ཉིན་བཅོ་བརྒྱད་པའི་ཆོས་ཁྲིད།
ཇི་སྐད་དུ་སློབ་དཔོན་ཙནྡྲ་གོ་མིའི་ཞལ་ནས། གང་ཞིག་ཐོབ་ནས་སྐྱེ་བའི་རྒྱ་མཚོ་མཐར་འབྱིན་ཅིང་། །བྱང་ཆུབ་མཆོག་གི་ས་བོན་དགེ་བའང་འདེབས་བྱེད་པ། །ཡིད་བཞིན་ནོར་བུ་བས་ཀྱང་ཡོན་ཏན་ཆེས་ལྷག་པ། །མི་ཉིད་དེ་ནི་སུ་ཞིག་འབྲས་བུ་མེད་པར་བྱེད། །ཅེས་དང་། སེམས་ཀྱི་སྟོབས་ཆེན་མི་ཡིས་རྙེད་པ་གང་ཡིན་པ། །ལམ་དེ་ལྷ་དང་ཀླུ་ཡིས་མི་རྙེད་ལྷ་མིན་དང་། །མཁའ་ལྡིང་རིག་འཛིན་མི་འམ་ཅི་དང་ལྟོ་འཕྱེས་མིན། །ཅེས་གསུངས་ཏེ། དེ་ཡང་རྟེན་འབྲེལ་བཅུ་གཉིས་ཀྱིས་འཁོར་བའི་འཁོར་ལོ་ནི། སྲིད་རྩ་མ་རིག་པས་སྲིད་པ་བསྐྱེད་ནས་གྲུབ་པ་ཡིན་ལ། དེ་ཡང་ཐོག་མའི་སྐྱེ་བ་མེད་ན་ཐ་མའི་རྒ་ན་འཆི་བ་མེད་པས། སྐྱེ་བའི་མཐའ་ཆོད་པས་ཤི་བའི་མཐའ་ཆོད་པ་ཡིན་ཕྱིར་འཁོར་བའི་འཁོར་མཚམས་བཞག་ནས། བྱང་ཆུབ་དགེ་བ་སྟེ་སྤྱིར་ན་ཐར་བ་ཐམས་ཅད་ལ་བྱང་ཆུབ་ཀྱི་སྒྲ་འཇུག་པ་ཡིན་ཡང་བྱང་ཆུབ་དགེ་བའམ་བྱང་ཆུབ་མཆོག་གི་དགེ་བ་ཞེས་བརྗོད་ཚེ་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ཉིད་ཡིན་པས་དེ་ཉིད་ཀྱི་ས་བོན་འདེབས་པར་བྱེད་པ་པོ་ཡིད་བཞིན་གྱི་ནོར་བུ་བས་ཀྱང་ཆེས་ལྷག་པ་སྟེ། ཡིད་བཞིན་གྱི་ནོར་བུ་བསམ་པ་ཐམས་ཅད་ཡིད་བཞིན་དུ་འགྲུབ་པར་བྱེད་པ་དེས་ཀྱང་། འཇིག་རྟེན་གྱི་ལོངས་སྤྱོད་གང་ལ་ཅི་འདོད་སྦྱིན་པ་ཙམ་ལས་ཐར་བའི་མཆོག་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་དངོས་གྲུབ་སྦྱིན་མི་ནུས་པས། ཡིད་བཞིན་གྱི་ནོར་བུ་དེ་བས་ཀྱང་ཆེས་ལྷག་པའི་མི་ཉིད་ཀྱི་ལུས་རྟེན་མཆོག་ཏུ་གྱུར་པ་ཐོབ་ནས་འཁོར་བའི་རྒྱ་མཚོ་གཏིང་མཐའ་མེད་པ་ལས་རང་ཐར་བ་མ་ཟད་གཞན་སྐྱོབ་པར་བྱེད་པའི་མཐུ་སྟོབས་ནུས་པ་ཞིག་ཐོབ་ཡོད་པས། དེ་ལས་སྙིང་པོའི་རིན་ཐང་མི་ལེན་པར་འབྲས་བུ་མེད་པར་རང་གར་ཆུད་གསོན་མཁན་ཞིག་སུ་ཡོད་དམ། དེ་གལ་ཏེ་ཡོད་ན་སེམས་མེད་ཀྱི་སྨྱོན་པ་ཞིག་དང་ཁྱད་པར་མེད་དོ་ཞེས་པའོ། །ཡང་སེམས་ཀྱི་སྟོབས་ཆེན་སྐྱེས་བུ་ཆེན་པོའི་ལམ་བགྲོད་བྱ་མཐར་ཐུག་པའི་མཆོག་དེ་ཉིད། སྙིགས་དུས་ཚེ་ཐུང་གི་དུས་གཅིག་ལ་སྒྲུབ་ཐུབ་པའི་ལམ་གྱི་མཐུན་རྐྱེན་ཚོགས་པའི་མིའི་ལུས་རྟེན་མི་རང་ཉིད་ཀྱིས་རྙེད་པ་གང་ཡིན་པ་འདི་དང་འདྲ་བའི་ལམ་དེ། འགྲོ་བ་གཞན་མཐོ་རིས་ཀྱི་གྲོང་འོད་ཀྱི་ཁང་བཟང་དང་ཡིད་འོང་གི་སྐྱེད་མོས་ཚལ་གྱི་ལྷ་དང་། ལོངས་སྤྱོད་ཀྱི་འབྱོར་བ་ཕུན་སུམ་ཚོགས་པའི་ཀླུ་དང་། ལྷ་དང་ཆ་འདྲ་བའི་མངའ་ཐང་འབྱོར་བ་དང་སྟོབས་ནུས་ལྡན་པའི་ལྷ་མ་ཡིན་དང་། མཁའ་ལྡིང་དང་། རིག་འཛིན་མིའམ་ཅི་དང་ལྟོ་འཕྱེ་ལ་སོགས་པའི་འགྲོ་བ་རིགས་སོ་སོ་ན་ཡོད་པའི་རང་རང་གི་མཐུ་སྟོབས་དང་། འབྱོར་བ་དང་། མངའ་ཐང་དང་། ཚེ་དང་བསོད་ནམས་ལྡན་པ་དེ་ཚོས་ཀྱང་འདི་ལྟ་བུའི་དོན་ཆེན་འགྲུབ་པ་མ་ཡིན་ནོ་ཞེས་པའོ། །དེས་ན་མིའི་ལུས་རྟེན་ནི་ཆོས་དང་འཕྲད་པ་དང་དེ་འདྲའི་རྩ་ཆེན་དང་རིན་ཆེན་ཞིག་ཡིན་པ་ཅིའི་ཕྱིར་སྙམ་ན། དལ་འབྱོར་གྱི་མི་ལུས་འདིས་མི་དགེ་བ་སྤོང་ཐུབ་པ་དང་། དགེ་བ་སྒྲུབ་ཐུབ་པས། འཁོར་བའི་རྒྱ་མཚོ་ལས་རྒལ་ཐུབ་པ་དང་། བྱང་ཆུབ་མཆོག་གི་ལམ་ལ་བགྲོད་ནས་རྫོགས་པའི་སངས་རྒྱས་ཀྱི་གོ་འཕང་ཐོབ་ནུས་པས། ལོངས་སྤྱོད་དང་འབྱོར་བ་དང་བདེ་སྐྱིད་དང་ལྡན་པའི་འགྲོ་བ་གཞན་གྱི་ལུས་རྟེན་གྱི་ཐོག་ནས་སྒྲུབ་མི་ཐུབ་པ་ཞིག་འདིས་འགྲུབ་པས་ན་རིན་པོ་ཆེ་ཞེས་དཀོན་པའི་དངོས་པོ་ཡིན་པས་ན་རྩ་བ་ཆེ་ཞེས་གསུངས་པའོ། །ཚེ་རིང་ལོངས་སྤྱོད་འབྱོར་བ་རྒྱས་ཆེ་ན་གཡེངས་པས་ཁྱེར་ནས་ཆོས་སྒྲུབ་མི་ནུས་པ་དང་། ངན་སོང་ངན་འགྲོའི་ལུས་ལྟ་བུའི་ལུས་རྟེན་ངན་པ་ཞིག་བླངས་ན་ལུས་སེམས་ཀྱི་སྡུག་བསྔལ་བཟོད་གླགས་མེད་པ་ཅན་ཞིག་ཡིན་ཕྱིར་སྡུག་བསྔལ་གྱི་ཚོར་བ་རྩུབ་མོ་དེས་མནར་ཞིང་གཟིར་བས་ཆོས་སྒྲུབ་པའི་གོ་སྐབས་མེད་དོ། །ཡང་ཀླ་ཀློ་དང་ལོག་ལྟ་ཅན་དབང་པོ་མ་ཚང་བ་ལ་སོགས་པ་མདོར་ན་ཆོས་ཀྱི་སྣོད་དུ་མ་གྱུར་པ་ཡང་མང་བ་ཡིན་པས་ན་རང་ཉིད་ཀྱི་དལ་རྟེན་འདི་ལ་རང་གིས་རང་ལ་རིན་ཐང་ཤེས་དགོས་པ་ཞིག་གོ །ཅི་ཡང་མེད་པ་ཞིག་ལ་ཡོད་སྣང་ཤར་ནས་ངའོ་བསམ་ནས་མཆོག་འཛིན་བྱས་ན་དེའི་མིང་ལ་མངོན་པའི་ང་རྒྱལ་ཟེར་ཞིང་། འོན་ཀྱང་ཡོད་པ་ཞིག་ལ་མེད་སྣང་ཤར་ནས་དཔའ་ཞུམ་ནས་སྒྱིད་པ་འཁུམས་པ་ལ་ནི་སྒྱིད་ལུག་བདག་ཉིད་བརྙས་པའི་ལེ་ལོ་ཟེར་བ་ཡིན་པས། དེ་གཉིས་ཀའི་མཐའ་ལ་མ་ལྷུང་བར་རང་ལ་ཡོད་པའི་རིན་ཐང་ངོ་ཤེས་དགོས་པ་ཡིན། དེས་ན་དལ་འབྱོར་གྱི་མི་ལུས་འདི་རྙེད་པར་དཀའ་ཞིང་ཕན་པ་ཆེན་པོ་ཅན་ཡིན་པའི་གནད་ཀྱིས་རིན་པོ་ཆེ་ལྟ་བུ་ཞེས་དཔེར་བཀོད་པའོ། །དེ་འདྲའི་རྙེད་དཀའ་བ་ཞིག་དང་། རྙེད་ན་རིན་ཐང་ཅན་ཞིག་ཡིན་ཡང་། འདི་རྙེད་དཀའ་འཇིག་སླ་ཞིག་ཀྱང་ཡིན་ཏེ། ཀུན་མཁྱེན་ཆོས་རྗེས། ཚེ་འདིའི་འཁྲུལ་སྣང་བྱིས་པའི་རྩེད་མོ་འདྲ། །བསླུ་ཞིང་འགྱུར་བ་ཡིན་ནོ་ཐར་ལམ་བགྲོད། །ཐམས་ཅད་བདེན་མེད་བར་སྣང་འཇའ་ཚོན་འདྲ། །གང་ལའང་ཡིད་བརྟན་མེད་ཀྱི་བྱང་ཆུབ་སྒྲུབས། །ཞེས་ཞལ་གདམས་མཛད་པའོ། །དལ་རྟེན་གྱི་མི་ལུས་འདི་དང་པོ་རྙེད་པར་དཀའ་བའི་ཚུལ་དང་རྙེད་ཀྱང་འཇིག་པར་སླ་བ་ཡིན་པའི་ཚུལ་ལ་བསམ་བློ་བཏང་ནས། ལུས་འདི་ལ་གྲུ་ཞིག་གི་འདུ་ཤེས་བཞག་ནས་འཁོར་བའི་རྒྱ་མཚོའི་ཕ་རོལ་ཏུ་སྒྲོལ་དགོས་ཏེ། རྒྱལ་སྲས་ཞི་བ་ལྷས་ཀྱང་། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱིས་ནས་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་བསྐུལ་བ་སྟེ། འུ་ཚོ་འཁོར་བའི་སེམས་ཅན་ཐམ་མེ་ཐོམ་མེར་བྱས་ནས་གཉིད་འཐོམ་མེ་བར་ཡོད་པ་རྣམས་རྨོངས་པ་ཞེས་འབོད་བཞིན་དུ་གོང་བ་ནས་བཟུང་སྟེ་འཐེན་པ་ལྟ་བུའོ། །དེས་ན་ད་རེས་ཐར་བའི་ལམ་བྱང་ཆུབ་དམ་པ་ཞིག་མ་བསྒྲུབས་ཚེ། དུས་གཏན་དུ་འཁོར་བའི་གནས་ནས་མི་ཐར་བ་ཞིག་ཏུ་འགྱུར་བ་ནི་རིག་རྒྱུ་གསལ་རྒྱུ་འདིའོ། །སྡུག་བསྔལ་ཅན་གྱི་གནས་འདི་ནས་མ་ཐར་ན་རང་གཞན་གཉིས་ཀས་སྡུག་བསྔལ་མྱོང་གིན་ཡོད་པ་འདི་ལ་གཅིག་བལྟས་ན་བཟོད་ཐབས་མེད་པ་ནི་ཧ་གོ་བཞིན་པ་འདང་ཡང་རྒྱག་བྱས་ན་ཤེས་ནུས་པ་ཡིན་ནོ། །གོ་ཚད་ཐམས་ཅད་སྡུག་བསྔལ་གྱི་འོ་དོད་ཤ་སྟག་ཡིན་པ་དང་། བཤད་ཚད་ཐམས་ཅད་མྱ་ངན་གྱི་ངུ་སྒྲ་འབའ་ཞིག་ཡིན་པ་ནི། འུ་ཚོ་མཐོ་རིས་མིའི་འཇིག་རྟེན་དུ་སྐྱེས་ཡོད་པ་རེད་ཀྱང་། རང་ཅག་གི་དུས་རྒྱུན་གྱི་ཁ་བརྡ་དང་སྐད་ཆ་ལ་ཕྱིར་དྲན་ཞིག་བྱས་ན། བཤད་རྒྱུ་བོ་ཅི་ཞིག་བཤད་ཀྱིན་ཡོད་ན། ཡ་ཀིས་ཕོ་མ་བྱས་རབས། མ་ཀིས་དོན་མ་འགྲུབ་ཚུལ། དེའི་རྐྱེན་གྱིས་འདི་བྱུང་ལུགས། དེ་མ་བྱས་ན་འདི་ཡོང་ས་མེད་པ། གཅིག་ན་ནས་སོང་བ། དེ་ཤི་ནས་ཡོད་པ། ཁོ་རྒས་ནས་ཡོད་ཚུལ། ང་ན་རྒྱུ་ཆེ་རབས། སྤུན་བླ་བདེ། ཕ་མ་བདེ་ཆེན། ཞང་པོ་འདས་པ། བསད་འགྲོ་རྒྱུ་དེ། ད་རེས་ཤི་འགྲོ་རྒྱུ་བོ་ལ་སོགས་པ་ནི་འུ་ཚོས་དུས་རྒྱུན་གྱི་བཤད་རྒྱུ་རྣམས་ཡིན་ལ། བཤད་རྒྱུ་ཡིན་པས་མ་ཚད་དོན་དངོས་ཀྱི་ཡོད་རྒྱུ་དང་ཡིན་རྒྱུ་ཡང་དེ་དག་རེད། ད་རུང་དེས་མི་ཚད་པར་གཞན་ཅི་ཤོད་ཀྱིན་ཡོད་ན་ངན་སྨོད་ལྐོག་དཔྱ་དགྲ་གྱོད་བོར་སྟོར་ལ་སོགས་མདོར་ན་མིག་ཆུ་མ་ཡོད་ཀྱང་སྡུག་བསྔལ་གྱི་ངུ་སྐད་ཤ་སྟག་གོ །དེ་ནི་ཁག་མེད་པ་ཡིན་ཏེ་ཚོར་བ་སྡུག་བསྔལ་ལས་མེད་ཚེ་བཤད་རྒྱུ་ཡང་སྡུག་བསྔལ་རབས་ལས་གཞན་ཅི་ཡོད་དེ། སེམས་ན་ན་བཤད། ལུས་ན་ན་རེག ཅེས་པའི་དཔེ་ལྟར་ཡིན་པའི་ཕྱིར། སྡུག་བསྔལ་ལ་སྡུག་བསྔལ་ཡིན་པར་ཤེས་ན། དེ་སྤོང་ཐབས་དང་མེད་ཐབས་ཀྱི་ལམ་ཞིག་བཙལ་ཡོང་བ་ཡིན་ནོ། །དེ་ཡང་ཐོག་མར་དེའི་འབྱུང་རྩ་ཤེས་དགོས་སོ། །སྡུག་བསྔལ་ལ་སྡུག་བསྔལ་ཡིན་པར་མ་ཤེས་དུས་ལམ་བསྒྲུབ་རྒྱུ་དེ་སྣང་མེད་དུ་ལུས་འགྲོ་བས། བཅོམ་ལྡན་འདས་ཀྱིས་དང་པོར་ཡུལ་ཝཱ་རཱ་ཎ་སཱི་དྲང་སྲོང་ལྷུང་བ་རི་དྭགས་ཀྱི་ནགས་ནས་བཀའ་དང་པོ་བདེན་བཞིའི་ཆོས་འཁོར་བསྐོར་བའི་དུས་སུ་སྡུག་བསྔལ་བདེན་པ་སྔོན་དུ་གསུངས་པའང་དེས་སོ། །སྡུག་བསྔལ་དེ་སྤང་འདོད་ཀྱི་བློ་ཞིག་སྐྱེས་ཚེ་དེ་གང་ནས་འབྱུང་བའི་རྩ་བ་ལས་ཉོན་ཡིན་པས། དེ་ལ་ཀུན་འབྱུང་བདེན་པ་ཞེས་གསུངས་པ་དང་། དེ་འདྲའི་སྡུག་བསྔལ་རྒྱུ་འབྲས་དེ་སྤོང་དགོས་ན་ལམ་རྒྱུད་ལ་བསྟེན་དགོས་པ་ཡིན་ཡང་འབྲས་བུ་འགོག་བདེན་དང་པོར་བསྟན་པ་ནི། ལམ་རྒྱུད་ལ་བསྟེན་དགོས་པ་ཤེས་པ་དང་བསྟེན་འདོད་སྐྱེ་བའི་རྒྱུ་མཚན་གྱིས་འགོག་ལམ་གཉིས་ཀ་རྒྱུ་འབྲས་སུ་གསུངས་པའོ། །འཁོར་བའི་སྡུག་བསྔལ་འདིའི་ནང་ནས་ཐར་འདོད་ན། དལ་རྟེན་གྱི་ལུས་འདིའི་ཐོག་ནས་ཚེ་ཐུང་གཡེངས་པའི་དབང་དུ་མི་ཤོར་བར་ཐར་པ་དོན་གཉེར་བྱེད་དགོས། དེའི་དོན་གཉེར་དེ་ད་རེས་ཀྱི་གོ་སྐབས་ཐོབ་ཚེ་འདི་ལ་མ་བྱས་ན། རང་གིས་རང་ཉིད་བསླུས་ནས་བརླགས་པར་བྱས་པའོ། །སྲིད་པའི་གྲོང་ལས་རིང་དུ་འདས་པའི་མྱ་ངན་ལས་འདས་པ་མཆོག་ཏུ་ཞི་བའི་རང་བཞིན་ཅན་ཐར་བ་བྱང་ཆུབ་སྒྲུབ་པ་ལ་འབད་དགོས་དུས་ཐོག་མ་ཉིད་ནས་དཀོན་མཆོག་རིན་པོ་ཆེ་རྣམ་པ་གསུམ་ལ་སྐྱབས་སུ་སོང་ནས་བྱང་ཆུབ་མཆོག་ཏུ་སེམས་བསྐྱེད་དགོས་པས། དེ་ཡང་རྩ་བ་སྙིང་རྗེ་ལ་ཐུག་པ་ཞིག་ཡིན་པས་སྙིང་རྗེའི་ས་བོན་ལས་སྐྱེས་པའི་བྱང་ཆུབ་མཆོག་ཏུ་སེམས་བསྐྱེད་ན། གནས་སྐབས་སྲིད་པའི་ཁམས་འདིར་གནས་པའི་རིང་ལ་ཡང་བདེ་བའི་འབྲས་བུ་མང་པོ་ལྡན་པ་དང་། མཐར་ཐུག་གཞལ་དུ་མེད་པའི་ཡོན་ཏན་ཡིད་བཞིན་ནོར་བུའི་གཏེར་ཆེན་པོ་ཐོབ་པ་དང་འདྲ་བར་ཡིན་པས་ན། གཞན་དོན་དུ་རྫོགས་པའི་བྱང་ཆུབ་ཏུ་སེམས་བསྐྱེད་ན་འདིའི་བསོད་ནམས་ཀྱི་ཕུང་པོ་དཔག་ཏུ་མེད་པ་ལ་རྒྱལ་བ་ཐམས་ཅད་ཀྱིས་བསྔགས་ཤིང་འཇིག་རྟེན་གསུམ་གྱིས་མངོན་པར་བསྟོད་པའོ། །སྨོན་དང་འཇུག་པའི་བདག་ཉིད་ཅན་བྱང་ཆུབ་ཏུ་སེམས་རིན་པོ་ཆེ་བསྐྱེད་པའི་དགེ་བ་དེ་དང་ཆ་འདྲ་བ་གཞན་ཞིག་འཇིག་རྟེན་གསུམ་ན་བཙལ་ཀྱང་ཡོད་པ་མིན་ཏེ། དེ་ཡང་སྨོན་པ་བྱང་ཆུབ་ཀྱི་སེམས་བསྐྱེད་ལྟ་བུ་ཞིག་ལ་མཚོན་ན་སྡུག་བསྔལ་མང་པོས་ཀུན་ནས་མནར་བའི་ཐོག་མེད་ནས་འཁོར་བར་འཁྱམས་པའི་སེམས་ཅན་ཐམས་ཅད་ལ་བརྩེ་བའི་སྒོ་ནས་ཚད་མེད་བཞི་སྒོམ་པ་སྟེ། ཚད་མེད་བཞི་སྒོམ་པའི་དུས་ཀྱང་བྱམས་པའི་ས་གཞི་ལ་སྙིང་རྗེའི་མེ་ཏོག་བཀྲམ། དགའ་བའི་ལྗོན་ཤིང་ལ་བཏང་སྙོམས་ཀྱི་མཚོ་རྫིང་བསྐྱིལ་ནས་མ་ལུས་འགྲོ་བའི་ཚོགས་ཐམས་ཅད་སྡུག་བསྔལ་མེད་པའི་ངལ་གསོའི་འགྲོན་སྟེགས་ཤིག་གཉེར་ནས། འཇུག་པ་སེམས་བསྐྱེད་ཀྱིས་ཕ་རོལ་ཏུ་ཕྱིན་པ་དྲུག་ལ་བསླབ་པ་སྟེ། བསླབ་རྒྱུ་དེ་ཡང་ཕྱིན་དྲུག་གི་རང་བཞིན་དྲུག་ཚན་དྲུག་པོ་དེ་གོ་ཆའི་སྒྲུབ་པས་སྒྱུ་མ་བཞིན་དུ་ཐག་བཅད་པ་སྟེ། དེ་ཡང་གཅོད་པ་པོ་དང་། གཅད་བྱའི་དངོས་པོ་དང་། གང་ཞིག་ཡུལ་དུ་བྱས་པ་ཐམས་ཅད་དངོས་པོ་མེད་པའི་འཁོར་གསུམ་དག་པས་བྱང་ཆུབ་ཆེན་པོ་ཐར་བའི་མཆོག་ལ་བསྔོ་བ་དེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སྤྱོད་པ་དམ་པ་མ་ནོར་བ་ཡིན། དེ་བཞིན་དུ་ཕྱིན་དྲུག་དང་ཐབས་སྟོབས་སྨོན་ལམ་ཡེ་ཤེས་ཀྱི་ཕར་ཕྱིན་བཅུ་བོ་རེ་རེ་ལ་བཅུ་བཅུར་དབྱེ་བས་ས་ཐམས་ཅད་ཡོངས་སུ་བསྒྲུབས་པར་བྱས་ནས་དེ་དང་དུས་མཚུངས་སུ་ཚོགས་སྦྱོར་མཐོང་སྒོམ་གྱི་ལམ་བཞི་ལ། དྲན་པ་ཉེ་བར་བཞག་པ་བཞི། ཡང་དག་པའི་སྤོང་བ་བཞི། རྫུ་འཕྲུལ་གྱི་རྐང་བ་བཞི། དབང་པོ་ལྔ། སྟོབས་ལྔ། བྱང་ཆུབ་ཀྱི་ཡན་ལག་བདུན། འཕགས་ལམ་ཡན་ལག་བརྒྱད་པོ་ཐམས་ཅད་མཉམ་བཞག་དང་རྗེས་ཐོབ་ཅན་གྱི་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་བསྒོམས་པས། གཟུངས་དང་ཏིང་འཛིན་སྤྱན་དང་མངོན་ཤེས་ལ་མངའ་བརྙེས་ནས་སྒྲིབ་པའི་མུན་པ་དང་བྲལ་ཏེ་ཡེ་ཤེས་ཀྱི་སྣང་བ་ལ་དབང་འབྱོར་བ་ཡིན་ནོ། །དེ་ལྟ་བུའི་ས་ལམ་གྱི་བགྲོད་པ་ཉི་ཟླའི་འགྲོས་བཞིན་མྱུར་བར་བགྲོད་ནས་མཐར་གྱིས་དག་པ་གཉིས་ལྡན་གྱི་ཆོས་སྐུའི་ཕོ་བྲང་ཆེན་པོ་དེར་གཤེགས་ནས། ལོངས་སྤྱོད་རྫོགས་སྐུ་དང་སྤྲུལ་བ་སྐུ་ཡི་གཟུགས་སྐུ་རྣམ་པ་གཉིས་ཀྱིས་བརྒྱན་ནས་རང་གཞན་དོན་གཉིས་ལྷུན་གྱིས་གྲུབ་པ་ཡིན་ནོ། །རྒྱུ་མཚན་དེས་ན་བྱང་ཆུབ་དོན་དུ་གཉེར་བའི་སྐལ་ལྡན་གྱི་སྐྱེས་བུ་ཞིག་ཡིན་ནས་བཟུང་སྟེ་མི་ཚེའི་ཉི་མ་དོན་ལྡན་དུ་སྐྱེལ་ནས་སྤྱོད་ཡུལ་ཐམས་ཅད་པོ་ཐར་བ་བྱང་ཆུབ་སྒྲུབ་པའི་ལམ་དེ་ལས་མ་འདས་པ་ཞིག་བྱེད་དགོས་སོ། །དེ་ཡང་ཉིན་ཞག་ཕྲུགས་གཅིག་ལ་མཚོན་ན། ཆུ་ཚོད་ཉི་ཤུ་རྩ་བཞིའི་ནམ་གྱི་ཆ་སྟོད་སྨད་གཉིས་ཉིན་གྱི་སྔ་ཕྱི་དྲོ་གཉིས་དང་དགུང་གཉིས་དང་ཐུན་དྲུག་གམ་དེ་ལྟར་མ་ནུས་ན་ཉིན་མཚན་གྱི་ཐུན་བཞིའི་རྣལ་འབྱོར་ལས་མི་འདའ་བར་བརྩོན་འགྲུས་ཆོས་ཕྱོགས་སུ་བརྩམ་དགོས་པས། །བསམ་གཏན་དང་ཆོས་སྤྱོད་ལ་ཅི་ནས་ཀྱང་བརྩོན་པ་དང་། །དུས་རྒྱུན་དུ་མི་རྟག་འཆི་བ་ནམ་ཡོང་ཆ་མེད་ཀྱི་འདུ་ཤེས་དང་མི་འབྲལ་བའི་ཐོག་ནས་དཀོན་མཆོག་གསུམ་པོ་རྟག་ཏུ་དྲན་པ་ལ་སོགས་པའི་སྤྱོད་ཡུལ་ཡོངས་སུ་དག་པའི་སྤྱོད་པ་ལ་སྤྱོད་བཞིན་དུ། རང་གིས་རང་ལ་བརྟགས་ཤིང་དཔྱད་ནས་རང་སྐྱོན་ངན་པ་དེ་མཚང་ནས་འདོན། ཡུལ་ནས་ཕུད། གཞན་སྐྱོན་མཐོང་བའི་དུས་སུ་རང་སྣང་འཁྲུལ་བ་རེད་བསམ་ནས། གཞན་གྱི་ཡོན་ཏན་ལ་རྗེས་སུ་ཡི་རངས་བྱེད་པ་དང་སྐྱེས་བུ་དམ་པ་རང་ལས་ལྷག་པ་རེ་བསྟེན་ནས་གོང་དུ་བཀུར་རྒྱུ་དང་ནི། ནམ་ཡང་སྡིག་པའི་གྲོགས་པོ་དང་མི་འགྲོག་པར་དེའི་དབང་དུ་མི་འགྲོ་བར་བྱེད་པ་དང་། དེ་ལྟ་བུའི་དམ་པའི་ཆོས་ལམ་ནས་ཚེ་འདིར་སྒྲུབ་པ་ཉམས་ལེན་གྱི་འབྲས་བུ་ཐོབ་པ་ཞིག་བྱེད་བསམ་ན། དབེན་པའི་གནས་དམ་པ་གོང་མའི་སྒྲུབ་པའི་གནས་ཤིག་ཏུ་སོང་སྟེ། ཐོས་བསམ་སྒོམ་པས་རང་གི་རྒྱུད་སྦྱངས་ནས་ཅི་བྱེད་དམ་པའི་ཆོས་ལ་འགྲོ་བ་ཞིག་གི་ཐོག་ནས། སེམས་ཉིད་ཀྱི་དབྱིངས་ལ་ལྟ་བའི་རྫོང་བཅས་ནས་གནས་ལུགས་འཕོ་འགྱུར་བྲི་གང་དང་བྲལ་བའི་ངང་དུ་མཉམ་པར་འཇོག་དགོས་སོ། །དེ་ལྟར་བྱས་ནས་འདི་ལྟར་སྣང་བའི་ཆོས་ཐམས་ཅད་སྒྱུ་མ་རྨི་ལམ་མིག་ཡོར་གཟུགས་བརྙན་དྲི་ཟའི་གྲོང་ཁྱེར་སྤྲུལ་བ་བཞིན་དུ་སྣང་དུས་ཉིད་ནས་རང་བཞིན་གྱིས་མ་གྲུབ་པ། གཟུང་འཛིན་དང་བྲལ་བའི་གསལ་སྣང་མཁའ་ལྟར་དག་ནས་སྤྲོས་པ་ཐམས་ཅད་ཞི་བ་མ་སྐྱེས་མ་འགགས་མི་གནས་འགྲོ་འོང་བསམ་བརྗོད་དང་བྲལ་བ་བསམ་འདས་བརྗོད་མེད་བྱང་ཆུབ་སེམས་ཀྱི་ངང་དེར་ཟབ་མོ་འཕགས་པའི་སྤྱོད་ཡུལ་ལ་བླ་མའི་ལུང་བཞིན་དུ་མཉམ་པར་བཞག་ན་ཡོན་ཏན་གྱི་ཚོགས་ཟད་མི་ཤེས་པ་ཞིག་མ་འབད་ལྷུན་གྱིས་གྲུབ་པ་ཡིན་ནོ། །འུ་ཚོ་སོ་སོའི་སྐྱེ་བོ་ཐ་མ་པ་ལ་མཚོན་ན་རྣམ་རྟོག་གི་སྤྲོས་པ་ཡུལ་ཐོག་ཏུ་འཕྲོ་བའི་བློ་ངན་གོམས་ཀྱི་བག་ཆགས་དེ། ཤོག་དྲིལ་དྲིལ་ལམ་དུ་རྒྱུག་པ་དང་འདྲ་བར་ཐོག་མེད་ནས་གོམས་སོང་བ་ཡིན་པས། ད་གཟོད་ནས་དྲན་ཤེས་ཀྱི་སྒྲོག་གིས་སྡོམ་དགོས་ན་གོ་རར་མ་འདུས་པའི་ཚུགས་ཀས། སྒོམ་པ་བས་ཀློག་འདོན་ཞིག་གི་སླ་བ་ལྟ་བུ་དང་། ཕྱག་སྐོར་སོགས་ལས་རྒྱུ་ཞིག་གི་སླའོ་སྙམ་པ་ལྟ་བུ། ལས་དང་པོ་བ་ལ་ཡོང་སྲིད་པ་ཡིན་ཡང་། རིམ་གྱིས་རིམ་གྱིས་གོམས་ནས་ཇེ་སླ་རུ་འགྲོ་བ་ཡིན་ཏེ། མ་མྱོང་བ་དེ་ཐོག་མར་དཀའ་སྣང་ཤར་བ་ནི་དངོས་པོ་ཐམས་ཅད་ཀྱི་ཆོས་ཉིད་ཡིན་པའི་ཕྱིར། དེས་ན་ཞི་ལྷག་ཟུང་འཇུག་གི་བསམ་གཏན་ལ་གོམས་ན་བར་ཞིག་ལ་དེའི་ངང་ནས་སེམས་ཕྱིར་འཕྲོས་ནས་ཐ་མལ་གྱི་རྣམ་རྟོག་ཤར་ཁ་མི་ཉན་པ་ཞིག་ཡོང་རྒྱུ་ཡོད་པ་རེད། སྤྱིར་ན་རང་གཞན་སུ་ཡིན་ཡང་འདོན་སྒོམ་ཞིག་གི་དུས་སུ་གཉིད་ལོག་བྱེད་པའམ་ཡང་ན་སེམས་ཡུལ་ཐོག་ཏུ་འཕྲོས་ནས་མི་འཁྲུལ་དགུ་འཁྲུལ་དུ་འཁྲུལ་འགྲོ་བ་ཞིག་རེད་ཀྱང་། སེམས་གནས་ཀྱི་བསམ་གཏན་སྒོམ་དུས་ཡིན་གཅིག་མིན་གཅིག་རྣམ་རྟོག་དགག་དགོས་པ་ཞིག་ཅི་ལ་ཡིན། མི་གསོན་པོ་སེམས་ཡོད་ཀྱི་སེམས་རྣམ་རྟོག་མི་ཤར་བ་ཞིག་གང་ན་སྲིད། རྫོགས་པ་ཆེན་པོ་སྒོམ་པའི་སྐབས་སུ་རྣམ་རྟོག་ཁོག་ཤོག་གསུངས་མེད་ཅིང་། དེ་མ་ཤེས་ནས་རྣམ་རྟོག་དགག་ས་ནས་སྲོག་ལ་རླུང་ཞུགས་ནས་འགའ་རེ་སྒོམ་སྨྱོན་དུ་འགྲོ་བཞིན་འདུག་པས་དེ་འདྲ་རེད་འགྲོ། རྣམ་རྟོག་ཤར་མ་ཆོག་ན་གང་ཤར་རང་གྲོལ་གསུངས་དོན་ཡོད་པ་མ་ཡིན། ཤར་མ་ཆོག་དུས་ཅི་ཞིག་གྲོལ་ཡོང་སྟེ་དེས་ན་གྲོལ་ཡོང་རྒྱུ་ཞིག་ཡོད་པ་མ་ཡིན། བུད་ཤིང་མེད་པའི་མེ་ཞིག་ཁྱེར་ཤོག་ཅེ་ན་དེ་ནི་བཙན་གཏམ་བཤད་པ་ཡིན་པ་དང་འདྲའོ། །དེས་ན་དུས་རྒྱུན་དུ་ཁ་ཏོན་དགེ་སྦྱོར་སྔོན་འགྲོ་ཡི་སྐབས་ལ་སོགས་པ་ཐམས་ཅད་ལ་ཡེངས་འབྱམས་འཁྲུལ་བའི་དབང་དུ་མི་ཤོར་བའི་དྲན་པ་ཞིག་བསྟེན་ནས་དྲན་པ་སྒོམ་གྱི་ངོ་བོ་རུ་གྱུར་ནས་བསྐྱེད་རིམ་རྫོགས་རིམ་ལ་སོགས་པ་ཉམས་ལེན་གང་ཡིན་ཡང་དེ་དང་སྦྱར་ནས་གྲིམ་ལྷོད་རན་པོ་བྱེད་པ་ནི་གནད་ཀྱི་མན་ངག་ཡིན། དེ་ལྟ་བུའི་ཡེངས་མེད་ཞེན་པ་དང་བྲལ་བ། བསྒོམ་རྒྱུ་ཏིལ་འབྲུ་ཙམ་ཡང་མེད་པ་ལ། ཡེངས་སུ་སྐད་ཅིག་ཀྱང་མི་འགྲོ་བའི་བརྩོན་འགྲུས་གཞུ་བདུང་བ་འདྲ་བ་ཞིག་གི་སྟེང་ནས་མི་ཚེའི་ཉི་མ་དོན་ལྡན་མཛད་དགོས་པའི་དྲན་སྐུལ་ཞུས་པ་དང་ཆབས་ཅིག་ཏུ། སྐབས་འདིར་གང་ཞིག་གསན་པར་བྱ་བ་གསང་བ་བླ་ན་མེད་པ་འོད་གསལ་རྡོ་རྗེའི་སྙིང་པོའི་གནས་གསུམ་གསལ་བར་བྱེད་པ་ཚིག་དོན་རིན་པོའི་མཛོད་འདི་ཉིད་འཆད་ཉན་བགྱི་བའི་སྐབས་ལས་རྡོ་རྗེའི་གནས་བཅུ་བ་བར་དོ་བཤད་པའི་སྐབས་ལས་འགའ་ཞིག་སོང་ནས།
༼༤༽ ཡེ་ཤེས་ལྷུན་གྲུབ་ལ་ཐིམ་ཚུལ་བསྟན་པ།
བཞི་པ་ཡེ་ཤེས་ལྷུན་གྲུབ་ལ་ཐིམ་པའི་སྣང་བ་བསྟན་པ་ལ་གཉིས་ཏེ། ལྷུན་གྲུབ་ཀྱི་འཆར་ལུགས་དང༌། ཐིམ་ལུགས་སོ། །དང་པོ་ནི་ཡེ་ཤེས་ཀྱི་སྣང་བ་དེ་དག་སྟེང་གི་འོད་ཟླུམ་དེ་ལ་འདུས་ནས་རང་དང་དབྱེར་མེད་པའི་ངང་ལས་རང་ས་སྟེང་གི་ཆ་ཀ་དག་གི་སྣང་བ་ནམ་མཁའ་སྤྲིན་མེད་པ་ལྟ་བུའི་ངང་ལས་འོག་ཏུ་ཁྲོ་བོའི་ཞིང་དང༌། ཞི་བའི་ཞིང་དང་རང་བཞིན་སྤྲུལ་པའི་ཞིང་དང༌། འོག་ན་མ་དག་པ་འགྲོ་དྲུག་གི་ཞིང་སྣང་གཟུགས་བརྙན་ལྟ་བུ་རྣམས་དུས་གཅིག་ལ་འཆར་ཏེ། དེ་ཡང་ཐུགས་རྗེ་ལྟར་ཤར་བས་འཁོར་འདས་རྒྱ་མ་ཆད་པ་ལ་སོགས་པའོ། །འདིའི་དུས་སུ་དར་ཅིག་རང་རིག་ཀ་དག་གི་ས་ལ་གནས་པ་སྟེ་རང་ངོ་ཤེས་ནས་དེའི་ངང་ལས་ཕྱིར་མི་ལྡོག་པ་དཔག་ཆེན་གྱི་མདའ་སོང་པ་ལས་མི་ལྡོག་པ་ལྟ་བུའི་གདམས་ངག་དྲན་པར་བྱ་སྟེ། ཉི་ཟླ་ཁ་སྦྱོར་ལས། དེ་ནས་རང་གི་ཤེས་པ་སྟེང་གི་འོད་ལ་ཐིམ་པས་ཤར་ལུགས་བརྒྱད་ཉམས་སུ་མྱོང་བའོ། །དེའི་ཚེ་འོག་གི་ལོངས་སྐུ་ཁྲོ་བོའི་སྣང་བ་རྣམས་ཀྱང་མཐོང་བར་འགྱུར་རོ། །ཤར་ལུགས་བརྒྱད་གང་ཞེ་ན། ཐུགས་རྗེ་ལྟར་ཤར་བས་འཁོར་འདས་རྒྱ་མ་ཆད། འོད་ལྟར་ཤར་བས་སྣང་བ་ཐམས་ཅད་ནང་ན་གསལ། སྐུ་ལྟར་ཤར་བས་ཤེས་བྱའི་ཁ་ཕྱིར་མ་ཤོར། ཡེ་ཤེས་ལྟར་ཤར་བས་སྣང་བ་ཐམས་ཅད་ཟང་ཐལ། གཉིས་མེད་ལྟར་ཤར་བས་རང་གི་ཤེས་པ་རྩེ་གཅིག་ཏུ་གནས། མཐའ་གྲོལ་ལྟར་ཤར་བས་མཐའ་གང་ལའང་མི་གནས། མ་དག་པའི་འཁོར་བའི་སྒོ་ལྟར་ཤར་བས་སྲིད་པའི་བྱུང་ཁུངས་མ་འགགས། དག་པ་ཡེ་ཤེས་ཀྱི་སྒོ་ལྟར་ཤར་བས་ཆོས་ཉིད་དུ་འབྲེལ་བའོ། །དེའི་ཚེ་ཕྱིར་མི་ལྡོག་པ་དཔག་ཆེན་གྱི་མདའ་ལྟ་བུའི་ཐབས་མཆོག་ཏུ་དྲན་པར་བྱའོ་ཞེས་སོ། །ཡེ་ཤེས་ལྷུན་གྲུབ་ལ་ཐིམ་པའི་སྐབས་འདིར། ཤར་ལུགས་དྲུག་དང་སྒོ་གཉིས་ཀྱིས་བརྒྱད་དུ་སྣང་བ་ནི་གོང་འོག་གི་ཚུལ་དུ་སྣང་སྟེ། སྟེང་ན་ཀ་དག་གི་སྣང་བ་ནམ་མཁའ་སྤྲིན་བྲལ་གཡའ་དག་པ་ལྟ་བུ། དེའི་འོག་ཏུ་ལོངས་སྐུ་ཁྲོ་བོའི་དཀྱིལ་འཁོར་རྒྱ་ཆེ་ལྷུན་སྟུག་གི་རང་བཞིན། དེའི་འོག་ན་ལོངས་སྐུ་ཞི་བའི་སྣང་བ་འོད་གསལ་ལ་བཀོད་ལེགས་པ། དེའི་ཕྱོགས་མཚམས་དག་ན་རང་བཞིན་སྤྲུལ་བའི་ཞིང་སྣང་ཡིད་དུ་འོང་ལ་ལྟ་ན་སྡུག་པ། འོག་ན་འགྲོ་དྲུག་འཁྲུལ་བའི་སྣང་བ་འདུལ་བྱེད་སྟོན་པ་དང་བཅས་པ། དེ་ཐམས་ཅད་ཀྱང་རང་སྣང་དུ་གཟུགས་བརྙན་ལྟར་སྣང་དུས། ངོ་མ་ཤེས་ན་གཞན་ལྟར་སྣང་བའོ། །འདི་དག་ཀྱང་སྔར་ངོ་མ་ཤེས་ནས་འཁྲུལ་ཏེ་ཡོང་སའི་གཞི་སྣང་རྣམས་དུས་འདིར་ཤར་བས། འདིའི་སྐབས་སུ་དཔག་ཆེན་གྱི་མདའ་ཚུར་མི་ལྡོག་པ་ལྟ་བུའི་གདམས་ངག་དྲན་དགོས་སོ། །ནང་དབྱིངས་ཀ་དག་ཟང་ཐལ་སྐད་ཅིག་གིས་རྟོགས་ཏེ། ཕྱིས་ལུས་བླངས་ནས་ལུས་སུ་མི་ལྡོག་པའི་གདམས་པ་གནད་ཆེ་སྟེ། འདིའི་དུས་སུ་དང་པོ་རང་སྣང་ཡིན་པར་རང་ངོ་ཤེས་ནས་སྔར་འདྲིས་ཀྱི་མི་དང་འཕྲད་པ་ལྟ་བུའི་རང་སྣང་ལ་ཐེ་ཚོམ་མི་ཟ་བར་ཡིད་ཆེས། དེ་ནས་མི་འགྱུར་བ་གསེར་གྱི་ཐུར་མའི་དཔེས་ཡིད་ཆེས་ཐོག་དེ་ནས་གཞན་དུ་མི་གཡོ་བ་བརྩོན་པ་བསྐྱེད་ནས་རང་ཉིད་ཀྱིས་བཙན་ས་གཟུང་བ་གནད་ཆེ་ཞིང་། དེའི་ཐོག་ནས་གོང་དུ་བཤད་པའི་དཔག་ཆེན་གྱི་མདའ་ཕྱིར་མི་ལྡོག་པའི་དཔེས་བཙན་ས་བཟུང་བའི་གཤིས་མི་འགྱུར་བ་དེའི་ཐོག་དེར་མི་གཡོ་བར་བཞག་པས་གྲོལ་བའོ། །ཚུར་བསྡུས་ན་རང་ངོ་ཤེས། བྱེ་བྲག་ཕྱེད། ཕྱེད་ཐོག་ནས་གྲོལ་བ་དེ་དག་ཡིན་ནོ། །དེ་ལྟར་ཀ་དག་གི་རིག་པ་ལ་འཆར་བྱེད་བརྒྱད་དུ་ཡེ་ནས་ཡོད་པའི་ཕན་ཡོན་གྱིས་སྐུ་དང༌། ཡེ་ཤེས་དང༌། ཐུགས་རྗེ་དང༌། ཡོན་ཏན་དང༌། འཕྲིན་ལས་ཤར་ནས་རང་བཞིན་གྱི་དོན་འབྱུང་བ་སྟེ། འཆར་ཚུལ་གྱི་ཆ་འདི་རྣམས་མེད་ན་རིག་པ་སྟོང་ཆད་དམ་འཁོར་འདས་འབྲེལ་ཐག་ཆད་པས་ཐུགས་རྗེས་དོན་མཛད་པ་གཏན་ནས་མི་འབྱུང་ལ། འཁོར་འདས་གཉིས་ཀ་ལྟེ་ཆད་ཅེས་པའི་གོ་དོན་ནོར་བས། མྱང་འདས་ཡར་ཆད་པ་དང་། འཁོར་བ་མར་ཆད་པར་བཟུང་ནས། མྱང་འདས་ནི་གཏན་དུ་མྱང་འདས་དང་། འཁོར་བ་ཡང་གཏན་དུ་འཁོར་བ་ཡིན་པས། སེམས་ཅན་འཁྲུལ་བས་མ་འཁྲུལ་བའི་ལམ་སྒོམ་ཞིང་འབྲས་བུ་སྡུག་བསྔལ་དང་འབྲལ་དུ་མེད་པར་གོ་བ་ཡོད་ཀྱང་། འཁོར་འདས་སུ་སྣང་བ་འདི་རིག་པའི་སྣང་ཚུལ་ཙམ་ཡིན་པས་གྱེས་གཞི་གཅིག་ཡིན། དེ་ཡང་མ་འདྲེས་ཤིང་འབྲེལ་བར་གྲུབ་པ་ཞེས་པ་སྟེ། གཞི་ལ་འཁྲུལ་བ་མེད་ཀྱང་འཁྲུལ་བ་གཞི་ལ་ཡོད་པའི་གོ་བ་དང་ཕྱོགས་འདྲའོ། །འཁོར་འདས་རང་ངོར་སྣང་བའི་ཆ་འདི་རྣམས་ཀྱང་ད་ལྟ་སུ་ལའང་སྣང་བར་མི་རིགས་པ་ལས་ལྷུན་གྲུབ་ཀྱི་འཆར་ཚུལ་མ་འགགས་པའི་ཡོན་ཏན་ཡིན་ནོ་ཞེས་བཤད་པ་ནི། རིན་པོ་ཆེ་སྤུངས་པ་ལས། ལྷུན་གྲུབ་འཆར་བྱེད་མ་འགགས་པས། །སྣ་ཚོགས་སྣང་བའི་རང་བཞིན་ནི། །ཡོན་ཏན་ཆེན་པོ་རྣམས་སུ་སྣང༌། །འཆར་བྱེད་སྒོ་རྣམས་བརྒྱད་ལས་ཀྱང༌། །ཡོན་ཏན་བརྒྱད་ཀྱི་ཚུལ་དུ་ཤར། །རིགས་དྲུག་འབྲོས་ཁུང་རང་བཅད་ནས། །འཁོར་བར་དཔྱང་ཐག་ཆད་པ་རྣམས། །སྙིང་རྗེའི་ཞགས་པས་གཟུང་བའི་ཕྱིར། །སྐྱེ་བཞིའི་གཟུགས་ཀྱིས་སེམས་ཅན་ལ། །ཐུགས་རྗེ་ཆེན་པོ་ཉིད་དུ་སྣང༌། །འཁོར་འདས་རང་འབྲེལ་ཡོན་ཏན་དུ། །གཉིས་ཆ་འདྲེས་པའི་ཚུལ་དུ་སྣང༌། །འདི་མེད་འཁོར་འདས་ལྟེ་ཆད་པས། །རྟོགས་པ་མེད་པའི་སྐྱོན་འགྱུར་བས། །ཡོན་ཏན་འབྱུང་ཚུལ་འདི་ཙམ་མོ། །སངས་རྒྱས་ཀུན་གྱི་རང་ཡུལ་ལ། །ལུས་དང་གྲིབ་མ་ཇི་བཞིན་དུ། །སྣང་བའི་འོད་ལྔས་ཁྱབ་པའི་ཕྱིར། །ནང་གི་སྣང་ཆ་རང་གསལ་བར། །འོད་ལྔའི་ཚུལ་གྱིས་འཆར་སྒོ་ལས། །ཡོན་ཏན་གསལ་བྱེད་ཕྱིར་མ་ཤོར། །འདི་མེད་སེམས་ཅན་རང་འོད་དང༌། །རྒྱ་ཆད་གུད་དུ་བཅད་པར་འགྱུར། །ཟུང་འཇུག་འཆར་བྱེད་འབྲེལ་བའི་ཕྱིར། །རང་སྣང་ཡོན་ཏན་ཆེན་པོར་འབྱུང༌། །ལུས་ཀུན་གཅིག་ཏུ་དྲིལ་བའི་ཕྱིར། །སྐུ་གསུམ་གཅིག་ཏུ་གནས་པས་ན། །ངོ་བོ་སྐུ་ཡི་རང་བཞིན་དུ། །རང་སྣང་གང་དུ་མི་འབྱེད་པས། །ངོ་བོ་གསལ་བྱེད་སྐུ་ལྟར་ཤར། །འདི་མེད་ངོ་བོ་མི་རྙེད་པས། །ལུས་ཀུན་རྫོགས་པའི་སྐུ་ལྟར་སྣང༌། །དེ་ཀུན་ཐ་དད་མ་ཡིན་པར། །གཉིས་མེད་མཉམ་པར་གནས་པས་ན། །འབྱེད་མེད་གཉིས་སུ་མེད་པ་ཡི། །སྣང་བ་ཕྱི་དང་ནང་ཀུན་དུ། །ཁྱབ་བྱེད་ཆེན་པོའི་ཚུལ་དུ་ཤར། །འདི་མེད་རང་ངོ་ཐ་དད་པས། །འཁོར་འདས་འདྲེས་པའི་མཚམས་མི་སྦྱོར། །རང་ས་ཉིད་ལས་མི་གྲོལ་བས། །སྒྱུར་ཟློག་མེད་པའི་སྐྱོན་འགྱུར་པས། །སྣང་བྱེད་ཡོན་ཏན་ཚུལ་དུ་ཤར། །ཤེས་བྱ་ཀུན་ལ་རང་ཁྱབ་པས། །བཞི་སྦྱོར་ཆེན་པོའི་སྣང་བར་ནི། །འཁོར་འདས་འབྲེལ་བའི་ལམ་དུ་སྣང༌། །འདི་མེད་གཞི་ལམ་མི་འབྱོར་བས། །ཡེ་ཤེས་བཞི་ཡི་ལམ་ཉིད་དུ། །སེམས་ཅན་རྣམས་ཀྱི་གསང་ལམ་དུ། །སྣང་བ་བཞི་ཡི་ཚུལ་དུ་ཡང༌། །ཅིག་ཅར་བ་དང་རིམ་གྱིས་སུ། །དབང་པོའི་སྒོ་རྣམས་ཡོད་བཞིན་སྣང༌། །མཐའ་བཞིའི་དྲི་མ་ལས་འདས་པའི། །འཆར་བྱེད་ཡོན་ཏན་མ་འགགས་པར། །མཐའ་གྲོལ་ཆེན་པོའི་སྣང་ཚུལ་དུ། །ལྷུན་གྲུབ་རང་རྫོགས་ཆེན་པོ་ལས། །ངེས་པའི་ཀ་དག་ལ་སྤྱོད་ཕྱིར། །མཐའ་དང་བྲལ་པའི་ཡེ་ཤེས་སུ། །འདི་ཉིད་རང་བྱུང་རང་ཤར་བས། །མཐའ་ལས་གྲོལ་བར་སྣང་བ་ནི། །ངོ་བོ་ཉིད་དང་འབྲེལ་པར་སྣང༌། །འདི་མེད་ངེས་པ་མི་ཐོབ་པས། །རྒྱུ་འབྲས་བཟློག་པའི་སྐྱོན་འགྱུར་བས། །མཐའ་གྲོལ་ཉིད་དུ་ཡང་དག་སྣང༌། །ཡོན་ཏན་འཆར་ཚུལ་མ་འགགས་པས། །འཁོར་བ་བསྐྱེད་བའི་བྱུང་ཁུངས་སུ། །མ་དག་པ་ཡི་འཆར་སྒོ་ལྟར། །བྱུང་ཚུལ་འགག་པ་མེད་པར་ཤར། །འདི་མེད་འཁྲུལ་པ་མིང་མེད་པས། །དེ་ཕྱིར་མ་དག་འཁོར་བའི་སྒོ། །སྲིད་པ་རྣམས་ཀྱི་རྒྱུ་སྲང་དུ། །སྣང་བ་འགགས་མེད་ཚུལ་དུ་ཤར། །འདི་མེད་འཁྲུལ་པ་མིང་མེད་པས། །མ་དག་འཁོར་བའི་སྒོ་ཞེས་བསྟན། །ཐོད་རྒལ་ཡེ་ཤེས་ཡོད་པས་ན། །དག་པ་ཉིད་ཀྱིས་དག་པ་མཚོན། །འཆར་བྱེད་སྣང་བ་སོ་སོའི་ལམ། །དག་པ་ཡེ་ཤེས་ཆེན་པོའི་སྒོ། །ཟང་ཐལ་རྣམ་པ་གསུམ་དུ་ཤར། །འདི་མེད་རང་རྩལ་མི་རྫོགས་པས། །དག་པ་ཡེ་ཤེས་ཆེན་པོའི་སྒོར། །ངོ་བོ་ཀ་དག་རྟོགས་ཕྱིར་ཤར། །ཞེས་སོ། །འདི་དག་གི་གནད་ལ་བསམས་པས་འཁོར་འདས་རིག་པའི་ངོ་ལ་སྣང་ཚུལ་རིག་པ་ལས་གྱེས་ཚུལ། རིག་པར་ཟློག་ཚུལ། རིག་པ་འཁོར་འདས་དང་མ་འདྲེས་ལ་འབྲེལ་བར་སྣང་བ་རྨི་ལམ་ལྟར་རྟོགས་པ་སྟེ། དག་པ་དང་མ་དག་པ་སོ་སོའི་ཆ་མ་འདྲེས་པར་སྣང་བའི་འཐད་པ། ཆོས་སྐུ་ལས་གཟུགས་སྐུ་འཕྲིན་ལས་དང་བཅས་པ་འབྱུང་ཚུལ། སེམས་ཅན་ལ་ཐུགས་རྗེས་འཇུག་ཚུལ། རང་ངོ་ཆོས་སྐུ་ལས་མི་གཡོ་བའི་ངང་ནས་སྐུ་དང་ཡེ་ཤེས་སུ་སྣང་ཚུལ་ལ་སོགས་པའི་ཆིངས་རླབས་པོ་ཆེ་རྣམས་གོ་རྒྱུ་ཡོད་པའི་རྩ་བ་འདི་ན་ཡོད་པས། ཤེས་རབ་ཀྱི་མིག་ཡོད་པས་ཞིབ་མོར་གཟིགས་པར་མཛོད་ཅིག ཁོ་བོས་ཀྱང་འདི་ལས་སྙིང་ཏིག་གི་གནས་ངེས་པ་རྣམས་རྙེད་པ་ཡིན་ནོ། །འདི་ནི་ཟབ་གནད་ཡིན་པས་ལེགས་པར་དཔྱོད་ཅིག་ཅེས་པའོ། །ཀུན་མཁྱེན་འཇིགས་གླིང་གིས་ཡེ་ཤེས་བླ་མའི་ལྷུན་གྲུབ་སྒོ་བརྒྱད་ཀྱི་སྐབས་སུ་ཡང་འདིའི་ཐད་ཀྱི་ཚིག་དོན་མཛོད་ཀྱི་ལུང་འདི་དྲངས་ཤིང་། ཉིད་ཀྱི་ཞལ་ནས། རང་བཞིན་ལེགས་པར་འདོམས་པའི་དོན་ལ་རྟོག་པ་དེང་སང་ཡང་སྲིད་ན་རྫོགས་པ་ཆེན་པོའི་བསྟན་པ་ཉི་ཞུར་ཙམ་གནས་སོ་སྙམ་ནས་དང་བ་སྟོན་པ་ལ་མཆོག་ཏུ་སྤྲོའོ། །ཞེས་གསུངས་པའི་དོན་ནི་འདིའི་དོན་ལ་སེམས་པ་རེ་ཡོད་ན་རྫོགས་པ་ཆེན་པོའི་བསྟན་པའི་མཇུག་མ་རྫོགས་པར་སྤྲིན་མཐོངས་ཉི་མའི་གསལ་མདའ་ཙམ་ཞིག་ས་དེར་ཡོད་པའི་རྟགས་སོ་དགོངས་ནས་ཁོང་གིས་དང་བ་སྟོན་པ་ལ་དགའ་སྤྲོ་མཛད་ཀྱིན་ཡོད་ཅེས་པའོ། །རང་རེ་ཡང་དེའི་རྗེས་སུ་ཞུགས་པས་རྒྱལ་བ་གོང་མ་མཉེས་པའི་ཐབས་མཆོད་པའི་མཆོག་ཏུ་འགྱུར་གྱིན་འདུག་སྙམ་ནས་དང་བ་བསྐྱེད་པ་དང་། ཐོས་བསམ་འཆད་ཉན་བྱེད་པ་དེ་ཡང་། ཡིག་ནག་ཤར་འདོན་གྱི་རྟ་རྒྱུག་དར་ཤུད་མ་ཞིག་གིས་རྒྱུ་མཚན་ཅི་ཡང་མེད་པར་ཐུགས་རྗེ་མ་ཆུང་ཟེར་བ་དང་། ཚིག་སྐམ་སྟོང་བཤད་ཀྱི་ཐ་སྙད་ཁ་ཤས་གང་ཡིན་སར་ལྷན་པོ་ལྟར་རྒྱག་པའི་ཕྱོགས་གཉིས་སུ་མ་ལྷུང་བར་སྙིང་ཐིག་སྙིང་པོའི་ཆོས་ཀྱི་གནད་ངེས་པར་གསང་བའི་སྙིང་པོའི་དོན་འདི་དག་ལ་གོ་བ་དཔྱིས་ཕྱིན་པ་གནད་ཐོག་དུ་འཁེལ་བ་རེ་ཨེ་ལོན་བལྟ་དགོས་སོ། །ལྷུན་གྲུབ་སྒོ་བརྒྱད་ཀྱི་སྣང་ལུགས་དང་འཆར་ལུགས་འདི་ཚོ་ཡུལ་རང་མཚན་པ་བརྒྱད་དུ་མི་གཟུང་བ་ནི། ཀུན་མཁྱེན་འཇིགས་གླིང་གིས་དབང་པོ་དྲུག་ལ་རྣམ་ཤེས་གཅིག་ཐ་དད་པར་འཇུག་པའི་དཔེར་བྱས་ཏེ། འདིའི་འཆར་ལུགས་བརྒྱད་དུ་སྣང་བ་འདི་ཡང་འཁོར་འདས་སོ་སོའི་འཇུག་ལྡོག་རིག་པ་དང་མ་འདྲེས་ཤིང་འབྲེལ་བར་ལྟར་དུ་གནས་པའི་མཚང་འདི་ཤེས་ན་འཁོར་འདས་གཉིས་ཀ་རིག་པའི་ངོ་ཁར་སྣང་ཆོག་པ་ཡིན་ལ། འཁོར་འདས་གཉིས་ཀ་དང་པོའི་གྱེས་གཞི་རིག་པ་གཅིག་གི་ཐོག་ནས་གྱེས་པ་ཡིན་པ་དང་། སླར་ཡང་ལྷུན་གྲུབ་སྒོ་བརྒྱད་ཤར་བའི་སྐབས་སུ་རང་སྣང་དུ་རང་ངོ་ཤེས་ནས་ཐེ་ཚོམ་མེད་ན་གཞི་སྣང་རིག་པ་ཀ་དག་གི་ཐོག་ཏུ་ལྡོག་ཚུལ་ཤེས་དགོས། དེ་ཡང་གནས་སྐབས་ཀྱི་གཞི་མཐར་ཐུག་གི་གྲོལ་གཞི་རུ་ཐིམ་པའི་ཕྱོགས་ལ། གཞི་སྣང་ནས་གྲོལ་དང་། གཞི་ཐོག་ནས་གྲོལ་ལ་སོགས་པ་དཀའ་བའི་གནད་དེ་དག་རང་ཤུགས་ཀྱིས་ཐག་ཆོད་པ་ཡིན་ནོ། །ལྷུན་གྲུབ་སྒོ་བརྒྱད་ཀྱི་སྣང་བ་འདི་འཁོར་འདས་འབྲེལ་བའི་ལམ་ཡིན་པ་ཤེས་དུས་རིག་པ་འཁོར་འདས་དང་མ་འདྲེས་ལ་འབྲེལ་བར་སྣང་བ་དཔེར་ན་རྨི་ལམ་ལྟར་རྟོགས་པ་ཡིན་པས་དག་དང་མ་དག་གི་ཆ་སོ་སོར་མ་འདྲེས་ནས་སྣང་ཆོག་པའི་འཐད་པ་རང་ཤུགས་ཀྱིས་གྲུབ་པ་སྟེ། ངོ་བོ་སྟོང་པ་ཆོས་ཀྱི་སྐུ་ལས་མ་གཡོས་བཞིན་དུ། རང་བཞིན་གསལ་བ་ལོངས་སྐུ་དང་། ཐུགས་རྗེ་ཀུན་ཁྱབ་སྤྲུལ་སྐུ་སྟེ་གཟུགས་སྐུ་གཉིས་འཕྲིན་ལས་དང་བཅས་པ་བྱུང་ནས་སེམས་ཅན་གྱི་དོན་མཛད་ཚུལ། རང་ངོ་ཆོས་སྐུ་ལས་གཡོ་མི་དགོས་པར་སྐུ་དང་ཡེ་ཤེས་ཀྱི་སྣང་ཚུལ་བསམ་གྱིས་མི་ཁྱབ་པ་སྣང་ཆོག་ལུགས་ཀྱི་ཆིངས་མང་པོ་ཞིག་གི་མདོ་མདུད་འདི་གཅིག་བཤིག་ན་སྒྲོག་མང་པོ་ཁྲོལ་བ་ཡིན་ནོ། །འདིའི་སྐབས་སུ་དར་ཅིག་རིག་པ་ལྷུན་གྲུབ་ལ་ཐིམ་ཟིན་པའི་རང་དུས་དེར། དེ་ནས་ཕྱིར་མི་ལྡོག་པ་རྒྱལ་པོ་ཕོ་བྲང་གི་ནང་ན་འདུག་པ། སྒོར་མ་ཐོན་པ་བཙན་ས་འཛིན་པ་གལ་ཆེ་བའི་མན་ངག་གཅེས་སོ། །དེའང་ད་ལྟའི་སྐབས་སུ་འོད་གསལ་གྱི་སྣང་བ་ལུ་གུ་རྒྱུད་དང་བཅས་པའི་གདངས་ངོས་ཟིན་པའི་ངང་དེར་མི་གཡོ་བར་མཉམ་པར་བཞག་ནས་དེ་ལས་ཕྱིར་མི་ལྡོག་པ་ཐོད་རྒལ་གྱི་ཉམས་ལེན་ལ་འདྲིས་ནས་བརྟན་པ་ཐོབ་བཅུག་ན་དེའི་དུས་སུ་བརྟན་པ་ཐོབ་པ་ལ་ཕན་པ་ཆེའོ། །དེའི་སྐབས་སུ་ལུག་རྒྱུད་འཆར་བ་མ་ཡིན་ཏེ། ལུག་རྒྱུད་ཐིག་ལེ་དང་བཅས་པ་སྐུ་དང་ཁམས་སུ་སྨིན་པས། དངོས་སུ་ལུག་རྒྱུད་མི་སྣང་བ་ཡིན་ནོ། །འོན་ཀྱང་ད་ལྟའི་མཐོང་སྣང་དུ་འཆར་བ་འདི་ལུག་རྒྱུད་ཀྱི་སྣང་བ་ཡིན་པས། འདི་ལ་གོམས་ན་དེ་དུས་གོམས་ཆ་བརྟན་པར་ཕན་ནོ། །ལྷུན་གྲུབ་ཀྱི་སྣང་བ་ཤར་དུས་འདིར་སྐྱེས་བུ་དེ་ལ་རྗེས་སུ་དྲན་པ་དྲུག མངོན་པར་ཤེས་པ་དྲུག མི་བརྗེད་པའི་གཟུངས། རྒྱུན་གྱི་ཏིང་ངེ་འཛིན་ཏེ། ཡོན་ཏན་གྱི་རྣམ་གྲངས་བཅུ་བཞི་འབྱུང་བ་ལས། བླ་མ་དྲན་ནས་རྗེས་འཛིན་ཤོག །ཡི་དམ་དྲན་ནས་ཞལ་མཐོང་ཞིང༌། །ལྟ་བ་དང་ནི་བསམ་པ་དང༌། །སྐྱེ་གནས་མན་ངག་དྲན་པར་ཤོག །ཅེས་པའི་རྗེས་སུ་དྲན་པ་འདི་དག་རྒྱུད་ལས་མངོན་ཤེས་ཀྱི་རྗེས་ལ་གསུངས་ཀྱང༌། འདིར་སྐྱེ་ཚུལ་གྱི་དབང་དུ་བྱས་ཏེ་སྔོན་ལ་བཤད་ན་སྔར་བླ་མ་དང་ཡི་དམ་གྱི་ལྷ་དང་མཁའ་འགྲོ་གསུམ་ལ་མཆོག་ཏུ་གང་མོས་དེ་འདིར་རང་སྣང་དུ་ཞལ་མཐོང་ནས་ལུང་སྟོན་པར་སྣང་བའོ། །དེའི་ཚེ་བླ་མའི་གདམས་ངག་རྗེས་སུ་དྲན་ནས་རང་རིག་གི་ལྟ་བ་རྗེས་སུ་དྲན་པ་ལས་སྒོམ་པའི་ལམ་རྗེས་སུ་དྲན་པ་མཉམ་པར་གཞག་པས་རང་གནས་ཀྱི་བསམ་གཏན་རྗེས་སུ་དྲན་པའི་ངང་ལ་ཞག་ལྔ་གནས་ནས་ཁ་ཅིག་དེ་ཉིད་དུ་གྲོལ་ལ། དབང་པོ་ཐ་མ་ཁ་ཅིག་སྐྱེ་གནས་རྗེས་སུ་དྲན་པས་རང་བཞིན་སྤྲུལ་སྐུའི་ཞིང་དུ་དབུགས་འབྱིན་པའོ། །དུས་དེར་གྲོལ་བ་རྣམས་ཀྱི་སྐྱེ་གནས་རྗེས་དྲན་གྱི་ཆ་ནི་ཀ་དག་གི་རང་སའོ། །འདིར་སྔར་འདྲིས་ཀྱི་མི་དང་གང་དུ་འཕྲད་ཀྱང་ཅར་ཕོག་ཏུ་ངོ་ཤེས་པ་ལྟར་རང་ངོ་ཀ་དག་གི་རང་ས་སྐད་ཅིག་ཅར་ཕོག་ཏུ་ཤེས་པའི་གདམས་པ་དྲན་པར་བྱ་སྟེ། ཉི་ཟླ་ཁ་སྦྱོར་ལས། དེའི་ཚེ་རྗེས་སུ་དྲན་པ་དྲུག་ཀྱང་འཆར་ཏེ། ལྷ་རྗེས་སུ་དྲན་པས་དེ་ཉིད་དུ་ཡི་དམ་ལྷའི་ཞལ་མཐོང་བ་དང༌། ལམ་རྣམས་རྗེས་སུ་དྲན་པས་བར་མ་དོའི་ཆོས་ཉིད་ལ་དབང་བསྒྱུར་བ་དང༌། སྐྱེ་གནས་རྗེས་སུ་དྲན་པས་དབང་པོ་ཐ་མ་རྣམས་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་འབྱིན་པ་དང༌། བསམ་གཏན་རྣམས་རྗེས་སུ་དྲན་པས་ཞག་ལྔར་བསམ་གཏན་ལ་གནས་པ་དང༌། བླ་མའི་མན་ངག་རྗེས་སུ་དྲན་པས་རང་གི་སྣང་བ་རྣམས་དང་གཉིས་སུ་མེད་པར་སྤྱོད་པ་དང༌། ལྟ་བ་རྗེས་སུ་དྲན་པས་སྔར་འདྲིས་པའི་མི་ཕྱིས་ཕྲད་པ་ཙམ་གྱིས་ངོ་ཤེས་པ་ལྟར་བུའོ་ཞེས་སོ། །རྗེས་དྲན་ཞེས་པ་ནི་སྔར་རང་གིས་ལམ་གྱི་གནས་སྐབས་ནས་སྦྱངས་བ་དེ་ལྷུན་གྲུབ་ཀྱི་ཡོན་ཏན་ལས་སྐབས་འདིར་རྗེས་སུ་དྲན་ནས་དེའི་ནུས་པའི་རྩལ་རྫོགས་པའམ་ནུས་པ་ཐོན་པའི་ཚོད་ལ་ཐོན་པ་ཡིན། དེས་ན་རྗེས་དྲན་རྒྱུད་ལ་སྐྱེ་བ་སྔོན་རང་གི་བསོད་ནམས་དང་བླ་མའི་ཐུགས་རྗེས་དམ་པའི་ཆོས་ལ་ཞུགས་ནས་ཉམས་ལེན་གྱི་གོམས་པ་འདིར་དངོས་སུ་ཤར་བ་སྟེ། ད་ལྟའི་སྐབས་སུ་དབང་ཞུས་པའི་སྟོབས་ཀྱིས་དེ་དུས་དབང་གི་ཆུ་བོ་འབབ་པར་མཐོང་བ་དང་། བསྐྱེད་རིམ་བསྒོམས་པའི་སྟོབས་ཀྱིས་ལྷ་རྗེས་སུ་དྲན་པ་དང་། རྫོགས་རིམ་བསྒོམས་པའི་སྟོབས་ཀྱིས་ལམ་དང་། གདམས་ངག་དང་། བསམ་གཏན་དང་། ལྟ་བ་རྗེས་སུ་དྲན་པ་དང་། སྨོན་ལམ་བཏབ་པ་རྗེས་སུ་དྲན་པས་དབང་པོ་ཐ་མ་ཞིག་ཡིན་ཡང་རང་བཞིན་སྤྲུལ་བའི་ཞིང་ཁམས་དྲན་ནས་དེར་དབུགས་འབྱིན་པ་ཡིན་ནོ། །འདིའི་སྐབས་སུ་རང་ཉིད་ཀྱི་རྩ་བའི་བླ་མ་ལ་དད་གདུང་དྲག་པོ་ཡོད་པས་བླ་མ་དྲན་པའི་དེ་མ་ཐག་ཏུ་ནམ་མཁར་བྱོན་ཏེ། གདམས་པ་ངོ་སྤྲོད་པ་འབྱུང་བས་མི་གྲོལ་བ་མི་སྲིད་ལ། ཡི་དམ་ལ་མོས་པ་རྣམས་ལ་རང་གི་ལྷག་ལྷ་གང་ཡིན་པ་དེའི་ཞལ་མཐོང་བས་བག་ཆགས་ཀྱི་ལུས་འདི་མི་སྣང་སྟེ། ཡི་དམ་གྱི་ལྷའི་གཟུགས་སུ་སྒྱུ་ལུས་བཟུང་དུས། ལུང་བསྟན་པ་ཡང་འབྱུང་ངོ། །འདི་གཉིས་གཅིག་ཏུ་འདྲེན་ནས་རྗེས་དྲན་དྲུག་ཏུ་བརྩི་བ་ནི། ལྷའི་མཆོག་ཏུ་གྱུར་པ་བླ་མ་ཡིན་པས་བླ་མ་ཡི་དམ་གཉིས་ཀ་རྗེས་དྲན་གཅིག་ཏུ་བརྩིས་པའོ། །ལྷུན་གྲུབ་ཀྱི་སྐབས་འདིར་སྣང་བ་ཐམས་ཅད་རང་སྣང་ཡིན་པ་ལ་ངེས་ཤེས་ཁྱད་པར་ཅན་སྐྱེས་པའི་བསོད་ནམས་དེའི་སྟོབས་ཀྱིས། དེ་བཞིན་གཤེགས་པ་ཐམས་ཅད་སྟེང་གི་ནམ་མཁར་བྱོན་ནས་དབང་བསྐུར། མཆོད་པའི་ལྷ་མོ་མང་པོས་མེ་ཏོག་གི་ཆར་བ་ཕབ། བཀྲ་ཤིས་པའི་གླུ་གར་བྱེད་པའི་སྣང་བ་ཤར་ནས་གཞིའི་དབང་ཐོབ་པ་ཡིན་ལ། ལམ་རྗེས་དྲན་གྱི་སྟོབས་ཀྱིས་བར་དོའི་ཆོས་ཉིད་སྐུ་དང་ཡེ་ཤེས་འོད་དང་ཁ་དོག་ལ་སོགས་པ་ལ་དབང་སྒྱུར་ཐུབ་པ་དང་། སྐྱེ་གནས་རྗེས་དྲན་གྱི་སྟོབས་ཀྱིས། ཐ་མ་པ་ཡིན་ཡང་སྤྲུལ་སྐུའི་ཞིང་ཁམས་སུ་དབུགས་འབྱིན་ནས་སྐྱེ་བ་ལེན་ཐུབ་པ་དང་། བསམ་གཏན་རྗེས་དྲན་གྱིས་བསམ་གཏན་གྱི་ཞག་ལྔ་ལ་རང་བཞིན་གྱི་བསམ་གཏན་ལ་ངང་གིས་གནས་ཐུབ་པ་དང་། བླ་མའི་གདམས་པ་རྗེས་སུ་དྲན་པས་རང་ཆོས་ཉིད་ལ་སྤྱོད་ཐུབ་པ་དང་། ལྟ་བ་རྗེས་དྲན་གྱི་ཐོག་ནས་ཆོས་ཉིད་མངོན་སུམ་གྱི་ལྟ་བ་སྔར་མཐོང་བ་དེ། དུས་འདིར་ཡང་དུ་ངོས་ཟིན་ནས་སྔར་འདྲིས་ཀྱི་མི་དང་འཕྲད་པར་ལྟ་བུ་ཡོང་བ་ཡིན་ནོ། །དེ་ཇི་ལྟར་ཡིན་ན་འཁྲུལ་བའི་སྣང་ཐོག་ལ་མངོན་སུམ་གྱི་སྣང་བ་ཅོག་གཞག་བྱས་ནས་བཞག་པའི་གནད་ཀྱིས། འཁྲུལ་བ་འོད་གསལ་དུ་གྱུར་ནས་གཟུང་འཛིན་མེད་པའི་རིག་པ་ནང་ནས་གསལ་བས་དེ་ཡིད་དཔྱོད་མིན་པའི་ཆོས་ཉིད་ཀྱི་མིག་གིས་མཐོང་ནས་ལྟ་སྒོམ་གྱི་ཤུབས་ལས་གྲོལ་ནས་གཞི་ཀ་དག་གི་སར་བསྐྱལ་བས་སྣང་སེམས་ཞེན་འཛིན་ཐམས་ཅད་ཟད་སར་འཁྱོལ་བའི་དགོངས་པ་དེ་ལས་བྱུང་བའོ། །མངོན་ཤེས་དྲུག་ནི། རྒྱུད་དེ་ཉིད་ལས། དེ་ལྟར་ཤར་བའི་ཚེ་རིགས་ཀྱི་བུ་དེ་ལ་མངོན་པར་ཤེས་པ་དྲུག་འཆར་ཏེ་ཞེས་གསུངས་པས། དབང་པོ་དང༌། སེམས་ལས་སུ་རུང་བ་དང༌། ཤེས་རབ་ལ་དབང་བ་དང་ཡེ་ཤེས་ཀྱི་མཐོང་བ་རྣམ་པར་དག་པ་དང༌། ཆོས་ཉིད་ཕྱིན་ཅི་མ་ལོག་པར་མཐོང་བ་དང༌། སངས་རྒྱས་ཀྱི་མཁྱེན་པ་ཕྱིན་ཅི་མ་ལོག་པར་མཐོང་བའི་མངོན་པར་ཤེས་པ་དྲུག་ཕྲག་དྲུག་རྣམས་འཆར་རོ། །འདི་དག་གི་རིམ་པ་རྒྱས་པར་དབྱེ་ན། དང་པོ་དབང་པོའི་མངོན་ཤེས་ལ་དྲུག་ལས། ཐོག་མར་མིག་གི་མངོན་པར་ཤེས་པ་འཆར་ཏེ། ཆུ་བུར་གྱི་མིག་རྣམ་པར་དག་པ་ལས་མིག་ཕྱེ་བཙུམས་མེད་པར་དངོས་པོ་རྣམས་ཟང་ཐལ་བར་མཐོང་བ་དང༌། དེ་ནས་ཤའི་མིག་དག་པས་ལྐོག་ཏུ་གྱུར་པ་རགས་པའི་དངོས་པོ་རྣམས་དཔག་ཚད་ལྔ་ཚུན་ཆད་དུ་མཐོང་བ་དང༌། གླིང་བཞི་རི་རབ་དང་བཅས་པ་གཅིག་མཐོང་བ་དང༌། ཤིན་ཏུ་རྣམ་པར་དག་པས་གཉིས་དང་གསུམ་མཐོང་བ་དང༌། རབ་ཏུ་དག་པས་བཅུ་མཐོང་བའོ། །དེ་ནས་ཤེས་རབ་ཀྱི་མིག་གིས་ཚིགས་སུ་བཅད་པ་བརྒྱ་མཐོང་བ་དང༌། རྣམ་པར་དག་པས་སྟོང་ལ་དབང་བ་དང༌། ཤིན་ཏུ་རྣམ་པར་དག་པས་ཁྲི་དང་འབུམ་གྱི་དོན་མཐོང་བ་དང༌། རབ་ཏུ་དག་པས་བྱེ་བ་དང་ས་ཡ་དང་གྲངས་མེད་པའི་དོན་ཕྱིན་ཅི་མ་ལོག་པར་མཐོང་བའོ། །དེ་ནས་ཡེ་ཤེས་ཀྱི་མིག་གིས་སྤྲུལ་སྐུའི་ཞིང་བརྒྱ་དུས་གཅིག་ལ་མཐོང་བ་དང༌། རྣམ་པར་དག་པས་ཞིང་འབུམ་ཕྲག་བརྒྱད་མཐོང་བ་དང༌། ཤིན་ཏུ་དག་པས་བྱེ་བ་ཕྲག་དགུ་མཐོང་བ་དང༌། རབ་ཏུ་དག་པས་བྱེ་བ་ཕྲག་དགུ་བཅུ་རྩ་གཅིག་མཐོང་བའོ། །དེ་ནས་ཐམས་ཅད་མཁྱེན་པའི་མིག་གིས་ལོངས་སྐུའི་ཞིང་ཁམས་བརྒྱ་དུས་གཅིག་ལ་མཐོང་བ་དང༌། རྣམ་པར་དག་པས་འབུམ་ཕྲག་ལྔ་མཐོང་བ་དང༌། རབ་ཏུ་རྣམ་པར་དག་པས་དབྱེ་བ་གྲངས་མེད་པ་བདུན་ཅུ་དུས་གཅིག་ལ་མཐོང་བའོ། །དེ་ནས་རྣམ་པ་ཐམས་ཅད་མཁྱེན་པའི་མིག་གིས་ཆོས་ཀྱི་སྐུའི་ཞིང་ཁམས་བསམ་གྱིས་མི་ཁྱབ་པ་དུས་གཅིག་ལ་མཐོང་བ་དང༌། །རྣམ་པར་དག་པས་ལོངས་སྐུའི་ཞིང་ཁམས་བསམ་གྱིས་མི་ཁྱབ་པ་དུས་གཅིག་ལ་མཐོང་བ་དང༌། །ཤིན་ཏུ་རྣམ་པར་དག་པས་སྤྲུལ་སྐུའི་ཞིང་ཁམས་བསམ་གྱིས་མི་ཁྱབ་པ་དུས་གཅིག་ལ་མཐོང་བ་དང༌། རབ་ཏུ་རྣམ་པར་དག་པས་སྐུ་གསུམ་རྣམ་པར་རོལ་པའི་ཞིང་ཁམས་ཐུག་པ་མེད་པ་དུས་གཅིག་ལ་མཐོང་བའོ། །དེ་ནས་རྣ་བའི་མངོན་ཤེས་ནི། ལྷའི་རྣ་བས་དངོས་པོར་ཐོས་པའི་སྟེང་དུ་འགྲོ་བ་ལྐོག་ཏུ་གྱུར་པ་རྣམས་ཀྱི་སྒྲ་ཐོས་པ་དང༌། རྣམ་པར་དག་པས་དཔག་ཚད་སྟོང་ཚུན་ཆད་ཐོས་པ་དང༌། ཤིན་ཏུ་རྣམ་པར་དག་པས་ལྔ་སྟོང་དང༌། རབ་ཏུ་དག་པས་དཔག་ཚད་འབུམ་ཕྲག་གཉིས་ཚུན་ཆད་ཀྱི་སྒྲ་ཐོས་པའོ། །ཤའི་རྣ་བས་ངན་སོང་གི་སྒྲ་དཔག་ཚད་འབུམ་ཚུན་ཆད་ཐོས་པ་དང༌། རྣམ་པར་དག་པས་ལྷ་མིན་རྣམས་དང༌། ཤིན་ཏུ་དག་པས་ལྷ་རྣམས་དང༌། རབ་ཏུ་དག་པས་གླིང་བསམ་གྱིས་མི་ཁྱབ་པའི་འགྲོ་བ་རྣམས་ཀྱི་སྒྲ་དུས་གཅིག་ལ་ཐོས་པའོ། །རྣམ་པར་གྲོལ་བའི་རྣ་བས་ཉན་རང་གི་སྒྲ་ཐོས་པ་དང༌། རྣམ་པར་དག་པས་བྱང་ཆུབ་སེམས་དཔའ་བཀའ་བགྲོ་བའི་སྒྲ་ཐོས་པ་དང༌། ཤིན་ཏུ་རྣམ་པར་དག་པས་སངས་རྒྱས་གྲངས་མེད་པའི་སྒྲ་ཐོས་པ་དང༌། རབ་ཏུ་དག་པས་སངས་རྒྱས་གྲངས་མེད་པ་བདུན་གྱི་བཀའ་བགྲོ་བ་མཛད་པ་ཐོས་པའོ། །དེ་ནས་སྣའི་མངོན་ཤེས་ནི། ལྷའི་སྣས་མི་སྣང་བའི་དྲི་ཚོར་བ་དང༌། རྣམ་པར་དག་པས་བེམ་པོ་རྣམས་ཀྱི་དྲི་ཚོར་བ་དང༌། ཤིན་ཏུ་དག་པས་གཟུགས་སུ་མེད་པ་རྣམས་ཀྱི་དྲི་ཚོར་བ་དང༌། རབ་ཏུ་དག་པས་མཁའ་གནས་ཀྱི་དྲི་ཚོར་བའོ། དཔེ་བྱད་དང་ལྡན་པའི་སྣས་འགྲོ་དྲུག་གི་དྲི་དུས་གཅིག་ལ་ཚོར་བ་དང༌། རྣམ་པར་དག་པས་ཉན་རང་དང༌། ཤིན་ཏུ་དག་པས་བྱང་ཆུབ་སེམས་དཔའ་དང་རབ་ཏུ་དག་པས་སངས་རྒྱས་ཀྱི་དྲི་ཚོར་བའོ། །ལྕེའི་མངོན་ཤེས་ནི། འབྱུང་བའི་ལྕེ་དག་པས་ལྷའི་བདུད་རྩི་ལོ་ཀའི་རོ་མྱོང་བ་དང༌། རྣམ་པར་དག་པས་བདུད་རྩི་སྟོང་ཕྲག་བདུན་གྱི་རོ་མྱོང་བ་དང༌། ཤིན་ཏུ་དག་པས་མཁའ་འགྲོ་མའི་དངོས་གྲུབ་ཀྱི་བདུད་རྩི་ཆེན་པོའི་རོ་མྱོང་བ་དང༌། རབ་ཏུ་དག་པས་ཁ་བདུད་རྩི་འཁྱིལ་བའི་དཔའ་བོ་རྙེད་པའོ། །ཉེར་ལེན་རྣམ་པར་དག་པའི་ལྕེས་བཀོད་པ་ཆེན་པོའི་ཏིང་ངེ་འཛིན་གྱི་རོ་མྱོང་། ཤིན་ཏུ་དག་པས་སངས་རྒྱས་སྟོང་ཕྲག་བདུན་གྱིས་ཕྱག་མཛད་པའི་རོ་མྱོང༌། རབ་ཏུ་དག་པས་བསྐལ་བ་འབུམ་ཕྲག་བདུན་གྱི་སངས་རྒྱས་ཀྱིས་ཕྱག་མཛད་པའི་བདུད་རྩིའི་རོ་མྱོང་བའོ། །ལུས་ཀྱི་མངོན་ཤེས་ནི། རྡུལ་ཕྲ་རབ་ཀྱི་མཐའ་དག་པས་ལུས་འཇམ་པའི་དབྱངས་ཀྱི་རེག་བྱ་ལ་སྤྱོད། །རྣམ་པར་དག་པས་བྱམས་མགོན་དྲི་མ་མེད་པའི་སྐུ་ལ་རེག ཤིན་ཏུ་དག་པས་ཉི་མ་སྟོང་གིས་བརྒྱན་པའི་སྐུ་ལ་རེག རབ་ཏུ་དག་པས་སྐུ་མཚུངས་མཐའ་ཡས་པའི་ཐུགས་ཀྱི་དཀྱིལ་འཁོར་ལ་རེག་པའོ། །དྲི་མ་ཟད་པའི་ལུས་ཀྱིས་འདས་པའི་སངས་རྒྱས་རྣམས་ཀྱི་ཐུགས་ལ་རེག རྣམ་པར་དག་པས་ད་ལྟ་དང༌། ཤིན་ཏུ་དག་པས་མ་འོངས་པ་དང༌། རབ་ཏུ་དག་པས་དུས་གསུམ་དབྱེར་མེད་པའི་སངས་རྒྱས་རྣམས་ཀྱི་ཐུགས་ལ་རེག་པའོ། །ཡིད་ཀྱི་མངོན་ཤེས་ནི། ཐ་མལ་རང་དག་པའི་ཡིད་ཀྱིས་ཏིང་ངེ་འཛིན་བཅུ་ལ་དབང༌། རྣམ་པར་དག་པས་བརྒྱ། ཤིན་ཏུ་དག་པས་སྟོང༌། རབ་ཏུ་དག་པས་ཁྲི་ལ་དབང་ངོ༌། །གཟུགས་ཀྱི་མཐའ་ལས་གྲོལ་བའི་ཡིད་ཀྱི་འབྱུང་བཞིའི་ནུས་པ་སོ་སོར་བསྒྱུར་ནུས། རྣམ་པར་དག་པས་སེམས་ཅན་མཐུན་པའི་གནས་སྤོ་ནུས། ཤིན་ཏུ་དག་པས་འགྲོ་དྲུག་གི་གནས་བསྒྱུར་ནུས། རབ་ཏུ་དག་པས་ཉན་རང་གི་རྫུ་འཕྲུལ་གྱི་མཐུ་འཕྲོག་ནུས་པའོ། །དེ་ལྟར་དབང་པོ་དྲུག་གི མིག་དྲུག རྣ་བ་གསུམ། སྣ་གཉིས། ལྕེ་གཉིས། ལུས་གཉིས། ཡིད་གཉིས་ཏེ་བཅུ་བདུན་ལ་རེ་རེ་ཞིང་ཆོས་ཚན་བཞི་བཞིར་སྦྱར་བས་དབང་པོའི་མངོན་ཤེས་དྲུག་ཅུ་རྩ་བརྒྱད་དེ་བསྡུ་ན་རྩ་བ་དྲུག་པོར་འདུས་པའོ། །ལོག་པར་རྟོག་པ་འགོག་པ་ནི། དེ་ཡང་འདིའི་དུས་སུ་ལུས་ངག་ཡིད་གསུམ་དང་བྲལ་ནས་རང་མཚན་དུ་མེད་པར་དེ་དག་གི་མངོན་ཤེས་འཆར་བ་མི་འཐད་དོ་ཞེ་ན། སྐབས་འདིར་ལུས་སེམས་ཞེས་པ་ཞིག་མེད་པས་དབང་པོ་དང་སེམས་ཀྱི་མངོན་ཤེས་ཇི་ལྟར་ཡོང་བ་ཡིན་སྙམ་པའི་དོགས་པ་ཡོད་ན། དབང་པོ་རྡོས་བཅས་དག་པ་ཁོ་ནས་འཐད་དོ། །ལུས་སེམས་ཡོད་པས་མངོན་ཤེས་ལ་སོགས་པ་མེད་དེ། འུ་ཚོ་ལ་ད་ལྟ་མེད་པའི་ཕྱིར། དེས་ན་དེ་མེད་པའི་གནད་ཀྱིས་ཤེས་པའོ། །དེ་ཡང་སྔོན་སྒོ་གསུམ་སྤྲིན་དང་འདྲ་བའི་ཆས་རིག་པ་ཉི་མའི་དཀྱིལ་འཁོར་ལྟ་བུ་ལ་བསྒྲིབས་པས་མངོན་ཤེས་ལ་སོགས་པའི་ཡོན་ཏན་འོད་ཟེར་གྱི་ཚུལ་དུ་ཡོད་པ་མ་མཐོང་བ་སྟེ། སྐབས་འདིར་སྤྲིན་དེངས་པས་ཉི་མ་གསལ་བ་ལྟར་སྒོ་གསུམ་དེངས་པས་སོ་སོའི་བསྒྲིབས་ཆ་རེ་དག་པའི་ཆ་ནས་དབང་པོ་སོ་སོའི་མངོན་ཤེས་ཞེས་དག་འབྲས་ལ་དག་རྒྱུ་དྲི་མའི་མིང་གིས་བཏགས་པ་སྟེ། དེ་མ་དག་ན་དེ་མི་སྣང་བའི་འབྲེལ་བ་གྲུབ་པའི་ཆ་ནས་བརྗོད་ཀྱང་དོན་ལ་སྒོ་གསུམ་གྱི་དག་འབྲས་སམ་བྲལ་འབྲས་ཀྱི་ཡོན་ཏན་ཞེས་བྱ་བར་འདོད་པ་ཡིན་ནོ། །དཔེར་ན་ཡོལ་བས་བསྒྲིབས་པའི་མར་མེའི་འོད་ཕྱིར་མི་གསལ་ཡང་། གལ་ཏེ་དེ་བསལ་བར་བྱས་ན་མར་མེའི་འོད་ཕྱིར་མངོན་པ་དང་འདྲ་བར་ལུས་རྒྱ་དང་བྲལ་ན་མངོན་ཤེས་ལ་སོགས་པའི་ཡོན་ཏན་འབྱུང་བའོ། །འདི་དག་འབྲས་ལ་དག་རྒྱུའི་མིང་གིས་བསྙད་ནས་དབང་པོ་སོ་སོའི་མངོན་ཤེས་ཞེས་གསུངས་པ་ལས་དོན་ལ་དག་འབྲས་སམ་བྲལ་འབྲས་ཀྱི་ཡོན་ཏན་ནོ། །གནད་འདི་ནི་ཤིན་ཏུ་གལ་ཆེ་བས་གསལ་པོར་བཤད་པ་ཡིན་ནོ། །དེ་ནས་སེམས་ལས་སུ་རུང་བའི་མངོན་ཤེས་དྲུག་ནི། སྔར་གྱི་ཞེན་པ་དག་པའི་སེམས་ཀྱི་མཐོང་བ་རྣམ་པར་དག་པ་དང༌། ཕྱིས་འབྱུང་བའི་འཁྲུལ་པ་ཟད་པའི་མཐོང་བ་རྣམ་པར་དག་པ་དང༌། གདུལ་བྱའི་མཁྱེན་པ་རྫོགས་པའི་མཐོང་བ་དག་པ་དང༌། མི་སྣང་བ་ལམ་དུ་གྱུར་པའི་མཐོང་བ་དག་པ་དང༌། འགྲོ་བ་རྣམས་ཡོངས་སུ་རྫོགས་པའི་མཐོང་བ་དག་པ་དང༌། དབང་པོ་ཕྱིན་ཅི་ལོག་ལས་གྲོལ་བའི་སེམས་ཀྱི་མཐོང་བ་རྣམ་པར་དག་པའི་མངོན་པར་ཤེས་པའོ། །དེ་ལ་སྔར་གྱི་ཞེན་པ་རྣམས་རྣམ་པར་དག་པའི་སེམས་ཀྱི་མཐོང་བ་དག་པས་སྔར་འདས་པའི་སྐྱེ་བ་བརྒྱ་ཕྲག་དྲན་པ་དང༌། རྣམ་པར་དག་པས་སྟོང་དང༌། ཤིན་ཏུ་དག་པས་འབུམ་དང༌། རབ་ཏུ་དག་པས་ཁྲག་ཁྲིག་བདུན་ཅུ་རྩ་གཉིས་ཀྱི་སྐྱེ་བ་ལག་མཐིལ་དུ་སྐྱུ་རུ་ར་རློན་པ་བཞག་པ་ལྟར་དུས་གཅིག་ལ་དྲན་པའོ། །ཕྱིས་འབྱུང་འཁྲུལ་བ་ཟད་པའི་མཐོང་བ་རྣམ་པར་དག་པས་སྔར་གྱི་སྐྱེ་བ་བླངས་དུས་ཀྱི་ལུས་ཀྱི་མཚན་ཉིད་མཁྱེན་པ་དང༌། རྣམ་པར་དག་པས་ངག་དང༌། ཤིན་ཏུ་དག་པས་སེམས་དང༌། རབ་ཏུ་དག་པས་དེ་གསུམ་ཀའི་མཚན་ཉིད་དུས་གཅིག་ལ་མཐོང་ཞིང་མཁྱེན་པའོ། །གདུལ་བྱའི་མཁྱེན་པ་རྫོགས་པའི་སེམས་ཀྱི་མཐོང་བ་རྣམ་པར་དག་པས་སེམས་ཅན་གཞན་གྱི་སྐྱེ་བ་འབུམ་ཕྲག་གྲངས་མེད་པའི་ལུས་དང༌། རྣམ་པར་དག་པས་ངག་དང༌། ཤིན་ཏུ་དག་པས་སེམས་དང༌། རབ་ཏུ་དག་པས་དེ་གསུམ་ཀའི་མཚན་ཉིད་དུས་གཅིག་ལ་མཐོང་བའོ། །མི་སྣང་བ་ལམ་དུ་གྱུར་པའི་སེམས་ཀྱི་མཐོང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་གྲངས་དུས་གཅིག་ལ་ཤེས་པ་དང༌། རྣམ་པར་དག་པས་དེ་སྙེད་ན་གནས་པའི་སེམས་ཅན་དེ་དག་གི་ཤེས་པར་ཇི་ལྟར་འགྱུས་པའི་གྲངས་དུས་གཅིག་ལ་ཤེས་པ་དང༌། ཤིན་ཏུ་དག་པས་སྣོད་བཅུད་ཀྱི་རང་བཞིན་རྣམས་ཤེས་པ་དང༌། རབ་ཏུ་དག་པས་ཆོས་ཉིད་སྟོང་པ་ཉིད་ཀྱི་དོན་རྣམས་མཐོང་བའོ། །འགྲོ་བ་རྣམས་ཡོངས་སུ་རྫོགས་པའི་སེམས་ཀྱི་མཐོང་བ་དག་པས་སྔར་རང་གིས་ལུས་བླངས་ཚད་ཀྱི་རླུང་ཇི་ཙམ་འགྱུས་ཀྱི་གྲངས་དུས་གཅིག་ལ་ཤེས་པ་དང༌། རྣམ་པར་དག་པས་མི་དགེ་བའི་སེམས་ཇི་ཙམ་འགྱུས་ཀྱི་གྲངས་དུས་གཅིག་ལ་ཤེས་པ་དང༌། ཤིན་ཏུ་དག་པས་དགེ་བའི་གྲངས་མཐོང་བ་དང༌། རབ་ཏུ་དག་པས་དགེ་མི་དགེ་གཉིས་ཀའི་གྲངས་དུས་གཅིག་ལ་མཐོང་བའོ། །དབང་པོ་ཕྱིན་ཅི་ལོག་ལས་གྲོལ་བའི་སེམས་ཀྱི་མཐོང་བས་རང་གི་སྔར་སྐྱེ་བ་བླངས་ཚད་ཀྱི་དུས་ཀྱི་གནས་ཀྱི་མཚན་ཉིད་མཐོང་བ་དང༌། རྣམ་པར་དག་པས་གཞན་གྱི་སྔོན་གྱི་སྐྱེ་གནས་མཐོང་བ་དང༌། ཤིན་ཏུ་དག་པས་རང་གི་ལུས་ངག་སེམས་ཀྱི་སྤྱོད་ཡུལ་རྣམས་ཤེས་པ་དང༌། རབ་ཏུ་དག་པས་རང་གཞན་གཉིས་ཀའི་སྔོན་གྱི་སྐྱེ་གནས་དང་ལུས་ངག་ཡིད་ཀྱི་སྤྱོད་ལམ་ཇི་ལྟར་བྱས་པ་རྣམས་དུས་གཅིག་ལ་མཐོང་བའོ། །དེ་ལྟར་དྲུག་ལ་བཞི་བཞིར་ཕྱེ་བས་ཆོས་ཀྱི་རྣམ་གྲངས་ཉི་ཤུ་རྩ་བཞིར་གནས་སོ། །དེ་ནས་ཤེས་རབ་ལ་དབང་བའི་མངོན་ཤེས་དྲུག་ནི། བློ་དང༌། ཚིག་དང༌། སྙམ་བྱེད་དང༌། ཡིད་དཔྱོད་དང༌། སྐྱེ་བ་དང༌། མཚན་ཉིད་དང་བྲལ་བའི་ཤེས་རབ་ཀྱི་མཐོང་བ་དག་པའི་མངོན་ཤེས་སོ། །དང་པོ་བློ་དང་བྲལ་བས་རང་གི་སེམས་ཀྱི་མཚན་ཉིད་ཅིག་ཅར་དུ་མཐོང་བ་དང༌། རྣམ་པར་དག་པས་གཞན་དང༌། ཤིན་ཏུ་དག་པས་རང་གཞན་གཉིས་ཀ་དང༌། རབ་ཏུ་དག་པས་ལྷག་མ་མ་ལུས་པར་མཐོང་བའོ། །ཚིག་དང་བྲལ་བའི་ཤེས་རབ་ཀྱི་མཐོང་བས་སྡེ་སྣོད་ཀྱི་ཆོས་རྣམས་ཀྱི་ཚིག་དུས་གཅིག་ལ་མཐོང་བ་དང༌། རྣམ་པར་དག་པས་དེ་དག་གི་དོན་ཕྱིན་ཅི་མ་ལོག་པ་དང༌། ཤིན་ཏུ་དག་པས་དེ་དག་གི་འབྲས་བུ་དང་གྲོལ་ས་རྣམས་ཤེས་པ་དང༌། རབ་ཏུ་དག་བས་དེ་དག་རྣམས་ཀྱི་སོ་སོའི་འཇུག་པ་མཐོང་བའོ། སྙམ་བྱེད་དང་བྲལ་བའི་ཤེས་རབ་ཀྱི་མཐོང་བས་ཆོས་ཐམས་ཅད་ཀྱི་རང་བཞིན་ཤེས་པ་དང༌། རྣམ་པར་དག་པས་དེ་དག་ལ་སྤྱོད་པའི་གང་ཟག་གི་དབང་པོ་རྣོ་རྟུལ་རྣམས་མཐོང་བ་དང༌། ཤིན་ཏུ་དག་པས་དབང་པོའི་གྲོལ་ས་རྣམས་ཤེས་པ་དང༌། རབ་ཏུ་དག་པས་དབང་པོའི་ཆོས་མཐུན་ཤེས་པའོ། །ཡིད་དཔྱོད་ལས་འདས་པའི་ཤེས་རབ་ཀྱི་མཐོང་བས་ཆོས་སྤྱིའི་དོན་ཐམས་ཅད་ལྷག་མཐོང་དུ་མཐོང་བ་དང༌། རྣམ་པར་དག་པས་རང་གི་དོན་མཐོང་བ་དང༌། ཤིན་ཏུ་དག་པས་སྤྱི་དང་རང་གཉིས་ཀ་ལྷག་མཐོང་དུ་མཐོང་བ་དང༌། རབ་ཏུ་དག་པས་ཚིག་དང་ཡི་གེ་ལས་འདས་པའི་དོན་མཐོང་བའོ། །སྐྱེ་བ་གཅོད་པའི་ཤེས་རབ་ཀྱི་མཐོང་བས་འཁོར་བའི་ཆོས་རྣམས་ཀྱི་རྒྱུ་མཐོང་། རྣམ་པར་དག་པས་དེའི་རྐྱེན་ཉོན་མོངས་པ་རྣམས་ཀྱི་མཚན་ཉིད་མཐོང༌། ཤིན་ཏུ་དག་པས་དེ་དག་གི་དུས་དང་མཚན་ཉིད་མཐོང༌། རབ་ཏུ་དག་པས་དེ་དག་ལས་རྣམ་པར་གྲོལ་བར་མཐོང་བའོ། །མཚན་ཉིད་དང་བྲལ་བའི་ཤེས་རབ་ཀྱི་མཐོང་བས་རང་གི་སེམས་ཀྱི་འགྱུ་བའི་ཚད་ཟིན། རྣམ་པར་དག་པས་སེམས་ཀྱི་མཚན་ཉིད་ཅེར་མཐོང་དུ་མཐོང༌། ཤིན་ཏུ་དག་པས་སེམས་ཅན་གྱི་སེམས་ཀྱི་འགྱུ་བ་མཐོང༌། རབ་ཏུ་དག་པས་དུས་གསུམ་གྱི་སེམས་ཅན་གྱི་སེམས་ཀྱི་འགྱུ་བ་དང་རྟོག་པ་དང་མི་རྟོག་པ་དང་བསམ་པའི་ཁྱད་པར་རྣམས་དུས་གཅིག་ལ་ཤེས་པའོ། །དེ་དག་བསྡོམས་པས་ཀྱང་ཆོས་ཀྱི་རྣམ་གྲངས་ཉི་ཤུ་རྩ་བཞིའོ། །དེ་ནས་ཡེ་ཤེས་ཀྱི་མཐོང་བ་རྣམ་པར་དག་པའི་མངོན་ཤེས་དྲུག་འཆར་ཏེ། ཆོས་ཀྱི་དབྱིངས་ཀྱི་ཡེ་ཤེས་མངོན་དུ་གྱུར་པའི་མངོན་ཤེས་ཀྱིས་མ་འོངས་པའི་སེམས་ཅན་གྱི་སྐྱེ་གནས་དུས་གཅིག་ལ་ཤེས། མེ་ལོང་ལྟ་བུས་འདས་པའི་ཤེས། མཉམ་པ་ཉིད་ཀྱིས་ད་ལྟའི་ཤེས། སོ་སོར་རྟོག་པས་མ་འོངས་པའི་སེམས་ཅན་རྣམས་ཀྱི་འཆི་འཕོ་ཤེས། བྱ་བ་གྲུབ་པས་འདས་པའི་ཤེས། མི་གནས་པའི་ཡེ་ཤེས་ཀྱི་མཐོང་བ་རྣམ་པར་དག་པའི་མངོན་ཤེས་ཀྱིས་ད་ལྟའི་སེམས་ཅན་རྣམས་ཀྱི་འཆི་འཕོ་ཤེས་པ་སྟེ་དྲུག་གོ །དེ་ནས་ཆོས་ཉིད་ཕྱིན་ཅི་མ་ལོག་པ་ཤེས་པའི་མངོན་ཤེས་དྲུག་ཤར་དུས་རང་དོན་མཐར་ཕྱིན་པས་གཞན་གྱི་མཛད་པ་ལ་སྤྱོད་པའོ། །དེ་ཡང་ཆོས་ཐམས་ཅད་སྤྲོས་པ་དང་བྲལ་བར་རྟོགས་པའི་མངོན་ཤེས་ཀྱི་དམྱལ་བའི་སྐྱེ་གནས་རྣམས་དུས་གཅིག་ལ་མཐོང་ནས་དེ་ཉིད་དུ་སྤྲུལ་པ་འབུམ་ཕྲག་དུ་མ་འགྱེད་ནུས། མཚན་མ་མེད་པའི་ཆོས་ཉིད་རྟོགས་པས་ཡི་དྭགས་ཀྱི་སྐྱེ་གནས་དང་སྡུག་བསྔལ་དང་ཚེ་ཚད་དང་ལས་དང་ལས་ཀྱི་མཐའ་མཐོང་བས་དེ་ཉིད་ལ་བརྩེ་བའི་སེམས་སྐྱེས་ནས་སྤྲུལ་པ་གྲངས་མེད་གསུམ་འགྱེད། ཆོས་ཐམས་ཅད་རང་བཞིན་འོད་གསལ་དུ་རྟོགས་པས་བྱོལ་སོང་གི་སྐྱེ་གནས་སྡུག་བསྔལ་ཚེ་ཚད་ལ་སོགས་པ་མཐོང་བས་སྤྲུལ་པ་གྲངས་མེད་ཕྲག་ལྔ་སོ་སོར་འབྱེད། ཆོས་ཐམས་ཅད་མཉམ་པ་ཉིད་དུ་རྟོགས་པས་མིའི་སྐྱེ་གནས་དང་སྡུག་བསྔལ་ཚེ་ཚད་ལ་སོགས་པ་མཐོང་ནས་སྤྲུལ་པ་བྱེ་བ་ཕྲག་བརྒྱ་འགྱེད། ཆོས་ཐམས་ཅད་བདག་གིས་སྟོང་པར་རྟོགས་པས་ལྷ་མིན་གྱི་སྐྱེ་གནས་ལ་སོགས་པ་མཐོང་སྟེ། སྤྲུལ་བ་དགུ་ཁྲི་དང་དགུ་སྟོང་སོ་སོར་འགྱེད། ཆོས་ཐམས་ཅད་ཚིག་དང་བྲལ་བར་རྟོགས་པས་ལྷ་རྣམས་ཀྱི་སྐྱེ་གནས་དང་འཆི་འཕོ་ལྟུང་བ་ལ་སོགས་པའི་སྡུག་བསྔལ་དང་ཚེ་ཚད་དང་ལས་དང་ལས་ཀྱི་རྣམ་སྨིན་མཐོང་བས་སྤྲུལ་པ་བརྒྱ་ཕྲག་དགུ་སྟོང་དགུ་བརྒྱ་འགྱེད་ནུས་པ་སྟེ་དེ་ལྟར་དྲུག་གོ །སངས་རྒྱས་ཀྱི་མཁྱེན་པའི་ཡེ་ཤེས་ཕྱིན་ཅི་མ་ལོག་པའི་མངོན་ཤེས་དྲུག་ནི། གནས་པ་ཏིང་ངེ་འཛིན་དུ་རྒྱས་པས་དངོས་པོའི་གནས་ལུགས་ཕྱིན་ཅི་མ་ལོག་པར་མཐོང༌། ངོ་བོ་སྐུར་རྒྱས་པས་སྐུ་གསུམ་གྱིས་བསྡུས་པའི་སྣང་བ་མཐོང༌། མཁྱེན་པ་ཡེ་ཤེས་སུ་རྒྱས་པས་སྔར་གྱི་མངོན་པར་ཤེས་པ་དེ་དག་དུས་གཅིག་ཏུ་མཐོང༌། མཛད་པ་འཕྲིན་ལས་སུ་རྒྱས་པས་སྤྲུལ་སྐུའི་མཛད་པ་སུམ་ཅུ་རྩ་དྲུག་མཐར་ཕྱིན། ཆོས་ཉིད་འགག་པ་མེད་པའི་ཡེ་ཤེས་ལ་སྤྱོད་པའི་མངོན་ཤེས་ཀྱིས་ཤེས་བྱ་ལ་སྲིད་ཚད་མཐོང༌། མཚན་མ་རང་དག་པའི་ཡེ་ཤེས་ཀྱི་མངོན་ཤེས་ཀྱིས་ཆོས་དང་ཆོས་ཉིད་མ་ལུས་པའི་རང་བཞིན་མངོན་དུ་གྱུར་པ་སྟེ་དྲུག་གོ །དེ་ལྟར་ན་མངོན་པར་ཤེས་པ་ཐམས་ཅད་བསྡོམས་ན་བརྒྱ་སུམ་ཅུ་རྩ་བཞི་སྟེ་བསྡུ་ན་སུམ་ཅུ་རྩ་དྲུག དེ་ཡང་བསྡུ་ན་རྩ་བ་དྲུག་ཁོ་ནའོ། །སུམ་ཅུ་རྩ་དྲུག་ཏུ་བརྩི་དུས་དྲུག་ཚན་ལྔ་བ་དབང་པོས་ཚུ་རོལ་མཐོང་བ་དྲུག་ནི་ཟག་བཅས་དང་། དྲུག་ཚན་དང་པོ་ལྔ་ཡི་དབང་པོ་དྲུག་གིས་ཕ་རོལ་མཐོང་བ་སུམ་ཅུ་ནི་ཟག་མེད་དང་། ཐ་མ་ནི་ཤིན་ཏུ་ཟག་མེད་ཡིན་ནོ། །འོན་ཀྱང་ཡེ་ཤེས་བླ་མ་ལྟ་བུའི་མན་ངག་གི་ཡིག་ཆའི་ནང་དུ་དྲུག་ཏུ་བསྡུས་ནས་གོ་བདེ་བའི་ཐོག་ནས་གསུངས་ཡོད་པ་དེ་དག་ལ་ཞིབ་ཏུ་གཟིགས་དགོས། ཐེག་མཆོག་མཛོད་དུ་ཞིབ་རྒྱས་སུ་གསུངས་པའང་ཕལ་ཆེར་འདི་དང་ཕྱོགས་འདྲ་ཡིན་ནོ། །མི་བརྗེད་པའི་གཟུངས་ནི་ཉི་ཟླ་ཁ་སྦྱོར་ལས། དེའི་ཚེ་མི་བརྗེད་པའི་གཟུངས་རྣམས་ཀྱང་རང་གི་རྒྱུད་ལ་སྐྱེ་བ་སྟེ། སྔོན་གྱི་ཆོས་ཐམས་ཅད་རྒྱུད་ལ་དུས་གཅིག་ལ་འཆར་རོ། །དེ་བཞིན་དུ་སྔར་མ་མཐོང་བའི་ཆོས་རྣམས་ཀྱང་འཆར་བས་ན་ཆོས་ཉིད་ཀྱི་བར་དོ་ཞེས་བྱའོ་ཞེས་སོ། །སྔོན་ཐོས་མྱོང་བའི་ཆོས་ཐམས་ཅད་དུས་གཅིག་ལ་རྒྱུད་ལ་འཆར་ཞིང་སྔོན་མ་ཐོས་པའི་ཆོས་ཀྱི་རྣམ་གྲངས་ཀྱང་ཚད་མེད་པ་འཆར་ཐུབ་པ་ཡིན་ནོ། །རྒྱུན་གྱི་ཏིང་ངེ་འཛིན་ཡང༌། རྒྱུད་དེ་ཉིད་ལས། རྒྱུན་གྱི་ཏིང་ངེ་འཛིན་རྒྱུད་ལ་རང་བཞིན་གྱིས་ཤར་བས་རྣམ་པར་རྟོག་པ་ངན་པ་གཏན་ནས་མི་སྐྱེའོ་ཞེས་སོ། །དེའི་སྐབས་སུ་ཆོས་ཉིད་རྣམ་པར་མི་རྟོག་པའི་ངང་དུ་བློའི་འཇུག་པ་ཞི་ནས། ཆོས་ཉིད་ཟད་པའི་སྣང་བ་ཤར་བ་ཡིན་པའི་གནད་ཀྱིས། རྣམ་རྟོག་ངན་པ་ལ་སྔར་ཞེན་དང་། ཕྱིས་ལེན་མེད་པར་ནམ་མཁའ་གཡའ་དག་པ་ལྟ་བུའོ།།
ག དབང་པོའི་རིམ་པས་དོན་བསྡུ་བ།
༼༡༽ དབང་པོའི་རབ་ཏུ་དབྱེ་བ་བཤད་པ།
གསུམ་པ་དབང་པོའི་རིམ་པས་དོན་བསྡུ་བ་ལ་གཉིས་ཏེ། དབང་པོའི་རབ་ཏུ་དབྱེ་བ་དང༌། སོ་སོའི་རང་བཞིན་རྒྱས་པར་བཤད་པའོ། །དང་པོ་ནི་ཉི་ཤུ་རྩ་གཅིག་སྟེ། རང་ཤར་ལས། དབང་པོ་ལ་རྣམ་པ་གསུམ་བསྟན་ཏེ། རབ་དང༌། འབྲིང་དང༌། ཐ་མའོ། །རབ་ལ་བདུན་ཏེ། རབ་ཀྱི་ཐ་མ་དང༌། རབ་ཀྱི་འབྲིང་དང༌། རབ་ཀྱི་རབ་དང༌། རབ་ཀྱི་ཕུལ་དང༌། རབ་ཀྱི་མཆོག་དང༌། རབ་ཀྱི་རྩེ་མོ་དང༌། རབ་ཀྱི་མཐར་ཕྱིན་པའོ། །དེ་ནི་རབ་ཀྱི་དབྱེ་བ་ཡིན་ནོ། །དེ་ཡང་མཐོང་ཚུལ་རེ། ཡེ་ཤེས་ཀྱི་སྣང་བ་སྐྱེ་ཚུལ་རེ། རྟོགས་པ་ཚད་རེ། སྣང་བའི་སྐྱེ་ཚུལ་རེ། གོ་བའི་དུས་རེ། ཤེས་པའི་ལྟ་ལུགས་རེ་ཤར་ནས་རང་རང་གི་སྣང་བ་ལ་བརྟན་པ་ཐོབ་བོ། །འབྲིང་ལའང་བདུན་ཏེ། འབྲིང་གི་ཐ་མ་དང༌། འབྲིང་གི་འབྲིང་དང༌། འབྲིང་གི་རབ་དང༌། འབྲིང་གི་ཕུལ་དང༌། འབྲིང་གི་མཆོག་དང༌། འབྲིང་གི་རྩེ་མོ་དང༌། འབྲིང་གི་མཐར་ཕྱིན་པའོ། དེ་ལ་ཡང་ཡེ་ཤེས་སྐྱེ་བའི་ཚད་རེ་འབྱུང་ངོ༌། །དེ་ནི་འབྲིང་གི་དབྱེ་བ་ཡིན་ནོ། །ཐ་མ་ལའང་བདུན་ཏེ། ཐ་མའི་ཐ་མ་དང༌། ཐ་མའི་འབྲིང་དང༌། ཐ་མའི་རབ་དང༌། ཐ་མའི་མཆོག་དང༌། ཐ་མའི་ཕུལ་དང༌། ཐ་མའི་རྩེ་མོ་དང༌། ཐ་མའི་རྩེ་ཟིན་པའོ་ཞེས་སོ།།
༼༢༽ སོ་སོའི་རང་བཞིན་རྒྱས་པར་བཤད་པ།
༼༡ གྲོལ་འཁྲུལ་གྱི་རྣམ་གཞག་སྤྱིར་བསྟན་པ།
གཉིས་པ་ལ་གསུམ་སྟེ། གྲོལ་འཁྲུལ་གྱི་རྣམ་གཞག་སྤྱིར་བསྟན། དབང་པོའི་གྲོལ་ལུགས་བྱེ་བྲག་ཏུ་བཤད། ཐིམ་ཚུལ་གྱི་རིམ་པས་མཇུག་བསྡུ་བའོ། །དང་པོ་ནི། ཆོས་ཉིད་ཀྱི་སྣང་བ་འདི་དག་གི་དུས་ན་རང་ངོ་ཤེས་པ་རྣམས་དབང་པོ་ཉི་ཤུ་རྩ་གཅིག་གི་རིམ་པས་གྲོལ་བ་དང༌། མ་ཤེས་པ་རྣམས་དེ་ནས་འཁྲུལ་བའི་རིམ་པ་སྔོན་གྱི་གཞི་སྣང་ལས་སེམས་ཅན་གྱི་འཁྲུལ་ཚུལ་ལྟར་འབྱུང་བ་སྟེ། ཉི་ཟླ་ཁ་སྦྱོར་ལས། དབང་པོ་ཉི་ཤུ་རྩ་གཅིག་གི་བྱེ་བྲག་ཏུ་བསྟན་པ་ཡང་ཡོད་དོ། །དེར་རང་གི་ཤེས་པ་མ་ཚུད་ཅིང་སྔར་བླ་མའི་ལུང་མེད་པ་རྣམས་ནི་སྣང་བ་དེ་ལ་བྲེད་པ་དང༌། དངངས་པ་དང༌། རྡུགས་པ་དང༌། འཇིགས་པ་དང༌། འདུ་ཤེས་ཤོར་བ་ལ་སོགས་ཏེ་ཡང་འཁོར་བའི་ཉེ་བར་ལེན་པའི་ཁ་ལེན་ཏེ་དབང་པོ་ཉི་ཤུ་རྩ་གཅིག་གི་བྱེ་བྲག་ཏུ་འཁྲུལ་བ་ཡང་ཡོད་དོ་ཞེས་སོ། །འཁྲུལ་ཚུལ་ནི། ཐ་མའི་ཐ་མ་རྣམ་པ་ལ་འཁྲུལ་བ་དང་ཉམས་ལ་འཁྲུལ་བ་ལ་སོགས་པ་བདུན་དང༌། འབྲིང་གི་ཐ་མ་ཡུལ་མེད་པ་ལ་འཁྲུལ་པ་དང་སྙིང་པོ་ལ་འཁྲུལ་བ་ལ་སོགས་པ་བདུན་དང༌། རབ་ཀྱི་ཐ་མ་འཛིན་པ་ལ་འཁྲུལ་པ་དང་འཛིན་པ་མེད་པ་ལ་འཁྲུལ་བ་ལ་སོགས་པ་བདུན་ཏེ་ཉི་ཤུ་རྩ་གཅིག་ནི་གོང་གི་ཇི་ལྟ་བ་བཞིན་དུ་རྒྱུན་གྱི་གནས་པ་ལས་གསལ་བ་སྟེ། ལུང་གིས་ཞིབ་པར་བཀྲལ་བ་ནི་རང་ཤར་ལས། སེམས་ཅན་རྣམས་ནི་བར་དོ་ལ་འདི་ལྟར་འཁྲུལ་ལོ། །ལ་ལ་རྣམ་པ་ལ་འཁྲུལ་ལོ། །ལ་ལ་ཉམས་ལ་འཁྲུལ་ལོ། །ལ་ལ་དེ་མ་ཐག་པ་ལ་འཁྲུལ་ལོ། །ལ་ལ་དམིགས་པ་ལ་འཁྲུལ་ལོ། །ལ་ལ་ཇི་མི་སྙམ་པ་ལ་འཁྲུལ་ལོ། །ལ་ལ་སྙམ་བྱེད་ལ་འཁྲུལ་ལོ། །ལ་ལ་ཡུལ་ལ་འཁྲུལ་ལོ། །དེ་དག་ནི་ཐ་མའི་ཐ་མ་ཡི་འཁྲུལ་ལུགས་སོ། །ལ་ལ་ཡུལ་མེད་པ་ལ་འཁྲུལ་ལོ། །ལ་ལ་སྙིང་པོ་ལ་འཁྲུལ་ལོ། །ལ་ལ་མ་རིག་པ་ལ་འཁྲུལ་ལོ། །ལ་ལ་རྐྱེན་ལ་འཕྲུལ་ལོ། །ལ་ལ་བཏགས་པ་ལ་འཁྲུལ་ལོ། །ལ་ལ་ད་ལ་འཁྲུལ་ལོ། །ལ་ལ་ངོ་མ་ཤེས་པ་ལ་འཁྲུལ་ལོ། །དེ་དག་ནི་དབང་པོ་འབྲིང་གི་ཐ་མའི་འཁྲུལ་ལུགས་སོ། །ལ་ལ་འཛིན་པ་ལ་འཁྲུལ་ལོ། །ལ་ལ་འཛིན་པ་མེད་པ་ལ་འཁྲུལ་ལོ། །ལ་ལ་འདུ་ཤེས་ལ་འཁྲུལ་ལོ། །ལ་ལ་རྒྱུ་ལ་འཁྲུལ་ལོ། །ལ་ལ་སྐད་ཅིག་གིས་འཁྲུལ་ལོ། །ལ་ལ་རྟགས་ལ་འཁྲུལ་ལོ། །ལ་ལ་གཟུགས་ལ་འཁྲུལ་ལོ། །དེ་དག་ནི་རབ་ཀྱི་ཐ་མའི་འཁྲུལ་ལུགས་སོ། །བར་མ་དོ་ལ་སེམས་ཅན་གྱི་བློ་ཉི་ཤུ་རྩ་གཅིག་ཡོད་པའི་ཕྱིར་འཁྲུལ་ལུགས་ཉི་ཤུ་རྩ་གཅིག་ལ་སྣང་བ་རྫོགས་པར་འོང་སྟེ། དེ་ཡང་འཁྲུལ་ལུགས་རེ་རེ་ལ་སྣང་བ་རེ་རེ་འཆར་རོ། །དེ་ནི་བར་དོ་ལ་འཁྲུལ་ལུགས་རྒྱས་པར་བཤད་པའོ་ཞེས་སོ།།