ཉིན་བཅུ་བདུན་པའི་ཆོས་ཁྲིད།
ཀུན་མཁྱེན་རྒྱལ་བ་ཀློང་ཆེན་པས། ཚེ་འདི་འབབ་ཆུ་འདྲ་སྟེ་རྟག་བརྟན་མེད། །ལུས་འདི་གཡར་བོ་འདྲ་སྟེ་ཡིད་བརྟན་མེད། །སྐྱེ་ཤི་འཁོར་ལོ་འདྲ་སྟེ་ཕ་མཐའ་མེད། །ཆོས་ཀུན་སྒྱུ་མ་འདྲ་སྟེ་སྙིང་པོ་མེད། །ཅེས་གསུངས་ཏེ། དེ་ལས་ཚེ་འདི་འབབ་ཆུ་འདྲ་སྟེ་རྟག་བརྟན་མེད། །ཅེས་པ་ནི་འུ་ཅག་གི་གཡོན་ཟུར་ནས་ཐུར་དུ་གངས་ཆུ་དཀར་པོ་རྒྱུག་བཞིན་ཡོད་པ་འདི་ལ་མཚོན་ན། དང་པོ་ལྷ་ཁང་ནང་དུ་ཡར་འཛུལ་ཡོང་དུས་ཀྱི་འབབ་ཆུ་དེ་སྒོ་རུ་ཕྱིར་སོང་དུས་ཀྱང་ད་ལྟའི་དེ་རེད་སྙམ་པ་ཡོད་ཀྱང་ག་ལ་ཡིན། དེས་མ་ཚད་སྐད་ཅིག་སྐད་ཅིག་གིས་མི་སྡོད་པར་རྒྱུན་སྔ་ཕྱིར་འགྱུར་ནས་འགྲོ་བཞིན་ཡོད་པས། འདི་ཉིན་མཚན་ཀུན་ཏུ་རྒྱུན་ཆད་མེད་པར་རྒྱུག་ཅིང་འགྱུར་བ་ཡིན། སྐྱེས་བུའི་ཚེ་འདི་གལ་ཏེ་སྐྱེ་བོ་དག་ཉིན་མོར་བྲེལ་ནས་མཚན་མོར་ཉལ་ནས་སྡོད་པ་ལྟ་བུ་ཞིག་ཡིན་ན། ཉིན་ཀ་ལས་མཚན་མོ་མི་འཛད་པ་ཡིན་ན་ཡང་། དེ་ལྟར་མ་ཡིན་པར་ཉིན་མཚན་ཀུན་ཏུ་འབབ་ཆུ་རྒྱུན་ཆད་མེད་པར་འབབ་པ་བཞིན་དུ་ཚེ་མི་རྟག་ཟད་པའི་ཕྱོགས་སུ་འགྲོ་བཞིན་ཡོད་པའི་དྲན་སྐུལ་གནང་བ་དང་། ཡང་ལུས་འདི་གཡར་བོ་འདྲ་སྟེ་ཡིད་བརྟན་མེད། །ཅེས་པ་ནི། ལུས་འདི་ལ་ངའི་ལུས་ཡིན་བསམ་ནས་ཐམས་ཅད་ལས་ཀྱང་གཅེས་པར་འཛིན་པ་བྱེད་ན་ཡང་། གཡར་བོའི་ཅ་ལག་སྔ་ཕྱི་ལ་མ་ལྟོས་པར་ཕྱིར་སྤྲོད་དགོས་པ་བཞིན་དུ། ལོ་གཅིག་འདུག་པའི་ཚེ་མ་དགོས་ཞག་གཅིག་འདུག་པའི་དུས་ཨེ་ཡོད་མི་ཤེས་བཞིན་དུ་ལོ་བརྒྱར་ད་རུང་འདུག་རྒྱུ་ཡོད་པ་ལྟ་བུའི་ལས་ཀྱིས་བྲེལ་ནས་རྟག་འཛིན་བྱེད་མ་འདུག་མ་གཏོགས། ཚེ་ལ་ཡིད་བརྟན་མེད་པས་ཉིན་ཞིག་མགོ་ངན་འགེལ་ཡོང་ཞེས་པ་དང་། སྐྱེ་ཤི་འཁོར་ལོ་འདྲ་སྟེ་ཕ་མཐའ་མེད། །ཆོས་ཀུན་སྒྱུ་མ་འདྲ་སྟེ་སྙིང་པོ་མེད། །ཅེས་གསུངས་པ་ནི། སྐྱེ་ཤི་གཉིས་ཀྱི་ཁ་བརྒྱུད་ནས་ཨ་འཁོར་ཡང་འཁོར་བྱས་ཏེ་འཁོར་བའི་སྡུག་བསྔལ་མྱོང་བའི་ཕ་མཐའ་ལ་ཐུག་འགྲོ་རྒྱུ་ཞིག་ཡོད་པ་མིན་པ་དང་། དེ་བཞིན་དུ་ཆོས་ཐམས་ཅད་སྒྱུ་མ་མཁན་གྱིས་སྒྱུ་མའི་ལྟད་མོ་བསྟན་པ་དང་མཚུངས་པར་དོན་ལ་ཅི་ཡང་མེད་པས་འཁོར་བའི་སྡུག་བསྔལ་འདི་ལས་ཐར་ཞིང་རང་གཞན་གནས་སྐབས་དང་མཐར་ཐུག་གི་གཏན་བདེར་འགོད་པའི་ཆེད་དུ་མི་བསླུ་ངེས་པར་ཅན་གྱི་དམ་པའི་ཆོས་རྣམ་དག་ཅིག་སྒྲུབས་ཞེས་གསུངས་པ་སྟེ། དམ་པའི་ཆོས་དེ་ལ་ཡང་སྐྱེས་བུ་ཆུང་འབྲིང་ཆེ་གསུམ་གྱི་ལམ་གྱི་རྣམ་བཞག་བདག་ཅག་གི་སྟོན་པ་བཅོམ་ལྡན་འདས་ཀྱིས་གསུངས་ཡོད་པ་ཡིན། རང་རེ་ནི་དེ་ལས་ཐེག་པ་ཆེན་པོའི་ཆོས་སྒོར་ཞུགས་ཏེ། ཐེག་ཆེན་མདོ་སྔགས་གཉིས་ཀྱི་ཆོས་ལ་ཉན་སེམས་བྱས། སོར་བྱང་སྔགས་གསུམ་གྱི་སྡོམ་པ་བླངས་ནས། འཐོབ་དགོས་པའི་ཆོས་ཀྱི་རིགས་ཐམས་ཅད་མ་ཚང་བ་མེད་པར་ཐོབ་ཡོད་ཅིང་། དེ་ཐོབ་པའི་ཕན་ཡོན་ཡང་བསམ་གྱིས་མི་ཁྱབ་པར་ཡོད་པ་སྨོས་མ་དགོས་ལ། འོན་ཀྱང་གཙོ་ཆེར་ལམ་སྟོན་པ་ཙམ་ལས་ལམ་དངོས་སུ་གོམ་པ་གང་ཙམ་ཡང་སྤོ་ཐུབ་མེད་ན་ཉི་མ་བརྒྱ་མ་དགོས་ལོ་བརྒྱའི་དུས་ཚོད་སོང་ན་ཡང་ཐོན་འགྲོ་རྒྱུ་ཞིག་ཡོད་པ་མིན། དེས་ན་ཐེག་ཆེན་མདོ་དང་སྔགས་ཀྱི་མྱུར་ལམ་ཡིན་དང་མིན་རང་གི་གོམ་པ་ལེན་སའི་ཕྱོགས་དང་། ལེན་ལུགས་ལ་རག་ལས་པས་ཐར་ལམ་བགྲོད་པའི་གཅེས་པ་རྣམ་གསུམ། ཐེག་པ་ཆེན་པོའི་དགེ་རྩ་རླབས་ཆེན་དམ་པ་གསུམ་གྱིས་རྩིས་ཟིན་རྒྱུ་དེ་མ་ཚང་དུས། དགེ་རྩའི་གཟུགས་བརྙན་གྱི་རྣམ་པ་ཕར་བལྟས་སུ་རྒྱ་ཆེན་ལྟར་སྣང་ཡང་གོ་ཆོད་པ་མིན། དེས་ན་དེ་རིང་ཞོར་དུ་རྒ་རྒས་རྣམས་ལ་གོ་སླ་ཉན་བདེའི་གཏམ་ཞིག་བཤད་ན། སེམས་བསྐྱེད་ཀྱིས་ཟིན་པའི་གཙུག་ལག་ཁང་ལ་སྐོར་བ་གཅིག་བརྒྱབ་པ་དང་། མ་ཟིན་པའི་སྐོར་བ་བརྒྱ་བྱས་པ་གཉིས་སེམས་བསྐྱེད་ཀྱིས་ཟིན་པའི་སྐོར་བ་གཅིག་བྱས་པ་དེས་ས་ཆོད་དང་ཕན་ཡོན་ཆེ་བ་ཡིན་པ་དང་། དེ་བཞིན་དུ་དངོས་གཞི་དམིགས་མེད་དང་། རྗེས་བསྔོ་བ་ཁྱད་པར་ཅན་གྱིས་ཟིན་དང་མ་ཟིན་གྱི་ཁྱད་པར་ཡང་གནམ་ས་འདྲ་འདྲ་ཞིག་ཡོད་པ་ཡིན། སྤྱིར་དགེ་རྩ་གང་སྒྲུབ་ཀྱང་ཐེག་ཆེན་སེམས་བསྐྱེད་ཀྱིས་ཟིན་ནས་ཐེག་པ་ཆེན་པོའི་དགེ་རྩ་ཐེག་ཆེན་ཐར་བ་ཆ་མཐུན་དང་། སངས་རྒྱས་འཐོབ་བྱེད་ཀྱི་རྒྱུར་འགྱུར་བ་དེ་ནམ་དང་ནམ། ཨ་དང་ཡང་གིས་གལ་བོ་ཆེ་ལ་ནན་ཏན་གྱིས་བཤད་པ་ཡིན། དེ་ཡང་ཡོད་ན་སངས་རྒྱས་སྒྲུབ་ལ་དེས་ཆོག མེད་ན་སངས་རྒྱས་སྒྲུབ་ལ་ཐབས་ཆག་གི་བྱང་ཆུབ་སེམས་མཆོག་རིན་པོ་ཆེ་འདི་སྐྱེ་ཐབས་ལ་འབད་དགོས་པ་ཡིན། དེར་འབད་པར་བྱེད་པ་ལ་བྱམས་སྙིང་རྗེ་གཉིས་ཀས་གཞི་བཅས་ནས། སེམས་བསྐྱེད་ཐོབ་ལ་མ་ཉམས་པ་ཞིག་རྒྱུད་ལ་ཡོད་པ་ཡིན་ན། སྡིག་པ་སྟོབས་ཆེན་དེས་དག་པ་དང་། བསོད་ནམས་སྟོབས་ཆེན་དེས་སོག་པ་ཡིན། དེས་ན་དོན་གཅིག་གིས་བསམ་པ་བརྒྱ་ཐམ་པ་མཉམ་གཅིག་ཏུ་འགྲུབ་པར་བྱེད་པའི་བྱང་ཆུབ་སེམས་མཆོག་གི་ཡིད་བཞིན་གྱི་ནོར་བུ་དེ་ལག་ཏུ་ལེན་པ་ཞིག་བྱེད་དགོས་ལ། དེ་ལོན་པར་བྱེད་པ་ལ་སེམས་བསྐྱེད་ཀྱི་རྟེན་གྱི་གང་ཟག་དེ་ཇི་ལྟར་ཞིག་དགོས་པ་གོང་དུ་ཞུས་པ་བཞིན་དུ། དམ་པའི་ཆོས་ལ་མོས་པ་ཡོད་པ་དང་། མ་སེམས་ཅན་ཐམས་ཅད་འཁོར་བ་ལས་སྒྲོལ་འདོད་ཀྱི་སེམས་ཡོད་པ་ལ་སོགས་པའི་ཐད་ནས་རང་རེ་ཡང་ཐེག་ཆེན་གྱི་རིགས་ཅན་ཞིག་ཡིན་ཆག་བྱས་ཏེ། མཐུན་རྐྱེན་གྱི་ཐད་ནས་ཀྱང་ཕྱིའི་མཐུན་རྐྱེན་ཆོས་སྟོན་མཁན་ཡོད་པ་དང་། ནང་གི་མཐུན་རྐྱེན་ཆོས་ཞུ་འདོད་དང་སྒྲུབ་འདོད་ཡོད་པ་གཞིར་བཞག་གི་སྟེང་ནས། བྱང་ཆུབ་སྒྲུབ་པའི་རྟེན་ནམ་སེམས་བསྐྱེད་ལེན་པའི་རྟེན་གྱི་གང་ཟག་ཅིག་གི་ཆ་རྐྱེན་ཡོད་པའི་འདང་རྒྱག་བྱས་ཤིང་། དེའི་སྟེང་དུ་ཇི་ལྟར་དགོས་ན། སྐྱབས་སུ་འགྲོ་དགོས་པ་ཡིན། སྐྱབས་སུ་འགྲོ་བ་ནི་འཁོར་བ་ངན་སོང་གི་འཇིགས་པ་དང་། རང་དོན་ཡིད་བྱེད་ཀྱི་འཇིགས་པ་གཉིས་ཀས་སྐྲག་ནས། དཀོན་མཆོག་གསུམ་ལ་དེའི་འཇིགས་པ་དག་ལས་སྐྱོབ་པའི་ཡོན་ཏན་ཡོད་པར་བསམ་པའི་དད་པ་སྟེ། འཇིགས་དད་གཉིས་ཀའི་སྒོ་ནས་སྐྱབས་སུ་འགྲོ་དགོས་པ་ཡིན། གོང་དུ་ཡིད་བཞིན་མཛོད་ཀྱི་སྤང་བྱ་མུ་སྟེགས་པའི་ལྟ་གྲུབ་བཤད་པའི་སྐབས་ནས་ལོག་པའི་སྐྱབས་ཚངས་པ། དབང་ཕྱུག། ཁྱབ་འཇུག་ལ་སོགས་པ་ནི་སྐྱབས་ཡང་དག་མིན་པར་ཤེས་པ་དང་། གཞན་ཡང་རང་རང་གི་ས་ཆའི་རི་བྲག་མཚོ་གསུམ་གནས་པ་ཅན་དུ་བསྙད་པ་རྣམས་ཀྱིས་ཀྱང་སྐྱོབ་མི་ནུས་པར། རྒྱལ་སྲས་ལག་ལེན་ལས། རང་ཡང་འཁོར་བའི་བཙོན་རར་བཅིངས་པ་ཡི། །འཇིག་རྟེན་ལྷ་ཡིས་སུ་ཞིག་སྐྱོབ་པར་ནུས། །ཞེས་པས་གོ་ལ། ཕར་སྐྱབས་བཅོལ་མི་དགོས་པར་ཚུར་སེམས་པ་ནི་ཚེ་འདིའི་ཕ་མ་གཉིས་ཀ་ཡིན་ལ། ཕ་མ་ཇི་ལྟར་ངན་རུང་རང་གི་བུ་རྒྱུད་གཅེས་པ་ཡིན། འོན་ཀྱང་ཚེ་འདི་ཕྱིའི་འཇིགས་པ་ལས་སྐྱོབ་མ་དགོས་ཚེ་འདིའི་ཚེ་རིང་ནད་མེད་ཙམ་ཞིག་དང་། བྱ་བ་ལམ་འགྲོའི་གནད་ཙམ་ཞིག་ཀྱང་མི་ཤེས་པར་རྒྱུ་འབྲས་འཆོལ་ཉོག་ཏུ་སྤྱོད་པར་བྱེད་པའི་རང་གཞན་གཉིས་ཀ་བླུན་ཞིང་གཏི་མུག་པ། འཁོར་བའི་སེམས་ཅན་བླང་དོར་གྱི་གནད་མ་ཤེས་ནས་སྡུག་བསྔལ་རྒྱུ་འབྲས་གཉིས་ལ་སྤྱོད་བཞིན་པ་འདི་ཡིན། དེས་ན་འཁོར་བའི་སྡུག་བསྔལ་ལས་སྐྱོབ་ཐུབ་པ་ནི་རང་ཉིད་འཁོར་བའི་སྡུག་བསྔལ་ལས་གྲོལ་བ་ཞིག་ཡིན་དགོས་པས་སྡུག་བསྔལ་ཐམས་ཅད་ལས་ཐར་ཞིང་གྲོལ་སོང་བ་ནི་སངས་རྒྱས་ཉག་གཅིག་ཡིན་པ་དང་། སངས་རྒྱས་ཐོབ་བྱེད་ཀྱི་ལམ་ནི་ཆོས་གཅིག་པུ་ལས་མེད་པ་དང་། ཆོས་སྒྲུབ་པའི་གྲོགས་ནི་དགེ་འདུན་གཅིག་པུ་ལས་མེད་པས། དེ་གསུམ་ལ་སྐྱབས་སུ་མི་འགྲོ་བར་དེ་ལས་ལྷག་པའི་སྐྱབས་གནས་ཤིག་རྙེད་དུ་མེད་པ་ཡིན། མདོ་མྱང་འདས་ལས། དཀོན་མཆོག་གསུམ་ལ་སྐྱབས་སོང་བ། །འཇིགས་པ་མེད་པར་ཐོབ་པར་འགྱུར། །ཞེས་གསུངས་ཤིང་། བྱང་ཆུབ་མཆོག་ཏུ་སེམས་བསྐྱེད་པ་ལ་རྟེན་གྱི་གང་ཟག་ཅིག་གི་ཆ་རྐྱེན་ཚང་བའི་སྟེང་དུ་སྐྱབས་འགྲོའི་ཡན་ལག་ཚང་དགོས་ལ། སྐྱབས་འགྲོའི་ནང་དོན་དེ་ཇི་ལྟར་ཞེ་ན། སྐྱབས་འགྲོ་ལ་དབྱེ་བ་དང་རྟེན་དང་ཡུལ་དང་དུས་ལ་སོགས་པ་མང་རབ་ཡོད་ལ། ངས་གོང་ནས་ལས་དང་པོ་བའི་ཆོས་པ་རྣམས་ཀྱིས་ལོ་གཅིག་ལ་སྐྱབས་འགྲོའི་སྐོར་ཤེས་ཐུབ་སོང་ན་རབ་ཅིག་ཤེས་སོང་བ་ཡིན་ཞེས་བཤད་པ་ཡིན། ཡིན་ན་ཡང་དང་པོའི་ལས་ཅན་གྱིས་སྦྱོར་བ་སེམས་བསྐྱེད་ཀྱི་དམིགས་རྣམ་ཙམ་ཞིག་ཤེས་པ་ལ་ཡང་སྐྱབས་འགྲོའི་ཚུལ་དེ་ཚང་དགོས། སྐྱབས་འགྲོའི་དབྱེ་བ་ལའང་ཐུན་མོང་དང་ཁྱད་པར་གྱི་སྐྱབས་འགྲོའི་ཁྱད་པར་ཡོད་པ་དང་། སྐྱབས་སུ་འགྲོ་བའི་རྟེན་གྱི་གང་ཟག་ལ་ཡང་དེ་བཞིན་དུ་ཁྱད་ཡོད་ཅིང་། ཐུན་མོང་པའི་རྟེན་གྱི་གང་ཟག་དེ་ཇི་ལྟར་ཞིག་ཅེ་ན། འཁོར་བའི་སྡུག་བསྔལ་གྱིས་སྐྲག་ནས་དཀོན་མཆོག་གསུམ་ལ་ལྷར་འཛིན་པ་དང་། ཁྱད་པར་ཅན་གྱི་རྟེན་གྱི་གང་ཟག་ནི་ཐེག་པ་ཆེན་པོའི་རིགས་ཅན་ལྷ་མིའི་ལུས་ཐོབ་པ་ཞིག་གོ །སྐྱབས་སུ་འགྲོ་བའི་ཡུལ་ལ་ཡང་དེ་བཞིན་དུ་ཁྱད་པར་ཡོད་ཅིང་། དེ་རིང་ཆོས་ཁྲིད་ཀྱི་གཞུང་ནས་ཀྱང་དེའི་སྐོར་འབྱུང་བ་ཡིན། གཞན་རྣམས་རྗེས་མར་འཆད་རྒྱུ་བྱེད། སྐབས་སུ་བབ་པ་གང་ཞིག་འཆད་ཉན་བྱ་བའི་ཆོས་ཀྱི་རིམ་པ་ནི། ཀུན་མཁྱེན་རྒྱལ་བ་ཀློང་ཆེན་པའི་གསུང་རབ་ཀློང་ཆེན་མཛོད་བདུན་ལས། ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ཀྱི་འགྲེལ་ཊཱིཀ་པདྨ་དཀར་པོ་འདི་ཉིད་འཆད་བཞིན་པ་ལས། ཁ་སང་ཡན་ཆོད་པོ་ཏི་སྔ་མའི་རྡོ་རྗེའི་གནས་དང་པོ་འཁོར་བའི་རང་བཞིན་སྤང་བྱར་གདམས་པ་དང་། དེ་ཡང་གཞི་གང་ལས་སྣང་བ། གང་ལས་སྣང་བའི་འཇིག་རྟེན། ཇི་ལྟར་སྣང་བའི་ཚུལ་ལ་སོགས་པ་བཤད་ནས། གནས་གཉིས་པ་མྱང་འདས་ཀྱི་རང་བཞིན་བླང་བྱར་བསྟན་པ་ལའང་སྦྱོང་བྱེད་ལམ་གྱི་རིམ་པ། དེ་ལ་ཐོས་བསམ་སྒོམ་པས་ཇི་ལྟར་འཇུག་ཚུལ། ཁྱད་པར་དུ་ཐོས་དོན་གཏན་ལ་དབབ་པ་ལ་སྤང་བྱ་ཕྱི་རོལ་པ་དང་། བླང་བྱ་ནང་པ་གཉིས་ཀྱི་ས་བཅད་བཞག་ནས། ཕྱི་རོལ་བའི་སྟོན་པ་དྲུག འཇིག་ཚོགས་ཉི་ཤུ། དྲུག་ཅུ་རྩ་གཉིས། སུམ་བརྒྱ་དྲུག་ཅུ། སྡེ་ཚན་བཅུ་གཉིས། ཏརྐ་སྡེ་ལྔ་རྣམས་ཀྱི་འདོད་པ་ཕྱོགས་སྔར་བཞག་ནས་ལོག་རྟོག་བསལ། དེའི་ནང་གི་རྟོག་གེ་སྡེ་ལྔར་གྲགས་པའི་གྲངས་ཅན་པ་དང་། དབང་ཕྱུག་པ་དང་། ཁྱབ་འཇུག་པ། རྒྱལ་བ་པ་སྟེ་རྟག་པར་ལྟ་བ་བཞི་དང་། ཆད་པར་སྨྲ་བ་ཕུར་བུ་པ་དང་། རྒྱང་འཕེན་པ་སྟེ་ལྔ་ཡིས་ལྟ་བ་ངན་པ་ཐམས་ཅད་ཚར་བཅད་ནས། གཉིས་པ་བླང་བྱ་ནང་པ་སངས་རྒྱས་པའི་གཞུང་དང་ཐེག་པའི་རིམ་པ་འཆད་པའི་སྐབས་སུ་བབ་པ་ལ། བསྟན་བཤད་བསྡུ་གསུམ། དང་པོ།
བླང་བྱ་ནང་པའི་གཞུང་མདོར་བསྟན་པ།
ད་ནི་ནང་པ་སངས་རྒྱས་པའི་གཞུང་རྒྱ་ཆེར་བཤད་པ་ལ་གཉིས་ཏེ། ཕྱི་རོལ་པ་ལས་ཁྱད་པར་དུ་འཕགས་པ་དང་། ཁྱད་པར་ཅན་གྱི་གཞུང་ཉིད་དབྱེ་བའོ། །དང་པོ་ལའང་བརྟེན་པ་སྐྱབས་ཀྱི་ཁྱད་པར། གནས་ལུགས་ལྟ་བའི་ཁྱད་པར། གོམས་པ་སྒོམ་པའི་ཁྱད་པར། བྱ་བ་སྤྱོད་པའི་ཁྱད་པར། ཐོབ་བྱ་འབྲས་བུའི་ཁྱད་པར་དང་ལྔ་ལས། དང་པོ་ནི། དཀོན་མཆོག་གསུམ་ལ་སྐྱབས་སུ་འཛིན་པ་ནང་པ། མི་འཛིན་པར་ཚངས་པ་དང་ཁྱབ་འཇུག་ལ་སོགས་པ་གཞན་འཛིན་པ་ཕྱི་པའོ། །ཟླ་བ་གྲགས་པས། གང་དག་སངས་རྒྱས་སྐྱབས་སོང་བས། །ལྷ་གཞན་དག་ལ་ཕྱག་མི་འཚལ། །ཞེས་གསུངས་པ་བཞིན་ནོ། །ནང་བ་སངས་རྒྱས་པས་དཀོན་མཆོག་གསུམ་སྐྱབས་སུ་འཛིན་པར་འདྲ་ན་ཡང་། སྐྱབས་གསུམ་ངོས་འཛིན་ལུགས་ནི་ཐེག་པ་ཆེ་ཆུང་ལ་ཁྱད་པར་ཡོད་པས། ཐེག་པ་ཆུང་ངུ་པས་སངས་རྒྱས་ནི་མཆོག་གི་སྤྲུལ་བའི་སྐུ་ཤཱཀྱ་ཐུབ་པ་ལྟ་བུ། སྤྲུལ་བའི་ཞེས་པ་ནི་ཐེག་ཆེན་གྱི་ཚིག་ཤན་ཞུགས་པ་ལས། ཁོ་རང་གི་ལུགས་ལ་སྤྲུལ་སྐུར་འདོད་པ་མིན། ཆོས་ལུང་རྟོགས་ཀྱི་བདག་ཉིད་ཅན། དགེ་འདུན་ཉན་རང་གི་དགེ་འདུན་ཞུགས་པ་བཞི་དང་གནས་པ་གསུམ་ལྟ་བུ་དང་། ཐེག་ཆེན་པ་ལྟར་ན། སངས་རྒྱས་སྐུ་གསུམ་གྱི་བདག་ཉིད་ཅན་དང་། ཆོས་མདོ་རྒྱུད་ལྟ་དང་ཏིང་འཛིན་གྱི་ནང་དོན་ཡོད་པ། དགེ་འདུན་འཕགས་པ་སློབ་དང་མི་སློབ་སངས་རྒྱས་བྱང་སེམས་རིག་འཛིན་དང་བཅས་པའོ། །སྐྱབས་སུ་འགྲོ་ཚུལ་ལ། རྒྱུ་དང་འབྲས་བུའི་སྐྱབས་འགྲོ་རྣམ་པ་གཉིས་ཡོད་པས། དམིགས་པ་འབྲས་བུ་ལ་དམིགས་ནས་སངས་རྒྱས་ལ་སྟོན་པ། ཆོས་ལ་ལམ། དགེ་འདུན་ལ་ལམ་སྒྲུབ་པའི་གྲོགས་སུ་བཟུང་ནས་སྐྱབས་སུ་འགྲོ་བ་རྒྱུའི་སྐྱབས་འགྲོ་དང་། སྐྱབས་གསུམ་མ་འོངས་པར་རང་རྒྱུད་ལ་ཐོབ་པའི་དོན་དུ་སྐྱབས་སུ་འགྲོ་བ་འབྲས་བུའི་སྐྱབས་འགྲོ་སྟེ། སྐྱབས་སུ་འགྲོ་ཡུལ་གཅིག་ཡིན་ཀྱང་། དམིགས་པའི་ཆ་ནས་རྒྱུ་འབྲས་ཀྱི་སྐྱབས་འགྲོ་རུ་བཏགས་པའོ། །གཉིས་པ། ཐེག་པ་ཐུན་མོང་བ་ལྟར་དུ་ཆོས་རྟགས་ཀྱི་ཕྱག་རྒྱའི་སྡོམ་བཞི་ལྟ་བུ་འོག་ནས་འབྱུང་མ་རག་པའི་འདུས་བྱས་ཐམས་ཅད་མི་རྟག་དང་། སྡུག་བསྔལ། བདག་མེད། ཞི་བ་བཞི་བསྒོམ་པ་དང་། ཐུན་མོང་མ་ཡིན་པ་ཆོས་ཐམས་ཅད་ཀྱི་རང་བཞིན་སྟོང་ཞིང་བདག་མེད་པའི་རང་བཞིན་ཇི་ལྟ་བུར་ཤེས་པ་མཐའ་བྲལ་བསམ་བརྗོད་ལས་འདས་པ་ཁས་ལེན་པ་ནང་པ། མི་ལེན་པར་རྟག་ཆད་ཀྱི་མཐར་ལྷུང་བ་ཕྱི་པ་སྟེ། དཀོན་མཆོག་བརྩེགས་པ་ལས། རྒྱལ་བའི་བསྟན་ལ་དད་པས་ཞུགས་རྣམས་ཀྱིས། །འདུས་བྱས་མི་རྟག་བསླུ་བར་མཐོང་ནས་ནི། །སྡུག་བསྔལ་སྤང་ཕྱིར་བདག་མེད་ཞི་བའི་ཆོས། །ནམ་མཁའ་ལྟ་བུའི་དོན་ལ་ནན་ཏན་བྱ། །ཞེས་སོ། །གོང་ནས་གསུངས་བའི་སྡོམ་བཞི་ནི། འདུས་བྱས་ཐམས་ཅད་མི་རྟག་པ་ཞེས། རྒྱུ་རྐྱེན་ལས་སྐྱེས་བའི་འདུས་བྱས་ཀྱི་ཆོས་ཐམས་ཅད་ནི། འཕྲལ་དུ་སྡུག་བསྔལ་བསྐྱེད་ཅིང་། དུས་གཉིས་པར་མི་སྡོད་པ་ཡིན་པས་ན་མི་རྟག་པ། ཆོས་ཐམས་ཅད་སྟོང་ཞིང་བདག་མེད་པ་ཞེས་པ་ནི། ཆོས་ཐམས་ཅད་རང་བཞིན་གྱིས་མེད་པའི་ཕྱིར་ན་བདག་ཁེགས་པའོ། །ཟག་པ་དང་བཅས་པ་ཐམས་ཅད་སྡུག་བསྔལ་བ་ཞེས་པ་ནི། འཁོར་བའི་སྡུག་བསྔལ་ལས་ཡོངས་སུ་གྲོལ་བ་མྱ་ངན་ལས་འདས་པ་འཐོབ་པར་བྱེད་པ་ལ་འཁོར་བས་བསྡུས་བའི་ཆོས་ཟག་པ་དང་བཅས་པ་ཐམས་ཅད་སྡུག་བསྔལ་གྱི་རང་བཞིན་ཡིན་པར་ཤེས་དགོས་པས་ན། སྡུག་བསྔལ་གྱི་རྒྱུ་འབྲས་ལས་མ་འདས་པ་ནི། ཟག་པ་དང་བཅས་པ་ཐམས་ཅད་སྡུག་བསྔལ་བའོ། །འཁོར་བའི་སྡུག་བསྔལ་ལས་ཡོངས་སུ་གྲོལ་བའི་མྱ་ངན་ལས་འདས་པ་ནི་ཞི་བ་བསིལ་བ་གྱ་ནོམ་པ་ལ་སོགས་པ་སྟེ། འདི་བཞི་བོའི་རྒྱས་འགྲེལ་སྡེ་སྣོད་གསུམ་གྱི་བརྗོད་བྱ་རྗོད་བྱེད་ཐམས་ཅད་ཡིན་པའོ། །སྒོམ་པ་གོམས་པའི་ཁྱད་པ་ཡང་ཐར་པ་ལ་དམིགས་ནས་དཀོན་མཆོག་སྐྱབས་སུ་འཛིན་པས་ཐེག་པ་ཐུན་མོང་བ་བདག་མེད་པའི་དོན་དྲན་པ་ཉེ་བར་བཞག་པ་བཞི། ཡང་དག་པའི་སྤོང་བ་བཞི་ལ་སོགས་པའི་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རིམ་པས་བསྒོམ་ཞིང་། ཐུན་མོང་མ་ཡིན་པ་ཐེག་པ་ཆེན་པོས་ཆོས་ཐམས་ཅད་ནམ་མཁའི་རང་བཞིན་དུ་རྟོགས་ནས་སྟོང་ཉིད་སྙིང་རྗེའི་སྙིང་པོ་ཅན་དུ་བསྒོམ་ན་ནང་པ། མི་བསྒོམ་པར་སེམས་རྟོག་པ་བཀག་ཙམ་དང་། བདེ་གསལ་མི་རྟོག་ཙམ་པོ་ཕྱོགས་རེའི་ངང་ལ་སེམས་འཛིན་པ་ཕྱི་པ་སྟེ། ལྟ་བ་ངན་སེལ་ལས། གང་བློ་བྱང་ཆུབ་སྙིང་རྗེ་དང་། །ཇི་བཞིན་མི་རྟོག་སྟོང་པ་ཉིད། །བདག་མེད་རྣལ་འབྱོར་པ་དེ་བརྩོན། །བཟློག་པ་གཞན་གྱི་ཕྱོགས་སུ་བཤད། །ཅེས་སོ། །སྤྱོད་པ་ནི། ཆགས་སྡང་གཏི་མུག་གི་རང་བཞིན་ཡུལ་ལ་ཞེན་པ་དང་། གཞན་ལ་འཚེ་བ་ལམ་གྱི་གེགས་སུ་འདོད་ཅིང་གཞན་གནོད་གཞི་དང་བཅས་པ་སྤངས་ཤིང་གཞན་ཕན་གཞི་དང་བཅས་པ་སྒྲུབ་པ་དེ་ཉིད་ནང་པ་སངས་རྒྱས་པ། དེ་དག་མི་འདོད་པར་དེ་ལས་བཟློག་པའི་སྤྱོད་པ་འཚེ་བ་ཆོས་སུ་སྨྲ་བ། དཀའ་ཐུབ་ངན་པས་དག་གྲོལ་དུ་ལྟ་བ་རྣམས་ནི་ཕྱི་རོལ་པ་སྟེ། སྐྱབས་འགྲོ་བདུན་ཅུ་པ་ལས། དམ་པའི་ཆོས་ལ་སྐྱབས་སོང་བས། །འཚེ་ཞིང་གནོད་པའི་སེམས་དང་བྲལ། །ཞེས་པ་བཞིན་ནོ། །འབྲས་བུ་ནི། ལམ་དེ་ཉིད་ཀྱིས་དངོས་སུ་ཐར་པ་ཉན་རང་དགྲ་བཅོམ་སངས་རྒྱས་གསུམ་གང་རུང་ཐོབ་པ་ནི་ནང་པ་ཡིན་ལ། མི་ཐོབ་པ་ནི་ཕྱི་པ་ཡིན་ཏེ། ཡུམ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། སེམས་ཅན་ཐམས་ཅད་མྱ་ངན་ལས་འདའ་བའི་ཕྱིར་ཉེ་བར་གནས་ཏེ། ཉན་ཐོས་ཀྱི་ས་ལ་མྱ་ངན་ལས་འདའ་བར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །རང་སངས་རྒྱས་ཀྱི་ས་དང་བླ་ན་མེད་པའི་སངས་རྒྱས་ཀྱི་ས་ལ་ཡོངས་སུ་མྱ་ངན་ལས་འདའ་བར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ་ཞེས་དང་། ཉན་ཐོས་ཞི་བ་འཚོལ་རྣམ་ཀུན་ཤེས་ཉིད་ཀྱིས་ཉེར་ཞིར་ཁྲིད་མཛད་ལ་སོགས་པ་མངོན་རྟོགས་རྒྱན་གྱི་མཆོད་བརྗོད་ཀྱིས་བསྟན་པ་ལྟ་བུའི་ལུང་དོན་ཏོ། །གཞན་ཀུན་ཏུ་རྒྱུ་དེ་དག་ལ་ལམ་ཡང་མེད་ལམ་མངོན་པར་རྟོགས་པ་ཡང་མེད་དོ་ཞེས་གསུངས་པ་བཞིན་ནོ། །གཉིས་པ་ཁྱད་པར་ཅན་གྱི་གཞུང་ཉིད་རྒྱ་ཆེར་དབྱེ་བ་ལ་གཉིས་ལས། མདོར་བསྟན་པ་ནི། ཐར་པ་དམ་པའི་རྗེས་འགྲོ་རྒྱལ་བའི་གཞུང་། །གང་དག་འཛིན་པ་དེ་ཡང་རྣམ་པ་གཉིས། །ཐེག་པ་དམན་དང་བླ་ན་མེད་པའོ། །ཞེས་གསུངས་ཏེ། སྤྱིར་ན་སངས་རྒྱས་ཀྱིས་གསུངས་བའི་བཀའ་ཐམས་ཅད་དོན་བཞིའི་ནང་དུ་བསྡུས་ན་སྡོམ་བྱེད་ཐུབ་ཅིང་། དེ་ཡང་གཉེན་པོ་ལ་དགོངས་ཏེ་གསུངས་པ་དང་། དབྱེ་བ་ལ་དགོངས་ཏེ་གསུངས་པ་དང་། གང་ཟག་གི་བློ་རིམ་ལ་དགོངས་ཏེ་གསུངས་པ་དང་། བསྡུས་པ་ལ་དགོངས་ཏེ་གསུངས་པ་བཞིའི་ཁུངས་སུ་བསྡུས་ན། གཉེན་པོ་ལ་དགོངས་ཏེ་རྒྱས་པར་བཀའ་སྩལ་བ་ནི། དུག་གསུམ་ཆ་མཉམ་དང་བཅས་པ་འདུལ་བའི་གཉེན་པོ་རུ་ཆོས་ཕུང་བརྒྱད་ཁྲི་བཞི་སྟོང་དུ་གསུངས་པ་ལྟ་བུ། དབྱེ་བར་དགོངས་ཏེ་གསུངས་པ་ནི་འབྲིང་དུ་བཀའ་སྩལ་བ་ཡིན་ཅིང་། བསྟན་པ་མཐའ་དག་གསུང་རབ་ཡན་ལག་བཅུ་གཉིས་ཀྱི་ནང་དུ་བསྡུས་ཏེ་བསྟན་པ་ལྟ་བུ་དང་། བསྡུས་པ་ལ་དགོངས་ཏེ་བཀའ་སྩལ་བ་སྡེ་སྣོད་གསུམ་དུ་བསྡུས་པ་དང་། གང་ཟག་གི་བློ་རིམ་ལ་དགོངས་ཏེ་བསྟན་པ་ནི་ཐེག་པའི་རྣམ་བཞག་རིམ་པ་སོ་སོར་བསྟན་པ་ལྟ་བུ་ཡིན་པས། འདི་ནས་དེའི་ཚུལ་བསྟན་པར་ནང་པ་སངས་རྒྱས་པ་དག་ནི་སངས་རྒྱས་སྟོན་པར་བྱེད་པ་དང་སྡེ་སྣོད་གསུམ་གཞུང་དུ་འཛིན་ཅིང་། ཐེག་པ་གསུམ་གྱི་རང་རང་གི་ཐར་པར་འགྲོ་བ་ལ་བགྲོད་ལམ་མ་ནོར་བ་ཉིད་ཀྱིས་ཐེག་པ་གསུམ་དུ་རྣམ་པར་གཞག་ནའང་། རེ་ཞིག་འདིར་དགོས་པའི་དབང་གིས་ཐེག་པ་ཆུང་ངུ་དང་། ཆེན་པོ་གཉིས་སུ་རྣམ་པར་གཞག་གོ །གཉིས་པ་ལ། ཐེག་པ་ཆུང་ངུ་དང་། ཆེན་པོ་གཉིས་ལས། དང་པོ་ལའང་བསྟན་བཤད་གཉིས་ལས། དང་པོ།
ཐེག་པ་ཆུང་ངུ་མདོར་བསྟན་པ།
དེ་ལ་དང་པོ་བསྟན་པ་ལ་འཇུག་པའི་རིམ་པའི་ཡང་སྒོར་གྱུར་པ་དང་། བླང་དོར་བྱེད་པའི་གཞུང་ཕལ་གྱི་ཕྱི་མོར་གྱུར་པ་དང་། ལས་དང་པོ་པ་དབང་པོ་རྟུལ་པོ་བས་འཇུག་པའི་རིམ་པ་ཡིན་པའི་ཕྱིར་སོ་སོའི་རྣམ་པར་གཞག་པ་རྒྱས་པར་བཤད་པའི་དབྱེ་བ་དང་པོ་བསྟན་པ་ནི། དམན་པའང་དབང་པོའི་རིམ་པ་རྣམ་པ་གཉིས། །ཉན་ཐོས་དང་ནི་རང་སངས་རྒྱས་པ་ཉིད། །ཅེས་གསུངས་ཏེ། རང་ཉིད་ཞི་བ་ཙམ་མཐར་ཐུག་གི་དོན་གྱི་གཉེར་བྱའི་གཙོ་བོར་བྱས་ཏེ། གཞན་ལ་ཕན་འདོགས་ནའང་རང་དོན་སྒྲུབ་པའི་དགེ་བར་སེམས་པས་བློ་ཆུང་ཞིང་། སྤྱོད་པ་དང་སྨོན་ལམ་རླབས་པོ་ཆེ་གཞན་དོན་དུ་སྒྲུབ་པ་མེད་པས་ཐབས་ཀྱི་རིམ་པ་དམན་པ་ལ་ཞུགས་པ་ཡིན་ཏེ། འདི་ནི་མན་ངག་གི་གཞུང་ཡིན་པས་བཤད་ཚད་ཇི་ལྟར་རང་རྒྱུད་ལ་སྦྱར་བའི་སྒོ་ནས་འགྲེལ་ཏེ་བཤད་དགོས་པས། འུ་ཚོས་ཀྱང་སངས་རྒྱས་ཆོས་ཚོགས་མ་ཞིག་དང་། སེམས་ཅན་ཐམས་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་ཅེས་རྒྱུན་དུ་འདོན་རུང་། དོན་དངོས་སུ་སྲོག་བསླུ་ཞིག་ཡིན་ནའང་རང་ཉིད་ཚེ་རིང་ནད་མེད་ཀྱི་ཆེད་དམ། དེས་བཟང་ཞིག་བསམ་ན་ཡང་ང་སངས་རྒྱས་ཐོབ་ཆེད། འབུམ་ལྔའི་བསགས་སྦྱངས་དང་ཉམས་ལེན་གྱི་ཐུན་རེ་བྱེད་ནའང། ང་ཤི་ཁར་སྐྲག་སྣང་མེད་པ་ཞིག་ཏུ་བསམ་ན་ཐེག་ཆེན་གྱི་ཆོས་མ་དགོས། ཐེག་དམན་གྱི་ཆོས་ཡང་དག་པའི་ལམ་དུ་འགྲོ་བ་མིན་པའི་ཚུལ་ཤེས་དགོས་སོ། །རིན་ཆེན་ཕྲེང་བ་ལས། ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་སྨོན་ལམ་དང་། །སྤྱོད་པ་ཡོངས་བསྔོ་མ་བཤད་པས། །ཐེག་པ་ཆེན་པོར་ག་ལ་འགྱུར། །ཞེས་སོ། །བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཡོངས་བསྔོ་སོགས་རྣམ་དག་ཅིག་མེད་ན་ཐེག་ཆེན་གྱི་ཆོས་མིན་ཅེས་སོ། །ལྟ་བའང་ཆོས་དང་གང་ཟག་གི་བདག་མཐའ་དག་གིས་སྟོང་པའི་ཆོས་ཉིད་བདག་མེད་རྣམ་གཉིས་རྟོགས་པའི་ཤེས་རབ་མ་རྟོགས་པས། རང་གི་ལྟ་བའི་མཐའ་གང་ཟག་གི་བདག་དང་། གཟུང་བ་རང་བཞིན་མེད་པ་ཙམ་ལ་དག་གྲོལ་དུ་ཤེས་ནས་ལམ་སྒོམ་པ་ལ་འཇུག་པ་ཡིན་ཏེ། དེ་ཡང་དམིགས་པ་སྒྲུབ་པ་ཡེ་ཤེས་བརྩོན་འགྲུས་རྣམས་ཀྱིས་ཀྱང་ཐེག་ཆེན་ཁྱད་པར་འཕགས་པ་ནི། ཕུག་གི་འདུན་པ་དང་ཁྱད་དུ་བྱ་བ་རང་དོན་སྒྲུབ་པ་དང་། སྒྲུབ་པ་ཐབས་ཤེས་ཁྱད་པ་ཅན་ཟུང་དུ་མ་འབྲེལ་བ། ཡེ་ཤེས་བདག་མེད་གཅིག་དང་ཕྱེད་གཉིས་ལས་མ་རྟོགས་པ། བརྩོན་འགྲུས་ཡང་གཞན་དོན་ལ་སྤྲོ་བ་ཞན་པས་ཡལ་བར་འདོར་བ་རྣམས་ནི་ཐེག་དམན་ཉན་རང་གི་ལམ་ཡིན་ནོ། །མངོན་རྟོགས་རྒྱན་ལས། གཟུང་དོན་རྟོག་པ་སྤང་ཕྱིར་དང་། །འཛིན་པ་མི་སྤོང་ཕྱིར་དང་ནི། །རྟེན་གྱིས་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་སོ། །གཉིས་པ་ལ། ཉན་ཐོས། རང་རྒྱལ་གཉིས། དང་པོ། སྤྱི་བྱེ་བྲག་གཉིས། དང་པོ་ལ་བསྟན་བཤད་གཉིས། དང་པོ།
ཉན་ཐོས་ཀྱི་ཐེག་པ་མདོར་བསྟན་པ།
དེ་ལྟར་ཉན་རང་གཉིས་ཀ་གཞུང་ཐེག་པ་འོག་མ་ཙམ་དུ་གཅིག་ཀྱང་། ལྟ་བ་དང་གྲུབ་ཚུལ་ཅུང་ཟད་མི་འདྲ་བ་དམིགས་པའི་ཕྱིར། སྐབས་འདིར་ཉན་ཐོས་དང་རང་རྒྱལ་རྣམ་པ་གཉིས་སུ་བརྗོད་པ་ལས། དང་པོ་ཉན་ཐོས་ཀྱི་རྣམ་པར་གཞག་པ་ནི། ཉན་ཐོས་ལ་ནི་སྡེ་ཚན་རང་བཞིན་དང་། །གྲུབ་པའི་མཐའ་སྟེ་རྣམ་པ་གསུམ་ཉིད་དོ། །ཞེས་པས་བསྟན་ནས་རྒྱས་བཤད་ལ། སྡེ་ཚན། རང་བཞིན། གྲུབ་མཐའ་གསུམ། དང་པོ།
སྡེ་བ་སོ་སོའི་དབྱེ་བ་བསྟན་པ།
ཉན་ཐོས་ཀྱི་ཐེག་པའི་རྣམ་པར་གཞག་པ་ལ་གསུམ་སྟེ། སྡེ་པ་སོ་སོའི་དབྱེ་བ་དང་། ཐར་པ་འཚོལ་བའི་རང་བཞིན། གྲུབ་པའི་མཐའ་རབ་ཏུ་དབྱེ་བའོ། །དང་པོ་ནི། ཕལ་ཆེན་པ་དང་གནས་བརྟན་རབ་དབྱེ་བས། །སྡེ་ཚན་བཅོ་བརྒྱད་ཕྱིས་ནི་གཞན་ཡང་དབྱེ། །ཞེས་གསུངས་ཏེ། དེ་ཡང་སངས་རྒྱས་མྱ་ངན་ལས་འདས་ནས་ལོ་སུམ་བརྒྱ་དང་བཅུ་དྲུག་ན་ཁ་ཆེའི་གྲོང་ཁྱེར་མེ་ཏོག་གིས་བརྒྱན་པར་རྒྱལ་པོ་དྷརྨ་ཨ་ཤོ་ཀ་སྟེ་ཆོས་རྒྱལ་མྱ་ངན་མེད་ཅེས་བྱ་བ་བྱུང་ངོ་། །དེའི་ཚེ་བདུད་སྡིག་ཅན་གྱིས་དགེ་སློང་ཞིག་ཏུ་སྤྲུལ་ནས་དབྱེན་ཆེན་པོ་སྐྱེད་དེ་དགེ་འདུན་རྣམས་འཁྲུགས་སོ། །གཞན་ཡང་བཅོམ་ལྡན་འདས་སྐུ་མྱ་ངན་ལས་འདས་ནས་ལོ་བརྒྱད་ཅུའི་སྐབས་ཤིག་ཏུ་དགེ་སློང་ལྷ་ཆེན་པོས། ཧུ་ལུ་ཧུ་ལུ་ཡི་རང་དང་། །ཀུན་སྤྱོད་སྣོད་དང་ལན་ཚྭ་དང་། །ལ་སོགས་པའི་མི་རུང་བའི་གཞི་བཅུ་བཅས་པ་དེ་ཚོ་བསལ་བའི་ཆེད་དུ། ཆོས་རྒྱལ་དྷ་རྨ་ཨ་ཤོ་ཀས་སྦྱིན་བདག་བྱས་ནས། ཆོས་སྡེ་སྣོད་གསུམ་དགྲ་བཅོམ་ཉེར་སྦས་ཀྱིས་བསྡུས་པའང་ཡོད་དོ། །རྗེས་མ་བདུད་སྡིག་ཏོ་ཅན་དགེ་སློང་གི་ཆ་བྱད་དུ་སྤྲུལ་ནས་ཆོས་ལོག་བསྟན་པའི་རྐྱེན་གྱིས། རྒྱལ་པོ་ཀྲྀ་ཀྲྀའི་རྨི་ལམ་གྱི་ལུང་བསྟན་ལྟར་དུ། རྩ་བ་སྡེ་བཞི། གྱེས་པ་བཅོ་བརྒྱད་དུ་གྱུར་ཏོ། །དེའི་ཚེ་གཞོན་ནུ་ཕལ་པ་མདོ་སྡེ་འཛིན་པ་ཕལ་མོ་ཆེ་ཕྱོགས་གཅིག་ཏུ་ཆད་པ་ལས། ཕལ་ཆེན་སྡེ་ཞེས་པ་དང་། རྒན་པོ་ཉུང་བ་འདུལ་བ་འཛིན་པ་ཁ་ཅིག་ཕྱོགས་གཅིག་ཏུ་ཆད་པ་ལ་གནས་བརྟན་སྡེ་ཞེས་གྲགས་སོ། །སངས་རྒྱས་ཀྱིས་གསུངས་པའི་འདུལ་བ་དང་། མདོ་སྡེ་གཙོ་ཆེར་ཁས་ལེན་པའི་དབྱེ་བས་གྲུབ་མཐའ་ཡང་སོ་སོར་གྱེས་ཏེ། ལྟུང་བ་དང་བསླབ་པའི་གཞི་ལའང་གྲངས་མང་ཉུང་སོ་སོར་བྱུང་ངོ་། །དེ་ནས་རིམ་གྱིས་ཕལ་ཆེན་པའང་བརྒྱད་དུ་གྱེས་ཏེ། གྱེས་པའི་ཕལ་ཆེན་པ། ཐ་སྙད་གཅིག་པ། འཇིག་རྟེན་ལས་འདས་པར་སྨྲ་བ། མང་དུ་ཐོས་པ། རྟག་པར་སྨྲ་བ། མཆོད་རྟེན་པ། ཤར་གྱི་རི་བོའི་སྡེ། ནུབ་ཀྱི་རི་བོའི་སྡེའོ། །གནས་བརྟན་པའང་བཅུ་རུ་གྱེས་ཏེ། གངས་རི་པ། ཐམས་ཅད་ཡོད་པར་སྨྲ་བ། རྒྱུར་སྨྲ་བ། གནས་མ་བུ་པ། ཆོས་མཆོག་པ། བཟང་པོའི་ལམ་པ། ཀུན་གྱིས་བཀུར་བ། མང་སྟོན་པ། ཆོས་སྦས་པ། ཆར་བཟང་འབེབས་པ་སྟེ། དེ་ལྟར་སྡེ་པ་བཅོ་བརྒྱད་དོ། །ཕྱིས་ནི་ཡོད་པར་སྨྲ་བ་ཡང་རྣམ་པར་ཕྱེ་སྟེ་ཡོད་པར་སྨྲ་བ་དང་། གོས་དམར་བ་གཉིས་སུ་གྱེས་སོ། །ཆར་བཟངས་འབེབས་པ་ཡང་། འོད་སྲུངས་པ་དང་། བླ་མ་པ་གཉིས་སོ། །གནས་མ་བུ་པ་ལའང་། རི་ཆེན་པོ་པ་དང་། འཕོ་བར་སྨྲ་བ་གཉིས་སོ། །ཀུན་གྱིས་བཀུར་བ་དང་། ཆོས་མཆོག བཟང་པོའི་ལམ་པ་རྣམས་ཀྱང་གྱེས་པར་བཤད་དོ། །རྩ་བའི་སྡེ་བཞི་ནི། གནས་བརྟན་པ། ཐམས་ཅད་ཡོད་པར་སྨྲ་བ། མང་པོས་བཀུར་བ། ཕལ་ཆེན་པ་དང་བཞི་སྟེ་རྩ་བ་དེ་ལས་གྱེས་པའོ། །འདིའི་སྐབས་ནས་གསུངས་བའི་གནས་བརྟན་པ་ནི། སྨྱུག་མ་མཁན་གྱི་རིགས་ལས་རབ་ཏུ་བྱུང་བ་མཐའ་འཁོབ་འདུལ་བའི་མཆོག་ཏུ་བསྟན་པའི་འཕགས་པ་ཀཱ་ཏྱ་ཡཱ་ན་ཆེན་པོའི་སློབ་བརྒྱུད། ཨ་ཝ་བྷྲཾ་ཤ་ཟུར་ཆག་པའི་སྐད་དུ་སྨྲ་བ། སྣམ་ཕྲན་ནི་དགུ་ཡན་ཆད་ཉི་ཤུ་རྩ་གཅིག་མན་ཆད་ལ་རྟགས་སུ་དུང་བྲིས་པའོ། །གཞི་ཐམས་ཅད་ཡོད་པ་སྨྲ་བ་ནི། བཅོམ་ལྡན་འདས་ཀྱིས་བསླབ་པ་ལ་གུས་པ་རྣམས་ཀྱི་ནང་ནས་མཆོག་ཏུ་ལུང་བསྟན་པ། རྒྱལ་རིགས་སྒྲ་གཅན་འཛིན་རབ་ཏུ་བཟང་པོ་བཅོམ་ལྡན་འདས་ཀྱི་སྲས་སུ་གྱུར་པ་དེའི་སློབ་བརྒྱུད། སཾ་སྐྲྀ་ཏའི་སྐད་དུ་སྨྲ་ཞིང་། སྣམ་སྦྱར་གྱི་སྣམ་ཕྲན་དགུ་ཡན་ཆད་ཉི་ཤུ་རྩ་ལྔ་མན་ཆད་དེ། རྟགས་སུ་ཨུཏྤ་དང་པད་མ་དང་རིན་པོ་ཆེ་དང་ཤིང་ལོ་འབྱུང་བའོ། །རང་རེའི་སྡོམ་རྒྱུན་ཡང་འདི་ཡིན་ནོ། །མང་པོས་བཀུར་བ་ནི། འདུལ་བ་འཛིན་པ་རྣམས་ཀྱི་མཆོག་ཏུ་ལུང་བསྟན་པ། ཤཱཀྱའི་བསྟན་པ་ལ་རུས་མི་གཙོ་རིགས་མི་གཙོ། འབྲེག་མཁན་ཉེ་བར་འཁོར་གྱི་རྐང་པ་ལ། ཤཱཀྱའི་རྒྱལ་པོ་བཟང་ལྡན་གྱིས་ཕྱག་བྱས་པ་ཞེས་དུས་རྒྱུན་དུ་བཤད་པའི་འབྲེག་མཁན་གྱི་རིགས་ལས་རབ་ཏུ་བྱུང་བ་འཕགས་པ་ཉེ་བ་འཁོར་གྱི་སློབ་བརྒྱུད། པི་ཤ་ཙིའི་སྐད་དུ་སྨྲ་བ། སྣམ་ཕྲན་ནི་གནས་བརྟན་པ་དང་མཐུན་པ་དང་། རྟགས་ནི་དུང་ངོ་། །ཕལ་ཆེན་པ་ནི། བྲམ་ཟེའི་རིགས་ལས་རབ་ཏུ་བྱུང་བ། སྦྱངས་པའི་ཡོན་ཏན་དང་ལྡན་པ་རྣམས་ཀྱི་ནང་ནས་མཆོག་ཏུ་ལུང་བསྟན་པ་གནས་བརྟན་འོད་སྲུང་ཆེན་པོའི་སློབ་བརྒྱུད། པྲ་ཀྲྀ་ཏའི་སྐད་ཡུལ་སྡེ་སོ་སོ་བ་དང་མཐུན་པའི་སྐད་དུ་སྨྲ་བ། སྣམ་སྦྱར་གྱི་སྣམ་ཕྲན་དགུ་ཡན་ཆད་ཉི་ཤུ་རྩ་གསུམ་མན་ཆད་དེ་རྟགས་སུ་གཡུ་དྲུང་འཁྱིལ་པ་དང་དཔལ་བེའུ་འབྱུང་བའོ། །དེ་ལྟ་བུའི་གནས་བརྟན་པ། མང་པོས་བཀུར་བ། ཐམས་ཅད་ཡོད་པར་སྨྲ་བ། ཕལ་ཆེན་སྡེ་བ་དང་བཞི་སྟེ་རྩ་བའི་སྡེ་བ་བཞི་སྟེ། དེ་ཡང་བརྟག་གཉིས་ལས། གནས་བརྟན་ཐམས་ཅད་ཡོད་སྨྲ་དང་། །ཀུན་བཀུར་དགེ་འདུན་ཕལ་ཆེན་ནོ། །ཞེས་སོ། །འདི་དག་ལ་དབྱེ་བས་གྱེས་པ་བཅོ་བརྒྱད་དུ་རྣམ་པར་གཞག་པ་གཞན་ཡང་ཡོད་དེ། ཁོ་བོས་བྱས་པའི་བསྟན་བཅོས་གྲུབ་པའི་མཐའ་རིན་པོ་ཆེའི་མཛོད་དུ་ཤེས་པར་བྱའོ། །དེ་དག་ལས་གནས་བརྟན་པ་རྣམས་ནི་གྲུབ་མཐའ་བྱེ་བྲག་ཏུ་སྨྲ་བར་འདུ་ལ། ཕལ་ཆེན་པ་རྣམས་མདོ་སྡེ་པར་འདུས་པར་བཤད་དོ། །དེ་དག་གི་གྲུབ་མཐའི་རྣམ་བཞག་འོག་ནས་འབྱུང་མ་རགས་པའི་སྡེ་པ་དེ་དག་སོ་སོའི་ངེས་ཚིག་ནི། མདོ་སྡེ་འཛིན་པའི་དགེ་འདུན་ཕལ་ཆེན་པ་ཕྱོགས་གཅིག་ཏུ་ཆད་པས་ཕལ་ཆེན་པའི་སྡེ་ཞེས་བྱའོ། །དེ་ལས་ཀྱང་ཐོག་མར་གྱེས་པས་གྱེས་པའི་ཕལ་ཆེན་པའོ། །སངས་རྒྱས་ཀྱིས་ཤེས་བྱ་ཐམས་ཅད་སྐད་ཅིག་གཅིག་ལ་མཁྱེན་པར་འདོད་པས་ཐ་སྙད་གཅིག་པའོ། །སངས་རྒྱས་ལ་འཇིག་རྟེན་པའི་ཆོས་མི་མངའ་ཟེར་བས་འཇིག་རྟེན་ལས་འདས་པར་སྨྲ་བའོ། །མང་དུ་ཐོས་པའི་སློབ་དཔོན་གྱིས་རྗེས་སུ་སྟོན་པས་མང་སྟོན་པའོ། །འདུས་བྱས་ལ་བརྟགས་ན་རྡུལ་ཆར་རྟག་ཟེར་བས་རྟག་པར་སྨྲ་བའོ། །མཆོད་རྟེན་ཅན་གྱི་རི་ལ་གནས་པས་མཆོད་རྟེན་པའོ། །གྲོང་ཁྱེར་མེ་ཏོག་གིས་བརྒྱན་པའི་ཤར་གྱི་རི་ལ་གནས་པས་ཤར་གྱི་རི་ལ་གནས་པའོ། །ནུབ་ཀྱི་རི་ལ་གནས་པས་ནུབ་རིར་གནས་པའོ། །གནས་བརྟན་པའི་རིགས་ཡིན་པས་གནས་བརྟན་པའོ། །གངས་རི་པ་ནི་གངས་ཀྱི་རི་ལ་གནས་པའོ། །དུས་གསུམ་དང་གཞི་ལྔ་རྫས་ཡོད་དུ་སྨྲ་བས་ཡོད་སྨྲ་བའོ། །དུས་གསུམ་ལས་འབྲས་བུ་འབྱུང་བའི་ལས་འགའ་ཞིག་མེད་ལ། འབྲས་བུ་མ་བྱུང་བའི་ལས་འགའ་ཞིག་ཡོད་པར་སྨྲ་བས་རྣམ་པར་ཕྱེ་སྟེ་སྨྲ་བའོ། །གོས་དམར་ཅན་གྱི་ལུགས་སྟོན་པས་གོས་དམར་ཅན་ནོ། །བྱུང་བ་དང་འབྱུང་འགྱུར་ཐམས་ཅད་རྒྱུ་བཅས་སུ་སྨྲ་བས་རྒྱུར་སྨྲ་བའོ། །ཀུན་ཏུ་རྒྱུར་གནས་པའི་བུད་མེད་ཅིག་གི་བུ་ཚུར་ཤོག་གིས་རབ་ཏུ་བྱུང་ཡང་ལྟ་བ་བརྗོད་དུ་མེད་པའི་བདག་ཁས་ལེན་པས་གནས་མ་བུ་པའོ། །སློབ་དཔོན་ཆོས་མཆོག་གི་རྗེས་སུ་སྟོན་པས་ཆོས་མཆོག་པའོ། །བཟང་པོའི་ལམ་པའི་སློབ་མ་ཡིན་པས་བཟང་པོའི་ལམ་པའོ། །ཀུན་གྱིས་བཀུར་བས་སློབ་དཔོན་གྱི་ལུགས་སྟོན་པས་ཀུན་གྱིས་བཀུར་བའོ། །སྐྱེ་བོ་མང་པོ་ལ་སྲིད་པ་མི་འབྱུང་བར་སྟོན་པས་མང་སྟོན་པའོ། །ཆོས་སྦས་ཀྱི་ལུགས་སྨྲ་བས་ཆོས་སྦས་པའོ། །དམ་པའི་ཆོས་ཀྱི་ཆར་འབེབས་པས་ཆར་བཟང་འབེབས་པའོ། །སློབ་དཔོན་འོད་སྲུངས་ཀྱི་རྗེས་སུ་བྱེད་པས་འོད་སྲུངས་པའོ། །སློབ་དཔོན་བླ་མ་ཡིན་པས་བླ་མ་པའོ། །འཇིག་རྟེན་འདི་ནས་ཕ་རོལ་ཏུ་གང་ཟག་འཕོ་བར་སྨྲ་བས་འཕོ་བར་སྨྲ་བའོ། །ཞར་ལ་དེ་དག་གི་འདོད་པ་ཅུང་ཟད་དགག་པ་ནི། གནས་མ་བུ། ཆོས་སྦས་པ། བཟང་པོའི་ལམ་པ། ཀུན་གྱིས་བཀུར་བ། བླ་མ་པ་ལྔས་བདག་འདོད་པ་ནི་སྔར་བཀག་པ་བཞིན་ནོ། །ཕལ་ཆེན་པས་ནི་གང་ཞིག་འདྲི་བ་ལ། གཞན་ལ་འདུད་པས་ལན་གདབ་པ་དང་། མི་ཤེས་པ་དང་། ཡིད་གཉིས་དང་། ཡོངས་སུ་བརྟག་པ་དང་། བདག་ཉིད་གསོ་བར་བྱེད་པ་སྟེ་དེ་ལྟ་བུའི་བསླབ་པའི་གཞི་ལྔ་འདོད་པ་མི་འཐད་དེ། དེ་དག་མུ་སྟེགས་པ་ལ་ཡོད་པའི་ཕྱིར་དང་། བདུད་ཀྱིས་བསླུས་པ་དང་། ཟས་ལ་ཆགས་པ་ལམ་གྱི་གེགས་ཡིན་པའི་ཕྱིར་རོ། །ཐ་སྙད་པས་སངས་རྒྱས་ལ་འཇིག་རྟེན་པའི་ཆོས་མི་མངའ། བྱང་ཆུབ་སེམས་དཔའི་དུས་ན་མེར་མེར་པོ་ལ་སོགས་པ་མི་འཇུག བྱང་ཆུབ་སེམས་དཔའ་ངན་འགྲོར་འདོད་པས་སྐྱེ་བ་ལེན། སངས་རྒྱས་ལ་འཇིག་རྟེན་པའི་ཡང་དག་པའི་ལྟ་བ་མེད་ཅེས་པའང་མི་རུང་སྟེ། དེ་བཞིན་གཤེགས་པ་ངན་འགྲོར་འདོད་པས་སྐྱེ་བ་ལེན་པ་སྔར་སྐྱེ་བ་བཀག་པ་ཉིད་ཀྱི་ཁེགས་པ་དང་། དེས་ན་འཇུག་པ་དང་ལེན་པ་རང་ཤུགས་ཀྱིས་མེད་པའམ་ཁེགས་པའི་ཕྱིར་རོ། །འདི་དག་གི་སྐབས་སུ་འཇམ་མགོན་བླ་མས། ཉན་ཐོས་ཀྱི་གྲུབ་མཐའི་སྐབས་སུ་སྡེ་བ་བཅོ་བརྒྱད་སོ་སོའི་འདོད་ཚུལ་འགོག་པ་རྣམས་དོན་ལ་འགལ་བ་མི་འདུག་ཀྱང་ཚིག་གི་བརྗོད་སྒྲོས་ཅུང་མི་གསལ་བ་རྣམས་ཡི་གེ་ཉམས་པ་ཕྲ་མོ་བྱུང་བ་འདྲ་སྟེ་མ་དཔེ་གང་ནའང་མི་གསལ་བ་རྣམས་ནི་སྤྱི་བརྟོལ་གྱིས་བཅོས་པར་མ་བྱས་པར་སོར་བཞག་པས་ན། སླར་ཡང་དཔེ་དག་ངེས་མཐོང་ནས་དོན་ཇི་བཞིན་སློང་ནུས་པ་བྱུང་ན་འབྲུ་ཟུར་བཅོས་པར་གྱིས་ཤིག ཅེས་གསུངས་འདུག་ཀྱང་དེང་སང་དཔེ་གསར་མང་ཡང་དག་མ་ངོ་མ་དེ་དཀོན་པར་འདུག མང་ཐོས་པས་དགེ་འདུན་འཇིག་རྟེན་ལས་འདས་པ་དང་། མཉམ་གཞག་ལ་ངག་འཇུག་པ་ཡོད་པའང་མི་རུང་ཞིང་ཡོད་པར་འདོད་པའང་མི་རུང་སྟེ། འདས་པ་འགྲོ་བ་བཀག་པས་ཁེགས་ལ། ངག་ཀྱང་དེ་བཞིན་དུ་སྔར་བཀག་པའི་ཕྱིར་རོ། །རྟག་སྨྲའི་ཕུང་པོ་མེད་པའི་སྡུག་བསྔལ་དོན་དམ་དུ་འདོད་པ་མི་རུང་སྟེ། སྡུག་བསྔལ་ཉིད་ཚོར་བའི་ཕུང་པོས་ཕྱེ་བ་དང་། བདེན་པ་བཀག་པའི་ཕྱིར་རོ། །མཆོད་རྟེན་པ་དང་ཤར་ནུབ་ཀྱི་རི་བོའི་སྡེ་ནི་གོང་གི་ཕལ་ཆེན་པ་བཞིན་ཏེ་བཀག་ཟིན་ཏོ། །གནས་བརྟན་པས་དགྲ་བཅོམ་པ་ལ་གཞན་གྱིས་སྟོན་པ་མེད། གང་ཟག་དང་འདས་མ་འོངས་ཡོད་པར་སྨྲ་བའང་མི་རུང་སྟེ། སྟོན་པ་ཡོད་ནས་སྟོན་པ་ལ་ཆོས་ཉན་པའི་ཕྱིར་དང་། གང་ཟག་དང་དུས་སྔར་ཡང་བཀག་པ་བཞིན་ནོ། །གངས་རི་པས་བྱང་ཆུབ་སེམས་དཔའ་སོ་སོ་སྐྱེ་བོ་མ་ཡིན། མྱ་ངན་ལས་འདས་དུས་ཕུང་པོ་འགགས་ཀྱང་གང་ཟག་རྟག་ཅེས་བྱ་བའང་མི་རུང་སྟེ། དེ་ལ་སོ་སོའི་སྐྱེ་བོ་ཡོད་པ་དང་། བདེན་པ་དང་། གང་ཟག་རྣམས་སྔར་བཀག་པའི་པའི་ཕྱིར་ན་ཁེགས་ཕྱིར་རོ། །ཡོད་སྨྲས་གང་ཟག་དང་། འདས་མ་འོངས་མེད། རྒྱུན་ཞུགས་བསམ་གཏན་ཐོབ། དགྲ་བཅོམ་ཡང་ཉམས་སྲིད། ལྷ་རྣམས་ལའང་ཚངས་པར་སྤྱོད་པ་ཡོད། མདོ་སྡེ་ཐམས་ཅད་དྲང་དོན་ཡིིན་ཞེས་པའང་མི་རུང་སྟེ། དུས་གསུམ་རྫས་ཡོད་འོག་ནས་བཀག་པ་འོག་ནས་དགག་འགྱུར་དང་། ཐོབ་པའང་དེ་བཞིན་དུ་འོག་ནས་བཀག་པ་དང་། མདོ་སྡེ་དྲང་དོན་ཡིན་ན་བསྟན་བཅོས་མཁན་པོས་ངེས་དོན་མི་རྙེད་པའི་ཕྱིར་རོ། །དེ་འགོག་པ་ལའང་ཉན་ཐོས་པ་རང་གི་ལུང་དེ་མཆོག མདོ་དྲང་དོན་ཞེས་པའི་མཚན་གྱིས་ཀྱང་ཤེས་པ་ལྟར་རོ། །མང་སྟོན་པས་འདས་མ་འོངས་མེད་སྡུག་བསྔལ་མཐོང་ན་བདེན་པ་བཞི་ཀ་མཐོང་། བར་སྲིད་མེད། དགྲ་བཅོམ་ཡང་བསོད་ནམས་སོགས་གང་ཟག་ལུས་དང་མཉམ། སངས་རྒྱས་དགེ་འདུན་དུ་གཏོགས་ཞེས་པའང་མི་རུང་སྟེ། བདེན་བཞི་འོག་ནས་བཀག་པ་འགྱུར་པ་དང་། བར་དོའི་ཚེ་ཚད་གསུངས་པ་དང་། གང་ཟག ལུས། མཉམ་པ་གསུམ་སྔར་བཀག་ཟིན་པ་དང་། དགེ་འདུན་ལས་སངས་རྒྱས་གཞན་དུ་གསུངས་པའི་ཕྱིར་རོ། །ཆོས་སྦས་པས་སངས་རྒྱས་དགེ་འདུན་དུ་མ་གཏོགས་པའང་མ་ཡིན་ཏེ། སངས་རྒྱས་རང་རྒྱུད་པ་འདོད་ན་དེ་ཉིད་དགེ་འདུན་མ་ཡིན་པ་དང་འགལ་བའི་ཕྱིར་ཏེ་དགེ་བ་ལ་ཐུགས་འདུན་པའི་ཕྱིར་རོ། །འོད་སྲུངས་པས་རྣམ་སྨིན་འབྱུང་བར་འདོད་པའང་མི་རུང་སྟེ། དངོས་པོ་ལ་རྟག་མི་རྟག་མེད་པས་ཁེགས་པའི་ཕྱིར་རོ། །གོས་དམར་བས་གང་ཟག་དང་ཕུང་པོ་མེད་པ་དང་ཡོད་དོ་ཞེས་པའང་གཉིས་ཀ་མི་རུང་སྟེ། ཡོད་མེད་རྫས་འགལ་བའི་ཕྱིར་དང་། བརྟགས་ཡོད་ཀྱི་གང་ཟག་ཁས་བླང་དགོས་ལ། རྫས་ཡོད་ཀྱི་ཕུང་པོའང་མེད་པའི་ཕྱིར་རོ། །བླ་མ་པས་ཕུང་པོ་ལྔ་འདི་ནས་ཕ་རོལ་ཏུ་འཕོ། ལམ་མ་རྟོགས་པར་ཕུང་པོ་མི་འགག གང་ཟག་དོན་དམ་པར་མེད་ཅེས་པའང་འཕོ་བ་ཉིད་བཀག་པ་དང་། ཕུང་པོའི་རྒྱུན་མ་གྲུབ་པ་དང་། གང་ཟག་བརྟགས་ཡོད་ཙམ་དང་འགལ་བ་དང་། ལམ་ཉིད་མ་གྲུབ་པའི་ཡང་ཕྱིར་རོ། །གནས་མ་བུ་པས་ཉེ་བར་བླང་བྱ་དང་ལེན་པ་ནི་རྟག་པ། ཆོས་གང་ཡང་འདི་ནས་ཕ་རོལ་ཏུ་འཕོ་བ་མེད། གང་ཟག་ནི་ཕུང་པོ་ལྔ་ཉེ་བར་བླངས་ནས་འཕོ། འདུས་བྱས་སྐད་ཅིག་དང་སྐད་ཅིག་མ་ཡིན་པའང་ཡོད། གང་ཟག་ནི་ཕུང་པོ་ལས་གཅིག་པ་དང་ཐ་དད་པར་མི་བརྗོད། མྱ་ངན་ལས་འདས་པ་ནི་གཅིག་པ་དང་ཐ་དད་པ་གང་དུའང་མི་བརྗོད། སེམས་ཅན་དང་སངས་རྒྱས་ཐམས་ཅད་ལ་བརྗོད་དུ་མེད་པའི་བདག་དམ་པ་རྟག་པར་ཡོད་ཅེས་པའང་མི་རུང་སྟེ། དེ་ཡང་སྔོན་སངས་རྒྱས་མྱ་ངན་ལས་འདས་པའི་ཚེ། གཅེར་བུ་པའི་སྟོན་པ་ཞིག་འོང་པ་ལ་ཚུར་ཤོག་གིས་རབ་ཏུ་བྱུང་བས་ཉན་ཐོས་སུ་འགྱུར་བ་དེས། གང་ཟག་གི་བདག་ཕུང་པོ་དང་གཅིག་གམ་ཐ་དད་དམ། གཉིས་ཀའམ་གཉིས་ཀ་མ་ཡིན་པར་ཡོད་ཅེས་དྲིས་པ་ལས། ཅང་མི་གསུང་པས་ལན་བཏབ་ཀྱང་། བརྗོད་དུ་མེད་པར་ཡོད་པར་གོ་ནས་ཆོས་འདི་པར་ཞུགས་ཀྱང་ལྟ་བ་མུ་སྟེགས་དང་འདྲེས་ཏེ་བརྗོད་དུ་མེད་པའི་བདག་ཁས་ལེན་པའོ། །འཇིག་པའི་རང་བཞིན་ཅན་ཡིན་པས་སྐད་ཅིག་ལ་འཇིག་རྒྱུ་མི་དགོས་ཤིང་། རྟག་ན་བཤིག་མི་ནུས་པས་འཇིག་པ་ལ་རྒྱུ་མི་དགོས་པའི་ཕྱིར་ན་འཇིག་པ་རྒྱུ་བཅས་མི་སྲིད་དོ། །སྐད་ཅིག་མིན་པའི་དངོས་པོ་བཀག་ཟིན་པ་དང་། བླང་བྱའི་ཕུང་པོ་དང་། ལེན་པ་པོའི་བདག་དུས་མཉམ་དང་མི་མཉམ་དུས་མི་མཉམ་ན་བླང་དུ་མེད་ལ། མཉམ་ན་རྫས་ཐ་དད་དུ་འགྱུར་བའི་ཕྱིར་མི་འགྲུབ་པ་དང་། མཐའ་གང་ཡང་མ་གྲོལ་ན་བདག་དང་ཕུང་པོ་མི་སྲིད་པར་ཐལ་བ་དང་། བདག་གམ་སེམས་ཀྱིས་ལུས་ལེན་པ་ཁེགས་པ་ཡིན་ལ། བརྗོད་དུ་མེད་པའི་ངོ་བོ་ལ་བདག་མི་རུང་སྟེ་བདག་ཏུ་བརྗོད་དུ་མི་རུང་པས་ན་མ་གྲུབ་བའི་ཕྱིར་རོ། །མང་པོས་བཀུར་བའི་ཆད་པར་གྱུར་པ་དང་ཆད་པ་དང་། གྲོལ་བར་གྱུར་པ་དང་གྲོལ་བ་དང་གྲོལ་བའི་རྣམ་པར་ཤེས་པ་ཡོད་པའང་མི་རུང་སྟེ། རྒྱུན་བཀག་པས་ཆད་པ་རང་ཤུགས་ཀྱིས་བཀག་པ་དང་། ཚེ་སྔ་ཕྱི་དང་ཤར་ནུབ་ལ་སོགས་པར་འགྲོ་བ་བཀག་པའི་ཕྱིར་དང་། རྣམ་ཤེས་སྔར་བཀག་པའི་ཕྱིར་རོ། །ཆོས་མཆོག་པ་དང་བཟང་པོའི་ལམ་པས། སྐྱེ་འགག་ལ་རག་མ་ལས་པ་དང་། འགག་པའོ་ཞེས་པ་ལ། ཡང་དག་ཏུ་སྐྱེ་བ་དང་འགག་པ་མ་གྲུབ་པ་དང་། ཐ་སྙད་དུ་རང་རང་གི་དངོས་པོ་སྐྱེ་འགག་ལ་རག་མ་ལས་པ་མི་སྲིད་པའི་ཕྱིར་དང་། གཞན་གཞན་གྱི་དངོས་པོར་འགྱུར་མི་སྲིད་པའི་ཕྱིར་རོ། །དེ་དག་ཐམས་ཅད་ཅིག་ཅར་ཁེགས་ཏེ། སྡུག་བསྔལ་ལ་སོགས་པ་ཐ་སྙད་དུ་རིམ་གྱིས་དམིགས་པ་ཉིད་དང་། སྐད་ཅིག་དང་འཕོ་བ་བཀག་པའི་ཕྱིར་རོ། །དེ་ཡན་གྱིས་ནི་སྡེ་བ་སོ་སོའི་དབྱེ་བ་བཤད་པ་དང་། འདོད་པ་ཡང་མ་དག་པ་འགའ་རེ་མུ་སྟེགས་པ་དང་མཉམ་དུ་བཀག་པས་ཁེགས་ཟིན་པ་དང་། འགའ་རེ་སྡེ་པ་སོ་སོའི་འགའ་ཞིག་བཀག་པས་འགའ་ཞིག་དེའི་ཞོར་དུ་ཁེགས་པ་དང་། འགའ་རེ་འོག་ནས་ཀྱང་དགག་པར་འགྱུར་བའོ། །གཉིས་པ།
ཐར་པ་འཚོལ་བའི་རང་བཞིན་བསྟན་པ།
ད་ནི་ཉན་ཐོས་སྡེ་བ་སྤྱི་མཐུན་པའི་ཐར་བ་འཚོལ་བའི་རང་བཞིན་བརྗོད་པ་ནི། ཉན་ཐོས་ལམ་གང་ཚུལ་གནས་ཐོས་དང་བསམ། །དགེ་སྦྱོང་ཆོས་སོགས་ལམ་དང་ཐར་པ་དག །ཐུན་མོང་མཐུན་ཕྱིར་བདེན་པ་དགག་བྱ་ཉིད། །ཅེས་གསུངས་ཏེ། མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱར། །ཞེས་པའི་ཚུལ་གྱིས་དང་པོར་བསྟན་པའི་སྒོར་རབ་ཏུ་བྱུང་ནས་ཚུལ་ཁྲིམས་སོར་ཐར་རིགས་བདུན་གང་རུང་གི་ཚུལ་ཁྲིམས་ཀྱིས་རྒྱུད་བསྡམས་པ་ཡིན་དགོས་པས། དགེ་སློང་ཕ་མ་གཉིས། དགེ་ཚུལ་ཕ་མ་གཉིས། དགེ་སློབ་མ་སྟེ་རབ་བྱུང་གི་ཕྱོགས་ཀྱི་ལྔ་དང་། དགེ་བསྙེན་ཕ་མ་ཁྱིམ་པའི་ཕྱོགས་ཀྱི་གཉིས་བསྣན་པས་བདུན་ནོ། །བསྙེན་གནས་ཀྱི་སྡོམ་པ་དུས་རེ་འགའ་བ་ཡིན་པས་ཡོན་ཏན་གྱི་རྟེན་དུ་མ་བཞག་པའོ། །དེ་ལྟ་བུའི་ཚུལ་ཁྲིམས་ལ་གནས་པ་དང་། གཤེ་ཡང་སླར་མི་གཤེ། ཁྲོས་ཀྱང་སླར་མི་ཁྲོ། བརྡེག་ཀྱང་སླར་མི་བརྡེག མཚང་བྲུས་ཀྱང་སླར་མཚང་མི་འབྲུ་བ་སྟེ་དགེ་སྦྱོང་གི་ཆོས་བཞི་དང་། ཟས་བསོད་སྙོམས་པ་གོས་ཕྱགས་དར་ཁྲོད་པ་ལ་སོགས་པ་སྦྱངས་པའི་ཡོན་ཏན་བཅུ་གཉིས་ལ་གནས་པ་དང་། ཕུང་པོ་དང་། ཁམས་དང་། སྐྱེ་མཆེད་དང་། རྟེན་འབྲེལ་དང་། ལམ་དང་ལམ་མ་ཡིན་པ་དང་གནས་དང་གནས་མ་ཡིན་པ་ལ་སོགས་པ་ལ་བླང་དོར་གྱི་དམིགས་ཤེས་པར་བྱ་བའི་ཕྱིར་ལམ་བསླབ་པ་གསུམ་གྱི་ཉམས་ལེན་གྱི་ཆེད་དུ་ལུང་སྡེ་སྣོད་གསུམ་ལ་ཐོས་བསམ་བྱ་བ་དང་། ཚོགས་དང་སྦྱོར་བ་ལ་སོགས་བའི་ལམ་ལ་སློབ་པར། དྲན་པ་ཉེར་བ་བཞག་པ་བཞི་སོགས་པའི་ཆོས་སུམ་ཅུ་རྩ་བདུན་བསྒོམས་པས་ཐར་པ་སྒྲུབ་པ་དང་། ཟས་ཀྱི་ཚོད་རིག་པ་དང་། སྲོད་དང་ཐོ་རངས་མི་ཉལ་བར་རྣལ་འབྱོར་ལ་བརྩོན་པ་དང་། འདོད་ཆགས་ལ་སོགས་པའི་གཉེན་པོ་རང་བཞིན་གྱི་ལུས། རྣམ་པར་བམ་པ་དང༌། རྣམ་པར་འབུས་གཞིག་པ་དང༌། རྣམ་པར་དམར་བ་དང༌། རྣམ་པར་སྔོ་བ་དང༌། རྣམ་པར་གནག་པ་དང༌། རྣམ་པར་ཟོས་པ་དང༌། རྣམ་པར་འཐོར་བ་དང༌། རྣམ་པར་ཚིག་པ་དང༌། རྣམ་པར་རུལ་བ་དང་། ཀེང་རུས་ཀྱི་འདུ་ཤེས་ཀྱིས་མི་གཙང་བ་དང་། ཞེ་སྡང་གི་གཉེན་པོ་དབུགས་འབྱུང་རྔུབ་ལ་སོགས་པ་བསྒོམ་པ་དང་། སོགས་ཁོངས་སུ་ཚོགས་ལམ་ཆུང་ངུའི་སྐབས་སུ་ནི་སེམས་དྲན་པ་ཉེར་བཞག་པ་ཞི་ལྷག་གི་རྣམ་པས་རྟོག་པ་ཞི་བ་དང་། སེམས་ཀྱི་རྒྱུན་ཀུན་རྫོབ་བདེན་པ་ཡིན་པར་དེ་བརྟགས་ན། ཆ་མེད་དོན་དམ་བདེན་པ་ཡིན་པ་དེའི་ངང་དུ་བདག་མེད་སྒོམ་པ་ལ་སོགས་པ་ཡོད་དོ། །རབ་ཏུ་བྱུང་བའི་རྟགས་ཆོས་གོས་དང་། ལྷུང་བཟེད་དང་འཁར་གསིལ་འཆང་བ་དང་འདོད་པ་ཆུང་བ་དང་། ཆོག་ཤེས་པ་ལ་སོགས་པ་དང་། བདེན་པ་བཞི་དང་། རྟེན་འབྲེལ་སྒོམ་པ་ལ་སོགས་པ་ནི། ཐེག་པ་མཐུན་པར་ཁས་ལེན་པས་དགག་པར་བྱ་བ་མ་ཡིན་ཏེ། ཡང་དག་པའི་ལམ་དོན་དུ་གཉེར་བྱ་ཁོ་ན་ཡིན་པའི་ཕྱིར་རོ། །འོན་ཀྱང་དེ་དག་ལ་དག་གྲོལ་དུ་བདེན་ཞེན་ཡོད་ན་བདེན་ཞེན་གྱི་བློ་ཉིད་འགོག་གི་ཡུལ་ཙམ་འགོག་པ་མ་ཡིན་ཏེ། ཞི་བ་ལྷས། འདིར་ནི་སྣང་ཉིད་དགག་མིན་གྱི། །གང་ལ་སྡུག་བསྔལ་རྒྱུར་གྱུར་པ། །བདེན་པར་རྟོག་པ་བཟློག་བྱ་ཡིན། །ཞེས་གསུངས་པ་བཞིན་ནོ། །སྦྱངས་པའི་ཡོན་ཏན་བཅུ་གཉིས་ནི། མདོ་ཀུན་ལས་བཏུས་པ་ལས། ཕྱགས་དར་ཁྲོད་དང་ཙོག་པུ་པ། །ཕྱིས་མི་ལེན་པ་ཕྱིང་བ་པ། །ཆོས་གོས་གསུམ་པ་ཤིང་དྲུང་པ། །སྟན་ཅིག་པ་དང་ཇི་བཞིན་གནས། །དུར་ཁྲོད་བླ་གབ་མེད་པ་དང་། །དགོན་པ་པ་དང་བསོད་སྙོམས་ཏེ། །ཐུབ་པ་ཞི་བའི་ཐུགས་མངའ་བས། །སྦྱངས་པ་བཅུ་གཉིས་འདི་དག་གསུངས། །ཞེས་སོ། །གཞན་རྣམས་སྔར་བསྟན་པ་དང་ཕྱིས་ཀྱང་འཆད་པར་འགྱུར་རོ། །གསུམ་པ།
གྲུབ་པའི་མཐའ་རབ་ཏུ་དབྱེ་བ།
ད་ནི་སྡེ་པ་ཀུན་འདོད་པ་ཐུན་མོང་པ་མཐུན་པར་ཁས་ལེན་པའི་གྲུབ་མཐའ་རབ་ཏུ་དབྱེ་བ་ནི། གྲུབ་པའི་མཐའ་དག་དབྱེ་ན་རྣམ་པ་གཉིས། །ཐུན་མོང་པ་དང་སོ་སོའི་རིམ་པའོ། །ཐུན་མོང་འདོད་པ་རྣམ་པ་བདུན་ཉིད་དེ། །དམན་པ་དགག་པས་འདིར་ནི་རབ་ཤེས་བྱ། །ཞེས་གསུངས་ཏེ། ཉན་ཐོས་པ་དག་གི་ཐུན་མོང་དུ་ཁས་ལེན་པའི་འདོད་པ་བདུན་དང་། སོ་སོའི་རང་བཞིན་རྒྱས་པར་བསྟན་པ་གཉིས་ལས། དང་པོ་ལ་བདུན་ཏེ། ཡུལ་བདེན་པ་བཞི་དང་། རྩོམ་བྱེད་དོན་དམ་པ་དང་། དགྲ་བཅོམ་མཐར་ཐུག་པ་དང་། ཀུན་གཞི་མེད་པ་དང་། ཐེག་ཆེན་མེད་པ་དང་། ས་བཅུ་མེད་པ་དང་། སངས་རྒྱས་རང་རྒྱུད་པའོ། །དང་པོ་ནི། སྡུག་བསྔལ། ཀུན་འབྱུང་། འགོག་པ། ལམ་བདེན་པ་ཉིད་དང་བཞི་སྟེ། བདེན་བཞི་དེ་དག་བླང་དོར་བྱ་བ་དག་གི་དམིགས་པའི་ཡུལ་ལོ། །དང་པོ་གྱུར་བ་སྡུག་བསྔལ་བདེན་པ་ནི། འབྲས་བུའི་ཕུང་པོ་སྟེ། སེམས་ཅན་སྐྱེ་བ་དང་། སྐྱེ་བའི་གནས་གཉིས་སོ། །སྐྱེ་བ་ནི། འགྲོ་བ་རིགས་དྲུག་པོ་གཅིག་ནས་གཅིག་ཏུ་འཁོར་བའོ། །གནས་ནི། ཕྱི་སྣོད་ཀྱི་འཇིག་རྟེན་སྔར་སྨོས་པ་བཞིན་ནོ། །དེ་ན་སྡུག་བསྔལ་གྱི་རྣམ་གྲངས་ནི། སྐྱེ་བ་ལ་སོགས་པ་མང་པོ་དག་གོ །འཁོར་བའི་སྣོད་བཅུད་ཀྱིས་བསྡུས་པའི་སྡུག་བསྔལ་བདེན་པ་དེ་ནི། ནད་དང་འདྲ་བ་ལུས་ངག་ཡིད་གསུམ་ལ་ཕྱི་ནང་གི་རྐྱེན་གྱིས་བསླངས་ནས་ཟུག་ངུ་ཡིད་དུ་མི་འོང་པ་སྣ་ཚོགས་ཡོང་བ་དང་། དེས་མཚོན་པའི་འཁོར་བའི་ཕུང་ལྔ་ཉེར་ལེན་དང་བཅས་པ་སྤང་ཆེད་དུ་སྡུག་བསྔལ་གྱི་རང་བཞིན་ཤེས་པར་འཇུག་དགོས་སོ། །ཀུན་འབྱུང་ནི། སྡུག་བསྔལ་གྱི་རྒྱུའི་ཆ་སྟེ། ལས་དང་ཉོན་མོངས་པ་གཉིས་སོ། །ཉོན་མོངས་པ་ནི། འདོད་ཆགས་ལ་སོགས་པའོ། །ལས་ནི། བསམ་པ་དང་། སེམས་པ་གཉིས་ཏེ། དགེ་མི་དགེ་ལུང་མ་བསྟན་དང་གསུམ་མོ། །དེའང་། བསམ་པ་ལུས་དང་ངག་གི་སྟེ། །སེམས་པ་ཡིད་ཀྱི་ཡིན་པར་འདོད། །ཅེས་པ་ལྟར་རོ། །མི་དགེ་བ་ནི། སྲོག་གཅོད་པ་ལ་སོགས་པ་བཅུ་དང་། ཕ་མ་གསོད་པ་ལ་སོགས་པ་མཚམས་མེད་པ་ལྔ་དང་། བྱང་ཆུབ་སེམས་དཔའ་གསོད་པ་ལ་སོགས་པ་ཉེ་བ་ལྔ་དང་། བསླབ་པ་འདྲལ་བ་ལ་སོགས་པའོ། །དགེ་བ་ནི། སྲོག་གཅོད་པ་སྤོང་བ་ལ་སོགས་པ་བཅུ་དང་གཞན་ཡང་ངོ་། །ལུང་མ་བསྟན་ནི། བཟོ་འདྲུབ་པ་ལ་སོགས་པའོ། །ཀུན་འབྱུང་ནི་ནད་ཀྱི་རྒྱུ་དང་འདྲ་བ་དང་། ལས་ནི་ཀུན་བྱེད་རི་མོ་མཁན་དང་འདྲ་བ་དང་། རྒྱུ་དུག་གསུམ་གྱིས་སྡུག་བསྔལ་སྣ་ཚོགས་བསྐྱེད་པ་ཡིན་པས་ཀུན་འབྱུང་སྤང་བ་ལ་འཇུག་གོ །འགོག་པ་ནི། སྡུག་བསྔལ་རྒྱུ་དང་བཅས་པ་གཏན་ནས་ཞི་བ་སྟེ་ལྷག་བཅས་ལྷག་མེད་དང་། སོ་སོར་བརྟགས་པ་དང་། བརྟགས་མིན་གྱི་འགོག་པའོ། །འགོག་པའི་བདེན་པ་ནི་ནད་ལས་གྲོལ་བའི་བདེ་བ་ལྟ་བུ། འཁོར་བའི་རིམས་ནད་ལས་གྲོལ་བའི་དགའ་བ་ཁྱད་པར་ཅན་གྱི་འབྲས་བུ་ཡིན་པས། དེ་ཐོབ་པར་བྱ་བའམ་འགོག་པ་མངོན་དུ་བྱ་བར་འཇུག་པའོ། །ལམ་ནི། སྡུག་བསྔལ་ཤེས། ཀུན་འབྱུང་སྤང་། འགོག་པ་མངོན་དུ་བྱེད། ལམ་རྒྱུད་ལ་བརྟེན་པའི་ཚུལ་གྱིས། ཚོགས་ལམ། སྦྱོར་ལམ། མཐོང་ལམ། བསྒོམ་ལམ། མི་སློབ་པའི་ལམ་དང་ལྔའོ། །ལམ་གྱི་བདེན་པ་ནི་སྨན་དང་འདྲ་བར་སྡུག་བསྔལ་གྱི་ནད་ལས་གྲོལ་བྱེད་ཡིན་པས། ལམ་སྒོམ་ཞིང་རྒྱུད་ལ་བརྟེན་པར་བྱ་བ་ལ་འཇུག་དགོས་པའོ། །དེ་ཡང་མཛོད་ལས། བདེན་པ་དག་ནི་བཞིར་བཤད་དོ། །སྡུག་བསྔལ་ཀུན་འབྱུང་དེ་བཞིན་དུ། །འགོག་དང་ལམ་སྟེ་དེ་ལྟར་ན། །དེ་དག་ཇི་ལྟར་མངོན་རྟོགས་རིམ། །ཞེས་སོ། །རྒྱུད་བླ་མ་ལས་ཀྱང་། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེ་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། །ཞེས་པ་དང་གཅིག་གོ །རྩོམ་བྱེད་དོན་དམ་ནི། རགས་མཐའ་རྡུལ་ཕྲན་ཐོ་བ་ལ་སོགས་པས་གཞིག་མི་ནུས་པ་དང་། ཤེས་མཐའ་སྐད་ཅིག་བློས་གཞིག་མི་རུང་བ་སྟེ། དེ་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་པར། །ཡོད་དེ་དོན་དམ་ཡོད་གཞན་ནོ། །ཞེས་སོ། །དེ་ཡང་རི་ལ་སོགས་པ་ནི། དཔག་ཚད་དུ་རགས་པ་ཉེ་ཕྲ་སོང་ནས་ཞིག་པ་ནས། རྒྱང་གྲགས་དང་། འདོམ་དང་། ཁྲུ་དང་། སོར་དང་། ནས་དང་། ཤིག་དང་། སྲོ་མ་དང་། ཉི་རྡུལ་དང་། གླང་རྡུལ་དང་། ལུག་རྡུལ་དང་། རི་བོང་རྡུལ་དང་། ཆུ་རྡུལ་དང་། ལྕགས་རྡུལ་དང་། རྡུལ་ཕྲན་དང་ཕྲ་རབ་རྣམས་ཀྱི་བར་དུ་ཞིག་པས་སོ། །ཉི་འོད་ཀྱི་རྡུལ་འབྲིང་པོ་གཅིག་བཞི་བཅུ་རྩ་དགུར་བགོས་པའི་ཆ་གཅིག་ཙམ་པ་ཟླུམ་གོང་དེ་ནི་དོན་དམ་པ་ཡིན་ཏེ། བློས་གཉིས་སུ་མི་རུང་བས་འཕགས་པ་རྣམས་ཀྱིས་ཀྱང་ཆ་ཤས་ཅན་དུ་ནི་མ་གཟིགས་ཏེ། མཚོན་གྱིས་བཅད་པ་དང་། གཏུན་དུ་ཞིབ་མོར་བརྡུངས་ཀྱང་གཉིས་སུ་འགྱེས་མི་སྲིད་པའི་ཕྱིར་རོ། །དེ་རྡུལ་ཕྲན་ཆ་མེད་དང་། དུས་མཐའ་སྐད་ཅིག་ཆ་མེད་ནི། མི་ཚེ་དང་བསྐལ་པ་ནི་ཀུན་རྫོབ་ཡིན་ཏེ་ལོའི་ཕུང་པོ་ཡིན་པས་ལོ་དུ་མར་ཞིག་པས་སོ། །ལོ་ཉིད་ཟླ་བའི་ཕུང་པོ་དང་། ཞག་དང་། ཡུད་ཙམ་དང་། ཐང་ཅིག་དང་། དབུགས་དང་། རྩ་འཕར་བ་ཡང་མི་བདེན་ཏེ། སྐད་ཅིག་དྲུག་ཅུར་ཞིག་པས་སོ། །མི་དར་མ་ཁམས་སྙོམས་པའི་རྩ་འཕར་བ་གཅིག་ལ་དྲུག་ཅུར་བགོས་པའི་ཆ་གཅིག་ཙམ་གྱི་དུས་ནི་དོན་དམ་ཡིན་ཏེ། མྱུར་ཡང་སྐད་ཅིག་གི་ཕྱིར་དང་། མདའ་ལ་སོགས་པ་མགྱོགས་པས་ཀྱང་དེའི་བར་དུ་ནུར་བའམ་འགྱུར་དུ་མེད་པའི་ཕྱིར་རོ། །དེ་ཉིད་ལས། གཟུགས་མིང་དུས་མཐའ་རྡུལ་ཡིག་དང་། །སྐད་ཅིག་ཕྲ་རབ་རྡུལ་དང་ནི། །རྡུལ་ཕྲན་དང་ནི་དེ་བཞིན་དུ། །ཉི་ཟེར་རྡུལ་དང་ཕྲ་མོ་དང་། །དེ་ལས་བྱུང་དང་དེ་བཞིན་དུ། །སོར་གཅིག་ཅེས་བྱ་གོང་བདུན་འགྱུར། །སོར་མོ་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་ངོ་། །དེ་དག་ལྔ་བརྒྱ་རྣམས་ལ་ནི། །རྒྱང་གྲགས་དེ་ལ་དགོན་པར་འདོད། །དེ་བརྒྱད་དཔག་ཚད་ཅེས་བྱའོ། །སྐད་ཅིག་མ་བརྒྱ་ཉི་ཤུ་ལ། །དེ་ཡི་སྐད་ཅིག་དེ་དག་ཀྱང་། །དྲུག་ཅུ་ལ་ནི་ཐང་ཅིག་གོ །ཡུད་ཙམ་ཉིན་ཞག་ཟླ་གསུམ་ནི། །གོང་ནས་གོང་དུ་སུམ་ཅུར་འགྱུར། །ཞག་མི་ཐུབ་དང་བཅས་པ་ཡི། །ཟླ་བ་བཅུ་གཉིས་ལ་ལོ་གཅིག །ཅེས་སོ། །དེ་ལྟར་སིལ་བུ་ཆ་ཤས་མེད་པ་དག་འཐོར་དུ་མེད་པ་ནི་རླུང་དྲག་པོས་མི་འགྱེས་པར་གནས་པ་ནི་སེམས་ཅན་སྤྱི་མཐུན་གྱི་ལས་ཀྱིས་བསྡུས་པའམ། ཡང་ན་ལྡན་པ་ཞེས་པས་མི་འགྱེས་པ་བསྡུད་པ་བྱེད་པ་ཡོད་པ་དེས་ཡིན་ནོ། །རྡུལ་དུ་མ་ལས་རི་ལ་སོགས་པའི་དངོས་པོ་རགས་པ་རྩོམ་པ་དང་། སྐད་ཅིག་མ་མཐུད་པས་ཡུན་རིང་པོར་རི་ལ་སོགས་པ་གནས་པར་སྣང་བ་ནི་བྱིས་པ་བློ་རགས་པའི་འཁྲུལ་པ་ལ་སྣང་བ་ཡིན་ནོ། །འཕགས་པ་རྣམས་ཀྱི་སྣང་ངོར་རྡུལ་ཕྲན་དང་སྐད་ཅིག་ཀྱང་འགག་པར་མཁྱེན་ཏེ། བཙུན་པ་དཔལ་ལེགས་ཀྱི་རྡུལ་བདུན་ཅུ་པ་ལས། ལག་མཐིལ་སྤུ་ཉག་གཅིག་འདུག་པ། །མི་རྣམས་ཀྱིས་ནི་མི་རྟོགས་ལ། །དེ་ཉིད་མིག་ཏུ་སོང་ན་ནི། །མི་བདེ་བ་དག་སྐྱེད་པ་ལྟར། །བྱིས་པ་ལག་མཐིལ་འདྲ་བ་ཡིས། །འདུ་བྱེད་སྡུག་བསྔལ་སྤུ་མི་རྟོགས། །འཕགས་པ་མིག་དང་འདྲ་བ་རྣམས། །དེ་ཡིས་ཡིད་ཀྱང་ཤིན་ཏུ་འབྱུང་། །ཞེས་སོ། །གཟུགས་རགས་པ་ཐམས་ཅད་ཀྱི་རྩོམ་གཞི་མཐར་ཐུག་པ་རྡུལ་ཕྲན་ཆ་མེད་དང་། ཤེས་པའི་རྩོམ་གཞི་དུས་མཐའི་སྐད་ཅིག་ཆ་མེད་གཉིས་ཀ་དོན་དམ་དུ་ཡོད་པ་ཡིན། དེ་ནས་རིམ་པར་བརྩམས་པ་ཡིན་ཅེས་སོ། །དགྲ་བཅོམ་མཐར་ཐུག་ནི། དགྲ་བཅོམ་ལྷག་མེད་དུ་མྱ་ངན་ལས་འདས་པ་ནི་མར་འཁོར་བར་ཡང་མི་ལྟུང་སྟེ། མཐོང་སྤང་སྒོམ་སྤང་གི་ཕྲ་རྒྱས་སྤངས་པས་ཁམས་གསུམ་དུ་སྐྱེ་བ་ལེན་པའི་རྒྱུ་ཟད་པའི་ཕྱིར་དང་། ཡར་སངས་རྒྱ་བ་མི་སྲིད་དེ་རིགས་ཉན་ཐོས་སུ་ངེས་པས་ན་སངས་རྒྱས་ཀྱི་རྒྱུར་མི་རུང་བའི་ཕྱིར་རོ། །སྤྱིར་ལུང་ལས་སངས་རྒྱས་འབྱུང་བར་གསུངས་པ་དེ་ནི་སྐྱེས་བུ་རབ་རྣམས་ཡིན་གྱི། བདག་གིས་བསྐལ་པ་གྲངས་མེད་དུ་འཁོར་བར་གནས་ན་སྡུག་བསྔལ་བསྲན་མི་བཟོད་ཅིང་ལམ་ལས་ཉམས་པར་འགྱུར་ལ། སེམས་ཅན་དམུ་རྒོད་བཟློག་ཏུ་མེད་པ་རྣམས་ཀྱི་དོན་བྱ་བར་མི་ནུས་པའི་ཕྱིར་ཞེས་སོ། །དགྲ་བཅོམ་ལྷག་མེད་མྱ་ངན་ལས་འདས་པ་ཁམས་གསུམ་དུ་སྐྱེ་བའི་རྒྱུ་ཟད་པས་མར་འཁོར་བར་མི་ལྟུང་། ཡར་སངས་རྒྱས་པར་མེད་དེ་ཉན་ཐོས་སུ་རིགས་ངེས་པ་ཡིན། མྱ་ངན་ལས་ངེས་པར་འདའ་བ་ནི་དཔེ་སྣུམ་ཟད་ཀྱི་མར་མེ་བཞིན་ཞེས་པའོ། །ཀུན་གཞི་མེད་པ་ནི། སངས་རྒྱས་བཅོམ་ལྡན་འདས་ཀྱིས་ཉན་ཐོས་ཀྱི་ཐེག་པར་ཀུན་གཞིའམ་ལེན་པའི་རྣམ་ཤེས་མ་བསྟན་ཅིང་། དེ་ནི་ཤེས་བྱ་ཤིན་ཏུ་ཕྲ་བ་རྟོགས་དཀའ་བ་ཡིན་པ་དང་། ཉན་ཐོས་རྣམས་ཀྱིས་འཁོར་བའི་སྡུག་བསྔལ་ཞི་བའི་ཐབས་ཙམ་མ་གཏོགས། ཤེས་བྱ་ཕྲ་བ་ཐམས་ཅད་ལྷག་པར་ཤེས་བའི་རིགས་མིན་པས་ཀྱང་མ་བསྟན་ཏོ། །དེས་ཕྱིར་ཀུན་གཞི་ཁས་ལེན་པ་མིན་ལ། མིག་གི་རྣམ་ཤེས་ནས་ཡིད་ཀྱི་རྣམ་ཤེས་ཀྱི་བར་དུ་འཇུག་པའི་རྣམ་ཤེས་ཚོགས་དྲུག་ནི་རེ་མོས་སུ་ཡོད་ཀྱི་དེ་དག་ལས་གཞན་ཀུན་གཞིའི་རྣམ་པར་ཤེས་པ་ནི་མེད་དེ་མ་དམིགས་པའི་ཕྱིར་དང་། བརྟན་པའི་སེམས་ཤིག་གྲུབ་ན་དེ་ཉིད་གང་ཟག་གི་བདག་ཡིན་པའི་ཕྱིར་རོ། །ཞེས་ཚོགས་དྲུག་གི་རྣམ་ཤེས་རྣམས་རེས་བསྐོར་ནས་འཆར་བ་ཡིན་གྱི། དེའི་ཕན་དུ་ཀུན་གཞི་ཞེས་པ་ཞིག་ལོགས་སུ་མེད་དོ། །གལ་སྲིད་ཐམས་ཅད་ཀྱི་གཞིར་གྱུར་བའི་བརྟན་པའི་སེམས་ཤིག་ཡོད་དུས་གང་ཟག་གི་བདག་ཡིན་ཅེས་སྒྲུབ་བྱེད་དུ་བཀོད་པའོ། །ཐེག་ཆེན་མེད་པ་ནི། སངས་རྒྱས་ཀྱིས་ནི་འདུལ་བ་ལུང་སྡེ་བཞི་སོ་སོར་ཐར་པ་དང་བཅས་པ་དང་། མདོ་སྡེ་གཅིག་ལས་འཕྲོས་པ་ལ་སོགས་པ་དང་། མངོན་པ་གདག་པའི་སྡེ་བདུན་ལ་སོགས་པ་ཙམ་གསུངས་ཀྱི། དེ་ལས་གཞན་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་དང་། དཀོན་མཆོག་བརྩེགས་པ་དང་། ཕལ་པོ་ཆེ་ལ་སོགས་པ་ནི་སངས་རྒྱས་ཀྱིས་མ་གསུངས་པ་ཡིན་ཏེ། སངས་རྒྱས་མྱ་ངན་ལས་འདས་ནས་བདུད་དང་མུ་སྟེགས་རྣམས་ཀྱིས་བསྟན་པ་ལ་མཐོ་བརྩམ་པའི་ཆེད་དུ་བྱས་པ་ཡིན་ཏེ། གནས་བརྟན་འོད་སྲུངས་ཆེན་པོ་ལ་སོགས་པ་ཉན་ཐོས་ཆེན་པོ་དེ་དག་རྟག་ཏུ་སྟོན་པའི་སྐུ་དྲུང་ན་འབྲལ་མེད་དུ་ཡོད་པ་ལས་དེ་དག་གིས་མ་ཐོས་པའི་ཕྱིར་དང་། འདི་ནས་འགལ་བ་གསུམ་གྱི་རྒྱུ་མཚན་གྱིས་ཐེག་ཆེན་སྟོན་པའི་བཀའ་མ་ཡིན་པར་བསྒྲུབས་པ་སྟེ། ལྟ་བ་བཀའ་རྟགས་ཀྱི་ཕྱག་རྒྱ་བཞི་དང་འགལ་བའི་ཕྱིར་དང་། སྡེ་སྣོད་གསུམ་དང་འགལ་བའི་ཕྱིར་དང་། ལས་རྒྱུ་འབྲས་དང་འགལ་བའི་ཕྱིར་ན་ཐེག་ཆེན་སངས་རྒྱས་ཀྱི་བཀའ་མིན་ཕྱིར་རོ། །དེ་ཡང་ཕྱག་རྒྱ་བཞི་དང་འགལ་བའི་འགལ་ལུགས་ནི་དང་པོ་འདུས་བྱས་མི་རྟག་པ་དང་འགལ་ཏེ་ཐེག་ཆེན་པས་འདོད་པའི་ལོངས་སྐུ་རྟག་པར་སྟོན་པའི་ཕྱིར་རོ། །དེ་ནི་འདུས་བྱས་མི་རྟག་པར་གསུངས་བ་དང་འགལ་བའོ། །གཉིས་པ་ཆོས་བདག་མེད་པ་དང་འགལ་ཏེ་བདེ་གཤེགས་སྙིང་པོས་ཁྱབ་པར་ཁས་ལེན་པ་དང་། དེས་མ་ཚད་ལེན་པའི་རྣམ་པར་ཤེས་པ་ཟབ་ཅིང་ཕྲ་བར་བསྟན་པའི་ཀུན་གཞིའི་རྣམ་ཤེས་སྟོན་པ་ཆོས་བདག་མེད་པ་དང་འགལ་པའི་ཕྱིར་རོ། །ལྟ་བ་བཀའ་རྟགས་ཀྱི་ཕྱག་རྒྱ་བཞིའི་ནང་གི་གསུམ་པ་དང་འགལ་ཏེ་ཟག་བཅས་ཐམས་ཅད་སྡུག་བསྔལ་དང་འགལ་ཏེ། བྱང་ཆུབ་སེམས་དཔའ་བདེ་བ་ནས་བདེ་བའི་སར་འགྲོ་བ་འདོད་པའི་ཕྱིར་རོ། །མྱང་འདས་ཞི་བ་དང་འགལ་ཏེ་ཉན་ཐོས་སངས་རྒྱས་སུ་ལུང་བསྟན་པ་དེ་དང་འགལ་པའི་ཕྱིར་དང་། སངས་རྒྱས་ནམ་ཡང་མྱ་ངན་ལས་མི་འདའ་བར་འདོད་པའི་ཕྱིར་མྱ་ངན་ལས་འདས་པ་ཞི་བ་དང་འགལ་ཕྱིར་རོ། །སྡེ་སྣོད་གསུམ་དང་ཡང་འགལ་ཏེ། ཁྱིམ་པ་ལའང་ཕྱག་བྱ་བར་སྟོན་པའི་ཕྱིར་དང་། དགེ་བསྙེན་གྱིས་བསད་པ་དང་རྐུ་བ་ལ་སོགས་པའང་བྱ་བར་སྟོན་པའི་ཕྱིར་རོ། །ལས་འབྲས་དང་ཡང་འགལ་ཏེ། ལུས་ཅན་དག་གིས་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་པ་ཡིན་པ་ལ། མཚམས་མེད་སྤྱད་པའི་སྡིག་ཀྱང་ཚེ་འདིར་དག་པར་འདོད་པའི་ཕྱིར་རོ། །དེས་ན་ལས་འབྲས་དང་ཡང་འགལ་བའོ། །སངས་རྒྱས་སྐུ་ངོ་མའི་ཞལ་ནས་གསུངས་ཤིང་ཉན་ཐོས་དགྲ་བཅོམ་ཐམས་ཅད་ཀྱིས་བསྡུས་པ་དེ་བཀའ་ཡིན། ཐེག་ཆེན་གྱི་ལུགས་འདི་བསྟན་པ་ལ་ཐོ་འཚམ་ཆེད་དུ་བདུད་ཀྱིས་བྱས་པ་ཡིན། ཅིའི་ཕྱིར་ཞེ་ན། སྡེ་སྣོད་གསུམ་དང་ཕྱག་རྒྱ་བཞི་ལ་སོགས་པ་སངས་རྒྱས་ཀྱི་བཀའ་དངོས་དང་མི་མཐུན་པས་སོ། །ས་བཅུ་མེད་པ་ནི། ས་བཅུ་ཞེས་པ་བདེན་པ་མཐོང་ནས་འཁོར་བར་བསྐལ་པ་མང་པོ་གནས་པ་ནི་མེད་ཀྱི། སོ་སོ་སྐྱེ་བོའི་ས་ལ་གྲངས་མེད་གསུམ་དུ་ཚོགས་བསགས་ནས་ངེས་འབྱེད་ཡན་ཆད་སྟན་ཅིག་ལ་ནུབ་གཅིག་གི་ཚེ་མངོན་དུ་བྱེད་པ་ཡིན་ནོ། །ས་བཅུར་བགྲོད་པ་ཡང་མེད་དེ་བདེན་པ་མཐོང་བས་བསྐལ་བ་མང་པོ་འཁོར་བའི་ནང་དུ་གནས་དགོས་པ་མིན་ལ། སངས་རྒྱས་མཁན་གྱིས་ངེས་འབྱེད་ཡན་ཆོད་སྟན་གཅིག་གི་ཐོག་ཏུ་ནུབ་གཅིག་ལ་བྱེད་པ་ཡིན་ཅེས་སོ། །སངས་རྒྱས་ནི། ཉན་ཐོས་ཀྱི་གང་ཟག་རང་རྒྱུད་པ་ཞིག་གིས་ཉན་ཐོས་ཀྱི་ལམ་འདི་བསླབས་ནས་ཚོགས་ཡུན་རིང་བསགས་པ་ཞིག་ཡིན་གྱི། སྤྲུལ་བའི་སྐུ་ཞེས་པ་ཞིག་ཡོད་པ་མ་ཡིན་ཏེ་ཁྲག་ཟགས་པ་དང་། སྐུ་རྒྱབ་སྙུང་བ་ལ་སོགས་པ་རྣམ་སྨིན་གྱི་ཆ་ལྷག་མ་དང་བཅས་པ་ཡོད་པའོ། །རྟག་ཏུ་མཉམ་པར་གཞག་པའང་མ་ཡིན་ཏེ། ཏིང་ངེ་འཛིན་དེ་ལས་བཞེངས་ཏེ་བསོད་སྙོམས་ལས་གཤེགས་སོ། །ཞེས་ལུང་ལས་འབྱུང་བའི་ཕྱིར་ན་རྟག་ཏུ་མཉམ་པ་བཞག་པ་མིན་ཕྱིར་རོ། །མྱ་ངན་ལས་འདས་ནས་འགྲོ་དོན་རྒྱུན་ཆད་པ་ཡིན་ནོ་ཞེས་འདོད་དོ། །དེ་དགག་པ་ལ་ཕྱོགས་སྔ་མ་ལྟར་བདུན་ལས། བདེན་པ་དགག་པ་ལའང་བཞི་ཡོད་པའི། དང་པོ་སྡུག་བསྔལ་དགག་པ་ལ། ནང་སེམས་ཅན། ཕྱི་སྣོད། སྡུག་བསྔལ་གྱི་རྣམ་གྲངས་དགག་པ་གསུམ་ལས། དང་པོ་ནི། འགྲོ་བ་རིགས་ལྔའམ་དྲུག་མ་གྲུབ་སྟེ་དམྱལ་བའམ་ལྷ་ཙམ་པོ་ཉིད་སྔར་སྤྱི་དགག་པ་དང་མཚུངས་ནས་ཁེགས་སོ། །དེའང་མི་ཤི་ནས་ལྷར་སྐྱེ་བ་མི་འཐད་དེ། ལྷར་སྐྱེས་ན་མི་མ་ཡིན་ལ། མ་སྐྱེས་ན་ལྷ་མ་ཡིན་པའི་ཕྱིར་དང་། ཕྲད་པ་མ་གྲུབ་པའི་ཕྱིར་རོ། །སྣོད་དགག་པ་ནི། འཇིག་རྟེན་ཆགས་པ་མི་རུང་སྟེ། ཡོད་དུས་དང་མེད་དུས་སུ་ཆགས་སུ་མི་རུང་བའི་ཕྱིར་རོ། །འདིའི་སྐོར་ལ་བློ་སྦྱོང་མྱངས་བ་ཞིག་ལ་ནི་ཚིག་འདི་ལས་དགོས་པ་མིན་ཀྱང་། གྲུབ་མཐའི་འདོད་པ་དང་ཚུལ་གསུམ་བཀོད་ནས་རིགས་ལམ་གྱིས་དགག་བཞག་རྒྱུས་ལེན་བྱེད་མ་མྱངས་པ་ཞིག་ལ་ཚིག་སྡུད་བྱས་སོང་བའི་དབང་གིས་གོ་བཀའ་ཡང་། དེས་ན་ཡོད་ན་ཆགས་མི་རིགས་ཆགས་ཅི་དགོས། མེད་པ་ཆགས་རྒྱུ་མེད་པས་སོ། །གནས་པ་མེད་དེ་སྐད་ཅིག་ཡིན་པས་འགག་པའི་ཕྱིར་རོ། །འཇིག་པ་མེད་དེ་ཡོད་དུས་མེད་དུས་སུ་འཇིག་པ་མི་རུང་བའི་ཕྱིར་རོ། །ཡང་གོང་བཞིན་ནོ། །སྟོངས་པ་མེད་དེ་ནམ་མཁའ་བཀག་པའི་ཕྱིར་རོ། །སྔར་ཞིག་པའི་ཤུལ་དེར་ཕྱིས་ཆགས་པ་མེད་དེ་ཤུལ་གྱི་ནམ་མཁའ་མ་གྲུབ་པའི་ཕྱིར་རོ། །དེ་ནི་གཞན་ལུགས་བཀག་པའོ། །འོ་ན་ཁྱེད་ཀྱིས་ཆགས་འཇིག་བཤད་པའང་མེད་དོ་ཞེ་ན། རང་ལུགས་སྒྲུབ་པ་ནི་དངོས་པོ་ལ་མེད་ཀྱང་འཁྲུལ་ངོར་སྣང་བ་ལ་འགལ་བ་མེད་དེ་དཔེ་རྨི་ལམ་གྱི་སྐྱེ་འཇིག་བཞིན་ནོ། །དོན་བསྡུ་བ་ནི་དེས་ན་སྣོད་བཅུད་ལ་ཆགས་གནས་འཇིག་པ་རང་མཚན་པ་མེད་དེ་སྣང་དུས་ཉིད་ནས་རང་བཞིན་མེད་པའི་ཕྱིར་རོ། །འདིའི་མཚམས་ནས་རྒྱབ་སྐྱོར་གྱི་ལུང་འདྲེན་པ་ནི་ཏིང་ངེ་འཛིན་རྒྱལ་པོ་ལས། ནམ་ཞིག་འཇིག་རྟེན་ཁམས་ནི་བྱུང་བ་དང་། །འཇིག་རྟེན་ཐམས་ཅད་ནམ་མཁར་གྱུར་པའི་ཚེ། །ཇི་ལྟར་སྔོན་བཞིན་ཕྱིས་ཀྱང་དེ་བཞིན་ཏེ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །འཇིག་རྟེན་འདི་ན་ཇི་སྙེད་ཅི་ཡོད་པ། །ཆུ་ཡི་ཕུང་པོ་འདི་ནི་འོག་ཏུ་འགྲོ། །འོག་ཏུ་ཅི་འདྲ་སྟེང་དུའང་དེ་འདྲ་སྟེ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་བར་སྣང་ཅུང་ཟད་སྤྲིན་མེད་ལས། །སྐད་ཅིག་ཏུ་ནི་སྤྲིན་གྱི་དཀྱིལ་འཁོར་སྣང་། །ཐོག་མ་གང་ལས་བྱུང་བ་ཤེས་པར་བྱ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་པ་བཞིན་ནོ། །བསྐལ་པའི་འཕེལ་འགྲིབ་མེད་དེ། རྟག་མི་རྟག་ལ་འཕེལ་འགྲིབ་མེད་པའི་ཕྱིར་རོ། །རི་དང་གླིང་ལ་སོགས་པ་རགས་པར་མ་གྲུབ་པས་དབྱིབས་དང་ཚད་གཞལ་དུའང་མི་རུང་བའི་ཕྱིར་རོ། །འདོམ་དང་སོར་ལ་སོགས་པའི་ཚད་ཀྱང་མེད་དེ། འཇལ་བཞིན་པའི་ཚེ་སྔར་གཞལ་བ་ཉིད་འགགས་ནས་མེད་པའི་ཕྱིར་རོ། །མདོ་ལས། གཟུགས་འདི་ནི་ཚད་མེད་ཅིང་བལྟར་མེད་པ་བསམ་གྱིས་མི་ཁྱབ་པའོ་ཞེས་སོ། །དེས་ན་སྣོད་མ་གྲུབ་པ་ཡིན་ནོ། །སྡུག་བསྔལ་གྱི་རྣམ་གྲངས་དགག་པ་ནི། སྡུག་བསྔལ་ལ་སྐྱེ་བ་དང་། རྒས་པ། ན་བ། སྡུག་པ་དང་བྲལ་བའི་སྡུག་བསྡུལ་བསྔལ། མི་སྡུག་པ་དང་འཕྲད་པའི་སྡུག་བསྔལ་ལ་སོགས་པ་ཡོད་པ་ལས། སྐྱེ་བ་མེད་དེ་ལུས་སྐྱེ་བ་ཡིན་ན། རྡུལ་ཆ་མེད་པ་འདོད་པ་ཡིན་པས་སྐྱེ་བ་པོ་གཏན་ནས་མ་གྲུབ་པས་མེད་ལ། ཡོད་ཀྱང་སྐད་ཅིག་གིས་འགགས་པས་སྐྱེ་བ་མི་སྲིད་དེ། སྐྱེ་བའི་སྐད་ཅིག་འགག་པར་གྱུར་པའི་ཕྱིར་རོ། །རྒས་པ་ཡང་དེ་བཞིན་དོན་དུ་མེད་དེ་དུས་མཐའི་སྐད་ཅིག་དང་རྡུལ་ཕྲན་ལ་གཞིག་ཅིང་དཔྱད་ན་རྒན་གཞོན་མ་གྲུབ་པ་ཆ་མེད་ཡིན་པའི་ཕྱིར་རོ། །སྐྱེ་བ་དང་རྒས་པ་མ་གྲུབ་པའི་རྒྱུ་མཚན་གྱིས་ན་བའང་མེད་དེ་ལུས་དང་ན་བ་གཅིག་ན་ལུས་གཅིག་ཉིད་ལ་ན་བ་དང་། ལུས་ཐ་དད་དུ་མི་འགྱུར་ལ། ལུས་དང་ན་བ་ཐ་དད་ཡིན་ན་ན་བ་ན་བ་ལས་ལུས་ན་བར་མི་རུང་ངོ་། །མི་སྡུག་པ་དང་ཕྲད་པ་དང་། སྡུག་པ་དང་བྲལ་བ་མེད་དེ་ཕྲད་པ་དང་བྲལ་རྒྱུ་སྔར་ནས་བཀག་ཟིན་པའི་ཕྱིར་རོ། །འདོད་པ་མ་རྙེད་པ་དང་བསྲུངས་ཀྱིས་མ་ཐུབ་པ་མེད་དེ་རྙེད་སྲུང་བྱེད་མཁན་གྱི་བདག་དང་རྙེད་སྲུང་བྱ་རྒྱུའི་དངོས་པོ་མ་གྲུབ་པའི་ཕྱིར་རོ། །དེས་ན་མེད་པ་ལ་ཡོད་པར་སྣང་བ་འདི་ནི་ཇི་ལྟ་བུ་ཞེ་ན་རྟེན་འབྲེལ་ཙམ་ཉིད་དང་འཁྲུལ་བའི་སྣང་བ་ཞེས་བྱ་སྟེ། ཀླུ་སྒྲུབ་ཀྱིས། རྟེན་ཅིང་འབྲེལ་འབྱུང་མ་ཡིན་པའི། །སྡུག་བསྔལ་ཡོད་པར་ག་ལ་འགྱུར། །མི་རྟག་སྡུག་བསྔལ་གསུངས་པ་དེ། །རང་བཞིན་ཉིད་ལ་ཡོད་མ་ཡིན། །ཞེས་པ་དང་། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་པ་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་སོ། །ལས་རྒྱུར་སྨྲ་བ་ཉིད་བཀག་ཟིན་ཏོ། །གསོད་པ་དང་། རྐུ་བ་ཡང་དངོས་པོ་དེ་དུས་གསུམ་དུ་ཕྱེ་ལ་ཕྲད་པ་བརྟགས་པ་དང་། སྐད་ཅིག་སྔ་ཕྱིར་དབྱེ་བས། རྐུ་དུས་འགགས་པས་དངོས་པོ་མ་གྲུབ་པར་འགྱུར་བ་བཞིན་ཀུན་ལ་མཚུངས་སོ། །དེས་ན་རྫུན་སྣང་གི་ལས་རྨི་ལམ་དང་འདྲ་བས་རང་བཞིན་མེད་པ་ཉིད་དོ། །རྩ་ཤེ་ལས། རང་བཞིན་ལས་ནི་ཡོད་ཡིན་ན། །ཅི་ཞིག་ཀུན་ཏུ་འབྱུང་བར་འགྱུར། །དེ་ཕྱིར་སྟོང་ཉིད་གནོད་བྱེད་ལ། །ཀུན་འབྱུང་ཡོད་པ་མ་ཡིན་ནོ། །ཞེས་སོ། །འགོག་པ་ཡང་། སྡུག་བསྔལ་ཀུན་འབྱུང་ཁེགས་པས། དེ་གཉིས་འགག་པའི་འགོག་པ་ཤུགས་ལ་ཁེགས་ཏེ། དགག་གཞི་མེད་ན་འགོག་པ་མེད་པས་ནད་མེད་པ་ལ་སྨན་མི་དགོས་པ་བཞིན་ནོ། །དེ་ཉིད་ལས། སྡུག་བསྔལ་རང་བཞིན་གྱིས་ཡོད་ལ། །འགོག་པ་འཐད་པ་མ་ཡིན་ནོ། །ཞེས་སོ། །ལམ་དགག་པ་ནི། ཉོན་མོངས་པའི་གཉེན་པོར་ལམ་སྒོམ་པ་ན། ཉོན་མོངས་པ་དང་དུས་མཉམ་མམ་ཐ་དད་དུ་སྒོམ། མཉམ་ན་རྒྱུད་གཅིག་ལ་སྤང་གཉེན་རྫས་འགལ་ལ། ཐ་དད་ན་གནོད་བྱ་གནོད་བྱེད་དུ་མི་རུང་སྟེ། ན་ནིང་གི་ནད་ལ་ད་ལོའི་སྨན་བཞིན་ནོ། །ལམ་དེ་ནི་གོང་དུ་འགྲོ་བ་ཡང་མེད་དེ་འགྲོ་བ་ཉིད་དུས་གསུམ་དུ་ཕྱེས་པས་བཀག་གོ །དེ་ཡན་གྱིས་ལམ་བཀག་ནས། ལམ་དུ་མི་རུང་སྟེ། ལམ་ཞེ་བྱ་བ་བགྲོད་པར་བྱ་བའི་གཞི་ཞིག་ཡིན་པས་གང་ཞིག་གང་གིས་བགྲོད་པ་པོ་དང་བགྲོད་ལམ་དུས་གཅིག་ཐ་དད་རྟག་མི་རྟག་གིས་བརྟགས་པས་ཁེགས་སོ། །སྤྱོད་འཇུག་ལས། རྣམ་ཤེས་ལུས་མེད་པ་ལ་ནི། །ཕྲད་པ་འཐད་པ་མ་ཡིན་ཉིད། །ཅེས་པ་དང་། རྩ་ཤེ་ལས། གང་ཚེ་མར་མེ་སྐྱེ་བཞིན་པ། །མུན་པ་དང་ནི་ཕྲད་པ་མེད། །ཇི་ལྟར་མར་མེ་སྐྱེ་བཞིན་པས། །མུན་པ་སེལ་བར་བྱེད་པ་ཡིན། །མར་མེས་ཕྲད་པ་མེད་པར་ཡང་། །གལ་ཏེ་མུན་པ་སེལ་བྱེད་ན། །འཇིག་རྟེན་ཀུན་ན་གནས་པའི་མུན། །འདི་ན་གནས་པ་དེས་སེལ་འགྱུར། །ཞེས་སོ། །ལམ་དང་ལམ་དེའི་སྤང་བྱ་དག སྐད་ཅིག་སྔ་ཕྱི་ཕྲད་པ་མེད་པས་མ་གྲུབ་པ་ཡིན་ནོ། །འགོག་པ་མངོན་དུ་བྱེད་པར་མི་རུང་སྟེ། འགོག་པ་ཉིད་བཀག་པས་མངོན་དུ་བྱེད་པ་ཁེགས་པའི་ཕྱིར་རོ། །དུས་གསུམ་གྱི་དཔྱད་བའི་ཐོག་ནས་དཔྱད་ན་དེ་ཡང་དགག་བྱ་འདས་ན་འགོག་མི་དགོས་ཏེ་འདས་ཟིན་པའི་ཕྱིར་རོ། །མ་འགགས་ན་བཀག་ཀྱང་མི་ཁེགས་པ་དང་། འགག་མ་འགག་དེ་གཉིས་དུས་མཉམ་ན་ངོ་བོ་འགལ་བ་གཉིས་ཐ་དད་པས་མི་རུང་། མི་མཉམ་ན་དགག་བྱ་དང་འགོག་བྱེད་དུ་མི་རུང་བའི་ཕྱིར་ཏེ་མ་གྲུབ་པ་ཁོ་ནའོ། །ཚོགས་ལམ་ལ་སོགས་པའང་སྒོམ་པའི་བློ་དེ་ཉིད་ཚོགས་ལམ་ལ་སོགས་པ་ཡིན་ན། བསྒོམ་བྱ་སྒོམ་བྱེད་ཐ་དད་ཀྱི་རྫས་སུ་མི་རུང་ལ། སྒོམ་པའི་བློ་ཚོགས་ལམ་སོགས་ལས་གཞན་ཡིན་ན་དེའི་བློ་མ་ཡིན་པ་དེའི་ལམ་དུ་མི་སྲིད་པས་སྒོམ་པ་དོན་མེད་པར་འགྱུར་བའི་ཕྱིར་རོ། །དེས་ན་བདེན་པ་བཞི་ཆར་མ་གྲུབ་པ་ཉིད་དེ། ལང་ཀར་གཤེགས་པ་ལས། སྐྱེ་བ་མེད་པ་བདེན་པ་གཅིག་ཡིན་ཏེ། །བྱིས་པ་རྣམས་ནི་བདེན་པ་བཞི་ཞེས་སྨྲ། །བྱང་ཆུབ་སྙིང་པོར་ཞུགས་ནས་བདེན་གཅིག་ཀྱང་། །གྲུབ་པར་མ་མཐོང་བཞི་ལྟ་ག་ལ་ཡོད། །ཅེས་པ་དང་། ཡུམ་ལས། འཕགས་པའི་བདེན་པ་རྣམས་ཀྱང་ངོ་བོ་ཉིད་མེད་དོ་ཞེས་སོ། །རྩོམ་བྱེད་དོན་དམ་དགག་པ་ལ་གཉིས་ཏེ། གཟུགས་ཅན་དང་། དུས་ཅན་དགག་པའོ། །དང་པོ་ནི། རྡུལ་ཕྲན་དེ་དག་ལ་བརྟག་པ་ལྔ་ལས། ཕྲད་མ་ཕྲད་ནི། རགས་པ་རྩོམ་ན་རྡུལ་རྣམས་ཕན་ཚུན་ཕྲད་དམ་མ་ཕྲད། མུ་སྟེགས་བྱེ་བྲག་པ་ཕྲད་པར་འདོད། ཉན་ཐོས་བྱེ་བྲག་སྨྲ་པ་བར་དང་བཅས་པར་འདོད། མདོ་སྡེ་པ་འབྱར་ལ་མ་རེག་པར་འདོད་དོ། །དེ་ཡང་ཕྲད་ན་དབུས་ཀྱི་རྡུལ་དེ་ཕྱོགས་བཞི་སྟེང་འོག་གཉིས་ཏེ་དྲུག་གི་རྡུལ་དང་ཕྲད་པའི་ཚེ། ངོས་ཆ་དྲུག་གིས་ཕྲད་དམ། ཤར་ལ་སོགས་པ་གཅིག་གི་ངོས་ནས་འཕྲད་པ་ཡིན། ཤར་ལ་སོགས་པར་ཕྲད་པའི་ངོས་དེ་ཉིད་ཀྱིས་ཕྲད་། ངོས་དྲུག་གིས་ཕྲད་ན། དབུས་རྡུལ་དེ་ཉིད་ཆ་དྲུག་ཏུ་ཐལ་ཏེ་ཕྲད་པའི་ངོས་དྲུག་ཡོད་པའི་ཕྱིར་རོ། །ཤར་སོགས་དྲུག་ཅར་དང་འབྱར་རོ་ཞེ་ན། ངོས་དྲུག་གི་རྡུལ་ཉིད་ཤར་ཕྱོགས་མ་ཁོ་ནའི་གོ་ན་ཡོད་པར་ཐལ་ཏེ། ཤར་ངོས་དང་འབྱར་བའི་ཕྱིར་རྡུལ་ཉིད་བཞིན་ནོ། །གལ་ཏེ་མ་འབྱར་ཞེ་ན། བར་དུ་སྣང་མུན་གྱི་རྡུལ་གྱིས་ཆོད་དམ་མ་ཆོད། མ་ཆོད་པ་མི་རུང་སྟེ། གཟུགས་ཅན་གྱི་བར་ཙམ་ལ་སྐྱ་ཐལ་ལེ་བ་སྣང་བའི་རྡུལ་དང་ནག་ཐིབས་སེ་བ་མུན་པའི་རྡུལ་གཉིས་གང་རུང་ཅིག་ལས་མི་འདའོ། །ཆོད་ན་སྣང་མུན་གྱི་རྡུལ་དེ་དག་དང་འབྱར་རམ་མ་འབྱར། རྡུལ་དང་རྡུལ་མ་འབྱར་ན་བར་དུ་ཆོད་པའི་སྣང་མུན་གྱི་རྡུལ་དང་འབྱར་དང་མ་འབྱར། འབྱར་ན་ཕྱོགས་དྲུག་གམ་གཅིག་གིས་འབྱར་བ་གང་ལྟར་ལས་མི་འདའོ། །མ་འབྱར་ན་དེ་ལ་ཡང་སྔོན་ལྟར་དུ་བར་ཡོད་པར་འགྱུར་བས་ན། བར་དེར་ཡང་གང་ལྟར་དུ་སྣང་མུན་ཞུགས་པ་དང་མ་ཞུགས་པ་གཉིས་ལས་མི་འདའོ། །གལ་ཏེ་ཐུག་མེད་དུ་ཡང་དེ་ལྟར་མ་འབྱར་པ་བར་ཏག་ཏག་གིས་ཆོད་པའོ་ཞེ་ན། ཡུངས་འབྲུ་གཅིག་གི་ནང་དུའང་གླང་པོ་ཆེ་ཤོང་བར་ཐལ་ཏེ། བར་ལ་དཔག་ཚད་ཐུག་པ་མེད་པའི་ཕྱིར་རོ། །གཞན་ཡང་མ་འབྱར་ན་ནི་བར་ཡོད་པས་ན་མཚོན་གྱིས་ལུས་ཆོད་པ་དང་། སྒྱོགས་ཀྱིས་མཁར་འཇིག་པ་དང་། ཀ་བས་གདུང་འདེགས་པ་དང་། རྔ་ལས་སྒྲ་འབྱུང་བའང་རྒྱུན་ཆད་པར་ཐལ་ལོ། །དེས་ན་དངོས་པོ་ཕྲ་བ་ལས་རགས་པ་བརྩམ་པར་སྣང་ཡང་དོན་དུ་ཕྲད་མ་ཕྲད་དུ་ཡོད་པ་མ་ཡིན་ཏེ་རྨི་ལམ་གྱི་རི་བཞིན་ནོ། །ཉི་ཤུ་པ་ལས། དྲུག་གི་ཆར་ནི་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ནི་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་པ་དང་། སེམས་འགྲེལ་ལས། ཕྱོགས་བཅུའི་དབྱེ་བས་ཕྱེ་བ་ཡིས། །རྡུལ་ཕྲན་ལ་ཡང་དབྱེ་བ་མཐོང་། །གང་ལ་ཆ་ཤས་ཀྱིས་བརྟགས་པ། །དེ་ལ་རྡུལ་ཕྲན་ཇི་ལྟར་འདོད། །ཅེས་སོ། །གཉིས་པ་བལྟས་མ་བལྟས་ཀྱིས་བརྟག་པ་ནི། རགས་པའི་རྩོམ་གཞི་རྡུལ་ཕྲན་འབྱར་རམ་མ་འབྱར་ཀྱང་བླ་སྟེ། དབུས་རྡུལ་གྱི་ཕྱོགས་དྲུག་གི་ངོས་ལ་བལྟས་ན་ཆ་དྲུག་ཏུ་འགྱུར་ལ། ཤར་ངོས་མ་ཉིད་ཀྱི་ཕྱོགས་ལ་བལྟས་ན་རི་ལ་སོགས་པའི་དངོས་པོ་ཐམས་ཅད་ཤར་ངོས་ཁོ་ན་ན་ཡོད་པར་འགྱུར་རོ། །དབུ་མ་རྒྱན་ལས། དབུས་གནས་རྡུལ་ཕྲན་རྡུལ་གཅིག་ལ། །ལྟ་བའི་རང་བཞིན་གང་ཡིན་པ། །རྡུལ་ཕྲན་གཞན་ལ་ལྟ་བ་ཡང་། །དེ་ཉིད་གལ་ཏེ་ཡིན་བརྗོད་ན། །དེ་ལྟ་ཡིན་ན་ས་ཆུ་སོགས། །ཇི་ལྟར་རྒྱས་འགྱུར་མ་ཡིན་ནམ། །རྡུལ་ཕྲན་གཞན་ལ་ལྟ་བའི་ངོས། །གལ་ཏེ་གཞན་ཉིད་ཡིན་བརྗོད་ན། །རབ་ཏུ་ཕྲ་རྡུལ་ཇི་ལྟ་བུ། །གཅིག་པུ་ཆ་ཤས་མེད་པར་འགྱུར། །ཞེས་སོ། །གསུམ་པ་གྲིབ་མ་དང་ཉི་ལོགས་ཀྱིས་བརྟག་པ་ནི། སྔ་དྲོ་ཉི་མ་ཤར་བའི་ཚེ་ཆ་མེད་ཀྱི་རྡུལ་རིལ་པོ་ཁེར་བུ་ཞིག་ཉི་ལོགས་སུ་ཡོད་ན། རྡུལ་ཕྲན་ལ་ཆ་མེད་པས་ན་ཉི་མ་ཤར་བའི་ལོགས་སུ་བལྟས་པའི་ཆ་དང་། ཉི་མ་མ་ཕོག་པར་གྲིབ་མ་ཅན་གྱི་ཆ་གཉིས་ཡོད་མི་ཤེས་ཏེ་ཡོད་ན་ཆ་གཉིས་སུ་འགྱུར་ལ། ཆ་གཉིས་མེད་པར་ཆ་ཐམས་ཅད་ལ་ཉི་མ་ཕོག་ན་གྲིབ་མ་གཏན་ནས་མེད་པས་ཤར་ངོས་མའི་གྲིབ་མ་ནུབ་ངོས་མ་ལ་འཕོག་པ་མེད་ཅིང་དེའི་ཚུལ་གྱིས་རྡུལ་ཐམས་ཅད་ལ་གྲིབ་མ་མེད་པར་སྣང་བ་སྒྲིབ་པ་མི་སྲིད་པས་རི་རབ་ཀྱི་ཤར་དུ་ཉི་མ་ཤར་བ་ནུབ་ཏུ་གཅིག་གིས་གཅིག་ལ་མི་སྒྲིབ་པར་ཐལ་ཏེ། ཤེལ་གོང་བཞིན་ནོ། །ཡང་ཆ་རིལ་པོ་ཐམས་ཅད་གྲིབ་མ་ཡིན་ན་ཉིན་པར་ཡང་མུན་ནག་ཏུ་ཐལ་ཏེ། ཉི་འོད་ཕོག་པ་ཤར་གྱི་ཕུག་པ་ལྟ་བུའང་ཉི་འོད་མ་ཕོག་པ་བྱང་བལྟས་ཕུག་པ་བཞིན་དུ་འགྱུར་ཏེ་གང་ལ་ཡང་ཉི་མའི་འོད་མ་ཕོག་པའི་ཕྱིར་མཚན་མོ་བཞིན་ནོ། །དེས་ན་གོང་བུ་ལྟ་བུ་ལ་ཉི་འོད་འཕོག་ཚེ་རྡུལ་ཕྲ་རབ་ལ་ཕོག་དགོས་པས་དེ་ལ་ཉི་འོད་ཕོག་མ་ཕོག་གི་ཆ་ལ་དཔྱད་པ་དེ་ལྟར་བྱའོ། །དེ་གཉིས་ཀ་མིན་པར་ཤར་ངོས་ཉི་མ་ཕོག་པ་ཡིན་ལ། ནུབ་ངོས་གྲིབ་མའོ་ཞེ་ན། རྡུལ་ཕྲན་ཆ་མེད་པ་མིན་པ་རྡུལ་ཕྲན་གཅིག་ལ་ཤར་ནུབ་ཀྱི་ཆ་གཉིས་ཡོད་པར་འགྱུར་རོ། །དེས་ན་རགས་པ་རྡུལ་ཕྲན་ཚོགས་པ་ལས་མི་འདའ་ལ། དེ་ཉིད་དུ་ཉི་མ་ཕོག་མ་ཕོག་གིས་སྒྲིབ་མི་སྒྲིབ་བརྟགས་པ་ཡིས་ཆ་མེད་མི་འགྲུབ་པ་ཡིན་ནོ། །བཞི་པ་འཕོ་བའི་བརྟག་པ་ནི། མི་རྩལ་ཆེན་ཞིག་གིས་མདའ་འཕངས་པ་མྱུར་དུ་འགྲོ་བ་དང་། ཉི་མ་ཕོག་ཡོད་ས་དང་མེད་སའི་གྲིབ་མཚམས་ཀྱི་ཁང་མིག་ཅིག་ཏུ་ཉི་ཟེར་ནུར་ཏེ་འགྲོ་བའི་རྡུལ་དག་དེའི་ལམ་གྱི་རྡུལ་དང་ཁ་བསྣོལ་ནས་ཐུག་བའི་ཡུན་རིང་ཐུང་ཡོད་དམ་མེད། ཡུན་རིང་ཐུང་མེད་ན། གཉིས་ཀས་ཅུང་ཟད་ཀྱང་མི་སྡོད་པར་ས་གཞིའི་ཁྱོན་རིམ་བཞིན་འདའ་དགོས་ལ། ཆ་མེད་ཀྱི་རྡུལ་གཅིག་གི་ཁྱོན་ལས་ཆུང་བ་ནི་སུས་ཀྱང་འདའ་རྒྱུ་མེད་པས་ན། ཆ་མེད་ཀྱི་རྡུལ་རེ་རེ་ནས་མི་སྡོད་པར་འདའ་བར་མཚུངས་པའི་ཕྱིར། མདའ་དང་ཁང་མིག་གི་གྲིབ་མ་མགྱོགས་བུལ་མཉམ་པར་ཐལ་ལ། །མི་མཉམ་པར་བསྣོལ་བ་ལ་དུས་རིང་ཐུང་ཡོད་པ་ཉི་ཟེར་རམ་གྲིབ་མ་ཡིས་ས་ནས་གང་ཙམ་གཅོད་པའི་ཡུན་ལ་མདའ་ཡིས་ས་ནས་སྟོང་ཕྲག་མང་པོའི་ས་ཁྱོན་གཅོད་ནུས་ན། གྲིབ་མ་དང་ཉི་ཟེར་ནུར་བས་ལམ་གྱི་རྡུལ་འདའ་བྱ་ཆ་མེད་གཅིག་གི་ཁྱོན་འགྲོགས་པའི་བར་དུ་མདའ་འགྲོ་བས་མདའི་རྡུལ་གྱིས་ཆ་མེད་ཀྱི་རྡུལ་སྟོང་གི་ཁྱོན་འདའ་རུ་ཡོད་པའམ་སྟོང་ཆོད་པར་ཐལ་ལོ། །ཅིའི་ཕྱིར་ན། ཇི་ལྟར་མགྱོགས་ཀྱང་ཆ་མེད་རེ་རེ་ནས་འདའ་དགོས་ལ། ཉི་ཟེར་གྱི་ཆ་གཅིག་གཅོད་ཡུན་ལ་མདས་དེ་འདྲ་སྟོང་ཙམ་ཆོད་ཐུབ་པས་མདའི་དུས་ཆ་སྟོང་ལྟ་བུ་དེ་རིམ་ཅན་དུ་འབྱུང་ཞིང་དུས་ཆ་རེ་རེ་ལ་ས་ཁྱོན་རེ་རེ་ཆོད་རྒྱུ་ཡོད་དགོས་པས་སོ། །དེ་ལྟར་ཆོད་པར་འདོད་ན་དེ་དང་མཉམས་དུ་དེའི་བར་ལ་རྡུལ་ཆ་སྟོང་ཡོད་པ་བཞིན་དུ་དུས་ཆ་ཡང་སྟོང་གྲུབ་པར་ཐལ་ཏེ། དུས་ཀྱི་དེ་ཉིད་འཕོ་བ་གཅིག་ཙམ་ལ་ཡུལ་གཅིག་ན་སྔར་གནས་པ་དང་ཅིག་ཤོས་ན་ཕྱིས་གནས་པས་ཁྱབ་པའི་ཕྱིར་རོ། །དེ་ལྟར་འདོད་ན་མདའི་རྡུལ་གྱིས་ལམ་གྱི་རྡུལ་ཕྲན་སྟོང་གཅོད་པའི་བར་དུ་གྲིབ་མའི་རྡུལ་གོ་སྟོང་འཕོས་པར་ཐལ་ཏེ། མི་སྡོད་པར་ལན་སྟོང་དུ་ནུར་བའི་ཕྱིར་རོ། །ཁྱབ་པ་ཡོད་དེ་ནུར་བ་ཙམ་ལ་སྔ་མ་དོར་ནས་ཕྱི་མ་ལེན་དགོས་པ་ཡིན་པས་ན་ཁྱབ་པའི་ཕྱིར་རོ། །འདོད་ན་ལམ་གྱི་རྡུལ་ཆ་སྟོང་ཡོད་པར་ཐལ་ཏེ། རྡུལ་གཅིག་གི་གོ་མ་ཟད་པར་རམ་མ་ཟད་གོང་ནས་གོ་སྟོང་ཡོད་པར་འཕོས་པའི་ཕྱིར་རོ། །འདིས་ནི་སྐད་ཅིག་ཆ་མེད་ཀྱང་ཁེགས་ཏེ། གྲིབ་མ་གནས་པའི་སྐད་ཅིག་ལ་མདའ་འཕོས་པའི་དུས་ཆ་སྟོང་གྲུབ་པས་སོ། །དེ་བཞིན་དུ་ཆ་མེད་མི་འགྲུབ་པའི་རིགས་པ་གཞན་ཡང་ཡོད་པ་སྟེ་འཁོར་ལོས་སྒྱུར་བའི་རྒྱལ་པོ་ལ་རྒྱལ་སྲིད་སྣ་བདུན་ཡོད་པ་ལས་རྟ་མཆོག་རིན་པོ་ཆེ་རྩལ་མྱུར་བ་འགྲོས་མགྱོགས་པ་དེ་པདྨས་བརྒྱན་པའི་མཚོ་སྟེང་ནས་མེ་ཏོག་པདྨ་འབའ་ཞིག་ལ་བརྫིས་ནས་མྱུར་བའི་ཤུགས་ཀྱིས་ཕྱིན་པའི་ཚེ། མེ་ཏོག་པདྨ་རྣམས་མ་ཉམས་ཤིང་ཆུའི་ནང་དུ་ནུབ་ལོང་མེད་པར་རྐང་པ་ཡར་འདེགས་པ་དང་། དེའི་རྐང་པ་ལ་པདྨ་རེག་གི་བར་དུ་དེ་ན་གནས་པའི་ཀླུས་རྟའི་རྐང་པ་ལ་མི་གནོད་པར་རྐང་པ་ལན་ཅིག་དཀྲིས་ཏེ་འགྲོ་བ་དང་། ཡང་སྦྲུལ་དེ་རྟའི་རྐང་པར་ལན་ཅིག་འཁྲིལ་བའི་བར་དུ་ཀུན་དགའ་བོས་དུས་ཐུང་ངུ་དེའི་ཚེར་ཚིག་བདུན་བློར་འཛིན་པ་དང་། ཀུན་དགའ་བོ་དེ་ཡིས་ཚིག་གཅིག་འཛིན་པའི་བར་དུ་མཽངྒལ་གྱི་བུས་རྫུ་འཕྲུལ་གཅིག་སྟོན་པ་དང་། མོོངྒལ་གྱི་བུས་རྫུ་འཕྲུལ་གཅིག་སྟོན་པའི་བར་དུ་ཤཱ་རིའི་བུས་ཆོས་ཀྱི་དོན་གཅིག་སེམས་པས་ན་དེའི་ཚེ་མདའི་ལམ་གྱི་རྡུལ་གཅིག་འཕོ་བའི་བར་དུ་ཡང་དུས་ཀྱི་ཆ་འབུམ་ཕྲག་དུ་མ་འགགས་པ་དང་། རྡུལ་ཆ་གཅིག་ལས་ཆ་དུ་མར་འཕོ་བ་ཡིན་ནོ། །མདའ་འཕངས་པ་ལས་ཀྱང་མཁའ་རྒྱུའི་ཡི་དྭགས་སོགས་ཀྱིས་མགྱོགས་པར་གསུངས་པའི་ཚུལ་ལའང་། འགོམ་བྱ་འགོམ་བྱེད་ཀྱི་རྡུལ་བསྣོལ་ཏེ་འདའ་ཚུལ་དེ་བཞིན་དུ་དཔྱད་པས་ཆ་མེད་མི་གྲུབ་པར་ཤེས་སོ། །རིགས་པ་དེས་དུས་ཆ་མེད་ཀྱང་དུ་མར་མཆེད་པས་མ་གྲུབ་པར་གཏན་ལ་ཕེབས་སོ། །མདའ་དེས་སྔ་མའི་ས་ཁྱོན་བཏང་ནས་ཕྱི་མ་ཕྱི་མའི་གཞིར་རིམ་བཞིན་འཇུག་པ་མིན་པར་ཅིག་ཅར་དུ་འགྲོ་བར་ནི་སྨྲ་བར་མི་ནུས་ཏེ། ལམ་གྱི་ཆ་རྣམས་ཐམས་ཅད་ཀྱི་སྟེང་ན་མདས་ རེས་འཇོག་མེད་པར་ཅིག་ཆར་སྣང་བ་དཔེར་ན་འཇའ་ཚོན་ལྟར་ཏེ་འཇའ་ཚོན་དེ་ཡུལ་གྱི་ཆ་གང་ན་སྣང་བ་དེ་ཕྱོགས་གཅིག་ཏུ་ངེས་པ་མེད་པར་ཕ་ཀི་ནས་བལྟས་ན་ཚུར་ཁར་དང་། ཚུར་ཁ་ནས་བལྟས་ན་ཕ་ཀིར་སྣང་ཞིང་གར་ཡང་ཁྱབ་པ་ལྟར་ཡིན་པར་འགྱུར་དགོས་ནའང་དེ་ལྟར་མ་ཡིན་པར་མཐོང་བའི་ཕྱིར་རོ། །དེས་ན་རིམ་ཅན་དུ་འགྲོ་བ་ཡིན་ནོ། །འཕོ་བ་སྔ་ཕྱིར་བཅས་པའི་ཕྱིར། །སྐད་ཅིག་དུས་ཆ་དུ་མར་འགྱུར། །ནུར་བ་འདོར་ལེན་བྱེད་པའི་ཕྱིར། །རྡུལ་ཕྲན་ཆ་ནི་དུ་མར་འགྱུར། །ཞེས་བརྗོད་པ་བཞིན་ནོ། །ལྔ་པ་རིང་ཐུང་གི་བརྟག་པ་ནི། རྡུལ་གཉིས་གཤིབས་པའི་ཐོག་ཏུ་དེ་གཉིས་ཀྱི་སྲུབ་ནོན་དུ་རྡུལ་གཅིག་བཞག་དུས། འོག་གི་གཉིས་པོ་དང་སྟེང་གི་གཅིག་པོ་ལ་ས་ཁྱོན་ཆེ་ཆུང་ངམ་རིང་ཐུང་ཡོད་དམ་མེད། མེད་ན་རྡུལ་དུ་མ་གཤིབ་ཀྱང་རྡུལ་གཅིག་གི་གོར་གཅིག་ཐིམ་ནས་ཇེ་ཆེར་མེད་པར་འགྱུར་ཏེ། གཅིག་ལས་མ་འཕེལ་བའི་ཕྱིར་རོ། །ཡོད་ན་སྟེང་འོག་གི་རྡུལ་གསུམ་པོ་ཆ་གཉིས་གཉིས་སུ་ཐལ་ཏེ། འོག་མ་གཉིས་པོའི་ཕྱེད་སྟེང་མས་ནོན་ཅིང་ཕྱེད་མ་ནོན་པའི་ཆ་ཡོད་དགོས་ལ། སྟེང་མའི་ཕྱེད་ཀྱིས་ཤར་ནོན་ཅིང་ཕྱེད་ཀྱིས་ནུབ་ནོན་པའི་ཕྱིར་རོ་སྟེ། སྟེང་མ་ལའང་ཕྱེད་རྡུལ་ཤར་ངོས་པ་ནོན་པའི་ཆ་དང་། ཕྱེད་ནུབ་ངོས་པ་ནོན་པའི་ཆ་ཡིན་པས་གཉིས་སུ་ཐལ་ལོ། །དེ་ཡང་དཔེར་ན་ཡུངས་ཀར་གཉིས་གཅིག་ལ་གཅིག་ཕྲད་པར་གཤིབ་པའི་སྲུབ་མཚམས་དེར་གཅིག་བཞག་རུང་བ་བཞིན་དུ་རྡུལ་ཆ་མེད་གཉིས་གཤིབ་པའི་སྲུབ་ཏུ་གཅིག་བློས་བཞག་སྟེ་དཔྱད་པའོ། །སྐད་ཅིག་དགག་པ་ལ་གཉིས་ཏེ། ཕྲད་མ་ཕྲད་ཀྱི་བརྟག་པ་དང་། རིང་ཐུང་གི་བརྟག་པས་དགག་པའོ། །དང་པོ་ནི། ཡུལ་དང་ཤེས་པ་ལ་སོགས་པའི་སྐད་ཅིག་དུ་མ་མཐུད་ནས་རྒྱུན་རྩོམ་པ་ན་སྐད་ཅིག་སྔ་ཕྱི་དག་ཕྲད་དམ་མ་ཕྲད། མ་ཕྲད་ན་ཤེས་པ་མེད་བའི་བེམ་གོག་རོ་ཡིན་པ་བཞིན་དུ་ལུས་འདི་ཡང་རོར་ཐལ་ཏེ་ཤེས་པ་སྔ་མ་འགགས་ལ། ཕྱི་མ་མ་སྐྱེས་ཀྱི་བར་ཤེས་པ་འགའ་ཡང་མེད་པའི་ཕྱིར་རོ། །ཤེས་པ་ཕྱི་མ་རྒྱུ་མེད་དུ་ཐལ་ཏེ། སྔ་མའི་རྒྱུན་མེད་པའི་ཆད་པ་ལས་ཤེས་པ་སྐྱེ་བའི་ཕྱིར་རོ། །ཕྲད་ན་དཔེར་ན་མི་ཞིག་གིས་ཨོཾ་ཨཱཿཧཱུྃ་ཞེས་བརྗོད་དུས་ཨཱཿདེ་སྔུན་གྱི་ཨོཾ་དང་རྗེས་ཀྱི་ཧཱུྃ་གཉིས་དང་དུས་གཅིག་གམ་མཉམ་པོར་ཕྲད་དང་རེ་མོས་སུ་ཕྲད། དུས་གཅིག་ཕྲད་ན་དུས་གསུམ་གྱི་དངོས་པོ་ཐམས་ཅད་དུས་མཉམ་བྱུང་བས་ན་སྐད་ཅིག་ཁོ་ན་ལས་མི་སྲིད་པར་ཐལ་ཏེ་རྒྱུ་མཚན་མཚུངས་པའི་ཕྱིར། རེ་མོས་སུ་ཕྲད་ན་ཨཱཿའི་སྐད་ཅིག་དེ་ཉིད་ཆ་གཉིས་སུ་ཐལ་ཏེ། སྔ་ཆ་ཨོཾ་དང་ཕྲད་ཅིང་། ཕྱི་ཆ་ཧཱུྃ་དང་ཕྲད་པའི་ཕྱིར་རོ། །འདོད་ན་སྐད་ཅིག་ཆ་མེད་ཉམས་སོ། །སྔ་ཕྱི་གཉིས་ཀྱིས་ཕྲད་པ་ན། །སྐད་ཅིག་དུས་ཆ་གཉིས་སུ་འགྱུར། །གཉིས་པོ་དག་ནི་དུས་མཉམ་ན། །བསྐལ་པ་སྐད་ཅིག་གཅིག་པར་འགྱུར། །ཞེས་བྱའོ། །རིང་ཐུང་གི་བརྟག་པ་ནི། ལྷ་སྦྱིན་མཆོད་སྦྱིན་གཉིས་ཤེས་པའི་སྐད་ཅིག་གི་ཚེ། ལྷ་སྦྱིན་གྱི་ཤེས་པ་སྐད་ཅིག་གཉིས་སུ་ཐལ་ཏེ། སྐྱེ་བའི་སྲུབ་ནོན་དུ་མཆོད་སྦྱིན་གྱི་ཤེས་པ་སྐད་ཅིག་གཅིག་སྐྱེས་པའི་ཚེ། གཉིས་པོ་དང་གཅིག་པོ་ལ་དུས་རིང་ཐུང་ཡོད་དམ་མེད། མེད་ན་བསྐལ་པའང་སྐད་ཅིག་ཏུ་ཐལ་ཏེ་མཐུད་པས་རིང་ཐུང་དུ་མ་གྱུར་པའི་ཕྱིར་རོ། །ཡོད་ན་སྐད་ཅིག་དེ་ཆ་གཉིས་སུ་ཐལ་ལོ། །དེའང་ལྷ་སྦྱིན་གྱི་ཤེས་པ་སྔ་མ་ཉིད་ཆ་གཉིས་སུ་ཐལ་ཏེ། སྔ་ལོགས་མཆོད་སྦྱིན་གྱི་ཤེས་པ་དང་མི་འགྲོགས་པའི་ཆ་གཅིག་དང་། ཕྱི་ལོགས་འགྲོགས་པའི་ཆ་གཅིག་ཡོད་ཕྱིར་རོ། །མཆོད་སྦྱིན་གྱི་ཤེས་པའང་ཆ་གཉིས་སུ་ཐལ་ཏེ། སྔ་ལོགས་ལྷ་སྦྱིན་གྱི་ཤེས་པ་དང་འགྲོགས་ཤིང་ཕྱི་ལོགས་མི་འགྲོགས་པའི་ཕྱིར་རོ། །དེ་ཡང་རྟོག་པ་སྔ་ཕྱི་གཉིས་པོ་དེ་ཕྲད་མ་ཕྲད་བརྟག་པ་ཡིན་ནོ། །ཞེས་པ་ནི། ལྷས་བྱིན་དུ་ཤེས་པ་དང་མཆོད་སྦྱིན་དུ་ཤེས་པའི་བློའི་སྐད་ཅིག་གཉིས་སྐྱེ་བ་ན། དེའི་མཚམས་སུ་སྲུབ་ནོན་དུ་མཆོད་སྦྱིན་ཤེས་པའི་ཤེས་པ་སྐད་ཅིག་མ་སྐྱེས་ན། ཤེས་པ་གཉིས་པོ་དང་སྲུབ་ནོན་གཅིག་པོ་ལ་ཡུན་རིང་ཐུང་ཡོད་དམ་མེད། ཡོད་ན་གསུམ་ཀ་ཆ་བཅས་སུ་ཐལ་ལ་མེད་ན་བསྐལ་པའང་སྐད་ཅིག་ཏུ་ཐལ་ཏེ་སྐད་ཅིག་དུ་མ་མཐུད་ཀྱང་སྐད་ཅིག་གཅིག་ལས་རིང་རྒྱུ་མེད་པས་སོ། །འདིར་རང་རྒྱུད་གཅིག་གི་དབང་དུ་བྱས་ཀྱང་རྣམ་པར་དཔྱད་པ་འཇུག་པས་འགལ་བ་མེད་ཀྱང་། བློ་ལ་འཆར་བདེ་བའི་ཕྱིར་རྒྱུད་ཐ་དད་པའི་དབང་དུ་བྱས་ན་སྐྱེས་བུ་ལྷས་བྱིན་གྱི་རྟོག་པ་སྐད་ཅིག་གཉིས་སྐྱེ་བའི་མཚམས་དེར། མཆོད་སྦྱིན་གྱི་རྟོག་པ་སྐད་ཅིག་གཅིག་སྐྱེས་ཏེ། དེ་ཡང་ལྷས་བྱིན་གྱི་རྟོག་པ་སྔ་མ་ཙམ་མ་སྔ། ཕྱི་མ་ཙམ་མ་ཕྱི་བའི་བར་དེར་སྐྱེ་བ་སྲིད་པས་ན། དེ་འདྲའི་སྐད་ཅིག་གསུམ་ལ་ཡུན་རིང་ཐུང་ཡོད་མེད་བརྟགས་པས་སྐད་ཅིག་ཆ་མེད་མ་གྲུབ་ཚུལ་གཏན་ལ་ཕེབས་སོ། །བར་དེར་སྐྱེ་བ་སྲིད་པ་ཡང་སྐད་ཅིག་གཉིས་ཀྱི་ཡུན་ལ་གཅིག་མི་ཤོང་མི་སྲིད་ལ་དེ་ཡང་དབུས་སམ་བར་མཚམས་དེར་སྐྱེ་བ་ལ་འགོག་བྱེད་མེད་པས་སོ། །གཞན་ལུགས་རིམ་གྱིས་དགག་ནས་རྒྱབ་རྟེན་གྱི་ལུང་ནི། རིན་ཆེན་ཕྲེང་བ་ལས། ཐོག་མ་དབུས་དང་ཐ་མ་ཡང་། །སྐད་ཅིག་བཞིན་དུ་བསམ་བྱས་ན། །སྐད་ཅིག་གསུམ་གྱི་བདག་ཉིད་ཕྱིར། །འཇིག་རྟེན་སྐད་ཅིག་ལ་མི་གནས། །ཞེས་སོ། །འདི་ལྟ་བུའི་རིགས་པས་ཆོས་རྣམས་སྣང་ལ་མ་གྲུབ་པར་ཤེས་དུས། ཤེས་རབ་ཀྱི་ཕ་རོལ་ཏུ་ཕྱིན་པའི་དོན་རྟོགས་པ་ལ་འཇུག་སྟེ། སྡུད་པ་ལས། གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། །ཤེས་རབ་རྣམ་པར་བཤིག་ནས་རྡུལ་ཙམ་མི་དམིགས་ཚེ། །འཇིག་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ། །ཞེས་སོ། །རང་ལུགས་ལུང་དང་བཅས་པས་དེ་ལྟར་བསྒྲུབས་པའོ། །སྡེབ་ཉི་ཤུ་རྩ་ལྔ་རེད་འདུག་དེ་རིང་འདིར་བཞག་ནས་སང་ཉིན་དགྲ་བཅོམ་མཐར་ཐུག་དགག་པ་ནས་བཤད་རྒྱུ་བྱེད། ཡིད་བཞིན་མཛོད་འདི་ནི་ཐེག་པ་ཆེན་པོའི་མན་ངག་གི་བསྟན་བཅོས་ཡིན་པས། ཐེག་པ་ཆེན་པོའི་མན་ངག་གི་ཁོངས་སུ་ཐེག་པ་འོག་མའི་ལྟ་གྲུབ་ཀྱི་གནད་ཐམས་ཅད་ཀྱང་ཡར་ལྡན་དུ་རྫོགས་པའི་ཚུལ་གྱིས་འདུས་ཡོད་པས་ཐེག་པ་ཐམས་ཅད་དམ་ཤེས་བྱའི་ཆོས་ཐམས་ཅད་གཏན་ལ་ཕབ་དགོས་པ་ཡིན། སྤང་བྱ་ཕྱི་རོལ་བའི་ལྟ་གྲུབ་ཕྱོགས་སྔ་དང་བཅས་པ་བཀོད་ནས། དེ་ལ་ལུང་རིག་ཚད་མས་དགག་བཞག་སྒྲུབ་གསུམ་མཛད་པ་དང་། དེ་རིང་ནས་བླང་བྱ་ནང་པ་སངས་རྒྱས་པའི་གཞུང་རྒྱ་ཆེར་བཤད་པ་ལ་ཁེལ་བ་རེད། དེ་ལ་ཡང་གདུལ་བྱའི་ཁམས་དབང་བསམ་པ་དང་མོས་པའི་ཁྱད་པར་ལྟར་དུ། ཐུབ་པ་བཅོམ་ལྡན་འདས་ཀྱིས་སྐྱེས་བུ་ཆུང་འབྲིང་ཆེ་གསུམ་གསང་སྔགས་ཀྱི་གདུལ་བྱ་དང་བཅས་པ་ལ་རང་རང་གི་བློ་དང་འཚམས་པའི་ཆོས་ཀྱི་འཁོར་ལོ་བསྐོར་ཡོད་པས། དེ་དང་མཐུན་པའི་ཐེག་པའི་རྣམ་བཞག་ཀྱང་བྱུང་བ་ཡིན། དེ་ལས་ཐེག་དམན་ཉན་རང་གི་ལམ་ཉན་ཐོས་བྱེ་བྲག་སྨྲ་བ་ལ་མཚོན་ན། ཉན་ཐོས་བྱེ་བྲག་སྨྲ་བ་འདིའི་ཕུང་པོ་ལྔ་དང་འདུས་མ་བྱས་གསུམ་གྱིས་བསྡུས་པའི་ཆོས་ཐམས་ཅད་དེ་ཤེས་བྱ་གཞི་ལྔ་རུ་བསྡུ་བ་ཡིན། དེ་ཡང་གཟུགས་དང་སེམས་སེམས་བྱུང་ལྡན་མིན་འདུ་བྱེད་འདུས་མ་བྱས་ལྔ་བོ་དེ་རྫས་ཐ་དད་པའི་གཞི་ལྔ་རུ་ཁས་ལེན་ལ། དེའི་ནང་ནས་འདུས་བྱས་ཀྱི་ཕྱོགས་ཐམས་ཅད་སྐད་ཅིག་མ་དང་རྡུལ་ཕྲ་རགས་ཀྱི་ཆ་ནས་ཕྱེ་དུས་གཟུགས་ཅན་ཐམས་ཅད་རྡུལ་ཕྲན་ཆ་མེད་ཀྱི་མཐའ་ཅན་དང་། ཤེས་པ་ཡོད་ཚད་པོ་སྐད་ཅིག་ཆ་མེད་ཀྱི་ཕྲེང་བར་རིམ་པར་སྐྱེ་བ་ཙམ་ལ་བློས་རྟོག་བྱས་ནས། བདེན་བཞིའི་ཉམས་ལེན་གྱི་སྒོ་ནས་གང་ཟག་གི་བདག་མེད་རྟོགས་པ་དང་། ཆ་མེད་གཉིས་ཀ་དོན་དམ་པར་གྲུབ་པར་འདོད་པ་ཡིན། སྐྱེ་འགག་དང་ཀུན་བྱང་གི་ཆོས་ཐམས་ཅད་སྟོང་ཉིད་མ་ཤེས་ནས་ཆོས་ཀྱི་བདག་མེད་མ་རྟོགས་པའི་དབང་གིས་རྫོགས་པའི་བྱང་ཆུབ་སྒྲུབ་པ་ལ་ལམ་ལྷག་མ་ཅན་དུ་གྱུར་པའོ། །སྒོམ་པ་ཉོན་མོངས་དུག་གསུམ་གྱི་གཉེན་པོར་མི་སྡུག་པ་སོགས་སྒོམ་པ་དང་། སྤྱོད་པ་སོ་ཐར་གྱི་ཚུལ་ཁྲིམས་ལ་གནས་པའི་སྒོ་ནས་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པ་ལ་སྤྱོད་པས། འབྲས་བུ་གང་ཟག་ཟུང་བཞི་ཡ་བརྒྱད་དེ། གནས་སྐབས་ཀྱི་འབྲས་བུ་བདུན་དང་མཐར་ཐུག་གི་འབྲས་བུ་ཁམས་གསུམ་གྱི་ཀུན་སྦྱོར་ཐམས་ཅད་ཟད་ནས་དགྲ་བཅོམ་པ་ཐོབ་པའོ། །དེའི་གྲུབ་མཐའ་དེའི་རྨང་གཞིའི་སྟེང་ནས་ཐ་སྙད་ཀྱི་ཚུལ་ལ་དངོས་སྟོབས་ཀྱི་རིགས་པ་དང་མཐུན་པའི་ཁས་ལེན་འགའ་ཞིག་གིས་འཕགས་པའི་མདོ་སྡེ་པའི་གྲུབ་མཐའ་རུ་ལོགས་སུ་བཞག་པ་སྟེ། ལྟ་སྒོམ་སྤྱོད་འབྲས་ཕལ་ཆེ་གཅིག་ཡིན་པའི་ཉན་ཐོས་ཀྱི་གྲུབ་མཐའ་འོ། །འདིའི་མན་ངག་གི་འགྲོས་ཐོས་བསམ་ཉམས་ལེན་གྱི་གནད་ལ་སྦྱར་ན། གོང་ནས་གསུངས་པ་ལྟར་དུ་མཛོད་ཀྱི་ལུང་། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་པ་ལྟར་དུ་དང་པོར་སངས་རྒྱས་བསྟན་པའི་སྒོར་ཞུགས་ནས་རབ་བྱུང་དང་བསྙེན་རྫོགས་ཀྱི་སྡོམ་པ་མནོས། ཚུལ་ཁྲིམས་རྣམ་པར་དག་པ་མིག་གི་འབྲས་བུ་བཞིན་དུ་བསྲུངས། དགེ་སྦྱོང་གི་ཆོས་བཞི་བསྟེན་པ་དང་། སྦྱོང་བའི་ཡོན་ཏན་བཅུ་གཉིས་ལ་གནས་པར་བྱེད། དེ་ནས་ཕུང་ཁམས་སྐྱེ་མཆེད་རྟེན་འབྲེལ་གནས་དང་གནས་མ་ཡིན་པ་རྣམས་ལ་མཁས་པ་བྱས་ནས་བླང་དོར་གྱི་དམིགས་ཕྱེས་ནས། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་སྒོམ་ནས་ལམ་ལྔ་མཐར་ཕྱིན་པར་བྱེད་པའོ། །རང་རེས་ཀྱང་དེ་དག་གིས་སྤྱིར་སྡེ་སྣོད་གསུམ་དང་། ཁྱད་པར་འདུལ་བའི་བསླབ་པ་ལ་ནན་ཏན་དུ་མཛད་པའི་ངོ་མཚར་ཅན་གྱི་མཛད་སྤྱོད་ལ་བསླབ་ཅིང་སྦྱོང་དགོས་ཏེ། ཨོ་རྒྱན་རིན་པོ་ཆེས། ཕྱི་ལྟར་ལག་ལེན་མདོ་སྡེའི་ལུགས་སུ་སྤྱད། །རྒྱུ་འབྲས་སྤང་བླང་ཞིབ་པའི་དགོས་པ་ཡོད། །ཅེས་གསུངས་པ་ལྟར་དུ་བསམ་པ་ཐེག་ཆེན་སེམས་བསྐྱེད་ཀྱིས་ཟིན་དགོས་པ་ནི་རྒྱུན་གྱི་ལམ་འཁྱེར་ཡིན་པས་འབྲལ་ག་ལ་ཉན། དེས་ན་དང་པོར་དགེ་སྦྱོང་གི་ཆོས་བཞི་བོ་ཡང་ལོ་ཁ་ཤས་ལ་སྦྱང་དགོས་ཐུག་ན་སྦྱང་དགོས་ཏེ། ཉན་ཐོས་ཀྱི་ཀུན་སྤྱོད་མེད་པ་ཞིག་གིས་ཐེག་ཆེན་བྱང་སེམས་ཀྱི་སྤྱོད་པའི་ཕྱོགས་ཙམ་ལ་གཅར་བ་མ་ཡིན། རྫོགས་ཆེན་གྱི་ལམ་ནས་གསུངས་པའི་སྤྱོད་པ་བདུན་ལས་དགེ་སྦྱོང་གཞོན་ནུ་ལྟ་བུའི་སྤྱོད་པ་བྱེད་དགོས་པར་གསུངས་པ་དེ་དང་མཐུན་པ་ཡིན། དེས་ན་ཐོག་མར་དགེ་སྦྱོང་གི་ཆོས་འདིར་བསྒྲུབ་དགོས་པར་སེམས། འོ་ན་དགེ་སྦྱོང་གི་ཆོས་བཞི་དེ་གང་ཡིན་ཞེ་ན། གཤེ་ཡང་སླར་མི་གཤེ་བ། ཁྲོས་ཀྱང་སླར་མི་ཁྲོ་བ། བརྡེགས་ཀྱང་སླར་མི་བརྡེག་པ། མཚང་བྲུས་ཀྱང་སླར་མཚང་མི་འབྲུ་བ། བཞི་བོ་ཡིན་ལ། གསར་བུ་དང་དགེ་བསྙེན་རྒན་ཞུགས་ཚང་མས་དང་པོར་དེའི་ཚིག་བཞི་བོ་དེ་བློར་ལེན་དགོས། དེ་ཡང་གཤེ་ཁྲོ་བརྡེག་དང་མཚང་འབྲུ་བཞི་བོ་དེ་མི་བྱེད་པ་ཡིན། གཤེ་བ་ལ་སླར་མི་གཤེ་བ་ཞེས་པ་ནི། གཤེ་བ་ནི་ཚིག་རྩུབ་ཀྱིས་ངན་ཟེར་དང་། ངན་སྨོད་བྱེད་པ་སྟེ། རང་གར་རང་ལམ་རང་གིས་བླངས་ནས་འགྲོ་བའི་དུས་སུ་དོན་མེད་དུ་འཕུལ་རྒྱག་གློ་མདུང་བྱས་ནས་ཁྱོད་ཀྱིས་ཕ་རོ་ཟོ། ཁྱོད་བུ་བཟང་ཨེ་ཡིན། མི་ངན་ཨ་ཁ་མ། ངོ་གདོང་ལ་བལྟས་ན་ཆེ་གེ་མོ་ཞིག་ལ་རིགས་པ་ལ་སོགས་བྱས་ཡོང་ན། དེའི་ལན་དུ་དེ་དང་མཚུངས་པ་ཞིག་བརྗོད་མི་རུང་བ་ཡིན། དེ་ལ་གཤེ་ཡང་སླར་མི་གཤེ་བ་ཟེར་བ་ཡིན། དེ་དང་མཚུངས་པ་ཞིག་ཕར་སྨྲས་ན་གཤེ་བ་ལ་སླར་གཤེ་བར་སོང་བ་ཡིན། དེ་དུས་བསམ་བློ་ཅི་ཞིག་གཏོང་དགོས་ན་ང་ནི་ཤཱཀྱའི་དགེ་བསྙེན་ནམ། རབ་ཏུ་བྱུང་བའམ། དགེ་ཚུལ་ལམ། དགེ་སློང་ངམ། བཙུན་པའམ། བཙུན་མ་ཡིན་པས་དེ་དང་མཚུངས་པ་ཞིག་བྱེད་མི་རུང་བསམ་དགོས་པ་ཡིན། ཆོས་པ་ཞིག་ཡིན་ན་མ་མཐའ་ཡང་དེ་ལྟར་དགོས་པ་ཡིན། དེ་ནས་ཁྲོས་པ་ལ་སླར་མི་ཁྲོ་བ། བརྡེགས་པ་ལ་སླར་མི་བརྡེག ཚུར་ལ་ཁྲོས་ཀྱང་ཕར་ལ་མི་ཁྲོ། ཚུར་ལ་བརྒྱབ་ཀྱང་དེའི་ལན་དུ་ཕར་ལ་རྒྱག་པ་ག་ལ་དྲན་ཏེ་ཚིག་ངན་ཙམ་ཡང་སྨྲ་མི་རུང་བ་ཡིན། བརྒྱབ་པ་བས་ཐུ་ད་རུང་རུས་ཀྱི་མཚང་། རིགས་ཀྱི་མཚང་། ཡོན་ཏན་གྱི་མཚང་འབྲུ་བ་སྙིང་དྲན་པ་སྐོར་ལོག་རྒྱག་བྱེད་ཅིག་སྨྲས་ཡོང་ན་ཡང་། ཕར་ལ་དེའི་ལན་མི་བྱེད་པས་མི་ཚད་ད་དུང་དེའི་སྤྱོད་པ་དེ་བྱང་ཆུབ་ཀྱི་སེམས་ཀྱི་རྩིས་ཟིན་པ་ཞིག་བྱེད་དེ། འདིས་ངར་བརྙས་བཅོས་བྱེད་པའི་དབང་གིས་བྱུང་བའི་སྡིག་པ་དང་ཉེས་པ་མི་འབྱུང་བར་ཤོག ང་ལ་བསྟོད་དམ་སྨད་དམ་སྐུར་བ་འདེབས་པ་ལ་སོགས་པའི་བཟང་ངན་ལས་ཀྱི་འབྲེལ་ཚད་ཐམས་ཅད་ང་ནམ་ཞིག་སངས་རྒྱས་པའི་སྐབས་སུ་དེ་དག་འཁོར་གྱི་ཐོག་མར་སྐྱེས་ནས། ངས་ཆོས་སྟོན་ཏེ་འཁོར་བ་ལས་བསྒྲལ་བར་འགྱུར་བར་ཤོག་ཅིག་བསམ་པར་བྱའོ། །ཡང་དེ་དང་མཉམ་དུ་གསང་སྔགས་ཀྱི་བསྐྱེད་རྫོགས་ཀྱི་ལམ་ནས། སྣང་ཚད་ལྷ་དང་ཞིང་ཁམས། གྲགས་ཚད་སྔགས་ཀྱི་སྒྲ་དབྱངས། དྲན་བསམ་ཐུགས་ཀྱི་རོལ་བར་བསམས་ནས་ཉམས་ལེན་གྱི་གནད་ལ་སྦྱར་ན་སོར་བྱང་སྔགས་གསུམ་གྱི་སྡོམ་པ་དང་མཐུན་པའི་ཆོས་པ། ཨོ་རྒྱན་རིན་པོ་ཆེས། ནང་ལྟར་གསང་སྔགས་ཐུན་མོང་ལུགས་སུ་སྤྱད། །བསྐྱེད་རྫོགས་དོན་དང་འབྲེལ་བའི་དགོས་པ་ཡོད། །གསང་བ་གསང་ཆེན་ཨ་ཏིའི་ལུགས་སུ་སྤྱད། །ཚེ་གཅིག་འོད་སྐུར་གྲོལ་བའི་དགོས་པ་ཡོད། །ཅེས་གསུངས་པ་ལྟར་དུ་སྡོམ་གསུམ་ཡར་ལྡན་དུ་རྫོགས་པའི་གནད་དང་མཐུན་པར་བྱས་ནས་ཡིད་བཞིན་མཛོད་ཀྱི་མན་ངག་སྐྱོར་སྦྱང་ཉམས་ལེན་བྱས་ནས་རྒྱུད་ལ་སྦྱར་དགོས་པ་ལས། འདི་སློབ་གྲྭའི་སློབ་ཁྲིད་སློབ་མས་སྦྱོང་པ་ལྟ་བུ་དང་། རྒན་པོའི་གནའ་སྒྲུང་བྱིས་པས་ཉན་པ་ལྟ་བུ་ཞིག་ཏུ་མི་འགྲོ་བར་འབད་དགོས། འདི་ཐད་ཀྱི་ལྟད་མོ་དང་ལོ་རྒྱུས་ཀྱི་དཔེ་དེབ་མ་ཡིན་པས། གྲོལ་བར་དོན་གཉེར་གྱི་ཆེད་དང་། བྱིན་རླབས་རྒྱུད་ལ་ཞུགས་པའི་ཆེད་དང་། ཐོས་གྲོལ་ཉམས་རྟོགས་ཀྱི་ཡོན་ཏན་སྐྱེས་ནས་རང་རྒྱུད་ཆོས་དང་འདྲེས་པའི་ཆེད་དུ་ཡིན་པས། བསམ་སྦྱོར་ཆ་འགྲིག་པའི་འབད་པ་གང་ཟག་རང་ཉིད་ཀྱི་མཛད་རྒྱུ་གནད་ཆེ་བ་ཡིན། ཀློག་པ་ཐོས་བསམ་པ་རྣམས་ཀྱིས་ཐེག་པ་དང་གྲུབ་མཐའ་སོ་སོའི་ལྟ་སྒོམ་སྤྱོད་འབྲས་ཀྱི་རྣམ་བཞག་དང་། དེའི་འགལ་སྤང་མཐུན་སྒྲུབ་ཀྱི་བརྒལ་བརྟག་ལ་རྒྱུན་དུ་སྦྱོང་པ་དང་། འཆད་རྩོད་རྩོམ་གསུམ་གྱིས་ཐེག་པ་གསུམ་གྱི་རྣམ་བཞག་ཚང་མ་གཏན་ལ་ཕབ་བཞིན་ཡོད་ལ། སྤང་བ་བསམ་གཏན་པ་ཚོས་ཀྱང་དེ་དང་མཐུན་པའི་རྣམ་དཔྱོད་ཀྱིས་གཞལ་ན། ཐོས་པ་མ་རིག་མུན་སེལ་སྒྲོན་མེ་ཡིན། །ཞེས་གསུངས་པ་ཡིན་པས་ཅི་ཙམ་གཟིགས་ཐུབ་ན་དེ་ཙམ་བཟང་པ་ཡིན། མདོར་ན་སུ་དང་གང་ཡིན་ཀྱང་ཐོས་པ་ཁ་ཕྱིར་བལྟས་སུ་མ་ཤོར་བར་ཐམས་ཅད་ཉམས་ལེན་གྱི་གནད་དུ་འཛིན་པ་ནི་གལ་ཆེན་ནན་གྱིས་གདམས་པའི་ཚིག་བརྒྱ་བཤད་པའི་སྙིང་པོའོ། །དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱིས་དུས་གསུམ་བསག་དང་ཡོད་པའི་དགེ་བའི་རྩ་བ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་གང་ན་སུ་བཞུགས་ཐམས་ཅད་ཀྱི་སྐུ་ཚེའི་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཐམས་ཅད་བདེ་སྐྱིད་རྫོགས་ལྡན་གྱི་དཔལ་ལ་སྤྱོད་དེ་མཐར་ཐུག་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པའི་ཕྱིར་དུ། རྗེ་བཙུན་འཇམ་པའི་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ནས། །སྐྱེ་རྒ་ན་འཆི་རྦ་བརླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་གྲོལ་བར་ཤོག།