ཉིན་ལྔ་བའི་ཆོས་ཁྲིད།
མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཁམས་གསུམ་འཁོར་བ་རིགས་དྲུག་ཏུ་དབང་མེད་དུ་རྒྱུ་ཞིང་འཁྱམས་པ། སྡུག་བསྔལ་རྣམ་པ་གསུམ་གྱིས་སྐད་ཅིག་ཐང་ཅིག་ཙམ་ཡང་མ་བཏང་བའི་མཐའ་ཡས་འགྲོ་ཁམས་རྒྱ་མཚོ་ལྟ་བུ་འདི་དག་གི་དོན་དུ། འཐོབ་བྱ་བླ་ན་མེད་པ་གཏན་གྱི་བདེ་བ་མཐའ་གཉིས་ལ་མི་གནས་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ། སྐྱོན་ཀུན་ཟད་ཡོན་ཏན་ཀུན་ལྡན་གྱི་བདག་ཉིད། མཁྱེན་བརྩེ་ནུས་པ་ཕྲིན་ལས་དང་ལྡན་པ་དེ་ཉིད་ཐོབ་པར་བྱས་ཏེ། མ་རྒན་མཐའ་ཡས་ཀྱི་སེམས་ཅན་འདི་དག་ཐམས་ཅད་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱ། དེའི་ཆེད་དུ་བླ་ན་མེད་པའི་ལམ་གྱི་འཇུག་ངོགས་དམ་པའི་ཆོས་ཟབ་མོ་ཉན་ནས་དེའི་དོན་ཚུལ་བཞིན་དུ་ཉམས་སུ་བླང་བར་བྱའོ་སྙམ་པའི་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་སྟེ། དེ་ཡང་འགྲོ་ཀུན་ཕ་མར་ཤེས་པའི་སྙིང་རྗེ་དང་། དེ་དག་རྫོགས་བྱང་ལ་འགོད་པའི་ཤེས་རབ་ཀྱི་ཟུར་གཉིས་ཚང་བ་དང་། དེའི་སྟེང་དུ་ཐབས་རྒྱ་ཆེ་བ་གསང་སྔགས་དག་སྣང་གི་ལམ། གནས་དུས་སྟོན་པ་འཁོར་དང་བཅས་པ་ཐམས་ཅད་ཡེ་ནས་དག་པའི་རང་བཞིན་དུ་གསལ་བཏབ་ནས། སྒོ་གསུམ་གུས་ཤིང་འདུད་པས་དང་བའི་སེམས་དང་ལྡན་པའི་ཀུན་སྤྱོད་ཀྱི་རིམ་པ་མདོ་རྒྱུད་བསྟན་བཅོས་དག་ལས་ཇི་ལྟར་འབྱུང་བ་བཞིན་དང་མ་བྲལ་བར་གསན་པར་བྱ་དགོས་ལ། དེ་ཡང་དམ་པའི་ཆོས་འདི་སྨན་དང་། ཆོས་བཤད་པའི་བླ་མ་སྨན་པ། རང་ཉིད་ནད་པ། རྒྱུད་ཉོན་མོངས་དུག་ལྔས་གཟིར་བ་འདི་ནད་གཞི་ཆེན་པོའི་གདོན་གྱིས་བཟུང་བ་ལྟ་བུ་ཞིག་ཡིན་པས། དེ་ལ་ནད་ཉེ་བར་འཚོ་བ་ཆོས་སེམས་རྒྱུད་དུ་འབྱོར་ནས་སེམས་ཁམས་ལ་ཕན་ཞིག་ཐོགས་པ་ནི། བླ་སློབ་སྨན་པ་དང་ནད་པ་ཐུན་མོང་གི་བྱེད་ལས་སུ་ཁེལ་ཞིང་། དམ་པའི་ཆོས་ནི་ཐར་བའི་སྲོག་གི་ཟུངས་གསོ་བའི་ལྷའི་བདུད་རྩི་ལྟ་བུ་ཞིག་ཡིན་ལ། དེ་བླུག་སའི་སྣོད་དེ་ཡང་གཙང་ཞིང་ལེགས་པ་བཅུད་མི་འཛག་ཅིང་མི་རྫོབ་པ་ཞིག་དགོས་པས། ཐོག་མར་རང་རྒྱུད་རང་གིས་རང་ལ་བརྟགས་ནས་བྱི་དོར་བྱེད་པ་ནི་གལ་ཆེ་ལ། འཇིག་རྟེན་གྱི་མི་རྣམས་སྐྱེས་ནས་ད་ལྟའི་བར་དུ་འཁྲུལ་བའི་གཞན་དབང་དུ་ཤོར་ནས་བདེ་བ་ཕྱི་ནས་རྙེད་རྒྱུ་ཡོད་པར་རློམ་སྟེ། ཕྱིའི་དངོས་པོའི་འབྱོར་བའི་མཐུན་རྐྱེན་གྱི་ཕྱོགས་ལ་ཆུང་ནས་ཆེ་དང་། གཞོན་ནས་རྒས་ཀྱི་བར་དུ་འབད་པ་དོན་མེད་ངལ་བ་འབྲས་བུས་སྟོང་བ་ཐོབ་རྒྱུ་ཅུང་ཟད་ཙམ་ཡང་མེད་པའི་ངང་ནས། མི་ཚེའི་ཡག་ས་བཟང་ས་ཕལ་མོ་ཆེ་དོན་མེད་དུ་གྲོན་ཞིང་། དེ་ཡང་རང་གར་དོན་མེད་དུ་སོང་ན་བླ་ཡང་དོན་ལོག་ཏུ་སོང་ནས་མི་དགེ་སྡིག་པའི་རྣམ་སྨིན་རི་རབ་དང་འདྲ་བ་ཞིག་རང་གི་གཉའ་བར་བཀལ་ནས་སྐྱབས་མེད་མགོན་མེད་ཀྱི་གནས་ལ་ལྷུང་བ་ནི། སོ་སོ་སྐྱེ་བོ་རྨོངས་པའི་གཞན་དབང་དུ་གྱུར་པས་ཡིན་ལ། ད་རེས་མི་ལུས་རིན་པོ་ཆེ་ཡིད་བཞིན་གྱི་ནོར་བུ་ལས་ལྷག་ཅིང་། ཡང་ཡང་རྙེད་དཀའ་ཉིན་དཀར་གྱི་སྐར་མ་དང་འདྲ་བ་ཐོབ་ནས། ཡར་འགྲོ་མར་འགྲོ་གཉིས་ཀའི་ས་མཚམས། ལམ་གྱི་བཞི་མདོ་རུ་ཐོན་ཡོད་པ་ཡིན་ལ། ད་སྔོན་ལམ་ལོག་ཁུར་བའི་ཕམ་ཁ་ཉོས་པའི་ཉམས་མྱོང་དེ་ལ་བརྟེན་ནས། ད་ནི་འཇིག་རྟེན་འཁོར་བའི་བྱ་བཞག་ཆོས་བརྒྱད་ཟིན་མེད་ཀྱི་བྲེལ་དོ་འདིས་མགོ་མ་གཡོགས་བསམ་པ་ཞིག་དང་། འདི་ལ་མགོ་མ་འཁོར་བསམས་པ་ཞིག་ཅི་ཡོད། ད་ནི་འཁྲུལ་སྣང་བཙོན་ཁང་ལྟ་བུ་འདིའི་ནང་ནས་དུས་གཏན་དུ་ཐར་བའི་ཐར་བ་དམ་པ། སྐྱེ་རྒ་ན་དང་འཆི་བའམ་བཤད་ཚོད་བགྲང་ཚོད་མེད་པའི་སྡུག་བསྔལ་འདི་དག་མེད་པའི་སྐྱིད་ས་བདེ་སའི་འགྲོ་ས་སྐྱབས་གནས་ཤིག་ཡོད་དུས་དེ་ལ་མི་འཇུག་པ་ནི་མྱོས་པ་ཡིན་པ་རེད། ཆོས་ཉན་ཞིང་ཉན། མན་ངག་ཐོབ་ཅིང་ཐོབ། དོན་གོ་ཞིང་གོ་ལ་བདེ་བ་ཞེས་པ་དེ་ཕྱི་ནས་བཙལ་རྒྱུ་མེད་པར་ནང་ནས་རྙེད་དགོས་པ་ཡིན་ནས་འདུག རིན་ཐང་ཅན་ནི་ཕྱིའི་རྒྱུ་ནོར་མིན་པར་ནང་རང་ཉིད་ཀྱི་མི་ཚེའི་དུས་ཚོད་ཡིན་པར་འདུག དེ་བས་ཀྱང་ནང་གི་བདེ་སྐྱིད་སེམས་ཉིད་ཆོས་སྐུའི་རང་ཞལ་མངོན་དུ་བྱེད་པ་དེ་ཡིན་པར་འདུག་པས། ད་སྔོན་དོན་མེད་ཆུད་ཟོས་སུ་ཤོར་བའི་ལོ་གཅིག་མ་དགོས། ཟླ་བ་གཅིག་གམ། དེ་མ་དགོས་ཞག་གཅིག་གམ། ཆུ་ཚོད་གཅིག་ཙམ་ཡང་ཚུར་ཚེའི་སྣོན་མར་ཉོ་དགོས་བསམ་ན། འཛམ་གླིང་གི་རྒྱུ་ནོར་ཐམས་ཅད་རང་ལ་དབང་ནས་རིན་དུ་བྱིན་ཡང་། ཉོ་རུ་མི་བཏུབ་པས། མི་ཚེའི་རིན་ཐང་དེ་ལྟར་ཡིན་པ་དེ་སྔར་ནས་ཧ་གོ་བ་དང་། འདས་པའི་མི་ཚེའི་དུས་ཚོད་ཡུན་རིང་དེའི་ཚེ་དམ་པའི་ལྷ་ཆོས་རང་གཞན་གཉིས་ཀ་ལ་ཕན་ཐོགས་བྱེད་དེ་འགྲུབ་ཡོད་ན་ཅི་འདྲའི་དོན་ཆེན་ཞིག་འགྲུབ་ཡོད་པར་འདུག་ཨང་། དེ་ལྟར་བསམ་བློ་བཏང་ན་ཨ་ཙ་མ་ཅི་འདྲའི་འཁྲུལ་ན་འཁྲུལ་ལུགས་སྡུག་པོ། གཉིད་མ་བདེ་བའི་རྨི་ལམ་ལྟ་བུའི་འཁྲུལ་རྒྱུ་ཡོད་ཅིང་སད་རྒྱུ་མེད་པ་ཞིག་ཨང་བསམས་ནས་རང་གིས་རང་ལ་ཞེ་ཁྲེལ་འདེབས་དགོས་སའི་ས་ལ་ཐོན་པ་དེ་ཤེས་དགོས་པ་ཡིན། དེའི་སྟེང་དུ་འདེང་བསམ་བློ་ཡང་གཏོང་ཞིག་བྱས་ན། རིག་འཛིན་གང་ཤར་རང་གྲོལ་གྱིས། ད་རེས་ལན་གཅིག་རྙེད་པའི་རྟེན་འདི་ལ། །སྙིང་ནས་དམ་ཆོས་སྒྲུབ་ལ་མ་བརྩོན་ན། །རིན་ཆེན་གླིང་ནས་སྟོང་ལོག་བྱས་པ་ལྟར། །མི་ཚེ་སྟོང་ཟད་ཡིན་ནོ་མཆེད་གྲོགས་ལགས། །ཞེས་གསུངས་པར་ལྟར་ད་ལྟ་འདེང་ཞིག་མ་ཕོག་པར་འདི་བཞིན་མུ་མཐུད་ན། ལུས་ངག་ཡིད་གསུམ་གྱིས་བྱས་ཚད་དྲན་ཚད་ཐམས་ཅད་མི་དགེ་སྡིག་པའི་ལས་ཤ་སྟག་ཡིན་པས། འདི་ལ་མཐའ་འབྲས་ལེགས་པོ་ཞིག་མེད་པ་ནི་ཤེས་གསལ་ཡིན། ཕ་དམ་པས། ཕོ་ངན་མདོ་དོན་ཆེ་ཆུང་ད་རེས་ཤེས། །ཚེ་ལ་སྟོང་ལོག་མ་བྱེད་དིང་རི་བ། །ཞེས་དིང་རི་བརྒྱད་ཅུའི་གདམས་ངག་ལས་དེ་འདྲ་གསུངས་ཡོད། ལས་སྔོན་ནས་དྲན་ན་མཁས་པ་ཡིན། རྗེས་ནས་དྲན་ན་འགྱོད་པ་ཡིན། འགྱོད་པ་ནི་ལས་ཀྱི་ཐ་མ་ཡིན། བུ་ཨེ་བཟང་མི་བཟང་འདེང་ཨེ་ཕོག་མི་ཕོག་བྱ་བ་ཨེ་ཐིག་མི་ཐིག་ནི་ད་རེས་ཡིན། ད་རེས་མེད་དུས་མེད་པ་ཡིན། ལོ་གྲངས་ནམ་ཟླའི་རྩིས་གྲངས་མཛུབ་མགོ་ལ་བཤར་ན་ད་སྔ་འདྲ་ཞིག་ད་འདུག་ཚེ་གང་ན་ཡོད་དེ་མེད་ལ། གལ་སྲིད་ཡོད་ཀྱང་རྒས་ཚེ་སྨད་རང་ལུས་དབང་དུ་མི་འདུས་པའི་དུས་ལ་ཐོན་ཡོད་པས་བྱ་བ་ཆེར་ཞིག་འགྲུབ་པ་མིན་པ་དང་། ལར་མི་ཚེ་ལ་རྟག་བརྟན་མེད་པས་ཚེ་ལྷག་ཅི་ཡོད་མི་ཤེས་པས། གད་མགོ་མཐའ་མགོ་ཞིག་ནས་ལྷུང་ལ་ཁད་པར་བྱས་ནས་རྐྱེན་ངན་པ་ཞིག་དང་ཐུག་རན་ནས་ཡོད་པ་ལའང་ཐང་མེད་པར་བསམས་ནས། ལོང་མེད་རྒྱུད་ལ་བརྟེན་པ་སྡར་མའི་པང་དུ་སྦྲུལ་ཐོན་པ་དང་། སྒེག་མོའི་མགོ་ལ་མེ་ཤོར་བ་ལྟ་བུ་ཞིག་དགོས་པ་ཡིན། གལ་ཏེ་ཚེ་ལོང་མེད་རྒྱུད་ལ་མ་སྐྱེས་ཤིང་དལ་འབྱོར་རང་ལ་ཡོད་པའི་རིན་ཐང་དེ་མ་ཤེས་པར། ཁ་གནམ་དུ་གདང་བཞིན་ཅི་ཡིན་གང་ཡིན་ངོ་མི་འབྱེད་ངོས་མི་ཟིན་ནས་བལྟས་འདུག་ཚེ། འཆི་བདག་གི་ཞགས་པ་སྐེ་ལ་བསྐོན་ནས་བཤའ་ལུག་བཟུང་བ་ལྟར་བྱས་ཚེ་གཞི་ནས་འགྱོད་ཀྱང་འཕྱིས་པ་ཡིན། དེས་ན་ཆོས་ཚིག་རེ་གོ་བའི་གནད་དེ་རང་ཉམས་ལ་ལོན་པར་བྱས་ནས་དོན་ཡོད་པར་གྱིས་མ་གཏོགས་ཉིན་རེ་ཟད་ཀྱང་ཕྱིར་འོང་མེད་པ་ཡིན། དེ་ལྟ་བུའི་ཟད་པ་ནི་མི་ཚེའི་ནང་གི་ཚེ་ཡིན་པས། འཆི་བདག་ཚུར་ཇེ་བཅར་ཡིན། དེ་དུས་རང་མགོ་རང་གིས་མ་ཐོན་ཚེ་གཞན་ཞིག་གིས་འདྲེན་འགྲོ་ཟེར་ཡང་། སངས་རྒྱས་ལས་ལྷག་གི་ཐུགས་རྗེ་ཅན་ཞིག་མེད་ཀྱང་། སེམས་ཅན་ལ་ལས་མེད་དུས་འུ་ཚོ་དྲངས་མ་ནུས། འདྲེན་ཐབས་མེད་ནས་ལྷག་ཡོད་པ་འདི་བཞིན་ཡིན། དེ་དང་འདྲ་བའི་འགྲོ་བ་རིགས་དྲུག་གི་སེམས་ཅན་ཆོས་སྒྲ་རྣ་བས་མ་གོ་བ་ཐར་ལམ་མཐོང་བའི་མིག་ཐོབ་མེད་པ་ཡང་ཅི་འདྲ་མེད། རང་གི་ཁྱིམ་བཟའ་ཚང་། གྲོང་རོགས་ཁྱིམ་མཚེས་ལ་ཁ་བསྐོར་ནས་བསམ་བློ་བཏང་ན། དོན་ཆུང་ལ་ཡེངས་ནས་དོན་ཆེན་ཤོར་བ་གྲངས་ཀྱིས་མི་ཆོད། འཇིག་རྟེན་ཕྱི་མའི་ལམ་ཆེན་ལ་སོང་བའི་རང་གི་མི་ཐོག་སྔོན་མ་དེ་ཚོ་ཡང་། ཤི་སྣང་ཡིད་ལ་མེད་ས་ནས་ཆོས་རྣམ་དག་དགེ་བ་སྣ་གཅིག་སྒྲུབ་མ་ཐུབ་པར་གཤིན་རྗེའི་འཕྲང་ལམ་ལ་བཤར་ནས་ཤི་གསོན་གྱི་ལ་མོ་བརྒལ་བ་ཤ་སྟག་ཡིན། ད་ནི་སེམས་ཅན་ཐམས་ཅད་ལ་སྙིང་མི་རྗེ་ས་ཞིག་མེད་པས་མ་ཚད། དགྲ་གཉེན་གྱི་དབྱེ་བ་ཕྱེ་ཡོང་ས་ཞིག་ཀྱང་མེད་པས། ཚང་མ་ཉམ་ཐག་སྙིང་རྗེའི་ཡུལ་ཁོ་ན་རེད་བསམས་ནས། ལེ་ལོ་དང་ཕྱི་བཤོལ་མེད་པར་ཐོས་བསམ་ལ་རྩེ་གཅིག་གིས་གཞོལ་ནས་གོ་བ་གཏིང་ནས་ལོན་པ་ཞིག་དགོས་པ་ལས། མི་ལས་མེད་ཀྱིས་ཁལ་བཀལ་བ་དང་འདྲ་བར་བྱས་ལོ་ལས་ལོའི་ཁྲལ་འགྲོ་ཁྲལ་འདུག་དང་། འགྲོ་ཞོར་འདུག་ཞོར་ལས་ཞོར་བཅའ་ཞོར་ཞིག་གིས། བྱས་པའི་མཐའ་ལ་གྲུབ་པའི་འབྲས་ཡོད་པ་ཞིག་མི་ཡོང་བའི་ཚུལ་ལ་སོགས་པ་ལ་ལེགས་པར་བསམས་ནས། སྐབས་སུ་བབ་པ་གང་གསན་པར་བྱ་བའི་དམ་པའི་ལྷ་ཆོས་དེ་ནི། རྒྱལ་བའི་བསྟན་པ་ཇི་སྙེད་ཡོངས་རྫོགས་པའི། །གཞུང་བཟང་ཀུན་མཁྱེན་བླ་མས་འཀྲལ་འདི་འདྲ། །འཕགས་བོད་མཁས་པའི་སྐྱེ་བོ་སུ་ཡིས་ཀྱང་། །སྔོན་ཆད་འཛམ་གླིང་ལྗོངས་འདིར་བཞག་པ་མེད། །ཅེས་གསུངས་པ་ལྟར་དུ། ཇི་སྙེད་རྒྱལ་བའི་གསུང་གི་ཟབ་དོན་གྱི་སྙིང་པོ་དྲིལ་བ་མཛོད་ཆེན་བདུན་གྱི་ཆོས་སྐུའི་མཆོད་སྡོང་ཆེན་པོ་ལས། མན་ངག་རིན་པོ་ཆེའི་མཛོད་འདི་ཉིད་འཆད་པའི་སྐབས་ནས་འགའ་ཞིག་སོང་ནས་དེ་རིང་ནི།
༡༡༣ གདམས་ངག་དྲུག་གིས་གནད་དུ་བརྡེག་པ་བསྟན་པ།
གདམས་ངག་དྲུག་གིས་གནད་དུ་བརྡེག་པ་ནི།།
བཟའ་མི་ཚོང་དུས་འགྲོན་པོ་ཚོགས་པ་འདྲ།།
ནམ་འབྲལ་མི་ཤེས་མཐར་ཐུག་དོན་ལ་སྦྱངས།།
གཉེན་འདུན་ལྕང་ཁའི་བྱིའུ་ཆུང་འདུས་པ་འདྲ།།
ནམ་གྱེས་མི་ཤེས་གདུང་སེམས་འཁྲི་བ་ཆོད།།
ཚེ་སྲོག་མི་རྟག་རྩྭ་ཁའི་ཟིལ་པ་འདྲ།།
སྒོམ་སྒྲུབ་ཆོས་ལ་རྩོལ་བ་དྲག་ཏུ་སྐྱེད།།
སྨྲ་མང་འཁྲུལ་བའི་དགྲར་ལྡང་ནེ་ཙོ་འདྲ།།
ངག་འཁྱལ་བྲེ་མོའི་གཏམ་འདྲ་སྨྲ་བཅད་གྱིས།།
ཆོས་སྒྲུབ་མཚོ་གླིང་ནོར་བུ་ལེན་འདྲ་བས།།
སྙན་བརྒྱུད་གདམས་ངག་ལྷུག་པར་སྤེལ་མི་བྱ།།
འགྲོགས་ཡུན་རིང་ན་སངས་རྒྱས་སྐྱོན་མཐོང་བས།།
མི་གཞན་རྣམས་དང་གནས་མལ་གཅིག་མི་བྱ།།
འདི་དག་སྙིང་གཏམ་མཆོག་ཡིན་གུས་པས་ཉོན།།
ཞེས་གསུངས་པ་སྟེ། གདམས་ངག་དྲུག་གིས་ཉམས་ལེན་གྱི་གནད་དུ་བརྡེག་ནས་འཁྲུལ་བའི་སྲོག་གཅོད་པའི་མན་ངག་ནི། ད་ལྟ་ཕ་མ་དང་མིང་སྲིང་ཕུ་ནུ་རུ་བྱས་ནས་བཟའ་ཚང་གཅིག་གི་མི་རུ་མཉམ་དུ་ལས་ཀྱིས་བསྐོས་ནས་གཤིབ་བཞིན་ཡོད་པ་འདི་དག་ཚོང་འདུས་ཀྱི་འགྲོན་པོ་དང་འདྲ་བར་སོ་སོར་ནམ་འབྲལ་མི་ཤེས་པས། ནམ་ཡང་འབྲལ་དུ་མེད་པའི་མཐར་ཐུག་གི་དོན་ལ་སྦྱང་དགོས་པ་སྟེ། དེ་ཡང་ཆོས་པ་རྣམས་ཀྱིས་ཁྱིམ་ཕ་མ་མིང་སྲིང་ལ་སོགས་པ་ལ་དགྲ་དང་འདྲ་བའི་འཛིན་སྟངས་ཀྱིས་འདོར་དགོས་ཞེས་པའི་དོན་མིན་ཏེ། ཕ་མ་ནི་དྲིན་ཆེ་བ་བརྩི་བཀུར་གྱི་ཡུལ་ཡིན་པས་དྲིན་ལེན་འཇལ་དགོས་པའི་ཕྱིར། འོན་ཀྱང་ཕ་མའི་དྲིན་ལེན་ཕ་མ་གཉིས་ཕྲག་ལ་ཁུར་ནས་ས་ཆེན་པོ་ལ་བསྐོར་བ་བྱས་ཀྱང་གསོབ་མིན་པར་བཤད་ཅིང་། འོ་ན་དེ་ཇི་ལྟར་གསོབ་ཅེ་ན། ཆོས་གཅིག་པོས་དྲིན་ལན་གསོབ་པ་ཡིན་པས་ཆོས་ཀྱིས་དྲིན་ལན་འཇལ་དགོས་པ་ཡིན། འོན་ཀྱང་ཁྱིམ་མིའི་ཉེ་འབྲེལ་དང་འབྲལ་མི་ཕོད་པའི་ཞེན་ཆགས་ཡོད་མི་རུང་སྟེ། ཆོས་ཀྱི་བར་ཆད་དུ་འགྲོ་བའི་ཕྱིར། ཕ་མ་རྒྱུ་མཚན་མི་ཤེས་མཁན་ཆོས་ལ་བར་ཆད་བྱེད་མཁན་ཡང་ཡོད་སྲིད་པ་རེད། དེས་བར་ཆད་བྱེད་པའི་དུས་སུ་ཕ་མ་ཡིན་ཡང་མི་ཉན་པར་རང་གཞན་གཉིས་ཀའི་དོན་དུ་མཐར་ཐུག་གི་དོན་ལ་སྦྱོང་དགོས་པ་དེས་ན་ཐེག་པ་ཆེན་པོའི་ལམ་ལ་བསླབས་ནས་སྦྱོང་དགོས་སོ། །བཟའ་ཚང་མི་རྟག་ཚོང་འདུས་ཀྱི་འགྲོན་པོ་དང་འདྲ་བ་ནི་ཇི་ལྟར་ཡིན་ན། གཏམ་པདྨའི་ཚལ་གྱི་ཟློས་གར་ལས། གསེར་གྱི་སྦྲང་ཆུང་པདྨའི་འདབ་ཡངས་དང་། གཡུའི་སྦྲང་ཆུང་པདྨའི་ངག་སྙན་གཉིས་སྐྱེད་ཚལ་མེ་ཏོག་གི་གླིང་ནས་རྩེད་འཇོ་རོལ་བཞིན་པའི་སྐབས་སུ། གློ་བུར་དུ་ནམ་མཁར་སྤྲིན་ནག་འཁྲིགས་ཤིང་སེར་དྲག་ཐར་ཐོར་བབས་ནས། གཡུའི་སྦྲང་ཆུང་ངག་སྙན་པདྨའི་འདབ་མའི་སྦུབས་སུ་འཐུམ་ནས་ཤི་གསོན་གཉིས་ཀྱི་ས་མཚམས་སུ་ཐོན་ཏེ། ཕྱིན་ཆད་ཐུག་ཏུ་མེད་པའི་ཡུལ་དུ་འགྲོ་རན་དུས། གསེར་གྱི་སྦྲང་ཆུང་འདབ་ཡངས་ཀྱིས། གློ་བུར་འཆི་བདག་བདུད་པོ། །སྔོན་མ་ཁོང་ལ་སླེབས་སོང་། །ངེད་ལ་ནམ་ཙམ་སླེབ་ཡོང་། །མཁྱེན་ནོ་བླ་མ་མཁྱེན་ནོ། །ཞེས་དང་། ལས་ཀྱིས་འབྲེལ་བའི་བརྩེ་གདུང་གི་ཟླ་གྲོགས། །བར་དོའི་ཡུལ་ན་ད་ལྟ་ཙམ་ལུས་ཡོད། །ཤི་ན་རེ་ས་ལྷ་ཆོས་ལས་མི་འདུག །ཕན་པའི་ལྷ་ཆོས་རང་བྱས་ཤིག་མེད་ན། །འགྱོད་ཀྱང་ནོར་གྱིས་ཉོ་རྒྱུ་ནི་མི་འདུག །ཅེས་པ་མཐར་ཐུག་རེ་ས་དམ་པའི་ལྷ་ཆོས་ལས་མེད་པར་བསྟན་པ་ཡིན། མཐར་ཐུག་གི་དོན་ཆོས་ཉིད་ཟབ་མོའི་གནད་ལ་སྦྱངས་ནས་ཕྱིན་ཆད་འཁོར་བ་འཁྱམས་མི་དགོས་པ་མ་ཟད་གཞན་སེམས་ཅན་འདྲེན་ཐུབ་པའི་གནད་ཤེས་པར་བྱ་དགོས་པ་དང་། གཉེན་ཉེ་བ་དང་འདུན་གྲོས་བྱེད་ས་ཐམས་ཅད་ནི་ལྕང་སྡོང་ཞིག་གི་ཁ་ལ་བྱིའུ་ཆུང་འདུས་པ་དང་འདྲ་བར། སྐབས་ཤིག་འཛོམས་ཀྱང་ཡུན་རིང་མི་བརྟན་པར་རང་རང་སོ་སོའི་གནས་སུ་འཕུར་བ་ལྟར་ནམ་གྱེས་སམ་ནམ་ཁ་འབྲལ་བར་མི་ཤེས་པས། གཉེན་བཤེས་ལ་གདུང་བའི་སེམས་ཀྱི་འཁྲི་བ་དང་འབྲེལ་ཐག་ཆོད་ཅིག སྐྱེས་བུའི་ཚེ་སྲོག་མི་རྟག་པ་ནི་དཔེ་རྩྭ་ཁའི་ཟིལ་པ་དང་འདྲ་ཞིང་། དེ་ཡང་ཚེ་མི་རྟག་པ་ནི་ཁ་བཤད་ཙམ་མིན་པར་ནམ་འཆི་ཆ་མེད་ཀྱི་ངེས་ཤེས་ནང་ནས་འདྲོངས་ཏེ་འཇིག་རྟེན་འདི་སྣང་གི་བྱ་བ་བྱེད་ཟེར་ན་ཞེ་མེར་བ་ཞིག་དགོས་པས། ཕྱི་བཤོལ་རྟག་འཛིན་ཆེ་བ་ནི་ལོང་མེད་རྒྱུད་ལ་མ་སྐྱེས་པས་ལན་པ་ཡིན། དེས་ན་ཚེ་མི་རྟག་པ་ལ་སྦྱོང་སྟེ་བསྒོམས་ན། སྒོམ་སྒྲུབ་གང་བྱེད་དགོས་ཀྱང་འགྲུབ་པ་ཡིན་པས་ཆོས་ལ་རྩོལ་བ་དྲག་ཏུ་སྐྱེད་པ་སྟེ། འདིར་ཐོས་བསམ་མི་གསུང་པར་སྒོམ་སྒྲུབ་གསུངས་པ་ནི་ཐ་མའི་གནད་ལ་སྒོམ་སྒྲུབ་གཙོ་ཆེ་བ་དང་ཐོས་བསམ་ཡང་སྒོམ་སྒྲུབ་ཀྱི་ཆེད་དུ་ཡིན་པར་བསྟན་པ་དང་། སྒོམ་སྒྲུབ་ལ་བརྟེན་ནས་འབྲས་བུ་ཉམས་ལེན་གྱི་རྩལ་ཤུགས་རྒྱས་ཞིང་བརྟན་པ་ཐོབ་པ་ནི་ཤུགས་ཀྱིས་བསྟན་པ་ཡིན་ནོ། །སྨྲ་བ་མང་པོའི་གཏམ་བཤད་མང་དྲགས་ན་འཁྲུལ་བའི་དགྲ་བོ་བསྐྱེད་པ་ཡིན་པས། ངག་འཁྱལ་བྲེ་མོའི་གཏམ་ཆགས་སྡང་སློང་བར་བྱེད་པའི་གཏམ་མ་སྨྲ་བར་ངག་བསྡམས་ནས་སྨྲ་བཅད་གྱིས་ཤིག ཆོས་ཟབ་མོ་སྒྲུབ་པ་ནི་རྒྱ་མཚོའི་གླིང་ནས་ནོར་བུ་ལེན་པ་དང་འདྲ་བས་ན་རྫོགས་ཆེན་གྱི་གདམས་ངག་ཆིག་བརྒྱུད་སྙན་ནས་སྙན་དུ་བརྒྱུད་པའི་གདམས་ངག ལྐུགས་པ་དང་འདྲ་བའི་སྣོད་ངན་ལ་ལྷུག་པར་སྤེལ་བར་མི་བྱ། འགྲོགས་པའི་ཡུན་རིང་ན་སངས་རྒྱས་ལ་སྐྱོན་མེད་ཀྱང་། རྨོངས་པ་མ་རིག་པས་བསྒྲིབས་པའི་དབང་གིས་སངས་རྒྱས་ལ་ཡང་སྐྱོན་ཡོད་པར་མཐོང་བ་དཔེ་ལེགས་སྐར་དང་ལྷས་སྦྱིན་ལྟ་བུ་ཡིན་ན། གང་ཟག་ཕལ་བ་སྐྱོན་ཅན་དང་མཉམ་དུ་བསྡད་དུས་གཅིག་གིས་གཅིག་ལ་སྐྱོན་མཐོང་བ་ཡིན་པས། མི་གཞན་རྣམས་དང་གནས་མལ་གཅིག་མི་བྱ་ཞིང་འགྲོགས་ཡུན་མི་རིང་བར་བྱེད་པ་སྟེ། འདི་དག་སྙིང་གཏམ་མཆོག་ཡིན་གུས་པས་ཉོན་ལ་དང་དུ་ལོངས་ཤིག་ཅེས་སོ།།
༡༡༤ ཆོས་བྱེད་རྣམས་ཀྱི་དུས་ཚོད་རྣམ་དྲུག་བསྟན་པ།
ཆོས་བྱེད་རྣམས་ཀྱི་དུས་ཚོད་རྣམ་དྲུག་ནི།།
མཚན་ལྡན་བླ་མ་རྣམས་དང་ཕྲད་པའི་ཚེ།།
སྤྲོས་པ་གཅོད་པའི་དུས་ཡིན་ཐེ་ཚོམ་དྲིས།།
རྐྱེན་ངན་ཡུལ་དང་རིག་པ་ཕྲད་པའི་ཚེ།།
ཉམས་ལེན་བསྲེ་བའི་དུས་ཡིན་རྩལ་སྦྱོང་གྱིས།།
ཟབ་མོའི་སྙན་བརྒྱུད་མན་ངག་རྙེད་པའི་ཚེ།།
འཁྲུལ་བ་འཇིག་པའི་དུས་ཡིན་ཐོག་ཏུ་ཁོལ།།
བརྩོན་འགྲུས་དྲག་པོས་སྒྲུབ་ལ་འབད་པའི་ཚེ།།
བར་ཆད་འོང་བའི་དུས་ཡིན་བདུད་ལ་བརྟག།
སྒྲུབ་པའི་མཐར་ཕྱིན་དངོས་གྲུབ་འོང་བའི་ཚེ།།
བདུད་ཀྱི་བར་ཆད་འོང་བས་ཤིན་ཏུ་གཟབ།།
གནས་ལུགས་དོན་ལ་ལྟ་བའི་རྩལ་སྦྱོང་ཚེ།།
གོལ་སྒྲིབ་འོང་བའི་དུས་ཡིན་བླ་མ་བསྟེན།།
འདི་དག་ཟབ་མོའི་གནད་ཡིན་ཡིད་ལ་ཟུངས།།
ཞེས་གསུངས་པ་སྟེ། ཆོས་བྱེད་པ་རྣམས་ཀྱི་དུས་ཚོད་ཤོར་མི་རུང་བ་རྣམ་པ་དྲུག་ནི། མཚན་ཉིད་དང་ལྡན་པའི་དགེ་བའི་བཤེས་གཉེན་བླ་མ་དམ་པ་རྣམས་དང་ཕྲད་པར་དཀའ་བས། ད་རེས་ལན་གཅིག་ཕྲད་པའི་སྐབས་སུ་སྤྲོས་པའམ་མི་ཤེས་པའི་ཐེ་ཚོམ་གྱི་སྒྲོ་འདོགས་གཅོད་པའི་དུས་ཡིན། དེས་ན་ཐེ་ཚོམ་གྱི་དྲི་བ་ཡོད་ན་དྲིས་ལ་བརྡར་ཤ་ཆོད་ཅིག རྐྱེན་ངན་ཐོག་བབས་ཀྱིས་ཡུལ་དང་རིག་པ་ཕྲད་པའི་དུས་སུ། རྐྱེན་ངན་ལམ་དུ་བསླངས་ནས་རིག་པ་བོགས་འདོན་པའི་ཉམས་ལེན་གྱི་གནད་ལ་བསྲེ་བའི་དུས་ཡིན་པས། རིག་པའི་རྩལ་སྦྱོང་སྣང་རིག་ངོས་བཟུང་དང་བྲལ་བ་ཡུལ་སྣང་ཐུག་ཕྲད་ཀྱི་ཉམས་ལེན་ལ་བརྩོན་པར་གྱིས་ཤིག གལ་ཏེ་ལས་དང་པོ་བའི་གང་ཟག་ཡིན་ན་སྣང་བ་བསླུ་སྐྱེན་རིག་པ་ཅོལ་ཆུང་བས་རྐྱེན་ཁར་འཆོལ་བ་ལ་གཟབ་དགོས་པ་དང་། བླ་མ་དམ་པ་ལས་ཞལ་ནས་སྙན་དུ་བརྒྱུད་པའི་མན་ངག་ཟབ་མོ་དང་ཕྲད་ནས་རྙེད་པའི་ཚེ། འཁྲུལ་བ་འཇིག་པར་བྱེད་པའི་དུས་ཡིན་པས་ཉམས་ལེན་གནད་ཐོག་ཏུ་ཁོལ་ཅིག བརྩོན་འགྲུས་དྲག་པོས་སྒྲུབ་ལ་འབད་པའི་དུས་སུ་བར་ཆད་འོང་བ་ཡིན་ཏེ། བརྩོན་འགྲུས་མ་ཐུབ་ནས་རང་རྒྱུད་ཐ་མལ་དུ་གནས་དུས་བདུད་ཀྱི་དབང་དུ་གྱུར་ཚར་བ་ཡིན་པས། དེ་ལ་བདུད་ཀྱི་བར་ཆད་བྱེད་དགོས་པ་མིན་པའི་ཕྱིར། དེས་ན་སྒྲུབ་པ་ལ་འབད་པའི་ཚེ། བར་ཆད་ཡོང་བའི་དུས་ཡིན་པས། འཕེལ་འགྲིབ་ཉམས་ཀྱི་རྟགས་དང་། མི་འགྱུར་གསང་བའི་རྟགས་དང་། བར་ཆད་བདུད་ཀྱི་རྟགས་རྣམས་གང་ཡིན་ལེགས་པར་བརྟགས་ནས་འབྱེད་དགོས། སྒྲུབ་པ་བྱས་ནས་གྲུབ་པའི་འབྲས་བུ་མཐར་ཕྱིན་ནས་དངོས་གྲུབ་བྱུང་བའི་ཚེ། ཆོས་ཟབ་ཙ་ན་ནག་པོའི་བདུད་ཀྱང་ཟབ་ཅེས་པ་ལྟར་དུ། བདུད་དགའ་རབ་དབང་ཕྱུག་གིས་རྒྱལ་བའི་གདུང་འཛིན་པ་ཞིག་ཡོང་བར་འདུག་བསམས་ཕྲག་དོག་གིས་བར་ཆད་རྩོམ་པ་བྱེད་པས། དེ་དུས་བླ་མའི་མན་ངག་དྲན་པར་བྱས་ནས་ཤིན་ཏུ་གཟབ་པར་བྱ་བ་དང་། ཆོས་ཉིད་བསམ་གྱིས་མི་ཁྱབ་པའི་གནས་ལུགས་ཟབ་མོའི་དོན་ལ་ལྟ་བའི་རྩལ་སྦྱོང་བའི་ཚེ། གོལ་ཤོར་ནོར་གསུམ་གྱི་འཕྲང་ལས་བརྒལ་དགོས་པས་གོལ་སྒྲིབ་འོང་བའི་དུས་ཡིན། དེ་དུས་བླ་མ་བསྟེན་ནས་གེགས་སེལ་གྱི་གདམས་ངག་ཞུ་དགོས་པ་སྟེ། འདི་དག་ཟབ་མོའི་གནད་ཀྱི་ཞལ་གདམས་ཡིན་པས་ཡིད་ལ་ངེས་པར་ཟུངས་ཤིག་ཅེས་པའོ།།
༡༡༥ ཚུལ་བཞིན་བསྒྲུབ་པའི་བྱ་དགོས་རྣམ་དྲུག་བསྟན་པ།
ཚུལ་བཞིན་བསྒྲུབ་པའི་བྱ་དགོས་རྣམ་དྲུག་ནི།།
ངན་སྤྱོད་འགོ་ཅན་མི་དང་འགྲོགས་མི་བྱ།།
བཟང་སྤྱོད་བསླབ་དཀའ་བཤེས་གཉེན་བསྟེན་པར་བྱ།།
སྣང་བ་འབྲིད་མཁས་ཡུལ་ལ་མ་ཡེངས་བྱ།།
རིག་པ་ཅོལ་ཆུང་འཁྲུལ་ཕྱིར་མ་སོང་བྱ།།
ཆགས་སྡང་དོས་དྲག་ཕྱོགས་རིས་མ་སོང་བྱ།།
འཁྲུལ་སྣང་འདྲིས་སླ་ཞེན་ཆགས་རྩད་གཅོད་བྱ།།
ཞེས་གསུངས་པ་སྟེ། ཚུལ་བཞིན་དུ་བསྒྲུབ་དགོས་པའི་བྱ་བ་རྣམ་པ་དྲུག་ནི། སོ་སོ་སྐྱེ་བོ་ཐ་མལ་པ་དེ་འཁོར་བའི་གནས་སུ་འཁྱམས་ཡུན་རིང་ཞིང་འཁྲུལ་སྣང་གི་བག་ཆགས་འཐུག་དྲགས་པའི་དབང་གིས་ངན་སྤྱོད་དང་ཕྲད་ཚེ་ཆུ་ཐུར་བབས་པ་བཞིན་དུ་འཇུག་ཅིང་། རིམས་ནད་བཞིན་དུ་འགོ་སླ་བ་ཡིན་པས། དང་པོ་ཉིད་ནས་དེ་འདྲའི་མི་དང་མི་འགྲོག་པར་ཐག་རིང་བར་བྱ་བ་དང་། བཟང་སྤྱོད་ནི་བསླབ་ཀྱང་ཤེས་དཀའ་བས་ངན་པའི་མི་དང་མི་འགྲོག་པས་མ་ཚད་བཤེས་གཉེན་དམ་པ་ལ་བསྟེན་པར་བྱ་བ་དང་། ཕྱིའི་འདོད་ཡོན་གྱི་སྣང་བ་འདི་བསླུ་བྲིད་བྱེད་པར་མཁས་པས་ཡུལ་ལ་མ་ཡེངས་བར་བྱ་དགོས་པ་ལས། མིག་གཟུགས་ལ་ཆགས་ན་ཕྱེ་ལེབ་མར་མེའི་འོད་ལ་ཆགས་པ་ལྟ་བུ་རུ་འགྱུར་བ་ལ་སོགས་པ་ཡིན་པས་སོ། །ཐ་མལ་པའི་རིག་པ་འདི་ཅོལ་ཆུང་བ་ཡིན་པས། བསླབ་པ་ཆུང་རིམ་ནས་བསྲུངས་ཏེ་འཁྲུལ་བའི་ཡུལ་ཕྱིར་མ་སོང་བར་བྱ། ཆགས་སྡང་ཤུགས་ཆེ་ནས་དོས་དྲག་པོར་སོང་ན་དེའི་དབང་གིས་ཕྱོགས་རིས་ཅན་དུ་འགྲོ་བས་དེ་ལྟར་མ་སོང་བར་བྱ་བ་ལས། ཆོས་ལ་ཕྱོགས་རིས་བྱས་ན་ཆོས་སྤོང་གི་ལས་བསགས་པ་ལ་སོགས་པའི་ཉེས་པ་ཡོང་བ་ཡིན་ཕྱིར། འཁྲུལ་སྣང་ཚུལ་མིན་ཡིད་བྱེད་ཀྱི་ཀུན་རྟོག་དེ་འདྲིས་སླ་བས་དེ་ལ་ཞེན་ཅིང་ཆགས་པ་རྩད་ནས་གཅད་པར་བྱ་དགོས་མ་གཏོགས་ངན་རྟོག་དེས་སྣ་ཁྲིད་ནས་ནོར་བ་ངན་པ་ཡོང་བ་ཡིན་ནོ།།
༡༡༦ ཐ་མ་འགྱོད་པ་མེད་པའི་ཆོས་དྲུག་བསྟན་པ།
ཐ་མ་འགྱོད་པ་མེད་པའི་ཆོས་དྲུག་ནི།།
ངོ་ཚ་ཁྲེལ་འཛེམ་ལྡན་པས་ཤི་ཡང་འགྱོད་པ་མེད།།
མི་དགེ་སྡིག་པ་མ་བྱས་ཤི་ཡང་འགྱོད་པ་མེད།།
ཆོས་ཕྱོགས་ཟས་ནོར་བཏང་བས་ཤི་ཡང་འགྱོད་པ་མེད།།
བསླབ་གསུམ་གཙང་མ་བསྲུངས་པས་ཤི་ཡང་འགྱོད་པ་མེད།།
དགེ་ལ་རྟག་ཏུ་བརྩོན་པས་ཤི་ཡང་འགྱོད་པ་མེད།།
རང་སེམས་གནོང་འགྱོད་མེད་པས་ཤི་ཡང་འགྱོད་པ་མེད།།
འདི་དག་རྣམས་དང་ལྡན་པར་བྱ་བ་གཅེས།།
ཞེས་གསུངས་པ་སྟེ། ཐ་མ་འགྱོད་པ་མེད་པའི་ཆོས་དྲུག་ནི། རང་ངོས་ནས་ངོ་ཚ་བ་དང་གཞན་ངོས་ནས་ཁྲེལ་ཡོད་པ་དང་ལྡན་པས་ནི་དལ་འབྱོར་དོན་ཡོད་པར་བྱས་པས་དེ་འདྲ་དེ་ནི་ཤི་ཡང་འགྱོད་པ་མེད་པ་ཡིན་པ་དང་། །མི་དགེ་སྡིག་པ་མ་བྱས་པ་ཡང་ཤི་ཡང་འགྱོད་པ་མེད་པ་སྟེ། དེ་ཡང་སྡིག་པ་གཏན་ནས་བྱེད་མ་མྱོང་བ་ནི་དཀའ་ཡང་། སྡིག་པ་བྱས་པ་བཤགས་ཤེས་པའི་མི་ཡང་སྡིག་པ་མ་བྱས་པ་དང་ཕྱོགས་མཚུངས་པ་ཡིན་ནོ། །ཆོས་ཀྱི་ཕྱོགས་ལ་ཟས་ནོར་བཏང་བ་དག་གིས་ཕྱི་མར་ཁྱེར་རྒྱུའི་རྒྱགས་ཆས་ཀྱི་ཉེར་བསྡོགས་གྲུབ་ཟིན་པས་ཤི་ཡང་འགྱོད་པ་མེད་པ་ཡིན་པ་དང་། ལར་རྒྱུ་ནོར་ཆོས་ཕྱོགས་སུ་བཏང་ནས་སྤྲང་པོར་གྱུར་པ་ཞིག་མི་སྲིད་པས་མ་ཚད་དེའི་རྐྱེན་གྱིས་ཕྱུག་ཆེས་ནས་རྒྱུ་བདག་པོ་མ་ཐུབ་པའི་ལོ་རྒྱུས་ཡོད་པ་ཡིན། གལ་ཏེ་ཆོས་ཕྱོགས་ལ་བཏང་ནས་རྒྱུ་མེད་དུ་ཆགས་ཀྱང་དེ་བས་ལྷག་པ་ཡིན་ཏེ། ནོར་ལས་ནོར་གྱི་སྙིང་པོ་བླངས་ཟིན་པ་ཡིན་པའི་ཕྱིར། དེས་ན་གྲྭ་བ་བན་རྒན་ཞིག་ཡིན་ཚེ་ལྷག་ཏུ་རྒྱུ་ནོར་ཆོས་ཕྱོགས་སུ་གཏོང་དགོས་པ་ཡིན། ཤི་དུས་ཤུལ་ན་ཁྲི་མང་པོའི་རྩ་བ་ཡོད་ན་བཙོག་པ་ཡིན། དེས་ན་ཟས་ནོར་ཆོས་ཕྱོགས་ལ་གཏོང་པ་ལས་དོན་མེད་དུ་འཕྲོ་བརླག་བྱེད་མི་རུང་། སོ་བྱང་སྔགས་ཀྱི་བསླབ་གསུམ་གཙང་མ་བསྲུངས་པས་གནས་སྐབས་སུ་མཐོ་རིས་ཀྱི་ཡོན་ཏན་བདུན་གྱིས་ཕྱུག་ཅིང་། མཐར་ཐུག་ཐར་བ་དང་ཐམས་ཅན་མཁྱེན་པའི་གོ་འཕང་ཐོབ་པ་ཡིན་པས་ཤི་ཡང་འགྱོད་པ་ཅིའི་ཕྱིར་ཡོད་དེ་མེད་དོ། །དུས་རྟག་ཏུ་དགེ་སྦྱོར་ལ་བརྩོན་པས་ཤི་ཡང་འགྱོད་པ་མེད་དེ་འདི་དང་ཤི་མ་བར་དོ་གསུམ་གང་རུང་ལ་ཐར་བའི་རིགས་ཅན་ཡིན་པས་སོ། །རྒྱལ་བ་སྲས་དང་བཅས་པ་ཡེ་ཤེས་ཀྱི་སྤྱན་དང་ལྡན་པ་དེ་དག་གི་མདུན་ནས་གནོང་འགྱོད་མེད་པ་དང་། ཐུགས་མཁྱེན་པའི་བདག་པོ་བླ་མ་དམ་པ་ད་ལྟ་ཞལ་མཇལ་ཡང་ཁྱོད་ཀྱིས་དེ་དུས་དྲན་ལུགས་ལས་ལུགས་མ་ལེགས་པར་གསུང་རྒྱུ་མེད་པར་རང་བློ་རང་ལ་ཁེལ་བ་ཞིག་བྱུང་ན་རང་སེམས་གནོང་འགྱོད་མེད་པ་ཡིན་པས་ཤི་ཡང་འགྱོད་པ་མེད་པ་སྟེ། དེ་ཡང་རབ་ལྷ་དང་བླ་མའི་མདུན་ན་མི་གནོང་མི་འགྱོད། འབྲིང་རང་སེམས་གཙང་མའི་ངོས་ནས་མི་གནོང་མི་འགྱོད། ཐ་མ་གྲོགས་ཀྱི་སྔོན་ནས་མི་གནོང་མི་འགྱོད་པ་ཞིག་དགོས་པ་ཡིན། འགྱོད་མེད་ཀྱི་བྱ་བ་འདི་དག་འགྲུབ་པ་དང་ལྡན་པར་བྱ་བ་ནི་ཤིན་ཏུ་གཅེས་སོ།།
༡༡༧ འབྲིང་གི་བྲོད་པ་དྲུག་དང་ལྡན་པ་བསྟན་པ།
འབྲིང་གི་བྲོད་པ་དྲུག་དང་ལྡན་པ་ནི།།
དཀོན་མཆོག་བསྟེན་པས་འཁོར་བ་སྐྱོབ་རེ་བྲོད།།
ཚོགས་གཉིས་བསགས་པས་འདི་བས་བདེ་སྟེ་བྲོད།།
དམ་ཚིག་བསྲུངས་པས་མཁའ་འགྲོས་བསུ་སྟེ་བྲོད།།
ཡི་དམ་བར་དོར་ལམ་སྣ་འདྲེན་ཏེ་བྲོད།།
བླ་མ་མཆོག་དང་འདུ་འབྲལ་མེད་དེ་བྲོད།།
སེམས་ཉིད་གོམས་པས་འོད་གསལ་འཆར་ཏེ་བྲོད།།
འདའ་དཀའ་འཆི་བྲོད་གདམས་པ་ཟབ་མོ་ཡིན།།
ཞེས་གསུངས་པ་སྟེ། བྲོད་ཅེས་པ་ནི་དངངས་སྐྲག་མེད་པའི་དཔའ་གདེང་དང་སྤོབས་པ་ཡོད་པ་ལ་གོ་ཞིང་། བླ་མ་དཀོན་མཆོག་གསུམ་པོ་བསྟེན་པས་ན་འཁོར་བ་ལས་སྐྱོབ་ཏུ་རེ་བ་ལྟར་དུ་བྲོད་པ་སྟེ་གདེང་ཡོད་པ་ཡིན། བསོད་ནམས་ཡེ་ཤེས་ཀྱི་ཚོགས་གཉིས་བསགས་པས་རྒྱུ་སྔོན་སོང་གི་འབྲས་བུ་ཚེ་འདི་བས་ཕྱི་མར་བདེ་སྟེ། བདེ་ལེགས་ཀྱི་གནས་སུ་འགྲོ་བའི་བྲོད་པ་ཡོད་པ་དང་། སྔགས་ཀྱི་དམ་ཚིག་བསྲུངས་པས། པདྨའི་ཕོ་ཉ་མཁའ་འགྲོ་གར་མཁན་མས༔ མངོན་སུམ་ལག་པའི་ཁུ་ཚུར་ནས་བཟུང་ནས༔ མཁར་ཆེན་བཟའ་དང་གུ་ཎ་ནཱ་ཐ་ལྟར༔ བདག་ཀྱང་པདྨ་འོད་དུ་འཁྲིད་པར་ཤོག༔ ཅེས་སྨོན་ལམ་བཏབ་པ་བཞིན་དུ་ཤི་མ་ཤི་གཉིས་ཀྱི་ས་མཚམས་ནས་མཁའ་འགྲོས་བསུས་ཏེ་ཞིང་ཁམས་སུ་བགྲོད་པའི་བྲོད་པ་སྟེ་དཔའ་གདེང་ཡོད་པ་དང་། ཡི་དམ་གྱི་བསྐྱེད་རིམ་གསལ་སྣང་བརྟན་པས་བར་དོར་ཡི་དམ་དེ་ཉིད་ཀྱི་སྐུའི་རྣམ་པས་ལམ་སྣ་འདྲེན་ཏེ་སྐྲག་མི་དགོས་པའི་བྲོད་ཚད་ཡོད་པ་དང་། རང་སེམས་བླ་མར་ཤེས་པས་བླ་མའི་ཐུགས་དུས་གསུམ་སངས་རྒྱས་ཐམས་ཅད་ཀྱི་དགོངས་པ་དང་དབྱེར་མེད་པ་དེ་ཉིད་དང་རང་སེམས་བསྲེས་ནས་ཐུགས་ཡིད་དབྱེར་མེད་ཀྱི་བླ་མའི་རྣལ་འབྱོར་ལ་གོམས་ན། བླ་མའི་སྐུ་གང་ན་བཞུགས་དང་མི་བཞུགས་ཀྱི་ཁྱད་པར་མེད་པས་སྐད་ཅིག་ཀྱང་འབྲལ་བར་མེད་པ་དེས་ན་བྲོད་པ་སྟེ་གློ་བ་སྐྱིད་སེམས་འཚེངས་ཞེས་པ་ཞིག་ལ་གོ་ནའང་ཆོག་གོ །སེམས་ཉིད་འོད་གསལ་གྱི་གནད་ལ་གོམས་པས་འོད་གསལ་རང་ངོ་ལ་འཆར་ཏེ་བྲོད་པ་སྐྱེ་བ་ཡིན་པ་དང་། འདའ་དཀའ་འཕོ་བའི་གདམས་པ་ཡོད་ན་འཆི་བྲོད་ཀྱི་གདམས་པ་ཟབ་མོ་ཡིན་ལ། དེ་བཞིན་དུ་མདོ་ཕྱོགས་ཀྱི་རྗེས་དྲན་དྲུག་དང་སྔགས་ཀྱི་བར་དོའི་གདམས་པ་ཐམས་ཅད་ཀྱང་དཔེ་དེ་བཞིན་ཡིན་ནོ།།
༡༡༨ རྣལ་འབྱོར་རབ་ཀྱི་འཆི་རྒྱུ་མེད་དྲུག་བསྟན་པ།
རྣལ་འབྱོར་རབ་ཀྱི་འཆི་རྒྱུ་མེད་དྲུག་ནི།།
རང་རིག་དགོངས་པ་ཡེ་ནས་འཆི་རྒྱུ་མེད།།
རང་བྱུང་ཡེ་ཤེས་ཡེ་ནས་འཆི་རྒྱུ་མེད།།
འོད་གསལ་ཆོས་ཉིད་ཡེ་ནས་འཆི་རྒྱུ་མེད།།
ངར་འཛིན་རིག་བྲལ་ཡེ་ནས་འཆི་རྒྱུ་མེད།།
རྒྱུ་འབྲས་ལ་དོར་ཡེ་གྲོལ་འཆི་རྒྱུ་མེད།།
རེ་དོགས་གཉིས་མེད་ནམ་མཁའ་འཆི་རྒྱུ་མེད།།
དེ་ལྟར་རྟོགས་ན་འཆི་བདག་བདུད་དང་བྲལ།།
ཞེས་གསུངས་པ་སྟེ། རྣལ་འབྱོར་རབ་ཀྱི་དགོངས་རྒྱུད་ལ་མངའ་བའི་འཆི་རྒྱུ་མེད་པ་རྣམ་པ་དྲུག་ནི། རང་རིག་གི་དགོངས་པ་དུས་གསུམ་སྐྱེ་འགག་དང་བྲལ་བ་ཡེ་ནས་རང་རྒྱུད་ལ་ཡོད་པ་དེ་ཉིད་རྟོགས་པ་ནི་ཡེ་ནས་འཆི་རྒྱུ་མེད་པ་དང་། རང་བྱུང་གི་ཡེ་ཤེས་རྒྱུ་རྐྱེན་དང་བྲལ་བ་ཡེ་ནས་སྐྱེ་འགག་གནས་གསུམ་དང་བྲལ་བས་འཆི་རྒྱུ་མེད་པ་དང་། འོད་གསལ་གྱི་ཡེ་ཤེས་ཆོས་ཉིད་མཚན་མ་དང་བྲལ་བ་ནམ་མཁའ་ལྟ་བུ་ལ་ཡེ་ནས་འཆི་རྒྱུ་མེད་པ་དང་། རིག་བྱ་རིག་བྱེད་དང་བྲལ་བའི་རིག་པ་ལ་ཡེ་ནས་འཆི་རྒྱུ་མེད་པ་དང་། རྒྱུ་འབྲས་ལ་དོར་ཅིང་སྤང་བླང་མཚན་མ་དང་བྲལ་བའི་དོན་རྟོགས་ན་ཡེ་གྲོལ་ཡིན་ལ། ཡེ་གྲོལ་ལ་གསར་དུ་གྲོལ་འཁྲུལ་མེད་པས་འཆི་རྒྱུ་མེད་པ་དང་། རེ་དོགས་གཉིས་སུ་མེད་པ་འདུས་མ་བྱས་སྐུ་ནམ་མཁའ་ལྟ་བུ་ལ་འཆི་རྒྱུ་མེད་པའམ། རེ་དོགས་བྲལ་བའི་བྱ་བྲལ་ནམ་མཁའི་རྣལ་འབྱོར་གྱི་དགོངས་པ་ཟང་ཐལ་ཆེན་པོ་ལ་ཡེ་ནས་འཕོ་འགྱུར་མེད་པས་ན་དེ་ལ་འཆི་རྒྱུ་མེད་པ་སྟེ། དེ་ལྟར་རྟོགས་ན་འཆི་བདག་གི་བདུད་དང་བྲལ་བ་ཡིན་ནོ།།
༡༡༩ མ་རྟོགས་དངོས་པོར་བཟུང་བའི་སྐྱོན་དྲུག་བསྟན་པ།
མ་རྟོགས་དངོས་པོར་གཟུང་བའི་སྐྱོན་དྲུག་ནི།།
རང་ལ་ཡོད་པ་བཞག་ནས་གཞན་དུ་བཙལ།།
སྒོམ་ཆེན་གནས་ལུགས་མ་ཤེས་མཚན་མས་བཅིངས།།
ཡུལ་སྣང་བརྫུན་པར་མ་ཤེས་བདེན་པར་འཛིན།།
དབྱིངས་གཅིག་གནས་ལུགས་མ་རྟོགས་སོ་སོར་འཛིན།།
རང་རིག་ངོ་བོ་མ་ཤེས་མཐོ་དམན་བགྲོད།།
འཁྲུལ་བའི་མངོན་ཞེན་མ་ཆོད་བདུད་ཀྱིས་བསླུས།།
མ་རྟོགས་ལོག་པའི་སྐྱོན་རྣམས་བརྟགས་ཏེ་སྤང༌།།
ཞེས་གསུངས་པ་སྟེ། མ་རྟོགས་པར་དངོས་པོ་དང་མཚན་མར་གཟུང་བའི་སྐྱོན་དྲུག་ནི། སངས་རྒྱས་རང་ལ་ཡོད་པ་དེ་རང་ངོ་ཨེ་ཤེས་མ་བལྟས་པར་བཞག་ནས་གཞན་དུ་བཙལ་བ་སྟེ་ས་ལམ་གཞན་ནས་འཚོལ་བའི་ངལ་བ་བྱས་པ་དང་། མིང་སྒོམ་ཆེན་ཡིན་ཡང་དོན་གནས་ལུགས་དོན་གྱི་བཞུགས་ཚུལ་དེ་མ་ཤེས་ནས་མཚན་མའི་རྣམ་རྟོག་གིས་བཅིངས་ནས་གྲོལ་བའི་དུས་མེད་པའི་སར་ལྷུང་བ་དང་། ཕྱིའི་ཡུལ་སྣང་ཐམས་ཅད་མེད་སྣང་སྒྱུ་མའི་རང་གཟུགས་རྫུན་པར་བསླུ་བའི་ཆོས་ཅན་ཡིན་པར་མ་ཤེས་པས་བདེན་པར་འཛིན་པའི་གཟུང་འཛིན་གྱི་སྒྲོག་ལས་མ་གྲོལ་བ་དང་། དབྱིངས་དེ་བཞིན་ཉིད་ལ་གཅིག་མ་གཏོགས་མེད་པ་གཉིས་མེད་ཐིག་ལེ་ཆེན་པོར་རོ་གཅིག་པ་ཡིན་ཡང་གནས་ལུགས་མ་རྟོགས་པས་དེ་སོ་སོར་འཛིན་ནས་འཁྲུལ་བ་ཡིན་པ་དང་། རང་རིག་གི་ངོ་བོ་མ་ཤེས་ནས་མཐོ་དམན་གྱི་གནས་སུ་བགྲོད་པར་བྱེད་པའི་ལམ་ཞིག་གཞན་ནས་འཚོལ་བ་དང་། ཕྱི་འཁྲུལ་སྣང་སྙེམས་བྱེད་ཀྱི་བདུད་དེ་བདུད་ཀྱི་རྩ་བ་ཡིན་ལ་དེ་མ་ཆོད་ན་བདུད་ཀྱིས་བསླུས་ནས་མ་རྟོགས་འཁོར་བར་འཁྱམས་པ་ཡིན་པས། གནས་ལུགས་ཀྱི་དོན་མ་རྟོགས་པའི་ལོག་པའི་སྐྱོན་རྣམས་བརྟགས་ཏེ་སྤང༌བར་བྱ་དགོས་སོ། །འདི་རྣལ་འབྱོར་བ་རབ་གོམས་པ་ཀློང་དུ་གྱུར་བ་ཞིག་མིན་ན་ལས་དང་པོ་པ་ཞིག་ལ་ད་རུང་གནས་ལུགས་ཀྱི་དོན་མ་དགོས་ངེས་འབྱུང་རྣམ་དག་ཅིག་ཀྱང་སྐྱེ་མེད་པ་ཡིན་པས་རིམ་གྱིས་བསླབ་དགོས་པའི་གནས་ཡིན་ཡང་། དེའི་ཕྱོགས་གོ་བའི་དགོས་པ་དང་ལྡན་པས་དབང་པོ་རབ་འབྲིང་ཐ་གསུམ་དང་སྦྱར་ནས་གསུངས་སོ།།
༡༢༠ ཕྱིར་མི་ལྡོག་པའི་གདམས་ངག་རྣམ་དྲུག་བསྟན་པ།
ཕྱིར་མི་ལྡོག་པའི་གདམས་ངག་རྣམ་དྲུག་ནི།།
བླ་མ་བསྟེན་པས་མི་ཆོས་ཕྱིར་མི་ལྡོག།
ཡུལ་གྱི་ཉེས་བསམས་མི་ཆོས་ཕྱིར་མི་ལྡོག།
བདེ་སྡུག་བསམས་པས་མི་ཆོས་ཕྱིར་མི་ལྡོག།
འཇིག་རྟེན་ཉེས་བསམས་མི་ཆོས་ཕྱིར་མི་ལྡོག།
འཁྲུལ་བར་བལྟས་པས་མི་ཆོས་ཕྱིར་མི་ལྡོག།
སྡུག་བསྔལ་འདམ་བསམས་མི་ཆོས་ཕྱིར་མི་ལྡོག།
དེ་ལྟར་བསམས་ན་འཇིག་རྟེན་ཆོས་ལས་གྲོལ།།
ཞེས་གསུངས་པ་སྟེ། ལེགས་པའི་ལམ་ལས་ཕྱིར་མི་ལྡོག་པར་བྱེད་པའི་གདམས་ངག་རྣམ་པ་དྲུག་ནི། བླ་མ་མཚན་ཉིད་དང་ལྡན་པ་བསྟེན་པའི་སློབ་མ་དེ་མི་ཆོས་འཁོར་བའི་ཕྱོགས་ལ་ཕྱིར་མི་ལྡོག་པ་དང་། ཡུལ་གྱི་ཉེས་དམིགས་བསམས་ནས་དེ་ཤེས་པ་དག་མི་ཆོས་ཆོས་བརྒྱད་ཀྱི་ཕྱོགས་ལ་ཕྱིར་མི་ལྡོག་པ་དང་། བདེ་སྡུག་གང་ཡང་རྟག་བརྟན་མེད་ཚུལ་བསམས་པས་ན་མི་ཆོས་འཇིག་རྟེན་གྱི་ལོ་འདོད་ལ་ཕྱིར་མི་ལྡོག་པ་དང་། འཇིག་རྟེན་འཁོར་བའི་ཉེས་པ་སྡུག་བསྔལ་འཛིན་འཁྲིའི་གནས་ལྟ་བུ་ཡིན་པར་བསམས་པས་ན་མི་ཆོས་འཇིག་རྟེན་མངོན་ཞེན་ལ་ཕྱིར་མི་ལྡོག་པ་དང་། འཁྲུལ་བ་འཁྲུལ་བར་ཡིན་པར་ཤེས་ནས་འཁྲུལ་བ་འཁྲུལ་བར་བལྟས་ནས་འཁྲུལ་སྣང་བདེན་མེད་དུ་ཤེས་པས་ན་མི་ཆོས་འཇིག་རྟེན་གྱི་བྱ་བ་ལ་ཕྱིར་མི་ལྡོག་པ་དང་། སྡུག་བསྔལ་ནི་འདམ་རྫབ་བཞིན་དུ་བྱིངས་ཤིང་ནུབ་པར་བྱེད་པ། འདམ་གྱིས་རྫས་འཛིན་ཞེས་པ་ལྟ་བུ་ཡིན་པར་བསམས་ནས་ཤེས་པས་ན་མི་ཆོས་འཇིག་རྟེན་ཕྱོགས་ལ་ཕྱིར་མི་ལྡོག་པ་སྟེ། དེ་ལྟར་བསམས་ན་འཇིག་རྟེན་གྱི་ཆོས་ལས་གྲོལ་ནས་འདས་པའི་སར་ཕྱིན་པ་དོན་གྱིས་སྟོན་པའོ།།
༡༢༡ གཉེན་པོའི་མེལ་ཚེ་དྲུག་གིས་བསྐོར་བ་བསྟན་པ།
གཉེན་པོའི་མེལ་ཚེ་དྲུག་གིས་བསྐོར་བ་ནི།།
ཉིན་མཚན་ཚེ་རྐུ་གཉེན་པོའི་མེལ་ཚེ་གྱིས།།
དུག་ལྔས་རྒྱུད་སྲེག་གཉེན་པོའི་མེལ་ཚེ་གྱིས།།
འདོད་པས་མི་ངོམས་གཉེན་པོའི་མེལ་ཚེ་གྱིས།།
དྲག་པོའི་ལས་ལ་གཉེན་པོའི་མེལ་ཚེ་གྱིས།།
དོན་མེད་ལས་ལ་གཉེན་པོའི་མེལ་ཚེ་གྱིས།།
སྒོ་གསུམ་ཅི་སྤྱོད་གཉེན་པོའི་མེལ་ཚེ་གྱིས།།
ཉོན་མོངས་དགྲ་རྐུན་གླགས་སྐབས་རྙེད་མི་འགྱུར།།
ཞེས་གསུངས་པ་སྟེ། གཉེན་པོའི་མེལ་ཚེ་དྲུག་གིས་བསྐོར་དགོས་པ་ནི། ཉིན་ངོ་དཀར་རེ་དང་། མཚན་ངོ་ནག་རེ་རེས་མོས་སུ་བྱུང་ནས་མཚན་རེད་ཅེས་མར་རེ་ཉལ། ཉིན་རེད་ཟེར་དུས་ཡར་རེ་ལང་བའི་ཉིན་མཚན་བར་མ་ཆད་པའི་མཚམས་ནས་མི་ཚེའི་དུས་ཚོད་བརྐུས་པས་གཉེན་པོའི་མེལ་ཚེ་སྟེ་བསྲུང་བར་བྱ་དགོས་ལ། དེ་ཡང་གཏན་དུ་རྐུ་མི་ཤོར་བར་བྱར་མེད་ཀྱང་མི་ཚེ་དོན་ལྡན་བྱེད་པའི་སྒོ་ནས་བསྲུང་དགོས། དེ་ཡང་ལང་ན་ལང་བ་དོན་ལྡན་ཐུན་བཞིའི་རྣལ་འབྱོར་ལ་བསླབ། ཉལ་ན་ཉལ་བ་དོན་ལྡན་རྨི་ལམ་འོད་གསལ་ལ་སྦྱངས། དགེ་སྡིག་དཀར་ནག་གི་རྩིས་གྲངས་བཏབ་ནས་དགེ་བ་གོང་འཕེལ་དུ་གཏང་དགོས་པ་དང་། ཉོན་མོངས་དུག་ལྔས་རྒྱུད་སྲེག་པར་བྱེད་པས་དེ་དང་དེའི་གཉེན་པོའི་མེལ་ཚེ་བྱེད་པ་དང་། འདོད་པ་རྣམས་ནི་ཕུང་ཀྲོལ་སྐྱེད་མཁན་ཡིན་པས་མ་ཚད། དེ་ལ་ཇི་ལྟར་སྤྱོད་ཀྱང་ལན་ཚྭའི་ཆུ་བཞིན་ངོམས་པ་མེད་པ་ཞིག་ཀྱང་ཡིན་པས་གཉེན་པོའི་མེལ་ཚེ་བྱེད་དགོས་པ་ལས། འདོད་པའི་དབང་དུ་ཤོར་ན་སྡུག་བསྔལ་དྲག་པོ་མྱོང་བ་ཡིན་པ་དང་། ཧ་ཅང་ཐལ་དྲགས་པའི་ལས་ཞེས་པའམ་ཡང་ན་ཁྲོས་འཁྲུག་ཅན་གྱི་དྲག་པོའི་ལས་ལ་གཉེན་པོའི་མེལ་ཚེ་བྱེད་དགོས་པ་དང་། ཚེ་འདིའི་མནོག་ཆུང་གི་བྱ་བ་དོན་མེད་ཀྱི་ལས་ལ་དེ་དང་དེའི་གཉེན་པོའི་མེལ་ཚེ་བྱེད་པ་དང་། སྒོ་གསུམ་གྱི་བསམ་སྤྱོད་གང་དང་ཅི་སྤྱོད་ཀྱང་དེ་དང་དེའི་གཉེན་པོའི་མེལ་ཚེ་བྱེད་པ་སྟེ། དེ་དག་དང་མ་བྲལ་ན་ཉོན་མོངས་པའི་དགྲ་རྐུན་གྱིས་གླགས་འཚོལ་བའམ་གནོད་སྐྱེལ་བའི་གོ་སྐབས་རྙེད་པ་མི་འགྱུར་རོ།།
༡༢༢ ཉམས་ལེན་མི་འགྲུབ་འཆོར་ས་རྣམ་དྲུག་བསྟན་པ།
ཉམས་ལེན་མི་འགྲུབ་འཆོར་ས་རྣམ་དྲུག་ནི།།
འཁོས་ཆུང་གང་ཟག་མི་ཚེ་དོན་མེད་འཆོར།།
གྲགས་འདོད་ཅན་དེ་མི་ཚེ་ལོ་འདོད་འཆོར།།
ཟས་སྲེད་ཅན་དེ་ཟས་ཕྱིར་མུག་ལྟོར་འཆོར།།
མི་རྒོད་ནོར་ཅན་ཁེ་སྤོགས་ཚོང་ལ་འཆོར།།
དད་མེད་ཐོས་བསམ་ཆོས་དྲེད་རྒྱུས་ཅན་འཆོར།།
ཐོས་ཆུང་བླུན་སྒོམ་ལོག་པའི་ལམ་དུ་འཆོར།།
འཆོར་བ་དྲུག་པོར་མ་སོང་ཤིན་ཏུ་གཅེས།།
ཞེས་གསུངས་པ་སྟེ། ཉམས་ལེན་མི་འགྲུབ་འཆོར་ས་རྣམ་དྲུག་ནི། འཁོས་ཆུང་གི་གང་ཟག་ནུས་མེད་དེ་ཡིས། ངས་ཅི་ནུས་ངས་ཅི་འགྲུབ་སྙམ་ནས་སེམས་ཞུམ་ཚེ་ཆོས་འཇིག་རྟེན་ཅི་ཡང་མི་འགྲུབ་པ་ཡིན་པས་དེ་འདྲ་བས་ནི་མི་ཚེ་དོན་མེད་དུ་འཆོར་བའམ་ཤོར་བ་ཡིན་པ་དང་། གྲགས་འདོད་ཅན་རྟག་པར་ཆེ་གྲགས་མཐོ་གྲགས་ཀྱི་མིང་ཅན་ཞིག་ཨེ་རེད་བསམ་མཁན་དེ་ནི། ལོ་འདོད་དེ་རྙེད་འདོད་གྲགས་འདོད་ཤ་སྟག་གིས་མི་ཚེ་རྫོགས་ནས་ཟད་པ་ཡིན་པ་དང་། ཟས་ཀྱི་སྲེད་པ་ཧ་ཅང་ཐལ་ཆེ་བ་ཅན་དེ་དག་ཟས་ཀྱི་ཕྱིར་དུ་མུག་ལྟོར་འཆོར་བ་སྟེ། ཧེབ་མུ་གེ་ཁོ་ནའི་ངང་དུ་འདས་ནས་ཉམས་ལེན་མི་འགྲུབ་པར་དུས་ཚོད་ཤོར་བ་ཡིན་པ་དང་། སེམས་མ་དུལ་བའི་མི་རྒོད་ནོར་དང་ལྡན་པ་དེ་ནི་སེམས་ཁ་འཚེང་དུ་མེད་པར། བརྒྱ་ཡོད་ན་ཉིས་བརྒྱ་དང་ཁྲི་ཡོད་ན་འབུམ་ཁ་ཨེ་གང་བསམ་ནས་ཚོང་ཁེ་སྤོགས་འབའ་ཞིག་གི་ཕྱོགས་ལ་བསམ་བློ་གཏོང་ནས་དེ་ཕྱོགས་སུ་འཆོར་བ་ཡིན་པ་སྟེ། ཁྱད་པར་དུ་གྲྭ་བས་ཚོང་བྱེད་མི་ཉན་མ་གཏོགས་བན་ཁོལ་དུ་ལོག་པ་ཡིན། བན་ཁོལ་ཞེས་པ་ནི་བན་མ་རྒན་སྐྱ་སེར་གཉིས་གོ་ཆོད་པ་ཅན་དུ་འགྱུར་བ་དེ་ལ་ཟེར་བ་ཡིན། དེ་ཡང་དཔལ་སྤྲུལ་ཚང་གིས། ཟ་ཆོག་ཚོགས་གྲལ་འགྲིམ་པ་གཞོན་ནུའི་དུས། །སྐྱ་སེར་གཉིས་གོ་ཆོད་པ་བར་དུ་སྟེ། །ཕྱི་ནས་རྒྱ་དབུས་འགྲིམ་པའི་ཚོང་དཔོན་དུ། །ཆས་པ་ཕྱོགས་འདིའི་ལམ་སྲོལ་གཉིས་པ་ལགས། །ཞེས་པ་དེ་ལུང་བསྟན་ཡིན་འདུག་སྙམ་པའི་ཚོད་ལ་ཐོན་ངེས་སོ། །དད་པ་མེད་པའི་མི་དེས་ཐོས་བསམ་བྱེད་ཁུལ་བྱས་ཀྱང་ཆོས་དྲེད་ཆོས་རྒྱུས་ཅན་ངན་པ་རྒྱུས་ཅན་དུ་འཆོར་འགྲོ་བ། དཔེར་ན་སྨན་མ་ཞུ་བ་དུག་ཏུ་ལོག་པ་ལ་སྨན་གྱིས་ཕན་མི་ཐོགས་པ་བཞིན་དུ་ཆོས་དྲེད་དུ་འགྱུར་དུས་ཆོས་ཀྱིས་ཀྱང་ཕན་མི་ཐོགས་པ་ཡིན་པ་དང་། ཐོས་པ་ཆུང་ཆུང་བླུན་པོའི་སྒོམ་བྱེད་མཁན་གྱིས་ཅི་ཡང་མི་འོང་བས་ཐོས་པ་ཆེ་དགོས་ཏེ། དབུ་མ་ཆེན་པོ་ལ་ནི་དཔྱད་པ་དགོས་ཏེ། དཔྱད་གསུམ་དག་པས་སྟོང་ཉིད་གཏན་ལ་འབེབས་དགོས་པའི་ཕྱིར། རྫོགས་པ་ཆེན་པོ་ལའང་ཐོས་བསམ་གྱི་ཤེས་རབ་དགོས་ཏེ། ཀུན་མཁྱེན་འཇིགས་གླིང་གིས་ཁྱད་པར་དུ་དེང་སང་མོས་པས་སྤྱོད་པའི་ས་ཡིན་པས་ཐོས་པ་ཆེ་དགོས་ཞེས་གསུངས་པ་དང་། འཇམ་མགོན་བླ་མས། བླུན་སྒོམ་སེམས་ལས་འདས་པའི་རྫོགས་པ་ཆེ། །ཞེས་གསུངས་པས་ཐོས་པ་མེད་ན་ལྟ་སྒོམ་གཉིས་ཀ་གང་བྱས་ཀྱང་ལོག་པའི་ལམ་དུ་འཆོར་བའི་ཉེན་ཡོད་པས། སྙིང་ནས་ཆོས་ལམ་གཉེར་མཁན་གྱིས་འཆོར་བ་དྲུག་པོ་རུ་མ་སོང་བ་ཞིག་ཤིན་ཏུ་གཅེས་སོ།།
༡༢༣ སྐྱོན་རྣམས་བྱུང་ན་བསལ་ཐབས་ཆོས་དྲུག་བསྟན་པ།
སྐྱོན་རྣམས་བྱུང་ན་བསལ་ཐབས་ཆོས་དྲུག་ནི།།
མོས་གུས་ཤོར་ན་ཡོན་ཏན་དཀའ་བས་སོམས།།
གཡེང་བས་ཁྱེར་ན་རྣམ་རྟོག་གྲོགས་སུ་སློང༌།།
བསྒོམས་ཀྱང་སྐྱེད་མེད་སྣ་ཚོགས་ཐབས་ཀྱིས་ཆུན།།
འབྱུང་འཁྲུགས་ན་ཚ་རྒྱུ་རྐྱེན་འབྲས་བུར་རྟོགས།།
འདུ་བ་ཡལ་ན་ཚོགས་དང་གཏོར་མ་རེམ།།
སེམས་བསྐྱེད་ཤོར་ན་གཉེན་པོའི་བསྐྱར་ལ་བླང༌།།
དེ་ཡིས་གེགས་རྣམས་གང་བྱུང་སེལ་བ་ཡིན།།
ཞེས་གསུངས་པ་སྟེ། གལ་ཏེ་སྐྱོན་རྣམས་བྱུང་ན་དེའི་གེགས་སྐྱོན་བསལ་ཞིང་མ་གོས་ཐབས་ཀྱི་ཆོས་དྲུག་ནི། མོས་གུས་ཇེ་ཆུང་དང་ཇེ་ཞན་དུ་འགྲིབ་ནས་མེད་སོང་ན་མོས་གུས་བྱེད་ས་བླ་མ་ཡིན་པས་བླ་མའི་ཡོན་ཏན་གྱི་ཕྱོགས་ལ་དཀའ་བས་དང་དུ་བླངས་ནས་སེམས་པར་བྱེད་པ་དང་། གཡེང་བས་ཁྱེར་ཤོར་འདུག་བསམས་ན། ཉམས་ལེན་པས་རྣམ་རྟོག་གྲོགས་སུ་སློང༌དགོས་པས། རྣམ་རྟོག་གྲོགས་སུ་བསླངས་ནས་བུད་ཤིང་ཅི་ཙམ་སྣོན་བཞིན་མེ་དེ་ལྟར་འབར་བ་ལྟར་དུ། རྣམ་རྟོག་ཆོས་ཉིད་དུ་གྲོལ་བར་བྱེད་པའམ། གཞན་ཡང་རྣམ་རྟོག་ངན་པ་དེ་ངེས་འབྱུང་དང་སྙིང་རྗེ་བྱང་ཆུབ་སེམས་ཀྱི་ཕྱོགས་སུ་སྒྱུར་བར་བྱེད་དགོས་པ་དང་། བསྒོམས་པར་བྱས་ཀྱང་ཡར་སྐྱེད་མེད་ན་དམ་ཚིག་ཉམས་ཆག་སོང་བའམ། ཟླས་ཉམས་དང་ཞོར་ཉམས་ཀྱིས་གོས་པའམ། ཚོགས་བསགས་ཀྱིས་མ་ཆོག་པ་ཡིན་ངེས་པས། ཚོགས་དང་བསྐོང་བ་དང་མཆོད་འབུལ་བྱེད་པ་དང་། ཡང་ན་མི་རྟོག་པ་སོགས་སྒོམ་བཞིན་ཡོད་ན་བདུད་ཀྱི་བཤེས་གཉེན་གྱིས་ཟིན་པ་ལ་སོགས་པས་བསྐྱེད་མེད་པར་འགྱུར་བས། དེ་དག་གང་ལ་གང་གི་གཉེན་པོ་བསྟེན་དགོས་པས། སྣ་ཚོགས་ཐབས་ཀྱིས་གནད་དུ་བསྣུན་ནས་རང་དབང་དུ་འཆུན་པར་བྱེད་པ་དང་། འབྱུང་ཁམས་འཁྲུགས་པའི་ན་ཚ་བྱུང་ན། དེ་ལ་ང་ལ་འདི་ལྟར་འོང་མི་རིགས་སྙམ་པའི་ཡི་ཆད་མི་བྱེད་པར། སྔར་བསགས་ཀྱི་རྒྱུ་ལ་སོགས་པ་རྒྱུ་རྐྱེན་འབྲས་བུ་རྣམས་རྟོགས་པར་བྱས་ནས། ན་ཚ་ལམ་སློང་ལ་སོགས་པས་ཉམས་ལེན་གྱི་གྲོགས་སུ་འགྲོ་བར་བྱེད་པ་དང་། ཀུན་མཁྱེན་འཇིགས་གླིང་གིས། འདུ་བ་རྣམ་གསུམ་དབྱར་གྱི་མཚོ་ལྟར་བསྐྱིལ། །འབར་བ་རྣམ་གསུམ་དུས་མཐའི་མེ་ལྟར་སྦོར། །ཞེས་པ་ལྟར་དུ། མི་ནོར་ཟས་གསུམ་དང་འཁོར་སློབ་ཀྱི་འདུ་བ་ཡལ་ནས་དམ་ཆོས་སྤེལ་བ་ལ་འགོག་རྐྱེན་བྱུང་ན། སྤྱིར་བསྡུ་བ་རྣམ་བཞིའི་འགྲོ་དོན་དང་། ཁྱད་པར་དུ་ཚོགས་དང་གཏོར་མ་ལ་རེམ་དགོས། བསྡུ་བ་རྣམ་བཞི་ནི་ལོག་འཚོའི་ཆེད་དུ་སྦྱིན་དང་སྙན་སྨྲ་གྱིས་གསུངས་པ་མིན་པར། ལན་དང་རྣམ་སྨིན་ལ་མི་རེ་བའི་སྦྱིན་པ་དང་། བྱམས་པའི་ངག་གི་ལས་སྙན་པར་སྨྲ་བ། གཞན་ལ་ཆོས་གང་བསྟན་ན་དེ་ཉིད་རང་གིས་དོན་མཐུན་དོན་སྤྱོད་ཀྱིས་སྒྲུབ་པ་ནི་གནད་ཆེ་ཤོས་ཡིན་ལ་དེ་ལྟར་མ་བྱས་ཚེ། བྱི་ལའི་གྲྭ་བར་བྱི་བ་བཞག་པ་བཞིན་དུ་ཇེ་ཉུང་ཇེ་ཉུང་དུ་འགྲོ་བས་མ་ཚད། ད་ལྟ་ཡོད་པ་རྣམས་ཀྱང་བཅར་མི་ཕོད་པར་འགྱུར་བ་ཡིན་པ་དང་། སེམས་བསྐྱེད་ལས་སྨོན་སེམས་ཤོར་ན་ཚད་མེད་རྣམ་བཞི་སྒོམ་པ་དང་། འཇུག་སེམས་ཤོར་ན་དམ་བཅའ་གསར་བ་ལེན་ཅིང་། གཉིས་ཀ་ཤོར་ན་བཤགས་པ་གནད་སྨིན་བྱེད་པ་གལ་ཆེ་བས་གཉེན་པོ་བསྐྱར་ལ་བླང༌བར་བྱ་བ་སྟེ། དེ་དག་གིས་གེགས་རྣམས་གང་བྱུང་སེལ་བ་ཡིན་པས། གེགས་སེལ་དེ་ལྟར་བྱེད་དགོས་སོ།།
༡༢༤ རྒྱུད་ལ་སྦྱོར་བ་ཕྱི་ནང་གནད་དྲུག་བསྟན་པ།
རྒྱུད་ལ་སྦྱོར་བ་ཕྱི་ནང་གནད་དྲུག་ནི།།
ནང་དུ་བདག་འཛིན་འཁྲི་བ་གཅད་པ་གནད།།
ཕྱི་རུ་ཡུལ་སྣང་ཆོས་སྐུར་འཁྱེར་བ་གནད།།
བར་དུ་འཛིན་རྟོག་གྲོགས་སུ་བླང་བ་གནད།།
ཡར་ལ་ལྟ་དགོངས་ཟད་པར་བྱེད་པ་གནད།།
མར་ལ་ཆོས་སྤྱོད་གཞུང་བཞིན་བསྲང་བ་གནད།།
བར་དུ་ཡེངས་མེད་ཤེས་བཞིན་བསྲུང་བ་གནད།།
དེ་དག་འཛོམ་ན་ཐར་ལམ་མྱུར་དུ་བགྲོད།།
ཅེས་གསུངས་པ་སྟེ། རྒྱུད་ལ་སྦྱོར་བར་འོས་པའི་ཕྱི་ནང་གི་གནད་དྲུག་ནི། འཕྲུལ་འཁོར་གྱི་འཁོར་མཚམས་འཇོག་དགོས་ན་གསང་ཐག་གི་འཛེར་མགོ་མནན་ཤེས་དགོས་པ་བཞིན་དུ། འཁོར་བའི་འཁྲུལ་སྣང་གི་རྒྱུན་ཆད་དགོས་ན། ནང་དུ་བདག་ཏུ་འཛིན་པའི་འཁྲི་བ་གཅད་པ་གནད་ཡིན་པ་དང་། ཕྱི་རུ་གང་ཡུལ་དུ་སྣང་བའི་ཆོས་ཐམས་ཅད་ཆོས་སྐུའི་ཡོ་ལང་ཡེ་ཤེས་གཅིག་ལས་མ་འདས་པར་འཁྱེར་ཤེས་པ་གནད་ཡིན་པ་དང་། བར་དུ་འཛིན་པའི་རྣམ་རྟོག་ཐམས་ཅད་གྲོགས་སུ་བླངས་ནས་རྟོག་ཚོགས་རང་གྲོལ་དུ་དག་པར་བྱེད་པ་གནད་ཡིན་པ་དང་། ལྟ་བ་མཐོ་དགོས་པས་ཡར་ལ་ལྟ་དགོངས་ཆོས་ཉིད་ཀྱི་ཀློང་དུ་ཟད་པར་བྱེད་པ་གནད་ཡིན་པ་དང་། སྤྱོད་པ་སྡར་དགོས་པས་མར་ལ་རྒྱུ་འབྲས་ཁྱད་གསོད་མི་བྱེད་པ་ཆོས་སྤྱོད་གཞུང་བཞིན་བསྲང་བ་གནད་ཡིན་པ་དང་། བར་དུ་དུས་རྟག་ཏུ་སྲུང་སེམས་མི་བརྗེད་པའི་དྲན་པ་དང་། རང་རྒྱུད་ལ་ཉེས་པ་བྱུང་མ་བྱུང་རྟོག་པའི་ཤེས་བཞིན་དང་། འཇུག་ལྡོག་གི་གནས་ལ་གཟོབ་པ་ལྷུར་ལེན་པའི་བག་ཡོད་པ་རྣམས་བསྲུང་བ་ནི་གནད་ཀྱི་དམ་པ་ཡིན་པ་སྟེ། དེ་དག་འཛོམ་ན་ཐར་ལམ་ལ་དཀའ་ཚེགས་མེད་པར་མྱུར་དུ་བགྲོད་ཐུབ་པ་ཡིན་ནོ།།
༡༢༥ སངས་རྒྱས་འདོད་ལ་གཅེས་པ་རྣམ་དྲུག་བསྟན་པ།
སངས་རྒྱས་འདོད་ལ་གཅེས་པ་རྣམ་དྲུག་ནི།།
སྒྱུ་མར་རྟོགས་ཀྱང་རྒྱུ་འབྲས་འཛེམ་པ་གཅེས།།
ངེས་ཤེས་ཐོབ་ཀྱང་ཁྱད་གསོད་མེད་པ་གཅེས།།
གྲོགས་སུ་འཆར་ཡང་དབེན་པར་གནས་པ་གཅེས།།
སྒོམ་མེད་གོ་ཡང་རྣམ་རྟོག་འདུལ་བ་གཅེས།།
མཉམ་རྗེས་མེད་ཀྱང་ཐ་མལ་མ་ཤོར་གཅེས།།
གནས་ལུགས་རྟོགས་ཀྱང་ལུང་རིགས་ཞུན་ཐར་གཅེས།།
མཐོན་པོར་ཕྱིན་ཡང་འདི་དྲུག་མ་བྲལ་གཅེས།།
ཞེས་གསུངས་པ་སྟེ། སངས་རྒྱས་སྒྲུབ་པར་འདོད་པའི་གང་ཟག་ཅིག་ལ་འཛོམ་དགོས་པའི་གཅེས་པ་རྣམ་པ་དྲུག་ནི། ཆོས་ཐམས་ཅད་སྒྱུ་མ་དང་རྨི་ལམ་ལྟར་བུར་རྟོགས་ཀྱང་གཟུང་འཛིན་གྱི་རྟོག་པ་རྩ་བ་ནས་ཟད་མེད་ན་རྒྱུ་འབྲས་ཕྲ་ཞིང་ཕྲ་བ་ནས་འཛེམ་པ་གཅེས་པ་དང་། རང་ལ་ཉམས་རྟོགས་ཀྱི་ངེས་ཤེས་ཅུང་ཟད་ཙམ་ཐོབ་ཡོད་ཀྱང་གཞན་ལ་ཁྱད་གསོད་མེད་པ་གཅེས་པ་དང་། རྐྱེན་ངན་གྲོགས་སུ་འཆར་ཞིང་རྣམ་རྟོག་ཡེ་ཤེས་སུ་གྲོལ་ཏེ་ཚོགས་སུ་གནས་པ་དང་། དབེན་པར་གནས་པ་ཁྱད་མེད་པར་གྱུར་ཀྱང་གཞན་གྱི་དད་པ་མི་ལྡོག་པའི་ཆེད་དུ་དབེན་པར་གནས་པ་ཤིན་ཏུ་གཅེས་པ་དང་། སྒོམ་མེད་ཡེངས་མེད་ཀྱི་གནད་གོ་ཡང་གོ་བ་རྒྱུད་ལ་སྦྱར་ནས་རྣམ་རྟོག་འདུལ་བ་གཅེས་པ་སྟེ། རྟོག་འདུལ་དམ་ཚིག་དེ་སྙེད་སྤྲོ། །ཞེས་པ་ལྟར་རྣམ་རྟོག་འདུལ་བའམ་ཟད་ནས་ཆོས་ཉིད་དུ་གྲོལ་བའམ། ལས་དང་པོ་པས་ངན་རྟོག་གི་གཉེན་པོར་བཟང་རྟོག་བསྟེན་པ་ལྟ་བུ་དང་། མཉམ་རྗེས་ཁྱད་པར་གཏན་ནས་མེད་པར་མཉམ་བཞག་གཅིག་གི་ངང་ལས་མི་འདའ་བ་ནི་སངས་རྒྱས་ཀྱི་ས་ཡིན་ལ། དེ་དང་རྗེས་མཐུན་གྱི་མཉམ་རྗེས་དབྱེར་མེད་དུ་གྱུར་ཀྱང་ཐ་མལ་གྱི་ཚུལ་ཅན་དུ་མ་ཤོར་བ་གཅེས་པ་དང་། གནས་ལུགས་ཀྱི་དོན་རྟོགས་ཀྱང་ལུང་དང་རིགས་པས་བརྡར་ཤ་བཅད་ནས་ཞུན་ཐར་བཅད་དེ། གོལ་ཤོར་ནོར་བའི་འཕྲང་བསལ་བ་ཤིན་ཏུ་གཅེས་པ་སྟེ། ཉམས་རྟོགས་ཅུང་ཟད་མཐོན་པོར་ཕྱིན་ཡང་འདི་དྲུག་དང་ནམ་ཡང་མི་འབྲལ་བ་ཤིན་ཏུ་གཅེས་སོ།།
༡༢༦ མཐར་འཛིན་འཆིང་བར་བསྟན་པའི་ཆོས་དྲུག་བསྟན་པ།
མཐར་འཛིན་འཆིང་བར་བསྟན་པའི་ཆོས་དྲུག་ནི།།
ཆགས་ན་ཡི་དམ་ཡིན་ཡང་འཆིང་བའི་རྒྱུ།།
བཟུང་ན་མཐོན་པོའི་གྲུབ་མཐའ་འང་འཆིང་བའི་རྒྱུ།།
འཛིན་ན་སྙིང་རྗེ་ཡིན་ཡང་འཆིང་བའི་རྒྱུ།།
རློམ་ན་དགོངས་པ་ཟབ་ཀྱང་འཆིང་བའི་རྒྱུ།།
ཞེན་ན་ཉམས་རྟོགས་ཡིན་ཡང་འཆིང་བའི་རྒྱུ།།
མྱོང་འཛིན་གཉིས་མེད་ཡིན་ཡང་འཆིང་བའི་རྒྱུ།།
ཐ་མལ་ངར་འཛིན་ནོར་རྫས་སྨོས་ཅི་དགོས།།
དེས་ན་གང་ལའང་ཞེན་ཆགས་མེད་པ་གཅེས།།
ཞེས་གསུངས་པ་སྟེ། གཟུང་འཛིན་མངོན་རློམ་གྱིས་མཐའ་རུ་འཛིན་ནས་འཆིང་བར་བྱེད་པའི་རྒྱུ་ཡིན་པར་བསྟན་པའི་ཆོས་དྲུག་ནི། ཆགས་པ་དང་ཞེན་པ་སྐྱེས་ན་ཡི་དམ་ལྷའི་ཞལ་མཇལ་པ་ཡིན་ཡང་འཆིང་བར་བྱེད་པའི་རྒྱུ་ཡིན་པ་ནི། གསེར་སྒྲོག་ཐག་སྒྲོག་འཆིང་བ་ལ་མཉམ་པ་དང་། མཚན་ཉིད་ཐེག་པའི་སྐབས་སུ་ཡང་། རྒྱལ་ལ་སོགས་ལ་ཆགས་པ་ཕྲ། །ཞེས་པ་དེ་ཡིན། འཛིན་པའི་འཆིང་ཞེན་དང་བཅས་ན་མཐོན་པོ་ཐེག་རྩེའི་གྲུབ་མཐའ་ཡིན་ནའང་འཆིང་བའི་རྒྱུ། འཛིན་པ་རང་རྒྱུད་དུ་ཤོར་ན་སྙིང་རྗེ་ཡིན་ཡང་འཆིང་བའི་རྒྱུ་ཡིན་། རློམ་པ་ང་རྒྱལ་ཆེ་དྲགས་ན་ལྟ་བ་དང་དགོངས་པ་ཟབ་ཀྱང་རློམ་པའི་དབང་གིས་འཆིང་བའི་རྒྱུ་ཡིན་པ་དང་། ཞེན་ན་ཞེན་ཡུལ་ལ་དཀར་ནག་མེད་པ་ཐི་གུ་དཀར་ནག་གཉིས་ཀ་འཆིང་བྱེད་ཀྱི་རྒྱུ་ཡིན་པ་བཞིན་དུ་ཉམས་རྟོགས་ཡིན་ཡང་འཆིང་བའི་རྒྱུ་ཡིན་པ་དང་། མྱོང་བ་ཅན་གྱི་འཛིན་པ་དེ་གཉིས་མེད་ཡིན་སྙམ་ཡང་མྱོང་བྱ་མྱོང་བྱེད་གཉིས་སུ་འཛིན་པས་གཉིས་མེད་མིན་ལ། གཉིས་འཛིན་ནི་འཁོར་བའི་འཆིང་བ་དངོས་ཡིན་པས་འཆིང་བའི་རྒྱུ་ཡིན་པ་སྟེ། དེ་དག་ཀྱང་འཆིང་བའི་རྒྱུ་ཡིན་ན་དེ་ལས་གཞན་པ་ཐ་མལ་གྱི་ནོར་རྫས་སོགས་ལ་ཆགས་པ་ནི་འཆིང་བྱེད་ཡིན་པ་སྨོས་ཀྱང་ཅི་དགོས་དེས་ན་གང་ལའང་ཞེན་ཆགས་མེད་པ་གཅེས་སོ།།
༡༢༧ འཆིང་བའི་སྒྲོག་དྲུག་བཅད་པའི་མན་ངག་བསྟན་པ།
འཆིང་བའི་སྒྲོག་དྲུག་བཅད་པའི་མན་ངག་ནི།།
ནོར་རྫས་མངོན་ཞེན་སྤེལ་སྲུང་སྒྲོག་གིས་འཆིང༌།།
རིགས་རྒྱུད་མངོན་ཞེན་ཁེ་གྲགས་སྒྲོག་གིས་འཆིང༌།།
རྣམ་གཡེང་ཆགས་ཞེན་འདུ་འཛིའི་སྒྲོག་གིས་འཆིང༌།།
ཐ་སྙད་ཚིག་ཞེན་ང་རྒྱལ་སྒྲོག་གིས་འཆིང༌།།
ཉམས་རྟོགས་མངོན་ཞེན་རློམ་སེམས་སྒྲོག་གིས་འཆིང༌།།
ཆོས་སྤྱོད་མངོན་ཞེན་གཉེན་པོའི་སྒྲོག་གིས་འཆིང༌།།
སྒྲོག་དང་བྲལ་བའི་ཆོས་པ་དཀའ་བར་སྣང༌།།
ཞེས་གསུངས་པ་སྟེ། འཆིང་བར་བྱེད་པའི་སྒྲོག་དྲུག་དེ་བཅད་པའི་མན་ངག་ནི། ནོར་རྫས་མངོན་ཞེན་ནི། ཀླུ་སྒྲུབ་ཀྱི་ཞལ་ནས། བསག་དང་བསྲུང་དང་ཚོལ་བའི་སྡུག་བསྔལ་གྱིས། ནོར་ནི་ཕུང་ཀྲོལ་མཐའ་ཡས་ཤེས་པར་བྱ། །ཞེས་པ་ལྟར་དུ་ནོར་དང་པོར་བསགས། བར་དུ་བསྲུང། ཐ་མར་བརླག་ཤོར་བ་ལ་སོགས་པ་སྡུག་བསྔལ་མང་བར་གསུངས་པ་བཞིན་དུ་སྤེལ་སྲུང་སྒྲོག་གིས་འཆིང༌བ་དང་། ངའི་མི་ཐོག་སྔོན་མ། ངའི་རིགས་རུས་བཟང་པོ་ཡིན་བསམས་ནས་དེས་འཆིང་བ་ནི་མངོན་ཞེན་ཁེ་གྲགས་ཏེ་རྒྱལ་ཁ་སྙན་གྲགས་ཀྱི་སྒྲོག་གིས་འཆིང༌བ་དང་། རྣམ་གཡེང་ཆགས་ཞེན་དང་གླུ་གར་རོལ་མོ། ཁྲོམ་དང་ལྟད་མོ་ལ་སོགས་པའི་འདུ་འཛིའི་སྒྲོག་གིས་འཆིང༌བ་དང་། ཐ་སྙད་ཀྱི་ཚིག་ལ་ཞེན་ནས་བདག་བསྟོད་གཞན་སྨོད་ཀྱི་རྩོད་པའི་འཁོར་ལོ་སྐོར་མཁན་དེ་ནི་ང་རྒྱལ་སྒྲོག་གིས་འཆིང༌བ་ཡིན་པས་ཐ་སྙད་ཀྱི་ཚིག་རྐྱང་པ་གཙོ་མི་ཆེ་བར་དོན་གྱི་ལམ་གནད་རྟོགས་པ་དེ་གནད་ཆེ་དང་། ཉམས་རྟོགས་ལ་མངོན་ཞེན་སྐྱེས་ན་རློམ་སེམས་ཀྱི་སྒྲོག་གིས་འཆིང༌བ་ཡིན་པས། ཉམས་ན་བུན་འདྲ་དེ་ཡལ་ནས་འགྲོ། །གོ་བ་ལྷན་པོ་འདྲ་དེ་གོག་ནས་འགྲོ། །ཞེས་པ་ལྟར་ཡིན་པས་ཉམས་སད་སུད་ལ་བལྟ་རྒྱུ་མེད་པས་རློམ་སེམས་ཀྱིས་མ་བཅིངས་པར་སྒོམ་པར་བྱེད་དགོས་པ་དང་། ཆོས་སྤྱོད་ལ་མངོན་ཞེན་སྐྱེ་བ་ནི་གཉེན་པོའི་སྒྲོག་གིས་འཆིང༌བ་ཡིན་པས་དེ་ལ་མངོན་ཞེན་མེད་པས་གཅད་པར་བྱ་བ་སྟེ། དེ་དག་ནི་སྒྲོག་ལས་གྲོལ་བར་བྱེད་པའམ་འཆིང་བྱེད་གཅོད་པའི་མན་ངག་ཡིན་ཡང་དོན་དངོས་སུ་སྒྲོག་དང་བྲལ་བའི་ཆོས་པ་དཀའ་བར་སྣང༌ངོ་།།
༡༢༨ ཆོས་བྱེད་རྣམས་ཀྱི་འོང་བའི་ཆོས་དྲུག་བསྟན་པ།
ཆོས་བྱེད་རྣམས་ཀྱི་འོང་བའི་ཆོས་དྲུག་ནི།།
ཆགས་སྡང་སྐྱེ་བའི་ཡུལ་ནས་ཕྱིར་བྲོས་དང༌།།
ཆོས་སྤྱོད་དགེ་སྦྱོར་ངང་གིས་འཕེལ་བར་འོང༌།།
ཀོ་ལོང་སྡོམ་པའི་ཟུར་མགོ་མ་རྣོ་དང༌།།
འགྲོགས་པ་རྒྱུན་རིང་འཐབ་རྩོད་ཉུང་བར་འོང༌།།
བླ་མ་དམ་པའི་གསུང་བཞིན་གུས་བསྒྲུབ་དང༌།།
ཐུགས་ལ་འདོགས་ཤིང་བྱིན་རླབས་དངོས་གྲུབ་འོང༌།།
རང་གི་སྣ་ཐག་གཞན་ལ་མ་གཏད་དང༌།།
ཤིན་ཏུ་སྐྱིད་ཅིང་སྒྲུབ་པ་མཐར་ཕྱིན་འོང༌།།
སྤྱོད་རྩིང་བོར་ལ་ཞི་དུལ་ལྡན་གྱིས་དང༌།།
ཀུན་དང་མཐུན་ཞིང་ཡིད་དུ་འཐད་པར་འོང༌།།
ཕྱོགས་འཛིན་བོར་ལ་བཟང་པོའི་སེམས་གཟུང་དང༌།།
ཚད་མར་འཛིན་ཅིང་ཀུན་གྱིས་བསྟོད་པར་འོང༌།།
ཞེས་གསུངས་པ་སྟེ། ཆོས་བྱེད་རྣམས་ཀྱི་འོང་བའི་ཆོས་དྲུག་ནི། ཡུལ་ངན་སྤོང་བ་རྒྱལ་སྲས་ལག་ལེན་ཡིན། །ཞེས་གསུངས་པ་བཞིན་དུ་ཆགས་སྡང་སྐྱེ་བའི་ཡུལ་ནས་ཕྱིར་བྲོས་ན་ཆོས་སྤྱོད་དང་དགེ་སྦྱོར་ངང་གིས་འཕེལ་བར་འོང༌བ་ཡིན་པ་དང་། ཀོ་ལོང་སྟེ་གདུག་རྩུབ་ཀྱི་གཤིས་ཀ་བསྡོམས་ནས་དེའི་དབང་དུ་མི་འགྲོ་བའི་ངང་ཚུལ་ལ་གནས་ཤིང་ཚིག་གི་ཟུར་མགོའམ་ཚིག་གི་སྣེ་མོ་མ་རྣོ་ན་བླ་སློབ་མཆེད་གྲོགས་སུ་དང་སུ་ཡིན་ཡང་འགྲོགས་པ་རྒྱུན་རིང་བ་ཡིན་སྟེ། དེ་ཡང་། འགྲོགས་པར་བདེ་བ་སྐ་རགས་ལྟ་བུ་དང་། འཇུག་པར་བདེ་བ་ལན་ཚྭ་ལྟ་བུ་དང་། །བཟོད་བསྲན་ཆེ་བ་ཀ་བ་ལྟ་བུ་ཡིས། བླ་མའི་འཁོར་དང་རྡོ་རྗེའི་སྤུན་ལ་བསྙེན། །ཞེས་པ་ལྟར་དུ་བྱས་ན་འཐབ་རྩོད་ཉུང་བར་འོང༌། དང་པོ་ཁ་མཚར་རྩེ་ཁུལ་བྱེད། བར་ཞིག་ལ་རྩེད་རྔ་ཤོར་ནས་སྤྲང་ལག་ཐུག་རྒྱུ་ཡོང་བ་དེ་འདྲ། མཐོ་གྲྭ་སའི་གྲྭ་བ་མན་ཆད་ནས་དམའ་གྲོང་ནང་གི་མི་ནག་པ་ཡན་ཆད་ལ་ཡོང་བ་ཡིན་པས། དེ་དག་ལ་གདུག་རྩུབ་མ་ཆེ། ར་རུ་མདའ་མདུང་མ་བཤད་ཅེས་པའོ། །བླ་མ་དམ་པས་ཅི་གསུང་གི་བཀའ་བཞིན་དུ་གུས་པས་བསྒྲུབས་ན། བླ་མ་དེས་ཐུགས་ལ་འདོགས་ཤིང་དེ་ལས་བྱིན་རླབས་དངོས་གྲུབ་འོང༌བ་ཡིན་ཏེ། བྱིན་རླབས་དང་དངོས་གྲུབ་ཐམས་ཅད་བླ་མ་མཉེས་པ་ལས་འོང་བ་ཡིན་པའི་ཕྱིར། རང་གི་སྣ་ཐག་དབང་ཆ་དེ་གཞན་ལ་མ་གཏད་མ་གཏོགས་སྣ་ཐག་མི་ལག་ལ་སྤྲད་ན་གང་དུ་ཁྲིད་ན་དེར་འགྲོ་དགོས་པ་ཡིན་པས། གལ་སྲིད་རྗེས་དེད་ས་དེ་ངན་པ་ཞིག་ཡིན་ཚེ་ལམ་ལོག་ཏུ་ཁྲིད་ནས་མི་ཚེའི་མཐའ་ལ་ཐུག་དུས་འགྱོད་པ་ཆེན་པོ་འོང་བ་ཡིན་པ་དང་། རང་དབང་ཐམས་ཅད་བདེ་བ་དང་གཞན་དབང་ཐམས་ཅད་སྡུག་བསྔལ་ཡིན་པས་རང་དབང་ཡོད་ཚེ་ཆོས་པ་རང་དབང་རང་གིས་སྤྱོད་ཤེས་པ་ཞིག་ཡིན་ན་ཤིན་ཏུ་སྐྱིད་ཅིང་སྒྲུབ་པ་མཐར་ཕྱིན་འོང༌བ་ཡིན་པ་སྟེ། དེ་ཡང་རང་མགོ་མི་ཐོན་པ་ཞིག་ལ་གཞན་དམ་པའི་སྐྱེས་བུ་ལ་མ་བསྟེན། དེའི་རྒྱུད་དུ་མ་གཅར་ཞེས་པའི་དོན་མིན་པར། དམ་པའི་རྒྱུད་ལ་བཅར་ནས་གྲོགས་ངན་པའི་དབང་དུ་མ་ཤོར། ཞེས་པའོ། །སྤྱོད་པ་རྩིང་པོ་བོར་ལ་ཞི་དུལ་དང་ལྡན་པར་གྱིས་དང༌། དེ་ལྟར་བྱས་ན་སྐྱེ་བོ་ཀུན་དང་མཐུན་ཞིང་ཡིད་དུ་འཐད་པར་འོང་བ་ཡིན་པ་དང༌། ཕྱོགས་རིས་ཀྱི་འཛིན་ཞེན་བོར་ལ་ཐམས་ཅད་ལ་བཟང་པོའི་སེམས་ལྷད་མེད་ཅིག་ཟུངས་དང༌། ཐམས་ཅད་ཀྱིས་ཚད་མར་འཛིན་ཅིང་སྐྱེས་བུ་དམ་པ་ཡིན་པའི་ཚད་དུ་འཇོག་པས་ཀུན་གྱིས་བསྟོད་ཅིང་བསྔགས་པར་འོང༌ངོ་།།
༡༢༩ ངན་པའི་རེ་བ་རྣམ་དྲུག་སྤོང་བར་བསྟན་པ།
ངན་པའི་རེ་བ་རྣམ་དྲུག་སྤོང་བ་ནི།།
བྱས་པ་མེད་པར་ཕན་འདོགས་འོང་དུ་རེ།།
དཀའ་བ་མ་སྤྱད་སྐྱིད་པ་འོང་དུ་རེ།།
སྒྲུབ་པ་མེད་པར་དངོས་གྲུབ་ཐོབ་ཏུ་རེ།།
མི་ཆོས་མ་བོར་ལྷ་ཆོས་འོང་དུ་རེ།།
ཉམས་སུ་མ་བླངས་བཤད་རིངས་གཞན་ཕན་རེ།།
ཅུང་ཟད་བསྒྲུབས་ལ་བསྙེན་བཀུར་འོང་དུ་རེ།།
ཐར་པའི་ལམ་དང་རྒྱ་མཚོའི་ཤར་ནུབ་བཞིན།།
ཞེས་གསུངས་པ་སྟེ། ངན་པའི་རེ་བ་རྣམ་དྲུག་སྤོང་བ་ནི། ཕར་ཕན་འདོགས་མ་མྱོང་བ་ཞིག་གིས་ང་འདིས་ཆེན་པོ་ཞིག་བྱེད་ཨེ་ཡོང་བསམ་རྒྱུ་མེད་པས། བྱས་པ་མེད་པར་ཕན་འདོགས་འོང་དུ་རེ་བ་མི་ཆེ་བ་དང་། དཀའ་བ་མ་སྤྱད་སྐྱིད་པ་འོང་དུ་རེ་བ་ཟ་འདོད་འགུལ་འཚེར་གྱི་མི་དང་། སྒྲུབ་པ་གཏན་ནས་མི་དགོས་པར་དངོས་གྲུབ་ཆེན་པོ་ཞིག་ཐོབ་ཏུ་རེ་བ་དེ་ཡོང་བ་དཀའ་བ་ཡིན་པས་དེ་འདྲའི་ངན་པའི་རེ་བ་སྤོང་དགོས་པ་ཡིན། མི་ཆོས་མ་བོར་ནས་སྐྱུར་ཐུབ་མེད་པ་ཞིག་གིས་ད་དུང་ལྷ་ཆོས་འོང་དུ་རེ་ན་འགྲུབ་པ་མིན་པ་ནི། ཆོས་འཇིག་རྟེན་གཉིས་ཀ་མེ་ཆུ་དགྲ་གཤེད་ཡིན་པས། མི་ཆོས་འགྲུབ་བཞིན་ཡོད་དུས་ལྷ་ཆོས་དེ་ལ་མེད་པའི་རྟགས་དང་། ལྷ་ཆོས་འགྲུབ་བཞིན་ཡོད་དུས་མི་ཆོས་ལ་ཕྱིར་བལྟས་མི་བྱེད་པ་ནི་བདག་ཅག་གི་སྟོན་པ་མན་ཆོད་ཡིན། བདག་ཅག་གི་སྟོན་པ་ཐབས་མ་མཁས་པ་ག་ལ་ཡིན། ཐབས་ལ་མཁས་པ་ཐུགས་རྗེ་ཆེན་པོ་དང་ལྡན་པ་ཡིན་པ་རེད། འོན་ཀྱང་འཇིག་རྟེན་དང་ཆོས་གཉིས་མཉམ་པོར་སྒྲུབ་མ་ཐུབ་པར་བསྟན་པ་ཡིན། ཐབས་མཁས་ཀྱི་མཛད་པ་མིའི་སྤྱོད་ཡུལ་ལས་འདས་པ་འགའ་རེ་མེད་ཟེར་ཅི་ཤེས་ཀྱང་། སྤྱིར་བཤད་ན་དེ་ལྟར་ཡིན། ཉམས་སུ་མ་བླངས་ནས་བཤད་པའི་དུས་ལ་མ་བབས་གོང་ཞིག་ནས་བཤད་ལ་རིངས་བ། མགོ་མ་ཚོས་གོང་ནས་ལྕེ་ལ་བསྙབས་ནས་གཞན་ཕན་ལ་རེ་བ་། ཉམས་ཆུང་དབུལ་པོའི་ལག་གི་རིན་ཆེན་དང་། ཐོས་ཆུང་བླུན་པོའི་ཁ་ཡི་གདམས་ངག་བསྟན་སྔ་སོང་བ་དང་། ཅུང་ཟད་བསྒྲུབས་པ་ཉམས་ལེན་བྱས་པ་ལ་བསྙེན་བཀུར་ཆེན་པོ་འོང་དུ་རེ་བ་དེ་དག་ཐར་པའི་ལམ་དང་རྒྱ་མཚོའི་ཤར་ནུབ་བཞིན་ཡིན་པ། མཁའ་དང་ས་གཞིའི་བར་ཐག་རྒྱང་རིང་ཞིང་། །ཤར་ནུབ་རྒྱ་མཚོའི་འགྲམ་ཐག་དེ་བས་རིང་། །ཞེས་པ་བཞིན་ནོ།།
༡༣༠ རང་བཞིན་ངན་པའི་ཀུན་སྤྱོད་རྣམ་དྲུག་བསྟན་པ།
རང་བཞིན་ངན་པའི་ཀུན་སྤྱོད་རྣམ་དྲུག་ནི།།
བཟའ་བཏུང་བགོ་ན་རང་བཞིན་ཆེ་བར་འདོད།།
ཉོ་ཚོང་བྱེད་ན་རྒྱལ་ཁ་རང་ལ་འདོད།།
གོས་གོན་ཚེ་ན་རང་དྲོ་འཇམ་པ་འདོད།།
རང་འཆང་བཟང་ལ་གཞན་གཏོང་ངན་པར་འདོད།།
ཞག་གཅིག་གནས་ལའང་རང་སྐྱིད་ས་ཕྱོགས་འདོད།།
ཆོས་དང་བླ་མས་ཉེ་འབྲེལ་གཅེས་པར་འདོད།།
དེ་འདྲའི་མི་ལ་ཐར་པའི་མྱུ་གུ་སྐམ།།
ཞེས་གསུངས་པ་སྟེ། རང་བཞིན་ངན་པའི་ཀུན་སྤྱོད་རྣམ་པ་དྲུག་ཡོད་པ་དེ་སྤོང་དགོས་ཏེ། དེ་ཡང་བཟའ་བཏུང་བགོ་ན་སྐལ་བ་ཆེ་བ་དེ་ངེས་པར་དུ་ང་ལ་དགོས་ཞེས་རང་བཞིན་ཆེ་བར་འདོད་པ་དང་། ཉོ་ཚོང་བྱེད་ན་ངེས་པར་དུ་ང་ཁེ་དགོས་ཁྱོད་ཕམ་དགོས་ཞེས་རྒྱལ་ཁ་རང་ལ་འདོད་པ་དང་། དེ་འདྲའི་རང་འདོད་ཅན་གྱི་མི་རང་འབའ་ཞིག་ལེགས་དགོས་གཞན་དག་ཅི་རེད་ཀྱང་རེད་བསམ་ནས་གཞན་ལ་བསམ་བློ་མི་གཏོང་མཁན། གོས་གོན་ཚེ་བཟང་ངན་གཉིས་ཡོད་ན་དེ་ལས་དྲོ་བ་དང་འཇམ་པ་ཁོ་ལ་དགོས་ཞེས་པ་དང་། ཁོ་རང་གི་འཆང་རྒྱུ་ནི་བཟང་པོ་དགོས་ལ་གཞན་ལ་ཕར་གཏོང་རྒྱུ་ནི་ངན་པར་གཏོང་དགོས་པར་འདོད་པ་དང་། ཞག་གཅིག་ཞག་སའི་གནས་ཁང་གཅིག་ལ་མཉམ་པོར་བསྡད་ན་ཁོ་ཡག་ས་དང་སྐྱིད་ས་ལ་འདུག་དགོས་ཟེར་བའི་རང་འདོད་ཅན་དང་། དེ་འདྲ་དེ་ལ་འདོམས་ཁར་བཅུག་ན་ཆོས་དང་བླ་མ་བས་རང་གི་ཉེ་འབྲེལ་གཅེས་པར་འདོད་པ་ཡིན་པ་དེ་འདྲ་དེས་རང་དང་ཉེ་བས་ཅི་བྱས་ཀྱང་ལེགས་པར་བརྩི་ཞིང་། གཞན་གྱིས་བཟང་པོར་སྒྲུབ་པ་ལ་ཡང་སྐྱོན་ཞིག་དེའི་ཟུར་དུ་འདོགས་རྒྱུ་ཨེ་རྙེད་ལྟ་བར་བྱེད་པའི་མི་རྒྱུད་ངན་དེ་འདྲ་ལ་ཐར་བའི་མྱུ་གུ་སྐམ་པ་ཡིན་པས་མྱུ་གུ་སྐམ་པོ་ལ་འབྲས་བུ་གསར་བ་སྨིན་དུ་མེད་དོ།།
༡༣༡ མ་ནོར་ལམ་དུ་འཇུག་པའི་ཆོས་དྲུག་བསྟན་པ།
མ་ནོར་ལམ་དུ་འཇུག་པའི་ཆོས་དྲུག་ནི།།
དགོན་པའི་ས་བཟུང་ང་དང་བདག་མ་འཛིན།།
འཚོ་བའི་རྐྱེན་བཟུང་ང་དང་བདག་མ་འཛིན།།
མཁས་བཙུན་ཚུལ་བཟུང་མཐོན་པོའི་ཆ་མ་འཛིན།།
མ་དད་སྤྱོད་སྤངས་གཞན་གྱི་ངོ་མ་བསྲུང༌།།
སྙིང་རྗེས་ཕན་ཐོགས་ཁྱིམ་ཐབ་ནོར་མ་བསྲེལ།།
ཕྱོགས་མེད་སྦྱིན་ཐོང་ཡུས་དང་ལན་མ་རེ།།
ཞེས་གསུངས་པ་སྟེ། ཐར་ལམ་ཡང་དག་ཅིག་རྙེད་དགོས་ན་མ་ནོར་བའི་ལམ་དུ་འཇུག་པའི་ཆོས་དྲུག་འདི་འཛོམས་དགོས་ལ། དེ་ཡང་འཛིན་དགོས་པ་དགོན་པའམ་དབེན་པའི་ས་གཟུང་བ་ལས་འཛིན་མི་རུང་བའི་ང་དང་བདག་ལ་མི་འཛིན་པ་སྟེ། དེ་ཡང་རང་རྒྱུད་ཀྱི་ཕུང་པོ་ལ་དམིགས་པའི་ང་དང་བདག་ལ་མི་འཛིན་པ་དང་། ཕྱི་རོལ་གྱི་དངོས་པོ་སོགས་ལ་དམིགས་ནས་ཀྱང་ངའི་རྒྱུ་ངའི་དགོན་པ་ངའི་ཁྱིམ་ལ་སོགས་པའི་ང་ཡིར་འཛིན་པའང་མི་རུང་བ་ཡིན། འཚོ་བའི་རྐྱེན་དུ་གྱུར་པའི་ཡོ་བྱད་ཙམ་གཟུང་འོས་པ་ཡིན་ཡང་ང་དང་བདག་ལ་ཤིན་ཏུ་ཞེན་ཅིང་ཆགས་པའི་འཐས་པར་མི་འཛིན་པ་དང་། མཁས་བཙུན་གྱི་ཚུལ་ལམ་ཚུགས་གཟུང་ཞིང་རང་རྒྱུད་ཀྱི་བསླབ་པ་ལ་གུས་པའི་ཕྱིར་དུ་བསླབ་པ་གཞོན་པའམ་ཁྱིམ་པ་སོགས་ཀྱི་ཕྱག་ལེན་པ་སོགས་ཀྱི་ཚུལ་འཛིན་པ་དང་། གཞན་རྒྱུད་ཀྱི་བསླབ་པ་ལ་གུས་པའི་ཆ་ནས་མཐོན་པོའི་མི་ཆེན་གྱི་ཚུགས་མི་འཛིན་པ་དང་། གཞན་ཡང་མཁས་བཙུན་ཡིན་ན་མཐོན་པོའི་ས་གཟུང་མི་དགོས་པར་ཟིན་པ་ཡིན། དེ་མིན་དུས་གཟུང་ཡང་ཕན་ཐོགས་ཡོད་པ་མིན་ཏེ། ཉིན་ཁ་ཤས་ཀྱིས་ཐུར་དུ་འདྲིལ་པ་ནི་ཆོས་ཉིད་ཡིན། དེས་ན་དམན་པའི་ས་བཟུང་ནས་མཁས་བཙུན་གྱི་ཚུགས་དེ་མ་ཤོར་ཞེས་པ་ཡིན། མ་དད་པའི་སྤྱོད་པ་སྤངས་ཀྱང་གཞན་གྱི་ངོ་སྲུང༌དང་ངོ་དགའ་མི་བྱེད་པ་དང་། ཐེག་པ་ཆེན་པོའི་ལམ་གྱི་སྲོག་ཡིན་པས་སྙིང་རྗེས་གཞན་ལ་ཕན་བཏགས་པ་ལས་ཁྱིམ་ཐབ་དང་ནོར་བསྲེལ་མི་རུང་ཏེ། སྡུག་བསྔལ་དང་ཉོན་མོངས་ཀྱི་གཞི་མ་ཡིན་པའི་ཕྱིར། ཕྱོགས་དང་རིས་མེད་པར་སྦྱིན་པ་བཏང་ནས་བྱས་ཡུས་དང་ལན་ལ་མི་རེ་བ་སྟེ། དེ་ཡང་རབ་བྱུང་གིས་ཆོས་དང་། ཁྱིམ་པས་ཟང་ཟིང་གི་སྦྱིན་པ་དང་། གཉིས་ཀས་མི་འཇིགས་པ་སྐྱབས་ཀྱི་སྦྱིན་པ་བྱའོ།།
༡༣༢ ཉམས་ལེན་རང་རྐྱ་ཐུབ་པའི་ཆོས་དྲུག་བསྟན་པ།
ཉམས་ལེན་རང་རྐྱ་ཐུབ་པའི་ཆོས་དྲུག་ནི།།
ངོ་ལྐོག་མེད་པའི་ཚུལ་ཁྲིམས་རྐྱེན་ངན་ཐུབ།།
གདམས་ངག་ཁོང་ཁྲོལ་གང་ཡང་ཉམས་ལེན་ཤེས།།
བར་ཆད་བགེགས་སེལ་ནད་གདོན་འདོན་ལ་མཁས།།
ཐོས་བསམ་མཐའ་ཆོད་གཞན་ལ་དྲི་རྒྱུ་མེད།།
གོལ་སྒྲིབ་མཐའ་ཆོད་ཐེག་པ་མཐོ་དམན་ཤེས།།
བདུད་ཀྱིས་མི་ཚུགས་གོ་ཆ་ལྡན་པའོ།།
ཞེས་གསུངས་པ་སྟེ། ཉམས་ལེན་རང་རྐྱ་ཐུབ་པར་བྱེད་པའི་ཆོས་དྲུག་དེ་གང་ཞེ་ན། ངོ་ལྐོག་མེད་པའི་ཚུལ་ཁྲིམས་ཀྱིས་རྐྱེན་ངན་པ་ཐུབ་པ་ལས་ངོས་ནས་བསྲུངས་ཤིང་ལྐོག་ནས་མི་བསྲུང་བ་དེས་རྐྱེན་ངན་ཐུབ་པ་མིན་པས། རྐྱེན་ངན་ཐུབ་པའི་ཚུལ་ཁྲིམས་རང་སེམས་གཙང་མ་དཔང་པོར་འཇོག་ཆོག་པ་ཞིག་བསྲུང་དགོས་པ་དང་། གདམས་ངག་གི་ཁོང་ཁྲོལ་བའམ་ཁོག་ཁྲོལ་ན་གང་ཡང་ཉམས་ལེན་ཤེས་པས། མི་མཐུན་པ་འབའ་ཞིག་གི་འགལ་བ་མི་འདུ་བ་ཡིན་པ་དང་། བར་ཆད་ཀྱི་བགེགས་རང་སྟོབས་ཀྱིས་སེལ་ནུས་ཤིང་། ནད་གདོན་འདོན་པའི་ཐབས་ལ་མཁས་པ་དང་། ཐོས་བསམ་གྱི་མཐའ་རྒྱ་ཆོད་ནས་གཞན་ལ་དྲི་རྒྱུ་མེད་པ་སྟེ་དྲི་རྒྱུ་ཚང་མ་བླ་མའི་མདུན་ནས་ཐེ་ཚོམ་ཆོད་ཚར་རྗེས་རི་ཁྲོད་ལ་འགྲོ་དགོས་པ་ལས། རི་ཁྲོད་དབེན་པར་ཐོན་དུས་ཡང་གཅིག་དྲི་བར་རྟ་ཟིན་སྒ་ཟིན་བྱས་ནས་རྒྱུག་རྒྱུ་ཡོད་པ་མིན། གོལ་སྒྲིབ་ཀྱི་མཐའ་མ་ཆོད་ན་འོག་མར་གོལ་བའི་ཉེན་ཡོད་པ་དེས་ན་ཐོས་བསམ་གྱི་མཐའ་རྒྱ་ཆོད་ནས་ཐེག་པ་མཐོ་དམན་གྱི་ཉམས་ལེན་གྱི་གནད་ཤེས་པ་དང་། བདུད་ཀྱི་བར་ཆད་ཀྱི་མཚོན་གྱིས་མི་ཚུགས་པར་བྱེད་པའི་གོ་ཆ་དང་ལྡན་པའོ།།
༡༣༣ ངོ་ཚ་རྣམ་དྲུག་སྤང་བར་གདམས་པ།
ངོ་ཚ་རྣམ་དྲུག་སྤང་བར་གདམས་པ་ནི།།
ནོར་རྫས་ཡོ་བྱད་སོག་ན་ངོ་ཚའི་གནས།།
གོས་བཟང་ཕྱི་འཆོར་ཆེ་ན་ངོ་ཚའི་གནས།།
རྒྱན་དང་སྒེག་ཆོས་བྱེད་པ་ངོ་ཚའི་གནས།།
ཟང་ཟིང་གཡེང་བ་བསྒྲུབས་ན་ངོ་ཚའི་གནས།།
ཆོས་མིན་བྱ་བ་མང་པོ་ངོ་ཚའི་གནས།།
ཆེ་ཁྱད་ང་རྒྱལ་དྲེགས་པ་ངོ་ཚའི་གནས།།
སྙིང་ནས་ཆོས་མཛད་རྣམས་ཀྱིས་སྤང་བར་འཚལ།།
ཞེས་གསུངས་པ་སྟེ། ངོ་ཚ་རྣམ་དྲུག་སྤང་བ་བྱ་བར་གདམས་པ་ནི། རབ་བྱུང་བ་ཞིག་ལ་མཚོན་ན་ནོར་རྫས་ཡོ་བྱད་སོག་ན་ངོ་ཚའི་གནས་ཇི་ལྟར་ཡིན་ན། བན་རྒན་ཤི་བའི་ཤུལ་དུ་རྒྱུ་ནོར་མང་ཆེན་ཡོད་པ། དཔེར་ན་གནའ་དགོན་པ་ཞིག་གི་བན་རྒན་ཞིག་ཤི་དུས་མཛུབ་མོ་གྱང་ལོགས་སུ་བཙུགས་ནས་ཤི་བ་རེད། དེར་སློག་དུས་དངུལ་སྒོར་ཞོ་བདུན་མ་མང་རབ་ཅིག་སྦས་ཡོད་ཅིང་། དེ་འདྲ་དེ་ངོ་ཚའི་གནས་ཡིན། ཁྱིམ་པ་ཡིན་ཡང་ཟ་མི་བྲ། གོན་མི་བྲ། བྱིས་པའི་སློབ་སྦྱོང་གི་དོན་དུ་གཏོང་མི་བྲ། ཤི་གསོན་གཉིས་ཀའི་དོན་དུ་མངག་མ་བྲ་བ་དེ། ནམ་ཞིག་འབྲེལ་མེད་ཁ་ཤས་ཀྱིས་བགོ་བཤའ་བྱེད་དུས་ངོ་ཚ་སྡུག་གྱོང་ཐམས་ཅད་ཀྱི་གཞི་ཡིན། དེ་དུས་ངོ་ཚ་མཁན་མེད་ཀྱང་མ་ཤི་གོང་ནས་ཀྱང་དེའི་རྒྱུ་མཚན་ཚང་མས་ཤེས་པ་ཡིན། ཁྱིམ་པ་ཞིག་ཡིན་ན་ལོངས་སྤྱོད་ཚུལ་དང་མཐུན་པ་ཞིག་གིས་གསོག་དགོས་ལ། གསོག་ནས་ཅི་བྱེད་དགོས་ན་གཏོང་དགོས། རབ་ཡིན་ན་ཆོས་ཕྱོགས་སུ་མངག་དགོས། འབྲིང་ཡིན་ན་སྙན་གྲགས་དང་མགོ་རྣ་ལ་རྒྱའི་དོན་དུ་མངག་དགོས། ཤོ་སྐུགས་དང་ཆང་རག་གི་དོན་དུ་ཤོར་བ་ནི་ཐ་ཆད་པ་ཡིན། གོས་བཟང་པོ་རིན་ཐང་ཅན་མི་ལ་མ་བལྟས་པའི་གོས་གྱོན་ནས་ཕྱི་འཕྱོར་ཆེ་ན་ངོ་ཚའི་གནས་ཡིན་པས། གྲྭ་བ་སེར་མོ་པ་ཞིག་ཡིན་ན་བཅོམ་ལྡན་འདས་ཀྱིས་གནང་བའི་ཆོས་གོས་རྣམ་གསུམ་དང་། ས་མཐའ་འཁོབ་ལ་ཡུལ་དུས་ཀྱི་དབང་གིས་ཀོ་ལྤགས་གནང་བ་བཞིན་དུ་ཤུགས་ལ་གནང་བའི་འུ་ཅག་གི་གྲྭ་ཆས་སྤྱིར་གཏང་བ་ཕུ་དུང་ཡོད་པ་འདི་ཚོ་ལ་སོགས་པ་དང་། ཞེན་པ་མེད་ན་འབུམ་རི་བ་ལ་སོགས་པ་གོན་ཆོག་པ་རེད་ཀྱང་ཕྱི་འཕྱོར་ཆེ་ཆེས་ན་མཛེས་བྱེད་མ་དགོས་རྫོབ་བྱེད་ཡིན་པ་རེད། རྒྱ་གསེར་གྱི་སྟོད་འབོག་ལ་སོགས་པ་མིག་ལ་མི་འཛའ་བ་གོན་ན་གོན་མཁན་ཁོ་རང་ངོ་ཚ་བས་མི་ཚད་ལྟ་མཁན་ཡང་ངོ་ཚ་བ་དེ་འདྲ་ཡོང་བ་རེད། བླ་སེར་ཞིག་གིས་སྐེ་རྒྱན་མཛུབ་དཀྲིས་གསེར་ཐག་ལ་སོགས་པ་བཏགས་ནས་རྒྱན་དང་སྒེག་ཆོས་བྱེད་པ་ངོ་ཚའི་གནས་ཡིན། དེ་ཡག་བྱེད་མ་དགོས་བཙོག་བྱེད་ཡིན། མཛེས་བྱེད་ཀྱི་རྒྱན་ངོ་མ་དེ་གང་ཡིན་ན་མཁས་པའི་ཡོན་ཏན་བཙུན་པའི་ཚུགས་ཡོད་དགོས་དེ་རྒྱན་རེད། ཁྱིམ་པ་ཡིན་ཡང་ཤེས་རིག་ཡོན་ཏན་གྱི་རྒྱན་དང་ལྡན་པ་བྱེད་པ་དང་། དེའི་ཐོག་ཏུ་རྒྱན་གོས་བབས་ཆགས་གཙང་མ་རེ་བྱས་ན་མཛེས་པོ་ཡོང་བ་ཡིན། ལར་སྐྱ་སེར་སུ་ཡིན་ཡང་གཙང་སྦྲ་ཡོད་དགོས། དྲི་ངན་ཕ་ལེ་མེད་ན་མཛེས་ཤིང་། དེ་ལ་ངོ་ཚ་མི་དགོས། ཟང་ཟིང་གཡེང་བ་རྒྱུ་ནོར་གསོག་འཇོག་འབའ་ཞིག་རང་འདོད་ཁོ་ནས་བསྒྲུབས་ན་ངོ་ཚའི་གནས་ཡིན། ཆོས་པའི་མིང་བཟུང་ནས་ཆོས་མིན་གྱི་བྱ་བ་མང་པོ་བསྒྲུབས་པར་བྱས་ན་ངོ་ཚའི་གནས་ཡིན། རང་གི་ཆེ་ཁྱད་འདོན་པ་དང་ང་རྒྱལ་དྲེགས་པ་ཡིས་གཞན་ལ་བརྙས་སྨོད་བྱེད་པ་འདི་དག་ཐམས་ཅད་བསྒྲུབས་ན་ངོ་ཚའི་གནས་ཡིན་པ་སྟེ། དེ་དག་ནི་ཞེ་སྙིང་ནས་དམ་པའི་ཆོས་མཛད་མཁན་སུ་དང་སུ་འདྲ་ཡིན་ན་དེ་རྣམས་ཀྱིས་སྤང་བར་འཚལ་ལོ།།
༡༣༤ གོང་མའི་རྣམ་ཐར་བསྟེན་པའི་ཆོས་དྲུག་བསྟན་པ།
གོང་མའི་རྣམ་ཐར་བསྟེན་པའི་ཆོས་དྲུག་ནི།།
ཡེང་མེད་མི་རྟག་འཆི་བས་སྐུལ་མ་བཏབ།།
འཁོར་བ་སྡུག་བསྔལ་ཤེས་པས་རྒྱབ་ཏུ་བོར།།
རྒྱལ་སྲིད་ལོངས་སྤྱོད་མཆིལ་མ་བཞིན་དུ་བོར།།
དད་བརྩོན་རྣམ་དག་བསྟན་པའི་ཆོས་སྒོར་ཞུགས།།
དགེ་བའི་བཤེས་བཙལ་ཐོས་བསམ་སྤྲོས་པ་བཅད།།
དཀའ་ཐུབ་ཆེར་སྤྱད་ལུས་སྲོག་འབེན་དུ་བཙུགས།།
དེ་ལྟར་མཛད་པས་གྲུབ་པ་བརྙེས་པ་དང༌།།
དེ་ལ་ཚད་བཙུགས་སྒྲུབ་ལ་འབད་པར་བྱ།།
ཞེས་གསུངས་པ་སྟེ། གོང་མ་དམ་པའི་རྣམ་ཐར་བསྟེན་པའི་ཆོས་དྲུག་ནི། ཚེ་གཅིག་ལ་ཡེངས་བ་མེད་པར་མི་རྟག་འཆི་བས་སྐུལ་མ་རང་ལ་བཏབ་ནས་འཆི་རྐྱེན་ངེས་མེད་ཡིན་པར་བསམ་བློ་བཏང་ནས་བློ་སྣ་ཐུང་དགོས་པ་དང་། འཁོར་བ་འདི་སྡུག་བསྔལ་གྱི་རང་བཞིན་ཅན་ཡིན་པ་ཤེས་པར་བྱས་ནས་ཆོས་བརྒྱད་ཀྱི་ཞེན་པ་རྒྱབ་ཏུ་བོར་བར་བྱེད་དགོས་པ་དང་། རྒྱལ་སྲིད་ཀྱི་འབྱོར་བ་དང་ལོངས་སྤྱོད་རྒྱས་ཀྱང་མཆིལ་མ་ས་རུ་འཕངས་ནས་ཡར་མི་ལེན་པ་བཞིན་དུ་བོར་དགོས་པ་དང་། དད་པ་དང་བརྩོན་འགྲུས་རྣམ་པར་དག་པས་སངས་རྒྱས་ཀྱི་བསྟན་པའི་ཆོས་སྒོར་ཡང་དག་པར་ཞུགས་དགོས་པ་དང་། དགེ་བའི་བཤེས་གཉེན་མཚན་ཉིད་དང་ལྡན་པ་ཞིག་བཙལ་ཏེ། དེའི་མདུན་ནས་ཐོས་བསམ་གྱི་སྤྲོས་པའམ་ཐེ་ཚོམ་གཅིག་ཀྱང་མ་ལུས་པར་གཅོད་པར་བྱེད་པ་དང་། དམ་པའི་ཆོས་ཐོས་པ་དེ་ཡང་བསམ། བསམ་པ་དེ་ཡང་སྒོམ་ཞིང་བསྒྲུབས་ནས་དཀའ་སྤྱད་སྙིང་རུས་ཆེ་ཐང་དུ་སྤྱད་ནས་ལུས་སྲོག་འབེན་དུ་བཙུགས་ནས་ཆོས་སྒྲུབ་པར་བྱེད་པ་སྟེ། དེ་ལྟར་མཛད་པས་སྒྲུབ་པའི་འབྲས་བུ་གྲུབ་པ་བརྙེས་པ་ཡིན་ཕྱིར་གོང་མའི་རྣམ་ཐར་དེ་དག་ལ་ཚད་བཙུགས་ནས་སྒྲུབ་པ་ལ་འབད་པར་བྱའོ།།
༡༣༥ དེ་ལས་གཞན་དོན་ཆོས་དྲུག་འབྱུང་བར་བསྟན་པ།
དེ་ལས་གཞན་དོན་ཆོས་དྲུག་འབྱུང་བ་ནི།།
ཐུགས་རྗེ་འབྱོངས་པས་ཉེ་རིང་མེད་པར་བརྩེ།།
རྟོགས་པ་ཚད་ཕྱིན་བདག་འཛིན་འཁྲུལ་བ་ཞིག།
རྒྱུད་ཚོད་ཤེས་པས་རྟེན་འབྲེལ་ཐབས་ལ་མཁས།།
ཆོས་ཉིད་གྲོལ་བས་ཅི་སྣང་གྲོགས་སུ་འཆར།།
བྱིན་རླབས་ཞུགས་པས་གཞན་སྣང་བསྒྱུར་ནུས་ཤིང༌།།
གདུལ་བྱ་དུས་བབ་དད་ལྡན་འགྲོ་བ་འདུ།།
ཕྱི་ནང་རྟེན་འབྲེལ་གཅིག་ཏུ་འགྲིགས་པ་ཡིན།།
ཞེས་གསུངས་པ་སྟེ། གོང་དུ་གསུངས་པ་དེ་ལྟར་སྒྲུབ་པ་ལ་འབད་པས་གཞན་དོན་འབྱུང་བའི་ཆོས་དྲུག་ནི། ཐུགས་སྙིང་རྗེ་ཆེན་པོ་རྒྱུད་ལ་འབྱོངས་པས་ཉེ་རིང་མེད་པར་སེམས་ཅན་ཐམས་ཅད་ལ་བརྩེ་བ་སྐྱེ་བ་དང་། ཉམས་དང་རྟོགས་པའི་ཡོན་ཏན་ཚད་དུ་ཕྱིན་ནས་བདག་འཛིན་འཁྲུལ་བ་ཞིག་པ་དང་། གཞན་གདུལ་བྱའི་རྒྱུད་ཚོད་ཤེས་པས་ན་དུས་ལ་བབས་དང་མ་བབས་ལ་སོགས་པའི་རྟེན་འབྲེལ་གྱི་ཐབས་ལ་མཁས་པ་དང་། ཆོས་ཅན་ཐམས་ཅད་ཆོས་ཉིད་ཀྱི་ཀློང་དུ་གྲོལ་བས་ན་ཅི་སྣང་ཐམས་ཅད་ལམ་གྱི་གྲོགས་སུ་འཆར་བ་ཡིན་པ་དང་། གོང་མའི་བྱིན་རླབས་རང་གི་རྒྱུད་ལ་ཞུགས་པས་ཆོས་བཤད་ན་ཕན་ཐོགས་པ་སོགས་གཞན་སྣང་བསྒྱུར་ནུས་པ་སྟེ། དེ་ཡང་ནུས་པ་ཁྱད་པར་ཅན་ངེས་མེད་ཀྱི་ཐོག་ནས་ཐོན་ཐུབ་པ་བྱིན་རླབས་དང་། དེས་བྱིན་གྱིས་བརླབས་པའམ་དེར་སྒྱུར་ཐུབ་པ་ལ་བྱིན་རླབས་ཐོབ་ཅེས་ཟེར། བྱིན་རླབས་ཡིན་ཚད་བཟང་པོ་ཏག་ཏག་ཡིན་པར་གོ་མི་དགོས་ཏེ། བདུད་ཀྱིས་བྱིན་གྱིས་རླབས་པ་ཡང་ཡོད་པའི་ཕྱིར། དེས་ན་ངན་པའི་བྱིན་རླབས་གྲོགས་ངན་དང་འགྲོགས་ནས་དེའི་ཤུགས་ལ་འགྲོ་བ་ལ་སོགས་པ་དང་། བཟང་པོའི་བྱིན་རླབས་རྟེན་ཁྱད་པར་ཅན་མཇལ་ན་ཉམས་རྟོགས་ཁྱད་པར་ཅན་སྐྱེ་བ་དང་། སྔར་མེད་ཀྱི་དད་པ་འཁྲུངས་པ་དང་། གནས་ཁྱད་པར་ཅན་གྱི་དབང་གིས་ཏིང་ངེ་འཛིན་དང་དད་པ་དང་ངེས་འབྱུང་རང་ཤུགས་ཀྱིས་སྐྱེ་བ་དང་། བླ་མས་ཆོས་གསུངས་དུས་ངེས་ཤེས་གཏིང་ནས་འདྲོངས་ནས་རྒྱུད་ལ་ཕན་ཐོགས་པ་ལ་སོགས་པ་ཡོད་དོ། །གདུལ་བྱ་དུས་ལ་བབས་ན་དད་ལྡན་འགྲོ་བ་ངང་གིས་འདུས་ནས་ཕྱི་དང་ནང་གི་རྟེན་འབྲེལ་དུས་གཅིག་ལ་མཉམ་དུ་འགྲིགས་པ་ཡིན་ནོ།།
༡༣༦ དགེ་སྦྱོར་རྒྱུད་ལ་མ་ཁེལ་སྐྱོན་དྲུག་བསྟན་པ།
དགེ་སྦྱོར་རྒྱུད་ལ་མ་ཁེལ་སྐྱོན་དྲུག་ནི།།
ཉམས་ལེན་མེད་ན་ཤེས་ཀྱང་འཁོར་བར་འཁྱམ།།
འབེན་དྲུང་བཞག་ནས་གཞན་དུ་རྒྱང་མདའ་འཕེན།།
ཇག་པ་ཤར་རི་ནུབ་རིར་ར 
་མདར་རྒྱུག།
རྐུན་མ་ནགས་བྲོས་རྐང་རྗེས་བྱེ་རིར་བཅད།།
ཆུས་ཁྱེར་ར་མདའ་སྐམ་ལ་རྒྱུག་པ་སྟེ།།
གྱེར་བའི་སྨྲང་ཡོད་མདོས་གཏོང་ས་མི་ཤེས།།
དེ་འདྲའི་གང་ཟག་བདེ་ཆེན་ས་དང་རིང༌།།
ཞེས་གསུངས་པ་སྟེ། དགེ་སྦྱོར་གང་བྱས་རྒྱུད་ལ་མ་ཁེལ་ན་སྐྱོན་དྲུག་འབྱུང་བ་ནི། ཉམས་ལེན་གྱི་གནད་མེད་ན་འཁོར་བ་རང་བཞིན་མེད་ཅེས་ཟེར་ཤེས་ཀྱང་རང་བཞིན་མེད་པའི་དོན་རྒྱུད་ཐོག་ལ་མ་ཁེལ་བས་འཁོར་བར་འཁྱམས་པ་ཡིན་པ་ནི། དཔེར་ན་འབེན་དྲུང་དུ་བཞག་ནས་གཞན་དུ་རྒྱང་མདའ་འཕངས་པར་བྱས་ཀྱང་
འབེན་གྱི་སྟེང་དུ་ཁེལ་རྒྱུ་མེད་པ་ལྟ་བུ་དང་། ཇག་པ་ཤར་རིའི་ཕྱོགས་ལ་བཞག་ནས་ནུབ་རིར་ར ་མདར་རྒྱུག་ན་ཐུག་རྒྱུ་མེད་པ་ལྟ་བུ་དང་། རྐུན་མ་ནགས་སུ་བྲོས་ཚེ་རྐང་རྗེས་བྱེ་རི་ལ་བཅད་པ་ལྟ་བུ་དང་། མི་ཆུས་ཁྱེར་དུས་ཆུ་ནང་དུ་སོང་ནས་སྲོག་སྐྱོབ་ཐབས་མི་བྱེད་པར་ར་མདའ་སྐམ་ལ་རྒྱུག་པ་ལྟ་བུ་དང་། གླུད་འཕེན་བྱེད་ཀྱི་འདོན་ཆོག་གྱེར་བའི་དབྱངས་རྟའི་སྨྲང་ཡོད་ཀྱང་མདོས་ཀྱི་ཡས་ལམ་མམ་གཏོང་ས་མི་ཤེས་པ་ལྟ་བུ་སྟེ། དེ་དག་ནི་དགག་བྱ་རང་རྒྱུད་ལ་ཡོད་པའི་བདེན་འཛིན་དང་དེས་སྐྱེད་པའི་ཉོན་མོངས་སྤོང་བ་ལ་མི་བརྩོན་པར་ཚིག་གི་བཤད་རྒྱང་འཐེན་པའི་འཛོལ་བ་ཅན། ཕྱོགས་དང་ལམ་དམིགས་པ་དང་འདུན་པ་ནོར་སོང་བའི་གང་ཟག་ཡིན་པས་བདེ་ཆེན་གྱི་ས་དང་ཐག་རིང༌བ་ཡིན་ནོ།།
༡༣༧ དཀའ་བའི་སྐྱོན་དྲུག་འབྱུང་བར་བསྟན་པ།
དཀའ་བའི་སྐྱོན་དྲུག་འབྱུང་བར་བསྟན་པ་ནི།།
འཁོར་བར་འདུན་ལ་ཡང་དག་དད་པ་དཀའ།།
ཁྲེལ་འཛེམ་མེད་པའི་བསླབ་གསུམ་བསྲུང་བ་དཀའ།།
མཚན་ལྡན་མ་མཇལ་ཐར་ལམ་ཚུད་པ་དཀའ།།
ཐབས་ལམ་མ་ཆུན་ཡེ་ཤེས་འཆར་བར་དཀའ།།
མཐར་འཛིན་མ་གྲོལ་ལྟ་བ་རྟོགས་པར་དཀའ།།
མངོན་ཤེས་མེད་པའི་གཞན་དོན་འབྱུང་བར་དཀའ།།
དཀའ་བ་ལགས་པས་ཀུན་གྱིས་འགྲུབ་པ་དཀོན།།
ཞེས་གསུངས་པ་སྟེ། ལམ་སྒྲུབ་སྐབས་ཀྱི་དཀའ་བའི་སྐྱོན་དྲུག་འབྱུང་བར་བསྟན་པ་ནི། འཁོར་བ་ལ་འདུན་ནས་འཁོར་བ་འདི་བདེ་ཞིང་སྐྱིད་པར་འདུག་སྙམ་པའི་ངེས་འབྱུང་མ་སྐྱེས་པའི་གང་ཟག་དེ་ལ་ཡང་དག་པའི་དད་པ་ཡོང་བ་དཀའ་བ་ཡིན་ཏེ། ཚེ་འདིའི་ཆེད་ཙམ་ལས་ཕྱི་མའི་འདེང་མེད་ན་དེ་ལ་ངེས་འབྱུང་མེད་པ་ཡིན། དེ་འདྲ་དེས་རྒྱུ་འབྲས་ཀྱི་འགྲོ་སྟངས་མི་ཤེས་པས་དད་པ་ཡང་དག་པ་བློ་གཏད་ལིང་སྐྱུར་ཡོད་པ་མིན། དེས་ན་དེ་ལ་བྱིན་རླབས་ཀྱང་ཐོབ་དཀའ་བ་ཡིན་ནོ། །ཁྲེལ་ལ་འཛེམ་བག་མེད་པའི་གང་ཟག་དེས་བསླབ་གསུམ་ཚུལ་བཞིན་དུ་བསྲུང་བ་དཀའ་བ་ཡིན་པ་དང་། མཚན་ལྡན་གྱི་བླ་མ་དམ་པ་མཇལ་ནས་གདམས་ངག་གི་བཅུད་མྱོང་མཁན་ཞིག་ཡིན་ཚེ་ཕྱོགས་གང་ནས་ཀྱང་མི་འདྲ་བའི་ཁྱད་པར་ཡོད་ཅིང་། དེ་ལས་གཞན་དུ་རང་གར་ཁུངས་མེད་ལུང་མེད་དག་གིས་ཕྱི་ཚུལ་ཅི་འདྲའི་འཆོས་བཞིན་བསྡད་ཀྱང་ཐར་ལམ་ཡང་དག་པ་ལ་ཚུད་པ་དཀའ་བ་ཡིན་པ་དང་། གསང་སྔགས་ཀྱི་ཐབས་གྲོལ་གྱི་ལམ་གཉིས་ལས་ཐབས་ལམ་གནད་དུ་མ་ཆུན་ན་བདེ་སྟོང་གི་ཡེ་ཤེས་འཆར་བར་དཀའ་བ་དང་། རྟག་ཆད་ལ་སོགས་པའི་མཐར་འཛིན་གྱི་སྤྲོས་པ་ལས་མ་གྲོལ་བ་ཡིས་སྟོང་ཉིད་ཀྱི་ལྟ་བ་རྟོགས་པར་དཀའ་བ་དང་། རང་ལ་མངོན་ཤེས་མེད་པའི་འོལ་ཚོད་ཀྱིས་གཞན་དོན་རྣམ་དག་འབྱུང་བར་དཀའ་བ་ཡིན་པས། གཞན་དོན་བྱེད་པའི་དུས་སུ་གཞན་གྱི་རྒྱུད་བརྟག་པ་ལ་སོགས་པའི་མངོན་ཤེས་ངེས་པར་དུ་ཡོད་དགོས་པ་ལས། ཁ་བའི་འོག་གི་དངོས་པོ་བཙལ་བ་བཞིན་དུ་གསལ་བོར་མི་ཤེས་པས་གཞན་རྒྱུད་ཐུལ་དཀའ་བ་ཡིན། དཀའ་བ་ལགས་པས་ཀུན་གྱིས་ཚེགས་མེད་བདེ་བླག་ཏུ་འགྲུབ་པ་དཀོན་ནོ།།
༡༣༨ ཉམས་ལེན་ཡེངས་ཐུབ་གོམས་པ་རྣམ་དྲུག་བསྟན་པ།
ཉམས་ལེན་ཡེངས་ཐུབ་གོམས་པ་རྣམ་དྲུག་ནི།།
དལ་འབྱོར་དྲན་པས་དོན་མེད་བྱ་བ་སྤང༌།།
མི་རྟོག་ཡེངས་མེད་ལེ་ལོའི་དགྲ་དང་བྲལ།།
དངོས་གྲུབ་རྙེད་པས་བརྩོན་པ་རྒྱུན་མི་འཆད།།
ཉམས་རྟོགས་འཕེལ་བས་སྒོམ་སྒྲུབ་བྲོད་པ་སྐྱེ།།
རིག་པ་དབང་ཐོབ་ཡེངས་རྐྱེན་ཆོས་ཉིད་འཆར།།
མདོ་རྒྱུད་ཆོས་དང་རང་རྒྱུད་འདྲེས་པའོ།།
ཞེས་གསུངས་པ་སྟེ། ཉམས་ལེན་ཡེངས་བ་ཐུབ་ནས་མི་ཡེངས་བར་གོམས་པ་རྣམ་དྲུག་ནི། དལ་འབྱོར་རྙེད་དཀའ་ཡིན་པ་དྲན་པས་ན་དོན་མེད་ཀྱི་བྱ་བ་སྤོང་ནུས་པ་དང་། རྣམ་པར་མི་རྟོག་པར་ཡེངས་མེད་ཀྱི་ཏིང་འཛིན་ལ་གནས་ཐུབ་ན་ལེ་ལོའི་དགྲ་དང་བྲལ་བ་དང་། དངོས་གྲུབ་རྙེད་པ་ཞིག་ཡིན་ཚེ་ཆོས་ལ་བརྩོན་པ་རྒྱུན་མི་འཆད་པར་རང་ཤུགས་ཀྱིས་འཇུག་པ་ཡིན་པ་དང་། ཉམས་རྟོགས་གོང་ནས་གོང་དུ་འཕེལ་བས་སྒོམ་སྒྲུབ་ལ་འབྲས་བུ་ཡོད་པར་ཧ་གོ་ནས་བྲོད་པའམ་དགའ་བ་རང་བཞིན་གྱིས་སྐྱེ་བ་དང་། རིག་པ་ལ་དབང་ཐོབ་ཚེ་ཕྱིའི་ཡེངས་རྐྱེན་དེ་ཡང་ཆོས་ཉིད་དུ་འཆར་བ་དང་། དེ་ལྟར་འགྱུར་ཚེ་མདོ་དང་རྒྱུད་སྡེའི་ཆོས་ཚུལ་རབ་འབྱམས་རང་གི་རྒྱུད་དང་འདྲེས་པར་འགྱུར་རོ།།
༡༣༩ མཐར་ཕྱིན་བར་དུ་བསྟན་པའི་ཆོས་དྲུག་བསྟན་པ།
མཐར་ཕྱིན་བར་དུ་བསྟེན་པའི་ཆོས་དྲུག་ནི།།
ཉེ་འབྲེལ་བོར་ལ་ཆོས་ལྡན་གྲོགས་བཟང་བསྟེན།།
སྡིག་གྲོགས་བོར་ལ་མཁས་བཙུན་བླ་མ་བསྟེན།།
འདུན་གྲོས་བོར་ལ་གཏན་གྱི་སྐྱིད་འདུན་ཆོས།།
ཐོས་བསམ་བསྟེན་ལ་རྒྱུད་ལ་ཅི་འདྲིས་གྱིས།།
གྲོང་ཡུལ་སྤངས་ལ་རི་ངོགས་དབེན་པ་བསྟེན།།
གདམས་པ་ཚོལ་ལ་བརྩོན་པས་སྒྲུབ་པ་གྱིས།།
དེ་ལྟར་བྱས་ན་དངོས་གྲུབ་མྱུར་དུ་ཐོབ།།
ཅེས་གསུངས་པ་སྟེ། སྒྲུབ་པ་མཐར་མ་ཕྱིན་གྱི་བར་དུ་བསྟེན་དགོས་པའི་ཆོས་དྲུག་ནི། ཉེ་འབྲེལ་བདུད་ཀྱི་གཡབ་མོ་ཡིན་པས་བོར་ལ་ཆོས་ལྡན་ནམ་ཆོས་མཐུན་གྱི་གྲོགས་བཟང་པོ་བསྟེན་པ་དང་། སྡིག་གྲོགས་ནི་ངན་འགྲོའི་ལམ་མཁན་ཡིན་པས་བོར་ནས་མཁས་བཙུན་བཟང་གསུམ་དང་ལྡན་པའི་བླ་མ་ལ་བསྟེན་པ་དང་། དེ་ཡང་སྡིག་གྲོགས་ཞེས་པ་ནག་པོ་རྭ་ཅན་ཞིག་ལོགས་ན་མེད་པར་དུས་རྒྱུན་ཟུར་དུ་ཡོད་པའི་ཐོས་བསམ་སྒོམ་པ་རྣམས་མར་འགྲིབ་པར་བྱེད་ཅིང་། ཉོན་མོངས་ཆགས་སྡང་རྨོངས་གསུམ་ཡར་འཕེལ་བར་བྱེད་པ་དེ་དག་ཡིན་ནོ། །འཇིག་རྟེན་གྱི་བྱ་བ་མང་པོ་ཞིག་ཐོན་དགོས་བསམས་ནས་འདུན་གྲོས་མང་པོ་བྱེད་པ་སྟེ། དཔེར་ན་མང་པོའི་གྲོས་འགོ་བསྡུ་བ་དང་། ཡ་ཀའི་གཉེན་སྒྲིག་ས། མར་ཀའི་གྱོད་བཤད་ས། ཐ་ན་རྩྭ་ས་མཚེར་ས་རྩོད་ས་ཚུན་ཆོད་ལ་ཐོན་ཡོད་པ་དེ་འདྲ་དེ་བོར་ནས་གཏན་གྱི་བདེ་སྐྱིད་ཀྱི་འདུན་མ་བཅའ་དགོས་པ་དང་། ཐོས་བསམ་བསྟེན་པར་བྱས་ནས་དེ་དག་རང་རྒྱུད་ལ་ཅི་འདྲིས་བྱེད་པ་དང་། ཆོས་སྒྲུབ་པའི་གང་ཟག་གིས་གྲོང་ཡུལ་འདུ་འཛིའི་གནས་སྤངས་ལ་རི་ངོགས་དབེན་པའི་རི་ཁྲོད་ལ་བསྟེན་པ་དང་། གདམས་པ་གང་གིས་ཟབ་པ་རྣམས་བཙལ་ནས་དེ་ལ་བརྩོན་པས་སྒྲུབ་པ་དགོས་པ་སྟེ། དེ་ལྟར་བྱས་ན་མཆོག་ཐུན་གྱི་དངོས་གྲུབ་རང་རང་གི་བློ་ཚོད་དང་མཐུན་པར་མྱུར་དུ་ཐོབ་པ་ཡིན་ནོ།།
༡༤༠ ཕན་གནོད་འདྲེས་མར་སོང་བ་རྣམ་དྲུག་བསྟན་པ།
ཕན་གནོད་འདྲེས་མར་སོང་བ་རྣམ་དྲུག་ནི།།
ཡོན་ཏན་མི་སྐྱེ་བླ་མ་བསྟེན་པ་དང༌།།
སྲོལ་དུ་མི་ཚུད་སློབ་མ་བསྟེན་པ་དང༌།།
ཆོས་བརྒྱད་མ་བྲལ་སྒྲུབ་པ་བྱེད་པ་དང༌།།
ལོག་འཚོའི་རྙེད་འཚོལ་གཞན་དོན་བྱེད་པ་དང༌།།
བསྲུང་སེམས་མེད་པའི་སྡོམ་ཁྲིམས་ནོད་པ་དང༌།།
དགེ་སྡིག་འཆོལ་བའི་གསང་སྔགས་སྤྱོད་པ་རྣམས།།
ཕན་གནོད་འདྲེས་པས་ཆོས་ཀྱི་གཟུགས་བརྙན་ཡིན།།
ཞེས་གསུངས་པ་སྟེ། བཟང་ངན་གཉིས་ཀ་འདྲ་འདྲེས་སོང་ནས་ཕན་གནོད་འདྲེས་མར་ཡོད་པའི་ཆོས་རྣམ་པ་དྲུག་ནི། ཡོན་ཏན་མི་སྐྱེ་བའི་བླ་མ་བསྟེན་ན་ཡོན་ཏན་མི་སྐྱེ་བས་ཕན་པ་ཆེར་མེད་ལ། བླ་མ་བསྟེན་པའི་དགེ་བ་དང་བསོད་ནམས་ཙམ་ཡོད་པ་དང༌། སྲོལ་དུ་མི་ཚུད་པའམ་ལམ་དུ་མི་ཞོག་པའི་སློབ་མ་བསྟེན་ན་ཕན་ཐོགས་པ་མིན་ཡང་། བླ་མའི་ངོས་ནས་ཕན་སེམས་བཟང་པོ་འཆང་ཡོད་པ་དང༌། ཆོས་བརྒྱད་དང་མ་བྲལ་བའི་སྒྲུབ་པ་བྱས་ན་ཆོས་བརྒྱད་མ་བྲལ་བའི་ཕྱོགས་དེ་གནོད་པ་ཅན་ཡིན་ཡང་སྒྲུབ་པ་བྱེད་པ་དེ་ལ་ཕན་པ་ཅུང་ཙམ་ཡོད་པ་དང༌། ལོག་འཚོའི་རྙེད་འཚོལ་གྱིས་གཞན་དོན་བྱེད་པ་གཅིག་ལས་བླངས་པ་གཅིག་ལ་སྦྱིན་པ་བྱས་ན་གཞན་དོན་དང༌ལོག་འཚོའི་ཕན་གནོད་འདྲེས་པ་དང་། བསླབ་པ་སྲུང་ཐུབ་པའི་ཆོད་སེམས་མེད་པ་དེ་འདྲ་དེས་སྡོམ་ཁྲིམས་མནོས་ནས་སྐབས་གཅིག་བསྲུངས་པའི་ཕན་ཡོན་དང་འགལ་བའི་ཉེས་པ་གཉིས་ཀ་ལྡན་པ་དང༌། དགེ་སྡིག་འཆོལ་བའི་གསང་སྔགས་སྤྱོད་པ་སྟེ་གསང་སྔགས་སྤྱོད་པའི་ཕན་ཡོན་དང་དགེ་སྡིག་འཆོལ་བའི་ཉེས་པ་གཉིས་ཀ་དང་ལྡན་པ་རྣམས་ཕན་གནོད་འདྲེས་པས་བསྒྲུབ་རྒྱུ་ཆོས་ཀྱི་གཟུགས་བརྙན་དང་སྒྲུབ་མཁན་ཆོས་པའི་གཟུགས་བརྙན་ཡིན་ནོ།།
༡༤༡ ལོག་གནོན་གཟེར་བུ་ལྟ་བུའི་ཆོས་དྲུག་བསྟན་པ།
ལོག་གནོན་གཟེར་བུ་ལྟ་བུའི་ཆོས་དྲུག་ནི།།
གནོད་བྱེད་དགྲ་སྡང་བཏུལ་ཞིང་སླར་མང་བས།།
ལོག་གནོན་བདག་འཛིན་གདུག་པ་འདུལ་བ་གནད།།
འདོད་ཡོན་སྤྱད་ཅིང་ཞེན་པ་སླར་འཕེལ་བས།།
ལོག་གནོན་བཙན་ཐབས་ཞེན་པ་གཅོད་པ་གནད།།
དལ་ཚོགས་ལོང་གཏམ་སྨྲས་ཤིང་སླར་མང་བས།།
ལོག་གནོན་མི་སྨྲ་གཅིག་པུར་འདུག་པ་གནད།།
གཞན་སེམས་གཟུང་འཛིན་བྱར་དགོས་སླར་མང་བས།།
ལོག་གནོན་གར་བབས་ངང་ལ་སྐྱུར་བ་གནད།།
རང་སེམས་སྒྲིམས་ཤིང་འཇུར་བུ་སླར་མང་བས།།
ལོག་གནོན་རང་བབས་ངང་དེར་གློད་པ་གནད།།
བྱ་བྱེད་སྤྲོས་པ་བྱས་ཤིང་སླར་མང་བས།།
ལོག་གནོན་ཅོག་གཞག་རང་བབས་གཏོང་བ་གནད།།
འདི་རྣམས་ལྡན་ན་རེ་དོགས་གཉིས་འཛིན་འཇིག།
ཅེས་གསུངས་པ་སྟེ། ཕྱིན་ཅི་ལོག་གི་མགོ་གནོན་པར་བྱེད་ཅིང་དེ་ལས་མི་འདའ་བར་བྱེད་པའི་གཟེར་བུ་ལྟ་བུའི་ཆོས་དྲུག་ནི། ཕྱིའི་གནོད་པར་བྱེད་པའི་དགྲ་སྡང་དེ་བཏུལ་ཞིང་བཏུལ་སླར་མང་བ་ནི་རང་རྒྱུད་བདག་འཛིན་གྱི་དགྲ་བོ་མ་ཐུལ་བས་ཡིན་ཕྱིར། དེའི་ལོག་གནོན་བདག་འཛིན་གདུག་པ་ཅན་ནང་རང་གི་རྒྱུད་ནས་འདུལ་བ་གནད་ཡིན་པ་དང་། འདོད་པའི་ཡོན་ཏན་སྤྱད་ཟིན་ཅིང་ཞེན་པ་ཟད་པ་ནི་མེད་པར་སླར་འཕེལ་བས། དེའི་ལོག་གནོན་རང་རྒྱུད་ཀྱི་ཞེན་པ་བཙན་ཐབས་ཀྱིས་གཅོད་པ་གནད་ཡིན་པ་དང་། མི་དལ་མོ་མང་པོ་ཚོགས་ནས་ལོང་གཏམ་སྣ་ཚོགས་མང་པོ་ཡས་བཤད་མས་བཤད་མང་པོ་བྱས་ཤིང་བྱས་ལ་སླར་ཇེ་མང་དུ་སོང་ནས་ཁ་འཛིང་སོགས་ཀྱང་ཡོང་བ་ཡིན་པས། ལོག་པའི་ལམ་དེ་གནོན་པ་ལ་མི་སྨྲ་གཅིག་པུར་འདུག་པ་གནད་ཡིན་པ་དང་། གཞན་སེམས་གཟུང་འཛིན་བྱས་ནས་ཡས་ཀྱི་ངོ་བླངས་མས་དང་འབྲེལ་བཀོད་པའི་མཇུག་རྫོགས་སུ་མེད་པར་སླར་ཡང་འཕེལ་བས། དེའི་ལོག་གནོན་ལ་ལྟོས་མེད་གར་བབས་ངང་ལ་སྐྱུར་བ་ནི་གནད་ཟབ་པའི་མཆོག་ཡིན་པ་དང་། སྒོམ་བྱེད་སྐབས་རང་སེམས་བསྒྲིམས་ཤིང་བསྒྲིམས་ལ་སྐུད་པ་གྲིམ་དྲགས་ན་འཇུར་བུ་སླར་མང་བ་ལྟར་ཡིན་པས། དེའི་ལོག་གནོན་མ་བཅོས་རང་བབས་ངང་དེར་གློད་པ་གནད་ཡིན་པ་དང་། བྱ་བྱེད་སྤྲོས་པ་བྱས་ཤིང་བྱས་ལ་སླར་མང་བ་དགོས་རྒྱུ་ཇེ་མང་དུ་འགྲོ་བས། ལོག་གནོན་ཅོག་གེར་མ་བཅོས་པར་གཞག་ཅིང་རང་བབས་སུ་གཏོང་བའི་གནད་དེ། འདི་རྣམས་ལྡན་ན་རེ་དོགས་གཉིས་འཛིན་རང་ཤུགས་ཀྱིས་འཇིག་ནས་འཆིང་བ་ལས་གྲོལ་བ་ཡིན་ནོ།།
༡༤༢ རང་རྒྱུད་ཆོས་ལ་འབྱོར་བའི་རྟགས་དྲུག་བསྟན་པ།
རང་རྒྱུད་ཆོས་ལ་འབྱོར་བའི་རྟགས་དྲུག་ནི།།
འདོད་ཡོན་བདུད་ཤེས་འཁོར་བར་ཞེན་ལོག་རྟགས།།
ཅི་བྱས་ལམ་འགྱུར་བྱིན་རླབས་ཞུགས་པའི་རྟགས།།
རིག་པ་དབང་བསྒྱུར་དངོས་གྲུབ་མཆོག་ཐོབ་རྟགས།།
གཞན་གྱིས་མི་འགྱུར་ལྟ་དགོངས་སྐྱེས་པའི་རྟགས།།
བླ་མ་མཇལ་སྤྲོ་མོས་གུས་ཞུགས་པའི་རྟགས།།
ཚེ་འདི་བློས་ཐོངས་ཆོས་ཀྱིས་ཕན་ཐོགས་རྟགས།།
རྟགས་ཆེན་དྲུག་ལྡན་སྐྱེས་བུ་དམ་པ་ཡིན།།
ཞེས་གསུངས་པ་སྟེ། རང་རྒྱུད་ཆོས་ལ་འབྱོར་བའི་རྟགས་དྲུག་ནི། འདོད་པའི་ཡོན་ཏན་ཐར་བའི་ལམ་ལ་བར་དུ་གཅོད་པའི་བདུད་ཡིན་པར་ཤེས་ཡོད་ན། འཁོར་བར་ཞེན་པ་ལོག་ནས་ངེས་པར་འབྱུང་བའི་བློ་ཆེ་ཆུང་ལ་མ་ལྟོས་པར་སྐྱེས་ཡོད་པའི་རྟགས་ཡིན་པ་དང་། བྱ་བ་ཅི་བྱས་ཀྱང་ལམ་ཡང་དག་ལས་མི་འདའ་བར་གྱུར་ན་བྱིན་རླབས་ཞུགས་པའི་རྟགས་ཡིན་པས་མ་ཚད། ན་ན་ན་སྟེ་ན་བས་དགའ། །སྔར་བསགས་ཀྱི་ལས་ངན་ཟད་པ་ཡིན། །ཞེས་དང་། ཤི་ན་ཤི་ན་ཤི་སྟེ་དགའ། །རྣལ་འབྱོར་འཚང་ཆུང་རྒྱ་བ་ཡིན། །ཞེས་པ་ལྟར་དུ་རྐྱེན་ངན་གྲོགས་སུ་བསྒྱུར་ནས་ལམ་དུ་སློང་ཤེས་ནའང་བྱིན་རླབས་ཞུགས་པའི་རྟགས་ཡིན། སྣང་སེམས་ལ་རང་དབང་འབྱོར་ནས་རིག་པ་ལ་དབང་བསྒྱུར་ཐུབ་ན་དངོས་གྲུབ་མཆོག་ཐོབ་ཡོད་པའི་རྟགས་དང་། གཞན་རྐྱེན་འཇམ་རྩུབ་བཟང་ངན་གང་གིས་ཀྱང་མི་འགྱུར་བ་ནི་ལྟ་དགོངས་སྐྱེས་ཤིང་བརྟན་པའི་རྟགས་ཡིན་པ་དང་། བླ་མ་ཡང་དང་ཡང་དུ་མཇལ་བར་སྤྲོ་ཞིང་འདུན་པ་ནི་མོས་གུས་ཞུགས་པའི་རྟགས་ཡིན་པ་ལས་བླ་མའི་མདུན་ནས་ཆོས་ཞུས་ཏེ་བརྒྱུད་པ་ལོན་ཚར་དུས་ཕྱིར་བལྟས་མེད་པ་ནི་མོས་གུས་མེད་པའི་རྟགས་ཡིན་ལ། གཞན་ཡང་བླ་མའི་ཐུགས་དང་འབྲལ་བ་མེད་པ། བླ་མ་དུས་གསུམ་སངས་རྒྱས་ལ། །ཡིད་དུང་ངེ་བ་ལ་འབྲལ་བ་མེད། །ཅེས་པ་ལྟར་ཡིན་ན་ཁྱད་པར་དུ་མོས་གུས་ཡོད་པའི་རྟགས་ཡིན་ནོ། །ཚེ་འདི་བློས་ཐོངས་ཡོད་ན་ཆོས་ཀྱིས་ཕན་ཐོགས་ཡོད་པའི་རྟགས་ཡིན་ཏེ་ཚེ་བློས་བཏང་གི་ནང་དུ་ཡོན་ཏན་ཁ་ཚང་འདུས་ཡོད་པས་སོ། །རྟགས་ཆེན་པོ་འདི་དྲུག་དང་སུ་ལྡན་པ་དེ་སྐྱེས་བུ་དམ་པ་ཡིན་ནོ།།
༡༤༣ མི་འཇིགས་རྣམ་དྲུག་དགོས་པར་བསྟན་པ་ནི།
མི་འཇིགས་རྣམ་དྲུག་དགོས་པར་བསྟན་པ་ནི།།
ཟབ་དོན་ཉམས་བླངས་ངན་རྟོག་དགྲས་མི་འཇིགས།།
སེམས་ཉིད་དོན་བལྟས་ཆོས་བརྒྱད་དགྲས་མི་འཇིགས།།
ཆོས་སྐུ་རྩལ་འབྱོངས་གཟུང་འཛིན་དགྲས་མི་འཇིགས།།
གཞི་མེད་ལམ་བླངས་སྒྲིབ་གཉིས་དགྲས་མི་འཇིགས།།
བདེ་ཆེན་ཉམས་བླངས་སྡུག་བསྔལ་དགྲས་མི་འཇིགས།།
ཕྱོགས་བྲལ་ཉམས་བླངས་རེ་དོགས་དགྲས་མི་འཇིགས།།
དེ་དག་གང་ལྡན་བྱས་པ་དོན་ཆེན་འགྲུབ།།
ཅེས་གསུངས་པ་སྟེ། མི་འཇིགས་པ་རྣམ་དྲུག་དགོས་པར་བསྟན་པ་ནི། ཟབ་མོའི་དོན་གོ་ནས་ཉམས་སུ་བླངས་ན་ངན་རྟོག་གི་དགྲ་ཅི་ལྟར་བྱུང་ཡང་དེ་ལ་མི་འཇིགས་པར་ཐོབ་པ་དང་། སེམས་ཉིད་ཀྱི་དོན་ལ་བལྟས་ནས་ངོ་ཤེས་ན་འཇིག་རྟེན་ཆོས་བརྒྱད་ཀྱི་དགྲས་མི་འཇིགས་པས། ཆོས་བརྒྱད་མགོ་རུ་ཤོར་ཡོད་ན་སེམས་ཉིད་ཀྱི་དོན་རྟོགས་མེད་པའི་རྟགས་ཡིན། རང་སེམས་ཆོས་སྐུ་རུ་ངོ་ཤེས་པའི་རྩལ་འབྱོངས་ཡོད་ན་གཟུང་དང་འཛིན་པའི་དགྲ་བོས་མི་འཇིགས་པས་གཟུང་འཛིན་གྱི་དགྲ་ལ་འཇིགས་དུས་རྩལ་འབྱོངས་མེད་པའི་རྟགས་ཡིན། གཞི་མེད་རྩ་བྲལ་སྤྲོས་པ་དང་བྲལ་བའི་སྟོང་ཉིད་ཀྱི་དོན་རྟོགས་ནས་དེའི་རང་ལམ་བླངས་བས་སྒྲིབ་གཉིས་ཀྱི་དགྲས་མི་འཇིགས་པ་དང་། བདེ་ཆེན་ཉམས་སུ་བླངས་ནས་མི་བདེའི་སྡུག་བསྔལ་རང་སར་དག་པས་སྡུག་བསྔལ་གྱི་དགྲས་མི་འཇིགས་པ་དང་། ཕྱོགས་མེད་ཕྱོགས་དང་བྲལ་བའི་ཉམས་བླངས་གནད་དུ་སོང་ན། རེ་དང་དོགས་པའི་དགྲས་མི་འཇིགས་པ་བྱ་རྒོད་པོ་མཁའ་དབྱིངས་ནས་འཕུར་ན་གཡང་ས་བྲག་ཀླུང་ལ་མི་འཇིགས་པ་ལྟ་བུ་ཡིན་པ་དང་། དེ་དག་ཐམས་ཅད་དང་ལྡན་ན་སྨོས་མ་དགོས་ལ་ནང་གསེས་ཀྱི་རེ་རེ་ཙམ་ལྡན་ཡང་བྱས་པ་དོན་ཆེན་འགྲུབ་པ་ཡིན་ནོ།།
༡༤༤ ཆོས་ལ་ཞུགས་པའི་སྤང་བླང་ཆོས་དྲུག་བསྟན་པ།
ཆོས་ལ་ཞུགས་པའི་སྤང་བླང་ཆོས་དྲུག་ནི།།
ཤེས་བཞིན་མ་བསྟེན་སྤྱོད་ལམ་ཆོས་མི་འབྱོར།།
མཐུན་འཇུག་མ་སྤངས་དགེ་སྦྱོར་སྲང་མི་ཚུད།།
གནད་ཀྱིས་མ་གཅུན་ཉམས་མྱོང་དྲོད་མི་སྐྱེ།།
དུས་ལ་མ་བབས་གཞན་དོན་ཕན་མི་ཐོགས།།
ནུས་མཐུ་མ་གྲུབ་བར་ཆད་རྐྱེན་མི་སོལ།།
ཟུང་འཇུག་མ་བསླངས་ཚེ་གཅིག་སངས་རྒྱས་མེད།།
དེ་བས་དགེ་སྦྱོར་གནད་དུ་འགྲོ་བ་གཅེས།།
ཞེས་གསུངས་པ་སྟེ། ཆོས་ལ་ཞུགས་པའི་སྤང་བླང་གི་ཆོས་དྲུག་ནི། རང་རྒྱུད་ལ་ཉེས་པ་བྱུང་དང་མ་བྱུང་རྟོག་པ་ནི་ཤེས་བཞིན་ཡིན་ལ། དེ་མ་བསྟེན་ན་སྤྱོད་ལམ་རྣམ་པར་དག་པའི་ཆོས་ལ་མི་འབྱོར་བ་དང་། རང་དོན་གྱི་འཇིག་རྟེན་མཐུན་འཇུག་མ་སྤངས་ན། ཡང་དག་པའི་དགེ་སྦྱོར་སྲང་ལ་མ་ཚུད་པ་ནི། རང་གིས་རང་ལ་བརྟགས་ཤིང་དཔྱད་ན་ཕྱི་ཚུལ་ལྟར་སྣང་གི་དགེ་སྦྱོར་རེ་བྱས་ཀྱང་། སེམས་ཀྱི་སྟེང་གི་དགེ་བ་ཡང་དག་འགྲུབ་པ་དཀའ་བར་གནས་ནས། བསོད་ནམས་ཆ་མཐུན་གྱི་དགེ་བ་ཙམ་རེ་ལས་དགེ་སྦྱོར་སྲང་ལ་ཡང་དག་པར་མ་ཚུད་པར་ལུས་ཡོད་པ་དང་། གནད་ཀྱིས་བཅུན་ནས་ཉམས་ལེན་ལ་རྡོ་རུས་མ་གཏུག་ན་ཉམས་མྱོང་གི་དྲོད་མི་སྐྱེ་བ་དང་། གཞན་དོན་དུས་བབས་ཀྱི་དུས་སུ་རང་དོན་མཆོག་ཐུན་གྱི་དངོས་གྲུབ་ཐོབ་ཡོད་དགོས་པ་ལས། དུས་ལ་མ་བབས་ན་གཞན་དོན་བྱེད་ལོ་བྱས་ཀྱང་གཞན་ལ་ཕན་མི་ཐོགས་པའམ། གདམས་ངག་སྒྲོན་མེ་ལག་བརྒྱུད་མི་ལ་སྤྲད་ཚེ་རང་ལ་མེད་པར་འགྱུར་བ་ཡིན་པས་རང་ལ་དྲོད་མ་ཐོབ་པར་གཞན་ལ་གདམས་ངག་ཁྱད་པར་ཅན་འབོགས་པ་དང་། རང་ལ་བྱིན་བརྒྱུད་མེད་པར་གཞན་ལ་དབང་བསྐུར་བ་སོགས་མི་བྱ་བ་ལ་གོ་དགོས་པ་ལས། གཞན་ཕན་གྱི་བསམ་པ་དག་པས་རང་ནུས་གང་ཡོད་ཀྱིས་སེམས་ཅན་ལ་ཕན་འདོགས་པར་མ་བྱེད། བཏགས་ཀྱང་མི་ཐོགས་ཞེས་པའི་དོན་ནི་མིན་ཏེ། དཔེར་ན་དེ་རིང་འདི་ནས་སྲོག་ཆགས་ཕྲ་མོ་ཞིག་ཉི་མས་ཚིག་བཞིན་ཡོད་ན་དེ་སྔོ་མའི་ནང་དུ་འཕེན་པ་དང་། མི་ཤེས་པ་དག་ལ་ཨོཾ་མ་ཎི་པདྨེ་ཧཱུྃཿ ཞེས་པ་ཞིག་བསླབས་ན་ཡང་དེ་དག་ལ་ཕན་པ་ཡོད་པ་ཡིན་པས་རང་ནུས་དང་བསྟུན་ནས་བརྩོན་དགོས་སོ། །ནུས་མཐུ་ཆ་ཚང་ཞིག་མ་འགྲུབ་ན་བར་ཆད་ཀྱི་རྐྱེན་རང་གར་མི་སོལ་བ་དང་། ཟུང་འཇུག་གི་གནད་དེ་མ་བསླངས་ན་ཚེ་ལུས་གཅིག་གི་སངས་རྒྱས་ཀྱི་གོ་འཕང་ཐོབ་ཏུ་མེད་པ་དེས་ན་དགེ་སྦྱོར་སྒྲུབ་ན་གནད་དུ་འགྲོ་བ་དང་དོན་དུ་སྨིན་པ་གཅེས་སོ།།
༡༤༥ ངན་པའི་འདུ་ཤེས་རྣམ་དྲུག་སྤང་བ་བསྟན་པ།
ངན་པའི་འདུ་ཤེས་རྣམ་དྲུག་སྤང་བ་ནི།།
བླ་མ་མིར་མཐོང་བྱིན་རླབས་སྟོར་བས་ངན།།
གྲོགས་ལ་དགྲར་ཤེས་དམ་ཚིག་རལ་བས་ངན།།
རང་ཉིད་ཆེ་ཕྱིར་ཆོས་ལམ་རིང་བས་ངན།།
གདམས་ངག་ཟོང་ཚོང་ལོག་འཚོ་འདྲེས་པས་ངན།།
ཡི་དམ་རྐྱེན་བཟློག་ལམ་སྣ་སྟོར་བས་ངན།།
ཆོས་སྤྱོད་ནོར་འཚོལ་ཐར་ལམ་སྟོར་བས་ངན།།
ངན་པ་དྲུག་བྲལ་སྒྲུབ་པ་ཤིན་ཏུ་གཅེས།།
ཞེས་གསུངས་པ་སྟེ། ངན་པའི་འདུ་ཤེས་རྣམ་དྲུག་སྤང་བ་ནི། བླ་མ་སངས་རྒྱས་སུ་མ་མཐོང་ནས་མི་རུ་མཐོང་ན་བྱིན་རླབས་སྟོར་བའམ་བོར་བས་ངན་པ་ཡིན་པ་དང་། གྲོགས་ཚངས་པ་མཚུངས་པར་སྤྱོད་པ་དང་སྐལ་ལྡན་རྡོ་རྗེའི་མཆེད་ལྕམ་རྣམས་ལ་དགྲར་འཛིན་པའི་འདུ་ཤེས་འཆང་ན་དམ་ཚིག་རལ་བས་ངན་པ་དང་། རང་ཉིད་ཆེ་ཆེ་འགྱིང་འགྱིང་གིས་ཆེ་འདོད་ངོམ་པའི་ཕྱིར་ན་ཆོས་ལམ་ལས་རིང་དུ་གྱུར་བ་ཡིན་པས་ངན་པ་དང་། གདམས་ངག་གང་ཟབ་ཟབ་ཟས་ངོ་ནོར་ངོ་མི་ངོ་ལ་བལྟས་ནས་ཤོར་བ་དང་། ཁྱད་པར་དུ་གདམས་ཟབ་དང་སྒོར་མོ་བརྗེས་ན་ལོག་འཚོའི་ཆེད་དུ་གདམས་ངག་བཙོངས་བ་ཡིན་པས་ངན་པ་དང་། གསང་སྔགས་ཀྱི་དཀྱིལ་འཁོར་གྲོང་བའི་ར་ཚང་གི་ནང་དུ་བཞེངས། ཞེས་པ་ལྟར་དུ་ཡི་དམ་གྱི་ལྷ་རྐྱེན་བཟློག་གི་ཆེད་དུ་སྒྲུབ་ན་ལམ་སྣ་སྟོར་བས་ངན་པ་དང་། ཡི་གེ་འབྲི་མཆོད་སོགས་ཆོས་སྤྱོད་བཅུའམ་རྒྱུན་གྱི་དགེ་སྦྱོར་གྱི་ཆོས་སྤྱོད་ཐམས་ཅད་ནོར་འཚོལ་བའི་ཆེད་དུ་བྱས་ན་ཐར་ལམ་སྟོར་བས་ངན་པ་ཡིན། དེས་ན་ཁ་འདོན་ཚིག་བཞི་ཙམ་ཞིག་ལས་མ་བཏོན་ཀྱང་ངེས་འབྱུང་བྱང་སེམས་ཡང་དག་པའི་ལྟ་བས་ཟིན་པ་ཞིག་ཡིན་དགོས། གཞན་དུ་ན་ཐར་ལམ་ལ་སྙེག་པའི་དགེ་སྦྱོར་དུ་འགྲོ་བ་མིན་པས་དེ་ལྟ་བུའི་ངན་པ་དྲུག་དང་བྲལ་བའི་སྒོ་ནས་སྙིང་པོའི་སྒྲུབ་པ་ལྷུར་ལེན་པ་ཤིན་ཏུ་གཅེས་སོ།།
༡༤༦ ཐར་ལམ་རང་བཞིན་མ་དྲན་ཆོས་དྲུག་བསྟན་པ།
ཐར་ལམ་རང་བཞིན་མ་དྲན་ཆོས་དྲུག་ནི།།
ཡུལ་ལ་ཡེངས་པས་མོས་གུས་མ་དྲན་དང༌།།
མུ་ལྟོ་ཟས་འཚོལ་དཀོན་མཆོག་མ་དྲན་དང༌།།
གཤིས་ངན་སྦུབས་ཐུང་དམ་ཚིག་མ་དྲན་དང༌།།
མིག་འགྲིབས་སྙིང་མེད་སྡུག་བསྔལ་མ་དྲན་དང༌།།
རྫས་སྲེད་རྙེད་འཚོལ་དགེ་བ་མ་དྲན་དང༌།།
ཞེ་སྡང་དུག་སེམས་སེམས་བསྐྱེད་མ་དྲན་དང༌།།
དོན་མེད་འཕྱལ་བས་ངན་སོང་མ་དྲན་དང༌།།
འདི་དྲུག་ལྡན་པས་ཡུན་རིང་འཁྱམས་པ་ཡིན།།
ཞེས་གསུངས་པ་སྟེ། ཐར་ལམ་རང་བཞིན་མ་དྲན་ཆོས་དྲུག་ནི། འདོད་ཡོན་གྱི་ཡུལ་ལ་ཡེངས་པས་ཆོས་དང་བླ་མ་ལ་མོས་གུས་མ་དྲན་པ་དང༌། མུ་ལྟོའམ་སྐྱིད་མེད་སྡུག་ཟད་ཀྱི་མི་བཟའ་བཏུང་འཚོལ་སྒྲུབ་ཏག་ཏག་གི་དོན་དུ་མི་ཚེ་ཟད་ནས་དཀོན་མཆོག་མ་དྲན་པ་དང༌། མི་གཤིས་ངན་ཞིང་སྦུབས་ཐུང་ངམ་ཁོག་ཆུང་འཚབ་སླའི་དབང་གིས་དམ་ཚིག་མ་དྲན་དང༌། ཡང་དག་པའི་ལྟ་བ་ཡི་མིག་འགྲིབས་ནས་ལེགས་ཉེས་འབྱེད་པའི་སྙིང་མེད་དེ་འཁོར་བའི་སྡུག་བསྔལ་མ་དྲན་ནས་བདེ་བར་འཛིན་པ་དང༌། ནོར་རྫས་ལ་སྲེད་པ་ཆེ་བའི་དབང་གིས་རྙེད་འཚོལ་ཏག་ཏག་གི་ངང་དུ་མི་ཚེ་ཟད་ནས་དགེ་བ་མ་དྲན་པ་དང༌། ཞེ་སྡང་དུག་ལྟ་བུའི་སེམས་དེ་རྒྱུད་ལ་ཡོད་པའི་དབང་གིས་སྙིང་རྗེ་མ་སྐྱེས། སྙིང་རྗེ་མེད་པས་སེམས་བསྐྱེད་མ་དྲན་པ་དང༌། དོན་མེད་ཡེངས་མ་ལམ་དུ་འཕྱལ་བས་ངན་སོང་དྲན་མ་ཐུབ་ནས་ཆོས་རྣམ་དག་མ་འགྲུབ་པ་དང༌། འདི་ལྟ་བུའི་ངན་པ་དྲུག་དང་ལྡན་པས་འཁོར་བའི་གནས་སུ་ད་སྔོན་ལ་འཁྱམས་ཤིང་ད་རུང་ཡང་ཡུན་རིང་འཁྱམས་པ་ཡིན་ནོ།།
༡༤༧ གདམས་ངག་རྣམ་དྲུག་སྐུལ་མ་གདབ་པ་བསྟན་པ།
གདམས་ངག་རྣམ་དྲུག་སྐུལ་མ་གདབ་པ་ནི།།
དམ་པ་རྣམས་ཀྱི་རྣལ་འབྱོར་ཕ་ནོར་ཡིན།།
སྒྲུབ་པ་སྙོམ་ལས་ཕྱི་བཤོལ་མི་བཞག་འཚལ།།
རྣམ་རྟོག་འཆར་སྒོམ་ཤེས་རབ་བུད་ཤིང་ཡིན།།
དམིགས་གཏད་སེམས་འཛིན་མཆོག་ཏུ་མི་འཛིན་འཚལ།།
སྡུག་བསྔལ་རྐྱེན་ངན་དགེ་བའི་སྐུལ་མ་ཡིན།།
མྱ་ངན་སྨྲེ་སྔགས་སྤོང་བློ་མི་བགྱིད་འཚལ།།
དུག་ལྔར་སྣང་བ་ཡེ་ཤེས་གསང་ལམ་ཡིན།།
དགྲ་སྡང་ཚོགས་ལྟས་ལོག་པར་མི་གཟུང་འཚལ།།
བར་ཆད་སྣ་ཚོགས་དངོས་གྲུབ་སྔ་ལྟས་ཡིན།།
འཁུ་འཕྲིག་ངན་རྟོག་ཞེ་སྡང་མི་བགྱིད་འཚལ།།
འཁོར་བར་སྣང་བ་རྒྱལ་བའི་ཞིང་ཁམས་ཡིན།།
འཁྲུལ་སྣང་གཉིས་འཛིན་བདེན་ཞེན་མི་འཆའ་འཚལ།།
ཞེས་གསུངས་པ་སྟེ། གདམས་ངག་རྣམ་པ་དྲུག་གིས་སྙིང་ནས་ཆོས་བྱེད་རྣམས་ལ་སྐུལ་མ་ཡང་ཡང་གདབ་པ་ནི། དམ་པ་རྣམས་ཀྱི་ཚུལ་ཇི་བཞིན་སྒྲུབ་པའི་རྒྱུན་གྱི་རྣལ་འབྱོར་དུ་བྱ་བ་ནི་ཕ་ནོར་རིན་ཐང་ཅན་ཡིན་པས། སྒྲུབ་པ་ལ་སྙོམ་ལས་དང་ཕྱི་བཤོལ་མི་བཞག་པར་གནད་ཆེ་བ་དང་། རྣམ་རྟོག་འཆར་བ་སྒོམ་དུ་ཤེས་ན་ཤེས་རབ་ཀྱི་བུད་ཤིང་ཡིན་པས་བུད་ཤིང་མང་ན་མེ་ཆེ་བའི་གྲོགས་ཡིན་པས། དམིགས་གཏད་སེམས་འཛིན་གྱི་སྒོ་ནས་སྡུག་སྒུར་བྱས་ནས་མི་རྟོག་ལྟེང་པོ་ལ་མཆོག་ཏུ་མི་འཛིན་པ་གལ་ཆེ་བ་དང་། རིག་འཛིན་འཇིགས་མེད་གླིང་པའི་ཞལ་ནས། དགྲས་ལོག་སྒྲུབ་བྱས་ཀྱང་ཐུགས་དམ་གྱི་བོགས་འདོན། །གཏམ་མ་ཉེས་ཁ་ཡོག་དགེ་སྐུལ་གྱི་ལྕག་འདེབས། །འདི་ཆགས་ཞེན་འཇིག་པའི་བླ་མ་རུ་འདུག་པས། །ཁོའི་དྲིན་ལན་འཁོར་ཐབས་མེད་པ་རུ་གཟིགས་མཛོད། །ཅེས་གསུངས་པ་ལྟར་སྡུག་བསྔལ་དང་རྐྱེན་ངན་དགེ་བའི་སྐུལ་མ་རུ་སློང་ཤེས་དགོས་པས། དེ་ལ་མྱ་ངན་དང་སྨྲེ་སྔགས་ཀྱི་ཐོག་ནས་སྤོང་བློ་མི་བགྱིད་པ་འཚལ། དུག་ལྔར་སྣང་བ་དེ་རྟོགས་པ་མཆོག་ལྡན་གྱི་ངོ་ཁ་ལ་ཡེ་ཤེས་ཀྱི་གསང་ལམ་ཡིན་པས། དུག་ལྔ་དགྲ་སྡང་གི་ཚོགས་ལ་བལྟས་ནས་དེའི་འཇོམས་བྱེད་བཙལ་ཏེ་ལོག་པར་མི་གཟུང་བ་འཚལ། བར་ཆད་ཀྱི་རྐྱེན་སྣ་ཚོགས་འོང་བ་ནི་དངོས་གྲུབ་ཀྱི་སྔ་ལྟས་ཡིན་ཏེ་ཐ་མལ་པ་ལ་ནི་བར་ཆད་མི་དགོས་པ་ཡིན། བར་ཆད་དང་སློང་ཚད་ཡོང་ས་རྣམས་ཚད་ངེས་ཅན་ཞིག་གི་ཐོག་ཏུ་ཐོན་ཡོད་པ་ཡིན། དེས་ན་བར་ཆད་དེ་ལ་འཁུ་འཕྲིག་ཐེ་ཚོམ་གྱི་ངན་རྟོག་དང་ཞེ་སྡང་མི་བགྱིད་པར་འཚལ་བ་དང་། འཁོར་བར་སྣང་བ་འདི་མ་དག་པའི་སྣང་བ་རེད་མ་གཏོགས་དོན་དངོས་དག་པའི་སྣང་རྩལ་ལ་རྒྱལ་བའི་ཞིང་ཁམས་ཡིན་པས། འདི་ལ་འཁྲུལ་སྣང་གཉིས་འཛིན་གྱི་བདེན་ཞེན་མི་འཆའ་བའམ་མི་བྱེད་པ་འཚལ་ལོ།།
༡༤༨ བསླད་པ་དྲུག་གིས་ཆོས་ཉིད་གོལ་བ་བསྟན་པ།
བསླད་པ་དྲུག་གིས་ཆོས་ཉིད་གོལ་བ་ནི།།
གནས་ལུགས་རྒྱ་ཡན་ཕྱོགས་མེད་ཡིན་པ་ལ།།
ཞེ་འདོད་བློ་ཡི་རྟོག་པ་བྱུང་བས་བསླད།།
ཆོས་ཉིད་སྨྲ་བསམ་བརྗོད་ལས་འདས་པ་ལ།།
ཡོད་མེད་མཐར་འཛིན་སྒྲོ་སྐུར་བཏབ་པས་བསླད།།
སེམས་ཉིད་གཉིས་མེད་སྐྱེ་འགག་མེད་པ་ལ།།
སྐྱེ་ཤིར་འཛིན་པའི་འདུ་ཤེས་བསྐྱེད་པས་བསླད།།
ཡུལ་སྣང་སེམས་ཉིད་སྟོང་པའི་མེ་ལོང་ལ།།
ཆགས་སྡང་གཉིས་འཛིན་བདེན་ཞེན་ཞུགས་པས་བསླད།།
དོན་དམ་སྤྲོས་པའི་མཚན་མས་དབེན་པ་ལ།།
བདེན་འཛིན་དོན་གྱི་ཐེ་ཚོམ་བྱས་པས་བསླད།།
གནས་ལུགས་ཀུན་གཞི་ཕྱོགས་མེད་རྟེན་འབྲེལ་ལ།།
གཟུང་འཛིན་འཁྲུལ་བའི་བག་ཆགས་འགོས་པས་བསླད།།
ཅེས་གསུངས་པ་སྟེ། བསླད་པའི་སྐྱོན་རྣམ་པ་དྲུག་གིས་ཆོས་ཉིད་ཀྱི་དོན་ཡང་དག་པར་མ་རྟོགས་ནས་གོལ་སོང་བ་ནི། དོན་དམ་པ་གནས་ལུགས་གཤིས་ཀྱི་བཞུགས་ཚུལ་དངོས་དེ་རྒྱ་ཡན་ནམ་རྒྱ་གར་ཡང་མ་ཆད་པ་དང་། ཕྱོགས་མེད་དམ་ཕྱོགས་གང་དུ་མ་ལྷུང་བ་ཡིན་པ་ལ། ཀུན་རྫོབ་ཞེ་འདོད་བློ་ཡི་རྟོག་པས་ཕྱོགས་ཞེན་རིས་སུ་བཅད་པ་བྱུང་བས་བསླད་པ་དང་། ཆོས་ཐམས་ཅད་ཀྱི་ཆོས་ཉིད་སྨྲ་བསམ་བརྗོད་མེད་སྤྲོས་པའི་མཐའ་ལས་འདས་པ་ཡིན་པ་ལ། ལ་ལས་ཡོད་པ་དང་། ལ་ལས་མེད་པའི་མཐའ་རུ་འཛིན་ནས་ཡར་སྒྲོ་བཏགས་མར་སྐུར་བ་བཏབ་པས་བསླད་པ་དང་། སེམས་ཉིད་འོད་གསལ་བའི་རང་བཞིན་དེ་གཉིས་མེད་ཀྱི་བདག་ཉིད་ཅན་སྐྱེ་འགག་མེད་པ་ཡིན་པ་ལ། སྐྱེ་ཤིར་འཛིན་པའི་གཉིས་འཛིན་གྱི་འདུ་ཤེས་བསྐྱེད་པས་བསླད་སོང་བ་དང་། ཡུལ་དུ་སྣང་བའི་སྣང་ཡུལ་དེ་སེམས་ཉིད་སྟོང་པའི་མེ་ལོང་ལ་ཤར་བ་ཙམ་ཡིན་པ་ལ། ཆགས་སྡང་གཉིས་སུ་འཛིན་པའི་བདེན་ཞེན་ཞུགས་པས་བསླད་སོང་བ་དང་། དོན་དམ་པ་ལ་སྤྲོས་པའི་མཚན་མས་དབེན་ཞིང་ཀ་ནས་དག་པ་ཡིན་པ་ལ། བདེན་འཛིན་གྱིས་དོན་གྱི་རང་བཞིན་སྒྲུབ་པའི་ཐེ་ཚོམ་བྱས་པས་བསླད་པ་དང་། གནས་ལུགས་ཡེ་དོན་གྱི་ཀུན་གཞི་ཕྱོགས་མེད་རྟེན་ཅིང་འབྲེལ་འབྱུང་གཞི་ཅིར་ཡང་མ་ཡིན་པ་ལས་ཅིར་ཡང་སྣང་བ་ལ། གཟུང་བ་ཡུལ་དང་འཛིན་པ་སེམས་སུ་འཁྲུལ་བའི་བག་ཆགས་འགོས་ནས་བག་ཆགས་སྣ་ཚོགས་པའི་ཀུན་གཞི་རུ་བཟུང་བས་བསླད་པ་ཡིན་ནོ། །དེ་རིང་། གཟུང་འཛིན་འཁྲུལ་བའི་བག་ཆགས་འགོས་པས་བསླད། །ཅེས་པ་འདིར་བཞག་ནས་སང་ཉིན། ལོག་པའི་འཚོ་བ་རྣམ་དྲུག་སྤང་བ་ནི། །ཞེས་པ་ནས་བཤད་རྒྱུ་བྱེད། ད་ཀུན་མཁྱེན་བླ་མའི་གསུང་གི་གསང་བ་ཆོས་སྐུའི་བསྟན་པ་སྒྲ་ཚིག་གི་འཕྲུལ་གྱིས་བསྟན་པའི་ཟབ་དོན་འདི་ཚོ། དགོངས་པ་གདིང་ནས་ཁྲོལ་བ་ནི་དཀའ་མོའི་ནང་གི་དཀོན་པོ་ཡིན་པ་རེད། མཐིལ་ཕྱིན་པའི་གོ་དོན་འགྲོལ་དགོས་ན་སོ་སོར་རང་རིག་པའི་ཡེ་ཤེས་ལ་མངའ་བརྙེས་པའམ། ཆོས་རབ་རྣམ་འབྱེད་ཀྱི་རྩལ་ཁ་ཆེ་ཚོད་ཆུང་མིན་རྒྱས་མེད་ཚེ་བཤད་འདེང་བྱེད་རྒྱུ་ཅན་ཞིག་མ་རེད། འོན་ཀྱང་བསྟན་པ་ཉག་ཕྲ་བའི་དུས་འདིར་རང་ལུགས་རྩ་བའི་བརྒྱུད་པ་མཐུད་པའི་སྐབས་སུ་དད་མོས་ལྷག་བསམ་གྱི་འདུན་པ་གཙོ་བོར་བཟུང་ནས། བཤད་པའི་རྒྱུན་མི་ནུབ་པར་འཛིན་བྱེད་དུ་ཐ་མལ་གྱི་ཚིག་གི་ཐོག་ནས་རང་ཉིད་ཀྱི་གོ་ཡུལ་མཚོན་བྱེད་ཙམ་ཞིག་ཁྱེད་རྣམ་པ་ལ་ནང་ལུགས་སུ་ཞུ་བཞིན་ཡོད་པ་ཡིན། དཔལ་སྤྲུལ་ཚང་གིས། ངེས་ཚིག་ཚིག་དོན་ཁྲོལ་རུང་མ་ཁྲོལ་རུང་། །བརྗོད་བྱའི་དོན་ཟབ་ཤེས་རུང་མ་ཤེས་རུང་། །དགོངས་པའི་ཞེ་ཕུགས་རྙེད་རུང་མ་རྙེད་རུང་། །རེ་དོགས་ཆོད་ལ་མ་ཡེངས་ངང་ནས་གཟིགས། །ཞེས་ངེས་ཚིག་ཁྲོལ་ན་མ་ཁྲོལ་ན། དོན་ཟབ་གོ་བཞིན་ཡོད་ཀྱང་མེད་ཀྱང་། དགོངས་པའི་ཞེ་ཕུགས་རྙེད་ཀྱིན་ཡོད་ན་ཐང་མེད་ན་ཐང་ཡང་། མདོར་ན་གང་ལྟར་ཡིན་ཡང་དལ་མོ་གཙོར་གཟུང་གིས་ལྟོས་གསུངས་པ་དང་། ཡང་ལྟོས་ཡང་ལྟོས་ཉམས་དང་བསྲེས་ལ་ལྟོས། །གཞུང་དང་སེམས་བསྲེས་སེམས་ལ་གཞུང་རྒྱས་ཐོབ། །དབྱེར་མེད་ངང་ནས་ཉམས་དགའ་གདངས་སུ་གྱེར། །མོས་གུས་རྩལ་འབར་རྟོགས་པའི་ཡེ་ཤེས་སྐྱེ། །ཞེས་འདི་རང་གར་ཤར་འདོན་ཞིག་བྱས་ནས་གོ་འདུག མི་གོ་རྒྱུ་ཅི་མི་འདུག་ཟེར་ནས་སྐྱུར་ཆོག་པ་ཞིག་མིན། འདི་མན་ངག་གི་ཡིག་ཆ་ཡིན་པས་འདིའི་ཚིག་རེ་ཕར་བཀྲལ་ན་གླེགས་བམ་དུ་མ་བྱེད་ཆོག་སྟེ། འདིའི་ནང་དུ་བཀའ་མདོ་རྒྱུད་གླང་པོ་ཆེའི་རྒྱབ་ཁལ་མང་པོ་དང་། མི་མིན་མཁའ་འགྲོས་བདག་བྱས་པའི་སྔགས་རྒྱུད་ཀྱི་རྒྱུད་སྡེ་བསམ་གྱིས་མི་ཁྱབ་པ་དག་གིས་ནང་དོན་ཡོད་དོ་ཅོག་ཚུར་བསྡུས་ནས་ཡོད་པ་ཡིན་པས། ཕར་བཀྲལ་ན་ཡང་དེ་ལྟར་དུ་བཀྲལ་དུ་ཡོད་པའི་བརྗོད་བྱ་རྒྱ་ཆེན་གཏིང་ཟབ་ཅན་ཡིན་པའི་ཕྱིར། འོན་ཀྱང་དོན་ཟབ་དཔོག་དང་མི་དཔོག་གང་ཡིན་ཡང་། མན་ངག་གི་དགོངས་དོན་རང་ཉིད་ཀྱི་ཉམས་དང་བསྲེས་ནས་ཡང་ཡང་བལྟ་བ་དང་། གཞུང་ལ་སེམས་ཕར་བསྲེས་པས་མི་ཚད་གཞུང་གིས་སེམས་ལ་ཚུར་རྒྱས་བཏབ་པ་སྟེ། མདོར་ན་མན་ངག་གི་གཞུང་དང་སེམས་འདྲེས་པའི་ཉམས་ལེན་གྱིས་གསུངས་པ་ཡིན། མཚམས་མཚམས་སུ་འདིའི་ཚིག་ཁ་ཤས་ངག་ཏུ་བཀུག་ནས་ཉམས་དབྱངས་ཀྱི་ཚུལ་དུ་འཐེན་པ་དང་། རང་ཉིད་ཀྱི་སེམས་ལ་ཕན་པའི་གདམས་ངག་འགའ་རེ་བསལ་ནས་སྔས་མགོ་རུ་སྦྱོར་དང་མི་བརྗེད་པའི་དྲན་རྟེན་དང་སེམས་རྟེན་དུ་ཡོང་བ་ཡིན། སྡུག་ཐུག་གི་ཉི་མ་བློ་ཕ་ལ་འདྲི་ས་མེད་གྲོས་མ་ལ་ཤོམ་ས་མེད་དུས་ཤིག་ལ་མན་ངག་འདི་ཚོ་ལ་བློ་དྲིས་ན་ཚིག་རེའི་ནང་དུ་གསེར་སྲང་འབུམ་ཕྲག་རི་བ་ཡོད་པ་ཡིན། དགེ་བསྙེན་ཕོ་མོ་དག་གིས་སྐོར་ལམ་ནང་ནས། ཡས་ཀྱི་ཕ་ཆུས། མས་ཀྱི་མ་ཆུས། དགོན་པའི་བསྟན་ཆུས། གནམ་གྱི་ཡག་བཙོག ཉི་མའི་དྲོ་གྲང་། པུས་འགོ་ན་རབས་མཁལ་སྐེད་གཟེར་རབས་སོགས་དོན་མེད་པའི་ངག་འཁྱལ་བཤད་མ་འདུག དེ་བས་འདིའི་ཆོས་ཀྱི་ཚིག་དོན་རེ་ཞེ་ལ་བཀོལ་ནས་ཕར་བཤད་ཚུལ་གླེང་རེ་གྱིས་དང་གོམས་ཆ་སྐྱེས་ནས་བཟང་ཡ་རབས་ཀྱི་ཕྱོགས་ལ་ལོབས་རྒྱུ་ཡོད་པ་ཡིན། ཡིག་ངོ་ཅུང་ཟད་རེ་ཨེ་ཤེས་ལྟོས་དང་དོན་ཞེ་ལ་བཟུང་རྟེན་ཡོང་བ་ཡིན། ཕྱི་མ་དུད་འགྲོའི་ལུས་རྟེན་བླང་མི་དགོས་པའི་ཕན་ཐུགས་ཀྱང་ཡོད་པ་ཡིན། ཡི་གེ་སྦྱོང་བ་ལ་རྒས་མ་རྒས་དང་ཕོ་མོའི་ཁྱད་པར་ཅི་ཡོད། ཡི་གེ་ཐམས་ཅད་ཀྱིས་སྦྱངས་ན་ཕན་ཡོན་ཆེ་བ་ཡིན། བརྗོད་བྱ་དམ་པའི་ཆོས་ཀྱི་ནང་དོན་ཅན་ཡི་གེ་ན་ཞིག་ཚུན་ཆོད་སངས་རྒྱས་ཀྱི་སྤྲུལ་བ་ཡིན། བཟོ་དང་སྐྱེ་བ་སྤྲུལ་བའི་སྐུ་ལས་སྤྲུལ་བའི་གཟུགས་སྐུ་ཡིན་པས་མ་ཚད་རྒྱལ་བའི་གསང་གསུམ་གྱི་འཕྲིན་ལས་ཀྱང་འདི་ལ་ཚང་བ་ཡིན། སྒྲ་མེད་བརྗོད་པ་དང་བྲལ་བའི་ཆོས་ཞུ་ཤེས་པ་ཞིག་ལ་སྐུ་རྟེན་བས་གསུང་རྟེན་ལྷག་པ་ཡིན། གསུང་རྟེན་ཡི་གེའི་གཟུགས་སུ་བྱོན་པ་དེས་ལེགས་ཉེས་བླང་དོར་གྱི་གནས་བསྟན་པས་མི་ཚད། བཤེས་གཉེན་དམ་པ་དེའི་བར་དུ་བརྒྱུད་ན་ཐུགས་ཀྱི་གསང་བ་ཟབ་མོ་བཅར་ཕོག་ཏུ་ངོ་འཕྲོད་ཐུབ་པ་ཡིན། དེས་ན་ཆོས་ཐོས་པ་ལ་དཀོན་པའི་འདུ་ཤེས་བསྐྱེད་པ་གནད་ཆེ་བ་དང་། དེ་བྱ་བ་ཐམས་ཅད་ལས་གནད་ཆེན་ཡིན་པར་ཤེས་པ་ནི་དེ་བས་ཀྱང་གལ་ཆེ་བ་ཡིན། ཆོས་དུང་བུས་པའི་ཕྱོགས་ལ་གོམ་པ་སྤོས་པ་ཙམ་མ་དགོས་དང་པའི་ཡིད་ཀྱིས་དེའི་ཕྱོགས་སུ་མོས་པའི་འདུན་པ་ཙམ་བསྐྱེད་ཀྱང་ཕན་ཡོན་དང་བསོད་ནམས་རྒྱལ་བའི་ལྗགས་ཀྱིས་ཀྱང་བརྗོད་མི་ལང་བ་ཡོད་པ་ཡིན། རྒྱལ་བའི་དབང་པོ་ཀློང་ཆེན་ཞབས་ཀྱིས་ཀྱང་། །ཆོས་རྔ་སྒྲོགས་པའི་སྒྲ་ཐོས་སེམས་ཅན་ཡང་། །ངན་སོང་རྣམ་གྲོལ་ཉན་རྣམས་སྨོས་ཅི་དགོས། །ཞེས་གསུངས་སོ། །འུ་ཚོ་དེ་ཉིན་སོས་ཀ་སྔོ་རྩི་ཤིང་དང་པོར་རྒྱས་དུས་ནས་ད་ནམ་ཟླ་སྟོན་མཇུག་གི་ཤིང་ལོ་རླུང་གིས་ཁུར་བའི་དུས། སྤང་ལྗོངས་ཀྱི་མདོག་གཉིས་བརྗེས་བའི་ཡུན་དུ་ངས་ཆོས་ཤིག་བཤད་ཁུལ་བྱས་པ་དེ་ཁྱེད་རྣམ་པས་གསན་པ་རེད། འགའ་རེ་དབྱར་ཟླ་གསུམ་དང་སྟོན་ཟླའི་བར་དུ་ས་རློན་གྱི་ཐོག་ཏུ་རས་གུར་རེ་ཕུབ་ནས་གནམ་དྲོ་གྲང་ཉི་མ་ཆར་ཞོད་གང་བྱུང་ཡང་བསྲན་ནས་ཆོས་ཕྱིར་དཀའ་སྤྱད་མཛད་དེ་བཞུགས་ཡོད་པ་རེད། འགའ་རེ་ས་ཐག་རིང་པོའི་ཆོས་ཞུ་བ་ཡིན་པས་སྐུ་ངལ་ཅི་འདྲ་ཞིག་མེད། དགོན་པ་འགའ་རེའི་གྲྭ་བས་ཆད་ལས་ཉིན་རེ་བཞིན་དུ་འཇལ་ཞོར་དུ་ཆོས་ཞུས་ནས་བཞུགས་པ་ཡང་ཡོད་འདུག འགའ་རེ་བྲོ་རྟེན་ཆད་ཀྱང་ཆོས་མ་བསྐྱུར་ནས་བློ་ཐབས་གང་དྲག་གིས་ཆོས་གསན་ནས་བཞུགས་ཡོད་པ་དང་། འདིའི་ཉིན་སྲིབ་ཀྱི་ཇོ་སེར་རྣམ་པས་ཀྱང་མཆོད་འབུལ་དང་དགེ་འདུན་གྱི་བསྙེན་བཀུར་ཆེད་དུ་དུས་རྒྱུན་དུ་འོ་བརྒྱལ་མང་པོ་མཛད་བཞིན་ཡོད། འོན་ཀྱང་རང་རེ་ཚང་མ་སྔར་བསགས་བསོད་ནམས་དང་ལས་སྨོན་མཐུན་པས་མཉམ་དུ་འཛོམས་པ་ཡིན་ཕྱིར། སྐབས་འདིའི་མཆེད་ལྕམ་དམ་ཚིག་གཅིག་གིས་སྦྲེལ་བའི་ཕྱི་མའི་མཐའ་ལ་བདེ་ནས་བདེ་བའི་ལམ་ལ་ཆོས་ཟབ་མོ་འདི་ཚོས་སྟོབས་ཀྱིས་དམ་ཚིག་མ་ཉམས་ན་ཚོམ་བུ་གཅིག་ཏུ་ལོས་འགྲོ་བསམ་གྱིན་ཡོད། དེ་ཆོས་ཟབ་མོ་ཐོད་པ་བོར་ཆོག་གི་གདམས་པ་ཡོད་པའི་ལེགས་རྐྱེན་གྱིས་ཡིན་པས་ཚང་མས་ཐུགས་སྤྲོ་སྤྲོ་གྱིས། ཨེ་སྐྱིད་མི་སྐྱིད་སེམས་ཡིན་སྐྱིད་པོ་རང་གིས་མ་བྱས་ན་གཞན་གྱིས་སྐྱིད་ཐབས་སྤྲོད་རྒྱུ་ཡོད་པ་མིན། སྐྱིད་རང་རྩིབ་ན་ཡོད་དུས་མ་ཤེས་ན་རྗེས་ནས་དེ་དུས་སྐྱིད་པ་ལ་ཨང་བསམས་ན་འདས་དོན་རྗེས་དྲན་ཡིན་པས་ཉམས་ལ་རན་པ་མིན་ནོ།།