སེམས་སྦྱོང་བདུན་གྱི་དོན་ཁྲིད་རྣམ་འགྲེལ་མཚོ་སྐྱེས་བླ་མ་དགྱེས་པའི་ཞལ་ལུང་།

སེམས་སྦྱོང་བདུན་གྱི་དོན་ཁྲིད་རྣམ་འགྲེལ་མཚོ་སྐྱེས་བླ་མ་དགྱེས་པའི་ཞལ་ལུང་ཞེས་བྱ་བ་བཞུགས་སོ།།

འགོ་བརྗོད།

སྤྲོས་པའི་མཚན་མ་ཡང་ཡེ་མི་མངའ་རྣམ་པ་ཀུན་གྱི་མཆོག་ལྡན་སྟོང་པའི་དབྱིངས།།

འོད་གསལ་ལྷུན་གྲུབ་སྐུ་དང་ཡེ་ཤེས་ཡོན་ཏན་རྒྱ་མཚོའི་སྣང་བའི་དཀྱིལ་འཁོར་ཟླུམ།།

མ་འགགས་ཐུགས་རྗེའི་རོལ་པ་ཕན་བདེའི་འོད་སྟོང་གང་འདུལ་འགྲོ་བའི་དཔལ་དུ་ཆས།།

སྐུ་གསུམ་སྟོན་པའི་བདག་ཉིད་རིགས་ཀུན་འདུས་ཞལ་དཔལ་ལྡན་བླ་མ་རྒྱལ་གྱུར་ཅིག།

རྨད་བྱུང་ཐུགས་བསྐྱེད་ལྔ་བརྒྱའི་སྨོན་ཤུགས་ཀྱིས།།

བཅུ་གཉིས་མཛད་པའི་འདོད་དགུ་ཡིད་བཞིན་སྤྲིན།།

རྩོད་ལྡན་འགྲོ་བའི་དཔལ་དུ་ཉེར་འཚོ་བ།།

སྟོན་མཆོག་ལྷ་མིའི་བླ་མར་གུས་ཕྱག་འཚལ།།

སྲིད་རྩའི་ཀུན་རྟོག་འཇོམས་པའི་གཉེན་གཅིག་པུ།།

ཐེག་གསུམ་ཞི་བསིལ་དམ་པའི་བདུད་རྩི་དང་།།

ལུང་རྟོགས་ནོར་བུའི་རྒྱན་གྱིས་ལེགས་སྤུད་པའི།།

བསྟན་པའི་རྩ་ལག་ཚོགས་ཀྱི་དམ་པར་འདུད།།

སྐུ་ཡི་བཀོད་པ་རབ་འབྱམས་ཞིང་གི་རྒྱན།།

གསུང་གི་སྣང་བ་ཐར་པའི་ལམ་སྒྲོན་ཏེ།།

ཐུགས་ཀྱི་མཁྱེན་པ་ཤེས་བྱའི་རྗེས་འགྲོ་བ།།

སངས་རྒྱས་གཉིས་པ་པདྨ་ཀཱ་རས་སྐྱོངས།།

གཞི་དབྱིངས་མི་འགྱུར་དག་པ་གཉིས་ལྡན་བྱ་རྩོལ་མེད་པའི་ཀློང་ཆེན་པོར།།

རྣམ་བྱང་ཟག་མེད་ཡེ་ཤེས་ལྔ་རྫོགས་འཛམ་བུའི་གསེར་གྱི་སྙིང་པོ་ཅན།།

མདོ་སྔགས་རབ་འབྱམས་ཟབ་ཅིང་རྒྱ་ཆེའི་མ་དྲོས་མཚོ་ཡི་རླབས་ཕྲེང་འཕྱོ།།

ཐེག་དགུའི་ལེགས་བཤད་ཁ་འབབ་རྣམ་བཞིའི་རྒྱུན་མཆོག་སྩོལ་མཁས་ངག་གི་དབང་།།

རྟོགས་གྲོལ་དུས་མཉམ་དགོངས་པའི་རྩལ་རྫོགས་དགའ་རབ་དཔའ་བོའི་རྣམ་ཐར་སྙེག།

རིག་པའི་ཀློང་ནས་ཆོས་གཏེར་རབ་བརྡོལ་ཤིང་རྟ་ཆེན་པོའི་གཞུང་ལ་འགྲན།།

ཟབ་དོན་སྙིང་ཐིག་གདམས་པས་རྣམ་གྲོལ་འབྲས་བུའི་དུས་སྟོན་སླར་ཡང་བསུས།།

མཁྱེན་རབ་ཐུགས་བརྩེའི་འོད་ཟེར་སྟོང་ལྡན་ནམ་མཁའི་རྣལ་འབྱོར་སྙིང་ནས་དྲན།།

ཕུན་ཚོགས་རིན་ཆེན་བདུན་གྱི་འབྱོར་པ་ཆེ།།

བསོད་ནམས་སྟོབས་ཀྱི་འཁོར་བསྒྱུར་ལོངས་སྤྱོད་དེ།།

སྙིང་ཐིག་གསང་བའི་མན་ངག་སེམས་སྦྱོང་བདུན།།

ཐར་འདོད་སྐལ་བཟང་སྙིང་གི་ནོར་བུ་ཉིད།།

རྒྱལ་དབང་པདྨའི་ཞལ་སྐྱིན་མཚུངས་མེད་རྗེས།།

ལུང་རིགས་མན་ངག་བཅུད་ཀྱི་ལྗགས་ཆབ་བཅས།།

ལས་ཅན་དག་པའི་འཁོར་ལ་ལེགས་བསྩལ་བའི།།

ཞལ་ལུང་ཉམས་མེད་འགྲོ་ལ་ཕན་ཕྱིར་དགོད།།

དེ་ཡང་གསང་ཆེན་སྔ་འགྱུར་བའི་བཤད་སྒྲུབ་ཀྱི་ཆོས་སྡེ་ཆེན་པོ་རུ་དམ་རྫོགས་ཆེན་ཨོ་རྒྱན་བསམ་གཏན་ཆོས་གླིང་གི་ཡང་དབེན་པདྨ་ཐང་ལུང་རྟོགས་པདྨའི་དགའ་ཚལ་དུ། མེ་མོ་གླང་གི་ལོའི་ཆུ་སྟོད་ཟླ་བའི་ཆོས་འཁོར་དུས་བཟང་ནས་དབུ་བརྩམས་ཏེ། ལས་ཅན་དག་པའི་འཁོར་ཚོགས་རྒྱ་མཚོ་ལ། རྒྱལ་དབང་པདྨའི་ཞལ་སྐྱིན། མཁས་བཙུན་གྲུབ་པའི་དབང་ཕྱུག ཡང་དར་བསྟན་པའི་ཤིང་རྟ། དོན་གྱི་སླད་དུ་མཚན་ནས་སྨོས་ན་༧ཁྱབ་བདག་འཁོར་ལོའི་མགོན་པོ་སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་གིས། བརྗོད་པ་རབ་སྤངས་བློ་འདས་ཀ་དག་ཆེན་པོའི་དགོངས་ཀློང་ལས་མ་གཡོས་བཞིན་དུ། ལྷུན་གྲུབ་སྒྱུ་འཕྲུལ་རྡོ་རྗེའི་རོལ་མོ་འབྱམས་སུ་ཀླས་པའི་རང་བཞིན་ཉིད། འགག་མེད་ཐུགས་རྗེའི་རོལ་རྩལ་ཅིར་ཡང་བསྒྱུར་བའི་ངོ་མཚར་ལས། ཟབ་ཅིང་རྒྱ་ཆེའི་བདེན་དོན་རབ་གསལ་ཐབས་ཆེན་གསང་བའི་མྱུར་ལམ་ནས་ཟུང་འཇུག་གི་འབྲས་བུ་ཕངས་མེད་བསྩལ་བའི་ལེགས་བཤད་ཚངས་པའི་དབྱངས་ཀྱིས་འདི་ལྟར་གསུངས་སྟེ།

ཉིན་དང་པོའི་ཆོས་ཁྲིད།

ཐེག་པ་ཆེན་པོའི་ཆོས་མདོ་སྔགས་གང་ཞིག་འཆད་ཉན་བྱེད་པའི་སྐབས་ཡིན་ཡང་མེད་དུ་མི་རུང་བ་ནི། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་པའི་ཆེད་དུ། དམ་པའི་ཆོས་ཟབ་མོ་ཉན་ནས། དེའི་ནང་དོན་ཇི་ལྟ་བ་བཞིན་དུ་ལག་ལེན་ལ་ཐེབས་པར་བྱས་ནས་འགོད་དགོས་སྙམ་པའི་བསམ་པ་རྒྱ་ཆེ་བ་བྱང་ཆུབ་ཀྱི་སེམས་བསྐྱེད་པ་སྔོན་དུ་འགྲོ་བའི་སྒོ་ནས། ཐབས་རྒྱ་ཆེ་བ་གསང་བ་སྔགས་ཀྱི་ཁྱད་ཆོས་ཐུན་མིན་གྱི་ལྟ་སྤྱོད་ཟབ་མོའི་ཉམས་ལེན་གྱི་གནད་དང་མི་འབྲལ་བར་ཉན་རྒྱུ་འདི་ཅིས་ཀྱང་གལ་ཆེ་བ་རེད། སྤྱིར་འུ་ཅག་བོད་ན་དར་བའི་དམ་ཆོས་འདི་ཐུབ་པའི་མདོ་སྔགས་ཀྱི་ཆོས་ཚུལ་རབ་འབྱམས་སྐྱེས་བུ་གསུམ་གྱི་ལམ་རིམ་ཆ་ཚང་བ་ཡིན་ཞིང་། འགྱུར་སྔ་ཕྱི་ཆོས་བརྒྱུད་གསར་རྙིང་གི་ཆོས་ལམ་ཞུགས་པ་ཚང་མ་ཐེག་ཆེན་མདོ་སྔགས་ཀྱི་ཉམས་ལེན་གནད་དུ་དྲིལ་བ་རྐྱང་རྐྱང་ཡིན་པའི་དབང་དུ་བཏང་ན། ཐམས་ཅད་ཐེག་ཆེན་གྱི་ཆོས་སྒོར་ཞུགས་པ་ཤ་སྟག་ཡིན་པ་དང་། བསྟན་པ་ཐམས་ཅད་འགལ་མེད་དང་། གཞུང་ལུགས་ཐམས་ཅད་གདམས་པར་དྲིལ་བའི་ཉམས་ལེན་ལ་འདུ་བ་ལམ་གནད་དུ་འཛིན་པ་ཁོ་ན་ཡིན་དགོས། འོན་ཀྱང་གདུལ་བྱའི་སེམས་ཅན་གྱི་བློ་སྟོབས་མི་འདྲ་བའི་དབང་གིས་སེམས་ཅན་མོས་པ་སྣ་ཚོགས་ཅན་གྱི་ཁམས་དང་བསམ་པ་ཐ་དད་ཡིན་པས། དང་པོ་ཆོས་སྒོར་ཞུགས་དུས་ནས་ཐེག་ཆེན་གྱི་རིགས་སད་པ་དང་། སེམས་ཅན་ཐམས་ཅད་ཕ་མ་ཡིན་པར་ངེས་ཤེས་འདྲོངས་པ་གཞིར་བྱས། སྙིང་རྗེས་རྒྱུད་གང་བ་ཤ་སྟག་ཡིན་པ་དཀའ་བར་མ་ཟད། རང་དོན་བདེ་བ་ཆུང་ཆུང་ཞིག་གི་དོན་ཡིན་ཡང་གྲི་མདུང་གཉིས་ཀྱི་ཁར་ལྕེབ་དགོས་བྱུང་ན་དེ་ལ་འཚང་ཁ་བྱེད། གྱོང་ཕམ་ཁ་ཞིག་ཁུར་འདུག་བསམ་ན་མཁན་སློབ་ཕ་མ་དང་། གྲོགས་དགའ་མཛའ་ཡིན་ཡང་དེའི་མགོ་ལ་བརྡེག་མཁན། མཐོན་པོ་ལ་ཕྲག་དོག དམའ་མོ་ལ་ང་རྒྱལ། མཉམ་པ་ལ་འགྲན་སེམས། བསྟོད་འདུག་བསམ་དུས་ང་རྒྱལ་གྱིས་དྲེགས་པ་སྐྱེས། སྨད་འདུག་བསམ་དུས་ཁོང་ཁྲོ་ཞེ་སྡང་གིས་ཁོག་པ་གང་། བསམ་པ་ངན་པ། གཡོ་སྒྱུའི་དྲན་འཕྲུལ། སྐྱིད་ན་སྐྱིད་མི་ཐེག་པ་སྲན་མ་རྔ་ཐོག་ཏུ་བཞག་པ་འདྲ་འདྲ། སྡུག་ན་སྡུག་མི་ཐེག་རྔ་མ་སྒྱིད་ཁུག་ཏུ་དྲངས་འགྲོ་བ་སྟེ། སོ་སོའི་སྐྱེ་བོའི་སེམས་ནི་དེ་འདྲའི་ཅོལ་ཆུང་ཡིན། འཁོར་བ་ཐོག་མེད་ནས་ད་ལ་མ་ཐུག་གི་བར་དུ་སེམས་ཅན་སེམས་ཀྱི་གཞན་དབང་ཅན་དུ་སོང་། སེམས་ཀྱང་ཉོན་མོངས་པའི་གཞན་དབང་དུ་སོང་། ཉོན་མོངས་པ་དེས་འཁོར་བའི་རྩ་བ་ལས་མངོན་པར་འདུ་བྱེད་པའི་རྒྱུ་རྐྱེན་དེ་རྣམས་ཚོགས་ནས་འཁོར་བའི་སྡུག་བསྔལ་སྣ་ཚོགས་པ་འདི་མྱོང་བ་ཡིན་པས། ཆོས་འཆད་དུས་བླ་མས་ཚིག་གཅིག་གིས། མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཕ་མ་ཡིན་གསུངས་པ། ཁ་ཡིས་རྗེས་ཟློས་ཙམ་ཤེས་ངེས་མོད། དོན་ལ་དེ་འདྲ་བསམ་པ་དཀའ་བར་སེམས། དེ་ལྟ་ན་ཐུབ་པའི་ཆོས་སྒོ་རབ་འབྱམས་སྐས་ཀྱི་ཐེམ་པ་བཞིན་དུ་གསུངས་ཡོད་པའི་ཐེག་པ་ཆེན་པོའི་ཆོས་སྒོར་ཞུགས་ནས། ཚེ་ལུས་འདིའི་ཐོག་ནས་འཁོར་བའི་སྡུག་བསྔལ་དང་བྲལ་བ་ཞིག་བྱ་དགོས་ན། ཇི་སྐད་དུ། ཡོད་ན་སངས་རྒྱས་སྒྲུབ་ལ་དེས་ཆོག་ཅིང་། །མེད་ན་སངས་རྒྱས་སྒྲུབ་ལ་ཐབས་ཆག་པ། །སངས་རྒྱས་བསྒྲུབ་པའི་ས་བོན་མ་ནོར་བ། །རྣམ་དག་བྱང་ཆུབ་སེམས་མཆོག་བསྐྱེད་པར་ཤོག །ཅེས་གསུངས་པ་བཞིན་བྱང་ཆུབ་ཀྱི་སེམས་རིན་པོ་ཆེ་དགོས་འདོད་ཀུན་འབྱུང་གི་ནོར་བུ་དེ་རྒྱུད་ལ་མི་སྐྱེད་ཐབས་མེད་ཡིན། རྫོགས་པའི་སངས་རྒྱས་ཀྱི་གོ་འཕང་ཐོབ་ནས་རང་གཞན་གཉིས་ཀའི་སྡུག་བསྔལ་སེལ་ཨེ་ཐུབ་བསམ་མཁན་ཞིག་ཡིན་ན་ལམ་དེ་ནས་མ་བརྒྱུད་པར་འགྲོ་ས་མེད། ཐེག་ཆེན་གྱི་ལམ་ལ་ཞུགས་དུས་དཀའ་ན་བྱང་ཆུབ་ཀྱི་སེམས་བསྐྱེད་དགོས། སླ་ནའང་བྱང་ཆུབ་ཀྱི་སེམས་བསྐྱེད་དགོས་པ་ཡིན། ཐེག་དམན་ཉན་རང་གི་ལམ་ལ་འཇུག་བསམ་ན་དེ་ནི་སོ་སོ་རེད། དེའི་ཕྱིར་ན་བློ་སྦྱོང་གི་ཆོས་འདི་དང་པོར་གནད་ཆེ་བས་མ་ཚད། བར་དུ་བློ་སྦྱོང་གི་ཆོས་དེ་དང་མི་འབྲལ་བར་ཉན་པར་བྱེད་ཅིང་། ཐ་མར་ཡང་དེའི་ཐོག་ནས་རང་གཞན་གཏན་བདེའི་ལམ་རྙེད་པའི་བཙན་སར་ཟིན་དགོས་ཏེ། བློ་སྦྱོང་བློ་སྦྱོང་རང་གི་བློ་སྦྱོངས་ཤིག །བློ་ལྡོག་རྣམ་བཞིས་རང་གི་བློ་སྦྱོང་ན། །ལུས་ངག་དགེ་བ་སྣ་གཅིག་མེད་ན་ཡང་། །ཐར་པའི་ལམ་ལས་འགྲོ་ས་གཞན་དུ་མེད། །ཅེས་གསུངས་པ་ཡིན་ན། ཐར་པ་ཞེས་པ་འཁོར་བའི་སྡུག་བསྔལ་ལས་ཐར་པ་ལ་གསུངས། སྡུག་བསྔལ་ལས་ཐར་ན་བདེ་བ་ཐོབ་པ་ཡིན། དེའི་ནང་ནས་བདེ་བའི་མཆོག་ཐེག་ཆེན་གྱི་ཐར་པའི་ལམ་སྣེ་ཟིན་ནས་རྫོགས་པའི་སངས་རྒྱས་ཀྱི་གོ་འཕང་དེ་རིམ་གྱིས་ཐོབ་དགོས་པ་ཡིན་དུས། བྱང་ཆུབ་ཀྱི་སེམས་དེ་ཉིད་ཀྱིས་ཐེག་ཆེན་ཐར་པའི་ལམ་སྣེ་ཟིན་ནས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱེད། དེས་ན་རང་གཞན་བར་གསུམ་ཚང་མས་ཉིན་མི་ཁོམ་མཚན་མི་དལ་བར་རྒྱུག་རྒྱུག་འདུར་འདུར། ལས་ལས་བཅས་བཅས་ཀྱི་དམིགས་ཡུལ་བདེ་བ་ཞིག་ཨེ་ཐོབ་བསམ་པར་མ་གཏོགས་སྡུག་བསྔལ་ལས་མི་ཐར་བའི་ཆེད་དུ་ཅི་ལ་ཡིན། བདེ་བ་དེ་ཡང་ཆོས་ཀྱི་ལམ་ནས་ཐོབ་དགོས་པའི་ཚུལ་ལ་འདང་རྒྱག་ན་མིའི་བདེ་སྡུག་གི་ཡོང་སའི་གཞི་རྟེན་དེ་ལུས་སེམས་གཉིས་མ་གཏོགས་མེད་ལ། དེ་ལས་ཀྱང་གཙོ་བོ་སེམས་ཡིན། སེམས་ཀྱི་བདེ་སྐྱིད་དེ་དམ་པའི་ཆོས་ལས་མ་གཏོགས་རྙེད་ཐབས་མེད་ཅིང་། སེམས་ཀྱི་བདེ་བ་ཆོས་ཀྱི་ཐོག་ནས་རྙེད་དེ་བདེ་སྐྱིད་ཀྱི་ཉི་མ་ནང་ནས་ཤར་དུས། ཚེ་འདིར་བདེ་ཕྱི་མར་སྐྱིད། ཚེ་འདིར་་སྐྱིད་ངེས་ཏེ་ཉོན་མོངས་དུག་ལྔའི་སྟོབས་ཀྱིས་བསྐྱེད་པའི་མི་འདོད་པའི་སྡུག་བསྔལ་ན་ཚ་ཐམས་ཅད་རང་ཞིར་འགྲོ། ཕྱི་མར་སྐྱིད་ངེས་ཏེ་དག་པའི་ཞིང་ཁམས་གང་དགའ་རེར་ཉུལ་ནས། གཞན་ཕན་སྙིང་རྗེའི་སེམས་ཀྱིས་འཁོར་བའི་སེམས་ཅན་གྱི་སྡུག་བསྔལ་སེལ་བའི་ཕྱིར་དུ། དམྱལ་བའི་མེ་དཔུང་དུ་འགྲོ་དགོས་ནའང་དེ་དུས་དགའ་ཞིང་སྤྲོ་བཞིན་དང་དུ་བླངས་ཏེ། དཔེར་ན་ངང་པ་པདྨའི་མཚོར་ཞུགས་པ་དང་འདྲ་བ་ཡིན་པས་སོ། །དེས་ན་དམ་པའི་ཆོས་སྒྲུབ། ཆོས་དང་སེམས་རྒྱུད་འདྲེས། སྒྲུབ་འབྲས་མངོན་དུ་གྱུར་པའི་མི་དེ་ཚེ་འདིར་གནམ་ས་ཁ་རྡེབ་ཀྱང་ཡ་ང་བག་ཚ་དང་རེ་དོགས་མེད་ཅིང་། ཕྱི་མར་གཤིན་རྗེ་ཆོས་རྒྱལ་ལ་སྐྲག་མི་དགོས་པར་དམྱལ་བ་དག་པའི་ཞིང་ཁམས་དང་དམྱལ་སྲུང་ཡི་དམ་གྱི་ལྷ་ཚོགས་སུ་འཆར་བ་རེད། དེས་ན་བདེ་སྐྱིད་འདོད་མཁན་ཞིག་ཡིན་ཕྱིན། ཕྱི་དངོས་པོའི་འབྱོར་པས་བདེ་སྐྱིད་ཡང་དག་པར་སྒྲུབ་མི་ཐུབ། དེ་སྒྲུབ་མ་ནུས་ནས་གནའ་རྒྱལ་པོ་ང་ལས་ནུ་ཟེར་བ་དེ་འཛམ་བུ་གླིང་གིས་མི་ཚད་པར་གླིང་བཞིའི་རྒྱལ་པོར་བྱས་ཀྱང་། དེས་མ་འཚེངས་པར་ལྷ་ཡུལ་དུ་སོང་སྟེ་སུམ་ཅུ་རྩ་གསུམ་གྱི་ལྷའི་དབང་པོ་བརྒྱ་བྱིན་སུམ་ཅུ་སོ་བདུན་གྱི་རིང་ལ་དབང་བསྒྱུར། དེ་དང་གདན་གཅིག་ཏུ་བྱས་ནས་འདོད་པའི་ཡོན་ཏན་ལོངས་སུ་སྤྱོད་ཀྱང་། དེས་ཀྱང་མ་འཚེངས་པར་བློ་ངན་གཅིག་དྲན་པས་འཇིག་རྟེན་མི་ཡུལ་དུ་ལྷུང་ནས་ཤི་ལུགས་སྡུག་པོར་གྱུར་ཏེ་ཤི་སོང་བའི་ལོ་རྒྱུས་ལྟ་བུ་རེད། དེས་ན་བདེ་སྐྱིད་ངོ་མ་ཆོས་ཀྱི་ནང་ནས་རྙེད་རྒྱུ་ཡོད། འུ་ཅག་གིས་དུས་རྒྱུན་གཏམ་དཔེ་བཀོད་དུས། རྒྱགས་པས་ཆོས་དྲན། །ལྟོགས་པས་རྐུ་དྲན། །ཟེར་བ་དེ་ལ་གོ་བ་ཞིབ་ཏུ་བླངས་ནས་ཞིབ་འཇུག་བྱ་རྒྱུ་ཡོད་དེ། མི་ལྟོགས་པ་ལ་འདང་རྒྱག་ཡོད་པ་མ་རེད། དཔེར་ན། མི་ལྟོགས་པའི་ཁ་ལ་མེ་འབར་ན། །མཐོ་རྒྱལ་པོའི་མཁར་ལ་སྐས་འཛུགས། །ཟེར་བ་རེད། རྒྱལ་པོའི་མཁར་ལ་སྐས་བཙུགས་ན་སྐྱིད་པོ་ཞིག་ཡོང་རྒྱུ་མེད་ཀྱང་། གྲི་ཤི་མུག་ཤི་འདྲ་འདུག་བསམ་ནས་ཕྱི་འདང་རིང་པོར་མ་བྱས་པ་རེད། རྒྱགས་པས་ཆོས་དྲན་ཟེར་བ་དེ། མི་རྒྱགས་པས་ཅི་བྱེད་མེད་པར་ཆོས་དྲན་ཟེར་བའི་གོ་བས་མི་ཚད་པར། དེ་ལ་གོ་བ་ཟབ་མོ་ཞིག་ཡོད་དེ། རྒྱུ་ནོར་ལོངས་སྤྱོད། དཔལ་འབྱོར་མངའ་ཐང་ཅི་ཙམ་འབྱོར་ཞིང་རྒྱས་ནའང་། སྡུག་བསྔལ་ཇེ་ཆེ་མ་གཏོགས་བདེ་བ་མ་རྙེད་ན། བདེ་བ་བཙལ་ས་ཆོས་མ་གཏོགས་མེད་པས་ཆོས་བཙལ་བ་རེད་ཅེས་པའི་གོ་བ་རང་ཤུགས་ལ་འབྱུང་བ་ཡིན། ཁྱད་པར་དུ་ཁ་སང་དེ་རིང་སྤྱི་ཚོགས་ཡར་རྒྱས་ཀྱི་སྐབས་སུ་སྔོན་ཐོན་གྱི་ས་ཆའི་མི་ཐམས་ཅད་ཀྱིས་ནང་ཆོས་ལ་དོན་གཉེར་བྱེད་ཀྱིན་ཡོད་ན། བྱ་བ་དངོས་པོའི་ཐོག་ནས་ཤེས་རྒྱུ་ཡོད་པ་ཞིག་རེད། དེས་ན་ཆོས་ཟེར་རྒྱུ་འདི་ནང་གི་བདེ་བ་འཐོབ་བྱེད་ཀྱི་གཞི་རྩ་ངོ་མ་དེ་རེད། དེ་ཡིན་ན་ད་རང་གི་བདེ་བའི་རྒྱུ་ཆོས་དེ་ཅི་འདྲར་བྱས་ནས་སྦྱོང་དགོས་པ་རེད་ཟེར་ན། དམ་པའི་ཆོས་ཟེར་བ་དེ་སྒྲུབ་པའི་དུས་སུ་བློ་སྦྱོང་ནས་འགོ་བཟུང་སྟེ་ཆོས་ཀྱི་འགོ་འཛུགས་དགོས། བློ་སྦྱོང་ཡག་པོ་ཞིག་འགྲུབ་ཡོད་དུས་གཞན་ཅི་ཡང་མེད་ཀྱང་ཆོག་ལ། བློ་སྦྱོང་ཡག་པོ་ཞིག་མེད་ན་ཅི་འདྲའི་ཉམས་རྟོགས་ཀྱི་ཡོན་ཏན་ཡོད་ཟེར་ནས། གྲུབ་པའི་རྟགས་ནམ་མཁར་འཕུར་ནུས་ཀྱང་ཁོ་རང་ལོག་པའི་རིགས་སྔགས་འདྲ་གྲུབ་པ་ཡིན་ན་མ་གཏོགས་ཐར་པའི་ལམ་དང་འབྲེལ་བ་མ་རེད། དེ་ཅི་རེད་ཟེར་ན་བློ་སྦྱོང་གི་སྙིང་པོ་ངེས་འབྱུང་དང་སྙིང་རྗེ་ཡིན་པས་ངེས་འབྱུང་དང་སྙིང་རྗེ་མེད་ན་དམ་པ་མིན་པས་ཁྱབ། ངེས་འབྱུང་དང་སྙིང་རྗེ་མེད་ཚད་དང་དམ་པ་མིན་པ་གཉིས་ཡིན་ཁྱབ་མཉམ་ཡིན་ཟེར་རྒྱུ་དེ་འདྲ་རེད། དེས་ན་རང་རེ་ཆོས་རའི་ནང་དུ་འཛུལ་རྒྱུའི་དོན་ཆོས་ལག་ལེན་བྱས་ནས་ཉན་དགོས་པ་དང་། ཉན་ན་ཕན་ཐོགས་སུ་ལ་ཡོད་ཟེར་བའི་འགྲོ་ཕྱོགས་འདྲ་བ་ཧ་ལམ་ཤེས་སོང་བ་རེད། གཏམ་ཚིག་གཅིག་མ་གཏོགས་མ་བཤད། ལམ་ལས་གོམ་གསུམ་མ་གཏོགས་མ་སྤོས་རུང་ཁོ་རང་གི་ཚོད་ཀྱི་དམིགས་ཡུལ་མེད་པ་ཞིག་ནི་སེམས་ཐོག་ན་མེད་པའི་སྨྱོན་པ་དང་། མགོ་ནད་ཅན་འདྲ་ཡིན་ན་མི་ཤེས་མ་གཏོགས། དུད་འགྲོ་ཟོག་དང་ལ་ཁའི་རི་དྭགས་ཤིག་ཡིན་ཡང་ལ་ཁར་འགྲོ་ན་ལྟོགས་པ་སེལ་བྱེད་ཀྱི་རྩྭ་གང་ཡག་ཅིག་ཟ་རྒྱུ་ཨེ་རྙེད་དང་། ལུང་ཁུང་དུ་འགྲོ་ན་སྐོམ་པ་སེལ་བྱེད་ཀྱི་ཆུ་ཧུབ་གང་བཏུང་རྒྱུ་ཨེ་ལོན་བསམ་པའི་དམིགས་ཡུལ་ཞིག་ལོས་ཡོད། དེས་ན་ང་ཚོ་མི་ཞིག་ཡིན་དུས་དེ་བས་མཆོག་གི་རིན་ཐང་ཡོད་པའི་དམིགས་ཡུལ་ཞིག་འཛིན་དགོས། དེ་དགོས་ན་རང་རེའི་ལྟ་བ་ཡས་འབེབས་ཡིན་ཡང་སྤྱོད་པ་མས་འཛེག་བྱེད་པའི་སྒོ་ནས་ལམ་ལ་རིམ་པ་བཞིན་དུ་བསླབ་དགོས་པ་རེད། དེ་ཅི་འདྲ་རེད་ཟེར་ན། མ་སེམས་ཅན་ཐམས་ཅད་ལ་རང་འདྲ་ཞིག་གཅེས་མ་ཤེས་པ་དང་གཅེས་མ་ཐུབ་པའི་སྔོན་དུ་དང་པོ་ང་རང་ཉིད་གཅེས་ལུགས་ཤེས་པ་སྦྱོང་དགོས། རང་གིས་རང་གཅེས་མི་ཤེས་པ་ཞིག་གིས་གཞན་ཅི་འདྲ་གཅེས་ཤེས་ཐུབ། རང་གིས་རང་ཉིད་གཅེས་ལོས་ཤེས། རང་གིས་རང་ལ་གཅེས་ནས་ཁེ་རྒྱལ་ཁ་ཡོད་ན་གྲི་མདུང་གི་རྩེར་ལྕེབ། གྱོང་ཕམ་ཁ་ཡོད་ན་དྲིན་ཆེན་ཕ་མ་ཡིན་རུང་མགོ་སྐོར་གཏོང་མི་ཟེར་རམ། དེ་གཅེས་པ་མིན་ན་ཅི་ཡིན། གཅེས་ཆེ་བའི་གནད་མེད་ན་ཆུང་བའི་གནད་ཡོད་པ་མ་རེད། རང་འདོད་དེ་གཞན་གྱིས་མ་བསླབས་རང་གིས་མ་སྦྱངས་ཀྱང་ལོབས་ནས་ཡོད་པ་རེད་བསམ་ན། གོང་དུ་བཤད་རྒྱུ་དེ་རང་གིས་རང་གཅེས་མ་ཤེས་པའི་རྒྱུ་མཚན་འགོད་པ་ཡིན། ཅིའི་ཕྱིར་ཞེ་ན། རང་གིས་རང་གཅེས་ན་རང་གནས་སྐབས་ཤིག་ཏུ་བདེ་བར་མ་ཟད་ཡུན་ནས་ཡུན་དུ་བདེ་ཐབས་ཤིག་བྱེད་དགོས་ཀྱང་། ལས་ཅི་བྱས་ཀྱིས་བདེ་བ་ཞིག་ཨེ་ཐོབ། སྐྱིད་པོ་ཞིག་ཨེ་ཡོང་བསམ་པ་ཡིན་ན། བདེ་ཐབས་སྐྱིད་ཐབས་ཀྱི་རྒྱུ་ངོ་མ་ཞིག་སྒྲུབ་ཤེས་དགོས་པ་རེད། འགྲོ་ས་ཤར་བྱས་ནས་ཁ་ནུབ་ཏུ་འཁོར་ན་འགྲིག་མེད་པ་བཞིན་དུ། རང་བདེ་ཐབས་སྐྱིད་ཐབས་བསམ་ནས་དེའི་རྒྱུ་ངོ་མ་བསྒྲུབས་མ་ཤེས་ན་རང་གིས་རང་གཅེས་མ་ཤེས་པ་རེད། རང་ཉིད་ཚེ་རིང་བ་དང་ནད་མེད་ན་བཟང་། དེ་བཟང་ན་དེ་འགྲུབ་པའི་ཐབས་སྲོག་གཅོད་ལ་སོགས་པ་གཞན་གནོད་སྤངས་ཤིང་སྲོག་བླུ་ལ་སོགས་པའི་གཞན་ཕན་སྒྲུབ་དགོས། དེ་སྒྲུབ་ན་ཚེ་འདི་ཕྱི་གཉིས་ཀར་ཚེ་རིང་ནད་མེད་ཡོང་། འོན་ཀྱང་དེ་མ་ཤེས་པས་རང་བདེ་བའི་ཆེད་དུ་གཞན་ལ་འཚེ་བར་བྱེད་ཀྱིན་ཡོད། རྒྱུ་ལོངས་སྤྱོད་དང་འབྱོར་པ་རྒྱས་ན་ལེགས། དེའི་རྒྱུ་སྦྱིན་པ་གཏོང་བ་དང་མཆོད་པ་འབུལ་བ་ལ་སོགས་པ་བསོད་ནམས་གསོག་དགོས་པ་ལས། དེ་མ་ཤེས་པས་ཚེ་འདིར་སྤར་ཁ་བསྡམས་ནས་མཆོད་སྦྱིན་མ་ཟད་རང་གིས་བཟའ་གོན་གཉིས་ཀའང་ལོངས་པོ་ཞིག་སྤྱོད་མི་ཐུབ། དེའི་ཐོག་རྐུ་འཕྲོག་ལ་སོགས་པས་གཞན་ནོར་ཧམ་པས་ལེན། སྙན་གྲགས་རྒྱས་པ་དང་གཞན་གྱིས་བསྟོད་བསྔགས་འདོད་ཀྱང་དེའི་རྒྱུ་ཚུལ་ཁྲིམས་བསྲུང་རྒྱུ་ཕར་ཞོག་སོར་བྱང་སྔགས་ཀྱི་སྡོམ་དམ་ཚིག་གང་ཡིན་ཞེ་ལ་དྲན་པ་ཙམ་ཡང་མི་བྱེད། དེ་ལ་སོགས་པ་རྣམས་ལ་ཡུན་རིང་པོར་འདང་རྒྱག འཁོར་བའི་སྡུག་བསྔལ་ལས་ཐར་པའི་སྤོབས་པ་སོགས་མེད་ཀྱང་སྐྱེས་བུ་ཆུང་ངུའི་ལམ་ཚེ་ཕྱི་མ་ལྷ་མིའི་ལུས་ཙམ་ཐོབ་པའི་ཐབས་ཞིག་སྒྲུབ་ཤེས་དགོས། མི་ཞིག་ཡིན་ན་འདང་རྒྱག་ཅིག་ཡོད་ངེས། རྟག་འཛིན་ལ་ཞེན་ཆེ་བས་འཆི་བ་མི་རྟག་པ་དྲན་མི་ཤེས་པར་ཞག་གཅིག་འདུག་རྒྱུའི་ཚེ་མེད་ནའང་ལོ་བརྒྱར་འདུག་རྒྱུའི་ལས་བྱེད་ཀྱིན་ཡོད་རེད། དེས་ན་རང་རེས་འདང་རེ་བརྒྱབ་ན། རང་གི་བསམ་པ་བཞིན་ལོ་བརྒྱ་ཐམ་པར་འདུག་འཆར་གྱིས། ལོ་སུམ་ཅུ་ཅན་གྱི་མི་ཞིག་ལ་དཔེར་བླངས་ན། ད་སྔ་མི་ལོ་སུམ་ཅུ་སོང་ཤུལ་ན་ལྷག་ཡོད་པའི་ལོ་བདུན་ཅུ་ལ་ཁྱོད་ཀྱིས་ཅི་ཞིག་བྱེད་རྩིས་ཡོད། གང་ཞིག་འགྲུབ་པའི་དམིགས་ཡུལ་ཡོད། ལོ་བཅུ་རེ་ཅན་གྱི་ཚན་པ་བདུན་ཡོད་པ་ལས་བཅུ་ཕྲག་དང་པོ་ལ་ཅི་བྱེད་རྩིས་ཡོད། དེ་བཞིན་དུ་བཅུ་ཕྲག་གཉིས་པ་དང་གསུམ་པ་སོགས་ལ་ཅི་བསྒྲུབ། གང་ཨེ་འགྲུབ་བལྟ་འཆར་ཡིན། ཐ་མར་ཤི་རན་དུས་མཐར་ཐུག་གི་དམིགས་ཡུལ་ཅི་འགྲུབ་དགོས། མིའི་ལུས་འདི་ལྕགས་ལས་གྲུབ་པ་དང་ཁྲོས་བླུག་པ་ཞིག་མ་རེད། འདི་ཁྲག་གི་ཆུ་བུར་ཞིག་རེད། ལོ་བརྒྱ་པོ་མ་ཚང་བར་མི་འཆི་བའི་སྐད་ཆའི་ཐོག་ནས་བཤད་ཀྱིན་ཡོད་ཀྱང་། ད་ལྟའི་ན་ཚོད་ལོ་སུམ་ཅུའི་ཐོག་ནས་མི་འདུག་སྟེ་ད་སྔོན་ཡང་བསྡད་མ་སོང་། །དང་པོ་བྱིས་པའི་དུས་སུ་མི་གཙང་བ་རང་གིས་འདོར་མི་ཐུབ་པ་ཞིག་ཡིན་པ་དང་། དེ་ནས་ལོ་མང་པོ་ཞིག་ལ་རང་ཁ་རང་གིས་མི་སོས་པའི་བྱིས་པ་ཉམས་ཆུང་བསམ་མེད་མི་གྲལ་དུ་མི་ཐོན་པ་ཞིག་ཡིན། ཁ་སང་དེ་རིང་ལུས་ཀྱི་སྟོབས་རྫོགས། སེམས་ཀྱི་ནུས་ཤུགས་རྒྱས། ནད་ན་ཚ་ཡིས་མ་མནར་བར་ཕོ་ལུ་རེ་འགྲངས་པའི་དབང་གིས་གནས་སྐབས་སྣང་ལུ་རེ་མཐོ་ཁུལ་ཡོད་ཀྱང་དེ་རྟག་བརྟན་ཅན་ཞིག་ག་ལ་ཡིན། ལོ་བཞི་བཅུར་སོན་དུས་ནས་པུས་མོའི་ཚིགས་ལ་ན་ཟུག་འབྱུང་། མིག་དང་རྣ་བའི་ནུས་པ་ཇེ་ཞན་དུ་འགྲོ། ལོ་ལྔ་བཅུ་དྲུག་ཅུར་སོན་དུས་ནད་ན་ཚ་ཇེ་མང་ནད་ཀྱིས་ཨ་ར་གདོན་གྱིས་ཨུ་རུ་འདོན་གྱིན་རྒས་སེམས་སྣེ་ལོར་སོང་ནས། གནའ་དུས་ལྟ་བུའི་སེམས་ཀྱི་ཤེད་ཤུགས་ད་ལྟ་མེད་པར་གྱུར་པ་དང་། རང་ལ་ནུས་པ་མེད་དུས་ཁྱིམ་ཚང་གིས་གཙིགས་མེད་བྱས་ནས་གྲུ་ཡི་ཁུག་ཏུ་ལྷུང་དུས་སྐྱིད་པོ་མེད། དེ་དུས་གསོན་མི་འདོད་པར་ཤི་རྒྱུའི་སྨོན་ལམ་འདེབས་ཀྱིན་ཡོད་པ་རེད། དེ་ཤི་བ་སྐྱིད་ནས་མ་རེད་དེ་གསོན་པ་སྡུག་པས་རེད། ཚེ་གང་གི་ལས་ཅི་བྱས་ཀྱི་རྣམ་སྨིན་རང་ཉིད་དང་མ་བྲལ་བར་ཡོད་པ་མ་གཏོགས། རྒྱུ་ནོར་ལོངས་སྤྱོད་ཐད་རང་གིས་གསོག་པ་གཞན་གྱིས་འཁྱེར་རྒྱུ་ཡིན་པས། ལར་བཟའ་རྒྱུ་དང་ཆག་འགྲོ་རྒྱུ་ཅན་ཞིག་མིན་ཚད་ནི་འཛམ་གླིང་གི་རྒྱུ་ནོར་ཡོད་ཚད་པོ་ཐུན་མོང་གི་རྒྱུ་ནོར་ཡིན། ཤི་དུས་སུ་གཅིག་གིས་འཁྱེར་ཐུབ་པ་མ་རེད། ཉི་མ་འགའ་ཞིག་གི་ཚེ་ངའི་ཡིན་བསམ་ནས་བདག་གིར་བྱས་ཀྱང་། ཡང་ཉི་མ་འགའ་རེ་འདས་དུས་གཞན་ཞིག་གིས་ཁོའི་ཡིན་བསམ་ནས་བདག་རྒྱག་རྒྱུ་རེད། དེ་ལའང་ཡུན་རིང་མི་དབང་བར་གཞན་ཞིག་གིས་བདག་བྱེད་འགྲོ་བ་རེད། སྔོན་གྱི་མི་དབང་འབྱོར་ཅན་འགའ་རེས་རྒྱུ་ནོར་རོ་དང་མཉམ་དུ་བཞག་མཁན་དེ་འདྲའང་ཡོད་དར་སྲིད་མོད། དེའང་ཡུན་རིང་ལོན་ན་ས་ཁར་ཐོན་ནས་གཞན་དང་ཐུན་མོང་གི་རྒྱུ་རེད་འགྲོ། དེས་ན་རྒྱུ་ནོར་གྱི་སྙིང་པོ་བླངས་ནས་བསོད་ནམས་ཀྱི་ཚོགས་བསགས་ན་དེ་ལ་ཕར་རྒྱབ་ཏུ་འཁྱེར་ས་ལོན་པ་རེད། ཚེ་གང་གི་འཆར་གཞི་ཞོགས་མེད་པ་དེས་ན། རང་གིས་རང་གཅེས་ཤེས་ཡོད་མ་རེད་ཟེར་རྒྱུ་དེ་འདྲ་ཞིག་རེད། ལོ་བརྒྱ་མི་དགོས་ལོ་བཅུ་ཡིན་ན། དེ་མ་ཟད་ལོ་གཅིག་ལའང་མི་ཤི་རྒྱུའི་འགན་འཁུར་དགོས་ན་རང་གཞན་སུ་ལའང་དེའི་ཚོད་ཐིག་པའི་གདེང་ཚོད་ཡོད་པ་མ་རེད། ན་ནིང་འུ་ཅག་གི་ཆོས་གྲལ་ན་ཡོད་པ་མང་པོ་ཞིག་ད་ལོ་ཚེ་ཕྱི་མར་སོང་ཚར་འདུག ན་ནིང་དེ་ཚོས་ད་ལོར་མེད་འདང་ཡོད་མ་རེད། སང་ཕོད་སུ་དང་སུ་མེད་ད་དུང་རང་རེས་མི་ཤེས། ཚེ་འདིའི་དོན་དུ་བློ་སྣ་སྤོས་རྒྱའི་རི་མོ་འདྲ་བ་འདི་ན་ཟད་སོང་ཟེར་རྒྱུ་མེད་པར་ལས་བྱ་བ་འདི་ལ་བྲེལ་ཟིང་ཆེ་བས། ཡར་མར་ཚང་མ་ལ་འཐམ་ཁུལ་བྱེད་ཀྱང་ཐ་མར་སྡུག་མུན་པའི་ཁུར་བོ་རི་རབ་འདྲ་རང་གི་མགོར་སྤུངས་ཏེ་མི་ལུས་ཐོབ་པའི་སྐལ་བ་ལྡན་པ་དེ་ཆུད་ཟོས་རེད་སོང་བ་རེད། འདང་དེ་ཚོ་རྒྱག་ན། སྐྱེས་ཕོ་རབ་ཕོ་འབྲིང་ཕོ་ཐ་གསུམ། །དྲན་སྔ་ཕྱི་མ་གཏོགས་འདྲ་འདྲ་ཡིན། །བློ་སྔོན་ན་དྲན་ན་མཁས་པ་ཡིན། །རྗེས་སུ་དྲན་པ་འགྱོད་པ་ཡིན། །འགྱོད་པ་ལས་ཀྱི་ཐ་མ་ཡིན། །ད་རང་ཆུས་རང་གིས་འཚོལ་ཤེས་དགོས་པ་ཡིན་ན། ཤེས་ཤེས་གསལ་གསལ་མིག་ཡོད་བཞིན་དུ་ཆུ་ལ་མཆོང་བ་བཞིན་དུ་རེད་འདུག་རྒྱུ་འདི། རྩ་བ་ལས་རྒྱུ་འབྲས་ལ་ཡིད་ཆེས་བརྟན་པོར་མེད་པའི་སྟོབས་ཀྱིས་རེད། འུ་ཚོ་སེམས་ཅན་ཟེར་རྒྱུ་དེ་ཤི་ཚར་ནས་མར་མེ་མནལ་བ་དང་། ཆུ་སྐམ་པ་ལྟ་བུར་མེད་འགྲོ་བ་ཞིག་ཡིན་ན་དེ་རང་རེད་དེ། སྐྱེ་བ་ཕྱི་མ་མེད་རྒྱུའི་ཁས་ལེན་མཁན་ཆད་ལྟ་མུ་སྟེགས་རྒྱང་འཕེན་པ་དང་། དེའི་ཕྱོགས་གཏོགས་འགའ་རེ་རེད་མ་གཏོགས་འཛམ་བུ་གླིང་གི་ནང་པ་ཡིན་མིན་གྱི་ཆོས་ལུགས་མང་ཆེ་བས་སྐྱེ་བ་ཕྱི་མ་ཁས་ལེན་པ་རེད། དེ་མི་ལེན་ཀ་མེད་རེད། རྒྱུ་འབྲས་རྟེན་འབྲེལ་གྱི་ཕྱོགས་ལ་བསམ་བློ་བཏང་ན་ས་བོན་ལས་མྱུ་གུ་སྐྱེ་བ། དཔྱིད་ཀར་ས་བོན་ས་ལ་བཏབ་ན་སྟོན་ཁར་ཞིང་ལས་མྱུ་གུ་འཁྲུངས་པ་ལྟ་བུ་ཕྱིའི་རྒྱུ་འབྲས་རྟེན་འབྲེལ་དང་། མ་རིག་ལས་འདུ་བྱེད། དེ་ལས་རྣམ་ཤེས་ནས་སྐྱེ་བ་ལས་རྒ་ཤི་འབྱུང་བ་ནང་གི་རྟེན་འབྲེལ་སོགས་གང་ལ་བསམ་བློ་བཏང་ན་ལས་རྒྱུ་འབྲས་དང་སྐྱེ་བ་སྔ་ཕྱི་གྲུབ་ངེས་རེད། མིག་ལག་པས་བཀབ་ནས་ངས་མིག་གིས་མི་རིག་པས་ཡོད་པ་མ་རེད་ཅེས་མི་བརྗོད་པར། རང་གི་སྐྱིད་སྡུག་གི་མདུན་ལམ་རང་གིས་མ་འཚོལ་ན་ཁོག་པའི་ནང་སེམས་མེད་པ་དང་འདྲ་འདྲ་རེད། དེས་ན་དམ་པའི་ཆོས་ཀྱི་ཕན་ཐོགས་ཅི་ཞིག་ཡོད་རེད་ཟེར་ན། ཚེ་འདིར་བདེ་ཐབས་ཕྱི་མ་སྐྱིད་ཐབས་ཅི་འདྲ་ཤིག་སྒྲུབ་དགོས་དེ་ཤེས་པའི་ཆེད་དུ་དམ་པའི་ཆོས་སྦྱོང་སྒྲུབ་བྱེད་ཀྱིན་ཡོད། དེ་ཡིན་ན་རང་རེ་སོ་སོའི་སྐྱེ་བོ་རྣམས་རྨོངས་པ་མ་རིག་པའི་དབང་དུ་སོང་ནས་མིག་མེད་པའི་ལོང་བ་ལྟ་བུ་ཞིག་ཡིན་ལ། མིག་དང་ལྡན་པ་མ་རིག་པའི་གཉིད་ལས་སད་པ་ནི་སངས་རྒྱས་རེད། སངས་རྒྱས་ཀྱིས་བསྟན་པའི་ལམ་ཡང་དག་པར་ཞུགས་པ་ནི་དམ་པའི་ཆོས་སྒྲུབ་ཟེར་བ་ཡིན། སངས་རྒྱས་མི་ཡུལ་དུ་བྱོན་ནས་མི་ལོ་ཉིས་སྟོང་ལྷག་སོང་བ་མ་ཡིན་ནམ། སངས་རྒྱས་ཀྱིས་ཅི་ཞིག་གསུངས་ཡོད་པ་སུས་ཤེས། ད་དུང་ལོག་ལྟ་ཅན་ཞིག་ཡིན་ན་སངས་རྒྱས་ནི་ད་ལྟ་ང་ཚོས་བཤད་པ་འདྲ་ཨེ་ཡིན་ཅི་ཤེས་བསམ་སྲིད་མོད། སངས་རྒྱས་ཁོང་གིས་སྐུ་ནར་སོན་ཚེ་དམ་པའི་ཆོས་གསུངས་ཡོད་ལ། དེ་ཡང་གདུལ་བྱའི་བློ་དང་འཚམ་པའི་ཆོས་སྒོ་ཐེག་པ་ཆེ་ཆུང་མདོ་སྔགས་ཀྱི་རིམ་པ་མང་པོ་གསུངས་ཡོད་པའི་སྟོབས་ཀྱིས་སངས་རྒྱས་ཅི་འདྲ་ཞིག་ཡིན། སངས་རྒྱས་ཀྱི་གསུང་ལས་དཔག་ན་ཤེས། ད་སྐབས་ཚན་རིག་ལ་མཁས་པ་རྣམས་ཀྱིས་ཧ་ལམ་ཤེས་རྩིས་བྱས་ཡོད་པའི་ལྐོག་གྱུར་གྱི་དོན་འགའ་རེ། སངས་རྒྱས་བཅོམ་ལྡན་འདས་ཀྱིས་མི་ལོ་ཉིས་སྟོང་གི་ཡར་སྔོན་ནས་དེ་བས་གསལ་དེ་བས་ཟབ་ཅིག་བྱས་ནས་གསུངས་མྱོང་། དེས་ན་ཆོས་ཚིག་རེ་གོ་ན་ཐོས་པའི་ཕན་ཡོན་ཡོད་པར་མ་ཟད་ཐོས་པའི་ཤེས་རབ་སྔར་མེད་ཀྱི་མིག་གསར་པ་ཞིག་རྒྱུད་ལ་ཐོབ་ཡོང་རྒྱུ་ཡོད། མིག་གསར་པ་དེ་གསར་དུ་རྙེད་ནས་དོན་གསར་པ་སྔོན་ཆད་མ་རིག་པ་ཞིག་གསར་དུ་རིག་ཐུབ། དེའི་དོན་དེ་ལ་བརྟགས་ཤིང་དཔྱད་ན་བསམ་པའི་ཤེས་རབ་ཟེར་བ་སྔར་མ་ཤེས་པ་ཞིག་ཤེས་ཡོང་། ཤེས་ཡོང་རྒྱུའི་དོན་དེ་ལག་ལེན་ལ་བསྟར་ནས་སེམས་ཐོག་ལ་སྦྱར་དུས་སྔར་ཡོད་མ་མྱོང་བའི་ནང་གི་བདེ་བ་གསར་རྙེད་ཡོང་རྒྱུ་ཡོད། དེའི་མིང་ལ་སྒོམ་པའི་ཤེས་རབ་ཟེར། དེ་ལ་གོམས་ཆ་བརྟན་དུ་བཅུག་ནས་རྒྱུན་བསྐྱངས་ཏེ་སྦྱོང་ན། བར་སྐབས་ཤིག་ཏུ་ལུས་སེམས་གཉིས་ལ་སྔར་མེད་ཀྱི་ཡོན་ཏན་ནམ་ནུས་པ་ཁྱད་པར་ཅན་གསར་པ་ཞིག་སྐྱེས་ནས། རང་གཞན་བདེ་བའི་ཐབས་ལམ་གསར་པ་ཞིག་རང་ལས་རྙེད་རྒྱུ་ཡོད། དེའི་ཡོན་ཏན་དེ་ནི་འགངས་ཆེན་རྩ་ཆེན་འཇིག་རྟེན་གྱི་རྒྱུ་ནོར་དངོས་པོ་ཞིག་ལས་རྩ་བ་དང་དོན་ཤིན་ཏུ་ཆེ། དེ་ཕྱིའི་རྒྱུ་ནོར་གྱིས་ཉོ་ཐབས་མེད་པར་ནང་རང་གི་སེམས་ཐོག་ནས་རྙེད་དགོས་པའི་དོན་འགངས་ཆེན་ཞིག་ཡིན། དེའི་དོན་རྩ་ཆེན་དེ་ཆོས་ཐོས་པར་བརྟེན་ནས་ཤེས་དགོས། མ་ཐོས་ན་ཅི་ཞིག་གོ མ་གོ་ན་ཤེས་རྒྱུ་དང་། མ་ཤེས་ན་རྒྱུད་ལ་སྦྱར་རྒྱུ་དང་ཕན་འབྲས་ཐོབ་ཡོང་རྒྱུ་ཞིག་མེད་དེ། མ་བསླབ་ཁ་རོག་འདུག་པ་ལ། །ལོ་བརྒྱ་སོང་ཡང་བཟང་བསྐྱེད་མེད། །ཅེས་གསུངས་ཡོད། དེའི་ཕྱིར་ན་ཆོས་ཞུ་དུས་དང་པོ་རང་གིས་རང་ལ་གཅེས་ན་གཅེས་ལུགས་འདི་འདྲ་དགོས་ཚུལ་ཤེས་རྒྱུ་དེའི་མིང་ལ་སྐྱེས་བུ་བློ་ཆུང་འཇིག་རྟེན་པའི་ལམ་ཟེར་། དེའང་ལས་རྒྱུ་འབྲས་ལ་ཡིད་ཆེས་རྙེད་དེ་འཇིག་རྟེན་ཡང་དག་གི་ལྟ་བར་བརྟེན། མི་དགེ་བཅུ་སྤོང་གི་ཚུལ་ཁྲིམས་བསྲུངས་ནས་ཟག་བཅས་ཀྱི་དགེ་བ་བསྒྲུབས་ན། ཚེ་ཕྱི་མར་ངན་སོང་དུ་མི་ལྟུང་བར་ལྷ་དང་མིའི་ལུས་རྟེན་ཐོབ་འགྲོར་གསུངས་ནས་བསྟན་ཡོད། དེ་བསྟན་པའི་རྒྱུ་མཚན་ཅི་རེད་ཅེ་ན། སངས་རྒྱས་ཀྱིས་སེམས་ཅན་ཐམས་ཅད་ཐར་པ་དམ་པའི་གོ་འཕང་ལ་བཀྲི་བའི་མཛད་པ་ཕྲིན་ལས་སྐྱོང་བ་ཡིན། དེས་ན་ཐར་པ་སྒྲུབ་པའི་རྟེན་ལྷ་དང་། ཁྱད་པར་དུ་མིའི་ལུས་རྟེན་ཁམས་དྲུག་ལྡན་གྱི་རྟེན་འདི་ཉིད་གལ་ཆེ་བ་ཡིན་ན་དེ་ཐོབ་པའི་དོན་དུ་གསུངས་པ་ཡིན་ཏེ། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་ལ་ཐག་མི་རིང་། །མི་དང་ལྷ་ཡི་རྟེན་བརྟེན་ནས། །འཛེགས་ན་ཐར་པ་ཐོབ་པ་ཡིན། །ཞེས་གསུངས་པས་སོ། །དེ་ལ་འཇིག་རྟེན་པའི་ལམ་ཟེར། འཇིག་རྟེན་ལས་མ་འདས་པའི་ལམ་དེས་འཁོར་བ་ལས་ཐར་པའི་ཐར་པ་ཐོབ་མི་ནུས། ཐར་པ་མ་ཐོབ་པ་དེ་དཔེར་ན་བུམ་ནང་གི་བུང་བ་ལྟ་བུ་རེད། བུམ་པའི་ནང་གི་བུང་བ་དེ་བུམ་པའི་སྟོད་དུ་འཁོར་ན་བུམ་པའི་ནང་རེད་ལ། སྨད་དུ་འཁོར་ནའང་བུམ་པའི་ནང་རེད། དེ་དང་འདྲ་བར་སྐབས་རེར་ལྷ་མིའི་ལུས་རྟེན་ཐོབ་ནས་ཟག་བཅས་དགེ་བའི་ལས་ཀྱིས་ཟག་བཅས་ཀྱི་བདེ་བ་རེ་མྱོང་ཡང་དེ་སྐྱེ་བ་ཐམས་ཅད་དུ་སྤྱོད་ཆོག་པ་ཞིག་མ་ཡིན་ཏེ། གནམ་རྡོ་གྱེན་དུ་འཕངས་ཀྱང་ཤུགས་ཟད་ན་ཐུར་དུ་མི་ལྷུང་འགྲོ་ས་མེད་པ་ལྟར། ལྷ་མིའི་བདེ་འབྲས་ཟད་ན་སྔོན་བསགས་ལས་ངན་གྱིས་ཁྲིད་དེ་ངན་སོང་གི་གཏིང་རྡོར་འགྲོ་བའང་ཡོད་པས། དེས་ཀྱང་ཕན་ཐོགས་ཆེན་པོ་མེད་པས། ཡུན་ནས་ཡུན་དུ་སྡུག་བསྔལ་མི་མྱོང་བ་ཞིག་འབྱུང་དགོས་ན་འཇིག་རྟེན་ལས་འདས་པའི་ལམ་ཞིག་ཅིས་ཀྱང་བསྟེན་དགོས། འཇིག་རྟེན་ལས་འདས་པའི་ལམ་དེ་ལའང་སྐྱེས་བུ་འབྲིང་ནི་ཉན་རང་གི་ཐེག་པ་རེད། དེའི་རང་ལམ་གྱི་རྗོད་བྱེད་སྡེ་སྣོད་གསུམ་ལ་འཆད་ཉན་དང་། བརྗོད་བྱ་བསླབ་པ་གསུམ་ལ་ཉམས་ལེན། ཁྱད་པར་དུ་ངེས་པར་འབྱུང་བའི་ཚུལ་ཁྲིམས་ཀྱིས་གཞིར་བཟུང་སྟེ་ལྟ་སྒོམ་སྤྱོད་པའི་ཉམས་ལེན་མཐར་ཕྱིན་ན་ཉན་ཐོས་སྐྱེས་བུ་ཟུང་བཞི་ཡ་བརྒྱད་དང་། རང་རྒྱལ་དགྲ་བཅོམ་པའི་གོ་འཕང་ཐོབ་སྟེ། ཁམས་གསུམ་གྱི་ཟག་པ་ཉོན་མོངས་པའི་དགྲ་བཅོམ་པས་འཁོར་བར་སྐྱེས་ནས་འཁོར་བའི་སྡུག་བསྔལ་མྱོང་མི་དགོས། འོན་ཀྱང་རང་ཉིད་གཅིག་པུ་ཐར་འདོད་པའི་རང་འདོད་ཀྱི་བློ་ཞི་བ་ཕྱོགས་གཅིག་པའི་ཀུན་སློང་དེས་མཐའ་གཉིས་ལ་མི་གནས་པའི་རྫོགས་པའི་སངས་རྒྱས་ཀྱི་གོ་འཕང་ཐོབ་མི་ཐུབ། དེ་མ་ཐོབ་པས་གཞན་དོན་རླབས་ཆེན་ཞིག་མི་འབྱུང། དེས་ན་རང་འདོད་ཡིད་བྱེད་ཀྱི་བློ་དེ་ཐེག་པ་ཆེན་པོའི་ལུགས་ལ་དུག་ལྟར་འཛེམ་དགོས། ཁྱད་པར་དུ་རང་ལུགས་ཀུན་མཁྱེན་ཡབ་སྲས་ཀྱིས་རང་འདོད་ཡིད་བྱེད་ཀྱི་བློ་ལྡོག་དགོས་ཚུལ་ཐུན་མིན་གྱི་རྩལ་འདོན་མཛད་ནས་གསུངས་ཡོད། འུ་ཅག་གིས་འདང་རེ་བརྒྱབ་ན་ང་རང་ཉིད་ཐར་ནས་འཁོར་བའི་སྡུག་བསྔལ་མྱོང་མ་དགོས་ཀྱང་། ད་དུང་དྲིན་ཆེ་བའི་ཕ་ཡོད། ལུས་སྦྱིན་པའི་མ་ཡོད། ཨ་ཕྱི་ཨ་མེས་ཁྱིམ་བཟའ་ཚང་། མིང་སྲིང་སྤུན་ཟླ་རྣམས་ཡོད། ཚེ་འདིའི་ཕ་མ་སྤུན་གྲོགས་དང་འདྲ་བའི་ཚེ་སྔ་མའི་ཕ་མ་སྤུན་ཟླ་སོགས་ལ་བསམ་བློ་གཏོང་ན། སྐྱེ་བའི་ཡ་མཐའ་བགྲང་བ་ལས་འདས་པས། ཚེ་འགའ་རེའི་ཕ་མ་ལ་གཅེས་དང་ཚེ་འགའ་རེའི་ཕ་མ་ལ་མི་གཅེས་ཟེར་རྒྱུ་ག་ལ་ཡོད། ན་ནིང་གི་ཨ་མ་དང་ད་ལོའི་ཨ་མ་གཉིས་དྲིན་ཆེ་ཆུང་མེད་ལུགས་འདྲ་འདྲ་རེད། ད་ལྟ་རིག་རྒྱུ་ཡོད་མེད་ཀྱིས་འདང་ཆེ་ཆུང་བྱེད་རྒྱུ་ཡོད་པ་མ་རེད། ཨ་མ་རྒྱ་གར་ན་ཡོད་ན་འདང་ཆུང་རྒྱུ་དང་། དྲུང་འདིར་ཡོད་ན་འདང་ཆེ་རྒྱུ་ཞིག་མེད་པ་དང་གཅིག་པ་རེད། ད་འུ་ཚོས་འདང་དེ་འདྲ་ཞིག་བརྒྱབ་ན་རང་གཅིག་པུ་ཐར་པས་ཕན་ཐོགས་མེད། མདོར་ན་ཕ་མར་གྱུར་པའི་སེམས་ཅན་ཐམས་ཅད་ལྷག་འགྲོ་བཞིན་ཡོད། དེ་འདྲའི་བསམ་བློ་གཏོང་ན་བདེ་དོན་སྡུག་བསྔལ་གྱི་རྒྱུ་ཁོ་ན་བསྒྲུབས་ནས་མེ་ཆེ་ཐོག་ཤིང་སྣོན་གྱིན་ཡོད་པ་དང་འདྲ་བའི་སེམས་ཅན་མཐའ་ཡས་པར་སྙིང་མི་རྗེ་བའི་ཐབས་ཤིག་ག་ལ་ཡོད། སེམས་ཅན་མིག་གིས་རིག་ན་སྙིང་རྗེ་དབང་མེད་དུ་སྐྱེ་བའི་ཚད་ལ་སླེབ་རྒྱུ་ཡོད། དེའི་ཚེ་ན་གོང་དུ་བཤད་རྒྱུའི་སྐད་ཆ། ཕ་མར་མ་གྱུར་པ་མེད་པའི་འགྲོ་བ་སེམས་ཅན་ཐམས་ཅད་གཏན་གྱི་བདེ་བ་རྫོགས་པའི་སངས་རྒྱས་ཀྱི་སར་དགོད་པའི་ཆེད་དུ། དམ་པའི་ཆོས་ཟབ་མོ་ཉན་ནས་དེའི་དོན་ཚུལ་བཞིན་དུ་ཉམས་སུ་ལེན་དགོས་ཟེར་བ་ནི། ཚིག་བཟང་ལ་ཁ་ན་དེ་བཞིན་ཐོད་ཐུག་པ་རེད། དེ་ལྟར་བསམ་བློ་ཞིག་བཏང་ནས་ཆོས་ཞུ་བའི་དོན་སྙིང་ཤེས་དགོས་པར་མ་ཟད། ཆོས་ཞུས་ནས་དེའི་དོན་སྒྲུབ་རྒྱུ་དེ་བྱ་བ་གཞན་གང་ལས་ཀྱང་གལ་ཆེན་ཞིག་རེད། འདི་ནི་སྔ་དྲོ་ཕྱི་དྲོ་གཉིས་ལས་སྔ་དྲོར་སྒྲུབ་དགོས་བསམ་པའི་སེམས་ཤུགས་བཟློག་མེད་ཅིག་ཡོད་དུས་ཆོས་སྒྲུབ་པ་གལ་ཆེ་བའི་གོ་བ་ལོན་པའི་རྟགས་ཡིན། སྨན་འཆི་གསོས་ཀྱི་བདུད་རྩི་ལྟ་བུའི་དམ་པའི་ཆོས་ཉན་དུས། དང་ཞིང་སྤྲོ་བའི་ངང་ནས་ཉན་དགོས།

འདིར་སྐབས་སུ་བབ་པ་གང་ཞིག་གསན་པར་བྱ་བ་ནི་རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་འགྲོ་སེམས་སྦྱོང་བདུན་པའི་དོན་ཁྲིད་འདི་ཡིན། འདིའི་གླེང་གཞིའི་ཐོག་ནས་བཤད་ན། རྫོགས་ཆེན་རང་གི་ཆོས་སྐད་ལྟར་ན་དུས་གསུམ་དུས་མེད་ཀ་དག་གཞི་རྫོགས་ཀྱི་དུས་ཆེན་པོ་ན། ཐོག་མའི་སངས་རྒྱས་ཀུན་ཏུ་བཟང་པོ་དེས་ཆོས་དབྱིངས་ཀུན་ཁྱབ་ཆེན་པོར་བྱང་ཆུབ་ནས་ལྷུན་གྲུབ་ཐུགས་རྗེའི་རྩལ་སྣང་གི་རྣམ་པར་འཕྲོ་བ། གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ཁམས་རིགས་ལྔ་གངས་ཆེན་མཚོའི་སྐུ་ལུས་ཀྱི་བཀོད་པ་ལས་ཞིང་ཁམས་མཐའ་ཡས་མུ་མེད་བསམ་གྱིས་མི་ཁྱབ་པ་ཞིག་བཀོད་ལ། ཞིང་ཁམས་སྣ་ཚོགས་བཀོད་པའི་སྣང་བ་དེའི་ནང་ནས་རྣམ་སྣང་གངས་ཆེན་མཚོའི་སྐུ་ལུས་ཀྱི་བཀོད་པའི་ཆ་ཤས་མི་མཇེད་ཀྱི་ཞིང་ཁམས་བྱེ་བ་ཕྲག་བརྒྱ་རུ། སྟོན་པ་ཤཱཀྱའི་རྒྱལ་པོ་བྱོན་ནས་སྐུ་དངོས་དང་རྡོ་རྗེ་འཆང་གི་སྐུར་བཞེངས་པ་སོགས་སྣ་ཚོགས་པའི་སྒོ་ནས་གདུལ་བྱའི་གང་ཟག་ཐམས་ཅད་ཀྱི་བློ་རིམ་དང་མཐུན་པའི་མདོ་སྔགས་ཀྱི་ཆོས་ཚུལ་ཟབ་རྒྱས་ཐུན་མོང་དང་ཐུན་མིན་གྱི་ཆོས་འཁོར་བསྐོར་ན། དེ་ལ་རང་རེས་གང་འཆད་ཉན་བྱ་རྒྱུའི་ཆོས་འདི། གསང་སྔགས་སྔ་འགྱུར་བའི་རང་ལུགས་ལྟར་ན་ཐེག་རིམ་རྣམ་པ་དགུ་ལས་ཕྱེས་པའི་ཐེག་རྩེ་རྫོགས་པ་ཆེན་པོའི་ཆོས་ཚན། དེ་ལས་ཀྱང་རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་འགྲོ་སེམས་སྦྱོང་བདུན་པའི་དོན་ཁྲིད་འདི་འཆད་པའི་སྐབས་ཡིན། འདི་ཉིད་ཇི་ལྟར་འཆད་ཚུལ་ནི་མན་ངག་དང་བསྟན་བཅོས་སྤྱིའི་འཆད་ཚུལ་ལྟར་དགེ་བ་རྣམ་པ་གསུམ་གྱི་སྒོ་ནས་འཆད་པ་ལ། ཐོག་མར་དགེ་བ་ཀླད་ཀྱི་དོན་དང་། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ་གྱི་སྒོ་ནས་འཆད་པ་ཡིན། དང་པོ་ལ་མཚན་སྨོས་པ་དང་། ཕྱག་འཚལ་བ། མཆོད་པར་བརྗོད་པ། ཐེག་རྩེའི་ཆོས་ཀྱི་ཆེ་བ་བསྟན་པའི་སྒོ་ནས་བརྩམ་པར་དམ་བཅའ་བ་དང་བཅས་པས་བསྟན་ཡོད། གཉིས་པ་བར་དུ་དགེ་བ་གཞུང་གི་དོན་ལ་ཐོག་མའི་རྟེན་འབྲེལ་གྱི་སྒོ་དང་པོ་ཆོས་འཆད་ཉན་གྱི་སྔོན་དུ་འཆད་ཉན་ཇི་ལྟར་བྱ་ཚུལ་དང་། དངོས་གཞི་སེམས་སྦྱོང་རྣམ་པ་བདུན་གྱི་དོན་ཁྲིད་དེ་ལུང་གིས་རྗེས་སུ་དཔག་ནས་བསྟན་པ་དང་། མན་ངག་གི་སྒོ་ནས་རྒྱུད་དང་སྦྱར་ཏེ་སྒོམ་ཚུལ་གྱི་ཁྲིད་རྐང་བདུན་ཡོད། བདུན་པ་དེ་ལའང་ནང་གསེས་གསུམ་དུ་ཕྱེས་ནས་ཁྲིད་རྐང་རྣམ་པ་དགུའི་སྟེང་ནས་མན་ངག་གིས་བཀྲལ་བའི་ལུས་ཡོངས་སུ་རྫོགས་པ་བསྟན་ཡོད། གསུམ་པ་ཐ་མར་དགེ་བ་མཇུག་གི་དོན་ལ་དེ་ལྟ་བུའི་ལག་ཁྲིད་ཀྱི་སྒོ་ནས་རིམ་གྱིས་རྒྱུད་དུལ་ཞིང་ལས་རུང་དུ་གྱུར་པའི་སྐལ་ལྡན་ལས་ཅན་གྱི་སློབ་མ་དེ་དག རྡོ་རྗེ་ཐེག་པའི་དངོས་གཞི་སྨིན་གྲོལ་གྱི་ལམ་ལ་ཇི་ལྟར་ཞུགས་ཤིང་། འབྲས་བུ་ཚེ་འདིར་འཐོབ་པར་བྱ་བའི་རིམ་པ་དེ་ཇི་ལྟར་བྱ་བ་གདམས་པ་དང་། མཇུག་ཞལ་གདམས་སྨོན་ལམ་མཛད་བྱང་དང་བཅས་པས་མཐར་བརྒྱན་ཏེ་བསྟན་པ་ནི་མན་ངག་གི་གཞུང་འདིའི་ལུས་ཀྱི་རྣམ་པར་བཞག་པའོ། །

༼ཨོྃ༽ ཐོག་མར་དགེ་བ་ཀླད་ཀྱི་དོན།

དང་པོ་མཚན་སྨོས་པ།

དེ་ལས་ཐོག་མར་དགེ་བ་ཀླད་ཀྱི་དོན་རྣམ་པ་ལྔ་ཙམ་གྱི་སྒོ་ནས་འཆད་པ་ལས། དང་པོ་མཚན་སྨོས་པ་དངོས་ནི། ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་ཁྲིད་ཐར་པའི་ཐེམ་སྐས་ཞེས་བྱ་བ་བཞུགས། ཞེས་བཀོད་ཡོད། སྤྱིར་ན་རྒྱུད་ལུང་མན་ངག་གི་སྐོར་དེ་འཆད་ཚུལ་མང་སྟེ། སྤྱི་དོན་གྱིས་ཁོག་དབུབ། དཀྱུས་ཀྱིས་ས་བཅད། ཚིག་གིས་འབྲུ་གནོན། བརྒལ་ལན་གྱིས་གཏན་ལ་ཕབ་ནས་བཤད་པ་སོགས་རྒྱུད་གཞུང་སྤྱིའི་འཆད་ཐབས་དང་། ཡང་ལྟ་བ་བརྒལ་བརྟག་གིས་བཤད་པ་དང་། སྤྱོད་པ་འཇུག་ཐབས་ཀྱིས་བཤད་པ་སོགས་རྒྱུད་ཀྱི་དངོས་པོ་བཅུ་གཅིག་དང་འབྲེལ་བའི་བཤད་ལུགས་དང་། ཡང་རང་བཞིན་དངོས་པོའི་གནས་ཚུལ། མ་རྟོགས་འཁྲུལ་པའི་སྣང་ཚུལ་སོགས་ཆོས་ལྔས་འཆད་པ་སོགས་མང་ཡང་། འདིར་རང་རེས་རྒྱུད་དོན་མན་ངག་གིས་བཀྲལ་བའི་ལུགས་ལ། པཎ་ཆེན་བི་མ་ལའི་བཞེད་པ་ལྟར། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་གསུངས་པ་བཞིན་མགོ་སྨོས་པ་ཙམ་གྱིས་གོ་བའི་གདུལ་བྱ་དབང་པོ་རབ་ལ་མཚན་བསྟན། ཅུང་ཟད་ཕྱེ་སྟེ་གོ་བའི་དབང་པོ་འབྲིང་ལ་སྤྱི་དོན་ས་བཅད་ཀྱི་རྣམ་དབྱེ་བསྟན། གཞུང་དོན་སྤྲོས་ཏེ་བཤད་ན་གོ་བའི་དབང་པོ་ཐ་མ་ལ་ཚིག་ཡིག་འབྲུ་རེ་རེའི་དོན་བཀྲལ་ཏེ་རྒྱས་བཤད་བྱས་ནས་འཆད་ཚུལ་ཡོད་ལ། རང་རེས་དེ་དང་མཐུན་པར་འཆད་པའི་ཚུལ་ཡིན། ཡང་འདི་ལ་གོ་བ་ལེན་ལུགས་ཡོད་དེ། མཚན་བསྟན་པ་ནི་དབང་པོ་རྣོན་པོའི་དོན་ཡིན་ན་ང་ལ་དེ་མི་དགོས་ཞེས་བསམ་པར་མི་བྱ་སྟེ། མཚན་བསྟན་པ་མགོ་སྨོས་པས་གོ་བའི་གདུལ་བྱ་དབང་རྣོན་གྱི་ཆེད་དུ་ཡིན་ཡང་དེ་ཁོ་ནའི་དོན་དུ་བསྟན་པ་མ་ཡིན་ཞིང་། དབང་པོ་འབྲིང་དང་ཐ་མ་གཉིས་ལའང་མགོ་སྨོས་པ་ཙམ་གྱིས་གོ་བའི་བག་ཆགས་རྒྱུད་ལ་འཇོག་པའི་དགོས་པའང་ཡོད་པས་སོ། །དབང་པོ་འབྲིང་ལ་སྤྱི་དོན་དང་ས་བཅད་ཀྱི་སྒོ་ནས་དོན་གྱི་གོ་བ་རྙེད་པའི་ཐབས་སུ་གསུངས་པ་ཡིན་ཡང་། དབང་པོ་ཐ་མ་ལའང་ཚིག་འབྲུ་གཉེར་གྱི་གོ་དོན་དགྲོལ་བའི་སྔོན་དུ་སྤྱི་ཁྱབ་ཀྱི་ལུས་རྣམ་བཞག་གི་ཚད་ཙམ་ཤེས་ན་ཕྱོགས་འདྲ་བ་ཧ་ལམ་གོ་ནས་ཚིག་དོན་གྱི་གོ་བ་རྙེད་པའི་དགོས་པ་ཡོད། དེས་ན་དང་པོ་མཚན་དོན་འགྲེལ་ན། སྤྱིར་རྒྱལ་བའི་ཆོས་སྒོ་མཐའ་དག་གདུལ་བྱ་སེམས་ཅན་སྣ་ཚོགས་པའི་ཁམས་དབང་དང་མོས་པའི་བྱེ་བྲག་དང་བསྟུན་ནས་གསུངས་པ་དེ་ཇི་ལྟར་ཡིན་ཞེ་ན། ཀུན་འབྱུང་འདྲེན་དང་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པའོ། །ཞེས་གསུངས་པ་དང་། ཨ་ཏི་བཀོད་པ་ཆེན་པོ་ལས། ཆུང་བའི་རིམ་པ་རྣམ་གསུམ་སྟེ། །དེ་ཡི་བློ་དང་མཐུན་པའི་ཆོས། །རྟོག་པས་སྦགས་ལ་ཉན་ཐོས་སོ། །འདུ་ཤེས་ཅན་ལ་རང་རྒྱལ་ཏེ། །རྟོག་འཛུད་ཅན་ལ་བྱང་སེམས་སོ། །འབྲིང་པོ་གསུམ་ལ་བསྟན་པ་ནི། །རབ་ཏུ་དམན་ལ་བྱ་བ་སྟེ། །དམན་པ་རྣམས་ལ་སྤྱོད་པའོ། །རྣམ་ཤེས་ཅན་ལ་རྣལ་འབྱོར་ཉིད། །ཆེན་པོ་རིམ་ལྡན་གསུམ་དག་ལ། །སེམས་ཡས་པ་ལ་བསྐྱེད་པ་སྟེ། །སེམས་བཅུད་ཅན་ལ་རྫོགས་པའོ། །མཆོག་གསང་རབ་ལ་རྫོགས་པ་ཆེ། །ཞེས་གསུང་པའི་ཐེག་པ་དགུ་པོ་དེ་ཐམས་ཅད་ཀྱི་རང་ལམ་ན་གཞི་ལྟ་བས་གཏན་ལ་འབེབ་ཚུལ། ལམ་སྒོམ་པས་ཉམས་སུ་ལེན་ཚུལ། དེའི་འབྲས་བུ་ཇི་ལྟར་ཐོབ་ཚུལ་དང་བཅས་པ་རྣམས་བཀའ་རྒྱ་ཆེ། ལུང་གྲངས་མང་། མན་ངག་མཐའ་ཡས་པའི་སྒོ་ནས་གསུངས་ཡོད་ལ། ཇི་ལྟར་གསུང་ཚུལ་ཡང་ནི། གསུང་གཅིག་ཡན་ལག་རྒྱ་མཚོའི་སྒྲ་སྐད་ཀྱིས། །རྒྱལ་བ་ཀུན་དབྱངས་ཡན་ལག་རྣམ་དག་པ། །འགྲོ་བ་ཀུན་གྱི་བསམ་པ་ཇི་བཞིན་དབྱངས། །ཞེས་གསུངས་པ་ལྟར་གདུལ་བྱའི་འགྲོ་བ་སྣ་ཚོགས་ཀྱི་སྤྱོད་ཡུལ་དང་མཐུན་པར་སྐུའི་རྣམ་པ། གསུང་གི་སྒྲ་དབྱངས། ཐུགས་ཀྱི་ཆོ་འཕྲུལ་མི་ཟད་པའི་སྒོ་ནས་གསུངས་ཡོད། ཐུབ་བསྟན་མདོ་དང་སྔགས་ཀྱི་ཆོས་ཚུལ་གང་ཡིན་ཡང་། ཐུན་མོང་དང་ཐུན་མིན་གྱི་དགོས་ཆོས་སྔོན་འགྲོ་དང་དངོས་གཞིའི་ཐབས་ཀྱིས་བསྟན། དེ་ལྟར་བསྟན་པ་དེའང་། མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་གསུངས་པ་ལྟར་ཐོས་བསམ་སྒོམ་གསུམ་གོ་མ་ལོག རྐང་མ་འཁྲུགས། མགོ་རྔ་མ་ནོར་བས་སངས་རྒྱས་ཀྱི་བསྟན་པའི་བབས་དང་རིམ་པ་དེ་སྐས་ཀྱི་གདང་བུ་ལྟར་དུ་རིམ་བགྲོད་བྱས་ཏེ། འདི་ནི་དབང་པོ་རྣོ་བརྟུལ་དང་། སྐྱེས་བུ་ཆེ་འབྲིང་ཐུན་མོང་གི་ལམ་ཡིན་པས་ཐུན་མོང་གི་སྔོན་འགྲོ་ཞེས་བྱ། སྔོན་འགྲོ་སྔོན་དུ་མ་སོང་ན་དངོས་གཞིའི་ལམ་ལ་འཇུག་ཐབས་མེད་པ་ནི། དཔེར་ན་མཁར་ཞིག་བརྩིག་པ་ལ་རྩིག་རྨང་བརྟན་པོ་ཞིག་བཞག་མེད་ན་དེ་བརྩིགས་ནས་མཁར་མཐོན་པོའི་མིང་དོན་ལྡན་པ་ཞིག་འགྲུབ་པར་མི་འགྱུར་ཏེ། རྨང་གཞི་མེད་པའི་ཐོག་བརྩེགས་ཤིག་བར་སྣང་དུ་འདུག་ཐབས་མེད་པས་སོ། །དེ་དང་འདྲ་བ་དང་པོ་སེམས་སྦྱོང་གིས་བློ་སྦྱངས་ནས་སེམས་ལས་སུ་རུང་བ་གཏོང་འགྲོ་བཞག་སྡོད་འཕེར་བ་ཞིག་བྱུང་། དེ་ནས་ད་གཟོད་དངོས་གཞིའི་ལམ་ཉམས་སུ་ལེན་དགོས། དེ་ལྟར་བརྗོད་ན་རང་གི་སེམས་ནི་རང་ལ་རང་དབང་ཅི་ལ་མེད། རང་གིས་ཅི་བསམ་ན་དེ་ཡིན་བསམ་རྒྱུ་ཡོད་པ་མ་རེད། བློ་ངན་གོམས་ཀྱི་བག་ཆགས་ངན་པའི་རྗེས་སུ་འབྲངས་ནས། བཟང་དགེ་བའི་ལས་ལམ་ཞིག་དང་འཕྲད་ན་བཟློག་དཀའ་བའི་གྱེན་ལ་འགྲོ་བ་དང་འདྲ་ཞིང་། ངན་མི་དགེ་བའི་སྡིག་ལས་ཤིག་ལ་ཐུག་དུས་འབད་རྩོལ་མི་དགོས་པར་ཆུ་སྣ་ཐུར་དུ་རྒྱུག་པར་འདྲ་བ་ཞིག་ཡོད་པ་དེ་རང་སེམས་རང་ལ་རང་དབང་མེད་པས། ངན་གོམས་ཀྱི་བག་ཆགས་ཤོག་གུ་དྲིལ་ལམ་དུ་རྒྱུག་འདྲའི་ངན་གཤིས་སུ་སོང་ཚར་བས་རེད། དེའི་དབང་གིས་འཁོར་བ་བཙོན་ཁང་འདྲ་བའི་ནང་དུ་སྡུག་བསྔལ་སྣ་ཚོགས་མྱོང་དགོས་ཐུག་པ་རེད། དེས་ན་ད་རེས་ལས་དང་སྐལ་བ་ལྡན་པས་དལ་འབྱོར་གྱི་རྟེན་འདི་རྙེད་ནས་དམ་པའི་ཆོས་ཟབ་མོ་འདི་འདྲ་བ་དང་འཕྲད་པ་ཡིན་ན། རང་གཞན་འཁོར་བའི་སྡུག་བསྔལ་ལས་སྐྱོབ་བྱེད་སེམས་སྦྱོང་ཐབས་རྣམ་པ་བདུན་གྱི་དོན་ཁྲིད་དེས་རང་བློ་འདུལ་སྦྱོང་དགོས་པས་ན། སེམས་སྦྱོང་རྣམ་པ་བདུན་ཞེས་གསུངས་པ་རེད། དེ་ལྟ་བུའི་སེམས་སྦྱོང་རྣམ་པ་བདུན་དེ་ཇི་ལྟར་གཏན་ལ་ཕབ་ཡོད་ཅེ་ན། བི་མའི་གསང་བ་སྙིང་ཐིག་ལས་ཟངས་ཡིག་ཅན་དུ་གསུངས་ཡོད། ཟངས་ཡིག་ཅན་ལས། ཀྱེ་མ་ཀྱེ་མ་རིགས་ཀྱི་བུ་རྣམས་ཉོན་ཅིག རིག་པ་མངོན་སུམ་གྱི་དོན་སྣང་བ་ལ་བློ་མི་ཕེབས་ཤིང་དབང་པོ་དམན་ལ་སྐལ་བ་ཞན་པའི་མི་རྣམས་ཀྱིས་འདི་ལ་ཡིད་མི་ཆེས་པ་འགའ་འབྱུང་སྲིད་པས། དེ་དག་རྣམས་རིག་པ་མཐོང་བར་བྱ་བའི་ཆེད་དུ་འདི་ལ་བསླབ་པར་བྱའོ། །ཞེས་ཚིག་དེ་ཙམ་གྱིས་སེམས་སྦྱོང་བདུན་གྱི་རིམ་པ་དགོས་པ་དང་བཅས་བསྟན་ཡོད། དེ་ལྟར་བི་མའི་དགོངས་དོན་ཇི་ལྟ་བ་བཞིན་དུ་སེམས་སྦྱོང་རྣམ་པ་བདུན་དེ་ལུང་དང་མན་ངག་གཉིས་ཀའི་སྒོ་ནས་དོན་མ་ནོར་མ་འཁྲུལ་བར་མངོན་སུམ་བསྟན་དོན་ལག་ཁྲིད་དུ་བསྟར་པ་ཡིན་པས་དོན་ཁྲིད་ཅེས་བྱ། འདིའི་མིང་ལ་ཐར་པའི་ཐེམ་སྐས་ཞེས་བཏགས་ཏེ། སྤྱིར་མཚན་བཏགས་པའི་དགོས་པ་ནི། མགོན་པོ་ཀླུ་སྒྲུབ་ཀྱིས། མིང་དུ་གདགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་མགོན་པོ་ཐབས་མཁས་པས། །ཆོས་རྣམས་མིང་དུ་གདགས་པར་མཛད། །ཅེས་གསུངས་པ་ལྟར་མིང་མེད་ན་ཚིག་མེད། ཚིག་མེད་ན་ཐ་སྙད་མེད། དེ་མེད་པས་འཇིག་རྟེན་ཕན་ཚུན་བརྡ་སྤྲོད་པའི་ཐབས་མེད་པས། སྐད་བརྡ་སྤྲོད་བྱེད་བཤད་བྱ་འཆད་བྱེད་མེད་པར་འགྱུར་བ་རེད། དེས་ན་འཇིག་རྟེན་གྱི་མགོན་པོས་ཐབས་ལ་མཁས་པའི་སྒོ་ནས་ཆོས་རྣམས་མིང་དུ་བཏགས་པར་མཛད་ནས་བདེན་གཉིས་ཀྱིས་བསྡུས་པའི་ཆོས་ཐམས་ཅད་གཏན་ལ་ཕབ་སྟེ། མ་འཁྲུལ་བའི་ཆོས་ཉིད་ཀྱི་དོན་དེ་བསྟན་ནས་འཁོར་བའི་སྡུག་བསྔལ་ལས་སྐྱོབ་པ་རེད། མིང་ལའང་འདོད་རྒྱལ་དང་རྗེས་གྲུབ་ཀྱི་སྒོ་ནས་འདོགས་ཚུལ་གཉིས་ཡོད། འདོད་རྒྱལ་གྱི་མིང་ནི་གཅན་གཟན་སེང་གེ་ལ་སེང་གེ་ཞེས་བཏགས་པ་ལྟ་བུ། དེའི་དོན་འགྲེལ་རྒྱུ་མེད་ལ། མི་ཁ་ཆེན་པོ་ཞིག་ལ་འདྲ་བ་རྒྱུ་མཚན་དུ་བྱས་ནས་སེང་གེ་ཞེས་བཏགས་པ་ལྟ་བུ་འདྲ་འབྲེལ་གྱི་སྒོ་ནས་བཏགས་པར་འགྲེལ་རྒྱུ་ཡོད་པ་ནི་བཏགས་མིང་རྗེས་གྲུབ་ཀྱི་མིང་ཡིན། དེས་ན་ཡི་གེ་ལས་ཀ་བ། བུམ་པ། སྣམ་བུ་སོགས་ཀྱི་མིང་བྱུང་སྟེ་དོན་གྱི་ངོ་བོ་ཙམ་སྟོན། དེས་རྩོམ་གཞིར་བྱས་ཏེ་དོན་གྱི་ཁྱད་པར་སྟོན་པའི་ཚིག་དང་བརྡ་བྱུང་བ་རེད། དཔེར་ན་རྒྱལ་པོས་བྲམ་ཟེ་ལ། བྲམ་ཟེ་ཆུ་ལ་ཅི་ཙམ་ཞིག བྲམ་ཟེས་མིའི་བདག་པོ་པུས་ནུབ་ཙམ་ཟེར་བ་ལྟ་བུ། སྒྲར་སྣང་བ། སྒྲར་གྲག་པ། བརྡར་གྱུར་པ་ཞེས་པ་དེ་འདྲ་ཡོད་དོ། །སྐབས་བབ་བསྟན་བཅོས་ཀྱི་མཚན་འདོགས་ཚུལ་ལའང་། བརྗོད་བྱ་དོན་དང་འབྲེལ་བའི་འདོགས་ཚུལ། རྗོད་བྱེད་ཚིག་དང་འབྲེལ་ནས་བཏགས་པ་ལ་སོགས་པ་མང་པོ་ཞིག་ཡོད་པ་ལས། འདིའི་སྐབས་སུ་བརྗོད་བྱ་དོན་དང་འབྲེལ་ནས་མཚན་བཏགས་པ་ཡིན་ཏེ། དཔེར་ན་སྐས་མེད་ན་ཁང་ཐོག་ཏུ་འགྲོ་མི་ཐུབ་པ་བཞིན་དུ། མན་ངག་གི་གཞུང་ལུགས་ཐེམ་སྐས་འདི་མེད་ན་ཐར་པའི་ཁང་བཟང་དུ་བགྲོད་མི་ཐུབ་པའི་རྒྱུ་མཚན་གྱིས། འདྲ་བ་རྒྱུ་མཚན་དུ་བྱས་ནས་བློ་ངོར་མིང་དོན་ལ་འབྲེལ་བ་གྲུབ་པར་འཛིན་པའི་སྒོ་ནས་མཚན་དེ་བཏགས་པས། དབང་པོ་རབ་ཀྱིས་དབུའི་མཚན་མཐོང་བས་གཞུང་དབུ་ཞབས་ཀྱི་དོན་ཐམས་ཅད་ཁོང་དུ་ཆུད་པ་དང་། འབྲིང་གིས་གང་གི་ཕྱོགས་སུ་གཏོགས་པར་ཤེས་བྱེད་དང་། ཐ་མས་ཀྱང་གླེགས་བམ་འཚོལ་སླ་བ་སོགས་ཀྱི་དགོས་པ་དང་ལྡན་པའི་སྒོ་ནས་མཚན་དེ་ལྡན་གྱི་གཞུང་དེ་ལ་གཙོ་བོར་འཇུག་པ་ཡིན་པས་ན་དེ་ལྟར་བཏགས། དེས་ན་ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་ཁྲིད་ཐར་པའི་ཐེམ་སྐས་ཞེས་བྱ་བ་བཞུགས་ཞེས་པ་ནི། མཚན་དེ་ལྡན་གྱི་དོན་དང་འབྲེལ་བའི་མན་ངག་གི་གླེགས་བམ་འདིའི་ནང་སྔོན་འགྲོ་སེམས་སྦྱོང་ཆ་ཚང་ཞིབ་རྒྱས་སུ་གསལ་བར་བཀོད་ཡོད་ཅེས་པའི་དོན་ཡིན་ནོ། །འདི་ལ་རྩིས་མགོ་ཡན་ལག་ལྔ་དང་སྦྱར་ནས་བཤད་ན། རྩོམ་པ་པོ་སུས་བརྩམས། འདིའི་བརྗོད་བྱ་གང་། ཕྱོགས་གང་དུ་གཏོགས། ལུང་གང་ལས་བཏུས། དབུ་ནས་ཞབས་སུ་བསྡུས་པའི་དོན་གང་ཡིན། དགོས་པ་གང་གི་ཆེད་དུ་མཛད་ཅེ་ན། དང་པོ་འདི་རྩོམ་པ་པོ་ནི་ཀུན་མཁྱེན་འཇིགས་མེད་གླིང་པའམ། མཚན་གཞན་མཁྱེན་བརྩེའི་འོད་ཟེར་པད་མ་དབང་ཆེན་ཡེ་ཤེས་རོལ་པའི་རྡོ་རྗེ་ཞེས་པས་མཛད། ཆོས་ཁུངས་བཙུན་པར་ཤེས་པར་བྱ་བའི་ཕྱིར་སྐབས་འདི་དང་བསྟུན་ནས་བསྟན་བཅོས་རྩོམ་པ་པོའི་ངོ་མཚར་བའི་རྣམ་ཐར་དང་། ཁྱད་པར་དུ་བསྟན་བཅོས་རྩོམ་པའི་རྒྱུ་ཚོགས་ཚང་ཚུལ་ཅུང་ཟད་བཤད་ན། འུ་ཅག་གིས་དམ་པའི་རྣམ་ཐར་གྱི་ཆ་ཤས་ཙམ་ཐོས་ནས་དད་མོས་སྐད་ཅིག་ཙམ་ཞིག་སྐྱེས་ན་ཡང་ཕན་ཡོན་བསམ་གྱིས་མི་ཁྱབ་པ་དང་ལྡན་པ་ཡིན། དེས་ན་མཛད་པ་པོའི་ཆེ་བ་རྣམ་ཐར་དང་འབྲེལ་ཏེ་རགས་ཙམ་ཞིག་ཤ་ཟིན་སྤུ་ཟིན་གྱི་ཚུལ་དུ་བརྗོད་ན། ཀུན་མཁྱེན་འཇིགས་མེད་གླིང་པ་ཚང་ནི་ས་ཆ་གང་ནས་འཁྲུངས་པའི་བླ་མ་ཞིག་ཡིན་ཞེ་ན། བོད་དབུས་གཙང་རུ་བཞི་ཞེས་པ། དབུས་ལ་དབུ་རུ་གཡོ་རུ་དང་། གཙང་ལ་གཡས་རུ་དང་རུ་ལག་ཟེར་བའི་ཐ་སྙད་ཅིག་སྔར་བོད་བཙན་པོའི་གདུང་རབས་ནའང་ཡོད། ལར་བོད་ཟེར་བའི་མིང་དེ་བྷོ་ཊ་ཞེས་པའི་བརྡའི་ཟུར་ཆག་ནས་ཐུ་བོད་ཅེས་བརྗོད་པ་དེ་ད་ལྟ་འཛམ་གླིང་སྤྱི་སྐད་ལ་ཡོངས་སུ་གྲགས་པ་ཐུ་བོད་ཐུ་ཞེས་མིང་དེ་ཐོགས་པ་རེད། བོད་ལ་བོད་དང་བོད་ཆེན་པོའི་ལྗོངས་ཞེས་གཉིས་ཀྱི་ཐ་སྙད་ཆགས་ཡོད་པ་ལས། བོད་ཆེན་པོའི་ལྗོངས་ནི། སྟོད་མངའ་རིའི་སྐོར་གསུམ་དང་། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ཐམས་ཅད་ཀྱི་སྤྱི་མིང་དུ་བཏགས་པ་ཡིན། དེ་ལྟར་སྟོད་དབུས་གཙང་ཆོས་ཀྱི་ཆོལ་ཁ། བར་མདོ་སྟོད་མིའི་ཆོལ་ཁ། སྨད་མདོ་སྨད་རྟའི་ཆོལ་ཁ་གསུམ་དུ་ཡོད་པ་ལས། ཀུན་མཁྱེན་འཇིགས་གླིང་འཁྲུངས་ས་དབུས་གཙང་ཆོས་ཀྱི་ཆོལ་ཁའི་དབུས་གཡོ་གཉིས་ལས་གཡོ་རུ་གྲ་ཡི་ཕྱོགས་སུ་འཁྲུངས། དེའང་གཡོ་རུ་གྲ་ཡི་ཕྱོགས་ཀྱི་ཀུན་མཁྱེན་ཀློང་ཆེན་པ་འཁྲུངས་པའི་ས་ཕྱོགས། རྒྱལ་བའི་དབང་པོ་ཀློང་ཆེན་པ་དང་སྐུའི་ཆོ་འབྲང་གཅིག་ཏུ་གཏོགས་པའི་ཡབ་ལས་འཁྲུངས། ཁོང་གསང་སྔགས་སྔ་འགྱུར་བའི་བསྟན་པ་དར་བའི་བསྟི་གནས། སྟོད་ན་རྡོར་སྨིན་དཔལ་གསུམ་ཞེས་པའི་སྔ་འགྱུར་གདན་ས་དྲུག་གི་ནང་ཚན་འཕྱོང་རྒྱས་དཔལ་རིའི་གདན་སར་ཚོགས་ཞུགས་མཛད། ཀུན་མཁྱེན་འཇིགས་གླིང་སྐུ་ན་ཆུང་དུས་ནས་སྙིང་རྗེ་ཆེ་ཞིང་འཛིན་ཆགས་ཆུང་བ་སོགས་དང་རྡོ་རྗེ་ཐེག་པའི་རིགས་སད་པའི་ཉམས་དང་རྨི་ལམ་དུས་རྒྱུན་དུ་འབྱུང་། སྐུ་ན་ཆུང་བའི་སྐབས་ཤིག་ཏུ་འཇིག་རྟེན་འདི་སྣང་གི་སྣང་བ་ཐམས་ཅད་རྨིི་ལམ་ལྟར་ནུབ་ནས་ཉམས་དང་རྨི་ལམ་འདྲེས་མའི་སྣང་བར་སྐྱེ་བ་སྔ་མའི་བག་ཆགས་ཐམས་ཅད་དྲན་ནས། རྒྱའི་ལོ་ཙཱ་བའི་སྐྱེ་བ་བཞེས་སྐབས་ཀྱི་གསལ་སྣང་ཤར་ཚུལ། ཆུ་ཀླུང་ཆེན་པོ་འབབ་པའི་འགྲམ་དུ་རྡོ་ཕ་བོང་ཆེན་པོའི་སྟེང་ན་རྒྱའི་ལུགས་ཀྱི་བཙུན་པའི་ཆས་སྟོད་ལྭ་སེར་པོ་ཞིག་གྱོན་ནས་ཉམས་འ་འུར་གྱི་སྤྱོད་པ་བྱུང་རྒྱལ་དུ་བསྐྱངས་པ་དྲན་རབས་རང་རྣམ་དུ་གསུངས་ཡོད། གུ་རུའི་ལུང་བསྟན་ལས། བསྟན་པ་བྱེར་ཟུག་སྐབས་སུ་ངའི་སྤྲུལ་པ། །ཟ་ཧོར་རྒྱལ་པོ་གཙུག་ལག་འཛིན་རྗེས་བཟུང་། །སེམས་ཅན་གང་གི་དོན་བྱེད་མ་འོངས་དུས། །དེ་ཝ་ཨ་ཀར་ཙནྡྲ་རི་རྒྱལ་གླིང་། །དེ་ནས་ཚེ་འཕོས་ཡིད་གཉིས་ཆ་མ་མཆིས། །ཕྱི་རབས་འབྱུང་འགྱུར་སངས་རྒྱས་བླ་མ་སྟེ། །དེ་ནས་ཚེ་འཕོས་རྒྱ་ཡི་ལོ་ཙཱ་ཞེས། །དེ་ནས་ཉི་མ་སེང་གེ་སྟོད་གཏེར་དབང་། །གཤེད་མ་བརྒྱ་ཡིས་བསྐོར་ཀྱང་ཉམ་མི་ང་། །གཏེར་སྟོན་རྐྱང་པའི་སྐྱེ་བ་བཅུ་གསུམ་ལེན། །ཞེས་གསུངས་ཡོད། ཁོང་སྐུ་གཞོན་དུས་སུ་ཐུན་མོང་རིག་པའི་གནས་ལ་སློབ་སྦྱོང་ཆེན་པོ་མ་དགོས་ཤིང་། སྦྱོང་རྩོལ་ལ་མ་ལྟོས་པར་སྐྱེས་ཐོབ་ཀྱི་ཤེས་རབ་རྨད་དུ་བྱུང་བ་ཡོད་པས། གཟིགས་པ་ཙམ་གྱིས་མི་མཁྱེན་མི་དགོངས་པ་ཞིག་མེད་པར། མི་ཕལ་པས་ལོ་དང་ཟླ་བས་སྦྱང་དགོས་པ་དང་། ད་དུང་སྦྱངས་ནས་ཤེས་ན་ཤེས་རབ་ཅན་དུ་བརྩི་བ་ཐུན་མོང་དང་ཐུན་མིན་གྱི་ཤེས་བྱ་ཚང་མ་ཁོང་གིས་མིང་ཙམ་མཐོང་བ་དང་། ཟུར་ཙམ་གཟིགས་པས་ཀྱང་དོན་མཐའ་དག་རྟོགས་ཐུབ་པ་དེ་འདྲ་ཞིག་ཡིན། དེའི་སྟོབས་ཀྱིས་རྒྱལ་བའི་བཀའ། དགོངས་འགྲེལ་གྱི་བསྟན་བཅོས། ཐ་སྙད་ཀྱི་གཞུང་ལ་སོགས་པ་དེ་དག་ཐམས་ཅད་མི་མཁྱེན་པ་གཅིག་ཀྱང་མེད་པས་ཀུན་མཁྱེན་ཞེས་པའི་མཚན་དང་དོན་མཚུངས་ལ། ཁྱད་པར་དུ་དཔལ་གྱི་བསམ་ཡས་མཆིམས་ཕུའི་གསང་ཆེན་མེ་ཏོག་ཕུག་ཏུ་ལོ་གསུམ་སྙིང་པོའི་སྒྲུབ་པ་ལ་གཞོལ་བའི་སྐབས་སུ། རྒྱལ་བ་ཀློང་ཆེན་པའི་ཡེ་ཤེས་ཀྱི་སྐུ་དང་ལན་གསུམ་དུ་མཇལ་ཞིང་། བརྡ་ཐབས་རྟེན་འབྲེལ་དུ་མའི་སྒོ་ནས་བྱིན་གྱིས་བརླབས་པ་ལ་བརྟེན་ནས། ཁོང་གི་ལས་འབྲེལ་རྫོགས་པ་ཆེན་པོ་ནས་སད་པ་ཡིན་ཞེས་ཉིད་ཀྱིས་གསུངས་ཡོད། དེའི་སྔོན་དུ་གྲུབ་དབང་ཐུགས་མཆོག་རྡོ་རྗེ་དང་། གནས་བརྟན་ཀུནབཟང་འོད་ཟེར་ལ་སོགས་པ་ཡོངས་འཛིན་གསར་རྙིང་གི་མཁས་གྲུབ་མང་པོ་བསྟེན། མདོ་སྔགས་ཀྱི་ཆོས་ཚུལ་དབང་ལུང་ཁྲིད་རྒྱུན་བསམ་གྱིས་མི་ཁྱབ་པ་མང་པོའི་བརྒྱུད་པ་བཞེས། ཁོང་གི་ཞལ་ནས་ཤྲཱི་པརྤ་ཏའི་ཆོས་གླིང་ན་ཞེས་གསུངས་པས། འཕྱོང་རྒྱས་དཔལ་རི་ནས་ལོ་གསུམ་གྱི་དམ་བཅའ་སྙིང་ནས་མཛད་དེ། ཕུག་སྒོར་འདག་སྦྱར་གྱིས་སྒྲུབ་པ་སྙིང་པོར་མཛད་པའི་དུས་སུ། དགོས་མེད་ཀྱི་ཞེན་ལོག སྐྱོ་ཤས་དང་ངེས་འབྱུང་། བཅོས་མིན་གྱི་དད་པ། སེམས་ཅན་ལ་སྙིང་རྗེ་ལ་སོགས་པ་ལམ་རྟགས་ཀྱི་ཡོན་ཏན་འཕེལ་རབས་མང་པོ་ཡོད། ཨོ་རྒྱན་ཆོས་ཀྱི་རྒྱལ་པོ་དང་། རིག་འཛིན་འཇམ་དཔལ་གཤེས་གཉེན་སོགས་འོད་གསལ་གྱི་ངང་ནས་མཇལ་ཏེ། བརྡ་དོན་སྤྲོས་པ་མེད་པའི་དབང་མང་པོ་བསྐུར་ནས་མཐར་རང་ཉིད་ལ་ཐིམ་པའི་ཉམས་ཡོང་བ་དང་། དེ་ཕྱིན་ཆད་ཉམས་ཀྱི་འཛིན་སྟངས་ཞིག ལས་རླུང་དབང་དུ་གྱུར། སྣང་བའི་རྫུན་ཕུག་རྡིབ། ཤེས་པ་ལ་བརྟུལ་ཞུགས་ཀྱི་ངར་ཐོབ། བསྒོམས་ནས་ཟླ་བ་གསུམ་ཙམ་སོང་ཚེ་རང་ལུས་མེ་རུ་སྦྱོང་བ་ནམ་མཁར་སྐྱིལ་ཀྲུང་དུ་བཞུགས་པ་དང་། དེ་སྐབས་ནས་བཟུང་ལུས་ལ་སྲིན་བུ་རྣམས་མི་འབྱུང་། ཞེས་པ་ལྟར་ལུས་ཀྱི་སྲིན་བུ་རྣམས་དག སྣང་བ་བདེན་མེད་སྒྱུ་མ་ལྟ་བུར་འགྲོ་བ་ཉམས་སྣང་ལ་ཡང་ཡང་བྱུང་པས། མདོ་སྡེ་ཏིང་འཛིན་རྒྱལ་པོ་དང་། སྒྱུ་མ་ངལ་གསོའི་མན་ངག་སོགས་ཉམས་འོག་ཏུ་ཆུད་པར་གསུངས། བསྐྱེད་རྫོགས་ལ་ཉམས་ལེན་གནད་དུ་བསྣུན་ནས་ལོ་གསུམ་གྱི་ཚེ་ན་ཡི་གེ་མེད་པའི་སྙན་བརྒྱུད་རྩལ་འདོན་གྱིས་བུམ་པ་ཅན་གྱི་རླུང་ཐུན་བཞི་ཆག་མེད་མཛད་པའི་སྟོབས་ཀྱིས། དུས་སྦྱོར་བཞིའི་འཕོ་བ་རྫོགས་ནས་ཡེ་ཤེས་ཀྱི་རླུང་དྷུ་ཏུར་ཞུགས་གནས་ཐིམ་གསུམ་གྱི་རྟགས་ཕལ་ཆེར་ཤར། རྩ་ཁམས་ཡི་གེའི་རྣམ་པར་གྲོལ་བས་མགྲིན་པ་རྡོ་རྗེའི་གླུའི་དཀོར་མཛོད་དུ་གྱུར་ཚུལ་དང་། དེ་དང་མཉམ་དུ་སྒོམ་བྱུང་གི་ཤེས་རབ་ཀློང་བརྡོལ་ནས་རིག་རྩལ་ཆོས་རབ་རྣམ་འབྱེད་ཀྱི་སྣང་འཆར་སོ་སོར་རྟོགས་པའི་རྩལ་འབར། སྲོག་ཐུར་འདྲེས་པས་ལྟེ་བ་སྤྲུལ་པའི་འཁོར་ལོ་རིལ་བ་ཞབས་ཚགས་ཅན་དུ་སོང་། བྱང་ཆུབ་ཀྱི་སེམས་རིན་པོ་ཆེ་རྡོ་རྗེ་ནོར་བུར་བརྟན་པས་བདེ་སྟོང་གི་ཡོན་ཏན་དཔག་ཏུ་མེད་པར་སྐྱེས། ཡི་དམ་མང་པོའི་བསྙེན་སྒྲུབ་ཀྱིས་སྒོ་གསུམ་རྡོ་རྗེ་གསུམ་དུ་གོ་འཕོ་བའི་བསྐྱེད་རིམ་ལ་གནད་དུ་བསྣུན། དེའི་རང་བཞིན་རྫོགས་རིམ་མཉམ་བཞག་ཆེན་པོ་དང་བསྲེ་བའི་སྒོ་ནས་བསོད་ནམས་དང་ཡེ་ཤེས་ཀྱི་ཚོགས་མཉམ་པོར་རྫོགས་པའི་སྟོབས་ཀྱིས་རྣམ་སྨིན་རིག་འཛིན་གྱི་འབྲས་བུ་བརྙེས། ལུས་རུས་སྦལ་འཁར་གཞོང་དུ་བཞག་པ་ལྟ་བུ་ལ་སོགས་པ་རྫོགས་པ་ཆེན་པོའི་ཆོས་ཉིད་མངོན་སུམ་པའི་ལམ་རྟགས་སྒྲ་ཇི་བཞིན་པར་མངོན་དུ་གྱུར། ད་དུང་དེའི་མུ་མཐུད་ནས་ལྕེ་བཙུན་སེང་གེ་དབང་ཕྱུག་གི་རྣམ་ཐར་འཁྱོངས་ན་ཁོང་འཇའ་ལུས་སུ་ཕེབས་རྒྱུའི་ས་ཚོད་ལ་སླེབས་ཡོད་པར་ཁོང་གི་གསུང་གིས་ཤེས་ལ། སྐབས་དེ་ཙམ་ན་ཆོས་སྐུ་ཡེ་ཤེས་ཀྱི་མཁའ་འགྲོ་མས་ཀློང་བྱང་ཡེ་ཤེས་ཀྱི་བརྡ་རིས་སྤྲད་པ། ཁོང་གི་རྟོགས་བརྗོད་ཆུ་ཟླའི་གར་མཁན་དུ་གསུངས་པ་ལྟར་ཆོས་སྐུ་ཡེ་ཤེས་ཀྱི་མཁའ་འགྲོ་མས་ཀློང་བྱང་ལྗོན་ཤིང་ལ་བྲིས་པའི་ཟ་མ་ཏོག་ལི་ལྕགས་དཀར་པོའི་རྣམ་པ་ཞིག་གཏད་ནས། དག་པའི་འཁོར་གྱི་སྣང་བ་ལ། །ཁྱེད་ནི་ཁྲི་སྲོང་ལྡེའུ་བཙན་ཡིན། །མ་དག་གདུལ་བྱའི་སྣང་བ་ལ། །ཁྱེད་ནི་སེང་གེ་རས་པ་ཡིན། །ཀུན་ཏུ་བཟང་པོའི་ཐུགས་ཀྱི་གཏེར། །རིག་པ་འཛིན་པའི་ཀློང་ཆུབ་བདུན། །མཁའ་འགྲོའི་གསང་མཛོད་ཆེན་པོ་ཡིན། །ཞེས་པའི་བརྡ་གསུངས་ནས་དམིགས་མེད་དུ་ཡལ་སོང་བ་དང་། དེ་ནས་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཀློང་བྱང་ཐུགས་ཀྱི་སྒྲོམ་བུ་བརྡ་བསྒྱུར་གསང་བའི་གལ་མདོ། བློས་བཀོད་པ་མ་ཡིན་པའི་ཡི་གེ་དེ་ཚོ་དགོངས་གཏེར་དུ་བབ། དེ་ནས་དགུང་ལོ་སུམ་ཅུ་ནང་སོན་པའི་ཚེ་བསམ་ཡས་མཆིམས་ཕུའི་དང་པོ་ཉང་བན་ཏིང་འཛིན་བཟང་པོའི་སྒྲུབ་ཕུག་ཏུ་བཞུགས་ནས་དཀའ་བ་སྤྱད། བྲག་ཕུག་དེས་ཆར་རླུང་མི་ཁོག་པར་ཕྱི་ནང་ཁྱད་མེད་དུ་གྱུར་ཀྱང་དེར་སྙིང་རུས་ཀྱིས་སྒྲུབ་ཚུགས་བཟུང་སྟེ་བཞུགས་པའི་ཚེ། སྐབས་ཤིག་ན་རྒན་པོ་ཞིག་གིས་སྒྱེ་དཀར་པོ་ཞིག་གཡར་བ་དེ་ཉིན་མཚན་གཉིས་ཀྱི་གོས་གདན་གཉིས་ཀའི་ཚབ་བྱས་ནས་མི་ལ་རས་པ་དང་། ཀློང་ཆེན་པའི་རྣམ་ཐར་བསྐྱངས་ཏེ་སྒྲུབ་ལ་དཀའ་ཐུབ་མཛད་ཚུལ་དང་། དེར་བཞུགས་སྐབས་དང་པོ་གསོལ་ཆས་ཅུང་གསོལ་རྒྱུ་ཡོད་ཀྱང་བར་སྐབས་དེ་ཡང་ཆད་ནས། ཁོང་གི་གསུང་ལས། ཇ་སྡོར་ལ་སོགས་པ་བཅུད་ལྡན་གྱི་ཟས་རྣམས་འཇའ་ལུས་འགྲུབ་ཏུ་ཉེ་བ་ན། སྔར་སྐྱིད་པོ་མ་གཏོགས་སྡུག་པོ་ཞིག་མ་མྱོང་ཡང་། ཨོ་རྒྱན་ཆེན་པོའི་སྒྲུབ་གནས་སུ་སྙིང་པོ་དོན་གྱི་བསྒྲུབ་པའི་རྒྱལ་མཚན་འཛུགས་པ་འདི་བསོད་ནམས་གང་ལས་ཀྱང་ཆེ། ཟས་དཀའ་ཐུབ་བཅུད་ལེན་རྐྱང་པ་ལ་བརྟེན་ནས་འདུག་དགོས་བྱུང་ཡང་བསྒྲུབ་པའི་དམ་བཅའ་མི་ལྡོག་སྙམ་པའི་ཞེ་བཅད་དྲག་པོར་སྐྱེས་ཞེས་གསུངས་པ་དང་། དེ་དུས་ཁོང་གིས་མགུར་གསུངས་པ་འདི་ལྟར། གནས་དབེན་པའི་བྲག་ཕུག་བསམ་གཏན་གྱི་རྫོང་ཆེན། །འཁོར་འདུ་འཛིའི་ཁ་རུལ་ཞེན་ཆགས་ཀྱི་རྩ་བ། །ང་རི་སུལ་འགྲིམ་པ་ཡུལ་མེད་ནི་མ་ལགས། །རྗེ་གྲུབ་ཐོབ་གོང་མའི་ཤུལ་ལམ་དུ་འདུག་གོ །གནས་བདག་འཛིན་གྱིས་ང་བདག་ཞེན་པ་དང་གཅིག །རྡོ་ངོས་འཇམ་གྱིས་རྩིག་པའི་ས་མཁར་དང་གཉིས། །ཐུག་དར་ཅོག་གིས་བརྒྱན་པའི་གནས་ཁང་དང་གསུམ། །འདི་གསུམ་བསྒྲུབ་ན་སྤྲང་པོས་ཀྱང་འགྲུབ་ཚོད་ནི་གདའ་སྟེ། །ཚེ་ངེས་མེད་འདི་བསམ་ནས་བྲག་ཕུག་བཟུང་བ་ལགས། །ཞེས་པ་ལ་སོགས་པ་མི་ལའི་མགུར་འདྲ་བ་མང་པོ་གསུངས་ཡོད། ཡང་ཕ་པད་འབྱུང་དང་དགའ་རབ་ཤྲཱི་སེང་། །རྗེ་མི་ལ་དང་ལོ་རས་དྭགས་པོ་སོགས། །ཁོང་ཕྱག་རྫོགས་ཀྱི་པཎ་གྲུབ་ཐམས་ཅད་ཀྱིས། །གནས་བྲག་ཁུང་བཟུང་ནས་དངོས་གྲུབ་ཐོབ། །བདག་དེ་དག་ལ་མིག་ལྟོས་ཞུ་བ་ལགས། །རྗེ་ཀློང་ཆེན་དང་ཟུར་པ་མེས་དབོན་གསུམ། །ཁོང་རྫོགས་ཆེན་མཆེད་བཞིའི་རྣམ་ཐར་གྱི། །མི་ཁོ་བོའི་ཡིད་ཁ་ཕྲོགས་པ་ལས། །འུད་ཆེ་ཚད་ལ་བ་སྤུ་མི་ལྡང་ཙམ། །སྤྲང་ལྟོས་མེད་ཀྱི་སྤྱོད་པ་སྐྱོང་བ་ལགས། །སོགས་དེ་འདྲའི་ཉམས་མགུར་རྡོ་རྗེའི་ཚིག སྤྲོས་བྲལ་དོ་ཧ་ཟབ་མོ་གསུངས་པ་མི་ལའི་མགུར་ལས་མ་མང་ན་མི་ཉུང་། དེའི་རྗེས་ཤིག་ན་ལྷན་སྐྱེས་ཀྱི་ཌཱཀྐིས་བརྡ་རྟགས་ལྟར་གསང་ཆེན་མེ་ཏོག་ཕུག་གི་མཚོ་རྒྱལ་གསང་ཕུག་སྟེ། དེང་སང་བསམ་ཡས་མཆིམས་ཕུར་མཇལ་དུ་ཡོད་པའི་མཁའ་འགྲོ་ཡེ་ཤེས་མཚོ་རྒྱལ་གྱི་གཟིམ་ཕུག་ཡིན་ཟེར་བ། གུ་རུ་རིན་པོ་ཆེ་བྲག་དམར་ཀེའུ་ཚང་ན་བཞུགས་པའི་སྐབས་ཤིག་ན། པདྨ་བཀའ་ཐང་དུ་གསུངས་པ་ལྟར། རྒྱལ་པོ་ཁྲི་སྲོང་ལྡེ་བཙན་གྱི་སྲས་མོ་ལྷ་ལྕམ་པད་མ་གསལ་བསྙུན་ནས་ནམ་དགུང་རྒོད་མ་དཀར་མོར་བཀལ་ཏེ་གུ་རུའི་དྲུང་དུ་བྱིན་རླབས་ཞུར་འོང་བའི་ཚེ་ན། གུ་རུས་རྫུ་འཕྲུལ་གྱིས་ཕྱག་གི་རྡོ་རྗེ་འཕངས་པས་མཁའ་འགྲོ་ཡེ་ཤེས་མཚོ་རྒྱལ་ཏིང་ངེ་འཛིན་ལས་བཞེངས་ཏེ། གུ་རུ་དང་རྒྱལ་པོའི་དྲུང་དུ་བྱོན་པའི་ལོ་རྒྱུས་ཡོད་པ་ཡེ་ཤེས་མཚོ་རྒྱལ་གྱི་གཟིམ་ཕུག་གསང་ཆེན་མེ་ཏོག་ཕུག་ནི་འདི་རེད་ཅེས་ཀུན་མཁྱེན་འཇིགས་གླིང་གིས་ངོས་འཛིན་མཛད་པ་རེད། ལྷན་སྐྱེས་ཡེ་ཤེས་ཀྱི་ཌཱཀྐིས་བརྡ་རྟགས་ལྟར་གསང་ཆེན་མེ་ཏོག་ཕུག་ཏུ་བཞུགས་པའི་ཚེ་ན། རྒྱལ་བ་གཉིས་པ་ཀློང་ཆེན་པའི་ཡེ་ཤེས་ཀྱི་སྐུ་ལན་གསུམ་མཇལ་བས་བརྒྱུད་གསུམ་དགོངས་པའི་རྟོགས་པདབྱེར་མེད་གྱུར། དགོངས་རྒྱུད་རྟོགས་པའི་བྱིན་རླབས་ཐུགས་ཡིད་ལ་འཕོས། ཇི་ལྟར་འཕོས་ན། ཇི་ལྟ་བའི་དགོངས་བརྒྱུད་རྒྱལ་དབང་པད་མ་ཡབ་ཡུམ་དང་རྒྱལ་བ་ཀློང་ཆེན་རབ་འབྱམས་ཀྱི་ཐུགས་རྒྱུད་ཐུགས་ལ་འཕོས་ཏེ། ཇི་སྙེད་པ་མཁྱེན་པའི་ཡེ་ཤེས་དབྱར་གྱི་ཆུ་མཚོ་ལྟར་བརྡོལ་ཏེ། གསུང་རྡོ་རྗེའི་དོ་ཧ་ལས། བླ་མ་བཟང་པོ་ཨོ་རྒྱན་ཆོས་རྗེ་ལ་ཞུས་པས། །བྱིན་རླབས་ཟབ་མོ་དགོངས་རྒྱུད་སྤྲོས་བྲལ་དེ་བབ་བྱུང་། །ལྟ་སྒོམ་ཡེ་བབས་སྐུ་གསུམ་ལྷུན་གྲུབ་འདི་དགའ་འོ། །ཉམས་ལེན་བྱར་མེད་བློ་འདས་ཡེ་གྲོལ་འདི་སྐྱིད་དོ། །དག་སྣང་ཟབ་མོ་དྲི་མེད་འོད་ཟེར་ལ་ཞུས་པས། །ཐུགས་སྲས་བདེ་ཆེན་རྟོགས་གྲོལ་དུས་མཉམ་ལ་ལོན་བྱུང་། །སྐད་ཅིག་འདུ་རྩོལ་བྱེད་འདོད་མ་དགོས་པ་དགའ་འོ། །ཡི་དམ་བཟང་པོ་པད་མ་སྙིང་ཏིག་ལ་ཞུས་པས། །བསྐྱེད་རིམ་ཟབ་མོ་སྣང་སྟོང་ཟུང་འཇུག་དང་མཇལ་བྱུང་། །རང་སེམས་མངོན་རྫོགས་ལྷ་སྐུར་སོང་བ་དེ་དགའ་འོ། །རྣམ་སྨིན་རིག་འཛིན་ཚེ་འདིར་ཐོབ་པ་དེ་སྐྱིད་དོ། །ལ་སོགས་གསུངས་ཡོད། དེའི་སྐབས་སུ་ཀོང་སྨྱོན་སྦས་པའི་རྣལ་འབྱོར་སོགས་དངོས་ཡོད་མིའི་སློབ་མ་དང་། ཞིང་སྐྱོང་ཚེ་རིང་མཆེད་ལྔ་ལ་སོགས་པ་གནས་ཡུལ་གྱི་དཔའ་བོ་ཌཱཀྐི་མི་མིན་གྱི་སློབ་ཚོགས་འདུས་པར་མ་ཟད། བཀའ་སྲུང་མ་མོ་དང་མགོན་པོ་སོགས་ཀྱིས་འབྲལ་མེད་ཅི་གསུངས་ཀྱི་བཀའ་སྒྲུབ་པ་མཐོང་ཆོས་ཡིན། ཀོང་སྨྱོན་དཔའ་བོའི་དབང་ཕྱུག་དང་། ཌཱཀྐི་ཚེ་རིང་མཆེད་ལྔ་སོགས་ཆོས་ཀྱི་རྔ་ཆེན་རྡུང་བ་དང་། གསང་མཛོད་ཐུགས་ཀྱི་སྒོ་ཆེན་འབྱེད་པའི་ལྡེའུ་མིག་ལྟ་བུའི་ཐུན་མིན་གྱི་སློབ་ཆེན་དུ་གྱུར། དེའི་མཚམས་སུ་ཁོང་བྱང་ཆུབ་ལྗོན་པའི་ཚལ་ཚེ་རིང་ལྗོངས་པད་མ་འོད་གླིང་དུ་བཞུགས་རྒྱུའི་རྟེན་འབྲེལ་འགྲིགས། མི་མིན་ཌཱཀྐི་ཆོས་སྐྱོང་གིས་དུས་རྟག་ཏུ་བསྙེན་ཅིང་བཀུར་སྟི་མཛད་པ་དང་། ཀློང་ཆེན་དགོངས་པའི་གསང་མཛོད་ཐང་མར་བརྡལ་ཞིང་འགགས་མེད་རྡོ་རྗེའི་གསུང་གི་གཏེར་ཆེན་པོ་ཐོལ་བྱུང་དུ་རྡོལ་བས་མི་ཟད་ནམ་མཁའ་མཛོད་ཀྱི་ཆོས་གཏེར་ཆེན་པོ། སྤྱི་བསྟན་པའི་མཛེས་རྒྱན་དུ་བཞག་པའི་མཛད་པ་བསྐྱངས་རབས་ཀྱི་ལོ་རྒྱུས་དེ་འདྲ་རེད། དེའི་སྔོན་རྗེས་སུ་རིས་མེད་གསར་རྙིང་གི་མཁས་གྲུབ་མང་པོས་རྗེ་བླ་མ་གང་གི་ཞབས་པད་སྤྱི་བོས་བླངས་ཏེ་སྒྲུབ་པའི་སྲོག་མཁར་འཛུགས་མཁན་གང་མང་བྱུང་ཞིང་། ཁྱད་པར་དུ་བརྒྱུད་པ་འཛིན་པའི་ཐུགས་སྲས་ཀྱི་བུ་ཆེན་ཁམས་པ་འཇིགས་མེད་མི་བཞི་ལ་སོགས་པ་སློབ་བརྒྱུད་ནམ་མཁའི་སྐར་གྲངས་ལྟར་མང་པོ་བྱོན། བཀའ་གཙིགས་བཀའ་ཆེམས་ལ་བསམ་བློ་གཏོང་ན། འཛམ་གླིང་མཛེས་པར་བྱེད་པའི་རྒྱན་དྲུག་མཆོག་གཉིས་དང་། ཀུན་མཁྱེན་རྒྱལ་བ་ཀློང་ཆེན་པའི་གསུང་དང་གཉིས་སུ་མ་མཆིས་པའི་ཤིང་རྟ་རྣམ་གཉིས། ཁྲིད་ཡིག་ཡེ་ཤེས་བླ་མ་ལ་སོགས་པ་སྙིང་ཐིག་པོད་དགུ་ཆ་ལག་དང་བཅས་པ་དེ་ཆོས་སྐུ་རིང་བསྲེལ་གྱི་ཕུང་པོ་བསྟན་པའི་བཙས་སུ་བཞག་སྟེ། གངས་ཅན་མཐའ་དབུས་ཀྱིས་གཙོས་པའི་འཛམ་གླིང་ཡོངས་ལ། རྫོགས་པ་ཆེན་པོ་ཀློང་ཆེན་སྙིང་ཐིག་གི་བསྟན་པ་དཀར་འབྱམས་ཡུག་གཅིག་ཏུ་བརྡལ་བས་ད་ལྟའི་བར་དུ་མ་ཉམས་པར་བཞུགས་ཡོད་པ་འདི་ཡིན། སྐུ་ཚེའི་སྨད་ཀྱི་ཚེ་སྙན་གྲགས་ཕྱོགས་ཀྱི་ཁོར་ཡུག་ཏུ་ཁྱབ་པས་བོད་མཐའ་དབུས་ཀྱི་ཆེ་དགུ་གཉེན་དགུ་ཐམས་ཅད་ཀྱིས་གཙུག་རྒྱན་དུ་བཀུར་ཏེ། འདུ་བ་རྣམ་གསུམ་དབྱར་གྱི་མཚོ་ལྟར་རྒྱས། འབར་བ་རྣམ་གསུམ་དུས་མཐའི་མེ་ལྟར་འབར་ཡང་། འདི་སྣང་ཆོས་བརྒྱད་ཀྱིས་ཐུགས་མ་འཕྲོག་པར་ཐུབ་བསྟན་ལུང་རྟོགས་ཀྱི་སྙིང་པོ་སྔ་འགྱུར་བཀའ་གཏེར་གྱི་ཟབ་ཆོས་མཐའ་དག་གི་རྒྱུན་སྤེལ་བ་དང་། སྐྱེ་དགུ་ཐམས་ཅད་ཀྱི་བསོད་ནམས་གསོག་པའི་ཞིང་ས་ཁྱད་པར་ཅན་བདེ་བར་གཤེགས་པའི་སྐུ་གསུང་ཐུགས་རྟེན་བཞེང་རྒྱུ། དགེ་འདུན་གྱི་སྡེ་གང་ན་བཞུགས་པ་ལ་སྐུ་འགྱེད་དང་མང་ཇ་མཆོད་འབུལ་ལ་སོགས་པ་རྒྱ་ཆེན་པོ་མཛད་པའི་ལོ་རྒྱུས་ཡོད། ལྷག་པར་དད་འབུལ་གྱི་དངོས་པོ་དཀོར་ནོར་ཐམས་ཅད་རླུང་འཁྱེར་གྱི་རྫས་བཞིན་དུ་སྲོག་བླུ་མཆོད་འབུལ། ཚོགས་འཁོར་སྐོང་བཤགས་ལ་སོགས་པ་མཛད་པའི་ཕྱག་སྲོལ་ཕྱི་རབས་སློབ་མའི་མིག་ལྟོས་དུ་བཞག་པར་མཛད་དོ། །མདོར་ན་རྒྱལ་བའི་བསྟན་པ་ཡོངས་རྫོགས་ཀྱི་ཕྱི་མོ་རྙིང་བསྟན་རི་མོའི་མར་མེ་ལྟར་གྱུར་པའི་གནས་སྐབས་ན། ཀུན་མཁྱེན་ཆོས་ཀྱི་རྒྱལ་པོའི་ལུང་རྟོགས་བསྟན་པའི་ཆོས་ཀྱི་ཁྲི་ཆེན་པོ་ལ་རང་སྟོབས་ཀྱི་འགྱིངས་ཏེ། སྔ་འགྱུར་རྡོ་རྗེའི་ཐེག་པ་ལ་བཀའ་དྲིན་བསྐྱངས་བ་དེ་ནི་བསྟན་འཛིན་ཡོངས་ཀྱི་བླ་ན་འཕགས་པ་ནི། དེ་རིང་ཁ་སང་ལ་བསམ་བློ་གཏོང་ན་གླིང་ལྔ་མཚོ་བཞིར་གནས་པའི་མགོ་སེར་ནག་སྐད་རིགས་མི་གཅིག་པ་ཚང་མས་རྫོགས་ཆེན་ཀློང་ཆེན་སྙིང་ཐིག་ཟེར་ནས་དོན་གཉེར་བྱེད་ཀྱིན་ཡོད་པ་འདི་ཡིན། འདིའི་བསྟན་པ་འདི་ཇི་སྲིད་འཁོར་བ་མ་སྟོངས་ཀྱི་བར་དུ་བཞུགས་པ་ཡིན། དམ་པ་འདི་ཉིད་སྐུ་གཞོན་ནུའི་དུས་སུའང་ཟབ་དོན་སྙིང་ཐིག་གི་མན་ངག་ཀ་དག་ཁྲེགས་ཆོད་དང་། ལྷུན་གྲུབ་ཐོད་རྒལ་སྒྲོན་དྲུག་སྣང་བཞིའི་རྣལ་འབྱོར་ལ་གོམས་ནས་བློ་ཟད་ཆོས་ཟད་ཆོས་སྐུའི་དགོངས་པ་མངོན་དུ་བརྙེས་ནས། ཟག་བཅས་ཀྱི་ཕུང་པོ་རྡུལ་ཕྲན་གྱི་སྙིགས་མ་ཡང་མི་ལུས་པར་འཇའ་ལུས་འཕོ་ཆེན་གྱི་སྐུར་བཞེང་རྒྱུ་ལ་ཐེ་ཚོམ་མི་དགོས་ཀྱང་། སངས་རྒྱས་བཅོམ་ལྡན་འདས་ཀྱིས་སེམས་ཅན་ཐམས་ཅད་ཀྱིས་དེ་བཞིན་གཤེགས་པ་མཇལ་བ་དཀོན་པའི་འདུ་ཤེས་དང་། རྟག་འཛིན་གྱི་བསམ་པ་དོར་ནས་མྱུར་དུ་དམ་ཆོས་བསྒྲུབ་པའི་ཆེད་དུ་སྐུ་མྱ་ངན་ལས་འདའ་བའི་ཚུལ་བསྟན་པ་བཞིན་དུ། ཀུན་མཁྱེན་འཇིགས་མེད་གླིང་པ་ཡང་ས་ཕོ་རྟ་ཡི་ལོ་དབྱུ་གུ་ཟླ་བའི་ཚེས་གསུམ་གྱི་མཚན་ཐུན་དང་པོར་དྲང་སྲོང་ཙོག་པུའི་བཞུགས་སྟངས་མཛད་དེ། གདོད་མའི་ནང་དབྱིངས་སུ་གཟུགས་སྐུའི་བཀོད་པ་བསྡུས་པའི་ཚུལ་བསྟན་རབས་སོགས་རྣམ་ཐར་དུ་གསུངས་ཡོད། ཀུན་མཁྱེན་འཇིགས་གླིང་ཁོང་སྔོན་རྒྱལ་པོ་ཀྲི་ཀྲིའི་སྲས་སུ་འཁྲུངས་དུས་སངས་རྒྱས་འོད་སྲུང་གི་མདུན་དུ་བྱང་ཆུབ་མཆོག་ཏུ་ཐུགས་བསྐྱེད། དེ་ནས་བདག་ཅག་གི་སྟོན་པ་མཉམ་མེད་ཤཱཀྱ་སེང་གེའི་གཅུང་དུ་འཁྲུངས། བོད་ཀྱི་རྒྱལ་པོ་སྲོང་བཙན་གྱི་དུས་སུ་དགེ་སློང་ཨ་ཀ་མ་ཏིའི་སྐྱེ་བ་བཞེས་པ་ནས་མཁན་སློབ་ཆོས་གསུམ་གྱི་སྐུ་དུས་སུ་བི་མ་དང་རྒྱལ་སྲས་ལྷ་རྗེའི་ཚུལ་བསྟན་ནས། སྐྱེ་བ་ཐམས་ཅད་དུ་བསྟན་འགྲོའི་དོན་ཆེན་དཔག་ཏུ་མེད་པ་བསྒྲུབས་ཏེ་ཉིད་ཀྱི་ཞལ་ནས། བྱ་དང་རི་དྭགས་གྲོང་ཁྱེར་སློང་མོ་བ། །གང་ལ་གང་འདུལ་དེ་ལ་དེར་མཐུན་དུ། སྣ་ཚོགས་གཟུགས་ཀྱིས་འགྲོ་བ་འདུལ་བར་ཤོག །ཅེས་གསུངས་པ་ལྟར། སེམས་ཅན་གྱི་ཕན་བདེའི་ཆེད་དུ་སྤྲུལ་པ་རྒྱུན་མི་འཆད་པར་མཛད་ཡོད་པའི་ཚུལ་དེ་འདྲ་རེད། རྒྱལ་བ་ཀློང་ཆེན་པའི་ཡང་སྤྲུལ་ཡིན་པར་དངོས་སུ་གསུང་མཁན་ཡང་ཡོད། མདོར་ན་བྱང་ཆུབ་ཀྱི་སྤྱོད་པ་རླབས་ཆེན་རྒྱ་མཚོ་ལྟ་བུ་བསྒྲུབས་ནས། མ་འོངས་པ་བསྐལ་པ་བཟང་པོ་འདིར་སངས་རྒྱས་རྣམ་པར་རྒྱལ་བ་ཅན་དུ་སངས་རྒྱས་རྒྱུ་ཡིན་པར་ཁོང་གི་ཞལ་ཆེམས་ཤོག་དྲིལ་དང་པོ་སྐུ་མྱ་ངན་ལས་མ་འདས་པའི་སྔོན་དུ་བཞག་པ་དེའི་ནང་གསལ་པོར་འཁོད་ཡོད་པ་རེད། ད་དུང་དེའི་ནང་དུ་ཁོང་གི་སྤྲུལ་པ་མང་པོ་ཡོད་གསུངས་ལ། དེའང་སྤྲུལ་པ་སྒྱུ་མ་ལྟ་བུས་སེམས་ཅན་འདུལ་བའི་སྐྱེ་བ་མི་འོང་བའི་ངེས་པ་མེད་པས་དབང་ཆས་དེ་ཚོ་མ་ཉམས་པར་ཞོགས་དང་། སྐྱེ་སྲིད་དེ་ཕར་རྩད་གཅོད་མི་དགོས་ཞེས་གསུང་ནས་བཀས་བཅད་མཛད་ཅིང་། དེའི་མཇུག་བྱང་དུ། ང་ནི་རྟག་ཏུ་ཆོས་ཉིད་ངང་། །ང་ལ་འགྲོ་སྡོད་གཉིས་སུ་མེད། །སྐྱེ་འཆིར་བསྟན་པ་རྗེས་ཐོབ་ཙམ། །ཡེ་གྲོལ་ཆེན་པོར་རྫོགས་སངས་རྒྱས། །ཞེས་གསུངས་ནས་བཞག་ཡོད། ཀུན་མཁྱེན་འཇིགས་གླིང་དགོངས་པ་རྫོགས་རྗེས་སྐུ་གདུང་རིན་པོ་ཆེ་ནི། ལྷོ་འབྲུག་དང་གཙང་ཕྱོགས་ཀྱི་བུ་སློབ་རྣམས་ཀྱིས་ཁོང་རྣམས་ཀྱི་ཕྱོགས་སུ་གདན་དྲངས་དགོས་ཟེར་བ་དང་། དཔལ་རི་འཕྱོངས་རྒྱས་ཀྱི་གྲྭ་ཚང་གིས་དཔལ་རི་དགོན་དུ་གདན་དྲངས་ནས་ཁོང་རྣམས་ཀྱིས་བདག་པོ་བྱེད་དགོས་ཟེར་བ་སོགས་ཁ་མ་འཆམས་པ་རེད། འོན་ཀྱང་དེ་ཉིད་བཅུ་དང་ལྡན་པའི་རྡོ་རྗེ་སློབ་དཔོན་ཆེན་པོའི་གདུང་རིལ་པོར་བཞུགས་པ་ནི། ཡིད་བཞིན་གྱི་ནོར་བུ་དངོས་ཡིན་པས་ཕྱོགས་གང་ན་བཞུགས་ཀྱང་དེ་ལ་མཆོད་པ་བྱེད་ཅིང་། གསོལ་བ་བཏབ་ན་དགོས་དགུ་ཡིད་བཞིན་དུ་འབྱུང་བ་ཡིན། སྐུ་གདུང་རིལ་པོ་མ་ཟད་དགེ་བའི་བཤེས་གཉེན་ཚད་ལྡན་གྱི་གདུང་གི་ཆ་ཤས་ཙམ་ལའང་ཕན་ཡོན་དཔག་ཏུ་མེད་པ་ཡོད་པར། རྒྱུད་སྡེ་མང་པོ་དང་རྒྱན་སྟུག་པོ་བཀོད་པའི་མདོ་སྡེ་ལས་ཀྱང་གསུངས་ཡོད་པ་རེད། དེས་ན་དེའི་ཚེ་རྗེ་འདིའི་འདའ་ཀའི་ཞལ་ཆེམས་སུ་སྐུ་གདུང་ཅི་བྱ་དགོས་སྔ་ནས་ཕྱག་བྲིས་བཞག་ཡོད་ལ། ཕྱག་བྲིས་སུ་ལྟ་དུས་ཁོང་གི་སྐུ་གདུང་དེ་སྐྱེ་བ་བདུན་པའི་གདུང་ཡིན་པས་མཆོད་རྟེན་གྱི་ནང་དུ་རིལ་པོར་བཞག་ན་ས་བཅུད་ཉམས་པ་གསོ་བ་དང་། བསྟན་རྒྱུན་ལ་ཕན་ཐོགས་འབྱུང་གསུངས་ཡོད་པས་སྐུ་གདུང་རིལ་པོ་ཚེ་རིང་ལྗོངས་སུ་དྲངས་ནས་བཞུགས་སུ་གསོལ། དུས་དེ་ནས་བཟུང་སྟེ་ཕྱིས་རབ་བྱུང་བཅུ་དྲུག་གི་སྨད། ཕྱི་ལོ་ལྟར་ན་དུས་རབས་ཉི་ཤུ་པའི་ལོ་རབས་དྲུག་ཅུའི་སྐོར་ལ་མ་ཐུག་གི་བར་དུ་གདན་ས་དེ་རུ་བཞུགས་ཏེ། སྟོད་དབུས་གཙང་ཕྱོགས་ཀྱིས་མཆོད་གནས་མཛད། དུས་འགྱུར་ཆེན་པོའི་སྐབས་དགོན་པ་བཤིག་སྟེ་སྐུ་གདུང་འཇིག་པའི་ཉེན་ཁ་ཆེ་བའི་དུས་སུ། མཆོད་རྟེན་ནང་གི་སྐུ་གདུང་ཟངས་སྒྲོམ་ཞིག་ཏུ་བཅུག་ཡོད་པ་དེ་དང་བཅས་བཙུན་མ་གཉིས་ཀྱིས་སྒེར་གྱི་ཁང་ཆུང་གི་རྩིག་པ་ཉིས་རིམ་གྱི་གསེབ་ཏུ་ལོ་ཤས་སྐུང་ཐུབ་བྱུང་མོད། དེ་རྗེས་རིག་གསར་གྱི་དུས་སུ་དེར་སྐུང་མ་ཐུབ་པར་སྐུ་གདུང་གཏོར་བརླག་ཐེབས་སོང་། གཏོར་བརླག་བྱེད་སྐབས་ཡུལ་དེའི་མི་རྣམས་ཀྱིས་བཤད་པ་ལྟར་ན། ཚང་མས་ཟངས་སྒྲོམ་ཁ་ཕྱེས་པ་དང་མཉམ་དུ་འུར་སྒྲ་ཆེན་པོ་ཞིག་གྲག དེ་དང་མཉམ་དུ་གདུང་རིང་བསྲེལ་ཐམས་ཅད་ནམ་མཁར་འཕུར་སོང་ཞེས་ཚེ་རིང་ལྗོངས་ཀྱི་སྒོམ་དཔོན་ཨ་ནེ་བྱང་ཆུབ་སྒྲོལ་མ་ཞེས་པ་ལོ་དགུ་བཅུར་ལོན་པ་ཞིག་ཡོད་པ་ན་ནིང་བར་དུ་སྐུ་ཚེ་བརྟན་སོང་བ། ཁོང་གི་ཞལ་ནས་ང་ལ་གསུངས་པ་ཡིན། དེའི་དུས་སུ་སྐུ་གདུང་རིན་པོ་ཆེ་གཏོར་བརླག་ཤོར་སོང་བ་རེད། དབུ་ཀླད་བཅོམ་སར་ཕྱིས་སུ་ནམ་རྒྱུན་དཔྱིད་ཀའི་དུས་སུ་མེ་ཏོག་དཀར་པོ་ཡ་མཚན་ཅན་མང་པོ་འཁྲུངས་རབས་བཤད་རྒྱུ་ཡོད། དེ་དུས་སྐུ་གདུང་གི་ཕྱག་གཡས་པའི་གྲུ་མོ་མན་ཆད་དེ་ལྷག་བསམ་ཅན་འགའ་རེས་བདག་གཉེར་བྱེད་རྒྱུ་བྱུང་བ་རེད། གཙོ་བོ་སྤོ་བོ་རྡོ་རྗེ་ལགས་ཟེར་བའི་རྒད་པོ་ཞིག་ཡོད་པ་དེ་ཚོ་ཡིན། རིག་གསར་གྱི་ལོ་བཅུའི་གནས་བབས་ཚབས་ཆེན་དེ་མཇུག་དྲིལ་བ་དང་མཉམ་དུ། ང་ཨ་ཅོར་བྱས་ནས་གནས་སྐོར་ལ་སོང་ཚེ་ཆེད་དུ་ཚེ་རིང་ལྗོངས་སུ་སོང་བ་ན། ཕྱག་གཡས་པའི་སྐུ་ཤ་ཡོད་ཚད་དང་སྐུ་རུས་ཕལ་ཆེ་བ་ཞིག་ངའི་ལག་ཏུ་ཡོང་བས་མདོ་ཁམས་སྨད་ཀྱི་བསོད་ནམས་ཀྱི་བགོ་སྐལ་དུ་ཐོབ་པ་ཡིན། མང་པོ་ཞིག་འཇིགས་བྲལ་བྱང་ཆུབ་རྡོ་རྗེའི་གདུང་རྟེན་འདི་དང་ཇོ་བོའི་གཟུངས་སུ་ཡོད། ཕལ་ཆེ་བ་པདྨ་ཐང་གི་རྟེན་སྒམ་ནང་དུ་བཞུགས། དུམ་བུ་ཞིག་འདི་ཕྱོགས་སུ་གནས་དུས་ཀྱི་འགྱུར་བ་ཅི་འོང་མི་ཤེས་བསམ་ནས་དེ་དུས་ཀྱི་མི་ཚང་མའི་བསམ་བློ་དང་བསྟུན་ནས་རྒྱུན་མི་ཆད་པའི་རེ་བས། ལོ་ཉི་ཤུའི་སྔོན་དུ་རྒྱ་གར་ལྷོ་ཕྱོགས་སུ་འཇིགས་བྲལ་བྱང་ཆུབ་རྡོ་རྗེའི་གདུང་རུས་ཕྱེད་ཀ་དང་མཉམ་དུ་བསྐྱལ་ཡོད། རྫོགས་ཆེན་ཚང་གི་ནང་རྟེན་གཙོ་བོ་སྲོག་བསྡོས་མ་གང་དྲགས་རྣམས་དེ་ན་ཡོད་པ་ལས་གདུང་རྟེན་དེ་གཉིས་བཙོག་པར་མ་ཟད། བརླག་ཚར་ཨེ་ཡོད་བསམ་ནས་སེམས་ཁྲེལ་བྱེད་ཀྱིན་ཡོད། སྐབས་སུ་བབ་པའི་བཤད་བྱ་ངོ་མ་ཀུན་མཁྱེན་འཇིགས་གླིང་དགོངས་པ་ཆོས་དབྱིངས་སུ་ཕྱོགས་རྗེས་སུ་རྙེད་ཡོང་བའི་ཞལ་ཆེམས་རྗེས་མ་ཁོང་གི་སྐུ་མདུན་གྱི་གསོལ་ཅོག་གི་བར་སྲུབ་དུ་ཤོག་དྲིལ་ཞིག་ཡོད་པ་དེ་རུ། འོད་སྣང་མཐའ་ཡས་ཞབས་ལ་ཕྱག་འཚལ་ལོ། །སྐྱེ་བ་ཞེས་བྱ་སྲིད་པའི་འཁོར་ལོ་སྟེ། །རྟེན་འབྲེལ་བཅུ་གཉིས་རྒྱུན་ལ་རྟག་འཁོར་ནས། །ནད་སོགས་སྡུག་བསྔལ་བདེན་པའི་ཉེར་ལེན་ཅན། །འཆི་བ་ཞེས་བྱ་དོན་དམ་བདེན་པ་སྟེ། །སེམས་ཀྱི་ཆོས་ཉིད་རང་བཞིན་མེད་པ་ལ། །སྐྱེ་འཆི་བར་ལག་རྣམ་པར་རྟོག་པས་བཟོས། །ཡུལ་ལྔའི་ཤེས་པ་རྣམ་ཐར་སྒོ་གསུམ་ཀློང་། །གནས་འདི་རང་བྱུང་རྡོ་རྗེའི་གཞལ་མེད་ཁང་། །པད་མ་འོད་དང་རང་བཞིན་སྤྲུལ་པ་ནི། །ཐུགས་རྗེས་འགྲོ་བ་འདུལ་བའི་གནས་མཆོག་སྟེ། །མོས་གུས་ཅན་དང་འབྲེལ་ཐོག་ཡིད་ཅན་ཀུན། །ཚོམ་བུ་གཅིག་ཏུ་མངོན་འཚང་རྒྱ་བར་ཤོག །ཅེས་གསུང་གི་ཐ་མའི་ཞལ་ཆེམས་དེ་འདྲ་བཞག་ཡོད། མདོར་ན་མན་ངག་གི་བསྟན་བཅོས་འདི་ཉིད་རྩོམ་པ་པོའམ། གསང་ཆེན་དགོངས་པའི་ཀློང་སྒྲོམ་ནས་འདོན་པ་པོ་སུ་ཡིན་ན་དེ་ལྟ་བུའི་སངས་རྒྱས་མིའི་གཟུགས་སུ་བྱོན་པ། རྫོགས་པ་ཆེན་པོ་ཀློང་ཆེན་སྙིང་ཐིག་ཅེས་ཞུ་བའི་ས་གྲགས་གནམ་གྲགས་ཀྱི་ཆོས། རིས་སུ་མ་ཆད་པའི་དམ་པའི་སྐྱེས་བུ་མང་པོས་ཐུགས་དམ་གྱི་མཐིལ་མཛད་ཀྱིན་ཡོད་པ་འདི་ཐོག་མའི་སྲོལ་འབྱེད་ཀྱི་ཤིང་རྟ་ཆེན་པོ་དེ་ཡིན། འོ་ན་ཀུན་མཁྱེན་འཇིགས་མེད་གླིང་པ་མ་བྱོན་པའི་སྔོན་ལ་ཆོས་རྫོགས་པ་ཆེན་པོ་དར། ཡང་གསང་སྙིང་གི་ཏི་ལ་ཀའམ་སྙིང་གི་ཐིག་ལེ་ཞེས་པའི་ཐ་སྙད་ཡོད་ཀྱང་། རྫོགས་ཆེན་ཀློང་ཆེན་སྙིང་ཐིག་མི་ཟེར་བའི་རྒྱུ་མཚན་ཅི་ཞེ་ན། ཀློང་ཆེན་སྙིང་ཐིག་འདི་ཀུན་མཁྱེན་འཇིགས་གླིང་ཁོང་གི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལ་ཞུ་བ་རེད། དེའི་རྒྱུ་མཚན་ནི་གོང་དུ་ཞུས་མ་ཐག་པ་ལྟར། ཀུན་མཁྱེན་འཇིགས་གླིང་ཉིད་མཆིམས་ཕུ་དཔལ་གྱི་དབེན་ཁྲོད་གསང་ཆེན་མེ་ཏོག་ཕུག་ཏུ་ལོ་གསུམ་སྙིང་པོའི་བསྒྲུབ་པར་གཞོལ་བའི་སྐབས་སུ། ཀུན་མཁྱེན་ཀློང་ཆེན་རབ་འབྱམས་ཀྱི་ཡེ་ཤེས་སྐུས་ལན་གསུམ་རྗེས་སུ་བཟུང་ནས། ཕྱི་ལྟར་ཧཱུཾ་ཆེན་འགྲོ་འདུལ་དྲི་མེད་རྗེ། །ནང་ལྟར་སེངྒའི་སློབ་དཔོན་མཉྫུ་ཤྲི། །གསང་བ་ཡེ་ཤེས་སྐུ་ཅན་ཀློང་ཆེན་པས། །བརྡ་ཐབས་རྟེན་འབྲེལ་དུ་མའི་དོན་བརྒྱུད་བྱིན། །ཞེས་གསུངས་པ་ལྟར། དུས་ལན་གཅིག་གི་ཚེ་ན་རིག་འཛིན་འཇིགས་མེད་གླིང་པ་ཉིད་ཐ་མལ་འཁྲུལ་སྣང་གི་རྨི་ལམ་རྨིས་པ་ལྟ་བུ་མ་ཡིན་པར་འོད་གསལ་འགྲོ་འོང་དང་བྲལ་བའི་ངང་དུ་མནལ་བའི་སྐབས་ཤིག་ན། ཁོང་གི་ཞལ་ནས། དབང་པོ་ཡུལ་ལྔའི་ཐ་མལ་གྱི་འཛིན་པ་དྭངས་པས་ཡུལ་ཅན་སེམས་ཀྱི་རྟོག་པ་འགག གཟུང་ཡུལ་རང་སྣང་ཡེ་ཤེས་ལ་ཐིམ་པས་ཡུལ་སྣང་གི་འཛིན་པ་ཞིག སྣང་ཆའི་རྟེན་འབྲེལ་མི་རྟོག་ཀུན་གཞིའི་ངང་དུ་ནུབ་པ་དང་། སླར་ཡང་དེ་ཉིད་ལྷག་མཐོང་གསལ་བའི་ཡེ་ཤེས་ཀྱི་འཆར་སྒོ་ལས་ཞེས་སོགས་གསུངས་པ་བཞིན། ཀུན་མཁྱེན་ངག་གི་དབང་པོ་ཀློང་ཆེན་རབ་འབྱམས་ཀྱི་ཡེ་ཤེས་སྐུའི་སྣང་བརྙན་དངོས་སུ་ཤར་བས། བརྗོད་བྱ་དོན་གྱི་དགོངས་བརྒྱུད་འཕོ་བར་གྱུར་ཅིག འཕོ་བར་གྱུར་ཅིག རྗོད་བྱེད་ཚིག་གི་བརྒྱུད་པ་རྫོགས་པར་གྱུར་ཅིག རྫོགས་པར་གྱུར་ཅིག ཅེས་གསུངས་ནས་བྱིན་གྱིས་བརླབས་ཚེ། ཁོང་གིས་ཕྱག་འཚལ་ལོངས་མེད་པར་ཀུན་མཁྱེན་བླ་མའི་ཕྱག་གཉིས་ལ་འཇུས་ནས། ཕ་ཀུན་མཁྱེན་ཆོས་ཀྱི་རྒྱལ་པོ་མཁྱེན་ཞེས་མོས་གུས་ཀྱིས་བརྒྱལ་བ་ཙམ་དུ་གསོལ་བ་ལན་གསུམ་བཏབ་པས། ཀུན་མཁྱེན་ཆོས་ཀྱི་རྒྱལ་པོས་སྤྱན་ཧུར་གྱིས་གཟིགས་ནས། རིགས་ཀྱི་བུ་ཁྱོད་ལ་ད་ཅི་སྨོན་ལམ་གཏད་རྒྱའི་སྒོ་ནས་དོན་རྒྱུད་ཀྱི་དགོངས་པ་འཕོས་པ་ཡིན་པས་སྒྲུབ་པའི་སྲོག་མཁར་ཚུགས་ལ་སྙིང་ཐིག་གཉན་པོའི་ཆོས་སྐལ་ལྡན་ལ་རྒྱ་ཆེར་སྟོན་ཅིག ཅེས་སྐུའི་བྱིན་རླབས་དེ་འདྲ་ཐོབ་པ་དང་། ཡང་ཁོང་གི་གསུང་ལས། སྐུ་གསུམ་གྱི་སྣང་ཆ་མིག་འཕྲུལ་ལྟ་བུ་དབྱིངས་སུ་ནུབ་སྟེ། ཀུན་མཁྱེན་བླ་མ་དྲན་པ་ལ་ཚུགས་ཐབས་མེད་པ་ཞིག་བྱུང་ངོ་ཞེས་གསུངས། དེ་ཞལ་གཟིགས་དང་པོའི་སྐབས་རེད། ཞལ་གཟིགས་གཉིས་པ་ལ། ཡང་གསང་ཆེན་མེ་ཏོག་ཕུག་ན་བཞུགས་པའི་ཚེ། འོད་གསལ་བསམ་གྱིས་མི་ཁྱབ་པ་འབྱམས་སུ་ཀླས་ཡོད་པའི་སྣང་ངོར། ཀུན་མཁྱེན་སངས་རྒྱས་གཉིས་པ་ཞལ་མཇལ་བ་ན། ཕྱག་དཔེ་གླེགས་བམ་ཞིག་གནང་ནས། འདིར་ཤིང་རྟ་ཆེན་མོ་ན་གབ་པའི་ཚུལ་དུ་ཡོད་པ་མཐའ་དག་གསལ་བར་ཡོད། ཅེས་དང་། གསང་མཛོད་ཆེན་མོའི་བརྡ་འགྲོལ་གྱི་སྐོར་སྐབས་དེར་གསུངས་པ་ཡིན། དེས་གསུང་གིས་བྱིན་གྱིས་བརླབས་ནས་ཡོན་ཏན་རིན་པོ་ཆེ་མཛོད་དགའ་བའི་ཆར་འགྲེལ་བ་བདེན་རྣམ་ཤིང་རྟ་རྣམ་གཉིས་བཅས་པ་རྩོམ་པའི་རྗེས་སུ་གནང་བ་ཐོབ་བོ། །ཞལ་གཟིགས་གསུམ་པ་ནི། ཀུན་མཁྱེན་ཆེན་པོས་ཤིན་ཏུ་དགྱེས་པ་ཆེན་པོའི་ཞལ་འཛུམ་མདངས་མུ་ལེ་བའི་ངང་ནས་ཕྱག་གཉིས་ཁོང་གི་དབུ་ཐོག་ཏུ་བཞག་སྟེ། བརྗོད་དུ་མེད་པའི་གསུང་གིས་བྱིན་བརྒྱུད་ཅིག་ཅར་དུ་འཕོས་ཏེ་འོད་གསལ་དག་པ་རབ་འབྱམས་ཀྱིས་དབང་བསྐུར་བས། དག་ཆེན་ཡེ་ཤེས་ཀྱི་སྣང་ཆ་དབྱིངས་སུ་ཐིམ་པར་གྱུར་པ་ནི། ཐུགས་ཀྱིས་བྱིན་གྱིས་བརླབས་ནས་དོན་བརྒྱུད་རྟོགས་པའི་བདག་པོར་རྗེས་སུ་གནང་བ་སྟེ་ཞལ་གཟིགས་གསུམ་པ་ཐོབ། དེ་ལྟར་སྐུ་གསུང་ཐུགས་ཀྱིས་བྱིན་གྱིས་བརླབས་པས་བླ་སློབ་དགོངས་པ་དབྱེར་མེད་དུ་གྱུར། བརྒྱུད་གསུམ་རིག་འཛིན་གཅིག་ལ་རྫོགས། རྩ་ཁམས་ཀྱི་ཡི་གེ་ཡེ་ཤེས་ཀྱི་རླུང་གིས་བསྐུལ་བས། མཁའ་འགྲོའི་བརྡ་ཡིག་ཀློང་ཆེན་དགོངས་པའི་གསང་མཛོད་ཀྱི་གཏེར་ཆེན་ཕྱེ་བའི་མན་ངག་གི་གཞུང་མང་པོ་ཞིག དོན་མེད་རྨོངས་པའི་ཟོལ་བསྟོད་ཙམ་མ་ཡིན་པར། རང་རེས་མངོན་སུམ་མིག་གི་བདུད་རྩིར་མཇལ་དུ་ཡོད་པ། འདི་ལྟ་བུའི་རིན་ཐང་གཞལ་དུ་མེད་པའི་མན་ངག་གསེར་ཆོས་འཇིག་རྟེན་གྱི་ཁམས་འདིར་ཕྱི་རབས་སྐལ་ལྡན་གྱི་བུ་ལ་གཞག་རྒྱུའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལ། ཀློང་ཆེན་སྙིང་ཐིག་ཅེས་ཞུ་བ་རེད། འོ་ན་རྒྱལ་བ་ཀློང་ཆེན་རབ་འབྱམས་ཀྱི་གསུང་གི་མཛོད་ཆེན་བདུན་དང་། ཤིང་རྟ་རྣམ་གསུམ་ལ་སོགས་པ་ལ་ཀློང་ཆེན་སྙིང་ཐིག་ཅེས་མི་ཟེར་བ་ཅི། ཀློང་ཆེན་པའི་ཐུགས་ཀྱི་ཐིག་ལེ་དགོངས་དཀྱིལ་དངོས་དེ་དག་མ་ཡིན་ནམ་སྙམ་ན། དོན་གྱི་ཆ་ནས་བཏགས་ན་དེ་ཡང་ཡིན་མོད་ཀྱང་། འཇིག་རྟེན་གྲགས་སྡེའི་ལུགས་ལ་དེ་ལྟར་ཟེར་སྲོལ་མེད། དེ་འདྲ་བཤད་ན་པདྨ་འབྱུང་གནས་དང་། བི་མ་མི་ཏྲ། དགའ་རབ་རྡོ་རྗེ། རྡོ་རྗེ་སེམས་དཔའ། ད་དུང་དེད་ན་རྡོ་རྗེ་འཆང་ལ་ཐུག་འགྲོ་བ་ཡིན་ན། དེའི་སྙིང་ཐིག་ཟེར་རྒྱུའི་སྲོལ་ལྷག་པར་ཀུན་ཁྱབ་ལ་མེད། པད་འབྱུང་དང་བི་མའི་བཀའ་སྲོལ་མཁའ་འགྲོ་སྙིང་ཐིག་དང་། གསང་བ་སྙིང་ཐིག ཟབ་པ་པོད་བཞི་དང་། དེའི་ཡང་ཏིག་ཀློང་ཆེན་པའི་མཁའ་འགྲོ་ཡང་ཏིག བླ་མ་ཡང་ཏིག ཟབ་མོ་ཡང་ཏིག་རྣམས་ལ་སྙིང་ཐིག་གོང་མ་དང་། དེའི་མན་ངག་གི་ཡང་བཅུད་ཀུན་མཁྱེན་འཇིགས་གླིང་ལས་བྱུང་བ་ལ་ནི་སྙིང་ཐིག་འོག་མའམ་ཀློང་ཆེན་སྙིང་ཐིག་ཅེས་ཞུ། འདིའི་གོང་འོག་ནི་ཐེག་རིམ་གོང་འོག་ལྟ་བུ་མངོན་རྟོགས་མཐོ་དམན་གྱི་ཁྱད་པར་མ་ཡིན། དུས་རབས་སྔ་ཕྱིའི་དབང་གིས་བཞག་པའི་ཐ་སྙད་ཀྱི་ཟེར་སྒྲོས་རེད། འདི་རྣམ་པ་ལ་ཀུན་མཁྱེན་ཞུ་བའི་རྒྱུ་མཚན་ཅི་ཞེ་ན། སྤྱིར་དམ་ཆོས་དར་བའི་ཕུག་རྒྱ་གར་འཕགས་པའི་ཡུལ་ན་གྲུབ་མཐའ་སྡེ་བཞི་དང་མདོ་སྔགས་ཀྱི་ཆོས་ཚུལ་ཙམ་ལས། བོད་ན་དར་བའི་ས་དགེ་བཀའ་རྙིང་ལ་སོགས་པའི་ཐ་སྙད་མེད་ཀྱང་། བོད་གངས་རིའི་ལྗོངས་འདིར་བསྟན་པ་དར་བའི་ཆོས་བརྒྱུད་ཀྱི་འགྲོས་ལ་བསམ་ན། རིམ་བཞིན་བཤད་བརྒྱུད་འདེགས་པའི་ཀ་ཆེན། སྒྲུབ་བརྒྱུད་འདྲེན་པའི་ཤིང་རྟ་ཞེས་མཚན་དང་དོན་མཐུན་པར་དབྱེ་བ་བྱུང་བས་རང་རང་གི་ཆོས་བརྒྱུད་བསྟན་པའི་སྲོལ་འབྱེད་དེ་ལ་ཀུན་མཁྱེན་དང་། རྒྱལ་བ་སོགས་ཞུ་ཞིང་། དེ་དག་ཤེས་བྱ་ཀུན་ལ་ཆགས་ཐོགས་མེད་པའི་གཟིགས་པ་མངའ་བརྙེས་པའི་ཆ་ནས་ཀུན་མཁྱེན་དང་། རྒྱལ་བའི་ཕྲིན་ལས་རྨ་མེད་པར་གདུལ་བྱའི་ཁམས་ལ་སྣང་བར་མཛད་པའི་བཀའ་དྲིན་གྱི་ངོས་ནས་རྒྱལ་བ་ཞུ་ཚུལ་དེ་འདྲ་དར་བ་རེད། འདི་ན་རིག་འཛིན་འཇིགས་མེད་གླིང་པར་ཀུན་མཁྱེན་ཞུ་བ་ཇི་ལྟར་རེད་ཅེ་ན། ཇི་ལྟ་མཁྱེན་པའི་ཡེ་ཤེས་དོན་དམ་ཆོས་ཉིད་ཀྱི་བདེན་པ་མཐོང་། ཇི་སྙེད་གཟིགས་པའི་ཡེ་ཤེས་རང་གཞན་གྲུབ་མཐའ་རྒྱ་མཚོའི་ཕ་རོལ་ཏུ་ཕྱིན། ཤེས་བྱའི་གནས་མཐའ་དག་ལ་མཁྱེན་པའི་ཡེ་ཤེས་ནང་ནས་རྒྱས་པས་ན་ཀུན་མཁྱེན་ནོ། །བསྟན་བཅོས་རྩོམ་པ་པོ་ལ་རྒྱུ་ཚོགས་གསུམ་ཚང་དགོས་པ་ཡིན་ཏེ། རབ་ཆོས་ཉིད་ཀྱི་བདེན་པ་མཐོང་བ་དང་། འབྲིང་ཡི་དམ་ལྷའི་ཞལ་གཟིགས་པ། ཐ་མའང་རིག་པའི་གནས་ལྔ་ལ་མཁས་པ་ཞིག་དགོས་ན། རྩོམ་པ་པོ་ཀུན་མཁྱེན་གཉིས་པ་མཁྱེན་བརྩེའི་འོད་ཟེར་རམ་འཇིགས་མེད་གླིང་པ་ལ་དེ་ལྟ་བུའི་རྒྱུ་ཚོགས་ཐམས་ཅད་ཚང་ལ། དེས་གཞུང་འདི་རྩོམ་པ་པོ་སུ་ཡིན་དང་ཅི་འདྲ་ཡིན་ཤེས་སོ། །འདིའི་བརྗོད་བྱ་ཅི་ཡིན་ཞེ་ན། ཐེག་པ་ཐམས་ཅད་ཀྱི་ཁོག་དབུབ། རྒྱུད་སྡེ་ཐམས་ཅད་ཀྱི་སྤྱི་ཆིངས། ཐོག་མ་སྔོན་འགྲོས་རྒྱུད་སྦྱངས་ནས་རྩ་རླུང་ཐིག་ལེའི་བྱེད་བཅིངས་ལ་བརྟེན་ནས་མི་རྟོག་པའི་ཡེ་ཤེས་བསྐྱེད་དགོས། ངེས་འབྱུང་གི་བསམ་པ་རྣམ་པར་དག་པས་སྲིད་པའི་མཐའ་ལ་ཆགས་པ་བཀག་པར་མ་ཟད། སྙིང་རྗེའི་བསམ་པ་ཚད་མེད་པས་ཞི་བའི་མཐའ་ལ་ཞེན་པ་བཀག་ནས་གཉིས་མཐར་མ་ལྷུང་བར། སྲིད་ལ་མི་གནས་ཞི་ལ་མི་འབབ་པར་ཐར་པ་ཡང་དག་པའི་ལམ་ལ་འགྲོ་དགོས་ན། ཐོག་མར་སེམས་ལས་སུ་རུང་བར་བྱས་ནས་ཐུན་མོང་དང་ཐུན་མིན་གྱི་སྔོན་འགྲོ་བརྒྱུད་ནས། དངོས་གཞིའི་ལམ་འགྲོ་བའི་ཁམས་རྡོ་རྗེ་བཞིའི་རང་བཞིན་གྱིས་གནས་པ་དེ་བརྡ་ཐབས་རྟེན་འབྲེལ་གྱི་ཆོ་ག་ཁྱད་པར་ཅན་གྱིས་སད་པར་བྱས་ནས། སློབ་མ་རྒྱུད་དག་པ་རབ་འབྱམས་སུ་སྨིན་པར་བྱེད་པ། གཟུང་འཛིན་གྱི་ཆོས་ཐམས་ཅད་དང་བྲལ་བ། སྐྱེ་འགགས་གནས་གསུམ་མེད་པའི་རོལ་རྩལ་དུ་ངོ་སྤྲོད། རྩོལ་མེད་ཆོས་སྐུའི་དགོངས་པ་ལ་སྦྱོར་བར་བྱེད་པ་འདིའི་བརྗོད་བྱ་རེད། འདི་ཕྱོགས་གང་དུ་གཏོགས་ན། ཐེག་པ་ཐམས་ཅད་ཀྱི་ཁོག་དབུབ་ཡིན་པའི་ཆ་ནས་ཐེག་པ་གསུམ་གྱི་བསྟན་དོན་དང་འབྲེལ་བས་ཐམས་ཅད་ལ་ཁྱབ་པར་མ་ཟད། སྐྱེས་བུ་ཆེན་པོའི་ལམ་ཐེག་ཆེན་མདོ་སྔགས་ཐུན་མོང་གི་ལམ་གྱི་རྨང་གཞི་མེད་དུ་མི་རུང་བ་ཡིན་པས། མཐར་ཐུག་ཆུ་ཕྲན་རྒྱ་མཚོར་འདུས་པ་བཞིན་དུ། འོག་མའི་ཐེག་རིམ་བརྒྱད་པོ་མཐར་འབྲས་རྫོགས་པ་ཆེན་པོ་ལ་འབབ་པ་ཡིན་པས། སྔ་འགྱུར་ཐེག་རིམ་དགུའི་རྩེ་མོ་ཨ་ཏི་ཡོ་ག་འབྲས་བུའི་ཐེག་པར་སྟོན་པའི་རྒྱུད་ལུང་མན་ངག་གསུམ་ལས་མན་ངག་གི་ཕྱོགས་སུ་གཏོགས་སོ། །ལུང་གང་ལས་བཏུས་ན། རྫོགས་པ་ཆེན་པོ་རྒྱུད་འབུམ་ཕྲག་དྲུག་ཅུ་རྩ་བཞིའི་སྙིང་པོ་རྒྱུད་བཅུ་བདུན། དེའི་ཡང་བཅུད་བཀའ་སྲོལ་རྣམ་གཉིས་དགོངས་འགྲེལ་དང་བཅས་པའི་ཟབ་དང་རྒྱ་ཆེའི་ཆོས་ཚུལ། དེ་ལས་ཀྱང་བི་མའི་གསང་བ་སྙིང་ཐིག་གསེར་ཡིག་ཅན་དང་གཡུ་ཡིག་ཅན་ལ་སོགས་ཟབ་པ་པོད་བཞིའི་ནང་ཟངས་ཡིག་ཅན་དང་དེའི་ཡང་ཡིག་བླ་མ་ཡང་ཏིག་གཉིས་ལས་གཙོ་བོ་བཏུས་པ་ཞིག་རེད། འདི་བཀའ་སྲོལ་རྣམ་གཉིས་ལ་གཙོ་བོ་བི་མའི་བཀའ་སྲོལ་ཡིན། འདིའི་དབུ་ཞབས་ཀྱིས་བསྡུས་པའི་དོན་ཅི་ཡིན་དང་། ད་དུང་དེ་དང་འབྲེལ་ནས་དགོས་པ་ཉིང་དགོས་དང་བཅས་པ་གོང་གི་བརྗོད་བྱ་བཤད་པའི་ཁོངས་སུ་འདུས་པ་རེད། དེའི་ཡན་ཆད་བརྗོད་བྱ་དང་དགོས་པ་ཉིང་དགོས་འབྲེལ་བ་སྟེ་དགོས་སོགས་ཆོས་བཞི་ཡང་ཤུགས་ལས་གོ་ཐུབ། ཐོག་མར་དགེ་བ་ཀླད་ཀྱི་དོན་ལ་མཚན་སྨོས་པ་ཕྱག་འཚལ་བ་སོགས་ཡོད་པ་ལས། དང་པོ་མཚན་སྨོས་པ། མཚན་དོན་འགྲེལ་བ། ཞར་བྱུང་རྩོམ་པ་པོའི་རྣམ་ཐར་དང་། ཇི་ལྟར་བརྩམ་པ། རྩོམ་པའི་དགོས་པ་དང་བཅས་པ་བཤད་ནས།

གཉིས་པ་ཕྱག་འཚལ་བ།

གཉིས་པ་ཕྱག་འཚལ་བ་ནི། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དཔལ་ཞེས་པའི་དོན་ནི་ཁ་སྐད་ལྟར་བཤད་ན། གཟི་བྱིན་ཕུན་སུམ་ཚོགས་པའི་གོ་དོན་ཞིག་རེད། སྐབས་འདིར་བརྗོད་སྟངས་ཀྱི་ཐད་ནས་རྟོགས་པ་བདག་གི་དཔལ་དང་། ཐུགས་རྗེ་གཞན་གྱི་དཔལ་གཉིས་ཀྱི་སྟེང་ནས་བཤད་ན། རྟོགས་པ་བདག་གི་དཔལ་གདོད་མའི་མགོན་པོ་ཆོས་སྐུ་ཀུན་ཏུ་བཟང་པོ་དེ་ཉིད་རང་དོན་ཆོས་སྐུའི་གོ་འཕང་མངོན་དུ་བྱས་པ་དབྱིངས་སྤྲོས་པ་དང་བྲལ་བའི་ངང་ལས་མ་གཡོས་བཞིན་དུ། ཐུགས་རྗེ་གཞན་གྱི་དཔལ་དུ་གཞན་དོན་གཟུགས་སྐུར་བཞེངས་ནས་སྲིད་པ་མ་སྟོངས་འཁོར་བ་མ་ཞིག་གི་བར་དུ་རྟག་ཁྱབ་ལྷུན་གྲུབ་རྒྱུན་མི་ཆད་པའི་མཛད་པ་དེ་དང་ལྡན་པས་དཔལ་དེ་གཉིས་དང་ལྡན་པས་ན་དཔལ། ཀུན་ཏུ་བཟང་པོ་ཞེས་པ་ལ། རང་བཞིན་ཀུན་ཏུ་བཟང་པོ། རྒྱན་ཀུན་ཏུ་བཟང་པོ། སྟོན་པ་ཀུན་ཏུ་བཟང་པོ། རིག་པ་ཀུན་ཏུ་བཟང་པོ། རྟོགས་པ་ཀུན་ཏུ་བཟང་པོ་དང་ལྔའི་སྒོ་ནས་གསུང་ཚུལ་ཡོད་ལ། རང་བཞིན་ཀུན་ཏུ་བཟང་པོ་ནི་ཆོས་ཐམས་ཅད་ཀྱི་གནས་ལུགས་དེ་བཞིན་ཉིད་དེ་རང་བཞིན་ཀུན་ཏུ་བཟང་པོའམ་གཞི་ཀུན་ཏུ་བཟང་པོ་ཡིན། རྒྱན་ཀུན་ཏུ་བཟང་པོ་ནི་ཆོས་ཉིད་རིག་པའི་རོལ་པ་ལས་ཤར་བའི་ཆོས་ཅན་གྱི་སྣང་བ་འདི་ཐམས་ཅད་འཆར་གཞི་དེ་ལས་མ་གཡོས་བཞིན་དུ་རིག་པའི་རྒྱན་དུ་ཤར་བས་རྒྱན་ཀུན་ཏུ་བཟང་པོ་ཞེས་བྱ། སྟོན་པ་ཀུན་ཏུ་བཟང་པོ་ནི་ནང་གསལ་ཆོས་སྐུའི་དཀྱིལ་འཁོར་དབྱིངས་སུ་འཁྱིལ་བ་དེ་ལས་ཕྱི་གསལ་ལོངས་སྐུའི་ཐུགས་རྗེ་ལས་འགྲོ་འདུལ་སྤྲུལ་སྐུའི་རོལ་པ་ཚད་མེད་ཆུ་ཟླ་ལྟར་ཤར་བ་དེ་ལ་སྟོན་པ་ཀུན་ཏུ་བཟང་པོ་ཞེས་བྱ། །རིག་པ་ཀུན་ཏུ་བཟང་པོ་ནི་འགྲོ་བ་ཡོངས་ལ་ཁྱབ་པའི་རང་བྱུང་གི་ཡེ་ཤེས་བདེ་གཤེགས་སྙིང་པོ་གཉུག་མ་དོན་གྱི་འོད་གསལ་དེ་ཡིན། རྟོགས་པ་ཀུན་ཏུ་བཟང་པོ་ནི་ལམ་ལ་སློབ་པའི་གང་ཟག་གིས་བླ་མའི་བྱིན་རླབས་དང་རང་གི་དད་པའི་ཉེར་ལེན་ལ་བརྟེན་ནས་རིག་པ་གཤིས་ཀྱི་གནས་ལུགས་ཇི་བཞིན་དུ་རྟོགས་པ་དེའོ། །གང་ལྟར་ཡང་དུས་གསུམ་དུས་མེད་མཉམ་པ་ཆེན་པོ་འཁོར་འདས་ཀུན་ལ་ཁྱབ་པའི་ཡེ་གྲོལ་ཀ་དག་གི་དུས་ན་བཟང་ཞེན་ཤེས་བྱའི་སྒྲོ་འདོགས་དང་། ངན་ཞེན་འཁོར་བའི་དྲི་མ་ཐམས་ཅད་དང་ལས་གྲོལ་བས་ན། ཀུན་བཟང་ཀློང་ན་མི་བཟང་གཅིག་ཀྱང་མེད། །ཅེས་གསུངས་པ་ལྟར་གདོད་མའི་མགོན་པོ་འཁོར་འདས་ཤེས་དང་ཤེས་བྱར་གྱུར་པའི་མཁའ་ཁྱབ་མཁའི་རྡོ་རྗེ་ཅན་རྫོགས་པ་ཆེན་པོའི་སྟོན་པ་ཀུན་བཟང་རྡོ་རྗེ་འཆང་སྟེ། དཔལ་ཀུན་ཏུ་བཟང་པོ་ལ་ཞེས་པའི་ལ་ནི་ངེས་པར་བཟུང་སྟེ་དེ་ལ་ཕྱག་འཚལ་ལོ། །ཕྱག་དེ་ལ་དབྱེ་ན་ཆོས་ཉིད་དོན་གྱི་ཕྱག་དང་། ཆོས་ཅན་བརྡ་ཡི་ཕྱག་གཉིས་སུ་བཤད་དེ། ཆོས་ཉིད་དེ་བཞིན་ཉིད་རང་ངོ་ཤེས་ནས་ཕྱག་འཚལ་བྱ་དང་འཚལ་བྱེད་གཉིས་སུ་མེད་པར་རྟོགས་པས་རབ་ལྟ་བ་མངོན་སུམ་དུ་མཇལ་བ་ལ་ཆོས་ཉིད་དོན་གྱི་ཕྱག་དང་། ཆོས་ཅན་བརྡ་ཡི་ཕྱག་འབྲིང་སྒོམ་པ་གོམས་པའི་ཉེ་རྒྱུ་སྤྱོད་པ། ཐ་མ་མོས་གུས་ཀྱི་ཕྱག་དང་བཅས་པ་ཚང་བའི་སྒོ་ནས་གདུལ་བྱ་སྐྱེས་བུ་གསུམ་གྱི་བློ་རིམ་དང་མཐུན་པའི་ཕྱག་འཚལ་བ་སྔོན་དུ་སོང་ནས།

གསུམ་པ་མཆོད་པར་བརྗོད་པ།

གསུམ་པ་མཆོད་པར་བརྗོད་པ་ལ། ཐོག་མའི་སངས་རྒྱས་གཞི་འབྲས་དབྱེར་མེད་པའི་བདག་ཉིད་ལ་མཆོད་པར་བརྗོད་པ་དང་། ཞིང་འདིར་གཞི་སྣང་གི་རོལ་པར་སྟོན་པ་གསང་སྔགས་ཀྱི་སློབ་དཔོན་ཆེན་པོ་སངས་རྒྱས་གཉིས་པ་པདྨ་འབྱུང་གནས་ལ་མཆོད་པར་བརྗོད་པ། དེ་ལས་གཞན་ཡང་སྟོན་པ་སངས་རྒྱས། སྐྱོབ་པ་བསྟན་པ་དམ་ཆོས། འདྲེན་པ་དགེ་འདུན་ཏེ་དཀོན་མཆོག་གསུམ་དང་། རྒྱལ་བ་སྲས་དང་སློབ་མ་འཕགས་བོད་ཀྱི་བསྟན་འཛིན་གྱི་ཚོགས་དང་བཅས་པའི་མཚན་སྨོས་པའི་སྒོ་ནས་མཆོད་པར་བརྗོད་པའོ། །དང་པོ་ཐོག་མའི་སངས་རྒྱས་གཞི་འབྲས་དབྱེར་མེད་པ་ལ་མཆོད་པར་བརྗོད་པ་ནི། གང་གི་རང་བཞིན་ཤིན་ཏུ་རྣམ་དག་རྒྱ་ཆད་ཕྱོགས་སུ་མ་ལྷུང་ཞིང་། །མ་སྐྱེས་མི་འགག་སྤྲོས་པ་ཀུན་བྲལ་ཡེ་བབས་གཉུག་མ་བྱང་ཆུབ་སེམས། །དུས་གསུམ་དུས་མེད་རྣམ་ཀུན་མཆོག་ལྡན་འཕོ་མེད་འདུས་མ་བྱས་ཀྱི་སྐུ། །འཁོར་འདས་བདག་མེད་ཁྱད་ཆོས་དྲུག་ལྡན་གདོད་མའི་མགོན་པོ་དེ་ལ་འདུད། །ཅེས་གསུངས་ཏེ། འདིས་ནི་གང་མཆོད་པར་བརྗོད་པའི་ཡུལ་ཆོས་དབྱིངས་སྤྲོས་བྲལ་བསམ་གྱིས་མི་ཁྱབ་ལྷུན་གྲུབ་རང་བྱུང་གི་ཡེ་ཤེས། སྐུ་དང་ཡོན་ཏན་རྒྱ་མཚོའི་མངའ་བདག་བདེ་བར་གཤེགས་པའི་ཐུགས་དང་གཉིས་སུ་མེད་པ་གང་གི་རང་བཞིན་ནི། དཔེར་ན་ནམ་མཁའ་ལ་སྤྲིན་དང་སྨུག་རླངས་འཁྲིགས་ཤིང་ཐོག་ཟེར་གློག་འོད་འཁྱུག་ན་ཇེ་ངན་དང་། ཉི་མ་ཤར། སྦྲང་ཆར་འབབ། འཇའ་འོད་འཁྲིགས་ན་ཇེ་བཟང་ལ་འགྲོ་རྒྱུ་མེད་པ་བཞིན་དུ། གཤིས་རང་བཞིན་གྱིས་རྣམ་པར་དག་པ་ལ་འཕོ་འགྱུར་དང་བྲི་གང་མེད་པར་ཤིན་ཏུ་རྣམ་པར་དག་པ་རིག་པ་བདེ་བར་གཤེགས་པའི་སྙིང་པོ་ཡེ་ནས་འཆིང་གྲོལ་མེད་པའི་ཡེ་གྲོལ་ཆེན་པོ། རྒྱ་གར་ཡང་མ་ཆད། ཕྱོགས་གང་དུ་མ་ལྷུང་། མ་སྐྱེས་མི་འགག་སྤྲོས་པ་ཀུན་བྲལ་ཡེ་བབས་གཉུག་མ། །རིག་པ་བྱང་ཆུབ་སེམས་མཁའ་མཉམ་གདོད་ནས་དག་པའི་རང་བཞིན་དེ་ནི་དང་པོ་སྐྱེ་བ་མེད་པ་སྐྱེ་བའི་རྒྱུས་སྟོང་པས་ན་མ་སྐྱེས། དེ་ལྟ་བུའི་མ་སྐྱེས་པ་དེ་ཉིད་ལ་བར་དུ་གནས་པ་མེད་པར་མ་ཟད། དང་པོ་སྐྱེ་བ་དང་བར་དུ་གནས་པ་མེད་པ་དེ་ལ་ཐ་མ་འགག་པ་ཞིག་ཀྱང་ཡོད་མི་སྲིད་པས་ན་མི་འགགས་ཞེས་གསུངས། དེ་ལྟ་བུའི་སྐྱེ་འགག་ཡོད་མེད་རྟག་ཆད་ལ་སོགས་བློས་བཏགས་ཀུན་རྫོབ་ཀྱི་ཆོས་ཐམས་ཅད་ལས་རིང་དུ་འདས་པས་ན། ཁས་ལེན་སྤྲོས་པ་ཀུན་བྲལ་ཡེ་བབས་རང་བྱུང་གི་རིག་པ་ཡེ་ནས་འཕོ་འགྱུར་ཡོད་མ་མྱོང་བའི་རིག་པ་བྱང་ཆུབ་ཀྱི་སེམས། དུས་གསུམ་དུས་མེད་རྣམ་ཀུན་མཆོག་ལྡན་འཕོ་མེད་འདུས་མ་བྱས་པའིི་སྐུ། །དུས་གསུམ་དུས་མེད་ཅེས་པ་ནི་འདས་པའི་ཆོས་འགགས། མ་འོངས་པའི་ཆོས་མ་སྐྱེས་པ། ད་ལྟའི་ཆོས་སྐད་ཅིག་ཆ་ཤས་ཕྱེས་ན་འདས་མ་འོངས་གཉིས་ལས་གཞན་པ་ཞིག་མི་སྲིད་པ་ཡིན་པས་ན་དུས་གསུམ་གྱི་དུས་ཀྱི་ཆ་ལས་འདས་པའི་དུས་བཞི་པ་ཀ་དག་གི་དུས་ནི། དུས་མེད་མཉམ་པ་ཆེན་པོ་ཞེས་གསུངས་པས། འདིས་བཞི་ཆ་གསུམ་བྲལ་གྱི་དགོངས་པ་བསྟན། རྣམ་ཀུན་མཆོག་ལྡན་འཕོ་མེད་འདུས་མ་བྱས་ཀྱི་སྐུ་ཀ་དག་སྟོང་གསལ་ཆེན་པོ་འགྱུར་བ་མེད་པའི་རྟག་པ་དམ་པ། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཇི་བཞིན་རྣམ་མི་རྟོག །ཅེས་པ་དང་། ཐེག་པ་ཆེན་པོའི་བསྟན་བཅོས་རྒྱུད་བླ་མ་ལས། ཇི་ལྟར་སྔ་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་ལྟར་ཆོས་ཀྱི་སྐུ་ནི། སྟོང་པའི་ངང་ལས་རིག་པའི་ཉི་ཤར་བས། །ནུབ་པ་མེད་པའི་གཏེར་ཆེན་དཀྱིལ་འཁོར་ནས། །འགྱུར་བ་མེད་པའི་སྐུ་ལྔར་ཤར་གྱིས་བྱུང་། །རྟོག་པ་མེད་པའི་ངང་དུ་གཉིས་མེད་རོལ། །ཞེས་རྒྱུད་ལས་གསུངས་པ་ལྟ་བུའི་ནང་གསལ་ངེས་པ་ལྔ་ལྡན་སྐྱེས་བུའི་བྱད་ལྟ་བུ་དེ་ལས། ཕྱི་གསལ་གཟུགས་སྐུའི་བཀོད་པ་ཆུ་ནང་ཟླ་གཟུགས་ཀྱི་དཔེ་བཞིན་དུ། ངོ་བོ་རང་བཞིན་ཐུགས་རྗེ་ཡེ་ཤེས་གསུམ་ལྡན་གྱི་བདག་ཉིད་སྐུ་གསུམ་འདུ་འབྲལ་མེད་པའི་འོད་གསལ་ཟུང་འཇུག་གི་སྐུ། འཁོར་འདས་བདག་མེད་ཁྱད་ཆོས་དྲུག་ལྡན་གདོད་མའི་མགོན་པོ་དེ་ལ་འདུད། །འཁོར་འདས་སྣང་བཏགས་ཀྱིས་བསྡུས་པའི་ཤེས་བྱའི་ཆོས་རིས་མེད་མཉམ་པ་ཆེན་པོར་རྫོགས་ཏེ་གཟུང་འཛིན་བདག་གི་འཆིང་བ་ལས་ཡེ་ནས་གྲོལ་བས་བདག་མེད། ཁྱད་ཆོས་དྲུག་ལྡན་ཏེ་གཞི་ལས་འཕགས་པ། རང་ངོར་སྣང་། བྱེ་བྲག་ཕྱེད། ཕྱེད་ཐོག་ཏུ་གྲོལ། གཞན་ལས་མ་བྱུང་། རང་སར་གནས་པ་སྟེ་དེ་ལྟ་བུའི་ཁྱད་ཆོས་དྲུག་དང་ལྡན་པའི་ཀུན་བཟང་གདོད་མའི་མགོན་པོ། ཁྱབ་བདག་དང་པོའི་སངས་རྒྱས་འོད་མི་འགྱུར་བ་དེ་ལ་འདུད། ཅེས་གཞི་འབྲས་དབྱེར་མེད་པའི་བདག་ཉིད་ཁྱབ་བདག་དང་པོའི་མགོན་པོ་ལ་མཆོད་པར་བརྗོད་དེ། ད་ནི་ཞིང་འདིར་གསང་སྔགས་བསྟན་པའི་སྒྲོན་མེ་རྣམ་པར་བཀོད་པའི་བྱེད་པོ་སངས་རྒྱས་གཉིས་པ་སློབ་དཔོན་ཆེན་པོ་པདྨ་ཀཱ་ར་ལ་ཐུན་མིན་གྱིས་མཆོད་པ་བརྗོད་པ་ནི། གང་གི་གཞི་སྣང་རོལ་པ་ཆུ་ཟླའི་གར། །སྲིད་མཚོར་བཅུད་དུ་སྨིན་པའི་དཔལ་ཡོན་ཅན། །འོད་ལུས་སྒྱུ་འཕྲུལ་དྲ་བའི་སྐུར་བཞེངས་པ། །སངས་རྒྱས་གཉིས་པ་པད་མ་འབྱུང་གནས་མཆོད། །ཅེས་གསུངས་པ་ནི་མཐའ་ཡས་རྡུལ་སྙེད་ཀྱི་ཞིང་ཁམས་རྒྱ་མཚོར་མཚན་དང་སྐུའི་བཀོད་པ་བསམ་གྱིས་མི་ཁྱབ་ཅིང་། གཞི་དབྱིངས་ཁྱབ་བརྡལ་ཆེན་པོར་ཐོག་མའི་སངས་རྒྱས་འོད་མི་འགྱུར་བའི་ངོ་བོར་ནང་གསལ་ཁྱད་ཆོས་དྲུག་ལྡན་ལས་ཐ་མི་དད་པར་བཞུགས་ནའང་། གང་གི་ཕྱི་གསལ་གྱི་གཞི་སྣང་གི་རོལ་པ་གདུལ་བྱའིཆུ་སྣོད་ཇི་སྙེད་པ་ཟླ་གཟུགས་དེ་སྙེད་དུ་འཆར་བ་ལྟར། སྤྲུལ་པའི་རོལ་གར་སྲིད་པ་ཁམས་གསུམ་འཁོར་བའི་རྒྱ་མཚོ་ཆེན་པོའི་གདུལ་བྱའི་བཅུད་དམ་དཔལ་མགོན་དུ་སྨིན་པའི་ངོ་མཚར་བྱེ་བའི་དཔལ་ཡོན་ཅན་གྱི་འཕོ་ཆེན་འཇའ་ལུས་ཟག་བྲལ་རྡོ་རྗེའི་ངོ་བོ། འཆི་བ་མེད་པ་ཚེ་ལ་མངའ་དབང་བརྙེས་པ་སྒྱུ་འཕྲུལ་དྲ་བ་ཆེན་པོ་ཅིར་ཡང་སྣང་བའི་སྐུར་བཞེངས་པ། སྒྱུ་འཕྲུལ་དྲ་བ་ཞེས་པ་ནི། ངེས་དོན་སྒྱུ་འཕྲུལ་དྲ་བ་སྟོང་གསལ་དབྱེར་མེད་ཆོས་ཀྱི་སྐུ་ལས། དྲང་དོན་རྟགས་ཀྱི་སྒྱུ་འཕྲུལ་དྲ་བ་གཟུགས་སྐུའི་རྣམ་པར་བཞེངས་པ་ལ་གོ་དགོས་པ་ཨེ་ཡིན་སྙམ། སངས་རྒྱས་རང་ཉིད་ཀྱི་ལུང་གིས་ཟིན་པའི་བསྟན་ལ་སྟོན་པ་གཉིས་པ་དང་འདྲ་བ། སངས་རྒྱས་གཉིས་པ་སློབ་དཔོན་ཆེན་པོ་པད་མ་འབྱུང་གནས་དད་བརྒྱའི་གཙུག་གི་སྤྱི་བོས་མཆོད་ཅེས་པའོ། །ལུང་གིས་ཇི་ལྟར་ཟིན་ན། ང་ནི་འདི་ན་མི་གནས་ནས། །ལོ་ནི་བརྒྱད་དང་བཅུ་གཉིས་ན། །མདངས་ལྡན་དྲི་མེད་མཚོ་དཀྱིལ་དུ། །ང་ལས་ལྷག་པའི་སྐྱེས་བུ་འབྱུང་། །ཞེས་གསུངས་པའི་ཕྱིར་རོ། །དེ་ལྟ་བུའི་ཐུན་མིན་གྱིས་སློབ་དཔོན་ཆེན་པོ་པད་མ་འབྱུང་གནས་ལ་མཆོད་པར་བརྗོད་ནས། སྐྱབས་གནས་མཆོག་གསུམ་དམ་པ་ལ་མཆོད་པ་བརྗོད་པ་ལས། ཐོག་མར་སངས་རྒྱས་དཀོན་མཆོག་དང་དེའི་སྲས་བསྟན་པའི་བརྒྱུད་འཛིན་དང་བཅས་པ་ལ་མཆོད་པ་བརྗོད་པ་ནི། རྐང་གཉིས་གཙོ་བོ་མི་ཡི་སེང་གེ་ཤཱཀྱའི་རྒྱལ་དང་དེ་ཡི་སྲས། །ཤིང་རྟ་གཉིས་སོགས་རྒྱན་དྲུག་མཆོག་གཉིས་འཇིགས་རྟེན་མིག་གཅིག་ཞི་བ་འཚོ། །སད་མི་བདུན་དང་མར་མེ་མཛད་དཔལ་ཤཱཀ་ཤྲཱི་ཀུན་མཁྱེན་ལྔ་པ་སོགས། །བསྟན་པའི་གཞི་རྟེན་ཚུལ་ཁྲིམས་གསུམ་གྱི་བདག་པོ་རྣམས་ལ་ཅིས་མི་དད། །ཅེས་ལྷ་དང་མིའི་རྣམ་འདྲེན་རྐང་གཉིས་རྣམས་ཀྱི་མཆོག་གམ་གཙོ་བོ་འཇིག་རྟེན་ན་ཟླ་མེད་པའི་དམ་པའི་ཆོས་ཀྱིས་མི་འཇིགས་པའི་ང་རོ་བསྒྲགས་ཤིང་། སྤངས་རྟོགས་ཀྱི་ཡོན་ཏན་མཐར་ཕྱིན་པའི་རྩལ་རྫོགས་པ། དཔེ་རི་དྭགས་ཀྱི་རྒྱལ་པོ་སེང་གེ་དང་ཆོས་མཚུངས་སྦྱར་ཏེ། མི་ཡི་སེང་གེ་ཤཱཀྱའི་རིགས་སུ་འཁྲུངས་ཤིང་བདུད་བཞིའི་དགྲ་ལས་རྒྱལ་བའི་རྒྱལ་བ་རྫོགས་པའི་སངས་རྒྱས་དང་། དེའི་སྲས་ཉེ་སྲས་བརྒྱད་དང་གནས་བརྟན་བཅུ་དྲུག་སོགས་དང་། བདེ་བར་གཤེགས་པའི་བཀའ་དྲི་མ་མེད་པ་མ་ནོར་མ་འཁྲུལ་བར་སྐྱེས་བུའི་ཤེས་རྒྱུད་དུ་འདྲེན་པར་བྱེད་པའི་བྱེད་ལས་ཀྱི་ཆ་ནས་འདྲ་བས་བཏགས་པ་ཤིང་རྟ་ཆེན་པོ་ཀླུ་སྒྲུབ་དང་། ཐོགས་མེད་རྣམ་གཉིས་སོགས་འཛམ་གླིང་མཛེས་པར་བྱེད་པའི་རྒྱན་དྲུག་དང་མཆོག་གཉིས་ཏེ། རྒྱན་དྲུག་མཆོག་གཉིས་ལ་བརྩི་ལུགས་འདྲ་མིན་ཡོད་ཀྱང་ཡོངས་གྲགས་སུ། འདུལ་བ་བདུད་རྩིའི་རྒྱན་ཡོན་ཏན་འོད་དང་ཤཱཀྱ་འོད་གཉིས། ཚད་མའི་རྒྱན་ཕྱོགས་གླང་དང་ཆོས་གྲགས་གཉིས། དབུ་མའི་རྒྱན་ཨརྱཱ་དེ་བ། མངོན་པའི་རྒྱན་དབྱིག་གཉེན་ཏེ་རྒྱན་དྲུག་དང་། མཆོག་གཉིས་ནི། ཟབ་མོ་ལྟ་བའི་སྲོལ་འབྱེད་སློབ་དཔོན་ཀླུ་སྒྲུབ་དང་། རྒྱ་ཆེན་སྤྱོད་པའི་སྲོལ་འབྱེད་འཕགས་པ་ཐོགས་མེད་དེ་ཤིང་རྟ་རྣམ་གཉིས་སོ། །ད་དུང་དེའི་ཐོག་ཏུ་རྨད་བྱུང་གི་སློབ་དཔོན་ཟླ་གྲགས་དང་ཞི་ལྷ་རྣམ་གཉིས་དང་། འཇིག་རྟེན་མིག་གཅིག་ཞི་བ་འཚོ་ཞེས་བོད་ཡུལ་མུན་པའི་གླིང་དུ་བསྟན་པའི་སྒྲོན་མེའི་སྣང་བ་དང་པོ་སྦྱིན་པ་པོ། དབུ་སེམས་ཟུང་འཇུག་གི་ཤིང་རྟའི་སྲོལ་འབྱེད་འཇིག་རྟེན་མིག་གཅིག་མཁན་ཆེན་ཞི་བ་འཚོ་དང་། བོད་ཀྱི་རབ་བྱུང་གི་ཐོག་མ་བོད་མིས་རབ་བྱུང་བྱས་ན་འགྲིག་མིན་ཉམས་སད་ཚོད་ལེན་བྱེད་པའི་ཆེད་དུ་མི་བདུན་རབ་ཏུ་བྱུང་བའི་སད་མི་བདུན་དང་། མར་མེ་མཛད་དཔལ་ཇོ་བོ་རྗེ་དཔལ་ལྡན་ཨ་ཏི་ཤ་དང་། ཁ་ཆེའི་པཎ་ཆེན་ཤཱཀྱ་ཤྲཱི། ཀུན་མཁྱེན་ལྔ་པ་སྟེ་གོང་ས་ཐམས་ཅད་མཁྱེན་པ་རྒྱལ་དབང་ལྔ་པ་ངག་དབང་བློ་བཟང་རྒྱ་མཚོ་སོགས་སོ། །ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་གསུངས་པས་བསྟན་པའི་གཞི་རྟེན་སོར་བྱང་སྔགས་གསུམ་གྱི་སྡོམ་པ་གསུམ་གྱི་ཚུལ་ཁྲིམས་ཀྱི་བདག་པོའམ་བསྟན་པའི་སྲོལ་འབྱེད་ཆེན་པོ་རྣམས་ལ་ཅིས་མི་དད་དེ་དད་ཅིང་གུས་པར་བྱེད་དོ། །རྒྱལ་བའི་བསྟན་པ་དེ་ནི་ལུང་དང་རྟོགས་པའི་བདག་ཉིད་ཅན་ཡིན་ལ། ལུང་གི་ཆོས་སྡེ་སྣོད་གསུམ་འདུལ་བ་མདོ་སྡེ་མངོན་པ་གསུམ་དང་། དེའི་བརྗོད་བྱ་རྟོགས་པའི་ཆོས་ཚུལ་ཁྲིམས་ཏིང་འཛིན་ཤེས་རབ་སྟེ་བསླབ་པ་གསུམ་ཡིན་ན། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཞེས་པ་ལྟར་ཚུལ་ཁྲིམས་ཀྱི་བསླབ་པ་དེ་ཡོན་ཏན་ཐམས་ཅད་ཀྱི་རྟེན་གཞི་ཡིན་པས། སྡེ་སྣོད་སོ་སོར་བསྟན་པའི་སྡོམ་པ་ནི་ཐ་སྙད་གྲགས་ཚོད་ལ་བསམ་ན། སོ་ཐར་གྱི་དགེ་བསྙེན་དགེ་ཚུལ་དགེ་སློང་སྟེ་བསླབ་ཚིགས་གསུམ། བྱང་ཆུབ་སེམས་དཔའི་ལམ་གྱི་ཉེས་སྤྱོད་སྡོམ་པ་དགེ་བ་ཆོས་སྡུད་སེམས་ཅན་དོན་བྱེད་ཀྱི་ཚུལ་ཁྲིམས་རྣམ་པ་གསུམ། སྔགས་ཀྱི་སྐུ་གསུང་ཐུགས་རྡོ་རྗེ་གསུམ་གྱི་དམ་ཚིག་གསུམ་ལ་བཞག་པ་ཡིན་ན། སྡེ་སྣོད་གསུམ་གྱི་ནང་ནས་འདུལ་བའི་སྡེ་སྣོད་ཀྱི་བསྟན་བྱ་སོ་ཐར་གྱི་སྡོམ་པ། མདོ་སྡེའི་སྡེ་སྣོད་ཀྱི་བསྟན་དོན་བྱང་སེམས་ཀྱི་སྡོམ་པ། སྡེ་སྣོད་བཞི་པ་རིག་པ་འཛིན་པའི་སྡེ་སྣོད་ཀྱི་བསྟན་དོན་སྔགས་སྡོམ་རྣམས་ཡིན་པས། དེ་ལྟ་བུའི་ཚུལ་ཁྲིམས་གསུམ་མམ་སྡོམ་པ་གསུམ་གྱི་བསླབ་པ་ནི། ཡོན་ཏན་གྱི་གཞི་དང་བསྟན་པའི་རྩ་བ་ཡིན་པས་དེའི་བདག་པོ་བསྟན་པ་འཛིན་པའི་རྒྱལ་དང་དེ་སྲས་འཕགས་བོད་ཀྱི་བསྟན་འཛིན་ཚོགས་དང་བཅས་པ་ལ་ཅིས་མི་དད་དེ། དང་ཞིང་དད་ཅེས་མན་ངག་གི་གཞུང་འདི་འཆད་རྩོམ་གྱི་ཐོག་མར་གཙོ་བོ་སངས་རྒྱས་དཀོན་མཆོག་སྲས་དང་བཅས་པ་རྣམས་ལ་མཆོད་པར་བརྗོད་དེ། ཆོས་དཀོན་མཆོག་ལ་མཆོད་པར་བརྗོད་པ་ནི། གསང་བདག་དཔའ་བོས་རྒྱལ་ཐབས་སྤྱི་བླུགས་དབང་བསྐུར་བྱིན་པའི་ཐེག་མཆོག་སྟོན་པ་དགའ་རབ་རྗེ། །དམ་པའི་རིགས་ཅན་དྲ་མ་ལྔ་དང་ཏནྟྲཱ་བཅོ་བརྒྱད་གླེགས་བམ་དབང་ཐོབ་རྒྱལ་པོ་ཛ། །རྣམ་གསུམ་ཡོ་གའི་དོན་བརྒྱུད་བདག་པོ་བི་མ་ལ་དང་བེེ་རོ་ལ་སོགས་ཉི་ཤུ་ལྔ། །ཀློང་ལྔའི་མཛོད་ནས་ཟབ་རྒྱའི་སྒོ་འབྱེད་བཅུ་ཕྲག་བཅུ་ཡི་ཕ་མཐར་བརྒལ་ལ་སྙིང་ནས་དད། །ཅེས་གསུངས། བཅོམ་ལྡན་འདས་རྒྱལ་བ་ཤཱཀྱ་ཐུབ་པ་ཉིད་གང་ཟག་རྟག་འཛིན་ཅན་གྱི་ངོར་སྐུ་མྱ་ངན་ལས་འདས་པའི་ཚུལ་བསྟན་པའི་གནས་སྐབས་ན། གསང་སྔགས་བླ་མེད་ཀྱི་བསྟན་པ་ཕྱིས་འབྱུང་བ་ལུང་བསྟན་ཏེ། ང་ནི་མྱ་ངན་འདའ་འོག་ཏུ། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་ཏེ། །རྒྱལ་པོ་ཛ་ཞེས་བྱ་བ་ལ། །སྔོན་ལྟས་བཟང་པོ་སྣང་བར་འགྱུར། །སོགས་གསུངས་པ་ལྟར། ནང་རྒྱུད་ཡོ་ག་གསུམ་གྱི་བསྟན་པ་འདི་འཇིག་རྟེན་གྱི་ཁམས་འདིར་རིམ་གྱིས་བྱུང་བ་ཡིན་ལ། དེའང་མ་ཧཱ་ཡོ་གའི་རྒྱུད་རྣམས་སྟོན་པ་འདས་ནས་ལོ་ཉི་ཤུ་རྩ་བརྒྱད་ན་རྒྱལ་པོ་ཛ་ལ་བབ་པ་དང་། ལུང་ཨ་ནུ་ཡོ་ག་ནི། ཡང་དེའི་སྐབས་ན་དམ་པའི་རིགས་ཅན་དྲ་མ་ལྔ་རི་མ་ལ་ཡ་ཡི་རྩེར་འདུས་ནས། ཕྱོགས་བཅུའི་སངས་རྒྱས་ཐམས་ཅད་ཡིད་ལ་བྱས་ཏེ། ཀྱེ་མ་ཀྱི་ཧུད་ཀྱེ་མ་ཀློང་། །སྟོན་པའི་གསལ་བྱེད་འོད་ནུབ་ན། །འཇིག་རྟེན་མུན་པ་གང་གིས་སེལ། །ཞེས་སོགས་གདུང་ཚིག་ཉེར་གསུམ་བཏོན་པ་ན། དེ་བཞིན་གཤེགས་པ་ཐམས་ཅད་ཀྱིས་གསང་བའི་བདག་པོ་ལ་བསྐུལ་ཏེ། གསང་བའི་བདག་པོས་ཀུན་འདུས་རིག་པའི་མདོ་ལ་སོགས་པ་གསུངས་པ་དང་། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་མཚོ་གླིང་དུ་གསང་བའི་བདག་པོ་ཕྱག་ན་རྡོ་རྗེས་སྤྲུལ་པའི་སྐུ་དགའ་རབ་རྡོ་རྗེ་ལ་གསང་བའི་རྒྱུད་དང་མན་ངག་གསུངས། ཁྱད་པར་དུ་རྫོགས་ཆེན་ཨ་ཏི་ཡོ་ག་ནི་དུས་གསུམ་སངས་རྒྱས་ཐམས་ཅད་འདུས་ནས་རྡོ་རྗེ་སེམས་དཔའ་ལ་བསྐུལ། དེས་སེམས་དཔའ་རྡོ་རྗེ་ལ་བསྐུལ་ནས། དང་པོ་ལྷའི་གནས་སུམ་ཅུ་རྩ་གསུམ་གྱི་ཕོ་བྲང་རྣམ་པར་རྒྱལ་བའི་ཁང་བཟང་དུ་ལྷའི་བུ་སེམས་ལྷག་ཅན་ལ་རྒྱལ་ཐབས་སྤྱི་བླུགས་ཀྱི་དབང་བསྐུར། མན་ངག་འཕྲུལ་གྱི་ལུང་བཅུ་ཕོག དབང་བདུན་མན་ངག་ལྔ་ལ་སོགས་པ་གནང་ནས་རྒྱལ་ཚབ་དམ་པར་དབང་བསྐུར། རྨད་བྱུང་དམ་པའི་སྙིང་པོ་ནི། །ལྷ་གནས་གསུམ་དུ་གྲགས་གྱུར་ཏེ། །ཡང་སྤྲུལ་གང་ཟག་ཐུགས་སྲས་ཀྱིས། །འཛམ་གླིང་དབུས་སུ་རྒྱས་པར་ཤོག །ཅེས་བདེན་ཚིག་གིས་སྨོན་ལམ་བཏབ། སྨོན་ལམ་བཏབ་པ་དེ་བཞིན་དུ་ཡུལ་དྷ་ན་ཀོ་ཥའི་གླིང་དུ་ཡབ་རྒྱལ་པོ་ཨུ་པ་རཱ་ཛ་དང་། ཡུམ་སྣང་གསལ་འོད་ལྡན་མ་གཉིས་ལ་སྲས་མོ་མེ་ཏོག་གསལ་ཞེས་པ་དགེ་སློང་མ་འཁོར་བའི་ཆོས་ཀྱིས་མ་གོས་པར་ཡོད་པ་ལ། གསང་བདག་གིས་བྱིན་གྱིས་བརླབས་ཏེ། དགའ་རབ་རྡོ་རྗེ་འཁྲུངས། ཕྱག་ན་རྡོ་རྗེ་མངོན་སུམ་དུ་བྱོན་ཏེ་རྒྱལ་ཐབས་སྤྱི་བླུགས་རྫོགས་པ་ལ་སོགས་པའི་དབང་བསྐུར། དགའ་རབ་རྡོ་རྗེ་རྩོལ་མེད་རྫོགས་པ་ཆེན་པོའི་སར་སྐད་ཅིག་གིས་སངས་རྒྱས་སོ། །དེ་ལྟ་བུའི་བདག་ཉིད་ཡིན་པས་ན་གསང་བདག་དཔའ་བོས་སུམ་ཅུ་རྩ་གསུམ་གྱི་ལྷ་གནས་དང་། འཇིག་རྟེན་མི་ཡུལ་དུ་རྒྱལ་ཐབས་སྤྱི་བླུགས་ཀྱི་དབང་བསྐུར་ཞིང་སྐད་ཅིག་གིས་སངས་རྒྱས་པའི་ཐེག་མཆོག་རྫོགས་པ་ཆེན་པོའི་སྟོན་པ་དགའ་རབ་རྡོ་རྗེ་དང་། དམ་པའི་རིགས་ཅན་དྲ་མ་ལྔ་སྟེ། སངས་རྒྱས་ཤཱཀྱ་ཐུབ་པ་སྐུ་མྱ་ངན་ལས་འདས་པའི་ཚུལ་བསྟན་ནས། མི་ལོ་ཉི་ཤུ་རྩ་བརྒྱད་ན་གསང་བདག་ཕྱག་ན་རྡོ་རྗེས་གསང་བའི་རྒྱུད་གསུངས་ནས་གདུལ་བྱ་དམ་པའི་རིགས་ཅན་དྲ་མའམ་མཆོག་ཏུ་གྱུར་པ་ལྔ་སྟེ། ལྷ་གྲགས་ལྡན་མཆོག་སྐྱོང་། ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། མིའི་རིགས་ལི་ཙྪ་བཱི་དྲི་མེད་གྲགས་པ་ལྔ་ལ་དམ་པའི་རིགས་ཅན་དྲ་མ་ལྔ་ཟེར། ཏནྟྲ་བཅོ་བརྒྱད་ནི་རྒྱུད་མ་ཧཱ་ཡོ་གའི་ཏནྟྲཱ་སྡེ་བཅོ་བརྒྱད་ལ་གོ་དགོས། རྒྱུད་མ་ཧཱ་ཡོ་གའི་ཏནྟྲཱ་ཆེན་པོ་སྡེ་བཅོ་བརྒྱད་ཀྱི་གྲངས་འདྲེན་ལུགས་བཞེད་པ་མི་འདྲ་བ་ཡོད་ལ། ཀུན་མཁྱེན་ཆེན་པོའི་སྔགས་ཀྱི་སྤྱི་དོན་ལས་གསུངས་པ་ལྟར་ན། སྐུ་གསུང་ཐུགས་ཡོན་ཏན་ཕྲིན་ལས་ལྔ་པོ་རེ་རེ་ལ་གསུམ་རེ་བཞག་པའི་ལྔ་ཚན་གསུམ་དང་། དེའི་སྟེང་དུ་སྤྱི་རྒྱུད་གསུམ་བཞག་སྟེ་བཅོ་བརྒྱད་བརྩི་བ་སྟེ། དེའང་སྐུའི་སྐུ་རྒྱུད་གླང་པོ་རབ་འབོག སྐུའི་གསུང་རྒྱུད་གླང་པོ་ཆུར་འཇུག སྐུའི་ཐུགས་རྒྱུད་སངས་རྒྱས་མཉམ་སྦྱོར་ཏེ་སྐུ་རྒྱུད་གསུམ། གསུང་གི་སྐུ་རྒྱུད་རི་བོ་བརྩེགས་པ། གསུང་གི་གསུང་རྒྱུད་པདྨ་དབང་ཆེན། གསུང་གི་ཐུགས་རྒྱུད་ཟླ་གསང་ཐིག་ལེ་སྟེ་གསུང་རྒྱུད་གསུམ། ཐུགས་ཀྱི་སྐུ་རྒྱུད་རྩེ་མོ་འདུས་པ། ཐུགས་ཀྱི་གསུང་རྒྱུད་གཅིག་ལས་འཕྲོས་པ། ཐུགས་ཀྱི་ཐུགས་རྒྱུད་གསང་བ་འདུས་པ་སྟེ་ཐུགས་རྒྱུད་གསུམ། ཡོན་ཏན་གྱི་སྐུ་རྒྱུད་མེ་རི་འབར་བ། ཡོན་ཏན་གྱི་གསུང་རྒྱུད་ས་མ་ཡ་འབུམ་སྡེ། ཡོན་ཏན་གྱི་ཐུགས་རྒྱུད་དཔལ་མཆོག་དང་པོ་སྟེ་ཡོན་ཏན་གྱི་རྒྱུད་གསུམ། ཕྲིན་ལས་ཀྱི་སྐུ་རྒྱུད་དཔལ་ཕྲེང་དཀར་པོ། ཕྲིན་ལས་ཀྱི་གསུང་རྒྱུད་མ་མོ་རྒྱུད་ལུང་། ཕྲིན་ལས་ཀྱི་ཐུགས་རྒྱུད་བི་ཏོ་ཏ་མ་འབུམ་སྡེ་སྟེ་ཕྲིན་ལས་ཀྱི་རྒྱུད་གསུམ། སྤྱིའི་སྐུ་རྒྱུད་ཐབས་ཞགས། སྤྱིའི་གསུང་རྒྱུད་ས་མ་ཡ་བཀོད་པ། སྤྱིའི་ཐུགས་རྒྱུད་གསང་བ་སྒྱུ་འཕྲུལ་ཏེ་སྤྱི་རྒྱུད་གསུམ་དང་བཅོ་བརྒྱད་དོ། །དཔལ་ཕྲེང་དང་པོའི་འགྲེལ་བ་ལྟར། སྨིན་གླིང་གཏེར་ཆེན་གྱི་བཞེད་པ་ལ་ལྔ་ཚན་གསུམ་དང་ཁ་སྐོང་དང་བཅས་པ་ལ་བཤད་དེ། ཆོས་ལྔའི་གཞི་དང་རྩ་བར་གྱུར་པའི་རྒྱུད་སྡེ་ལྔ་དང་། སྒྲུབ་པ་ལག་ལེན་དུ་བཏབ་པའི་རྒྱུད་སྡེ་ལྔ། སྤྱོད་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ་སྟེ་ལྔ་གསུམ་བཅོ་ལྔ་དང་། དེའི་ཐོག་ཏུ་མ་ཚང་བ་ཁ་སྐོང་བ་ཕྱི་མའི་རྒྱུད་གཉིས། བསྡུས་དོན་གྱི་རྒྱུད་གཅིག་དང་བཅོ་བརྒྱད་དུ་བརྩི། དེའང་ཆོས་ལྔའི་གཞི་དང་རྩ་བར་གྱུར་པའི་རྒྱུད་སྡེ་ལྔ་ནི། སྐུ་གསུང་ཐུགས་ཡོན་ཏན་ཕྲིན་ལས་ལྔར་ཕྱེས་ནས། སྐུ་རྒྱུད་སངས་རྒྱས་མཉམ་སྦྱོར་དང་། གསུང་རྒྱུད་ཟླ་གསང་ཐིག་ལེ། ཐུགས་རྒྱུད་གསང་བ་འདུས་པ། ཡོན་ཏན་གྱི་རྒྱུད་དཔལ་མཆོག་དང་པོ། ཕྲིན་ལས་ཀྱི་རྒྱུད་ཀརྨ་མ་ལེའོ། །སྒྲུབ་པ་ལག་ལེན་དུ་བསྟན་པའི་རྒྱུད་སྡེ་ལྔ་ནི། ཧེ་རུ་ཀ་རོལ་པའི་རྒྱུད་དང་། རྟ་མཆོག་རོལ་པའི་རྒྱུད། གཤིན་རྗེ་རོལ་པའི་རྒྱུད། བདུད་རྩི་རོལ་པའི་རྒྱུད། ཕུར་པ་བཅུ་གཉིས་པ་འབྱུང་བའི་རྒྱུད་སྡེ་དང་ལྔ་རེད། སྤྱོད་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ་ནི། རི་བོ་བརྩེགས་པ་དང་། ཡེ་ཤེས་རྔམས་གློག དམ་ཚིག་བཀོད་པ། ཏིང་འཛིན་རྩེ་གཅིག གླང་ཆེན་རབ་འབོག་གི་རྒྱུད་དེ་ལྔ། དེ་དག་ཏུ་མ་ཚང་བའི་ཁ་སྐོང་ལྟ་བུ་ཕྱི་མའི་རྒྱུད་གཉིས་ནི་རྣམ་སྣང་སྒྱུ་འཕྲུལ་དྲ་བ་དང་། ཐབས་ཞགས་པདྨའི་ཕྲེང་བའི་དོན་བསྡུས་སོ། །དེ་ཐམས་ཅད་ཀྱི་བསྡུས་དོན་ལྟ་བུ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་གཅིག་སྟེ་བཅོ་བརྒྱད་དོ། །དེ་ལྟ་བུའི་མ་ཧཱ་ཡོ་གའི་ཏནྟྲཱ་སྡེ་བཅོ་བརྒྱད་ཀྱི་གླེགས་བམ་དབང་ཐོབ་རྒྱལ་པོ་ཛ་སྟེ། དེ་ཡང་གོང་དུ་ཞུས་པ་བཞིན་སྟོན་པ་འདས་ནས་མི་ལོ་ཉི་ཤུ་རྩ་བརྒྱད་ན། རྒྱལ་པོ་ཛ་ལ་རྨིས་ལྟས་ངོ་མཚར་བ་བདུན་སྣང་ནས། རྒྱལ་པོ་རང་ཉིད་ཀྱི་ཁང་པའི་ཡང་ཐོག་ཏུ་རིན་པོ་ཆེ་གསེར་གྱི་གླེགས་བམ་ལ་བེེ་ཌཱུརྱ་ཞུན་མས་ཡི་གེ་བྲིས་པ་གསང་སྔགས་མ་ཧཱ་ཡོ་གའི་རྒྱུད་སྡེ་པུ་སྟི་མང་པོ་དང་། ཕྱག་ན་རྡོ་རྗེའི་སྐུ་ཁྲུ་གང་བ་རྙེད། དེ་ལ་གསོལ་བ་བཏབ་པས་རྡོ་རྗེ་སེམས་དཔའ་ཞལ་མཐོང་གི་ལེའུ་ཤེས། དེ་དང་ཕྱག་རྡོར་གྱི་སྐུ་ལ་བརྟེན་ནས་ཟླ་བ་དྲུག་ལ་བསྒྲུབས་པས། རྡོ་རྗེ་སེམས་དཔའི་ཞལ་མཇལ་ནས་བྱིན་གྱིས་བརླབས་པས་གླེགས་བམ་ཐམས་ཅད་ཀྱི་ནང་དོན་མ་ལུས་པར་མཁྱེན། དེ་ལས་རིམ་པར་བརྒྱུད་ནས་དར་རོ། །དེས་ན་ཏནྟྲཱ་བཅོ་བརྒྱད་དབང་ཐོབ་རྒྱལ་པོ་ཛ་ཞེས་གསུངས་སོ། །སྤྱི་མདོ་དགོངས་པ་འདུས་པ་ལས། དོན་དམ་ངེས་པའི་ཐེག་པ་ནི། །གསུམ་དུ་ངེས་པར་སྣང་བ་སྟེ། །ཀུན་འབྱུང་འདྲེན་དང་དཀའ་ཐུབ་རིགས། །དབང་བསྒྱུར་ཐབས་ཀྱི་ཐེག་པའོ། །ཞེས་གསུངས་པས་དེ་གསུམ་ལ་གསུམ་གསུམ་དུ་ཕྱེ་བས་ཐེག་པ་དགུའི་ནང་ནས། དབང་བསྒྱུར་ཐབས་ཀྱི་ཐེག་པ་གསུམ་པོ་ནི། རྒྱུད་མ་ཧཱ་ཡོ་ག་དང་། ལུང་ཨ་ནུ་ཡོ་ག མན་ངག་ཨ་ཏི་ཡོ་ག་གསུམ་ཡིན་ལ། དེའི་ནང་གི་ཕ་རྒྱུད་མ་ཧཱ་ཡོ་ག་ནི། དང་པོ་དབང་བཞིས་བསྡུས་པ་ཕན་ནུས་ཟབ་མོའི་དབང་གིས་སྨིན་པར་བྱས་ནས། གཞི་ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་ལྷག་པའི་ཆོས་སྐུ་ཆེན་པོར་རྟོགས་པའི་སྟེང་ནས། ལམ་སྒོམ་ཚུལ་ཕ་རྒྱུད་མ་ཧཱ་ཡོ་ག་རང་ཉིད་ལའང་ནང་གསེས་ཀྱི་ཕ་མ་གཉིས་མེད་ཀྱི་རྒྱུད་སྡེ་གསུམ་དུ་དབྱེ་རུ་ཡོད་ལ། དེའི་ཁྱད་པར་ཇི་ལྟར་འབྱེད་ན། ཐབས་བསྐྱེད་རིམ་གྱི་སྤྲོས་པ་གཙོ་བོར་སྟོན་པ་དང་། རྫོགས་རིམ་གསང་དབང་གི་ཉམས་ལེན་རླུང་གཙོ་བོར་བྱེད་པས། གསལ་སྟོང་རྣམ་པར་མི་རྟོག་པའི་ཡེ་ཤེས་སྐྱེད་པར་བྱེད་པ་དེ་ཕ་རྒྱུད། མཚན་གཞི་ནི། གསང་འདུས་དང་གཤིན་རྗེའི་གཤེད་ལྟ་བུའོ། །བསྐྱེད་རིམ་ཆ་ཙམ་དང་རྫོགས་རིམ་ཤེར་དབང་གི་ཉམས་ལེན་ཁམས་བྱང་ཆུབ་སེམས་ཀྱི་ཐིག་ལེ་གཙོ་བོར་བྱེད་པས་བདེ་སྟོང་གི་ཡེ་ཤེས་སྐྱེད་པར་བྱེད་པ་མ་རྒྱུད། མཚན་གཞི་ནི་ཡང་དག་དང་འཁོར་ལོ་སྡོམ་པ་ལྟ་བུའོ། །བསྐྱེད་རྫོགས་ཟུང་འཇུག་དང་། ཁྱད་པར་རྫོགས་རིམ་དབང་བཞི་པའི་ཉམས་ལེན་བདེ་གསལ་རྣམ་པར་མི་རྟོག་པའི་ཡེ་ཤེས་ཆེན་པོ་ཆོས་ཉིད་བསམ་གྱིས་མི་ཁྱབ་པ། འོད་གསལ་རང་བྱུང་གི་ཡེ་ཤེས་མཆོག་ཏུ་མི་འགྱུར་བ་གཙོ་བོ་ཉམས་སུ་ལེན་ཞིང་། སྤྱོད་པ་གསུམ་གྱི་ཉེ་རྒྱུས་འབྲས་བུ་ཚེ་འདིར་བླ་ན་མེད་པ་ཐོབ་པར་མཛད་པ་དེ་མ་ཧཱ་རང་ལུགས་ཀྱི་གཉིས་མེད་རྒྱུད་དེ། བདེ་གསལ་མི་རྟོག་གསུམ་རྩལ་འདོན་གྱི་ཁྱད་པར་གྱིས་དེ་ལྟར་འཇོག་པ་སྟེ། དཔེར་ན་རྩ་རྒྱུད་སྒྱུ་འཕྲུལ་དྲྭ་བ་དེ་གཉིས་མེད་ཀྱི་རྒྱུད་དུ་བཞག་པ་ལྟ་བུའོ། །ལུང་ཨ་ནུ་ཡོ་ག་ནི། སྣང་བའི་ཆ་ཡེ་ནས་དག་པ་ཀུན་ཏུ་བཟང་པོ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང་། དེའི་སྟོང་ཆ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར། དེའི་དབྱིངས་རིག་སོ་སོ་མ་ཡིན་ཐ་མི་དད་པ་སྲས་བདེ་བ་ཆེན་པོའི་དཀྱིལ་འཁོར་སྣང་སྲིད་ཀྱིས་བསྡུས་པའི་ཆོས་ཐམས་ཅད་དག་མཉམ་བདེན་པ་ཆེན་པོར་ལྟ་བ། ཕྱི་སྤྲོས་བཅས་བསྐྱེད་རིམ་སོགས་ལ་མི་ལྟོས་པར་ནང་རྡོ་རྗེའི་ལུས་ཀྱི་རྩ་རླུང་ཐིག་ལེ་གནད་དུ་བསྣུན་པས་རགས་པའི་འགྱུར་བ་ཐམས་ཅད། འགྱུར་མེད་ཡེ་ཤེས་ཀྱི་དབུ་མའི་ཀློང་དུ་ཐིམ་པའི་ལྟ་བའི་ཐོག་ནས། སྒོམ་པ་དབང་བཞི་དང་འབྲེལ་བའི་ནང་ནས་གསང་དབང་དང་། ཤེར་དབང་གི་ཉམས་ལེན་རང་ལུས་དང་གཞན་ལུས་ཐབས་ལྡན་གྱི་རྣལ་འབྱོར་གཙོ་བོར་ལམ་དུ་བྱས་ནས། གོང་ལྟར་ལས་རླུང་དབུ་མའི་ནང་དུ་བསྟིམས་ནས་གཉུག་མ་བྱང་ཆུབ་སེམས་ཀྱི་དཀྱིལ་འཁོར་དུ་འཇུག་པ་ལ་འདུས། སྤྱོད་པ་ཞུ་བདེའི་རྗེས་ཆགས་ཀྱི་ཉམས་ལེན་གཙོ་བོར་བཟུང་ནས། ཐབས་མཁས་ཟབ་མོའི་དབང་གིས་འབྲས་བུ་ཚེ་འདིར་འདུན་པ་སེམས་པ་ལ་སོགས་པ་ལམ་ལྔ་དང་། འགྱུར་བ་མ་ངེས་པ་ལ་སོགས་ས་བཅུ་གཅིག་པོ་ནང་གི་ཐབས་མཁས་ཀྱིས་བགྲོད་ནས། སྐུ་བཞི་ཡེ་ཤེས་ལྔ་ཡི་བདག་ཉིད་སངས་རྒྱས་རྡོ་རྗེ་འཆང་གི་སྐུ་འགྲུབ་པར་བྱེད་པའོ། །མན་ངག་ཨ་ཏི་ཡོ་གའམ་གཉིས་མེད་ཀྱི་རྒྱུད་སྡེ་ཨ་ཏི་ཡོ་ག་ནི། སེམས་ཀློང་མན་ངག་གི་རྒྱུད་སྡེ་ལ་བརྟེན་ནས་སེམས་ཉིད་རང་བྱུང་གི་ཡེ་ཤེས་ངོ་བོ་ཀ་དག རང་བཞིན་ལྷུན་གྲུབ། དེ་ལྟ་བུའི་སྟོང་གསལ་དབྱེར་མེད་ཀྱི་ཆོས་ཉིད་དེའི་རྩལ་ལས་འཁོར་འདས་སྣ་ཚོགས་སུ་སྣང་བའི་ཐུགས་རྗེ་ཀུན་ཁྱབ་ཏུ་བཞུགས་པ་དེ་ཉིད། བསྐྱེད་རིམ་དང་མཚན་བཅས་རྫོགས་རིམ་གྱི་ཐབས་ལ་མི་ལྟོས་པར་དོན་རྒྱུད་འཕོ་བའི་བྱིན་རླབས་དང་སེམས་ཉིད་རང་ངོ་སྤྲོད་པའི་བླ་མའི་མན་ངག་ལ་བརྟེན་ནས། བསལ་བཞག་མེད་པའི་ཆོས་ཉིད་དེ་ཐད་ཀར་ངོས་ཟིན་པ་རིག་པ་འགྱུར་མེད་ཀྱི་ལྟ་བ་དེའི་ཐོག་ཏུ། སྒོམ་པ་ཡེ་བབ་སོར་བཞག་རང་བཞིན་འོད་ཀྱི་བསམ་གཏན་ལ་གནས་པའི་སྒོམ་མེད་ཡེངས་མེད་ཀྱི་ཐོག་ནས་རྣམ་རྟོག་རང་ཤར་རང་གྲོལ། རྩོལ་སྒྲུབ་མི་དགོས་པར་ཐམས་ཅད་རིག་པའི་དབྱིངས་སུ་སྦྱར་ནས། སྤྱོད་པ་སྤང་བླང་དགག་སྒྲུབ་དང་བྲལ་བས། འབྲས་བུ་སྐུ་གསུམ་གྱི་ཡོན་ཏན་མ་བཙལ་རིག་པའི་གཞི་ལ་རྫོགས་པ་ཇི་བཞིན་པར་མངོན་དུ་གྱུར་པའོ། །ཁྱད་པར་མན་ངག་སྡེའི་སྐབས་སུ། ཅོག་བཞག་བཞི་དང་། མི་གཡོ་གསུམ་ལྡན་གྱིས་ཁྲེགས་ཆོད་ཀྱི་ལྟ་སྒོམ་གྱི་གནད་དང་མི་འབྲལ་བས། སྒྲོན་དྲུག་འཇའ་ཟེར་ཐིག་ལེའི་གནད་ལ་བསྣུན་ནས་རིག་གདངས་རྩོལ་མེད་མངོན་སུམ་དུ་སྣང་བས། སྣང་བཞི་མཐར་ཕྱིན་ནས་གདོས་བཅས་ཀྱི་ལུས་འོད་གསལ་གྱི་དབྱིངས་སུ་དེངས་ཏེ་གདོད་མའི་དབྱིངས་སུ་སངས་རྒྱས་པར་འགྱུར་བ་སྟེ། དེ་ལྟ་བུའི་རྒྱུད་མ་ཧཱ་ཡོ་ག ལུང་ཨ་ནུ་ཡོ་ག མན་ངག་ཨ་ཏི་ཡོ་ག་སྟེ་ཡོ་ག་རྣམ་པ་གསུམ་གྱི་ཚིག་བརྒྱུད་ལུང་གི་བརྒྱུད་པར་མ་ཟད་དོན་བརྒྱུད་བྱིན་རླབས་ཀྱི་བདག་པོ་བི་མ་ལ་སྟེ། བི་མ་ལ་མི་ཏྲ་འདི་རྒྱ་གར་པཎ་གྲུབ་ལྔ་བརྒྱའི་གཙུག་རྒྱན། འཕགས་བོད་ཀུན་ན་རླུང་ལྟར་གྲགས་པ། སློབ་དཔོན་ཛྙཱ་ན་སུ་ཏྲའི་འདས་རྗེས་བཞག་ཐབས་བཞི་བ་བབས་པས་དགོངས་པ་དབྱེར་མེད་དུ་གྱུར་པ། འཕོ་ཆེན་འོད་ལུས་དྭངས་མའི་སྐུར་བརྙེས་ཏེ་བསྐལ་པ་མ་ཞིག་འཁོར་བ་མ་སྟོང་གྱི་བར་དུ་སྐུ་ལུས་དེས་འགྲོ་དོན་མཛད་པའི་རྫོགས་པ་ཆེན་པོའི་སྲོལ་འབྱེད་ཀྱི་ཤིང་རྟ་ཆེན་པོ་དེ་ཉིད་དང་། ལོ་ཆེན་བེེ་རོ་ཙཱ་ན་ནི། མཚན་ལ་ལོ་ཙཱ་བཏགས་ཀྱང་དོན་ལ་པཎྜི་ཏ་ཆེན་པོ། བེེ་རོ་ཙ་ན་འདྲ་བའི་ལོ་ཙཱ་བ། །སྔར་ཡང་མ་བྱོན་ཕྱིས་ཀྱང་འབྱོན་རེ་ཀན། །མ་འོངས་རྒྱ་གར་འཕྲལ་སྐད་ཤེས་ཙམ་ལ། །ལོ་ཙཱར་བཞེད་སྲིད་བེེ་རོའི་ཆར་མི་ཉེ། །ལོ་ཙཱ་བཏགས་ཀྱང་དོན་ལ་པཎྜི་ཏ། །འདི་ཡི་ཆོས་དྲིན་ཡོད་དོ་ཕྱི་རབས་རྣམས། །ཞེས་དང་། བེེ་རོ་རང་ཉིད་ཀྱིས་ཀྱང་། བདག་ནི་ལོ་ཙཱ་བཻ་རོ་ཙ་ན་སྟེ། །དམིགས་མེད་མཁའ་ལྟར་དག་པ་ཆོས་ཀྱི་དབྱིངས། །བདེ་ཆེན་འདུ་འབྲལ་མེད་པའི་ཀློང་དཀྱིལ་ནས། །ཡ་མཚན་རྨད་བྱུང་བདག་གི་ལུས་འདི་རྙེད། །ལ་སོགས་པ་གསུངས་པ་ལྟར་སྤྲུལ་པའི་ལོ་ཙཱ་བ་ཆེན་པོ་རྣམ་སྣང་ལོ་ཙཱ་བ་སྟེ། རྗེ་རྒྱལ་པོ་ཁྲི་སྲོང་ལྡེའུ་བཙན། འབངས་ལོ་ཆེན་བེེ་རོ་ཙ་ན། གྲོགས་མཁའ་འགྲོ་ཡེ་ཤེས་མཚོ་རྒྱལ་ཏེ་ལས་ཅན་རྗེ་འབངས་གྲོགས་གསུམ། སྐལ་ལྡན་སྙིང་གི་བུ་དགུ་སོགས་རྗེ་འབངས་ཉི་ཤུ་རྩ་ལྔ་ལ་སོགས་གསུངས་པས། དེ་ཡན་ཆད་ཀྱིས་རིང་བརྒྱུད་བཀའ་མའི་བརྒྱུད་པ་གཙོ་བོ་བསྟན། འདི་མན་ཆད་ཀྱིས་ཉེ་བརྒྱུད་གཏེར་གྱི་བརྒྱུད་པ་གཙོ་བོ་བསྟན་ཏེ། འབྱུང་བ་ལྔའི་ཀློང་ལྔ་ཟབ་གཏེར་གྱི་མི་ཟད་པའི་མཛོད་ཡིན་པས་ན་ཀློང་ལྔའི་མཛོད་དེ། སྣོད་བཅུད་ཡེ་ནས་དག་པ་ས་སངས་རྒྱས་སྤྱན་མ་དང་། ཆུ་མ་མ་ཀི མེ་གོས་དཀར་མོ། རླུང་དམ་ཚིག་སྒྲོལ་མ། ནམ་མཁའ་དབྱིངས་ཀྱི་དབང་ཕྱུག་མ་སྟེ་ཡུམ་ལྔའི་མཁའ་ཀློང་རྣམ་པར་དག་པ་ལས་མ་འདས་པ་ཞིག་ཡིན་ན། སྔོན་སློབ་དཔོན་པད་མ་འབྱུང་གནས་ཀྱིས་བཀའ་བབ་སྙིང་གི་བུ་དགུ་སོགས་ལ་སྨོན་ལམ་གཏད་རྒྱ་བྱས། དབང་བསྐུར་མངའ་གསོལ་ཏེ་དུས་ཐ་མའི་འགྲོ་བ་འདུལ་བར་བྱིན་གྱིས་བརླབས། འབྱུང་ལྔའི་ཀློང་ཆེན་པོ་ལྔའི་དབྱིངས་སུ་གཏེར་དུ་སྦས། གཏེར་བདག་མཁའ་འགྲོ་བཅུ་གསུམ་ལ་གཏད། མ་འོངས་ལས་ཅན་གྱི་བུ་དང་འཕྲད་པར་ཤོག་ཅེས་གསུངས་ནས། གཏེར་རྒྱ། གཏད་རྒྱ་ལ་སོགས་རྒྱ་རིམ་པ་དགུ་དང་བཅུ་གསུམ་སོགས་ཀྱིས་བཏབ་ནས་བཞག་པ་ཉིད། སྨོན་ལམ་དུས་བབ་ཀྱི་དབང་གིས་བཀའ་བབ་ལུང་བསྟན། སྨོན་ལམ་དབང་བསྐུར། མཁའ་འགྲོ་གཏད་རྒྱའི་བརྒྱུད་པ་ལ་སོགས་པ་བརྒྱུད་པ་དྲུག་ལྡན་གྱི་ཐོག་ནས་གཏེར་སྟོན་སྤྲུལ་སྐུ་བརྒྱུད་པའི་བླ་མ་ཐམས་ཅད་ཀྱིས་ཟབ་གཏེར་ལ་སོགས་པའི་གཏེར་ནས་སྤྱན་དྲངས་ཏེ། རྫས་གཏེར་དང་། ཆོས་གཏེར། ཤར་གཏེར་སྨིན་པ་འབྲས་བུའི་སྐོར། ལྷོ་གཏེར་འདྲིལ་བ་སྡོང་པོའི་སྐོར། ནུབ་གཏེར་གསལ་བ་མེ་ཏོག་གི་སྐོར། བྱང་གཏེར་རྒྱས་པ་ཡལ་འདབ་ཀྱི་སྐོར། དབུས་གཏེར་གྲུབ་པ་རྩ་བའི་སྐོར་སོགས་མང་ངོ་། །ཟབ་མོའི་གདམས་པ་ཇི་སྙེད་པ། །བཀའ་བཞིས་གདབ་ནས་གཏེར་དུ་སྦས། །དུས་རྟགས་གདུལ་བྱ་འཛོམས་པ་ན། །རིམ་བཞིན་བཏོན་ནས་དོན་བྱེད་པ། །སྨོན་ལམ་གཏད་རྒྱའི་གཏེར་དུ་སྦས། །ཞེས་དང་། གུ་རུ་ཉིད་ཀྱི་གཏེར་ལུང་དུ་གསལ་བ། ཡུལ་ཆེན་རེ་ལ་གཏེར་ཆེན་རེ། །ཡུལ་གྲུ་རེ་ལ་གཏེར་ཕྲན་རེ། །དེ་ཡང་ཨོ་རྒྱན་རྗེ་ཚབ་ཡིན། །ཞེས་གསུངས་པ་ལྟར་གཏེར་ཆེན་བརྒྱ་དང་རྩ་བརྒྱད་དང་། གཏེར་ཕྲན་སྟོང་དང་རྩ་གཉིས་ལ་སོགས་པའི་གཏེར་ཆོས་དང་། ཁྱད་པར་དུ་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ཇི་སྙེད་པར་འཛིན་པའི་གཏེར་སྟོན་སྤྲུལ་སྐུ་བརྒྱུད་པའི་བླ་མ་ཐམས་ཅད་ལ་སྙིང་ནས་གུས་པས་འདུད་དོ་ཞེས་སོ། །ཚིགས་བཅད་འདིའི་དངོས་བསྟན་གཙོ་བོ་ཆོས་དཀོན་མཆོག་སྟེ། བཀའ་གཏེར་གྱི་ཆོས་བཀའ་རབ་འབྱམས་ཇི་སྙེད་པ་ལ་མཆོད་པ་བརྗོད་པའམ། ཡང་ན་ཚིགས་བཅད་དང་པོ་རྐང་གཉིས་གཙོ་བོ་སོགས་ཀྱིས་མདོ་དང་། ཚིགས་བཅད་གཉིས་པ་གསང་བདག་དཔའ་བོ་སོགས་ཀྱིས་སྔགས། གཉིས་ཀས་ཐུན་མོང་དུ་དེ་འཛིན་གྱི་དགེ་འདུན་དཀོན་མཆོག་ལ་མཆོད་པར་བརྗོད་པ་བསྟན་ཏོ། །དེ་ནས་རྒྱལ་བ་གཉིས་པ་ཀློང་ཆེན་རབ་འབྱམས་ལ་དམིགས་ཀྱིས་བཀར་ནས་མཆོད་པར་བརྗོད་པ་ནི། རྗོད་བྱེད་གསུང་རབ་ཡན་ལག་བཅུ་གཉིས་དང་། །བརྗོད་དོན་རང་བཞིན་མེད་པའི་སྟོང་པ་ཉིད། །ཐུབ་པའི་ལུང་རྟོགས་བསྟན་པ་གངས་ཅན་འདིར། །གསལ་མཁས་ཀུན་མཁྱེན་ངག་གི་དབང་པོར་ངེས། །གང་རྗོད་པར་བྱེད་པ་གསུང་རབ་ཡན་ལག་བཅུ་གཉིས། དེའང་རྒྱལ་བས་ཆོས་ཀྱི་འཁོར་ལོ་རིམ་པ་གསུམ་མམ་བཞིར་བསྐོར་བའི་ཆོས་ཕུང་བརྒྱད་ཁྲི་བཞི་སྟོང་རྣམས་ཚུར་བསྡུ་ན། མདོ་སྡེ་དབྱངས་བསྙད་ལུང་བསྟན་ཚིག་སུ་བཅད། །ཆེད་བརྗོད་གླེང་གཞི་རྟོགས་བརྗོད་དེ་ལྟར་བྱུང་། །སྐྱེས་རབས་རྒྱས་དང་རྨད་བྱུང་གཏན་ལ་དབབ། །ཅེས་དེ་ལྟ་བུའི་གསུང་རབ་ཡན་ལག་བཅུ་གཉིས་དང་། དེའང་བསྡུ་ན་འདུལ་བ་མདོ་སྡེ་མངོན་པ་སྟེ་སྡེ་སྣོད་གསུམ་གྱི་ཁོངས་སུ་འདུས་པ་དེ་དང་། བརྗོད་དོན་དངོས་བརྒྱུད་གང་རུང་གི་སྒོ་ནས་སྣང་བཏགས་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་བཞིན་གྱིས་གྲུབ་པར་མེད་པས་བདག་གཉིས་ཀྱིས་སྟོང་པའི་སྟོང་པ་ཉིད། སྐྱེ་འགག་གནས་གསུམ་དང་བྲལ་བར་གཏན་ལ་ཕབ་ཅིང་རྟོགས་པའི་རིམ་པའི་རྣམ་པར་བཞག་པ་སྟེ། ཐུབ་པའི་ལུང་དང་རྟོགས་པའི་བསྟན་པ་རིན་པོ་ཆེ་གངས་ཅན་བསིལ་བའི་ལྗོངས་འདིར་མཁའ་ལ་ཉི་མ་ཤར་བ་ལྟར་གསལ་བར་མཛད་མཁས་པ་ནི་ཀུན་མཁྱེན་ངག་གི་དབང་པོ་ཉིད་ངེས་ཞེས་གསུངས། ཀུན་མཁྱེན་ཆེན་པོ་ལ་ཨོ་རྒྱན་ཆེན་པོས་དྲི་མེད་འོད་ཟེར་དང་། མཁའ་འགྲོ་ཡེ་ཤེས་མཚོ་རྒྱལ་གྱིས་རྡོ་རྗེ་གཟི་བརྗིད་རྩལ་ཞེས་མཚན་གསོལ་བ་དང་། ཨ་ཏི་བཀོད་པ་ཆེན་པོ་དང་། སྒྲ་ཐལ་འགྱུར་རྩ་བའི་རྒྱུད་ལས། དེ་འོག་བློ་གྲོས་མཆོག་གིས་འཛིན། །ཞེས་རྡོ་རྗེ་འཆང་གི་ལུང་གིས་ཟིན་པ་དང་། བཀའ་ཆེམས་ཀ་ཁོལ་མ་རུ། བློ་གྲོས་མིང་ཅན་ཐོགས་མེད་བྱ་བཞིན་རྒྱུ། །ཞེས་དང། ཆེད་དུ་བརྗོད་པའི་བསྟོད་པ་ནི། ཁྲོམ་ནས་ཆོས་བཤད་གངྒཱའི་ཆུ་རྒྱུན་འདྲ། །རིག་གྲྭར་རྩོད་དུས་འབྲུག་སྒྲ་སྒྲོག་པ་འདྲ། །བསྟན་བཅོས་རྩོམ་དུས་རི་གཟར་འབབ་ཆུ་འདྲ། །མཉམ་པར་འཇོག་དུས་རྣལ་འབྱོར་མངོན་སུམ་འདྲ། །ཞེས་དང་། ཇི་ལྟར་མཚན་མོ་དྭངས་པའི་ནམ་མཁའ་ལས། །རི་བོང་འཛིན་པ་ཤར་བས་ཀུ་མུ་ཏ། །དགོད་པ་བཞིན་དུ་ཁ་བྱེ་ལྷག་གེར་གསལ། །ཞར་ལ་རྒྱུ་སྐར་ཚོགས་རྣམས་དམན་པར་གྱུར། །སྙིགས་མའི་དུས་འདིར་འཇམ་དབྱངས་སྤྲུལ་པ་མཆོག །ཀུན་མཁྱེན་བྱོན་པས་སྐལ་བ་མཆོག་ཏུ་རྒྱལ། །ཞེས་སོགས་བསྟོད་ཡོད་པ་བཞིན། གསང་ཆེན་ཐེག་རྩེའི་བསྟན་པའི་འཁོར་ལོས་སྒྱུར་བའི་རྒྱལ་སྲིད་ལ་དབང་བསྒྱུར་བ་གངས་རིའི་ལྗོངས་ཀྱི་དགའ་རབ་དཔའ་བོ་གཉིས་པ། གཞན་གྱི་དྲིང་ལ་མི་འཇོག་པ་གཅིག་པུ། དགོངས་པའི་ཀློང་ལས་ཟབ་མོའི་ཆོས་གཏེར་རྡོལ་བའི་གཏེར་སྟོན་བརྒྱ་རྩའི་ཏོག་ལྟ་བུ། སྐུ་ལུས་མི་གཟུགས་སུ་བྱོན་ཀྱང་དགོངས་པ་སངས་རྒྱས་དང་མཉམ་པ། སྙིགས་མའི་དུས་འདིར་བཀའ་དྲིན་སངས་རྒྱས་ལས་ཀྱང་ལྷག་པས། སྐབས་འདིར་དམིགས་ཀྱིས་བཀར་ནས་མཆོད་པར་བརྗོད་པའོ།།

བཞི་བ་རྩོམ་པར་དམ་བཅའ་བ།

དང་པོ་ཐེག་རྩེའི་ཆོས་ཀྱི་ཁྱད་ཆོས་བསྟན་པ།

ད་ནི་རྩོམ་པར་དམ་བཅའ་བ་ལའང་། ཐེག་རྩེ་རྫོགས་པ་ཆེན་པོའི་ཁྱད་ཆོས་སྤྱིར་བསྟན་པ་དང་། བྱེ་བྲག་ཏུ་ཐུན་མོང་གི་སྔོན་འགྲོ་སེམས་སྦྱོང་བདུན་པའི་རྩོམ་པར་དམ་བཅའ་བ་དངོས་བསྟན་པ་གཉིས་ལས། དང་པོ་ནི། མདོ་སྔགས་ཆོས་རྣམས་བསྟན་པ་ཡོངས་རྫོགས་སུ། །སྟན་ཐོག་གཅིག་གིས་གོ་ན་བསྟན་པའི་མཐར། །བྱ་རྩོལ་མེད་པ་ཆོས་སྐུའི་དགོངས་པ་ལ། །སྦྱོར་བ་རྫོགས་པ་ཆེན་པོའི་ཁྱད་ནོར་ཡིན། །ཞེས་མདོ་སྔགས་ཆོས་རྣམས་ཞེས་པ་ཐུབ་དབང་སྤྲུལ་སྐུའི་ཆ་ལུགས་ཀྱིས་བསྟན་པའི་སྤྲུལ་སྐུའི་བསྟན་པ་མདོ་ཡི་ཆོས་དང་། ལོངས་སྐུའི་བསྟན་པ་བསྐྱེད་རྫོགས་དང་། ཆོས་སྐུའི་བསྟན་པ་བརྡ་ཐབས་ཀྱི་ཡུལ་ལས་འདས་པའི་དོན་བསྟན་པ་སྔགས་ཀྱི་ཆོས་ཏེ་དེ་ལྟ་བུའི་མདོ་སྔགས་ཀྱི་ཆོས་རྣམས་ཏེ། མདོར་ན་བསྟན་པ་ཡོངས་སུ་རྫོགས་པ་ཆ་ཚང་དོན་རྒྱས་པར་མྱུར་ལམ་འགལ་མེད་སྟན་ཐོག་གཅིག་གམ་ཆོས་ཚུལ་གཅིག་གིས་གོ་ན་ཚང་ཞིང་མ་འདྲེས་པར་བསྟན་པའི་མཐར། ཀུན་ཀྱང་བྱ་རྩོལ་མེད་པར་ཆོས་སྐུའི་དགོངས་པ་སྤྲོས་བྲལ་ཐིག་ལེ་ཉག་གཅིག་གི་ཀློང་དུ་བཟླུམས་ཤིང་སྦྱོར་བར་བྱེད་པ་རྫོགས་པ་ཆེན་པོའི་ཆོས་འདིའི་ཁྱད་ཆོས་ཀྱི་ནོར་བུ་ཡིན་ཏེ། འཇམ་དཔལ་རྒྱུ་དྲྭ་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུ་གནས། །ཞེས་གསུངས་པ་ལྟར། ཉན་རང་བྱང་སེམས་ཀྲི་ཡོག་ཐེག་པ་སོ་སོའི་རང་རང་གི་མི་མཐུན་ཕྱོགས་ལས་ངེས་པར་འབྱུང་བའི་འབྲས་བུ་རེ་ཐོབ་ཀྱང་། མཐར་ཐུག་གི་འབྲས་བུ་ཐོབ་པ་ལ་ད་དུང་སྔགས་བླ་མེད་ལ་མ་ཞུགས་པར་མི་ཐོབ་ལ། དེས་ན་ཐེག་རྩེ་ཨ་ཏི་ཡོ་ག་རྫོགས་ཆེན་འབྲས་བུའི་ཐེག་པ་འདིའི་ཁྱད་ཆོས་གཞན་དང་མི་འདྲ་བ་ལྷག་པར་གསལ་བ་བསྟན་པའོ། །

གཉིས་པ་རྩོམ་པར་དམ་བཅའ་བ་དངོས།

དེ་ཕྱིར་དེ་ཡི་འཁྲིད་ཚུལ་རབ་འབྱམས་ཀྱི། །ཐུན་མོང་སྔོན་འགྲོ་སེམས་སྦྱོང་རྣམ་པ་བདུན། །རྒྱས་བསྡུས་གཉིས་ཀའི་ཕྱོགས་སུ་མ་ལྷུང་བར། །ཚད་མ་གསུམ་གྱི་གཉེར་ཁས་བཤད་པར་བྱ། །རྒྱུ་མཚན་དེའི་ཕྱིར་རྫོགས་པ་ཆེན་པོ་དེ་ཡང་གདུལ་བྱའི་དབང་པོ་རྣོ་རྟུལ་གྱི་ཁྱད་པར་གྱིས། དེའི་འཁྲིད་ཚུལ་ཡང་དེ་དང་འཚམ་པར་སྣ་ཚོགས་པ་མི་འདྲ་བ་རབ་འབྱམས་མཐའ་ཡས་པར་ཡོད་པ་ཐམས་ཅད་ཀྱི་ཐུན་མོང་གི་སྔོན་འགྲོ་སྟེ། སྐྱེས་བུ་ཆུང་འབྲིང་ཐུན་མོང་གི་ལམ། བློ་དང་འཚམ་པར་སེམས་སྦྱོང་རྣམ་པ་བདུན་གྱི་དོན་ཁྲིད་འདི་ཉིད། རྒྱས་བསྡུས་གཉིས་ཀྱི་ཕྱོགས་སུ་མ་ལྷུང་བ་སྟེ། ཧ་ཅང་རྒྱས་ཆེ་བས་བློ་ཆུང་གི་བློར་མི་ཤོང་བ་དང་། ཧ་ཅང་བསྡུས་ཆེ་བས་དོན་མ་འདུས་པ་དེ་ལྟ་བུའི་གཉིས་ཀའི་ཕྱོགས་སམ་མཐའ་གཉིས་སུ་མ་ལྷུང་བར། མངོན་སུམ་རྗེས་དཔག་སོགས་ཀྱི་ཚད་མ་གསུམ་མམ་ལུང་རིགས་མན་ངག་གི་ཚད་མ་གསུམ་གྱིས་གཉེར་ཁ་དང་མ་བྲལ་བའི་སྒོ་ནས་བཤད་པར་བྱའོ་ཞེས་རྩོམ་པར་དམ་བཅས། རྩོམ་པར་དམ་བཅའ་བའི་དགོས་པ་ནི། དམ་པས་ཁས་འཆེ་མང་པོ་མི་བྱ་ཞིང་། །གལ་ཏེ་བཀའ་ལས་ཁས་ནི་བླངས་གྱུར་ན། །རྡོ་ལ་རི་མོ་བྲིས་པ་ཇི་བཞིན་དུ། །ཤི་ཡང་གཞན་དུ་འགྱུར་བ་མ་ཡིན་ནོ། །ཞེས་གསུངས་པ་ལྟར་རྩོམ་ལྡོག་གི་ཉེས་པ་མི་འབྱུང་བའི་ཆེད་དང་། རྩོམ་པ་མཐར་ཕྱིན་པའི་དགོས་པ་དང་ལྡན་པར་མ་ཟད། བསྟན་པ་འཛིན་བསྲུང་སྤེལ་བའི་ཆེད་དུ་འཆད་རྩོད་རྩོམ་པའི་མཁས་པའི་བགྱི་བ་རྣམ་གསུམ་གང་བྱེད་ན། ཐོག་མར་དབུ་བརྩམས་ཏེ་ཁས་བླངས་པ་ཙམ་ལའང་བསོད་ནམས་ཆེན་པོ་ཡོད་པས་ན་དེ་ལྟ་བུའི་རྩོམ་པར་དམ་བཅའ་བ་མཛད་པ་རེད། དེ་ཡན་ཆོད་ཀྱིས་བཤད་བྱའི་ཡན་ལག་བཤད་པ་སོང་ནས། འཆད་བྱ་དངོས་བཤད་པ་ནི་སང་ཉིན་ནས་འཆད་རྒྱུ་ཡིན། རང་རེའི་ཁྲིད་འདི་ཁྲིད་སྦྱོང་དང་སྦྲག་མར་བྱས་ནས་ཚད་ལྡན་དུ་ལག་ཁྲིད་བྱེད་རྩིས་ཡིན་ལ། འུ་ཅག་ལོ་ཆེ་ཆུང་དང་ཁ་རྒན་གཞོན་སུ་ཡིན་ཡང་མི་ཚེའི་དུས་ཚོད་ཟེར་བ་ནི་རིན་ཐང་ཅན་ཞིག་ཡིན། འདི་ཁོ་རང་སྔོན་ལས་ཀྱིས་ཅི་ཙམ་བསྐོས་ཡོད་ན་དེའི་ཕན་ལ་མཐོ་གང་དང་སོར་གང་ཇེ་རིང་དུ་བསྣན་མི་ཐུབ། རྒྱུ་ཡོད་པར་མ་ཟད་དབང་ཡོད་པ། དབང་ཡོད་པར་མ་ཟད་ཅི་འདྲའི་དྲན་རྒྱུ་དང་བློ་སྣ་རྒོད་པོ་ཞིག་ཡིན་ནའང་། ཚད་དེའི་ཐོག་ནས་ཁ་ཕྱི་ལ་མི་འཁོར་བར་འགྲོ་རན། སྡུག་བདེན་གྱི་ཕུང་པོ་ཁོ་འཇིག་རན་དུས་དེ་འདྲའི་བཀའ་བཙན་པོ་ཡིན། དེས་ན་ད་རེས་མི་ནུས་ཀྱང་རྗེས་མར་སྒྲུབ་བསམ་རྒྱུའི་ཆག་འཆར་གཞི་ཕར་བཞག་ཀྱང་ཆོས་སྒྲུབ་ལོང་བྱེད་ལོང་སྟེར་བ་མ་རེད། དུས་ཚོད་ཅེས་པ་ཚེ་སྲོག་དང་འབྲེལ་ནས་ཡོད་པ་དེ་འདྲའི་རྩ་ཆེན་ཞིག་ཡིན་པས། དེས་ན་ཆོས་ཞུས་ན་ཞུ་ནི་འདྲ། སྦྱོང་ན་སྦྱོང་ནི་འདྲ། ཤེས་ཤག་ཤག་ལོབ་ཤག་ཤག འདི་འདྲ་ཡིན་སོང་། འདི་དགོས་ཐལ། ང་ལ་འདི་ཡོད་བསམ་རྒྱུ་ཞིག་ཡོད་དགོས་པ་རེད་མ་གཏོགས་ད་སྔར་ཆོས་གྲལ་ལ་སོང་ཡང་། སོང་མྱོང་མོད་གོ་མ་བྱུང་ཟེར་ན། བོད་ཀྱིས་བོད་ལ་བོད་སྐད་ཀྱི་ཐོག་ནས་བཤད་ན་གོ་ངེས་མོད། གོ་བྱུང་ཟེར་ན་འགག་ལ་ཐུག་དུས་བེད་སྤྱོད་གཏོང་ཆོག་པ་ཞིག་ཤེས་མེད་ན་མི་རྗེས་ཁྱི་དེད་ཀྱི་ཞད་ཡོད་པ་རེད། ད་སྔར་མ་སོང་ཅི་སོང་། ན་ཚོད་ཡར་བསགས་ཚོ་ལ་བལྟས་ན་རྐང་ལག་ལྷུ་ཚིགས་ཟད་དེ་མ་འདང་བས། ནད་ན་ཚས་གཟུང་བ་ལ་མ་ཐུག་གི་བར་དུ་སོང་བ་རེད། ད་སྔར་མ་བཤད་ཅི་བཤད། མཚན་གྱི་གཉིད་ཐུན་ཙམ་མ་གཏོགས་ཚང་མར་བཤད་པ་ཡིན། ད་སྔར་མ་ལས་ཅི་ལས། འདི་མ་ལས་བསམ་རྒྱུ་མེད་པ་ཞིག་ལས་ལས་ན། རིག་རྒྱུ་མེད་པའི་ཡུལ་དུ་འགྲོ་རན་ཁའི་གྲོ་རྟེན་ཅི་ཡོད་ཀྱི་དེ་འདྲའི་འདང་རེ་རྒྱག་ན། ད་ལྟ་རང་དབང་རང་ལག་ལ་ཡོད། ལུས་འབྱུང་བ་མི་བདེ་ཟེར་ན་བདེ་མོ་རེད། ཡུན་དུ་བསྡད་ན་ཇེ་སྡུག་ཏུ་འགྲོ་ན་མ་གཏོགས་ཇེ་དགར་འགྲོ་བ་མ་རེད། ད་ལྟ་ད་རུང་བལྟས་ན་རིག ཉན་ན་གོ དཔྱད་ན་ཤེས་པའི་སྐབས་འདིར་རང་གཞན་བར་གསུམ་གྱིས་ཟླ་བ་གཅིག་གི་དུས་ཚོད་དེ་འཕྲོ་བརླག་ཏུ་མི་ཤོར་བར་བྱ་བ་གལ་ཆེ། ལོ་གཅིག་ལ་ཟླ་བ་བཅུ་གཉིས་ཡོད་ན་མི་ཚེའི་ནང་ནས་ལོ་གསར་ཐེངས་མང་པོ་སོང་ཡང་། ད་རེས་ཟླ་བ་འདི་ཚེ་གཅིག་ལ་མི་བརྗེད་པའི་ཟླ་བ་གཅིག ཚེ་ཕྱི་མའི་ཡུལ་དུ་འགྲོ་ན་འགྲོ་རྟེན་ཡོད་པའི་ཟླ་བ། གསོན་འདི་ལ་བསྡད་ན་སེམས་གཏད་ས། བློ་ཁེལ་ས། སྐྱིད་ན་གོང་ནོན། སྡུག་ན་སྐྱོ་གྲོགས་བྱ་རྒྱུའི་ཆེད་དུ་ཕན་ངེས་གྱི་དོན་ཞིག་གཉེར་རྒྱུའི་དོན་དུ་ལུས་ངག་ཡིད་གསུམ་ཆུན་གཅིག་ཏུ་དྲིལ་ཏེ་ཆོས་ལམ་དུ་འཇོག་དགོས། ད་སྔར་ཉི་མ་ཡན་ཆད་ཆོས་ལ་དད་པ་ཡོད། དཀོན་མཆོག་ལ་བློ་ལོག་མ་མྱོང་། ད་དུང་ཡང་དེ་ཡིན། ད་ཕྱག་འཚལ་རྒྱུ་དང་སྐོར་བ་བསྐོར་རྒྱུ་ཞིག་ཡིན་ན་དེ་ཅི་ནུས་ཅི་ལྕོགས་ཀྱིས་བྱེད་ནུས་ཀྱང་། འདོན་རྒྱུ་ཞིག་ཡིན་ན་སེམས་དེའི་ཐོག་འདུག་ཟེར་བ་དཀའ་མོ་རེད་མ་གཏོགས་ཁ་གྲངས་བྱེ་ཆེན་བྱེ་ཆུང་རེ་སོག་རྒྱུ་རེད། དེ་ཕན་ཆད་ཆོས་ཟེར་བ་བོ་གཅིག་ན་མི་གོ་ཞིང་། གཉིས་ན་སྒོམ་རྒྱག་ཟེར་ན་དེ་བས་མི་ཤེས། མིག་གིས་བལྟས་ན་ཁྲ་ལམ་མེ། བཙུམ་ན་ནག་འཐུམ་མེར་འགྲོ་བས། དེ་རང་མགོ་རང་གིས་གཡོག་པ་རེད་མ་བསམ། ཕྱག་སྐོར་བ་བྱེད་པ་བཟང་ཞིང་། འདོན་བཟླས་བརྗོད་བྱེད་ན་ལེགས་མོད། དེ་གཉིས་ལུས་ངག་གི་ལས་ཀ་ཞིག་རེད། ལུས་ངག་གཉིས་གཡོག་པོ་དང་སེམས་དཔོན་པོ་ཡིན་ཞེས། རང་རེས་དུས་རྒྱུན་དུ་ཟེར་མོད། གཡོག་པོའི་ལས་ཀ་ཆོད་ཆུང་དཔོན་པོའི་ལས་ཀ་ཆོད་ཆེ། གཡོག་པོ་ཞིག་ཉི་མ་བརྒྱར་རྒྱུག་པ་ལས་དཔོན་ཆེན་པོ་ཞིག་གིས་སྐད་ཆ་ཚིག་གཅིག་གིས་ཆོད་ཆེ། དཔེ་དེ་ལྟ་བུ་ལུས་ངག་གི་དགེ་བ་གཉིས་ལས་སེམས་ཀྱི་དགེ་བ་ཆོད་ཆེ་སྟེ། སེམས་ཕྱིན་ཅི་ལོག་ཏུ་སོང་ན་ལུས་ངག་གིས་དཀའ་ལས་རྒྱག་གིན་འདུག་པ་ནི་དགེ་སྡིག་གང་གི་གྲལ་དུ་འགྲོ་ཅི་ཤེས། བསམ་པ་དགེ་དང་མི་དགེའི་བྱེ་བྲག་ལས། །སོགས་གསུངས་པ་རེད། དེ་ཡིན་ན་སཙྪ་གཅིག་གི་དབུ་ཐོག་ཏུ་མི་གཅིག་གིས་ལྷམ་ཐེད་བཀབ། གཅིག་གིས་དེ་ཕར་བསལ་བས་གཉིས་ཀ་བསམ་པ་དག་པས་དགེ་བར་འགྱུར་བ་ལྟར་རེད། བསམ་པ་མ་དག་ན་ཆོས་ཀྱི་གཟུགས་བརྙན་ཆེན་པོ་བྱས་ཀྱང་ཕན་ཐོགས་མེད་དེ། ལེགས་སྨོན་དང་འཇིགས་སྐྱོབ་ཀྱིས་ཆོས་གོ་མི་ཆོད་གསུངས་ཡོད། དེས་ན་ད་རེས་ཀྱི་ཆོས་ཁྲིད་འདིའི་སྐབས་འདོན་རྒྱུའང་ཡོད་ཀྱང་གཙོ་བོ་སྒོམ་རྒྱུ་ཡིན། སྒོམ་ཤེས་ངེས་ཏེ་སྒོམ་ཅི་ལ་མི་ཤེས། ཚེ་མི་རྟག་པ་སྒོམ་དགོས། ང་ད་ཤི་འགྲོ་བཞིན་ཡོད། སང་ཉིན་གྱི་ཉི་མ་ངའི་མགོ་ཐོག་ལ་འཆར་རྒྱུ་མེད་པར། གཉེན་ཉེ་བཟའ་ཚང་གཅེས་པ་སྙིང་འདྲ་བ་དེ་ཚང་མ་ད་ནས་བཙན་བྲལ་བྱས་ཏེ་ཐུག་རྒྱུ་མེད་ལུགས་དེ་ཚོ་སེམས་ཐོག་ལ་བླངས། ལུས་ཐོག་ལ་ད་སྨིན་ཡོད་པར་འདང་བརྒྱབ་ནས་དེ་སྒོམས། ཡང་མིན་ན་ངའི་ཨ་ཕ་དྲིན་ཆེན་དང་ཨ་མ་ལོ་ལོ། སྤུན་ཡ་འདང་ཆེན་ཤ་ཉེ་སྲོག་འདྲ་འདྲ། མིང་པོ་གཅེས་པོ། སྲིང་མོ་འདང་ཆེན་མ་སོགས་ཤི་སོང་བ་རྣམས་ཞེ་ཐོག་ལོངས་དང་། དེ་རྣམས་ཤི་བའི་སྐྲག་སྔངས། བར་དོའི་འཇིགས་སྐྲག་ལ་བསམ་བློ་བཏང་ན། མིག་མཐར་མཆི་མ་འཁོར་རྒྱུ་མེད་དམ། དེ་ཚོ་ཤི་ནས་བདེ་འགྲོ་ཐོབ་ཡོད་མེད་ཨེ་ཤེས། མེད་ན་ཤ་ཚ་ཨེ་ཡོད། ཉེ་སྔོན་རྒྱ་ཧུ་ཧུའི་ལག་ན་འཇོག་རྒྱུའི་སྐེ་དམར་ཤར་རེ་བསད་པའི་སྒོ་ཁའི་གཡག་རྒན་འབྲི་རྒན་ཚང་མ་གནའ་ངའི་ཕ་བླ་བདེ་དེའི་སྐྱེ་བ་ཡིན་པའི་བསམ་བློ་བཏང་ན་ཅི་འདྲ་རེད། དེ་མིན་ན་དེ་ཚོ་རང་ཡིན་པར་བྱས་ན་ཅི་འདྲ་རེད། དེ་ལྟར་འཁོར་བའི་སྡུག་བསྔལ་དང་དེའི་ལས་རྒྱུ་འབྲས་སྒོམ་དགོས། མི་ཤེས་རྒྱུ་ཞིག་མེད། ཤེས་ཤག་ཤག་ངས་སློབ། ཨེ་ཤེས་ཨེ་ལྟ་ཁྱོད་ཚོས་ཤེས། མདོར་ན་ཁྲིད་མགོ་རྔ་ཚང་མ་ཞུས་པ་ཐམས་ཅད་ལ་ད་རེས་ཆོས་ཞུས་པའི་འབྲས་བུ་འདི་ཐོབ་བྱུང་ཞེས་ཟེར་རྒྱུ་ཞིག་ཡོད་ངེས་བྱེད་དགོས། དེ་ཡང་ཕྱེད་ཆོས་དང་བླ་མ་ལ་རག་ལས་པ་དང་། ཕྱེད་རང་གི་བརྩོན་འགྲུས་ལ་ཐུག་ཡོད་རེད། ཡང་འཁོར་བ་པ་རེད། འཁོར་བ་པ་ནི་སོ་སྐྱེས་ཐམས་ཅད་ཡིན་ཡང་། སྐྱེ་བོ་ཁྱིམ་ནག་པ་ཁ་གསོ་རྒྱབ་འགེབས་ཀྱིས་བྲེལ་བ་ཚང་མ་དང་། ཁྱད་པར་དུ་བུད་མེད་ནུས་མེད་ཉམ་ཆུང་ཚང་མས་ཀྱང་རེས་བསྐོར་ནས་ཆོས་འབྲེལ་རེ་འཇོག་བསམ་ནའང་ཆོག་རྒྱུར་བྱེད་པ་ཁ་སང་ནས་བཤད་པ་ཡིན། ཆོས་ཚིག་རེ་གོ་ནའང་ཕན་ཡོན་ཆེ། དེའི་རྗེས་སུ་དུས་ཚོད་ལྟར་རང་རེས་ཁྲིད་སྦྱོང་བྱ་དགོས་པས། དེ་ལུགས་ཁྲིད་སྦྱོང་བྱེད་ཚུལ་ལ་བསམ་བློ་གཏོང་དགོས། དེ་རིང་དང་སང་ཉིན་གཉིས་ཀྱི་ཕྱི་དྲོ་དང་དགོང་མོར་གཞི་ཐོག་དང་པོ་དང་སྦྲེལ་ཏེ་ཡིག་བརྒྱ་དང་། ཡིག་དྲུག་བསགས་ནས་རྫོགས་པ་ཆེན་པོའི་ཁྲིད་ཞུས་པའི་སྔོན་དུ་དམ་ཚིག་ཉམས་ཆགས་བཤགས་སྦྱོང་དང་དག་ཐབས་ཀྱི་འབད་པར་བྱེད་དགོས། ང་ནི་དམ་ལྡན་ཡིན་དམ་ཚིག་ཉམས་ཆགས་སོང་མེད་བསམ་རྒྱུ་ཡོད་པ་མ་རེད། ཟླས་ཉམས་དང་ཞོར་ཉམས་ལ་སོགས་པ་ཉམས་སྒྲིབ་གོས་སླ་ཞིང་། དེ་རིང་ཁ་སང་ནི་དམ་ཉམས་གསར་པ་མོད་པའི་དུས་ཚོད་རེད། དེ་མི་དར་བ་ཞིག་ཀྱང་མ་རེད། ཉིན་གྱི་ཁ་གཏད་སྲིབ་དང་། སྔ་དྲོའི་ཁ་གཏད་ཕྱི་དྲོ་རེད། ཆོས་ཟབ་ས་ན་ནག་པོའི་བདུད་རེ་ཡོད་དར་བ་རེད། དེའང་དམ་ཉམས་དང་དམ་ཚིག་གི་སེལ་ཟེར་བ་མིའི་ཁོག་ལ་འདྲེ་ཞུགས་ནས་ཆོས་དང་བསྟན་པ་ལ་སེལ་བྱེད་འོང་། དམ་ཚིག་ཉམས་ཆགས་ཀྱིས་བསྟན་པ་དང་བླ་མ་ལ་གནོད་མོད། གཙོ་བོ་རང་ལ་གནོད། དམ་ཚིག་ཉམས་ཆགས་སོང་ན་ཚོགས་དང་བསྐང་བ་སོགས་ཀྱིས་འཕྲལ་དུ་མ་བཤགས་ན། མི་འདོད་སྣ་དགུ་རང་ཐོག་ལ་ཡོང་ངེས་རེད། དེས་ན་ཆོས་པ་ཞིག་བྱས་ནས་རང་ལེགས་སུ་འདོད་པ་ཞིག་ཡིན་ན་རང་རྒྱུད་གཙང་མ་ཞིག་བྱས། སོར་བྱང་སྔགས་གསུམ་གྱི་ཤེལ་སྒོ་ཚད་ཞོར་ལ་ཧ་གོ་རྒྱུ་ཡོད། རང་གིས་རང་ལ་ཤེལ་སྒོ་ཚད་ཞོར་བྱེད་ན་རང་རྒྱུད་ངོས་ཟིན་འོང་། རང་ལེགས་པར་རང་མགུ་དུས་ཆོག་འདུག་ཡོད་རེད། དེ་ལ་ལྷ་དང་བླ་མས་དབྱིངས་ནས་མ་ཁྲེལ་ན་དེས་དོན་ལ་ཆོག་ཡོད་པ་རེད། དེས་ན་ཚང་མས་གཉེན་པོ་སྟོབས་བཞི་ཚང་བའི་སྒོ་ནས་བཤགས་པ་རྣམ་དག་རེ་གྱིས་དང་། ཐོག་མེད་ནས་བསགས་པའི་སྡིག་སྒྲིབ་ཉམས་ཆགས་བྱང་ན་སྔར་མེད་ཀྱི་ཡོན་ཏན་གསར་པ་རྒྱུད་ལ་སྐྱེ་བར་ཕན་ཐོགས་ཆེན་པོ་ཡོད་ངེས་པ་དང་། རྐྱེན་བགེགས་བར་ཆད་སེལ་བྱེད་རིམ་འགྲོའང་དེ་མཆོག་ཏུ་གྱུར་པ་ཡིན། དགོང་མོར་ཁྲིད་སྦྱོང་གི་མཇུག་ཏུ་དགེ་འདུན་པས་གཅོད་ཚར་རེ་གཏོང་རྒྱུ་མི་ཆག་པ་དང་། དེའི་སྐབས་མི་སྐྱ་ཕོ་མོ་རྒན་གཞོན་ཚང་མ། ཁྱད་པར་དུ་སྲི་ངན་འཕྲོ་ངན་ཡོད་པ། ནད་པ་སྨན་གྱིས་ཕན་དཀའ་བ། རྒྱལ་འགོང་དང་དམ་སྲིའི་གནོད་པ་ཡོད་མཁན་རྣམས་གཅོད་དམིགས་ཀྱི་གྲལ་དུ་སྡོད་དང་བཟང་། ལན་གྲངས་མང་པོ་སྡོད་དང་དེ་བས་བཟང་། ཕྱི་དྲོའི་དུས་ཚོད་བཞི་པར་དགེ་འདུན་པས་གསོལ་ཀ་དང་རྒྱབ་ཆོག་གསུངས་པ་རེད། དེ་དུས་ཤི་གསོན་གཉིས་ཀའི་ཆེད་འདོན་བྱ་དང་བསྒྲུབ་བྱ་མ་འགྲུབ་པ་རེ་ཡོད་ན་རྒྱབ་ཆོག་གྱིས་དང་། སྤྱིར་དགེ་འདུན་པའི་བྱིན་རླབས་དང་། ཁྱད་པར་དུ་ད་རེས་དགོན་སྡེ་མང་པོའི་གསལ་གསལ་ཁྲིག་ཁྲིག་ཉམས་ལེན་པ་མཁན་སྤྲུལ་མང་པོས་དབུ་མཛད་པའི་འདུས་པ་འཛོམས་ཡོད་པས་ཆོད་གོ་ལྷག་པར་དུ་ཆེ། དེ་ཚོ་ཐུགས་ལ་ཞོག་ཟེར་རྒྱུ་དེ་ཡིན།

ཉིན་གཉིས་པའི་ཆོས་ཁྲིད།

རང་རེ་འདི་ན་ཡོད་པ་ཚང་མ་སེམས་ཅན་སྤྱི་མཐུན་གྱི་སྡེ་རིས་མཐུན་པ་མིའི་ལུས་རྟེན་ལ་སྐྱེས། དེའི་ཐོག་ན་ལས་མཉམ་དུ་གསོག་སྟོབས་ཀྱིས་མོས་པ་ཆོས་ཕྱོགས་ལ་གཏོད་པ་ཤ་སྟག་ཡིན་པའི་དབང་དུ་གཏོང་ན། དེ་སྡེ་ཚན་མཐུན་པ་ཡིན་ནའང་གང་ཟག་སྒེར་ངོས་ལ་ཚེ་འདིའི་ཚེ་རིང་ཐུང་དང་། ལས་སྐྱིད་སྡུག་བསོད་ནམས་བསགས་ཚུལ་མི་འདྲ་ཞིང་། དེ་མི་འདྲ་བས་སྐྱེ་བ་ཕྱི་མ་རྣམ་སྨིན་མྱོང་རྒྱུ་ཡང་དེ་དང་མཐུན་པར་འདྲ་བ་མ་རེད། དེ་ལྟར་ནའང་རང་རེས་སྔོན་ཆད་གྱི་སྐྱེ་བ་ཡར་སྔོན་ཞིག་ལ་ལས་ཅི་འདྲ་ཞིག་མཉམ་དུ་བསགས། སྨོན་ལམ་ཅི་འདྲ་ཞིག་མཉམ་དུ་ཐེབས་སོང་བ་ཡིན་ན། ད་རེས་རང་ཅག་ཆོས་ར་གཅིག་གི་ནང་དུ་ཆོས་གཅིག་གིས་མཉམ་དུ་བསྡུས་པ་འདི། ལས་སྤྱིར་བཏང་བ་ཞིག་ཡིན་རྒྱུ་མ་རེད། འཁོར་བ་ཐོག་མེད་ནས་ད་ལ་མ་ཐུག་གི་བར་དུ་ལུས་ལེན་ལུགས་སྐྱེ་བ་བརྗེ་རབས་ལ་འདང་ཞིག་རྒྱག་ན། མཐོ་བའི་ཚངས་དང་བརྒྱ་བྱིན། སྟོང་འཁོར་ལོས་བསྒྱུར་བའི་རྒྱལ་པོ་ནས་དམའ་བའི་འོན་ལོང་ལྐུག་པ། འབུ་སྲིན་སྲོག་ཆགས་ངན་སོང་ངན་འགྲོའི་སེམས་ཅན་གྱི་ལུས་རྟེན་བླངས་པ་ཡན་ཆད་བསམ་གྱིས་མི་ཁྱབ། སྐྱེ་བ་འདི་མ་བླངས་དང་ལས་འདི་མ་བསགས་བསམ་རྒྱུ་ཅི་ཡོད། འོན་ཀྱང་འཁོར་བའི་ནང་ནས་ཐར་བྱེད་ཀྱི་ལས་བསགས་མ་མྱོང་བས་ད་ལྟའི་བར་དུ་མ་ཐར་ལ་ད་དུང་འཁོར་བའི་ནང་དུ་འཁྱམས་ཡོད། དེའང་དམ་པའི་ཆོས་ཀྱི་ཐར་པའི་ལམ་མཁན་ལ་མ་ཐུག་པ་དང་དེས་ཐུགས་རྗེའི་ལྕགས་ཀྱུས་མ་གཟུང་བར་གཅིག་པུས་ལྷག་སོང་བར་ཡིན་རྒྱུ་མ་རེད། སྟོན་པ་སངས་རྒྱས་བྱོན་སྐབས་ལ་ཁེལ་བ་དང་། དམ་པའི་ཆོས་ཀྱི་ཉི་མ་ཤར་དུས་ལ་ཐུག་མྱོང་ན་ཐང་མོད། འོན་ཀྱང་རང་ཉིད་ལས་དང་སྐལ་བ་དམན། བསགས་པ་བསོད་ནམས་ཆུང་བའི་སྟོབས་ཀྱིས་སངས་རྒྱས་བྱང་སེམས་ལ་ཐུགས་རྗེ་ལྕགས་ཀྱུ་ཡོད་ཀྱང་། གདུལ་བྱ་གཞན་ངོས་ལ་དད་དང་མོས་པ་མེད་པས་འདྲེན་པའི་ཨ་ལོང་མེད་པའི་དབང་གིས། ནམ་ཡིན་ཡང་དར་ཤུད་འཐེན་པ་ལྟར། བཟང་པོའི་ལས་དང་སྨོན་ལམ་ཐུག་ཐེབས་ས་ནས་ཤུད། ངན་པའི་ལས་ངན་རྒྱུ་འབྲས་ལ་སྦྲང་མ་མི་གཙང་བའི་འདམ་ལ་འཁོར་བ་ལྟར་དུ་འཁོར་བའི་སྟོབས་ཀྱིས། ད་དུང་ཡང་རྩྭ་ཡིས་མེ་འཛིན། འདམ་གྱིས་རྫས་འཛིན། མཁའ་འགྲོ་འདོད་པའི་རྙི་ཡིས་འཛིན་གསུངས་པ་ལྟར། བྱ་འདབ་ཆགས་ཟས་ལ་ཆགས་ས་ནས་རྔོན་པས་ལག་རྙིས་འཛིན་པ་དང་འདྲ་བར། མི་གཙང་བ་ལ་གཙང་བ་དང་། སྡུག་བསྔལ་བ་ལ་བདེ་བ། མི་རྟག་པ་ལ་རྟག་པ། བདག་མེད་པ་བདག་ཏུ་འཛིན་པས། འཁོར་བའི་ལྕགས་སྒྲོག་གིས་སྡོམ་བཞིན་ཡོད་པ་རེད། སྐབས་རེར་དམ་པའི་མགོན་དང་མཇལ། གདམས་ངག་ཆོས་ཀྱི་བདུད་རྩི་རེ་ཐོབ་ཀྱང་། རང་ཉིད་ཀྱི་ངན་གཤིས་ཉོན་མོངས་ཀྱི་དབང་དུ་སོང་བས། རང་རྒྱུད་ཡང་དག་ལམ་གྱི་ཕྱི་རོལ་དུ། །གྱུར་ནས་ངན་འགྲོའི་གཡང་སར་འཁྱམས་པ་མང་། །ཞེས་གསུངས་པ་ལྟར། རྒྱུད་ལོག་ལྟས་ལྷད་ནས་ཐང་ཁྲོམ་ཟོས་པའི་མིས་མིག་སྔར་གང་ལ་བལྟས་ཀྱང་འཁྲུལ་སྣང་ཤར་བ་ལྟར་དུ། དམ་པ་ལ་དམ་པ་ཡིན་པར་མ་ཤེས་པས་ལོག་ལྟ་བྱེད། གདམས་ངག་བདུད་རྩི་ཡིན་པར་མ་ཤེས་པས་དང་དུ་མ་བླངས། ཐ་ན་ཆོས་སྤོང་དང་མཚམས་མེད་ཀྱི་ལས་བསགས་པས་དམྱལ་བ་ཚ་གྲང་མྱོང་ཚུལ་སོགས་བརྩི་ཡོང་རྒྱུ་མེད་ངེས་ཡིན། ཡང་སྐབས་རེར་ཟག་བཅས་ཀྱི་དགེ་བ་སྣ་རེ་གཉིས་བསགས་པས་དུད་འགྲོ་ཡིན་ན་དབང་ཡོད་རེ་དང་། མི་ལུས་ལྷ་ལུས་བཟང་བ་རེ་ཐོབ་ཡོད་ཤས་ཆེ་ཡང་། གཟེར་འཇོམས་ཀྱི་སྨན་འཐུང་བ་བཞིན་དེའི་ཚེ་གནས་སྐབས་ཀྱི་སྡུག་བསྔལ་ཆུང་བ་ཙམ་རེད་མ་གཏོགས་ཡུན་དུ་བློ་གཏད་མེད་པར། འདི་འདྲའི་ཤ་ཁྲག་གི་གཟེབ་ལ་རྣམ་ཤེས་རྒྱུད་ཅིག་གཏད་དེ་ངའམ་བདག་ཏུ་འཛིན་པའི་གཞི་མི་གཙང་བའི་ཕུང་པོ་འདི་ལ་ཞེན་པས། འདི་འབྲལ་རྒྱུ་མེད་པའི་འཁྲུལ་སྣང་། སད་རྒྱུ་མེད་པའི་རྨི་ལམ་ཞིག་ཏུ་གྱུར་སོང་བ་རེད། ཡིན་ནའང་ད་རེས་ཀྱི་ལུས་རྟེན་འདིར་གཅིག་ན་སངས་རྒྱས་འཇིག་རྟེན་དུ་བྱོན་པའི་སྒྲོན་མེའི་བསྐལ་པ་དང་འཕྲད། གཉིས་ན་སངས་རྒྱས་ཀྱི་གཟུགས་སྐུ་དངོས་དང་མཇལ་བའི་སྐལ་བ་དང་མ་ལྡན་རུང་དེས་བསྟན་པའི་དམ་ཆོས་མ་ནུབ། གསུམ་ན་བླ་མ་དགེ་བའི་བཤེས་གཉེན་སྤང་བླང་འདོར་ལེན་གྱི་གནས་སྟོན་མཁན་རེ་དང་འཕྲད་པར་མ་ཟད། རང་ངོས་ནས་དམ་པའི་ཆོས་ཉན་འདོད་ཀྱི་བློ་ཁ་རེ་ཕྱོགས་རྒྱུ་འདི་ཚོ་སྐྱེ་བ་སྔོན་མར་ཚོགས་བསགས་པས་ཡིན་ངེས་དང་། ཁྱད་པར་དུ་རང་རེ་ཁྱད་ཆོས་ཆེ་བ་དྲུག་གིས་འཕགས་པའི་གསང་སྔགས་སྔ་འགྱུར་བའི་ཆོས་སྒོ། དེའི་ནང་ནས་དམ་ཆོས་རྫོགས་པ་ཆེན་པོ། དེ་ཡང་བཤད་བརྒྱུད་ཀྱི་བརྒྱུད་པ་མ་ཆད། སྙན་བརྒྱུད་ཀྱི་བྱིན་རླབས་མ་ཉམས་པར། སྐབས་འདིར་སྙན་བརྒྱུད་ཐོས་གྲོལ་ཆེན་པོ་ཆོས་ཚིག་རྣ་བས་ཐོས་པ་ཙམ་གྱིས་གྲོལ་བ་ཐོབ་ནས་སྐལ་ལྡན་ཚེ་གཅིག་ལུས་ཅིག་ལ་གྲོལ་བ། དབང་རབ་བརྩོན་འགྲུས་ཅན་ཡིན་ན་ལོ་དང་ཟླ་བས་ཀྱང་གང་ཟག་མིའི་ལུས་རྟེན་དུ་ཡོད་ཀྱང་དགོངས་པ་སངས་རྒྱས་དང་མཉམ་ཐུབ་པའི་དེ་འདྲའི་དམ་ཆོས་ཟབ་མོ་ལ་ལོངས་སུ་སྤྱོད་དེ། བླ་སློབ་དང་མཆེད་གྲོགས་སུ་གྱུར་པ་དེ་རྒྱུ་མེད་རྐྱེན་མེད་དང་། སྟེས་དབང་སྟབས་ལེགས་ཀྱིས་བྱུང་བ། དཔེར་ན་ཁ་བའི་ནང་གི་བྱ་རྗེས་དེ་བཀྲ་ཤིས་རྟགས་བརྒྱད་ཀྱི་རི་མོར་དོད་པ་ལྟ་བུ་མ་ཡིན་པར། སྔར་གསང་སྔགས་ཀྱི་དཀྱིལ་འཁོར་ཞིག་ཏུ་མཉམ་དུ་ཞུགས། ལས་དང་སྨོན་ལམ་གཉིས་ཀྱིས་མཉམ་དུ་འབྲེལ་བས་ད་རེས་ཆོས་ར་གཅིག་གི་ནང་དུ་ཆོས་ཟབ་མོར་མཉམ་དུ་ལོངས་སྤྱོད་རྒྱུ་འདི། དཔེར་ན་ཚེ་གཅིག་གི་དབུལ་པོ་རྒྱུ་མེད། ཁ་ཟས་མེད་རྒྱབ་གོས་མེད། ནངས་ཆུ་མི་རག་གྲོང་སྟོད་དང་། ནུབ་ཆུ་མི་རག་གྲོང་སྨད་སྤྲང་ནས། ཁ་མི་སོས་ནམ་མི་ལང་བར་ཡོད་དུས་ཁྱིམ་དུ་མ་བསམ་མ་དྲན་ས་ནས་ཉིན་ཞིག་ལ་མ་རྒན་དབུལ་མོས་གསེར་ལོག་ལོག་མི་མགོ་འདྲ་བ་འགའ་རེ་རྙེད་ན། དེའི་མི་དེ་ཡིད་དགའ་བར་གྱུར་པ་སྨྲོས་ཅི་དགོས། གསེར་རྡོག་ཆེན་པོ་ཞིག་རྙེད་ན་ཚེ་གཅིག་གི་དབུལ་བ་སེལ་བ་དང་། དུས་ཉི་མ་དེ་ནས་བཟུང་སྟེ་རྒྱུ་ནོར་ལོངས་སྤྱོད་ཀྱིས་ཕྱུག་པོ་རུ་གྱུར་ནས། མིས་ཚུར་ཨེ་བསྐྱབ་བསམ་མི་དགོས་པར་མ་ཟད་མི་ལ་ཕར་རོགས་བྱེད་ནུས་པ་ཞིག་ཏུ་གྱུར་སོང་ཡང་། འཇིག་རྟེན་འདི་སྣང་གི་རྒྱུ་ལོངས་སྤྱོད་ཅི་འདྲ་ཡོད་པ། རྣམ་ཐོས་སྲས་ཀྱི་བང་མཛོད་ཀྱི་བདག་པོ་རེད་སོང་རུང་ཤི་མི་དགོས་པ་ཞིག་ལ་ཕན་ཐོགས་མེད་པར་མ་ཟད། ཤི་ནས་ཐར་པ་ཐོབ་བྱེད་ལ་དེ་བས་ཕན་ཐོགས་ཡོད་པ་མ་རེད། དེ་ལྟར་བསམ་བློ་གཏོང་ཡོང་ན་རྒྱུ་ལོངས་སྤྱོད་ཅི་འདྲ་ཡོད་པ་བས་ཤི་ན་ཕན་ཐོགས་ཅན་གྱི་ཆོས་ཚིག་བཞི་ཞིག་གིས་དགའ་བ་རེད། ཆོས་ཚིག་བཞི་ཞིག་ལ་གསེར་སྲང་སྟོང་བྱིན་ཡང་ཕམ་ཁ་མེད། འཛམ་གླིང་གི་ས་གཞིར་གསེར་གྱིས་བཀང་བ་བྱིན་པ་བས་དགའ་བའི་དམ་པའི་ལྷ་ཆོས་དེ་བསོད་ནམས་ཀྱི་བགོ་སྐལ་ལས་ཐོབ་དུས་དེ་མི་དགོས་ཟེར་ན་སྨྱོན་པ་བསམ་མེད་རེད། དེ་དོན་གཉེར་ཞིག་མ་བྱེད་ན་མཐོ་དམན་དྲག་ཞན་སུ་ཡིན་ཡང་འགྱོད་པ་རིམ་གྱིས་ཉོས་པ་ཡིན། དེའི་ཕྱིར་ན་སྔོན་སངས་རྒྱས་བཅོམ་ལྡན་འདས་ཀྱིས་སློབ་པ་ལམ་གྱི་གནས་སྐབས་སུ་སེམས་ཅན་ཐམས་ཅད་ཀྱི་ཕྱིར་དུ། ཆོས་ཚིག་བཞི་པའི་ཚིགས་སུ་བཅད་པའི་དོན་དུ་སྐུ་སྲོག་གཏོང་བའི་སྐྱེས་རབས་རྣམ་ཐར་ཡོད་རྒྱུ་བོ་དེ་འདྲ་རེད། དཔེ་འཇོག་ན་རི་མགོ་བྲག་རི་མཐོན་པོ་ཤར་རི་གནམ་ཟུག་གི་གཡང་ས་གཟར་པོ། ཁང་རྩེག་རྩི་ན་སྟོང་ཕྲག་མང་པོ་ཡོད་པའི་སྟེང་ནས་མར་མི་ཞིག་རྡོག་འཁྱོར་ནས་ལྷུང་འགྲོ་ན་དེའི་ཁྱིམ་ན་ཡོད་པའི་རྒྱུ་ཅ་ལག་གིས་དགའ་འམ། གནམ་ལ་འཕུར་བྱེད་ཀྱི་གཤོག་པ་ཞིག་གར་བྱུང་མེད་པར་འབྱར་ནས་བར་སྣང་ཁམས་ལ་འཕུར་ནུས་པས་གཡང་ས་མཐོན་པོ་ལ་ཉམ་མི་ང་བ་ཞིག་གྱུར་ན་དགའ། དེ་དང་འདྲ་བ་གསོན་འདི་ལོག་གི་བྲག་མགོ་ནས་རྡོག་འཁྱོར་བས་གསོན་པོའི་སྣང་བ་ཟད་དེ་ཤི་བར་དོའི་གཡང་སར་ལྷུང་འགྲོ་བ་ན། ཐུར་དུ་འདྲེན་བྱེད་ཀྱི་རྡོ་ལྗིད་མོ་སྐེ་ལ་བཏགས་པ་འདྲ་བའི་ཤུལ་གྱི་ནོར་རྫས་ཤིག་གིས་དགའ་དང་། བར་སྣང་ཁམས་ན་གཤོག་པ་ཐོབ་པར་འདྲ་བའི་དག་པའི་ཞིང་ཁམས་སུ་འཇའ་ལམ་གསེར་ཐག་གི་ནང་ནས་བུད་འགྲོ་རྒྱུས་དགའ་ས་རེད། རང་རེ་ད་སྔོན་ཉི་མ་ཡན་ཆད་སྨུག་ལང་ལོང་ནང་ནས་མགོ་འཁོར། རྫ་ཁྲབ་ཁྲོབ་ནང་ནས་རྐང་ཆག་ནས་མ་རིག་རྨོངས་པའི་གཞན་དབང་དུ་སོང་། དུས་ཡག་ཉེས། མདུན་ལམ་བཟང་ངན་མགོ་མ་ཐོན་པ་རེད། དཔེར་ན་ས་བྱང་ཐང་ཤར་ལྷོ་ནུབ་བྱང་གང་ཡིན་ངོས་མི་འབྱེད་པའི་རྒྱུས་མེད་ཀྱི་ས་ཆ་ཞིག་ན། མུན་ནག་ཆར་ནག་གི་ནང་ནས་མགོ་འཁོར་ཏེ་སོང་སོང་བརྒྱུགས་བརྒྱུགས་ནས་དཀའ་ལས་སྡུག་བསྔལ་རིག་རིག་མྱོང་མྱོང་གི་མཐའ་རྔ་མར་གཅིག་ལྟ་དུས་ཁ་རྩང་གི་ཡོང་ས་ན་ཕྱིར་ཐོན་ཡོད་ན། དཀའ་ལས་བརྒྱབ་ཚད་པོ་སྡུག་གྱོང་རེད། འབད་པར་བྱས་པ་འཕྲོ་བརླག་ཏུ་གྱུར། སྡུག་བསྔལ་མྱོང་བ་དོན་མེད་རེད་སོང་བ་བཞིན་དུ། ད་སྔོན་ཚེ་སྟོད་ཀྱི་ཉི་མ་ནམ་ཟླའི་དུས་ཚོད། ཁ་མིག་དབང་པོ་གསལ་དུས་ལུས་སྟོབས་འབྱུང་བ་མ་རྒུད་པའི་སྐབས། ཉིན་གཅིག་གི་ཉི་མ་ལ་དཔེར་འཇོག་ན། ཡག་ས་བཟང་སའི་སྔ་དྲོའི་ཉི་མ་ལྟ་བུ་དེ་ཤོར་ནས་ཉི་མ་ནུབ་རྒྱུའི་དུས་ཚོད་ལ་ཐོན་པ་རེད། ད་ཕྱིར་བལྟས་བྱས་ནས་ཕྱོགས་སྡོམ་ཞིག་བརྒྱབ་ན། ལས་ལས་རྒྱུག་རྒྱུག་འདུར་འདུར་གྱིས་ཅི་ཞིག་འགྲུབ་ཡོད། དགོས་པའི་དོན་འགྲུབ་ཨེ་ཚར། མ་ཚར་ན་ད་དུས་ཚོད་ཅི་ཙམ་ཞིག་གིས་འགྲུབ་འོང་། ལར་མ་གཞི་མི་ང་རང་གིས་ང་རང་གི་ཚེ་ཚད་དུས་ཚོད་ཅི་ཡོད་ཤེས་ནས་ཚོད་བརྩིས་བྱེད་ཚོད་ཨེ་ཡོད། དེ་མེད་ན་མི་ལོང་བ་ཞིག་གིས་མཁར་མཐོན་པོའི་ཡང་རྩེར་རྒྱུག་པ་བཞིན་དུ། མ་བསམ་མ་དྲན་ས་ནས་ཆག་སྒོ་ཉོ་རྒྱུ་བོ་ལག་པའི་མཐིལ་ན་ཡོད་པ་རེད། སྤྱིར་མི་གཞན་ལ་ལྟོས་ནས་རང་ལ་འདང་རེ་རྒྱོབ་དང་ད་སྔོན་ཉི་མ་ཡན་ཆད་ལ་ས་གཞི་འདི་ཆགས་ནས་མི་ལོ་དུང་ཕྱུར་མང་པོ་སོང་ཚར་ས་རེད་མོད། དེ་རེད་ཡོད་ན་མིའི་འཇིག་རྟེན་འདི་ཆགས་ནས་ད་བར་ས་འདིའི་ཐོག་ལ་རྐང་རྗེས་གཏོད་མཁན་ཇི་ཙམ་མང་པོ་ཞིག་ཡོད་རྒྱུ་རེད། ཚང་མ་འཇིག་རྟེན་ཚེ་འདིའི་བྱ་བཞག་ཟིན་རྒྱུ་མེད་པའི་འཇའ་འདྲའི་རྗེས་དེད་ནས་རྗེས་མ་ཟིན་གོང་ནས་ཤི་བར་དོའི་ལམ་ཆེན་ལ་བུད་སོང་བ་ཤ་སྟག་ཡིན། འུ་ཚོའི་མི་ཐོག་སྔོན་མ་ལ་འདང་རེ་རྒྱག་ན། ང་ཚོས་ཤེས་རྒྱུའི་ཨ་མྱེ་དང་ཨ་མེས་དང་དེའི་སྔོན་གྱི་མེས་པོ་དང་ཡང་མེས་ཚོས་ཆོས་རེ་གོ་མྱོང་ཡོད་རྒྱུ་རེད། དམ་པ་ཆོས་ཕྱོགས་ལ་འདང་རྒྱག་ན་འུ་ཚོའི་མི་ཐོག་ལས་དེ་ཚོའི་མི་ཐོག་སྐལ་བ་བཟང་རྒྱུ་རེད། ང་ཚོས་བླ་བརྒྱུད་ཀྱི་གྲལ་ན་གསོལ་བ་འདེབས་ས། ཀུན་ཏུ་བཟང་པོ་དང་། དགའ་རབ་རྡོ་རྗེའི་འཕྲོར་འཇོག་འདུག་རྒྱུའི། ཐང་གའི་ནང་གི་འཇའ་འོད་གུར་ཁང་ནང་ན་པད་མའི་གདན་ལ་བཞུགས་ཡོད་པའི་འགའ་རེ་མི་ཐོག་གོང་མ་ཁོང་ཚོ་དང་མི་ཐོག་གཅིག་པ་ཡིན་ཡང་། ཆོས་རང་གིས་མ་བསྒྲུབས་ན་བཅོམ་ལྡན་འདས་ཡིན་རུང་དགེ་སློང་ལྷས་བྱིན་གསོན་པོ་ས་གས་ནས་དམྱལ་བར་ལྷུང་དུས། སེམས་ཅན་གྱི་ལས་ཀྱི་རྣམ་སྨིན་ལ་གཟིགས་ཀྱིན་འདུག་པ་ལས་ཐབས་གཞན་མ་ཡོད་པ་ལྟ་བུ། མི་ཐོག་སྔོན་མ་ཚོས་འཇིག་རྟེན་འདི་སྣང་གི་བྱ་བ་ལ་འཁྲུལ་ནས་དགྲ་ལ་སྡང་ཡོད་རྒྱུ་རེད། གཉེན་ལ་ཆགས་ཡོད་རྒྱུ་རེད། དགྲ་འདུལ་ཨེ་ཐུབ་དང་གཉེན་སྐྱོང་ཨེ་ཐུབ་བལྟ་ཁུལ་བྱས་ནས། རང་རྒྱུ་ལ་ཞེན་ཆགས། གཞན་ནོར་ལ་རློམ་སེམས་བྱས་པས་ཡོད་པ་བརླག་གིས་དོགས་པའི་སྡུག་བསྔལ། མེད་པས་བཙལ་རྒྱུ་མི་ལོན་པའི་སྡུག་བསྔལ། སྐྱེ་རྒ་ན་འཆི་བར་མེད་ཀྱི་སྡུག་བསྔལ། བསམ་པ་ཐོག་ཏུ་མི་འགྲོ་བར་མི་འདོད་པ་མགོ་ཐོག་ཏུ་བབ་པའི་སྡུག་བསྔལ། མདོར་ན་སྡུག་བསྔལ་ཁོ་ན་མྱོང་ནས་འགའ་རེ་གྲི་ཤི། འགའ་རེ་གཡང་ལ་ཤོར། དྲག་ཤོས་པོ་ཤི་དུས་ཉལ་ས་དྲོན་པོ་ཟེར་ཡང་། ཆོས་སྔོན་སོང་མེད་པའི་གཅེར་བུ་ལག་སྟོང་དབུགས་ཆད་ཁར་མིག་སྒོར་མཆི་མ་འཁྲིགས། བྲང་ལ་སྤར་ཤད་བྱས་ནས་འགའ་རེ་གཟེར་ཏེ་བཀད། མདོར་ན་དབུགས་རྟ་རྔ་འདྲ་བོ་མ་ཆད་བར་དུ་ལུས་སེམས་གཉིས་ཀྱིས་སྡུག་བསྔལ་མྱོང་བ་ཡིན་ན། སྡུག་བསྔལ་ཁོ་ནས་མ་བཟོད་ནས། འུ་ཚོས་ཤུགས་ཅི་ཡོད་ཀྱིས་གཡག་མཆུ་བཅང་ན་དེའི་ཕན་ན་ཅི་བྱེད་ཀྱིན་ཡོད་མ་རེད། དབུགས་ཚར་གཅོད་བྱེད་པའི་སྐྲག་སྔངས་ཅི་འདྲ་ཡོད་ས་རེད་ཁ་སྣ་ལག་པས་བཀག་ནས་སྐར་ཆ་གཅིག་གཉིས་རེ་སྡོད་དང་ཤེས་རྒྱུ་ཞིག་ཡོད། དེའི་ཕན་ལ་སྡུག་བསྔལ་ཅི་འདྲ་ཞིག་ཡོད་དང་། ཤི་བར་དོའི་འཕྲང་ན་ཐོན་དུས་སྡུག་བསྔལ་ཅི་ཡོད་ལྐོག་གྱུར་རེད། འོན་ཀྱང་བཟའ་ཚང་སྐོར། གཉེན་ཉེ་རིང་། རྒྱུ་ནོར་རྫས། ཐ་ན་ང་ཟེར་ནས་གཅེས་བསྐྱང་བྱ་རྒྱུའི་ལུས་བེམ་གོག་གི་གནས་ཚང་བསྐྱུར་ཏེ། མར་དཀྱིལ་ནས་སྤུ་བཏོན་པ་ལྟར་འགྲོ་བ་ནི་མིག་རིག་ལག་མཐོང་རེད། དཔལ་སྤྲུལ་ཚང་གི་གསུང་ལས། ཀྱེ་ལགས་ལྟོས་དང་མི་རྟག་སྲིན་པོའི་ཁ། །གླལ་བའི་ཁྱོན་འདི་བདེན་བཞིའི་ཆོས་ཀུན་གྱི། །གླེང་གཞི་ལགས་ཏེ་འཁོར་བའི་གྲོང་ཁྱེར་ན། །སྣོད་བཅས་འཇིག་རྟེན་ཟ་བ་པོ་ཡང་འདི། །སྔར་ཞིག་བཀོད་ཅིང་བཀོད་པའི་སྟོང་ཁམས་བརྒྱ། །ཟོས་པའི་སྒྲེགས་སྐད་ཐོས་པ་ཡོད་ལགས་ཀྱང་། །ངེས་འབྱུང་རླུང་གིས་བ་སྤུ་མི་གཡོ་བ། །རྟག་འཛིན་བདུད་འདིས་ཡིད་དབང་འཕྲོག་པས་ལན། །ཞེས་གསུངས་ཡོད། མི་ཤི་བའི་རྗེས་ན་བཞི་བཅུ་ཞེ་དགུ་ཁྲལ་སོད་ཅིག་འཚོགས་ནས་དེས་ཆོག་རྒྱུ་བྱས་པ་རེད། དང་པོར་དེའི་རྗེས་སུ་འཆི་ཐུབ་སྙམ་པའི་སྡུག་ཆེ་ཁུལ་བྱེད་ཀྱང་། ཞག་གཅིག་སོང་གཉིས་སོང་གིས་ཞེ་དགུའི་སྨད་ན་ཐོན་དུས་ཤི་བོ་ཇེ་བརྗེད། རྒྱུ་རྩིས་ཇེ་ཆེ། ཕྱི་ལོར་ཤི་ཚིགས་འཚོགས་རན་དུས་བླ་བདེ་དང་བླ་བདེའི་ཆེད་དུ་མི་གཏོང་བར། ནོར་ལུག་ཚོ་བཤས་རའི་ནང་ན་ཐོན་འགྲོ་བཞིན་མེད་ན་རབ་རེད་མོད། དེའི་རིན་པ་སྒོར་རྡོག་ཚོ་ཤོ་བག་རྒྱན་འཇོག་ཆང་དུ་བ་གཉིས་ཀྱི་རྗེས་སུ་མ་གཏོང་ན་དྲག་ཤོས་རེད། དུས་ངན་གྱི་སྐབས་མི་ཐོག་སྔོན་མས་ལྷག་བསམ་དཀར་པོས་སྲོག་གིས་སྲུང་བའི་ལྷ་སྐུ་རྟེན་གསུམ་ཡིན་ཡང་ཚོང་རྫས་བྱེད་པའི་དུས་ཚོད། མི་ཐོག་སྔོན་མ་ཚོའི་རྐང་རྗེས་གྲིབ་མ་མི་ཡལ་བར་དང་པོ་སྲོལ་ཉམས་འཛིན་ཁུལ་བྱེད་ཀྱང་། བར་སྐབས་ཤིག་ན་མིང་སྐམ་པོ་ཤུལ་ན་ལྷག་པ་དེའང་འཇའ་ཡལ་བ་ལྟར་མི་ཐོག་གཅིག་གཉིས་བརྗེས་དུས་མེད་འགྲོ་ངེས་རེད། དེ་བྱ་སྔ་མ་ཤི་བའི་རོ་ལ་བལྟས་ན། རྗེས་མ་མི་རྟག་དེ་དང་མི་འདྲ་བ་ཞིག་ལས་མེད་པས། མི་ཐོག་སྔོན་མ་ལ་ཅི་འོང་རྗེས་མར་འོང་ངེས་རེད། དེ་འདྲའི་སྡུག་བསྔལ་ཁོ་ནའི་ནང་བར་མེད་དུ་འཁོར་བས་འཁོར་བའི་འཁོར་ལོ་ཟེར་བ་རེད། ད་དེ་དུས་ཀྱི་ཕོ་སར་ཡིན་ན། དེང་སོང་གི་བཟའ་དཔོན་ཡིན། སང་གནངས་ཀྱི་ཨ་མྱེ་ཡིན། ད་དུང་དེ་བས་འདུག་ཡུན་རིང་ན་དེའི་ཕྱི་ལོ་ཡང་ལོར་སྐྱོས་རྒན་སྐྱོས་གོག་ཁྱིམ་བརྫད་རེད་ཡོད་པ་རེད། དེ་ཚོ་ཚང་མ་ལ་འདང་རེ་རྒྱག་ན་འུ་ཚོས་དེང་སང་གི་ཚན་རིག་པའི་སྐད་ཆ་བཤད་སྟངས་བྱེད་ན། མི་ཞེས་པ་དེ་མཐོ་རིམ་གྱི་སྲོག་ཆགས་རེད་ཟེར། ཅིའི་ཕྱིར་ཟེར་ན། འབུ་དང་། བྱ་དང། ཉ་དང་། གཡག་དང་ཁྱི་ལ་སོགས་པ་དང་མི་འདྲ་བར་བསམ་བློ་གཏོང་བའི་རྣམ་རིག་དང་རྣམ་དཔྱོད་དེ་རྣམས་ལས་ལྷག་པར་ཡོད་པས་རེད་ཅེས་ཟེར། ཟ་རྒྱུ་དང་ཉལ་རྒྱུ་ཞིག་མ་གཏོགས་མི་ཤེས་ན་དེ་རྣམས་ལས་ཁྱད་ཆོས་འདི་རེད་ཟེར་ནས་བསྟན་རྒྱུ་མེད་པ་རེད། དུད་འགྲོ་ལའང་སྤྱང་མི་སྤྱང་ཡོད། དུད་འགྲོ་བློ་གསལ་བ་འགའ་རེ་མི་སྐད་ཤེས་མི་ཤེས་ཙམ་རེད་མ་གཏོགས། མི་ཐབས་རྡུག་ཅིག་དང་མི་འདྲའམ་བསམ་རྒྱུ་ཡོད་པ་རེད། དུད་འགྲོ་ཡིན་ཡང་ངོ་འདྲིས་ན་འདྲིས་བཟང་བའི་ཤ་ཟན་སྟག་མོ་ཡིན་ཡང་། ངོ་ཤེས་འདྲིས་ཤིང་འདྲིས་ན་དགའ་དགར་བྱེད་ཤེས་པ་དེ་འདྲ་ཡོད། དེས་མི་ཚད་དུད་འགྲོ་ཡིན་ཡང་མ་འོངས་ཀྱི་འདང་རྒྱག་མེད་པར་མིན་ཚུལ། བྱིའུ་དང་ཨ་བྲ་ཡིན་ཡང་རང་རང་གི་ཚང་བཅའ་ལུགས་དང་དགུན་ཁར་བཟའ་རྒྱུ་སྟོན་ཁར་ཚགས་ཉར་བྱེད་ཤེས་ལ། མི་སྡུག་པོས་དེ་ཡང་མི་ཤེས་སྐྱིད་མེད་སྡུག་ཟད་འདང་རྒྱག་མེད་པར། ཆང་འཐུང་དུད་འཐེན་ཁྱི་རོ་རུལ་བ་དང་འདྲ་བར་ཅི་འདྲ་མེད། མི་ཞིག་ཡིན་དུས་དུད་འགྲོའི་ཡན་ན་སོང་བའི་འདང་ཞིག་རྒྱག་ཀྱང་དགོས་ལ་ཕོག་ཀྱང་དགོས། འུ་ཚོ་ད་སྔོན་གྱི་ཚེ་ཚད་དེ་འཛམ་གླིང་གི་ཉི་མ་ཤར་ནུབ་འདི་ལ་བརྩིས་ན། ཁ་སང་དང་དེ་རིང་སོགས་ཉིན་འགའ་ཞིག་སོང་ན་ཉི་མ་ཆ་རེ་བགྲངས་ནས་ན་ཚོད་ཡོལ་བའི་དུས་ལ་བབ་པ་རེད། ཐོད་པའི་རྒས་གཉེར་ཇེ་མང་ལ་འགྲོ་བཞིན་ཡོད་ནའང་། སང་ཉིན་དང་སང་ཕོད་རྡོག་མ་འགའ་རེ་བརྩིས་ནས་ལོ་གསར་རྡོག་མ་དུ་བྱེད་ལོང་ཡོད་པའམ། གཅིག་ཀྱང་བྱེད་ལོང་ཨེ་གཏད་མི་ཤེས། མདོར་ན་ཤི་རན་དུས་དབུགས་ཀྱི་རྒྱུ་བ་ཆད་པ་དང་། སྙིང་གི་འཕར་མཚམས་བཞག་ནས་མི་ཚེའི་ཟློས་གར་གྱི་འཁྲབ་སྟོན་མཇུག་བསྡུ་རན་པ་རེད། དེ་ཡིན་ན་ཤི་དུས་དམ་པའི་ཆོས་མ་གཏོགས་རེ་ས་སྐྱབས་གནས་ཤིག་གནམ་ས་གཉིས་ཀྱི་བར་ན་བཙལ་ནས་མི་ལོ་དགུ་ལ་སོང་ན་རྙེད་འོང་རྒྱུ་ཞིག་མེད་པར་བསམ་བློ་ཐོངས་དང་། རང་གཅིག་པུས་མི་ཚད་པར་མར་གྱུར་ནམ་མཁའི་མཐའ་མཉམ་གྱི་སེམས་ཅན་ཐམས་ཅད་བདེ་བ་འདོད་ལུགས་གཅིག་པ་དང་། སྡུག་བསྔལ་མི་འདོད་ཚུལ་འདྲ་འདྲ་ཡིན། རང་ཅིག་པུ་བདེ་ན་ཡང་རྗེས་ན་ཡོད་པའི་མ་སེམས་ཅན་ཐམས་ཅད་བློས་བཏང་ན་ཁྲེལ་མེད་རེད། རྒྱལ་བ་རྫོགས་པའི་སངས་རྒྱས་ཀྱིས་ཆོས་སྒོ་བརྒྱད་ཁྲི་བཞི་སྟོང་གསུངས་ཡོད་ན། གདུལ་བྱ་བློ་མཆོག་དམན་མི་འདྲ་བ་འདྲེན་པའི་ཐབས་ལ་དགོངས་ནས་གསུངས་པ་ཞིག་རེད། འོན་ཀྱང་རང་འདོད་ཡིད་བྱེད་རྐྱང་པ་ཞིག་གིས་རང་བདེ་ཐབས་ཁོ་ན་དོན་དུ་གཉེར་ན་ཐ་མ་རང་དོན་ཡག་པོ་ཞིག་ཀྱང་མི་འགྲུབ། དོན་གཉིས་ལྷུན་གྲུབ་རྫོགས་སངས་རྒྱས་ཀྱི་ཡོན་ཏན་འབའ་ཞིག་པ་ནི། གཞན་དོན་ཁོ་ན་བསམ་པར་མཛད་པའི་དབང་གིས་ཐ་མར་རང་གཞན་དོན་གཉིས་གྲུབ་ནས་མཐའ་གཉིས་ལ་མི་གནས་པའི་རྫོགས་བྱང་འགྲུབ་པ་རེད། རང་ཉིད་ཡིན་ན་ཆོས་དར་སར་སྐྱེས་ཡོད་པ་དང་། བྱང་ཆུབ་སེམས་དཔའི་ཆོས་སྒོར་ཞུགས། དགེ་བསྙེན་ཡན་ཆད་གསང་སྔགས་ཀྱི་དབང་སྣ་རེ་ཞུས་པ་ཚུན་ཆད། མདོར་ན་སྡོམ་པ་གསུམ་ལ་ཞུགས་པའི་སངས་རྒྱས་ཀྱི་རྗེས་འཇུག་ཡིན་པས། སངས་རྒྱས་རང་ཉིད་ཀྱིས་ཅི་འདྲའི་གཞན་ཕན་སྒྲུབ་ཡོད་ན་དེ་ལྟར་དུ་བསླབ་པར་བྱ་བསམ་ནས་སེམས་བསྐྱེད་ལ་དམ་བཅའ་དང་། གནས་དུས་སྟོན་འཁོར་ཐམས་ཅད་མ་དག་པའི་སྣང་བ་ལྟར་མ་ཡིན་པར་དག་པའི་སྣང་བར་སྦྱངས་ནས། ཆོས་གསན་པའི་ཀུན་སློང་དང་ཀུན་སྤྱོད་དེ་མདོ་རྒྱུད་བསྟན་བཅོས་ཚད་མ་དག་ལས་ཇི་ལྟར་འབྱུང་བ་བཞིན་ཉམས་སུ་ལེན་ཚུལ་མི་འབྲལ་བའི་སྒོ་ནས་གསན་དགོས། གང་གསན་པའི་ཆོས་ནི་རྫོགས་ཆེན་ཀློང་ཆེན་སྙིང་ཐིག་གི་ཐུན་མོང་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་ཁྲིད་ཐར་པའི་ཐེམ་སྐས་ཞེས་བྱ་བ་འདི་ཡིན། འདི་ལ་ཐོག་མར་དགེ་བ་ཀླད་ཀྱི་དོན་དང་། བར་དུ་དགེ་བ་གཞུང་གི་དོན། མཐའ་མར་དགེ་བ་མཇུག་གི་དོན་དང་གསུམ་ལས། ཁ་སང་ཡན་ཆད་ཐོག་མར་དགེ་བ་ཀླད་ཀྱི་དོན་སོང་ནས།

༼ཨཱཿ༽ བར་དུ་དགེ་བ་གཞུང་གི་དོན།

སྤྱི་དོན་ཁོག་འབུབས་པ།

ད་བར་དུ་དགེ་བ་གཞུང་དོན་དངོས་ལ་འཇུག་པ་ལ། དེ་ལ་འདིར་བརྒྱུད་པའི་ཁྱད་པར་དྲུག་དང་ལྡན་པའི་སྒོ་ནས་མདོ་སྔགས་ཀྱི་ཆོས་ཚུལ་རབ་འབྱམས་མཐའ་དག་སྟན་ཐོག་གཅིག་ཏུ་འཆད་ནུས་པའི་ཐེག་པའི་རྩེ་རྒྱལ་རང་བཞིན་རྫོགས་པ་ཆེན་པོ་ལ་འཇུག་པའི་ལམ་སྟེགས་ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་ཁྲིད་ནི། ཞེས་པ་འདིས་ཆོས་འཆད་ཉན་ཇི་ལྟར་བགྱིད་པའི་ཐེག་པ་སྤྱི་ཡི་ཁོག་འབུབས་བསྟན་པ་རེད། དེ་ལ་འདིར་གསང་ཆེན་སྔ་འགྱུར་བའི་བརྒྱུད་པའི་ཁྱད་པར་དྲུག་དང་ལྡན་པ་སྟེ། རྒྱལ་བ་དགོངས་བརྒྱུད་དང་། རིག་འཛིན་བརྡ་བརྒྱུད། གང་ཟག་སྙན་བརྒྱུད་གསུམ་དང་། བཀའ་བབ་ལུང་བསྟན། སྨོན་ལམ་དབང་བསྐུར། མཁའ་འགྲོ་གཏད་རྒྱའི་བརྒྱུད་པ་སྟེ་དྲུག་དང་། ཡང་ན་བརྒྱུད་པ་དགུ་དང་ལྡན་པའི་སྒོ་ནས་ཐུབ་བསྟན་མདོ་དང་སྔགས་ཀྱི་ཆོས་ཚུལ་རབ་འབྱམས་ཞེས་ཐུབ་པའི་ཆོས་སྒོ་མ་ལུས་ཤིང་ལུས་པ་མེད་པར་མཐའ་དག་སྟན་ཐོག་གཅིག་སྟེ་གནད་གཅིག་ལ་ཚང་བའི་གཞུང་གཅིག་གིས་འཆད་ནུས་པའི་དོན་ནོ། །སྤྱིར་ན་བཀའ་བབ་ཀྱི་ཆུ་བོ་བཞི་དང་ལྡན་པ་སྔ་འགྱུར་རྙིང་མ་འདི་ལ། སྨིན་བྱེད་དབང་གི་ཆུ་བོ་བསྐུར་ཐབས་ངོ་སྤྲོད་དང་བཅས་པ། དཀྱུས་བཤད་གཞུང་གི་ཆུ་བོ་འབྲེལ་ཊཱིཀ་སྟོང་ཐུན་དང་བཅས་པ། སྙན་བརྒྱུད་གདམས་ངག་གི་ཆུ་བོ་གནད་ཡིག་དམར་ཁྲིད་དང་བཅས་པ། ཕྱག་བཞེས་འཕྲིན་སྒྲུབ་ཀྱི་ཆུ་བོ་བསྟན་སྲུང་དྲག་སྔགས་དང་བཅས་པ་ཞེས་བཀའ་བབ་ཀྱི་ཆུ་བོ་བཞི་གསུངས་ཡོད་ན། རིང་བརྒྱུད་བཀའ་མ་དང་། ཉེ་བརྒྱུད་གཏེར་མའི་ཕྱོགས་གཉིས་ཀ་ཐུན་མོང་ལ་སྤྱིར་བརྒྱུད་པ་དྲུག་ལྡན་དུ་བརྩི་རྒྱུ་ཡོད་ཀྱང་། འདིར་གཏེར་བརྒྱུད་ཁོ་ནའི་སྒོས་ཆོས་ལྟར་དུ་བརྩི་བའི་དབང་དུ་བཏང་ནས་འཆད་ན། སྤྱིར་གཏེར་རིགས་ཞེས་པ་སྔར་སློབ་དཔོན་རིན་པོ་ཆེ་སོགས་ཀྱི་མདུན་ནས་ཆོས་བཀའ་དེ་དང་དེའི་དབང་ཐོབ་ཅིང་། དམ་ཚིག་རྣམ་པར་དག་པ་བསྲུངས་པའི་རྒྱུ་མཐུན་གྱིས་སྐྱེ་བ་རྗེས་མ་རྣམས་ལ་ཡང་སྔགས་ཀྱི་ཚུལ་ཁྲིམས་རྣམ་པར་དག་པའི་སྟོབས་ཀྱིས། ཚུལ་ཁྲིམས་ལྡན་པའི་སྨོན་ལམ་ཆུད་མི་འཛའ་བ་ཡིན་པས། སྨོན་ལམ་གྱི་དབང་གིས་ད་ལྟའི་སྐབས་སུ་གསང་སྔགས་ཀྱི་ཆོས་སྐལ་དེ་དང་དེ་ལག་ཏུ་འོང་རྒྱུ་ཅན་ཞིག་གོ །དེའང་མི་བརྗེད་པའི་མཛུབ་བསྐུལ་ལ་བརྟེན་ནས་མི་བརྗེད་རྒྱུའི་དོན་དེ་དྲན་པ་དང་འདྲ་བར་བརྡ་ཡིག་དང་ཤོག་སེར་དེ་ཚོ་རིག་པ་དང་། སྔར་དེ་དང་དེའི་དབང་དང་གདམས་ངག་གི་བག་ཆགས་གསལ་པོར་སད་འོང་བ་རེད། དཔེར་ན་རང་རེ་ཆོས་དུང་གི་སྒྲ་དེ་ནམ་ཡིན་ཡང་གོ་བསྡད་པ་ཡིན་ན། དེའི་ཆོས་དུང་གི་སྒྲ་དེ་ས་གཞན་དང་དུས་གཞན་དུ་གོ་ཡང་དགེ་འདུན་བསྡུས་ནས་ཆོས་ཁྲིད་འཆད་རྩིས་ཡིན་པར་ཞེ་ལ་ལྷང་ངེར་དྲན་པ་བཞིན་དེ་དང་ཕྱོགས་འདྲ་བར། དེ་དུས་སློབ་དཔོན་ཆེན་པོས་གསུངས་པའི་དབང་དང་གདམས་ངག་ཚང་མ་ཆད་ལུས་མེད་པར་ཕབ་ནས་བསྒྱུར་ནུས་པ། གཅིག་ན་གཏེར་སྟོན་རང་གི་ལས་འཕྲོ་དང་། གཉིས་ན་བླ་མ་དམ་པའི་བྱིན་རླབས་ཀྱི་ལག་རྗེས་ཡིན། བརྒྱུད་པ་དྲུག་ཚང་ཚུལ་གྱི་ཐད་ལ་རང་རེས་གཏེར་ཕྱོགས་ནས་བཤད་ན། དང་པོ་དགོངས་བརྡ་སྙན་བརྒྱུད་གསུམ་ལས་དགོངས་བརྒྱུད་ནི། ཆོས་བཀའ་དེ་དང་དེ་ལས་ཅན་གྱི་བུ་ལ་ཐོན་པའི་ཆེད་དུ། གུ་རུས་དགོངས་པ་སྐལ་ལྡན་གྱི་རིག་པ་འཛིན་པ་གཏེར་འབྱིན་པ་པོ་དེ་ལ་གཏད་ཡོད་པའི་གནད་ཀྱིས། གཏེར་ཡིག་ལ་དབང་བསྒྱུར་ནས་སྔགས་ཀྱི་རྟོགས་པ་ཐམས་ཅད་ཐོད་བརྒལ་དུ་བསྒྱུར་བ་དེ་གུ་རུའི་དགོངས་པ་རྒྱུད་ལ་དབབ་པར་ཡིན་པས་ན་དགོངས་བརྒྱུད་ཅེས་བྱ། བརྡ་བརྒྱུད་ནི། བརྡ་ཡིག་ཤོག་སེར་ལ་བརྟེན་ནས་དེས་དྲན་བསྐུལ་གྱི་རྐྱེན་བྱས་པ་ལྟ་བུས་ཡིད་ལ་ཐོགས་མེད་དུ་ཤར་ནས་དཔའ་བོ་ཌཱཀྐིའི་གསང་མཛོད་ལ་སོགས་དང་། སྤོབས་པའི་གཏེར་གྲོལ་བའི་རྐྱེན་གྱིས་སངས་རྒྱས་བྱང་སེམས་ཀྱི་བྱིན་རླབས་མངོན་སུམ་དུ་ཞུགས་ནས། མི་ནོར་བརྡ་ལ་བརྟེན་ནས་དོན་འཁྲོལ་བས་ན་བརྡ་བརྒྱུད་རེད། སྙན་བརྒྱུད་ནི་གཏེར་ཡིག་དེ་སྤྲུལ་སྐུ་ཡིན་གསུངས་ཡོད་པས། དཔའ་བོ་རིག་འཛིན་དང་ཌཱཀྐི་མཁའ་འགྲོ་མ་ཐམས་ཅད་བརྡ་རིས་དེ་ལ་ཞུགས་པས། གཏེར་སྟོན་གྱིས་གཏེར་ཡིག་དེ་ཐ་མལ་བ་ཡིན་རྒྱུའི་སྣང་བ་ལོག་ནས། སངས་རྒྱས་སྤྲུལ་པའི་སྐུ་དངོས་ཡིན་པའི་འདུ་ཤེས་བསྐྱེད་འོང་དུས་ཤོག་སེར་བརྡ་ཡིག་དེའི་རྐྱེན་གྱིས་རིག་འཛིན་ལ་བརྡ་བརྒྱུད་དང་། གང་ཟག་ལ་སྙན་བརྒྱུད་དུ་འཇོག་པར་ལྡོག་ཆ་ཐ་དད་དུ་ཡིན་པ་རེད། དེའི་ཐོག་ཏུ་བཀའ་བབ་ལུང་བསྟན་གྱི་བརྒྱུད་པ་ནི། གཏེར་སྟོན་གྱི་སྐྱེ་བ་སྔོན་མའི་སྐབས་སུ་གུ་རུ་རིན་པོ་ཆེས་ཆོས་གང་དང་གང་གི་བཀའ་བབ་ཀྱི་བདག་པོར་དགོངས་པ་གཏད་ཅིང་དེའི་བཀའ་བབ་ཡོད་ན། ཕྱིས་སུ་ཆོས་འདིས་འགྲོ་དོན་སྒྲུབ་པའི་ཆེད་དུ་འདི་ལྟར་འབྱུང་ཞེས་ས་རྟགས་དང་དུས་རྟགས་བཅས་པ་ལུང་བསྟན། དེའི་བྱིན་རླབས་དེ་ཚེ་འདིར་རྒྱུད་ལ་སྨིན་ནས་ངེས་ཤེས་ཁྱད་པར་ཅན་ཞིག་སྐྱེས་པའི་སྟོབས་ཀྱིས། སྔོན་གྱི་བག་ཆགས་ཚེ་འདིར་གསལ་པོར་སད་པའི་ལས་འཕྲོ་ཡོད་པ་དེ་ལ་བཀའ་བབ་ལུང་བསྟན་གྱི་བརྒྱུད་པ་ཞེས་གོ་དགོས། སྨོན་ལམ་དབང་བསྐུར་གྱི་བརྒྱུད་པ་ནི། བག་ཆགས་དེ་སད་པའི་ཕྱིར་གཏེར་སྟོན་གྱི་སྐུ་ཚེ་སྔོན་མའི་སྐབས་སུ་གཏེར་སྟོན་ལས་འཕྲོ་ཅན་འདི་དང་འཕྲད་པར་ཤོག འཕྲད་ནས་འགྲོ་དོན་དཔག་མེད་འབྱུང་བར་ཤོག ཅེས་གསུངས་ནས་གུ་རུས་དགོངས་པ་གཏད་པའི་བདེན་ཚིག་སྨོན་ལམ་གྱིས་དབང་བསྐུར་བའི་སྐབས་སུ་གཏེར་སྟོན་རང་གིས་ཀྱང་དེ་བཞིན་དུ་འདུན་པ་གཏད་པས་དེ་ཡིན་ནོ། །དྲུག་པ་མཁའ་འགྲོ་གཏད་རྒྱའི་བརྒྱུད་པ་ནི། སྔོན་རབས་ཀྱི་དུས་དེ་རྡོ་རྗེའི་གནས་ཀྱི་མཁའ་འགྲོ་དང་མཁའ་འགྲོ་མ་ཏིང་ངེ་འཛིན་གྱི་རྩལ་འབྱོང་བ་རྣམས་ལ་གཏེར་ཚུལ་བཞིན་རྙེད་ཅིང་འགྲོ་དོན་འབྱུང་བ་དང་། སྐལ་མེད་ལ་གསང་སྒོ་མི་རལ་བ་སོགས་ཀྱི་ཆེད་དུ་བཀའ་གཏད་པ། དེ་ལ་བརྟེན་ནས་གདུལ་བྱ་འདིའི་ཚེ་ཕྱི་མར་ལས་ཀྱི་འཕྲོ་མཐུད་པའི་ཆ་རྐྱེན་དུ་གུ་རུ་རིན་པོ་ཆེ་དང་། མཁར་ཆེན་མཚོ་རྒྱལ་གྱིས་སྐུ་བསྟན་པའི་དབང་གིས་ཆོས་བདག་མཁའ་འགྲོ་ཐམས་ཅད་ཀྱིས་ཤོག་སེར་དང་བརྡ་རིས་ཅི་རིགས་པ་རྟེན་འབྲེལ་སྒོ་དུ་མ་ནས་བསྒྲིགས་པ་དེ་འདྲའི་གོ་བ་རེད། དེ་ལྟ་བུའི་མདོ་སྔགས་ཀྱི་ཆོས་ཚུལ་རབ་འབྱམས་མཐའ་དག་སྟན་ཐོག་གཅིག་ཏུ་འཆད་ནུས་པའི་ཐེག་པའི་རྩེ་རྒྱལ་བླ་མེད་འབྲས་བུའི་ཐེག་པའི་རང་བཞིན་རྫོགས་པ་ཆེན་པོ་ལ་ཞེས་གསུངས། རྫོགས་པ་ཆེན་པོ་ཞེས་པ་འགྲེལ་ན། མངའ་རིས་པཎ་ཆེན་པད་མ་དབང་གི་རྒྱལ་པོའི་རྗེས་སུ་འབྲངས་ན། རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས། །ཡོངས་སུ་དག་སྐུ་རྡོ་རྗེ་འཆང་ཆེན་པོ། །འབྲས་བུའི་མཐར་ཐུག་སངས་རྒྱས་ཉག་གཅིག་དེ། །ཟབ་རྒྱས་ཆོས་ཀྱི་སྒོ་འཕར་བགྲང་ཡས་ཀྱང་། །གསང་ཆེན་སྨིན་གྲོལ་ལམ་མཆོག་མ་བསྟན་པར། །ཐོབ་པ་མིན་ཞེས་རྫོགས་སངས་རྒྱས་དེས་གསུངས། །ཞེས་གསུངས་ཡོད་པ་དེའི་ཚིག་རྐང་དང་པོ་གཉིས་འཇམ་དཔལ་ཞལ་ལུང་གི་ཚིག་རྐང་ཞིག་ཡིན་པར་གསུངས་ཡོད། མདོ་ཏིང་འཛིན་རྒྱལ་པོ་ལས། དག་པ་དྭངས་པ་འོད་གསལ་བ། །མི་འཁྲུགས་འདུས་མ་བྱས་པ་ཉིད། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་གསུངས་པ་ལྟར། དེ་སྦྱང་གཞི་བདེ་གཤེགས་སྙིང་པོ་ངོ་བོ་རང་བཞིན་ཐུགས་རྗེའི་བདག་ཉིད་སྐུ་གསུམ་རང་ཆས་སུ་བཞུགས་པ་དེ་གློ་བུར་གྱི་དྲི་མ་འབྲལ་རུང་ཡོད་པ་དེ་དཔེ་དགུས་མཚོན་པ་ཞིག་ཡིན་ན། དེ་གནས་ཚུལ་གྱི་སྒོ་ནས་དབྱེ་བར་ཕྱེས་ན་ཆོས་ཉིད་ཆ་ཤས་མེད་པར་ཡིན་པས། དབྱེ་བ་འབྱེད་རྒྱུ་མེད་ཀྱང་དེ་རྒྱུད་ལྡན་གང་ཟག་ཅི་འདྲ་ཞིག་ཡིན་ན། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། །དེ་བཞིན་གཤེགས་པ་ཞེས་བརྗོད་དོ། །ཞེས་གསུངས་པ་ལྟར་མ་དག་པ་དང་། མ་དག་དག་པ་དང་། ཤིན་ཏུ་རྣམ་དག་གི་གནས་སྐབས་གསུམ་ལ་ལྟོས་ནས་འཇོག་གོ། །རིགས་སད་ཚུལ་གྱི་ཐོག་ཏུ་ཐེག་པ་གསུམ་གྱི་རིགས་དང་། འཕགས་བཞིའི་གང་ཟག་གི་རབ་ཏུ་དབྱེ་བར་བསྟན་ཡོད། དེ་ནས་སྦྱོང་བྱེད་ལམ་གྱི་རྣམ་པར་ཤར་བ་དེས་སྦྱངས་ནས། སྦྱོང་འབྲས་གང་ཡིན་ན་མཐར་ཐུག་གི་འབྲས་བུའི་མཆོག་ཡོངས་སུ་རྫོགས་པ་འབྲས་བུ་ཐམས་ཅད་ཀྱི་མཆོག་ཏུ་གྱུར་པ་དེར་ཡོངས་སུ་རྫོགས་པ། སྤངས་དང་རྟོགས་དང་སེམས་ཆེན་པོ་སྟེ། ཆེན་པོ་གསུམ་གྱི་ཁྱད་པར་དུ་བྱས་པའི་རྫོགས་པ་ཆེན་པོ་སངས་རྒྱས་ཐམས་ཅད་ཀྱི་སྤྱི་གཟུགས་རྡོ་རྗེ་འཆང་སྐུ་གསུམ་ཡེ་ཤེས་ལྔ་དང་དབྱེར་མི་ཕྱེད་པའི་བདག་ཉིད་དེ་ཡིན་པས། ཐེག་པ་འོག་མ་སོ་སོའི་ལམ་གྱི་ཟབ་རྒྱས་ཆོས་ཀྱི་སྒོ་འཕར་ཅི་འདྲ་ཞིག་བཤད་ཀྱང་། མཐར་ཐུག་གསང་ཆེན་སྨིན་གྲོལ་གྱི་ལམ་ལ་མ་བརྟེན་པར་ཐོབ་པའི་ཐབས་མེད་པས། འདིར་དེ་ལ་འཇུག་པའི་ལམ་སྟེགས་ཐུན་མོང་གི་སྔོན་འགྲོ་ཞེས་པ་དེ་ལ་འཇུག་པའི་སྒོའམ་ལམ་མམ་ལམ་གྱི་སྟེགས་སམ་ལམ་གྱི་འཇུག་སྒོ་ཐུན་མོང་གི་སྔོན་འགྲོ་ནི་ཞེས་མཚམས་སྦྱར། ཇི་སྐད་དུ། བདག་གི་བླ་མ་རྒྱལ་དབང་པད་མའི་དོན་གྱི་རྒྱལ་ཚབས་ཀུན་མཁྱེན་ཤནྟ་པུ་རི་པས། ཞེས་བདག་ཀུན་མཁྱེན་འཇིགས་མེད་གླིང་པའི་བླ་མ་འཕྲེང་པོ་གཏེར་ཆེན་ཤེས་རབ་འོད་ཟེར་གྱི་སྔགས་སྨོན་ལས། མངོན་མཐོ་སྒྲུབ་བྱེད་རྒྱལ་བའི་གསུང་རབ་ཀུན། །དོན་རྣམས་སྐྱེས་བུ་ཆུང་ངུའི་ལམ་དང་ནི། །ཐར་པ་བསྒྲུབ་པའི་ཐབས་ལ་བརྩོན་པ་ཡི། །ཆོས་ཀྱི་རྣམ་གྲངས་ཀུན་གྱི་བརྗོད་བྱའི་དོན། །སྐྱེས་བུ་འབྲིང་གི་ལམ་གྱི་རིམ་པ་སྟེ། །ཞེས་གསུངས་པ་སྟེ། ཚེ་ཕྱི་མར་མངོན་མཐོ་ལྷ་མིའི་གོ་འཕང་སྒྲུབ་བྱེད་ཀྱི་རྒྱལ་བའི་གསུང་རབ་རྒྱས་བསྡུས་ཐམས་ཅད་ཀུན་ལས། རྒྱུ་མི་དགེ་བ་སྤངས་ཤིང་དགེ་བ་བཅུའི་ལས་ལམ་བསྒྲུབ་པ་དང་། བསྙེན་གནས་ཡན་ལག་བརྒྱད་པ་ལ་སོགས་པ་གཙོ་བོར་སྟོན་པའི་གསུང་རབ་ཀྱི་དོན་ཐམས་ཅད་དེ་བློ་དམན་སྐྱེས་བུ་ཆུང་ངུ་འཁོར་བའི་ཟག་བཅས་བདེ་བ་ལྟར་སྣང་བ་ཙམ་སྒྲུབ་པའི་ལམ་ཡིན་པ་དང་། རང་དོན་རྐྱང་པ་ཞི་བདེ་ཙམ་ལ་དམིགས་ནས། ཐར་པ་སྒྲུབ་པའི་ཐེག་དམན་གྱིས་འདུལ་བ་དག་གི་ཐབས་ལ་བརྩོན་པའི་ཆོས་ཀྱི་རྣམ་གྲངས་ཇི་སྙེད་པ་དེ་དག་ཀུན་གྱི་བརྗོད་བྱའི་དོན་ནི་སྐྱེས་བུ་འབྲིང་གི་ལམ་གྱི་རིམ་པ་སྟེ། རང་དོན་ཞི་བདེ་ཙམ་ལ་དམིགས་ནས་ཐར་པའི་གོ་འཕང་གཉེར་བ་དེ་དང་། གོང་གི་སྐྱེས་བུ་ཆུང་ངུའི་ལམ་གནས་སྐབས་མངོན་མཐོའི་བདེ་བ་དོན་དུ་གཉེར་བ་དེ་གཉིས་ཐེག་པ་ཆེན་པོའི་ལམ་སྟེགས་ཡིན་པས། དཔེར་ན་སྐས་ཐེམ་འོག་མར་བརྟེན་ནས་བར་མ་དང་། འོག་མ་དང་བར་མ་ལ་བརྟེན་ནས་སྐས་ཐེམ་གོང་མར་འཛེགས་དགོས་པ་ལྟར། དེ་དག་ལ་བརྟེན་ནས་ངེས་འབྱུང་གི་བློ་ཁྱད་པར་ཅན་བསྐྱེད་དེ་སྲིད་པའི་སྡུག་བསྔལ་ལས་ཐར་པར་སྨོན་པ་དེའང་ལས་དང་པོ་བའི་ལམ་གྱི་འཇུག་ངོགས་ཁྱད་པར་ཅན་ཡིན་ནོ། ཞེས་གསུངས་པ་ལྟར་འདི་ཉིད་ས་བཅད་ཀྱི་དབང་གིས་སྐྱེས་བུ་འབྲིང་མན་ཆད་ཀྱི་ལམ་དུ་བཞག་ནའང་། ཞེས་སྔོན་འགྲོ་སེམས་སྦྱོང་བདུན་གྱི་དོན་ཁྲིད་འདི་ཉིད་ས་བཅད་འཇོག་ཚུལ་གྱི་དབང་གིས་ཡིན་ལུགས་ཐོག་ཏུ་བསྡུ་ན་སྐྱེས་བུ་འབྲིང་གི་ལམ་མན་ཆད་དུ་བཞག་པ་ཡིན་ནའང་། དངོས་གཞིར་བསྟན་བྱའི་ལམ་གྱི་ངོ་བོ་ཐེག་པའི་མཆོག་རབ་ཡིན་པར་མ་ཟད། ཅེས་འདི་ཉིད་སྔོན་དུ་སོང་བའི་དངོས་གཞི་བསྟན་བྱའི་ལམ་གྱི་ངོ་བོ་ཐེག་པའི་མཆོག་རབ་རྫོགས་པ་ཆེན་པོའི་ལམ་ལ་བཀྲི་ཆེད་ཡིན་པར་མ་ཟད། ལྟར་སྣང་སྐྱེས་བུ་ཆུང་འབྲིང་གི་ལམ་ཡིན་ཡང་། ཐེག་ཆེན་སེམས་བསྐྱེད་ཀྱིས་ཟིན་ན་ཕན་ཡོན་དཔག་ཏུ་མེད་པ་ཐོབ་པར་འགྱུར་བའང་ཡིན་ཏེ། ཐེག་པ་ཆེན་པོའི་སེམས་བསྐྱེད་ཀྱི་འཕེན་པ་ལན་རེ་རེའི་ནུས་སྟོབས་ཀྱང་བསམ་གྱི་མི་ཁྱབ་པ་ཞེས། སྤྱིར་ན་བྱང་ཆུབ་ཀྱི་སེམས་བསྐྱེད་པའི་ཕན་ཡོན་ལྟ་བུ་ལ་མཚོན་ན་བསམ་གྱིས་མི་ཁྱབ་ཏེ། སྔར་བྱང་སྡོམ་གྱི་སྐབས་ན་བཤད་པ་ལྟར་བསྡུ་ན་ལྔའི་སྒོ་ནས་འཆད། མིང་དོན་གནས་འགྱུར་བ་དང་། མི་དགེའི་གཉེན་པོར་བྱེད་པ། དགེ་འབྲས་གོང་ནས་གོང་དུ་འཕེལ་བ། ངན་སོང་གི་སྒོ་འཕར་གཅོད་པ། རྣམ་མཁྱེན་སངས་རྒྱས་ཀྱི་གོ་འཕང་ཐོབ་པ་དེ་འདྲའི་ཕན་ཡོན་ཆེན་པོ་དང་ལྡན་པ་ཡིན་པར་མ་ཟད། འདིའི་དངོས་བསྟན་ལྟར་གསུང་བའི་སེམས་བསྐྱེད་ཀྱི་འཕེན་པ་སྐད་ཅིག་མ་རེ་རེའི་ནུས་སྟོབས་ཀྱང་བསམ་གྱི་མི་ཁྱབ་ཅེས་པ། དཔེར་ན་དགེ་སློང་ཚུལ་ལྡན་གྱི་སེམས་བསྐྱེད་ཀྱི་འཕེན་པར་བཅས་པས་སྣབ་དང་ཁ་ལུད་སོགས་ཡི་དྭགས་ལ་བསྔོ་ན་དེའི་སྣང་ངོར་ལོངས་སྤྱོད་དཔག་མེད་ཐོབ་ནས་ཚིམ་པར་བྱ་བ་ལ་སོགས་ཡིན་པས། དེ་ཉིད་ལ་དཔག་ནས་ལམ་གྱི་ཐོག་མ་ཉིད་ནས་སེམས་བསྐྱེད་ཁྱད་པར་བ་ཡོད་པའི་ཕྱིར་ཞེས་ལམ་གྱི་ཐོག་མ་དང་པོ་ནས་ཞུགས་དུས་ནས་ཀྱང་ཐེག་ཆེན་སེམས་བསྐྱེད་ཁྱད་པར་ཅན་ཡོད་པས་འདི་སྐྱེས་བུ་ཆེན་པོའི་ལམ་དུ་བཞག་ཀྱང་མི་འགལ་ལོ། །རྣམ་པའི་དབང་དུ་བྱས་ན་སྐྱེས་བུ་ཆུང་འབྲིང་གི་ལམ་ཡིན་ཡང་སེམས་བསྐྱེད་ཁྱད་པར་ཅན་གྱིས་ཟིན་པའི་དབང་དུ་བསམ་ན་སྐྱེས་བུ་ཆེན་པོའི་ལམ་ཡང་ཡིན་ཆོག་པ་ནི། དཔེར་ན་སོ་ཐར་གྱི་སྡོམ་པ་ཞུ་བའི་སྐབས་སུ་ཆོ་ག་ཐེག་དམན་ལུགས་ལྟར་བླངས་ཀྱང་། ཐེག་ཆེན་སེམས་བསྐྱེད་ཀྱིས་ཟིན་ན་ཐེག་ཆེན་གྱི་སོ་ཐར་འགྱུར་བ་དང་ཚུལ་མཚུངས་པ་རེད། འོ་ན་ཐེག་པ་ཆེན་པོའི་ཆོས་སྒོར་ཞུགས་ནས་ཐེག་ཆེན་གྱི་ལམ་ལ་བསླབ་པའི་སྐབས་སུ་སྐྱེས་བུ་ཆུང་འབྲིང་གི་ལམ་ལ་བསླབ་འདུག་དགོས་དོན་ཅི་ཡིན་སྙམ་ན། འུ་ཚོས་རང་གིས་རང་ལ་འདང་བརྒྱབ་ན། ཐེག་པ་ཆེན་པོའི་ཆོས་དར་བའི་ས་ཆར་སྐྱེས་ཡོད་ཅིང་། ཐེག་པ་ཆེན་པོ་མདོ་ཕྱོགས་མ་ཟད་མདོ་སྔགས་གཉིས་ཀའི་ལམ་ལ་ཞུགས་ཁུལ་བྱེད་ཡོད་པ་རེད། འོན་ཀྱང་རང་གི་རྒྱུད་ཚོད་དེ་སྐྱེས་བུ་ཆེན་པོ་དང་འབྲིང་གི་ལམ་མ་དགོས་སྐྱེས་བུ་ཆུང་ངུའི་ལམ་སྣེ་ཙམ་ཡང་ཟིན་མེད་པར་རང་གིས་རང་ལ་མི་ཤེས་རྒྱུ་ཞིག་གང་ན་ཡོད། སྐྱེས་བུ་ཆུང་ངུས་རང་གཞན་གཉིས་དོན་དུ་མཐའ་གཉིས་ལ་མི་གནས་པའི་གཏན་བདེ་རྫོགས་པའི་སངས་རྒྱས་ཀྱི་གོ་འཕང་སྒྲུབ་མི་ནུས་པར་མ་ཟད། རང་དོན་འཁོར་བ་ལས་ཐར་པའི་ཉན་རང་དགྲ་བཅོམ་གྱི་གོ་འཕང་ཡང་སྒྲུབ་མི་ཤེས། གནས་སྐབས་ངན་འགྲོ་མི་ལྟུང་ཞིང་ངན་སོང་གསུམ་གྱི་སྡུག་བསྔལ་མྱོང་མི་དགོས་པ་ཙམ་ཞིག་དང་། མི་དང་ལྷའི་གོ་འཕང་རེ་བསྒྲུབ་པའི་ཐབས་དེ་སྐྱེས་བུ་ཆུང་ངུའི་ལམ་རེད། འོན་ཀྱང་དེ་ཡང་ལས་སླ་མོ་ཞིག་མ་ཡིན་པར། སྒོ་གསུམ་གྱི་མི་དགེ་བ་བཅུ་སྤངས་ཤིང་དགེ་བཅུ་ཚུལ་བཞིན་དུ་སྒྲུབ་དགོས་སོ། བསམ་གཟུགས་ཀྱི་ཏིང་ངེ་འཛིན་སྒོམ་ཤེས་དགོས། དེའི་ཐོག་ན་སྨོན་ལམ་དག་པས་མཚམས་སྦྱོར་དགོས། སྨོན་ལམ་དེའང་རང་གར་ངས་ཕྱི་མར་ངན་སོང་གི་སྡུག་བསྔལ་མི་མྱོང་བར་ཤོག ང་ཤི་དུས་གནད་གཅོད་སྡུག་བསྔལ་མེད་པར་ཤོག་ཟེར་བ་རྐྱང་པས་མི་ཆོག སྨོན་ལམ་འགྲུབ་བྱེད་རྒྱུ་ཡོད་དགོས། དེ་བསོད་ནམས་ཡིན། བསོད་ནམས་དེ་སྔར་རང་ལ་མེད་པའམ་ཡོད་ཀྱང་ཟད་སོང་བ་ཡིན་རུང་འདྲ། མདོར་ན་གང་ལྟར་ད་གསར་དུ་མ་གསག་ན་མེད་པར་འགྱུར་འགྲོ། བསོད་ནམས་མ་གསོག་པར་སྒྲོ་ཁ་ཐུར་བསྟན་ཡིན་ན་མཐོ་རིས་ལྷ་མིའི་རྟེན་ཙམ་ཡང་འཐོབ་རྒྱུ་མེད། དེ་མེད་ན་རང་གིས་མ་འདོད་ཀྱང་འགྲོ་ས་ངན་སོང་དང་མྱོང་རྒྱུ་སྡུག་བསྔལ་མ་གཏོགས་མེད། དེས་ན་སྐྱེས་བུ་ཆུང་ངུའི་ལམ་གྱིས་མངོན་མཐོ་དོན་གཉེར་བྱེད་དགོས་ནའང་ཆ་རྐྱེན་མང་པོ་འཚོགས་དགོས། འུ་ཚོས་ཁར་རྩང་སྔོན་མར་དཔེ་བཞག་མྱོང་། དཔེར་ན་རང་རེ་རླངས་འཁོར་ནང་དུ་བསྡད་དེ་ག་ཤེད་དུ་འགྲོ་ན། ཐོན་དགོས་སར་ཐོན་རྒྱུ་བོ་དམིགས་ཡུལ་ཡིན་མོད་ཀྱང་། རླངས་འཁོར་འགྲོ་བ་ལ་འགྲོ་བྱེད་ཀྱི་སྣུམ་ཡོད་དགོས། དེ་མེད་ན་རླངས་འཁོར་གྱི་ལྷུ་ལག་འགུལ་རོགས་མི་བྱེད། དེ་དང་འདྲ་བ་ཚེ་འདི་ཕྱི་གཉིས་ཀའི་བདེ་འབྲས་ཤིག་འཐོབ་དགོས་ན་དེའི་རྒྱུ་ངོ་མ་བསོད་ནམས་ཡོད་དགོས། རླངས་འཁོར་ལ་སྣུམ་ཡོད་པ་རྐྱང་པས་མི་ཆོག་ཁ་ལོ་བ་གང་ལ་འགྲོ་བསམ་ན་དེ་ལ་སྒྱུར་མཁས་པ་ཞིག་ཡོད་དགོས། དེ་དང་འདྲ་བ་འདུན་པ་དམིགས་ཡུལ་གྱི་ཕྱོགས་ལ་གཏད་དེ་སྨོན་ལམ་དག་པས་མཚམས་སྦྱོར་བྱེད་དགོས། རླངས་འཁོར་དང་སྣུམ་དང་ཁ་ལོ་བ་ཡོད་ཀྱང་མི་ཆོག་པར་འགྲོ་ལམ་དགོས་པ་ལྟར། དེ་དང་འདྲ་བ་ཆོས་ཉིད་རང་བཞིན་གྱིས་དག་པ་དང་ཆོས་ཅན་རྒྱུ་འབྲས་བསླུ་མེད་ཀྱི་བདེན་སྟོབས་ལ་ངེས་ཤེས་འདྲོང་རྒྱུ་པོ་དེ་ཚོ་མེད་ཐབས་མེད། དེས་ན་སྐས་ཐེམ་རིམ་བགྲོད་ཀྱིས་ཁང་པའི་ཁང་ཐོག་ཏུ་ཐོན་དགོས་པ་དང་འདྲ་བ་ཞིག་ཡིན་པས། བློ་དམན་པའི་རིགས་ཅན་ཞིག་ཡིན་ན་ཐེག་པ་ལ་རིམ་འཇུག་བྱེད་རྒྱུ་དང་། བློ་ཆེན་པོའི་རིགས་ཅན་ཞིག་ཡིན་ཡང་བསྟན་པ་ཐམས་ཅད་འགལ་མེད། གཞུང་ལུགས་ཐམས་ཅད་གདམས་པར་ཤར་བའི་ཉམས་ལེན་བྱེད་རྒྱུ་བོ་དེ་གལ་ཆེ་བ་རེད། དཔེར་ན་ཁ་སྐམ་གྱིན་ཡོད་པའི་མི་ཞིག་གིས་ཆུ་རིག་པ་དང་གོ་བས་མི་ཕན། ཆུ་འཐུང་རྒྱུ་ལོན་དགོས། ཆུ་དེ་འཐུང་རྒྱུ་ལོན་ན་ད་གཟོད་སྐོམ་པ་སེལ། དེ་བཞིན་དུ་ཆོས་མཐོན་པོའི་སྐད་ཆ་ཁ་རྐྱང་པས་བཤད་ན་བེད་མེད། རང་རྒྱུད་ཀྱི་ཉམས་ལ་གང་རན་ན་དེ་ནས་འགོ་བཙུགས་ཏེ་སྦྱོང་དགོས། ངས་འདོད་པ་བདེ་བ་འདོད་ཀྱང་། འོང་རྒྱུ་སྡུག་བསྔལ་ཁོ་ན་འོང་འདུག་པ་དེ། ཅི་ཞིག་གིས་ཉེས་པ་རེད་བསམ་ནས་བསམ་བློ་དེ་གཏོང་དུས། བདེ་སྐྱིད་ཀྱི་རྒྱུ་ཚོགས་གཉིས་མ་བསགས། སྡུག་བསྔལ་གྱི་རྒྱུ་སྡིག་པ་སྤོང་མ་ནུས་པའི་དབང་གིས་རེད་བསམ་འོང་དུས་འཕྲིགས་ཤིག་ཟ་འོང་རྩིས་རེད། ད་སྔོན་རྫོགས་པ་ཆེན་པོ་སྒོམ་པ་ཡིན་ཟེར་ནས་མི་ལོ་མང་པོ་ཞིག་སོང་རུང་། སྟོང་ཉིད་རྗེས་མཐུན་པ་ཞིག་ཙམ་རྟོགས་པའི་མྱོང་རྟགས་གཤིས་ལ་མ་ཤར་བས་ཡོན་ཏན་གྱི་ཁ་མ་གང་། ཉོན་མོངས་ཀྱི་ཁ་ཞིག་མ་དམའ་བས་སྙིང་རྗེ་ཇེ་ཆེར་མ་སོང་། ངེས་འབྱུང་བཅོས་མ་ཞིག་ཀྱང་མ་སྐྱེ་བ་ནི་སྔོན་འགྲོའི་སྦྱོང་བ་མ་སོང་བས་སེམས་རྒྱུད་ཆོས་ཀྱིས་མ་ཐུལ་ནས། ཁ་ཚོད་མཐོན་པོ་རི་རྒྱལ་གྱི་རྩེར་ཡོད་རུང་། དོན་ཚོད་དམའ་མོ་ཆུ་བོའི་གཞུང་ལ་ཡོད་པའི་རྟགས་རེད། དེས་ན་འདིར་སྐྱེས་བུ་ཆུང་འབྲིང་ཆེ་གསུམ་གྱི་ལམ་གྱི་རྣམ་བཞག་དང་བསྟུན་ནས་གསུངས་ཀྱིན་ཡོད་རེད། འདི་ས་བཅད་ཀྱི་དབང་གིས་སྐྱེས་བུ་ཆུང་འབྲིང་གི་ལམ་དུ་བཞག་ཀྱང་དོན་གྱི་དབང་གིས་སྐྱེས་བུ་ཆེན་པོའི་ལམ་དུ་བཞག་ཀྱང་འགལ་བ་མེད་པའི་རྒྱུ་མཚན་ནི་དེ་འདྲ་ཞིག་ལ་ཐུག་པ་རེད། དེ་ལྟ་བུའི་སྐྱེས་བུ་གསུམ་གྱི་རྣམ་པར་བཞག་པ་ནི་ཚེ་དབང་རིག་འཛིན་སླར་ཡང་སྡེ་སྣོད་གསུམ་གྱི་སྤངས་རྟོགས་ཀྱི་བསྟན་པ་སྤེལ་བའི་སླད་དུ་ཚངས་པར་མཚུངས་སྤྱོད་ཀྱི་བརྫུ་ལ་ཞུགས་པ། ཞེས་དེ་ལྟ་བུའི་སྐྱེས་བུ་གསུམ་གྱི་ལམ་གྱི་རིམ་པའི་རྣམ་པར་བཞག་པའི་ཚུལ་འདི་ཉིད་ནི། ཚེ་དབང་རིག་འཛིན་ནམ་འཆི་མེད་ཚེ་ཡི་རིག་འཛིན་བརྙེས་པས་སྐྱེ་འཆི་མེད་པའི་སློབ་དཔོན་པདྨ་འབྱུང་གནས་ཉིད། སླར་ཡང་སྡེ་སྣོད་གསུམ་དང་བསླབ་པ་གསུམ་གྱི་སྤངས་རྟོགས་ཀྱི་བསྟན་པ་སྤེལ་བའི་སླད་དུ་ཚངས་པ་མཚུངས་སྤྱོད་རབ་བྱུང་ངུར་སྨྲིག་གི་ཆ་ལུགས་ཅན་གྱི་ལྷ་གཅིག་དཱི་པམ་ཀཱ་ར་ཇོ་བོ་རྗེ་དཔལ་ལྡན་ཨ་ཏི་ཤས་བྱང་ཆུབ་ལམ་གྱི་སྒྲོན་མ་ལས་སྐྱེས་བུ་གསུམ་གྱི་ལམ་གྱི་རིམ་པ་བསྟན་པ་ལྟར་ལས། ཇོ་བོ་རྗེ་ནི་བྱང་ཆུབ་སེམས་ཀྱི་མངའ་བདག་གསེར་གླིང་པ་ཆོས་ཀྱི་གྲགས་པ་དང་། རང་གི་སྐུ་ཤ་དངོས་སུ་སྦྱིན་ནུས་པའི་བྱམས་སྙིང་རྗེ་ཁོ་ནར་བརྟེན་ནས་སྟོང་ཉིད་རྟོགས་པ་རྒྱུད་ལ་འཁྲུངས་པའི་བླ་མ་དྷརྨཱ་རཀྵི་ཏ་དང་། ཡང་གཞན་གྱི་སྡུག་བསྔལ་དངོས་སུ་ལེན་ནུས་པའི་བླ་མ་བྱམས་པའི་རྣལ་འབྱོར་པ་སྟེ་དེ་གསུམ་སོགས་ཀྱི་མདུན་ནས་ཡུན་རིང་པོར་ཆོས་གསན་ཏེ། བྱང་ཆུབ་སེམས་ཀྱིས་ཐུགས་རྒྱུད་གཏམས་པ། ཁོང་བོད་གངས་ཅན་གྱི་ལྗོངས་སུ་བྱོན་ནས་རིགས་ཅན་གསུམ་གྱི་གདུལ་བྱ་མཐའ་ཡས་པ་ཞིག་བྱང་གྲོལ་གྱི་ལམ་ལ་འགོད་མཛད་ཡོད་ན། སློབ་མའི་གཙོ་བོ་ནི་རིགས་གསུམ་སེམས་དཔའི་སྤྲུལ་པ་ཁུ་རྔོག་འབྲོམ་གསུམ་སྟེ། ཁུ་བརྩོན་འགྲུས་གཡུང་དྲུང་། རྔོག་ལེགས་པའི་ཤེས་རབ། འབྲོམ་རྒྱལ་བའི་འབྱུང་གནས་གསུམ་ཡིན། དེའི་ནང་ནས་སྤྱན་རས་གཟིགས་ཀྱི་སྤྲུལ་པ་འབྲོམ་སྟོན་རིན་པོ་ཆེ་ལ་གཞུང་གདམས་པ་མན་ངག་གསུམ་གྱི་བཀའ་བབ་སྟེ། བཀའ་གདམས་གཞུང་དྲུག་གི་བཤད་སྲོལ་དང་། བདེན་བཞི་གདམས་ངག་ཏུ་སྟོན་པ་མན་ངག་ཐིག་ལེ་བཅུ་དྲུག་གི་བཀའ་སྲོལ་ཟེར་རྒྱུ་དེ་འདྲ་དར་བ་རེད། བཀའ་གདམས་པ་ཡིན་ན་ལྷ་བཞིས་ལུས་བརྒྱན། སྡེ་སྣོད་གསུམ་གྱིས་ངག་བརྒྱན། བསླབ་པ་གསུམ་གྱིས་སེམས་བརྒྱན་པའི་བཀའ་གདམས་རིན་པོ་ཆེའི་བརྒྱུད་པ་ཞེས་ཟེར་བ་རེད། ཇོ་བོའི་བྱང་ཆུབ་ལམ་སྒྲོན་ལ་གཞིར་བཟུང་ནས་རྗེ་བདག་ཉིད་ཆེན་པོས་བྱང་ཆུབ་ལམ་རིམ་ཆེན་མོ་མཛད། འདི་ཐམས་ཅད་མདོ་ལུགས་རང་རྐང་གི་ཐོག་ནས་སྔགས་དང་ཅུང་ཟད་འབྲེལ་བའི་གདམས་ངག སྟོང་ཉིད་སྙིང་རྗེ་ཟུང་འབྲེལ་གྱི་ལམ་སྟོན་པར་ཤ་སྟག་ཡིན། དེས་ན་སྐྱེས་བུ་གསུམ་གྱི་ལམ་གྱི་རིམ་པ་དེ་ཚོ་བྱང་ཆུབ་ལམ་སྒྲོན་གྱི་ནང་དུ་བསྟན་པ་རྣམས་སྔ་འགྱུར་བ་དང་ཐུན་མོང་བ་ཡིན་ཞིང་། ཀུན་མཁྱེན་ཆེན་པོའི་སེམས་ཉིད་ངལ་གསོའི་ནང་གི་བླ་བརྒྱུད་དང་ཚང་མ་གཅིག་ཡིན། དེའི་ནང་ནས་མ་འཐུས་པའི་དོན་གྱི་ཐད་ན་མི་འདྲ་བའི་ས་ཟིན་ཟུར་པ་གཞན་ཞིག་མེད་ཅིང་ངོ་བོ་ངོ་མ་ལའང་ཆོས་སྐད་འདྲ་མིན་ཅུང་ཟད་ཙམ་གྱིས་འཇུག་ལྡོག་གི་ཁྱད་པར་ཙམ་ཡིན་པ་ལ་དགོངས་ནས་སྐྱེས་བུ་གསུམ་གྱི་ལམ་གྱི་རིམ་པ་སོགས་སྔ་འགྱུར་པའི་ཕྱོགས་ལ་གྲགས་ཆུང་བ་ལྟར་ཡིན་ཡང་། ངོ་མར་བཤད་ན་གོང་དུ་ཞུས་པ་ལྟར་བཀའ་གདམས་ལམ་རིམ་ལས་བྱུང་བའི་ལམ་གྱི་རིམ་པའི་འགྲོས་དེ་གསར་རྙིང་གཉིས་ཀའི་ཐུན་མོང་གི་ལུགས་ཡིན་ནོ། །དེ་ལྟར་ནའང་ཤེས་བྱ་རྣམ་པར་འབྱེད་པའི་བློ་གྲོས་དཔྱད་བཟོད་པ་ཉིད་དང་སྟེ་བརྟགས་ན་མི་བསླུ་བ་ཞིག་ལ་གསུངས་པ་རེད། སྔོན་གྱི་ལམ་སྟོན་ཆེན་པོ་རྣམས་ནས། བསྟན་པ་ཐམས་ཅད་འགལ་མེད་དུ་རྟོགས་པ། གསུང་རབ་ཐམས་ཅད་གདམས་པར་འཆར་བ། རྒྱལ་བའི་དགོངས་པ་བདེ་བླག་ཏུ་རྙེད་པ། ཉེས་སྤྱོད་ཆེན་པོ་རང་འགག་ཏུ་འགྲོ་བ་སྟེ་ཆེ་བ་བཞི་དང་ལྡན་པར་སྲོལ་བཏོད་པའི་ཕྱིར། མདོ་སྔགས་ཀྱི་བསྟན་པ་ཐམས་ཅད་གང་ཟག་གཅིག་འཚང་རྒྱ་བའི་ཐབས་ལ་གྲུ་བཞི་ལམ་གྱིས་འགལ་མེད་དུ་འཁྱེར་ཤེས་པར་ཅན་དུ་གོ་དགོས་ཏེ། རྗེ་བདག་ཉིད་ཆེན་པོས། དང་པོ་རྒྱ་ཆེན་ཐོས་པ་མང་དུ་བཙལ། །བར་དུ་གཞུང་ལུགས་ཐམས་ཅད་གདམས་པར་ཤར། །ཐ་མ་ཉིན་མཚན་ཀུན་ཏུ་ཉམས་སུ་བླངས། །ཀུན་ཀྱང་བསྟན་པ་རྒྱས་པའི་ཆེད་དུ་བསྔོ། །ཞེས་གསུངས་པ་ལྟར་ཡིན་པའི་ཕྱིར་རོ། །དེ་ལྟར་བསྟན་པ་ཐམས་ཅད་འགལ་མེད་གྲུ་བཞི་ལམ་དུ་འཁྱེར་ཤེས་པས་ཐུབ་པའི་བཀའ་ལུང་གང་ཞིག་ཡིན་ཡང་རང་དབང་དུ་གོ་དོན་བཀྲལ་བའི་ནུས་པ་རྒྱུད་ལ་འཇོག་པའི་ཕྱིར་དང་། བཅོམ་ལྡན་འདས་ཀྱིས་མདོ་ལས། འཇམ་དཔལ་དམ་པའི་ཆོས་སྤོང་བའི་ལས་ཀྱི་སྒྲིབ་པ་ནི་ཕྲའོ། །ཞེས་དམ་པའི་ཆོས་སྤོང་བའི་ལས་ཀྱི་སྒྲིབ་པ་ནི་ཆེན་པོ་ཤིན་ཏུ་སྤོང་དཀའ་ཞིང་རྟོགས་པར་དཀའ་བས་ཕྲ་བར་གསུངས་པ་རེད། ཇི་ལྟར་ཆོས་སྤོང་བ་ཡིན་ན། འཇམ་དཔལ་གང་དེ་བཞིན་གཤེགས་པས་གསུངས་པའི་བཀའ་ལ་ལ་ནི་བཟང་བར་འདུ་ཤེས། ལ་ལ་ནི་ངན་པར་འདུ་ཤེས་པ་ནི་ཆོས་སྤོང་པའོ། །ཞེས་གསུང་རབ་ཐམས་ཅད་གདམས་པར་མ་ཤེས་པས་བཟང་ངན་དུ་འདུ་ཤེས་ན་ཆོས་སྤོང་བ་དང་། ལས་དེ་ཉེས་པ་ཤིན་ཏུ་ཆེ་ཞེས་གསུངས་པ་ལྟར་སྙིགས་མ་ལྔ་ཆེས་ཆེར་བདོ་ཞིང་ཁྱད་པར་དུ་ལྟ་བའི་སྙིགས་མའི་གཞན་དབང་དུ་གྱུར་པས། བསྟན་པ་ཅུང་ཟད་ཉམས་པའི་རྟགས་མཐོང་བའི་བར་སྐབས་སུ་ཕྱོགས་རེའི་མིག་ཅན་འགའ་ཞིག་གིས་བསྟན་པ་རྣམ་དག་ལ་རྟོག་བཏགས་འགལ་འདུའི་རྫུན་ཕྲེང་གིས་དྲི་བཅས་སུ་བསྒྲུབས་པས་རྐྱེན་བྱས་ཤིན་ཏུ་གསང་བ་ཆེན་པོའི་ཐེག་པ་ལ་ལམ་གྱི་གོ་རིམ་ཙམ་ཡང་མེད་པར་ཞེས། བར་སྐབས་ཤིག་ལ་ལྟ་གྲུབ་རང་བཟོས་བསླད་པའི་ཕྱོགས་རེའི་མིག་ཅན་བློ་རྒྱ་ཆུང་བ་འགའ་ཞིག་གིས། བསྟན་པ་རྣམ་དག་གསང་ཆེན་འབྲས་བུའི་ཐེག་པ་ལའང་། རྟོག་གེ་ཟོལ་མའི་རྟོག་བཏགས་འགལ་འདུ་སྒྲུབ་པའི་རྫུན་ཕྲེང་གིས་བསྟན་པ་རྣམ་དག་དེའང་དྲི་མ་དང་བཅས་པའི་དྲི་བཅས་སུ་བསྒྲུབས་པའི་ལོག་ཤེས་ཀྱིས་རྐྱེན་བྱས་ནས། ཤིན་ཏུ་གསང་བ་ཆེན་པོ་རྫོགས་ཆེན་ཨ་ཏིའི་ཐེག་པ་ལ་ལམ་གྱི་གོ་རིམ་ཙམ་ཡང་མེད་པར་ཐབས་སྤྱོད་པའི་ཕྱོགས་ཁྱད་དུ་བསད་སྙམ་པའི་ཐེ་ཚོམ་གྱི་བློས་ཀུན་ནས་བསླངས་ཏེ། རྒྱུ་མཚན་དང་གོ་རིམ་ཅི་ཡང་མེད་པར་བཙན་ཐབས་ཉིད་དུ་ཧ་ཤང་གི་ལྟ་བ་དང་འདྲའོ་ཟེར་བས། ཆོས་ཐམས་ཅད་རང་བཞིན་མེད་པ་རྐྱང་པར་བསྟན་པ་གོ་ནས་མ་རྟོགས་ལོག་རྟོག་གི་སྐྱོན་གྱིས་ཡང་དག་པའི་ལམ་ལ་ཡང་ཆོས་མ་ཡིན་པར་འདུ་ཤེས་ཏེ། གསང་སྔགས་རྫོགས་ཆེན་གྱི་ཆོས་ལ་གཤེ་ཞིང་སྡང་བས་ཆོས་སྤོང་གི་ལས་ཀྱིས་ཕྱི་མར་ངན་སོང་ངན་འགྲོར་ལྟུང་བར་བྱེད་པའི་ཉེས་སྤྱོད་ཆེན་པོའི་གཡང་ས་ལས་སྐྱོབ་པའི་ཕྱིར་ཡང་ཡིན་ནོ་ཞེས་གསུངས། འདིའི་ཡན་ཆད་མན་ངག་གི་གདམས་པ་འདི་ཉིད་བསྟན་པའི་དགོས་པའི་རྣམས་གྲངས་ཕྱེས་ཏེ་བསྟན་ནས། འདིའི་མཚམས་འདི་ནས་དེ་ལྟ་བུའི་ཆེ་བ་དང་དགོས་པ་ལྡན་པའི་གཞུང་ཉན་བཤད་ཇི་ལྟར་བྱ་བའི་སྐོར་བསྟན་པ་ནི། དེ་ཡང་རྟེན་འབྲེལ་གྱི་སྒོ་དང་པོ་སྟོན་པ་དང་ཆོས་ལ་རིམ་གྲོ་དང་བཀུར་སྟི་བྱ་བར་རྒྱལ་བའི་ཡུམ་དང་སའི་སྙིང་པོའི་མདོ་སོགས་ལས་རྒྱ་ཆེར་བཤད་ཅིང་། ཞེས་དམ་ཆོས་འཆད་ཉན་ཡང་དག་པར་བྱེད་པའི་ཐོག་མའི་རྟེན་འབྲེལ་གྱི་སྒོ་དང་པོ་དེ་གང་ཡིན་ན། སྟོན་པ་དང་དེས་བསྟན་པའི་དམ་ཆོས་ལ་གོ་བའམ། ཡང་ན་སྐབས་བབ་ཀྱི་ཆོས་བཤད་ཅིང་བསྟན་པའི་སྟོན་པ་སློབ་དཔོན་དང་། དེས་གསུངས་པའི་ཆོས་ལ་གོ་ནའང་ཆོག་གི། མདོར་ན་སྟོན་པ་དང་ཆོས་ལ་རིམ་གྲོ་དང་བཀུར་སྟི་བྱ་དགོས་པ་རྒྱལ་བའི་ཡུམ་ཤེར་ཕྱིན་རྒྱས་འབྲིང་བསྡུས་གསུམ་སོགས་དང་། སའི་སྙིང་པོའི་མདོ་དང་སོགས་ཁོངས་ནས་མདོ་རྒྱུད་མང་པོ་བསྡུས་པ་རེད། དེ་དག་ལས་རྒྱ་ཆེར་བཤད་ཅིང་། ཇི་ལྟར་བཤད་ན། དེ་སྐད་དུ་ཀུན་ཏུ་བཟང་པོའི་ཏནྟྲ་ལས། དང་པོར་སློབ་མས་བླ་མ་ལ། །སྡོམ་ཆོས་ཞུ་ཚེ་འདི་ལྟར་བྱ། །སྔ་བར་ལངས་ལ་ཁ་ལག་བཀྲུས། །ལུས་ཀྱི་ཆས་རྣམས་ལེགས་པར་གཟབས། །ཞེས་དམ་ཆོས་འཆད་ཉན་བྱེད་པའི་དང་པོ་དགོས་རྒྱུ་ནི། ཆོས་འདོད་དོན་གཉེར་གྱི་སློབ་མ་དེས། དང་པོ་བླ་མ་བརྟག་ལ་མཁས་པ་དང་། །བར་དུ་བླ་མ་བསྟེན་ལ་མཁས་པ་དང་། །ཐ་མ་དགོངས་སྤྱོད་བསླབ་ལ་མཁས་པ་ཡིས། །སྐྱེས་བུ་དེ་ནི་ཡང་དག་ལམ་དུ་འགྲོ། །ཞེས་གསུངས་པ་ལྟར་བརྟགས་ནས་བསྟེན་པའི་བླ་མ་དེ་ལ་སོར་བྱང་སྔགས་གསུམ་གྱི་སྡོམ་པ་དང་། མདོ་རྒྱུད་མན་ངག་གི་དབང་ལུང་ཁྲིད་གསུམ་གྱི་ཆོས་ཞུ་ཚེ་སྤྱོད་ལམ་འདི་ལྟར་བྱ་དགོས་ཏེ། དགེ་ཚུལ་ཀཱ་རི་ཀཱ་ལྔ་བཅུ་པ་ལས། ནམ་གྱི་ཆ་སྨད་མལ་ནས་ལངས་། །ནམ་ལངས་བར་དུ་ཁ་ཏོན་བྱ། །གདོང་དང་སོ་ཡི་དྲི་མ་བཀྲུས། །རྫོགས་སངས་རྒྱས་ལ་གུས་ཕྱག་འཚལ། །ཞེས་གསུངས་པ་བཞིན་སྔ་བར་ཡར་ལངས་ལ་ཁ་ལག་གཙང་མར་བཀྲུས་ཏེ། གསུང་ཆོས་ཞུ་དུས་སམ་མིན་ན་རྟེན་ཁྱད་པར་ཅན་ནམ་དམ་པའི་སྐྱེས་བུ་མཇལ་བའམ། རང་ཁྱིམ་ན་དཀོན་མཆོག་གི་རྟེན་ལ་མཆོད་པ་འབུལ་བའི་ཚེ་ཁ་ལག་སྤྱོད་གསུམ་གཙང་མར་བྱས་ཏེ། མཆོད་རྫས་ཡོན་ཆབ་ལ་སོགས་པར་ཁ་རླངས་ཕོག་མི་བཅུག་ནས་བཤམས་དགོས། ཁ་ལག་གཙང་མའི་མཆོད་པ་ཞེས་ཟེར་བ་ཡིན། ལུས་ཀྱི་ཆས་གོས་དང་རྒྱན་ཆ་རྣམས་འཕྱོར་སྒེག་དང་། མ་གུས་པའི་རྣམ་པ་ཅན་མ་ཡིན་པར་ཆས་གོས་གཙང་མ་ལེགས་པར་གཟབ་ཅིང་གཙང་མའི་ཆས་ཀྱིས་སྤྲས་དགོས་ཤིང་། མཆེད་གྲོགས་དམ་ཚིག་ལྡན་མི་ལྡན། །སྟ་གོན་རྣམ་དབྱེ་ལེགས་པར་བྱ། །ཆོས་རར་ཆག་ཆག་བྱི་དོར་བྱ། །ཞེས་གསུངས་ཏེ། བླ་མར་བརྟགས་ནས་བསྟེན་དགོས་པར་མ་ཟད། མཆེད་གྲོགས་ཐམས་ཅད་ཀྱང་གསང་སྔགས་ཀྱི་དབང་དང་སྡོམ་པ་ཞུས་པའི་ཚེ་དམ་ཚིག་དང་ལྡན་མི་ལྡན་དང་། འགལ་ཉམས་འདས་རལ་དུ་གྱུར་པའི་གང་ཟག་ཡིན་མིན་བརྟག་དགོས། དེ་ལྟ་བུ་ཡིན་ན་ཐབས་ཀྱིས་གཟུར་རྒྱུ་ལེགས་པར་ཆོས་མ་ཞུས་གོང་ནས་གཟབ་གཟབ་མ་བྱས་པར་དེ་དང་མཉམ་དུ་ཆོས་ཞུ་ན། རང་ལ་དེའི་ཉམས་གྲིབ་ཀྱིས་འདས་ཉམས་དང་ཞོར་ཉམས་ཀྱིས་ཉེས་པས་གོས་པ་རེད། སྟ་གོན་ཏེ་གྲ་སྒྲིག་གི་རྣམ་དབྱེ་ཅི་འདྲ་དགོས་པའི་སྐོར་རྣམ་པར་ཕྱེས་ཏེ་ལེགས་པར་བྱ་དགོས། ཀུན་མཁྱེན་ཀློང་ཆེན་པས། ཐོག་མེད་དུས་ནས་ཉེ་བར་གོམས་པ་ཡི། །ཡིད་མཁའི་ཉོན་མོངས་གདུང་བ་ཞི་བྱའི་ཕྱིར། །ནོར་བཟང་རྟག་ཏུ་ངུ་བཞིན་ཆོས་འཚོལ་བས། །སྐྱོ་ངལ་སྤངས་ལ་དགེ་བའི་བཤེས་གཉེན་བསྟེན། །ཞེས་གསུངས་པ་བཞིན། གནའ་སྔོན་མར་གྲོང་ཁྱེར་སྐྱིད་པའི་འབྱུང་གནས་ཟེར་བ་ཞིག་ཡོད། དེའི་གྲོང་ཁྱེར་དེར་ཚོང་དཔོན་ནོར་རབ་ཏུ་བརྟན་པ་ཟེར་བ་ཞིག་ཡོད་པ་དེའི་བུ་ནོར་བཟང་གིས་ཆོས་སྒྲུབ་པའི་ཆེད་དུ། ཡུལ་ལྷོ་ཕྱོགས་སུ་བརྒྱུད་ནས་ལྷོ་ཕྱོགས་ལ་སོང་སོང་ནས། ཆོས་བཙལ་ཏེ་དཀའ་བ་ཆོས་ཕྱོགས་སུ་སྤྱད་སྤྱད་པས། ལྷག་པའི་ལྷས་ལུང་སྟོན་ཅིང་བྱིན་རླབས་ཐོབ་པའི་བླ་མ་ལྔ་བཅུ་རྩ་བཞི་དང་། གདམས་པ་རྗེས་སུ་བསྟན་པའི་བླ་མ་ལྔ་བཅུ་རྩ་བཞི་སྟེ་བླ་མ་བརྒྱ་དང་རྩ་བརྒྱད་བསྟེན་པ་རེད། དེ་བཞིན་དུ་བྱང་ཆུབ་སེམས་དཔའ་རྟག་ཏུ་ངུ་ཞེས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འཚོལ་དུས་རང་ཉིད་ཀྱིས་ལུས་བཙོངས་ནས། ཚོང་དཔོན་གྱི་བུ་མོ་འཁོར་ལྔ་བརྒྱ་དང་ལྷན་ཅིག་ཏུ་ཤིང་རྟར་ཞུགས་ཏེ་ཤར་ཕྱོགས་སྤོས་ངད་ལྡན་པའི་གྲོང་ཁྱེར་སོང་ནས། བྱང་ཆུབ་སེམས་དཔའ་ཆོས་འཕགས་ལ་བསྙེན་བཀུར་གྱིས་དཀའ་སྤྱད་མཛད་པ་བཞིན་དུ། ཆོས་རར་ཆག་ཆག་གདབ་ཅིང་བྱི་དོར་བྱ་བ་སོགས་ཕྱིན་དྲུག་ཚང་བའི་དཀའ་སྤྱད་བྱེད་དགོས་སོ། །ཞེས་པ་ལྟར་ཁྲུས་བྱས་ཤིང་གོས་གཙང་མ་གྱོན་ན་དྲི་མ་ངན་པ་བྲོ་བ་མ་རེད། སྤྱིར་ལུས་ཁོ་རང་མི་གཙང་བ་ཡིན་པས་དྲི་མ་གཏན་ནས་མི་བྲོ་བའི་གཙང་མར་བྱ་རྒྱུ་མེད་ཀྱང་། ཟུར་དེ་ན་གཅིག་དྲི་མ་ཐུལ་ལེ་འདུག་ན་མི་གཞན་མི་དགའ་ཞིང་། དེ་དང་འདྲ་བ་བླ་མ་དཀོན་མཆོག་ལ་མི་གཙང་པའི་དྲི་ངན་མི་བདུག་པའི་ཆེད་དུ་གཙང་མར་བྱེད་དགོས། དཀོན་མཆོག་ལ་གཉིས་འཛིན་མེད་ཀྱང་རང་ཉིད་ཀྱི་བསམ་པ་དག་ན་རྒྱུད་དག་པས་དེའི་ཆེད་དུ་དེ་འདྲ་གྱིས་གསུངས་པ་རེད། མཆེད་དམ་ཚིག་དང་མི་ལྡན་པ་དག་ཕྱིར་བསལ་ཏེ་དངོས་སུ་བསྐྲད་པའམ་ཡང་ན་ཐབས་ཀྱིས་སྤངས་པར་བྱས། ཆོས་གསུང་སའི་ཆོས་རར་ཡུལ་དུས་དང་བསྟུན་པའི་བྱི་དོར་ཅི་དང་ཅི་དགོས་ན་དེ་ལྟར་བྱ་བ་སོགས་བྱི་དོར་རྣམ་པ་གསུམ་དུ་ངེས་པར་བྱ་ཞིང་ཞེས་འདིའི་བྱི་དོར་རྣམ་པ་གསུམ་ནི་རང་ཉིད་ཆོས་ཞུ་བ་པོའི་ལུས་ངག་ཡིད་གསུམ་གྱི་སྒོ་གསུམ་གཙང་མའི་བྱི་དོར་གསུམ་མམ། ཡང་ན་གནས་དང་གྲོགས་དང་རང་ལུས་གསུམ་ལ་གོ་ནའང་ཆོག། དེ་ལྟ་བུའི་བྱི་དོར་རྣམ་པ་གསུམ་དུ་ངེས་པར་བྱ་ཞིང་། དེ་ནས་བཞུགས་ཁྲི་བླ་ཡོལ་ལྡ་ལྡི་དང་། །ཕྱི་ནང་མཆོད་པ་རྒྱས་པར་བཤམ། །བཀོད་པས་ཁྱད་པར་འཕགས་པ་ནི། །དག་གིས་དང་འདྲེན་བློ་ཕེབས་བཅའ། །ཞེས་བྱི་དོར་གཙང་མར་བྱས་པའི་རྗེས་དེ་ནས་ཆོས་འཆད་པ་པོའི་བླ་མ་དེ་བཞུགས་སའི་ཁྲི་དང་། བླ་རེ་དང་ཡོལ་བ་ལྡ་ལྡི་སྟེ་འཕན་གྱི་རིགས་ཅན་གྱི་མིང་རེད། དེ་ནས་ཕྱི་ནང་གི་མཆོད་པ་ནི། སྤྱིར་མཆོད་པའང་ཐུན་མོང་དང་ཐུན་མིན་གྱི་མཆོད་པ་ཡོད་པ་དང་། བདུད་རྩི་དང་ག་བུར་ལ་སོགས་པ་ཐུན་མོང་ལྟར་དུ་རྒྱས་པར་བཤམས། ཐུན་མོང་ལའང་དངོས་འབྱོར་དང་ཡིད་སྤྲུལ། དངོས་འབྱོར་ལའང་ཡོངས་སུ་བཟུང་བ་དང་། ཡོངས་སུ་མ་བཟུང་བ་གཉིས་སོགས་ཡོད། འདི་ན་ཐུན་མོང་དངོས་འབྱོར་གྱི་མཆོད་པ་སོགས་བྱས་ན་རེད་ཀྱིན་ཡོད། མེ་ཏོག་སྤོས་དང་མར་མེ་ཞལ་ཟས་ཆུ། །བླ་རེ་འཕན་ལྡིང་གདུག་དང་རོལ་མོའི་སྒྲ། །རྒྱལ་མཚན་རྔ་ཡབ་རྫ་རྔ་ལ་སོགས་དང་། །ལུས་དང་ལོངས་སྤྱོད་མཁོ་རྒུའི་ཡོ་བྱད་ཀྱིས། །འགྲོ་བའི་བླ་མ་དཀོན་མཆོག་སྲས་བཅས་མཆོད། །ཞེས་གསུངས་པ་བཞིན་དང་། བཀོད་པས་ཁྱད་པར་འཕགས་པ་ནི་ཞེས། ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མ་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །ཞེས་གསུངས་པ་ལྟར། ཆོས་ར་དང་བཞུགས་ཁྲི་མཆོད་པ་སོགས་རྒྱན་དང་བཀོད་པས་མཛེས་ཤིང་ཡིད་དུ་འོང་བ། ཐ་མལ་ཁྲལ་སོད་ལྟར་མ་ཡིན་པར། ཁྱད་པར་དུ་དེ་དག་གིས་དང་བ་འདྲེན་ཞིང་བློ་བདེ་བག་ཕེབས་པའི་རྣམ་པ་ཅན་དེ་ལྟར་བཅའ་བར་བྱ། དེ་ནས་ཆོས་འཁོར་བསྐུལ་བའི་སྒྲ། །ཆོས་ཀྱི་དུང་ཆེན་ལན་དགུ་པོ། །བླ་མའི་ཕྱོགས་སུ་ཁ་བལྟས་འབུད། །ཀུན་གྱིས་གསོལ་འདེབས་དུང་བར་བྱ། །བླ་མ་སྤོས་དང་རོལ་མོས་བསུ། །བདེ་བའི་སྟན་ལ་བཞུགས་སུ་གསོལ། །ཞེས་དེ་ལྟར་གྲ་སྒྲིག་གི་བྱ་བ་ཚང་མ་ཚགས་སུ་ཚུད་པར་བྱས་ནས་ཆོས་འཁོར་བསྐོར་བར་བསྐུལ་བའི་སྒྲ། ཆོས་འཁོར་བསྐོར་བ་ལ་དཔོན་སློབ་ཚང་མ་ཚུར་འདུ་ཞིང་ཆོས་ཉན་པ་ལ་བསྐུལ་བའི་སྒྲ་རེད། དེ་ཡང་བདག་ཅག་གི་སྟོན་པ་མཉམ་མེད་ཟས་གཙང་སྲས་པོ་མ་ག་དྷ་རྡོ་རྗེ་གདན། བྱང་ཆུབ་ལྗོན་ཤིང་གི་དྲུང་དུ་སྲོད་ལ་བདུད་བཏུལ། དགུང་ལ་མཉམ་པར་བཞག ཐོ་རངས་མངོན་པར་རྫོགས་པ་སངས་རྒྱས་ནས་ཞག་བདུན་ཕྲག་བདུན་ལ་ཆོས་མ་གསུང་། བདུན་ཕྲག་དང་པོ་ལ་སྐྱིལ་ཀྲུང་མ་བཤིག གཉིས་པར་བྱང་ཆུབ་ཀྱི་ཤིང་ལ་གཟིགས། གསུམ་པ་ལ་འཛམ་གླིང་ཉེ་བར་བཅགས། བཞི་པ་ལ་སྟོང་གསུམ་རིང་དུ་བཅགས། ལྔ་པར་ཀླུའི་རྒྱལ་པོ་བཏང་བཟུང་གི་གནས་སུ་གཤེགས། དྲུག་པ་ལ་ཤིང་སྒྲོལ་རྒྱུའི་ཚལ་དུ་བཞུགས་ཤིང་དེའི་ཚེ་ན། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་བརྙེས། །སུ་ལ་བསྟན་ན་གོ་བར་མི་འགྱུར་བས། །མི་སྨྲ་གཅིག་པུར་ནགས་ཀྱི་ནང་དུ་གནས། །ཞེས་གསུངས་ནས་བཞུགས་པ་ན་ཚོང་པ་ག་གོན་དང་། བཟང་པོ་གཉིས་ཀྱིས་སྦྲང་རྩི་ཕུལ་བས་དེ་གསོལ་ས་སྣོད་མ་འབྱོར་བས། རྒྱལ་པོ་ཆེན་པོ་བཞིས་རྡོའི་ལྷུང་བཟེད་བཞི་ཕུལ་བས་དེ་ཕྱོགས་གཅིག་ཏུ་རྫུ་འཕྲུལ་གྱིས་བསྡོམས་ནས་ལྷུང་བཟེད་གཅིག་ཏུ་བྱིན་གྱིས་བརླབས་ཏེ། དེའི་ནང་གསོལ་བ་ན་ཤིས་པར་བརྗོད་པ་ཙམ་ལས་ཆོས་མ་གསུང་། དེ་ནས་བདུན་ཕྲག་བདུན་པ་ལ་ལྷ་ཚངས་པས་གསེར་གྱི་འཁོར་ལོ་རྩིབས་སྟོང་དང་ལྡན་པ་དང་། བརྒྱ་བྱིན་གྱིས་དུང་དཀར་པོ་གཡས་སུ་འཁྱིལ་བ་སོགས་ཕུལ་ནས་ཆོས་ཀྱི་འཁོར་ལོ་བསྐོར་བར་གསོལ་བ་བཏབ་པས། རིམ་པ་བཞིན་དུ་ཆོས་ཀྱི་འཁོར་ལོ་རིམ་པ་རྣམ་གསུམ་བསྐོར་བ་ཡིན་ལ། དང་པོ་ཡུལ་ཝ་ར་ཎ་སཱི་དྲང་སྲོང་ལྷུང་བ་རི་དྭགས་ཀྱི་གནས་སུ་འཁོར་ལྔ་སྡེ་བཟང་པོ་ལྷ་བརྒྱད་ཁྲི་དང་བཅས་པ་ལ་བཀའ་དང་པོ་བདེན་བཞིའི་ཆོས་འཁོར་བསྐོར། དེ་ནས་བྱ་རྒོད་ཕུང་པོའི་རི་ལ་ཕྱོགས་བཅུའི་བྱང་ཆུབ་སེམས་དཔའ་དང་། གཞན་ཡང་འཁོར་རྣམ་བཞི་དང་ལྷ་ཀླུ་སོགས་ལ་བཀའ་བར་པ་མཚན་ཉིད་མེད་པའི་ཆོས་འཁོར་བསྐོར། དེ་ནས་ལྷ་ཀླུའི་གནས་དང་མིའི་ཡུལ་གྲོང་ཁྱེར་ཀུ་མུ་ད་གསལ་བྱིན་ལ་སོགས་པར་ལེགས་པ་རྣམ་པར་ཕྱེ་བའི་ཆོས་ཀྱི་འཁོར་ལོ་བསྐོར་བ་རེད། བཀའ་འཁོར་ལོ་རྣམ་པ་གསུམ་དེ་གདུལ་བྱ་དབང་པོ་ཆུང་འབྲིང་ཆེ་གསུམ་ལ་དང་པོ་འཇུག་པའི་གཞི་དང་། བར་དུ་ཞུགས་པའི་ལམ། ཐ་མར་དོན་གྱི་སྙིང་པོ་གསུམ་ལ་དགོངས་ཏེ། སྡེ་སྣོད་གསུམ་རྗོད་བྱེད་དང་བསླབ་པ་གསུམ་བརྗོད་བྱའི་ཚུལ་དུ་བྱས་ནས་གསུངས་པ་བཞིན་དུ། དུས་ཐ་མ་སྟོན་པའི་རྒྱལ་ཚབ། བསྟན་པའི་སྲོག་ཤིང་དུ་བྱོན་པའི་བླ་མའི་མདུན་ནས་ཆོས་ཞུ་བའི་རྟེན་འབྲེལ་གྱི་དགོས་དབང་དང་། གུས་ཤིང་བསྐུལ་བའི་བསམ་པ་དང་ལྡན་པས་ཆོས་འཁོར་བསྐོར་བར་བསྐུལ་བའི་བརྡ། ཆོས་ཀྱི་དུང་ཆེན་ལན་དགུའམ་དུས་རྒྱུན་ལན་གསུམ་འབུད་རྒྱུའི་ཕྱག་སྲོལ་དང་། ཡང་ཚོགས་པ་སྒྲིག་ཆེན་ལ་དུང་བརྡ་ཞེས་དུང་གི་སྔོན་འགྲོ་དང་ལན་བཞིར་འབུད་པ་སོགས་དར་སྲོལ་ཡོད་པ་རེད། དུང་ལན་གསུམ་ལ་གསུམ་རེ་འབུད་ན་དགུ་རེད་འགྲོ་གི་མོད། ཆོས་དུང་མཆོད་པའི་ཚུལ་དུ་བླ་མའི་ཕྱོགས་སུ་ཁ་བལྟས་ཏེ་འབུད་དགོས། དུང་སྒྲ་དེས་བསྐུལ་ཏེ་དཔོན་སློབ་ཐམས་ཅད་འདུས་ནས་ཀུན་གྱིས་གསོལ་བ་འདེབས་ཤིང་། སེམས་དང་འདོད་དད་པས་དགའ་ཞིང་དུང་བ་དང་། ལུས་གུས་པས་འདུད་པའི་སྒོ་ནས་བླ་མ་ཆོས་རའི་ནང་བྱོན་པ་ན་སྤོས་དང་རོལ་མོས་སྔོན་བསུ་བྱ། བསུ་བའི་བླ་མ་དེ་བདེ་བའི་སྟན་ལ་བཞུགས་སུ་གསོལ་བ་སྟེ། ཆོས་འཆད་པའི་སྐབས་ཆོས་ཀྱི་ཆེ་བ་འདོན་པའི་ཕྱིར་བླ་མ་ཁྲི་ཐོག་ཏུ་བཞུགས་དགོས། དེ་དགེ་འདུན་ལ་བརྙས་པ་མ་གྱི་ཆོས་ལ་གུས་པའི་ཕྱིར་ཕྱག་ལེན་ལྟར་རང་རེས་ཀྱང་དེ་ལྟར་བྱེད་ཁུལ་ཡོད་པ་རེད། ཅེས་རྒྱུད་ལས་གསུངས་པ་ལྟར་མདོར་ན་བླ་མ་ལ་ང་རྒྱལ་དང་། མཉམ་འགྲོགས་ཀྱིས་ཅི་ལོ་གང་བྱུང་བརྙས་སྟབས་སུ་མ་སོང་བར་ཆོས་འཆད་པའི་བླ་མ་དང་སྐྱབས་ཡུལ་དཀོན་མཆོག་གསུམ་ལ་ཐུགས་མཉེས་པའི་མཆོད་པ་གྱ་ནོམ་པ་དང་། ཁྲི་སྟན་མཐོན་པོར་བཤམས་པ་སོགས་བྱ་ཞེས་གསུངས་ཏེ། བླ་མ་ཐུགས་མཉེས་ན་དཀོན་མཆོག་མཉེས་པ་རེད། དཀོན་མཆོག་གསུམ་གྱི་མཐར་ཐུག་པ་སངས་རྒྱས་ཡིན་ན། སངས་རྒྱས་ཀྱི་མཛད་པ་གཞན་དོན་གྱི་ཕྲིན་ལས་སེམས་ཅན་ཡོངས་ལ་ཕན་པ་མཛད་རྒྱུ་དེ་ཡིན། ཐུན་མོང་ལྟར་དུ་བཤད་ན་བླ་མ་ནི་ཐར་པའི་ལམ་ལ་ཁྲིད་མཁན་འཁོར་བའི་རྒྱ་མཚོ་ལས་སྒྲོལ་བའི་དེད་དཔོན་ཡིན་པས། དཀོན་མཆོག་ལ་ཐུགས་རྗེ་ཡོད། སེམས་ཅན་ལ་དད་པ་ཡོད་ཀྱང་བར་དེ་ན་བླ་མ་མ་བཞུགས་ན་མི་རུང་སྟེ། དཔེར་ན་ཉི་མ་ལ་ཚ་དྲོད་ཡོད། རྩྭ་སྐམ་པོ་ལ་མེ་འབར་མ་རག་པ་ཡིན་ཡང་བར་དེ་ན་མེ་ཤེལ་ཞིག་མེད་ན་རྩྭ་སྐྱ་ཉི་མའི་དྲོད་ཀྱིས་ཐད་ཀར་མི་འཚིག བར་དེ་ན་མེ་ཤེལ་ཡོད་ན་ཉི་མའི་དྲོད་ཀྱི་རྩྭ་ལ་མེ་འབར་བ་བཞིན་རེད། ཐུན་མིན་ལྟར་དུ་བཤད་ན། བླ་མ་དཀོན་མཆོག་ཀུན་འདུས་ཀྱི་ངོ་བོ་རེད། བླ་མའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཡིན་ན། མཚོན་བྱེད་རྟགས་ཀྱི་མཆོག་གསུམ་ལ་འདུན་པས་འགྲོ་བའི་སྐྱབས་འགྲོ་ཉི་ཚེ་བ་ཙམ་མ་ཡིན་པར། དད་པ་དང་མོས་གུས་རྣམ་པར་དག་པས་མཆོད་པ་དང་བཀུར་སྟི་བྱེད་ན། མཚོན་བྱ་དོན་གྱི་མཆོག་གསུམ་ཆོས་ཉིད་བསམ་གྱིས་མི་ཁྱབ་པའི་ངོ་བོ་བླ་མའི་ཐུགས་ཡེ་ཤེས་ཆེན་པོའི་དགོངས་རྒྱུད་བྱིན་རླབས་འཕོས་པས། དབྱིངས་དང་ཡེ་ཤེས་གཉིས་སུ་མེད་པར་ཟུང་འཇུག་སྐུ་བཞིའི་རྒྱལ་སར་མངའ་དབང་འབྱོར་བ་ཡིན་པས་ན། བླ་མ་དང་དཀོན་མཆོག་མཉེས་པའི་མཆོད་པ་དང་ཁྲི་སྟན་མཐོན་པོར་བཤམས་པ་སོགས་བྱ་དགོས། འདིའི་སོགས་ཁོངས་ནས་སྦྱིན་པ་ལ་སོགས་ཕྱིན་དྲུག་ཚང་བའི་ཞབས་ཏོག་བསྙེན་བཀུར་དགོས་པ་ཡང་བསྟན་ཡོད། ཆོས་ལ་བསྐུལ་བའི་དུང་འབུད་པའི་ཚེ་ཡང་བླ་མ་ལ་ཁ་བསྟན་ཏེ་བུས་པས་མཆོད་པའི་ཚུལ་དུ་འགྲོ། ཞེས་པས་གོང་གི་ལུང་དོན་འགྲེལ་བ་རེད། ཆོས་འཆད་པའི་དུས་ལ་བབ་དུས་སློབ་དཔོན་དང་སློབ་མ་འཁོར་དང་བཅས་པ་སྤྱན་འདྲེན་ཆོས་ལ་བསྐུལ་བའི་བརྡར་དུང་འབུད་པའི་ཚེའང་ནམ་རྒྱུན་གུས་པའི་ཚུལ་གྱིས་བླ་མ་ལ་རྒྱབ་ཀྱིས་ཕྱོགས་མི་རུང་བས་མ་ཚད། དུང་འབུད་པའི་ཚེའང་བླ་མ་ལ་ཁ་གཏད་ནས་གུས་པས་འདུད་པའི་ཚུལ་གྱིས་འབུད་ན། གུས་པའི་གཟུགས་དང་སྙན་པའི་སྒྲ་ཡི་མཆོད་པའི་ཚུལ་དུ་འགྲོ། ཆོས་ལ་བསྐུལ་བའི་བརྡ་དེ་དུང་གི་སྒྲ་ཡིན་དགོས་དོན་ཅི། བརྡ་གཞན་གྱིས་བསྐུལ་ན་མི་ཆོག་གམ་སྙམ་ན། རྟེན་འབྲེལ་ཁྱད་པར་ཅན་གྱི་དགོས་དབང་གིས་དུང་སྒྲས་བསྐུལ་བ་རེད། དེའང་གོང་དུ་ཞུས་པ་ལྟར་བརྒྱ་བྱིན་གྱིས་དུང་གཡས་འཁྱིལ་ཕུལ་བས་རྟེན་འབྲེལ་མཆོག་ཏུ་གྱུར་པའི་སྟོབས་ཀྱིས། སངས་རྒྱས་བཅོམ་ལྡན་འདས་ཀྱིས་ཝ་ར་ཎ་སཱི་དྲང་སྲོང་ལྷུང་བ་རི་དྭགས་ཀྱི་ནགས་ཀྱི་གནས་སུ། འཁོར་ལྔ་སྡེ་ལྷ་བརྒྱད་ཁྲི་དང་བཅས་པ་ལ་བཀའ་དང་པོ་བདེན་བཞིའི་ཆོས་འཁོར་བདེན་པ་བཞི་ནས་བརྩམས་ཏེ་ཆོས་འཁོར་ལན་གསུམ་བསྔགས་བརྗོད་དང་བཅས་པ་གསུངས་པ་ཡིན་ན། རྟེན་འབྲེལ་དེའི་དགོས་དབང་གིས་རྗེས་འཇུག་ཐམས་ཅད་ཀྱིས་ཐུགས་ཆོས་ཚུལ་ཟབ་མོ་འཆད་ཉན་བྱེད་པའི་སྐབས་སུ། དུང་སྒྲས་བསྐུལ་བ་འདི་རྟེན་འབྲེལ་མཆོག་ཏུ་འགྱུར་བས། སེམས་ཅན་རྨོངས་པ་མ་རིག་པའི་གཉིད་འཐུག་པོ་ལས་སད་པ་དང་། ཟབ་ཞི་སྤྲོས་པ་དང་བྲལ་བའི་དབྱངས་དེས་ཡིད་ཅན་མཐའ་དག་གནས་སྐབས་དགའ་བ་ནས་མཐར་ཐུག་བདེ་བའི་སར་ཕྱིན་པའི་དོན་མཚོན་པར་མ་ཟད། སྙན་པའི་སྒྲ་དབྱངས་ཀྱིས་བླ་མ་དང་དཀོན་མཆོག་མཉེས་པའི་མཆོད་པ་སྒྲ་དབྱངས་ཀྱི་མཆོད་སྤྲིན་ཡང་འགྱུར་འགྲོ་བ་རེད། ཆོས་རྔ་སྒྲོག་པའི་སྒྲ་ཐོས་སེམས་ཅན་ཡང་། །ངན་སོང་རྣམ་གྲོལ་ཉན་པ་སྨོས་ཅི་འཚལ། །ཞེས་གསུངས་པ་ལྟར། ཆོས་ལ་བསྐུལ་བའི་དུང་སྒྲ་དེ་ལ་སོགས་པ་རྣ་ལམ་དུ་ཐོས་པའི་སེམས་ཅན་མང་པོ་ཐ་ན་དུད་འགྲོའི་གནས་སུ་སྐྱེས་པའི་འབུ་སྲིན་ལ་སོགས་པའི་སེམས་ཅན་ཡང་ངན་སོང་དུ་སྐྱེ་འགྱུར་གྱི་ལས་གསོག་ཡོད་ཀྱང་། དེ་ལས་ཐར་པར་བྱེད་པ་གཎྜཱིའི་མདོ་སོགས་སུ་བཤད་པའི་རྒྱུ་མཚན་གྱིས་སྤངས་རྟོགས་མཐར་ཕྱིན་པའི་སངས་རྒྱས་དང་། སེམས་ཅན་གྱི་དོན་དུ་རྫོགས་སྨིན་སྦྱོང་བ་རྒྱ་མཚོ་ལ་གོམས་པའི་བྱང་ཆུབ་སེམས་དཔའི་སྤྱོད་ཡུལ་དང་ཐབས་མཁས་བསམ་གྱིས་མི་ཁྱབ་པ་ཤེས་པར་བྱས་ལ། ཞེས་སེམས་ཅན་གྱི་བྱ་སྤྱོད་ལས་འདས་པའི་ཐབས་ལ་མཁས་པའི་མཛད་སྤྱོད་བསམ་གྱིས་མི་ཁྱབ་པ་ཡིན་པར་ཤེས་པར་བྱས་ནས། ཆོས་ཀྱི་ཐུན་ཐམས་ཅད་ཀྱི་བརྡར་དུང་འབུད་པ་ལའང་གནད་ཆེན་པོ་དེ་ལྟ་བུ་ཡོད་པ་ཡིན་ནོ། །དགེ་བའི་བཤེས་གཉེན་མཚན་ཉིད་དང་ལྡན་པ་ཞེས་པ་ནི། ཀུན་མཁྱེན་ཀློང་ཆེན་པས་ཡིད་བཞིན་མཛོད་ལས། དེ་ཡང་ཐབས་མཁས་ཐུགས་རྗེ་དཔག་མེད་ཅིང་། །མདོ་རྒྱུད་ཡིད་བཞིན་མཛོད་མངའ་འགྲོ་བ་འདྲེན། །སྐྱོན་བྲལ་ཡོན་ཏན་རྫོགས་པའི་བླ་མ་ནི། །སྙིགས་མའི་དུས་སུ་སངས་རྒྱས་དངོས་དང་མཚུངས། །ཞེས་གསུངས་པ་ལྟར། དཀའ་ཚེགས་དང་ངལ་དུབ་ཆེན་པོ་མི་དགོས་པར་དོན་ཆེན་པོ་འགྲུབ་པའི་ཐབས་ལ་མཁས་ཤིང་། གཞན་ཕན་གྱི་ཐུགས་རྗེ་སྐྱོ་ངལ་མེད་པར་བདེ་བར་གཤེགས་པའི་མདོ་རྒྱུད་གང་ལའང་མི་མཁྱེན་པ་མེད་པར། ཡིད་བཞིན་ནོར་བུ་ལྟ་བུའི་མཛོད་ཐུགས་རྒྱུད་ལ་མངའ་བས་འགྲོ་བའི་ཁ་ལོ་གྱེན་ལ་བསྒྱུར་བའི་ཕྲིན་ལས་ཀྱིས་ཐར་པའི་ལམ་སྣ་འདྲེན་ཐུབ་པ། སྐུ་གསུང་ཐུགས་ལ་ཇི་ལྟར་བརྟགས་ཀྱང་མི་དགེ་བའི་ཉེས་སྐྱོན་དང་བྲལ་ཞིང་། ཡོན་ཏན་གྱིས་གང་བའི་ཡིད་བཞིན་གྱི་ནོར་བུ་ལྟ་བུའི་བླ་མ་དེ་སྙིགས་མའི་དུས་འདིར་སངས་རྒྱས་དངོས་བྱོན་མཇལ་བ་དང་ཁྱད་པར་མེད་ཅེས་གསུངས་པ་རེད། འོན་ཀྱང་བླ་མ་བཟང་ངན་ཟེར་བ་དེ་ཡང་གདུལ་བྱའི་བསོད་ནམས་ཆེ་ཆུང་ལ་རག་ལས་པས། དེ་རིང་ཁ་སང་གི་དུས་འདིར་དེ་འདྲ་ཙམ་ག་ལ་འོང་སྟེ། འབྲེལ་ཚད་ངན་སོང་དུ་མི་ཁྲིད་པ་དང་། བླ་མ་དེ་སློབ་མ་ལས་ལྷག་པའི་ཡོན་ཏན་དང་ལྡན་པ། ལྷག་བསམ་གཞན་ཕན་ཅན། དོན་སྤྱོད་དོན་མཐུན་ཆོས་དང་མཐུན་པའི་མཛད་སྤྱོད་མངའ་བ། གཞན་གྱིས་མིག་ལྟོས་བྱེད་འོས་པ་ཞིག་ངེས་པར་དུ་ཡིན་དགོས། ཆོས་འཆད་པའི་དུས་ལ་བབ་པ་དེའི་ཚེ་ཆོས་འཆད་པའི་བླ་མས་ཀྱང་འཁོར་གྱི་གདུལ་བྱའི་བློ་དང་བ་འདྲེན་ནུས་པའི་སྤྱོད་ལམ་བཟང་པོ་མཐའ་དག་ལ་ངེས་པར་བསླབ་དགོས་ཏེ། རྒྱུད་ཀློང་གསལ་ལས། སློབ་མའི་མོས་གུས་ཆེ་ཆུང་དེ། །བླ་མའི་མཛད་སྤྱོད་ལེགས་ཉེས་ཡིན། །འགྲོ་ཆག་ཉལ་དང་ཟ་བ་སོགས། །སྤྱོད་ལམ་ཐབས་ལ་ལེགས་པར་བསླབ། །སྤྱིར་སློབ་མ་ཡོངས་དང་ཁྱད་པར་དུ་ལས་དང་པོ་བའི་སློབ་མའི་མོས་གུས་ཆེ་ཆུང་ལ་གོ་དགོས་པས། སློབ་མ་སྐྱོང་མཁན་གྱི་བླ་མ་དེའི་རྒྱུན་གྱི་མཛད་སྤྱོད་ལེགས་ཉེས་ལ་ལྟོས་པ་ཞིག་ཡིན་པས། མི་ཞིག་ཡིན་ན་སྤྱོད་ལམ་རྣམ་བཞི་ལ་བརྟེན་ཡོད་པ་རེད། ལམ་དུ་འགྲོ་བ་དང་བསྡད་པ་དང་གནས་ཁང་སོགས་སུ་འཆག་པ། མཚན་མོར་ཉལ་བ། ལུས་འཚོ་བའི་ཆེད་ཟས་ཟ་བ་སོགས་སྤྱོད་ལམ་རྣམ་བཞི་གང་གི་སྐབས་ཡིན་ཡང་དྲན་ཤེས་བག་ཡོད་དང་ལྡན་པས། སྤྱོད་ཚུལ་གྱི་ཐབས་ལ་བཅོས་མར་མ་ཡིན་པ་ཞིག་ལ་ལེགས་པར་བསླབ་པར་བྱ་བའི་བླ་མ་ལ་བཀུར་དགོས། སློབ་མའི་མོས་གུས་ཆེ་ཆུང་དེ། །བླ་མའི་མཛད་སྤྱོད་བཟང་ངན་ཡིན། །ཞེས་པའི་ཤུགས་ལ་འདོན་པ་བསྒྱུར་ཏེ། སློབ་མ་བྱ་སྤྱོད་ལེགས་ཉེས་དེ། །སྐྱེ་བོ་གཞན་གྱི་མིག་ལྟོས་ཡིན། །ཟེར་བ་ཞིག་ཀྱང་གོ་ཆོག འཁོར་སྤྱོད་པ་བཟང་པོ་དང་ལྡན་པར་རིག་ན་དེའི་ཆོས་བརྒྱུད་དང་། དེའི་བླ་མའི་འཁོར་དང་སྡེ་རིས་ལ་དགའ་ཞིང་དད་པ་དང་སྤྲོ་བ་བསྐྱེད་པ་ཇེ་མང་དུ་འགྲོ་བ་ཡིན། དེ་ཇི་ཙམ་མང་ན་འགྲོ་བ་སེམས་ཅན་གྱི་རིགས་དེ་ཙམ་མང་པོ་ལ་ཕན་ཐོགས་འགྲོ། ང་གང་ཟག་སྒེར་བ་ཞིག་ལ་སྐྱིད་སྡུག་ཅི་ཡོད་བསམ་རྒྱུ་མེད། རེ་རེ་འཚོགས་པ་ཐུན་མོང་བར་འགྱུར་དགོས་ན། རེ་རེ་ནས་རྒྱུད་བཟང་ཀུན་སྤྱོད་ཡག ཆོས་དང་མཐུན་ན་དེའི་ཆོས་སྒར་དེ་ཚང་མ་ཆོས་མཐུན་ཆོས་ཀྱི་མཆེད་པོ་ལོས་ཡིན་བསམ་པ་དང་། དེའི་དགོན་པ་དེའང་དེ་ལྟ་བུ། དེའི་སྡེ་རིས་དེའང་དེ་ལྟ་བུ་ཡིན་པས་གཞན་དག་དང་བ་འདྲེན་ནུས་པ་རེད། དེ་མིན་མིང་ལ་དགོན་པ་ཆོས་ར་དང་། བཤད་གྲྭ་ཆོས་སྒར་ལ་སོགས་པ་གང་བཏགས་ཀྱང་། དོན་ལ་ཚོང་པ་གཡོ་ཅན་དང་ཁྲམ་པ་ཁྲམ་མས་གང་ན། བསྟན་ཞབས་ལ་ཐག་པ་བཏགས་འགྲོ་བཞིན་ཡོད་པ་རེད། དེས་ན་སྤྱོད་ལམ་ཐབས་ལ་མཁས་པ་ལ་ལེགས་པར་བསླབ་ཅེས་གསུངས་ཤིང་། རྒྱུད་སྡེ་རྒྱ་མཚོ་ནས་དམ་ཚིག་གི་རྣམ་བཤད་སྟོན་པའི་སྐབས་སུའང་། ཞེས་གསང་སྔགས་ཀྱི་རྒྱུད་སྡེ་རྒྱ་མཚོ་ནས་སྲུང་བྱ་དམ་ཚིག་སྲོག་གི་རྣམ་བཞག་བསྟན་པའི་སྐབས་སུའང་། དཔོན་གྱིས་ཉམས་ན་སྦྱོང་ཐབས་མེད། །གཉིས་ཀ་ན་རཀ་ཆེན་པོར་འགྲོ། །ཞེས་གསུངས་པས་རྡོ་རྗེ་སློབ་དཔོན་དབང་སྐུར་བ་པོ་དཔོན་གྱིས་དམ་ཚིག་ཉམས་པར་གྱུར་ན་སྦྱོང་ཐབས་མེད་པའམ་སྦྱང་དཀའ་བ་དམན་ལ་དགག་པའི་སྒྲ་སྦྱར་ནས་གསུངས་པ་རེད། དཔོན་གྱི་དམ་ཚིག་ཉམས་ན་དཔོན་སློབ་གཉིས་ཀ་ན་རཀ་དམྱལ་བ་ཆེན་པོར་འགྲོ་བར་འགྱུར་ཞེས་གསུངས་པས། སྤྱིར་དུས་དང་རྣམ་པ་ཐམས་ཅད་དུ་ཤིན་ཏུ་རིགས་པ་འོས་ཤིང་འཚམས་པའི་སྤྱོད་ལམ་ལ་བསླབ་ཅིང་། དེའི་ནང་ནས་ཁྱད་པར་དུ་ཆོས་སྟོན་པའི་སྐབས་དང་། བསྐྱར་སྦྱོང་དང་ཁྲིད་སྦྱོང་རང་ཉིད་ཀྱི་བསམ་སྒོམ་ལ་སོགས་པའི་སྐབས་སུ་རེད། ཐོས་བསམ་སྒོམ་པ་འདི་དག་གི་ཚེ་སྤོམ་ཡོར་ཞེས་པ་ཅི་ཡིན་ཞིབ་ཚགས་མ་བྱས་པ་དང་། ཡོམ་ཡུགས་ཏེ་མེ་འཁོར་ནང་དུ་རྒྱུག་བཞིན་ཡུལ་ལྗོངས་ལ་བལྟ་བ་ལྟ་བུ་དར་ཞུད་འཐེན་སོང་བ་ལ་ཟེར་བ་རེད། དེ་ལྟ་བུའི་ཡོམ་ཡུགས་སུ་མ་སོང་བ་ཞིག་དགོས་ཏེ། ཀློང་གསལ་ལས། དེ་ལྟར་སྣོད་ལྡན་སློབ་མ་ལ། །ཟབ་ཆོས་བསྟན་པའི་དུས་ཀྱི་ཚེ། །བླ་མའི་སྤྱོད་ལམ་འདི་ལྟར་བྱ། །བདེ་བའི་སྟན་ལ་སྐྱིལ་ཀྲུང་བཅས། །ཞེས་དེ་ལྟར་སྣོད་ལྡན་གྱི་སློབ་མ་ལ་བླ་མས་ཟབ་ཅིང་རྒྱ་ཆེ་བའི་ཆོས་འཆད་པའམ་སྟོན་པའི་དུས་ཀྱི་ཚེ། ཆོས་འཆད་མཁན་གྱི་བླ་མའི་སྤྱོད་ལམ་འདི་ལྟར་བྱ་དགོས་ཏེ། ཆོས་ཀྱི་ཁྲི་ལྟ་བུ་བདེ་བའི་སྟན་ལ་འཁྲིས་སྙེས་ལྟ་བུ་མ་ཡིན་པར་ཞབས་སྐྱིལ་ཀྲུང་བཅའ་བའི་སྒོ་ནས་བཞུགས་ཏེ། རང་ཉིད་ཐེག་པ་གང་སྟོན་པའི། །དཀྱིལ་འཁོར་གཙོ་བོར་གསལ་བཏབ་ལ། །འགྲོ་དྲུག་སེམས་ཅན་མ་ལུས་ཀུན། །མདུན་དུ་སྐད་ཅིག་འཁོད་པར་བསམ། །ཞེས་བླ་མ་རང་ཉིད་ཀྱིས་བཤད་བྱའི་ཐེག་པ་གང་ཞིག་གི་ཆོས་སྟོན་པའི་སྐབས་ཡིན་ན། རང་ཉིད་དེའི་དཀྱིལ་འཁོར་གྱི་གཙོ་བོ་སྟེ། དཔེར་ན་མདོ་སྟོན་པའི་ཚེ་རྒྱལ་བ་ཤཱཀྱ་སེང་གེ་ལྟ་བུ། རྒྱུད་སྟོན་པའི་ཚེ་རྡོ་རྗེ་འཆང་ལྟ་བུའི་དཀྱིལ་འཁོར་གྱི་གཙོ་བོར་གསལ་བཏབ། ལྷ་ཀླུ་ལྷ་མ་ཡིན་ལ་སོགས་པའི་འགྲོ་དྲུག་གིས་བསྡུས་པའི་སེམས་ཅན་མ་ལུས་པ་ཐམས་ཅད་རང་གི་མདུན་དུ་ཆོས་རའི་ནང་དུ་སྐད་ཅིག་ཡུད་ཙམ་གྱིས་འཁོད་ཅིང་འདུག་པར་བསམ་ལ། རང་རང་སྐད་དང་བློ་འཚམ་པའི། །ཐེག་ཆེན་ཆོས་སྟོན་སེམས་ཀྱང་བསྐྱེད། །ཆོས་སྐྱོང་དཀར་ཕྱོགས་ཐམས་ཅད་ལ། །ལེགས་སྤེལ་བར་ཆད་སྲུངས་ཤིག་ཅེས། །རང་རང་ལས་ཀྱི་ཕྲིན་ལས་བཅོལ། །ཞེས་འགྲོ་བ་མཐའ་དག་ལ་རང་རང་གི་སྐད་དང་འཚམ་པ་དང་། རང་རང་གི་སེམས་རྒྱུད་ཐ་དད་པ་དང་མོས་པ་སྣ་ཚོགས་པའི་བློ་དང་འཚམ་ཞིང་རན་པ་འཐད་པའི་སྒོ་ནས། ཐེག་པ་ཆེན་པོའི་ཆོས་དྲི་མ་མེད་པ་སྟོན་པ་དང་མཉམ་དུ། སེམས་ཅན་ཐམས་ཅད་ཐར་པའི་མཆོག་དམ་པ་ལ་འགོད་པར་བྱ་བའི་ཆེད་དུ། བྱང་ཆུབ་འདོད་པའི་བླ་མེད་བྱང་ཆུབ་མཆོག་ཏུ་སེམས་ཀྱང་བསྐྱེད་པར་བྱ་བ་དང་། བསྟན་པ་སྐྱོང་བའི་ཆོས་སྐྱོང་དང་། བསྟན་པ་ལ་དགའ་བའི་དཀར་ཕྱོགས་མི་མ་ཡིན་ཐམས་ཅད་ལ་རྣལ་འབྱོར་པ་འཁོར་དང་བཅས་པའི་ཆོས་དང་མཐུན་པའི་ལེགས་པའི་ཕྱོགས་སྤེལ་ཞིང་། མི་མཐུན་འགལ་རྐྱེན་བར་ཆད་ཐམས་ཅད་སྲུངས་ཤིག་ཅེས་དམ་བསྒྲགས་ཤིང་བཀའ་བསྒོ། སྔར་རང་རང་གི་ཁས་བླངས་དམ་བཅའ་བའི་ལས་ཀྱི་ཕྲིན་ལས་ཡོངས་སུ་བཅོལ་བར་བྱའོ། །ཆོས་གྲལ་དབུས་སུ་སྟོང་པར་གཞག །མི་དང་མི་མིན་དཀར་ཕྱོགས་ཀུན། །མོས་པས་དམ་ཆོས་ཉན་པར་བསམ། །མིག་གིས་སློབ་མ་ཀུན་ལ་བལྟ། །ཞེས་བླ་མའི་མདུན་ན་སློབ་མ་ཆོས་གྲལ་དུ་འཁོད་དུས་ཆོས་གྲལ་གྱི་དབུས་སམ་དཀྱིལ་དེ་སྟོང་པར་གཞག་དགོས། ལྷ་ཁང་ཆུང་ཞིང་སློབ་མ་མང་ན་མ་འཚང་ཐབས་མེད་རེད་མ་གཏོགས། བར་མཚམས་སྟོང་པར་བྱས་ནས་ཁོད་ཡངས་མོ་ཞིག་བྱ་དགོས་གསུངས་པ་རེད། ཆོས་ཉན་མཁན་མི་ཡི་སློབ་མ་རྐྱང་པ་མ་གཏོགས་མེད་པར་མི་བསམ་པར། མི་དང་མི་མིན་ལྷ་ཀླུ་དྲི་ཟ་ལ་སོགས་གུས་པས་ཆོས་གྲལ་དུ་འཁོད་ལ་དད་ཅིང་མོས་པས་དམ་པའི་ཆོས་ཟབ་མོ་ཉན་དུ་ཡོད་པར་བསམ་དགོས། བཅོམ་ལྡན་འདས་ཀྱིས་ཆོས་གསུངས་དུས་ལྷ་དང་མི་དང་ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཞེས་གསུངས་པ་ལྟར། རང་རེ་ཐ་མལ་པས་ལྷ་ཀླུ་མི་མ་ཡིན་གྱིས་མངོན་པར་བསྟོད་ཨེ་ཡོད་མི་ཤེས་ཀྱང་། ཆོས་དང་མཐུན་པའི་ལེགས་བཤད་དྲི་མ་མེད་པར་བཤད་ན་མངོན་པར་བསྟོད་ཀྱིན་ཡོད་རྒྱུ་རེད་སྙམ། ཆོས་འཆད་པའི་སྐབས་སུ་མིག་གིས་གཞན་ལ་མི་གཡེང་བར་མདུན་གྱི་སློབ་མའི་ཚོགས་ཀུན་ལ་དགའ་བའི་མདངས་ཀྱིས་ཞལ་ཕྱོགས་ཏེ་བལྟ་བ་དང་། །ལག་པ་ཆོས་འཆད་མཉམ་གཞག་བྱ། །ངག་གི་ཚིག་གསལ་གདངས་སྙན་པས། དཔེ་དོན་རྟགས་གསུམ་འབྲེལ་བར་བཤད། །དབང་པོ་གང་ལ་འཚམ་པ་ཡི། །ཆོས་སྒོ་ཐེག་པ་རིམ་པར་བསྟན། །ཞེས་ལག་གཡས་པས་ཆོས་འཆད་ཀྱི་ཕྱག་རྒྱ་དང་གཡོན་པས་མཉམ་གཞག་བྱ་ཞིང་། བརྗོད་ཚུལ་གྱི་ངག་གང་ཞིག་རང་སྟོབས་ཀྱིས་བཤད་དགོས་ན། སྙན་ཞིང་རྣ་བར་འཇེབས་པ། མཛེས་ཤིང་ཡིད་དུ་འོང་བ། བཟང་ཞིང་སྤྲོ་བ་བསྐྱེད་པ་དེ་ངག་གི་སྒྲིབ་པ་སྤངས་པ་ཞིག་མིན་ན་བཤད་ཐུབ་དཀའ་ཞེས་གསུངས་པ་རེད། ལེགས་པའི་སྐད་གདངས་མཁས་པའི་ཡིད་འཕྲོག་ཅིང་། །སྒྲ་དག་དོན་གསལ་སྡེབ་སྦྱོར་ཉམས་པ་མེད། །སོགས་བཤད་ཚུལ་ཡོད་ལ། ཐམས་ཅད་མཁྱེན་པས་ལྷ་ཡི་སྐད་དུའང་གསུངས་པ་ཡོད། རེད་དེ་བདེ་བར་གཤེགས་པའི་བཀའ་དྲི་མ་མེད་པའི་སྙིང་དོན་མན་ངག་གི་བསྟན་བཅོས་འདི་ལྟ་བུ་བཤད་ཅིང་འགྲེལ་བའི་སྐབས་སུ། འཆད་པ་པོས་ངག་སྐྱོན་གྱིས་མི་བརྫད་པར། དཔེར་ན་སྙན་ངག་བརྩམས་ཏེ་སྙན་པོ་འདྲ་ཞིག་བྲིས་ཡོད་བསམ་དུས། གཅིག་པོས་ལྡབ་ལྡིབ་ཏུ་འདོན་སོང་ན་དགོས་དོན་མི་འདུག་བསམ་རྒྱུའི་ཇེ་བཙོག་ཏུ་གཏོང་འགྲོ་མོད། དེ་འདྲ་མིན་པར་ངག་གི་ཚིག་གསལ། ཡི་གེ་བརྡ་དག་གི་སྒྲ་ཟུར་ཐོན་པ། གདངས་སྙན་པ། དལ་བྲེལ་རན་པ། དཔལ་སྤྲུལ་ཚང་གིས། བྲེལ་ཉམས་ཀྱིས་བཟློས་སྐྱོན་མ་ཤོར་བ། དལ་ཉམས་ཀྱི་བར་སྟོང་མ་ལུས་པ། དལ་ལ་རྒྱུན་རིང་བ་སྒྲ་དག་ཚིག་གསལ་བ་སོགས་གསུངས་པ་བཞིན་དུ་དོན་དང་འབྲེལ་བའི་མཚོན་ནུས་པའི་དཔེ། དཔེ་དང་མཚུངས་པའི་དོན་དང་། དོན་དེ་གོ་ནུས་པའི་རྟགས་དང་གསུམ་པོ་འབྲེལ་ནས་ཡོད་པ་དེ་འདྲ་བཤད་དགོས་པ་ལས། དོན་དང་མ་འབྲེལ་བའི་དཔེ། དཔེ་དོན་མཚུངས་པའི་རྟགས་མེད་པར། ཆང་བཟི་བས་འཆོལ་གཏམ་བླ་བརྡོལ་དུ་བཤད་པ་ལྟ་བུ་ཞིག་མི་རུང་སྟེ། དཔེ་དང་དོན་དུ་འགལ་བ། དཔེ་མང་ཁུར་དུ་ལུས་པ་དེ་མི་མཁས་ང་རྒྱལ་ཅན་ལ་འབྱུང་གསུངས་པ་རེད། བཤད་རྒྱུ་དེའང་གདུལ་བྱའི་ཁམས་དང་དབང་པོ་ཅི་དང་ཅི་ལྟ་བུ་གང་ཟག་སུ་དང་གང་ལ་འཚམ་ཞིང་འོས་པ། ཐུབ་པའི་ཆོས་ཀྱི་སྒོ་མོ་ཐེག་པའི་རིམ་པ་ལྟར་བསྟན་པར་བྱ། ཐེག་པའི་རིམ་པ་སྣ་ཚོགས་པའི་རྣམ་བཞག་མཛད་པ་དེ་རེ་ཞིག་དེ་དང་དེའི་རིགས་ཅན་གྱི་གདུལ་བྱ་དྲངས་ནས། མཐར་ཐུག་འཇམ་དཔལ་སྒྱུ་དྲྭ་ལས། ཐེག་པ་གསུམ་གྱིས་ངེས་འབྱུང་ལ། །ཐེག་པ་གཅིག་གིས་འབྲས་བུ་གནས། །ཞེས་གསུངས་པ་ལྟར་ཐེག་པའི་མཆོག་རྡོ་རྗེའི་ཐེག་པར་ལ་བཟླ་བར་བྱ་ཞེས་གསུངས། ཞེས་འདི་ལྟ་བུའི་ཆོས་འཆད་ལུགས་ནི་ཐེག་པའི་རིམ་པ་གང་དང་གང་སྟོན་པ་ཐམས་ཅད་ཀྱི་ཁོག་འབུབས་ཀྱང་ཡིན་ལ། རྒྱུ་མཚན་དེའི་ཕྱིར་ན་ཆོས་འཆད་པའི་སྐབས་ལུས་ཀྱི་སྤྱོད་ལམ་བདེ་བའི་སྟན་ལ་སྐྱིལ་ཀྲུང་བཅའ་བ་ལས། བག་མེད་པར་ཅི་བྱུང་གང་བྱུང་གིས་འགྱེལ་བུབ་སྟེ་ཕྱིར་བཀན་ཏེ་ལོག་པ་དང་། ཁ་བུབ་ཏུ་ཉལ་བ། གཞོགས་སྙེས་ཏེ་གློ་སྒང་ལ་སྙེས་པ་ལ་སོགས་པ་སྤངས་ཏེ། ལག་པ་གཡོན་པ་མཉམ་བཞག་དང་གཡས་པ་ཆོས་འཆད་ཀྱི་ཕྱག་རྒྱ་བཅའ་བ་སྔོན་དུ་འགྲོ་བས། སྔོན་འགྲོའི་ཆོས་འཆད་པའི་ཚེ་ན་རང་ཉིད་སྟོན་པ་ཤཱཀྱ་ཐུབ་པའི་སྐུར་གསལ་བ་དང་། དངོས་གཞིའི་ཆོས་འཆད་པའི་ཚེ་རྒྱུད་ལུང་མན་ངག་གང་ཇི་ལྟར་སྟོན་པའི་དེ་ཉིད་ཀྱི་དཀྱིལ་འཁོར་གྱི་བདག་པོར་གསལ་བཏབ་ནས། ཕ་མར་གྱུར་པའི་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་རྣམ་བྱང་རྫོགས་པའི་སངས་རྒྱས་ཀྱི་ས་ལ་འགོད་པའི་ཆེད་དུ། ཆོས་འཆད་པར་བྱ་བསམ་ཏེ་སེམས་བསྐྱེད་ཀྱིས་འཕེན་པ་དོན་གཉིས་སམ་ཟུར་གཉིས་དང་ལྡན་པའི་བསམ་པ་རྒྱ་ཆེ་བ་བྱང་ཆུབ་ཀྱི་སེམས་སྔོན་དུ་འགྲོ་བས་གཞིར་བཟུང་། དེའི་ཚེ་རིགས་དྲུག་གི་སེམས་ཅན་དངོས་ཡོད་དང་དངོས་མེད། གཟུགས་ཅན་དང་གཟུགས་མེད་ཐམས་ཅད་ཆོས་འཆད་པ་པོ་རང་གི་མདུན་དུ་ཆོས་ཉན་པའི་ཕྱིར་དུ་གུས་ཤིང་དད་པ་དང་བཅས་འཁོད་ཅིང་འདུས་ཡོད་པར་བསམ་ཞིང་། ཁྱད་པར་དུ་གང་དུ་བཤད་པ་ལྟར་ཆོས་རའི་དབུས་ཀྱི་ས་གཞི་སྟོང་པར་བཞག་པ་ལ་ལྷ་ཀླུ་དྲི་ཟ་ལ་སོགས་པ་མི་མ་ཡིན་པ་དཀར་ཕྱོགས་པ་ཀུན་ཀྱང་འདུས་ནས་དང་ཞིང་མོས་པས་ཆོས་ཉན་པར་བསམ་ཞིང་། ཆོས་འཆད་ཉན་བགྱིད་པ་ལ་བར་ཆད་ཞི་བ་དང་། མཐུན་རྐྱེན་ལེགས་སྤེལ་དང་ཉེན་འགོག་གི་ཁ་མགོན་དང་སྡོང་གྲོགས་མཛད་པའི་འཕྲིན་ལས་བཅོལ། འདོད་ལྷ་སྡེ་བཅས་ཀྱི་གཉེན་པོར་བློ་གྲོས་རྒྱ་མཚོས་ཞུས་པའི་མདོ་ལས་ཆོས་འཆད་པའི་སྔོན་དུ་བདུད་ཚར་བཅོད་པའི་སྔགས་བཏོན་ན་དཔག་ཚད་བརྒྱ་ཚུན་ཆད་དུ་བདུད་དང་བདུད་རིས་ཀྱིས་བར་ཆད་ཀྱིས་ཀླགས་ལྟ་བར་མི་ནུས་པར་བཤད་ཡོད་པས་དེ་ལྟར་འདོན་དགོས་གསུངས་སོ། །འོ་ན་ཆོས་རའི་དབུས་སྟོང་པར་བཞག་ནས་མི་མ་ཡིན་དང་དཀར་ཕྱོགས་པ་ཀུན་ཀྱང་འདུས་ནས་ཞེས་པ་དང་། བདུད་ཚར་གཅོད་པའི་སྔགས་ཀྱིས་འདོད་ལྷ་སྡེར་བཅས་དཔག་ཚད་བརྒྱ་ཚུན་དུ་ཉེར་མི་འཇུག་པས། དེ་དག་བསྐྲད་པས་གནོད་བསྐྱལ་མི་ཐུབ་ཅིང་དེ་དག་དེ་ལས་ཕར་བཀར་ཏེ་ཆོས་ར་ནས་ཕུད་པ་ཡིན་ན། ཆོས་སྦྱིན་གཏོང་སའི་སྙིང་རྗེའི་ཡུལ་དུ་མ་སྙོམས་པ་ཨེ་རེད་བསམ་ན། གོང་དུ་གསུངས་པ་དེ་སྤྱི་ཁྱབ་ཀྱི་སྒོ་ནས་རིགས་དྲུག་གི་འགྲོ་བ་སྙིང་རྗེའི་ཡུལ་དུ་བཏང་སྙོམས་ཚད་མེད་ཀྱིས་སྙོམས་པར་བྱས་ནས། ཚད་མེད་གཞན་གསུམ་དང་མ་བྲལ་བས་བྱང་ཆུབ་མཆོག་ཏུ་སེམས་བསྐྱེད་དགོས། དེས་ན་སྤྱིར་ཆོས་འཆད་པའི་ཚེ་སེམས་བསྐྱེད་ཀྱིས་འཕེན་པ་སྔོན་དུ་གཏོང་བ་དེ་ཐེག་ཆེན་སྤྱིའི་ལུགས་ཡིན། ཐེག་ཆེན་གྱི་ཆོས་སུ་གཏོགས་མི་གཏོགས་དང་། རིགས་དེ་ལས་ཉམས་མི་ཉམས་ཀྱང་སེམས་བསྐྱེད་དེ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པ་ཡིན་པར་གཞི་བཞག་གི་ཐོག་ནས། སེམས་ཅན་ཐམས་ཅད་ཆོས་རའི་ནང་དུ་འཁོད་ནས་ཆོས་ཉན་དུ་ཡོད་པར་བསམ་དགོས་གསུངས་པ་རེད། དེའི་འོག་ཏུ་གསུངས་པའི་བདུད་རིས་ནག་ཕྱོགས་པ་ལ་སོགས་པ་སེམས་ཅན་མོས་པ་སྣ་ཚོགས་པ་ཅན་འགའ་ཞིག་ཞི་བས་མི་ཐུལ་བར་དྲག་པོས་འདུལ་ཚུལ་དུའམ། ཡང་ཐབས་སྣ་ཚོགས་ཀྱིས་ཆོས་ལ་བསྐུལ་ཞིང་འཁོར་བ་མཐའ་ཅན་གྱི་ཐོག་ནས་སངས་རྒྱས་པའི་རིང་རྒྱུ་བསྐྲུན་དགོས་པ་ལ། དེ་བཞིན་དུ་གནས་སྐབས་བསྐྲད་སྡིག་སོགས་ཀྱི་མཛད་པའི་ཐོག་ནས་ཐར་པའི་ས་བོན་བསྐྲུན་ནས་མཐར་ཐུག་ཡང་དག་ལམ་དུ་འཛུད་པའམ། ཡང་ན་དེ་དག་གི་བདུད་སེམས་ཐབས་ཀྱིས་འདུལ་བས་བདུད་ཀྱི་མཐུ་བཅོམ་པར་མཛད་དེ་ཆོས་ལ་བསྐུལ་བ་སྟེ། མདོར་ན་སངས་རྒྱས་བྱང་སེམས་ཀྱི་ཐབས་ལ་མཁས་པའི་མཛད་པ་དེ་དམིགས་ཀྱིས་བཀར་ནས། དོན་གཞན་གྱི་དེ་འདྲའི་དགོངས་པ་ལེན་དགོས་རྒྱུ་རེད་སྙམ། དེས་ན་དེ་ལྟར་ཆོས་དུང་གི་བརྡས་བསྐུལ་ནས་དཔོན་སློབ་ཐམས་ཅད་ཆོས་རའི་ནང་འདུས། སྤྱོད་ལམ་ཚུལ་བཞིན་དུ་བྱེད། བདུད་ཚར་བཅོད་ཀྱི་སྔགས་བཏོན་པ་སོགས་ཆོས་འཆད་པའི་སྔོན་འགྲོའི་བྱ་བ་རྣམས་འགྲུབ་ཚར་བ་ན། ངག་བུལ་དལ་ཆེ་བ་ལས་དང་པོ་པས་འདོན་པ་ལྟ་བུ། མགྱོགས་ཆེ་བས་ལྕེ་ཡིས་མི་ཟིན་ཡིད་ལ་མི་དྲན་པ་དེ་གཉིས་ཐོན་འོང་དུས་ལྡབ་ལྡིབ་ལ་སོགས་གྱུར་པས། ཐོས་འཛིན་རྣ་བའི་ཚེར་མར་གྱུར་ནས་མི་སྙན་ཞིང་ཉན་མི་འདོད་པར་དེ་འདྲ་སྤངས་ལ། ངག་གསལ་དག་སྙན་པའི་སྒྲས་དཔེ་དོན་རྟགས་གསུམ་འབྲེལ་བར་བཤད་ཅིང་། དེ་ཡང་སངས་རྒྱས་བསྟན་པའི་བབས་དང་བསྟུན་ནས་གོ་རིམ་འབྲེལ་ཆགས་པར་བཤད་པ་མ་གཏོགས་ངེས་དོན་གྱི་ཚིག་དངོས་གཞིའི་ཆོས་ཟབ་མོ་དེ་ཐོག་མ་ཉིད་ནས་གབ་སྦས་ཀྱི་གསང་བ་བསྒྲག་ཅིང་འཆད་པ་དང་། ཏན་གན་གྱི་སྤྱོད་པ་སྟེ། གསང་སྔགས་ཀྱི་དབང་དང་འབྲེལ་བའི་ཡན་ལག་གི་དམ་ཚིག་གི་ནང་ནས། ཤེས་པར་བྱ་བའི་དམ་ཚིག་ལྔ་དང་། སྤྱད་པར་བྱ་བའི་དམ་ཚིག་ལྔ། དང་དུ་བླང་བའི་དམ་ཚིག་ལྔ། མི་སྤང་བ་ཡི་དམ་ཚིག་ལྔ། བསྒྲུབ་པར་བྱ་བའི་དམ་ཚིག་ལྔ་སྟེ་ལྔ་ཚན་ལྔ་ཡོད་པའི་ནང་ནས། ཏ་ན་ག་ཎ་མ་བྱིན་ལེན་དང་རྫུན། །ངག་འཁྱལ་རྣམས་ནི་སྤྱད་པར་བྱ་བ་ལྔ། །ཞེས་གསུངས་པ་ལྟར་གྱི་མདོར་ན་ཏན་གན་ཏེ་སྦྱོར་སྒྲོལ་ཀྱི་གསང་བ་བཤད་པས། ལས་དང་པོ་བ་དང་། སློབ་བུ་རྒྱུད་མ་སྨིན་པ་ལ་གསང་བའི་ཟུར་འཕྲིག་པ་ལ་སོགས་ཀྱིས་གདུལ་བྱའི་བློ་ལས་སུ་མི་རུང་བར་འགྱུར་བའི་ཕྱིར་ན་སྤང་བར་བྱ་ལ། དེ་སྐད་དུ། ཀློང་གསལ་ཉི་མ་ལས། བླ་མས་སློབ་མ་གསོ་བའི་ཚེ། །སློབ་མ་གསར་བུ་དད་ལྡན་དེ། །ཐོག་མར་ཐབས་ཀྱིས་འཁྲིད་པར་བྱ། །ངེས་དོན་སྙིང་པོ་མ་གོའི་བར། །རྒྱུ་འབྲས་གཉིས་ཀྱི་ཆོས་རྣམས་བཤད། །ཅེས་རྡོ་རྗེ་སློབ་དཔོན་དེ་ཉིད་བཅུ་དང་རང་བཞིན་བརྒྱད་ལྡན་གྱི་བླ་མ་དམ་པ་དང་། ཕར་ཕྱིན་ཐེག་པའི་ལུགས་ཀྱི་མཚན་ཉིད་དང་ལྡན་པའི་དགེ་བའི་བཤེས་གཉེན་དེས། སྐལ་ལྡན་སྣོད་རུང་གི་སློབ་མ་དེ་གསོ་ཞིང་སྐྱོང་བར་བྱེད་པའི་ཚེ། སློབ་མ་གསར་བུ་ལས་དང་པོ་བ་དད་པ་དང་ལྡན་པ་དེ་ཉིད། དཔེར་ན་ཕ་མས་རང་གི་བྱིས་པ་དེ་ཐབས་ཀྱིས་འཁྲིད་ནས་གནོད་པ་ལས་སྐྱོབ་པ་བཞིན་དུ། ཐོག་མར་ཐབས་ཀྱིས་བློ་ཡང་དག་པའི་ལམ་ལ་རིམ་གྱིས་འཁྲིད་མཁས་པར་བྱ་སྟེ། དེའང་ངེས་དོན་སྙིང་པོའི་དོན་རེ་ཞིག་མི་གོ་བའི་ཚེ། རྒྱུ་འབྲས་བསླུ་མེད་ཀྱི་ཆོས་རྒྱུ་མ་འཁྲུལ་བ་ལས་འབྲས་བུ་མི་འཁྲུལ་བར་འབྱུང་བ་ལ་ངེས་པར་འདྲོང་བར་བྱ་བའི་རྒྱུ་འབྲས་ཀྱི་ཆོས་སྐོར་རྣམས་བཤད། སྒྲུང་དང་དཔེ་དང་བསྟན་བཅོས་དང་། །མགུར་གླུ་ལ་སོགས་འཁོར་བ་ལ། །ཡིད་དབྱུང་ངན་སོང་སྡུག་བསྔལ་དང་། །སངས་རྒྱས་ཡོན་ཏན་ལ་སོགས་བཤད། །ཅེས་གསུངས་ཏེ། དེའང་ལས་དང་པོ་བ་གསར་བུ་ཚོ་ལ་སྒྲུང་དང་དཔེ་སོགས་བཤད་དགོས་གསུངས་ཏེ། སྒྲུང་ལ་བྱུང་བ་སྔོན་སོང་གི་ལོ་རྒྱུས་བཤད་པ་དང་། སྙན་ངག་གི་རྩོམ་སྒྲུང་གཉིས་ཡོད། སྔོན་སོང་གི་ལོ་རྒྱུས་ཇི་མ་ཇི་བཞིན་བཤད་པ་ནི། དཔེར་ན་སློབ་དཔོན་ཀླུ་སྒྲུབ་ཀྱིས་ལས་ཀྱི་ལྷག་མ་མྱོང་བས་རྩྭ་ཀུ་ཤས་མགུལ་ལ་བརྒྱབ་ནས་འདས་སོང་རབས་དང་། བསྐལ་པ་ཆགས་གནས་འཇིག་སྟོང་སོགས་སྲིད་པ་ཆགས་འཇིག་གི་མི་རྟག་པའི་སྒྲུང་གཏམ། རྒྱལ་བུ་དྲི་མེད་ཀུན་ལྡན་དང་། ཆོས་རྒྱལ་ནོར་བཟང་གི་རྣམ་ཐར་སོགས་སྟོན་པའི་སྐྱེས་རབས་དང་འབྲེལ་བ་རྣམས་ལྟ་བུ་དང་། སྙན་ངག་གི་རྩོམ་སྒྲུང་ནི། ཀུན་མཁྱེན་ཆེན་པོའི་གསུངས་ལས། ཀླུ་ཀུན་ཏུ་དགའ་བའི་གཏམ་དང་། བུ་མོ་བདུན་གྱི་རྟོགས་བརྗོད་སོགས་དང་། དཔེ་ཞེས་གསུངས་པའི་དཔེ་ཆོས་ནི་ངང་པའི་དྲིས་ལན་སྤྲིན་གྱི་སྙིང་པོ་དང་། རི་བོང་གི་རྟོགས་བརྗོད། ཡང་རིག་འཛིན་འཇིགས་གླིང་གི་རི་དྭགས་ཀྱི་གཏམ་ངེས་འབྱུང་གི་ཕུག བློ་ལྡན་བྷྲ་མ་རའི་གཏམ་ཚིག་སོགས་མི་རྟག་པའི་སྒྲུང་དང་དཔེ་ཆོས་ལ་གསུངས་པ་རེད། བསྟན་བཅོས་ཞེས་པ་ལུགས་ཀྱི་བསྟན་བཅོས་སོགས་ལ་གོ་དགོས་པ་ཨེ་ཡིན་ན། སྔོན་བྱོན་གྱི་བླ་མ་དམ་པའི་མགུར་གླུ་སོགས་ཐོས་པ་ཙམ་གྱིས་འཁོར་བ་ལ་ཞེན་ལོག་དང་། ཡིད་དབྱུང་ཞིང་ངེས་འབྱུང་བསྐྱེད་ནུས་པའི་ཐབས་ངན་སོང་གསུམ་གྱི་སྡུག་བསྔལ་དང་། སངས་རྒྱས་བྱང་སེམས་ཀྱི་ཡོན་ཏན་སོགས་བཤད་ནས་སློབ་མའི་རྒྱུད་ལ་ཕན་གདག་དགོས་གསུངས་པ་རེད། བླ་མ་ཉིད་ཀྱང་སྤྱོད་ལམ་གཟབ། །གལ་ཏེ་ཏན་གན་ཟུར་འཕྲིག་ན། །བློ་ཆུང་དད་ལོག་རྫ་མི་དྲོས། །དེ་ལ་བྱིན་རླབས་གཞན་མི་འགོ །ཞེས་གོང་དུ་བཤད་པ་ལྟར་སློབ་མ་གསར་བ་སྐྱོང་བའི་ཚེ་བླ་མ་རང་ཉིད་ཀྱང་སྤྱོད་ལམ་གཟབ་པར་བྱ་དགོས། གལ་ཏེ་མ་སྨིན་པའི་སློབ་མས་མཐོང་ཆོས་མི་རུང་བའི་ཏན་གན་གསང་བ་བསྟན་པས་ཟུར་འཕྲིག་ན། བློ་ཆུང་གི་བློ་མི་བརྟན་པ་དང་། བློར་མི་ཆུད་པས་དད་པ་ལོག་ཤོར་ནས། རྫ་མི་དྲོས་ཞེས་རྫ་ཁོག་བཅའ་བས་མི་ཆོག་པར་རྫ་མེ་ལ་བསྲེགས་ནས་རྫ་སོ་བཏང་དགོས། དེ་རྫ་སོ་མ་བཏང་ན་སྲ་མེད་པས་རྫ་ཁོག་ཆག་འགྲོ། དེ་དང་འདྲ་བ་སློབ་མའི་རྒྱུད་སྨིན་དགོས། སློབ་མའི་རྒྱུད་མ་སྨིན་པ་དེ་ལ་བྱིན་རླབས་གཞན་མི་འགོ་སྟེ། རྒྱུད་ལོག་ལྟས་ལྷད་ནས་མ་རུངས་པར་གྱུར་སོང་ན་ཆོས་དྲེད་ལོག་ལྟ་ཅན། ཆོས་དྲེད་ཆོས་ཀྱིས་མི་ཐུལ་བས་ན་བྱིན་རླབས་གཞན་མི་འགོ་བར་འགྱུར། ཞེས་གསུངས་སོ། །དེའི་ཕྱིར་ཚུལ་འདི་ལྟ་བུའི་སེམས་སྦྱོང་ལུགས་ནི་ལས་དང་པོ་བ་བློ་སྦྱོང་བའི་ཐབས་ཁྱད་པར་ཅན་ཡིན་པར་ཡང་ཤེས་པར་བྱ་ལ། དེས་སྔོན་འགྲོའི་ཆོས་ཀྱིས་སློབ་མའི་རྒྱུད་ལས་སུ་རུང་བར་བྱ་སྟེ། དངོས་གཞིའི་ཚེ་ཇི་ལྟར་བྱ་དགོས་པ་ནི། རྒྱུད་ཀློང་གསལ་དེ་ཉིད་ལས། རྡོ་རྗེའི་ཚིག་རྐང་བཀྲོལ་ལ་བཤད། །རྒྱུད་དཀྲུགས་པ་རྣམས་བསྡེབས་ལ་བཤད། །ལུང་གཅུས་པ་རྣམས་བརྐྱངས་ལ་བཤད། །ཅེས་གསུངས་ཏེ། རྒྱུད་ཀྱི་རྡོ་རྗེའི་ཚིག་རྐང་དེ་རྒྱུད་རྒྱུད་ཀྱིས་བཤད་པ་དང་། རྒྱུད་འགྲེལ་བས་བཤད་པ་དང་། རྒྱུད་སྒྲུབ་ཐབས་ཀྱིས་བཤད་པ། རྒྱུད་མན་ངག་གིས་བཤད་པ་སྟེ་བཞི་པོའམ། ཡང་ན་གང་རུང་གིས་བཀྲོལ་ལ་བཤད་དགོས། རིགས་ཆད་དང་གཟུ་ལུམ་ཅན་ལ་གསང་བའི་ཆེད་དུ་རྒྱུད་དཀྲུགས་ཡོད་པ་རྣམས་དཀྱུས་སུ་བསྡེབས་པའམ་བསྒྲིགས་ཏེ་བཤད་དགོས། གབ་སྦས་ཀྱི་ལུང་གཅུས་པ་རྣམས་ཚུར་བསྲངས་ཤིང་བརྐྱངས་ལ་ཐད་དྲང་དུ་བཤད། ད་དུང་གབ་པ་མངོན་དུ་ཕྱུང་ནས་བཤད་པ་སོགས་སྐྱོན་བཞི་དང་བྲལ་བའི་སྒོ་ནས་བཤད་དགོས་སོ། །དྲང་པོར་དགོངས་དང་ལྡེམས་པོར་དགོངས། །མ་འོངས་འཇུག་དོན་དགོངས་པ་དང་། །དྲང་དོན་ངེས་དོན་སྙིང་པོའི་དོན། །གཉིས་སུ་མེད་པའི་དོན་ཚིག་རྣམས། །རྒྱུད་ལུང་མན་ངག་ཕྱེ་ལ་བཤད། །ཅེས་དགོངས་པ་ཅན་གྱི་གསུང་དྲང་པོར་དགོངས་པ་དང་། ལྡེམ་པོར་དགོངས་པ་དང་། མ་འོངས་མོས་པས་འཇུག་པའི་དོན་ལ་དགོངས་ནས་གསུངས་པ་དང་། དགོངས་གཞི་དགོས་པ་དངོས་ལ་གནོད་བྱེད་གསུམ་ཚང་བའི་དྲང་དོན་དང་། དེ་ལས་ལྡོག་པ་ངེས་དོན་སྙིང་པོའི་དོན་ཟུང་འཇུག་གཉིས་སུ་མེད་པའི་རྒྱུད་དོན་རྒྱ་ཆེ་གཏིང་ཟབ་ཀྱི་ཚིག་རྣམས། བརྒྱུད་གསུམ་བར་མ་ཆད་པའི་རྒྱུད་དང་། བཀའ་བསྟན་ཚད་མའི་ལུང་དང་། བླ་མ་དམ་པའི་མན་ངག་རྣམས་སོ་སོར་ཕྱེ་ལ་བཤད་དགོས། མུན་ནག་མཛུབ་གཡུག་མ་སོང་བར། །སློབ་བུའི་རྒྱུད་ལ་ཐེབས་པར་གདབ། །དམུས་ལོང་མིག་ཕྱེ་ཇི་བཞིན་དུ། །ལག་ལེན་མྱོང་བས་ཡིད་ཆེས་འཇུག །ཅེས་མུན་ནག་གི་ནང་གི་མཛུབ་གཡུག་གིས་ལག་བརྡ་བྱེད་ན་བརྡ་འཕྲོད་པའི་དོན་མི་འགྲུབ་པས། དེ་ལྟ་བུར་མ་སོང་བར་སློབ་བུའི་རྒྱུད་ལ་གོ་བརྡ་འཕྲོད་ངེས་དང་། ཕན་ཐོགས་ངེས་ཀྱིས་མན་ངག་ཐེབས་པར་གདབ་དགོས། དམུས་ལོང་ལ་དཀར་པོ་སོགས་ཇི་ལྟར་བཤད་རུང་གོ་བརྡ་མི་འཕྲོད་ཀྱང་། མིག་ཕྱེས་ནས་བསྟན་ན་ཇི་བཞིན་དུ་གོ་ཐུབ་པ་བཞིན་དུ། གོ་བརྡ་འཕྲོད་ངེས་ཀྱིས་ལག་ལེན་མྱོང་བའི་སྒོ་ནས་དམར་ཁྲིད་བྱས་ཏེ་ཡིད་ཆེས་བསྐྱེད་དུ་འཇུག བླ་མ་རང་ལ་མྱོང་བ་མེད་ན་ཁ་རྐྱང་པས་བཤད་ན་རྒྱུད་ལ་ཕན་ཐོགས་དཀའ་བས་ན། མྱོང་བའི་སྒོ་ནས་བཤད་པས་ཡིད་ཆེས་བསྐྱེད་དུ་འཇུག ཅེས་གསུངས་པ་ལྟར། ཞེས་པ་འདི་ནས་རྒྱུད་ཀྱི་ལུང་དོན་བཀྲལ་བ་རེད། གསང་སྔགས་རྡོ་རྗེའི་ཚིག་རྐང་རྣམས་ཚིག་བརྒྱུད་ཙམ་མ་ཡིན་པར་དོན་བརྒྱུད་ཀྱི་བྱིན་རླབས་འཕོས་པས་དགོངས་པ་ཀློང་བརྡོལ་དུ་བྱུང་བ་རིག་རྩལ་ཇི་སྙེད་མཁྱེན་པའི་ཤེས་རབ་ཀྱིས་བཀྲལ་དགོས་ཏེ། མདོ་སྡུད་པ་ལས། འཆད་དང་རིག་པ་དག་དང་ལྡན་པར་བརྗོད་པ་དང་། །ཞེས་གསུངས་པ་ལྟར། དགོངས་འགྲེལ་ཐམས་ཅད་ཀྱང་བྱིན་གྱིས་རླབས་པའི་བཀའ་ཡིན་པས་དེ་ལྟར་དུ་བཤད་དགོས། དེ་ཡང་རྒྱུད་གོང་འོག་བསྣོལ་ཏེ་དཀྲུག་པ་རྣམས་དཀྱུས་སུ་བསྡེབས་ཏེ་མུ་ཏིག་བལྟར་ལ་བརྒྱུས་པ་བཞིན་དུ་དཀྱུས་སུ་བསྡེབས་ཏེ་བཤད། ལུང་གཅུས་ཤིང་མི་མངོན་པ་རྣམས་སྦྲུལ་གྱི་མདུད་པ་བརྐྱང་བ་ལྟར་བསྲང་ལ་བཤད། མན་ངག་གབ་པ་ཤུགས་ལ་གོ་དགོས་པ་རྣམས་ཉི་མས་མུན་པ་བསལ་བ་བཞིན་དུ་མངོན་དུ་ཕྱུང་ནས་དྲང་ངེས་ལྡེམ་དགོངས་ཀྱི་ལུང་དོན་རིགས་པས་འབྱེད་པ་ལ། ཆོས་ཐམས་ཅད་ཀྱི་རང་བཞིན་གཏན་ལ་ཕབ་པར་འདོད་པའི་གང་ཟག་གིས། དང་པོ་ཐོས་པའི་ཤེས་རབ་ཀྱི་འཇལ་བྱེད་རིན་ཆེན་ལྡེ་མིག་གི་རྣམ་པར་བཞག་པ་དང། གཞལ་བྱ་དམ་ཆོས་ཀྱི་རྣམ་པར་བཞག་པ་བདེན་གཉིས་ཀྱི་རྣམ་བཞག་མ་ཤེས་ཐབས་མེད་ཡིན་ལ། དེའི་ནང་ནས་སྐབས་འདིར་བཤད་པའི་དྲང་ངེས་ཀྱི་ཐད་ལ་བསམ་ན། མདོ་སྡེ་གང་དག་ལམ་ལ་ཞུགས་པའི་ཕྱིར་དུ་བསྟན་པ་དྲང་དོན། འབྲས་བུ་ལ་འཇུག་པའི་ཕྱིར་དུ་སྟོན་པ་ངེས་དོན་ལ་གོ། མདོར་ན་གཤིས་ཀྱི་གནས་ལུགས་དང་དེ་སྟོན་པའི་མདོ་རྣམས་ངེས་པའི་དོན་དང་དེའི་མདོ་སྡེ། གཤིས་དེ་ལ་འཇུག་པའི་ཐབས་སུ་ཐབས་མང་པོས་སེམས་ཅན་ཀྱི་བློ་འདྲེན་པའི་ཆོས་མ་དག་འཁྲུལ་པ་དང་དེའི་དབྱེ་བ་སོགས་སྟོན་པ་ཐམས་ཅད་དྲང་དོན་དང་དྲང་བའི་ཆོས་ཞེས་བྱ། དྲང་ངེས་ཀྱི་དོན་འདི་ཆོས་རྣམས་ལ་བལྟ་བའི་མེ་ལོང་དང་འབྱེད་པའི་ལྡེའུ་མིག་ལྟ་བུ་ཡིན། ལྡེམ་དགོངས་ཞེས་གསུངས་ན་གདུལ་བྱའི་གང་ཟག་དེ་དོན་གང་ལ་དགའ་ཞིང་མོས་པ་དེ་ལ་བརྟེན་ནས་ཡང་དག་པའི་ལམ་ལ་ཞུགས་པའི་ཕྱིར་དུ། དེ་དང་ཚུལ་མཐུན་ནའང་དོན་མི་མཐུན་པའི་སྒོ་ནས་ཁ་དྲངས་ཤིང་ལམ་ལ་གཞུག་པའི་ཐབས་སྟོན་པ་རེད། འདི་ལ་ཞུགས་པ་ལྡེམ་པོར་དགོངས་པ་དང་། མཚན་ཉིད་ལྡེམ་པོར་དགོངས་པ། བསྒྱུར་བ་ལྡེམ་པོར་དགོངས་པ། གཉེན་པོ་ལྡེམ་པོར་དགོང་པ་སྟེ་རྣམ་པར་བཞིར་གཞུང་རྣམས་ལས་གསུངས་ཡོད། ཞུགས་པ་ལྡེམ་དགོངས་ནི། ཉན་ཐོས་ཀྱི་རིགས་ཅན་ལ་གཟུགས་ཡོད་དོ་ཞེས་གསུངས་པ་ལྟ་བུ་ཁོང་རྣམས་ཀྱིས་གོ་ཚོད་ལ་དོན་ལ་གྲུབ་པར་གོ་བས་འཇུག་པ་ན། འཆད་པ་པོས་སྣང་ཚུལ་རྨི་ལམ་ལྟ་བུ་ལ་དགོངས་ནས་གསུངས་པ་དང་། མཚན་ཉིད་ལྡེམ་དགོངས་ནི། ཆོས་རྣམས་ཀྱི་ངོ་བོ་ཉིད་ཀྱི་གནས་ལུགས་ཤེས་པར་བྱ་བའི་ཕྱིར། ཆོས་ཐམས་ཅད་ཀྱི་ངོ་བོ་ཉིད་མེད་དོ་ཞེས་གསུངས་པ་ལྟ་བུ་སྟེ། ཀུན་བཏགས་གཞན་དབང་ཡོངས་གྲུབ་གསུམ་ངོ་བོ་ཉིད་མེད་པར་གསུམ་བསྟན་པ་ལྟ་བུ་རེད། གཉེན་པོ་ལྡེམ་དགོངས་ནི། འགའ་རེས་ཤཱཀྱ་ཐུབ་པ་སྐུ་བོངས་ཆུང་བ་དང་། སྐུ་ཚེ་ཐུང་བ་ལ་སོགས་པས་སྟོན་པ་གཞན་ལས་ཅུང་ཟད་དམན་པ་ཞིག་གོ་སྙམ་ནས་བརྙས་པ་ལ་དགོངས་ནས། སྟོན་པས་ང་དེའི་ཚེ་དེ་བཞིན་གཤེགས་པ་རྣམ་པ་གཟིགས་སུ་གྱུར་ཏོ། །ཞེས་གསུངས་པ་ལྟ་བུ། དེའི་ཚེ་ཉན་པ་པོས་གཟུགས་སྐུ་མཉམ་པར་གོ་ཞིང་། འཆད་པ་པོས་ཚོགས་རྫོགས་པར་མཉམ་པ་དང་། ཆོས་སྐུ་ཐོབ་པར་མཉམ་པ་དང་། འགྲོ་དོན་མཛད་པར་མཉམ་པ་གསུམ་ལ་དགོངས་ནས་གསུངས་སོ། བསྒྱུར་བ་ལྡེམ་དགོངས་ནི། ཆོས་འདི་དང་འདི་ནི་གོ་སླ་བས་རྩ་ཆེན་ཞིག་ཅི་ཡིན་རྒྱུ་མ་རེད་བསམ་པ་ལ་དགོངས་ནས་དེ་བཟློག་པའི་ཕྱིར། ཤིན་ཏུ་རྟོགས་པར་དཀའ་པའི་ཚུལ་དུ་བསྟན་པ་སྟེ། དཔེར་ན། ཕ་དང་མ་ནི་གསད་བྱ་ཞིང་། །རྒྱལ་པོ་གཙང་སྦྲ་ཅན་གཉིས་དང་། །ཡུལ་འཁོར་སྐོར་བཅས་བཅོམ་པ་ན། །མི་དེ་དག་པ་ཉིད་དུ་འགྱུར། །ཞེས་པའི་ཚིག་གི་དོན་དེ་གཞན་དུ་བསྒྱུར་ཏེ། འཁོར་བ་འདུ་བྱེད་པས་སྲེད་ལེན་གཉིས་ཕ་མ་གཉིས་དང་། ཀུན་གཞི་བག་ཆགས་སྣ་ཚོགས་པའི་རྟེན་དུ་གྱུར་པས་རྒྱལ་པོ་དང་། བྲམ་ཟེ་འཇིག་ལྟ་དང་། མཆོག་འཛིན་གཉིས་གཙང་སྦྲ་ཅན་གཉིས་དང་། ནང་གི་སྐྱེ་མཆེད་གཟུང་འཛིན་དང་བཅས་པ་རྣམ་ཤེས་ཚོགས་བརྒྱད་ནི་ཡུལ་འཁོར་སྐོར་དང་བཅས་པའོ། །དེ་དག་བཅོམ་ན་འཚང་རྒྱ་བ་ཡིན་ཞེས་པ་བསྒྱུར་ཏེ་གསུངས་པ་ལྟ་བུ་རེད། དེ་ལྟ་བུའི་དྲང་ངེས་ལྡེམ་དགོངས་ཀྱི་ལུང་དོན་རིགས་པས་འབྱེད་པ་ལ། སྔ་འགྱུར་བཀའ་བབས་ཀྱི་ཆུ་བོ་བཞི་དང་མདོ་རྒྱུ་སེམས་གསུམ་གྱི་བཤད་པའི་རྒྱུན་མ་ཉམས་པ་ཞེས། སྔ་འགྱུར་དང་ཕྱི་འགྱུར་ཟེར་བ་འདི་འགྱུར་སྔ་ཕྱིའི་ཁྱད་པར་གྱི་ཐོག་ནས་བཏགས་པ་ཡིན་ལ། དེའང་གསང་སྔགས་བོད་ལ་འགྱུར་སྔ་ཕྱིའི་ཁྱད་པར་གྱིས་རེད། བཀའ་ཅོག་ཞང་གསུམ་དང་བེེ་རོ་ཙ་ན་སོགས་ཀྱིས་བསྒྱུར་བ་ལ་སྔ་འགྱུར་དང་། ལོ་ཙཱ་བ་རིན་ཆེན་བཟང་པོ་ཚུན་ཆད་ཀྱིས་བསྒྱུར་བ་ལ་ཕྱི་འགྱུར་ཟེར། དེས་ན་སྔ་འགྱུར་རྙིང་མ་ཕྱི་འགྱུར་གསར་མ་ཞེས་པའི་ཐ་སྙད་ཐོགས་པ་རེད། རྙིང་མའི་ལོ་ཙཱ་རྗེས་མ་ཙནྟྲ་ག་ཏི་དང་། གསར་མའི་ལོ་ཙཱའི་ཐོག་མ་རིན་ཆེན་བཟང་པོ་རེད། སྔ་འགྱུར་བས་སྔ་འགྱུར་དེ་ཆེ་བ་དྲུག་གིས་ཁྱད་པར་དུ་འཕགས་པ་ཡིན་ཞེས་གསུངས་ལ། ཆེ་བ་དྲུག་ནི། སྤྱན་འདྲེན་ཡོན་བདག་གི་ཆེ་བ། བསྒྱུར་ས་གནས་ཀྱི་ཆེ་བ། བསྒྱུར་བྱ་ཆོས་ཀྱི་ཆེ་བ། སྒྱུར་བ་པོ་ལོ་ཙཱའི་ཆེ་བ། སྒྱུར་བྱེད་པཎྜི་ཏའི་ཆེ་བ། ཞུ་རྟེན་མཎྜལ་གྱི་ཆེ་བས་འཕགས་པ་རོང་ཟོམ་ཆོས་ཀྱི་བཟང་པོས་གསལ་བར་གསུངས་ཡོད་པ་བཞིན་རེད། བཀའ་བབ་ཀྱི་ཆུ་བོ་བཞི་ཞེས་པ་ནི། སྤྱིར་བཀའ་བབ་ཞེས་པ་དེ་དམ་པའི་ཆོས་སྒོ་དམིགས་བསལ་དེ་ལ་གཞན་མཚུངས་བྲལ་བའི་ནང་བྱན་ཆུད་དེ། དེ་ཉིད་འཆད་སྤེལ་སྒོམ་སྒྲུབ་ཀྱི་བྱེད་པོར་གྱུར་པ་དང་། དེའི་སྒོ་ནས་ཕྲིན་ལས་དར་ཞིང་རྒྱས་པ་ཞིག་ལ་གོ་དགོས་རྒྱུ་རེད་བསམ། དཔེར་ན། ཆེ་མཆོག་སྒྲུབ་པ་བཀའ་བརྒྱད་ལ་བཀའ་བབ་ཀྱི་རིག་འཛིན་ཆེན་པོ་བརྒྱད་ཡོད་པ་ལ། འཇམ་དཔལ་སྐུ་ཡི་བཀའ་བབ་རིག་འཛིན་འཇམ་དཔལ་གཤེས་གཉེན། པདྨ་གསུང་གི་བཀའ་བབ་སློབ་དཔོན་ནཱ་ག་རྫུ་ན། ཡང་དག་ཐུགས་ཀྱི་བཀའ་བབ་སློབ་དཔོན་ཧཱུཾ་ཆེན་ཀཱ་ར། བདུད་རྩི་ཡོན་ཏན་གྱི་བཀའ་བབ་དྲི་མེད་བཤེས་གཉེན། ཕུར་པ་ཕྲིན་ལས་ཀྱི་བཀའ་བབ་པྲ་བྷ་ཧསྟི། རྦོད་གཏོང་མ་མོའི་བཀའ་བབ་དྷ་ན་སཾ་ཀྲི་ཏ། འཇིག་རྟེན་མཆོད་བསྟོད་ཀྱི་བཀའ་བབ་གུ་ཧྱ་ཙནྟྲ། དམོད་པ་དྲག་སྔགས་ཀྱི་བཀའ་བབ་ཤནྟིང་གརྦྷ་རྣམས་ཡོད་པ་བཞིན། འདི་ན་བཀའ་བབ་ཀྱི་ཆུ་བོ་དམིགས་ཀྱིས་བཀར་འོང་དུས། ཞལ་ནས་གསུངས་པའི་བཀའ་མ་དང་། རྗེས་སུ་གནང་བའི་གཏེར་མ། བྱིན་གྱིས་རླབས་པའི་དག་སྣང་མ། དེའང་ཟབ་རྒྱས་གཉིས་ཀྱི་ཐོག་ནས་རྒྱ་ཆེ་བ་བཀའ་དང་། ཟབ་པ་གཏེར་གྱི་ཕྱོགས་སུ་བརྩི་རྒྱུ་རེད། བརྒྱུད་ཚུལ་གྱི་དབང་གིས་རིང་བརྒྱུད་བཀའ་མ་དང་ཉེ་བརྒྱུད་གཏེར་མ། ཤིན་ཏུ་ཉེ་བར་དག་སྣང་གི་ཆོས་སྐོར་ཞེས་གསུངས་སྲོལ་ཡོད། མདོར་ན་སྔ་འགྱུར་བཀའ་གཏེར་གཉིས་ཞེས་སུ་གྲགས་པ་ཡིན་ན་དེའི་ནང་གི་གཏེར་མ་ལའང་། ས་གཏེར་དང་། ཡང་གཏེར། དགོངས་གཏེར་སོགས་དང་། ཁྱད་པར་སྙན་བརྒྱུད། དག་སྣང་། རྗེས་དྲན་ཏེ་དེ་ཐམས་ཅད་ལ་སྔ་འགྱུར་བཀའ་གཏེར་དག་སྣང་གི་ཆོས་ཟེར་བ་རེད། དེ་དག་གི་མཚན་གཞི་བཞག་ན། མདོ་སྒྱུ་སེམས་གསུམ་ལྟ་བུ་བཀའ་མ་དང་། གཏེར་མ་ནི་བླ་མ་བསྟན་གཉིས་སྐོར་གསུམ་ལྟ་བུ་ས་གཏེར། རྩ་གསུམ་དྲིལ་སྒྲུབ་ལྟ་བུ་ཡང་གཏེར། ཕག་མོའི་སྙིང་ཐིག་ལྟ་བུ་དགོངས་གཏེར། ཕུར་པ་དུང་ཐིག་ལྟ་བུ་སྙན་བརྒྱུད། སྐུ་གསུམ་རིགས་འདུས་ལྟ་བུ་དག་སྣང་། ལྕེ་བཙུན་སྙིང་ཐིག་ལྟ་བུ་རྗེས་དྲན་ཏེ། དེ་ལྟ་བུའི་རིགས་ཐམས་ཅད་ཆུ་བོ་བཞིའི་ཁོངས་སུ་བསྡུ་ན། གོང་དུ་ཞུས་པ་ལྟར་དཀྱུས་བཤད་གཞུང་གི་ཆུ་བོ་འགྲེལ་ཊཱིཀ་སྟོང་ཐུན་དང་བཅས་པ། སྨིན་བྱེད་དབང་བཞིའི་ཆུ་བོ་བསྐུར་ཐབས་ངོ་སྤྲོད་དང་བཅས་པ། སྙན་བརྒྱུད་གདམས་པའི་ཆུ་བོ་གནད་ཡིག་དམར་ཁྲིད་དང་བཅས་པ། ཕྱག་བཞེས་ཕྲིན་སྒྲུབ་གྱི་ཆུ་བོ་བསྟན་སྲུང་དྲག་སྔགས་དང་བཅས་པ་ལ་སྔ་འགྱུར་བཀའ་བབ་ཀྱི་ཆུ་བོ་ཆེན་པོ་བཞི་ཞེས་གསུངས། དེ་ལྟ་བུའི་སྔ་འགྱུར་བཀའ་བབ་ཀྱི་ཆུ་བོ་བཞི་དང་མདོ་སྒྱུ་སེམས་གསུམ་གྱི་བཤད་པའི་རྒྱུན་མ་ཉམས་པར་ཀུན་མཁྱེན་ངག་གི་དབང་པོའི་མན་ངག་གི་བསྟན་བཅོས་རྒྱ་མཚོ་ལྟ་བུ་ལས་བཤད་དགོས་པ་ཉིད་དོ་ཞེས་གསུངས་པ་རེད། བཀའ་བབ་ཀྱི་ཆུ་བོ་བཞིའི་ནང་གསེས་ཀྱི་མདོ་སྒྱུ་སེམས་གསུམ་ཏེ་མདོ་དགོངས་པ་འདུས་པ། རྒྱུད་སྒྱུ་འཕྲུལ་དྲྭ་བ། སེམས་ཕྱོགས་རྫོགས་པ་ཆེན་པོ་སྟེ་མདོ་སྒྱུ་སེམས་གསུམ་ཡོད་པ་ལས། ནང་རྒྱུད་ཡོ་ག་རྣམ་གསུམ་ལ་བསམ་བློ་གཏོང་ན། ཕྱི་བསྐྱེད་པ་མ་ཧཱ་ཡོ་ག་ལ་རྒྱུད་སྡེ་དང་། སྒྲུབ་སྡེ་གཉིས་སུ་བཤད་ཡོད་པ་ལས། རྒྱུད་སྡེ་འདྲ་ཡིན་ན་རྒྱལ་སྲས་སེམས་དཔས་རིགས་གསུམ་སེམས་དཔའ་ལ་བཤད། རིགས་གསུམ་སེམས་དཔས་ལྷ་ཀླུ་གནོད་བྱིན་ལ་བཤད། སོ་སོའི་འཁོར་འབུམ་སྡེ་དང་བཅས་པ་གྲོལ་བའི་སར་བཞག་པ་རེད། སླར་ཡང་གསང་བདག་གིས་གནས་རི་བོ་མ་ལ་ཡའི་རྩེར་མི་དང་མི་མིན་གྱི་དྲ་མ་ལྔ་ལ་བཤད་པས། སྲིན་པོ་བློ་གྲོས་ཐབས་ལྡན་གྱིས་རིན་པོ་ཆེའི་གླེགས་བམ་ལ་བཀོད་ནས་དེ་ནམ་མཁའི་ཀློང་དུ་རྒྱས་བཏབ་པ་ཉིད་རྒྱལ་པོ་ཛའི་ཁང་ཐོག་ཏུ་བབ་ནས་དར་བ་རེད། སྒྲུབ་སྡེ་ནི་འོག་མིན་ན་ཀུན་བཟང་ཆེ་མཆོག་ཧེ་རུ་ཀས་ཆོས་ཉིད་ཀྱིས་རང་སྒྲས་གསུངས་པ་ཉིད་རིག་འཛིན་རྡོ་རྗེ་ཆོས་ཀྱིས་བསྡུས་ནས་གླེགས་བམ་དུ་བཀོད་པ་དེ། མཁའ་འགྲོ་མ་ལས་ཀྱི་དབང་མོ་ཆེས་སྤྱི་རྒྱུད་དང་། སྒོས་རྒྱུད་ཚང་མ་རིན་པོ་ཆེའི་སྒྲོམ་བུར་བཅུག་ནས་མཆོད་རྟེན་ཆེན་པོ་བདེ་བྱེད་བརྩེགས་པར་གཏེར་དུ་སྦས་པ་རེད། དུས་ལ་བབ་པའི་ཚེ་བྱེ་བྲག་གིས་སྒྲོམ་བུ་རིག་འཛིན་བརྒྱད་དང་། སྤྱི་རྒྱུད་རིན་ཆེན་ཀུན་འདུས་ཀྱི་སྒྲོམ་བུ་དེ་སློབ་དཔོན་ཆེན་པོར་གཏད་པ་རེད། དེ་དག་མ་ཧཱ་ཡོ་གའི་རྒྱུད་སྡེ་དང་སྒྲུབ་སྡེ་བཤད་པ་རེད། ནང་ལུང་ཨ་ནུ་ཡོ་ག་ནི་དམ་པའི་རིགས་ཅན་དྲ་མ་ལྔས་ཕྱོགས་བཅུའི་བདེ་བར་གཤེགས་པ་ཡིད་ལ་བྱས་ཏེ་གདུང་ཚིག་ཉེར་གསུམ་བཏོན་པའི་ཚེ། དུས་གསུམ་བདེ་གཤེགས་ཐམས་ཅད་ཀྱིས་ཐུགས་རྒྱུད་བསྐུལ་བས་གསང་བའི་བདག་པོ་དངོས་སུ་བྱོན་ནས་གསུངས་པས་རིམ་པར་དར་བ་རེད། གསང་བ་མན་ངག་ཨ་ཏི་ཡོ་ག་ནི། སུམ་ཅུ་རྩ་གསུམ་གྱི་ལྷ་ཡུལ་དུ་ལྷ་དེ་བ་བཟང་སྐྱོང་གི་བུ་ལྷ་བུ་སེམས་ལྷག་ཅན་ལ། རྡོ་རྗེ་སེམས་དཔས་དབང་བསྐུར་མན་ངག་བྱིན། གནས་དེ་ནས་འཕོས་ཏེ་འཛམ་བུ་གླིང་དུ་རིག་འཛིན་དགའ་རབ་རྡོ་རྗེར་འཁྲུངས་པ་ལ་གསང་བདག་དཔའ་བོས་རྒྱལ་ཐབས་སྤྱི་བླུགས་ཀྱི་དབང་བསྐུར། ཀློང་ཆེན་ཉི་ཁྲི་སོགས་རྒྱུད་གཏད་དེ་རྒྱུད་ལུང་མན་ངག་ཀུན་ཀྱི་བདག་པོར་མངའ་གསོལ། དེ་ནས་ཉི་མ་སྣང་བྱེད་མི་ལོ་ཉི་ཤུ་ཐམ་པར་བསམ་གཏན་ལ་བཞུགས། སྐུ་ཉི་གཞོན་ལྟ་བུར་གྱུར་ཏེ་ནམ་མཁར་བྱ་བྱེད་མཛད་དུས། རྫོགས་པ་ཆེན་པོ་རྒྱུད་འབུམ་ཕྲག་དྲུག་ཅུ་རྩ་བཞི་གདོད་ནས་ཐུགས་ཐོག་ཏུ་ཡོད་པར་ཞལ་འདོན་མཛད་པ་དེ་ཉིད། མཁའ་འགྲོ་མས་བསྡུས་ཏེ་ཡི་གེར་བཀོད་ནས་འཇམ་དཔལ་བཤེས་གཉེན་ལ་བརྒྱུད། དེས་སེམས་ཀློང་མན་ངག་གསུམ་དུ་ཕྱེས་ནས་ཤྲཱི་སེང་ཧ་དང་སློབ་དཔོན་ཀླུ་སྒྲུབ་སོགས་ལ་བརྒྱུད། ཤྲཱི་སེང་ཧས་མན་ངག་གི་སྡེ་ལ་ཕྱི་ནང་གསང་བ་ཡང་གསང་བླ་མེད་ཀྱི་སྐོར་བཞིར་ཕྱེས་ནས་པད་འབྱུང་དང་། བི་མ་ལ། ཛྙཱ་ན་སུ་ཏྲ་སོགས་ལ་བརྒྱུད་དེ་རིམ་བཞིན་བོད་ལ་དར་བ་རེད། དེ་སྙིང་ཐིག་བཀའ་མ་ལྟར་བཤད་པ་རེད། གཏེར་མའི་དབང་དུ་འཆད་ན། ཤྲཱི་སེང་ཧས་ཨོ་རྒྱན་ཆེན་པོར་དང་། ཨོ་རྒྱན་ཆེན་པོས་དམ་ཆོས་མི་ནུབ་པ་དང་། གདམས་ངག་མི་འཆུག་པ། བྱིན་རླབས་མི་ཡལ་བ། བརྒྱུད་ཐག་ཉེ་བ་སྟེ་བཞི་ལ་དགོངས་ཏེ། རྒྱུད་ལས་སྒྲུབ་ཐབས་དང་། སྒྲུབ་ཐབས་ལས་མན་ངག མན་ངག་ལས་ལག་ལེན་ལ་གདབ་སྟེ་མ་འོངས་པ་ན་འདོན་པར་དབང་བའི་ལས་ཅན་སོ་སོ་ལ་སྨོན་ལམ་དབང་བསྐུར། གཏད་རྒྱ་ལུང་བསྟན་དང་བཅས་པར་གནང་ནས་མཚོན་བྱ་དོན་གྱི་མན་ངག་སྐུ་གསུམ་རང་བྱུང་གི་སྒྲོམ་བུ། མཚོན་བྱེད་ཚིག་གི་གཏད་རྒྱ་སྐུ་གསུམ་ཐུགས་ཀྱི་རྟེན། མྱོང་གྲོལ་དམ་རྫས་དང་བཅས་པ་གཏེར་གནས་འདྲ་མི་འདྲར་འབྱུང་ངེས་རྒྱ་ཡི་བདག་ཉིད་སྦས་པ་དེ། འགྲོ་དོན་དུས་ལ་བབ་པ་ན་སྨོན་ལམ་ལས་ཅན་གྱི་སྐྱེས་བུ་རྣམས་ཀྱིས་རིམ་པར་གཏེར་ནས་བླངས་ཏེ་སྤེལ་བ་དེ་ལ། སྤྱིར་གཏེར་རིགས་བཅོ་བརྒྱད་ཡོད་པ་ལས། དེའི་ནང་མཆོག་ཏུ་གྱུར་པ་ཟབ་མོ་དགོངས་པའི་གཏེར་ཡིན། དངོས་ཉམས་རྨི་ལམ་གསུམ་གྱིས་རབ་འབྲིང་ཐ་གསུམ་གྱི་ཚུལ་དུ་འབྱུང་རྒྱུ་ཞིག་ཡིན་ན། ང་ཚོའི་བོད་གངས་ལྡན་ས་ལའི་ལྗོངས་ཀྱི་དགའ་རབ་དཔའ་བོ་གཉིས་པ་གསང་ཆེན་བསྟན་པའི་ཤིང་རྟ་བ་ཆེན་པོ་རྒྱལ་བ་ཀློང་ཆེན་རབ་འབྱམས་པ་ནི། རྒྱལ་བ་ཐམས་ཅད་ཀྱི་ཐུགས་མཛོད་གསང་བའི་གཏེར་ལ་མངའ་བརྙེས། མཁྱེན་རབ་ཡེ་ཤེས་ཀྱི་རྩལ་ཆེན་རྫོགས་པ་ཡིན་ན། འདིར་ཀུན་མཁྱེན་ངག་གི་དབང་པོའི་མན་ངག་གི་བསྟན་བཅོས་རྒྱ་མཚོ་ལྟ་བུ་ཞེས་གསུངས་པའི་མཛོད་བདུན་དང་། ངལ་གསོ་སྐོར་གསུམ། ཤིང་རྟ་རྣམ་གསུམ་ལ་སོགས་པ་ཟབ་ཅིང་རྒྱ་ཆེ་བས་རྒྱ་མཚོ་ལ་དཔེར་བླངས་ནས་གསུངས་པས། རྒྱ་མཚོ་ལྟ་བུ་རབ་ཏུ་མང་ལ་ཟབ་པས་བཤད་དགོས་པ་ཉིད་དོ་ཞེས། གང་ཟག་དབང་པོ་ཤིན་ཏུ་རྣོན་པོ་སོ་སོ་རང་རིག་པའི་ཡེ་ཤེས་མཁྱེན་རབ་ཡེ་ཤེས་ཀྱི་རྩལ་དང་ལྡན་པ་རྒྱ་ཆེ་བ་པཎྜི་ཏའི་ལུགས་ཀྱི་སྦྱོང་བར་བྱེད་བསམ་པ་ཞིག་ཡིན་ན་དེ་ཚོར་ལྟོས་ཞེས་ཞལ་འཕངས་པ་རེད། དེ་ལྟར་སྦྱོར་དངོས་རྗེས་གསུམ་གྱི་སྒོ་ནས་ལམ་གྱི་རིམ་པ་ཇི་ལྟ་བུ་འཆད་པ་ནའང་། ཞེས་གོང་དུ་བཤད་པ་དེ་ལྟར་ཆོས་འཆད་པའི་སྦྱོར་དངོས་རྗེས་གསུམ་གདམས་པ་དེ་ཉིད་ལག་ལེན་ལ་ཐེབས་པའི་སྒོ་ནས་སྐྱེས་བུ་གསུམ་གྱི་ལམ་གྱི་རིམ་པ་གང་དང་ཅི་ལྟ་བུ་འཆད་པའི་སྐབས་ཡིན་ནའང་། ཆོས་མཚམས་ལེའུའམ་ཐུན་གྱི་མཚམས་སོ་སོར་ཞེས་ཆོས་མཚམས་ལེ་ཚན་དུ་ཕྱེ་བའི་ལེའུའམ་ཞེས། མ་གཞི་ལེའུ་གཟུང་བདེ་ཞིང་གོ་རིམ་མི་འཁྲུགས་པའི་ཆེད་དུ་སྦྱར་བའི་དགོས་པ་དང་ལྡན་པ་ཞིག་སྟེ། སངས་རྒྱས་བཅོམ་ལྡན་འདས་ཀྱིས་གསུངས་པའི་མདོ་རྣམས་ལ་བམ་པོ་དང་ལེའུ་ཕྱེ་ཡོད། བམ་པོ་ཁ་ཐུར་བསྟན་འགོར་སྦྱར་བ་དང་། ལེའུ་ཁ་ཡར་བསྟན་མཇུག་ཏུ་སྦྱར་བ། མདོར་ན་གཟུང་བདེ་ཞིང་གོ་རིམ་མི་འཁྲུགས་པའི་ཆེད་དུ་སྦྱར་བ་ཞིག་རེད། བསྟན་བཅོས་ཀྱི་ནང་དུ་ལེའུ་དང་། རབ་བྱེད། སྐབས་དང་པོ་དང་གཉིས་པ་སོགས་གསུང་རྒྱུ་དང་། ཀློང་ཆེན་པའི་ཐེག་མཆོག་མཛོད་ལ་རིམ་ཁང་ཕྱེས་ནས། རིམ་ཁང་དང་པོ་དང་གཉིས་པ་སོགས་བསྟན་པ་དང་། ཚིག་དོན་མཛོད་ན་རྡོ་རྗེའི་གནས་བཅུ་གཅིག་གིས་བསྟན་པ་རེད། དེ་ལྟ་བུ་ཆོས་ཁྲིད་ཀྱི་མཚམས་དང་། ལེའུའི་མཚམས་དང་། སྤྱི་དོན་ས་བཅད་ཀྱི་མཚམས་ཏེ་དེ་ལྟ་བུའི་མཚམས་སོ་སོར་ཇི་ལྟར་བཤད་པའི་ཚིག་ཐམས་ཅད་དོན་ཐོག་ཏུ་ཧྲིལ་གྱིས་བསྡུས་ལ། ཞེས་ཚིག་གིས་ལོ་མས་དོན་གྱི་སྙིང་པོ་འབྲས་བུ་མི་སྒྲིབ་པར་དོན་གྱི་གནད་ཐམས་ཅད་ཧྲིལ་གྱིས་བསྡུས་ལ་བསྡུ་མཁས་པར་བྱ་སྟེ། ཚིག་བརྒྱ་བཤད་ཀྱི་སྙིང་པོ། འོ་མ་བརྒྱ་སྲུབ་ཀྱི་མར་ལོ་ཞེས་ཟེར་བ་ལྟར། བསྒོམ་བྱའི་དམིགས་གནད་ངོ་མའི་ཐོག་ཏུ་དྲིལ་ནས། དེའང་སློབ་བུའི་རྒྱུད་དང་བསྟུན་ཏེ་དེའི་རྒྱུད་ལ་འདྲེས་ངེས་པར་བྱ། ཆོས་འཆད་པ་པོ་སློབ་དཔོན་དེ་ཉིད་ཀྱིས་ཆོས་འཆད་པའི་སྐབས་ཅི་རིགས་པར་གང་ལ་གང་འོས་སུ་གྲུབ་ཐོབ་དམ་པ་གོང་མའི་ངོ་མཚར་བའི་རྣམ་པར་ཐར་པ་དང་། དགོས་པ་མེད་པར་བྱ་རོག་སོ་བརྟག་གི་བསྟན་བཅོས་ལྟ་བུ་དང་། འབྲེལ་བ་མེད་པར་འདྲེ་ཤར་སྒོར་བཞག་ནས་གླུད་ནུབ་སྒོར་འཕངས་པ་དང་འདྲ་བ། དགོས་འབྲེལ་གཉིས་ཀ་མེད་པར་ཕྱི་རོལ་པའི་གཞུང་བྲམ་ཟེའི་རིག་བྱེད་ལྟ་བུ་རེད། དེ་ལྟ་བུའི་ཚུལ་མ་ཡིན་པར་དགོས་པ་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་ནུས་པ་དང་། འབྲེལ་བ་ཡང་དག་པར་རྫོགས་པའི་སངས་རྒྱས་ཀྱི་བཀའ་དང་སྐབས་དོན་ལ་འབྲེལ་བ། དེ་ལྟ་བུའི་དགོས་འབྲེལ་གཉིས་དང་ལྡན་པའི་སྒྲུང་རྒྱུད་དམ་གཏམ་རྒྱུད་ངོ་མཚར་བ་བཤད་པས་སློབ་མ་གཉིད་དང་ཉན་མི་མོས་པའི་བྱིང་བ་བསང་ཞིང་། མཚམས་རེར་སློབ་བུའི་སྐྱོན་མཚང་ངན་པ་ཐད་ལ་འདོན་པ། དཔེར་ན་ཀློང་ཆེན་པའི་གསུང་ལས། རྒྱུ་ལ་ཁམས་འདུས་མེ་ཏོག་གི་ཕྲེང་ལྡན། རྐྱེན་ལ་ཁམས་འདུས་ཀ་ཁ་སུམ་ཅུ་ལྟ་བུས་སློབ་མའི་སྐྱོན་མཚང་ཐད་ཀར་འདོན་པ་དང་། དཔེར་ན། ཏེ་ལོ་པས་ན་རོ་ལ་དཀའ་སྤྱད་ཀྱིས་བྱིན་རླབས་འཕོས་པ་སོགས་དང་འདྲ་བ། མདོར་ན་ཐབས་སྣ་ཚོགས་ཀྱིས་སློབ་མའི་རྒྱུད་འདུལ་བའི་མན་ངག་ལ་མཁས་པར་བྱས་པས་སཙྪའི་སྐོས་ཕོར་ལས་སཙྪ་འབྱུང་བ་བཞིན་དུ་བླ་མའི་ཐུགས་རྗེ་དང་མཁྱེན་གཉིས་ཀྱི་ཡེ་ཤེས་ཉམས་རྟོགས། བྱིན་རླབས་ཐམས་ཅད་སློབ་མའི་རྒྱུད་ལ་དབྱེར་མེད་དུ་བསྲེ་ནུས་པ་ཡིན་ནོ། །དཔེར་ན། ཏེ་ལོ་པས་ན་རོ་ལ་ཉ་རྒྱུ་ནང་ཁྲོལ་དང་བཅས་པས་འགྲམ་ལྕག་ནམ་ལངས་པར་འདྲ་ཞིག་བརྒྱབ་པས་རྟོགས་པ་ངོ་སྤྲད་པ་དང་། དཔལ་སྤྲུལ་ཚང་གི་སྒོ་ཁར་མདོ་མཁྱེན་བརྩེ་བྱོན་ཡོང་ནས། དཔལ་དགེ་ཁྱི་རྒན། བུ་བཟང་ཡིན་ན་སྒོ་ལ་བུད་གསུངས་པ་ན། སྒོ་ལ་བུད་དུས་ཐོང་རྩ་ནས་བཟུང་ཏེ་ས་ལ་བསྒྱེལ། བླ་མའི་ཞལ་ལ་ཆང་དྲི་བྲོ་བས་དམ་པའི་སྐྱེས་བུ་འདི་འདྲ་བའང་ཆང་གིས་འདི་འདྲ་གོས་འདུག་འདྲ་བསམ་པ་དང་། དེ་དགོས་པ་དང་བཅས་པ་ཞིག་ཡིན་རྒྱུ་རེད་བསམ་ནས་མཉམ་པར་བཞག་པས། སྔར་འཇིགས་མེད་རྒྱལ་བའི་མྱུ་གུས་ནམས་ལངས་པ་དང་འདྲ་བར་བྱས་པ་དེ། མདོ་མཁྱེན་བརྩེས་ཉི་མ་ཤར་བ་དང་འདྲ་བར་བྱེད་བྱུང་གསུངས་པས། རྟོགས་པ་རྒྱུད་ལ་འཕོས་པ་ལྟ་བུའི་སློབ་མའི་རྒྱུད་ལ་བླ་མའི་ཐུགས་རྒྱུད་བསྲེ་ནུས་པ་ཡིན་ནོ། །ཁྱད་པར་དུ་ཆོས་ཁྲིད་དང་ཉམས་ལེན་གྱི་ཐུན་སོ་སོའི་འགོར་སེམས་བསྐྱེད་དང་། མཇུག་ཏུ་དམིགས་པ་མེད་པའི་བསྔོ་སྨོན་གྱིས་མཚམས་སྦྱོར་བ་སྟེ་དམ་པ་གསུམ་གྱི་རྩིས་ཟིན་པར་བྱེད་པ་ཡང་། སྤྱིར་ནང་པ་སངས་རྒྱས་པ་དང་ཁྱད་པར་དུ་ཐེག་པ་ཆེན་པོའི་མེད་དུ་མི་རུང་བའི་ཁྱད་ཆོས་ཡིན་ལ། དེ་སྐད་དུ་ཀློང་གསལ་ལས། ཆོས་མཚམས་ལེའུའི་ཐུན་གྱི་དུས། །ཡས་དྲིལ་མས་དྲིལ་དོན་ཀུན་བསྡུ། །བསྒོམ་བྱའི་དམིགས་པ་བརྟན་དུ་གཞུག །བསམ་བྱའི་གོ་བ་ལེན་དུ་གཞུག །ཅེས་གོང་གི་དོན་དེ་ལུང་གིས་ངེས་པར་བསྐྱེད་དུ་འཇུག་པ་རེད། ཆོས་ཁྲིད་བཤད་སྐབས་སམ། ཡང་ན་གཞུང་གི་སྤྱི་དོན་དང་མཚམས་དང་ལེའུ་ལྟ་བུ་ཐུན་གྱི་མཚམས་སུ་ཐུག་དུས་སུ་སྤྱི་དོན་ས་བཅད་ཀྱི་ཆིངས་སུ་དྲིལ་བ་ཡས་ནས་དྲིལ་བ་དང་། མས་ནས་དྲིལ་བ་སྟེ་བཤད་བྱའི་གཞུང་དོན་གོ་རིམ་མ་ནོར་བ་འགག་དོན་སྙིང་པོའི་གནད་འགག་ཚུར་བསྡུས་ནས་ངེས་པར་བསྐྱེད་པའི་ཐོག་ནས། ཚིག་གི་སྤྲོས་པས་དོན་གྱི་སྙིང་པོ་མི་གོ་བར་མི་བྱེད་པར་བསྒོམ་བྱའི་དམིགས་པའི་གཙོ་བོ་དེ་ལ་བརྟན་པར་བྱེད་དུ་གཞུག་དགོས་པ་དང་། ཡར་བཤད་མར་བཤད་སྙིང་པོ་གང་ཡིན་མི་གོ་བ་ཞིག་བྱེད་ཉན་པ་མ་རེད། ཐོས་པ་རྐྱང་པའི་གོ་ཡུལ་བཤད་ཡམ་རྐྱང་པར་མ་སོང་བར་ཁ་བཤད་ལག་ལེན་མེད་པ་ཞིག་མི་བྱེད་པར་བསམ་བྱའི་གོ་བ་དེ་དོན་གྱི་སྟེང་ན་ལེན་དུ་གཞུག་གོ། །སྐབས་སུ་སྒྲུང་རྒྱུད་ལ་སོགས་པ། །ངོ་མཚར་གཏམ་གྱིས་བྱིང་བ་བསྲིང་། །སློབ་བུའི་སྐྱོན་མཚང་འདོན་པའི་ཕྱིར། །སྔོན་གྱི་སྒྲུང་རྒྱུད་ལྡེའུ་ཆུང་བརྡེག །ཅེས་ཆོས་ཚན་རིང་དྲགས་ནས་སློབ་མ་བྱིང་རྨུག་འཐིབ་པའམ། ཡང་ན་གོ་དཀའ་བས་སྒྱིད་ལུག་པའི་ཚེ་མི་གོ་བ་ན་ངལ་བ་བསོ་དང་། སྤྲོ་བ་བསྐྱེད་པའི་ཆེད་དུ་སྒྲུང་རྒྱུད་ལེགས་པ་སྙན་ཞིང་ངོ་མཚར་བའི་གཏམ་གྱིས་སློབ་བུའི་བྱིང་བ་བསྲིང་བའམ་སངས་བར་བྱ་བ་དང་སྤྲོ་བར་བསྐྱེད་དགོས། སྐབས་དང་སྐབས་སུ་དགོས་པ་ལྡན་དུས། གདམས་པའི་མཆོག་མཚང་ལ་རྒོལ་བ་ཡིན། ཞེས་པ་ལྟར་སློབ་བུའི་སྐྱོན་མཚང་དྲུངས་ནས་འདོན་པའི་ཕྱིར་དུ། དཔལ་སྤྲུལ་ཚང་གིས། སྤྱོད་ལམ་ཐམས་ཅད་མ་རབས་ལད་མོ། །སྨྲ་བརྗོད་ཐམས་ཅད་རྫུན་གྱི་འཁོར་ལོ། །ལོངས་སྤྱོད་ཐམས་ཅད་སྡིག་པའི་གཡོ་བཀོལ། །སྙིགས་མའི་རང་མཚང་འདི་འདྲ་ལགས་སོ། །ཞེས་སྙིགས་མའི་རང་མཚང་འདོན་པ་དང་། དམ་སྡོམ་འཆོར་ལ་གྲུབ་ཐོབ་སྤྱོད་པ་ཟེར། །ཆགས་སྡང་བྱས་ལ་རྟེན་འབྲེལ་མཆིས་སོ་སྐད། །བླུན་པོ་འགའ་ཞིག་དེ་ཉིད་བདེན་པར་རྩི། །ངན་སྤྱོད་མཁན་རྣམས་གཅིག་རྒྱབ་གཅིག་གིས་འཚོ། །ཞེས་དུས་ངན་གྱི་རང་རྟགས་ཐད་ལ་འདོན་པ་ལྟར་དང་། སྔོན་གྱི་སྒྲུང་རྒྱུད་ལྡེའུ་ཞེས་སྒྲུང་རྒྱུད་གོང་དུ་བཤད་པ་དེ་དང་། ལྡེའུ་ཞེས་པ་བརྡ་རྙིང་ཞིག་རེད། བོན་དང་ལྡེའུ་ཞེས་སྟོན་མོ་ལ་གོ་རྒྱུའང་ཡོད། སྟོན་མོའི་སྐབས་སུ་གཏམ་གྱི་རྒྱས་བཤད་དང་པོར་སྲིད་པ་ཆགས་རབས། མགོ་ནག་མིའི་བྱུང་རབས། རིགས་དང་རུས་ཀྱི་མཆེད་ཚུལ་དེ་ཚོ་བཤད་པའི་ལོ་རྒྱུས་ཀྱི་དག་ཐུབ་པའི་གཏམ་གྱི་སྦྱོར་བས་བློ་སྣ་དགེ་བ་ལ་བསྐུལ་ནུས་པའི་ལྟར་སྣང་སྙན་དང་ངོ་མཚར་བ་དེ་ལྟ་བུ་མཚམས་སུ་ཤོད་གསུངས་པ་རེད། ལྡེའུ་ཆུང་ཞེས་ངོ་མཚར་བའི་གཏམ་ཐུང་ཟེར་ནི་ཨེ་ཡིན་ན། རྗེས་སུ་བསྔོ་བ་སྨོན་ལམ་གདབ། །ཀུན་ལ་བྱང་སེམས་བརྩེ་ལྡན་གཅེས། །ཞེས་དམ་པའི་ཆོས་འཆད་ཉན་གྱི་སྐབས་རྗེས་སུ་དགེ་བ་སེམས་ཅན་ལ་བསྔོ་བ་དང་། དེ་དེ་བཞིན་དུ་འགྲུབ་པའི་སྨོན་ལམ་གདབ། བསྔོ་བ་ལ་དགེ་བ་སྔོན་སོང་དེ་བསྔོ་བ་དང་། སྨོན་ལམ་ལ་དེ་ལྟར་མ་ངེས་པ་ནི་བསྔོ་བ་དང་སྨོན་ལམ་ཀྱི་ཁྱད་པར་གསུངས་ཡོད་པ་བཞིན་ནོ། །སྦྱོར་དངོས་རྗེས་གསུམ་ཀུན་ལ་བྱང་ཆུབ་སེམས་ཀྱིས་རྩིས་ཟིན་ཞིང་། བརྩེ་བ་སྙིང་རྗེ་ཆེན་པོ་དང་སྟོང་ཉིད་རྟོགས་པའི་ལྟ་བ་གཉིས་ཟུང་དུ་འབྲེལ་བའི་སྟོང་ཉིད་སྙིང་རྗེའི་སྙིང་པོ་ཅན་དེ་ཉིད་དང་ལྡན་པར་ཤིན་ཏུ་གཅེས། ཆོས་འཆད་པ་པོ་དེ་དམ་པའི་སྐྱེས་བུ་མཆོག་ཏུ་གྱུར་པ་ཞིག་ཡིན་ན། དམ་པའི་ཆོས་ཀྱི་སྒྲ་དབྱངས་འཇིག་རྟེན་ལ་བསྒྲག་དུས་གདུལ་བྱའི་སེམས་ཅན་གྱིས་ཐོས་པས་མ་རིག་པའི་མུན་པ་སངས། ཆོས་སྒོ་མང་པོ་དང་གཟུངས་དང་སྤོབས་པ་དང་ཏིང་ངེ་འཛིན་མང་པོ་ཐོབ་ནུས་པ་དེ་ལྟར་བཤད་པ་རེད། བཤད་པའི་ཚེ་ཆོས་ཀྱི་ཚིག་གསལ་དག་སྙན་པའི་སྒོ་ནས་སྤྲོ་དང་སྡུད་པའི་རིམ་པ་ཇི་ལྟར་དགོས་ན་དེ་ལྟར་བཤད་པར་བྱ། མདོར་ན་གདུལ་བྱས་གོ་སླ་བའི་རིམ་པའི་ཐོག་ནས་རྒྱ་ཆེར་བཤད་དེ་ཐེ་ཚོམ་སེལ་དགོས། ཆོས་འཆད་པའི་སྐབས་སུ་སྐྱོན་བརྡ་མ་འཕྲོད་པ་ན་གེ་ནོག་གེ་ཚིག་དོན་ནོར་བ་དང་། ཆད་ལྷག་ཤོར་བ་སོགས་དང་། དམ་བཅའ་སྔོན་མ་དང་ཁས་བླངས་འགལ་བ་དང་། རང་ཚིག་སྔ་ཕྱི་འགལ་བ་རང་གིས་རང་ལ་སུན་འབྱིན་བྱེད་པ་དང་། གདུལ་བྱའི་བློ་དང་མི་འཚམ་པ་དེ་འདྲ་མི་བཤད་པར། བརྡ་གསལ་བ། རྣ་བར་སྙན་པ། ཚིག་དོན་བཀྲོལ་མཁས་པས་ཐེ་ཚོམ་གཅོད་ནུས་པ། དཔེ་དོན་ལ་མཁས་པས་ཉན་པ་པོའི་བློར་འབབ་པ། དེ་གདུལ་བྱའི་བློ་དང་འཚམ་ཞིང་ཕན་ཐོགས་ནུས་པ་དེ་ལྟར་བཤད་དགོས། དེ་ལྟར་ལག་ལེན་སྟོན་མཁས་ན། །བླ་མ་སངས་རྒྱས་བརྐོས་ཕོར་ལ། །དམ་པ་ཆོས་ཀྱི་རི་མོ་ཡོད། །སློབ་མ་སྣོད་ལྡན་བྷི་བྷི་བཅུག །བརྐོས་ཕོར་རི་མོ་དེ་ལ་ཐེབས། །སྐུ་གསུམ་ཚྭ་ཚྭར་དཀྲོང་གིས་འགྱུར། །དེ་ལྟར་སློབ་དཔོན་ལག་ལེན་གཅེས། །ཞེས་གོང་དུ་བཤད་པ་དེ་ལྟ་བུའི་ལག་ལེན་ཆོས་སྟོན་པར་མཁས་ན། བླ་མ་སངས་རྒྱས་ཀྱི་ཕྲིན་ལས་ཀྱིས་ཇི་ལྟར་སྒྲུབ་པའི་འབྲས་བུ་དེ་སློབ་མ་ལའང་དེ་བཞིན་དམ་པ་ཆོས་ཀྱི་རི་མོ་དོད་ཡོད་དགོས་ཏེ། བླ་མ་སངས་རྒྱས་ཀྱི་རྐོས་ཕོར་ལ་དམ་པ་ཆོས་ཀྱི་ཡོན་ཏན་གྱི་རི་མོ་ཡོད་པ་དེར་སློབ་མ་སྣོད་ལྡན་གྱི་རྒྱུད་ལས་སུ་རུང་བའི་ས་འདག་གི་བྷི་བྷི་བཅུག་པ་ན། དེ་ལ་བླ་མའི་རྐོས་ཕོར་ལ་རི་མོ་ཅི་ཡོད་དེ་ཐེབས་ཏེ་བླ་མའི་ཐུགས་རྒྱུད་ཀྱི་ཡོན་ཏན་བུམ་པ་གང་བྱོའི་ཚུལ་དུ་འཕོས་ཏེ་སྐུ་གསུམ་གྱི་ཚྭ་ཚྭར་དཀྲོང་གིས་འབྱུང་བར་འགྱུར། དེ་ལྟར་སློབ་དཔོན་གྱིས་སློབ་མ་ཚུལ་བཞིན་སྐྱོང་པའི་ལག་ལེན་ནི་ཤིན་ཏུ་གཅེས་སོ། །སྤྱིར་བླ་མས་སློབ་མ་རྗེས་སུ་འཛིན་པ་ལ་རྒྱུད་ཚོད་དང་བློ་རིམ་བརྟག་དགོས། ཇི་ལྟར་བརྟག་ན་རབ་ལ་མངོན་པར་ཤེས་པས་གདུལ་བྱའི་ཁམས་དང་དབང་པོ་བག་ལ་ཉལ་བརྟགས་ནས་ཤེས་པས་དེ་དང་མཐུན་པའི་ཆོས་བསྟན་དགོས། འབྲིང་ཡིན་ན་སློབ་མ་དང་འགྲོགས་ནས་བརྟག ཐ་མ་ཡིན་ན་སློབ་མ་རང་ཉིད་ལ་དྲིས་ནས་བརྟག་དགོས། དེ་ལྟར་མིན་ན་ཆོས་གཅིག་གིས་བློ་རིགས་ཐ་དད་པའི་རྒྱུད་གྲོལ་དཀའ་སྟེ། སློབ་མའི་རྒྱུད་ཚོད་བླ་མས་མ་ཤེས་ན་བླ་མའི་ཆོས་ཀྱིས་སློབ་མའི་རྒྱུད་ལ་ཕན་དཀའ་སྟེ། ལ་ལའི་སྨན་ལ་ལར་ཕན་བྱེད་ཡིན་ཡང་ལ་ལར་གནོད་བྱེད་འགྱུར་བའང་ཡོད། དཔེར་ན། བེའུ་ལུ་ལ་ཕན་པའི་འོ་མ་དེ་སྦྲུལ་ལ་བླུད་ན་གནོད་པའི་དུག་ཏུ་འགྱུར་བ་བཞིན་ནོ། །དེ་ལྟར་ཡིན་པས་སངས་རྒྱས་ཀྱིས་ཆོས་ཀྱི་རྣམ་གྲངས་དེ་གདུལ་བྱའི་བློ་དང་བསྟུན་ཏེ། མཛོད་ལས། སྤྱོད་པ་རྣམས་ཀྱི་གཉེན་པོ་ནི། །ཆོས་ཀྱི་ཕུང་པོ་མཐུན་པར་གསུངས། །ཞེས་པ་ལྟར་གསུངས་པ་ཡིན། དེས་ན་བློ་ཐ་མའི་རིགས་ཅན་ལ་ཉན་རང་གི་ཆོས་དང་། འབྲིང་ལ་ཐེག་པ་ཆེན་པོའི་རྒྱུ་མཚན་ཉིད་ཀྱི་ཐེག་པ། ཆེན་པོ་ལ་མོས་པ་རྣམས་ལ་གསང་སྔགས་རྡོ་རྗེའི་ཐེག་པ་བཤད་དགོས། འོན་ཀྱང་གང་ཟག་བློ་རིམ་སྣ་ཚོགས་ཅན་ལ་ཆོས་འཆད་པའི་སྐབས་སུ་ཐེག་གསུམ་འགལ་མེད་གནད་གཅིག་ཏུ་དྲིལ་ཏེ། འོག་མ་ནས་ཡར་གོང་མ་ལ་རིམ་པར་འཁྲིད་དེ་ཐབས་ཤེས་ཟུང་འཇུག་ཚོགས་གཉིས་ཤིང་རྟའི་འཕང་ལོ་འབྲལ་མི་རུང་བར་སྟོང་ཉིད་སྙིང་རྗེ་ལ་འཇུག་རྒྱུ་ཅན་པོ་རེད། ཁྱད་པར་དུ་ལས་དང་པོ་བ་ཡིན་ན་མི་རྟག་པ་ལ་སོགས་པ་བློ་ལྡོག་གི་ཆོས་བསྟན་ནས་འཁོར་བ་ལས་བློ་ལྡོག་འཇུག་པ་དང་། འཁོར་བ་ལས་བློ་ལྡོག་པ་ན་དེ་ནས་རིམ་བཞིན་རང་བཞིན་མེད་པའི་ཆོས་ལ་སོགས་པ་བསྟན་དགོས་ཏེ། དཔེར་ན། བྱིས་པ་ཆུང་ངུ་ལ་དང་པོ་ནུ་འོ་སྣུན། དེ་ནས་ཟས་བྱིན་ཚོད་ཀྱིས་རིམ་གྱིས་གསོས་པ་བཞིན་དུ་སློབ་མ་བསྐྱེད་བསྲིང་དགོས། བསོད་ནམས་ཡེ་ཤེས་ཀྱི་ཚོགས་ཀྱིས་ཁམས་ཀྱི་སྐུ་གསུམ་ལ་སྒྲིབ་པའི་དྲི་མ་སེལ་དགོས་པས། ཚོགས་གཉིས་བསགས་པས་ཁམས་ཀྱི་དྲི་མ་དག་ནས་ཆོས་གཟུགས་ཀྱི་སྐུ་མངོན་དུ་བྱེད་ཚུལ་ལ། སྙིང་རྗེ་ཆེན་པོས་ཉན་རང་གི་ཞི་བདེ་ལས་བཟློག་པ་སེམས་ཅན་གྱི་དོན་བྱེད་ནུས་པ། སྟོང་ཉིད་རྟོགས་པའི་ཤེས་རབ་ཀྱིས་སྲིད་པའི་མཐའ་ལས་གྲོལ་བ་སྟེ། མངོན་རྟོགས་རྒྱན་ལས། ཤེས་པས་སྲིད་ལ་མི་གནས་ཤིང་། །སྙིང་རྗེས་ཞི་ལ་མི་གནས་པ། །ཞེས་གསུངས་པ་ལྟར་རོ། །ཞེས་གོང་དུ་གསུངས་པའི་སྟ་གོན་ཉེར་བསྡོགས་སམ་སྦྱོར་བ་གྲ་སྒྲིག་དང་ལག་ལེན་ཆེན་པོ་དཀའ་ཚེགས་ལ་སྐྲག་ནས་མི་འཛེམ་པ་དང་། ཆུང་ངུ་ཅི་མི་སྙམ་པར་མི་འཇོག་པར་ཆེ་ཕྲ་མཐའ་དག་ལ་གཟབ་སྟེ་དེ་འདྲ་ཞིག་གིས་ལོས་ཆོག དེ་འདྲ་བས་རེད་ལོས་ཡོད་སྙམ་པ་སོགས་ཆོས་ལ་དབང་ཟ་བའི་རང་བཟོའི་དྲི་མས་མ་སྦགས་པ་ཉིད་ཆོས་འཆད་པའི་སྔོན་དུ་སོང་ནས་མཎྜལ་འབུལ་དུ་གཞུག་གོ །དམ་པའི་ཆོས་ཞེས་པ་འདི་མི་འགའ་རེས་སྤྱིར་བཏང་གི་རིག་གནས་ཤིག་རེད་བསམ་གྱིན་ཡོད་རེད། ད་སྐབས་རྒྱལ་སྤྱིའི་ཐོག་ནའང་ནང་ཆོས་དེ་ཤར་ཕྱོགས་ཀྱི་རིག་གནས་ཤིག་རེད་ཟེར་བཞིན་འདུག་ཡིན་ན། འགའ་རེས་རིག་གནས་སྤྱིར་བཏང་བ་སྦྱོང་བ་ལྟར་དུ་སྦྱོང་ཆོག་པ་ཞིག་ཡིན་བསམ་ནས། ཁྲིད་ཡིག་ནི་དེང་སང་མང་པོ་རེད། ཡིག་རིགས་དང་སྐད་རིགས་འདྲ་མི་འདྲའི་སྟེང་ན་ཀུན་སློང་སྣ་ཚོགས་པས་བསྒྱུར་བ་ནི་མང་། རྫོགས་ཆེན་ཕྱག་ཆེན་ལ་སོགས་པ་ཆོས་གང་གི་ཟབ་ཟབ། མིང་གང་གི་ཆེ་ཆེ་གཉན་གཉན་ཚང་མ། དབང་མེད་ལུང་མེད་ཁྲིད་མེད་ཀྱིས་བརྒྱུད་པ་གཅིག་ཀྱང་མི་དགོས་པར་བལྟས་ནས་ཚུགས་ཀ་བཏོད་དེ་སྒོམ་ཁུལ་བྱེད་ཀྱང་། གར་སོང་འདིར་སོང་ཅི་ཡོད། དེ་མི་དགོས་ལོ་མང་པོར་ཉམས་སུ་ལེན་འདོག་བྱས་ཀྱང་རང་རྒྱུད་སོར་གང་གིས་ཡར་བསྐྱེད་མེད་པ་དེ། གཅིག་ན་དད་པ་དང་ངེས་འབྱུང་གིས་མ་འདང་། གཉིས་ན་ཆོས་སྒྲུབ་ལུགས་མགོ་རྔ་ནོར་བ། སྔོན་འགྲོས་རང་རྒྱུད་མ་སྦྱོང་བར་དངོས་གཞི་སྒོམ་ཁུལ་བྱེད་ཀྱང་སྒོམ་གོ་སྒོམ་གོར་མ་ཆོད། སླ་མོ་ཡོད་ས་དཀའ་མོར་འགྱུར་སོང་བས་མི་ཚད་ལམ་ལོག་ཏུ་ཞུགས་པས་ཆོས་ལ་དབང་ཟ་ཞེས་ཧབ་རྒྱག་ནི་རེད། ཆོས་ཀྱི་ཐོག་ན་དབང་ཡོད་བྱས་ནས་མི་ཉན་རྒྱུ་ཅི་ཡོད། ཅི་རེད་འགྲོ་འོང་བསམ་ནས་རང་བཟོ་དང་རང་ཕོད་ཆེ་བས་རེད། དེ་འདྲ་བ་ནི་ཉེས་པ་ཆེ་བར་མ་ཟད་བཀའ་ཆད་འབྱུང་ངེས་ཡིན། དེས་ན་བརྒྱུད་པའི་བྱིན་རླབས་འབྱུང་བ་ལ་ཆོས་ཐོབ་དགོས། བཅོམ་ལྡན་འདས་ཀྱི་སྐྱེས་རབས་སུ་ཚིག་བཞི་པའི་ཚིགས་སུ་བཅད་པ་རེ་རེའི་དོན་དུ་གོང་དུ་ཞུས་པ་ལྟར་སྐུ་ལུས་མེ་དོང་དུ་མཆོང་བ་ལ་སོགས་ཅི་འདྲའི་དཀའ་སྤྱད་མཛད་རབས་མང་གི། དམ་པའི་ཆོས་ནི་ཚེ་འདི་ཕྱི་གཉིས་དང་རང་གཞན་གཉིས་ཀའི་དོན་འགྲུབ་ངེས་པ། ད་རེས་མ་གཏོགས་ནམ་ཡིན་ན་འཕྲད་པར་དཀའ་བ་དང་། ཐོབ་པར་དཀའ་བ་ཡིན་པས་འདི་ན་ཆོས་མ་གསུངས་པའི་སྔོན་དུ་ཆོས་འཆད་པ་པོ་ལ་མཎྜལ་འབུལ་ཞིང་ཆོས་འཁོར་བསྐོར་བར་བསྐུལ་དགོས་གསུངས་པ་རེད། མཎྜལ་འབུལ་བའི་བསོད་ནམས་དང་ཆོས་འཁོར་བསྐོར་བར་བསྐུལ་བའི་ཕན་ཡོན་བསམ་གྱིས་མི་ཁྱབ་པ་ཡོད་པར་གསུངས་ཡོད། དེ་ལྟ་བུའི་རྒྱུ་མཚན་དེ་ཉིད་ཤེས་པའི་སྒོ་ནས་སློབ་མ་རྣམས་ལ་མཎྜལ་འབུལ་དུ་གཞུག་གསུངས་པ་རེད། དེ་རིང་གི་ཁྲིད་སྦྱོང་སྐབས་སྔོན་ལྟར་ཡིག་བརྒྱ་དང་ཡིག་དྲུག་གསོག་པས་ཉམས་ཆག་བཤགས་དགོས། རབ་ན་ཡིག་བརྒྱ་དང་ས་ཏྭ་འདོན་པའི་ཚེ་རྡོར་སེམས་སྒོམ་བཟླས་ཀྱི་དམིགས་པ་བྱ་རྒྱུ་དང་། དེ་ལྟར་མ་བྱུང་ཡང་ཕྱོགས་བཅུའི་རྒྱལ་བ་སྲས་བཅས་ཀྱི་མདུན་ནས། བདག་སོགས་མཁའ་མཉམ་སེམས་ཅན་ཐམས་ཅད་ཀྱིས་ཐོག་མེད་ནས་བསགས་པའི་སྡིག་སྒྲིབ་བཤགས་པ་ཡིན་བསམ་ནས། སྔར་བྱས་ཀྱི་ལས་ལ་འགྱོད་སེམས། ཕྱིན་ཆད་མི་བྱ་བའི་དམ་བཅའ་དྲག་པོས་སྟོབས་བཞི་ཚང་བའི་བཤགས་པ་བྱེད་དགོས། རྟེན་གྱི་སྟོབས་ཟེར་བ་དེ་བླ་མ་གཅིག་དང་སངས་རྒྱས་གཅིག་ཁོ་ན་མ་ཡིན་པར། ཕྱོགས་བཅུ་དུས་གསུམ་རྒྱལ་བ་སྲས་བཅས་དང་། ཡང་ན་བླ་མ་རྡོ་རྗེ་སེམས་དཔའ་གཅིག་ལ་རྒྱལ་བ་ཐམས་ཅད་འདུས་པའི་བདག་ཉིད་ཀུན་འདུས་ནོར་བུའི་ལུགས་ལྟར་བྱས་ན་ཆོག་ལ། ཕྱོགས་བཅུའི་རྒྱལ་བ་སྲས་བཅས་ཟེར་དུས་ས་ཆེན་པོའི་རྡུལ་གྲངས་ཀྱིས་གཞལ་དུ་མེད་པའི་མང་པོ་ཞིག་ཡིན། དེ་ཡིན་པ་ལྟར་བསོད་ནམས་ཀྱང་དེ་ལྟར་ཆེན་པོ་དང་མང་པོ་ཐོབ་པ་རེད། བཤགས་མཁན་པོ་ང་གཅིག་པུས་ལས་ཉེས་བྱས་པ་རྐྱང་པར་མི་བསམ་པར། རང་གཞན་སེམས་ཅན་ཐམས་ཅད་ཀྱིས་ཐོག་མེད་ནས་ད་བར་བསགས་པའི་སྡིག་སྒྲིབ་བསམ་ན་ནི། སེམས་ཅན་ཐམས་ཅད་ཟེར་རྒྱུ་བོ་ནམ་མཁས་གར་ཁྱབ་ན་ཡོད་པ་ཞིག་ཡིན་པས་དགེ་བའི་སྟོབས་ཀྱང་དེ་བཞིན་དུ་ཆེ་བ་ཡིན། དེས་ན་བསམ་པ་སེམས་བསྐྱེད་དང་འབྲེལ་རྒྱུ་ནི་ནམ་ཡིན་ན་གཙོ་ཆེ་ལ། དམིགས་མེད་དང་འཁོར་གསུམ་དག་པའི་དངོས་གཞི་དང་རྗེས་ཀྱི་བསྔོ་བ་སྟེ་སྦྱོར་དངོས་རྗེས་གསུམ་ཚང་ན་ཅི་བཤད་དང་། དེ་ཙམ་གྱིས་དངོས་གཞིའི་ལྟ་བའི་རྩི་ཡིས་མ་ཟིན་ནའང་འདི་སྣང་སྒྱུ་མ་དང་རྨི་ལམ་ལྟ་བུའི་འདུ་ཤེས་དང་མ་བྲལ་བའི་བསྔོ་བ་ཡག་པོ་རེ་གྱིས། སང་ཉིན་ནས་སྔོན་འགྲོ་སེམས་སྦྱོང་བདུན་གྱི་ཁྲིད་རྐང་རེ་རེ་ནས་ཁྲིད་སྦྱོང་བྱེད་དགོས། ཐུན་དང་ཆོས་ཁྲིད་ནང་ཞུགས་པ་ཚང་མས་ངག་གཅད་བྱ་རྒྱུ་གལ་ཆེ། ལྷ་ཁང་ནང་དུ་འཛུལ་ནས་སྒོ་ཕྱི་ལ་མ་ཐོན་བར་ངག་གཅད་གྱིས། ངག་བཅད་བྱས་ནས་ལྷ་སྒོམ་སྔགས་བཟླས་ན་ཕན་ཡོན་ལྷག་པར་ཆེ། ངག་འདི་རྫུན་དང་། ཕྲ་མ། ཚིག་རྩུབ། ངག་འཁྱལ་བཞི་ཀའི་སྒོ་ཡིན་པར་མ་ཟད་མི་དགེ་བ་གཞན་གྱི་སྣ་འདྲེན་བྱེད་པ་རེད། མདོར་ན་དགེ་བ་སྒྲུབ་དུས་ལུས་ངག་ཡིད་གསུམ་ཆུན་གཅིག་ཏུ་དགེ་བའི་ལམ་ལ་དྲིལ་ཐུབ་ན་ཤིན་ཏུ་བཟང་། ཚོགས་འཁོར་དང་རྒྱབ་ཆོག་སོགས་གང་གི་སྐབས་སུའང་ངག་གཅད་མཛད་ན་ཡག་པོ་ཡིན། རང་རེའི་ཆོས་རའི་ནང་དུ་གཞུང་བཀའ་པོད་ལྔའི་འཆད་རྩོད་རྩོམ་གསུམ་ལ་ཐོགས་པ་མེད་པའི་རབ་འབྱམས་པ་མཁས་པའི་དབང་པོ་མང་པོ་ཡོད། ཐོས་པ་ཕྱོགས་མེད་དུ་བཙལ་ནས་ལོ་མང་སོང་བ་དང་། སྒྲུབ་བརྩོན་སྦས་པའི་རྣལ་འབྱོར་པ་ཡང་མི་ཉུང་བ་ཡོད། ཡང་མོས་པ་ཆོས་ཕྱོགས་སུ་བྱས་ནས་དད་པ་དང་དག་སྣང་ལས་འབྲས་ལ་ཡིད་ཆེས་ཀྱི་གདེང་ཡོད་རུང་ཐོས་པ་སློབ་གཉེར་མ་མྱོང་བ་དང་། ཡང་རྒན་ཞུགས་ཡིག་ངོ་ཙམ་ཡང་མི་ཤེས་པར་ཁྱིམ་པ་ཕོ་མོ་སོགས་མཐའ་ལ་བརྟེན་པ། རྒྱུད་ཚོད་འདྲ་དང་མི་འདྲ་ཡོད་པས། ཚང་མའི་རྒྱུད་ཚོད་དང་འབྲེལ་བ་ཞིག་འུ་གུས་བཤད་ཐུབ་དཀའ་བ་རེད། སྤྱིར་བཏང་འདིར་གང་ལྟར་བཤད་ཀྱང་སྔ་འགྱུར་གྲུབ་དབང་རྫོགས་ཆེན་པའི་རང་ལུགས་དྲི་མ་མེད་པའི་ཁྲིད་རྒྱུན་མཐུད་པ་ཡིན་པས། གཙོ་ཆེ་བ་སྔོན་གྱི་དམ་པ་གོང་མའི་ཕྱག་བཞེས་ལ་ལད་མོ་མ་བྱས་ཐབས་མེད་འདྲ་རེད། ངས་གཙོ་བོ་ཡོངས་འཛིན་དགེ་བའི་བཤེས་གཉེན་རྣམ་པ་གཉིས་བསྟེན་མྱོང་བ་རེད། གཅིག་ནི་མཁན་ཆེན་པད་མ་ཚེ་དབང་ཚང་རེད། གཅིག་དེ་འཇིགས་མེད་རྟ་མགྲིན་ཡོན་ཏན་མགོན་པོ་ཚང་རེད། མཁན་ཆེན་པད་མ་ཚེ་དབང་ཚང་གིས་གསུངས་དུས་ཚིག་རེའི་འབྲུ་རེ་ཐོག་གི་རྒྱས་འགྲེལ་དང་། དཀའ་གནད་ཐམས་ཅད་མཐའ་དཔྱད་ཅིང་། ཚུལ་གསུམ་ཚང་བའི་དགག་གཞག་མཛད་དེ་དངོས་པོ་སྟོབས་ཞུགས་ཀྱི་རིགས་པས་གཏན་ལ་ཕབ་སྟེ་གསུང་རྒྱུ་བོ་རེད། འཇིགས་མེད་ཡོན་ཏན་མགོན་པོ་ཚང་གིས་གསུངས་དུས་དོན་གྱི་མདོ་འགག་གནད་དུ་དྲིལ་ཞིང། ཆིངས་ཀྱིས་བཅིངས་ཏེ་དོན་འགྲེལ་གྱི་ཚུལ་དུ་མཚམས་མཚམས་སུ་འགག་བསྡམས་ཏེ་གསུང་རྒྱུ་བོ་རེད། དེ་ཚོ་གཙོ་བོ་མདོ་སྔགས་ཀྱི་འཆད་ཚུལ་གྱི་ཁྱད་པར་ཡིན་ས་རེད། དེ་ཚོ་ང་ལོ་བཅོ་ལྔ་བཅུ་དྲུག་གི་སྐབས་ཀྱི་སྐད་ཆ་རྙིང་པ་ཞིག་རེད། ལོ་རྒྱུས་ཀྱི་ཐོག་བཤད་པ་ཡིན། ད་འུ་གུས་དེ་གཉིས་ཀྱི་གཅིག་གི་སྟངས་ལྟར་ཐོན་པ་མ་རེད་དེ། ལད་མོས་གཟུགས་བརྙན་གྱི་ཚུལ་འདྲར་བྱེད་ན། ཁྱད་པར་དུ་ལས་དང་པོ་བ་དང་སྒོ་བསྟུན་ཏེ་ཚིག་རེ་གསལ་འགྲེལ་དང་མན་ངག་ལག་ལེན་ལ་དྲིལ་བའི་ཉམས་བཏོད་ཁུལ་ཡོད་ནི་རེད། འོན་ཀྱང་གསང་སྔགས་ཀྱི་ཆོས་འདི་འདྲ་འཆད་པའི་སྐབས་སོ་སོའི་སྐྱེ་བོ་རྨོངས་པའི་གཞན་དབང་གིས་བཤད་ཉེས་བྱེད་ཡོད་ན་ལྷ་དང་སྲུང་མ། ཆོས་སྤྱན་དང་ལྡན་པ་ཐམས་ཅད་ཀྱི་མདུན་དུ་བཤགས་པ་དང་། བསམ་པ་དག་པས་ཀུན་ནས་སློང་བའི་དགེ་བའི་ཆ་རེ་མཆིས་སྲིད་ན་བསྟན་དང་འགྲོ་བའི་དོན་དུ་བསྔོ་རྒྱུ་ཡིན་ནོ།།

ཉིན་གསུམ་པའི་ཆོས་ཁྲིད།

ད་ཡང་ཚེ་བསྐལ་པ་ལན་བརྒྱར་བཙལ་ཀྱང་རྙེད་པར་དཀའ་བའི་དཀོན་མཆོག་གི་སྣང་བ་དང་མི་འབྲལ་ཞིང་། དམ་པའི་ཆོས་ཀྱི་འོད་ཟེར་ལ་ལོངས་སྤྱོད་ཡོད་པའི་སྐབས་འདིར། ཇི་སྐད་དུ། འཆི་བ་མ་དྲན་ཆོས་ཀྱི་གཟུགས་བརྙན་དེས། །འཆི་བདག་དྲུང་ན་ཆོས་གོ་མི་ཆོད་ཀྱི། །སེམས་དང་ཆོས་སུ་འདྲེས་པའི་ནོར་བུ་དེ། །རྟག་ཏུ་ཆོས་དོན་སེམས་པའི་ལག་རྗེས་ལགས། །ཞེས་གསུངས་པས་འཆི་བ་མི་རྟག་ནམ་འོང་མི་ཤེས་པར་སྙིང་ནས་མ་དྲན། རྟག་འཛིན་ཤི་རྒྱུ་མེད་པའི་འདུན་ནམ། ཡང་ན་ཡུན་རིང་ཞིག་ལ་མི་འཆི་པའི་འདང་ལོག་བརྒྱབ་སྟེ། ཕྱི་ནས་ལྟ་ན་ཆོས་པའི་གཟུགས་བརྙན་ཙམ་ཞིག་བྱེད་པ་དེས་འཆི་བདག་གཤིན་རྗེས་དབང་མེད་དུ་ཁྲིད་པའི་དུས་སུ་ཆོས་ཀྱི་གོ་མི་ཆོད། ཆོས་བྱེད་ན་ཁ་ཆོས་མིན་པའི་དོན་ཆོས། ཆོས་དང་སེམས་འདྲེས་པས་ཆོས་ཀྱིས་སེམས་དུལ་ནས་སེམས་ལ་ཕན་ཐོགས་ཡོད་པ་ཞིག་ཡིན་ན། དེའི་ཆོས་དེ་ཡོད་ཤག་ཤག ཚེ་འདི་ཕྱི་གཉིས་ཀའི་བསམ་དོན་འགྲུབ་པའི་ནོར་བུ་ཡིན། དེའི་ནོར་བུ་དེ་ལག་ཏུ་ལོན་འོང་ཐབས་ནི། དུས་རྟག་ཏུ་ཆོས་ཐོས་པའི་དོན་བསམ་པས་རྒྱུད་ལ་སྦྱར། སྒོམ་པས་ཉམས་སུ་བླང་བའི་ལག་ལེན་དེ་ཉིད་ཡིན། དེ་ལྟར་བྱེད་ན་རང་དྲིན་རང་ལ་ཆེ་བ་རེད་གསུངས་པ་རེད། དེ་ཡིན་སོང་ན་འདི་སྣང་འཁོར་བའི་འཁྲུལ་སྣང་གི་གཉིད་མོ་ཆེའི་རྨི་ལམ་ལྟ་བུ། འཁྲུལ་བ་བསླུ་བའི་ཆོས་ཅན་འདི་ལ་མགོ་མི་འཁོར་བར་གཏན་དུ་ཕན་པའི་ལྷ་ཆོས་རྣམ་དག་ཅིག་འགྲུབ་དགོས་ཀྱང་། དེ་རིང་རྒྱབ་ཀྱི་སང་ཉིན། ད་ལོའི་ཕར་གྱི་སང་ཕོད་བཞག་ནས་མ་འོངས་པའི་དུས་ཤིག་ལ་ཡིན་སྙམ་པའི་མ་འོངས་པ་ཟད་དུ་མེད་པའི་རྟག་འཛིན་ཁོ་ནའི་ངང་ནས་མི་ཚེ་ཤོར་ན་གྱོང་ཁ་ཆེ་བས། དེས་ན་རང་རང་ཁ་ཁ་སོ་སོའི་མི་ཚེ་ན་ཚོད་ལ་འདང་རེ་བརྒྱབ། ཚོད་རེ་བླངས་ཏེ་མི་ཚེའི་བྱ་བའི་དམིགས་ཡུལ་དང་། དམིགས་ཡུལ་དེ་འགྲུབ་པའི་འཆར་གཞི། འཆར་གཞི་དེ་གཙོ་བོ་ནམ་འགྲུབ་ཀྱི་དུས་ཚོད་གཏན་ཁེལ། གལ་ཏེ་གློ་བུར་དུ་འགལ་རྐྱེན་འོངས་ནས་ཁྱད་པར་མི་ཚེའི་དུས་ཚོད་ཀྱིས་མི་འདང་བའི་རྐྱེན་ངན་གྱི་ལས་ཀ་འོང་ན་དེ་གདོང་ལེན་ཅི་འདྲ་བྱེད། འགོག་བསྲུང་ནུས་པའི་ཐབས་ཤེས་ཅི་འདྲ་དགོས། དེ་ཚོ་འདང་མ་བརྒྱབ་རང་བརྒྱབ་ཅིག་ལ་ཐུག་ཡོད་པ་རེད། མདོར་ན་ཅི་བྱས་རྗེས་ནས་འགྱོད་པ་མི་ཤོར་བའི་སྔར་འདང་ད་ནས་ཕོག་དགོས་ཀྱི། འགྱོད་པ་རྗེས་ནས་བྱེད་རྒྱུ་ནི་བྱ་བ་མ་ཐོན་པའི་ཕོ་ངན་གྱི་ལུགས་རེད། དོན་ཆེན་བསྐྱུར་ནས་དོན་ཆུང་ལ་སྙེག་སར་ཐུག་དུས་མདོར་ན་བྱ་བ་མ་འགྲུབ་པའི་སྔ་ལྟས་རེད། དུས་ཚོད་ཀྱི་བྱ་བ་དེ་དུས་ཚོད་ཀྱི་ཐོག་ནས་སྒྲུབ་དགོས། ཁ་ཡོད་ལག་ཡོད་ཀྱི་དངོས་ཡོད་གནས་ཚུལ་གནད་ཆེན་རེད། དཔེར་འཇོག་ན། ན་ནིང་གི་དྲོད་རླུང་འཇམ་པོས་ད་ལོའི་ས་ཆུ་སོས་པ་ལ་ཕན་ཐོགས་མེད་ལ། མདང་དགོང་རྨི་ལམ་ནང་གི་རྒྱན་གོས་བཟང་བས་དེ་རིང་གི་ཞོགས་ལྷགས་ལ་མི་ཕན་པ་དང་འདྲ། ཚེ་འདི་ཕྱི་གཉིས་ཀའི་རང་མགོ་ཐོན་བྱེད་རང་ལ་ཡོད་དུས་ཡོད་རེད། གཞན་གྱིས་ཇི་ལྟར་ངན་པའི་གྲལ་དུ་བཞག་རུང་རང་ཉིད་མ་ངན་ན་རེད་ཡོད། མིས་རྒྱ་མ་བརྒྱ་ཐམ་པའི་ལྗིད་ཚད་འདུག་ཟེར་རུང་རང་ཉིད་ཀྱིས་སྲང་གང་གི་རྒྱ་ཁ་ནོན་བྱེད་མེད་ན་དོན་ལ་མེད་པ་རེད། དེས་ན་ཚེ་འདིའི་འདུག་ཆུས་ཀྱི་དོན་དུ་ཇི་ལྟར་བརྒྱུགས་ཀྱང་མ་བརྒྱུགས་ཀྱང་ལྟོ་ཕོ་བ་གང་གི་ཟ་རྒྱུ་ཞིག་དང་། རྒྱབ་ལུས་པོ་གང་གི་གྱོན་རྒྱུ་ལས་ཡར་ལྷག་ལས་འོང་རྒྱུ་ཅི་ཡོད་པ་མ་རེད། དེ་ནི་ལ་ཁའི་རྩྭ་ཟན་གྱི་དུད་འགྲོ་ཡིན་ཡང་རང་རང་གི་ཚོད་ཀྱིས་དུས་ཚོད་བུད་འགྲོ་བཞིན་ཡོད་རེད། དེས་ན་དཀའ་གནད་སྐྲག་དགོས་ས་ངོ་མ་ནི། མིང་ཙམ་ཡང་གཟུང་དགོས་ན་གཟུང་དཀའ་ཤོས། སྒྲ་ཙམ་གོ་ནའང་མི་འདོད་པ་ནི་འཆི་བ་རེད། འཆི་བདག་ངོ་གནག་གི་མདུན་ན་ཐོན་དུས་ཁམས་གསུམ་གྱི་སེམས་ཅན་ཐམས་ཅན་སྐྲག་དགོས། ལྷའི་དབང་པོ་བརྒྱ་བྱིན་ལ་འཁོར་ཉེ་དབང་སོ་གཉིས་ཀྱིས་བསྐོར་ཏེ་ལྷ་དམག་ལྷ་མ་ཡིན་གྱི་ཐོག་ཏུ་དྲངས་དུས་དཔའ་བོ་ཡིན་ཡང་། ཚེ་ཟད་ལས་དབང་རྫོགས་ཏེ་ཤི་རན་དུས་དམྱལ་བའི་སྒྱེད་རྡོ་ཡན་ཆད་ལ་སྐྲག་དགོས་པ་རེད། འཇིག་རྟེན་འདིར་སྣང་གི་དབང་ཚོད་མེད་དེ་ཚོ་དང་དེའི་ཁ་འོག་གི་ཉམས་ཆུང་ཚང་མ་ཁྲིམས་ཆད་པ་ལ་སྐྲག་དགོས་པ་རེད། གནའ་གཅིག་གིས་ཟེར་བ་ལྟར། ང་ལ་ཐུག་དུས་སྟག་འདྲ་ཞིག་རེད་དེ། དགྲ་ལ་ཐུག་དུས་ཝ་འདྲ་ཞིག་རེད་ཟེར་བ་ལྟར་ཡིན། དཔོན་ཇི་ཙམ་ཆེ་ཡང་འཆི་བདག་ལ་སྐྲག་མི་དགོས་པ་ཞིག་མེད། དེས་ན་འཆི་བདག་གི་སྔོན་ལ་ད་ལྟར་ཐོན་ན་སྐྲག་མི་དགོས། འཇིགས་མི་དགོས། གླིང་གེ་སར་ཨ་མ་འགོག་མོའི་དོན་དུ་དམྱལ་ཁམས་ན་བྱོན་པ་འདྲ་ཞིག་རེད་ཐབས་ཡོད་ན། འདི་དང་ཕྱི་མར་ཡོད་པའི་དཔའ་བོ་རེད། དེ་མིན་ན་མིག་བཙུམས་ནས་མ་རིག་པས་མེད་སྣང་ཤར་བ་ཙམ་གྱིས་མེད་རྒྱུ་ངོ་མའི་གྲལ་དུ་འགྲོ་རྒྱུ་མ་རེད། ཁྱོད་ཀྱིས་མ་རིག་པས་མེད་པར་ཡིན་ན་ལ་ཕར་རྒྱབ་ཀྱི་མི་དང་སྲོག་ཆགས་མེད་པའི་གྲལ་དུ་འགྲོ་དགོས་ན་དེ་མི་འགྲོ་གི་མོད། དེ་ཡིན་དུས་གསོན་འདིར་སྣང་གི་མི་ཚེ་ཟེར་རྒྱུ་དེ་ཇི་ཙམ་རིང་ཡང་། ལྷ་གནས་གོང་མ་ཞིག་གི་སྐད་ཅིག་མ་ཙམ་གྱིས་རང་རེ་འདོད་པའི་ཁམས་ཀྱི་མི་ཚེ་རྫོགས་འགྲོ་བ་རེད། ཚེ་ཕྱི་མའི་འགྲོ་ལམ་སྐྱེ་བ་རྗེས་མའི་བདེ་སྡུག་དེ་ཡུན་རིང་གི་དོན་དག འདང་རྒྱག་བྱ་རྒྱུའི་དོན་གལ་ཆེན་པོ་དེ་འདྲ་ཞིག་ཡིན། ཚེ་འདིར་སྣང་ལྟ་བུ་ཡུན་ཐུང་དཀའ་ཚེགས་ཅན་ལ་ཞེན་འདུག་པས་ཕན་ཐོགས་མེད། བདེ་ན་བདེ་རྐྱང་མ་སྡུག་བསྔལ་གཏན་ནས་མྱོང་དགོས་མི་ཐུབ་པ་ཞིག་རེད་དགོས། དེའི་ལམ་དེ་ད་སྔར་མ་རྙེད་པས་འདི་བྱུང་བ་རེད། ད་རེས་དམ་པའི་ཆོས་ཞེས་པ་རང་གཞན་གྱི་སྡུག་བསྔལ་སེལ་བྱེད། གཏན་བདེ་ཐར་པའི་སྒོ་འབྱེད་བྱེད་ཀྱི་ལྡེ་མིག་འདྲ་བོ་ལག་ལ་བྱུང་བའི་དུས་འདིར། ཆུ་ལ་སྐར་མ་བཀྲ་ནི་འདྲ་ཅི་ཡིན་འདི་ཡིན་དང་གར་ཡིན་གང་ཡིན་མ་ཤེས་པར། དཔེར་ན། མི་དབུལ་པོའི་ལག་ན་ཡིད་བཞིན་གྱི་ནོར་བུ་ལག་ཏུ་འོང་ཚེ་ནོར་བུའི་ནོར་ཉམས་མ་ཆོད་ནས་ཡིད་བཞིན་ནོར་བུ་ལག་ན་ཡོད་བཞིན་དུ་དབུལ་པོར་ལུས་པ་བཞིན་གྱོང་ཆེན་པོ་དང་། ཁེ་ཆེན་པོའི་གཏན་ཉེས་གཏན་ལེགས་ཀྱི་ས་མཚམས་ལ་ཐོན་པ་རེད། ཆོས་ཐུན་གཅིག་ཉན་རྒྱུའི་གོ་སྐབས་འདི་འཛམ་གླིང་གི་རྒྱུ་ནོར་བས་དགའ་དང་དགའ་རེད། དེ་ལྟར་ཡིན་རྒྱུ་བོ་འདང་ཞིབ་ཏུ་བརྒྱབ་ནས་དེ་འདྲ་ཤེས་པར་གྱིས། དེ་ལྟར་མ་ཤེས་པའི་རྒྱབ་སོ་ན་ཆོས་རའི་ནང་དུ་གཉིད་ལོག་བྱེད་ཞོར། དུས་ཚོད་ལ་ལྟ་ཞོར། མི་དགེ་སྡིག་ལས་གཡོ་སྒྱུ་སྐོར་མགོ་དྲན་ཞོར་འདུག་པ་ལས་མ་འདུག་ན་དགའ་བ་རེད། ཉི་མ་གཅིག་གི་ཉིན་ལས་ཁྱིམ་ལས་ཙག་ཙིག་ཅིག་དང་། དོན་ཆུང་ཞིག་གི་དོན་དུ་ག་ཤེད་འགྲོ་རྒྱུ་དང་ཆོས་ཁྲིད་གཉིས་བརྗེ་ས་ལ་ཐུག་དུས། ལས་དང་སྐལ་བའི་གཏིང་རྡོ་ལྗིད་པོ་ཞིག་གིས་ཁྲིད་ནས་ཨ་ཁུ་ཆོས་རྒྱལ་ཚང་གི་ཁྲིམས་རའི་ནང་ཐེངས་མ་འགའ་རེ་འགྲོ་རྒྱུའི་ཐོད་པའི་རི་མོ་སྣོག་དཀའ་བའི་རྟགས་རེད། དེ་འདང་རྒྱག་དང་པོ་རེད། འདང་དང་པོ་བརྒྱབ་ནས་ངོ་མ་ཆོས་གོ་རྒྱུ་གནད་ཆེ། བསྒྲུབ་རྒྱུ་དེ་བས་ཀྱང་གལ་ཆེན་ཞིག་རེད་འདུག ཚེ་འདི་ཕྱི་དང་རང་གཞན་གཉིས་དོན་ལ་དེའི་གལ་ཆེ་བ་དང་གནད་ཆེ་བ་ཞིག་མེད་པས། འཁོར་བའི་སྡུག་བསྔལ་དང་བྲལ་བའི་སངས་རྒྱས་བྱང་སེམས་འཕགས་པའི་དགེ་འདུན་ཐམས་ཅད་དམ་པའི་ཆོས་ལ་བརྟེན་ནས་གྲོལ་ནས་གྲོལ་བའི་ལམ་རྙེད་པ་རེད། ཞི་བསིལ་རྙོག་པར་མེད་པ་བདུད་རྩི་ལྟ་བུ་ཐོབ་ན་འཕྲལ་དུ་ལུས་སེམས་ཀྱི་སྡུག་བསྔལ་ཞི། ཕུགས་ཀྱི་གཏན་བདེ་ཐར་པའི་ལམ་མཆོག་ལ་བཙན་སར་ཟིན་འགྲོ་འདུག་བསམ་ནས། ཤྭ་ཆད་ཀྱིས་ཆུར་སྙེག་པ་དང་མཚོ་ལམ་དུ་དར་འཆག་པར་འདྲ་བའི་བརྩོན་པ་དང་དོ་སྣང་ཞིག་ཡོད་དུས་ཆོས་བསྒྲུབ་ན་འགྲུབ་པ་རེད། དེའི་ཐོག་ནས་འདང་རྒྱག་གཉིས་པ་ཆོས་ཞུ་ལུགས་ཞུ་སྟངས། སྒྲུབ་ལུགས་སྒྲུབ་སྟངས། འགོ་གང་ནས་བཟུང་བས་མཇུག་གང་དུ་ཇི་ལྟར་མཐར་ཕྱིན་དུ་གཞུག་པའི་སྒྲུབ་ལུགས་ཤེས་རྒྱུ་དེ་གལ་ཆེ། དེས་ན་སངས་རྒྱས་བཅོམ་ལྡན་འདས་ཀྱིས་སྐྱེས་བུ་ཆེ་འབྲིང་ཆུང་གསུམ་གྱི་གདུལ་བྱའི་བློ་སྟོབས་ཀྱི་ཁམས་དང་མོས་པ་དང་བསྟུན་ནས་ཆོས་ཀྱི་སྒོ་མོ་མཐའ་ཡས་པ་ཞིག་གསུངས་ཡོད་ན། དེ་ཐམས་ཅད་འགལ་མེད་ཀྱི་ཐོག་ནས་ཐེག་ཆེན་གྱི་ལམ་ལ་བཀྲི་ཤེས་པའི་སྒོ་ནས་མྱུར་ལམ་ཁྱད་པར་ཅན་ལ་འཇུག་རྒྱུ་ནི་མ་ནོར་བའི་ལམ་བཟང་གི་འཇུག་ངོགས་ངོ་མ་ཡིན། དེས་ན་རང་རེས་ཆོས་ནམ་བཤད་ཀྱི་ཐོག་མར་མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཞེས་པའི་ཚིག་དེ་འོང་བ་རེད། འོང་ན་ཁ་ཟེར་རྐྱང་པ་ཙམ་གྱིས་མི་ཚད་པར་དེའི་དོན་ལ་ངེས་ཤེས་འདྲོང་། ཚིག་དོན་གཉིས་ཀ་མ་འཛོལ་ནས་བྱང་ཆུབ་སེམས་ལ་བློ་འབྱོང་བ་ནི་ཐོག་མཐའ་བར་གསུམ་མེད་དུ་མི་རུང་བའི་དོན་ཆེན་ཞིག་རེད། བྱང་ཆུབ་མཆོག་ཏུ་སེམས་བསྐྱེད་པ་ལ་བློ་འབྱོངས། བྱང་ཆུབ་སེམས་བསྐྱེད་ཀྱི་སྡོམ་པ་ཆ་ཚང་བ་རྒྱུད་ལ་འབྱོར་ན་ཅི་བཤད། དེ་ཙམ་ཞིག་མ་འབྱོར་ཡང་དེའི་ཆ་ཤས་ཙམ་ཞིག་རྒྱུད་ལ་འཁྲུངས་ཤིང་བསྲུང་ན་ཕན་ཐོགས་དང་ཡོན་ཏན་བསམ་གྱིས་མི་ཁྱབ། དཔེར་ན། རིན་པོ་ཆེ་རྡོ་རྗེ་ཕ་ལམ་དེ་རིན་པོ་ཆེ་ཐམས་ཅད་ཀྱི་མཆོག་ཡིན་པས་དེའི་རིན་པོ་ཆེ་དེ་ཡོངས་སུ་རྫོགས་པར་ཆ་ཚང་ཞིག་རྙེད་ན་དབུལ་བ་ཐམས་ཅད་སེལ་ཞིང་། དགོས་འདོད་ཐམས་ཅད་ཐོབ། འོན་ཀྱང་དེའི་ཆ་ཤས་དུམ་བུ་ཅུང་ཟད་ཙམ་གྱིས་ཀྱང་རིན་པོ་ཆེ་རྒྱན་གཞན་ཐམས་ཅད་ཟིལ་གྱིས་གནོན་ཞིང་། རྒྱན་ཁྱད་པར་ཅན་དུ་འགྱུར་བར་མ་ཟད། ཆུང་ནའང་དེའི་མིང་ཡང་མི་འདོར་བའི་ཐོག་ནས་དབུལ་བ་ཡང་སེལ་བ་དེ་བཞིན་དུ། བྱང་ཆུབ་ཀྱི་སེམས་འབྱོངས་ཤིང་གདམ་པ་ཡོངས་རྫོགས་ཐུགས་རྒྱུད་ལ་འཁྲུངས་མ་དགོས་དེའི་ཆ་ཤས་ཙམ་ཞིག་གི་དོན་རྒྱུད་ལ་འཁྲུངས་ན། བྱང་ཆུབ་སེམས་དཔའི་མཚན་ཐོབ་པ་དང་། ཉན་རང་གི་དགེ་བ་གསེར་ལ་སོགས་པའི་རྒྱན་ཐམས་ཅད་ལས་ཀྱང་ཁྱད་པར་དུ་འཕགས་པ། དེ་ཐམས་ཅད་ཟིལ་གྱིས་གནོན་ནུས་པ། དེ་ཡོད་ན་འཁོར་བའི་དབུལ་བ་རང་ཤུགས་ཀྱིས་སེལ་འགྲོ་བར་གསུངས་ཡོད། དཔེར་ཉི་མ་ལ་འཇོག་ན། ཉི་མའི་དཀྱིལ་འཁོར་ངོ་མ་ལ་མུན་པས་ཁེབས་ཟེར་རྒྱུ་ཞིག་མི་སྲིད་ལ། དེ་མ་ཟད་ཉི་མའི་འོད་ཕོག་པའི་གླིང་དེར་མུན་པས་ཁེབས་པའི་གནས་མེད་པ་བཞིན་དུ། བྱང་ཆུབ་ཀྱི་སེམས་འབྱོངས་ཤིང་གདམ་པ་ཆ་ཚང་ཞིག་ཐུགས་རྒྱུད་ལ་འཁྲུངས་ན་ཅི་བཤད་ཀྱང་། དེའི་ཆ་ཤས་ཙམ་གྱི་དོན་རྒྱུད་ལ་སྐྱེས་ནའང་བདག་འཛིན་མ་རིག་པ་དང་དེས་དྲངས་པའི་རང་གཅེས་འཛིན་གྱི་བློ་ངན་ལ་སོགས་པ་དང་། ཉོན་མོངས་པ་དང་ཉེ་བའི་ཉོན་མོངས་པའི་མུན་ནག་ཉེ་མི་ནུས། ཡང་དཔེ་གཞན་སྨན་གྱི་ལྗོན་ཤིང་ཞིག་ལ་བླངས་ན། སྨན་གྱི་ལྗོན་ཤིང་ཆ་ཚང་ཡང་རྫོགས་ལ་ནད་བཞི་བརྒྱ་རྩ་བཞི་སེལ་བའི་མཐུ་དང་ནུས་པ་ཡོད་ན། དེའི་འབྲས་བུ་དང་ཡལ་ག་དང་རྩ་བ་ལོ་མ་སོགས་ཆ་ཤས་རེས་ཀྱང་ནད་ཉེ་བར་ཞི་བར་བྱེད་ཐུབ་པ་བཞིན་དུ། བྱང་ཆུབ་སེམས་འབྱོང་གི་སྡོམ་པ་ཡོངས་རྫོགས་རྒྱུད་ལ་འབྱོར་ན་ལྟ་ཅི། དེའི་ནང་ཆ་ཤས་ཙམ་གྱི་དོན་རྒྱུད་ལ་འཁྲུངས་ནའང་ཉོན་མོངས་པ་བརྒྱད་ཁྲི་བཞི་སྟོང་གི་ནད་ཞི་བའི་སྨན་དམ་པར་འགྱུར་བ་རེད། ཁྱད་པར་དེང་སང་དུས་སྙིགས་མའི་སེམས་ཅན་སྙིགས་མ་ལས་ཀྱང་སྙིགས་མ་ལྔ་ཆེས་བདོ་བའི་དུས་འདིར་བསམ་རྒྱུ་ཉོན་མོངས་མ་གཏོགས་མེད་ལ། ལས་རྒྱུ་སྡིག་པ་གསོག་རྒྱུ་མ་གཏོགས་མེད། རང་ཉིད་མ་གཏོགས་གཞན་སུ་ལའང་བཟང་དང་རྒྱན་ཡོད་མི་ཉན། མི་གཞན་ལ་མི་འདོད་པ་ཞིག་བྱུང་ན་རྒྱུ་མཚན་གོ་ལོག་གི་ཐོག་ནས་རྗེས་སུ་ཡི་རང་བྱེད། མི་ལ་བཟང་ཁེ་རྒྱན་གསུམ་ཞིག་བྱུང་ན་ཕྲག་དོག་གིས་ཀུན་ནས་སློང་པས་སེམས་མི་བདེ་བའི་ན་ཚ་སྐྱེས་ནས། དེ་འདྲའི་བསམ་སྦྱོར་ངན་པས་གཞན་གནོད་ཁོ་ནར་བྱེད་པའི་སེམས་ཅན་དེ་འདྲས་ས་ཕྱོགས་གང་ལའང་ཁྱབ་ཡོད་ན། དེའི་ས་ཆ་དེར་དཀར་ཕྱོགས་ལ་དགའ་བའི་ལྷ་དང་སྲུང་མ་རྣམས་ཞལ་གཞན་ལ་ཕྱོགས། ནག་ཕྱོགས་ལ་དགའ་བའི་མི་དང་མི་མིན་ཐམས་ཅད་ཀྱིས་གནོད་བྱེད་པས་བཀྲ་མི་ཤིས་པ་མང་པོར་འབྱུང་བ་དེ་འདྲ་ཡིན། དུས་ཚོད་དེ་འདྲ་ལ་ཐོན་དུས་དམ་ཆོས་བསྒྲུབ་པའི་བར་ཆད་ལྷག་པར་ཆེ། ནག་ཕྱོགས་མི་དང་འདྲེ་བདུད་ཁ་དར་ན། །དཀར་ཕྱོགས་དབུགས་དབྱུང་མཛོད་ཅིག་པད་མ་འབྱུང་། །ཞེས་པའི་གསོལ་བ་འདེབས་དགོས་པའི་དུས་སྐབས་རེད། དུས་འདི་འདྲའི་སྐབས་ལ་ཐོན་དུས་ལྷག་པར་བྱང་ཆུབ་སེམས་མཆོག་རིན་པོ་ཆེ་རྒྱུད་ལ་འབྱོང་བའི་ཆོས་སྒོ་ལ་ཞུགས་ནས་འབད་པར་བྱས་ན་མི་མཐུན་ཕྱོགས་ཀྱི་རྐྱེན་ངན་གྲོགས་སུ་འགྱུར། ལྟས་ངན་གཡང་དུ་ལེན་པའི་དགོས་པ་དང་ལྡན་པ་ཡིན། རང་རེས་ཕྱི་མ་བདེ་བ་ཅན་གྱི་ཞིང་ཁམས་ལ་སྐྱེ་བའི་སྨོན་ལམ་འདེབས་ཀྱིན་ཡོད་ཀྱང་། བྱང་ཆུབ་སེམས་ཀྱི་སྟོབས་ཀྱིས་དགྲ་གཉེན་ལ་བསྒྱུར། རྐྱེན་ངན་ཡོད་ཚད་བྱང་ཆུབ་བསྒྲུབ་པའི་གྲོགས་ལ་སྒྱུར་ཤེས་དུས་མི་བདེ་བ་ཞིག་ཡོད་པ་མ་རེད། ད་ལྟ་ནས་ནང་སེམས་ཀྱི་བདེ་བ་ཅན་རང་གིས་ཀྱང་བྱས་ཆོག་པ་རེད། སེམས་ཀྱི་བདེ་བ་དེ་འདྲ་མ་ཐོབ་ན་ཕྱི་ཡི་འབྱོར་པ་བདེ་ཆེན་གྱི་ཞིང་འདྲ་བའི་ཆ་རྐྱེན་ཞིག་ཐོབ་ཀྱང་བདེ་བའི་མིང་ཡང་ཡོད་པ་མ་རེད། དགྲ་ཡང་དགེ་བའི་བཤེས་ཡིན་བཟོད་པ་ཡི་བསྐུལ་མ། །གཉེན་ཡང་དགེ་བའི་བཤེས་ཡིན་བྱམས་པ་ཡི་བསྐུལ་མ། །ཐམས་ཅད་དགེ་བའི་བཤེས་ཡིན་སྙིང་རྗེ་ཡི་བསྐུལ་མ། །སྣང་བ་དག་པར་ཤར་ན་དཀྱིལ་འཁོར་གྱི་འཁོར་ལོ། །ཞེས་གསུངས་པ་ལྟར་ཐམས་ཅད་དག་སྣང་གི་གཞི་མ་དང་། ཐམས་ཅད་བདེ་བའི་རྒྱུ་རྐྱེན་དུ་ཤར་སོང་དུས། བདེ་བ་ཅན་ཞེས་ཟུར་དུ་བཙལ་མི་དགོས། ཤི་དུས་ཕར་རྒྱབ་ན་ད་གཟོད་བདེ་བ་ཅན་དུ་སྐྱེས་ཏེ་བདེ་བ་ཐོབ་འདོད་ཀྱི་སྒུག་ཡུན་རིང་པོ་དེ་ཡང་དགོས་པ་མ་རེད། ཕྱི་མ་བདེ་བ་ཅན་དུ་སྐྱེ་ཐབས་ཀྱི་རྒྱུ་ཡང་དེ་བས་ཟབ་ཅིག་ཡོད་པ་མ་རེད། བློ་སྦྱོང་སྙན་བརྒྱུད་ཆེན་པོ་ལས་ཀྱང་འདི་འདྲ་གསུངས་ཡོད། དེ་ལྟར་སྒོམ་པའི་ལུས་འདོམ་གང་གྲུ་བཞི་འདི་བདེ་བ་ཅན་གྱི་ཞིང་ཁམས་ཡིན་པར་མ་ཟད། མི་འཁྲུགས་པའི་འཇིག་རྟེན་གྱི་ཞིང་ཁམས་ཀྱང་དེ་ལ་ཟེར། རྒྱུ་མཚན་ཅིའི་ཕྱིར་ན། ལུས་སེམས་ཀྱི་སྡུག་བསྔལ་མེ་དཔུང་ལྟ་བུའང་འཁྲུགས་པ་མི་ནུས་པའི་ཕྱིར་རོ། །ཞེས་དང་། གྲོང་ཁྱེར་སྐྱིད་པའི་འབྱུང་གནས་ཀྱང་དེ་ལ་ཟེར་ཞེས་ཀྱང་གསུངས་ཡོད། ཞིང་དག་པ་དང་། དུས་བསྐལ་པ་བཟང་དུས་སུ་ཡུན་རིང་ལ་ཚོགས་ཆེན་པོ་བསགས་པ་བས་དུས་སྙིགས་མའི་སྐབས་འདིར་བྱང་ཆུབ་ཀྱི་སེམས་སྒོམ་པའི་ཕན་ཡོན་ཆེ་བར་མ་ཟད་ཚོགས་འདུམ་སླ་བས། བྱ་སླ་ལ་ཆོད་ཆེ་བ། དུས་ངན་དུས་བཟང་དུ་སྒྱུར། མི་ངན་མི་བཟང་དུ་སྒྱུར་བའི་ཐབས་དང་མན་ངག་ཁྱད་པར་ཅན་ཞིག་ཀྱང་འདི་ཡིན། དེས་དང་པོ་ཆོས་མ་ཐོབ་པའི་སྐྱོན་ཆ་ཤེས། དེ་ནས་དམ་ཆོས་ཐོབ་པའི་ཕན་ཡོན་གོ། ད་ཆོས་ཞུ་ལུགས་ཅི་འདྲ་དགོས་ཧ་ལམ་འདྲ་བོ་གོ་སོང་དུས། སེམས་ཅན་ཐམས་ཅད་ཀྱི་དོན་དུ་དམ་པའི་ཆོས་ཟབ་མོ་ཉན་དགོས་བསམ་རྒྱུའི་བསམ་པ་བྱང་ཆུབ་སེམས་ཀྱིས་རྩིས་ཟིན་པ་ཞིག་རེད་ཐུབ་པ་རེད། སྤྱིར་ན་སེམས་ཅན་སྲོག་ལྡན་ཞིག་ཡིན་ཚད་རང་ཅི་འདྲ་རོགས་ཡིན་པས། བདེ་བ་འདོད་ཅིང་སྡུག་བསྔལ་མི་འདོད་པ་ཤ་སྟག་རེད། དེའི་སྟེང་ན་ཐོག་མེད་ནས་མཐའ་མེད་དུ་འཁོར་ཞིང་འཁྱམས་པའི་འཁོར་བ་འདི་ལ་ཐོག་མཐའ་མེད་པའི་སྟོབས་ཀྱིས། སེམས་ཅན་གཅིག་གིས་གཅིག་ལ་ཕ་མར་བྱས་མ་མྱོང་བ་གཅིག་ཀྱང་མེད་པར་མ་ཟད། ད་ལྟ་ཚེ་འདིའི་ལུས་འདི་སྐྱེད་པའི་ཕ་མ་ཇི་ལྟ་བ་བཞིན་དུ་དྲིན་ཆེན་པོས་སྐྱོང་བ་འབའ་ཞིག་ཡིན། འོན་ཀྱང་མ་རིག་རྨོངས་པའི་གཞན་དབང་དུ་སོང་ནས་ཕ་མར་ཡིན་པའི་འདང་མ་ཕོག་པས། སྐབས་རེར་དགྲ་ལ་འགྱུར། སྐབས་རེར་གཉེན་ལ་འགྱུར་བ་གང་མང་མང་ཡིན། དགྲ་ལ་འགྱུར་དེ་གནོད་པ་བྱེད་པ་དེའང་སྔོན་ཞིག་ལ་རང་ཉིད་ཀྱིས་ཕར་གནོད་པ་བསྐྱལ་བའི་ལན་ཆགས་ཚུར་འཁོར་བས་རྣམ་སྨིན་གྱི་བུ་ལོན་སྤྲད་པའི་དུས་ལ་བབ་འོང་བ་ཡིན་ན། ཕ་རོལ་བོ་སྙིང་རྗེའི་ཡུལ་ཡིན། མདོར་ན་སེམས་ཅན་ཐམས་ཅད་དང་པོ་བཏང་སྙོམས་ཚད་མེད་ཀྱིས་སྙོམས་པར་བྱས། དེ་ནས་བདེ་བ་དང་བདེ་བའི་རྒྱུ་དང་ལྡན་འདོད་ཀྱི་བྱམས་པ་དང་། སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་འདོད་ཀྱི་སྙིང་རྗེ། སྡུག་བསྔལ་མེད་པའི་བདེ་བ་དང་མི་འབྲལ་བ་ལ་དགའ་བའི་དགའ་བ་སྟེ། དེ་ལྟ་བུའི་ཚད་མེད་བཞི་ལ་བློ་སྦྱོང་བ་དང་མི་འབྲལ་བའི་དམིགས་རྣམ་གྱི་སྟེང་དུ། བསམ་པ་རྒྱ་ཆེ་བྱང་ཆུབ་སེམས་ཀྱི་ཀུན་སློང་དོན་གཉིས་སམ་ཟུར་གཉིས་དང་ལྡན་པའི་སེམས་བསྐྱེད་པར་བྱ། དེའི་ཐོག་ཏུ་ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་སྣོད་བཅུད་དག་པའི་དཀྱིལ་འཁོར་དུ་རོ་གཅིག་པར་བསམ་ནས་ཆོས་འཆད་ཉན་ལ་འཇུག་དགོས་སོ། །སྐབས་སུ་བབ་པ་གང་ཞིག་གསན་པར་བྱ་བ་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྡེ་ལས་བྱུང་བའི་མན་ངག་གི་གཞུང་། ཐུན་མོང་གི་སྔོན་འགྲོ་སེམས་སྦྱོང་བདུན་པའི་དོན་ཁྲིད་ཐར་པའི་ཐེམ་སྐས་དེ་ཉིད་ཁྲིད་པའི་སྐབས་ཡིན་ན། འདི་ལ་ཐོག་མར་དགེ་བ་ཀླད་ཀྱི་དོན་དང་། བར་དུ་དགེ་བ་གཞུང་གི་དོན། མཐའ་མར་དགེ་བ་མཇུག་གི་དོན་དང་གསུམ་གྱི་ཐོག་ཏུ་འཆད་པ་ལས། ཐོག་མར་དགེ་བ་ཀླད་ཀྱི་དོན་སོང་ནས། གཉིས་པ་བར་དུ་དགེ་བ་གཞུང་གི་དོན་ལའང་ཐེག་པ་སྤྱིའི་ཁོག་འབུབས་དང་། ཆོས་འཆད་ཉན་ཇི་ལྟར་བྱ་བའི་སྐོར་སོགས་བཤད་གྲུབ་ནས། ད་དངོས་ཀྱི་ཁྲིད་རྐང་བདུན་ལས་དང་པོ་རེད། ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྗོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ་བའི་ཕྱིར་དུ། སྟོན་པ་བདེ་བར་གཤེགས་པའི་གསུང་གི་བདུད་རྩི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་མཐའ་དག་གི་ཡང་ཞུན་ཐེག་པའི་རྩེ་རྒྱལ་རང་བཞིན་རྫོགས་པ་ཆེན་པོའི་འབྲས་བུ་དོན་དུ་གཉེར་བའི་ལམ་ལ་འཇུག་གོ་སྙམ་པའི་མོས་པ་མི་ཕྱེད་པས་གཞི་བཟུང་། ཞེས་གསུངས་ན། ནམ་མཁའ་ཞེས་པ་བར་སྣང་སྟོང་པར་གོ་འབྱེད་པའི་ཆ་དེ་ལ་མཐའ་འདི་རེད་ཅེས་པ་ཞིག་མེད་པའི་མཐའ་མེད་ཀྱི་ནམ་མཁའ་དང་མཉམ་པའི་སེམས་ཅན་ཟད་པའི་མཐའ་མེད་པར་གྲངས་མེད་ཚད་ལས་འདས་པའི་ཤིན་ཏུ་མང་པོ་དེ་དག་ཐམས་ཅད། བླ་ན་མེད་པ་ཡང་དག་པར་རྫོགས་པའི་སངས་རྒྱས། འཐོབ་བྱའི་མཆོག་མཐར་ཐུག་པ་སྐུ་བཞི་ཡེ་ཤེས་ལྔ་ཡི་བདག་ཉིད། སྲིད་དང་ཞི་བའི་མཐའ་ལས་འདས་པའི་གོ་འཕང་དམ་པ་ལ་སེམས་ཅན་དེ་དག་ཐམས་ཅད་འགོད་པར་བྱ་བའི་ཕྱིར་དུ། འཇིག་རྟེན་གྱི་མིག་ལྷ་དང་བཅས་པའི་སྐྱབས་དང་མགོན་དམ་པ་སྟོན་པ་བདེ་བར་བཤེགས་པའི་གསུང་གི་བདུད་རྩི་སྟེ། རྒྱལ་བའི་གསུང་ནི་རྣམ་པ་ཐམས་ཅད་དུ། །གསུང་གཅིག་སྒྲ་ལས་དུ་མའི་ཚུལ་གོ་སྟེ། །གང་ཡང་བརྗོད་པ་རྙོག་པ་མི་མངའ་བས། །ཟབ་པའི་ཚུལ་དེ་རྒྱ་ཆེར་གྱུར་པ་ཡིན། །ཞེས་གསུངས་པ་ལྟར། རྗོད་བྱེད་ཀྱི་ངག་དག་པ་ཡིན་པས་གསུང་དབྱངས་ཡན་ལག་དྲུག་ཅུ་དང་ལྡན་པའི་གསུང་གི་བདུད་རྩི། དེའི་བརྗོད་བྱའི་དོན་བཟང་ཞིང་ལམ་ཐེག་པ་གསུམ་གྱི་གནད་ཡོད་ཚད་ཚང་བ། དུག་གསུམ་ཆ་མཉམ་དང་བཅས་པ་འདུལ་བའི་གཉེན་པོ། སྡེ་སྣོད་གསུམ་མམ་བཞི་ཞེས་རིག་པ་འཛིན་པ་སྔགས་ཀྱི་སྡེ་སྣོད་དང་བཅས་པའི་ཆོས་ཕུང་བརྒྱད་ཁྲི་བཞི་སྟོང་མཐའ་དག་གི་སྙིང་པོའི་བཅུད་དམ་ཡང་ཞུན་ཐེག་པའི་རྩེ་རྒྱལ་རང་བཞིན་རྫོགས་པ་ཆེན་པོའི་འབྲས་བུ་དོན་དུ་གཉེར་བའི་ལམ་ལ་སྟེ། རྫོགས་པ་ཆེན་པོ་འགྲེལ་ཚུལ་གཞན་ཞིག་བྱེད་ན། འཁོར་འདས་སྣང་བཏགས་ཀྱིས་བསྡུས་པའི་ཆོས་ཐམས་ཅད་ཀྱི་མ་བཅོས་གཤིས་ཀྱི་རང་བཞིན་གྱི་གནས་ལུགས་དེ། སངས་རྒྱས་བཟང་པོས་ཇེ་བཟང་ལ་མ་གཏོང་། སེམས་ཅན་ངན་པས་ཇེ་སྡུག་ལ་མ་གཏོང་བས། བློ་བྲལ་སེམས་ལས་འདས་པའི་རིག་པ་སྐད་ཅིག་མ་འདིའི་ཀློང་དུ་མ་རྫོགས་པར་མེད་པར་མ་བཙལ་ཡེ་རྫོགས་ཀྱི་ཚུལ་དུ་ཡོད་པས་ན་རྫོགས་པ། དེ་ལྟ་བུའི་སེམས་ཀྱི་ཆོས་ཉིད་དེ་གནས་ལུགས་རང་གི་གཤིས་ཐོག་ན་སྒྲིབ་པས་གོས་མ་མྱོང་བ་ལ་ངོ་བོ་ཡེ་དག་གི་སྤངས་པ་ཕུན་ཚོགས་དང་། ཡང་ངོ་བོ་སྟོང་ཕྱོགས་ནས་ཁས་ལེན་ཐམས་ཅད་དང་བྲལ་ཞིང་། རང་བཞིན་གསལ་བའི་ངོས་ནས་སྟོབས་བཅུ་མི་འཇིགས་སོགས་རྒྱལ་བའི་ཡོན་ཏན་ལྷུན་གྲུབ་ཏུ་ཡོད་པར་མངོན་དུ་གྱུར་པའི་གློ་བུར་འཕྲལ་དག་གི་རྟོགས་པ་ཕུན་ཚོགས། དེ་ལྟ་བུའི་གསལ་སྟོང་ཕྱོགས་སུ་མ་ལྷུང་བར་ཟུང་འཇུག་ལྷུན་གྲུབ་རྟེན་འབྱུང་གི་རང་བཞིན། སྐུ་གསུམ་རང་ཆས། ལས་བཞི་ལྷུན་གྲུབ། ཕྲིན་ལས་ཕུན་སུམ་ཚོགས་པ་སྟེ། སྤངས་རྟོགས་ཕྲིན་ལས་གསུམ་གྱི་བདག་ཉིད་ཡིན་པས་ན་ཆེན་པོ། རྫོགས་པ་ཆེན་པོ་འདི་བཞག་པར་ཐེག་པ་རིམ་དགུའི་ཡང་རྩེར་བཞག་ཀྱང་། ཡིན་པར་རྒྱུ་འབྲས་གཉིས་ལས་འབྲས་བུའི་ཐེག་པ་ཡིན་པས་ན། རྫོགས་པ་ཆེན་པོའི་འབྲས་བུ་དོན་དུ་གཉེར་བའི་ལམ་ལ་འཇུག་གོ་སྙམ་པའི་མོས་པ་མི་ཕྱེད་པས་གཞིར་བཟུང་སྟེ། དམ་ཆོས་ཇི་ལྟར་ཉན་དགོས་པ་དེ་ཡང་། མདོ་ལས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་པར་བྱའོ། །ཞེས་པས་རྣ་བ་མི་གཏད་ཁ་སྦུབ་ལྟ་བུའི་སྐྱོན་དང་། ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན། ཉོན་མོངས་དང་འདྲེས་དུག་ཅན་ལྟ་བུའི་སྐྱོན་གསུམ་སྤངས་ཏེ་ཉན་དགོས་པར་བསྟན་པ་དང་། ཀུན་མཁྱེན་ཆེན་པོས། ཉན་བྱེད་སྣོད་ཀྱི་སྐྱོན་དྲུག་སྤོང་བ་ནི། །དུས་ལ་མ་བབ་རྫ་སོ་མ་བཏང་དང་། །རྣ་བ་མི་གཏོད་ཁ་སྦུབ་ལྟ་བུ་དང་། །ཐོས་པ་མི་བརྟན་ཞབས་རྡོལ་ལྟ་བུ་དང་། །ཉོན་མོངས་དང་འདྲེས་དུག་ཅན་ལྟ་བུ་དང་། །ལམ་དུ་མི་འགྲོ་དྲི་མ་སྦགས་འདྲ་དང་། །ཚིག་གི་ང་རྒྱལ་སྣོད་ངན་གང་འདྲ་བའི། །སྐྱོན་རྣམས་སྤངས་ཏེ་ལེགས་པར་རབ་ཏུ་ཉོན། །ཞེས་གསུངས་པ་ལྟར་སྣོད་ཀྱི་སྐྱོན་གསུམ་དང་དྲུག་སྤངས་ཏེ་རང་ཉིད་ལ་ཉོན་མོངས་པའི་ནད་ཀྱིས་ཡུན་རིང་དུ་མནར་བས་སྡུག་བསྔལ་གསུམ་གྱི་ཟུག་རྔུ་ཡོད་པའི་ནད་པ་ཞིག་གི་འདུ་ཤེས་དང་། དམ་པའི་ཆོས་ཞི་བསིལ་འདུས་མ་བྱས་པ་དེས་ནད་དེ་སེལ་བར་བྱེད་པས་ན་ཆོས་ལ་བདུད་རྩི་སྨན་གྱི་འདུ་ཤེས། དམ་པའི་ཆོས་མཐར་ཐུག་པ་གང་གི་ཐུགས་རྒྱུད་ལ་མངའ་ཞིང་གདུལ་བྱའི་ཉོན་མོངས་པའི་ནད་ཀྱི་ཟུག་རྔུ་སེལ་བྱེད་ཆོས་མཆོག་སྨན་གྱི་བདུད་རྩི་འགྲོ་ལ་བརྩེ་བས་སྟོན་པར་མཛད་པའི་སྟོན་པ་ལ་སྨན་པ་མཁས་པའི་འདུ་ཤེས། དམ་པའི་ཆོས་ནན་ཏན་ཉམས་སུ་ལེན་ཏེ་རང་རྒྱུད་ལ་སྦྱོར་བ་དེ་ལ་ནད་གསོ་བའི་འདུ་ཤེས། རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རེག་པར་བྱ་ཞིང་བསྟེན་པར་བྱ། །ཞེས་གསུངས་པ་ལྟར་དང་། དེ་བཞིན་གཤེགས་པ་ལ་འཇིག་རྟེན་དུ་འབྱོན་པ་དཀོན་ཞིང་འདྲེན་པ་ཀུན་གྱི་མཆོག་ཡིན་པས་སྐྱེས་བུ་དམ་པ་མཚུངས་ཟླ་དང་བྲལ་བ་ཡིན་པའི་འདུ་ཤེས། དེའི་གདུང་འཚོབ་ཅིང་ལུང་རྟོགས་དམ་པའི་ཆོས་ཚུལ་འཆད་ཉན་བྱས་པས་འཇིག་རྟེན་གྱི་ཁམས་ལ་ཡུན་རིང་དུ་གནས་པའི་འདུ་ཤེས་ཏེ་དེ་ལྟར་འདུ་ཤེས་དྲུག་དང་། གཞན་ཡང་ཉེས་པ་སུམ་བཅུ་རྩ་དྲུག་སྤངས་ལ་ཉན། །གང་ཚེ་ལེགས་པའི་ཚུལ་གྱིས་མཉན་བྱ་བ། །ནོར་བུའི་འདུ་ཤེས་ལ་སོགས་གཅེས་པ་དྲུག །ཉོན་མོངས་བཟོད་སོགས་དཀའ་བའི་སྤྱོད་པ་དྲུག །ཐོས་མང་གཉེར་སོགས་རྐྱེན་གྱིས་མི་འགྱུར་དྲུག། སོགས་ཀུན་མཁྱེན་ཆེན་པོའི་མན་ངག་མཛོད་ལས་མ་གུས་ལ་སོགས་སྐྱོན་སོ་དྲུག་དང་བྲལ་ཞིང་། ནོར་བུའི་འདུ་ཤེས་སོགས་ཡོན་ཏན་རྩ་དྲུག་དང་ལྡན་པར་བྱས་ནས་ཆོས་ཉན་དགོས་པར་གསུངས་པས། དེ་ལྟ་བུའི་འདུ་ཤེས་དྲུག་དང་ཀུན་སློང་ཀུན་སྤྱོད་ཡང་དག་པར་ལྡན་པས་ཆོས་ཉན་དགོས་ཏེ། ཀུན་ཏུ་བཟང་པོའི་རྒྱུད་ལས། བདེ་བའི་ས་ལ་སྐྱིལ་ཀྲུང་བཅའ། །ས་གཅིག་དག་ལས་གནས་མི་སྤོ། །ཞྭ་མོ་ཡོད་ན་མདུན་དུ་བཞག །སྐྲ་ལོ་ཡོད་ན་མདུན་དུ་ཕབ། །ལག་པ་ཐལ་སྦྱར་མཉམ་བཞག་བཅའ། །ཞེས་ཆོས་ཉན་ཚུལ་ལུང་གིས་བསྟན་པ་རེད། ཆོས་སྨྲ་བ་པོའི་མདུན་གྱི་དམའ་ཞིང་བདེ་བའི་ས་ལ་འདུག་ཚུལ། རྐང་པ་སྐྱིལ་ཀྲུང་བཅས་ནས་ཡར་ལང་མར་འདུག་མང་པོ་ཞིག་མི་བྱེད་པར་འདུག་ས་གཅིག་པོ་དག་ལ་གནས་པར་བྱ་ཞིང་། གུས་པའི་རྣམ་འགྱུར་གྱིས་ཞྭ་ཕུད་ནས་མདུན་དུ་བཞག ཁྱིམ་ན་གནས་པའི་རིགས་ཅན་སོགས་མགོར་སྐྲ་ལོ་ཡོད་ན་གུས་པའི་ཚུལ་གྱིས་སྐྲ་མདུན་དུ་ཕབ། ལག་པ་གཉིས་ཐལ་མོ་སྦྱར་བ་དང་། ཡང་ན་ལུས་དྲང་པོར་བསྲངས་ནས་གནས་ཤིང་ལག་པ་མཉམ་བཞག་གི་སྒོ་ནས་འདུག་ལ། ལག་གིས་འདུ་བྱེད་ཐམས་ཅད་སྤོང་། །མིག་གིས་བླ་མའི་ཞལ་ལ་ལྟ། །རྣ་བས་བླ་མའི་གསུང་ལ་ཉན། །སེམས་ཀྱིས་ཚིག་དོན་གཏན་ལ་འབེབས། །ཞེས་ཆོས་ཞུ་དུས་ལག་པས་ཡི་གེ་འབྲི་བ་དང་། འཁོར་ལོ་བསྐོར་བ་སོགས་མི་བྱེད་པར་འདུ་བྱེད་ཐམས་ཅད་སྤོང་དགོས། སྤྱིར་ཡི་གེ་འབྲི་མཆོད་སོགས་ཆོས་སྤྱོད་ཀྱི་བྱ་བ་བཅུ་ལས་གཅིག་ཡིན་པས་དུས་རྒྱུན་པར་དགོས་རྒྱུ་ཞིག་ཡིན་ཡང་། ཆོས་ཁྲིད་ཀྱི་སྐབས་སུ་ཡི་གེ་འབྲི་བ་དང་འཁོར་ལོ་བསྐོར་བ་སོགས་མི་བྱ། དེ་མིན་ཡང་སྒྲིག་ཆེན་པོའི་སྐབས་སུ་འཁོར་ལོ་བསྐོར་བ་སོགས་ཡག་ནི་མ་རེད། ཆོས་ཉན་དུས་ཆོས་དེ་ལ་རིག་པ་གཏད་དེ་སྒོ་གསུམ་ཆུན་གཅིག་ཏུ་དྲིལ་ཏེ་ཉན་དགོས། དེས་ན་འདུ་བྱེད་ཐམས་ཅད་སྤོང་ཞེས་གསུངས་པ་རེད། མིག་གི་དབང་པོས་བླ་མའི་ཞལ་ལ་དགའ་ཞིང་དང་བའི་སྒོ་ནས་ལྟ་བའམ། ཡང་ན་གུས་པས་མིག་ཕབ་སྟེ་ཉན་དགོས། རྣ་བའི་དབང་པོས་བླ་མའི་གསུང་དམ་པའི་ཆོས་ཀྱི་སྒྲ་ལ་ཉན། སེམས་ཀྱིས་བླ་མས་གསུངས་པའི་ཆོས་ཀྱི་ཚིག་དང་དོན་ལ་བསམ་པས་དཔྱད་དེ་གཏན་ལ་འབེབས། ཐེ་ཚོམ་ཡོད་ན་ལོག་ལ་ཞུ། །ངག་ཏུ་ཤུབ་པའི་ཚིག་རྣམས་སྤང་། །རྐང་བརྐྱང་གཞོགས་སྙེས་ཆེ་བཅོས་དང་། །མ་གནང་ཁྲི་དང་སྟན་སྟེགས་སྤང་། །ཞེས་མི་ཤེས་པ་དང་ཐེ་ཚོམ་ཡོད་ན་སྐབས་དང་བསྟུན་ནས་ལོགས་སམ་ཟུར་དུ་ཞུས་ནས་ཐེ་ཚོམ་གཅོད། ཆོས་ཞུ་བའི་ཚེ་ངག་འཁྱལ་བཤད་པ་སོགས་ངག་ཏུ་ཤུབ་བུའི་ཚིག་རྣམས་ཏེ་གོ་ལ་མི་གོ་པའི་སྐད་ཆ་བཤད་པ་སྤོང་དགོས། ཡང་མི་སྐྱ་ཕོ་མོ་སོགས་མི་ཚང་མ་མཉམ་དུ་ཚོགས་པའི་ཚེ་ཡུན་རིང་མ་འཕྲད་པས་དང་པོ་ཐུག་དུས་ཁྱོད་ཨེ་བདེ་དང་ང་བདེ་ཟེར་དགོས་ཀྱང་། ཆོས་རའི་ནང་ནས་ཁ་གྲག་མི་ཉན། ཁ་ཡིས་སྐད་ཆ་བཤད་ན་སེམས་ཆོས་ཕྱོགས་སུ་མི་འགྲོ་བ་དང་། གཞན་ལ་ཆོས་མི་གོ་བའི་འགལ་རྐྱེན་བྱེད་པས་དེས་ན་སྐྱོན་དེ་དག་སྤངས་ཏེ་ཉན་དགོས། ཆོས་ཉན་པའི་ཚེ་རྐང་པ་བརྐྱང་བ་དང་། གཞོགས་སྙེས་ཏེ་ཁེན་ནས་འདུག་པ་དང་། ཆེ་བཅོས་ཏེ་ཆེ་འགྱིང་གི་ཉམས་བཏོད་ནས་འདུག་པ་རྣམས་མི་ཉན། བླ་མས་མ་གནང་བཞིན་དུ་ཁྲི་དང་སྟན་འདིང་བ། སྟེགས་བུའི་སྟེང་དུ་འདུག་པ་སོགས་སྤོང་དགོས། འདི་ན་ཡོད་པ་མང་ཆེ་བ་དགེ་འདུན་པ་ཡིན་ཡང་། རྒ་རྒས་དང་རྒན་ཞུགས་ཇོ་རྒན་མ་སོགས་ནད་པ་ཡོད་རྒྱུ་རེད། འདུག་ན་རྐང་པ་སྐུམ་མི་ཐུབ་པ་དེ་ཚོ་ཁག་མེད། རྒ་ན་གཉིས་ཀ་དབང་མེད་བདུད་ཀྱི་ཆུ་བོ་སུས་ཀྱང་འགོག་མི་ནུས་པས་ཐོག་ཏུ་བབ་པ་རེད། སྤྱིར་རྒན་པོ་རྒན་མོ་རབ་ཏུ་བྱུང་རྒྱུ་འདི་གྲྭ་ལོག་ཇོ་ལོག་སྡོམ་པ་ཡང་ཞུ་བྱེད་པ་བས་འདུལ་བ་དང་མཐུན་དང་མཐུན་ཡིན་ཏེ། ཁྱིམ་བདག་དཔལ་སྐྱེས་བཅོམ་ལྡན་འདས་སྐུ་བཞུགས་ཡོད་དུས་རྒས་ཤིང་འཁོགས་པ་རབ་ཏུ་བྱུང་བ་རེད། འོན་ཀྱང་སྒྲིག་ལམ་དང་བསྟུན་དགོས། འདུལ་བའི་ལས་ཆོག་ལས་སློབ་དཔོན་དང་མཁན་པོ་རྣམས་ཀྱིས་དྲིས་པའི་ཚེ་ཁྱོད་ཀྱི་ལུས་ལ་ནད་ཀྱི་རྣམ་པ་གང་དང་གང་དག་མེད་དམ་ཞེས་དྲིས་པ་དེར་རྒྱུ་མཚན་ཞིག་ཡོད་ནས་དྲིས་པ་རེད། གཞན་ཡང་སྐྲ་སེར་ཅན་སོགས་མཛེས་པའི་བར་ཆད་མེད། །ཅེས་གསུངས་ཡོད་པས་བསྟན་པ་ལ་འཕྱ་སྨོད་མི་བྱེད་པའི་ཆེད་དུ་མིག་ལ་མཛེས་མོ་དང་བ་འདྲེན་པའི་སྤྱོད་ལམ་བསྟེན་དགོས་སོ། །མི་ན་བ་ལ་མགོ་གཡོགས་དང་། །དགྲ་མེད་པ་ལ་མཚོན་ཐོགས་དང་། །མ་རྒས་པ་ལ་དབྱུག་ཐོགས་དང་། །ཚུལ་དང་མི་མཐུན་ཐམས་ཅད་སྤང། །ཞེས་གསུངས་ཏེ། ནད་ཀྱིས་ན་སྟེ་བླ་མས་གནང་བ་མིན་ན་མི་ན་བ་ལ་མགོ་བོ་གོས་དང་རས་ཀྱིས་གཡོགས་པ་དང་། མཆིམས་ལྷམ་གྱོན་པ་དང་། དགྲ་མེད་བཞིན་དུ་ལག་ན་མཚོན་ཆ་ཐོགས་པ་སྤོང་དགོས། དེའང་དགྲ་ཡོད་ན་མཚོན་ཆ་ཐོགས་ནས་དགྲ་གསོད་ཆོག་གསུངས་པ་མ་རེད། བྱང་སེམས་དང་སྔགས་རྫོགས་མ་ཟད་ཐུན་མོང་ཐེག་པའི་ལུགས་ལའང་དགེ་སྦྱོང་གི་ཆོས་བཞི་ཁྲོ་བ་ལ་སླར་མི་ཁྲོ་བ་དང་། རྡེག་པ་ལ་སླར་མི་རྡེག་པ་སོགས་ཡིན་པས། དགྲ་དང་གཅན་གཟན་སོགས་ཀྱིས་འཚེ་བ་མེད་པར་རང་གི་གནོད་པ་སྲུང་ཆེད་དུ་མ་གུས་པའི་སྤྱོད་ལམ་མ་གཏོགས་པ་རྣམས་དེ་ལྟ་བུའི་དགོས་པ་ཡོད་ན་གནང་བ་ཡོད། ལོ་ན་མ་རྒས་པ་དང་ལུས་ཚུགས་མི་བརྟན་པའི་ནད་སོགས་མེད་བཞིན་དུ་ལག་ན་ཆེ་འགྱིང་གིས་ལག་རྟེན་དབྱུག་པ་ཐོགས་པ་དང་། གཞན་ཡང་མིག་ལ་ནད་དང་སྐྱོན་མེད་བཞིན་དུ་ལྷ་ཁང་ནང་དུ་ཤེལ་མིག་ནག་པོ་གྱོན་པ་སོགས་ཚུལ་དང་མི་མཐུན་པའི་སྤྱོད་ལམ་ངན་པ་ཐམས་ཅད་སྤོང་དགོས། ཚིག་དོན་རེ་རེ་གཞིག་འགྲེལ་བྱ། །ཆོས་ཐུན་མཇུག་གི་དམིགས་པ་ལ། །ནན་ཆགས་ཆེན་པོ་གོང་འོག་མཐུད། །ཐ་མལ་སྤྱོད་པ་ཐམས་ཅད་སྤང་། །ཆོས་ཁྲིམས་ལུང་བཞིན་བག་ཡོད་སྤྱད། །ཅེས་བླ་མས་གསུངས་པའི་ཆོས་ཀྱི་ཚིག་དང་དོན་རེ་རེ་ལའང་བསམ་གཞིག་སྟེ་བརྟགས་ཤིང་དཔྱད་ནས་འགྲེལ་བར་བྱ་ཞིང་། ཆོས་ཐུན་གྱི་དམིགས་པའི་གཙོ་བོ་དེ་ལ་ནན་ཆགས་ཏེ་ནན་ཏན་ཆེན་པོས་གོང་འོག་གི་དོན་ཐམས་ཅད་འཇུག་རིམ་གྱིས་མཚམས་སྦྱོར་ཞིང་མཐུད་ནས་ཆ་ཚང་དོན་འབྲེལ་གནད་དུ་གྱུར་པའི་ཐོག་ཏུ། ཆོས་ཀྱི་ཁྲིམས་གང་སྤང་བླང་བྱ་བ་ཐམས་ཅད་ལུང་ལས་ཇི་ལྟར་བྱུང་བ་བཞིན་དུ་བག་ཡོད་པའི་སྒོ་ནས་སྤྱད་པར་བྱའོ། །དེ་ལྟར་ཆོས་ཞུས་པའི་ལུས་ངག་གི་སྤྱོད་ལམ་དེ་ལྟར་དང་། སེམས་ཀྱིས་ཀྱང་ཡུལ་གཞན་ལ་མི་གཡེང་བར་ཆོས་ཀྱི་ཚིག་དོན་ལ་གཞོལ་བར་མ་ཟད། ཆོས་ཉན་པའི་ཚེ་ཏིང་ངེ་འཛིན་འདི་ལྟར་སྒོམ་དགོས་ཏེ། ཆོས་ཞུ་བ་པོ་སྐྱེས་པ་ཡིན་ན་རང་ཉིད་འཇམ་དཔལ་རྣོན་པོ་སྐུ་མདོག་དམར་སེར་ལག་ན་ཨུཏྤལའི་སྟེང་ན་རལ་གྲི་དང་། པོ་སྟི་འཛིན་པ་དང་། བུད་མེད་ཡིན་ན་ལྷ་མོ་སྒྲོལ་མ་སྐུ་མདོག་ལྗང་ཁུ་ལག་ན་ཨུཏྤལ་འཛིན་པ་དང་། ཆོས་འཆད་པ་པོ་དེ་ཐེག་པ་གང་དང་གང་ཡིན་ན་དེའི་དཀྱིལ་འཁོར་གྱི་གཙོ་བོ་དེ་ཡིན་པར་བསམ་ཞིང་། ཆོས་འཆད་པ་པོ་དེའི་ཞལ་ནས་ཆོས་ཀྱི་འོད་ཟེར་འཕྲོས་པ་རང་རང་གི་སྙིང་ནང་དུ་སོང་བས། མ་རིག་པའི་མུན་པ་སངས་ནས་བློའི་པདྨོ་རྒྱས་པར་བསམ་དགོས་པ་རེད། ཅེས་གསུངས་པས་ཀུན་སློང་དང་ཀུན་སྤྱོད་ཐམས་ཅད་ལེགས་པར་གསལ་བཏབ་སྟེ་གསན་འཚལ། ཞེས་ཀུན་སློང་བསམ་པ་བཟང་པོ་བྱང་ཆུབ་ཀྱི་སེམས་དང་ལྡན་པ་དང་། ཀུན་སྤྱོད་གོང་དུ་བཤད་པའི་བཟང་པོ་ཐམས་ཅད་མདོ་རྒྱུད་བསྟན་བཅོས་རྣམས་ལས་ཇི་ལྟར་འབྱུང་བ་བཞིན་ལེགས་པར་གསལ་བཏབ་སྟེ་གསན་པར་འཚལ། གང་ཞིག་གསན་པར་བྱ་བ་ནི་སྐབས་འདིར་མན་ངག་གི་གཞུང་གཞན་དང་སྦྱར་བའི་ཚུལ་གྱིས་འཆད་པ་དང་། མན་ངག་གི་གཞུང་འདི་ཁོལ་བུའི་ཚུལ་དུ་འཆད་པའི་ཚུལ་གཉིས་ཡོད་པ་ལས། སྐབས་འདིར་སྙིང་ཐིག་ཡ་བཞི་ལ་སོགས་པ་མན་ངག་གི་གཞུང་གཞན་དང་སྦྲེལ་བའི་ཚུལ་གྱིས་འཆད་པའི་སྐབས་ཡིན་ན། ཆོས་དེ་དང་འབྲེལ་བའི་ཆོས་ཀྱི་ཆེ་བ་དང་། དེའི་བརྒྱུད་རིམ་ཐུན་མོང་མ་ཡིན་པ་སློབ་མའི་ཁམས་དང་མོས་པ་དབང་པོ་དང་བསྟུན་ཏེ་དང་བ་འདྲེན་པར་བཤད་རྗེས་སམ། ཡང་ན་མན་ངག་འདི་ཉིད་ཁོལ་བུ་འཆད་པ་གང་ལྟར་ཡང་།

ཨོཾ༽ སེམས་སྦྱོང་དང་པོ།

སྔོན་འགྲོ་སེམས་སྦྱོང་དང་པོ་ནི། བུ་ཡིག་ལས། འདུས་བྱས་ཐམས་ཅད་མི་རྟག་པར་བསམ་པ་དང་། ཞེས་པའི་ཚིག་ཅིག་གསུངས་ཡོད་པས། འདུས་བྱས་ཀྱི་ཆོས་ཐམས་ཅད་གཅིག་ཏུ་བརྟན་པ་མ་ཡིན་པར་མི་རྟག་པའི་ཆོས་ལ་མི་རྟག་པར་བསམ་པ་དང་པོར་འཇོག་པ་རེད། དང་སྒྲ་ནི་ཁྲིད་རྐང་འོག་མ་དང་སྦྲེལ་བའི་ཚིག་ཡིན་ལ།

དང་པོ་ལུང་ལས་དཔག་ནས་བསམ་པ།

དང་པོ་ལུང་ལས་རྗེས་སུ་དཔག་ནས་བསམ་པ་ནི། རང་གཞན་སེམས་ཅན་ཐམས་ཅད་ཀྱིས་དོན་དུ་གཉེར་བྱ་དེ་བདེ་བ་ཡིན་ལ། བདེ་བའི་ནང་ནས་མཆོག་ཏུ་གྱུར་པ་གཏན་གྱི་བདེ་བ། ནམ་ཡང་སྡུག་བསྔལ་མྱོང་མི་དགོས་པ་ནི་ཐར་པའི་མཆོག་རྫོགས་པའི་སངས་རྒྱས་ཀྱི་གོ་འཕང་ཡིན། དེ་ལྟ་བུའི་བྱང་ཆུབ་བསྒྲུབ་དགོས་ན། དེ་སྒྲུབ་པའི་ལུས་རྟེན་ཚང་མ་ལས་མཆོག་ཏུ་གྱུར་པ་ནི་མིའི་ལུས་རྟེན་རེད། དེའང་དལ་འབྱོར་ཚང་བའི་ལུས་རྟེན་འདི་ཉིད་ཡིན་ན། ད་རེས་དལ་འབྱོར་ཚང་བའི་མིའི་ལུས་རྟེན་རྙེད་ཡོད་པ་ནི་དགའ་སྤྲོ་བྱ་འོས་པ་དང་། མི་ལུས་འདི་རིན་ཐང་ཅན་ཞིག་ཡིན་པར་མ་ཤེས་ན་དལ་རྟེན་ཆུད་ཟོས་བྱེད་པའི་ཉེན་ཁ་ཡོད་པ་རེད། དེའི་ཐོག་ནས་དལ་རྟེན་འདི་རིན་ཐང་ཅན་ཞིག་ཡིན་ཡང་། འདི་རྟག་བརྟན་ཅན་གྱི་བློ་གཏད་འཕེར་ས་ཞིག་མིན་པར་ཤེས་དགོས། དེ་ཤེས་ན་དལ་རྟེན་ཐོབ་པའི་གོ་སྐབས་བཟང་པོ་འདིའི་ཐོག་ནས་དགེ་བ་སྒྲུབ་པའི་བརྩོན་འགྲུས་རྩོམ་ཤེས་དགོས། དེ་ཡག་པོ་ཞིག་མ་ཤེས་པས་ལེ་ལོ་སྙོམས་ལས་ཀྱི་དབང་དུ་ཤོར་ནས་དུས་ཚོད་བཟང་པོ་དེ་ཆུད་ཟོས་སུ་ཤོར་ཉེན་ཡོད། དུས་ཚོད་བཟང་པོ་དེ་ཆུད་ཟོས་སུ་ཤོར་ན་ཐར་པའི་ལམ་སྣེ་ཟིན་དུས་ཤིག་མེད་པས། ད་སྔོན་ཐོག་མེད་ནས་ད་བར་སྡུག་བསྔལ་མྱོང་བ་ཡིན་ན། ད་དུང་མཐའ་མེད་ཀྱི་བར་དུ་འཁྲུལ་རྒྱུན་མི་ཆད་པར་སྡུག་བསྔལ་མྱོང་བ་མཐར་ཕྱིན་རྒྱུ་མེད་པ་ཞིག་འགྱུར་བའི་ཉེན་ཁ་དེ་ཚོ་ལ་བསམ་བློ་ཐོངས་དང་། དལ་འབྱོར་རྙེད་དཀའ་བ་ཅི་འདྲ་ཡིན་པ་འདི་ལ་ཐོག་མར་སྦྱོང་དགོས་པ་རེད། དལ་འབྱོར་རྙེད་པར་དཀའ་ཚུལ་ལ་བསམ་བློ་གཏོང་ན། རང་རྒྱུད་རྟེན་གྱི་མི་ཁོམ་པ་བརྒྱད་དང་། འཕྲལ་བྱུང་རྐྱེན་གྱི་མི་ཁོམ་པ་བརྒྱད། རིས་ཆད་བློ་ཡི་མི་ཁོམ་པ་བརྒྱད་དེ་མི་ཁོམ་པའི་གནས་ཉི་ཤུ་རྩ་བཞི་དང་བྲལ་བ། དེའི་ཐོག་ན་མིར་གྱུར། དབང་པོ་ཚང་། ཡུལ་དབུས་སུ་སྐྱེས་པ་སོགས་རང་འབྱོར་ལྔ། སངས་རྒྱས་བྱོན་པ་དང་དེས་ཆོས་གསུངས། བསྟན་པ་གནས། དེ་ལ་ཞུགས་པ་སོགས་གཞན་འབྱོར་ལྔ་སྟེ་དལ་འབྱོར་གྱི་ཆོས་སུམ་ཅུ་རྩ་བཞི་ཚང་བ་དེ་འདྲ་ཞིག་རྙེད་ཡོད་པ་ཡིན་ན། འདི་རྙེད་དཀའ་ཚུལ་ལ་བསམ་ན། དེ་སྔོན་སྐྱེ་བ་གྲངས་མེད་ན་ཚངས་དབང་དང་བརྒྱ་བྱིན་གྱི་ལུས་ཀྱང་གྲངས་མེད་བླངས་པ་དང་། ངན་སོང་ངན་འགྲོའི་ལུས་རྟེན་ལེན་པ་ཡང་རྩི་ཚོད་མེད་པ་ཞིག་ཡིན། དལ་འབྱོར་གྱི་ལུས་རྟེན་ཐོབ་པ་ནི་ད་རེས་ཙམ་ཡིན། དཔེར་ན་ཨུ་དུམ་ཝ་རའི་མེ་ཏོག་འཇིག་རྟེན་དུ་འབྱུང་བ་འདྲ་དང་། དེའི་ཐོག་ཏུ་ཆོས་ལ་དད་པའི་ལུས་འདི་དེ་བས་ཀྱང་དཀོན་པས་ཨུ་དུམ་ཝ་རའི་མེ་ཏོག་ལྟ་བུ་རྙེད་པ་དཀའ་བ་དང་། རྙེད་ན་དོན་ཆེན་པོ་དང་ལྡན་པ་ཡིན་པས། དེ་ཡང་རང་རེས་སྔོན་གྱི་བསགས་པ་ཕུལ་དུ་ཕྱིན་པའི་མཐུ་ཁོ་ན་ལ་བརྟེན་ནས། ཞེས་དེ་ཡང་རང་རེས་དལ་འབྱོར་མི་ལུས་ཀྱི་རྟེན་རྙེད་པ་འདི་ནི་སྔོན་གྱི་བསོད་ནམས་བསགས་པ་ཕུལ་དུ་ཕྱིན་པའི་མཐུ་ཁོ་ན་ལ་བརྟེན་ནས། དཔེ་གྲངས་ངོ་བོ་གང་གི་སྒོ་ནས་རྙེད་པར་དཀའ་བ་འདི་ཉིད་ཐོབ་པ་ཡིན་ན། དཔེ་ཨུ་དུམ་ཝ་རའི་མེ་ཏོག་བཞག་པ་རེད། ཨུ་དུམ་ཝ་རའི་མེ་ཏོག་དེ་ས་གང་ཡིན་ལ་མི་སྐྱེ་བར་མཚོ་མ་དྲོས་པའི་བྱང་ཕྱོགས་ཀྱི་རིའི་དཀྱིལ་ན་མེ་ཏོག་ཨུ་དུམ་ཝ་རའི་ཚལ་ཡོད། དེ་ཁོ་ནར་སྐྱེ་བ་དང་། དུས་ནམ་ཡིན་ན་མི་སྐྱེ་བར་སངས་རྒྱས་འཇིག་རྟེན་དུ་བྱོན་དུས་ཐེངས་རེར་སྐྱེ་བ་དང་། སངས་རྒྱས་འཇིག་རྟེན་དུ་བྱོན་ཞིང་དེས་ཆོས་ཀྱི་འཁོར་ལོ་བསྐོར་ཚེ་མེ་ཏོག་དེ་ཤིན་ཏུ་རྒྱས་པ་དང་། སངས་རྒྱས་མྱ་ངན་འདས་ཚེ་མེ་ཏོག་དེ་རྙིང་ནས་ས་ལ་ལྷུང་བར་འགྱུར་བར་ཡིན་པ་དེ་དང་འདྲ་བ་དལ་འབྱོར་ཚང་བའི་མི་ལུས་འདི་རྙེད་པར་དཀའ་བ་ཡིན་གསུངས། ཡང་དཔེ་གཞན་ལ་འཇོག་ན། རྒྱ་མཚོ་ཆེར་གཡེང་བའི་གཉའ་ཤིང་གི་བུ་གར་རུས་སྦལ་གྱི་མགྲིན་ཆུད་ཀྱི་དཔེས་བསྟན་པ། ཇི་སྐད་དུ། རྒྱ་མཚོ་ཆེར་གཡེང་གཉའ་ཤིང་གི། བུ་ག་རུས་སྦལ་མགྲིན་ཆུད་ལྟར། །མི་ཉིད་ཤིན་ཏུ་རྙེད་པར་དཀའ། །ཞེས་གསུངས་པ་ལྟར། རྒྱ་མཚོ་ཆེན་པོ་མཐའ་དང་མཚམས་མེད་པའི་ཁར་ཤིང་གཉའ་ཤིང་བུ་ག་གཅིག་པུ་ཞིག་ཡོད་པ་རླུང་གིས་བསྐྱོད་པའི་རྒྱ་མཚོའི་རླབས་ཀྱིས་བདས་ཏེ་གནས་གཅིག་ཏུ་མི་སྡོད་པར། ཕྱོགས་བཞི་མཚམས་བརྒྱད་གཡེང་ཞིང་འཁྱམས་ནས་རླུང་དང་ཆུས་དེད་དེ་འགྲོ་བ་ཞིག་དང་། མཚོའི་གཏིང་ན་རུས་སྦལ་ལོང་བ་ལོ་བརྒྱ་རེའི་མཚམས་སུ་མཚོ་ཁར་སྐེ་ལན་རེ་བསྲིང་བ་ཞིག་ཡོད་ན། རུས་སྦལ་གྱི་སྐེ་དེ་གཉའ་ཤིང་གི་བུ་ག་དང་འཕྲད་པར་ཤིན་ཏུ་དཀའ་བ་ལྟར་དལ་འབྱོར་ཐོབ་དཀའ་བ་དང་། ཡང་གྱང་ལོགས་ཀྱི་སྲན་མ་ལ་དཔེར་འཇོག་པ་ནི། དཔེར་ན་གྱང་འཇམ་པོ་ཤེལ་འདྲ་བའི་ངོས་སུ་སྲན་མ་སྤར་གང་གཏོར་ན། སྲན་མ་རེ་གཉིས་རེ་གྱང་ལོགས་སུ་འདུག་པ་ཨེ་སྲིད་ན་ཤིན་ཏུ་སྲིད་དཀའ་བ། དེ་བས་ཀྱང་དལ་འབྱོར་གྱི་ཆོས་ཚང་བའི་ལུས་རྟེན་རྙེད་དཀའ་བ་ཡིན་གསུངས། གྲངས་ཀྱི་སྒོ་ནས་སེམས་ཅན་གྱི་གྲངས་དང་རིམ་པའི་ཐོག་ནས་གསུངས་ན། དམྱལ་བའི་སེམས་ཅན་དེ་ས་ཆེན་པོའི་རྡུལ་གྲངས་དང་འདྲ་བ་དང་། ཡི་དྭགས་ནི་རྒྱ་གར་གྱི་ཆུ་བོ་གངྒཱའི་ཀླུང་གི་བྱེ་མའི་རྡུལ་གྲངས་དང་འདྲ་བ། དུད་འགྲོ་ནི་ཆང་འགག་གི་སྦང་མ་དང་འདྲ། ལྷ་མ་ཡིན་ཡང་དེ་བཞིན་དུ་ཁ་ཆར་བུ་ཡུག་འཚུབ་པའི་གྲངས་བཞིན། ལྷ་དང་མིའི་ལུས་རྟེན་ནི་སེན་མོའི་སྟེང་གི་རྡུལ་ལྟ་བུའི་མང་ཉུང་མ་གཏོགས་མེད་པ་ཡིན། སྤྱིར་མཐོ་རིས་ཀྱི་ལུས་རྟེན་དཀོན། ཁྱད་པར་དུ་མིའི་ལུས་རྟེན་དཀོན། དེའི་ནང་ནས་དལ་འབྱོར་ཚང་བའི་མི་ལུས་ཁྱད་པར་ཅན་དཀོན་གསུངས། དེ་རང་རེས་མིག་གིས་བལྟས་ན་ཤེས་རྒྱུ་རིག་རྒྱུ་ཅན་རེད། རང་རེའི་མིག་གིས་འགྲོ་བ་གཞན་ལྷ་དང་དམྱལ་བ་སོགས་མི་མཐོང་ཡང་། དུད་འགྲོའི་རིགས་ལ་བསམ་བློ་གཏོང་ན། བྱིང་གནས་ཁ་འཐོར་གང་ཡིན་ཡང་རིག་འདུག་པ་རེད། ལུང་པ་གཅིག་གི་ནང་དབྱར་ཁའི་འབུའི་གྲངས་ཀ་དེ་མདོ་དབུས་ཁམས་གསུམ་གྱི་མི་གྲངས་ལས་མང་བ་ཞིག་ཡོད། ས་སྟེང་དང་བར་སྣང་ས་འོག་ཐམས་ཅད་དེ་འདྲ་ཡིན་པས། དེ་རྐྱང་པ་ལ་ལྟོས་ན་མིའི་ལུས་རྟེན་དཀོན་པ་ཡིན་རྒྱུ་རིག་ཡོང་། གནར་མི་ཞིག་གིས། བླ་མ་ཁྱེད་རང་གིས་མ་མཐོང་བ་རེད་མ་གཏོགས་རྒྱ་ག་གེ་མོའི་ཡུལ་དུ་སོང་ན་མི་ལས་གྲངས་མང་བ་ཞིག་ཡོད་ནི་མ་རེད་ཅེས་བཤད་པ་ལྟར། བོད་ལ་མི་གྲངས་ཉུང་བས། དེས་ན་ད་ལྟ་གྲངས་ཉུང་མི་རིགས་ཀྱང་ཟེར་གྱིན་ཡོད། རྒྱ་དཀར་ནག་གཉིས་ཀའི་ཡུལ་གྱི་གྲོང་ཁྱེར་ཆེ་བ་ཞིག་གི་མི་གྲངས་བསྡོམ་ན་བོད་མི་ཡོངས་རྫོགས་ཀྱི་མི་གྲངས་ཙམ་ཡོད་ས་རེད། འོན་ཀྱང་མིའི་ལུས་རྟེན་དེ་འདྲ་དཀོན་པོ་མ་རེད་བསམ་རྒྱུ་མེད་དེ། རྒྱ་དཀར་ནག་ཚང་མའི་མི་གྲངས་བསྡོམ་ན་དུང་ཕྱུར་བཅུ་ཁ་ཉི་ཤུ་ཞིག་ཡོད་མོད། རྒྱ་མཚོའི་མཚོ་ཁུག་ཆུང་ཆུང་ཀྭི་སྐད་གང་གི་རྒྱ་ཁྱོན་གྱི་ཆུར་གནས་དུད་འགྲོའི་གྲངས་ལ་བསམ་བློ་གཏོང་ན་དེ་ལས་ཚད་རྒྱུ་མ་རེད། རང་རེའི་ས་ཆའི་འབུ་གྲོག་མ་མང་བའི་ལུང་པ་རེ་དང་། མཚོ་འགའ་རེའི་འགྲམ་གྱི་ཚྭ་འབུ་འཕུར་བ་དང་། ས་ཆ་འགའ་རེའི་ཨ་བྲའི་གྲངས་ལ་བསམ་ན། བདེན་པ་སྨྲ་བའི་གསུང་ལ་བསླུ་བ་ཅི་ཡོད་བསམ་རྒྱུའི་ངེས་ཤེས་རྙེད་རྒྱུ་ཡོད་པ་རེད། དེས་ན་ངན་འགྲོའི་སེམས་ཅན་ལ་གྲངས་ཀྱིས་མི་ཆོད། ཡང་མི་ཡིན་ཚད་མི་ལུས་དོན་ལྡན་མ་རེད། མི་ལུས་ཡིན་ཚད་དལ་འབྱོར་གྱི་ཆོས་ཚང་པ་ཅི་ལ་ཡིན། ཟེར་མི་རུང་རྒྱུ་ཨེ་རེད་དེ། ཆོས་པ་ཡིན་བསམ་པའི་སེར་སྐྱ་བླ་གྲྭ་ཡན་ཆོད་ཀྱི་མི་ཁྲི་ཚོ་གཅིག་གི་ནང་ན་ཆོས་པ་ངོ་མ་དལ་འབྱོར་གྱི་ཆོས་སུམ་ཅུ་རྩ་བཞི་ཚང་ཡོད་པ་མང་པོ་ཨེ་ཡོད་ཅི་ཤེས། དེ་དགེ་འདུན་པ་ལ་བསྐུར་པ་འདེབས་ནི་མ་རེད་དེ། སྙིགས་མའི་དུས་འདིར་འགལ་རྐྱེན་གྱི་འཚེ་བ་མང་བས་དོན་ལ་དེ་ལྟར་ཡིན། དེ་ལྟ་བུའི་དཔེ་དང་གྲངས་དང་ངོ་བོའི་སྒོ་ནས་རྙེད་པར་དཀའ་བའི་དལ་འབྱོར་གྱི་མི་ལུས་རིན་པོ་ཆེ་ཐོབ་པ་ནི་སྐལ་བ་བཟང་སྟེ། དལ་འབྱོར་རྙེད་པར་དཀའ་བར་མ་ཟད་ཚེ་ལ་ངེས་པ་མེད་ལུགས་དེ་རྣམས་ལ་བསམ་བློ་གཏོང་ན། འདུལ་བ་ལུང་ལས། བསགས་པ་ཀུན་གྱི་མཐའ་འཛད་ཅིང་། །མཐོན་པོ་རྣམས་ཀྱི་མཐའ་ལྷུང་འགྱུར། །སྐྱེས་པའི་མཐའ་ནི་འཆི་བ་སྟེ། །འདུས་པའི་མཐའ་ནི་འབྲལ་བ་ཡིན། །ཞེས་གསུངས་པ་ལྟར་བསམས་ན་གློ་བུར་གྱི་རྐྱེན་མི་ཟད་པས་དོ་ནུབ་ཤི་ནས་སང་ནངས་པར་ཡར་ལང་དུ་མེད་པར་མལ་དུ་རོ་ལ་གྱུར་སོང་བ་དང་། མལ་ས་དུར་ཁྲོད་ལ་གྱུར་སོང་ན་ཇི་ལྟར་བྱེད་གསུངས་པ་རེད། ཚེ་མི་རྟག་པར་བསམ་པའི་སྐབས་འདིར། ཕྱི་སྣོད་ཀྱི་འཇིག་རྟེན་ལ་བསམ་ན་མི་རྟག་པ་ཡིན་ཚུལ་ནི། ཀུན་མཁྱེན་ཆེན་པོས། སྣོད་བཅུད་མི་བརྟན་སྲིད་པ་ཆགས་འཇིག་གི། །མེ་བདུན་ཆུ་གཅིག་རླུང་གིས་འཐོར་བའི་དུས། །ཁོར་ཡུག་རྒྱ་མཚོ་གླིང་དང་རིས་བསྐོར་བའི། །ལྷུན་པོ་རིན་ཆེན་བཞི་ཡང་མི་རྟག་ཅིང་། །ཐམས་ཅད་ནམ་མཁའ་གཅིག་ཏུ་འགྱུར་བའི་སྐབས། །ངེས་པར་བསམ་སྟེ་སྙིང་ནས་ཆོས་མཛོད་ཅིག །ཅེས་གསུངས་པ་ལྟར། བསྐལ་པ་འདི་དང་པོ་ཆགས་པའི་སྔ་རོལ་ན་ནམ་མཁའ་སྟོང་པ་ཞིག་མ་གཏོགས་མེད་པ། དབྱིངས་སྟོང་པ་གོ་འབྱེད་པའི་ཁོངས་དེར་རླུང་རྡོ་རྗེ་རྒྱ་གྲམ་དང་པོར་ཆགས། དེའི་སྟེང་ཆུའི་དཀྱིལ་འཁོར་ཆགས། དེའི་སྟེང་དབང་ཆེན་གསེར་གྱི་ས་གཞི་ཆགས། དབང་ཆེན་གསེར་གྱི་ས་གཞིའི་ཐད་ནས་མུ་ཁྱུད་ཆེན་པོ་བསམ་གཏན་དང་པོའི་ལྷ་གནས་ཀྱི་མཐོ་དམན་དང་འདྲ་བ་ཞིག་ཀྱང་མཉམ་དུ་ཆགས། དེའི་ནང་ན་ནམ་མཁའི་ཁམས་ནས་ཆར་བབ་པས་ཆུའི་ཐང་དུ་གྱུར། ཆུ་དེ་འཁྲུགས་ཤིང་བརྡེགས་ཤིང་བརྡབས་པས་ལྦུ་བའི་དྭངས་མ་དེ་རིའི་རྒྱལ་པོ་རི་རབ་དང་གླིང་བཞིའི་རྣམ་པར་ཆགས། དབུས་ཀྱི་རིའི་རྒྱལ་པོ་རི་རབ་ནི་རིན་པོ་ཆེའི་རང་བཞིན་ཏེ། ཤར་ཤེལ། ལྷོ་བཻཌཱུརྱ། ནུབ་པདྨ་རཱ་ག བྱང་གསེར་ལས་གྲུབ་པ། མཐའ་བསྐོར་ཆུ་མཚམས་ལ་ཐུག་གི་བར་གསེར་གྱི་རི་བདུན། རོལ་པའི་མཚོ་བདུན། དེ་ནས་ཤར་ལུས་འཕགས་པོ། ལྷོ་འཛམ་བུ་གླིང་། ནུབ་བ་ལང་སྤྱོད། བྱང་སྒྲ་མི་སྙན་ཏེ་གླིང་བཞི་གླིང་གཡོག་དང་བཅས་པ་ཆགས། གླིང་བཞི་གླིང་ཕྲན་བརྒྱད་ནི་མིའི་འགྲོ་བའི་ཕྱིའི་སྣོད་ཀྱི་འཇིག་རྟེན་ཡིན། དེ་ནས་རི་རབ་ཀྱི་སྟེང་ན་རྣམ་པར་རྒྱལ་བའི་ཁང་བཟང་། ཚལ་བཞི་དང་ཡོངས་འདུའི་ས་བརྟོལ་གྱི་ལྗོན་ཤིང་གིས་བརྒྱན་པར་བཅས་ཆགས། མཐའི་རྒྱ་མཚོའི་ཁོར་ཡུག་གཉའ་ཤིང་འཛིན་རིའི་ཚད་དང་མཉམ་པའི་ལྕགས་རིས་བསྐོར་བ་དང་། ཉི་མ་དང་ཟླ་བས་བརྒྱན་པའི་སྣོད་ཀྱི་འཇིག་རྟེན་དེ་འདྲ་བར་ཆགས་སོ། །དེ་ལྟར་བསྐལ་པ་ཡར་ཆགས་ནས། བར་དུ་གནས་པའི་བསྐལ་པ་འདི་འདྲར་གནས་ཏེ། ཐ་མ་འཇིག་པའི་བསྐལ་པ་ཤར་ཚེ་མེ་བདུན་གྱིས་ཐམས་ཅད་ཚིག་སྟེ་ཐལ་བ་ཡང་མི་ལུས་པར་གྱུར་འགྲོ། མེས་ཅིའི་ཕྱིར་འཚིག་འགྲོ་ནི་རེད་རྒད་པོ་རྒན་མོ་རྣམས་ཀྱིས་བསམ་ན་མི་ཤེས་ཏེ། གཞུང་འགའ་རེ་ལས་ཉི་མ་བདུན་འཆར་བ་དང་། ཡང་འགའ་རེར་ཉི་མ་གཅིག་ལ་བདུན་གྱི་དྲོད་ཚད་ཡོད་པ་ཞིག་གིས་འཚིག་འགྲོ་གསུངས་ཡོད། དོན་ལ་མི་མཇེད་འཇིག་རྟེན་གྱི་ཁམས་བྱེ་བ་ཕྲག་བརྒྱར་ཉི་མ་བྱེ་བ་ཕྲག་བརྒྱ་པོ་བདུན་འགྱུར་དུ་ཇེ་ཚར་སོང་ནས་མཐར་འཚིག་འགྲོ། ཚིག་པའི་ཤུལ་ན་ཐལ་བའང་མི་ལྷག མེ་ཡིས་བདུན་ནོ་ཆུ་ཡིས་གཅིག །ཅེས་མེའི་འཇིག་པ་བདུན་ཚན་རེའི་མཚམས་སུ་ཆུའི་འཇིག་པ་རེ་འབྱུང་བས་བསམ་གཏན་གཉིས་པ་མན་ཆད་ཆུས་བཤལ། དེ་ལྟར་ཚན་པ་བདུན་རྫོགས་ནས། ཐ་ནི་རླུང་གིས་གཏོར་བ་ཡིན། །ཞེས་ཐ་མ་ནི་རླུང་གིས་བསམ་གཏན་གསུམ་པའི་ལྷ་གནས་མན་ཆད་གཏོར་ཏེ། ནམ་མཁའ་སྟོང་པ་གཅིག་ཏུ་གྱུར་ནས་སྔར་བསྐལ་པ་མ་ཆགས་པ་དང་འདྲ་འདྲ་རེད་འགྲོ་སྟེ། མདོ་ཏིང་འཛིན་རྒྱལ་པོ་ལས། ནམ་ཞིག་འཇིག་རྟེན་ཁམས་འདི་འབྱུང་བ་དང་། །འཇིག་རྟེན་ཐམས་ཅད་ནམ་མཁར་འགྱུར་བ་སྟེ། །ཇི་ལྟར་སྔོན་བཞིན་ཕྱིས་ཀྱང་དེ་བཞིན་ཏེ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་གསུངས་པ་ལྟར་ཡིན། ཡང་དཔེ་དེ་དང་འདྲ་བ་ནང་སེམས་ཅན་གྱི་འཇིག་རྟེན་འདི་ཡང་མི་རྟག་པ་ཡིན། དེའང་འབྱུང་གནས་འཇིག་གསུམ་ཀའང་ཕྱིའི་འཇིག་རྟེན་ཆགས་ལུགས་དང་འདྲ་བ་རེད། ཇི་ལྟར་ན། སེམས་ཅན་ཞེས་པའི་སེམས་དང་ལུས་ཤིག་མ་གྲུབ་པའི་སྔ་རོལ་ཏུ། དང་པོ་སེམས་ཀྱི་ཆོས་ཉིད་ནམ་མཁའ་གཅིག་ཏུ་གནས་ཡོད་པའི་ངང་དེའི་ཐོག་ནས་མ་རིག་པ་དང་ཀུན་ཏུ་རྟོག་པའི་རླུང་ཆགས། དེ་ལ་བརྟེན་ནས་འཁོར་བར་སྡུད་པར་བྱེད་པའི་ལས་ཀྱི་ས་བོན་ཆུའི་རང་བཞིན་ཅན་ལས་གྲུབ་པའི་རྐྱེན་གྱིས་ཕ་མའི་ས་བོན་ལས་ལུས་རིའི་རྒྱལ་པོ་རི་རབ། མིག་གཉིས་ཉི་ཟླ་གཉིས། ནང་གི་དྭངས་མ་དཀར་དམར་སྐྱེ་མཆེད་བཅུ་གཉིས་དང་། ཁམས་བཅོ་བརྒྱད་གླིང་བཞི། གླིང་ཕྲན་བརྒྱད་ཀྱི་རྣམ་པའི་ཚུལ་དུ་ཆགས། རྣམ་ཤེས་ཚོགས་བརྒྱད་དེ་རི་བདུན་ཁོར་ཡུག་ཆེན་པོ་དང་བརྒྱད། ལུས་ངག་ཡིད་གསུམ་པོ་བརྟེན་སའི་རྩ་དབུ་རྐྱང་རོ་གསུམ་ད། སྒོ་གསུམ་དང་དུག་གསུམ་སྐུ་གསུམ་གྱི་རྟེན་ཅན་ཁམས་གསུམ། རྩ་འདབ་འཁོར་ལོ་ལྔའམ་དྲུག་རྣམས་འགྲོ་བ་ལམ་རྒྱུད་ལྔ་དང་རིགས་དྲུག གནས་རིས་སོ་སོ་མི་འདྲ་བ་ལྟར་བདེ་སྡུག་སྣ་ཚོགས་པ། ནང་གི་སྟོང་ཆེན་འཇིག་རྟེན་གྱི་ཁམས་གང་ཟག་སྒེར་གྱི་ལུས་འདིའང་དང་པོ་འདུས་པས་ན་ཐ་མར་འབྲལ་བ། དང་པོ་སྐྱེས་པའི་རྒྱུ་མཚན་གྱིས་ཐ་མར་འཆི་བ། འདུས་བྱས་ཡིན་པའི་དབང་གིས་འཇིག་པའི་ཆོས་ཅན་ཡིན་ཏེ། འཆི་བའི་སྐབས་སུ་བབ་པ་ན་ཕྱི་འབྱུང་བ་བཞི་དེ་ནང་འབྱུང་བཞིར་སྡུད་པ་དེ་མེ་བདུན་དང་ཆུ་གཅིག་གིས་འཇིག་པ། ནང་འབྱུང་བཞི་གསང་འབྱུང་བཞིར་སྡུད་དུས་གདོད་མའི་འོད་གསལ་ལ་ཐིམ་པས། ཐམས་ཅད་ནམ་མཁའ་གཅིག་ཏུ་གྱུར་པས་དང་པོ་ལུས་ཆགས་པའི་སྐབས་དང་འདྲ་བ་ཡོང་རྒྱུ་ཡོད་པ་རེད། སེམས་ཅན་སོ་སོའི་ངོས་ཀྱི་འཇིག་རྟེན་ནུབ་ཚུལ་འདི་ལ་བསམ་བློ་གཏོང་ན། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེགས་པའི་ལུས་ཅན་འདི་དག་ཀྱང་། །ཐལ་བ་ཡང་ནི་ལུས་པར་མི་འགྱུར་ན། །ཤིན་ཏུ་ཉམས་ཆུང་མི་ལྟ་སྨོས་ཅི་འཚལ། །ཞེས་བཤེས་སྤྲིང་ལས་གསུངས་པ་ལྟར་སྲིད་པ་ཆགས་འཇིག་གི་དཔེ་ལ་བསམ་ན་ཕྱི་སྣོད་ཀྱི་འཇིག་རྟེན་བསྐལ་པར་གནས་པའང་མཐར་མི་རྟག དེ་བཞིན་དུ་ནང་བཅུད་ཀྱི་སེམས་ཅན་ལ་བསམ་ན་སེམས་ཅན་གྱི་ལུས་མི་རྟག་པ་རེད། གོང་དུ་བཤད་པ་ལྟར་གླིང་བཞི་གླིང་ཕྲན་བརྒྱད་ལ་མིའི་འགྲོ་བ་ཆགས་པར་བཤད་ན། གླིང་བཞི་པའི་མི་འདི་དང་པོ་འོད་གསལ་ལྷ་ལས་མཆེད་པ་ཡིན་ཞེས་གསུངས་ཡོད། ལས་ངན་པས་སྣང་བའི་དུད་འགྲོ་དང་ཡི་དྭགས་དམྱལ་བ་རྣམས་ནི། དུད་འགྲོ་བྱིང་གནས་རྒྱ་མཚོ་ཆེན་པོ་དང་། ཡི་དྭགས་རྒྱལ་པོའི་ཁབ་ཀྱི་འོག་ཏུ་ཆགས། དམྱལ་བ་ཚ་གྲང་ནི། མཛོད་ལས། འདི་འོག་སྟོང་ཕྲག་ཉི་ཤུ་ན། །མནར་མེད་པའོ་དེ་ཙམ་མོ། །ཞེས་གངས་ཏི་སེའི་འོག་ཏུ་ཡོད་པ་ཉེ་འཁོར་གྱི་རྩ་བའི་གནས་མནར་མེད་ཀྱི་ཕྱོགས་བཞི་ན་ཡོད། དུད་འགྲོ་ཁ་འཐོར་དང་། མཁའ་ལ་རྒྱུ་བའི་ཡི་དྭགས། ཉི་ཚེ་བ་རྣམས་མི་ཡུལ་ལ་ཡོད་ཚུལ་བཅས་གསུངས། ལྷ་ནི་རི་རབ་ཀྱི་ཕྱེད་ཆུ་མཚམས་ཡན་ཉི་ཟླ་གཟའ་སྐར་གྱི་གནས་སུ་རྒྱལ་ཆེན་རིས་བཞིའི་ལྷ་དང་། རི་རབ་ཀྱི་སྟེང་ན་སུམ་ཅུ་རྩ་གསུམ་དང་། དེ་སྟེང་གི་ནམ་མཁའ་ན་འདོད་ལྷ་གཞན་བཞི་ཀ་དང་། རི་རབ་གྱི་ཁོང་གསེང་ན་ལྷ་མ་ཡིན་སྒྲ་གཅན་དང་། སྐར་ཕྲེང་། མགུལ་ཕྲེང་། ཐག་བཟང་རིས་ཀྱི་གནས་རྣམས་ཆགས་ཡོད། འདོད་ལྷའི་ཡན་གྱི་ནམ་མཁར་ཚངས་རིས་ལ་སོགས་བསམ་གཏན་དང་པོ་དང་། འོད་ཆུང་ལ་སོགས་པ་བསམ་གཏན་གཉིས་པའི་གནས། དགེ་ཆུང་སོགས་བསམ་གཏན་གསུམ་པའི་གནས། སྤྲིན་མེད་སོགས་བསམ་གཏན་བཞི་པའི་སོ་སྐྱེས་ཀྱི་གནས་གསུམ། དེའི་སྟེང་ན་གཙང་རིས་ཀྱི་ལྷ་ལྔ་དང་། གཟུགས་མེད་ཀྱི་སྲིད་རྩེ་མན་གྱི་ལྷ་རྣམས་ཆགས་ཡོད། མིའི་འགྲོ་བའི་དབང་དུ་ཚེ་ལོ་དཔག་མེད་ཐུབ་པའི་དུས་དེར། སངས་རྒྱས་རྣམ་པར་གཟིགས་བྱོན་པ་ནས་ཚེ་ལོ་བརྒྱ་པའི་སྐབས་སུ་ཤཱཀྱ་ཐུབ་པ་བྱོན་པ་ནས། ཚེ་ལོ་བཅུ་པ་ལ་ཐུག་པའི་བར་ཡར་ཐོག་རིང་མོ་དང་། དེ་ནས་ཡར་སྐྱེ་དང་མར་འགྲིབ་ཀྱི་བར་ཁུག་བཅོ་བརྒྱད་ཡོད་ལ། དེའི་བར་ལ་སངས་རྒྱས་དགུ་བརྒྱ་དགུ་བཅུ་རྩ་ལྔ་བྱོན། མ་ཐོག་རིང་མོའི་མགོ་འཛུགས་དུས། སངས་རྒྱས་མོས་པ་བྱོན་ནས་འགྲོ་བ་འདྲེན་པ་རེད། བསྐལ་པ་འཇིག་དུས་དེར་སེམས་ཅན་གཅིག་ཀྱང་མི་ལུས་པར་འཇིག་ཟིན། དམ་པའི་སྐྱེས་བུ་ལ་བསམ་ན། མི་མཇེད་འཇིག་རྟེན་གྱི་ཁམས་འདིར་ད་སྔར་བྱོན་པའི་སངས་རྒྱས་རྣམ་པར་གཟིགས་དང་། གཙུག་ཏོར་ཅན། ཐམས་ཅད་སྐྱོབ། འཁོར་བ་འཇིག གསེར་ཐུབ། འོད་སྲུང་། ཤཱཀྱ་ཐུབ་པ་སྟེ་སངས་རྒྱས་རབ་བདུན་བྱོན། དེ་དག་མཚན་བཟང་པོ་སུམ་ཅུ་སོ་གཉིས། དཔེ་བྱད་བཟང་པོ་བརྒྱད་ཅུས་སྤྲས་པའི་རྡོ་རྗེའི་སྐུ་ཡིན་ནའང་མེད་པར་འགྱུར་བའི་མི་རྟག་པའི་ཚུལ་བསྟན་པར་མ་ཟད། ཤཱཀྱའི་བསྟན་པ་ལས་གཞན་པ་དེ་དག་གི་བསྟན་པའང་ནུབ་པའི་ཚུལ་ལ་བསམ་བློ་གཏོང་དགོས། བཤེས་སྤྲིང་ལས། འགྲོ་བའི་དོན་ཕྱིར་རྒྱལ་བ་ཉི་མ་འདྲ། །དམ་ཆོས་མཛོད་ཀྱི་ཟླ་བ་ནུབ་ལ་ལྟོས། །རང་གི་ཕུན་ཚོགས་འཁོར་དང་ལོངས་སྤྱོད་ཀུན། །རྟག་པར་མེད་པ་ཉིད་དུ་མཁྱེན་འཚལ་ལོ། །ཞེས་གསུངས། མཐོ་སྲིད་པའི་རྩེ་མོ་མན་ཆད་ནས་དམའ་ན་རཀ་དམྱལ་ཁམས་ཡན་ཆོད་ཀྱི་སེམས་ཅན་ཡོད་ཚད་ཤི་མི་དགོས་པ་ནི་གཅིག་ཀྱང་མེད་ནའང་། བླུན་རྨོངས་ཕལ་ནི་འཆི་བ་འོང་མི་འོང་གི་རྟོག་དཔྱོད་ཙམ་ཡང་མི་བྱེད་པར་སྣང་བ་གདོང་འདེད་ཁོ་ནའི་ངང་ལ་ཐུག་སྟེ་འཆི། ཞེས་དེ་ལྟར་མ་ཤེས་པའི་བླུན་ཞིང་རྨོངས་པར་གྱུར་པའི་སེམས་ཅན་ཕལ་པོ་ཆེ་འཆི་བ་རང་ཐོག་ལ། ནམ་འོང་དང་འདི་འོང་གི་རྟོག་དཔྱོད་ཙམ་ཡང་མི་བྱེད་པར། སྣང་བ་གདོང་འདེད་དེ་ཅི་བྱུང་གང་བྱུང་ཅི་མཐའ་གང་མཐའ་བྱས་ནས་སྒུག་འདུག་པ་དེ་ཁོ་ནའི་ངང་མི་ཚེ་ཟད་པ་ལ་ཐུག་སྟེ་དེའི་ངང་ནས་འཆི་བ་ཡིན། འགའ་ཞིག་འཆི་བ་འོང་སྙམ་པ་ཡོད་ཀྱང་མ་རྒས་ཀྱི་བར་ལ་དགའ་རབ་ཡོད་རེའི་བསམ་པས་རིམ་གྲོ་དང་ཐབས་སྣ་ཚོགས་ཀྱི་སྒོ་ནས་ཕྱི་ཚིས་དང་རེ་དོགས་ཁོ་ན་ལྷུར་ལེན་ཅིང་ཚེ་འདིའི་འདུན་མ་འབའ་ཞིག་གི་དབང་དུ་འགྲོ། དེའི་ནང་ནས་འགའ་རེས་ནམ་ཞིག་ལ་འཆི་འགྲོ་རྒྱུ་རེད། འཆི་རྒྱུ་ཡོད་པ་ཤེས་ནས་འཆི་བ་ཡོང་སྙམ་པ་རེ་ཡོད་ཀྱང་རྟག་འཛིན་ཕྱི་ཚིས་ཀྱི་བློ་སྣ་རིང་པོས་ད་དུང་ག་ལ་ཤི། མ་རྒས་བར་དུ་འདི་འདྲ་སྐྱིད་པོ་འདུག་ཆོག་རྒྱུའི་རེ་བ་བསམ་ནས་དགའ་རབ་ཡོང་རྒྱུར་རེ་བས་ལྷ་དང་སྲུང་མ་ལ་བརྟེན་ནས་ཚེ་རིང་པོར་འཚོ་བར་བསྒྲུབ་པའི་རིམ་འགྲོ་དང་ཐབས་སྣ་ཚོགས་པ། ཡང་ལུས་ལ་སྨན་དང་འཕྲོད་བསྟེན། ཁྲུས་དང་བསྐུ་མཉེ་སོགས་རིམ་འགྲོ་དང་ཐབས་སྣ་ཚོགས་ཀྱི་སྒོ་ནས་ཡུན་རིང་འཚོ་བའི་འདང་རྒྱག་དང་། ཕྱི་ཚིས་དང་རེ་དོགས་ཀྱི་ཐོབ་ཤོར་ཁོ་ནར་ལྷུར་བླངས་ཤིང་། གཏན་དོན་ཕྱི་མའི་དོན་ཆེན་བསྐྱུར་ནས་ཚེ་འདིའི་འདུན་མ་ཚེ་འདིར་དགའ་ཐབས་བདེ་ཐབས་སྐྱིད་ཐབས་ཆེ་ཐབས་བསྒྲུབས་ཏེ། ཆོས་བརྒྱད་བདུད་ཀྱི་གཡབ་མོ་འབའ་ཞིག་གི་དབང་དུ་འགྲོ་བ་ནི་ཆེས་མང་། ད་ལྟ་མི་ཀུན་ཟླ་བ་རྟིང་མའི་བྱ་བྱེད་ཀྱི་ཤོམ་ར་དང་རྒྱགས་ཕྱེ་ལ་སོགས་འོག་གྲབས་བྱེད་ཀྱང་། དེའི་དུས་ན་རང་རེ་ལུས་རྟེན་འདི་འདྲ་མིན་པའི་མགོ་དང་ཁ་ལ་རྭ་ཅོ་ཡོད་པ་ཞིག་ཏུ་སྐྱེས་ནས་ལུས་རྟེན་འདིའི་རུས་པ་ཙམ་ཡང་ཤུལ་མེད་དུ་མི་བྱེད་པའི་གདེངས་ཨེ་འདུག གདེང་མི་འདུག་ན་དེའི་ཚེ་ཐབས་ནི་གང་ཡང་མེད་དེ། དེ་ལྟར་ཤི་རྒྱུའི་ཕྱོགས་ལ་འདང་མི་རྒྱག་པར་ཚེ་འདིའི་འདུག་ཆུས་ཁོ་ནར་བྱེད་པས། མི་ཀུན་ཟླ་བ་དང་ལོ་རྟིང་མའམ་རྗེས་མའི་ལས་ཀ་དང་བྱ་བ་འདི་བྱེད། འདི་ཚར་ནས་འདི་བྱེད་ཅེས་ཤོམ་ར་དང། ལོ་ཟླ་རྗེས་མའི་ཚེ་སྨད་ཀྱི་རྒྱགས་ཕྱེ་ལ་སོགས་འདུག་ཆུས་ཀྱི་འོག་གྲབས་བྱེད་ཀྱང་། མ་འོངས་ལོ་ཟླ་རྗེས་མའི་དུས་ན་རང་རེའི་ད་ལྟའི་ལུས་རྟེན་འདི་བརྗེས་ཏེ། འདི་འདྲ་མིན་པར་དུད་འགྲོ་ཉམ་ཐག་གམ་ཉི་ཚེ་བའི་དམྱལ་བའི་སེམས་ཅན་གྱི་ལུས་ལྟ་བུ་མགོ་དང་ཁ་ལ་རྭ་ཅོ་ཡོད་པ་ཞིག་ཏུ་སྐྱེས་ནས། ལུས་རྟེན་འདིའི་རོ་དེ་མེ་ལ་བསྲེག་གམ་ཆུ་ལ་བསྐྱུར་བའམ་བྱ་རྒོད་ཀྱིས་ཟོས་ནས་བྱ་སྐྱག་ཏུ་གྱུར་ནས་རུས་པ་ཙམ་ཡང་ཤུལ་མེད་དུ་མི་འགྱུར་བའི་གདེང་ཨེ་འདུག དེ་ལྟར་མི་འགྱུར་བའི་གདེང་ཚོད་མི་འདུག་ན་དེའི་ཚེ་འཆི་བདག་གཤིན་རྗེའི་ཕོ་ཉས་ཁྲིད་ནས་འགྲོ་བ་དེ་བཟློག་པའི་ཐབས་ནི་གང་ཡང་མེད་དེ། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ། དཔེར་ན་ཕྱོགས་བཞི་ནས་རི་སྲ་བ། བརྟན་པ། དཔང་མཐོ་བ་བཞི་འགྱེལ་ནས་རྩྭ་དང་། ཤིང་གེལ་པ་དང་། སྲོག་ཆགས་ཐམས་ཅད་ཕྱེ་མར་འཐག་ཅིང་རུབ་རུབ་བྱུང་ན། དེ་ལ་མགྱོགས་པས་འབྲོས་པ་དང་། སྟོབས་ཀྱིས་བཟློག་པ་སླ་བ་མ་ཡིན་ནོ། །དེ་བཞིན་དུ་སེམས་ཅན་ཐམས་ཅད་ལ་ན་བ་དང་། རྒ་བ་དང་། འཆི་བ་དང་། རྒུད་པ་ཞེས་བྱ་བའི་འཇིགས་པ་ཆེན་པོ་བཞི་འབྱུང་སྟེ། དེ་ལ་མགྱོགས་པར་འབྲོས་པའམ། སྟོབས་ཀྱིས་བཟློག་པའམ། ནོར་གྱིས་བསླུ་བའམ། རྫས་དང་། སྔགས་དང་། སྨན་གྱིས་བཟློག་པར་སླ་བ་མ་ཡིན་ནོ། །ཞེས་རྒྱལ་པོ་ཆེན་པོ་ཞེས་བོས་ཏེ། དཔེར་ན་ཕྱོགས་བཞི་ནས་བྲག་གི་རི་བོ་ལྷུན་སྟུག་པ། སྲ་བ་བརྟན་ཅིང་མི་ཤིགས་པ། དཔང་མཐོ་བ་རྩེ་མོ་ནམ་མཁར་ཟུག་པ་ལྟ་བུ་བཞི་ཡོད་པ་མཉམ་དུ་ལོག་ཅིང་འགྱེལ་ནས་རྩྭ་དང་། ལྡུམ་རིགས་དང་ཤིང་གེལ་པའམ་ལྗོན་ཤིང་ཆེན་པོ་དང་། ཤིང་ཕྲན་དང་། སྲོག་ཆགས་ཐམས་ཅད་ཕྱེ་མར་འཐག་ཅིང་རི་ཐམས་ཅད་ནང་དུ་རུབ་རུབ་བྱུང་ན་དེ་ལ་མགྱོགས་པའི་བང་གིས་མགྱོགས་པར་འབྲོས་པ་དང་། སྟོབས་ཆེན་གྱིས་སྟོབས་ཀྱིས་བཟློག་པའམ། རྒྱུ་ཆེན་གྱིས་ལྐོག་བརྔན་སྤྲད་ནས་ནོར་གྱིས་བསླུ་བའམ། རྫས་འཕྲུལ་འདྲ་མིན་དང་། རིག་སྔགས་དང་། སྨན་གྱིས་ཅི་བྱེད་ཀྱང་བཟློག་པར་སླ་བ་མ་ཡིན་ནོ། །དེ་བཞིན་དུ་སྲིད་པ་ཁམས་གསུམ་འཁོར་བ་འདི་ན་རྒྱུ་བའི་སེམས་ཅན་ཐམས་ཅད་ལ་སྤྱི་མཐུན་དུ་ཡོད་པའི་འབྱུང་བཞི་འཁྲུགས་པའི་ནད་ན་བ་དང་། ལང་ཚོ་རྒུད་པའི་རྒ་བ་དང་། ལུས་སྲོག་འབྲལ་བའི་འཆི་བ་དང་། ཉམས་ཤིང་རྒ་བའི་རྒུད་པ་ཞེས་བྱ་བའི་འཇིག་པ་ཆེན་པོ་བཞི་འབྱུང་སྟེ། འཇིག་པ་ཆེན་པོ་བཞི་པོ་དེ་ལ་གོང་དུ་གསུངས་པ་ལྟར་དེ་ལ་མགྱོགས་པོར་ཞོན་ནས་མགྱོགས་པར་འབྲོས་པ་དང་། སྟོབས་ཤུགས་ཀྱིས་བཟློག་པ་དང་། རྒྱུ་ནོར་འགངས་ཆེན་སྤྲད་པས་བསླུ་བའམ། རྫས་འཕྲུལ་དང་། སྔགས་བཟླ་བ་དང་། སྨན་གྱིས་བཟློག་པར་སླ་བ་མ་ཡིན་ནོ། །ཞེས་གསུངས་ལ། ད་དུང་འཆི་བ་མི་རྟག་པའི་དཔེ་མང་དུ་གསུངས་ཏེ། ཀུན་མཁྱེན་ཀློང་ཆེན་པས། ཚོང་འདུས་བཞི་མདོ་མགྲོན་ཁང་གནས་རྣམས་སུ། །ཕྱོགས་ཀྱི་སྐྱེ་བོ་འདུས་ཤིང་འགྱེས་པའི་དཔེས། །འདུས་པ་འབྲལ་ཞེས་སྙིང་ནས་ངེས་པར་བསམ། །ཞེས་པ་ལྟར་ཚོང་འདུས་ཆེན་པོའམ་ལམ་གྱི་བཞི་མདོའི་མགྲོན་ཁང་ཆེན་པོ་ན་མི་མང་པོ་ཕྱོགས་བཞི་མཚམས་བརྒྱད་ནས་འོང་བས་མཉམ་དུ་འདུས་ཤིང་གནས་སྐབས་འཚོགས་ཀྱང་། འདུས་པ་མི་རྟག་པས་དེ་མ་ཐག་ཏུ་ཕྱོགས་སོ་སོར་འགྱེས་འགྲོ་བ་དེ་བཞིན་དུ། ད་ལྟའི་སྐབས་འདིར་བདག་དང་གཞན། དགྲ་དང་གཉེན། བར་མའི་སེམས་ཅན་མང་པོ་ལྷན་ཅིག་འཛོམས་ཤིང་འདུས་པ་རྣམས་ལ་རྟག་བརྟན་གང་ཡང་ཡོད་པ་མ་རེད། དེ་རྣམས་ལ་བསམ་བློ་གཏོང་ན། ཕ་མ་དང་། མཁན་སློབ། གྲོགས་མཆེད། ཡུལ་མི་ཁྱིམ་མཚེས་མཛའ་མི་མཛའི་མི་སུ་ཡིན་རུང་མཉམ་པོར་ཡོད་དུས་མི་འཐབ་མི་འཁོན་མཐུན་པར་འགྲོགས། འབྲལ་བའི་དུས་སུ་འདུས་པ་ཐམས་ཅད་འབྲལ་བའི་ཆོས་ཅན། འདུས་བྱས་ཀྱི་མཚང་ད་ལྟ་ནས་རིག་སྟེ་འགྱོད་པ་མི་སྐྱེ་བར་བྱ་དགོས་ཞེས་གདམས་པ་མཛད་ཡོད། རང་གི་མི་ཚེ་གང་པོའི་ད་སྔོན་འདུག་པའི་ས་ཕྱོགས། སྐྱིད་པའི་གནས་ཁང་གནས་མལ། ཚེ་སྟོད་ཀྱི་གཉེན་ཉེ་ཕ་མ། གྲོང་རོགས་ཁྱིམ་མཚེས། གྲྭ་རོགས་གྲོགས་མཆེད། ན་ནིང་ཡོད་རྒྱུ་རྣམས་ད་ལོ་མེད་པ་དེ་ཚོར་འདང་རྒྱག་ན་རྟག་པ་དང་བརྟན་པ་མེད་པར་ཤེས་འདུག་རྒྱུ་ཅན་ཞིག་ཡིན་རེད། མི་རྟག་པའི་ཚོམས་ལས། འདུས་པ་ཐམས་ཅད་འབྲལ་བས་ན། །གང་ལའང་ཡིད་བརྟན་མི་རུང་པས། །སྐྱེ་བོ་རྣམས་དང་བདག་ཉིད་ལ། །ཞེན་ཅིང་ཆགས་པ་མེད་པར་བྱ། །ཞེས་གསུངས་པ་བཞིན་ནོ། །དེ་ལྟར་འདུས་བྱས་ཀྱི་ཆོས་ཐམས་ཅད་ལ་རྟག་བརྟན་མེད་པ་ཡིན་པ་རྒྱུ་མཚན་དེའི་ཕྱིར་ན་རང་ཅག་རྣམས་ངེས་པ་འཆི་སྟེ། མྱ་ངན་བསལ་བའི་མདོ་ལས། ཅི་སྟེ་སངས་རྒྱས་རྣམས་ཀྱི་སྐུ། །མཚན་དང་དཔེ་བྱད་ཀྱིས་བརྒྱན་པའི། །རྡོ་རྗེ་སྐུ་ཡང་མི་རྟག་ན། །ཆུ་ཤིང་སྡོང་པོ་ལྟ་བུ་ཡི། །ལུས་ཅན་རྣམས་ལྟ་སྨོས་ཅི་དགོས། །ཞེས་རྒྱུ་མཚན་ཅི་ཞིག་གི་ཕྱིར་མི་རྟག་པ་ཡིན་ཞེ་ན། སྤངས་རྟོགས་མཐར་ཕྱིན་པའི་མངོན་པར་སངས་རྒྱས་རྣམས་ཀྱི་གཟུགས་ཀྱི་སྐུ་མཚན་བཟང་སོ་གཉིས་དང་དཔེ་བྱད་བརྒྱད་ཅུས་བརྒྱན་པའི། རྡོ་རྗེའི་སྐུ་མཐོང་ན་མི་མཐུན་པར་མེད་པ་འགྲོ་བའི་དཔལ་དུ་བྱོན་པ་དེ་ཡང་མི་རྟག་ཅིང་མྱ་ངན་ལས་འདས་པའི་ཚུལ་བསྟན་པ་ཡིན་ན། སྙིང་པོ་མེད་པ། འབྱུང་བ་བཞི་འདུས་ཀྱི་སྡུག་བདེན་ཉེར་ལེན་གྱི་ཕུང་པོ། ཆུ་ཤིང་གི་སྡོང་པོ་ལྟ་བུའི་སོ་སོ་སྐྱེ་བོའི་ལུས་ཅན་རྣམས་མི་རྟག་པ་འཆི་བར་འགྱུར་བར་ལྟ་སྨོས་ཅི་དགོས་ཞེས་པས། སྐྱེ་འཆི་ལ་རང་དབང་ཐོབ་པའི་འོ་སྐོལ་གྱི་སྟོན་པ་ཤཱཀྱ་ཐུབ་པ་ཡང་གདུལ་བྱ་རྟག་འཛིན་ཅན་གདུལ་བར་བྱ་བའི་ཕྱིར་ཐ་མའི་གཟིམས་ཁྲི་ལ་མནལ་བས་ཡིད་སྐྱོ། འཕགས་པས་འཆི་དང་ན་བ་དང་། རྒ་བའི་སྡུག་བསྔལ་རྩད་ནས་སྤངས། །ཞེས་གསུངས་པས། འཆི་བདག་གི་བདུད་བཅོམ་པས་སྐྱེ་འཆི་རང་མཚན་པ་མི་མངའ་བས་སྐྱེ་འཆི་ལ་རང་དབང་ཐོབ་པའི་འོ་སྐོལ་གྱི་སྟོན་པ་མཉམ་མེད་ཤཱཀྱ་ཐུབ་པ་དེ་དགུང་ལོ་བརྒྱད་ཅུ་རྩ་གཅིག་གི་སྐབས་སུ་གདུལ་བྱ་རྟག་འཛིན་ཅན་མ་ཐུལ་བ་འདུལ་བ་དང་། མི་རྟག་པ་སྟོན་པ། སྐྱོ་བ་བསྐུལ་བ། ཆོས་ཀྱི་སྐུ་ལ་སྦྱོར་བ་སོགས་དོན་བཅུ་ལ་དགོངས་ནས་གྱད་ཡུལ་རྩྭ་ཆེན་གྱི་ཤིང་སཱ་ལ་ཟུང་གི་དྲུང་དུ་དགེ་སློང་དག་གི་དྲི་བའི་ལྷག་མ་བསལ། གདུལ་བྱ་ལྷག་མ་འགའ་ཞིག་ཀྱང་བརྟུལ་ནས། སེང་གེའི་ཁྲི་ལ་བཞུགས་ཤིང་སྐུའི་སྟོད་གཡོག་བསལ་ཏེ། དགེ་སློང་དག་དེ་བཞིན་གཤེགས་པའི་སྐུ་ལ་ལྟོས་ཤིག དེ་བཞིན་གཤེགས་པ་ལ་ལྟ་བ་ནི་རྙེད་པར་དཀའ་སྟེ་ཨུ་དུམ་ཝཱ་ར་བཞིན་ནོ། །འདུས་བྱས་ཐམས་ཅད་ནི་འཇིག་པའི་ཆོས་ཅན་ནོ། །ཞེས་གསུང་གི་ཐ་མ་དེ་བཀའ་བསྩལ་ཏེ་གློ་གཡས་པ་ས་ལ་ཕབ་ནས། སེང་གེའི་ཉལ་སྟབས་མཛད་དེ་མྱ་ངན་ལས་འདའ་བར་མཛད་དོ། །དེ་བཞིན་དུ་རྒྱ་བོད་ཀྱི་པཎ་གྲུབ་རྒྱལ་བློན་བྱང་ཆུབ་སེམས་དཔའི་རྣམ་འཕྲུལ་དེ་དག་ཀྱང་བྱོན་ནས་བསྟན་པ་ལ་བྱ་བ་འདི་ལྟར་མཛད་ཅེས་པའི་གཏམ་རྒྱུད་ཆོས་འབྱུང་། དེབ་ཐེར། རྣམ་ཐར་སོགས་མཛུབ་མོ་རི་སྟོན་ལས་དེ་དག་གཅིག་ཀྱང་མ་བཞུགས་པར་མངོན་སུམ་ཚད་མས་གྲུབ་པས་སྙིང་རླུང་ལྡང་། རྒྱ་བོད་གྱི་པཎ་གྲུབ་རྒྱལ་བློན་བྱང་ཆུབ་སེམས་དཔའི་རྣམ་འཕྲུལ་སངས་རྒྱས་གཉིས་པ་དེ་དག་ལས། སློབ་དཔོན་ཆེན་པོ་པདྨ་འབྱུང་གནས་ལ་མཚོན་ན། བོད་གངས་ཅན་ལ་བྱོན་ནས་ལྷ་འདྲེ་གདུག་པ་ཅན་ཐམས་ཅད་དམ་ལ་བཏགས། གསང་སྔགས་བསྟན་པའི་ཆོས་འཁོར་བསྐོར། མཁན་སློབ་ཆོས་གསུམ་ཞལ་འཛོམས། མདོ་སྔགས་ཀྱི་ཉི་མ་དེ་བསིལ་ལྡན་ཁ་བ་དཀར་པོའི་ལྗོངས་འདིར་ཤར་བ་མཛད་དེ། སློབ་དཔོན་ཆེན་པོ་ཡུན་དུ་བཞུགས་རྒྱུའི་སྐུ་དངོས་ཀྱི་བོད་ཡུལ་གྱི་གདུལ་བྱའི་འགྲོ་དོན་རྫོགས་ཏེ་ལྷོ་ནུབ་སྲིན་པོའི་ཡུལ་དུ་སྲིན་པོ་འདུལ་དུ་བྱོན་པར་དགོངས་ནས། དོང་པོ་སྐམ་པའི་ཡུར་པ་བཞིན་དུ་ནི། །བོད་དུ་མི་བཞུགས་པད་འབྱུང་སྲིན་ཡུལ་འགྲོ། །ལྗོན་ཤིང་ཁ་ནས་བྱ་ཚོགས་འཕུར་བ་བཞིན། །སྐད་ཅིག་མི་སྡོད་པད་འབྱུང་སྲིན་ཡུལ་འགྲོ། །ཞེས་གསུངས་ཏེ་བཞུགས་ཞུས་ཇི་ལྟར་ཕུལ་ཡང་བཤོལ་མ་ཐུབ་ནས་མང་ཡུལ་གུང་ཐང་ལ་ཁར་ཕེབས་བསྐྱལ་གྱི་གྲ་སྒྲིག་བྱས། སྤྲེལ་ལོ་སྤྲེལ་ཟླའི་ཚེས་བཅུ་ཉིན་ཆིབས་པ་ཅང་ཤེས་ནག་པོར་སེང་ལྡེང་གི་སྒ་བསྟད། གསེར་སྲབ་གཡུ་ཐུར་བསྐྱོན་ནས་སློབ་དཔོན་པདྨ་འབྱུང་གནས་ཆིབས་གོང་ལ་བུད་དེ། བསམ་ཡས་ཟུར་མཁར་གྱི་ནེའུ་སིང་དུ་རྒྱལ་སྲས་མུ་ཏིག་བཙན་པོས་གཙོས་པའི་བོད་ཀྱི་རྒྱལ་བློན་ཕོ་མོ་ཐམས་ཅད་ཀྱིས་སློབ་དཔོན་ཆེན་པོ་བསྐྱལ་ཐུང་བྱས་ཚེ། གུ་རུ་རིན་པོ་ཆེ་ཆིབས་གོང་ནས་བབ་སྟེ། རྡོའི་མཆོད་རྟེན་གྱི་ཟུར་དུ་བཞུགས་ནས་བོད་འབངས་ཡོངས་ལ་ཆོས་གསུངས་པ། ད་ལྟར་བཞུགས་དང་མ་འོངས་འབྱོན་པ་ཡི། །པད་འབྱུང་ང་ལ་མོས་གུས་བྱེད་པ་རྣམས། །ཐམས་ཅད་ཐུགས་ལ་འདི་བཞིན་གཞག་པར་ཞུ། །དོན་མེད་ལས་ལ་སྡུག་སྒུར་མ་འཛུགས་པར། །འདི་ཕྱི་གཉིས་ཀར་བདེ་སྐྱིད་ཆོས་མཛོད་ཅིག །སྡིག་པ་མི་དགེས་ངན་སོང་གསུམ་དུ་སྐྱེ། །དགེ་བ་བྱས་པས་མཐོ་རིས་གནས་སུ་སྐྱེ། །ལུས་ངག་ཐ་མལ་མ་སྡོད་ཆོས་གྱིས་དང་། །ངན་སོང་སྐྱེས་ཀྱང་ང་རང་བླུ་རུ་འོང་། །ང་ཡི་ཚེ་ལ་འདས་གྲོངས་ཡོད་མ་ཡིན། །དད་ལྡན་མི་རེའི་མདུན་ལ་པད་འབྱུང་རེ། །ཞེས་གསུངས་པས་བོད་ཀྱི་རྗེ་འབངས་ཐམས་ཅད་ངུ་སྒྲ་དིར་རེ་སོང་བ་དང་། དེ་ནས་རྒྱལ་སྲས་མུ་ཏིག་བཙན་པོ་ལ་རྗེ་འབངས་ཉི་ཤུ་རྩ་ལྔས་བསྐོར་བ་དང་། མཁན་པོ་ཤཱཀྱ་པྲ་བྷ་ལ་སོགས་བོད་ཀྱི་རབ་བྱུང་ཡོད་ཚད། བཻ་རོ་ཙ་ན་དང་སྐ་ཅོག་ལ་སོགས་པ་བོད་ཀྱི་ལོ་ཙཱ་ཐམས་ཅད། མཐུ་མཁན་སངས་རྒྱས་ཡེ་ཤེས་ལ་སོགས་པ་བོད་ཀྱི་སྔགས་ནག་ཐམས་ཅད། སྔགས་པ་རྡོ་རྗེ་བདུད་འཇོམས་ལ་སོགས་པས་སྣ་དྲངས་ཏེ་རྔ་རྡུང་ཕྲེང་ཐོགས་ཐམས་ཅད་དང་། ཡོན་བདག་མཁར་ཆེན་རྒྱལ་གྱིས་སྣ་དྲངས་པའི་བོད་ཀྱི་སྐྱེས་ཕོ་མོ་སེར་སྐྱ་ཚང་མས་དཔལ་མོ་དཔལ་ཐང་དུ་སྐྱེལ་མ་བྱེད་དུས། ཐུགས་རྗེ་ཆེན་པོའི་སྒོམ་ལུང་གནང་། བོད་སྤྱི་སྒེར་ཡོངས་ལ་ཞལ་གདམས་མང་པོ་གསུངས་ནས། རྗེ་འབངས་འཁོར་དང་བཅས་པ་ད་འདི་ནས་ཕྱིར་ལོག་སོང་གསུངས་དུས། བོད་ཀྱི་རྗེ་འབངས་ཡོན་ཆོད་ཐམས་ཅད་སློབ་དཔོན་དང་འབྲལ་དགོས་པའི་སྡུག་བསྔལ་གྱིས་མི་རེའི་ཁོང་ནས་སྙིང་རེ་བཏོན་སོང་བ་ལྟ་བུའི་གདུང་ཡུས་ཀྱིས་མིག་མཆི་མས་གང་ནས། བོད་འབངས་ལྷ་མི་ཐམས་ཅད་ཀྱི། །མི་རེའི་མགོ་ལ་ཉི་རེ་ནུབ། །གསེར་མེས་གདུངས་འཚོ་སུ་ཡིས་བསྲོ། །མི་རེའི་དཔྲལ་ནས་མིག་རེ་ཕྱུང་། །ཅེ་རེ་ལོང་ཁྲིད་སུ་ཡིས་བྱ། །མི་རེའི་ཁོང་ནས་སྙིང་རེ་བཏོན། །སྨྲ་ཤེས་རོ་ཚོར་སུ་ཡིས་བསྲེ། །ཞེས་སོགས་གདུང་དབྱངས་སྨྲེ་ངག་ལ་སྐྱོ་བཏོན་ཀྱང་། བཤོལ་མ་ཐེབས་པར་གུང་ཐང་ལ་ཁར་ཞག་སར་མཛད་དུས། ནམ་མཁའ་སྤྲིན་དཀར་གྱི་ཕུང་པོ་འཇའ་འོད་འཁྱིལ་བའི་དཀྱིལ་ནས་རྟའི་རྒྱལ་པོ་ཅང་ཤེས་བྷ་ལ་ཧ་རྟ་སྔོན་པོ་རིན་པོ་ཆེའི་སྒ་སྲབ་སྤྲས་པ་ཨི་ཧིའི་སྒྲ་ཆེན་སྒྲོག་ཞོར་ལྷ་དང་ལྷ་མོ་མང་པོས་རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད་མང་པོས་སྣ་དྲངས་ཏེ། རིག་འཛིན་དང་མཁའ་འགྲོ་མང་པོས་བསུས་ཏེ་བྱོན་ཞོར་ལ། གུ་རུ་རིན་པོ་ཆེས་མགུར་འདི་ལྟར་གསུངས། ང་འགྲོ་མེ་ལོང་ཡེ་ཤེས་ཡུལ་དུ་འགྲོ། །མེ་ལོང་ཡེ་ཤེས་ཡུལ་དུ་འགྲོ་ཙ་ན། །ཞེ་སྡང་དགྲ་ལ་མི་ཁྲོ་འོད་གསལ་དྭངས། །དབྱིངས་རིག་མ་བུ་འབྲལ་མེད་འགྲོགས་ནས་འགྲོ། །ཞེས་སོགས་དང་། ང་འགྲོ་ལྷོ་ནུབ་སྲིན་པོའི་ཡུལ་དུ་འགྲོ། །གདོང་དམར་སྲིན་པོ་འདུལ་དུ་འགྲོ་ཙ་ན། །སེམས་ཅན་ཐམས་ཅད་བདེ་ལ་བཀོད་དུ་འགྲོ། །ང་འགྲོ་ཟངས་མདོག་དཔལ་རིའི་ཕོ་བྲང་འགྲོ། །ཟངས་མདོག་དཔལ་རིའི་ཕོ་བྲང་འགྲོ་ཙ་ན། །སྲིན་པོ་ཐམས་ཅད་ཆོས་ལ་འཛུད་དུ་འགྲོ། །རྗེ་འབངས་ཡུན་དུ་སྐུ་ཁམས་བདེ་བར་བཞུགས། །ཐུགས་རྗེ་རྒྱུན་ཆད་མེད་དོ་གསོལ་བ་ཐོབ། །ཅེས་གསུངས་ཏེ་ཆིབས་པའི་སེང་ལྡེང་གི་ཆིབས་སྒའི་སྔ་རུའི་ཐོག་ཞབས་གཉིས་མཉམ་དུ་བཞེངས་ཏེ་ཉམས་འུར་ཡོང་བ་འདྲར་བྱས་ནས། དེ་མཚམས་སུ་འདོམ་གང་ནམ་མཁར་འཕགས་ཏེ་བཞུགས་ནས་རྗེ་འབངས་རྣམས་ལ་ཞལ་ཕྱིར་གཟིགས་ཏེ་ཞལ་གདམས་གསུངས་ནས་མཇུག་ཏུ་འདི་ལྟར། བདེ་བ་ཆེན་པོའི་ཕོ་བྲང་དུ། །པདྨ་འབྱུང་གནས་འགྲོ་བ་ལ། །སྐྱེལ་ཐུང་མི་འཚལ་ལོག་ནས་བྱོན། །འདུ་འབྲལ་མེད་དོ་ཐུགས་མ་ཆད། །ཅེས་དང་། ཉིན་པར་བྱུང་རེས་ཐུགས་རྗེ་ཆེན་པོ་སྒོམས། །མཚན་མོ་བྱུང་རེས་པདྨ་ང་ཉིད་སྒོམས། །མི་ཆོས་བྱས་པས་ལྷ་ཆོས་མི་འབྱུང་བས། །ཚེ་འདིའི་བྱ་བ་ཐོངས་ཤིག་རྗེ་འབངས་རྣམས། །ཞེས་གསུངས་ཏེ། རྟ་མཆོག་རིན་པོ་ཆེར་བཅིབས་ཏེ་དཔའ་བོ་སྡེ་བཞིས་སྣ་དྲངས་ནས་འཇའ་མཚོན་འཁྱིལ་ལེ་བར་སྣང་ལ་ཕེབས་སོང་བ་དང་། རྗེ་འབངས་རྣམས་ཀྱིས་ཉ་མོ་བྱེ་ཚན་དུ་བོར་བ་ལྟར། གདུང་བའི་ཡུས་དང་བཅས་པས་ཕྱི་ནས་ཕར་མཇལ་བ་ན། ཉི་ཟེར་གསེབ་ན་བྱ་རོག་ཙམ་དང། ཕུག་རོན་ཙམ། བྱེའུ་ཙམ་སོང་ཞིང་མཐར་ཇེ་ཆུང་དུ་སོང་ནས་མ་མཐོང་བར་གྱུར་ཏོ། །དེ་ལྟར་གུ་རུ་ཨོ་རྒྱན་པད་འབྱུང་སྲིན་ཡུལ་དུ་བྱོན་ནས་བོད་ཡུལ་སྟོང་པ་ལུས་པའི་མི་རྟག་པའི་ངང་ཚུལ་དེ་འདྲ་ཡོང་མྱོང་བ་རེད། རྒྱ་བོད་ཀྱི་པཎ་གྲུབ་རྒྱལ་བློན་ཞེས་པའི་རྒྱལ་པོ་ཁྲི་སྲོང་ལྡེ་བཙན་ལ་མཚོན་ན། འཛམ་གླིང་སུམ་གཉིས་མངའ་འོག་ཏུ་བསྡུས། བོད་དུ་དར་བའི་སངས་རྒྱས་ཀྱི་བསྟན་པ་འདི། ཡབ་མེས་ཐོ་རི་གཉན་བཙན་གྱི་སྐུ་དུས་སུ་དབུ་བརྙེས། སྲོང་བཙན་སྒམ་པོའི་དུས་སུ་སྲོལ་བཏོད། ལྷ་གཅིག་ཁྲི་སྲོང་ལྡེ་བཙན་གྱི་དུས་སུ་དར་ཞིང་རྒྱས་པར་མཛད་དེ། སངས་རྒྱས་ཀྱི་བསྟན་པ་ཉི་མ་ལྟ་བུ་དེ་བོད་ལ་ཤར་བར་མཛད་པ་རེད། ཁོང་དགུང་ལོ་ལྔ་བཅུ་རྩ་དགུའི་འབྲུག་གི་ལོར་ལོ་གསར་གྱི་སྐབས་རྟ་རྒྱུག་རྩེ་དུས་བདུད་བློན་ཞིག་གིས་ལྐོག་མདའ་བརྒྱབ་པས་བཀྲོངས་སོང་བ་ཡིན་མོད། དེ་ལ་སོགས་པའི་རྒྱལ་བློན་བྱང་སེམས་གྱི་སྤྲུལ་པ་དེ་དག་ཀྱང་མི་རྟག་པའི་ཚུལ་བསྟན་ནས། སངས་རྒྱས་ཀྱི་བསྟན་པ་ལ་བྱ་བ་འདི་འདྲ་བྱས་མྱོང་ཞེས་ལོ་རྒྱུས་ཙམ་ལས་ད་ལྟར་གཅིག་ཀྱང་མི་བཞུགས་པར། མིག་རིག་ལག་མྱོང་གི་ཐོག་ནས་མི་རྟག་པར་གྲུབ་པ་ཡིན། ད་དུང་དམ་པའི་སྐྱེས་བུ་ལ་བསམ་བློ་གཏོང་ན། རྗེ་མར་པ་ལོ་ཙཱ་བའི་སྲས་དར་མ་མདོ་སྡེ་སྐུ་གཞོན་དུས་རྟས་དྲུད་ནས་བཀྲོངས་པ་དང་། ལྷ་ལྕམ་པདྨ་གསལ་དགུང་ལོ་བཅུ་གསུམ་གྱི་སྐབས་སུ་མ་འཚོ་བའི་ཚུལ་སོགས་དམ་པའི་སྐྱེས་བུ་ཡིན་ཡང་མི་རྟག་པའི་ཚུལ་ལས་མི་འདས་པའི་ལོ་རྒྱུས་མང་པོ་ཡོད། རྗེ་བཙུན་མི་ལ་རས་པ་ཡིན་ན་ཁོང་ཡབ་མི་ལ་ཤེས་རབ་རྒྱལ་མཚན་དང་། ཡུམ་མྱང་ཚ་དཀར་རྒྱན་གཉིས་ཀྱི་སྲས་སུ་འཁྲུངས། ཆུང་དུས་ཀྱི་མཚན་ལ་ཐོས་པ་དགའ་ཞུ། སྲིང་མོ་པེ་ཏ་མགོན་སྐྱིད་དང་བཅས་པ་ཕ་མ་འགོ་འཛིན། རྒྱུ་ནོར་ཁང་གཞིས། རྟ་ནོར་ལུག་གསུམ་བཅས་པ་འཛོམས་པའི་སྐྱིད་པའི་དུས་ཚོད་དེ་ཡུན་ཐུང་། ཐོས་པ་དགའ་དགུང་ལོ་བདུན་གྱི་དུས་སུ་ཡབ་མི་ལ་ཤེས་རབ་རྒྱལ་མཚན་གྲོངས་སོང་བ་རེད། ཡབ་མི་ལ་ཤེས་རབ་རྒྱལ་མཚན་ཤི་ཁའི་ཁ་ཆེམས་ལ། ཨ་ཁུ་དང་ཨ་ནེ་གཉིས་གཙོས་པའི་ཉེ་འབྲེལ་གྲོང་མི་ཁྱིམ་མཚེས་ཚང་མ་བོས་ནས། ང་ད་རེས་ནད་འདིའི་འོག་ཏུ་མི་ཐར་ཁོ་ཐག་རེད། བུ་ཐོས་པ་དགའ་ཆུང་ནི་རེད། འདི་ལག་ཆགས་ནས་ཁྱིམ་སོ་མ་ཟིན་བར་དུ་འདི་མ་སྨད་གསུམ་གྱི་སྐྱིད་སྡུག་ཁྱེད་ཨ་ཁུ་དང་ཨ་ནེ་ཨ་ཞང་གཙོས་བྱས་པའི་གཉེན་ཉེ་བ་ལ་བཅོལ་བ་ཡིན། ཕུ་ན་རྟ་ནོར་ལུག་གསུམ་གྱི་སྒོ་ཕྱུགས་ཡོད། མདའ་ན་འོར་མ་གྲུ་གསུམ་གྱི་ཞིང་ཁ་ཡོད། མཛོད་ན་གསེར་དངུལ་དར་གོས། ཐབ་ན་རྡིག་ཆ་སོགས་མདོར་ན་རྒྱུ་ནོར་རྫས་གཞན་ལ་སྨོན་མི་དགོས་པར་ཡོད། འདི་ཁ་ནས་བོར་མ་ཤོར། མཐིལ་ནས་ཟགས་མ་ཤོར་བར་འདིའི་ཆ་ཤས་ཤིག་ངའི་རྗེས་སུ་ཐོངས། དེ་མིན་པ་ཐོས་པ་དགའ་ཁྱིམ་སོར་ཟིན་དུས་ལག་ན་ཡོད་པར་གྱིས། ཕ་ཤུལ་བུ་ལ་འཛིན་དུ་ཞོག ངས་ཤི་དུར་ཁུང་ནང་ནས་ལྟ་འདུག་ནི་ཡིན་ཟེར་ནས། ཡབ་མི་ལ་ཤེས་རབ་རྒྱལ་མཚན་གྲོངས་སོང་བ་རེད། དེ་ནས་ཕ་འདས་པའི་དགོངས་རྫོགས་ཀྱི་སྐབས་སུ་ཨ་ཞང་གིས་གཙོས་པའི་ཡུལ་མི་བསམ་ཤེས་རྣམས་ཀྱིས། རྒྱུ་ནོར་རྫས་ཐམས་ཅད་ད་རྟ་རྔ་རྔོག་གི་བདག་པོ། ཡུག་ས་གྱང་རལ་གྱི་བདག་པོ་མྱང་ཚ་དཀར་རྒྱན་ཡིན་པས། མོ་རང་ལ་བདག་པོར་བྱེད་དུ་ཆུགས། རོགས་ཅི་དགོས་ངེད་རྣམས་ཀྱིས་ཟུར་དུ་འཚོ་ནས་བྱེད། ནུས་ཤུགས་ཕྱུང་རེས་བྱེད་ཟེར་དུས། ཨ་ཁུ་དང་ཨ་ནེ་གཉིས་ཀྱིས། ད་མི་དྲག་བྱས་ཀྱང་ཉེ་རིང་དྲག ཁོང་མ་སྨད་ཚོ་སྡུག་ཁ་མ་འཇོག རྒྱུ་ནོར་ཤི་བོའི་ཁ་ཆེམས་བཞིན་ཚགས་ཉར་བྱེད་དགོས་ཟེར་ནས། ཕོ་ནོར་ཡོད་ཚད་ཨ་ཁུས་ཁྱེར། མོ་ནོར་ཡོད་ཚད་ཨ་ནེས་ཁྱེར། དེ་མིན་ཚང་མ་ཕྱེད་བགོས་བྱས་ནས། རྒྱུ་ཁབ་དང་སྐུད་པ་ཙམ་ཡང་མ་ལྷག་པར་འཕྲོག་སོང་། མ་བུ་གསུམ་པོ་གསོ་རེས་བྱེད་ནི་ཡིན་ཟེར་ནས། མ་བུ་གསུམ་པོ་ལ་རྒྱུ་ནོར་མ་དབང་བའི་ཐོག་ཏུ་དབྱར་ཞིང་ལས་བྱེད་དུས་ཨ་ཁུའི་གཡོག་ཡིན། དགུན་བལ་ལས་བྱེད་དུས་ཨ་ནེའི་གཡོག་ཡིན། ཁྱི་ཟས་བྱིན། མཛོ་བེད་སྤྱད། ཉིན་མཚན་དལ་མེད། ནངས་སྔར་ལངས་དང་ནུབ་ཕྱིས་ཉལ་བྱས་ནས་ལས་ཀ་ཁོ་ནར་བཀོལ། མ་བུ་གསུམ་ཀ་ཕྱི་གོས་མེད་འཁྱག་གིས་འཆིང་། ནང་ཟས་མེད་ལྟོགས་ཀྱིས་མནར། རྐང་ལག་སེར་ཀ་གས། གཉེན་ཉེ་བས་རིག་ན་མཆི་མ་ཤོར་ནི། སྡང་དགྲ་བོ་ཡིན་ཡང་སྙིང་རྗེ་སྐྱེ་བའི་ས་མཚམས་ལ་ཐུག་ནི་རེད། དེ་ནས་མི་ལ་ཐོས་པ་དགའ་དགུང་ལོ་བཅོ་ལྔ་ཙམ་ལ་ཐོན་དུས། མ་ཡུམ་གྱིས་ཨ་ཁུ་དང་ཨ་ནེ་གཙོས་པའི་ཉེ་འབྲེལ་ཚང་མ་བོས་ནས། ད་ནི་བུ་འདི་ལག་ཆགས་འདུག་ཁྱིམ་སོ་འཛིན་པའི་དུས་ལ་ཐོན་རྩིས་རེད། སྔར་གྱི་རྒྱུ་ནོར་ཚུར་ལ་བྱིན་ཟེར་བ་ན། ཨ་ཁུ་ཁོང་ཁྲོ་ལངས་ཏེ། དེ་ཅི་ཟེར་ནི་རེད་གོ། མི་ལ་ཤེས་རབ་རྒྱལ་མཚན་གསོན་གྲང་ང་ཁམས་ལ་སྡོད་དུས་ཕར་གཡར་སོང་རྒྱུའི་རྟ་ནོར་ལུག་གསུམ། ཁང་ས་ཞིང་། གསེར་དངུལ་དར་ཕྲུག་སོགས་མ་ཤི་གོང་ནོར་བདག་པོ་ངེད་ཨ་ཁུ་དང་ཨ་ནེ་ལ་ཕྱིར་སྤྲད་པ་རེད། ཁྱེད་མ་བུ་ལ་དབང་བའི་རྒྱུ་ཞིག་རིག་མ་མྱོང་། ལྟོགས་ཤི་མུག་ཤི་རེད་ལ་ཁད་བྱས་ནས་དེའི་ཐོག་ལ་མ་བཞག་པ་རན་པ་ཡིན། ཟེར་ནས་སྣ་ཤུ་སོ་བྱས་ནས་གཏམ་མ་ཉན་པར། ཡར་ལངས་ནས་མ་སྨད་གསུམ་གྱི་ཚོད་ལ་བལྟས་ནས་བརྡུངས་ནི་རེད། ངོ་མ་བྱས་ན་ཁང་པ་འདིའང་ང་ལ་དབང་བ་ཡིན་ཁྱོད་མ་བུ་གསུམ་པོ་ཕྱིར་ལ་སོང་ཟེར། དེ་དུས་མྱང་ཚ་དཀར་རྒྱན་ངུས་ནས་མི་ལ་ཤེས་རབ་རྒྱལ་མཚན་གྱི་མིང་ནས་བོས་ཏེ། ཁྱེད་ཀྱིས་ཤི་དུར་ཁུང་ནས་ལྟས་འདུག་ཟེར་བ་ད་ངེད་མ་བུ་གསུམ་གྱི་སྐྱིད་སྡུག་ཨེ་རིག་གི་ཟེར་བ་ན། ཨ་ཁུ་གཡུང་དྲུང་རྒྱལ་མཚན་གྱིས། ཁྱོད་ཚང་གི་རྒྱུ་ནོར་ཞིག་ངའི་རྩར་མེད། གལ་ཏེ་ཡོད་ནའང་མི་སྤྲད། ཅི་ཀོབ་རྒྱུ་ཡོད་ན་ཀོབ་ཤོག་ཅེས་ས་ཆ་འདིའི་ཁ་སྐད་ལྟར་ན་ཅི་སྤུར་རྒྱུ་ཡོད་ན་སྤུར་ཤོག ཅི་བསྒྱུར་རྒྱུ་ཡོད་ན་བསྒྱུར་ཤོག་ཟེར་ནི་རེད། ཁྱེད་མ་སྨད་ཚོས་མང་ན་དམག་དྲོངས་ཤོག ཉུང་ན་མཐུ་ཐོངས་ཤིག་ཟེར་ནས། མ་སྨད་ཉམས་ཆུང་ཚོས་བཤད་ས་གཏམ་ས་མ་ལོན་ནི་རེད། ཨ་ཞང་ལ་སོགས་པ་བསམ་པ་དཀར་པོ་འགའ་རེ་ཡོད་ཀྱང་ཁས་དྲག་ཞན་ཤོར་ནས་ཅི་ཡང་མ་ཕན། དེ་ནས་ཨ་ཞང་དང་། ཐོས་པ་དགའ་དང་ཆུང་གཉེན་སྒྲིག་བཞག་པའི་མཛེས་སེའི་ཁྱིམ་ཚང་གཉིས་ཀྱིས་ལྐོག་ནས་རོགས་རེ་བྱས་ཏེ་ཐོས་པ་དགའ་ལ་ཡི་གེ་ཅུང་སྦྱོང་རྒྱུའི་གོ་སྐབས་བྱུང་། མ་བུ་ཚོ་ལྟོགས་ཤི་འཁྱགས་ཤིར་མ་ཐེབས་ཙམ་བྱུང་། ལྕམ་སྲིང་མ་ད་དུང་མུ་མཐུད་ནས་གཡོག་རྒྱུག ཨ་ཞང་གིས་མ་བུ་གཉིས་ལྟོགས་གྲི་འཁྱགས་གྲིར་མ་ཤོར་ཙམ་གྱིས་ནམ་ཟླ་བསྐྱལ་བ་ན། ཉིན་ཞིག་མ་ཡུམ་གྱིས་བུ་ལ་ད་ཁྱེད་ལག་ཆགས་ནས་ན་ཚོད་ལ་སོན་པ་རེད། ཁྱོད་རྒྱབ་ལ་བེར་གྱོན། འོག་ལ་རྟ་ཞོན། ཡོབ་ཁྲ་མོ་དགྲ་བོའི་མགོ་ཐོག་ཏུ་འཐོག་ནི་ཞིག་ཨེ་ཡོང་བསམ་ཡང་། དེ་གཅིག་འོང་དཀའ་རྒྱུ་རེད། ཁྱོད་ལ་དེ་འདྲའི་རེ་ཞིག་ཅང་མི་འདུག ཁྱོད་ཀྱི་ཚོད་ལ་བལྟས་ན་ངན་གཡོ་ཆེ་རབ་འོང་བ་འདྲ་འདུག་པས། མཐུ་ངན་སྔགས་གནན་གཏད་སེར་གསུམ་མཐར་ཕྱིན་པར་སྦྱངས་ནས། ཨ་ཁུ་ཨ་ནེ་གཙོས་རང་རེ་མ་སྨད་སྡུག་གཏད་མཁན་གྱི་དགྲ་ཚོ་མི་རབས་དགུ་རྒྱུད་ནས་ཆད་པ་ཞིག་ཨེ་ཐོན་ལྟོས་ཟེར་བ་ན། བུ་ཐོས་པ་དགའ་བས་དྲིན་མ་ལོའི་གཏམ་དེ་ཞེ་ལ་བཟུང་སྟེ་མཐུ་བསླབ་ཏུ་འགྲོ་གྲབས་བྱས་ནས། འགྲོ་བའི་ཉིན་པར། ཨ་མས་བུ་ལ་སེམས་འཕྲེང་། བུས་ཨ་མ་ལ་སེམས་འཕྲེང་། བུས་ཕྱིར་བལྟས་བྱེད་ཞོར་མཆི་མ་ཕྱི་ཞོར་སོང་། ཨ་མས་བུ་མ་རིག་སར་མ་སོང་བར་དུ་ལང་ཞིང་བལྟས་པ་དང་། མི་མཐོང་བ་དང་ངུ་བཞིན་ཁྱིམ་དུ་ལོག དེ་ཕྱིན་ནས་མ་བུ་གཉིས་ཀ་ཚེ་དེ་ལ་འཕྲད་མ་མྱོང་ནི་རེད། དེ་ནས་བུ་ཐག་རིང་གི་རོགས་འགའ་རེ་དང་འགྲོགས་ནས་སོང་སོང་བ་ན། གཡུང་སྟོན་ཁྲོ་རྒྱལ་དང་མཇལ་ནས་མཐུ་སློབ་པར་ཞུས། ཁོང་གིས་གཙང་རོང་གི་གནུབས་ཁུ་ལུང་དུ་བླ་མ་གནུབས་ཆུང་པའི་མདུན་དུ་མངག་ནས་མཐུ་བསླབས་པས་མཐུ་ལས་སླ་བས་འགྲུབ་ནས། ཞག་བདུན་གཉིས་བཅུ་བཞི་ལ་མཐུ་བསྒྲུབས་ནས་བཏང་བས། ཕ་ཡུལ་ན་ཨ་ཁུའི་བུ་ཆེ་བ་ལ་མནའ་མ་བླངས་ཏེ་བག་སྟོན་ཐོག་ཏུ། ཨ་ཁུའི་བུ་རྣམས་དང་མནའ་མས་ཐོག་དྲངས་མ་བུ་གསུམ་གྱི་སྟེང་དེ་བས་སྡང་མེད་པའི་མི་སུམ་ཅུ་སོ་ལྔ་འཛོམས་ཡོད་པས་གློ་བུར་དུ་ཁང་པ་བརྡིབས་ནས་ལྷན་ཅིག་ཏུ་བསད་སོང་། ནངས་པར་བླ་མ་བྱོན་ནས་མདང་དགོང་བཀའ་སྲུང་དམ་ཅན་རྣམས་ཀྱིས་མི་མགོ་སུམ་ཅུ་སོ་ལྔ་དོན་སྙིང་དང་བཅས་པ་ཁྱེར་བྱུང་། ད་དུང་གཉིས་ལྷག་འདུག་པས་སྒྲོལ་ལམ་གསུངས་དུས། དེ་གཉིས་སྙིང་ཚིམ་བདར་བའི་རྟེན་དུ་འཇོག་དགོས་ཞུས་ནས་བཞག་པས་དེ་གཉིས་ཨ་ཁུ་དང་ཨ་ནེ་གཉིས་ཡིན། ཡང་སེར་བ་གྱང་རིམ་གསུམ་ཙམ་ཡོད་པ་ཕབ་པས་དགྲ་ཕྱོགས་ཀྱི་ཞིང་དང་ལོ་ཏོག་ལེན་རྒྱུ་མེད་པ་ཞིག་བཟོས་པ་རེད། དེ་ནས་མི་ལ་ཐོས་པ་དགའ་མཐུ་དང་སེར་བས་སྡིག་ཆེན་བསགས་པ་དེ་ལ་འགྱོད་སེམས་ཆེན་པོ་སྐྱེས་ཏེ། ད་ནི་ཆོས་ཡང་དག་ཅིག་བསྒྲུབ་དགོས་བསམ་ནས། ཆོས་ཤིག་བསྒྲུབ་རྒྱུ་མ་གཏོགས་དྲན་རྒྱུ་བསམ་རྒྱུ་མེད་པ་ཞིག་ཏུ་གྱུར་ནས། བླ་མ་རོང་སྟོན་ལྷ་དགའི་མདུན་དུ་སོང་སྟེ། བླ་མས་ཁྱོད་ང་དང་ལས་འབྲེལ་མི་འདུག ཁྱོད་འདི་ནས་ལྷོ་བྲག་གྲོ་བོ་ལུང་བའི་དགོན་པ་ན་པཎ་ཆེན་ནཱ་རོ་པའི་དངོས་སློབ། སྐྱེས་མཆོག་སྒྲ་སྒྱུར་གྱི་རྒྱལ་པོ་མར་པ་ལོ་ཙཱ་ཞེས་བྱ་བ་སྔགས་གསར་མའི་གྲུབ་ཐོབ། ས་གསུམ་ན་འགྲན་ཟླ་དང་བྲལ་བ་ཞིག་བཞུགས། དེ་དང་ཁྱོད་རང་ཚེ་སྔ་མ་ནས་ལས་འབྲེལ་འདུག་པས་དེར་སོང་ལ་ཆོས་ཞུས་ཤིག་གསུངས་པ་དང་། སྒྲ་སྒྱུར་མར་པའི་མཚན་ཐོས་པ་ཙམ་གྱིས་སེམས་ལ་སྨྲ་མི་ཤེས་པའི་དགའ་བ་དང་། ལུས་ལ་བ་སྤུ་ཀུན་གཡོ་བའི་བདེ་བ། མཆི་མ་འཁྲུག་པའི་མོས་གུས་ཚད་མེད་པ་ཞིག་སྐྱེས་ནས་དེར་སོང་བ་རེད། སང་ཉིན་ཐོས་པ་དགའ་མར་པའི་མདུན་དུ་ཐོན་པའི་ནུབ་མོར་བླ་མ་ཡབ་ཡུམ་གཉིས་ལ་གཟིམ་ལམ་ཁྱད་པར་ཅན་མང་པོ་རྨིས། ཕྱི་ཉིན་བླ་མས་རྟེན་འབྲེལ་གྱི་ཆེ་བ་འདོན་ཕྱིར་ལམ་ཁར་ཞིང་རྨོ་བའི་ཚུལ་མཛད་ནས་བསུ་མ་ལ་ཕེབས་པ་དང་མཇལ་འཕྲད་མཛད། དེར་རྟེན་འབྲེལ་མཆོག་ཏུ་འགྲིགས། བླ་སློབ་ཏུ་གྱུར། དེ་ནས་རྗེ་བཙུན་མི་ལ་རས་པས་དཀའ་བ་ཆེ་ཆུང་མང་པོར་སྤྱད། མི་ལའི་གསས་མཁར་དགུ་ཐོག་བཞེངས་ཏེ། ཐེངས་རེར་མར་བཤིག ཐེངས་རེར་ཡར་བཞེངས། དུས་བར་དུ་སྐབས་རེར་བླ་མའི་བཀའ་བཞིན་མཐུ་དང་སེར་བ་བཏང་། དེ་ལའང་སྐྱོ་བ་སྐྱེས། ཆོས་མ་ཐོས་ནས་ཡུན་རིང་པོར་འགོར་ཡང་སྙིང་རུས་ཀྱིས་བླ་མའི་བཀའ་བཞིན་དུ། ཅི་མཛད་ལེགས་མཐོང་གིས་ཞབས་ཕྱི་བསྒྲུབས། ཡིད་ཆད་ཆེན་པོ་ལན་དགུ་ལ་ཕྱི་གྱེད་ཐེངས་གཅིག་ཀྱང་མ་བྱས། ཉིན་ཞིག་བླ་མས་རྗེས་སུ་བཟུང་ནས་ཐུན་མོང་སོ་ཐར་དང་། ཐུན་མིན་བྱང་སེམས་ཀྱི་སྡོམ་པ་གནང་། མཚན་ལ་མི་ལ་རྡོ་རྗེ་རྒྱལ་མཚན་བཏགས། དེའི་ཕྱི་ཉིན་ནས་གསང་སྔགས་ཀྱི་སྨིན་བྱེད་ཀྱི་དབང་གནང་། མཚན་བཞད་པ་རྡོ་རྗེར་བཏགས། རྒྱུད་ལུང་མན་ངག་གི་ཉམས་ལེན་ཆ་ཚང་མ་གནང་ནས། མ་འོངས་པ་ན་སྒྲུབ་བརྒྱུད་ཀྱི་བསྟན་པ་འཛིན་པའི་བརྒྱུད་འཛིན་དུ་དབུགས་དབྱུངས་དང་གཟེངས་བསྟོད་མཛད། དེ་ནས་ཁོང་གིས་བླ་མས་གནང་བའི་མན་ངག་མ་ལུས་བུག་སྒོར་འདག་སྦྱར་བྱས་ནས་སྒོམ་སྒྲུབ་མཛད་པས་གྲུབ་པ་ཐོབ། དོལ་གྱི་ཚུར་སྟོན་དབང་ངེ་། གཞུང་གི་རྔོག་སྟོན་ཆོས་རྡོར། གཙང་རོང་གི་མེས་སྟོན་ཚོན་པོ། གུང་ཐང་གི་མི་ལ་རས་པ་བཞི་ལ་རང་རང་གི་བཀའ་བབ་ཕྲིན་ལས་ཀྱི་གདམས་ངག་དང་རྟེན་གསུམ་གནང་། མི་ལ་རས་པའི་གཟིམས་ལམ་ལྟར་བླ་མས་བརྡ་འགྲོལ་མཛད་དེ། བྱང་དུ་ཀ་ཆེན་བཙུགས་པ་དེ། །གུང་ཐང་གི་མི་ལ་རས་པ་ཡིན། །ཀ་ཐོག་ཏུ་རྒོད་པོ་ལྡིང་བ་དེ། །ཁོ་མི་གཞི་རྒོད་དང་འདྲ་བ་ཡིན། །རྒོད་རྩེ་སྒྲོ་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །རྒོད་ཚང་བྲག་ལ་བཅས་པ་དེ། །ཚེ་སྲོག་བྲག་ལས་སྲ་བ་ཡིན། །རྒོད་དེ་ལ་བུ་གཅིག་བྱུང་བ་དེ། །འགྲན་གྱི་དོ་མེད་ཅིག་འོང་བ་ཡིན། །བྱ་ཕྲན་གྱིས་ནམ་མཁའ་གང་བ་དེ། །བཀའ་བརྒྱུད་ཀྱི་བསྟན་པ་དར་བ་ཡིན། །ཞེས་སོགས་གསུངས་ནས་རྗེ་བཙུན་མི་ལ་རས་པ་ལ་དམིགས་བསལ་གྱིས་གཏུམ་མོའི་གདམས་ངག་དང་། མཻ་ཏྲི་པའི་དབུ་ཞྭ། ནཱ་རོའི་ན་བཟའ་རྣམས་གནང་ནས། གནས་གཡའ་ཁྲོད་དང་གངས་ཁྲོད་འགྲིམས་ལ་ལྟ་བསྒོམ་ཉམས་སུ་ལོངས་ཤིག་གསུངས། རྗེ་བཙུན་གྱིས་བླ་མའི་བཀའ་བཞིན་དེར་ལོ་མང་བསྒྲུབ་པ་མཛད་དེ་བཞུགས། དུས་རྒྱུན་མཚན་མོར་མི་གཟིམས་ཡང་། ལན་ཅིག་ཐོ་རངས་ཅུང་ཟད་གཟིམས་སོང་བའི་རྨི་ལམ་ན། ཕ་ཡུལ་ལ་ཕེབས་ཡོད་པ། ཕ་ཡུལ་གྱི་ཁང་པ་ཀ་བཞི་གདུང་བརྒྱད་དེ་བོང་རྒན་གྱི་རྣ་ཆོག་བཞིན་ཞིག ནང་གི་ནོར་དམ་ཆོས་དཀོན་མཆོག་བརྩེགས་པ་དེ་ཐིག་ཆུས་འཇིག ཕྱིའི་ཞིང་འོར་མ་གྲུ་གསུམ་དེ་འཇག་སྐྱ་འཕྱུར་རེ། མ་རྒན་ཤི། སྲིང་མོ་སྤྲང་འཁྱར་ལ་སོང་བ་སོགས་སྐྱོ་སྣང་ཅན་གྱི་རྨི་ལམ་རྨིས་པས་རྐྱེན་བྱས་ནས་བླ་མ་ལ་ཕ་ཡུལ་དུ་ལན་གཅིག་གཏོང་བའི་གནང་བར་ཞུས། ཕ་ཡུལ་ལ་བྱོན་ཁར་བླ་མས་མཁའ་འགྲོ་སྙན་བརྒྱུད་ཀྱི་སྨིན་གྲོལ་སོགས་གདམས་ངག་མང་པོ་གནང་ནས། བླ་སློབ་འབྲལ་མི་ཕོད་པ་ལྟ་བུའི་ངང་ཕྱིར་བྱོན་ནས་ཕ་ཡུལ་ལ་ཐོན་དུས། སྔར་གྱི་རྨི་ལམ་ཇི་མ་ཇི་བཞིན་དུ། ཕྱིའི་ས་ཞིང་ས་རྒོད་དུ་གྱུར་ནས་འཇག་སྐྱས་འཕྱུར། ཕ་ཁང་ལྷ་ཁང་ལྟ་བུ་དེ་ཞིག་ལ་ཁད། ནང་དུ་སོང་ནས་བལྟས་པས་དམ་ཆོས་དཀོན་མཆོག་བརྩེགས་པ་མཆོད་པ་འབུལ་བའི་རྟེན་དུ་ཡོད་པ་དེ་ཐིག་ཆུ་ཟག་པ་དང་བྱ་དང་བྱི་བའི་ཚང་གདན་དུ་གྱུར། གོ་ཁར་སོང་ནས་བལྟས་པས། རྩྭ་ཉོབ་དང་རས་ཆད་ཀྱི་ལྷན་པ། ས་དང་འདྲ་མ་འདྲེས་ཀྱི་ཕུང་པོ་ལ་སྔོ་མ་མང་པོ་སྐྱེས་འདུག་པ་དེ་ཡར་བླངས་པས་མི་རུས་མང་པོ་སྐྱ་ཁྲོབ་ཁྲོབ་ཏུ་ཡོད་པར་མ་ཡུམ་གྱི་རུས་པ་ཡིན་པར་ཤེས་ཏེ། ཨ་མ་དྲན་དྲགས་པའི་སྐྱོ་གདུང་བཟོད་གླགས་མེད་པར་བསམ་མི་ཤེས་སྨྲ་མི་ཐུབ་པ་ཞིག་སྐྱེས་ནས། རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན། །སྒྲ་སྒྱུར་མར་པའི་བཀའ་ལུང་བཞིན། །ཕ་ཡུལ་བདུད་ཀྱི་བཙོན་ར་རུ། །མི་རྟག་སྒྱུ་མའི་སློབ་དཔོན་བྱུང་། །སློབ་དཔོན་བཟང་པོ་འདི་ཉིད་ལ། །ངེས་ཤེས་འདྲོངས་པར་བྱིན་གྱིས་རློབས། །སྤྱིར་སྣང་ཞིང་སྲིད་པའི་ཆོས་རྣམས་ཀུན། །མི་རྟག་མི་བརྟན་འགྱུར་ཞིང་འགྲོ། །སྒོས་འཁོར་བའི་ཆོས་ལ་སྙིང་པོ་མེད། །སྙིང་པོ་མེད་པའི་བྱ་བྱེད་བས། །སྙིང་པོའི་ལྷ་ཆོས་བྱེད་དུ་འགྲོ། །དང་པོ་ཕ་ཡོད་ཙ་ན་བུ་ང་མེད། །བུ་ཡོད་ཙ་ན་ཕ་ཡང་མེད། །གཉིས་ཀ་འཛོམས་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་རྟ་སོར་སྒོམ་དུ་འགྲོ། །མ་ཡོད་ཙ་ན་བུ་ང་མེད། །བུ་ང་སླེབས་ཚེ་མ་རྒན་གུམ། །གཉིས་ཀ་འཛོམས་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་རྟ་སོར་སྒོམ་དུ་འགྲོ། །སྲིང་མོ་ཡོད་ཚེ་མིང་པོ་མེད། །མིང་པོ་སླེབས་ཚེ་སྲིང་མོ་འཁྱར། །གཉིས་ཀ་འཛོམས་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་རྟ་སོར་སྒོམ་དུ་འགྲོ། །སོགས་ཐུགས་སྐྱོ་བའི་མགུར་གསུངས། ཨ་མའི་རྣམ་ཤེས་ཁོང་གི་ཐུགས་སེམས་དང་བསྲེས། དེ་བཀའ་བརྒྱུད་བླ་མའི་ཐུགས་ཡེ་ཤེས་དང་བསྲེས་ནས། མ་ཡི་རུས་པ་ལ་སྔས་མགོར་བྱས་ཏེ་སྒོ་གསུམ་སྐད་ཅིག་ལ་མ་གཡེང་བར་འོད་གསལ་དུ་གནས་པས། ཕ་མ་གཉིས་ཀ་འཁོར་བའི་སྡུག་བསྔལ་ལས་གྲོལ་བའི་བདེན་པ་མཐོང་། ཞག་བདུན་དུ་སོང་བ་དང་ཏིང་ངེ་འཛིན་དེ་ལས་བཞེངས་ནས། མ་ཡི་རུས་པ་སྦྱོང་ཆོག་གི་བཀོད་པ་མཛད། དམ་བཅའ་ཐུགས་ལ་བརྟན་པོར་བཅངས་ཏེ་བྲག་དཀར་རྟ་སོར་དབུ་མ་རྫོང་དུ་སྒྲུབ་པ་ལ་བྱོན་ནས། ཉིན་མཚན་མེད་པར་ཉམས་ལེན་མཛད་རྒྱུའི་ཐུགས་ཐག་བཅད། ཆོས་བརྒྱད་ཀྱི་སྣང་བ་ཤར་ན་ལྕེབས་ནས་ཤི། སྐྱིད་ཆོས་ཀྱི་སྣང་བ་ཞིག་ཤར་ན་མཁའ་འགྲོ་ཆོས་སྐྱོང་རྣམས་ཀྱིས་ཁོང་གི་སྲོག་ཆོད་ཅིག་གསུངས་ནས། དེ་ལྟར་བྲག་དཀར་རྟ་སོར་སྔོ་མ་ཟ་ཚོད་ལ་འཚོ་རྟེན་བྱས་ནས་དཀའ་ཐུབ་ཁོ་ནས་བསྒྲུབ་པ་མཛད་པ་རེད། དེའི་སྐབས་སུ་མགུར་ནང་དུ། བྲག་དཀར་རྟ་སོ་དབུ་མ་རྫོང་། །དབུ་མ་རྫོང་གི་རྫོང་རྩེ་ན། །བོད་ཀྱི་རྣལ་འབྱོར་རས་པ་ང་། །ལྟོ་གོས་ཚེ་འདི་བློས་བཏང་ནས། །རྫོགས་པའི་སངས་རྒྱས་སྒྲུབ་པ་ལ། །འོག་ན་སྲ་བའི་འབོལ་ཆུང་བདེ། །སྟེང་ན་བལ་པོའི་ཤིང་རས་བདེ། །པུས་འཁྱུད་སྒོམ་ཐག་སྐོར་གཅིག་བདེ། །འགྲངས་ལྟོག་སྙོམ་པའི་སྒྱུ་ལུས་བདེ། །ལྟ་རྟོག་ཐོངས་པའི་སེམས་ཉིད་བདེ། །མི་བདེ་མེད་དེ་བདེ་མོར་གདའ། །སོགས་བདེ་བ་ལྔ་ཡི་མགུར་གསུངས་པ་དང་། བར་ཆད་བདུད་རིགས་ཀྱི་གཡུལ་ལས་རྒྱལ་ཏེ་སྐུ་ཚེ་དེ་ལ་ཟུང་འཇུག་རྡོ་རྗེ་འཆང་གི་གོ་འཕང་བརྙེས་པ་དེ་ཡང་མྱ་ངན་ལས་འདས་པ་རེད། དེ་ལྟར་མི་རྟག་པའི་རང་གཤིས་ལ་བསམ་ན། རྗེ་བཙུན་མི་ལས་གསུངས་པ་ལྟར། ཕ་ཡོད་ཙ་ན་བུ་ང་མེད། །བུ་ང་ཡོད་དུས་ཕ་ཡང་མེད། །གཉིས་ཀ་འཛོམས་ཀྱང་སྙིང་པོ་མེད། །ཅེས་པ་ལྟར་མི་རྟག་འཁོར་བའི་སྡུག་བསྔལ་འདི་ལ་བསམ་བློ་གཏོང་ན་ངོ་མས་སྙིང་རླུང་ལྡང་བྱེད་ཅིག་ཡིན། རང་གི་གཉེན་བཤེས་བར་མའི་འགྲོ་བ་ལ་སོགས་ཏེ་ཇི་སྙེད་ཅིག་ན་ནིང་དང་། ཁ་སང་ཟླ་བ་སྔོན་མ་ཕན་ཆད་ཡོད་པ་འཇིག་རྟེན་ཕ་རོལ་ཏུ་སོང་སྟེ་རོ་མེད་པར་བྱས་ཟིན་པ་དང་། མིང་ཙམ་ཤུལ་དུ་ལུས་པས་རང་རེ་ཡང་ངེས་པར་འཆི། ཞེས་རང་གིས་རང་ལ་བསམ་བློ་ཞིག་བསྐོར་ན་རང་གི་གཉེན་བཤེས་དང་ནི། བར་མའི་འགྲོ་བ་ངོ་ཤེས་མི་ཤེས་པ་གྲངས་མང་པོ་ཇི་སྙེད་ཅིག་ན་ནིང་ལོ་དང་ཁ་སང་ཟླ་བ་སྔོན་ཕན་ཆད་ལ་བདེ་བདེ་ཁོད་ཁོད་བྱས་ནས་ཤི་སྣང་ཞེ་ལ་མ་ཤར་བར་ཡོད་པ་རྣམས། རྐྱེན་གློ་བུར་བ་ཞིག་ལ་བརྟེན་ནས་འཆི་བདག་གཤིན་རྗེའི་ཞགས་པ་ཐེབས་ཏེ་འཇིག་རྟེན་ཕ་རོལ་ཏུ་སོང་སྟེ། རོ་རེངས་ཤིང་རྒོག་འདྲ་མེད་པར་བྱས་ཟིན་པ་དང་། མིང་ཙམ་ཡང་ཤུལ་དུ་ལུས་པ་ལས་མེད་པར་ཡིན་ན། སྔ་མར་ཅི་འོང་རྗེས་མ་ལའང་འོང་རྒྱུ་དེ་ཡིན་པས་ན། རང་རེ་གསོན་པོར་འགྲོ་བ་རྣམས་ཀྱང་ཨེ་འཆི་མི་འཆི་ཙམ་མིན་པར་ངེས་པར་འཆི་བས་ངེས་ཤེས་པ་ཡིན། ད་ནི་བསྐལ་པའི་སྙིགས་མ་ལ་ཐུག་ཅིང་ཚེ་ཚད་ཇི་བཞིན་ཐུབ་ནའང་དབུགས་ཉི་ཁྲི་ཆིག་སྟོང་རྒྱུ་རིང་ལ་ཞག་གཅིག་གི་མི་ཚེ་ཐུང་དུ་སོང་ངོ་། །ད་ནི་སྙིགས་མ་ལྔ་བདོ་བའི་བསྐལ་པའི་དུས་ཀྱི་སྙིགས་མ་ལ་ཐུག་ཅིང་ཁྱད་པར་དུ་ཚེའི་སྙིགས་མ་ཡིན་པས་ཚེ་ཚད་ཇི་བཞིན་དུ་ཐུབ་པར་དཀའ་ཞིང་། ཐུབ་ནའང་དབུགས་ཉི་ཁྲི་ཆིག་སྟོང་རྒྱུ་རིང་ལ་ཉིན་ཞག་གཅིག་གིས་མི་ཚེ་ཇེ་ཐུང་དུ་སོང་། དེ་བཞིན་དུ་ཞག་སུམ་ཅུས་ཟླ་བ་གཅིག ཟླ་བ་བཅུ་གཉིས་ཀྱིས་ལོ་འཛད་པས་ཚེ་ཟད་པ་ལ་དཀའ་ཚེགས་གང་ཡང་མེད་དེ། རྒྱ་ཆེར་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་གསུངས་ཏེ། འདོད་ཁམས་གཟུགས་ཁམས་གཟུགས་མེད་ཁམས་ཀྱི་སྲིད་པ་གསུམ་པོ་མི་རྟག་པ་སྟེ། བརྟན་པ་མེད་པར་སྐད་ཅིག་ཀྱང་མི་སྡོད་པའི་ཕྱིར། དཔེར་ན་སྟོན་ཀའི་ལྷོ་སྤྲིན་དང་འདྲ་བ་དང་། འགྲོ་བའི་སྐྱེ་འཆི་ནི་གཅིག་ཏུ་ངེས་པར་མེད་པས་གར་དང་མིག་འཕྲུལ་ལ་ལྟ་བ་དང་མཚུངས་པ་དང་། སྲིད་གསུམ་འགྲོ་བའི་ཚེ་མྱུར་མགྱོགས་སུ་ཟད་འགྲོ་བ་ནམ་མཁའི་གློག་དང་འདྲ་བ་དང་། དཔེ་གཞན་རི་གཟར་འབབ་ཆུ་བཞིན་སྐད་ཅིག་ཀྱང་མི་སྡོད་པར་མྱུར་མགྱོགས་སུ་འགྲོ་ཞེས་རགས་པ་རྒྱུན་གྱི་མི་རྟག་པ་རྣམས་ཀྱང་ཕྲ་བ་སྐད་ཅིག་གི་མི་རྟག་པས་ཡིན་ལ། མདོར་ན་སྐད་ཅིག་སྐར་ཆའི་ཡུན་ལ་སྡོད་དབང་མེད་པའི་ཚུལ་ལ་ལེགས་པར་བསམས་ནས་སྙིང་པོའི་ལྷ་ཆོས་ཉམས་སུ་ལེན་པ་ལ། མགོ་ལ་མེ་ཤོར་གྱི་ཚུལ་ལྟར་ལེ་ལོ་དང་ཕྱི་བཤོལ་མེད་པར་བརྩོན་འགྲུས་བསྐྱེད་པར་བྱའོ། །ཚེ་ཟད་པའི་ཚུལ་འདི་ལ་གཞན་དཔེ་མང་པོ་གསུངས་ཡོད། དཔེར་ན་ཉི་མ་ནུབ་པའི་གྲིབ་སོ་ལྟ་བུ་འགྲིབ་སྟེ། ཉི་མ་དགོང་ཁའི་རི་མགོར་ནུབ་པ་ན་གྲིབ་མ་དེ་ཚུར་ཚུར་ཇེ་ཉེར་འོང་བ་དང་འདྲ། དེའང་མི་ཚེ་རིང་ཞིག་ལ་ཆ་མཚོན་ན། ལོ་སུམ་ཅུ་ཡར་ནང་དུ་སོན་དུས་དགོང་དཀྱིལ་གྱི་ཉི་མ་ལྟ་བུ་རེད། ད་ལྟར་ལས་ཀ་བསྒྲུབ་ལོང་ཡོད་དུས་སྔ་དྲོ་རེད། དེ་ཟད་ན་ཟད་པ་རེད། ཚེ་ཐུང་ངུ་ཞིག་ཡིན་ན་ཉི་མ་སྔ་དྲོ་དང་ཕྱི་དྲོའི་ཤར་ནུབ་ཀྱི་བར་བགྲོད་ལོང་མེད་པར་ཉི་མ་གློ་བུར་སྤྲིན་ནག་གིས་ནམ་སྒྲིབ་ཅི་ཤེས་དེ་དང་འདྲ། ཡང་འབྲུའི་བང་མཛོད་ལ་དཔེར་བཞག་པ་རེད། དཔེར་ན་འབྲུའི་བང་མཛོད་གང་ཡོད་པ་དེ་ལ་ཚུར་སྣོན་པ་མེད་པར་ཉིན་རེ་བཞིན་ཕར་ལེན་ཁོ་ནར་བྱེད་པས་ཉིན་ཞིག་ལ་ཟད་འགྲོ་བ་བཞིན་དུ། མི་ཞིག་ལ་ཉིན་ཞག་སྟོང་ཕྲག་གཅིག་འདུག་ཚེ་ཡོད་ན་ཉིན་རེ་སོང་ན་ཚེ་ཟད་པར་མ་ཚད་དབུགས་གཅིག་སོང་ན་ཉིས་ཁྲི་ཆིག་སྟོང་ནང་གི་གཅིག་ཟད་པ་རེད། ཚེའི་ཚད་མར་ཇེ་ཉུང་མ་གཏོགས་མེད་ལ། དེ་བཞིན་དུ་ལྟག་ཆུ་ཆད་པའི་རྫིང་བུ་འཁྱིལ་བ་མཐིལ་བརྡོལ་ཡོད་ན་རིམ་བཞིན་བྲི་བ་ལྟར་ཚེའང་ཉིན་རེ་དང་སྐད་ཅིག་རེ་ཞིང་ཁ་དམའ་བཞིན་ཡོད། དེ་བཞིན་དུ་བར་སྣང་གི་སྤྲིན་ཡལ་བ་ལ་དཔེར་འཇོག་ན། བར་སྣང་གི་སྤྲིན་ལ་ཚད་བཙུགས་ཏེ་ཡིད་རྟོན་དང་བློ་ཁེལ་མི་རུང་སྟེ། ད་ཡོད་ན་ད་ཡལ་འགྲོ་བ་བཞིན་དུ་མི་ཚེའང་འདི་ཙམ་གནས་ཞེས་གཏན་ཁེལ་བར་མེད་པ་དང་། རི་གཟར་གྱི་རྦབ་ཆུ་ལ་དཔེར་བླངས་པ་རྒྱ་ཆེར་རོལ་པའི་ལུང་བཞིན་དང་། ཡང་མི་ནག་ཆེན་གཤེད་མའི་དྲུང་ན་སླེབས་པ་ལ་དཔེར་བླངས་པ་ནི། དཔེར་ན་མི་ནག་ཆེན་བཙོན་འོག་ཏུ་ཡོད་པ་ཞིག་སྐེ་བཅད་ནས་གསད་རྒྱུའི་ཐག་བཅད་པ་ཞིག་སྐེ་ལྕགས་ཐག ལག་ལྕགས་སྒྲོག་ལ་འཁྲིད་འགྲོ་ན་གོམ་གང་སོང་ན་མགོ་ཆད་རྒྱུར་ཐག་ཇེ་ཉེ་བཞིན་དུ། ང་ཚོའི་མི་ཚེའང་གཅིག་མཚུངས་ཡིན་པས། བཙོན་པ་བོའུ་བརྒྱན་ལ་འཇོག་རྒྱུའི་ཐག་བཅད་ཚར་བ་ཞིག་ཡིན་ན་སྡུག་ས་ཨེ་འདུག རང་རེའང་དེ་དང་འདྲ་བ་གསོད་རྒྱུ་ཐག་བཅད་ཚར་བ་རེད། སྐྱེས་ནས་གསོད་པ་དང་འཆི་རྒྱུའི་ཐེལ་རྒྱག་པ་དང་འདྲ་འདྲ་རེད། ཤི་ལུགས་དང་འཆི་རྐྱེན་མི་འདྲ་བ། ནད་ན་བ། གློ་བུར་ཡེ་འདྲོག་གིས་ཤི་བའམ། རླངས་འཁོར་འགྲིལ་བ། མགོ་ལ་རྡོ་ཕོགས་པ། གཞན་གྱིས་གསོད་པ། ཟ་ཉེས་དང་འཐུང་ཉེས་ཀྱིས་ཤི་དགོས་པ་སོགས་མི་ཤེས་པ་མ་གཏོགས་བཙོན་པ་སྲོག་ཁྲིམས་གཅད་པ་ཞིག་དང་ཁྱད་མེད་རེད། ཡང་ཆུ་ཕྲན་རྒྱ་མཚོའི་ནང་དུ་འབབ་པ་ལ་དཔེར་བྱེད་ན། རང་རེའི་ས་ན་ཡོད་པའི་རྨ་རྫ་འབྲུ་གསུམ་གྱི་ཆུ་སོགས་རང་རེས་མཐོང་མི་ཐུབ་མ་གཏོགས། གལ་ཏེ་གྲུ་ནང་དུ་ཞུགས་ཏེ་ཆུ་དང་ལྷན་དུ་འགྲོག་སོང་ན་ཇི་ཙམ་སོང་ཡང་རྒྱ་མཚོའི་ནང་དུ་འབབ་རྒྱུ་ཐག་ཇེ་ཉེ་དང་། མཐར་རྒྱ་མཚོའི་ནང་དུ་མ་གཏོགས་འགྲོ་ས་གཞན་མེད་པ་དང་འདྲ། ཡང་མདོ་ལས་གྱད་ཆེན་གྱིས་མདའ་འཕེན་པ་ལ་དཔེར་བྱས་ནས་གསུངས་ཡོད། དེའང་གྱད་སྟོབས་ཆེན་དང་རྩལ་ཆེན་གྱིས་མདའ་འཕངས་ན་འབེན་ལ་བབ་ཚེ་དེའི་ལམ་གྱི་བར་སྣང་ལ་སྐད་ཅིག་ཀྱང་མི་སྡོད་པ་བཞིན་དུ། མིའི་ཚེའང་ སྐད་ཅིག་ཀྱང་མི་བསྡད་པར་ཟད་འགྲོ་བ་རེད། དེས་ན་རྒྱལ་སྲས་ཞི་བ་ལྷས། ཚེ་འདི་རྟག་ཏུ་གོད་འགྱུར་ཞིང་། །སྣོན་པ་གུད་ནས་ཡོང་མེད་པས། །བདག་ལྟ་འཆི་བར་ཅིས་མི་འགྱུར། །ཞེས་གསུངས་པ་བཞིན་ནོ།།

གཉིས་པ་མན་ངག་གི་སྒོ་ནས་སྒོམ་པ།

ད་གཉིས་པ་དོན་དེ་ཉིད་མན་ངག་གི་སྒོ་ནས་རྒྱུད་ལ་སྦྱར་ནས་སྒོམ་པ་ནི། ད་སྔར་ལུང་ལ་སྦྱར་ནས་གསུངས་པ་རེད། ལུང་ལས་དེ་ལྟར་གསུངས་ཡོད་པར་གོ་བ་རྐྱང་པས་མི་ཆོག་གི། ད་སྔར་རང་གིས་གོའང་གོ་མི་ཆོད་ཅིང་ཕན་ཐོགས་མེད་པ་དེ་ནི། རྒྱུད་ལ་སྦྱར་ནས་མ་བསྒོམས་པས་རེད། དེས་ན་དེ་ཉིད་ལ་མན་ངག་ལག་ཁྲིད་ཀྱི་སྒོ་ནས་རང་གི་རྒྱུད་ལ་སྦྱར་བ་ནི། གང་ཟག་ཆོས་ཀྱི་གོ་རྟོགས་ཅན་ལ་ལུང་ལ་དཔགས་ནས་སྐྱོ་བ་བསྐུལ་བ་ཉིད་རྣམ་པ་གཙང་ཞིང་རྒྱུད་ལ་འཕྲོད། ཅེས་གང་ཟག་དབང་པོ་རབ་ཆོས་ཀྱི་གོ་རྟོགས་ཅན། ཐོས་པ་རྒྱུད་ལ་སྦྱོར་མཁན་ཅན་དེ་ལ་གོང་དུ་བཤད་པ་ལྟར། ལུང་ལ་རྗེས་སུ་དཔགས་ནས་དེའི་རྐྱེན་གྱིས་སྐྱོ་བ་བསྐུལ་བ་ཉིད་རྣམ་པ་གཙང་ཞིང་སྟབས་བདེ་བ་དང་རྒྱུད་ལ་འཕྲོད་པ་ཡིན་ཡང་། ལས་དང་པོ་པ་སྤྱིར་ན་ཆོས་ཕྱོགས་ཀྱི་སྦྱོང་བ་རྒྱ་མི་ཆེ་བ་དང་། ཁྱད་པར་དུ་རྣམ་པར་ཤེས་པ་ཤིན་ཏུ་ལྐོག་ཏུ་གྱུར་པའི་རིགས་ཅན་ཏེ་རྨོངས་ཤིང་བླུན་པ་རྣམ་འབྱེད་ཀྱི་ཤེས་རབ་མེད་པའི་རིགས་ཅན་འགའ་ཞིག་ལ་དཔེ་ཆོས་དང་། ཞེས་དཔེ་དང་སྦྱར་བའི་ཆོས་གོང་དུ་བཤད་པ་ལྟ་བུ་སྒྲུང་རྒྱུད་ལོ་རྒྱུས་དང་འབྲེལ་བ་དང་། བློ་སྣ་ཐབས་ཀྱིས་འདྲིད་ཅིང་འཁྲིད་པ་འདི་གནད་ཟབ་པའི་མན་ངག་ཡིན་པས་ན། བླ་མས་སློབ་མ་སྐྱོང་བའི་ཚེ་ཐམས་ཅད་དཔེ་ཚད་གཅིག་གི་ཐོག་ཏུ་མི་འཇོག་པར་སློབ་མའི་ཁམས་དང་དབང་པོ་བསམ་པ་དང་སྦྱར་ནས་ཁྲིད་དགོས་སོ། །དེ་ཇི་ལྟར་སྦྱར་ཞིང་མན་ངག་གི་ཐོག་ནས་ཇི་ལྟར་སྒོམ་ཞེ་ན། ཉན་པ་རྐྱང་པས་མི་ཚད་ཐུན་བཅད་དེ་སྒོམ་དགོས། རང་རེས་ཐུན་བཅད་དེ་སྒོམ་པའི་ཚེ། འགོར་བླ་མའི་རྣལ་འབྱོར་རེ་འདོན་སྒོམ་བྱེད། དེ་ནས་འདུག་སྟངས་མྱ་ངན་གྱི་འདུག་སྟངས་བྱ་སྟེ། དྲང་སྲོང་ཙོག་པུར་དང་ཧ་ལམ་འདྲ་བ་ལ། ལག་པ་གཉིས་ཁུ་ཚུར་བཅངས་ཏེ་འགྲམ་པ་སྐྱོར་ནས་འདུག འདི་སྐབས་ཁ་དཔེ་བཤད་པ་ལྟར་དེ་འདྲ་ཡོད་དར་བསམ་རྒྱུ་འདྲ་མ་ཡིན་པར། ངོ་མ་རང་ཉིད་དེ་འདྲ་ཞིག་གི་ནང་དུ་ཐོན་ཡོད་པ་དང་། རང་ཉིད་ཀྱིས་དེ་ལྟར་མྱོང་བཞིན་ཡོད་པ་ཞིག་སྒོམ་དགོས། དཔེར་ན་མིག་གིས་རོ་སྐྱུར་བོ་ཅན་མཐོང་ན་ཁ་ནས་འགྲམ་ཆུ་ལྡང་བ་ལྟར། སྒོམ་དུས་བསྒོམ་རྒྱུའི་སྣང་བ་དེ་རང་ཉིད་ཀྱི་ཚོར་སྣང་ཐོག་ཏུ་ཡོང་ངེས་སུ་བྱ་དགོས། ཆོས་གང་སྦྱོང་ན་དེ་འདྲ་རེད། རང་ཉམས་ལ་ཕན་ཐོགས་ཡོད་པ་ཞིག་མ་རེད་པར་ཕྱི་ཚུལ་གྱི་ཚུགས་ཀ་བཏོད་ན་དེ་རང་མགོ་རང་གིས་གཡོག་པ་རེད། དེས་ན་འདི་ལྟར་བསྒོམ་དགོས། དེ་ཡང་བདག་ཉིད་ཡིད་ལ་མེད་པ་ཞིག་ལ་ངོ་མི་ཤེས་པའི་ལུང་པ་མཐོང་བ་ཙམ་ན་སྐྲག་ཅིང་འཇིགས་སུ་རུང་བ། མྱ་ངམ་གྱི་ཐང་ཤིན་ཏུ་རྒྱ་ཆེ་བ། དེའི་ལུང་པ་དེ་ན་མིའི་རྒྱུ་འགྲུལ་མི་དགོས་རྗེས་ཙམ་ཡང་རིག་རྒྱུ་མེད་པ། ས་ཐོག་གི་མི་མ་དགོས་ནམ་མཁའི་བྱ་འཕུར་རྒྱུ་མེད་པ། རླུང་སྒྲ་དྲག་པོ་སུ་རི་རི་སྒྲོག་པ། རླུང་གི་སྒྲ་དང་འགྲོག་པའི་འཇག་སྐྱ་པུ་རུ་རུ་ཟེར་བ། འདྲེ་ཕུར་པར་བཏགས་ན་མི་བཟུང་ས། ལྷ་གཡང་སྐྱབས་བཅས་ན་མི་འཁྲི་ས་དེ་འདྲའི་ས་ཆ་ཞིག་ཏུ་སླེབས་ནས། ཅི་བྱ་བརྟོལ་མེད་ཅིང་ཡིད་སློང་སློང་པོའམ་སེམས་སྐྱོ་ལྷང་ལྷང་པོར་གྱུར་ནས་ཡོད་ཙ་ན། གློ་བུར་དུ་གང་ནས་འོངས་བའི་ཆ་མེད་པའི་སྐྱེ་བོ་ཕོ་མོ་དཀར་ནག་གཉིས་བྱུང་བ་སྟེ། སྐྱེས་པ་ཁ་དོག་དཀར་པོ་དང་བུད་མེད་ཁ་དོག་ནག་པོ་ཅན་གཉིས་བྱུང་ནས་དེ་གཉིས་ཀྱིས་འདི་ལྟར་ཟེར། ས་ཚོགས་དྲུག་སྒྱུ་མའི་གྲོང་ཁྱེར་བྱ་བ་ན་ཡིད་བཞིན་གྱི་ནོར་བུར་མཆིང་བུ་བྱ་བ་ཡོད། དེ་ལེན་དུ་འགྲོ་བ་ལ་ཆུ་བོ་ཆེན་པོ་ལ་གྲུ་གཟིངས་སུ་ཞུགས་ནས་འགྲོ་དགོས། རང་རེ་གསུམ་ལྷན་དུ་འགྲོགས་པར་འདོད་དམ་ཞེས་ཟེར་བ་ན། གཏམ་དེ་རང་གི་བློ་ལ་བབ་ནས་དེ་མི་ཆོག་རྒྱུ་མི་འདུག་པས་ངོ་མ་དེར་འགྲོགས་དགོས་བསམ་ནས། དེ་ལ་རང་ཉིད་བློ་ཡིད་ཕྱོགས་ཏེ་ཁོང་གཉིས་ཀྱི་རྗེས་སུ་འབྲངས་ནས་སོང་སོང་བ་ལས། ཅི་ཞིག་ན་རྒྱ་མཚོ་ཆེན་པོ་གནམ་ཐང་ལ་བབ་པ་འདྲ་བ། ཡར་གནམ་ལ་ལྟ་ན་གནམ་གྱི་མཐའ་དང་མར་རྒྱ་མཚོ་ལ་ལྟ་ན་མཚམས་མི་མངོན་པར་རྒྱ་ཁྱོན་བློས་མི་ཆོད་པ། རྒྱ་མཚོ་འཇམ་ཆིལ་ལེ་འཁྱིལ་བ་མ་ཡིན་པར་རྦ་རླབས་བར་སྣང་ལ་འཕྱོ་བ། མཐོང་ན་འཇིགས་སྐྲག་སྐྱེ་བ། དེའི་ནང་ན་ཆུ་སྲིན་གྱི་རིགས་མི་འདྲ་བ་སྐྱེས་རབས་སོགས་སུ་འབྱུང་བ་ལྟར་འཛིན་འཁྲི་དང་། རལ་གྲིའི་སོ་ཅན་སོགས་དང་། སྲོག་ཆགས་གང་དང་འཕྲད་ན་སྲོག་འཕྲོག་པར་བྱེད་པའི་ཉ་བོ་ཆེ་དང་། ཆུ་མི་དང་། ཆུ་རྟ་ལ་སོགས་པ་མདོར་ན་གདུག་པ་ཅན་སྔར་མིག་གིས་མཐོང་མ་མྱོང་བ། རིག་ན་སྐྱི་གཡའ་ཞིང་། འཕྲད་ན་སྲོག་འཕྲོག་པར་བྱེད་པའི་འགའ་རེ་མགོ་ཆེ་ལ་ལུས་ཆུང་བ། འགའ་རེ་ལུས་ཆེ་ལ་མགོ་བོ་ཆུང་བ། འགའ་ཞིག་མགོ་ཆེན་པོ་མགོ་ལུས་ཚང་མ་ཁ་རེད་སོང་བ་སོགས་སྲོག་ཆགས་མགོ་ལུས་མི་མཚུངས་པ་མང་པོས་རྒྱ་མཚོ་ཁེངས་ཤིང་གང་བ། རྒྱ་མཚོ་རླུང་ཆེན་གྱིས་བསྐུལ་བའི་རྦ་རླབས་ཀྱི་གཉེར་མ་ལ་ཕར་ཚུར་འཇུག་ལྡོག་བྱེད་པ་ཞིག་གི་རྩར་སླེབས། དེར་རང་ཉིད་ཤིན་ཏུ་འཇིགས་ཤིང་སྐྲག་པས་བྲོས་འཚལ་བ་ནའམ་བྲོས་བསམ་པ་ཞིག་ཡིན་ནའང་། ནོར་བུ་དེ་ལོན་དུ་རེ་བའི་འདོད་པས་གདུངས་ཏེ་སྐྲག་ཞོར་འཇིགས་ཞོར་དུ་ཁོང་གཉིས་ཀྱིས་གཏོང་བའི་གཟིངས་སུ་ཞུགས་ཏེ་སོང་སོང་བ་ན་རྒྱ་མཚོ་ཆེན་པོ་ལ་བརྒལ་བ་ལས་མཚོ་ཆེན་པོ་དེའི་དཀྱིལ་ཙམ་དུ་སླེབས་པ་དང་། གློ་བུར་དུ་རླུང་དམར་དྲག་པོ་ཤིན་ཏུ་མི་བཟད་པ་ཞིག་ལངས་ནས་རྒྱ་མཚོའི་རླབས་ཇེ་ཆེར་སོང་བས་དེའི་འཇིགས་སྐྲག་གིས་མ་བཟོད་པར་སྐྱ་བ་ཞེས་གྲུ་འདོར་བྱེད་ཤིན་ཏུ་དུབ་ཅིང་རྩོལ་བར་བརྒྱབ་པ་ལས་མི་སྐྱེས་ཕོ་མོ་དེ་གཉིས་ཀྱི་ལག་པའི་སྐྱ་བ་ཟུང་ཡང་དུས་གཅིག་ལ་ཐུག་སྟེ་མཉམ་པོར་ཆག ཆུའི་རྦ་རླབས་ནམ་མཁའ་ལ་འཕྱོ་བ་ལྟ་བུས་རེས་འགའ་གྲུ་གཟིངས་སྲིད་པའི་རྩེ་མོ་ལ་ལྡིང་བ་སྙམ་བྱེད་པ་དང་། རེས་འགའ་ཆུ་བོ་བར་སྣང་ལ་འཕྱོ་ཞིང་གྲུ་གཟིངས་རྒྱ་མཚོའི་གཏིང་དུ་ཆུད་པ་སྙམ་བྱེད་པ། དེའི་ཚེ་བྲོས་པས་ཐར་པ་དང་། གཞན་ལ་ར་མདའ་སྦྲན་དང་། རང་སྟོབས་ཀྱིས་ལག་པ་འཇུ་ས་ནི་མེད། ལུས་ཅན་ཐམས་ཅད་འཆི་བ་དེ་ལས་ཐར་མི་ཞེས་ཟེར་འདུག་རྒྱུའི་འཆི་བ་འཆི་བ་ཟེར་བའི་འཇིགས་པ་ཅན་གྱི་དགྲ་ཆེན་དེ། དབུགས་ཕར་ཚུར་འབྱུང་འཇུག་ཙམ་གྱི་ཁོངས་སུ་བཙན་ཐབས་སུ་སླེབས། ད་ནི་འཆི་རྒྱུ་མ་གཏོགས་ཐར་ས་ཡོད་མ་སོང་། སྔོན་ཆད་འཆི་བ་དེ་དེ་འདྲ་ལས་སླ་མོ་ཞིག་གིས་ཡོང་སྣང་ཡེ་མ་དྲན་པས། འཆི་དུས་མི་འཇིགས་པ་དང་དེ་ལ་ཕན་པའི་ཆོས་བྱས་པའི་གདེང་ཚོད་ནི་རང་ལ་མེད། གཅེས་པའི་བུ་དང་ཞེན་ཆགས་ཀྱི་ཡུལ་ནོར་རྫས་གཉེན་འདུན་ཡུལ་མི་ཁྱིམ་མཚེས་ཐམས་ཅད་དང་ཉི་མ་དེ་རིང་ནས་བྲལ་ཞིང་། འཇིགས་སྐྲག་འདི་འདྲས་སྡུག་ཐུག་པའི་ཉི་མ་བྱུང་དུས་དེ་དག་གིས་ཕན་པ་ནི་ཏིལ་འབྲུ་ཙམ་ཡང་མེད། ཇི་སྐད་དུ། ཚེ་འདི་སྐྱིད་ཀྱང་དེ་རིང་ཉིན་གུང་ཙམ། །ཕྱི་མའི་སྣང་བ་མི་རིང་སང་ཉིན་ཙམ། །བར་དོའི་སྣང་བ་དེ་བས་མི་རིང་ཙམ། །ད་ལྟ་ཉིད་ནས་དམ་པའི་ཆོས་ལ་འབུངས། །ཞེས་པ་ལྟར་དྲན་མ་ཐུབ་པས་འདི་འདྲ་བྱུང་སོང་། ད་དྲན་ཡང་ཕྱིས་དྲགས་སོང་། ད་ཅི་བྱེད། ཨ་ཙི་འཇིགས་པ་ལ། ད་ཅི་བྱེད་ན་དྲག ཨ་ཙ་མ་ཞེས་སྐྲག་པའི་འཇིགས་པ་ཐོག་ཏུ་བབ་པའི་ཚིག་དང་། ཀྱི་ཧུད། ཀྱི་ཧུད། ཅེས་སྨྲེ་སྔགས་དང་དེ་ངུ་འབོད་དང་ལྡན་པའི་འོ་དོད་དྲག་པོ་འདོན་གྱིན་ཡོད་པའི་ཚེ་ན། གློ་བུར་དུ་མདུན་གྱི་ནམ་མཁར་སྐུ་དྲིན་ཅན་གྱི་བླ་མ་ཞེས། བཀའ་ཡི་དྲིན་གསུང་གི་བདུད་རྩིས་སྐྱོང་བའི་བཀའ་དྲིན་དང་། སྐུ་ཡིས་རྫས་གནང་བ་དང་སྐུ་དངོས་ཀྱིས་སྲོག་སྐྱོབ་པ་སོགས་ལ་སྐུ་དྲིན་དང་། ཡང་ན་གསུང་གི་ཆོས་ཀྱིས་བསྐྱངས་ཤིང་ཐུགས་ཀྱི་བྱིན་རླབས་འཕོ་བའང་རྟེན་གཟུགས་སྐུ་ལས་བརྒྱུད་ནས་བྱུང་བས་ན། སྐབས་འདིར་བཀའ་དྲིན་དང་སྐུ་དྲིན་གཅིག་མཚུངས་ཤིག་གོ་ན་ཨེ་ཆོག་སྙམ། དེ་ལྟ་བུའི་སྐུ་དྲིན་ཅན་གྱི་རྩ་བའི་བླ་མ་དེ་ཉིད་ཨོ་རྒྱན་ཆེན་པོ་པདྨ་ཐོད་ཕྲེང་རྩལ་གྱི་རྣམ་འགྱུར་ཅན་དུ་སྐུ་གར་སྟབས་ལིང་ལིང་བྱོན་ནས། ཀྱེ་ཞེས་འབོད་པའི་ཚིག་གིས་ཁྱོད་ཀྱིས་འཁོར་བའི་རྒྱ་མཚོ་ཆེན་པོ་སྡུག་བསྔལ་གསུམ་གྱི་རང་བཞིན་ཅན་འདི་ལ་ཡིད་བཞིན་གྱི་ནོར་བུ་ལྟ་བུར་མཐོང་སྟེ། མི་གཙང་བ་ལ་གཙང་བ་དང་། སྡུག་བསྔལ་བ་ལ་བདེ་བ། མི་རྟག་པ་ལ་རྟག་པ། བདག་མེད་པ་ལ་བདག་ཏུ་འཛིན་པས་མཁྲིས་ནད་ཅན་གྱིས་དུང་ལ་སེར་པོར་སྣང་བ་ལྟར་ཕྱིན་ཅི་ལོག་གི་རྟོག་པས་དེ་ལྟར་མཐོང་བ་ཡིན། སྙིང་མེད་འཁོར་བའི་ཆོས་ལ་ཞེན་ལོག་དང་ངེས་འབྱུང་མ་སྐྱེས། འཆི་ཁར་ཕན་པའི་ཆོས་ཡེ་ནས་མ་དྲན་པས་ལན་ནས་འདི་བྱུང་བ་རེད། ཁྱོད་རང་གི་ད་ལྟའི་སྣང་བ་འཁྲུལ་སྣང་ཤིན་ཏུ་འཐུག་པོའི་ཨ་འཐས་མངོན་ཞེན་ཅན་འདི་ནི་མ་རིག་པ་རྣམ་པ་གསུམ་ལས་རྒྱུ་བདག་ཉིད་གཅིག་པའི་མ་རིག་པ་ལས་བྱུང་ངོ། །སྤྱིར་མ་རིག་པ་འདི་ལ་རྫོགས་པ་ཆེན་པོའི་རྒྱུད་རང་ཤར་ལས། དབྱེ་བ་དྲུག་གསུངས་ཏེ། རྩ་བ་སེམས་ཀྱི་མ་རིག་པ་དང་། འཁྲུལ་པ་ཡུལ་གྱི་མ་རིག་པ། འཁྲུལ་རྒྱུ་གཞི་ཡི་མ་རིག་པ། འཛིན་པ་རྟོག་པའི་མ་རིག་པ། བཅོས་པ་ལམ་གྱི་མ་རིག་པ། མ་ཤེས་རྨོངས་པའི་མ་རིག་པ་རྣམས་ཡོད་ཀྱང་། དང་པོ་སེམས་ཅན་འཁྲུལ་པའི་ཚེ་གཞི་ལས་གཞི་སྣང་ཤར་བ་ན། ཐུགས་རྗེའི་རྩལ་ཤེས་པ་གསལ་རིག་གི་རྣམ་པ་ཡུལ་དཔྱོད་བྱེད་དུ་ཤར་བ་ལ་ལྟོས་ཏེ། རྒྱུ་བདག་ཉིད་གཅིག་པའི་མ་རིག་པ་ཞེས་ཤེས་པའི་རྣམ་པ་དེ་ལ་རང་ངོར་མ་ཤེས་པ་དེ་དང་། ལྷན་ཅིག་སྐྱེས་པའི་མ་རིག་པ་ནི་རང་ངོ་མ་ཤེས་པ་དེ་ལས་དཔྱོད་བྱེད་ཤེས་པ་ཕྲ་མོ་དེ་ཉིད་ནུས་པ་ཇེ་ཆེར་སོང་ནས་མ་ཤེས་པའི་ལྡོག་པ་དེ་དང་། ཀུན་ཏུ་བཏགས་པའི་མ་རིག་པ་རང་སྣང་ལ་བདག་གཞན་གཉིས་སུ་རྟོག་པ་གྱུར་པའི་ཆ་དེ་གསུམ་རེད། ཆ་ཞེས་ཟེར་དོན་དེ་གསུམ་ཤེས་པ་གཅིག་ལ་ལྡོག་པ་ཐ་དད། ངོ་བོ་གཅིག་ཡིན་པ་དེ་རང་སྣང་ལ་ཤར་བའི་གནས་སྐབས་ན། གཞི་ངོ་བོ་རང་བཞིན་ཐུགས་རྗེ་གསུམ་གཞི་སྣང་ལྷུན་གྲུབ་ཀྱི་འཆར་ཚུལ་གཞི་སྣང་གི་རང་བཞིན་ཡིན་པར་མ་ཤེས་པས་གཞན་ཡིན་པར་བཟུང་བའི་ཁྱད་པར་གྱི་ཐོག་ནས་འཁྲུལ་སོང་བ་དེ་འདྲ་ཞིག་རེད། དེས་ན་འདི་ད་ལྟའི་སྣང་བ་ཨ་འཐས་མངོན་ཞེན་ཅན་འདི་ནི་རྒྱུ་བདག་ཉིད་གཅིག་པའི་མ་རིག་པ་ལས་བྱུང་ངོ་ཞེས་གསུངས་སོ། །བསླུ་བྲིད་མཁན་གྱི་སྐྱེ་བོ་ཕོ་མོ་གཉིས་ནི་རང་ངོ་མ་ཤེས་པ་དེ་དང་མཉམ་དུ་རྟོག་དཔྱོད་ཀྱི་ཤེས་པ་བྱུང་བ་ལྷན་སྐྱེས་ཀྱི་མ་རིག་པ་དང་། རང་སྣང་ལ་བདག་གཞན་དུ་འཛིན་པའི་ཆ་ཀུན་ཏུ་བཏགས་པའི་མ་རིག་པའོ། །རྒྱ་མཚོ་ཆེན་པོ་ནི་འཁོར་བའི་སྡུག་བསྔལ་གྱི་རྒྱ་མཚོ་ཆེན་པོ་མཐའ་མེད་པ་འདིའོ། །གྲུ་གཟིངས་ནི་གཟུགས་ནི་དབུ་བ་རྡོས་པ་འདྲ་ཞེས་གསུངས་པ་བཞིན་དབུ་བ་བརྡོས་པ་ལྟ་བུའི་ཟག་བཅས་ལས་ཉོན་གྱིས་བསྐྱེད་པའི་སྒྱུ་ལུས་ཀྱི་ཕུང་པོའོ། །སྐྱེ་བོ་ཕོ་མོ་དེ་གཉིས་ཀྱིས་ལག་ན་གཟུང་བའི་གྲུ་འགྲོ་བྱེད་ཀྱི་སྐྱ་བ་གཉིས་ཐུག་གིས་ཆག་པ་ནི། ཉིན་དང་མཚན་མོ་ལྟེ་བ་བསྣོལ་གྱི་ཐོག་ནས་མི་ཚེ་བཅར་གྱིས་ཟད་ནས་དེ་ལ་ཡར་ཁ་བསབས་ཐེབས་ཅིས་ཀྱང་མེད་པའོ། །ཀྱེ་རིགས་ཀྱི་བུ། ད་ནི་ཤི་བས་ཀྱང་མི་ཆོག་ཤི་ཚར་ནས་ལས་ཀྱི་རྗེས་སུ་འབྲངས་ཏེ་རྣམ་སྨིན་མྱོང་དགོས་ཀྱི། ཤི་ཚར་ནས་མུ་སྟེགས་ཆད་པར་ལྟ་བ་གཅེར་བུ་རྒྱང་འཕེན་པའི་འདོད་པ་བཞིན་ཁྲོན་པ་ཞབས་མེད་པའི་ནང་དུ་རྡོ་འཕངས་པ་བཞིན་དུ་གར་སོང་འདིར་སོང་མེད་པར་སོང་ན་དེ་ཀས་ཆོག་སྟེ། ཆད་པར་ལྟ་བའི་མུ་སྟེགས་པ་རྣམས་ཀྱིས་ཚེ་སྔ་ཕྱི་དང་། ལས་རྒྱུ་འབྲས། ཐར་པ་དང་གྲོལ་བ། མ་མཐོང་བའི་འགྲོ་བ་མེད་ཟེར་བ་རེད། དེ་མེད་པར་ཇི་ལྟར་སྒྲུབ་ན། རིགས་པའི་སྒོ་གཅིག་དང་། དཔེ་གསུམ་དང་ཚུལ་བཞིའི་སྒོ་ནས་སྒྲུབ་པ་རེད། རིགས་པའི་སྒོ་གཅིག་ནི། རང་གི་དབང་པོའི་སྤྱོད་ཡུལ་དུ་མ་མཐོང་བའི་ཕྱིར་ན་མེད་པར་འདོད་པ་དང་། དཔེ་གསུམ་ནི། རྒྱུ་མེད་པའི་དཔེ། སྤང་ལ་ཤ་མང་རྡོལ་བ་ལྟ་བུ། འབྲས་བུ་མེད་པའི་དཔེ། ཐལ་བ་རླུང་གིས་གཏོར་བ་ལྟ་བུ། ཆོས་ཐམས་ཅད་རྒྱུ་མེད་ངོ་བོ་ཉིད་ཀྱིས་བྱུང་བའི་དཔེ། ཉི་ཤར་ཆུ་བོ་ཐུར་དུ་འབབ་པ་དང་། །སྲན་ཟླུམ་ཚེར་མ་གཟེང་རིང་རྣོ་བ་དང་། །རྒྱལ་པོའི་བུ་མོ་ལྟ་ན་སྡུག་པ་རྣམས། །སུས་ཀྱང་མ་བྱས་ངོ་བོ་ཉིད་ལས་བྱུང་། །ཟེར་བ་ལྟ་བུ་དང་། ཚུལ་བཞི་ནི། ཚེ་སྔ་ཕྱི་མེད་ཀྱང་ཕྱིའི་འཇིག་རྟེན་བདེ་སྡུག་སོགས་ཡོད་པའི་ཚུལ་དང་། བདག་གཙོ་བོ་ལྟ་བུ་སྔ་ཕྱིར་འཕོ་བ་མེད་ཀྱང་གློ་བུར་ལུས་གྲུབ་དུས་རང་ཆས་སུ་ཡོད་ཚུལ། ས་སོགས་འབྱུང་བ་རྣམས་ལ་རིག་པ་སྐྱེད་ནུས་ཀྱི་རྒྱུ་ཡོད་པ་ལྷན་ཅིག་ཏུ་འདུས་པ་ལས་ཆན་ལས་མྱོས་བྱེད་ཀྱི་ནུས་པ་ལྟར་ཤེས་པ་གསར་དུ་གྲུབ་ཚུལ། ལམ་སྦྱོང་དཀའ་ཐུབ་ཀྱི་གྲོལ་བ་མེད་ཀྱང་རང་བཞིན་ཤི་བ་ན་ཐམས་ཅད་གྲོལ་བ་གཅིག་པའི་དབྱིངས་སུ་གནས་པའི་རྒྱུ་འབྲས་མེད་པའི་ཚུལ་ཤེས་ན། གྲོལ་བའི་ཆེད་དུ་ངལ་དུབ་སོགས་ལ་མི་བརྟེན་པའི་རྒྱང་འཕེན་གྱི་གཞུང་བསྟན་པ་དོན་མེད་མིན་པའི་ཚུལ་ཏེ་བཞིར་འདོད་པ་རེད། འདི་ན་དེ་ཚང་གིས་འདོད་པ་ལྟར། བཟང་མོ་མ་ཤི་བར་དུ་ཅི་བདེར་སྤྱོད། །ཤི་ནས་དེ་ཡི་སྤྱོད་ཡུལ་མིན། །ཟེར་བ་ལྟར་ཡིན་ན་ཤི་རྒྱུ་རྐྱང་པའི་སྡུག་རེད། དེ་ཕན་ཆད་མེད་ན་དེ་ཀས་ཆོག་གི་དྲག་ཀྱང་། དེ་མིན་པར་མདོ་སྡེ་ལས་བརྒྱ་པ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱ་ཡང་ཆུད་མི་འཛའ། །ཚོགས་ཤིང་དུས་ལ་བབ་པ་ན། །འབྲས་བུ་མྱུར་དུ་སྨིན་པར་འགྱུར། །ཞེས་གསུངས་པ་ལྟར་སྐྱེས་བུས་བྱས་ཤིང་བསགས་པའི་དཀར་ནག་གི་ལས་ཐམས་ཅད་ཆུད་མི་ཟ་བ་ཁྲེ་འུར་ཞེས་པ་བརྡ་རྙིང་ཞིག་རེད། སྐབས་འགར་ཁྲ་བོ་ལ་གོ་བ་ཡོད་ཀྱང་། འདིར་དཀར་ནག་གི་ལས་གཞི་གཅིག་ཏུ་བསགས་པ་ལ་གོ་དགོས་པས། དཀར་ནག་གི་ལས་སྣ་ཚོགས་པར་བསགས་པ་ཐམས་ཅད་མ་ནོར་མ་འདྲེས་པར་གནམ་ཐིག་དྲང་པོ་ཡོ་ཟུར་མེད་པར་བཏབ་པ་བཞིན་དུ། ནོར་བ་དང་འཕྱུགས་པ་མེད་པར་ལས་བྱེད་པ་པོའི་སྟེང་དུ་ཇི་ལྟར་བྱས་པ་དེ་ལྟར་འབབ་པ་ཡིན་གསུངས་ཏེ། ཡོན་ཏན་མཛོད་ལས། ས་བླ་མཐོན་པོར་གཤེགས་པའི་མཁའ་ལྡིང་གི། །གྲིབ་མ་རེ་ཞིག་བལྟ་བར་མི་མངོན་ཡང་། །ལུས་ཅན་དག་དང་འདུ་འབྲལ་སྤངས་པ་བཞིན། །ཚོགས་ཤིང་དུས་ལ་བབ་ཚེ་ལྷག་པར་མངོན། །ཞེས་གསུངས་པ་བཞིན། དཔེར་ན་བྱ་འདབ་ཆགས་གཤོག་ཅན་ཞིག་ནམ་མཁའ་མཐོན་པོའི་དབྱིངས་སུ་འཕུར་སོང་ན། ད་ལྟ་རེ་ཞིག་དེའི་གྲིབ་མ་འདི་ཡིན་ཞེས་ལྷག་པར་མ་མངོན་ནའང་། དེའི་གྲིབ་མ་མེད་པར་སོང་བ་མ་ཡིན་པར་བྱ་ས་ལ་བབ་པ་དང་མཉམ་དུ་གྲིབ་མ་ནག་རིལ་ལེ་མཐོང་ཡོང་བ་བཞིན་དུ། སྐྱེས་བུས་དགེ་སྡིག་གི་ལས་བྱས་པ་ཐམས་ཅད་དེ་མ་ཐག་ཏུ་མ་མངོན་ནའང་། མཐར་རང་གི་ཐོག་ཏུ་མི་བབ་འགྲོ་ས་གཞན་ཞིག་མེད། དེས་ན་ཤི་རྒྱུའི་མི་ཚད་བསགས་པའི་ལས་ཀྱི་རྣམ་སྨིན་རང་ཐོག་ཏུ་འབབ་རན་པ་ཡིན་པས། དེ་ལ་བསམ་ན་ད་ཇི་ལྟར་བགྱི། ཞེས་གསུངས་པས་དེ་དུས་ཤི་བའི་སྡུག་བསྔལ་མྱོང་རྒྱུ་མི་ཚད་ཤི་ནས་ལས་ཀྱི་རྣམ་སྨིན་མྱོང་རྒྱུ་ལ་བསམ་ནས་སླར་འཇིགས་ཤིང་སྐྲག་པ་དང་སྡུག་བསྔལ་ཤིན་ཏུ་ཇེ་ཆེར་སོང་ནས། བླ་མ་དང་ཨོ་རྒྱན་ཆེན་པོ་དབྱེར་མེད་པ་ལ་ཡིད་ཁྱེད་ཤེས། བློ་གཏད་ལིང་བསྐྱུར་གྱིས་གསོལ་བ་རྩེ་གཅིག་ཏུ་འདེབས་ཤིང་ཅི་བྱ་དང་འདི་བྱ་གཏོལ་མེད་པར་ཡོད་ཙ་ན། བླ་མའི་ཐུགས་ཀ་ནས་འོད་ཟེར་དཀར་ལ་འཚེར་བ་བ་ཐག་འཛིངས་པ་ལྟ་བུ་ཞིག་སྐྱ་ནར་གྱིས་བྱུང་སྟེ། རང་གི་སྙིང་གར་ཟུག་པ་དང་མཉམ་དུ་གྲུ་གཟིངས་མགོ་མཇུག་ལྡོག་པ་དང་དུས་མཉམ་སྟེ་ལུས་སེམས་རྒྱབ་གྱེས་བེམ་རིག་གཉིས་ཁ་བྲལ་ཏེ། དེ་མ་ཐག་ཏུ་སྐུ་གསུམ་ཀྱི་གཞལ་ཡས་ཁང་པདྨ་འོད་ཀྱི་ཕོ་བྲང་དུ་ཨོ་རྒྱན་ཆེན་པོའི་ཐུགས་དང་གཉིས་སུ་མེད་པར་གྱུར་ནས་སངས་རྒྱས། དེ་ལྟ་བུའི་རྒྱུ་མཐུན་གྱིས་འཇིགས་པས་མནར་ཞིང་སྡུག་བསྔལ་བའི་སེམས་ཅན་ཐམས་ཅད་བདག་གིས་ཐར་པའི་གླིང་དུ་འདྲེན་ནུས་པའི་སྐལ་བ་རང་ཉིད་ཀྱི་རྒྱུད་ལ་བཞག་པར་བསམ་དགོས། དེ་ལྟར་བསམ་པའི་རྗེས་སུ་སྤྲོས་བྲལ་ལྟོས་མེད་ཀྱི་ངང་དུ་མཉམ་པར་བཞག་པས། དུས་གསུམ་གྱི་རྣམ་རྟོག་ཐམས་ཅད་རྟེན་མེད་ཁ་ཡན་རང་བབ་ཏུ་གློད་ལ། འཕྲོ་ན་འཕྲོ་བའི་ཐོག་དང་། གནས་ན་གནས་པ་སོ་སོའི་ཐོག་ཏུ་དྲན་པའི་བྱ་ར་དང་བཅས་ཏེ་བཞག་གོ། །ཞེས་གསུངས་སོ། །སྤྱིར་རྩེ་གཅིག་འདུན་པའི་གཞུ་ལ་དྲངས་ཏེ་མི་གཡོ་བར་མཉམ་པར་བཞག་པ་དེ་ཞི་གནས་ཡིན་ལ། འདིའི་ཁྲིད་རྐང་འདི་འདྲ་ཡིན་ན། དང་པོ་དམིགས་རྟེན་མཚན་མ་ཡོད་པའི་དམིགས་པ་དེ་ལ་དམིགས་ཏེ་རང་གིས་དངོས་སུ་ཉམས་སུ་མྱོང་བཞིན་ཡོད་པ་ཞིག་སྒོམ། དེ་ནས་བླ་མའི་ཐུགས་དང་རང་སེམས་དབྱེར་མེད་དུ་བསྲེས་ཏེ་མི་རྟོག་པའི་ངང་དུ་རྒྱ་མཚོ་རླབས་ཀྱིས་མི་བསྐྱོད་པ་བཞིན་དུ། འཇུ་དྲན་དང་བྲལ་བའི་ངང་དུ་གནས་པ་དེ་ཞི་གནས་དམིགས་མེད་ཡིན། དེའི་སྟེང་དུ་གསལ་སྟོང་བརྗོད་པ་དང་བྲལ་བའི་ཉམས་སྣང་མེད་ཀྱི་གསལ་ཆ་ཡོད་ན་ཞི་ལྷག་ཟུང་འཇུག་གི་སྒོམ་ཡོད་ཚུལ་རེད། ཡིན་ནའང་ལས་དང་པོ་པས་མཉམ་པར་བཞག་པའི་སྐབས་སུ་ཐ་མལ་རང་བབས་སུ་གློད་དེ་འཕྲོ་ན་འཕྲོ་བའི་ཐོག་དང་། གནས་ན་གནས་པའི་ཐོག་ཏུ་འདས་པའི་རྣམ་རྟོག་གི་རྗེས་མི་གཅོད། མ་འོངས་པའི་རྣམ་རྟོག་གི་མདུན་མི་བསུ། ད་ལྟའི་རྣམ་རྟོག་གིས་བཅས་བཅོས་མི་བྱེད་པར། གཞི་མེད་ཧ་སངས་རྗེན་པ། ཡངས་ཁྲོལ་ལེ་བའི་ཐོག་ཏུ་བཞག་ཐབས་དང་ལྡན་ཏེ་འཇོག་དགོས། འོན་ཀྱང་ལས་དང་པོ་བའི་ཚེ་ན་རྣམ་རྟོག་འདི་ཐོག་མེད་ནས་གོམས་པའི་དབང་དུ་སོང་བས་འཁྲུལ་པ་རྒྱ་འབྱམས་སུ་འགྲོ་བ་ཞིག་ཡིན་ཡང་། དྲན་པའི་རྒྱང་སོ་དང་མི་འབྲལ་བའི་སྒོ་ནས། ཡང་སྒོམ་ཡང་སྒོམ་ཡུན་ཐུང་གྲངས་མང་གིས་བསྒོམས་ན། སྒོམ་གྱི་བརྟན་ཆ་དང་ཞི་གནས་ཀྱི་གནས་ཆ་ཐོན་ཡོང་། ཞི་གནས་སྒོ་ཅན་གྱི་ཁྲིད་འདི་ལ་དང་པོ་བརྟན་ཆ་ཐོན་རྒྱུ་གལ་ཆེན་རེད། དྲན་པའི་བྱ་ར་ཞེས་དྲན་པའི་སོ་བ་ལ་ཟེར། སྤྱིར་ན་དྲན་པ་ཞེས་པ་དེ་སེམས་མི་གཡེང་བར་དམིགས་པ་གང་ཡིན་པ་དེ་མི་བརྗེད་པ་ཞིག་ལ་ཟེར་བ་རེད། རྫོགས་པ་ཆེན་པོའི་སྐབས་སུ་འདུ་བྱེད་ཀྱི་དྲན་པ་དང་། ཆོས་ཉིད་ཀྱི་དྲན་པ། མ་བཅོས་རང་བབས་ཀྱི་དྲན་པ་རྣམས་གསུང་རྒྱུ་ཡོད་པ་རེད། ལས་དང་པོ་པས་འཕྲོ་གནས་སོ་སོའི་སྟེང་དུ་རང་བབས་སུ་གཞག་བྱ་འཇོག་བྱེད་གཉིས་དང་བྲལ་བའི་སྒོ་ནས་མ་ཡེངས་པར་སྒོམས། མཉམ་བཞག་དེ་ལས་ལྡང་བའི་རྗེས་ཐོབ་ཐམས་ཅད་སྒྱུ་མ་དང་། སྨིག་རྒྱུ་དང་། མདང་དགོང་མ་ཉལ་གྱི་རྨི་ལམ་ལྟ་བུ་སྣང་ལ་རང་བཞིན་མ་གྲུབ་པའི་ངེས་ཤེས་སམ། མཉམ་བཞག་གི་ནུས་པའམ་ངེས་པ་ཚུར་རྗེས་ཐོབ་ལ་དྲངས་ནས། སྤྱོད་ལམ་ལ་ཞུགས་པའི་སྐབས་ཡིན་ན། ཆོས་ཆོས་རེད་འཇིག་རྟེན་འཇིག་རྟེན་རེད་བསམ་ནས་ད་ལྟ་ཆོས་རའི་ནང་གི་མི་དེ་ད་མིན་པར། དགེ་སེམས་སྐད་ཅིག་མ་དེ་ཆོས་རའི་ནང་དུ་བསྐྱུར་ནས་རྒྱུག་འགྲོ་མི་ཉན། ཆོས་ཞུས་པ་དེ་སྤྱོད་ལམ་དང་འཚོ་བའི་ནང་དུ་བེད་སྤྱོད་གཏོང་ཐུབ་དགོས་རེད། འུ་ཚོས་ད་རེས་ཁྲིད་སྦྱོང་བྱ་བའི་སྔོན་འགྲོ་སེམས་སྦྱོང་བདུན་གྱི་དོན་ཁྲིད་འདི་ལ་སེམས་སྦྱོང་རྣམ་པ་བདུན་ཡོད། དེའི་བདུན་པ་དེ་ལ་ནང་གསེས་གསུམ་དུ་ཕྱེས་ནས་ཁྲིད་རྐང་ཚན་པ་དགུ་ཡོད་པ་རེད། ཁྲིད་རྐང་སྔ་མ་དྲུག་པོ་རེ་རེ་ལ་ཉིན་གཉིས་རེ་དང་། ཕྱི་མའི་ནང་གསེས་གསུམ་ལ་ཉིན་གསུམ་བཞི་ཙམ་རེ་དུས་ཚོད་དང་བསྒྲིགས་ནས་ཁྲིད་སྦྱོང་བྱེད་ན། ཚོགས་འཁོར་བཅས་པ་ཟླ་ཁྲིད་གཅིག་ལྷག་གི་འཆར་གཞི་རེད། ཁ་སང་ཡན་གྱི་ཆོས་ཁྲིད་ཉིན་གཉིས་ལས། ཉིན་དང་པོ་ལ་ཐོག་མར་དགེ་བ་ཀླད་ཀྱི་དོན་དང་། གཉིས་པ་ལ་ཆོས་འཆད་ཉན་ཇི་ལྟར་བྱ་ཚུལ་ཐེག་པ་སྤྱིའི་ཁོག་འབུབས། ད་དེ་རིང་དངོས་གཞི་ཁྲིད་རྐང་དང་པོ་འདུས་བྱས་མི་རྟག་པ་སྒོམ་པ་རེད། འདི་ལ་ལུང་ལ་བརྟེན་ནས་རྗེས་སུ་དཔག་པ་དང་། མན་ངག་ལ་བརྟེན་ནས་རྒྱུད་ལ་སྦྱར་བའི་ས་བཅད་གཉིས་ཀྱི་སྒོ་ནས་གསུངས་ཡོད་ལ། སྒོམ་དུས་ཀྱང་དེ་ལྟར་དུ་དཔྱད་སྒོམ་དང་འཇོག་སྒོམ་གཉིས་བྱས་ནས་སྒོམ་དགོས་ཏེ། རང་རེས་སྦྱངས་ཏེ་ཉམས་སུ་ལེན་དུས། དང་པོ་ཐོས་བསམ་གྱི་སྒོ་ནས་ལུང་གི་དོན་ལ་ཚད་མ་གསུམ་གྱིས་དཔྱད་ནས་ངེས་ཤེས་འདྲོང་དུ་བཅུག་པ་དང་གོ་བ་སྐྱེས་འཇུག དེ་ནས་མན་ངག་རང་རྒྱུད་ལ་སྦྱར་དུས་དོན་ངོ་མའི་ཐོག་ནས་གོང་དུ་བཤད་པའི་གཏམ་རྒྱུད་དང་འབྲེལ་ནས་གསུང་རྒྱུ་དེ་རང་གི་རྒྱུད་ལ་མྱོང་ནས་སྨིན་ཡོད་པར་བྱས་ཏེ། དེ་ལྟར་དཔྱད་སྒོམ་དང་འཇོག་སྒོམ་གཉིས་ཀ་བྱས་ནས་མཐར་མི་དམིགས་པའི་ངང་དུ་བཞག རང་རེའི་ཆོས་ཁྲིད་འདི་རིག་གནས་ཀྱི་སློབ་ཁྲིད་མ་རེད། ཁ་ཡང་ཟེར་ཤེས་པ་ཙམ་གྱིས་མི་ཆོག་ལ། ལུང་བཏོན་པ་དང་ཡང་མི་འདྲ། བཀླག་ལུང་གི་སྒྲ་རྣ་བས་ཐོས་དུས་ལུང་ཐོབ་སོང་ཡང་། འདི་ཁྲིད་རེད། ཁྲིད་ནང་གིའང་ལག་ཁྲིད་རེད། འདི་སེམས་ཐོག་ལུས་ཐོག་གཉིས་ཀ་ནས་ཉམས་སུ་བླངས་ཏེ་རང་རྒྱུད་འདུལ་ཐུབ་པ་དང་། སྔར་མེད་ཀྱི་སེམས་རྒྱུད་ལ་ཆོས་ངོ་མ་ཞིག་སྦྱར་རྒྱུའི་ཆེད་དུ་རེད། དེས་ན་རང་རྒྱུད་འདུལ་སྦྱོང་གི་སྔོན་འགྲོ་འདི་ཡག་པོ་རེད་ན་ཆོས་པ་རྣམ་དག ཆོས་ཁ་ཆོས་མིན་པའི་དོན་ཆོས་བསྒྲུབ་པ། ཆོས་བསྒྲུབ་ན་སྒྲུབ་གོ་ཆོད་པ་ཞིག་ཨེ་རེད་བསམ་ནས་འདི་བཤད་པ་རེད། དཔེར་ན་གྱང་དང་ཞལ་བ་རི་མོ་གསུམ་པོ་གཅིག་ལ་གཅིག་བརྟེན་ཡིན་པར་མ་ཟད། སྔ་མ་མེད་ན་ཕྱི་མ་ཡོང་ཐབས་མེད་པ་ཞིག་རེད། གྱང་མེད་ན་ཞལ་བ་གང་ལ་བྱུག དེ་གཉིས་མེད་ན་རི་མོ་གང་ལ་འབྲི། ཡག་པོ་ཞིག་གཏན་ནས་ཡོང་ཐབས་མེད་པ་དེ་བཞིན་དུ། ད་སྔར་སྔོན་འགྲོ་མེད་པའི་ཆོས་རེ་བསྒྲུབས་ཡོད་ན་དེ་ཞལ་བ་མེད་པའི་གྱང་ལ་རི་མོ་བཙོག་པ་འབྲི་བའམ། ཡང་ན་གྱང་དང་ཞལ་བ་གཉིས་ཀ་མེད་པའི་རི་མོ་ཡག་པོ་ཞིག་ཡོང་རེ་བའི་རེ་སྟོང་དོན་ལ་མི་གནས་པ་གང་རུང་ཞིག་རེད་སོང་བའི་རྟགས་རེད། ཆོས་གོ་ནས་ལོ་ཅི་ཙམ་སོང་ཡང་སེམས་འདི་ལ་འགྱུར་བ་ཞིག་འགྲོ་རྒྱུ་མེད་པ་དེ། དེ་འདྲ་ཐབས་མི་མཁས་པ། ཆོས་བསྒྲུབ་བསམ་ཡང་སྒྲུབ་ལུགས་མ་ཤེས་པས་ལན་སོང་བ་རེད། དེ་ཟེར་ན་ས་ཆ་འདིའི་མིས་བསམ་ན། སུ་གཅིག་གིས་ཆོས་སྒྲུབ་ལུགས་མི་སློབ་པས་ཁ་རོག་ཅི་ལ་ཤེས་འོང་བསམ་ན་མི་ཤེས་ཏེ། རང་གི་རྒྱུད་ལ་ཕན་ངེས་ཀྱི་ཆོས་བླ་མ་ལ་གསུངས་རོགས་ཞུ་དགོས་པ་རེད། དཔེར་ན་ནད་དུས་རང་གིས་སྨན་པ་ཕར་བཙལ་དགོས་པ་བཞིན་དུ། ཚེ་འདིའི་དོན་ཆུང་གང་ལ་རང་གིས་དོན་གཉེར་དང་འབད་པ་མ་བྱས་ན་མི་འགྲུབ་ན། འདི་ཕྱིའི་དོན་ཆེན་ལ་རང་གིས་དོན་གཉེར་གྱིས་འབད་པ་མ་བྱས་ན་ཇི་ལྟར་འགྲུབ། དེས་ན་རང་གིས་དོན་གཉེར་བྱེད་དགོས། རང་རེའི་ཆོས་ཁྲིད་ནང་བླ་གྲྭ་སྐྱ་སེར་ལོ་ཆེ་ཆུང་དང་བློ་མཆོག་དམན་གྱི་རིགས་མང་པོ་ཡོད་པས། དེ་དང་མཚུངས་པའི་ཁྲིད་སྦྱོང་བྱེད་ཚུལ་བསམ་བློ་གཏོང་དགོས། ཐོག་མའི་ཁྲིད་སྦྱོང་དྲུག་ཚང་མས་མཉམ་དུ་བྱ་རྒྱུ་དང་། བདུན་པའི་ཁྲིད་རྐང་གནད་ཆེན་བདེ་སྟོང་མི་རྟོག་པ་ལ་སེམས་སྦྱོང་བ། གསལ་སྟོང་མི་རྟོག་པ་ལ་སེམས་སྦྱོང་བ། ཆོས་ཉིད་མི་རྟོག་པ་ལ་སེམས་སྦྱོང་གསུམ་ལ་ཐུག་དུས། མི་སྐྱ་ཕོ་མོ་རྣམས་ཀྱིས་བླ་མའི་རྣལ་འབྱོར་དང་སྦྲགས་ནས་སིདྡྷི་གསོག དགེ་འདུན་པས་གཏུམ་མོ་དང་རྩ་རླུང་འཕོ་བ་རྣམས་དང་སྦྲགས་ནས་སྦྱོང་དགོས། བདེ་སྟོང་མི་རྟོག་པ་ལ་སེམས་སྦྱོང་བ་དང་མཉམ་དུ་གཏུམ་མོ། གསལ་སྟོང་མི་རྟོག་པ་ལ་སེམས་སྦྱོང་བ་དང་མཉམ་དུ་དེ་དང་འབྲེལ་བ་རྩ་རླུང་། ཆོས་ཉིད་མི་རྟོག་པ་ལ་སེམས་སྦྱོང་བ་དང་སྦྲགས་ནས་འཕོ་བ་སྦྱོང་། དེ་དུས་དབང་པོ་རབ་དང་སྦྱོང་བ་རབ་རྣམས་ཀྱིས། རབ་ཆོས་སྐུའི་འཕོ་བ་དབྱིངས་རིག་བསྲེ་བའི་རྩལ་སྦྱོང་། ཁྲེགས་ཆོད་ཐོད་རྒལ་ཟུང་འབྲེལ་གྱི་ཐོག་ད་ལོའི་དངོས་གཞིའི་བོགས་འདོན་ཡང་རེད་འགྲོ་དགོས། དེས་ན་ད་རེས་ཀྱི་ཆོས་ཁྲིད་འདི་ཁྲིད་སྦྱོང་གཙོ་བོར་བྱེད་དགོས། རང་ལ་འོང་སྒོ་ཅི་འདྲ་འོང་གཞན་ལ་རག་མི་ལས་པར་རང་ཉིད་ལ་རག་ལས་པ་རེད། ཐོག་མར་ཐུན་འགོར། བླ་མ་མཁྱེན། ལན་གསུམ། སྐུ་གསུམ་བཀའ་བརྒྱུད། རྒྱལ་བ་ཀུན་འདུས། སྐྱབས་གནས་ཀུན་འདུས་རྣམས་ཚར་གསུམ་རེའི་འཕྲོར། ཧྲཱིཿ འོག་མིན་ཆོས་ཀྱི་སོགས་གསུངས་ནས་བླ་རྣལ་བསྡུས་པ་རེ་ཨེ་དགོས་ལྟོས། དེ་ནས་དེ་རིང་ཡིན་ན། བུ་ཡིག་ལས་ཞེས་པའི་མན་ཆད་ལུང་ལས་དཔག་པ་དེ་དལ་མོར་བྱས་ནས་ཚར་གཅིག་འདོན། གཉིས་པ་དེ་ཉིད་མན་ངག་གི་སྒོ་ནས་རྒྱུད་ལ་སྒོམ་པ་ནི། དེ་ཡང་བདག་ཉིད་ཡིད་ལ་མེད་པ་མན་ཆད་ཤིན་ཏུ་དལ་མོ་ཚིག་ཁེར་ཟེར་གཉིས་ཟེར་བྱས་ནས་རྒན་རྒོན་རྣམས་ཀྱིས་གོ་ལོང་ཉན་ལོང་དང་བསམ་ལོང་ཡོད་པར་བྱས་ནས། མཚམས་མཚམས་སུ་ཡུན་ཅུང་ཟད་ཡོད་པ་ཞིག་བྱ་དགོས། འདིའི་སྐབས་སུ་མྱ་ངན་གྱི་འདུག་སྟངས་ཏེ། སྡུག་འདུག་ཁྱི་མོ་ཙོག་པུའི་འདུག་ལུགས། ལག་པ་ཁུ་ཚུར་ལག་མཐིལ་གཉིས་ཀྱིས་འགྲམ་པ་སྐྱོར་ནས། ཚིག་གིས་གསལ་བཏབ་ནས་རང་གི་ཐོག་ཏུ་དངོས་སུ་དེ་ལྟར་འབབ་ཡོང་བའི་མྱོང་བ་ཐོན་པའི་དམིགས་གཏད་ཅན་གྱིས་དེ་ལྟར་བྱས་ནས་སྒོམ་དགོས། མཐར་ཨོ་རྒྱན་ཆེན་པོ་དང་གཉིས་སུ་མེད་པར་སངས་རྒྱས་ཞེས་དང་། འཕྲོ་གནས་སོ་སོའི་ཐོག་ཏུ་དྲན་པའི་བྱ་ར་བཞག་གོ་ཞེས་པའི་སྐབས་ན་ལུས་འདུག་སྟངས་རྣམ་སྣང་ཆོས་བདུན་དང་ལྡན་པར་བྱ་དགོས། རྣམ་སྣང་ཆོས་བདུན་ནི། རྐང་པ་སྐྱིལ་ཀྲུང་། ལག་པ་གཉིས་ཀྱི་ལག་མཐིལ་གཉིས་པུས་མགོར་བཀབ། དཔུང་པ་ལྷོད་དེ་རྐྱོང་། རྒལ་ཚིགས་ཡར་མདའ་ལྟར་དྲང་པོར་སྲོང་། སྐེ་ཅུང་ནང་དུ་དགུག ཁ་ཧ་ཅང་མི་གདང་ཧ་ཅང་མི་བཙུམ་པར་མཆུ་སོ་མ་རེག་གི་བར་དུ་དབུགས་ཁ་ནས་གཏོང་། མིག་ཟིམ་བུའི་ཚུལ་གྱིས་མདུན་གྱི་བར་སྣང་ལ་ལྟ། དེ་འདུག་སྟངས་རེད། དེ་དུས་སེམས་ཀྱིས་ཇི་ལྟར་བསམ་ན། ལས་དང་པོ་པས་འཕྲོ་གནས་སོ་སོའི་ཐོག་ཏུ་དྲན་པའི་བྱ་ར་བཅས་བཞག་ཅེས་གསུངས་ན། རྣམ་རྟོག་ཡུལ་རྗེས་མི་འབྲང་བར། གུ་རུ་རིན་པོ་ཆེའི་ཐུགས་དང་དབྱེར་མེད་དུ་སངས་རྒྱས་པར་བསམ་ཞིང་དེའི་ངང་ནས་མོས་གུས་སྒོམ་ལ་འཆར་བ་ཞིག་བྱས་ཏེ། མཚན་མ་མེད་པའི་མི་རྟོག་པའི་ངང་དུ་བཞག་པར་བྱ་དགོས། དེ་ལྟར་གཞུང་གི་མན་ངག་ལུགས་ཀྱི་ཁྲིད་སྦྱོང་དེ་ལན་གསུམ་རེ་ཙམ་ཨེ་འགྲོ་ལྟོས། ཐུན་དེ་ལས་ལངས་ནས་དགེ་བ་བསྔོ་བར་བྱའོ། །ཡང་སང་ཉིན་སྔ་དྲོ་ནས་བཟུང་སྔ་དྲོ་རྣམས་ལ་འབུམ་ལྔའི་ཁྲིད་སྦྱོང་ཞིག་ཀྱང་བྱ་འཆར་རེད། ཐོར་ཐུན་སྔ་མོར་སོང་ཚར་བའི་དབང་དུ་བཏང་ནས། རླུང་རོ་བསལ་བ་དང་། རླུང་བྱིན་རླབས་སོགས་མི་དགོས། ངག་བྱིན་རླབས་ནས་སྔོན་འགྲོ་ངག་འདོན་ཧ་ཅང་མི་དལ་མི་བྲེལ་བས་གསུངས་ཏེ། སང་ཉིན་སྔ་དྲོ་ནས་སྐྱབས་འགྲོ་བསགས་ཏེ་ཐུན་གྱི་མཐའ་ན་མཇུག་ཕུད། སྔོན་འགྲོའི་ཁྲིད་སྦྱོང་བྱེད་རྒྱུ་འདི་ནི། བསགས་སྦྱོང་གཉིས་ཀྱི་གནད་བསྡུས་པའི་ཉམས་ལེན་རང་རེའི་ཆོས་བརྒྱུད་འདི་ལ་འབུམ་ལྔ་ཟེར་བ་ཞིག་གསོག་རྒྱུ་ཡོད་པ་དང་། ཇི་ལྟར་གསོག་པའི་ཚུལ་ཤེས་པའི་ཆེད་དང་། འབུམ་ལྔ་གསོག་ན་ཕན་ཡོན་ཅི་ཡོད་བསམ་པའི་དྲན་བསྐུལ་གྱི་ཆེད་དུ་འབུམ་ལྔ་གསོག་རྒྱུའི་མགོ་འཇོག་པ་རེད། ཐུན་ཚང་མ་ལ་དེ་འདྲའི་ཁྲིད་སྦྱོང་བྱེད། སྒོམ་རྒྱག་རྒྱུ་དང་འཆི་ཆོས་བསྒྲུབ་རྒྱུ་དེ་བླ་མ་གྲྭ་བ་མ་གཏོགས་མི་དགོས་པ་ཞིག་མ་རེད། རྒད་པོ་རྒན་མོ་རྣམས་སྒོམ་རྒྱག་པ་ལ་ངོ་ཚ་དགོས་པ་མ་རེད། དེ་བས་ཤི་དུས་ཁ་གདང་མིག་བགྲད་འཁྲུལ་ནས་ཁ་ལབ་རྒྱུ་དེ་ཚོ་ངོ་ཚ་བ་རེད། ངོ་ཚ་བའི་ཕན་ལ་ད་རུང་འཇིགས་སྐྲག་ཡོད་པ་རེད། སྐྲག་སྔངས་ཕྱོགས་ལ་བསམ་བློ་གཏོང་ཕོད་ཞིག་ཡིན་མ་རེད། ད་ནས་གྲ་སྒྲིག་གྱིས། མི་སྐྲག་རྒྱུ་རང་གིས་བྱེད་ཆོག སེམས་ལ་མི་འཇིགས་པའི་གདེང་རེ་ཡོད་ན་གནམ་ས་ཁ་རྡེབ་ཀྱང་མི་སྐྲག་པ་བྱེད་ཆོག་རེད། ཨེ་བྱེད་མི་བྱེད་ད་ལྟ་རང་ལག་རེད། དེ་ལྟར་ཐུགས་ལ་ཞོག། །།

ཉིན་བཞི་པའི་ཆོས་ཁྲིད།

བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་ལྷ་དང་བཅས་པའི་འགྲོ་བ་ཡོངས་ཀྱི་དཔུང་གཉེན་དུ་གྱུར་པ་གང་གིས། སེམས་ཅན་ཐམས་ཅད་ཉོན་མོངས་པའི་སྡུག་བསྔལ་ལས་བསྒྲལ་ཏེ་ཞི་བ་མྱང་འདས་ཀྱི་གོ་འཕང་དམ་པར་འགོད་པའི་ཆེད་དུ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ངམ་ཆོས་འཁོར་རིམ་པ་གསུམ་གྱི་གསུང་གི་བདུད་རྩི་བཀའ་བསྩལ་བ་རེད། ཆོས་འཁོར་རིམ་པ་གསུམ་པོ་དེ་བཀའ་རྒྱ་ཆེ། གསུང་གྲངས་མང་། མན་ངག་ཐོར་བུའི་ཚུལ་དུ་གསུངས་ཡོད་པ་ཞིག་ཡིན་པས། དེའི་ནང་དོན་སྙིང་བཅུད་བསྡུས་ནས་གོ་སླ་ཉན་བདེའི་ཐོག་བཤད་ན། ངའམ་བདག་ཏུ་འཛིན་པའི་འཁྲུལ་པ་འདི་ཟད་བྱེད་དང་། གཞན་དོན་ལྷུར་ལེན་གྱི་བསམ་སྦྱོར་ལ་གོམས་པར་བྱེད་པའི་ཐབས་ཆ་ལག་དང་བཅས་པ་དེ་གཉིས་སུ་འདུ་ལ། དེའང་བདག་འཛིན་ཟད་བྱེད་ཀྱི་ཆོས་དེ་ལས་གཙོ་བོར་བརྩམས་ཏེ། བརྗོད་བྱའི་དབང་དུ་བྱས་ན་ཉན་ཐོས་དང་རང་སངས་རྒྱས་ཀྱི་ཐེག་པ་གཉིས། རྗོད་བྱེད་ཀྱི་དབང་དུ་ན་ཉན་རང་གི་རིགས་ཅན་ལམ་ལ་བཀྲི་བའི་ཐེག་དམན་གྱི་སྡེ་སྣོད་གསུངས་ཤིང་། གཞན་དོན་ལྷུར་ལེན་གྱི་བསམ་སྦྱོར་གོམས་བྱེད་གཙོ་བོར་མཛད་དེ། བརྗོད་བྱ་ཐེག་པ་ཆེན་པོའི་རྒྱུ་འབྲས་ཀྱི་ཐེག་པ་དང་། རྗོད་བྱེད་ཐེག་པ་ཆེན་པོའི་མདོ་སྔགས་ཀྱི་གསུང་རབ་རྣམས་གསུངས་སོ། །དེས་ན་སྟོན་པའི་བསྟན་པ་ཆུན་གཅིག་ཏུ་བཟུང་ནས་བསྟན་པ་དམ་ཆོས་ངོ་མ་ཉམས་སུ་ལེན་པ་ཞིག་ཡིན་ན། དེ་གཉིས་ཀ་འགལ་མེད་ལམ་གྱི་ལུས་གཅིག་ཏུ་དྲིལ་ཏེ་ཉམས་སུ་ལེན་དགོས། དེ་ཡིན་ན་རང་རེ་བོད་གངས་ཅན་དུ་སྐྱེས་པའི་མི་ལ་མཚོན་ན། མང་ཆེ་བ་ཐེག་ཆེན་མདོ་སྔགས་ཀྱི་ཆོས་ཚུལ་ལ་ཞུགས་ཏེ་ཐར་པ་དོན་གཉེར་བྱེད་མཁན་ཡིན་པར་མ་ཚད། རང་རེ་ཡིན་ན་ཐེག་ཆེན་སྔགས་ཀྱི་ཆོས་ལ་འཆད་ཉན་བྱེད་པའི་སྐབས་ཡིན། ཐོག་མར་བསམ་པ་བྱང་ཆུབ་སེམས་ཀྱི་ཀུན་སློང་། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ། མཐའ་གཉིས་ལ་མི་གནས་པའི་རྫོགས་པའི་བྱང་ཆུབ་ཐོབ་འདོད་ཀྱི་བློ་བཅོས་མ་མ་ཡིན་པ་ཞིག་སྙིང་ནས་མེད་ན། ཐེག་ཆེན་སེམས་བསྐྱེད་ཀྱི་གྲལ་དུ་མི་འགྲོ། དེས་ན་ཐེག་པ་ཆེན་པོ་ལ་འཇུག་པའི་སྒོ་དང་པོ་དེ། བྱང་ཆུབ་སེམས་སྦྱོང་གི་གདམས་པ་ལ་ཐུག་ཡོད་པའི་ཕྱིར་ན། དེ་ཉིད་གལ་ཆེན་གཙིགས་སུ་འཛིན་དགོས། དེས་ན་སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་སྦྱོང་གི་གདམས་པ་ཇི་སྙེད་ཅིག་བཀའ་བསྩལ་པ་དེ་ཉིད། ཤིང་རྟ་ཆེན་པོ་སོ་སོའི་ལུགས་ལྟར་དུ་ཕྱག་ལེན་དུ་འདེབས་ལུགས་ལ་ཡོངས་སུ་གྲགས་པ་ཞིག་ཡིན་ན། ཐམས་ཅད་ཀྱིས་ཅི་ཞིག་ལ་ཕན་པ་ཡོད་རེད་ཟེར་ན། ཉོན་མོངས་པ་བརྒྱད་ཁྲི་བཞི་སྟོང་གི་ནད་དང་། ནད་དེ་དག་གིས་བསྐྱེད་པའི་སྐྱེ་རྒ་ན་འཆི་ལ་སོགས་པའི་སྡུག་བསྔལ་ཐམས་ཅད་བཅོམ་སྟེ་མི་གནས་པའི་མྱང་འདས་ཞི་བ་དམ་པའི་བདུད་རྩི་མཆོག་ཏུ་ཐོབ་པ་དེ་ཡིན། དེས་ན་རང་རེས་ལམ་དེ་ལ་ཞུགས་ཏེ་དམ་པ་གོང་མའི་ཞབས་རྗེས་བསྙེགས་ཏེ་དེ་རྣམ་པའི་རྗེས་སུ་བསླབ་དགོས་ན། དང་པོ་སྔོན་འགྲོའི་ཆོས་དེ་རང་ཉིད་ཀྱི་སེམས་ཐོག་ཏུ་རྨང་གཞི་བརྟན་པོར་ཞོག་དགོས། འདི་འདྲ་བྱས་ནས་འདང་རྒྱག་ན། འཁོར་བ་ཐོག་མེད་ནས་ད་ལ་ཐུག་གི་བར་དུ། རང་རེ་སེམས་ཅན་ཞེས་པ་སེམས་ཀྱི་གཞན་དབང་དུ་སོང་། སེམས་ཉོན་མོངས་པའི་གཞན་དབང་དུ་སོང་། ཉོན་མོངས་པས་འཁོར་བའི་རྩ་བ་ལས་གསོག ལས་དང་ཉོན་མོངས་དེ་དག་གིས་རྐྱེན་བྱས་ནས་འཁོར་བའི་སྡུག་བསྔལ་མི་མྱོང་དགུ་མྱོང་། འདི་མ་མྱོང་བསམ་རྒྱུ་མེད་པ། མྱོང་རྒྱུ་ཟད་པ་མེད་པར་དེ་འདྲ་ཞིག་མྱངས་ནས་མཐར་འདི་ལ་ཐུག་པ་ཡིན་པའི་ཚུལ་དེ་ཤེས་དགོས། དེ་ཤེས་ནས་ད་ནི་འཁོར་བའི་སྡུག་བསྔལ་འདི་མི་མྱོང་བ་ཞིག་བྱ་དགོས། དེ་བྱེད་དགོས་ན། རྩ་བ་སེམས་ལ་ཐུག་ཡོད་དེ། དེའི་རྒྱུ་མཚན་སེམས་ཅན་སེམས་ཀྱི་གཞན་དབང་དུ་སོང་ནས། སྡུག་བསྔལ་མྱོང་བའི་གཞི་རྩ། རིག་པ་རླུང་སེམས་ཀྱིས་གཡོས་ནས་རྣམ་རྟོག་གི་དབང་དུ་ཤོར་སོང་བ་ཡིན་ན། ད་ནི་དབང་མི་ལག་དང་། ཅོ་ཏོ་གཞན་ལག་ལ་མི་འཇོག་པར་རང་དབང་རང་ལག་ཏུ་ཡོད་པ་ཞིག་བྱ་དགོས། དེ་དགོས་ན་བཅོམ་ལྡན་འདས་ཀྱིས་ཚིག་ཉུང་དོན་འདུས་ཐོག་ནས། རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་ཡོད་པས། རང་གི་སེམས་དེ་རང་དབང་རང་ལ་ཡོད་པ། འདི་གཞག་སར་འདུག་པ། གཏང་སར་འགྲོ་བ། གཏོང་འགྲོ་བཞག་སྡོད་གང་བྱེད་ན་ལས་སུ་རུང་བ་ཞིག་བྱས་ཏེ། སྔོན་འགྲོ་དངོས་གཞི་གང་ཞུ་བའི་གནས་སྐབས་ཡིན་ནའང་། སེམས་བྱིང་རྒོད་རྣམ་རྟོག་གི་དབང་དུ་མི་འགྲོ་བ་ཞིག་གི་ཐོག་ནས་རང་ཉིད་ལ་ཕན་ཐོགས་ཡོད་པ་ཞིག་བྱེད་དགོས། བྱང་ཆུབ་སེམས་དཔའི་སྤྱོད་འཇུག་ལས། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱིས་ནས་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་གསུངས་པ་ཡིན་ན། ད་རེས་རྙེད་དཀའ་བའི་མི་ལུས་རིན་པོ་ཆེ་རྙེད། ཚང་དཀའ་བའི་དལ་འབྱོར་བཅོ་བརྒྱད་ཚང་ཡོད་ན། འདི་རྟག་བརྟན་སྙིང་པོ་ཅན་ཞིག་མིན་པར་མ་ཟད། ད་སྔོན་ལས་ལུགས་བཅའ་སྟངས་ལ་བསམ་བློ་གཏོང་ན། སྤྱོད་འཇུག་གི་ནང་ནས། བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་འཐོབ་མི་འགྱུར། །ཞེས་གསུངས་པ་ལྟར་ཤི་ཚར་ནས་སྐྱེ་བ་ཞིག་མི་བླང་ག་ན་འགྲོ། ལས་འབྲས་བསླུ་བ་མེད་པར་ཡིན་པས་སྐྱེ་བ་ཡག་པོ་ཞིག་ལེན་བྱེད་དང་། སྐྱེས་ནས་བདེ་བ་ཐོབ་པའི་རྒྱུ་ཞིག་རེད་མི་འདུག་བསམ་ནས། ངེས་འབྱུང་དང་སྐྱོ་ཤས་ཀྱི་ཐོག་ནས་དལ་འབྱོར་རྙེད་དཀའ་བ། ཚེ་མི་རྟག་པ། འཁོར་བའི་ཉེས་དམིགས། ལས་རྒྱུ་འབྲས་ལ་ཡིད་ཆེས་བཅས་ཀྱིས་བློ་ལྡོག་རྣམ་པ་བཞི་ཡིས་བློ་སྦྱངས་ནས་སྔོན་འགྲོ་རྟེན་གྱི་ཆོས་དེ་རང་རྒྱུད་ལ་ངེས་ཤེས་རྙེད་ངེས་པར་བྱས། དེ་ནས་དངོས་གཞི་བྱང་ཆུབ་ཀྱི་སེམས་རིན་པོ་ཆེ་རང་གི་རྒྱུད་ལ་བསྐྱེད་དགོས། ད་འགོ་ནས་ཞུས་པ་ལྟར། ཐེག་ཆེན་མདོ་སྔགས་ཀྱི་ཆོས་སྒོ་ལ་གཅིག་ཞུགས་དུས་བྱང་ཆུབ་ཀྱི་སེམས་རིན་པོ་ཆེ་ལ་བློ་སྦྱངས་ནས་ཞུགས་དགོས། བྱང་ཆུབ་ཀྱི་སེམས་དེ་ནམ་རྒྱུད་ལ་སྐྱེས་ན་ཐེག་པ་ཆེན་པོར་འགྱུར་འགྲོ། དེ་དང་བྲལ་ན་ཡོན་ཏན་གཞན་ཅི་ཡོད་ཀྱང་ཕན་ཐོག་མེད་པར་ཐེག་ཆེན་གྱི་གྲལ་ནས་ལྷུང་སྟེ་དེའི་གྲལ་དུ་མ་ཐེ་བ་རེད། དེས་ན་དང་པོ་ཐེག་ཆེན་དུ་ཚུད་པ་དེའང་བྱང་ཆུབ་སེམས་བསྐྱེད་ཀྱི་ཐོག་ནས་འཇོག་ལ། ཐ་མ་དེའི་གྲལ་ནས་བུད་རྒྱུ་དེའང་སེམས་བསྐྱེད་དེ་དང་བྲལ་བ་ལ་ཐུག་པ་རེད། འོ་ན་དེ་ལྟ་བུའི་བྱང་ཆུབ་ཀྱི་སེམས་དེའི་ཕན་ཡོན་ཇི་ལྟར་ཡིན་སྙམ་ན། དཔེ་རྣམ་གྲངས་མང་པོ་ཞིག་གི་སྒོ་ནས་དེའི་ཡོན་ཏན་བསྟན་ཡོད་དེ། བྱང་ཆུབ་ཀྱི་སེམས་དེ་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་བྱེད་པས་སངས་རྒྱས་ཀྱི་ས་བོན་ལྟ་བུ་དང་། འགྲོ་བ་ཐམས་ཅད་ཀྱི་ཆོས་དཀར་པོའི་ཕྱོགས་འཕེལ་བར་བྱེད་པས་ཞིང་ས་བཟང་པོ་ལྟ་བུ། དོན་ཐམས་ཅད་ཡང་དག་པར་སྒྲུབ་པར་བྱེད་པས་ཡིད་བཞིན་གྱི་ནོར་བུ་ལྟ་བུ། བསམ་པ་ཐམས་ཅད་ཡོངས་སུ་རྫོགས་པར་བྱེད་པས་ན་བུམ་པ་བཟང་པོ་ལྟ་བུ་ཡིན་ཚུལ་སོགས་གསུངས་པ་དང་། རྫོགས་པའི་སངས་རྒྱས་ཀྱི་གོ་འཕང་ཐོབ་བྱེད། ཐེག་ཆེན་ལ་འཇུག་པའི་སྒོ་ཐུན་མོང་མ་ཡིན་པའི་བྱང་ཆུབ་ཀྱི་སེམས་དེ་རང་གི་རྒྱུད་ལ་འཁྲུངས་ན། སྔོན་བསགས་ལས་ཀྱི་སྒྲིབ་པ་ཐམས་ཅད་ཉི་མས་བ་མོ་འཇོམས་པ་ལྟར་དག་པ་དང་། སྡུག་བསྔལ་དང་འཇིགས་པ་ཐམས་ཅད་ལས་སྐྱོབ་པ། དེས་མི་ཚད་པར་མངོན་མཐོ་དང་ངེས་ལེགས་ཀྱི་འབྲས་བུ་ཟད་མི་ཤེས་པ་ཞིག་འབྱིན་པར་བྱེད་པར་གསུངས་པས་ན། ད་རེས་ངས་བྱང་ཆུབ་ཀྱི་སེམས་ཉམས་སུ་ལེན་རྒྱུ་ཡོད་པ་འདི་ནི། སྐལ་བ་བཟང་པོ་རེད་བསམ་ནས་ངེས་ཤེས་ཤུགས་དྲག་ཅིག་ཡོད་པའི་ཐོག་ཏུ། ཐོག་མར་ཀུན་རྫོབ་བྱང་ཆུབ་ཀྱི་སེམས་སྦྱོང་དགོས། ཀུན་རྫོབ་བྱང་ཆུབ་ཀྱི་སེམས་སྦྱོང་ཚུལ་དེ་ཡང་མདོར་བསྡུ་ན། གཞན་དོན་དོན་གཉེར་དང་། བྱང་ཆུབ་དོན་གཉེར་གྱི་བློ་སྦྱོང་གཉིས་ལ་འདུས་པ་ཡིན་ཏེ། སྙིང་རྗེས་གཞན་དོན་ལ་དམིགས་པ་དང་། ཤེས་རབ་ཀྱིས་རྫོགས་བྱང་ལ་དམིགས་པ་གཉིས་ལ་འདུས་ཡོད་པས་སོ། །དེས་ན་དང་པོ་རང་གཅེས་འཛིན་གྱི་ཉེས་དམིགས་དང་། གཞན་གཅེས་འཛིན་གྱི་ཕན་ཡོན་ཐོས་པར་བྱེད་དགོས་པས། བཀའ་གདམས་པའི་དགེ་བའི་བཤེས་གཉེན་ཆེན་པོ་འཆད་ཀ་བས། ལེ་ལན་ཐམས་ཅད་རང་ལ་བདའ་ཞེས་གསུངས་པས། རང་རེ་ལ་སྡུག་བསྔལ་མི་འདོད་ཅིང་མ་བསམ་ནའང་ཐོག་ཏུ་འབབ་པ་དང་། འདོད་པ་བསམ་པ་འདྲ་ཞིག་མི་འགྲུབ་པ་ཚང་མ་ཕྱི་རོལ་ཡུལ་གྱི་ཐོག་ལ་ལེ་བདར་བྱས་ནས། དེས་ང་གཅིག་བྱེད་མ་བྱུང་མ་གཏོགས་ང་མ་འདྲ་བ་ཞིག་རེད་ས་ཡོད། དེ་འཆུག་ཅིང་ནོར་ནས་དེས་རེད་མ་ཐལ་མ་གཏོགས་ངས་མ་འདྲ་བ་ཞིག་ཐོན་ཡོད་བསམ་རྒྱུ་ཐམས་ཅད་ནོར་སོང་བ་རེད། ད་བསམ་བློ་གཏོང་ན་མཐོ་སྲིད་པའི་རྩེ་མོ་མན་ཆད་དང་དམའ་དམྱལ་ཁམས་ཡན་ཆད་ཀྱི་འགྲོ་བ་རིགས་དྲུག་དང་རྒྱུད་ལྔ་པོའི་སེམས་ཅན་གྱིས་སྡུག་བསྔལ་སྣ་ཚོགས་པ་ཞིག་མྱོང་འདུག་ཡོད་པ་འདི། རྒྱུ་མེད་རྐྱེན་མེད་ལས་བྱུང་བ་ཞིག་མ་ཡིན་ལ། མི་མཐུན་པའི་རྒྱུ་དང་རྒྱུ་རྐྱེན་འཛོལ་ནས་བྱུང་བ་ཞིག་ཀྱང་མ་ཡིན། ལས་དང་ཉོན་མོངས་པའི་ཀུན་འབྱུང་ལ་བརྟེན་ནས་བྱུང་བ་རེད། ལས་ཉོན་དེ་གཉིས་ལས་ཀྱང་ལས་དེ་ཉོན་མོངས་པའི་དབང་གིས་གསོག་པས། ཉོན་མོངས་པ་དེ་གཙོ་ཆེ་ལ། ཉོན་མོངས་པའི་ནང་ནས་ཀྱང་ལུས་ལ་ལུས་དབང་བཞིན་དུ་ཀུན་ལ་ཁྱབ་བྱེད་ཀྱི་བདག་ཏུ་འཛིན་པའི་མ་རིག་པས་སྡུག་བསྔལ་ཐམས་ཅད་སྐྱེད་པར་བྱེད་པས་ན། སྡུག་བསྔལ་ཐམས་ཅད་ཀྱི་རྩ་བ་བདག་འཛིན་འདི་ཡིན་པས། དེས་ན་རྒྱལ་སྲས་ཞི་བ་ལྷས། འཇིག་རྟེན་དག་ན་འཚེ་བ་ཅི་ཡོད་པ། །འཇིགས་དང་སྡུག་བསྔལ་ཇི་སྙེད་ཡོད་གྱུར་པ། །དེ་ཀུན་བདག་ཏུ་འཛིན་པ་འདི་ལས་བྱུང་། །འདྲེ་ཆེན་དེས་ཀོ་བདག་ལ་ཅི་ཞིག་བྱ། །ཞེས་གསུངས་པ་བཞིན་དུ། བདག་འཛིན་གྱིས་གཙོས་བྱས་པའི་ཉོན་མོངས་འདི་རྣམས་ཀྱིས་གནོད་པར་བྱེད་པ་ལ་འདང་རེ་རྒྱག་ན། གནོད་བསྐྱལ་བའི་གནོད་ཚབ་ཆེ་བ་དང་། གནོད་བསྐྱལ་བའི་དུས་ཚོད་རིང་བ་ལ་བསམ་ན། གནོད་བྱེད་ཀྱི་དགྲ་བོ་དེ་ཉིད་དང་འགྲིག་དགོས་ན་འགྲིག་ཐབས་མཐུན་ཐབས་མེད་པ་རེད། དེ་ལྟར་ཡུན་རིང་རྒྱུན་ཆགས་དགྲ་རུ་གྱུར་པ། གནོད་པའི་ཚོགས་མང་པོ་འཕེལ་བའི་རྒྱུ་གཅིག་པོ་དེ་བདག་རང་གི་ནང་ན་གནས་བཅས་ནས་བསྡད་ཡོད་ན། འཁོར་བའི་གནས་འདིར་འཇིགས་པ་མེད་པ་དང་། བདེ་བ་དང་དགའ་བ་འཐོབ་རྒྱུ་ཞིག་ཡོད་ལོ་བ་མ་རེད། དེ་ལྟར་ཡུན་རིང་རྒྱུན་ཆགས་དགྲར་གྱུར་པའི། །གནོད་པའི་ཚོགས་རབ་འཕེལ་བའི་རྒྱུ་གཅིག་པུ། །བདག་གི་སྙིང་ལ་ངེས་པར་གནས་འཆའ་ན། །འཁོར་བར་འཇིགས་མེད་དགའ་བར་ག་ལ་འགྱུར། །ཞེས་གསུངས། རང་གཅེས་འཛིན་བྱེད་པ་འདི་ལས་གནོད་པ་མང་པོ་ཞིག་མ་འོང་བསམ་རྒྱུ་ཅི་ཡོད། འདིས་གཞན་ཕན་སྒྲུབ་པའི་གོ་བཀག་པ་རྐྱང་བ་ལ་བསམ་ན་ཞེ་ནད་འཁོན་འཛིན་དེ་སོད་འགྲོ་རྒྱུ་མེད་པ་རེད། འདིས་ཐོག་མཐའ་བར་གསུམ་དུ་གནོད་པ་བྱེད་ལུགས་ལ་ཞིབ་ཏུ་བསམ་ན། གཏི་མུག་མ་རིག་པས་དྲང་བའི་རང་གཅེས་འཛིན་དང་། གཞན་ཡལ་བར་དོར་བའི་དགྲ་དེས། ལས་དགེ་སྡིག་རྒྱུ་འབྲས་ཁྱད་དུ་བསད་དེ་ལོག་པར་ལྟ་བའི་མཚོན་ཆ་བཟུང་ནས། མཐོ་རིས་ཐར་པའི་སྲོག་གཅོད་པས། སྡིག་ཆེན་ཤན་པ་འདི་རེད། རང་གཅེས་འཛིན་གྱི་དུག་གི་རྐྱལ་པ་བཟུང་ནས། དགེ་བའི་ལོ་ཏོག་ཅུང་ཟད་ཡོད་ཚད་འཇོམས་པར་བྱེད་པས། དགྲ་རྐུན་མ་གཉིས་ཀ་འདི་རེད་འདུག་གསུངས་པ་རེད། ཞེ་སྙིང་གི་གཏིང་ནས་སྡིག་རྫས་ཁོ་ན་གསོག མི་དགེ་བའི་སྒོ་ནས་མི་དང་མི་མིན་གྱི་གནོད་བྱེད་ཐམས་ཅད་འགུགས་བྱེད་ཀྱི་ལྟས་ངན་འུག་པའི་ཧ་བགད་བྱེད་པ་འདི་རེད། ལས་ཀྱི་ཞིང་ས་ལ་རྣམ་ཤེས་ཀྱི་ས་བོན་ཞིག་བཏབ་ནས། སྲེད་པ་དང་ལེན་པ་གཉིས་ཀྱི་ཆུས་བརླན་ཁྲིད་ནས་ཁམས་གསུམ་འཁོར་བའི་སྡུག་བསྔལ་གྱི་མྱུ་གུ་སྐྱེད་ཐོན་བྱེད་མཁན། ཞིང་པ་རྒན་པོའི་རྩ་བ་འདི་ལ་ཐུག་ཡོད་པ་རེད་ཅེས་གསུངས་ཡོད། དེས་ན་ངོ་མར་བཤད་ན་སྔོན་གྱི་སངས་རྒྱས་བཅོམ་ལྡན་འདས་དང་རང་རེ་ཚང་མ་སྲིད་པ་འདི་ན་སྔ་ཕྱི་མེད་པར་དུས་མཉམ་དུ་ཡོང་ཡོད་ན། རང་རེ་སོ་སོའི་སྐྱེ་བོ་རྣམས་ལ་ད་དུང་ཡང་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་སྣ་གཅིག་ཀྱང་མ་འགོས་ནས། གཅེར་བུ་ལག་སྟོང་དུ་ལུས་པ་ཡང་འདི་ལས་བྱུང་བ་རེད། ཐོག་མེད་ནས་རང་གཅེས་འཛིན་འདིའི་དབང་དུ་སོང་སྟེ། ཡུལ་འདི་ན་ནད་ན་ཚ་ཞིག་ཡོད་ན་ང་ལ་འགོས་ཨེ་འོང་། སྒོ་ཁྱི་བཙན་པོ་ཞིག་གསིག་ནས་ཤོར་འོངས་ན་ང་གཟུང་ཨེ་འོང་། འབྲུག་སྒྲ་ཆེན་པོ་ཞིག་གྲག་ན་ཐོག་བརྒྱབ་ནས་ང་བསད་ཨེ་འགྲོ་བསམ། ང་ཁོ་ནའི་ཉེན་ཁ་བསམ་པར་མི་ཚད་དེའི་བག་ཆགས་ཀྱིས་མཚན་མོ་རྨི་ལམ་ནང་ཚུན་ཆད་ང་ཁོ་ནར་བསམ་པས། ང་གཡང་སར་ལྷུང་ཡོད་སྣང་ཤར་ནས་འཇིགས་སྐྲག་སྐྱེས། ང་ལ་མི་འདོད་པ་ཡོང་གིན་ཡོད་པ་རྨིས་ནས་སྡུག་བསྔལ་བ་སོགས། དེ་ཐམས་ཅད་ཀྱི་རྩ་བ་ངར་འཛིན་གྱི་དགྲ་དེ་ལ་ཐུག དེ་ཡིན་པས་དགེ་བའི་བཤེས་གཉེན་གླང་རི་ཐང་པས། ཁོང་གིས་གསོལ་ཇ་བཀོལ་དུས། ཇ་ཀོང་ནང་དུ་ཇ་རྡུང་བ་ན། བདག་འཛིན་གྱི་མགོ་ལ་ཛ་ཛ་གསུངས་ནས་བརྡུང་དར་བ་རེད་གསུངས་འདུག གཞན་ཡང་ཁོང་གི་ཞལ་ནས། ཁེ་དང་རྒྱལ་ཁ་ཐམས་ཅད་གཞན་སེམས་ཅན་ལ་སྦྱིན་དགོས། ལེགས་ཚོགས་ཐམས་ཅད་ཁོང་སེམས་ཅན་ལ་བརྟེན་ནས་བྱུང་བ་རེད། གྱོང་དང་བུབ་ཁ་ཐམས་ཅད་རང་གིས་ལེན་དགོས། གནོད་པ་དང་སྡུག་བསྔལ་ཐམས་ཅད་རང་གཅེས་འཛིན་གྱི་ཁོངས་ནས་བྱུང་བ་རེད་ཅེས་གསུངས། དེས་ན་རང་གིས་རང་ལ་བློ་སྦྱོང་ན། རང་གཅེས་འཛིན་གྱི་འགོང་པོ་དེ་མགོ་མར་དམའ་ཐབས་ཐོན་འགྲོ། དེ་སོང་ན་སེམས་རྒྱུད་ཆོས་དང་འདྲེས་པ་ཞིག་ད་གཟོད་ཡོང་ཐུབ་པ་དང་། ཆོས་ཞུ་ན་ཆོས་པ་ཞིག་འོང་རྒྱུའི་རེ་བ་འདྲ་བོ་གཞི་ནས་ཡོད་སོང་བ་རེད། དེ་མིན་ན་ཡོན་ཏན་གྱི་མིང་བཏགས་པ་སོགས་ཅི་འདྲ་ཞིག་ཡོད་ནའང་། དེ་ཐམས་ཅད་བདག་འཛིན་ལ་གྲོགས་དང་། ཁ་སྣོན་དང་ཉོན་མོངས་ཡར་འཕེལ་བྱེད་ལ་ལོག་རྒྱུ་རེད། དེས་ནི་ད་ལྟ་གོང་ན་ཐུབ་པའི་ཆོས་སྒོ་བརྒྱད་ཁྲི་བཞི་སྟོང་པོའི་དོན་གྱི་རྩ་བ་བསྡུས་ན། ངའམ་བདག་ཏུ་འཛིན་པའི་འཁྲུལ་བ་འདི་སེལ་བྱེད་དང་། གཞན་དོན་ལྷུར་ལེན་གྱི་སྤྱོད་པ་ལ་གོམས་པར་བྱེད་པའི་ལམ་ཆ་ལག་དང་བཅས་པར་འདུས་ཡོད་ཅེས་བཤད་ན། དེས་བདག་འཛིན་འཁྲུལ་བས་བཟོས་པའི་ཉེས་དམིགས་སྐྱོན་ཆ་རིག་ནས། དེའི་དབང་གིས་བྱུང་བའི་རང་གཅེས་འཛིན་གྱི་ཉེས་དམིགས་དང་། སྐྱོན་ཆ་རིག་ནས་དོར་བྱ་ཡིན་པར་བཤད་ནས། གཞན་གཅེས་འཛིན་གྱི་ཕན་པ་དང་ཡོན་ཏན་ལ་བསམ་ནས་དེ་ཉམས་སུ་ལེན་རིགས་པའི་སྐོར་ལ་བསམ་བློ་གཏོང་ན། དགེ་བའི་བཤེས་གཉེན་ཆེན་པོ་འཆད་ཁ་བས། ཀུན་ལ་བཀའ་དྲིན་ཆེ་བར་སྒོམ། །ཞེས་གསུངས་ཡོད་ལ། ཐེག་པ་ཆེན་པོའི་རིགས་ཅན་གྱི་གང་ཟག་ཅིག་གིས་ཐེག་པ་ཆེན་པོའི་རང་ལམ་ནས་རྫོགས་པའི་བྱང་ཆུབ་བསྒྲུབ་དུས། བྱམས་དང་སྙིང་རྗེ་དེ་ཐོག་མཐའ་བར་གསུམ་དུ་ཡོད་དགོས་ཤིང་མེད་ཐབས་མེད་པར་ཡིན་ཏེ། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདིའི། །ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་པ། །ཞེས་སོགས་འཇུག་པའི་ལུང་གིས་ཤེས་པས་སོ། །དེས་ན་མེད་དུ་མི་རུང་ཞིང་མེད་ན་ཐབས་མེད་ཀྱི་བྱམས་སྙིང་རྗེ་དེ་སེམས་ཅན་ལ་བརྟེན་ནས་སྐྱེ་བ་ཞིག་རེད། སེམས་ཅན་སྡུག་བསྔལ་གྱིས་གཟིར་བ་ལ་དམིགས་ནས་སྙིང་རྗེ་སྐྱེ་བ་དང་། སེམས་ཅན་བདེ་བ་མྱོང་བཞིན་པ་ཞིག་ལ་དམིགས་ནས་བྱམས་པ་སྐྱེ་དགོས། དེ་མ་ཟད་བྱམས་སྙིང་རྗེ་སྔོན་སོང་ཅན་གྱི་བླ་མེད་བྱང་ཆུབ་དོན་གཉེར་ཀྱི་སེམས་དེའང་སེམས་ཅན་ལ་བརྟེན་ནས་སྐྱེ་དགོས་ཏེ། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པས། སེམས་ཅན་ཐམས་ཅད་ལ་ཕན་བདེ་མ་ལུས་པ་བསྒྲུབས་ཤིང་། སྡུག་བསྔལ་མཐའ་དག་སེལ་བར་འདོད་ཅིང་། དེ་ནུས་པ་ནི་རྫོགས་པའི་སངས་རྒྱས་ཉག་གཅིག་རེད། དེ་བསམ་ནས་བྱམས་སྙིང་རྗེས་བསྐུལ་ཏེ་རྫོགས་པའི་བྱང་ཆུབ་འཐོབ་འདོད་ཀྱི་སེམས་བསྐྱེད་པ་དང་། བསྡུ་བའི་དངོས་པོ་བཞི་དང་། ཕ་རོལ་ཏུ་ཕྱིན་པ་དྲུག་ཀྱང་སེམས་ཅན་ལ་བརྟེན་ནས་སྐྱེ་བ་རེད། སྐྱེས་པ་ཙམ་མ་ཟད་སྐྱེས་པ་དང་གནས་པ་དང་གོང་དུ་འཕེལ་བ་ཐམས་ཅད་སེམས་ཅན་ལ་བརྟེན་དགོས། གཞན་ཡང་འབྲས་བུ་སངས་རྒྱས་འགྲུབ་པའི་རྒྱུ་ཚོགས་ཐམས་ཅད་སེམས་ཅན་ལ་བརྟེན་ནས་འབྱུང་བ་ཡིན། དེས་ན། མིག་གིས་སེམས་ཅན་ལྟ་ན་ཡང་། །འདི་དག་ཉིད་ལ་བརྟེན་ནས་བདག །སངས་རྒྱས་ཉིད་དུ་འགྱུར་རོ་ཞེས། །དྲང་ཞིང་བྱམས་པའི་ཚུལ་གྱིས་ལྟ། །ཞེས་གསུངས་ཏེ། དཔེར་ན་ཞིང་ས་ཡག་པོར་ས་བོན་བཟང་པོ་ཞིག་བཏབ་ན། སྟོན་ཀའི་དུས་སུ་ལོ་ཏོག་གང་མང་མང་དང་། གང་བཟང་བཟང་ལེན་རྒྱུ་ཡོང་ལ། དེ་ཡོང་བར་རིག་ནས་ཞིང་ས་བཟང་པོ་དེར་གཅེས་སྤྲས་བྱེད་རིགས་པ་དེ་བཞིན་དུ། སེམས་ཅན་གྱི་ཞིང་སར་བྱམས་སྙིང་རྗེ་བྱང་ཆུབ་ཀྱི་སེམས་དང་། ཕ་རོལ་ཏུ་ཕྱིན་པ་དང་། བསྡུ་བའི་དངོས་པོ་བཞིས་ས་བོན་ལེགས་པར་བཏབ་སྟེ། གཅེས་སྤྲས་བྱས་ནས་སྲུང་ནུས་ན། དོན་གཉིས་མཐར་ཕྱིན་སངས་རྒྱས་ཀྱི་གོ་འཕང་དེ་འགྲུབ་པ་ཡིན་པས། སེམས་ཅན་གྱི་ཞིང་ས་དེ་གཅེས་སྤྲས་བྱེད་རིགས་པའི་ཕྱིར་རོ། །དེས་ན་རང་གཅེས་འཛིན་དགྲ་ལྟ་བུ་དེ་བཅོམ་ལ། གཞན་གཅེས་འཛིན་གྱི་གཉེན་པོ་དེ་བསྟེན་ནས། མ་དྲིན་ཆེན་སེམས་ཅན་རྣམས་ཐོག་མར་བྱང་ཆུབ་མཆོག་ཏུ་སེམས་བསྐྱེད་པའི་རྐྱེན་དང་། བར་དུ་བྱང་ཆུབ་སྒྲུབ་པའི་ལམ་གྱི་གྲོགས་དང་། མཐའ་མར་རྫོགས་པའི་སངས་རྒྱས་ཀྱི་འབྲས་བུ་འགྲུབ་པའི་རྐྱེན་དང་ཕྲིན་ལས་ཀྱི་ཡུལ་ཡིན་པས། སེམས་ཅན་དེ་དག་ལ་ཁ་ཞེ་གཉིས་མཚུངས་གོང་དུ་ཞུས་པ་ལྟར་ཉམས་ལེན་དང་མ་བྲལ་བའི་སྒོ་ནས། དམ་པའི་ཆོས་འཆད་ཉན་ལ་ཞུགས་དགོས་སོ། །གང་བཤད་པར་བྱ་བ་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཐུན་མོང་སྔོན་འགྲོ་སེམས་སྦྱོང་བདུན་གྱི་དོན་ཁྲིད་ཐར་པའི་ཐེམ་སྐས་འདི་འཆད་ཉན་བྱེད་པའི་སྐབས་ཀྱི། ཐོག་མར་དགེ་བ་ཀླད་ཀྱི་དོན་བསྟན་བཅོས་རྩོམ་པ་ལ་འཇུག་པའི་ཡན་ལག་ཐམས་ཅད་སོང་ནས། བར་དུ་དགེ་བ་གཞུང་གི་དོན་ལ་ཆོས་འཆད་ཉན་ཇི་ལྟར་བྱ་བ་དང་། ཐེག་པ་དམ་ཆོས་ཇི་ལྟར་འཆད་ཉན་བྱེད་ཚུལ་སྤྱིའི་ཁོག་འབུབས་བཅས་པ་བཤད་ནས། ད་སེམས་སྦྱོང་བདུན་གྱི་དོན་དངོས་འཆད་པ་ལ་སེམས་སྦྱོང་དང་པོ་འདུས་བྱས་མི་རྟག་པ་ལ་བསམ་པའི་སྐོར་བཤད་གྲུབ་ནས།

ཨ༽ སེམས་སྦྱོང་གཉིས་པ།

དང་པོ་ལུང་ལས་རྗེས་སུ་དཔག་ནས་བསམ་པ།

ད་ནི་སེམས་སྦྱོང་གཉིས་པ་བྱས་པ་ཐམས་ཅད་སྡུག་བསྔལ་གྱི་རྒྱུར་སྣང་བ་བསམ་པ་ནི། །སེམས་སྦྱོང་གཉིས་པ་ནི། བུ་ཡིག་ཡེ་ཤེས་གསལ་སྒྲོན་ལས། བྱས་པ་ཐམས་ཅད་སྡུག་བསྔལ་གྱི་རྒྱུར་སྣང་བ་བསམ་པ་དང་། ཞེས་ལུང་ཚིག་ཉུང་ངུ་ཞིག་གིས་བསྟན་པ་རེད། དེའང་འཇིག་རྟེན་འདིར་སྣང་གིས་གཙོས་བྱས་པའི་ལས་འདུ་བྱེད་པ་ཐམས་ཅད། ད་ལྟའི་སྡུག་བསྔལ་གྱི་ཁུར་དང་། མ་འོངས་པའི་སྡུག་བསྔལ་གྱི་འབྱུང་རྩ། སྡུག་བསྔལ་རྣམ་པ་གསུམ་གྱི་རྒྱུར་སྣང་བ་ཉིད། ཇི་བཞིན་དུ་བསམ་ནས་རྒྱུད་ལ་སྦྱོར་བ་འདི་ཁྲིད་རྐང་གཉིས་པ་རེད། དང་སྒྲས་ཁྲིད་རྐང་འོག་མ་དང་མཚམས་སྦྱོར་བྱེད་ཡིན་པ་ནི་གོང་འོག་ཐམས་ཅད་དུ་འདྲ། ཞེས་པའི་ལུང་དེས་བསྟན་པའི་དོན་འདི་ལའང་ལུང་ལས་རྗེས་སུ་དཔག་པ་དང་། བློ་བྲིད་དེ་ཐབས་ཀྱིས་སྒོམ་པ་གཉིས་ཡོད་པ་ལས། དང་པོ་ལུང་ལ་རྗེས་སུ་དཔག་ནས་བསམ་པ་ནི། མདོ་སྡེ་ལས་བརྒྱ་པ་ལས། ལུས་ཅན་རྣམས་ཀྱི་བདེ་སྡུག་ནི། །ལས་རྣམས་ཡིན་པར་ཐུབ་པས་གསུངས། །ལས་རྣམས་ཀྱང་ནི་སྣ་ཚོགས་ལ། །དེ་ཡིས་འགྲོ་འདི་སྣ་ཚོགས་བྱས། །སྣ་ཚོགས་རྣམ་པར་འཁྱམས་ཤིང་འཇུག །ལས་ཀྱི་དྲྭ་བ་འདི་ཆེའོ། །ཞེས་ཁམས་གསུམ་གྱི་ལུས་ཅན་ནམ་སེམས་ཅན་ཐམས་ཅད་ཀྱི་གནས་རིས་དང་བདེ་སྡུག་མི་འདྲ་ཐ་དད་པ་ནི། སྡོན་བསགས་ལས་དཀར་ནག་གཉིས་ལས་བྱུང་བ་ཡིན་པར་བདེན་པར་སྨྲ་བའི་ཐུབ་པས་གསུངས་ལ། སློབ་དཔོན་དབྱིག་གཉེན་གྱིས། ལས་ལས་འཇིག་རྟེན་སྣ་ཚོགས་སྐྱེས། །ལས་ནི་སེམས་པ་དང་དེས་བྱས། །ཞེས་སོགས་གསུངས་པ་ལྟར། ལས་རྣམས་ཀྱང་ནི་དབྱེ་བ་མི་འདྲ་བ་སྣ་ཚོགས་པ་ཡིན་ལ། ལས་འབྲས་ཀྱི་ཞིབ་ཕྲའི་རྣམ་བཞག་ཇི་བཞིན་པ་ནི། ཀུན་མཁྱེན་གྱི་ཡེ་ཤེས་མིན་པར་རྟོགས་མི་ཐུབ་པ་ཡིན་ལ། སྣ་ཚོགས་པའི་ལས་དེ་ཡིས་འགྲོ་བ་འདི་ཡི་རྣམ་གྲངས་དང་བདེ་སྡུག་སྣ་ཚོགས་སུ་བྱས་ཏེ། འགྲོ་བ་འདི་གནས་རིས་མཆོག་དམན་ཐ་དད་པ་ཐམས་ཅད་དུ་བདེ་སྡུག་མི་འདྲ་བ་སྣ་ཚོགས་པ་མྱོང་ཞིང་། ལོང་བ་རྒྱུས་མེད་ཐང་དཀྱིལ་དུ་ལུས་པ་ལྟ་བུ་གཏད་སོ་མེད་པར་གནས་མེད་རྟེན་མེད་དུ་རྣམ་པར་འཁྱམས་ཤིང་། སླར་ཡང་རྟེན་འབྲེལ་བཅུ་གཉིས་སྲིད་པའི་འཁོར་ལོ་ལུགས་རྒྱུད་དུ་འཁོར་ཞིང་འཁོར་བར་འཇུག་པར་བྱེད། དེས་ན་ལས་ཀྱི་འཆིང་བྱེད་ཀྱི་དྲྭ་བ་འདི་ཆེའོ་ཞེས་འདི་འཆིང་བྱེད་ཡིན་པས་དྲྭ་བའི་གཟུགས་སུ་བཀོད་པ་ཡིན། ཞེས་གསུངས་པས་རང་རེ་རྣམས་ཀྱི་བདེ་སྡུག་བཟང་ངན་ལེགས་ཉེས་ཐམས་ཅད་ནི་ལས་ཁོ་ནའི་རྗེས་སུ་འབྲང་བར་གདོན་མི་ཟ་ན། ཞེས་རང་རེ་འཁོར་བ་ན་གནས་པའི་སེམས་ཅན་རྣམས་ཀྱི་མྱང་བྱ་བདེ་བ་དང་སྡུག་བསྔལ། གནས་རིས་དང་ལུས་རྟེན་བཟང་ངན་ལེགས་ཉེས་ཐམས་ཅད་ནི་སྔོན་གྱི་ལས་ཁོ་ནའི་རྗེས་སུ་འབྲང་བར་གདོན་མི་ཟ་བའམ་གོར་མ་ཆག་པ་ཐེ་ཚོམ་མི་དགོས་པར་ཡིན་ངེས་ན། དེའི་མི་མཐུན་ཕྱོགས་ཚེ་འདིའི་བྱ་བཞག་དགྲ་འདུལ་གཉེན་སྐྱོང་སོ་ནམ་ཚོང་ཁེ། ཁེ་དྲག་ལོ་འདོད་ཆགས་སྡང་ཁོང་ཁྲོ། གཞན་ལ་ཤ་ཚ་གྲོས་འདེབས། ཆེ་ཐབས་དང་སྙན་གྲགས་བསྒྲུབ་པ་ལ་སོགས་ཅི་བྱས་ཀྱང་ཡིད་བརྟན་དང་བློ་ལྟོས་རུང་བ་མི་འདུག སེམས་ཅན་ཐམས་ཅད་བདེ་སྐྱིད་འདོད་སྡུག་བསྔལ་མི་འདོད་པ་ཤ་སྟག་རེད། འདོད་རྒྱུའི་བདེ་སྐྱིད་དེའི་མི་མཐུན་ཕྱོགས་མི་བདེ་བ་འབྱུང་བའི་རྒྱུ། ཚེ་འདིའི་བྱ་བཞག་དགྲ་འདུལ་གཉེན་སྐྱོང་གསུངས་ཏེ། སྐད་ཅིག་གིས་ནི་འཛའ་འགྱུར་ཞིང་། །སྐད་ཅིག་གིས་ནི་དགྲ་རུ་འགྱུར། །ཞེས་པ་ལྟར་གནས་སྐབས་རྐྱེན་ཅུང་ཞིག་གི་དོན་གྱིས་དགྲ་རུ་འགྱུར། དེ་ལ་ཞེ་སྡང་སྐྱེས། དེ་འདུལ་ཁུལ་བྱེད། སྔོན་ལས་ལན་ཆགས་ཀྱི་དབང་གིས། ད་ལྟ་གནས་སྐབས་གཉེན་དུ་གྱུར་པ་རྣམས་ལ་ཞེན་ནས་སྐྱོང་། ཞིང་ལ་སོ་ནམ། ཚོང་ཁེ་སྐྱེད། འཇིག་རྟེན་ཆོས་བརྒྱད་དང་འབྲེལ་བའི་ཁེ་དྲག་ལོ་འདོད། གཉེན་དང་དགྲ་ལ་ཆགས་སྡང་། དུས་རྒྱུན་དུ་རྒྱུད་འཚིག་པར་བྱེད་པའི་ཁོང་ཁྲོ། འཇིག་རྟེན་འདི་སྣང་ལ་འཁྲུལ་ནས་རང་ཉིད་མུན་པའི་གླིང་དུ་འཕྱན་འགྲོ་བར་མི་ཤེས་པས་ད་དུང་གཞན་ལ་ལམ་སྟོན་དང་བློ་སྣ་བཀོད་པ། རང་གཞན་གཉིས་ཀ་འཁོར་བར་འཁྱམས་བྱེད་ཀྱི་ཤ་ཚ་གྲོས་འདེབས། སུ་གང་ཡིན་ཡང་རང་ཉིད་ཡར་མཐོ་ཐབས་ཆེ་ཐབས་དང་། བཟང་དང་འཇིག་གི་ཟེར་ཐབས། སྙན་གྲགས་ཆེ་འགྲུབ་ཆུང་འགྲུབ་ཀྱིས་བསྒྲུབ་པ་ལ་སོགས་པ། མདོར་ན་ཚེ་འདིའི་བྱ་བ་ཅི་བྱས་ཀྱང་བྱེ་མའི་ཁང་བུ་ལྟར། ཡིད་རྟོན་དང་བློ་ལྟོས་དང་། རང་གཞན་གཉིས་ཕན་གྱི་བྱ་བ་ཞིག་དེའི་ཁོངས་ན་མི་འདུག ཚེ་འདིའི་བདེ་སྐྱིད་ནོར་རྫས་ཀྱིས་སྒྲུབ་ཆོག་བསམ་ནས། བསགས་དང་བརླག་པའི་སྡུག་བསྔལ་ཐམས་ཅད་བཟོད་པར་བྱས་ཏེ། ཡོ་བྱད་ཐབས་སྣ་ཚོགས་ཀྱིས་བསགས་ཀྱང་། ནོར་ནི་ཕུང་ཁྲོལ་མཐའ་ཡས་བསྐྱེད་པའི་རྒྱུ། །གསུངས་པ་ལྟར། དགྲ་རྐུན་གྱི་འདོད་པ་བསྒྲུབ་པ་ཡོད་དེ། དགྲ་རྐུན་མ་ལ་ལག་གཡུག་བྱས་པ་ལྟ་བུ་རེད་རྒྱུ་ཡོད་པ་དང་། ཞིམ་དུ་རེ་བའི་ཟ་འདོད་ཀྱིས་ཟས་སྐོམ་ཟོས་ཀྱང་ནད་རོ་བསླངས་ཤིང་སྲོག་གཅོད་ཀྱི་གཤེད་མར་ནང་ནས་གྱུར་ཏེ་འཆི་བའི་རྐྱེན་དུ་གྱུར་པ་དང་། སྔ་དྲོར་གཉེན་གྱི་དྭངས་མ་ཡིན་ཡང་ཕྱི་དྲོར་དགྲ་ཡི་རྩེ་མོར་གྱུར་པ་སོགས། ཕན་དུ་རེ་ནས་གཉེན་བཤེས་མཛའ་གཅུགས་སུ་བཏགས་ཀྱང་། དེའི་སྟེང་དུ་མི་སྡོད་པར་དུས་ངན་སྐྱེ་བོའི་བློའི་འགྱུར་བག་ནི་ནམ་ཟླ་སྟོན་ཁའི་ལྷོ་སྤྲིན་ལྟར་ཡིན་པས་ཡུན་རིང་མི་དགོས་པར། ཡང་དགྲ་ཡི་དྭངས་མར་གྱུར་པ་དང་། གཞན་ལ་གནོད་པ་ལ་སོགས་པ་མ་བྱས་ཀྱང་དོན་མེད་ལ་ཕར་ཡག་པོ་བྱས་ཀྱང་ཚུར་ངན་བྱེད་པས་མངོན་ལྐོག་བརྒྱུད་གསུམ་ནས་ངན་སྨྲས་ཞེ་ཤ་གཅོད་པའི་ཚིག་བཤད་པ་དང་། སྐྱོན་ནས་བརྗོད་དེ་འཕྱ་བའི་ཚིག་དང་། སྔར་མི་ཞིག་གིས། མི་ལ་མ་དགའ་ན་དེ་ཐུབ་བྱེད་ལ་སློང་འདེབས་རྒྱུ་ལས་ལྷག་མི་འདུག་ཅེས་ལབ་པ་ལྟ་བུ། མ་ཉེས་ཁ་ཡོག ཡོན་ཏན་ཡོད་པ་ལ་མེད་ཟེར་བ་སོགས་བསྐུར་འདེབས་དང་། སྐྱོན་མེད་ཀྱང་ཡོད་པར་བརྗོད་པ་སྒྲོ་འདོགས་པ། དངོས་སུ་མ་བརྗོད་ཀྱང་དོན་གྱིས་ཟུར་ཟས་ཤེས་རྒྱུད་བསྲེག་པ་སོགས་སྣང་ཚུལ་ཐམས་ཅད་སྡུག་བསྔལ་གྱི་རང་བཞིན་དང་། འཕྲལ་དང་ཡུན་དུ་སྡུག་བསྔལ་བསྐྱེད་པའི་རྒྱུ་ཁོ་ནར་འདུག་པས་ན། ཆོས་རྣམ་དག་ཅིག་བསྒྲུབ་དགོས་ན་ཚེ་འདིའི་བྱ་བ་བློས་ཐོང་བ་ཞིག་མ་རེད་ན། ལྟར་སྣང་གི་དགེ་སྦྱོར་གང་བྱས་ཀྱང་དམ་ཆོས་རྣམ་དག་ཅིག་འགྲུབ་པའི་གོ་ཆོད་ཡོད་པ་མ་རེད། ཇོ་བོ་རྗེ་འདའ་ཁར། རྣལ་འབྱོར་པས་ཁྱེད་འདས་ཚར་དུས། ཁོ་བོས་སྒོམ་རྒྱག་འདུག་ཨེ་རེད་ཞུས་པས། ཇོ་བོས། སྒོམ་བྱེད་པའང་ཆོས་རེད་ཅེས་གསུངས། དེ་ཅི་ཡིན་རྒྱུ་མ་རེད་བསམ་ནས། འོ་ན་ཆོས་འཆད་པར་བྱེད་ཨེ་རེད་ཞུས་དུས། ཇོ་བོས་སྔར་ལྟར་གསུངས། འོ་ན་ཅི་བྱེད་ཞུས་པས། ཇོ་བོས་ཁྱེད་རྣམས་ཀྱིས་འབྲོམ་སྟོན་འདི་ལ་བརྟེན་ནས་ཚེ་འདི་བློས་ཐོང་ཞེས་གསུངས་པ་རེད། གྲྭ་བ་ཞིག་གིས་རྭ་སྒྲེང་ལ་གླིང་སྐོར་བྱེད་བཞིན་པ་ན་འབྲོམ་སྟོན་དང་མཇལ་ཚེ། འབྲོམ་སྟོན་གྱིས། སྐོར་བ་བྱེད་པའང་གློ་བ་དགའ་སྟེ། དེ་བས་ཆོས་ཤིག་བྱེད་ན་མི་དགའམ་ཞེས་གསུངས། ཁོང་གིས་སྐོར་བ་བྱེད་པ་ལས་མདོ་འདོན་པ་དགའ་འམ་སྙམ་ནས་མདོ་འདོན་པའི་ཚེ། ཡང་འབྲོམ་གྱིས། མདོ་འདོན་པའང་གློ་བ་དགའ་སྟེ། དེ་བས་ཆོས་ཤིག་བྱེད་ན་མི་དགའམ་ཞེས་གསུངས། གྲྭ་བས་དེ་བས་སྒོམ་རྒྱག་ན་དགའ་འདུག་བསམ་ནས། མིག་ཟིམ་ཟིམ་བྱས་ནས་སྒོམ་རྒྱག་ཚེ། འབྲོམ་གྱིས་དེ་བས་ཆོས་ཤིག་བྱེད་ན་མི་དགའམ་གསུངས་པས། གྲྭ་བས་ཐབས་མ་རྙེད་ནས་དགེ་བཤེས་ཚང་ལ། འོ་ན་ཆོས་ཇི་ལྟར་བྱེད་དྲིས་ཚེ། དགེ་བཤེས་ཀྱིས། ཚེ་འདི་བློས་ཐོང། ཚེ་འདི་བློས་ཐོང་ཞེས། ཤིན་ཏུ་དོན་དང་ལྡན་པ་ལ། །ཚིག་གཅིག་ལན་གཉིས་བརྗོད་པར་བྱ། །ཞེས་པ་ལྟར་ལན་གཉིས་སུ་ནན་ཏན་གྱིས་བསྐྱར་ནས་གསུངས་པ་རེད། དེ་ལྟ་བུའི་འདི་ཕྱི་གཉིས་དོན་གྱི་དམ་ཆོས་རྣམ་དག་དེ་སྒྲུབ་ལུགས་མ་ཤེས་པས། ད་སྔ་ཕན་ཆོད་དེ་ལྟར་མ་གོ་བའམ་མ་ཤེས་པ་འདི་མཚང་རེ་ཆེ་བའམ་སྐྱོན་རེ་ཆེ། ད་ཁ་ནང་དུ་བསྐོར་ནས་ལེགས་པར་བསམ་ན། འདས་པ་ཐམས་ཅད་མཐོང་མི་འགྱུར། །དེ་དེ་དྲན་པའི་ཡུལ་དུ་གྱུར། །ཞེས་པ་ལྟར་ཁ་སང་ཕན་ཆད་ཀྱི་བྱ་བྱེད་ཐམས་ཅད་ཀྱང་ཡིད་ཡུལ་དུ་དྲན་པ་ཙམ་ལས་རྗེས་སུ་མི་འབྲང་བས་མདང་གི་རྨི་ལམ་དང་འདྲ། མདང་གི་རྨི་ལམ་ནང་དུ་བུ་ཤི་བར་རྨིས་པ་དེ་རིང་སྡུག་མྱོང་བ་མེད་ལ། མདང་རྨི་ལམ་དུ་ནོར་བུ་རྙེད་པར་རྨིས་པ་དེ་རིང་བེད་སྤྱད་དུ་མེད། དེ་རིང་གི་སྣང་བ་དང་བྱ་བྱེད་ཐམས་ཅད་ཀྱང་དོ་ནུབ་ཀྱི་རྨི་ལམ་དང་མཚུངས་ཏེ། སང་ཉིན་མེད་པར་གར་སོང་ཆ་མེད་རེད། སང་ཕན་ཆད་ཀྱི་མ་འོངས་པའི་བྱ་བཞག་ལ་བསམ་ན། གནང་གཞེས་ཉིན་དང་། ཟླ་བ་རྗེས་མ། ལོ་རྗེས་མ། ཚེ་སྨད་སོགས་ཀྱི་བྱ་བྱེད་རྣམས་ཀྱང་སང་ནུབ་ཀྱི་རྨི་ལམ་དང་འདྲ་བ་ཞིག་ཡིན་པ་ལས། རྟག་ཐུབ་པ་དང་ཡིད་རྟོན་ཁེལ་བ་ཞིག་ཇི་ལྟར་བརྟགས་ནའང་མི་འདུག་ཀྱང་། མེད་ལ་ཡོད་པར་འཛིན་པ་འཁྲུལ་པའི་རྟགས། །ཞེས་པ་ལྟར་དོན་མེད་དོན་དུ་འཁྲུལ་བའི་མངོན་ཞེན་གྱི་སྣང་བ་ཨ་འཐས་པས་ན། དེའི་རྐྱེན་གྱིས་གཉེན་ལ་ཆགས། དགྲ་ལ་སྡང་། ལུས་ངག་གི་འཐབ་རྩོད་དང་། སྙན་མི་སྙན་བསྟོད་སྨད་གཤེ་བསྐུར་གྱི་ཚིག རྒྱུ་ནོར་ལ་གསོག་འཇོག རང་གཞན་གྱི་བདེ་སྡུག་ཁྱིམ་གཞིས་དང་སྡེ་རིས་ལ་ཁ་འཛིན་གྱི་ལོག་པའི་སྤྱོད་པས་དུས་འདའ་བ་འདི་རང་རེ་སོ་སོའི་སྐྱེ་བོ་རྣམས་ནི་སྐྱོན་གྱི་གོང་བུར་འདུག འཇིག་རྟེན་ཚེ་འདིའི་སྣང་བ་འདི་ཀུན་བྱིས་པ་མིག་འཕྲུལ་གྱིས་བསླུས་པ་ལྟར་བསླུ་བྲིད་སྒྱུ་མའི་རང་བཞིན་དུ་འདུག་པར་བསམ་བློ་བཏང་ན། མི་རྟག་པ་ལ་རྟག་པར་བཟུང་ནས་ད་སྔོན་གྱི་བར་དུ་རྟག་བརྟན་ཐེར་ཟུག་ཏུ་ལྟ་བ་དེ་འགྱོད་པའི་གཞི་མ་ཞིག་རེད་འདུག་པས་ང་རེ་འགྱོད་ཅེས་གསུངས་ལ། དེའང་དཔེར་ན། སྔོན་གྲྭ་བ་ཞིག་ལ་གྲོགས་པོ་ངོ་ཤེས་སྒྱུ་མ་མཁན་ཞིག་ཡོད། ཉིན་ཞིག་གྲྭ་བ་དེ་ཁོམ་སྐབས་ཤིག་ཁེལ་ཏེ། སྒྱུ་མ་མཁན་གྱི་ཁྱིམ་དུ་སོང་ནས། སྒྱུ་མ་མཁན་ལ་ཁྱོད་ཀྱིས་ང་ལ་སྒྱུ་མའི་ལྟད་མོ་ཞིག་ཨེ་བསྟན་ཟེར། སྒྱུ་མ་མཁན་གྱིས། སྒྱུ་མའི་ལྟད་མོ་སོ་ཅི་མི་བསྟན། དེ་བས་ཁྱེད་རང་གིས་ཇ་འཐུང་ཟེར་ནས་ཇ་ཕོར་བ་གང་བླུགས་ཏེ་གྲྭ་བའི་མདུན་ཅོག་ཐོག་ཏུ་བཞག་ནས། ཁོང་གཉིས་ཀྱིས་སྐད་ཆ་བཤད། དེ་ནས་བར་ཞིག་ན་སྒྱུ་མ་མཁན་སྒོར་སོང་ནས་ཅུང་མ་འགོར་བར་ཕྱིར་ཡོང་དུས། གྲྭ་བ་ལ། དེ་རིང་ངེད་ཚང་གི་སྒོ་ཁར་རྟ་ཡག་པོ་ཞིག་བཙོང་རྒྱུ་ཁྲིད་འདུག་ཟེར་བས། གྲྭ་བ་དེ་ཁོ་རང་རྟ་ལ་ཤིན་ཏུ་དགའ་བས། རྟ་ག་རེ་ཟེར་ནས་སྒོར་བུད་དེ་བལྟས་པས། སྒྱུ་མ་མཁན་ཚང་གི་སྒོ་ཁར་རྟ་སྔོ་ནག་གཡུ་འབྲུག་འཁྱིལ་འདྲ། དོང་ཁར་ཉི་ཟླའི་རི་མོ་དོད་ཡོད་པ། ཐང་གའི་ནང་གི་རི་མོ་ལ་མ་བལྟས་ན་དཔེར་འཇོག་ས་མི་ལོན་པ་ཞིག་ཡོད་པ་དང་། ཁོས་སེམས་དེ་ལ་ཤོར་ནས། འདི་འདྲའི་བྱོལ་སོང་མ་འདྲ་བ་འཇིག་རྟེན་གྱི་ཁམས་ན་ཡོད་སྲིད་པ་ལ། འདི་ལག་ན་མ་ལོན་ཐབས་མེད་ཡིན་བསམ་ནས། ཡ་རྟ་བདག་གོང་ཅི་དགོས་ཟེར་བ་ན། རྟ་བདག་གིས་དང་པོ་གོང་མི་བཤད། ཁྱོད་ཀྱིས་རྟ་ཅི་འདྲ་གོམ་ཚད་གྱིས་ཟེར་ནས་སྲབ་མདའ་ལག་ཏུ་གཏད་པ་ན། གྲྭ་བ་ཅི་བསམ་འདི་དྲན་མེད་པར་མཆོང་ཐེངས་གཅིག་གིས་རྟ་གོང་བུད་པ་དང་། རྟ་དེ་ནམ་མཁའི་བྱ་དང་འདྲ་བ། རྒྱུག་འཕུར་མཆོང་ནས་སོང་བས་མཐོན་པོའི་གངས་དང་རྫ་ལ་ཁུར། དམའ་མོའི་ལུང་དང་ཐང་ལ་ཁུར། ལ་ལུང་པ་དང་ཐང་ཆེན་པོ་བརྩི་ཚོད་མེད་པ་ཞིག་བཅད་ནས། བར་སྐབས་ཤིག་ལ་ས་མཐའ་གནམ་མཐའ་གང་ཡིན་མི་ཤེས་པའི་ས་རྒྱུས་མེད། ཕ་ཡུལ་ཟེར་རྒྱུ་དེ་མི་ཚེ་གཅིག་ལ་ད་མིག་གིས་མ་མཐོང་ཐལ་བསམ་པའི་ས་ཞིག་ལ་ཁུར་སོང་ནས། ཁུར་ཁུར་རྒྱུག་རྒྱུག་གི་ཐ་མར། གྲྭ་བ་སྐྲག་ནི་འདྲ། མགོ་ན། ཞེ་ཁ་ལོག མགོ་ཡུ་འཁོར། མིག་སྔར་དཀར་ལམ་དམར་ལམ་འཆར་ཏེ་ག་ཤེད་དུ་ལྷུང་ནས་བརྒྱལ་སོང་འདུག ཅུང་ཟད་ན་བརྒྱལ་སངས་ནས་གཅིག་བལྟས་པས་རྟ་མ་དགོས་རྟ་སྤུ་གཅིག་ཀྱང་མེད་པར་བྱང་ཐང་སྐྱ་མོ་ཞིག་ཏུ་འཕངས་ཡོད་འདུག དེ་ནས་ཡར་ལངས་ནས་འགྲོ་བསམ་ཡང་གར་འགྲོ་དང་འདིར་འགྲོ་མེད་པ། ཕྱོགས་ཤར་ལྷོ་ནུབ་བྱང་ངོས་མི་ཟིན་ས་ལ་ཐོན་འདུག དེ་ནས་ས་འགྲོ་རྡོ་འགྲོ་བྱས་ནས་ཉིན་མཚན་འགའ་རེར་སོང་སོང་ནས། ཉིན་ཞིག་ལ་རི་ལུང་པ་ཡོད་སའི་ས་ཕྱོགས་མི་རྒྱུ་འགྲུལ་ཡོད་ས་རེད་བསམ་པ་ཞིག་ཏུ་སླེབས་སོང་། ད་དུང་སྡུག་རུས་བྱས་ནས་སོང་སོང་བ་ན། རྫི་བོ་འགའ་རེ་དང་འཕྲད་ནས་སྐད་ཆ་དྲིས་ཀྱང་ཡུལ་ལུང་ས་ཐག་རིང་བ་སྐད་བརྡ་མ་འཕྲོད། ཁ་བརྡ་ལག་བརྡ་བྱས་ནས་དེ་རྣམས་ཀྱི་ཡུལ་དུ་ཁྲིད། རིམ་བཞིན་འདྲིས་པས་སྐད་བརྡ་འཕྲོད་དེ། སེར་གོས་ཤིག་ཀྱང་གྱོན་པས་ཡུལ་དེ་ཡང་ཆོས་དད་ཡོད་པ་ཞིག་ཡིན། དེ་ན་ཨ་མཆོད་བྱས་ཏེ་ཆོས་འདོན་འཇུག་ནས་དུས་ཚོད་ཡུན་རིང་སོང་། དེ་ཁོས་འདོན་ཡོན་རེ་བསགས་ནས་རྒྱུ་ཅུང་བསགས་པ་དང་། དེ་དང་མཉམ་དུ་ཚོང་བརྒྱབ་ནས་རྒྱུ་ཆེན་ལ་གྱུར་སོང་། ད་དུང་འདོད་རྔམ་ཇེ་ཆེར་གྱུར། དེ་ནས་སྐྱ་མིན་སེར་མིན་དུ་གྱུར་ནས་ཨ་མཆོད་ཀྱང་འདོན་མ་མོས། དོན་ནང་ཉམས་ལ་སྐྱ་ཚབ་སེར་གོ་གཉིས་ཀ་མི་ཆོད་རུང་། ཕྱི་ནས་བལྟས་ན་སྐྱ་གོ་སེར་གོ་གཉིས་ཀ་ཆོད་པ་ཞིག་ཏུ་གྱུར་སོང་ནས། ཕྱི་ལོ་ཡང་ལོ་ཡུན་རིང་མ་འགོར་བར་གྲྭ་ལོག་ཏེ། ཁོ་རང་ལའང་རྒྱུ་ཡོད་ཅིང་། ཁྱིམ་ཚང་ཡང་རྒྱུ་ཆེན་པོ་ཡོད་པ་ཞིག་དང་གཉེན་བསྡེབས་པས་འཁོར་བ་ཆེན་པོར་ཆགས་སོང་། སྦྲ་ནག་མཚོ་འདྲ་ཕུག ཁྱི་ནག་དོམ་འདྲ་བསྐོར། རྟ་ནོར་ལུག་གསུམ་གྱིས་སྒོར་གང་སྟེ། སླས་མཐར་ཀི་བཏབ་ན་མི་གོ་བའི་ཁྱིམ་ཚང་ཆེན་པོ་ཞིག་གི་ཁྱིམ་བདག་གྱུར། རྒྱབ་ན་བོའུ་འཁུར་རྒྱུ་དང་། འོག་ན་རྟ་བཞོན་རྒྱུ་ཡོད་པ། མི་ཕྱེད་ལ་ཁ་ཡ་དང་། ཆུ་ཕྱེད་ལ་ལྷམ་མི་ཕུད་པ་ཞིག་ཏུ་གྱུར། དེ་འདྲ་བྱས་ནས་འཚོ་བ་བསྐྱལ་བ་ན། ཕྱི་ནས་བལྟས་ན་ལོས་སྐྱིད་བསམ་རྒྱུ་འདྲ་འདྲ། དོན་ནང་ཉམས་ལ་བལྟས་ན་དཀའ་ལས་དཀའ་ཚེགས་ཉིན་རེ་བཞིན་ཇེ་ཆེ། སྔར་གྲྭ་ཆུང་ཡིན་དུས་ཀྱི་ཁ་འཕང་མགོ་འཕང་དེ་མེད་པར་སོང་། དེ་ནས་བཟའ་འཛིངས་ནང་འཁོན་ཇེ་ཆེ་ཇེ་མང་། ཉི་མ་འདིའི་ཉིན་པར་སྐྱིད་འདི་རིག་སོང་བསམ་རྒྱུའང་ཅང་མེད་པར། དེ་འདྲ་བྱས་ནས་སྐྱིད་མེད་སྡུག་གིས་མི་ཚེ་ན་ཚོད་བསྐྱལ་བསྐྱལ་ནས། བར་སྐབས་ཤིག་ན་བྱིས་པ་སྤྲང་ཕྲུག་གསུམ་གྱིས་མཐའ་བསྐོར། རྒྱུ་མི་རྟག་རྩ་མགོའི་ཟིལ་བ་ཡིན་ནི་རེད། རྒྱུ་ནོར་ལོངས་སྤྱོད་དེ་མར་ཇེ་ཉམས། དབང་ཐང་རླུང་རྟ་དེ་ཇེ་རྒུད། ལོ་ན་ཚོད་ཀྱང་ཇེ་ཆེ་ལ་ཐོན་ནས། བར་གཅིག་ཁ་མ་སོས། ནམ་མ་ལངས། ཧ་དོམ་བུ་ལོན་བླངས་ནས་ཁ་ཨེ་སོས་བལྟ་དགོས་པའི་ས་མཚམས་ཤིག་ལ་ཐོན། དེ་དུས་སྔར་འཁོར་བ་ཐོག་མར་བཟུང་སྐབས་ཀྱི་རྣམ་དཔྱོད་དབང་ཐང་ཡང་མེད་པས། རྒད་པོ་མདོག་སྡུག་འདྲ་འདྲ་རེད། རྒན་མོ་ཁ་བཙན་ཆེ་ནི་འདྲ་འདྲ། སྤྲང་ཕྲུག་ཚོ་ཡང་མགོ་རྒྱས་བུད་སོང་ནས། ཁྱི་དེད་པ་ལམ་དུ་འགྲོ་ནི་གཅིག་ཀྱང་མེད་པར། ཁྱིམ་གོ་ཁ་གསུམ་ནས་ཐལ་བ་འཕྱུར། རྒན་མོ་ཁ་བཙན་ཆེ་ནི། རྒད་པོའི་གནས་ཚུལ་ཅི་སྡུག་འདི་སྡུག་མེད་པ། སྡང་དགྲ་བོས་བལྟས་ན་ཡ་ང་བ། གཉེན་ཉེ་བས་བལྟས་ན་ཡིད་མུག་པ་ཞིག་ཏུ་གྱུར། དེ་ལྟའི་ལྟོགས་མུ་གེས་ལོ་ཟླ་ས་ཆོད་རྡོ་ཆོད་བྱས་ནས། བར་གཅིག་ཅི་བྱེད་ལ་དང་འདི་བྱེད་ཀྱི་ཐུར་མེད་པས། རྒད་པོས་རི་དྭགས་འདྲ་ཨེ་སོད་བལྟས། རྔོན་གཡོག་བྱས་ནས་རྔོན་བདའ་རུ་སོང་བ་ན། དང་པོ་རེ་གཉིས་རེ་སོད་ཀྱང་། རྗེས་མར་ལོ་ན་མཐོ་ནི་རེད་རྐང་པས་མ་བཟོད་པར་རྔོན་རྗེས་མ་ཆོད་ནས་རྔོན་ཡང་མ་སོད་ནས། འཕྱི་བ་བདའ་ཁ་བྱས་ཀྱང་། འཕྱི་བ་ཁོ་རང་གིས་འདི་འདྲ་ཟེར་བ་རེད་ཟེར་སྲོལ་ཡོད་པ་རེད། མི་དྲག་ཤོས་ཀྱིས་ཁོ་མི་གསོད། མི་སྡུག་པོས་ཁོ་མི་སོད་ཟེར་ནི་རེད་ཅན་པོ། འཕྱི་མགོར་བརྡུང་རྒྱུའང་ལས་བོ་སླ་མོ་ཞིག་གིས་མ་ཡིན་པས། ད་ནི་རྒད་པོ་ཁྱིམ་བཟའ་ཚང་ནང་གི་སྔར་གྱི་གོ་ས་ཤོམ་ར་ག་ན་ཡོད། དེ་མེད་ནས་མ་ཚད་བཟའ་ཆེ་ཆུང་གཉིས་ཀའི་མི་གཡོག་ལ་ལྷུང་བས། ཁ་ངན་ཚིག་གྱོང་རག་པ། སྒོའི་ཁྱི་རྒན་རྒྱ་བོའི་ཡན་ཞིག་ལ་ལྷུང་སོང་བ་རེད། ཡང་ཉིན་ཞིག་ཐད་ཀའི་རི་མགོར་གཅིག་ཨེ་སོད་བལྟར་སོང་བ་ན། དེ་ཉིན་རྟགས་ཤིག་ལོས་ཡིན་ཏེ། རྒོ་ལུ་མ་ཞིག་སོད་པས་དགའ་དྲགས་ནས། ཕྱི་དྲོར་རྒོ་རོ་རྒྱབ་ན་ཁུར། བོའུ་ཡོག་གིས་ལག་རྟེན་བྱས་ནས་པུས་ཚིགས་ལྟེབ་ཞོར་ཡུལ་ལ་གཏད་དེ་བབ་ཡོང་ནས་ཁྱིམ་ཚང་རིག་ས་ཞིག་ཏུ་སླེབས་པ་ན། བྱིས་པ་ཆུང་བ་དེ་བུ་ཞིག་ཡིན་པ་དེས་རིག་སྟེ། དེ་རིང་ཨ་ཕས་ཆེན་པོ་ཞིག་འཁྱེར་འདུག་བསམ་ནས། ཨ་ཕ་ཟེར་ནས་འབོད་ཞོར་ཨ་ཕ་བསུ་བར་རྒྱུག་འོང་བ་དང་། ཉིན་སྲིབ་གཉིས་ཀྱི་བར་གྱི་ལུང་གཞུང་ན་ཆུ་ཆེན་པོ་ཞིག་ཡོད་པས་དེའི་ཟམ་ཐོག་ན་བྱིས་པ་རྡེག་འཆའ་སྟེ་ཆུ་ནང་ལྷུང་ནས་ཤི་སོང་། དེའི་སྐབས་སུ་བྱིས་པ་ཆེ་བ་བྱིས་མོ་གཉིས་རྒྱུག་ཡོང་སྟེ་ལག་སྦྲེལ་བྱས་ནས་ཆུ་ནང་མཆོང་ནས་བྱིས་པ་ཆུང་བ་ཨེ་ལོན་བལྟ་ཁུལ་བྱས་པས་གསུམ་ཀ་ཆུས་ཁྱེར་སོང་བ་དང་། མ་རྒན་གྱིས་དེ་རིག་པ་དང་ཕོས་ཆེ་རྒྱུ་ཆུང་རྒྱུ་མེད་པ་ཞིག་བཏབ་ནས་བསམ་བློ་ཞིག་ཀྱང་མ་གཏོང་བར་ཆུ་ནང་ལྕེབ་སོང་བ་ན། རྒད་པོ་འགྲོ་ས་རི་ན་མེད། འདུག་ས་ཡུལ་ན་མེད་པར། སྡུག་ཆེ་ནས་ཤི་ན་ཤི་མ་དོ། སྡུག་སྨྲེ་སྔགས་འདོན་ནས་བསྡོད་ཡོད་པ་ན། སྐད་ངོ་ཤེས་པ་ཅན་ཞིག་གིས་ཟུར་དེ་ནས་དགོས་མེད་གི་ད་ཡར་ལོངས་ཟེར་བ་ཞིག་རྣ་ལམ་དུ་གོ་ནས་གཅིག་བལྟ་དུས། སྔར་གྱི་སྒྱུ་མ་མཁན་ཚང་གི་སྒོ་ཁ་ན་དབྱུག་པ་ཞིག་དྲུད་ནས་ནུད་ཀྱིན་བསྡད་ཡོད་པ་དང་། བན་རྒན་སེམས་ཐོག་ཚུར་ཐོན་ནས་ངོ་ཚ་བ་དང་སེམས་སྡུག་ནི་མཉམ་དུ། ཅི་སྡུག་འདི་སྡུག་མེད་པར་ཡར་ལངས་ནས་ཁྱིམ་ནང་དུ་སོང་དུས། ད་དུང་ཅོག་ཙེའི་སྟེང་གི་ཇ་ཕོར་བ་གང་གི་རླངས་པ་ཡང་ཡལ་མེད་པ་རེད། འཁོར་བའི་འཁྲུལ་སྣང་ཟེར་བ་དེ་དང་འདྲ་བ་ཞིག་ཡིན། དེས་ན་འཇིག་རྟེན་གྱི་སྣང་བ་འདི་ཀུན་བསླུ་བྲིད་སྒྱུ་མའི་རང་བཞིན་དུ་འདུག་པ་ལ་རྟག་བརྟན་ཐེར་ཟུག་ཏུ་བལྟ་བ་ང་རེ་འགྱོད་ཅེས་གསུངས་སོ། །ད་ནི་སང་ཕན་ཆད་ཀྱི་བསམ་མནོ་གང་ཡང་མི་གཏོང་བར་བདག་ཏུ་འཛིན་པ་ལ་སྐྱོན་དུ་བལྟ་བར་བྱའོ་སྙམ་དུ་ཞེ་ཐག་པ་ནས་བསམ་མོ། །འཁོར་བ་ཐོག་མེད་ནས་ད་ལ་མ་ཐུག་གི་བར་དུ་བདག་མེད་པ་ལ་བདག་ཏུ་འཛིན། ང་རང་གི་དོན་དུ་གཞན་ལ་གནོད་པ་བསྐྱལ་བ་ལ་སོགས་པ་སྡིག་པ་མི་དགེ་བའི་ལས་མང་པོ་ཞིག་བསགས་པས་འཁོར་བའི་གནས་སུ་ངན་སོང་ལ་སོགས་པའི་སྡུག་བསྔལ་འདི་དག་བྱུང་བ་རེད། དེས་ན་སྤྱོད་འཇུག་ལས། ཡིད་ཁྱོད་རང་དོན་བྱེད་འདོད་པས། །བསྐལ་པ་གྲངས་མེད་འདས་གྱུར་ཀྱང་། །ངལ་བ་ཆེན་པོ་དེ་ལྟ་བུས། །ཁྱོད་ཀྱིས་སྡུག་བསྔལ་འབའ་ཞིག་བསྒྲུབས། །ཞེས་གསུངས། ད་དེ་འདྲར་བྱས་ནས་སྡུག་བསྔལ་འདི་བདག་འཛིན་གྱིས་བསྐྱེད་པ་ཡིན་པས། གནོད་བྱེད་ཀྱི་དགྲ་བོ་སྡུག་བསྔལ་གྱི་ནང་དུ་འཕེན་མཁན་སུ་རེད་ཟེར་ན། བདག་འཛིན་འདི་ཡིན། དེས་ན་བདག་འཛིན་འདི་ལ་དགྲར་བཟུང་ནས་འདིའི་སྐྱོན་ཡོད་ཚད་ལྷང་ལ་ཕུད་དགོས། འདིས་འཁོར་བ་ཐོག་མེད་ནས་ད་བར་དུ་སྡུག་བསྔལ་འབའ་ཞིག་བསྐྱེད་དེ། འདིས་མཐོ་ལ་ཕྲག་དོག དམའ་ལ་བརྙས་བཅོས། མཉམ་ལ་འགྲན་སེམས། འཁོར་བའི་ནང་ནས་ཐར་རྒྱུ་མེད་པ་ཞིག་བྱེད་པ་དང་། མི་དང་མི་མིན་གྱི་གནོད་པ་ཐམས་ཅད་འདིའི་ཁུངས་ནས་བྱུང་བ་རེད། མདོར་ན་མི་འདོད་པ་ཡོད་ཚད་འདིས་ལན་པ་ཡིན་པར་ཤེས་པར་བྱས་ནས། འདི་འདུལ་བར་ཅི་ཐུབ་གང་ཐུབ་ལ་འབད་དགོས་ཞེས་གསུངས་ཏེ། བཀའ་གདམས་པའི་དགེ་བཤེས་ཤར་བོ་བས། ད་རེས་ཚེ་ཐུང་འདི་ལ་འགོང་པོ་འདི་ཅི་ཐུབ་ཅིག་བྱ་དགོས། ཞེས་དང་། དགེ་བཤེས་འབེན་གྱིས་ཀྱང་། ད་རེས་སེམས་ཀྱི་གཉེན་པོའི་མཁར་སྒོ་ན་གཉེན་པོའི་མདུང་ཞིག་བཟུང་ནས་འདུག་པ་ལས་གཞན་ཅི། ཁོ་སྒྲིམ་ན་ང་ཡང་སྒྲིམ། ཁོ་ལྷོད་ན་ང་ཡང་ལྷོད་ཅེས་གསུངས་སོ། །དེས་ན་བདག་འཛིན་དགྲ་རུ་བཟུང་ནས་གཞན་གཅེས་འཛིན་ལ་བློ་སྦྱོང་དགོས། དེས་བྱས་པ་ཐམས་ཅད་སྡུག་བསྔལ་གྱི་རྒྱུར་སྣང་བ་དེ་ཉིད་ལུང་ལས་དཔག་ནས་བསམ་པ་སོང་ངོ་། །

གཉིས་པ་བློ་བྲིད་དེ་ཐབས་ཀྱིས་སྒོམ་པ།

གཉིས་པ་མན་ངག་གི་ལུགས་ལ་བློ་མ་དྲངས་གྲོལ་བ་དེ་ཉིད་བྲིད་དེ་ཐབས་ཀྱིས་རང་རྒྱུད་ལ་སྦྱར་ཏེ་ཐུན་ནང་སྒོམ་པ་ནི། ཡང་རང་ཉིད་ས་ཆ་གང་ནས་ཕྱིན་ཆ་མེད་རྒྱུས་མེད་པའི་ལུང་བ་ཐག་རིང་པོ་གང་ཡིན་ངོ་མི་འཚལ་བ་སྟེ་ངོ་མི་ཤེས་པའི་ས་ཆ་རྒྱུས་མེད་ཞིག་ཏུ་སླེབས་པར་སྒོམ། མདུན་གང་ལ་གཏད་ནས་གར་འགྲོའི་གཏད་སོ་མེད་པ། རྒྱབ་གང་ལ་གཏད་ནས་གང་ནས་འོང་ཆ་མི་འཚལ་བར་ཐོམ་ཐོམ་དུ་ཅི་བྱེད་འདི་བྱེད་མེད་པར་ཡོད་ཙ་ན། གློ་བུར་དུ་གར་ཡོང་འདི་ཡོང་མི་ཤེས་ཤིང་ངོ་མི་ཤེས་པའི་ཕོ་སྐྱེས་གཞོན་ནུ་བརྒྱད་ཐོན་བྱུང་ནས། དེ་དག་ན་རེ། བདག་ཅག་ནི་ཀུན་གཞི་མུན་པའི་གླིང་བྱ་བའི་ས་ཆ་ནས་འོངས་། འདི་ནས་ཕར་ལ་ལོ་ཟླ་མང་པོ་བརྒལ་བའི་ས་ཆ་ན། ཡུལ་རིན་པོ་ཆེའི་གླིང་ཞེས་བྱ་བ་ཡོད། གླིང་དེ་ན་ནོར་བུའི་རིགས་བྱེད་སྣ་ཚོགས་བསམ་གྱིས་མི་ཁྱབ་པ་མཆིས་ལ། དེ་དག་ལེན་དུ་འགྲོ་བ་ལ་ལམ་དུ་དཀའ་ཚེགས་ལ་མི་འཛེམས་པར་ངལ་བ་ཁྱད་དུ་བསད་ནས་འགྲོ་དགོས་པ་ཡིན། ཁྱོད་ཅག་ཀྱང་དེ་ལྟར་འགྲོ་བར་མི་བགྱིའམ་ཞེས་ཟེར་བ་དེ་གོ་བས་བློ་འགྱུར་ཏེ། ཕོ་སྐྱེས་བརྒྱད་པོ་དེ་དག་དང་བསྡོངས་ནས་བསྐྱོད་དེ་སོང་བ་ན། སྐབས་རེས་འགའ་ནི་གྲང་ངར་ཤུགས་དྲག་ལྡན་པའི་རྫི་ངར་ཅན་གྱི་རླུང་ལ་འགམས། ཡང་རེས་འགའ་ནི་སྟག་གཟིག་དོམ་དྲེད་ལ་སོགས་པ་གཅན་གཟན་གདུག་པ་ཅན་གྱིས་ད་ཟ་འགྲོ་སྙམ་པའི་འཕྲང་ལ་བཤར། ཡང་རེས་འགའ་ནི་ཆུ་བོ་ཆེན་པོའི་དབའ་ལ་བཤམས། དཀའ་ཚེགས་འཁྱགས་གསུམ་པོ་བསྲན་ནས་རྒྱུ་སྟོང་སྐེད་པར་དཀྲིས། མཆིལ་མས་སྐོམ་སེལ། རྒྱུ་མས་སྐེ་རགས་བྱས། མི་ཚེ་རིང་པོ་ལ་དུས་ཀྱི་ཚད་བཙུགས་ནས། ཉིན་གཅིག་འདུག་པའི་ཚེ་ཡོད་མེད་མི་ཤེས་རུང་། ལོ་བརྒྱ་འདུག་རྒྱུའི་ལས་ཀ་ཡུན་རིང་གི་འདང་བརྒྱབ་སྟེ་ཉིན་མཚན་བར་མེད་དུ། ནངས་བ་མོས་ལྷམ་བྱས། ནུབ་སྐར་རྒྱན་གྱིས་ཞྭ་བྱས་ནས། ལོ་དང་ཟླ་བ་མཐུད་དེ་སོང་སོང་བས་ལུས་སེམས་གཉིས་ཀ་ཤིན་ཏུ་ཐང་ཆད་པའི་ངང་ལ་ཕྱིན་ཕྱིན་པ་ལས། ཅི་ཞིག་ན་མི་ཚེ་ཡང་ཕལ་ཆེར་ཟད། སྐྲ་དང་ཁ་སྤུ་ཡང་དཀར་པོར་སོང་སྟེ་ཚེ་སྟོད་གཞོན་སོ་དཀར་གྱི་དུས་ནས་བཟུང་ཚེ་སྨད་རྒན་སྐྲ་དཀར་གྱི་བར་དུ་སོང་སོང་བའི་སྐབས་ཤིག་ན། དང་པོ་བསམ་པའི་དམིགས་ཡུལ་གྱི་འདོད་པའི་དོན་ཐམས་ཅད་གྲུབ་སྟེ་རིན་པོ་ཆེའི་གླིང་ནས་ནོར་བུའི་བྱེ་བྲག་བསམ་གྱིས་མི་ཁྱབ་པ་འཇིག་རྟེན་གྱི་དངོས་པོ་དེ་དག་ཐོབ་ནས། ད་ནི་ལོན་རྒྱུའི་དངོས་པོ་རྣམས་ནི་ལོན་སོང་བསམ་ནས་དགའ་སྤྲོ་ཡང་དཔག་ཏུ་མེད་པ་དང་བཅས་ཏེ་རང་གི་ཡུལ་དུ་ཕྱིར་ལྡོག་ནས་ཡོང་ཙ་ན། ཞག་གསུམ་གྱིས་རང་གི་ཕ་ཡུལ་སླེབས་རྒྱུའི་སའི་ཆ་མིང་ལ་འདུ་བ་རྣམ་བཞིའི་ཐང་ཞེས་བྱ་བ་དེར་ཞག་ཚུགས་བྱས་ནས་འདུག་པའི་ཚེ་ན། གློ་བུར་དུ་ཇག་པ་ཤིན་ཏུ་མི་བསྲུན་མ་རུངས་པ་འཇིགས་སུ་རུང་བའི་སྤུན་བདུན་དང་ཕྲད་དེ། མི་ཚེ་ཚད་ལ་བཙུགས། སྲོག་ལ་བརྡོས་ཏེ་ཡུན་རིང་པོས་དཀའ་བས་བཙལ་བའི་ནོར་བུ་རྣམས་ཕྲོགས། ཐ་ན་ལུས་ལ་གྱོན་ཞིང་འཇག་པའི་ལྷག་སྐྱོབ་ཀྱི་གོས་ཀྱང་ནི་བཤུས། རྐང་ལག་སོགས་ཡན་ལག་ཐམས་ཅད་ལྕགས་སྒྲོག་སོགས་ཀྱིས་དམ་པོས་བཅིངས་ཏེ་དབང་མེད་དུ་བྱས། མདའ་མདུང་རལ་གྲི་ལ་སོགས་པ་མཚོན་ཆའི་རིགས་ཤིན་ཏུ་རྣོན་པོ་ཐོགས་ནས་ཚིག་རྩུབ་བརླང་པོ་མི་སྙན་པའི་ངག་གིས། ལས་ངན་ཁྱོད་ལ་བླ་མ་ཟེར་བའི་བྱིན་རླབས་ཅན་ཞིག་ཡོད་ན་འབོད་རན་པས་གསོལ་བ་ཐོབ། ཡི་དམ་ཞེས་པ་དངོས་གྲུབ་ཅན་ཞིག་ཡོད་ན་ད་ཐུགས་རྗེ་བསྐུལ། མཁའ་འགྲོ་དང་ཆོས་སྐྱོང་ཟེར་བའི་འཕྲིན་ལས་མྱུར་མགྱོགས་དང་ལྡན་པ་ཞིག་ཡོད་ན་ད་ར་མདའ་སྦྲོན། རྒྱབ་རྟེན་དང་དཔུང་གཉེན་ཡོད་ན་ད་འོང་རན། སྐྱབས་དང་རེ་ས་མགོན་དཔུང་གཉེན་དེ་དག་གང་ཡང་མེད་ན་འཆི་བ་ཟེར་བའི་སྒྲ་བོ་ཆེ་དེ་སྒོམ། དེ་རང་ཐོག་ལ་བབ་པ་རེད། ཚེ་འདི་ཕྱི་ཟེར་བའི་ས་མཚམས་ཤི་གསོན་བྱེ་མའི་ལ་ཁར་ད་སླེབས་པ་ཡིན་ནོ། ད་དེའི་ཕན་ལ་འགྲོ་ས་འདུག་ས་ཞིག་ཡོད་པ་མ་ཡིན་ནོ། །ཞེས་ཟེར་བའི་སྒྲ་མི་སྙན་པ་དེ་ཐོས་པས་སྙིང་རྩེ་ཤུམ་མམ་ཚ་ཤར་གྱིས་སོང་། ཨ་ཙ་མ་ཞེས་སྡུག་བསྔལ་མགོ་ཐོག་ལ་བབ་ནས་ཤུགས་དྲག་གི་མྱ་ངན་མྱོང་བའི་ཚིག་སྨྲས་ནས། བདག་གིས་མི་ཚེ་ཁོ་ན་ཚད་བཙུགས་ནས་ཁྲག་དང་རྔུལ་ཆུའི་ཐིག་པ་བསགས་ཏེ་དཀའ་བ་དེ་ཙམ་ཞིག་བྱས་པ། ཨ་བྲའི་གསོག་པ་མཛོ་ཕོའི་ཁམ་གང་། རྒྱུ་ནོར་ཡོད་ཚད་ཕྲོག་ནས་དོན་མེད་དུ་སོང་བས་མ་ཆོག་ད་ནི་རིན་ཆེན་སྲོག་དང་བྲལ་བ་ལ་ཐུག བདག་མེད་ཀྱི་ལུང་པ་ས་སྟོང་རྒྱུས་མེད་འདི་ལྟ་བུར་གཤེད་མ་གདུག་རྩུབ་ཅན་འདི་ལྟ་བུ་དང་འཕྲད་དུས། རི་བོང་གླག་གིས་འཁྱེར་དུས། འབོད་ས་ཨ་སྔོན་གནམ་ཟེར་བ་ལྟར། སྐྱབས་དང་མགོན་དང་དཔུང་གཉེན་རེ་ས་ནི་མེད། ཅི་བྱེད་དང་འདི་བྱེད་མེད་སར་ཐུག སྔར་དཀའ་བ་སྤྱད་པའི་ལས་བྱས་བྱས་ཐམས་ཅད་ཀྱིས་ཕན་པ་ཡོད་པ་ནི་གཅིག་ཀྱང་མ་བྱུང་། ཚེ་ཚད་ཡུན་རིང་དུ་འཇོག་འདུག་རྒྱུའི་ཚེ་ཟད་ལོང་མེད་པར་འཆི་བ་གྲི་ཐོག་དམར་པོ་མགོ་ལ་ལྷུང་བ་ལྟར། གློ་བུར་བཙན་ཐབས་སུ་ངའི་མགོ་ལ་སླེབས་ནས་གདའ། ཨ་ཙ་མ་ཞེས་སྐྱི་གཡའ་བའི་ཚིག་དང་། བྲེད་ཤ་ཐོན་པའི་མིག་བགྲད་ནས། །ཕྱོགས་བཞིར་སྐྱབས་དག་འཚོལ་བར་བྱེད། །ཕྱོགས་བཞིར་སྐྱབས་མེད་མཐོང་ནས་ནི། །དེ་ནས་ཀུན་ཏུ་ཡི་མུག་གྱུར། །ཞེས་པ་ལྟར། འཇིགས་པ་ལ་ཞེས་ཉམ་ཐག་གི་ང་རོ་དང་། ཀྱི་ཧུད་ཀྱི་ཧུད་ཅེས་སྨྲེ་སྔགས་དང་འོ་དོད་དྲག་པོ་འབོད་ཀྱིན་ཡོད་པའི་ཚེ། མདུན་གྱི་ནམ་མཁར་འཇའ་འོད་གུར་ཁང་ན་ཨོ་རྒྱན་ཆེན་པོ་ཉིད། ལམ་སྲང་འཇིགས་པའི་འཕྲང་ལ་འགྲིམ་པའི་ཚེ། །བསད་འཁྱེར་ཇག་པ་ཆོམ་པོས་ཉེན་པ་ན། །ཡིད་གཉིས་ཐེ་ཚོམ་མེད་པར་གསོལ་བ་འདེབས། །ཨོ་རྒྱན་ཕྱག་རྒྱ་བཞི་ཡི་དགོངས་པ་ལྡན། །ཙོ་ར་མི་རྒོད་རྔམས་སེམས་བརླག་པར་བྱེད། །ཅེས་པ་ལྟར། བསད་པ་དང་། དབྱེ་བ་དང་། བསྐྲད་པ་དང་། མྱོས་པ་སྟེ་ཕྱག་རྒྱ་བཞི་ལྡན་གྱི་རྣམ་པར་བྱོན་ནས་འོད་ཟེར་སྤྲོ་ཞིང་བསྡུས་པས་མི་རྒོད་ཇག་པའི་ཚོགས་རྣམས་རྒྱང་རིང་པོར་ཕྱིར་བསྐྲད་པར་མཛད་རྗེས། ཀྱེ་ཞེས་པའི་སྙན་པའི་གསུང་དབྱངས་ཀྱིས་བསྐུལ་ནས། ལས་ངན་གྱི་སེམས་ཅན་ཁྱོད་ཀྱིས་དགྲ་འདུལ་གཉེན་སྐྱོང་། ཚོང་སོ་ནོམ། ནོར་གསོག་འཇོག་སོགས་འཁོར་བའི་བྱ་བ་བཙན་དུག་ཁོང་དུ་སོང་ན་སྲོག་གཅོད་པ་ལྟ་བུ་ཐར་པའི་སྲོག་འཕྲོག་བྱེད་ལ་རོ་བརྒྱ་དང་ལྡན་པའི་བདུད་རྩི་ལྟ་བུར་བརྩིས་ནས་ཆགས་པས་ལན། སྔར་ངོ་མ་ཤེས་པའི་ཁྱོད་མགོ་གཡོག་ནས་ཁྲིད་མཁན་གྱི་ཕོ་སྐྱེས་བརྒྱད་པོ་ནི། རྣམ་ཤེས་ཚོགས་བརྒྱད་རླུང་སེམས་ཀྱི་བཞོན་པ་རྟ་ལོང་བ་དང་འདྲ་བ་དེས་རིག་པའི་ཡེ་ཤེས་བསླུས་ཏེ་དེའི་གདང་ཕྱིར་འཆར་ཞིང་འཕྲོ་བའི་འཁྲུལ་བའི་སྣང་བ་བསྐྱེད་པ་ཡིན། རིན་པོ་ཆེའི་གླིང་གི་ནོར་བུར་ལོན་པ་ནི་མི་བརྟན་ཚེ་འདིའི་ཟག་བཅས་ཀྱི་བདེ་སྐྱིད་རྨི་ལམ་ལྟ་བུ་དོན་ལ་མེད་པའི་འཁྲུལ་སྣང་བརྟག་མི་ཐུབ་པ་ཡིན། རྒྱུ་སྟོང་སྐེད་པར་དཀྲིས་ནས་དཀའ་བ་སྣ་ཚོགས་སྤྱད་པ་ནི། རྡོ་ཐང་ལ་ཡོད་པ་ཐད་ལ་བླངས་པ་བཞིན། རང་སྡུག་རང་ལ་གཏད་དེ་སྡུག་བསྔལ་རང་ཉིད་ཀྱི་སྟེང་དུ་དང་དུ་བླངས་པས་བསླུ་བའི་གཞི་ངོ་མ་དེ་བསྒྲུབ་པ་ཡིན། སྐྲ་དང་ཁ་སྤུ་ནག་པོ་ཡིན་པ་དེ་ལོ་ཟླའི་འཕྲེང་བ་བར་མེད་དུ་བགྲངས་ནས་དཀར་པོར་མདོག་འགྱུར་སྟེ་གཞོན་སོ་དཀར་ཅན་དེ་རྒན་མགོ་དཀར་ཅན་གྱི་བཅོལ་རྒན་དུ་འགྱུར་བ་ནི། འཁོར་བའི་སེམས་ཅན་སྡུག་བསྔལ་གྱི་ལས་ལ་གཡེང་ཞིང་སྡུག་བསྔལ་བདེ་བར་འཛིན་པ་ལ་འཁྲུལ་བཞིན་པའི་ངང་དུ་མི་ཚེ་ཡེང་མ་ལམ་ལ་དོན་མེད་དུ་འཛད་པ་ཡིན། རླུང་མཁྲིས་བད་ཀན་འདུ་བའི་ནད་ཀྱི་འདུ་བ་རྣམ་བཞིའི་ཐང་དུ་ཇག་པ་མ་རུངས་པས་སྲོག་ལ་རྒོལ་བ་ནི། བཞི་བརྒྱ་རྩ་བཞིའི་ནད་ཀྱིས་གཙེས་ཏེ་མནར་བས་འཆི་བདག་ངོམ་གནག་གཤིན་རྗེའི་སྐྱེས་བུ་གློ་བུར་དུ་ཐོན་ནས་དབང་མེད་དུ་སྲོག་འཕྲོག་ཅིང་གཏོར་བ་ཡིན། འདོད་པའི་དབང་དུ་སོང་ནས་སྡུག་བསྔལ་མྱོང་བ་ལུང་ལས་བྱུང་བ་ལ་བསམ་ན། སྔོན་སངས་རྒྱས་བཅོམ་ལྡན་འདས་སྐུ་བཞུགས་པའི་ཚེ། དགེ་སློང་མ་ཨུཏྤལའི་མདོག་ཅེས་པ་དགྲ་བཅོམ་མ་ཞིག་ཡོད། ཁོང་གིས་དགེ་སློང་མ་གསར་བུ་འདོད་པའི་ཉོན་མོངས་ལས་མ་གྲོལ་བ་རྣམས་ལ་ཆོས་གསུངས་པའི་ཚེ། ཁོང་རབ་ཏུ་མ་བྱུང་དགྲ་བཅོམ་མ་ཐོབ་པའི་སྔོན་གྱི་བྱུང་བ་ཚེ་འདིའི་གནས་ཚུལ་ངོ་མ་དེ་བརྗོད་པ་རེད། དེའང་ཁོང་ཀུན་ཏུ་རྒྱུ་རིགས་མཐོན་པོ་ཞིག་གི་ཁྱིམ་དུ་སྐྱེས། ནར་སོན་པ་ན། ཀུན་ཏུ་རྒྱུ་རིགས་མཐོན་པོ་རྒྱུ་ནོར་ལོངས་སྤྱོད་ཡོད་མཁན། རིག་བྱེད་ལ་མཁས་པ་ཞིག་ལ་བག་མར་བྱིན་པས། བུ་གཅིག་སྐྱེས་ཤིང་ཡང་ལུས་ལ་བུ་གཅིག་འཁོར་ནས་ཁྱིམ་ཐབས་དང་ལྷན་དུ་བུ་བཙས་ཕྱིར་ཕ་མའི་ཁྱིམ་དུ་ལོག་སྐབས། ཕ་མའི་ཁྱིམ་ཡོད་ས་ཐག་རིང་པོ་ཡིན་པས་དེའི་དགོང་མོ་ལམ་ཕྱེད་ཙམ་དུ་ཕྱིན་ནས་ས་སྟོང་ཞིག་ཏུ་ཞག་སར་བྱས། ཁོང་ཤིང་སྡོང་ཞིག་གི་རྩར་ཉལ་ནས་ནམ་ཕྱེད་ཙམ་ལ་བུ་བཙས་པ་ན། ཁྱོ་ཕོ་ལ་བོས་ཀྱང་ལན་མ་སྟེར། ཕྱི་ཉིན་ནམ་ལངས་དུས་བལྟས་པ་ན། ཁྱོ་ཕོ་དུག་སྦྲུལ་གྱིས་བཟུང་སྟེ་དུག་གིས་ཟིན་ནས་ཤི་ཚར་འདུག དེའི་སྐབས་ན་མྱ་ངན་གྱིས་དྲན་མེད་དུ་བརྒྱལ་སོང་། རེ་ཞིག་བུ་ཆེ་བ་དེས་ཕའི་རོ་ལ་འཐམས་ཏེ་ངུས་པས་རྐྱེན་བྱས་ནས་སད་བྱུང་བ་དང་། གཞན་ཅི་བྱེད་མེད་པར་ཕ་མའི་ཁྱིམ་གྱི་ཕྱོགས་སུ་གཏད་དེ། བུ་ཆེ་བ་རྒྱབ་ལ་འཁུར། ཆུང་བ་པང་དུ་བཟུང་ནས་ངུ་བཞིན་ས་སྟོང་ཞིག་ལ་སོང་སོང་ནས་ཆུ་ཆེན་པོ་ཞིག་དང་ཐུག་པ་ན། ལུས་ཟུངས་ཞན་པས་བུ་གཉིས་ཀ་ལྷན་ཅིག་ཏུ་མ་ལྕོག་པས། བུ་ཆེ་བ་དེ་ཚུར་ཁར་བཞག་ནས། དང་པོ་བུ་ཆུང་བ་ཕར་ཁར་བསྐྱལ་ནས་ཚུར་འོང་དུས། བུས་ཨ་མ་ཞེས་བོས་ནས་རྒྱུག་ཡོང་བས་ཆུར་ལྷུང་སོང་། ལུས་ཀྱི་སྟོབས་ཤུགས་ཅི་ཡོད་བསྐྱེད་ནས་དེད་ཀྱང་མ་ཟིན་པས་ཨ་མ་ཞེས་བོས་བཞིན་ཆུས་ཁྱེར་སོང་། དེ་ནས་བུ་ཆུང་བ་ལ་ཕྱི་བལྟས་ཤིག་བྱེད་དུས་སྤྱང་ཀི་ཞིག་གིས་ཟ་འགྲོ་བར་རིག་ཏེ་མགྱོགས་པར་ཆུ་བརྒལ་ཏེ་དེར་འཐོན་པ་ན་སྤྱང་ཀི་བྲོས་ཚར་ཡང་བུའི་ཁྲག་ཐིག་ཙམ་ཞིག་མ་གཏོགས་ལྷག་མ་མེད་པར་ཟོས་ཟིན། ཡང་སྡུག་གིས་དྲན་མེད་དུ་བརྒྱལ་སོང་། སྡུག་གིས་ཤི་རྒྱུ་མེད་པས་ཡང་སོས་ནས་གཅིག་པུ་ངུ་ཞོར་དུ་སོང་སོང་ནས་ཕ་ཡུལ་དང་ཐག་མི་རིང་བའི་སར་སླེབས་པ་དང་། ཕ་ཕྱོགས་ཀྱི་ཉེ་རིང་འདུན་པ་ཡོད་པ་ཞིག་དང་འཕྲད། མི་དེས་ཁྱོད་འདི་འདྲ་སྡུག་མོ་ཅི་རེད་སོང་ཞེས་དྲིས། མོས་ངུ་བཞིན་ལོ་རྒྱུས་རྒྱས་པར་བཤད་པས། མི་དེའང་ངུར་ཤོར་བ་དང་། མོས་དེ་ལ་ངའི་ཕ་མ་གཉིས་བདེའམ་ཞེས་དྲིས་པས། མི་དེས་ཁྱོད་ཀྱི་ཕ་མའི་ཁྱིམ་མེས་ཚིག་ནས་ཤི་ཚར། ཁྱོད་འགྲོ་ས་ཞིག་ཡོད་མ་སོང་ཟེར་བས། ཡང་མོ་དར་ཅིག་དྲན་མེད་དུ་བརྒྱལ་ནས་ཡར་སོས་པ་དང་ཉེ་རིང་དེའི་ཁྱིམ་དུ་སོང་ནས་བསྡད། དེ་ཚང་གི་རང་གི་བུ་མོ་བཞིན་ཅི་དྲག་གིས་ཡག་པོར་བྱེད་བཞིན་དུས་ཚོད་གང་འཚམས་ཤིག་འདས་ནས། དམུས་རྒྱུ་མེད་པའི་བན་རྒན། །ན་ནིང་ཤི་སར་ད་ལོ། །ཡང་གཞན་ཞིག་ལ་མནའ་མ་སོང་བས། དེ་ཚང་གི་མི་དེ་ཆང་འཐུང་མཁན་ངན་པ་ཞིག་ཡིན་པས། ཉིན་ཞིག་གཞན་ཞིག་གི་ཁྱིམ་དུ་ཆང་བརྒྱག་རྒན་ཞིག་འཐུང་ནས་ར་བཟི་ཞིང་དགོང་མོ་ནམ་ཕྱེད་ཙམ་ལ་ཕྱིར་ལོག་སྟེ་སྒོ་བརྡུང་བ་ན། མོ་ལ་བུ་ཞིག་སྐྱེས་ནས་དེ་མ་ཐག་སྒོ་ཕྱེར་འགྲོ་མ་ཐུབ་པས། ཁོས་སྒོ་གཏོར་ཏེ་ནང་དུ་ཡོང་དུས། མོས་ལོ་རྒྱུས་བཤད་ཀྱང་ཁོས་མ་ཉན་པར་སྤྲོ་ཐོག་སྤྲོ་ལངས་ནས། མོ་བརྡུང་བུ་བསད། བུ་རོ་མར་ཁུའི་ནང་དུ་བརྔོས་ནས་མོ་ལ་ཟ་རུ་བཅུག་པས། མོས་ང་ཅི་འདྲའི་ལས་ངན་བསོད་ནམས་མེད་པ་ཞིག་རེད་བསམ་ཞིང་། མི་དེ་བསྐྱུར་ཏེ་བྲོས་པས་ཝ་ར་ཎ་སིར་སོང་ནས་གྲོང་ཁྱེར་གྱི་ཕྱི་རོལ་ཤིང་སྡོང་ཞིག་གི་དྲུང་དུ་གཅིག་པུར་འདུག་པ་ན། ཡང་དེ་ན་ཁྱིམ་ཚང་ཞིག་བག་མ་གསར་པ་གློ་བུར་དུ་ཤི་ནས། ཁྱོ་ཕོ་དེས་དེའི་རོ་དུར་ལ་སྦས་ནས་ངུ་བཞིན་འགྲོ་བ་དང་འཕྲད། དེ་གཉིས་སྐད་ཆ་ཕར་བཤད་ཚུར་བཤད་བྱས་ཤིང་དེ་ཚང་གི་ཁྱིམ་དུ་སོང་ནས། མི་སྡུག་ཐུག་རེད། ལས་གར་ཟད་རེད། འཇིག་རྟེན་གྲང་ང་ཁམས་ན་ལས་ཐབས་གཞན་མེད་ནས་དེ་ཚང་གི་ཁྱིམ་བདག་མོ་བྱས་ཀྱང་། ཡུན་མི་རིང་བར་མི་དེ་ལ་ནད་ཅིག་ཕོག་ནས་སྨན་དཔྱད་སོགས་ཅི་བྱས་ཀྱང་མ་ཕན་པས་ཤི་སོང་། ས་ཆ་དེའི་ལུགས་ལ་སྐྱེས་པ་ཤི་དུས་ཆུང་མ་དེའི་རོ་དང་མཉམ་དུ་ས་འོག་སྦ་དགོས་པའི་དར་སྲོལ་ཡོད་པས། མོ་གསོན་པོ་རོ་དང་མཉམ་དུ་སྦས་པ་ན། དེ་ནུབ་དུར་རྐུན་པ་མང་པོ་འཐོན་ཡོང་བས་མོ་ཁྲིད་ནས་དུར་རྐུན་གྱི་དམག་དཔོན་གྱི་ཆུང་མར་བྱས། དུར་རྐུན་པ་རྣམས་ནམ་ཡིན་ན་དུར་རྐུན་དུ་འགྲོ་བ་ན། ཉིན་ཞིག་དུར་རྐུན་དཔོན་པོ་རྒྱལ་པོ་ཚང་གིས་བཟུང་བར་མ་ཟད་བསད་ནས་དེའི་རོ་དང་མཉམ་པར་དུར་དུ་སྦས་ནས་ཞག་གསུམ་སོང་བ་ན། ད་ཤི་རྒྱུ་རེད་ཤི་ན་ཤི་བསམ་ནས། ཤི་མ་གསོན་དུ་བསྡད་ཡོད་པའི་སྐབས་ན། སྤྱང་ཀི་ཞིག་གིས་དུར་བསལ་ནས་ཕྱི་རོལ་དུ་ཐར་པ་ན། བསམ་བློ་གཏོང་དུས་ལུས་འདིའི་ཐོག་ན་མྱོང་བའི་སྡུག་བསྔལ་བརྩི་གྲངས་མེད་པ་ཞིག་མྱངས་སོང་། ཤི་ན་ཤི་རྒྱུ་མེད་པར་ཤི་ཁར་ཡར་ཐར་ཡོང་། ད་ནི་འཁོར་བའི་སྡུག་བསྔལ་དང་འདོད་པའི་ཉེས་དམིགས་ལ་དམུས་སོང་བ་ཡིན། སྡོན་ཆད་གོ་མྱོང་བ་ཞིག་ལ་ཤཱཀྱའི་སྲས་པོ་ཞིག་མངོན་པར་བྱང་ཆུབ་བརྙེས་ནས་སྡུག་བསྔལ་རྒྱུ་དང་བཅས་པ་སྤངས་པ་ཞིག་ཡོད་ལ། མཚན་སངས་རྒྱས་དང་། དེས་མི་མཁྱེན་པ་གང་ཡང་མེད་པས་ཀུན་མཁྱེན་ཡང་ཞུ་ཞེས་གོ་མྱོང་། ད་དེ་ལ་སྐྱབས་སུ་འགྲོ་དགོས་བསམ་ནས། རྒྱལ་བུ་རྒྱལ་བྱེད་ཀྱི་ཚལ་སངས་རྒྱས་བཞུགས་ཡོད་པ་དེར་སོང་ནས་དེ་བཞིན་གཤེགས་པ་མཇལ་བ་ན། འཁོར་ཉན་ཐོས་དགྲ་བཅོམ་གྱི་དབུས་ན་བཅོམ་ལྡན་འདས་སྐར་ཚོགས་ཀྱི་དཀྱིལ་ན་ཉ་གང་གི་ཟླ་བ་ཤར་བ་བཞིན། སྐུ་གཟི་བརྗིད་དང་ལྡན་པ། མཐོང་ན་མི་མཐུན་པར་མེད་པ། དང་བ་ལྷག་པར་འདྲེན་པ་ཞིག་མཛད་ནས་བཞུགས་ཡོད་པ་ན། བཅོམ་ལྡན་འདས་ཀྱིས་ཐོགས་པ་མེད་པར་མཁྱེན་པའི་ཡེ་ཤེས་ཀྱིས་གཟིགས་ནས། འཁོར་གྱི་དབུས་ནས་མོའི་མདུན་དུ་བྱོན་པ་དང་། མོ་སྒྲེན་མོ་ལག་པ་དང་ཁ་སར་གཏད་དེ་བསྡད་པ་ན། བཅོམ་ལྡན་འདས་ཀྱིས་ཀུན་དགའ་བོ་ལ་བུད་མེད་འདི་ལ་གོས་སྐོན་ཅིག་གསུངས་པས། ཀུན་དགའ་བོས་གོས་ཤིག་གནང་། དེ་ནས་མོས་བཅོམ་ལྡན་འདས་ལ་ཕྱག་འཚལ་ནས། བདག་ལས་ངན་པ་ལ་ཐུགས་བརྩེ་བས་དགོངས་ཏེ་རབ་ཏུ་དབྱུང་བར་གསོལ་བ་བཏབ་པས། བཅོམ་ལྡན་འདས་ཀྱིས་ཀུན་དགའ་བོ་ལ་འདི་སྐྱེ་དགུ་བདག་མོ་ལ་གཏད་དེ་རབ་ཏུ་ཕྱུངས་ཤིག་གསུངས་པས། སྐྱེ་དགུ་བདག་མོའི་དྲུང་དུ་སོང་ནས་རབ་ཏུ་བྱུང་ཞིང་བསྙེན་པ་རྫོགས། ཆོས་གོས་རྣམ་གསུམ་གྱོན། དེའི་མདུན་ནས་བདེན་བཞིའི་ཆོས་ཞུས། བརྩོན་འགྲུས་རྩོམ་པས་ད་ལྟ་འདི་བཞིན་དུ་དགྲ་བཅོམ་ཐོབ་ནས་མངོན་ཤེས་ལ་སོགས་པའི་ཡོན་ཏན་དང་ལྡན་པ་ཡིན་ཞེས་གསུངས་པས། དགེ་སློང་མ་གསར་བུ་རྣམས་ངོ་མཚར་སྐྱེས་ནས། ཁྱེད་ཀྱིས་དེ་འདྲའི་སྡུག་བསྔལ་མང་པོ་མྱོང་ཡང་། མཐར་སངས་རྒྱས་བཅོམ་ལྡན་འདས་དང་མཇལ་ནས་འདི་འདྲའི་ཡོན་ཏན་ཐོབ་པ་སྔོན་ལས་ཅི་ཞིག་བགྱིས་པས་ཡིན་ཞེས་ཞུས་པས། དགེ་སློང་མ་ཨུཏྤལའི་མདོག་གིས་སྔར་གྱི་ལས་བསགས་ལུགས་དང་ལས་འབྲས་བསླུ་མེད་མྱོང་ཚུལ་མངོན་ཤེས་ཀྱིས་གཟིགས་ཏེ་གསུངས་པས། དགེ་སློང་མ་གསར་བུ་ཚང་མ་འཁོར་བའི་ཆོས་ལ་ཞེན་པ་གཏིང་ནས་ལོག ཐར་པའི་ཆོས་ལ་སྤྲོ་བ་སྙིང་ནས་སྐྱེས་ཏེ་བརྩོན་འགྲུས་བརྩམས་ཏེ་སྒོམ་པས་ཐམས་ཅད་ཀྱིས་འབྲས་བུ་ཐོབ། འཁོར་བའི་རྒྱ་མཚོའི་ཕ་མཐར་བརྒལ་བ་རེད། དེའི་ཚུལ་བཅོམ་ལྡན་འདས་ཀྱིས་མཁྱེན་ནས། དགེ་སློང་མ་ཨུཏྤལའི་མདོག་གིས་ཆོས་ལེགས་པར་བསྟན་ཏོ་ཞེས་ལེགས་སོའི་དབུགས་དབྱུང་གནང་ངོ་། །ད་འཁོར་བའི་གནས་འདིར་འཁྱམས་ནས་ལས་ལས་བྱས་བྱས་ཐམས་ཅད་དེ་འདྲའི་སྡུག་བསྔལ་རྒྱུ་འབྲས་གཉིས་ཁོ་ན་རེད། ལས་སྔ་མའི་སྡིག་པའི་འབྲས་བུ་སྡུག་བསྔལ་མི་བཟོད་པ་ཞིག་མྱོང་བཞིན་དུ། ཡང་ཕྱི་མའི་གནས་སྐབས་སུ་དེ་བས་ཆེ་བའི་སྡུག་བསྔལ་མྱང་བའི་རྒྱུ་ལས་ངན་གྱི་ས་བོན་དེ་ཕར་འདེབས་པ། དགེ་སློང་མ་ཨུཏྤལའི་མདོག་གི་ཚེ་སྟོད་ཀྱི་གནས་ཚུལ་ཕྱོགས་མཚུངས་འདྲ་བ་ཁོ་ན་ཡིན། ཁ་སོ་དཀར་ནས་མགོ་སྐྲ་མ་དཀར་གྱི་བར་དུ་དེ་འདྲ་ཤ་སྟག་མྱོང་བས། འདུ་བ་རྣམ་བཞིའི་ཐང་ལ་མ་ཕྱིན་གྱི་བར་དུ་མྱོང་རྒྱུ་དེ་འདི་ནས་གསུངས་པ་ལྟར་ཡིན་པས་ན། ཨོ་རྒྱན་རིན་པོ་ཆེས། ཀྱེ་ཁྱོད་འདྲ་བའི་ལས་ངན། ཁྱོད་ཀྱིས་སྲིད་པ་འཁོར་བའི་གནས་འདིར་ཞེན་ནས་དོན་མེད་འཁྲུལ་པའི་བྱ་བ་ཇི་སྙེད་ཅིག་བྱས་ཀྱང་དོན་ཆེན་འགག་ལ་ཐུག གློ་བུར་འཆི་བདག་གི་ཞགས་ནག་སྐེ་ལ་ཐེབས་པ་ན་སྐྱབས་མེད་མགོན་བྲལ་དེ་དང་དེ་འདྲ་བ་ཡིན་ཞེས་གསུངས་པ་ཐོས་པས། བསམ་བློ་ཡང་ཡང་བཏང་ནས་སྔར་བྱས་ཀྱི་ལས་ལ་ལྷག་པར་འགྱོད་པ་སྐྱེས། ཚེ་འདིའི་བྱ་བ་ཅི་བསྒྲུབ་ཐམས་ཅད་སྡུག་བསྔལ་ཁོ་ནའི་རང་བཞིན་དུ་ཤེས་ནས། ཨོ་རྒྱན་ཆེན་པོ་ལ་གསོལ་བ་ཕུར་ཚུགས་སུ་ཞེས་པ་སྤང་ལ་བེ་ཕུར་བཏབ་པ་འདོན་མི་ཐུབ་པ་ལྟར་འདེབས་པའི་སྣང་བ་ཤར་བ་ན། གུ་རུ་རིན་པོ་ཆེ་དང་རྩ་བའི་བླ་མ་དབྱེར་མེད་པའི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་ཞིག་བྱུང་བ་རང་གི་སྙིང་གར་ཟུག་པ་དང་དུས་མཉམ་དུ་པདྨ་འོད་ཀྱི་ཞིང་དུ་སྐད་ཅིག་ལ་སྐྱེས་ནས། སེམས་ཅན་ཐམས་ཅད་འདྲེན་པའི་དེད་དཔོན་དམ་པར་གྱུར་པར་བསམ་ལ་མཐར་འཇོག་སྒོམ་གྱི་ངང་དུ་ཤེས་པ་རང་བབས་སུ་བཞག་ལ་ངལ་གསོ་བར་བྱའོ། །འཆི་བ་མི་རྟག་པ་ཡང་ཡང་བསྒོམ་ན་སྡུག་བསྔལ་གྱི་རྒྱུ་དོན་མེད་ཀྱི་བྱ་བས་མི་ཚེ་ཆུད་ཟོས་སུ་མི་བྱེད། དེས་ན་གླང་པོ་ཆེའི་རྗེས་ལ་བརྟེན་ནས་ལམ་ལ་སོང་ན་གཡང་སར་འཆོར་བའི་ཉེན་ཁ་མེད་པ་བཞིན་དུ་འཆི་བ་མི་རྟག་པ་སྒོམ་པ་འདི་འདུ་ཤེས་ཐམས་ཅད་ཀྱི་མཆོག་ཏུ་གསུངས་ཤིང་། འཆི་བ་མི་རྟག་པ་བསྒོམས་ནས་ངེས་འབྱུང་རྒྱུད་ལ་སྐྱེས་པའི་ཚད་ཇི་ལྟར་ཡིན་པའི་དཔེ་མང་དུ་གསུངས་ཏེ། དཔེར་ན་སྐྱེས་བུའི་སྙིང་ལ་མདས་ཟིན་པ་ལྟ་བུ་ཞིག་དགོས་ཏེ། སྙིང་ལ་མདས་ཟིན་ན་གསོན་པོར་རེ་བ་མེད་ཅིང་ཤི་རྒྱུ་མ་གཏོགས་དྲན་རྒྱུ་མེད་ལ། ཡང་ཐར་མེད་ཀྱི་གཡང་ས་མཐོན་པོ་ནས་ལྷུང་བ་ལྟ་བུ་ཞིག་དགོས། གཡང་གཟར་ནས་རྡེག་འཆའ་སྟེ་ལྷུང་ན་ཐར་འོང་བསམ་རྒྱུ་ཞིག་མེད་པ་གཞི་བཞག་རེད། ཡང་སྐྱེལ་མས་བསླུས་པ་ལྟ་བུ་ཞིག་དགོས། སྐྱེལ་མར་བྱེད་ཁུལ་གྱིས་ཇག་ཚང་དུ་ཁྲིད་ནས་ཇག་པའི་དཀྱིལ་དུ་ཚུད་ན་འོང་རྒྱུ་གཅིག་མ་གཏོགས་མེད་པ་བཞིན་དང་། ཡང་རྒྱ་མཚོའི་གླིང་དུ་གཟིངས་ཞིག་པ་དང་། ཆུ་བོ་ཆེན་པོར་གྲུ་རྡིབ་པ་ལྟ་བུ་དགོས་ཏེ་དེ་དག་ལ་ད་དུང་ཨེ་ཐར་བསམ་རྒྱུའི་རེ་བ་ཞིག་གང་ན་ཡོད། ཉེས་ཅན་ལ་སྲོག་གི་ཆད་པ་ཕོག་ནས་གསོད་མཁན་ཤན་པའི་ལག་ཏུ་ཐོན་པ་ལྟ་བུ་ཡིན། དེ་ལྟར་ཡིན་པ་ལ་ཡིན་རྒྱུའི་ངེས་ཤེས་དེ་ལྟར་དུ་ཡོད་ན། འཁོར་བའི་སྡུག་བསྔལ་ལ་འཇིགས་སྐྲག་སྐྱེས་ཤིང་། ནམ་འཆི་ཆ་མེད་དང་འཆི་ཚེ་དམ་པའི་ཆོས་མིན་པ་གཞན་གྱིས་མི་ཕན་པར་ཤེས། འཇིག་རྟེན་ཚེ་འདིའི་བྱ་བ་བློས་བཏང་ནས་སྒོ་གསུམ་ཆོས་ལ་བཀོལ་ཐུབ་པ་སོགས་ནི་མི་རྟག་པ་བསྒོམས་ནས་ངེས་འབྱུང་དང་ཞེན་ལོག་སྐྱེས་པའི་ཚད་རེད། དེ་ལྟར་མ་བྱུང་གི་བར་དུ་སྒོམ་དགོས། དེ་ལྟར་མི་རྟག་པ་རྒྱུད་ལ་སྐྱེས་ན་ཕན་ཐོགས་ཅི་ཡོད་ཅེ་ན། རྒྱལ་བ་ཀློང་ཆེན་པས། དགེ་ལ་རབ་བརྩོན་ཚེ་འདི་འཁྲུལ་བར་ཤེས། །ཚོགས་གཉིས་རབ་རྫོགས་གྲགས་ལྡན་ལྷས་གཟིགས་ཤིང་། །བདེ་བ་ཚེ་ཡི་དུས་བྱེད་མཐོ་རིས་འགྲོ། །མྱུར་དུ་འཆི་མེད་བདུད་རྩིའི་གོ་འཕང་ཐོབ། །ཅེས་གསུངས་པས། ངོ་མ་མི་རྟག་པ་རྒྱུད་ལ་ཡག་པོ་ཞིག་གོམས་ན། འཁོར་བ་ལ་སྐྱོ་ཤས་དང་ངེས་འབྱུང་སེམས་གཏིང་ནས་སྐྱེས་པས་ཚེ་འདིའི་བྱ་བཞག་ལ་ཞེན་ལོག་རྒྱུད་ལ་མི་སྐྱེ་བའི་དབང་མེད། དེ་སྐྱེས་ན་སྔར་མེད་ཀྱི་ཡོན་ཏན་མང་པོ་རྒྱུད་ལ་སྐྱེས། རྟག་འཛིན་གྱི་བློ་ལོག དགྲ་གཉེན་ལ་ཆགས་སྡང་མི་ཆེ། དུས་རྟག་ཏུ་དགེ་བ་ལ་བརྩོན། ཚེ་འདི་འཁྲུལ་སྣང་དུ་ཡིན་པར་ཤེས། ཚོགས་གཉིས་མྱུར་དུ་མཉམ་པོར་རྫོགས། སངས་རྒྱས་དང་བྱང་སེམས་རྣམས་ཀྱིས་དགོངས་ཤིང་གཟིགས་པ་དང་། ཚེ་འདིར་དགའ་ཞིང་སྤྲོ་བ་དང་བཅས་པའི་ངང་ནས་བདེ་བར་གནས། ཕྱི་མར་གནས་སྐབས་མཐོ་རིས་དང་མཐར་ཐུག་ཐམས་ཅད་མཁྱེན་པའི་གོ་འཕང་ཐོབ་ནས་བདེ་ནས་བདེ་བའི་སར་འགྲོ་ཐུབ་པ་སོགས་དེ་ལྟར་ཡིན་ནོ། །མདོ་མྱང་འདས་ལས། ཞིང་རྨོ་བ་ཐམས་ཅད་ཀྱི་ནང་ནས་སྟོན་གྱི་ལོ་ཏོག་ལེན་པ་མཆོག་ཡིན། རྗེས་ཐམས་ཅད་ཀྱི་ནང་ནས་ཁྱུ་མཆོག་གི་རྗེས་མཆོག་ཡིན། འདུ་ཤེས་ཐམས་ཅད་ཀྱི་ནང་ནས་མི་རྟག་པ་སྒོམ་པ་མཆོག་ཡིན་ཞེས་དང་། མཆོག་ཡིན་པའི་རྒྱུ་མཚན་ནི། འབྲས་བུ་ཁམས་གསུམ་གྱི་འདུ་ཤེས་ལས་བཟློག་པར་འགྱུར་རོ། །ཞེས་གསུངས་པས། ཁམས་གསུམ་གྱི་འདུ་ཤེས་ལས་བཟློག་ན་ཐར་པ་མ་གཏོགས་འགྲོ་ས་མེད་ཅིང་། ད་དུང་འདུལ་བ་ལུང་ལས། དགེ་སློང་བརྒྱ་ལ་གདུགས་ཚོད་ཡོན་དང་བཅས་པ་བྱིན་པ་བས། འདུས་བྱས་མི་རྟག་པ་སྐད་ཅིག་མ་གཅིག་དྲན་པ་མཆོག་གོ་ཞེས་གསུངས་པས་ན། དེ་ལྟ་བུའི་ཕན་ཡོན་དང་དགོས་པ་ཁྱད་པར་ཅན་ཡིན་པར་དྲན་ནས། འགྲོ་འཆག་ཉལ་འདུག་གི་སྤྱོད་ལམ་ཐམས་ཅད་དུ་འཆི་བ་མི་རྟག་པ་དྲན་དགོས། འགྲོ་ན་ལམ་མི་རྟག སྡོད་ན་གནས་མི་རྟག ཉལ་ན་གནས་མལ་མི་རྟག བཟའ་བཏུང་ལོངས་སྤྱོ་ཐམས་ཅད་དེ་བཞིན་དུ་མི་རྟག སེམས་ཀྱིས་དྲན་པའི་རྣམ་རྟོག་མི་རྟག ཁ་ནས་བཤད་པའི་བརྗོད་པའི་ངག་མི་རྟག བྱ་བའི་ལས་ཀ་རྣམས་དེ་བས་ཀྱང་མི་རྟག མདོར་ན་རྟག་པ་གཅིག་ཀྱང་མེད་པར་བསམ་ནས། མདོ་སྡེ་ལས་བརྒྱ་པས། རྟག་ཏུ་སྤྱོད་ཡུལ་ཐམས་ཅད་དུ། །འཆི་བདག་རྗེས་སུ་དྲན་པར་བྱ། །ཞེས་པ་ལྟར་བསྒོམ་དགོས། དེ་ལྟར་བསྒོམས་ནས་ཐུན་གྱི་མཇུག་ཏུ་གོང་དུ་གསུངས་པ་ལྟར་བླ་མ་དང་ཨོ་རྒྱན་པད་འབྱུང་གི་ཐུགས་དང་རང་སེམས་དབྱེར་མེད་དུ་འདྲེས་ནས་སེམས་ཅན་ཐམས་ཅད་ཀྱི་འདྲེན་པའི་དེད་དཔོན་དམ་པར་འགྱུར་བར་བསམ་སྟེ་མ་བཅོས་པའི་ངང་དུ་མཉམ་པར་འཇོག དེའི་མཉམ་བཞག་དེ་ལས་ལངས་ནས་གོང་དུ་བསྒོམ་རྒྱུའི་འདུས་པ་ཐམས་ཅད་མི་རྟག་པར་བསམ་པ་དང་། བྱས་པ་ཐམས་ཅད་སྡུག་བསྔལ་གྱི་རྒྱུར་བསམ་ནས། དེ་ལྟར་མ་རྟོགས་པའི་འཁོར་བར་འཁྱམས་པའི་སེམས་ཅན་ཐམས་ཅད་སྡུག་བསྔལ་བདེན་པས་དངོས་སུ་གནོད། ཀུན་འབྱུང་བདེན་པས་བརྒྱུད་ནས་གནོད་དེ་ཀུན་འབྱུང་ལས་ཉོན་གྱི་འབྲས་བུ་ཁམས་གསུམ་འཁོར་བའི་སྡུག་བསྔལ་ལ་སྤྱོད་པ་འདི་ཐམས་ཅད་སྡུག་བསྔལ་དང་བྲལ་ཞིང་བདེ་བ་དང་ལྡན་ན་ཅི་མ་རུང་སྙམ་པ་འདུན་པ་དང་འབྲེལ་བ། དེ་ལྟར་སྡུག་བསྔལ་དང་བྲལ་ཞིང་བདེ་བ་དང་ལྡན་པར་གྱུར་ཅིག་སྙམ་པ་སྨོན་པ་དང་འབྲེལ་བ། བདེ་བ་དང་ལྡན་སྡུག་བསྔལ་དང་བྲལ་བར་ངས་བྱའོ་སྙམ་པ་དམ་བཅའ་དང་འབྲེལ་བ་དང་འབྲེལ་བ་གསུམ། དེའི་སྟེང་དུ་སེམས་ཅན་ཐམས་ཅད་སྡུག་བསྔལ་དང་བྲལ། བདེ་བ་དང་ལྡན་པ་བླ་མ་དཀོན་མཆོག་གསུམ་ཁྱེད་མཁྱེན་སྙམ་པ་གསོལ་འདེབས་དང་འབྲེལ་བ་སྟེ་འབྲེལ་བ་བཞི་དང་ལྡན་པའི་ཉམས་ལེན་གྱི་གནད་དང་མི་འབྲལ་བའི་སྒོ་ནས། དགེ་བ་སེམས་ཅན་ལ་བསྔོས་ནས་ཐུན་མཚམས་སྤྱོད་ལམ་ལ་འཇུག་དགོས། ཐུན་མཚམས་ཀྱི་སྐབས་སུའང་བླང་དོར་གྱི་གནས་མི་བརྗེད་པའི་དྲན་པ་སྒོ་སྲུང་ལྟ་བུ་དང་། སྒོ་གསུམ་ལ་ཡང་ཡང་བརྟག་པར་བྱེད་པའི་ཤེས་བཞིན་བྱ་ར་བ་ལྟ་བུ། སྤང་བླང་གི་གནས་ལ་གཟོབ་པ་ལྷུར་ལེན་པ་བག་ཡོད་བག་མ་གསར་པ་ལྟ་བུའི་ངང་ཚུལ་གསུམ་དང་མི་འབྲལ་བར་བྱེད་དགོས། དེ་ལྟར་རང་གིས་རང་ཉིད་ལམ་ལ་བཞག་ནས། རང་རྒྱུད་རང་གིས་བརྟགས་དཔྱད་བྱས་ནས་དམ་པ་གོང་མའི་རྣམ་ཐར་གྱི་རྗེས་སུ་འབྲངས་ཏེ། ནངས་རེ་བཞིན་དུ་དམ་བཅའ། ཐུན་རེ་བཞིན་དུ་བརྟགས་དཔྱད་གཏོང་ན། རང་ཉིད་ཉེས་པ་ལས་ལྡོག་ནས་ལེགས་པའི་ལམ་ལ་བསྐྱོད་ཐུབ་པར་མ་ཟད། འབྲེལ་ཚད་ལ་ཕན་རེ་ཐོགས་རྒྱུའི་ས་ཚོད་ལ་འཐོན་སླ་བ་ཡིན་ནོ།།

ཉིན་ལྔ་བའི་ཆོས་ཁྲིད།

ཇི་སྐད་དུ། རྒྱལ་བའི་དབང་པོ་ཀློང་ཆེན་པས། ཅིས་ཀྱང་དགོས་མེད་བསམ་པའི་ཆོས་དྲུག་ནི། །ལམ་སྣ་མ་ཟིན་གང་བྱས་དགོས་པ་མེད། །དགེ་བ་མ་བསྒྲུབས་ཅིས་ཀྱང་དགོས་པ་མེད། །ཆོས་ལ་མ་སྤྱད་ཚེ་རིང་དགོས་པ་མེད། །ཆོས་མིན་གཞན་གྱིས་ཕན་བཏགས་དགོས་པ་མེད། །ཚོགས་གཉིས་མ་བསགས་ཡོ་བྱད་དགོས་པ་མེད། །བྱང་ཆུབ་མ་བསྒྲུབས་ཅིས་ཀྱང་དགོས་པ་མེད། །ཅེས་གསུངས་པ་ལྟར། ཐེག་པ་ཆེན་པོའི་ཆོས་སྒོ་ལ་ཞུགས། དམ་ཆོས་རྣམ་དག་ཅིག་སྒྲུབ་པའི་སྐབས་འདིར། འཇིག་རྟེན་ཚེ་འདིའི་བྱ་བཞག འདི་སྣང་འཁོར་བའི་སོ་ཚིས་ལ་དགོས་མེད་སྙིང་ནས་དྲན་ཏེ། ངེས་འབྱུང་གིས་བློ་སྣ་བསྟུངས་ཏེ་ཆོས་ལ་ཕྱི་བཀྱེད་མེད་པ་ཞིག་དགོས། དེས་ན་ཀུན་མཁྱེན་རྒྱལ་བ་ཀློང་ཆེན་པས། ལམ་སྣ་མ་ཟིན་གང་བྱས་དགོས་པ་མེད། །ཅེས་གསུངས་པས་ད་རེས་དལ་འབྱོར་ཚང་བའི་རྟེན་བཟང་རྙེད་པའི་དོན་སྒོ་ནི། ཐར་པའི་ལམ་སྣེ་ཟིན་པ་ཞིག་མ་རེད་ན་དེ་མིན་ཚེ་སྲིང་བྱེད། དཔའ་སྐྱེད་བྱེད། ལོངས་སྤྱོད་ཀྱི་འབྱོར་པ་རྒྱས་བྱེད། ཕྱི་མར་མངོན་མཐོའི་རྟེན་ཙམ་ཐོབ་བྱེད་སོགས་ཀྱིས་ཅི་ཡང་དགོས་པ་མེད་ཅེས་གསུངས་པ་རེད། དགེ་བ་མ་བསྒྲུབ་ཅིས་ཀྱང་དགོས་པ་མེད། །ཅེས་པས་དཀར་པོ་དགེ་བའི་ལས་ཀྱིས་རང་གཞན་ཐར་ལམ་ལ་འགོད་པའི་གཞན་ཕན་ཞིག་མ་འགྲུབ་ན་གཞན་ཅི་འགྲུབ་ཀྱང་དགོས་པ་མེད་པ་དང་། ཆོས་ལ་མ་སྤྱོད་ཚེ་རིང་དགོས་པ་མེད། །ཅེས་མཐོ་རིས་མིའི་ལུས་དལ་འབྱོར་ཚང་བའི་རྟེན་བཟང་འདི་ལྟ་བུ་ཞིག་ཐོབ་དུས། རྟེན་འདིའི་སྙིང་པོ་མ་ལེན། དགོས་པའི་དོན་ཆེན་ཞིག་མ་བསྒྲུབས། ཡང་དག་པའི་དོན་ཞིག་མ་འགྲུབ་ན། རྣམ་གཡེང་དོན་མེད་ཀྱིས་དུས་གྲོན་པའི་སྡུག་ཚེ་ཇི་ལྟར་རིང་ཡང་དགོས་པ་མེད། ཆོས་མིན་གཞན་གྱིས་ཕན་བཏགས་དགོས་པ་མེད། །ཅེས་གཞན་ལ་ཕན་བཏགས་ན་རང་གཞན་གཉིས་ལ་འདི་ཕྱི་གཉིས་ཕན་གྱི་དམ་ཆོས་རྣམ་པར་དག་པ་ཞིག་གིས་ཕན་གདགས་ན་དོན་ལ་གནས་པའི་ཕན་བཏགས་པ་ཡིན་མ་གཏོགས། ཟང་ཟིང་གི་རྒྱུ་ནོར། ཚེ་འདིའི་སྙན་གྲགས་མངའ་ཐང་རྒྱས་ཐབས་སོགས་ཅི་འདྲ་ཞིག་འགྲུབ་ནའང་མི་ཕན་པར་མ་ཟད་གནོད་པའི་གཞི་མར་ཡིན་པས་ཕན་མི་ཐོགས་པ་དང་། ཚོགས་གཉིས་མ་བསགས་ཡོ་བྱད་དགོས་པ་མེད། །ཅེས་པས་གནས་སྐབས་དང་མཐར་ཐུག་གི་དགེ་ལེགས་སྒྲུབ་ཐབས་ངོ་མ་བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་པའི་ནོར་དེ་གཉིས་མ་གཏོགས། འཇིག་རྟེན་ཕལ་པའི་ཡོ་བྱད་ཆགས་ཞེན་སྲེད་པའི་འཆིང་ཐག་ཡིན་པས་དགོས་པ་མེད་པ་དང་། བྱང་ཆུབ་མ་བསྒྲུབས་ཅིས་ཀྱང་དགོས་པ་མེད། །ཅེས་མདོར་ན་བྱང་ཆུབ་ཆེན་པོ་སངས་རྒྱས་ཀྱི་གོ་འཕང་བསྒྲུབས་ནས་མཐར་ཐུག་སེམས་ཅན་ཐམས་ཅད་གཏན་གྱི་བདེ་བ་བླ་ན་མེད་པ་ལ་འགོད་པའི་རླབས་ཆེན་གྱི་སྤྱོད་པ་དེ་མ་གཏོགས་པར། སྙིང་མེད་ཆོས་ལྟར་བཅོས་པའི་ཆོས་མིན་ལྟར་སྣང་གི་བྱ་སྤྱོད་ཀྱིས་ཅི་ཞིག་ཕན་ཏེ་ཅི་ཡང་དགོས་པ་མེད་ཅེས་གསུངས་པས། དེ་ལྟ་བུ་དགོས་མེད་དྲུག་གི་ཕྱོགས་ལ་མགོ་མི་འཁོར་བར། ལོང་མེད་མི་ཚེའི་དུས་ཚོད་ཐུང་ངུ་འདི་ལ་འཁྲུལ་མེད་རྒྱལ་བ་དགྱེས་པའི་ལམ་ལ་ཞུགས་རྒྱུ་གནད་ཤིན་ཏུ་ཆེ་ལ། དེས་ན་འདི་ན་ཡང་བསྐྱར་ལས་དང་པོ་བའི་གང་ཟག གསར་དུ་ཆོས་སྒོར་ཞུགས་པ་ཞིག་གི་ཚོད་དང་བསྟུན་ཏེ་དམ་པའི་ཆོས་བསྒྲུབ་པའི་སྐབས་སུ་མ་ཤེས་ཐབས་མེད་ཀྱི་གནད་འགའ་རེ་ཞུ་ན། སྤྱིར་ན་ཤེས་བྱའི་ཆོས་ཞེས་པ་རྣམ་གྲངས་མང་པོ་ཞིག་ཡོད་པས། ཤེས་བྱ་ནམ་མཁའི་གཟའ་སྐར་འདྲ། །བསླབ་དགོས་གནས་ལ་ཟད་པ་མེད། ཅེས་གསུངས་ཡོད་པ་རེད། འོན་ཀྱང་ཤེས་བྱའི་ཆོས་ཐམས་ཅད་ཚུར་བསྡུ་ན། འཁོར་བ་དང་མྱ་ངན་འདས་པ་གཉིས་ཀྱི་ནང་དུ་འདུས་ལ། དེའི་ནང་ནས་འཁོར་བ་ཞེས་པ་དེ་ཅི་འདྲ་ཞིག་ཡིན་ན། འཁོར་བའི་རང་བཞིན་སྟོང་ཉིད། རྣམ་པ་འཁྲུལ་བར་སོང་བ། མཚན་ཉིད་སྡུག་བསྔལ་དུ་ཤར་བ་ཡིན། མྱ་ངན་ལས་འདས་པ་ནི། དེ་ཡང་རང་བཞིན་སྟོང་པ་ཉིད་ལས་མ་འདས་པ། རྣམ་པ་མ་འཁྲུལ་བ། མཚན་ཉིད་སྡུག་བསྔལ་ཐམས་ཅད་ལས་གྲོལ་བ་ཞིག་རེད། དེ་ཡིན་ན་འཁོར་བའི་གནས་སུ་འཁྲུལ་བར་འཁྱམས་རྒྱུའི་འཁྲུལ་མཁན་སུ་ཞིག་འཁྲུལ་ན། ཁམས་གསུམ་འཁོར་བའི་སེམས་ཅན་འཁྲུལ། འཁྲུལ་ལུགས་ཀྱི་ཐད་ནས་གཞི་གང་ལས་འཁྲུལ་ན། གཞི་སྟོང་པ་ཉིད་ཀྱི་ངང་ནས་འཁྲུལ། རྒྱུ་ཅི་ཞིག་གིས་འཁྲུལ་ན། རྒྱུ་མ་རིག་པའི་དབང་གིས་འཁྲུལ། ཚུལ་ཇི་ལྟར་འཁྲུལ་ན། འགྲོ་བ་རིགས་དྲུག་གི་སྤྱོད་ཡུལ་དུ་འཁྲུལ། འཁྲུལ་བའི་དཔེ་འཇོག་ན། གཉིད་དང་རྨི་ལམ་ལྟ་བུ་འཁྲུལ། དུས་ཇི་ཙམ་དུ་འཁྲུལ་ན། དུས་འཁོར་བ་ཐོག་མེད་ནས་འཁྲུལ་སོང་བ། འཁྲུལ་བ་དེའི་སྐྱོན་ཆ་ཅི་ཡོད་ན། འཁྲུལ་བ་དེའི་དབང་གིས་སྡུག་བསྔལ་ཁོ་ན་མྱོང་དགོས་པ་ནི་འཁྲུལ་བ་དེའི་སྐྱོན་རེད། འཁྲུལ་བ་དེ་མ་འཁྲུལ་བའི་ཡེ་ཤེས་སུ་ནམ་འགྱུར་ན། བླ་ན་མེད་པའི་བྱང་ཆུབ་དམ་པ་ཐོབ་དུས་འཁྲུལ་བ་ཡེ་ཤེས་སུ་འགྱུར་བ་རེད། འཁྲུལ་བ་དེ་རང་སངས་སུ་འགྲོ་རྒྱུར་ཨེ་ཡོད་ཟེར་ན། དེ་མེད་པས་འཁོར་བ་མཐའ་མེད་ཡིན་པར་ཀུན་ལ་གྲགས་ཤིང་ཡོངས་སུ་གྲུབ་པ་ཞིག་རེད། དེས་ན་འཁོར་བ་འདི་འཁྲུལ་བ་ཡིན་པ་དང་། སྡུག་བསྔལ་དེ་འདྲ་ཆེ་བ། འཁྲུལ་བའི་དུས་ཡུན་རིང་བ་ཐོག་མེད་དང་མཐའ་མེད་ལ་བསམ་བློ་བཏོང་ན། གོང་དུ་ཀུན་མཁྱེན་ཆེན་པོའི་གསུང་ལུང་དྲངས་པ་བཞིན་དུ་དགོས་མེད་དྲུག་གིས་བློ་སྣ་བསྟུང་རྒྱུ་དེ་ཞེ་ལ་བཟུང་སྟེ། ད་རེས་བླ་མེད་བྱང་ཆུབ་སྒྲུབ་པའི་ཐབས་ལམ་གང་དྲག་ལ་འབད་རན་པའི་དུས་ཚོད་མ་སྔ་མ་ཕྱི་བར་རང་གཞན་སུ་ལ་བལྟས་ན་དེ་ལྟར་རེད་ཡོད། བླ་མེད་བྱང་ཆུབ་དམ་པ་དེ་ལ་ཇི་ལྟར་བྱས་ནས་འབད་དགོས། འགོ་གང་ནས་བཟུང་། སྐེད་པ་ཇི་ལྟར་བསྐྱང་། མཐའ་ཇི་ལྟར་ཕུད་དགོས་པ་རེད་ཟེར་ན། བླ་མེད་བྱང་ཆུབ་སྒྲུབ་པའི་རྒྱུ་དང་གཅིག སྒྲུབ་པའི་གང་ཟག་གི་རྟེན་དང་གཉིས། བསྒྲུབ་པ་སྙིང་པོ་ལ་སྐུལ་བར་བྱེད་པའི་རྐྱེན་དང་གསུམ། དེ་སྒྲུབ་པའི་ཐབས་དང་བཞི། གྲུབ་པའི་འབྲས་བུ་དང་ལྔ། གྲུབ་ནས་མཛད་པ་ཕྲིན་ལས་དང་དྲུག་གི་སྒོ་ནས་ཤེས་པར་བྱ་བ་ཞིག་ཡིན་ལ། གཞི་རྒྱུ་བདེ་གཤེགས་སྙིང་པོ་ཡིན། སྒྲུབ་པ་པོའི་གང་ཟག་དེ་ཉིད་ལ་གཞི་རྒྱུ་བདེ་གཤེགས་སྙིང་པོ་མེད་ན་སངས་རྒྱས་བསྒྲུབ་ཀྱང་འབྲས་བུ་འགྲུབ་པ་མི་འགྱུར་སྟེ། དཔེར་ན་གྲོ་ནས་ཀྱི་ས་བོན་ཞིང་ལ་བཏབ་ནས་སྨིན་པའི་རྐྱེན་དང་འཕྲད་ན་སྐྱེ་རྒྱུ་ཡོད་ལ། རྡོ་ས་འོག་ཏུ་སྦས་ན་འབྲས་བུ་མི་འབྱུང་བ་བཞིན་ནོ། །སྒྲུབ་པའི་རྟེན་མི་ལུས་རིན་པོ་ཆེ་རེད། རྟེན་དེས་རྫོགས་པའི་བྱང་ཆུབ་བསྒྲུབ་པ་ལ་སྒྲུབ་པ་སྙིང་པོར་བྱེད་དགོས། སྒྲུབ་པ་སྙིང་པོར་བྱེད་ན་དེ་ལ་སྐུལ་བར་བྱེད་པའི་རྐྱེན་ཞིག་དགོས། དེའི་རྐྱེན་ཡང་དག་པ་ནི་དགེ་བའི་བཤེས་གཉེན་རེད། དགེ་བའི་བཤེས་གཉེན་ཡོད་པ་ཙམ་གྱིས་མི་ཕན་པར། དེའི་གསུང་ལ་བརྟེན་ནས་སྤང་བླང་འཇུག་ལྡོག་གི་གནས་ཤེས་པར་དགོས་པས་ན། སྒྲུབ་པའི་ཐབས་དགེ་བའི་བཤེས་གཉེན་གྱིས་བསྟན་པའི་གདམས་ངག་ཟབ་མོ་ལག་ལེན་འདེབས་པ་ལ་བརྟེན་དགོས། ཐབས་དེའི་གདམས་ངག་དེས་གྲུབ་པའི་འབྲས་བུའི་མཆོག་གང་ཡིན་ན། རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ཡིན། འབྲས་བུ་རྫོགས་པའི་སངས་རྒྱས་ཐོབ་ནས་མཛད་པ་འཕྲིན་ལས་ལྷུན་གྲུབ་ཏུ་འབྱུང་བ་དང་བཅས་པ་སྟེ། དེ་ལྟར་དམ་པའི་ཆོས་སྒྲུབ་པའི་ཚུལ་ལམ་ཤེས་བྱ་སྤྱིའི་རྣམ་བཞག་མདོར་ཙམ་ཞིག་ཚིག་འགའ་རེའི་སྟེང་ནས་གོ་སོང་བ་རེད། འོ་ན་བླ་མེད་རྫོགས་པའི་བྱང་ཆུབ་ཀྱི་གོ་འཕང་ཞེས་པ། སྐུ་བཞི་ཡེ་ཤེས་ལྔའི་བདག་ཉིད་ཅན། དེ་ལ་སྟོབས་བཅུ་མི་འཇིགས་ལ་སོགས་ཡོན་ཏན་སུམ་ཅུ་སོ་གཉིས། མཚན་བཟང་གི་ཡོན་ཏན་སུམ་ཅུ་སོ་གཉིས་སྟེ་བྲལ་སྨིན་གྱི་ཡོན་ཏན་དྲུག་ཅུ་རྩ་བཞི་ཚང་བ། སྤང་བྱ་ལྷག་མར་མ་ལུས་པ་སྤངས་ཤིང་རྟོགས་བྱ་ལྷག་མར་མ་ལུས་པ་རྟོགས་སོང་བ་ཞིག་ཡིན་ན། །དེའི་གོ་འཕང་དེ་རང་རེ་ལྟ་བུའི་སོ་སོའི་སྐྱེ་བོའི་གང་ཟག་མ་དག་འཁོར་བའི་གནས་སུ་འཁྱམས་པ་ཞིག་གིས་འཐོབ་ནུས་པ་ཞིག་ཨེ་ཡིན། ཡིན་མིན་རྒྱུ་མཚན་དང་བཅས་པ་གང་ཡིན་ཞེ་ན། འབད་པས་སྒྲུབ་ན་སེམས་ཅན་གྱིས་སངས་རྒྱས་འཐོབ་ནུས་པ་ཡིན་ཏེ། སྲིན་བུ་པདྨ་ཡན་ཆད་ཀྱི་སེམས་ཅན་ཐམས་ཅད་ལ་གཞི་བདེ་གཤེགས་སྙིང་པོས་ཁྱབ་ཡོད་པའི་ཕྱིར་རོ། །འོ་ན་མངོན་སུམ་མཐོང་རྒྱུ་དང་རིག་རྒྱུ་མེད་པའི་ལྐོག་གྱུར་དང་ཤིན་ཏུ་ལྐོག་གྱུར་གྱི་རིགས་ལ་བདེ་བར་གཤེགས་པའི་བཀའ་ལུང་ཚད་མ་དང་དངོས་སྟོབས་ཀྱི་རིགས་པ་ཚད་མས་གཞལ་དགོས་ན། དེ་ལ་ལུང་ཅི་འདྲ་ཡོད་ཅེ་ན། མདོ་མྱང་འདས་ཆུང་བ་ལས། སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་དང་། མདོ་མྱང་འདས་ཆེ་བ་ལས། དཔེར་ན་འོ་མ་ལ་མར་གྱིས་ཁྱབ་པར་གནས་སོ། །དེ་བཞིན་དུ་དེ་བཞིན་གཤེགས་པའི་སྙིང་པོས་སེམས་ཅན་ཐམས་ཅད་ལ་ཁྱབ་པར་གནས་སོ། །ཞེས་གསུངས་པའི་ཕྱིར་དང་། ད་དུང་དེའི་སྐོར་གྱི་མདོ་དང་བསྟན་བཅོས་ཀྱི་ལུང་ཤིན་ཏུ་མང་པོ་ཡོད། འོ་ན་སེམས་ཅན་ཐམས་ཅད་སངས་རྒྱས་ཀྱི་སྙིང་པོ་ཅན་ཡིན་པའི་རིགས་པའི་སྒྲུབ་བྱེད་གང་ཡིན་ཞེ་ན། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་སེམས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་པས། ཆོས་སྐུ་སྟོང་ཉིད་ཀྱིས་སེམས་ཅན་ཀུན་ལ་ཁྱབ་པའི་ཕྱིར་དང་། ཆོས་ཉིད་དེ་བཞིན་ཉིད་ལ་དབྱེར་བ་མེད་པའི་ཕྱིར་དང་། སེམས་ཅན་ཐམས་ཅད་ལ་རིགས་ཡོད་པའི་རྒྱུ་མཚན་གསུམ་གྱིས་སངས་རྒྱས་ཀྱི་སྙིང་པོ་ཅན་དུ་སྒྲུབ་པ་རེད། དེས་ན་སེམས་ཅན་ལ་སངས་རྒྱས་ཀྱི་རིགས་ཡོད་པའི་རྒྱུ་མཚན་གྱིས། སྙིང་རྗེ་པདྨ་དཀར་པོ་ལས། སེམས་ཅན་མྱ་ངན་ལས་འདའ་བའི་སྐལ་བ་མེད་པ་ཞིག་གིས་སངས་རྒྱས་ལ་དམིགས་ཏེ་ཐ་ན་མེ་ཏོག་རྐང་གཅིག་ནམ་མཁར་འཐོར་ན་ཡང་། དེ་མྱ་ངན་ལས་འདས་པའི་འབྲས་བུ་ཅན་ཡིན། ཞེས་གསུངས་ཡོད། འོ་ན་སེམས་ཅན་ཐམས་ཅད་ལ་སངས་རྒྱས་པའི་རིགས་ཡོད་པའི་རྒྱུ་མཚན་གྱིས་སངས་རྒྱས་པ་ཡིན་ན། རིགས་དེ་ལ་རྣམ་གྲངས་ཇི་ལྟར་ཡོད་ཅེ་ན། སྤྱིར་རིགས་ཀྱི་རྣམ་གྲངས་དེ་ལ། རིགས་ཆད་དང་། མ་ངེས་པའི་རིགས་དང་། ཉན་ཐོས་དང་རང་སངས་རྒྱས་ཀྱི་རིགས་དང་། ཐེག་པ་ཆེན་པོའི་རིགས་ཅན་ཞེས་པའི་དབྱེ་བ་ཡོད། འོ་ན་རིགས་ཆད་ཡོད་ན། སངས་རྒྱས་ཀྱི་རིགས་མེད་པའི་སེམས་ཅན་ཡོད་པས། སེམས་ཅན་ལ་བདེ་གཤེགས་སྙིང་པོས་མ་ཁྱབ་པ་ཡོད་དམ་སྙམ་ན། རིགས་ཆད་ཅེས་པ་ནི་འཁོར་བའི་གནས་སུ་ཡུན་རིང་དུ་འཁྱམས་པ་ལ་དགོངས་ནས། དམན་ལ་དགག་སྒྲ་སྦྱར་བ་རེད། དེ་ཡིན་པའི་རྒྱུ་མཚན་ནི་གོང་དུ་དྲངས་པའི་ལུང་ལས། སེམས་ཅན་མྱ་ངན་ལས་འདའ་སྐལ་མེད་པ་ཞིག་གིས་སངས་རྒྱས་ལ་དམིགས་ནས་ཐ་ན་མེ་ཏོག་རྐང་གཅིག་ནམ་མཁར་འཐོར་ན་དེ་མྱ་ངན་ལས་འདས་པའི་འབྲས་བུ་ཅན་ཡིན་ནོ་ཞེས་པས་ཤེས་ནུས་ལ། རིགས་ཆད་གསུངས་སའི་སེམས་ཅན་དེ་ཅི་འདྲ་ཞིག་ཡིན་ན། འཁོར་བའི་སྐྱོན་རིག་ན་སྐྱོ་བ་དང་ངེས་འབྱུང་མི་སྐྱེ་བ་དང་། སངས་རྒྱས་ཀྱི་ཡོན་ཏན་མཐོང་ན་དད་པ་སྐྱེ་རྒྱུ་མེད་པ། དེའི་རྒྱུད་ལ་ཁྲེལ་དང་ངོ་ཚ་མེད་པ། སྙིང་རྗེ་མེད་པ། སྡིག་པ་ཇི་ལྟར་བྱས་ཀྱང་འགྱོད་པ་མེད་པ་སོགས་དེ་ལྟ་བུའི་རིགས་ལ་དགོངས་ཏེ་གནས་སྐབས་སུ་རིགས་ཆད་ཅེས་གསུངས་པ་རེད། དེའི་གྲལ་དུ་རང་ཉིད་ཐེ་ཡོད་མེད་བརྟགས་པ་དང་། མེད་ན་གཉེན་ཉེ་རིང་བུ་ཚ་རྒྱུད་སོགས་དེའི་གྲལ་དུ་ལྷུང་རྩིས་བྱེད་ན། རང་རེས་རོགས་ཆེ་ཐོན་ཆུང་ཐོན་གྱིས་སྐྱོབ་ཨེ་ཐུབ་བལྟ་དགོས། རྡོ་ལྗིད་མོ་ཆུ་ནང་ལྷུང་བ་ལྟར་ལ་ལ་སྐྱོབ་ཐབས་མེད་པའང་ཡོད་སྲིད་པ་རེད། མ་ངེས་པའི་རིགས་ཞེས་པ་གནས་སྐབས་རྐྱེན་གྱི་དབང་གིས་གཞན་དང་གཞན་དུ་བསྒྱུར་ཆོག་པ་ཞིག་རེད། ཉན་རང་གི་རིགས་དེ་འཁོར་བའི་སྡུག་བསྔལ་མཐོང་བས་འཇིགས་ཤིང་སྐྲག་ནས་ངེས་འབྱུང་གིས་བསྐུལ་ནས་མྱང་འདས་དོན་དུ་གཉེར་བར་བྱེད་པ། སེམས་ཅན་གཞན་དོན་ལ་མི་བརྩོན་པར་རང་ཉིད་ཞི་བདེ་ལ་དགའ་བའི་རིགས་ལ་གསུངས་པ་རེད། ད་དུང་རང་སངས་རྒྱས་ཀྱི་རིགས་འདྲ་ཡིན་ན། དེའི་སྟེང་དུ་ང་རྒྱལ་ཅུང་ཟད་ཆེ་བ། སློབ་དཔོན་གསང་བའི་སྒོ་ནས་བསྟེན་པ། རང་གཅིག་པུ་དབེན་པར་གནས་པ་ལ་དགའ་བ་ཡིན་པར་གསུངས། ཉན་རང་གི་རིགས་ཅན་དེ་དག་རང་རང་གི་ཐེག་པར་ཞུགས་ནས་རང་རང་གི་འབྲས་བུ་ཐོབ་ནའང་མཐར་ཐུག་གི་མྱ་ངན་འདས་པ་ངོ་མ་མིན་ཡང་། ཁོ་རང་ཚོ་ལ་མྱ་ངན་ལས་འདས་པ་ཡིན་པའི་འདུ་ཤེས་ཡོད་པ་རེད། འོ་ན་མཐར་ཐུག་གི་མྱ་ངན་ལས་འདས་པ་ངོ་མ་ཐོབ་བྱེད་མིན་པའི་ལམ་ཞིག་སངས་རྒྱས་བཅོམ་ལྡན་འདས་ཀྱིས་ཇི་ལྟར་བསྟན་པ་ཡིན་སྙམ་ན། དེ་བསྟན་པ་ལ་དགོས་པ་ཆེན་པོ་ཞིག་ཡོད་པ་རེད། དགོས་པ་ཅི་ཡོད་ཅེ་ན། དཔེར་ན་འཛམ་བུ་གླིང་འདི་ནས་ཚོང་པ་རྣམས་རྒྱ་མཚོའི་གླིང་དུ་ནོར་བུ་ལེན་པར་འགྲོ་བ་ན། དེའི་ནང་ནས་སེམས་སྟོབས་ཆུང་བ་རྣམས་དཀའ་ཞིང་དུབ་ནས་ནོར་བུ་ལོན་པའི་དུས་ཤིག་མི་སྲིད་སྙམ་ནས་སེམས་ཆད་དེ་སྟོང་པར་བྱས་ནས་ཕྱིར་ལོག་འགྲོ་བའི་ཉེན་ཁ་ཡོད་པའི་ཚེ། དེད་དཔོན་སྣ་ཁྲིད་བྱེད་མཁན་དེ་རྫུ་འཕྲུལ་དང་ལྡན་པ་ཞིག་ཡིན་ན་གྲོང་ཁྱེར་ཆེན་པོ་ཡིད་དུ་འོང་བ་སྤྲུལ་ནས་ངལ་གསོར་འཇུག་པ་བཞིན་དུ། སེམས་ཅན་སྙིང་སྟོབས་ཆུང་ངུ་ཅན་རྣམས་སྐྲག་ནས་སངས་རྒྱས་འཐོབ་པའི་ལམ་ལ་རེ་ཞིག་འཇུག་མི་ནུས་པ་རྣམས་ལ་ཉན་རང་གི་ལམ་འདི་གཉིས་བསྟན་པ་རེད། ངལ་སོས་ནས་དུས་ལ་བབ་པའི་ཚེ་དེ་བཞིན་གཤེགས་པས་སྐུའི་སྣང་བ་བསྟན། གསུང་གིས་དབུགས་དབྱུང་། ཐུགས་ཀྱིས་འོད་ཟེར་བཀྱེས་ནས་ཉན་རང་དེ་དག་ཟག་མེད་ཀྱི་ཏིང་ངེ་འཛིན་ལས་སད་པར་བྱས་ཏེ། གཟོད་བྱང་ཆུབ་མཆོག་ཏུ་སེམས་བསྐྱེད་ནས་བསྐལ་པ་དཔག་མེད་ལ་བྱང་ཆུབ་སེམས་དཔའི་སྤྱོད་པ་སྤྱད་ནས་སངས་རྒྱས་པ་ཡིན། ཐེག་པ་ཆེན་པོའི་རིགས་ཞེས་པ་ཇི་ལྟར་ཡིན་ཞེ་ན། འདི་ལ་དབྱེ་བ། ངོ་བོ། རྣམ་གྲངས། གཞན་ལས་ཁྱད་པར་དུ་འཕགས་པའི་རྒྱུ་མཚན། དེའི་རྣམ་པ། དེའི་རྟགས་ཏེ་དོན་རྣམ་པ་དྲུག་གི་སྒོ་ནས་བཤད་ན། དང་པོ་དབྱེ་བ་ནི། རིགས་ལ་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས་ཡོད། དེ་གཉིས་ཀྱི་ངོ་བོ་ནི། སངས་རྒྱས་ཀྱི་ཆོས་བསྐྱེད་པའི་ནུས་པ་ཐོག་མ་མེད་པའི་དུས་ཅན་ཆོས་ཉིད་ཀྱིས་ཐོབ་པ་དང་། དེའི་ཐོག་ནས་སངས་རྒྱས་ཀྱི་ཆོས་བསྐྱེད་པའི་ནུས་པ་སྔོན་དགེ་བའི་ལས་ལ་གོམས་པར་བྱས་པ་དེ་གཉིས་རིམ་བཞིན་རང་བཞིན་གནས་རིགས་དང་རྒྱས་འགྱུར་གྱི་རིགས་ཀྱི་ངོ་བོ་ཡིན། མིང་གི་རྣམ་གྲངས་ལ་ནི། རིགས་དང་། ས་བོན། ཁམས། རང་བཞིན་ལ་སོགས་གང་ཟེར་ན་ཆོག འདི་རིགས་གཞན་ལས་ཁྱད་པར་དུ་འཕགས་པའི་རྒྱུ་མཚན་ནི། ཉན་རང་གི་རིགས་ནི་རིགས་དམན་པ་ཡིན་ཏེ། ཉོན་སྒྲིབ་བྱང་བ་ཙམ་དང་དེ་ལས་ཅུང་དྲག་པ་ཤེས་སྒྲིབ་ཅུང་ཟད་ཙམ་སྤངས་པ་སྟེ་རིགས་དེ་གཉིས་ནི་རྣམ་དག་ཙམ་པོ་བའི་རྟེན་ཡིན། ཐེག་ཆེན་གྱི་རིགས་དེས་སྒྲིབ་པ་གཉིས་ཀ་བྱང་བའི་རྣམ་དག་གི་རྟེན་དུ་གྱུར་པས་ན་ཁྱད་པར་དུ་འཕགས། རིགས་ཐམས་ཅད་ལས་ཁྱད་པར་དུ་འཕགས་པ་དེ་ལ་བརྟེན་པའི་བླ་ན་མེད་པའི་ལམ་དེ་ནས་འབྲས་བུ་ཐོབ་པ་ནི་བླ་ན་མེད་པའི་མྱ་ངན་ལས་འདས་པ་ཡིན། རིགས་ཀྱི་རྣམ་པའི་ཐོག་ཏུ་བཤད་ན་ནི། རིགས་སད་པ་དང་། རིགས་མ་སད་པ་གཉིས། དེ་ལ་རིགས་སད་པ་ནི་འབྲས་བུ་ཡང་དག་འགྲུབ་པའི་རྟགས་དམིགས་པ་དང་། མ་སད་པ་ནི་འབྲས་བུ་འགྲུབ་པའི་རྟགས་མི་དམིགས་པའི་ཁྱད་པར་ཡོད་པ་རེད། རིགས་དེ་ཡོད་པའི་རྟགས་དང་མཚན་མ་ཅི་ཡོད་ན། གཉེན་པོ་ལ་མ་ལྟོས་པར་རིགས་དེ་ཡོད་པའི་གང་ཟག་དེ་རང་བཞིན་གྱིས་ལུས་ཀྱི་སྤྱོད་པ་དང་ངག་གི་སྨྲ་བ་འཇམ་པོ་དང་། སེམས་གཡོ་སྒྱུ་ཆུང་བ་དང་། སེམས་ཅན་ལ་བྱམས་ཤིང་བརྩེ་བ་དང་། ཁྱད་པར་དུ་རང་བཞིན་གྱིས་སྙིང་རྗེ་ཆེ་བ། ཆོས་ཕྱིར་དཀའ་སྤྱད་བཟོད་པ་དེ་འདྲ་ཞིག་ཡོད་པ་ནི། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ཡང་དག་བཤད། །ཅེས་གསུངས། སེམས་ཅན་ལ་སྙིང་རྗེ་མེད། ལས་རྒྱུ་འབྲས་ལ་ཡིད་ཆེས་ཀྱི་དད་པ་མེད། དཀོན་མཆོག་གསུམ་ཙམ་ཡང་མི་ཤེས་པ་རྣམས་སངས་རྒྱས་བྱང་སེམས་ཀྱི་སྤྲུལ་པ་མི་དགོས་འདི་ནས་གསུངས་པའི་བྱང་ཆུབ་སེམས་དཔའི་རིགས་ཅན་ཞིག་ཀྱང་ཡིན་དཀའ་སྟེ། ཆུ་རྐྱལ་ལས་ནི་ཆུ་བཞིན་དང་། །དུ་བ་ལས་ནི་མེར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་གསུངས་པའི་ཕྱིར་རོ། །མདོར་ན་ཐེག་པ་ཆེན་པོའི་རིགས་ཡོད་པ་ནི་གང་ཟག་དེ་སངས་རྒྱས་ཀྱི་ཉེ་རྒྱུ་དང་། གཞན་རྣམས་ནི་རིང་རྒྱུ་དང་ཤིན་ཏུ་རིང་རྒྱུ་ཡིན་ལ། སངས་རྒྱས་བཅོམ་ལྡན་འདས་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེས་དམ་ཆོས་བདུད་རྩིའི་སྣང་བ་མཐའ་ཡས་པ་ཞིག་སྤྲོ་བར་མཛད་དེ། བསྟན་དོན་ལམ་གྱི་རིམ་པ་མང་པོ་གསུངས་པ་ཐམས་ཅད་ཚུར་བསྡུ་ན། མཐོ་རིས་དང་ཐར་པ་བསྒྲུབ་པའི་ཐབས་ཚུལ་གཉིས་སུ་འདུས། ཐར་པ་དེའང་ཐར་པ་དང་ཐམས་ཅད་མཁྱེན་པ་སྒྲུབ་པའི་ཐབས་ཀྱི་དབང་གིས་ཐེག་པ་ཆེ་ཆུང་གཉིས་ཀྱི་དབྱེ་བ་ཡོད། དེས་ན་སྤང་བྱ་ཕྱོགས་རེ་ཙམ་མ་ཡིན་པར་སྤངས་པ་དང་། ཡོན་ཏན་ཕྱོགས་རེ་ཙམ་མ་ཡིན་པར་སྒྲུབ་པའི་ཐབས་མཁས་ཀྱི་གནད་མ་ཚང་བར་མེད་པ་མཆོག་ཏུ་གྱུར་པ་དང་། ཁྱད་པར་དུ་འཕགས་པ་ནི་ཐེག་པ་ཆེན་པོ་ཡིན་པར་ལུང་དང་རིགས་པས་གྲུབ་པ་རེད། ཐེག་པ་ཆེན་པོ་དེ་ལའང་རྒྱུ་ལམ་དུ་བྱེད་པའི་ཐེག་པ་དང་། འབྲས་བུ་ལམ་དུ་བྱེད་པའི་ཐེག་པ་གཉིས་ཀྱི་ཁྱད་པར་གྱིས་ཕར་ཕྱིན་གྱི་ཐེག་པ་དང་། སྔགས་ཀྱི་ཐེག་པ་གཉིས་སུ་གསུངས། དེ་གཉིས་སྦྱོར་བ་བྱང་ཆུབ་སེམས་དཔའི་སྤྱོད་པ་སྒྲུབ་ཚུལ་གྱི་དབང་གིས་གསུངས་པ་རེད་མ་གཏོགས། ཐེག་ཆེན་གྱི་འཇུག་སྒོ་བསམ་པའི་ངོས་ནས་ཁྱད་པར་མེད། དེ་མེད་པའི་སྟོབས་ཀྱིས་གསང་སྔགས་ཀྱི་སྡོམ་བཟུང་གི་སྐབས་ན། བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཞེས་གསུངས་ཤིང་རང་རེས་རྗེས་ཟློས་བྱེད་པ་རེད། ཉན་རང་གི་གནས་སྐབས་སུ་ངེས་འབྱུང་གི་བསམ་པ་དང་། དེ་ཁོ་ན་ཉིད་ཀྱི་ལྟ་བ་སོགས་ཅི་འདྲ་མངོན་རྟོགས་སེམས་འཕྲོག་བྱེད་མང་པོ་ཡོད་ནའང་བྱང་ཆུབ་ཀྱི་སེམས་མེད་པའི་དབང་གིས་ཐེག་པ་ཆེན་པོའི་མིང་དོན་མེད་པ་རེད། དེ་བཞིན་དུ་ལྷ་སྒོམ་རྒྱུ། སྔགས་བཟླ་རྒྱུ། དམ་ཆོས་འཆད་ཉན་སྒོམ་བསྒྲུབ་གང་གི་སྐབས་ཡིན་ཡང་ཐེག་པ་ཆེན་པོའི་ལམ་གྱི་འཇུག་ངོགས་གཅིག་པུ་བྱང་ཆུབ་ཀྱི་སེམས་ཁོ་ན་ཡིན་ཞིང་། དེ་ཡང་སྙིང་རྗེ་ཆེན་པོའི་རྩ་བ་ཅན་ཞིག་ཡིན་པས། རང་རེས་ཆོས་འཆད་ཉན་གྱི་སྐབས་སུ་བྱང་ཆུབ་ཀྱི་སེམས་དང་མ་འབྲལ་བའི་སྒོ་ནས་འཆད་ཉན་བྱེད་ན། ཐེག་པ་ཆེན་པོའི་རིགས་ཅན་གྱི་གང་ཟག་ཅིག་གིས་ཆོས་འཆད་ཉན་ཚུལ་བཞིན་བྱེད་པའི་གྲལ་དུ་འགྲོ་བ་རེད། དེའི་རྩ་བ་སྙིང་རྗེ་ཟེར་བ་དེའང་། ཇོ་བོ་རྗེས། རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །ཅེས་གསུངས་པ་ལྟར་སྡུག་བསྔལ་རང་ཉམས་དང་སྦྱར་ནས་ཁམས་གསུམ་འཁོར་བ་ན་རྒྱུ་བའི་ཕ་མ་སེམས་ཅན་ཐམས་ཅད་ལས་དང་ཉོན་མོངས་པའི་གཞན་དབང་ཅན་ལ་བསམ་ནས། སྙིང་རྗེ་ཤུགས་དྲག་པོ་དེས་བསྐུལ་ཏེ་སེམས་ཅན་དེ་དག་ཐམས་ཅད་འཁོར་བའི་རྒྱ་མཚོ་གཏིང་རིང་འདི་ལས་འདོན་པའི་ཆེད་དུ་ཕར་ཕྱིན་དྲུག་དང་བསྡུ་བའི་དངོས་པོ་བཞིའི་སྤྱོད་པ་ལ་བརྩོན་དགོས། དེ་ལྟ་བུའི་གནད་དང་རྒྱུ་མཚན་ཤེས་པའི་སྒོ་ནས་རང་རེས་དམ་ཆོས་འཆད་ཉན་འདིའི་སྐབས་ཡིན་ན། སེམས་ཅན་ཐམས་ཅད་ལ་སྙིང་རྗེ་ཤས་མི་བཟོད་པ་ཞིག་གིས་བསྐུལ་ནས། སེམས་ཅན་དེ་དག་ཐམས་ཅད་ཐར་པ་ཡང་དག་པའི་ལམ་ལ་འགོད་པའི་ཆེད་དུ་དམ་པའི་ཆོས་ཟབ་མོ་ཉན། དེའི་དོན་ཚུལ་བཞིན་དུ་སྒྲུབ་དགོས་བསམ་ནས། བསམ་པ་དོན་གཉིས་ཚང་བ་དང་། ཀུན་སྤྱོད་ཚུལ་དང་མཐུན་པ་ཞིག་གི་ཐོག་ནས་དམ་ཆོས་འཆད་ཉན་ལ་ཞུགས་དགོས། སྐབས་སུ་བབ་པ་རྫོགས་ཆེན་ཀློང་ཆེན་སྙིང་ཐིག་གི་སྔོན་འགྲོ་སེམས་སྦྱོང་བདུན་གྱི་མན་ངག་ཐར་པའི་ཐེམས་སྐས་འདི་འཆད་བཞིན་པའི་སྐབས་སུ་བབ་ལ། འདིར་ལག་ཁྲིད་བྱས་ནས་འཆད་བཞིན་པའི་སྐབས་ཡིན་ན། འདུས་བྱས་མི་རྟག་པ་ལ་བསམ་པ་དང་། བྱས་པ་ཐམས་ཅད་སྡུག་བསྔལ་གྱི་རྒྱུར་བསམ་པ་གཉིས་སོང་ནས།

ར༽ སེམས་སྦྱོང་གསུམ་པ།

དང་པོ་ལུང་ལས་དཔག་ནས་བསམ་པ།

དེ་རིང་ཁྲིད་རྐང་གསུམ་པ་འཆད་པ་ནི། སེམས་སྦྱོང་གསུམ་པ་ནི། བུ་ཡིག་ཡེ་ཤེས་གསལ་སྒྲོན་ལས། རིགས་དྲུག་གི་སེམས་ཅན་ལ་སྙིང་རྗེ་སྐྱེ་ཞིང་། ལས་སུ་དཀོན་མཆོག་མཆོད་ཅིང་དཀར་པོ་དགེ་བའི་ལས་བསྐྱེད་པ་དང་། ཞེས་ཚིག་ལྷུ་གཉིས་ཀྱིས་བསྟན་པ་རེད། སྟོད་མཐོ་རིས་ལྷ་དང་མི་དང་ལྷ་མ་ཡིན་དང་། སྨད་རིས་དམྱལ་བ་དང་། ཡི་དྭགས་དང་དུད་འགྲོ་སྟེ་མཐོ་རིས་གསུམ་དང་ངན་སོང་གསུམ་སྟེ་རིགས་དྲུག་གི་སེམས་ཅན་དང་། ཡང་སྐབས་གཞན་དུ་ལྷ་མ་ཡིན་རིས་གཞན་དུ་བསྡུས་ནས་འགྲོ་བ་རྒྱུད་ལྔར་གསུངས་པའང་ཡོད་ལ། མདོར་ན་དེ་ལྟ་བུའི་སེམས་ཅན་ཐམས་ཅད་ལ་འཁོར་བའི་སྡུག་བསྔལ་དང་བྲལ་འདོད་ཀྱི་སྙིང་རྗེ་ཤུགས་དྲག་པོ་བཟོད་དུ་མེད་པ་ཞིག་བསྐྱེད་ཅིང་། སྙིང་རྗེ་བ་ཙམ་མ་ཟད་སེམས་ཅན་དེ་དག་གི་དོན་དུ་སྦྱོར་བ་ལུས་ངག་གི་སྒོ་ནས། དུས་མཆོད་མི་བཅག་རང་གཞན་སྐྱབས་འགྲོར་འགོད། །ཅེས་གསུངས་པ་ལྟར། ལས་སུ་དཀོན་མཆོག་རིན་པོ་ཆེ་རྣམ་པ་གསུམ་མཆོད་ཅིང་བསོད་ནམས་ཆ་མཐུན་དང་། ཐར་པ་ཆ་མཐུན་གྱི་དཀར་པོ་དགེ་བའི་ལས་ལམ་བཅུ་ལ་སོགས་པ་བསྐྱེད་པ་དང་། ཞེས་པས་ཏེ་རྒྱུ་མཚན་བཀོད་པའི་ཚིག་བསྟན་པ་རེད། གོང་དུ་བཤད་མ་ཐག་པ་དེ་ལྟར་ཁྲིད་རྐང་དང་པོ་འཆི་བ་མི་རྟག་པ་དང་། ཁྲིད་རྐང་གཉིས་པ་བྱས་པ་ཐམས་ཅད་སྡུག་བསྔལ་རྣམ་པ་གསུམ་གྱི་རང་བཞིན་དུ་དོན་སྤྱིའི་གོ་བ་ཙམ་གྱི་བློ་ཡོད་ཀྱང་ཆོས་བྱེད་ལུགས་ཀྱི་གནད་འགག་མ་གོ་ན། འདོད་ཁམས་པའི་འབྱུང་ལུས་ཤ་ཁྲག་ལས་གྲུབ་པ་ཞིག་ཡིན་དུས་ཁམས་ཀྱི་ཟས་དང་། ལྷག་སྐྱོབ་ཀྱི་གོས་ལ་མ་བརྟེན་ཐབས་མེད་ཀྱང་། དེ་ལ་ཁ་གཡར་ནས་ཆོས་ཀྱི་མཐུན་རྐྱེན་དུ་མིང་བཏགས་པའི་ཟས་གོས་ལོངས་སྤྱོད་ཅི་ཙམ་འབྱོར་ཡང་སྲིད་པའི་ཕུན་ཚོགས་ལ་ཆོག་མི་ཤེས་པ། དེས་པ་བདོག་མང་ཇི་ལྟར་སྡུག་བསྔལ་བ། །འདོད་པ་ཆུང་རྣམས་དེ་ལྟར་མ་ལགས་ཏེ། །ཀླུ་མཆོག་རྣམས་ལ་མགོ་བོ་ཇི་སྙེད་པ། །དེ་ལས་བྱུང་བའི་སྡུག་བསྔལ་དེ་སྙེད་དོ། །ཞེས་སོགས་བཤེས་སྤྲིངས་ལས་གསུངས་པ་ལྟར། མི་འདོད་ཆེན་ལ་སེམས་ཁ་གང་རྒྱུ་མེད་པར། གཅིག་ཡོད་ན་དེའི་ཟླ་བོ་ཁ་ཡ་གཅིག་དགོས། བརྒྱ་ཡོད་ན་སྟོང་། སྟོང་ཡོད་ན་ཁྲི་ཞིག སྤྱོད་རྒྱུ་མི་ཚད་གཞག་རྒྱུ་སོགས་མི་དགོས་པའི་ཚད་ལ་ཐོན་རྒྱུ་དང་། ཁ་གང་རྒྱུ་ཞིག་མེད་ལ། བློ་ངན་ལང་ཤོར་གྱིས་ཡོ་བྱད་སྣ་ཚོགས་པ་དཀའ་སྤྱད་ངལ་དུབ་ལོག་འཚོ་གཡོ་སྒྱུ་ལ་སོགས་པའི་ཐབས་དུ་མས་རྩོལ་སྒྲུབ་ལ་རེམ་ཞིང་འབད། རྙེད་པ་དང་། བདེ་བ་དང་། གྲགས་པ་དང་། བསྟོད་པ་སྟེ་འདོད་པ་བཞི་དང་། དེའི་ལྡོག་ཕྱོགས་མ་རྙེད་པ་དང་། སྡུག་བསྔལ་དང་། གྲགས་པ་ངན་པ། སྨད་པ་སྟེ་མི་འདོད་པ་བཞི་སྟེ་འཇིག་རྟེན་ཆོས་བརྒྱད་ཅེས་བྱ་བ་དེ་ལ་འདོར་ལེན་ཁོ་ནས་མི་ཚེ་འཛད་པ་མང་བས། བཤེས་སྤྲིངས་ལས། ནོར་རྣམས་ཀུན་གྱི་ནང་ནས་ཆོག་ཤེས་པ། །རབ་མཆོག་ལགས་པར་ལྷ་མིའི་སྟོན་པས་གསུངས། །ཀུན་ཏུ་ཆོག་ཤེས་མཛོད་ཅིག་ཆོག་མཁྱེན་ན། །ནོར་མི་བདོག་ཀྱང་ཡང་དག་འབྱོར་བ་ལགས། །ཞེས་གསུངས་པ་ལྟར་དེ་ལྟ་བུའི་ཆོག་ཤེས་བསྟེན་ཏེ། ནོར་ལ་ཆོག་མི་ཤེས་པས་ཆོས་བརྒྱད་ཁོ་ནས་མི་ཚེ་འཛད་ན་གྱོང་ཆེ་བར་ཡིན་པར་ཤེས་ཏེ། དེའི་ཕྱིར་ཁམས་གསུམ་འཁོར་བའི་སྡུག་བསྔལ་ལ་བསམ་ཞིང་བློ་ཐོག་ལ་ལེན་ནས་རིགས་དྲུག་གི་སེམས་ཅན་ལ་ཁ་ཙམ་མིན་པའི་སྡུག་བསྔལ་དང་བྲལ་འདོད་ཀྱི་སྙིང་རྗེ་བསྐྱེད་པར་བྱའོ། །སྙིང་རྗེ་སྒོམ་དུས་ཐོག་མར་སེམས་ཅན་ཐམས་ཅད་མར་ཤེས། དྲིན་དྲན། དྲིན་ལན་གཟོ་འདོད་དེ་རྣམས་ངེས་པར་དུ་ཤེས་དགོས། ད་ལྟའི་གནས་སྐབས་ན་ཁམས་གསུམ་གྱི་སེམས་ཅན་སོ་སོའི་སྐྱེ་བོ་རྣམས་ལ་མཚོན་ན། རང་གི་ཕ་མ་བུ་ཚ་རྣམས་ལ་ཤ་ཚ་སྙིང་རྗེ་སྐྱེ་བའི་སྙིང་རྗེ་ཆུང་ཆུང་གི་གཞི་འདྲ་ཞིག་ཡོད་པ་རེད། དེ་ཡང་གཅན་གཟན་གཏུམ་པོ་རྣམས་ལའང་ཡོད་པ་ཞིག་ཡིན། ངོ་མ་བཤད་ན་སྙིང་རྗེ་ཟེར་ན་ཆགས་སེམས་ཤིག་རེད། ད་ལྟ་རང་གི་ཕ་མ་བུ་ཚ་ལ་ཡོད་རྒྱུའི་ཤ་ཚ་སྙིང་རྗེ་དེ་སེམས་ཅན་ཐམས་ཅད་ལ་ཡོད་པ་དང་། དེའང་ཕྱོགས་རིས་མེད་པར་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་ཡོད་ན་དེ་ལ་སྙིང་རྗེ་ཆེན་པོ་ཟེར། སྙིང་རྗེ་དེ་འབྱོངས་བའི་ཚད་ནི། སྡུག་བསྔལ་ཅན་གྱི་སེམས་ཅན་མིག་གིས་མཐོང་ན་སྙིང་རྗེའི་ཤུགས་ཀྱིས་མིག་ནས་མཆི་མ་ཡོང་བ་ཞིག་རེད་ན་དེ་ལ་བརྩི་ཞེས་གསུངས་ལ། དེ་ཡང་ངོ་མ་བཤད་ན་མི་འགྲུབ་རྒྱུ་དང་མི་ཡོང་བ་ཞིག་མ་རེད། ཇི་ལྟར་ཡིན་ན། མི་རེ་ལ་ཕ་མ་རེ་ཡོད་པ་དང་། ཕ་མ་དེ་རྣམས་ལའང་ཕ་མ་ཡོད་ན། རང་རེའི་སྐྱེ་བ་ལ་ཡ་མཐའ་མེད་ན། ཕ་མའི་ཡ་མཐའ་ཡང་ཐུག་མེད་རེད། སྐྱེ་བ་རེ་ལ་ཕ་མ་རེ་ཡོད་པས། སྐྱེ་བ་བརྩི་ཚོད་མེད་པ་བཞིན་དུ་ཕ་མ་ལའང་བརྩི་ཚོད་མེད་པར་ཡིན་རྒྱུ་འདི་བདེ་བར་གཤེགས་པའི་བཀའ་མིན་ན་ཡང་རང་གི་རིགས་པས་དཔྱད་ན་འགྲུབ་རྒྱུ་དང་། ཡིན་ངེས་པར་ཡོད་ཤག་ཤག་ཅིག་རེད། དེ་ཡིན་ན་སྐྱེ་བ་ཕྱི་མ་ཤར་དུས་དེ་དུས་ཀྱི་ཕ་མ་དེ་མ་གཏོགས་ད་ལྟའི་སྐབས་ཀྱི་ཕ་མ་བརྗེད་ཚར་བས་ངོ་མི་ཤེས་པ་དང་། ཡང་དེའི་རྗེས་མར་དེ་བརྗེད། དེའི་རྗེས་མར་ཡང་དེ་བརྗེད་ཚར་བ་རེད། དེས་ན་ཕ་མ་ཡིན་ལུགས་ལ་ཁྱད་པར་མེད་ཅིང་། དྲིན་གྱིས་བསྐྱང་ལུགས་ལའང་འདྲ་འདྲ་རེད། ལས་ཀྱིས་འབྲེལ་ལུགས་གཅིག་རེད། དཔེར་ན་ཁ་སང་གི་ཕ་མ་དང་དེ་རིང་གི་ཕ་མ་གཉིས་ཁྱད་པར་མེད་པ་བཞིན་དུ། སྐྱེ་བ་སྔོན་རྗེས་ཚང་མའི་ཕ་མ་ཐམས་ཅད་གཅིག་ཡིན་པར་བསམ་ནས་སེམས་ཅན་ཐམས་ཅད་ཕ་མ་ཡིན་པར་ཤེས་དགོས། ཕ་མ་ཡིན་པར་ཤེས་ན་དྲིན་ཆེ་བ་ལོས་ཤེས། ལུས་སྲོག་བསྐྱེད་པའི་དྲིན་དང་། འཇིག་རྟེན་བསྟན་པའི་དྲིན་དང་། ཆོས་ལ་གཏད་པའི་དྲིན། སེམས་ཅན་མེད་ན་སངས་རྒྱས་ཐོབ་ཐབས་མེད་པས་སངས་རྒྱས་ཐོབ་པའི་དྲིན་ལ་སོགས་པ་དྲིན་མང་དུ་ཡོད། དེ་དྲན་དུས་ཁྲེལ་མེད་ཐ་ཆད་པ་ཞིག་མིན་ན་སེམས་ཅན་ཕ་མ་ལ་དྲིན་ལན་སྤྲད་རྒྱུ་མི་དྲན་ཐབས་མེད་ཡིན་པས། དྲིན་ལན་ཆོས་ཀྱིས་གསབ་དགོས། དེས་ན་ཐོག་མར་གལ་ཆེ་བ་སྙིང་རྗེ། བར་དུ་མེད་ཐབས་མེད་པ་སྙིང་རྗེ། མཐའ་མའང་སྙིང་རྗེའི་དམིགས་པ་ཚད་མེད་པའི་རང་བཞིན་ལས་མ་འདས་པ་ཞིག་འགྲུབ་དགོས་པ་ཡིན་ན། སྙིང་རྗེ་ངེས་པར་དུ་བསྐྱེད་དགོས། སྙིང་རྗེ་བསྐྱེད་དགོས་ན་འཁོར་བའི་སྡུག་བསྔལ་དྲན་དགོས་པ་ཡིན་པས་ན། དེའང་དེའི་ཚུལ་མདོ་དྲན་པ་ཉེར་བཞག་ལས། འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གསུངས་ཏེ། ཁམས་གསུམ་འཁོར་བའི་གནས་འགྲོ་བ་རིགས་དྲུག་གང་དུ་སྐྱེས་ཀྱང་ཤིན་ཏུ་ཆ་ཕྲ་ཞིང་ཆུང་བའི་ཁབ་ཀྱི་རྩེ་ཙམ་ལ་བདེ་ཞིང་སྐྱིད་པའི་གནས་སྐབས་དུས་ནམ་ཡང་ཡོད་པ་མ་ཡིན། ཞེས་གསུངས་པ་ཡིན་ལ། བདེ་བ་ཆུང་ཆུང་རེ་ལོས་ཡོད། ལྷ་མིའི་བདེ་བ་བདེ་བ་མ་ཡིན་ནམ་སྙམ་ན། དེ་ལ་བདེ་བའི་མིང་ཙམ་ལས་དོན་ཡོད་པ་མ་ཡིན་ཏེ། སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་ཅུང་ཟད་ཆུང་བའི་གནས་སྐབས་ལ་བདེ་བ་ཞེས། བདེ་བ་གཏན་ནས་རིག་མ་མྱོང་བ་ལ་བདེ་བའི་མིང་བཏགས་ཀྱང་། དོན་ལ་འདུ་བྱེད་ཀྱི་སྡུག་བསྔལ་གྱིས་ནམ་ཡང་མི་སྟོང་སྟེ། མཛོད་ཊཱིཀ་ལས། བྱིས་པ་ལག་མཐིལ་འདྲ་བ་ཡིས། །འདུ་བྱེད་སྡུག་བསྔལ་སྤུ་མི་རྟོགས། །འཕགས་པ་མིག་དང་འདྲ་བ་ནི། །དེ་ཡིས་ཤིན་ཏུ་ཡིད་ཀྱང་འབྱུང་། །ཞེས་གསུངས་པས། དཔེར་ན་སྤུ་ཉག་གཅིག་ལག་མཐིལ་དུ་བཞག་ན་མི་གོ་ཡང་། མིག་ཏུ་སོང་ན་ན་ཚ་ཆེར་བསྐྱེད་པ་དེ་བཞིན་དུ་རང་རེ་འཁོར་བའི་སེམས་ཅན་གྱིས་སྡུག་བསྔལ་ཡིན་པར་མི་ཤེས་པའི་འདུ་བྱེད་ཀྱི་སྡུག་བསྔལ་འཕགས་པ་རྣམས་ཀྱིས་གཟིགས་ན་སྡུག་བསྔལ་ཆེན་པོ་ཞིག་ཡིན་པར་གསུངས། ཞེས་འཁོར་བའི་གནས་རིས་ཐམས་ཅད་ལ་སྡུག་བསྔལ་ཁོ་ན་ལས་བདེ་བ་ཡོད་པར་མ་གསུངས་ཞེས་འཁོར་བའི་སྡུག་བསྔལ་སྤྱིར་བསམ་པ་བསྟན་ནས། ད་བྱེ་བྲག་ཏུ་བཤད་པ་ནི། འགྲོ་བ་རིགས་དྲུག་དེའི་ནང་ནས་ཀྱང་དམྱལ་བ་ཡི་དྭགས་དུད་འགྲོ་སྟེ་ངན་སོང་གསུམ་གྱི་འགྲོ་བའི་མི་བཟད་པའི་སྡུག་བསྔལ་ལ་བསམ་པ་ནི། སློབ་དཔོན་ཞི་བ་ལྷས། དམྱལ་སོགས་སྡུག་བསྔལ་བསམ་བྱས་ན། །འདོད་པ་རྣམས་ལ་མཚོན་དང་ནི། །དུག་དང་མེ་དང་གཡང་ས་དང་། །དགྲ་རྣམས་ཀྱིས་ཀྱང་དཔེར་མི་ཕོད། །ཅེས་དམྱལ་བ་དང་ཡི་དྭགས་སོགས་ངན་སོང་གི་གནས་རིས་ཀྱི་སྡུག་བསྔལ་ལ་བསམ་བློ་བཏང་བར་བྱས་ན། སྡུག་བསྔལ་དེ་དག་འབྱུང་བའི་གཞི་འདོད་པའི་ཡུལ་བསླུ་བྲིད་ཀྱི་རྐྱེན་རྣམས་ལ། མཚོན་ཆ་གདུག་པའི་དབལ་དང་། ཟོས་མ་ཐག་ཏུ་ཤི་འགྲོ་བའི་དུག ཚིག་ཅིང་སྲེག་པར་བྱེད་པའི་མེ་དོང་དུ་ལྷུང་ན་ཐལ་བ་ཙམ་ཡང་མི་ལུས་པ་དང་། གཡང་ས་གཟར་མོ་དང་། འཐབ་ནས་སྲོག་གཅོད་པར་བྱེད་པའི་དགྲ་མ་རུངས་པ་རྣམས་ཀྱིས་ངན་སོང་གི་སྡུག་བསྔལ་འབྱུང་བའི་ཉེས་དམིགས་ཀྱི་ཆ་ཙམ་ཡང་གཞལ་དུ་མེད་ཅིང་དཔེར་ཡང་མི་ཕོད་དོ། །ཅེས་པ་ལྟར་འཁོར་བ་དང་ངན་སོང་གི་སྡུག་བསྔལ་ཤིན་ཏུ་མི་བཟད་པ་ཡིན་པར་རྒྱལ་བ་བདེན་པར་སྨྲ་བས་གསུངས་པ་ལྟར་ལས། ཁ་ནང་དུ་བསྐོར་ནས་འདང་རྒྱག་ན་རང་ཉིད་ཀྱང་ཤི་བའི་འོག་ཏུ་མར་མེ་ཤི་བའམ་རྩྭ་ཕུང་མེས་བསྲེགས་པ་ལྟར་ལས་ཀྱི་རྣམ་སྨིན་མྱོང་མི་དགོས་པར་ཤུལ་མེད་དུ་སོང་ན་དེ་ཀས་ཆོག་ཀྱང་། བདག་འཛིན་དང་ལས་ཉོན་གྱི་རྒྱུ་རྐྱེན་ཚང་ན་རྒྱུ་འབྲས་རྟེན་འབྱུང་གི་ཆོས་ལ་བསླུ་བ་མེད་པས། སྐྱེ་བ་ཞིག་མི་འདོད་ཀྱང་ལེན་དགོས། སྐྱེ་བ་ལེན་པ་དེའང་ཡང་ན་བདེ་འགྲོ་དང་ངན་འགྲོ་གང་རུང་ཞིག་ཏུ་ལེན་དགོས། བདེ་འགྲོ་ལྷ་དང་མིར་སྐྱེ་བའི་རྒྱུ་རྣམ་དཀར་གྱི་དགེ་བ་ཡིན་ན། ཕྱི་མར་གང་སྐྱེ་ད་ལྟའི་ལས་ལ་ལྟོས་ཟེར་བ་ལྟར། སྔོན་ཆད་རང་གིས་བློ་བདེ་སིང་ངེ་བའམ་བདེ་ཤག་ཤག་བྱས་ཆོག་པའི་རིགས་ཕྱི་མ་བདེ་འགྲོ་ཐོབ་བྱེད་ཀྱི་ལས་ནི་དགེ་སྡིག་བསགས་ལུགས་ལ་བསམ་ན་ཆེར་མི་གདའ། སྙིང་རྗེ་པདྨ་དཀར་པོ་ལས། ལྷའི་རྒྱལ་སྲིད་ནི་སྡུག་བསྔལ་འབྱུང་བའི་རྒྱུ་ལགས་སོ། །མིའི་རྒྱལ་སྲིད་ཀྱང་སྡུག་བསྔལ་མྱོང་བའི་རྒྱུ་ལགས་སོ། །ཞེས་གསུངས་པས་ལྷ་དང་མིའི་རྒྱལ་པོ་དེ་རྣམས་བསོད་ནམས་ཅན་ཡིན་ཡང་། ཤི་ནས་ངན་སོང་གི་སྡུག་བསྔལ་མྱོང་དགོས་ན། རང་རེ་སེམས་ཅན་ཕལ་པ་བསོད་ནམས་དམན་པ། ལྷ་མིའི་བདེ་བའི་ལུས་རྟེན་ཙམ་ཡང་ལེན་པའི་བསོད་ནམས་ཀྱང་མེད་པ་རྣམས་ཀྱིས་ཚེ་འདིར་དམ་ཆོས་རྣམ་དག་ཅིག་མ་འགྲུབ་ན་ཕྱི་མ་འགྲོ་ས་གཅིག་མ་གཏོགས་ཅི་ཡོད་བསམ་རྒྱུ་དེ་འདྲ་ཡིན། དེར་མ་ཟད་ཚེ་རབས་སྔ་མ་རྣམས་སུའང་དགེ་བའི་ཆོས་བསོད་ནམས་ཆེར་མ་བསགས་པར། སྔ་མར་ཅི་བྱས་ད་ལྟའི་ལུས་ལ་ལྟོས། །ཞེས་པ་ལྟར། ད་ལྟའི་སྐབས་སུ་མི་བདེ་བ་དང་མི་སྙན་པ་སོགས་མི་འདོད་ཁོ་ནས་མནར་བའི་མྱོང་བ་རྒྱུ་མཐུན་གྱི་འབྲས་བུས་ད་ལྟ་སླེབས་གདའ་མོད། སྒོ་གསུམ་གྱི་མི་དགེ་བའི་ལས་ནི་རང་གིས་བསམ་བློ་གཏོང་ན་རང་གིས་ཤེས་རྒྱུ་ཅན་ཐ་ན་རྩེད་མོའི་ཞོར་ཙམ་དུའང་བསམ་གྱིས་མི་ཁྱབ་པ་བསགས་ཚར་བས། དེའི་འབྲས་བུས་ངན་འགྲོའི་གནས་སུ་ཚ་གྲང་བཀྲེས་སྐོམ་ལ་སོགས་པའི་སྡུག་བསྔལ་མྱོང་དགོས་པ་བྱུང་ན་ཚེ་འདི་ག་ལ་བྱུང་བ་དང་། ལུས་རྟེན་ཕྱི་མ་ལ་བྱུང་བ་གཉིས་ལ་ཁྱད་པར་རྡུལ་ཙམ་མེད་དེ། རང་རྒྱུད་ཀྱི་སྡུག་བསྔལ་ཡིན་པས། དེ་རིང་མི་བདེ་བ་དང་སང་ཉིན་མི་བདེ་གཉིས་ལ་ཁྱད་པར་མེད་པ་བཞིན་ནོ། །དེས་ན་འདི་འདྲ་བྱས་ནས་དམ་པའི་གདམས་ངག་གི་མེ་ལོང་ཆེན་པོ་ཞིག་མདུན་ཐད་དུ་བཞག་ནས། རང་གིས་ད་སྔོན་ལས་ལས་བྱས་བྱས་ལོ་རྒྱུས་ཀྱི་རི་མོ་དེའི་ནང་དུ་འཆར་བཅུག་ན། འོ་ཐར་རྒྱུ་དང་འགྲོ་ས་གཅིག་མ་གཏོགས་མི་འདུག་བསམ་རྒྱུ་དེ་མི་ཤེས་མི་གསལ་རྒྱུ་ཞིག་ཡོད་པ་མ་རེད། འོན་ཀྱང་ད་དུང་མི་ཤེས་ཁུལ་བྱས་ནས་ཡིན་མདོག་མདོག་བྱེད་པ་ནི་རང་མགོ་རང་གིས་གཡོག་པ་འདི་གླེན་པའི་ནང་གི་གླེན་པ་རེད། མིག་བཙུམས་ནས་ཆུ་ནང་མཆོང་བ་དང་གཅིག་རེད། ད་འུ་ཚོས་ཆོས་བཤད་དང་ཆོས་སྒྲུབ་ཟེར་ན་མ་འོངས་ཕྱི་མའི་འདུན་ལམ་གྱི་གྲོས་འགོ་ཞིག་གཤོམ་པ་རེད། དེ་ཡིན་ན་རང་རེས་ཕར་བཤད་ཚུར་བཤད་བྱས་ནས་བསམ་བློ་རེ་གཏོང་ན། ད་དུང་མ་སྔ་མ་ཕྱི་རེད། གསོན་གྲང་ང་ཁམས་ལ་ཡོད་པས། ཁ་གང་ལ་འཁོར་ན་ཆོག་རྒྱུ་ཞིག་རེད། ཚེ་ཕྱི་མའི་སྐྱེ་བ་ལེན་ཚར་དུས་མི་དགོས། བར་དོའི་སྐབས་ཡིན་ན་དཀའ་མོ་ཡིན་པ་རེད། ཉམས་ལེན་གནད་ཀྱི་གོམས་མྱོང་ཅན་རེ་མིན་ན། ཆོས་ཉིད་བར་དོའི་སྐབས་ན་སྒྲ་འོད་ཟེར་གསུམ་གྱི་སྣང་བ་དང་། ཞི་ཁྲོའི་ལྷ་ཚོགས་ཀྱི་སྐུ་ཤར་དུས་གྲོལ་ཐུབ་པར་དཀའ་མོ་རེད། ཆོས་ཉིད་བར་དོའི་སྣང་བ་བརྒལ་ནས་སྲིད་པ་བར་དོར་ཐུག་ནས་སྔོན་ལས་ཀྱི་རྗེས་སུ་འབྲངས་ཏེ་འཁྲུལ་སྣང་འཇིགས་སྐྲག་གི་སྣང་བ་ཤར་དུས། དག་ཞིང་ལ་འདུན་པ་གཏད་རྒྱུ་དྲན་ཟེར་ན་དཀའ་མོ་ཡིན། དེར་མ་ཟད་ཤི་ངོར་ཟིན་རྒྱུའང་དཀའ་མོ་རེད། རང་རེ་ད་ལྟ་གྲང་ང་ཁམས་ན་ཡོད་ནི་རེད། བསམ་ལོང་བསྒྲུབ་ལོང་རེ་གཏད་ཀྱང་། འདི་འདྲ་བསམ་བློ་རེ་གཏོང་ན་ད་སྔར་ཤི་སོང་བའི་ཤི་བོ་དེ་རྣམས་ཀྱིས་ད་སྐབས་ཅི་འདྲ་མྱོང་བཞིན་མེད་ན། འགའ་རེ་ལ་དགེ་བའི་ར་མདའ་རེ་གཏོང་ན་ཅི་འདྲའི་གོ་ཆོད་ཀྱིན་ཡོད་ན་བསམ་རྒྱུ་འདྲ་ཡིན་ནི་རེད། སྔོན་གུ་རུ་ཉི་ཟླ་འོད་ཟེར་མཚམས་ལ་བཞུགས་ཡོད་སྐབས། ཡུལ་དེ་ན་ནད་ཡམས་ཀྱིས་མི་མང་པོ་ཤི་སོང་། དེའི་དུས་སུ་ཁོང་གི་ཕ་གཅིག་མ་གཅིག་ཡིན་པའི་ནུ་བོ་ཆུང་བ་ཁེ་རུ་མ་རྡོ་རྗེ་རྒྱལ་མཚན་ཞེས་པ་ལོ་སུམ་ཅུ་སོ་གཉིས་ཐོག་ཁོ་རང་གི་བུ་མོ་དང་ཕ་བུ་གཉིས་མཉམ་དུ་ཤི་སོང་ནས་ཟླ་བ་གསུམ་ཙམ་སོང་བ་ན། གུ་རུ་ཉི་ཟླ་འོད་ཟེར་ཁོང་གཅིག་པུ་མཚམས་ལ་བཞུགས་ཡོད་དུས་ཤིག་ལ་ནུ་བོ་དྲན་པས་རྐྱེན་བྱས་ནས། ཐུགས་སྐྱོ་བས་ནུ་བོ་གཙོས་པའི་སེམས་ཅན་དེ་དག་གང་ན་ཡོད་བསམ་ནས་སྐྱེ་གནས་དྲན་པ་དང་མཐོང་བའི་ཉམས་ལེན་ལ་ཐུགས་གཏད་པས། བར་དོའི་སྲིད་པའི་སེམས་ཅན་གྱི་གྲལ་དུ་བྱོན་སོང་ནས་བར་དོའི་སེམས་ཅན་གྲངས་མེད་གཟིགས་པ་དང་། བར་སྐབས་ཤིག་ན་ཁོང་གི་ཨ་མ་དེ་སྔ་བས་གཞོན་ཞིག་བྱས་ཏེ་གར་འོང་འདིར་འོང་མ་གོ་བར་བྱོན་ཡོང་ནས། རྡོ་རྗེ་རྒྱལ་མཚན་དེང་སང་སྡུག་གིན་ཡོད་རེད། དགྲ་ཡོད་དོགས་པས་ང་ཁོ་ལ་ལྟ་རུ་སོང་བ་ཡིན། ཁོས་ཉམ་ཐག་གི་སྐད་ཆ་མང་པོ་མང་པོར་བཤད་ཀྱང་། ངས་སེམས་གསོ་བྱས་ཡོད། རྡོ་རྗེ་རྒྱལ་མཚན་གྱིས་གནས་ཁང་བཟང་པོ་ཞིག་མ་རྙེད་ནས་སྒུག་ཡོད། གནས་ཁང་ངན་པ་སྡིག་ཅན་གྱི་ཁྱིམ་དུ་ངས་མ་བཏང་ནས་བར་ཆད་མེད་པའི་སྲུང་སྐྱོབ་བྱས་ཡོད། ཁྱོད་དེ་ན་ཕར་སོང་དང་ད་ལྟ་ཁྱེད་གཉིས་ཐུག་འོང་སྐད་ཆ་ཤོད་ཅེས་ཟེར་ནས། ཨ་མ་ཆུ་ཆེན་ཞིག་གི་ཕ་རོལ་ལ་སོང་ནས་མེད་པར་གྱུར་སོང་། དོན་ལ་ཡི་དམ་ཁྲོས་མ་ནག་མོ་དེ་ཉིད་བྱམས་བརྩེ་ཅན་གྱི་ཨ་མའི་གཟུགས་སུ་བརྫུས་ནས་རྡོ་རྗེ་རྒྱལ་མཚན་གྱི་མགོན་སྐྱབས་སུ་བྱོན་པ་ཡིན། དེ་ནས་གུ་རུ་ཉི་ཟླ་འོད་ཟེར་ཐུགས་དགའ་སྐྱོ་འདྲེས་མའི་ངང་ནས་ཕར་བྱོན་པ་ན། རྩིབས་ལམ་ཕྲ་མོ་ཞིག་ཏུ་རྡོ་རྗེ་རྒྱལ་མཚན་གྱིས་ཤིང་ཁྲ་མ་ཁུར་བོ་ཞིག་འཁུར་ནས་སྡུག་གླུ་ངུ་རྟ་རིང་མོ་ཞིག་བླངས། སྐབས་རེར་ཧུ་ཤུ་རེ་འཐེན་བཞིན་འོང་བ་དང་འཕྲད། བར་དོའི་སེམས་ཅན་དེ་ལུས་རགས་པ་མེད་པས། རྟེན་མེད་གནས་མེད་ཁོ་ཤོག་སྐམ་པོ་རླུང་གིས་འཁྱེར་བ་དང་འདྲ་བ་ཡིན་པས། འཁྲུལ་རྟེན་འདྲ་བའི་སྣང་བ་ཤིང་ཁྲ་མ་སྐམ་པོ་ཞིག་འཁུར་བའི་སྣང་བ་ཡོད་པ་དང་འཕྲད་པ་ན། གུ་རུ་ཉི་ཟླ་འོད་ཟེར་གྱིས་འདི་གསོན་པོ་ཡིན་སྣང་འདྲ་བར་ཤར་ཡང་། འདི་ཤི་ནས་ཟླ་བ་གསུམ་ཙམ་སོང་ཚར། ད་དུང་འདི་འདྲའི་གནས་མེད་རྟེན་མེད་དུ་འཁྱམས་ཡོད་པར་དགོངས་ཤིང་ཐུགས་སྐྱོ་བས། རེ་ཞིག་གསུང་ངག་ཞལ་ནས་མ་འཐོན་པར་ལུས་པ་དང་། རྡོ་རྗེ་རྒྱལ་མཚན་ཕུ་བོ་དང་འཕྲད་པས་དགའ་བ་སྐྱེས། ཡང་འདི་བར་དོ་ཡིན་བསམ་ནས་སེམས་སྐྱོ་བ་སྐྱེས། དེ་ནས་ཉི་ཟླ་འོད་ཟེར་གྱིས་ཁྱོད་ད་བར་གང་དུ་སོང་། དག་ཞིང་ཞིག་ཏུ་འདུན་པ་གཏད་པའམ་ཡང་ན་མི་ལུས་ཆོས་ལྡན་ཞིག་གི་སྐྱེ་བ་མི་བླང་བར་འདི་འདྲ་འཁྱམས་པས་ཅི་བྱ་གསུངས་པ་དང་། རྡོ་རྗེ་རྒྱལ་མཚན་ན་རེ། ང་མ་སོང་ས་དང་མ་འཁྱམས་ས་ཞིག་མེད། ང་རོགས་ངོ་ཤེས་མི་ཤེས་འབུམ་ཚོ་མང་པོ་དང་འགྲོགས་ནས་འགྲོ་བཞིན་ཡོད། སྐབས་ཤིག་ལ་རོགས་འབུམ་ཚོ་བཅུ་བདུན་དང་བཅས་སྟེ་འགྲོ་དུས་གློ་བུར་དུ་ཆ་གཉིས་ཙམ་ཞིག་དོང་མོ་ཆེར་ལྷུང་སོང་། ཆ་གཅིག་དྲག་ཆར་དང་རླུང་འཚུབ་ཀྱིས་དེད་པས་སྐྲག་ནས་ནགས་གསེབ་དང་ས་ཕུག་གད་ཁུང་སོགས་གང་བྱུང་དུ་གབ་སོང་། ང་ཨ་མས་གོས་ཀྱིས་བསྐྱབས་ནས་སེར་དྲག་དང་རླུང་འཚུབ་འཕྲད་ཀྱང་གནོད་པ་སྡུག་པོ་མ་བྱུང་། ད་སྔར་དོང་མོ་ཆེའི་ནང་དུའང་མ་སོང་། ཨ་ཁུ་ཁམས་པ་སོགས་ངོ་ཤེས་པ་མང་པོ་དོང་མོ་ཆེ་ནང་དུ་ཁྲིད་སོང་། ད་ལྟར་སྡུག་བསྔལ་མྱོང་ཚོད་ཡོད། ད་དུང་ཕ་ཡུལ་གཅིག་པའི་མི་འགའ་རེའི་མིང་ནས་བཟུང་ནས་དེ་དག་གིས། བླ་མ་ཉི་ཟླས་སྡིག་ཅན་གྱི་ཁྱིམ་ལ་མ་འགྲོ་གྲིབ་འོང་ཟེར་ཡང་། ད་བར་ཁྱིམ་གཙང་མར་མ་རྙེད། འདུག་ཡུན་རིང་ན་དོང་མོ་ཆེའི་མཐིལ་དུ་འཐེན་ཉེན་ཡོད། ད་སྔོན་ཁྱེད་དང་མཉམ་པོར་འགྲོགས་པས་ཕན་པ་ཡིན་གྱི། ད་སྡིག་ཅན་གྱི་ཁྱིམ་ཡིན་ཡང་སྐྱེ་བ་ཞིག་ལེན་ན་དགའ་ཟེར་ནས་སོང་། ངན་སོང་གསུམ་ལ་མ་སོང་ཡང་སྡིག་ཅན་གཅིག་གི་ཁྱིམ་དུ་ད་ཙམ་སྐྱེ་ཚོད་ཡིན་ཟེར་ནས། ཡང་གཏམ་བཤད་འཕྲོ་ལ་སྐྱོ་གླུ་ལྷང་ལྷང་འཐེན་ཏེ་ལས་རླུང་གིས་དེད་ནས་སོང་། ཁྱིམ་ཁྱིམ་བཤེས་གཉེན་མཁན་པོའི་ཁྱིམ། །དཀོན་དཀོན་ས་སྟེང་འདི་ན་དཀོན། །བཙོག་བཙོག་སྡིག་ཅན་ཁྱིམ་རེ་བཙོག །སྐྱིད་སྐྱིད་མི་ཡུལ་འདི་ན་སྐྱིད། །སྡུག་སྡུག་བར་དོའི་འཕྲང་རེ་སྡུག །ཐུང་ཐུང་མི་ཚེ་འདི་འདྲ་ཐུང་། །ཆུང་ཆུང་རང་དབང་འདི་འདྲ་ཆུང་། །ཞེས་སྐྱོ་ཤས་ལྷང་ལྷང་འཐེན་བཞིན་ཤིང་ཁུར་འཁྱེར་ནས་འཕྲང་ལ་སོང་བ་ན། ཡང་གུ་རུ་ཉི་ཟླ་འོད་ཟེར་གྱིས་དེད་ནས་བོས་པས་ཁོ་དེར་སྡོད་ཟེར་ནས། ཡང་དྲིས་པ། ཁྱོད་ད་རུང་ཕ་ཡུལ་གྱི་མི་ཤི་བ་རྣམས་དང་འཕྲད་ཨེ་བྱུང་། སྐད་ཆ་ཞིབ་པར་ཤོད་ཟེར་དུས། ཁོས་ཐུག་རྒྱུ་མང་པོ་ཐུག་ཀྱང་། ལ་ལ་ནི་ཡུད་ཙམ་ན་བྲལ་སོང་། ལ་ལ་ནི་ཉིན་རེ་ཙམ་མཉམ་པོར་བྱུང་། ཁྱེད་ལ་དབང་ཞུས་པའི་མི་བཞི་ལྔ་ཞིག་དང་ཞག་བཅུ་ཙམ་ལ་མཉམ་པོར་བྱུང་། ཉོས་བཙུན་མ་ནི་རི་ཞིག་ལ་འཛེགས་སོང་། སྐྱིད་སྡུག་ནི་ཅི་འདྲ་བྱུང་ཆ་མེད། གཞན་ཐམས་ཅད་གློ་བུར་དུ་གར་སོང་ཆ་མེད་པར་གཅིག་ཟག་གཉིས་ཟག་ལ་སོང་། ཡིན་ཡང་བར་དོའི་ཆོས་དང་དེའི་ནང་ནས་ཀྱང་བར་དོ་ཐོས་གྲོལ་འདི་བས་དགའ་ཞིག་མི་འདུག འདི་གསོན་པོའི་དུས་སུ་རྣ་བར་འཇག ཡིད་ལ་བྱང་དགོས་འདུག ང་ཚོ་བར་དོ་ཐོས་གྲོལ་རྣ་བར་ཐོས་མྱོང་བ་རྣམས་ཀྱང་གནས་བཟང་ངན་འདམ་ཤེས། ངེད་རྣམས་འགའ་རེས་བར་དོའི་སྨོན་ལམ་རྣམས་གྲབ་གཅིག་ཏུ་བསྒྲིགས་ནས་མགུར་མར་འཐེན་པས། མི་འབུམ་ཚོ་མང་པོ་ངུ་སྒྲ་དིར་གྱིས་བྱུང་། ཁྱོད་རྣམས་ཅི་ལ་ངུ་བ་ཡིན་དྲིས་པས། ཁྱེད་རྣམ་པ་རེ་དགའ། དེ་འདྲའི་སྨོན་ལམ་ཡག་པོ་ཤེས་པས་གནས་ཁང་འདམ་ཤེས། མཉམ་པོར་འགྲོགས་རྒྱུ་འདུག་པས་ཁྱེད་རྣམས་ལ་སྨོན་པ་ཡིན། ངེད་རྣམས་ཡིད་མུག་སྐྱེས་ནས་ངུ་བ་ཡིན་ཟེར། ངས་བར་དོ་ཐོས་གྲོལ་མགོ་འཇུག་ཚང་ལ་ཁད་ཙམ་མི་དེ་རྣམས་ལ་བཤད་རྒྱུ་བྱུང་བས། མི་དེ་རྣམས་ན་རེ། ཁྱོད་རྣམས་ཆོས་ཉིད་བར་དོའི་སྐབས་སུ་འོད་ལམ་ཡག་པོ་དེ་འདྲ་བ་གཅིག་ལ་མི་འགྲོ་བར་ད་དུང་འདིར་བསྡད་པ་ཅི་ཡིན་ཟེར། ང་ཆོས་ཉིད་བར་དོའི་སྒྲ་འོད་ཟེར་གསུམ་ཟིལ་ཆེ་བས་སྐྲག་ནས་བརྒྱལ་སོང་། འོད་ལམ་དང་གནས་ལུགས་ཀྱང་མི་སྣང་། ངོ་ཤེས་ལ་ཁད་མི་ཤེས་པས་རེད། ངས་གསོན་པོའི་དུས་སུ་བར་དོའི་ངོ་སྤྲོད་ལན་གཉིས་ཐོབ་པས། ཆོས་ཉིད་བར་དོ་ངོས་ཟིན་ལ་ཁད་ཡལ་ནས་འགྲོ། ལན་གསུམ་ཐོབ་ནས་ངོས་ཟིན་ངེས་འདུག་སྟེ། ལན་གཉིས་ལས་མ་ཐོབ་པས་ད་རུང་ངོས་མ་ཟིན་པ་ཡིན། ད་ཆོས་ལྡན་གྱི་བུ་ཞིག་སྐྱེས་ན་དགའ་བས་གནས་བཟང་པོ་ཞིག་སྒུག་ཀྱང་རྙེད་པར་དཀའ་ཟེར་འཕྲོ་ལ། ཁྱིམ་ཁྱིམ་བཤེས་གཉེན་མཁན་པོའི་ཁྱིམ། །དཀོན་དཀོན་ས་སྟེང་འདི་རུ་དཀོན། །བཙོག་བཙོག་སྡིག་ཅན་ཁྱིམ་རེ་བཙོག །མང་མང་ངན་སོང་མངལ་སྒོ་མང་། །སྐྱོ་སྐྱོ་བར་དོའི་འཕྲང་ལ་སྐྱོ། །ཞེས་ལྷང་ལྷང་འདོན་ཞིང་། ཡང་ཤིང་དེ་འཁུར་ནས་འཕྲང་བརྒྱུད་དེ་ཡུད་དེ་ཡུད་དེ་འགྲོ་བ་དང་། ཡང་ཉི་ཟླས་བོས་ཤིང་། ལག་ནས་བཟུང་སྟེ། ཁྱོད་སྐྱོ་མི་དགོས། ངས་ཁྱོད་ལ་སྡུག་བསྔལ་བར་མི་འཇུག ཁྱོད་ཀྱིས་བར་དོའི་སེམས་ཅན་ཐམས་ཅད་ལ་འཕྲིན་གྱིས། དམ་པ་ཉི་ཟླ་འོད་ཟེར་གྱིས་ནངས་རེ་བཞིན་བར་དོ་ཐོས་གྲོལ་དང་བཏགས་གྲོལ་འདོན་གྱིན་ཡོད་ཉན་དུ་འགྲོ་ཟེར་ནས་ཁྲིད་ལ་ཤོག ངས་ནངས་རེ་བཞིན་མ་ཆག་པར་ཐོས་གྲོལ་དང་བཏགས་གྲོལ་འདོན། བརྒྱ་རྩ་དང་ཆུ་གཏོར་བར་དོ་ཆུ་སྦྱིན། བསྔོ་བ་སྨོན་ལམ་བཏབ་ཀྱིན་ཡོད་གསུངས། ཁོ་ན་རེ། ཁྱེད་ཀྱིས་བར་དོའི་སྨོན་ལམ་ནངས་རེ་བཞིན་བཏོན་པས་ཐམས་ཅད་ལ་བཀའ་དྲིན་ཆེ། སྨོན་ལམ་དེ་དག་གིས་བར་དོའི་སེམས་ཅན་རྣམས་ལ་ཕན་ཐོགས་འདུག ང་དང་བོད་ཀྱི་སྔགས་པ་གསུམ་བར་དོའི་སེམས་ཅན་ནང་དབང་ཆེ་ཤོས་ཡིན། ཁོང་གསུམ་ནི་ཐོས་གྲོལ་ཉམས་ལེན་བྱེད་མཁན་ཡིན་ཟེར། གསང་སྔགས་ཀྱི་དབང་མང་པོ་ཐོབ་པའི་ཕན་ཡོན་རེད་བསམ་པ་བྱུང་། ང་ནི་མི་ཡུལ་ལ་སྡོད་ཡུན་ཐུང་བས་ད་རུང་མི་ལུས་གཙང་མ་ཞིག་ཨེ་རྙེད་བསམ་ནས་སྒུག་ཡོད། ཨ་མས་གནས་ཚང་གཙང་མ་ཞིག་མ་རྙེད་བར་དོང་མོ་ཆེར་མི་གཏོང་ཟེར། གནས་ཁང་གཙང་མ་ནི་བར་དོའི་སྐབས་འདིར་དཔེར་ན་མི་ཡུལ་དུ་ཡིད་བཞིན་ནོར་བུ་བས་ཀྱང་དཀོན་པར་སྣང་ངོ། །ད་ནི་ཉུག་དཀའ་བ་ཟེར་བཞིན། ཡང་འཇིགས་འཇིགས་དོང་མོ་ཆེ་རེ་འཇིགས། །སྐྱོ་སྐྱོ་བར་དོའི་འཕྲང་རེ་སྐྱོ། །ལྗིད་ལྗིད་ཤིང་ཁུར་འདི་རེ་ལྗིད། །བུད་བུད་བར་དོར་ཉུག་རེ་བུད། །ཁྱིམ་ཁྱིམ་བཤེས་གཉེན་མཁན་པོའི་ཁྱིམ། །དཀོན་དཀོན་ས་སྟེང་འདི་རུ་དཀོན། །ཟེར་ནས་ཤིན་ཏུ་སྐྱོ་བའི་ཚུལ་གྱིས་སྐྱོ་གླུ་འཐེན་བཞིན་སོང་བ་ན། ཉི་ཟླ་འོད་ཟེར་མཆི་མ་ཤོར་ཏེ། ཡང་བོས་ནས་ཁྱོད་མ་འགྲོ་དང་། ངས་ཁྱོད་ལ་བཤད་རྒྱུ་གཅིག་ཡོད་བྱས་པས། ངལ་སྟེགས་ཤིག་གི་ཐོག་ཏུ་ཤིང་ཁུར་ཕོག་ནས་ཧུ་ཤུ་ཟེར་ཞིང་སྒུག་བསྡད་པ་ལ། ད་ཁྱོད་སྡུག་མི་དགོས། ངས་ཀླས་ལར་ཞི་ཁྲོའི་ཕོ་བྲང་གཅིག་བཞེངས་ཡོད། དེའི་དགེ་རྩ་ཁྱོད་ལ་བསྔོ། དགེ་བཤེས་དང་དགེ་འདུན་ལ་མ་ཎི་གསུང་དུ་འཇུག་པ་དང་། མ་ཎིའི་རྒྱུན་འཛུགས་ཡོད་པ་ཁྱོད་ལ་བསྔོའོ། །ང་རང་གི་དགེ་སྦྱོར་བྱས་ཚད་ཁྱོད་ལ་བསྔོའོ། །ཤུལ་དུ་མ་སྨད་རྣམས་ལ་མ་ཎི་བགྲང་བ་སོགས། གཞན་ཡང་དགེ་རྩ་ཅི་འགྲུབ་གྱིས་བྱས་ཡོད། ཁྱོད་ད་ལྟ་བར་དོའི་ལུས་ཡིན་པས་འདུན་པ་རྩེ་གཅིག་སེམས་ལ་བཟུང་ན་འདུན་པ་གར་གཏད་དུ་འགྲོ་ཆོག་པར་གསུངས་ཡོད་པས། ཁྱོད་ཟངས་མདོག་དཔལ་རིར་ཨོ་རྒྱན་རིན་པོ་ཆེའི་དྲུང་དུ་འདུན་པ་དྲག་པོར་གཏོད་ལ། སྨོན་ལམ་བཏབ་ནས་རིག་འཛིན་གྱི་ཚོགས་གྲལ་དུ་སོང་ན་མི་དགའམ་ཟེར་བས། ཡང་ཁོས་མི་ཡུལ་དུ་འདུག་ཡུན་ཐུང་བས་ཞེ་མ་ཚིམ། ཁྱེད་སྤུན་ཡ་རྣམས་ཀྱི་དྲིན་གྱིས་སྡིག་པ་ཆུང་ཡང་དེ་དུས་ཆོས་ཤིག་མ་བྱས་པས་འགྱོད་པ་ཆེ། ཕ་མ་སྤུན་ཡ་ཁྱེད་རྣམས་དང་འགྲོགས་ལོང་མ་བྱུང་བས་ཞེ་འགྱོད་ཆེ། ད་དེ་འདྲ་གར་བཙལ་ཀྱང་མི་རྙེད། ཡོད་པ་དེ་ལ་རང་དབང་མ་ཐོབ་པས། ད་མེད་པ་གཅིག་བཙལ་དགོས་པས་སྡུག་པ་ལ། ད་རུང་མི་ལུས་ཆོས་ལྡན་ཞིག་རྙེད་རྒྱུ་སྒུག་པ་ཡིན་ཟེར་ནས་མིག་ནས་མཆི་མ་ཤར་ཤར་དུ་བྱུང་། འོ་ན་ཁྱོད་ཀྱི་བུ་མོ་ཁྲ་ཧུ་རེ་གར་སོང་། འཕྲད་ཨེ་བྱུང་དྲིས་པས། ཟླ་བ་སྔོན་མ་ལ་ཁྲོམ་ཆེན་པོ་ཞིག་གི་དཀྱིལ་དུ་ཡུད་ཙམ་གཅིག་འཕྲད་བྱུང་། དེ་ནས་གར་སོང་ཆ་མེད་དུ་སོང་། དེ་ནས་མ་འཕྲད་ཟེར་ནས་བུ་མོ་དྲན་པས་མིག་ནས་མཆི་མ་བཏོན་ཅིང་། སྐྱོ་གླུ་བླངས་བཞིན་ཤིང་ཁུར་འཁུར་ནས་འཕྲང་དེར་སོང་ནས། སྐྱིད་སྐྱིད་མི་ཡུལ་མཐིལ་རེ་སྐྱིད། །སྡུག་སྡུག་བར་དོའི་འཕྲང་རེ་སྡུག །ཐུང་ཐུང་མི་ཚེ་འདི་ལས་ཐུང་། །སྐྱོ་སྐྱོ་འགྲོགས་ལོང་མེད་པར་སྐྱོ། །ཆུང་ཆུང་རང་དབང་འདི་ལས་ཆུང་། །ཟེར་བཞིན་སོང་བ་དང་། ཡང་བོས་ཏེ་ཁྱོས་སྒུག་དང་འདྲི་རྒྱུ་ཞིག་ཡོད། ཁྱོད་ཀྱིས་ཆོས་ཀྱི་རྒྱལ་པོའི་དྲུང་དུ་མཇལ་ས་ཨེ་སོང་བྱས་པས། མ་སོང་། དོང་མོ་ཆེའི་ནང་དུ་བབ་ན་མཇལ་བར་ཡིན་ཡང་། འགྲོ་མ་ཕོད། ང་ནི་ཨ་མས་བསྲུངས་པ་རེད། གཞན་སྲུང་མི་མེད་པ་རྣམས་རང་དབང་མེད་པར་འཁྲིད་སོང་ཟེར་ནས་འགྲོ་གྲབ་བྱེད་ཅིང་། འཇིགས་འཇིགས་དོང་མུན་ནག་པོ་འཇིགས། །མགྱོགས་མགྱོགས་ལས་རླུང་ནག་པོ་མགྱོགས། །ཚ་ཚ་ལས་ཀྱི་མེ་རེ་ཚ། །འཁྱམས་འཁྱམས་གྲོགས་མེད་གཅིག་པུར་འཁྱམས། །ལུས་ལུས་ཐམས་ཅད་ཤུལ་དུ་ལུས། །ལྕི་ལྕི་ལས་ངན་སྡིག་སྒྲིབ་ལྕི། །ཟེར་ནས་ཡང་ཤིང་ཁུར་བོ་ཡང་བསིགས་བྱས་ནས། ཧུ་ཤུ་ཟེར་ཏེ་སེམས་ཕམ་པའི་ཚུལ་བྱས་ཏེ་སོང་། ཁྱོད་དེ་འདྲ་སྡུག་བསྔལ་མ་བྱེད། ཁྱོད་མི་ལུས་བཟང་པོའི་གནས་རྙེད་པ་དང་། ཕྱི་མར་ཆོས་དང་འཕྲད་པ་དང་། ང་རང་སྤུན་རྣམས་དང་ཡང་ཁྱོད་སྐྱེ་བ་ཕྱི་མར་འཕྲད་པའི་སྨོན་ལམ་རྒྱ་ཆེན་པོ་ངས་བཏབ་བོ། །སྡུག་མི་དགོས། ཁྱོད་གཅིག་པུ་མིན། ངེད་རྣམས་ཀྱང་འདི་འདྲ་རེས་མོས་བྱས་ནས་ལུས་ཐོག་ཏུ་མྱོང་དགོས། སེམས་ཅན་ཀུན་ལ་འོང་། ཁྱོད་རང་སེམས་ཕམ་མི་དགོས། ཇོ་བོ་ཐུགས་རྗེ་ཆེན་པོ་དང་ཨ་མས་རོགས་བྱེད་པ་དེ་ཡི་དམ་རྡོ་རྗེ་ཕག་མོ་ཡིན། ཁྱོད་རང་གིས་དབང་ཐོབ་པ་དང་ཁྲོས་མའི་ཕྲིན་ལས་ཤེས་པའི་བྱིན་རླབས་འཇུག་པ་རེད། ཁྱོད་རང་གསོལ་བ་ཐོབ་གསུངས་པ་ན། ཁོ་ན་རེ། སྤྱིར་བར་དོ་སྡུག་དྲགས་པས་དེ་སྐད་སྨྲེ་སྔགས་འདོན་པ་ཡིན། བར་དོའི་སེམས་ཅན་གཞན་དང་བར་དོ་བ་ཕལ་ཆེར་ལས་ང་རང་སྐྱིད་པ་ཡིན། ཁྱེད་ཀྱིས་སྐྱེ་བདུན་རིལ་བུ་དང་བཏགས་གྲོལ་སྦྲགས་མ་སྲེག་པ་དེས་ར་རང་ལ་ཤིན་ཏུ་ཕན་པར་མ་ཟད། བར་དོའི་སེམས་ཅན་ཀུན་ལའང་ཕན་པ་རྒྱ་ཆེན་པོ་བྱུང་འདུག ད་རུང་ཡང་ངའི་རུས་པ་སྐམ་པོར་ཚ་ཚ་ཐོབ། བཏགས་གྲོལ་དང་སྐྱེ་བདུན་རིལ་བུ་སྦྲགས་ནས་མེར་བསྲེག་པར་མཛོད། ན་རཀ་སྐོང་བཤགས་འདི་ཕན་ཡོན་ཆེ་བར་སྣང་བས་འབད་འབུང་ཐོན་ཞེས་ཟེར། ཡང་ལངས་ནས་ཁོ་ཤོག་སྐམ་པོ་རླུང་གིས་འཁྱེར་བ་བཞིན་འདུག་དབང་མེད་པར་སོང་ཐལ་གསུངས་པ་རེད། དེས་ན་གུ་རུ་ཉི་ཟླ་འོད་ཟེར་གྱི་མཆེད་ཡ་སྔགས་པ་ཆོས་ལྡན་དེ་འདྲ་བས་བར་དོའི་སྡུག་བསྔལ་དང་འཇིགས་སྐྲག་དེ་འདྲ་མྱོང་བས་མི་ཚད། དམྱལ་བའི་དོང་མོ་ཆེའི་ནང་དུ་ལྷུང་བར་དེ་འདྲའི་སྐྲག་སྔངས་ཤིག་དགོས་ན། རང་རེ་དམྱལ་བར་འགྲོ་རྒྱུའི་ཆ་རྐྱེན་ཚང་མ་བསྒྲུབས་ནས་འགྲོ་ཆོག་ཆོག་བྱས་ཡོད་ན་མིག་བཙུམ་ལོང་དང་བར་དོའི་སྣང་བ་ཤར་ལོང་མེད་པར་འདི་ནས་གསུངས་པའི་དམྱལ་ཁམས་དེ་དག་གི་ནང་དུ་སྐྱེས་སོང་ན་ཇི་ལྟར་བྱེད། རང་མ་སྐྱེ་རུང་རྡོ་རྗེ་རྒྱལ་མཚན་གྱི་བུ་མོ་ཆུང་ཆུང་མི་མང་ནང་འཕྲད་ཙམ་བྱས་ནས་དེ་ཕྱིན་ཆད་མ་ཐུག་པ་བཞིན་དུ། རང་རེའི་སྤུན་སྲིང་མོ། ཕ་ཁུ་བོ། མ་ཞང་པོ། སྙིང་དང་འདྲ་བའི་གཅེས་དམར་མ་འདིང་ཆེན་དེ་ཚོ་དེ་དང་འདྲ་བར་་རིག་རྒྱུ་མེད་པ་རེད། དམྱལ་བའི་དོང་མོ་ཆེའི་ནང་དུ་ལྷུང་ནས་སྡུག་བསྔལ་མྱོང་བཞིན་ཡོད་ན་ཅི་འདྲ་བྱེད། ངོ་མ་དེ་འདྲའི་སྡུག་བསྔལ་མྱོང་བ་དེ་ཚོ་རང་གཞན་གཉིས་ཀས་ཤེས་ཤེས་ཁ་བསམ་བློ་མ་གཏོང་ན། དུད་འགྲོ་ལས་སྡུག་པ་ཞིག་ཨེ་ཡོད་ན་མ་གཏོགས་དུད་འགྲོ་ལས་ཀྱང་སྡུག་རེད། དམྱལ་བ་ན་ཡོད་པའི་སེམས་ཅན་རྣམས་དོན་མེད་དག་དག་མ་རེད། ཕ་མ་བྱེད་མ་མྱོང་བའི་སེམས་ཅན་གཅིག་ཀྱང་མེད་པས། ཁྲིད་འདི་ཚོ་ཞུས་ནས་དེའི་རྒྱུ་མཚན་ཤེས་དགོས། འདི་ལྟར་དམྱལ་བའི་སྡུག་བསྔལ་ནི་ཞེས་འདི་མན་གྱིས་ངན་སོང་གི་སྡུག་བསྔལ་ལས་དམྱལ་བའི་སྡུག་བསྔལ་བྱེ་བྲག་ཏུ་བཤད་པ་རེད། བཤེས་སྤྲིང་ལས། དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླགས་སམ་གཟུགས་སུ་བགྱིས་པས་ཀྱང་། །སྡུག་བསྔལ་སྐྱེ་བར་འགྱུར་ན་མི་བཟོད་པའི། །རྣམ་སྨིན་ཉམས་སུ་མྱོང་ན་སྨོས་ཅི་དགོས། །ཞེས་དམྱལ་བ་རི་མོ་བྲིས་པ་མཐོང་བ་དང་། གཞན་ལས་ཐོས་པ་དང་། དམྱལ་བའི་སྡུག་བསྔལ་བཤད་པ་དྲན་པ་དང་། གསུང་རབ་ལས་བཀླག་པ་དང་། འཇིམ་པ་སོགས་ལས་དམྱལ་བའི་སེམས་ཅན་གྱི་གཟུགས་བརྙན་བགྱིས་པས་ཀྱང་། སེམས་ལ་སྡུག་བསྔལ་འཇིགས་སྐྲག་སྐྱེ་བར་འགྱུར་བ་ཡིན་ན། དམྱལ་ཁམས་དངོས་སུ་སྐྱེས་ནས་མི་བཟོད་པའི་རྣམ་སྨིན་གྱི་སྡུག་བསྔལ་དྲག་པོ་དངོས་སུ་ཉམས་སུ་མྱོང་ན་འཇིགས་སྐྲག་ཡོད་པར་སྨོས་ཅི་དགོས། ཞེས་གསུངས་པ་དེ་ལྟ་བུའི་ཚ་གྲང་གི་སྡུག་བསྔལ་སོགས་རང་གི་རྒྱུད་ཐོག་ཏུ་མ་བསམ་ན། གཞན་གྱི་སྡུག་བསྔལ་ལ་ལྟད་མོ་བལྟ་བ་ལྟ་བུས་རང་རྒྱུད་ལ་མི་སྐྱེ། ཞེས་གསུངས་པས། ཁྲིད་འདི་ཚོ་ཞུ་དུས་ཉན་ནས་སྡུག་བསྔལ་དེ་འདྲ་ཡོད་པར་ཤེས་པ་ཙམ་གྱིས་མི་ཕན་ཏེ། ད་སྔར་ཡང་གོ་མྱོང་། ད་ཡང་ལན་བརྒྱ་གོ་ཡང་ཕན་ཐོགས་མེད། དེ་ལྟ་བུའི་སྡུག་བསྔལ་རང་གི་རྒྱུད་ཐོག་ལ་ངོ་མ་མྱོང་བར་བསམ་ཏེ་དམྱལ་བ་སྐྱེས་ནས་ཚ་གྲང་། ཡི་དྭགས་སྐྱེས་ནས་བཀྲེས་སྐོམ་སོགས་དངོས་སུ་མྱོང་བར་བསམ་དགོས་སོ། །དེ་ལྟར་མ་བསམ་པར་གཞན་གྱི་སྡུག་བསྔལ་ལ་ལྟད་མོ་བལྟ་བ་ལྟ་བུས་རང་རྒྱུད་ལ་ངེས་འབྱུང་དང་སྙིང་རྗེའི་བསམ་པ་ཡང་དག་མི་སྐྱེ་གསུངས་པ་རེད། འདི་ན་གསུང་རྒྱུ་ནི་ངེས་འབྱུང་རྣམ་དག་དང་བྱམས་སྙིང་རྗེ་རང་རྒྱུད་ལ་སྐྱེ་བའི་ཆེད་དུ་ངན་སོང་གི་སྡུག་བསྔལ་དེ་རང་གི་ལུས་ཐོག་ལ་ཉམས་སུ་མྱོང་བར་བསམ་པ་རེད། ལས་དང་པོ་བས་ཁྱད་པར་དུ་བློ་ལྡོག་རྣམ་བཞིས་བློ་མ་སྦྱོང་བར་བྱམས་དང་སྙིང་རྗེ་རྒྱུད་ལ་མེད་པའི་དམུ་རྒོད་ཅིག་གིས་རང་མཐུན་སེམས་ཅན་གྱི་སྡུག་བསྔལ་མྱོང་བ་མངོན་སུམ་དུ་མཐོང་བཞིན་པ་ལ་སྙིང་རྗེ་ཡང་སྐྱེ་བར་དཀའ་བ་ཡིན་པས་ན། ད་རེས་ཁྲིད་འདི་ལ་སེམས་ཅན་གྱི་སྡུག་བསྔལ་དེ་རང་གི་རྒྱུད་ཐོག་ལ་བྱུང་བར་བསམ་པའི་བློ་ནང་དུ་བཀུག་ནས་སྒོམ་དགོས་ཏེ། རྫོགས་པ་ཆེན་པོའི་འདས་རྗེས་ལས་ཀྱང་། རིགས་དྲུག་སྡུག་བསྔལ་བློ་ལ་བླངས། །ཞེས་སྔོན་འགྲོའི་ཁྲིད་སྦྱོང་གི་སྐབས་སམ་གནས་སྐབས་ཐམས་ཅད་དུ་རིགས་དྲུག་གི་ཕ་མར་གྱུར་པའི་སེམས་ཅན་ཐམས་ཅད་ཀྱི་སྡུག་བསྔལ་བློ་ལ་བླངས་ནས་རང་གི་རྒྱུད་ཐོག་དངོས་སུ་མྱོང་བར་བསམ། ཞེས་གསུངས་པའི་ཕྱིར་རོ། །དེའི་ཡན་གྱིས་ལུང་ལས་དཔག་ནས་འཁོར་བ་སྤྱི་དང་བྱེ་བྲག་ངན་སོང་དང་དེའི་ནང་དམྱལ་བའི་སྡུག་བསྔལ་རྒྱུད་ཐོག་ལ་བླངས་ཏེ་དེ་དང་དེ་འདྲ་བའི་མྱོང་དང་མྱང་འགྱུར་གྱི་སེམས་ཅན་ལ་སྙིང་རྗེ་བསྐྱེད་ཚུལ་བསྟན་ཏོ།།

གཉིས་པ་དེའི་དོན་མན་ངག་ལག་ཁྲིད་ཀྱི་སྒོ་ནས་བསམ་པ།

དེའི་དོན་མན་ངག་ལག་ཁྲིད་ཀྱི་སྒོ་ནས་བསམ་པ་ནི། བསམ་གཏན་གྱི་ཚེར་མ་མེད་པའི་གནས་དབེན་པར་སོང་སྟེ། འདུག་སྟངས་སྐྱིལ་ཀྲུང་མཉམ་བཞག་གམ་དྲང་སྲོང་ཙོག་པུར་ལྟ་བུའི་མྱ་ངན་གྱི་འདུག་སྟངས་བྱས་ནས། བརྒྱུད་པའི་གསོལ་འདེབས་སོགས་བཏོན། དངོས་གཞི་ཐུན་གྱི་སྐབས་སུ་བསྒོམ་ཚུལ་དངོས་ནི། གང་ནས་ཡོང་དང་གང་ན་ཕྱིན་ཆ་མེད་པར་གངས་རི་ཆེན་པོའི་སྟོངས་སམ་བར་གསེབ། ཞབས་ཐམས་ཅད་འཁྱགས་རོམ་གྱི་སྦུག་གིས་གང་ལ། སྟེང་དང་བར་སྣང་ན་ཆར་རླུང་ཤིན་ཏུ་མི་བཟད་པས་མུན་པ་ནག་པོས་ནོག་ནོག་པོར་བྱེད་པ་ཞིག་ཏུ་སླེབས་པས། ཤིན་ཏུ་གྲང་ཞིང་འཁྱག་པའི་སྣང་བ་འདྲ་ཞིག་ཤར་ཏེ་འདི་འདྲ་མ་གྲང་བར་ཅུང་དྲོ་ན་བསམ་ནས་ཚ་བ་དོན་དུ་གཉེར་བའི་བསམ་པ་ཤར་བ་ན། བསམ་ལོང་དྲན་ལོང་མེད་པར་སྐད་ཅིག་ལ་རྨི་ལམ་འཁྲུལ་བ་ལྟར་ཚ་དམྱལ་དུ་སྐྱེས་ཏེ་འོག་ཐམས་ཅད་མེ་ལྕེ་ལྷབ་ལྷུབ་ཏུ་འབར་བའི་ལྕགས་བསྲེགས་ཀྱི་ས་གཞི། ཁོར་ཡུག་ཐམས་ཅད་ཀྱང་གང་ལ་བལྟས་ན་ལྕགས་བསྲེགས་ཀྱི་ར་བས་བསྐོར་བ། སྟེང་འོག་ཕྱོགས་མཚམས་ཐམས་ཅད་གོ་མཚམས་དང་བར་མཚམས་མེད་པར་མེ་ལྕེ་དམར་ལྷབ་ལྷབ་འབར་བས་ཁེངས་ཤིང་། མེ་རི་དང་མེ་དོང་འབར་ཞིང་འཁྲུགས་པའི་ཀློང་དུ་གྱུར། དེའི་ཡན་ཚ་དམྱལ་གྱི་གནས་བརྒྱད་པོ་དྲག་ཞན་མ་གཏོགས་ཧ་ལམ་འདྲ་བ་ཡིན། སྤྱིར་དམྱལ་བའི་གནས་ཀྱི་སྡུག་བསྔལ་བསམ་པའི་སྐབས་འདིར། དམྱལ་བའི་དབྱེ་བ། གནས། སྡུག་བསྔལ། ཚེ་ཚད་བཞིའི་སྒོ་ནས་བཤད་ན། དམྱལ་བ་ལ་ཚ་དམྱལ་བརྒྱད་དང་། གྲང་དམྱལ་བརྒྱད། ཉེ་འཁོར་དང་ཉེ་ཚེ་གཉིས་ཏེ་བཅོ་བརྒྱད་ཡོད། ཚ་དམྱལ་གྱི་གནས་ནི། མཛོད་ལས། འདི་འོག་སྟོང་ཕྲག་ཉི་ཤུ་ན། །མནར་མེད་པའོ་དེ་ཙམ་མོ། །དེ་ཡི་སྟེང་ན་དམྱལ་བ་བདུན། །ཞེས་གསུངས་པ་དང་། ལྷས་བྱིན་དངོས་སུ་ས་གས་ཏེ་ས་འོག་གི་དམྱལ་བར་ལྷུང་སོང་ཞེས་པ་དང་མཐུན་ཞིང་། ཡང་སྡིག་ཅན་གང་དུ་ཚེ་འཕོས་པ་དེ་ཉིད་དུ་དམྱལ་བའི་སྣང་བ་འཆར་ཞེས་གསུངས་པའང་ཡོད། ལས་སྣང་ཡིན་པའི་ཆ་ནས་གང་ལྟར་བྱས་ཀྱང་གནད་འདྲ་བས་འགལ་བ་མེད། མནར་མེད་དེ་འོག་མར་བྱས་ནས་དེའི་སྟེང་ན་རབ་ཏུ་ཚ་བ་དང་། ཚ་བ། ངུ་འབོད་ཆེན་པོ། ངུ་འབོད། བསྡུས་འཇོམས། ཐིག་ནག ཡང་སོས་རྣམས་རིམ་པ་བཞིན་དུ་ཡོད་པར་གསུངས། སྡུག་བསྔལ་མྱོང་ཚུལ་ནི། དམྱལ་བ་སོ་སོའི་མིང་འཇུག་པའི་ཁྱད་པར་གྱི་སྒོ་ནས་གསུངས་པ་རེད། ཚེ་ཚད་ནི། ཡང་སོས་ལ་སོགས་དྲུག་རིམ་བཞིན། །འདོད་ལྷའི་ཚེ་དང་ཉིན་ཞག་མཉམ། །དེས་ན་དེ་དག་རྣམས་ཀྱི་ཚེ། །འདོད་པའི་ལྷ་དང་འདྲ་བ་ཡིན། །ཞེས་པ་ལྟར་རོ། །འདི་ན་དང་པོ་ཡང་སོས་ཀྱི་སྡུག་བསྔལ་གསུངས་པ་ནི། ཚ་དམྱལ་ཡང་སོས་ཀྱི་སྡུག་བསྔལ་མྱོང་བའི་སེམས་ཅན་རྣམས་སྔར་ཞེ་སྡང་གི་དབང་གིས་སྲོག་གཅོད་པའི་རྣམ་སྨིན་ཐོག་ཏུ་བབ་པས། རང་དང་རང་འདྲ་བ་དཔག་ཏུ་མེད་པ་དེ་དག་ཞེ་སྡང་གི་ལས་ཀྱི་དབང་གིས་མཚོན་ཆ་ལག་ཏུ་བྱུང་ནས་ཕན་ཚུན་གཅིག་གིས་གཅིག་ལ་མཚོན་ཆ་སྣ་ཚོགས་བརྡེག་རེས་བྱས་པས། ལུས་ཚལ་པ་བརྒྱ་སྟོང་དུ་སོང་བས་དེའི་ཚེ་ན་ཚ་མ་བཟོད་པར་རེས་འགའ་དྲན་མེད་དུ་བརྒྱལ་ཞིང་། དམྱལ་བའི་སེམས་ཅན་གྱིས་ཤི་བ་བདེ་བར་བརྩིས་པ་རེད། ཤི་བ་སྙམ་བྱེད་པའི་ཚེ་ན་ནམ་མཁའི་དཀྱིལ་ནས། ཡང་སོས་པར་གྱུར་ཅིག་ཅེས་པའི་སྒྲ་སྐད་ལྷང་ལྷང་བྱུང་བས་རྐྱེན་བྱས་སམ། ཡང་འགའ་ཞིག་ཏུ་རླུང་བསིལ་བུ་བྱུང་བས་རྐྱེན་བྱས་པའང་གསུངས་ཡོད། ཡང་སྔར་ལྟར་སོས་ཏེ་སྡུག་བསྔལ་ཤིན་ཏུ་མི་བཟོད་པ་ཉིན་མཚན་བར་མེད་ཁོར་ཡུག་ཏུ་མྱོང་ངོ་། །འདིའི་མཆན་དུ། ཡང་སོས་ཀྱི་ཚེ་ཚད་མི་ལོ་བྱེ་བ་ཕྲག་འབུམ་དྲུག་ཁྲི་ཉིས་སྟོང་གསུངས་ཡོད་པ་འདི། འདོད་ལྷའི་ཚེ་དང་སྦྲགས་ན། མིའི་ལོ་ལྔ་བཅུ་ལ་རྒྱལ་ཆེན་རིགས་བཞིའི་ཞག་གཅིག རྒྱལ་ཆེན་རིགས་བཞིའི་རང་ལོ་ལྔ་བརྒྱ་ཡང་སོས་ཀྱི་ཞག་གཅིག་ཏུ་བརྩིས་པའི་རང་ལོ་ལྔ་བརྒྱ། བསྡུས་འཇོམས་སྟོང་། ཐིག་ནག་ཉིས་སྟོང་། ངུ་འབོད་བཞི་སྟོང་། ངུ་འབོད་ཆེན་པོ་བརྒྱད་སྟོང་། ཚ་བའི་ཆིག་ཁྲི་དྲུག་སྟོང་དང་། རབ་ཏུ་ཚ་བ་བསྐལ་པ་ཕྱེད། མནར་མེད་ཀྱི་བར་བསྐལ་གཅིག་གསུངས་པ་རྣམས་མི་ལོ་དང་བསྒྲིགས་ན་ཡང་སོས་ཀྱི་ཚེ་བྱེ་བ་ཕྲག་འབུམ་དྲུག་ཁྲི་ཉིས་སྟོང་གསུངས་པ་རེད། བཤེས་སྤྲིང་ལས། འདི་ན་ཉིན་གཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ལགས་པ། །དེས་ནི་དམྱལ་བའི་སྡུག་བསྔལ་ཆུང་ངུ་ལའང་། །འོལ་ཡང་མི་བགྱི་ཆར་ཡང་མི་ཕོད་དོ། །ཞེས་མིའི་ནང་འདི་ན་ལུས་ལ་ཉིན་གཅིག་རངས་པོར་མདུང་ཐུང་སུམ་བརྒྱ་ཡིས། དུས་གཅིག་ལ་ཤུགས་དྲག་པོས་བརྒྱབ་པའི་སྡུག་བསྔལ་གྱིས། ཚ་དམྱལ་བའི་ནང་ནས་སྡུག་བསྔལ་ཆུང་ཤོས་ཡང་སོས་སམ་ཉི་ཚེ་བ་ལྟ་བུ་ཡིན་ཡང་། དེའི་སྡུག་བསྔལ་ཆུང་ངུ་ཞིག་གི་བརྒྱ་སྟོང་གི་ཆར་ཡང་འགྲན་མི་ནུས་པར་གསུངས། ཚ་དམྱལ་གྱི་གནས་གཉིས་པ་དམྱལ་བ་ཐིག་ནག་ནི། དམྱལ་བ་དེའི་དམྱལ་སྲུང་འཇིགས་སུ་རུང་བ་མགོ་བརྙན་སྣ་ཚོགས་ཅན་ཁ་ནས་རྒྱབ་སོད་ཀྱི་སྒྲ་སྒྲོག་པ་དེ་དག་གིས། དམྱལ་བའི་སེམས་ཅན་དེའི་རང་ལུས་ལ་ཐིག་ནག་པོ་བཞི་དང་བརྒྱད། བཅུ་དྲུག་སོ་གཉིས་སོགས་བཏབ་སྟེ། སོག་ལེ་རྣོན་པོ་མེ་འབར་བས་གཤགས། སྟ་རེ་རྣོན་པོས་གཞོགས། ཡང་རྨ་འབྱར་བ་ན་སྔར་བཞིན་ཐིག་བཏབ་ནས་གཤགས་པས་ཚེ་ཚད་མ་ཚང་གི་བར་དུ་ཉིན་མཚན་ཁོར་མོ་ཡུག་ཏུ་མནར་བས་དེའི་ན་ཚ་ཤིན་ཏུ་མ་བཟོད་ནས་འོ་དོད་འབོད་ཅིང་འབྲོས་པའི་སྣང་བ་ཤར་རོ། །ཚེ་ཚད་ནི་ཡིག་ཆུང་ནང་དུ། མི་ལོ་བྱེ་བ་ཕྲག་ས་ཡ་ཉིས་འབུམ་དགུ་ཁྲི་དྲུག་སྟོང་བཅུ་གཉིས་གསུང་འདུག དེ་ནས་ཚ་དམྱལ་བའི་གནས་གསུམ་པ་བསྡུས་འཇོམས་ཀྱི་སྡུག་བསྔལ་སྒོམ་སྟེ། འདིའི་ཚེ་ཚད་ནི་མི་ལོ་བྱེ་བ་ཕྲག་གསུམ་འབུམ་ཕྲག་དྲུག་ཁྲི་བརྒྱད་སྟོང་རྩ་གཅིག་གསུངས། རི་བོ་ཐམས་ཅད་གནས་འགྱུར་ཏེ་གླང་ཆེན་དང་སེང་གེ་སྟག་གཟིག་ར་ལུག་ལྟ་བུའི་སེམས་ཅན་དང་སྲོག་ཆགས་ཀྱི་གདོང་དབྱིབས་དེ་ཐམས་ཅད་འགུལ་ཞིང་རྒྱུག་པ་དང་རྡུང་ཁ་བཀྱེ་བའི་བར་དུ་ཚུད་དེ། དམྱལ་བའི་སེམས་ཅན་གྱི་ལུས་རི་བོ་དེ་དག་གི་བར་དུ་གཅིར་ནས་སྒོང་ལྤགས་བཅར་བ་ལྟར་བཙིར་བས་བ་སྤུའི་བུ་ག་ཚུན་ཆད་ནས་ཁྲག་གི་རྒྱུན་ཆི་ལི་ལི་འབབ། ཡང་རི་བོ་ཁ་ཕྱེ་ཞིང་རླུང་གྲང་མོ་ལྡང་བའི་སྣང་བས་ལུས་སྔར་ལྟར་སོས་པ་དང་། ཡང་རི་བོའི་བར་དུ་བཅར་བ་དང་། ལྕགས་ཀྱི་གཏུན་ཆེན་པོའི་ནང་ཐོ་ལུམ་མེ་འབར་བས་རྡུང་བ་སོགས་ཀྱི་སྡུག་བསྔལ་མྱོང་བས་ན་ཚ་དང་སྡུག་བསྔལ་མ་བཟོད་པར་དེ་ནས་འབྲོས་པའི་སྣང་བ་ཤར་རོ། །ཚ་བའི་དམྱལ་བ་བཞི་པ་ངུ་འབོད་ནི། ཚེ་ཚད་མི་ལོ་བྱེ་བ་ཕྲག་ས་ཡ་གཉིས་དང་བྱེ་བ་ཕྲག་དགུ་འབུམ་བཞི་ཁྲི་སྟོང་བྱེ་བ་བདུན། ལྕགས་ཀྱི་ཁང་པ་མེ་འབར་བའི་ནང་དུ་སླེབས་པ་དང་། དང་པོ་འགྲོ་སའི་སྒོ་ཞིག་ཡོད་པའི་སྣང་བ་ཤར་བ་དེ་སྒོ་དབྱེར་མེད་དུ་འགྲིག་སོང་ནས། ལྕགས་ཁྱིམ་སྒོ་མེད་དེའི་ཕྱོགས་མཚམས་ཐམས་ཅད་ནས་མེ་འབར་བས་ལུས་རྡུལ་ཕྲན་ལྟ་བུར་བསྲེག་གོ། །བསྲེགས་ནས་ཤི་ན་དྲག་ཀྱང་ཤི་རྒྱུ་མེད་པར་ཡང་སྔར་བཞིན་མྱོང་། ད་ནི་སྒོ་མེད་ལྕགས་ཁྱིམ་ཡ་ང་བའི་ནང་དུ་ཚུད་པས་འབྲོས་ས་ཡང་མི་འདུག་སྙམ་ནས་ངུ་སྐད་ལྷང་ལྷང་འབོད་པའི་ཚེ། དམྱལ་བའི་གནས་ལྔ་པ་ངུ་འབོད་ཆེན་པོ་ཞེས་པ་ནི། ཚེ་ཚད་མི་ལོ་བྱེ་བ་ཕྲག་ས་ཡ་གསུམ་དང་བྱེ་བ་ཕྲག་ལྔ་འབུམ་ལྔ་ཁྲི་གཉིས་སྟོང་དྲུག་ཅུ་རྩ་དྲུག་ཡིན། ལྕགས་ཁང་སྒོ་མེད་དེ་ལ་སླར་ཡང་ལྕགས་ཁང་རིམ་པ་གཅིག་གིས་གཏུམས་པའི་ལྕགས་ཁང་ཉིས་རིམ་གྱི་ནང་དུ་ཚུད་པས། ད་ནི་ལྕགས་ཁང་ནང་མ་ནས་ཐོན་ཀྱང་ཕྱི་མ་ནས་མི་ཐོན་སྙམ་པའི་ངུ་འབོད་ཆེན་པོའི་སྐད་ཀྱིས་ང་རོ་འབྱིན་པའི་སྡུག་བསྔལ་སྔ་མ་ངུ་འབོད་ལས་ཉིས་འགྱུར་གྱིས་ཆེ་བ་མྱོང་ཞིང་ཤིན་ཏུ་ཉམ་ཐག་གོ །ཚ་དམྱལ་གྱི་གནས་དྲུག་པ་ཚ་བ་ནི། ཚེ་ཚད་མི་ལོ་བྱེ་བ་ཕྲག་ས་ཡ་བརྒྱད་དང་བཞི་འབུམ་བྱེ་བ་ཕྲག་ཁྲི་དྲུག་སྟོང་ལྔ་བརྒྱ་སུམ་ཅུའོ། །ལྕགས་ཀྱི་གསལ་ཤིང་དང་ལྕགས་ཀྱི་མཚོན་ཆ་རྩེ་གཅིག་པ་ཚེར་མ་ཅན་མེ་འབར་བས་འཕོངས་ཀྱི་གཤང་ལམ་ནས་སྤྱི་བོའི་བར་ཏལ་མར་ཐལ་ལེར་ཐོགས་མེད་དུ་ཕུག་སྟེ་མིག་དང་རྣ་བ་སོགས་དབང་པོའི་སྒོ་ཐམས་ཅད་ནས་མེ་ལྕེ་དམར་ལྷབ་ལྷབ་འབར་བ་དང་། ཡང་ལྕགས་ཀྱི་ས་གཞི་མེ་འབར་བའི་སྟེང་ལུས་རྒྱངས་ནས་པགས་པ་བཤུས་ཏེ་ཕུར་བས་བཏབ་ཐོ་བས་བརྡུང་བ་སོགས་ཀྱང་གསུངས་ཡོད། ཡང་རེས་འགའ་ལུས་རིལ་པོ་ཁྲོ་ཆུ་ཁོལ་མའི་ནང་དུ་བཙོས་ནས་ཤ་རུས་སོ་སོར་སོང་ནས་སྐྱ་ཁྲོལ་གྱིས་སོ་སོ་འབྲལ་བའི་སྡུག་བསྔལ་མྱོང་ཡང་ད་དུང་ཡང་ཤི་རྒྱུ་མེད་པར་ཡང་ཡང་མྱོང་ངོ། །ཡང་ཚ་དམྱལ་བདུན་པ་རབ་ཏུ་ཚ་བའི་དམྱལ་བ་ནི། ཚེ་ཚད་བར་གྱི་བསྐལ་པ་ཕྱེད་དེ་མིའི་ལོ་གྲངས་ཀྱིས་གཞལ་བའི་ཡུལ་ལས་འདས་ཞེས་གསུངས། ལྕགས་ཀྱི་གསལ་ཤིང་དང་མཚོན་ཆ་རྩེ་གསུམ་གྱི་དབུས་མ་སྤྱི་བོ་དང་ལོགས་གཉིས་པོ་ཕྲག་པ་གཡས་གཡོན་དུ་ཏལ་མར་ཐལ་ལེར་ཕུག་པ་དང་། ལྕགས་ཀྱི་ཁྲོ་ཆུ་ཁོལ་མ་བླུད་པས་ནང་ཁྲོལ་ཐམས་ཅད་ཚིག་ནས་བུ་ག་དགུ་ནས་དུ་བ་འཐུལ། ལྕགས་སྲེག་ལེབ་མོ་དམར་འབར་བས་ལུས་ལ་སྣམ་བུ་ལྟར་དཀྲི་བས་འཚིག་ཅིང་གཞོབ་པ་དང་། ཕྱོགས་བཞི་མཚམས་བརྒྱད་སྟེང་འོག་གི་མེ་དང་ནང་ནས་གློ་སྙིང་ལ་མེ་འབར་བ་སྟེ་མེའི་ཕུང་པོ་བཅུ་གཅིག་གིས་སྲེག་པར་གསུངས། ལྕགས་ཀྱི་ཐོ་ལུམ་མེ་འབར་བ་དང་ཁྲོ་ཆུ་ཁོལ་མ་ཁ་ནང་དབང་མེད་དུ་བླུག་པ་དང་། ཁྲོ་ཆུ་ཁོལ་མའི་ནང་དུ་ཤ་རྗེན་ལ་བཙོས་པས་ཤ་ལྤགས་རྣམས་འཐོར་ཏེ་ཀེང་རུས་ལྟར་སྐྱ་ཁྲོལ་གྱིས་འགྲོ་བ། ཡང་ཤ་སྔར་བཞིན་སོས་ནས་དེ་ལྟར་མྱོང་བའི་གནས་སུ་སྐྱེས་ནས་སྔ་མའི་སྡུག་བསྔལ་ལས་བརྒྱ་འགྱུར་གྱིས་ཆེ་བས་ཟུག་རྔུ་མ་བཟོད་པར། ངག་ནས་མི་བཟོད་པའི་སྒྲ་ཨ་ར་དང་། ཨུ་ཁྱུ་དང་། ཀྱི་ཧུད་ཀྱི་སྒྲ་དྲག་པོས་འབོད་ཅིང་དེ་ནས་འབྲོས་པའི་སྣང་བ་ཤར་རོ། །དེ་ནས་མནར་མེད་པའི་དམྱལ་བ་ནི། དམྱལ་བ་གོང་མ་རྣམས་ལས་བདུན་འགྱུར་གྱི་སྡུག་བསྔལ་ཆེ་བས་དེ་ལས་མནར་རྒྱུ་མེད་པས་མནར་མེད་ཅེས་བྱ། ཚེ་ཚད་བར་གྱི་བསྐལ་པ་གཅིག་ཡིན། འདིའི་མཆན་ལས། འཇིག་རྟེན་ཆགས་གནས་འཇིག་སྟོངས་ཏེ་བསྐལ་ཆུང་བཞིར་བར་བསྐལ་གཅིག་སྟེ་དེའི་ཚེ་ཚད་ཀྱི་ཡུན་ནོ། །ཞེས་གསུངས་འདུག ལྕགས་ཀྱི་ཁང་པ་མེ་འབར་བ་གནམ་འཕང་དང་རྒྱ་ཁྱོན་དཔག་ཚད་སྟོང་ཕྲག་མང་པོ་ཡོད་པའི་ནང་དུ། ཕྱོགས་མཚམས་དང་མུ་མེད་པར་རབ་ཏུ་ཚ་བའི་མེ་འབར་བས་ལུས་དང་། མེ་དང་གཉིས་སུ་མེད་པར་བསྲེག་ཅིང་ངུ་བའི་སྐད་ལྷང་ལྷང་ཐོས་པ་ཙམ་ལས་ལུས་ཀྱི་དངོས་པོ་འདི་ཞེས་མི་མངོན་པའི་སྡུག་བསྔལ། ནང་གི་ཁང་པ་དཔག་ཚད་སྟོང་ཕྲག་མང་པོ་ཡོད་པའི་ནང་དུ་ཁྲོ་ཆུ་དང་ཟངས་ཞུན་ཁོལ་མ་བླུགས་ནས་དེའི་ནང་དུ་བཙུད་ཅིང་། ཕྱོགས་བཞིར་མེ་འབར་བས་ཤ་རུས་ཐམས་ཅད་བསྲེགས་ནས་དམྱལ་བའི་སེམས་ཅན་འོ་དོད་འབོད་པ་ཙམ་ལས་ལུས་མི་མངོན་པར་སྡུག་བསྔལ་བཟོད་བརླག་མེད་པ་དང་། ལྕགས་ཁང་མེ་འབར་བའི་ནང་དུ་དམྱལ་བའི་ལས་མཁན་རྣམས་ཀྱིས་ཐོ་བས་རྡུང་། དགྲ་སྟས་གཞོག གཏུན་ནང་བརྡུང་། སོག་ལེས་གཤག མདུང་རྩེ་གསུམ་གྱིས་ཕུག ལྕགས་ལེབ་དམར་འབར་གྱིས་དཀྲིས། ལྕེ་ཕྱི་རོལ་བརྒྱངས་ནས་ལྕགས་ཀྱི་ཐོང་གཤོལ་གྱིས་རྨོ་བ་སོགས་ཀྱིས་གོང་མའི་སྡུག་བསྔལ་བསྡོམས་པས་མི་ཚད་བདུན་འགྱུར་གྱིས་མནར་བའི་སྡུག་བསྔལ་བཟོད་བླག་མེད་པར་མྱོང་ཞིང་། ཉམ་ཐག་པའི་འོ་དོད་དང་ཨ་ཙ་མ། ཨ་ར་ར། ཨུ་ཁྱུ། ཀྱི་ཧུད་ཀྱི་ཧུད་ཞེས་འོ་དོད་དང་སྨྲེ་སྔགས་དྲག་པོ་རང་གིས་འདོན་གྱིན་ཡོད་པར་སྒོམས། རང་གི་ལུས་ཐོག་ཏུ་མྱོང་བ་དང་རང་གི་གཉེན་ཉེ་སོགས་ཀྱིས་དེ་ལྟར་མྱོང་བར་བསྒོམ་དགོས། སྡུག་བསྔལ་དྲག་པོ་དེ་ལྟར་མྱོང་བཞིན་པའི་སྐབས་ན། སླར་མདུན་གྱི་ནམ་མཁར། བསམ་ལྷུན་ལས། སྒྱུ་ལུས་གཡར་པོ་ཞིག་པའི་བར་དོ་རུ། །འཁྲུལ་སྣང་ཉིང་འཁྲུལ་སྡུག་བསྔལ་ཉེས་པ་ན། །ཡིད་གཉིས་ཐེ་ཚོམ་མེད་པར་གསོལ་བ་འདེབས། །ཨོ་རྒྱན་བདེ་ཆེན་རྒྱལ་པོའི་ངོ་བོ་སྟེ། །སྡུག་བསྔལ་འཁྲུལ་བ་རྩད་ནས་ཞི་བར་བྱེད། །ཅེས་གསུངས་པ་ལྟར། ཨོ་རྒྱན་བདེ་ཆེན་རྒྱལ་པོ་སྐད་ཅིག་ལ་དངོས་སུ་བྱོན་ནས། ལས་ངན་པའི་སེམས་ཅན་ཉམ་ཐག་ལ་ཐུགས་རྗེས་སྤྱན་གྱིས་གཟིགས་ནས། ཀྱེ་མ་ལས་ངན་པའི་སེམས་ཅན་ཞེས་བོས་ནས། ཁྱོད་ཀྱིས་རྒྱུ་ཞེ་སྡང་གིས་ཀུན་ནས་བསླང་བའི་སྲོག་གཅོད་པ་ལ་སོགས་པའི་ལས་རྔམ་པོ་ཆེ་བསགས། ཡུལ་ཁྱད་པར་ཅན་དཀོན་མཆོག་གསུམ་དང་ཕ་མ་སློབ་དཔོན་དགྲ་བཅོམ་པ་སོགས་ལ་ཁོང་ཁྲོ་དྲག་པོར་བྱས་པས་ལས་དེའི་རྣམ་སྨིན་འབྲས་བུ་དམྱལ་བའི་སྡུག་བསྔལ་དེ་དང་དེ་ལྟ་བུ་མྱོང་བ་ཡིན། ད་ཁྱོད་ཀྱིས་སྔར་བྱས་མི་དགེ་བའི་ལས་རྣམས་ལ་འགྱོད་པ་དྲག་པོས་བཤགས། རང་དང་རིགས་མཐུན་པའི་དམྱལ་གནས་ཀྱི་སེམས་ཅན་ཐམས་ཅད་ལ་སྙིང་རྗེ་དྲག་པོ་སྒོམས། དམྱལ་བའི་སེམས་ཅན་སོགས་སེམས་ཅན་གཞན་གྱི་སྡུག་བསྔལ་ཡང་རང་གིས་ལེན་པའི་སྙིང་སྟོབས་བསྐྱེད་ཅིང་ཕ་རོལ་པོ་བདེ་བ་ཐོབ་པར་བྱེད་ན་སྡུག་བསྔལ་འདི་ལས་ཐར་པ་སྲིད་དེ་ཞེས། ཨོ་རྒྱན་བདེ་ཆེན་རྒྱལ་པོ་མདུན་གྱི་ནམ་མཁར་བྱོན་ནས་ཞལ་གདམས་དེ་ལྟར་གསུངས་པར་སྒོམས། དགེ་བའི་ར་མདའ་དང་སྐྱེས་བུ་དམ་པའི་ནུས་པ་བསམ་གྱིས་མི་ཁྱབ་པ་ཡིན་པས། སྔོན་གཤིན་རྗེའི་གཤེད་ཀྱི་རྣལ་འབྱོར་རྒྱལ་བའི་བློ་གྲོས་ཞེས་ཡོད་པའི་ཨ་མ་ཐགས་འཐག་བཞིན་པ་ལས་བབ་ལོང་མེད་པར་གློ་བུར་དུ་ཤི་སོང་བ་རེད། དེ་ཁོང་གིས་བསམ་པར་ངེད་མ་བུ་གཉིས་ཤི་ཁར་སྐད་ཆ་ཚིག་གཅིག་ཀྱང་བཤད་ལོང་མ་གཏད་རུང་། ཐགས་ཁྲི་ལས་བབ་ལོང་མ་འཇུག་པ་འདི་གཤིན་རྗེ་དབང་ཆེ་ཚོད་མེད་པས་རེད་བསམ་ནས། ཁོང་རྣལ་འབྱོར་པ་རེད་བསྐྱེད་རྫོགས་ཀྱི་གདེང་ཡོད་པས། མའི་རོ་རྩར་བསྡད་ནས་བསྐྱེད་རིམ་བསྒོམས་ཏེ་གཤིན་རྗེའི་ཡུལ་དུ་གཙང་རིས་གྱི་དཔལ་མགོན་བདུན་ཅུ་རྩ་ལྔ་སྣང་སྲིད་ཀྱི་ལྷ་མ་སྲིན་སྡེ་བརྒྱད་གཤིན་རྗེ་ཡ་མན་ཏ་ཀའི་དམག་དང་བཅས་པ་མངགས་ནས། གཤིན་རྗེ་དང་འཐབ་པའི་བར་དེ་ནས་མ་ཁང་པ་ནག་པོ་ཞིག་གི་ནང་བཙུད་ཡོད་པ་བྲོས་པས་མི་ཡུལ་དུ་ཐར་ནས་སྔར་གྱི་རོ་ལ་རྣམ་ཤེས་ཞུགས་ནས་སྔར་བཞིན་བྱུང་བ་རེད་ཟེར་བའི་ལོ་རྒྱུས་ཡོད་པ་དང་། སྔོན་བདག་ཅག་གི་སྟོན་པ་ཤཱཀྱ་ཐུབ་པ་སློབ་པ་ལམ་གྱི་གནས་སྐབས་སུ་དམྱལ་བའི་གནས་སུ་གྱད་པཀྴི་ཏ་བྱ་བར་སྐྱེས་ནས་དམྱལ་བའི་ཤིང་རྟ་འདྲེན་པ་ལ། གྲོགས་ཀ་མ་རུ་པ་ཞེས་པ་དམྱལ་བའི་སེམས་ཅན་ལུས་སྟོབས་ཆུང་ངུ་ཞིག་ཡོད་པས་ཤིང་རྟ་འདྲེན་པས་མ་འདྲོངས་ནས་དམྱལ་སྲུང་ཁྲོས་ཏེ་མགོ་ལ་ལྕགས་ཀྱི་ཐོ་ལུམ་བསྣུན་པས་གྲོགས་པོ་ལ་སྙིང་རྗེ་ཚད་མེད་པར་སྐྱེས་ནས། འདིའི་ཤིང་རྟའི་ཐག་པ་ཡང་བདག་གི་གཉའ་བར་ཐོགས་ཤིག་ཅེས་ཟེར་ནས་བདེ་སྡུག་བརྗེ་བར་ཐུགས་བསྐྱེད་པས་ན། དམྱལ་སྲུང་ན་རེ། སེམས་ཅན་རང་རང་གིས་བསགས་པའི་ལས་ཀྱི་རྣམ་སྨིན་ལ་རང་རང་གིས་སྤྱོད་པར་སུས་ཅི་བྱ་ཞེས་ཟེར་ནས་དབུ་ལ་ལྕགས་ཀྱི་ཐོ་བས་བརྒྱབ་ནས་བསྡིགས་པས། སྐད་ཅིག་དེ་ཉིད་ལ་ཚེ་འཕོས་ནས་ལྷ་གནས་སུམ་ཅུ་རྩ་གསུམ་དུ་སྐྱེས་ཏེ། ཐུགས་བསྐྱེད་དེའི་སྟོབས་ཀྱིས་སྡུག་བསྔལ་དེ་ལས་གྲོལ་ལོ། །དེས་ནི་དུས་མཐའི་མེ་བཞིན་སྡིག་པ་རྣམས། །སྐད་ཅིག་གཅིག་གིས་ངེས་པར་སྲེག་པར་བྱེད། །ཅེས་གསུངས་པ་བཞིན་བདག་བས་གཞན་གཅེས་ཀྱི་ཐུགས་བསྐྱེད་དེའི་བསོད་ནམས་ཀྱི་སྟོབས་ཀྱིས་སྡིག་པ་དག་ནས་སྡུག་བསྔལ་ལས་གྲོལ་ལོ་ཞེས་ཨོ་རྒྱན་ཆེན་པོས་གཏམ་རྒྱུད་དང་བཅས་པ་གསུངས་པ་ཐོས་པས། རང་ཉིད་ཀྱང་གཉིད་སད་པ་ལྟར་རང་འདྲ་བའི་ལས་ངན་པའི་སེམས་ཅན་འདི་དག་ཐམས་ཅད་ཕ་མར་གྱུར་པ་ཤ་སྟག་ཡིན་པས། འདི་རྣམས་སྡུག་བསྔལ་འདི་ལས་ཐར་ན་དེ་དག་ཐམས་ཅད་ཀྱི་སྡུག་བསྔལ་བདག་ལ་སྨིན་ནས་བདག་ད་དུང་དམྱལ་བ་འདི་གར་གནས་དགོས་ནའང་བཟོད་པར་བྱའོ་སྙམ་པའི་སེམས་སྙིང་ཁུང་རུས་པའི་གཏིང་ནས་སེམས་བསྐྱེད་མ་ཐག་ཏུ། ཨོ་རྒྱན་ཆེན་པོའི་ཐུགས་ཀ་ནས་འོད་ཟེར་དཀར་པོ་ལྕགས་ཀྱུའི་དབྱིབས་ལྟ་བུ་ཞིག་སྐྱ་ཏལ་གྱིས་འོད་ཟེར་བྱུང་སྟེ། རང་ལ་ཕོག་མ་ཐག་ཨོ་རྒྱན་ཆེན་པོ་དེ་དང་གཉིས་སུ་མེད་པར་སངས་རྒྱས། རང་གཞན་གྱི་དོན་གཉིས་མ་འབད་ལྷུན་གྱིས་གྲུབ་པས་མཐར་ཕྱིན་ཅིང་། རྟག་ཁྱབ་ལྷུན་གྲུབ་མི་ཟད་རྒྱན་གྱི་འཁོར་ལོའི་བདག་ཉིད་ནུས་མཐུའི་ཕྲིན་ལས་ཅན་དུ་གྱུར་ནས། རང་གི་ཐུགས་ཀ་ནས་སྔར་ལྟར་འོད་ཟེར་སྤྲོས་པས་དམྱལ་བའི་སེམས་ཅན་ཐམས་ཅད་ལ་ཕོག་པས་དམྱལ་བའི་སེམས་ཅན་དེ་དག་སྐད་ཅིག་ལ་དམྱལ་གནས་ནས་འདྲོངས་ཏེ་དམྱལ་བའི་གནས་སྟོངས་པར་བསམ་མོ། །ཞར་ལ་འཕྲོས་དོན་གྱི་ཚུལ་དུ་དམྱལ་བ་དེ་དག་གི་ཚེ་ཚད་བཤད་པ་ནི། ཐུན་མོང་གི་མདོ་སྡེ་དྲན་པ་ཉེར་བཞག་དང་། ལས་རྣམ་འབྱེད། མངོན་པ་མཛོད་ལ་སོགས་ལས་བགྲང་བྱ་ངེས་ཅན་དུ་གསུངས་ནའང་། གོང་དུ་བཤད་པ་ལྟར་གཉེན་པོ་སྟོབས་ཆེན་གྱིས་མ་ཟིན་པའི་དབང་དུ་བྱས་ནས་དེ་ལྟར་ཡིན་ཡང་། འདིར་ཐེག་པ་ཆེན་པོར་གཉེན་པོས་ཟིན་པའི་དབང་དུ་བྱས་ཏེ་ངེས་པ་མེད་པར་བཤད་པ་སྟེ། ཀུན་མཁྱེན་ཆེན་པོས་ཤིང་རྟ་ཆེན་པོར། ཐེག་པ་ཐུན་མོང་བའི་མདོ་དང་རྒྱུད་དང་བསྟན་བཅོས་རྣམས་སུ་རང་རང་གི་ལས་སྲབ་མཐུག་གིས་ཚེ་འཕོ་བ་ཙམ་ལས། གནས་རིས་དེར་ལྟུང་བ་རྣམས་ཚེ་ཚད་གཅིག་ཏུ་ངེས་པར་མ་གསུངས་ཏེ། གཉེན་པོ་དྲག་པོ་རྒྱུད་ལ་སྐྱེས་པ་ལ་སོགས་པས་གློ་བུར་དུའང་འཕོ་བ་དང་། རྡོ་རྗེ་སློབ་དཔོན་ལ་བརྙས་པ་ལ་སོགས་པས་བསྐལ་ཆེན་དུ་མར་གནས་དགོས་པར་བཤད་པས་ལས་ཀྱི་སྒྲིབ་པས་ཕྱེ་བ་ཡིན་ནོ། །ཞེས་གཉེན་པོ་སྟོབས་ཆེན་རྒྱུད་ལ་སྐྱེས་པ་དང་། སོགས་ཁོངས་ནས་དམ་པའི་སྐྱེས་བུ་དང་འབྲེལ་ནས་ཐབས་ཁྱད་པར་ཅན་གྱིས་བཙན་ཐབས་སུ་འཕོ་བ་རྣམས་བསྟན་པ་རེད། དེ་ལྟ་བུ་གློ་བུར་དུ་འཕོ་བ་དང་། རྡོ་རྗེ་སློབ་དཔོན་ལ་བརྙས་པ་དང་། དམ་པའི་ཆོས་སྤང་བ་ལ་སོགས་པས་གོང་གི་ཐུན་མོང་གི་ཚེ་ཚད་ལས་ཇེ་རིང་དུ་སོང་ནས་བསྐལ་ཆེན་དུ་མར་ཡར་ལྷག་གནས་དགོས་པར་བཤད་པ་ཐམས་ཅད་ལས་ཀྱི་སྒྲིབ་པས་ཕྱེ་བ་ཡིན་ནོ། །ཞེས་གསུངས་པ་དང་། སྤྱོད་འཇུག་ལས། སེམས་ཅན་དམྱལ་བའི་མཚོན་ཆ་རྣམས། །སུ་ཞིག་གིས་ནི་ཆེད་དུ་བྱས། །ལྕགས་སྲེག་ས་གཞི་སུ་ཡིས་བྱས། །མེ་ཚོགས་དེ་དག་ཅི་ལས་བྱུང་། །དེ་འདྲ་དེ་དག་ཐམས་ཅད་ནི། །སྡིག་སེམས་ཡིན་པར་ཐུབ་པས་གསུངས། །ཞེས་པ་ལྟར་དེ་ལྟ་བུའི་སེམས་ཅན་གྱིས་རྣམ་སྨིན་ཡིད་དུ་མི་འོང་བ་མྱོང་རྒྱུ་དེ་ལས་སྣང་ཡིན་པར་གསུངས་པ་དང་། གོང་དུ་བཤད་མ་ཐག་པའི་གྱད་པཀྴི་ཏ་དང་། མཛའ་བོའི་བུ་མོའི་གཏམ་རྒྱུད་ལ་སོགས་པས་ཀྱང་ཤེས་སོ། །ཞེས་གསུངས་ན། མཛའ་བོའི་བུ་མོའི་གཏམ་རྒྱུད་སྔོན་འགྲོ་ཀུན་བཟང་བླ་མའི་ཞལ་ལུང་དུ་གསུངས་ཡོད་པ་ལྟར་ཏེ། སྔོན་རྒྱ་གར་ན་ཁྱིམ་བདག་མཛའ་བོ་ཞེས་བྱ་བ་ཡོད་པ་ལ་བུ་སྐྱེས་ཚད་ཤི་བ་དང་། ཡང་བུ་གཅིག་སྐྱེས་པ་ན་ཆུང་སྲི་ཆད་པའི་ཆེད་དུ་ཁོ་ལ་བུ་མོ་ཞེས་བཏགས་པ་ན། ཐམས་ཅད་ཀྱི་མཛའ་བོའི་བུ་མོ་ཞེས་འབོད། ཕ་རྒན་དེད་དཔོན་མཛའ་བོ་རྒྱུན་དུ་རྒྱ་མཚོའི་གླིང་དུ་ནོར་བུ་ལེན་མཁན་ཞིག་ཡིན་པས་སྐབས་ཤིག་རྒྱ་མཚོའི་ནང་དུ་གྲུ་གཟིངས་ཞིག་ནས་ཤི་སོང་བ་རེད། རྒྱ་གར་ན་ཕའི་རིགས་ཀྱི་ལས་ཀ་གང་ཡིན་ན་བུས་ཀྱང་དེ་བྱ་དགོས་ན། མཛའ་བོའི་བུ་མོ་ཆེར་སྐྱེས་ནས་མ་ལ་ཕའི་རིགས་ཀྱི་ལས་གང་ཡིན་དྲིས་པས། མས་དྲང་པོར་བཤད་ན་རྒྱ་མཚོའི་ནང་དུ་འགྲོ་ནས་མགོ་ཐོན་དཀའ་བར་བསམ་སྟེ། ཁྱོད་འབྲུ་ཚོང་བའི་རིགས་ཡིན་བྱས་པས། བུས་འབྲུ་ཚོང་བྱས་ནས་ཉིན་རེར་ཀརྴ་པ་ཎ་ཅི་ལོན་གྱིས་མ་ལ་བསྙེན་བཀུར་བྱས། འབྲུ་འཚོང་བྱེད་མཁན་རྣམས་ཀྱིས་ཁྱོད་འབྲུ་ཚོང་གི་རིགས་མ་ཡིན་ཟེར་བས། ཡང་མར་དྲིས་པས། མས་སྤོས་ཚོང་གི་རིགས་ཡིན་སྨྲས་པས། སྔར་ལྟར་བྱེད་པས་ཡང་དེ་མ་ཡིན་པར་ཤེས་པས་ན། མས་རིན་པོ་ཆེའི་འཚོང་བྱས་པའི་རིགས་ཡིན་ཟེར་བས། དེ་ལྟར་བྱས་པས་ཀརྴ་པ་ཎ་ལོན་པས་སྔར་ལྟར་མ་ལ་བསྙེན་བཀུར་བྱས། དེར་ཚོང་པ་རྣམས་ཀྱིས་རྒྱ་མཚོ་ནས་ནོར་བུ་ལེན་པའི་རིགས་ཡིན་པས་རང་གི་རིགས་ཀྱི་ལས་གྱིས་ཤིག་ཟེར་བས། ཁོས་མ་ལ་ང་ནོར་བུ་ལེན་པའི་རིགས་ཡིན་འདུག་པས། རྒྱ་མཚོར་ནོར་བུ་ལེན་དུ་འགྲོ་དགོས་ཟེར་བ་ན། མས་ཁྱོད་ནོར་བུ་ལེན་པའི་རིགས་ཡིན་ཡང་། ཁྱོད་ཀྱི་ཕ་དང་ཨ་མྱེས་ལ་སོགས་པ་ཐམས་ཅད་རྒྱ་མཚོའི་ནང་དུ་ནོར་བུ་ལེན་དུ་སོང་ནས་ཤི་བ་ཡིན། ཁྱོད་ཀྱང་སོང་ན་ཤི་འགྲོ་བས་མི་ཉན་ཟེར་ཡང་། ཁོས་མ་ཉན་ནས་འགྲོ་རྒྱུའི་གྲ་སྒྲིག་ཚང་མར་བྱས་ནས། འགྲོ་ཁར་མས་གོས་ཀྱི་མཐའ་ན་བཟུང་སྟེ་ངུས་ནས་མ་གཏོང་བ་ན། བུ་ཁོང་ཁྲོ་སྐྱེས་ནས་ང་རྒྱ་མཚོར་འགྲོ་བ་ལ་ཁྱོད་ཀྱིས་བཀྲ་མི་ཤིས་པར་བྱས་ཟེར་ནས། མ་ཡིས་མགོར་རྡོག་པས་བསྣུན་ནས་སོང་བ་ན། སོང་སོང་ནས་གྲུ་གཟིངས་ཞིག་ནས་རོགས་ཚང་མ་ཤི་བ་དང་། མཛའ་བོའི་བུ་མོས་ཤིང་ལེབ་ཅིག་ལ་འཇུས་ནས་མཚོ་གླིང་ཞིག་ཏུ་ཐོན་པ་དང་། དེར་དགའ་བ་ཞེས་བྱ་བའི་གྲོང་། རིན་པོ་ཆེའི་ཁང་པར་མཛེས་སྡུག་གི་ལྷ་མོ་བཞིས་སྣེ་ལེན་བསྙེན་བཀུར་བྱས། ཡང་འགྲོ་བ་ན། ཁྱོད་ལྷོ་ཕྱོགས་སུ་མ་འགྲོ་ཉེས་པ་ཆེན་པོར་འབྱུང་ཉེས་ཡོད་ཟེར་ཡང་། མ་ཉན་པར་ལྷོ་ཕྱོགས་སུ་ཕྱིན་པ་ན། དགའ་བ་ཅན་ཞེས་བྱ་བའི་གྲོང་ན་མཛེས་སྡུག་གི་ལྷ་མོ་བརྒྱད་ཀྱིས་སྔར་ལྟར་བསྙེན་བཀུར་བྱས་ནས། ལྷོ་ཕྱོགས་སུ་མ་འགྲོ་ཟེར་ཡང་ལས་ཀྱིས་དེད་ནས་ཡང་ལྷོ་ཕྱོགས་སུ་སོང་བ་ན། ར་རོ་ཞེས་པའི་གྲོང་དང་། བླ་མ་ཚངས་པའི་མཁར་ཞེས་པ་སྔར་ལས་མཛེས་པར་རིམ་བཞིན་དུ་སོང་ནས་མཛེས་སྡུག་གི་ལྷ་མོ་བཅུ་དྲུག་དང་སོ་གཉིས་ཀྱིས་བསྙེན་བཀུར་ཐོབ་ནས་འདིར་སྡོད་ལྷོ་ཕྱོགས་སུ་ཅིས་ཀྱང་མ་འགྲོ་ཟེར་ཡང་། ཡང་ལས་དབང་གིས་ལྷོ་ཕྱོགས་སུ་སོང་བ་ན། ལྕགས་མཁར་ནག་པོ་གནམ་ལ་ཐུག་པ་ཞིག་གི་སྒོར་མི་ནག་པོ་མིག་དམར་པོ་ཅན་ཞིག་འདུག་པ་ལ་སྐད་ཆ་དྲིས་ཀྱང་དེས་ཁ་མ་གྲག ཡང་བལྟས་པ་དེ་འདྲ་མང་པོ་འདུག་པར་མཐོང་བས། འཇིགས་ཤིང་སྐྲག་ནས་ལྷོ་ཕྱོགས་སུ་མ་འགྲོ་ཉེས་པ་འོང་ཟེར་བ་འདི་རེད་འདུག་བསམ་བཞིན་མཁར་དེའི་ནང་དུ་ཕྱིན་ནས་བལྟས་པས། མི་ཞིག་གི་མགོར་ལྕགས་ཀྱི་འཁོར་ལོ་འཁོར་ཏེ་ཀླད་པ་སྐྱ་ཐ་ལ་ལ་གཏོར་གྱིན་འདུག་པ་ལ། ཁྱོད་ཀྱིས་ལས་ཅི་བྱས་ནས་འདི་འདྲར་གྱུར་དྲིས་པས། དེས་ངས་མའི་མགོར་རྡོག་པས་བརྡེག་པའི་ལས་ཀྱི་རྣམ་སྨིན་གྱིས་འདི་བྱུང་བ་རེད། ཁྱོད་བླ་མ་ཚངས་པའི་མཁར་གྱི་བདེ་སྐྱིད་མི་མྱོང་བར་འདི་ན་ཅི་བྱེད་དུ་ཡོང་བ་ཡིན་ཟེར་བ་དང་། ཁོས་ང་ཡང་ལས་དབང་གིས་ཁྲིད་འོང་བ་རེད་སྙམ་པ་དང་། ནམ་མཁའ་ནས་གང་བཅིངས་པ་དེ་ཉིད་གྲོལ་བར་གྱུར་ཅིག གང་གྲོལ་བ་དེ་ཉིད་འཆིང་བར་གྱུར་ཅིག་ཅེས་པའི་སྒྲ་གྲག་པ་ན། དེ་མ་ཐག་འཁོར་ལོ་ཁོང་གི་དབུ་ཐོག་ཏུ་འཁོར་ནས་སྡུག་བསྔལ་བཟོད་པར་དཀའ་བ་མྱོང་། དེའི་རྐྱེན་གྱིས་ཁོང་གིས་རང་འདྲ་བའི་སེམས་ཅན་ཐམས་ཅད་ལ་སྙིང་རྗེ་དྲག་པོར་སྐྱེས་ཏེ། འཁོར་བའི་གནས་འདི་ན་ང་འདྲ་བ་མའི་མགོར་རྡོག་པས་བསྣུན་ཞིང་དེའི་རྣམ་སྨིན་གྱི་སྡུག་བསྔལ་མྱོང་བ་དུ་མར་ཡོད་ན། དེ་དག་ཐམས་ཅད་ཀྱི་སྡུག་བསྔལ་ཀྱང་བདག་ལ་སྨིན་ནས་བདག་ཁོ་ནས་མྱོང་བར་ཤོག་ཅིག སེམས་ཅན་གཞན་དག་ཐམས་ཅད་སྐྱེ་བ་ནས་ཚེ་རབས་ཐམས་ཅད་དུ་སྡུག་བསྔལ་འདི་འདྲ་བ་མི་མྱོང་བར་ཤོག་ཅིག་ཅེས་བསམ་པ་དང་། དེ་མ་ཐག་ཏུ་འཁོར་ལོ་ནམ་མཁར་འཕགས་ཏེ། ཁོང་སྡུག་བསྔལ་ལས་གྲོལ་ཏེ་ཤིང་ཏ་ལ་བདུན་སྲིད་ཀྱི་སྟེང་ན་བདེ་ཆམ་མེར་འདུག་པ་རེད། དེད་དཔོན་མཛའ་བོའི་བུ་མོ་འདི་བདག་ཅག་གི་སྟོན་པ་སངས་རྒྱས་ཤཱཀྱ་ཐུབ་པའི་སྐྱེས་རབས་ཤིག་ཡིན་ཞིང་། སྔོན་བདག་གཞན་བརྗེ་བ་བྱང་ཆུབ་ཀྱི་སེམས་དེ་ལྟར་སྦྱོང་བ་རེད། དེ་ནས་གྲང་དམྱལ་གྱི་སྡུག་བསྔལ་བསམ་པ་ནི། གྲང་དམྱལ་བརྒྱད་ནི་ཆུ་བུར་ཅན། ཆུ་བུར་རྡོལ་བ་ཅན། སོ་ཐམ་ཐམ་པ། ཨ་ཆུ་ཟེར་བ། ཀྱི་ཧུད་འདོན་པ། ཨུཏྤལ་ལྟར་གས་པ། པདྨ་ལྟར་གས་པ། པདྨ་ལྟར་ཆེ་གས་པ་སྟེ་བརྒྱད་དོ། །ཡང་རང་ཉིད་གང་ནས་ཡོང་དང་གང་ན་ཕྱིན་ཆ་མེད་པའི་ས་གཞི་ཐམས་ཅད་བྱེ་ཚན་གྱི་རང་བཞིན་ལ་བསིལ་བའི་རེག་བྱ་བསིར་བུའི་རླུང་ཙམ་ཡང་མི་འགུལ་ཞིང་། ཉི་མའི་ཚ་གདུང་གིས་ཤིན་ཏུ་གདུང་ནས་དུབ་པའི་ལུང་པ་ཞིག་ཏུ་སླེབས། ཤེས་པ་མི་གསལ་སྣང་བ་མི་དང་བ་ལུང་མ་བསྟན་དུ་ཐོམ་ཐོམ་འགྲོ་ཞིང་། འདི་འདྲ་ཞིག་མ་ཚ་ན་འདི་ལས་ཅུང་ཞིག་བསིལ་བ་ཞིག་ཡོད་ན་སྙམ་ཞིང་བསམ་པས་རྐྱེན་བྱས། ཚ་གདུང་གི་སྣང་བ་འགགས་ནས་སྐད་ཅིག་ལ་གྲང་དམྱལ་བརྒྱད་དུ་སྐྱེ་བར་སྒོམ་སྟེ། གྲང་དམྱལ་གང་དུ་ཡོད་པའི་ངོས་འཛིན་ནི། འཛམ་གླིང་འདིའི་འོག་གི་དམྱལ་བ་ཆེན་པོ་ཚ་དམྱལ་བརྒྱད་ཀྱི་ཐད་ཀ་ན་ཡོད་པ་དང་། དེ་རྣམས་ཀྱི་སྡུག་བསྔལ་མྱོང་ལུགས་ཀྱིས་ལུས་དང་སྒྲའི་འགྱུར་བ་དང་མཐུན་པར་མིང་བཏགས་པ་སྟེ། དེའང་གྲང་བའི་ཉེས་པས་ཉམ་ཐག་པས་མི་བཟོད་ནས་ལུས་འགྱུར་བས་མིང་བཏགས་པ་དང་པོ་གཉིས། གྲང་བའི་ཉེས་པས་མི་བཟོད་པས་འོ་དོད་འབོད་པ་སྒྲ་འགྱུར་བ་ལས་མིང་བཏགས་པ་བར་པ་གསུམ་དང་། གྲང་བས་ཤིན་ཏུ་གདུང་བའི་ཉེས་པས་ལུས་ཤིན་ཏུ་འགྱུར་བས་མིང་བཏགས་པ་ཕྱི་མ་གསུམ་སྟེ་བརྒྱད་རེད། འདི་ན་དང་པོ་གྲང་དམྱལ་སྤྱིའི་གནས་བསྟན་པ་ནི། གྲང་དམྱལ་གྱི་ས་གཞི་ཐམས་ཅད་ཁ་བ་དང་འཁྱགས་རོམ་གྱི་རང་བཞིན་བུ་ཡུག་འཚུབ་པ། ས་ཆ་འགག་དོག་ཅིང་ཉམས་མི་དགའ་བའི་ཅོང་རོང་དང་སྤང་ལྗོངས་སོགས་ཡིད་དུ་འོང་བའི་ས་ཆ་མེད་པའི་ངམ་གྲོག་ཕྱོགས་དེ་དག་ཐམས་ཅད་ཧ་ཅང་འཐས་ཤིང་སྲ་བའི་འཁྱག་རོམ་གྱིས་གང་བ། མཐའ་སྐོར་ཐམས་ཅད་དུ་གངས་རི་ཆེན་པོས་བསྐོར་ཞིང་། རླུང་དྲག་པོ་ལྡང་ནས་སྟེང་ན་ཁ་བ་བུ་ཡུག་འཚུབས་པ། ཉི་མའི་སྣང་བ་མེད་པར་མུན་པ་ནག་ཐུམ་ཐུམ་བྱེད་ཅིང་། རླུང་ནག་གི་ངར་སྒྲ་འུ་རུ་རུ་སྒྲོག་པའི་ནང་དུ། གྲང་དམྱལ་བའི་གནས་དང་པོ་ཆུ་བུར་ཅན་གྱི་དམྱལ་བ་ཁ་བའི་བུ་ཡུག་དང་གྲང་བའི་རེག་བྱས་དེའི་ལུས་ལ་བཏབ་པས། སྐད་ཅིག་སྐད་ཅིག་ལ་ལུས་ལ་ཆུ་བུར་མཐེ་རྡོག་ཙམ་བྱུང་བ་དང་། སྡུག་བསྔལ་མི་བཟོད་པ་འཆར་ཞིང་ཤ་ལྤགས་ཐམས་ཅད་འཁྱགས་ཤིང་འཁུམས་ནས་སྐྱི་གཡའ་བ། བག་ཚ་བ། ཉམ་ང་བའི་རྣམ་པའི་སྐྱི་བུང་བྱེད་པའི་སྡུག་བསྔལ་མི་བཟད་པ་དང་། སྡུག་བསྔལ་དེ་ལས་སམ་དེའི་ཐོག་ན་ད་དུང་ཆུ་བུར་དེ་དག་བརྡོལ་ནས་རྨར་སོང་ནས་རྣག་ཁྲག་ཆི་ལི་ལི་འཛག་པ་ཆུ་བུར་རྡོལ་བ་ཅན་དང་དེ་གཉིས་ནི་ལུས་ཀྱི་འགྱུར་བ་ལས་མིང་བཏགས་པ་རེད། ད་རུང་སྔ་མ་དེ་བས་སྡུག་བསྔལ་ཇེ་ཆེར་སོང་སྟེ་འཁྱགས་ནས་ཨ་ཆུ་ཞེས་སྐད་ཀྱི་གདངས་ཆེན་པོས་དྲག་པོར་འདོན་པ་དང་། ད་དུང་སྔར་བས་སྡུག་བསྔལ་ཇེ་ཆེར་སོང་བས་སྐད་ཀྱི་ཟུངས་ཀྱང་ཆག་སྟེ་ཀྱི་ཧུད་ཅེས་རྐན་གྱི་ཕུགས་ནས་འདོན་པ་དང་། ད་དུང་དེ་བས་ཀྱང་སྡུག་བསྔལ་ཇེ་ཆེར་འཕེལ་བས་ཁ་ནས་ཉམ་ཐག་པའི་སྒྲ་སྐད་ཀྱང་མ་ཐོན་པར་སོ་ཐམ་ཐམ་བྱེད་པ་དང་། དེ་གསུམ་ནི་མྱ་ངན་ཉམ་ཐག་གི་སྒྲའི་ཁྱད་པར་གྱིས་མིང་བཏགས་པའོ། །དེ་ལ་རླུང་ཆེན་པོའི་གྲང་འཁྱག་གི་ངར་གྱིས་བཏབ་པས་ལུས་ཀྱི་ཁ་དོག་ཀྱང་འགྱུར་ཏེ་སྔོ་ནག་ལྷང་གི་སོང་ཞིང་མེ་ཏོག་ཨུཏྤལ་གྱི་ཁ་དོག་དང་འདབ་མ་ལྟར་སེར་ཁ་ཕྲ་མོ་ཚལ་པ་དྲུག་བརྒྱད་དུ་གས་པ་དང་། ད་དུང་གྲང་ཟུག་གིས་པགས་པ་རྣམས་ཀྱང་བཤུས་ཏེ་ཤའུ་དམར་ཧུ་རེ་པདྨ་ལྟར་ཁ་དོག་དམར་པོ་དང་ཚལ་པ་བཅུར་གས་པ་དང་། སླར་ཡང་སེར་ཁ་དེ་བས་ཀྱང་མང་དུ་སོང་སྟེ་པདྨ་ལྟར་ཆེར་གས་ནས་སྔ་མ་རྣམས་ཀྱི་སྡུག་བསྔལ་ལས་བརྒྱ་འགྱུར་གྱིས་ཆེ་བ་མྱོང་ཞིང་། ཕྱི་མ་དེ་གསུམ་གྲང་བའི་ཉེས་པས་ལུས་ཀྱི་འགྱུར་བའི་སྒོ་ནས་མིང་བཏགས་པ་རེད། གྲང་དམྱལ་གྱི་སྡུག་བསྔལ་དེ་ཡང་གྲོང་ཁྱེར་མ་ག་དྷའི་འབྲུ་འཇལ་བྱེད་ཀྱི་བྲེ་བོ་ཆེའི་ཁལ་བརྒྱད་ཅུ་ཤོང་བའི་ཏིལ་གྱི་བང་བ་ནས་ལོ་བརྒྱ་བརྒྱའི་མཚམས་སུ་ཏིལ་རྡོག་རེ་ཕྱིར་ཕྱུང་བས་དེ་ཟད་པའི་ཚེ་ཆུ་བུར་ཅན་གྱི་ཚེ་ཚད་དུ་བཤད་པ་སོགས་ཏེ། མཛོད་ལས། ཏིལ་སྦྱངས་ནང་ནས་ལོ་བརྒྱ་ཞིང་། །ཏིལ་གཅིག་ཕྱུང་བས་ཟད་གྱུར་པ། །ཆུ་བུར་ཅན་གྱི་ཚེ་ཚད་དོ། །གཞན་གྱི་ཚེ་ནི་ཉི་ཤུར་འགྱུར། །ཞེས་གསུངས་པ་དེའི་དོན་ནི་སྔོན་བཅོམ་ལྡན་འདས་ཀྱིས་དགེ་སློང་རྣམས་ལ། འདི་ན་ཡུལ་མ་ག་དྷ་ཏིལ་གཞོང་ན་འབྲུའི་རིགས་ཁལ་བརྒྱད་ཅུ་ཤོང་བའི་ནང་དུ་ཡུལ་ཀོ་ས་ལའི་ཏིལ་ཞིབ་པ་ཁ་གང་བར་བླུགས་ནས། ལོ་བརྒྱ་རེའི་མཚམས་ན་ཏིལ་རེ་ཕྱིར་འཕངས་པ་དེ་ནམ་ཟད་ན་ཆུ་བུར་ཅན་གྱི་ཚེ་ཟད་པ་དང་། འོག་མ་རྣམས་ཉི་ཤུའི་འགྱུར་རེ་རིང་བར་བཤད་པ་སོགས་གོ་ནས་ཤིན་ཏུ་ཡིད་མུག་ཅིང་སྒྱིད་ལུག་པའམ་ཡི་ཆད་པར་བསྒོམ། ད་འདི་ལས་ཐར་པའི་དུས་ཤིག་མི་སྲིད་སྙམ་པ་སོགས་ཀྱིས་ཡིད་མུག་ཅིང་སྒྱིད་ལུག་པ་དེ་ལྟ་བུའི་སྐབས་ཤིག་ན། སླར་ཡང་མདུན་གྱི་ནམ་མཁར་ངོ་བོ་བཀའ་དྲིན་སུམ་ལྡན་གྱི་རྩ་བའི་བླ་མ་དེ་ཉིད་རྣམ་པ་ཨོ་རྒྱན་ཆེན་པོ་ཟ་ཧོར་མའི་ཆ་ལུགས་སུ་བྱོན་ནས། བུ་ཞེས་བོས་པ་དང་དགྱེས་པའི་མདངས། བརྩེ་བའི་སྤྱན་གྱིས་གཟིགས་ནས་སྡུག་བསྔལ་དེ་སྔོན་རང་གི་བྱས་ཤིང་བསགས་པའི་ལས་ཀྱི་རྣམ་སྨིན་གྱི་སྡུག་བསྔལ་སོགས་ལས་སུ་ཤེས་པར་གྱིས་ལ། ལས་དེ་མྱོང་སྟོབས་ཀྱིས་ཟད་པའི་དགའ་བ་སྒོམས། དེ་དང་མཉམ་དུ་གཞན་སེམས་ཅན་མང་པོ་གྲང་དམྱལ་གྱི་སྡུག་བསྔལ་མྱོང་བ་ལ་བྲལ་འདོད་ཀྱི་སྙིང་རྗེ་དྲག་པོའི་བསམ་པས་རང་གི་སྡུག་བསྔལ་དེའི་སྟེང་ན་ད་དུང་གཞན་གྱི་སྡུག་བསྔལ་བསྣོན་མར་ལོང་ལ། བདག་གཞན་བརྗེ་བ་དང་བདག་བས་གཞན་གཅེས་ཀྱི་གཉེན་པོ་ཁྱད་པར་ཅན་བསྟེན་ཅིག ཅེས་པའི་གདམས་ངག་དེ་ལྟ་བུའི་གསུང་ཐོས་པ་ཙམ་གྱིས། བདག་ལྟ་བུའི་སྡུག་བསྔལ་མྱོང་བའི་གྲང་དམྱལ་གྱི་སེམས་ཅན་ཐམས་ཅད་སྙིང་རེ་རྗེ། དེ་དག་གིས་སྡུག་བསྔལ་དེ་རྣམས་སྐད་ཅིག་ཙམ་ཡང་མྱོང་འདོད་མེད་ཀྱང་མི་མྱོང་ཐབས་མེད་པར་རྨོངས་པའི་དབང་གིས་སྔར་ལས་ངན་བསགས་ཟིན་པས། བདག་གིས་སེམས་ཅན་དེ་དག་ཐམས་ཅད་ཀྱི་སྡུག་བསྔལ་མྱང་བྱའི་སྐལ་བ་མྱོང་ནས་འདི་བས་སྡུག་བསྔལ་འབུམ་འགྱུར་གྱིས་ཆེ་བ་བྱུང་ཡང་སེམས་ཅན་ཐམས་ཅད་ཀྱི་དོན་དུ་བདག་གཅིག་པུས་མྱོང་ཆོག་པས་ན་བཟོད་པར་བྱའོ། །སེམས་ཅན་དེ་དག་ཐམས་ཅད་སྡུག་བསྔལ་ལས་ཐར་བར་ཤོག་ཅིག་ཅེས་པའི་དགེ་སེམས་ཁྱད་པར་ཅན་བསྐྱེད་མ་ཐག་ཏུ་ལས་ངན་ཐམས་ཅད་ཉི་མས་བ་མོ་བཞུ་བ་བཞིན་སྐད་ཅིག་ལ་ཟད་དེ། ཨོ་རྒྱན་ཆེན་པོའི་ཐུགས་ཀར་ཡེར་གྱིས་འཕོས་ནས་མ་དག་འགྲོ་བ་འདྲེན་པའི་དེད་དཔོན་དམ་པར་གྱུར་པར་བསམ་ལ། དཔྱད་སྒོམ་མཐར་འཇོག་སྒོམ་འདི་ལྟར་བྱ་སྟེ། བདེ་སྡུག་གང་ཤར་གྱི་རང་ངོ་ལ་ཅེར་གྱིས་ལྟ་ཞིང་ཤེས་པ་མ་བཅོས་རང་བབས་ཤེས་པ་བཟོ་མེད་ཀྱིས་རྣལ་དུ་དབབ་བོ། །དེ་ཡན་གྱིས་དམྱལ་བ་ཚ་གྲང་གི་སྡུག་བསྔལ་ལ་བསམ་པ་རེད། ཤེས་པ་བཟོ་མེད་དུ་བདེ་སྡུག་གང་ཤར་གྱི་ངོ་ལ་བལྟས་པས་ན། སེམས་ལ་སེམས་མ་མཆིས་པར་སེམས་ཀྱི་རང་བཞིན་འོད་གསལ་བའོ། །ཞེས་གསུངས་པའི་སེམས་ཀྱི་ཆོས་ཉིད་འོད་གསལ་འདུས་མ་བྱས་པ་རྣམ་པར་མི་རྟོག་པའི་ཡེ་ཤེས་ལ་ཉེ་བ་རེད། ཞབས་དཀར་ཚོགས་དྲུག་རང་གྲོལ་གྱིས། སེམས་ཞེས་བྱ་བ་རིག་རིག་འགྱུ་འགྱུ་བོ། །བདས་ན་མི་ཟིན་ཡལ་ཡལ་བུན་བུན་བོ། །བཞག་ན་མི་ཟིན་ཚུབ་ཚུབ་ཡེར་ཡེར་བོ། །འདི་ཞེས་མཚོན་མེད་སྟོང་པ་ཕྱང་ཆད་པོ། །བདེ་སྡུག་སྣ་ཚོགས་མྱོང་མཁན་རང་གི་སེམས། །ཞེས་དང་། གཞནཡང་། སེམས་ཀྱི་རང་བཞིན་དྲི་མེད་ཤེལ་གོང་བཞིན། །ངོ་བོ་སྟོང་པ་རང་བཞིན་གསལ་བ་དང་། །ཐུགས་རྗེ་འགག་པ་མེད་པར་ས་ལེར་གནས། །འཁོར་བའི་སྐྱོན་གྱིས་ཅི་ཡང་མ་གོས་ཏེ། །སེམས་ཉིད་ཡེ་ནས་སངས་རྒྱས་ཡིན་པར་ངེས། །ཞེས་གསུངས་པ་ལྟར་རོ། །འོན་ཀྱང་ལས་དང་པོ་བས་རྣམ་རྟོག་ཤར་མཁན་ཁོ་རང་གི་ངོ་བོ་ལ་ལྟ་དུས། བལྟ་བྱ་དང་ལྟ་མཁན་ཐ་དད་མེད་པར་ཅི་ཟེར་འདི་ཟེར་མེད་པའི་སར་ཐོན་པ་ན་སྨྲ་བརྗོད་དང་བྲལ་བ་དེའི་གཤིས་ཐོག་ཏུ་མ་བཅོས་རྣལ་དུ་དབབ་ལ་རང་བབས་སུ་བཞག་གོ །དེ་ནས་ངན་སོང་གི་གནས་གཉིས་པ་ཡི་དྭགས་ཀྱི་སྡུག་བསྔལ་ལ་བསམ་པ་ནི། བཤེས་པའི་སྤྲིང་ཡིག་ལས། ཡི་དྭགས་ན་ཡང་འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆགས་མི་འཆོས་ལ། །བཀྲེས་སྐོམ་གྲང་དྲོ་ངལ་དང་འཇིགས་པ་ཡིས། །བསྐྱེད་པ་ཤིན་ཏུ་མི་བཟད་བསྟེན་འཚལ་ལོ། །ཞེས་སེམས་ཅན་དམྱལ་བ་ཆེན་པོའི་སྡུག་བསྔལ་ཉམ་ང་བས་མི་ཚད་པར།ཡི་དྭགས་སུ་སྐྱེས་ནའང་གཙོ་བོ་སེར་སྣའི་དབང་གིས་ཟས་སྐོམ་མི་རྙེད་པ་ལ་སོགས་པའི་འདོད་པས་ཕོངས་པས་བསྐྱེད་པའི་བཀྲེས་སྐོམ་དང་། འཇིགས་སྐྲག་ལ་སོགས་པ་རྒྱུན་ཆགས་སུ་འཕྲལ་དུ་མི་འཆོས་པའམ་བཅོས་བསྒྱུར་མེད་ལ། བཀྲེས་སྐོམ་དང་དགུན་གྲང་། སོ་གར་དྲོ་བ་དང་། ཟས་སྐོམ་འཚོལ་བས་ངལ་ཞིང་དུབ། གཞན་མཚོན་ཆ་ཐོགས་པ་སོགས་མཐོང་བས་འཇིགས་སྐྲག་ལ་སོགས་པ་ཡིས་བསྐྱེད་པའི་སྡུག་བསྔལ་མི་བཟད་པ་རྣག་པ་དཀའ་བ་དེ་འདྲ་བ་བསྟེན་པར་ཤེས་པར་འཚལ། །ཞེས་ཡི་དྭགས་ལ་འོག་ཏུ་འཆད་འགྱུར་ལྟར་རིགས་གསུམ་དུ་ཡོད་པར་བཤད་པའི་སྡུག་བསྔལ་རགས་རིམ་ཙམ་བློ་ལ་བླང་བ་ནི། ཡི་དྭགས་ཡུལ་ན་གནས་པ་དང་། མཁའ་ལ་རྒྱུ་བ་གཉིས་དང་། ཡང་ཕྱིའི་སྒྲིབ་པ་ཅན་དང་། ནང་གི་སྒྲིབ་པ་ཅན། སྒོས་ཁུར་གྱི་སྒྲིབ་པ་ཅན་རྣམས་སུ་ཡོད་པ་དང་། ཡི་དྭགས་ཀྱི་ཡུལ་ནི་རྒྱལ་པོའི་ཁབ་ཀྱི་འོག་གི་དཔག་ཚད་ལྔ་བརྒྱ་ཙམ་ན་ཡོད་པར་གསུངས། ཡི་དྭགས་ཀྱི་རྒྱལ་པོ་གཤིན་རྗེའི་ཡུལ་དུ་གནས་པ་དང་། ཁ་འཐོར་འཕྲོས་པའི་ཡི་དྭགས་མྱ་ངམ་གྱི་ཐང་སོགས་ལ་ཡོད་རབས་བཤད་པར་མ་ངེས་པའང་ཡོད། ཚེ་ཚད་མིའི་ཟླ་བ་གཅིག་ལ་ཡི་དྭགས་ཀྱི་ཉིན་ཞག་གཅིག་ཏུ་བརྩིས་པའི་རང་ལོ་ལྔ་བརྒྱར་སྡུག་བསྔལ་མྱོང་བ་ཡིན་པར་གསུངས། ཀུན་མཁྱེན་ཆེན་པོས། ཕྱི་ཡི་སྒྲིབ་ཅན་བཟང་དགུ་མཐོང་ནའང་བསྐམས། །ནང་གི་སྒྲིབ་ཅན་གློ་སྙིང་མེ་འབར་ཞིང་། །སྤྱི་མཐུན་སྒྲིབ་ཅན་ཟས་སྐོམ་ཡིད་ལ་བཏགས། །ཞེས་གསུངས་པས། ཕྱིའི་སྒྲིབ་པ་ཅན་ནི། ཡང་རང་ཉིད་ཟས་ཞིམ་གོས་བཟང་དང་དངོས་པོ་ལ་ཆགས་སྲེད་ཞེན་པའི་དབང་གིས་བསོད་ནམས་གསག་པའི་ཞིང་ཡུལ་ཁྱད་པར་ཅན་དང་འཕྲད་ཀྱང་སྤར་མོ་སྡོམ། སེམས་འཁུམས་ནས་མཆོད་པ་དང་བཀུར་སྟི་ལྟ་བུ་ལ་སེར་སྣ་སྐྱེས་པའི་བསམ་པས་རྐྱེན་བྱས་ནས་སྐད་ཅིག་ལ་ཡི་དྭགས་ཕྱིའི་སྒྲིབ་པ་ཅན་དུ་སྐྱེ་བ་བསྒོམས་ཏེ། ཕྱིའི་སྒྲིབ་པ་ཅན་གྱི་སྡུག་བསྔལ་ཇི་ལྟར་ཡིན་ན། རྒྱང་རིང་ལ་བལྟས་པ་ན། ལྗོན་ཤིང་གི་འབྲས་བུ་དང་། ཆུ་ཀླུང་ཡིད་དུ་འོང་བ་སོགས་མཐོང་བ་ན་དེ་ལ་ལོངས་སྤྱོད་པའི་བསམ་པས་ཐག་རིང་པོར་དཀའ་ཚེགས་ངལ་དུབ་ལ་མ་འཛེམས་པར་ཐང་ཆད་ཆད་དུ་ཕྱིན་ནས་དྲུང་དུ་སླེབས་པ་ན། སྐྱེ་བོ་མཚོན་ཆ་ཐོགས་པ་མང་པོས་བསྲུང་བ་དང་། གཞན་གྱིས་ལོངས་སྤྱོད་དུ་མི་འཇུག་པ་དང་། དེ་དག་རྣག་ཁྲག་དང་ཕྱི་ས་ལ་སོགས་པ་ཡིད་དུ་མི་འོང་བར་སོང་ནས་ཤིན་ཏུ་སྐྱེངས་ཤིང་བཀྲེས་སྐོམ་གྱི་སྡུག་བསྔལ་བཟོད་མི་ཕོད་པ་མྱོང་བ་དང་། ཡང་ནང་གི་སྒྲིབ་པ་ཅན་ནི། གཞན་གྱིས་བསྲུང་བ་སོགས་མེད་ཀྱང་སྡོད་གནས་དང་གྲོང་ཁྱེར་ས་མདོག་སོགས་སེར་སྐྱ་དང་། ཆུ་དང་རྩི་ཤིང་སོགས་འདོད་པའི་དངོས་པོ་ཅི་ཡང་མེད་པའི་མྱ་ངན་གྱི་གནས་དེར། བཟའ་བའི་ཟས་དང་བཏུང་བའི་སྐོམ་ཞེས་ལོ་ཟླའི་བར་དུ་བཙལ་ཀྱང་མི་རྙེད་པས་སྡུག་བསྔལ་བ་དང་། སྐོམ་ནས་ཁོག་པའི་ནང་དུ་མེ་འབར་ནས་ནང་ཁྲོལ་གློ་སྙིང་ཐམས་ཅད་སྲེག་པ་དང་། ཁ་ནས་མེ་ལྕེ་དང་དུ་བ་འཐུལ་བ་དང་། སྤྱི་མཐུན་དུ་ལྟོག་སྐོམ་གྱིས་མི་བཟོད་པ་དང་། ཆུའི་སྒྲ་ཙམ་ཡང་མི་གོ་ཞིང་། ཐོས་ཀྱང་ལོངས་སུ་སྤྱོད་དབང་མེད་པ་དང་། གལ་ཏེ་ཟས་སྐོམ་གྱི་རིགས་ཉུང་ངུ་སྨན་ཙམ་རེ་རྙེད་ཀྱང་ཁ་ཁབ་མིག་ཙམ་གྱི་ནང་དུ་མི་ཤོང་། ཁ་ཅིག་ཁ་ནི་ཁབ་ཀྱི་མིག་ཙམ་ལ། །ལྟོ་བ་རི་ཡི་གཏོས་ཙམ་བཀྲེས་པས་ཉེན། །མི་གཙང་གྱི་ནར་བོར་བ་ཅུང་ཟད་ཀྱང་། །འཚལ་བའི་མཐུ་དང་ལྡན་པ་མ་ལགས་སོ། །ཞེས་པ་ལྟར་དགེ་སྦྱོང་དང་བྲམ་ཟེ་སོགས་ཀྱི་སྣབ་ལུད་དང་མི་གཙང་བ་དོར་བ་སོགས་ཅུང་ཟད་ཐོབ་ཀྱང་། ཁ་ཁབ་མིག་ཙམ་གྱི་ནང་དུ་མི་ཤོང་། ཅུང་ཟད་ཤོང་ཡང་མགྲིན་པ་རྟ་རྔ་ཙམ་གྱི་སྦུབས་ལ་མི་ཐར། ཐར་ཀྱང་ལྟོ་བ་རི་རབ་ཙམ་པ་མི་ཁེངས་ཤིང་ཡན་ལག་འཇག་མ་ཙམ་གྱིས་ལུས་མི་ཐེག་པ་སོགས་ཀྱི་སྡུག་བསྔལ་ཤིན་ཏུ་ཉམ་ཐག་པར་མྱོང་། ཡང་ཟས་སྐོམ་གྱི་སྒྲིབ་པ་ཅན་ནམ་སྒོས་ཁུར་གྱི་སྒྲིབ་པ་ཅན་གོ་དོན་འདྲ་མོ་རེད། འདི་ལ་མེ་ལྕེའི་ཕྲེང་བ་ཅན་དང་། ལྗན་ལྗིན་ཟ་བ་གཉིས་ཡོད་པར་གསུངས་པའང་ཡོད་དེ། མེ་ལྕེའི་ཕྲེང་བ་ཅན་ནི། ཟས་སྐོམ་ལྟོ་བའི་ནང་དུ་ཚུད་པ་དང་། དེ་དག་ཀྱང་མེ་འབར་ནས་ལུས་འཚིག་པ་དང་། ལྗན་ལྗིན་ཟ་བ་ནི། རང་ཤ་རང་གིས་ཟ་བ་དང་། བཤང་གཅི་སོགས་མི་གཙང་བ་ཟ་བས་ཤིན་ཏུ་ཉམ་ཐག་པའོ། །བཤེས་སྤྲིང་ལས། འདི་དག་རྣམས་ལ་སོས་ཀའི་དུས་སུ་ནི། །ཟླ་བའང་ཚ་ལ་དགུན་ནི་ཉི་མའང་གྲང་། །ལྗོན་ཤིང་འབྲས་བུ་མེད་འགྱུར་འདི་དག་གིས། །བལྟས་པ་ཙམ་གྱིས་ཀླུང་ཡང་བསྐམས་པར་གྱུར། །ཞེས་གསུངས་པ་ལྟར། ཡི་དྭགས་སྨད་རིས་འདི་དག་སོས་ཀ་དྲོད་དང་ལྡན་པའི་ཚེ་ཟླ་བའི་རེག་བྱ་ག་བུར་ལྟར་བསིལ་ཞིང་གྲང་བ་དེ་ཡང་ཚ་བ་འགྱུར། དགུན་གྲང་བའི་ངར་དང་ལྡན་པའི་ཚེ་ཉི་མའི་འོད་ཟེར་ཡང་བསིལ་ཞིང་གྲང་བར་གྱུར་ནས། ཚ་དུས་ཚ་ཆེ། གྲང་དུས་གྲང་ཆེ་བས་ཚ་གྲང་ཁོད་མི་སྙོམས། ལྗོན་ཤིང་ཡལ་ག་རྒྱས་ཤིང་འབྲས་བུ་ཕུན་སུམ་ཚོགས་པར་སྨིན་པ་རྣམས་དང་། ཡན་ལག་བརྒྱད་ལྡན་གྱི་ཆུ་ཀླུང་ཡིད་འོང་གི་རིགས་འདི་དག་གིས་བལྟས་པ་ཙམ་གྱིས་བསྐམས་ཏེ། ཆུ་མེད་པའི་རྡོ་སྲེག་གིས་གང་བའི་ཚ་བའི་ཐང་། ངམ་གྲོག་ཉམས་མི་དགའ་བའི་སྣང་བར་འཆར་བ་སོགས་མདོར་ན་བཀྲེས་སྐོམ་གྱི་སྡུག་བསྔལ་དཔག་ཏུ་མེད་པ་མྱོང་། དེ་ལྟ་བུའི་སྡུག་བསྔལ་ཡུན་ཐུང་ངུས་མི་ཆོག་པར་མི་ལོ་ཆིག་ཁྲི་ལྔ་སྟོང་མྱོང་དགོས་པར་ཤེས་པས་ཡི་མུག་ཅིང་སྒྱིད་ལུག་པར་སྒོམས། སྔར་རྒྱ་གར་གྱི་ཡུལ་རྒྱལ་པོའི་ཁབ་ན་ཚོང་དཔོན་ཞིག་ལ་སྐར་མ་ཆུ་སྨད་ལ་སྐྱེས་པའི་བུ་ཞིག་ཡོད་པ་ལ་སྐྱེས་དུས་ཀྱི་རྒྱུ་སྐར་གྱི་མིང་གིས་བཏགས་པས་ཆུ་སྨད་ཅེས་བཏགས་པ་ཞིག་ཡོད་པ་རེད། བུ་ཆུ་སྨད་སྐྱེས་ནས་ནར་སོན་པ་ན་ཕ་ཚོང་དཔོན་ཤི་ནས་ཁྱིམ་གྱི་བདག་པོར་གྱུར། དེ་ནས་ཕའི་རིགས་ཀྱི་ལས་ཀ་ཚོང་གིས་འཚོ་བའི་སྐབས་ཤིག་ན། སངས་རྒྱས་བཅོམ་ལྡན་འདས་མཇལ་བས་དད་པ་སྐྱེས་ནས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་བསམ་ཡང་། མས་མོ་མ་ཤི་བར་དུ་རབ་ཏུ་བྱུང་མི་འཇུག་ང་ཤི་ནས་ཁྱོད་རང་གིས་ཤེས་ཟེར་བས། རབ་ཏུ་བྱུང་ཐབས་མ་བྱུང་། རྒྱུ་ནོར་ལོན་ཚད་མ་ལ་སྤྲད་ནས། ཨ་མ་ཁྱོད་ཀྱིས་འདི་རྣམས་དགེ་སྦྱོང་དང་བྲམ་ཟེ་རྣམས་ལ་མཆོད་པ་ཕུལ། དབུལ་ཕོངས་དང་ཉམ་ཐག་ལ་སྦྱིན་པ་ཐོང་ཞེས་ཟེར་ཡང་། མ་རྒན་རྐམ་ཆགས་དང་སེར་སྣ་ཆེན་པོ་ཅན་ཞིག་ཡིན་པས། རྒྱུ་ནོར་ཚང་མ་བསྐུངས་ནས་མཆོད་སྦྱིན་མི་བྱེད་པར་མ་ཟད་དགེ་སྦྱོང་བྲམ་ཟེ་རྣམས་ལ་ཁྱོད་རྣམས་ཉིན་རེ་བཞིན་དུ་སྒོ་བརྡུངས་ནས་བསླང་བས་ཡི་དྭགས་དང་འདྲ་བོ་ཞེས་ངན་སྨྲས་བྱས་པ། ད་དུང་མོས་ཉིན་རེ་བཞིན་དུ་དགེ་སྦྱོང་དང་བྲམ་ཟེ་རྣམས་ལ་བསོད་སྙོམས་འབུལ་ཡོད་ཅེས་བུ་མགོ་བསྐོར་བ་དང་། ནམ་ཞིག་ན་མ་རྒན་ཤི་ནས་ཡི་དྭགས་སུ་སྐྱེས་པ་ན། བུས་མའི་དགེ་རྩར་མཆོད་སྦྱིན་བྱས་ཤིང་འཁོར་བ་ལས་ངེས་པར་འབྱུང་བའི་བློ་སྐྱེས་ནས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་། ལམ་ལ་བརྩོན་པས་ཁམས་གསུམ་གྱི་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པའི་འབྲས་བུ་མངོན་དུ་བྱས་ནས། ཁམས་གསུམ་གྱི་འདོད་ཆགས་དང་བྲལ། གསེར་དང་བོང་བ་མཉམ། ནམ་མཁའ་དང་ལག་མཐིལ་མཉམ་པ་ཞིག་གྱུར་པ་ན། དེས་ཆུ་ཀླུང་གངྒཱའི་འགྲམ་དུ་ལོ་མའི་སྤྱིལ་པོར་བྱས་ནས་བཞུགས་པ་ན། མ་ཡི་དྭགས་སུ་སྐྱེས་པ། ལུས་སྡོང་དུམ་མེས་ཚིག་པ་དང་འདྲ་བ། ཁ་ཁབ་མིག ལྟོ་བ་རི་རབ་ནས་རྐང་ལག་རྩྭ་འཇག་དང་འདྲ་བས་ལུས་མི་ཐེག་པ་ཁ་ནས་མེ་འབར་། སྣ་ནས་དུ་བ་འཐུལ་བ་གོང་དུ་བཤད་པ་དང་འདྲ་བ་ཞིག་འོང་ནས། ང་ཁྱོད་ཀྱི་མ་ཡིན། ང་སྐོམ་པས་ཆུ་ཞིག་བྱིན་ཟེར་བ་ན། དགྲ་བཅོམ་པ་ཆུ་སྨད་ཀྱིས་ཁྱོད་མི་ཡུལ་དུ་ཡོད་དུས་ངས་ཁྱོད་ལ་ནོར་མང་པོར་བྱིན་ནས་མཆོད་སྦྱིན་གྱིས་ཞེས་བཤད་པ་མ་ཡིན་ནམ། ཁྱོད་འདི་འདྲའི་ལུས་ངན་པ་བླངས་པ་ཅི་ཡིན་ཞེས་སྨྲས་པ་དང་། ཡི་དྭགས་ཀྱིས་ང་སེར་སྣ་ཆེ་བས་སྦྱིན་པ་བྱེད་མ་ནུས་པས་འདི་འདྲའི་ལུས་སུ་གྱུར། ནོར་རྣམས་བསྐུངས་ནས་ཡོད། དེ་རྣམས་བླངས་ལ་སངས་རྒྱས་འཁོར་བཅས་ལ་མཆོད་པ་གྱིས། དགེ་བ་ང་ལ་བསྔོ་ན་སྡུག་བསྔལ་འདི་ལས་ཐར་རྒྱུ་ཨེ་ཡོད་ན་ཟེར་བ་དང་། ཆུ་སྨད་ཀྱིས་འོ་ན་སང་ཉིན་བཅོམ་ལྡན་འདས་འཁོར་བཅས་གདུགས་ཚོད་ལ་གདན་འདྲེན་ཞུ་རྒྱུ་ཡིན། དེ་དུས་ཁྱོད་ཤོག་ཅེས་སྨྲས་པ་ལ། ཡི་དྭགས་མོས་ང་ངོ་ཚ་ནས་སང་ཉིན་ཡོང་མི་ཐུབ་ཟེར། བུས་ཁྱོད་ཀྱིས་ལས་ངན་བསག་པ་ལ་ངོ་མི་ཚ་ན་ད་ལུས་ངན་བླངས་ནས་འབྲས་བུ་མྱོང་བ་ལ་ངོ་ཅི་ཚ། ཤོག་ཅེས་པས་འོང་བ་ན། དེ་ལྟར་ལུས་མི་སྡུག་པར་བྱས་ནས་ཡོང་བས་ཐམས་ཅད་སྐྱོ་བར་བྱས། བཅོམ་ལྡན་འདས་ཀྱི་ཞལ་རས་ལ་བལྟས་པ་ན། ཆུ་སྨད་ཀྱིས་དགེ་སློང་གི་དགེ་འདུན་ལ་ཞལ་ཟས་ཕུལ་ནས་ཡི་དྭགས་མོའི་ཕྱིར་དུ་ཡོན་བསྔོ་བར་ཞུས་པས། བཅོམ་ལྡན་འདས་ཀྱིས། སྦྱིན་པ་འདི་ཡི་བསོད་ནམས་གང། །དེ་དག་ཡི་དྭགས་ཕྱི་བཞིན་སོང་། །ཡི་དྭགས་འཇིག་རྟེན་རབ་འཇིགས་ནས། །དེ་ལས་མྱུར་དུ་ཐར་གྱུར་ཅིག །ཅེས་སོགས་སྦྱིན་པའི་རབས་དང་ཆོས་མང་པོ་གསུངས་པས་ཡི་དྭགས་མོ་ཡང་ཡིད་དགའ། དེ་ནས་ཤི་འཕོས་ཏེ་ཡི་དྭགས་རྫུ་འཕྲུལ་ཆེན་པོ་མ་ཞེས་པ་སྐྱེས་པ་ན། ཆུ་སྨད་ཀྱིས་ད་ནི་ཁྱོད་ལ་མཐུ་ནུས་པ་ཡོད་པས་སྦྱིན་པ་ཐོང་ལ་བསོད་ནམས་གསོག་པར་གྱིས་ཟེར་བ་ལ། མོས་ང་དང་པོ་ནས་སྦྱིན་པ་ལ་མི་དགའ་བས་སྦྱིན་པ་བྱེད་མི་ནུས་ཟེར་བ་དང་། བུ་ཆུ་སྨད་ཀྱིས་ཐབས་སྣ་ཚོགས་ཀྱིས་དེའི་ལག་ནས་རས་ཡུག་གཅིག་ལེན་ཐུབ་སྟེ་དགེ་འདུན་ལ་ཕུལ་ནས། དགེ་སློང་ཞིག་གིས་ཉོས་ནས་གོས་ཀྱི་རྡང་ལ་བཀལ་བ། ཡི་དྭགས་མོ་ནམ་གུང་ཡོང་ནས་ཕྱིར་བརྐུ་སོང་བ་ན། དགེ་སློང་དེས་དེ་ལྟར་ཆུ་སྨད་ལ་ཟེར་བས། སླར་ཡང་བླངས་ནས་ལན་གསུམ་གྱི་བར་དུ་དེ་ལྟར་བྱས་ནས་བརྐུས་སོང་བ་དང་། ཐེངས་གསུམ་པའི་ཚེ་དགེ་སློང་དེས་རས་དེ་དེ་མ་ཐག་ཏུ་དུམ་བུར་གཤགས་ནས་ཕྱོགས་བཅུའི་དགེ་འདུན་གྱི་སྟན་ལ་བསླན་པས་དེ་ཕྱིན་མ་བརྐུ་བ་རེད། དེ་ལྟར་སེར་སྣ་ཉེས་པ་ཆེ་བར་མ་ཟད། རྒྱུ་མཐུན་གྱི་དབང་གིས་སེར་སྣ་འཇུར་གེགས་སྤོང་མི་ཐུབ་ནས་སྡུག་བསྔལ་མྱོང་བ་རེད། གོང་དུ་བཤད་པ་ལྟར་ཡི་དྭགས་ཀྱི་སྡུག་བསྔལ་བསྒོམས་ནས། དེ་ལྟར་སྒོམ་བཞིན་པའི་སྐབས་ན། སླར་མདུན་གྱི་ནམ་མཁར་རྩ་བའི་བླ་མ་དེ་ཉིད་ཨོ་རྒྱན་ཆེན་པོའི་ཆ་བྱད་ཅན་དུ་བྱོན་ནས། ཀྱེ་ཞེས་བོས་ནས། ཁྱོད་ཀྱིས་སེར་སྣའི་སྒོ་ནས་བསགས་པའི་སྡུག་བསྔལ་རང་ཐོག་ཏུ་ནོར་བ་དང་འཕྱུགས་པ་མེད་པར་བབ་པ་ལ། སེམས་ཅན་གཅིག་གི་ལས་ལ་སངས་རྒྱས་བརྒྱ་བྱོན་ཡང་མཐུ་རྡུག་ཅེས་པ་ལྟར། དུས་གསུམ་སངས་རྒྱས་ཀྱིས་ཀྱང་ལས་འཕྲོག་ཏུ་མེད་པས་སྐྱོབ་པར་དཀའ། རྒྱལ་བ་ཤཱཀྱ་ཐུབ་པས་རྒྱལ་པོ་གཟུགས་ཅན་སྙིང་པོ་ལ་གསུངས་པ་ལྟར། རང་གིས་བྱས་པའི་ལས་བདག་གིར་བྱོས་ལ་ལས་ངན་མྱོང་སྟོབས་ཀྱིས་ཟད་པའི་དགའ་བ་སྒོམས། རང་འདྲ་བའི་སེམས་ཅན་གཞན་གྱིས་སེར་སྣའི་ལས་ཀྱི་སྡུག་བསྔལ་མྱོང་བ་ཐམས་ཅད་ལ་སྙིང་རྗེའི་བསམ་པས། སེམས་ཅན་གཞན་གྱི་སྡུག་བསྔལ་མྱོང་བ་རང་གིས་ལེན་ནས། གཞན་གྱིས་མ་མྱོང་ན་ངས་མྱོང་ན་མྱོང་སྙམ་པས་རང་གི་སྡུག་བསྔལ་གྱི་ཁ་སྣོན་ལ་ལེན་པའི་སྙིང་སྟོབས་བསྐྱེད་ལ་བྱམས་སྙིང་རྗེ་བྱང་ཆུབ་སེམས་ཀྱི་གཉེན་པོར་བསྟེན་ཅིག ཅེས་གསུངས་པ་ཐོས་པ་ཙམ་གྱིས་ཨ་ཙ་མ། བདག་འདྲ་བའི་སེམས་ཅན་རང་གཅེས་འཛིན་ཁོ་ན་བྱས་པའི་ལས་ངན་གྱིས་ད་ལྟ་ཕན་ཆད་འཁོར་བ་མཐའ་མེད་དུ་འཁྱམས་ཤིང་སྡུག་བསྔལ་འདི་ལྟ་བུ་མྱངས་དང་མྱོང་བཞིན་པ་རེད། ལས་ངན་བསགས་པ་དང་སྡུག་བསྔལ་མྱོང་བར་འདྲ་བའི་བདག་དང་རིགས་མཐུན་པའི་ཡི་དྭགས་ཆུ་བོ་གངྒཱའི་ཀླུང་གི་བྱེ་མའི་གྲངས་ཇི་སྙེད་ཀྱི་རྡུལ་གྲངས་དང་ལྡན་པ་བགྲང་དུ་མེད་པ་དག་ལའང་སྡུག་བསྔལ་འདི་ཁོ་ན་ལྟར་ཡོད་པས་ཤིན་ཏུ་སྙིང་རྗེ། ད་ནི་རང་གི་སྡུག་བསྔལ་བཟོད་པར་བྱས་ནས་སེམས་ཅན་གཞན་གྱི་སྡུག་བསྔལ་ཡང་དང་དུ་བླང་བར་བྱ། ཡི་དྭགས་ཀྱི་གྲོང་ཁྱེར་རྨིང་ནས་སྟོངས་པར་ཤོག་ཅིག་བསམ་པའི་མོད་ལ། སྙིང་རྗེ་དང་སེམས་བསྐྱེད་སྨོན་ལམ་དེའི་མཐུ་ཆེན་པོས་ལས་ངན་སྐད་ཅིག་ལ་ཟད་དེ་ཨོ་རྒྱན་ཆེན་པོའི་དགོངས་པ་དང་གཉིས་སུ་མེད་པར་སངས་རྒྱས། སྡུག་བསྔལ་མྱོང་བཞིན་པའི་སེམས་ཅན་དེ་དག་ཀྱང་བདག་གི་ཐུགས་ཀའི་འོད་ཟེར་གྱིས་དྲངས་པར་བསམ་ལ་འཕྲོ་གནས་ཀྱི་མཁན་པོ་ལ་བརྟག་གོ། །དེ་ལྟར་དཔྱད་སྒོམ་དང་འཇོག་སྒོམ་སྤེལ་མར་བྱེད་དགོས། གོང་དུ་བདེ་སྡུག་གང་ཤར་གྱི་ངོར་ལྟོས་ཞེས་དང་། འདིར་འཕྲོ་གནས་ཀྱི་མཁན་པོ་ལ་བརྟག་གོ་ཞེས་པས་འཁོར་འདས་ཀྱི་རྩ་བ་སེམས་ཉིད་ཡིན་པ་དང་། སེམས་ཉིད་ཀྱི་རྩལ་སེམས་རྣམ་རྟོག་ཏུ་ཤར་བ་འདི་དབྱིབས་དང་ཁ་དོག་སོགས་དངོས་པོར་གྲུབ་པ་རེད་དང་། མ་གྲུབ་པ་རེད། ཡོད་པ་རེད་དང་། མེད་པ་རེད། ཡོད་པ་ཞིག་མིན་ན་ཤེས་དོན་གསལ་དོན་མེད། ཡོད་པ་ཞིག་ཡིན་ན་འདི་ཞེས་བསྟན་རྒྱུ་རིག་རྒྱུ་ཨེ་ཡོད། ཡོད་པའང་མ་ཡིན་མེད་པའང་མ་ཡིན་པའི་སྟོང་པར་ཐག་ཆོད་ན། ཡོད་པ་མ་ཡིན་རྒྱལ་བས་འདི་མ་གཟིགས། །མེད་པ་མ་ཡིན་འཁོར་འདས་ཀུན་གྱི་གཞི། །འགལ་འདུ་མ་ཡིན་བརྗོད་བྱའི་ཡུལ་ལས་འདས། །རྫོགས་ཆེན་གཞི་ཡི་གནས་ལུགས་རྟོགས་པར་ཤོག །ཅེས་པའི་ཐོག་ཏུ་བབ་པ་རེད། འདི་དང་པོ་གང་ནས་བྱུང་། བར་དུ་གང་ན་གནས། ཐ་མ་གང་དུ་འགྲོ་ཞེས་བརྟག་ན། འདི་དང་པོ་གང་ནས་བྱུང་དང་འདི་ནས་བྱུང་ཞེས་མི་རྙེད་པ་འདི་དང་པོ་མ་སྐྱེས་པ་རེད། སེམས་ཉིད་ཀྱི་ངོ་བོ་མ་སྐྱེས་པ་ཡིན་པས། དང་པོ་སྐྱེ་བ་ཞིག་དང་། བར་དུ་གནས་པ། ཐ་མ་འགྲོ་བ་གང་ན་ཡོད། དང་པོ་སྐྱེས་པ་དང་། བར་དུ་གནས་པ། ཐ་མ་འགག་པ་མེད་པས་སྐྱེ་འགག་གནས་གསུམ་དང་བྲལ་བ་གཏན་ལ་ཕབ། བར་སྣང་སྟོང་པ་ལ་མིང་ནམ་མཁའ་ཞེས་བཏགས་པ་ལྟར་སེམས་ཉིད་སྟོང་པ་ལ་མིང་སེམས་ཞེས་བཏགས་པ་རེད། དེ་ལྟ་བུ་དཔྱད་དེ་མཇུག་ཏུ་མི་རྟོག་པའི་ངང་དུ་མཉམ་པར་འཇོག་དགོས། འདིའི་ཁྲིད་རྐང་དེ་རིགས་དྲུག་གི་སེམས་ཅན་ལ་སྙིང་རྗེ་སྐྱེ་ཞིང་། ལས་སུ་དཀོན་མཆོག་མཆོད་ཅིང་དཀར་པོ་དགེ་བའི་ལས་བསྐྱེད་པ་ཞེས་པའི་ཁྲིད་རེད། འདིའི་ཁྲིད་རྐང་འདི་ཤིན་ཏུ་གནད་ཆེན་པོ་ཡིན། ད་སྔོན་ཉི་མ་ཡན་ཆད་འཁོར་བའི་སྡུག་བསྔལ་མ་ཤེས་པར་མི་བདེ་བ་ལ་བདེ་བ་དང་། མི་གཙང་བ་ལ་གཙང་བར་བཟུང་ནས། སྦྲང་མ་མི་གཙང་བའི་འདམ་ལ་ཆགས་པ་ལྟར་དང་། རང་གིས་རང་བསྡོམ་རང་གིས་རང་བཅིངས་ནས་སྲིན་བུ་རང་གིས་ཁ་ཆུས་བསྡོམ་པ་བཞིན་འཁྲུལ་སྣང་འཁོར་བའི་ལྕགས་སྒྲོག་གིས་སྡོམ་པ་དང་། ཉ་དྲ་བའི་ནང་དུ་ཚུད་པ་ལྟར་ཐར་མེད་འཁོར་བའི་དྲ་བ་ཆེན་པོ་འདིའི་ནང་དུ་ཚུད་པ་འདི་ནི། དམྱལ་བ་ཡི་དྭགས་སོགས་ངན་སོང་གི་གནས་སུ་སྐྱེ་འགྲོ་བ་དང་། སྐྱེ་བའི་རྒྱུ་ཅི་ཡིན་གཏན་ནས་མི་ཤེས་པ་དང་གོ་མ་མྱོང་བ་ཞིག་ཀྱང་མ་ཡིན། བོད་ཀྱི་མི་ཞིག་ཡིན་དུས་མང་ཆེ་བ་མུ་སྟེགས་ཆད་པར་ལྟ་བའི་ལྟ་བ་རེ་བཟུང་སྟེ་ཚེ་སྔ་ཕྱི་དང་ལས་རྒྱུ་འབྲས་མེད་ཟེར་ནས་ལྟ་ལོག་འཛིན་པ་ཞིག་ཀྱང་ཅི་ཡིན་རྒྱུ་མ་རེད་དེ། ལས་རྒྱུ་འབྲས་ལ་ཡིད་ཆེས་པའི་དད་པ་ངེས་ཤེས་བརྟན་པོ་ཞིག་སྐྱེས་མ་ཐུབ་དང་། ཁྱད་པར་དུ་མི་སྐྱ་ཕོ་མོ་རྣམས་ཡིན་ན་ཐོས་རྒྱུ་ཉུང་། རིགས་པའི་གནད་ལ་སྦྱངས་ནས་ཤེས་པའི་ཤེས་རབ་བསྟེན་མ་མྱོང་བས། རྒྱུ་མཚན་ཤེས་པའི་སྒོ་ནས་གནད་ཀྱི་གོ་བ་མ་ལོན་པས་རེད། མི་སྐྱ་ཕོ་མོ་ཚོ་རྐྱང་པ་མ་རེད་། རང་གཞན་སུ་ཡིན་ན་དེ་རིང་སང་ཉིན་ཙམ་ལས། ཚེ་ཕྱི་མ་མི་དགོས་ཚེ་འདིའི་ཚེ་མཇུག་གི་འདང་ཡག་པོ་མ་ཕོག་ནས། ཅི་རེད་གང་རེད། ཅི་བྱུང་གང་བྱུང་། རང་རེ་འཚོ་བ་བརྟེན་སའི་རྟ་ཟོག་རྣམས་དང་ཕྱོགས་འདྲ་བར་འདང་རྒྱག་མ་བྱས་པའི་སྐྱོན་ཆ་རེད། དེ་འདྲའི་མིང་ལ་ཤེས་རབ་དང་རྣམ་དཔྱོད་མེད་པ་དང་། ཐབས་ལ་མི་མཁས་པ་ཟེར་རྒྱུ་དེ་ཡིན། འོན་ཀྱང་ད་སྔར་མ་ཤེས་འཁྲུལ་པའི་དབང་དུ་སོང་ཡང་། ད་བསམ་བློ་རིག་པ་གཏན་ལ་ཕབ་ཟེར་བ་ལྟར། ད་དུང་གསོན་འདི་ངོགས་རེད། རང་དབང་རང་ལག་རེད། རང་གཞན་གཉིས་ཀའི་དོན་སྒྲུབ་ཆོག་ཆོག་གི་ཆོས་དང་འཕྲད་པ་རེད། དམ་པའི་ཆོས་ཁ་ལ་འཇོག ཁོག་ལ་བཙུད་པ་མིན་ཚད་བྱེད་རྒྱུ་འདི་གདན་ས་ཆོས་འཁོར་ཆེན་པོའི་ཟུར་ལ་སྐྱེས་པའི་བེད་དང་། སྔོན་བསོད་ནམས་བསགས་པའི་འབྲས་བུ་རེད། དེས་ན་རིགས་དྲུག་གི་སེམས་ཅན་ལ་སྙིང་རྗེ་སྐྱེ་བའི་ཆེད་དུ། རིགས་དྲུག་གི་སེམས་ཅན་གྱི་སྡུག་བསྔལ་རང་ཐོག་ལ་ལེན་ནས་བསྒོམ་རྒྱུ་འདི་གལ་ཆེ་སྟེ། ས་ཆ་ཞིག་གི་གནས་ཚུལ་གོ་བ་དང་རང་ངོ་མ་དེར་ཐོན་པ་གཉིས་ཞེ་གཏིང་ན་བག་ཆགས་འཇོག་ལུགས་མི་འདྲ་གི་ཡིན་ན། བླ་མ་རྫུ་འཕྲུལ་ཅན་ཞིག་ཡིན་ན་བཤད་པས་གོ་བ་འཇགས་མི་འཇགས་བྱེད་པ་བས། སློབ་མ་རྣམས་དམྱལ་བ་དང་ཡི་དྭགས་ཀྱི་གནས་སུ་གཅིག་ཁྲིད་སོང་ན་དགའ་ས་རེད། བཅོམ་ལྡན་འདས་ཀྱིས་གཅུང་དགའ་བོ་ལ་ལྷ་ཡུལ་གྱི་བདེ་སྐྱིད་དང་དམྱལ་བའི་སྡུག་བསྔལ་བསྟན་པ་ལྟར་རེད་འགྲོ་ས་ཡོད་མོད། འོན་ཀྱང་བླ་མ་ལ་དེའི་ནུས་པ་མེད་དུས། བཅོམ་ལྡན་འདས་ཀྱི་བཀའི་རྗེས་སུ་འབྲངས་ནས་བཤད་ན་མ་གཏོགས་ཐབས་མེད་སོང་བ་རེད། རང་རེས་བློས་རྗེས་སུ་དཔག་ན། དཔྱིད་ཀར་ཞིང་ལ་ས་བོན་བཏབ་ན་སྟོན་ཀར་ལོ་ཏོག་དེའི་འབྲས་བུ་སྨིན་པ་ལྟར། དེའི་ཕྱོགས་ལ་བསམ་བློ་གཏོང་ན་ལས་རྒྱུ་འབྲས་དགེ་སྡིག་གི་འབྲས་བུ་བདེ་སྡུག་མྱོང་རྒྱུ་བོ་འདི་མི་ཞིག་ཡིན་ན་ཧ་ལམ་མི་གོ་རྒྱུ་མེད་པ་རེད། བསམ་ཤེས་ཉམས་སུ་བླངས་ན་མངོན་སུམ་རིག་པ་དང་ཧ་ལམ་འདྲ་བོ་རེད། འདིའི་ཁྲིད་རྐང་འདི་མང་པོའང་རེད། ཚོ་གསུམ་བགོས་ཏེ་ཆོས་ཁྲིད་ཉིན་གསུམ་ཁྲིད་ནས་ཁྲིད་སྦྱོང་དེ་ལྟར་བྱ་དགོས། དང་པོ་དམྱལ་བའི་སྡུག་བསྔལ་ལ་བསམ་པའི་ཚེ། ཁྲིད་ཡིག་ནང་བཞིན་དུ་དམྱལ་བའི་གནས་རེ་རེ་བཏོན་ནས་དེ་བཞིན་སྡུག་བསྔལ་རང་གི་ལུས་སེམས་ཀྱི་ཐོག་ཏུ་དངོས་སུ་མྱོང་བར་སྒོམས། རང་ཉིད་ཀྱི་ཕ་མ་ཉེ་འབྲེལ་ཤི་བོ་སྔོན་མ་རྣམས་ཀྱིས་མྱོང་བ་མིག་གིས་མངོན་སུ་མཐོང་བ་ལྟར་དམྱལ་གནས་ཚང་མ་སྒོམ་ཚར་དུས། མདུན་གྱི་ནམ་མཁར་རང་གི་རྩ་བའི་བླ་མ་དང་དབྱེར་མེད་པར་ཨོ་རྒྱན་བདེ་ཆེན་རྒྱལ་པོ་སྐུ་དངོས་སུ་བྱོན་ནས། གདམས་ངག་གསུངས་ཚར་བ་དང་མཉམ་དུ་ཨོ་རྒྱན་ཆེན་པོའི་ཐུགས་དང་རང་གི་སེམས་དབྱེར་མེད་དུ་སངས་རྒྱས་པ་དང་། དོན་གཉིས་ལྷུན་གྲུབ་གྱི་མཐུ་ནུས་དང་ལྡན་པར་བསམ། ཡང་རང་གི་ཐུགས་ཀ་ནས་འོད་ཟེར་འཕྲོས་པས་དམྱལ་བའི་སེམས་ཅན་ཐམས་ཅད་ཐུགས་རྗེའི་འོད་ཟེར་གྱིས་དྲངས་ནས་དམྱལ་གནས་དོང་ནས་སྤྲུག་པར་སྒོམས། ངོ་མ་དངོས་གཞི་རིག་ངོ་འཕྲོད་ཅིང་དེ་ལ་གོམས་པ་རྒྱུན་སྐྱོང་བའི་རྟོགས་པ་མཆོག་ལྡན་ཞིག་ཡིན་ན། འགྲོ་དྲུག་སེམས་ཅན་གྱི་སྡུག་བསྔལ་ལ་དམིགས་པའི་སྙིང་རྗེ་དང་འབྲེལ་བའི་ཆོས་ཉིད་རྣམ་པར་མི་རྟོག་པའི་དོན་ལ་མཉམ་པར་བཞག་ན། ཆོས་ཉིད་བདེན་པའི་བྱིན་རླབས་ཀྱིས་སེམས་ཅན་ལ་དངོས་སུ་ཕན་ཐོགས་ཏེ་དམྱལ་གནས་དོང་ནས་སྤྲུག་ནུས་པ་རེད། དེ་ལྟར་མིན་ཡང་མོས་པ་རྣམ་པར་དག་པ་དད་དང་སྙིང་རྗེའི་ངང་ནས། བླ་མ་དང་གུ་རུ་རིན་པོ་ཆེ་དབྱེར་མེད་ཀྱི་ཐུགས་ལ་མཉམ་པར་བཞག་ནས་ངན་འགྲོའི་གནས་དོང་ནས་སྤྲུགས་ཏེ་སེམས་ཅན་དེ་དག་དག་ཞིང་དུ་ཁྲིད་པར་སྒོམ་ན་ཕན་ཡོན་དཔག་ཏུ་མེད་པ་ཡོད་པར་མ་ཟད། མ་འོངས་པ་ན་དེ་དང་དེར་འགྱུར་བའི་རྟེན་འབྲེལ་འགྲིག་རྒྱུ་ཡོད་པ་རེད། རྟེན་འབྲེལ་ལུས་ལ་སྒྲིག་ན་རྟོགས་པ་སེམས་ལ་འཆར་ཞེས་གསུངས་སོ། །འདིར་ཆོས་ཁྲིད་མེད་པའི་ཉིན་གསུམ་གྱི་སྔ་དྲོར་འབུམ་ལྔའི་ནང་གི་རྡོར་སེམས་སྒོམ་བཟླས་ཡིག་བརྒྱ་གསོག་དགོས། དེའང་བྱང་ཆུབ་ཀྱི་སེམས་དང་འབྲེལ་བའི་དམ་པ་གསུམ་གྱིས་རྩིས་ཟིན་ན་སྡིག་པ་དག་སྟོབས་ལྷག་པར་ཆེ། རྟེན་གྱི་སྟོབས་དེ་བླ་མ་རྡོ་རྗེ་སེམས་དཔའ་ཀུན་འདུས་ནོར་བུའི་ལུགས་སུ་བསྒོམ་ན་སྐྱབས་གནས་ཀུན་འདུས་སུ་གྱུར་པ་ཡིན། འབུམ་ལྔ་ཞེས་པ་བསགས་སྦྱང་གཉིས་ཏེ། ཚོགས་བསགས་དང་སྒྲིབ་སྦྱོང་གི་ཐབས་ཁྱད་པར་ཅན་རེད། ཚོགས་རྗོགས་སྒྲིབ་པ་དག་ན་ཐར་པའི་མཆོག་ཐོབ། སྒྲིབ་པ་དག་ན་རྟོགས་པ་ངང་གིས་འཆར། ཞེས་གསུངས། དེ་དུས་དེས་གཞན་དོན་འགྲུབ་ལ། གཞན་དོན་སྒྲུབ་ནུས་པ་དེས་རང་དོན་ཞོར་ལ་འགྲུབ་ཅིང་ཚགས་སུ་ཚུད་ཚར་བ་རེད། དེས་ན་རང་རེས་དེ་རིང་ཕྱི་དྲོར་གྲང་དམྱལ་གྱི་སྡུག་བསྔལ་སྒོམ། སང་ཉིན་ཕྱི་དྲོ་དང་དགོང་མོར་ཡི་དྭགས་ཀྱི་སྡུག་བསྔལ་སྒོམ། མཐར་ཨོ་རྒྱན་ཆེན་པོའི་ཐུགས་དང་རང་སེམས་དབྱེར་མེད་དུ་བསྲེས། ཡི་དྭགས་སུ་སྐྱེས་པའི་སེམས་ཅན་ཐམས་ཅད་དག་ཞིང་དུ་དྲང་བར་སྒོམས། ཐུན་ཐམས་ཅད་ཀྱི་མཐར་དམིགས་མེད་ཀྱི་དོན་ལ་མཉམ་པར་བཞག མཉམ་པར་བཞག་ཟེར་ན་སེམས་རྣམ་རྟོག་གི་རྦ་རླབས་ཀྱི་དབང་དུ་མི་ཤོར་བར། དྭངས་པའི་རྒྱ་མཚོ་མི་གཡོ་བ་བཞིན་དགོས། མཉམ་ཟེར་ན་སེམས་ཕྱོགས་སུ་མ་ལྷུང་བར་ཞོག་ཅེས་པའི་དོན་རེད། མཉམ་བཞག་གི་ཚིག་གི་ཐོག་ལ་བསམ་ན། སེམས་འཇོག་ཐབས་དང་འཇོག་ཐབས་དེ་ལ་བརྟེན་པའི་ཐབས་བྱུང་ཡེ་ཤེས་གཉིས་ཀ་ལ་གོ་ཆོག ད་རེས་ཀྱི་ཁྲིད་འདི་ལ་སྒོམ་རྒྱག་དགོས། སྒོམ་མི་ཤེས་རྒྱུ་ཅི་ཡོད། ངས་སློབ་ཅེས་གོང་དུ་བཤད་མྱོང་ལ། སྒོམ་རྒྱག་དུས་ལུས་རྣམ་སྣང་ཆོས་བདུན་བྱ་དགོས། སྒོམ་སེམས་ཀྱིས་རྒྱག་ན་ལུས་ལ་ཅི་འབྲེལ་བ་ཡོད་བསམ་ན། སེམས་ལུས་ལ་གནས་ཡོད། སེམས་ཆོས་ཅན་དང་། དེའི་ཆོས་ཉིད་ཡེ་ཤེས་ཡིན། དེའི་ཡེ་ཤེས་དེ་ཁྱད་ཆོས་གསུམ་ལྡན། ངོ་བོ་སྟོང་པ། རང་བཞིན་གསལ་བ། ཐུགས་རྗེ་འགག་མེད་དེ་སྟོང་གསལ་འགག་མེད་གསུམ་པོ་རེད། གཉུག་མ་བྱང་ཆུབ་སེམས་ཀྱི་དཀྱིལ་འཁོར་ཟེར་ན། མ་བཅོས་རང་བྱུང་གི་ཡེ་ཤེས་ཞེས་སེམས་ཀྱི་ཆོས་ཉིད་གང་ཡིན་པ་དེ། སྙིང་ཙིཏྟ་རིན་པོ་ཆེ་ཟུར་བརྒྱད་པ་ན་དྭངས་མ་ལྔ་འདུས་ཀྱི་ཐིག་ལེའི་ནང་དུ་བཞུགས་ཡོད། དེའི་སྟོབས་ཀྱིས་ཁམས་དྲུག་ལྡན་གྱི་མིའི་ལུས་དེ་སྔགས་རྫོགས་ཆེན་སྒོམ་པའི་རྟེན་ཁྱད་པར་ཅན་ཡིན། འོ་ན་ལུས་འཇིགས་པའི་ཚེ་ཡེ་ཤེས་ཅི་རེད་འགྲོ་བསམ་ན། འདི་ལུས་གནས་ལུས་ལས་མ་སྐྱེས་པའི་ཡེ་ཤེས། ཆ་མེད་ཀུན་འགྲོ་ཀུན་ལ་ཁྱབ་པའི་བདག་ཉིད་ཅན་ཡིན། འདི་ལ་རྒྱུད་གཞན་ལས་མཁའ་ཁྱབ་མཁའི་རྡོ་རྗེ་ཞེས་གསུངས་ཡོད། དོན་དུ་ཡེ་ཤེས་ཀྱི་ངོ་བོ་དེ། འཇིག་བྲལ་མེད་པ་རྡོ་རྗེ་ལྟ་བུ། སྤྲོས་པའི་མཐའ་དང་བྲལ་ཞིང་དུས་གསུམ་མཉམ་པ་ཉིད་དུ་གྱུར་པ། གནས་ཚུལ་རང་བྱུང་གི་ཡེ་ཤེས་ལས་མ་གཡོས་ཀྱང་། སྣང་ཚུལ་སེམས་ཀྱི་ཆོས་ཉིད་དུ་བཞུགས་པ། ཆོས་ཉིད་དེའི་རྩལ་དང་རོལ་པ་ལས་སྣ་ཚོགས་སྣང་བའི་སེམས་ཀྱི་རྣམ་རྟོག་འདི་རྒྱ་མཚོ་རླུང་གིས་བསྒུལ་དུས་རྦ་རླབས་བྱུང་བ་བཞིན་དུ། འཁྲུལ་སྣང་ཤར་བ་རེད། ད་སྒོམ་བརྒྱབ་ནས་འཁྲུལ་བ་དེ་མ་འཁྲུལ་བའི་གཞིའི་སྟེང་དུ་ཕྱིར་ལྡོག་དགོས་དུས་དེའི་རྟེན་གཞི་རྩ་རླུང་ཐིག་ལེ་རྣམས་གནད་དུ་བསྣུན་དགོས་པས་ལུས་གྲུབ་པའི་གཞི་རྩ་རླུང་ཐིག་ལེ་རྣམས་ཡིན་ན། ལུས་ཀྱི་འདུག་སྟངས་གཙོ་ཆེ་བའི་རྒྱུ་མཚན་དེས་རེད། འདུག་སྟངས་རེ་རེའི་ཐད་ཀྱིས་མི་རྟོག་ཡེ་ཤེས་འཆར་ཚུལ་གྱི་དགོས་གནད་ཆེན་པོར་ཡོད་པ་རེད། འདུག་སྟངས་དེའི་སྟེང་དུ་ད་རེས་ཀྱི་སྐབས་མི་དམིགས་ངང་དུ་མཉམ་པར་བཞག་གསུངས་ན། མི་དམིགས་པའི་ཏིང་ངེ་འཛིན་འདི་ལ་གོམས་རིམ་བཞིན་དུ་གཡོ་ཐོབ་གོམས་བརྟན་མཐར་ཕྱིན་པའི་ཉམས་རྣམས་ཡོད་པ་ལས། གཡོ་བའི་ཉམས་རི་གཟར་གྱི་རྦབ་ཆུ་ལྟ་བུ། ཐོབ་པའི་ཉམས་ལུང་ཁུང་དོགས་མོའི་ཆུ་ལྟ་བུ། གོམས་པའི་ཉམས་དལ་འབབ་ཀྱི་ཆུ་ཆེན་ལྟ་བུ། བརྟན་པའི་ཉམས་རྒྱ་མཚོ་རླུང་གི་མི་གཡོ་བ་ལྟ་བུ། མཐར་ཕྱིན་པའི་ཉམས་རི་རྒྱལ་གཡོ་འགུལ་མེད་པ་ལྟ་བུ་སྟེ། གཙོ་བོ་ཞི་གནས་ཕྱོགས་ནས་བཞག་ཐབས་བཤད་ན་དེ་ལྔ་དང་། གཙོ་བོ་ལྷག་མཐོང་གི་ཕྱོགས་ནས་བཞག་ན་རྫོགས་ཆེན་གྱི་སྐབས་ལྟ་བུ་ཡིན་ན། ཅོག་བཞག་བཞི་དང་མི་གཡོ་གསུམ་ལྡན་གྱི་དགོངས་པའི་གནད་དང་བསྟུན་པའི་ལམ་ཚད་དྲོད་རྟགས་དང་བཅས་པ། ངོ་ཤེས་རྩལ་རྫོགས་བརྟན་པ་ཐོབ་པ་ལ་སོགས་པ་ཟབ་ཅིང་རྒྱས་པའི་ཐོག་ནས་མན་ངག་གི་དངོས་གཞིའི་སྐབས་སུ་དེ་ལྟར་དུ་གསུངས་ཡོད། ཞི་ལྷག་འདི་གཉིས་བཤད་པ་ཐ་སྙད་ཀྱི་ཚིག་གི་ཐོག་ནས་གཉིས་བྱས་ནས་བཤད་ཡོད་ཀྱང་། ཡིན་པ་མཚོན་བྱ་དོན་གྱི་དགོངས་པ་ཆོས་ཉིད་འཕོ་འགྱུར་དང་བྲལ་བའི་གནས་ལུགས་རྟོགས་པ་གཅིག་པུ་དེ་ལ། བརྡ་མི་ནོར་བའི་ཆེད་དུ་ལྡོག་པ་ཐ་དད་ནས་གསུངས་པ་ཙམ་ཞིག་རེད། དེས་ན་མི་དམིགས་པ་ལ་མཉམ་པར་འཇོག་པ་འདི་ལ་གང་ཟག་རང་རང་གི་རྟོགས་ཚད་ལྟར་མ་གཏོགས་ཐམས་ཅད་གཅིག་འདྲ་ཡིན་པ་མ་རེད། ཞི་གནས་དང་ལྷག་མཐོང་གི་ཚིག་ཙམ་མ་ཀི་ཉན་ཐོས་ཐེག་པ་ནས་ཡ་ཀི་ཐེག་རྩེའི་རྫོགས་ཆེན་བར་དུ་ཡོད་པ་ཞིག་ཡིན་ཡང་། དེ་ལ་སྒྲ་མཐུན་དོན་འཕགས་ཀྱིས་དོན་གྱི་ཐོག་ནས་གོང་མ་གོང་མ་ལ་ཁྱད་པར་དུ་འཕགས་པའི་འཕགས་ཆོས་རྣལ་འབྱོར་གྱི་བློ་ཁྱད་ཀྱིས་ཁྱད་པར་བ་རེ་ཡོད་པ་རེད། དེས་ན་ལས་དང་པོ་བ་རྣམས་ཀྱིས་འདིའི་སྐབས་ན། འདས་པའི་རྣམ་རྟོག་གི་རྗེས་སུ་མི་འབྲང་། མ་འོངས་པའི་རྣམ་རྟོག་གི་མདུན་མི་བསུ། ད་ལྟའི་རྣམ་རྟོག་གི་འཕྲོ་མི་མཐུད་ནས། དེ་ལ་ཡང་ལས་དང་ཡང་བཅོས་མི་བྱེད་པ་དང་། རྒྱུ་འབྲས་ལ་ཡིད་ཆེས་པ་དང་། བླ་མ་དཀོན་མཆོག་ལ་དད་པ། སེམས་ཅན་སྤྱི་དང་ཁྱད་པར་དུ་ངན་སོང་གི་སེམས་ཅན་ལ་སྙིང་རྗེ་སྐྱེ་བ། དད་དང་ངེས་འབྱུང་སྙིང་རྗེ་རྣམས་བསྒོམ་གྱི་ངོ་བོ་ཤར་བ་ནས་དམིགས་གཏད་ཀྱི་མཚན་མ་མེད་པའི་ཐོག་ཏུ་འཇོག་དགོས་ལ། སེམས་ཀྱི་རྣམ་རྟོག་འདི་ད་སྔོན་ནས་ད་ལྟའི་བར་དུ་བདག་རྒྱག་མ་མྱོང་བས་རྟ་རྒོད་ཚ་གཟུང་བྱེད་དུས་འདྲོག་ནི་རེད། ངན་པ་རང་ལམ་དང་། ཤོག་གུ་དྲིལ་ལམ་ཡིན་ནི་རེད། འོན་ཀྱང་ག་ལེ་ག་ལེར་བྱས་ནས་ཐབས་དང་མན་ངག་གིས་བཅོས་ནས་ལམ་དུ་གཞག་རྒྱུ་ཡོད་རེད། འདི་ལྟར་དམིགས་མེད་ཀྱི་ངང་དུ་གཞག་ན་ཡང་རྣམ་རྟོག་གི་རྦ་རླབས་འཚུབས་ནས་འདྲ་མི་འདྲ་དྲན་ཡོང་། འོན་ཀྱང་རྣམ་རྟོག་ལ་སྐྱོན་དུ་བལྟ་མི་དགོས། དྲན་རྒྱུ་གཏན་ནས་མེད་ན་ཤི་སོང་བ་རེད། རྣམ་རྟོག་ཆོས་ཉིད་ཀྱི་རྩལ་རེད། མཚོ་མིན་པའི་རྦ་རླབས་ཤིག་མེད་པ་ལྟར་ཆོས་ཅན་སེམས་ཀྱི་རྙོག་མ་དྭངས་སོང་དུས་ཆོས་ཉིད་མ་བཅོས་གཡོ་མེད་ཁོ་རང་ལས་གཞན་མེད་ལ། དེ་གཉིས་བར་དུ་ཡུལ་གཞན་ཞིག་ཡོད་པ་མ་རེད། དར་གཅིག་དམིགས་མེད་ཀྱི་ངང་དུ་མཉམ་པར་བཞག་ནས། ཡང་མཐར་འབྲེལ་བ་བཞི་ལྡན་གྱི་སྒོ་ནས་བསྡོ་བ་སྨོན་ལམ་ཞེ་ཐག་པ་ནས་བྱ་དགོས། འབྲེལ་བ་བཞི་ལྡན་ནམ་ཡིན་ན་བཤད་འདུག་པ་དེ་རེད། སེམས་ཅན་འདི་དག་ཐམས་ཅད་དམྱལ་བ་ཡི་དྭགས་ཀྱི་སྡུག་བསྔལ་དང་བྲལ་ན་ཅི་མ་རུང་། འབྲལ་བར་ཤོག བྲལ་བ་ཞིག་བདག་གིས་བྱ་སྙམ་པ་འདུན་པ་དང་འབྲེལ་བ། སྨོན་པ་དང་འབྲེལ་བ། དམ་བཅའ་དང་འབྲེལ་བ། དེའི་སྟེང་དུ་དེ་ལྟར་བྲལ་བ་དཀོན་མཆོག་གིས་ཐུགས་རྗེས་གཟིགས་སྙམ་པ་གསོལ་འདེབས་དང་འབྲེལ་བ་སྟེ་འབྲེལ་བ་བཞི་རེད། དེ་དག་ཚང་རྒྱུ་ནི་ད་རེས་མིན་ཡང་དུས་དང་རྣམ་པ་ཀུན་ཏུ་དགོས། འདི་ན་ཉི་མ་ཆ་རེར་འཚོགས་རྒྱུ་འདི་ལོ་གཅིག་གི་ནང་ལ་ཆོས་འདི་མ་གཏོགས་མི་དགོས་ཟེར་བ་མ་རེད། ཚེ་གཅིག་ལ་དུས་དང་རྣམ་པ་ཀུན་ཏུ་དེ་ལྟར་བརྩོན་པས་དགེ་སྦྱོར་གྱིས་དང་། འབྲས་བུ་ཕན་ཐོག་ཅན་ཞིག་ཁྱོད་རང་ལ་སྨིན་རྒྱུ་ཡོད་ཅེས་ཟེར་བའི་བརྡ་རེད། དེ་རིང་གི་དྲོས་ཇ་འཐུང་རྒྱུས་སང་ཉིན་གྱི་དྲོས་ཇ་འཐུང་མི་དགོས་པ་ལ་མི་ཕན་གྱི། སང་ཉིན་ཡང་དེ་ལྟར་འཐུང་དགོས། དེ་ལོས་དགོས་ལུས་འཚོ་བྱེད་རེད། དེ་བཞིན་དུ་མཐོ་རིས་དང་ཐར་པའི་སྲོག་འཛིན་བྱེད་དམ་པའི་ཆོས་རེད། ཐར་པའི་སྲོག་དེ་རྒྱུན་ཆད་འཇུག་མི་ཉན། དམ་པའི་ལྷ་ཆོས་བསྒྲུབ་རྒྱུ་མེད་ན། མི་ཚེའི་འཚོ་བའི་ནང་ན་དེའི་དྲག་མེད་པ་དེ་མེད་སོང་བ་རེད། དེ་ཡིན་པར་ཤེས་ནས་དེ་རིང་ཁ་རྩང་འཇིག་རྟེན་གྱི་བྱ་བ་བསྒྲུབ་པ་ལ་རང་རེ་ལས་བརྒྱ་འགྱུར་སྟོང་འགྱུར་གྱིས་མཁས་པའི་འཛམ་གླིང་གི་མགོ་སེར་ནག་ཅན་ཚང་མས་འདི་དོན་གཉེར་བྱས་ནས་ཨེ་ཤེས་ལྟ་བཞིན་ཡོད་རེད། ཆོས་སྒྲུབ་དུས་ཆོས་དེ་དུས་རྒྱུན་གྱི་བསམ་པ་དང་སྤྱོད་པའི་འཚོ་བ་དང་བསྲེ་ཤེས་དགོས། ཆོས་དང་རྒྱུན་གྱི་བསམ་སྤྱོད་ཁ་འབྲལ་མི་ཉན། དེ་བཤད་སྟངས་གཞན་ཞིག་གི་ཐོག་ནས་བཤད་ན། ཆོས་དང་རང་རྒྱུད་འདྲེས་དགོས། དེ་མ་འདྲེས་པར་ཆོས་དང་རང་རྒྱུད་ལ་ཕར་ནང་ཚུར་ནང་རེད་སོང་ན། ད་ཡ་ཟེར་དུས་ཆོས་ཀྱིས་ཕན་ཐོགས་མེད་པར། དཔེར་ན་ཁྱོད་ཀྱི་ལག་གི་མཚོན་ཆ་ལྷག་སོང་ན་དགྲ་དང་ཐུག་དུས་ལག་ཡུ་མ་ཡིན་པ་ལྟར། དགྲ་འདོད་ཆགས་ཞེ་སྡང་གཏི་མུག་གསུམ་གྱིས་ཁྱོད་གར་ཁྲིད་གཡག་ལུ་སྣ་མ། གར་བསྡད་བདག་པོའི་བོང་ལུ། མྱོང་རྒྱུ་འོང་རྒྱུ་གཅིག་མ་གཏོགས་མེད། གར་བྲིས་སྨྱུ་གུའི་ལམ་དང་། གར་བསྡད་བདག་པོའི་དབང་རེད། མྱོང་རྒྱུ་དར་རྒྱུ་གཅིག་མ་གཏོགས་ཡོད་པ་མ་རེད། ད་སྔར་འཁྲུལ་པ་ལྟར་ད་རུང་འཁོར་བའི་མཐའ་མཐོང་དཀའ། མི་ཚེའི་རྒྱུན་གྱི་འཚོ་བའི་ནང་ན་ཆོས་བསྒྲུབ་རྒྱུ་མེད་དུས། ཟས་ཨ་ར་སྣེ་གསུམ་ཐོད་མི་ཐུག་ཟེར་ནི་བོ་ཆུང་ཆུང་ཞིག་རེད། ཆོས་མེད་ཀྱི་མི་དང་དུད་འགྲོ་རྩྭ་ཟས་གཉིས་གཅིག་རེད། སེམས་ད་དུང་རང་རེའི་སྒོ་ཟོག་ཚོ་ལྟ་བུ་ཡིན་ན་དེ་ཚོའི་སྐྱིད་ན་མི་ཤེས། རྩྭ་ཆུ་གཉིས་ཀྱིས་བརྒྱགས་སོང་དུས། བཟེ་རེ་ཕྲག་དོག་གི་སྣང་བ་དགྲ་ལངས་སོགས་ཀྱིས་རང་སྡུག་རང་གིས་ཉོས་པ་སོགས་དེ་ཚོ་ལ་ཡོད་ས་མེད་གི། དུད་འགྲོ་གླེན་པ་དེ་དག་གིས་དེ་འདྲའི་སྣང་བ་རྣམ་རྟོག་ཤེས་ས་མ་རེད། མདོར་ན་ཆོས་ཡོད་པའི་ཁྱིམ་ཚང་སྐྱིད་ལ། ཆོས་ཤེས་པའི་ཁྱིམ་ཚང་དེ་བས་སྐྱིད། དམ་པ་ལྷ་ཆོས་འདི་སྐྱིད་ཀྱི་གོང་ནོན་ཡིན་ཏེ། འདིའི་དོན་ཡག་པོ་ཞིག་ཤེས། དེ་ལ་ལག་ལེན་ཐེབས་ན་ལས་བྱ་བའི་ཚོད་ཐིག་པ་རེད། འདོད་ཆུང་ཆོག་ཤེས་ཅན་གྱི་སྐྱིད་ཅིག་ས་སྟེང་ན་མེད། སྡུག་གི་སྐྱོ་གྲོགས་ཡིན་ཏེ། སྡུག་བསྔལ་བདེ་སྐྱིད་ལ་བསྒྱུར་ཤེས་པས་རེད། དེ་འདྲ་དེ་ལྟས་ངན་གཡང་ལ་འགྱུར། རྐྱེན་ངན་གྲོགས་ལ་འགྱུར། ཐམས་ཅད་མཐུན་པའི་རྐྱེན་ལ་འགྱུར་འགྲོ་བ་རེད། ད་རེས་འུ་ཚོས་ཉི་མ་ཆ་རེར་སྔོན་འགྲོ་འབུམ་ལྔ་གསོག་རྒྱུ་བོ་འདི་འདྲའི་དུས་ཚོད་ཐུང་ངུ་ཞིག་ལ་འབུམ་ལྔ་སོག་འགྲོ་བ་མ་རེད། འོན་ཀྱང་འབུམ་ལྔ་ཞེས་པ་ཚོགས་གསག་སྒྲིབ་སྦྱོང་གི་ཆེད་དུ་གསོག་རྒྱུ་ཡོད་པ། གསོག་ན་ཇི་ལྟར་གསོག་དགོས། གྲྭ་པས་ལྟ་ཅི་མི་སྐྱ་ཕོ་མོ་སོགས་སུ་ཡིན་ཡང་གསོག་ལོ་རབས་ཆོག་རབས་ཀྱི་གསལ་བརྡ་བསྟན་པ་ཡིན། རང་རེ་ས་ཁུག་ལུང་ཀྱོག་གི་མི་དེར་ཚིག་གཅིག་གཉིས་རེ་བཤད་པས་མི་གོ ཡིག་ངོ་ཞིག་བསྟན་ནའང་དེ་སྒྲ་དོན་ཐམས་ཅད་གོ་བརྡ་འཕྲོད་དཀའ་བས། ཨ་ནས་ཡང་དུ་ཐབས་ཚུལ་མང་པོ་ཞིག་གི་ཐོག་ནས་ཕན་རེ་ཨེ་ཐོགས་ལྟ་ཁུལ་བྱེད་རྒྱུ་བོ། ཆོས་རེ་བཤད་པ་དང་ཆོས་སྒར་རེ་གཟུང་བའི་དམིགས་ཡུལ་རེད། སངས་རྒྱས་བཅོམ་ལྡན་འདས་ཀྱི་རྗེས་འཇུག་ཅིག་ཡིན་ན་སངས་རྒྱས་ཀྱི་མཛད་པ་བསྒྲུབ་དགོས། སངས་རྒྱས་ཀྱི་མཛད་པ་སེམས་ཅན་ལ་ཕན་ཐོགས་པ་དེ་རེད། དོན་གྱི་ཕན་ཐོགས་ངོ་མ་ནི་དམ་པའི་ཆོས་ཀྱི་ཐོག་ནས་བསྒྲུབ་པ་དེ་ཡིན། དེས་ན་དམ་པའི་ཆོས་འཛིན་པ་དང་བསྟན་པས་སེམས་ཅན་ལ་ཕན་པ་བསྒྲུབ་པ་ནི། ཤཱཀྱའི་རྗེས་འཇུག་ཐམས་ཅད་ཀྱི་འོས་འགན་རེད། འོན་ཀྱང་ཤཱཀྱའི་རྗེས་འཇུག་མ་ཟད་བདག་ཅག་གི་སྟོན་པ་ཤཱཀྱ་ཐུབ་པ་རང་ཉིད་དངོས་སུ་བྱོན་ཀྱང་ཆོས་བསྟན་རྒྱུའི་ཕན་ན་མཛད་རྒྱུ་མེད་པས་སེམས་ཅན་རང་ཉིད་ལའང་ཐུག་ཡོད་པས་ཐར་པའི་ལམ་དུ་ངེས་པར་འཇུག་དགོས་ཏེ། ངས་ནི་ཁྱོད་ལ་ཐར་པའི་ཐབས་བསྟན་གྱི། །ཐར་རང་ལ་རག་ལས་བརྩོན་པར་གྱིས། །ཞེས་གསུངས་པས་སོ། །མདོར་ན་ཆོས་ཚིག་རེ་གོ་ན་དེའི་དོན་ཞེ་ལ་ཞོག གནད་སྙིང་པོ་རང་གི་སེམས་ལ་ངེས་སུ་འཇུག་དགོས། ད་བཤད་དུས་ཧ་ལམ་གོ་རྒྱུ་རེད། མི་སྐད་ཀྱིས་མི་ལ་བཤད་པ་རེད། དེའི་འཕྲོར་མི་བརྗེད་པའི་གཟུངས་དང་སྤོབས་པ་ལ་དབང་མ་འབྱོར་བས་ཚིག་མང་ཆེ་བ་མི་འགོར་བར་བརྗེད་འགྲོ། མི་བརྗེད་པའི་གཟུངས་སྤོབས་དེ་མེད་པས་སེམས་ཅན་ཕལ་པ་ཟེར། འོན་ཀྱང་གསུང་རབ་ཀྱི་དགོངས་དོན་ལེན་དུས་རྟོན་པ་བཞི་ལ་བརྟེན་ནས། ལུང་དང་རྟོགས་པའི་ཆོས་གོ་བ་དེ་ཆུད་མི་འཛའ་བར་རང་གི་རྒྱུད་ལ་དེའི་དོན་སྦྱར་དགོས་རྒྱུ་ནི། ཚིག་ལ་མི་རྟོན་དོན་ལ་རྟོན། རྣམ་ཤེས་ལ་མི་རྟོན་ཡེ་ཤེས་ལ་རྟོན་པ་ལ་སོགས་ཡིན་དུས། དེའི་དོན་གྱི་སྙིང་པོ་གནད་ངོ་མ་དེ་ཨེ་ཟིན་བལྟ་དགོས། མདོར་ན་ཆོས་ཚིག་རེ་གོ་ན་དོན་ངོ་མ་བོ་ཅི་བཤད་ཀྱིན་ཡོད་པ་དེ་ཤེས་པར་གྱིས་ལ། ཡི་གེ་ཤེས་པ་རྣམས་ཀྱིས་ཁྲིད་ཡིག་ལ་ཞིབ་ལྟ་གྱིས། ཚར་མང་པོ་ལྟོས། ཆོས་ཁྲིད་ཞུ་དུས་མ་མཐའང་བསྐྱར་སྦྱོང་ཚར་བཅུ་རེ་དགོས་དར་ནི་རེད། མཁས་པའི་གསུང་དང་དམ་པའི་མན་ངག་ལ་ཚར་མང་པོར་བལྟས་ན་དེ་ལྟར་དུ་གོ་རྒྱུ་ཡོད་ཅིང་དེའི་ཚོད་ཀྱིས་བྱིན་རླབས་ཀྱང་འཇུག་པ་རེད། ཡི་གེ་མི་ཤེས་པ་ཚོས་ཤེས་པ་རྣམས་ལ་འདོན་བཅུག་ནས་ཉོན། ནང་ཕན་ཚུན་འདིའི་ཐད་ལ་བགྲོ་གླེང་གྱིས། སྐད་ཆ་ཆོས་ཕྱོགས་སུ་གྱིས་དང་རང་གཞན་ཚང་མ་ལ་ཕན་ཐོགས་ཡོད། དེ་རིང་གནམ་ངོ་ཡག་ན་ཡག མ་ཡག་ན་མ་ཡག ཉི་མ་དྲོ་ན་དྲོ། མ་དྲོ་ན་མ་དྲོ། ཆགས་སྡང་དགའ་སྡུག་གི་སྐད་ཆ་ཁོ་ན་མ་བཤད་མ་གཏོགས། རང་གི་རྣམ་ཤེས་སྟེང་ལ་བག་ཆགས་ངན་པ་འཇོག་བྱེད་རེད། ཉོན་མོངས་དུག་ལྔས་འགྲུབ་རྒྱུ་ཞིག་ཡོད་ན་ཁམས་གསུམ་སེམས་ཅན་ཐམས་ཅད་ཀྱིས་སྔ་ནས་འགྲུབ་ཚར་ཤག་ཤག་རེད། དེ་འགྲུབ་རྒྱུ་མེད་པས་དེས་དམུས་ནས། རང་རེས་དེ་མིན་པའི་ལམ་ཞིག་བཙལ་ཏེ་ཞུགས་ན། ད་རུང་ཁ་ཤར་ལ་འཁོར་ནས་འགྲོ་ས་ནུབ་ཏུ་བྱེད་ན། རང་ལམ་རང་གིས་བཀག་པ་འདྲ་རེད་ཞིག་འགྲོ། འགའ་རེས་ཀུན་བཟང་བླ་མའི་ཞལ་ལུང་ཚར་འགའ་རེ་བལྟས་ཡོད་ཚོད་ཡིན། དེ་དང་ཁྲིད་ཡིག་འདི་ཚོ་དང་ཀུན་ལ་ལྟོས། འདིའི་དོན་ཆུ་ཚོད་རེ་གཉིས་ལ་བསྒོམ་རྒྱུ་འདི་ནི་ཕྱིན་ཆད་རང་གིས་ནམ་ཡིན་ན་འདི་འདྲ་བསྒོམ་ཟེར་བརྡ་རེད། ཆོས་བསྒྲུབས་ཡོད་བསམ་ནའང་ལས་འབྲས་ལ་འཛེམ་མི་ཤེས། སྒོམ་རྒྱག་ཡོད་བསམ་ནའང་སྙིང་རྗེ་སོར་གང་ཡང་ཇེ་ཆེར་མ་སོང་བ་ཚོས། སྟོང་ཉིད་སྙིང་རྗེའི་སྙིང་པོ་ཡིན་པས། སྙིང་རྗེ་ནར་མ་འཕར་དུས་སྟོང་ཉིད་རྟོགས་མེད་པ་དང་། འདི་སྒོམ་རྒྱུས་ད་དུང་འདངས་མེད་པའི་རྟགས་རེད། ད་ལོ་འདི་བཤད་རྒྱུ་ནི་རང་གཞན་ཚང་མའི་སྨན་ཞིག་ཡིན་པ་དང་། འདིའི་སྨན་འདི་དུས་ཐོག་ཏུ་འཕྲོད་དགོས་བསམ་ནས་བཤད་པ་ཡིན། དངོས་གཞི་གནད་ཆེ་ཡང་། སྔོན་འགྲོའི་རྨང་གཞི་མེད་ན་གྱང་མེད་པའི་རི་མོ། ཁྱད་གཞི་མེད་པའི་ཁྱད་ཆོས་གཏོད་ས་རུ་འགྲོ་བས། དེ་མི་འགྱུར་བའི་ཕྱིར་དུ་འདི་གལ་ཆེར་ནན་བཤད་བྱེད་པ་ཡིན། སྔོན་འགྲོའི་ཁྲིད་ཡིག་འདི་རྣམས་ཡུན་དུ་ལྟོས། རྒྱུན་དུ་རང་གི་སེམས་ལ་སྦྱོར་དང་། རང་ལ་ཡོང་སྒོ་ཐུན་མོང་མ་ཡིན་པ་ཞིག་རང་གི་སེམས་ལ་འོང་རྒྱུ་ཡོད། སེམས་བདེ་ན་ལུས་བདེ། ལུས་བདེ་ན་རང་དང་ཁོར་ཡུག་གི་མི་རྣམས་ཀྱང་སྐྱིད་པ་རེད། ཆོས་པ་ཚེ་འདིར་སྐྱིད་ལ་ཕྱི་མ་དེ་བས་སྐྱིད། མདོར་ན་སྐྱིད་པའི་ལམ་གྱི་སྣེར་ཅི་ཟིན་གྱིས་ཟེར་རྒྱུ་བོ་བསམ་བཟང་གི་ཁ་ཏ། ཆོས་བཤད་པའི་སྙིང་པོ་དེ་ཡིན། དེ་རིང་ཆོས་མཚམས་ང་རང་ཚོས་འཕྲོ་གནས་ཀྱི་མཁན་པོ་ལ་བརྟག་གོ་གསུངས་ས་འདི་ནས་འཇོག

ཉིན་དྲུག་པའི་ཆོས་ཁྲིད།

ནམ་མཁའི་མཐའ་དང་མཉམ་པའི་སེམས་ཅན། སྡུག་བསྔལ་རྣམ་པ་གསུམ་གྱིས་དུས་རྟག་ཏུ་མནར་བ་འདི་དག་ཐམས་ཅད། གཏན་བདེ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་དགོད་པར་བགྱི། དེའི་ཆེད་དུ་དམ་པའི་ཆོས་ཟབ་མོ་ཉན་ཞིང་དེའི་དོན་ཉམས་སུ་བླང་བར་བྱ་བསམ་པའི་ཀུན་སློང་གི་སྒོ་ནས་ཆོས་ཉན་དགོས་པ་ནི། ཐེག་ཆེན་མདོ་སྔགས་ཀྱི་ཆོས་གང་བཤད་པའི་འགོར། ཆོས་བཤད་པའི་ཚུགས་ཀ་སྟོན་མཁན་ཡོད་ཚད་ཀྱིས་རྒྱུན་འདོན་ཁ་ལ་བྱང་སོང་བ་ཞིག་ཡིན་ན། ཁ་དང་དོན་མཚུངས་པར་བཤད་པ་ལག་ལེན་ལ་སྦྱོར་བ་དེ། ཆོས་ཉན་བཤད་སྒོམ་གསུམ་གང་གི་སྐབས་ཡིན་ན་གནད་ཆེན་དོན་དང་ལྡན་པ་ཞིག་ཡིན་གྱི། ཁ་བཤད་དོན་ལ་མ་གནས་པར་བཤད་ཡམ་ཚིག་གི་ལོ་མ་ཞིག་གིས་ཆོས་འཆད་ཉན་གྱི་གཟུགས་བརྙན་ཙམ་ལ་འགྲོ་གྲབ་རེད། དེས་ན་གཞན་སེམས་ཅན་གྱི་སྡུག་བསྔལ་མྱོང་བ་དེ་དང་པོ་རང་རྒྱུད་ལ་སྦྱར་ཏེ་བསམ་རྒྱུ་འདི་གལ་ཆེ། རགས་པའི་སྡུག་བསྔལ་ངན་སོང་གི་སྡུག་བསྔལ་དང་། ཕྲ་བའི་སྡུག་བསྔལ་ཁམས་གསུམ་འཁོར་བ་ན་རྒྱུ་བའི་སེམས་ཅན་ཐམས་ཅད་ལས་དང་ཉོན་མོངས་པའི་གཞན་དབང་དུ་སོང་བའི་འདུ་བྱེད་ཀྱི་སྡུག་བསྔལ་ལ་བསམ་སྟེ། འཁོར་བའི་སྡུག་བསྔལ་གྱིས་ཡིད་འབྱུང་མྱོང་བ་ཁྱད་པར་ཅན་ཞིག་རང་ཉིད་ལ་སྐྱེ་དགོས། དེ་སྐྱེ་བར་བྱེད་པ་ལ་ཐོག་མ་རང་ཉིད་ཀྱི་ཉེ་དུ་མཛའ་བཤེས་ནས་མགོ་བཟུང་སྟེ། དགྲ་གཉེན་གང་ཡང་མ་ཡིན་པའི་བར་མ་ནས་རིམ་གྱིས་དགྲའི་བར་དུ་ཚང་མ་སྙོམས་པར་བསྒོམ་དགོས། བསམ་བློ་ཞིབ་པར་གཏོང་ན། རྒྱུ་མེད་ཀྱི་དངོས་པོ་ཞིག་མི་སྲིད་པས། དཔེར་ན་མེ་མེད་པའི་དུ་བ་མི་སྲིད་པ་བཞིན་དུ། དངོས་པོ་གང་དང་གང་ཞིག་ཡིན་ཡང་རང་རང་གི་མཐུན་པའི་རྒྱུ་ལས་བྱུང་བ་ཞིག་ཡིན་ལ། དེས་ན་རང་རེའི་ཟག་བཅས་ཉེར་ལེན་གྱི་ཕུང་པོ་འདི་གང་ལས་བྱུང་ན། འདི་ཚེ་རབས་སྔ་མའི་སྐབས་ཀྱི་རང་གི་རིགས་འདྲ་སྔ་མ་དང་ལས་དང་ཉོན་མོངས་ལས་བྱུང་བ་ཡིན་པས། སྐྱེ་བ་ཚེ་རབས་རེ་ལ་དེའི་སྔ་མ་རེ་ཡོད། དེའི་ཡང་སྔ་སོགས་ཡར་དེད་ནས་དཔྱད་པ་ཞིག་བྱེད་ན། སྐྱེ་ཤི་ཁ་བརྒྱུད་པའི་འཁོར་བ་འདི་ལ་ཐོག་མའི་ཡ་མཐའ་ཞིག་འཇོག་རྒྱུ་མི་ལོན། དེས་ན་དེའི་སྐྱེ་བ་རེ་རེ་ལ་ཕ་མ་རེ་རེ་ཕལ་ཆེར་ལོས་ཡོད། དེ་དང་མཚུངས་པའི་དེའི་སྤུན་ཟླ་མཛའ་བཤེས་ལ་སོགས་པའི་ཡར་མཐའ་འདིའི་མཚམས་ནས་མེད་པར་རེད་ཅེས་པ་ཞིག་རྙེད་རྒྱུ་མེད་དེ། ཐོག་མེད་ཀྱི་དུས་ནས་མ་བུའི་བརྩེ་སེམས་གོམས་པའི་སྟོབས་ཀྱིས། དཔེར་ན་ཁར་བྱང་བའི་འདོན་པ་དེ་ཡི་གེ་ལ་ཡང་ལྟ་མི་དགོས་པར་འདོན་ཤེས་པ་བཞིན་དུ། འཇིག་རྟེན་བླུན་པོའི་མཐར་ཐུག་པའི་ཕྱུགས་ཟོག་སོགས་རེད་དེ། རང་གི་བུ་ལ་བརྩེ་སེམས་དང་བྱམས་པས་གསོ་སྐྱོང་སོགས་སུས་ཀྱང་སློབ་མི་དགོས་པར་རང་ཤུགས་ཀྱིས་ཤེས་པའི་ཕྱིར། དེས་ན། སྐྱེས་རབས་ལས། བློ་ཡི་མཐུ་སྟོབས་ནུས་པ་མེད་པ་དང་། །དབང་པོ་རྣམས་ཀྱང་བླུན་པོའི་རང་བཞིན་ཅན། །བྱུང་མ་ཐག་ཏུ་སུས་ཀྱང་མ་བསླབ་པར། །ཁ་ཟས་གཞན་ལ་བཙལ་བར་བྱེད་པ་འདིས། །སྐྱེ་བ་གཞན་ལ་གོམས་པ་བྱས་པར་གྲུབ། །ཅེས་གསུངས་པ་ལྟར། དེ་ལྟ་བུའི་སྐྱེ་བ་དཔག་མེད་བགྲང་དུ་མེད་པ་ལ་ཕ་མར་བྱེད་པ་ནི། ཚེ་འདིའི་ཕ་མ་འདི་རྣམས་ཀྱིས་རྐྱང་པས་བྱེད་འདུག་པ་ཞིག་མ་རེད། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་རེ་རེ་བཞིན་དུ་འཁོར་བའི་འཁོར་ལོ་འདི་འཁོར་མཚམས་མེད་པར་བསྐོར་འདུག་པ་ལྟར། ཕ་མ་བུ་རྒྱུད་རེས་བསྐོར་ནས་འཁོར་གྱིན་ཡོད་པ་རེད། དེ་ཡོད་པ་རྒྱལ་བའི་ལུང་གིས་མདོ་སྡེ་དཀོན་མཆོག་སྤྲིན་དང་། དྲག་ཤུལ་ཅན་གྱིས་ཞུས་མདོ་སོགས་ལས་ཞིབ་པར་གསུངས་ཡོད། རིགས་པས་བརྟགས་ཤིང་དཔྱད་ནའང་། ཕ་མར་གྱུར་པ་རྩི་ཚོད་མེད་པར་ལྟར་དགྲ་གཉེན་བར་མར་གྱུར་པའང་དེ་ལྟར་མང་པོ་ཡིན་ལ། དེའང་སྔོན་གྱི་ལས་བསགས་སྟོབས་ཀྱི་ཁྱད་པར་གྱིས་དེ་ལྟར་འདྲ་མི་འདྲར་རེད་འགྲོ་བ་རེད། རང་རེའི་ད་ལྟའི་སྐབས་ཀྱི་སྣང་ཚུལ་ངོ་མར་ཆ་བཞག་སྟེ། སེམས་ཅན་གཅིག་ལ་མཚོན་ན། སྐབས་རེར་ཆགས་པའི་དབང་གིས་གཉེན་བྱེད་པ་དང་། སྐབས་རེར་ཞེ་སྡང་གིས་དགྲ་རེད་འགྲོ་བའང་ཡོད་པ་རེད། ལས་སྣ་ཚོགས་དེ་ལོ་དང་ཟླ་བ་རེ་རེའི་ནང་དུ་གོ་རིམ་མ་ངེས་པར་གསོག་རྒྱུ་འདི་མྱོང་བས་གྲུབ་པ་ལ་བསམ་ན། དེ་དང་མཐུན་པའི་འབྲས་བུ་སེམས་ཅན་གཅིག་ལ་མཚོན་ན་སྐབས་རེར་དགྲ། སྐབས་རེར་གཉེན། སྐབས་རེར་བར་མ་ལ་སོགས་བྱས་པ་གྲངས་ཀྱིས་མི་ཆོད། བརྟགས་ཤིང་དཔྱད་ན་དེ་འདྲ་རེད། འོན་ཀྱང་གཉེན་ཐམས་ཅད་ཀྱི་ནང་ན་སྙིང་བརྩེ་བའི་མཐར་ཐུག་པ་དེ་མ་རྒན་ཡིན་པའི་གནད་ཀྱིས། གཙོ་བོ་མར་ཤེས་པ་འདིའི་ཐོག་ནས་སེམས་ཅན་ཐམས་ཅད་ལ་ཡིད་འོང་བསྒྲུབ་རྒྱུ་འདི་ཤིང་རྟ་ཆེན་པོ་རྣམས་ཀྱི་ལུགས་སྲོལ་རེད། རང་རེས་ཆོས་ནམ་བཤད་ལ་མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཟེར་དགོས་པ་དང་། མན་ངག་རྒྱུ་འབྲས་བདུན་ལྡན་གྱི་ཐོག་ནས་བཤད་དུས། མར་ཤེས་པ་དང་པོར་འཇོག་དགོས་ན། ཚད་མེད་པ་བཞི་བཤད་དུས་བཏང་སྙོམས་ཚད་མེད་མགོར་བཞག་སྟེ་རྩ་བའི་མ་ནས་བཟུང་སྟེ་བསྒོམ་དགོས་པ་རེད། ད་རང་རེས་བཤད་རྒྱུའི་ནང་དོན་ངོ་མ་ཅི་ཟེར་གྱིན་ཡོད་བསམ་ན། ཁ་ཡིས་མ་རྒན་སེམས་ཅན་ཐམས་ཅད་ཟེར་བ་ཙམ་གྱིས་མི་ཆོག་པར། དང་པོ་སེམས་ཅན་གྱི་སྡུག་བསྔལ་རང་ཐོག་ལ་བླངས་ནས་ཡིད་འབྱུང་ངེས་བྱས། དེ་ནས་དེ་མྱོང་བའི་སེམས་ཅན་ཐམས་ཅད་རང་ཉིད་ཀྱི་མར་ཡིན་ལུགས་དེ་ལུང་དང་རིགས་པ་གཉིས་ཀྱིས་གཞན་གྱིས་ཁ་ལ་ཉན་པ་ཙམ་མ་ཡིན་པར་རང་ཉིད་ཀྱིས་ཤེས་པ་ན། སྙིང་རྗེས་གཞན་དོན་ལ་དམིགས་པའི་བསམ་པ་དེ་འབྱུང་བ་རེད། འོན་ཀྱང་དེ་རྐྱང་པས་མི་ཕན་པར་ཤེས་རབ་ཀྱིས་རྫོགས་བྱང་བསྒྲུབ་ལུགས་དེ་མ་ཤེས་ན་མ་ལག་རྡུམ་མའི་བུ་ཆུས་འཁྱེར་བ་བཞིན་ཡིན། མ་ལག་རྡུམ་ཞིག་གི་བུ་ཆུས་འཁྱེར་སོང་ན་བུ་ལ་སྙིང་རྗེ་ཡོད་ཀྱང་སྐྱོབ་པའི་ནུས་པ་མེད། དེ་བས་ཕ་དཔའ་བོ་ཞིག་གི་བུ་གཡུལ་ས་ན་ལྷག་ཡོད་ན་རང་གར་མི་འཇོག་པ་ལྟར་དགོས། ཁ་སང་རང་རེས་གཞི་བདེ་གཤེགས་སྙིང་པོ་ཡོད་པས་སོ་སོས་འབད་ན་སངས་རྒྱས་རྒྱུ་ཡོད་ཚུལ་བཤད་ནས། དེ་རིང་རྟེན་མི་ལུས་རིན་ཆེན་གྱི་སྐོར་ལ་འདང་ཞིག་རྒྱག་ན། སེམས་ཅན་ཐམས་ཅད་སངས་རྒྱས་ཀྱི་སྙིང་པོ་ཅན་ཡིན། འབད་ན་ཐམས་ཅད་ཀྱིས་སངས་རྒྱས་འཐོབ་ན། འོ་ན་དམྱལ་བ་ཡི་དྭགས་ལ་སོགས་འགྲོ་བ་གཞན་ལྔ་པོའི་རྟེན་ལ་སངས་རྒྱས་སྒྲུབ་ནུས་པ་ཨེ་རེད་ཟེར་ན། དེ་ནུས་པ་མ་རེད། མི་ལུས་དལ་འབྱོར་གཉིས་ལྡན་དང་། སེམས་དད་པ་དང་མ་བྲལ་བ་གསུམ་ནི་སངས་རྒྱས་སྒྲུབ་པའི་རྟེན་གྱི་གང་ཟག་ལ་བཟང་ནི་རེད། དལ་བ་བརྒྱད་ནི་མི་ཁོམ་པ་བརྒྱད་དང་བྲལ་བ། མདོ་དྲན་པ་ཉེར་བཞག་ལས། དམྱལ་བ་ཡི་དྭགས་དུད་འགྲོ་དང་། །ཀླ་ཀློ་ཚེ་རིང་ལྷ་དང་ནི། །ལོག་ལྟ་སངས་རྒྱས་ཀྱིས་སྟོང་པ། །ལྐུག་པ་འདི་དག་མི་ཁོམ་བརྒྱད། །ཅེས་གསུངས་པ་ལྟར། དམྱལ་བ་དང་ཡི་དྭགས་ལ་སོགས་འགྲོ་བ་རིགས་བཞི་ལ་དལ་བ་མེད་པ་དང་། མིའི་མི་ཁོམ་པ་བཞི་ལ་ཆོས་སྒྲུབ་པའི་མཐུན་རྐྱེན་མི་ཚང་བའི་ཕྱིར་ན་དེ་བརྒྱད་དང་བྲལ་བའི་དལ་བ་བརྒྱད། དེའི་སྟེང་ན་རང་འབྱོར་ལྔ་དང་གཞན་འབྱོར་ལྔ་སྟེ་འབྱོར་པ་བཅུ་སྟེ་དལ་འབྱོར་ཚང་བའི་ལུས་རྟེན་ཐོབ་ཡོད་ན། སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབ་ན། །ཕྱིས་ནས་ཡང་དག་འབྱོར་པ་ག་ལ་འགྱུར། །ཞེས་གསུངས་པ་ལྟར། དལ་འབྱོར་ལུས་རྟེན་ལ་མངོན་མཐོ་དང་ངེས་ལེགས་སྒྲུབ་པའི་མཐུ་སྟོབས་ནུས་པ་ཡོད་པས་ན་སྐྱེས་བུ་ཞེས་བྱ་ལ། འོན་ཀྱང་སྐྱེས་བུའི་ནུས་པ་དེ་ཡང་ཐམས་ཅད་གཅིག་འདྲ་འབའ་ཞིག་མིན། ནུས་པ་ཆེ་ཆུང་རབ་འབྲིང་ཐ་གསུམ་ཡོད་པས། སྐྱེས་བུ་རབ་འབྲིང་ཐ་གསུམ་ཞེས་བཏགས་པ་རེད། བྱང་ཆུབ་ལམ་སྒྲོན་ལས། ཆུང་ངུ་འབྲིང་དང་མཆོག་གྱུར་པས། །སྐྱེས་བུ་གསུམ་དུ་ཤེས་པར་བྱ། །ཞེས་དང་། རྒྱལ་སྲས་ཞི་བ་ལྷས། སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །ཞེས་གསུངས་ན། རྒྱུ་འབྲས་ཡིད་ཆེས་ཀྱི་དད་པ་ཡོད་ནས་དམ་པའི་ཆོས་ལམ་ལ་ཞུགས་པའི་སྐྱེས་བུ་ཞིག་ལ། དོན་ཅི་ཞིག་བསྒྲུབ་པའི་ནུས་པ་ཡོད་ན། སྐྱེས་བུ་ཆུང་ངུ་ཞིག་ལ་རང་ཉིད་ངན་སོང་དུ་མི་ལྷུང་བར་ལྷ་མིའི་གོ་འཕང་ཐོབ་པར་བྱེད་པའི་ནུས་པ་ཡོད་པ་དང་། སྐྱེས་བུ་འབྲིང་ཞིག་ཡིན་ན་རང་ཉིད་འཁོར་བ་ལས་གྲོལ་ནས་ཞི་བདེའི་གོ་འཕང་ཐོབ་པར་བྱེད་པའི་ནུས་པ་ཡོད། སྐྱེས་བུ་ཆེན་པོ་ཞིག་ཡིན་ན་སེམས་ཅན་ཀྱི་དོན་དུ་སངས་རྒྱས་ཐོབ་པར་བྱེད་པའི་ནུས་པ་དེ་ཚང་མ་ཡོད་པ་རེད། དེས་ན་སློབ་དཔོན་ཙནྡྲ་གོ་མིས། སེམས་ཀྱི་སྟོབས་ཆེན་མི་ཡིས་རྙེད་པ་གང་ཡིན་པའི། །ལམ་དེ་ལྷ་དང་ཀླུ་ཡིས་མི་རྙེད་ལྷ་མིན་དང་། །མཁའ་ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །ཞེས་གསུངས་པ་ལྟར། ལྷ་ཀླུ་ལ་སོགས་འགྲོ་བ་གཞན་ལས་ཁྱད་པར་འཕགས་པའི་འཕགས་ཆོས་ཅི་ཡོད་ཟེར་ན། དལ་འབྱོར་གྱི་མི་ལུས་འདིས་མི་དགེ་བ་སྤོང་ཐུབ་པ་དང་། དགེ་བ་སྒྲུབ་ཆོག་པ། འཁོར་བའི་རྒྱ་མཚོ་ལས་བརྒལ་ནུས་པ་དང་། བྱང་ཆུབ་ཀྱི་ལམ་ལ་བགྲོད་ནུས་པ། རྫོགས་པའི་སངས་རྒྱས་ཐོབ་ནུས་པ་དེ་འདྲ་ཡོད་པ་རེད། དེས་ན་དལ་བའི་རྟེན་བཟང་འདི་ཉིད་ཡིད་བཞིན་གྱི་ནོར་བུ་རིན་པོ་ཆེ་ལས་ལྷག་པར་གྱུར་པ་ཡིན་ཞེས་གསུངས་ཡོད། སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་ནས་ཡང་དག་འབྱོར་པ་ག་ལ་འགྱུར། །ཞེས་གསུངས་ཡོད་ན། དལ་འབྱོར་གྱི་ལུས་རྟེན་རྙེད་དཀའ། རྙེད་ན་དོན་ཆེ་བ་ཡིན། འོན་ཀྱང་འདི་འཇིག་པ་སླ་བ་ཡིན་ཏེ། སྐྱེས་བུའི་ཚེ་སྲོག་འདི་མར་ཟད་ན་མ་གཏོགས། ཡར་ཁ་སྣོན་བྱེད་མཁན་ཡོད་པ་མ་རེད་ལ། འཆི་རྐྱེན་མང་། འཚོ་བའི་རྐྱེན་ཉུང་། འཚོ་རྐྱེན་ཡོད་པ་དེའང་འཆི་རྐྱེན་དུ་འགྱུར་བ་མང་བས་ན། སྤྱོད་འཇུག་ལས། དེ་རིང་ཁོ་ན་མི་འཆི་ཞེས། །བདེ་བར་འདུག་པ་རིགས་མ་ཡིན། །ཞེས་གསུངས་པ་རེད། བརྒྱ་ལམ་རེས་འགའ་ན་སྟབས་ལེགས་སྟེས་དབང་གིས་རྙེད་པའི་མིའི་ལུས་ཤིག་རྙེད་ཚེ། རང་གཞན་ལ་ཕན་པ་ཡོད་པའི་བྱ་བ་ཞིག་སྒྲུབ་མ་ནུས་ན། ཕྱིན་ཆད་ནམ་ཡིན་ན་རྙེད་དཀའ་བ་རེད། རྒྱུ་མེད་པའི་འབྲས་བུ་ཨེ་འབྱུང་བསམ་པ་ནི་རེ་སྟོང་རེད། དེས་ན། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱིས་ནས་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་ལུས་འདི་ལ་གྲུ་ཡི་འདུ་ཤེས་བཞག་ནས། འཁོར་བའི་རྒྱ་མཚོའི་ཕ་རོལ་ན་ཐར་ཐབས་བྱེད་དགོས། ལུས་འདི་ལ་འོག་རྟའི་འདུ་ཤེས་བཞག་ནས་འཁོར་བའི་སྡུག་བསྔལ་གྱི་འཕྲང་ལས་ཅི་ཐར་བྱེད་དགོས། ལུས་འདི་ལ་གཡོག་པའི་འདུ་ཤེས་བཞག་ནས་དགེ་བའི་ལས་ལ་བཀོལ་དགོས། དེ་མ་ཤེས་ན་རྨོངས་པའི་གདོན་གྱིས་ཟིན་ནས། ད་ཡིན་ཟེར་དུས་གཉིད་དུ་ཤོར་ནས་དུས་སྐབས་བཟང་པོ་ཆུད་ཟོས་སུ་ཤོར་བའི་ཉེན་ཁ་འདི་ན་ཡོད་ཅེས་གསུངས་པ་རེད། དེས་ན་དལ་རྟེན་གྱི་ལུས་འདི་བེད་སྤྱོད་ནས་ཐར་པའི་ས་ལ་བགྲོད་དགོས་ན། ལམ་གང་ནས་བརྒྱུད། སྤྱིར་དགེ་བའི་ལས་ལམ། ཁྱད་པར་དུ་དམ་ཆོས་བྱང་ཆུབ་བསྒྲུབ་པའི་འགོ་གང་ནས་བཟུང་དགོས་ཤེ་ན། འགོ་དང་པོ་དད་པ་ཡོད་དགོས། དད་པ་མེད་ན་དཀར་པོའི་ཆོས་ཤིག་རྒྱུད་ལ་སྐྱེ་རྒྱུ་མེད་དེ། འཕགས་པ་ཆོས་བཅུ་པའི་མདོ་ལས། དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་འབྱུང་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས་པའི་ཕྱིར་དང་། རྒྱུད་བླ་མ་ལས། རང་བྱུང་ཉིད་ཀྱི་དོན་དམ་ནི། །དད་པ་ཉིད་ཀྱིས་རྟོགས་བྱ་བ། །ཞེས་གསུངས་པ་ལྟར། དད་པ་མེད་ན་ཡོན་ཏན་གཞན་ཅི་འདྲ་མང་ཡང་མི་ཕན་ཏེ། དཔེར་ན་གཟུགས་མཛེས་ཀྱང་མིག་མེད་པ་དང་འདྲ་བ་ཡིན། དེས་ན་དད་པ་ཞེས་པ་ཅི་འདྲ་ཞིག་ཡིན་ན། དད་པ་ལ་ངོ་བོའི་སྒོ་ནས་དབྱེ་ན། དང་འདོད་ཡིད་ཆེས་ཀྱི་དད་པ་དང་གསུམ་ཡོད། དེ་ལ་དང་བའི་དད་པ་ནི། ཡུལ་དཀོན་མཆོག་གསུམ་ལ་བརྟེན་ནས་སྐྱེ་དགོས་པ་ཞིག་སྟེ། ལམ་སྟོན་པའི་སངས་རྒྱས་དཀོན་མཆོག ལམ་དུ་གྱུར་པ་ཆོས་དཀོན་མཆོག ལམ་སྒྲུབ་པའི་གྲོགས་དགེ་འདུན་དཀོན་མཆོག་རྣམས་ལ་མོས་ཤིང་གུས་ནས་སེམས་དང་བར་བྱ་བ་ལ་དང་བའི་དད་པ་ཞེས་བྱ། འདོད་པའི་དད་པ་ཞེས་པ་བླ་ན་མེད་པའི་བྱང་ཆུབ་དེ་ཉིད་ཡོན་ཏན་ཁྱད་པར་ཅན་དུ་རིག་ནས་དེ་ཐོབ་པའི་ཆེད་དུ་གུས་པ་དང་ལྡན་པས་ལམ་ལ་སློབ་འདོད་པ་ལྟ་བུ་རེད། ཡིད་ཆེས་པའི་དད་པ་ནི། ལས་དང་ལས་ཀྱི་འབྲས་བུ་ལ་མི་བསླུ་བར་ཡིད་ཆེས་པའི་ཐོག་ཏུ། གཞི་ལམ་འབྲས་བུའི་ཆོས་ལ་ཐེ་ཚོམ་མེད་པར་ཡིད་ཆེས་བརྟན་པོ་ཡོད་པ་ཞིག་རེད། རིན་ཆེན་ཕྲེང་བ་ལས། འདུན་དང་ཞེ་སྡང་འཇིགས་པ་དང་། །རྨོངས་པས་གང་ཞིག་ཆོས་མི་འདའ། །དེ་ནི་དད་པ་ཅན་ཞེས་བྱ། །ངེས་པར་ལེགས་པའི་སྣོད་མཆོག་ཡིན། །ཞེས་གསུངས་པ་ལྟར། དེ་ལྟ་བུའི་དད་པ་ཞེ་གཏིང་ནས་ཡོད་ན། འདུན་པས་ཆོས་ལས་མི་འདའ་སྟེ། དེ་ལྟ་བུའི་གང་ཟག་དད་པ་ཅན་དེ་ལ་རྒྱུ་ནོར་རྫས་དང་རྒྱལ་སྲིད་སོགས་བྱིན་ནས་ཆོས་ལ་དད་པ་མ་བྱེད་ཟེར་ནའང་འདུན་པ་བསྒྱུར་མི་ཐུབ་པ་དང་། ཞེ་སྡང་གིས་ཆོས་ལས་མི་འདའ་བ་ཡིན་སྟེ། ཇི་ལྟར་ཞེ་ན། འགའ་ཞིག་གིས་ད་སྔོན་གནོད་པ་མང་པོ་བྱས་ཤིང་ད་དུང་ཡང་གནོད་པ་ཆེན་པོ་བསྐྱལ་རྒྱུའི་གྲ་སྒྲིག་བྱེད་ནའང་ཆོས་མི་གཏོང་། གཞན་ཅི་ལ་ཐུག་ཀྱང་ཆོས་མི་གཏོང་བ་དང་། འཇིགས་པས་ཆོས་ལས་མི་འདའ་བ་ནི། དཔེར་ན་འགའ་ཞིག་གིས་ཁྱོད་ཀྱིས་ཆོས་མ་གཏོང་ན། གསོད་རྡུང་བྱེད་པ་ཡིན་ཟེར་ནས་ཅི་འདྲའི་སྡུག་གཏད། ཅི་འདྲའི་སྡིགས་མོ་བྱེད། ཉིན་རེ་བཞིན་ཁྱེད་ཀྱི་ལུས་ཐོག་ན་ཤ་་ལིང་མ་རེ་གཅོད་རྒྱུ་ཡིན་ཟེར་ནའང་ཆོས་ལས་མི་འདའ་ཞིང་ཆོས་མི་གཏོང་། རྨོངས་པས་ཆོས་ལས་མི་འདའ་བ་ནི། འགའ་ཞིག་ཁོ་རང་རྨོངས་པ་ཡིན་པའི་དབང་གིས་རྒྱུ་བདེན་པ་མ་རེད་འབྲས་བུ་མི་བདེན། དཀོན་མཆོག་བདེན་པ་མ་རེད། ཆོས་བྱ་རྒྱུ་དཀའ་ལས་རེད། རྨོངས་དད་རེད། བསྐྱུར་ཞོག་ཟེར་ནའང་མི་ལྡོག་པས་ཆོས་ལས་མི་འདའ། དེ་འདྲ་བ་ཞིག་རེད་ན་དེ་ལ་ཡིད་ཆེས་པའི་དད་པ་ཅན་ཞེས་ཟེར་ཆོག དེ་ལྟ་བུའི་དད་པ་ཅན་དེ་ངེས་ལེགས་ཐར་པའི་གོ་འཕང་སྒྲུབ་པའི་སྣོད་མཆོག་ཏུ་གྱུར་པ་ཡིན་ཚུལ་དེ་ལྟར་ཡིན། ད་དུང་དད་པ་ཡོད་ན་ཕན་ཐོགས་གཞན་ཡོད་པའི་དཔེ་ཅི་ལྟར་ཡིན་ན། དད་པ་ཞིང་ས་གཤིན་པོ་དང་འདྲ་ཞེས་གསུངས་ཏེ། བྱང་ཆུབ་ཀྱི་མྱུ་གུ་དེ་དེའི་ཞིང་ནས་འཁྲུངས། དད་པ་རྒྱ་མཚོའི་གཟིངས་དང་འདྲ་སྟེ། འཁོར་བའི་རྒྱ་མཚོའི་ཕ་རོལ་ཏུ་འགྲོ་བ་དད་པའི་གཟིངས་ལ་བརྟེན་ནས་འགྲོ་དགོས། དད་པ་དགྲ་ཇག་རྒོད་པོ་ཡོད་སའི་སྐྱེལ་མ་བཟང་པོ་དང་འདྲ་སྟེ། ཉོན་མོངས་པའི་དགྲ་ལས་སྐྱོབ་ཐུབ་པ་དང་། དད་པ་རྟ་མཆོག་དང་འདྲ་སྟེ། ཐར་པའི་གླིང་དུ་ཁྲིད། དད་པ་དེ་ནོར་བུ་དང་འདྲ་སྟེ། འདོད་པའི་དོན་ཐམས་ཅད་འགྲུབ། ཇི་སྐད་དུ། དད་པ་ནོར་དང་གཏེར་དང་རྐང་པའི་མཆོག །དད་པ་ཡོངས་སུ་གཏོང་ལ་དགའ་བར་བྱེད། །དད་པ་ཡིད་བཞིན་ནོར་འདྲ་དགོས་འདོད་སྟེར། །ཞེས་པ་ལྟར་དད་པ་ལ་དེ་འདྲའི་ཕན་ཡོན་ཆེན་པོ་དང་ལྡན་པ་ཡིན་ལ། དད་པ་འཕགས་པའི་ནོར་བདུན་གྱི་ནང་གི་དང་པོ་རེད། དད་པ་མེད་ན་གོང་དུ་ལུང་ལས་བཤད་པ་ལྟར། ས་བོན་མེས་ཚིག་པ་ཞིག་ཞིང་ལ་བཏབ་ཀྱང་ལོ་ཏོག་མྱུ་གུ་སྔོན་པོ་མི་འབྱུང་བ་ལྟར་དུ། དད་མེད་མི་ལ་དཀར་པོའི་ཆོས་མི་འབྱུང་། དེ་མེད་པས་བདེ་བའི་འབྲས་བུ་འབྱུང་བ་མེད། ད་ལྟར་མི་ལུས་ཤིག་ཐོབ་ནས་ཚེ་འདི་ལ་ནོར་ལོངས་སྤྱོད་ཀྱིས་ཕོངས་པ་མེད་ནའང་། ཚེ་རབས་སྔ་མའི་སྦྱིན་འབྲས་ཅུང་ཟད་ཅིག་ཡོད་པའི་འཕྲོ་མ་ཡིན། དེ་ཟད་ནས་ཡོད་པ་མ་རེད། དེས་ན་དད་པ་མེད་པ་མཚོ་གཏིང་གི་ཕ་བོང་ལྟ་བུ་ཡིན་ཏེ། ཐར་པའི་སྐམ་སར་ཐོན་དུས་མེད། ལག་རྡུམ་གསེར་གླིང་དུ་ཐོན་པ་ལྟར་ཡིན་ཏེ། དགོས་འདོད་ལེན་བྱེད་ཀྱི་ལག་པ་མེད། ལོང་བ་ལྷ་ཁང་དུ་ཕྱིན་པ་ལྟར་ཡིན་ཏེ། ཆོས་ཀྱི་སྣང་བ་མཐོང་མི་སྲིད། དེ་འདྲའི་སྐྱོན་ཆེན་པོ་ཡོད་པའི་རྒྱུ་མཚན་མང་པོར་གསུངས་ཡོད། དད་པ་ཡོད་པ་ཙམ་གྱིས་མི་ཆོག་པར། དེ་ཡར་འཕེལ་ཐབས་བྱེད་དགོས། དམ་པར་བསྟེན་དང་དགེ་གྲོགས་མདོ་རྒྱུད་བལྟ། །འཆི་བ་བསམ་དང་ལས་འབྲས་ཡིད་ཆེས་བྱ། །ཐོས་བསམ་སྒོམ་པ་སྔར་བས་བརྩོན་པ་སྟེ། །དེ་ལས་དད་པ་གོང་འཕེལ་ཉིད་དུ་འགྲུབ། །ཅེས་ཀུན་མཁྱེན་རྒྱལ་བ་ཀློང་ཆེན་པས་གསུངས་ཡོད། དེས་ན་བླ་མ་དམ་པ་བསྟེན། དགེ་བའི་གྲོགས་པོ་དང་འགྲོགས། མདོ་རྒྱུད་ཟབ་མོར་བལྟ། འཆི་བ་ཡེངས་མེད་དུ་བསམ། ལས་འབྲས་བསླུ་མེད་ལ་ཡིད་ཆེས་བྱེད་པས་དད་པ་ཡར་འཕེལ་བར་བྱེད་དགོས། དད་པ་མར་འགྲིབ་པའི་རྒྱུ་རྐྱེན་ནི། བླ་མ་མཆེད་གྲོགས་ཀྱི་སྐྱོན་ལ་རྟོག་པ་དང། ཐ་མལ་གཤིས་ངན་གྱི་གྲོགས་དང་འགྲོགས་པ་དང་། ཁྱད་པར་དུ་སྡིག་པའི་གྲོགས་པོ་དང་འགྲོགས་པ། དེའི་ཐོག་ཏུ་ལེ་ལོ་ཆེ་བ། ཆོག་ཤེས་མེད་པར་འདོད་ཡོན་ལ་ཞེན་པ་རྣམས་ཀྱི་ཁོངས་ནས་འབྱུང་བ་རེད། དེ་ཐམས་ཅད་སྤངས་ཏེ་འཁོར་བའི་འཁྲུལ་སྣང་གིས་ཡིད་སུན་ནས་མཁྲིས་ནད་ཅན་གྱིས་སྣུམ་ཟས་མཐོང་བ་ལྟར་དང་། བླ་མ་དཀོན་མཆོག་ལ་དད་པ་བུ་ཆུང་མ་ལ་གདུང་བ་ལྟ་བུ། ཐོས་བསམ་ལ་ནན་ཏན་བྱེད་པ་སྐོམ་པས་ཆུ་འཐུང་བ་ལྟ་བུ། བསླབ་པ་ལ་གཅེས་སྤྲས་བྱེད་པ་དབུལ་པོས་གསེར་རིལ་རྙེད་པ་ལྟ་བུ་ཞིག་དགོས་ཞེས་གསུངས་ཡོད། ཁྱད་པར་དུ་དགེ་སྦྱོར་ཉམས་ལེན་གྱི་བརྩོན་འགྲུས་ཚོང་པ་གསེར་གླིང་དུ་ཐོན་པ་ལྟ་བུ། ཐེག་པ་ཐམས་ཅད་ལ་དད་པ་འདོད་ཆེན་ཚོང་འདུས་ལ་ཐོན་པ་ལྟ་བུ་སྟེ། ཐེག་པ་གསུམ་གྱི་ཆོས་རང་གིས་ཚང་བར་ལོན་དགོས་བསམ་ནས་དེ་འདྲའི་འབད་པར་བྱེད་དགོས། མདོར་ན་རྟེན་མི་ལུས་རིན་ཆེན་འདིའི་ཐོག་ནས་རང་རྒྱུད་ཆོས་ཀྱིས་ཐུལ་ཏེ་ཆོས་དང་གང་ཟག་ཡ་མ་འཛོལ་བ་ཞིག་བྱ་རྒྱུ་ཅིས་ཀྱང་གལ་ཆེ། བསམ་བློ་དེ་འདྲ་བཏང་ནས་སྐབས་སུ་བབ་པ་གང་ཞིག་འཆད་པར་བྱ་བའི་ཆོས་ནི་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཆོས་སྡེ་ལས་ཐུན་མོང་གི་སྔོན་འགྲོ་སེམས་སྦྱོང་རྣམ་པ་བདུན་གྱི་དོན་ཁྲིད་ཐར་པའི་ཐེམ་སྐས་ཞེས་པ་འདི་ཉིད་འཆད་པའི་སྐབས་ནས། སེམས་སྦྱོང་གསུམ་པ་རིགས་དྲུག་གི་སེམས་ཅན་ལ་སྙིང་རྗེ་བྱ་ཞིང་། ལས་སུ་དཀོན་མཆོག་མཆོད་ཅིང་དཀར་པོ་དགེ་བའི་ལས་བྱེད་པ་འཆད་པ་ལས། གོང་དུ་ཚ་དམྱལ་དང་གྲང་དམྱལ་གྱི་སྡུག་བསྔལ་བསམ་པ་སོང་ནས། དེ་འཕྲོ་རིམ་བཞིན་འཆད་པ་ལ། དེ་ཡང་གོང་གི་ཚ་དམྱལ་དང་གྲང་དམྱལ་ལས་གཞན་ཉི་ཚེ་ཉེ་འཁོར་ནི། ཇི་སྐད་དུ། འདུལ་བ་ལུང་ལས། དེ་ནས་མོའུ་འགལ་གྱི་བུས་རྒྱ་མཚོའི་མཐར་ཕྱིན་པ་ལས། ཉི་ཚེ་བའི་སེམས་ཅན་དམྱལ་བ་གཏུན་ལྟ་བུ་དང་། ཕྱགས་མ་ལྟ་བུ་དང་། ལྗོན་ཤིང་ལྟ་བུ་རབ་ཏུ་མང་པོ་སྡུག་བསྔལ་གྱིས་གདུངས་བར་མཐོང་སྟེ། ཞེས་རྗུ་འཕྲུལ་ཅན་རྣམས་ཀྱི་མཆོག་འཕགས་པ་མོའུ་འགལ་གྱི་བུས་རྒྱ་མཚོའི་མཐར་ཕྱིན་ནས་གཟིགས་པ་ལས། ཉི་ཚེ་བའི་དམྱལ་བའི་གནས་ལ་ངེས་པ་མེད་པར། ཆུ་དང་རི་བོ། མྱ་ངམ་གྱི་ཐང་། ས་འོག་སོགས་ལ་གནས་ཡོད་པས། ཉི་ཚེ་བའི་སེམས་ཅན་དམྱལ་བ་གཟིགས་ཚུལ་འབྲུ་རིགས་སོགས་བརྡུང་སའི་གཏུན་དང་། གད་དར་བྱེད་པའི་ཕྱགས་མ་ལྟ་བུ། ལྗོན་ཤིང་དང་། རྒྱ་མཚོ་དང་། རི་བོ་དང་། བར་སྣང་། ཁང་པ། བྲག་རི། སྒོ་དང་ཀ་བ། ཐབ་ཀ་དང་ཐག་པ་སོགས་ལ་རང་གི་ལུས་སུ་ཞེན་ནས་ཡོད་པས་ན། དེ་ལྟ་བུ་རབ་ཏུ་མང་པོ་སྡུག་བསྔལ་གྱིས་གདུངས་བར་མཐོང་སྟེ། ཞེས་གསུངས་པ་ལྟ་བུའི་ཉི་ཚེ་བ་དང་། ཉེ་འཁོར་བ་ནི། ཚ་གྲང་གཉིས་ཀའི་དམྱལ་བ་བརྒྱད་ཚན་གཉིས་ཀྱིས་ཁེངས་སར་ཡོད་པས། སོ་སོའི་གནས་ནི་ཐེག་མཆོག་མཛོད་དུ། ཉི་ཚེ་བ་ནི། ས་ཆུ་མེ་རླུང་སྣ་ཚོགས་ན་ངེས་པ་མེད་པར་ཡོད་ལ། ཉེ་འཁོར་བ་ནི། བརྒྱད་ཚན་གཉིས་ཀྱི་འཁོར་ན་ཡོད་དོ། །ཞེས་གསུངས་པ་ལྟར། ཉི་ཚེ་བ་ནི་གོང་དུ་བཤད་པ་ལྟར་ས་ཆུ་མེ་རླུང་སྣ་ཚོགས་ན་མོའུ་འགལ་གྱི་བུས་གཟིགས་པ་ལྟར་གནས་ལུས་ངེས་པ་མེད་པར་ཡོད་ལ། ཉེ་འཁོར་བ་ནི་ཚ་དམྱལ་བརྒྱད་དང་གྲང་བའི་དམྱལ་བ་བརྒྱད་དེ་བརྒྱད་ཚན་གཉིས་ཀྱི་འཁོར་ན་ཡོད་དོ། །ཞེས་ཉི་ཚེ་དང་ཉེ་འཁོར་གཉིས་རིགས་གཅིག་གིས་བསྡུས་ནས་གསུངས་པ་དང་། དེའི་ནང་ནས་ཉེ་འཁོར་བ་ནི། དམྱལ་བ་མནར་མེད་སོགས་ཀྱི་ཕྱོགས་བཞི་ན་ཡོད་དེ། མཛོད་ལས། བརྒྱད་པོ་ཀུན་ལ་ལྷག་བཅུ་དྲུག །དེ་དག་གི་ནི་ངོས་བཞི་ན། །མེ་མ་མུར་དང་རོ་མྱགས་འདམ། །སྤུ་གྲི་ལམ་སོགས་ཆུ་བོ་ཡིན། །ཞེས་གསུངས་པ་ལྟར། མེ་མ་མུར། རོ་མྱགས་འདམ། རལ་གྲི་ལོ་མའི་ནགས་ཚལ། ཐལ་ཚན་གྱི་ཆུ་བོ་རབ་མེད་དེ་རྣམས་རེད། མཚམས་རེར་ལྕགས་ཀྱི་ཤལ་མ་ལིའི་སྡོང་པོ་ཡང་ཡོད་པར་གསུངས་ཏེ། དེ་ཡང་མེ་མ་མུར་ནི་མེ་མ་མུར་པུས་ནུབ་ཙམ། དམྱལ་བའི་སེམས་ཅན་རྣམས་ཀྱིས་གནས་རེ་བཙལ་ཞིང་འགྲོ་བ་ན་མེ་མ་མུར་དང་ཐུག་ནས། རྐང་པ་སར་བཞག་པ་ན་མེ་མ་མུར་དུ་ནུབ་ནས་ཤ་རུས་པགས་པ་རྒྱུས་པ་ཚང་མ་ཚིག་ནས་ཞིག་འགྲོ་བ་དང་། ཡང་རྐང་པ་ཡར་བཏེགས་པ་ན་སྔར་བཞིན་སོས་པ་དང་། ཡང་ས་ལ་འཇོག་པ་ན་ཚིག་འགྲོ་བ། དེ་མིན་པར་འགྲོ་ས་གཞན་མེད་པ་དང་། དེ་འདྲའི་སྡུག་བསྔལ་མྱོང་བ་ཉེ་འཁོར་དང་པོ་རེད། དེ་ནས་ཡང་སོང་བ་ན། རོ་མྱགས་ཀྱི་འདམ་དང་འཕྲད་པས། རོ་སྣ་ཚོགས་རུལ་ཞིང་མྱགས་པའི་འདམ་དུ་ནུབ་ནས། སྲིན་བུ་ལྕགས་ཀྱི་མཆུ་རྣོན་ཅན་མང་པོས་ཤ་ཟོས་ཏེ་རུས་པ་ལ་ཐུག་གི་བར་འབིག་པར་བྱེད་པ་སོགས་ཀྱིས་སྡུག་བསྔལ་བ་ཉེ་འཁོར་ལྷག་པ་གཉིས་པ་རེད། དེ་ནས་ཡང་སོང་ནས་རལ་གྲི་ལོ་མའི་ནགས་ཚལ་དང་། སྤུ་གྲིས་གཏམ་པའི་ལམ་པོ་ཆེ་དང་ཁྱི་སྲེ་བོ་ལྕགས་ཀྱི་མཆེ་བ་ཅན་གྱི་གནོད་པ། ལྕགས་ཀྱི་ཤལ་མ་ལིའི་སྡོང་པོའི་མཚམས་བཞི་ན་བྱ་ཁྭ་ཏ་ལྕགས་ཀྱི་མཆུ་ཅན་གྱི་གནོད་པ་ནི་ཉེ་འཁོར་ལྷག་པ་གསུམ་པ་དང་། ཡང་སོང་ནས་ཐལ་ཚན་གྱི་ཆུ་བོ་རབ་མེད་དེ། སྤྱོད་འཇུག་ལས། ཆུ་བོ་རབ་མེད་མེ་དོང་འདྲ་ནང་བྱིང་བ་དག །ཤ་ཀུན་ཞིག་གྱུར་རུས་གོང་མེ་ཏོག་ཀུན་དའི་མདོག །ཅེས་གསུངས་པ་ལྟར་ཏེ། །དེ་དག་ལས་ཐར་ཏེ་ཕ་རོལ་ཕྱིན་པ་ན་སྐྱེས་བུ་གོ་མཚོན་ཅན་མང་པོས་བཀག་ནས་ཡོད་པ་ཉེ་འཁོར་ལྷག་པ་བཞི་པ་རེད། གོང་དུ་བཤད་མ་ཐག་པའི་ཡི་དྭགས་ལའང་། ཀུན་མཁྱེན་ཆེན་པོས། ཡི་དྭགས་བྱིངས་མཁར་རྒྱུ་བའི་བྱིངས་གནས་པ། །ཞེས་པའི་ཡི་དྭགས་བྱིངས་ལ་གནས་པ་དང་། མཁའ་ལ་རྒྱུ་བའི་རིགས་གཉིས་ཡོད་པ་ལས་བྱིངས་ལ་གནས་པ་ནི། ཕྱིའི་སྒྲིབ་པ་ཅན་སོགས་སྔ་མར་བཤད་པའི་གསུམ་པོ་ཡིན་ལ། མཁའ་ལ་རྒྱུ་བའམ་ཕྲན་ཚེགས་པ་ནི། ཤིང་རྟ་རྩ་བར། མཁའ་ལ་རྒྱུ་བའི་ཡི་དྭགས་འདྲེ་རྣམས་དང་། །གནོད་སྦྱིན་སྲིན་པོ་བཙན་དང་རྒྱལ་པོ་སོགས། །ཞེས་པ་ལ་སོགས་པས་བསྟན་པ་ལྟར། མཁའ་ལ་རྒྱུ་བའི་ཡི་དྭགས་མཚན་མོར་རྒྱུ་ཞིང་ཚེ་རྐུ་མདངས་འཕྲོག་པར་བྱེད་པའི་འདྲེ་དང་། མ་མོ་ཐེའུ་རང་། གནོད་སྦྱིན་དང་སྲིན་པོའི་རིགས། བཙན་དང་རྒྱལ་པོ་དང་། སོགས་པས་བསྡུས་པ། ལས་ཀྱི་རྫུ་འཕྲུལ་ཐོགས་མེད་ཀུན་ཏུ་རྒྱུ། །གནོད་པ་སྣ་ཚོགས་མངོན་པར་སྒྲུབ་པ་སྟེ། །ནད་གཏོང་མདངས་འཕྲོག་ཚེ་ལ་བར་དུ་གཅོད། །ཅེས་པ་ལ་སོགས་པ་གསུངས་ཡོད་པ་རྣམས་རེད། འགའ་རེས་ངས་འདྲེ་རིག འདྲེས་གནོད་བྱུང་ཟེར་བའི་རིག་འདུག་རྒྱུ་དེ་ཚོ་མཁའ་ལ་རྒྱུ་བའི་རིགས་སུ་གཏོགས་པ་རེད། དཔེར་ན་གནོད་སྦྱིན་དང་བཙན་དང་རྒྱལ་པོ་དང་། ཤི་འདྲེ་ཐེའུ་རང་སོགས་ལས་ཀྱི་རྫུ་འཕྲུལ་དང་ལྡན་པ། ཀུན་ཏུ་ཐོགས་མེད་དུ་རྒྱུ་བ་འདི་རྣམས་ཡི་དྭགས་ཀྱི་འགྲོ་བས་བསྡུས་པ་ཡིན་པའི་ཕྱིར་ན། དུས་རྟག་ཏུ་འཁྲུལ་སྣང་དང་འཇིགས་སྐྲག་ཁོ་ན་སྤྱོད་པའི་སྡུག་བསྔལ་དཔག་མེད་མྱོང་བ་དང་། བསམ་པ་ནག་པོས་གཞན་ལ་འཚེ་བ་ལ་བརྩོན་པར་བྱེད་པ་དང་། སྙིང་ཉེ་ས་དང་དགའ་སའི་མི་སར་སོང་ན། སྔར་འཆི་བའི་གནད་གཅོད་ཀྱི་སྡུག་བསྔལ་དེ་ལ་འཕོས་ཤིང་འགོས་ནས་གནོད་བྱེད་ཨེ་ཐུབ་བལྟ་བ་དང་། འགའ་རེས་གནོད་པ་བྱེད་མ་བསམ་ནའང་། རང་ཤུགས་ཀྱིས་གནོད་པ་དང་། རང་ཉིད་ཡང་དུས་གཏན་དུ་ནད་དེའི་སྡུག་བསྔལ་དེས་མནར་ཞིང་ནད་དེ་ལས་ཐར་པའི་ཆེད་དུ་ཚེ་རྐུ་མདངས་འཕྲོག སྲོག་གཅོད་དབུགས་ལེན་བྱེད་པ་དང་། རྫུ་འཕྲུལ་གྱིས་སོང་ནའང་སྔགས་པ་ནུས་མཐུ་ཅན་གྱིས་ལམ་བཀག་ནས་མི་ཐར་པ་དང་། མནན་སྲེག་འཕངས་གསུམ་བྱེད་པས་ས་འོག་མུན་པའི་གནས་ན་བསྐལ་པ་མ་སྟོང་གི་བར་དུ་འདུག་དགོས་པ་དང་། དྲག་པོའི་སྦྱིན་སྲེག་གིས་མེ་ནང་བསྲེག་པ་དང་། དྲག་པོའི་ཐུན་རྫས་གྱིས་བྲབ་པ་ན་མགོ་བོ་ཚལ་པ་བརྒྱ་དང་ལུས་དུམ་བུ་སྟོང་དུ་བཀས་པའི་སྡུག་བསྔལ་དང་། འགའ་ཞིག་ལ་སྔོན་གྱི་དགེ་བ་ཕྲ་མོས་འབྲས་བུ་ལོངས་སྤྱོད་ཀྱི་འབྱོར་བ་ཕྲན་བུ་རེ་ཡོད་ཀྱང་སྡུག་བསྔལ་ཡུན་རིང་པོས་གདུང་བ་ལྟ་བུ་དེ་འདྲའི་སྡུག་བསྔལ་ཡོད་དོ། །ཞེས་སློབ་མ་དབང་པོ་རྣོན་པོ་ལ་སྤྲོས་ནས་འཆད་ན་དགེ་བ་གསུམ་གྱི་དོན་ཁྲིད་ཀྱི་ནང་དོན་ལྟར་ཤེས་པར་བྱ་ཞིང་། གཞན་དུ་ནི་དཀྱུས་སུ་བཤད་པས་དོན་འགྲུབ་བོ། །ཞེས་གསུངས་ན། རང་རེའི་ནང་ན་འདྲ་མི་འདྲ་ཚང་མ་ཡོད་ཀྱང་། མཐའ་གཉིས་སུ་མ་ལྷུང་བའི་ཚུལ་གྱིས་བཤད་པའི་ཉམས་ཡིན་དེ་ཡན་གྱིས་དམྱལ་བ་དང་ཡི་དྭགས་ཀྱི་སྡུག་བསྔལ་བསམ་པ་སོང་ནས། དེ་ནས་ངན་སོང་གི་གནས་གསུམ་པ་དུད་འགྲོའི་སྡུག་བསྔལ་བསམ་ཞིང་བློ་སྦྱང་བ་ནི། བཤེས་སྤྲིང་ལས། དུད་འགྲོའི་སྐྱེ་གནས་ན་ཡང་གསོད་པ་དང་། །བཅིང་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་གྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། །ཞེས་དུད་འགྲོའི་གནས་སུ་སྐྱེས་པའི་སེམས་ཅན་ནའང་རང་དབང་མེད་པར་གཞན་གྱིས་གསོད་པ་དང་། ལུས་བཅིང་བ་དང་བརྡེག་པ་བཀོལ་བ་ལ་སོགས་པའི་མི་དང་མི་མིན་གྱི་གནོད་པ་མཐའ་ཡས་པའི་སྡུག་བསྔལ་རྣམ་པ་སྣ་ཚོགས་པ་མྱོང་བ་མ་གཏོགས། ལུས་བདེ་སེམས་སྐྱིད་ཀྱི་ཞི་བར་གྱུར་པའི་དགེ་བའམ་ཕུན་ཚོགས་ཀྱི་འབྱོར་པ་སྤངས་པའམ། ཞི་གྱུར་ངེས་ལེགས་ཀྱི་རྒྱུ་ཐར་པ་ཆ་མཐུན་གྱི་དགེ་བའི་སྣོད་དུ་མི་རུང་བའི་དུད་འགྲོ་རྣམས་ལ་ནི། བྱེ་བྲག་གི་སྡུག་བསྔལ་གཅིག་གིས་གཅིག་གསོད་པ་དང་། གཅིག་ལ་གཅིག་གིས་ཟ་བའི་སྡུག་བསྔལ་ཤིན་ཏུ་མི་བཟད་པ་དང་ལྡན་པ་ཡིན་ནོ། །ཞེས་དུད་འགྲོ་ལ་དབྱེ་ན་རྐང་མང་དང་། རྐང་མེད་། རྐང་གཉིས་རྐང་བཞི་སོགས་རིགས་མཐའ་ཡས་པ་ཞིག་ཡོད་ཀྱང་བྱིངས་གནས་དང་ཁ་འཐོར་བ་སྟེ། རྣམ་གྲངས་གཉིས་སུ་ས་སྡེ་ལས་བཤད་ལ། དུད་འགྲོའི་གནས་ཀྱི་གཙོ་བོ་ནི། བྱིངས་གནས་དེ་གཙོ་བོ་ཕྱིའི་རྒྱ་མཚོ་ཆེན་པོ་དང་ཆུ་དང་ཐང་ནགས་སོགས་ན་གནས་པ་དང་། ཁ་འཐོར་ནི་ལྷ་དང་མིའི་གནས་ནའང་ཡོད། དུད་འགྲོའི་རིགས་སུ་གྱུར་པའི་སེམས་ཅན་འདི་དག་གི་སྡུག་བསྔལ་ནི། གོང་དུ་བཤད་པ་ལྟར་སྤྱི་མཐུན་དུ་རྨོངས་པའི་སྡུག་བསྔལ་གླེན་ཞིང་གཏི་མུག་པ་དང་། དེའི་སྟེང་ན་གཅིག་ལ་གཅིག་ཟ་བའི་སྡུག་བསྔལ་དང་གཅིག་ལ་གཅིག་གིས་འཚེ་བའི་སྡུག་བསྔལ། ཚ་གྲང་བཀྲེས་སྐོམ་དམྱལ་བ་དང་ཆ་འདྲ་བའི་སྡུག་བསྔལ། ནད་དང་འཚེ་བ་སོགས་དཔག་ཏུ་མེད་པ་ཡོད། ཁ་འཐོར་བ་མིའི་ཡུལ་ན་ཡོད་པ་རྣམས་ནི་རྔོན་པ་དང་ཉ་པ་ལ་སོགས་པས་གསོད་པ་སོགས་ཤ་དང་རུས་པ་ལྤགས་པ་སྤུ་ལ་སོགས་པའི་དོན་དུ་སྲོག་མི་འཚམས་པ། མིས་བཀོལ་ཞིང་བེད་སྤྱོད་བྱས་ནས་རྟ་ཁེལ་མ་འབྲི་ར་ལུག་སོགས་བཤས་རར་ཕབ་ནས་གསོད་ཐབས་སྣ་ཚོགས་པས་མནར་གཅོད་གཏོང་བ། ཀླུ་ལ་སོགས་པ་དུད་འགྲོའི་རིགས་གྱུར་སྐྱིད་སྡུག་དོ་མི་མཉམ་པར་སྔ་དྲོར་བདེ་ན་ཕྱི་དྲོར་སྡུག་པ། ནམ་མཁའ་ལྡིང་དང་རིགས་སྔགས་ཀྱི་ནུས་པས་གནོད་པ་ཡོད། དུད་འགྲོའི་ཚེ་ཚད་ལ་བསམ་ན་མ་ངེས་པ་རེད། འགའ་རེ་ཡུད་ཙམ་གནས་ནས་ཤི་བ་དང་། འགའ་རེ་ཉིན་རེར་གནས་པ། ཀླུ་སོགས་འགའ་ཞིག་བསྐལ་པར་གནས་པའང་ཡོད་པར་གསུངས། དེ་དག་ལུང་ལས་དཔག་ནས། དེ་ལྟ་བུའི་དུད་འགྲོའི་སྡུག་བསྔལ་བསམས་ཤིང་བློ་ལ་བླངས་པ་ནི། འདི་ལག་ཁྲིད་ཀྱི་སྒོ་ནས་བསྒོམ་རྒྱུ་རེད། ཡང་ཐུན་ནང་རང་ཉིད་གཏི་མུག་མུན་པ་ལྟ་བུའི་ཉོན་མོངས་པས་རྐྱེན་བྱས་ཏེ་སྐད་ཅིག་ཉིད་ལ་ཕྱིའི་རྒྱ་མཚོ་ཆེན་པོའི་ནང་དུ་བྱིངས་ན་གནས་པའི་དུད་འགྲོ་ཉ་དང་། དུང་དང་ཆུ་སྲིན་ལ་སོགས་པ་ཆེ་བ་རི་ལྟ་བུ་དང་། ཆུང་བ་ཁབ་རྩེ་དང་རྡུལ་ཕྲན་ལྟ་བུས་གང་ནས་གོ་མཚམས་མེད་པར་ཆང་འགག་གི་སྦང་མ་ལྟར་ལྕིག་ལྕིག་ཡོད་པའི་ནང་དུ་སྐྱེས་པར་སྒོམ། སྐབས་རེས་འགའ་རང་ཉིད་ཆུ་སྲིན་དང་ཆུ་རྟ་ཉ་བོ་ཆེ་སོགས་ཆེ་བར་གྱུར་པའི་ལུས་བླངས་པའི་ཚེ་དུང་ལ་སོགས་པ་ཆུང་བ་རྣམས་ཀྱིས་ལུས་ཏལ་མར་ཕུགས་ནས་སྙིང་ལ་མདའ་ཕོག་པ་ལྟ་བུའི་ན་ཚ་དང་སྡུག་བསྔལ་མྱོང་བ། རེས་འགའ་རང་ཉིད་ཉ་འབུ་སོགས་ཆུང་བར་གྱུར་པའི་ཚེ་དུད་འགྲོ་ཆེ་བ་རྣམས་ཀྱིས་ཁྱུར་མིད་དུ་ཟོས་ནས་ལུས་ལྕགས་ཀྱི་པར་བུ་བཅུག་པ་ལྟ་བུའི་སྡུག་བསྔལ་མྱོང་བ། གླིང་འདི་དང་གླིང་གཞན་གྱི་ཕྱི་མཐའི་ལྕགས་རི་གཉིས་ཀྱི་གོ་དབར་ཉི་ཟླའི་སྣང་བ་མེད་པའི་མུན་ནག་གི་ཁྲོད་ན་སྐྱེས་པ་དང་། ད་ལྟ་རང་རེའི་མཐོང་སྣང་གི་ས་ལྒང་རིལ་པོ་འདིའི་ཕར་བྱང་སྣེ་ས་ཐག་ཉེ་སའི་རྒྱལ་ཁབ་ཧྥན་ལན་དང་། ནོ་ཝེས་སོགས་ན་སོང་དུས་དགུན་ཁ་ཉི་མ་ཤར་རྒྱུ་མེད་པས་དམུས་འགྲོ་གི་ཡིན་ན། ད་ལྟར་ཚན་རིག་གིས་གློག་ཡོད་རེད་མ་གཏོགས་སྔར་གློག་མེད་དུས་ཅི་འདྲ་སྡུག་ན། དེ་དང་འདྲ་བའི་ཉི་ཟླའི་སྣང་བ་མེད་པའི་མུན་ནག་རང་གི་ལག་པ་བརྐྱང་བསྐུམ་ཙམ་ཡང་མི་མཐོང་བའི་ཁྲོད་དུ་སྡུག་བསྔལ་བ་ལ་བསམ་ན་ངུ་བྲོ་བ་དང་། ཁ་འཐོར་བའི་དུད་འགྲོ་ལ་བསམ་ན། བྱ་དང་རི་དྭགས་འབུ་སྦྲང་གཅན་གཟན་ལ་སོགས་ཏེ་བདག་ཏུ་མ་བཟུང་བ་རྣམས་ལ་རང་བཞིན་གྱི་སྡུག་བསྔལ་ཚ་གྲང་བཀྲེས་སྐོམ་གཅིག་གིས་གཅིག་ཟ་བས། དོ་ནུབ་དང་ད་ལྟ་སེ་གོལ་གཏོག་པའི་ཡུན་ཙམ་གྱི་རིང་ལ་ཚེ་འདི་ཕྱི་ཤི་གསོན་གྱི་མཚམས་སུ་ཡོད་ཅིང་། མི་ལ་སོགས་པ་མིག་གིས་མཐོང་ཚད་ལ་ཁོག་པ་འཕྲལ་ནས་སྲོག་རྩ་དམར་པོ་ལ་གྲི་བཞག་པའི་སྲོག་གཅོད་ཀྱི་གཤེད་མ་ཁོང་ལག་ཅན་དུ་མཐོང་ནས་སྣང་བ་ཐམས་ཅད་དོགས་པར་འཆར་བས། འཇིགས་སྐྲག་གི་སྣང་བ་ཁོ་ནས་ལྟོ་ཁམ་རེ་ཟ་བའི་རིང་ལ་བག་མི་ཕེབས་པར་མགོ་བོ་ཕྱོགས་བཞི་མཚམས་བརྒྱད་དུ་གསོད་མཁན་ཞིག་གིས་སྲོག་ཐོག་ཏུ་ཕབ་པའི་དོགས་པས་བྱ་རར་གཡེང་བ་དང་། ཁྱད་པར་དུ་རྔོན་པ་དང་། ཉ་པ་དང་། བྱ་གཤོར་བ་དག་གིས་བརྩེ་བ་མེད་པར་རྒྱ་དང་སྙི་དང་མེ་མདའ་སོགས་གསོད་ཐབས་སྣ་ཚོགས་པའི་འཇིགས་པ་དུ་མས་སྐད་ཅིག་ལ་གསོད་པ་དང་། མིས་བདག་ཏུ་བཟུང་བའི་དུད་འགྲོ་གཡུང་དྭགས་རྟ་ནོར་དང་། ར་ལུག་བ་གླང་ལ་སོགས་པ་ཐམས་ཅད་ཀྱང་ཁ་ལ་ལྕགས་ཀྱི་སྒྲོག་གཡོགས་ཏེ་སྲབ་བསྐོན། རྒྱབ་ལ་སྒ་བསྟད་དེ་བཞོན་ནས་རྒྱང་རིང་པོར་མནར་བ་དང་། བཤའ་ཟོག་བཤའ་ལུག་ལྟ་བུ་འགའ་ཞིག་རྐང་ལག་ཐག་པས་བཀྱིག་ལུས་གནམ་ས་བསྒྱུར་ཏེ་ཕྱི་དབུག་ནང་དབུགས་ཆད་ལ་མ་ཆད་ཀྱི་སྐབས་ན། བྲང་དྲོན་མོའི་ཁ་གྲི་རྣོན་པོས་གཤགས་ནས་ལྟོར་ལག་བཏང་སྟེ་ཁོག་པའི་ནང་དུ་ལག་པ་བཏང་ནས་སྲོག་དབུགས་ཀྱི་རྒྱུ་བ་གཅོད་པ་དང་། གོང་དུ་བཤད་པ་ལྟར་མུ་ཏིག་གི་ཆེད་ཉ་ཕྱིས་དང་། མཆེ་བ་དང་རུས་པའི་དོན་དུ་གླང་པོ་ཆེ་དང་། པགས་པའི་དོན་དུ་སྟག་དང་གཟིག་སྲམ་ཝ་ལ་སོགས་པ་དང་། སྤུའི་དོན་དུ་རི་དྭགས་གཙོད་སོགས་དང་། ཤ་ཁྲག་གི་དོན་དུ་རྐྱང་འབྲོང་རྒོ་གནའ་ལ་སོགས་པ་དང་། གླ་རྩིའི་དོན་དུ་གླ་བ་གསོད་པ་དང་། འགའ་རེ་གསོད་པའི་ཞོར་དུ་འགའ་རེ་ཤི་བ་དང་། རྒྱ་མཚོའི་ཆུ་གནས་སོགས་ཟས་ཀྱི་དོན་དུ་གསོད་པ་སོགས། མདོར་ན་རང་ཉིད་སྐྱེ་རྒྱུ་དེ་གསོད་པའི་ཆེད་དུ་སྐྱེས་པ་འདྲ་ཞིག་ཡིན་པ་དང་། བོད་ན་མཛོ་གཡག་སོགས་གཞན་དག་སྣ་འབིགས་པ་དང་། རྨོས་རྨོ་བ་དང་། བྱ་གཅོད་པ་དང་། བརྡེག་པ་དང་། གསོན་ཁྲག་འབྱིན་པ་དང་། བལ་སོགས་ཁལ་ལྕི་མོ་ཐེག་ཚད་འགེལ་ཏེ་ཐག་རིང་དེད་པ་དང་། དུད་འགྲོ་ཤིན་ཏུ་བླུན་རྨོངས་ཅན་ཤ་མ་གཏོགས་མི་ཟ་བ་རྣམས་ཀྱིས་ནི་མིག་གིས་མཐོང་ཚད་རང་གིས་གསོད་ཐུབ་ཚད་གསོད་ཅི་ཐུབ་བྱེད་པ་དང་། རང་རེ་མི་ཡིན་ནའང་གསོད་དགའ་ཅན་རྣམས་ཀྱིས་རྒྱགས་རྒྱགས་མཚར་མཚར་གྱིས་བྱ་རི་དྭགས་གསོད་པ་དང་། ལར་ཟས་ཀྱི་དོན་དུ་སེམས་ཅན་སྲོག་མ་བཅད་ན། མི་འདིས་ཤ་མ་ཟོས་ནའང་ཟས་གཞན་གྱིས་སྲོག་འཚོ་ཐུབ་པ་རེད། མིས་ཅི་ཡིན་ན་ཟ་ཤེས་ལ་ཐབས་སྒྲིག་ཤེས་པ་རེད། ད་དུང་སྡིག་ཟས་ཤ་འདིས་ནད་སྣ་ཚོགས་བསྐྱེད་ཅིང་། ཅི་ཙམ་ཟོས་ན་དེ་ཙམ་དུ་སྲེད་པ་འཕེལ་ནས་ཟ་དྲན་པ་རེད། སྡིག་པའི་སྟོབས་ཀྱིས་བར་གཅིག་བཤས་ཤ་མ་གཏོགས་ཤི་ཤ་ཟ་ཉན་ཡོད་ནི་མ་རེད། དེའི་ཐོག་ན་ངོམས་པ་མེད་པར་ཟོས་ཤིང་ཟོས་ན་བད་ཀན་རྒྱས་ནས་ཤ་ཚོ་བ་ཕག་འདྲ་རེད། ལྟོ་ཚིལ་དྲུད། ཕོ་བ་ལྷུག གཏི་མུག་འཕེལ། གཏི་མུག་གིས་བསྐྱེད་པའི་ནད་སྣ་ཐམས་ཅད་ཡར་ལྡང་། སྡུག་གི་དེང་སང་རླངས་འཁོར་ཡོད་ནི་རེད་མ་གཏོགས་ཐ་ན་རྟ་ཡིས་མི་ལྕོགས་པར་དེ་འདྲ་རེད་ནི་རེད། རྒས་སོང་དུས་རང་གཡོག་རང་གིས་མི་ཕེར་བ་ཡོད་པ་རེད། དེས་ན་ཤ་བཟའ་རྒྱུ་འདི་གཏན་ནས་སྤོང་ཐུབ་ན་ཤིན་ཏུ་ཡག་པོ་རེད། ཇོ་སེར་ལོ་ཉུང་ཚོའི་ནང་ན་ཤ་སྤོང་མཁན་མང་ཐལ། བླ་སྤྲུལ་རྣམ་པའི་ནང་ན་ཤ་གཅད་ནི་མང་གི། ཁ་སང་ཁ་ཉིན་སོགས་ལ་གྲྭ་བ་ལོ་ཆུང་གི་ནང་ན་ཤ་གཅོད་མཁན་མང་པོ་ཡོང་ཐལ། དེ་རྣམས་ལ་ནམ་ཡིན་ན་རྗེས་སུ་ཡི་རང་བྱེད་ཀྱིན་ཡོད། ད་ངོ་མ་བཤད་ན་བཤས་མི་བཤའ་རྒྱུ་སྡེ་མང་ཚོགས་ནས་མགོ་འཛུགས་རྒྱུ་ཅན་རེད་ལ། ཤ་མི་ཟ་རྒྱུ་དགོན་པའི་བླ་གྲྭ་ནས་མགོ་བཙུགས་ནས་ཚང་མས་ཤ་ཉོ་རོགས་མ་བྱས་ན་བཤས་བཤའ་མཁན་མེད་ནས་དུད་འགྲོར་སྐྱེས་པའི་ཕ་མ་ཕལ་ཆེར་གྱི་སྲོག་མགོ་ཐོན་འགྲོ་གི། གནའ་སྔ་མོར་གྲྭ་བའི་ནང་ན་པགས་པའི་གོས་མི་གྱོན་མཁན་དེ་འདྲ་ཡོད་དར། དཔལ་སྤྲུལ་ཚང་གིས་ཕྱིང་རྩག་མནབ་རྒྱུ་བོ་པགས་གོས་མི་གྱོན་པའི་དབང་གིས་རེད། རྫ་ཆུ་ཁ་ནའང་ཕྱིང་རྩག་མནབ་མཁན་མང་པོ་ཡོད། དེ་དུས་ས་མཐོ་སྒང་ན་ཅི་འདྲའི་སྙིང་རུས་མཛད་འདུག་མ་གཏོགས། དེང་སང་ཡིན་ན་པགས་པ་མིན་ནའང་སྤུ་ཡོད་དྲོན་པོ་གྱོན་རྒྱུ་ལོན་གི། ད་དུང་གཙང་སྦྲ་ཅན་ཞིག་ཡིན་ན་སྤུ་མི་འགོས་པས་པགས་རིགས་མིན་པ་གྱོན་ན་ཡག་ས་རེད། གཅན་གཟན་གྱི་པགས་རིགས་གྱོན་རྒྱུའི་ལམ་ལུགས་འདི་ཚོ་རྒྱུན་དུ་མེད་ན་ཡག་ས་ཡོད་གི། བྱི་རུ་འདི་ཚོ་སྲོག་ཆགས་རེད་མི་ཟེར་རམ། དེ་འདྲ་ཡིན་ན་བྱི་རུ་བཏགས་རྒྱུ་མེད་ན་སྲོག་ཆགས་འགའ་རེའི་སྲོག་མགོ་ཐོན་འགྲོ་ནི་ཨེ་མི་ཡིན། ཡང་སྲོག་ལྡན་འགའ་རེ་ཤི་ནས་ཤིང་དང་རྩྭར་རེད་སོང་བ་རྣམས་ནི་སྡིག་པ་ཡོད་མེད་བཅོམ་ལྡན་འདས་ཁོང་བཞུགས་ཡོད་ན་བཀའ་འདྲི་མ་ཞུས་ན་མི་ཤེས་རྒྱུའང་འདུག་ཡིན་ན། དེ་བཞིན་དུ་ཀླུ་རྣམས་ལའང་བྱེ་ཚན་དང་། ནམ་མཁའ་ལྡིང་གི་འཇིགས་པ་དང་། མི་དང་དྲང་སྲོང་གི་རིགས་སྔགས་སྣ་ཚོགས་ཀྱིས་གཟིར་བ་དང་། ཟླ་གྲོགས་གཅིག་གིས་གཅིག་སྤངས་ཏེ་མཉམ་པའི་ཁྱུར་མི་ཚུད་ཅིང་གྲོགས་མེད་པ་དང་། སྤྱི་མཐུན་དུ་དུད་འགྲོ་ཡོད་ཚད་ལ་རྨོངས་པ་དང་གདུག་རྩུབ་ཆེ་བ་ལ་སོགས་པའི་སྡུག་བསྔལ་བརྗོད་ཀྱིས་མི་ལོང་བ་ཡོད་པ་དང་། གཞན་ཡང་ཚེ་ཚད་མ་ངེས་པར་མྱོང་བ་སོགས་དུད་འགྲོའི་སྐྱེ་གནས་སུ་སྐྱེས་པའི་སེམས་ཅན་དེ་དག་ཐམས་ཅད་ཀྱང་། སྡུག་བསྔལ་འདོར་འདོད་སེམས་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུག །ཅེས་གསུངས་པ་ལྟར་བླང་དོར་གྱི་གནས་མི་ཤེས་པ་གླེན་ཞིང་གཏི་མུག་པའི་རང་བཞིན་ཅན་ཏེ། དེ་དག་རང་ཡིན་པ་དང་དེ་དག་གི་སྡུག་བསྔལ་རེ་རེ་ནས་རང་གིས་མྱོང་བར་བསམ་སྟེ། ཁ་དཔེ་བཤད་པ་དང་ཐད་ནས་ལྟད་མོར་བལྟ་བ་ལྟ་བུ་མ་ཡིན་པར་དེ་རང་ཡིན་ཞིང་དེའི་སྡུག་བསྔལ་མྱོང་གིན་ཡོད་པར་བསམ་ནས་སྒོམ་དགོས། དེ་ལྟར་འཁོར་བ་དྲན་པ་ཙམ་ལ་སྐྱུགས་ལོག་གི་འགྲོ་བར་དེ་ལྟར་བྱ་དགོས་ཏེ། ཀུན་མཁྱེན་གྱིས། འདི་དག་བསམ་ན་བྱོལ་སོང་འཇིག་རྟེན་ལས། །ཐར་འདོད་རྣམས་ཀྱིས་ཕན་བདེ་བསྒྲུབ་པའི་ཕྱིར། །མངོན་མཐོ་ངེས་ལེགས་ལམ་བཟང་སྲོལ་བཏོད་ལ། །ཉིན་མཚན་བརྩོན་པས་དགེ་ལ་གཞོལ་བར་མཛོད། །ཅེས་འཁོར་བའི་གནས་སྤྱི་དང་བྱེ་བྲག་ངན་འགྲོའི་སྡུག་བསྔལ་བསམ་སྟེ་དེ་རང་ཐོག་ལ་བླངས་ནས། དགེ་བ་ལ་སོགས་པ་ལེགས་པའི་ཆོས་ལས་བྱོལ་ནས་སོང་བ་དུད་འགྲོའི་འཇིག་རྟེན་འདི་ལས་དུས་གཏན་དུ་ཐར་པ་འདོད་པ་རྣམས་ཀྱིས། རང་གཞན་གྱི་ཕན་བདེ་མཐའ་དག་བསྒྲུབ་པར་བྱ་བའི་ཕྱིར་དུ། མངོན་པར་མཐོ་བ་ལྷ་དང་ཁྱད་པར་མིའི་རྟེན་དང་། ངེས་པར་ལེགས་པ་ཐར་པའི་ལམ་བཟང་དེ་བགྲོད་པའི་སྲོལ་བཏོད་ལ། ཉིན་མཚན་ཀུན་ཏུ་བརྩོན་པ་དྲག་པོས་རྣམ་དཀར་དགེ་བའི་ལས་ལ་གཞོལ་བར་མཛོད་ཅིག་ཅེས་གདམས་ངག་གསུངས་སོ། །དེ་དག་ཀྱང་ཚིག་གི་གོ་དོན་སེམས་ལ་བཞག་ནས། དུད་འགྲོའི་སྡུག་བསྔལ་མཐར་ཆགས་སུ་རེ་རེ་བཞིན་རང་ཐོག་ལ་བླངས་ནས་སྡུག་བསྔལ་རང་ཉིད་ཀྱིས་མྱོང་བའི་དམིགས་པ་བྱས་ཟིན་པའི་མཐར་རང་ཉིད་སྦྲུལ་ལྟ་བུའི་ཀླུ་ཞིག་ཏུ་སྐྱེས་པར་བསམ་ནས། ནམ་མཁའ་ལྡིང་བྱ་ཁྱུང་གཏུམ་པོ་ཞིག་གིས་གློ་བུར་དུ་བར་སྣང་ལ་ཁྱེར་ནས་ད་ནི་དབུགས་རྟ་རྔ་ཙམ་དེ་ནམ་ཆད་འགྲོ་བར་མི་ཤེས་པར་དབུགས་ཕྱི་ནང་གང་གི་མཚམས་ཀྱང་ཚེ་འདི་ཕྱིའི་སོ་མཚམས་སུ་སླེབས་ཡོད་པར་བསྒོམས་ནས། ཨ་རེ་འཇིགས། རྒོལ་ལན་རྫོགས་མི་ཐུབ་པའི་སྟོབས་ལྡན་གྱི་འདབ་ཆགས་འཇིགས་པ་ཅན་འདི་ལྟ་བུས་བདག་ཉིད་གསོན་ཟས་སུ་བྱེད་པ་ཨ་ཙི། ཨ་ཙི། འཇིགས་པ་ལ། འཇིགས་པ་ལ། ཀྱི་ཧུད། ཀྱི་ཧུད་ཅེས་འཇིགས་སྐྲག་གི་སྨྲེ་སྔགས་བསྐྱར་བཟློས་དང་བཅས་དྲན་པ་འཐོར་བ་ཙམ་གྱི་འཇིགས་སྐྲག་གི་སྡུག་བསྔལ་གྱི་རོ་རང་གིས་ཉམས་སུ་མྱོང་བ་ན། སླར་སྟེང་གི་ནམ་མཁའ་ལ་རྩ་བའི་བླ་མ་དེ་ཉིད་ཨོ་རྒྱན་ཆེན་པོའི་རྣམ་པའི་ཆ་ལུགས་སུ་བྱོན་ནས། ཀྱེ་ཞེས་བོས་ནས་ལས་ངན་གྱི་སེམས་ཅན་ཁྱེད་ཀྱིས་འདི་ལྟ་བུའི་སྡུག་བསྔལ་དང་འཇིགས་སྐྲག་མྱོང་དགོས་པའང་རྩ་བ་རང་ལ་ཐུག་སྟེ། འཁོར་བ་མཐའ་མེད་དུ་ང་མེད་ལ་ངར་བཟུང་། བདག་མེད་པ་ལ་བདག་ཏུ་འཛིན་པས་བདག་གཅེས་འཛིན་ཁོ་ན་ལྷུར་བླངས་པས་ལན། ད་ནི་སྙིང་རྗེའི་བསམ་པས་ཀུན་ནས་བསླངས་ཏེ་བདག་བས་གཞན་གཅེས་ཀྱི་བྱང་ཆུབ་ཀྱི་སེམས་རིན་པོ་ཆེ་ཁྱད་པར་ཅན་སྒོམ་ན་སྡུག་བསྔལ་ཅན་གྱི་གནས་འདི་ལས་གྲོལ་བའི་ཐབས་བླ་ན་མེད་པ་ཡིན་ཏེ། སྔོན་བསྟན་པའི་བདག་པོ་ཤཱཀྱ་སེང་གེས་སློབ་པ་ལམ་གྱི་གནས་སྐབས་སུ་བྱང་ཆུབ་ཀྱི་སྤྱོད་པ་ལ་བསླབ་པའི་ཚེ། མཛའ་བོའི་བུ་མོ་ཞེས་བྱ་བར་སྐྱེས་ནས་རྒྱ་མཚོའི་གླིང་དུ་འགྲོ་བ་ལ་མས་བསྲུངས་ཀྱང་མ་ཉན་པར་མའི་མགོ་ལ་འགོངས་ནས་རྒྱ་མཚོར་ནོར་བུ་ལེན་དུ་ཕྱིན་པས་གྲུ་གཟིངས་ཞིག ཤིང་ལེབ་གཅིག་ལ་འཇུས་པས། མཚོ་གླིང་ཞིག་ཏུ་ཐོན། དེ་ནས་རིམ་པར་ཕྱིན་པའི་ཅི་ཞིག་ན་ལྕགས་ཀྱི་ཁང་བ་ཞིག་ཏུ་མི་ཞིག་གི་མགོ་ལ་ལྕགས་ཀྱི་འཁོར་ལོ་བསྐོར་ནས་ཀླད་པའི་དཀྱིལ་དུ་འབུགས་ཀྱིན་འདུག ཅི་བྱས་པ་ཡིན་དྲིས་པས་མའི་མགོ་ལ་འགོངས་པའི་རྣམ་སྨིན་ཡིན་ཟེར། འོ་ན་ང་ཡང་ལས་ཀྱིས་འདིར་ཁྲིད་པ་ཡིན་སྙམ་པ་དང་། ནམ་མཁའ་ནས་སྒྲ་བྱུང་སྟེ་བཅིངས་པ་གང་ཡིན་པ་གྲོལ་བར་འགྱུར་རོ། །གྲོལ་བ་གང་ཡིན་པ་བཅིངས་པ་འགྱུར་རོ་ཟེར་ནས་འཁོར་ལོ་རང་གི་མགོ་ཐོག་ཏུ་བྱུང་སྟེ་བསྐོར་བས་བཟོད་ཐབས་མེད་པའི་སྡུག་བསྔལ་བྱུང་ངོ། །དེའི་རྐྱེན་གྱིས་རང་འདྲའི་སེམས་ཅན་རྣམས་ལ་སྙིང་རྗེ་དྲག་པོ་སྐྱེས། འདི་ལྟ་བུའི་སྡུག་བསྔལ་མྱོང་བའི་སེམས་ཅན་མང་པོ་ཡོད་པས་སྙིང་རེ་རྗེ། དེ་དག་གི་སྡིག་པ་དང་སྡུག་བསྔལ་བདག་ལ་འབྱུང་བར་ཤོག་ཅིག་སྙམ་དུ་དགོངས་པ་དང་། དེ་མ་ཐག་འཁོར་ལོ་ནམ་མཁའ་ལ་འཕུར་ཏེ་སྡུག་བསྔལ་ལས་གྲོལ་ལོ། །ཞེས་སྔོན་མ་ཞིག་ལ་བཤད་པ་ལྟར་རེད། རྒྱལ་བས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་ཐམས་ཅད་གང་གི་དོན་དུ་གསུངས་ན། དངོས་སམ་བརྒྱུད་ནས་བྱང་ཆུབ་ཀྱི་སེམས་སྟོང་ཉིད་སྙིང་རྗེའི་སྙིང་པོ་ཅན་དེ་བསྐྱེད་པའི་ཐབས་སུ་གསུངས་པ་རེད། བྱང་ཆུབ་ཀྱི་སེམས་རིན་པོ་ཆེ་འདི་དང་བྲལ་ན་གཞན་ཆོས་ཟབ་མོ་ཅི་བསྒྲུབས་ཀྱང་སངས་རྒྱས་འཐོབ་པའི་དངོས་རྒྱུར་འགྱུར་བའི་ཕན་ཐོགས་ཡོད་པ་མ་རེད། བསྐྱེད་རྫོགས་དང་གསང་སྔགས་ཀྱི་ཉམས་ལེན་ལ་བྱང་ཆུབ་ཀྱི་སེམས་འདིས་ཟིན་ན་ཚེ་འདི་ལ་རྫོགས་པའི་སངས་རྒྱས་འཐོབ་པའི་རྒྱུར་འགྲོ་ནུས་པ་དང་། བྱང་ཆུབ་ཀྱི་སེམས་དང་བྲལ་ན་ལྷ་སྒོམ་སྔགས་བཟླས་ཅི་འདྲ་བྱེད་ཀྱང་མུ་སྟེགས་པའི་ལམ་དང་ཁྱད་ཆེན་པོ་ཡོད་པ་མ་རེད། མུ་སྟེགས་པ་ལའང་ལྷ་སྒོམ་རྒྱུ་དང་སྔགས་བཟླ་རྒྱུ། རྩ་རླུང་སྒོམ་པ། རྒྱུ་འབྲས་སྤང་བླང་བྱེད་པ་སོགས་ཡོད་ཀྱང་སྐྱབས་འགྲོ་དང་སེམས་བསྐྱེད་འདི་གཉིས་མེད་པས་འཁོར་བའི་ནང་ནས་ཐར་མི་ཐུབ་པ་རེད། བདག་བས་གཞན་གཅེས་སྒོམ་དུས་བདག་ལ་སྡུག་བསྔལ་གང་བྱུང་ན་བཟོད། སེམས་ཅན་ཐམས་ཅད་ལ་སྡུག་བསྔལ་ཡོང་མི་འདོད། སེམས་ཅན་ཐམས་ཅད་ཀྱི་སྡུག་བསྔལ་དེ་བདག་ལ་སྨིན་པར་ཤོག བདག་གི་བདེ་བ་དང་བདེ་བའི་རྒྱུ་ཐམས་ཅད་སེམས་ཅན་ཐམས་ཅད་ལ་རྫོགས་པར་ཤོག་ཅིག་བསམ་པར་མ་ཟད། དངོས་སུའང་དེ་འདྲ་ཉམས་སུ་ལེན་དགོས་པ་རེད། དེས་ན་བདག་བས་གཞན་གཅེས་ཀྱི་བསམ་པ་འདི་ནུས་པ་ཤིན་ཏུ་ཆེ་བ་ཡིན་པས་རང་འདྲའི་སེམས་ཅན་དཔག་ཏུ་མེད་པ་ཡོད་པ་དེ་དག་ལ་སྙིང་རྗེ་ཆེན་པོ་བསྐྱེད་དོ། །དེ་དག་གི་སྡུག་བསྔལ་ཁྱོད་རང་གི་སྡུག་བསྔལ་འདིའི་སྣོན་མར་ལོང་ལ་དགའ་བ་སྒོམས་ཤིག ཅེས་གུ་རུ་རིན་པོ་ཆེས་དེ་སྐད་གསུངས་པའི་གསུང་ཐོས་པ་ཙམ་གྱིས་རང་འདྲའི་སེམས་ཅན་ཐམས་ཅད་ལ་སྙིང་རྗེ་དྲག་པོ་བསྐྱེད་ཅིང་། བདེ་སྡུག་གཏོང་ལེན་གྱི་སྙིང་སྟོབས་བསྐྱེད་པ་ཙམ་གྱིས་ལས་ངན་སྐད་ཅིག་ལ་ཟད། འཇིགས་ཤིང་སྐྲག་པ་ལ་རྨི་ལམ་གྱི་སྣང་བ་ལྟར་བདེན་མེད་དུ་ཡལ་ནས་ཨོ་རྒྱན་ཆེན་པོ་དང་གཉིས་སུ་མེད་པར་སངས་རྒྱས། གསང་སྔགས་ཀྱི་མྱུར་ལམ་དང་མན་ངག་ཁྱད་པར་ཅན་འདི་དག་གི་སྐབས་སུ་གཙོ་བོ་དད་པ་དང་དག་སྣང་ཡོད་པ་གལ་ཆེ། རིག་འཛིན་མཁའ་སྤྱོད་གྲུབ་པའི་མྱུར་ལམ་ཞེས་པ་འཆི་རན་ཁར། ཕྱི་ནང་སྣོད་བཅུད་ཐམས་ཅད་ཟངས་མདོག་དཔལ་རིར་གསལ་ནུས་ན་རབ་རེད། མ་ནུས་ཀྱང་རང་ཉིད་རྡོ་རྗེ་རྣལ་འབྱོར་མར་གསལ་བ་དེ་སྤྱི་གཙུག་གི་གུ་རུ་རིན་པོ་ཆེའི་ཐུགས་ཀར་ཐིམ་པར་བསམ་ནས་ཐུགས་ཡིད་དབྱེར་མེད་དུ་མཉམ་པར་བཞག་ནུས་ན་ངན་སོང་དུ་མི་འགྲོ་བ་དང་། བར་དོའི་སྐབས་ན་གུ་རུ་རིན་པོ་ཆེ་བྱོན་ནས་དབང་བསྐུར་གདམས་པ་གནང་ངོ་སྤྲད་ནས་གྲོལ་འགྲོ་བ་དང་། ཐུགས་ཡིད་དབྱེར་མེད་བསྲེ་རྒྱུ་དཀའ་མོ་ཞིག་ཡིན་རྒྱུའི་འདང་རྒྱག་མི་ཉན། ཐོད་པའི་སྐྲ་རྩེ་ནས་མར་ཆུ་ཐིགས་གཅིག་པང་ཐོག་ཏུ་ལྷུང་བའི་ཡུན་ཙམ་ལ་ཐུགས་ཡིད་དབྱེར་མེད་ལ་མཉམ་པར་བཞག་ནུས་ན་བསྐལ་པ་གཅིག་གི་སྡིག་སྒྲིབ་དག་པར་གསུངས་ཡོད་པས། སྒོམ་དགོས་ས་ཨེ་རེད། དེ་ལྟ་བུ་ཨོ་རྒྱན་ཆེན་པོ་དང་གཉིས་སུ་མེད་པར་སངས་རྒྱས་ནས། དུད་འགྲོའི་རིགས་ཀྱི་སེམས་ཅན་ཐམས་ཅད་ལ་འོད་ཟེར་སྤྲོས་པས་དེ་དག་གཅིག་ཀྱང་མ་ལུས་པ་བྱ་ཁྱུ་ལ་འུར་རྡོ་འཕངས་པ་ལྟར་རིག་འཛིན་རྣམ་པ་བཞིའི་གྲལ་དུ་དྲངས་བར་བསམ་ལ། ཞེས་རིག་འཛིན་རྣམ་པ་བཞི་ནི་སྔར་བསྐྱེད་རྫོགས་ཀྱི་སྐབས་ཤིག་ཏུ་བཤད་མྱོང་ཡང་། རྣམ་སྨིན་རིག་འཛིན་དང་། ཚེ་དབང་རིག་འཛིན། ཕྱག་ཆེན་རིག་འཛིན། ལྷུན་གྲུབ་རིག་འཛིན་ཏེ་བཞི་རེད། བཀའ་སྡེ་ཟུར་པའི་ལུགས་ལྟར་ན། རྣམ་སྨིན་རིག་འཛིན་ནི། རྣམ་སྨིན་གྱི་ལུས་རྟེན་རགས་པ་དང་མ་བྲལ་ཞིང་སེམས་ཡི་དམ་གྱི་ལྷ་སྐུར་སྨིན་པ། ལུས་རྒྱ་དེ་དང་བྲལ་མ་ཐག་ཏུ་ཕྱག་ཆེན་རིག་འཛིན་དུ་སྦྱོར་ངེས་པ་སྟེ་ཆོས་གསུམ་ལྡན་གྱི་མཐོང་ལམ་པ་ཡིན། འདི་ལ་རྣམ་སྨིན་གྱི་ལུས་རྒྱས་འཆིང་བའི་ཆ་ནས་རྣམ་སྨིན་དང་། སེམས་ལྷ་སྐུར་རྣམ་པར་སྨིན་པའི་ཆ་ནས་རིག་འཛིན་ཞེས་གསུངས་པ་རེད། ཚེ་དབང་རིག་འཛིན་ནི་ལུས་ཟག་མེད་དུ་གྱུར་པའི་མཐོང་ལམ་པ་ཞིག་ཡིན་དགོས། ཡང་ན་རྣམ་སྨིན་རིག་འཛིན་དང་ཡང་ན་ཚེ་དབང་རིག་འཛིན་ནས་ཕྱག་ཆེན་དུ་བསྒྱུར་དགོས། མཐོང་ལམ་གྱི་རྟེན་གཅིག་ལ་རིག་འཛིན་གཉིས་མཉམ་དུ་ཐོབ་པའི་རྣམ་བཞག་ཡོད་པ་མ་རེད། འདིའི་སྐབས་ནས་གསུངས་པའི་ཟག་མེད་ཅེས་པའི་ཟག་པ་དེ་ལ་བཞི་ཡོད་དེ། ཉོན་མོངས་པའི་ཟག་པ། ལུས་ཀྱི་ཟག་པ། ཁམས་ཀྱི་ཟག་པ། སྐྱེ་གནས་ཀྱི་ཟག་པ་བཞི་ཡིན་ལ། ཕྱིན་ཅི་ལོག་གི་སྒྲོ་འདོགས་ཉོན་མོངས་པའི་ཟག་པ། ལུས་རང་དབང་མེད་པར་འདོར་བ་ལུས་ཀྱི་ཟག་པ། ཁམས་མི་བདེ་བ་རང་དབང་མེད་པར་འབྱུང་བ་ཁམས་ཀྱི་ཟག་པ། ལས་ཀྱི་དབང་གིས་རང་དབང་མེད་པར་ལུས་ལེན་པ་སྐྱེ་གནས་ཀྱི་ཟག་པ། དེའི་ནང་ནས་དང་པོ་ཉོན་མོངས་པའི་ཟག་པ་དེ་རྩ་བ་དང་། གཞན་གསུམ་པོ་དེའི་ཡན་ལག་རེད། དེས་ན་སྐབས་འདིའི་བཤད་བྱ་རྣམ་སྨིན་རིག་འཛིན་དང་ཚེ་དབང་རིག་འཛིན་གཉིས་ཀའང་། དོན་གྱི་འོད་གསལ་མཚན་ཉིད་པ་ཐོབ་པ་དང་། རྩ་བའི་ཟག་པ་ཟད་པའི་སྤངས་རྟོགས་ཀྱི་ཆ་ནས་ཁྱད་པར་མེད། འོན་ཀྱང་དབང་པོ་རྣོ་རྟུལ་གྱི་དབང་གིས་རགས་པའི་ལུས་དེ་ཡེ་ཤེས་ཀྱིས་མེས་སྦྱོང་ནུས་མི་ནུས་སམ། གོང་ནས་བཤད་པའི་་ཡན་ལག་གི་ཟག་པ་གསུམ་ཟད་མ་ཟད་ཀྱིས་ཕྱེ་བ་རེད། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་འགྱུར་བ་ཡིན། །ཞེས་གསུངས་པས། འདི་གཉིས་དབང་པོ་རྣོ་རྟུལ་གྱིས་ཁྱད་པར་ཡིན་པས་གོང་དུ་བཤད་པ་ལྟར་གང་ཟག་གཅིག་གིས་རིག་འཛིན་དེ་གཉིས་ཀ་བགྲོད་མི་དགོས་ཏེ་མཐོང་ལམ་ལན་གཉིས་ཐོབ་པ་མི་སྲིད་པས་སོ། །ཕྱག་ཆེན་རིག་འཛིན་དེ་ཚེ་དབང་རིག་འཛིན་གྱི་སྐབས་ལས་ཀྱང་གསལ་བརྟན་དག་གསུམ་གྱིས་ཁྱད་པར་འཕགས་ནས། མངོན་ཤེས་ཡོད་པས་ལོངས་སྐུའི་ཞིང་དང་མཉམ་པར་འགྲོ་བའི་དོན་བྱེད་ནུས་པ་དང་། འདི་སྒོམ་ལམ་ས་དགུའི་སྐབས་ལ་འཇོག་པ་རེད། ལྷུན་གྲུབ་རིག་འཛིན་ནི་མཐའ་ལམ་ས་བཅུའི་ཁྱད་པར་གྱི་ལམ་ལ་གནས་པ། སངས་རྒྱས་ལོངས་སྤྱོད་རྫོགས་སྐུ་དང་གནས་ཚུལ་མཐུན་པའི་ལུས་ཅན་ཡིན་པ་དང་། རྟོགས་པ་དང་ཕྲིན་ལས་ཀྱི་ཐད་ན་སངས་རྒྱས་ཉིད་དང་ཕྱོགས་མཚུངས་པ་ཞིག་ཡིན། ཕྱག་ཆེན་རིག་འཛིན་དང་ལྷུན་གྲུབ་རིག་འཛིན་འདི་གཉིས་ཀྱི་སྐབས་སྒྲིབ་པ་ཕྲ་མོ་སྤོང་བར་གསུངས་པ་ནི་ཤེས་སྒྲིབ་ཕྲ་མོ་ཡིན་དགོས་པ་རེད། ཉོན་སྒྲིབ་ཀུན་བཏགས་ལྷན་སྐྱེས་མ་ཕྱེ་བར་མཐོང་ལམ་ནས་སྤོང་བར་གསུངས་པ་རེད། རིག་འཛིན་རྣམ་པ་བཞིའི་བགྲོད་ཚུལ་ལ། གང་ཟག་དབང་པོ་རྣོ་རྟུལ་བློ་ཆེ་ཆུང་གིས་མཐའ་གཅིག་ཏུ་རིམ་བགྲོད་དགོས་པའི་ངེས་པ་མེད། ཐོད་རྒལ་བའང་ཡོད་པར་གསུངས་ཡོད། ཀུན་མཁྱེན་ཡབ་སྲས་ཀྱི་རང་ལུགས་དཀའ་བའི་གནད་ཐམས་ཅད་ཀུན་མཁྱེན་ཡབ་སྲས་ཀྱི་གཞུང་ལ་ཞིབ་པར་གཟིགས་ན་མཁྱེན་ཐུབ། དེ་ལྟ་བུའི་རིག་འཛིན་རྣམ་པ་བཞིའི་གྲལ་དུ་དྲངས་པར་བསམ་ལ་རྟོག་པའི་སྤུན་ཐག་བཅད་ནས་དྲན་ཤེས་ཁ་ཡན་དུ་གློད་པར་བྱའོ། །ཞེས་གསུངས་ན་རྟོག་པའི་སྤུན་ཐག་བཅད་ནས་སམ་རྣམ་རྟོག་སྣ་ཚོགས་ཀྱི་ཤུན་པ་དོར་ནས་རང་བབས་སྤྲོས་པ་བྲལ་བའི་ངང་དུ་གློད་པར་བྱའོ། །དེ་རིང་གི་ཁྲིད་རྐང་འདི་ཁྲིད་རྐང་གསུམ་པ་རིགས་དྲུག་གི་སེམས་ཅན་ལ་སྙིང་རྗེ་བྱ་ཞིང་། ལས་སུ་དཀོན་མཆོག་མཆོད་ཅིང་དཀར་པོ་དགེ་བའི་ལས་བསྐྱེད་པ་ཞེས་པའི་ནང་གི་ཁར་རྩང་ཁེ་ཉིན་ཚ་དམྱལ་བརྒྱད་དང་གྲང་དམྱལ་བརྒྱད། ཡི་དྭགས་དང་བཅས་པའི་སྡུག་བསྔལ་དྲན་ནས་སྙིང་རྗེའི་སེམས་དང་བཅས་པ་བསྒོམས་ཤིང་། དེ་རིང་ཉེ་འཁོར་ལྷག་པ་བཅུ་དྲུག་ཉི་ཚེ་བ་དང་བཅས་པའི་དམྱལ་བའི་གནས་གྱི་སྡུག་བསྔལ་རྣམས་དང་། དེའི་སྟེང་དུད་འགྲོའི་སྡུག་བསྔལ། དེ་ལ་ཡང་བྱིངས་ན་གནས་པ་དང་ཁ་འཐོར་བའི་རིགས་གཉིས་ཡོད་པ་དེ་དག་གི་སྡུག་བསྔལ་སེམས་ཐོག་ཏུ་ལེན་པ་དང་། ལུས་ཐོག་ཏུ་མྱོང་གིན་ཡོད་པར་བསམ་ནས་སེམས་ཅན་དེ་དག་ལ་སྙིང་རྗེ་ཤས་མི་བཟོད་པ་སྐྱེས་ཏེ། མཐར་ཐུག་སློབ་དཔོན་ཆེན་པོའི་ཐུགས་དང་རང་སེམས་དབྱེར་མེད་དུ་བསྲེས་ནས་མི་དམིགས་པའི་ཏིང་འཛིན་ལ་མཉམ་པར་བཞག་པ་དང་། ངན་འགྲོའི་སེམས་ཅན་དེ་དག་འདྲེན་པའི་དེད་དཔོན་དུ་འགྱུར་བའི་སྨོན་ལམ་འདེབས་པ་དེ་ལྟར་བྱེད་དགོས། དེ་རིང་ཕྱི་དྲོ་དང་དགོང་མོར་ཉེ་འཁོར་བ་སྒོམས། སང་ཉིན་སྔ་དྲོར་ཡང་རྡོར་སེམས་བསྒོམ་བཟླས་དང་ཕྱི་དྲོ་དང་དགོང་མོར་དུད་འགྲོའི་སྡུག་བསྔལ་སེམས་ལ་ལེན་རྒྱུའི་ཁྲིད་སྦྱོང་དེ་ལྟར་བྱེད། འདི་ན་རྟོག་པའི་སྤུན་ཐག་བཅད་ནས་དྲན་ཤེས་ཁ་ཡན་དུ་གློད་པར་བྱའོ། །ཞེས་སྤུན་པ་ཞེས་པ་ཤུན་པ་ལ་གོ་བས། རིག་པ་རྗེན་ལ་བུད་པའི་ལྷག་མཐོང་གི་ཡེ་ཤེས་ཁྱད་པར་ཅན་བཤད་ཡོང་དུས། ཉམས་ཞེན་གྱི་ཤུན་པ་དང་བྲལ་བ། འབྲས་སྣེའུ་ལ་དཔེར་བཞག་ནས་གསུངས་པ་དེ་དང་ཕྱོགས་མཚུངས་ཀྱིས་ཆོས་ཅན་སེམས་ཀྱི་རྣམ་རྟོག་གི་ཤུན་པ་མེད་པར། ཆོས་ཉིད་མ་བཅོས་པའི་ངང་དུ་གློད་དེ། ཁ་ཡན་ཞེས་པ་ཁོ་རང་ཇི་ལྟར་ཡིན་ན་དེ་ལྟའི་ངང་དུ་ཞོག་གསུངས་པ་རེད། འདི་ལས་དང་པོ་བ་ཞིག་ཡིན་ན་སེམས་བཞག་ཐབས་དང་། ཉམས་མྱོང་ཅན་ཞིག་ལ་མཚོན་ན་ཐབས་བྱུང་གི་ཡེ་ཤེས་གཉིས་ཀ་ལ་སྦྱར་ཆོག་སྙམ། ཡང་ན་སྤུན་ཐག་གསུངས་རྒྱུའི་ཚིག་འདི་འགྲེལ་སྟངས་གཞན་ཞིག་བྱས་ནའང་འགལ་བ་མི་ཆེ་སྟེ། དཔེར་ན་ཐགས་འཐག་པའི་ཚེ་རྒྱུ་སྤུན་གཉིས་དགོས་པའི་ནང་གི་སྤུན་གྱི་ཐག་པ་དེ་བཅད་ན། དེའི་རྩོམ་གཞིའམ་ སྤྲོ་གཞི་མེད་པས་བྱ་བའི་རྒྱུན་ཆད་པ་བཞིན་དུ་རེད་ཟེར་ནའང་མི་ཆོག་པར་མེད་པས་འགྲེལ་ལོག་ངོ་མ་ཞིག་མ་རེད། དེ་བཞིན་གཤེགས་པའི་གསུང་གཅིག་ལ་དོན་སོ་སོར་འཇལ་བ་ཡོད་པ་རེད། རིག་འཛིན་འཇིགས་མེད་གླིང་པའི་གསུང་འདི་ཚོ་རྒྱལ་བའི་གསུང་དང་གཉིས་སུ་མེད་པ་རེད། དེ་བཞིན་གཤེགས་པས་གྲོང་ཁྱེར་གྱི་སྒོ་ནས་སྒྲིབ་པ་སངས་པ་ཞེས་གཅིག་གསུང་དུས། འགའ་རེས་དུག་གིས་སྒྲིབ་པ་ལས་སངས་པ་གོ་བ་དང་། འགའ་རེས་འདུག་ལུགས་མ་རེད་པས་སྒྲིབ་པ་ལས་སངས་པ་གོ་བ་དང་། འགའ་རེས་རིགས་སྔགས་ཀྱིས་སྒྲིབ་པ་ལས་སངས་པ་གོ་བ་དེ་ལྟར་ཡིན་པ་དང་། ནད་པ་རྣམས་ཀྱིས། རིན་ཆེན་སྲོག་དང་མ་བྲལ་ན། །སྒྱུ་མའི་ནོར་རྫས་བཙལ་བས་ཆོག །ནད་གཡོག་རྣམས་ཀྱིས། སྔ་མ་དེ་ལ་ནན་ཏན་ཉོན། །ཕྱི་མ་ཅི་འགྱུར་ཆ་ཡང་མེད། །སྨན་པ་རྣམས་ཀྱིས། སྨན་པའི་མཆོག་ནི་སྙིང་རྗེ་སྟེ། །ནད་པ་དེ་སོས་སྨན་པའི་དྲིན། །ཞེས་པ་གོ་སོང་བ་རེད། དེ་བཞིན་གཤེགས་པའི་གསུང་གཅིག་གི་སྒྲ་ལ་སེམས་ཅན་མང་པོའི་བསམ་པ་དང་མཐུན་པའི་ཆོས་ལ་སོ་སོར་གོ་རྒྱུའི་སྣང་བ་དེ། གསུང་མཆོག་དམ་པའི་རང་བཞིན་སྒྲ་སྐད་དུ་སྣང་བ་ཐམས་ཅད་ཀྱི་རྒྱལ་པོ་ཡིན། མདོར་ན་འདིའི་སྐབས་ཀྱི་གོ་བ་རྟོག་པའི་སྤུན་ཐག་བཅད་པའམ། སེམས་རྣམ་རྟོག་གི་འཁྲུལ་བའི་རྒྱུན་བཅད་དེ། དཔེ་ཐོག་ཏུ་དཔེར་བཞག་ན། པི་ཝང་གི་རྒྱུན་ཐག་བཅད་ན་སྒྲ་འབྱུང་བ་མཚམས་འཇོག་པ་བཞིན་དུ། མ་འཁྲུལ་རང་སར་གནས་པའི་དྲན་ཤེས་ཁ་ཡན་དུ་གློད་ཅེས་དྲན་པ་དང་མ་བྲལ་བའི་ཡུལ་མེད་རང་གསལ་གྱི་ཤེས་པ་བཅོས་སླད་མེད་པར་ཁ་ཡན་དུ་རང་བབས་སུ་གློད་དེ་ཞོག་དང་། དཔེར་ན་ཆུ་མ་བསྒུལ་ན་དྭངས་པ་བཞིན་དུ། མ་འཁྲུལ་དོན་གྱི་ཡེ་ཤེས་ལྷངས་ལ་བུད་ཡོང་ཞེས་གསུངས་པ་རེད། འདི་ཚོ་ཕར་བལྟས་ན་གོ་བདེ་མོ་འདྲ་རེད། སྤོམ་བཤད་ཡོམ་ཡུག་གསུང་རྒྱུ་ལྟ་བུ། དེ་ལྟར་བྱས་ནས་མགྱོགས་པ་མཆོང་འགྲོ་ན་ཆོག་ཀྱང་། ཚིག་རེར་དོན་རེའི་གོ་དོན་ཞིབ་མོར་བྱེད་ན། རྡོ་རྗེའི་གསུང་གི་ཚིག་བརླིང་ཞིང་དོན་ཟབ་པ་ཡིན་པས། འདི་ནས་དྲན་ཤེས་ཁ་ཡན་དུ་གློད་ཅེས་པའི་དྲན་དང་ཤེས་བཞིན་གཉི་ག་དང་། ཁ་ཡན་ཏུ་གློད་གསུང་པའི་ཚིགས་འདི་ཚོས་དབུ་ཕྱག་རྫོགས་གསུམ་གྱི་ལྟ་བ་དང་། ཁྱད་པར་དུ་རྫོགས་ཆེན་སེམས་ཕྱོགས་ཀྱི་མན་ངག་གི་སྙིང་དོན་ཚང་བར་བསྡུས་པར་མ་ཟད། འདི་ཐུན་མོང་དང་ཐུན་མིན་གྱི་གང་ཟག་དབང་པོ་རྣོ་རྟུལ་ཚང་མ་དང་འཕྲོད་པའི་གོ་བ་ལེན་སྟངས་བྱ་རྒྱུར་ཡོད་པའི་ཐོག་ནས་སྐྱེས་བུ་གསུམ་གྱི་ལམ་རིམ་ཆ་ཚང་གནད་ཀྱི་སྙིང་དོན་བསྡུས་པ་ཞིག་ཀྱང་ཡིན། དེ་ལྟར་མཉམ་པར་བཞག་པ་དེ་ལས་ལངས་པའི་རྗེས་ཐོབ་ཡིན་ནའང་། འཁྲུལ་བ་རྒྱ་འབྱམས་སུ་མི་གཏོང་བར་དྲན་པ་དང་ཤེས་བཞིན་གྱིས་བྱ་རས་འཚོ་དགོས། དྲན་པ་དང་ཤེས་བཞིན་བག་ཡོད་གསུམ་དང་མ་བྲལ་ན་གང་ལྟར་ཡང་ཉེན་སྐྱོན་ཆེན་པོའི་གཡང་སར་མི་ལྷུང་། གནའ་སྔ་མོ་ཞིག་ལ་རྒྱ་གར་གྱི་ཡུལ་འཕགས་རྒྱལ་ཞེས་པའི་ཡུལ་དུ་ནད་ཡམས་ཆེན་པོ་ཞིག་བྱུང་ནས་ཐབས་ཇི་ལྟར་བྱས་ཀྱང་ནད་དེ་ཆད་མ་ཐུབ་པ་དང་། ཡུལ་དེའི་རྒྱལ་པོ་གཏུམ་པོ་རབ་སྣང་ཟེར་བ་ཞིག་ཡོད་པ་དེ་ཁོའི་མངའ་འབངས་ནད་ངན་ན་བས་སེམས་ཁོང་དུ་ཆུད་ནས་ཅི་བྱེད་འདི་བྱེད་མེད་པར་འདུག་འདུག་ནས། ཉིན་ཞིག་རྒྱལ་པོས་ནད་འདི་དྲག་ཐབས་བྱེད་དགོས་ཀྱི། ཐབས་སུ་ལ་ཡོད་ན་ང་ལ་བརྗོད་དང་བརྔན་པ་ཅི་དགོས་སྟེར་ཟེར་བ་ན། བདག་ཅག་གི་སྟོན་པ་སྐུ་བཞུགས་པའི་སྐབས་ཡིན་པས་སངས་རྒྱས་ཀྱིས་མངོན་པར་ཤེས་པས་དགོངས་ཏེ། ཡུལ་དེའི་མི་རྣམས་འཕགས་པ་ཀ་ཏྱ་ནའི་གདུལ་བྱ་ཡིན་པར་གཟིགས་ནས། ཀ་ཏྱ་ན་ལ་ཁྱོད་ཀྱིས་རྒྱལ་པོ་འཁོར་བཅས་ལ་སོམས་ཤིག་ཅེས་གསུངས་པ་དང་། འཕགས་པ་ཀ་ཏྱ་ནས་ཁོང་གིས་གདུལ་དགོས་པ་དགོངས་ནས། འཁོར་དང་བཅས་པ་ཡུལ་འཕགས་རྒྱལ་དུ་བྱོན་པ་ན། གྲོང་ཁྱེར་དུ་ཞུགས་མ་ཐག་པར་ནད་ཀྱི་ཕྱེད་ཀ་རང་ཞི་རུ་སོང་ནས་མེད་པར་གྱུར་པ་ན། གྲོང་ཁྱེར་གྱི་སྒོ་སྲུང་བ་སོགས་ཡུལ་གྱི་མི་འགའ་རེས། རྒྱལ་པོ་ལ་དེ་རིང་གྲོང་ཁྱེར་དུ་སྔར་མེད་པའི་དགེ་སྦྱོང་འགའ་ཞིག་བྱོན་བྱུང་ལ། བྱོན་པ་ན་ནད་ཀྱི་ཕྱེད་ཀ་མེད་པར་གྱུར་སོང་ཞེས་སྙན་ཞུ་ཕུལ་བ་ན། རྒྱལ་པོས་ཤིན་ཏུ་ལེགས་པས་དེ་རྣམས་ལ་བསྙེན་་བཀུར་གྱིས་ཞེས་ཟེར་བ་ན། དེ་དང་མཉམ་དུ་ཕྱི་རོལ་པའི་བྲམ་ཟེ་འགའ་ཞིག་ཀྱང་འོངས་ནས། ངེད་རྣམས་ཀྱིས་ནད་ཞི་བར་བྱས་པས་ནད་ཕྱེད་ཀ་དྲག་སོང་། ད་མྱུར་ཏུ་བཀུར་སྟི་གྱིས་དང་ཚང་མ་མེད་པར་བྱ་འོང་ཟེར། དགེ་སློང་རྣམས་ཀྱིས་གཞན་ཅི་ཡང་མ་གསུངས་ལ་བྱོན་རན་པ་ན། རྒྱལ་པོ་ལ་ནད་མེད་པར་གྱུར་ཅིག་ཅེས་གསུངས་ནས་བྱོན་སོང་ངོ་། །རྒྱལ་པོས་བློན་པོ་རྣམས་ལ་ནད་མེད་པ་འདི་དགེ་སྦྱོང་རྣམས་ཀྱིས་ཁོང་རྣམས་ཀྱིས་བྱས་པ་ཡིན་ཟེར་ལ། བྲམ་ཟེ་རྣམས་ཀྱིས་ཁོང་རྣམས་ཀྱིས་བྱས་པ་ཡིན་ཟེར། ནད་དྲག་ཐབས་ངོ་མ་བྱེད་མཁན་སུ་ཡིན་ཤེས་དགོས་པས། ཁྱེད་རྣམས་ཀྱིས་སང་ཉིན་ཕྱོགས་གཉིས་ཀ་གདན་དྲངས་ནས་ཚང་མ་ས་མི་གཙང་བ་གླང་པོ་ཆེ་བཏགས་ས་ན་འདུག་བཅུག་ལ། ཟས་དེ་བས་ངན་མེད་པ་ཞིག་བྱིན་ལ་ཅི་ཟེར་ལྟོས་ཟེར་བ་ན། བློན་པོ་རྣམས་ཀྱིས་དེ་བཞིན་དུ་བྱས་པས། སྒོ་སྲུང་རྣམས་ཀྱིས་བྲམ་ཟེ་རྣམས་ལ་ཁྱེད་རྣམས་ཟས་ཀྱིས་ཚིམ་མམ་སོགས་དྲིས་པས། བྲམ་ཟེ་རྣམས་ཁོང་ཁྲོ་བས། ཅི་འདྲའི་རྒྱལ་པོ་ཐ་ཆད། ཆོས་མིན་གྱི་བྱ་བ་བྱེད་པ་ལ་དགའ་བ། ངེད་མཆོད་གནས་རྣམས་ལ་མི་གཙང་བའི་སར་ཟས་ངན་པ་དེ་འདྲ་སྦྱིན་ཞེས་ཟེར་ནས་སོང་། དགེ་སློང་རྣམས་ལ་དེ་བཞིན་དུ་དྲིས་པས། དགེ་སློང་རྣམས་ཀྱིས་སྦྱིན་པ་པོས་ནི་བྱིན། ལེན་པ་པོས་བླངས་ཏེ་ཟོས། མྱོང་བ་རྣམས་ཚིམས་ཏེ་ཉིན་གཅིག་གི་བསོད་སྙོམས་རེད་སོང་ཞེས་གསུངས་ནས་བྱོན་པ་དང་། འཁོར་རྣམས་ཀྱིས་དེའི་གནས་ཚུལ་རྒྱལ་པོ་ལ་ཞུས། རྒྱལ་པོས་ཡང་ཁྱེད་རྣམས་ཀྱིས་སང་ཉིན་དེ་རྣམས་ས་ཆ་གཙང་མ་ཤིན་ཏུ་སྐྱིད་པ་ཞིག་ལ་ཟས་གང་ཞིམ་བྱིན་ལ་ཅི་ཟེར་ལྟོས་ཟེར་བ་ན། དེ་ལྟར་བྱེད་པས་བྲམ་ཟེ་རྣམས་ཀྱིས་དགའ་ནས་རྒྱལ་རིགས་སྤྱི་བོ་ནས་དབང་བསྐུར་བ་ཟེར་རྒྱུ་བོ་དེ་འདྲ་མིན་ན་ཅི་འདྲ་ཡིན། ཞིམ་ལ་ཚིམ་སོང་ཟེར་བ་དང་། དགེ་སློང་རྣམས་ཀྱིས་སྔར་བཞིན། སྦྱིན་པ་པོས་བྱིན། ལེན་པ་པོས་ནི་བླངས་ཏེ་ཟོས། མྱོང་བ་རྣམས་ནི་ཚིམས་ཉིན་གཅིག་གི་བསོད་སྙོམས་རེད་སོང་ཞེས་གསུངས་པ་རྣམས་རྒྱལ་པོ་ལ་ཞུས་པས། རྒྱལ་པོས་ད་དུང་བརྟག་དཔྱད་བྱ་དགོས་ཟེར་ནས་ཡུན་རིང་བརྟགས་པས། ཡོན་གནས་བཟང་བ་མཆོག་ཏུ་གྱུར་པ་ནང་པའི་ཤཱཀྱའི་དགེ་སྦྱོང་རྣམས་རེད་ཕྱི་རོལ་པའི་བྲམ་ཟེ་རྣམས་རེད་མི་འདུག་བསམ་ནས། འཕགས་པ་ཀ་ཏྱ་ནའི་མདུན་དུ་སོང་སྟེ་ཕྱག་འཚལ་ནས་སང་ཉིན་ཁྱེད་འཁོར་བཅས་རྒྱལ་པོ་བདག་གིས་གདུགས་ཚོད་ལ་སྤྱན་འདྲེན་ན་ཕེབས་པར་མཛོད་ཞུས་པས། འཕགས་པས་ཞལ་གྱིས་བཞེས་སོ། །ཕྱི་ཉིན་རྒྱལ་པོས་གྲ་སྒྲིག་གི་བཀོད་པ་ཤིན་ཏུ་བཟང་པོར་བྱས་ཏེ་གདན་དྲངས་པ་ན། ཕྱོགས་གཅིག་ན་གླུ་གར་བྱེད། ཕྱོགས་གཅིག་ན་རོལ་མོ་སྣ་ཚོགས་འབུད་བཀྲོལ་བྱས་ནས་གསོལ་སྟོན་དྲངས་པ་ན། དགེ་སློང་རྣམས་ཀྱིས་དབང་པོའི་སྒོ་བསྡམ་བཞིན་གུང་ཚིགས་གསོལ་ཟིན་པ་དང་རྒྱལ་པོས་འཕགས་པ་ལ་ཞུས་ཏེ་འཕགས་པ་རྣམས། གར་འཁྲབ་པ་མཛེས་སམ། གླུ་བླངས་པ་རྣམས་སྙན་ནམ། ཞེས་དྲིས་པས་འཕགས་པ་རྣམས་ཀྱིས་ཁྱེད་ཀྱིས་གླུ་གར་མཐོང་ཐོས་མཁན་རྣམས་ལ་དྲིས་གསུངས་པ་ན། རྒྱལ་པོས་ཁྱེད་རྣམས་ཀྱིས་ཅིའི་ཕྱིར་གླུ་གར་མ་མཐོང་མ་ཐོས་པ་ཡིན་ཞེས་དྲིས་པས། དགེ་སློང་རྣམས་ཀྱིས་དབང་པོའི་སྒོ་བསྡམ་པས་མཐོང་ཐོས་མ་བྱུང་བ་ཡིན་གསུངས་པར། རྒྱལ་པོས་དེ་ཙམ་བདེན་དུ་མ་བཟུང་བ་ལ། འོ་ན་སྲོག་ཆད་བཅད་ནས་གསོད་རན་པའི་བཙོན་པ་ཨེ་ཡོད་དྲིས་པས། རྒྱལ་པོས་ཡོད་ཟེར། འོ་ན་དེ་ལ་ཏིལ་མར་གྱི་མར་ཁུས་བཀང་བའི་སྣོད་ལག་ཏུ་གཏོད་ལ། ཤན་པ་རལ་གྲི་ཐོགས་པ་རྣམས་ཀྱིས་ཁྲིད་དེ་གྲོང་ཁྱེར་ལ་སྐོར་བར་བྱེད་བཅུག་ནས། མར་ཁུ་འདིའི་ནང་ན་ཐིགས་པ་ཞིག་བོར་ན་རལ་གྲིས་མགོ་བོ་བཅད་ནས་གསོད་རྒྱུ་ཡིན་ཞེས་སྡིགས་མོ་བྱེད་ཞོར་་དང་། ཡང་དེའི་ཟུར་ནས་གླུ་གར་བྱེད་བཅུག་ནས་དེ་ལ་དྲིས་དང་ཧ་གོ་འོང་ཞེས་གསུངས་པ་དང་། རྒྱལ་པོས་དེ་ལྟར་བྱས་པས། བཙོན་པ་རྣམས་ལ་གར་འཁྲབ་པ་མཛེས་སམ། གླུ་བླངས་པ་སྙན་ནམ་ཞེས་དྲིས་པ་ན། བཙོན་པས་ངས་མ་མཐོང་མ་ཐོས་པས་ཤེས་མ་སོང་། ཁྱེད་ཀྱིས་མཐོང་ཐོས་ཅན་རྣམས་ལ་དྲིས་འཚལ་ཞུས་པ་ན། རྒྱལ་པོས་ཁྱོད་ཀྱིས་ཇི་ལྟར་མ་གོ་བ་ཡིན་དྲིས་པས། བཙོན་པས་ངས་མར་ཁུ་ཐིགས་པ་གཅིག་བོར་ན་སྲོག་གཅོད་པ་ཡིན་ན། སྲོག་གཅོད་པའི་འཇིགས་པས་སྐྲག་ནས་དེ་ཁོ་ན་ལ་སེམས་གཏད་པས་གླུ་གར་རྣམས་མཐོང་ཐོས་མ་བྱུང་ཟེར་བ་ན། རྒྱལ་པོས་ཅི་ཡང་མི་སྨྲ་བ་ན། འཕགས་པ་ཀ་ཏྱ་ན་ཆེན་པོས། མི་འདིས་མི་ཚེ་འདི་ཁོ་ནའི་སྲོག་ཐེངས་གཅིག་གཅོད་པའི་སྡུག་བསྔལ་ལ་སྐྲག་ནས་འདི་ལྟར་བག་ཡོད་པར་བྱེད་ན། ངེད་བསླབ་པ་འཛིན་པ་རྣམས་ཀྱིས་ཚེ་རབས་མང་པོའི་སྡུག་བསྔལ་སྤྱི་དང་། ཁྱད་པར་སྲོག་གི་འཇིགས་པས་སྐྲག་ནས་བག་ཡོད་པར་བྱས་པས་གླུ་གར་མཐོང་ཐོས་མ་བྱུང་བ་ཡིན་གསུངས་པར། རྒྱལ་པོ་ཡིད་ལྷག་པར་ཆེས་ནས། འཕགས་པ་ཀ་ཏྱ་ན་འཁོར་བཅས་བསོད་སྙོམས་ཀྱིས་ཚིམས་པར་བྱས། འཕགས་པ་ལས་ཆོས་ཉན་ཞིང་འཕགས་པའི་བཀའ་བཞིན་བསྒྲུབས་པས་ཡུལ་དེར་དེའི་ཕྱིན་ཆད་ཆོས་དར་ཞིང་། ནད་ཡམས་ཐམས་ཅད་རྒྱུན་ཆད་དེ་བདེ་སྐྱིད་དང་ལྡན་པར་གྱུར་ཏོ། །དེའི་ལོ་རྒྱུས་རྒྱས་པ་འདུལ་བ་ལུང་ན་ཡོད། དེ་རིང་གི་ཆོས་ཁྲིད་དྲན་ཤེས་ཁ་ཡན་དུ་གློད་པར་བྱའོ་ཞེས་པའི་མཚམས་སུ་འཇོག་རྒྱུ་ཡིན། སང་གནངས་ཉིན་ནས་བདེ་འགྲོ་ལའང་བདེ་བ་མེད་པར་བསམ་པ་ནས་འཆད་རྒྱུར་བྱེད། དྲན་པ་དང་ཤེས་བཞིན་བག་ཡོད་བརྟེན་ཞེས་པའི་ལོ་རྒྱུས་ཟུར་ནས་བཤད་པ་དང་། དྲན་ཤེས་ཁ་ཡན་དུ་གློད་ཅེས་པ་གཉིས་དོན་ཁ་ཁ་རེད། ད་རང་རེས་དམ་པའི་ཆོས་ལ་སྦྱངས་ཤིང་སྦྱོང་དང་། མན་ངག་གི་གཞུང་ནས་ཐོན་ཞིང་ཐོན་ན་དམ་པའི་ཆོས་དང་རང་རྒྱུད་གཉིས་ར་སྤྲོད་ཐོད་གཏུག་ཡོང་ན། ལས་ཚད་བྱས་ཚད་ཚང་མ་ནི་རེད་མེད་རྒྱུར་ཁོ་ན་རེད། ལས་འདོད་རྒྱུ་སེམས་ལ་བབ་རྒྱུ། བྱང་ཆ་ཡོད་པ་ཐམས་ཅད་ནི་མི་ཉན་པའི་སྡིག་པ་དང་། སྡིག་པའི་ཕྱོགས་གཏོགས་ཁོ་ན་རེད། ལས་ན་མི་འདོད་རྒྱུའི་དཀའ་ལས་ཅན་གྱི་ཕྱོགས་མང་པོ་ནི་དགེ་བའི་ཕྱོགས་རེད་བསམ་མཁན་ཡོད་སྲིད་པ་རེད། མི་བསོད་ཆུང་འགའ་རེས་གང་རེད་ན་རེད། ཅི་བྱས་ཀྱང་བདེ་འགྲོ་ཐོབ་བྱེད་ཀྱི་ལས་དེ་འགྲུབ་ས་མ་རེད། གང་རེད་ན་རེད། ཁྲ་སྡིག་ཅན་དམྱལ་བར་འགྲོ་ཁ་ལ། བྱིའུ་འཛུམ་མ་རེ་རེའི་ཕན་གནོད་མེད་བསམ་པའི་སྐྱིད་མེད་སྡུག་ཟད་ཡོད་སྲིད་པ་རེད། དེ་ནི་ཤིན་ཏུ་ཐ་ཆད་རེད། དེ་ལ་དངོས་གྲུབ་ཐོབ་ཁར་ཉྭ་ཡུ་འདར་ཟེར་བ་རེད། འདིའི་སྐབས་སུ་སྨན་པ་མཁས་པས་ནད་པའི་ནད་ཀྱི་ཚ་གྲང་ངོས་བཟུང་ནས་ནད་པ་ལ་ཕན་པའི་དཔྱད་བྱེད་པ་བཞིན་དུ། བླ་མ་སློབ་དཔོན་དགེ་བའི་བཤེས་གཉེན་རྣམས་ཀྱིས་དེ་ལྟ་བུ་ལ་ལམ་སྟོན་གསལ་འདེབས་བྱེད་དགོས། ཇི་ལྟར་བྱེད་ན། ཁྱོད་ད་སྔར་ལས་ལས་དང་བྱས་བྱས་དེ་དང་དམ་པའི་ཆོས་གཉིས་ར་སྤྲོད་ནས་མཚང་ངན་པ་ཞིག་ལྷང་ལ་ཕུད་དེ། ད་སྔར་བྱས་ཚད་སྡིག་པ་ཤ་སྟག་རེད། དགོས་པ་མི་འདུག་བསམ་སྟེ་རང་རྒྱུས་ལོན་ནས་རང་ལ་ཧ་ལས་རྒྱུ་དེ་ནི་ཆོས་སྦྱོང་བའི་གྲུབ་འབྲས་རེད། སྔ་དང་བསྡུར་ན་ཡར་ཐོན་གོམ་པ་གང་མདུན་དུ་སྤོ་བ་རེད། དེའི་ཐོག་ནས་ད་རན་རྒྱུ་ཞིག་ཡོད། སོ་སོའི་སྐྱེ་བོའི་འཁྲུལ་བའི་བྱ་རིམ་ནང་ནས་སྡིག་པ་གསོག་ལོས་ཡོད། དེ་མེད་ན་སོ་སྐྱེས་ཅི་ལ་ཟེར། དེ་འདྲའི་ལས་ཉེས་མེད་པར་སྐྱོན་ཀུན་ཟད་ཡོན་ཏན་ཀུན་ལྡན་ཤ་སྟག་ཡིན་ན་ཐམས་ཅད་སངས་རྒྱས་ལོས་ཡིན། འཁོར་བའི་སེམས་ཅན་ཞེས་ཅི་ལ་བཏགས། ད་སྔོན་འཁོར་བའི་སེམས་ཅན་གྱིས་ལས་ངན་པ་བསགས་ཆེ་བས། དེའི་ཕྱོགས་ལ་བྱང་ཆ་ཆེ་སོང་བས། མ་བསླབ་ནའང་མི་དགེ་སྡིག་ལས་བྱེད་ཤེས་པ། དཀར་པོ་དགེ་བའི་ལས་བསགས་སྟོབས་ཆུང་བས་དེ་བྱེད་དུས་དཀའ་སྣང་ཤར་བ། སེམས་ཁོ་རང་དེ་སྔོན་གང་ལ་གོམས་ན་དེ་སླ་མོ་དང་། མ་གོམས་ཚད་དཀའ་སྣང་ཤར་བ་རེད་མ་གཏོགས། དཀའ་མོ་དང་མི་འདོད་རྒྱུ་ཡོད་ཚད་དགེ་བ་དང་། འདོད་རྒྱུ་བསམ་རྒྱུ་དགའ་རྒྱུ་ཚང་མ་སྡིག་པ་མ་རེད། གོམས་ན་དཀའ་མོ་སླ་མོར་བསྒྱུར་ཆོག་པ་རེད། ད་ལྟར་དགའ་སའང་རྗེས་མར་མི་དགའ་བར་བསྒྱུར་ཆོག་པ་རེད། ཆོག་ས་ཨེ་རེད་སོམས་དང་། དཔེར་ན་ཟས་ཞིམ་པོ་ལྷ་ཡུལ་གྱི་ཟ་མ་དང་འདྲ་བ་རོ་བརྒྱ་དང་ལྡན་པ་ཞིག་ཡོད་ན། ཞིམ་པོ་དེ་སུ་ཡིན་ན་བཟའ་བསམ་ཞིང་། དེ་ཟོས་ན་སྡུག་བསྔལ་ཆེ་རུ་འགྲོ་མི་བསམ་པར། འདོད་ཡོན་ལ་བརྩིས་ནས་བདེ་སྐྱིད་ཀྱི་མཐུན་རྐྱེན་ཞིག་ལ་བསམ་པ་རེད། འོན་ཀྱང་དེ་ཟ་ཉེས་བྱས་ན་དུག་དུ་འགྱུར་ནས་གཟེར་ཚ་ནས་འགད་ལ་ཁད་ཅིག་རེད་ཡོང་ན། དེའི་ཁ་ཟས་དེ་ཕྱིན་ཆད་ཟ་མི་དགོས་ཞེ་ལ་དྲན་ན་སྐྱུག་བྲོ་བ་ཞིག་རེད་འགྲོ། དེ་དང་འདྲ་བ་འདོད་ཡོན་གྱི་བསླུ་བྲིད། ཉོན་མོངས་དུག་ལྔ་དུག་གསུམ་གྱི་རྐྱེན་དུ་གྱུར་པ་འདི་ཚོས་མ་བརྟགས་མ་དཔྱད་པའི་བློ་ངོར་འཕྲལ་དུ་ཉམས་དགའ་བ་ཙམ་རེ་བྱེད་ཀྱང་། ཕུགས་སུ་སྐྱོན་ཆེ་བས་དེའི་ཕྱོགས་དྲན་ཡོང་ན་དམུས་འགྲོ་རྒྱུ་ཡོད་པ་རེད། དེ་འདྲའི་གོམས་པ་ཆོས་ཕྱོགས་སུ་བསྒྱུར་ན་བར་སྐབས་ཤིག་ན་དཀར་པོ་དགེ་བའི་ལས་བསྒྲུབ་རྒྱུ་སླ་མོ་དང་། མོས་རྒྱུ་ཅན་དང་སྐྱིད་པོ་རེད་ལ། མི་དགེ་སྡིག་པའི་ལས་ཕྱོགས་ལ་ཞེ་ཁ་ལོག དེ་བྱེད་མི་འདོད་པར་འགྱུར་རྒྱུ་ཡོད་རེད། དེ་དུས་བློ་སྦྱོང་གིས་གོ་ཞིག་ཆོད་དེ། ངེས་འབྱུང་རྒྱུད་ལ་སྐྱེས། ཐར་པའི་ལམ་སྣེ་ཟིན་པ་ལ་ཉེ་འོང་རྩིས་རེད། ཅུང་ཟད་རེ་ལོས་དཀའ། ཚེ་འདིའི་དོན་ཆུང་བསྒྲུབ་པ་ལ་ཅི་འདྲའི་དཀའ་ལས་རྒྱག་དགོས་འདུག ཚེ་རབས་གཏན་གྱི་དོན་ཆེན། དེ་མི་ཚད་རང་གཞན་གཉིས་དོན་མཉམ་དུ་འགྲུབ་རྒྱུའི་བྱ་བ་ཆེན་པོ་ལ་འབད་ན་བརྩོན་པ་བསྐྱེད་ལོས་དགོས། ཆོས་ངོ་མ་འགྲུབ་རྒྱུ་དེ་བུ་རེ་བ་ཅན་ཞིག་མིན་ན་འགྲུབ་དཀའ་བ་རེད། འདི་ན་ཡོད་པའི་མི་སྐྱ་ཕོ་མོ་རྣམས་བུ་བཟང་འདང་རྒྱག་ཅན་རེད་ཀྱང་རེད་དེ། རེད་ཟེར་ན་ཆོག་རྒྱུ་ཅན་པོ་ཡིན་ནི་རེད། ས་སྟེང་མི་ཡིས་གང་ན་ཆོས་ཞེ་ནས་བྱེད་མི་ཆ་རེ་རྡོག་རེ་རེད། འདིའི་ས་ཆ་འབྲོག་རུ་སྡེ་པ་ལ་མཚོན་ན་རུ་གསར་ཚོ་བརྩིས་ན་མོ་དུད་སྟོང་དང་ལྔ་བརྒྱ་ཙམ་ཞིག་ཡོད་གི་ན་ནིང་ཞིག་ལ་ཟེར་མ་ཐལ་ན། ཁྱིམ་ཚང་རེ་ལ་ཆ་སྙོམས་བཟའ་བ་མི་གྲངས་བཞི་རེ་བརྩིས་རྒྱག་དང་། མི་གྲངས་སྟོང་ཕྲག་དྲུག་ལ་ཉེ་བ་ཞིག་རེད། དེའི་ནང་ན་འདིར་ཡོད་ཚད་ཚང་མར་བསམ་བློ་གཏོང་ན་ཚེ་འདི་ཕྱིའི་རང་གཞན་གཉིས་དོན་གྱི་འདང་རྒྱག་ཡོད་མཁན་གྱི་མི་བཟང་པོ་ཚང་མ་ལྷང་ལ་བུད་ནི་རེད་བསམ་གི། ཆོས་བཤད་དུས་འཁོར་བའི་སྡུག་བསྔལ་དང་ལས་ངན་གསག་ལུགས། དེའི་འབྲས་བུ་ཚང་མ་བཤད་དུས་སྡུག་རབས་ཐ་རབས་ཁོ་ན་བཤད་ཀྱིན་ཡོད་པ་འདྲ་རེད་མ་བསམ་དང་། སྐྱིད་སྡུག་གཉིས་ཀའི་ས་མཚམས་ཀྱི་སྡུག་ཟད་ལ་ཉེ་ནས་སྐྱིད་ཀྱི་སྣེ་མོར་འཛིན་གྲབས་རེད། སྐྱིད་མ་སྡུག་གི་འགོ་བཟུང་ནས་སྡུག་མཐའ་རིང་ལམ་ལ་སྙོག་རྒྱུ་བོ་འཁོར་བའི་བྱ་བ་དང་། འབད་བརྩོན་དང་སྙིང་རུས་ཀྱིས་འགོ་བཟུང་ནས་སྐྱིད་འཛད་རྒྱུ་མེད་པའི་ལམ་སྣེ་འཛིན་པ་ནི་དམ་པའི་ཆོས་བསྒྲུབ་པ་འདི་ཡིན། འདི་བསོད་ནམས་ཅན་དང་སྙིང་རུས་ཅན་ཞིག་མིན་ན་སྒྲུབ་མི་ཐུབ་ལ། དེའི་བསོད་ནམས་མེད་ན་དེར་མི་ཁེལ། ངོ་མ་བཤད་ན་ཆོས་སྒྲ་རྣ་བས་གོ། ཆོས་རར་རྡོག་པས་བརྫིས་ན་ངན་སོང་ངན་འགྲོའི་སྒོ་ཁེགས་པར་མི་ཚད་འཁོར་བ་མཐའ་ཅན་དུ་འགྱུར། འོན་ཀྱང་ད་དུང་དེ་ཙམ་གྱིས་མི་ཚིམས་པར་སེམས་ཅན་ཐམས་ཅད་ཀྱི་དོན་དུ་ཐར་པའི་མཆོག་རྫོགས་པའི་བྱང་ཆུབ་ཚེ་ལུས་འདིའི་ཐོག་ལ་བསྒྲུབ་པའི་སེམས་བསྐྱེད་ཀྱིས་འཕེན་པ་བྱེད་དགོས། དེ་ལྟར་བྱས་ནས་འདིར་ཡོད་ཀྱི་མི་སྐྱ་ཕོ་མོ་ཚོས་དགའ་བཞིན་སྤྲོ་བཞིན་དུ་ཆོས་བསྒྲུབ་པའི་སྤོབས་པ་དང་སེམས་ཤུགས་སྤྲོ་སྣང་ཡར་བསྐྱེད་དང་། དམ་པའི་ཆོས་འདི་བསྒྲུབ་པའི་དོན་དུ་དབུགས་ཤིག་ཅི་བླངས་དང་གོམ་པ་ཅི་སྤོ་ཚང་མ་གོ་ཆེན་པོར་ཆོད་པ་རེད། ཆོས་བསྒྲུབ་རྒྱུ་དེ་ཉིན་གཅིག་གིས་ཚར་སྒྲུབ་མ་བྱེད་ཀྱང་རྒྱུན་མི་ཆད་པའི་ཐོག་ཏུ་བྱ་སྤྱོད་བསམ་པ་དང་བཅས་པ་ཆོས་དང་འདྲེས་པ་རེ་ཨེ་ཐོན་ལྟོས་དང་། ཐོན་རྒྱུ་ངེས་པར་ཡོད་རེད། དེ་དུས་སྐྱེ་བ་བརྗེ་ལེན་གྱི་འཆི་བ་ཐོག་ཏུ་བབ་ཚེ་གོས་ཤིག་བརྗེ་བ་དང་། དག་པའི་ཞིང་ཁམས་སུ་ངང་པ་པདྨའི་མཚོ་གཅིག་ནས་མཚོ་གཞན་ཞིག་ཏུ་ཞུགས་པའི་དགའ་སྤྲོ་ཙམ་མ་གཏོགས། འཆི་བ་ལ་ཤི་སྡུག་གི་ཉམ་ང་བའི་འཇིགས་སྐྲག་དང་སྡུག་བསྔལ་མེད་པར། དེ་དུས་རང་དོན་དང་གཞན་དོན་གཉིས་ཀ་མཉམ་དུ་འགྲུབ་འོང་། དེས་ན་སྐྱ་སེར་སུ་ཡིན་ཡང་རང་གི་དགེ་རྒན་དེ་རང་གིས་བྱས་ནས། རང་གིས་རང་ལམ་དུ་འཇོག་དགོས། གོང་དུ་བཤད་པ་ལྟར་དྲན་ཤེས་བཞིན་བག་ཡོད་པ་རྣམས་བརྟེན་ནས་ཆོས་སྒྲུབ་རྒྱུ་གལ་ཆེན་གནད་ཀྱི་དོན་སྙིང་ཡིན་ནོ། །

ཉིན་བདུན་པའི་ཆོས་ཁྲིད།

ནམ་མཁའ་དང་མཉམ་པའི་སེམས་ཅན་ཐམས་ཅད་ཐུགས་ལ་བཅངས་ཏེ་དམ་པའི་ཆོས་གསན་པར་བྱ་དགོས། དེའང་ནམ་མཁའི་མཐའ་མཉམ་གྱི་སེམས་ཅན་ཐམས་ཅད་དྲིན་ཆེན་གྱི་ཕ་མ་ཤ་སྟག་ཡིན་ན། དེ་དག་གི་དྲིན་དྲན་ནས་དྲིན་ལན་གསབ་པ་ལ། དེ་རྣམས་གཏན་གྱི་བདེ་བ་ལ་འགོད་དགོས། དེའི་ཆེད་དུ་རྫོགས་བྱང་སྒྲུབ་དགོས་ལ། ཡིན་ཡང་རྫོགས་པའི་བྱང་ཆུབ་ཆེན་པོ། སྐྱོན་ཀུན་ཟད་ཡོན་ཏན་ཀུན་ལྡན། སྤངས་རྟོགས་མཐར་ཕྱིན། དོན་གཉིས་ཕུན་ཚོགས། རྟག་ཁྱབ་ལྷུན་གྲུབ་ཀྱི་འཕྲིན་ལས་ལ་མངའ་དབང་འབྱོར་བའི་གོ་འཕང་དམ་པ་དེ་མ་ཐོབ་ན། སེམས་ཅན་ཐམས་ཅད་འཁོར་བ་ལས་སྒྲོལ་ཟེར་རྒྱུ་སྨོན་པ་ཙམ་རེད། ཁ་བཤད་དོན་ལ་གནས་པ་དང་། མདའ་འཕངས་འབེན་ལ་གཅར་བ་ཞིག་མི་འོང་གི་བསམ་ནས། སེམས་ཅན་ཐམས་ཅད་རྫོགས་པའི་བྱང་ཆུབ་ཆེན་པོའི་ས་ལ་འགོད་པའི་ཆེད་དུ། ད་རེས་ཀྱི་ལུས་རྟེན་འདིའི་ཐོག་ཏུ་རྫོགས་པའི་བྱང་ཆུབ་ཀྱི་གོ་འཕང་དམ་པ་བསྒྲུབ་ཐུབ་དགོས་བསམ་རྒྱུའི་སེམས་ཤུགས་དེ་དུས་དང་རྣམ་པ་ཀུན་ཏུ་འབྲལ་མི་རུང་བ་ཞིག་རེད། དེས་ན་དང་པོ་འདིའི་ཐད་ནས་སེམས་ཅན་ཐམས་ཅད་མར་ཡིན་པའི་ངོས་ལ་བསམ་བློ་ཞིག་གཏོང་ན། ད་ལྟའི་མ་ཡི་དྲིན་དྲན་དགོས། དེ་དང་འདྲ་བ་ཚེ་རབས་སྔ་མའི་མ་རྣམས་ཀྱང་མར་ཡིན་པའི་ངོས་ནས་ཁྱད་མེད། འོན་ཀྱང་སེམས་ཅན་ཐམས་ཅད་ཟེར་དུས་དགྲའང་དེའི་ནང་འདུ་ཡོད་པས། དགྲ་ལའང་དེ་དང་འདྲ་བའི་བློ་སྟོབས་ཤིག་ད་དུང་མི་འདུག ཁྱད་པར་དུ་ཚེ་འདིའི་གནོད་བྱེད་ཀྱི་དགྲ་བོ་དེ་ལ་ཨ་མ་དེ་དང་ཁྱད་མེད་བྱེད་དགོས་ཟེར་ན་དེ་གཅིག་དཀའ་མོ་རེད་བསམ་ན་མི་ཤེས་ཏེ། འོན་ཀྱང་དེ་བསམ་རྒྱུ་ཡོད་པ་མ་རེད། འདི་ལན་པ་དགྲ་བོས་ལན་པ་མ་རེད། རང་ཉིད་ཀྱིས་ལན་པ་རེད། ད་ལྟའི་སྐབས་སུའང་། གནོད་བྱེད་དགྲ་བོའི་ཚུལ་དུ་སྣང་བ་འདི་རྣམས་ལ་མཚོན་ན། སྔར་རང་ཉིད་ཀྱིས་ཕར་གནོད་པར་བྱས་པ་དེའི་རྣམ་སྨིན་གྱི་ལེ་ལན་རྣམས་ཚུར་རང་ཐོག་ལ་འཁོར་ཡོང་བ་རེད། དེ་ལ་བསམ་བློ་གཏོང་ན་སྔོན་ཐོག་མེད་ནས་རང་རྒྱུད་ཀྱི་ཉོན་མོངས་པ་འདིས་ཉེར་ལེན་བྱས་ནས་གཞན་གནོད་ཁོ་ན་བྱས་པའི་ལས་དེས་ལྷན་ཅིག་བྱེད་རྐྱེན་བྱེད་པའི་དབང་གིས། དེ་ལ་བརྟེན་ནས་གནོད་བྱེད་ཕ་རོལ་པོ་དེ་དག་གིས་ཀྱང་བསམ་པ་ངན་པ་ཞིག་གིས་ཀུན་ནས་བསླངས་ཏེ། སྦྱོར་བ་དྲག་པོ་ཕྱིན་ཅི་ལོག་སོང་བ་མང་པོ་ཞིག་གིས་རྒྱུར་བྱས་ནས། སྤྱིར་ན་འཁོར་བ་མཐའ་མེད། བྱེ་བྲག་ཏུ་ངན་སོང་ངན་འགྲོའི་གནས་སུ་དེ་དག་ཕར་དེ་འདྲ་འཕེན་པ་རེད། དེར་འཕེན་པའི་གྱོད་རྩ་ལེ་ལན་ཕུགས་དེད་ན་རང་ལ་ཐུག་འདུག་ཡོད། ཁྱད་པར་དུ་ད་ལྟའི་སྐབས་རང་རེ་ཐེག་པ་ཆེན་པོའི་ཆོས་སྒོར་ཞུགས། ཐེག་ཆེན་མདོ་སྔགས་ཀྱི་མྱུར་ལམ་ནས་སངས་རྒྱས་སྒྲུབ་པའི་སྐབས་འདིར། དེ་རྣམས་ཀྱིས་ཐབས་སྣ་ཚོགས་ཀྱིས་གནོད་པ་འདྲ་མི་འདྲ་བསྐྱལ་ནས། ཐེག་པ་ཆེན་པོའི་ཆོས་ལ་བར་ཆད་བྱེད་པ་འདིས། འཁོར་བའི་སྡུག་བསྔལ་མང་པོ་ཞིག་དེ་རྣམས་ལ་མྱོང་དུ་བཅུག་སོང་བསམ་ནས་སྙིང་རྗེ་སྒོམ་དགོས། སྙིང་རྗེ་སྒོམ་པས་མི་ཚད་དྲིན་བསམ་དགོས། དེ་དག་གི་དྲིན་བསམ་པའི་དུས་སུ་ཚེ་རབས་སྔ་མའི་མར་ཡིན་པའི་དྲིན་རྐྱང་པ་ཞིག་གིས་མི་ཚད་པར། གནོད་བྱེད་མེད་ན་བཟོད་པ་སུ་ལ་སྒོམ། དེ་དག་གི་བེད་ཀྱིས་ཡོངས་ལ་སྙོམས་པའི་གཞན་ཕན་གྱི་རྩ་བ་ཚུགས། བྱང་ཆུབ་སེམས་ཀྱི་གཞི་བརྟན་པོ་ཞིག་རེད་སོང་བས། ངོ་མ་དོན་དམ་དོན་ལ་བསྐོར་ན་སངས་རྒྱས་ལག་ལ་གཏད་པའི་དྲིན་ཆེན་དེ་ད་ལྟའི་དགྲ་བོ་འདི་རྣམས་ཡིན། དེས་ན་དགེ་བའི་བཤེས་གཉེན་ཆད་ཁ་བའི་ཞལ་ནས། དགྲ་འམ་འོན་ཏེ་མཛའ་ཡང་རུང་། །ཉོན་མོངས་སྐྱེ་བའི་ཡུལ་རྣམས་ལ། །དགེ་བཤེས་ཡིན་པར་སུས་མཐོང་བ། །མི་དེ་གང་ན་གནས་ཀྱང་བདེ། །ཞེས་གསུངས་པ་ལྟར། དེ་འདྲ་བསམ་བློ་གཏོང་ཤེས་ན། བྱམས་སྙིང་རྗེ་དང་གཞན་ཕན་གྱི་སེམས་ཟེར་བ་ཟུར་ཞིག་ན་བཙལ་འདུག་དགོས་པ་མ་རེད། དཔའ་ལུས་ལ་ཡོད་ན་མཚོན་ཆ་ཐང་ལ་འཁྱམས་ཡོད་ཟེར་བ་ལྟར་རེད། མི་གཅིག་ལ་ཆོས་གཅིག་ཡོད་ན་ཆོས་གཅིག་པོས་གོ་ཆོད་པ་ཟེར་རྒྱུ་བོ་དེ་རེད། གླང་རི་ཐང་པ་ཚང་གིས། བྱང་ཆུབ་ཀྱི་སེམས་དེ་སེམས་ཅན་ལ་བརྟེན་ནས་སྐྱེ་བས་ན། དུས་གསུམ་རྒྱལ་བ་བསྐྱེད་པའི་ཡུམ་དེ་སེམས་ཅན་རེད། ཡུམ་དེ་ལ་ཕྱག་འཚལ་ཏེ་མཇལ་ཆོག་གསུངས་ཡོད། དགྲ་གཉེན་བར་མའི་གནས་སྐབས་ཀྱི་སྣང་ཚུལ་ལ་མ་ལྟོས་པར་ཐམས་ཅད་དྲིན་ཆེན་གྱི་མ་རྒན་ཡིན་པའི་སེམས་ཅན་ཐམས་ཅད་ལ་སྙིང་རྗེ་དྲག་པོ་ཤས་མི་བཟོད་པ་ཞིག་བསྐྱེད་པའི་ཐོག་ནས། དམ་པའི་ཆོས་གསན་པའི་གནས་སྐབས་སུ་དེ་ལྟ་བུའི་ཀུན་སློང་དང་ཀུན་སྤྱོད་རྣམ་པར་དག་པར་བྱས་ནས་གསན་དགོས། དམ་པའི་ཆོས་གསན་བསམ་ཚུལ་བཞིན་དུ་བསྒྲུབས་ཏེ་བླ་མེད་བྱང་ཆུབ་བསྒྲུབ་པ་ལ་འབད་དགོས་པའི་ཐད་ནས་མ་ཤེས་ཐབས་མེད་ཀྱི་ཕྱོགས་ནས། རྒྱུ་བདེ་གཤེགས་སྙིང་པོ། རྟེན་མི་ལུས་རིན་ཆེན། རྐྱེན་དགེ་བའི་བཤེས་གཉེན་ཞེས་བཤད་ཡོད་ན། རྒྱུ་བདེ་གཤེགས་སྙིང་པོ་དང་། རྟེན་མི་ལུས་རིན་ཆེན་གྱི་སྐོར་སྔ་མའི་ཆོས་ཁྲིད་ཀྱི་ཞོར་ལ་བཤད་ནས། རྐྱེན་དགེ་བའི་བཤེས་གཉེན་བསྟེན་ཚུལ་གྱི་ཐད་ལ་བསམ་བློ་གཏོང་ན། རྟེན་ཕུན་སུམ་ཚོགས་པ་དལ་འབྱོར་གྱི་ལུས་རྟེན་སྤྱིར་ཐོབ་ཡོད་ནའང་། རྐྱེན་དགེ་བའི་བཤེས་གཉེན་གྱིས་མ་བསྐུལ་ན། སྔར་ནས་ད་བར་བྱ་བ་ངན་གོམས་ཤུགས་དྲག་པས་ཆུ་རྒྱུན་ཐུར་ལ་རྒྱུག་པ་འདྲ་ཞིག་ཡིན་དུས། བྱང་ཆུབ་ཀྱི་ལམ་ལ་རང་སྟོབས་ཀྱིས་ཁ་ལོ་གྱེན་ལ་བསྒྱུར་ནས་འཇུག་དཀའ། རྒྱུ་མཚན་དེས་ན་དགེ་བའི་བཤེས་གཉེན་བསྟེན་དགོས། དགེ་བའི་བཤེས་གཉེན་བསྟེན་པའི་ཚུལ་འདི་ལ་དོན་ཚན་ལྔའི་སྒོ་ནས་བཤད་ན། དགེ་བའི་བཤེས་གཉེན་བསྟེན་དགོས་པའི་འཐད་པ་དང་། དགེ་བའི་བཤེས་གཉེན་གྱི་དབྱེ་བ། དགེ་བའི་བཤེས་གཉེན་སོ་སོའི་མཚན་ཉིད། དགེ་བའི་བཤེས་གཉེན་བསྟེན་ཚུལ། བསྟེན་པའི་ཕན་ཡོན་དེ་ལྔ་ཡིས་བཤད་ནབཤེས་གཉེན་བསྟེན་པའི་རྣམ་བཞག་ཅིག་ཡིད་ངོར་ངེས་རྒྱུ་ཡོད་པས། དང་པོ་དགེ་བའི་བཤེས་གཉེན་བསྟེན་དགོས་པའི་འཐད་པ་འདི་ལ། ལུང་དང་རིགས་པ་དཔེ་དང་གསུམ་ལས། ལུང་ནི། འཕགས་པ་སྡུད་པ་ལས། བླ་མ་མཁས་པ་དག་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །ཞེས་སོགས་མདོ་རྒྱུད་དུ་མར་དགེ་བའི་བཤེས་གཉེན་བསྟེན་དགོས་ཚུལ་རྒྱ་ཆེར་གསུངས་པའི་ཕྱིར་དང་། རིགས་པ་ནི། ཐམས་ཅད་མཁྱེན་པ་སྒྲུབ་པའི་གང་ཟག་དེས། དགེ་བའི་བཤེས་གཉེན་བསྟེན་དགོས་ཏེ། རང་ཉིད་གཅིག་པུས་རང་སྟོབས་ཀྱིས་ཚོགས་གསག་ཐབས་དང་ལམ་བགྲོད་ཚུལ་སྒྲིབ་པ་སྤོང་ཚུལ་མི་ཤེས་པའི་ཕྱིར། དཔེ་ནི་གསུམ་ཡོད་དེ། ལམ་སྟོན་དགེ་བའི་བཤེས་གཉེན་ནི། ལམ་རྒྱུས་མེད་ལ་འགྲོ་ཚེ་རྒྱུས་ཡོད་ཀྱི་ལམ་མཁན་ལྟ་བུ་རེད། དཔེར་ན་ལམ་རྒྱུས་མེད་ཞིག་ལ་འགྲོ་ཚེ་ལམ་མཁན་རྒྱུས་ཡོད་ཅིག་མེད་ན། ལམ་ནོར་དོགས་དང་། གོལ་དོགས། འཁྱར་དོགས་དང་གསུམ་ཡོད་ཀྱང་། ལམ་མཁན་སྣ་ཁྲིད་བཟང་པོ་ལམ་རྒྱུས་ཅན་ཞིག་ཡོད་ན་དེ་རྣམས་ཀྱི་དོགས་པ་མི་དགོས་པར་གོམས་པ་གང་སྤོ་ན་འཕྲོ་བརླག་དང་། དཀའ་ལས། སྟོང་ལོག་མི་འགྲོ་བར་སླེབ་དགོས་སར་སླེབས་འགྲོ་བ་དེ་བཞིན་དུ། བླ་མེད་བྱང་ཆུབ་སྒྲུབ་པའི་ལམ་ལ་ཞུགས་ཏེ་རྫོགས་པའི་སངས་རྒྱས་ཀྱི་སར་འགྲོ་བར་བྱེད་པ་ལ། ལམ་མཁན་དང་འདྲ་བའི་ཐེག་ཆེན་གྱི་དགེ་བའི་བཤེས་གཉེན་ཡང་དག་པ་ཞིག་མེད་ན། གཞུང་གདམས་ངག་རྩ་ཆེན་དང་ཡིག་ཆ་ཅི་འདྲ་ཞིག་བལྟ་ཁུལ་བྱེད་ཀྱང་འགྲེལ་བཤད་རྒྱག་ལུགས། གོ་བརྡ་སྤྲད་ལུགས་དང་དེའི་གོ་བ་ལེན་ཕྱོགས་མུ་སྟེགས་ཀྱི་ལམ་དང་ནོར་དོགས་ཡོད། ཉན་ཐོས་ཀྱི་ས་ལ་གོལ་དོགས་ཡོད། རང་སངས་རྒྱས་ཀྱི་སར་འཁྱར་དོགས་ཡོད་ན། ལམ་མཁན་ལྟ་བུའི་དགེ་བའི་བཤེས་གཉེན་ཞིག་ཡོད་ན། ནོར་དོགས་དང་། གོལ་དོགས། འཁྱར་དོགས་གསུམ་པོ་མི་དགོས་པར་ཐམས་ཅད་མཁྱེན་པའི་གྲོང་ཁྱེར་ལ་བདེ་བླག་ཏུ་ཕྱིན་ཐུབ་པ་རེད། དཔེ་དང་པོ་རེད། དཔེ་གཉིས་པ་ནི། དགེ་བའི་བཤེས་གཉེན་དེ་འཇིགས་པའི་ས་ཕྱོགས་སུ་འགྲོ་བ་ལ་སྐྱེལ་མ་དཔའ་བོ་ལྟ་བུ་ཞིག་རེད། འཇིགས་པ་ཅན་གྱི་ས་ཕྱོགས་སུ་དགྲ་ཇག་པ། གཅན་གཟན་གཏུམ་པོ་སོགས་ཀྱིས་འཚེ་བ་ཡོད་པས། སྐྱེལ་མ་དཔའ་བོ་ཞིག་མེད་ན་ལུས་སྲོག་དང་རྒྱུ་ནོར་ལ་ཉེན་ཁ་འོང་ན། སྐྱེལ་མ་བཙན་པོ་དང་འགྲོགས་ན་ཉེར་འཚེ་མེད་པར་དམིགས་ཡུལ་གྱི་ས་ཕྱོགས་ལ་ཐོན་འགྲོ་བ་དཔེ་དེ་བཞིན་དུ། བྱང་ཆུབ་སྒྲུབ་པའི་ལམ་ལ་ཞུགས་ཏེ་བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་ནས་ཐམས་ཅད་མཁྱེན་པའི་གྲོང་ཁྱེར་དུ་འགྲོ་བ་ལ། སྐྱེལ་མ་དཔའ་བོ་དང་འདྲ་བའི་དགེ་བའི་བཤེས་གཉེན་མེད་ན། དགྲ་ཇག་གཅན་གཟན་དང་འདྲ་བའི་ནང་རྣམ་རྟོག་དང་ཉོན་མོངས། ཕྱི་བདུད་དང་ལོག་འདྲེན་གྱིས་དགེ་བའི་ནོར་འཕྲོག་བདེ་འགྲོའི་སྲོག་གཅོད་པའི་ཉེན་ཁ་དང་དོགས་པ་ཡོད་ཀྱང་། སྐྱེལ་མ་བཟང་པོ་དང་འདྲ་བའི་དགེ་བའི་བཤེས་གཉེན་ཡོད་ན་དགེ་བའི་ནོར་མི་ཤོར། བདེ་འགྲོའི་སྲོག་མི་ཆད་ནས་འཚམས་པོ་བདེ་མོས་ཐམས་ཅད་མཁྱེན་པའི་གྲོང་དུ་ཕྱིན་ཐུབ་པ་རེད། དེ་དཔེ་གཉིས་པ་རེད། དཔེ་གསུམ་པ་ནི། དགེ་བའི་བཤེས་གཉེན་ནི་ཆུ་བོ་ཆེན་པོ་ལས་སྒྲོལ་བའི་མཉན་པ་ལྟ་བུ་ཞིག་རེད། མཉན་པ་ཞེས་པ་གྲུའི་ཁ་ལོ་བ་ལ་ཟེར། དཔེར་ན་ཆུ་བོ་ཆེན་པོ་ཞིག་གི་ཕ་རོལ་ཏུ་འགྲོ་དགོས་ན། གྲུ་གཟིངས་ཡོད་པ་ཙམ་གྱིས་མི་ཆོག གྲུ་པ་མེད་ན་གྲུ་གཟིངས་འགྲོ་ཁ་མི་ཉན། གྲུ་པ་མེད་བཞིན་དུ་གྲུ་འགྲོ་ཁུལ་བྱས་ན་ཆུས་འཁྱེར་བའམ་ཆུའི་ནང་དུ་གཏིབ་འགྲོ། མཉན་པ་ཡོད་ན་དེ་ལ་བརྟེན་ནས་ཆུའི་ཕ་རོལ་ཏུ་ཐོན་ཐུབ། དཔེ་དེ་བཞིན་དུ་འཁོར་བའི་རྒྱ་མཚོའི་ཕ་རོལ་ཏུ་འགྲོ་དགོས་ན། མཉན་པ་མཁས་པ་ལྟ་བུའི་དགེ་བའི་བཤེས་གཉེན་མེད་ན། དམ་པའི་ཆོས་ཀྱི་གྲུར་ཞུགས་ཀྱང་འཁོར་བའི་ཆུ་རྒྱུན་གྱིས་འཁྱེར་ནས་དབང་མེད་དུ་དེད་འགྲོ་ལ། མཉན་པ་མཁས་པ་ལྟ་བུའི་དགེ་བའི་བཤེས་གཉེན་ཡོད་ན་འཁོར་བའི་རྒྱ་མཚོའི་ཕ་རོལ་མྱ་ངན་ལས་འདས་པའི་སྐམ་སར་ཕྱིན་ཐུབ་པ་རེད། དེ་དཔེ་གསུམ་པ་རེད། དཔེ་དེ་གསུམ་དང་འདྲ་བའི་དོན་བསྡུ་ན། དགེ་བའི་བཤེས་གཉེན་ནི་ལམ་མཁན་ལྟ་བུ་དང་། སྐྱེལ་མ་ལྟ་བུ་དང་། མཉན་པ་ལྟ་བུ་ཞིག་རེད། གཉིས་པ་དགེ་བའི་བཤེས་གཉེན་གྱི་དབྱེ་བ་ལ་བཞི་ཡོད་དེ། སོ་སོའི་སྐྱེ་བོའི་དགེ་བའི་བཤེས་གཉེན་དང་། ས་ཆེན་པོ་ལ་གནས་པའི་བྱང་སེམས་དགེ་བའི་བཤེས་གཉེན། སྤྲུལ་སྐུའི་དགེ་བའི་བཤེས་གཉེན་དང་། ལོངས་སྐུའི་དགེ་བའི་བཤེས་གཉེན་དང་བཞི་རེད། དགེ་བའི་བཤེས་གཉེན་དེ་དག་ཇི་ལྟར་བསྟེན་ན། རང་གི་རྒྱུད་ཚོད་དང་བསྟུན་ནས་བསྟེན་དགོས་ཏེ། རང་ཉིད་སོ་སྐྱེས་ཡིན་པ་དང་དེའི་ནང་ནས་ལས་དང་པོ་བ་ཡིན་པའི་སྐབས་ན། སངས་རྒྱས་དང་ས་ཆེན་པོ་ལ་གནས་པའི་དགེ་བའི་བཤེས་གཉེན་བསྟེན་པའི་ནུས་པ་མེད་པའི་ཕྱིར་ན། གཙོ་ཆེར་སོ་སོའི་སྐྱེ་བོའི་དགེ་བའི་བཤེས་གཉེན་བསྟེན་དགོས། དེ་ནས་རང་ཉིད་ལས་སྒྲིབ་ཅུང་ཟད་དག་ནས་ས་ཆེན་པོ་ལ་གནས་པའི་དགེ་བའི་བཤེས་གཉེན་བསྟེན་ནུས་ཤིང་། ཚོགས་ལམ་ཆེན་པོ་ཐོབ་དུས་སངས་རྒྱས་སྤྲུལ་པའི་སྐུ་དང་། ས་ཆེན་པོ་ཐོབ་པའི་ཚེ་ལོངས་སྤྱོད་རྫོགས་པའི་སྐུ་བསྟེན་ནུས་པ་རེད། རང་རེ་ལྟ་བུ་ལས་དང་པོ་བ་ཉོན་མོངས་པའི་མུན་ཁང་ན་ཡོད་པ་ཞིག་གིས་དགེ་བའི་བཤེས་གཉེན་གོང་མ་རྣམས་བསྟེན་མི་ནུས་པར་མ་ཟད་ཞལ་ཙམ་ཡང་མཇལ་བ་དཀའ་ལ། དེས་ན་དང་པོ་དགེ་བའི་བཤེས་གཉེན་སོ་སོའི་སྐྱེ་བོའི་ཚུལ་ཅན་མཇལ་ནས་དེའི་གསུང་གི་སྒྲོན་མེས་ལམ་རིག་ཏུ་བཅུག་ནས། དགེ་བའི་བཤེས་གཉེན་གོང་མ་རྣམས་དང་མཇལ་བའི་སྐལ་བ་རིམ་གྱིས་ཐོབ་པས། དགེ་བའི་བཤེས་གཉེན་བཀའ་དྲིན་ཆེ་ཤོས་ནི་སོ་སོའི་སྐྱེ་བོའི་རིགས་ཅན་གྱི་དགེ་བའི་བཤེས་གཉེན་དེ་ཡིན། དེས་ནི་དགེ་བའི་བཤེས་གཉེན་གྱི་དབྱེ་བ་སོང་ནས། དགེ་བའི་བཤེས་གཉེན་དེ་དག་གི་མཚན་ཉིད་བཤད་ན། སངས་རྒྱས་ནི་སྤངས་པ་ཕུན་ཚོགས་སྒྲིབ་པ་གཉིས་ཀ་སྤངས་པ་དང་། རྟོགས་པ་ཕུན་ཚོགས་མཁྱེན་གཉིས་ཀྱི་ཡེ་ཤེས་མངའ་བ་ཞིག་ཡིན་ལ། དགེ་བའི་བཤེས་གཉེན་ས་ཆེན་པོ་ལ་གནས་པའི་བྱང་ཆུབ་སེམས་དཔའ་དེ་ལ་ས་བཅུའི་ཁྱད་པར་གྱིས་སྤངས་རྟོགས་ཀྱི་ཡོན་ཏན་ཅི་རིགས་པར་མངའ་བ་དང་། དེའི་ནང་ནས་ས་བརྒྱད་པ་ཡན་ཆད་ལ་གནས་པ་ཞིག་ཡིན་ན། ཚེ་དང་སེམས་དང་ཡོ་བྱད་དང་། ལས་དང་སྐྱེ་བ་མོས་པ་དང་། །སྨོན་ལམ་རྫུ་འཕྲུལ་ཡེ་ཤེས་དང་། །ཆོས་ལ་དབང་བ་དབང་བཅུའོ། །ཞེས་པའི་སྡོམ་ལྟར། དབང་བཅུ་ལ་མངའ་བརྙེས་པ་སྟེ། ཚེ་ལ་དབང་བ་ནི་སྐུ་ཚེ་གཏོང་བ་དང་འདོད་ན་ཇི་སྲིད་འདོད་པ་ལྟར་དུ་གནས་པ་ལ་དབང་བ་དང་། སེམས་ལ་དབང་བ་ནི་ཇི་ལྟར་འདོད་པ་བཞིན་དུ་ཏིང་ངེ་འཛིན་ལ་མཉམ་པར་འཇོག་ནུས་པ་དང་། ཡོ་བྱད་ལ་དབང་བས་སེམས་ཅན་རྣམས་ལ་ཡོ་བྱད་རིན་པོ་ཆེ་དཔག་ཏུ་མེད་པ་ཆར་ལྟར་འབེབ་ནུས་པ་དང་། ལས་ལ་དབང་བ་ནི་འགྲོ་བ་སོ་སོའི་ས་དང་འགྲོ་བའི་སྐྱེ་གནས་དང་། མྱོང་འགྱུར་གྱི་ལས་ལ་སོགས་པ་གཞན་དང་གཞན་དུ་བསྒྱུར་བ་དང་། སྐྱེ་བ་ལ་དབང་བས་བསམ་གཏན་ལ་གནས་ཤིང་མ་ཉམས་བཞིན་དུ་འདོད་ཁམས་སུ་སྐྱེ་ནུས་ཤིང་། དེའི་སྐྱོན་གྱིས་མི་གོས་པ་ལྟ་བུ་གནས་གང་དང་གང་དུ་ཅི་ལྟར་འདོད་པ་བཞིན་སྐྱེ་ནུས་པ་དང་། མོས་པ་ལ་དབང་བས་ས་ཆུར་བསྒྱུར་བ། ཆུ་མེར་བསྒྱུར་བ། མེ་རླུང་དུ་བསྒྱུར་བ་ལ་སོགས་པ་གང་འདོད་བསྒྱུར་ནུས་པ་དང་། སྨོན་ལམ་ལ་དབང་བས་ཇི་ལྟར་མོས་པ་ལྟར་བདག་དང་གཞན་གྱི་དོན་ཕུན་སུམ་ཚོགས་སྒྲུབ་པར་བྱེད་པའི་སྨོན་ལམ་བཏབ་པ་འགྲུབ་པ་དང་། རྫུ་འཕྲུལ་ལ་དབང་བ་ནི་རྫུ་འཕྲུལ་གང་དང་གང་འདོད་ན་དེ་ལྟར་ཐོགས་པ་མེད་པར་སྟོན་ནུས་པ་དང་། ཡེ་ཤེས་ལ་དབང་བ་ནི་དུས་གསུམ་གྱི་ཤེས་བྱ་ཀུན་ལ་ཆགས་ཐོགས་མེད་པར་མངའ་དབང་འབྱོར་བ་དང་། ཆོས་ལ་དབང་བ་ནི་གསུང་རབ་ཡན་ལག་བཅུ་གཉིས་ཀྱིས་བསྡུས་པའི་ཆོས་རྣམས་གདུལ་བྱའི་མོས་པ་ལྟར་འཆད་པ་ལ་དབང་ཐོབ་པ་རྣམས་སོ། །དགེ་བའི་བཤེས་གཉེན་སོ་སོའི་སྐྱེ་བོ་དེའང་མཚན་ཉིད་བརྒྱད་དང་ལྡན་པ་ཞིག་དགོས་ཏེ། མང་ཐོས་རྟོགས་ལྡན་སྙིང་བརྩེ་མི་འཇིགས་ལྡན། །བཟོད་དང་མི་སྐྱོ་ཚིག་གི་བྱ་བ་ལྡན། །ཞེས་གསུངས་པ་ལྟར། བྱང་ཆུབ་སེམས་དཔའི་ཚུལ་ཁྲིམས་དང་ལྡན་པ་དང་། བྱང་ཆུབ་སེམས་དཔའི་སྡེ་སྣོད་མང་དུ་ཐོས་པ་དང་། རྟོགས་པ་དང་ལྡན་པ། སེམས་ཅན་ལ་རྗེས་སུ་བརྩེ་བ་ཅན། འཁོར་བའི་ནང་དུ་མི་འཇིགས་པ་དང་ལྡན་པ། བཟོད་པ་དང་ལྡན་པ། ཡིད་མི་སྐྱོ་བ། ཚིག་གི་བྱ་བ་དང་ལྡན་པ་དགོས་པར་བྱང་ས་ལས་གསུངས་བའི་ཕྱིར་དང་། །ཡང་མཚན་ཉིད་བཞི་ལྡན་དུ་གསུངས་ཏེ། མདོ་སྡེ་རྒྱན་ལས། རྒྱ་ཆེ་ཐེ་ཚོམ་སྤོང་བ་དང་། །གཟུང་འོས་དེ་ཉིད་གཉིས་སྟོན་པ། །འདི་ནི་བྱང་ཆུབ་སེམས་དཔའ་ཡི། །སྟོན་པ་ཕུན་ཚོགས་ཡིན་ཞེས་བྱ། །ཞེས་མང་དུ་ཐོས་པས་སྟོན་པ་རྒྱ་ཆེ་བ་དང་། ཤེས་རབ་ཆེ་བས་གཞན་གྱི་ཐེ་ཚོམ་གཅོད་པ་ལ་མཁས་པ། སྐྱེས་བུ་དམ་པའི་ལས་བྱེད་པ་ཡིན་པས་ཚིག་གཟུང་འོས་པ། ཀུན་ཉོན་དང་རྣམ་བྱང་གཉིས་ཀྱི་མཚན་ཉིད་དེ་ཁོ་ན་ཉིད་སྟོན་པ་དང་བཞི་དང་ལྡན་པ་དང་། ཡང་གཉིས་སུ་གསུངས་པའང་ཡོད་དེ། སྤྱོད་འཇུག་ལས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏོང་ངོ། །ཞེས་ཐེག་ཆེན་གྱི་དོན་ལ་མཁས་པ་དང་། བྱང་ཆུབ་སེམས་དཔའི་སྡོམ་པའི་བརྟུལ་ཞུགས་སྲོག་གི་ཕྱིར་ཡང་མི་གཏོང་བ་ཞིག་དགོས་གསུངས་པ་རེད། དེའི་སྟེང་ན་གསང་སྔགས་ཀྱི་བླ་མ་རྡོ་རྗེ་སློབ་དཔོན་གྱི་མཚན་ཉིད་ནི། གཞན་དང་གཞན་དུ་བཤད་དང་འཆད་འགྱུར་ལྟར་རོ། །དེ་ལྟ་བུའི་དགེ་བའི་བཤེས་གཉེན་རྙེད་ནས་དེ་ཚུལ་ཇི་ལྟར་བསྟེན་ལུགས་དང་། བསྒྲུབ་པ་ནན་ཏན་གྱི་སྒོ་ནས་ཇི་ལྟར་བྱེད་ཚུལ་སྐོར་རྣམས་གང་བཤད་བྱའི་མན་ངག་གི་གཞུང་འདིའི་ཁྲིད་རྐང་རྗེས་མ་རྣམས་སུ་འཆད་པར་འགྱུར་བ་རེད། དགེ་བའི་བཤེས་གཉེན་གྱི་མདུན་ནས་ཆོས་ཞུ་སྟངས་ཀྱི་ཐད་ནས་སྦྱོར་དངོས་འཇུག་གསུམ་ཚང་བར་བྱས་ནས་ཞུ་དགོས་ཏེ། སྦྱོར་བ་བྱང་ཆུབ་ཀྱི་སེམས་དང་ལྡན་ཞིང་། དངོས་གཞི་རང་ལ་ནད་པའི་འདུ་ཤེས། ཆོས་ལ་སྨན་གྱི་འདུ་ཤེས། དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས། ཆོས་ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས་བསྐྱེད་ནས་ཞུ་དགོས། འཇུག་ཅེས་པ་ཞུགས་པའི་དོན་ཡིན་ན། སྣོད་ཁ་སྦུབ་དང་། ཞབས་བརྡོལ་དང་དུག་ཅན་ལྟ་བུའི་སྐྱོན་གསུམ་སྤངས་ནས་ཆོས་ཉན་པ་ལ་འཇུག་དགོས་ཞེས་པ་ལྟ་བུས་གསུང་སྲོལ་ཡང་ཡོད། དགེ་བའི་བཤེས་གཉེན་བསྟེན་པའི་ཕན་ཡོན་ནི། དགེ་བའི་བཤེས་གཉེན་ཡང་དག་པས་ཟིན་པའི་གང་ཟག་དེ་ངན་སོང་དུ་མི་ལྟུང་། སྡིག་པའི་གྲོགས་པོའི་དབང་དུ་མི་འགྲོ། ཐེག་ཆེན་གྱི་ཆོས་ལས་ཕྱིར་མི་ལྡོག སོ་སོའི་སྐྱེ་བོའི་ས་ལས་ཡོངས་སུ་འདའ་བ་དང་། མྱ་ངན་ལས་འདས་པའི་ས་ལས་འདའ་བར་མི་འགྱུར་བ་དང་། གཞན་ཡང་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་དེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བ་དེ་འདྲ་ཡིན་པར་སངས་རྒྱས་ཀྱིས་མདོ་ལས་གསུངས་ཡོད། འོན་ཀྱང་དེང་སང་དུས་སྙིགས་མའི་གནས་སྐབས་འདིར་བཤེས་གཉེན་གོང་མ་གསུམ་མི་དགོས། སོ་སོའི་སྐྱེ་བོའི་དགེ་བའི་བཤེས་གཉེན་མཚན་ཉིད་དང་ལྡན་པའང་ཉིན་མོའི་སྐར་མ་ལྟར་དཀོན། འོན་ཀྱང་གཏན་ནས་མེད་ཀྱང་ཟེར་ཤེས་མ་རེད། གཅིག་ན་སངས་རྒྱས་བསྟན་པའི་གནས་ཚད་མ་རྫོགས། གཉིས་ན་གདུལ་བྱ་ཡོད་ན་འདུལ་བྱེད་རྒྱུན་མི་ཆད་པ་རྒྱལ་བའི་ཕྲིན་ལས་བསམ་གྱིས་མི་ཁྱབ་པའི་མཐུ་ཡིན་པའི་ཕྱིར་དང་། ཁྱད་པར་དུ་རྔ་བོ་ཆེ་ཆེན་པོའི་མདོ་ལས། མྱ་ངན་མ་བྱེད་ཀུན་དགའ་བོ། །སྨྲེ་སྔགས་མ་འདོན་ཀུན་དགའ་བོ། །ང་ནི་ཕྱི་མའི་དུས་ཀྱི་ཚེ། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་གསུངས་པ་ལྟར། སྙིགས་མའི་དུས་འདིར་ཆོས་འཆད་རྩོད་རྩོམ་པའི་བྱ་བ་རང་གཞན་སུས་བྱེད་ཀྱང་། དོན་བཞིན་དུ་ཆོས་སྟོན་ཅིང་ཆོས་བཞིན་དུ་གདུལ་བྱ་སྐྱོང་བས་དགེ་སློང་ཆོས་སྨྲ་བ་ཞེས་གྲགས་པ་དོན་དང་ལྡན་པ་ཡིན་པར་མ་ཟད། རྒྱལ་བའི་ཡུམ་ལས། ཕྱིར་མི་ལྡོག་པའི་བྱང་སེམས་ཡིན་པར། ཕྱིར་མི་ལྡོག་པའི་ཆོས་བརྗོད་པའི་ངག་ལས་དཔོག་ཅེས་རྟགས་ལྟར་སྣང་མིན་པའི་ཡིད་ཆེས་ཡོད་པ་རེད། དུས་མཐར་ཆོས་རྔ་སུས་རྡུང་ན་དེ་ཡང་རྒྱལ་བའི་ཕྲིན་ལས་ཡིན་པས་ན། དེ་ལ་རྒྱལ་བ་དངོས་ལྟ་བུའི་དད་པ་དང་དང་བ་བསྐྱེད་ན་ཕན་ཡོན་དང་བསོད་ནམས་ཆེན་པོ་ཡོད་དེ། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། །བགྱིས་པ་ཅི་འདྲའང་རུང་སྟེ་མཁས་པས་མཆོད། །དེ་བཞིན་བདག་གི་སྙན་ངག་འདི་ངན་ཡང་། །དམ་ཆོས་བརྗོད་ལ་བརྟེན་སླད་སྨད་མི་བགྱི། །ཞེས་གསུངས་པ་ལྟར་རེད། ཁྱད་པར་དུ་གསང་སྔགས་རྫོགས་ཆེན་གྱི་སྐབས་འདིར། ཀུན་མཁྱེན་རྒྱལ་བ་ཀློང་ཆེན་པས། དཀོན་མཆོག་བཞི་པ་བླ་མ་སངས་རྒྱས་ཏེ། །དཀྱིལ་འཁོར་དབང་ཕྱུག་ཧེ་རུ་ཀ་དཔལ་ཉིད། །སྙིགས་དུས་འགྲོ་བ་གདུལ་དཀའི་དོན་མཛད་པས། །གདུལ་བྱའི་ངོར་ནི་སངས་རྒྱས་ཀུན་བས་ལྷག །དངོས་གྲུབ་རྩ་བ་རྡོ་རྗེ་སློབ་དཔོན་ལ། །སྒོ་གསུམ་ཟོལ་མེད་གཙང་མའི་སྤྱི་བོས་བསྟེན། །ཅེས་གསུངས་པ་ལྟ་བུ་ཡིན་པས་ན་གོང་དུ་བཤད་པ་ལྟར། དེ་བཞིན་གཤེགས་པ་ནི་ད་ལྟའི་སེམས་ཅན་ལ་དངོས་སུ་མི་སྣང་ནའང་། སངས་རྒྱས་ཀྱི་ཕྲིན་ལས་པ་དགེ་བའི་བཤེས་གཉེན་སྣང་བར་མ་ཟད་དེས་ཆོས་བསྟན་ཏེ་ཐར་པའི་ས་བོན་འདེབས་པས་ན། བཀུར་སྟི་ཕུ་དུད་ཀྱིས་མཆོད་ཅིང་། དེ་མཆོད་པའི་མཆོག་བསྒྲུབ་པ་ལ་སྐྱོ་ངལ་མེད་པར་ནན་ཏན་ལྷུར་བླངས་ན་ཕན་བདེ་བརྒྱ་ཕྲག་མོད་ལ་འབྱུང་བ་ནི་མཐོང་བའི་ཆོས་ཡིན་པ་རེད། དེ་ལྟ་བུའི་ཚུལ་ཤེས་པར་བྱས་ནས་སྐབས་སུ་བབ་པ་གང་ཞིག་གསན་པར་བྱ་བ་ནི། རྫོགས་པ་ཆེན་པོ་ཀློང་ཆེན་སྙིང་ཐིག་གི་ཆོས་སྡེའི་ནང་ཚན། ཐུན་མོང་གི་སྔོན་འགྲོ་སེམས་སྦྱོང་བདུན་གྱི་དོན་ཁྲིད་ལས། སེམས་སྦྱོང་གསུམ་པ་རིགས་དྲུག་གི་སེམས་ཅན་ལ་སྙིང་རྗེ་བསྐྱེད་ཅིང་། ལས་སུ་དཀོན་མཆོག་མཆོད་ཅིང་དཀར་པོ་དགེ་བའི་ལས་བྱེད་པའི་སྐོར་ནས་ཁར་རྩང་ཡན་ཆད་ངན་སོང་གསུམ་གྱི་སྡུག་བསྔལ་བཤད་པ་སོང་ནས། དེ་རིང་མཐོ་རིས་ནའང་བདེ་བ་མེད་པའི་ཚུལ་བཤད་པ་ནི། དེ་ནས་བདེ་འགྲོ་མཐོ་རིས་ཀྱི་གནས་གསུམ་ནའང་བདེ་བ་མེད་པར་བསམ་ཞིང་ཉམས་སུ་ལེན་པ་ནི། འོ་ན་ངན་སོང་གསུམ་དུ་སྐྱེས་ན་སྡུག་བསྔལ་དྲག་པོ་འབའ་ཞིག་གིས་མནར་བ་ལས་བདེ་བའི་གོ་སྐབས་སྐད་ཅིག་ཙམ་མེད་པར་གོང་དུ་བཤད་པ་དེ་ལྟར་ཡིན་ཡང་། ལྷ་མི་སོགས་བདེ་འགྲོའི་གོ་འཕང་ཐོབ་ན་སྡུག་བསྔལ་མེད་པའི་བདེ་བ་འབའ་ཞིག་གོ་སྙམ་ན་མ་ཡིན་ཏེ། བཤེས་སྤྲིང་དུ། མཐོ་རིས་ན་ཡང་བདེ་ཆེན་དེ་དག་གི། །འཆི་འཕོའི་སྡུག་བསྔལ་ཉིད་ནི་དེ་བས་ཆེ། །ཞེས་མཐོ་རིས་འདོད་པའི་ལྷ་ཡུལ་ན་ངན་སོང་གི་སྡུག་བསྔལ་དང་བསྡུར་ན། འདོད་ཡོན་ལ་སྤྱོད་པའི་ཟག་བཅས་ཀྱི་བདེ་བ་ཞིག་ཡོད་པ་དེ་བདེ་བ་ཆེན་པོ་འདྲ་ཞིག་ཡིན་མོད་ཀྱང་། ལྷ་འཆི་འཕོ་ལྟུང་བའི་སྡུག་བསྔལ་ནི་ངན་སོང་གི་སྡུག་བསྔལ་དང་རང་གི་བདེ་བ་དེ་བས་ཆེ། ཞེས་འཕོ་བའི་སྡུག་བསྔལ་གསུངས་པ་དང་། ལྷ་ཡི་འཇིག་རྟེན་དག་ནས་འཕོས་པ་ལ། །གལ་ཏེ་དགེ་བའི་ལྷག་མ་འགའ་མེད་ན། །དེ་ནས་དབང་མེད་དུད་འགྲོ་ཡི་དྭགས་དང་། །དམྱལ་བར་གནས་པ་གང་ཡང་རུང་བར་འགྱུར། །ཞེས་གསུངས་ན། སྔར་བསོད་ནམས་ཆ་མཐུན་དང་མི་གཡོ་བའི་ལས་བསགས་པའི་དབང་གིས་ལྷ་ཡི་འཇིག་རྟེན་འདོད་གཟུགས་དང་གཟུགས་མེད་ཀྱི་ཁམས་སུ་སྐྱེས་པ་རྣམས་ལ། གལ་ཏེ་དགེ་བའི་ལས་ཟད་དེ་ལྷག་མ་འགའ་ཡང་མེད་པར་གྱུར་ན། གནམ་མདའ་གྱེན་ལ་འཕངས་ཀྱང་ཤུགས་ཟད་ན་ཐུར་དུ་ལྷུང་བ་ལྟར། ལྷ་ཡུལ་ཉམས་དགའ་བའི་གནས་དེ་ནས་རང་དབང་མེད་པར་ངན་སོང་གི་གནས་དུད་འགྲོ་དང་ཡི་དྭགས་དང་དམྱལ་བར་གནས་པའི་སེམས་ཅན་གང་ཡང་རུང་བར་སྐྱེས་ཏེ། སྡུག་བསྔལ་དྲག་པོ་ཉམས་སུ་མྱོང་བར་འགྱུར་རོ། །ཞེས་ལྟུང་པའི་སྡུག་བསྔལ་བསྟན་པ་དང་། མདོ་དྲན་པ་ཉེར་གཞག་ལས། མི་དག་འཚོ་བ་ཐུང་བས་ཉམས། །ལྷ་དག་བག་མེད་པ་ཡིས་ཉམས། །ལྷ་མིན་འཐབ་ཅིང་རྩོད་པས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གླིང་བཞིར་སྐྱེས་པའི་མི་སྤྱི་དང་ཁྱད་པར་དུ་འཛམ་བུ་གླིང་པའི་མི་དག་ནི་སྲོག་འཚོ་བའི་ཚེ་ཐུང་བས་ཉམས་ཤིང་རྒུད་པ་དང་། ལྷ་དག་འདོད་ཡོན་དང་སྙོམས་འཇུག་གི་རོ་ལ་ཞེན་པའི་བདེ་བ་དང་། དགའ་བས་གཡེང་བའི་བག་མེད་པ་ཡིས་ཉམས། ལྷ་མ་ཡིན་རྣམས་ནི་རྟག་ཏུ་ཕྲག་དོག་དང་ཁོང་ཁྲོས་རྒྱུད་འཚིག་པས་འཐབ་ཅིང་རྩོད་པས་ཉམས་ཤིང་རྒུད་པར་གྱུར་པས། ཁམས་གསུམ་འཁོར་བ་འདི་ན་ཁབ་ཀྱི་རྩེ་མོ་ཙམ་གྱི་བདེ་བ་ནམ་ཡང་ཡོད་པ་མ་ཡིན། ཞེས་བདེ་འགྲོ་སྤྱི་ལ་བདེ་བ་མེད་ཅིང་སྡུག་བསྔལ་གྱི་རང་བཞིན་ཡིན་པར་གསུངས་པ་ལྟར་དང་། བྱེ་བྲག་མིའི་སྡུག་བསྔལ་བཤད་པ་ནི། མཐོ་རིས་མིའི་བདེ་འགྲོ་ཐོབ་ཀྱང་སྡུག་བསྔལ་ལས་མ་འདས་པ་ཡིན་ཏེ། ཡོན་ཏན་མཛོད་ལས། དར་ལ་བབ་པ་རྒ་བའི་ཆད་པས་འཚེ། །འདུ་བ་རྣལ་མར་གནས་པ་ན་བས་དཀྲུག །ཕུན་ཚོགས་རྟེན་ཅིང་འབྲེལ་འབྱུང་རྒུད་པས་འཇོམས། །འཆི་བས་སྲོག་ལ་རྒོལ་བ་མྱུར་བར་འོང་། །ཞེས་གསུངས་པ་ལྟར་སྡུག་བསྔལ་གསུམ་དང་བརྒྱད་ཀྱི་རང་བཞིན་ཏེ། སྡུག་བསྔལ་གྱི་སྡུག་བསྔལ་ནི། སྡུག་བསྔལ་སྔ་མ་ཉིད་མ་སངས་བར་ཕྱི་མ་འབྱུང་བའི་བརྩེགས་མར་འབྱུང་བ་ཕ་ཤི་བའི་ཐོག་ཏུ་མ་ཡང་འདས་པ་དང་། རྟ་ནོར་དགྲས་དེད་པའི་ཐོག་ཏུ་བུ་གཅེས་པ་བསད་ཤོར་པ་ལྟ་བུ། འཁོར་བའི་གནས་འདིར་ཕལ་ཆེར་སྡུག་བསྔལ་བརྩེགས་མར་འབྱུང་བ་ཡིན་པས་སྡུག་རྒྱུན་མི་ཆད་པ་ཟད་རྒྱུ་མེད་པ་ཞིག་མྱོང་བ་རེད། འགྱུར་བའི་སྡུག་བསྔལ་ནི། ད་ལྟ་བདེ་བ་ལྟར་ཡོད་འཕྲོ་ཁོ་ན་སྐད་ཅིག་ཙམ་ལ་མ་བསམ་ས་ནས་གློ་བུར་གྱི་སྡུག་བསྔལ་དུག་དང་འདྲེས་པའི་ཁ་ཟས་ཟོས་པའམ། རྩེད་མོའི་ཆེད་དུ་ཆུ་བརྒལ་བས་ཆུ་ནང་བྱིང་སྟེ་སྐད་ཅིག་ལ་སྲོག་འདོར་ནས་ཤི་བ་ལྟ་བུ། འཁོར་བའི་གནས་འདིར་ཕར་བལྟས་ན་བདེ་སྐྱིད་སྙན་གསུམ་ཡོད་པ་ལྟར་སྣང་ཡང་། ངོ་མ་ཞིབ་པར་བརྟགས་ན་བདེ་སྐྱིད་མེད་པར་མ་ཟད། མཐར་སྡུག་བསྔལ་ཁོ་ན་ལས་མ་འདས་པ་ཡིན་པར་གསུངས། ཁྱབ་པ་འདུ་བྱེད་ཀྱི་སྡུག་བསྔལ་ནི། རང་རེས་ད་ལྟ་བདེ་བར་རློམ་པ་ཐམས་ཅད་ཀྱང་དོན་ངོ་མར་ལྟར་མི་མངོན་པའི་སྡུག་བསྔལ་ཡིན་ཏེ། ཟས་ཟོས། གོས་གྱོན། རྒྱན་དང་གནས་ཁང་སྟོན་མོ་ལོངས་སྤྱོད་ཐམས་ཅད་སྡིག་པའི་རྒྱུ་ཁོ་ནས་བསྒྲུབ་པ་མ་གཏོགས་མེད་པས་ན། འབྲས་བུ་སྡུག་བསྔལ་ཁོ་ན་འབྱུང་བ་ཡིན། ཟས་ཟ་ཉེས་དང་། གོས་གྱོན་ཉེས། སྤྱོད་ལམ་མ་གཟབ་པའི་ཉེས་པས་ཤིན་ཏུ་སྡུག་བསྔལ་དོས་དྲག་པའི་ནད་ལ་སོགས་པ་མྱོང་བའམ། མི་བཙན་པོ་ལ་རྒོལ་བར་བྱས་པས་ཕྱིས་གནོད་པའི་ལན་འདུ་བྱེད་པ་འགོག་ཏུ་མེད་པ་ལྟ་བུ་སྟེ། རྩ་བའི་སྡུག་བསྔལ་ཆེན་པོ་གསུམ། དེ་སྐད་དུ་འདུལ་བ་ལུང་ལས། འཁོར་བ་སྡུག་བསྔལ་ཅན་ཕུང་པོ། །སྡུག་བསྔལ་སྡུག་བསྔལ་འདུ་བྱེད་དང་། །འགྱུར་བ་ཉིད་གསུམ་བརྒྱད་རྣམས་ཀྱིས། །མི་རྣམས་ཤིན་ཏུ་སྡུག་བསྔལ་ལོ། །ཞེས་གསུངས་པ་ལྟར་འཁོར་བའི་གནས་གང་དུ་སྐྱེས་ཀྱང་སྡུག་བསྔལ་ཅན་གྱི་ཕུང་པོ་ལས་མ་འདས་པ་སྟེ། གོང་དུ་བཤད་པའི་སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། ཁྱབ་པ་འདུ་བྱེད་ཀྱི་སྡུག་བསྔལ་ཏེ་རྩ་བའི་སྡུག་བསྔལ་ཆེན་པོ་ཉིད་གསུམ་གྱི་སྟེང་དུ། གཞན་ཡང་འཆད་འགྱུར་གྱི་སྡུག་བསྔལ་བརྒྱད་ལ་སོགས་པའི་སྡུག་བསྔལ་སྣ་ཚོགས་པ་རྣམས་ཀྱིས་མི་རྣམས་ཤིན་ཏུ་སྡུག་བསྔལ་ལོ། །ཞེས་དང་། དགའ་བོ་མངལ་འཇུག་གི་མདོ་ལས། དེ་བཞིན་དུ་སྐྱེ་བ་ཡང་སྡུག་བསྔལ་ཡིན་ནོ། །རྒ་བ་ཡང་སྡུག་བསྔལ་ཡིན་ནོ། །ན་བ་ཡང་སྡུག་བསྔལ་ལོ། །འཆི་བ་ཡང་སྡུག་བསྔལ་ལོ། །སྡུག་པ་དང་བྲལ་བའང་སྡུག་བསྔལ་ཡིན་ནོ། །མི་སྡུག་པ་དང་འཕྲད་པའང་སྡུག་བསྔལ་ཡིན་ནོ། །གང་འདོད་པ་བཙལ་ཀྱང་མ་རྙེད་པའང་སྡུག་བསྔལ་ཡིན་ནོ། །ཡོད་པ་སྲུང་དཀའ་བའང་སྡུག་བསྔལ་ཡིན་ནོ། །ཞེས་རྣམ་པ་བརྒྱད་དེ་ལྟར་གསུངས་ནས་དེ་ལྟ་བུའི་སྡུག་བསྔལ་སྣ་ཚོགས་ཀྱིས་མིའི་འགྲོ་བ་རྣམས་ཤིན་ཏུ་སྡུག་བསྔལ་ལོ་ཞེས་གསུངས་པ་ལྟར་དུ། རྩ་བའི་སྡུག་བསྔལ་གསུམ་གྱི་སྟེང་དུ་གཞན་སྡུག་བསྔལ་བརྒྱད་བཤད་པའི་སྐྱེ་བའི་སྡུག་བསྔལ་ནི། མའི་མངལ་ན་གནས་པའི་ཚེ་བཙོན་ཁང་དོག་མོར་གནས་པ་ལྟ་བུ་དང་། བཙས་པའི་ཚེ་ལྕགས་ཀྱི་འཇུར་མིག་དུ་དྲངས་པ་ལྟ་བུ། རྒྱབ་ཀྱི་ཕྲུས་མ་བཤུས་དུས་གསོན་པོའི་ལུས་ཀྱི་པགས་པ་བཤུས་པ་ལྟ་བུ་ལ་སོགས་པའི་སྡུག་བསྔལ་བ་དང་། རྒས་པའི་སྡུག་བསྔལ་ལུས་ཀྱི་སྟོབས་ཉམས། དབང་པོ་རྣམ་ལྔ་རྒུད། བཀྲག་དང་གཟི་མདངས་ཉམས། ངག་གི་སྨྲ་བརྗོད་ཁ་མི་འགྲོས་ནས་གཏམ་ལྡབ་ལྡིབ་ཏུ་གྱུར། མིས་ཚིག་ལ་མི་བརྩི། སེམས་ཀྱི་སྟོབས་ཤོར། རྒས་སེམས་སྣེ་ལོར་ལོག རྒལ་ཚིག་སྣད་མར་གྱུར། ཤི་བའི་སྡུག་བསྔལ་གྱིས་སེམས་མི་བདེ། ཚེ་མཐའི་ཉི་མ་དེ་འཆི་བ་སྒུག་ནས་འདུག་པ་སོགས་ཤི་མ་རན་གོང་ན་ལུས་སེམས་གཉིས་ཀའི་ཐོག་ཏུ་ཤི་བའི་སྡུག་བསྔལ་མྱོང་དགོས་པ་དང་། ན་བའི་སྡུག་བསྔལ་ནི། ལུས་འབྱུང་བཞི་རླུང་མཁྲིས་བད་ཀན་འདུ་བ་ཆ་མ་སྙོམས་པས། ཚ་བའི་ནད་མེ་འབར་བ་འདྲ། གྲང་བའི་ནད་ཆུ་ཁོལ་པ་འདྲ་བ་སོགས་ནད་སྣ་ཚོགས་ཀྱིས་མནར་བས། ཤི་ན་ཤི་རྒྱུ་མེད། དྲག་ན་དྲག་རྒྱུ་མེད། མལ་ས་སྐམ་རློན་འདྲེས། ཉིན་གྱི་ཉི་མ་ཆོད་རུང་། མཚན་གྱི་ནམ་མི་ཆོད། གཏར་བསྲེག་གཤག་གཅོད་ཚང་མ་བསྲན་རུང་། གཉེན་ཉེ་རེ་ལྟོས་ཚང་མས་བསྲུངས་ཀྱང་། སྲོག་དམར་པོ་རླུང་ནང་གི་མར་མེ་འདྲ་བ་ཤི་གསོན་ཕྱེད་མའི་སར་ཐོན་པའི་སྡུག་བསྔལ་དེ་ཁྲིམས་ཀྱིས་ཆད་པ་དྲག་པོས་མནར་བ་དང་འདྲ་བ་ཡིན་ཏེ། ཇི་སྐད་དུ། གང་ཚེ་གཤིན་རྗེའི་གཡུལ་ངོར་ཕམ་པ་དེ། །སྐྱབས་དང་དཔུང་གཉེན་བྲལ་བའི་གཡང་སར་རྒྱུག །འཚོ་བའི་མདངས་དང་དབང་པོ་རྣམ་པར་སྤངས། །སྨན་དང་སྨན་པ་དག་ཀྱང་དེ་ལ་འབྲོས། །ཞེས་གསུངས་པ་ལྟར་རོ། །ཡང་མཐར་འཆི་བའི་སྡུག་བསྔལ་ཡོད་པ་རེད། འཆི་རྟགས་ལུས་ལ་ཚང་དུས་དབུགས་ཕར་འཕེན་པ་ཚུར་མི་འདུ། ཤ་ཚ་སྙིང་རྗེའི་གཉེན་ཉེས་བསྐོར་ཀྱང་། ཞག་གཅིག་ཆུ་ཚོད་གཅིག་ཀྱང་གསོན་པོ་མི་ཡུལ་དུ་འདུག་པའི་དབང་མེད། འཆི་བདག་གཤིན་རྗེའི་ཞགས་ནག་སྐེར་ཐེབས། འབྱུང་བཞིའི་ཐིམ་རིམ་ཤར། འཁྲུལ་སྣང་མིག་སྔར་བབ་ནས། གསོན་མི་ཡུལ་བསྐྱུར་ནས་འཇིགས་པའི་སྒྲ་བཞི་དང་། ཡ་ང་བའི་གཡང་ས་གསུམ་ལ་སོགས་པར་འགྲོ་བའི་འཆི་བའི་སྡུག་བསྔལ་ཐོག་ཏུ་ཡོང་བ་མི་དགོས་དྲན་ན་འཇིགས་ཤིང་སྐྲག་པའི་གནས་ཡིན་པ་རེད། དེ་ལྟར་སྐྱེ་རྒ་ན་འཆིའི་བདུད་ཀྱི་ཆུ་བོ་ཆེན་པོ་བཞི་མ་ཟད། དགྲ་མི་སྡུག་པ་དང་འཕྲད་པའི་སྡུག་བསྔལ་ཏེ། དགྲ་མི་སྡུག་པ་ཞེས་པ་མཐོང་དུ་མི་འདོད་པ་འཇིགས་ཤིང་ཡ་ང་བ་དང་འཕྲད་ཅིང་གནོད་འཚེ་བྱེད་པ་དང་། ཚེ་སྔོན་ལས་ཀྱི་ལན་ཆགས་ཀྱིས་འགའ་རེ་ཕར་ཕན་བཏགས་ཡོད་ཀྱང་ཚུར་གནོད་བསྐྱལ་བའི་དགྲའང་ཡོད། ཕན་ཆེན་མ་བཏགས་གནོད་ཆེན་ག་ལ་བསྐྱལ། །ཞེས་པ་ལྟར་དང་། ཡང་སྒོས་དེ་རིང་ཁར་རྩང་གི་དུས་ཚོད་ལ་དེ་འདྲ་ཡིན། འདིས་ང་ལ་འདི་འདྲའི་གནོད་སེམས་ཤིག་བྱེད་འདུག ངས་འདི་ལ་ཕན་ཅི་བཏགས་ཡོད་བསམ་པ་གཏོང་དུས། འོ་དེ་ལོས་ཡིན་དེ་དུས་དེར་སྡུག་ཐུག་དུས་ངས་དེ་ལ་ཕན་ཞིག་བཏགས་ཡོད་བསམ་རྒྱུ་ཅན་པོ་ལྟ་བུ་དང་། ཡང་འགའ་རེ་ལས་ཀྱིས་དབང་གིས་ཕ་རོལ་པོ་དགྲར་ལོག་པ། མདོར་ན་རིག་ན་མི་དགའ་གོ་ན་མི་འདོད་པའི་མི་དང་འཕྲད། རྡུང་བཅོམ་འཕྲོག་གསུམ་མྱོང་། གཏམ་ངན་རྣ་སྡུག་གོ། དགྲ་ནག་པོ་འབོད་པའི་རྒྱུ་ནོར་གྱིས་གཡབ་མོས་དགྲ་ཇག་རྐུན་གསུམ་བཀུག་ནས། གསོག་བསྲུང་བརླག་པའི་སྡུག་བསྔལ་སྣ་ཚོགས་མྱོང་བས་ལུས་མི་བདེ་སེམས་མི་སྐྱིད་པ་དེ་ལྟ་བུའི་མི་འདོད་པ་དང་འཕྲད་པའི་སྡུག་བསྔལ་དང་། གཉེན་བྱམས་པ་དང་བྲལ་བའི་སྡུག་བསྔལ། ལས་ཀྱིས་བསྐོས་པའི་གཉེན་གྲོགས། གཅེས་ཤ་དམར་ཐང་ཡོད་པ། ཉིན་གཅིག་དང་ཡང་ཁ་ཁ་དབྱེ་མི་ཐུབ་པ། ཞག་རེ་སོང་ཡང་སེམས་མི་བདེ་བ་དེ་ཚོ་འཇིག་རྟེན་འདི་དང་གཏན་བྲལ་རེད་རྒྱུ། གྲོགས་མཐུན་པོ་ཡུན་རིང་འགྲོགས་ལོང་མེད་པ་དང་། ཕ་མ་བུ་རྒྱུད་དང་བྲལ་བ། བུ་རྒྱུད་ཕ་མ་དང་བྲལ་བའི་སྡུག་བསྔལ་སོགས་བཤད་ཚོད་མེད་པ་དེ་འདྲ་ཡོད་པ་རེད། འདོད་པ་ཐོག་ཏུ་མ་ཁེལ་བས་ཕོངས་པའི་སྡུག་བསྔལ། མིའི་བསམ་ཐོག་ཏུ་རྟ་ཡིས་མ་བརྫིས། མ་བསམ་པ་ཐོག་ཏུ་ཁེལ་བ། ལས་བསམ་པས་མ་རེད། གསག་པས་རེད། ཡར་མཐོ་གང་ཨེ་མཐོ་བསམ་ས་ནས་མར་འདོམ་གང་ལྷུང་ཤོར་བ། རྒྱུ་ཨེ་ལོན་བསམ་ཡང་མ་ལོན། གྲོགས་ཨེ་ཁུག་བསམ་ཡང་མ་ཁུག ཐོབ་ཨེ་མཐོ་བསམ་ཡང་མ་མཐོ། ད་རུང་དེའི་ཐོག་ཏུ་གྱོང་ཆེན་པོ་རག་རྒྱུ། ཐང་གི་རྡོ་ལེན་ས་ནས་རུམ་ནང་གི་གྲོ་ལྷུང་ཤོར་བ་ལ་སོགས་པ། མདོར་ན་འདོད་པ་ཐོག་ཏུ་མི་ཁེལ་བའི་སྡུག་བསྔལ་དང་། ཉེར་ལེན་གྱི་ཕུང་པོ་ལྔས་སྡུག་བསྔལ་གཏན་དུ་འཛིན་པ་སྟེ། གཟུགས་འབྱུང་འདུས་ཀྱི་ཕུང་པོར་མི་རྟག་པ་ཐོག་ཏུ་བབ་པ་དང་། ཚོར་བ་སྡུག་བསྔལ་གྱིས་རྟག་ཏུ་གཟིར་བ། འདུ་ཤེས་འཁྲུལ་པའི་རང་བཞིན་ལ་བདེ་དུས་མེད་པ། འདུ་བྱེད་ལས་ངན་གྱི་བྱེད་རྩོལ་ཟད་རྒྱུ་མེད་པ་ཞིག་མྱོང་བ། རྣམ་ཤེས་ཡུལ་དོན་གཉིས་ཀྱིས་བསླུས་ཏེ་ལས་ཉོན་ཀུན་འབྱུང་གིས་སྲིད་པ་ཕྱི་མ་བསྐྲུན་པའི་སྡུག་བསྔལ་བ་སྟེ། དེ་ལྟར་ཉེར་ལེན་གྱི་ཕུང་པོ་ལྔས་སྡུག་བསྔལ་གཏན་ཏུ་འཛིན་པ་སྟེ། དེ་ལྟ་བུའི་སྡུག་བསྔལ་རྣམ་པ་བརྒྱད་ཀྱིས་དུས་རྟག་ཏུ་མནར་བས་ན་མིའི་འགྲོ་བ་ནི་ཤིན་ཏུ་སྡུག་བསྔལ་ལོ། །དེའི་ཕྱིར་ཀུན་མཁྱེན་ཆེན་པོས། དེ་ལྟར་མི་ཡི་འཇིག་རྟེན་མཐའ་དག་ནའང་། །སྡུག་བསྔལ་རྒྱུ་འབྲས་ཉིད་ཕྱིར་བདེ་བ་མེད། །དེ་ལས་ཐར་ཕྱིར་ལེགས་པའི་ཆོས་བསམ་སྟེ། །འཁོར་བའི་གནས་ལས་ཐར་བའི་ཐབས་འཚལ་ལོ། །ཞེས་དེ་ལྟར་འགྲོ་བ་མིའི་འཇིག་རྟེན་གྱི་ཁམས་མཐའ་དག་གང་ལ་བསམ། གང་ལ་བལྟས་ཀྱང་སྡུག་བསྔལ་རྒྱུ་འབྲས་གཉིས་ལ་ཁོར་མོ་ཡུག་ཏུ་སྤྱོད་པས་ན་བདེ་བ་ཅུང་ཟད་ཀྱང་མེད་ལ། སྡུག་བསྔལ་ཅན་གྱི་གནས་དེ་ལས་ཐར་པར་བྱ་བའི་ཕྱིར་དུ་ཡང་དག་པའི་དམ་པའི་ཆོས་ཐོས་བསམ་སྒོམ་གསུམ་བྱས་ཏེ། འཁོར་བའི་གནས་བཙོན་ར་ལྟ་བུ་འདི་ལས་མྱུར་དུ་ཐར་པའི་ཐབས་ལ་འབད་འཚལ་ལོ། །ཞེས་གསུངས་སོ། །དེའི་ཡན་ཆད་ཀྱིས་མིའི་སྡུག་བསྔལ་བསྟན་པ་སོང་སྟེ། ལྷའི་སྡུག་བསྔལ་བསྟན་པ་ནི། མི་ལ་སྡུག་བསྔལ་མང་པོར་ཡོད་པ་དེ་བཞིན་དུ་འདོད་ལྷའི་གནས་ནའང་སྡུག་བསྔལ་ཚད་མེད་པ་ཡོད་དེ། ལྷ་གནས་དེ་དག་གང་དུ་ཡོད་ཅེ་ན། འཇིག་རྟེན་ཁམས་ཀྱི་ཆགས་སྟངས་བཤད་ཚུལ་ལ་འདྲ་མིན་འགའ་ཞིག་ཡོད་ཀྱང་། རང་ལུགས་ཀློང་ཆེན་པའི་ཡིད་བཞིན་མཛོད་ལྟར་འཆད་ན། རིའི་རྒྱལ་པོ་རི་རབ་དབུས་སུ་བྱས་པ་ལ། དེའི་ཕྱོགས་བཞི་ན་གཉའ་ཤིང་འཛིན་རི་དང་གཤོལ་མདའ་འཛིན་ལ་སོགས་པ་གསེར་གྱི་རི་བདུན་གྱིས་གྲུ་བཞིར་བྱས་ནས་བསྐོར་བ་དང་། དེ་དག་གི་བར་ཐམས་ཅད་ན་བསིལ་དང་ཞིམ་དང་ཡང་བ་སོགས་ཡན་ལག་བརྒྱད་ལྡན་གྱི་ཆུས་གང་བའི་རོལ་པའི་མཚོ་བདུན་དང་། ཕྱི་རོལ་ན་བ་ཚྭ་ཅན་གྱིས་མཚོས་གང་བ། ཕྱོགས་བཞིར་གླིང་བཞི་ཆགས་ཏེ། གླིང་བཞི་ནི་མིའི་གནས་ཀྱི་འཇིག་རྟེན་ཡིན་ལ། ཤར་ལུས་འཕགས་པོའི་གླིང་གི་དབྱིབས་ནི་ཟླ་གམ་ལྟ་བུ་གླིང་ཕྲན་དང་བཅས་པ་དང་། ལྷོ་འཛམ་བུའི་གླིང་ནི་སོག་ཁའི་དབྱིབས་དང་འདྲ་བ་གླིང་གཡོག་གཉིས་དང་བཅས་པ། ནུབ་བ་གླང་སྤྱོད་དབྱིབས་ཟླུམ་པོ་གླིང་གཡོག་གཉིས་དང་བཅས་པ། བྱང་སྒྲ་མི་སྙན་དབྱིབས་གྲུ་བཞི་གླིང་གཡོག་གཉིས་དང་བཅས་པ་ཆགས། འཛམ་བུའི་གླིང་གི་གངསཏི་སེའི་འོག་གི་དཔག་ཚད་ཉིས་ཁྲི་ན་དམྱལ་བ་མནར་མེད་པ་དང་། ཚ་དམྱལ་གཞན་བདུན་པོ་དེའི་སྟེང་ན་རྩེག་མར་ཆགས་པར་གསུངས། ཡི་དྭགས་ཀྱི་རྩ་བའི་གནས་རྒྱལ་པོའི་ཁབ་ཀྱི་འོག་གི་དཔག་ཚད་ལྔ་བརྒྱ་ན་ཡོད་པ་དང་། ཡན་ལག་རྣམས་ནི་ལྷ་དང་མིའི་གནས་ནའང་ཡོད་པར་གསུངས། དུད་འགྲོ་བྱིང་གནས་རྒྱ་མཚོ་ཆེན་པོ་དང་། ཁ་འཐོར་ལྷ་མིའི་ཡུལ་ནའང་ཡོད། མཐོ་རིས་ལྷ་མི་གཉིས་ལས་ལྷ་ཡུལ་ལ། འདོད་ཁམས་དང་། གཟུགས་ཁམས་དང་གཟུགས་མེད་ཁམས་གསུམ་གྱི་ལྷའི་གནས་ཡོད་པ་ལས། འདོད་ཁམས་ཀྱི་ལྷར་གཏོགས་པ་ནི་འདོད་ལྷ་རིགས་དྲུག་སྟེ། དེ་ལ་ས་ལ་བརྟེན་པའི་ལྷ་གནས་གཉིས་དང་། ནམ་མཁར་བརྟེན་པའི་ལྷ་གནས་བཞི་སྟེ་དྲུག་ཡོད། ས་གཞིར་བརྟེན་པ་གཉིས་ནི། རྒྱལ་ཆེན་རིགས་བཞི་ནི་རི་རབ་ཀྱི་བང་རིམ་དང་། ཉི་ཟླ་སྐར་མའི་སྟེང་ན་ཡོད། སུམ་ཅུ་རྩ་གསུམ་རི་རབ་ཀྱི་རྩེ་མོར་ཆགས་པ་དང་། དེའི་སྟེང་གི་ནམ་མཁའ་ན་གྱེན་ལ་རིམ་བཞིན་ས་གཞི་དང་མ་འབྲེལ་བ་འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་རྣམས་ཡོད། རི་རབ་ཀྱི་ཆུ་མཚམས་ཡན་གྱི་ཁོང་གསེང་ན་ལྷ་མ་ཡིན་སྒྲ་གཅན་དང་། སྐར་ཕྲེང་། མགུལ་ཕྲེང་། ཐགས་བཟང་རིས་རྣམས་ཆགས་ཡོད། འདོད་ཁམས་ཀྱི་གྱེན་དུ་འཕགས་པའི་སྟེང་གི་ནམ་མཁའ་ན་གཟུགས་ཁམས་ཀྱི་ལྷ་གནས་ཆགས་པའི་དང་པོ། བསམ་གཏན་དང་པོའི་ཚངས་རིས་དང་། ཚངས་པ་མདུན་ན་འདོན། ཚངས་ཆེན་དང་གསུམ། གཉིས་པའི་འོད་ཆུང་དང་། ཚད་མེད་འོད་དང་། འོད་གསལ་གསུམ། གསུམ་པའི་དགེ་ཆུང་དང་། ཚད་མེད་དགེ་དང་། དགེ་རྒྱས་གསུམ། བཞི་པའི་སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་བ་སྟེ་སོ་སྐྱེས་ཀྱི་གནས་གསུམ་དང་། དེའི་གོང་ན་མི་ཆེ་བ་དང་། མི་གདུང་བ། གྱ་ནོམ་སྣང་བ། ཤིན་ཏུ་སྣང་བ། འོག་མིན་ཏེ་འཕགས་པའི་གནས་གཙང་ལྔ་ཆགས་ཡོད། དེ་དག་གཟུགས་ཁམས་གནས་རིས་བཅུ་བདུན་རེད། དེ་ནས་ནམ་མཁའ་མཐའ་ཡས་ལ་སོགས་པའི་གཟུགས་མེད་སྐྱེ་མཆེད་མུ་བཞི་ཡང་ཡོད། གནས་དེ་རྣམས་ལ་བཤད་ཚུལ་འདྲ་མིན་གྱི་མཐའ་དཔྱད་འདྲ་མང་པོ་ཡོད་ཀྱང་ཧ་ཅང་མང་བར་འགྱུར་བས་མི་བཤད། གཙང་མའི་གནས་དེ་དག་ཐམས་ཅད་ལས་འདས་པའི་ཡང་རོལ་ན་འོག་མིན་ཆེན་པོའམ། དབང་ཕྱུག་ཆེན་པོ་དང་། འོག་མིན་རྣམ་མཛེས་ཞེས་ཀྱང་བྱ་བའི་ས་བཅུ་པའི་བྱང་ཆུབ་སེམས་དཔའ་རྣམས་བཞུགས་པའི་གནས་རྣམས་ཆགས་ཡོད། གཟུགས་མེད་པའི་རིས་བཞི་ལ་རིག་པ་ཏིང་ངེ་འཛིན་གྱི་ལུས་མ་གཏོགས་དེའི་གནས་དེར་ཕྲ་རགས་ཀྱི་མངོན་སྣང་གི་གཟུགས་སུ་གྲུབ་པ་མེད་པས་ན་གཟུགས་མེད་ཅེས་བྱ། འོ་ན་གཟུགས་ཁམས་ཞེས་པ་བསམ་གཏན་གྱི་ལྷ་ཁོ་ན་སྦྱར་དོན་ཅི་ཡིན། འདོད་ལྷ་ལའང་གཟུགས་ཡོད་པ་མ་ཡིན་ནམ་སྙམ་ན། གཟུགས་སུ་གྲུབ་པ་ཙམ་འདྲའང་། དགེ་བ་ཟག་བཅས་ཀྱི་འབྲས་བུ་གཟུགས་ཀྱི་མཆོག་བསམ་གཏན་གྱི་གཟུགས་འོད་གསལ་དྭངས་པ། སྣང་བ་འོད་ཀྱི་གཟུགས་ཡིན་པས་ན་གཟུགས་ཁམས་དང་། འདོད་པའི་རྣམ་སྨིན་སྐྱེས་ཀྱི་འབྲས་བུའི་གཟུགས་དང་མི་འདྲ་བའི་ཕྱིར་དམན་ལ་དགག་སྒྲའི་དབང་གིས་འདོད་ལྷ་ལ་གཟུགས་ཀྱི་སྒྲ་མ་སྦྱར་བ་རེད། འདིར་འཁོར་བའི་སྡུག་བསྔལ་གསུངས་པ་ན། མཐོ་རིས་ལྷ་གནས་སུ་སྡུག་བསྔལ་ཡོད་པའི་ཚུལ་འདི་ལྟར། མཆན། འོག་གི་ཨངྒི་འདི་རྣམས་ནི་མིའི་ལོ་གྲངས་ཏེ། ལྷ་གནས་སོ་སོའི་ཞག་རེ་ཡིན་ལ། དེའི་ལོ་ཟླའི་འགྱུར་གྱིས་བརྩིས་ནས་རྒྱལ་ཆེན་རིགས་བཞིའི་ལོ་ལྔ་བརྒྱ་ལ་ཡང་སོས་ཀྱི་ཞག་གཅིག སུམ་ཅུ་རྩ་གསུམ་པ་ནས་རིམ་པར་སྟོང་དང་། ཉིས་སྟོང་དང་། བཞི་སྟོང་དང་། བརྒྱད་སྟོང་དང་། ཁྲི་དྲུག་སྟོང་རྣམས་ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་རྣམས་ཀྱི་ཞག་རེ་ཡིན་ལ། རབ་ཏུ་ཚ་བ་དང་མནར་མེད་པ་ནི་གཞལ་བྱ་དེས་མ་ཡིན་ཏེ་གོང་དུ་བཤད། ཨངྒི་འདི་རྣམས་མིའི་ལོ་གྲངས་དང་བསྡུར་ཏེ་དེ་ལྷ་གནས་རྣམས་ཀྱི་ཞག་རེར་བྱས་པའི་དེའི་ལོ་ཟླའི་འགྱུར་གྱིས་བརྩིས་པའི་ལོ་གྲངས་རྣམས་ནི་དེ་དག་གི་ཚེའི་ཚད་ཡིན། འདོད་པའི་ལྷ་རྒྱལ་ཆེན་རིགས་བཞི་༥༠དང་། སུམ་ཅུ་རྩ་གསུམ་༡༠༠དང་། ལྷ་ཕྲུག་ཕོ་མོ་མཉམ་དུ་མཚེ་མ་ལྟར་སྐྱེས་པས་མཚེ་མའམ་འཐབ་བྲལ༢༠༠དང་། དགའ་ལྡན་༤༠༠དང་། འཕྲུལ་དགའ་༨༠༠དང་། གཞན་འཕྲུལ་དབང་བྱེད་༡༦༠༠ཀྱི་བར་དེ་དག་འདོད་པའི་ཡོན་ཏན་སྣ་ཚོགས་ལོངས་སུ་སྤྱོད་པས་བདེ་བ་ལྟར་སྣང་ཡང་། དོན་ལ་འགྱུར་བ་དང་། འདུ་བྱེད་ཀྱི་སྡུག་བསྔལ་ཁོ་ནས་མནར་བ་ཡིན་པས་ན་འགྱུར་བའི་སྡུག་བསྔལ་ཡོད་། འདོད་ཡོན་ལ་བརྩེ་ཞིང་དགའ་བས་གཡེངས་སྟེ་སྐྱིད་པའི་སྐབས་ན་ལྷ་མིན་དང་གཡུལ་འགྱེད་དེ་ཤི་རྨས་དང་། མིན་ཡང་རྒྱལ་བློན་དང་རིགས་གཟུགས་སོགས་མཐོ་དམན་མེད་པར་ཐམས་ཅད་བདེ་བ་ཅན་དང་འདྲ་བ་མིན་པས། འོད་དང་གཟི་མདངས་སྟོབས་རྩལ་ཆེ་ཆུང་སོགས་ལ་བརྟེན་ནས་གཞན་གྱིས་དཔའ་སྐོང་བ་སོགས་ཀྱི་སྡུག་བསྔལ་དང་། ནམ་ཞིག་འོག་ཏུ་ལྟུང་བ་དང་། ཟག་བཅས་ཀྱི་བདེ་བ་ཡིན་པས་འདུ་བྱེད་ཀྱི་སྡུག་བསྔལ་བསམ་གྱིས་མི་ཁྱབ་པ་ཡོད་པ་དང་། འཆི་བའི་ཚེ་ལྷའི་ཞག་བདུན་གྱི་སྔོན་ནས་ལུས་ཀྱི་མདོག་མི་སྡུག་པར་འགྱུར་བ་དང་། ལུས་ཀྱི་རྒྱན་ཆ་མེ་ཏོག་རྙིངས་པ་དང་། འཆི་ལྟས་ཚང་བས་རང་ཉིད་ཡི་མུག་ཅིང་ཉམས་མི་དགའ་བ་དང་། ལྷ་ཟླ་བོའམ་གྲོགས་པོས་སྤོང་ཞིང་རྩར་མི་འོང་བས་སེམས་ཀྱི་འདུ་ཤེས་འཁྲུགས་པ་དང་། ཕྱི་མ་གང་དུ་སྐྱེས་པའི་གནས་འོག་མ་རྣམས་ལྷ་ཡི་མིག་གིས་མཐོང་བས་ཕལ་ཆེ་བར་ངན་སོང་གི་གནས་སུ་སྐྱེ་བ་སོགས་སུ་མཐོང་བས་རྐྱེན་བྱས་ནས་སྡུག་བསྔལ་དེ་ལ་སྐྲག་སྟེ་བརྒྱལ་བ་ན། ལྷ་ཕ་མའམ། མཛའ་བཤེས་ལ་སོགས་པས་ཉེ་བར་མི་བཅར་ཞིང་རྒྱང་རིང་པོ་ནས་བོས་ཏེ། འདི་ནས་ཚེ་འཕོས་ཏེ་འཛམ་བུའི་གླིང་དུ་ལས་ཀྱི་ས་པའི་མི་རྣམས་ཀྱི་ནང་དུ་སྐྱེ་བར་ཤོག་ཅིག འཛམ་གླིང་མིའི་རྟེན་དེར་ཡང་དགེ་བཅུར་སྤྱད་ནས་ཕྱིས་ཀྱང་ལྷའི་གནས་རིས་འདིར་སྐྱེ་བར་ཤོག་ཅིག ཅེས་ཡིད་ཀྱི་སྨོན་པ་ཁར་བཏོན་ཅིང་། གྱེས་ཕྱག་གི་ཚུལ་དུ་ལྷ་ཡུལ་ནས་འབྲལ་རན་ཁར་མེ་ཏོག་གཏོར་ནས་རྒྱང་རིང་པོར་འབྲོས་པ་དེ་ལྟ་བུའི་སྡུག་བསྔལ་ལྷའི་ཞག་བདུན་དུ་སྤྱོད་པས་ཉམ་ཐག སུམ་ཅུ་རྩ་གསུམ་ལ་མཚོན་ན་ཞག་རེར་མིའི་ལོ་བརྒྱ་རེ། ལྷའི་ཞག་བདུན་ལ་མི་ལོ་བདུན་བརྒྱ་སྟེ། དེ་ལྟ་བུ་སོགས་ཡུན་རིང་པོ་ལ་དེ་འདྲའི་འཕོ་ལྟུང་གི་སྡུག་བསྔལ་མྱོང་བ་དང་། གོང་མ་རྣམས་དེ་བས་རིང་བ་ཡིན། འོ་སྐོལ་ཏེ་ང་ཚོའི་མི་རྣམས་འཆི་བའི་ཚེ་མཛའ་གྲོགས་གཉེན་བཤེས་ཐམས་ཅད་ཀྱིས་ནད་པ་དེའི་མལ་སའི་མཐའ་བསྐོར་ནས་དེའི་འདོད་པ་ལྟར་ཡར་བཀྱག་མར་ཕབ། གོས་བརྗེ་བ་སོགས་ཐབས་དུ་མས་རེ་བ་སྐོང་ཅི་ཐུབ་བྱེད་ནའང་ཤིན་ཏུ་སྡུག་བསྔལ་ཞིང་ཡི་མུག་ན། ལྷ་དག་དེ་འདྲ་དུས་ཡུན་རིང་པོ་མི་ལོ་བདུན་བརྒྱ་སོགས་སུ་་རང་གཅིག་པུར་གནས་ནས་འཆི་འཕོའི་སྡུག་བསྔལ་མྱོང་ན་ལྟ་ཅི་སྨོས། གཞན་ཡང་བསམ་གཏན་དང་པོའི་ཚངས་རིས་ནས་བསམ་གཏན་བཞི་པའི་འབྲས་བུ་ཆེན་པོའི་བར་ཏེ། གཟུགས་ཁམས་བསམ་གཏན་གྱི་ལྷ་རྣམས་སྔོན་མི་གཡོ་བའི་དགེ་བས་གཟི་བྱིན་གྱི་དཔལ་དང་ལྡན་པ་དེ་དག་ཀྱང་ལས་ཟད་ནས་འཆི་བའི་ཚེ། ད་ལྟའི་བདེ་བ་དེ་ཉིད་འགྱུར་ནས་སྲིད་པ་ཕྱི་མར་འཇུག་པའི་སྡུག་བསྔལ་དཔག་ཏུ་མེད་དེ། འཕགས་པ་ཀླུ་སྒྲུབ་ཀྱིས། ཚངས་རིས་ལ་སོགས་བསམ་གཏན་ལྷུན་གྲུབ་ཀུན། །འོད་དང་ཁ་དོག་གཟི་བརྗིད་མཐའ་ཡས་ཀྱང་། །བདག་རྟོག་བག་ལ་ཉལ་བ་མ་གཟིགས་ནས། །ཤི་ནས་དམྱལ་བར་སྐྱེ་བ་ཆ་མེད་དམ། །ཞེས་ཚངས་རིས་ལ་སོགས་པ་བསོད་ནམས་ཆ་མཐུན་གྱི་དགེ་བས་བསམ་གཏན་གྱི་གནས་སུ་བསམ་གཏན་གྱི་འབྲས་བུ་ལྷུན་གྱིས་གྲུབ་པ་དེ་དག་ཐམས་ཅད་ཀུན་ཀྱང་། འོད་དང་ཁ་དོག དཔལ་དང་གཟི་བརྗིད་མཐའ་ཡས་ཀྱང་བདག་རྟོག་འཁོར་བའི་རྩ་བ་བག་ལ་ཉལ་བ་ཡོད་པར་མ་གཟིགས་ནས། བདག་མེད་རྟོགས་པའི་ཤེས་རབ་ཀྱིས་འཁོར་རྩ་མ་བཅོམ་པས་འཁོར་བ་ལས་མ་ཐར་ཞིང་མཐོ་རིས་འཕེན་པའི་དགེ་བའི་ཤུགས་ཟད་པས་ཤི་ནས་དམྱལ་བར་མི་སྐྱེ་བའི་ཆ་མེད་པའམ་ངེས་པ་མེད་དོ། །ཞེས་གསུངས་ལ། དེ་བཞིན་དུ་ནམ་མཁའ་མཐའ་ཡས་ལ་སོགས་པ་གཟུགས་མེད་སྐྱེ་མཆེད་མུ་བཞི་ནི་འཇིག་རྟེན་པའི་ལམ་ཡིན་པས་ཐར་པ་དང་ཐམས་ཅད་མཁྱེན་པ་ཐོབ་པའི་ཉེ་རྒྱུ་མ་ཡིན་པའི་རྒྱུ་སྙོམས་འཇུག་གི་བསམ་གཏན་གྱི་དབང་གིས། འབྲས་བུ་སྐྱེ་བའི་ལུང་མ་བསྟན་གྱི་བསམ་གཏན་ནམ་སྙོམས་འཇུག་ཉི་ཚེ་བར་འབྱམས། ཅི་ཞིག་ན་ཚེ་ཚད་ཟད་དེ་འཆི་འཕོས་ནས་སྲིད་པ་ཕྱི་མའི་སྡུག་བསྔལ་མི་མྱོང་ཐབས་མེད་ཡིན་ཏེ། དཔེར་ན་ནམ་མཁའ་ལ་འཕུར་བའི་འདབ་ཆགས་ཡར་ཅི་ཙམ་མཐོ་བར་འཕུར་ཏེ་གནམ་འཕང་བསྐྱོད་ཀྱང་མཐར་ངེས་པར་ས་ལ་བབ་དགོས་པ་བཞིན་དུ། ལས་ཀྱི་རྗེས་སུ་འབྲངས་ཏེ་གནས་ངེས་མེད་དུ་སྡུག་བསྔལ་ངེས་མེད་མྱོང་ན། འཇིག་རྟེན་པའི་གནས་སྐབས་ཟག་བཅས་ཀྱི་བདེ་བ་ལ་ཡིད་བརྟན་པར་བྱེད་པ་ནི་སྐྱོན་གྱི་མཚང་རེ་ཆེ་སྟེ། སློབ་སྤྲིང་ལས། སྡུག་བསྔལ་མེ་ཚོགས་ཕུང་པོས་འཇིགས་པའི་འཇིག་རྟེན་འདིར། །སྐྱེ་བོ་བདེ་སྙམ་མངོན་པའི་ང་རྒྱལ་བྱེད་པ་གང་། །དེ་ནི་གཤིན་རྗེའི་ཁ་ཡངས་འབྱེད་པར་བྱེད་པ་སྟེ། །དེ་ནི་སྐྱེ་བ་ཕྱི་མའི་ལྗོན་ཤིང་ས་བོན་ཡིན། །ཞེས་མེ་དོང་ཐལ་བས་གཡོགས་པ་ལྟར་གྱི་འཁོར་བའི་སྡུག་བསྔལ་གྱི་མེ་མུར་ལྟ་བུས་བསླུ་ཞིང་ཕུང་སྟེ་དབལ་ཚ་བའི་མེ་ཚོགས་ཀྱིས་འཇིགས་ཤིང་ཉམ་ང་བའི་འཇིག་རྟེན་གྱི་ཁམས་འདིར། སྐྱེ་བོ་རྣམས་འདི་སྣང་ལྷ་མིའི་བདེ་བས་བདེའོ་སྙམ་པ་ནི། སྡུག་བསྔལ་རགས་པ་ཕྱིར་བཅོས་པ་ཙམ་བདེ་བ་མེད་པ་ལ་བདེ་བའོ་སྙམ་ནས་མངོན་པའི་ང་རྒྱལ་བྱེད་པ་གང་དག་འདོད་ཡོན་གྱིས་གཡེང་བ་དེ་ནི། སྡུག་བསྔལ་གྱི་མཆེ་བ་རྣོན་པོས་ཟ་བར་བྱེད་པའི་ལས་ཀྱི་གཤིན་རྗེའི་ཁ་ཡངས་པར་འབྱེད་པར་བྱེད་ནས་ཤི་བ་སྒུག་པ་ལྟ་བུ་སྟེ། དེ་ལྟར་བདེ་བ་མེད་པ་ལ་ཡོད་པར་རློམ་ནས་ཞེན་ཅིང་ཆགས་པ་དེ་ནི་སྐྱེ་བ་ཕྱི་མའི་ཡང་སྲིད་ཉེ་བར་ལེན་ཏེ་སྡུག་བསྔལ་བའི་ལྗོན་ཤིང་གི་ས་བོན་བཏབ་པ་ལྟ་བུ་ཡིན་ནོ། །ཞེས་གསུངས་སོ། །དེའི་ཡན་གྱིས་ལྷའི་སྡུག་བསྔལ་བསྟན་ནས། ད་ནི་ལྷ་མ་ཡིན་གྱི་སྡུག་བསྔལ་བསྟན་པ་ནི། གཞན་ཡང་འདི་ལྟར་ལྷ་མིན་རྣམས་ལ་ནི་སྡུག་བསྔལ་དེ་བས་ཀྱང་དབལ་ཚ་སྟེ། བཤེས་སྤྲིང་ལས། ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ནའང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་ལུས་དང་རྫུ་འཕྲུལ་ལོངས་སྤྱོད་རྣམས་ལྷ་དང་ཕྱོགས་འདྲའང་། རིས་དང་སྐལ་བ་མི་འདྲ་བས་ན་ལྷ་མ་ཡིན་ཞེས་བྱ་ལ། ལྷ་མ་ཡིན་གྱི་གནས་དག་ཏུ་སྐྱེས་པའི་འགྲོ་བ་དེ་དག་རྣམས་ནི་རང་བཞིན་གྱིས་ཕྲག་དོག་ཆེ་བས་ལྷ་ཡི་དཔལ་དང་འབྱོར་པ་ལ་སྡང་ཞིང་། ཕྲག་དོག་གི་རླུང་འཚུབ་ཞེ་སྡང་གི་མེ་འབར་བ་སོགས་ཀྱིས་ཡིད་མི་བདེ་བས་ཡིད་ཀྱི་སྡུག་བསྔལ་ཆེ་བ་དང་། མཐོ་རིས་སུ་སྐྱེས་པའི་ལྷ་མ་ཡིན་དེ་དག་ངན་སོང་གི་འགྲོ་བ་ལ་ལྟོས་ན་བློ་དང་ལྡན་པ་ཡིན་ནའང་། རང་སའི་འགྲོ་བའི་སྡུག་བསྔལ་དང་རྣམ་སྨིན་གྱི་སྒྲིབ་པ་ཤིན་ཏུ་ཆེ་བ་དང་། ལས་ཀྱི་སྒྲིབ་པ་དང་བདེན་འཛིན་མ་རིག་འཐུག་པོས་སྒྲིབ་པས་བདེན་པ་མཐོང་བ་མ་ཡིན་ནོ། །ཞེས་གསུངས་ན། ལྷ་མ་ཡིན་དེ་དག་གི་གནས་ནི་རི་རབ་ཀྱི་ཆུ་མཚམས་མན་ན་ཡོད་ལ། ཆོས་བཟང་ལྷའི་འདུན་ས་ལ་སོགས་པ་གནས་སུམ་ཅུ་རྩ་གསུམ་ན། གཙོ་བོ་ཉེ་བའི་དབང་པོ་སོ་གཉིས་དང་། ལྷའི་དབང་པོ་བརྒྱ་བྱིན་དང་བཅས་པ་སུམ་ཅུ་རྩ་གསུམ་ཡོད་པས་སུམ་ཅུ་རྩ་གསུམ་ཞེས་པའི་ལྷ་ཡུལ་ནི། རི་རབ་ཀྱི་སྟེང་ན་ལྷའི་གྲོང་ཁྱེར་ལྟ་ན་སྡུག་པའི་དབུས་ན་རྣམ་པར་རྒྱལ་བའི་ཁང་བཟང་ཡོད་ལ། ཕོ་བྲང་དེ་ནི་རིན་པོ་ཆེ་སྣ་ཚོགས་ལས་གྲུབ་པ། རིན་པོ་ཆེའི་དྲྭ་བ་དང་ཆུན་འཕྱང་གིས་བརྒྱན་པ། ཕྱི་རོལ་ན་སྐྱེད་མོས་ཚལ་དང་ཁྲུས་ཀྱི་རྫིང་བུ་དང་པདྨས་བརྒྱན་པ། རིན་པོ་ཆེ་སྣ་ཚོགས་ཀྱི་ཐེམ་སྐས་དང་ལན་ཀན་དང་། འདོད་འབྱུང་དཔག་བསམ་ཤིང་གིས་བརྒྱན་པའི་དཔལ་དང་ལྡན་པ། གྲོང་ཁྱེར་ལྟ་ན་སྡུག་པའི་ས་གཞི་ཐམས་ཅད་ཤིང་བལ་གྱི་འདབ་མ་ལྟར་འཇམ་པ། ཚོན་སྣ་བརྒྱ་རྩ་གཅིག་གི་ཁ་དོག་ཅན། མཐའ་ན་གསེར་གྱི་ར་བས་བསྐོར་བ། ནོར་བུ་སྣ་ཚོགས་ཀྱི་སྒོ་རྒྱན་ཡོད་པ། ཕྱིའི་སྒོ་ཆེན་གྱི་ཕྱོགས་ཐམས་ཅད་ན་སྒོ་དགུ་བརྒྱ་དགུ་བཅུ་གོ་དགུ་ཡོད་ཅིང་། དེ་རེ་ལ་ལྷའི་སྲུང་མ་གོ་མཚོན་ཅན་ལྔ་བརྒྱ་རེས་སྲུང་བ། ཕྱོགས་ཀྱི་ལམ་སྲང་ཐམས་ཅད་རིན་པོ་ཆེ་སྣ་ཚོགས་ལས་གྲུབ་པ། ལམ་འགྲམ་ཐམས་ཅད་ན་རྫིང་བུ་སྦྲང་རྩིའི་ཆུ་གསེར་ཅན་ཡོད་པ། ཨུཏྤལ་དང་པདྨ་དཀར་པོ་སོགས་དྲི་ཞིམ་ཅན་གྱི་མེ་ཏོག་གིས་ཁེབས་པ། མཚམས་དང་མཚམས་སུ་དཔག་བསམ་གྱི་ལྗོན་ཤིང་ཕྲེང་བ་ལྟར་བསྒྲིག་པ། དེ་རྣམས་ལ་མེ་ཏོག་དང་གོས་སོགས་འདོད་པའི་ཡོན་ཏན་ཅི་འདོད་པ་འབྱུང་བ། ལྷའི་བྱ་སྐད་སྙན་པར་སྒྲོག་པ་དང་ལྡན་པ། གྲོང་ཁྱེར་ལྟ་ན་སྡུག་དེའི་ཤར་ཕྱོགས་ན་ཤིང་རྟ་སྣ་ཚོགས་པའི་སྐྱེད་མོས་ཚལ་ཡོད་ཅིང་། དེར་འདོད་པའི་ཡོན་ཏན་སྣ་ཚོགས་ལ་ལོངས་སུ་སྤྱོད་པ་དང་། ལྷོ་ཕྱོགས་ན་རྩུབ་འགྱུར་ཚལ་ཡོད། ལྷ་རང་བཞིན་གྱིས་ངང་རྒྱུད་ཞི་ཞིང་དུལ་བ་ཡིན་པས་ཁོང་ཁྲོ་བ་མེད་ཀྱང་། ལྷ་དང་ལྷ་མིན་འཐབ་པའི་ཚེ་རྩུབ་འགྱུར་གྱི་ཚལ་དེར་སོང་ནས་དེ་ན་ཡོད་པའི་ཆུ་འཐུང་བ་ན་ཁོང་ཁྲོ་བའི་རྣམ་པ་སྐྱེས་པ་དང་། ལྗོན་ཤིང་དེ་དག་ལས་རིན་པོ་ཆེའི་གོ་ཆ་སྲ་བ་མཚོན་གྱིས་མི་ཕིག་པ་དང་མཚོན་ཆ་སྣ་ཚོགས་པ་འབྱུང་བ་དང་། ནུབ་ན་འདྲེས་མའི་ཚལ་དང་། བྱང་ན་དགའ་བའི་ཚལ་ཡོད། དགའ་བའི་ཚལ་དེའི་དབུས་ན་བསྐལ་བཟང་སངས་རྒྱས་སྟོང་གི་བཞུགས་ཁྲི་རིན་པོ་ཆེ་ལྗོན་པའི་ནང་ན་ཡོད་པའི་འོད་ཟེར་དེ་ལ་ལྷའི་དབང་པོ་མ་གཏོགས་ལྷ་ཕྲན་གཞན་གྱིས་བལྟ་མི་བཟོད་པ་དང་། ལྷའི་དབང་པོས་དེའི་ནང་བལྟ་བ་ན། ལྷ་རྣམས་ཀྱི་ཚེ་རབས་ཀྱི་ལེགས་ཉེས་དང་། གཡུལ་དུ་ཞུགས་དུས་གནོད་པས་རྫི་དང་མི་རྫིའི་མཚན་མ་སོགས་མེ་ལོང་ན་གཟུགས་བརྙན་ཤར་བ་ལྟར་གསལ་པོར་མཐོང་ཐུབ་པ་དང་། གྲོང་ཁྱེར་ལྟ་ན་སྡུག་གི་བྱང་ཤར་མཚམས་སུ་རི་རབ་ཀྱི་ས་གཞི་ཡར་བརྟོལ་ནས་བྱུང་བའི་ཤིང་ཡོངས་འདུའི་ས་བརྟོལ་ཞེས་པ་སྐྱེས་ཡོད་ལ། ཤིང་དེའི་རྩ་བ་དཔག་ཚད་ལྔ་བརྒྱ་ཐུར་དུ་ཟུག་ཅིང་སྟེང་དུ་ཡར་དཔག་ཚད་ལྔ་བརྒྱ་སྐྱེས་པ། དཔག་བསམ་གྱི་ལྗོན་ཤིང་དེ་ལས་གང་འདོད་ཐམས་ཅད་ཡིད་ལ་བསམ་པ་ཙམ་གྱིས་འབྱུང་བ། དེའི་རྩ་བ་ལྷ་མ་ཡིན་གྱི་ཡུལ་དུ་ཟུག་ཅིང་། སྡོང་པོ་དང་། ཡལ་ག་དང་། འབྲས་བུ་ཐམས་ཅད་ལྷའི་ཡུལ་དུ་རྒྱས་པ་ལ། ལྷ་རྣམས་ཀྱི་ཅི་དགར་ལོངས་སུ་སྤྱོད་པ་ལ་ལྷ་མ་ཡིན་དེ་ལ་ཕྲག་དོག་བྱེད་པ། དེའི་རྐྱེན་གྱིས་ལྷ་དང་ལྷ་མིན་འཐབ་ཅིང་རྩོད་པ་ཡིན་ཞེས་གྲག་ལ། དེས་ན་ལྷ་མ་ཡིན་རྣམས་ཀྱིས་སུམ་ཅུ་རྩ་གསུམ་པའི་སྐྱིད་པ་དང་འབྱོར་པ་མཐོང་ནས། ཁོང་ཁྲོ་དང་ཕྲག་དོག་གི་མེས་གདུང་ནས་ལྷ་དང་འཐབ་པའི་ཚེ་གཡུལ་ངོར། ལྷའི་དམག་གིས་ལྷའི་གླང་པོ་ཆེ་རབ་བརྟན་གྱི་མགོ་བོ་སུམ་ཅུ་རྩ་གཉིས་ལ་ཉེ་དབང་སུམ་ཅུ་རྩ་གཉིས། དབུས་ཀྱི་མགོ་བོ་ལ་ལྷའི་དབང་པོ་བརྒྱ་བྱིན་ཞོན་ནས་ལྷའི་དམག་ཚོགས་བསམ་གྱིས་མི་ཁྱབ་པས་བསྐོར་ཏེ། ཀི་བསོ་ཆ་སྒྲ་དང་བཅས་ཏེ་གཟི་བྱིན་བཟོད་པར་དཀའ་བ་ཞིག་བྱེད་པ་དང་། ལྷ་རྣམས་སྔོན་ལས་ཀྱི་དབང་གིས་ལྷ་མ་ཡིན་ལས་ལུས་མི་འགྲེང་བདུན་གྱིས་མཐོ་ཞིང་ལྷ་མ་ཡིན་རྣམས་དམའ་ལ། ལྷ་རྣམས་རྫུ་འཕྲུལ་ཡོད་པས་རི་ཆེན་པོ་སོགས་འཕེན་ཞིང་། ལྷ་རྣམས་མགོ་བོ་བཅད་པ་མ་གཏོགས་གང་ལ་ཕོག་ན་ལྷའི་འཆི་གསོས་བདུད་རྩིས་གསོ་བས་མི་འཆི། ལྷ་མ་ཡིན་རྣམས་མི་དང་འདྲ་བར་གནད་སར་ཕོག་ན་ཤི་བ་དང་། གཡུལ་འཁྲུག་བྱེད་པ་ན་བརྒྱ་བྱིན་གྱི་ལག་གི་རྡོ་རྗེ་དང་། ལྷའི་མདའ་བོ་ཆེ་དང་། མཚོན་ཆའི་འཁོར་ལོ་དང་མདུང་ཐུང་ལ་སོགས་པའི་མཚོན་ཆ་སྣ་ཚོགས་པས་ལྷ་མ་ཡིན་དེ་དག་གི་མགོ་དང་ཡན་ལག་གཅོད་ཅིང་སྲོག་འགག ལྷའི་གླང་པོ་ཆེ་ཀུན་སྐྱོང་གི་སྣ་ལ་མཚོན་ཆའི་འཁོར་ལོ་བཏགས་ནས་མངག་པའི་ཚེ་ལྷ་མ་ཡིན་གྱི་དམག་འབུམ་ཕྲག་རེ་ཙམ་མཉམ་དུ་གསོད་པ་དང་། ལྷ་མ་ཡིན་རྣམས་བསད་པའི་རོ་རི་རབ་ཀྱི་ངོས་ནས་རྦབ་འགྲིལ་བ་ན་རོལ་མཚོའི་ནང་དུ་ལྷུང་བས། རོལ་མཚོའང་དམར་པོ་ཁྲག་གི་ཁ་དོག་ཏུ་ཉིན་མང་པོར་བསྒྱུར་བ་སོགས་ཡོད་པ། གཡུལ་སར་ལུས་ཤིན་ཏུ་སྣད་པ་དང་། འཆི་བ་ལ་ཐུག་པའི་སྡུག་བསྔལ་ཤིན་ཏུ་མི་བཟད་པས་མནར་རོ། །ལྷ་མ་ཡིན་ལ་ནང་གསེས་དབྱེ་ན། ཚེ་དཔལ་ལྷའི་རིགས་དང་། སྟོབས་ལྡན་གནོད་སྦྱིན་གྱི་རིགས། རྩུབ་འགྱུར་བདུད་ཀྱི་རིགས། གསོད་བྱེད་སྲིན་པོའི་རིགས། གདུག་པ་ཀླུའི་རིགས་དང་ལྔ་ཡོད་པ་ལས། ཚེ་དཔལ་ལྷའི་རིགས་ནི་དཔལ་དང་སྐལ་བ་བཟང་བ། ངང་ཚུལ་འཇམ་ཞིང་དཀར་ཆོས་ལ་དད་པ་དང་། སྟོབས་ལྡན་གནོད་སྦྱིན་གྱི་རིགས་ནི་ནོར་དང་ལོངས་སྤྱོད་དང་། མཐུ་དང་རྫུ་འཕྲུལ་ཆེ་བ། རྩུབ་འགྱུར་བདུད་ཀྱི་རིགས་ནི་ནག་པོའི་ཕྱོགས་ལ་དགའ་བ། གསོད་བྱེད་སྲིན་པོའི་རིགས་ནི་སེམས་ཅན་ལ་འཚེ་བ་བྱེད་པ་ལ་དགའ་བ་དང་། མཁའ་ལ་རྒྱུ་བའི་ཡི་དྭགས་དང་ཕྱོགས་མཚུངས་པ། གདུག་པ་ཀླུའི་རིགས་ནི། ལུས་དང་ལོངས་སྤྱོད་བདེ་སྡུག་ཕྱེད་མར་ཡིན་ལ། བླུན་ཞིང་རྨོངས་པ་ཀླུ་དང་འདྲ་བ་ཡིན། འགྲོ་བ་ལམ་རྒྱུད་ལྔར་བཤད་པའི་ཚེ་བསྟན་བཅོས་འགའ་རེའི་ནང་ལྷ་མ་ཡིན་ལྷ་དང་དུད་འགྲོར་བསྡུ་བའང་ཡོད། མདོར་ན་ལྷ་མ་ཡིན་གྱི་སེམས་ཅན་རྣམས་སྤྱིར་བཏང་ཕྲག་དོག་དང་གདུག་རྩུབ་ཆེ་ཞིང་། གོང་དུ་བཤད་པའི་ཚེ་དཔལ་ལྷའི་རིགས་སོགས་གལ་ཏེ་བློ་གསལ་བ་དང་ལྡན་པ་དག་ཡོད་སྲིད་ཀྱང་གཙོ་བོ་རྣམ་སྨིན་གྱི་སྒྲིབ་པའི་དབང་གིས། ཉན་ཐོས་རང་གི་ལམ་གྱི་མཐོང་ལམ་མི་ཐོབ་པས་བདེན་པ་མི་མཐོང་ཞེས་ཐེག་དམན་གྱི་གཞུང་དུ་བཤད་དེ། ལྷ་མ་ཡིན་རྣམས་རྣམ་སྨིན་གྱི་སྒྲིབ་པ་ཆེ་བས་རྟེན་དེ་ལ་བདེན་པ་མི་མཐོང་ཞེས་གསུངས་ལ། འོན་ཀྱང་ཐེག་པ་ཆེན་པོའི་ལུགས་སུ་ནི་དེ་ལྟར་མ་ཡིན་པར་མདོ་སྡེ་དཀོན་མཆོག་བརྩེགས་པ་ལས་གསུངས་པ་ཀུན་མཁྱེན་ཆེན་པོས་ལུང་འདྲེན་མཛད་མོད། དཀོན་མཆོག་བརྩེགས་པའི་ལུང་ལས་ནི། དེའི་ཚེ་ཆོས་ཀྱི་རྣམ་གྲངས་འདི་བཤད་པ་ན། ལྷ་དང་ཀླུ་དང་ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་བགྲང་བ་ལས་འདས་པ་དག་གིས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་ཐོབ་བོ། །ཞེས་གསུངས། ཇི་ལྟར་ཡང་དེར་སྐྱེ་བའི་སྲིད་པ་སྤོང་བའི་ཐབས་ལ་འབད་དགོས་པ་ནི། ཀུན་མཁྱེན་གྱིས། ལྷ་མིན་པ་དག་ཤིན་ཏུ་སྡུག་བསྔལ་ན། །དེ་བས་དགེ་ལས་ཞི་བའི་འགྲོ་བ་དག །མྱུར་བ་ཉིད་དུ་དམ་པའི་ཆོས་མཛོད་ཅིག །ཅེས་འགྲོ་བའི་གནས་གཞན་དང་འདྲ་བར་ལྷ་མ་ཡིན་པའི་སྐྱེ་བ་བླངས་པའི་སེམས་ཅན་དག་ཤིན་ཏུ་སྡུག་བསྔལ་བ་ཡིན་པས་ན། དེ་བས་དགེ་བའི་ལས་ཀྱིས་ཞི་བའི་བདེ་བར་འདོད་པའི་འགྲོ་བ་དག་གིས། ལེ་ལོ་དང་རྣམ་གཡེང་གི་དབང་དུ་མ་ཤོར་བར་མྱུར་བ་ཉིད་དུ་དམ་པའི་ཆོས་རྣལ་མ་ཞིག་སྒྲུབ་པར་མཛོད་ཅིག་ཅེས་གསུངས་པ་ལྟར་རོ། །དེ་ཡན་གྱིས་འགྲོ་བ་རིགས་དྲུག་གི་སྡུག་བསྔལ་སོ་སོར་བཤད་ཟིན་ནས། མདོར་བསྡུ་བ་ནི། དེ་ལྟར་འཁོར་བའི་སེམས་ཅན་ཐམས་ཅད་དུས་དང་རྣམ་པའི་སྡུག་བསྔལ་མཐའ་མེད་ཅིང་དོས་དྲག་པ་གནས་རིས་གཅིག་ནས་ཐར་ཀྱང་གཞན་གཅིག་ཏུ་འཛུད་པ་དཔེ་བཞག་ན་ཟོ་ཆུའི་ཁྱུད་མོའམ། ཟོ་ཆུའི་འཁྱུད་མོ་ཟེར་ན་གནའ་སྔ་མོར་གད་འོག་ནས་གད་ཐོག་ཏུ་ཆུ་འདྲེན་བྱེད་ཟོ་བ་མང་པོ་སྦྲེལ་ཏེ་སྟེང་འོག་བརྗེ་ནས་འཁོར་བ་ལ་ཟེར། བུམ་ནང་གི་བུང་བ་བཞིན་མཐོ་དམན་གང་དུ་སོང་ཡང་སྡུག་བསྔལ་ལས་མི་འདའ་བར་སྡུག་བསྔལ་ཁོ་ནའི་རང་བཞིན་ཅན་ཏེ། སློབ་སྤྲིང་ལས། གང་ཞིག་འཁོར་བའི་འཁོར་ལོ་རྟག་ཏུ་འཁོར་གྱུར་པའི། །ནང་དུ་ཞུགས་ནས་བསྟི་བ་ཙམ་ལ་བདེར་སེམས་པ། །དེ་ནི་ངེས་པར་དབང་མེད་རིམ་གྱིས་བརྒྱ་ཕྲག་ཏུ། །འགྲོ་བ་མཉམ་དང་མི་མཉམ་ཀུན་ཏུ་འཁྱམ་པར་འགྱུར། །ཞེས་སེམས་ཅན་གང་ཞིག་ཁམས་གསུམ་འཁོར་བ་རིགས་དྲུག་གི་འཁོར་ལོ་དུས་རྟག་ཏུ་བར་མེད་དུ་འཁོར་བར་འགྱུར་བའི་ནང་དུ་ཞུགས་ནས། གནས་སྐབས་སྡུག་བསྔལ་གྱི་ཚོར་བ་རགས་པ་ཞི་ནས་བསྟི་བའམ་གནས་པ་ཙམ་ལ་བདེ་བ་ཡིན་པར་སེམས་པ་དེ་ནི། ངེས་པར་ལས་ཉོན་གྱིས་དབང་མེད་པ་ཡིན་པས་རིམ་གྱིས་ལན་གྲངས་བརྒྱ་ཕྲག་དག་ཏུ་འགྲོ་བའི་་རིགས་དང་ལུས་རྟེན་སྣ་ཚོགས་མཉམ་དང་མི་མཉམ་སྟེ་འདྲ་དང་མི་འདྲ་བར་ཀུན་ཏུ་འཁྱམ་པར་འགྱུར་རོ། །ཞེས་གསུངས་སོ། །དེ་ལྟར་འཁོར་བའི་སྡུག་བསྔལ་དེ་དུས་རྒྱུན་རིང་ལ་རྣམ་པ་དོས་དྲག་པར་ཡིན་པས་ན། དེ་ལས་ཐར་པ་སྒྲུབ་པའི་རྟེན་དལ་འབྱོར་གྱི་མི་ལུས་རྙེད་པར་དཀའ་ཞིང་རྙེད་ན་དོན་ཆེ་བས། དེ་སྟོང་ལོག་དང་ཆུད་ཟོས་སུ་མ་བྱེད་ཅིག་ཅེས་པ་སྟེ། །སློབ་དཔོན་པདྨས། ཡང་ཡང་རྙེད་དཀའ་ཨུ་དུམ་ཝ་ར་འདྲ། །རྙེད་ན་དོན་ཆེན་ཡིད་བཞིན་ནོར་ལས་ལྷག །ཅེས་དང། ཀུན་མཁྱེན་ཀློང་ཆེན་པོས། དལ་འབྱོར་འདི་ནི་ཐོབ་པ་བརྒྱ་ལམ་ཙམ། །དེ་བས་ཆོས་དང་མཇལ་བ་ཉིན་སྐར་ཙམ། །ཞེས་དང་། རྗེ་བདག་ཉིད་ཆེན་པོས། མི་ཡི་ལུས་དང་བསྟན་དང་མཇལ་བ་ནི། །ཡང་ཡང་མི་རྙེད་ད་རེས་ཙམ་ལགས་ཤིང་། །འདི་ན་དོན་ཆེན་སྒྲུབ་པའི་གནས་ཡོད་པའི། །ཚུལ་འདི་སོམས་ལ་མི་ལུས་སྙིང་པོ་ལོངས། །ཞེས་གསུངས་པ་བཞིན་ནོ། །འོ་ན་ངན་འགྲོའི་གནས་དང་རིགས་དྲུག་ཐུན་མོང་གི་སྡུག་བསྔལ། གསུངས་ན་འདི་ལ་ངན་སོང་དང་ངན་འགྲོ། ལོག་པར་ལྟུང་བ་ཞེས་གསུངས་ས་ཡོད་ན་རེ་རེ་བཞིན་རིམ་པར་ ཆོས་ངན་པར་སྤྱོད་ཅིང་ཡ་ང་བའི་གནས་ངན་པར་སོང་བས་ན་ངན་སོང་དང་། སྡུག་བསྔལ་དྲག་པོ་ཡུན་རིང་པོར་བར་མེད་དུ་མྱོང་བས་ན་ངན་འགྲོའི་གནས་དང་། གནས་རིས་འོག་མར་གནས་ཤིང་གཡང་ས་ཆེ་ཞིང་ཉམ་ང་བ། ལོག་པའི་ལས་ཀྱིས་ལོག་པའི་ལམ་དུ་ཁྲིད་ཅིང་ལོག་པར་ལྟུང་བས་ན་ལོག་པར་ལྟུང་བ་ཞེས་གསུངས་པ་ཡིན། དེ་ལྟ་བུའི་ངན་འགྲོའི་གནས་དང་རིགས་དྲུག་ཐུན་མོང་གི་སྡུག་བསྔལ་ཐམས་ཅད། སངས་རྒྱས་མཁྱེན་པ་དང་ཐུགས་རྗེ་ཅན་ཡིན་ཞིང་། ཕྲིན་ལས་ཚད་མེད་པ་མངའ་བས་སངས་རྒྱས་ཀྱིས་སྐྱོབ་པས་ན་དྲག་གི་ཨའུ་ཙི་མོད་སྙམ་ན། དེ་ལྟར་མ་ཡིན་ཏེ། འདུལ་བ་ལུང་ལས། ངས་ནི་ཁྱོད་ལ་ཐར་པའི་ལམ་བསྟན་གྱི། །ཐར་པ་རང་ལ་རག་ལས་བརྩོན་པར་གྱིས། །ཞེས་སྟོན་པ་སངས་རྒྱས་ངས་ནི་གདུལ་བྱར་གྱུར་པ་ཁྱེད་རྣམས་ལ་འཁོར་བ་ལས་ཐར་པའི་ཐབས། ལམ་དམ་པའི་ཆོས་ཀྱི་བདུད་རྩི་ཞི་བ་བསིལ་བར་གྱུར་པ་བསྟན་ཟིན་པ་ཡིན་གྱི། དམ་པའི་ཆོས་ཚུལ་བཞིན་ཉམས་སུ་བླང་ན་ཐར་པ་ཐོབ་པ་ཡིན་པས། ཨེ་ཐར་མི་ཐར་རང་ལ་རག་ལས་ཤིང་རང་ལག་ཡོད་པས་ན་སྡུག་བསྔལ་བྲལ་ནས་ཐར་པ་ཐོབ་དགོས་ན་བརྩོན་པར་གྱིས་ཤིག །ཅེས་གསུངས་པས་རང་ཅག་དུས་སྙིགས་མའི་སེམས་ཅན་རྣམས་བླང་དོར་གྱི་གནས་ལ་བློ་རྨོངས་པའི་ཕྱིར། བདེ་བར་གཤེགས་པས་གང་ཟག་སོ་སོའི་བློ་རིགས་དང་མཐུན་པའི་ཆོས་བསྟན་ནས་ཐབས་དུ་མའི་སྒོ་ནས་ཐར་པའི་ལམ་བསྟན་པ་ཙམ་ལས། འཁོར་བ་དང་ངན་སོང་ལས་ཐར་པ་ནི་རང་གི་བརྩོན་པ་ཁོ་ན་ལ་རག་ལས་པ་ཡིན་པས། དཔེར་ན་གཉིད་ཀྱིས་མྱོས་པའི་ཚེ་རྨི་ལམ་སུས་ཀྱང་དགག་མི་ནུས་པ་བཞིན་ནོ། །མི་སྐྱ་ཕོ་མོ་སོགས་ཀྱིས་ཤི་དུས་བླ་མས་འདྲེན་འགྲོ་བསམ་ནས། རང་ངོས་ནས་དམ་པའི་ཆོས་ཚུལ་བཞིན་མ་བསྒྲུབ་ན། བླ་མས་འུར་མཐིལ་དུ་རྡོ་བཞག་ནས་འཕངས་པ་ལྟར་དག་པའི་ཞིང་ཁམས་སུ་འཕེན་ནུས་པ་མ་རེད། བླ་མ་དང་སངས་རྒྱས་ལ་ནུས་པ་མེད་པ་མ་རེད། དད་པ་ཡོད་གསོལ་བ་བཏབ་ན་བྱིན་རླབས་འབྱུང་ཡང་། རང་ཉིད་ཀྱི་ངོས་ནས་ཀྱང་འབད་པ་དང་བརྩོན་འགྲུས་ཡོད་དགོས། ཁྱད་པར་དུ་དད་པ་དང་ཡིད་ཆེས་མེད་ན་དཀའ་བ་རེད། དེ་དག་ཡོད་ན་བླ་མ་དཀོན་མཆོག་གི་ཐུགས་རྗེ་དང་བྱིན་རླབས། ཆོས་ཉིད་བདེན་པའི་སྟོབས་ཀྱིས་འདྲེན་ཐུབ་པ་རེད། གལ་ཏེ་དེ་ལྟར་མིན་པར་སངས་རྒྱས་ཀྱིས་འདྲེན་བཞག་ན་ཆོག་པ་རྐྱང་རྐྱང་ཞིག་ཡིན་ན། སངས་རྒྱས་ཐུགས་རྗེ་ཅན་དེ་དག་གཅིག་གི་ཐུགས་རྗེའི་འོད་ཟེར་གྱིས་ཀྱང་སྲིད་པ་འདི་དཔག་ཏུ་མེད་པའི་སྔ་རོལ་ནས་སྟོངས་པར་མཛད་ཟིན་ངེས་སོ། །རྒྱུ་མཚན་དེ་བས་ན་འོ་སྐོལ་མཐའ་མེད་སྡུག་བསྔལ་ཅན་གྱི་འཁོར་བའི་དོང་དུ་ནི་ལྷུང་། ཡུལ་དང་ཡུལ་ཅན་གཉིས་སུ་ཞེན་པའི་གཟུང་འཛིན་གྱི་སྒྲོག་དོམ་པོས་ནི་བཅིངས། ཆགས་སོགས་ཉོན་མོངས་པའི་མཚོན་གདུག་པའི་དབལ་གྱིས་ནི་བསྣུན། རྟེན་འབྲེལ་བཅུ་གཉིས་སྲིད་པའི་འཁོར་ལོ་ཆུ་རྒྱུན་བཞིན་དུ་བར་མེད་དུ་འཁོར་བས། ད་ལྟའི་སྡུག་བསྔལ་ལ་སྤྱོད་ཅིང་སྲིད་པ་ཕྱི་མའི་སྡུག་བསྔལ་འདྲེན་པ་ལས་འོས་མེད་པ་འདིར་ལེགས་པར་བསམས་ནས། དེ་ལྟར་མ་རྟོགས་པའི་རིགས་དྲུག་གི་སེམས་ཅན་ལ་སྙིང་རྗེ་དཔག་ཏུ་མེད་པར་བསྐྱེད། སྙིང་རྗེ་ཞེས་པ་དེ་རང་རེའི་ཁ་སྐད་ལྟར་བཤད་ན་སེམས་ཀྱི་བསམ་བློ་གཏོང་ལུགས་ཁྱད་པར་བ་ཞིག་རེད། སེམས་ཡོད་པའི་སེམས་ཅན་མང་ནའང་སྤྱིར་བཏང་བཤད་ན་སྙིང་རྗེའི་ནུས་པ་འདོན་ཐུབ་པ་འུ་ཚོ་འགྲོ་བ་མི་འདི་ཡིན། དེ་ཡིན་ན་སྙིང་རྗེ་ཟེར་བ་འདི་རྒྱུ་དངོས་པོ་ཐམས་ཅད་ལས་རྩ་བ་ཆེ་ཤོས་དང་། རིན་ཐང་ཆེ་ཤོས་དེ་ཡིན་ཞིང་། སྙིང་རྗེ་ཞེས་པའི་རིན་ཐང་ཅན་དེ་མི་སུའི་རྒྱུད་ན་ཡོད་ན་དེའི་མི་དེའང་རིན་ཐང་ཅན་ཡིན། སྙིང་རྗེ་དེ་ཡང་བསམ་པ་བཟང་པོས་ཀུན་ནས་སློང་བ་ཞིག་ཡིན་ལ། སྙིང་རྗེ་སུ་ལ་ཡོད་ན་དེས་གཞན་ཕན་ཞིག་བསྒྲུབ་ཐུབ་པ་རེད། རང་རེ་རྣམས་ལའང་བསམ་པ་བཟང་པོ་དང་ཀུན་སློང་ཡག་པོ་ཞིག་ཡོད་ན་རང་ཉིད་བདེ་སྐྱིད་འདོད་བློ་གང་བ་ཞིག་འོང་བས་མི་ཚད་པར། རང་གི་ཁོར་ཡུག་གི་མི་ཡིན་ནའང་དེའི་ཤུགས་རྐྱེན་གྱིས་འཚོ་བ་ཡག་པོ་ཞིག་མྱོང་ཐུབ་འགྲོ་བ་རེད། དེ་འདྲའི་སྙིང་རྗེ་དང་ཕན་སེམས་དེ་ཡར་རྒྱས་དང་ཁྱབ་གདལ་དུ་སོང་ན། དེ་བས་ཁྱབ་ཆེ་བའི་ཡུལ་གྲུ་མང་པོ་དང་གླིང་ཆེན་གཞན་གྱི་མི་དང་། སེམས་ཅན་མང་པོ་ཞིག་གིས་དེའི་རྐྱེན་གྱིས་བསྐྲུན་པའི་བདེ་སྐྱིད་ཀྱི་ཚོར་སྣང་དེ་མྱོང་ཐུབ་པ་རེད། ཁྱད་པར་དུ་དེང་སང་གི་ཡུལ་དུས་ཀྱི་གནས་སྐབས་དང་བསྟུན་ན། རང་རེ་འགྲོ་བ་མིའི་རིགས་འདི་ལ་ཕྱི་ལུས་ཀྱི་དཀའ་ངལ་མང་པོ་ཞིག་མྱོང་བར་མ་ཟད། ནང་སེམས་ཀྱི་དཀའ་ངལ་མང་པོ་ཞིག་མུ་མཐུད་ནས་འཕྲད་འདུག་གིན་ཡོད་པ་རེད། བཟློག་ཏུ་མེད་པའི་ཕྱིའི་རྒྱུ་རྐྱེན་གྱིས་འོང་བའི་དཀའ་ངལ་ཟློག་ཐབས་མེད་རུང་། ཁྱད་པར་དུ་དངོས་པོ་ཡར་རྒྱས་ཀྱི་སྐབས་འདི་དང་བསྟུན་ནས་མི་དགོས་པའི་དཀའ་ངལ་སྣོན་མ་མང་པོ་ཞིག་ནང་རང་གི་སེམས་ཀྱིས་བཟོས་པ་དང་། སེམས་ཀྱི་ནང་ནས་ཆ་རྐྱེན་ཞིག་མ་ཚང་བའི་སྟབས་ཀྱིས་སྡུག་བསྔལ་རང་གིས་མ་གཏོགས་མི་རིག་པའི་མང་པོ་མྱོང་འདུག་གིན་ཡོད་རེད། དེའི་སྡུག་བསྔལ་དང་དཀའ་ངལ་དེ་ཚོ་མི་དགོས་པ་ཞིག་ཡིན་པར་མ་ཟད། སྡུག་བསྔལ་དང་དཀའ་ངལ་དེ་དག་བསལ་ན་རང་གིས་སེལ་ཐུབ་རྒྱུ་ཅན་ཞིག་ཡིན་པ་རེད། ཆོས་བཤད་དུས་འཁོར་འདས་ཐམས་ཅད་སེམས་ལ་ཐུག་ཅེས་པ་ལྟར། སེམས་འདིས་བསམ་བློ་གཏོང་ལུགས་མ་རེད་པས་ཉེས་སོང་དུས་སྡུག་བསྔལ་གྱི་ཐོག་ན་སྡུག་བསྔལ། སྡུག་བསྔལ་འགོ་ནས་མི་དྭངས་པ་ཞིག་རང་གིས་རང་ལ་བྱེད་ཀྱིན་ཡོད་རེད། དེས་ན་སེམས་ཀྱི་སྦྱོང་བརྡར་དང་སེམས་ཀྱི་བསྒྱུར་བཅོས། སེམས་ཀྱི་ལྟ་ཚུལ་ཡང་དག་ཅིག་ཡོད་པར་བྱེད་དགོས། ད་སྔར་རང་ལ་བསམ་བློ་ཡང་དག་པར་ཡོད་ན་ཕུན་སུམ་ཇེ་ཚོགས་སུ་གཏོང་། མེད་ན་ད་སེམས་ཀྱི་ལྟ་ཚུལ་ཡང་དག་པ་ཞིག་ཡོད་པར་བསྒྲུབ་དགོས། རྒྱུ་ཅ་ལག་མཁོ་ཆ་སྣོད་རྫས་ཉེར་སྤྱོད་ཀྱི་དངོས་པོ་གང་ཡིན་ན་ཡག་པོ་སྟབས་བདེ། སྤུས་དག་བེད་ཆོད་པ་ཡིན་དགོས། ལུས་ངག་གཉིས་གཡོག་པོ་རེད། དེ་ལ་དེ་འདྲར་དགོས་ན་སེམས་དཔོན་པོ་འདྲ་བོ་རེད། དེ་ལ་རིན་ཐང་དང་སྤུས་ཚད་ཅུང་ཟད་ཡོད་དགོས་པ་རེད་མ་གཏོགས་དེ་མེད་ན་ཚར་སོང་བ་རེད། ཕྱི་ཡག་ནང་བཙོག་ལ་རིན་ཐང་ཞིག་གང་ན་ཡོད་ཁྱི་ལུད་དར་བཏུམ་ཟེར་རེད། ཁྱི་ལུད་དར་བཏུམ་ལ་མི་གཙང་བའི་དྲི་ངན་ཡོད་པས། འགོས་ཨེ་འོང་བསམ་ནས་དོགས་དགོས་ས་ཞིག་རེད། དེ་འདྲ་ཡིན་དུས་བསམ་པ་བཟང་པོའི་རྩ་བ་ཅན་གྱི་སྙིང་རྗེ་ཞིག་ཡོད་ན་གཞན་ཕན་རང་ཤུགས་ཀྱིས་ཡོང་། གཞན་ཕན་གྱི་སེམས་ཤིག་ཡོད་ན་གཞན་གྱི་སྡུག་བསྔལ་ལ་སེམས་ཁུར་ཞིག་མི་སྐྱེ་ཐབས་མེད་ཡིན་ན། དེ་དུས་རང་གཅེས་འཛིན་འདི་ཇེ་ཆུང་ལ་མི་འགྲོ་བའི་དབང་མེད། མི་འདོད་པའི་སྡུག་བསྔལ་ཐམས་ཅད་ཀྱི་རྩ་བ་དེད་ན། ང་བསམ་རྒྱུའི་རང་གཅེས་འཛིན་བྱེད་པ་འདིའི་ཁོངས་ནས་འབྱུང་བ་རེད། ང་ཐད་དུ་བཞག་ནས་གཞན་དང་སུའི་གནད་ཆེ་ས་རེད་ཅིག་བལྟས་ན། ང་ཞེས་གཅིག་པུ་ཞིག་རེད། གཞན་ཞེས་པ་མཐའ་ཡས་པ་མང་པོ་རེད། ང་གཅིག་པུའི་དོན་དུ་མང་པོ་ཞིག་ལ་སྡུག་བསྔལ་མྱོང་འཇུག་གམ། ཡང་ན་གཞན་མང་པོའི་དོན་དུ་ང་གཅིག་པུ་ཅི་རེད་ན་རེད་བསམ་པ་དེ་གཉིས་གདམ་ཁ་བྱེད་རྒྱུ་རེད། ཁྱད་པར་དུ་སེམས་ཅན་ཞེས་པ་ཚེ་སྔ་མའི་ཕ་མ་མཛའ་བཤེས་ཡིན་པ་ལ་བསམ་བློ་གཏོང་ན་སྙིང་རྗེ་མི་སྐྱེ་ཐབས་མེད་རེད། རང་གི་ཚེ་འདིའི་གཉེན་ཉེ་མཛའ་དང་མཐུན་གྲོགས་ལ་གཅེས་ཤིང་ཆགས་ཞེན་བྱེད་པ་དེ། སྙིང་བརྩེ་ཆུང་ངུ་ཆགས་ཞེན་དང་འབྲེལ་བ་ཞིག་རེད། དེ་ལྟར་མ་ཡིན་པར་སྙིང་རྗེ་ངོ་མ་ཞིག་སྐྱེ་བར་བྱེད་པ་ལ། སྙིང་རྗེའི་ཡུལ་སེམས་ཅན་ཐམས་ཅད་ལ་ཁྱབ་པ་ཞིག་དང་། སྡུག་བསྔལ་མཐའ་དག་བྲལ་འདོད་པ་ཞིག་དགོས། དེ་ལ་ད་གཟོད་སྙིང་རྗེ་ཆེན་པོའི་མིང་ཐོགས་པ་རེད། དེ་ལྟ་བུའི་སྙིང་རྗེ་དེ་རྐྱེན་གཞན་གྱིས་བཟློག་ཏུ་མེད་པར་བཟོད་བསྲན་ཅན་ཚུགས་ཐུབ་པའི་སྙིང་རྗེ། སྐབས་རེར་སྙིང་རྗེ་སྐྱེ་བ་ལྟ་བུ་རེས་འགའ་བ་མ་ཡིན་པར་སྙིང་རྗེ་བརྟན་པོ། སྙིང་རྗེ་རྒྱ་ཆེན་པོ་ཞིག་དགོས་ན། དེ་སྦྱང་སའི་དགེ་རྒན་མཆོག་ཏུ་གྱུར་པ་དེ་གང་ཡིན་ན་དགྲ་ཡིན་ཏེ། གོང་དུ་བཤད་པ་ལྟར། ཁོང་ཁྲོ་སྐྱེ་ཡུལ་མེད་ན་བཟོད་པ་སུ་ལ་སྒོམ། ཕ་མས་སློབ་མི་ཤེས་པའི་བཟང་ཡོན་ཏན་དགྲ་ལ་བརྟེན་ནས་ལོབ་དགོས་པ་རེད། དེས་ན་སྙིང་རྗེ་དེ་ཆོས་ཀྱི་སྙིང་པོ་ངོ་མ། ཐར་ལམ་མ་ནོར་བའི་འཇུག་ངོགས། རང་གཞན་བདེ་ལ་འགོད་བྱེད་ཀྱི་ཐབས་དེ་ཡིན་པར་མ་ཟད། གནས་སྐབས་བསམ་བློ་གཏོང་ནའང་། སྙིང་རྗེ་མེད་པའི་སྲིན་པོ་འདྲ་ཤ་སྟག་དང་མཉམ་དུ་གཤིབ་ན། སྦྲུལ་ཚང་ནང་དུ་བསྡད་པ་ལྟ་བུ་རེད། བདེ་བ་སྐད་ཅིག་ཙམ་ཡང་་མི་ཐོབ། མདོར་ན་བྱང་ཆུབ་མཆོག་ཏུ་སེམས་བསྐྱེད་པ་ཞིག་གིས་སེམས་ཅན་ཐམས་ཅད་ལ་སྙིང་རྗེ་བསྒོམ་དགོས། སངས་རྒྱས་བཅོམ་ལྡན་འདས་ཀྱིས་མི་གནས་པའི་མྱ་ངན་ལས་འདས་པའི་གོ་འཕང་མངོན་དུ་མཛད་པའི་རྒྱུ་ངོ་མ་སྙིང་རྗེ་ཡིན་ཏེ། དཔེར་ན་ལོ་ཏོག་ལ་ཐོག་མར་ས་བོན། བར་དུ་ཆུ། ཐ་མར་སྨིན་པ་གལ་ཆེ་བ་ལྟར་དུ། སངས་རྒྱས་ཀྱི་ལོ་ཏོག་ལ་ཐོག་མཐའ་བར་གསུམ་དུ་གལ་ཆེ་བ་སྙིང་རྗེ་ཡིན་པ་དེས་ན་དཔལ་ལྡན་ཟླ་བས། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདི། །ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་པས། །དེ་ཕྱིར་བདག་གིས་ཐོག་མར་སྙིང་རྗེར་བསྟོད་པར་བགྱི། །ཞེས་གསུངས་པ་དང་། ཆོས་ཡང་དག་པར་སྡུད་པའི་མདོ་ལས། བྱང་ཆུབ་སེམས་དཔས་ཆོས་རབ་ཏུ་མང་པོ་ལ་བསླབ་པར་མི་བྱའོ། །ཆོས་གཅིག་རབ་ཏུ་གཟུང་ཞིང་རབ་ཏུ་རྫོགས་པར་བགྱིད་ན་སངས་རྒྱས་ཀྱི་ཆོས་ཐམས་ཅད་དེའི་ལག་མཐིལ་དུ་མཆིས་པ་ལགས་སོ། ཆོས་གཅིག་གང་ཞེ་ན་སྙིང་རྗེ་ཆེན་པོའོ། །ཞེས་དང་། རྣམ་སྣང་མངོན་བྱང་ལས། གསང་བའི་བདག་པོ། ཐམས་ཅད་མཁྱེན་པའི་ཡེ་ཤེས་ནི་སྙིང་རྗེའི་རྩ་བ་ཅན་ནོ། །ཞེས་དང་། དཔལ་ས་ར་ཧ་པས། སྙིང་རྗེ་དང་བྲལ་སྟོང་པ་ཉིད་ཞུགས་གང་། །དེས་ནི་ལམ་མཆོག་རྙེད་པ་མ་ཡིན་ཏེ། །ཞེས་གསུངས་པ་རེད། དེས་ན་སྙིང་རྗེ་ཅན་གྱི་མི་གཞན་ཕན་མ་གཏོགས་མི་བསམ་པ་དེ་བརྒྱ་བརྒྱའི་ནང་ན་རེ་རེ་ཙམ་ཡིན་པས། མིའི་ནང་ན་ནོར་བུ་དང་འདྲ་བ་རྙེད་པར་དཀའ་བ་ཡིན་པ་རེད། དེས་ན་རང་གི་རང་ལ་དེ་འདྲའི་རིན་ཐང་ལྡན་པ་ཞིག་བྱས་སྟེ། སྙིང་རྗེ་དཔག་ཏུ་མེད་པ་བསྐྱེད། སེམས་ཅན་དེ་དག་ཐམས་ཅད་ཐར་པའི་ལམ་ལ་བཀྲི་བའི་ཆེད་དུ་ཉི་མ་དེ་རིང་ནས་བཟུང་། ཡོན་ཏན་ཐམས་ཅད་ཀྱི་འབྱུང་གནས་དཀོན་མཆོག་གསུམ་ཐབས་དུ་མའི་སྒོ་ནས་མཆོད་པ་དང་། མི་དགེ་བའི་བསམ་པ་སྐད་ཅིག་མ་སྐྱེ་བ་ཡན་ཆད་ལ་སྟོབས་བཞི་ཚང་བའི་གཉེན་པོ་ཤུགས་དྲག་པོས་གཅུན་ནས་བཤགས་སྡོམ་བྱ་དགོས་ཏེ། འདུལ་བ་ལུང་ལས། སྡིག་པ་ཆུང་ངུ་དག་ལ་ཡང་། །མི་གནོད་སྙམ་དུ་བརྙས་མི་བྱ། །མེ་སྟག་ཕྲ་མོ་དག་གིས་ཀྱང་། །རྩྭ་ཕུང་རི་ཙམ་སྲེག་པར་བྱེད། །གསུངས་ན་སྡིག་པ་མི་དགེ་བའི་ལས་རེར་འདི་ཆུང་ཆུང་རེད་འདིས་མི་གནོད་བསམ་ནས་བརྙས་པར་མི་བྱ་སྟེ། དཔེ་མེ་རྟག་ཕྲ་མོ་ཆུང་ངུས་ལྷ་རི་གཉན་པོ་སྲེག་འགྲོ་བ་བཞིན་ནོ། །ཅེས་གསུངས་ལ། དགེ་བ་སྔར་བསགས་འདུན་པ་དྲག་པོས་སྨོན་ལམ་གྱིས་ཁ་བསྒྱུར་ནས་ཡར་མང་པོར་སྤེལ་བ་དང་། དགེ་བ་གསར་པ་གསོག་པ་ལ་སྒོ་དུ་མ་ནས་འཇུག་སྟེ། ཉི་མ་རེ་རེའི་དུས་ཚོད་ལའང་དལ་འབྱོར་དོན་ཡོད་བྱ་བ་ལ་འབད་དགོས། ད་ལྟའི་སྐབས་ན་དགེ་བ་སྒྲུབ་མ་ཐུབ་ན་ངན་སོང་ངན་འགྲོའི་གནས་སུ་སྐྱེས་དུས། གཅིག་ན་རང་དབང་མེད་པ་དང་། གཉིས་ན་རང་རྒྱུད་ལས་སུ་མི་རུང་བ་ལ་སོགས་པའི་སྐབས་སུ་འཇིགས་པ་ལས་སྐྱོབ་པའི་སྐྱབས་བཙལ་ཀྱང་མི་རྙེད་པས་ན། ད་ལྟ་རང་དབང་ཡོད་པ་སོགས་ཆོས་སྒྲུབ་པའི་མཐུན་རྐྱེན་ཚང་དུས་དད་པ་དང་ངེས་འབྱུང་སོགས་དགེ་བའི་བསམ་པ་ཆ་ཤས་ཕྲ་མོ་ཚུན་ཆད་ནས་གསག་ཅིང་། དྲན་ཤེས་བག་ཡོད་དང་ལྡན་པས་དཀར་པོ་དགེ་བའི་ལས་འབའ་ཞིག་གིས་མི་ཚེའི་དུས་ཚོད་འདའ་བར་བྱེད་དགོས། ཡང་གང་ཟག་འགའ་ཞིག་གིས་བདག་ཤེས་རབ་ཆུང་བས་ཐོས་བསམ་མི་ནུས་སྐད་པ་སྟེ་མི་ནུས་ཟེར་བ་དང་། ཡང་གང་ཟག་འགའ་ཞིག་གིས་བདག་ལོངས་སྤྱོད་ཀྱི་འབྱོར་པ་དམན་པས་ཟག་བཅས་ཟང་ཟིང་གི་མཆོད་སྦྱིན་མི་འགྲུབ་སྐད་པ་དང་། གང་ཟག་འགའ་ཞིག་གིས་བདག་ན་སོ་རྒས་པས་ཆོས་བསྒྲུབ་པ་མི་ཡོང་སྐད་པ་སོགས་སྨྲ་ཞིང་སེམས་པའང་ལུས་ངག་དང་ལོངས་སྤྱོད་ཀྱིས་མི་འབྱོར་བ་མིན་གྱི། གཙོ་བོར་སེམས་ཁོ་ནས་མ་ནུས་པ་ཡིན་ཏེ། བརྩོན་འགྲུས་དང་སྤོབས་པ་བསྐྱེད་ན་དུད་འགྲོའི་སྐྱེ་གནས་སུ་སྐྱེས་པས་ཀྱང་ཐར་པ་བསྒྲུབ་ནུས་པར་གསུངས་ན་སྨྲ་ཤེས་དོན་གོ་བའི་མི་ཡིས་བསྒྲུབ་ནུས་པ་ལྟ་ཅི་སྨོས་ཏེ། ཤཱནྟ་དེ་ཝས་སྤྱོད་འཇུག་ལས། བདག་གིས་བྱང་ཆུབ་ག་ལ་ཞེས། །སྒྱིད་ལུག་པར་ནི་མི་བྱ་སྟེ། །འདི་ལྟར་དེ་བཞིན་གཤེགས་པ་ནི། །བདེན་པར་གསུངས་པས་བདེན་འདི་གསུངས། །ཞེས་རང་གིས་རང་ལ་བརྙས་ཏེ་བདག་འདྲ་བའི་དམན་པས་རྫོགས་པའི་བྱང་ཆུབ་ག་ལ་ཐོབ་ཅེས་སྒྱིད་ལུག་པ་དང་ཡིད་ཆད་པར་ནི་མི་བྱ་སྟེ། རྒྱུ་མཚན་འདི་ལྟར་ཡིན་ཏེ། དེ་བཞིན་གཤེགས་པ་ནི་བརྫུན་གྱི་ཚིག་མི་མངའ་བས་བདེན་པ་འབའ་ཞིག་གསུངས་པའི་བསླུ་བ་མེད་པ་ཡིན་པས། དེས་བདེན་པའི་ཚིག་འདི་ལྟར་གསུངས་ཡོད་དེ། ལག་བཟང་གིས་ཞུས་པ་ལས། གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་རྗེས་སུ་སློབ་སྟེ། གང་དག་སེང་གེ་དང་། སྟག་དང་། ཁྱི་དང་། ཅེ་སྤྱང་དང་། བྱ་རྒོད་དང་ཁྲུང་ཁྲུང་དང་བྱ་རོག་དང་འུག་པ་དང་། སྲིན་བུ་དང་། སྦྲང་མ་དང་སྦྲང་བུ་དང་། ཤ་སྦྲང་དུ་གྱུར་པ་དེ་དག་ཀྱང་བླ་ན་མེད་པའི་བྱང་ཆུབ་ཏུ་འཚང་རྒྱ་བར་འགྱུར་ན། བདག་མིར་འགྱུར་བཞིན་དུ་སྲོག་གི་ཕྱིར་ཡང་བྱང་ཆུབ་ཐོབ་པའི་བརྩོན་འགྲུས་ཉམས་པར་བྱེད་སྙམ་མོ། །ཞེས་དང་། དཀོན་མཆོག་སྤྲིན་ལས་ཀྱང་གསུངས་པ་དེས་ན། སྦྲང་བུ་ཤ་སྦྲང་བུང་བ་དང་། །དེ་བཞིན་སྲིན་བུར་གང་གྱུར་པས། །དེས་ཀྱང་བརྩོན་པའི་སྟོབས་བསྐྱེད་ན། །བྱང་ཆུབ་ཐོབ་དཀའ་བླ་མེད་ཐོབ། །ཅེས་སྲོག་ཆགས་དམན་པའི་མཐར་ཐུག་པ་སྦྲང་བུ་དང་ཤ་སྦྲང་བུང་བ་དང་། དེ་བཞིན་དུ་སྲིན་བུར་གང་གྱུར་པའི་སེམས་ཅན་དེ་དག་གིས་ཀྱང་བརྩོན་པའི་སྟོབས་ཤུགས་བསྐྱེད་ན། རྫོགས་པའི་བྱང་ཆུབ་ཅེས་པ་ཐོབ་དཀའ་བ་བླ་ན་མེད་པ་དེ་ཐོབ་བོ་ཞེས་གསུངས་ན། །བདག་ལྟའི་རིགས་ཀྱིས་མིར་སྐྱེས་ལ། །ཕན་དང་གནོད་པ་ངོ་ཤེས་ནས། །བྱང་ཆུབ་སྤྱོད་པ་མ་བཏང་ན། །བདག་གིས་བྱང་ཆུབ་ཅིས་མི་ཐོབ། །ཅེས་བདག་ཅག་ལྟ་བུ་རིགས་ཀྱི་ཁྱད་པར་མི་རུ་སྐྱེས་ཤིང་། བསམ་པའི་ཁྱད་པར་བྱང་ཆུབ་སྒྲུབ་པ་ལ་ཕན་པ་དང་གནོད་པའི་འཇུག་ལྡོག་གི་གནས་ངོ་ཤེས་པས། བྱང་ཆུབ་ཀྱི་སྤྱོད་པ་ལ་ཞུགས་ནས་བརྩོན་པ་ལྷུར་ལེན་ནས་དེ་ཉིད་མ་བཏང་ན། སྲིན་བུ་པདྨ་ཡན་གྱིས་ཐོབ་ན་མིར་གྱུར་པ་བདག་གིས་བྱང་ཆུབ་ཅིས་མི་ཐོབ་སྟེ་ཐོབ་བོ། །ཞེས་གསུངས་པ་དང་། མདོ་སྡེ་རྒྱན་ལས། གལ་ཏེ་སེམས་ཅན་མིར་གྱུར་པ། །ཚད་མེད་སྐད་ཅིག་རེ་རེ་ལ། །རྫོགས་པའི་བྱང་ཆུབ་ཐོབ་དེའི་ཕྱིར། །ཞུམ་པ་དང་དུ་བླང་མི་བྱ། །གལ་ཏེ་སེམས་ཅན་མིར་གྱུར་པ་བདག་ཅག་ལྟ་བུ་ཚད་མེད་པ་མང་པོ་ཞིག་གིས་སྐད་ཅིག་རེ་རེ་ལ་ཚོགས་བསགས་ཏེ་རྫོགས་པའི་བྱང་ཆུབ་ཐོབ་པ་ཡིན་ན། རྒྱུ་མཚན་དེའི་ཕྱིར་བདག་ལྟ་བུས་ཐོབ་པ་མི་ནུས་ཞེས་ཞུམ་པ་དང་དུ་བླང་བར་མི་བྱའོ། །ཞེས་སེམས་སྟོབས་ཆེན་པོས་བརྩོན་པ་བསྐྱེད་ཅིག་གསུངས་པའི་ཕྱིར་རོ། །གཞན་ཡང་དགེ་བའི་ལས་ཇི་སྙེད་པ་ལའང་ངས་ད་སྔོན་ཆེ་ཚད་ཆུང་མིན་ཞིག་བསྒྲུབས་ཡོད། དེས་ཆོག་རྒྱུ་རེད་ཅེས་པ་ལྟ་བུའི་ཆོག་ཚོད་དང་། རྩིས་གྲངས་བརྒྱབ་ནས་ངས་གྲངས་ཀ་མང་པོ་འདི་འདྲ་བསྒྲུབས་ཡོད་དེས་ཆོག་གོ་སྙམ་པ་ལྟ་བུའི་རྩིས་གྲངས་ཀྱིས་ཁྲིགས་སུ་བཅད་པར་མི་བྱ་སྟེ། སྡོང་པོ་བཀོད་པ་ལས། རིགས་ཀྱི་བུ་ཁྱོད་ཀྱིས་དགེ་བའི་རྩ་བ་གཅིག་ལ་ཆགས་པར་མ་བྱེད་ཅིག ཆོས་ཀྱི་སྒོ་གཅིག་དང་། སྤྱོད་པ་གཅིག་ཡོངས་སུ་རྫོགས་པས་ཆོག་པར་མ་འཛིན་ཅིག ཅེས་ཐེག་ཆེན་གྱི་རིགས་དང་ལྡན་པས་རིགས་ཀྱི་བུ་ཞེས་བོས་ནས། ཁྱོད་ཀྱིས་དགེ་བའི་རྩ་བ་ཕྱག་འཚལ་བ་ལ་སོགས་པ་སྣ་གཅིག་ལ་ཆགས་པའམ་ཆོག་ཤེས་པར་མ་བྱེད་ཅིག ཆོས་ཀྱི་སྒོ་གཅིག་དང་། བྱང་ཆུབ་ཀྱི་སྤྱོད་པ་སྣ་གཅིག་ཁོ་ན་ཡོངས་སུ་རྫོགས་པས་དེ་གཅིག་པུས་ཆོག་པར་མ་འཛིན་ཅིག དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔས་ནི་དགེ་བའི་རྩ་བ་ཚད་མེད་པ་ཡོངས་སུ་བསྡུ་བར་བྱ་དགོས་སོ། །ཞེས་རིགས་ཀྱི་བུ་བྱང་ཆུབ་སེམས་དཔའ་ནི་རྒྱ་མཚོ་ཆུས་མི་ངོམས་པ་ལྟར་དགེ་བའི་རྩ་བ་ཚད་མེད་པས་མི་ངོམས་པར་ཡོངས་སུ་བསྡུ་བར་བྱ་དགོས་སོ། །ཞེས་གསུངས། ད་ལྟ་འོ་སྐོལ་གྱི་དགེ་བ་ཇི་ཙམ་ཞིག་འབད་ཀྱང་དེ་ཉིད་སྡིག་པ་མི་དགེ་བའི་ལས་དང་གཏན་ནས་མ་འདྲེས་པའང་རྣམ་པར་བརྟགས་ཤིང་དཔྱད་ན་འོང་མི་ཐང་བའི་ཕྱིར་དང་། གལ་ཏེ་སྡིག་པ་མ་འདྲེས་པའི་དགེ་བ་རེ་རེ་ཙམ་སྐབས་རེར་སྲིད་ནའང་ཡིད་ཅན་ནམ་རྨོངས་པའི་སེམས་ཅན་ཕལ་ཆེར་བློ་གྲོས་ཀྱི་མིག་རྨོངས་པའི་དྲི་མས་མ་དག་པས་སྦྱོར་བ་སེམས་བསྐྱེད་དམ་པ་དང་། དངོས་གཞི་དམིགས་མེད་དམ་པ། རྗེས་བསྔོ་བ་དམ་པ་སྟེ་སྦྱོར་དངོས་རྗེས་གསུམ་གྱིས་ཟིན་པའི་དམ་པ་གསུམ་དང་འབྲེལ་བའི་དགེ་བའི་རྩ་བ་གསོག་པ་ཤིན་ཏུ་དཀོན་ལ། སྦྱོར་དངོས་རྗེས་གསུམ་ནི་དམ་པ་གསུམ་པོ་དེ་ཡིན་ལ། སྤྱིར་ཐེག་ཆེན་མདོ་སྔགས་ཀྱི་ལམ་གཉིས་འབྲས་བུ་ལམ་བྱེད་ཀྱི་ཐབས་མཁས་ཡིན་མིན་གྱིས་རྒྱུ་འབྲས་ཀྱི་ཐེག་པ་གཉིས་སུ་ཐ་དད་པ་རེད། དེའི་ཁྱད་པར་དེ་བསམ་སྦྱོར་གཉིས་ལས་སྦྱོར་བ་བྱང་ཆུབ་སེམས་དཔའི་སྤྱོད་པ་སྒྲུབ་ཚུལ་གྱི་ཐོག་ནས་ཕྱེ་བ་རེད་མ་གཏོགས། འཇུག་སྒོ་བསམ་པའི་ངོས་ནས་ཁྱད་པར་ཡོད་པ་མ་རེད། དེས་ན་ཐེག་ཆེན་ལམ་གྱི་འཇུག་ངོགས་བགྲོད་པ་གཅིག་པུའི་ལམ་ནི་བྱང་ཆུབ་ཀྱི་སེམས་རིན་པོ་ཆེ་དེ་རེད། དེའི་རྩ་བ་ཡང་གོང་དུ་བཤད་པ་ལྟར་སྙིང་རྗེ་ཆེན་པོ་ལ་ཐུག་ཡོད་པ་ཡིན་ན། ཐེག་པ་ཆེན་པོ་ནི་སྙིང་རྗེ་ཆེན་པོས་ཁྱད་པར་དུ་ཕྱེས་པ་རེད། དེས་ན་སྙིང་རྗེའི་ཡུལ་ནམ་མཁའི་མཐའ་དང་མཉམ་པའི་མ་རྒན་རིགས་དྲུག་གི་སེམས་ཅན་ཐམས་ཅད་ཐོག་མེད་ནས་མཐའ་མེད་ཀྱི་བར་དུ་ལས་དང་ཉོན་མོངས་པའི་གཞན་དབང་དུ་སོང་ནས། སྡུག་བསྔལ་བསམ་གྱིས་མི་ཁྱབ་པ་མྱོང་བ་ལ་སྡུག་བསྔལ་དེ་དང་བྲལ་འདོད་པའི་སྙིང་རྗེ་ཤས་མི་བཟོད་པར་སྐྱེས་པ་དེ་སྙིང་རྗེས་སེམས་ཅན་ལ་དམིགས་པ་དང་། དེ་དག་ཐམས་ཅད་ཀྱི་དོན་དུ་གཏན་གྱི་བདེ་བ་དམ་པ་རྫོགས་པའི་སངས་རྒྱས་ཀྱི་སར་འགོད་་པར་བགྱི་ཞེས་པ་ཤེས་རབ་ཀྱིས་རྫོགས་བྱང་ལ་དམིགས་པ་སྟེ། དམིགས་པ་དེ་གཉིས་དང་མ་བྲལ་བའི་སེམས་དེ་སྦྱོར་བ་སེམས་བསྐྱེད་དམ་པ་རེད། སྙིང་རྗེ་དང་ལྡན། སེམས་ཅན་རྗོགས་བྱང་ལ་འགོད་འདོད་རེ་རེ་རྐྱང་པ་སྒོམ་པ་ཙམ་གྱིས་མི་ཆོག་སྟེ། དོ་ཧ་མཛོད་ལས། སྙིང་རྗེ་དང་བྲལ་སྟོང་པ་ཉིད་ཞུགས་གང་། །དེས་ནི་ལམ་མཆོག་རྙེད་པ་མ་ཡིན་ནོ། །ཞེས་གསུངས་ཀྱང་། འོན་ཏེ་སྙིང་རྗེ་འབའ་ཞིག་བསྒོམས་ན་ཡང་། །འཁོར་བ་འདི་ལས་ཐར་པ་ཐོབ་མི་འགྱུར། །ཞེས་གསུངས་པས་ན། སྦྱོར་བ་སེམས་བསྐྱེད་པ་དེའི་རྗེས་ཐོག་ཏུ་དེ་དང་མ་བྲལ་བའི་ངང་ནས་དངོས་གཞི་དམིགས་མེད་སྒོམ་དགོས། དེ་ཇི་ལྟར་སྒོམ་ན། འདི་ལྟར་སྣང་བའི་ཆོས་ཐམས་ཅད་སྒྱུ་མ་དང་། རྨི་ལམ་དང་། སྨིག་རྒྱུ་གཟུགས་བརྙན་བྲག་ཆ་སྤྲུལ་པ་སོགས་བདེན་མེད་ཀྱི་དཔེ་བརྒྱད་དང་འདྲ་བར་གསུངས་པ་རེད། དེའང་མེད་བཞིན་དུ་སྣང་བ་མངོན་ཞེན་བག་ཆགས་ཀྱིས་བསྐྲུན་པའི་སྒྱུ་མ་ལྟ་བུ། བདེན་འཛིན་ལོག་ཤེས་ཀྱིས་བསྐྱེད་པའི་རྨི་ལམ་ལྟ་བུ། སྣང་ཡང་བདེན་པར་མ་གྲུབ་པ་སྨིག་རྒྱུ་ལྟ་བུ། འཁྲུལ་རྟོག་གི་རང་གཟུགས་སུ་ཤར་བ་གཟུགས་བརྙན་ལྟ་བུ། བརྟགས་ཤིང་དཔྱད་ན་ངོ་བོ་མ་གྲུབ་པས་བྲག་ཅར་ལྟ་བུ། གཉིས་སྣང་འཁྲུལ་ཤེས་སུ་འཆར་བ་སྤྲུལ་པ་ལྟ་བུ་ཡིན་པས་ན། རྩ་བ་ཤེས་རབ་ལས། རྟེན་ཅིང་འབྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས། དེས་ན་སྟོང་པ་ཉིད་ཀྱི་དོན་བསྒོམས་ནས་དངོས་གཞི་དམིགས་པ་མེད་པ་ཞི་ལྷག་ཟུང་འབྲེལ་གྱི་སྒོམ་པ་མཚན་ཉིད་པ་ཞིག་ཡོང་དགོས་ན། ཁྱད་པར་ལས་དང་པོ་པས་ཞི་གནས་འཇོག་སྒོམ་མི་རྟོག་པའི་ངང་དུ་འཇོག་པ་དང་། ལྷག་མཐོང་སོ་སོར་རྟོག་པའི་ཤེས་རབ་ཀྱིས་སོ་སོར་ཕྱེས་ནས་སྒོམ་པ་དེ་སྔོན་དུ་འགྲོ་བའི་ཐོག་ནས། ཞི་ལྷག་ཟུང་འཇུག་སྣང་སྟོང་བདེན་གཉིས་ཟུང་འབྲེལ་ལམ། གནས་སྣང་ཐ་མི་དད་པ། སྣང་བ་མ་ཡིན་སྣང་བའི་ཆོས་ལས་འདས་པ། སྟོང་པ་མ་ཡིན་སྟོང་པའི་ཆོས་ལས་འདས་པའི། རྫོགས་ཆེན་བྱ་བྲལ་ལྷུན་གྲུབ་ཀྱི་དགོངས་པ་མངོན་དུ་གྱུར་དགོས་པ་ཡིན། དེ་ལྟར་དངོས་གཞི་དམིགས་མེད་མཚན་ཉིད་པ་དང་། རྗེས་མཐུན་པ་གང་རུང་རང་གི་བློ་ཚོད་དང་བསྟུན་པར་བསྒོམས་ནས། རྗེས་བསྔོ་བ་དམ་པ་ནི། ཡོན་ཏན་མཛོད་ལས། བདག་ཏུ་ལྟ་བས་འདར་བའི་རྣམ་དཀར་ཡང་། །སྲིད་པ་ལན་གཅིག་མཐོ་བའི་ཆོ་ངེ་དེ། །བྱང་ཆུབ་བསྔོ་བའི་གསེར་འགྱུར་རྩིས་ཐེབས་པ། །འདི་ནི་སྟོན་པ་གཞན་གྱི་ལུགས་ལ་མེད། །ཅེས་གསུངས་པ་ལྟར། དགེ་རྩ་ཆེ་ཆུང་ཅི་བསགས་ན་བླ་ན་མེད་པའི་བྱང་ཆུབ་ཏུ་བསྔོ་དགོས། དེའང་གང་བསྔོ་བྱ་སྔོ་བྱེད་བསྔོ་ཡུལ་དང་བཅས་པ་འཁོར་གསུམ་དམིགས་མཐའ་དང་བྲལ་བའི་བདག་མེད་ཀྱི་ལྟ་བས་རྩིས་ཟིན་པའི་ཐོག་ཏུ་བསྔོ་དགོས། དེ་ལྟར་མ་བསྔོས་པའི་དགེ་རྩ་དེ་དགེ་འབྲས་ལན་གཅིག་མྱངས་ནས་ཟད་འགྲོ། བྱང་ཆུབ་ཡོངས་བསྔོས་ཀྱི་དགེ་རྩ་དེ་བཟའ་ཤིང་བཟང་པོའི་འབྲས་བུ་བཞིན་དུ་འབྲས་བུ་མི་ཟད་པར་འཕེལ་བ་ཡིན། དེའི་ཕྱིར་ན་དམ་པ་གསུམ་དང་འབྲེལ་བའི་དགེ་བའི་རྩ་བ་གསོག་པ་ཤིན་ཏུ་དཀོན་ལ། དམ་པ་གསུམ་དང་འབྲེལ་བ་དཀའ་བས་དེ་གསུམ་དང་མ་འབྲེལ་བ་དེའི་ཕྱིར་བྱང་ཆུབ་སེམས་ཀྱིས་མ་ཟིན་པའི་དགེ་རྩ་དེ་ཐར་པ་ཆ་མཐུན་གྱི་དགེ་རྩ་སངས་རྒྱས་ཐོབ་པའི་རྒྱུར་མི་འགྱུར་ཞིང་། གཞན་བསོད་ནམས་ཆ་མཐུན་གྱི་དགེ་བ་ནི་མཐོ་རིས་སྐྱེ་བའི་དགེ་འབྲས་ཅན་ཡིན་པས། འབྲས་བུ་ལན་གཅིག་སྨིན་ནས་ཟད་པར་འགྱུར་བའི་ཆུ་ཤིང་གི་འབྲས་བུ་དང་འདྲ་བ་དག་ནི། དབུས་ཀྱི་རི་བོ་མཆོག་རབ་ཙམ་གྱི་ཆེན་པོ་ཡོད་པར་རློམ་ཡང་། ད་ལྟ་ཡོད་ཀྱང་རླུང་གིས་གཏོར་ནས་མེད་པར་འགྱུར་བའི་སྟོན་ཀའི་སྤྲིན་དང་འདྲ་བ་སྟེ། ཤིན་ཏུ་སྙིང་པོ་མེད་པའི་ཡ་མ་བརླ་ཡིན་པས། ཐབས་ཁྱད་པར་ཅན་བྱང་ཆུབ་ཀྱི་སེམས་དང་། ཟབ་མོ་སྟོང་ཉིད་རྟོགས་པ་དང་འབྲེལ་ན་དགེ་བ་གང་ཞིག་ཁྱད་པར་ཅན་འགྱུར་བར་ཡིན་པས་ན། ལག་པ་བརྐྱང་བསྐུམ་ཙམ་གྱི་བསམ་པ་དང་སྤྱོད་པ་ཡང་དགེ་བའི་ལས་འབའ་ཞིག་ཏུ་འགྲོ་བར་བྱ་དགོས་སོ། །ཞེས་བྱང་ཆུབ་འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་ལ་དངོས་སུ་སྦྱོར་བ་དང་། ཐབས་ཁྱད་པར་ཅན་གསང་སྔགས་ཀྱི་ལམ་དང་འབྲེལ་ནས་རང་གཞན་གཉིས་འཁོར་བའི་རྒྱ་མཚོ་ལས་སྒྲོལ་ནུས་པའི་བྱང་ཆུབ་དམ་པ་མངོན་དུ་བྱེད་དགོས་ཞེས་གསུངས་པ་རེད། དེ་རིང་གི་ཆོས་མཚམས་འདིར་འཇོག དེ་རིང་གི་ཁྲིད་ཐེངས་འདི་ཁྲིད་རྐང་གསུམ་པའི་ནང་གི་མཐོ་རིས་ཀྱི་གནས་ནའང་བདེ་བ་མེད་པ་དང་། ལས་འབྲས་བསླུ་མེད་སྐོར་གྱི་ཁྲིད་རེད། གོང་གི་ཁྲིད་ཐེངས་དང་པོ་ལ་དམྱལ་བ་དང་ཡི་དྭགས་ཀྱི་སྡུག་བསྔལ་ལ་བསམ་པ་དང་། ཁྲིད་ཐེངས་གཉིས་པ་ཉི་ཚེ་བ་དང་ཉེ་འཁོར་དང་དུད་འགྲོའི་སྡུག་བསྔལ་ལ་བསམ་པ། ཁྲིད་ཐེངས་གསུམ་པ་ལ་མཐོ་རིས་གསུམ་ན་བདེ་བ་མེད་པར་བསམ་པ་རེད། མཐོ་རིས་རྣམ་གསུམ་ན་ངན་སོང་གསུམ་དང་འདྲ་བའི་སྡུག་བསྔལ་དོས་དྲག་པ་མ་རེད་དེ། འོན་ཀྱང་བདེ་བ་ཡོད་པ་མ་རེད། བདེ་བ་མིན་ཚད་སྡུག་བསྔལ་རེད། བཏང་སྙོམས་རེད་བསམ་པ་ཡང་འདུ་བྱེད་ཀྱི་སྡུག་བསྔལ་གྱིས་མ་བཏང་བ་ཞིག་ཡིན། འཁོར་བའི་གནས་ན་སྡུག་བསྔལ་གསུམ་གྱིས་མི་མནར་བ་ཞིག་ཡོད་པ་མ་རེད། སྐབས་རེར་སྡུག་བསྔལ་གསུམ་གྱིས་དུས་གཅིག་ཏུ་མནར་བས་མི་ཚད་པར། ངན་སོང་གི་སྡུག་བསྔལ་དང་འདྲ་འདུག་བསམ་པ་ལུས་ཐོག་ཏུ་ཡོང་རྒྱུ་ཡོད་པ་རེད། ངན་སོང་གི་སྡུག་བསྔལ་དང་བསྡུར་ན་སྡུག་བསྔལ་རགས་པའི་ཚོར་བ་ཅུང་ཟད་ཆུང་བས་ན་མཐོ་རིས་ཞེས་བྱ། མཐོ་རིས་ཀྱི་གནས་ན་དུས་རྟག་ཏུ་མཐོ་ན་ཆོག་ཀྱང་། བཙན་དུག་ཁོག་ཏུ་སོང་ན་གཟེར་རྒྱག་རན་པ་འདྲ་བ་ཡིན་པས། ད་ལྟ་མཐོ་རིས་ན་ཡོད་ཀྱང་དབུགས་གཅིག་གི་རྒྱུ་ལུགས་ཀྱིས་སྨད་རིས་སུ་ལྷུང་ནས་ངན་སོང་གི་སྡུག་བསྔལ་མྱོང་རན་འདུག་ཡོད་པ་རེད། ཤེས་བྱ་གང་ཞིག་མྱ་ངན་ལས་འདས་པའི་ཕྱོགས་མ་ཡིན་པ་ཐམས་ཅད་འཁོར་བ་རེད། འཁོར་བ་ཞེས་པ་འཁོར་བ་པོ་དེ་རེད། སྤྱིར་འཁོར་བའི་སྡུག་བསྔལ་དང་། ཁྱད་པར་དུ་མཐོ་རིས་རྣམ་གསུམ་ལ་བདེ་བ་མེད་པ་དེ་རྣམས་རེ་རེ་བཞིན་དུ་དེ་རིང་སང་ཉིན་གཉིས་ཀ་ལ་ཁྲིད་སྦྱོང་གྱིས། རང་རེས་ཆོས་ཐུན་རེ་ལ་ཁྲིད་སྦྱོང་ཐེངས་ལྔ་རེ་བྱ་རྒྱུ་ཡོད་པ་ལས། ཐུན་གཅིག་འབུམ་ལྔའི་ཁྲིད་སྦྱོང་རེད། བཞི་ལས་གཉིས་ལ་མིའི་སྡུག་བསྔལ་བསམ་པ་དང་། གཉིས་ལ་ལྷ་དང་ལྷ་མིན་གྱི་སྡུག་བསྔལ་བསམ་ཏེ་མཐར་དམིགས་མེད་ཀྱི་ངང་དུ་མཉམ་པར་བཞག་ནས་དགེ་བ་བསྔོ་རྒྱུ་ཡིན། དེ་རིང་ཕྱི་དྲོ་དང་དགོང་མོ་གཉིས་ལ་མིའི་སྡུག་བསྔལ་དང་། སང་ཉིན་སྔ་དྲོར་རྡོར་སེམས་སྒོམ་བཟླས། ཕྱི་དྲོ་དགོང་མོར་ལྷ་མིན་དང་ལྷའི་སྡུག་བསྔལ་བསམ་པར་ཁྲིད་སྦྱོང་གྱིས། ད་རེས་འདི་ན་ས་ཆ་ཐག་རིང་ཐུང་ལ་མ་ལྟོས་པར་དོན་གཉེར་ཅན་མང་པོ་ཞིག་ཆོས་གཅིག་གིས་བསྡུས་པའི་ཆོས་གྲྭ་འདིའི་ནང་ན་མཉམ་དུ་ཚོགས་པ་ཡིན་ན། ས་ཆ་གར་སོང་ཟེར་ན་འདིར་སོང་དང་། དོན་གོ་ཅི་ཆོད་ཟེར་ན་འདི་ཆོད། ཆོས་ཞུས་ནས་རང་རྒྱུད་སྔར་དང་མི་འདྲ་བའི་ཡར་སྐྱེད་ཅིག་ཡོད་དགོས་པ་རེད། ད་སྔར་ཉི་མ་ཡན་ཆད་ཆོས་ཁ་ནས་བཤད་རྒྱུ་དང་རྣ་བས་ཉན་པ་རྐྱང་པ་ཞིག་རེད་སོང་བ་ཡིན་པས། ད་རེས་སེམས་ལ་བསམ་རྒྱུ་ཞིག་དང་ཡིད་ལ་བསྒོམ་རྒྱུ་ཞིག་བྱས་ནས་རང་རྒྱུད་ཆོས་ཀྱིས་ཐུལ། སེམས་དང་ཆོས་གཉིས་འདྲེས། གདམས་ངག་ལག་ལེན་ལ་ཐེབས། ཉམས་ལེན་གནད་ཐོག་ཏུ་ཁེལ་བའི་དམ་པ་གོང་མས་མཛད་པའི་ཕྱག་ལེན་གྱི་རྗེས་སུ་ཞུགས་པ་ཡིན་ན། ས་ཚ་བསྐོས་ཕོར་ནས་བླངས་པ་ལྟ་བུ་ཞིག་མ་རེད་རུང་། སྣམ་བུ་ཚོས་ནང་དུ་འཕངས་པ་ལྟ་བུ་ཞིག་དགོས། སྣམ་བུ་ཚོས་ནང་བཙོ་ན་ཚོན་ཁ་རྒྱུགས་ལུགས་ཀྱིས་ཁྱད་པར་རེ་ལོས་ཡོད་མ་གཏོགས། ཅི་སྡུག་ན་སྔར་དང་མི་འདྲ་བའི་མདོག་ཅིག་འགྱུར་ཡོད་ངེས་པ་རེད། བསམ་པ་བཟང་པོ་ལ་ཁ་སྣོན་ཞིག་ལོན། སྙིང་རྗེས་དྲངས་པའི་བྱང་ཆུབ་ཀྱི་སེམས་ཤིག་སྐྱེས་ཐུབ་ཡོད་ན། སྒོར་མོ་ཁྲི་ཚོ་འབུམ་ཚོ་དང་དུང་ཕྱུར་ཆ་རེའི་ཚོང་ཕོག་པ་དང་། ཁྱིམ་ལས་ཙག་ཙིག་རེ་འགྲུབ་པ་དང་། ངས་ཁ་གྲངས་ཅི་འདྲ་མང་པོ་བཏོན་ཡོད་ཟེར་བ་རྣམས་དང་རིན་ཐང་མི་འདྲ་བར། ཡོང་སྒོ་དང་ལོན་སྒོ་དེ་བས་ཆེ་མེད་པ་ཚེ་རབས་ཐམས་ཅད་ལ་འཚེངས་པ་ཞིག་རེད་སོང་བ་ཡིན། དེ་ཙམ་ཞིག་མིན་ནའང་རྟག་འཛིན་ཇེ་ཆུང་། བདག་འཛིན་ཇེ་ལྷོད། དད་དང་སྙིང་རྗེ་སྔར་དང་མི་འདྲ་བར། རྒྱུད་ཇེ་འཇམ་དུ་སོང་ནས། འདི་སྔར་དང་མི་འདྲ་བ་རེད་འདུག་བསམ་རྒྱུའི་ཆོས་བསྒྲུབ་པའི་ཕན་ཐོགས་ཀྱིས་གཞན་ལ་མིག་ལྟོས་ཤིག་ཡོང་དགོས་པ་རེད་མ་གཏོགས། ཆོས་ཞུས་པས་གོ་མི་ཆོད་པས་སྟོང་ལོག་རེད་པར་མ་ཟད། ད་དུང་སྟབས་མ་ལེགས་ན་ངན་པ་ཆོས་རྒྱུས་ཅན་རེད་རྒྱུ་ཡོད་པ་རེད། ཅི་མ་ཟེར། རང་གཞན་སུས་ཀྱང་འགྲུབ་འགྲུབ་ནི་མ་རེད་ཟེར་ནས། བདུད་ཀྱི་གསང་ཚིག་ཁ་ནས་སྒྲོག་མཁན་ཆོས་དྲེད་ཆོས་ཀྱིས་མི་ཐུལ། ཚེ་ཕྱི་མའི་རི་མགོ་རིག་མ་རན་བར་དུ་འདང་རྒྱག་མི་ཤེས་མཁན་གྱི་ཀླད་ལོག་ལ་འགྱུར་རྒྱུ་ཡོད་པ་རེད། དེས་ན་ད་རེས་དབེན་པའི་གནས་སུ་ཡོང་ན་འདི་སེམས་གཞི་བསམ་གཏན་བསྒོམ་ས། སེམས་ཀྱི་ངལ་གསོ་ས་རེད། དམ་པའི་ཆོས་ཤིག་འཆད་རྒྱུ་འདི་སེམས་ཀྱི་བདུད་རྩི་སེམས་ཁམས་བཟང་པོའི་ཕྱོགས་ལ་སྒྱུར་བྱེད་ཀྱི་སྨན་ཡིན། རང་རེས་སེམས་ཅན་ཟེར་ནས་མིང་བཏགས་ས་དང་། ང་ཟེར་ནས་བདག་ཏུ་འཛིན་ས་འདྲ་བོ་ལུས་ངག་ཡིད་གསུམ་འདི་ལ་མཛུབ་མོ་བཙུག་གིན་ཡོད་པ་རེད། རང་རེ་འཇིག་རྟེན་མིའི་ལུས་རྟེན་འདི་མཐོ་རིས་རྣམ་གསུམ་ནང་གི་གཅིག་ཡིན་ཡང་། མཐོ་རིས་དམའ་རིས་གང་ཟེར་ཡང་འཁོར་བ་སྡུག་བསྔལ་གྱི་རྒྱ་མཚོའི་ནང་དུ་ཚུད་ཡོད་པས་ན། སྡུག་བསྔལ་ཁོ་ན་མྱོང་བས་དཀའ་ནས་ཐང་ཆད་དེ་འདུག་ཡོད་པ་འདི་བཞིན་རེད། ད་ངལ་གསོས་ནས་དེའི་སྡུག་བསྔལ་དེ་ཆུང་ཐབས་བྱེད་དགོས་ན། ལུས་ངག་གཉིས་ཀྱི་ངལ་ཞིག་སོས་ཀྱང་སེམས་ཀྱི་ངལ་གསོ་མ་ཐུབ་ན། ལུས་ངག་གཉིས་ངལ་སོས་རུང་མི་སྐྱིད་པ་རང་རེས་ཉམས་སུ་མྱོང་རྒྱུ་འདི་ཡིན་རེད། དེས་ན་སེམས་ཀྱི་རྣམ་རྟོག་འདིས་ཐོག་མེད་ནས་ད་ཡི་བར་ངལ་གསོ་ལོང་མེད་པར་ཆུ་རྒྱུག་པ་ལྟ་བུ། བར་མཚམས་ཤིག་གཏན་ནས་མེད་པར་དོན་མེད་སྡུག་བསྔལ་གྱི་རྦ་རླབས་ནང་ནས་བུད་ཐུབ་ཡོད་པ་མ་རེད། མ་བསམ་ཐབས་མེད་གཅིག་རྗེས་གཉིས་སླེབས་རྣམ་རྟོག་འཁྲུལ་སྣང་སྡུག་བསྔལ་ཁོ་ནའི་ངང་ནས། རང་སེམས་སོས་དལ་བ་ཞིག་ཡོང་མྱོང་བ་མ་རེད། བློ་ངན་གོམས་ཤོག་གུ་དྲིལ་ལམ་དུ་རྒྱུག་པ་ལྟ་བུའི་སྐྱོན་དེ་རིག་ནས། ད་རེས་དབེན་པའི་གནས་འདིར་ཐོན་ན། ལུས་དང་ངག་དབེན་པས་མི་ཚད་པར་གཙོ་བོ་སེམས་དབེན་གྱི་ཐོག་ཏུ་སེམས་འདི་ལ་ངལ་ཞིག་གསོ་འཇུག་དགོས་པ་རེད། འདི་ལྟར་འདང་བརྒྱབ་ན། ཕྱིའི་འདོད་པའི་ཡོན་ཏན་གྱི་ཐོག་ན་བདེ་བ་ཞིག་ཨེ་རྙེད་བལྟ་བ་འདི། དཔེར་ན་ཟ་འཕྲུག་ཅན་གྱི་རྒྱབ་འཕྲུག་པའི་བདེ་བ་ལྟ་བུ་ཞིག་ཡིན། དོན་ངོ་མ་བཤད་ན་ཟ་འཕྲུག་འཕྲུག་ན་བདེ་བ་ཡིན་པ་མ་རེད། ཟ་འཕྲུག་མེད་ན་བདེ་བ་རེད། ཟ་འཕྲུག་གི་ནད་མེད་ནས་རིམས་ནད་བྱང་བའི་བདེ་བ་ལྟ་བུའི་རང་གི་སེམས་ངལ་གསོ་ནས་བདེ་བ་རྙེད་དགོས། སེམས་འདི་རྒྱ་མཚོ་ལ་དཔེར་བཞག་ན་རྒྱ་མཚོ་རྙོག་པ་མེད་ན་དྭངས་མོ་ཡིན་ཞིང་། རྒྱ་མཚོ་དྭངས་མོའི་ནང་གཟའ་སྐར་གྱི་གཟུགས་བརྙན་ཡག་པོ་འཆར་བ་རེད། དཔེ་དེ་བཞིན་དུ་རང་སེམས་ཀྱི་རྒྱ་མཚོ་དེ་དྭངས་པའི་རང་བཞིན་དུ་བསྒྱུར་ཐུབ་ན་མངོན་ཤེས་ལ་སོགས་པ་ཡོན་ཏན་མང་པོ་འཆར་ཐུབ་པ་རེད། དེས་ན་བདེ་བ་ཐམས་ཅད་ཀྱི་མཆོག་ད་སྔོན་རྙེད་མ་མྱོང་བ་སེམས་ངལ་སོས་ནས། སྤྱིར་རྣམ་རྟོག་སྣ་ཚོགས། ཁྱད་པར་དུ་རྣམ་རྟོག་ངན་པའི་རྗེས་སུ་མ་འབྲངས་ན་སེམས་ཀྱི་བདེ་བ་དེ་སེམས་ཀྱི་ནང་ན་རྙེད་རྒྱུ་ཡོད་པ་རེད། རང་སེམས་ལ་རང་དབང་བསྒྱུར་ཏེ་སྡུག་བསྔལ་མྱོང་བའི་བློ་ངན་དེ་རིམ་གྱིས་ལམ་ལ་བཞག་ན། གོམས་ཤིང་གོམས་ན་ཇེ་སླར་སོང་ནས་རང་སེམས་ཀྱི་སྤྱོད་ཡུལ་རང་གིས་བླང་དོར་བྱེད་ཤེས་པའི་དེ་འདྲའི་རྣམ་དཔྱོད་ཀྱི་བློ་རང་ཉམས་དང་མཐུན་པའི་ལམ་རྒྱུས་ཡོད་པའི་ས་ཚོད་ལ་མགྱོག་པར་འཐོན་རྒྱུ་ཡོད་པ་རེད། སྒོ་གསུམ་གྱི་གཙོ་བོ་སེམས་འདི་ལ་བདག་པོ་ཞིག་གཏན་ནས་རྒྱག་མ་མྱོང་ན། ཆུ་རྒྱུན་ཐུར་དུ་རྒྱུག་པ་བཞིན་དུ་ཡུལ་ངན་པའི་རྗེས་སུ་དེད་དེ་རྫ་རོང་བྲག་འཕྲང་ཐམས་ཅད་ལ་རྒྱུག་དགོས་བྱུང་ན། གཡོག་པོ་ལུས་ངག་གཉིས་ཀྱིས་སྡུག་བསྔལ་མི་བཟོད་པ་ཞིག་མྱོང་དགོས་པ་འདི་དེ་ལ་ཐུག་པ་རེད། དེས་ན་ད་རེས་དམ་པའི་ཆོས་དང་བླ་མའི་མན་ངག་གིས་མིག་གསར་པ་ཞིག་གསར་དུ་ཕྱེས་ནས། འདིའི་གནད་ཁ་སྐྱོན་ཡོན་ཕྱི་ནང་གསང་གསུམ་པོ་མཐོང་བ་ཞིག་རེད་ན། རང་གིས་རང་ལ་མ་གཅེས་ན་སུས་གཅེས་འོང་། ཐར་པའི་སྒོ་ཞིག་ལ་འཁྲིད་མཁན་ཡོད་པའི་སྐབས་འདིར་དེའི་རྔ་མར་བཟུང་སྟེ། ལོང་བས་བ་རྔ་ལ་བཟུང་བ་བཞིན་ཞེས་པའི་དཔེ་ལྟར་བྱེད་རན་པ་རེད། ངས་འདི་ནས་མཐའ་མཇུག་ལ་ཐར་ལམ་རྣམ་དག་སྒྲུབ་པའི་གང་ཟག་ཅིག་ལ་ཤེས་དགོས་རྒྱུ། མ་ཤེས་ཐབས་མེད་ཀྱི་མན་ངག་གི་ཆིངས་ལྔ་ཞོར་ལ་བཤད་ན། ལས་དང་པོ་བ་རྣམས་ཀྱིས་སེམས་ལ་ཟུང་། ཕྱི་སོ་ཐར་གྱི་སྡོམ་པའི་ངོ་བོ་འཁོར་བ་ཞེན་ལོག་གི་ངེས་འབྱུང་དང་གཅིག ནང་བྱང་སེམས་ཀྱི་སྡོམ་པའི་ངོ་བོ་གཞན་དོན་དོན་གཉེར་གྱི་སེམས་དང་གཉིས། གསང་བ་གསང་སྔགས་ཀྱི་སྡོམ་པའི་ངོ་བོ་སྣང་སྲིད་རྣམ་དག་གི་དག་སྣང་དང་གསུམ། དེའི་ཐོག་ལ་བླ་མ་ལ་ཡིད་ཆེས་པའི་དད་པ་དང་བཞི། ཆོས་གཅིག་གིས་བསྡུས་པའི་མཆེད་གྲོགས་ལ་བརྩེ་གདུང་ཡོད་དགོས་པ་དང་ལྔ་སྟེ། ཐར་འདོད་ཀྱི་གང་ཟག་སྤྱི་དང་། ཁྱད་པར་དུ་གསང་སྔགས་རྫོགས་ཆེན་ལ་ཞུགས་པའི་གང་ཟག་ཅིག་གིས་མ་སྦྱོང་ཐབས་མེད། མི་ཤེས་སུ་མི་རུང་བར་རྒྱུད་ལ་སྦྱོར་དགོས་རྒྱུ་ཅན་ཡིན་ལ། དེའང་ཚུར་བསྡུ་ན་སྙིང་རྗེས་དྲངས་པའི་བྱང་ཆུབ་སེམས་ལ་འདུས་པ་རེད། མདོར་ན་ད་རེས་དལ་འབྱོར་གྱི་མི་ལུས་ཐོབ། མཚན་ལྡན་གྱི་བླ་མ་དང་མཇལ། གདམས་ངག་གི་བདུད་རྩི་ཐོབ་སྟེ། སངས་རྒྱས་ལས་ཀྱང་འཕྲད་པར་དཀའ་བའི་གསང་སྔགས་རྡོ་རྗེའི་ཐེག་པ་དང་འཕྲད་པའི་སྐབས་འདིར། པདྨ་ཅན་གྱི་མཚོར་ངང་པ་རྒྱུ་བ་དང་། དྲི་ཞིམ་ཅན་གྱི་ཚལ་དུ་བུང་བ་རྒྱུ་བ་བཞིན་དུ། དགའ་སྤྲོ་དང་བཅས་ཏེ་ཕྱིར་བཀྱེད་མི་བྱེད་པར་འཇུག་རན་པ་རེད་ཟེར་རྒྱུ་དེ་ཡིན།

ཉིན་བརྒྱད་པའི་ཆོས་ཁྲིད།

འོ་ན་མཁའ་ཁྱབ་མཁའ་དང་མཉམ་པའི་མར་གྱུར་རིགས་དྲུག་གི་འགྲོ་བ་དུས་རྟག་ཏུ་སྡུག་བསྔལ་རྣམ་པ་གསུམ་གྱིས་གཅིག་མིན་ན་གཅིག་གིས་མནར་བའི་ཉམས་ཆུང་སྙིང་རྗེའི་ཡུལ་དུ་གྱུར་པ་འདི་དག་ཐམས་ཅད། རྫོགས་བྱང་བླ་ན་མེད་པ་རྣམ་མཁྱེན་སྟོབས་བཅུ་མངའ་བའི་སངས་རྒྱས་ཀྱི་གོ་འཕང་ལ་འགོད་དགོས། དེའི་ཆེད་དུ་དམུས་ལོང་གི་ལམ་སྟོན། མུན་ནག་གི་སྒྲོན་མེ་སྡུག་བསྔལ་གྱི་ནད་ཐམས་ཅད་སེལ་བྱེད་ཀྱི་དམ་པའི་ཆོས་ཀྱི་བདུད་རྩི་དེ་ཉིད་འདི་ལྟར་ལོངས་སྤྱོད་པའི་སྐལ་བཟང་མངོན་དུ་གྱུར་པ་འདི། དབུལ་པོའི་ལག་ཏུ་ནོར་བུ་ལན་གཅིག་ཐོབ་པ་དང་འདྲ་བས་ན། འདི་ཡལ་བར་མི་འདོར་བས་ཉམས་སུ་ལེན་དགོས་བསམ་པ་སྔོན་དུ་འགྲོ་བའི་སྒོ་ནས། ཆོས་ཇི་ལྟར་གསན་པའི་ཀུན་སྤྱོད་ཀྱང་དམ་ཆོས་རྣ་བས་ཉོན། ཡིད་ལ་བཟུང་། བླ་མ་གུས་པས་བསྟེན། དགོངས་བརྒྱུད་ལོན་པར་བྱ་རྒྱུ་ལ་སོགས་པ་བསམ་སྤྱོད་ཡང་དག་དང་བཅས་ཏེ་གསན་དགོས། འཁོར་བའི་གནས་སྡུག་བསྔལ་ཅན་འདི་ལས་ཐར་དགོས་ན། དེའི་ནང་ནས་ཐར་བའི་ཐབས་ལམ་ཞིག་བཙལ་དགོས། དེས་ན་འཁོར་བའི་ནང་དུ་ཐར་པའི་ཐབས་སྟོན་བྱེད། འཕྲལ་དང་ཡུན་གྱི་ཕན་བདེའི་ལེགས་ཚོགས་མ་ལུས་པ་འགྲུབ་པ་ནི། རྒྱལ་བའི་གསུང་རབ་རྒྱལ་བ་ཉིད་ཀྱི་ཞལ་ཚབ་དེ་ཉིད་རེད། རྒྱལ་བ་ཉིད་ཀྱང་བདེ་བ་ནས་བདེ་བའི་སར་གཤེགས་པའི་སྐབས་སུ་ལམ་དེ་ལ་མ་བརྟེན་པར་ཐབས་གཞན་པ་ཞིག་ཡོད་པ་མ་རེད། དེས་ན་རྒྱལ་བའི་བཀའ་མདོ་རྒྱུད་དང་ལུང་མན་ངག་ནི་གདམས་པ་ཐམས་ཅད་ཀྱི་མཆོག་ཏུ་གྱུར་པ་ཡིན་པས་དེ་ཉིད་ལ་གཞིར་བཟུང་སྟེ། གདུལ་བྱའི་གང་ཟག་གི་ཉམས་ལེན་གྱི་སྙིང་པོར་དྲིལ་ནས་རང་གཞན་འཁོར་བའི་སྡུག་བསྔལ་ལས་ཐར་དགོས་པས་ན། ཐར་པའི་གཞི་བདེ་གཤེགས་སྙིང་པོ་སེམས་ཅན་རང་རང་ལ་ཡེ་ནས་ཡོད་པ་དེ་དང་། རྟེན་མི་ལུས་རིན་ཆེན་ད་རེས་ཐོབ་ཡོད་པ་འདིའི་སྟེང་ན། རྐྱེན་དགེ་བའི་བཤེས་གཉེན་བསྟེན་ཐབས་ཤེས་པ་རྐྱང་པས་མི་ཚད་པར། དམ་ཆོས་འཆད་ཉན་ལ་ཞུགས་པའི་སྐབས་ཡིན་ན། ཐབས་དེའི་གདམས་ངག་གིས་ཟིན་རྒྱུའི་སྐོར་དེར་འདང་རྒྱག་བྱ་ས་གལ་ཆེན་ཞིག་ལ་ཐུག་ཡོད་པ་རེད། དེ་ཡིན་པའི་རྩ་བ་གང་ཡིན་ཞེ་ན། གཞི་བདེ་གཤེགས་སྙིང་པོ་ནི་སྲིན་བུ་པདྨ་ཡན་ཆད་སེམས་ཅན་ཐམས་ཅད་ལ་ཡོད་པ་ཞིག་ཡིན་ན། ད་རེས་མིན་ཡང་ཐོག་མེད་ནས་ཡོད་བསྡད་པ་ཞིག་རེད། རྟེན་མི་ལུས་རིན་ཆེན་རེ་ཡང་ཐོབ་པ་དང་། རྐྱེན་དགེ་བའི་བཤེས་གཉེན་རེ་བསྟེན་མྱོང་ཤས་ཆེ་ཡང་། ད་རུང་སངས་རྒྱས་ཐོབ་མ་དགོས་རང་རྒྱུད་སོར་གང་གིས་ཇེ་བཟང་དུ་མ་སོང་བར་ཡོད་པ་འདི། སྐྱོན་ཆ་ཅི་ཞིག་གིས་ཉེས་པ་ཡིན་རྩད་བཅད་ན། སངས་རྒྱས་མི་ཐོབ་ཅིང་། ཐོབ་ཏུ་མི་འཇུག་པའི་གེགས་བཞི་ཡོད་པའི་འཕྲང་འགག་བསལ་མ་ཐུབ་པའི་སྐྱོན་ཡིན། དེའང་ཐབས་བླ་མའི་གདམས་ངག་གིས་མ་ཟིན་པའི་སྐྱོན་ཆའི་ཕན་ན་འགྲོ་ས་མེད་ལ། དེའི་ཕྱིར་ན་གེགས་བཞི་པོ་དེ་ཐོག་མར་ཤེས་དགོས། གེགས་བཞི་པོ་དེ་དག་གང་ཡིན་ཞེ་ན། ཚེ་འདིའི་སྤྱོད་ཡུལ་ཆགས་པ་དང་། སྲིད་པའི་བདེ་བ་ལ་ཆགས་པ་དང་། དེ་ལ་མ་ཆགས་ཀྱང་ཞི་བའི་བདེ་བ་ལ་ཆགས་པ་དང་གསུམ། སངས་རྒྱས་བསྒྲུབ་དགོས་བསམ་ཡང་བསྒྲུབ་པའི་ཐབས་ངོ་མི་ཤེས་པ་དང་བཞི་རེད། དེའི་གེགས་བཞི་པོ་དེ་སེལ་དགོས་ན། ཐབས་དགེ་བའི་བཤེས་གཉེན་གྱིས་ཟིན་པས་མི་ཚད་དེའི་གདམས་ངག་དེ་ཉམས་སུ་བླངས་ན། གོང་གི་གེགས་བཞི་པོ་སེལ་ནས་འཕྲང་འགག་གི་སྒོ་བསལ་ཐུབ། དེ་སེལ་སོང་དུས་རྫོགས་པའི་སངས་རྒྱས་ཀྱི་ལམ་ལ་བདེ་མྱུར་གྱི་སྒོ་ནས་བགྲོད་ཐུབ་པ་རེད། དེ་ཡིན་ན་དགེ་བའི་བཤེས་གཉེན་གྱི་གདམས་ངག་དེ་ཇི་ལྟར་ཡིན་ན། གང་ཟག་སོ་སོའི་ཁམས་དབང་མོས་པ་དང་བསྟུན་པའི་སྐྱེས་བུ་གསུམ་གྱི་ལམ་རིམ་གདམས་ངག་རྒྱ་ཆེ་རྣམ་གྲངས་མཐའ་ཡས་པ་ཞིག་ཡོད་པ་ཡིན་ནའང་། ཚུར་བསྡུ་ན་རྣམ་པ་བཞིའི་ཁོངས་སུ་བསྡུས་པ་རེད། དེའང་མི་རྟག་པ་སྒོམ་པར་གདམས་པ་དང་གཅིག འཁོར་བའི་ཉེས་དམིགས་ལས་འབྲས་དང་བཅས་པ་སྒོམ་པར་གདམས་པ་གཉིས། བྱམས་སྙིང་རྗེ་སྒོམ་པར་གདམས་པ་གསུམ། བྱང་ཆུབ་མཆོག་ཏུ་སེམས་བསྐྱེད་པའི་གདམས་པ་དང་བཞིའི་ཁོངས་སུ་འདུས་ལ། བཞི་པོ་དེ་གོང་གི་གེགས་བཞིའི་གཉེན་པོ་དང་སྦྱར་ན། མི་རྟག་པ་སྒོམ་ན་ཚེ་འདིའི་སྤྱོད་ཡུལ་ལ་ཆགས་པའི་གཉེན་པོར་འགྲོ་བ་དང་། འཁོར་བའི་ཉེས་དམིགས་ལས་འབྲས་དང་བཅས་པ་སྒོམ་ན་སྲིད་པའི་བདེ་བ་ལ་ཆགས་པའི་གཉེན་པོར་འགྲོ་བ་དང་། བྱམས་སྙིང་རྗེ་སྒོམ་ན་ཞི་བའི་བདེ་བ་ལ་ཆགས་པའི་གཉེན་པོར་འགྲོ་བ་དང་། བྱང་ཆུབ་མཆོག་ཏུ་སེམས་བསྐྱེད་པའི་གདམས་པ་དེ་སངས་རྒྱས་བསྒྲུབ་པའི་ཐབས་མི་ཤེས་པའི་གཉེན་པོར་འགྲོ་བ་ཡིན་ཏེ། ཁྱད་པར་དུ་སྐྱབས་འགྲོ་ནས་འགོ་བཟུང་སྟེ་བདག་མེད་རྣམ་གཉིས་སྒོམ་པ་མན་ཆད་དུ་བྱང་ཆུབ་མཆོག་ཏུ་སེམས་བསྐྱེད་པའི་ཆོས་སུ་འགྲོ་བ་ཡིན་པའི་ཕྱིར་ཏེ། འགའ་རེ་ནི་སེམས་བསྐྱེད་ཀྱི་རྟེན་དང་། འགའ་རེ་དམིགས་པ། འགའ་རེ་ཆོ་ག འགའ་རེ་བསླབ་བྱ། འགའ་རེ་འབྲས་བུ་སྟེ་ཐེག་པ་ཆེན་པོའི་ཆོས་ཐམས་ཅད་སེམས་བསྐྱེད་ཀྱི་ནང་དུ་མ་འདུས་པ་མེད་པར་མངོན་རྟོགས་རྒྱན་སོགས་ལས་གསུངས་སོ། །དེ་ལྟ་བུའི་གདམས་ངག་ཚང་མ་དེ་དགེ་བའི་བཤེས་གཉེན་ལས་འབྱུང་ཞིང་། དགེ་བའི་བཤེས་གཉེན་ལ་རག་ལས་པ་ཞིག་ཡིན། དེའི་ཕྱིར་ན་སངས་རྒྱས་བཅོམ་ལྡན་འདས་ཀྱིས། དགེ་བའི་བཤེས་གཉེན་ནི་དགེ་བའི་ཆོས་ཐམས་ཅད་ཀྱི་འབྱུང་གནས་ཡིན། ཐམས་ཅད་མཁྱེན་པ་ནི་དགེ་བའི་བཤེས་གཉེན་གྱི་གདམས་ངག་ལ་རག་ལས་པ་ཡིན་ཞེས་སོགས། སྡོང་པོ་བཀོད་པ་སོགས་ལས་ལན་གཅིག་མ་ཡིན་པར་གསུངས་ཡོད། དེས་ན་རང་རེས་ཚེ་འདིའི་སྤྱོད་ཡུལ་ལ་ཆགས་པའི་གཉེན་པོ་མི་རྟག་པ་སྒོམ་པའི་ཚུལ་ལ་བསམ་བློ་ཡང་གཏོང་ཞིག་བྱེད་ན། བཅོམ་ལྡན་འདས་ཀྱིས། དགེ་སློང་དག་འདུས་བྱས་ཐམས་ཅད་ནི་མི་རྟག་པའོ། །ཞེས་གསུངས་ཡོད་ན། འདི་ཇི་ལྟར་མི་རྟག་པ་རེད་བསམ་ན། མི་རྟག་པའི་མཐའ་བཞིས་བསྡུས་པ་སྟེ། སྐྱེ་མཐའ་འཆི། འདུས་མཐའ་འབྲལ། བསགས་མཐའ་འཛད། མཐོ་མཐའ་ལྟུང་བའི་རང་བཞིན་ཡིན་པས་ན་མི་རྟག་པའི་མཐའ་བཞི་གསུངས་པ་རེད། འདིའི་སྒོམ་ཚུལ་གྱི་དབྱེ་བའི་ཐོག་ནས་བཤད་ན། ཕྱི་སྣོད་ཀྱི་འཇིག་རྟེན་མི་རྟག་པར་རགས་པ་རྒྱུན་གྱི་མི་རྟག་པ་དང་། ཕྲ་བ་སྐད་ཅིག་གི་མི་རྟག་པ་དང་། ནང་བཅུད་ཀྱི་སེམས་ཅན་མི་རྟག་པར་རང་མི་རྟག་དང་། གཞན་མི་རྟག་པ་སོགས་དེ་ལྟ་བུའི་ཁྲིད་ཚུལ་འདི་རྣམས་རེད། དེ་རྣམས་སྒོམ་པའི་ཐབས་ལག་ཁྲིད་དང་བཅས་པ་གོང་དུ་སོང་བ་དང་། སྲིད་པའི་བདེ་བ་ལ་ཆགས་པའི་གཉེན་པོ་འཁོར་བའི་ཉེས་དམིགས་དང་ལས་རྒྱུ་འབྲས་ལ་བསམ་པ་ཡིན་ན། སྡུག་བསྔལ་རྣམ་པ་གསུམ་གྱི་འཁོར་བའི་ཉེས་དམིགས་ཀྱི་རང་བཞིན་བསམ་པ་དེ་ཡང་གོང་དུ་སོང་མ་ཐག་པ་དང་། ལས་རྒྱུ་འབྲས་ཀྱི་རྣམ་བཞག་འོག་ཏུ་འབྱུང་མ་རག་པ་ཡིན་པས་འདི་དག་སྒོམ་པ་འདིས་འཁོར་བའི་སྡུག་བསྔལ་ལ་འཇིགས་ཤིང་ལས་རྒྱུ་འབྲས་ལ་ཡིད་ཆེས་པས། སྲིད་པའི་བདེ་བ་ལ་མི་ཆགས་པར་མ་ཟད་དེ་ལས་ངེས་པར་འབྱུང་འདོད་ཀྱི་བློ་བཅོས་མ་མ་ཡིན་པ་ཞིག་སྐྱེས་ནས། དེའི་ཐོག་ནས་ཞི་བའི་བདེ་བ་ལ་ཆགས་ན་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པ་མ་རེད། དེ་སེལ་བྱེད་འགྲོ་ཀུན་ལ་བྱམས་སྙིང་རྗེ་སྒོམ་དགོས། དེ་ཡིན་ན་ངས་འདི་ནས་བྱམས་སྙིང་རྗེའི་སྐོར་འདི་ཐུགས་གསོས་ཤིག་ཞུ་ན། ཞི་བའི་བདེ་བ་ལ་ཆགས་པའི་གཉེན་པོར་བྱམས་སྙིང་རྗེ་བསྒོམ་དགོས་གསུངས་དུས་ལས་དང་པོ་རྣམས་ཀྱིས་ཞི་བའི་བདེ་བ་ལ་ཆགས་ཞེས་པ་ཅི་ཡིན་སྙམ་ན། བདག་རང་ཉིད་གཅིག་པུ་མྱ་ངན་ལས་འདས་པ་ཐོབ་པར་འདོད་པས་སེམས་ཅན་གཞན་གྱི་བདེ་སྡུག་ལ་བསམ་བློ་མི་གཏོང་བར་བློས་གཏོང་བ་དེ་རེད། དེ་ཐེག་པ་དམན་པའི་ལུགས་རེད། ཐེག་ཆེན་གྱི་ལམ་ལ་ཞུགས་ཏེ། མཐའ་གཉིས་ལ་མི་གནས་པའི་བྱང་ཆུབ་དམ་པ་ལ་རང་གཞན་སེམས་ཅན་ཐམས་ཅད་འགོད་དགོས་དུས་བྱམས་སྙིང་རྗེ་འདི་དང་འབྲལ་ཐབས་མེད་པ་ཞིག་རེད། དེས་ན་བྱམས་སྙིང་རྗེ་སྒོམ་ཚུལ་བཤད་པ་ལ། བྱམས་སྙིང་རྗེའི་དབྱེ་བ་དང་། དམིགས་ཡུལ། རྣམ་པ། སྒོམ་ཐབས། དེ་འབྱོངས་པའི་ཚད། ཡོན་ཏན་དང་བཅས་པ་དྲུག་གི་སྒོ་ནས་བཤད་དགོས། བྱམས་སྙིང་རྗེ་གཉིས་ལས་དང་པོ་བྱམས་པའི་དབྱེ་བ་ནི། སེམས་ཅན་ལ་དམིགས་པའི་བྱམས་པ་དང་། ཆོས་ལ་དམིགས་པའི་བྱམས་པ། དམིགས་པ་མེད་པའི་བྱམས་པ་དང་གསུམ་ཡོད་པ་ལས། སེམས་ཅན་ལ་དམིགས་པའི་བྱམས་པ་ནི། དང་པོ་སེམས་བསྐྱེད་པའི་བྱང་ཆུབ་སེམས་དཔའི་རྒྱུད་ལ་ཡོད་པ་དང་། ཆོས་ལ་དམིགས་པའི་བྱམས་པ་ནི། སྤྱོད་པ་ཕྱིན་དྲུག་ལ་འཇུག་བཞིན་པའི་བྱང་སེམས་ཀྱི་རྒྱུད་ལ་ཡོད་པ་དང་། དམིགས་པ་མེད་པའི་བྱམས་པ་ནི། མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་སེམས་ཀྱི་རྒྱུད་ལ་མངའ་བར་གསུངས་ཡོད། དེ་དག་བྱང་སེམས་ཀྱི་དབང་དུ་བྱས་སམ་སྙམ། ལས་དང་པོ་བའི་དབང་དུ་བྱས་ན། སེམས་ཅན་ལ་དམིགས་པའི་བྱམས་པ་འདི་གལ་ཆེ་བས་ན། འདིའི་དམིགས་ཡུལ་དང་རྣམ་པའི་བློ་ནི། དམིགས་པའི་ཡུལ་སེམས་ཅན་ཐམས་ཅད། རྣམ་པའི་བློ་བདེ་བ་དང་ལྡན་འདོད་ཀྱི་བསམ་པ། འདི་སྒོམ་ཐབས་ཀྱི་སྒོ་ནས་བཤད་ན། རྩ་བ་དྲིན་དྲན་པ་ལ་རག་ལས་པས་ན། རང་ཉིད་ཀྱི་ཚེ་འདིའི་དྲིན་ཆེན་མ་ནས་འགོ་བཟུང་སྟེ་བསྒོམ་དགོས། དྲིན་ཇི་ལྟར་ཆེ་ན། ལུས་བསྐྱེད་པའི་དྲིན། སྲོག་བྱིན་པའི་དྲིན། དཀའ་བ་སྤྱད་པའི་དྲིན། འཇིག་རྟེན་བསྟན་པའི་དྲིན་དང་བཞི་ཡོད། དེའི་དྲིན་དེ་ལན་རེ་དང་ལན་གཉིས་ཆེ་བ་ཙམ་མ་ཡིན་པར། བསམ་ཡུལ་འདས་པ་ཐེངས་བརྒྱ་སྟོང་ཁྲི་ཚོས་གཞལ་ནས་བརྩི་འོང་རྒྱུ་མེད་པའི་ཚེ་རབས་མང་པོ་ན་མར་བྱས་པས་མི་ཚད་པར་དྲིན་དེ་འདྲ་ཆེ་བ་ཡིན། དེ་བཞིན་དུ་སེམས་ཅན་ཐམས་ཅད་ཀྱིས་མར་བྱས་ཤིང་དྲིན་ཆེ་བ་ཤ་སྟག་ཡིན། དེས་ན་ནམ་མཁའི་གར་ཁྱབ་ཀྱི་སེམས་ཅན་ཐམས་ཅད་ལ་ཕན་པ་དང་བདེ་བར་འདོད་པའི་བློ། ད་ལྟའི་མ་འདི་ལ་སྐྱེ་བ་བཞིན་དུ་སྐྱེ་དགོས་པ་རེད། དེ་སྐྱེས་ན་དེའི་མིང་ལ་བྱམས་པ་ཟེར། བྱམས་པའི་ཤུགས་ཀྱི་མིག་ནས་མཆི་མ་འཁྲུག་པ་དང་། ལུས་ཀྱི་བ་སྤུ་ལྡང་བ་ཞིག་རེད་ན་དེ་བྱམས་པ་ཆེན་པོ་ཟེར། དེ་ལྟ་བུ་དེ་སེམས་ཅན་ཐམས་ཅད་ལ་སྐྱེས་ཡོད་ན་བྱམས་པ་ཚད་མེད་རེད་འགྲོ། དེ་བསྒོམས་ནས་འབྱོངས་པའི་ཚད་ནི། རང་ཉིད་ལ་བདེ་བ་འདོད་པའི་བློ་ཞིག་ཡོད་རྒྱུའི་འདིའི་ཚབ་དུ་སེམས་ཅན་ཐམས་ཅད་བདེ་བ་འདོད་པ་དེ་རེད་སོང་དུས་འབྱོངས་པའི་ཚད་རེད། བྱམས་པ་བསྒོམ་པ་ལ་ཡོན་ཏན་ཅི་ཡོད་ན། ཟླ་བ་སྒྲོན་མེའི་མདོ་ལས། མཆོད་པ་ཚད་མེད་རྣམ་མང་ཇི་སྙེད་པ། །ཞིང་ནི་བྱེ་བ་ཁྲག་ཁྲིག་གཏམ་སྙེད་དུ། །སྐྱེས་བུ་མཆོག་ལ་མཆོད་པ་དེ་བྱས་པས། །བྱམས་པའི་སེམས་དང་གྲངས་ལ་ཆར་མི་ཕོད། །ཅེས་གསུངས་སོ། །སྙིང་རྗེ་སྒོམ་པའི་ཚུལ་ལ་ཡང་དབྱེ་བ་དང་། དམིགས་ཡུལ། རྣམ་པ། སྒོམ་ཐབས་སོགས་དྲུག་གི་སྒོ་ནས་བཤད་ན། སྙིང་རྗེའི་དབྱེ་བ་ལའང་། སེམས་ཅན་ལ་དམིགས་པའི་སྙིང་རྗེ་སོགས་གསུམ་ཡོད་པ་ལས། སེམས་ཅན་ལ་དམིགས་པའི་སྙིང་རྗེ་ནི། སེམས་ཅན་ཐམས་ཅད་གྱིས་ངན་སོང་གསུམ་གྱི་སྡུག་བསྔལ་ལ་སོགས་པ་མྱོང་བ་ལ་དེ་དང་བྲལ་འདོད་ཀྱི་སྙིང་རྗེ་སྐྱེས་པ་འདི་ལྟ་བུ་རེད། རང་ཉིད་ཀྱིས་འཕགས་པའི་བདེན་པ་བཞི་ལ་བློ་གོམས་ནས། རྒྱུ་འབྲས་རྣམ་བཞག་ཤེས་པས་རྟག་འཛིན་གྱི་བློ་ལྡོག་དུས། སེམས་ཅན་གཞན་དག་རྣམས་ཀྱིས་རྒྱུ་འབྲས་མི་ཤེས་པས་རིལ་པོ་དང་རྟག་པར་འཛིན་ནས་འཁྲུལ་ཡོད་པ་ལ་སྙིང་རྗེ་སྐྱེ་བ་འདི་ཆོས་ལ་དམིགས་པའི་སྙིང་རྗེ་རེད། རང་ཉིད་ཀྱིས་མཉམ་པར་བཞག་ནས་ཆོས་ཐམས་ཅད་སྟོང་པ་ཉིད་དུ་རྟོགས་པ་ན། དེ་ལྟར་མ་རྟོགས་པའི་སེམས་ཅན་དངོས་འཛིན་ཅན་ལ་ལྷག་པར་སྙིང་རྗེ་སྐྱེ་བ་ནི་དམིགས་པ་མེད་པའི་སྙིང་རྗེ་རེད། སྙིང་རྗེའི་དམིགས་པའི་ཡུལ་ནམ་མཁའ་དང་མཉམ་པའི་སེམས་ཅན་ཐམས་ཅད་ཡིན་ལ། རྣམ་པ་སྡུག་བསྔལ་རྒྱུ་འབྲས་ཐམས་ཅད་དང་བྲལ་བར་འདོད་པའི་བློ་ཞིག་རེད། འདི་སྒོམ་ཐབས་ནི། དང་པོ་རང་ཉིད་ཀྱི་ཚེ་འདིའི་མ་དང་ངན་སོང་གི་སྡུག་བསྔལ་སྦྱར་ཏེ་བསྒོམས་ནས། མཐར་སེམས་ཅན་ཐམས་ཅད་ལ་དེ་ལྟར་དུ་སྒོམ་དགོས། དཔེར་ན་རང་ཉིད་ཀྱི་དྲིན་ཆེན་མ་རྒན་འདི། སྔུན་འདི་ན་ལྕགས་སྲེག་དམར་ལིང་ཞིག་གི་ཐོག་ཏུ་བཞག་ནས་གཞོགས་ཁ་ཡ་སོག་ལེས་དྲས། གཞོགས་ཁ་ཡ་སྟ་རེས་གསེས། གསོན་སྙིང་དམར་པོ་ལེན་འགྲོ་བཞིན་ཡོད་ན་སྙིང་ལོས་རྗེ། ལྟ་དགོས་ན་ལྟ་མི་ཐུབ་པ་དེ་བཞིན་དུ་དགུན་ཟླ་གསུམ་གྱི་གྲང་ངར་གངས་འཁྱགས་ཁ་བ་བུ་ཡུག་གི་ནང་དུ་གོས་མེད་གཅེར་བུར་བཞག་ནས། འཁྱགས་ཤིང་ཕྱིད་པས་མི་ཚད་འཁེངས། འཁེངས་པས་མི་ཚད་གས་ནས། གསོན་ཤི་རྒྱག་འགྲོ་བཞིན་ཡོད་ན་སྙིང་རྗེ་ས་ཨེ་ཡོད་གི་དེ་ལྟར་བསྒོམས་ན། ད་ལྟ་དམྱལ་བར་སྡུག་བསྔལ་དེ་རྣམས་མྱོང་བཞིན་པའི་སེམས་ཅན་ཐམས་ཅད་རང་རེ་རྣམས་ཀྱི་དྲིན་ཆེན་གྱི་མ་ཤ་སྟག་ཡིན། དེས་ན་དེ་དག་ཐམས་ཅད་སྡུག་བསྔལ་རྒྱུ་དང་བཅས་པ་བྲལ་བར་འདོད་པའི་སྙིང་རྗེ་སྒོམ། ཡང་རང་ཉིད་ཀྱི་དྲིན་མོ་ཆེའི་མ་དེ་བཟའ་རྒྱུ་མེད་པས་ལྟོག བཏུང་རྒྱུ་མེད་པས་སྐོམ། ཚ་བས་གཟིར། གྲང་བས་ཉེན། ལུས་ཁོ་ཤོག་སྐམ་པོ་རླུང་གིས་འཁྱེར་བ་ལྟ་བུའི་ཡི་དྭགས། སྣབ་ཁ་ལུད་ལ་རེ་ནས་རྒྱུག་འདུག་པ་ཞིག་ཏུ་གྱུར་པ་དངོས་སུ་མཐོང་ཡོང་ན་བཟོད་དུ་མེད་པའི་སྙིང་རྗེ་སྐྱེས་ངེས་པ་ཡིན་པས། ཚེ་འདིའི་མ་བླ་བདེ་མ་དེ་ན་སྐྱེས་མེད་ཟེར་ཅི་ཤེས་དང་། མིན་རུང་ད་ལྟར་ཡི་དྭགས་ཀྱི་སེམས་ཅན་དུ་སྐྱེས་ནས་བཀྲེས་སྐོམ་མྱོང་ཚད་པོ་མ་མིན་པ་གཅིག་ཀྱང་ཡོད་མ་རེད། ཡང་མ་རྒན་དྲིན་ཆེན་མ་དེ་རང་རེས་མ་འབྲི་སྒོ་ཟོག་ཅིག་ལ་གཏད་པ་བཞིན་དུ་སྡུག་བཀོལ་བཀོལ་ནས། བེད་སྤྱད་སྤྱད་ཀྱི་མཐར་རྐང་ལག་ཐག་པས་བཅིངས། མཆུ་ཐག་གུས་སྡོམ། བྲང་གྲིས་གཤགས་ནས་གསོན་པོར་གསོད་འགྲོ་བཞིན་ཡོད་ན། ཡང་མ་རྒན་དྲིན་ཆེན་མ་དེ། ལ་ཁའི་རི་དྭགས་ཤིག་གི་ལུས་བླངས་ནས་ས་རི་ཡན་གྱི་རྩ་ཆུ་བདག་མེད་ལོངས་སྤྱོད་མི་བཅུག་པར། སྲོག་ཐོག་ལ་བབ་འགྲོ་བཞིན་ཡོད་པ་ལྟར་དུ། ད་ལྟར་དུད་འགྲོའི་ལུས་བླང་ཚད་པོ་ཕ་མ་དྲིན་ཆེན་ཡིན་ལུགས་གཅིག་པ་རེད། ངན་སོང་གསུམ་མིན་ནའང་མཐོ་རིས་གསུམ་ན་ཡོད་པའི་སེམས་ཅན་ཡིན་ཡང་ངན་སོང་གི་གཡང་ས་གཟར་མོའི་ཁར་ལྟུང་ལ་ཁད་དང་། ལྟུང་རྒྱུར་ཉག་གཅིག་ཡིན་ཏེ་སྡིག་པ་མི་དགེ་བ་སྤོང་མི་ཤེས་པར་མ་ཟད་དེ་ལ་དོགས་ཟོན་ཙམ་ཡང་བྱེད་མི་ཤེས་པ་དང་། དགེ་བའི་བཤེས་གཉེན་གྱིས་ཟིན་མེད། བདེ་འདོད་སྡུག་བསྔལ་གྱི་རྒྱུ་ཁོ་ན་བསྒྲུབས་ནས་མེ་ཆེ་ཐོག་ཏུ་ཤིང་བསྣན་པ་ལྟ་བུ་ཞིག་ཡིན་ན་སྙིང་ཅིའི་ཕྱིར་་མི་རྗེ་བསམ་ནས། མ་སེམས་ཅན་ཐམས་ཅད་ཀྱི་སྡུག་བསྔལ་རྒྱུ་དང་བཅས་པ་བྲལ་འདོད་དེ་སྙིང་རྗེ་སྒོམ་ཐབས་རེད། དེ་ལྟར་སྙིང་རྗེ་བསྒོམས་ནས་འབྱོངས་པའི་ཚད་ནི། རང་གཅེས་འཛིན་གྱི་གདོས་ཐག་ཆད་དེ། སེམས་ཅན་ཐམས་ཅད་ཀྱི་སྡུག་བསྔལ་བྲལ་འདོད་ཀྱི་བློ། ཁ་ཙམ་ཚིག་ཙམ་ཞིག་མ་ཡིན་པར་སྙིང་ནས་སྐྱེས་ནས། སེམས་ཅན་མིག་གིས་མཐོང་དུས་མིག་ནས་མཆི་མ་ལྷུང་ནུས་པ་ཞིག་རེད་དུས་འབྱོངས་ཚད་རེད། དེ་སྙིང་རྗེ་ཆེན་པོ་རེད། དེའི་སྙིང་རྗེ་སེམས་ཅན་ཡོངས་ལ་སྒོམ་ཐུབ་པ་ཞིག་རེད་ན་སྙིང་རྗེ་ཚད་མེད་ཅེས་བྱ། སྙིང་རྗེ་སྒོམ་པའི་ཡོན་ཏན་ནི། ཆོས་ཡང་དག་པར་སྡུད་པའི་མདོ་ལས། འཁོར་ལོས་བསྒྱུར་བའི་འཁོར་ལོ་རིན་པོ་ཆེ་གང་ན་ཡོད་ན་དེར་དཔུང་གི་ཚོགས་ཐམས་ཅད་ཡོད་པ་དང་། དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་གང་ན་ཡོད་ན་དེ་ན་སངས་རྒྱས་ཀྱི་ཆོས་ཐམས་ཅད་ཡོད། ཅེས་དང་། ཡང་མདོ་ལས། ཐམས་ཅད་མཁྱེན་པའི་ཡེ་ཤེས་དེ་ནི་སྙི་རྗེ་ཆེན་པོའི་རྩ་བ་ལས་བྱུང་བ་ཡིན་ནོ། །ཞེས་གསུངས་པ་ལྟར། དེ་འདྲའི་ཕན་ཡོན་ཆེན་པོ་བསམ་གྱིས་མི་ཁྱབ་པ་མངའ་བ་ཡིན་ནོ། །དེས་ན་བྱམས་པ་བསྒོམས་ནས་སེམས་ཅན་ཐམས་ཅད་བདེ་བ་ཐོབ་པར་འདོད་པ་དང་། སྙིང་རྗེ་བསྒོམས་པས་སེམས་ཅན་ཐམས་ཅད་སྡུག་བསྔལ་དང་བྲལ་བར་འདོད་པ་མཐར་ཕྱིན་པའི་ཚེ། རང་གཅིག་པུ་ཞི་བདེ་ཐོབ་པ་ལ་མི་སྤྲོ་བས། སེམས་ཅན་ཐམས་ཅད་ཀྱི་དོན་དུ་སངས་རྒྱས་སྒྲུབ་པ་ལ་དགའ་བ་ཡིན་པས་ན། ཞི་བའི་བདེ་བ་ལ་ཆགས་པའི་གཉེན་པོར་གྱུར་པ་བྱམས་སྙིང་རྗེ་དེ་ལྟར་སྒོམ་པ་དེ་ཐེག་ཆེན་ཆོས་ཀྱི་རྩ་བ་མེད་དུ་མི་རུང་བ་ཡིན། གདམས་ངག་ཐམས་ཅད་ཀྱི་ནང་ནས་མཆོག་ཏུ་གྱུར་པ་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པ་འདི་ཡིན། འཁོར་བར་འཁྱམས་པའི་རྒྱུ་རྐྱེན་ནི་ལས་བཟང་ངན་སྣ་ཚོགས་པར་བྱས་པ་ལས་བྱུང་བ་དང་། ལས་དེ་གང་ལས་བྱུང་ན་ཆགས་སྡང་སོགས་ཉོན་མོངས་པ་ལས་བྱུང་བ་དང་། དེའི་རྩ་བ་གང་ལ་ཐུག་ན། ང་ལྟོག་འོང་། ང་འཁྱགས་འོང་། ང་ན་འོང་། ང་ཤི་འོང་། ང་ལ་ཟས་དགོས། གོས་དགོས། ད་རུང་རྒྱུ་དགོས། ང་ལ་གཉེན་ཉེ་རིང་དགོས་བསམ་ནས་མི་དགོས་དགུ་དགོས་ཀྱི་འདོད་ཆེན། ང་བདག་གི་འགོང་པོ་ངའམ་བདག་ཏུ་གཟུང་བ་འདི་ལ་ཐུག་ཡོད་པ་རེད། ཆོས་འགྲུབ་དང་མི་འགྲུབ་དང་ཐར་པའི་ལམ་སྣེ་ཟིན་མིན་ནི་བདག་འཛིན་གྱི་དགྲ་ཆེན་ནང་ན་ཡོད་པ་འདི་འདུལ་ནུས་མི་ནུས་ལ་རག་ལས་པ་རེད། བདག་འཛིན་ནམ་འདུལ་ཐུབ་ན་དེ་དུས་སངས་རྒྱས་པ་རེད། དེ་རིང་འདུལ་ན་དེ་རིང་སངས་རྒྱས། སང་ཉིན་འདུལ་ན་སང་ཉིན་སངས་རྒྱས། བཀའ་མདོ་རྒྱུད་ལུང་མན་ངག་ཐམས་ཅད་བདག་འཛིན་འདུལ་བའི་གཉེན་པོར་བསྟན་པ་མ་སོང་བ་ཞིག་ཡོད་པ་མ་རེད། འོན་ཀྱང་དེའི་ནང་ན་ཉི་མ་གཅིག་གིས་མུན་ནག་ཐམས་ཅད་སེལ་བྱེད། སྨན་ཨ་རུ་གཅིག་གིས་ནད་ཐམས་ཅད་འཇོམས་འགྲོ་བྱེད། གྲི་རྣོན་པོ་གཅིག་གིས་འཆིང་བ་ཐམས་ཅད་གཅོད་བྱེད། ཡིད་བཞིན་གྱི་ནོར་བུ་གཅིག་གིས་འདོད་པའི་རེ་བ་ཐམས་ཅད་སྐོང་བ། བུ་དཔའ་བོ་གཅིག་གིས་དགྲ་ཐམས་ཅད་འདུལ་ཐུབ་པ་ནི་གང་ཡིན་ན། བྱམས་སྙིང་རྗེ་དང་བྱང་ཆུབ་ཀྱི་སེམས་གཉིས་ཀ་ཡིན། སྔོན་བྱོན་རྒྱལ་བ་སྲས་དང་བཅས་པ་ཐམས་ཅད་ཀྱིས་མགྲིན་དབྱངས་གཅིག་གྱུར་གྱིས་གསུངས་པའི་གདམས་ངག་ཡིན་པར་མ་ཟད། ལམ་དེ་ལ་མ་བརྟེན་པའི་རྒྱལ་དང་རྒྱལ་སྲས་བྱང་ཆུབ་སེམས་དཔའ་ཞིག་བྱོན་མྱོང་ཡོད་པ་མ་རེད། དེ་ལྟ་བུའི་བྱམས་སྙིང་རྗེ་ཁྱད་པར་ཅན་སྐྱེས་པའི་ཐོག་ཏུ། བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་འབྱོང་བར་མཛད་རྒྱུའི་དམ་ཆོས་བྱང་ཆུབ་སྒྲུབ་པའི་ལམ་གནད་ཐམས་ཅད། རྒྱུད་ལ་ངེས་པར་མཛད་དེ། སྐབས་སུ་བབ་པ་གང་ཞིག་གསན་པར་བྱ་བ་རྫོགས་ཆེན་ཀློང་ཆེན་སྙིང་ཐིག་གི་ཆོས་སྡེ་ལས། ཐུན་མོང་གི་སྔོན་འགྲོ་སེམས་སྦྱོང་བདུན་གྱི་དོན་ཁྲིད་ཐར་པའི་ཐེམ་སྐས་འདི་འཆད་པ་ལ། ཁྲིད་རྐང་གསུམ་པ་ཡན་ཆད་ཁྲིད་སྦྱོང་དང་བཅས་པ་ལག་ཁྲིད་ཀྱི་ཚུལ་དུ་སོང་གྲུབ་ནས།

པ༽ སེམས་སྦྱོང་བཞི་པ།

དང་པོ་དགེ་བའི་བཤེས་གཉེན་བརྟག་པ།

དེ་རིང་སེམས་སྦྱོང་བཞི་པ་འཆད་པ་ནི། འདི་ལ་ས་བཅད་གསུམ་དུ་དབྱེར་ཡོད། དང་པོ་དགེ་བའི་བཤེས་གཉེན་བརྟག་པ་དེ་རེད། དེ་ལ་བླ་མའི་མཚན་ཉིད་བཤད་པའི་ཞོར་ལ་སློབ་མའི་མཚན་ཉིད་ཀྱང་བསྟན་པ་དང་། དེ་ནས་དངོས་གཞི་བླ་མ་བསྟེན་ཚུལ། དེ་ལ་བསམ་པས་བསྟེན་ཚུལ་དང་། སྦྱོར་བའི་བསྟེན་ཚུལ་གཉིས་སུ་དབྱེ་བའི་སྒོ་ནས་གསུངས་ཡོད་པ་ལས། དང་པོ་ནི། བུ་ཡིག་ལས། བླ་མའི་གདམས་ངག་ཅིག་ཅི་ནས་ཀྱང་ཐོབ་པར་བྱ་ཞིང་། ཐབས་གང་གི་སྒོ་ནས་ཀྱང་ཐོབ་པར་བྱ་དགོས་སྙམ་པ་དང་། ཞེས་པའི་ལུང་དེས་བསྟན་པ་རེད། གོང་དུ་བཤད་པ་ལྟར་གཞི་བདེ་གཤེགས་སྙིང་པོ་སངས་རྒྱས་ཐོབ་རུང་གི་ས་བོན་ཡོད། རྟེན་མི་ལུས་རིན་ཆེན་རྙེད་དཀའ་བའང་རྙེད། རྐྱེན་དགེ་བའི་བཤེས་གཉེན་མཇལ་རྒྱུ་ཡོད་པའི་དུས་སྐབས་སུ་ཁེལ་ཡང་། དེ་རྐྱང་པས་ཕན་པ་མེད་པས། བླ་མའི་མདུན་ནས་གདམས་ངག་ཟབ་མོ་ཞིག་ཅི་ནས་ཀྱང་རང་གིས་ཉམས་སུ་བླང་རྒྱུ་ཞིག་འཐོབ་པར་བྱ་ཞིང་། ཐབས་གང་འདྲ་ཞིག་བྱེད་དགོས་ཀྱང་དཀའ་བ་དང་ལེན། ངལ་བ་ཁྱད་བསད་ཐུབ་པའི་ཆོད་སེམས་བརྟན་པོ་ཞིག་ཡོད་དགོས། ངལ་བ་ཁྱད་བསད་ཀྱི་སྒོ་ནས་ཀྱང་ཐོབ་པར་བྱ་དགོས་སྙམ་པ་དང་། ཞེས་པས་བསྟན། དེ་ལྟར་སྔར་བཤད་མ་ཐག་པའི་ཁམས་གསུམ་འཁོར་བ་རིགས་དྲུག་གི་གནས་གང་དུ་སྐྱེས་ཤིང་འཁོར་ཀྱང་། འཁོར་བ་འདི་ནི་མེའི་འོབས་དང་། སྲིན་པོའི་གླིང་། དུག་སྦྲུལ་གདུག་པའི་ཚང་ལྟ་བུ་ཡིན་པས་ན་སྡུག་བསྔལ་འབའ་ཞིག་ལས་བདེ་བ་མེད་ཚུལ། ཨོ་རྒྱན་ཆེན་པོས། འཁོར་བ་འདི་ལ་ཁབ་ཀྱི་རྩེ་ཙམ་ཡང་། །བདེ་བ་ནམ་ཡང་ཡོད་མ་ཡིན་ཞེས་གསུང་། །གསུངས་པ་ལྟར་བདེ་བ་ཁབ་ཀྱི་རྩེ་མོ་དང་སྤུའི་ཉག་མ་ཙམ་ཡང་མ་མཆིས་པར་ཤེས་པར་བྱ་བ་དང་། གསུང་རབ་ཀྱི་ཡིག་ཆ་དང་། བླ་མའི་ཞལ་རྒྱུན་གང་ཡིན་ཡང་། ཐེག་ཆེན་གྱི་དམ་ཆོས་ཤིག་མ་མཉན་མ་བལྟ་ན་མ་གཏོགས། གོ་བ་དང་རིག་པ་ཞིག་ཡིན་ཕྱིན་དེ་འདྲའི་གོ་བ་ཙམ་ཡོད་ཀྱང་། རང་གཞན་ཐམས་ཅད་ཀྱི་དེ་འདྲའི་འཁོར་བའི་སྡུག་བསྔལ་མྱོང་བ་དེ་ལ་ཡིད་མུག་པར་བྱས་པ་གཅིག་པུས་སྡུག་བསྔལ་དེ་ལས་ཐར་པ་མ་ཡིན་ཏེ། སྡུག་བསྔལ་མྱོང་བ་ཡིན་པར་ཤེས་པས་མི་ཚད་སྡུག་བསྔལ་དེ་ལས་ཐར་པ་ཐོབ་པ་དེ་ལ་ཕན་པའི་ཐབས་ཁོ་ན་ལྷུར་ལེན་དགོས། སྡུག་བསྔལ་དེ་མི་མྱོང་བར་བྱེད་པའི་ཕན་པའི་ཐབས་དེ་གང་ཡིན་ན། གསལ་རྒྱལ་ལ་གདམས་པའི་མདོ་ལས། རྒྱལ་པོ་ཆེན་པོ་ཞེས་བོས་མཛད་དེ། མཐའ་བཞིས་བསྡུས་པའི་འཁོར་བའི་ཉེས་པ་སྤྱི་དང་། ཁྱད་པར་དུ་འཆི་བ་ཐོག་ཏུ་བབ་པ་དེའི་ཚེ། དེའི་དུས་ན་དམ་པའི་ཆོས་མ་གཏོགས་རེ་སའི་མགོན་དང་། སྡུག་བསྔལ་ལས་སྐྱོབ་པའི་སྐྱབས་མེད་དོ། །དམ་པའི་ཆོས་ནི་ཉམ་ཐག་མགོན་མེད་དུ་གྱུར་པ་དེའི་ཚེ། ཉམ་ཐག་གི་རེ་སའི་མགོན་དང་། བློ་གཏད་བྱེད་ཆོག་པའི་མི་བསླུ་བའི་སྐྱབས་དང་། རེ་ལྟོས་འཆའ་སའི་རྟེན་དང་། ཡིད་བརྟན་ཕེར་ཤིང་གདུང་བ་སེལ་བའི་ངལ་གསོའི་གླིང་དང་། ར་མདའ་སྦྲན་ཆོག་ཆོག་གི་དཔུང་གཉེན་ལྟ་བུ་ཡིན་ནོ། །ཞེས་གསུངས་ཤིང་དེ་ཡང་ཡི་གེ་ནག་འདོན་གྱིས་ཀློག་པ་ཙམ་གྱིས་ནི་ཕན་པ་ཡོང་བ་མ་ཡིན་ཏེ། དཔེར་ན་འོ་མ་ལས་མར་དང་། མེ་ལས་དུ་བ་འབྱུང་བ་ལྟར་ལམ་གྱི་རྩ་བ་དགེ་བའི་བཤེས་གཉེན་ཁོ་ན་བསྟེན་ནས་སྙིང་པོ་ལེན་པར་བྱ་སྟེ། རང་གཞན་སེམས་ཅན་ཐམས་ཅད་འཁོར་བའི་སྡུག་བསྔལ་གྱི་རྒྱ་མཚོ་ཆེན་པོ། རྒྱ་ཆེ་ཆེ་བས་ཕ་མཐའ་ཞིག་མི་མངོན། གཏིང་ཟབ་ཟབ་ཀྱིས་འོག་ཏུ་ཐུག་རྒྱུ་མེད་པ། ཤུགས་དྲག་དྲག་གིས་ལས་ཀྱི་རྦ་རླབས་ཀྱིས་གང་སར་འཕེན་འདུག་པ་ཡིན་ན། ཡར་སྲིད་པའི་རྩེ་མོ་དེ་མཚོ་ཁ་ཐོག་དང་འདྲ་བ་ཡིན་ན། མར་མནར་མེད་ཀྱི་ས་གཞི་རྒྱ་མཚོའི་གཏིང་ན་ཟུག་ཡོད་པ། སྡུག་བསྔལ་གྱི་རིགས་སྣ་ཚོགས་པའི་ཆུ་སྲིན་གདུག་པ་ཅན་གྱི་གནོད་པ་ཡོད་པ། ཅི་འདྲ་བྱས་ཀྱང་ཐར་དཀའ་བའི་འཁོར་བའི་རྒྱ་མཚོ་འདིའི་ནང་དུ་འཁོར་ཞིང་འཁྱམས་ཡོད་ན། བླ་ན་མེད་པའི་ཆོས་ཀྱི་གྲུ་དང་། དེད་དཔོན་བླ་མའི་ཁ་ལོ་བ་དང་བཅས་པ་བཞུགས་པའི་སྐབས་འདིར། ད་རེས་ཀྱི་ལུས་རྟེན་འདིའི་ཐོག་ན་ཆོས་ཀྱི་གྲུ་ཆེན་ལ་ཞུགས། བླ་མ་དགེ་བའི་བཤེས་གཉེན་གྱི་དེད་དཔོན་མ་བསྟེན་ན། ཕྱིན་ཆད་འཁོར་བ་དང་ངན་སོང་གི་གནས་ནས་ཐར་དཀའ་བས། ཡོད་ན་ད་རེས་རེད། མེད་ན་ད་རེས་རེད། ཤི་བ་ཤེས་ཤེས་ཁ་དང་། མ་ཎི་ཁ་ལ་འཆོས་འཆོས་ཁ་ཟེར་བ་ལྟར། ད་རེས་ཀྱི་སྐབས་འདི་དང་བསྟུན་ནས་སྲིད་པའི་མཚོ་ལས་སྒྲོལ་ཐུབ་པའི་བྱ་བ་ཞིག་སྒྲུབ་དགོས་བསམ་ནས། བླ་མ་དམ་པ་ཞིག་བསྟེན་རྒྱུ་ནི་ཐར་ལམ་འདོད་པ་ཐམས་ཅད་ཀྱི་མཆོག་ཏུ་གཅེས་པའི་མན་ངག་རེད། དེས་ན་ཡར་ཐར་ལམ་ལ་འགྲོ་ས་དང་། མར་ངན་སོང་ལ་ལྷུང་ས། བར་དུ་གནས་གཞན་དུ་འཁྱམས་ས། རང་རེའི་ཁ་བཤད་ལྟར་ལམ་རྒྱ་གྲམ་འདྲ་བའི་བཞི་མདོར་ཐོན་ཡོད་ན། ད་ལམ་སྟོན་གྱི་ས་མཁན་བཟང་པོ་ཞིག་གདམ་མ་ཤེས་ཤིང་། བསྟེན་མ་ཤེས་དུས་བྱ་བ་ཆེན་པོའི་ཡག་ཉེས་རེད། ཚེ་འདིའི་བྱ་བ་ཞིག་འཕྱུག་ཟེར་བ་འདྲ་ག་ན་ཡིན། ཚེ་རབས་སྐྱེ་བ་མང་པོའི་གཏན་གྱི་བྱ་བ་ཉེས་འགྲོ་བ་ཡིན་པས་ན། བླ་མ་མཚན་ཉིད་དང་ལྡན་པ་ཞིག་བསྟེན་རྒྱུ་དེ་གལ་ཆེ་བ་ཡིན་པར་ཤེས་དགོས། བཤེས་གཉེན་སྤྱིའི་མཚན་ཉིད་ནི། མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེ་ཞི་བ། །ཡོན་ཏན་ལྷག་པར་བརྩོན་བཅས་ལུང་གིས་ཕྱུག དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བརྟེན། །ཞེས་པའི་ཡོན་ཏན་དང་ལྡན་པ་དང་། དེའི་སྟེང་ནས་ཁྱད་པར་གསང་སྔགས་སྟོན་པའི་བླ་མའི་མཚན་ཉིད་ནི། དེ་ཉིད་བཅུ་དང་རང་བཞིན་བརྒྱད་ལྡན་གྱི་མཚན་ཉིད་ཚང་བ་དང་། དེའི་ནང་ནས་རྫོགས་ཆེན་སྟོན་པའི་བླ་མ་ཡིན་ན། ཆོས་སྐུ་རང་གནས་ཀྱི་ཡེ་ཤེས་ངོ་སྤྲོད་པ་དང་། བོགས་འདོན་ཉམས་རྟོགས་ཀྱི་ཡོན་ཏན་གོང་འཕེལ་དུ་གཏོང་བ། ཚེ་འདིར་འཁོར་བའི་རྒྱ་མཚོའི་ཕ་རོལ་སྐྱེལ་ཐུབ་པ་ཞིག་ཡིན་དགོས་ཏེ། མདོ་སྡུད་པ་ལས། བླ་མ་མཁས་པ་རྣམས་ལ་རྟག་ཏུ་བསྟེན་བྱ་སྟེ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །ནད་པའི་ཚོགས་ཀྱིས་གསོ་ཕྱིར་སྨན་པ་བསྟེན་པ་ལྟར། །གཡེལ་བ་མེད་པར་དགེ་བའི་བཤེས་གཉེན་བསྟེན་པར་བྱ། །ཞེས་མཁྱེན་པའི་ཡོན་ཏན་རྫོགས་པའི་བླ་མ་མཁས་པ་རྣམས་ལ་ཐར་པ་འདོད་པ་དག་གིས་རྟག་ཏུ་བསྟེན་ཅིང་བཀུར་བར་བྱ་དགོས་པ་ཡིན་ཏེ། རྒྱུ་མཚན་ཅིའི་ཕྱིར་ཞེ་ན། རང་རྒྱུད་ལ་མཁས་པའི་ཡོན་ཏན་ཐམས་ཅད་བླ་མ་མཁས་པ་དེ་ལས་འབྱུང་བ་ཡིན་ཏེ། དཔེར་ན་ནད་པའི་ཚོགས་ཀྱིས་ནད་གསོ་བའི་ཕྱིར་སྨན་པ་མཁས་པ་བསྟེན་པ་ལྟར། དུས་ལས་ཡོལ་བའམ་གཡེལ་བ་མེད་པར་དགེ་བའི་བཤེས་སམ་གཉེན་དུ་གྱུར་བའི་དཔལ་མགོན་བླ་མ་དམ་པ་བསྟེན་པར་བྱའོ། །ཞེས་གསུངས་ལ། ཀུན་མཁྱེན་ཀློང་ཆེན་པས། དེ་ཡང་ཐབས་མཁས་ཐུགས་རྗེ་དཔག་མེད་ཅིང་། །མདོ་རྒྱུད་ཡིད་བཞིན་མཛོད་མངའ་འགྲོ་བ་འདྲེན། །སྐྱོན་བྲལ་ཡོན་ཏན་རྫོགས་པའི་བླ་མ་ནི། །སྙིགས་མའི་དུས་སུ་སངས་རྒྱས་དངོས་དང་མཚུངས། །རབ་དད་སྲི་ཞུ་གུས་པས་སྤྱི་བོས་བསྟེན། །ཞེས་གསུངས་སྟེ། དེ་ཡང་ཚེགས་ཆུང་ངུས་དོན་ཆེན་པོ་འགྲུབ་པའི་ཐབས་ལ་མཁས་ཤིང་། ཐུགས་རྗེ་སྐྱོ་ངལ་མེད་པས་གཞན་ལ་ཕན་པ་དཔག་མེད་མཛད་པ། རྒྱལ་བའི་གསུང་རབ་མདོ་རྒྱུད་མང་དུ་ཐོས་པའི་སྤྱན་དྲི་མ་མེད་པའི་ཡིད་བཞིན་ནོར་གྱིས་གཏམས་པའི་ཐུགས་མཛོད་མངའ་བས་འབྲེལ་ཚད་ཀྱི་འགྲོ་བ་ཐར་ལམ་ལ་འདྲེན་པ། སྐུ་གསུང་ཐུགས་ལ་ཉེས་པའི་སྐྱོན་གྱི་དྲི་མ་ཐམས་ཅད་དང་བྲལ་ཞིང་། ཡིད་བཞིན་རེ་སྐོང་གི་ཡོན་ཏན་ཐམས་ཅད་རྫོགས་པའི་བླ་མ་དེ་ལྟ་བུ་ནི། སྙིགས་མའི་དུས་འདིར་སངས་རྒྱས་དངོས་སུ་བྱོན་པ་དང་མཚུངས་ཕྱིར། རབ་ཏུ་དད་པ་ཐང་ལྷོད་མེད་པར་སྒོ་གསུམ་གུས་པའི་ཚུལ་གྱིས་བསྟེན་པར་གྱིས། །ཞེས་གསུངས་ལ། དེ་ལ་བསྟེན་བྱ་བླ་མ་དམ་པའི་མཚན་ཉིད་ནི། རིན་པོ་ཆེ་ཕུང་པོའི་མདོར། བྱམས་པས་གསོལ་པ། དགེ་བའི་བཤེས་གཉེན་མཚན་ཉིད་ཇི་ལྟ་བུ་དང་ལྡན་པར་བསྟེན་པར་བགྱི། ཞེས་ཞུས་པ་ན། བཅོམ་ལྡན་འདས་ཀྱིས་བཀའ་བསྩལ་པ། ཐར་ལམ་ལ་ཁྲིད་པའི་དགེ་བའི་བཤེས་གཉེན་ནི། ཐེག་པའི་རྣམ་གྲངས་ལམ་གྱི་འཇུག་སྒོའི་ཆོས་ཅི་དང་ཅི་སྟོན་པ་ཐམས་ཅད། དོན་དུ་ཆོས་ཀྱི་དབྱིངས་སྤྲོས་པ་ཐམས་ཅད་དང་བྲལ་བ་དེ་བཞིན་ཉིད་དོན་དམ་པའི་བདེན་པ། ཆོས་ཐམས་ཅད་ཀྱི་གནས་ལུགས་མ་འཁྲུལ་བ་འབའ་ཞིག་རང་གིས་རྟོགས་ཤིང་སེམས་ཏེ། གདུལ་བྱའི་སེམས་ཅན་ཐམས་ཅད་ལ་རྟོགས་པའི་ཕྱིར་སྟོན་པར་བྱེད་གསལ་བར་བྱེད་པ་དེ་ནི། དགེ་བའི་བཤེས་གཉེན་ལམ་དྲང་པོ་ནས་འཁྲིད་པར་བྱ་བ་ཡིན་ནོ། །ཞེས་གསུངས་པ་དེ་ལ་སོགས་པ་མདོ་རྒྱུད་མང་པོ་ནས་བླ་མའི་མཚན་ཉིད་མང་དུ་གསུངས་པ་དེ་གཞིར་བཞག་ནས། མདོ་སྡེ་རྒྱན་ལས་གསུངས་པ་ལྟར་ལམ་གཞན་མུ་སྟེགས་སོགས་ཀྱི་བརྟུལ་ཞུགས་ལས་ཁྱད་དུ་འཕགས་པའི་ལྷག་པའི་བསླབ་པ་གསུམ་གྱིས་རྒྱུད་ལེགས་པར་དུལ་བ། སྤྱིར་ཤེས་བྱ་རིག་པའི་གནས་ཐམས་ཅད་ལ་མཁས་ཤིང་ཐོགས་པ་མེད་པ་དང་། བྱེ་བྲག་ཏུ་ཆོས་ཀྱི་སྒོ་མང་པོ་ལ་ཐོས་བསམ་མཛད་པས་ཐེག་པ་ཐམས་ཅད་ཀྱི་ཚིག་དོན་མཁྱེན་ཅིང་ཁོང་དུ་ཆུད་པ་དང་། ཁྱད་པར་དུ་ལྟ་སྤྱོད་ཕུལ་དུ་བྱུང་བའི་དགོངས་སྤྱོད་མངའ་བས་དམན་དང་ལོག་པའི་གྲུབ་མཐའ་ལས་གྲོལ་བ། གདུལ་བྱའི་ཁམས་དང་དབང་པོ་བསམ་པའི་ཁྱད་པར་ལ་གཟིགས་ནས། དེ་དང་མཐུན་པའི་ཆོས་བསྟན་པ་ལ་མཁས་ཤིང་བསྟན་པའི་ལམ་སྲོལ་དུ་འཛུད་མཁས་པ། ཆོས་དང་ཆོས་མིན་གྱི་དབྱེ་བ་འབྱེད་མཁས་པས་བདུད་དང་གོལ་ས་གཅོད་པ་ལ་ལྷག་པར་མཁས་པ། ཕྱོགས་རེའི་གཞུང་ལ་ཐལ་རྒྱུག་མ་ཡིན་ཤེས་བྱ་སྲིད་ཚད་མཁྱེན་པའི་བློ་གྲོས་ཀྱིས། ཞེས་གསུངས་པ་ལྟར་དུ། ཕྱོགས་རེ་ཙམ་མ་ཡིན་པར་མདོ་རྒྱུད་བསྟན་བཅོས་མང་དུ་ཐོས་པ་ལུང་གི་ཡོན་ཏན་རྒྱ་མཚོ་ལྟ་བུ་ཟད་པ་མེད་པར་མངའ་བ། ཡོན་ཏན་མཛོད་ལས། སྡོམ་གསུམ་གནང་བཀག་གཙང་མའི་ས་གཞི་ལ། །ཐོས་དང་སྙིང་རྗེ་ཆེན་པོས་ཐུགས་རྒྱུད་བརླན། །སྡེ་སྣོད་སྔགས་རྒྱུད་རྒྱ་མཚོའི་ཆོ་གར་མཁས། །སྤངས་རྟོགས་ཡེ་ཤེས་དྲི་མེད་འབྲས་བུས་ཕྱུག །ཅེས་གསུངས་པ་བཞིན་ནོ། །དེ་ཁོ་ན་ཉིད་སྟོང་ཉིད་རྟོགས་པའི་ཤེས་རབ་ཀྱི་བསླབ་པ་སློབ་མ་རྣམས་ལས་ཆེས་ལྷག་པར་གྱུར་པའི་ཁྱད་པར་གྱི་ཡོན་ཏན་དང་ལྡན་པ་དགོས་ཏེ། དམན་པར་བསྟེན་པས་མི་རྣམས་ཉམས་འགྱུར་ཞིང་། །ཐད་ཀར་བབ་པར་བསྟེན་པས་སོ་ན་གནས། །གཙོ་བོར་བསྟེན་པས་དམ་པ་ཐོབ་འགྱུར་ཞིང་། །དེ་ཕྱིར་བདག་ལམ་མཆོག་གྱུར་བསྟེན་པར་བྱ། །ཞེས་གསུངས་པ་ལྟར། སློབ་མ་ཚོགས་ལམ་པ་ཞིག་ཡིན་ན་བླ་མ་སྦྱོར་ལམ་ལ་གནས་པ་དང་། སློབ་མ་སྦྱོར་ལམ་པ་ཞིག་ཡིན་ན་བླ་མ་མཐོང་ལམ་ལ་གནས་པ་ཞིག་ངེས་པར་དགོས་པས། སློབ་མ་རྣམས་ལས་ཆེས་ལྷག་པའི་ཁྱད་པར་གྱི་ཡོན་ཏན་ཡོད་པ། དེ་ལས་གཞན་དུ་ན། ཁྱད་པར་རང་ལས་ཡོན་ཏན་ལྷག་བཅས་མིན། །བྱང་ཆུབ་སེམས་བྲལ་གྲགས་པའི་མཐུས་བསྟེན་ན། །ལོང་བའི་དེད་དཔོན་ནོར་བ་ཆེན་པོ་སྟེ། །ཟོལ་འགྲོགས་མུན་པའི་སྨག་ཏུ་འཁྱམ་པར་འགྱུར། །ཞེས་གསུངས་པ་ལྟ་བུ་ཡིན། ཟབ་ཅིང་རྒྱ་ཆེ་བའི་མདོ་རྒྱུད་ཀྱི་ལུང་དོན་ཐམས་ཅད་རྣམ་དཔྱོད་ཀྱི་རིག་པས་བཀྲལ་ནས་དགོངས་དོན་ཕྱིན་ཅི་མ་ལོག་པར་འབྱེད་པ་ལ་སྐྱེས་སྦྱོང་གི་རྣམ་དཔྱོད་ཀྱི་མཐུ་ཕུན་སུམ་ཚོགས་པ་གཞན་ལས་ཁྱད་པར་དུ་འཕགས་པ་མངའ་བས་ན། གདུལ་བྱའི་རྣ་བར་སྙན་ལ་འཇེབས་ཤིང་ཚིག་དེའི་རྗེས་སུ་ཞུགས་པས་དོན་དམ་པ་ཡང་དག་པའི་ལམ་ལ་བཀྲི་ཞིང་བཀོད་པར་མཁས་པ་སྟེ། ཀུན་མཁྱེན་ཆེན་པོས་ཡིད་བཞིན་མཛོད་ལས། ཐེག་པའི་རིམ་པ་ལ་མཁས་པས་ས་ལམ་གང་མོས་ལ་འགོད་པ། མས་འཛེག་ལམ་རིམ་ལ་མཁས་པས་བློ་དམན་དགེ་སྦྱོར་ལ་འཛུད་པ། ཐར་ལམ་གྱི་དམར་ཁྲིད་ཟབ་མོས་རང་གནས་གྱི་ཆོས་སྐུ་རང་ངོ་ཅེར་མཐོང་དུ་སྤྲོད་པ། རྩལ་སྦྱོང་གི་བོགས་འདོན་ཟབ་མོས་ཡོན་ཏན་གོང་འཕེལ་དུ་བསྐྱེད་པ། མཐར་ཕྱིན་རྟོགས་པ་མངའ་བས་གདུལ་བྱར་ཡིན་ལུགས་ཀྱི་རྟོགས་པ་བསྐྱེད་པ། ཐབས་ལམ་ཟབ་མོ་མངའ་བས་གང་ཡང་ལམ་དུ་སྒྱུར་བ། སྣ་ཚོགས་གདམས་པ་མང་བས་ཤེས་རྒྱུད་འགྲོལ་བར་མཁས་པ། མཐོང་ཐོས་མྱོང་བ་ཆེ་བས་བདུད་དང་གོལ་ས་གཅོད་པར་མཁས་པ། ཞེས་སོགས་གསུངས་པ་བཞིན་སློབ་མ་དོན་དམ་པའི་ལམ་ལ་བཀྲི་བ་ལ་མཁས་པས། ཆོས་སྟོན་པ་དེ་རྙེད་པ་དང་བཀུར་སྟི་སོགས་འཇིག་རྟེན་ཆོས་བརྒྱད་ལ་མི་གཟིགས་ཤིང་དེ་བསྒྲུབ་པའི་ཆེད་དུ་མ་ཡིན་པར། སྤྱོད་འཇུག་ལས། བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །སྡུག་བསྔལ་འདོར་འདོད་སེམས་ཡོད་ཀྱང་། །སྡུག་བསྔལ་རྒྱུ་ལ་མངོན་པར་རྒྱུག །ཅེས་གསུངས་པ་ལྟར་གྱི་དབང་མེད་ལས་ཀྱི་རླུང་ཤུགས་ལྡོག་དཀའ་བས་བསྐྱོད་ནས། འཁོར་བ་དང་ངན་སོང་གི་རྒུད་པ་སྣ་ཚོགས་ཀྱིས་གདུང་བས་དུས་རྟག་ཏུ་བདེ་བས་ཕོངས་ཤིང་སྡུག་བསྔལ་ལ་སྤྱོད་པ། གཞན་སུས་ཀྱང་སྐྱོབ་དཀའ་བའི་འགྲོ་བ་ཉམས་ཆུང་ལ་ལྷག་པར་བརྩེ་བའི་སྙིང་རྗེ་ཅན། དཔེར་ན་མས་བུ་ཐམས་ཅད་ལ་བརྩེའང་ན་བའི་བུ་ལ་ལྷག་པར་བརྩེ་བ་ལྟ་བུ་དང་། བླ་མ་རང་ཡང་ཆོས་བཞིན་དུ་སྤྱོད་ལ་གཞན་ཡང་དེ་ལ་སྦྱོར་བ། གཞན་དོན་བསྒྲུབ་པ་སྐྱོ་དུབ་མེད་པའི་བརྩོན་འགྲུས་ཅན། གདུལ་བྱ་བློ་རྨོངས་པ་ཐོས་པའི་བག་ཆགས་མེད་པ་ལ་ལན་གཅིག་བཤད་པས་མི་གོ་བ་ཚོར་ཡང་ཡང་འཆད་པ་ལ་སྐྱོ་ངལ་མེད་པ། དུས་ངན་གྱི་སློབ་མ་རྣམས་ཕར་ལ་ཆོས་བཤད་ནས་ཐར་པའི་ལམ་སྟོན་ནས་ཕན་བཏགས་ན། ཚུར་ལ་གཤེ་ཞིང་བསྐུར་བ་འདེབས་པ་སོགས་ལོག་སྒྲུབ་ལ་བཟོད་པས། ས་གཞི་ལྟ་བུ་ཅི་ཡང་འཁུར་བཟོད་པའི་སྙིང་སྟོབས་ཅན་གྱི་བླ་མ་དམ་པ་ཞིག་བསྟེན་དགོས་གསུངས་པ་རེད། ཡོན་ཏན་མཛོད་ལས་ཀྱང་། མཐའ་དག་ཡོན་ཏན་འབྱོར་བའི་བླ་མ་ནི། །སངས་རྒྱས་ཀུན་གྱི་ཡེ་ཤེས་ཐུགས་རྗེའི་ཁམས། །གདུལ་བྱའི་ཡུལ་ལ་སྐྱེས་བུའི་གཟུགས་ཀྱིས་བྱོན། །དངོས་གྲུབ་ཀུན་གྱི་རྩ་བ་བླ་ན་མེད། །ཅེས་གསུངས་ན། བླ་མ་བརྟགས་ནས་བསྟེན་པ་ནི་གལ་ཆེན་ནང་གི་དོན་ཆེན་རེད། སྔོན་བསྐལ་པ་ཡར་ལྡན་གྱི་སྐབས་ན་འཕགས་པའི་བླ་མ་གྲུབ་པ་ཐོབ་པའི་དགེ་བའི་བཤེས་གཉེན་མང་པོ་བྱོན། དེའི་དུས་སུ་གདུལ་བྱ་ཡང་བསོད་ནམས་དང་ལྡན་པ་ཡིན་ལ། ད་ནི་བསྟན་པ་སྙིགས་མའི་སྐབས་རེད། མཐའ་དག་ཡོན་ཏན་རྫོགས་པའི་བླ་མ་དཀོན་ཞིང་། གལ་ཏེ་ཡོད་ཀྱང་རྒྱུད་སྦས་ཚུལ་གྱིས་བཞུགས་པ་ཤས་ཆེ་བ་ཡིན། སེམས་ཅན་རྨོངས་པ་གྲགས་པའི་རྗེས་འབྲངས་མང་བ་ཡིན་པས། ལྟར་སྣང་འཁྲུལ་པའི་བླ་མ་ངན་པ་དང་འཕྲད་སོང་ན་གཞན་སྐྱེས་བུ་དམ་པའི་དྲུང་དུ་འགྲོར་མི་འཇུག དེའི་ཟུར་ན་བསྡད་ཀྱང་ཡོན་ཏན་སྐྱེ་རྒྱུ་མེད་པ་དེ་འདྲ་ཡོད། སློབ་པ་སོ་སོའི་སྐྱེ་བོ་ནས་སངས་རྒྱས་ཀྱི་སར་འཁྲིད་པའི་ལམ་མཁན་ཡིན་པས། བླ་མ་བརྟག་པ་ལས་གནད་ཆེ་བ་ཞིག་ཡོད་པ་མ་རེད། བླ་མ་དེ་ལ་ནང་གསེས་སུ་དབྱེ་ན། སྤྱི་མདོ་དགོངས་པ་འདུས་པ་ལས། ཕྱི་སྒྲོ་འདོགས་གཅོད་པ་ལ་མཁས་པའི་བླ་མ། ནང་གསང་སྔགས་ཀྱི་གདམས་པ་སྟོན་པ་དྲིན་ཅན་གྱི་བླ་མ། གསང་བ་སེམས་ཉིད་སྐྱེ་བ་མེད་པར་སྟོན་པ་རྩ་བའི་བླ་མ། རང་བཞིན་གཞིའི་བླ་མ། དག་པ་རང་སེམས་ཀྱི་བླ་མ། སྣང་བ་བརྡའི་བླ་མ། གང་ཟག་བརྒྱུད་པའི་བླ་མ་རྣམས་ལ་འདུས་པའོ། །ཞེས་མདོ་རྒྱུད་བཀའ་དང་བསྟན་བཅོས་ཐམས་ཅད་ཀྱི་དཀའ་བའི་གནས་ལ་སྒྲོ་འདོགས་གཅོད་པ་ལ་གཞན་དྲིང་མི་འཇོག་པར་མདོ་རྒྱུད་བསྟན་བཅོས་ལ་བཀའ་བབ་པ་མཁས་པའི་བླ་མ། །ནང་བསྐྱེད་རྫོགས་ཀྱི་གདེང་དང་ལྡན་པས། གསང་སྔགས་ཀྱི་དབང་དང་དམ་ཚིག་གི་བྱིན་བརྒྱུད་འཕོ་བར་བྱེད་པའི་གདམས་ངག་སྟོན་པ་ལ་དྲིན་ཅན་གྱི་བླ་མ། གསང་བ་སེམས་ཉིད་གདོད་ནས་དག་པ་སྐྱེ་བ་མེད་པ་ཆོས་སྐུའི་རང་ཞལ་མངོན་སུམ་རྗེན་ཅར་ཏུ་སྟོན་ནུས་པ་ལ་རྩ་བའི་བླ་མ། ཀུན་མཁྱེན་ཆེན་པོས། རིམ་བརྒྱུད་བྱིན་རླབས་ལྡན་པའི་བླ་མ་ནི། །གོང་མ་མཉེས་བྱས་གྲུབ་ཐོབ་བརྒྱུད་པ་འཛིན། །ཐུགས་མཛོད་ལོན་པས་སྙན་བརྒྱུད་གདམས་པ་ལྡན། །ཕྱག་བཞེས་མཐོང་བས་དོན་གཉིས་སྒྲུབ་ལ་མཁས། །བསྒྲུབ་ལ་བརྩོན་པས་དངོས་གྲུབ་སྤྲིན་ཚོགས་བརྙེས། །གཞན་སྣང་བསྒྱུར་ནུས་ཐར་པའི་ལམ་སྣ་འདྲེན། མདོ་རྒྱུད་བཀའ་བབ་དམ་ཚིག་གཙང་གྱུར་པ། །དེ་འདྲའི་མཁས་གྲུབ་དཔལ་མགོན་སྤྱི་བོས་བསྟེན། །ཞེས་གསུངས་པ་ལྟར་དང་། རང་བཞིན་གཞིའི་བླ་མ་ནི། སེམས་ཉིད་འོད་གསལ་བའི་ཡེ་ཤེས་རང་བྱུང་བྱང་ཆུབ་ཀྱི་སེམས། ཡེ་རྫོགས་ལྷུན་གྲུབ་འདུས་མ་བྱས་པ་སྐུ་གསུམ་འདུ་འབྲལ་མེད་པ། ངོ་བོ་ཡེ་ནས་དག་པ་ཆོས་སྐུ་གཞི་གནས་ཀྱི་རིག་པ་དེ་ཡིན། དག་པ་རང་སེམས་ཀྱི་བླ་མ་ནི། བླ་མའི་མན་ངག་དང་བརྒྱུད་པའི་བྱིན་རླབས་ལ་བརྟེན་ནས། དགོངས་བརྒྱུད་རྟོགས་པའི་ཕ་ཕོགས་ཐོབ་སྟེ་བསལ་བཞག་སྤྲོས་པ་དང་བྲལ་བའི་དག་གསལ་རང་གནས་ཀྱི་ཡེ་ཤེས་ངོ་འཕྲོད་དེ། དུས་གསུམ་རྒྱལ་བའི་དགོངས་པ་དང་གཉིས་སུ་མེད་པ་དེ་རེད། སྣང་བ་བརྡའི་བླ་མ་ནི། གང་སྣང་ཡེ་ཤེས་ཀྱི་རོལ་པ། གང་ཤར་ཆོས་སྐུའི་རང་རྩལ་དུ་ཤེས་པ་དེ་ཡིན། གང་ཟག་བརྒྱུད་པའི་བླ་མ་ནི། གང་འདུལ་གཟུགས་སྐུའི་ཚུལ་དུ་སྣང་བ། རྣམ་པ་མིའི་ཟོལ་ལ་བརྟེན་ནས་བྱོན་པའི་དམ་པ་གོང་མ་རིམ་ནས་རིམ་བརྒྱུད་བར་མ་ཆད་པར་བྱོན་པ་དེ་རྣམས་ཡིན་པ་རེད། བླ་མ་དེ་རྣམས་སུ་འདུས་པ་ཡིན་ཞེས་གསུངས། འདི་ལ་རྩ་བ་དང་ཡན་ལག་གི་བླ་མ་གཉིས་སུ་ཕྱེ་བ་ལས་རྩ་བའི་བླ་མ་ཞེས་པ་བརྒྱུད་པའི་རིམ་པ་ཡིན་པའང་གོ་དགོས། །དེས་བླ་མའི་མཚན་ཉིད་མཚན་གཞི་དབྱེ་བ་དང་། བླ་མ་བསྟེན་པའི་དགོས་པ་དང་བཅས་པ་བསྟན་ནས། འདིའི་ཤུགས་བསྟན་དུ་གོ་དགོས་རྒྱུ་ནི། བླ་མ་མ་བསྟེན་པའི་སྐྱོན་ཅི་ཡོད་ནི། བླ་མ་བསྟེན་པའི་ཡོན་ཏན་ལས་ལྡོག་ནས། ཐར་པའི་ལམ་སྣེ་མི་ཟིན་པ་དང་། ཡོན་ཏན་གྱི་ཚོགས་མི་འབྱུང་བ། འཁོར་བའི་སྡུག་བསྔལ་གྱི་ནང་དུ་ཚུད་པ། དེའི་སྟེང་ན་སྐྱོན་ཅན་གྱི་བླ་མ་དང་གྲོགས་ངན་འགྲོགས་ན་ཉེས་པ་མང་པོ་འགོ་བ་ཡིན་ཏེ། གཏི་མུག་ཤས་ཆེ་བ་དང་འགྲོགས་ན་ཤེས་རབ་འགྲིབ་པ་དང་། ཞེ་སྡང་ཤས་ཆེ་བ་དང་འགྲོགས་ན་གདུག་རྩུབ་ཇེ་ཆེ། འདོད་ཆགས་ཤས་ཆེ་བ་དང་འགྲོགས་ན་འདོད་སྲེད་ཆེ་བ། ཨེ་ལོན་ཁོ་ན་ལྟ་བའི་མི་ལྟོ་བའི་བླ་མ་དང་འགྲོགས་ན་ལོག་འཚོའི་ཉེས་པ་སོགས་འགོ་བས་སོ། །མདོར་ན་བླང་དོར་མ་ནོར་བའི་སྒོ་ནས་བླ་མ་བསྟེན་རྒྱུ་གལ་ཆེ་བ་རེད། བླ་མ་བརྟག་ཕྱིར་བླ་མའི་མཚན་ཉིད་བསྟན་པའི་ཞར་ལ་སློབ་མའི་མཚན་ཉིད་ཀྱང་བསྟན་པ་ནི། རྒྱུད་ཀློང་གསལ་ལས། སྣོད་དང་མི་ལྡན་སློབ་མ་ནི། །ཤེས་ཆུང་ཁ་གསག་གདོང་ལྟས་ཆེ། །ཁ་མཁས་ལག་དམ་གཡོ་སྒྱུ་ཆེ། །བླ་མའི་གསུང་བཅག་དྲིན་ལ་རྩོད། །ཡོན་ཏན་མི་མཐོང་སྐྱོན་ལ་རྟོག །རིགས་རྒྱུད་ངང་རྒྱུད་ངན་པ་དང་། །བཀའ་དྲིན་ཁྱད་གསོད་རང་ལ་བསྟོད། །དོན་དམ་དམ་ཚིག་ཉམས་ལེན་འཆལ། །སློབ་མ་མ་བརྟག་སློབ་དཔོན་དགྲ། །ཞེས་དམ་ཆོས་ཟབ་མོ་བསྟན་པའི་སྣོད་ཀྱི་མཚན་ཉིད་དང་མི་ལྡན་པའི་སློབ་མ་ནི། དད་པ་དང་ཤེས་རབ་ཆུང་ཞིང་གཡོ་སྒྱུ་དང་ཁ་གསག་ཆེ་བ། གསར་འགྲོག་ཨ་གསར་ཆེ་བ་དང་ངོས་ལྐོག་ཅན་གྱི་གདོང་ལྟས་ཆེ་བ། མཆོད་པ་དང་མཎྜལ་ཕྱོགས་ལ་སེར་སྣ་ཆེ་ཞིང་ལག་པ་དམ་པོ། དོན་ལ་མི་གནས་པའི་ཁ་མཁས་པ། གཡོ་སྒྱུ་ཆེ་བ། བླ་མའི་བཀའ་ལ་མི་བརྩི་ནས་གསུང་བཅག བླ་མས་གསོལ་རས་རེ་གནང་ན་ཉི་མ་འགའ་རེར་དད་པ་སྐྱེ་བ་སོགས་དྲིན་ལ་རྩོད་པ། བླ་མའི་ཡོན་ཏན་མི་མཐོང་ཞིང་དང་པོ་ནས་བླ་མའི་སྐྱོན་ལ་རྟོག་ཅིང་འཚོལ་བ་དང་། རིགས་རྒྱུད་དང་ངང་རྒྱུད་ངན་པ། མི་གཞི་ངན་པའི་ཟོལ་སྦྱོར་ཐ་གུས་ལྕེ། །བླ་མ་སྤོས་ཀྱི་གླང་པོ་ལྟར་བསྟེན་ནས། །སོགས་གསུངས་པ་ལྟར། བླ་མའི་བཀའ་དྲིན་མི་དྲན་པར་ཁྱད་གསོད་བྱེད་ཅིང་རང་ཉིད་ལ་བསྟོད་པ་ལ་དགའ་བ་དང་། དོན་དམ་དུ་དམ་ཚིག་ཆུད་ཟོས་དང་ཉམས་ལེན་གནད་འཆལ་བ་སྟེ། དམ་ཚིག་དང་སྡོམ་པ་ལ་དང་པོ་ནས་མི་བསམ་པ་ཡིན་པས་ན་དེ་ལྟ་བུའི་སློབ་མ་མ་བརྟགས་པར་ཉར་ན་སློབ་དཔོན་གྱི་དགྲ་ཡིན། ཞེས་གསུངས་པ་ལ་བརྟགས་པའམ་སློབ་མའི་རྒྱུད་བརྟགས་པར་སྔོན་དུ་འགྲོ་བས་བསྟེན་བྱ་སློབ་མ་མཚན་ཉིད་དང་ལྡན་པ་ནི། འོད་གསལ་གྱི་རྒྱུད་རིག་པ་རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་གཡེང་བ་མེད། །དམ་ཚིག་ལྡན་ཞིང་སྒྲུབ་ལ་བརྩོན། །ཞེས་ཆོས་དང་བླ་མ་ལ་དད་པའི་སྟོབས་ཆེ་བ་དང་། དམ་པའི་ཆོས་བསྒྲུབ་པ་ལ་སྤྲོ་བའི་བརྩོན་འགྲུས་ཆེ་བ། ཡང་དག་པའི་ཤེས་རབ་ཆེ་ཞིང་བློ་རྣོ་བ། འདི་སྣང་སྒྱུ་མའི་དངོས་པོ་ལ་འཛིན་ཆགས་མེད་པ། བླ་མ་ལ་གུས་བཀུར་ཕུ་དུད་ཆེ་ཞིང་གསང་སྔགས་ཚུལ་བཞིན་དུ་སྤྱོད་པ། ཡིད་སེམས་ཉེ་བར་མ་ཞི་བའི་ཚུལ་མིན་ཡིད་བྱེད་ཀྱི་རྟོག་པ་མེད་པས་སེམས་ལ་གཡེང་བ་མེད་པ། སྡོམ་པ་དང་དམ་ཚིག་ལྡན་ཞིང་བླ་མའི་བཀའ་བཞིན་དུ་བསྒྲུབས་ནས་སྒྲུབ་པ་ལ་བརྩོན་པ་དེ་འདྲ་དགོས་ཞེས་གསུངས་པ་ཁོ་ན་ལས། དེ་ལས་ལྡོག་པ་གཞན་དུ་སློབ་མ་བསྡུ་བར་རུང་བ་མ་ཡིན་ལ། གོང་དུ་བཤད་པའི་བཟང་པོའི་ཆ་རྐྱེན་ལྡན་པའི་དེ་ལྟ་བུའི་དཔོན་སློབ་མ་འཛོལ་བར་ཟུང་དུ་འབྲེལ་ན། དཔེར་ན་གཤོག་པ་གཉིས་ལྡན་གྱི་འདབ་ཆགས་མཁའ་ལ་འཕུར་བ་ལ་ཚེགས་མེད་པ་བཞིན་དུ། བྱང་ཆུབ་བསྒྲུབ་པ་ལ་དེ་ཙམ་གྱི་དཀའ་ལས་མེད་པས་སློབ་མས་ཀྱང་གདམས་ངག་སྦྱིན་པའི་བླ་མ་སྤྱི་དང་བྱེ་བྲག་གི་མཚན་ཉིད་དང་ལྡན་པ་བསྟེན་ཅིང་། སློབ་མ་རང་ཉིད་ལའང་མཚན་ཉིད་བསྟན་པའི་ལུང་དང་འགལ་བའི་ཉེས་པའི་སྐྱོན་གང་དང་གང་ཆེ་བ་དེ། ངོས་ཙེར་གྱིས་བཟུང་ནས་དེ་དང་དེར་གཉེན་པོས་རྒྱུད་བསྡམས་རྗེས་སུ་སློབ་མ་ཡང་དག་པའི་མཚན་ཉིད་ཚང་བར་བྱ་དགོས།

གཉིས་པ་བཤེས་གཉེན་བསྟེན་ཚུལ་དངོས།

དང་པོ་བསམ་པས་བསྟེན་ཚུལ།

བཤེས་གཉེན་བསྟེན་པ་དངོས་ལ་བསམ་པས་བསྟེན་པའི་ཚུལ་དང་། སྦྱོར་བས་བསྟེན་པའི་ཚུལ་གཉིས་ཀྱི་སྔ་མ་བསམ་པས་བསྟེན་པའི་ཚུལ་ནི། དཀོན་མཆོག་ཏ་ལའི་གཟུངས་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་བསྲུང་ཞིང་འཕེལ་བར་བྱེད། །དོགས་པ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་ལེགས་གྲོང་ཁྱེར་མཚོན་བྱེད་ཡིན། །དད་པ་རྙོག་པ་མེད་ཅིང་སེམས་དང་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་ནོར་དང་གཏེར་དང་རྐང་པའི་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །ཞེས་དད་པ་ནི་དཀར་པོའི་ཆོས་ཐམས་ཅད་ཀྱི་སྔོན་འགྲོ་ཡིན་པས། འགྲོ་བ་ཐམས་ཅད་སྐྱེད་པ་པོ་མ་ཡིན་པ་ལྟར་དཀར་པོའི་ཆོས་དང་ཡོན་ཏན་ཐམས་ཅད་བསྐྱེད་པ་སྟེ། དད་པས་སྔར་མེད་ཀྱི་ཡོན་ཏན་རྒྱུད་ལ་བསྐྱེད་པར་མ་ཟད་ཡོན་ཏན་ཡོད་པ་ཐམས་ཅད་བསྲུངས་ཤིང་གོང་དུ་འཕེལ་བར་བྱེད་པ་ཡིན། ཡིད་ཆེས་པའི་དད་པ་ཡོད་ན་ཐེ་ཚོམ་གྱི་དོགས་པ་སེལ་ཞིང་སྲིད་པའི་སྡུག་བསྔལ་གྱི་ཆུ་བོ་རྣམས་ལས་སྒྲོལ་བར་བྱེད་པ་དང་། འདོད་པའི་དད་པ་སོགས་ནི་མངོན་མཐོ་ངེས་ལེགས་ཀྱི་བདེ་ལེགས་ལྡན་པའི་གྲོང་ཁྱེར་མཚོན་བྱེད་ཀྱི་སྒོ་ལྟ་བུ་ཡིན། དང་བའི་དད་པ་སོགས་ཡོད་ན་སེམས་ལ་ར་རིའི་དྲི་མས་རྙོག་པ་མེད་ཅིང་དགེ་སེམས་དང་བར་བྱེད། ང་རྒྱལ་སྤངས་ཤིང་གུས་པའི་རྩ་བའང་དད་པ་ཡིན། དད་པ་ནི་འཕགས་པའི་ནོར་དང་ཡོན་ཏན་མི་ཟད་པ་འབྱུང་བའི་གཏེར་དང་། ཐར་ལམ་དུ་འགྲོ་བའི་རྐང་པའི་མཆོག་ཏུ་གྱུར་པ་ཡིན། དད་པ་ནི་ལག་པ་བཞིན་དུ་བསོད་ནམས་བསགས་ཏེ་དགེ་བ་མཐའ་དག་སྡུད་པའི་རྩ་བ་ཡིན་ནོ། །ཞེས་གསུངས་པ་ལྟར་དགེ་བའི་བཤེས་གཉེན་བརྟགས་ཤིང་བསྟེན་པ་དེ་ལ། མཉམ་འགྲོགས་བདུད་ཀྱིས་བསླུས་པ་མ་ཡིན་པར་ཞེ་ཐག་པ་ནས་མི་ཕྱེད་པའམ་མི་ལྡོག་པའི་དད་པ་དང་ལྡན་པ་འཕགས་པ་རྟག་ཏུ་ངུས་བྱང་ཆུབ་སེམས་དཔའ་ཆོས་འཕགས་ཀྱི་ཡོན་ཏན་མཐོང་བ་ལྟ་བུ་ཞིག་ངེས་པར་དགོས། སྔོན་ཆད་བསྐལ་པ་བཟང་། དུས་ཚོད་ཡར་ལྡན་གྱི་སྐབས་སུ། བླ་མའང་གྲུབ་བརྙེས་ཀྱི་སྐྱེས་བུ་མང་པོར་བྱོན་ཞིང་། སློབ་མའང་སྔོན་སྦྱོང་ལས་འཕྲོ་ཡོད་པའི་སྣོད་ལྡན་མང་ལ། སྣོད་ཀྱི་ཁྱད་པར་གྱིས་གཞན་དང་མི་འདྲ་བའི་ངོ་མཚར་ཅན་གྱི་མཁས་གྲུབ་གཉིས་ལྡན་གྱི་དམ་པའི་སྐྱེས་བུ་མང་པོར་བྱོན་མྱོང་བ་རེད། བླ་མའི་ཐུགས་རྗེ་དང་དགོངས་བརྒྱུད་བྱིན་རླབས་སློབ་མའི་མོས་གུས་གྱི་ཉེར་ལེན་གྱིས་བུམ་པ་གང་བྱོ་ཡི་ཚུལ་དུ་གྱུར་སོང་བའང་མང་བ་རེད། འོན་ཀྱང་དེ་རིང་ཁ་རྩང་དུས་སྙིགས་མ་རེད། ཁྱད་པར་ལྟ་བའི་སྙིགས་མའང་ཁེལ་ཡོད་པས། སྔོན་མའི་དུས་ལྟར་རྒྱུ་རྐྱེན་རྟེན་འབྲེལ་འཚོགས་པ་དཀའ། དེས་ན་དད་པ་ཡོད་དགོས། དད་པ་སྔོན་འགྲོ་མ་ལྟར་ཡིན། དད་པ་དགེ་རྩ་སྡུད་བྱེད་ཀྱི་ལག་པ་ཡིན་གསུངས་པ་དང་། དད་པ་མེད་ན་ཆོས་ཀྱི་རྩ་བ་རུལ་གསུངས་ཡོད། དད་པ་ཡོད་དགོས་རྒྱུ་ཅི་བཤད་དེ། དེས་མི་ཚད་པར་དེའི་སྟེང་དུ་ཤེས་རབ་ཡོད་དགོས། ཤེས་རབ་མེད་ན་ཆོས་ཀྱི་གནད་ཁྱད་པར་ཅན་ཤེས་ཤིང་རྟོགས་ཐུབ་པ་མ་རེད། ཐོས་པ་ཡོད་དགོས། ཐོས་པ་མེད་ན་ཆོས་དང་ཆོས་མིན་གྱི་དབྱེ་བ་མི་ཤེས། ཆོས་ཀྱི་ནང་དོན་མ་ཤེས་ན་གོ་རྒྱུ་ཤེས་རྒྱུ་ཞིག་ཡོད་པ་མ་རེད། དེའི་ཐོག་ཏུ་སྙིང་རྗེ་ཡོད་དགོས། སྙིང་རྗེ་མེད་ན་ཐེག་ཆེན་གྱི་ཆོས་གྲལ་དུ་མི་ཚུད། ད་རུང་སྡོམ་དམ་ཚིག་བསྲུང་དགོས། སྡོམ་དམ་ཚིག་མེད་ན་སྨན་དུག་ཏུ་འགྱུར་བ་ལྟར་ཡིན་པས་ན་སྡོམ་དམ་ཚིག་རྣམ་པར་དག་རྒྱུ་གལ་ཆེ། སྡོམ་དམ་ཚིག་རྣམ་པར་དག་པ་ལ་རྩ་བ་དྲན་དང་ཤེས་བཞིན་ལྡན་པའི་སྒོ་ནས་སྒོ་གསུམ་ཞི་བ་ཡིན་དགོས། སྒོ་གསུམ་ཉེ་བར་མ་ཞི་བ་ལ་ཉེས་ལྟུང་གི་ཆར་པ་འབབ་པ་རེད། ཡང་ཁོག་ཡངས་དཀྱེལ་ཆེ་ཡིན་དགོས། ཁོག་དོག་ངང་ཐུང། རྒྱུས་ཀ་མེ་ཐོག་ཏུ་གཞག་པ་འདྲ་ཞིག་གིས་མཆེད་གྲོགས་དང་། ཉེ་འཁོར་དང་ཁོར་ཡུག་གི་མི་ཚང་མ་ལ་སུན་པ་སྟེར་ནས་འགྲིགས་དཀའ་བ་རེད། གཏོང་ཕོད་དང་ལྡན་དགོས། དེ་མེད་ན་བསོད་ནམས་ཀྱི་ཚོགས་འགགས་འགྲོ། ཐམས་ཅད་ལ་དག་སྣང་ཡོད་དགོས། དེ་མེད་ན་སྣང་བ་དགྲར་ལངས་ནས་རིག་ཚད་མ་དག་པའི་སྣང་བ་ཁོ་ན་ཤར་ཡོང་བ་རེད། ཁྲེལ་དང་ངོ་ཚ་ཡོད་དགོས། དེ་མེད་ན་འཕགས་པའི་ལམ་ལ་བསླབ་མི་ནུས། གཞན་སྐྱོན་ཁོ་ན་མི་བཙལ་བར་རང་སྐྱོན་རང་གིས་བརྟགས་ཏེ། དགེ་བའི་བཤེས་གཉེན་བསྟེན་ནས་ཆོས་ལམ་ཡང་དག་ཅིག་ལ་ཞུགས་རྒྱུ་ལོན་པ་འདི་ནི་རྙེད་པ་ཆེན་པོ། རྙེད་པར་དཀའ་བའི་གྲོགས་ཆེན་པོ་ཞིག་ཁ་ནང་ཡོང་བ་རེད། རང་ཉིད་ལ་སློབ་མའི་མཚན་ཉིད་ཞིག་མ་ཚང་ན་སྣོད་ངན་ནང་དུ་ཡོན་ཏན་གྱི་ཆུ་མི་ཆགས་པས། ང་ལ་འདི་དང་འདིའི་ཐད་ནས་ཚང་མི་འདུག་བསམ་ནས་རང་མཚང་རང་ལ་རྒོལ་དགོས། སྔོན་བྱོན་གྱི་སྐྱེས་བུ་དམ་པ་དེ་རྣམས་ཀྱིས་བླ་མ་ཇི་ལྟར་བསྟེན་ནས་རྟོགས་པའི་ཡེ་ཤེས་ཁྱད་པར་ཅན་རང་རྒྱུད་ལ་ཇི་ལྟར་སྐྱེས་འདུག སྐབས་དང་སྐབས་སུ་དམ་པའི་རྣམ་ཐར་ལ་བལྟ་རྒྱུ་དེ་ཚོ་གལ་ཆེན་ནང་གི་དོན་ཆེན་ཡིན་ཏེ། རང་ཉིད་ལ་ཕན་ཐོགས་ཆེན་པོ་ཡོད་པ་རེད། ཚོང་དཔོན་གྱི་བུ་ནོར་བཟང་གིས་དགེ་བའི་བཤེས་གཉེན་བརྒྱ་རྩ་བརྒྱད་བསྟེན་པའི་རྣམ་ཐར་ལས་གསུངས་པ་ལྟར་དུ། དུས་རྟག་ཏུ་དགེ་བའི་བཤེས་གཉེན་གྱི་ངོ་ལ་ལྟ་བ་བུ་མཛངས་པ་ལྟ་བུ། བླ་མས་བཀའ་བཀྱོན་བྱེད་ན་མི་ཁྲོ་བ་ཁྱི་ལྟ་བུ། འགྲོ་འོང་གིས་མི་སྐྱོ་བ་གྲུ་ལྟ་བུ། བཟང་ངན་ཐམས་ཅད་ཐེག་པ་ཟམ་པ་ལྟ་བུ། ཆོས་དང་བླ་མའི་ཕྱིར་དུ་སྡུག་བསྔལ་སྣ་ཚོགས་བཟོད་པ་མགར་བའི་འོག་རྡོ་ལྟ་བུ། ང་རྒྱལ་སྤོང་བ་ཕྱགས་དར་བ་ལྟ་བུ། དྲེགས་པ་སྤོང་བ་ཁྱུ་མཆོག་གི་རྭ་བཅད་པ་ལྟ་བུའི་སེམས་ལ་བརྟེན་ཏེ་དགེ་བའི་བཤེས་གཉེན་བསྟེན་དགོས། དགེ་བའི་བཤེས་གཉེན་བསྟེན་པ་ལྟར་དུ་དགེ་བའི་བཤེས་གཉེན་གྱིས་ཟིན་པའི་གང་ཟག་ངན་སོང་དུ་འགྲོ་བར་མི་འགྱུར་ཞེས་གསུངས་པ་རེད། དེས་ན་ན་རོས་ཏེ་ལོ་དང་། མི་ལས་མར་པ་བསྟེན་ཚུལ་སོགས་ལ་ལྟོས་དང་ཤེས་རྒྱུ་ཞིག་ཡོད། དེ་རྣམས་ནི་གལ་ཆེན་ནང་གི་དོན་ཆེན་རེད། ལས་དག་པ་ཞིག་ཡིན་ན་མ་དག་པ་ལའང་དག་པར་སྣང་ཡང་། འོ་སྐོལ་ལས་མ་དག་པའི་དབང་གིས་དག་པ་ཡིན་ཡང་མ་དག་པར་སྣང་བ། དཔེར་ན་རབ་རིབ་ཅན་གྱིས་མཁའ་ལ་སྐྲ་ཤད་སྣང་བ་ལྟར་དུ། བླ་མ་མཚན་ཉིད་དང་ལྡན་པ་ལའང་དེ་དག་གིས་དྲང་ངེས་ལྡེམ་དགོངས་རྣམ་པ་བཞི་སྟེ། ཐེག་པ་ཆེན་པོའི་བཀའ་བཤད་པའི་ཚེ་དྲང་ངེས་ལྡེམ་དགོངས་བཞིའི་སྒོ་ནས་བཤད་ཀྱིན་ཡོད་རེད། བཀའི་དོན་ཐམས་ཅད་སྒྲ་ཐད་དྲང་ཁོ་ན་འཛིན་རྒྱུ་ཞིག་ཀྱང་མིན་ལ། ཡང་མཐའ་གཅིག་སྒྲ་ཇི་བཞིན་པ་ལས་འགལ་བ་ཤ་སྟག་ཏུ་འཛིན་རྒྱུ་ཞིག་ཀྱང་ཡིན་པ་མ་རེད། དེའི་རྒྱུ་མཚན་ཅི་ཡིན་ཞེ་ན། དེ་བཞིན་གཤེགས་པའི་གསུང་དེ་སྒྲ་ཚིག་གི་གཞན་དབང་དུ་གྱུར་པ་ཞིག་རྣམ་པ་ཀུན་ཏུ་མ་ཡིན་པས་རེད། ཁྱད་པར་དུ་སྔགས་ཀྱི་གནས་སྐབས་ན། གདུལ་བྱའི་དབང་པོའི་ཁྱད་པར་གྱིས་མོས་པ་སྤྱོད་པ་ཙམ་ལ་དགོངས་པ་དང་། རྟོགས་གོམས་མཐར་ཕྱིན་པའི་གང་ཟག་ལ་གནང་བའི་ཁྱད་པར་མ་ཕྱེས་ན། ལྡེམ་པོ་དགོངས་པ་ལ་སྒྲ་ཇི་བཞིན་པར་བཟུང་ན་ངན་སོང་དུ་འཕེན་པའི་རྒྱུར་འགྱུར་བ་རེད། དེས་ན་སྒྲ་གཅིག་ལ་དངོས་བསྟན་དང་། དགོངས་པ་བླང་སྟངས་ཀྱིས་ཆ་གཉིས་སུ་ཕྱེ་ན་དོན་གྱི་གནད་ལ་འགལ་བ་མི་འདུ། འདིར་དྲང་ངེས་གསུང་རྒྱུ་དྲང་དོན་ནི། གཞུང་དེའི་ཚིག་དངོས་ཟིན་གྱི་དོན་དེ་ལས་དོན་གཞན་པ་ཞིག་དྲང་རྒྱུ་ཡོད་པ་དྲང་དོན་དང་། ཚིག་དངོས་ཟིན་ལ་བསྟན་པ་དེ་ལས་གཞན་དུ་དོན་འདྲེན་རྒྱུ་མེད་པ་ངེས་དོན་རེད། ལྡེམ་དགོངས་ལ་དགོངས་དང་དགོངས་མིན་གྱི་ཐོག་ནས་བཤད་ན། བསྟན་དོན་གཅིག་ཡིན་ནའང་གདུལ་བྱའི་དབང་པོའི་ཁྱད་པར་གྱིས་དབང་རྣོན་གྱི་དབང་དུ་བྱས་ནས་དོན་དེ་ལ་འགལ་བའི་སྒྲས་གསུངས་པ་དགོངས་བཤད་དང་། དབང་རྟུལ་གྱི་དབང་དུ་བྱས་ནས་སྒྲ་ཐད་དྲང་དུ་བཤད་པ་དགོངས་མིན་རེད། དེ་ལྟ་བུའི་དྲང་ངེས་ལྡེམ་དགོངས་རྣམ་པ་བཞིའི་སྒོ་ནས་མཛད་པ་སྣ་ཚོགས་བསྟན་པའི་གནད་མ་གོ་བར། སྐུ་གསུང་ཐུགས་ཀྱི་གསང་བ་དེ་ཤིན་ཏུ་སྦས་པ་ཡིན་པས། རང་གི་སྒྲིབ་པས་ལྟ་མི་མངོན་པས་སྐྱོན་ཡོན་འདྲེས་མར་སྣང་བ་སྲིད་པས། ཁྱད་པར་དུ་སྔགས་ལམ་དུ་རྣམ་པར་གྲོལ་བའི་རྩལ་བརྙེས་ནས་རིག་པ་བརྟུལ་ཞུགས་དང་། ཟུང་འཇུག་གི་སྤྱོད་པ་སོགས་ཀྱི་རང་བཞིན་དེ་སོ་སོའི་སྐྱེ་བོའི་བློས་ཐད་ཀར་བརྟག་ཤེས་རྒྱུ་ཅན་ཞིག་མིན། དཔེར་ན་བྲམ་ཟེ་སྒྲ་གཅན་འཛིན་དང་། ཤྭ་བ་རི་པ། བི་ན་ས། ལ་བ་པ། ཏི་ལུ་པ། ཨིནྡྲ་བྷུ་ཏི་ལ་སོགས་པ་དེ་དག་གི་མཛད་པ་ལྟ་བུ་རེད། ལྟར་སྣང་ལ་སྐྱོན་ཡོན་འདྲེས་མར་སྣང་བ་སྲིད་པས་དེའི་ཚེ་ཐེ་ཚོམ་དང་ལོག་ལྟ་ཅན་ལ་སྐྱོན་དུ་ཤར་བའི་བློ་དེ་རང་ཉིད་ཀྱིས་དགག་དགོས། ཡོན་ཏན་ཐམས་ཅད་དངོས་སུ་ཤེས་རྒྱུ་ནི། ལས་དག་པའི་སྤྱོད་ཡུལ་མཐུན་པ་ཞིག་མིན་ན་མཐོང་དཀའ་བ་རེད། རང་བློ་འཁྲུལ་རྟོག་གིས་སྐྱོན་དུ་ཤར་བ་དེ་དགག་ནུས་ན་ཅི་མཛད་ལེགས་མཐོང་ངམ་ངམ་ཤུགས་ཀྱིས་འོང་བ་ལས་འོས་མེད། མཛད་སྤྱོད་གང་ཡང་ལོག་པར་མི་ལྟ་སྟེ། །འཕགས་པའི་ཡུལ་གྱི་དབང་ཕྱུག་ཕལ་མོ་ཆེ། །གདོལ་པ་གཡུང་པོ་སྡིག་སྤྱོད་ཕལ་པའི་ཚུལ། །ཉམས་པ་ལས་ཀྱང་ཤིན་ཏུ་ཉམས་པ་ཡོད། །ཅེས་གསུངས་ཤིང་། ཁྱད་པར་དུ་ཐེག་པ་ཆེན་པོའི་ཤེས་རབ་དང་ཡེ་ཤེས་སྤོབས་པ་བསམ་གྱིས་མི་ཁྱབ་པ་ཐོབ་པའི་བྱང་ཆུབ་སེམས་དཔའ་དང་། གྲུབ་པའི་དབང་ཕྱུག་ཆེན་པོ་རྣམས་ཀྱིས་རང་སའི་སྡེ་སྣོད་ཀྱི་ལམ་ནས་གནང་བཀག་ལ་སྒྲ་ཇི་བཞིན་པ་འཇུག་པའི་ཚུལ་དེ་རང་རེ་སོ་སོའི་སྐྱེ་བོས་བཟུང་བ་མི་ནུས་པར་མ་ཟད། དེ་རྣམ་པའི་རྗེས་སུ་སྟག་མཆོང་སར་ཝ་ལུ་མ་མཆོང་ན་སྐེད་པ་ཕུད་བྱེད་རེད། ནང་གི་ཉམས་རྟོགས་ཀྱིས་དེ་རྣམ་པའི་རྗེས་མ་ཟིན་པར་ཕྱིའི་སྤྱོད་པ་དེ་རྣམ་པའི་རྗེས་སུ་འཇུག་ཁུལ་བྱས་ན་མི་རུང་། རྨ་བྱས་དུག་ཟོས་ན་རྒྱན་དུ་འགྲོའང་སྲོག་ཆགས་གཞན་གྱིས་ཟོས་ན་རྒྱན་དུ་མི་འགྲོ་བར་མ་ཟད་སྲོག་གཅོད་པའི་རྒྱུ་ཡིན། དཔེར་ན་འཕགས་པའི་ཡུལ་གྱི་བྲམ་ཟེ་ཆེན་པོ་སྒྲ་གཅན་འཛིན་བྲམ་ཟེ་རྣམས་ཀྱི་ངོར་བྲམ་ཟེའི་རིགས་ལས་ཉམས་པ་དང་། གནས་བརྟན་གྱི་སྤྱོད་པ་ལས་ཉམས་ཏེ་སྨྱུག་མཁན་མོ་དང་ལྷན་ཅིག་སྤྱོད་པ་ལ་ཞུགས་པ་དང་། ཏེ་ལོ་པས་ཉ་གསོན་བསྲེག་མཛད་པ་དང་། སྐབས་འགར་ཏིལ་བརྡུང་བ། སྐབས་འགར་སྨྱོ་ཁུལ་བྱེད་པ་སོགས་དང་། ལ་བ་པས་གཏི་མུག་ཆོས་སུ་སྨྲ་བ་སོགས་དེ་འདྲ་སྤྱོད་པ་ལ་བལྟ་རྒྱུ་ཡོད་པ་མ་རེད། དེའི་ཕྱིར་འདི་ལྟར་བླ་མ་དེའི་མཛད་པ་དེ་རང་གར་གྱི་མིས་བལྟས་ན་སྐྱོན་ལྟར་སྣང་བ་ཐམས་ཅད་དད་ལོག་འགོག་ཕྱིར། ཆེད་དུ་གཉེར་ནས་གཉེན་པོའི་གསལ་འདེབས་བྱ་བ་ནི། བླ་མ་དེའི་མཛད་པ་ལེགས་ཉེས། གསུང་བགྲོས་བཀའ་མོལ་གནང་ལུགས། ཐ་ན་ན་བཟའ་བཞེས་ལུགས་ལྟ་བུ་ཞིག་གི་མཚམས་སུ་ཡང་འདི་ལྟར་མ་ལེགས་སྙམ་པའི་བསམ་པ་ཞིག་ཧུར་གྱིས་ཤར་བྱུང་ན། རྣམ་རྟོག་དེ་ཤར་མ་ཐག་ཏུ་རྣམ་རྟོག་ངན་པ་དེ་ལ་བདག་པོར་བརྒྱབ་ནས་བདག་འཛིན་དང་མུ་མཐུད་ནས་དེའི་རྗེས་གཅོད་མི་བྱ་བར་འདི་ལྟར་བསམ་པར་བྱ་སྟེ། བདག་ལྟ་བུའི་ལས་ངན་གྱི་སེམས་ཅན་རང་གི་ནོར་བ་རང་གིས་མི་ཤེས་ན། འདི་ལྟ་བུའི་དམ་པའི་བླ་མ་ཁྱད་པར་ཅན་ལ་མཛད་སྤྱོད་འདི་རེད་མ་སོང་བསམ་པ་ནི་རང་གར་ཡིན་ཏེ། ཁོང་ལ་དེ་འདྲའི་ཉེས་སྐྱོན་ཡོང་བ་མི་སྲིད། རང་ཉིད་ལ་ཐོག་མ་མེད་པ་ནས་མ་དག་པར་གོམས་པའི་ལས་ཉོན་གྱི་མཐུས་སྐྱོན་དུ་ཤར་བར་ཡིན་འདུག གང་ཟག་རླུང་ཁམས་ཅན་ལ་ཟུར་དུ་ཡོད་ཚད་གནོད་པ་ཅན་དུ་མཐོང་བ་དང་། རླུང་ནད་ལས་གྲོལ་སོང་ན་རང་གི་རྣམ་རྟོག་ལ་རང་ཁྲེལ་ཡོང་བ་མངོན་སུམ་རེད། ཐང་ཕྲོམ་ཟོས་པའི་རྒན་མོའི་མིག་སྔར་ནམ་མཁའ་ནས་སྐྲ་ཤད་འཛག་པ་དང་། མཁྲིས་ནད་ཀྱིས་གདུངས་བའི་མིའི་མིག་ཤེས་ལ་དུང་གི་ཁ་དོག་ཀྱང་སེར་པོར་སྣང་བ་དང་ཁྱད་པར་ག་ལ་ཡོད། སྐྱེས་བུ་དམ་པ་ཟབ་མོའི་བློ་ཆེན་གྱི་དགོངས་པའི་གདིང་སོ་སོའི་སྐྱེ་བོས་དཔོག་ག་ལ་ནུས། ཐུགས་ལ་འཁྲུལ་བ་མི་སྲིད་པས། འགྲོ་བ་འདུལ་ཕྱིར་གང་འདུལ་གྱི་མཛད་པ་རླབས་ཆེན་ཞིག་ཡིན་ངེས། དམ་པའི་སྐྱེས་བུའི་མཛད་སྤྱོད་འཇིག་རྟེན་གྱི་རྣམ་བཞག་དང་འགལ་བ་དང་མི་མཐུན་པ་ལོས་ཡིན། འཇིག་རྟེན་དང་མི་མཐུན་པ་དེ་སྐྱེས་བུ་དམ་པའི་སྒྲུབ་བྱེད་རེད། ཡང་ན་སློབ་མའི་སྣོད་བརྟག་པའི་ཕྱིར་དུ་ལྟར་སྣང་མི་དགེ་བ་ལྟར་མཛད་པའི་སྐབས་ཀྱང་ཡོད་སྲིད་པ་རེད། གཞན་ལ་ཕན་པའི་ཕྱིར་ལུས་ངག་གི་མི་དགེ་བ་བདུན་ཀྱང་བྱང་ཆུབ་སེམས་དཔའ་ལ་གནང་བའི་སྐབས་ཡོད་པས། དགོངས་པ་གང་ལ་གཏད་ཡོད་སུས་ཤེས། མ་དད་པ་ཅུང་ཟད་ཀྱང་བྱ་མི་ཉན་བསམ་ནས་སྐད་ཅིག་ཐང་ཅིག་མ་འགོར་བར་དུས་ཐོག་ཏུ་བཤགས་པར་བྱེད་དགོས། ཐ་ན་རྨི་ལམ་དུའང་བླ་མའི་མཛད་པ་ལ་དད་ལོག་བྱེད་པར་རྨིས་ན་གཉིད་སད་མ་ཐག་ཏུ་བཤགས་པར་བྱེད་དགོས། རང་རེ་ཆགས་པར་བྱེད་པ་དང་། རྨོངས་པར་བྱེད་པ་ལ་སོགས་པ་འདོད་པའི་མདའ་ལྔས་སྙིང་ཕུགས་སྟེ་རང་དབང་མེད་པར་གྱུར་པའི་འགྲོ་བ་དག་གི་སྤྱོད་ཚུལ་དང་བསྟུན་ཀྱིན་རིམ་གྱིས་ཁ་དྲང་བའི་དགོངས་པ་ཅན་གྱི་ཚུལ་དུ། སྐབས་རེར་ལྟར་སྣང་མ་དག་པའི་མཛད་པ་དེ་དག་ཆེད་དུ་མ་བསྟན་པའི་ངེས་པ་ཡང་མེད་པས་ཅི་ཆ། སྐྱོན་ཀུན་ཟད་ཡོན་ཏན་ཀུན་རྫོགས་ཀྱི་འདྲེན་པ་ཤཱཀྱ་ཐུབ་པ་ལའང་དགེ་སློང་ལེགས་པའི་སྐར་མ་མདོ་སྡེ་བཅུ་གཉིས་བློ་ལ་འདོན་ཐུབ་ཅིང་། བསམ་གཏན་དང་པོའི་ཏིང་ངེ་འཛིན་ཐོབ་པ་དེས་བསོད་ནམས་མ་ཡིན་པའི་ལས་ཀྱི་སྟོབས་ཀྱིས་ཁོའི་སེམས་ཟིལ་གྱིས་མནན་ནས། བདག་ཅག་གི་སྟོན་པ་ལྷ་དང་བཅས་པའི་རྣམ་འདྲེན་དམ་པ་ལ། འོད་འདོམ་གང་ཡོད་པ་ལས་ཁོ་རང་དང་འདྲ་འདྲ་ཡིན་ཞེས་བསྐུར་བ་བཏབ་པས་མཐར་ཡི་དྭགས་སུ་སྐྱེས་པ་དང་། ལྷས་བྱིན་གྱིས་སངས་རྒྱས་ཀྱི་མཛད་པ་ཐམས་ཅད་གཡོ་སྒྱུ་རེད་ཟེར་ནས་བསྐུར་པ་བཏབ་པ་དང་། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པ་སོགས་མཚམས་མེད་ཀྱི་ལས་བྱས་པས། གསོན་པོར་ས་ཁ་གས་ནས་དམྱལ་ཁམས་སུ་ལྷུང་བ་ལྟ་བུ་དང་། མུ་སྟེགས་ཀྱི་སྟོན་པ་སྡེ་དྲུག་གིས་ཆོ་འཕྲུལ་ཆེན་པོས་ཆོམ་ལ་མ་ཕབ་བར་དུ་གཽ་ཏ་མས་བཤད་ཚད་མགོ་གཡོག་རེད་ཟེར་ནས་བསྐུར་བ་བཏབ་འདུག དེ་དག་ལ་སོགས་པ་དག་གིས་དེ་ལྟ་བུའི་སྐྱོན་གྱི་གོང་བུར་མཐོང་བ་དང་། སྔོན་གྱི་པཎ་གྲུབ་མཁན་སློབ་རྒྱལ་བློན་བྱང་ཆུབ་སེམས་དཔའ་དེ་དག་ལའང་། བོན་དང་སྡིག་བློན་མ་རུངས་པ་དེ་དག་གིས་ཉེས་པའི་གོང་བུར་མཐོང་བ་དང་། དཔེར་ན་པཎ་ཆེན་བི་མ་མི་ཏྲ་ལ་མུ་སྟེགས་ཕྲ་མ་མཁན་རེད་ཟེར་ནས་ཡུན་རིང་རྒྱལ་པོ་དང་མཇལ་འཕྲད་བྱེད་མ་བཅུག་པ་དང་། དེ་བཞིན་དུ་བཻ་རོ་ཙ་ན་ཡིན་ན་མཚན་ལ་ལོ་ཙཱ་བཏགས་ཀྱང་དོན་ལ་པཎྜི་ཏ་ཆེན་པོ་ཡིན་ཡང་། བཙུན་མོ་དམར་རྒྱན་བཟའ་དང་བོན་བློན་རྣམས་ཀྱིས་འོ་བརྒྱལ་གཏད་ནས་རྒྱལ་མོ་ཚ་བའི་རོང་དུ་སྤྱུགས་པ་རེད། བཻ་རོ་ཙ་ན་བྱོན་རན་ཁར། ལོ་བརྒྱད་ལོན་ནས་ལོ་ཙཱ་བསླབ་པའི་མཐའ་འདིར་མཆིས། །བཅོ་ལྔ་མན་ཆད་སྐད་སྣ་སྟོང་དང་དྲུག་བརྒྱ་སྦྱངས། །རྒྱ་གར་གསང་མཛོད་བརྟོལ་ནས་དམ་ཆོས་བོད་དུ་བསྒྱུར། །བོད་ཀྱི་མུན་སེལ་ཁྲི་གདུགས་འདྲ་བ་སྤྱུགས། །གོ་རྟོགས་བློའི་བདེ་འབྱེད་ཚེ་འགྱོད་པའི་དུས་ཤིག་མཆིས། །བཅོ་ལྔ་ལོན་ནས་ལྔ་བཅུ་རྩ་བདུན་མ་ལོན་བར། །འགྲོ་བ་མི་འདོད་ཕྱིར་དུ་རྒྱ་གར་ཡུལ་ཀུན་འགྲིམས། །བོད་ཀྱི་རྒྱལ་ཁམས་ཐམས་ཅད་དཀར་པོར་ཡོངས་བསྒྱུར་ཏེ། །ཕུང་པོ་ཡོན་ཏན་བརྒྱན་པའི་བོད་ཀྱི་བནྡེ་སྤྱུགས། །བོད་ཕྲུག་རྒྱ་གར་འཁོར་ཚེ་འགྱོད་པའི་དུས་ཤིག་མཆི། །ཞེས་སོགས་དང་དཀའ་བ་བཅུ་དྲུག་སྤྱད་པའི་མགུར་གསུངས་མཐར་འགྲོ་དགོས་བྱུང་བ་དང་། ཁྲི་སྲོང་ལྡེའུ་བཙན་ཡིན་ཡང་དབང་མེད་པར་གཏོང་དགོས་བྱུང་བ་རེད། དེ་ལྟ་བུའི་མ་དག་པའི་མིག་གིས་ལྟ་ཉེས་བྱས་པ་རེད། འཕགས་པ་ཐོགས་མེད་ཀྱིས་ལོ་བཅུ་གཉིས་བར་དུ་མི་ཕམ་མགོན་པོ་བསྒྲུབ་ཀྱང་ཞལ་མ་མཇལ་བར། སྐབས་ཤིག་སྒྲིབ་པ་ཅུང་སྲབ་པས་ཁྱི་མོ་ཁོག་སྨད་འབུས་གཡེང་བར་གཟིགས་པ་དང་དེ་ལ་སྙིང་རྗེ་སྐྱེས་པས་ཞལ་མཇལ་བ་དང་ཁྱད་པར་མེད། ཡབ་སྲས་མཇལ་བའི་མདོ་ལས་བདེ་བར་གཤེགས་པས་བདུད་ཀྱི་ཚུལ་དུ་སྤྲུལ་ནས་སེམས་ཅན་གྱི་དོན་མཛད་པར་ཡང་གསུངས་པའི་ཕྱིར་ན། སེམས་ཅན་བློ་རིག་རྨོངས་པས་བསྒྲིབས་ནས་སངས་རྒྱས་ལ་བདུད་དུ་མཐོང་བའང་གདུལ་བྱ་རང་གི་སྣང་བ་མ་དག་པ་ཁོ་ན་ལས་ཡུལ་དམ་པ་དེ་དག་ལ་སྐྱོན་ཡེ་ནས་མེད་པར་རང་གིས་ཞེ་གཏིང་ནས་ངེས་ཤེས་བསྐྱེད་པར་བྱས་ནས། བློ་འདུས་བྱས་ཡིན་ཕྱིར་གདུལ་དུ་རུང་བའི་མཚན་ཉིད་ཅན་ཡིན་པས་རང་གི་སེམས་ལས་སུ་རུང་བའི་ཉེར་ལེན་དང་རྐྱེན་གྱིས་ཡང་ཡང་བཅོས་ནས། དང་པོ་རང་ཉིད་ལ་སློབ་མའི་མཚན་ཉིད་ཕྱོགས་གཅིག་མ་གཏོགས་མེད་ནའང་རྗེས་སུ་ངང་གིས་ཚང་བར་བྱེད་ཆོག དེ་ལྟར་ཡང་དང་ཡང་དུ་རྒྱུ་མཚན་དང་བཅས་པ་བསམས་ནས་ཡུལ་དམ་པ་ལ་སྐྱོན་དུ་ལྟ་མཁན་གྱི་མ་དག་པའི་ཀུན་རྟོག་ངན་པ་དེ་གཉེན་པོས་ཟིལ་གྱིས་གནོན་དགོས་ཏེ། སྔོན་བོད་ཡུལ་དུ་འཕགས་པ་སྤྱན་རས་གཟིགས་ཀྱི་སྤྲུལ་པ་ཞིག་བཞུགས་ཡོད་ཟེར་ཏེ་ལི་ཡུལ་ནས་དགེ་ཚུལ་གཉིས་ཆེད་དུ་མཇལ་བར་ཡོང་བ་དང་། རྒྱལ་པོས་མི་མང་པོ་ལ་སྲོག་ཁྲིམས་གཅོད་པར་མཐོང་བས། སེམས་ཅན་ལ་གནོད་པ་བསྐྱལ་བར་རིག་ནས་དགེ་ཚུལ་གཉིས་དད་ལོག་སྐྱེས་ནས་ཕྱིར་བྲོས་པ་ན། རྒྱལ་པོས་མངོན་ཤེས་ཀྱིས་མཁྱེན་པས་དེ་གཉིས་ཀྱི་རྒྱུད་ཆུད་གསོན་འགྲོ་བར་དགོངས་ནས་བང་ཆེན་གཏོང་བས་ཕྱིར་བཀུག་སྟེ། ངས་བོད་དམུ་རྒོད་ཀྱི་སེམས་ཅན་འདུལ་ཕྱིར་སྤྲུལ་པར་བསྟན་པ་ཡིན་མ་གཏོགས་དོན་ལ་སེམས་ཅན་གཅིག་གི་བ་སྤུ་ལ་གནོད་པ་བྱ་མ་མྱོང་གསུངས་ཤིང་། སྤྲུལ་པ་བཤིགས་པས་དགེ་ཚུལ་གཉིས་དད་ནས་ཐུགས་རྗེ་ཆེན་པོའི་སྒོམ་ལུང་ཕོགས་པ་རེད། དེ་ལྟ་བུ་ཡིན་པའི་ཕྱིར་ཏེ། རྒྱུད་དོན་མདོར་བསྡུས་ལས། བླ་མའི་མཛད་པ་ཐམས་ཅད་ལ། །སངས་རྒྱས་མཛད་པ་ཉིད་དུ་བསམ། །གལ་ཏེ་གཟིམས་སམ་བཞེངས་པ་ནི། །འོད་གསལ་སྒྱུ་མར་སྣང་བར་བལྟ། །ཞེས་སངས་རྒྱས་ཀྱི་རང་བཞིན་འགྱུར་བ་མེད་པའི་རྣམ་པ་ཀུན་གྱི་མཆོག་དང་ལྡན་པའི་ཆོས་སྐུ་རེད། དེ་བླ་མ་ལ་མ་བརྟེན་པར་གཞན་གང་གིས་ཀྱང་འབྱུང་ཐབས་མེད། མཚན་ཉིད་ལྡན་པའི་དཔལ་ལྡན་བླ་མ་དམ་པ་ལ་ཕྱོགས་བཅུའི་སངས་རྒྱས་ཀྱིས་ཕྱག་འཚལ་ཞིང་བསྔགས་པ་བརྗོད་བཞིན་ཡོད་པ་རེད། དེས་ན་བླ་མའི་མཛད་པ་ཐམས་ཅད་ལ་ལྟར་སྣང་དུ་སྐྱོན་ཡོན་བཟང་ངན་གང་སྣང་ཡང་སངས་རྒྱས་དངོས་དང་དེའི་མཛད་པ་མཉམ་པ་ཉིད་དུ་བསམ་དགོས། སངས་རྒྱས་ཀྱི་མཛད་པ་གང་ཡིན་ན། སེམས་ཅན་གྱི་འགྲོ་དོན་ལས་མ་འདས་པ་ཞིག་ཡིན་པ་དེས་ན་སངས་རྒྱས་སྐུ་དངོས་ཀྱིས་འདུལ་དགོས་པའི་གདུལ་བྱ་ལ་དབུ་ལ་གཙུག་ཏོར་དང་ཞབས་ལ་འཁོར་ལོ་ཅན་གྱི་སངས་རྒྱས་དངོས་སུ་བྱོན་ནས་དེའི་དོན་མཛད་པ་དང་། ཡང་དགྲ་བཅོམ་པ་དང་། ཉན་རང་འཕགས་པ་ཕྱིར་མི་འོང་ལ་སོགས་དང་། ས་གནས་ཀྱི་བྱང་ཆུབ་སེམས་དཔའ་དང་། པཎྜི་ཏའི་ཚུལ་གྱིས་འདུལ་དགོས་དུས་དེ་དང་དེར་སྤྲུལ་ནས། བཀའི་བསྡུ་བར་མཛད་པ་དང་། བསྟན་བཅོས་རྩོམ་པ་སོགས་ཀྱིས་དོན་མཛད་པ་རེད། ཡང་དེང་སང་སྙིགས་མ་ལྔ་ལ་ཐུག་དུས་སྙིགས་མའི་སེམས་ཅན་ལ་དེ་དང་བསྟུན་ནས། དེ་དག་ལ་ཐར་པ་དང་ཐམས་ཅད་མཁྱེན་པའི་ལམ་སྟོན་པའི་ཆེད་དུ་རང་རང་གི་མོས་པ་དང་མཐུན་པའི་རྣམ་པར་འཕྲུལ་ནས། མིའི་གཟུགས་སུ་སྟོན་པའི་དགེ་བའི་བཤེས་གཉེན་དུ་སྣང་བས་སེམས་ཅན་གྱི་དོན་མཛད་པ་ཡིན་པས། བླ་མའི་ངོ་བོའི་ཆ་ནས་སངས་རྒྱས་དང་མཉམ་པ་ཡིན་ཡང་། རྣམ་པའི་ཆ་ནས་སངས་རྒྱས་ཉིད་ཀྱིས་སྤོང་བའམ་ལྷག་ནས་འདུལ་སྐལ་མེད་པའི་སེམས་ཅན་ཤིན་ཏུ་ཉོན་མོངས་པ་རང་རེ་ལྟ་བུ་ལ་ཕན་པ་ལྷུར་ལེན་པའི་བཀའ་དྲིན་ཅན་ཡིན་པས། བདག་རང་ཉིད་ཀྱི་ངོས་ནས་ཐུགས་རྗེའི་བཀའ་དྲིན་གྱིས་སྐྱོང་བས་ན་སངས་རྒྱས་ལས་ཀྱང་ལྷག་ན་ཆོག་རྒྱུ་ཅན་ཞིག་ཡིན། དེ་ཡིན་པས་བླ་མའི་ཅི་མཛད་པ་ཐམས་ཅད་ལེགས་པ་ཞིག་མ་གཏོགས་ནམ་ཡང་ཡོད་པ་མ་རེད། གལ་ཏེ་གཟིམས་སམ་བཞེངས་པ་ན། །འོད་གསལ་སྒྱུ་མར་སྣང་བར་བལྟ། །གསུངས་ན་གལ་ཏེ་བླ་མ་གཟིམས་ན་རྨི་ལམ་འོད་གསལ་དུ་བཞུགས་ཡོད་པ་དང་། བཞེངས་ན་ཉིན་སྣང་སྒྱུ་མའི་རོལ་པར་སྣང་གིན་ཡོད་པར་་བལྟ་བར་བྱ་དགོས། ཕྱག་དང་བསྐོར་བ་གང་མཛད་ཀྱང་། །སངས་རྒྱས་རོལ་པ་ཉིད་དུ་སྟོན། །གར་དང་རྣམ་འགྱུར་བཞད་པ་ན། །སངས་རྒྱས་དགོངས་པའི་མཛད་པ་ཅན། །ཞེས་བླ་མས་ཕྱག་དང་བསྐོར་བ་ལ་སོགས་པ་དགེ་སྦྱོར་གྱི་རྣམ་པ་གང་མཛད་ཀྱང་། ཐམས་ཅད་ཅི་མཛད་ཆོས་ཀྱི་སྤྱོད་པ་སངས་རྒྱས་ཀྱི་རོལ་པ་ཉིད་དུ་སྟོན་པ་རེད་བསམ། སྐབས་རེར་སྟངས་སྟབས་སྣ་ཚོགས་པའི་གར་དང་རྣམ་འགྱུར་གླུ་དང་བཞད་པ་དང་སྐུ་རྩེད་སོགས་ཀྱི་སྤྱོད་པ་མཛད་ན། སངས་རྒྱས་ཀྱི་ཐུགས་ཀྱི་དགོངས་པ་ལས་གཡོ་བ་མེད་བཞིན་དུ་དགོངས་སྤྱོད་རྒྱ་ཆེན་པོའི་མཛད་སྤྱོད་གཞན་དང་གཞན་དུ་མཛད་པ་ཅན་དུ་བལྟ་དགོས། ཁྲོ་དང་ཆགས་པ་ཅིར་སྟོན་ཡང་། །སངས་རྒྱས་བྱང་ཆུབ་ཉིད་དུ་བསམས། །མི་བརྒྱ་དུས་གཅིག་བསད་ན་ཡང་། །སངས་རྒྱས་འགྲོ་ལ་ཕན་མཛད་ཉིད། །སྐབས་རེར་བླ་མའི་ཐུགས་ཁྲོ་བ་དང་སྐབས་རེར་ཆགས་པའི་རྣམ་འགྱུར་ཅིར་སྟོན་ཡང་། སངས་རྒྱས་ཀྱི་བསམ་གྱིས་མི་ཁྱབ་པའི་དགོངས་སྤྱོད་གདུལ་བྱའི་སེམས་ཅན་བྱང་ཆུབ་ཉིད་དུ་སྦྱོར་བར་མཛད་པའི་དགོས་པ་ཅན་ཞིག་ཡིན་པར་བསམ་དགོས། རྣལ་འབྱོར་གྱི་དབང་ཕྱུག་གྲུབ་ཆེན་བི་ཝ་པ་ཞེས་བྱ་བ་གྲུབ་ཆེན་བརྒྱད་ཅུའི་ནང་དུ་ཡོད་པ་ཞིག་རེད། གྲུབ་ཆེན་དེ་རྒྱ་གར་ལྷོ་ཕྱོགས་སོ་མ་པུ་རིའི་གཙུག་ལག་ཁང་ན་བཞུགས་དུས་དགེ་འདུན་ཉིས་སྟོང་གི་གྲལ་དུ་བཞུགས་པའི་དགེ་སློང་དཔལ་ལྡན་ཆོས་སྐྱོང་ཞེས་པ་དེ་ཡིན། ཁོང་གི་བདེ་མཆོག་གི་དབང་ཞུས་ནས་མི་ལོ་བཅུ་གཉིས་ལ་རྡོ་རྗེ་ཕག་མོ་བསྒྲུབས་ཏེ། བསྙེན་པ་འབུམ་ཕྲག་བརྒྱ་ལན་བདུན་དུ་བཟླས་ཀྱང་རྨི་ལམ་བཟང་པོའི་རྟགས་ཙམ་ཡང་མ་བྱུང་བས་ཐུགས་ཆད་ཡིད་མུག་ནས་འདོན་རྒྱུ་བསྐྱུར་ཏེ་ཕྲེང་བ་བདག་ཏུ་མ་བརྒྱབ་པར་འཕངས་པ་ན། ནུབ་གཅིག་ཚོགས་གྲལ་དུ་ཕྲེང་བ་ལྷག་སོང་སྙམ་པའི་ཐུགས་རྟོག་ཤར་དུས། མཁའ་འགྲོ་མས་ཕྲེང་བ་ལག་ཏུ་བཞག་ནས། རིགས་ཀྱི་བུ་ཁྱེད་ཡིད་མ་ཆད། ངས་བྱིན་གྱིས་རླབས་ཀྱི། ཁྱེད་ཀྱིས་རྣམ་རྟོག་གི་མཚན་མ་སྤངས་ལ་སྒྲུབ་པ་གྱིས་ཞེས་གསུངས་པས། ཡང་ཁོང་གིས་ལོ་བཅུ་གཉིས་སུ་སྒྲུབ་པས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་སྟེ། གྲུབ་ཐོབ་ཅེས་བྱ་བའི་ཐ་མལ་མིའི་སྤྱོད་ཡུལ་ལས་འདས་པ་ཞིག་ཏུ་གྱུར་ནས། ཕར་ལྟར་སྣང་ལ་ཁོང་གི་མཛད་སྤྱོད་ཐམས་ཅད་ཤ་ཆང་ཁོ་ན་གསོལ་བ། བར་སྐབས་ཤིག་ན་གཙུག་ལག་ཁང་ལ་འཁྲིས་ནས་བབ་ཡོད་པའི་ཕུག་རོན་ཚང་མ་བསད་ནས་ཤ་གསོལ་བས། དེའི་ཕུག་རོན་ཕལ་ཆེར་ཟད་སོང་བ་ན། དགེ་འདུན་པ་རྣམས་ཀྱིས་ཕུག་རོན་འདི་རྣམས་སུས་ཟོས་པ་ཡིན་ཟེར་ནས་རྩད་གཅོད་པས་གྲྭ་ཁང་རྣམས་བཤེར་བ་ན། བི་ཝ་པ་བཞུགས་སའི་གྲྭ་ཁང་གི་སྐར་ཁུང་ནང་དུ་བལྟས་པས། ཁོང་གིས་ཕུག་རོན་གྱི་ཤ་དང་ཆང་གསོལ་བ་གཟིགས་པས། དགེ་འདུན་གྱིས་གནྜཱི་བརྡུངས་ནས་གནས་དབྱུང་གཏོང་བར་རྩོམ་པ་ན། ཁོང་གིས་ཆོས་གོས་དང་ལྷུང་བཟེད་ལྷ་ཁང་ནང་གི་རྟེན་ལ་ཕུལ་ཏེ་ ཕྱག་གསུམ་འཚལ་ནས་ལྷ་ཁང་ལ་ཐད་ཀར་ཐོགས་མེད་དུ་བྱོན་ནས་ཕྱི་རོལ་དུ་འཐོན་པ་དང་། ལྷ་ཁང་གི་ཟུར་ན་མཚོ་ཆེན་པོ་ཞིག་ཡོད་པར་གཏད་དེ་བྱོན་པ་ན། དགེ་སློང་ཞིག་གིས་ཁྱེད་ལམ་གང་དུ་བརྒྱུད་ནས་བྱོན་གྲབས་ཡིན། མདུན་དུ་ཡོད་པ་འདི་མཚོ་རེད་ཟེར་བ་ན། ཁྱེད་རྣམས་ཀྱིས་ང་བསྐྲད་པ་ཡིན་ན། ང་རང་གར་འགྲོ་འདིར་འགྲོ་ཅི་ཡོད་གསུངས་ནས། མཚོའི་སྟེང་དུ་ཐད་ཀར་ཆུའི་ནང་དུ་མ་ནུབ་པར་ཐང་ལ་རྒྱུ་བ་བཞིན་དུ་བྱོན་སོང་བ་དང་། ད་དུང་མཚོའི་ནང་ཞབས་བཞག་ས་རེ་ན་མེ་ཏོག་པདྨ་རེ་སྐྱེས་པས་ཀུན་གྱིས་ངོ་མཚར་སྐྱེས་ནས་སློབ་དཔོན་པདྨའི་ཞབས་ཞེས་པའི་མཚན་དུ་གྲགས། དེ་ནས་སོ་མ་པུ་རིའི་མི་རྣམས་ཀྱིས་འགྱོད་པ་ཆེན་པོ་སྐྱེས་ནས། དེ་སྐྱེས་བུ་ཁྱད་པར་ཅན་ཞིག་ཡིན་འདུག་པས། བསྐྲད་པས་མ་ཉན་ཟེར་ཞིང་སློབ་དཔོན་གྱི་ཞབས་ལ་ཕྱག་འཚལ་ནས་འགྱོད་བཤགས་བྱས། དེ་རྣམས་ཀྱིས་ཁྱེད་ཀྱིས་ཕུག་རོན་ཅིའི་ཕྱིར་གསོད་པ་ཡིན་ཞེས་ཞུས་པ་ན། ཁོང་གིས་ངས་ཕུག་རོན་རྣམས་མ་བསད། ཕུག་རོན་རྣམས་དེ་ན་ཡོད་གསུངས་པས། སྔར་གྱི་ཞབས་འབྲིང་བས་གཟིམ་ཁང་ནང་དུ་ཕུག་རོན་གྱི་སྒྲོ་དང་གཤོག་པ་ཐར་ཐོར་ཡོད་པ་རྣམས་འཁྱེར་ཡོང་བ་ན། སློབ་དཔོན་གྱིས་སེལ་གོ་ཞིག་གདབ་དུས་ཕུག་རོན་རྣམས་གསོན་པོར་གྱུར་ནས་འུར་དིར་རེ་འཕུར་སོང་བ་དང་། ཡང་འོ་ན་ཁྱེད་ཀྱིས་ཆང་ཅིའི་ཕྱིར་གསོལ་བ་ཡིན་ཞུས་པ་ན། ཁོང་གིས་ངས་ཆང་འཐུང་མ་མྱོང་། ཆང་ཚང་མ་རྫ་མ་ནང་དུ་ཡོད་གསུངས་པ་ན། རྫ་བུམ་དུ་བལྟས་པས་ཆང་གི་རྫ་མ་ནང་འོ་མས་གང་ནས་ཡོད་པར་མཐོང་བར་བྱིན་གྱིས་རླབས་པ་རེད། དེ་ནས་ཁོང་གིས་དགེ་སློང་གི་རྟགས་སྤངས་ནས་རྣལ་འབྱོར་པའི་སྤྱོད་པས་གང་ས་གང་ལ་ངེས་མེད་དུ་བྱོན་ནས་ཉིན་ཞིག་ཆུ་བོ་གངྒཱའི་འགྲམ་དུ་ཕྱིན་པ་ན། ཆུའི་ལྷ་མོ་རྣམས་ལ་ང་ལ་བཟའ་རྒྱུ་འཐུང་རྒྱུ་རེ་བྱིན་ཞེས་གསུངས་ཀྱང་། དེ་རྣམས་ཀྱིས་མ་སྟེར་བས་སློབ་དཔོན་ཐུགས་ཁྲོས་པའི་ཚུལ་གྱིས་ཆུར་སྡིགས་མཛུབ་མཛད་པས་ཆུ་ཡར་བཅད་མར་བཅད་བྱས་ཏེ་དེའི་བར་ནས་ག་ལེར་བྱོན་སོང་བ་རེད། དེ་ནས་གྲོང་ཁྱེར་ཞིག་གི་ནང་དུ་ཐོན་པས། ཆང་ཁང་ཞིག་གི་ནང་དུ་འཛུལ་ནས་ཆང་ཚོང་མ་ལ་ཆང་འཁྱེར་ཤོག་ཟེར་བས་ན། ཆང་ཚོང་མས་ཆང་རིན་བྱིན་ཟེར་བས། རིན་ད་ལྟར་སྤྲད་རྒྱུ་མེད་ཀྱང་རྗེས་སུ་སྤྲད་འོང་ཟེར། ཆང་ཚོང་མས་འོ་ན་གཏའ་མ་ཅི་འཇོག་ཟེར་བ་ན། གཏའ་མ་ཅི་མི་ཤེས་ཏེ་ཉི་མ་མ་ནུབ་ཚུན་སྤྲད་འོང་ཟེར་ནས། ཟ་མ་དང་ཆང་མང་པོ་གསོལ་ནས་བཞུགས་པ་ན། ཞག་མ་ཕྱེད་གསུམ་གྱི་ཚོད་རེད་ཀྱང་ཉི་མ་འགྲོ་རྒྱུ་མེད་པ་དང་། ཡུལ་དེའི་རྒྱལ་པོ་སྐྲག་ཞིང་ཧ་ལས་ནས་འདི་ཅི་ཡིན། སུའི་ཆོ་འཕྲུལ་ཡིན་ཟེར་ནས་དྲིས་ཀྱང་། འདི་ཡིན་གྱི་ལན་སྟེར་མཁན་མ་བྱུང་། དེ་ནས་རྒྱལ་པོའི་རྨི་ལམ་ན་ཉི་མའི་ལྷ་མོ་ཡོང་ནས། ཉི་མ་ནི་རྣལ་འབྱོར་པ་ཞིག་གིས་ཆང་རིན་སྤྲད་རྒྱུ་མེད་པས་ཉི་མ་གཏའ་མར་འཇོག་ཡོད་པ་རེད་ཅེས་ཟེར་ནས་ལུང་བསྟན་པ་ན། རྒྱལ་པོས་ཆང་ཁང་དུ་བཙལ་བ་ན་རྣལ་འབྱོར་པ་རྙེད་པ་ན། རྒྱལ་པོས་ཆང་རིན་སྤྲད་ཆོག་པས་ཉི་མ་གཏོང་བར་ཞུ་ཞུས་པས། བི་ཝ་པས་ཉི་མ་དུས་རྒྱུན་ལྟར་བཏང་ནས་ཡུལ་གཞན་དུ་བྱོན་སོང་བ་ན། ཡུལ་དེ་ནི་མུ་སྟེགས་པའི་ཆོས་ལུགས་ཡོད་ས་ཞིག་ཡིན། ཡུལ་དེའི་མི་རྣམས་ཀྱིས་ཁྱེད་མི་གསར་བ་ཞིག་དེ་རིང་འདིར་ཐོན་པ་ཡིན་པས། ལྷ་དབང་ཕྱུག་ཆེན་པོའི་སྐུ་རྟེན་ལ་ཕྱག་འཚོལ་ཞིག་ཟེར་བ་ལ། སློབ་དཔོན་གྱིས་ང་རང་ཕུ་བོ་རེད། དབང་ཕྱུག་ཆེན་པོ་ནུ་བོ་རེད། ཕུ་བོས་ནུ་བོ་ལ་ཕྱག་འཚལ་ཚུལ་ཞིག་ཡོད་པ་ཨེ་རེད་གསུངས་ནས་ཕྱག་མ་འཚལ། དེ་ཡུལ་དེའི་རྒྱལ་པོས་གོ་བ་ན། ལྷ་དབང་ཕྱུག་ཆེན་པོ་ལའང་ཕྱག་མི་འཚལ་བ་དེ་སུ་རེད། མི་དེ་སོད་ཤོག་ཟེར་བ་ན། སློབ་དཔོན་གྱིས་ངས་འདི་ལ་ཕྱག་འཚལ་ན་ཆོག་ཀྱང་ཁོ་ལ་སྡིག་པ་ཡོད་པས་མ་འཚལ་བ་ཡིན་གསུངས་པ་ན། རྒྱལ་པོས་ཁྱོད་ཀྱིས་ཕྱག་འཚལ་དང་ལྷ་ཆེན་ལ་ཕྱག་འཚལ་བའི་སྡིག་པ་ངས་འཁུར་ཟེར། སློབ་དཔོན་གྱིས་ཕྱག་འཚལ་བ་དང་། ལྷ་ཆེན་གྱི་སྐུ་རྟེན་ཕྱེད་ཚལ་དུ་གས་ནས། བར་སྣང་ནས་སྒྲ་ཆེན་པོ་ཞིག་གྲག་པ་ན། ཡུལ་མི་ཐམས་ཅད་སྐྲག་ནས་སློབ་དཔོན་ལ་ཕྱག་འཚལ་གུས་འདུད་བྱས་ནས། ཉི་མ་དེ་རིང་ནས་བཟུང་ཁྱེད་ཀྱི་བཀའ་སྒྲུབ་པ་ཡིན་ཟེར། སློབ་དཔོན་གྱིས་འོ་ན་ངས་ཅི་ཟེར་བསྒྲུབ་རྒྱུའི་ཁས་ལེན་དགོས་གསུངས་པ་ན་དེ་ལྟར་ཁས་བླངས་ནས། དེ་ཕྱིན་གྱིས་ལྷ་མ་ཧཱ་དེ་ཝ་མཆོད་པའི་ཡོ་བྱད་ཐམས་ཅད་སློབ་དཔོན་ལ་ཕུལ་བས་དེས་ནང་བའི་དགེ་འདུན་གྱི་འཚོ་བའི་མཐུན་རྐྱེན་སྦྱོར་བ་རེད། དེ་ནས་དེ་བ་ཀོ་ཊ་ཞེས་པའི་ཡུལ་དུ་བྱོན། ཡུལ་དེ་ན་མི་རྣམས་ལས་ཕྲ་མེན་མ་མང་པོ་ཡོད་པ་ལ། ཕྲ་མེན་མ་ཞེས་པ་འདྲེ་མོའི་དོན་རེད། མིའང་ཡིན་པ་ལ་ཤ་ཟ་འདྲེའི་རིགས་སུ་གཏོགས་པ་དེ་འདྲ་ཞིག་རེད། ཕྲ་མེན་མ་ཞིག་ཉིན་པར་ལམ་ཁར་འདུག་སྟེ་ཕྲ་མེན་གྱི་སྔགས་བཟླས་ནས་མི་རྣམས་ལ་སྔགས་བཏབ་པ་ན། སློབ་དཔོན་ལམ་དེ་ནས་བརྒྱུད་དེ་གཙུག་ལག་ཁང་རྙིང་པ་ཞིག་ཏུ་གཟིམ་ཡོད་པ་ན། དེའི་རྗེས་སུ་བྲམ་ཟེའི་ཕྲུ་གུ་ཞིག་ཡོང་བ་དང་། དེ་ལ་ཕྲ་མེན་མས་སྔགས་བཏབ་པ་ན། བྲམ་ཟེའི་བུ་ཞིག་གིས་གྲོང་ཁྱེར་དེ་ནས་ཟས་རྙེད་ཀྱང་ཉལ་ས་ཞིག་གཏན་ནས་མ་རྙེད་པར་སོང་བ་ན། རྣལ་འབྱོར་མ་ཞིག་གིས་ཡུལ་འདི་ན་ཕྲ་མེན་མ་མང་པོ་ཡོད་པས་དེ་རྣམས་ཀྱིས་སུ་ལ་ཡིན་ན་བར་ཆད་བྱེད་པ་རེད། ཁྱོད་གཙུག་ལག་ཁང་ཕ་དེའི་ནང་དུ་སོང་ནས་སྡོད་ན་བཟང་ཟེར་བ་དང་། བྲམ་ཟེའི་ཕྲུ་གུ་གཙུག་ལག་ཁང་དུ་ཕྱིན་པ་ལ། སློབ་དཔོན་བི་ཝ་པས་སྔགས་བཏབ་ནས་བྱིན་རླབས་མཛད། དེ་ནུབ་ཕྲ་མེན་མ་རྣམས་ཚོགས་ནས་སྲིང་མོ་མ་རྣམས་དོ་ནུབ་མཆོད་པའི་རྫས་ཅི་ཡོད་ཟེར་བ་ན། ཕྲ་མེན་མ་གཅིག་ན་རེ། མཆོད་པའི་ཡོ་བྱད་གཞན་ཚང་མ་ཡོད་ཀྱང་ཤ་ཆེན་མེད་ཟེར་བ་ན། གཅིག་ན་རེ། ངས་ཤ་ཆེན་གཉིས་བཀུག་ཡོད་ཟེར། གཙོ་མོ་ན་རེ་འོ་ན་དེ་འཁྱེར་ཤོག་ཟེར། དེས་ཇི་ལྟར་བཀུག་ཀྱང་བྲམ་ཟེའི་ཕྲུ་གུ་འགུགས་མ་ནུས་པ་དང་། ཡང་སྔགས་བཏབ་པས་སློབ་དཔོན་བི་ཝ་པ་ཤིང་སྡོང་ཆེན་པོ་ཞིག་གི་སྟེང་ན་བཞུགས་ཡོད་པ་ཤིང་དང་བཅས་པ་བཀུག་ཡོང་བ་ན། ཕྲ་མེན་མ་རྣམས་ཀྱིས་འདི་རེ་ཞིག་མཛོད་ཁང་དུ་ཞོགས་དང་། དེ་ནས་ཚོགས་འཁོར་བསྐོར་ཟེར་ནས་མཛོད་ཁང་དུ་བཞག་པ་ན། སློབ་དཔོན་གྱིས་མཛོད་ཁང་དུ་ཆང་ཚང་མ་གསོལ་ནས་བཞུགས། ཕྲ་མེན་མ་རྣམས་ཀྱིས་སློབ་དཔོན་གསོད་དགོས་བསམ་ནས། ཐམས་ཅད་ཀྱིས་གད་རྒྱང་གི་སྒྲ་སྒྲོག་པ་དང་། སློབ་དཔོན་གྱིས་ཁྲོ་བོའི་གད་མོ་བྱས་པས་ཕྲ་མེན་མ་རྣམས་བརྒྱལ་ནས་བླ་འཁུམས་སོང་། ཕྲ་མེན་མ་ཐམས་ཅད་དཀོན་མཆོག་གསུམ་གྱི་སྐྱབས་འོག་ཏུ་འཛུལ་རྒྱུའི་ཁས་བླངས། བི་ཝ་པ་ལ་དད་པའི་སེམས་ཅན་ལ་གནོད་པ་མི་བྱེད་པའི་དམ་བཅའ། ས་དེའི་ཕྲ་མེན་མ་ཐམས་ཅད་དམ་ལ་བཏགས་སོ། །སློབ་དཔོན་ལམ་དུ་བྱོན་པའི་ལམ་ཁ་ཞིག་ན་ལྷ་དབང་ཕྱུག་ཆེན་པོ་དང་ལྷ་མོ་ཨུ་མ་དེ་བས་གྲོང་ཁྱེར་དཔག་ཚད་ཕྱེད་དང་ལྔ་བརྒྱ་ཡོད་པར་སྤྲུལ་ནས་སློབ་དཔོན་གདན་དྲངས། སུམ་ཅུ་རྩ་གསུམ་གྱི་ལྷ་གནས་ལ་སོགས་པའི་ཞལ་ཟས་ཐམས་ཅད་བླངས་ནས་མཆོད་པར་བྱས་པའི་ལོ་རྒྱུས་ཡོད་པ་རེད། རྣལ་འབྱོར་པ་གྲུབ་ཆེན་གྱི་ནང་རྟོགས་པའི་ཡོན་ཏན་དེ་ཕྱི་ཚུལ་ལ་བལྟས་ནས་ངོས་ཟིན་རྒྱུ་ཅན་ཞིག་ཡིན་པ་མ་རེད། བླ་མས་མི་བརྒྱ་དུས་གཅིག་ལ་བསད་ན་ཡང་། སངས་རྒྱས་ཀྱིས་འགྲོ་ལ་ཕན་པར་མཛད་པའི་མཛད་པ་འཕྲིན་ལས་མ་འདས་པར་བསམ་དགོས། རང་གར་སེམས་ཅན་གསད་ཤེས་པས་མི་ཕན། སྡིག་ཅན་ཤན་པ་རྣམས་ཀྱིས་ཀྱང་གསོད་ཤེས། རྟོགས་པས་བསྒྲལ་ནུས་ན། ཐུགས་རྗེས་འདྲེན་ནུས་དགོས་པ་རེད། བསད་པ་གསོ་ནུས་པ་ཞིག་དགོས། གྲུབ་ཆེན་ཤྭ་བ་རི་པས་རྔོན་བདས་པ་ལྟ་བུ་དང་། ཏེ་ལོ་པས་ཉ་བསད་པ། ས་ར་ཧ་པ་སྨྱུག་མཁན་མོ་དང་འགྲོགས་པ་དང་། ཨིནྡྲ་བྷུ་ཏིས་འདོད་ཡོན་ལ་སྤྱོད་པ་ལྟ་བུ་ཞིག་དགོས་པ་རེད་མ་གཏོགས། ང་གཅིག་ཡིན་ཅན་པོ་ཞིག་གིས་བྱེད་པས་ས་ཆོད་མི་དགོས་ངན་པའི་ནང་གི་ངན་པ། གཅར་ན་གྲིབ་ཀྱིས་ནོན་པ་ཅན་པོ་ཡིན་ན་ཤེས་པ་མ་རེད། བཙུན་མོ་བརྒྱ་དང་རོལ་ན་ཡང་། །བདེ་ཆེན་ཡེ་ཤེས་ཕྱག་རྒྱ་ཆེ། །འདོད་པ་འདུན་པ་ཅིར་སྣང་ཡང་། །སངས་རྒྱས་འདོད་པ་བྲལ་བ་ཡིན། །ཞེས་བཙུན་མོ་བརྒྱ་དང་ལྷན་ཅིག་རོལ་ན་ཡང་། བདེ་ཆེན་ལྷན་ཅིག་སྐྱེས་པའི་ཡེ་ཤེས་ཐབས་ལམ་ཕྱག་རྒྱ་ཆེན་པོའི་མྱུར་ལམ་ཡིན་པར་བསམ། འདོད་པ་ལ་འདུན་པ་ལ་སོགས་སྣང་ཚུལ་ཅི་དང་ཅིར་སྣང་ཡང་། སངས་རྒྱས་འདོད་པ་དང་བྲལ་བ་ཡིན་ཞིང་གདུལ་བྱ་ཐབས་ཀྱིས་འདུལ་བའི་དགོས་དབང་ཡིན་པར་བསམ་དགོས་ཏེ། དམ་པའི་སྐྱེས་བུ་སངས་རྒྱས་དང་ས་གནས་བྱང་སེམས་ཀྱི་སྤྲུལ་པ་རྣམས་ཐུགས་ལ་འཁྲུལ་བ་མི་མངའ་བའི་ཕྱིར་ན་མཛད་སྤྱོད་ལ་ཉེས་སྤྱོད་ཅིག་འབྱུང་བ་མི་སྲིད་པའི་ཕྱིར་ཏེ། རང་དོན་ཕུན་སུམ་ཚོགས་ནས་གཞན་དོན་གདུལ་བྱ་སྐྱོང་བའི་སྐབས་ཡིན་པས། མཛད་པའི་རྣམ་གྲངས་ཀྱི་ཐོག་ནས་ཞི་བ་དྲག་པོ་ཤིན་ཏུ་རྒྱས་པ་དང་དབང་སྡུད་ལ་སོགས་པ་རྣམ་པ་ཅི་དང་ཅིར་སྟོན་ཀྱང་འགྲོ་བ་འདུལ་བ་དང་གདུལ་བྱ་སྐྱོང་བའི་ཐབས་ཡིན་པས་སོ། །ཐར་པའི་ལམ་སྟོན་བླ་མ་མ་གཏོགས་སུ་ཡང་མེད་པས་ན་རྟེན་འབྲེལ་འགོ་ནས་འཆུག་འཇུག་མི་ཉེས། བསྐལ་པ་འབུམ་ཕྲག་མང་པོ་ན་རྙེད་པར་དཀའ་བའི་བླ་མ་དང་ཐེག་ཆེན་གྱི་ཆོས་ཟབ་མོ། སྣོད་ལྡན་གྱི་སློབ་མ་བཅས་ཀུན་འཛོམས་རེད་ཡོང་དུས་བདུད་སྡིག་ཅན་མི་དགའ་ཞིང་དེ་ལ་བར་ཆད་ཅིག་ཅིས་དྲག་བསམ་ནས། བལྟར་མི་མངོན་པའི་ཐོག་ནས་དཔོན་སློབ་གཉིས་ཀྱི་བར་དུ་དབྱེན་ཞིག་བྱེད་ན་ཨེ་དགའ། ཡང་ཆོས་ཀྱི་མཐུན་རྐྱེན་འཚོ་བའི་ཆ་རྐྱེན་ཞིག་མི་འདང་བར་བྱེད་ན་ཨེ་དགའ། བུ་ཚ་ཕ་མ་མཛའ་གྲོགས་ཀྱི་ཞེན་པ་མི་ཆོད་པར་བྱེད་ན་ཨེ་དགའ། དུས་ལ་མ་བབ་པའི་འགྲོ་དོན་དང་། སྙིང་རྗེ་དགྲར་ལང་གི་རྣམ་རྟོག་མང་པོ་འཆར་དུ་འཇུག་པ་ལ་སོགས་པའི་བདུད། རང་དང་ཁོར་ཡུག་གི་མིའི་ཁོག་ཏུ་ཞུགས་ནས་བར་ཆད་མང་པོར་རྩོམ་པ་རེད། དེ་དུས་ལྷག་པར་དུ་བླ་མ་དང་ཆོས་ལ་མོས་གུས་བྱས་ནས་དཀའ་སྤྱད་བཟོད་པའི་སྙིང་སྟོབས་ཀྱི་གོ་ཆ་བགོ་དགོས། དཔེར་ན་ནོར་བུ་རིན་པོ་ཆེ་འདོད་པའི་དོན་ཐམས་ཅད་འགྲུབ་པ་ཞིག་རྙེད་ན་དེ་ལ་གཅེས་སྤྲས་བྱས་ནས་བོར་བ་དང་བརླག་ཏུ་མི་འཇུག་པ་ལྟར། ཆོས་དང་བླ་མ་ལ་མོས་གུས་ཀྱི་སྒོ་ནས་བསྲུངས་ཏེ་རང་ཉིད་དེ་དང་འབྲལ་དུ་འཇུག་མི་ཉན། ཐམས་ཅད་སངས་རྒྱས་མཛད་པ་སྟེ། །ཅི་མཛད་མཐོང་བ་ལེགས་པའི་ལམ། །ཅི་གསུང་ཐོས་པ་དམ་པའི་ཆོས། །ཅི་དགོངས་ཐམས་ཅད་མཁྱེན་པའི་དཔལ། །ཞེས་བླ་མའི་སྐུས་ཅི་མཛད་ཀྱི་བྱ་བ་ཐམས་ཅད་སངས་རྒྱས་ཀྱི་མཛད་པ་ཡིན་ཞིང་། ཅི་མཛད་ལེགས་པར་མཐོང་བའི་མོས་གུས་རང་ལ་ཡོད་ན་དེ་ཉིད་ཐམས་ཅད་ལེགས་པའི་ལམ་མ་ནོར་ཡིན་ལ། ཞལ་ནས་ཅི་གསུང་ཞིང་གང་ཐོས་པ་ཐམས་ཅད་དམ་པའི་ཆོས་ལ་བཀྲི་བའི་ཐབས་ཡིན། ཐུགས་ལ་ཅི་དགོངས་པ་ཐམས་ཅད་ཇི་ལྟ་མཁྱེན་པའི་ཡེ་ཤེས་ཀྱི་མེ་ལོང་གཙང་མའི་ངོར་ཇི་སྙེད་མཁྱེན་པའི་གཟུགས་བརྙན་མ་འདྲེས་པ་གཟིགས་པའི་དཔལ་ཡིན་ནོ། །བླ་མ་འཁྲུལ་པ་སྲིད་མཐར་ཡང་། །འབྱུང་བ་མེད་ཀྱི་གལ་ཏེ་ན། །མཐོང་སྣང་འཁྲུལ་པ་ལྟར་སྣང་ཚེ། །རང་སྣང་བསམ་པ་མ་དག་པས། །མིག་སྐྱོན་ཅན་གྱི་གངས་ཉིད་ལ། །རྒྱུན་དུ་ནག་པོ་མི་སྲིད་ཀྱང་། །ནག་པོར་དངོས་སུ་མཐོང་དང་མཚུངས། །མཁྲིས་ནད་ཅན་གྱིས་དུང་ཉིད་ལ། །རྒྱུན་དུ་དཀར་པོ་ཉིད་ཡིན་ཡང་། །སེར་པོར་མཐོང་བ་ཉིད་དང་མཚུངས། །བླ་མ་སངས་རྒྱས་ཡིན་ན་སངས་རྒྱས་འཁྲུལ་བ་ཀུན་དང་བྲལ་བས་སྲིད་པའི་མཐར་ཡང་འཁྲུལ་བ་འབྱུང་བ་མེད་ཅིང་། གལ་ཏེ་མཐོང་ན་ཡང་རང་གི་མཐོང་སྣང་འཁྲུལ་པའི་སྣང་བ་ལ་སྐྱོན་ལྟར་སྣང་བ་ཡིན་ཏེ། རང་སྣང་འཁྲུལ་པ་དེ་རང་གི་བསམ་པ་མ་དག་པས་སྣང་བ་བསྐྱེད་པར་ཡིན་པས་སོ། །དཔེར་ན་མིག་སྐྱོན་ཅན་གྱིས་གངས་རི་དཀར་པོ་ཉིད་ཡིན་པ་ལ། རྒྱུན་དུ་ནག་པོའི་ཁ་དོག་ཡོད་པར་མི་སྲིད་ཀྱང་། ནག་པོ་ཉིད་དུ་དངོས་སུ་མཐོང་བ་དང་། མཁྲིས་ནད་ཅན་གྱིས་དུང་དཀར་པོ་ལ་བལྟས་ཀྱང་དུང་སེར་པོར་མཐོང་བ་དང་ཉིད་དང་མཚུངས་སོ། །ལོག་སྲེད་ཅན་གྱིས་ཆུ་ཉིད་ལ། །ཁྲག་རྣག་མཚོན་ཆ་མེད་ན་ཡང་། །རྣག་ཁྲག་མཚོན་ཆར་མཐོང་དང་མཚུངས། །བླ་མ་ལ་སྐྱོན་མེད་ཀྱང་འཁྲུལ་བ་ལྟར་སྣང་བ་ནི་རང་གི་བློ་མིག་མ་དག་པ་ཡིན་ཏེ། ལོག་སྲེད་ཅན་ལ་ལོག་པའི་སྣང་བ་འཆར་ལུགས་ཀྱི་དཔེར་གཞན་འཇོག་ན། དོན་ངོ་མ་ཆུ་ལ་ཁྲག་རྣག་དང་མཚོན་ཆ་མེད་ཀྱང་། ལས་ངན་འཁྲུལ་པའི་ལོག་ཤེས་ཀྱི་དབང་གིས་སེམས་ཅན་ཡི་དྭགས་དང་། ལྷ་མ་ཡིན་སོགས་ཀྱིས་ཆུ་ཉིད་ལ་རྣག་ཁྲག་དང་མཚོན་ཆ་སོགས་སུ་མཐོང་བ་དང་མཚུངས་སོ། །ཁམས་གསུམ་འདི་ན་བསོད་ནམས་དང་རྙེད་པ་ཆེན་པོ་མཆོག་ཏུ་གྱུར་པ་དེ་དམ་པའི་ཆོས་བསྒྲུབ་པ་དང་ཆོས་ལམ་ཞུགས་པ་ཡིན། དེ་ལོས་ཡིན་གཏན་གྱི་བདེ་བ་སྒྲུབ་བྱེད་ཡིན་པས་སོ། དེ་བླ་མ་ལ་བརྟེན་ནས་འབྱུང་དགོས་པ་ཡིན་པས་ན། ཆོས་དང་བླ་མ་མཇལ་བ་དེ་ཚངས་དབང་དང་འཁོར་ལོས་བསྒྱུར་བ་ཐོབ་པས་ཀྱང་དོ་ཟླ་མ་མཆིས་པ་ཡིན་པས། འདོད་ཁམས་འདི་ནས་སེམས་ཅན་གཅིག་སངས་རྒྱས་ན། བདུད་སྡིག་ཅན་གྱི་སྣང་བ་ལ་ཁོ་རང་གི་སྡེ་རིས་ལས་གཅིག་ཉུང་སོང་བསམ་ནས་མྱ་ངན་བྱེད་ཀྱིན་ཡོད། དེས་ན་རང་རེར་ནམ་བློ་ལས་སུ་མ་རུང་བར་གྱུར་ནས་བླ་མ་ལ་དད་གུས་བྱེད་པ་སོགས་ལ་ཐང་ལྷོད་བྱུང་ན། དེ་བདུད་སྡིག་ཅན་གྱི་མདའ་སྙིང་ལ་ཟུག་པའི་རྟགས་ཡིན་པས་སྤོང་དགོས། དེ་ཕྱིར་བླ་མའི་རྣམ་ཐར་ལ། །ལོག་ལྟ་སྐྱེས་ན་ཐར་ལམ་འགག །འགྲོ་འདུལ་ཐབས་མཁས་སྤྱོད་པས་ཏེ། །བརྡ་དང་ཐབས་སུ་ཤེས་པར་བྱ། །ཞེས་གོང་དུ་བཤད་པའི་རྒྱུ་མཚན་དེའི་ཕྱིར་ན་བླ་མའི་རྣམ་ཐར་དང་མཛད་སྤྱོད་ཐམས་ཅད་ལ། ལོག་ལྟ་སྐྱེས་ན་རང་ཉིད་ཀྱི་ཐར་པའི་ལམ་འགག་པར་བྱེད་ལ། བླ་མས་ཞི་རྒྱས་དབང་དྲག་གི་ལྟར་སྣང་མཛེས་དང་མི་མཛེས་གང་མཛད་ཀྱང་འགྲོ་བ་འདུལ་བའི་ཐབས་མཁས་ཀྱི་སྤྱོད་པ་ཆེད་དུ་མཛད་པ་ཡིན་པས། ཅི་མཛད་ཐམས་ཅད་བརྡ་དང་ཐབས་སུ་ཤེས་པར་བྱའོ། །ཞེས་གསུངས་སོ། །དེའི་ཕྱིར་སྣང་ཚུལ་ཇི་ལྟར་སྣང་ཡང་ངེས་པའི་དོན་དུ་བླ་མ་དམ་པ་དེ་ལ་སྐྱོན་གྱི་ཆ་ཕྲ་མོ་ཙམ་ཡང་ཡེ་ནས་མི་མངའ་བར་འགྱུར་བར་མེད་པའི་ངེས་ཤེས་གཏིང་ཚུགས་པ་ཞིག་སྐྱེས་ཕྱིན་ཆད། ལེགས་པའི་ཡོན་ཏན་ཐམས་ཅད་ཡར་ངོའི་ཟླ་ལྟར་འཕེལ་བ་བཞིན་དུ་ངམ་ངམ་ཤུགས་ལ་འབྱུང་བ་ནི། སློབ་དཔོན་ནཱ་གརྫུ་ནས། རི་དབང་རྩེ་ནས་འགའ་ཞིག་ལྷུང་གྱུར་ན། །ལྷུང་བར་མི་འགྱུར་སྙམ་ཡང་ལྷུང་བར་འགྱུར། །བླ་མའི་དྲིན་གྱིས་ཕན་པའི་ལུང་ཐོབ་ན། །གྲོལ་བར་མི་འགྱུར་སྙམ་ཡང་གྲོལ་བར་འགྱུར། །ཞེས་དཔེར་ན་རི་ཡི་རྒྱལ་པོ་རི་རབ་དང་འདྲ་བའི་རི་མཐོན་པོ་གཡང་གཟར་ཞིག་གི་རྩེ་ནས་འགའ་ཞིག་ལྷུང་བར་གྱུར་ན། ལྷུང་བར་མི་འགྱུར་སྙམ་ཡང་དོན་ལ་ལྷུང་བར་འགྱུར་ངེས་པར་ཡིན་པ་དེ་བཞིན་དུ། བླ་མའི་དྲིན་གྱིས་ཕན་པའི་གདམས་ངག་ཟབ་མོའི་ལུང་ཐོབ་ན། ང་ལ་ཕན་ཐོགས་ཅི་ཡོད་མ་སོང་བསམ་ཞིང་རང་རྒྱུད་གྲོལ་བར་མི་འགྱུར་སྙམ་ཡང་སྔར་དང་མི་འདྲ་བའི་རང་རྒྱུད་གྲོལ་བར་འགྱུར་ངེས་པར་ཡིན་ནོ། །མི་ཕན་བསམ་ཡང་ཕན་ཐོགས་ཡོད་པ་རེད། ཞེས་གསུངས་སོ། །ཡོན་ཏན་མཛོད་ལས། ཇི་ལྟར་མ་ལ་ཡ་ཡི་ནགས་ཀླུང་དུ། །རྣམ་པར་འཁྱམས་པའི་སྡོང་དུམ་ཕལ་པ་ཡང་། ཡལ་འདབ་བརླན་པའི་ཙནྡན་དྲིས་བསུང་ལྟར། །གང་ལ་བརྟེན་པ་དེ་ཡི་རྗེས་སུ་འགྲོ། །ཞེས་གསུངས་པ་བཞིན་ཏེ། དཔེར་ན་རི་མ་ལ་ཡ་ཡི་ཙན་དན་སྨན་ལྗོངས་ཀྱི་ནགས་ཚལ་དུ་་ཤིང་དུམ་ཕལ་པ་ཞིག་འཕངས་ན། ཙན་དན་གྱི་དྲི་བསུང་ཞིམ་པོ་དེ་ལ་འགོས་ནས་ཙན་དན་དང་ནོར་འདུག་པ་ཞིག་རེད་རྒྱུ་ཡོད་པ་རེད། དཔེ་དེ་བཞིན་དུ་དམ་པའི་སྐྱེས་བུ་དང་འགྲོགས་པ་དང་དམ་པའི་སྐྱེས་བུ་བསྟེན་ན། ཇི་ལྟར་སོ་སོའི་སྐྱེ་བོའི་རྒྱུད་མ་དུལ་བ་མ་རུངས་པ་ཤིང་ཕལ་པ་ཚེར་མ་ཅན་དང་འདྲ་བ་ཡིན་ནའང་། དེ་ལ་ཡོན་ཏན་གྱི་དྲི་བསུང་འགོས་ཏེ་ལེགས་པའི་ཡོན་ཏན་རེ་སྐྱེ་རྒྱུ་ཡོད་པ་རེད། བྲམ་ཟེའི་ཁྱེའུ་མི་ཐུང་སོར་མོའི་ཕྲེང་བ་ཅན་གྱིས་མི་དགུ་བརྒྱ་དགུ་བཅུ་གོ་དགུ་བསད་ནས་མཐར་སྟོང་ཕྲག་གཅིག་ཁ་སྐོང་བའི་ཆེད་དུ་རང་གི་མ་བསད་གྲབ་བྱས་པ་ན། དེ་བཞིན་གཤེགས་པ་དང་འཕྲད་པས་ཁོས་དེ་བཞིན་གཤེགས་པའི་སྐུ་ལ་ཐོ་བརྩམས་པའི་ཚེ། སྟོན་པས་དམ་པའི་ཆོས་བསྟན་པ་ཐོས་པས་རྒྱུད་འགྱུར་ཏེ། ལམ་ལ་ཞུགས་ནས་བདེན་པ་མཐོང་བའི་ལོ་རྒྱུས་ཡོད། དེས་ན་རང་ལེགས་སུ་འདོད་པའི་སྐྱེ་བོ་སེམས་ལྡན་ཞིག་ཡིན་ན། དགེ་བའི་བཤེས་གཉེན་སྤྱི་དང་། ཁྱད་པར་དུ་ཐེག་པ་ཆེན་པོའི་གསང་སྔགས་ཀྱི་མྱུར་ལམ་ཟབ་མོའི་དམ་ཆོས་ལ་འཇུག་པའི་སྐབས་འདིར། མཚན་ཉིད་ཀུན་ལྡན་གྱི་དགེ་བའི་བཤེས་གཉེན་རྒྱུད་ལས་གསུངས་པའི་བརྟག་ཐབས་ཀྱིས་བརྟགས་ཟིན་ནས། ཞེ་སྙིང་ནས་གུས་པ་ཆེན་པོ་བསྐྱེད་ཅིང་བླ་མའི་བཀའ་བཞིན་སྒྲུབ་པར་བྱེད་པ་ལ་བླ་མས་བཀའ་བཀྱོན་དྲག་པོ་ཇི་ལྟར་གནང་ཡང་། ཆོས་བཤད་པ་དང་དོན་གཅིག་པ་ཡིན་པས་གདུལ་བྱ་རང་ཉིད་ཀྱི་རྒྱུད་ལ་ཕན་པའི་མཛད་ཚུལ་ཐབས་གཞན་ཞིག་རེད་བསམ་རྒྱུ་དང་། ཕྱག་འབེབ་གནང་སྟེ་རྡུང་བཙོག་མཛད་ཀྱང་བགེགས་དང་བར་ཆད་ཞི་ཕྱིར་བྱིན་གྱིས་རླབས་པའི་ཐབས་ཉིད་དུ་མཐོང་བ་ཞིག་དགོས་ཏེ། གྲུབ་ཆེན་ན་རོ་པས་ཏེ་ལོ་པ་བསྟེན་དུས། ན་རོ་པ་ལོ་བཅུ་གཉིས་ཀྱི་བར་དུ་གྲོང་དུ་བསོད་སྙོམས་ཁོ་ན་བསླངས་ནས་བླ་མ་ལ་ཕུལ། དེའི་ཚེ་ན་ཆོས་ཚིག་གཅིག་ཀྱང་མ་གསུངས་པར་མ་ཟད། ཁྱོད་ཕ་ཡུལ་གང་ཡིན། མིང་ཅི་ཟེར་ཙམ་ཡང་འདྲི་མ་མྱོང་ཞིང་། སློབ་མའི་སྡིག་སྒྲིབ་སྦྱོང་ཕྱིར་དཀའ་བ་མང་པོ་སྤྱད་བཅུག་སྟེ། ཁང་རྩེག་མཐོན་པོའི་ཐོག་ནས་མཆོང་བཅུག་པ་དང་། སྙུག་མ་བཤགས་ནས་ཤ་གསེབ་ཏུ་དྲངས་པ་སོགས་སྡུག་འདྲ་མི་འདྲ་མྱོང་བཅུག་ནའང་། ད་རུང་ཡིད་མ་ཆད་པར་དད་ལོག་མ་ཤོར་ནས་བླ་མ་སངས་རྒྱས་དངོས་སྣང་གི་དད་པ་བཞག་སྟེ་ཞབས་འབྲིང་བྱས། སྐབས་ཤིག་ལ་ཁྱོད་ཀྱི་བླ་མ་ང་མ་ཡིན། ངའི་སློབ་མ་ཁྱོད་མ་ཡིན་ལ་སོགས་གསུངས་ནས་གཤེ་བ་མང་པོར་མཛད་ཀྱང་། ན་རོ་པ་བླ་མ་ལ་དད་པ་དང་བསྙེན་བཀུར་བྱེད་པའི་བློ་ལྡོག་མ་མྱོང་། སྐབས་ཤིག་ལ་ཁྱིམ་བདག་ཆེན་པོ་ཚང་ཞིག་གིས་སྟོན་མོ་བྱེད་སར་བསོད་སྙོམས་མཛད་དེ། བཟའ་བཏུང་ཚོད་མའི་རིགས་མང་པོ་དང་ཁྱད་པར་དུ་སྔོ་མའི་ཚོད་མ་ཞིམ་པོ་ཞིག་ལོན་པ་བླ་མར་ཕུལ་བས། དེ་ཉིན་པར་བླ་མ་སྔར་དང་མི་འདྲ་བ་ཐུགས་དགྱེས་ནས། མིང་ལ་བུ་ཞེས་བོས་ནས། ཁྱོད་ཀྱིས་འདི་འདྲའི་ཟ་མ་ཞིམ་པོ་གང་ནས་རྙེད་པ་ཡིན་ཞེས་གསུངས་པ་ན། ན་རོ་པ་ས་དང་པོ་ཐོབ་པ་ཙམ་གྱི་དགའ་བ་སྐྱེས་ཏེ། ངས་ལོ་བཅུ་གཉིས་ལ་ཞབས་ཕྱི་ཞུས་ཀྱང་སུ་ཡིན་ཙམ་གསུངས་མ་མྱོང་ན། དེ་རིང་བུ་ཞེས་གསུངས་པ་དེ་ཅི་འདྲའི་མི་སྲིད་པའི་བདེ་སྐྱིད་ཅིག་རེད་བསམ་པ་དང་། ཏེ་ལོ་པས་བུ་མཆོག་ན་རོ་པ་ད་དུང་འཁྱེར་ཤོག་གསུངས་པས། ཡང་སོང་བ་ན་དེ་བཞིན་གསུངས་པས། དེ་འདྲ་ལན་བཞིའི་བར་དུ་སོང་སྟེ་བསླངས་ནས་བླ་མར་འབུལ་ཡང་ད་རུང་སོང་གསུངས་པ་ན། ད་འགྲོ་ན་ངོ་ཚ་ཞིང་མ་འགྲོ་ན་བླ་མ་ཐུགས་མི་དགྱེས་པར་འགྱུར་རོ་སྙམ་བཞིན་ཡང་སོང་བ་ན། དེ་ཚང་ལས་ཀ་བྲེལ་བའི་སྐབས་དང་བསྟུན་ནས་ཚོད་མ་སྣོད་དང་བཅས་པ་བརྐུས་པ་ན། བདག་པོ་ཚང་གིས་བརྡུངས་ནས་རོ་དང་འདྲ་བར་བྱས། བླ་མས་ཨེ་ན་དྲིས་པས། ན་བས་མི་ཚད་རོ་འདྲ་རེད་ཐལ་ཞེས་ཞུས། དེའི་ཐོག་ནས་བླ་མ་ཏེ་ལོ་པ་ཐུགས་མཉེས་པས་ཐུགས་ལ་བཏགས་ཏེ་གདམས་ངག་བསྟན་པས་ཟླ་བ་དྲུག་ལ་བསྒྲུབ་པས་དངོས་གྲུབ་བརྙེས་པ་རེད། ལུང་གི་དབྱེ་བར། མདོར་ན་སྐུ་ཡིས་རྡུང་བཙོག་གསུང་གི་བཀའ་བཀྱོན་གནང་བ་དང་། དྲག་སྔགས་བཟླས་པས་འདུལ་བ་དང་། གཡུལ་སྤྲོད་པའི་ཚུལ་གྱིས་མཚོན་ཆ་བསྣུན་ནས་ཕུགས་པ་དང་བརྡེག་པ་སོགས་ཞི་དྲག་གི་མཛད་པ་ཅི་ལྟར་མཛད་ཀྱང་། སློབ་མ་རང་ཉིད་རྒྱུད་ཀྱི་སྐྱོན་གྱི་དྲི་མ་སེལ་བའི་ཐབས་ཡིན་གྱི་བསམ་ནས། བླ་མའི་མཛད་པ་དེ་ལ་མ་གུས་པ་སྤང་བར་བྱ་སྟེ། བླ་མའི་སྐུ་གསུང་ཐུགས་ཀྱི་མཛད་པ་ནི། ཅི་ལྟར་མཛད་ཀྱང་སངས་རྒྱས་ཀྱི་རྣམ་འཕྲུལ་ཡིན་པས་དེའི་སྒྱུ་འཕྲུལ་གར་གྱི་ཆོ་འཕྲུལ་རོལ་པ་སྣ་ཚོགས་སུ་མཛད་པ་ལས། གཞན་དུ་མ་དག་པ་ཅི་ཡང་ཏེ་ཅུང་ཟད་ཀྱང་བསམ་པར་མི་བྱ། མ་གུས་པ་དང་མ་དག་པར་བསམ་པར་བྱས་ན། གྲོགས་ཁ་རུ་ཡོང་བ་ལྕེ་ཡིས་འཕུལ་ཏེ་དངོས་གྲུབ་ཐོབ་པ་ལ་རྒྱབ་ཀྱིས་ཕྱོགས་པ་ཡིན་པས། བླ་མ་ལ་མོས་གུས་ལོག་ན་གང་ཟག་ཉམས་པ་ཅན་དུ་གྱུར་པས་ཉམས་པའི་ཆད་པ་བདུད་ཀྱིས་འཛིན་ཅིང་། ཚེ་འདིར་བསམ་པའི་དོན་མི་འགྲུབ་ནད་མང་ཚེ་ཐུང་ཞིང་། ཕྱི་མར་ངན་འགྲོར་ལྟུང་བར་འགྱུར་རོ། །ཞེས་སོ། །དེའི་ཕྱིར་བློ་དང་ལྡན་པ་གང་ཞིག་གིས་འདི་ལྟར་བསམ་པར་བྱ་སྟེ་བདག་གི་བླ་མ་འདི་ནི་དོན་དུ་སྐྱོན་ཀུན་ཟད་ཡོན་ཏན་ཀུན་རྫོགས། སྤངས་རྟོགས་མཐར་ཕྱིན་པའི་སངས་རྒྱས་རྣམས་དང་ཁྱད་པར་མེད་ཀྱང་། རང་རེ་དུས་སྙིགས་མའི་གདུལ་བྱའི་སེམས་ཅན་བསོད་ནམས་དང་སྐལ་བ་དམན་པས། བླ་མ་འདིའི་སྐུ་གསུམ་གྱི་སྣང་བ་ཇི་བཞིན་པ་ནི། རང་ངོར་ལས་མ་དག་པས་སྣང་དབང་མ་མཆིས་པའམ་སྣང་བའི་སྐལ་བ་མེད་པས་ཐ་མལ་གྱི་ཚུལ་བསྟན་པ་ཡིན་ཏེ། རིག་འཛིན་འདུས་རྒྱུད་ལས། སངས་རྒྱས་རྣམས་དང་དེ་ཡི་སྲས། །གང་གིས་གདུལ་བྱ་དེ་ཉིད་ལ། །དེ་དང་མཐུན་པའི་གཟུགས་སྟོན་ཏེ། །ཞེས་རྫོགས་པའི་སངས་རྒྱས་བཅོམ་ལྡན་འདས་རྣམས་དང་། དེ་ཡི་སྲས་ས་ལ་གནས་པའི་རིག་འཛིན་དང་བྱང་ཆུབ་སེམས་དཔའ་རྣམས་ཀྱིས་གང་དང་གང་གིས་འདུལ་བའི་གདུལ་བྱ་དེ་ཉིད་ལ། དེ་དང་དེར་མཐུན་པའི་འདུལ་བྱེད་ཀྱི་གཟུགས་སྟོན་ཏེ་ཞེས་གསུངས་སོ། །དེའང་འདི་ལྟར་སངས་རྒྱས་ཆོས་ཀྱི་སྐུ་ནང་གསལ་གཞོན་ནུ་བུམ་པའི་སྐུ་ཀུན་གཞིའི་སྟེང་ནས་ཁྱད་ཆོས་དྲུག་གི་འཕགས་པའི་གདོད་མའི་མགོན་པོ་དེ་ནི་སོགས་ཀྱི་ཚིག་འདི་རྣམས། རྫོགས་པ་ཆེན་པོ་ཀ་དག་ཁྲེགས་ཆོད་ཀྱི་དགོངས་པ་དང་བསྒྲིགས་ནས་འགྲེལ་དགོས་པ་ཞིག་རེད དེ་ལྟ་བུའི་བླ་མ་དེ་ཡང་འདི་ལྟར། དབྱིངས་རང་བཞིན་གྱི་རྣམ་པར་དག་པ་གྲུབ་བསལ་མེད་པའི་ཆོས་ཉིད་ལ། གློ་བུར་གྱི་དྲི་མ་དག་པར་བྱས་ནས་ཟད་དང་མི་སྐྱེ་བའི་ཡེ་ཤེས་བརྙེས་པའི་དག་པ་གཉིས་ལྡན་གྱི་རང་བཞིན་སངས་རྒྱས་ཆོས་ཀྱི་སྐུ། ཟག་མེད་ཀྱི་ཆོས་སྡེ་ཚན་ཉེར་གཅིག་གི་བདག་ཉིད་ཅན་གྱི་སྐུ་དེ་ཉིད། རྒྱུ་ལས་མ་བྱུང་བའི་འབྲས་བུ། ལུང་ལས་མ་བྱུང་བའི་སངས་རྒྱས། ནང་གསལ་ཤིན་ཏུ་ཕྲ་བའི་ཆོས་དབྱིངས་ཡེ་ཤེས་རིག་པའི་ངོ་བོ་དང་གཉིས་སུ་མེད་པ་ལ་གཞོན་ནུ་བུམ་པའི་སྐུ་ཞེས་གསུངས་ན། དེ་ལྟ་བུའི་རིག་པའི་ཡེ་ཤེས་དེ་ཉིད་སྐྱེ་འཆི་བགྲེས་རྒུད་དང་བྲལ་བས་གཞོན་ནུ། ཕྱི་གསལ་དུ་མི་མངོན་པར་གཏིང་གསལ་གྱི་ཚུལ་དུ་གནས་པའམ། ནང་གསལ་ཤིན་ཏུ་ཕྲ་བའི་ཡེ་ཤེས་ཡིན་པའི་ཆ་ནས་དོན་དམ་ལ་ཆོས་ཀྱི་སྐུའི་ཐ་སྙད་སྦྱར་ཏེ་་བུམ་སྐུ་གསུངས་པ་ཉིད། ཀུན་གཞིའི་དྲི་མ་དག་ཅིང་གཞིའི་གནས་ལུགས་ལུང་མ་བསྟན་ལས་ཁྱད་ཆོས་དྲུག་གིས་འཕགས་པའི་གདོད་མའི་ནང་དབྱིངས་གཞོན་ནུ་བུམ་པའི་སྐུར་གྲགས་པ་འདི། ངེས་གསང་རྫོགས་པ་ཆེན་པོའི་འབྲས་བུའི་འཆད་ཚུལ་ཐུན་མོང་མ་ཡིན་པའི་དགོངས་པ་ཡིན། ཀུན་གཞི་ཆོས་དབྱིངས་སུ་ཟད་པའི་ཆ་ནས་དབྱེ་བའི་ཁྱད་པར་འདི་དགོངས་འགྲེལ་མཁན་པོ་ཐམས་ཅད་ཀྱིས་མི་ཤེས་པའི་གསང་བའི་དཀའ་གནད་ཅིག་ཡིན། ཀུན་གཞི་ལུང་མ་བསྟན་གྱི་གཞི་དེའི་སྟེང་ནས་གཞི་ལས་འཕགས་པ། རང་ངོར་སྣང་། བྱེ་བྲག་ཕྱེད། ཕྱེད་ཐོག་ཏུ་གྲོལ་བ་སོགས་ཁྱད་ཆོས་དྲུག་གིས་འཕགས་པའི་ཀུན་བཟང་གདོད་མའི་མགོན་པོ་ཆོས་སྐུ་ཀུན་ཏུ་བཟང་པོ་དེ་ནི། སྒྲིབ་པ་ཀུན་སྤངས་རྟོགས་པ་ཕུལ་དུ་ཕྱིན་པའི་ཡེ་ཤེས་ཀྱི་མཐོང་བ་རྣམ་པར་དག་པའི་མཐོང་བ་ལས། འཆིང་བ་ཀུན་ལྡན་གྱི་སོ་སྐྱེས་ལྟ་ཅི། ས་བཅུའི་དབང་ཕྱུག་ཆེན་པོ་བྱང་ཆུབ་སེམས་དཔའ་གཞན་གྱིས་སྤྱོད་ཡུལ་དུ་མ་གྱུར་པ་སྟེ། བློ་དང་སྙམ་བྱེད་དཔེ་དང་འགལ་བའི་ཕྱིར། །ས་བཅུའི་དབང་ཕྱུག་གི་ཡང་སྤྱོད་ཡུལ་མིན། །ཞེས་གསུངས་སོ། །ལོངས་སྤྱོད་རྫོགས་པའི་སྐུ་ནི། གནས་ངེས་པ་འོག་མིན་སྟུག་པོ་བཀོད་པར། འཁོར་ངེས་པ་ས་བཅུའི་བྱང་ཆུབ་སེམས་དཔའ་འབའ་ཞིག་ལ། ཆོས་ངེས་པ་ཐེག་པ་ཆེན་པོ་ཁོ་ན། སྟོན་པ་ངེས་པ་རྣམ་པར་སྣང་མཛད་སོགས་རིགས་ལྔའི་སངས་རྒྱས་ཀྱིས། དུས་ངེས་པ་རྟག་པ་རྒྱུན་གྱི་འཁོར་ལོ་སྟེ་ངེས་པ་ལྔ་དང་། ལོངས་སྤྱོད་རྫོགས་པའི་ཡན་ལག ཁ་སྦྱོར་གྱི་ཡན་ལག བདེ་བ་ཆེན་པོའི་ཡན་ལག རང་བཞིན་མེད་པའི་ཡན་ལག སྙིང་རྗེས་ཡོངས་སུ་གང་བའི་ཡན་ལག རྒྱུན་མི་ཆད་པའི་ཡན་ལག འགོག་པ་མེད་པའི་ཡན་ལག་སྟེ་ཁ་སྦྱོར་ཡན་ལག་བདུན་ལྡན་དེ་ནི་ཐུན་མོང་མ་ཡིན་པའི་གདུལ་བྱ་ས་བཅུའི་དབང་ཕྱུག་ཁོ་ན་ལས་གཞན་ལ་མི་སྣང་། སངས་རྒྱས་སྤྲུལ་པའི་སྐུ། ཇི་སྐད་དུ། གནས་དང་གནས་མིན་རྣམ་སྨིན་ཁམས། །མོས་དང་དབང་པོ་བསམ་གཏན་དང་། །ལམ་དང་སྔོན་གནས་འཆི་འཕོ་དང་། །ཟག་པ་ཟད་མཁྱེན་སྟོབས་བཅུའོ། །ཞེས་དང་། རྟོགས་དང་སྤངས་པ་ལམ་དང་གེགས། །སྟོན་ལ་མི་འཇིགས་རྣམ་པ་བཞི། །ཞེས་པ་ལྟར་སྟོབས་བཅུ་དང་མི་འཇིགས་པ་བཞི། མ་འདྲེས་པ་བཅོ་བརྒྱད། བསྲུང་བ་མེད་ལ་སོགས་པའི་རྩལ་མངའ་བ་དེ་ནི་གཙོ་བོ་ཉན་རང་གི་སྟོན་པར་གྱུར་ཀྱང་། ཆོས་ལོངས་སྤྲུལ་གསུམ་དེ་དག་ལས་དངོས་སུ་ཆོས་ཞུ་བའི་བཀའ་དྲིན་ནོད་པའི་བསོད་ནམས་ཀྱིས་ཕོངས་ཤིང་དབུལ། དེའང་སངས་རྒྱས་སྐུ་གསུམ་གྱི་སྟོན་པ་དེ་དག་གི་ཐུགས་རྗེ་ལ་ཉེ་རིང་དང་ཕྱོགས་རིས་མངའ་ནས་རང་རེ་སྙིགས་མའི་སེམས་ཅན་རྣམས་ཆེད་དུ་ཐུགས་བློས་གཏོང་བའམ་དོར་བ་མ་ཡིན་ཡང་། ཉི་མ་ལ་ཉེ་རིང་དང་ཕྱོགས་རིས་ཀྱི་ཀུན་སློང་མེད་ཀྱང་བྲག་ཕུག་ཁ་བྱང་བསྟན་ལ་ཉི་མའི་སྣང་བ་མི་འཆར་བ་བཞིན་དུ། དུས་སྙིགས་མའི་སེམས་ཅན་རང་ཉིད་ལས་དང་སྐལ་བ་དམན་པས་སངས་རྒྱས་སྐུ་གསུམ་གྱི་རང་བཞིན་དེ་དག་གི་སྐུ་མཇལ་བ་དང་། གསུང་ཐོས་པའི་སྣོད་དུ་མ་གྱུར་པས་ད་ལྟ་ཕན་ཆད་མཐའ་མེད་ཀྱི་འཁོར་བ་མེའི་འོབས། སྲིན་མོའི་གླིང་། སྦྲུལ་གྱི་ཚང་། རྒྱལ་པོའི་བཙོན་དོང་ལྟ་བུར་ལྷུང་བ་འདི་ཙམ་དུ་ཟད། དེ་ལྟར་ནའང་། མེད་པའི་ནང་གི་བསོད་ནམས། ད་རེས་མི་ལུས་ཐོབ་པའི་དུས་འདིར་བཤེས་གཉེན་དམ་པ་མཚན་ཉིད་དང་ལྡན་པ་འདི་ལྟ་བུ་མཇལ་བ་ནི། བསོད་ནམས་ཤིན་ཏུ་ཆེ་ཞིང་སྐལ་བ་བཟང་བ་ཡིན། བསྟན་པའི་གནས་ཚད་ལྔ་བརྒྱ་ཕྲག་བཅུ་ཡིན་པ་ལས་རང་རེ་ལྔ་བརྒྱ་ཐ་མ་རྩོད་ལྡན་སྙིགས་མ་ལྔ་བདོའི་སྐབས་ལ་ཁེལ་བའི་སེམས་ཅན་རྣམས་ཀྱི་དོན་དུ། རྔ་བོ་ཆེན་པོའི་མདོ་ལས། མྱ་ངན་མ་བྱེད་ཀུན་དགའ་བོ། །སྨྲེ་སྔགས་མ་འདོན་ཀུན་དགའ་བོ། །ང་ཉིད་ཕྱི་མའི་དུས་ཀྱི་ཚེ། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་གསུངས་པ་ལྟར། རང་རེ་སྙིགས་མའི་སེམས་ཅན་འདུལ་བའི་ཆེད་དུ་སངས་རྒྱས་དེ་དག་ཀུན་གྱིས་མཐུན་པར་སྣང་བ་སོ་སོའི་སྐྱེ་བོའི་སློབ་དཔོན་གྱི་ཚུལ་དུ་སྤྲུལ་ནས་གདུལ་བྱ་འདུལ་བར་མདོ་རྒྱུད་མང་པོ་ནས་གསུངས་ཏེ། སློབ་དཔོན་ཆེན་པོས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །བླ་མ་དཔལ་ཆེན་ཧེ་རུ་ཀ །ཞེས་དང་། སངས་རྒྱས་མཉམ་སྦྱོར་ལས། སངས་རྒྱས་ཆོས་དང་དགེ་འདུན་དང་། །བླ་མ་ཡང་ནི་བཞི་པ་ཡིན། །ཞེས་དང་། རྒྱུད་གཞན་ལས། སངས་རྒྱས་རྣམས་དང་དེ་ཡི་སྲས། །གང་གི་གདུལ་བྱ་དེ་ཉིད་ལ། །དེ་དང་མཐུན་པའི་གཟུགས་བསྟན་ཏོ། །ཞེས་པ་ལ་སོགས་པ་གསུངས་པས་ན། བདག་གི་བསོད་ནམས་ཀྱི་བགོ་སྐལ་དུ་བྱོན་པའི་བླ་མ་དམ་པ་འདི་ཡང་ངེས་པའི་དོན་དུ་ཐ་མལ་བ་མ་ཡིན་པར་སངས་རྒྱས་བྱང་སེམས་ཀྱི་སྤྲུལ་པ་ཡིན་པར་གྲུབ་ལ། རང་ངོས་ནས་སངས་རྒྱས་མཇལ་བ་དང་མི་གཉིས་པའི་དངོས་ཀྱི་གདམས་པ་བསྟན་པས་ན་བཀའ་དྲིན་སངས་རྒྱས་ལས་ཀྱང་ལྷག མཚན་དཔེས་སྤྲས་པའི་སངས་རྒྱས་དངོས་སུ་མཇལ་ཡང་། ངས་ནི་ཁྱོད་ལ་ཐར་པའི་ཐབས་བསྟན་གྱི། །ཐར་པ་རང་ལ་རག་ལས་ཤེས་པར་གྱིས། །ཞེས་པ་ལྟར། ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་བདུད་རྩི་བསྟན་ནས་ཐར་པ་དང་ཐམས་ཅད་མཁྱེན་པའི་གོ་འཕང་ལ་བཀྲི་བ་ཉིད་ལས་ལྷག་པ་ནི་མཛད་རྒྱུ་མེད་ལ། དེའི་ཕྱིར་དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་ལ་སོགས་པས་ལེགས་པར་བསྟེན་དགོས། སྤྱིར་དགེ་བའི་བཤེས་གཉེན་བསྟེན་ལུགས་ལ། ཀུན་མཁྱེན་འཇིགས་གླིང་གིས། ཡང་དག་དོན་ལ་སྦྱོར་བའི་དད་པ་དང་། །ལྟར་སྣང་ཚེ་འདི་བསྒྲུབ་པའི་འདོད་པ་དང་། །གཉིས་ཀར་ལུང་དུ་མ་བསྟན་གཟུ་ལུམ་ཅན། །གསུམ་དུ་གནས་པའི་མཚན་ཉིད་བརྟག་པར་གཅེས། །གསུངས་ཡོད་རེད། དད་པས་འཇུག་པའི་ཚུལ། འདོད་པས་འཇུག་པའི་ཚུལ། ལུང་མ་བསྟན་གྱིས་འཇུག་པའི་ཚུལ་དང་གསུམ་ཡོད་པ་ལས། དང་པོ་དད་པས་འཇུག་ལུགས་ནི། ཆོས་དང་བླ་མ་རྟེན་དང་བརྟེན་པའི་རང་བཞིན་དུ་ཤེས་ནས། དད་དང་ངེས་འབྱུང་གི་སྒོ་ནས་བསྟེན་པ་ཡིན་པས་ཐོས་བསམ་སྒོམ་གསུམ་རྣམ་དག་ཏུ་བྱས་ནས་མཐར་ཐུག་རང་གཞན་གཉིས་དོན་འགྲུབ་པ་རེད། འདོད་པས་འཇུག་པའི་གང་ཟག་གིས། ཚེ་འདི་བདེ་སྐྱིད་སྙན་གསུམ་གྱི་ཆེད་དུ་འཇུག་པ་རེད། ཆོས་དང་བླ་མ་ལ་བརྟེན་རྒྱུའི་རྣམ་པ་ཙམ་ལས་ཀུན་སློང་ཆགས་སྡང་ལས་མ་འདས་པ། ཀུན་གྱི་མཐོང་སྣང་ཡག་བྱེད་དང་། ཕྲིན་ལས་མངའ་ཐང་རྒྱས་བྱེད། དབང་དང་ལུང་དེ་ཚོ་ཐོབ་སོང་ན་རྗེས་མར་མཁོ་ཡོང་བསམ་པ། ཕ་རོལ་དགྲ་ཟླས་འགྲན་མི་ནུས་པའི་ཕྱིར་དང་། སྐྱིད་པོ་སོས་དལ་ཉལ་རྒྱུའི་དོན། ཁ་སོས་བྱེད། ཉལ་ཉལ་ཁར་བཟའ་རྒྱུ་ལོན་ཕྱིར་སོགས། མདོར་ན་ཆགས་སྡང་ང་རྒྱལ་ཕྲག་དོག་སོགས་ཚེ་འདི་ཁོ་ན་དོན་དུ་གཉེར་བའི་ཀུན་སློང་དུག་ཅན། ངེས་འབྱུང་དང་གཞན་ཕན་གྱི་བསམ་པས་མ་ཟིན་པར་འཁོར་བ་ལས་གྲོལ་བྱེད་དུ་མི་འགྱུར། ལུང་མ་བསྟན་གྱིས་འཇུག་པ་ནི། གོང་གི་དེ་གཉིས་ཀའི་ཕྱོགས་སུ་མ་གཏོགས་པར། ཅི་དྲན་འདི་དྲན་གྱི་དམིགས་ཡུལ་མེད་པ། ཁྱི་ལྡོམ་མིའི་རྗེས་སུ་འབྲང་བ་ལྟ་བུ་དང་། སྤྲེའུའི་མཉམ་བཞག་དང་། ནེ་ཙོའི་འདོན་པ་ལྟར་ཕན་ཅི་ཐོགས་འདི་ཐོགས་མེད་པར་རང་གར་འཇུག་པའང་ཡོད། དེ་ལྟར་ཆོས་ལ་འཇུག་ཚུལ་གསུམ་ཡོད་པ་ལས། འདོད་པས་འཇུག་པ་དང་ལུང་མ་བསྟན་གྱིས་འཇུག་པ་མ་ཡིན་པར། དད་པས་འཇུག་པའི་སྒོ་ནས་བཤེས་གཉེན་ལེགས་པར་བསྟེན་པའི་དོན། དེས་གསུངས་པའི་ཆོས་དང་མན་ངག་བཞིན་རང་གིས་ཉམས་སུ་ལེན་ནུས་ན། མངོན་མཐོ་དང་ངེས་ལེགས་ཀྱི་གོ་འཕང་ཐོབ་པར་ཐེ་མི་ཚོམ། ཚེ་འདིའི་ཟས་གོས་གྱི་ན་ཕྲན་ཚེགས་ཉུང་ངུ་ངན་ངོན་ཙམ་སྦྱིན་པའི་ཡོན་གྱི་བདག་པོའམ་བླ་དཔོན་ག་གེ་མོ་དང་། དགྲ་གདོན་སོགས་ལས་སྐྱོབ་པ་དག་ལའང་བཀའ་དྲིན་ཆེ་བར་རྩི་དགོས་ན། འཁོར་བའི་སྡུག་བསྔལ་ལས་སྐྱོབ་མཁན་ལ་བཀའ་དྲིན་ཆེ་བ་ལོས་རྩི། ས་ཆ་འགའ་རེའི་ཁ་སྲོལ་ཡག་པོ་དང་གུས་ཞབས་འདྲ་ཡིན་ས་རེད་མོད། མི་འགའ་རེ་ལ་ཇ་ཕོར་གང་བླུག་ནའང་བཀའ་དྲིན་ཆེ་ཟེར་ནས་ལྕེའང་གནར་འདུག་ཀྱང་། དེ་བཀའ་དྲིན་ཨེ་ཆེ་མི་ཤེས་ཏེ། བཀའ་དྲིན་ཆེ་ངེས་པར་ངན་སོང་དང་འཁོར་བ་ལས་ཐར་པའི་ཐབས་ཆོས་བསྟན་པ་བཀའ་དྲིན་ཆེ། དེ་ལྟར་འཇིག་རྟེན་ན་ཕན་ཐོགས་ཆུང་ངུ་ལའང་བཀའ་དྲིན་ཆེ་བར་རྩི་ན། གལ་ཏེ་བླ་མས་ཆོས་མ་བསྟན་ན། འཁོར་བ་ཐོག་མེད་ནས་སྡུག་བསྔལ་མྱོང་བ་ཡིན་པར་མ་ཟད་མཐའ་མེད་དུའང་མྱོང་ངེས་ཡིན་ཏེ། དེའི་རྒྱུ་ལས་ངན་གསོག་བཞིན་ཡོད་པས་སོ། དེས་ན་བླ་མས་ཆོས་བསྟན་པའི་སྒོ་ནས་འཁོར་བ་མཐའ་མེད་ཀྱི་སྡུག་བསྔལ་སེལ་ཞིང་། གཏན་གྱི་བདེ་བ་རྫོགས་པའི་སངས་རྒྱས་ཀྱི་གོ་འཕང་ལ་བཀོད་པར་མཛད་པའི་བཀའ་དྲིན་ནི། ལུང་བ་རྟ་ནོར་གྱིས་བཀང་། མདུན་ཅོག་གསེར་དངུལ་གྱིས་བཀང་བས་མི་ཚད། དབང་ཆེན་གསེར་གྱི་ས་གཞི་འདིར་འཛམ་བུའི་ཆུ་བོའི་གསེར་གྱིས་བཀང་ནས་རིན་པོ་ཆེ་སྣ་ཚོགས་ཀྱིས་བརྒྱན་ཏེ་ཕུལ་ཡང་བཀའ་དྲིན་གཞལ་བར་ག་ལ་ནུས་ཏེ་ཆ་ཙམ་ཡང་གཞལ་བར་མི་ནུས་སོ། །རྒྱུ་མཚན་དེའི་ཕྱིར་སངས་རྒྱས་ཐམས་ཅད་བཀའ་དྲིན་ཆེ་ཡང་། གདུལ་བྱ་རང་ངོས་ནས་སངས་རྒྱས་ཐམས་ཅད་ལས་བླ་མ་དམ་པ་དེ་བཀའ་དྲིན་ཆེ་ཞིང་ལྷག་གོ་སྙམ་པའི་དད་གུས་དང་མོས་པ་སྙིང་ཁུང་རུས་པའི་གཏིང་ནས་བསྐྱེད་དགོས་ཏེ། འཕགས་པ་དཀོན་མཆོག་སྤྲིན་ལས། དེ་ལ་སྟོན་པའི་འདུ་ཤེས་བསྐྱེད་པར་བྱའོ། །ཞེས་པ་དང་། མ་རྒྱུད་ཀློང་གསལ་ལས། ནད་གདོན་ཞི་བྱེད་སྨན་པའི་མཆོག །དགོས་འདོད་འབྱུང་བའི་རིན་པོ་ཆེ། །ཐམས་ཅད་དབང་དུ་སྡུད་བྱེད་རྩི། །འགྲོ་བ་མ་ལུས་སྒྲོལ་བའི་གྲུ། །ཞེས་བླ་མ་དམ་པ་འདི་འཁོར་བའི་སྡུག་བསྔལ་གྱི་ནད་གདོན་ཞི་བར་བྱེད་པའི་སྨན་པའི་མཆོག་ཡིན། ཡིད་ལ་བསམ་པའི་དགོས་འདོད་འབྱུང་བའི་ཡིད་བཞིན་གྱི་ནོར་བུ་རིན་པོ་ཆེ་ཡིན། འགྲོ་བ་མ་ལུས་པ་དབང་དུ་སྡུད་ཅིང་། དབང་དུ་བསྡུས་ནས་དད་ཅིང་གུས་པས་ཐར་པའི་ལམ་དང་མི་འབྲལ་བ་སྦྱོར་བར་བྱེད་པའི་འབྱར་རྩི་ལྟ་བུ་ཡིན། འགྲོ་བ་མ་ལུས་པ་འཁོར་བའི་རྒྱ་མཚོ་ཆེན་པོ་ལས་སྒྲོལ་བའི་གྲུ་ཡང་ཡིན། ཕྲིན་ལས་ཀུན་གྱི་མངའ་བདག་མཆོག །ཐོག་མར་བླ་མ་གལ་ཆེའོ། །གང་ཟག་འཁོར་བར་ཞེན་པ་རྣམས། །ཞེན་པ་བཟློག་ཐབས་བླ་མ་གཙོ། །ཞེས་ཞི་རྒྱས་དབང་དྲག་གི་ཕྲིན་ལས་ཀུན་གྱི་ལས་ཐམས་ཅད་འགྲུབ་པར་བྱེད་པའམ་རྒྱལ་བའི་ཕྲིན་ལས་མི་ཟད་རྒྱན་གྱི་འཁོར་ལོའི་མངའ་བདག་མཆོག་ཡིན་པས་ན། བདེ་བར་འདོད་པ་ཐམས་ཅད་ཀྱིས་ཐོག་མར་བླ་མ་ཚུལ་བཞིན་བསྟེན་པ་གལ་ཆེའོ། གང་ཟག་བློ་རྟུལ་བ་འགའ་ཞིག་འཁོར་བར་ཞེན་པ་ཨ་འཐས་པ་རྣམས་ཀྱང་། འཁོར་བ་ལ་ཞེན་པ་ལྡོག་པའི་ཐབས་ལ་བླ་མ་བསྟེན་པ་ཤིན་ཏུ་གཙོ། གང་ཟག་དམ་ཆོས་མ་དྲན་ཞིང་། །དགེ་སྡིག་ངོ་མི་ཤེས་པ་རྣམས། །ཆོས་སྟོན་དགེ་སྡིག་ངོས་སྟོན་ཕྱིར། །བླ་མ་དམ་པ་ཤིན་ཏུ་གཅེས། །ཞེས་ཚེ་འདི་སྣང་ལ་ཞེན་ཆེ་བའི་གང་ཟག་འགའ་རེས་དམ་པའི་ཆོས་བསྒྲུབ་པ་གནད་ཆེ་བར་མ་ཤེས་པས་ཆོས་སྒྲུབ་པ་མ་དྲན་ཞིང་། དགེ་སྡིག་ངོ་མི་ཤེས་པའི་བླུན་པོ་ཆོས་མེད་རྣམས་ལ་དགེ་སྡིག་བླང་དོར་གྱི་དམ་པའི་ཆོས་སྟོན་པའི་སྒོ་ནས། དགེ་བ་འདི་རེད། དེ་སྒྲུབ་ན་འབྲས་བུ་བདེ་བ་ཐོབ། སྡིག་པ་འདི་རེད་དེ་བྱེད་ན་སྡུག་བསྔལ་འབྱུང་བ་རེད། ཅེས་དགེ་སྡིག་རྒྱུ་འབྲས་ངོས་འཛིན་གསལ་པོར་སྟོན་པའི་ཕྱིར་དུ། ཚེ་འདི་ཕྱི་རང་གཞན་གཉིས་ཀའི་དོན་དུ་བླ་མ་དམ་པ་བསྟེན་པ་ནི་ཤིན་ཏུ་གཅེས་པ་ཡིན། སྒོམ་སྐྱེས་གེགས་ཀྱིས་ཐུམས་པ་ལ། །གེགས་སེལ་འབྲས་བུ་འབྱུང་བ་ཡང་། །བླ་མ་དག་གི་དྲིན་ལས་འབྱུང་། །ཞེས་རྣལ་འབྱོར་པ་སྒོམ་བསམ་གཏན་ལ་མཉམ་པར་བཞག་པ་ལ་གནས་པ་ཞིག་ཡིན་ནའང་། སྒོམ་ལས་སྐྱེས་པའི་གེགས་གོལ་ཤོར་ནོར་གསུམ་ལ་སོགས་པ་སྒོམ་སྐྱོན་གྱིས་འཐུམས་པ་ལ། གེགས་སེལ་གྱི་མན་ངག་ལ་བརྟེན་ནས་བྱུང་བའི་ཉམས་རྟོགས་ཀྱི་འབྲས་བུ་ཡང་དག་འབྱུང་བ་ཡང་། བླ་མ་མེད་ན་འབྱུང་ཐབས་མེད་པས་བླ་མ་དག་གི་དྲིན་ལས་ལམ་གྱི་གེགས་སེལ་དེ་བྱུང་བ་རེད། ཅེས་གསུངས་པ་དང་། རྒྱུ་དང་འབྲས་བུའི་ཆོས་རྣམས་ཀུན། །བླ་མའི་ཞལ་ལས་འབྱོན་པ་ཡིན། །དུས་གསུམ་སངས་རྒྱས་ཐམས་ཅད་ཀྱང་། །བླ་མ་དམ་པ་བསྟེན་ལས་བྱུང་། །ཞེས་རྒྱུ་དང་འབྲས་བུའི་རྟེན་ཅིང་འབྲེལ་འབྱུང་གི་ཆོས་སམ་མདོ་སྔགས་རྒྱུ་འབྲས་ཀྱི་ཐེག་པའི་ཆོས་རྣམས་ཀུན། རྒྱལ་བས་ཇི་ལྟར་གསུངས་པ་བཞིན་དུ་བླ་མའི་ཞལ་གྱི་བུམ་པ་ལས་འབྱོན་པ་ཡིན་ཞེས་གསུངས་པ་རེད། རྗེ་མར་པས་ན་རོ་པ་བསྟེན་ནས་བླ་མའི་སྐུ་མདུན་དུ་བཞུགས་ཚེ། མར་པ་ན་རོའི་དྲུང་དུ་གཟིམ་ཡོད་པའི་ཐོ་རངས་ཤིག་ལ། པཎ་ཆེན་ན་རོ་པས་མདུན་གྱི་ནམ་མཁར་ཡི་དམ་དགྱེས་པ་རྡོ་རྗེའི་དཀྱིལ་འཁོར་རྟེན་དང་བརྟེན་པར་བཅས་པ་ཞིག་སྤྲུལ་ནས། མར་སྟོན་ཆོས་ཀྱི་བློ་གྲོས་ཞེས་བོས་ནས། མ་ཉལ་ཡར་བཞེངས་དང་། ནམ་མཁར་ཁྱེད་ཀྱི་ཡི་དམ་དགྱེས་པ་རྡོ་རྗེ་རྟེན་དང་བརྟེན་པར་བཅས་བྱོན་ཡོད་པས། ཁྱོད་ཀྱིས་ཡི་དམ་ལ་ཕྱག་འཚལ་ལམ། ང་ལ་ཕྱག་འཚལ་བ་ཡིན་ཞེས་གསུངས་པ་དང་། མར་པས་དང་པོ་ཡི་དམ་དགྱེས་པ་རྡོ་རྗེ་ལ་ཕྱག་འཚལ་བ་ན། ན་རོའི་ཞལ་ནས། བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །བསྐལ་པ་སྟོང་གི་སངས་རྒྱས་ཀྱང་། །བླ་མ་དག་ལ་བརྟེན་ནས་འབྱུང་། །ཡི་དམ་བླ་མའི་སྤྲུལ་པ་ཡིན། །ཞེས་གསུངས་ནས་ཡི་དམ་དགྱེས་པ་རྡོ་རྗེའི་དཀྱིལ་འཁོར་ཐམས་ཅད་ཐུགས་ཀར་ཐིམ་སོང་བ་དང་། རྟེན་འབྲེལ་དེའི་དབང་གིས་ཁྱོད་ཀྱི་སྲས་བརྒྱུད་དེ་ཡུན་རིང་དུ་མི་གནས། དེ་ཡང་སེམས་ཅན་གྱི་ལས་སྐལ་གྱིས་ཡིན་ཞེས་གསུངས། དུས་གསུམ་གྱི་བྱོན་དང་འབྱོན་འགྱུར་གྱི་སངས་རྒྱས་ཐམས་ཅད་ཀྱང་། བླ་མ་དམ་པ་མཉེས་པ་གསུམ་གྱི་སྒོ་ནས་ལེགས་པར་བསྟེན་པ་ལས་བྱུང་བ་ཡིན། ཞེས་གསུངས་ལ། རྒྱུ་མཚན་དེའི་ཕྱིར་ཐོག་མ་ཉིད་ནས་བླ་མ་དམ་པའི་མཚན་ཉིད་ལྡན་མིན་ཡང་ཡང་ཞིབ་མོར་བརྟགས་ནས་བདུད་ཀྱི་སྤྲུལ་པ་དང་། ཟོལ་ཟོག་བསླུ་བ་མཁན། རང་གིས་མི་ཤེས་གཞན་ལ་སློབ། །རང་རྒྱུད་མ་སྨིན་གཞན་སྨིན་འདོད། །ཐོས་ཆུང་དྲིས་ལ་ལན་མི་ཐེབས། །སློབ་དཔོན་མ་བརྟག་སློབ་མའི་བདུད། །ཅེས་དང་། དཔལ་སྤྲུལ་ཚང་གིས། རང་འདོད་ཕུག་བཅུག་གཞན་ཕན་ཁ་ལ་རེ། །རང་ངོ་མ་འཕྲོད་ངོ་སྤྲོད་རོ་ལ་འདེབས། །རང་དོན་མ་འགྲུབ་གཞན་ཕན་བསླུས་མཐོང་ནས། །ད་ནི་འགྲོ་དོན་གཡང་ལ་བསྐྱུར་སྙིང་འདོད། །ཅེས་གསུངས་པ་འདྲ་བའི་དོན་དེ་ལྟར་མ་ཡིན་པའི་བླ་མ་དམ་པ་མཚན་ཉིད་དང་ལྡན་པ་ཞིག་དང་མཇལ་བའི་རྗེས་ཐོག་ཏུ་ཅི་མཛད་ལེགས་མཐོང་གི་མོས་གུས་སྐྱེ་བ་ནི། གྲགས་སྐམ་འུར་བསྟོད་ཀྱི་རྗེས་སུ་འབྲང་བ་མ་ཡིན་པར་ཞེ་ནས་སྐྱེས་པའི་དད་པ་དང་། མོས་གུས་བཅོས་མིན་ཡོད་པ་དེ་བྱིན་རླབས་ཞུགས་པའི་རྟགས་སུ་ངེས་ལ། ཆོས་འདོད་གཞན་སེམས་བསླུ་བའི་བསམ་སྦྱོར་ཅན། །དད་པ་མེད་པའི་ཕྱག་གིས་ཐལ་འཚུབ་སློང་། །མོས་གུས་མེད་པའི་ཁམས་འདྲི་བསྙུན་ཞུ་གསོལ། །ངན་སྤྱོད་རྟོག་པའི་མིག་གིས་བྱ་ར་བྱེད། །ཅེས་གསུངས་པ་ལྟར། མོས་གུས་རྫུན་མས་ཕུགས་མི་ཐུབ་པས་། བླ་མའི་མཛད་པ་ཆུང་ཆུང་ཞིག་རེད་མི་རེད་ཙམ་དང་། སྤྱོད་ལམ་མ་དག་པ་བག་ཙམ་མཐོང་བ་ཙམ་གྱིས་དད་པ་ལྡོག་པའི་ཕྱིར་ཡིད་བརྟན་རུང་བའི་དད་པ་མ་ཡིན་ནོ། །ཡང་སློབ་མ་འགའ་རེས་བླ་མས་ཟང་ཟིང་གི་གནང་སྦྱིན་བྱེད་ན་དད་པ་ལྷག་པར་ཆེ་བ་དང་། གནང་སྦྱིན་ལུས་སོང་བ་སོགས་བྱུང་བ་ན། ང་ལས་ཆེ་གེ་མོ་ཐུགས་གཙིགས་ཆེ་བར་འདུག་བསམ་ནས་དད་པ་ལྡོག་འགྲོ་བ་དེ་འདྲ་ཡོད་པ་རེད། དེ་ལྟ་བུ་ནི་དད་པ་ངོ་མ་དང་བརྟན་པོ་མིན་པའི་རྟགས་རེད། ཟང་ཟིང་ཙམ་གྱིས་ཚིམ་པ་ཐོབ་ནས་ཀྱང་། །བཅོས་མའི་དད་པས་དུས་བཞིའི་འགྱུར་ལྡོག་ངོམ། །ཞེས་པ་ལྟ་བུའི་དད་པ་དེ་དབྱར་དགུན་སྟོན་དཔྱིད་དུས་ཀྱི་འགྱུར་ལྡོག་བཞིན་ཡིད་བརྟན་རུང་བའི་དད་པ་མ་ཡིན། དེས་ན་བཅོས་མིན་གྱི་དད་པ་བརྟན་པོ་ནི་བྱིན་རླབས་ཞུགས་པའི་རྟགས་སུ་ངེས་ཞེས་གསུངས་སོ། །དེ་ཡན་ཆད་ཀྱིས་བཤེས་གཉེན་བསྟེན་ཚུལ་དེ་ལ་བསམ་པའི་བསྟེན་ཚུལ་དང་། སྦྱོར་བའི་བསྟེན་ཚུལ་གཉིས་ལས་བསམ་པའི་བསྟེན་ཚུལ་སོང་བ་རེད། དེ་རིང་ཆུ་ཚོད་ཀྱིས་འདི་ནས་འཇོག་རྒྱུ་བྱེད། སྤྱིེར་འདིའི་ཁྲིད་རྐང་བཞི་པ་འདི་བླ་མའི་གདམས་ངག་ཅི་ནས་ཀྱང་ཐོབ་པར་བྱ་ཞིང་ཐབས་གང་གིས་སྒོ་ནས་བླ་མ་བསྟེན་ཚུལ་བསམ་པའི་ཁྲིད་རྐང་རེད། འདི་རང་རེས་ཆོས་ཐུན་གཉིས་བྱས་ནས་ཁྲིད་ཀྱིན་ཡོད་རེད། འདིའི་ས་བཅད་དང་པོ་འདི་ལ་བླ་མ་བསྟེན་པའི་དགོས་པ་དང་། བླ་མ་བརྟག་ཐབས་དང་བསམ་པས་བསྟེན་ཚུལ་བཤད་པ་རེད། གཉིས་པ་སྦྱོར་བའི་སྒོ་ནས་བསྟེན་ཚུལ་སང་ཉིན་ནས་བཤད་རྒྱུ་རེད། འདིའི་ཁྲིད་སྦྱོང་ལ། ཁྲིད་རྐང་སྔོན་མའི་ནང་དུ་འཁོར་བའི་སྡུག་བསྔལ་བསྟན་པས་རིགས་དྲུག་གི་སྡུག་བསྔལ་གང་དུ་སྐྱེས་ཀྱང་བདེ་སྐྱིད་མེད་པར་ཧ་གོ་སོང་དུས། འཁོར་བ་དེའི་ནང་ནས་ཐར་པའི་ཐབས་གང་དགའ། རང་སྟོབས་ཀྱིས་ཐར་ཐབས་ཨེ་ཡོད། མེད་ན་གང་ལ་བརྟེན་ནས་འཁོར་བའི་སྡུག་བསྔལ་ལས་ཐར་དགོས། དམ་པའི་ཆོས་སྒྲུབ་པའི་ཕན་ལས་ཐབས་གཞན་མེད་པ་ཁ་བཤད་ཙམ་མ་ཡིན་པར་དོན་གྱིས་སེམས་ཐོག་ཏུ་བླངས་ནས། རང་གཞན་གཉིས་ཀ་བདེ་ཐབས་ལ་དམ་པའི་ཆོས་འདི་ལས་དགའ་ཞིག་མི་འདུག ཚེ་ཕྱི་མ་ལ་ལོས་དགའ་སྟེ། ཚེ་འདི་ལའང་རེ་ས་སྐྱབས་གནས་དམ་པའི་ཆོས་ཁོ་ན་མ་གཏོགས་མི་འདུག་བསམ། ད་ཆོས་དེ་ཅི་འདྲ་ཐོབ་དགོས། རང་གིས་ཡིག་རིགས་ཤིག་བལྟ་ན་ཨེ་ཆོག དེས་མ་ཆོག་ན། མར་འབྱུང་ས་འོ་མ་དང་། དུ་བ་འབྱུང་ས་མེ་ཡིན་པ་བཞིན་དུ་ཆོས་འབྱུང་ས་བླ་མ་རེད་འདུག བླ་མའི་མདུན་ནས་ཆོས་ཐོབ་སྟེ་བྱིན་རླབས་རྒྱུད་ལ་ཞུགས་དགོས་པ་རེད། དེ་བསམ་ཤེས་ཡོང་དུས། ད་བླ་མ་ཟེར་རྒྱུ་དེ་ཅི་འདྲ་ཞིག་ཡིན། མིང་ལ་བླ་མ་ཐོགས་ཚད་དང་། ན་བཟའ་དམར་པོ་གྱོན་ཚད་ཀྱིས་ཆོག་དང་། དེ་ལ་ཆ་རྐྱེན་གྱི་ཚད་མང་པོ་ཞིག་ལོང་རྒྱུ་ཡོད་ཅེས་དེའི་འདང་རྒྱག་ཅིང་། དེ་ནས་བླ་མ་བརྟགས་ནས་བླ་མ་གདམ། གདམ་རྒྱུ་ལོན་པའི་དགའ་མེད། གདམ་ནོར་སོང་བའི་སྡུག་མེད་ཟེར་ནི་རེད། ལྟར་སྣང་བ་དང་ངོ་མ་གཉིས་ནོར་དོགས་ཆེ། དེ་རྣམས་མན་ངག་གི་ཐོག་ནས་ཉམས་སུ་ལེན་པའི་ཞོར་ལ་སློབ་མའི་མཚན་ཉིད་ཀྱང་ཡོད་པ་རེད། རང་ཉིད་ལ་དམ་པའི་ཆོས་ཞུ་བའི་སློབ་མའི་ཆ་ཚད་ཚང་ཨེ་ཡོད། མེད་ན་ཅི་འདྲ་བྱས་ནས་ཚང་དུ་འཇུག་དགོས། དེ་ཚོ་བསམ་བློ་བཏང་ནས། ཁྲིད་སྦྱོང་ཟེར་ན་སེམས་ཀྱིས་སློབ་སྦྱོང་བྱ་ཚུལ་ཞིག་རེད། སེམས་ཀྱི་སྦྱོང་བརྡར་ཞིག་རེད་ཟེར་ན་མི་ཆོག་རྒྱུ་མི་འདུག དེ་རིང་གི་ཁྲིད་སྦྱོང་ནང་བླ་མ་བརྟག་ལུགས་ཀྱིས་མི་ཚད་པར་བརྟགས་ཚར་ནས་བསམ་པས་བསྟེན་ལུགས་ཀྱང་ཡོད། དེ་རིང་ཕྱི་དྲོའི་ཁྲིད་ལ་བླ་མ་བསྟེན་པའི་དགོས་པ་དང་། བླ་མ་བརྟག་པའི་སྐོར་ཁྲིད་སྦྱོང་བྱ་རྒྱུ་རེད། ཁྲིད་དཔོན་གྱིས་ས་བཅད་ལྟར་ལེ་ཚན་རེ་རེ་བཞིན་དུ་ཚིག་གཅིག་རེ་གཉིས་རེ་གསུངས་ནས་མཚམས་དང་མཚམས་སུ་སློབ་མ་རྣམས་ཀྱིས་དེའི་དོན་བསམ་ནས་སྒོམ་པའི་ཚུལ་ལྟར་བསམ་བློ་གཏོང་དགོས། ཡང་ལེ་ཚན་རེ་གསུངས་ཤིང་སྒོམ། དེ་འདྲར་བྱས་ནས་ལན་གྲངས་འགའ་རེ་དུས་ཚོད་ཐུང་ཐུང་བྱེད། དོ་དགོང་ཡང་དེ་འདྲ་ཡིན། སང་ཉིན་ཉིན་གུང་དང་། ཕྱི་དྲོ་དང་། དགོང་མོར་བསམ་པའི་སྒོ་ནས་བླ་མ་བསྟེན་ལུགས་ལ་ཁྲིད་སྦྱོང་བྱ་དགོས། འདིའི་ཁྲིད་རྐང་བཞི་པ་འདི་ལ་ཆོས་ཐུན་གཉིས་བྱས་ཡོད། ཉིན་གཉིས་ཀྱི་སྔ་དྲོ་ལ་འབུམ་ལྔའི་ཁྲིད་སྦྱོང་ནང་གི་མཎྜལ་གསོག་རྒྱུ་ཡིན། མཎྜལ་ཡོད་པ་རྣམས་ཀྱིས་མཎྜལ་འཁྱེར་ཤོག ཁྲིད་དཔོན་གྱིས་ཇི་ལྟར་བྱེད་ན་དེ་ལྟར་དུ་གྱིས། རྗེས་མར་རང་ཉིད་ཀྱིས་མཎྜལ་ཆ་ཚང་གསག་དུས་གསོག་ཤེས་པའི་དགོས་པ་ཡོད་པ་རེད། མཇུག་གི་ཀུ་ས་ལིའི་ཚོགས་བསགས་ཚར་གཅིག་བཏོན་ན་ཆོག་གི། །མཎྜལ་དེ་ཚོགས་བསགས་པའི་སྒོ་མཆོག་ཏུ་གྱུར་པ་ཡིན། རྡོར་སེམས་བསྒོམ་བཟླས་དང་མཎྜལ་གཉིས་བསགས་སྦྱོང་གཉིས་ཀྱི་གནད་འདུས་ས་རེད། ཡན་ལག་བདུན་པ་དང་འབུམ་ལྔའི་གནད་ཚང་མ་བསགས་སྦྱོང་གཉིས་སུ་འདུས་པ་ཡིན། སྒྲིབ་པ་ཐམས་ཅད་སྦྱངས་ནས་ཚོགས་གཉིས་ཡོངས་སུ་རྫོགས་ཚར་དུས་སངས་རྒྱས་སོང་བ་རེད། དེས་ན་བསགས་སྦྱོང་གཉིས་གནད་ཆེ་བས་འདི་གཉིས་ཡར་ལྷག་གསོག་རྒྱུའི་གོ་སྐབས་ཡོད་པར་བྱས་པ་ཡིན། འདིའི་ཐུན་གྱི་རྗེས་སུ་དམིགས་མེད་ཀྱི་ངང་དུ་མཉམ་པར་བཞག་དགོས། མཉམ་བཞག་དེ་ལས་ལངས་པའི་རྗེས་ཐོབ་ཏུ་བསྔོ་བ་དང་། སྨོན་ལམ་ཡག་པོར་བྱ་རྒྱུ་འདིའི་སྐབས་མ་ཟད་རྒྱུན་གྱི་སྤྱོད་ལམ་ལའང་འཇགས་བཅུག་དགོས་པ་རེད། མཉམ་བཞག་དང་རྗེས་ཐོབ་ཟེར་ན། སེམས་གཞན་ལ་མི་གཡོ་བར་ཏིང་ངེ་འཛིན་སྣང་བཅས་སྣང་མེད་དང་། མཚན་བཅས་མཚན་མེད་གང་གི་ཐོག་ཏུ་མཉམ་པར་བཞག་ན་དེའི་ངོ་བོའི་ཐོག་གཡོ་མེད་དུ་འདུག་པ་མཉམ་བཞག་རེད། མཉམ་བཞག་དེ་ལས་ལངས་པའི་ཟ་ཉལ་འགྲོ་འཆག་གི་སྤྱོད་ལམ་གྱི་ཚེ། འདི་ལྟར་སྣང་བའི་ཆོས་ཐམས་ཅད་སྒྱུ་མ་དང་རྨི་ལམ་ལྟ་བུ་དྲན་པའི་རྫི་བོ་དང་མ་བྲལ་བར། མཉམ་བཞག་གི་ཉམས་ལེན་དེ་མ་བརྗེད་པ་དེ་ལ་རྗེས་ཐོབ་ཟེར། སེམས་དྲན་ཤེས་དང་བྲལ་ཏེ་འཁྲུལ་འབྱམས་སུ་སོང་ནས་དུས་རྒྱུན་ལྟར་གྱུར་ན་རྗེས་ཐོབ་རྒྱ་ཡན་པ་ཟེར་རེད། མཉམ་རྗེས་ཐ་མི་དད་པར་མཉམ་པར་བཞག་བཞིན་པས་སྤྱོད་ལམ་མཛད་པ་ནི་སངས་རྒྱས་ཁོ་ནའི་ཁྱད་ཆོས་ཡིན། སངས་རྒྱས་མ་ཐོབ་བར་དུ་མཉམ་རྗེས་ཀྱི་ཁྱད་པར་ཙམ་རེ་ཡོད་པ་ཡིན་ན། སྤྱོད་ལམ་ཐམས་ཅད་ལ་རྣམ་པ་ཀུན་ཏུ་མ་འཁྲུལ་བ་ཟེར་རྒྱུ་དེ་གཅིག་དཀའ་ནི་རེད། འོན་ཀྱང་རྒྱུན་དུ་དྲན་ཤེས་བག་ཡོད་བསྟེན་པ་དེ་སྐྱ་སེར་ལ་མ་ལྟོས་པར་ཆོས་པ་སུ་ཡིན་རུང་བརྗེད་མི་ཉན། བག་ཡོད་པ་ནི་ཚིག་ཉུང་ཡང་དོན་རྒྱ་ཆེའོ་ཞེས་གསུངས་ཡོད། ངོ་ཚ་ཤེས་པ་དང་ཁྲེལ་ཡོད་པ་གཉིས་བག་ཡོད་ཀྱི་གྲོགས་རེད། རང་ལ་བརྟེན་ནས་ཉོན་མོངས་པའི་སྡིག་ལྟུང་གི་ལས་མི་བྱེད་པ་དེ་ངོ་ཚ་ཤེས་པ། གཞན་གྱིས་ཁྲེལ་གྱིས་དོགས་ནས་མི་དགེ་བ་བསྲུང་རྒྱུ་དེ་ཁྲེལ་ཡོད་པ་རེད། ཁྲེལ་ངོ་ཚ་གཉིས་ཤེས་དུས་གཅིག་ལོ་ནི་རེད། རང་གི་འཁྲུལ་བར་རང་གིས་བརྟགས་ཏེ་རང་གི་འགོ་འཛིན་རང་གིས་བྱེད་དགོས། ཆོས་ཤིག་ཞུས་ནས་དེར་བརྟེན་ནས་འགྲོ་ངོ་འདུག་ངོ་ཞིག་མ་ཤེས་ན་མི་ཞིག་བྱས་ནས་འགྲོ་ཁུལ་བྱེད་པ་དེ། རྭ་རྔ་མ་གཉིས་མེད་པ་མ་གཏོགས་དུད་འགྲོ་དང་ཁྱད་པར་ཆེན་པོ་མེད་པས་མི་ཚད། སྲོག་མ་ཆད་པའི་རོ་དང་། དབུགས་མ་ཆད་པའི་བེམ་པོ་རེད་ཟེར་ན་ཆོག་རྒྱུ་ཅན་རེད་སོང་བ་རེད། དེས་ན་ཕྱི་ནམ་ཟླའི་འགྱུར་ལྡོག ནང་ཕུང་པོའི་དར་རྒུད། ཉིན་མཚན་སྐད་ཅིག་གི་འགྱུར་བ། རྒན་རབས་གཞོན་རབས་ཚང་མ་མི་རྟག་ནས། སྔ་རབས་འདས་པའི་ཕྱོགས་སུ་བུད་སོང་བ་ལ་འདང་རེ་བརྒྱབ། ཁ་རང་ཉིད་ལ་བསྐོར་ནས་རང་ཉིད་ཀྱི་ཚེ་སྲོག་ཀྱང་མི་རྟག་པ་ཡིན་པ་ལ་བློ་སྣ་སྦྱང་རྒྱུ་འདི་ནི། བླ་མ་སེར་མོ་མན་ཆད་གྲོང་ནང་གི་ཁྱིམ་པ་ཕོ་མོ་ཡན་ཆད་རང་རོགས་ཚང་མ་ཐམས་ཅད་ལ་གལ་ཆེ་བ་ཞིག་རེད། འཇིག་རྟེན་ཆོས་བརྒྱད་དང་། རང་འདོད་ཡིད་བྱེད། བདེན་འཛིན་རྣམས་མ་ལོག་ན་གང་གི་མིང་ཡོད་ཀྱང་ཐ་མལ་བ་དང་ཐ་དད་པའི་ཁྱད་པར་འབྱེད་ཆོས་གཞན་མེད་པས་ན་ཐ་མལ་པ་ཡིན་ནི་རེད། ཁ་ནས་ཆོས་སྐད་རྟ་འདྲ་བ་མང་པོ་བཤད་ཤེས་ཀྱང་ཁ་དང་དོན་འཛོལ་ན། གང་ཟག་ལ་ཁྱི་མ་གཏོགས་མི་རི་བ་རེད། སུ་ཡིན་ཡང་བློ་སྦྱོང་དང་པོར་ཞོག་རྒྱུ་དེ་གནད་ཆེ། ཀློག་པ་ཐོས་བསམ་པ་ཡིན་ཡང་རྒྱུན་དུ་བློ་སྦྱོང་ཉམས་ལེན་བྱེད་དགོས་རེད། བློ་སྦྱོང་རྒྱུད་ལ་མེད་ན་གོ་ལྟ་སྐམ་པོས་ས་མི་ཆོད། ཐོས་པ་ཁ་ཕྱིར་བལྟས་ལ་ཤོར་ནས། རང་རྒྱུད་ཀྱི་ང་རྒྱལ་མགོ་མི་ནོན་པར་དཔེ་ཀློག་གཞན་སྐྱོན་འཚོལ་བྱེད་ཀྱི་ཐུར་མར་གྱུར་སོང་དུས། འདྲེ་རྒྱལ་འགོང་སྙིང་ལ་ཞུགས་ནས། འགྲོ་ན་མི་བདེ། འདུག་ན་མི་སྐྱིད་པར་རེད་རྒྱུ་ཡོད་ནི་རེད། ཀུན་མཁྱེན་འཇིགས་གླིང་གི་གསུང་ལས། ཐོས་བསམ་ཆེ་བས་མི་ཆོག་གི །སྒོམ་པས་རང་རྒྱུད་མ་གྲོལ་ན། །འཆི་ཁ་ལག་སྟོང་ཡོང་ཉེ་བས། །སྟོན་ཆེན་གྱི་ལད་མོ་མ་མཛད་ཨང་། །ཞེས་དང་། ཚིག་མཐའ་ཤེས་བྱས་གཞལ་བ་ངར་འཛིན་གྱི་ཅོང་རྡོ། །དོན་མཐའ་རྟོགས་པས་གཅོད་པ་གྲུབ་ཐོབ་ཀྱི་བཤུལ་ལམ། །བྱར་མེད་རྒྱལ་པོ་སྐྱིད་ཉལ་ཤུགས་འབྱུང་གྱི་ངང་དུ། །ངའི་སྐྱོ་གྲོགས་འོད་གསལ་སྦུབས་འཇུག་ལ་ཕེབས་དང་། །ཞེས་གསུངས་པ་རེད། དཔེ་ཆ་བ་མིན་ནའང་གྲྭ་བ་བླ་མ་སེར་མོ་བ་ཡིན་དུས་སྟོན་པ་སངས་རྒྱས་ཀྱི་རྗེས་འཇུག་ཤ་སྟག་ཡིན་པས། སྟོན་པས་བསྟན་པའི་ལམ་ལ་ཞུགས་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཡིན་དགོས། སེམས་ཁྱིམ་ན་ལུས་ཏེ་བུད་མ་ནུས་ན་ལུས་རབ་བྱུང་བྱས་ཀྱང་། རྒྱལ་པོ་ཀྲི་ཀྲིའི་རྨི་ལམ་གྱི་ནང་ལྟར་གླང་མཇུག་སྐར་ཁུང་ན་ཐོགས་པའི་དཔེ་ཡོད་པ་རེད། ད་སྔོན་ཆོས་བརྒྱད་ཀྱིས་བསླུས་ནས་ཆུད་ཟོས་སུ་སོང་བ་གྲངས་ཀྱིས་ཅི་ཆོད། ལོག་འཚོའི་འབྱོར་བས་རྒྱགས་པའི་ངན་དཔེ་ལ་ལྟ་མི་ཉན། ཕྱི་མར་འཇིགས་སུ་རུང་བ་ཡིན། སྐུ་བསོད་རྒན་པོ་གཡོ་ཅན། རང་སེམས་བྱིས་པ་མགོ་སྟོང་ཡིན་ནི་རེད། བྱ་བཞག་རྩེད་མོའི་དགག་སྒྲུབ་ཡིན་ནི་རེད། ནོར་དང་འདོད་ཡོན་གྱིས་ཆུ་ནང་འཕེན་འཕེན་སུས་འཕེན། དེ་འདྲ་ཡིན་པས་ན་རབ་བྱུང་ཟེར་རྒྱུ་ཅི་ཡོད། སོ་ཐར་རིས་བདུན་གང་རུང་གི་སྡོམ་པ་ཞུ་ནི་ཚང་མས་གཞི་ཚུལ་ཁྲིམས་རྣམ་པར་དག་པས་གཞིར་བཟུང་། སྦྱིན་སོགས་དགེ་བའི་གྲོགས་བྱེད། སྨོན་ལམ་རྣམ་པར་དག་པས་མཚམས་སྦྱོར་ཏེ་ཆོས་ལམ་ངོ་མ་ལ་ཞུགས་ནས་ཆོས་རྣམ་པར་དག་པ་ཞིག་སྒྲུབ་རྒྱུ་འཆུག་མི་ཉན། རང་སྐལ་ལ་བབ་པའི་ལས་འགན་རེད། དེ་མ་འགྲུབ་དུས་ཆོས་པའི་མིང་ཡོད་ཀྱང་དོན་མ་ཡོད་ནི་རེད། དེ་ཡང་ཀུན་མཁྱེན་འཇིགས་གླིང་གིས། ཁྱིམ་ཆུང་སྤངས་ནས་བསྟན་པའི་སྒོར་ཞུགས་ཀྱང་། །ཁྱིམ་ཆེན་བཟུང་ནས་བྱ་བ་མཐའ་ཡས་ཤིག །བསགས་དང་བསྲུང་དང་སྤེལ་བའི་འཁྲུགས་པ་ཡང་། །སྣང་ནས་མུན་པའི་སྒོ་རུ་འཁྱན་འཚལ་ལོ། །ཞེས་གསུངས་ཡོད། དེས་ན་མི་རྟག་པ་སྒོམ་པ་འདི་དང་པོ་ཆོས་ལམ་འཇུག་པའི་རྒྱུ། བར་དུ་དམ་ཆོས་ཉམས་ལེན་གྱི་རྐྱེན། ཐ་མ་འཆི་བ་འོད་གསལ་གྱི་སྐབས་སུ་ཉམས་མྱོང་གི་གྲོགས་ཡིན་པས། དེ་འདྲ་བྱེད་ན། གང་ཟག་གཅིག་གི་མི་ཚེའི་ཚད་དང་སྦྱར་ན། དང་པོ་ཐོས་བསམ་ཚོལ། དེ་དང་མཉམ་དུ་ཐོས་དོན་བསམ། ཐ་མ་བསམ་དོན་བསྒོམས་ནས་ཆོས་རང་རྒྱུད་ལ་སྦྱར་རྒྱུ་ནི་ལམ་གྱི་གོ་རིམ་ཡིན་ཡང་། ཧ་ཅང་རྟག་འཛིན་ཆེ་སོང་ན། བྱ་བའི་ལྷུས་ཐིངས་ཟེར་རྒྱུ་དཀའ་མོ་ཡིན་ཏེ། ཟག་བཅས་ཉེར་ལེན་སྡུག་བདེན་གྱི་ཕུང་པོ་འདི་ལ་ཡུན་རིང་གི་བློ་གཏད་མེད། དེས་ན་དང་པོ་ནས་བློ་སྦྱོང་དང་མ་འབྲལ་བའི་སྒོ་ནས་ཐོས་བསམ་བྱེད་དགོས། སོ་དཀར་གཞོན་པའི་མི་ཚེ་ཡད་ཡུད་ལ་ལངས་སོང་། །དབུ་དཀར་རྒན་པོའི་འཚོ་རྩིས་སྒུག་ལོང་ནི་མི་གདའ། །ད་ནི་མི་ཚེའི་ཉི་མ་ནུབ་རི་ལ་ལངས་སོང་། །ངའི་ལམ་སྣ་ཨོ་རྒྱན་ཆོས་རྗེ་ཡིས་མཛོད་དང་། །ཞེས་གསུངས་པ་ལྟར། རང་ལ་རང་དབང་ཡོད་པའི་སྐབས་ན། ཡར་དེའི་ཁ་ལ་མི་ཉན། མར་དེའི་ངོ་སྲུང་མི་བྱེད། རང་ཐག་རང་གིས་བཅད། སྣ་ཐག་མགོ་ལ་བརྒྱབ་ནས་དབེན་རི་གྲུབ་པའི་རྒྱལ་ས་ལ་སྙོག་རྒྱུ་ནི། དམ་པ་གོང་མའི་རྗེས་འཇུག་གི་བྱ་བ་མ་ནོར་བར་རེད་ཡ། ཟང་ཟིང་འདུ་འཛིའི་ནང་ན་ད་སྔར་འདི་ལ་མ་ཐུག་གི་བར་དུ་ཆོས་བརྒྱད་ཀྱི་ལག་གཡོག་བྱས་ནས་མི་ཚེ་བུད་སོང་བ་ཡིན་ན། ད་དབང་ཐང་རླུང་རྟ་ཐུར་རྒུད་ལ་ཐུག་དུས་སྔ་ན་མེད་པའི་ཡར་བསྐྱེད་ཅིག་རྒྱབ་ཟེར་ན་དཀའ་རྒྱུ་རེད། གཞན་དབང་ཆོས་ལྟར་བཅོས་པའི་བྱ་བ་སྙིང་པོ་མེད་པར་རིག་སོང་ནི་རེད། གཅིག་ངོ་ལོན་ན་བརྒྱ་ངོ་ལོན་ནི་མ་རེད། བརྒྱ་ངོ་ལོན་ན་སྟོང་ངོ་ལོན་ནི་མ་རེད། ལོན་ཀྱང་དེ་ལ་སྙིང་པོ་མེད། བྱ་བྱེད་བྱིས་པའི་རྩེད་མོ་རེད། ལོ་འགའ་རེ་ལོན་དུས་འདས་འགྲོ་ནི་རེད། དེ་བས་ཚེ་གཅིག་ཡུན་ལ་ཕན་པའི་དམ་ཆོས་གདམས་ངག་སིལ་བུ་བཞག་རྒྱུ་རེ་ལོན་ན་དེ་དག་གི་བདེ་སྐྱིད་ལ་རོ་མྱངས་ནས་འདུག་རྟེན་ཡོད་དུས་འདུག་དགོས་ཏེ། སྙིང་རུས་གནད་དུ་སྨིན་པར་ཁྱེད་ཀྱིས་གྱིས། །གདམས་ངག་ཟབ་དགུའི་བདུད་རྩིའི་ཁོ་བོས་སྟེར། །ཚེ་དང་སྒྲུབ་པ་མཉམ་པའི་རྟེན་འབྲེལ་ཞིག །འགྲིགས་ན་ཕྱི་མའི་འགྲོ་ས་པདྨས་སྟོན། །ཞེས་གསུངས་པ་ལྟར་རེད་རྒྱུ་ཡོད་པ་ནི། ཁྱིམ་ན་གནས་པའི་ཁྱིམ་པ་ཕོ་མོ་རྣམས་ཡིན་ན་ཡང་། ཚེ་སྔ་མའི་ལས་ཀྱིས་འབྲེལ་བའི་བཟའ་ཚང་གི་ཁ་གསོ་རྒྱབ་འགེབས་འདི་དང་འབྲལ་གཏོང་རྒྱུ་མེད་རུང་། རྒྱན་གྱིས་བརྒྱན་པར་བྱས་ཀྱང་ཆོས་ལ་སྤྱོད། །གསུངས་པས་ཆོས་བསྒྲུབ་ཐབས་ཡོད་ནི་རེད། སེམས་ཀྱིས་ཆོས་མ་བསྒྲུབས་ན་གནས་རི་ཁྲོད་ཅིག་བསྟེན་ཁུལ་བྱས་ཀྱང་རི་དྭགས་དང་འདྲ་འདྲར་རེད། རི་ཁྲོད་བྲག་ཕུག་ཅིག་ན་འདུག་ཁུལ་བྱས་ནའང་། ལྷོ་འཛམ་བུ་གླིང་ལ་ཁ་པར་གྱིས་འབྲེལ་གཏུགས་བྱེད། རྒྱ་བོད་ཧོར་གསུམ་གྱི་སྐད་ཆ་དེ་དབེན་གནས་རི་ཁྲོད་དུ་ཡར་ཁྲིད་སོང་དུས། གྲག་སྟོང་བསམ་མནོ་བྲལ་བའི་ངང་ལ་གཅིག་གཞག་མི་དགོས། ཡུལ་རྗེས་སུ་འབྲང་བའི་རྣམ་རྟོག་ཆགས་སྡང་དགའ་སྡུག་གི་ཚུལ་མིན་ཡིད་བྱེད་དེའི་རྗེས་སུ་འབྲངས་ནས། འབྱུང་བ་གཅིག་བགྲང་དུས་དེ་ལུས་དབེན་འདྲ་ཡིན་ན་མ་གཏོགས། ངག་དབེན་སེམས་དབེན་གཉིས་ཀ་མེད་དུས། བར་སྐབས་ཤིག་ན་འཁྱག་འཁྱག་འཁྱག་གིས་མི་བརྟན་ནས། ལུས་ཀྱང་དབང་མེད་དུ་དྲུད་འགྲོ་ནི་རེད་ཡིན་ན། ཁྱིམ་པ་ཕོ་མོ་ཚོས་བསམ་བློ་གཏོང་དང་། ཚེ་འདི་ནི་འགྲོ་བའི་ཆོས་ཅན། འབྱོར་པ་འདི་ནི་རྒུད་པའི་མཐའ་ཅན། ལང་ཚོ་འདི་ནི་མི་རྟག་པའི་རང་བཞིན། གཉེན་གྲོགས་ཐམས་ཅད་འབྲལ་བའི་ཆོས་ཉིད་ཡིན་པས། བཟོ་ཆ་ཚད་གཏན་ལ་མི་ཕེབས་པ་ཞིག་གིས། ཕོར་ཆག་ནང་དུ་གླིང་བཞིའི་བཀོད་པ་བྲིས་ཏེ། བློ་སྣ་སྤོས་བརྒྱའི་རི་མོ་འདི་ནས་ཟད་པ་མེད་པའི་བློ་སྣ་མང་པོ་ཞིག་དྲན་གྱིན་འདུག་པ་བས། བསམ་པའི་སྟེང་དུ་གོམ་པ་སྤོ་མཁན་ཉུང་ནི་རེད། རང་སེམས་ལ་སྡུག་བཀོལ་བྱེད། བར་དོ་ལ་འཁྱམས་ཡུན་ཇེ་རིང་དུ་འགྲོ་བྱེད་རེད་འགྲོ་ནི་རེད། གནས་གཏན་འཕོ། ཡུལ་གཏན་བརྗེར་བྱས་ནས་རུ་བ་ག་ཤེད་ལ་བཀལ་ཏེ། ཁ་ཕྱིར་ལ་འཁོར་རྒྱུ་མེད་པའི་ས་ཆ་ལ་འགྲོ་དུས། ཚེ་ཕྱི་མའི་རྟ་གྲོ་རོགས་གསུམ་ད་ལྟ་ནས་འདང་ཞིག་མ་རྒྱག་ན། ད་རུང་མི་སྐྱོན་བསམ་ནས་ལོང་ཡོད་ཀྱི་མི་ཚེ་རིང་པོའི་ཚད་ཤིང་བཞག་ནས་འདུག་པར་བྱེད་པ་ཙམ་གྱིས། ཚེ་ཅི་ཡོད་སུས་ཤེས། ཡང་དགོས་སྙིགས་མའི་དུས་ཀྱི་ཚེ་ལ་ངེས་པ་མེད། ལོ་ཉུང་བ་ཙམ་གྱིས་སྔོན་མ་ཡིན་དང་རྗེས་མ་ཡིན་ཚོད་ཐིག་ནི་མ་རེད། རྒས་རྒན་ནད་པ་གཅིག་གི་ཚེ་ལ་ལོ་ཆུང་ནད་མེད་ཅི་འདྲ་མེད་པར་རེད་འགྲོ་གི། སྔོན་ལ་རྫ་མ་ཆག་དང་ལུང་ཐག་ཆད་ཤེས་ནི་མ་རེད། དེས་ན་ལོ་རྒན་གཞོན་ཚང་མས་ཆོས་བསྒྲུབ། ཆོས་དྲག་ཤོས་སེམས་ཀྱིས་སྒྲུབ་རྒྱུ་རེད། དེའི་འཕྲོར་ལུས་ངག་གཉིས་རེད། དེའི་འཕྲོར་རྒྱུ་ནོར་དངོས་པོ་རེད། དྲག་ཤོས་དེ་སྒྲུབ་མ་ཤེས། འབྲིང་བ་དེ་སྒྲུབ་མ་ནུས། ཐ་མ་དེ་སྒྲུབ་མ་བྲ་དུས། ཐ་མར་ཅི་ཡང་མེད་པའི་གཅེར་བུར་ལྷུང་གྲབས་རེད། ཁ་ལག་གཙང་མའི་མཆོད་པ། བསམ་པ་དཀར་པོའི་སྨོན་ལམ་དང་འབྲེལ་བའི་ཕྱག་དང་སྐོར་བ། འདོན་བཟླས་བརྗོད་རེ་རྒྱུན་དུ་མ་གཅད། དེ་རྣམས་དམ་པ་གསུམ་དང་འབྲེལ་བའི་གོ་བ་རྗེས་མཐུན་པ་ཡོད་ན་དེའང་གཅིག་ལོ་གི་འདུག་ནི་རེད། དེ་རིམ་གྱིས་ནར་འཕར་ནས་བསྐྱེད་བརྒྱབ་རྒྱུ་ཡོད། ཆོས་པ་རབ་ལ་ཉིན་བསྐྱེད་ཟེར་ནི་རེད། ཉིན་རེ་དང་ཉིན་རེ་མི་འདྲ་བའི་ཆོས་ཀྱི་གོ་དོན་ཞེ་ལ་འཇགས་ནས། ཉམས་ལེན་རེ་ཇེ་ཤེས་རེད་རྒྱུ་ཡོད་ནི་རེད། ཆོས་པ་འབྲིང་ལ་ཟླ་བསྐྱེད་ཟེར་ནི་རེད། ཟླ་བ་ཨ་ལོང་འདྲ་ཞིག་གི་ནང་དུ་ད་ནངས་དོ་ནུབ་བྱས་ནས་ཆོས་ནང་བཙོ་ན་རྡོ་འདྲ་ཡིན་ན་མ་གཏོགས་བརླན་ཞིག་བབ་རྒྱུ་ལོས་ཡོད། ཨ་ལ་རྩེད་མོ་ཡིན། ཡུན་རིང་ན་གཅིག་འདྲ་ནི་མ་རེད། ཐ་མ་ཡིན་ན་ལོ་བསྐྱེད་ཟེར་ནི་རེད། ན་ནིང་དང་ད་ལོ་མི་འདྲ་བའི་རང་རྒྱུད་ཆོས་དང་འདྲེས། ཉོན་མོངས་པའི་མགོ་རེ་ནོན། རྒྱུ་འབྲས་ལ་ཡིད་ཆེས་གཏིང་གིས་ཡོད། སྙིང་རྗེ་སྔར་དང་མི་འདྲ་བའི་ཇེ་ཆེ། བཤད་ཚད་པོ་གཞན་སྐྱོན། བསམ་ཚད་པོ་ངན་སེམས་མིན་པ་ཙམ་དེ་འདྲ་ཡོང་རྒྱུ་ཡོད་པ་རེད། ཉོན་མོངས་མགོ་ནོན། རྒྱུ་འབྲས་ལ་ཡིད་ཆེས་འོང་རེད། དེ་འདྲ་ཙམ་གྱི་ཕན་ཐོགས་ཀྱང་མེད་པར། ཆོས་གོ་ནས་ལོ་དུ་རེད་ཀྱང་དེ་དང་འདྲ་བ། ད་རུང་རང་རྒྱུད་སྔ་ལས་རྩུབ་པར་འདྲ་བ་དང་། ཆོས་ཀུན་འདོན་གྱིན་ཆགས་སྡང་ཇེ་ཆེ། རྡོ་ཅོང་གཞི་འཐུང་གི་ནད་པ་ཇེ་ཐུ་རེད་ན། གང་ལྟར་ལས་ཀྱི་སྒྲིབ་པ་མཐུག་པའི་རྟགས་རེད། སྒྲིབ་སྦྱོང་གིས་ད་རུང་ཆོག་མེད་ནི་རེད། དམན་ལ་དགག་སྒྲ་སྦྱར་བའི་རིགས་ཆད་ཅན་པོའི་ནང་དུ་སོ་ལྟུང་ཨེ་འགྲོ་ན་སྟེ། ཆོས་སྒྲ་ཐོས་པ་ཙམ་གྱིས་ཀྱང་ཐར་པ་མ་ཐོབ་རུང་མཐོ་རིས་ཀྱི་རྟེན་རེ་རྙེད་ནས་སྐྱེ་བ་རིམ་བརྒྱུད་ཀྱིས་སྡུག་པོ་མི་རེད་ན་ཅི་ཤེས། དེ་འདྲ་ཡིན་དུས། ང་ཁྱིམ་པ་རེད། ང་མི་སྐྱ་རེད། ང་བུད་མེད་རེད་མ་བསམ། ཆོས་བདག་མེད་སྙིང་རུས་སུ་ཆེ་རེད། སུས་སྦྱོང་ན་དེས་ཆོས་ཤེས་ལ། སུས་དགེ་བ་བསྒྲུབ་ན་དེས་བསོད་ནམས་ཐོབ་ནི་རེད། དང་པོ་ཕྱག་སྐོར་སྒྲིབ་སྦྱོང་། གཟུངས་སྔགས་བཟླས་པ་ལ་སོགས་པ་གཙོ་བོ་ལུས་ངག་དང་རྒྱུ་རྫས་ཀྱིས་དམིགས་བཅས་བསོད་ནམས་ཀྱི་ཚོགས་བསགས། དེ་ནས་བར་སྐབས་ཤིག་ན་དོན་གྱི་གོ་བ་རེ་རྙེད་ནས་ངེས་ཤེས་ཀྱི་སྒོ་ནས་གཙོ་བོ་སེམས་ཀྱི་ཐོག་ནས་དམིགས་མེད་ཡེ་ཤེས་ཀྱི་ཚོགས་རེ་བསགས་ཤེས་པ་ཞིག་རེད་ན། གཞི་བདེན་གཉིས་ཟུང་འཇུག་ཡིན་པའི་སྟོབས་ཀྱིས། ལམ་ཚོགས་གཉིས་ཟུང་འཇུག་ལ་བརྟེན་ནས། འབྲས་བུ་སྐུ་གཉིས་ཟུང་འཇུག་འཐོབ་རྒྱུ་ཡོད་པ་རེད། མདོར་ན་མཐོ་དམན་དྲག་ཞན་སྐྱ་སེར་སུ་ཡིན་ན་ཆོས་པ་ཟེར་དུས་སྐྱིད་པོ་ཡིན་ནི་རེད། སྐྱིད་དང་སྤྲོ་སྣང་གིས་སེམས་གང་འདུག་ཆོག་སྟེ། ཚེ་འདི་ལ་སྐྱིད་ནི་རེད། བློ་སྣ་བླ་མ་དཀོན་མཆོག་ལ་གཏད་ན། སྐྱིད་ན་བླ་མ་དཀོན་མཆོག་གི་ཐུགས་རྗེ། སྡུག་ན་ཚེ་སྔོན་གྱི་ལས་འབྲས་ཡིན་པར་ཤེས་ནས། སྐྱབས་འགྲོ་སེམས་བསྐྱེད་ཀྱིས་གཞིར་བཟུང་། ཐེག་ཆེན་མདོ་སྔགས་ཀྱི་ལམ་ནས་ཚོགས་བསགས་ཐབས། སྒྲིབ་པ་སྦྱོང་ཐབས་འདྲ་མི་འདྲ་ཤེས་ནི་རེད། ལག་པ་ཡ་གཅིག་ཅི་བཀྱག ཁ་ནང་དབུགས་ཤིག་ཅི་ལེན་རང་གཞན་གྱི་དོན་ཆེན་བསོད་ནམས་དང་ཡེ་ཤེས་ཀྱི་ཚོགས་རྫོགས་བྱེད་ལ་འགྱུར་ཐབས་བྱས་པ་རེད། ཚེ་ཕྱི་མ་དེ་བས་ཀྱང་སྐྱིད་ནི་རེད། འགྲོ་ས་དག་པའི་ཞིང་མཆོག་ཏུ། ལམ་སྣ་ལྷ་དང་བླ་མས་འདྲེན། དབང་གདམས་ངག་གི་དམ་ཚིག་མ་ཉམས་ན་སྐལ་ལྡན་རྡོ་རྗེའི་མཆེད་ལྕམ་ཚོམ་བུ་གཅིག་ཏུ་བྱ་ཁྱུ་འཕུར་བ་ལྟར་འགྲོ་ཆོག་པར་མ་ཟད། དགེ་སྒྲུབ་སྡིག་སྤོང་རེ་གྱིས། བདེ་བ་ཅན་དུ་སྐྱེ་བའི་རྒྱུ་བཞི་པོ་རེ་སྒྲུབས་དང་ཁྱིམ་བཟའ་ཚང་གང་པོ་བདེ་བ་ཅན་དུ་མཉམ་དུ་འགྲོ་ནས། ཤུལ་དུ་ཉེ་དུ་གྲྭ་སློབ་ལ་ཕན་བཏགས་ཆོག་རྒྱུ་དེ་འདྲ་ཡོད་ནི་རེད། ཆོས་ལམ་ལ་ཞུགས་མི་ཤེས་པ་ཅི་འདྲ་མེད། བསམ་བློ་གཏོང་ན། གཡས་རྩ་གཡོན་སྐོར་ཁྱིམ་མཚེས་རུ་རོགས། གྲོང་དང་སྡེ་ཤོག ཤོག་ཁ་ཡར་མར་གྱི་ནང་ན་ཅི་འདྲ་མི་མང་། དེ་རྣམས་ཐམས་ཅད་ལ་སྙིང་རྗེ་བྱས་པའི་ཐོག་ནས་ཕན་ཆེ་ཐོགས་ཆུང་ཐོགས་ཀྱིས་མི་རེ་རེ་ཡིན་ཡང་ཆོས་སྒོར་གཟུད་ནུས་ན་དེ་ཡང་དམ་པའི་ལྷ་ཆོས་རེད། མི་ལྷ་མི་དང་། ལུང་པ་ལྷ་ལུང་རེད་ན། བོད་གངས་ལྗོངས་ཆོས་ལྡན་གྱི་ཡུལ་གྲུ། འཕགས་པ་སྤྱན་རས་གཟིགས་ཀྱི་གདུལ་ཞིང་རེད་ཟེར་ན་ངོ་མི་ཚ་ཙམ་དང་། ས་ཡུལ་ལུང་རེ་ན་འདི་བཞིན་དུ་ཡག་བསྡད་ན། རེ་རེ་ཚོགས་པའི་ཐུན་མོང་གིས་སྡུག་རྒྱག་ནུས་ཚེ། མ་འོངས་པར་འགྲོ་བ་མིའི་རིགས་ཀྱི་ལམ་སྟོན་དང་སྣེ་ཁྲིད་ཀྱི་ནུས་པ་ཐོན་ནས། དམ་ཆོས་དཀར་འཇམ་ཡུག་གཅིག་ཏུ་གདལ་རྒྱུའི་སེམས་བསྐྱེད་དང་སྨོན་ལམ་རྒྱ་ཆུང་ཉན་ནི་མ་རེད།