གླེང་གཞི།
༄༅།། བླ་མ་དང་གཉིས་སུ་མེད་པ་གདོད་མའི་མགོན་པོ་དཔལ་ཏུ་བཟང་པོ་ལ་ཕྱག་འཚལ་ལོ།།
ཀ་དག་མི་འགྱུར་དག་པ་གཉིས་ལྡན་མཆོག་གི་ཞི་བའི་དབྱིངས་ཆེན་པོར།།
ལྷུན་གྲུབ་འོད་གསལ་མ་འགགས་ཡེ་ཤེས་དྲྭ་བའི་སྤྲིན་ཆེན་དཀྲིགས་པའི་དཔལ།།
གཉིས་མེད་རྩལ་སྣང་ཕྱོགས་མཐར་འཕྲོས་པས་རྡུལ་སྙེད་ཞིང་གི་ཁམས་ཆེན་འགེངས།།
གྲངས་མེད་བསྐལ་པར་ལེགས་བྱས་འབྲས་བུས་བདག་གི་མགོན་དུ་སྣང་ལ་འདུད།།
ཞི་བའི་དབྱིངས་ཉིད་ངང་དེར་ཞི་བའི་མཁྱེན་རབ་ཟབ་མོས་མངོན་དུ་མཛད།།
མ་འགགས་ཤར་བའི་ཤེས་བྱ་ཀུན་ཀྱང་མ་འདྲེས་སོ་སོར་རབ་ཏུ་མཁྱེན།།
ཨེ་མ་དེ་ནི་དུས་གསུམ་རྒྱལ་བའི་ཐུགས་ཀྱི་གསང་བ་ཆེན་པོ་སྟེ།།
སྨྲ་བའི་ཉི་མ་ཉིན་མོར་བྱེད་ཀྱིས་བདག་བློའི་པདྨོ་རྒྱས་པར་མཛོད།།
སྡེ་གསུམ་ཀློང་དགུ་སྐོར་ཚོ་གསུམ་གྱི་མན་ངག་ཟིལ་མངར་བདུད་རྩིའི་བཅུད།།
ཡོངས་སུ་འཐུང་སྟེ་མཁྱེན་རབ་རྟོགས་པས་རྣམ་ཀུན་མྱོས་པའི་གད་རྒྱངས་གླུ།།
བསམ་སྒོམ་ལྟ་ཅི་ཀློག་དང་ཐོས་པས་ཉམས་རྟོགས་རབ་འཕེལ་གྱེར་བའི་དབྱངས།།
ལེན་ལ་དབང་ཐོབ་ཀུན་མཁྱེན་མཆོག་ཉིད་ཀུན་ཁྱབ་རིག་པའི་དབྱིངས་ལ་བཞུགས།།
རྡོ་རྗེ་འཆང་ཆེན་ཟབ་གསང་དགོངས་པའི་གནད།།
ཐབས་ཆེན་མཆོག་གིས་ཡི་གེའི་རིས་སུ་ཕབ།།
མན་ངག་ཟབ་མོས་སྐལ་བཟང་འཚེངས་པར་བྱས།།
མེས་དང་ཡང་མེས་བླ་མར་གུས་ཕྱག་འཚལ།།
ཆོས་དབྱིངས་རིན་ཆེན་རང་བྱུང་ཡེ་ཤེས་དོན།།
མངོན་སུམ་ཐང་མར་བརྡལ་བའི་མན་ངག་གནད།།
ཐད་ཀར་བཀྲལ་བའི་མ་གསང་རྡོ་རྗེའི་ཚིག།
ཕྱི་རབས་འགྲོ་ལ་ཡི་གེའི་འཕྲུལ་གྱིས་སྦྱིན།།
དེ་ཡང་དུས་ཕུན་སུམ་ཚོགས་པ། དུས་བཞི་མཉམ་པ་ཉིད་ཀ་དག་ཐོག་མའི་དུས་རྟག་པ་རྒྱུན་གྱི་འཁོར་ལོ་ལས་མ་གཡོས་བཞིན་དུ་ཐུན་མོང་གི་ངོར་འདི་སྐད་བདག་གིས་ཐོས་པའི་དུས་རྣམ་པར་རྒྱལ་བ་ཆུ་མོ་སྦྲུལ་གྱི་ལོའི་ཆུ་སྟོད་ཟླ་བའི་ཡར་ཚེས་བཅོ་ལྔའི་ཉིན། གནས་ཕུན་སུམ་ཚོགས་པ། ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་གངས་རྒྱན་གསེར་གྱི་པདྨའི་གན་དྷོ་ལ་ཆེན་པོར། འཁོར་ཕུན་སུམ་ཚོགས་པ། རིག་འཛིན་ཕོ་མོ་དཔའ་བོ་མཁའ་འགྲོའི་ཚོགས་ཐམས་ཅད་མ་འོངས་བསྟན་པའི་སྲོག་རྒྱུན་མཐུད་པར་ཐུགས་བསྐྱེད་སྨོན་ལམ་གཅིག་ཏུ་མཐུན་ནས་མཁན་སྤྲུལ་དགེ་འདུན་འདུས་པའི་རྣམ་པར་བྱོན་པ་རྣམས་ལ། སྟོན་པ་ཕུན་སུམ་ཚོགས་པ་དུས་གསུམ་རྒྱལ་བའི་སྤྱི་གཟུགས། རིགས་དང་དཀྱིལ་འཁོར་རྒྱ་མཚོའི་ཁྱབ་བདག ཨོ་རྒྱན་རྡོ་རྗེ་འཆང་གི་ཐུགས་ཀྱི་གསང་བ་ཆེན་པོ། ལྔ་བརྒྱ་པའི་འགྲོ་ལ་ལྷག་པར་བརྩེ་བའི་ཀུན་སྣང་སྙིང་རྗེ་ཆེན་པོའི་རོལ་རྩལ་ལས་དགེ་སྦྱོང་ངུར་སྨྲིག་གི་རྣམ་པར་འཆང་བ། མཆོག་གསུམ་གྱི་ངོ་བོ། རྩ་གསུམ་གྱི་བདག་ཉིད། སྐུ་གསུམ་གྱི་རང་གཟུགས། ཁམས་གསུམ་ཆོས་ཀྱི་རྒྱལ་པོ། ཆོས་རྗེ་ཡིད་བཞིན་གྱི་ནོར་བུ། འགྲོ་ཁམས་རྒྱ་མཚོའི་མུན་སེལ་གྱི་སྒྲོན་མེ། མ་འདྲིས་པའི་སེམས་ཅན་ཡོངས་ཀྱི་རྩ་ལག་དམ་པ། ཐེག་མཆོག་འབྲུག་སྒྲ་ཟབ་མོས་སྐྱེ་དགུ་མ་རིག་པའི་གཉིད་ལས་སློང་བའི་སྟོན་པ་ཆེན་པོ། ཁྱབ་བདག་རྩ་བའི་བླ་མ་བཀའ་དྲིན་སུམ་ལྡན་གྱི་བདག་ཉིད་གང་གིས། ཆོས་ཕུན་སུམ་ཚོགས་པ་ཆོས་ཕུང་བརྒྱད་ཁྲི་བཞི་སྟོང་གི་ཉིང་ཁུ། ཐེག་དགུའི་རྩེ་རྒྱལ་ཟབ་གསང་རྫོགས་པ་ཆེན་པོའི་མན་ངག་ཐང་མར་བརྡལ་བ་སྐྱུད་བྱང་དུ་བསྡུ་བ་ལ། དེ་ཡང་ཁྱབ་བདག་གང་གིས་ཐུགས་ཟབ་མོའི་ཏིང་འཛིན་ལས་མ་གཡོས་བཞིན་དཀར་ལ་སྨུག་པའི་ཞལ་གྱི་དཀྱིལ་འཁོར་འཁོར་ཚོགས་ཡོངས་ལ་མངོན་པར་ཕྱོགས་ཏེ། བརྩེ་བའི་སྤྱན་རས་ཀྱིས་གཟིགས་བཞིན་ཅུང་ཟད་འཛུམ་པའི་ཉམས་དང་བཅས་བཀའ་བསྩལ་བ་ནི་འདི་ལྟར།