ཛ༽ཉིན་བཅུ་དགུ་བར་༼ཕཊ༽འཕོ་བའི་ཆོས་ཁྲིད།
མཆོད་བརྗོད་སོགས་གསུངས་ནས།
ཨ༽མཚམས་སྦྱོར་གྱི་གདམས་ངག
མར་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཐུགས་ལ་བཅངས་ཏེ་དམ་པའི་ཆོས་གསན་དགོས། སྤྱིར་གཅིག་གིས་སྣ་ཁྲིད་དེ་གཞན་དག་དེའི་རྗེས་སུ་འགྲོ་བ་དང་། གཅིག་གིས་བསླབས་ཤིང་གཞན་དག་གིས་དེ་ལ་སྦྱོང་བར་བྱེད་པ་དེ། ཆོས་དང་འཇིག་རྟེན་འཕྲལ་མཁོའི་བྱ་བ་ཡན་ཆད་ལ་མང་བ་ཡིན། དགེ་རྒན་དང་སློབ་ཕྲུག་གི་བར། སློབ་དཔོན་དང་སློབ་མའི་བར། ཕ་མ་དང་བུ་རྒྱུད་ཀྱི་བར། བླ་མ་དང་སློབ་མའི་བར་ལ་སོགས་ཐམས་ཅད་གཅིག་གི་རྗེས་སུ་གཅིག་གིས་དེད། གཅིག་གི་ལད་མོར་གཅིག་གིས་བྱེད་པ་དེ་འདྲ་འཇིག་རྟེན་ན་མང་ལ། འོན་ཀྱང་སྤྱིར་ན་ཆོས་འཆད་ཉན། དེའི་ནང་ནས་ཐེག་པ་ཆེན་པོ། དེ་ལས་ཀྱང་གསང་སྔགས་རྡོ་རྗེ་ཐེག་པའི་ལམ་ལ་ཞུགས་ནས་ཟབ་ཁྲིད་མན་ངག་གི་གདམས་པ་འཆད་ཉན་བྱེད་རྒྱུ་འདི་ནི། གོང་དུ་བཤད་པའི་འཇིག་རྟེན་གྱི་བཟོ་རིག་ལག་རྩལ། ཐ་སྙད་ཡིག་རྩིས་སློབ་ཁྲིད་དང་མི་འདྲ་བས། དཔལ་སྤྲུལ་སང་གིས། བླ་མར་གླ་བ། ཆོས་ལ་གླ་རྩིའི་འདུ་ཤེས་སོགས་འཇོག་མི་ཉན་གསུངས་པ་ལྟར། ཆོས་ཞུ་དུས་ནད་པས་སྨན་པ། མགྲོན་པོས་སྐྱེལ་མ། ཚོང་བས་དེད་དཔོན་བསྟེན་པ་ལྟ་བུའི་འདུ་ཤེས་འཇོག་དགོས། རྒྱ་མཚོར་ནོར་བུ་ལེན་དུ་འགྲོ་དགོས་ན། གཟིངས་ཆེན་པོར་ཞུགས་ནས་དེད་དཔོན་མཁས་པ་ཉམས་མྱོང་དང་ལྡན་པ་ཞིག་ལ་བསྟེན་ནས་སོང་ན། གཞི་ནས་ནོར་བུ་རྙེད་ཅིང་དོན་འགྲུབ་པར་འོང་། དེ་ལས་ལྡོག་ན་ནོར་བུ་ལོན་པ་ལྟ་ཅི་རང་སྲོག་ཆུ་ལ་ཤོར་བའི་ཉེན་ཁ་ཡོད། དཔེ་དེ་བཞིན་གསང་སྔགས་ཀྱི་ཆོས་སྒོར་ཞུགས་པ་ནི་ཁེ་ཆེ་ལ་ཉེན་ཆེན་པོ་དང་ཡང་ལྡན་པ། ཡང་ན་ཕུང་ཡང་ན་འཚེང་བ་གཉིས་ལས་འགྲོ་ས་མེད་པས་སྦྲུལ་སྨྱུག་སྦུབས་ནང་བཅུག་པ་ལྟ་བུ་ཡར་མར་གཉིས་ལས་འགྲོ་ས་གསུམ་པ་མེད། ཁྱད་པར་དུ་རྡོ་རྗེ་ཐེག་པའི་སྔགས་ལམ་ལ་ཞུགས་ནས། དབང་བསྐུར། རྒྱུད་བཤད།མན་ངག་ཟབ་མོའི་མྱོང་ཁྲིད་དམ་ལག་ཁྲིད་ཀྱི་རིགས་འདི་ལྟ་བུ་ཞུ་དུས། འཁོར་བ་ལ་ངེས་འབྱུང་གི་བློ་དང་། སེམས་ཅན་ཐམས་ཅད་ཕ་མར་ཤེས་པའི་སྙིང་རྗེ། བྱང་ཆུབ་ཀྱི་སེམས་རིན་པོ་ཆེ་དང་མི་འབྲལ་བའི་ཐོག་ནས། བླ་མ་དང་ཆོས་ལ་དད་ཅིང་འདུན་པའི་མོས་གུས་ཁོ་ནས་བྱིན་རླབས་འདྲེན་པ་མ་གཏོགས། ལག་བཟོ་ས་རིས་སློབ་པ་ལྟ་བུ་དང་། ཞིང་པས་རྨོ་རྐོ་སོ་ནམ། འབྲོག་པས་གཞོན་བཞོ་འོ་གཡུགདེང་གི་ཡིག་རིགས་སྐད་རིགས།གློག་རྡུལ་རྩིས་འཕྲུལ། འཕྲུལ་འཁོར་སྒུལ་བསྐྱོད་ཀྱི་ལག་རྩལ་ལྟ་བུར། སྦྱོང་ཟིན་དུས་ཚར་སོང་བ་དེ་ལྟར་མ་ཡིན། དེས་ན་དུས་ནམ་དང་ནམ་དུ་ཡང་བློ་ལྡོག་རྣམ་བཞི་འདི་དང་འབྲལ་མི་རུང་བས། བློ་ལྡོག་རྣམ་བཞིས་བློ་སྦྱངས་ནས་འཁོར་བར་ཞེན་པ་གཏིང་ནས་ལོག་ཡོད་ན་བློ་འབྱོངས་པའི་རྟགས་ཡིན། དཔལ་སྤྲུལ་རིན་པོ་ཆེས། སྲིད་པའི་འགྲོ་བ་ཞིང་རྡུལ་ལས་མི་ཉུང་། །བདེ་བའི་རྣམ་འགྱུར་ཉིན་སྐར་ལས་དཀོན་ན། །འགྲོ་བའི་གནས་འདིར་སུ་ཞིག་མི་སྐྱོ་སྟེ། །བདེ་བཤེགས་ཆོས་ལ་རབ་དགའ་ཅིས་མི་སྐྱེ། །ཞེས་གསུངས་པ་ལྟར་དུ་འཁོར་བར་ཞེན་ལོག་གི་ངེས་འབྱུང་གིས་རྒྱུད་བསྐུལ་ནས། ཐར་པ་དམ་པ་བདེ་བར་གཤེགས་པའི་བསྟན་པའི་ལམ་མ་ནོར་བ་གསུང་རབ་དམ་པའི་ཆོས། འཁོར་བའི་འཇིགས་པ་ལས་སྐྱོབ་པའི་ཐབས་ཁྱད་པར་ཅན་གྱི་ལམ་དེར་འཇུག་དགོས། འོན་ཀྱང་རང་དོན་ཡིད་བྱེད་ཀྱིས་འཚང་རྒྱ་མི་ཐུབ་ཅིང་། ཞི་བ་ཕྱོགས་གཅིག་པའི་མཐར་ལྷུང་སོང་ན་མ་སེམས་ཅན་ཐམས་ཅད་འཁོར་བའི་གནས་སུ་བསྐྱུར་ནས་རང་ཉིད་གཅིག་པུའི་ཞི་བདེ་གཉེར་བར་བློས་ཇི་ལྟར་བཟོད། ཁྱེད་རྣམས་ཅི་རེད་ན་རེད་ང་རང་གཅིག་པུ་མགོ་ཐོན་དགོས་ཁི་ཟེར་ན་འཇིག་རྟེན་ལུགས་ལའང་ཕོ་ཐ་མའི་བསམ་པ་རེད། ང་ཅི་རེད་ན་རེད་སེམས་ཅན་ཐམས་ཅད་ཉེན་ཁ་ལས་བསྐྱབས་པར་བྱའོ་སྙམ་པའི་གཞན་ཕན་སྐད་ཅིག་མ་རེ་སྐྱེས་པའི་ས་བོན་ལ་བརྟེན་ནས་རྫོགས་པའི་བྱང་ཆུབ་ཐོབ་པའི་རྣམ་ཐར་དང་ལོ་རྒྱུས་ཡོད་པ་ནི་གོང་བཤད་ལྟར། བྱ་ས་ཀོ་ཁའི་བང་ཆེན་པ་ཆུ་ནང་འཆོངས་པའི་དཔེ་དང་། བདག་ཅག་གི་སྟོན་པ་སྔོན་ཁྱིམ་བདག་མཛའ་བོའི་བུ་མོར་སྐྱེས་པའི་ལོ་རྒྱུས་སོགས་ལྟ་བུ་ཡིན། དེས་ན་བློ་མ་སྦྱངས་ན་རང་དོན་ཁོ་ན་སྒྲུབ་པའི་བསམ་སྦྱོར་འདི་སྤོང་མི་ནུས། རང་དོན་ཁོ་ན་བསྒྲུབས་ནས་མཐར་ཐུག་གི་འབྲས་བུ་ཐོབ་སོང་བའི་དཔེ། ཆོས་དང་འཇིག་རྟེན་གཉིས་ཀ་ན་མེད་དེ། རྒྱལ་སྲས་ཞི་བ་ལས། འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་འདོད་ལས་བྱུང་། །འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་བདག་བདེ་འདོད་ལས་བྱུང་། །ཞེས་གསུངས་པས་འཇིག་རྟེན་ཁམས་ཀྱི་བདེ་བ་དང་ལེགས་ཚོགས་ཐམས་ཅད་གཞན་ལ་ཕན་པའི་བསམ་པ་ལས་བྱུང་བ་དང་། འཇིག་རྟེན་ཁམས་ཀྱི་སྡུག་བསྔལ་ཇི་སྙེད་ཐམས་ཅད་བདག་རང་དོན་ཁོ་ན་སྒྲུབ་པ་ལ་བརྟེན་ནས་འཁོར་བའི་གནས་སུ་སྡུག་བསྔལ་མྱོང་བ་ཤ་སྟག་ཡིན། དེ་ཉིད་ཀྱིས། མང་དུ་བཤད་ལྟ་ཅི་ཞིག་དགོས། །བྱིས་པས་རང་གི་དོན་བྱེད་དང་། །ཐུབ་པས་གཞན་གྱི་དོན་མཛད་པ། །འདི་གཉིས་ཀྱི་ནི་ཁྱད་པར་ལྟོས། །ཞེས་གསུངས་པ་ལྟར་འདིའི་ཐད་མང་དུ་བཤད་ཅི་དགོས་བྱིས་པ་སོ་སོའི་སྐྱེ་བོས་རང་དོན་ཁོ་ན་བསྒྲུབས་ཀྱང་མ་འགྲུབ་ནས་འཁོར་བའི་སྡུག་བསྔལ་མྱོང་བ་དང་། ཐུབ་པ་བཅོམ་ལྡན་འདས་ཀྱིས་གཞན་དོན་ཁོ་ན་མཛད་པས་རང་གཞན་གཉིས་ཀའི་དོན་འགྲུབ་ནས་མཐའ་གཉིས་ལ་མི་གནས་པའི་ཞི་བ་དམ་པའི་གོ་འཕང་བརྙེས་པའི་ཁྱད་པར་ལ་ལྟོས་དང་ཤེས་ནུས་གསུངས། མངོན་སུམ་ཚད་མས་བལྟས་ཀྱང་འཇིག་རྟེན་ཕྱོགས་ནས་བསམས་ན་རང་འདོད་ཁོ་ན་སྒྲུབ་པའི་མིའི་བྱ་བའི་མཐར་བཟང་པོ་མི་འོང་། གཞན་དོན་སྤྱི་སེམས་ཅན་སྤྱི་ཕན་རྣམ་དག་སྒྲུབ་པའི་མིས་རང་དོན་མ་འགྲུབ་ནས་མཐར་ཕམ་པའི་དཔེ་མེད། ཆོས་ཕྱོགས་ལ་བསམས་ན་ཉན་རང་རྣམས་ཀྱིས་རང་དོན་ཞི་བདེ་དོན་དུ་གཉེར་ཡང་བྱང་ཆུབ་སེམས་དཔའི་སའི་ཡོན་ཏན་དང་སངས་རྒྱས་ཀྱི་འབྲས་བུའི་ཡོན་ཏན་ཐམས་ཅད་མ་ཐོབ་པ་ཡིན། དེས་ན་འོ་ཅག་གིས་ཆོས་ཚིག་བཞི་བའི་ཚིགས་སུ་བཅད་པ་གཅིག་ཙམ་ལས་མ་བཤད་ཀྱང་ཐམས་ཅད་ཀྱི་འགོར། ནམ་མཁའ་དང་མཉམ་པའི་སེམས་ཅན་ཐམས་ཅད་ཟེར་བའི་རྒྱུ་མཚན་ཡང་སྙིང་རྗེས་ཀུན་ནས་བསླངས་ཏེ་བྱང་ཆུབ་ཀྱི་སེམས་མཆོག་བསྐྱེད་དེ། མཐའ་ཡས་པའི་སེམས་ཅན་ཐམས་ཅད་འཁོར་བ་ལས་བསྒྲལ་བའི་དོན་ལ་ཐུག་ཡོད། སྤྱིར་སྙིང་རྗེ་ཕྱོགས་རེ་བ་ཙམ་ནི་སུ་ལའང་ཡོད་དེ། ཤ་ཟ་སྲིན་པོ་ཡིན་ཡང་བུ་མི་ཟ། །རི་སྤྱང་སྔོན་མོ་ཡིན་ཡང་མ་མི་གསད། །ཟེར་བ་ལྟར་རང་གིས་ཕ་མ་བུ་རྒྱུད་དང་ཁྱིམ་བཟའ་ཚང་ལ་བརྩེ་བ་ཙམ་ལ་སྙིང་རྗེ་ཆེན་པོ་མི་ཟེར་བས་སྙིང་རྗེ་ཉི་ཚེ་བ་ཡིན། དེ་ནི་བྱམས་དང་སྙིང་རྗེ་ཆེན་པོ་མ་ཡིན། དང་པོ་བྱང་ཆུབ་ཀྱི་སེམས་རིན་པོ་ཆེ་ནི། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་འདོད་ཀྱི་བསམ་པ་དེ་ཡིན། དེ་ཉིད་མ་སྐྱེས་པ་སྐྱེ་བའི་ཐབས་ཚད་མེད་བཞིས་བློ་སྦྱོང་དགོས། མི་ཉམས་པ་གོང་ནས་གོང་དུ་འཕེལ་བའི་ཐབས་བྱང་ཆུབ་མཆོག་ཏུ་སེམས་བསྐྱེད་པ་དང་དེའི་བསླབ་བྱ་ལ་སློབ་དགོས་པ་ཡིན། དེ་འདྲའི་བྱང་ཆུབ་ཀྱི་སེམས་རིན་པོ་ཆེ་དེ་དང་པོ་མ་སྐྱེས་པ་སྐྱེ་བའི་ཐབས་དང་། བར་དུ་སྐྱེས་པ་མི་ཉམས་པའི་ཐབས་དང་། མཐར་གོང་ནས་གོང་དུ་འཕེལ་བའི་ཐབས་ལ་བརྩོན་དགོས། དེའི་ཐབས་མཆོག་ནི་རྒྱས་པར་ཕྱེ་ན་ཚད་མེད་བཞི། འབྲིང་དུ་ཕྱེ་ན་བྱམས་སྙིང་རྗེ་གཉིས། གཅིག་ཏུ་བསྡུ་ན་སྙིང་རྗེ་ཉག་མ་གཅིག་པོ་དེ་ལ་ཐུག་པས། མ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ལ་ཕྱོགས་རིས་མེད་པའི་སྙིང་རྗེ་ཆེན་པོ་ཞིག་ཡོད་དགོས། སེམས་ཅན་སྡུག་བསྔལ་ཅན་མཐོང་དུས་སྙིང་རྗེའི་ཤུགས་ཀྱིས་མིག་ནས་མཆི་མ་འབབ་པ་ཞིག་བྱུང་ན་སྙིང་རྗེ་འབྱོངས་པའི་ཚད་ཡིན་གསུངས། ད་སྔ་ཉི་མ་ཡན་ཆད་རང་གཅེས་འཛིན་འབའ་ཞིག་བྱས་ནས་གཞན་ཡལ་བར་དོར་བའི་འབྲས་བུ་རང་གཞན་གཉིས་ཀའི་དོན་མ་འགྲུབ་ནས་འཁོར་བར་འཁྱམས་པ་འདི་ཡིན། བཅོམ་ལྡན་འདས་ཐུབ་པའི་དབང་པོས་རང་ཡལ་བར་དོར་ནས་གཞན་གཅེས་པ་བཟུང་སྟེ་གཞན་དོན་འབའ་ཞིག་མཛད་པས་མངོན་པར་རྫོགས་པར་སངས་རྒྱས་ཟིན་ནི་རེད། དེས་ན་ལམ་ལ་ཞུགས་པའི་གང་ཟག་གིས། ལམ་འོག་མ་བསྒོམས་ཤིང་བསྒོམས་ནས། ལམ་གོང་མར་ཐོབ་འདོད་ཇེ་ཆེར་འགྲོ་བ་དང་། གོང་མ་གོང་མ་རྣམས་ཉན་ཞིང་ཉན་ནས། འོག་མ་འོག་མ་རྣམས་སྒྲུབ་འདོད་ཇེ་ཆེ་འགྲོ་ནི་ཞིག་དགོས་ཏེ། འོག་མ་བསྒྲུབས་ནས་གོང་མ་ཐོབ་དགོས། གཞུང་ལུགས་ཐམས་ཅད་གདམས་པར་ཤར་བའི་ཉམས་ལེན་བྱེད་དགོས། ལམ་སྒོམ་པའི་ཚེ་མི་སོ་སོའི་རྒྱུད་ཚོད་མི་འདྲ་བས་མི་གཅིག་གི་ཆ་ཚད་དེས་མི་ཚང་མ་ལ་འགེབས་རྒྱུ་ཡོད་པ་མ་རེད། རང་གིས་རང་གི་རྒྱུད་དང་སྦྱར་ནས་ཉམས་ལེན་བྱེད་དགོས། ལམ་ཁྲིད་གནང་བའི་དགེ་བའི་བཤེས་གཉེན་ལ་དད་པ་ཆུང་བའི་རིགས་ཤིག་ཡིན་ན། ལེགས་ཚོགས་ཐམས་ཅད་ཀྱི་རྩ་བ་ཆད་ལ་ཉེ་བས་བཤེས་གཉེན་བསྟེན་ཚུལ་ལ་ཡང་ནས་ཡང་དུ་སྦྱོང་སྟེ། ཐུན་ཕྱི་མ་རྣམས་ལ་ཡང་ཉམས་ལེན་འབྲལ་མེད་དེ་ལ་འབད་དགོས། སྒྲུབ་པ་ལ་བརྩོན་འགྲུས་ཆུང་བའི་རིགས་ཤིག་ཡིན་ན་དལ་འབྱོར་རྙེད་དཀའི་སྐོར་ལ་ཡང་ནས་ཡང་དུ་དཔྱད་སྒོམ་དང་འཇོག་སྒོམ་གང་དྲག་གིས་དེ་ལ་སྦྱོང་བ་གནད་ཁེལ་བྱེད་དགོས། ཡང་ཚེ་འདིའི་མངོན་ཞེན་ལྡོག་དཀའ་བའི་རིགས་ཤིག་ཡིན་ན་མི་རྟག་པ་དང་ངན་འགྲོའི་སྡུག་བསྔལ་དང་འཁོར་བའི་ཉེས་དམིགས་ལ་བློ་སྦྱངས་ནས་གཙོ་ཆེར་དེ་དག་བསྒོམ་དགོས། ཁས་བླངས་དམ་བཅའ་དང་འགལ་ནི་ཞིག་ཡིན་ན་ལས་རྒྱུ་འབྲས་ཀྱི་རྣམ་བཞག་ལ་ཡིད་ཆེས་གཏིང་ནས་སྐྱེས་པའི་ངེས་ཤེས་ཡོད་པ་ཞིག་མ་བྱུང་གི་བར་དུ་བརྩོན་དགོས། ཡང་མྱི་འགའ་ཞིག་འཁོར་བ་ལ་སྐྱོ་ཤས་ཆུང་བའི་རིགས། དམུས་རྒྱུ་མེད་པའི་བན་རྒན། །ན་ནིང་ཤི་སར་ད་ལོར། །ཟེར་བ་ལྟར་རང་གི་ས་ཆ་ཡུལ་རིས་ལ་ཆགས་ནི་ཞིག་ཡིན་ན། འཁོར་བ་གང་དུ་སྐྱེས་ཀྱང་སྡུག་བསྔལ་གྱི་ཡོ་ལངས། སྡུག་བསྔལ་གྱི་འཕྲུལ་འཁོར། སྡུག་བསྔལ་རྣམ་པ་གསུམ་གྱིས་དམ་ལ་མ་བཞག་པ་མེད་པའི་ཚུལ་ལ་བསམས་ནས་བསྒོམ་དགོས། དེས་ན་རང་རེས་དུས་དང་རྣམ་པ་ཐམས་ཅད་དུ་སེམས་ཅན་ཐམས་ཅད་ཕ་མ་ཡིན་པས་སྙིང་རྗེ་དགོས་ཚུལ། ཚེ་ལ་རྟག་པ་མེད་པས་ལོང་མེད་རྒྱུད་ལ་བརྟེན་དགོས་ཚུལ་གསུངས་པ་རྣམས་གཙོ་བོ་རང་རེའི་རྒྱུད་ཚོད་དང་སྦྱར་ནས་བཤད་པ་ཡིན། སྐབས་སུ་བབས་པ་གང་གསན་པར་བྱ་བའི་ཆོས་ཀྱི་རིམ་པ་ནི། དེ་རིང་ཁྲིད་རྐང་ཐམས་ཅད་ཀྱི་རྗེས་མ་དངོས་གཞི་གདམས་པའི་ཆ་ལག་འདའ་ཀ་མའི་མན་ངག་འཕོ་བ་མ་བསྒོམས་སངས་རྒྱས་ཀྱི་ཁྲིད་འཆད་པའི་སྐབས་ཡིན་ཏེ། རྨོངས་པ་མ་རིག་པས་བསླད་པའི་འགྲོ་བ་མགོན་མེད་པ་དག་ལ་ཐུགས་རྗེ་བརྩེ་བ་ཆེན་པོ་ལྷག་པར་འཇུག་པ་ཡིན་ཞིང་། གདུལ་བྱ་སྡིག་པོ་ཆེ་ལ་ཐུགས་བརྩེ་བས་རྗེས་སུ་ལྷག་པར་འཛིན་པར་མཛད་ཅིང་། གདུལ་བ་དཀའ་བའི་འགྲོ་མང་སེམས་ཅན་གྱི་ཁམས་ལ་གང་ལ་གང་འདུལ་གྱི་ཐབས་མཁས་ལྷག་པར་སྟོན་པ་མཚུངས་མེད་བླ་མ་དམ་པའི་ཞབས་ལ་ཕྱག་འཚལ་ལོ། །ཞེས་སྐབས་ཀྱི་ཕྱག་འཚལ་བ་དང་བཅས་ཏེ། དེ་ནས་འདའ་ཀ་མའམ་འཆི་ཁ་མའི་མན་ངགའཕོ་བ་མ་བསྒོམས་སངས་རྒྱས་ཀྱི་ཁྲིད་ནི། སྤྱིར་དངོས་གཞིའི་གདམས་པ་གནད་དུ་སོང་བའི་གང་ཟག་དེ་ཀ་དག་ཁྲེགས་ཆོད་ཀྱི་གྲོང་འཕོ་གྲོང་འཇུག་དང་། ལྷུན་གྲུབ་ཐོད་རྒལ་གྱི་འོད་གསལ་སྦུབས་འཇུག་ལ་རང་བྱན་ཆུད་སོང་ནི་རིག་པའི་གཏན་སྲིད་ཟིན་པ་ལ་འདི་མི་དགོས། དེ་མ་ཡིན་པའི་རིག་པ་རྐྱེན་ཁར་འཆོལ་བ་སོགས་ལ་འདི་དགོས་ཏེ། ལམ་སྦྱངས་པ་དམན་ན་འཕོ་བས་བསུ། །གསུངས་པ་ལྟར་རོ། །འདི་མ་བསྒོམས་སངས་རྒྱས་གསུངས་པ་ནི་བསྐྱེད་རྫོགས་གཞན་ལྟར་དུས་ཡུན་རིང་དང་འབད་པའི་བཀའ་སྤྱོད་ཀྱི་ངལ་བ་ལ་ལྟོས་ནས་བསྒོམ་མི་དགོས་གསུངས་པ་ཡིན་གྱི། འཕོ་བ་རང་གི་དམིགས་པ་ཙམ་ཡང་བསྒོམ་མི་དགོས་གསུངས་པ་མིན། གཏུམ་མོ། འོད་གསལ། སྒྱུ་ལུས། བར་དོ། འཕོ་བ། གྲོང་འཇུག་སྟེ་རྫོགས་རིམ་ནཱ་རོ་ཆོས་དྲུག་གི་ནང་ཚན་བློ་ཆོད་འཕོ་བའང་འདི་ཡིན།
༼༣༽ཉེ་ལམ་འཕོ་པའི་ཁྲིད་ལ་ལྔ།
༡༽འཕོ་བའི་དབྱེ་བ་སྤྱིར་བཤད་པ།
དེ་ཡང་འཕོ་བ་ལ་དབྱེ་ན་ལྔ་སྟེ། རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ། འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ། ཐ་མ་སྤྲུལ་སྐུ་ཚད་མེད་ཐུགས་རྗེའི་འཕོ་བ། ཐ་མལ་པ་འདུ་ཤེས་གསུམ་ལྡན་གྱི་འཕོ་བ། གཤིན་པོ་རྗེས་འཛིན་ཐུགས་རྗེ་ལྕགས་ཀྱུའི་འཕོ་བ་དང་ལྔ་ཡོད་དེ། དེ་ལ་དང་པོ་རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ་ནི། ཚེ་འདིར་གནས་ལུགས་མ་བཅོས་པའི་དོན་གྱི་ལྟ་བ་མ་ནོར་བ་ཞིག་རང་རྒྱུད་ལ་སྐྱེས་ཤིང་། ལྟ་བ་དེ་ཉིད་རྟོགས་ནས་གོམས་འདྲིས་བྱེད་པ་རྣམས། འཆི་ཁའི་ཚེ་ཀ་དག་ཁྲེགས་ཆོད་ཀྱི་གསང་ལམ་ནས་ངོ་སྤྲོད་ཀྱི་གདམས་པ་ཐེབས་སོང་བས་དབྱིངས་དང་རིག་པའི་གནད་ལ་བརྟེན་ཏེ། ཇི་སྐད་དུ། དབྱིངས་དང་རིག་པ་མི་འགྱུར་ན། །མི་དེ་བར་དོ་མེད་པ་རུ། །འཚང་རྒྱ་བ་ལ་ཐེ་ཚོམ་མེད། །ཅེས་གསུངས་པ་ལྟར། ཆོས་སྐུའི་ཀློང་དུ་འོད་གསལ་སྦུབས་འཇུག་གིས་འཕོ་བ་དེ་ཡིན། འདི་གང་ཟག་དབང་པོ་རབ་མཐོང་ལམ་ཆོས་ཉིད་ཀྱི་བདེན་པ་མཐོང་བའི་འཕགས་པ་རྣམས་ཀྱི་འཕོ་ལུགས་དེ་ཡིན། འོན་ཀྱང་རབ་ཚེ་འདིར་གྲོལ་བ་དང་འབྲིང་བར་དོ་གྲོལ་བ་གཉིས་ཀའང་། རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བའི་གྲངས་སུ་བགྲང་ཆོག་སྟེ། ཚེ་འདི་ལ་གནས་ལུགས་མ་བཅོས་པའི་ལྟ་བ་རྒྱུད་ལ་སྐྱེས་ནས་སྒོམ་ཉིན་མཚན་འཁོར་ཡུག་ཏུ་འགྲོ་བའི་གང་ཟག་དེ་ཀ་དག་ཁྲེགས་ཆོད་ཀྱི་མན་ངག་གམ། ལྷུན་གྲུབ་ཐོད་རྒལ་ཀྱི་མན་ངག་གིས་གྲོལ་བ་ཐོབ་པར་ཡིན། དེ་ལྟར་རིག་པ་ལ་རང་དབང་མ་ཐོབ་ཅིང་ཉིན་སྣང་ཙམ་ཆོད་ཀྱང་མཚན་སྣང་མི་ཆོད་པའི་གང་ཟགདམ་ཚིག་རྣམ་པར་དག་པ་དེ་དག་འཆི་བའི་ཚེ་ཕྱི་ནང་གི་ཐིམ་རིམ་རྣམས་དང་། སྣང་མཆེད་ཐོབ་གསུམ་རྣམས་རྫོགས་པའི་རྗེས་སུ་འཆི་སྲིད་ཆོས་སྐུའི་འོད་གསལ་རྐྱེན་གསུམ་དང་བྲལ་བའི་སྟོན་གནམ་ལྟ་བུའི་གཞི་དུས་མ་ཡི་འོད་གསལ་འཆར་ཞིང་ཚེ་འདིའི་འོད་གསལ་བུ་ལྟ་བུས་སྐྱེལ་མ་བྱས་ནས་གཞིའི་འོད་གསལ་མ་ལྟ་བུ་དང་མཇལ་ཞིང་ཀ་དག་དང་པོའི་གཞི་སྣང་ངམ་གཞི་ཐོག་ཏུ་གྲོལ་བ་ཡིན། ཐོད་རྒལ་གྱི་ཉམས་སྣང་གོང་འཕེལ་གྱི་སྣེ་ཟིན་པའི་གང་ཟག་དེ་འཆི་བའི་ཚེ་འཆི་སྲིད་ཆོས་སྐུའི་འོད་གསལ་འཆར་དུས་ད་ལྟ་རྟོགས་པ་མ་རྟོགས་པའི་སྟོབས་ཀྱིས་འཆི་སྲིད་ཀྱི་འོད་གསལ་དང་པོ་ངོས་མ་ཟིན་ཞིང་གྲོལ་མི་ཐུབ་ལ་ཆོས་ཉིད་དག་པའི་བར་དོ་འཆར་དུས་ངོ་ཤེས་ཤིང་མཉམ་པར་བཞག་པས་ལྷུན་གྲུབ་ཀྱི་སྣང་བ་ལས་གྲོལ་བ་ཡིན། དེས་ན་ཚེ་འདི་དང་བར་དོར་གྲོལ་བ་གཉིས་ཀ་རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བའི་གྲངས་སུ་བགྲང་བ་ཡིན། འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ་ནི། བར་དོའི་སྨོན་ལམ་ལས། དེ་ཡང་བསྐྱེད་རིམ་ལ་གོམས་ན། །རླུང་སེམས་ཙམ་གྱི་ལུས་དེ་ཉིད། །མཚན་དཔེའི་རྫོགས་པའི་ཡི་དམ་གྱི། །ལྷ་སྐུར་མངོན་བྱང་ལྔས་ཆུབ་པ། །བར་དོ་ལོངས་སྐུར་བསྲེ་བ་ཡི། །སྒྱུ་མའི་སྐུ་རུ་ལྡང་བར་ཤོག །ཅེས་པ་ལྟར་ཚེ་འདིར་བསྐྱེད་རྫོགས་དབྱེར་མེད་ཀྱི་རྣལ་འབྱོར་ལ་གོམས་འདྲིས་བྱས་ཤིང་སྒྱུ་མ་ལྟ་བུའི་ལྷ་སྐུ་ལ་རྩལ་འབྱོངས་པ་དག་འཆི་བའི་ཚེ་བར་དོ་འཁྲུལ་པའི་སྣང་བ་འཆར་བ་དང་མཉམ་དུ་ཟུང་འཇུག་ཡེ་ཤེས་ཀྱི་སྐུར་འཕོ་བ་དེ་ཡིན། འདི་རྫོགས་རིམ་གྱི་ཡེ་ཤེས་ཀྱི་སྣེ་ཟིན་པ་སྦྱོར་ལམ་དྲོད་རྩེ་མོ་བཟོད་པ་ཆོས་མཆོག་སྟེ་ངེས་འབྱེད་ཆ་བཞི་གང་ལ་སླེབ་པ་སྦྱོར་ལམ་གྱི་ཡེ་ཤེས་རྒྱུད་ལ་སྐྱེ་བའི་སྒྱུ་ལུས་ལ་འཇུག་ལྡང་ནུས་པའམ། མིན་ཡང་ངོ་སྤྲད་ནས་རྩལ་སྣང་དག་པ་ལྷའི་བསྐྱེད་རྫོགས་ཟུང་འཇུག་ལ་གོམས་པ་དེ་འཆི་ཁར་བསྐྱེད་རིམ་བསྡུ་རིམ་བྱེད་པ་ལྟར་སྒྱུ་ལུས་འོད་གསལ་དུ་བསྡུས་ནས་ཚེ་འདིར་དཔེའི་འོད་གསལ་རྒྱུད་ལ་སྐྱེས་ཡོད་ན་བར་དོ་དོན་གྱི་འོད་གསལ་རྒྱུད་ལ་སྐྱེས་ནས་དེའི་རྗེས་ཐོབ་ཡི་དམ་གྱི་སྐུ་སློབ་པའི་ཟུང་འཇུག་ཕྱག་རྒྱ་ཆེན་པོ་ལ་ལྡང་ནས་གྲོལ་བ་རྣམས་འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ་གསུངས། ཐ་མ་སྤྲུལ་སྐུ་ཚད་མེད་ཐུགས་རྗེའི་འཕོ་བ་ནི། གསང་སྔགས་སྨིན་བྱེད་ཀྱི་དབང་ཐོབ་ཅིང་། དམ་ཚིག་ལ་སྐྱོན་མ་ཞུགས། བསྐྱེད་རྫོགས་ལ་མོས་པ་བྱེད་ཅིང་བར་དོའི་གདམས་ངག་དང་ལྡན་པ་རྣམས། ཇི་སྐད་དུ། མངལ་སྒོ་དགག་ནས་རུ་ལོག་དྲན་པར་བྱ། །སྙིང་རུས་དག་སྣང་དགོས་པའི་དུས་ཤིག་ཡིན། །ཞེས་གསུངས་པ་ལྟར། མ་དག་པའི་མངལ་སྒོ་ངན་པ་བཀག་ཅིང་། སྙིང་རྗེ་ཆེན་པོའི་འཕེན་པ་དང་། དེ་ཚེ་རང་བཞིན་སྤྲུལ་བའི་ཞིང་། །མངོན་པར་དགའ་དང་དཔལ་ལྡན་དང་། །པདྨ་རྩེགས་དང་ལས་རབ་གྲུབ། །དབུས་ཕྱོགས་མེ་རི་འབར་བ་སྟེ། །རྣམ་གྲོལ་དབུགས་ཆེན་འབྱིན་པ་ལྔའི། །དག་ཞིང་ཡིད་ལ་གོམས་བྱས་ནས། །གདོད་མའི་ས་ལ་གྲོལ་བར་ཤོག །ཅེས་གསུངས་པ་ལྟར། སྐྱེ་བ་སྤྲུལ་པའི་ལམ་ཁྱེར་ལ་བརྟེན་ནས་ཞིང་དག་པའི་སྐྱེ་གནས་སུ་འཕོ་བ་དེ་ཡིན་ཏེ། དབང་ཐོབ་དམ་ཚིག་དང་ལྡན་པ་ལྟ་བ་ལ་གོ་བ་བཟང་པོར་ཆགས་པའི་ཚོགས་ལམ་པ་ལས་དང་པོ་བ་བསྐྱེད་རིམ་ལ་ཡང་མོས་པ་ཙམ་ལམ་དུ་བྱེད་པ་དེས་འཆི་སྲིད་ཆོས་སྐུའི་འོད་གསལ་དང་ཆོས་ཉིད་བར་དོ་གཉིས་ལ་གྲོལ་བའི་གདེང་མེད་ཀྱང་། བར་དོར་སྐྱབས་འགྲོ་དང་བླ་མ་ལ་གསོལ་བ་འདེབས་པའི་སྒོ་ནས་མངལ་སྒོ་ངན་པ་རྣམས་དགག་བཟང་པོ་འདེམས་ཤིང་སྙིང་རྗེ་དང་བྱང་ཆུབ་སེམས་ཀྱིས་འཕེན་པས་དག་པའི་ཞིང་དུ་འགྲོ་བའམ་མིན་ཡང་ཕ་མ་ཆོས་ལྡན་གྱི་མངལ་དུ་སྐྱེ་བ་སྤྲུལ་པའི་སྐུར་སྐྱེ་བ་ལེན་ཅིང་ཕྱི་མ་དེར་གྲོལ་བ་ཡིན། ཐ་མལ་པ་འདུ་ཤེས་གསུམ་ལྡན་གྱི་འཕོ་བ་ནི། ལས་དང་པོ་བ་དམ་པའི་ཆོས་ལ་མོས་པ་ཙམ་བྱེད་པ། སྐྱེ་འཆི་བར་དོ་ཕྱི་མ་རྣམས་ཀྱིས་གྲོལ་བའི་ལམ་རྟགས་དང་མི་ལྡན་པ་རྣམས་ཀྱི་འཕོ་ལུགས་ཡིན། འདུ་ཤེས་གསུམ་ནི། རྩ་དབུ་མ་ལ་ལམ་གྱི་འདུ་ཤེས། སེམས་རྣམ་ཤེས་ཀྱི་ཐིག་ལེ་ལ་མགྲོན་པོའི་འདུ་ཤེས། གནས་བདེ་ཆེན་དག་པའི་ཞིང་ལ་འགྲོ་སའི་འདུ་ཤེས་བྱས་ཏེ་འཕོ་བ་ཡིན། གཤིན་པོ་རྗེས་འཛིན་ཐུགས་རྗེ་ལྕགས་ཀྱུའི་འཕོ་བ་ནི། རྟོགས་པ་མཆོག་ལྡན་གྱི་གང་ཟག་སྣང་སེམས་ལས་སུ་རུང་སྟེ། བར་དོའི་ཤེས་རྒྱུད་མཁྱེན་པའི་རྣལ་འབྱོར་པས་གཞན་འཆི་ཀ་མའམ་བར་དོ་ན་ཡོད་པའི་སེམས་ཅན་དེ་ལ། འཕོ་བ་འདེབས་པ་དེ་ཡིན། དམིགས་པ་ལ་རང་དབང་ཐོབ་སོང་བའི་རྣལ་འབྱོར་པ་ཞིག་གིས་རླུང་སེམས་གཞུ་ལྟ་བུ་དེ་ལ་ཚེ་འདས་ཀྱི་རྣམ་ཤེས་མདའ་ལྟ་བུ་དེ་སྦྱར་ནས་རྣལ་འབྱོར་པ་རང་ལུས་ཀྱི་དམིགས་པའི་སྟེང་ནས་འཕེན་པ་ཡིན། དེ་ཡང་སྤྱིར་གཤིན་པོ་ལ་འཕོ་བ་འདེབས་པ་ལ། འདེབས་པ་པོ་དེ་ཉིད་མཐོང་ལམ་ཐོབ་པ་ཞིག་ངེས་པར་དགོས་ཏེ། རྗེ་མི་ལའི་ཞལ་ནས་ཀྱང་། མཐོང་ལམ་གྱི་བདེན་པ་མ་མཐོང་བར། །གཤིན་པོ་ལ་འཕོ་བ་མ་འདེབས་ཤིག །ཅེས་གསུངས། འོན་ཀྱང་འཕོ་བ་གདབ་པའི་དུས་མ་ནོར་བ་དེ་ཕྱི་དབུགས་ཆད་ནས་ནང་དབུགས་མ་ཆད་པའི་དུས་དེ་ཡིན་ཏེ། དེ་ལྟ་བུའི་དུས་ངེས་པ་ཅན་དང་འཕྲད་ན་འཕོ་བའི་མན་ངག་ལ་ཅུང་ཟད་གོམས་འདྲིས་ཡོད་པ་གང་རུང་རུང་གིས་འཕོ་བ་བཏབ་ན་ཡང་། ཕན་ཐོགས་ཆེ་ཞིང་ངན་སོང་གི་སྐྱེ་གནས་ལ་སོགས་པ་དགག་པར་ནུས་ཏེ། མགྲོན་པོ་ལམ་དུ་ཞུགས་པ་ལ་གྲོགས་ཀྱིས་སྒྱུར་བ་དང་འདྲ། དེ་ལྟར་མ་ཡིན་པར་ལུས་སེམས་བྲལ་ཚར་ནས་ནི་འཕོ་བ་དཀའ་སྟེ། དེ་འདྲ་དེ་ལ་འཕོ་བ་འདེབས་པ་ལ་བར་དོའི་སྐྱེ་གནས་མཁྱེན་པ་ཞིག་དང་། སྣང་སེམས་ལ་དབང་ཐོབ་པ་ཞིག་དགོས། དེ་ལྟ་བུའི་རྣལ་འབྱོར་པ་ཞིག་ཡིན་ན་བར་དོ་གདོས་བཅས་ཀྱིས་ལུས་དང་བྲལ་བ་དེ་རྐྱེན་གྱིས་སྒྱུར་བར་སླ་བ་ཡིན་པས། གདོས་བཅས་ཀྱི་ལུས་དང་བྲལ་བའི་བར་དོ་རང་ནས་འཕོ་བ་བཏབ་ན་རྣམ་ཤེས་དག་པའི་ཞིང་དུ་སྤར་ནུས་པ་ཡིན་གྱི། ཕྱི་དབུགས་ཆད་ནས་ནང་དབུགས་མ་ཆད་པའི་བར་དུ་འཕོ་བ་བཏབ་ན་འཕོ་བ་ལས་རུང་ཙམ་ཞིག་གྲུབ་པས་ཀྱང་བར་དོའི་རྣམ་ཤེས་མགྲོན་པོ་ལམ་ཞུགས་གྲོགས་ཀྱིས་སྒྱུར་བ་དང་འདྲ་བ་སྤར་སླ་བ་ཡིན། དབུགས་ཆད་ཟིན་ནས་ལུས་སེམས་བྲལ་ཚར་བའི་གནས་སྐབས་ན། འཕོ་བ་དཀའ་ཏེ་ཤི་ཚར་ནས་ཀྱང་ཕུང་པོ་དང་མཚན་བྱང་ལ་རྣམ་ཤེས་བཀུག་སྟེ་འཕོ་བར་རློམ་པ་ལ་ནི་སྙིང་པོ་ཅི་ཡང་མེད་གསུངས། རྟོགས་པ་མཆོག་ལྡན་གྱི་གང་ཟག་སྣང་སེམས་ལ་རང་དབང་ཐོབ་པ་ཞིག་ཡིན་ན། རྣམ་ཤེས་རྟེན་ལ་བཀུག་མི་དགོས་པར་དག་པའི་ཞིང་དུ་སྤར་ནུས་པ་ཡིན་ལ། འོན་ཀྱང་རྣམ་ཤེས་རྟེན་སོགས་ལ་བཀུག་པའི་ཕྱག་བཞེས་ཆོས་རྒྱུན་འདི་ལའང་ཡོད་པ་ཡིན་ཏེ། ཆོ་ག་རྣམས་ཀྱི་གཞུང་ན་གསལ་བ་དང་། རྫོགས་ཆེན་པདྨ་རིག་འཛིན་དང་སློབ་བུ་ཉི་ཟླ་སྐར་གསུམ་གྱིས་འཕོ་བ་བཏབ་པའི་ལོ་རྒྱུས་ལྟ་བུ་རེད། དེ་བས་ན་ད་ལྟ་བླ་མའམ་སྤྲུལ་སྐུ་ལ་སོགས་པའི་མིང་ཙམ་བཏགས་པ་ཕལ་མོ་ཆེས་གཤིན་པོ་ལ་འཕོ་བ་འདེབས་པ་ནི། བྱམས་སྙིང་རྗེ་བྱང་ཆུབ་སེམས་ཀྱིས་ཀུན་ནས་བསླངས་ཏེ་རང་འདོད་ཀྱི་འཁྲིས་རྩ་བ་ནས་མེད་ན་ནི། དོན་དམ་བྱང་ཆུབ་སེམས་མ་ལྡན་ན་ཡང་ཀུན་རྗོབ་བྱང་ཆུབ་ཀྱི་སེམས་ཡོད་ན་ཀུན་སློང་དེ་ལས་གཤིན་པོ་ལ་ཡང་ཕན་ཐོགས་ཤས་ཆེ་ཞིང་རང་ལ་སྒྲིབ་པར་མི་འགྱུར་མོད། དེ་ལྟར་མ་ཡིན་པར་རང་གི་རྙེད་ཚོལ་གྱི་ཆེད་དུ་ངག་འདོན་ཙམ་ཤེས་པ་ལ་བརྟེན་ནས་འཕོ་བ་འདེབས་ཤིང་། གཤིན་པོའི་འཕོ་རྟ་སོགས་ལེན་པ་ནི་ཤིན་ཏུ་ཐ་ཆད་པ་ཡིན་ཏེ། ཇི་སྐད་དུ། རང་ཐར་བའི་སྐམ་སར་མ་ཕྱིན་པར། །མི་གཞན་གྱི་འདྲེན་སྟོན་བྱེད་པ་དེ། །དེ་གཉིས་ཀྱང་ཅུང་ཟད་ཆ་མ་མཐུན། །དཔེ་ཆུས་ཁྱེར་མི་ལ་མིས་འཇུས་འདྲ། །ཞེས་པ་ལྟར་དང་། སྔོན་རྟོགས་ལྡན་བསྟན་འཛིན་ཆོས་འཕེལ་ཙྭ་རིར་གནས་སྐོར་བྱོན་པའི་སྐབས་ཤིག་ཁོང་གི་སྣང་བ་ལ་སྔ་སོར་ཁོང་རང་ནས་འཕོ་བ་བཏབ་སྟེ། འཕོ་རྟ་བླངས་པའི་མི་ཞིག་ཡོད་པ་དེས་ཁྲག་མཚོ་དམར་པོ་ཞིག་གི་ནང་ནས་མགོ་མཐོང་ཙམ་བྱས་ཏེ། ཁོང་གི་མཚན་ནས་འབོད་ཅིང་ང་ཅི་བྱེད་དགོས་རྒྱུ་ཡིན་ཟེར་བ་ལ། ཁོང་སྐྲག་ནས་ངས་ཙྭ་རི་བསྐོར་བའི་དགེ་བ་དེ་ཁྱོད་ལ་བྱིན་པ་ཡིན་བྱས་པས་མི་སྣང་བར་གྱུར་སྐད། དེར་མ་ཟད་རྟོགས་པ་མཆོག་ལྡན་གྱི་གང་ཟག་སྐྱེས་བུ་དམ་པ་ཡིན་ཡང་ཤི་བོའི་འབུལ་བ་བླངས་ནས་གསུང་ཆོག་སོགས་མ་བྱས་ན་ས་ལམ་ལ་སྒྲིབ་པ་ཡིན་ཏེ། སྔོན་རྫོགས་ཆེན་རིན་པོ་ཆེ་འགྱུར་མེད་ཐེག་མཆོག་བསྟན་འཛིན་ཞིང་གཤེགས་པའི་ཚེ་དྲི་མེད་ཞིང་སྐྱོང་མགོན་པོ་གདུང་ཆོག་ལ་སྤྱན་དྲངས་པས་ཉིན་གང་གི་རིང་ལ་ཁྲུས་ཆོག་དང་དགུག་པ་ཁོ་ན་མཛད་ནས་ཡང་དང་ཡང་འཕོ་བ་བཏབ་སྟེ། གང་ཟག་ཕལ་པ་ཞིག་ལ་བྱེད་པ་ལྟར་མཛད་པ་ལ། གྲྭ་པ་རྣམས་ནས་དེ་ལྟར་མཛད་པའི་རྒྱུ་མཚན་དྲིས་པས། སྔོན་ཁོང་གིས་གཤིན་པོ་རྟ་ནག་པོ་འབུལ་མཁན་ཞིག་ལ་གསུང་ཆོག་དང་བསྔོ་སྨོན་སོགས་མ་མཛད་འདུག་པ། དེ་ཤིན་ཏུ་སྡིག་ཅན་གྱི་གང་ཟག་ཅིག་ཏུ་འདུག་པས་ཁོང་གི་ས་ལམ་ལ་ཅུང་ཟད་སྒྲིབ་པར་འདུག་ཀྱང་། ད་ལྟ་ངེད་རྣམ་གཉིས་མཐུ་བསྡོངས་དཔུང་བསྡོངས་བྱས་ཏེ་ཕན་ཐོགས་པར་བྱུང་སོང་གསུངས་ཏེ། དེ་མགོ་ལོག་བསྟན་འཛིན་ཟེར་བ་ཡིན་སྐད། དེས་ན་བླ་མ་དང་སྤྲུལ་བའི་སྐུ་ཆེན་པོའི་གོ་སར་ཡོད་པ་རྣམས་ནས་ཀྱང་། གཤིན་པོའི་འབུལ་བ་བཞེས་པའི་ཚེ་ཐུགས་བསྐྱེད་དང་བསྔོ་སྨོན་གསུང་ཆོག་སོགས་གནད་དུ་འགྲོ་ངེས་རེ་མ་མཛད་ན། ང་དེ་དང་དེ་ལྟ་བུ་ཡིན་ནོ་སྙམ་པ་ཙམ་གྱིས་ནི་གང་ཡང་མི་འོང་སྟེ། དམ་པ་གོང་མའི་སྐྱེ་སྲིད་འཁྲུལ་མེད་དུ་ཞལ་གྱིས་བཞེས་པའི་སྤྲུལ་པའི་སྐུ་མཆོག་རྣམས་ནས་ཀྱང་། དང་པོ་ཀ་ཁ་ག་ང་ནས་བརྩམས་ཏེ་ཡི་གེའི་ཀློག་སྦྱང་ཚུན་ཆད་ཕལ་པའི་གང་ཟག་རྣམས་དང་ཁྱད་མེད་དུ་སློབ་དགོས་ཀྱིན་འདུག་པས། གོང་མའི་དུས་མཁྱེན་པའི་ཡི་གེའི་ཀློག་འདོན་བརྗེད་ནས་བསྐྱེད་རྫོགས་ཀྱི་རྣལ་འབྱོར་མ་བརྗེད་པར་ལུས་མེད་ངེས་ཡིན་པས། ཆིབས་གོང་ཐུབ་ཙམ་ནས་དཀོར་རྫས་འབུལ་སྡུད་ལ་མི་འབྱོན་པར་ཐུགས་བསྐྱེད་ཉམས་ལེན་བཟང་པོ་རེ་དང་མཚམས་སྒྲུབ་རེ་ལ་ཅུང་ཟད་སློབ་དགོས་སམ་སྙམ་མོ།།
༢༽བྱེ་བྲག་གི་འཕོ་བ་གལ་ཆེ་བའི་རྒྱུ་མཚན།
དེ་ལ་ད་རེས་ཀྱི་སྐབས་སུ་འཆད་རྒྱུའི་འཕོ་བ་འདི་ནི། ཐ་མལ་པ་འདུ་ཤེས་གསུམ་ལྡན་གྱི་འཕོ་བའམ། རྣམ་ཤེས་བླ་མའི་འཕོ་བ་ཞེས་བྱ་སྟེ། དྲི་མེད་བཤགས་རྒྱུད་ལས། འདའ་ཀ་འོད་ཀྱི་གོང་བུ་སྒྲ་ཡིས་འཕོ། །ཞེས་པ་དང་ཡང་མཐུན། འདི་ལྟ་བུའི་འཕོ་བ་འདི་རྟོགས་པ་མཆོག་ལྡན་གྱི་གང་ཟག་ལ་ནི་མི་དགོས་ཏེ། དེ་འདྲ་དེ་རྒྱུད་ལས། འཆི་བ་ཞེས་བྱ་རྣམ་རྟོག་སྟེ། །མཁའ་སྤྱོད་གནས་སུ་ཁྲིད་པར་བྱེད། །ཅེས་དང་། གཞན་ཡང་། འཆི་བ་འཆི་བ་ཞེས་བྱ་བ། །རྣལ་འབྱོར་སངས་ཆུང་རྒྱ་བ་ཡིན། །ཞེས་གསུངས་པ་ལྟར། ཚེ་འདིར་ཀ་དག་གདོད་མའི་ནང་དབྱིངས་སུ་བཙན་ས་ཟིན་པའི་གང་ཟག་སྐྱེ་འཆིའི་རང་དབང་ཐོབ་པ་རྣམས་ནི། ཕལ་བས་བལྟས་ན་འཆི་བ་ལྟར་སྣང་ཡང་ད་ལྟ་གནས་གཅིག་ནས་གཅིག་ཏུ་འགྲོ་བ་སྟེ་ངང་པ་པདྨའི་མཚོ་ནས་པདྨའི་མཚོ་གཞན་ཞིག་ཏུ་འགྲོ་བ་ལྟ་བུ་ལས་མེད་ལ། དེ་ཡང་བསྐྱེད་རྫོགས་ཀྱི་གནད་ལ་གོམས་པ་རྣམས་ནི། སྔར་བཤད་པ་ལྟར་སྐྱེ་འཆི་བར་དོའི་ཉམས་ལེན་གསུམ་གྱིས་སྐུ་གསུམ་དུ་འཕོ་བ་ཡིན་ནོ། །དེས་ན་འཆི་སྲིད་ཆོས་སྐུའི་ལམ་ཁྱེར་ཁྲེགས་ཆོད་ཡིན། ཆོས་ཉིད་དག་པའི་བར་དོའི་ལམ་ཁྱེར་ཐོད་རྒལ། སྐྱེ་བ་སྤྲུལ་སྐུའི་ལམ་ཁྱེར་འཕོ་བ་དང་དག་སྣང་གཉིས་ཡིན། དེས་ན་ཇི་སྐད་དུ། ལམ་ལ་གོམས་འདྲིས་ཀྱིས་སྦྱངས་པ་དམན་ན་འཕོ་བས་བསུ། །གསུངས་པ་ལྟར། ལམ་བརྟན་པ་མ་ཐོབ་པའི་རིགས་ཅན་དང་། གང་ཟག་སྡིག་པོ་ཆེ་བཙན་ཐབས་སུ་འཕོ་བ་ལ་སོགས་པ་ལ་གནད་འདི་དགོས་པ་ཡིན། འདི་ལྟ་བུའི་འཕོ་བའི་མན་ངག་དང་ལྡན་ན་ཅི་ཙམ་དུ་སྡིག་པོ་ཆེ་ཡིན་ཡང་ངན་སོང་གི་སྐྱེ་སྒོ་ཁོག་ངེས་ལ། མཚམས་མེད་པའི་ལས་ངན་བསགས་པ་ལྟ་བུ་མར་གྱི་ཟང་ཐལ་དུ་སྐད་ཅིག་གིས་འགྲོ་དགོས་བ་རྣམས་ཀྱང་གདམས་པ་འདི་དང་འཕྲད་ན། ངན་སོང་གི་སྐྱེ་གནས་སུ་འགྲོ་མི་དགོས་ངེས་པ་ཡིན་ཏེ། རྒྱུད་ལས། ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་ནི་བྱེད་པ་ཡང་། །འདི་ཡི་ལམ་གྱིས་གྲོལ་འགྱུར་ཏེ། །སྡིག་གིས་གོས་པར་མི་འགྱུར་རོ། །ཞེས་པ་ཡང་། བུ་ག་དགུ་ཡི་སྟེང་ཕྱོགས་སུ། ཡིད་ཀྱིས་བསམས་ཏེ་འཕོ་བྱེད་ན། །སྡིག་གིས་གོས་པར་མི་འགྱུར་ཏེ། །དག་པའི་ཞིང་དུ་སྐྱེ་བར་འགྱུར། །ཞེས་དང་། གཞན་ཡང་ཇི་སྐད་དུ། གནས་སྤྱི་གཙུག་ཉི་ཟླའི་གདན་སྟེང་ན། །ཕ་མཚན་ལྡན་གྱིས་བླ་མའི་ཞབས་དྲུང་དུ། །རྩ་དར་དཀར་གྱི་ལམ་ལ་འགྲོ་ཤེས་ན། །མཚམས་མེད་ལྔ་པོ་བྱས་ཀྱང་གྲོལ། །ཞེས་གསུངས། དེས་ན་ལམ་ཟབ་མོ་འཕོ་བའི་གདམས་པ་འདི་ནི་བསྐྱེད་རྫོགས་སོགས་ལམ་གཞན་མ་བསྒོམས་པར་སངས་རྒྱས་པའི་ཆོས། སྡིག་པོ་ཆེ་བཙན་ཐབས་སུ་གྲོལ་བའི་གསང་ལམ་ཡིན་ཏེ། སངས་རྒྱས་རྡོ་རྗེ་འཆང་གི་ཞལ་ནས། ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་པོ་བྱེད་པ་ཡང་། །གདམས་པ་འདི་དང་འཕྲད་གྱུར་ན། །གྲོལ་འགྱུར་འདི་ལ་ཐེ་ཚོམ་མེད། །ཅེས་དང་། ཨོ་རྒྱན་ཆེན་པོའི་ཞལ་ནས་ཀྱང་། བསྒོམས་ཏེ་སངས་རྒྱས་ཀུན་ལ་ཡོད། །མ་བསྒོམས་ཆོས་ནི་ང་ལ་ཡོད། །ཅེས་དང་། པཎ་ཆེན་ནཱ་རོ་པས། སྒོ་དགུ་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པོའི་སྒོ། །སྒོ་དགུ་བཅད་ནས་སྒོ་གཅིག་ཕྱེ། །ཐར་པའི་ལམ་ལ་ཐེ་མི་ཚོམ། །ཞེས་དང་། ལྷོ་བྲག་མར་པ་ལོ་ཙཱའི་ཞལ་ནས། ངས་ད་ལྟའི་དུས་སུ་འཕོ་བ་སྦྱངས། །སྦྱངས་ཤིང་སྦྱངས་ཤིང་ཡང་ཡང་སྦྱངས། །ཐ་མལ་འཆི་ཡང་ཉམ་ང་མེད། །སྔ་འདྲིས་བྱས་པའི་གདེང་ཞིག་ཡོད། །ཅེས་དང་། རྗེས་བཙུན་བཞད་པ་རྡོ་རྗེས། བསྲེ་འཕོ་མཚམས་སྦྱོར་གྱི་གདམས་ངག་འདི། །གནད་བར་དོ་འཇོམས་པའི་ལམ་མཁན་ཡིན། །ལམ་འདི་དང་ལྡན་པའི་མི་ཡོད་དམ། །སྲོག་རྩོལ་དབུ་མར་ཚུད་པའི་མི་རེ་བདེ། །ཆོས་ཀྱི་དབྱིངས་སུ་སླེབ་པ་འདི་ཨེ་མ་ཧོ། །ཞེས་གསུངས།
༣༽སྦྱོང་བ་དང་ལས་ལ་སྦྱར་ཚུལ་ཁྱད་པར་དུ་བཤད་པ།
དེ་ལྟར་བུའི་གདམས་པ་དེ་ལ་དང་པོར་རང་གིས་སྦྱོང་བ་དང་། ལས་སུ་སྦྱར་བ་གཉིས་ཡོད། དང་པོ་སྦྱོང་བ་ནི། ད་ལྟ་རང་ཉིད་ཀྱིས་འཕོ་བའི་ཁྲིད་ཞུས་ཏེ། ཡང་དང་ཡང་དུ་སྦྱངས་ཤིང་རྟགས་མ་ཐོན་གྱི་བར་དུ་འབད་པ་དེ་ཡིན། རྟགས་ཐོན་ཀྱང་བསྐྱུར་མི་བཞག་པར་སྲོད་ཐུན་ལྟ་བུ་ལ་མ་ཆག་པ་འདོན་དགོས། གལ་ཏེ་ངག་འདོན་བྱེད་པའི་ཁོམས་པ་མེད་ན་དམིགས་པ་ཚར་རེ་ཆག་མེད་བྱེད་དགོས་པ་ནི་འཕོ་ལུང་ཞུས་པའི་གནད་ཀྱི་དོན་སྒོ་ཡིན། དེ་ཡང་ད་ལྟ་རང་ཉིད་ལུས་ཀྱི་རྩ་རླུང་ཐིག་ལེའི་ཆ་ཐམས་ཅད་མ་ཉམས་ཤིང་དར་བའི་དུས་ན་འཕོ་བ་ལ་རྟེན་ནས་དངོས་སུ་འཕོ་བ་ཅུང་ཟད་དཀའ་ཞིང་། འཆི་ཀའི་དུས་ལ་བབས་པའམ། ཤིན་ཏུ་རྒས་འཁོགས་པའི་དུས་ན་ནི་འཕོ་སླ་བ་ཡིན་ཏེ། དཔེར་ན་ཤིང་ཏོག་དང་འབྲས་བུ་སོགས་དབྱར་ཁ་དར་ལ་བབས་པའི་དུས་ན་ནི་བཏུ་ཤིན་ཏུ་དཀའ་ལ། སྟོན་ཀ་སྨིན་ནས་ལྷུང་ལ་ཉེ་བའི་ཚེ་གོས་མདའ་ཙམ་རེག་ཀྱང་ལྷུང་འོང་བ་དང་འདྲ་བ་ཡིན་ནོ། །དེ་ནས་ལས་ལ་སྦྱར་བ་ནི། རང་ཉིད་ལ་འཆི་ལྟས་ཀྱི་བརྟགས་ཐབས་ལ་བརྟེན་ནས་བརྟགས་ཚེ་འཆི་ལྟས་ལྡོག་མེད་བྱུང་སྟེ་ཅིས་ཀྱང་མི་བཟློག་པར་ཤེས་ཤིང་ཐིམ་རིམ་ལ་སོགས་པ་བྱུང་བའི་ཚེ་བྱ་དགོས་ཀྱི། དེ་ལས་གཞན་དུ་མི་རུང་སྟེ། རྒྱུད་ལས། དུས་ལ་བབས་ན་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །ཞེས་གསུངས། འཆི་ནད་ཀྱིས་ཐེབས་ནས་འཆི་ཁར་རང་གིས་རང་ཉིད་དག་པའི་ཞིང་དུ་འཕོ་བ་ཡིན་པས། ཐིམ་རིམ་རྣམས་བྱུང་བའི་སྐབས་སུ། ཡོ་བྱད་སྤོང་དག་བྱེད། ཐོག་མེད་ནས་བསགས་པའི་སྡུག་ལྟུང་སྤྱི་དང་། ཁྱད་པར་བླ་མ་དང་མཆེད་གྲོགས་ལ་འགལ་བ་ལ་བཤགས་པ་བྱེད། དགེ་རྩ་བྱང་ཆུབ་ཆེན་པོར་བསྔོ་ཞིང་། སྐྱེ་བ་ནས་ཚེ་རབས་ཐམས་ཅད་དུ་ཐེག་པ་ཆེན་པོའི་ཆོས་དང་དགེ་བའི་བཤེས་གཉེན་མཇལ་བར་སྨོན་ལམ་འདེབས། འཆི་ཁའི་འཁྲུལ་སྣང་དང་བར་དོའི་སྡུག་བསྔལ་ལ་མི་འཇིགས་པར་དཔའ་གདེངས་བསྐྱེད་དེ། བདག་ད་སྔོན་སྐྱེ་ཤི་གྲངས་མེད་བྱས་པ་དང་ད་རེས་མི་འདྲ་སྟེ། བདག་གིས་ད་རེས་དལ་འབྱོར་གྱི་མི་ལུས་ཐོབ། མཚན་ལྡན་གྱི་བླ་མ་དང་མཇལ། ཟབ་མོའི་གདམས་ངག་ཐོབ་ནས་འཕོ་བའི་མན་ངག་ཉམས་མྱོང་ལག་ཁྲིད་དང་ལྡན་པ་ཡིན་པས་སྐྲག་མི་དགོས། དག་པའི་ཞིང་ཁམས་རྣམས་སུ་འགྲོ་བའི་གདམས་པ་ང་ལ་ཡོད་པས་འཆི་བ་ཞེས་པ་འཚང་ཆུང་རྒྱ་བ་ཡིན་སྙམ་དུ་སེམས་ལ་སྤྲོ་བ་དང་དཔའ་གདེང་བསྐྱེད་དགོས། དེ་ལ་སྤྱིར་ཐིམ་རིམ་ལ་མང་དུ་ཡོད་ཀྱང་གོ་བདེ་བའི་དབང་དུ་བྱས་ན། དབང་པོ་ལྔ། འབྱུང་བ་བཞི། སྣང་མཆེད་ཐོབ་གསུམ་གྱི་ཐིམ་རིམ་རྣམས་ཡོད་པ་ལ། དང་པོ་དབང་པོ་ལྔ་ཡི་ཐིམ་རིམ་ནི་རང་གི་སྔས་མགོར་སེར་འཚོགས་ལྟ་བུ་ཡོད་ན། དེ་དག་གི་འདོན་པ་གསུངས་པའི་སྒྲ་ལ་ཉན་ན་འུར་ཏིར་ཏིར་ཙམ་ལས་ཚིག་གི་འབྲུ་ཐོས་རྒྱུ་མེད་ཙ་ན་རྣ་བའི་ཤེས་པ་འགགས་པ་ཡིན། དེ་ལྟར་མིན་ཡང་གཞན་གྱི་སྨྲ་བརྗོད་ཀྱི་གཏམ་ལ་སོགས་པ་ལ་ཡང་རྒྱང་ནས་གྲགས་པ་ལྟར་སྒྲ་ཙམ་ཐོས་ཀྱང་ཚིག་འབྲུ་མི་ཐོས་པ་ཡིན། དེ་བཞིན་དུ་མིག་གིས་གཟུགས་ལ་བལྟས་པས་ཀྱང་ལོང་ངེ་ལོང་ངེ་ཞིག་ལས། རང་བཞིན་ཅི་ཡིན་པ་མི་མཐོང་བའི་ཚེ་མིག་གི་ཤེས་པ་འགགས། དེས་མཚོན་ནས་སྣས་དྲི། ལྕེས་རོ། ལུས་ཀྱིས་རེག་བྱ་ལ་སོགས་མི་མྱོང་བར་འགྱུར་བའི་ཚེ་ཐིམ་རིམ་ཕྱི་མ་ཡིན་པས་འདི་དུས་ངོ་སྤྲོད་གདབ་དགོས་ཤིང་། འཕོ་བ་འདེབས་མཁན་ཡོད་ན་འདེབས་པའི་དུས་མ་ནོར་བ་ཡིན། དེ་ནས་འབྱུང་བ་ལྔ་ཡི་ཐིམ་རིམ་ནི། ཤ་ཡི་ཁམས་ས་ལ་ཐིམ་པས་ལུས་དོང་དུ་ལྷུང་བ་དང་། རི་བོས་ནོན་པ་ལྟ་བུ་ལྕི་སྣང་འཆར་ཏེ། ད་ལྟ་མི་འཆི་ཀ་མ་འགའ་རེས་ང་ཡར་ལ་འཐེན་ཟེར་བ་དང་། ངའི་སྔས་འདི་མཐོ་རུ་ཆུག་ལ་སོགས་ཟེར་བ་དེ་ཡིན། དེ་ནས་ཁྲག་གི་ཁམས་ཆུ་ལ་ཐིམ་དུས་ཁ་ཆུ་དང་སྣ་ཆུ་ལ་སོགས་པ་འཛགདེ་ནས་དྲོད་ཀྱི་ཁམས་མེ་ལ་ཐིམ་དུས་ཁ་སྣ་ཐམས་ཅད་སྐམ་པ་དང་། ལུས་ཀྱི་དྲོད་མཐའ་ནས་སྡུད་དེ་ཁ་ཅིག་ལ་སྤྱི་བོ་ནས་རླངས་པ་ཕྱུ་རུ་རུ་འོང་བ་དེ་ཡིན། དབུགས་ཀྱི་ཁམས་རླུང་ལ་ཐིམ་པའི་ཚེ། གྱེན་རྒྱུ། ཐུར་སེལ། མེ་མཉམ། ཁྱབ་བྱེད་ཀྱི་རླུང་ཐམས་ཅད་སྲོག་འཛིན་གྱི་རླུང་ལ་འདུས་ནས་དབུགས་ཕྱིར་འཕེན་ཡུན་རིང་པོ་ལས་དབུགས་ནང་དུ་སྡུད་དཀའ་ཞིང་། དབུགས་ཀྱི་གནས་གློ་བ་ནས་ལམ་མིད་པ་དཀར་ནག་བརྒྱུད་དེ་དབུགས་ཕྱིར་ལ་འཕྲོ་འཕྲོ་བརྩེགས་པ་དེ་ཡིན། དེ་ནས་ལུས་ཀྱི་ཁྲག་ཐམས་ཅད་སྲོག་རྩར་འདུས་ཏེ་སྙིང་དབུས་སུ་ཁྲག་གི་ཐིགས་པ་གསུམ་རིམ་པར་བརྒྱབ་བས་དབུགས་རིང་པོ་གསུམ་ཕྱིར་ལ་འཕེན་ཞིང་ཕྱི་དབུགས་ཁྲོག་གིས་ཆད། དེའི་དུས་སུ་ཕྲ་བ་སྣང་མཆེད་ཐོབ་གསུམ་ལས་དང་པོ་ནི་སྤྱི་བོ་ནས་ཕ་ལས་ཐོབ་པའི་ཐིག་ལེ་དཀར་ཆ་ཐུར་དུ་བརྒྱུགས་ཏེ། ཕྱི་རྟགས་སུ་ནམ་མཁའ་གཡའ་དག་པ་ལ་ཟླ་འོད་ཕོག་པ་ལྟ་བུའི་དཀར་ལམ་འཆར། ནང་རྟགས་སུ་ཤེས་པ་གསལ་ཉམས་དང་ལྡན་ཞིང་ཞེ་སྡང་གི་རྟོག་པ་སོ་གསུམ་འགགས། དེ་སྣང་བ་ཟེར་བ་ཡིན། སྣང་བའི་འོད་གསལ་གྱི་དུས་སུ་སྒོ་ལྔའི་ཤེས་པ་ཡིད་ཤེས་ལ་ཐིམ། ལྟེ་བ་ནས་མ་ལས་ཐོབ་པའི་རཀྟ་དམར་ཆ་གྱེན་དུ་རྒྱུག་པས་ཕྱི་རྟགས་སུ་ནམ་མཁའ་དག་པ་ལ་ཉི་འོད་ཕོག་པ་ལྟ་བུའི་དམར་ལམ་འཆར། ནང་རྟགས་སུ་ཤེས་པ་བདེ་ཉམས་ཆེ། འདོད་ཆགས་ཀྱི་རྟོག་པ་བཞི་བཅུ་འགགས། དེ་མཆེད་པ་ཟེར་བ་ཡིན། འདིའི་སྐབས་ཡིད་ཤེས་ཉོན་ཡིད་ལ་ཐིམ། དེ་ནས་དཀར་དམར་གཉིས་སྙིང་དབུས་སུ་འཕྲད་པའི་བར་དུ་རྣམ་ཤེས་ཚུད་ནས་ཕྱི་རྟགས་སུ་ནམ་མཁའ་གཡའ་དག་པ་ལ་སྨག་གིས་ཁྱབ་པ་ལྟ་བུའི་ནག་ལམ་དང་། ནང་རྟགས་སུ་ཤེས་པ་མི་རྟོག་པའི་ཉམས་འཆར་ཞིང་གཏི་མུག་གི་རྟོག་པ་བདུན་འགག་སྟེ་རང་བཞིན་བརྒྱད་ཅུའི་རྟོག་ཚོགས་ཐམས་ཅད་འགག་པ་ཡིན། དེ་ནས་ནག་ཐུམ་གྱིས་བརྒྱལ་འགྲོ། འདིའི་དུས་ཉོན་ཡིད་ཀུན་གཞི་ལ་ཐིམ་པའོ། །དེ་ཉེར་ཐོབ་ཟེར་བ་ཡིན། དེ་ནས་ཀུན་གཞི་འོད་གསལ་ལ་ཐིམ་པ་ཅུང་ཟད་བརྒྱལ་སངས་ནས་ནམ་མཁའ་སློང་བྱེད་ཀྱི་རྐྱེན་གསུམ་དང་བྲལ་བ་ལྟ་བུའི་གཞི་དུས་ཀྱི་འོད་གསལ་འཆར་བ་དེ་རང་ངོ་ཤེས་ནས་མཉམ་པར་བཞག་ན་རབ་ཆོས་སྐུར་འཕོ་བ་ཞེས་བྱ་བ་ཡིན་ཏེ་ཆོས་ཉིད་བར་དོ་དང་སྲིད་པ་བར་དོ་སོགས་མེད་པར་འཚང་རྒྱ་བ་ཡིན། ད་དུང་མ་གྲོལ་ན་དེ་ནས་རིམ་པས་ཆོས་ཉིད་དང་སྲིད་པའི་བར་དོ་སོགས་འཆར་བ་ཡིན་ཏེ། དེ་དག་དངོས་གཞིའི་ཁྲིད་ཀྱི་ཆ་ལག་ཡིན་པས་འདིར་མི་སྤྲོའོ། །དེ་དག་ལས་ལམ་ལ་གོམས་འདྲིས་ཆུང་བ་དག་འཕོ་བ་ལས་ལ་སྦྱར་བའི་དུས་མ་ནོར་བ་ནི་ཐིམ་རིམ་རྣམས་འཆར་བའི་མགོ་རྩོམ་པའི་དུས་དེར་ཡིན་ཏེ། དེའི་དུས་སུ་ཚེ་འདིའི་ཞེན་པའི་འདུ་ཤེས་ཐམས་ཅད་རྦད་ཀྱིས་བཅད། བཅོམ་ལྡན་འདས་ཀྱིས་མདོ་ལས་འདུ་ཤེས་བཅུ་གཅིག་གསུངས་ཏེ། ཚེ་འདི་ལ་མ་ཆགས་པའི་འདུ་ཤེས་དང་། སེམས་ཅན་ཐམས་ཅད་ལ་བྱམས་པའི་འདུ་ཤེས་དང་། འཁོན་དུ་འཛིན་པ་ཐམས་ཅད་ཡོངས་སུ་འདོར་བའི་འདུ་ཤེས་དང་། འཆལ་བའི་ཚུལ་ཁྲིམས་ཐམས་ཅད་བཤགས་པའི་འདུ་ཤེས་དང་། ཚུལ་ཁྲིམས་ཐམས་ཅད་ཡང་དག་པར་བླང་བའི་འདུ་ཤེས་དང་། ཉེས་པ་ཆེན་པོ་བྱས་པ་དག་ལ་ཡང་ཡང་བའི་འདུ་ཤེས་དང་། དགེ་བའི་རྩ་བ་ཆུང་ངུ་དག་ཆེ་བའི་འདུ་ཤེས་དང་། འཇིག་རྟེན་ཕ་རོལ་དག་ལ་འཇིགས་པ་མེད་པའི་འདུ་ཤེས་དང་། འདུས་བྱས་ཐམས་ཅད་ལ་མི་རྟག་པའི་འདུ་ཤེས་དང་། ཆོས་ཐམས་ཅད་ལ་བདག་མེད་པའི་འདུ་ཤེས་དང་། མྱ་ངན་ལས་འདས་པ་ནི་ཞི་བའི་འདུ་ཤེས་མངོན་དུ་བྱའོ། །ཞེས་གསུངས། ད་སྔོན་སྐྱེ་བ་གྲངས་མེད་འཆི་བ་བྱུང་བ་དང་མི་འདྲ་བར་ད་རེས་འཆི་བ་འདི་བླ་མའི་གདམས་ངག་ལ་བརྟེན་ཏེ་དག་པའི་ཞིང་ཁམས་སུ་དཔག་ཆེན་གྱི་མདའ་འཕངས་པ་ལྟར་འགྲོ་བ་ཡིན་པས་ང་རེ་དགའ་སྙམ་དུ་སེམས་ཀྱིས་དཔའ་བསྐྱེད། འཕོ་བའི་དམིགས་པ་སོགས་རང་གི་ཡིད་ལ་གསལ་དཀའ་ཞིང་གསལ་འདེབས་ནུས་པའི་གྲོགས་དམ་ཚིག་དང་ལྡན་པ་ཡོད་ན་གསལ་འདེབས་སུ་འཇུགགསལ་འདེབས་མཁན་ཡོད་མེད་གང་ལྟར་ཡང་སྐབས་འདིར་སྔར་སྦྱངས་པ་ལྟར་ལམ་ཟབ་མོ་འཕོ་པའི་གདམས་པ་ལ་བསྟེན་ཏེ་ལས་ལ་སྦྱར་ནས་བཙན་ཐབས་སུ་འཕོ་དགོས་པ་ཡིན་ནོ། །དེ་ལྟར་སྦྱོང་བ་དང་ལས་ལ་སྦྱར་བ་གང་གི་ཚེ་ཡིན་ཡང་འདྲ་སྟེ།
༤༽འཕོ་བའི་གདམས་པ་དངོས་བསྒོམ་པ།
འཕོ་བའི་གདམས་པ་དངོས་བསྒོམ་པའི་རིམ་པ་ནི། སྟན་བདེ་བ་ལ་རྡོ་རྗེའི་སྐྱིལ་མོ་ཀྲུང་ལ་སོགས་པ་བཅའ་ཞིང་། ལུས་སེམས་ལྷོད་དེ་དྲང་པོར་བསྲང་། སྔོན་འགྲོ་བླ་མ་རྒྱང་འབོད་ནས་བཟུང་སྟེ་བླ་མའི་རྣལ་འབྱོར་གྱི་བསྡུ་རིམ་དང་བཅས་ཡོངས་སུ་རྫོགས་པ་གསལ་ལ་རྒྱས་པར་བྱ། དེ་ནས་དངོས་གཞིའི་དམིགས་པ་ནི། དང་པོ་རང་ཉིད་སྡོད་སའི་ས་ཕྱོགས་འདི་ཉིད་ཐ་མལ་མ་དག་པའི་གནས་དང་ཡུལ་ཁམས་མ་ཡིན་པར། ནུབ་ཕྱོགས་བདེ་བ་ཅན་གྱི་ཞིང་གི་རྒྱན་དང་བཀོད་པ་ཐམས་ཅད་ཡོངས་སུ་རྫོགས་པ་གསལ་བའི་དབུས་སུ་རང་གི་གཞི་ལུས་ཀྱི་ཕུང་པོ་མི་གཙང་བའི་རང་བཞིན་ཅན་འདི་ཉིད་མ་ཡིན་པར་སྐད་ཅིག་གིས་གནས་གྱུར་ཏེ་པདྨ་དང་ཉི་མའི་གདན་ལ་ངོ་བོ་མཁའ་འགྲོ་ཡེ་ཤེས་མཚོ་རྒྱལ་ཡིན་པ་ལ་རྣམ་པ་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས། ཞབས་གཉིས་མཉམ་པའི་འདོར་སྟབས་ཅན། སྤྱན་གསུམ་ནམ་མཁར་གཟིགས་ཤིང་། འཕོ་ལུང་གི་དུས་འདིར་ཅུང་ཟད་ཞི་མ་ཁྲོའི་ཉམས་ཆག་པ་ཞིག་བསྒོམ། ཕྱག་གཡས་མ་རིག་གཏི་མུག་གི་གཉིད་ལས་སློང་བའི་ཐོད་པའི་ཌ་མ་རུ་ནམ་མཁའི་དབྱིངས་སུ་འཁྲོལ་བ། འཕོ་ལུང་གི་འདོན་ཆོག་དང་ཕྱག་མཚན་ལ་ཁྱད་པར་ཅུང་ཡོད་ཀྱང་མི་འགལ། གཡོན་དུག་གསུམ་རྩད་ནས་གཅོད་པའི་གྲི་གུག་དཀུར་བརྟེན་པ། སྐུ་གཅེར་མོ་རུས་པའི་རྒྱན་དང་མེ་ཏོག་གི་ཆུན་འཕྱངས་ཅན། སྣང་ལ་རང་བཞིན་མེད་པ་དར་དམར་གྱི་གུར་ཕུབ་པ་ལྟ་བུ་ཞིག་བསྒོམ། དེ་ཕྱི་ལུས་ཀྱི་སྟོང་ར་ཡིན། དེའི་ལུས་ཀྱི་དབུས་དྲང་པོ་ན་ཁྲག་དང་ཆུ་སེར་གྱིས་མ་གོས་པ་རྩ་དབུ་མ་ཁང་སྟོང་ནང་ཀ་བ་བཙུགས་པ་ལྟར་བསྒོམ་དགོས་ཏེ། རྩ་དབུ་མ་ལའང་གནས་པ་རྩ་ཡི་དབུ་མ། ཆོས་ཉིད་དོན་གྱི་དབུ་མ། དོན་དམ་འབྲས་བུའི་དབུ་མ་གསུམ་དུ་དབྱེར་ཡོད། གནས་པ་རྩ་ཡི་དབུ་མ་ནི་གནས་ཚུལ་གྱི་ངོས་ནསསྲོག་འཛིན་པའི་རྩ་ཡིན་ལ། ཆོས་ཉིད་དོན་གྱི་དབུ་མ་ནི། ཆོས་ཉིད་ཀྱི་རྩ་མཚན་ཉིད་བཞི་དང་ལྡན་པ། འོད་གསལ་བའི་རང་བཞིན་ཅན་ཐོགས་རེག་དང་བྲལ་བ་ཇི་སྲིད་དུ་ལུས་སེམས་དབུགས་གསུམ་གྱི་ཚོགས་པ་ཡོད་པ་དེ་སྲིད་ཡོད་པས་མེད་པའང་མིན་ལ། དེ་གསུམ་སོ་སོར་གྱེས་པའི་ཚེ་དེ་ཡང་མི་སྣང་བར་འགྱུར་བས་ཡོད་པའང་མིན་ཏེ། དཔེར་ན་རྐྱེན་ཚོགས་པ་དེ་སྲིད་དུ་འཇའ་ཚོན་ཡང་སྣང་ལ་ཚོགས་པ་གྱེས་པ་ན་མི་སྣང་བ་བཞིན་ནོ། །དོན་དམ་པའི་དབུ་མ་ནི། འབྲས་བུའི་ངོ་བོ་ཉིད་དེ་ངོ་བོ་ངོས་བཟུང་དང་བྲལ་བ་ཞིག་ལ་གོ་དགོས། ཆོས་ཉིད་ཀྱི་རྩ་མཚན་ཉིད་བཞི་ལྡན་སྒོམ་དུས་སྲོག་རྩའི་དབུས་སུ་བསྒོམ་དགོས་ཏེ། དེའི་རྒྱུ་མཚན་ཀུན་གཞི་སྲོག་རླུང་དང་བཅས་པ་དེ་ལ་བརྟེན་པས་ཐམས་ཅད་ཆོས་ཉིད་དུ་རོ་གཅིག་ཏུ་འགྱུར་དགོས་པའི་ཕྱིར་རོ། །དེ་ཡང་གཡས་གཡོན་གང་དུའང་མ་ཡོ་བར་ལུས་ཀྱི་དབུས་དྲང་པོ་ན་ཡོད་པའི་དོན་གྱིས་དབུ་མ་ཟེར་བ་ཡིན། དེ་ཡང་ཆོས་སྐུ་འགྱུར་བ་མེད་པ་མཚོན་པའི་བརྡར་ཁ་དོག་མཐིང་གི་ཤུན་པ་ལྟར་སྔོ་བ། བག་ཆགས་ཀྱི་སྒྲིབ་པ་སྲབ་པའི་བརྡར་པདྨའི་འདབ་མ་ལྟར་སྲབ་པ། མ་རིག་པའི་མུན་པ་བསལ་བའི་བརྡར་ཏིལ་གྱི་མར་མེ་ལྟར་གསལ་བ། ལམ་དམན་པ་དང་ལམ་ལོག་པར་མི་འགྲོ་བའི་ཆེད་དུ་ཆུ་ཤིང་གི་ལྡེམ་བུ་ལྟར་དྲང་བ་སྟེ། མཚན་ཉིད་བཞི་དང་ལྡན་པ། མཐོ་རིས་དང་ཐར་པའི་ལམ་མཚོན་པའི་ཆེད་དུ་ཡར་སྣེ་སྤྱི་བོ་ཚངས་པའི་བུ་ག་ན་རྒྱ་མཐོངས་ཁ་ཕྱེ་བ་ལྟར་ཧད་པོར་ཡོད་པ། འཁོར་བ་དང་ངན་སོང་གི་སྒོ་འགགས་པ་མཚོན་པའི་མར་སྣ་ལྟེ་འོག་སོར་བཞིའི་ཐད་ན་རྩ་ཕུག་རྡུགས་སུ་ཁ་ཟུམ་པ། དེ་ལྟ་བུ་ཞིག་གསལ་གདབ། རྩ་དབུ་མ་ངོས་འཛིན་དུས་སྲོག་རྩ་ལ་འདོད་པ་དང་། རྩ་ནག་མ་ལ་འདོད་པ་ཡོད་ཀྱང་། སྲོག་རྩའི་ནང་རླུང་ཞུགས་ན་སྨྱོ་བས་མི་འཐད། རྩ་ནག་མ་ནི་ཤི་བའི་རོ་ལའང་ཡོད་པས་མི་འཐད། རྟེན་སྲོག་རྩའི་ནང་ན་ཡོད་པས་ལམ་ལ་སྦྱོང་བའི་སྟོབས་ཀྱིས་གནས་དེར་རླུང་འདུས་པའི་ཚེ་འོད་གསལ་འཆར་ཞིང་འཆི་བའི་ཚེ་ན་ཆོས་དབྱིངས་སུ་ཐིམ་པ་ཞིག་ལ་ངོས་འཛིན་དགོས། དེ་ཡན་ཆད་ནང་རྩའི་སྟོང་ར་ཡིན། དེ་ནས་རྩ་དབུ་མ་དེའི་ནང་སྙིང་གའི་ཐད་ན་སྙུག་མ་ཚིགས་ཀྱིས་འགགས་པ་ལྟ་བུའི་ཚིགས་ཤིག་ཡོད་པར་བསམ། དེའི་སྟེང་དུ་རླུང་གི་ཐེག་ལེ་ལྗང་སྐྱ་འགུལ་བ་དང་འཕྲིགས་པའི་རྣམ་པ་ཅན་ཞིག་བསྒོམ། དེའི་སྟེང་དུ་རླུང་སེམས་ཞེས་པ་གཡོ་བའི་ཆ་ནས་རླུང་། ཤེས་པའི་ཆ་ནས་སེམས་ཞེས་བཏགས་ཀྱང་རླུང་སེམས་གཉིས་ངོ་བོ་གཅིག་ཡིན་པ་ལ་སེམས་རྣམ་པར་རྟོག་པ་ཞེས་བཏགས་པས་རང་གི་རླུང་སེམས་བསྡུ་བའི་དུས་སེམས་རྣམ་ཤེས་ཀྱི་ངོ་བོ་དེ་ཡི་གེ་ཧྲཱིཿཡིག་དམར་པོའི་རིང་ཆ་ཚེགས་དྲག་དང་བཅས་པ་དར་ལྕོག་རླུང་གིས་བརྡབས་པ་ལྟར་འཕར་འདར་གཡོ་མགུལ་དང་བཅས་པའི་ཧྲི་ལི་ལི་ཡོད་པ། དེ་ལྟ་བུ་ཞིག་བསྒོམས་པ་ལས་གཞན་ཞིག་ལ་བལྟས་པ་ལྟ་བུ་བསམ་མི་ཉན་ཏེ། དེ་གསང་བ་རིག་པ་སེམས་ཀྱི་རྟེན་གཞི་ཡིན། དེ་ནས་རང་གི་སྤྱི་བོར་ཁྲུ་གང་ཙམ་གྱི་སྟེང་གི་ནམ་མཁར་རྨ་བྱ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲིའི་སྟེང་དུ་སྣ་ཚོགས་པདྨ་དང་ཉི་མ་ཟླ་བའི་གདན་སུམ་བརྩེགས་ཀྱི་སྟེང་ན། ངོ་བོ་དུས་གསུམ་སངས་རྒྱས་ཐམས་ཅད་འདུས་པའི་བདག་ཉིད་མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ། རྣམ་པ་སངས་རྒྱས་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་པོ་པདྨ་རཱ་གའི་ལྷུན་པོ་ལ་ཉིན་བྱེད་འབུམ་གྱིས་འཁྱུད་པ་ལྟ་བུ་གཟི་བྱིན་ཅན། ཞལ་གཅིག་ཕྱག་གཉིས་མཉམ་བཞག་གི་སྟེང་ན་འཆི་མེད་ཡེ་ཤེས་ཀྱི་བདུད་རྩིས་གང་བའི་ལྷུང་བཟེད་འཛིན་པ་མཆོག་གི་སྤྲུལ་སྐུ་ཚངས་པར་སྤྱོད་པའི་ཆ་ལུགས་ཅན། སྐུ་ལ་སྣམ་སྦྱར་བླ་གོས་མཐང་གོས་ཏེ་ཆོས་གོས་རྣམ་གསུམ་གསོལ་ཞིང་དབུ་ལ་གཙུག་ཏོར་དང་ཞབས་ལ་འཁོར་ལོ་ལ་སོགས་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། འོད་དང་འོད་ཟེར་མུ་མཐའ་མེད་པར་འཕྲོ་བ་དེ་ལྟ་བུ་ཞིག་གསལ། མགོན་པོ་འོད་དཔག་མེད་དེའི་གཡས་སུ་རྒྱལ་བ་ཀུན་ཀྱི་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་དཀར་པོ་ཞལ་གཅིག་ཕྱག་བཞིའི་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་འོག་མས་ཤེལ་དཀར་གྱི་ཕྲེང་བ་འདྲེན་པ་གཡོན་འོག་མས་པདྨ་དཀར་པོའི་ཡུ་བ་ནས་འཛིན་པའི་མེ་ཏོག་གི་འདབ་མ་སྙན་གྱི་ཐད་ཀར་ཁ་ཕྱེ་བ། འོད་དཔག་མེད་ཀྱི་གཡོན་དུ་རྒྱལ་བ་ཐམས་ཅད་ཀྱི་མཐུ་སྟོབས་ནུས་པའི་བདག་ཉིད་མཐུ་ཆེན་ཐོབ་བམ་གསང་བའི་བདག་པོ་ཕྱག་ན་རྡོ་རྗེ་སྐུ་མདོག་མཐིང་ག་ཕྱག་གཉིས་རྡོ་རྗེ་དང་དྲིལ་བུ་བསྣོལ་སྟབས་སུ་འཛིན་པ། སྤྱན་རས་གཟིགས་དང་མཐུ་ཆེན་ཐོབ་ཏེ་སེམས་དཔའ་དེ་གཉིས་ཀའང་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་པ། དེ་ཡང་གཙོ་བོ་འོད་དཔག་མེད་སྲིད་ཞིའི་མཐའ་ལ་མི་གནས་པའི་བརྡར་ཞབས་རྡོ་རྗེའི་སྐྱིལ་མོ་ཀྲུང་དང་། སེམས་དཔའ་གཉིས་འགྲོ་དོན་སྐྱོ་དུབ་དང་བྲལ་བའི་བརྡར་ཞབས་བཞེངས་པའི་སྟབས་ཀྱིས་བཞུགས་པ། གཙོ་བོ་དེ་གསུམ་གྱི་མཐའ་སྐོར་དུ་ལམ་ཟབ་མོ་འཕོ་བ་བརྒྱུད་པའི་བླ་མ་ཐམས་ཅད་དྭངས་པའི་མཁའ་ལ་སྤྲིན་ཕུང་འཁྲིགས་པ་ལྟར་བཞུགས་ནས། རང་གཞན་སེམས་ཅན་ཐམས་ཅད་ལ་བརྩེ་བའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས། དགྱེས་པའི་ཐུགས་ཀྱིས་དགོངས་ནས་རང་གཞན་སེམས་ཅན་ཐམས་ཅད་འཁོར་བ་དང་ངན་སོང་གི་སྡུག་བསྔལ་ལས་བསྒྲལ་ཏེ། བདེ་ཆེན་དག་པའི་ཞིང་དུ་འདྲེན་པའི་དེད་དཔོན་ཆེན་པོར་བཞུགས་པར་བསམས་ལ། རང་ཉིད་གཞི་ལུས་རྡོ་རྗེ་རྣལ་འབྱོར་མ། །སོགས་ནས། སྤྱན་གསུམ་ནམ་མཁར་གཟིགས། དེའི་ཁོང་དབུས་རྩ་དབུ་མ་སོགས། མཚན་དཔེ་རྫོགས་པའི་ཕུང་པོར་གསལ། ཞེས་གསལ་གདབ། དེ་ནས་གསོལ་བ་ཕུར་ཚུགས་སུ་གདབ་སྟེ་ཡིད་ཁྱེད་ཤེས་ཀྱི་དད་པའི་ཤུགས་ཀྱི་སྒོ་ནས་ལུས་བ་སྤུ་གཟེངས། མིག་མཆི་མ་འཁྲུགས་པ་དང་བཅས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཞེས་ལན་ཅི་མང་མོས་གུས་དང་བཅས་བརྗོད་མཐར། ཨེ་མ་ཧོ། གནས་རང་སྣང་དོན་གྱི་འོག་མིན་ན། །སོགས་ནས། དབྱིངས་ཆོས་སྐུའི་རྒྱལ་ས་ཟིན་པར་ཤོག །བར་ཐམས་ཅད་ཚང་བར་ཚར་གསུམ། རྗེས་མ་ལ་ཡིད་མོས་གུས་མན་ཆད་ཚར་གསུམ། དེའི་ཡང་རྗེས་མ་ལ། དབྱིངས་ཆོས་སྐུའི་རྒྱལ་ས་ཟིན་པར་ཤོག །ལན་གསུམ་བརྗོད། དེ་དག་གི་ཚེ་བླ་མ་དང་མགོན་པོ་འོད་དཔག་མེད་ལ་མོས་གུས་གདུང་ཤུགས་མཆི་མ་འཁྲུགས་པ་ལྟ་བུའི་ངང་ནས་རིག་པ་སེམས་ཀྱི་རྟེན་གཞི་ཧྲཱིཿཡིག་ཁོ་ན་ལ་སེམས་བཟུང་། དེ་ནས་སྤར་ཆོག་གི་ཚེ་རྐན་གྱི་ཕུགས་ནས་ཧྲཱིཿཧྲཱིཿཞེས་ལྔ་ཚར་བརྗོད་པ་དང་མཉམ་དུ་རིག་པ་སེམས་ཀྱི་རྟེན་གཞི་ཡི་གེ་ཧྲཱིཿཡིག་དམར་པོ་དེ་རླུང་གི་ཐིག་ལེ་ལྗང་སྐྱ་གཡོ་བའི་རྣམ་པ་ཅན་དེས་བཏེགས་ཏེ་འདར་ཕྲི་ལི་ལི་བྱེད་ཅིང་ཇེ་མཐོ་ཇེ་མཐོར་སོང་། སྤྱི་བོ་ཚངས་པའི་བུ་གར་ཐོན་པ་དང་མཉམ་དུ་ཧིཀ་ཞེས་བརྗོད་པས། དཔག་ཆེན་གྱི་མདའ་འཕངས་པ་ལྟར་ཡར་ཏེ་སངས་རྒྱས་འོད་དཔག་མེད་ཀྱི་ཐུགས་ཀར་ཕྱིར་མི་ལྡོག་པའི་ཚུལ་གྱིས་ཐིམ་པར་བསམ། ཡང་སྙིང་གར་ཧྲཱིཿཡིག་གསལ་ལ། དམིགས་པ་སྔར་ལྟར་བཅས་ཧིཀ་སྒྲ་བདུན་ནམ་ཉེར་གཅིག་སོགས་བརྗོད། ལུགས་ཀ་གཞན་ལ་ཧིཀ་བརྗོད་ནས་སྤར་ཞིང་ཀ་བརྗོད་པས་མར་འབབས་པའི་དམིགས་པ་བྱ་སྲོལ་ཡོད་ཀྱང་། འདིར་ཀ་བརྗོད་ནས་མར་འབེབས་སྲོལ་མེད། ཡང་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སོགས་ནས། གསོལ་འདེབས་དང་སྤར་ཆོག་སོགས་སྔར་ལྟར་བཅས་ཇི་ཙམ་འཚམས་པར་སྦྱང་། དེ་ནས་ཡང་བཅོམ་ལྡན་འདས་སོགས་ནས། མཆོད་དོ་སྐྱབས་སུ་མཆིའོ། །ལན་བདུན་ནམ་གསུམ་ལ་སོགས་པའི་མཐར། གཏེར་སྟོན་ཉི་ཟླ་སངས་རྒྱས་ཀྱི་འཕོ་བ་སྤྱི་གཙུག་ན་འཇག་མ་བཙུགས་སྲོལ་ཡོད་པས་འཇག་འཛུགས་མ་རྫོགས་ཆེན་ནས་བརྒྱུད་པ་ལྟར་གྱི་གསོལ་འདེབས་བསྡུས་པ། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །དྲིན་ཆེན་རྩ་བའི་བླ་མས་ཐུགས་རྗེས་ཟུང་། །རྩ་བ་བརྒྱུད་པའི་བླ་མས་ལམ་སྣ་དྲོངས། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །བདག་སོགས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་ལན་གསུམ་གྱི་རྗེས་མ་ལ། བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་པ་ལན་གསུམ་བྱ་ཞིང་། སྤར་ཆོག་སོགས་སྔར་ལྟར་དེ་དག་རང་གི་ཁམས་མོས་པ་དུས་ཚོད་དང་བསྟུན་ནས་ཇི་ལྟར་འཚམས་པར་སྦྱངས་ནས་ཡང་། བཅོམ་ལྡན་འདས་དེ་བཞིན་གཤེགས་པ་སོགས་སྔར་ལྟར་དང་། གནམ་ཆོས་ཀྱི་གཏེར་ཁ་ནས་བྱོན་པའི་འཕོ་བ་དཔལ་ཡུལ་ནས་བརྒྱུད་པའི་གསོལ་འདེབས། ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ། །བདག་སོགས་རྩེ་གཅིག་ཡིད་ཀྱིས་གསོལ་བ་འདེབས། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །བདག་སོགས་ནམ་ཞིག་འཆི་བའི་དུས་བྱུང་ཚེ། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ལན་གསུམ་གྱི་ཚིག་རྐང་རྗེས་མ་ཡང་བསྐྱར་དང་། སྤར་ཆོག་སོགས་སྔར་ལྟར་ཡིན། གསོལ་འདེབས་རྗེས་མ་གཉིས་པོ་འདི་ཀློང་ཆེན་སྙིང་ཐིག་གི་ཁྲིད་གཞུང་མ་ཡིན་པས། རིག་འཛིན་འཇིགས་མེད་གླིང་པ་ནས་བརྒྱུད་པ་མིན་ཡང་། རྫོགས་ཆེན་རིན་པོ་ཆེ་དང་། སྒོ་ཆེན་སོགས་ནས་བརྒྱུད་དེ། སྐྱབས་རྗེ་རྡོ་གྲུབ་རིན་ཆེ་ལ་ཆུ་བོ་གཅིག་འདྲེས་སུ་བཞུགས་པ་དེས་གསུང་སྲོལ་ལྟར། རྗེ་བླ་མ་འཇིགས་མེད་རྒྱལ་བའི་མྱུ་གུས་ཀྱང་གསུང་བར་འདུག་ལ། འོན་ཀྱང་གྲུབ་རྗེ་རིན་པོ་ཆེ་ལ་དྭགས་པོ་ནས་བརྒྱུད་པའི་བཀའ་བརྒྱུད་ཀྱི་འཕོ་བའི་ཁྲིད་རྒྱུན་ཀྱང་བཞུགས་པས་འཕོ་བའི་ངག་འདོན་གྲུབ་རྗེའི་བསྒྲིགས་མར་དེ་ཉིད་གྱི་གསོལ་འདེབས་ཀྱང་ཡོད་མོད་ཀྱང་། རྗེ་བླ་མས་གསུང་སྲོལ་མེད་ལ། གང་ལྟར་ཡང་བརྒྱུད་སྲོལ་མི་འདྲ་བ་ཐམས་ཅད་དམིགས་རིམ་སོགས་ལ་ཁྱད་པར་མེད་པས་ཁྲིད་རྒྱུན་ཆུ་བོ་གཅིག་འདྲེས་སུ་སོང་བར་ངེས་ཤིང་། སྐྱབས་རྗེ་རྡོ་གྲུབ་རིན་པོ་ཆེའི་དྲུང་ནས་རྗེ་བླ་མས་ལན་གྲངས་དུ་མར་གསན་པ་བཅས་རྗེ་བླ་མ་ནས་འཕོ་ཁྲིད་ཐོབ་པ་རྣམས་ཀྱིས་ཀྱང་། བཀའ་བརྒྱུད་ཀྱི་འཕོ་ལུང་ཡང་ཐོབ་པར་བྱས་ནས་བརྒྱུད་འདེབས་སོགས་བཏོན་ཀྱང་ཆོག་པར་སེམས་སོ། །གསོལ་འདེབས་བསྡུ་མ་འདི་གཉིས་ཀྱང་གྲུབ་རྗེའི་བསྒྲིགས་མ་ལྟ་བུ་ཡིན་ནམ། གང་ལྟར་ཡང་གཞན་རྣམས་དང་ཅུང་ཟད་མི་འདྲ་ཙམ་འདུག་པས། འདིར་རྗེའི་གསུང་རྒྱུན་ལྟར་བྲིས་པ་ཡིན་ནོ། །ཡང་གནམ་ཆོས་འཕོ་ལུང་གི་དུས་རྗེ་བླ་མས་མང་ཚོགས་ལ་འཕོ་བ་གདབ་པའི་དུས། འདི་རྣམས་ནམ་ཞིག་ཚེ་ཡི་དུས་བྱས་ཚེ། །ཞེས་གསུང་སྲོལ་ཡོད་པ་བརྡ་མ་འཕྲོད་པར་བཟུང་ནས། ད་ལྟ་ཁ་ཅིག་གིས་འདིར་སྣང་ནམ་ཞིག་དང་། འདི་ནས་ནམ་ཞིག་སོགས་སུ་འདོན་པ་ནི། ཅུང་ཟད་མ་དག་གམ་སྙམ་མོ། །འཕོ་བའི་དམིགས་རིམ་ལ་ཁྱད་པར་ཡོད་དེ་ཀློང་ཆེན་སྙིང་ཐིག་ལ་འོད་དཔག་མེད་གཙོ་བོ་གཅིག་པུ་དང་། གནམ་ཆོས་ལ་སེམས་དཔའ་གཉིས་དང་བཅས་པ། འཇག་ཟུག་མ་ལ་བརྒྱུད་པའི་བླ་མ་རྣམས་དང་བཅས་པ་གསལ་ནས་བསྒོམ་པས་སྒོམ་ཚུལ་ཙམ་ལ་ཁྱད་པར་ཡོད། དེ་ལྟར་ཡང་དང་ཡང་དུ་སྦྱངས་པ་སོང་ནས་མཐར་འཇོག་ཁར། སྐུ་ལྔའི་དབྱིངས་སུ་རྒྱས་གདབ་པའི་ཆེད་དུ། ཕཊཿལྔ་ཕྲུགས་སུ་བརྗོད་ཅིང་ཕཊཿརེའི་མཚམས་སུ་ཨ་རེ་ཆུང་ངུ་བརྗོད་པར་བླ་མའི་ཞལ་རྒྱུན་ཡིན། གནས་ལུགས་སྤྲོས་པ་དང་བྲལ་བའི་ངང་དུ་མཉམ་པར་བཞགདེ་ནས་སྤྱི་གཙུག་གི་བརྒྱུད་པའི་བླ་མ་ཐམས་ཅད་གཙོ་བོ་གསུམ་ལ་ཐིམ། སེམས་དཔའ་གཉིས་ཀྱང་འོད་དཔག་མེད་ལ་ཐིམ། འོད་དཔག་མེད་འོད་དུ་ཞུ་ནས་རང་ལ་ཐིམ་པས། རང་ཉིད་སྐད་ཅིག་གིས་བཅོམ་ལྡན་འདས་མགོན་པོ་ཚེ་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས་ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་པ་ཕྱག་གཉིས་མཉམ་བཞག་གི་སྟེང་ན་འཆི་མེད་ཡེ་ཤེས་ཀྱི་བདུད་རྩིས་གང་བའི་ཚེ་བུམ་དཔག་བསམ་ལྗོན་ཤིང་གི་ཁ་རྒྱན་ཅན་འཛིན་པ། སྐུ་ལ་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་པ་དེ་ལྟ་བུ་ཞིག་ཏུ་བསྒོམས་ལ། ཨོཾ་ཨ་མཱ་ར་ཎི་ཛཱི་ཝན་ཏི་ཡེ་སྭཱ་ཧཱ། ཞེས་བརྒྱ་རྩ་དང་ཚེ་གཟུངས་སོགས་འདོན། དེས་ཚེ་ལ་མི་གནོད་ཅིང་རྟེན་འབྲེལ་གྱི་བདེན་པས་ཚེ་གེགས་ཀྱང་ཞི་བའི་དགོས་པ་ཁྱད་པར་ཅན་ཡོད་པ་ཡིན། ལར་དེང་སང་འགའ་རེས་ལོ་ཉུང་གི་འཕོ་ལུང་ཞུ་མི་ཉན་ཏེ་ཚེ་ཐུང་བ་ཡིན་པས་ཟེར་བ་རྣམས་ཆོས་མི་ཤེས་པའི་རྟགས་དངོས་ཡིན། དེས་ན་གཞན་ཤི་བོ་དང་འཆི་ཀ་མ་ལ་གདབ་པ་དང་རང་ཉིད་འཆི་བའི་ཚེ་ལས་ལ་སྦྱར་བའི་དུས་འདི་མི་དགོས། དེ་ལྟར་སྦྱངས་པས་འབྱོངས་པའི་རྟགས་ཀྱང་གཞུང་ལས། མགོ་ན་ཆུ་སེར་ཟིལ་པ་ཕྲོམ། །འཇག་མ་དལ་གྱིས་ཚུགས་སོགས་འབྱུང་། །ཞེས་གསུངས་པས་རྟགས་ཐོན་ཚེ་མགོ་ན་བ་དང་། སྤྱི་བོ་ཚངས་པའི་བུ་གའི་ཐད་ནས་ཆུ་སེར་འབྱུང་བ་དང་། ཟིལ་པ་ཁྲོམ་མེ་འོང་བ་དང་། འཇག་མ་འཛུགས་ཆོག་པ་སོགས་འོང་སྟེ། འདི་ནའང་ཁ་སང་ད་ཞག་ཡེ་ཤེས་བླ་མའི་ནང་གི་སློབ་མ་ཕལ་ཆེར་བརྒྱ་ཆ་དགུ་བཅུ་ཡས་མས་འཇག་མ་ཟུག་པར་བྱུང་བ་ཡིན། ཞེས་པ་ལྟ་བུའི་རྟགས་མ་ཐོན་གྱི་བར་དུ་ནན་ཏན་གྱིས་སྦྱང་དགོས་པ་ཡིན་ནོ། མཇུག་དགེ་བ་བསྔོ་ཞིང་། བདེ་བ་ཅན་དུ་སྐྱེ་བའི་སྨོན་ལམ་ལ་སོགས་པ་འདོན་པར་བྱའོ། །སྡིག་པོ་ཆེ་བཙན་ཐབས་སུ་གྲོལ་བའི་གསང་ལམ་གྱི་མན་ངག་ཁྱད་པར་ཅན་འདི་དང་འཕྲད་ན་ངན་སོང་གི་སྐྱེ་གནས་སུ་འགྲོ་མི་དགོས་པ་ཐེ་ཚོམ་མེད་པ་གྲོལ་བར་འགྱུར་བ་ཡིན་པས་ན། ད་ལྟ་ཁྲིད་ཞུས་ནས་རྟགས་མ་ཐོན་གྱི་བར་དུ་སྦྱངས་ནས་ནམ་ཞིག་རང་ཉིད་ལ་འཆི་ལྟས་བྱུང་བའི་ཚེ་ན་ལས་ལ་སྦྱོར་དགོས་པ་ཡིན། དེ་ལྟར་ཟབ་ལམ་འཕོ་བའི་གདམས་པ་འདི་ནི་བསྐྱེད་རྫོགས་ཀྱི་རྣམ་གྲངས་གཞན་ལྟར་དུས་ཡུན་རིང་དུ་སྦྱང་མི་དགོས་པར་བདུན་ཕྲག་གཅིག་ཙམ་སྦྱངས་ན་ངེས་པར་རྟགས་ཐོན་དུ་འབྱོངས་པ་གསུངས། ད་ཞག་ཞག་བདུན་ཕྲག་རེ་མ་ཟིན་ཙམ་ནས་འབྱོངས་པར་བྱུང་བ་ནི་དངོན་སུམ་ལག་ལེན་ཐོག་གི་དངོས་ཡོད་གནས་ཚུལ་རེད། དེས་ན་མ་བསྒོམས་པར་འཚང་རྒྱ་བའི་ཆོས་ཞེས་པའང་གསུངས་པ་ལྟར་ཡིན་པས་མྱུར་ལམ་བླ་ན་མེད་པ་འདི་ལྟ་བུ་ལ་ཐམས་ཅད་ཀྱིས་ཡི་དམ་དུ་བྱ་བར་རིགས་སོ། དེ་ཡན་ཆད་ཀྱིས་འཕོ་བའི་དམིགས་རིམ་དང་། འཕོ་བའི་གོ་དོན། ཇི་ལྟར་སྦྱངས་ནས་ལས་ལ་སྦྱར་ཚུལ་བཅས་ཁྲིད་ཡིག་གིས་བསྟན་པའི་བསྒོམ་རིམ་གྱི་སྐོར་གསལ་པོ་སོང་ནས། ད་དངོས་སུ་མ་སྦྱངས་པའི་སྔོན་དུ་ཀློང་ཆེན་སྙིང་ཐིག་རང་གཞུང་གི་འཕོ་ཁྲིད་ཀྱི་ཕྱག་ལེན་ཆོག་ཁྲིགས་ལྟར་དུ་ངས་མར་ཚར་གཅིག་བཏོན་ནས། དེ་དང་མཉམ་དུ་ཁྱེད་རྣམས་ཀྱིས་དམིགས་པ་གྱིས་དང་ཐོབ་པ་ཡིན། དེའི་རྗེས་སུ་ལག་ཁྲིད་ཀྱི་ཚུལ་དུ་རང་རེས་ཡང་མཉམ་སྦྱོང་བྱེད་པའི་དུས་ཚོད་དེ་རིང་ཡོད་དགོས་ནི་རེད། དེས་ན་ཆོས་ཁྲིད་ཀྱི་འཕྲོ་མུ་འཐུད་ནས་ད་དུང་ངས་ཚར་གཅིག་བཏོན་ནས་ཐོབ་ཚར་བའི་རྗེས་སུ་འོ་ཅག་གིས་མཉམ་དུ་ཡང་ཐེངས་གཅིག་སྦྱོང་དགོས་པས་རྗེས་ཟློས་དགོས་སར་གྱིས་གསུངས་ནས། ༼ཐུགས་བརྩེ་ཆེན་ཡེ་ཤེས་ཀྱི་ཀློང་ནས་གསུང་སྙན་བརྗིད་བཅད་མཚམས་འདེགས་འཇོག་འགྱུ་ཁུག་སོགས་ཚད་མེད་པའི་དགེ་མཚན་དང་ལྡན་པས་འཁོར་ཚོགས་ཐམས་ཅད་ལ་མོས་གུས་དགའ་གདུང་ཤུགས་ཀྱིས་སྟེར་པའི་དབུས་སུ་གསུངས་པ་འདི་ལྟར། ༽
༥༽འཕོ་བའི་འདོན་ཆོག་གི་ལྗགས་ཁྲིད།
ནམ་མཁའ་དང་མཉམ་པའི་སེམས་ཐམས་ཅད་ལ་ཕན་འདོད་ཀྱི་ལྷག་བསམ་ཡིད་ལ་མཆོག་ཏུ་བཅངས་ཏེ་དམ་པའི་ཆོས་ཉན་པ་ལ་ཞུགས་པ་ནི། སྐྱེས་བུ་ཆེན་པོའི་ལམ་བསོད་ནམས་ཚད་མེད་པའི་འཇུག་ངོགས་དམ་པ་ཡིན་ཏེ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲའོ། །ཞེས་གསུངས་པ་ལྟར་སེམས་ཅན་ཐམས་ཅད་ཐུགས་ལ་བཅངས་ཏེ་གསོན་པར་ཞུ། དེ་ལ་གང་གསན་པར་བྱ་བའི་ཆོས་ནི། སློབ་དཔོན་ཆེན་པོ་ཞི་བ་ལྷས། དལ་འབྱོར་འདི་ནི་རྙེད་པ་ཤིན་ཏུ་དཀའ། །སྐྱེས་བུ་དོན་སྒྲུབ་ཐོབ་པར་གྱུར་བ་ལ། །གལ་ཏེ་འདི་ལ་ཕན་པ་མ་སྒྲུབ་ན། །ཕྱིས་ནི་ཡང་དག་འབྱོར་བ་གལ་ལ་འགྱུར། །ཞེས་གསུངས་པ་ལྟར་ད་རེས་ཡིད་བཞིན་གྱི་ནོར་བུ་རིན་པོ་ཆེ་ལག་ཏུ་ལེན་པའི་དཔེས་བརྒྱ་སྟོང་གི་ཆ་ཡང་མི་ཕོད་པའི་དལ་བའི་རྟེན་བཟང་པོ་འདི་ལྟ་བུ་རྙེད་པའི་སྐབས་སུ། ཐར་བ་དང་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་ཐབས་ལྷུར་ལེན་དགོས། དེ་ལ་ཡང་དག་པར་རྫོགས་པའི་སངས་རྒྱས་རྣམས་ནི་ཐབས་མཁས་ཤིང་ཐུགས་རྗེ་ཚད་མེད་པས་སེམས་ཅན་ཁམས་ཡལ་བར་མི་འདོར་བའི་ཕྱིར། གདུལ་བྱ་རྣམས་ཀྱི་ཁམས་དབང་བསམ་པ་བག་ལ་ཉལ་གྱི་རིམ་པ་དང་རྗེས་སུ་མཐུན་པ་དམ་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་གསུངས་པ་ཐམས་ཅད་ཀྱི་ནང་ནས། མཆོག་དང་ཕུལ་དང་རབ་ཏུ་གྱུར་བ་ནི། རྡོ་རྗེ་ཐེག་པ་བླ་མེད་ཀྱི་ལམ་ཁོ་ན་ཡིན། དེ་ལས་ཀྱང་ཇི་སྐད་དུ། དཔལ་རྡོ་རྗེ་གདན་བཞིའི་རྒྱུད་ལས། ཉེས་པ་ཀུན་ཀྱིས་མ་གོས་པ། །འཕོ་བའི་སྦྱོར་བ་སྦྱངས་བས་གྲོལ། །སྡིག་གིས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་འགྲོ། །ཞེས་སོགས་རྒྱལ་བ་ཁྱབ་བདག་རྡོ་རྗེ་འཆང་ཆེན་པོས་ལན་གཅིག་མ་ཡིན་པར་བསྔགས་པས་མ་བསྒོམས་སངས་རྒྱས་འཕོ་བའི་མྱུར་ལམ་ལ་བརྟེན་ནས་མཁའ་སྤྱོད་ཀྱི་གོ་འཕང་བདེ་བླག་ཏུ་སྒྲུབ་པའི་གདམས་པ་ཟབ་མོས་རྗེས་སུ་བཟུང་བའི་སྐབས་ཡིན། དེ་ལ་ཡང་མན་ངག་གི་རྣམ་གྲངས་མཐའ་ཡས་ཀྱང་བསྡུ་ན་ལྔར་འདུ་སྟེ། རབ་ཆོས་སྐུ་གཏད་མེད་ཀྱི་འཕོ་བ། འབྲིང་ལོངས་སྐུ་ཟུང་འཇུག་གི་འཕོ་བ། ཐ་མལ་སྤྲུལ་སྐུ་རྩལ་སྦྱོང་གི་འཕོ་བ། རང་དོན་དུ་འདུ་ཤེས་གསུམ་ལྡན་གྱི་འཕོ་བ། གཞན་དོན་དུ་ཐུགས་རྗེ་ལྕགས་ཀྱུའི་འཕོ་བ་སྟེ་རྣམ་པ་ལྔ་ཡོད་པ་ལས། འདི་སྤྲུལ་སྐུ་རྩལ་སྦྱོང་གི་འཕོ་བའི་གདམས་པ་ཉམས་སུ་བླངས་པ་ལའང་། སྔོན་འགྲོ་དངོས་གཞི་རྗེས་དང་གསུམ་ལས། ཐོག་མ་སྔོན་འགྲོའི་རྒྱུད་དག་པར་བྱ་བའི་སླད་དུ། མདུན་གྱི་ནམ་མཁའ་བླ་མ་དང་མཉིས་སུ་མེད་པའི་སྐྱབས་གནས་མཆོག་གསུམ་རྒྱ་མཚོའི་ཚོགས་རྣམས་མངོན་སུམ་ལྟ་བུ་བཞུགས་ཡོད་སྙམ་པའི་མོས་པས། དེ་རྣམས་ཀྱི་སྤྱན་སྔར་རང་གཞན་སེམས་ཅན་ཐམས་ཅད་འཁོད་དེ། དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་ཅི་མཛད་ཁྱེད་མཁྱེན་སྙམ་པའི་རེ་ལྟོས་ལིང་བསྐྱུར་གྱིས་སྐྱབས་སུ་འགྲོ་བ་དང་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་ཟབ་ལམ་འཕོ་བའི་རྣལ་འབྱོར་ཟབ་མོ་ཉམས་སུ་བླང་བར་བགྱིའོ་སྙམ་པའི་ཡིད་ཆེས་སྐྱབས་སུ་འགྲོ་བ་དང་། སེམས་བསྐྱེད་པ་འདི་ཡི་རྗེས་བཟློས་མཛོད། ན་མོ། དཀོན་མཆོག་གསུམ་དངོས་བདེ་བཤེགས་རྩ་བ་གསུམ། །རྩ་རླུང་ཐིག་ལེའི་རང་བཞིན་བྱང་ཆུབ་སེམས། །ངོ་བོ་རང་བཞིན་ཐུགས་རྗེའི་དཀྱིལ་འཁོར་ལ། །བྱང་ཆུབ་སྙིང་པོའི་བར་དུ་སྐྱབས་སུ་མཆི། །༼ཞེས་རྗེས་ཟློས་དང་བཅས་ལན་གསུམ། ཡང་། ༽ཧོ། སྣ་ཚོགས་སྣང་བ་ཆུ་ཟླའི་རྫུན་རིས་ཀྱིས། །འཁོར་བར་ལུ་གུ་རྒྱུད་དུ་འཁྱམས་པའི་འགྲོ། །རང་རིག་འོད་གསལ་དབྱིངས་སུ་ངལ་གསོའི་ཕྱིར། ཚད་མེད་བཞི་ཡི་ངང་ནས་སེམས་བསྐྱེད་དོ། །༼དེ་ཡང་དེ་ལྟར་ལན་གསུམ། ༽སླར་ཡང་ཚོགས་ཞིང་དེ་རྣམས་ཀྱི་སྤྱན་སྔར་བསགས་སྦྱོང་སྤེལ་གསུམ་གྱི་གནད་བསྡུས་པ་ཡན་ལག་བདུན་པ་འདི་ཡི་རྗེས་བཟློས་མཛོད། ཧྲཱི། ཆུ་ལས་ཆུ་བུར་ཇི་བཞིན་དུ། །ཡེ་ཤེས་དབྱིངས་ལས་སྤྲུལ་པའི་ལྷ། །བདག་ལུས་ཞིང་གི་རྡུལ་རྙེད་དུ། རྣམ་པ་སྤྲུལ་བས་ཕྱག་འཚལ་ལོ། །དངོས་བཤམས་ཡིད་སྤྲུལ་ཏིང་འཛིན་མཐུས། །སྣང་སྲིད་མཆོད་པའི་ཕྱག་རྒྱར་འབུལ། །སྒོ་གསུམ་མི་དགེའི་ལས་རྣམས་ཀུན། །འོད་གསལ་ཆོས་སྐུའི་ངང་དུ་བཤགས། །བདེན་པ་གཉིས་ཀྱིས་བསྡུས་པ་ཡི། །དགེ་ཚོགས་ཀུན་ལ་རྗེས་ཡི་རང་། །རིགས་ཅན་གསུམ་གྱི་གདུལ་བྱ་ལ། ཐེག་གསུམ་ཆོས་འཁོར་བསྐོར་བར་བསྐུལ། ཇི་སྲིད་འཁོར་བ་མ་སྟོངས་བར། །མྱ་ངན་མི་འདའ་བཞུགས་གསོལ་འདེབས། །དུས་གསུམ་བསགས་པའི་དགེ་རྩ་ཀུན། །བྱང་ཆུབ་ཆེན་པོར་རྒྱུ་རུ་བསྔོ། །༼ཡང་དུས་གསུམ་བསགས་པའི་མན་ལན་གསུམ་གསུངས་ནས། ༽དེ་ལྟར་ཐུན་མོང་གི་སྔོན་འགྲོས་རྒྱུད་སྦྱོང་བ་སོང་ནས་དངོས་གཞིའི་ཉམས་ལེན་ཟབ་མོ་ལ་འཇུག་པའི་སླད་དུ། ལུས་གནད་སྐྱིལ་ཀྲུང་དྲང་པོར་སྲོངས། ངག་གནད་རླུང་རྒྱུ་བ་རང་ས་ཞོགསེམས་ཀྱི་གནད་གཞན་དུ་མ་ཡེངས་པར་དམིགས་པ་འདི་བཞིན་དུ་མཛོད། ཨོྃ་མ་ཧཱ་ཤུཎྱ་ཏ་སོགས། ཁྱོད་རང་རྣམས་ཀྱི་ཕུང་ཁམས་དང་སྐྱེ་མཆེད་ཀྱི་མཚོན་པས་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་ས་ཕྱོགས་འདི་ཉིད་དག་པ་རབ་འབྱམས་འོག་མིན་མཁའ་སྤྱོད་རྡོ་རྗེ་བཙུན་མོའི་གྲོང་ཁྱེར་ཆེན་མོར་གསལ་བའིདབུས་སུ་ཁྱོད་རང་རྣམས་སྐད་ཅིག་གི་སྒྱུ་ལུས་ཀྱི་བཀོད་པ་རྒྱལ་ཡུམ་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་མ། གཡས་གྲི་གུག་དང་། གཡོན་ཐོད་པ་ཁྲག་གིས་གང་བ་འཛིན་པ། མཆན་ཁུང་གཡོན་ན་ཡབ་ཧེ་རུ་ཀའི་ངོ་བོ་ཁ་ཊྭཱཾ་ག་འཁྱུད་པ། དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ། ཞབས་གཡས་ཅུང་ཟད་བརྐུམས་ཤིང་གཡོན་བརྐྱངས་པའི་དོར་སྟབས་ཀྱིས་པདྨ་ཉི་མ་བམ་རོའི་སྟེང་ན་བཞུགས་པ་གསལ་བའི་སྐུ་ཡི་དབྱིབས་ཕྲུ་མ་ཕུས་བཏབ་པ་ལྟ་བུའི་ནང་དུ་རྩ་དབུ་མ་སྦོམ་ཕྲ་མདའ་སྨྱུག་ཙམ་པ་སྟོང་སང་ངེ་འོད་ཀྱི་སྦུ་གུའི་རྣམ་པ་གསལ་བའི་ཡར་སྣེ་ཚངས་བུག་གི་གནས་སུ་རྒྱ་མཐོང་ཁ་ཕྱེ་བ་ལྟར་ཧར་རེ་ཡོད་པ། མར་སྣེ་ལྟེ་འོག་སོར་བཞིའི་གནས་སུ་ཁ་ཟུམ་པ། སྙིང་ཁའི་ཐད་སྨྱུག་མ་ཚིགས་ཀྱིས་བཅད་པ་ལྟ་བུའི་སྟེང་དུ་རླུང་གི་རང་བཞིན་ཐིག་ལེ་ལྗང་སྐྱ་སྲན་མ་ཙམ་པ་ཅུང་ཟད་གཡོ་བ་དང་བཅས་པ་ལ། རིག་པའི་ངོ་བོ་ཡི་གེ་ཧྲཱིཿདམར་པོ་འབྲུ་མར་གྱི་སྡོང་བུ་ལྟར་འབར་བས་མཚོན་པ་གསལ་བཏབ། སྤྱི་བོར་ཁྲུ་གང་ཙམ་གྱིས་མཐོ་བའི་ནམ་མཁར་ཆོས་དབྱིངས་དོན་གྱི་འོག་མིན་ཆེན་པོ་རིག་པ་རྡོ་རྗེ་ལུ་གུ་རྒྱུད་འཇའ་ཟེར་ཐིག་ལེ་འཁྲིགས་པའི་ཀློང་དུ་པདྨ་ཟླ་བའི་གདན་ལ། སྐྱབས་གནས་ཀུན་འདུས་དྲིན་ཆེན་རྩ་བའི་བླ་མ་དང་དབྱེར་མ་མཆིས་པའི་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས། ཕྱག་གཉིས་མཉམ་བཞག་གི་ཕྱག་རྒྱ་མཛད་པའི་སྟེང་ན་འཆི་མེད་བདུད་རྩིས་གང་བའི་ལྷུང་བཟེད་འཛིན་པ། ན་བཟའ་ཆོས་གོས་རྣམ་གསུམ་ངུར་སྨྲིག་དུ་གསོལ་ཞིང་། མཚན་དཔེའི་གཟི་བྱིན་མཆོག་ཏུ་འབར་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་གཡས་སུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། གཡོན་དུ་བྱང་ཆུབ་སེམས་དཔའ་མཐུ་ཆེན་ཐོབ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་རྩ་གསུམ་རྒྱལ་བ་རབ་འབྱམས་ཀྱི་འཁོར་གྱིས་བསྐོར་ཏེ་ཁྱེད་རང་གི་ཐར་བའི་ལམ་སྟོན་ཆེན་པོ་མངོན་སུམ་ལྟ་བུ་བཞུགས་ཡོད་སྙམ་པའི་མོས་པས་བདག་གིས་བླ་མ་ལ་གསོལ་བ་བཏབ་ཅིང་ཧྲཱིཿལྔ་ཚར་བརྗོད་པའི་ཚེ་ཁྱོད་རང་རྣམས་ཀྱིས་ཀྱང་སྤྱི་བོའི་བླ་མ་ལ་མོས་གུས་གདུང་ཤུགས་དྲག་པོས་ཤེས་པ་གཞན་དུ་མ་ཡེངས་པར་རྩེ་གཅིག་ཏུ་གསོལ་བ་བཏབ་པས། སྙིང་ཁའི་རླུང་སེམས་ཀྱི་ངོ་བོ་ཐིག་ལེ་ཡིག་འབྲུ་དང་བཅས་པ་དེ་ཉིད་དབུ་མའི་ལམ་བརྒྱུད་དེ་ཤོག་སྐྱ་རླུང་གིས་བཏེགས་པ་བཞིན་དུ་ཡར་ཡར་འགྲོ་བའི་ངང་ལ་ཧཱིཀ་ཅེས་དྲག་ཏུ་བརྗོད་པ་དང་ལྷན་ཅིག་ཏུ་མདའ་འཕངས་པ་བཞིན་དུ་སོང་ནས་བླ་མའི་ཐུགས་ཀར་སིབ་ཀྱིས་ཐིམ་པས་བླ་མའི་ཐུགས་དང་རང་སེམས་དབྱེར་མེད་དུ་འདྲེས་པའི་སྤྲོས་བྲལ་བློ་འདས་ཀྱི་དབྱིངས་སུ་མཉམ་པར་ཞོག་མཛོད་ཅིགབཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐབས་སུ་མཆིའོ། །༼ལན་གསུམ་གསུངས། ༽ཨེ་མ་ཧོ། གནས་རང་སྣང་དོན་གྱི་འོག་མིན་ན། །ཡིད་དད་བརྒྱས་འཇའ་གུར་འཁྲིགས་པའི་ཀློང་། །སྐྱབས་ཀུན་འདུས་རྩ་བའི་བླ་མ་ནི། །སྐུ་ཐ་མལ་མ་ཡིན་དྭངས་མའི་ལུས། །དཔལ་སངས་རྒྱས་སྣང་མཐའི་ངོ་བོར་བཞུགས། །ཡིད་མོས་གུས་གདུང་བས་གསོལ་བ་འདེབས། །ལམ་འཕོ་བ་འབྱོངས་བར་བྱིན་གྱིས་རློབས། །གནས་འོག་མིན་བགྲོད་པར་བྱིན་གྱིས་རློབས། །དབྱིངས་ཆོས་སྐུའི་རྒྱལ་ས་ཟིན་པར་ཤོག །༼ཡང་ཡིད་མོས་གུས་ནས་ཚར་གསུམ། ཡང་དབྱིངས་ཆོས་སྐུའི་སོགས་ནས་ཚར་གསུམ་མཐར། ཧྲཱིཿཧྲཱིཿཧྲཱིཿཧྲཱིཿཧྲཱིཿཧིཀ་བཅས་ལན་བདུན། ཡང་བཅོམ་ལྡན་འདས་སོགས་ནས། འོད་དཔག་མེད་སོགས་ལན་གསུམ། ༽སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །དྲིན་ཆེན་རྩ་བའི་བླ་མའི་ཐུགས་རྗེས་ཟུང་། །རྩ་བ་བརྒྱུད་པའི་བླ་མས་ལམ་སྣ་དྲོངས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། བདག་གཞན་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །༼ཡང་ཟབ་ལམ་འཕོ་བ་འབྱུང་བར་བྱིན་གྱིས་རློབས་ཚར་གསུམ། ཡང་བདེ་བ་ཅན་སོགས་ལན་གསུམ། ཡང་ཧྲཱི་ལྔ་ཚར་རྗེས། ཧིཀ་ལན་ལྔ། ཡང་བཅོམ་ལྡན་འདས་དེ་བཞིན་སོགས་ལན་གསུམ།༽ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ། །བདག་སོགས་རྩེ་གཅིག་ཡིད་ཀྱིས་གསོལ་བ་འདེབས། ཟབ་ལམ་འཕོ་བ་འབྱོང་བར་བྱིན་གྱིས་རློབས། །བདག་གཞན་འདི་ནས་ཚེ་འཕོས་གྱུར་མ་ཐག །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། ༼ཡང་ཟབ་ལམ་འཕོ་བ་མན་ཚར་གསུམ། ཡང་རྣམ་ཤེས་མན་ཚར་གསུམ་མཐར་སྤར་ཆོག་སྔར་ལྟར་ཚར་ལྔའི་མཐར།༽ཀྱེ་མ་བདག་གཞན་གྱི་རྣམ་ཤེས་རྟེན་དང་བཅས། །འོད་བུན་ནེ་སངས་རྒྱས་ཐུགས་ཀར་འཕོས། །ཀློང་དབྱེར་མེད་ཕྱམས་གཅིག་སངས་རྒྱས་ནས། སྐུ་བདེ་ཆེན་ཞིང་གི་རྒྱན་དུ་བཞུགས། ཕཊ་༼ལྔ་ཚར་གསུངས་ནས་རང་རིག་མ་བཅོས་རྒྱུན་གྱི་ཉམས་ལེན་ལ་ཡུན་རིང་མཉམ་པར་བཞུགས་ཏེ། ༽སླར་ཡང་ཐུགས་ཀ་ནས་འོད་ཟེར་གྱི་ཚོགས་བསམ་གྱིས་མི་ཁྱབ་པར་འཕྲོས་པས་འཁོར་འདས་ལམ་གསུམ་གྱི་ཚེ་བཅུད་ཐམས་ཅད་འོད་དང་འོད་ཟེར་གྱི་རྣམ་པ་སྤྱན་དྲངས་ནས་རང་ལ་སིབ་སིབ་ཐིམ་པས་འཆི་མེད་རྡོ་རྗེའི་སྐུར་གྱུར་བའི་མོས་པ་མཛོད། ཨོཾ་ཨ་མ་ར་ན་༼སོགས་ཅི་མང་གསུངས། ༽དེས་ཟབ་ལམ་འཕོ་བའི་གདམས་པ་ལེགས་པར་ཐོབ་པ་ཡིན་པས་གནས་སྐབས་ཀུན་ཏུ་དམིགས་པའི་རྟེན་གོམས་པ་ལ་བསླབ་པ་དང་། མཐར་ནམ་ཞིག་འཆི་ངེས་པའི་དུས་ལ་བབས་པའི་ཚེ་ན་རང་དོན་འདུ་ཤེས་གསུམ་ལྡན་གྱི་འཕོ་བའི་ལས་ལ་སྦྱར་བ་ནི། ཚེ་འདི་སྣང་གི་ཆགས་སྡང་གི་འཁྲུལ་བ་རྦད་ཀྱིས་བཅད་ལ། རྩ་དབུ་མ་ལ་ལམ་གྱི་འདུ་ཤེས། རང་ཉིད་ལམ་དེར་འགྲོ་བའི་འདུ་ཤེས། བླ་མའི་ཐུགས་ཀར་འཕོ་བའི་འདུ་ཤེས་གསུམ་ལྡན་གྱི་སྒོ་ནས། སྙིང་ཁའི་རླུང་སེམས་ཀྱི་ཐིག་ལེ་ཡིག་འབྲུ་དང་བཅས་པ་སྔར་བཞིན་དུ་འཕོས་ནས་བླ་མའི་ཐུགས་དང་རང་སེམས་དབྱེར་མེད་དུ་འདྲེས་པའི་ངང་ལ་མཉམ་པར་བཞག་པ་དང་། གཞན་ཡང་འཇིག་རྟེན་འདི་ནས་ཕ་རོལ་ཏུ་ཉིང་མཚམས་སྦྱར་བའི་དམིགས་ཡུལ་ཚེ་དུས་ལས་འདས་པ་འདས་མ་རྣམས་ཀྱི་སླད་དུ་ཐུགས་རྗེ་ལྕགས་ཀྱུའི་འཕོ་བས་དག་པའི་ཞིང་ཁམས་སུ་དབུགས་དབྱུང་བ་སོགས་དོན་གཉིས་རླབས་པོ་ཆེ་སྒྲུབ་པའི་ཐབས་ལ་མཁས་པར་བྱའོ། །དེས་ཀློང་ཆེན་སྙིང་ཐིག་རང་གཞུང་གི་འཕོ་ཁྲིད་ཆོག་ཁྲིགས་མའི་འགྲོས་ལྟར་ཕུལ་བས་ཁྱེད་རྣམ་པ་ཚང་མའི་ཐོབ་སོང་བ་ཡིན། ད་ལག་ཁྲིད་ཀྱི་ཚུལ་དུ་ཚར་གཅིག་རང་རེ་ཀུན་ཀྱིས་མཉམ་སྦྱོང་བྱེད། དུས་རྒྱུན་གྱི་ཁྲིད་སྦྱོང་དང་ལས་ལ་སྦྱར་བ་གཉིས་ཀའི་སྐབས་སུ་རྒྱུན་འདོན་གྱི་འདོན་ཆོགཨེ་མ་ཧོ། རང་སྣང་ལྷུན་གྲུབ་སོགས་ཁ་བསྒྱུར་ན་ཆོག་པས་དེ་འདོན་དགོས། སྤྱིར་འཕོ་བ་ལ་གོང་དུ་རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ་སོགས་ལྔ་རུ་དབྱེ་བ་ལྟར་ཡིན་ལ། དེའི་དང་པོ་བཞི་རྣལ་འབྱོར་བ་རབ་འབྲིང་ཐ་མའི་བློ་ཅན་གྱི་རྟོགས་ཚད་ཀྱི་བློ་རིགས་དང་བསྟུན་ནས་རང་དོན་དུ་ལམ་ལ་སྦྱོང་བ་དང་དེ་ཉིད་ལས་ལ་སྦྱོར་ཚུལ་ཡིན། ཐ་མའི་གཅིག་ཁེ་རུ་པོ་དེ་ནི་གཞན་སྡིག་ཅན་རྗེས་སུ་འཛིན་ནས་བཙན་ཐབས་སུ་འདྲེན་པ་ཐུགས་རྗེའི་ལྕགས་ཀྱུས་དྲོངས་ཚུལ་ཡིན། ཐམས་ཅད་འཕོ་བ་མ་བསྒོམས་སངས་རྒྱས་ཀྱི་མྱུར་ལམ་གསང་སྔགས་རྫོགས་པ་ཆེན་པོའི་མ་བསྒོམས་སངས་རྒྱས་ཆོས་ལྔའི་ནང་ཚན་རེད། དེའི་ནང་ནས་རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ་ནི། གོང་དུ་ཡང་ཞུས་ཀྱང་རྫོགས་ཆེན་སྒོམ་པའི་རྣལ་འབྱོར་པ་དབང་པོ་རབ་སྒོམ་པ་ཉིན་མཚན་ཁ་སྦྱོར་དུ་གྱུར་ནས། ཆོས་རྫོགས་པ་ཆེན་པོ་ཡིན་པས་མ་ཚད་གང་ཟག་རྫོགས་པ་ཆེན་པོར་གྱུར་པས་དབྱིངས་དང་རིག་པའི་གནད་ལ་བརྟེན་ཏེ་ཆོས་སྐུའི་དགོངས་ཀློང་དུ་ཚེ་འདིར་གྲོལ་བ་ཐོབ་ཅིང་འཕོ་བ་དེ་ལྟ་བུ་ཡིན། དེ་ལ་རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བའམ་སྐུ་དང་ཡེ་ཤེས་ལ་འཇུག་པ་དང་འོད་གསལ་སྦུགས་འཇུག་ཀྱང་ཟེར། འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ་ནི། བསྐྱེད་རྫོགས་དབྱེར་མེད་ཀྱི་རྣལ་འབྱོར་ལ་གོམས་འདྲིས་བྱང་སོང་བས་ལྷུན་གྲུབ་ཐོད་རྒལ་གྱི་སྣང་ཆ་ཤར་བ་རྣམས་ལ་ད་ལྟའི་འོད་གསལ་འདི་སྐྱེལ་མ་དང་འདྲ་བ་དང་། བར་དོའི་འོད་གསལ་དེ་བསུ་མ་དང་འདྲ་བ་གཉིས་ཀ་ཟུང་སྦྲེལ་བས་ཟུང་འཇུག་ཡེ་ཤེས་ཀྱི་སྐུར་འཕོ་བའམ། ཆོས་ཉིད་བར་དོའི་རང་སྣང་ངོ་ཤེས་ནས་མ་པང་དུ་བུ་འཇུག་པ་ལྟར་འོད་གསལ་ཟུང་འཇུག་ལ་གྲོལ་བ་ཡིན། ཐ་མལ་སྤྲུལ་སྐུ་ཚད་མེད་ཐུགས་རྗེའི་འཕོ་བ་ནི། བསྐྱེད་རྫོགས་ལ་མོས་པ་ཡོད་པ་དང་དམ་ཚིག་མ་ཉམས་པ་སྐྱེ་བ་སྤྲུལ་སྐུའི་རྣལ་འབྱོར་ལམ་དུ་ཁྱེར་ཤེས་པས་སྲིད་པ་བར་དོ་རྣམ་གྲོལ་དབུགས་ཆེན་འབྱིན་པའི་ཞིང་ལྔ་སོགས་སུ་འཕོ་ཐུབ་པ་ཅན་ཡིན། ཐ་མལ་བ་འདུ་ཤེས་སུམ་ལྡན་གྱི་འཕོ་བ་ནི། གོང་དུ་བཤད་པ་ལྟར་རྩ་དབུ་མ་ལ་ལམ་གྱི་འདུ་ཤེས། སེམས་རྣམ་ཤེས་ཀྱི་ཐིག་ལེ་ལ་མགྲོན་པོའི་འདུ་ཤེས། གནས་བདེ་ཆེན་དག་པའི་ཞིང་ལ་འགྲོ་སའི་འདུ་ཤེས་བྱས་ནས་འཕོ་བ་ནི། ད་ལྟ་རང་རེས་སྦྱོང་བཞིན་པ་འདི་ཡིན། གཤིན་པོ་རྗེས་འཛིན་ཐུགས་རྗེ་ལྕགས་ཀྱུའི་འཕོ་བ་ནི། རྟོགས་པ་མཆོག་ལྡན་གྱི་གང་ཟག་སྣང་སེམས་ལས་སུ་རུང་བས་སྡིག་ཅན་ཡིན་ཡང་ཐར་བའི་ཞིང་དུ་འདྲེན་པའི་མན་ངག་ཁྱད་པར་ཅན་ལྡན་པ་དེ་ལྟ་བུའི་གང་ཟག་རྟོགས་པ་མཆོག་ལྡན་ཞིག་གིས་འཕེན་པ་ཡིན་པས་གསང་སྔགས་རྫོགས་ཆེན་གྱི་ཁྱད་ཆོས་གོང་དུ་བཤད་མ་ཐག་པ་ལྟར་ཡིན། སྐབས་སུ་བབས་པ་འོ་ཅག་གིས་སྦྱོང་རྒྱུ་འདི་ནི་འདུ་ཤེས་སུམ་ལྡན་གྱི་འཕོ་བ་ཡིན། ད་སྦྱོང་བའི་སྐབས་སུ་ལུས་གནད་རྣམ་སྣང་ཆོས་བདུན་ཟུག་རྔུ་མེད་པ་ཞིག་བཅའ་དགོས། ཟུག་རྔུ་མེད་པའི་དོན་ནི་མ་བདེ་བ་མེད་པར་བདེ་མོ་བསྡད་ནས། དེ་ཡང་རྐང་པ་རྡོ་རྗེའི་སྐྱིལ་ཀྲུང་། སྒལ་ཚིགས་དྲང་པོར་སྲོངས། དཔུང་པ་བརྒྱང་སྟེ་ལག་གཉིས་མཉམ་བཞག་གམ་སེམས་ཉིད་ངལ་གསོའི་ཕྱག་རྒྱ་བྱ། མགྲིན་པ་ཨེན་ཙམ་བཀུག་ནས་ཨོལ་མདུད་མནན། རྫོགས་ཆེན་སྐབས་སུ་དབུགས་སྣ་ནས་མི་གཏོང་ཁ་ནས་གཏོང་དགོས་ཏེ་ལས་རླུང་དབྱིངས་སུ་དག་ནས་ཡེ་རླུང་དབུ་མར་འཁྱིལ་བའི་དགོས་པ་ཁྱད་པར་ཅན་ཡོད། མིག་ཟུམ་པའི་ཚུལ་གྱིས་ཐད་ཀ་འདོམ་གང་ཙམ་ལ་མིག་ཧད་པོ་གཟུགས་ལ་མི་འཛིན་པ་བར་སྣང་ལ་གཏད་མེད་དུ་བལྟ། འདིའི་སྐབས་སྲིན་མཛུབ་ཀྱི་རྩ་དེ་མཐེ་བོང་གིས་མནན་ནས་རྡོ་རྗེའི་ཁུ་ཚུར་བཅའ་དགོས། དེ་གཉིས་ཀྱི་བརླའི་རྩ་ཆེན་མནན་ནས་ལུས་གནད་དེ་ལྟར་བཅའ། ངག་འདོན་སྙིང་ཐིག་སྔོན་འགྲོའི་བླ་མའི་རྣལ་འབྱོར་གྱི་སྐབས། ཨེ་མ་ཧོ། རང་སྣང་ལྷུན་གྲུབ་སོགས་ནས། བཀོད་པ་རབ་རྫོགས་བདེ་ལྡན་ཞིང་གི་དབུས་ཞེས་ཁ་སྒྱུར་དགོས། ནམ་མཁར་གཟིགས་ཡན་ཆད་ཀྱིས་ཕྱི་ལུས་ཀྱི་སྟོང་ར་བསྟན། དེ་དབུས་ཁོང་དབུས་སོགས་ནས་མར་སྣེ་ལྟེ་འོག་ཟུམ་པ་ཡི་བར་གྱིས་ནང་རྩ་ཡི་སྟོང་ར་བསྟན། སྙིང་ག་ཚིགས་ཀྱིས་སོགས་ནས་ཧྲཱིཿཡིག་དམར་པོ་གསལ་ཞེས་པའི་བར་གྱིས་རིག་པ་སེམས་ཀྱི་རྟེན་གཞི་བསྟན། སྤྱི་བོར་གྲུ་གང་སོགས་ནས་ཕུང་པོ་གསལ་ཞེས་པའི་བར་གྱིས་སྐྱབས་ཡུལ་འདྲེན་པའི་དེད་དཔོན་ཆེན་པོར་གསལ་འདེབས་པའི་ཚིག་གསང་སྔགས་མོས་གུས་ལམ་ཁྱེར་ཡིན་པས་ཞིང་ཁྱད་པར་ཅན་བསྟན་པ་ཡིན། ཐུགས་ཀར་འཕོ་སའི་ཡུལ་ནི་རྩ་བའི་བླ་མ་དང་གཉིས་སུ་མེད་པ་དེ་བཞིན་གཤེགས་པ་ཐམས་ཅད་ཀྱི་གསུང་གི་ངོ་བོ་པདྨའི་རིགས་བདེ་ལྡན་ཞིང་གི་མགོན་པོ་འོད་དཔག་མེད་བསྒོམ་དགོས། ད་རེས་ཀློང་ཆེན་སྙིང་ཐིག་གི་འཕོ་ལུང་ཡིན་པས་གཙོ་རྐྱང་སྒོམ་ཡང་ཆོགགནམ་ཆོས་གཙོ་འཁོར་གསུམ་པ་དང་། རྫོགས་ཆེན་འཇག་ཟུག་མའི་སྐབས་སུ་བརྒྱུད་པའི་བླ་མ་དང་བཅས་པ་ཁྲོམ་ཚོགས་སུ་བཞུགས་པ་སྟེ་བསྒོམ་ལུགས་གསུམ་ཡོད་པའི་ནང་ནས་ད་རེས་སྙིང་ཐིག་གི་འཕོ་ལུང་གཙོ་བོ་རེད། དམིགས་པ་གཞན་གཉིས་སྐབས་དམིགས་པ་སྒྱུར་དགོས་མ་གསུངས་པས་གཙོ་བོ་སྙིང་ཐིག་ལྟར་བསྒོམ་ཡང་ཆོག་སྙམ། འོད་དཔག་ཏུ་མེད་པ་ལ་ཕྱག་འཚལ་བ་དང་མཆོད་ཅིང་སྐྱབས་སུ་མཆི་བའི་ཚིག་བཅོམ་ལྡན་འདས་སོགས་ལན་བདུན་ཡན་ཆད་གསོག་རྒྱུའི་ཕྱག་སྲོལ་ཡོད། དང་པོ་རྫོགས་པ་ཆེན་པོ་ཀློང་ཆེན་སྙིང་ཐིག་གཞུང་གི་འཕོ་བ་ཨེ་མ་ཧོ་གནས་རང་སོགས་འདོན། དེ་ནས་འཇག་ཟུག་མ་དང་གནམ་ཆོས་འཕོ་བ་བཅས་གོང་དུ་འདོན་པ་ལྟར་ཚིག་རྗེས་དོན་དྲན་གྱིས་འདོན། ཁྱད་པར་དུ་བླ་མ་དང་མགོན་པོ་འོད་དཔག་མེད་དབྱེར་མེད་པ་ལ་མོས་གུས་གདུང་ཤུགས་དྲག་པོས་སྙིང་ནས་གསོལ་བ་འདེབས་དགོས་ཏེ། གཙོ་ཆེར་འཕོ་བའི་དམིགས་པ་ཐེབས་མི་ཐེབས་དང་། སྦྱངས་རྟགས་ཐོན་མི་ཐོན་དད་གུས་དང་མོས་པ་ལ་ཐུག་ཡོད། ཧྲཱིཿལྔ་ཚད་རྐན་ཕུགས་ནས་སྒྲ་ཆེན་པོར་བརྗོད་དགོས་པ་མེད་ཀྱང་ཚོགས་པ་མཉམ་དུ་འདོན་ཚེ་གཞན་གྱི་གོ་བྱེད་ཙམ་མ་བརྗོད་ན་མི་འགྲིག་པས་ཧྲཱིཿརེ་རེ་བཞིན་བརྗོད་ཚེ་རང་གི་རིག་པ་སེམས་ཀྱི་ངོ་བོའི་ཧྲཱིཿཡིག་དེ་རླུང་གི་ཐིག་ལེ་ལྗང་སྐྱས་བཏེག་པའི་འཕར་ལ་ཁད་པ་འཕར་ལ་ཁད་པ། ཡལ་ལ་ཁད་པ་ཡལ་ལ་ཁད་པ་ཞིག་ཡོད་པ་དེ་ཧྲཱིཿརེ་རེས་རྩ་དབུ་མའི་ལམ་བརྒྱུད་དེ་ཡར་ཡར་བཀྱག་ནས་ཧྲཱིཿལྔ་པའི་ཚེ་ཚངས་བུག་གི་རྒྱ་མཐོང་ཁར་ཐོན་ནས་ཧིཀ་གཅིག་གིས་བླ་མ་དང་འོད་དཔག་མེད་དབྱེར་མེད་པའི་ཐུགས་ཀར་མདའ་འཕང་བ་བཞིན་དབྱེར་མེད་རོ་གཅིག་ཏུ་བསྲེས་ནས་ཡང་ཡང་རྟགས་མ་ཐོན་གྱི་བར་དུ་སྦྱོང་དགོས། རྟགས་ཐོན་ནའང་སྐྱུར་མི་བཞག་པར་རྒྱུན་དུ་ཆགས་མེད་ཀྱིས་ཐུགས་དམ་མཛད་དགོས། འདིའི་སྐབས་སུ་གོང་ཞུས་ལྟར་རླུང་སེམས་འདུས་པའི་བདག་ཉིད་རང་གི་རིག་པ་སེམས་ཀྱི་ངོ་བོ་ཡི་གེ་ཧྲཱིཿཡིག་དེ་ཉིད་ལ་དམིགས་པ་ལས། ཟུར་ནས་གཞན་ལ་ལྟད་མོ་བལྟ་བ་ལྟ་བུ་བྱེད་མི་ཉན། ད་རེས་ཐམས་ཅད་མཉམ་པོ་རུ་རྩ་གསུམ་འཆིང་རྒྱ་བྱས་ནས་ཚིག་རྗེས་དོན་དྲན་འདོན་དགོས། དང་པོ་ཐལ་མོ་སྦྱར་ནས་བརྒྱུད་པའི་གསོལ་འདེབས་འདོན། གསུངས་ནས། བླ་མ་མཁྱེན་ལན་གསུམ། སྐུ་གསུམ་བཀའ་བརྒྱུད་ཀྱི་ངོ་བོ། །ཡོངས་འདུས་ཡིད་བཞིན་གྱི་ནོར་བུ། །རྩ་བའི་བླ་མ་དེ་མཁྱེན་ནོ། །མཆོག་ཐུན་དངོས་གྲུབ་ཀུན་སྩོལ་ཅིག །ལན་གསུམ། རྒྱལ་བ་ཀུན་འདུས་རྗེ་བཙུན་བླ་མ་མཁྱེན་ནོ། །འཁོར་བ་དོང་ནས་སྤྲུགས་པར་བྱིན་གྱིས་རློབས་ཤིག །ལན་གསུམ། སྐྱབས་གནས་ཀུན་འདུས་ཀྱི་ངོ་བོ། །མཁྱེན་བརྩེ་ནུས་པའི་བདག་ཉིད། །དྲིན་ཆེན་མཚོ་སྐྱེས་རྡོ་རྗེར། །སྙིང་ནས་གསོལ་བ་འདེབས་སོ། །རྟག་ཏུ་དབྱེར་མེད་ཐུགས་རྗེས། །བདག་རྒྱུད་བྱིན་གྱིས་རློབས་ཤིག །ལན་གསུམ། བསླུ་མེད་དཀོན་མཆོག་གསུམ་གྱི་ངོ་བོ་ཉིད། །ངན་སོང་འཇིགས་ལས་སྒྲོལ་བའི་དཔའ་བོ་ཆེ། །དག་པའི་ཞིང་དུ་ཁྲིད་པའི་དེད་དཔོན་མཆོག །མགོན་པོ་འོད་དཔག་མེད་ལ་གསོལ་བ་འདེབས། །གནད་གཅོད་གཤིན་རྗེའི་འཇིགས་ལས་བསྐྱབ་ཏུ་གསོལ། །འཇིགས་རུང་བར་དོའི་འཕྲང་ལས་བསྒྲལ་དུ་གསོལ། །གཟོད་དཀའ་ངན་འགྲོའི་གཡང་ལས་དྲང་དུ་གསོལ། །ཞིང་མཆོག་བདེ་བ་ཅན་དུ་ཁྲིད་དུ་གསོལ། །རེ་ས་གཞན་ན་མེད་དོ་ཐུགས་རྗེས་ཟུང་། །ཨེ་མ་ཧོ། རང་སྣང་ལྷུན་གྲུབ་དག་པ་རབ་འབྱམས་ཞིང་། །བཀོད་པ་རབ་རྫོགས་བདེ་ལྡན་ཞིང་གི་དབུས། །རང་ཉིད་སྒྱུ་ལུས་རྡོ་རྗེ་རྣལ་འབྱོར་མ། །ཞལ་གཅིག་ཕྱག་གཉིས་དམར་གསལ་གྲི་ཐོད་འཛིན། །ཞབས་གཉིས་དོར་སྟབས་སྤྱན་གསུམ་ནམ་མཁའ་གཟིགས། །དེ་ཡི་ཁོང་དབུས་རྩ་དབུ་མ། །སྦོམ་ཕྲ་མདའ་སྨྱུག་ཙམ་པ་ལ། །སྟོང་སང་འོད་ཀྱི་སྦུ་གུ་ཅན། །ཡར་སྣེ་ཚངས་བུག་གནས་སུ་ཧར། །མར་སྣེ་ལྟེ་འོག་ཟུམ་པ་ཡི། །སྙིང་ག་ཚིགས་ཀྱིས་བཅད་པའི་སྟེང་། །རླུང་གི་ཐིག་ལེ་ལྗང་སྐྱའི་དབུས། །རིག་པ་ཧྲཱིཿཡིག་དམར་པོ་གསལ། །སྤྱི་བོར་ཁྲུ་གང་ཙམ་གྱི་སྟེང་། །སངས་རྒྱས་སྣང་བ་མཐའ་ཡས་ནི། །མཚན་དཔེ་རྫོགས་པའི་ཕུང་པོར་གསལ། །བཅོམ་ལྡན་འདས་དེ་བཞིན་སོགས་ལན་བདུན། ཨེ་མ་ཧོ། གནས་རང་སྣང་དོན་གྱི་འོག་མིན་ན། །སོགས་ནས། དབྱིངས་ཆོས་སྐུའི་རྒྱལ་སར་ཟིན་པར་ཤོག །ལན་གསུམ། ཡིད་མོས་གུས་གདུང་བས་གསོལ་བ་འདེབས། །མན་ཆད་ལན་གསུམ། དབྱིངས་ཆོས་སྐུའི་རྒྱལ་སར་ཟིན་པར་ཤོག །ལན་གསུམ། ཧྲཱིཿལྔ་ཚར་ཧིཀ་བཅས་ལན་ལྔ་གསུངས། ཡང་། བཅོམ་ལྡན་འདས་སོགས་ལན་བདུན། སངས་རྒྱས་འོད་དཔག་མེད་ལ་ཕྱག་འཚལ་ལོ། །སོགས་ལན་གཅིག །ཟབ་ལམ་འཕོ་བ་འབྱུང་བར་བྱིན་གྱིས་རློབས། །མན་ལན་གསུམ། བདེ་བ་ཅན་དུ་སྐྱེ་བར་བྱིན་གྱིས་རློབས། །ལན་གསུམ། སྤར་ཆོག་སྔར་ལྟར་ལན་ལྔ་གསུངས། ཡང་། བཅོམ་ལྡན་འདས་སོགས་ལན་བདུན། ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །སོགས་ནས་ལན་གཅིགཟབ་ལམ་འཕོ་བ་འབྱོང་བར་བྱིན་གྱིས་རློབས། །མན་ལན་གསུམ། རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ལན་གསུམ། སྤར་ཆོག་སྔར་བཞིན་ལན་ལྔ། གནམ་ཆོས་ཀྱི་འཕོ་བ་འདིའི་མཇུག་གི་རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ཞེས་པ་འདི་ལན་གསུམ་རེ་འཇིགས་བྲལ་བྱང་ཆུབ་རྡོ་རྗེའི་གསུངས་དར། གཞན་ཡང་ཟབ་ལམ་འཕོ་བ་མན་ལན་གསུམ་བསྐྱར་ན་འགལ་བ་མེད་སྙམ། རྗེས་ཐུན་བསྡུ་བའི་ཚེ་ཕཊཿལྔ་བརྗོད་པ་ནི་སྐུ་ལྔའི་དབྱིངས་སུ་རྒྱས་གདབ་སྟེ་ཕྱིར་མི་ལྡོག་པའི་རྒྱས་གདབ་པའི་རྒྱ་ཡི་དོན་རེད། ཕཊཿརེ་རེའི་བར་ཨ་རེ་ངག་གིས་མི་བརྗོད་ནས་ཡིད་ཀྱིས་བརྗོད་དགོས་གསུངས་རྒྱུའི་ཞལ་རྒྱུན་ཡོད། ཨ་ནི་ཆོས་དབྱིངས་སྐྱེ་འགག་དང་བྲལ་བ་ཆོས་སྐུ་འགྱུར་བ་མེད་པའི་དོན་ཏེ་དེ་ལས་ཕྱིར་འདའ་བ་མེད་པའི་དོན་མཚོན་བྱེད་ཡིན། ཀྱེ་མ་བདག་གཞན་༼སོགས་ཕཊཿལྔ་ཕྲུགས་གསུངས། ༽ཐུན་བསྡུ་བ་དངོས་ལ། སྤྱི་བོའི་འོད་དཔག་དེ་ཉིད་ཚེ་དཔག་མེད་དུ་གནས་གྱུར་ནས་རང་ལ་ཐིམ་ཏེ་རང་ཉིད་ཀྱང་ཚེ་དཔག་མེད་དུ་གྱུར་ནས་ཚེ་བསྙེན་འདོན་ན་ཚེའི་གེགས་བར་ཆད་ཐམས་ཅད་ཞི་བ་ཡིན། སྤྱི་བོའི་ཚེ་དཔག་མེད་པའི་སྐུ། །འོད་དུ་ཞུ་ནས་རང་ལ་ཐིམ། །རྐྱེན་དེས་སྐད་ཅིག་དྲན་རྫོགས་སུ། །རང་ཉིད་ཚེ་དཔག་མེད་དུ་གྱུར། ཨོྃ་ཨ་མ་ར་སོགས་༼ཅི་མང་གསུངས་ནས། ༽ཨེ་མ་ཧོ། ངོ་མཚར་སངས་རྒྱས་སྣ་བ་མཐའ་ཡས་དང་། །གཡས་སུ་ཇོ་བོ་ཐུགས་རྗེ་ཆེན་པོ་དང་། །གཡོན་དུ་སེམས་དཔའ་མཐུ་ཆེན་ཐོབ་རྣམས་ལ། །སངས་རྒྱས་བྱང་སེམས་དཔག་མེད་འཁོར་གྱིས་བསྐོར། །བདེ་སྐྱིད་ངོ་མཚར་དཔག་ཏུ་མེད་པ་ཡི། །བདེ་བ་ཅན་ཞེས་བྱ་བའི་ཞིང་ཁམས་དེར། །བདག་གཞན་འདི་ནས་ཚེ་འཕོས་གྱུར་མ་ཐག །སྐྱེ་བ་གཞན་གྱིས་བར་མ་ཆོད་པ་རུ། །ཞིང་དེར་སྐྱེས་ནས་སྣང་མཐའི་ཞལ་མཐོང་ཤོག །དེ་སྐད་བདག་གིས་སྨོན་ལམ་བཏབ་པ་ལ། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱིས། །གེགས་མེད་འགྲུབ་པར་བྱིན་གྱིས་བརླབ་ཏུ་གསོལ། །ཏདྱ་ཐཱ། པཉྩནྡྲི་ཡ་ཨ་ཝ་བོ་དྷ་ནི་སྭཱ་ཧཱ། མི་གཙང་ལུས་འདི་བོར་བ་གྱུར་མ་ཐག །བདེ་བ་ཅན་དུ་རྫུས་ཏེ་སྐྱེ་བར་ཤོག །སྐྱེ་མ་ཐག་ཏུ་ས་བཅུ་རབ་བགྲོད་ནས། །སྤྲུལ་བས་ཕྱོགས་བཅུར་གཞན་དོན་བྱེད་པར་ཤོག །ད་དེས་ལག་ཁྲིད་ཀྱི་ཐོག་ནས་འཕོ་བ་ཐམས་ཅད་སྦྱངས་པ་ཡིན། འཕོ་བ་སྦྱོང་བའི་དུས་སུ་དུས་མིན་ལས་ལ་སྦྱར་ན་ལྷ་བསད་པའི་ཉེས་པ་འབྱུང་བ་ཡིན། འོན་ཀྱང་འཕོ་ཐུབ་ཀྱང་དཀའ། འཆི་ལྟས་ཚང་ཞིང་བཟློག་ཐབས་མེད་ན་ལམ་སྦྱོང་བ་དམན་ན་འཕོ་བས་བསུ་གསུངས་པ་ལྟར་འཕོ་བའི་གདམས་པ་ཟབ་མོ་འདི་ལས་ལ་སྦྱར་རན་པའི་དུས་སྐབས་རེད། དེའི་སྐབས་སུ་ཆུ་ནང་གི་ཀོ་གྲུ་ལྟར་ཤུགས་ཆུང་ངུས་ཀྱང་བསྒུལ་ཐུབ་པ་དང་། ཁྱད་པར་རྒས་པའི་དུས་སུ་སྟོན་ཀའི་ཤིང་ཏོག་ས་ལ་ལྷུང་སླ་བ་བཞིན་རྣམ་ཤེས་འཕོ་སླ་བ་ཡིན། འཕོ་ལུང་དམིགས་རིམ་གྱི་སྟོབས་ཀྱིས་འཕོ་ཐུབ་པ་ཡང་གཙོ་ཆེ་བ་བླ་མའི་བྱིན་རླབས་དང་། གདམས་པའི་ཟབ་ཁྱད་དང་། རང་གི་མོས་གུས་གསུམ་པོ་ཚོགས་ན་འབྲས་བུ་ལག་ཏུ་ཐོབ་ངེས་པར་ཐེ་ཚོམ་མི་དགོས། དོན་དངོས་བྱེད་ན་འཕོ་བའི་ཁྲིད་སྦྱོང་འདི་ཉིན་བདུན་བྱེད་དགོས་པ་དང་། ཁྲིད་རྐང་གཞན་རྣམས་ཉིན་ཉི་ཤུ་རྩ་གསུམ་བྱས་ན་ཀུན་བཟང་ཞལ་ལུང་ཟླ་ཁྲིད་གཅིག་བྱས་ན་རྒྱས་བསྡུས་འཚམས་པ་ཡིན། དེ་ལྟར་ནའང་ད་རེས་ལས་དང་པོའི་སྒོམ་པ་གསར་བུ་རྣམས་སྣ་སུན་ཨེ་འགྲོ་བསམ་ནས་ཉམས་སད་ཚོད་ལེན་ཙམ་བྱེད་པ་ཡིན། འོན་ཀྱང་གཞིས་བྱེས་ཀྱི་ཆོས་ཞུ་མི་སྣའི་ནང་ནས། བྱེས་ནས་ཕེབས་པའི་ཆོས་པ་ཡག་ཐག་ཆོད་པ་ཚོ་ཅི་བྱེད་རུང་བཟང་ནི་རེད། རྫོགས་ཆེན་ཚང་གི་གཞི་གྲྭ་རྣམ་པ་ཚོ་ཡང་ཤིན་ཏུ་ལེགས་ཐལ། ཆོས་ཞུ་བའི་སྤྱོད་ལམ་བཟང་བྱུང་། རྗེས་སུའང་ཉིན་རེ་བཞིན་དགོང་མོར་ཆག་མེད་ཚར་རེ་ཙམ་སྦྱོང་བ་དང་། ཀུན་བཟང་ཞལ་ལུང་ཐོབ་ཚར་ནས་རྒྱུན་དུ་ཚར་མང་པོར་གཟིགས་ཐུབ་ན་ཡང་དཔེ་མེད་བཟང་པས་དེ་ལུགས་མཛོད། མི་སྐྱ་ཕོ་མོ་རྣམས་ཀྱིས་ཀྱང་དམིགས་རིམ་གྱི་འདོན་པ་ཉུང་ཉུང་འདི་དག་བློ་ལ་སྦྱངས་ནས་ཤེས་པར་གྱིས་དང་འཆི་ཁར་འཕོ་འདེབས་ཀྱི་བླ་མ་མ་འཛོམས་ན་ཡང་རང་གི་དམིས་པས་འཕེན་ཆོག་ནི་རེད། བླ་མ་ཚད་ལྡན་འཛོམས་ན་དེས་ཐུགས་བསྐྱེད་དང་རང་གི་དམིགས་པ་གཉིས་ཀ་བསྡོངས་ན་གནས་བདེ་ཆེན་དག་པའི་ཞིང་ཁམས་སུ་འཕོ་ཐུབ་པ་ལ་ཕན་ཐོགས་ཚད་མེད་ཡོད། རྒྱུན་དུ་ཀུན་ཀྱིས་ནངས་སྔ་མོར་དམིགས་པ་དང་ལྡན་པས་དལ་མོར་སྔོན་འགྲོའི་ངག་འདོན་ཚར་རེ་དང་། ཟངས་མདོག་དཔལ་རིའི་སྨོན་ལམ་རེ་ཙམ་འདོན་པ་དང་། དགོང་མོ་འཕོ་ལུང་མ་ཆགས་པ་དང་དེའི་རྗེས་སུ་བདེ་སྨོན་རྒྱས་བསྡུས་གང་ཤེས་རེ་འདོན། འབུམ་ལྔ་བསགས་ཟིན་རྗེས་བླ་མའི་རྣལ་འབྱོར་ལ་བརྟེན་ཏེ་རབ་ན་སིདྡྷི་དུང་དང་། འབྲིང་ན་གཞུང་གི་འགྲོས་ལྟར་སིདྡྷི་འབུམ་ཕྲག་བརྒྱ་དང་། མ་ཐ་ཡང་ཉིན་རེ་བཞིན་གང་ཐུབ་ཐུབ་དམ་བཅའ་དང་ལྡན་པས་སོག་དང་ཆོས་འདི་ལ་ཞུགས་ནས་ཆོས་ཁྲིད་ཞུས་པའི་དོན་པོ་རེད། མི་སྐྱ་ཡི་གེ་ཤེས་པ་རྣམས་ཀྱིས་ཀྱང་ཚར་ཅི་མང་འགོ་ནས་མར་ལྟོས་དང་གོ་བ་རེ་ལོན་རྒྱུ་ཡོད། གཞུང་འདི་སྙན་ངག་མངོན་བརྗོད་སོགས་ཀྱིས་མ་བཅིངས་ནས་ཐ་མལ་བས་གོ་སླ་ལ་ཉན་བདེ་བར་གསུངས་ཡོད་པས་ཡི་གེ་མི་ཤེས་པ་རྣམས་ཀྱིས་ཀྱང་གཞན་ལ་འདོན་བཅུག་ནས་ཉོན་དང་ཕན་ཐོགས་ཆེན་པོ་ཡོང་སྲིད། མི་སྐྱ་ཕོ་མོ་ཚོས་ཀྱང་གོ་དགོས་རྒྱུ། ཀུན་བཟང་ཞལ་ལུང་སོགས་ཆོས་ཁྲིད་གང་ཞུ་དུས་འགོ་ནས་མཇུག་གི་བར་མི་ཆག་པར་ཆ་ཚང་ཉན་དགོས། ཁྱད་པར་ད་ལོའི་སྨིན་ཁྲིད་འདི་ལྟ་བུར་ཐུན་བཞི་ཆག་མེད་བྱས་ནས་བསྡམ་དགོས་མ་གཏོགས་ཆོས་ཀྱིས་རང་རྒྱུད་ལ་ཕན་མི་ཐོགས། རང་གཅིག་པུས་ཁྱིམ་སྟོང་ཞིག་ཏུ་ཁྲིད་སྦྱོང་བྱེད་མདོག་བྱས་པ་དང་མི་འདྲ་སྟེ། ད་རེས་དགེ་འདུན་འདུས་པ་རྒྱ་མཚོ་དང་མཉམ་དུ་ཁྲིད་སྦྱོང་བྱེད་སར་ལོན་དུས། བྱིན་རླབས་དང་ཐུགས་རྗེ་ལྷག་མར་མྱུར་ནི་རེད། དབང་ཞུ་དང་འཆམ་མཇལ་སོགས་ལ་ཉིན་སྐོར་མ་བྱས་ན་ཆོག་གི་མ་གཏོགས་ཆོས་ཁྲིད་ཞུ་དུས་འགོ་མཇུག་ཆ་ཚང་དགོས། དབང་ཞུ་ནའང་དབང་རྫས་དང་བུམ་ཆུ་ལོན་པ་ཙམ་གྱིས་དབང་ཐོབ་པའི་ངེས་པ་མེད་པས་དབང་ཞུ་ལུགས་ཤེས་དགོས། དེ་ཡང་དབང་གང་གསུངས་ཤེས་དགོས་པ་དང་། དབང་ཚིག་གོ་བརྡ་འཕྲོད་ནས་རྣ་བས་ཉན་ཅིང་རྗེས་ཟློས་དགོས་སར་རྗེས་ཟློས་བྱེད་ཅིང་དབང་དོན་རྣམས་བླ་མས་གསུངས་པ་ལྟར་ཡིད་ལ་བསྒོམ་དགོས། དབང་བསྐུར་མཁན་གྱི་བླ་མ་ཡང་མི་རུ་མི་བཟུང་བར་དབང་བསྐུར་བའི་དཀྱིལ་འཁོར་གྱི་ལྷ་གང་ཡིན་དང་དབྱེར་མེད་དུ་བསྒོམ་ན་བྱིན་རླབས་ཆེ་བས་དབང་ཡང་ཐོབ། དབང་རྫས་མགོ་ལ་བཞག་དགོས་རིགས་ལ་མགོ་སྒུར། ཁ་ལ་འཐུང་རྒྱུ་ཡིན་ན་ལག་པ་ཟེད། ལག་གཡས་གཡོན་ལ་ཁྱད་པར་ཡོད་ན་དབང་ཚིག་ཉན་ནས་འཛེད། ཡང་དབང་རྫས་འགའ་ཞིག་སྒོ་ལུས་ངག་ཡིད་གསུམ་ལ་བསྐུར་དགོས་པ་རྣམས་ལ་ལག་པ་གཉིས་པོ་བཟེད་ནས་རང་ཉིད་ཀྱི་སྙིང་ཁ་ལ་ལག་གཉིས་ཀྱིས་བསྟིམ་ཚུལ་བྱ་དགོས། དབང་གི་རྗེས་ཆོག་བཀྲ་ཤིས་ཡོན་འབུལ་ལ་སོགས་པ་གྲུབ་རྗེས་སོ་སོར་འགྲོ་ཆོགདབང་ཐོབ་པ་ལ་ཡང་འགོ་མཇུག་མེད་པར་ཆ་ཚང་ཞུ་དགོས། ཆོས་ཞུ་བ་ལ་འགོ་མཇུག་མེད་པར་ཆ་ཚང་ཞུ་དགོས་ཀྱི་སྐེད་ཆད་མཇུག་རྡུམ་རེད་ཤོར་ན་མི་རུང་སྟེ་ཆོས་ཞུ་རྒྱུའི་རྟེན་འབྲེལ་འཕྱུགས་པ་དང་རང་ཉིད་ཀྱིས་མི་གོ་ཞིང་ཆ་ཚང་ཞིག་ཐོབ་ཀྱང་མེད། དེས་ན་ཆོས་ས་ཆོས་ཡུལ་ལ་སྐྱེས་པའི་རྟགས་མཚན་དབང་ཞིག་ཡིན་ཡང་ཞུ་ལུགས་ཤེས་ན་ཡག་པོ་ཡིན། དེ་རྣམས་ཞོར་དུ་བཤད་པ་ཡིན། དེ་རིང་གི་ཁྲིད་སྦྱོང་འདིར་མི་སྐྱ་ཕོ་མོ་རྣམས་ཀྱང་དགེ་འདུན་པའི་གྲལ་དུ་འདུག་བཅུག་ན། ཁོ་རང་ཚོ་ལ་ཡང་འཕོ་བའི་བྱིན་རླབས་འཇུག་པ་སོགས་ཀྱི་དགོས་པ་ཡོད། རང་མགོ་རང་གིས་འདོན་པའི་ཉམས་ལེན་གྱི་ས་ཟིན་མེད་པས་རང་མགོ་མི་ཐོན་པའི་སྟེང་དུ་གཞན་ཤི་བོའི་རོ་མགོར་སོང་ནས་དམིགས་རིམ་མེད་པའི་ཧིཀ་དང་ཕཊ་ཀྱིས་ཅ་ཅོ་སྣ་ཚོགས་སྒྲོགས་ཏེ། དམ་ཆོས་རང་རྒྱུད་ལ་སྦྱར་ཏེ་ཉམས་སུ་མི་ལེན་པར་ཁ་ཡིས་བཤད་རྒྱངས་རིང་པོ་དང་ཆེན་པོར་གདུགས་ལྟར་ཕུབ་པ། ཁོང་གིས་ཁེངས་སྐྱུང་མཛད་ནས་བདག་དང་གདུལ་བྱ་བླུན་པོའི་རིགས་ཅན་བདག་འདྲ་ཟོག་པོའི་རིགས་ཅན་རྣམས། །སྒྲུབ་ལ་སྙིང་རུས་ནུས་པར་བྱིན་གྱིས་རློབས། །འཕོ་བ་མ་བསྒོམས་སངས་རྒྱས་ཀྱི་ཁྲིད་དོ།། །།ཞེས་གསུངས་ཤིང་བསྔོ་བས་མཐའ་བརྒྱན་ཏེ་ཆོས་
ཁྲིད་གྲོལ་སོང་ངོ་།།