ཉིན་བཅུ་དགུ་པའི་ཆོས་ཁྲིད།

ཆོས་འཆད་ཉན་སྒོམ་སྒྲུབ་གང་གི་སྐབས་སུ་ཡིན་ནའང་ཀུན་སློང་འདི་གཙོ་ཆེ་བ་དེས་ན་ཐོག་མར་རང་ཉིད་ཀྱི་ཀུན་སློང་ལ་རང་ཉིད་ཀྱིས་ཞིབ་བཤེར་ཞིག་བྱས་ནས་ཁ་ནང་དུ་འཁོར་ཏེ་རང་ཉིད་ཀྱི་སེམས་ལ་བརྟག་དཔྱད་བྱས་ཡོང་ན། ཀུན་སློང་གི་རིགས་ཐམས་ཅད་པོ་ཀུན་སློང་རྣམ་པ་གསུམ་ལས་མི་འདའ་བ་ཞིག་ཡིན་ཏེ། གསུམ་པོ་དེ་གང་གང་ཡིན་ཞེ་ན། དགེ་བའི་ཀུན་སློང་དང་། མི་དགེ་བའི་ཀུན་སློང་དང་། ལུང་མ་བསྟན་གྱི་ཀུན་སློང་དང་གསུམ་པོ་འདི་ཡིན། དེ་ལས་དགེ་མི་དགེ་གཉིས་མིན་པའི་ལུང་མ་བསྟན་གྱི་ཀུན་སློང་དེ་ཅི་ལྟ་བུ་ཞིག་ཡིན་ཞེ་ན། འདི་བསམ་དེ་བསམ་གྱི་དམིགས་ཡུལ་ཆེ་ཞིག་མེད་པའི་མི་རྗེས་སུ་ཁྱི་དེད་པ་ལྟ་བུ་དང་། མི་རྒོད་ཀྱིས་མིའི་ལད་མོ་བྱས་པ་ལྟ་བུ་སྟེ། མི་རྒོད་རྣམས་ཀྱིས་ནགས་གསེང་ནས་བལྟས་བསྡད་དུས་མི་རྣམས་ཀྱིས་ཤིང་གསེ་བཞིན་ཡོད་པ་རིག་ནས་མི་དག་སོང་རྗེས་ཁོང་རྣམས་ཀྱིས་ཀྱང་དེའི་སྟངས་བྱེད་པར་གྲགས་ལ། དེ་ཤེས་པའི་མི་གནག་སེམས་ཅན་རྣམས་ཀྱིས་ལག་ཏུ་སྟ་རེ་བཟུང་ནས་གཅིག་གིས་གཅིག་ལ་རྒྱག་ཁུལ་བྱས་ནས་འཐབ་རེས་བཀྱེ་རེས་དང་རྫོགས་རེས་བྱེད་ཁུལ་བྱས་ནས་སྟ་རེ་དག་ཤུལ་དུ་བསྐྱུར་ནས་བུད་སོང་དུས་མི་རྒོད་རྣམས་ཀྱང་མར་བབས་ནས་གཅིག་གིས་གཅིག་ལ་སྟ་རེའི་རྒྱག་རེས་བྱས་ནས་ཚང་མ་ཤི་འགྲོ་ཐབས་ཀྱི་གཡོ་འཕྲུལ་ངན་པ་རྔོན་པའི་རིགས་དེ་དག་གིས་བྱེད་དར་བ་རེད་ཟེར་སྲོལ་ཡོད་པ། དེ་དང་མཚུངས་པར་དམིགས་ཡུལ་ལ་བརྟག་དཔྱད་མེད་པའི་བྱ་བ་ལ་བཟང་འབྲས་མེད་དོ། །དགེ་སྡིག་གང་ཡང་མིན་པའི་ལུང་མ་བསྟན་གྱི་སེམས་ཀྱིས་ཆོས་གྲལ་དུ་བསྡད་ཀྱང་ཆོས་ཐོས་པའི་ཕན་ཡོན་ཆེན་པོ་ཞིག་ཡོད་པ་མིན་ཏེ། ཆོས་དབང་བཙན་དུ་བྱས་ན་དུད་འགྲོའི་རྣ་ལམ་དུ་ཆོས་སྒྲ་ཐོས་པའི་ཕན་ཡོན་གྱིས་བདེ་འགྲོ་ཐོབ་ཚུལ་གསུངས་ཡོད་པ་ཡིན་ཡང་། གང་ཟག་དབང་བཙན་དུ་བྱས་ཡོང་ན་ཆོས་ཀྱི་བྱིན་རླབས་ཀྱིས་ཐར་བའི་ས་བོན་ཐེབས་པ་ཙམ་ལས་ལུང་མ་བསྟན་གྱི་ཀུན་སློང་གི་དབང་གིས་འབྲས་བུ་ཆེན་པོ་ཞིག་ཐོབ་དཀའ་འོ། །ཀུན་སློང་གཉིས་པ་མི་དགེ་བའི་ཀུན་སློང་ནི་སྤང་དགོས་ལ། དེ་ནི་ཆགས་སྡང་རྨོངས་གསུམ་སྟེ་གཉེན་ལ་ཆགས་དགྲ་ལ་སྡང་བར་ལ་གཏི་མུག་པའི་དུག་གསུམ་དང་འབྲེལ་བའི་ཀུན་སློང་དང་། དེ་ལས་གཞན་དུ་ཚེ་འདིའི་བདེ་སྐྱིད་སྙན་གསུམ་འདོད་ནས་གདོན་བགེགས་ཀྱིས་གནོད་པ་མི་ཡོང་བའི་ཆེད་དང་ན་ཚ་འཇིགས་སྐྲག་ལས་སྐྱོབ་པའི་ཆེད་དང་། རྙེད་བདེ་གྲགས་བསྟོད་ལ་བསམ་ནས་འཇིགས་སྐྱོབ་དང་ལེགས་སྨོན་གྱི་སྒོ་ནས་ཆོས་ཞུ་བ་དེ་དག་སྤང་བྱའི་ཀུན་སློང་ཡིན་ཏེ། བློ་སྦྱོང་ཞེན་པ་བཞི་བྲལ་གྱི་ནང་དུ། ཚེ་འདི་ལ་ཞེན་ན་ཆོས་པ་མིན། གསུངས་ཡོད་པ་ཡིན་པས་བསམ་པའི་ཀུན་སློང་དེ་ལས་མེད་བཞིན་ཆོས་ཞུས་པའི་མིང་ལ་ཆོས་པ་དངོས་ཀྱི་མིང་མེད་པས། ཆོས་པའི་གཟུགས་བརྙན་ཙམ་ཞེས་པ་དེ་ཡིན། དགེ་བའི་ཀུན་སློང་དེ་ཅི་འདྲ་ཞིག་ཡིན་ཞེ་ན། རང་འདོད་སྒྲུབ་པའི་ཀུན་སློང་ཞིག་དང་གཞན་དོན་སྒྲུབ་པའི་ཀུན་སློང་སྟེ་གཉིས་ཡོད་པ་རེད། དེ་ལས་རང་འདོད་སྒྲུབ་པའི་ཀུན་སློང་དེ་ལ་རང་ཉིད་ངན་སོང་གསུམ་གྱི་སྡུག་བསྔལ་ལས་ཐར་ནས་མངོན་མཐོ་ལྷ་མིའི་གོ་འཕང་འཐོབ་པར་འདོད་པ་ལ་སྐྱེས་བུ་ཆུང་ངུའི་ཀུན་སློང་ཞེས་ཟེར་ལ། འོན་ཀྱང་འཁོར་བ་ལ་ཞེན་ན་ངེས་འབྱུང་མིན། །གསུངས་པས། ལྷ་མིའི་གོ་འཕང་ཐོབ་ཀྱང་འཁོར་བ་ལས་མ་འདས་པ་ཡིན་པས་ནམ་ཞིག་ངན་སོང་ལ་ཡང་འཁྱམས་པ་ཡིན་ཕྱིར། འཁོར་བ་ལས་ངེས་པར་འབྱུང་བའི་བློ་སྟེ། ཁམས་གསུམ་འཁོར་བའི་གནས་ན་བདེ་བ་མེད་པར་ཤེས་ཤིང་། རང་ཉིད་གཅིག་པུའི་ཐར་བ་དོན་གཉེར་བྱེད་པ་དེ་སྐྱེས་བུ་འབྲིང་ཉན་རང་གཉིས་ཡིན། དེ་ཡང་། བདག་དོན་ལ་ཞེན་ན་སེམས་བསྐྱེད་མིན། །དེ་ཡང་གསུངས་པས། དགེ་བའི་ཀུན་སློང་ཡིན་རུང་གཞན་ཕན་གྱི་སེམས་མེད་པ་དང་ནི་མཐར་ཐུག་གི་ཐར་བ་མཆོག་མ་ཐོབ་པའི་ཆ་ནས་དེ་ལྟ་བུའི་ཀུན་སློང་གཉིས་པོ་ཡང་སྤང་བྱ་ཡིན་ནོ། །གང་བླང་བར་བྱ་བའི་སྐྱེས་བུ་ཆེན་པོའི་ཀུན་སློང་དེ་ཇི་ལྟར་ཡིན་ཞེ་ན། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་འཐོབ་པར་བྱའོ་བསམ་པའི་ཐོག་ནས་དེའི་རྒྱུ་ལམ་ལ་བསླབ་པ་དེ་ཡིན། ད་ལྟ་ང་ཡང་འཁོར་བའི་སེམས་ཅན་ཡིན་པས་སེམས་ཅན་ཐམས་ཅད་དང་འདྲ་བར་འཁོར་བའི་གནས་ནས་སྡུག་བསྔལ་མྱོང་གིན་ཡོད་པའི་ཉམས་ཐག་གི་སེམས་ཅན་ཞིག་རེད། སེམས་ཅན་ཐམས་ཅད་སྐྱོབ་མ་དགོས་རང་ཉིད་མགོ་ཐོན་པའི་ཐབས་དང་ནུས་པ་མེད་ལ། འོན་ཀྱང་རང་གཅིག་པུ་བདེ་ཐབས་ཀྱིས་ཕན་ཐོགས་མེད་དེ། མ་སེམས་ཅན་ཐམས་ཅད་པོ་སྡུག་བསྔལ་གྱི་གནས་སུ་ལུས་པ་ཡིན་པས། རང་གཞན་སེམས་ཅན་ཐམས་ཅད་འཁོར་བའི་མཚོ་ལས་སྒྲོལ་བའི་ནུས་པ་དེ་སུ་ལ་ཡོད་ན་སངས་རྒྱས་བཅོམ་ལྡན་འདས་བདུད་བཞིའི་དགྲ་ལས་རྒྱལ་ཞིང་སྤངས་རྟོགས་མཐར་ཕྱིན་པ་ཡང་དག་པར་རྫོགས་པའི་བྱང་ཆུབ་བརྙེས་སོང་བ་དེ་ཁོ་ན་ལ་ཡོད་པས། དེ་ལ་སྐྱབས་སུ་སོང་ནས་རང་ཉིད་ལ་དེའི་ནུས་པ་དང་ཡོན་ཏན་ཐམས་ཅད་ཡོད་པ་ཞིག་བྱས་ན། གཞི་ནས་སེམས་ཅན་ཐམས་ཅད་སྡུག་བསྔལ་ལས་སྐྱོབ་ཐུབ་པར་འགྱུར་བ་ཡིན། གཞན་དུ་སྐྱོབ་པར་འདོད་ཀྱང་སྐྱོབ་པའི་ནུས་པ་མེད་པས་རྒན་མོ་བསམ་བཟང་གི་ཡིད་སྨོན་ཙམ་ཞིག་གིས་དོན་ཆེན་མི་འགྲུབ་པར་འདུག་བསམ་ནས་སྐྱབས་གནས་མཆོག་གསུམ་དང་རྩ་བ་གསུམ་ལ་སྐྱབས་སུ་འགྲོ་དགོས་པས། སྐྱབས་སུ་འགྲོ་ཚུལ་དེ་ལ་ཡང་གསང་སྔགས་རྫོགས་ཆེན་གྱི་སྐབས་འདིར་སྐྱབས་གནས་ཀུན་འདུས་ཀྱི་ངོ་བོ་བླ་མ་ཡིན་པས་བླ་མ་གཅིག་ལ་མཆོག་གསུམ་རྩ་གསུམ་སྐུ་གསུམ་ཐམས་ཅད་འདུས་པ་ཡིན། འོན་ཀྱང་བླ་མ་མི་རུ་བཟུང་པའི་ལོག་ལྟ་མི་འབྱུང་བའི་ཆེད་དུ་རྣམ་པ་གུ་རུ་མཚོ་སྐྱེས་རྡོ་རྗེར་གསལ་བཏབ་ནས་ཚོགས་ཞིང་གི་གཙོ་བོར་བསྐྱེད་ན་ཆོག དེ་ཡང་བསྐྱེད་རིམ་གྱི་གསལ་སྣང་ཞལ་ཕྱག་མཚན་མའི་རྣམ་པ་རྒྱ་ཆེར་འཆར་ཁ་མ་ཉན་ཡང་། ལས་དང་པོ་བས་མོས་སྒོམ་ཙམ་ཞིག་བྱས་ནའང་ཆོག་པ་ཡིན། གུ་རུ་རིན་པོ་ཆེ་ནི་དུས་གསུམ་རྒྱལ་བ་ཐམས་ཅད་ཀྱི་ངོ་བོ་གསང་གསུམ་གཅིག་ཏུ་འདུས་པའི་རང་གཟུགས་ཐུགས་བསྐྱེད་ཀྱི་སྟོབས་ཀྱིས་དུས་སྙིགས་མའི་སྐབས་སུ་ཐུགས་རྗེ་ལྷག་པར་མྱུར་བ་ཞིག་ཡིན་པས་མ་ཚད་པར། དད་པ་ཅན་ལ་པད་འབྱུང་སྒོ་ཉལ་ཡོད། གསུངས་པས་དད་ལྡན་བུ་ལ་བྱིན་རླབས་ལྷག་ཏུ་འཇུག་པའི་ཞལ་བཞེས་ཀྱང་མཛད་ཡོད་པས། གུ་རུ་རིན་པོ་ཆེ་ལ་དད་པ་བྱས་ན་གང་ཟག་ཅི་འདྲ་ཞིག་ཡིན་ཡང་ལས་ལ་བཟང་ངན་དང་ལུས་ལ་ཕོ་མོ་རིགས་རུས་ཀྱི་མཐོ་དམན་ཐོབ་དང་དབུལ་ཕྱུག་ན་ཚོད་རྒས་གཞོན་མེད་པར་ཐམས་ཅད་ལ་བྱིན་རླབས་འཇུག་པ་ཡིན། དེས་ན་ཆོས་འདིའི་སྒོ་རུ་ཞུགས་མཁན་ཐམས་ཅད་ཀྱིས་རྒྱུན་དུ་བླ་མའི་རྣལ་འབྱོར་གྱི་ཉམས་ལེན་ལ་མཐིལ་དུ་གཟུང་རྒྱུ་གལ་ཆེའོ། །སྔོན་འགྲོ་དངོས་གཞི་ནམ་དང་ནམ་གྱི་སྐབས་ཡིན་ན་བླ་མའི་རྣལ་འབྱོར་དང་འབྲལ་མི་རུང་། བླ་མ་དང་གུ་རུ་རིན་པོ་ཆེ་དབྱེར་མེད་དུ་སྒོམ་ན་ཐུགས་རྗེ་དང་བྱིན་རླབས་རང་རྒྱུད་ལ་འཇུག་སླ་བའི་དགོས་པ་ཁྱད་པར་ཅན་ལྡན་པ་ཡིན། དེ་ཡང་ལམ་ཐམས་ཅད་ལ་དད་པ་སྔོན་དུ་འགྲོ་དགོས་པ་ཞིག་ཡིན་པས། གུ་རུ་རིན་པོ་ཆེ་ནི་སངས་རྒྱས་ཆོས་དང་དགེ་འདུན་སྟེ་དཀོན་མཆོག་ཀུན་འདུས། བླ་མ་ཡི་དམ་མཁའ་འགྲོ་སྟེ་རྩ་གསུམ་ཀུན་འདུས། ཆོས་སྐུ་ལོངས་སྐུ་སྤྲུལ་སྐུ་སྟེ་སྐུ་གསུམ་ཀུན་འདུས་ཀྱི་བདག་ཉིད་སྐྱབས་གནས་དགུ་ཕྲུགས་ཀྱི་བདག་ཉིད་ཡིན་པའི་མོས་པ་དང་འདུན་པ་བསྐྱེད་ཅིང་། ཕ་མ་རིགས་དྲུག་གི་སེམས་ཅན་རང་དང་བཅས་པ་ཐམས་ཅད་པོ་འཁོར་བ་སྡུག་བསྔལ་ཅན་གྱི་གནས་འདི་ནས་ཕ་མ་ཉེ་འབྲེལ་གྱིས་སྐྱོབ་མི་ཐུབ་ལ་གཞི་བདག་གནས་བདག་གིས་ཀྱང་སྐྱོབ་མི་ཐུབ་ཅིང་ཚངས་དང་དབང་པོ་བརྒྱ་བྱིན་སོགས་ཀྱིས་ཀྱང་སྐྱོབ་ཐུབ་པ་མ་ཡིན་ལ་སྐྱོབ་ནུས་པའི་སྐྱབས་གནས་ཐམས་ཅད་ཀྱི་ནུས་པ་གཅིག་ཏུ་བཟླུམས་པ་ནི་གུ་རུ་རིན་པོ་ཆེའོ་བསམ་ནས་རྒྱུ་མཚན་ཤེས་པས་སྐྱབས་སུ་འགྲོ་དགོས། དེ་ལ་ཤེས་པ་ལས་བྱུང་བའི་དད་པ་ཞེས་བྱ་སྟེ། རྨོངས་པ་གཞན་རྗེས་སུ་སྙེགས་པའི་དད་པ་མ་ཡིན་པ་རང་གིས་བརྟགས་ཤིང་དཔྱད་པ་བརྒྱུད་པའི་རྒྱུ་མཚན་ཤེས་པའི་དད་པ་ཡིན་པའི་ཕྱིར། དེ་ཡང་རྒྱུན་དུ་གུ་རུ་རིན་པོ་ཆེ་ཨོ་རྒྱན་རྡོ་རྗེ་འཆང་ཆེན་རང་གི་སྤྱི་བོ་ན་སྐྱབས་གནས་ཀུན་འདུས་ཀྱི་ངོ་བོ་རུ་བཞུགས་ཡོད་པར་སྒོམ་པ་དང་འབྲལ་མི་རུང་བ་ཡིན་ནོ། །བསྒོམ་རྒྱུ་དེ་ཡང་ཆོས་སྐུ་རྡོ་རྗེ་འཆང་ཆེན་ནས་དགོངས་པ་བརྡ་དང་སྙན་བརྒྱུད་ཀྱི་བརྒྱུད་གསུམ་འདུས་པའི་བླ་མ་ཐམས་ཅད་ནས་རང་ཉིད་ཀྱི་ཐུན་མིན་གྱི་རྩ་བའི་བླ་མའི་བར་དང་བཅས་པ་ཐམས་ཅད་ཡུལ་ཉེར་བཞི་གནས་སོ་གཉིས་དུར་ཁྲོད་ཆེན་པོ་བརྒྱད་ལ་སོགས་པའི་ཧེ་རུ་ཀའི་གནས་བཅུ་ལ་སོགས་པའི་མཁའ་སྤྱོད་དང་ས་སྤྱོད་ན་བཞུགས་པའི་མདོར་ན་དཔའ་བོ་མཁའ་འགྲོ་ཆོས་སྐྱོང་སྲུང་མ་དང་བཅས་པ་ཐམས་ཅད་ཚོགས་ཞིང་ལྟར་དུ་རྒྱས་པར་བྱས་ནས་སྒོམ་ན་ཡང་ཆོག་ལ་གུ་རུ་རིན་པོ་ཆེ་གཅིག་ལ་ཐམས་ཅད་འདུས་པ་ཀུན་འདུས་ནོར་བུའི་ལུགས་སུ་སྒོམ་ནའང་ཆོག གུ་རུ་རིན་པོ་ཆེ་ཉིད་ཀྱི་ཞལ་ནས། ང་སྒྲུབ་སངས་རྒྱས་ཐམས་ཅད་འགྲུབ། །ང་མཐོང་སངས་རྒྱས་ཐམས་ཅད་མཐོང་། །ང་ནི་བདེ་གཤེགས་འདུས་པ་ཡིན། །མོས་གུས་ཅན་གྱི་དྲུང་དུ་ནི། །ང་ཉིད་འདུ་འབྲལ་མེད་པར་གནས། །ཞེས་སོ། །སློབ་དཔོན་མཚོ་སྐྱེས་རྡོ་རྗེ་དང་བླ་མ་དབྱེར་མེད་སྒོམ་ན། རྒྱུད་ལས། གང་གིས་བསྐལ་བ་བྱེ་བ་རུ། །ལྷ་སྐུ་འབུམ་ཕྲག་བསྒོམས་པ་ལས། །བླ་མ་སྐད་ཅིག་དྲན་པ་མཆོག །ཅེས་གསུངས་སོ། །དད་པ་ཅན་ལ་བྱིན་རླབས་ཇི་ལྟར་འཇུག་པ་ཡིན་ཞེ་ན། བླ་མ་དང་འབྲལ་མེད་དུ་བསྒོམས་སྟེ་བླ་མའི་ཐུགས་དང་རང་སེམས་དབྱེར་མེད་དུ་བསྲེས་ནས་མཉམ་པར་བཞག་ན་དུས་གསུམ་གྱི་འཁྲུལ་རྟོག་ཐམས་ཅད་དག་ནས་བདེ་གསལ་མི་རྟོག་པའི་ཉམས་ཞེན་དང་བྲལ་བའི་རྟོགས་པ་ཁྱད་པར་ཅན་རྒྱུད་ལ་སྐྱེ་བ་ཡིན། དུས་རྒྱུན་དུ་མཚམས་མཚམས་སུ་བླ་མ་དྲན་པའི་གདུང་དབྱངས་འབོད་པ་དང་། སྔོན་འགྲོའི་རྒྱུན་འདོན་གྱི་སྐབས་སུ་བླ་མ་མཁྱེན་ཞེས་གསོལ་བ་འདེབས་ཀྱིན་ཡོད་པས། བླ་མ་མཁྱེན་དང་པོའི་སྐབས་སུ་སོ་ཐར་གྱི་ལམ་གྱི་རྩ་བ་ངེས་འབྱུང་དང་འབྲེལ་དགོས་ཏེ། ཁམས་གསུམ་འཁོར་བའི་གནས་འདི་སྡུག་བསྔལ་དུ་ཤེས་ནས་དེ་ལས་ཐར་འདོད་ཀྱི་བསམ་པ་དང་། དེ་ལ་ཞེན་ལོག་གིས་སྣ་དྲངས་ནས་རང་གཞན་སེམས་ཅན་ཐམས་ཅད་འཁོར་བའི་གནས་འདི་ནས་ཐར་བ་ཞིག་ཁྱེད་མཁྱེན་ཁྱེད་ཀྱིས་གཟིགས་བསམ་པའི་འཁོར་བ་ཞེན་ལོག་གི་ངེས་འབྱུང་གིས་འབོད་པར་བྱེད་དགོས། བླ་མ་མཁྱེན་ཞེས་པའི་གདུང་དབྱངས་གཉིས་པའི་སྐབས་སུ་ལམ་གྱི་རྩ་བ་བྱང་སེམས་དང་འབྲེལ་དགོས་ཏེ། བྱང་ཆུབ་ཀྱི་སེམས་མཆོག་རིན་པོ་ཆེ་ནི་རྣམ་མཁྱེན་གྱི་དངོས་རྒྱུ་ཡིན། དེ་སྙིང་རྗེ་ཆེན་པོ་དང་མི་འབྲལ་བ་ཞིག་དང་སྙིང་རྗེའི་རྩ་བ་ཅན་ཞིག་ཡིན་པས་ཁམས་གསུམ་འཁོར་བའི་གནས་ན་སྡུག་བསྔལ་མྱོང་བའི་སེམས་ཅན་འདི་ཐམས་ཅད་སྡུག་བསྔལ་དེ་ལས་ཐར་ནས་སངས་རྒྱས་ཀྱི་གོ་འཕང་ལ་འགོད་རྒྱུའི་གཞན་ཕན་དོན་གཉེར་གྱི་ལྷག་པའི་བསམ་པའི་སྒོ་ནས་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་བ་ཞིག་ཁྱེད་མཁྱེན་ཁྱེད་ཀྱིས་དགོངས་བསམ་པའི་བྱང་སེམས་ལམ་གྱི་རྩ་བ་དང་འབྲེལ་བ་ཡིན། བླ་མ་མཁྱེན་གསུམ་པའི་སྐབས་སུ་གསང་སྔགས་ལམ་གྱི་རྩ་བ་དང་འབྲེལ་དགོས་ཏེ། དེ་ཇི་ལྟར་འབྲེལ་དགོས་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་དག་མཉམ་ཆེན་པོ་སྣང་སྲིད་གཞིར་བཞུགས་ཀྱི་བདག་ཉིད་ཡེ་ནས་ཡིན་པ་ལ་དེ་ལྟ་བུའི་གནས་ཚུལ་མ་རྟོགས་ནས་སྣང་ཚུལ་འཁོར་བར་འཁྱམས་པའི་སེམས་ཅན་ཐམས་ཅད་གློ་བུར་སྒྲིབ་གཉིས་ཀྱི་དྲི་མ་དང་བྲལ་ནས་སྐུ་དང་ཡེ་ཤེས་མངོན་གྱུར་གྱི་ཐོག་ནས་སྣང་སྲིད་གཞིར་བཞེངས་དག་པ་རབ་འབྱམས་དག་མཉམ་སྐུ་དང་ཡེ་ཤེས་ལྷ་སྔགས་ཆོས་ཉིད་ཀྱི་རང་བཞིན་དུ་སེམས་ཅན་ཐམས་ཅད་ཀྱིས་རྟོགས་པར་བྱིན་གྱིས་རློབས། དེ་ལྟར་བྱིན་གྱིས་རློབ་པ་སྐྱབས་གནས་ཀུན་འདུས་ཀྱི་ངོ་བོ་བླ་མ་དམ་པ་ཁྱེད་མཁྱེན་ཁྱེད་ཡིན་བསམ་པའི་གསང་བ་སྔགས་ཀྱི་ལམ་གྱི་རྩ་བ་དང་འབྲེལ་བ་ཞིག་དགོས་སོ། །གསང་སྔགས་ནི་དག་སྣང་གི་ལམ་ཡིན་ལ་སེམས་བསྐྱེད་ཀྱང་ཡིན་ནོ། །རྗེས་ཐོབ་སྤྱོད་ལམ་གྱི་སྐབས་ཐམས་ཅད་ལ་ཡང་སྣང་སྲིད་ཐམས་ཅད་བླ་མའི་རོལ་བ་རུ་བཞེངས་ན། བྱིན་རླབས་འཇུག་པ་དང་། དག་སྣང་གི་མོས་གུས་འདྲེན་པ་དང་། བགེགས་དང་བར་ཆད་མི་འཇུག་པར་སྐྱིད་སྡུག་རོ་སྙོམས་ཐུབ་པ་ལ་སོགས་པ་རྣལ་འབྱོར་ལམ་པ་ཞིག་ལ་མཚོན་ན་མེད་དུ་མི་རུང་བའི་དགོས་གནད་ཁྱད་པར་ཅན་ཡིན་པས། དེ་ལྟ་བུའི་གནད་ཀྱི་གདམས་པ་བྱིན་རླབས་ཀྱི་ཉིང་ཁུ་མན་ངག་ཐམས་ཅད་ཀྱི་སྙིང་པོ་ཐམས་ཅད་ཀུན་འདུས་དེ་བླ་མའི་རྣལ་འབྱོར་ཡིན། བློ་ལྡོག་རྣམ་བཞི་དང་འབྲེལ་ནས་བཤད་ན་ཡང་དལ་འབྱོར་ཚང་བའི་ལུས་རྟེན་འདི་རྙེད་དཀའ་འཇིག་སླ་ཆུའི་ཆུ་བུར་ལྟ་བུ་ཞིག་ཡིན་ན་འདི་ཆུད་ཟོས་སུ་བཏང་ནས་དོན་ཆུང་ཚེ་འདིའི་གཡེངས་བའི་ཁུར་བོས་དུས་འདའ་བ་ལས་བློ་ལྡོག་ནས་དལ་འབྱོར་ཆོས་ལ་བཀོལ་ནས་སྙིང་པོ་ལེན་པ་དང་། རྟག་འཛིན་ཕྱི་ཚིས་ཀྱི་རེ་དོགས་ལས་བློ་ལྡོག་ནས་ནམ་འཆི་ཆ་མེད་འཆི་རྐྱེན་ངེས་མེད་བསམ་པས་བློ་སྣ་བསྟུང་པ་དང་། འཁོར་བ་མཐོ་དམན་གང་དུ་སྐྱེས་ཀྱང་སྡུག་མི་བསྔལ་ས་ཞིག་མེད་པས་འཁོར་བའི་ཉེས་དམིགས་ལ་བློ་ལྡོག་ནས་སྙིང་ནས་ངེས་འབྱུང་བསྐྱེད་པ་དང་། དགེ་སྡིག་རྒྱུ་འབྲས་བསླུ་མེད་ཀྱིས་བདེ་སྡུག་བསྐྱེད་པ་ཡིན་པས་རྒྱུ་འབྲས་ཀྱི་རྣམ་གཞག་མི་ཤེས་པའི་རྨོངས་པའི་ལམ་ལས་བློ་ལྡོག་ནས་རྒྱུ་འབྲས་ཡིད་ཆེས་ཀྱི་ངེས་ཤེས་བསྐྱེད་ནས་རང་གཞན་སེམས་ཅན་ཐམས་ཅད་ཐར་བ་རྣམ་མཁྱེན་གྱི་གོ་འཕང་ལ་སྦྱོར་བར་བྱེད་པའི་ཉམས་ལེན། སྦྱོར་དངོས་རྗེས་གསུམ་ཚང་བ་ཞིག་རྒྱུད་ལ་སྐྱེ་བ་ནི་བླ་མ་དཀོན་མཆོག་གསུམ་པོ་ཁྱེད་མཁྱེན་ཁྱེད་ཀྱི་ཐུགས་རྗེས་ཟུངས་བསམས་ནས་སྐྱབས་འགྲོ་སེམས་བསྐྱེད་ལ་སོགས་པའི་འདོན་པ་གང་བཏོན་ཀྱང་སེམས་ཀྱིས་དེ་བཞིན་དུ་བསམ་པ་དང་དམིགས་པའི་གསལ་འདེབས་ཀྱང་དེ་བཞིན་དུ་བྱེད་དགོས་པ་ཡིན། དུས་འདི་ནས་བྱང་ཆུབ་སྙིང་པོ་མ་ཐོབ་ཀྱི་བར་དུ་སྐྱབས་གནས་ཀུན་འདུས་ཀྱི་བདག་ཉིད་ངོ་བོ་རྩ་བའི་བླ་མ་ཡིན་པ་ལ་རྣམ་པ་མཚོ་སྐྱེས་རྡོ་རྗེ་སྐྱབས་གནས་དགུ་ཕྲུགས་ཚང་བའི་བདག་ཉིད་ཅན་ལ་མོས་གུས་གདུང་ཤུགས་དྲག་པོས་སྐྱབས་སུ་མཆི་བ་ཡིན། བློ་ཡག་ན་ཉེས་ན་གཏོད་ས་ཁྱེད་ཡིན། མཐོ་ན་དམའ་ན་སྐྱིད་ན་སྡུག་ན་རེ་ས་སྐྱབས་གནས་ཁྱེད་ལས་གཞན་ཞིག་མེད་བསམ་ནས་སྐྱབས་སུ་འགྲོ་དགོས། འདི་ལྟ་བུའི་སྐྱབས་སུ་འགྲོ་བ་དེ་ལ་རྒྱུ་འབྲས་རྣམ་པ་གཉིས་ཀྱི་སྟེང་ནས་ཕྱེས་ཡོང་ན་དེ་རྒྱུའི་སྐྱབས་འགྲོ་དང་། དེ་ལྟ་བུའི་རྒྱུ་བྱས་ན་གཞི་རྒྱུད་བདེ་གཤེགས་སྙིང་པོའི་སྟེང་ན་སྐུ་གསུམ་འདུ་འབྲལ་མེད་པའི་ཡོན་ཏན་རང་ཆས་སུ་ཡོད་པའི་རིགས་སད་པ་དེ་འབྲས་བུའི་སྐྱབས་འགྲོ་ཡིན། སེམས་བསྐྱེད་དང་སྦྲེལ་ནས་བཤད་ན་ཡང་སྙིང་རྗེའི་སེམས་ཅན་ལ་དམིགས་པའི་ཟུར་དང་པོ་དང་ཤེས་རབ་ཀྱིས་རྫོགས་བྱང་ལ་དམིགས་པའི་ཟུར་གཉིས་པ། མདོར་ན་དོན་གཉིས་དང་ལྡན་པའི་སེམས་བསྐྱེད་པ་སྟེ། དམ་བཅའ་དང་ལྡན་པའི་སྨོན་སེམས་དང་། དེའི་ཆེད་དུ་ལམ་ཟབ་མོ་བླ་མའི་རྣལ་འབྱོར་དང་འབྲེལ་བའི་ཉམས་ལེན་ལ་འབད་པ་དངོས་སུ་འདོན་པ་ནི་འཇུག་པ་སེམས་བསྐྱེད་དོ། །དེ་ལྟ་བུའི་སྨོན་འཇུག་གི་བདག་ཉིད་ཀུན་རྫོབ་བྱང་ཆུབ་ཀྱི་སེམས་དེ་ལ་བརྟེན་ནས་དབྱིངས་དང་ཡེ་ཤེས་གཉིས་སུ་མེད་པའི་གནས་ལུགས་མངོན་དུ་གྱུར་པར་བྱས་པའི་དོན་དམ་སེམས་བསྐྱེད་རྒྱུད་ལ་འབྱོངས་པ་ནི། སྦྱོར་བ་སྐྱབས་འགྲོ་སེམས་བསྐྱེད་དང་ལྡན་པས་དངོས་གཞི་གསལ་སྟོང་འཛིན་མེད་ཞེན་པ་དང་བྲལ་བ་བློ་འདས་སྤྲོས་པ་དང་བྲལ་བའི་ངང་དུ་ཐུགས་ཡིད་དབྱེར་མེད་དུ་བསྲེ་བའི་མཉམ་བཞག་ཞི་གནས་དང་ལྷག་མཐོང་ཟུང་འབྲེལ་གྱི་སྒོམ་པ་དང་མི་འབྲལ་བར་བྱེད་དགོས་སོ། །འཛིན་པ་བྱུང་ན་ལྟ་བ་མིན། ཅེས་གསུངས་པ་ནི་དེའོ། །དེ་ལྟ་བུའི་ལྟ་སྒོམ་སྤྱོད་གསུམ་ཡ་མ་བྲལ་བའི་ཐོག་དེ་ནས་རྗེས་བསྔོ་བ་དང་སྨོན་ལམ་གྱིས་མཐའ་བརྒྱན། དེའི་སྐབས་སུ་ཡང་བསྔོ་ཡུལ་ནམ་མཁའ་དང་མཉམ་པའི་སེམས་ཅན་ཐམས་ཅད་ལ། བསྔོ་བྱ་རང་ཉིད་ཀྱིས་སྦྱོར་དངོས་རྗེས་གསུམ་ཚང་བའི་ཉམས་ལེན་བྱས་པའི་དགེ་རྩ་དང་། རང་གཞན་གྱི་དུས་གསུམ་བསགས་པའི་དགེ་བ་ཐམས་ཅད་བསྡོམས་ནས། བསྔོ་དོན་དེ་ཐམས་ཅད་སངས་རྒྱས་ཀྱི་གོ་འཕང་འཐོབ་པའི་ཆེད་དུ། བསྔོ་ཚུལ་གུ་རུ་རིན་པོ་ཆེ་ལ་སོགས་པ་སྔོན་གྱི་རྒྱལ་བ་གོང་མ་རྣམ་པས་ཇི་ལྟར་བསྔོས་པ་ལྟར་དུ་འཁོར་གསུམ་དམིགས་མཐའ་དང་བྲལ་བའི་སྒོ་ནས་བསྔོ་བ་ཡིན་བསམ་ནས་སྨོན་ལམ་འདེབས་དགོས་སོ། །བློ་བླ་མར་གཏད་པ་སྐྱབས་འགྲོ་ཡི་མཐར་ཐུག །གསུངས་པ་ཡིན་པས་བླ་མའི་རྣལ་འབྱོར་དང་འབྲེལ་བའི་ཉམས་ལེན་སྦྱོར་དངོས་རྗེས་གསུམ་ཚང་བ་རེ་ཆགས་མེད་ཀྱིས་བྱེད་ཐུབ་ན་དེའི་ཕན་གྱི་ཉམས་ལེན་མིང་ཆེན་ཞིག་ཟུར་ནས་དགོས་པ་མིན། རབ་ཚེ་འདི། འབྲིང་འཆི་ཁ། ཐ་མ་བར་དོའི་སྐབས། ཡང་ཐ་ཡིན་ཡང་སྲིད་པ་བར་དོའི་སྐབས་སུ་གུ་རུ་རིན་པོ་ཆེ་བླ་མ་དང་དབྱེར་མེད་དུ་མཇལ་ནུས་པ་ནི་ཐེ་ཚོམ་མི་དགོས་པ་ཡིན་ནོ། །དེ་ལྟ་བུའི་ངེས་ཤེས་ཀྱི་འདུན་པ་གཞུར་དུ་དྲངས་ནས་ཉམས་ལེན་གནད་སྨིན་མཛད་པ་དང་བཅས་ཏེ་གང་ཞིག་གསན་པར་བྱ་བ་རྫོགས་ཆེན་སྡེ་གསུམ་ཀློང་དགུའི་ཡང་བཅུད་རྒྱུད་དོན་མན་ངག་ཏུ་བཀྲལ་བའི་གཞུང་ཚིག་དོན་རིན་པ་ཆེའི་མཛོད་འདི་ཉིད་འཆད་བཞིན་པའི་སྐབས་ལས་རྡོ་རྗེའི་གནས་ཚིག་དོན་བཅུ་བ་ལས། ཉམས་སུ་ལེན་པ་རྒྱལ་པོའི་ཁང་བཟང་དང་འདྲ་བའི་ནང་ཚན་བར་དོ་བཤད་པའི་སྐབས་ལས་འགའ་ཞིག་སོང་ནས།

༼༢ དབང་པོའི་གྲོལ་ལུགས་བྱེ་བྲག་ཏུ་བཤད་པ།

གཉིས་པ་དབང་པོའི་གྲོལ་ལུགས་བྱེ་བྲག་ཏུ་བཤད་པ་ལ། སྤྱིར་སྐད་ཅིག་དང་བསམ་གཏན་གྱི་ཞག་མང་ཉུང་ཇི་ཙམ་བསྟན་ཡང་དབང་པོ་ཉི་ཤུ་རྩ་གཅིག་གི་གྲོལ་ལུགས་འདིར་འདུ་བས། དབང་པོ་རབ་རྣམས་སྐད་ཅིག་གསུམ་ལ་གྲོལ་ཏེ། དང་པོ་ལ་རང་སྣང་མཐོང༌། གཉིས་པ་ལ་བྱེ་བྲག་ཕྱེད། གསུམ་པ་ལ་ཕྱེད་ཐོག་ནས་གྲོལ་བའོ། །འདི་ལའང་རབ་ཀྱི་མཐར་ཕྱིན་པ་དེ་སྐད་ཅིག་གསུམ་པ་རྫོགས་མ་ཐག་ལ་ཀ་དག་ཏུ་གྲོལ་ལ། འདི་རྣམ་གྲོལ་གྱི་སྐད་ཅིག་མ་ལ་གོ་དགོས། ལྷག་མ་དྲུག་གི་སྐད་ཅིག་གསུམ་ནི་བྱ་བ་རྫོགས་པའི་སྐད་ཅིག་མ་གསུམ་སྟེ། བསམ་གཏན་གྱི་ཞག་མང་ཉུང་ཅི་རིགས་པ་ཡོད་པ་ནི་རྒྱུད་རང་ཤར་ན་གསལ་ལོ། །འབྲིང་རྣམས་སྐད་ཅིག་བཞི་ལ་གྲོལ་ཏེ། དང་པོ་ལ་རང་སྣང་དུ་ཤར། གཉིས་པ་ལ་རང་གདངས་སུ་ཤེས། གསུམ་པ་ལ་ཤེས་ཐོག་ཏུ་གནས། བཞི་པ་ལ་གནས་ཐོག་ནས་གྲོལ་ལོ། །ཐ་མ་རྣམས་སྐད་ཅིག་ལྔ་ལ་གྲོལ་ཏེ། སྐད་ཅིག་དང་པོ་ལ་སྣང་བ་ཤར། གཉིས་པ་ལ་དཔྱད་པ་ཞུགས། གསུམ་པ་ལ་རང་སྣང་དུ་ཤེས། བཞི་པ་ལ་ཤེས་ཐོག་ཏུ་གནས། ལྔ་པ་ལ་གནས་ཐོག་ནས་གྲོལ་པའོ། །འདི་དག་ཀྱང་བྱ་བ་རྫོགས་པའི་སྐད་ཅིག་མ་ཡིན་ལ། དེ་དག་ལའང་བསམ་གཏན་གྱི་ཞག་མང་ཉུང་ཅི་རིགས་སུ་ཡོད་པ་ནི་རྒྱུད་བཞིན་ནོ། །ཁ་ཅིག་གིས་སྐད་ཅིག་དང་བསམ་གཏན་གཉིས་གཅིག་ཏུ་བཤད་པ་ནི་ཆ་ཕྱེད་དབྱིངས་མ་གོ་བ་རྣམ་པ་འདྲེས་པ་ཡིན་ནོ། །སྐད་ཅིག་མ་ལ་རྣམ་གྲོལ་གྱི་སྐད་ཅིག་མ་དང་། བྱ་རྫོགས་ཀྱི་སྐད་ཅིག་གཉིས་ཡོད་པ་ནི་ཤེས་པར་བྱ་བ་ཡིན་ལ། བསམ་གཏན་གྱི་ཞག་རྣལ་འབྱོར་བའི་གོམས་པ་རྒྱུན་རིང་ཐུང་ལ་རྩི་བ་ཡིན་ཞིང་། བསམ་གཏན་འདི་དག་སྐད་ཅིག་མས་བཅིངས་ནས་བཤད་པའོ། །སྐད་ཅིག་མའི་ཆར་དབྱེ་བ་དེ་ལ་རང་ངོ་ཤེས་པའི་རྟོགས་པས་ཁྱབ་ལ། རང་ངོ་ཤེས་པའི་རྟོགས་པས་ཁྱབ་པ་དེ། བསམ་གཏན་གྱི་ཞག་ཡིན་ན་རྟོགས་པས་ཁྱབ་སྟེ། མ་རྟོགས་ཀྱང་རང་བཞིན་གྱི་བསམ་གཏན་ལ་ཡོད་པའི་ཕྱིར་ཏེ། ལྷུན་གྲུབ་ཀྱི་ཐ་མ་བཞིན་ནོ། །དེ་ཡང་སྐད་ཅིག་མ་ལ་བསམ་གཏན་གྱི་ཞག་གིས་མ་ཁྱབ་སྟེ། རྟོགས་པའི་སྐད་ཅིག་ལ་ཀ་དག་ཏུ་གྲོལ་བ་བཞིན་ནོ། །དེ་ལྟ་བུའི་སྐད་ཅིག་མ་ནི་རྟོགས་ཚུལ་ཤེས་རབ་ཀྱི་ཆ་ཡིན་ལ། བསམ་གཏན་ནི་གནས་པ་ཏིང་ངེ་འཛིན་གྱི་ཆ་ཡིན་ནོ། །རབ་ལྟར་དུ་སྐད་ཅིག་རྣམ་གསུམ་དུ་བསྡུས་ཀྱང་འགལ་བ་མེད། འབྲིང་ཐ་ལྟར་དུ་གཅིག་དང་ལྔར་ཕྱེ་ཡང་འགལ་བ་མེད་དེ། གྲོལ་ཚད་རྟོགས་པ་སྐྱེ་པའི་རང་དུས་ངོས་ཟིན་པ་ཙམ་ལས་གཞན་དུ་འཁྲུལ་པ་མེད་དོ། །བསམ་གཏན་ལ་རྒྱུད་ནས་སོ་སོར་གང་བཤད་ཀྱི་ཆ་དེ་ལས་མང་ཉུང་དུ་དབྱེ་བསྡུ་བྱས་པ་མེད་དོ། །བསམ་གཏན་རྣམས་སྐད་ཅིག་མས་བཅིངས་པར་ཤེས་པར་བྱའོ། །འདི་མ་ཕྱེད་ན་ཆ་འདྲེས་ནས་ཅི་ཟེར་དང་བཞག་ས་མེད་པའི་སྐྱོན་གྱིས་མགོ་འཁྲུགས་པར་ཡོད་པས་གནད་གལ་པོ་ཆེ་ཡིན་ནོ། །དེ་དག་གི་ངེས་པ་རྒྱུད་ཀྱི་སྟེང་ནས་རྟོགས་པར་བྱ་སྟེ། རང་ཤར་ལས། དེ་ཡང་དབང་པོ་རབ་ནི་སྐད་ཅིག་མ་གསུམ་ལ་སངས་རྒྱས་ནས་སྤྲུལ་པ་རང་བཞིན་དུ་འབྱུང་ངོ༌། །དེ་ཡང་སྐད་ཅིག་མ་གཅིག་ལ་ཚོམ་བུའི་སྣང་བ་འགགས། སྐད་ཅིག་མ་གཅིག་ལ་ལྷུན་གྲུབ་ཀྱི་སྣང་བ་སྐྱེས། སྐད་ཅིག་མ་གཅིག་གིས་ཀ་དག་གི་བདེན་པ་མཐོང་ངོ༌། །དེ་ཡང་སྤྲུལ་པ་ནི་ཀ་དག་གི་ས་ནས་མི་འགྱེད་དེ། ལམ་དུ་དབང་ཐམས་ཅད་ཀྱི་དེ་བཞིན་ཉིད་ཐོབ་ནས། དཔེར་ན་སྐར་མདའ་ནམ་མཁའ་ལ་རྒྱུག་པའི་ཚུལ་ཏེ། སྐར་མདའ་དེ་ལས་འོད་འཕྲོ་བ་དང་འདྲ་བར་སྤྲུལ་པ་བཀྱེ་ནས་འགྲོ་བའི་དོན་བྱེད་དེ། དོན་བྱེད་ནི་ཞག་གསུམ་ནས་ནུས་སོ། །དབང་པོ་རབ་ཀྱི་རྩེ་མོ་ནི་ཞག་གཅིག་བར་དོར་སྡོད་དོ། །དེ་ཡང་ཡེ་ཤེས་ཁ་སྦྱོར་གྱི་སྣང་བ་ལ་རང་གི་སྣང་བ་མཐོང་སྟེ། དེ་ཡང་བདག་གི་མིག་ནས་ཡེ་ཤེས་ཀྱི་མེ་གཉིས་བྱུང་བས་མཚོན་ཆར་བབ་པ་དེ་ཀུན་ཚིག་ནས་སྣང་བ་འགག་པ་མེད་པར་ཤར་བས་དེ་ལ་རང་གི་ཤེས་པ་སད་ནས་རང་གི་ཡུལ་མཐོང་སྟེ་ལྷུན་གྲུབ་ཀྱི་ས་ལ་ངེས་པ་རྙེད་ནས་ཡང་སྐར་མདའ་ལྟ་བུར་ཤེས་པར་བྱའོ། །དབང་པོ་རབ་ཀྱི་མཆོག་ནི་ཞག་གཉིས་ན་འཚང་རྒྱ་སྟེ། དེ་ཡང་ཚོམ་བུའི་སྣང་བ་ལ་ཞག་གཅིག་སྡོད་དོ། །དེ་ཡང་རང་གི་ཐུགས་ཀ་ནས་ཡེ་ཤེས་ཀྱི་ཉི་མ་གཅིག་འཆར་ཏེ་དེ་ལས་འོད་ཟེར་ཕྱོགས་བཅུར་འཕྲོའོ། །དེ་ལས་འོད་ཟེར་གྱི་རྩེ་མོ་རེ་རེ་ལ་དེ་བཞིན་གཤེགས་པའི་སྐུ་རེ་རེ་འཆར་རོ། །དེས་སྣང་བའི་སྤྱོད་ཡུལ་ཐམས་ཅད་སྐུའི་རང་བཞིན་དུ་མཐོང་ངོ༌། །དེ་ནས་ཡང་ལྷུན་གྲུབ་ཀྱི་སྣང་བ་ལ་ཡང་ངེས་པ་རྙེད་ནས་སྤྲུལ་པ་ཡང་ཞག་བདུན་ན་དོན་བྱེད་ནུས་སོ། །ཡང་སྐར་མདའ་བཞིན་ནོ། །རབ་ཀྱི་ཕུལ་ནི་ཞག་གསུམ་བར་དོ་ལ་སྡོད་དོ། །དེ་ཡང་ཚོམ་བུ་ལ་ཞག་གཅིག་སྡོད་དོ། །དེ་ལ་ཡང་ངེས་པ་རྙེད་པས་ཡེ་ཤེས་ཀྱི་སྣང་བ་ལ་རང་གི་སྣང་བའི་ཆ་གཅིག་འཆར་རོ། །དེ་ཡང་ཞག་གཅིག་སྡོད་དོ། །ཞག་དང་པོ་ལ་འོད་མཐོང་ངོ༌། །ཞག་གཉིས་པ་ལ་སྐུ་མཐོང་སྟེ། སྐུ་དེ་ཡང་ཆེ་བ་རགས་པར་མཐོང་ངོ༌། །དེ་ལ་ཡིད་ཆེས་ནས་ལྷུན་གྲུབ་ཀྱི་ས་དེ་ལ་ངེས་པ་རྙེད་དོ། །དེ་ཡང་སྐར་མདའ་ལྟར་ཤེས་པར་བྱའོ། །སྤྲུལ་པ་ཡང་ཞག་བཅུ་གཅིག་ན་དོན་བྱེད་ནུས་སོ། །རབ་ཀྱི་རབ་ནི་ཞག་བཞི་བར་དོ་ལ་སྡོད་དོ། །དེ་ཡང་རང་གི་མདུན་ན་ཚོམ་བུ་ལྔ་བཀྲ་ས་ལེ་འདུག་པ་མཐོང་ནས་དེ་ལ་རང་གི་བག་ཆགས་སད་ནས་ཤར་ཕྱོགས་ཀྱི་ཚོམ་བུ་ལ་ཞག་གཅིག་སྡོད་དོ། །དེ་བཞིན་དུ་ཕྱོགས་བཞིའི་ཚོམ་བུ་ལ་ཞག་རེ་རེ་སྡོད་དོ། །དེ་ནས་ཡང་ལྷུན་གྲུབ་ལ་ངེས་པ་རྙེད་ནས་འཚང་རྒྱའོ། །སྤྲུལ་པ་ཡང་ཞག་བཅུ་བཞིན་དོན་བྱེད་ནུས་སོ། །དབང་པོ་རབ་ཀྱི་འབྲིང་ནི་ཞག་ལྔ་ན་བདེན་པ་མཐོང་ངོ༌། །དེ་ཡང་འདི་ལྟ་སྟེ། ཞག་བཞི་ཚོམ་བུ་ལ་སྡོད་དོ། །ཞག་གཅིག་ཡེ་ཤེས་ཀྱི་སྣང་བ་ལ་སྡོད་དོ། །དེ་ཡང་རང་གི་ཐུགས་ཀ་ནས་འོད་ཟེར་གྱི་ཐག་པ་རྟ་རྔ་ཙམ་ཞིག་བྱུང་སྟེ། དེ་ཡང་ནམ་མཁའི་མཐོངས་སུ་འགྲེང་བུར་འོང་ངོ༌། དེ་ལ་རང་གི་མིག་མ་ཡེངས་པར་བཟུང་ནས་བལྟས་པས་ནམ་མཁའི་དཀྱིལ་ན་ཚོམ་བུ་ཆེན་པོ་བཀྲ་ས་ལེ་བ་དེ་མཐོང་ནས་དེ་ལ་ཡིད་ཆེས་རབ་ཏུ་སྐྱེས་ནས་རང་གི་སྣང་བ་ཡིན་སྙམ་པའི་ཤེས་པ་ཞིག་བྱུང་བས་ཡིད་ཆེས་པ་མ་པང་དུ་བུ་འཇུག་པའི་གདམས་ངག་ཅེས་བྱའོ། །དེ་ནས་དེ་ལ་རང་གི་རིག་པ་བསྟིམ་གྱིས་ཐིམ་པ་ནི་མི་འགྱུར་བ་གསེར་གྱི་ཐུར་མ་ལྟ་བུའི་མན་ངག་གོ །དེ་ལ་ཡང་མི་གནས་པར་ཀ་དག་གི་ས་ལ་ཐིམ་པ་ནི་ཕྱིར་མི་ལྡོག་པ་དཔག་ཆེན་གྱི་མདའ་ལྟ་བུའི་གདམས་ངག་ཅེས་བྱའོ། །སྤྲུལ་པ་ཡང་ཞག་ཉི་ཤུ་རྩ་གཅིག་ན་དོན་བྱེད་ནུས་སོ། །དབང་པོ་རབ་ཀྱི་ཐ་མ་ནི་ཞག་དྲུག་ཐོགས་ཏེ། དེ་ཡང་ཚོམ་བུ་ལ་ཞག་བཞི་ཐོགས། ཡེ་ཤེས་ཀྱི་སྣང་བ་དང་ཆོས་ཀྱི་དབྱིངས་ལ་ཞག་གཅིག་ཐོགས་སོ། །དེ་ནས་ཡང་རང་གི་མིག་གཉིས་ནས་ཡེ་ཤེས་ཀྱི་མེ་ལོང་གསལ་བ་གཉིས་ལྷག་གིས་འཆར་ཏེ། དེ་ལས་སྣང་བ་དཔག་ཏུ་མེད་པ་འཕྲོས་ནས། གཅིག་རང་གི་སྟེང་དུ་ཚོམ་བུ་གཅིག་ཏུ་སྡོད་དོ། །གཅིག་རང་གི་མདུན་དུ་ཚོམ་བུ་ཆེན་པོ་ཞིག་ཏུ་མཐོང་ངོ༌། །དེ་ནས་ངེས་པ་ཐོབ་ནས་འཚང་རྒྱའོ། །སྤྲུལ་པ་ཡང་ཞག་ཉི་ཤུ་རྩ་ལྔ་ན་དོན་བྱེད་ནུས་སོ་ཞེས་དང༌། འབྲིང་གི་ངེས་པ་ལ་འཇོག་པ་ནི་ཞག་བདུན་ན་ངེས་པ་རྙེད་དོ། །དེ་ཡང་ཞག་ལྔ་ཚོམ་བུའི་སྣང་བ་ལ་སྡོད་དོ། །ཞག་གཅིག་ཆོས་ཀྱི་དབྱིངས་ལ་སྡོད་དོ། །ཞག་གཅིག་མེ་ལོང་ཡེ་ཤེས་ལ་སྡོད་དོ། །དེ་ཡང་རང་གི་ཐུགས་ཀ་ནས་སྐུ་གཅིག་བྱུང་བ་དེ་ལས་སྐུ་གྲངས་མེད་པ་འཕྲོས་པས་དེ་ལ་རང་གི་ཤེས་པ་བསད་དེ་སྟོབས་སུ་གྱུར་ནས་ཡང་སྐར་མདའ་ལྟ་བུའོ། །སྤྲུལ་པ་ཡང་ཞག་ཉི་ཤུ་རྩ་དྲུག་ན་དོན་བྱེད་ནུས་སོ། །དབང་པོ་འབྲིང་གི་རྩེ་མོ་ནི་ཞག་བརྒྱད་ཐོགས་ཏེ། ཡང་ཚོམ་བུ་ལ་ཞག་ལྔ་ཐོགས་སོ། །ཡེ་ཤེས་བཞིའི་སྣང་བ་ལ་ཞག་གསུམ་བསྡད་ནས་ཡང་རང་གི་སྟེང་ན་ཡེ་ཤེས་ཀྱི་སྐུ་སྣ་ཚོགས་སུ་འཕྲོ་བ་ཞིག་མཐོང་བས་དེ་ལ་ངེས་པ་རྙེད་ནས་དེ་ཡང་སྐར་མདའ་ལྟ་བུའོ། །སྤྲུལ་པ་ཡང་ཞག་ཉི་ཤུ་རྩ་བདུན་ན་དོན་བྱེད་ནུས་སོ། །འབྲིང་གི་མཆོག་གིས་ཞག་དགུ་ཐོགས་ཏེ། ཡང་ཚོམ་བུ་ལ་ཞག་ལྔ་ཐོགས། ཡེ་ཤེས་ལ་ཞག་བཞི་ཐོགས་སོ། །དེ་ནས་ཡང་ངེས་པ་རྙེད་དེ་ཅི་སྣང་ཐམས་ཅད་མེ་ལོང་ལྟ་བུར་རྟོགས་ཤིང་མཐོང་ནས་བརྟན་པ་ཐོབ་བོ། །སྤྲུལ་པ་ཡང་ཞག་སུམ་ཅུ་ན་དོན་བྱེད་ནུས་སོ། །འབྲིང་གི་ཕུལ་ནི་ཞག་བཅུ་ཐོགས་ཏེ། ཡང་ཚོམ་བུ་ལ་ལྔ། ཡེ་ཤེས་ཀྱི་སྣང་བ་ལ་བཞི། ལྷུན་གྲུབ་ཀྱི་སྣང་བ་ལ་ཞག་གཅིག་ཐོགས་ནས་སྐུ་དེ་དག་ཐམས་ཅད་གཉིས་མེད་དུ་རྟོགས་ནས་འཚང་རྒྱའོ། །སྤྲུལ་པ་ཡང་ཞག་སུམ་ཅུ་རྩ་གཅིག་ན་དོན་བྱེད་ནུས་སོ། །འབྲིང་གི་རབ་ཞག་བཅུ་གཅིག་ཐོགས་ཏེ། ཡང་ཚོམ་བུ་ལ་ལྔ། ཡེ་ཤེས་ལ་ལྔ། ལྷུན་གྲུབ་ལ་གཅིག་གནས་ཏེ། དེ་ནས་ཡང་ངེས་པ་རྙེད་ནས་སྣང་བ་ཐམས་ཅད་འོད་ཁྱིམ་དུ་མཐོང་ནས་ངེས་པ་རྙེད་དོ། །སྤྲུལ་པ་ཡང་ཞག་སུམ་ཅུ་རྩ་བཞི་ན་དོན་བྱེད་ནུས་སོ། །འབྲིང་གི་འབྲིང་ནི་ཞག་བཅུ་གཉིས་ཐོགས་ཏེ། ཡང་ཚོམ་བུ་ལ་ལྔ། ཡོངས་སུ་ཁྲོ་བོའི་ཞིང་ཁམས་སུ་གཅིག་ཡེ་ཤེས་ཀྱི་སྣང་བ་ལ་ཞག་ལྔ། ལྷུན་གྲུབ་ཀྱི་སྣང་བ་ལ་ཞག་གཅིག་གནས་ནས་ཀྱང་ངེས་པ་རྙེད་དེ་བརྟན་པ་ཐོབ་བོ། །སྤྲུལ་པ་ཡང་ཞག་སུམ་ཅུ་རྩ་བདུན་ན་དོན་བྱེད་ནུས་སོ། །འབྲིང་གི་ཐ་མ་ནི་ཞག་བཅུ་གསུམ་ཐོགས་ཏེ། ཡང་ཚོམ་བུ་གོང་འོག་ལ་དྲུག ཡེ་ཤེས་ལ་ལྔ། ལྷུན་གྲུབ་ལ་གཉིས་གནས་པས། ཡང་ཅིར་སྣང་མར་མེའི་དཀྱིལ་འཁོར་ལྟར་མཐོང་ནས་ངེས་པ་རྙེད་དོ། །སྤྲུལ་པ་ཡང་ཞག་སུམ་ཅུ་རྩ་དགུ་ན་དོན་བྱེད་ནུས་སོ་ཞེས་པ་དང་དེ་ཡང་ཐ་མའི་ས་ཟིན་པ་ནི་ཞག་བཅུ་བཞི་ཐོགས་ཏེ། དེ་ཡང་ཚོམ་བུ་གོང་འོག་ལ་དྲུག ཡེ་ཤེས་ལ་ལྔ། ལྷུན་གྲུབ་ལ་ཞག་གསུམ་ཐོགས་པའི་ཐ་མ་རང་གི་སྣང་བ་མཐོང་ནས་འཚང་རྒྱའོ། །སྤྲུལ་པ་ཡང་ཞག་བཞི་བཅུ་ན་དོན་བྱེད་ནུས་སོ། །ཐ་མའི་རྩེ་མོ་ནི་ཞག་བཅོ་ལྔ་ཐོགས་ཏེ། ཡང་ཚོམ་བུ་དང་ཡེ་ཤེས་གོང་བཞིན་ནོ། །ལྷུན་གྲུབ་ལ་ཞག་གཅིག་གནས་པའི་ཐ་མ་ལ་རང་གི་སྣང་བ་མཐོང་ནས་བརྟན་པ་ཐོབ་བོ། །སྤྲུལ་པ་ཡང་ཞག་བཞི་བཅུ་ཞེ་གསུམ་ན་དོན་བྱེད་ནུས་སོ། །ཐ་མའི་མཆོག་ནི་ཞག་བཅུ་དྲུག་ཐོགས་ཏེ། ཚོམ་བུ་དང་ཡེ་ཤེས་གོང་བཞིན་ནོ། །ལྷུན་གྲུབ་ལ་ཞག་ལྔ་གནས་པའི་ཐ་མ་ཡང་རང་གི་སྣང་བ་མཐོང་ནས་བརྟན་པ་ཐོབ་བོ། །སྤྲུལ་པ་ཡང་ཞག་ཞེ་དྲུག་ན་དོན་བྱེད་ནུས་སོ། །ཐ་མའི་ཕུལ་ནི་ཞག་བཅུ་བདུན་ཐོགས་ཏེ། ཚོམ་བུ་དང་ཡེ་ཤེས་ཀྱང་གོང་བཞིན་ནོ། །ལྷུན་གྲུབ་ལ་ཞག་དྲུག་གནས་པའི་ཐ་མ་ཡང་རང་གི་སྣང་བ་མཐོང་ནས་བརྟན་པ་ཐོབ་པའོ། །སྤྲུལ་པ་ཡང་ཞག་ཞེ་བདུན་ན་དོན་བྱེད་ནུས་སོ། །ཐ་མའི་རབ་ཞག་བཅོ་བརྒྱད་ཐོགས་ཏེ། ཡང་ཚོམ་བུ་ལ་ཞག་དྲུག་ཐོགས་སོ། ཡེ་ཤེས་ལ་ཞག་བརྒྱད་དོ། །ལྷུན་གྲུབ་ལ་ཞག་གསུམ་གནས་པའི་ཐ་མ་རང་གི་སྣང་བ་མཐོང་ནས་བརྟན་པ་ཐོབ་བོ། །སྤྲུལ་པའང་ཞག་ལྔ་བཅུ་ན་དོན་བྱེད་ནུས་སོ། །ཐ་མའི་འབྲིང་ནི་ཞག་བཅུ་དགུ་ཐོགས་ཏེ། ཡང་ཚོམ་བུ་ལ་བཅུ་གཉིས་ཐོགས། ཡེ་ཤེས་ལ་བཞི་གནས་སོ། །ལྷུན་གྲུབ་ལ་ཞག་གསུམ་གནས་པའི་ཐ་མ་ལ་རང་གི་སྣང་བ་མཐོང་སྟེ་འཚང་རྒྱའོ། །སྤྲུལ་པ་ཡང་ཞག་ལྔ་བཅུ་རྩ་གསུམ་ན་དོན་བྱེད་ནུས་སོ། །སེམས་ཅན་གྱི་དབང་པོ་དེ་རྣམས་ཀུན་ཀྱང་སངས་རྒྱས་ཀྱི་ས་ནོན་པའོ། །བར་དོ་དེ་རྣམས་ཀྱང་དཔེར་ན་རྨི་ལམ་ལྟ་བུའོ་ཞེས་སོ། །འདིའི་སྐད་ཅིག་གི་སྐབས་སུ་རྣམ་གྲོལ་གྱི་སྐད་ཅིག་དང་བྱ་རྫོགས་ཀྱི་སྐད་ཅིག་མ་ནོར་མི་རུང་ལ། བསམ་གཏན་གྱི་ཞག་དང་སྐད་ཅིག་མ་མ་ནོར་དུས་གོ་བ་ཆེན་པོ་འཕྱུག་ས་མེད་དོ། །དེ་དག་གི་དུས་ན་གྲོལ་བ་གནད་ཀྱི་མན་ངག་ལ་གསུམ་སྟེ། ཆོས་ཉིད་ཀྱི་སྣང་བ་རང་སྣང་དུ་ཤེས་པ་མ་པང་དུ་བུ་འཇུག་པའི་གདམས་པ་དང༌། ཤེས་ཐོག་དེར་དར་ཅིག་རང་བཞིན་གྱི་བསམ་གཏན་ལས་མི་གཡོ་བ་གསེར་གྱི་ཐུར་མ་ལྟ་བུའི་གདམས་ངག་དང༌། གནས་ཐོག་གི་ངང་རང་ས་ཀ་དག་ལས་གྲོལ་ནས་ཕྱིར་མི་ལྡོག་པ་དཔག་ཆེན་གྱི་མདའ་ལྟ་བུའི་མན་ངག་རྣམ་པ་གསུམ་དྲན་པར་བྱའོ། །དེ་ཡང་དབང་པོ་རབ་ལྟ་བུ་ལ་དཔེར་མཚོན་ན་སྐད་ཅིག་དང་པོ་ལ་ཚོམ་བུ་འགགས། གཉིས་པ་ལ་ལྷུན་གྲུབ་སྐྱེས་དུས་སྐད་ཅིག་དང་པོ་ལ་རང་ངོ་ཤེས། སྐད་ཅིག་གཉིས་པ་ལ་ཤེས་ཐོག་ཏུ་གནས། སྐད་ཅིག་གསུམ་པ་ལ་ཀ་དག་གི་བདེན་པ་མཐོང་ནས་གྲོལ་ཏེ་དབྱིངས་སུ་མ་ཐིམ་པའི་བར་དེར་བསམ་གཏན་གྱི་ཞག་གསུམ་གནས་པའི་ངང་ནས་སྐར་མདའ་ལས་འོད་འཕྲོ་བ་ལྟར་རིག་པ་ལས་སྤྲུལ་པ་བཀྱེ་ནས་སེམས་ཅན་གྱི་དོན་རང་སྣང་ཙམ་དུ་བྱས་ཏེ་ཀ་དག་ཏུ་སླར་ཐིམ་པ་སྐར་མདའ་དབྱིངས་སུ་ཐིམ་པ་ལྟ་བུའོ། །འདིའི་སྐར་མདའ་ལ་དཔེ་བྱས་པ་ནི། སྐར་མདའ་དང་འདྲ་བའི་མགྱོགས་པ་ཞིག་ལ་གསུངས་པ་མིན་པར་སྐར་མདའ་རྒྱུག་པའི་རིང་ལ་འོད་འཕྲོ་བ་དང་འདྲ་བར། ཀ་དག་གི་ནང་དབྱིངས་ལ་མ་འཁྱིལ་གྱི་བར་དུ་རང་སྣང་གི་སེམས་ཅན་གྱི་དོན་བྱེད་པ་དང་། སྐར་མདའ་དབྱིངས་སུ་ཐིམ་དུས་འོད་མི་སྣང་བ་ལྟར་དུ་ཀ་དག་གི་ནང་དབྱིངས་དངོས་ནས་སྤྲུལ་བ་འགྱེད་པ་མིན་ལ། སྤྲུལ་བ་ཇི་ལྟར་འགྱེད་ན་དེ་ནས་ལྷུན་གྲུབ་ཀྱི་སའི་ཐུགས་རྗེས་རང་བཞིན་ལྷུན་གྲུབ་ཏུ་དོན་འབྱུང་བ་ལས། ཀ་དག་གིས་དེ་ནས་དངོས་སུ་སྤྲུལ་པ་མི་འགྱེད་དེ་ཆོས་སྐུ་བྱ་བྱེད་གཡོ་རྩོལ་ལས་འདས་པའི་ས་ཡིན་པའི་ཕྱིར་རོ། །ཞག་འདི་གནས་པ་ཏིང་ངེ་འཛིན་སྔོན་གནས་ཀྱི་ཆའི་ཡུན་ལ་བརྩི་བ་ཡིན་ལ། དབང་པོ་རྣམས་རང་རང་གྲོལ་ནས་རང་བཞིན་གྱི་བསམ་གཏན་ལ་ཞག་སུམ་ཅུ་དང་བཞི་བཅུ་ལ་སོགས་པ་ནས་ཐ་མ་ལྔ་བཅུ་རྩ་གསུམ་རང་གནས་པའི་ངང་ནས་སྤྲུལ་པ་བཀྱེ་ནས་དོན་བྱས་རྟིང་ནང་དབྱིངས་སུ་འཇུག་པའོ། །དེ་ཡང་གྲོལ་ནས་དབྱིངས་སུ་མ་ཐིམ་གྱི་བར་དེར་སྤྲུལ་པ་འགྱེད། རང་གི་ཞག་སོ་སོར་གནས་རྟིང་དབྱིངས་སུ་ཐིམ་པའོ།།

༼༣ ཐིམ་ཚུལ་གྱི་རིམ་པས་མཇུག་བསྡུ་བ།

གསུམ་པ་ཐིམ་ཚུལ་གྱི་རིམ་པས་མཇུག་བསྡུ་བ་ནི། སྔར་ལྷུན་གྲུབ་ཀྱི་སྣང་བ་ཤར། དེ་དག་སླར་རིག་པ་ཉིད་ཀྱི་ངང་དུ་ཐིམ་པ་ནི་ཤེལ་འོད་ནང་ཐིམ་ལ་སོང་བ་ལྟ་བུ་སྟེ། རིན་པོ་ཆེ་སྤུངས་པ་ལས། རོལ་པའི་རྩལ་དུ་ཐིམ་ལུགས་བརྒྱད། །ལྷུན་གྲུབ་ངེས་པ་མེད་པའི་གཞི། །ཡོན་ཏན་ཚུལ་དུ་འདི་ལྟ་བུ། །ཞེས་དང༌། རང་ཤར་ལས། ཀྱེ་གྲོགས་པོ་དག་ལྷུན་གྲུབ་ཀྱི་སྣང་བ་ལ་རང་གི་དེ་ཉིད་སྟོབས་སུ་གྱུར་ནས་བདེན་པ་མཐོང་བའི་ཚེ། ཐིམ་ལུགས་བརྒྱད་དོ་ཤེས་པར་བྱའོ། །དེ་ཡང་ཐུགས་རྗེ་ཐུགས་རྗེ་ལ་ཐིམ་པ་ནི་དཔེར་ན་ཉི་མ་ནུབ་པའི་ཟེར་ལྟ་བུའོ། །ཡེ་ཤེས་ཡེ་ཤེས་ལ་ཐིམ་པ་ནི་དཔེར་ན་མ་པང་དུ་བུ་འཇུག་པ་ལྟ་བུའོ། །འོད་འོད་ལ་ཐིམ་པ་ནི་དཔེར་ན་འཇའ་ཚོན་ནམ་མཁའ་ལ་ཡལ་བ་ལྟ་བུའོ། །སྐུ་སྐུ་ལ་ཐིམ་པ་ནི་དཔེར་ན་བུམ་པའི་སྐུ་ལྟ་བུའོ། །གཉིས་མེད་གཉིས་མེད་ལ་ཐིམ་པ་ནི་དཔེར་ན་ཆུ་བོ་ཆུ་བོ་ལ་ཐིམ་པ་ལྟ་བུའོ། །མཐའ་གྲོལ་མཐའ་གྲོལ་ལ་ཐིམ་པ་ནི་དཔེར་ན་ནམ་མཁའ་ནམ་མཁའ་ལ་ཐིམ་པ་ལྟ་བུའོ། །དག་པ་ཡེ་ཤེས་ཀྱི་སྒོ་ངོ་བོ་ཀ་དག་ལ་ཐིམ་པ་ནི་དཔེར་ན་སེང་གེས་གངས་ཟིན་པ་ལྟ་བུའོ། །མ་དག་པ་འཁོར་བའི་སྒོ་དག་པ་ཡེ་ཤེས་ལ་ཐིམ་པ་ནི་དཔེར་ན་སྦྲའི་ཆོན་ཐག་བརྟུལ་བ་ལྟ་བུའོ་ཞེས་སོ། །ལྷུན་གྲུབ་ཀྱི་ཐིམ་ཚུལ་ནི། སྔར་ཤར་བ་ཐམས་ཅད་ད་ནང་དུ་བསྡུ་བ་སྟེ། ཤར་ལུགས་བརྒྱད་དུས་གཅིག་ལ་ཤར་བར་བཞིན་དུ། ཐིམ་ལུགས་བརྒྱད་དུས་གཅིག་ལ་འབྱུང་བ་ནི། ཐུགས་རྗེ་ཐུགས་རྗེ་ལ་ཐིམ་པ་དཔེར་ན་ཉི་མ་ནུབ་པའི་ཟེར་ལྟ་བུ་ཞེས་པ་ནི། ཉི་མས་ནུབ་རི་བརྒལ་དུས་ཉི་ཟེར་ཀྱང་རང་ཤུགས་ཀྱིས་དེ་ལ་འདུས་ཏེ་མེད་སོང་བ་ལྟར། རིགས་དྲུག་གི་སྣང་ཆ་རང་ངོ་ལ་མི་སྣང་བར་མ་དག་པའི་འཁྲུལ་བའི་མིང་མེད་དེ་གཟིགས་སྣང་ལས་འདས་པའི་དོན་ཏོ། །ཡེ་ཤེས་ཡེ་ཤེས་ལ་ཐིམ་པ་ནི་དཔེར་ན་མ་པང་དུ་བུ་འཇུག་པ་ལྟ་བུ་ཞེས་པ་ནི། མ་པང་དུ་བུ་ཞུགས་ན་སོ་སོར་མིན་པ་མི་གཅིག་གི་གོ་ན་ཡོད་པ་དང་འདྲ་བར། ཆོས་ཉིད་མ་དང་རིག་པ་བུ་གཉིས་ཀ་གཉིས་མེད་དུ་འདྲེས་ནས་ངོས་གཟུང་མེད་པ་ལ་གསུངས་པའོ། །འོད་འོད་ལ་ཐིམ་པ་དེ་ནམ་མཁའི་འཇའ་ཚོན་ཡལ་བ་ལྟ་བུ་ཞེས་པ་ནི། འཇའ་ཚོན་ནམ་མཁའ་ལ་ཡལ་ཚེ་སྟོང་བའི་དབྱིངས་ལ་རོ་གཅིག་སོང་བ་ལྟར། འོད་དང་ཁ་དོག་གི་མཚན་མའི་རིས་མེད་པར་སྟོང་པ་ངོས་གཟུང་དང་བྲལ་བའི་དབྱིངས་སུ་རོ་གཅིག་པའི་དོན་ཏོ། །སྐུ་སྐུ་ལ་ཐིམ་པ་ནི་དཔེར་ན་བུམ་པའི་སྐུ་ལྟ་བུའོ་ཞེས་པ་ནི། ཤེས་བྱ་ནང་གསལ་དུ་སོང་ནས་མཚན་མ་རིས་ཅན་གྱི་ཞལ་ཕྱག་ཏུ་གྲུབ་པ་མེད་པར་རྣམ་པར་དག་པའི་དོན་ཏོ། །གཉིས་མེད་གཉིས་མེད་ལ་ཐིམ་པ་ནི་དཔེར་ན་ཆུ་བོ་ཆུ་བོ་ལ་ཐིམ་པ་ལྟ་བུའོ་ཞེས་པ་ནི། ཆུ་དང་ཆུ་བོ་གཉིས་ཀ་འདྲེས་དུས་གཅིག་ཏུ་གྱུར་ནས་འདྲེས་པ་ལྟར། གདོད་མའི་ཆོས་སྐུ་རུ་གྲོལ་བས་ཆོས་སྐུའི་དགོངས་པར་རོ་གཅིག་ཏུ་གྱུར་ཏེ་དབྱེར་མེད་སྤྲོས་པ་དང་བྲལ་བའི་དོན་ཏོ། །མཐའ་གྲོལ་མཐའ་གྲོལ་དུ་ཐིམ་པ་ནམ་མཁའ་ལ་ནམ་མཁའ་ཐིམ་པ་ལྟ་བུ་ཞེས་པ་ནི། སྟོང་པ་ལ་གཏད་པའི་ཡུལ་མེད་དེ་བསམ་ཡུལ་ལས་འདས་པའི་དོན་ཏོ། །དག་པ་ཡེ་ཤེས་ཀྱི་སྒོ་ངོ་བོ་ཀ་དག་ལ་ཐིམ་པ་སེངྒེས་གངས་ཟིན་པ་ལྟ་བུ་ཞེས་པ་ནི། ཡ་ང་དང་བག་ཚ་མེད་དེ་རིག་པ་རང་ཡུལ་དུ་ཕྱིན་པའི་དོན་ཏོ། །མ་དག་པ་འཁོར་བའི་སྒོ་དག་པ་ཡེ་ཤེས་ལ་ཐིམ་པ་སྦྲའི་ཆོན་ཐག་བརྟུལ་བ་ལྟ་བུ་ཞེས་པ་ནི། སྦྲ་ཕབ་ནས་ཆགས་ལྟེབ་བྱེད་དུས་ཆོན་ཐག་ཀྱང་དེ་དང་མཉམ་དུ་རུག་སོང་བ་ལྟར། ཐིག་ལེ་ཉག་གཅིག་ལ་འདུས་པའོ་ཞེས་པའི་དོན་ཏོ། །དེ་ལྟར་བརྒྱད་པོ་ཐིམ་དུས་རིག་པ་ཤེལ་གོང་སྐྱོན་དང་བྲལ་བ་ལྟར་ཀ་དག་ནང་དབྱིངས་གཅིག་ཏུ་གནས་པས་ངོ་ཤེས་པ་རྣམས་ཆོས་སྐུ་ཉག་གཅིག་ཏུ་བདེ་ཀློང་གཅིག་ཏུ་འཁྱིལ་བའི་དུས་སོ། །ལྷུན་གྲུབ་ཐིམ་ལུགས་བརྒྱད་ཀྱི་སྣང་བ་ཤར་ནས་ཀ་དག་གི་ནང་དབྱིངས་སུ་ཐིམ་པ་འདིའི་ཐད་དུ། རྒྱལ་བ་ཀློང་ཆེན་པས་རྒྱུད་དོན་རྩལ་འདོན་མཛད་པའི་མན་ངག་རྣམ་པ་གཉིས་ཏེ། ཆོས་ཉིད་དོན་གྱི་མན་ངག་གིས་གནད་དུ་བརྡེག་པ་དང་། དུས་གསུམ་གནད་ཀྱི་མན་ངག་གིས་དམིགས་སུ་གདབ་པའོ། །དང་པོ་ནི། ཚེ་འདི་དང་བར་དོ་གཉིས་ཀར་གནད་དུ་སྣུན་ཐབས་བསྟན་པ་སྟེ། ངོ་བོ། རང་བཞིན། ཐུགས་རྗེའི་གནད་གསུམ་ལས། ངོ་བོའི་གནད་ནི། རང་ཐོག་ཏུ་ངོ་ཤེས། ཡིན་ཐོག་ཏུ་ཐག་ཆོད། གྲོལ་ཐོག་ཏུ་གདེང་བཅའ་བ་གསུམ་ལས། དང་པོ་ནི། རང་བཞིན་འོད་དུ་སྣང་ཡང༌ངོ་བོ་རིག་གདངས་གཅིག་ལས་མ་འདས་པའི་གནད་དེ་ཤེས་པས་ཤར་ཆ་གང་ཤར་ཡང་རིག་པ་སྟོང་གསལ་ཟང་ཀ་དེ་ཀ་དག་གི་རང་ངོ་ཡིན་པར་ཐག་ཆོད་པ་ནི་མཐར་ཐུག་གི་གྲོལ་ས་རིག་པ་ཅེར་མཐོང་དུ་ངོ་ཤེས་པའོ། །གཉིས་པ་ནི། དེའི་ངང་དེ་བཏང་བཞག་མེད་པར་རང་བཞིན་གྱི་བསམ་གཏན་དུ་ཐག་རྦད་ཀྱིས་བཅད་ལ་མ་ཡེངས་ལ་མི་འཛིན་པས་སྒོམ་པའོ། །གསུམ་པ་ནི། དེའི་ཚེ་བསྒོམ་བྱ་སྒོམ་བྱེད་ལས་འདས་པའི་རིག་པ་ཟང་ཐལ་དུ་ཤར་ཞིང་གྲོལ་བའི་ལམ་དེ་ནས་བཟང་ངན་གྱི་རྟོག་ཚོགས་མ་སྤངས་པར་རང་གྲོལ་བའི་གདེང་ལ་ཡིད་ཆེས་ཤིང་ཟློ་པར་བྱེད་པའོ། །དེས་ན་ངོ་བོ་རང་བཞིན་གསུམ་ལས་ངོ་བོའི་གནད་དེ་དེ་ལྟར་གོ་དགོས་སོ། །རང་བཞིན་གྱི་གནད་ནི། འོད་སྣང་ཆོས་ཉིད་དུ་གྲོལ་བའི་གདམས་པ་སྟེ། ཕར་ལ་བལྟས་པས་ཚུར་ལ་གསལ་བའི་རིག་པ་སྐད་ཅིག་མ་རྗེན་ལ་བུད་པའི་ངོ་སྤྲོད་ཡིན་ལ། དེ་ཡང་རང་བཞིན་གྱི་གནས་ལ་སྣ་ཚོགས་སུ་སྣང་ཡང་སྣང་ངོ་ཙམ་ལས། དོན་རང་གསལ་རྗེན་པའི་ཡེ་ཤེས་གཅིག་ཏུ་ཐག་ཆོད་པ་ནི། སྣང་བ་ལ་བལྟས་ན་མཐའ་ཡས་ཀྱང་། རིག་པ་ལ་བལྟས་ན་གཅིག་ཀྱང་མེད་པ་རིག་ངོ་རྗེན་པར་ཤར་བས། གྲོལ་སར་པར་གྱིས་བཏབ་པའི་མན་ངག་གོ །དེ་ནས་ཐུགས་རྗེའི་གནད་ནི། ཕྱི་སྣ་ཚོགས་འཆར་བའི་རྐྱེན་རེ་ལ་ནང་འཆར་བའི་རིག་པ་མང་པོ་ཞིག་འཕྲོ་བཞིན་བསྡད་ཀྱང་། ཕྱི་རུ་འཕྲོ་བའི་རྗེས་མི་གཅད། རང་ངོར་མི་བརྟག ནང་དུ་མི་དགག་པར་གང་ཤར་དེ་ཀའི་ཐད་དེར་ཅོག་གིས་བཞག་ལ། བར་མེད་ཀྱི་ཤེས་པ་རྗེན་པ་ཟང་ཐལ་ཞིག་མངོན་དུ་བུད་པ་དེ་ངོས་བཟུང་བས། གྲོལ་ས་ཅེར་མཐོང་དུ་ཟིན་ཏེ། ཤར་གྲོལ་རང་ཡལ་གྱི་རིག་པ་ཧར་སོང་རྗེན་པ་ཟང་ཐལ་བ་དེ་ཀ་འདི་དང་བར་དོའི་ཤེས་པ་འཆར་བྱེད་མ་འགགས་པར་ངོས་བཟུང་བས། ཀ་དག་ཐུགས་རྗེའི་རིག་པ་ཟིན་ནས་གྲོལ་བ་ཐོབ་པའི་གནད་ཡོད་དོ། །དེ་དག་ནི་ངོ་བོ་རང་བཞིན་ཐུགས་རྗེའི་གནད་ཀྱི་ཆིངས་གལ་ཆེན་གསུམ་ཡིན་ནོ། །གཉིས་པ་དུས་གསུམ་གནད་ཀྱི་མན་ངག་གིས་དམིགས་སུ་གདབ་པ་ནི། གནད་གསུམ་ལ་བརྟེན་པ་ཡིན། འཇུག་པ་ཤེས་པའི་གནད། གྲོལ་བ་རང་ངོའི་གནད། མཐར་ཕྱིན་པ་ངོ་ཤེས་པའི་གནད་དོ། །དང་པོ་ནི། རིག་པ་ཕར་འོད་གསལ་གྱི་སྣང་བ་ལ་འཇུག་དུས་རང་སྣང་ཡིན་པ་ངོ་ཤེས་པ་དང་། འོད་སྣང་ཚུར་རིག་པ་ལ་འཇུག་དུས་ཀ་དག་གི་རང་ས་ཟིན་པའི་ངང་དེའི་ཐོག་ནས་མི་གཡོ་བ་ཤེས་པར་བྱའོ། །གཉིས་པ་ནི། ཕུང་པོ་བདག་འཛིན་དེངས་ནས་ལུས་འོད་གསལ་དུ་གྲོལ་བས་ཆོས་ཉིད་རང་ངོ་ལ་གནས། འབྱུང་བ་ཕྲ་རགས་ཀྱི་རྡོས་པ་ལས་གྲོལ་བས་སྣང་བ་འོད་གསལ་བདེ་ཆེན་དུ་ཤར། ཉོན་མོངས་པ་ཕྲ་རགས་ལས་གྲོལ་བས་རིག་པ་མ་ལ་བུའི་ཐིམ་དུ་གནས་པའོ། །དེའང་ཕྱིའི་འཁྲུལ་པ་དག་པས་རིག་པ་ཆོས་ཉིད་མ་དང་ཕྲད། ཤེས་པ་དང་སྣང་བའི་རྐྱེན་སྣ་ཚོགས་ཡུལ་དུ་སྣང་བའི་དངོས་པོ་ཕྲ་རགས་ལས་གྲོལ་བས་མ་བུ་གཉིས་མེད་དུ་གྲོལ་བས་ཕྱིའི་ཆོས་ཡུལ་དང་ཡུལ་ཅན་དང་། ནང་གི་ཆོས་རྣམ་རྟོག་དང་ཐ་དད་དུ་འཛིན་པ་དང་། གསང་བའི་ཆོས་རིག་པ་ཉིད་ལ་འཛིན་པ་ཙམ་ཡང་མེད་པའི་རང་ངོ་ཤེས་པར་བྱེད་པའོ། །གསུམ་པ་མཐར་ཕྱིན་པ་ངོ་ཤེས་པའི་གནད་ནི། རིག་པ་ལྷུན་གྲུབ་རིན་པོ་ཆེའི་རང་ཡུལ་དུ་ཕྱིན་ནས། འཁོར་འདས་དང་རྟག་ཆད་ཡོད་མེད་ལ་སོགས་པ་གང་དུ་ཡང་མ་གྲུབ་པས་ཀ་དག་ལྷུན་གྲུབ་དབྱེར་མེད་འཁོར་འདས་གཞི་གྲོལ་གྱི་ས་ལ་ཐོན་པ་ནི། ལྷུན་གྲུབ་ཐིམ་ཚུལ་གྱི་དུས་དེར་ངོ་ཤེས་པར་བྱ་དགོས་སོ། །དེ་ནས་ངོ་མ་ཤེས་ན་སླར་ཡང་། ལ་ལ་ནི་རྣམ་པ་ལས་འཁྲུལ། ལ་ལ་ནི་ཉམས་ལས་འཁྲུལ། ལ་ལ་ནི་དེ་མ་ཐག་པ་ལས་འཁྲུལ་ཏེ། ཁམས་གསུམ་འཁོར་བ་གཞི་ནས་འབྱུང་བའོ།།

༼ང སྲིད་པ་བར་དོ་ལ་ལས་ཀྱི་འཕྲོ་མཐུད་པ་ཡུར་བ་རྐང་ཆག་པ་ལ་ཝ་འཛུགས་པ་ལྟ་བུའི་གདམས་ངག་བསྟན་པ།

ཀ༽ རང་བཞིན་སྤྲུལ་སྐུའི་ཞིང་དུ་དབུགས་འབྱིན་ཚུལ་བསྟན་པ།

དོན་བཞི་པ་སྲིད་པ་བར་དོ་ལ་ལས་ཀྱི་འཕྲོ་མཐུད་པ་ཡུར་བ་རྐང་ཆག་པ་ལ་ཝ་འཛུགས་པ་ལྟ་བུའི་གདམས་ངག་ལ་གཉིས་ཏེ། རང་བཞིན་སྤྲུལ་སྐུའི་ཞིང་དུ་དབུགས་འབྱིན་ཚུལ་དང་། སྲིད་པ་བར་དོ་དངོས་རྒྱས་པར་བཤད་པའོ། །དང་པོ་ནི། རྫོགས་པ་ཆེན་པོ་གསང་བ་སྙིང་ཏིག་འདིའི་དབང་པོ་ཉི་ཤུ་རྩ་གཅིག་གི་ཐ་མའི་ཐ་མ་དེ་སྲིད་པའི་བར་དོ་རྨི་ལམ་དང་འདྲ་བ་ལས་ལམ་བྱུང་ནས་ཆོས་ཉིད་བདེན་པའི་བྱིན་རླབས་ཀྱིས་རང་བཞིན་སྤྲུལ་སྐུའི་ཞིང་དུ་རྫུས་ཏེ་སྐྱེས་ནས་བར་དོ་མེད་པར་འཚང་རྒྱ་བ་སྟེ། རང་ཤར་ལས། བདེན་པ་མཐོང་བའི་སེམས་ཅན་ནི། །རྟོགས་པ་རྒྱུད་ལ་མ་སྐྱེས་ཀྱང༌། །ཕྱོགས་བཅུ་སྤྲུལ་པའི་ཞིང་ཁམས་སུ། །གནས་ནས་མཐར་ཕྱིན་གྲོལ་བར་འགྱུར། །ཞེས་པ་དང༌། ཡང་དེ་ལས། དབང་པོ་ཐ་མའི་ཐ་མ་ནི་ཞག་ཉི་ཤུ་གནས་ནས་དེ་ནས་ཡང་ལྷུན་གྲུབ་ཀྱི་སྣང་བར་ལམ་བྱུང་ནས་མ་དག་པ་འཁོར་བའི་སྒོར་ལམ་བྱུང་སྟེ་ཕྱོགས་བཅུ་སྤྲུལ་པ་སྐུའི་ཞིང་ཁམས་སུ་གནས་ནས་བར་དོ་མེད་པར་ཡང་དག་པར་འཚང་རྒྱའོ་ཞེས་པ་དང༌། ཉི་ཟླ་ཁ་སྦྱོར་ལས། འདི་མཐོང་དབང་པོ་ཐ་མ་ལ། །བར་མ་དོ་ཉིད་སྣང་འགྱུར་རམ། །འོན་ཏེ་མི་སྣང་བའམ་ཅི། །སྟོན་པས་གསུངས་པ་དེ་སྣང་དེ། །རང་གར་འཛིན་པའི་བག་ཆགས་ཟད། །རང་བཞིན་སྤྲུལ་པར་དབུགས་ཕྱུང་སྟེ། །བར་དོ་མེད་པར་སངས་རྒྱས་ཉིད། །ཅེས་སོ། །དབང་པོ་རབ་བདུན་དང་། འབྲིང་བདུན་གྱིས་བདུན་གཉིས་བཅུ་བཞི་དེའི་ཐོག་ཏུ་ཐ་མའི་དྲུག་གིས་དབང་པོའི་དབྱེ་བ་ཉི་ཤུ་ཐམ་པ་ཡིན། མྱུར་བུལ་གྱི་ཁྱད་ལ་མ་ལྟོས་པར་གྲོལ་བར་ཐོབ་པ་ཡིན་པས། ཐ་མའི་ཐ་མ་དབང་པོ་རྟུལ་པོ་དེ་ཉི་ཤུ་རྩ་གཅིག་པ་ཡིན་ཡང་། རྫོགས་པ་ཆེན་པོའི་གསང་བ་སྙིང་ཐིག་གི་ལམ་ལ་ཞུགས་པའི་གང་ཟག་དེས་སྲིད་པ་བར་དོ་རྨི་ལམ་གྱི་སྣང་བ་འདྲ་བ་ལ་ལམ་བརྒྱུད་ཙམ་ཞིག་གིས་ཆོས་ཉིད་བདེན་པའི་བྱིན་རླབས་ཀྱིས་རང་བཞིན་སྤྲུལ་སྐུའི་ཞིང་དུ་དབུགས་འབྱིན་ཐུབ་ཅེས་པའོ། །ཞིང་དེ་དག་གི་རང་བཞིན་ལོངས་སྐུའི་རྣམ་པ་འདྲར་རུང་དུ་སྣང་སྟེ། ཕྱོགས་བཞི་ཞི་བས་བསྐོར་བའི་དབུས་སྟེང་གི་ཆར་རང་རང་གི་མདུན་ནས་བལྟས་པ་ན་ཁྲོ་བོའི་ཞིང་ཡོད་པ་ནི་སྟོན་པ་ཀུན་ཏུ་བཟང་པོ་རྡོ་རྗེ་འཆང་གི་བྱིན་རླབས་ལས་རང་ཤར་བའོ། །འདི་ནས་མར་མི་གོ་བ་ཞིག་མེད་པར་ལྟར་སྣང་ཡང་། དོན་གྱི་ཐོག་ནས་ཞིང་དག་པའི་ཡོན་ཏན་སངས་རྒྱས་ཀྱི་ལྗགས་ཀྱིས་ཀྱང་བརྗོད་པར་དཀའ་བ་ཡིན་ན་སོ་སོའི་སྐྱེ་བོས་དེ་བས་ཀྱང་བརྗོད་པ་ག་ལ་ནུས། ངག་གི་བརྗོད་པ་ལས་འདས་པ་ཞིག་ཡིན་པས་ཚིག་དང་ཡི་གེས་ཀྱང་མཚོན་ཐབས་མེད་ཀྱང་། གདུལ་བྱའི་སྐྱེ་བོས་བློ་ཁར་ཕྱོགས་པའི་མོས་པ་དང་འཚམས་པར་གསུངས་པ་ཡིན་པས་མར་འདོན་སོང་ན་ཆོག་འདུག དེ་ཡང་རང་ཤར་ལས། འདི་ནས་ཤར་ཕྱོགས་ཀྱི་འཇིག་རྟེན་གྱི་ཁམས་ན་ཞིང་ཁམས་མངོན་པར་དགའ་བ་ཞེས་བྱ་བ་ཡོད་དེ། སྤྲུལ་པ་སྐུའི་ཞིང་ཁམས་དེ་ན་སྤྲུལ་པའི་སྐུ་རྡོ་རྗེ་སེམས་དཔའ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་དམ་པ་ཐོབ་པའི་གནས་དེ་ན་གཞལ་ཡས་ཁང་གི་ཡོན་ཏན་དཔག་ཏུ་མེད་པ་ཡོད་དེ། དེ་ཡང་འདི་ལྟ་སྟེ། རིན་པོ་ཆེ་ཤེལ་ལས་གྲུབ་པའི་ཁང་བ་སྒོ་བཞི་དང་ལྡན་པ། རིན་པོ་ཆེ་སྣ་ལྔའི་རྟ་བབས་དང་ལྡན་པ། ས་གཞི་ཐམས་ཅད་ཀྱང་རིན་པོ་ཆེ་ཤེལ་ལས་གྲུབ་པ། ཤིན་ཏུ་ཡིད་དུ་འོང་བ་བལྟ་ན་སྡུག་པ། ཐེམ་སྐས་དང་དཀར་ཁུང་དང་ལྡན་པ། ཕྱོགས་བཞི་ན་གསེང་དཀར་ཆེན་པོ་བཞི་ཡོད་པ། གསེང་དཀར་ནས་ཉི་མ་ཤར་བས་རིན་པོ་ཆེ་ཤེལ་ལས་གྲུབ་པའི་ཁང་པ་ལ་ཕོག་ནས་ནང་དུ་ཉིན་མོ་འོད་ལྔའི་སྣང་བ་ལྷུག་པར་འཆར་བ། གཞལ་ཡས་ཁང་དེའི་ཕྱི་རོལ་ན་ཡན་ལག་བརྒྱད་དང་ལྡན་པའི་ཆུའི་འོབས་ཡོད་པ། ཆུ་དེ་ལ་ནད་ཀྱིས་བཏབ་པ་རྣམས་ཀྱིས་འཐུངས་ན་ནད་འཚོ་བར་འགྱུར་ལ། དེའི་ཕྱི་རོལ་ན་མཚེའུ་བརྒྱད་ཡོད་དེ། དེ་རྣམས་ཀྱི་ནང་ན་ཡང་བྱ་སྐད་སྙན་པ་སྣ་ཚོགས་ཏེ། དེ་ཡང་འདི་ལྟ་སྟེ། བྱའི་རྒྱལ་པོ་ངང་བ་གསེར་ལྡན་དང་མཐིང་རིལ་དང༌། བྱ་ཀ་ཏི་དང༌། རྨ་བྱ་དང༌། ནེ་ཙོ་མི་སྐད་ཤེས་པ་དང༌། ཁུ་བྱུག་དང༌། ཤང་ཤང་ཏེའུ་དང༌། རི་སྐེགས་དང༌། དེ་ལ་སོགས་ཏེ་སྐད་སྙན་པའི་བྱ་རིགས་སྟོང་ཕྲག་བརྒྱད་ཅུ་དང༌། ཡིད་དུ་འོང་བའི་བྱ་རིགས་འདི་ལྟ་སྟེ། ཀང་ཀ་རི་དང༌། ཟེར་མོ་དང༌། སྤབས་དང༌། ལྷའི་བྱ་དྲིལ་བུའི་སྐད་ཅན་དང༌། བྱ་ཀྲི་ཏི་པ་གསེར་གྱི་རྡོ་རྗེའི་གཟུགས་ལ་སོགས་ཏེ། གཡུའི་མདོག་ལྟར་སྔོ་བ་དང༌། དུང་གི་མདོག་ལྟར་དཀར་བ་དང༌། བྱི་རུའི་མདོག་ལྟར་དམར་བ་དང༌། ཨིནྡྲ་ནཱི་ལ་ལྟར་ལྗང་བ་ལ་སོགས་ཏེ་ཡིད་དུ་འོང་བ་དང་སྐད་སྙན་པ་བསམ་གྱིས་མི་ཁྱབ་པ་ཡོད་དོ། །དེའི་ཕྱི་རིམ་ན་རིན་པོ་ཆེ་སྣ་བདུན་གྱི་ལྕགས་རི་ཡོད་དོ། །དེ་རྣམས་ཀྱི་དབུས་ན་རིན་པོ་ཆེ་སྣ་བདུན་ལས་བྱས་པའི་ཁྲི་ཆོས་བཤད་པའི་སྟན་དང་ལྡན་པ་ཡོད་དོ། །དེར་སྤྲུལ་པའི་སྐུ་རྡོ་རྗེ་སེམས་དཔའ་ཞེས་བྱ་བ་དེས་སྲོད་ལ་འཁོར་རྣམས་ལ་རྒྱུའི་ཆོས་འཆད་དོ། །ནམ་ཕྱེད་ན་སྔགས་ཕྱིའི་ཆོས་འཆད་དོ། །ཐོ་རངས་གསང་སྔགས་ནང་གི་ཆོས་འཆད་དོ། །ཉི་མ་ཕྱེད་ན་རྫོགས་པ་ཆེན་པོ་འབྲས་བུ་བླ་ན་མེད་པའི་ཆོས་འཆད་དོ། །དེ་ལྟར་ཞག་རེ་རེ་ལ་ཆོས་ཐུན་བཞི་བཞི་འབྱུང་ངོ༌། །དེ་ན་གནས་པའི་བྱང་ཆུབ་སེམས་དཔའ་དེ་དག་ཀྱང་སྐྱེ་བ་གཅིག་གིས་ཐོགས་པ་ཤ་སྟག་གོ །ལོ་ཡང་ལྔ་བརྒྱ་ལྔ་བཅུ་ཐུབ་བོ། །ཞིང་ཁམས་དེ་ན་ཟས་དང་སྐོམ་ཡང་ཡིད་ལ་དྲན་པ་ཙམ་གྱིས་ཚིམ་པ་ཡོད་དོ། །དེ་ན་ནད་མེད་ལ་འབྱུང་སྲིད་ནའང་ཆུ་ཡན་ལག་བརྒྱད་དང་ལྡན་པ་དེ་འཐུངས་པས་ནད་སེལ་ལོ། །མེ་ཏོག་སྣ་ཚོགས་ཀྱིས་སྤྲུལ་པའི་སྐུ་དེ་ལ་མཆོད་པ་ཆེར་བྱེད་པ་ཤ་སྟག་གོ །གཞལ་ཡས་ཁང་དེའི་ཟུར་བཞི་ན་མུ་ཏིག་ལས་གྲུབ་པའི་མཆོད་རྟེན་བཞི་ཡོད་དེ། དེ་བཞིའི་བར་དྲིལ་བུ་གཡེར་ཁ་དྲྭ་བའི་ཐག་པས་སྦྲེལ་ནས་ཡོད་དེ་ཐག་པ་དེ་རླུང་གིས་བསྐྱོད་པ་ན་དྲིལ་བུའི་སྒྲ་ཡིད་དུ་འོང་བ་སྣ་ཚོགས་འབྱུང་ངོ༌། །ཕྱོགས་བཞི་ན་དར་སྣ་ཚོགས་ཀྱི་བ་དན་བཞི་ཡོད་དེ་རླུང་གིས་བསྐྱོད་པ་ལས་དྲི་ཞིམ་པ་སྣ་ཚོགས་འབྱུང་ངོ༌། །གཞལ་ཡས་ཁང་དེ་ན་ཡོན་ཏན་དཔག་ཏུ་མེད་པ་དེ་ལྟ་བུ་ཡོད་དོ། །གཞལ་ཡས་ཁང་དེ་ནི་འདི་ནས་ཤར་ཕྱོགས་ན་དཔག་ཚད་ལྔ་བརྒྱ་འདས་པའི་སྟེང་ན་ཡོད་དོ། །དེར་སྐྱེས་པའི་བྱང་ཆུབ་སེམས་དཔའ་དེ་དག་ཀྱང་སུམ་ཅུ་རྩ་གསུམ་གྱི་ལྷ་དང་ལོངས་སྤྱོད་མཉམ་མོ། །ཤར་ཕྱོགས་ཀྱི་སྤྲུལ་པའི་སྐུའི་ཞིང་ཁམས་དེ་ན་དེ་བཞིན་དུ་ཡོད་དོ། །འདི་ནས་ལྷོ་ཕྱོགས་ན་དཔལ་དང་ལྡན་པའི་ཞིང་ཁམས་སྤྲུལ་པ་སྐུའི་གནས་དེ་ན་ཡང་རིན་པོ་ཆེ་གསེར་ལས་གྲུབ་པའི་ཁང་པ་གྲུ་བཞི་པ་བ་གམ་དང་བཅས་པ། སྒོ་བཞི་རྟ་བབས་དང་བཅས་པ། ཟུར་བཞིར་མཆོད་རྟེན་དང་བཅས་པ། ལོགས་བཞིར་བ་དན་དང་བཅས་པ། ཕྱོགས་བཞིར་གསེང་དཀར་དང་བཅས་པ། མཚོ་བདུན་བྱ་དང་བཅས་པ། ཡན་ལག་བརྒྱད་དང་ལྡན་པའི་ཆུ་ལྕགས་རི་དང་བཅས་པ། ཁྲི་དང་ཆོས་ཀྱང་གོང་གི་ལྟར་བཤད་དོ། །བྱང་ཆུབ་སེམས་དཔའ་དེ་དག་ཀྱང་སྐྱེ་བ་གཅིག་གིས་ཐོགས་པ་ཤ་སྟག་གོ །སྤྲུལ་པའི་སྐུ་རིན་པོ་ཆེ་འབྱུང་ལྡན་གྱི་ཞིང་ཁམས་དེ་ན་ཡོན་ཏན་དེ་ལྟ་བུ་ཡོད་དོ། །འདི་ནས་ནུབ་ཕྱོགས་ན་པདྨ་བརྩེགས་པའི་ཞིང་ཁམས་ནའང་སྤྲུལ་པ་སྐུའི་ཞིང་ཁམས་དེ་ན་སྤྲུལ་པའི་སྐུ་སྣང་བ་མཐའ་ཡས་ཞེས་བྱ་བ་ཡོད་དེ། དེ་ནའང་གོང་གི་ཡོན་ཏན་དང་མཉམ་པ་ཡོད་དོ། །འདི་ནས་བྱང་ཕྱོགས་ཀྱི་འཇིག་རྟེན་གྱི་ཁམས་ན་རིན་པོ་ཆེ་རྣམ་པར་བཀོད་པ་ཞེས་བྱ་བ་ཡོད་དེ། དེ་ན་སྤྲུལ་པའི་སྐུ་དོན་ཡོད་གྲུབ་པ་ཞེས་བྱ་བའི་ཞིང་ཁམས་དེ་ན། གཞལ་ཡས་ཁང་གི་ཡོན་ཏན་འདི་ལྟ་བུ་ཡོད་དེ། རིན་པོ་ཆེ་ཨིནྡྲ་ནཱི་ལ་ལས་གྲུབ་པའི་ཁང་པ་གྲུ་བཞི་དང་ལྡན་པ་ཡོད་དེ། དེ་ཡང་ཕྱོགས་བཞི་ན་གསེང་དཀར་ཆེན་པོ་བཞི་ཡོད་དེ། དེ་ནས་ཉི་མ་ཤར་བས་འོད་ལྗང་གུས་ནང་ཁེངས་ནས་ཡོད་དོ། །ས་གཞི་ཐམས་ཅད་ཀྱང་ཨིནྡྲ་ནཱི་ལ་ལས་གྲུབ་པ་ཡོད་དོ། །དེའི་ཕྱི་རིམ་ན་ཆུ་ཡན་ལག་བརྒྱད་དང་ལྡན་པ་རེག་ན་བདེ་བ། འཐུངས་ན་ནད་ཐམས་ཅད་སེལ་བ་ཡོད་དོ། །དེའི་ཕྱི་རིམ་ན་མཚེའུ་བདུན་ཡོད་པ། དེའི་ནང་ན་བྱ་སྐད་སྙན་པ་རྣམ་པ་སྣ་ཚོགས་པ་གནས་ཏེ། དེ་ཡང་འདི་ལྟ་སྟེ་བྱའི་རྒྱལ་པོ་ངང་པ་གསེར་ལྡན་དང༌། མཐིང་རིལ་དང༌། བྱ་ཀ་ཏ་རི་དང༌། རྨ་བྱ་དང༌། ནེ་ཙོ་མི་སྐད་ཤེས་པ་དང༌། ཁུ་བྱུག་དང༌། ཤང་ཤང་ཏེའུ་དང༌། རི་སྐེགས་དང༌། དེ་ལ་སོགས་ཏེ་སྐད་སྙན་པའི་བྱ་རིགས་སྟོང་ཕྲག་བརྒྱད་ཅུ་དང༌། གཞན་ཡང་ཡིད་དུ་འོང་བའི་བྱ་རིགས་འདི་ལྟ་སྟེ། ཀང་ཀ་རི་དང༌། ཟེར་མོ་དང༌། སྤབས་དང༌། ལྷའི་བྱ་དྲིལ་བུའི་སྐད་ཅན་དང༌། བྱ་ཀྲི་ཏི་པ་གསེར་གྱི་རྡོ་རྗེའི་གཟུགས་དང༌། དེ་ལ་སོགས་ཏེ་གཡུའི་མདོག་ལྟར་སྔོ་བ་དང༌། དུང་གི་མདོག་ལྟར་དཀར་བ་དང༌། བྱེ་རུའི་མདོག་ལྟར་དམར་བ་དང༌། ཨིནྡྲ་ནཱི་ལའི་མདོག་ལྟར་ལྗང་བ་དང༌། དེ་དག་ལ་སོགས་ཏེ་ཡིད་དུ་འོང་བ་དང་སྐད་སྙན་པ་བསམ་གྱིས་མི་ཁྱབ་པ་ཡོད་དོ། །དེའི་ཕྱི་རོལ་ན་རིན་པོ་ཆེ་སྣ་བདུན་གྱི་ལྕགས་རི་ཡོད་དོ། །དེ་རྣམས་ཀྱི་དབུས་ན་རིན་པོ་ཆེ་མརྒད་ལས་གྲུབ་པའི་ཁྲི་ཆོས་བཤད་པའི་སྟན་དང་བཅས་པ་ཡོད་དོ། །དེར་སྤྲུལ་པའི་སྐུ་དོན་ཡོད་གྲུབ་པ་ཞེས་བྱ་བ་དེས་སྲོད་ལ་གདམས་ངག་གི་ཆོས་སྟོན་ཏོ། །ནམ་ཕྱེད་ན་དབང་གི་ཆོས་སྟོན་ཏོ། །ཐོ་རངས་སྤྱོད་པའི་ཆོས་སྟོན་ཏོ། །ཉི་མ་ཕྱེད་ན་ལྟ་སྒོམ་གྱི་ཆོས་སྟོན་ཏོ། །དེར་ཞག་རེ་ལ་ཆོས་ཐུན་བཞི་བཞིས་འཁོར་རྣམས་ཀྱི་རྒྱུད་འགྲོལ་ལོ། །དེ་ན་གནས་པའི་བྱང་ཆུབ་སེམས་དཔའ་རྣམས་ཀྱང་སྐྱེ་བ་གཅིག་གིས་ཐོགས་པ་ཤ་སྟག་གོ །ལོ་ཡང་སྟོང་སྟོང་ཐུབ་བོ། །ཞིང་ཁམས་དེ་ན་ཟས་དང་སྐོམ་ཡིད་ལ་དྲན་པ་ཙམ་གྱིས་ཚིམ་པ་ཡོད་དོ། །དེ་ན་བད་ཀན་ལས་གྱུར་པ་དང༌། རླུང་ལས་གྱུར་པ་དང༌། མཁྲིས་པ་ལས་གྱུར་པ་དང༌། འདུས་པ་ལས་གྱུར་པའི་ནད་མེད་དོ། །མེ་ཏོག་སྣ་ཚོགས་ཀྱིས་སྤྲུལ་པའི་སྐུ་དེ་ལ་མཆོད་པ་རྒྱ་ཆེར་བྱེད་པ་ཤ་སྟག་གོ །བྱང་ཆུབ་སེམས་དཔའ་དེ་དག་ཀྱང་ཁ་དོག་ལྗང་གུ་ཤ་སྟག་གོ །རྟ་དང་བཞོན་པ་ཡང་ལྗང་གུ་ཤ་སྟག་གོ །ཁྱེའུ་དང་བུ་མོའི་གཟུགས་སུ་སྣང་བ་ཤ་སྟག་གོ །ཀུན་ཀྱང་འདོད་པ་དང་བྲལ་ཞིང་དགའ་བ་ཤ་སྟག་གོ །ཀུན་ཀྱང་རྣམ་རྟོག་མེད་པ་ཤ་སྟག་གོ །ཞིང་ཁམས་དེ་ན་སེམས་ཅན་རྣམ་པ་གསུམ་མེད་དོ། །ཡིད་དྲུག་མེད་དོ། །ཉོན་མོངས་པ་དྲུག་མེད་དོ། །མ་རིག་པའི་རྐྱེན་བཞི་དང་བཅས་པ་མེད་དོ། །མ་རིག་པ་དང་མཚུངས་པར་ལྡན་པའི་ཡིད་མེད་དོ། །ཀུན་ཀྱང་རྣམ་རྟོག་དང་བྲལ་བ་ཤ་སྟག་གོ །གཞལ་ཡས་ཁང་གི་འཁོར་གྱི་ཡོན་ཏན་ནོ། །གཞལ་ཡས་ཁང་དེའི་ཟུར་བཞི་ན་རིན་པོ་ཆེ་ཤེལ་གྱི་མཆོད་རྟེན་ཁྲི་འཕང་དགུ་པ་བཞི་ཡོད་དོ། །དེའི་བར་རྣམས་གསེར་གྱི་དྲིལ་བུ་གཡེར་ཁ་དྲྭ་བའི་ཐག་པས་སྦྲེལ་ནས་ཡོད་དོ། །དེ་རླུང་གིས་བསྐྱོད་པ་ལས་དྲིལ་བུའི་སྒྲ་སྙན་པ་སྣ་ཚོགས་པ་འབྱུང་ངོ༌། །མཆོད་རྟེན་བཞི་ལ་ཉི་མ་ཕོག་པས་འོད་ལྔའི་ཞགས་པས་འབྲེལ་ནས་ཡོད་དོ། །ཕྱོགས་བཞི་ན་རྨ་བྱའི་བ་དན་བཞི་ཡོད་དེ་དེ་རླུང་གིས་བསྐྱོད་པས་ཡིད་དུ་འོང་བ་དང་མཛེས་པ་སྣ་ཚོགས་འབྱུང་ངོ༌། །ཡོན་ཏན་དཔག་ཏུ་མེད་པ་དེ་ལྟ་བུ་ཡོད་དོ། །གཞལ་ཡས་ཁང་དེ་ནི་འདི་ནས་བྱང་ཕྱོགས་ན་དཔག་ཚད་ལྔ་བརྒྱའི་སྟེང་ན་ཡོད་དོ། དེར་སྐྱེས་པའི་བྱང་ཆུབ་སེམས་དཔའ་དེ་དག་ཀྱང་གཟུགས་ཁམས་ཀྱི་ལྷ་དང་ལོངས་སྤྱོད་མཉམ་མོ། །བྱང་ཕྱོགས་ཀྱི་སྤྲུལ་པའི་ཞིང་ཁམས་དེ་ན་དེ་བཞིན་དུ་ཡོད་དོ། །ཞིང་ཁམས་དེ་དག་གི་མདུན་གྱི་བར་སྣང་ལ་སྤྲུལ་པའི་སྐུ་ཁྲོ་བོའི་ཞིང་ཁམས་ཡོད་དེ། དུར་ཁྲོད་ཆེན་པོ་མེ་རི་འབར་བ་ཞེས་བྱ་བ་ཡོད་དེ། དེ་ཡང་གཞལ་ཡས་ཁང་འདི་ལྟ་བུ་ཡོད་དོ། །ཐོད་པའི་ཁང་པ་གྲུ་བཞི་དང་ལྡན་པ་ཡོད་དེ། དེ་ཡང་འདི་ལྟ་སྟེ། ཐོད་པ་སྐམ་པོས་གྲམ་བུ་བྱས་པ། ཤར་རི་ཡོད་པས་རྩིག་པ་བྱས་པ། བྷནྡྷ་ལྕང་ལོ་ཅན་གྱིས་ཁ་བད་བྱས་པ། རྒྱ་དང་དཔངས་དཔག་ཏུ་མེད་པ། གནམ་ལྕགས་ཀྱི་གཟེར་བཏབ་པ། རཀྟའི་ཞམ་ཆུ་འབབ་པ། ཉི་ཟླའི་ཀ་གདན་བྱས་པ། ཆུ་སྲིན་ཁ་ཡིས་ཀ་གཞུ་བྱས་པ། ལྷ་ཆེན་པོ་བརྒྱད་གདུང་དུ་བྲེས་པ། མཆོག་ཆེན་པོའི་གྲལ་མ་བཏང་བ་ཡོད་དོ། །ཉིན་མོ་རླུང་འཚུབ་པ། མཚན་མོ་མེ་འབར་བ། གཞལ་ཡས་ཁང་དེའི་ཟུར་བཞི་ན་ཞིང་ཆེན་གྱི་གདུགས་ཕུབ་པ། ལྷ་མོ་ལྔ་གར་བྱེད་པ། ས་གཞི་ཐམས་ཅད་ཀྱང་རཀྟའི་རྦ་ཀློང་འཁྲུག་པའོ། །གཞལ་ཡས་ཁང་དེའི་ནང་ན་བཅོམ་ལྡན་འདས་གཞོན་དུ་དཔའ་བོ་སྟོབས་ལྡན་ཞེས་བྱ་བ་ཐུགས་ཞི་བ་ལས་མ་གཡོས་ཀྱང་སྐུ་ཁྲོ་བོའི་ཆ་བྱད་དུ་བསྟན་པ། མཁའ་འགྲོ་མ་དང་ཁྲོ་བོའི་ཚོགས་དཔག་ཏུ་མེད་པས་བསྐོར་ནས་ཡོད་དོ། །དེ་ཡང་འདི་ལྟ་སྟེ། མཁའ་འགྲོ་མ་པུརྣ་ཉེ་བར་ཞི་བ་དང༌། ཚངས་པ་དུང་མགྲིན་ཅན་དང༌། དྲང་སྲོང་ཟླ་འོད་གཞོན་ནུ་དང༌། ཡང་འཁོར་གྱི་མཁའ་འགྲོ་མ་ཨེ་ཀ་ཛ་ཊཱི་སྤུན་དྲུག་དང༌། དེའི་བྲན་མོ་བཅུ་བཞི་དང༌། གཡོག་མོ་ལྔ་བཅུ་རྩ་བརྒྱད་དང༌། ཡང་གཡོག་འབུམ་ཁྲི་དྲུག་སྟོང་ལ་སོགས་ཏེ་མཁའ་འགྲོ་མའི་འཁོར་དཔག་ཏུ་མེད་པས་བསྐོར་བའོ། །བཅོམ་ལྡན་འདས་དེའི་ཐུགས་ལས་སྤྲུལ་པའི་འཁོར་ཕྱག་ན་རྡོ་རྗེ་ལ་སོགས་ཏེ་ཁྲོ་བོའི་འཁོར་བསམ་གྱིས་མི་ཁྱབ་པས་བསྐོར་བ། དགའ་རབ་རྡོ་རྗེ་ལ་སོགས་ཏེ་མིའི་འཁོར་དཔག་ཏུ་མེད་པས་བསྐོར་བའོ། །འཁོར་རྣམས་ལ་འབྲས་བུ་གསང་སྔགས་བླ་ན་མེད་པའི་ཆོས་འདི་ཉིད་ཀྱིས་ཞི་བ་སྤྲུལ་པ་སྐུའི་བྱང་ཆུབ་སེམས་དཔའ་རྣམས་གྲོལ་བར་བྱེད་པ། ཐམས་ཅད་ཀྱང་ཁྲོ་བོའི་གཉེར་མ་དང་ལྡན་པ་ཤ་སྟག་གོ །དེ་ལ་སོགས་ཏེ་ཐུན་མོང་དང་ཁྱད་པར་གྱི་འཁོར་དཔག་ཏུ་མེད་པས་བསྐོར་བ། ཆོས་ཀྱི་གླུ་དང་ཆོས་ཀྱི་གར་སྣ་ཚོགས་པ་དང་ཆོས་ཀྱི་སྒྲ་སྣ་ཚོགས་པ་སྒྲོག་པ་ཤ་སྟག་གོ་ཞེས་སོ། །དེ་ཡང་ཁ་ཅིག་གི་བཞེད་ཀྱིས་ཐ་མའི་གང་ཟག་དེ་ཞིང་ལྔ་པོ་ཐམས་ཅད་ཉུལ་བར་འདོད་དེ། སྐྱེ་བའང་སྐད་ཅིག་མ་ལ་བརྫུས་ཏེ་སྐྱེའོ་ཞེས་པའང་འདིའི་དགོངས་པར་མི་སྣང་སྟེ། ཞིང་དེ་དག་ན་སྐྱེ་བ་གཅིག་གི་ཐོགས་པ་ཤ་སྟག་ཅེས་བཤད་པ་དང་ཡང་འགལ་ལ། ལོ་ཡང་ལྔ་བརྒྱ་ན་གྲོལ་བར་བཤད་དེ། ཨ་ཏི་བཀོད་པ་ཆེན་པོ་ལས། ལྔ་བརྒྱ་དག་ན་ངེས་པའི་སར་གྲོལ་ལོ། །ཞེས་པས་ཞིང་སོ་སོ་ཐམས་ཅད་དུ་སྐྱེ་ན་ལོ་དེ་བས་ལྷག་པ་དགོས་པའི་ཕྱིར་རོ། །དེས་ན་བཤད་འགྲེལ་ཆེན་མོ་ལས་གསུངས་པ་ལྟར། ཞིང་གང་དུ་སྐྱེས་པ་དེར་རྒྱུད་སྨིན་ནས་མདུན་གྱི་ནམ་མཁའ་མི་མཇེད་བརྩེགས་པ་ལ་ཁྲོ་བོའི་ཞིང་མཐོང་དུས་དེའི་བྱིན་རླབས་ཀྱིས་ཤེས་བྱའི་སྒྲིབ་པ་མཐའ་དག་སྦྱངས་ཏེ་ཀ་དག་གི་ས་ལ་མངོན་པར་བྱང་ཆུབ་པ་ཡིན་ནོ། །འདི་ཡང་འདིའི་གནད་ཆེ་བ་གཅིག་ཏུ་ཡོད་པས་ལེགས་པར་དབྱེ་བ་ཕྱེད་པ་གཅེས་སོ། །ལ་ལས་དབང་པོ་ཐ་མའི་གང་ཟག་དེས་རྣམ་གྲོལ་དབུགས་ཆེན་འབྱིན་པའི་ཞིང་ལྔ་བོར་སྐྱེ་བ་བླངས་ནས་ཉུལ་བ་བཤད་པ་ནི་མི་འཐད་པས། རང་ཉིད་གང་ལ་འདུན་ཞིང་མོས་པ་དང་ལས་འབྲེལ་ཡོད་པའི་ཞིང་དེར་སྐྱེས་ནས་སྒྲིབ་པ་མཐའ་དག་དེ་ནས་སྦྱངས་ཏེ་ཀ་དག་གི་ས་ལ་མངོན་པར་བྱང་ཆུབ་པ་ཡིན་ཞེས་པའོ།།

ཁ༽ སྲིད་པ་བར་དོ་དངོས་རྒྱས་པར་བཤད་པ།

གཉིས་པ་སྲིད་པའི་བར་དོ་དངོས་རྒྱས་པར་བཤད་པ་ལ་རྣམ་གྲངས་ངེས་པ་ཉི་ཤུ་སྟེ། འཁོར་ཚུལ། ངེས་ཚིག ཆ་བྱད༌། མངོན་ཤེས། རྫུ་འཕྲུལ། ཚེ་ཚད། ཁ་དོག མགོ་བོའི་ལྟ་ལུགས། ལས་བསོག་མི་བསོག ལས་ཀྱི་ལྟས། མིང་གི་རྣམ་གྲངས། ལུས་ཀྱི་ཚད། སྐྱེ་གནས། སྤྱོད་ལམ། འོད། ལས་འབྲེལ། ཕྱི་མའི་ལུས། ཉོན་མོངས་དང༌། ཁམས་གང་དུ་གཏོགས་པ། མངལ་དུ་ཚུད་པའི་ལྟས། དཔེས་ཉེ་བར་མཚོན་པའི་ཁྱད་པར་རོ། །དང་པོ་འཁོར་ཚུལ་གྱི་ཁྱད་པར་ནི། ཟོ་ཆུན་གྱི་འཁོར་ལོ་ལྟར་སྔ་མའི་ལུས་དང་སྣང་བ་སྤངས་ནས་སྲིད་པ་བར་དོར་འཇུག དེ་ནས་ཕྱི་མར་འཇུག ཡང་བར་དོར་འཇུག་པ་ལན་གྲངས་མེད་པར་འཕོ་སྟེ་སོ་སོའི་ཡིད་ཀྱི་ལུས་ཅན་རྨི་ལམ་ལྟར་བརྟེན་མི་ཐུབ་པ་ཐོགས་པ་མེད་པ་འབྱུང་བཞི་རགས་པ་དང་བྲལ་ཡང་ཡོད་པ་སྙམ་པ་ནི་ས་བོན་གྱི་ཆ་ཀུན་གཞི་ལ་ཡོད་པ་ལངས་པས་སྲིད་པའི་མིང་དང་འབྱུང་བའི་མིང་གཉིས་འཛིན་པའི་ལུས་ཅན་ནོ། །ཆོས་འདིའི་སྒོ་མ་མཐོང་བའམ་མཐོང་ཡང་ཡིད་མ་ཆེས་ཤིང་ཉམས་སུ་མ་ལོན་པ་རྣམས་ལ་ཆོས་ཉིད་བར་དོའི་འཆར་སྣང་ཡུན་ཐུང་བ་དང་། རང་སྣང་ཡིན་པ་ངོ་མ་ཤེས་ཏེ་སྲིད་པ་བར་དོ་ལ་ཡང་དང་ཡང་དུ་ཁ་འཁྱལ་ཏེ། ཤ་ཁྲག་རང་ག་མའི་གཟུགས་ཡོད་པ་མ་ཡིན་ཡང་སྔོན་ནས་ལུས་ལ་བདག་འཛིན་གོམས་པའི་བག་ཆགས་ཀྱིས་རྨི་ལམ་དང་འདྲ་བའི་དབང་པོ་ཀུན་ཚང་གི་ཤ་གཟུགས་ཤིག་ཡོད་སྣང་ཤར་བས། ཡིད་ཀྱི་སྲིད་པའི་མིང་དང་། འབྱུང་བཞིའི་ས་བོན་གྱི་ཆ་དེ་ལ་བརྟེན་ནས་ལུས་ལ་འཇུག་ཏུ་ཉེ་བས་སྒྱུ་མ་ལུས་ཀྱི་མིང་གཉིས་ཅན། ས་ཟིན་མེད་པས་ལས་ཀྱིས་ཀུན་ཏུ་བསྐྱོད་ཅིང་འཁོར་བའོ། །ངེས་ཚིག་ནི་ལས་དང་སྐྱེ་གནས་དང་བདེ་སྡུག་དུ་མ་སྲིད་པས་སྲིད་པ་སྐྱེ་བ་སྔ་མ་ནུབ་ཕྱི་མ་མ་བླངས་པའི་བར་ཡིན་པས་བར་དོ་ཞེས་བྱའོ། །སྔ་ཕྱིའི་བར་ཡིན་པས་ན་བར་དང་། དེ་གཉིས་ཟུང་དུ་སྦྲེལ་བའི་དོ་ཐག་ལྟ་བུ་ཡིན་པས་དོ་ཞེས་བྱའོ། །ཡར་མར་གྱི་ཟང་ཐལ་གཉིས་དང་འཕོ་བ་འབྱོངས་པ་རྣམས་ལས་གཞན་ལ་བར་དོ་འདི་བརྒྱུད་དགོས་སོ། །ལུས་ཀྱི་ཆ་བྱད་ཀྱི་ཁྱད་པར་ནི་བར་དོར་ཇི་ཙམ་གནས་པའི་ཕྱེད་སྔར་གྱི་ཆ་བྱད་དུ་འབྱུང་བ་ནི་བག་ཆགས་སྔ་མའི་སྟོབས་ནུབ་ཏུ་ཉེ་བ་ཡིན་ལ། ཕྱེད་ཕྱི་མ་གར་སྐྱེ་དེའི་ལུས་དང་གོས་ལ་སོགས་པར་འཆར་བ་ནི་བག་ཆགས་ཕྱི་མ་ལངས་སུ་ཉེ་བའི་མགོ་བརྩམས་པ་ལས་འབྱུང་བའོ། །སྣང་བ་དང་འདུ་ཤེས་ཀྱང་ཚེ་སྔ་ཕྱི་གང་དང་ཉེ་བའི་ལུས་སྣང་ཡོད་ན་དེ་ལྟར་དུ་ཡིན་ནོ། །མངོན་ཤེས་ཀྱི་ཁྱད་པར་ནི་ཟག་བཅས་ཀྱི་མངོན་ཤེས་ཀྱིས་སྟོང་གསུམ་གྱི་འཇིག་རྟེན་སྣོད་བཅུད་དུ་སྣང་བ་ཐམས་ཅད་དུས་གཅིག་ལ་དབང་པོའི་ཡུལ་དུ་མཐོང་བ་སྟེ། སྔར་མངོན་ཤེས་ཀྱི་སྒོ་མཐོང་བ་ལས་འབྱུང་བའོ། །སྤྱིར་ན་ཆོས་ཉིད་ཀྱི་ས་བོན་ཡོད་པ་དང་། དེའི་ཐོག་ཏུ་བར་སྲིད་པ་དེ་ཉིད་སྒྲིབ་བྱེད་ཀྱི་ལུས་རང་ག་བ་ཡོད་པ་མིན་པ་དང་། གོང་གི་ཆོས་ཉིད་ཀྱི་རང་གདངས་མཐོང་བ་དེ་དག་གི་བྱིན་རླབས་ཀྱི་སྟོབས་ཀྱིས་རྫུ་འཕྲུལ་དང་མངོན་ཤེས་ཕྲ་མོ་ཞིག་འཆར་བ་ཡིན་ནོ། །རྫུ་འཕྲུལ་གྱི་ཁྱད་པར་ནི་གང་དུ་བསམས་པ་དེར་སྐད་ཅིག་གིས་སླེབ་པ་ཡིད་མགྱོགས་ཀྱི་རྫུ་འཕྲུལ་ཡོད་པས་ནམ་མཁའ་ལ་འགྲོ་ཞིང་ཁབ་ཀྱི་མིག་དང༌། རྟ་རྔའི་ཉག་དང༌། སྐྲའི་ནང་དང༌། བྲག་དང༌། སྒོ་ང་ལ་སོགས་པའི་ནང་རགས་པ་དང་ཕྲ་བ་གང་དུ་ཤེས་པ་ཆུད་ཀྱང་དེར་ཚུད་ནས་མངལ་གནས་དང་རྡོ་རྗེ་གདན་མ་གཏོགས་པ་ཐམས་ཅད་ལ་ཟང་ཐལ་བའོ། །དེ་ཡང་གོང་དུ་ལོངས་སྐུའི་རྫུ་འཕྲུལ་མཐོང་བ་ལས་འབྱུང་བའོ། །འདི་དག་ཀྱང་རྨི་ལམ་ལྟར་སྐད་ཅིག་ལ་ཡལ་ནས་དེ་ནས་སྣང་བ་གཞན་འཆར་བས་རྟག་མི་ཐུབ་པའོ། །འུ་ཚོ་རྨི་ལམ་གྱི་ནང་ནས་འཕུར་ཆོག་པ་ལྟར་རྡོས་བཅས་ཀྱི་ལུས་མེད་ཅིང་དབང་པོ་གསལ་ཞིང་རྫོགས་པ་ཡོད་པའི་སྣང་བ་ཤར་བའི་སྟོབས་ཀྱིས་རྨི་ལམ་གྱི་སྣང་བ་དང་འདྲ་བར་ཐོགས་པ་མེད་པ་ཞིག་ཡིན་ནོ། །ཚེ་ཚད་ཀྱི་ཁྱད་པར་ནི། སྐྱེ་ཚུལ་ཉི་ཤུ་པོ་འདི་དག་ཞག་བདུན་ལ་སོགས་ཏེ། ཞག་བདུན་སོང་ནས་སྔར་གྱི་ཤི་བ་དྲན་པ་ལས། སྔར་ཤི་བའི་དུས་དེར་འཆི། སྐྱེ་བ་དྲན་པ་ལས་ཀྱང་སྐྱེ་བ་སྟེ། བདུན་ཕྲག་བདུན་ཚུན་ཆད་ཞག་བདུན་ཕན་ཆད་ཀྱི་བར་སྲིད་པ་བར་དོར་གནས། ལ་ལ་བདུན་ཚན་དང་པོ་རྫོགས་ནས་ལུས་ལེན། ཁ་ཅིག་བདུན་ཕྲག་གཉིས་དང་གསུམ་དང་བཞི་ལྔ་ལ་སོགས་པ་རིང་དུ་གནས་ནས་ལུས་ལེན་པ་སྟེ། རིང་མཐའ་ཞག་བཞི་བཅུ་རྩ་དགུའོ། །འདིར་སྐྱེ་བར་སྣང་བ་བདུན་དང་། གནས་པར་སྣང་བ་བདུན་དང་། འཆི་བར་སྣང་བ་བདུན་དང་། བདུན་ཚན་བདུན་གྱི་ཞག་མ་བཞི་བཅུ་ཞེ་དགུས་བར་སྲིད་སྤྱིར་བཏང་གི་ཚེ་ཚད་རིང་མཐའ་རྫོགས་པ་ཡིན་ནོ། །ཁ་དོག་གི་ཁྱད་པར་ནི་ཕྱི་མ་གར་སྐྱེ་བ་དེའི་ཁ་དོག་སྣང་སྟེ། ལྷ་མི་གཉིས་དཀར། ལྷ་མིན་དང་དུད་འགྲོ་སེར། ཡི་དྭགས་སྔོ། དམྱལ་བ་སྨུག་ནག་གོ །རྒྱུ་ནི་གོང་དུ་ཆོས་ཉིད་ཀྱི་ཁ་དོག་མཐོང་བ་ལས་འབྱུང་བའོ། །མགོ་ལྟ་བའི་ཁྱད་པར་ནི་ལྷ་མི་གྱེན། ལྷ་མིན་དང་དུད་འགྲོ་འཕྲེད། ཡི་དྭགས་དང་དམྱལ་བ་ཐུར་ལ་བལྟའོ། ལས་སོག་མི་སོག་གི་ཁྱད་པར་ནི་རགས་པ་མངོན་གྱུར་པ་མི་སོག་ལ། ཕྲ་བ་ལུང་མ་བསྟན་སྔོན་དང་ཕྱི་མའི་ཉེར་ལེན་གྱི་ཆ་ཅན་ཕྲ་བར་གསོག་སྟེ་རྨི་ལམ་བཞིན་ནོ། །འདིས་ལས་སོག་ཚུལ་ནི་ཤེས་པ་སྔ་ཕྱིའི་བར་དུ་རྨི་ལམ་གྱི་རང་དུས་བཞིན་དུ། ལས་བར་མ་ཟེར་བ་ཕྱི་མའི་ཁ་སྣོན་ཙམ་ཞིག་གསོག་པ་ཡིན་གསུངས་ལ། ཕྱི་མའི་ལས་ཀྱི་འབྲེལ་བ་དེ་ཡང་འདིའི་རྒྱུ་མཐུན་གྱི་འབྲས་བུ་གཅིག་ལ་གཅིག་བརྒྱུད་བྱས་ཏེ་འཁོར་བར་བྱེད་པའོ། །དགེ་སྡིག་གི་ལྟས་ཀྱི་ཁྱད་པར་ནི་ལས་དཀར་ཞིང་བདེ་འགྲོར་འགྲོ་བ་རྣམས་ཤེས་པ་གསལ་ལ། མི་དགེ་བའི་ལས་ཀྱིས་ངན་འགྲོར་འགྲོ་བ་རྣམས་ཤེས་པ་རྨུགས་ཤིང་མི་གསལ་ལོ། །མིང་གི་ཁྱད་པར་ནི་བཞི་སྟེ། འབྱུང་བ་ཕྲ་མོའི་བག་ཆགས་ཀྱི་གཟུགས་རགས་པ་མེད་ཀྱང་ཡོད་པར་སྣང་བས་སྲིད་པའི་ཤ་གཟུགས་ཅན་དང་གཅིག ཟས་སུ་དྲི་ཟ་ཞིང་ལས་ཀྱི་ཉེ་བར་འཁོར་བས་དྲི་ཟ་ཉེ་བར་འཁོར་བ་དང་གཉིས། ལུས་སྔ་ཕྱིའི་བར་ཡིན་པས་སྲིད་པའི་བར་དོར་ཕུང་པོ་ཉེ་བར་ལེན་པའི་མཚམས་སྦྱོར་བ་དང་གསུམ། གཟུགས་དང་དབང་པོ་རགས་པར་མེད་ཀྱང་ལས་དང་བག་ཆགས་ཀྱི་དབང་པོ་ཚང་བར་མཐོང་བས་དབང་པོ་ཀུན་ཚང་ཐོགས་མེད་ལྡན་དང་བཞིའོ། །རྒྱུ་ནི་གང་དུ་ཡེ་ཤེས་བཞི་སྦྱོར་གྱི་རྩལ་ལས་འབྱུང་བའོ། །མདོར་ན་མིང་བཞི་འདུས་པའི་བདག་ཉིད་ཅན་དྲི་ཙམ་གྱི་ཟས་ལ་འཁོར་བ་ཞིག་གོ །ལུས་ཚད་ཀྱི་ཁྱད་པར་ནི་ལས་དག་པ་རྣམས་བྱིས་པ་ལོ་བཅུ་དྲུག་ལོན་པའི་ན་ཚོད་ལ། མ་དག་པ་རྣམས་བརྒྱད་པ་ཙམ་སྟེ། ལྷུན་གྲུབ་ཀྱི་སྣང་བ་མཐོང་བ་ལས་འབྱུང་བའོ། །སྐྱེ་གནས་བཞི་ལས་གང་དུ་གཏོགས་པའི་ཁྱད་པར་ནི། རྫུས་སྐྱེས་སུ་གཏོགས་ཏེ་ལྷ་དང་ཆོས་མཐུན་པས་འོད་དང་རྫུ་འཕྲུལ་ཡོད་ལ། དམྱལ་བ་དང་ཆོས་མཐུན་པས་ཞག་བདུན་བདུན་ན་སྐྱེ་ཤིའི་སྡུག་བསྔལ་དྲག་པོ་ལ་སྤྱོད་པའོ། །ཐུན་མོང་གི་ལུང་ལས་ཀྱང༌། དམྱལ་བ་རྣམས་དང་ལྷ་རྣམས་དང༌། །སྲིད་པ་བར་མ་བརྫུས་ཏེ་སྐྱེ། །ཞེས་བཤད་པ་བཞིན་ནོ། །རྒྱུ་ནི་གོང་དུ་སྤྲུལ་པའི་སྣང་བ་མཐོང་བ་ལས་འབྱུང་བའོ། །འདི་སྐྱེ་བ་རྫུས་སྐྱེས་སུ་གཏོགས་ལ། ཆོས་གང་དང་མཐུན་པ་ཡིན་ན་རྫུ་འཕྲུལ་དང་འོད་ཡོད་པས་ལྷ་དང་མཐུན་པ་ཞིག་ཡིན་ལ། ཞག་བདུན་རེའི་མཚམས་ནས་སྐྱེ་ཤིའི་སྡུག་བསྔལ་ལ་སྤྱོད་པས་དམྱལ་བ་དང་མཐུན་པ་ཞིག་ཀྱང་ཡིན་ནོ། །སྤྱོད་ལམ་གྱི་ཁྱད་པར་ནི། ཆོས་ཉིད་ཀྱི་སྟོབས་ཡལ། སྔར་ཞེན་གྱི་བག་ཆགས་ལངས་པས་སྔར་གང་བྱེད་ཀྱི་ལས་ལ་སྤྲོ་བའོ། །རྒྱུ་ནི་ཆོས་ཉིད་བར་དོ་ལ་བྲེད་ཅིང་དངངས་པ་ལས་འབྱུང་བའོ། །འོད་ཀྱི་ཁྱད་པར་ནི། ལས་དག་པ་རྣམས་ལ་དཔག་ཚད་གཅིག་ཏུ་གསལ་ལ། མ་དག་པ་རྣམས་ལ་མོག་མོག་པོར་གསལ་བ་སྟེ་ཆོས་ཉིད་ཀྱི་རང་འོད་གསལ་བ་ལས་བྱུང་བའོ། །ཕྱི་མའི་ལས་འབྲེལ་གྱི་ཁྱད་པར་ནི། ཕྱི་མ་བདེ་འགྲོར་སྐྱེ་ན་འདིར་ལས་བཟང་པོའི་རྣམ་པ་དང་འཕྲད་པར་སྣང་ལ། ངན་འགྲོར་སྐྱེ་ན་མི་དགེ་བའི་སྣང་བ་ལ་སྤྱོད་པ་སྙམ་བྱེད་པ་སྟེ། སྔར་ཆོས་ཉིད་ཀྱི་སྣང་བ་ལ་དགའ་གདུང་དུ་བཟུང་བ་ལས་འབྱུང་བའོ། ཕྱི་མའི་ལུས་དང་ཉོན་མོངས་ཀྱི་ཁྱད་པར་ནི། ཞེ་སྡང་ལས་གཟུགས། འདོད་ཆགས་ལས་འདོད་པ། གཏི་མུག་ལས་གཟུགས་མེད་དུ་སྐྱེ་བའི་ལས་འབྲེལ་དུ་འབྱུང་སྟེ། ཆོས་ཉིད་ཀྱི་སྣང་བ་ལ་གོལ་བ་ལས་འབྱུང་བའོ། །འདི་དུས་གཟུགས་རང་ག་མ་ཞིག་མེད་ཀྱང་རྨི་ལམ་ལྟ་བུའི་རང་གཟུགས་ལ་ཆགས་པ་སྐྱེ་ན་འདོད་པ་དང་། སྡང་བ་སྐྱེ་ན་གཟུགས་ཁམས་དང་། གཏི་མུག་ཆ་མཚུངས་ཀྱི་བར་མ་སྐྱེ་ན་གཟུགས་མེད་ཁམས་སུ་སྐྱེ་བའོ། །ཁམས་གསུམ་ལས་གང་དུ་གཏོགས་པའི་ཁྱད་པར་ནི། གཟུགས་རང་མཚན་དུ་མེད་པས་གཟུགས་མེད་དུ་གཏོགས་ཏེ་མིང་གཞིའི་ཕུང་པོ་ལ་སེམས་ཀྱི་རྒྱུད་བརྟེན་པར་ཆོས་མཐུན་པའི་ཕྱིར་རོ། །མིང་བཞིའི་ཕུང་པོ་ཡང་ཕྲ་བ་ས་བོན་གྱི་ཆའི་འབྱུང་བ་ཀུན་གཞིའི་སྟེང་ན་ཡོད་པ་ལས་འབྱུང་བའོ། །རྒྱུ་ནི་ཆོས་ཉིད་སྒྱུ་མ་ལྟ་བུའི་སྣང་བ་མཐོང་བ་ལས་འབྱུང་བའོ། །གཟུགས་ལས་གཞན་པའི་ཕུང་པོ་ལྷག་མ། ཚོར་བ། འདུ་ཤེས། འདུ་བྱེད། རྣམ་ཤེས་རྣམས་བག་ལ་ཉལ་གྱི་ཕུང་པོར་གནས་པས་གཟུགས་མེད་ཁམས་སུ་གཏོགས་པ་ཡིན། ཕྱི་མའི་ལུས་དང་འབྲེལ་པའི་ལྟས་ཀྱི་ཁྱད་པར་ནི་བར་དོར་སྡོད་པའི་ཚེ་རྫོགས་ནས་ཕྱི་མའི་ལུས་ལེན་དུ་ཉེ་བའི་ཚེ། མའི་མངལ་དུ་ལས་རླུང་གི་འཕངས་པ་ལས་ལྷའི་སྐྱེ་གནས་སམ་མངལ་དུ་ཚུད་ན་ལྷ་ཁང་གི་ཡང་ཐོག་གམ་ཁང་བུ་བརྩེགས་པའི་ནང་ན་འདུག་སྙམ་བྱེད། ལྷ་མིན་གྱི་མངལ་དུ་ཚུད་ན་མགལ་མེའི་འཁོར་ལོའི་དབུས་སམ་ཆར་འབབ་པའི་དཀྱིལ་ན་འདུག་པ་སྙམ་བྱེད། མིའི་མངལ་དུ་ཚུད་ན་རབ་ཏུ་གྲང་སྙམ་བྱེད་ན་མི་ལུས་ཙམ་པོ། ནམ་རྨུགས་པའི་དཀྱིལ་ན་འདུག་པ་སྙམ་བྱེད་ན་མི་ལུས་གཙང་མ། སྐྱེ་བོ་འདུས་པའི་ཅ་ཅོའི་གསེབ་ན་འདུག་པ་སྙམ་བྱེད་ན་མི་ལུས་རིན་པོ་ཆེའི་མངལ་དུ་ཚུད་པའོ། །ངན་སོང་ལ་བྱོལ་སོང་གི་མངལ་དུ་ཚུད་ན་ན་བུན་གྱི་ནང་ངམ་སྤྱིལ་བུའི་ནང་ན་འདུག་པ་སྙམ་བྱེད། ཡི་དྭགས་ཀྱི་མངལ་དུ་ཚུད་ན་བྲག་ཕུག་རྡུགས་པའམ་གྲོག་པོ་སྟོང་པ་ན་འདུག་པ་སྙམ་བྱེད་དོ། །དམྱལ་པ་ནི་བརྒྱུད་པ་ལས་དངོས་སུ་སྲིད་པའི་བར་དོ་མི་སྣང་སྟེ་དབུགས་ཆད་པ་དང་སྐྱེ་བ་དུས་མཉམ་དུ་གནས་པའོ། །འདི་དག་གི་རྒྱུ་ནི་ཆོས་ཉིད་མའི་སྣང་བ་ལ་ཡིད་མ་ཆེས་པ་ལས་འབྱུང་བའོ། །ལས་ཀྱི་དབང་གིས་སྐྱེ་བ་ལེན་ས་དེར་དགའ་སྣང་སྐྱེས་ནས་དེར་ཞུགས་པ་ཙམ་གྱིས་ལུས་ངན་བླངས་ཚར་བ་ཡིན་པས། དེའི་དུས་སུ་རབ་ཡིན་ན་ཆགས་སྡང་མིག་སེར་སྤངས་ནས་སྣང་བ་བདེན་མེད་དུ་སྦྱང་བ་དང་། ཀ་དག་ཆོས་སྐུའི་ངང་དུ་གྲོལ་ཨེ་ཐུབ་བལྟ་བ་དང། འབྲིང་ཡིན་ན་གསུམ་པའི་དབང་དོན་གྱི་ཡེ་ཤེས་དྲན་ནས་བདེ་སྟོང་གི་དོན་ལ་མཉམ་པར་བཞག་བླ་མ་དང་ཡི་དམ་གྱི་བསྐྱེད་རིམ་དྲན་ནས་དག་པའི་ཞིང་ལ་འཕོ་ཨེ་ཐུབ་བལྟ་དགོས། ཐ་མ་ཡིན་རུང་མི་སྡུག་པ་དང་ཞེན་ལོག་གི་གཉེན་པོ་བསྟེན་ནས་མངལ་སྒོ་དགག་ནས་བདེ་བ་ཅན་སོགས་ལ་འཕོ་ཨེ་ཐུབ་བལྟ། ཤིན་ཏུ་ཐ་མ་ཞིག་ཡིན་ཡང་བར་དོའི་སེམས་ཅན་ལ་མངོན་ཤེས་ཕྲ་མོ་ཡོད་པ་ཡིན་ན་ཆོས་ལྡན་གྱི་ལུས་ལ་སྐྱེ་བ་བླངས་ནས་ཆོས་འདི་ཉིད་དང་ཕྲད་པའི་སྨོན་ལམ་འདེབས་དགོས་སོ། །དཔེས་ཉེ་བར་མཚོན་པའི་ཁྱད་པར་ནི། རྩྭས་མེ་འཛིན་པ་ལྟར་བག་ཆགས་ཀྱིས་མངལ་འཛིན་པ་དང༌། འདམ་རྫབ་ཀྱིས་ནོར་བུ་ལ་སོགས་འཛིན་པ་ལྟར་འཁོར་བ་ན་དག་པའི་ཡེ་ཤེས་འཛིན་པ་དང༌། རྙིས་བྱ་འཛིན་པ་ལྟར་མངལ་གྱིས་སྲིད་པ་བར་དོའི་སེམས་ཅན་འཛིན་པའོ། །དེ་ལྟར་རྣམ་གྲངས་ཉི་ཤུ་པོ་དེ་ཡང་ཉི་ཟླ་ཁ་སྦྱོར་ལས། སྲིད་པའི་བར་དོ་ཞེས་བྱ་བ། །འཁོར་བའི་གནས་ཀྱི་ལམ་མགོ་ནི། །དཔེར་ན་ཟོ་ཆུ་བཞིན་དུ་འཁོར། །ཤ་ཁྲག་རང་གའི་ལུས་བྲལ་ནས། །སྒྱུ་མ་ཡིད་ཀྱི་གཟུགས་ཅན་ནོ། །རྡོས་དང་བྲལ་བས་མིང་གཉིས་པ། །སྔ་མའི་ཤེས་པ་སྣང་བ་འགགས། ཕྱི་མ་ཉིད་ནི་མ་བྱུང་བར། །རིགས་ཅན་གང་དུ་མ་ངེས་པས། །གང་ནུས་གང་སྣང་དེ་སྐབས་ན། །སྐད་ཅིག་གནས་པའི་བར་མ་དོ། །ཕྱིས་ནི་གང་སྐྱེའི་ཆ་བྱད་འཛིན། ཕྱིས་འབྱུང་ཆ་བྱད་ཡོངས་བཟུང་ནས། །རིགས་དྲུག་སོ་སོའི་སྣང་ཆར་འགྱུར། །འདོད་པ་ཁམས་ཀྱི་ཕྱི་སྣོད་དང༌། །བཅུད་ནི་རང་གིས་རིག་ཅིང་གསལ། །རང་གར་སྐྱེ་བའི་སྣོད་བཅུད་ཀྱང༌། །དེ་ཉིད་དུས་ན་གསལ་བའོ། །འདོད་ལྡན་སྣོད་བཅུད་གསལ་བར་སྣང༌། །དབང་པོ་ཡན་ལག་ཡོངས་རྫོགས་པས། །དངོས་པོ་ཀུན་ལ་ཐོགས་མེད་ཅིང༌། རི་བྲག་ལ་སོགས་ཐོགས་མེད་འཇུག །གཞན་ལས་ཚེ་ནི་ཞག་བདུན་འགྱུར། །ཞག་ནི་བདུན་ཕྲག་བདུན་གྱི་ནི། །དེ་ཡི་ཚེ་ཡི་ཚད་ཡིན་ནོ། །ལྷ་དང་མི་ནི་ཁ་དོག་དཀར། །ལྷ་མ་ཡིན་དང་བྱོལ་སོང་སེར། །ཡི་དྭགས་འོད་ནི་དུ་བ་འདྲ། །དམྱལ་བ་སྡོང་དུམ་ལྟ་བུའམ། །ཡང་ན་བལ་ནག་གཡེངས་པ་འདྲ། །བྱོལ་སོང་ཡང་ན་ཁྲག་བཙོས་བཞིན། །ལྷ་མིན་ཁ་ཆར་འབབ་པ་བཞིན། །དེ་ཚེ་ཁ་ནི་འདི་ལྟ་སྟེ། །ལྷ་དང་མི་ནི་གྱེན་ལ་བལྟ། །ལྷ་མིན་བྱོལ་སོང་དེ་བཞིན་འཕྲེད། །ཡི་དྭགས་དམྱལ་བ་ཐུར་དུ་བལྟ། །འདི་དག་ད་གདོད་སྐྱེ་བའི་དབང༌། །སྲིད་པའི་བར་དོར་ལས་རྣམས་ནི། །སོག་དང་མི་སོག་ལྟས་འདིའོ། །རྣམ་པར་སྨིན་པའི་བག་ཆགས་མེད། །བར་མའི་དབང་གི་རྒྱུ་མཐུན་པའི། །བག་ཆགས་རྣམས་ནི་འདིས་སོག་གོ །དེ་ཚེ་ཤེས་པའི་ལྟས་འདིའོ། །གང་ཞིག་ལས་ནི་དག་པ་ཡི། །ཤེས་པ་ཉིད་ནི་གསལ་བ་ཡིན། །དེ་བཞིན་མ་དག་རྣམས་མི་གསལ། །དེ་ཀུན་དགེ་སྡིག་ལས་ལས་བྱུང༌། །དེ་ཉིད་མིང་གི་རྣམ་གྲངས་ནི། །འདི་དག་རྣམས་སུ་རིག་པར་བྱ། །མིང་བཞི་འདུས་པའི་བདག་ཉིད་ཅན། །སྲིད་པ་ཡི་ནི་ཤ་གཟུགས་དང༌། །སྒྱུ་ལུས་དྲི་ཟ་ཉེ་བར་འཁོར། །སྲིད་པའི་བར་དོ་ཕུང་མཚམས་སྦྱོར། གཟུགས་མེད་དབང་པོ་ཀུན་ལྡན་པས། །ཐོགས་པ་མེད་པར་ཀུན་ལ་འཇུག །དེ་ལྟར་བར་མའི་ལུས་ཀྱི་ཚད། །བྱིས་པ་ལོ་བརྒྱད་ལོན་པའམ། །ལོ་བཅུ་ལོན་པའི་ལུས་ཚད་དུ། །རྨི་ལམ་ལྟ་བུའི་གཟུགས་སུ་གནས། །སྐྱེ་གནས་ཉིད་ནི་རྣམ་བཞི་ལས། །བརྫུས་ནས་སྐྱེས་པ་ཉིད་དུ་སྟེ། །ལྷ་དང་དམྱལ་བ་བར་མ་དོ། །འདི་ཀུན་བརྫུས་པ་ལས་སྐྱེའོ། །སྤྱོད་པ་ཉིད་ནི་བར་མ་དོ། །སྔར་ཞེན་ལས་ལ་སྤྲོ་བ་སྟེ། །དེ་ཡི་རྗེས་སུ་ཞུགས་ནས་ནི། །དེ་ཆོས་ཡིད་ཀྱི་རྗེས་སུ་འཛིན། །དེ་ཉིད་འོད་ཀྱི་ཚད་རྣམས་ནི། །སྔར་ཞེན་བག་ཆགས་ཆུང་བ་དང༌། །འདི་ཡི་འོད་ནི་དཔག་ཚད་གཅིག །ཁ་དོག་དཀར་པོ་ལྷང་ལྷང་པོ། །འདི་ནི་ལྷ་མིའི་སྐྱེ་གནས་སོ། །བག་ཆགས་ཅན་ལ་གསལ་མི་སྣང༌། །གང་གི་ལས་ནི་བཟང་ངན་གྱིས། །བཟང་བས་དགེ་དང་ཡིད་འོད་འཕྲད། །ངན་པས་སེམས་ཅན་བག་ཆགས་ཅན། །ཡིད་དུ་མི་འོང་མངལ་དུ་འཇུག །ཕྱི་ནང་ལུས་དང་འབྲེལ་བ་ནི། །རང་ཤུགས་ཞེ་སྡང་སྐྱེས་པའི་རྒྱུ། །དེ་བཞིན་འདོད་ཆགས་རྐྱེན་གྱིས་ནི། །ཕྱི་མ་ལ་ནི་སྣང་བའི་ཚུལ། །ཁམས་ནི་རྣམ་པ་གསུམ་དག་ལས། །མིང་གཞིའི་ཕུང་པོ་མ་འགགས་ཏེ། །ཕྱི་མ་མ་བླངས་བར་མའི་སྲིད། །མིང་གཞི་འདུས་པའི་ཕུང་པོ་ལ། །ཤ་ཁྲག་གཟུགས་ནི་མི་སྣང་བས། །གཟུགས་ནི་མེད་པའི་ཁམས་སུའོ། །ཕྱི་མའི་ལུས་དང་ཉེ་བའི་ཚེ། །མགལ་མེའམ་ནི་ཆར་པའམ། །དེ་བཞིན་གྲང་པ་ནམ་རྨུགས་པ། །སྐྱེ་བོ་འདུས་པའི་ཅ་ཅོ་དང༌། །ལྷ་ཁང་དམ་ནི་ཡང་ཐོག་གམ། །ཁང་བུ་དག་ནི་བརྩེགས་པར་མཐོང༌། །ངན་སོང་རྣམས་ནི་སྤྱིལ་བུའམ། །ཕུགས་རྡུགས་གྲོག་པོ་སྟོང་པར་མཐོང༌། །འདི་དག་མངལ་དུ་ཚུད་པའི་རྟགས། །འགྲོ་བར་འདོད་ཀྱང་རྒྱས་འཐུམས་ཏེ། །ཐོགས་པ་ཉིད་དང་བཅས་པའོ། །དཔེ་ནི་རྩྭས་ནི་མེ་འཛིན་དང༌། །དེ་བཞིན་འདམ་གྱིས་རྫས་འཛིན་དང༌། །མཁའ་འགྲོ་འདོད་པའི་དབང་གིས་ནི། །ས་ཁུང་བྲུས་པའི་རྙིས་འཛིན་ལྟར། །དབང་མེད་ཆགས་པའི་རྙིས་འཛིན་ནོ། །ཞེས་གསུངས་སོ། །དེ་ལྟར་སྲིད་པ་བར་དོ་ནས་ལམ་བརྒྱུད་དེ། ལས་ཀྱི་དབང་གིས། དགའ་བ་དང་ལྡན་པ་ལྷ་དང་། རྩོད་པ་དང་ལྡན་པ་ལྷ་མ་ཡིན་དང་། ཆ་མཉམ་ལྡན་མི་དང་། གཉིས་ལྡན་དུད་འགྲོ་དང་། བཀྲེས་ལྡན་ཡི་དྭགས་དང་། སྡུག་བསྔལ་ཆེན་པོ་དང་ལྡན་པ་དམྱལ་བ་སྟེ་འགྲོ་བ་རིགས་དྲུག་གི་གནས་སུ་ཟོ་ཆུའི་འཁོར་ལོ་བཞིན་དུ་གཅིག་ནས་གཅིག་ཏུ་འགྲོ་བས་འགྲོ་བ་རིགས་དྲུག་ཅེས་བྱའོ། །འདི་ལ་ལམ་རྒྱུད་ལྔ་ཡང་བྱ་སྟེ། དེ་ཡང་ལྷ་མ་ཡིན་འདོད་ལྷ་ལ་སོགས་པར་བསྡུས་ཚེ། དམྱལ་བ་གདུང་བའི་ལམ། ཡི་དྭགས་འགོག་པའི་ལམ། བྱོལ་སོང་མུན་པའི་ལམ། མི་འདམས་པའི་ལམ། ལྷ་གཡེངས་པའི་ལམ་མོ། །འདིའི་ལམ་ཞེས་པ་ནི་བདེ་སྡུག་ཏུ་ཕྱོགས་ཤིང་སྒྲུབ་པར་བྱེད་པས་ན་ལམ་དང་། རིགས་མི་འདྲ་བ་ལྔ་ཡོད་པས་ལྔ་སྟེ་ལམ་དེ་ལྟ་བུར་གཅིག་ནས་གཅིག་ཏུ་ཁ་བརྒྱུད་ནས་འཁོར་བ་མུ་མེད་དུ་འཁོར་བའོ། །གནད་འདི་དག་ནི་གལ་པོ་ཆེ་ཡིན་པས་རྒྱས་པར་བསྟན་ཏོ། །ཚིག་དོན་རིན་པོ་ཆེའི་མཛོད་ལས་ཉམས་སུ་ལེན་པ་རྒྱལ་པོའི་ཁང་བཟང་སྟེ་རྡོ་རྗེའི་གནས་བཅུ་པ་རྒྱ་ཆེར་བཤད་པའོ།།