ཉིན་ལྔ་བའི་ཆོས་ཁྲིད།
ཇི་སྐད་དུ་ཀུན་མཁྱེན་ཆོས་རྗེས། སྣང་ལ་རང་བཞིན་མེད་པའི་ལས་འབྲས་ཀྱིས། །སྣང་ལ་རང་བཞིན་མེད་པའི་ལམ་བསྒོམས་ཏེ། །སྣང་ལ་རང་བཞིན་མེད་པའི་འབྲས་བུ་འཐོབ། །སྣང་ལ་རང་བཞིན་མེད་པའི་སེམས་ཅན་དོན། །སྣང་ལ་རང་བཞིན་མེད་པའི་མཛད་པ་ནི། །དག་པའི་རྒྱུ་འབྲས་ཟབ་མོའི་རྟེན་འབྲེལ་ཡིན། །ཞེས་གསུངས་པ་སྟེ། དེ་ཡང་འདི་ལྟར་སྣང་བའི་ཆོས་ཐམས་ཅད་སྒྱུ་མ་རྨི་ལམ་སྤྲུལ་བ་དྲི་ཟའི་གྲོང་ཁྱེར་ལ་སོགས་པ་སྒྱུ་མའི་དཔེ་བརྒྱད་དང་མཚུངས་པར་སྣང་ལ་རང་བཞིན་གྱིས་མ་གྲུབ་པ་སྒྱུ་མ་ལྟ་བུའི་འཁྲུལ་བའི་སྣང་ཤེས་འདི་དང་མ་བྲལ་བའི་རིང་ལ་རྨི་ལམ་གཉིད་ཀྱི་ངོ་ཁར་བདེན་པར་སྣང་བ་བཞིན་དུ། སྣང་ལ་རང་བཞིན་མེད་པའི་ལས་ཀྱིས་སྣང་ཞིང་། རང་བཞིན་མེད་པའི་འབྲས་བུ་འབྱིན་ཅིང་། དེ་ལྟར་ཡིན་པ་དེའི་ཕྱིར་ན་དམ་པའི་དོན་དུ་མྱ་ངན་ལས་འདས་པ་ཡང་མ་དམིགས་ཤིང་། ད་རུང་མྱ་ངན་ལས་འདས་པ་ལས་ལྷག་པའི་ཆོས་ཤིག་ཡོད་ན་ཡང་དེ་བཞིན་མ་དམིགས་པ་སྒྱུ་མ་ལྟ་བུ་ཡིན་ཚུལ་རྒྱལ་བས་གསུངས་ཤིང་། དེ་ལྟར་ཡིན་པར་ཁ་ཡིས་བཤད་ཀྱང་དོན་ལ་མངོན་དུ་མ་གྱུར་ནས། ལག་པ་ཁབ་དང་འཕྲད་ན་ཚ་བ་དང་། མེ་སྟག་ཤ་ཐོག་ལ་ལྷུང་ན་ཚིག་པ་དང་། ཁྱོད་བཟང་བར་བཤད་ན་དགའ་ཞིང་། ཁྱོད་སྡུག་པར་བཤད་ན་མི་དགའ་བ་འབྱུང་དུ་ཡོད་པའི་གནས་སྐབས་འདི་ལྟ་བུའི་དུས་སུ། སྣང་ལ་རང་བཞིན་མེད་པའི་ལམ་བསྒོམས་ནས། སྣང་ལ་རང་བཞིན་མེད་པའི་འབྲས་བུ་ཞིག་རང་རྒྱུད་ནས་ཐོབ་པར་བྱས་ཏེ། མཐར་ཐུག་གི་དགོས་དོན་སྣང་ལ་རང་བཞིན་མེད་པའི་སེམས་ཅན་གྱི་དོན་གནས་སྐབས་དང་མཐར་ཐུག་གི་ཕན་བདེ་བསྒྲུབས་ནས། སྣང་ལ་རང་བཞིན་མེད་པའི་རྒྱལ་བའི་མཛད་པ་བསྒྲུབ་རྒྱུ་དེ་ནི་དག་པའི་རྒྱུ་འབྲས་ཟབ་མོ་རྟེན་ཅིང་འབྲེལ་འབྱུང་གི་ཁྱད་ཆོས་ཡིན་པར་གདམས་ཡོད་པས། རང་རེས་ཀྱང་དམ་ཆོས་འཆད་ཉན་བྱ་བའི་སྐབས་སུའང། གང་ཞིག་ཇི་ལྟར་བསྒྲུབས་ནས་ཅི་ཞིག་འགྲུབ་པར་བྱེད་པའི་དོན་འདི་ལ་སྔ་བསམ་ཕྱི་འདེང་ཡང་དག་ཅིག་མ་བྱས་པར། རང་གར་འདི་དག་ཐམས་ཅད་ཆོས་དུང་འབུད་དུས་བཤར་སོང་བ་དང་། ཡང་ན་ཐག་རིང་གི་ཆོས་ཞུ་པ་མང་པོ་འགྲོ་བཞིན་འདུག་པས་ང་ཡང་དེ་དག་གི་རྗེས་སུ་དེད་ནས་འགྲོ་དགོས་སྙམ་པ་ཞིག་གིས་ག་ལ་འོང་། དེ་ལ་དང་པོར་ལར་ང་ཟེར་ས་དེ་སུ་རེད་སྙམ་ནས། དེར་མཛུ་གུ་ཞིག་ཚུགས་དང་ང་ཟེར་ས་ནི་སྒོ་གསུམ་གྱི་རང་བཞིན་ཅན་གྱི་ཉེ་བར་ལེན་པའི་ཕུང་ཁམས་སྐྱེ་མཆེད་ཀྱི་ཚོགས་པ་འདི་ལ་བཏགས་པ་ཡིན་ལ། དེ་ཡང་རིགས་པས་དཔྱད་ན་རྡོ་ཕུང་ཞིག་ལ་ལབ་རྩེ་རུ་བཏགས་པ་དེ་བཤིག་བཞག་ན་རྡོའི་ཕུང་པོ་ཞིག་ལས་མ་འདས་ལ། དེ་ཡང་བཤིག་ན་རྡུལ་ཕྲན་གྱི་རང་བཞིན་ཡིན་པ་བཞིན་དུ། ལུས་སེམས་འདི་ཡང་རྡུལ་དང་སྐད་ཅིག་གི་ཆ་ཤས་སུ་བསིལ་ནས། དེ་ཡང་ཆ་ཤས་ཆ་མེད། ཆ་མེད་ཡུལ་མེད། ཡུལ་མེད་རྟེན་བྲལ། གཞི་མེད་རྩ་བྲལ་ལ་སོང་དུས་ཡུལ་དང་ཡུལ་ཅན་གཉིས་ཀའི་སྟེང་ནས་ང་ཟེར་ས་ཞིག་མ་གྲུབ་པ་ཡིན། འོན་ཀྱང་གནས་སྐབས་ཤིག་ལ་རང་བཞིན་མེད་ཀྱང་སྣང་དུ་ཡོད་པ་འདིའི་སྟེང་ནས། སྣང་ལ་རང་བཞིན་མེད་པའི་ལམ་ཞིག་བསྒྲུབས་ཏེ། སྣང་ལ་རང་བཞིན་མེད་པའི་འབྲས་བུ་ཞིག་ཐོབ་པར་བྱེད་པ་ལ། དམ་པའི་ཆོས་སྒོ་གསུམ་འདིའི་ཐོག་ནས་བསྒྲུབ་དགོས་ཤིང་། དེ་ཡང་སྒོ་ལུས་ངག་གཉིས་ཀ་སེམས་ཀྱིས་ཅི་བྱས་ཀྱི་འོག་ན་ཡོད་པས། སེམས་ནི་རྒྱལ་པོ་བཀོད་འདོམས་པ་ལྟ་བུ་དང་། ལུས་ངག་གཉིས་ཀ་འབངས་མི་བཀོད་འདོམས་ཉན་མཁན་དང་འདྲ་བ་ཞིག་ལས་མ་འདས། སྟོབས་ཤུགས་ཆེ་ཆུང་གི་ཐད་ནས་བསམ་བློ་བཏང་ན་ཡང་། ལུས་ཀྱིས་གོམ་པ་བརྒྱ་ཡིས་ཀྱང་མི་ཐོན་པའི་ས་དེར། ངག་གིས་ཀི་ཞིག་བཏབ་ན་རྒྱང་གྲགས་གཅིག་གི་ཕར་ནང་ལ་གོ་བ་དང་། དེའི་ཚེ་ལ་སེམས་ཀྱིས་འཇིག་རྟེན་སྲིད་པ་གསུམ་པོ་འདི་ལ་བསྐོར་བ་བརྒྱ་ཕྲག་གཅིག་ཀྱང་བསྐོར་ནུས་པ་སྟེ། དེ་ལྟ་བུའི་ནུས་པ་ཆེ་ཆུང་ཡོད་ཅིང་། དེ་ཡོད་པའི་དབང་གིས་ཆོས་སྒྲུབ་དུས་ཀྱང་སེམས་ཀྱིས་སྒྲུབ་པའི་ཆོས་ཀྱི་ཆོད་སྒོ་ཆེ་བའི་གནད་ཀྱིས། སེམས་རྒྱུད་ཆོས་དང་འདྲེས་དགོས་པ་དེ་གལ་ཆེ་བར་ནམ་ཡིན་ཡིན་དུ་བཤད་པ་ཡིན། རྒྱལ་བས་གསུངས་པའི་ཆོས་སྒོ་གྲངས་མང་ཐབས་དང་ཤེས་རབ་ཀྱི་ཆ་ཁྱད་པར་དུ་འཕགས་མིན་ལས་ཐེག་པ་ཆེ་ཆུང་དང་མདོ་སྔགས་སུ་བཞག་པ་དེ་ཚང་མ། རྒྱ་སྒོ་འབྱེད་བྱེད་ཀྱི་ལྡེ་མིག་ལྟ་བུ་ཞིག་ཡིན་ཞིང་། གང་འབྱེད་པའི་ནོར་བུའི་གཏེར་མཛོད་ནི་རང་གི་རྒྱུད་ན་ཡོད་པའི་སེམས་ཉིད་ཡིད་བཞིན་རིན་ཆེན་གྱི་སྤྲིན་ཟད་པ་མེད་པ་དེ་ཡིན། དེ་རང་ལ་ཡོད་ཀྱང་དབུལ་པོའི་ནོར་ངོ་མ་ཆོད་པ་བཞིན་དུ་བདེ་སྐྱིད་ཕྱི་ནས་འཚོལ་བ་ནི་ནོར་སོང་བ་ཡིན་པས། རྩ་བ་རང་སེམས་ལ་བསྒྱུར་བཀོད་བཏང་ནས་སེམས་ཀྱི་རིན་ཐང་རང་གི་སེམས་ནས་ལེན་དགོས། དོན་དངོས་སུ་བཤད་ན་རྒྱལ་བའི་ཆོས་སྒོ་མཐའ་དག་གི་བསྟན་དོན་ནི་བློ་སྦྱོང་ཡིན་ལ། བློ་བྱང་ཆུབ་སེམས་ལ་འབྱོངས་དུས་འབྱོངས་པ་ཡིན་པ་དེས་ན་བློ་སྦྱོང་གལ་ཆེ་ཞེས་པ་དེ་བཤད་པར་བྱ་བ་ཡིན། དེ་ཡང་དང་པོར་རྒྱུ་འབྲས་ཡིད་ཆེས་ཀྱི་དད་པ་འཇིག་རྟེན་ཡང་དག་གི་ལྟ་བ་ནས་མགོ་འཛུགས་དགོས་པའི་གླེང་མོལ་གྱི་ཚིག་སྣེ་ཞིག་བཞག་མྱོང་བས། དེ་ལ་མཐུད་ནས་གྲོས་གླེང་གི་ཚུལ་ཞིག་བྱེད་པ་ལ། གོང་ནས་བཤད་མ་ཐག་པ་ཁ་ཤས་ཤིག་ཆོས་བསྒྲུབ་པར་གཤར་བཞིན་ཡོད་པ་དེའི་རྗེས་ལ་དེད་སོང་བ་ལྟ་བུ་ནི། བྱ་བ་ཕྱི་མཐར་ཕེར་བ་ཞིག་དང་། སྒེར་ཚུགས་རང་རྐྱ་ཐུབ་པ་ཞིག་ཡོང་བ་མ་རེད། རིག་ཚད་ཀྱི་རྗེས་ལ་དེད་ནས་དེ་དག་གིས་ཅི་བྱེད་ཀྱི་ལད་མོ་ནགས་གསེང་གི་སྲོག་ཆགས་དུད་འགྲོ་མི་རྒོད་རྣམས་ཀྱིས་མིའི་ཅི་བྱེད་བྱེད་པ་ལྟར་དུ་བྱས་ན། འགའ་རེ་གཡང་དུ་མཆོངས་ནས་ལྕེབ་མཁན་ཡང་ཡོད་པས་དེ་འདྲ་དང་ཐུག་ནས་དེའི་རྗེས་སུ་བྲག་རོང་དུ་ལྕེབ་དགོས་པ་ཡང་ཆགས་པ་ཡིན། འོན་ཀྱང་ལྕེབ་རན་ཁ་ངོ་མའི་ལྕེབ་མ་ལྕེབ་ཀྱི་མཚམས་ཤིག་ལ། ལམ་ལོག་ཏུ་སོང་བའི་འགྱོད་པ་ཞིག་ནམ་སྐྱེས་ན། ད་དུང་གསོན་པོའི་མི་རུ་ཆགས་ཡོད་པས་བསམ་བློ་གཏང་ས་མེད་པའི་སྡུག་པོ་ངོ་མ་དེ་རེད་མེད་པས། ཕམ་ཁའི་མྱོང་བ་ལ་བརྟེན་ནས་རྒྱལ་ཁའི་ལམ་ལ་བསྙེགས་ནས་ངན་སྐྱོན་བཟང་ལ་འགྱུར་རྒྱུ་དང་བསྒྱུར་རྒྱུ་གཉིས་ཀ་ཡོད་ཀྱང་། དེ་སྔོན་ལམ་ལོག་ལ་སོང་བའི་དུས་ཚོད་རིན་ཐང་ཅན་དེ་འཕྲོ་བརླག་སྟོང་ཟད་ལ་སོང་ཞིང་། མ་ཚད་བསམ་སྤྱོད་ངན་པས་རང་རྒྱུད་བརྫད་ནས་ཡོད་ན་གྱོང་ཁ་དེ་བས་ཀྱང་ཆེ་བ་ཡིན། དེས་ན་བྱ་བ་གང་ལ་ཡང་བརྟགས་ཤིང་དཔྱད་པ་རང་གིས་གཏང་དགོས་ལ། དེ་ཡང་བྱ་བ་དེ་ལ་མ་ཞུགས་ཀྱི་སྔོན་ལ་གཏང་དགོས། དམ་པའི་ཆོས་ཡིན་ཡང་དཔྱད་པ་སྔོན་དུ་འགྲོ་དགོས་པ་ཡིན། དེ་ལ་འདི་ལྟར་སེམས་ཏེ་སྤྱིར་སོ་སྐྱེ་ནི་བྱིས་པའི་རང་བཞིན་ཡིན་པ་དང་། ཁྱད་པར་དུ་སྙིགས་མའི་སྐྱེ་བོའི་བསམ་སྤྱོད་ཀྱི་རྗེས་སུ་མ་འབྲངས་ཞེས་པ་ནི་བདེན་ཏེ། ཕ་མ་གཉེན་ཉེ་དག་བསམ་པ་དཀར་ནའང་འདི་ཕྱི་འཕྲལ་ཡུན་གྱི་དགེ་སྐྱོན་ཁོང་ཚོས་ཀྱང་མ་རིག་ནས་སྡུག་བསྔལ་བཞིན་ཡོད་པས་ལོང་པས་ལམ་གོ་མ་ཆོད་པ་ལྟ་བུ་ལས་མ་འདས་ཤིང་། དེ་ཚོ་ཡང་སྙིགས་མའི་སྐྱེ་བོའི་བསམ་སྤྱོད་ཀྱི་རྗེས་ལ་མ་འབྲངས་ཟེར་སའི་གྲལ་ལ་གཏོགས་ཀྱང་། དམ་པའི་ཆོས་ལ་ད་གཟོད་བརྟག་དཔྱད་ཞིབ་འཇུག་གྱིས་ཟེར་ཡང་མི་བྱེད་དེ། འུ་ཚོས་ཡན་དང་ཡན་གྱི་བརྟག་ཞིབ་གཏན་ལ་ཕབ་པའི་ཕྱིར་ཟེར་ན་བདེན་ཏེ། ཆོས་ཀྱི་ངོས་ནས་གནད་ཤེས་པས་བལྟས་ན་དེ་ལྟར་ངེས་ཤིང་། འོན་ཀྱང་ཆོས་ཀྱི་ངོས་ནས་དེ་ལྟར་ཡང་དག་ཡིན་ན་ཡང་དེ་ལ་ལྟ་བྱེད་ཀྱི་མིག་མ་དག་ན་ལོག་པར་མཐོང་སྲིད་པས་མ་ཚད་མཐོང་ངེས་པའང་ཡིན་པས། བློ་མིག་ཚད་ལྡན་མིན་པ་རྒྱུ་མཚན་དུ་བྱས་པའི་དཔྱད་པ་ཞིབ་མོ་སྔོན་ལ་མ་སོང་བའི་དབང་གིས། ཡིད་ཆེས་དང་བདེན་བཟུང་མེད་བཞིན་དུ་མ་ཞུགས་ཞེས་བརྗོད་ན་ལེགས་པར་སྨྲས་པ་ཡིན་ཏེ། དེ་ནི་ནང་པ་མིན་ཡང་ཕྱི་བར་ཆགས་མེད་ལ། དེ་ནི་ཐེ་ཚོམ་ཅན་ལས་ལོག་ལྟ་ཅན་དུ་མ་སོང་བའི་ཕྱིར། རང་ཉིད་ཀྱིས་དཔྱད་པ་སྔོན་ལ་སོང་ནས་རྒྱུ་མཚན་མཐོང་། ངེས་ཤེས་སྐྱེས་ནས། དད་པས་མོས་པ་ཞིག་ཡིན་ན་ཕྱིན་ཆད་རྐྱེན་གང་དང་ཐུག་ནའང་བློ་རྩེ་གཉིས་ཐེ་ཚོམ་གྱི་རྐྱེན་གྱིས་མི་འཕྲོག་པ་ཞིག་ཏུ་འགྲོ་བ་ཡིན། དེ་དུས་ལམ་ལ་ཞུགས་རྐྱང་བྱེད་ཆོག་པ་ལས་འདེང་ཡང་རྒྱག་བྱེད་དགོས་པ་མ་ཡིན། སྤྱིར་མི་ཚེའི་དུས་ཚོད་ཐུང་བ་དང་། ཁྱད་པར་དེང་སང་གི་མི་ཚེ་ལ་ངེས་པ་མེད་ཅིང་། དུས་ཐ་མའི་མི་རྣམས་ལོག་པའི་ཤེས་རབ་ཀྱི་རྣམ་རིག་བཀྲ་བ་ཙམ་ལས། ཡང་དག་པའི་དབང་པོ་དང་རྣམ་རིག་རྟུལ་བ་མ་ཟད། དཀའ་སྤྱད་བཟོད་སྲན་ཡང་ཆུང་བ་ཡིན། ཡས་མས་ཀྱི་བྱ་བ་མང་པོ་ཞིག་སྒྲུབ་ལོང་ཡང་མེད་ལ། འགྲུབ་པའི་ནུས་པ་དང་ཕོ་ཚོད་ཀྱང་ཞན་པ་སྟེ། འུ་ཚོ་རང་ཉིད་ལ་བསམ་བློ་ཚུར་བསྐོར་ན། འཁོར་བ་ངན་སོང་གི་སྡུག་བསྔལ་ཟེར་བ་འདི་མེད་སྣང་ཤར་བ་དང་། ཤི་ནས་ངན་སོང་ལ་སྐྱེ་མི་འགྲོ་བའི་སྣང་བ་དང་། ཤི་ནས་ངན་སོང་ལ་སྐྱེ་རྒྱུར་མི་སྐྲག་པ་ནི་མིན་ཞིང་། སེམས་ཅན་ཐམས་ཅད་ལ་ད་ལྟའི་ཚེ་འདིའི་ཕ་མ་དང་འདྲ་བའི་སྙིང་རྗེ་ཁ་ཡིས་བཤད་པ་ཙམ་ལས་དོན་ལ་དཀའ་ཡང་། ད་ལྟའི་ཕ་མ་སྤུན་གྲོགས་ལ་ཤ་ཚ་སྙིང་རྗེ་མེད་པ་མ་ཡིན་ཞིང་། ཚེ་འདིའི་སྙིང་དམར་ཅན་གྱི་ཤི་བོ་དེ་ཚོ་དམྱལ་བར་སྐྱེས་ནས་ཚ་གྲང་གི་སྡུག་བསྔལ་མྱངས་ནས། ཆོས་དགེ་བའི་ར་མདའ་ཡོང་རྒྱུའི་རེ་བ་འུ་ཚོ་ལ་བྱེད་བཞིན་ཡོད་ན་ཅི་ཞིག་བྱེད་དགོས་པ་ལ་སྙམ་པའི་སེམས་ཀྱི་འཁྱུག་སྐོར་མཚམས་རེར་ཡོད་རྒྱུ་ཞིག་རེད། འོན་ཀྱང་དེ་ལ་ཡུན་མེད་པ་ནི། ངེས་འབྱུང་གཏིང་ནས་མེད་པར་ཚེ་འདིའི་འཁྲུལ་སྣང་ལ་མགོ་འཁོར་ནས་བྱིས་པས་རྩེད་རྡོ་ལ་རྟ་ནོར་དུ་བརླམས་ནས་མགོ་འཁོར་བ་དང་འདྲ་བར་སོང་བས་ཡིན། གཅིག་གིས་ཚེ་འདིར་རྒྱལ་པོའི་རྒྱལ་སྲིད་ཐོབ་པ་དང་། གདམས་ངག་ཚེ་གཅིག་སངས་རྒྱས་གཉིས་ཀ་གང་བདམ་པ་ཡིན་ཅེས་འདམ་དུ་བཅུག་ན། འགའ་རེས་རྒྱལ་སྲིད་མ་དགོས་སྒོར་རྡོག་བརྒྱའི་ཆེད་དུ་ཆོས་ཁྲིད་དང་ཁྲིད་སྦྱོང་ཐུན་རེ་གཅད་རྒྱུ་ལ་ཇི་མི་སྙམ་པར་ཤོག་རྡོག་བརྒྱ་བོ་ལ་འཐམ་འགྲོ་བ་ཡོད་པ་དང་། ཡང་འགའ་རེས་སྒོར་རྡོག་བརྒྱ་དང་མི་བརྗེ་ཡང་རྒྱལ་པོའི་རྒྱལ་སྲིད་དང་ལག་གཡས་གཡོན་བྱས་ནས་འདམ་ཁ་སྐོར་ཡོང་དུས། ཅུང་ཟད་དྲག་ཤོས་སུ་བརྩི་ས་ཞིག་ཡིན་ཡང་། འཇིག་རྟེན་གྱི་མི་འདི་འདོད་པ་ཆེ་བའི་དབང་གིས། གཉིས་ཀ་ཤོར་མི་ཉན་བསམས་ནས་གཉིས་ཀ་དགོས་ཟེར་ངེས། འོན་ཀྱང་ཕུན་ཚོགས་སྡེ་བཞིའི་དཔལ་གཡང་འཛོམས་པ་ནི་སྲིད་འབྱོར་ཆོས་ཀྱིས་འཚོ་བའི་ཁྱིམ་པ་རྒྱལ་བློན་འབངས་གསུམ་གྱི་དབང་དུ་བྱས་ཏེ་གསུངས་པ་ལས། ཁྱིམ་ནས་ཁྱིམ་མེད་པར་རབ་ཏུ་བྱུང་བའི་སྦྱངས་ཡོན་ལ་གནས་པའི་དགེ་སྦྱོང་ཞིག་ལ་གསུངས་པ་མིན་པས། ཆོས་ངོ་མ་སྙིང་ནས་སྒྲུབ་པ་ཞིག་གི་ངོས་ནས་བཤད་ན། ཆོས་སྲིད་གཉིས་ལྡན་བུ་ལུགས་བླ་ལུགས་གཉིས་ཀ་ལྡན་མི་ལྡན་འཇིག་རྟེན་པས་ཟེར་དར་ཡང་། ཆོས་འཇིག་རྟེན་གཉིས་ཀ་མཉམ་དུ་སྒྲུབ་ལུགས་ཡོད་ཀྱང་འགྲུབ་ལུགས་ཡོད་པ་མ་ཡིན། རྒྱལ་པོ་ཨིནྡྲ་བྷཱུ་ཏིས་འདོད་ཡོན་མ་སྤངས་པར་གྲུབ་པ་ཐོབ་པ་ཡིན་ཡང་། དེ་འདྲའི་གྲུབ་ཐོབ་ཀྱི་བརྒྱུད་པ་ལམ་མས་སྦྱོང་གི་གང་ཟག་ཕལ་བའི་ཚད་དང་སྦྱར་དུ་ཡོད་པ་མིན། དེ་ལྟར་བལྟས་ཡོང་ན་ངེས་འབྱུང་ཡང་དག་ཅིག་རྒྱུད་ལ་མ་འཁྲུངས་པའི་རྩ་བ་ངོ་མ་དེད་ནས་སོང་ན། རྒྱུ་འབྲས་ཡིད་ཆེས་དེ་སད་དེ་སུད་དེ་ཞིག་ཡིན་པའི་དབང་གིས་ད་སྔོན་ཡན་ཆད་ཀྱི་མི་ཚེའི་རིང་ལ་བྱས་བྱས་འཁོར་བའི་གཞི་རྩ། བསྒྲུབས་བསྒྲུབས་ཚེ་འདིའི་དོན་ཆུང་ཞིག་ལ་མགོ་འཁོར་སོང་བ་ཡིན་པས། ད་ཤི་ཁར་ལག་སྟོང་ལ་འགྲོ་བའི་ཉིན་པར་འགྱོད་པ་གཞི་ནས་སྐྱེས་ཀྱང་འཕྱིས་པའི་ཚོད་ལ་ཐོན་ཚེ་འདེང་མ་ཕོག་འཆར་གཞི་མ་ཞོག་པ་ཡིན། དེས་ན་མདོ་དོན་ཚིག་གི་རྩ་བ་རྒྱུ་འབྲས་ཡིད་ཆེས་ཀྱི་ཕྱོགས་འདི་ལ་ངེས་ཤེས་བརྟན་པོ་ཞིག་ཡོད་དུ་འཇུག་པ་ནི། ཁྱད་པར་དེང་སང་གི་དུས་འདིར་གནད་ཆེ་བར་སེམས་ཤིང་། དེ་ཡང་སྐྱེ་བ་སྔ་ཕྱི་ཡོད་མེད་འདིའི་སྟེང་ནས་འཛམ་གླིང་ས་འདིའི་ཐོག་གི་མི་མང་པོ་ཞིག་གར་འགྲོ་ངོས་ཟིན་གྱི་ལམ་ངོ་མ་ཤེས་པ་དང་། ཤེས་ཀྱང་གདེང་ཁེལ་བ་ཞིག་མ་བྱུང་བར་ཡོད་པ་ཡིན། དེ་ལ་དཔྱད་པ་ཞིག་ཞུགས་ན། སྐྱེ་བ་སྔ་ཕྱི་བར་གསུམ་དེ་དུས་ཀྱི་རྒྱུན་དང་འབྲེལ་ནས་བཤད་བཞིན་ཡོད་ཅིང་། དུས་འདས་པ་ནི་ཁ་རྩང་གི་དུས་དང་འདྲ་ཞིང་། ཁ་རྩང་གི་དུས་འདས་པ་ཡོད་པ་ནི་མྱོང་བས་གྲུབ་པ་བཞིན་དུ་སྐྱེ་བ་སྔ་མའང་ཡོད་པ་དང་། དེ་རིང་ཡོད་པའི་གནད་དེ་ཁ་རྩང་ཡོད་པའི་རྒྱུ་མཚན་ལ་ཐུག་པ་ཡིན་པས། ད་ལྟའི་སྐྱེ་བ་འདི་ཡོད་པའི་རྒྱུ་མཚན་གྱིས་སྐྱེ་བ་ཕྱི་མའང་ཡོད་པར་འགྲུབ་ཐུབ་པ་ཡིན། དེ་ཅིའི་ཕྱིར་ཞེ་ན། ཁ་རྩང་ཡོད་པ་ལ་བརྟེན་ཏེ་དེ་རིང་ཡོད་པ་དང་། དེ་རིང་ཡོད་པའི་རྒྱུ་མཚན་གྱིས་སང་ཉིན་ཡོད་པར་བསྒྲུབ་ཐུབ་པ་དང་གཅིག་ཡིན་པའིི་ཕྱིར། དེ་ཡང་དོན་ངོ་མས་བཤད་ན་གོང་ནས་གསུངས་པ་ལྟར་དུ་དུས་གསུམ་དུས་ལས་འདས་པའི་དུས་མེད་ཀྱི་དུས་ཤིག་ནས། སྣང་ལ་རང་བཞིན་མེད་པའི་དུས་སུ་འཁྲུལ་ཏེ་འཁོར་བའི་འཁྲུལ་སྣང་དང་སྡུག་བསྔལ། སྣང་ལ་རང་བཞིན་མེད་པ་སད་དུ་མེད་པའི་རྨི་ལམ་འདྲ་བ་འདི་བྱུང་བ་ཡིན། འདིའི་འཁྲུལ་བ་འདི་གཞི་ལ་མ་ལྡོག་གི་བར་དུ་སྐྱེ་བ་ཕྱི་མ་དང་། ཕྱི་མའི་ཡང་སྲིད་ཉེ་བར་ལེན་པའི་རྟེན་འབྲེལ་བཅུ་གཉིས་སྲིད་པའི་འཁོར་ལོའི་རྒྱུ་འབྲས་རྟེན་ཅིང་འབྲེལ་འབྱུང་ལ་བསླུ་བ་ཡོད་པ་མིན། དུས་གསུམ་དུས་ལས་འདས་པའི་དུས་མེད་ཀྱི་དུས་ཞེས་པ་སྔགས་ཀྱི་སྐབས་སུ་བཤད་པ་དེ་ཅི་ཞིག་ཅེ་ན། ཆོས་ཅན་འདུས་བྱས་ཀྱི་ལྡོག་ཆ་ནས་དུས་གསུམ་དང་། ཆོས་ཉིད་འདུས་མ་བྱས་པའི་ལྡོག་ཆ་ནས་དུས་བཞི་མཉམ་ཉིད་ཀྱི་ཡེ་ཤེས་འཁོར་འདས་གཉིས་མེད་ཀྱི་རང་བཞིན་ལ་གོ་བ་སྟེ། སྐྱེ་བ་སྔ་མ་དྲན་པའི་མི་དེང་སང་ཡོད་པས་མི་ཚད་པར་སྐྱེ་བ་སྔོན་མའི་སྐྱེ་ཡུལ་དང་སྐྱེ་ཁྱིམ་ཐོ་གཏུག་ཏུ་ཡོད་པའི་བདེན་དཔང་ཅན་མང་པོ་ཡོད་ན་ཡང་། གཙོ་བོ་རིགས་པས་བསྒྲུབས་ནས་གྲུབ་པར་གནད་ཆེ་ལ། ཁྱད་པར་ལམ་ཞུགས་ཀྱི་ཆོས་པ་ལས་དང་པོ་པ་དང་། མིན་ཡང་རང་གཞན་འཕྲལ་ཕུགས་ཀྱི་བདེ་སྡུག་ལ་དཔྱད་པ་གཏོང་མཁན་ཞིག་ཡིན་ན། དང་པོར་ཐེ་ཚོམ་ལོས་ཡོད་ཐེ་ཚོམ་ཤར་ནས་བརྟགས་ཤིང་དཔྱད་དེ་གང་ཞིག་རིགས་པས་གྲུབ་པ་དེ་ཚད་མར་འཛིན་ན་བློ་གཏད་ཕེར་བ་རེད། འུ་ཚོ་མིན་ན་ཡང་ཕ་རོལ་པོ་འགའ་རེས་སངས་རྒྱས་ཞེས་པ་དེ་ཅི་ཞིག་ཡིན། ད་ལྟ་གང་ན་ཡོད། ཅི་འདྲ་ཞིག་ལ་སངས་རྒྱས་ཟེར་ནས་ངོས་འཛིན་དགོས་པ་སྟེ། དེ་དག་ལེགས་པར་མི་ཤེས་པའི་གང་ཟག རྨོངས་པ་དང་ཐེ་ཚོམ་གྱིས་བཅིངས་ནས་འཐུམས་པའི་མ་རིག་པའི་གཞན་དབང་དུ་གྱུར་པ་ཅན་དག་གིས། ལུང་ལ་ཚད་མར་འཛིན་པ་མིན་པས་རིགས་པ་ཚད་མས་མངོན་སུམ་དུ་གཏན་ལ་ཕབ་པའི་རྗེས་སུ། དཔྱད་གསུམ་དག་པ་སྲང་རྒྱ་མ་ཐམས་ཅད་ཚད་ཐོག་གཅིག་ལ་བབ་པ་ཞིག་ཡོང་བ་ཡིན། སྐྱེ་བ་སྔ་ཕྱི་སྒྲུབ་བྱེད་ཀྱི་རིགས་པ་དེ་ཚོ་རགས་རིམ་གྱིས་བཤད་ན། རིགས་འདྲ་སྔོན་སོང་དང་། ཉེར་ལེན་སྔོན་སོང་། གོམས་པ་སྔོན་སོང་། མྱོང་བ་སྔོན་སོང་ལ་སོགས་པའི་ཐོག་ནས་འཆད་དུ་ཡོད་ཅིང་། དེ་འཆད་དུས་ཧ་ཞིག་སུ་ཡིན་ཡང་གོ་རྒྱུ་ཡོད་པ་རེད། རིགས་འདྲ་སྔོན་སོང་རྐྱང་པ་ལྟ་བུ་ཞིག་ལ་བསམ་བློ་གཏོང་ན། འུ་ཚོས་ང་ཟེར་ནས་གཅེས་པར་སྐྱོང་བ་དང་། ངའི་ཟེར་ནས་བདག་ཏུ་འཛིན་ཡང་། ང་དང་པོར་གང་ནས་ཡོང་བ་དང་། རྗེས་མ་གང་ལ་འགྲོ་རྒྱུ་ཡིན་པའི་ཕུགས་བཅད་ནས་ཆོད་པ་མེད་ཅིང་། སྒོ་གསུམ་པོ་འདི་ལ་ང་རུ་ཞེན་པའི་སྐབས་སུ། ལུས་འདི་ནི་ཉི་མ་ཁ་ཤས་ཀྱིས་བསྐྱུར་རྒྱུ་ཅན་དང་། ངག་ནི་དེ་ལ་བརྟེན་པའི་བྲག་ཆ་ལྟ་བུ་ཞིག་ཡིན། དེས་ན་སེམས་རྣམ་ཤེས་ཀྱི་རྒྱུན་འདི་བདེ་སྡུག་གི་འབྲས་བུ་མྱོང་བ་པོར་གྲུབ་པ་ཡིན། འདིའི་སེམས་རྣམ་ཤེས་སྐྱེ་ཞིང་མཆེད་པའི་རང་བཞིན་ཅན་འདི་གསལ་རིག་གི་རྣམ་པ་ཅན་ཞིག་སྟེ། གསལ་ཞིང་རིག་པ་སེམས་ཀྱི་མཚན་ཉིད་ཅེས་སུ་འཆད་པ་ཡིན། འུ་ཚོ་ཞིང་ལས་ཀྱི་ས་ཆ་ཞིག་ནས་སོས་ཀར་ས་བོན་ས་ཞིང་ལ་ཅི་ཞིག་བཏབ་ཡོད་ན། སྟོན་ཁའི་ལོ་ཏོག་ལ་དེ་བཞིན་མི་འགྱུར་བར་སྐྱེ་བ་ལས། ཕར་ནས་བཏབ་ན་ཚུར་འབྲས་དང་གྲོ་སྐྱེ་བ་ལྟ་བུ་དང་། ཕར་ས་བོན་ཞིང་ལ་མ་བཏབ་ན་ཚུར་ལོ་ལེགས་ཀྱི་སྟོན་ཐོག་ཅིག་སྨིན་དུ་ཡོད་པ་ཞིག་མི་སྲིད་པ་བཞིན་དུ། སེམས་རྣམ་པར་ཤེས་པ་སྔོན་སོང་གི་རྒྱུན་རིགས་འདྲ་སྔོན་ལ་སོང་བའི་རྗེས་སུ་རིགས་འདྲ་ཕྱི་མ་ཡོང་པ་ནི། མེད་ན་འབྱུང་བ་མི་སྲིད་པའི་རྒྱུ་རྐྱེན་དང་འབྲེལ་བའི་འགྲོས་ཤིག་ཡིན། ཚེ་སྐྱེ་བ་སྔོན་མའི་འཆི་སེམས་སྐད་ཅིག་ཐ་མ་ནས་སྐྱེ་བ་འདིའི་སྐྱེས་སེམས་སྐད་ཅིག་དང་པོའི་བར་གྱི་དབུགས་ཀྱི་རྒྱུན་ཆད་པ་དང་། ལུས་ཀྱི་རྟེན་དང་བྲལ་ནས་རགས་སྣང་ཕྲ་བར་ཐིམ་ནས། གཞིའི་འོད་གསལ་གྱི་སྣང་ཆ་དེ་ལས་སླར་ཡང་མཆེད་པའི་ཕྲ་བའི་སྣང་བ་དེ་རིམ་བརྒྱུད་ཀྱི་ཐོག་ནས་རགས་སྣང་ལ་ཤར་ནས་སྐྱེ་བ་སྔ་ཕྱིའི་འབྲེལ་མཐུད་སོང་བ་ཡིན་ཞིང་། སོང་ན་ཡང་སྐྱེ་བ་སྔ་ཕྱིའི་ལུས་རྟེན་དང་སྡེ་རིས་མི་འདྲ་བའི་དབང་གིས་སྣང་བའི་འདུ་ཤེས་མི་འདྲ་བར་འབྱུང་བ་སྟེ། དཔེར་ན་ད་ལྟ་སྐམ་ལ་གནས་པའི་སྲོག་ཆགས་ཤིག ཕྱི་མར་མེ་དང་ཆུ་ལ་གནས་པའི་སྲོག་ཆགས་ཤིག་ཏུ་ལུས་རྟེན་བརྗེས་སོང་ན། དེ་དང་དེའི་སྐབས་ཀྱི་ཡུལ་དང་གནས་མཐུན་པའི་རྐྱེན་ལ་སྣང་བ་ཡིན། དེ་བཞིན་དུ་ཉེར་ལེན་དང་གོམས་པ་མྱོང་བ་སྔོན་སོང་དག་གིས་ཀྱང་ཤེས་པ་ཡིན། ཆ་བཞག་ན་དུད་འགྲོ་ཡིན་ཡང་མང་པོའི་ནང་ནས་མ་ངོ་ཤེས་པ་དང་། མ་བསླབས་པར་མ་ལས་འོ་མ་ནུ་ཤེས་པ་དང་། འུ་ཚོ་མི་རྣམས་ཀྱང་བཟང་ངན་གཅིག་འདྲ་ཏག་ཏག་མ་ཡིན་པར། འགའ་རེ་གཟུགས་བཟང་། འགའ་རེ་མི་སྡུག་པའི་མཚན་མ་མང་པོས་བརྒྱན་པ། འགའ་རེ་འབྱོར་ཞིང་ཕྱུག འགའ་རེ་དབུལ་ཞིང་ཕོངས། འགའ་རེ་ཚེ་རིང་ནད་མེད་ཅི་བསམ་ལམ་ལ་འགྲོ། གང་འདོད་ཐོག་ལ་ཁེལ་བ། འགའ་རེ་ཚེ་ཐུང་ནད་མང་མི་འདོད་སྣ་དགུ་འདི་མི་ཡོང་བསམ་རྒྱུ་མེད་པ་ཡོང་བ་ཡང་ཡོད་པ་ཡིན། དེ་ཚོ་ལ་བལྟས་ཡོང་ན་སྔ་མ་གང་བྱས་དེ་ད་ལྟའི་ལུས་དང་། ཕྱི་མ་ཅི་ཡོང་དེ་ད་ལྟའི་ལས་ཀྱིས་འབྱེད་པ་ནི་རྒྱུ་དང་འབྲས་བུའི་འགྲོ་ལུགས། བསྒྱུར་རྒྱུ་བསྣོག་རྒྱུ་མེད་པ་མིག་རིག་ལག་ཐོགས་སུ་ཡོད་པ་སྟེ། དེ་ལ་སོགས་པའི་ལས་འབྲས་ཕྲ་ཞིབ་ཀྱི་དབྱེ་བ་ཤིན་ཏུ་ཞིབ་ཅིང་ཕྲ་བ་མདོ་དང་བསྟན་བཅོས་ཀྱི་ནང་ནས་གསུངས་པ་ནི། རང་གཞན་ཚང་མས་རྒྱུན་མཐོང་ངག་འདོན་ལྟ་བུར་ཆགས་ཡོད་ཀྱང་། གོ་མྱོང་དང་མ་མྱོང་། ཡང་ཟེར་ཤེས་དང་མི་ཤེས་ཤིག་གི་གནད་འགག་མ་ཡིན་པར། དེ་ལ་སེམས་ཀྱི་སྟེང་ནས་ངེས་ཤེས་བསྐྱེད་ནས་ཡིད་ཆེས་བློ་ཐག་ཆོད་པའི་རྩ་བ་ངེས་འབྱུང་ཞིག་མ་སྐྱེས་དུས་ཆོས་རྣམ་པར་དག་པ་ཞིག་མི་འགྲུབ་པའི་ཚིག་མཚམས་དེ་ནས་འཕྲོད་པ་ཡིན་པས། རྒྱུ་འབྲས་ལ་ཡིད་ཆེས་ཨེ་ཡོད་ངེས་འབྱུང་གིས་ཤེས་པ་དང་། ངེས་འབྱུང་ངོ་མ་ཨེ་ཡོད་ཆོས་བརྒྱད་འདིར་སྣང་གི་ཞེན་པ་ཆོད་མ་ཆོད་ཀྱིས་ཤེས་པ་རེད། འཇིག་རྟེན་འདིར་སྣང་གི་བདེ་སྐྱིད་སྙན་གསུམ་རྙེད་བདེ་གྲགས་བསྟོད་བཞི་བོ་ལ་མི་དགའ་ཞིང་མི་འདོད་པ་ཞིག་འདོད་པའི་ཁམས་འདིར་མེད་ཀྱང་། མངར་ཆས་བཏུམས་པའི་དུག་གི་རིལ་བུ་ཟ་མི་ཕོད་པ་དང་། ད་ལྟ་ཤན་པས་སྐེ་རྩ་གྲི་ཡིས་བཅད་རྒྱུ་ཅན་ཞིག་ལ་རྒྱལ་པོའི་སྲིད་འབྱོར་ཁྱོད་ལ་སྦྱིན་ཟེར་རུང་ཡི་ག་མེད་པ་དང་། ཤི་གསོན་གཉིས་ཀྱི་སོ་མཚམས་ནས་འཆི་མེད་ཚེའི་རིལ་བུ་ཞིག་གཅིག་གིས་བྱིན་ན་དང་དུ་མི་ལེན་པ་ནི་མི་སྲིད་པའི་དཔེ་དང་། སྡར་མའི་པང་ལ་སྦྲུལ་ཞུགས་པ་དང་། སྒེག་མོའི་མགོ་ལ་མེ་ཤོར་པའི་དཔེ་དང་མཐུན་པའི་ངེས་འབྱུང་གི་བློ་སྣ་དྲག་པོ་མདུང་ཐུང་བྲང་ཁ་རུ་ཚད་ཀྱང་ཕྱིར་གྱེད་མི་བྱེད་པར་ཆོས་ལ་འཇུག་པའི་ཚད་ལ་མ་ཐོན་དུས། ཆོས་འགྲུབ་ཅེས་པ་ནི་སྟོང་གཏམ་ཁ་བཤད་རྐྱང་པ་ཞིག་ལ་འགྱུར་འགྲོ་བ་དང་། ཆོས་མེད་ལག་སྟོང་དུ་ལྷུང་ནས། མིག་མཆི་མ་ཙ་རེ་གཤིན་རྗེའི་གྲོང་སྒོ་ལ་གློ་བུར་དུ་འགྲིམ་དགོས་པའི་ཉིན་མ་ཚེས་ནས། སྡུག་པ་དང་ཕུང་བ་གཉིས་ཀས་མ་ཚད་ཡིད་འགྱོད་རྟས་མི་བསླེབ་པ་དང་གསུམ་པོ་མཉམ་དུ་བྱུང་དུས། གཞན་དོན་མ་དགོས་རང་དོན་ཉི་ཚེ་བ་ཞིག་ཀྱང་འགྲུབ་མེད་པ་ཡིན་ནོ་ཞེས་པའི་གྲོས་གླེང་གི་གཏམ་མཇུག་འཚོས་པ་དང་བཅས་ཏེ། སྐབས་བབས་གང་ཞིག་འཆད་པར་བྱ་བ། ཆོས་དབྱིངས་རིན་པོ་ཆེའི་མཛོད་ཀྱི་འགྲེལ་བ་ལུང་གི་གཏེར་མཛོད་འདི་ཉིད་རེད། འདིའི་ཐོག་མར་དགེ་བ་ཀླད་ཀྱི་དོན་སོང་ཞིང་། བར་དུ་དགེ་བ་གཞུང་གི་དོན་ལས་ཀྱང་། ལེའུ་གསུམ་པ་ཡན་ཆད་སོང་ནས། ལེའུ་གསུམ་པས་ནི་རང་བཞིན་བྱང་ཆུབ་སེམས་ཀྱི་དཔེས་ཉེ་བར་མཚོན་པ་གཙོ་བོ་བྱས་ཏེ་བསྟན་ནས།
བྱང་ཆུབ་སེམས་ཀྱི་རང་བཞིན་བསྟན་པ་སྟེ་ལེའུ་བཞི་པའི་འགྲེལ་པ།
ལེའུ་བཞི་བ་བྱང་ཆུབ་སེམས་ཀྱི་རང་བཞིན་བསྟན་པའི་ལེའུ་བསྟན་པ་ལ། རིག་པ་བྱང་ཆུབ་ཀྱི་སེམས་ཀྱི་རང་བཞིན་ངེས་པ་སྤྱིར་བསྟན་པ་དང་། རང་བཞིན་གྱིས་དག་ལ་གདལ་བ་ཆོས་ཉིད་དུ་རྫོགས་པའི་ངོ་བོ་ཉིད་བྱེ་བྲག་ཏུ་བསྟན་པ་དང་། ཀུན་ཁྱབ་ཐིག་ལེ་ཉག་གཅིག་ཏུ་འདུས་པས་འགག་བསྡམས་ནས་དེ་ལྟ་བུའི་དབྱིངས་དེ་ཀུན་ལ་ཡོད་ཀྱང་སྐལ་ལྡན་འགའ་ཡི་ཡུལ་དུ་བསྟན་པས་སྒོམ་པའི་འཕྲང་བསལ་བ་དང་། སྣང་སྲིད་ཞིང་ཁམས་སུ་གནས་པས་བླང་དོར་བཟང་ངན་མེད་པར་བསྟན་པ་ནང་གསེས་དང་བཅས་པ་དང་། ལེའུའི་དོན་མཁའ་ཀློང་ཡངས་པ་ཆེན་པོར་བསྡུ་བ་སྟེ་ལྔ་ལས།
༼ཀ༽དང་པོ་རིག་པ་བྱང་ཆུབ་སེམས་ཀྱི་རང་བཞིན་ངེས་པ་སྤྱིར་བསྟན་པ།
དེ་ལྟར་དཔེས་ཉེ་བར་བསྟན་པས་དོན་ཁོང་དུ་ཆུད་པའི་ཕྱིར་ན། རིག་པ་བྱང་ཆུབ་སེམས་ཀྱི་རང་བཞིན་ངེས་པ་ནི།
ཀུན་འདུས་བྱང་ཆུབ་སེམས་ཀྱི་རང་བཞིན་ནི།།
སྣང་བ་མ་ཡིན་སྣང་བའི་ཆོས་ལས་འདས།།
སྟོང་པ་མ་ཡིན་སྟོང་པའི་ཆོས་ལས་འདས།།
ཡོད་པ་མ་ཡིན་དངོས་པོ་མཚན་མ་མེད།།
མེད་པ་མ་ཡིན་འཁོར་འདས་ཀུན་ལ་ཁྱབ།།
ཡོད་མེད་མ་ཡིན་ལྷུན་མཉམ་གདོད་མའི་དབྱིངས།།
ཕྱོགས་དང་རིས་མེད་གཞི་རྩ་དངོས་པོ་མེད།།
ཅེས་གསུངས་ཏེ། རིག་པའི་ངོ་བོ་ལ་བསམ་བརྗོད་སྤྲོས་པའི་མཐའ་དང་བྲལ་བས་ཡོད་མེད་ཀྱི་ཡུལ་དུ་མ་གྲུབ་ལ། འཁོར་འདས་ཀུན་ལ་ཡེ་ནས་ཁྱབ་པ་སྟེ། རང་ཤར་ལས། སྐྱེ་བ་མེད་པས་འགག་པ་མེད། །འཛིན་པ་མེད་པས་རང་སར་གྲོལ། །དམིགས་པ་མེད་པས་སྤྲོས་པ་མེད། །བྱས་པས་མ་བྱུང་ཀུན་ལ་ཡོད། །འདུས་མ་བྱས་པས་རྣམ་དག་དབྱིངས། །འཛིན་པའི་ཐ་སྙད་ཆོས་དང་བྲལ། །རང་བཞིན་མེད་པས་བརྗོད་དང་བྲལ། །ཡང་དག་ཆོས་ཉིད་རིག་པའི་ཀློང་། །ཀུན་ལ་ཁྱབ་པས་ཡབ་ཀྱི་ངང་། །ཐམས་ཅད་བསྐྱེད་པས་ཡུམ་གྱི་དབྱིངས། །བརྗོད་དུ་མེད་པའི་ཤེས་རབ་ལ། །བསྟན་དུ་མེད་པའི་ལུང་ཆེན་གནས། །བཏང་གཞག་བྲལ་བའི་ཆོས་སྐུ་ལ། །དམིགས་པ་མེད་པའི་ཏིང་འཛིན་གསལ། །འདུས་མ་བྱས་པའི་ཀློང་དཀྱིལ་ནས། །རིག་པའི་རྒྱལ་པོ་ཡེ་ཤེས་འཕྲོ། །སྐྱེ་འགག་མེད་པའི་ཀློང་དཀྱིལ་ནས། །རང་བྱུང་ཤེས་རབ་མིག་གསལ་བ། །ཀུན་ལ་ཁྱབ་པའི་ཉག་གཅིག་ཡིན། །ཞེས་སོ། །ཡུལ་མེད་ཀུན་ཁྱབ་ཀུན་འདུས་བྱང་ཆུབ་སེམས་ཀྱི་རང་བཞིན་དེ་ནི། རིག་ངོར་སྣང་བ་ཕྱི་ཡུལ་གྱི་ཆོས་ཐམས་ཅད་མེད་པ་གསལ་སྣང་གཟུགས་བརྙན་ལྟར་སྟོང་པས་ན་སྣང་བ་མ་ཡིན་ལ་སྣང་བའི་ཆོས་ལས་ཀྱང་འདས་པ་ཞིག་དང་། ནང་གི་ཆོས་ཐམས་ཅད་བར་སྣང་གི་བྱ་རྗེས་ལྟར་དུ་འགྱུ་བ་གང་ཤར་རྗེས་མེད། སྟོང་པར་བཏགས་ཀྱང་སྟོང་བྱ་སྟོང་བྱེད་དང་བྲལ་བ་སྟོང་པ་མ་ཡིན་ཞིང་སྟོང་པའི་ཆོས་ལས་ཀྱང་རིང་དུ་འདས་ཤིང་། ཡོད་པར་སྨྲས་ཀྱང་དངོས་པོ་མཚན་མ་དང་བྲལ་བ། མེད་པར་སྨྲས་ཀྱང་འཁོར་འདས་ཀུན་ལ་ཁྱབ་པ། གཉིས་ཀ་གཉིས་མིན་སོགས་ཀྱི་མཐའ་ཐམས་ཅད་ལས་ཀྱང་འདས་ཤིང་ཡོད་མེད་ཀྱི་ཡུལ་དུ་མ་གྲུབ་པའི་ཕྱིར་ན། དེ་ལྟར་ཡོད་མེད་ཡིན་མིན་དངོས་མཚན་ཐམས་ཅད་དང་བྲལ་བ། ལྷུན་མཉམ་ཕྱོགས་དང་རིས་མེད་པ་གཞི་རྩ་དངོས་པོ་མེད་པ་དེ་ལྟ་བུ་ཡི་གདོད་མའི་དབྱིངས་ཞེས། ཀུན་ཁྱབ་འདུས་མ་བྱས་ཀྱི་དབྱིངས་ཐིག་ལེ་ཉག་གཅིག་ཏུ་སྤྱིར་བསྟན་པའོ།།
༼ཁ༽གཉིས་པ་བྱེ་བྲག་རང་བཞིན་གྱིས་དག་ལ་གདལ་བ་ཆོས་ཉིད་དུ་རྫོགས་པའི་ངོ་བོ་ཉིད་དུ་བསྟན་པ།
རང་བཞིན་གྱིས་དག་ལ་གདལ་བ་ཆོས་ཉིད་དུ་རྫོགས་པའི་ངོ་བོ་ཉིད་ནི།
རྒྱུན་ཆད་མེད་པས་རིག་པ་བྱང་ཆུབ་ཀློང་།།
འཕོ་དང་འགྱུར་མེད་མཁའ་དབྱིངས་ཡེ་ནས་གདལ།།
རང་བྱུང་ཡེ་ཤེས་དཔེ་ཟླ་མེད་པའི་དོན།།
མི་སྐྱེ་མི་འགག་ཐིག་ལེ་གཅིག་ཏུ་འདུས།།
མ་ངེས་ཀུན་ཁྱབ་ཕྱོགས་མཐའ་ཡོངས་ཀྱི་མེད།།
ཅེས་གསུངས་ཏེ། དབྱིངས་རང་བྱུང་གི་ཡེ་ཤེས་ནི་ལྷུན་གྲུབ་གདལ་ཁྱབ་ཆེན་པོ། ཀུན་འདུས་རྒྱུན་ཆད་མེད་པའི་ངོ་བོ་སྟེ། དཀྱིལ་འཁོར་ཡིད་བཞིན་གཏེར་གྱི་འབྱུང་གནས་སུ་ཡེ་ནས་གནས་པ་ནི། ནོར་བུ་ཕྲ་བཀོད་ལས། སྐུ་གཅིག་སེམས་ཅན་ཀུན་ལ་སྣང་། །སྐུ་གཅིག་འགྲོ་དོན་མཐར་ཕྱིན་པ། །སྐུ་གཅིག་སྣང་བ་ཀུན་ཏུ་སྟོན། །སྐུ་གཅིག་མཐའ་ལ་མི་གནས་པ། །རྡོ་རྗེ་སྙིང་པོ་ཡེ་ཤེས་སྐུ། །བསམ་གཏན་སྙིང་པོ་ཚིག་ལས་འདས། །མངོན་པར་བྱང་ཆུབ་སྐུ་ཉིད་གསལ། །ཡེ་ཤེས་གཅིག་ཆོད་གཉིས་སྣང་བྲལ། །རྡོ་རྗེ་འཛིན་སྐུ་དོན་མི་འགྲུབ། །མཐའ་གཉིས་མི་གནས་རང་གསལ་ཆེ། །ཕྱག་རྒྱའི་རྡོ་རྗེ་འགྱུར་བ་མེད། །མི་བསྐྱོད་དཀྱིལ་འཁོར་ལས་བྱུང་བའི། །ཡང་དག་གཞུང་ཉིད་རབ་བརྟན་སྐུ། །ཐིག་ལེ་སྣ་ཚོགས་སྐུ་ཡི་དབྱིག །མཚོན་ལྡན་དཀྱིལ་འཁོར་སྐུ་གསུམ་རྫོགས། །བྱ་བྱེད་མེད་པས་དབྱིངས་དང་ལྡན། །གཅིག་ལས་མི་གཡོ་ཆོས་ཀྱི་སྐུ། །གཉིས་སུ་མ་ཡིན་རང་སྣང་ཡུལ། །དོན་དམ་ཀུན་རྫོབ་གཉིས་ལས་འདས། །འཛིན་པའི་མཐའ་གཉིས་རྣམ་པར་སྤངས། །དཀྱིལ་འཁོར་རྡོ་རྗེ་ཡིད་བཞིན་གཏེར། །མཐའ་ལ་མི་གཡོ་མཉམ་པའི་ངང་། །གོལ་སྒྲིབ་གཉིས་ཀྱི་རྟོག་པ་སངས། །བྱས་པས་མ་བྱུང་ཆོས་ཀྱི་སྐུ། །བཟུང་བས་མི་ཟིན་ཆུ་ཟླ་འདྲ། །ཐུགས་རྗེ་ཐབས་ལ་རང་སྣང་བས། །ཉི་མ་དང་ནི་ཟེར་བཞིན་དུ། །ཤེས་རབ་རྩལ་གྱིས་རབ་གནས་པས། །དོན་གྱི་དཀྱིལ་འཁོར་སྣང་མཐའ་ཡས། །སྐུ་ཡི་སེམས་ཉིད་སྟོང་བདག་མེད། །ཡེ་ཤེས་ཕུང་པོ་སྐྱེ་འཇིག་བྲལ། །བསམ་འདས་ཆོས་ཉིད་ཞི་བ་སྟེ། །སྣང་བ་མཐའ་ཡས་ཞིང་དུ་གྲོལ། །རང་བྱུང་སྐུ་ཉིད་རྣམ་པར་དག །སྟོང་པ་ཉིད་ཀྱི་དམ་ཚིག་ལས། །རིག་པའི་ཡུལ་དུ་རྣམ་པར་སྣང་། །ཞེས་སོ། །སྐྱེ་མེད་ཀྱི་ཀློང་ནས་འགག་མེད་དུ་གསལ་ཞིང་། ཕྱི་ནང་བར་མེད་ཟང་ཐལ་ནམ་མཁའ་དང་འདྲ་བའི་དབྱིངས་རང་བྱུང་གི་ཡེ་ཤེས་རྒྱུན་ཆད་མེད་པའི་རིག་པ་བྱང་ཆུབ་ཀྱི་ཀློང་ཆེན་པོ་དེ་ཉིད། ཡངས་ཤིང་འཕོ་འགྱུར་མེད་པ་ལྷུན་གྲུབ་གདལ་ཁྱབ་ཆེན་པོའི་མཁའ་དབྱིངས་སུ་ཡེ་ནས་གདལ་བས་ན་སྣ་ཚོགས་ཕྱི་ནང་གི་ཆོས་ཐམས་ཅད་སྣང་བའི་འབྱུང་གནས་ཡིན་ལ། ཀུན་འདུས་ཡིད་བཞིན་གྱི་གཏེར་རང་བྱུང་དཔེ་ཟླ་མེད་པའི་ཡེ་ཤེས་སུ་གནས་པའི་དོན་དེ། མི་སྐྱེ་མི་འགག་ཐིག་ལེ་གཅིག་ཏུ་འདུས་པའི་རྡོ་རྗེའི་ཆིངས་ཀྱིས། མ་ངེས་ཀུན་ལ་ཁྱབ་ཅིང་ཕྱོགས་མཐའ་ཡོངས་ལ་རིས་སུ་མ་ཆད་པར་ཕྱོགས་སུ་ལྷུང་བ་མེད་པ་གཅིག་ལས་ཀུན་ཤར་ཞིང་། ཀུན་ཀྱང་རང་བྱུང་རྣམ་པར་དག་པའི་རིག་དབྱིངས་གདལ་བ་ཆོས་ཉིད་ཀྱི་ངོ་བོ་གཅིག་པོ་དེར་རྫོགས་པར་བསྟན་པའོ།།
༼ག༽གསུམ་པ་དེ་ལྟ་བུའི་དབྱིངས་ཀུན་ལ་ཡོད་ཀྱང་སྐལ་བ་ཅན་འགའི་ཡུལ་དུ་བསྟན་པ།
དེ་ལྟ་བུའི་དབྱིངས་ཀུན་ལ་ཡོད་ཀྱང་སྐལ་བ་ཅན་འགའི་ཡུལ་དུ་བསྟན་པ་ནི།
ལྷུན་མཉམ་མི་གཡོ་རྡོ་རྗེ་སྙིང་པོའི་གདུང་།།
འདུ་འབྲལ་མེད་པའི་དབྱིངས་མཆོག་རབ་འབྱམས་འདི།།
ཚིག་གིས་མཚོན་པའི་སྤྱོད་ཡུལ་མ་ཡིན་ཏེ།།
ཤེས་རབ་ཀློང་རྡོལ་སོ་སོ་རང་རིག་ཡུལ།།
བསམ་བརྗོད་སྤྲོས་དང་བྲལ་བའི་རྣལ་འབྱོར་པས།།
མཚོན་དང་མི་མཚོན་མེད་པར་ཐག་བཅད་དེ།།
སྒོམ་དང་བསྒོམ་པར་བྱ་བ་མ་རྙེད་པས།།
བྱིང་རྒོད་རྣམ་རྟོག་དགྲ་བོ་བསད་མ་དགོས།།
ཞེས་གསུངས། རིག་པའི་རང་ངོ་ལྟ་སྒོམ་རྩོལ་སྒྲུབ་ལས་འདས་པ་ནི་རྡོ་རྗེ་སྙིང་པོའི་གདུང་སྟེ། འདུ་འབྲལ་མེད་པའི་དབྱིངས་མཚོན་བརྗོད་ལས་འདས་པའི་རང་བཞིན་ནི། སོ་སོ་རང་རིག་ཡེ་ཤེས་ཀྱི་ཡུལ་ལས་བསམ་བརྗོད་སྤྲོས་པའི་ཡུལ་མ་ཡིན་ཏེ། རྨད་བྱུང་རྒྱལ་པོ་ལས། བསམ་དུ་མེད་པའི་ཆོས་ཉིད་བྱང་ཆུབ་སེམས། །བསམ་དང་བརྗོད་པས་གཏན་ལ་ཕེབས་པ་མེད། །ཅེས་པ་དང་། རྡོ་རྗེ་གཅོད་པ་ལས། ཆོས་ཉིད་ཤེས་བྱ་མ་ཡིན་ཏེ། །དེ་ནི་ཤེས་པར་ནུས་མ་ཡིན། །ཞེས་སོ། །འདིའི་འགྲེལ་བའི་ཚིག་ལུང་འདྲེན་གཉིས་དང་བཅས་པས་རྩ་བའི་ཚིག་རྐང་བརྒྱད་པོའི་ནང་གི་སྔོན་མ་གསུམ་གྱི་དོན་བཀྲལ་བ་སྟེ། རིག་པ་བྱང་ཆུབ་སེམས་ཀྱི་རང་ངོ་ཆོས་ཉིད་རྣམ་པར་དག་པའི་ལྷུན་མཐོ་བ། ཐེག་དགུའི་ཡང་རྩེའི་ཀུན་འདུས་ཀུན་བཟང་དགོངས་པའི་ཀློང་ཆེན་པོ། འཁོར་འདས་ཡོངས་ལ་ཁྱབ་ཅིང་བཟང་ངན་མཉམ་པར་གདལ་བ་ཡེ་ནས་མི་གཡོ་འཕོ་འགྱུར་རྩོལ་སྒྲུབ་དང་བྲལ་ཞིང་བྱ་བྱེད་བྱས་ཆོས་ལས་འདས་པ་དེ་ནིི་རྡོ་རྗེ་སྙིང་པོའི་གདུང་ངམ་བདེ་བར་གཤེགས་པ་ཀུན་གྱི་ཐུགས་བཅུད་འགྱུར་མེད་དོན་གྱི་གནས་ལུགས་ཀྱི་རང་ཞལ་ཡིན། དེ་ནི་སྟོང་པ་གསལ་བའི་སྙིང་པོ་ཅན་སྟོང་གསལ་འདུ་འབྲལ་མེད་པའི་ཆོས་ཀྱི་དབྱིངས་རྣམ་པ་ཀུན་གྱི་མཆོག་དང་ལྡན་པ། ལྷུན་གྲུབ་རབ་ཏུ་འབྱམས་ཤིང་ཕྱོགས་མེད་མཐའ་བྲལ་གྱི་ཀློང་ཆེན་པོར་འདུས་པ་འདི་ཚིག་གིས་མཚོན་པའི་སྤྱོད་ཡུལ་མ་ཡིན་ཏེ་ཞེས་པའི་རྣམ་གཅོད་ཀྱིས་འདུ་འབྲལ་མེད་པའི་དབྱིངས་འདི་ཚིག་གིས་མཚོན་བརྗོད་ལས་འདས་པར་བསྟན་ནས། ཡོངས་གཅོད་དུ་ཤེས་རབ་ཀློང་རྡོལ་སོ་སོར་རང་རིག་པའི་ཡུལ་ཡིན་པའི་ཚུལ་ཚིག་འོག་མ་དག་དང་ཁྱད་པར་དུ་ཚིག་རྐང་བཞི་བས་བསྟན་པ་སྟེ་དེའི་སྒྲུབ་བྱེད། སོ་སོ་རང་རིག་པའི་ཡུལ་ཡིན་ཏེ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཞེས་པ་བཞིན་ནོ། །འདི་ལ་ཡང་རིགས་པ་ཁ་ཕྱིར་བལྟས་ཀྱི་ཚིག་ལ་འཆེལ་བའི་བཤད་པའི་ཁུར་འཛིན་གྱི་སློབ་དཔོན་གཞན་དག་ཆོས་ཉིད་དེ་ཡོངས་གཅོད་ལ་ཤེས་བྱ་མ་ཡིན་ཏེ་བསམ་བརྗོད་ལས་འདས་པའི་ཕྱིར་རོ། །རྣམ་གཅོད་ལ་ཤེས་བྱ་ཡིན་ཏེ་བདེན་པ་གཟིགས་པ་རྣམས་ཀྱི་ཡུལ་དུ་བྱར་རུང་བའི་ཕྱིར་རོ་ཞེས་པའང་ཁ་ཕྱིར་བལྟས་འཆད་པ་ནི་མ་མཐོང་རྒྱང་གི་གཏམ་རྒྱུད་ལོང་བའི་ལམ་སྟོན་དོན་གྱི་མྱོང་བ་རང་རྒྱུད་ལ་མེད་པའི་ཚིག་སྐམ་བཤད་ཡམ་ཙམ་ལས་འཐད་པར་མ་མཐོང་སྟེ། དོན་རང་ཐོག་ཏུ་མྱོང་བ་མེད་པའི་ཚིག་གོ །ཞེས་མཚོན་བརྗོད་ཀྱི་ཡུལ་ཡིན་པར་བཀག་ཅིང་། སྒྲུབ་བྱེད་ཀྱི་གཏན་ཚིགས་ནི་འདིར་ནི་བློས་བསམས་ན་སྤྲོས་པ་ཡིན་པས་དྲན་བསམ་གྱི་ཡུལ་མ་ཡིན་ཏེ། རྟོག་པ་དང་རྫས་འགལ་བའི་ཕྱིར་རོ། །བློས་བསམ་བརྗོད་མེད་པར་གནས་དུས་དོན་རང་ཐོག་ཏུ་ཕེབས་པས་རང་རིག་པའི་ཡུལ་ཡིན་ཏེ། རིག་པའི་ངོ་བོ་ཆོས་ཉིད་དོན་དམ་དུ་གནས་པ་ཉིད་དུས་དེར་མངོན་དུ་གྱུར་པའི་ཕྱིར་རོ། །དོན་དེ་ཉིད་རང་བབས་ལྷུན་གྲུབ་ཆེན་པོར་རྟོགས་པའི་གང་ཟག་ནི་ཡང་རབ་རྡོ་རྗེ་སྙིང་པོའི་གདུང་འཛིན་པ་སྟེ། ཆོས་ཉིད་དང་མཐུན་པར་གང་ཟག་དེ་ཡང་བྱ་བྲལ་འབད་རྩོལ་ཞིག་པའི་རྣམ་པ་སྟེ། ཁྱུང་ཆེན་ལས། རང་བཞིན་ཡོད་མེད་བརྟག་དཀའི་སེམས་ལ་རེག་ནུས་ཤིང་། །མ་བསམས་འཁྲུལ་བ་ཞིག་པའི་ཡེ་ཤེས་ཉིད། །བྱ་བྲལ་གླེན་པའི་ཤུགས་འཆང་བློ་བདེ་བ། །སྤྲོས་མེད་ནམ་མཁའི་ཡིད་ཅན་རྣམས་ཀྱིས་བྱོས། །ཞེས་པ་དང་། ཐལ་འགྱུར་ལས། ཡང་ན་ངང་རིང་ཤུགས་དལ་བ། །ལྷུག་པ་གླེན་པའི་ལྷོད་ཡོད་པ། །རྟོག་པ་ཆུང་ཞིང་རང་བཞིན་དལ། །ལུས་ངག་བྱ་བ་བྲལ་བ་དང་། །ཤེས་རབ་ལྡན་པས་འཛིན་པར་འགྱུར། །ཞེས་སོ། །ཤེས་རབ་ཀློང་རྡོལ་སོ་སོར་རང་རིག་ཡུལ་ཞེས་པའི་ཤེས་རབ་འདི་ཅི་ཞིག་ལ་གོ་དགོས་ན། འཇམ་དཔལ་ལས། ཤེས་རབ་ཆེན་པོས་སྐད་ཅིག་ལ། །ཆོས་ཀུན་ཁོང་དུ་ཆུད་པ་འཆང་། །ཞེས་པའི་ཤེས་རབ་སྟེ་སངས་རྒྱས་ཀྱི་སོ་སོར་རང་རིག་པའི་ཡེ་ཤེས་ཡིན་ཞིང་། གོང་ནས་ཡུམ་བསྟོད་ཀྱི་ལུང་གིས་བསྟན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དེ་དང་རྫོགས་པ་ཆེན་པོ་དོན་གཅིག་པ་སྟེ། ཀུན་མཁྱེན་འཇིགས་གླིང་གིས། རྒྱལ་བས་འཁོར་ལོ་བར་པར་རྣམ་ཐར་གསུམ། །བསྟན་བྱའི་ངོ་བོ་སོ་སོ་རང་རིག་ཉིད། །སེམས་ཅན་ཁམས་ལ་བདེ་གཤེགས་སྙིང་པོ་རུ། །རང་བཞིན་བཞུགས་ལ་རྫོགས་པ་ཆེན་པོར་གྲགས། །ཞེས་གསུངས་པ་ལྟ་བུའོ། །བསམ་བརྗོད་སྤྲོས་པ་དང་བྲལ་བའི་དོན་མངོན་དུ་གྱུར་པའམ་དེ་ཉིད་ཇི་བཞིན་དུ་འབྱེད་པའི་རྣལ་འབྱོར་པ་ནི། ཁྱུང་ཆེན་དང་ཐལ་འགྱུར་གྱི་ལུང་དོན་ལྟར་དུ་སྤྲོས་མེད་ནམ་མཁའི་ཡིད་ཅན་ཤེས་རབ་དང་ལྡན་པ་སྟེ། དབང་རྣོན་རབ་ཏུ་གྱུར་པའི་རྣལ་འབྱོར་པ། དེ་ལ་ཡང་ནང་ཚན་གྱིས་དབྱེ་ན། རྒྱུད་རང་ཤར་ལས་གསུངས་པའི་ལུས་སེམས་ཕྱེད་པའི་རྣལ་འབྱོར། ལུང་བསྟན་ཐོབ་པའི་རྣལ་འབྱོར། དབུགས་ཆེན་འབྱིན་པའི་རྣལ་འབྱོར། རྩལ་ཆེན་རྫོགས་པའི་རྣལ་འབྱོར་རྣམས་ལ་གོ་དགོས་ཤིང་། དེ་ལྟ་བུའི་སོ་སོར་ཡང་དག་གི་གནས་ལུགས་ཇི་བཞིན་དུ་རང་གིས་རིག་པའི་རྣལ་འབྱོར་པ་ལ་བྱིང་རྒོད་དང་གོལ་སྒྲིབ་མེད་པས་འཕྲང་རང་བཞིན་གྱིས་སེལ་བ་དེ་ཚིག་རྐང་འོག་མ་བཞི་ཡིས་བསྟན་པའོ། །རིག་པའི་ངོ་བོ་ཤེས་ནས་རིག་པ་ཉིད་རང་སོར་གནས་སམ། འཆར་རམ། བྱིང་རྒོད་ལ་སོགས་པ་ཅི་བྱུང་ཡང་རང་བྱུང་གི་ཡེ་ཤེས་ཉིད་ཀྱི་ངོ་བོ་དང་རོལ་བ་ཙམ་ལས། གོལ་སྒྲིབ་ལོགས་སུ་བསལ་དུ་མེད་དེ། གོལ་སྒྲིབ་དེ་ཉིད་རིག་པ་མ་གཏོགས་པ་གཞན་གཅིག་བྱུང་བ་མེད་ལ། རིག་པ་ཡེ་ནས་ཆོས་སྐུ་བྱ་བྲལ་ལྷུན་གྲུབ་ཆེན་པོར་གནས་པས། རིན་པོ་ཆེ་གསེར་གླིང་དུ་ཕྱིན་དུས་གསེར་ལས་མ་གཏོགས་པའི་ས་རྡོ་ངན་པ་བཙལ་ཀྱང་མི་རྙེད་པ་བཞིན་ནོ། །ཀུན་བྱེད་ལས། ཀྱེ་སེམས་དཔའ་ཆེན་པོ་ཉོན་ཅིག སྔ་རབས་འདས་པའི་སངས་རྒྱས་རྣམས་ཀྱིས་ཀྱང་། །རང་གི་སེམས་ལས་གཞན་དུ་ཆོས་བཙལ་མེད། །ཇི་བཞིན་པ་ལ་འཆོས་པར་བྱེད་མ་མྱོང་། །ཏིང་འཛིན་རྣམ་པར་རྟོག་པ་སྒོམ་མ་མྱོང་། །རང་སེམས་མི་རྟོག་པ་ཡིས་གྲུབ་པ་ཡིན། །ད་ལྟར་བཞུགས་དང་སླད་ཀྱིས་འབྱོན་པ་ཡང་། །རྟོག་མེད་མཉམ་པ་ཉིད་ཀྱིས་འགྲུབ་པར་འགྱུར། །ཞེས་པ་དང་། བདེ་ཆེན་གདལ་བའི་ཆོས་ཉིད་ཀློང་དཀྱིལ་ན། །མི་རྟོག་མཉམ་པ་ཆེན་པོའི་རང་བཞིན་གནས། །ཆོས་ཉིད་སྣང་བ་མེད་པའི་རང་བཞིན་ལ། །རིག་པས་མི་རྟོག་ཏིང་འཛིན་མ་བྱེད་ཅིག །ངང་ལ་གནས་པས་གཡོ་མེད་ལྷུན་གྱིས་གྲུབ། །རང་བཞིན་གནས་པས་སུས་ཀྱང་བཅོས་སུ་མེད། །མ་བཙལ་ཇི་བཞིན་པ་རུ་གནས་པ་དེ། །བྱ་བ་མེད་པ་ལས་ཀྱི་མཆོག་ཏུ་བསྟེན། །ཞེས་སོ། །རང་གནས་ཀྱི་བསམ་གཏན་ལ་བྱིང་རྒོད་མི་སྲིད་དེ། རིན་པོ་ཆེ་སྤུངས་པ་ལས། རང་བཞིན་བསམ་གཏན་བར་མེད་ལ། །བྱིང་རྒོད་མེད་པ་ཡ་རེ་མཚན། །ཞེས་གསུངས་སོ། །རང་བབས་ལྷུན་གྲུབ་ཀྱི་བསམ་གཏན་མ་བསྒོམས་ཆུ་བོའི་རྒྱུན་དུ་ཤེས་པ་དེ་ལ་གང་ཡང་ཆོས་ཉིད་དུ་འཆར་བས་གོལ་སྒྲིབ་དང་བྱིང་རྒོད་དང་ཡེང་དང་མ་ཡེངས་མེད་དེ་ཡེང་ཡུལ་ཆོས་ཉིད་ཀྱི་རོལ་བར་ཤར་བའི་ཕྱིར་རོ། །དེ་ལས་གཞན་པའི་སྒོམ་ཆེན་གྱི་རིག་པ་རྩེ་གཅིག་ཏུ་མ་ཡེངས་པའི་ངང་བསྒོམས་ཀྱང་། བསམ་གཏན་གཟུགས་མེད་དུ་འཁོར་བའི་བརྟོད་ཕུར་ལས། སངས་རྒྱ་བ་ལ་སྔ་འདྲེས་གཅིག་གིས་ཉེར་མ་སོང་སྟེ། དཔེར་ན་དེང་སང་གི་ཞི་བྱེད་པ་ཁ་ཅིག་བཞིན་ནོ། །ཀུན་བྱེད་ལས། རང་གམ་བཞག་ནས་གཞན་མ་རྒྱང་དུ་ཚོལ། །བྱར་མེད་བདེ་བོར་རྩོལ་བ་དང་དུ་ལེན། །ཚི་ཆད་ནད་དུ་དེ་ལས་ཆེ་བ་མེད། །མ་ཡེངས་ཏིང་འཛིན་འཛིན་པའི་བརྟོད་ཕུར་ཡིན། །ཡེ་ནས་ཡིན་ལ་ཡེང་མེད་ཤོར་བ་མེད། །མ་ཡེངས་ཏིང་འཛིན་རེ་བའི་བསླུ་མཁན་དེས། །རྒྱུ་འབྲས་ཐེག་ཆེན་དྲང་བའི་ལུང་བསྟན་ཡིན། །ཡེ་ནས་ཡིན་པས་ཡེང་མེད་ཤོར་མེད་དེ། །བྱར་མེད་རྩོལ་སྒྲུབ་ཀུན་ལས་འདས་པ་ཡིན། །ཞེས་སོ། །རིམ་བརྒྱུད་གདམས་པའི་ཉིང་བཅུད་དེ་བླ་མ་དམ་པའི་བྱིན་རླབས་ཀྱིས་རང་རྒྱུད་ལ་ཞུགས་ཚེ། རིག་པའི་ཡེ་ཤེས་སེམས་ཉིད་འོད་གསལ་བའི་ངོ་བོ་མཐོང་སྟེ། དེ་ཡང་སྨྲ་བསམ་བརྗོད་པ་ལས་འདས་པ་ནམ་མཁའ་ལྟར་མཐོང་བའི་དུས་དེར་སྔ་ཕྱི་རིས་མེད་བསལ་བཞག་ལས་འདས་པར་རྟོགས་པས་འཆིང་བ་ཀུན་ལས་གྲོལ་ཏེ། མངོན་རྟོགས་རྒྱན་ལས། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཅེས་སོ། །སེམས་ཉིད་གཤིས་ཀྱི་དོན་དེ་མཐོང་བ་ལ། །ཤེས་རབ་ཀྱི་ཕ་རོལ་ཏུ་ཕྱིན་པ་དང་། དབུ་མ་དང་། ཞི་བྱེད་དང་། ཕྱག་རྒྱ་ཆེན་པོ་དང་། རྫོགས་པ་ཆེན་པོ་ལ་སོགས་མིང་ཅི་བཏགས་ཀྱང་། དོན་ངོ་བོ་གཅིག་སྟེ་རིག་པ་གཡོ་མེད་སེམས་གཤིས་ཀྱི་གནས་ལུགས་བྱང་ཆུབ་ཀྱི་སེམས་ཀུན་བྱེད་ནམ་མཁའ་ལྟ་བུའོ། །གནས་ལུགས་མཐོང་བའི་ངོ་བོ་ནི་ཐེག་པ་དང་གྲུབ་མཐའི་ཡིད་དཔྱོད་ཀྱིས་མི་རྟོགས་ཏེ་ཚིག་དང་ཐ་སྙད་ཀྱི་ཡུལ་ལས་འདས་པའི་ཕྱིར་དང་། མོས་སྒོམ་དོན་སྤྱིའི་ཡུལ་ལས་འདས་ཏེ་བློ་བྲལ་གཉིས་མེད་ནམ་མཁའ་ལྟར་བསམ་བརྗོད་ལས་འདས་པའི་ཕྱིར་ན་རིན་པོ་ཆེ་གསེར་གླིང་ལ་ཐོན་དུས་ས་རྡོ་ཕལ་བ་བཙལ་ཀྱང་རྙེད་དུ་མེད་པ་བཞིན་དུ། རིག་པ་ཆོས་སྐུའི་རང་ཞལ་མཇལ་དུས་མ་རྟོག་གོལ་སྒྲིབ་དང་། བྱིང་རྒོད་ཀྱི་འཕྲང་ཞིག་ཡོད་དོན་མེད་དེ། ཀུན་བཟང་ཀློང་ན་མི་བཟང་གཅིག་ཀྱང་མེད། །ཅེས་པ་ལྟར་ཡིན་ལ། རྩེ་གཅིག་རེ་དོགས་ཀྱི་གཞུར་ལ་དྲངས་པའི་བསམ་གཏན་དེ། སྟོང་པར་གོལ་ན་གཟུགས་མེད། གསལ་བར་གོལ་ན་གཟུགས་ཁམས་སོགས་ཀྱི་གཟུང་འཛིན་སེམས་ཀྱི་རྟོད་ཕུར་ལས་འདའ་བ་མིན་པས། བྱར་མེད་རྩོལ་སྒྲུབ་བྲལ་བའི་གནས་ལུགས་དེ་རང་གི་འཁྲིས་སུ་བཞག་ནས་གཞན་དུ་མ་ཚོལ་མ་གཏོགས། གླང་པོ་ཁྱིམ་དུ་བཞག་ནས་གླང་རྗེས་ནགས་སུ་འཚོལ་བས་རྙེད་པའི་དུས་མི་ཡོང་བ་དང་འདྲ་བར་གསུངས་པའོ། །དེ་ཡིས་དབྱིངས་ཀུན་ལ་ཡོད་ཀྱང་སྐལ་བ་ཅན་འགའ་རེས་སྤྱོད་ཡུལ་ཡིན་པ་དང་། རིག་པ་བྱང་ཆུབ་སེམས་ཀྱི་རང་བཞིན་ངེས་པ་སྤྱི་དང་། བྱེ་བྲག་འགག་བསྡམས་པ། འཕྲང་བསལ་བ་དང་བཅས་པ་སོང་ཟིན་ནས།
༼ང༽བཞི་བ་སྣང་སྲིད་ཞིང་ཁམས་སུ་གནས་པས་བླང་དོར་བཟང་ངན་མེད་པར་བསྟན་པ།
བཞི་བ་སྣང་སྲིད་ཞིང་ཁམས་སུ་གནས་པས་བླང་དོར་བཟང་ངན་མེད་པར་བསྟན་པ་ལ། ཁམས་གསུམ་འདི་ཉིད་རང་བཞིན་མཉམ་པའི་ཞིང་ཁམས་སུ་བསྟན་པ་དང་། མྱ་ངན་ལས་འདས་པ་ཡང་སངས་རྒྱས་ཉིད་ཀྱི་རང་སྣང་དག་པ་ཙམ་ལས་གཞན་དུ་མེད་པར་བསྟན་པ་དང་། དེ་ལྟ་བུའི་རིག་པ་རང་ངོ་རྟོགས་ན་གོལ་སྒྲིབ་ཤུགས་ཀྱིས་ཆོད་པར་བསྟན་པ་དང་། རིག་པའི་ངང་ལ་ཅི་སྣང་ཡང་དབྱིངས་ལས་གཡོས་པ་མེད་པར་བསྟན་པ་དང་། དེ་ལྟ་བུའི་རིག་པ་སྟོང་གསལ་འགག་མེད་ཆེན་པོར་བསྟན་པ་དང་། རིག་པ་བྱང་ཆུབ་ཀྱི་ཀློང་ཡངས་པར་བསྟན་པ་དང་དྲུག་ལས།
༼ཀ དང་པོ་ཁམས་གསུམ་འདི་ཉིད་རང་བཞིན་མཉམ་པའི་ཞིང་དུ་བསྟན་པ།
ད་ནི་སྣང་སྲིད་ཞིང་ཁམས་སུ་གནས་པས་བླང་དོར་བཟང་ངན་མེད་པར་བསྟན་པ་ནི།
ཡེ་ནས་སྤྱི་བླུགས་གནས་པའི་ཆོས་ཉིད་ལ།།
བདག་དང་གཞན་དུ་རྟོག་པ་མི་མངའ་བས།།
ཁམས་གསུམ་འདི་ཉིད་རང་བཞིན་མཉམ་པའི་ཞིང་།།
ཞེས་གསུངས་ཏེ། རིག་པ་དག་མཉམ་ལྷུན་གྲུབ་ཆེན་པོས་ཁྱབ་པའི་ཞིང་། །ཁམས་གསུམ་རིགས་དྲུག་ཏུ་སྣང་ཡང་རང་བྱུང་ཡེ་ཤེས་ཀྱི་ཞིང་ཁམས་སུ་ཡེ་ནས་རང་ཤར་བས། ཆོས་ཉིད་རྫོགས་པ་ཆེན་པོའི་ཚུལ་རྡོ་རྗེའི་དབྱིངས་སུ་ཡེ་ནས་སངས་རྒྱས་པར་བསྟན་པ་ནི། ཐལ་འགྱུར་ལས། གཞན་ཡང་རྐྱེན་གྱིས་སེམས་ཅན་རྣམས། །སངས་མ་རྒྱས་པ་གཅིག་ཀྱང་མེད། །རང་སྣང་ཡེ་ཤེས་ཆོས་མཐུན་ཕྱིར། །འཁོར་བ་ཡེ་ནས་ཡོད་མ་ཡིན། །དེ་ཕྱིར་རང་རང་སངས་རྒྱས་སོ། །སྐྱེ་བ་ཉིད་ནི་རྟོགས་པ་ལ། །མངལ་དུ་གནས་པ་ཆོས་ཀྱི་དབྱིངས། །ལུས་སེམས་འདུས་པས་དབྱིངས་རིག་འབྲེལ། །ལུས་སུ་གནས་པས་སྐུ་གསུམ་སྟེ། །རྒས་པས་ཆོས་ཟད་འཁྲུལ་སྣང་འགག །ན་བས་ཆོས་རྣམས་ཉམས་སུ་མྱོང་། །ཤི་བས་སྟོང་པ་ངོས་གཟུང་མེད། །དེས་ན་སེམས་ཅན་སངས་རྒྱས་དངོས། །ཞེས་པ་དང་། མུ་ཏིག་ཕྲེང་བ་ལས། ཐབས་དང་ཤེས་རབ་སྦྱོར་བ་ལས། །ཕ་དང་མ་ཡི་རྒྱུ་ཉིད་དག །འཕེན་པའི་རླུང་གིས་བསྐྱོད་པས་ནི། །བྱང་ཆུབ་རང་རིག་བདེ་ཆེན་པོ། །འབྱུང་ལྔའི་རྒྱུ་ལས་ས་བོན་ནི། །སྟོང་ཉིད་ཡུལ་ལ་སྣང་བར་ཤར། །གཉིས་ཀྱི་བདེ་བའི་སྙོམས་འཇུག་ནི། །ཐབས་ལས་བྱུང་བའི་ཤེས་རབ་ཉིད། །མངལ་གྱི་ལྷུམས་སུ་ཚུད་པ་ནི། །རང་རིག་གཞི་ནས་སྣང་བར་ཤར། །བདུན་ཚན་བདུན་ནི་རྟོགས་ཚད་དོ། །ཟླ་བཅུས་ས་རྣམས་བགྲོད་པ་ཉིད། །བཙས་པ་ཉིད་ནི་སྐུར་བཞེངས་ཏེ། །ལུས་བསྐྱེད་པ་ནི་གཞི་སྣང་ཡུལ། །ལུས་སུ་གནས་པ་གཞི་ཡིན་ཏེ། །རྒས་པ་དག་གིས་འཁྲུལ་བ་སངས། །ན་བ་ཉིད་ནས་རྟོགས་པའི་གདེང་། །ཤི་བས་ཆོས་ཉིད་སྟོང་པར་གྲོལ། །གཟུགས་སུ་སྣང་བའི་སེམས་ཅན་ཀུན། །འབད་མེད་ཡེ་ནས་རྫོགས་སངས་རྒྱས། །ཞེས་སོ། །ཁམས་གསུམ་རིགས་དྲུག་གི་སེམས་ཅན་འདི་དག་ཐམས་ཅད་བདེ་སྡུག་ཏུ་སྣང་བ་ཡིན་ཡང་། ཡེ་ནས་སྤྱི་བླུགས་སངས་རྒྱས་པའི་ཆོས་ཉིད་གཅིག་གིས་ཁྱབ་པར་གནས་ཤིང་། དེ་ཡང་དག་མཉམ་ལྷུན་གྲུབ་ཆེན་པོའི་ཞིང་ཁམས་འབྱུང་བ་ལྔར་སྣང་བ་དེ། རིག་པའི་ངང་ལས་ཤར། ངང་ལ་གནས། ངང་ལ་གྲོལ་བ་ཡིན་ཞིང་། དེ་བཞིན་དུ་སེམས་ཅན་དུ་ཤར་བ་ཡང་རིག་པའི་ངང་ལས་ཤར། ངང་ལ་སྣང་། ངང་ལ་གྲོལ་བ་ཡིན། ཁམས་གསུམ་གྱི་སེམས་ཅན་འདི་དག་ནི་རྣལ་འབྱོར་ལྔའི་ནང་ནས། བཀའ་སྡོད་ལས་ཀྱི་རྣལ་འབྱོར་ཡིན་ཞིང་། དེ་ལྟར་ན་ཁམས་གསུམ་སྣོད་བཅུད་དང་བཅས་པ་རང་བྱུང་ཡེ་ཤེས་ཀྱི་ཞིང་ཁམས་སུ་ཤར་བ་ལས་མ་འདས་པ་ཡིན་པས་སྣང་སྲིད་ཞིང་ཁམས་སུ་གནས་པས་བཟང་ངན་བླང་དོར་མེད་པར་བསྟན་པའོ། །དེ་ལྟར་སེམས་ཅན་ཐམས་ཅད་སངས་རྒྱས་པའི་ཆོས་མཐུན་ཡོད་པས་སངས་རྒྱས་ཞེས་བརྗོད་དེ། ཆོས་མཐུན་སྦྱོར་མི་ཤེས་པར་གད་མཆོངས་གཡང་མཆོངས་ལ་ཐམས་ཅད་ཡེ་ནས་སངས་རྒྱས་ཡིན་རང་སྣང་ཡིན་ཟེར་བ་ནི་རྨོངས་པ་རྡོལ་ཐབས་སུ་སྨྲ་བ་སྟེ། གཉིད་ཁུང་དུ་ཁ་ཅིག་ལབ་རྡོལ་ལ་དེ་སྐད་ཟེར་བ་དང་ཁྱད་མེད་དོ། །གཞི་འབྲས་གཉིས་ཀྱི་ཁྱད་པར་མ་ཕྱེད་ནས་རྣམ་པ་ཀུན་ཏུ་སེམས་ཅན་སངས་རྒྱས་ཡིན། སངས་རྒྱས་ཀྱང་སངས་རྒྱས་ཡིན་ཟེར་བ་ནི་རྡོལ་ཐབས་སུ་ལབ་རྡོལ་དུ་སྨྲ་བ། སྨྱོན་པས་ཁ་བླ་བ་དང་ཁྱད་མེད་པའོ། །གཞན་ཡང་ཆོས་མཐུན་དང་དག་པ་སྦྱར་བས་སེམས་ཅན་གྱི་ཁམས་དང་སྣོད་བཅུད་དུ་སྣང་བ་སངས་རྒྱས་ཀྱི་དཀྱིལ་འཁོར་དུ་རྟོགས་པར་བྱ་སྟེ། གསང་སྙིང་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་བདག་ཉིད་དོ། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མའོ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་མ་ལུས་ཆོས་སོ་ཅོག །ཐམས་ཅད་མ་ལུས་སངས་རྒྱས་ཞིང་། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་པ་དང་། ཐལ་འགྱུར་ལས། སྣང་བ་འཁྲུལ་བའི་རང་བཞིན་ནི། །ཡེ་ཤེས་ཡིན་པ་སྔར་མ་མཐོང་། །རྟོག་བཅས་འཁྲུལ་བ་གཞི་མེད་པས། །ཀུན་གཞི་ཆོས་སྐུ་ཆེན་པོར་རྟོགས། །འཁྲུལ་བའི་རང་རྟོག་རྒྱུན་ཆད་དོ། །དེ་ལྟར་འཁྲུལ་མེད་སྣང་བ་ནི། །ཡེ་ནས་གྲོལ་བའི་གནད་ལས་བྱུང་། །འགྲོ་བའི་ཕུང་པོ་སངས་རྒྱས་སྐུ། །ཡེ་ནས་ཡིན་པ་སུས་མ་རིག །ཅེས་པ་དང་། རིན་པོ་ཆེ་སྤུངས་པ་ལས། བདག་དང་འཛིན་པའི་ཞེན་ཡུལ་ནི། །དང་པོ་ཉིད་ནས་ཆོས་ཉིད་ལ། །འདི་ཀུན་རང་གིས་རང་སྣང་བར། །ཡེ་ནས་སྣང་བ་སྔར་མ་རིག །བདག་རྟོག་བཅིངས་པའི་ཉོན་མོངས་ལྔ། །ཡེ་ནས་རིག་པར་རང་ཤར་བས། །ལྷན་ཅིག་གནས་པ་ཞལ་མ་འཚོ། །ཞེས་སོ། །འདི་ལྟར་སྣང་བའི་སྣང་སྲིད་སྣོད་བཅུད་ཀྱི་ཆོས་ཐམས་ཅད་ཡེ་ནས་སྐྱེ་འགག་གནས་དམིགས་འགྲོ་འོང་ཐམས་ཅད་དང་བྲལ་བ་ཡེ་ཤེས་ལྔ་ཡི་རང་བཞིན་ཡིན་པས་ན། བདག་ཏུ་འཛིན་པའི་ཞེན་ཡུལ་རྟོག་བཅས་འཁྲུལ་བའི་གཞི་མེད་པ་ཡེ་ནས་རིག་པ་རང་ཤར་ཞིང་གྲོལ་བའི་གནད་ཀྱིས། འགྲོ་བའི་ཕུང་པོ་སངས་རྒྱས་ཀྱི་སྐུ་དང་། ཉོན་མོངས་པ་ལྔ་ཡེ་ཤེས་ཀྱི་རང་མདངས། སྲིད་གསུམ་གྱི་ཆོས་སོ་ཅོག་སངས་རྒྱས་ཀྱི་ཞིང་དང་སངས་རྒྱས་ལས་གཞན་པའི་ཆོས་ཤིག་སངས་རྒྱས་ཉིད་ཀྱིས་ཀྱང་མི་རྙེད་ལ། དེ་ལྟར་ཡེ་ནས་ཡིན་པ་ལ་ཡིན་པར་ངོ་མ་ཤེས་པའི་དབང་གིས། ཡིན་ལུགས་དང་ལྷན་ཅིག་ཏུ་གནས་པའི་ཞལ་མ་འཚོ་བ་དེ། འདི་ལྟར་ཆོས་མཐུན་དག་པར་སྦྱར་བས་ན་ད་སྔོན་མ་ཤེས་པར་འཁྲུལ་བའི་སེམས་ཅན་གྱི་ཁམས་དང་སྣོད་བཅུད་དུ་སྣང་བ་ཐམས་ཅད་སངས་རྒྱས་ཀྱི་དཀྱིལ་འཁོར་དུ་རྟོགས་པར་གྱིས་ཤིག་ཅེས་པའོ།།
༼ཁ གཉིས་པ་མྱ་ངན་ལས་འདས་པ་ཡང་སངས་རྒྱས་ཉིད་ཀྱི་རང་སྣང་དག་པ་ཙམ་ལས་གཞན་དུ་མེད་པར་བསྟན་པ།
དེ་ལྟར་འཁོར་བ་ཡེ་སངས་རྒྱས་པ་ཡང་རིག་པའི་རང་སྣང་དུ་ཤར་བ་ལྟར། མྱ་ངན་ལས་འདས་པ་ཡང་སངས་རྒྱས་ཉིད་ཀྱི་རང་སྣང་དག་པ་ཙམ་ལས་གཞན་དུ་མེད་པར་བསྟན་པ་ནི།
དུས་གསུམ་རྒྱལ་བ་རང་སྣང་དག་པ་སྟེ།།
སྤང་བླང་མེད་པར་ཐམས་ཅད་ཕྱམ་གཅིག་པས།།
གཞན་ནས་ཐོབ་པར་བྱ་བ་རྡུལ་ཙམ་མེད།།
ཆོས་ཀུན་སེམས་ཉིད་ཀློང་ཆེན་དེར་གསལ་ལ།།
མཉམ་པའི་དོན་ལས་གཡོས་པ་ཅུང་ཟད་མེད།།
ཅེས་གསུངས་ཏེ། རིག་པ་གློ་བུར་གྱི་དྲི་མ་ལས་དག་ཙམ་ལས། རྒྱུ་རྐྱེན་དང་རྩོལ་སྒྲུབ་ཀྱི་སེམས་ཉིད་ལས་གཞན་ནས་སངས་རྒྱས་ཀྱི་ངོ་བོ་བཙལ་དུ་མེད་དེ། རིག་པ་དག་པ་ལ་སངས་རྒྱས་ཞེས་བརྗོད་པ་ལས་གཞན་མེད་པའི་ཕྱིར་རོ། །སངས་རྒྱས་ཀྱི་སྣང་བ་དེ་ཡང་རིག་པའི་སྣང་ཚུལ་ལས་གཞན་མ་ཡིན་པས། བྱང་ཆུབ་སེམས་ཀྱི་དབྱིངས་སུ་སངས་རྒྱས་པ་དེ་ཡང་གཞན་ནས་རྙེད་པའི་གནས་མེད་དེ། གསང་སྙིང་ལས། ཕྱོགས་བཅུ་དུས་བཞི་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་པས། །སངས་རྒྱས་གཞན་དུ་མ་ཚོལ་ཅིག །བཙལ་ཀྱང་རྒྱལ་བས་མི་རྙེད་དོ། །ཞེས་པ་དང་། ཀུན་བྱེད་ལས། སྣང་སྲིད་ཆོས་དང་སྣང་མེད་བྱང་ཆུབ་སེམས། །སེམས་ཀྱི་དེ་བཞིན་ཉིད་འབྱུང་དེ་བཞིན་ཉིད། །དེ་བཞིན་ཉིད་དུ་མ་རྟོགས་སོ་སོར་མཐོང་། །དེ་བཞིན་ཉིད་ནི་དབྱིངས་ནས་ཚོལ་བྱེད་པ། །དུས་གསུམ་རྒྱལ་བས་བཙལ་ཀྱང་མི་རྙེད་དོ། །ཞེས་པ་དང་། སྔ་རབས་འདས་པའི་སངས་རྒྱས་ཀྱང་། །རང་སེམས་མ་བཅོས་སྔར་མཐོང་རྟོགས། །ཞེས་སོ། །སྔར་བྱོན་པ་དང་། ཕྱིས་འབྱོན་པ། ད་ལྟར་བཞུགས་པའི་དུས་གསུམ་གྱི་རྒྱལ་བ་རྫོགས་པའི་སངས་རྒྱས་རྣམས་ཀྱང་། སེམས་ཅན་ཀུན་ལ་ཁྱབ་པའི་རིག་པ་བདེ་བར་གཤེགས་པའི་སྙིང་པོའི་གློ་བུར་གྱི་དྲི་མ་དག་པའི་རང་སྣང་དག་པ་ཙམ་ལས། རྒྱུ་དང་རྐྱེན་ལ་ལྟོས་པའི་རྩོལ་སྒྲུབ་སྤང་བླང་གིས་མེད་པའི་ཆོས་ཤིག་གསར་དུ་བསྒྲུབས་པ་མ་ཡིན་པར་ཐམས་ཅད་ཕྱམ་གཅིག་པ། དཔེར་ན་གསེར་གྱི་ངོ་བོ་གཅིག་ལ་སྐུ་གཟུགས་བྱས་པ་ངོ་མཚར་བ་དང་། རྒྱན་དང་གདུ་བུར་བྱས་པས་མཛེས་པ་དང་། ཆོལ་ཟངས་ཀྱི་སྣོད་དུ་བྱས་པས་བཙོག་པར་འཛིན་ཀྱང་། ངོ་བོ་ལ་གསེར་གྱི་དབྱིངས་སུ་གཅིག་སྟེ། གསེར་གྱི་ཁམས་ལ་བཟང་ངན་མེད་པ་ལྟར། སངས་རྒྱས་ཀྱང་རུང་མ་རྒྱས་ཀྱང་རུང་རང་སྣང་དག་དང་མ་དག་གི་ཁྱད་པར་ཙམ་ལས་གཞན་ནས་ཐོབ་པའམ་གཞན་ནས་རྙེད་པ་རྡུལ་ཙམ་ཡང་མེད་པར། ཆོས་ཐམས་ཅད་སེམས་ཉིད་ཀློང་ཆེན་ཡངས་པའི་མཁའ་ཀློང་གཅིག་ལས་གཡོས་པ་ཅུང་ཟད་ཀྱང་མེད་པ་ནི། ཕྱོགས་བཅུ་དང་དུས་བཞི་གང་ནས་ཀྱང་། རྫོགས་པའི་སངས་རྒྱས་སྟོབས་བཅུ་མངའ་བས་བཙལ་ཀྱང་། སེམས་ཉིད་རིག་པའི་ངོ་བོ་དག་པ་ལས་གཞན་པའི་སངས་རྒྱས་ཤིག་རྙེད་མི་སྲིད་ཅིང་། སྣང་སྲིད་ཀྱི་ཆོས་དང་སྣང་མེད་ཀྱི་བྱང་ཆུབ་སེམས་ཐམས་ཅད་དེ་བཞིན་ཉིད་ལས་འབྱུང་བ་ཡིན་པ་དང་། དེ་བཞིན་ཉིད་དེ་བཞིན་ཉིད་དུ་མ་མཐོང་ཞིང་མ་རྟོགས་པར་སོ་སོར་མཐོང་ན། དེ་བཞིན་ཉིད་ནི་དབྱིངས་ནས་ཚོལ་ཡང་དུས་གསུམ་རྒྱལ་བས་ཀྱང་མི་རྙེད་པ་དང་། སྔ་རབས་ཀྱི་སངས་རྒྱས་ཐམས་ཅད་ཀྱིས་རང་སེམས་མ་བཅོས་རིག་པའི་ངོ་བོ་སྔར་མཐོང་ནས། རང་སྣང་དག་པའི་སྟོབས་ཀྱིས་སྔོན་དུ་སངས་རྒྱས་པ་ཡིན་ལ། དེ་བཞིན་དུ་ད་ལྟ་འབྱོན་བཞིན་པ་དང་། མ་འོངས་འབྱོན་འགྱུར་གྱི་སངས་རྒྱས་ཐམས་ཅད་ཀྱིས་ཀྱང་རང་སེམས་མ་བཅོས་པའི་ངོ་བོ་འདི་མཐོང་ནས་སངས་རྒྱས་པ་ཡིན་ནོ།།
༼ག གསུམ་པ་དེ་ལྟ་བུའི་རིག་པ་རང་ངོ་རྟོགས་ན་གོལ་སྒྲིབ་ཤུགས་ཀྱིས་ཆོད་པར་བསྟན་པ།
དེ་ལྟ་བུའི་རིག་པ་རང་ངོ་རྟོགས་ན་གོལ་སྒྲིབ་ཤུགས་ཀྱིས་ཆོད་པ་སྟེ།
ཕྱི་དང་ནང་མེད་འཆར་ནུབ་རྙོག་པ་མེད།།
མཐའ་ཡི་མུན་སེལ་རྩ་བ་བྱང་ཆུབ་སེམས།།
གང་ཡང་མ་སྤངས་གོལ་ས་ཤུགས་ལ་ཆོད།།
ཅེས་གསུངས་ཏེ། རིག་པའི་ངོ་བོ་སྤང་བླང་བྱ་བརྩལ་ལས་འདས་པས་གཞན་དུ་བགྲོད་པ་དང་བལྟར་མེད་པའི་ཕྱིར་གོལ་ས་དང་སྒྲིབ་པ་མེད་ལ། རིག་པའི་ངོ་བོ་རང་ལ་བཞག་ནས། དེ་ནས་ལོགས་སུ་འབད་རྩོལ་དང་ལྟ་སྒོམ་བྱས་པས་གོལ་སྒྲིབ་ཏུ་བྱུང་བ་སྟེ། ཀུན་བྱེད་ལས། བྱང་ཆུབ་སེམས་ཀྱི་རང་བཞིན་འདི་ཉིད་ནི། །ཆོས་ཀུན་མ་ལུས་པ་ཡི་སྙིང་པོ་སྟེ། །མ་སྐྱེས་རྣམ་པར་དག་པས་སྒྲིབ་པ་མེད། །བགྲོད་པའི་ལམ་དང་བྲལ་བས་གོལ་ས་མེད། །ཡེ་ནས་ལྷུན་གྱིས་གྲུབ་པས་བཙལ་དུ་མེད། །ཆོས་ཀུན་སྙིང་པོ་བྱང་ཆུབ་སེམས་གཅིག་ལ། །གཅིག་ལ་རྣམ་པར་བགྲངས་པས་གོལ་སྒྲིབ་བྱུང་། །བགྲོད་དུ་མེད་ལ་བགྲོད་པས་གོལ་ས་བྱུང་། །དམིགས་མེད་བལྟས་པས་མ་མཐོང་སྒྲིབ་པ་བྱུང་། །ཞེས་སོ། །རང་མལ་ལས་གཡོས་མ་མྱོང་བའི་རིག་པའི་ངོ་བོ་མཐོང་བའི་རྣལ་འབྱོར་པས། ཕྱི་རུ་འཆར་བ་དང་ནང་དུ་ནུབ་པ་མེད་ཅིང་དྭངས་གསལ་རྙོག་པ་དང་བྲལ་བའི་རིག་པ་རང་མལ་ནས་ཤར་དུས། ཤར་བས་ཤེས་པ་གསལ། གནས་པས་ཏིང་འཛིན་རྙེད་ནས་གཞན་ཞིག་ལ་བགྲོད་པ་དང་བལྟ་ས་མེད་པའི་རྒྱུ་མཚན་གྱིས། གོལ་སྒྲིབ་ལོགས་ནས་སྤང་མི་དགོས་པར་རང་དག་ཏུ་འགྲོ་ཞིང་། རིག་པ་བྱང་ཆུབ་ཀྱི་སེམས་ནི་མ་སྐྱེས་རྣམ་དག་ཡིན་པས་སྒྲིབ་པ་མེད་པ་དང་། བགྲོད་པའི་ལམ་མེད་པས་གོལ་འགྲོ་ས་ཞིག་མེད་ཅིང་། ཡེ་ནས་ལྷུན་གྱིས་གྲུབ་པས་བཙལ་ཞིང་བསྒྲུབ་ཏུ་ཡང་མེད། སྙིང་པོ་བྱང་ཆུབ་ཀྱི་སེམས་གཅིག་ལ་གཉིས་སུ་བགྲང་ན་གོལ་སྒྲིབ་འབྱུང་ཞིང་། བགྲོད་དུ་མེད་པའི་ས་ལ་བགྲོད་པ་ཡོད་པར་བཟུང་ན་གོལ་ས་རང་གིས་བཟོས་པ་ཡིན་པ་དང་། དམིགས་མེད་ལ་བལྟ་བྱ་རུ་བཟུང་ནས་བལྟས་དུས་དམིགས་མེད་མ་མཐོང་བར་དམིགས་བཅས་སྒྲིབ་པ་བྱུང་བ་སྟེ། མདོར་ན་རིག་པའི་ངང་ལས་མ་གཡོས་ན་གོལ་ཤོར་ནོར་གསུམ་མེད་པ་ཡིན་ནོ། །འཁོར་འདས་རིག་པའི་རང་སྣང་དུ་བསྟན་ཞིང་ཞར་ལ་གོལ་སྒྲིབ་ཤུགས་ཀྱིས་ཆོད་པ་དང་བཅས་པ་བསྟན་ནས།
༼ང བཞི་བ་རིག་པའི་ངང་ལ་ཅི་སྣང་ཡང་དབྱིངས་ལས་གཡོས་པ་མེད་པར་བསྟན་པ།
རིག་པའི་ངང་ལ་ཅི་སྣང་ཡང་དབྱིངས་ལས་གཡོས་པ་མེད་པར་བསྟན་པ་ནི།
འགྲོ་བའི་སྣང་ཚུལ་སྣ་ཚོགས་འཇིག་རྟེན་དང་།།
དག་པའི་སངས་རྒྱས་སྐུ་དང་ཡེ་ཤེས་ཀྱང་།།
རྟོགས་དང་མ་རྟོགས་རྩལ་ལས་ཤར་བ་ཡི།།
རོལ་བ་མ་འགགས་ནམ་མཁའི་དབྱིངས་ཁྱབ་ཀུན།།
ཆོས་དབྱིངས་ངང་ལ་རྟོགས་དང་མ་རྟོགས་ཙམ།།
རྟོགས་པས་བདེ་གཤེགས་དག་པའི་སྣང་བ་དང་།།
མ་རྟོགས་མ་རིག་གཟུང་འཛིན་བག་ཆགས་ལས།།
སྣ་ཚོགས་སྣང་ཡང་དབྱིངས་ལས་གཡོས་པ་མེད།།
ཅེས་གསུངས་ཏེ། དབྱིངས་རང་བྱུང་གི་ཡེ་ཤེས་རང་ངོ་ཤེས་པས་སངས་རྒྱས་དང་མ་ཤེས་པས་སེམས་ཅན་ལྟར་སྣང་ཡང་། གཉིས་ཀ་རིག་པའི་ངང་དུ་རོ་གཅིག་པས་རྒྱ་ཆད་དང་ཕྱོགས་ལྷུང་མེད་པ་སྟེ། ཀུན་བྱེད་ལས། སྣང་སྲིད་སྣོད་བཅུད་བསྡུས་པ་ཐམས་ཅད་དང་། །སངས་རྒྱས་སེམས་ཅན་བསྡུས་པ་ཐམས་ཅད་ཀུན། །ཀུན་བྱེད་བྱང་ཆུབ་ང་ཡིས་བྱས་པའི་ཕྱིར། །ཐམས་ཅད་བྱང་ཆུབ་སེམས་ལས་མ་གཏོགས་པ། །གཞན་ཞེས་བྱ་བ་ཡེ་ནས་མེད་པའི་ཕྱིར། །ཀུན་ཀྱང་བྱང་ཆུབ་སེམས་སུ་བསྟན་པ་ཡིན། །ཞེས་སོ། །སྣོད་དང་བཅུད་ཀྱིས་བསྡུས་པའི་འགྲོ་བའི་སྣང་ཚུལ་སྣ་ཚོགས་པ། ཇི་ལྟར་རྡ་དུ་ར་ཟོས་པའི་མིའི་འཁྲུལ་སྣང་ལྟ་བུའི་འཇིག་རྟེན་མ་དག་པའི་སྣང་བ་དང་། དག་པའི་རང་སྣང་འཁྲུལ་སྣང་གཉིད་སད་པ་ལྟ་བུའི་སངས་རྒྱས་ཀྱི་སྐུ་དང་ཡེ་ཤེས་ཡོན་ཏན་འཕྲིན་ལས་ཏེ། དེ་ལྟ་བུའི་དག་དང་མ་དག་ཏུ་ཤར་བ་ཐམས་ཅད་ཀྱང་དབྱིངས་རང་བྱུང་གི་ཡེ་ཤེས་རང་ལ་གནས་པ། དེའི་རང་ངོ་ཤེས་དང་མ་ཤེས་རྟོགས་དང་མ་རྟོགས་ཀྱི་རྩལ་དང་རོལ་བའི་འཆར་ཚུལ། བཟང་ངན་མ་ངེས་མཁའ་ལྟར་བགྲང་ཡས་སྣ་ཚོགས་སུ་སྣང་བ་དེ་ཐམས་ཅད། ཆོས་དབྱིངས་ཀྱི་ངང་ནས་གཞལ་ན་རྟོགས་དང་མ་རྟོགས་ཀྱི་ཁྱད་པར་ཙམ་ཞིག་ཡིན། རྟོགས་པས་སངས་རྒྱས་བདེ་གཤེགས་དག་པའི་སྣང་བ་ཤར། མ་རྟོགས་པས་མ་རིག་གཟུང་འཛིན་བག་ཆགས་ཀྱི་མཐུ་བརྟས་པས་མ་དག་གི་སྣང་བ་ཤར་ཡང་། དོན་ལ་གཉིས་ཀ་རིག་པ་ཆོས་དབྱིངས་ཆེན་པོའི་ངང་དུ་བཟང་ངན་གྱི་རྒྱ་ཆད་པ་དང་མཐོ་དམན་གྱི་ཕྱོགས་སུ་ལྷུང་བ་ཞིག་མེད་ལ། ཐམས་ཅད་ཀུན་བྱེད་བྱང་ཆུབ་ཀྱི་སེམས་ཀྱིས་བྱས་ཤིང་དེ་ལས་གཞན་དུ་གྱུར་པའི་ཆོས་ཤིག་མེད་པའི་ཕྱིར་ན་ཐམས་ཅད་ཀུན་ཀྱང་བྱང་ཆུབ་སེམས་ལས་མ་འདས་པར་བསྟན་པའོ། །གཞན་ཡང་ཀུན་བྱེད་རྒྱལ་པོའི་རྩ་རྒྱུད་ལེའུ་དྲུག་པ་ལས་ཀྱང་། སངས་རྒྱས་སྐུ་དང་ཡེ་ཤེས་ཡོན་ཏན་དང་། །སེམས་ཅན་ལུས་དང་བག་ཆགས་ལ་སོགས་པ། །སྣང་སྲིད་སྣོད་བཅུད་བསྡུས་པ་ཐམས་ཅད་ཀུན། །བྱང་ཆུབ་སེམས་ཀྱི་ངོ་བོ་ཡེ་ནས་ཡིན། །ཅེས་གསུངས་པ་ལྟར་དུ་ཐམས་ཅད་སེམས་ཀྱི་ཆོ་འཕྲུལ་ལས་མ་འདས་པས་ན། མ་རྟོགས་པ་ཡིས་འཁོར་བར་བསྙད་པ་ཙམ་མོ།།
༼ཅ ལྔ་བ་དེ་ལྟ་བུའི་རིག་པ་སྟོང་གསལ་འགག་མེད་ཆེན་པོར་བསྟན་པ།
དེ་ལ་མདོར་བསྟན་པ་དང་། རྒྱས་པར་བཤད་པ་གཉིས་ལས།
ཀ༽དང་པོ་མདོར་བསྟན་པ།
དེ་ལྟ་བུའི་རིག་པ་སྟོང་གསལ་འགག་མེད་ཆེན་པོར་བསྟན་པ་ནི།
བྱང་ཆུབ་སེམས་ནི་ཀུན་གྱི་དངོས་གཞི་སྟེ།།
མཚན་ཉིད་མ་འགགས་སྣ་ཚོགས་ཅི་ཤར་ཡང་།།
རང་གསལ་ཆོས་ཉིད་དག་པའི་དབྱིངས་གསལ་བས།།
དབྱེ་བསལ་མེད་དོ་རྒྱ་ཡན་རིག་པའི་འགྲོས།།
ཤེལ་གོང་དྲི་མ་མེད་པ་ལྟར་ངོ་བོ་སྟོང་གསལ་ཅིར་ཡང་མ་གྲུབ་པའི་སྐྱེ་མེད་ཀྱི་ངང་ལས། འགག་མེད་ཀྱི་རོལ་བ་ཅིར་ཡང་འཆར་བ་སྟེ། རིག་པ་རང་ཤར་ལས། ཕྱོགས་སུ་མ་ལྷུང་རྒྱ་མ་ཆད། །ཕྱི་དང་ནང་མེད་ཡངས་པ་ཆེ། །དག་པ་དྲི་མེད་ཤེལ་གོང་བཞིན། །སྣང་ལ་རང་བཞིན་མེད་པར་གསུངས། །ཞེས་སོ། །རིག་པ་སྟོང་གསལ་འགག་མེད་བྱང་ཆུབ་ཀྱི་སེམས་དེ་ནི། ཀུན་གྱི་དངོས་གཞིའམ་ཆོས་ཐམས་ཅད་ཀྱི་ཆོས་ཉིད། ཀུན་དང་འདུ་འབྲལ་མེད་པ་རྡོ་རྗེ་སྙིང་པོའི་དབྱིངས་ཏེ། དཔེར་ན་ཤེལ་གྱི་གོང་བུ་དྲི་བྲལ་རྐྱེན་དང་ཕྲད་ན་འོད་ལྔ་ཤར་བ་བཞིན་དུ། ངོ་བོ་སྐྱེ་མེད་སྟོང་གསལ་ཅི་ཡང་མ་གྲུབ་པའི་ངང་དེ་ལས། རོལ་བ་འགག་མེད་སྣ་ཚོགས་སུ་འཆར་བའི་བདག་ཉིད་ཅན། ཕྱོགས་གང་དུ་ཡང་མ་ལྷུང་། རྒྱ་གར་ཡང་མ་ཆད། ཕྱི་དང་ནང་མེད། ཟང་ཐལ་ཡངས་པ་ཆེན་པོ་སྣང་སྟོང་འདུ་འབྲལ་མེད་པས་སྣང་ལ་རང་བཞིན་མེད་ཅིང་ཡོད་མེད་སོགས་ཀྱི་མཐའ་ཐམས་ཅད་ལས་བྲལ་བར་མདོར་བསྟན་པའོ།།
ཁ༽གཉིས་པ་དེའི་རང་བཞིན་རྒྱས་པར་བཤད་པ།
དེའི་རང་བཞིན་རྒྱས་པར་བཤད་པ་ནི།
ཟང་ཐལ་ཡེ་ཤེས་རང་བྱུང་ཀློང་ཡངས་ཤིང་།།
མ་བསྒྲིབས་ཕྱི་ནང་མེད་པར་འོད་གསལ་བས།།
རང་རིག་སེམས་ཀྱི་མེ་ལོང་འོད་པོ་ཆེ།།
འདོད་འབྱུང་ནོར་བུ་རིན་ཆེན་ཆོས་ཀྱི་དབྱིངས།།
བཙལ་བ་མེད་པར་ཐམས་ཅད་རང་འབྱུང་བས།།
རང་བྱུང་ཡེ་ཤེས་འདོད་དགུར་འབྱུང་བའི་དཔལ།།
ཞེས་གསུངས་ཏེ། དབྱིངས་རང་བྱུང་གི་ཡེ་ཤེས་ལྷུན་གྲུབ་ནོར་བུའི་རྩེ་མོ་ནི་ངང་གིས་འོད་གསལ་ལ་དྲི་མ་མེད་པའི་འོད་ཟེར་འཁོར་འདས་ཡོངས་ལ་ཁྱབ་པར་འཕྲོ་བས་བྱང་ཆུབ་སེམས་ཀྱི་མེ་ལོང་འོད་པོ་ཆེ་ཞེས་བྱ་སྟེ། ཡངས་པ་ཆོས་ཉིད་ཀྱི་ངོ་བོ་བསམ་ཡུལ་ལས་འདས་པ་ཉིད། སེང་གེ་རྩལ་རྫོགས་ལས། རྫོགས་ཆེན་ང་ཡི་བྱང་ཆུབ་སེམས། །རིག་པའི་ངོ་བོ་རྟོག་མེད་ལ། །ཅི་ཡང་མེད་པས་ཅི་ཡང་འབྱུང་། །ཞེས་པ་དང་། རང་ཤར་ལས། མི་འགག་རོལ་བའི་ཆོས་ཉིད་ལས། །ཀུན་བཟང་ཡངས་པའི་དབྱིངས་ཉིད་ཤར། །དགོངས་པ་ཤེས་རབ་ཆེན་པོའི་དབྱིངས། །འཛིན་པའི་ཆོས་ཉིད་ཆགས་པ་མེད། །རྟོག་མེད་སྨྲ་བསམ་ཡུལ་ལས་འདས། །དཔེར་ན་ནམ་མཁའི་ཆོ་འཕྲུལ་བཞིན། །ཞེས་སོ། །ཟང་ཐལ་ཡེ་ཤེས་རང་བྱུང་ཀློང་ཡངས་ཤིང་། །ཞེས་པས་ནི། རིག་པ་བྱང་ཆུབ་སེམས་དེའི་རང་བཞིན། ཟང་ཐལ་སྟོང་པའི་ཡེ་ཤེས་དབྱིངས་རང་བཞིན་གྱི་སྤྲོས་པ་དང་བྲལ་བའི་རང་བྱུང་མ་བཅོས་ཀློང་ཡངས་ཆོས་ཉིད་གདལ་བ་ཆེན་པོ་བསྟན་པ་དང་། མ་བསྒྲིབས་ཕྱི་ནང་མེད་པ་འོད་གསལ་བས། །ཞེས་པ་འདིས། ལྷུན་གྲུབ་སྣང་བའི་འོད་གསལ་རོལ་རྩལ་ཅི་ཡང་འཆར་བ། འགག་མེད་རིག་པའི་རྒྱན་དུ་ཆེ་བ་དེ་ཉིད་བསྟན་ཏེ། རང་རིག་སེམས་ཀྱི་མེ་ལོང་འོད་པོ་ཆེ། །ལ་སོགས་པའི་ཚིག་རྐང་བཞི་པོ་འདིས། འདོད་པ་ཀུན་འབྱུང་ཡིད་བཞིན་གྱི་ནོར་བུ་ལྟ་བུའི་རིག་པ་རང་བྱུང་གི་ཡེ་ཤེས་ལ། ཡོན་ཏན་རང་རྫོགས་སུ་ཡོད་པར་བསྟན་པ་སྟེ། དེ་ཡང་ནོར་བུ་བསམ་འཕེལ་དབང་གི་རྒྱལ་པོ་དེ་རྣམ་རྟོག་མེད་བཞིན་དུ་བསམ་དོན་འགྲུབ་པའི་ཡོན་ཏན་རང་ཆས་སུ་ཡོད་པ་ལྟར་དུ། དབྱིངས་རང་བྱུང་རང་རིག་བྱང་ཆུབ་སེམས་ཀྱི་མེ་ལོང་གི་ངོ་བོ་གང་དུ་ཡང་མ་གྲུབ་ཀྱང་། ཡོན་ཏན་འཕྲིན་ལས་ཀྱི་འོད་པོ་ཆེ་འཁོར་འདས་ཡོངས་ལ་ཁྱབ་པར་འཕྲོ་བ་དང་། དེ་ཉིད་བཙལ་ཞིང་སྒྲུབ་མི་དགོས་པར་རང་བྱུང་གིས་འབྱུང་བས་ན། རང་བྱུང་ཡེ་ཤེས་འདོད་དགུར་འབྱུང་བའི་དཔལ། །ཞེས་ཚིག་རྐང་ཐ་མས་དོན་བསྡུས་ཏེ་བསྟན་པའོ། །ལུང་སྔོན་མས་སྟོང་པ་གསལ་བའི་སྙིང་པོ་ཅན། རྟོག་བྲལ་ཅི་ཡང་མ་གྲུབ་པ་ལས་ཅིར་ཡང་འབྱུང་བ་དང་། ལུང་རྗེས་མས་གསལ་བ་སྟོང་པའི་ཆོས་ཉིད་ཅན། མ་འགགས་རྩལ་དང་རོལ་བར་འཆར་ཡང་། དབྱིངས་ཆོས་ཉིད་རྟོག་མེད་སྨྲ་བསམ་བརྗོད་བྲལ་ནམ་མཁའ་ལྟ་བུའི་ངང་ལས་འདའ་བར་མེད་པར་བསྟན་པའོ།།
༼ཆ དྲུག་པ་རིག་པ་བྱང་ཆུབ་ཀྱི་ཀློང་ཡངས་པར་བསྟན་པ།
རིག་པ་བྱང་ཆུབ་ཀྱི་ཀློང་ཡངས་པར་བསྟན་པ་ནི།
ཆེ་བའི་ཡོན་ཏན་རྣམ་གྲངས་ཇི་སྙེད་པ།།
དབྱིངས་ལས་དབྱིངས་བྱུང་ཐབས་མཆོག་མ་འགགས་ཤར།།
ཐམས་ཅད་སྐྱེ་མེད་དབྱིངས་སུ་ལྷུན་རྫོགས་པས།།
དངོས་པོ་ཟིལ་གནོན་སྟོང་ཉིད་བྱང་ཆུབ་ཀློང་།།
སྟོང་པ་ཟིལ་གནོན་རང་རིག་བྱང་ཆུབ་ཀློང་།།
ཞེས་གསུངས་ཏེ། མཐའ་བཞི་ལས་རྣམ་པར་གྲོལ་བའི་རིག་པ་ནམ་མཁའི་ངང་དང་། དེ་ལས་ཤར་བའི་ཆོས་ཐམས་ཅད་སྒྱུ་མ་ཆུ་ཟླ་ལྟར་ཡོད་མེད་ལས་འདས་པའི་ཕྱིར། ཆོས་ཉིད་ཀློང་ཆེན་དག་པའི་རང་བཞིན་དུ་བསྟན་ཏེ། རིག་པ་རང་ཤར་ལས། སྒྱུ་མ་ཆུ་ཟླ་སྨིག་རྒྱུ་བཞིན། །མེད་པ་ཟང་མ་མ་ཡིན་ལ། །ཡོད་པ་ཡང་ནི་མ་ཡིན་ནོ། །ཡོད་མེད་གཉིས་ལས་འདས་པའི་ཕྱིར། །རིག་པའི་ངོ་བོ་སྐྱེ་བ་མེད། །སྣང་བའི་རང་བཞིན་འགག་པ་མེད། །རིག་པའི་མཚན་ཉིད་དངོས་པོ་མེད། །རིག་པའི་འབྲས་བུ་མ་བཅོས་པ། །རིག་པ་སྐུ་གསུམ་ངོ་བོར་གསུངས། །ཞེས་སོ། །མཐའ་གྲོལ་སྟོང་གསལ་འགག་མེད། འདོད་འབྱུང་ཡོན་ཏན་ལྷུན་གྲུབ་སོགས་རིག་པ་བྱང་ཆུབ་སེམས་ཀྱི་ཆེ་བའི་ཡོན་ཏན་གྱི་རྣམ་གྲངས་ཇི་སྙེད་པ་ཐམས་ཅད། རིག་པ་ནམ་མཁའ་ལྟ་བུའི་ངང་ལས་ཤར་བ་ཡིན་ཞིང་། དེ་ལྟར་ཤར་བའི་སྣ་ཚོགས་སྣང་བའི་ཆོས་ཐམས་ཅད་ཀྱང་། ཆོས་ཉིད་མཐའ་བྲལ་ཀློང་ཡངས་དེའི་ངང་ལས་མ་འདས་པའི་ཕྱིར་ན་སྟོང་པ་ལས་སྟོང་པའི་རང་མདངས་ཤར་བ་སྟེ། སྟོང་པ་ལས་སྟོང་པའི་རང་མདངས་ཤར་བ་དབྱིངས་ལས་དབྱིངས་བྱུང་བས་མཚོན་ཏེ། ཐབས་མཆོག་སྟོང་པའི་རང་རྩལ་འགག་མེད་དུ་ཤར་བ་ཐམས་ཅད་པོ་སྐྱེ་མེད་མ་བཅོས་པའི་དབྱིངས་སུ་ལྷུན་གྱིས་གྲུབ་པའམ་རང་བཞིན་གྱིས་རྫོགས་པ་ཡིན་པས། དངོས་པོར་སྣང་བ་ཐམས་ཅད་ཟིལ་གནོན་སྟོང་ཉིད་བྱང་ཆུབ་ཀྱི་ཀློང་གཅིག་གིས་ཁྱབ་པ་དང་། སྟོང་པར་རྟོགས་པ་དེ་ཡང་མཐའ་བྲལ་བྱང་ཆུབ་ཀྱི་ཀློང་གིས་ཟིལ་གྱིས་མནན་ཏེ། རང་རིག་ཀློང་ཆེན་དག་པའི་ཆོས་ཉིད་ཆེན་པོ་གཅིག་གི་རང་བཞིན་དུ་བསྟན་པའོ། །དེ་ཡིས་རིག་པ་བྱང་ཆུབ་སེམས་ཀྱི་རང་བཞིན་དབྱེ་བ་དང་རྣམ་གྲངས་སྣ་ཚོགས་ཀྱིས་བསྟན་ཏེ།
༼ཅ༽ལྔ་བ་དེ་དག་གི་དོན་མཁའ་ཀློང་ཡངས་པ་ཆེན་པོར་བསྡུ་བ།
ད་ནི་དེ་དག་གི་དོན་མཁའ་ཀློང་ཡངས་པ་ཆེན་པོར་བསྡུ་བ་ནི།
བྱང་ཆུབ་སེམས་ལ་སྣང་སྟོང་ཡེ་ནས་མེད།།
གཉིས་མེད་མ་ཞེན་བསམ་ཡས་ཆོ་འཕྲུལ་འབྱུང་།།
དུས་གསུམ་དུས་མེད་སྐྱེ་མེད་ཆོས་ཀྱི་དབྱིངས།།
མི་འགྱུར་མི་ཕྱེད་འདུས་མ་བྱས་པའི་ཀློང་།།
དུས་གསུམ་སངས་རྒྱས་རིག་པ་ཡེ་ཤེས་དབྱིངས།།
གཟུང་འཛིན་ཟིལ་གནོན་རང་རིག་བྱང་ཆུབ་ཀློང་།།
ཕྱི་དང་ནང་མེད་ཆོས་ཉིད་ལྷུན་ཡངས་སོ།།
ཞེས་གསུངས་ཏེ། རིག་པའི་ངོ་བོ་ལ་སྣང་སྟོང་ལ་སོགས་པར་མ་གྲུབ་ཅིང་དུས་གསུམ་མཉམ་པའི་དབྱིངས་འདུས་མ་བྱས་པ་ནི། རིག་པ་དུས་གསུམ་གྱི་སངས་རྒྱས་སུ་ཡེ་ནས་ཤར་བས་གཟུང་འཛིན་མེད་པའི་ཆོས་སྐུ་སྟེ། རང་ཤར་ལས། དེ་ཡང་མཚན་ཉིད་འགྱུར་མེད་ཡིན། །ཐ་དད་མ་ཡིན་གཅིག་པུ་ཉིད། །སངས་རྒྱས་བས་ཀྱང་ང་སྔར་བྱུང་། །གཟུང་འཛིན་བསླད་པའི་ཆོས་མེད་པའོ། །ཞེས་པ་དང་། རྩལ་རྫོགས་ལས། གཉིས་མེད་རིག་པའི་རང་སྣང་ཅིར་ཡང་འཆར། །ཆོས་སྐུ་དངོས་བྲལ་ཡེ་ཤེས་གསང་བ་ཉིད། །སྣང་བ་རང་ལུགས་ཡེ་འབྱམས་ཐུགས་ལ་གནས། །ཟད་མེད་རིག་པའི་སྣང་བ་ཅིར་ཡང་སྣང་། །འགག་མེད་རོལ་བའི་རིག་པ་ཅིར་ཡང་འཆར། །རྟོག་མེད་ཐུགས་ཀྱི་དགོངས་པ་མཉམ་པ་ཉིད། །དུས་གསུམ་སངས་རྒྱས་རིག་པ་གཟུང་འཛིན་བྲལ། །ཞེས་གསུངས་སོ། །རིག་པ་བྱང་ཆུབ་སེམས་ཀྱི་ངོ་བོ་ལ། སྣང་སྟོང་གི་མཚན་མ་མ་གྲུབ་ཅིང་། གཉིས་མེད་བསམ་བརྗོད་དང་བྲལ་བ་ལ་ཡང་འཛིན་པས་མ་ཞེན་བཞིན་དུ་འདོད་འབྱུང་ནོར་བུ་རིན་ཆེན་ཆོས་ཀྱི་དབྱིངས་འཁོར་འདས་ཀྱི་སྣ་ཚོགས་སྣང་བའི་ཆོ་འཕྲུལ་འགག་མེད་དུ་ཤར་བའི་དུས་གསུམ་གྱི་དུས་མེད་པའི་དུས་ཀུན་མཉམ་པའི་དབྱིངས་འདུས་མ་བྱས་པ་ཆོས་ཀྱི་དབྱིངས་འགྱུར་བ་མེད་པ་དེའི་ཀློང་དེ་ལས། དུས་གསུམ་གྱི་སངས་རྒྱས་ཀྱང་ཡེ་ནས་ཤར་བ་མ་གཏོགས་པར། རྩོལ་སྒྲུབ་ཅན་དུ་མ་དམིགས་པས་གཟུང་འཛིན་ཟིལ་གནོན། རིག་པ་ཟང་ཐལ་ཡེ་གྲོལ་དུ་རྗེན་ལ་སངས་དུས་ཆོས་སྐུ་ཟད་པའི་དགོངས་པར་ཕྱིན་ཏེ་རྟོགས་པ་མི་ནུབ་པའི་རྒྱལ་མཚན་རྩེ་མོ་ལས་རང་བྱུང་ཡེ་ཤེས་ཀྱི་ཉི་ཟླ་འོད་གསལ་བ། རྣམ་པ་ཀུན་ལྡན་གྱི་སྟོང་ཆེན་རིག་པའི་ངང་དུ་ཤར་བས། འཁོར་འདས་འཆིང་གཞིའི་མུན་པ་སངས་པ་ཞེས་བྱའོ། །རྟོག་མེད་ཐུགས་ཀྱི་དགོངས་པ་མཉམ་པ་ཉིད་དུ་མི་གཡོ་པའི་ཆོས་སྐུའི་གསང་བ་ཆེན་པོར་བསྟན་པའོ། །ལེའུ་མཚན་ནི། ཆོས་དབྱིངས་རིན་པོ་ཆེའི་མཛོད་ལས། བྱང་ཆུབ་སེམས་ཀྱི་རང་བཞིན་བསྟན་པ་སྟེ། ལེའུ་བཞི་པའི་འགྲེལ་པའོ།། །།
ལེའུ་ལྔ་པ་རྩོལ་སྒྲུབ་རྒྱུ་འབྲས་ལས་འདས་པར་བསྟན་པའི་འགྲེལ་པ།
ལེའུ་ལྔ་བ་རྩོལ་སྒྲུབ་རྒྱུ་འབྲས་ལས་འདས་པར་བསྟན་པའི་ལེའུ་ལ་དང་པོ་རང་བྱུང་ཡེ་ཤེས་རྩོལ་སྒྲུབ་རྒྱུ་འབྲས་ལས་འདས་པ་སྡོམ་གྱིས་བསྟན་པ་དཔེ་དང་བཅས་པ་དང་། གཉིས་པ་ཐེག་པའི་རིམ་པ་མཐའ་དག་ཨ་ཏིའི་འཇུག་སྒོར་བསྟན་པ་རྩོལ་སྒྲུབ་རྒྱུ་འབྲས་ལས་འདས་པ་ཨ་ཏིའི་རང་ངོའི་དགོངས་པ་བསྟན་པ་དང་། གསུམ་པ་རང་བྱུང་གི་ཡེ་ཤེས་དང་གཞན་བྱུང་གི་རྟོག་ཚོགས་འབྱེད་པའི་དབྱེ་བ་མཇུག་སྡུད་དང་བཅས་པ་བསྟན་པ། བཞི་བ་རྟོགས་པའི་རྣལ་འབྱོར་པ་ལ་འགྱུ་འཕྲོར་སྣང་བ་དང་ཡུལ་སྣང་སྒྱུ་མའི་རྩེད་མོ་ཙམ་ལས་གོས་པ་མེད་པའི་གནད་བསྟན་པ། ལྔ་བ་དེ་དག་གི་དོན་རྒྱུ་འབྲས་རྩོལ་སྒྲུབ་ལས་འདས་པར་བསྡུ་བ་དང་ལྔ་ལས།
༼ཀ༽དང་པོ་རང་བྱུང་ཡེ་ཤེས་རྩོལ་སྒྲུབ་རྒྱུ་འབྲས་ལས་འདས་པ་སྡོམ་གྱིས་བསྟན་པ་དཔེ་དང་བཅས་པ་བསྟན་པ།
དང་པོ་ལ། རིག་པ་བྱང་ཆུབ་སེམས་ཀྱི་རང་བཞིན་ཉིད་བྱ་བཙལ་རྒྱུ་འབྲས་ལས་འདས་པ་མདོར་བསྟན་པ་དངོས་དང་། དེ་ལྟར་གང་དུའང་བྱ་རྩོལ་དང་སྤང་བླང་མེད་པའི་དཔེ་ངེས་པ། རང་བཞིན་བཅུའི་ཆོས་བསྟན་པ་ཉིད་ཨ་ཏིའི་རྣལ་འབྱོར་པས་གོལ་སྒྲིབ་ཏུ་ཤེས་པར་བྱ་བ་དང་གསུམ་ལས།
༼ཀ རིག་པ་བྱང་ཆུབ་སེམས་ཀྱི་རང་བཞིན་ཉིད་བྱ་བཙལ་རྒྱུ་འབྲས་ལས་འདས་པ་མདོར་བསྟན་པ་དངོས།
ལེའུ་གོང་མས་བསྟན་པ་དེ་ལྟ་བུའི་རིག་པ་བྱང་ཆུབ་སེམས་ཀྱི་རང་བཞིན་ཉིད་བྱ་བཙལ་རྒྱུ་འབྲས་ལས་འདས་པར་བསྟན་པ་ནི།
སེམས་ཉིད་བྱང་ཆུབ་སེམས་ཀྱི་ངོ་བོ་ལ།།
ལྟ་བ་བསྒོམ་མེད་སྤྱོད་པ་སྤྱད་དུ་མེད།།
འབྲས་བུ་བསྒྲུབ་མེད་ས་ལམ་བགྲོད་དུ་མེད།།
དཀྱིལ་འཁོར་བསྐྱེད་མེད་བཟླས་བརྗོད་རྫོགས་རིམ་མེད།།
དབང་ལ་བསྐུར་མེད་དམ་ཚིག་བསྲུང་དུ་མེད།།
ཡེ་ནས་ལྷུན་གྲུབ་དག་པའི་ཆོས་ཉིད་ལ།།
གློ་བུར་རིམ་རྩོལ་རྒྱུ་འབྲས་ཆོས་ལས་འདས།།
ཞེས་གསུངས་ཏེ། འདིར་དོན་དམ་པའི་བདེན་པ་རིག་པ་ནམ་མཁའ་ལྟ་བུའི་ངོར་བྱས་ན་གང་དུའང་གྲུབ་པ་མེད་པའི་ཕྱིར། ལྟ་སྒོམ་སྤྱོད་འབྲས་དང་། དཀྱིལ་འཁོར་བསྐྱེད་རྫོགས་དང་། དམ་ཚིག་སྡོམ་པ་ལ་སོགས་པ་གྲུབ་པ་མེད་དེ། སྟོང་ཞིང་བདག་མེད་པའི་རིག་པ་མཚོན་བརྗོད་ཐམས་ཅད་ལས་འདས་པའི་ངོ་བོ་ཉིད་ཀྱི་ཕྱིར་རོ། །འདིའི་རྩ་བའི་ཚིག་རྐང་གསུམ་གྱིས། སེམས་ཉིད་དོན་དམ་པའི་བདེན་པ་རིག་པ་བྱང་ཆུབས་སེམས་ཀྱི་ངོ་བོའམ། དེའི་ངོ་ཁར་ལྟ་སྒོམ་སྤྱོད་འབྲས་ཀྱིས་ས་ལམ་བགྲོད་དུ་མེད་པའི་ཆིངས་ཀྱིས་སྤྱིར་བཅིངས་ནས། ཚིག་རྐང་བར་མ་གཉིས་ཀྱིས། བསྐྱེད་རྫོགས་དབང་དང་དམ་ཚིག་གི་བྱ་བྱེད་ཀྱིས་དགོས་པ་མེད་པར་བྱེ་བྲག་ཏུ་བསྟན་པ་དང་། ཚིག་རྐང་ཐ་མ་གཉིས་ཀྱིས་ཡེ་ནས་ལྷུན་གྲུབ་དག་པའི་ཆོས་ཉིད་དེ། གློ་བུར་རིམ་རྩོལ་དང་རྒྱུ་འབྲས་བྱ་བྱེད་ཀྱི་ཆོས་ལས་འདས་པར་བསྟན་ཞིང་། དེ་འགྲེལ་བས་བཀྲལ་བ་ནི། རིག་པ་ནམ་མཁའ་ལྟ་བུའི་ངོ་བོ་ལ། ལྟ་སྒོམ་སྤྱོད་འབྲས་ལ་སོགས་པར་གྲུབ་པ་མེད་དེ་ཞེས་དམ་བཅས་ནས། སྟོང་ཞིང་བདག་མེད་ཀྱི་རིག་པ་དེ་མཚོན་བརྗོད་ཐམས་ཅད་ལས་འདས་པའི་ཕྱིར། དེ་ཡང་ཡིན་ཏེ། གྲུབ་པ་མེད་ཅེས་པའི་ཐ་སྙད་ཀྱང་བླ་དྭགས་ཙམ་སྟེ། དེ་ཅིའི་ཕྱིར་ཞེ་ན། གང་དུ་ཡང་གྲུབ་པར་མེད་པའི་ཕྱིར་ཞེས་པའོ། །ཡིད་ཆེས་ཀྱི་ལུང་གིས་ངེས་པ་ནི། ཀུན་བྱེད་ལས། བྱང་ཆུབ་སེམས་ནི་ནམ་མཁའ་ལྟ་བུ་སྟེ། །ནམ་མཁའ་ལྟ་བུའི་སེམས་ཉིད་ཆོས་ཉིད་ལ། །ལྟ་བ་བསྒོམ་མེད་དམ་ཚིག་བསྲུང་དུ་མེད། །འཕྲིན་ལས་བརྩལ་མེད་ཡེ་ཤེས་སྒྲིབ་པ་མེད། །ས་ལ་སྦྱང་མེད་བགྲོད་པའི་ལམ་ཡང་མེད། །ཕྲ་བའི་ཆོས་མེད་གཉིས་མེད་འབྲེལ་པ་མེད། །སེམས་ལས་ངེས་ལུང་གཏན་ལ་འབེབས་པ་མེད། །སྒྲོ་སྐུར་འདས་པས་མན་ངག་ལ་བཟླར་མེད། །རྫོགས་ཆེན་བྱང་ཆུབ་སེམས་ཀྱི་ལྟ་བའོ། །ཞེས་པ་དང་། ནམ་མཁའ་ལྟ་བུའི་རིག་པ་བྱང་ཆུབ་ཀྱི་ངོ་བོ་ལ། ལྟ་སྒོམ་དམ་ཚིག་འཕྲིན་ལས་ས་ལམ་དང་བཅས་པའི་རྩོལ་སྒྲུབ་གཉིས་ཆོས་ལས་འདས་པ་ནི། རྫོགས་ཆེན་བྱང་ཆུབ་སེམས་ཀྱི་ལྟ་བ་ཡིན་པར་བསྟན་ནས། རང་ཤར་ལས། དོན་ནི་སྐྱེ་མེད་བྱང་ཆུབ་སེམས། །དེ་ལ་གཉེན་པོས་གཞིག་ཏུ་མེད། །དེ་ལ་ཕྱོགས་དང་རིས་སུ་མེད། །ང་དང་བདག་ཏུ་འཛིན་པ་མེད། །བཟང་དང་ངན་པའི་རྣམ་རྟོག་མེད། །ཡིན་དང་མིན་པའི་མཐའ་ལས་འདས། །རྟོགས་དང་མི་རྟོགས་ཆོས་ལས་འདས། །རྟག་དང་ཆད་པ་གཉིས་དང་བྲལ། །གོལ་དང་སྒྲིབ་པའི་ཆོས་ལས་འདས། །རྟོགས་དང་མ་རྟོགས་གཉིས་སུ་མེད། །དག་དང་མ་དག་མཐའ་ལས་འདས། །སེམས་དང་ཡིད་དང་ཆོས་ལས་འདས། །ཤེས་དང་མ་ཤེས་གཉིས་སུ་མེད། །མ་རིག་འཁྲུལ་བའི་སེམས་ལས་འདས། །སྒྲ་དང་ཐ་སྙད་ཚིག་དང་བྲལ། །གཟུང་འཛིན་སེམས་ཀྱི་དྲི་མ་མེད། །རྟོག་པ་ལམ་གྱི་དྲི་མ་བསལ། །བསམ་པ་སྣ་ཚོགས་བྱ་བྱེད་འདས། །དངོས་པོར་འཛིན་པའི་ཆོས་དང་བྲལ། །ས་དང་ལམ་ལ་སྦྱང་དུ་མེད། །ལྷ་ལ་མཆོད་པ་འབུལ་མི་དགོས། །དགེ་བ་བཅུ་ཡིས་བསྐྱབ་ཏུ་མེད། །སྡིག་པས་དེ་ལ་གོས་མི་འགྱུར། །འཁོར་བ་ངན་སོང་ག་ལ་ཡོད། །མྱ་ངན་འདས་པའི་ཆོས་མེད་ཅིང་། །བདག་དང་གཞན་དུ་ལྟ་བ་མེད། །ལོག་དང་མ་ལོག་ག་ལ་ཡོད། །ཡོད་དང་མེད་པའི་མཐའ་ལས་འདས། །ཁ་དོག་མེད་ཅིང་དབྱིབས་མེད་པའོ། །ཞེས་པ་དང་། སྤང་གཉེན་ལམ་གྱི་དྲི་མ་མེད་པར་བསྟན་པའོ། །རིན་པོ་ཆེ་སྤུངས་པ་ལས། འདི་ལ་སྔགས་དང་ཕྱག་རྒྱ་མེད། །དཀྱིལ་འཁོར་ལྷ་དང་མཆོད་པ་ཡང་། །འདི་ལ་དགོས་དོན་གང་ཡང་མེད། །རྫས་དང་ཆོ་ག་བཤམ་མི་དགོས། །འཇུག་དང་ཡེ་ཤེས་དབབ་ཏུ་མེད། །ཅེས་པ་དང་། བསྐྱེད་རིམ་མེད་པར་བསྟན་པའོ། །རྩལ་རྫོགས་ལས། རྫོགས་ཆེན་རིག་པའི་རང་སྐད་ནི། །སྣང་དང་སྟོང་པའི་ཡུལ་ལས་འདས། །སེམས་དང་ཡིད་དང་ཆོས་ལས་འདས། །ཡིན་དང་མིན་པ་གཉིས་ལས་འདས། །བཟང་དང་ངན་པའི་ལྟ་བ་མེད། །སྒོམ་དང་མི་སྒོམ་གཉིས་སུ་མེད། །ཅེས་པ་དང་། རྫོགས་རིམ་མེད་པར་བསྟན་པའོ། །རིག་པའི་སྐུ་དང་དམ་ཚིག་མེད། །སྲུང་དང་བསྲུང་བར་བྱ་བ་མེད། །སྣང་དང་མི་སྣང་དམ་ཚིག་མེད། །རང་རིག་རྫོགས་ཆེན་ངོ་བོ་ལ། །དམ་ཚིག་ལུང་དུ་བསྟན་དུ་མེད། །ཤེས་རབ་ཆེན་པོའི་སྤྱོད་ཡུལ་ནི། །མེད་པ་ཉིད་ལ་མེད་པ་སྤྱོད། །གཅིག་པུ་ཉིད་ལ་གཅིག་པུ་སྤྱོད། །ཕྱལ་པ་ཉིད་ལ་ཕྱལ་པ་ཡིས། །ལྷུན་གྲུབ་ཉིད་ལ་ལྷུན་གྲུབ་སྟེར། །ཞེས་སོ། །དམ་ཚིག་ཀྱང་བསྲུང་བྱ་སྲུང་བྱེད་ལས་འདས་པར་བསྟན་པའོ། །ཡེ་ནས་ལྷུན་གྲུབ་དག་པའི་ཆོས་ཉིད་རིག་པ་བྱང་ཆུབ་སེམས་ཀྱི་ངོ་བོ་གློ་བུར་རིམ་རྩོལ་རྒྱུ་འབྲས་ཀྱི་ཆོས་ལས་འདས་ཤིང་མེད་པ་ཡིན་ལ། དེ་ཡང་མེད་པའི་ཚིག་ལ་རྩལ་འདོན་མཛད་པ་ཡང་ཡོད་པ་བཀག་པའི་མེད་པར་སྒྲུབ་པར་བྱེད་པ་མ་ཡིན་པར། མེད་པ་ཙམ་དུའང་མ་གྲུབ་པའི་ཚིག་དང་ཐ་སྙད་ཀྱི་ཆོས་ལས་འདས་པའི་གྲུབ་མཐའ་འཆའ་བ་སྟེ། འཁོར་བར་སྣང་བའི་ཆོས་ཐམས་ཅད་རྒྱུ་འབྲས་ཀྱི་སྣང་ཚུལ་མ་འགགས་པ་ལས་བྱུང་ལ། མཚན་འཛིན་གྱི་ལས་ལ་གོམས་པ་རྣམས་ཀྱི་འཇུག་སྒོ་རུ་རྒྱུ་འབྲས་རྩོལ་གྲུབ་ཅན་གྱི་འདས་ལམ་བསྟན་ན་ཡང་། དོན་གྱི་སྐྱེལ་སོ་རིག་པ་ཟང་ཀ་རང་གསལ་རྗེན་པའི་ངོ་བོ་ལ་འཁོར་འདས་མཉམ་ཉིད་རྒྱུ་འབྲས་མེད་པས་འཁོར་བར་ལྷུང་བ་དང་བདེ་སྡུག་གི་གཡང་ས་ཡེ་ནས་ཆོད་པ་ནམ་མཁའ་ལྟ་བུའི་ངང་དེ་ཉིད་དེ་ཇི་ལྟར་ཡིན་པར་ཐད་གྲངས་སུ་བསྟན་པ་སྟེ། རིག་པ་གང་དུའང་མེད་པའི་ངང་ནས་ལས་དགེ་སྡིག་རྒྱུ་འབྲས་སུ་ཇི་ལྟར་ཤར་ཞིང་གནས་པ་དེ་ཉིད། གཉིད་དུས་རྨི་ལམ་སྣང་ཡང་སད་དུས་མེད་པ་ལྟར་དུ། རྣལ་འབྱོར་པས་རིག་པའི་རང་ངོ་རྟོགས་ནས་ཆོས་ཟད་སྟོང་པ་ཡེ་དག་ཏུ་སངས་དུས་དགེ་སྡིག་རྒྱུ་འབྲས་མེད་ཅིང་། དེ་མེད་པས་ཚེ་སྔ་ཕྱི་མེད་པར་སྐྱེ་བའི་ངོ་བོ་ཟད་པས་སྲིད་གསུམ་ཀ་དག་ཆེན་པོར་སྟོངས་ཏེ། འཁོར་བ་དོང་སྤྲུགས་ཆེན་པོ་ཞེས་བྱའོ། །དེ་ལྟ་བུའི་རྣལ་འབྱོར་པ་ཡང་རབ་ཀྱིས་སྣང་བ་བག་ཡངས་སུ་སྤྱོད་ཆོག་པ་ནི། རྡོ་རྗེའི་གད་མོ་བཅུ་གཉིས་དང་། ངོ་མཚར་པའི་ཚིག་ཆེན་བདུན་ནམ་བརྒྱད་ལ་སོགས་པ་རིན་པོ་ཆེ་སྤུངས་པའི་རྒྱུད་ལས་གསུངས་པ་རྣམས་སྒྲ་ཇི་བཞིན་པར་འཛིན་ཆོག་པའོ། །དེ་ཡན་གྱིས་མེད་པའི་རང་ངོའི་བཞུགས་ཚུལ་བྱ་རྩོལ་རྒྱུ་འབྲས་ལས་འདས་པའི་ཆིངས་སམ་མདོར་བསྟན་པ་ཡིན་ལུགས་སྒྲུབ་བྱེད་ལུང་གི་རྒྱབ་སྐྱོར་དང་བཅས་པ་སོང་ནས།
༼ཁ གཉིས་པ་དེ་ལྟར་གང་དུའང་བྱ་རྩོལ་དང་སྤང་བླང་མེད་པའི་དཔེ་ངེས་པ།
དེ་ལྟར་གང་དུའང་བྱ་རྩོལ་དང་སྤང་བླང་མེད་པའི་དཔེ་ངེས་པ་ནི།
འདི་དག་བྱང་ཆུབ་སེམས་ཀྱི་ངོ་བོ་སྟེ།།
ཉི་མ་སྤྲིན་དང་མུན་པས་མ་བསྒྲིབས་ལ།།
གློ་བུར་མ་བྱས་དབྱིངས་ན་ངང་གིས་གསལ།།
ཞེས་གསུངས་ཏེ། ཉི་མའི་ངོ་བོ་ནི་ནམ་མཁའི་དབྱིངས་ན་རང་བཞིན་གྱིས་འོད་གསལ་བ་སྟེ། དེའི་ངོ་བོ་ལ་སྤྲིན་གྱིས་སྒྲིབ་ཏུ་ཡང་མེད་དེ། རྒྱུ་འབྲས་ཀྱིས་གློ་བུར་དུ་འོད་གསལ་བར་ཡང་བྱར་མེད་པ་དེ་བཞིན་དུ། རིག་པའི་རང་ངོ་ལ་རྒྱུ་འབྲས་དང་སྒྲིབ་པ་ཡོད་མི་སྲིད་པའོ། །གླིང་བཞིའི་མིས་བལྟས་དུས་རེས་འགའ་བསྒྲིབས་པ་ལ་སོགས་པར་སྣང་བ་ནི། ཉི་མ་བསྒྲིབས་པ་མ་ཡིན་གྱིས། རང་གི་མིག་སྔར་སྤྲིན་གྱིས་བསྒྲིབ་པར་སྣང་བ་ལ། ཉི་མ་བསྒྲིབས་སོ་སྙམ་དུ་འཛིན་པ་ནི་འཁྲུལ་བ་ཞེས་བྱའོ། །དེ་བཞིན་དུ་གློ་བུར་བའི་ཉོན་མོངས་པ་ལ་སོགས་པས་རིག་པ་ལ་གོལ་བ་དང་བསྒྲིབས་པ་མེད་ཀྱིས། འཁྲུལ་རྟོག་གི་ངོ་ཁ་ལ་བསྒྲིབས་པར་སྣང་བ་ལ། རིག་པ་བསྒྲིབ་པ་དང་ལྡན་ནོ་དག་པར་བྱའོ་ཡོན་ཏན་བསྐྱེད་དོ་སྙམ་པ་ནི་འཁྲུལ་བ་ཟང་མ་ཞེས་བྱའོ། །འདི་དག་བྱང་ཆུབ་སེམས་ཀྱི་ངོ་བོ་སྟེ། །ཞེས་པ་འདིས་གོང་ནས་བཤད་པའི་མེད་པའི་རང་ངོའི་དོན་བསྡུས་ཤིང་། ལྷག་མ་འདྲེན་པའི་ཚིག་གིས་འོག་གི་དཔེ་དང་། དཔེ་དོན་སྦྲེལ་པའི་ཚིག་གིས་མཚམས་སྦྱར་ནས། འགྲེལ་པས་ཞིབ་པར་བཀྲལ་ཏེ། ཉི་མའི་ངོ་བོ་སྤྲིན་གྱིས་བསྒྲིབས་པ་མ་ཡིན་པར་མིག་སྔར་སྤྲིན་གྱིས་བསྒྲིབས་པ་དང་འདྲ་བར། རིག་པའི་ངོ་བོ་དྲི་མས་བསྒྲིབས་པ་མ་ཡིན་པར་འཁྲུལ་རྟོག་གི་ངོར་རང་གི་རིག་པ་མ་མཐོང་པ་ལ་རིག་པ་དྲི་མས་བསྒྲིབས་པའི་སྣང་བ་ཤར་བ་སྟེ། དེ་ནི་འཁྲུལ་བ་ཟང་མའམ་འཁྲུལ་བ་ཉག་གཅིག་གོ །དཔེ་གཞན་ཡང་སྒྱུ་མ་མཁན་གྱིས་མིག་འབྲིད་པའི་རྩེད་མོའི་སྤྲུལ་པ་བྱས་ཚེ། དེར་རྒྱུས་མེད་པའི་བྱིས་པ་བློའི་ཤེད་མ་སྐྱེས་པའི་བྱིས་པ་དག་གིས་བདེན་པར་སེམས་ཤིང་དོན་དུ་གྲུབ་པར་འདུ་ཤེས་ཀྱང་། རྒན་པོ་རྒྱུས་ཅན་གྱིས་བལྟས་ཚེ་དེའི་གནད་ཚང་མ་ཤེས་ནས་མི་འཆིང་བ་བཞིན་དུ། འདི་ལྟར་སྣང་བའི་ཆོས་མེད་པ་གསལ་སྣང་སྒྱུ་མའི་སྟོང་གཟུགས་སུ་བདག་ཏུ་ཞེན་པའི་སྐྱེ་བོས་བདེན་པར་ཞེན་ནས་འཆིང་ན་ཡང་། རྣལ་འབྱོར་པས་དེ་ཁོ་ན་ཉིད་ཀྱི་དོན་ཤེས་ཤིང་རིག་པའི་རང་ངོ་རྟོགས་པས། འཆིང་གྲོལ་གཉིས་ཀ་ལས་འདས་པའི་ཉག་གཅིག་ཆོས་སྐུའི་ཀློང་དུ་གྲོལ་བའོ། །དེའི་དོན་ལུང་གིས་གསལ་བར་བྱས་པ་ནི། ཡུམ་ཆེན་མོ་ལས་ཀྱང་། སེམས་ལ་སེམས་མ་མཆིས་ཏེ་སེམས་ཀྱི་རང་བཞིན་ནི་འོད་གསལ་བ་ལགས་སོ་ཞེས་པ་དང་། མངོན་རྟོགས་རྒྱན་ལས་ཀྱང་། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་ཟད་མེད། །ཅེས་པ་དང་། རང་ཤར་ལས། རིག་པ་ཉིད་ཀྱི་སྣང་བ་ནི། །རྟག་ཆད་གཉིས་ཀྱི་མཐའ་ལས་འདས། །བརྗོད་མེད་རྣམ་པར་དག་པའི་ཆོས། །ཡིན་དང་མིན་པའི་མཐའ་ལས་འདས། །དགག་དང་སྒྲུབ་པ་མེད་པ་ཉིད། །འཛིན་དང་ཆགས་པའི་མཐའ་ལས་འདས། །དྲི་མེད་འོད་གསལ་ལྷུན་གྲུབ་ཉིད། །ཅེས་པ་ལྟ་བུའོ། །འདི་ཆུ་ཀླུང་ཆེན་པོའི་རྒྱུད་ཀྱི་ནང་ལ་སོགས་པ་ནས་ཀྱང་སྒྲ་གཅིག་དོན་གཅིག་གིས་འབྱུང་བ་ཡིན། དེ་ཡིས་རིག་པའི་རང་བཞིན་བྱ་རྩོལ་རྒྱུ་འབྲས་ལས་འདས་པ་དོན་དང་དཔེ་སྦྱར་ནས་སྡོམ་གྱིས་མདོར་བསྟན་ཏེ།
༼ག གསུམ་པ་རང་བཞིན་བཅུའི་ཆོས་བསྟན་པ་ཉིད་ཨ་ཏིའི་རྣལ་འབྱོར་པས་གོལ་སྒྲིབ་ཏུ་ཤེས་པར་བྱ་བ།
རིག་པའི་ངོ་བོ་དེ་ལྟར་ཡིན་ཡང་དབང་པོ་དམན་པའི་ངོར་རང་བཞིན་བཅུའི་ཆོས་བསྟན་པ་ཉིད། ཨ་ཏིའི་རྣལ་འབྱོར་པས་གོལ་སྒྲིབ་ཏུ་ཤེས་པར་བྱ་བ་ནི།
རྩོལ་ཞིང་བསྒྲུབ་པའི་ཆོས་བཅུ་གང་བསྟན་པ།།
རྩལ་ལས་གློ་བུར་འཁྲུལ་ངོར་གསུངས་པ་ཉིད།།
རིམ་རྩོལ་དབང་པོའི་རིམ་པས་འཇུག་པའི་ཐབས།།
ཨ་ཏི་ཡོ་ག་རྡོ་རྗེ་སྙིང་པོའི་དོན།།
ཇི་བཞིན་རྣལ་དུ་འབྱོར་ལ་བསྟན་པ་མིན།།
ཞེས་གསུངས་ཏེ། འདིའི་དོན་ལུང་གིས་བཀྲལ་པས་འཐུས་པར་མཛད་པ་སྟེ། ཇི་སྐད་དུ། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས། ཡོངས་སུ་རྣལ་འབྱོར་ལ་སོགས་གསུམ་པོ་སྟེ། མ་ཧཱ་དང་། ཨ་ནུ་དང་། སྔགས་ཕྱི་པ་གསུམ་པོ་གཅིག་ཏུ་བརྩིས་པ་དང་གསུམ་ལ། །རང་བྱུང་ཡེ་ཤེས་ཆེ་དང་མི་ལྡན་པས། །ལམ་ལ་བགྲོད་ཅིང་ས་ལ་སྦྱོང་བར་བྱེད། །དམ་ཚིག་བསྲུང་ཚུལ་ལྟ་བ་སྒོམ་བྱེད་པ། །གོམས་པ་དྲག་དལ་ལྟ་སྤྱོད་ཡོད་མ་ཡིན། །དེ་བས་ཤིན་ཏུ་རྣལ་འབྱོར་ལྟ་སྤྱོད་ནི། །ཡེ་ནས་ཀུན་བྱེད་ཉིད་ཀྱིས་བྱས་པའི་ཕྱིར། །ལམ་ལ་མི་བགྲོད་ས་ལམ་སྦྱོང་མི་བྱེད། །དམ་ཚིག་མི་སྲུང་ལྟ་བ་སྒོམ་མི་བྱེད། །བྱང་ཆུབ་ཆེན་པོའི་ལམ་ནས་ཀུན་འབྱུང་ཕྱིར། །བྱང་ཆུབ་ཉིད་ལ་བྱང་ཆུབ་ཉིད་མི་བགྲོད། །བགྲོད་པ་བྱང་ཆུབ་ཉིད་ལས་མེད་པའི་ཕྱིར། །བྱང་ཆུབ་ཉིད་ལ་བྱང་ཆུབ་ཉིད་མི་སྤྱོད། །དམ་ཚིག་རང་བཞིན་བྱང་ཆུབ་ཉིད་ཡིན་པས། །བྱང་ཆུབ་ཉིད་ལ་བྱང་ཆུབ་ཉིད་མི་བསྲུང་། །སྒོམ་པའི་རང་བཞིན་བྱང་ཆུབ་ཉིད་ཡིན་པས། །བྱང་ཆུབ་ཉིད་ཀྱིས་ཉིད་ལ་སྒོམ་དུ་མེད། །ལྟ་བའི་རང་བཞིན་བྱང་ཆུབ་ཉིད་ཡིན་པས། །བྱང་ཆུབ་ཉིད་ཀྱིས་ཉིད་ལ་བལྟར་མེད་ཕྱིར། །ཤིན་ཏུ་རྣལ་འབྱོར་ལྟ་སྤྱོད་བྱར་མེད་འདི། །རང་བྱུང་ཡེ་ཤེས་གོམས་པ་དྲག་དལ་ཅན། །ཀུན་བྱེད་རྒྱལ་པོ་ང་ཡི་གོམས་པ་ཡིན། །རྒྱུ་འབྲས་ཐེག་པ་ཅན་གྱི་སྤྱོད་ཡུལ་མིན། །ཞེས་སོ། །འདིའི་ལུང་ལས་འབྱུང་བའི་རྣལ་འབྱོར་བཞི་ནི། སེམས་དཔའི་རྣལ་འབྱོར་སྔགས་ཕྱི་པ་གསུམ། ཀྲི་ཡ། ཨུ་པ། ཡོ་གའོ། །རྣལ་འབྱོར་ཆེན་པོ་བསྐྱེད་པ་མ་ཧཱ་ཡོ་ག ཡོངས་སུ་རྣལ་འབྱོར་རམ་རྗེས་སུ་རྣལ་འབྱོར་ཏེ། མ་ཧཱ་ཡོ་གའི་རྗེས་སུ་འབྱུང་བས་སམ་འདིའི་རྗེས་སུ་ཨ་ཏི་ཡོ་ག་འབྱུང་བས་ན་རྗེས་སུ་རྣལ་འབྱོར་རོ། །ལུང་ཨ་ནུ་ཡོ་ག ཤིན་ཏུ་རྣལ་འབྱོར་མན་ངག་ཨ་ཏི་ཡོ་གའོ། །ཤིན་ཏུ་རྣལ་འབྱོར་གྱི་ལྟ་སྤྱོད་ནི། བྱར་མེད་ཀུན་བྱེད་རིག་པ་བྱང་ཆུབ་ཀྱི་སེམས་ཉིད་ཀྱིས་བྱས་པའི་ཕྱིར་ན། ལམ་ལ་བགྲོད་རྒྱུ་དང་ས་ལམ་སྦྱོང་མི་དགོས་ཤིང་། དམ་ཚིག་སྲུང་རྒྱུ་དང་། ལྟ་སྒོམ་བྱེད་རྒྱུའང་མི་དགོས་ཏེ། དེ་ནི་བྱང་ཆུབ་ཆེན་པོའི་ལམ་ཡིན་ལ། བྱང་ཆུབ་ཆེན་པོ་དེ་ནི་གཞན་འབྱུང་བའི་གནས་ཡིན་པའི་ཕྱིར་ན། ཀུན་འབྱུང་བྱང་ཆུབ་ཀྱིི་སེམས་ལ་བྱང་ཆུབ་བགྲོད་མིི་དགོས་སོ། །དེ་དག་གི་ཁྱད་པར་ཡང་རྒྱུད་དེ་ཉིད་ལས། ཤིན་ཏུ་རྣལ་འབྱོར་ཡོངས་སུ་རྣལ་འབྱོར་དང་། །རྣལ་འབྱོར་ཆེན་པོ་སེམས་དཔའི་རྣལ་འབྱོར་བཞི། །སྙིང་པོ་དོན་གྱི་རྣལ་འབྱོར་བྱར་མེད་ལ། །བལྟས་པས་མཐོང་བའི་ཡུལ་ནི་རྣམ་པ་བཞི། །སེམས་དཔའི་རྣལ་འབྱོར་ཡུལ་དང་དབང་པོར་མཐོང་། །བྱང་ཆུབ་ལྔ་དང་ཆོ་འཕྲུལ་རྣམ་པ་བཞིས། །བྱིན་གྱིས་བརླབས་ནས་སེམས་དཔའི་ལྷ་གཉིས་ལྟ། །སྙིང་པོ་དོན་གྱི་རྣལ་མ་མཐོང་བ་མེད། །མ་བཅོས་དེ་བཞིན་ཉིད་དུ་སེམས་དཔའ་ཞོག །དོན་གྱི་སྙིང་པོ་རྣལ་མ་བྱར་མེད་ལ། །རྣལ་འབྱོར་ཆེན་པོ་རྣམས་ཀྱིས་མཐོང་བ་ནི། །ཡེ་ནས་རང་རྒྱུད་དག་པའི་དཀྱིལ་འཁོར་ལ། །རྒྱུ་ལས་འབྲས་བུ་ལྷ་ཡི་དཀྱིལ་འཁོར་དེ། །བསྙེན་སྒྲུབ་བཞི་ཡི་ཡན་ལག་རྫོགས་བྱས་ནས། །འཕྲོ་འདུས་བདག་ཉིད་ལྷུན་གྱིས་གྲུབ་པར་ལྟ། །དོན་གྱི་སྙིང་པོ་རྣལ་མ་མཐོང་བ་མེད། །མ་བཅོས་དེ་བཞིན་ཉིད་དུ་ཆེན་པོར་ཞོག །དོན་གྱི་སྙིང་པོ་རྣལ་མ་བྱར་མེད་ལ། །ཡོངས་སུ་རྣལ་འབྱོར་རྣམས་ཀྱིས་མཐོང་བ་ནི། །དབྱིངས་ཀྱི་སྙིང་པོ་རྣལ་མའི་རྒྱུར་མཐོང་ལ། །ཡེ་ཤེས་ཆེན་པོ་རྣལ་མའི་འབྲས་བུར་མཐོང་། །སྙིང་པོ་གཅིག་ལ་རྒྱུ་འབྲས་གཉིས་མཐོང་བས། །རྒྱུ་འབྲས་འདས་པའི་རྣལ་འབྱོར་མཐོང་བ་མིན། །མ་བཅོས་དེ་བཞིན་ཡོངས་སུ་རྣལ་འབྱོར་ཞོག །དོན་གྱི་སྙིང་པོ་རྣལ་མ་བྱར་མེད་ལ། །ཤིན་ཏུ་རྣལ་འབྱོར་རྫོགས་ཆེན་ལྟ་མཐོང་བས། །བྱང་ཆུབ་སེམས་ནི་ཀུན་གྱི་སྙིང་པོར་མཐོང་། །དེ་ཉིད་མ་བཅོས་དོན་གྱི་རྣལ་མ་མཐོང་། །ལྟ་བ་ཡེ་ནས་བསྒོམ་དུ་མེད་པར་ཞོག །དམ་ཚིག་ཡེ་ནས་སྲུང་དུ་མེད་པར་བཞག །འཕྲིན་ལས་ཡེ་ནས་བཙལ་དུ་མེད་པར་བཞག །བཞག་པས་དེ་བཞིན་ཉིད་ལ་རྣལ་དུ་འབྱོར། །ཞེས་སོ། །རྣལ་འབྱོར་བཞིའི་ལམ་ནས། སྙིང་པོ་དོན་གྱི་རྣལ་འབྱོར་བྱར་མེད་བྱས་ཆོས་དང་བྲལ་བ་ཨ་ཏི་རྫོགས་པ་ཆེན་པོའི་རིག་པ་བྱང་ཆུབ་ཀྱི་སེམས་ལ་བལྟས་པས། གང་ཟག་གི་བློ་ཁྱད་དང་ཐེག་རིམ་མཐོ་དམན་གྱི་དབང་གིས་མཐོང་ཚུལ་མི་འདྲ་བ་རྣམ་པ་བཞི་རུ་མཐོང་སྟེ། སེམས་པའི་རྣལ་འབྱོར་ཕྱི་རྒྱུད་སྡེ་གསུམ་གྱིས། མངོན་བྱང་ལྔ་དང་ཆོ་འཕྲུལ་རྣམ་པ་བཞི་ཡིས་བྱིན་གྱིས་བརླབས་ནས། བདག་དམ་ཚིག་སེམས་དཔའ་དང་ལྷ་ཡེ་ཤེས་སེམས་དཔའ་ཐ་དད་ལ་ལྟ་ཞིང་། དེ་དག་གིས་སྙིང་པོའི་དོན་མཐོང་མེད་ལ། རྣལ་འབྱོར་ཆེན་པོ་རྣམས་ཀྱི་མཐོང་བ་ནི། ཡེ་ནས་རང་རྒྱུད་དག་པའི་དཀྱིལ་འཁོར་ལ་རྒྱུ་ལས་འབྲས་བུ་ལྷ་ཡི་དཀྱིལ་འཁོར་དེ། བསྙེན་སྒྲུབ་བཞི་ཡི་ཡན་ལག་རྫོགས་པར་བྱས་ནས། འཕྲོ་འདུས་བདག་ཉིད་ལྷུན་གྱིས་གྲུབ་པར་ལྟ་བ་ཡིན་ལ། དེས་ཀྱང་སྙིང་པོ་དོན་གྱི་རྣལ་མ་མཐོང་མེད་ཅིང་། ཡོངས་སུ་རྣལ་འབྱོར་རྣམས་ཀྱིས་མཐོང་བ་ནི། དབྱིངས་དང་ཡེ་ཤེས་རྒྱུ་འབྲས་སུ་འཛིན་པས། རྒྱུ་འབྲས་ལས་འདས་པའི་རྣལ་འབྱོར་དེ་བཞིན་ཉིད་མཐོང་མེད་ཅིང་། ཤིན་ཏུ་རྣལ་འབྱོར་གྱིི་ལམ་ནས་རྫོགས་ཆེན་གྱི་ལྟ་བ་མཐོང་ཞིང་། ལྟ་བ་བསྒོམ་དུ་མེད། དམ་ཚིག་བསྲུང་དུ་མེད། འཕྲིན་ལས་བཙལ་དུ་མེད་པར་ཇི་བཞིན་པའི་ངང་དེར་བཞག་པས་རྣལ་དུ་འབྱོར་བའོ། །རིག་པ་སྟོང་གསལ་ཉག་གཅིག་རྟག་ཆད་མེད་པའི་རང་ངོ་དེ་ཉིད་ཕྱི་ནང་གཟུང་འཛིན་ལས་འདས་པའི་ཕྱིར་ན། རྒྱུ་འབྲས་དགེ་སྡིག་བྲལ་ཞིང་རྣམ་སྨིན་བག་ཆགས་མེད་པས་ན་ཟང་ཐལ་ཀུན་ཏུ་བཟང་པོའི་དགོངས་པ། མེད་པ་དོན་གྱི་སྙིང་པོ་ལ་འགག་བསྡུས་ཏེ་བསྟན་པའོ། །དེ་རིང་གི་ཆོས་མཚམས་འདི་ནས་བཞག་སྟེ་རྗེས་མའི་ཆོས་ཁྲིད་ལ། རྒྱས་པར་བཤད་པ་ཐེག་དགུའི་དབྱེ་བ་དགོངས་ཚུལ་དང་བཅས་པ་ནས་བཤད་རྒྱུ་བྱེད། ལས་དང་པོ་བ་དང་གསར་བུ་རེ་གཉིས་དང་རྒན་ཞུགས་འགའ་རེས། མཚམས་གསལ་བོར་མ་ཕྱེད་པའང་ཡོད་ངེས་པས། ད་ནི་ཐེག་པ་དགུའི་དབྱེ་བ་དགོངས་ཚུལ་དང་བཅས་པ་བསྟན་པ་ལས། ཞེས་པ་ནས་ཆོས་ཁྲིད་རྗེས་མར་བཤད་རྒྱུ་རེད། དེ་རིང་ཞེས་སོ་གསུང་སའི་མཚམས་ནས་བཞག་པ་ཡིན། དེ་རིང་ཆུ་ཚོད་ཀྱང་ཚང་རན་འདུག་པས་དེ་ནས་བཞག་ན་ཆོག་འདུག སང་ཉིན་ཧོར་ཟླ་དྲུག་པའི་ཚེས་ཉེར་ལྔ་ལ་ཁེལ་བས། སྤྲེལ་ཟླའི་ཚེས་བཅུའི་ཚོགས་འཁོར་འཚོགས་ནས་དེ་རིང་ཚུན་ཆོད་ལ་ཉི་མ་བཅོ་ལྔ་སྟེ། དེའི་ཚེར་ཟླ་བ་ཕྱེད་གཅིག་འདས་སོང་བར་འདུག འུ་ཚོས་ཀྱང་ཉེར་ལྔ་འཚོག་དགོས་པས། སང་ཉིན་སྔ་དྲོ་འགའ་རེས་ཚོགས་འཁོར་གྱི་གྲ་སྒྲིག་བྱེད་པ་དང་། ཕྱི་དྲོ་དུས་ཚོད་རེའུ་མིག་ལྟར་འཚོགས་རྒྱུ་དང་གྲོལ་རྒྱུ་བྱེད། སང་ཉིན་འུ་ཆ་གས་རི་ཁྲོད་པའི་འདོན་པ་དུས་རྒྱུན་གྱི་གསོལ་ཁ་ཉུང་བསྡུས་ཀྱིས་ཆོག་ལ། ཆོ་ག་དུས་རྒྱུན་ལྟར་རིག་འཛིན་ཡུམ་ཀའི་ཁོག་ཕུད་ནས་དབྱངས་མི་འཐེན་པར་འདོན་རྟ་དང་བཅས་པས་གསུང་རྒྱུ་དང་། རྔ་ཆེན་དང་རོལ་ཆེན་མང་པོ་ཞིག་མེད་ན་ཆོག་འདུག དེང་སང་ཚོགས་ཚང་མ་གཙོ་བོ་ཉ་བྱེ་རིལ་ལ་འགྱུར་ཞིང་། དེ་ཡང་ཟས་རིགས་རྫུན་མས་བྱས་པ་དག་ནི་རིན་གོང་བདེ་ཞིང་ཕར་བལྟས་ན་མང་པོ་ཡོད་པ་དེ་ལ་དགོས་པ་ཅི་ཡང་མི་འདུག དགེ་འདུན་པ་སྙུང་རྐྱེན་དུ་ཡང་འགྱུར་ངེས་པས། དེ་བས་སྤུས་དག་མོ་ཅ་དག་ཁམས་ལ་འཕྲོད་པ་ཞིག་གིས་དགའ་འདུག་སྙམ་པ་ཡིན། ངས་འགན་འཛིན་པ་རྣམས་ལ་ཚོགས་རྫས་ཀྱི་ཁུག་མའི་ནང་ན་ཤ་ཆང་གི་དོད་ཐུབ་རྫས་མཚོན་ཞིག་དང་། ཚོགས་གཏོར་གྱི་དོད་ཅིག་དགོས་པར་བཤད་ཡོད། ད་རེས་ཕལ་ཆེར་འཛོམ་ཡོད་ངེས། དམར་ཕྱོགས་ཀྱི་ཚེས་བཅུ་འདི་མར་ངོས་ཉི་ཤུ་ལྔ་མཁའ་འགྲོ་འདུ་བའི་དུས་ཆེན་དང་། འུ་ཆ་གས་ཟབ་ཁྲིད་བཤད་པའི་བར་མཚམས་ལ་ཉམས་ཆག་བསྐངསཤིང་བཤགས་པ་བྱེད་པའི་གོ་སྐབས་འདི་ལྟ་བུ་ཞིག་བྱུང་བ་ནི་ཤིན་ཏུ་བཟང་བས། རྣལ་འབྱོར་ལུས་ཀྱི་དཀྱིལ་འཁོར་གདན་གསུམ་ཚང་པའི་རང་བཞིན་ལ། གནས་ཡུལ་ཉེར་བཞིའི་སྣོད་བཅུད་ཀྱི་བཀོད་པ་ཚང་པ་ཡིན་པས། སྔགས་ཀྱི་གསོ་སྦྱོང་ཞིག་ལ་ཡང་འགྱུར་བ་ཡིན། དེ་རིང་ཕན་ཆོད་ཀྱི་ཆོས་དབྱིངས་མཛོད་ཀྱི་ཆོས་ཁྲིད་ཉི་མ་ལྔ་བོའི་ཚེར་ཁྲེགས་ཆོད་ཀྱི་ཁྲིད་སྦྱོང་མཛད་དགོས། མང་ཆེ་བ་ཉམས་ལེན་པ་རྙིང་པ་ཏག་ཏག་ཡིན་པས། ཀ་དག་ལྷུན་གྲུབ་དབྱེར་མེད། ཁྲེགས་ཆོད་ཐོད་རྒལ་ཟུང་འཇུག་གི་ཉམས་ལེན་ཞི་ལྷག་གཉིས་མེད་ཀྱི་རྣལ་འབྱོར་ལ་ཐུན་གྱི་སྙིང་པོ་འཛིན་བཞིན་ཡོད་པ་དང་། གསར་བུ་ལས་དང་པོ་བ་ཚོས་ཀྱང་འདིའི་ཉིན་རེའི་ཆོས་ཁྲིད་ཀྱི་གོ་དོན་ལ་སྙིང་པོར་བཟུང་ནས། དེའི་བརྗོད་དོན་བསྟན་བྱའི་སྙིང་པོ་ལས་མི་འདའ་བའི་དཔྱད་སྒོམ་དང་འཇོག་སྒོམ་སྤེལ་མ་མཛད་ཆོག་པ་དང་། འདི་ཐུན་མོང་རིག་གནས་ཀྱི་སློབ་ཁྲིད་དང་མཚན་ཉིད་ཐེག་པའི་བཤད་པ་དང་མི་འདྲ་བས། སྒོམ་ཁྲིད་དུས་སྐྱོར་སྦྱང་སྒོམ་གྱིས་བྱེད་དགོས་པ་ཡིན། འོ་ན་ཅི་ཇི་ལྟར་བྱས་ཏེ་བསྒོམ་དགོས་སྙམ་ན། མན་ངག་རང་གཞུང་ལ་གཏུགས་ནས་རྟོན་པ་བཞི་གོ་ལྡོག་ཏུ་མ་སོང་བ་ཞིག་བྱེད་དགོས་པ་ཡིན། འདིའི་འཕྲོས་ཀྱི་ཆོས་ཁྲིད་ཉི་མ་ཁ་ཤས་བཤད་པའི་རྗེས་སུ་རླུང་སྦྱོང་ལ་ཐུག་པ་དང་། དེའི་འཕྲོར་ལེའུ་དགུ་བ་ནས་ངོ་སྤྲོད་ཀྱི་དངོས་གཞི་ལ་ཁེལ་བ་ཡིན། དེ་དུས་ལྷག་ཏུ་ཞིབ་ཆ་ཞིག་དགོས་པ་ཡིན། མ་གཞི་ཐམས་ཅད་གནད་གཅིག་ཆེ་གཉིས་ཆེ་ཡིན་པ་ལས། ལེའུ་དགུ་བ་དང་བཅུ་བ་དག་གནད་ཀྱི་ནང་ནས་མ་ཆེ་དེ་ཆེའི་གྲས་དང་། སྤྱིར་ན་རྒྱལ་བའི་ཆོས་སྒོ་རབ་འབྱམས། འདུལ་མངོན་མདོ་སྡེ་མདོ་སྔགས་རྒྱུད་སྡེ་གང་ནས་བཤད་ནའང་། རྩ་བ་ལུས་སེམས་འདི་གཉིས་ཀའི་ཐོག་ནས། འཁོར་འདས་ཀྱི་ཤན་ཕྱེད་ཅིང་། བསམ་སྒོམ་གང་བྱས་ཀྱང་སྣང་ཤེས་ཐ་མལ་དུ་མི་ལུས་པ་དེ་གནད་དུ་འཛིན་པ་ནི་དོན་གྱི་འགག་རྩ་ཡིན། ཀུན་མཁྱེན་ཡབ་སྲས་ཀྱི་རྗེས་སུ་ཞུགས་ནས། དགོངས་བརྒྱུད་རྟོགས་པའི་བྱིན་རླབས་འཕོ་ཞེས་པ་དེ། གདམས་པ་ཡིག་ཐོག་དང་མན་ངག་ཚིག་ཐོག་ལ་མི་ལུས་པར། སྐྱིད་ན་མགོ་གནོན་དང་སྡུག་གི་སྐྱོ་གྲོགས་ལ་འཛིན་ཐུབ་དགོས། གང་སྣང་ཐུག་ཕྲད་རང་གྲོལ་གྱི་གདམས་པའི་གནད་ཙམ་ཞིག་དང་པོ་ཉིད་ནས་མ་ཟིན་ནའང་། ཅི་ཤར་ཆོས་སྐུའི་ཡོ་ལང་གི་རྩལ་སྣང་རོལ་བའི་གནད་དེ། གོ་ཡུལ་དུ་ངེས་པ་ཙམ་གྱིས་ཀྱང་སྣང་ཤེས་དང་ཉམས་རྟོགས་བན་མ་བུན་དུ་སོང་ནས། དཔེར་ན་ནམ་ཚ་དབྱར་ཀའི་ལྷགས་རླུང་འདྲ་བར། ཨ་འཐས་ཞེན་འཛིན་གྱི་དགུན་ཀའི་ལྷགས་རླུང་ངར་མའི་ཁོང་ཤེད་དེ་མར་འགྲིབ་པ་ལ་ཕྱོགས་དུས། ཆར་བ་ཆུ་དང་ཐུག་པ་བཞིན་དུ། ཆོས་ཉིད་ཀྱི་དགོངས་པ་ནང་འཕྲད་པའི་བྱིན་རླབས་ཀྱི་རྒྱུན་ལ་ཉེ་ནས་ཡོད་པ་ཡིན། སྐྱིད་ན་གོང་གནོན་དང་སྡུག་ན་སྐྱོ་གྲོགས་ཞེས་པ་དེ་ཅི་ཟེར་བ་ཡིན་ཞེ་ན། སོ་སོའི་སྐྱེ་བོའི་བྱིས་པའི་བློ་འདི་ཅོལ་ཆུང་བ་ཡིན་པས། རྐྱེན་ཆུང་ཆུང་རེ་ཡིས་སྒྱུར་སླ་ཞིང་། སྐྱིད་ན་སྐྱིད་ལོང་མེད་པར་རྟ་ངན་སྔོ་མས་རྒྱགས་པ་བཞིན་དུ་ཚོད་མི་ཟིན་པར་མཐོ་ལྡིང་དམའ་ལྡིང་བྱེད་ནས་གད་ཁ་ནས་ཀྱང་མཆོང་འགྲོ་བར་འདུག་སྙམ་པ་ཞིག་བྱེད་པ་དང་། སྡུག་ན་སྡུག་ལོང་དང་ཉམས་དམའ་ན་དམའ་ཚོད་མི་ཟིན་པར་རྔ་མ་སྒྱིད་ཁུག་ལ་འཁུམ་འགྲོ་བ་ཡིན། འོན་ཀྱང་མན་ངག་གི་གནད་ཀྱི་གདམས་པ་འདི་ཚོ་བསྟེན་ནས། གདམས་པ་རང་རྒྱུད་ལ་ཅུང་ཟད་ཙམ་ཞིག་འདྲེས་ཐབས་ཐུབ་སོང་ན། དེ་མ་ཐག་ཏུ་འཁོར་འདས་མཉམ་ཉིད་དུ་རྟོགས་པའི་ལྟ་བ་ཞིག་བརྙེས་མེད་ནའང་། སྐྱིད་སྡུག་གང་བྱུང་རོ་སྙོམས་ཀྱི་གོ་བ་ཞིག་དང་། སྐྱིད་སྡུག་ལམ་ཁྱེར་གྱི་འདུ་ཤེས་ཙམ་རེ་འཛིན་ཐུབ་པར་བྱུང་ན། རྐྱེན་ངན་ཐོག་ཏུ་གློ་བུར་དུ་བབ་དུས། ཐ་མལ་པ་དང་མི་འདྲ་བར་ཁབ་ལེན་ལ་ལྕགས་འབྱར་བ་བཞིན་དུ་ཕྱིའི་རྐྱེན་གྱིས་དེ་མ་ཐག་ཏུ་སྒྱུར་མི་ཐུབ་ཅིང་གནོད་པས་མི་ཚུགས་པའི་གནོད་འགོག་གི་ནུས་པའི་སྟོབས་སམ་གོ་ཆ་ཞིག་ཡོད་འདུག་པ་ཡིན། བརྩོན་འགྲུས་མ་ཞན་ཞིང་དད་པ་དག་སྣང་མ་འཕྱུགས་ན། དེ་ལྟར་རིམ་གྱིས་རིམ་གྱིས་ན་འཕར་ནས། གོ་མྱོང་རྟོགས་པའི་ཐེམ་པ་བརྒྱུད་རིམ་བཞིན་དུ། རིང་པོར་མི་འགོར་བར་རྟོགས་པའི་ཡེ་ཤེས་རང་རྒྱུད་དུ་བརྙེས་སུ་ཡོད་པ་ལ་ཐེ་ཚོམ་མི་དགོས་ཤིང་། དེ་ཡང་ལམ་གྱི་སྦྱང་བགྲོད་ཀྱི་ཁྱད་པར་གྱིས། བསྐྱེད་རྫོགས་ལ་མི་ལྟོས་པར་སེམས་ཉིད་ཡེ་ནས་སངས་རྒྱས་པའི་རང་བཞིན་དུ་བསྟན་པའམ་ཡེ་ཤེས་རང་སྣང་བའི་ངོ་བོར་སངས་རྒྱས་པའི་ལམ་རྫོགས་རིམ་ཆེན་པོའི་འགྲོས་ཀྱིས། འོད་གསལ་སྣང་བཞི་ལུགས་འབྱུང་ལྡོག་གི་བརྒྱུད་རིམ་མམ། ཡང་ན་བསྐྱེད་རྫོགས་ཟུང་འཇུག་གི་ལམ་ནས་རིག་འཛིན་རྣམ་པ་བཞིའི་མྱུར་ལམ་བགྲོད་ནས། མེས་པོ་དམ་པ་གོང་མའི་གཤེགས་ཤུལ་གྱི་ཞབས་རྗེས་ཟིན་ནས། ཕ་རྗེས་བུ་ཡིས་སྙེག་པའི་ཀློང་ཆེན་བརྒྱུད་པའི་ཕྱི་རབས་པ། གང་ལྟར་བཤད་ཀྱང་སེང་ཆེན་དཀར་མོའི་བརྒྱུད་པ་ལ་སེང་ཕྲུག་དང་། བྱ་རྒྱལ་ཁྱུང་གི་བརྒྱུད་པ་ལ་ཁྱུང་ཕྲུག་ལས་གང་དུའང་འགྲོར་མེད་པའི་གདེང་ཚོད་དང་སྤོབས་པའི་ཐུགས་ཤུགས་མི་ཞན་པའི་སྒོ་ནས། ཟབ་ཆོས་གདམས་པའི་རྒྱུན་ལེན་ཞོར་དུ་རང་ཐད་ཀྱི་མི་ཚེའི་སྔ་བར་ཕྱི་གསུམ་གྱི་འགྲོ་ལམ་ལ། སྔ་བལྟས་ཕྱི་བལྟས་ཀྱི་རྒྱང་མིག་གིས་ཚོད་ཐིག་པའི་སྟེང་ནས། ད་རེས་ཐེངས་འདིའི་ཆོས་ཁྲིད་ཀྱི་ཉམས་བཞེས་འདི་བརྒྱུད་དེ། ཕྱིན་ཆད་གནས་གང་དུ་ཕྱིན་ཀྱང་། གྲོགས་སུ་དང་འགྲོགས་ཀྱང་། རྐྱེན་བཟང་ངན་ཅི་ཞིག་ལ་ཐུག་ནའང་ཁྱི་རྔ་ལ་མྱེ་འབྱར་བ་བཞིན་དུ་འདུར་རྒྱུག་བྱེད་འདུག་མི་དགོས་པས་མ་ཚད། བློ་ཕ་དང་གྲོས་མ་ལ་ཡང་བྱེད་འདུག་མི་དགོས་པར་རང་བློ་ཁེར་བཅད་ཀྱི་ཕུགས་འདུན་དེ། སྣང་ཤེས་ཐ་མལ་ལས་ལོག་པའི་གང་ཤར་རིག་སྟོང་རྗེན་པའི་ངང་ལས་མི་འདའ་བར། གྲོལ་འཁྲུལ་སེམས་ཀྱི་རི་མོ་དེ་ཐ་སྙད་བྱིས་པའི་རྩེད་མོ་རུ་མཐོང་བའི་ཉམས་ལེན་གྱི་གནད་ཐུགས་ལ་འཆང་དགོས་པ་དང་། ཁྱད་པར་དུ་ཐག་རིང་གི་ཆོས་ཞུ་པ་ཚོས་ཕྱིར་རང་ཡུལ་རང་གནས་ལ། དོན་གཉེར་གྱི་མགྲོན་པོས་བྱེས་དོན་ཐམས་ཅད་འགྲུབ་ནས་གཞིས་ལ་འཁོར་བ་འདྲ་ཞིག་མཛད་དགོས་པའི་ཐུགས་འདུན་མཛོད་ཅེས་ཞུས་པའོ། །དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་འཁྲུག་རྩོད་ཐམས་ཅད་རྒྱུན་ཆད། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་དང་། བདག་ཅག་རྣམས་ཀྱི་ཚེ་འདིའི་ཕ་མ་གཉིས་དང་། དགྲ་བགེགས་གཉིས་ཀྱི་གཙོ་བྱས་པའི་བཟང་འབྲེལ་ངན་འབྲེལ་ཐོགས་པའི་མཐའ་ཡས་སེམས་ཅན་ཐམས་ཅད་མཐར་ཐུག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པ་དང་། དེ་མ་ཐོབ་ཀྱི་བར་དུ་ཡང་མཐོ་རིས་ཡོན་ཏན་བདུན་དང་ལྡན་པའི་ལུས་རྟེན་ཁྱད་པར་ཅན་ཞིག་རྙེད་ནས་ཐེག་པ་ཆེན་པོའི་ཆོས་ལ་ཚུལ་བཞིན་དུ་སྤྱོད་པའི་སྐལ་བ་དང་ལྡན་པའི་ཕྱིར་དུ་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་རླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག།