པོ་སྲོང་བཙན་སྒམ་པོ་བྱུང་སྟེ། མཐའ་འདུལ་དང་ཡང་འདུལ་རུ་ནོན་གྱི་གཙུག་ལག་ཁང་རྣམས་དང་། ལྷ་སའི་ར་ས་འཕྲུལ་གྱི་གཙུག་ལག་ཁང་བཞེངས། རྗེ་བཙུན་སྒྲོལ་མའི་སྤྲུལ་པ་རྒྱ་བཟའ་ཀོང་ཇོ་དང་། ཇོ་མོ་ཁྲོ་གཉེར་ཅན་གྱི་སྤྲུལ་པ་བལ་བཟའ་ཁྲི་བཙུན་གཉིས་ཁབ་ཏུ་བསུས་པའི་སྐྱེལ་རྫོངས་སུ་སྟོན་པ་དགུང་ལོ་བཅུ་གཉིས་པ་དང་བརྒྱད་པའི་སྐུ་ཚད་ཅན་གྱི་ཇོ་བོ་རྣམ་པ་གཉིས་སྤྱན་དྲངས། ཐོན་མི་སཾ་བྷོ་ཊས་བོད་ཡི་གེ་མེད་པ་ལ་ཡི་གེའི་སྲོལ་བཏོད། རྒྱ་གར་པཎྜི་ཏ་ལྷ་རིག་པའི་སེང་གེ་ལས་སྒྲ་བསླབས་ཏེ། མདོ་སྡེ་དཀོན་མཆོག་སྤྲིན་ལ་སོགས་པའི་རྒྱ་ཆོས་བོད་དུ་འགྱུར་གྱི་མགོ་དེ་དུས་བཙུགས། དེ་ཡང་རྒྱལ་པོ་སྲོང་བཙན་སྒམ་པོས་མཐའ་འཁོབ་ཀྱི་ཡུལ་འདིར། སེམས་ཅན་གྱི་དོན་བྱེད་པ་ལ། ཡི་དམ་གྱི་ལྷ་ཞིག་བཞེངས་དགོས་ཏེ། དེའི་རྒྱུ་གང་ལེགས་དགོངས་ནས། འཕགས་པ་ལ་གསོལ་བ་བཏབ་པས། ཐོ་རངས་ཀྱི་དུས་སུ་སངས་རྒྱས་བྱང་སེམས་ཉན་ཐོས་ལྷའི་བུ་དང་བུ་མོ་ལ་སོགས་པ་ཐམས་ཅད་འདུས་ནས་མགྲིན་གཅིག་ཏུ་རྒྱལ་པོ་ལ་ཚིགས་སུ་བཅད་པ་ཞུས་པའི་དོན་འདི་ལྟར། སྤྲུལ་པའི་རྒྱལ་པོ་བྱང་ཆུབ་སེམས་དཔའ་མགོ་ནག་ཡོངས་ཀྱི་རྗེ་ཁྱེད་ཀྱིས་མ་འོངས་པའི་སེམས་ཅན་ཐམས་ཅད་ཀྱི་མོས་གུས་བསོད་ནམས་བསགས་པའི་རྟེན་ཡི་དམ་ལྷ་ཞིག་བཞེངས་དགོངས་ན། རྒྱ་གར་ཡུལ་གྱི་ལྷོ་ཕྱོགས་སུ་སིངྒ་ལ་ཡི་རྒྱ་མཚོའི་འགྲམ་རང་བྱོན་ཁ་སརྤ་ཎིའི་རྒྱབ། གླང་ཆེན་ཉལ་བའི་བྱེ་མའི་མགོ་རུ་ཙནྡ་སྦྲུལ་གྱི་སྙིང་པོ་ལས་གྲུབ་པའི་རང་བྱོན་སྤྱན་རས་གཟིགས་ངོ་མཚར་ཅན་ཞིག་དེ་ན་བཞུགས་ཡོད། དེ་ནི་རྒྱལ་པོའི་ཡི་དམ་གྱི་ལྷ་ཡིན། ཞེས་ཟེར་ཏེ་མི་སྣང་བར་གྱུར་ཏོ། དེ་ནས་རྒྱལ་པོའི་སྨིན་མཚམས་ནས་སྤྲུལ་པའི་དགེ་སློང་ཨཱ་ཀར་མ་ཏི་ཤཱི་ལ་ཞེས་བྱ་བར་དབུ་ལ་སངས་རྒྱས་འོད་དཔག་མེད་བཞུགས་པ་ཞིག་སྤྲུལ་ཏེ། ཡི་དམ་དེ་སྤྱན་འདྲེན་པ་ལ་བཏང་ངོ་། དེ་ནས་རྒྱ་གར་ཡུལ་གྱི་མུ་སྟེགས་པའི་རྒྱལ་པོ་བཏུལ། རྒྱ་གར་དང་ཟངས་གླིང་གི་མཚམས་བྱེ་མའི་གླིང་ཙན་དན་སྦྲུལ་གྱི་སྙིང་པོའི་ཁོང་ནས་རང་བྱུང་འཕགས་པ་མཆེད་ལྔ་སྤྱན་དྲངས། གཞན་ཡང་རྒྱལ་པོས། རྒྱ་གར་དང་བལ་པོའི་མཚམས་ཀྱི་ནགས་ཁྲོད་ཆེན་པོ་ཞིག་ན། ཙནྡན་ཧ་རིའི་སྡོང་པོ་འོད་ཟེར་ཕྱོགས་བཅུར་འཕྲོ་བ་ཞིག་ཡོད་པས་དེ་ལས་རང་བྱོན་འཕགས་པ་མཆེད་བཞི་བྱོན་པར་གཟིགས། ཡང་སྤྲུལ་པའི་དགེ་སློང་དེ་རྟེན་དེ་རྣམས་སྤྱན་འདྲེན་དུ་བཏང་ངོ་། ཙནྡན་དེ་སྟྭ་རེས་བཅད་པ་ན་སྐུ་བཞི་རིམ་བཞིན་བྱོན། དང་པོ་ཇོ་བོ་ཝ་ཏི་མང་ཡུལ་གྱི་སྐྱིད་གྲོང་དུ་བཞུགས། གཉིས་པ་ཇོ་བོ་དབུ་གང་མ་གྲོང་ཁྱེར་ཡམ་བུ་ཡ་འགལ་དུ་བཞུགས། གསུམ་པ་ཇོ་བོ་རྒྱ་མ་ལི་རྒྱ་བལ་གྱི་མཚམས་སུ་བཞུགས། བཞི་པ་དེ་ཉིད་རྒྱལ་པོ་སྲོང་བཙན་སྒམ་པོའི་ཡི་དམ་འཕགས་པ་ལོ་ཀི་ཤྭ་རི་སྤྲུལ་པའི་དགེ་སློང་གིས་སྤྱན་དྲངས་པ་འདི་ད་ལྟ་རྩེ་ཕོ་བྲང་པོ་ཏ་ལ་ལ་བཞུགས་པ་དེ་ཡིན། ལྷ་སའི་ཇོ་བོ་རང་བྱུང་ལྔ་ལྡན་བཅུ་གཅིག་ཞལ་ཁྱད་པར་དུ་འཕགས་པ་བཞེངས། འདི་ནི་ཆོས་རྒྱལ་འཁོར་བཅས་ཐིམ་ས་ཡང་ཡིན། དེ་ནི་སྤྲུལ་བའི་དགེ་སློང་ཨཱ་ཀར་མ་ཏིས། སངས་རྒྱས་འཁོར་བ་འཇིག་གིས་རབ་གནས་མཛད་པའི་རྒྱ་གར་ལྷོ་ཕྱོགས་ཀྱི་མཆོད་རྟེན་པདྨའི་བུམ་པའི་ནང་ནས། སངས་རྒྱས་རབ་བདུན་གྱི་རིང་བསྲེལ་བྲེ་གང་བསྣམས་ནས། དེ་ནས་རྒྱ་མཚོའི་གླིང་བྱོན་པ་དང་། འཇག་མ་རེ་རེའི་སྟེང་ན། སངས་རྒྱས་རེ་རེ་བཞུགས་པར་གཟིགས་ནས་འཇག་མ་ཕོན་གཅིག་ཀྱང་བསྣམས་སོ། །དེ་ནས་ཆུ་བོ་ནཻ་རཱཉྫའི་འགྲམ་དུ་བྱོན་པ་དང་། བྱེ་མ་འབྲུ་རེའི་སྟེང་ན་སངས་རྒྱས་རེ་བཞུགས་པར་གཟིགས་ནས་བྱེ་མ་བྲེ་གང་ཡང་བསྣམས་སོ། །ཙནྡ་སྦྲུལ་སྙིང་དང་། གོ་ཤིར་ཥ་དང་། རང་བྱང་ཆུབ་ཀྱི་ལྗོན་ཤིང་གི་ཡལ་ག་དུམ་བུ་རེ་དང་། དབེན་གནས་ཆེན་པོ་བརྒྱད་ཀྱི་ས་སྟེ་དེ་རྣམས་སྤྱན་དྲངས་ཏེ་རྒྱལ་པོ་ལ་ཕུལ་བའོ། །རྒྱལ་པོས་བལ་བོའི་ལྷ་བཟོ་ལ་ཁྱོད་ཀྱིས་འཕགས་པ་བཅུ་གཅིག་ཞལ་ཞིག་བཞེངས་ནུས་སམ་གསུངས། ནུས་ལགས་ཞུས་ཏེ། དེའི་བཟོ་རྒྱུ་རྒྱ་གར་ནས་སྤྱན་དྲངས་པའི་ངོ་མཚར་བའི་རྫས་མང་པོ་བསགས་ཏེ། བ་དམར་དང་ར་དཀར་གྱི་འོ་མ་ལ་སྦྱར་ཏེ། འཇིམ་པའི་ཕུང་པོ་ཆེན་པོ་གཅིག་བྱས། རྒྱལ་པོ་གཟིམས་པའི་དབུ་སྔས་སུ་བཞགནངས་པར་བཅུ་གཅིག་ཞལ་ཡིད་བཞིན་གྱི་ནོར་བུ་རང་བྱོན་དུ་སྣང་བས་ལྷ་བཟོས་བཞེངས་མ་དགོས་སོ། །རྒྱལ་པོ་འདིའི་རིང་ལ་སངས་རྒྱས་ཀྱི་བསྟན་པའི་སྲོལ་བཏོད། དེ་ནས་རྒྱལ་རབས་ལྔ་ན་འཕགས་པ་འཇམ་དཔལ་གྱི་སྤྲུལ་པ་རྒྱལ་པོ་ཁྲི་སྲོང་ལྡེའུ་བཙན་འཁྲུངས་ཏེ། དགུང་ལོ་བཅུ་གསུམ་ལོན་པའི་ཚེ་ཡབ་གཤེགས། བཅུ་བདུན་གྱི་བར་དུ་ངམ་ཏ་ར་ཀླུ་གོང་དང་། ལྷ་བཟང་ཀླུ་དཔལ་ལ་སོགས་པའི་བློན་པོ་རྣམས་དང་བགྲོས་ནས་དམག་ཇག་གི་སྒོ་ནས་ཡུལ་ཁམས་མང་པོ་བཏུལ་ཏེ་མངའ་འོག་ཏུ་བཙུད། དེ་ནས་ཡབ་མེས་ཀྱི་ཡིག་ཚང་གཟིགས་པས་ལྷ་ཐོ་ཐོ་རི་སྙན་ཤལ་གྱི་རིང་ལ་དམ་པ་ཆོས་ཀྱི་དབུ་བརྙེས། སྲོང་བཙན་སྒམ་པོས་སྲོལ་བཏོད་པ་སོགས་ཡབ་མེས་གོང་མ་ཐམས་ཅད་ཆོས་ཁོ་ན་མཛད་པར་འདུག་པས། བདག་གིས་དམ་ཆོས་ཁོ་ན་དར་ཞིང་རྒྱས་པ་ཞིག་མཛད་དགོས་དགོངས་ནས། ཆོས་བློན་འགོས་པད་མ་གུང་བཙན་དང་གྲོས་བྱས། བློན་པོ་གཞན་ལ་ཐབས་ཀྱིས་གདམ་ག་བསྐུར་བ་ཏེ། གཙང་པོ་ཟངས་ཀྱི་སྦུབས་སུ་འཇུག་པའམ། ཧས་པོ་རི་རྩེར་ཞང་ཡུལ་མཐོང་བའི་ཤེལ་གྱི་མཆོད་རྟེན་བརྩིག་པའམ། ཝ་ལུང་གྲོག་པོ་གསེར་ཕྱེས་འགེངས་པའམ། གཙུག་ལག་ཁང་ཞིག་བཞེངས་པར་འདོམས་ཞེས་གསུངས། གཙུག་ལག་ཁང་ཞིག་བཞེངས་པར་ཀུན་གྲོས་མཐུན་ནས། ས་འདུལ་མཁན་གྱི་བླ་མཆོད་བཙལ་བའི་ཚེ། རྒྱལ་པོའི་མཆོད་གནས་ཉང་ཏིང་འཛིན་བཟང་པོ་བསམ་ཡས་མཆིམས་ཕུ་ན་བཞུགས་པ་ལ་ཞུས་པས། རྒྱ་གར་ཤར་ཕྱོགས་ཟ་ཧོར་གྱི་ཡུལ་ན་ཆོས་རྒྱལ་གོ་མ་དེ་བྱི་བྱ་བའི་སྲས་པོ་མཁན་ཆེན་ཞི་བ་འཚོ་བཞུགས་པ་ཞི་གནས་ཀྱི་གསལ་སྣང་གིས་མཁྱེན་ཏེ། རྒྱལ་པོ་ལ་གསུངས་པས་རྒྱལ་པོ་དགྱེས་ཏེ་སྦ་མི་ཛྙཱ་ན་ཤྭ་ར་དང་། གཉགས་ཛྙཱ་ན་ཀུ་མཱ་ར་གཉིས་ལ་གཡོག་པོ་གསུམ་གསུམ་གསེར་ཕྱེ་བྲེ་རེ་བསྐུར་ནས་སྤྱན་འདྲེན་དུ་བཏང་བས་ཟ་ཧོར་ས་ཆོད་མཁན་པོའི་དྲུང་དུ་སླེབས། བཀའ་ཕྲིན་གསེར་ཕྱེ་ཕྱག་ཏུ་ཕུལ་བས་མཁན་པོས་དགྱེས་པའི་ཞལ་མདངས་དཀར་པོ་བསྟན་ནས་མྱུར་མགྱོགས་ཀྱིས་བོད་དུ་སྤྱན་དྲངས་པས་ཕེབས། དེ་ནས་མེ་མོ་གླང་ལོའི་ཚེས་ཉི་ཤུ་ལ་བསམ་ཡས་གླིང་བཞི་གླིང་ཕྲན་བཅུ་གཉིས་ཡོད་པ་དང་། ཡཀྴ་ལྟག་འོག་ཉི་ཟླ་གཉིས་ཀྱི་ཚུལ་ཅན་ས་རིས་བཅད་ནས་མཁན་པོས་ས་བཏུལ་ཡང་ཨཱརྱ་པཱ་ལོའི་གླིང་ན་ཀླུ་གནས་པའི་སེ་ཕུང་ཞིག་ཡོད་པ་གཅོད་པར་ཤེས་ནས་ཀླུ་དེས་ལྷ་འདྲེ་ཐམས་ཅད་ར་མདར་སློགདགེ་བསྙེན་ཉེར་གཅིག་དང་མི་དང་མི་མ་ཡིན་རྣམས་ཀྱི་དམག་དཔུང་བསྡུས། ཉིན་མིས་བརྩིགས་པ་རྣམས་མཚན་མོ་ལྷ་འདྲེས་བཤིགས་ཏེ་ས་རྡོ་ཐམས་ཅད་རང་གནས་སུ་བསྐྱལ། དེར་རྒྱལ་པོས་མཁན་པོ་ལ་འདི་ལྟར་ཡོང་བ་བདག་སྒྲིབ་པ་ཆེའམ་མཁན་པོས་བྱིན་གྱིས་མ་བརླབས་སམ། བསམ་པ་མི་འགྲུབ་པ་ལགས་སམ་ཞེས་ཞུས་པས། མཁན་པོའི་ཞལ་ནས། བདག་གིས་བྱང་ཆུབ་ཀྱི་སེམས་འབྱོངས་ཀྱང་ལྷ་འདྲེ་རྣམས་ཞི་བས་མི་ཐུལ་དྲག་པོ་མངོན་སྤྱོད་ཀྱིས་འདུལ་དགོས་པར་འདུགད་ལྟ་རྒྱ་གར་རྡོ་རྗེ་གདན་ན། ཨོ་རྒྱན་པདྨ་འབྱུང་གནས་ཞེས་བྱ་བ། སྐུ་རྫུས་སྐྱེས་སུ་འཁྲུངས་པ། རིག་པའི་གནས་ལྔ་ལ་མཁས་པ། དོན་དམ་གྱི་རྩལ་འབྱོངས་པ། མཆོག་ཐུན་མོང་གི་དངོས་གྲུབ་བརྙེས་པ། བདུད་བཅོམ་སྡེ་བརྒྱད་བྲན་དུ་ཁོལ་བ། ལྷ་འདྲེ་ཐམས་ཅད་འདར་ཞིང་འབྱུང་པོ་འདུལ་བ་ཞིག་བཞུགས་པ་དེ་སྤྱན་དྲངས་ན། ལྷ་འདྲེ་ཐམས་ཅད་ཀྱིས་འཁུ་མི་ནུས་ཏེ་དེ་ལྟར་ན། རྒྱལ་པོའི་ཐུགས་དགོངས་མཐར་ཕྱིན་པར་འགྱུར་རོ་གསུངས། རྒྱལ་པོས་དེ་འདྲ་སྤྱན་འདྲོང་ངམ་ཞུས་པས། སྔོན་གྱི་སྨོན་ལམ་ཡོད་པས་སྤྱན་འདྲོང་སྟེ། སྔོན་བལ་ཡུལ་དུ་བྱ་རྫི་གསལ་ལེའི་བུ་མོ་བདེ་མཆོག་མ་ལ་རྟ་རྫི། ཕག་རྫི། བྱ་རྫི། ཁྱི་རྫི་བཞིས་བཤོས་པའི་བུ་བཞིར་གྱུར་དུས་མཆོད་རྟེན་བྱ་རུང་ཁ་ཤོར་བཞེངས་ཏེ་བུམ་པ་མ་ཐོགས་གོང་ནི་མ་ཚེ་དུས་བྱས་པས་དམ་ཚིག་གི་ལྷ་མོ་པྲ་མོ་ཧར་སངས་རྒྱས་སོང་། དེ་བུ་བཞིས་འདུས་ནས་གྲོས་བྱས་མཆོད་རྟེན་འཕྲོ་མཐུད་ནས་བུམ་པ་བཏགས་ནས་བུ་རེས་སྨོན་ལམ་རེ་བཏབ་པ་སྟེ། ཆེ་བ་རྟ་རྫི་བུས་མཆོད་རྟེན་འདི་ལ་བུམ་པ་བཏགས་པའི་མཐུས་བདག་ས་བདག་མགོ་ནག་རྒྱལ་པོར་སྐྱེ་བར་ཤོགཅེས་སྨོན་ལམ་བཏབ་པས་ཆོས་རྒྱལ་ཁྲི་སྲོང་ལྡེའུ་བཙན་ཡིན། དེ་འོག་ཕག་རྫི་བུ་ཡིས་སྨོན་ལམ་བཏབ་པ་ནི་མཆོད་རྟེན་འདི་ལ་བུམ་པ་བཏགས་པའི་མཐུས་རིག་འཛིན་སྔགས་འཆང་དགོངས་རྒྱུད་དག་པར་རྫུས་ཏེ་སྐྱེས་ནས་ལྷ་འདྲེ་མི་གསུམ་འདུལ་བར་ཤོག་ཅེས་སྨོན་ལམ་བཏབ་པ་མཐུ་བཙན་པས་གུ་རུ་པདྨ་འབྱུང་གནས་ཡིན། དེ་འོག་ཁྱི་རྫི་བུ་ཡིས་སྨོན་ལམ་བཏབ་པ་ནི་མཆོད་རྟེན་འདི་ལ་བུམ་པ་བཏགས་པའི་མཐུས་བསྟན་པའི་གཞི་མ་དགེ་འདུན་མཆོག་ཏུ་ཤོག་ཅེས་སྨོན་ལམ་བཏབ་པས་མཁན་པོ་བོ་དྷི་ས་ཏྭ་ཡིན། བྱ་རྫི་བུས་སྨོན་ལམ་བཏབ་པ་ནི་ཁྱོད་ཕུ་བོ་གསུམ་གྱིས་སངས་རྒྱས་ཀྱི་བསྟན་པ་འཛིན་བསྲུང་སྐྱོང་གསུམ་བྱེད་འདུག་པས་ངས་མཆོད་རྟེན་འདི་ལ་བུམ་པ་བཏགས་པའི་མཐུས་སྤུན་ཟླ་རྣམས་ཀྱི་འཕྲིན་བློན་བྱེད་པར་ཤོག་ཅེས་སྨོན་ལམ་བཏབ་པས་ཡར་ལུང་སྦ་མི་ཁྲི་གཞེར་ཡིན་པ་སོགས་སྨོན་ལམ་བཏབ་པའི་ལོ་རྒྱུས་རྣམས་གསུངས་ཏེ། སྦ་ཁྲི་བཞེར། རྡོ་རྗེ་བདུད་འཇོམས། མཆིམས་ཤཱཀྱ་པྲ་བྷ། ཤུད་པུ་དཔལ་གྱི་སེངྒེ་རྣམས་ལ་གསེར་ཕྱེ་བྲེ་རེ། གསེར་གྱི་པ་ཏྲ་རེ་བསྐུར་ནས་རྒྱ་གར་ལ་བརྫངས། དེ་རྣམས་ཀྱིས་སློབ་དཔོན་བོད་ཡུལ་དུ་གཙུག་ལག་ཁང་གི་ས་གཞི་བྱིན་གྱིས་རློབ་པར་འབྱོན་དགོས་པའི་ཞུ་བ་ཕུལ་བས་ཞལ་གྱིས་བཞེས་ཏེ་རིམ་བཞིན་བྱོན་ནས། ལམ་དུ་བརྟན་མ་བཅུ་གཉིས། སྐྱོང་མ་བཅུ་གཉིས། རྡོ་རྗེ་ལེགས་པ་སོགས་དགེ་བསྙེན་ཉེར་གཅིག་ལ་སོགས་པ་བོད་ཡུལ་གྱི་ལྷ་འདྲེ་ཐམས་ཅད་དམ་ལ་བཏགས་ནས་བྲག་དམར་མགྲིན་བཟང་དུ་ཕེབས། ཧཱུཾ་ཉོན་ཅིག་པད་འབྱུང་བཀའ་ལ་ཉོན་སོགས་གསུངས་ནས་རྡོ་རྗེས་གར་མཛད་དེ་མི་མིན་གྱི་ལྷ་འདྲེ་ཐམས་ཅད་དམ་ལ་བཞག་ནས་གཙུག་ལག་ཁང་གི་ས་བཏུལ་ཏེ། ས་ཕོ་སྟག་ལོའི་སྟོན་ཟླ་འབྲིང་པོའི་ཚེས་བརྒྱད་ཕུར་བུ་དར་བ་འབྲུག་དང་སྐར་མ་ལག་སོར་ཉིན་པར་ཨོ་ཏནྟ་པུ་རིའི་གཙུག་ལག་ཁང་ལ་དཔེ་བྱས་ནས་རྩིག་རྨང་བཙུགས་པ་སོགས་མཛད་ནས་བསམ་ཡས་ལྷུན་གྱིས་གྲུབ་པའི་གཙུག་ལག་ཁང་དབུ་རྩེ་རིམ་གསུམ་ནི་རྒྱ་གར་རྒྱ་ནག་བོད་ཀྱི་ལུགས་གསུམ་དང་ལྡན་པ། ཤར་སྒོ་འཇམ་དཔལ་གླིང་། ལྷོ་ཕྱོགས་ཨཱརྱ་པ་ལོའི་གླིང་། ནུབ་བྱམས་པ་གླིང་། བྱང་སེམས་བསྐྱེད་གླིང་སྟེ་གླིང་བཞི། སྒྲ་བསྒྱུར་རྒྱ་གར་གླིང་། བརྡ་སྦྱོར་ཚང་མང་གླིང་། བདུད་འདུལ་སྔགས་པ་གླིང་། མི་གཡོ་བསམ་གཏན་གླིང་སོགས་གླིང་ཕྲན། ཡག་ཤ་ལྟག་འོག་ཉི་མ་དང་ཟླ་བ། ལྕགས་རི་མུ་ཁྱུད་ཀྱིས་བསྐོར་བ་མདོར་ན་འདུལ་བ་ལྟར་ན་གཙུག་ལག་ཁང་། མདོ་སྡེ་ལྟར་ན་ཞིང་ཁམས་ཀྱི་ཆགས་ཚུལ། མངོན་པ་ལྟར་ན་སྣོད་བཅུད་ཀྱི་ཆགས་དབྱིབས། གསང་སྔགས་ལྟར་ན་དཀྱིལ་འཁོར་གྱི་ཚུལ་དུ་བཞེངས། མཁན་པོ་དང་། སློབ་དཔོན་པདྨ། བི་མ་ལ་མི་ཏྲ་གསུམ་གྱིས་རྟེན་བརྟེན་པ་དང་བཅས་པ་ལ་རབ་གནས་མེ་ཏོག་ལན་གསུམ་དུ་འཐོར། ངོ་མཚར་གྱི་ལྟས་དང་ཆོ་འཕྲུལ་མང་དུ་བྱུང་། དེ་ནས་མཁན་པོས་འདུལ་བ་དང་། མདོ་ལུགས་ཀྱི་སྲོལ་བཟུང་། སློབ་དཔོན་པདྨ་དང་། བི་མ་མི་ཏྲས་སྔགས་ཀྱི་བསྟན་པ་བཙུགས། དེའི་དུས་སུ་ཨོ་རྒྱན་སངས་རྒྱས་གཉིས་པ་དང་། པཎ་ཆེན་བི་མ་མི་ཏྲ་གཉིས་ཀྱིས། ཐུགས་སྲས་རྗེ་འབངས་གྲོགས་གསུམ། ཉང་དབེན་ཏིང་འཛིན་བཟང་པོ་ལ་སོགས་པ་སྣོད་དང་སྐལ་བར་ལྡན་པ་རྣམས་ལ་ཤན་འབྱེད་ལ་བཟླ་རང་གྲོལ་མངོན་སུམ་དུ་སྟོན་པ་རྫོགས་ཆེན་ཨ་ཏི་ཡོ་ག་ལ་སོགས་པ་ནང་རྒྱུད་ཡོ་ག་གསུམ་གྱི་ཆོས་ཀྱི་འཁོར་ལོ་བསྐོར་ཏེ། དེ་ཕྱིན་ཆད་ཀྱི་བརྒྱུད་པ་ལ་གང་ཟག་སྙན་བརྒྱུད་དུ་གྲགས། དེར་མ་ཟད་ཨོ་རྒྱན་སངས་རྒྱས་གཉིས་པས་སྦྱོར་སྟོད་ཏི་སྒྲོ་བྲག་ཏུ་མཁར་ཆེན་མཚོ་རྒྱལ་ལ་གདམས་ངག་ཆིག་བརྒྱུད་དུ་ལྐོག་ཆོས་སུ་གདམས། སླར་ཡང་མངའ་བདག་གི་སྲས་མོ་ལྷ་ལྕམ་པདྨ་གསལ་ལ་མཚོན་བྱ་དོན་གྱི་ཡེ་ཤེས་དེ་སྨོན་ལམ་དབང་བསྐུར་གྱི་རྒྱས་བཏབ་ཏེ་མཚོན་བྱེད་བརྡ་ཡི་ཚིག་བརྒྱུད་དུ་ཡི་གེ་བཀོད་དེ་གཏེར་དུ་སྦས་པ་ཕྱིས་སུ་པདྨ་ལས་འབྲེལ་རྩལ་གྱིས་གཏེར་ནས་བཏོན་པའི་མཁའ་འགྲོ་སྙིང་ཐིག་ལ་སོགས་པ། མདོར་ན་སློབ་དཔོན་པདྨ་འབྱུང་གནས་ཀྱིས་རྗེ་འབངས་སྐལ་བ་དང་ལྡན་པ་རྣམས་ལ་རང་རང་ལས་འཕྲོས་དབང་བའི་ཆོས་བཀའ་བསམ་གྱིས་མི་ཁྱབ་པ་ཞིག་གནང་སྟེ་དཔེ་རྒྱུད་ཤོག་སེར་ལ་བྲིས་ནས་གཏེར་དུ་སྦས། མ་འོངས་རྗེས་འཇུག་གི་དོན་དུ་སྨོན་ལམ་གཏད་རྒྱ་དང་བཅས་ཏེ་མཛད་པ། ཕྱིས་ལུང་བསྟན་དུས་ལ་བབས་པ་ན་སྔོན་གྱི་སྨོན་ལམ་ལ་དབང་བའི་གྲུབ་ཐོབ་སྤྲུལ་པའི་སྐུ་གློ་བུར་བ་རེ་བྱོན་ཏེ་ཟབ་མོ་གཏེར་གྱི་སྒོ་ཕྱེས་ལས་ཅན་གྱི་གང་ཟག་མང་པོ་རྗེས་སུ་བཟུང་སྟེ་འགྲོ་དོན་མཛད་པ་རྣམས་ལས་བརྒྱུད་པ་ནི། གོང་དུ་བཤད་པའི་བརྒྱུད་པ་གསུམ་གྱི་སྟེང་དུ་མཁའ་འགྲོ་གཏད་རྒྱའི་བརྒྱུད་པ། སྨོན་ལམ་དབང་བསྐུར་གྱི་བརྒྱུད་པའམ་བཀའ་བབས་ལུང་བསྟན་གྱི་བརྒྱུད་པ། ཤོག་སེར་ཚིག་གི་བརྒྱུད་པ་དང་དྲུག་གོ། དེའི་ཐོག་ཉམས་ལེན་བྱིན་རླབས་ཀྱི་བརྒྱུད་པ། སྙན་བརྒྱུད་དམར་ཁྲིད་ཀྱི་བརྒྱུད་པ། ཕྲིན་ལས་ཕྱག་བཞེས་ཀྱི་བརྒྱུད་པ་དང་དགུ་སྟེ། སྔ་འགྱུར་བརྒྱུད་པ་དྲུག་ལྡན་ནམ་དགུ་ལྡན་ལ་སོགས་པར་གྲགས་པ་ཡིན་ནོ། །དེ་ལྟར་སྤྲུལ་སྐུ་གཏེར་སྟོན་གྲངས་མེད་པ་འབྱུང་བ་ལས་འདིར་རིག་འཛིན་འཇིགས་མེད་གླིང་པ་ནི་འཕགས་པ་སེམས་ཉིད་ངལ་གསོ་དངོས་སུ་དགེ་བའི་བཤེས་གཉེན་གྱི་ཚུལ་བཟུང་ནས། ཨོ་རྒྱན་སངས་རྒྱས་གཉིས་པ། པཎ་ཆེན་བི་མ་མི་ཏྲ། ཀུན་མཁྱེན་ཀློང་ཆེན་རབ་འབྱམས་ལ་སོགས་པ་ལས་དགོངས་བརྡ་སྙན་བརྒྱུད་ཀྱི་བརྒྱུད་གསུམ་ཆིག་རྫོགས་སུ་བླངས་ཏེ། ལས་དང་སྐལ་བར་ལྡན་པའི་གང་ཟག་རྣམས་ལ་བསྟན་པ་ཡོངས་རྫོགས་ཀྱི་ཆོས་འཁོར་བསྐོར་ཞིང་མངོན་པར་རྫོགས་པའི་སངས་རྒྱས་སུ་བཞུགས་པ་ཡིན་ཏེ། ཇི་སྐད་དུ། ལུས་ནི་གང་ཟག་ལྷ་མི་ཡང་། །དགོངས་པ་དམ་པ་སངས་རྒྱས་དངོས། །ཞེས་པ་ལྟར་རོ། །དེས་ན་རྗེ་བླ་མ་རྫ་མཚམས་པ་འཇིགས་མེད་རྒྱལ་བའི་མྱུ་གུའི་ཞལ་ནས་ཀྱང་། ཁྱེད་རྣམས་ཀྱིས་ཉམས་སུ་ལེན་ཅིང་གསོལ་བ་འདེབས་ནུས་ན། ང་ཡི་བླ་མ་རྡོ་རྗེ་འཆང་རྗེ་བཙུན་འགྲོ་བའི་མགོན་པོ་ཀུན་མཁྱེན་འཇིགས་མེད་གླིང་པ་དེ་ཉིད་བསྟོད་འདོད་དང་མོས་གུས་ཀྱི་དབང་གིས་བཞག་པ་ཙམ་མ་ཡིན་པར་ངེས་པར་རྫོགས་པའི་སངས་རྒྱས་རྡོ་རྗེ་འཆང་ཆེན་པོ་ཉིད་གང་ཟག་མི་ཡི་ཚུལ་བཟུང་སྟེ་སེམས་ཅན་གྱི་དོན་དུ་བྱོན་པ་ཞིག་ཡིན་ལ། ཀུན་མཁྱེན་འཇིགས་མེད་གླིང་པ་ནི་ཡུལ་དབུས་གཙང་གཡོ་རུའི་འཛིན་མ་ལ་སྐུ་བལྟམས། ཡོངས་འཛིན་དགེ་བའི་བཤེས་གཉེན་མང་པོར་བསྟེན། བཀའ་གཏེར་གསར་རྙིང་གི་ཆོས་བཀའ་ཅི་རིགས་པ་ཐམས་ཅད་ཐུགས་ཉམས་སུ་བཞེས། སྐྱེ་བའི་ཐོག་པའི་མཁྱེན་རབ་ཕུལ་བྱུང་གི་སྟོབས་ཀྱིས་མདོ་རྒྱུད་རིགས་གནས་དང་བཅས་པ་ལ་མ་སྦྱངས་པར་མཁས་པའི་རྩེ་མོར་སོན། མཆིམས་ཕུ་དཔལ་གྱི་དབེན་གནས་གསང་ཆེན་མེ་ཏོག་ཕུག་སོགས་སུ་སྒྲུབ་པ་མཛད། ཨོ་རྒྱན་སངས་རྒྱས་གཉིས་པ་དང་ཀུན་མཁྱེན་ཀློང་ཆེན་རབ་འབྱམས་ཀྱི་ཡེ་ཤེས་ཀྱི་སྐུས་རྗེས་སུ་བཟུང་ནས་བྱིན་བརྒྱུད་རྟོགས་པའི་ཡེ་ཤེས་བཙན་ཐབས་སུ་བརྙེས། མགྲིན་པ་ལོངས་སྤྱོད་འཁོར་ལོའི་རྩ་མདུད་གྲོལ་བས་སྣང་གྲགས་བརྡ་དང་དཔེ་ཆར་ཤར། སྒོམ་བྱུང་གི་ཤེས་རབ་ཀློང་རྡོལ་ནས་རང་གཞན་གྲུབ་མཐའ་རྒྱ་མཚོ་ལ་མི་འཕྲོག་པའི་ཤེས་རབ་ཀྱི་རྩལ་འབར་བ་དེ་ལྟ་བུ་ཞིག་ཡིན། དེ་དང་ཁྱེད་ཚོའི་བར་ང་མ་གཏོགས་བརྒྱུད་པ་གཞན་གྱིས་ཆོད་པ་མེད། ངས་ཀྱང་བླ་མ་རྡོ་རྗེ་འཆང་དང་པོ་མཇལ་ནས་བཟུང་སྟེ་ཅི་གསུང་བཀའ་བཞིན་བསྒྲུབས། ཞབས་ཏོག་མཉེས་པ་གསུམ་གྱི་སྒོ་ནས་བསྟེན་པ་མ་གཏོགས་ཐ་ན་སྤྱན་ལོག་ཅིག་གཟིགས་པ་ཙམ་གྱི་ཡང་ཐུགས་ལ་མི་འབབ་པའི་བྱ་བ་བྱེད་མ་མྱོང་བས་ན། བརྒྱུད་པ་གསེར་གྱི་ཉག་ཐག་ལ་དམ་སེལ་གྱི་གཡས་མ་གོས་པ་ཞིག་ངེས་པར་ཡིན་པས་བྱིན་རླབས་ཀྱི་བརྒྱུད་པ་གཞན་དང་མི་འདྲ་བ་ཞིག་ཡིན། ཞེས་གསུངས། དེ་དག་ཀྱང་རྒྱུད་ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་པ་ལྟར། བརྒྱུད་པ་ཁུངས་ལ་ཐུག་པའི་ཆེ་བ་དང་། ལོ་རྒྱུས་བཤད་པས་རྗེས་འཇུག་ཡིད་ཆེས་བསྐྱེད་པའི་དགོས་པ་ཡོད་པ་ཡིན་པས་ན། འདིར་བླ་མའི་རྣལ་འབྱོར་དང་འབྲེལ་ནས་བཤད་པ་ཡིན་ནོ། །དེ་ལྟ་བུའི་བླ་མའི་རྣལ་འབྱོར་གྱི་བསྙེན་པའི་ཚད་ཀྱང་འབུམ་ཕྲག་བརྒྱ་ཐམ་པ་ཁོ་ན་ཡིན་ཏེ་ཅི་ནས་ཀྱང་འགྲོ་ངེས་པར་བྱ་དགོས་སོ། །དེ་ལྟར་མ་བྱས་པར་སྔོན་འགྲོའི་ཆོས་འདི་དག་ལ་དེ་ཙམ་གལ་མི་ཆེའམ་སྙམ་པའམ། དངོས་གཞིའི་ཆོས་ཀྱི་ཟབ་ཟབ་མོའི་ཁ་སྐད་ལ་རེ་ནས་སྔོན་འགྲོ་ཉམས་སུ་ལེན་ལོང་མེད་པར་བསྐྱེད་རྫོགས་སོགས་བསྒོམ་ལོ་བྱེད་པ་རྣམས་ནི། འཇིག་རྟེན་པའི་ཁ་སྐད་ལ། མགོ་མ་ཚོས་གོང་ལྕེ་སྙབས། །མལ་མ་དྲོས་གོང་རྡོག་པ་རྐྱོང་། །ཟེར་བ་ལྟར། སྔོན་འགྲོའི་ཆོས་གཞུག་ཤོར་པའི་ཉམས་ལེན་ལ་སྙིང་པོ་ཏིལ་འབྲུ་ཙམ་ཡང་མེད་ཅིང་། དྲོད་རྟགས་ཏེ་ལམ་རྟགས་ཀྱི་ཡོན་ཏན་གློ་བུར་བ་ཅུང་ཟད་སྐྱེས་ཀྱང་བརྟན་པ་མེད་པ་རྩིག་རྨང་མ་བླངས་པའི་མཁར་དང་འདྲའོ། །གལ་ཏེ་སྔོན་འགྲོའི་དུས་སྦྱངས་པ་སོགས་བྱེད་ཁུལ་བྱས་ཀྱང་། དངོས་གཞིའི་དུས་དེ་དག་སྔོན་འགྲོའི་ཆོས་ཡིན་པས་ད་ནི་མི་དགོས་སོ་སྙམ་དུ་འདོར་བ་ཡང་དེ་དང་འདྲ་སྟེ། ལམ་གྱི་གཞི་རྟེན་སྔོན་འགྲོའི་ཆོས་དོར་བས་གྱང་མེད་པའི་རི་མོ་ལྟར་ཁྱད་གཞི་མེད་པས་ཁྱད་ཆོས་ཆོས་ཀྱི་རྩ་བ་ཆད་པ་ཡིན་པས་ན། དུས་དང་རྣམ་པ་ཐམས་ཅད་དུ་སྔོན་འགྲོའི་ཆོས་འདི་དག་ལ་ངེས་ཤེས་བཅོས་མ་མ་ཡིན་པ་རེ་སྐྱེས་སྐྱེས་སུ་འབད་ཅིང་། ཁྱད་པར་བྱིན་རླབས་ཀྱི་འཇུག་སྒོ་བླ་མའི་རྣལ་འབྱོར་འདི་ཁོ་ན་ལ་ཉམས་ལེན་གྱི་མཐིལ་གཏད་དེ་འབད་པ་ནི་གནད་དམ་པ་ཡིན་ནོ། །དྲིན་ཆེན་བླ་མ་སངས་རྒྱས་དངོས་མཐོང་ཡང་། །རང་གཤིས་གྱོང་བས་དམ་པའི་བཀའ་ལས་འགོངས། །ཁམས་གསུམ་སེམས་ཅན་ཕ་མར་གོ་ན་ཡང་། །གདུག་རྩུབ་ཆེ་བས་མཆེད་ལ་ཚིག་རྩུབ་ཤོར། །བདག་དང་བདག་འདྲ་ལས་ངན་སེམས་ཅན་རྣམས། །སྐྱེ་བ་འདི་དང་ཚེ་རབས་ཐམས་ཅད་དུ། །ཞི་དུལ་དེས་ཤིང་མཉེན་ལྕུག་ལྡན་པ་ཡིས། །དགེ་བའི་བཤེས་གྲོགས་བསྟེན་པར་བྱིན་གྱིས་རློབས། །རྟོགས་པའི་ཡེ་ཤེས་བཙན་ཐབས་སུ་བསྐྱེད་པ། བྱིན་རླབས་ཀྱི་འཇུག་སྒོ་བླ་མའི་རྣལ་འབྱོར་གྱི་ཁྲིད་དོ།། །།ཞེས་གསུངས་ཤིང་བསྔོ་བས་མཐའ་བརྒྱན་ཏེ་ཆོས་ཁྲིད་གྲོལ་སོང་ངོ་།།