ཉིན་བདུན་པའི་ཆོས་ཁྲིད།

དམ་པའི་ཆོས་ཞེས་བྱ་བ་ནི་ནད་འཆི་སོས་ཀྱི་བདུད་རྩི་ལྟ་བུ། གང་དག་ཉོན་མོངས་པའི་ཉེས་པ་བརྒྱ་ཡི་ལྕགས་སྒྲོག་གིས་བཅིངས་ཤིང་སྡུག་བསྔལ་རྣམ་པ་གསུམ་གྱིས་དུས་རྟག་ཏུ་གཟིར་བའི་འཁོར་བ། ཤིན་ཏུ་ཉམ་ངའི་བཙོན་ར་ལྟ་བུ་འདིའི་ནང་ནས་ཐར་བར་བྱེད་པའི་ཐབས་དང་། གང་ལས་ཉོན་གྱི་གཞན་དབང་དུ་གྱུར་པའི་རྩ་བ་སྲིད་རྩ་མ་རིག་པའི་གདོན་ཆེན་ལས་ལྡོག་པར་བྱེད་པའི་རིག་སྔགས་དང་། སྨན་ཆེན་ལྟ་བུ་ཞིག་ཡིན་ལ། འདི་ཉིད་ལ་རང་དབང་དུ་སྤྱོད་རྒྱུ་ཡོད་པའི་གོ་སྐབས་བཟང་པོ་ཐོབ་པ་འདི། སྔར་བསགས་བསོད་ནམས་ཀྱི་དབང་གིས་ཡིན་པ་དང་། ཁྱད་པར་དུ་ཆོས་ཐོས་པའི་བགོ་སྐལ་མ་འགགས་ཙམ་གྱི་ཆོས་སྒྲ་རྣ་བས་གོ་བ་ཙམ་རེ་སུ་ལ་ཡང་ཡོད་སྲིད་ཀྱང་། སྒོམ་སྒྲུབ་ཉམས་ལེན་གྱི་སྙིང་པོར་བཟུང་ནས་མི་ཚེ་ཆོས་ལ་སྒྲིལ། ཚེ་འདིར་བྱང་ཆུབ་བསྒྲུབས་ནས་རྟེན་འདིའི་ཐོག་ཏུ་འཁོར་བར་ཕྱི་ཕྱག་འཚལ་བ་ནི། རབ་ཏུ་བྱུང་བའི་རྟེན་འདིའི་སྟེང་ནས་སྒྲུབ་སླ་བ་ཡིན་པ་དེའི་ཕྱིར་ན་འདི་ལྟ་བུའི་ལུས་རྟེན་ཐོབ་པ་དེ་བསྐལ་པ་མང་པོ་ལ་བསོད་ནམས་བསགས་པའི་འབྲས་བུ་ཡིན་ཏེ། སྲིད་གསུམ་བདག་པོ་སྔར་ཡང་ལན་བརྒྱར་སྐྱེས། །ངུར་སྨྲིག་རྒྱལ་མཚན་འཛིན་པ་ད་རེས་ཙམ། །ཞེས་གསུངས་པ་ཡིན། འོན་ཀྱང་དེ་རིང་ཁ་རྩང་དུས་སྙིགས་མ་རུ་གྱུར། དུས་སྙིགས་ཞེས་པ་དེ་ཡང་དབྱར་དགུན་སྟོན་དཔྱིད་གོ་ལོག་ཏུ་ཤར་སོང་བ་ཞིག་མ་ཡིན་པར། མིའི་སྤྱོད་པ་སྙིགས་ཏེ་བྱ་ངན་སྣ་ཚོགས་པ་ཞིག་བརྩམས། དེ་ཡང་བསམ་པ་སྙིགས་པ་ལས་བྱུང་བ་ཡིན་པས། སེམས་རྒྱུད་ཉོན་མོངས་པའི་གདོན་གྱིས་བརླམས་སོང་བའི་སྨྱོན་པ་ཁྱུ་གཅིག་ཏུ་གྱུར་ནས། སེམས་ཅན་གྱི་སྙིགས་མས་ལྟ་བའི་སྙིགས་མ་བཟུང་ནས། ཉོན་མོངས་པའི་སྙིགས་མ་ལྷག་པར་བདོ་བའི་ལས་ཉོན་གྱི་རྒྱུ་དེ་ཡིས། ཚེའི་སྙིགས་མ་ཚེ་ཐུང་ནད་མང་ལ་སོགས་པའི་སྡུག་བསྔལ་དྲངས་པའི་སྐབས་དེར། དུས་ཀྱི་སྙིགས་མ་ཁ་ཁ་ནས་ཚེས་འདུག་མི་དགོས་པར་རྟེན་གཞི་སྣོད་ཀྱི་འཇིག་རྟེན་མར་རྒུད། བརྟེན་པ་བཅུད་ཀྱི་སེམས་ཅན་ཐམས་ཅད་སྨྱོན་པའི་ཚུལ་ཅན་དུ་གྱུར་པ་ཡིན། སྨྱོན་པས་སྨྱོ་ལས་ཤིག་མ་གཏོགས་ཅི་ཞིག་བྱེད་ཡོང་། དེའི་དབང་གིས་རང་གཞན་ཐམས་ཅད་ཕུང་ལ་སྦྱོར། གོས་ངུར་སྨྲིག་གི་ཚངས་པར་སྤྱོད་པའི་རྒྱལ་མཚན་སྟོན་པའི་ན་བཟའ་རེ་འཆང་བ་ཙམ་དུ་ཡོད་ཀྱང་། ངན་སྤྱོད་སྣ་དགུ་ལ་ཞུགས་པ་དེ་འདྲ་ཡོད་སྲིད་པའི་དུས་ཚོད་ཡིན་ལ། གནའ་དུས་བཟང་རྫོགས་ལྡན་གྱི་སྐབས་སུ་སྟོན་པའི་དམ་ཆོས་དར་ཞིང་། བསྟན་འཛིན་བཤེས་གཉེན་དམ་པ་མང་བའི་དུས་ཚོད་ལ། ན་བཟའ་སེར་པོའི་དྲ་རས་ཙམ་ལ་ཡང་གུས་པས་བསྙེན་བཀུར་བྱེད། དགེ་འདུན་གྱི་སྡེ་ནི། རྒྱལ་པོའི་ཡན་གྱི་བླ་མཆོད། །ཅེས་ཅི་འདྲའི་ཆེ་བཙན་དྲག་ཤུལ་ཅན་ཞིག་ཡིན་ཡང་དགེ་འདུན་པ་དབུའི་མཆོད་གནས་སུ་བཀུར་བའི་ལམ་སྲོལ་ཡོད་པ་ཡིན། འོན་ཀྱང་དེ་རིང་ཁ་རྩང་གི་གནས་སྐབས་སུ་ངུར་སྨྲིག་གི་རྒྱལ་མཚན་ཡིན་ཡང་ཆས་གོས་ཀྱི་རིགས་གཅིག་ལ་བརྩིས་ནས། དེ་འདྲ་གོན་པའི་མི་ཚོ་ཞིག་ཡོད་པ་ཡིན་ནོ་སྙམ་པ་ཙམ་ལས་ཇི་མི་སྙམ་སྟེ་གཞན་ངོས་ནས་རྩི་ཐང་ཆུང་དུས་རང་ངོས་ནས་ཀྱང་དེའི་ལྟ་ཚུལ་དོན་ལ་གནས་པའི་ཕལ་བའི་བསམ་སྤྱོད་ཙམ་ལས་འདའ་མ་ཐུབ་ན། སྤྱོད་ངན་རང་གིས་བྱེད་ནས་དུས་ངན་ཟེར། །ཞེས་པའི་ལུང་བསྟན་གྱི་ཐོག་ལ་ཁེལ་བའི་འཁྲབ་སྟོན་པ་དེ་རང་གིས་བྱས་བཞག་དུས་གཞན་གྱི་དད་ལོག་ལྡོག་ཐབས་མེད་པས། མཐར་རང་གཞན་ཚང་མ་སྨྱོན་པ་ཁྱུ་གཅིག་ཏུ་ལོག་ནས་ཆུ་ནང་ལ་མཉམ་དུ་མཆོངས་པ་ལྟ་བུའི་དུས་ངན་སྙིགས་མའི་བསམ་སྤྱོད་ལ་འདེང་ཞིག་བརྒྱབ་ན། ད་ཁ་ཕྱི་ལ་འཁོར་ནས་གཞན་མགོ་འདོན་ཟེར་ན་དཀའ་བའི་དུས་ཚོད་ཅིག་ཡིན་པས། དེ་བས་ཁ་ནང་ལ་འཁོར་ནས་རང་རྒྱུད་དམ་ཆོས་ཀྱིས་ཕྱུག་ཅིང་ཆོས་དང་བྱ་སྤྱོད་གཉིས་ཀ་འབྲེལ་ཆེ་ཐུབ་ཆུང་ཐུབ་ཅིག་ངེས་པར་བྱ་དགོས་སྙམ་པའི་མོས་པ་དང་བརྩོན་པ་ཡོད་དགོས་པའི་དུས་ཚོད་ཅིག་ཡིན་ཏེ། དེ་ཡོད་ན་གང་ལྟར་བཤད་ཀྱང་མི་འདྲ་བ། གོས་སྣེ་གསུམ་འདི་ལུས་ལ་གྱོན། མཁན་སློབ་དགེ་འདུན་གྱི་མདུན་ནས་སྡོམ་པ་ཞིག་ཞུས། མདོ་དང་སྔགས་ཀྱི་ཆོས་སྒོ་ལ་མ་ཞུགས་མ་ཐོབ་བསམ་རྒྱུ་ཞིག་མེད་པར་བྱས་ཡོད་པས། དེའི་ཚོད་ཀྱི་དོན་གོ་རང་ཉམས་དང་མཐུན་པ་ཞིག་རང་རྒྱུད་ནས་ཆོད་དགོས་པ་ཡིན། གྲྭ་ཇོ་སེར་བསླབ་པ་རྒན་གཞོན་སུ་ཞིག་ཡིན་ཡང་འཇིག་རྟེན་གྱི་མི་ལུས་ཤིག་བླངས་ཡོད་པས། ཁྱིམ་ཕ་མ་དང་གཉེན་ཉེ་འབྲེལ་མེད་པ་ཞིག་སུ་ཡོད་ཀྱང་། ཁྱིམ་པའི་འཚོ་ཚིས་ཁ་གསོ་རྒྱབ་འགེབས་དགྲ་གཉེན་ཆགས་སྡང་བྱས་ནས་དེ་དག་དང་གཤིབས་ན་ཡང་དེ་དག་ལ་ཕན་ཆེན་པོ་ཞིག་ཐོགས་པ་མེད་པས་མ་ཚད། དེ་དག་ཡར་འཐེན་ཞིག་མ་དགོས་སྨིན་མ་ནུས་པའི་རང་རྒྱུད་ཀྱི་ཆོས་སེམས་ཉག་ཕྲ་མདང་སྐྱེས་ཀྱི་མྱུ་གུ་ལྟ་བུ་དེ་སད་ཀྱིས་ཁྱེར་བའི་རྐྱེན་ཞིག་ཏུ་ལོག་ནས་རང་ཉིད་མར་འཐེན་ཞིག་གི་རྒྱུ་ལས་མི་འདུག་གོ་སྙམ་དགོས་པ་ཡིན། དེ་ལྟར་བསམ་མ་ཐག་ཏུ་མི་མེད་ལུང་སྟོང་ཞིག་ལ་འགོས་སྔ་བྱེད་འགྲོ་མི་དགོས་ཏེ། སྤྱིར་ཕྱི་དབེན་ནང་དབེན་གསང་དབེན་གྱི་དབེན་གསུམ་ཞི་བའི་རྒྱལ་སར་བསྙེག་དགོས་པ་ཡིན་ཡང་། ཉམས་ལེན་པ་ལས་དང་པོ་བ་ཞིག་ལ་མཚོན་ན་དང་པོར་ནང་དབེན་དང་གསང་དབེན་གཉིས་ཀའི་མཐུན་རྐྱེན་མ་ཚོགས་དུས། ཕྱི་དབེན་ཉི་མ་ཁ་ཤས་ཀྱིས་མཐའ་མི་བརྟན་ཞིང་ས་མ་ཟིན་ནས་དེ་བས་མཐོ་མེད་ས་ནས་དེ་བས་དམའ་མེད་ས་ལ་ལྷུང་བ་ཡང་ཡོད་ངེས་པ་ཡིན་པས། ང་ཚོ་ཉམ་ཆུང་གི་ཆོས་པ་ཞིག་ལ་མཚོན་ན་བསམ་རྒྱུ་རང་རྒྱུད་ཆོས་དང་འདྲེས་ཐབས་དང་། ལས་རྒྱུ་ཆོས་ཐོབ་པ་དེའི་ཉམས་ལེན་ལ་འཇུག་པ་དེ་ལས་གཞན་པ་ཞིག་མེད་པས་མ་ཚད་དེ་ལས་དགོས་པ་ཡང་མིན་ཕྱིར། ཁ་ཕྱི་ལ་འཁོར་ནས་མི་སྔོན་ནས་ཡག་ཐབས་མཛེས་ཐབས། བསྟོད་བཀུར་བསྔགས་བརྗོད་སོགས་ཐོབ་ཐབས་ལ་བསམ་བློ་གཏོང་བཞག་དུས་གང་ལྟར་བྱས་ཀྱང་ཆོས་བརྒྱད་དང་འདྲེས་ཤིང་། ཆོས་བརྒྱད་ཀྱི་དུག་དང་འདྲེས་པའི་དབང་གིས་རང་རྒྱུད་ལ་ཉམས་ལེན་གྱི་སྐྱེད་ཡོང་རྒྱུ་མེད་པ་ལ་གནོད་པ་ཡོད་པའི་ཚུལ་ལ་ལེགས་པར་སེམས་དགོས་པ་ཡིན། ཚུལ་འཆོས་རྒས་པ་ཚུལ་ཁྲིམས་ཞེས་པ་ཆོས་ཞུགས་ལས་དང་པོ་བས་གཞན་ངོས་ནས་ཁྲེལ་དང་། རང་ངོས་ནས་ངོ་ཚ་ཤེས་པའི་བག་ཡོད་བསྟེན་ཏེ་རིམ་གྱིས་བརྟུལ་ཞུགས་བརྟན་པར་འགྱུར་བའི་གསུང་ཚུལ་ཡོད་ན་ཡང་། རྟེན་འདིར་རྫོགས་པ་ཆེན་པོའི་མན་ངག་གི་ཉམས་ལེན་ལ་ཞུགས་ནས་རང་གཞན་གྱི་དོན་ཆེན་འགྲུབ་པའི་ཆོད་སེམས་བརྟན་པོ་ཡོད་པའི་ཆོས་པ་ངོ་མ། རྫོགས་པ་ཆེན་པོའི་རྣལ་འབྱོར་བ་མིང་དོན་མཚུངས་པ་ཞིག་ཨེ་ཡོང་བསམ་དུས། དང་པོར་སེམས་འདིའི་སྟེང་ནས་བློ་སྦྱོང་གི་སྒྱུར་བཀོད་ཆེ་བ་ཞིག་བཏང་སྟེ་སེམས་ཐག་གདིང་ནས་མ་ཆོད་ན། དེ་སྔོན་ཡང་རང་ས་གཞན་ཡུལ་གཉིས་ཀ་ནས་སྐྱ་སེར་གཉིས་གོ་འདྲ་ཞིག་བཅད་ཁུལ་བྱས། ཁྱིམ་གཞིས་དགོན་གཞིས་གང་ཡིན་ཡང་རང་རང་རང་གི་ཚོད་ཀྱི་གཞིས་འཁོར་ཀ་རེ་ཡི་མགོ་རྫིའི་འགན་བཟུང་ཁུལ་བྱས། ཐ་མ་ཆོས་འཇིག་རྟེན་གཉིས་ཀ་མ་འགྲུབ་པ་ནི་ཅི་འདྲའི་མང་འདུག་སྙམ་པའི་འདྲ་དཔེ་ལ་བལྟས་ན་ལེགས་པར་ཤེས་སུ་ཡོད་ཅིང་། ཐམས་ཅད་པོ་རང་ཉིད་ལ་མི་གཅེས་པ་སུ་ཞིག་ཡོད། རང་སེམས་རང་ལ་མི་དཀར་བ་ཡང་ཡོད་པ་མ་རེད། སེམས་དཀར་ལུགས་དང་གཅེས་ལུགས་མི་ཤེས་འདུག་རྒྱུ་དེ་ཁ་རྩང་དོ་ཞག་རྟག་པར་བཤད་འདུག་པའི་རྒྱུ་འབྲས་ཕྲ་ཞིབ་ཀྱི་གོ་བ་དེ་མ་ལོན་པའི་དབང་གིས་ལས་བྱ་བ་ཐམས་ཅད་འཕྱུག་བཞིན་ཡོད་པ་དེ་ཤེས་པར་བྱས་ནས། རང་གིས་རང་ལ་ལྕག་འདེད་ཅིག་དགོས་པ་ཡིན། ཀུན་མཁྱེན་ཆེན་པོས། དེ་བས་ངེས་དོན་མདོ་རྒྱུད་སྙིང་པོའི་དོན། །ཚོགས་གཉིས་ཟུང་འཇུག་རིམ་གཉིས་བསྐྱེད་རྫོགས་ཀྱིས། །མྱུར་དུ་རྫོགས་པའི་སངས་རྒྱས་སྒྲུབ་བྱེད་ཡིན། །ཞེས་གསུངས་པ་ལྟར་དུ། ངེས་དོན་སྙིང་པོའི་མདོ་དང་རྒྱུད་སྡེའི་སྙིང་པོའི་དགོངས་དོན་བཅུད་དུ་དྲིལ་བ་དེ་གང་ཡིན་པ་རེད་ཟེར་ན། བསོད་ནམས་དང་ཡེ་ཤེས་ཀྱི་ཚོགས་གཉིས་ཟུང་དུ་འཇུག་པའི་རིམ་པ་ལྟར་དུ། བསྐྱེད་རྫོགས་རིམ་གཉིས་ཀྱི་ཉམས་ལེན་གནད་དུ་སྨིན་པའི་ཐོག་དེ་ནས། མྱུར་དུ་རྟེན་འདི་ལ་རྫོགས་པའི་སངས་རྒྱས་སྒྲུབ་པར་བྱེད་པའི་བྱེད་ཐབས་ཉག་གཅིག་སྟེ། དེ་ཡང་རྒྱུ་འབྲས་རྟེན་འབྲེལ་ཟབ་མོའི་གནད་ཀྱི་གོ་དོན་རང་རྒྱུད་ལ་སྦྱོར་རྒྱུ་དེ་འདི་ཡིན་ཞེས་གསུངས་པ་ཡིན། རང་གཞན་རོགས་དང་གསུམ་པོ་སྟེ་ང་དང་ཁྱེད་དང་ཁོང་ཟེར་བའི་གང་ཟག་གི་ཚོད་གང་ཟག་གིས་མངོན་ཤེས་མེད་ན་མི་ཟིན་པ་ཡིན་པས། རང་རྒྱུད་ཐད་ལ་བཞག་ནས་རང་བློ་རང་ལ་ལྐོག་ཏུ་མ་གྱུར་པ་དེ་ཉིད་འདྲ་དཔེ་བྱས་ནས་མི་བཤད་པའི་ཐབས་མེད་དེ། གཞན་རྒྱུད་ཀྱི་ཚོད་མི་ཐིག་པ་དང་། ཆོས་འཆད་པ་པོ་ལ་མངོན་ཤེས་ཡོད་དགོས་གསུང་དོན་ཡང་དེ་ཡིན་པའི་ཕྱིར། གཞན་གྱི་རྒྱུད་ཚོད་མ་ཤེས་པའི་ཆོས་བཤད་ཀྱིས་གཞན་རྒྱུད་ལ་ཕན་ཐོགས་ཆེ་བ་མིན། ནད་ལ་ཚོད་སྨན་བྱིན་དུས་ཕན་ཐོགས་མེད་པས་མི་ཚད་འགའ་རེ་ལ་སྨན་དུག་ཏུ་འགྱུར་རྒྱུ་ཡང་ཡོད་པ་རེད། འོ་ན་གཞན་རྒྱུད་ཀྱི་ཚོད་མ་ཐིག་དུས་ཅི་དགོས་པ་རེད་ཟེར་ན། ཚོད་ཐིག་རྒྱུ་ངོ་མ་དེ་སུ་ཡིན་ན་རང་རྒྱུད་རེད། རང་རྒྱུས་རང་ལ་ཆེ་བ་ཡིན། ངས་ནམ་བཤད་ལ་རང་ཉམས་ལ་སྦྱར་ནས་འཆད་བཞིན་ཡོད། འུ་ཅག་གིས་ཆོས་འཆད་ཉན་གྱི་དབུ་བཟུང་ནས་འདིར་ཡོད་ཀྱི་མང་ཆེ་བ་དང་མཉམ་དུ་ལོ་མང་བུད་ཐལ། འདིའི་ནང་གི་མང་པོ་ཞིག་གིས་མ་འོངས་བསྟན་པའི་རྒྱུན་འཛིན། རང་གཞན་སེམས་ཅན་གྱི་དོན་མཛད་ནས། བསྟན་འགྲོར་སྨན་པའི་མཛད་པ་རླབས་ཆེན་འགྲུབ་ངེས་པ་ཡིན་བསམ་ས་ཡང་ཡོད་པ་རེད། ཡང་འགའ་རེས་ཚེ་དང་སྒྲུབ་པ་སྙོམས། མི་ཚེ་སྒྲུབ་ལ་གཞོལ་བ། ཕྱི་ཚུལ་ཕལ་བའི་ཚུལ་དང་ནང་ཚུལ་དམ་པའི་རྣམ་ཐར་སྐྱོང་བའི་སྦས་པའི་རྣལ་འབྱོར་བ་ཡང་ཡོད་ངེས་པ་ནི་སྨོས་མ་དགོས་ཤིང་། གང་ལྟར་ཡང་ཐམས་ཅད་རྫོགས་པ་ཆེན་པོའི་ཆོས་ཀྱི་ལས་འབྲེལ་ཅན་ཡིན་པས། དབང་རབ་ཚེ་འདིར་གྲོལ། དབང་འབྲིང་བར་དོར་གྲོལ། ཐ་མ་ཡིན་ཡང་རང་བཞིན་སྤྲུལ་བའི་ཞིང་ཁམས་ལ་དབུགས་འབྱིན་པའི་ཆོས་ཀྱི་ཟབ་ཁྱད་ལ་རང་ངོས་ནས་དམ་ཚིག་མ་ཉམས་ན་བསླུ་བ་ཡོད་རྒྱུ་མ་རེད། ཡང་ཐ་ཡིན་ཡང་སྐྱེ་བ་དུ་མར་བརྒྱུད་མཐར་ཆོས་གདམས་པ་འདི་དང་འཕྲད་ནས་མཐོ་རིས་རིམ་བརྒྱུད་ལ་སོགས་པས་གྲོལ་བ་ཐོབ་པ་ནི་སྒྲ་ཇི་བཞིན་དུ་བཟུང་ནས་བློ་གདེང་འཆའ་ཆོག་པ་ཡིན། འོན་ཀྱང་རང་དང་སྐལ་བ་མཉམ་པ་ཆོས་ཐོབ་པའི་ཐོབ་ཡིག་མང་ཡང་། དོན་སྙིང་པོའི་ཉམས་ལེན་གྱི་གཏད་སོ་འདི་ཡོད་བསམ་རྒྱུ་མེད་པ་དག་གིས། ཐོག་མར་བློ་སྦྱོང་གི་གཞི་གདན་དེ་ཡང་འཇོག་ཅིག་བྱས་ན་སྙམ་ནས་ཉིན་བཞིན་དེའི་ཕྱོགས་ནས་བཤད་པ་ཡིན། ཆོས་འཆད་མཁན་གྱི་ཚིག་སྒྲོས་བཟང་ངན་དང་། ཉན་ན་སྙན་ཞན་ལ་ཐུག་ཡོད་པ་མ་ཡིན་ལ། ཉན་མཁན་དག་ཀྱང་མི་སྔུན་ནས་ཕྱི་ཚུལ་འཆོས་པ་ཙམ་གྱིས་གོ་མི་ཆོད་པར། དོན་ངོ་མའི་ཐོག་ནས་ཉིན་ཞག་གཅིག་ལ་ཆུ་ཚོད་ཉེར་བཞི་ཡོད་པའི་ནང་ནས། གཉིད་ཐུན་གཅིག་གི་ཆུ་ཚོད་དྲུག་བདུན་པོ་ཕར་ཕུད་ཤུལ་གྱི་ཆུ་ཚོད་བཅུ་བདུན་བཅོ་བརྒྱད་ཅིག་ལྷག་པ་དེའི་ནང་གི་མང་ཆེ་བ་དགེ་བའི་བསམ་སྤྱོད་དུ་འདུག་གམ་མི་འདུག་ངེས་པར་བརྟག་དགོས། དེ་ལས་མང་ཆེ་བ་འཇིག་རྟེན་ཆོས་བརྒྱད་དང་ཡེངས་མ་ལམ། ཡང་ན་མང་ཆེ་བ་རྣམ་གཡེང་འདུ་འཛི་དང་ཚུལ་མིན་ཡིད་བྱེད་དུ་སོང་ནས་ཡོད་ན། ཉིན་ཞག་རེ་རེ་དངོས་གཞིའི་མཉམ་བཞག་གི་ཐུན་དུས་ཚོད་དུ་ཙམ་རེ་ཆོད་པ་དང་། ལར་དམ་པའི་ཆོས་ལ་ཡིད་ཆེས་དང་ལོང་མེད་རྒྱུད་ལ་སྐྱེས་པའི་ཚད་ཇི་ཙམ་ཡོད་པ་དང་། འཆི་བ་ཟེར་བའི་དགྲ་ཆེན་དེ་ཐོག་ལ་ཐོན་བྱུང་ན་དཔའ་གདེང་ཅི་ཞིག་ཡོད་པ་དང་། ཆགས་སྡང་ཉོན་མོངས་དྲག་པོ་གློ་བུར་ལ་སྐྱེ་ན་དེའི་དུས་སུ་ཉམས་ལེན་གྱི་སྙིང་པོ་གང་ལ་འཛིན་དགོས་པ་དང་། ཆོས་ཉམས་ལེན་གྱིས་སྐྱིད་ཀྱི་གོང་གནོན་དང་སྡུག་གི་སྐྱོ་གྲོགས་ཡོང་དགོས་པར་གསུངས་ཤིང་། དང་པོ་ཆོས་སྒོར་ཞུགས་ནས་འབུམ་ལྔའི་བསགས་སྦྱོང་གི་མགོ་བཟུང་ནས་དངོས་གཞིའི་ཁྲིད་ཀ་རེ་ལ་བག་ཆགས་བཞག་དང་ཚུན་ཆད་དུ་རང་རྒྱུད་འདི་ལ་སྐྱེད་ཐོན་པའི་འགྱུར་བ་ཅི་ཙམ་སོང་ཡོད་པ་དང་། ངེས་འབྱུང་སྙིང་ནས་སྐྱེས་ཏེ་འཁོར་བར་ཞེན་ལོག་ཇེ་ཆེ་དང་ཐར་བ་དོན་གཉེར་ཇེ་ཆེར་འདུག་གམ། སྙིང་རྗེ་དང་གཞན་ཕན་དག་སྣང་མོས་གུས་ཀྱི་ཕྱོགས་ནས་འགྱུར་བ་ཅི་ཙམ་ཞིག་སོང་ཡོད་འདུག་སྙམ་ནས། རང་གིས་རང་ལ་རྒྱུགས་ལེན་རྒྱུ་ནི་གཙོ་བོ་གནད་ཆེ་ཞིང་། དེ་ལྟར་རྒྱུགས་བླངས་དུས་ཨ་ཁ་ཅི་ཞིག་བྱུང་བ་ཡིན་ན་ཇེ་སྡུག་འདྲ་ཞིག་མ་རེད་དམ། དེ་དུས་ཨ་གསར་དང་མཉམ་དུ་ཉམས་ལེན་ཐུན་རེ་ལ་སྒ་སྒ་སྒོང་སྒོང་བྱས་ནས་བསྡད་བསྡད་ན་གཅིག་སྨིན་རྒྱུ་ཡོད་སྣང་འདྲ་ཞིག་ཤར་བ་ཡིན། ད་ནི་ལོ་དུ་མ་སོང་ཡང་དེ་དང་དེ་རེད། གར་སོང་འདིར་བརྒྱབ་གང་ཡང་མེད་པ་ཤིང་མདའ་སྒྲོ་མེད་ནགས་སུ་འཕངས་པ་ལྟ་བུ་ཞིག་རེད་སྙམ་པ་ཞིག་བྱུང་ན། དེ་ཡང་ཐ་ཆད་པ་མ་ཡིན་ཏེ་ཆོས་དྲེད་ཆོས་ཀྱིས་མི་ཐུལ་བའི་མི་ཡིས། དེ་གསུངས་དར་བ་དང་ཡིག་ཆའི་ནང་ལ་དེ་ལྟར་ཡོད་ན་ཡང་ཉམས་ལེན་རྒྱུད་ལ་འགེལ་མཁན་དང་བཀལ་ནས་དོན་ཐོག་ལ་ཞོག་ཡོང་ས་ཞིག་དང་ཡོང་རྒྱུ་ཞིག་ཅང་ཡོད་པ་མ་རེད་བསམ་པའི་ལོག་རྟོག་ཅན། ལས་མཐའ་ལོག་ཉེན་ཡོད་པ་དག་ལས་ལྷག་དང་ལྷག་ཡིན། ལོ་མང་ཉམས་ལེན་བྱས་པའི་སྐྱེད་རང་རྒྱུད་ལ་ཐོན་ཨེ་འདུག་བལྟས་ནས་ནང་ལ་འཁོར་རྒྱུ་དེ་ཡང་སྔོན་དང་བསྡུར་ན་ཡར་སྐྱེད་ཅིག་ཡིན། བྱིན་རླབས་རང་རྒྱུད་ལ་འཇུག་དགོས་ན་དད་དང་མོས་གུས་ཡོད་དགོས་པ་ཡིན། བཅོམ་ལྡན་འདས་ཀྱིས་དོན་དམ་པ་ནི་དད་པས་རྟོགས་པར་བྱ་བ་ཡིན་གསུངས་པ་རེད། དེ་ཡང་དད་པས་ཤེས་རབ་བསྐྱེད་ནས་དོན་དམ་ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེ་བ་ཡིན་ཞེས་པའི་དོན་རེད། ངེས་འབྱུང་དང་དད་མོས་གུས་ཀྱིས་ཁྱོག་ཡོད་ན་ལོ་བདུན་བརྒྱད་ལ་ཉམས་ལེན་བྱས་པ་ནི་དུས་ཚོད་ཐུང་ཐུང་མ་རེད། ཉམས་རྟོགས་ཀྱི་ཚོད་ཀྱིས་རང་རྒྱུད་ལ་བློ་གདེང་ཁེལ་བ་དང་། གཉིས་འཛིན་དང་བྲལ་བའི་ལྟ་བ། ཡེངས་མེད་ངང་གཞག་གི་སྒོམ་པ། རེ་དོགས་མེད་པའི་སྤྱོད་པ་རྣམས་བརྒྱུད་ནས། སྤང་ཐོབ་བྲལ་བའི་འབྲས་བུ་ལ་ཕྱོགས་པ་སྟེ། ཕྱག་ཆེན་གྱི་ཆོས་སྐད་དང་སྦྱར་ན། རོ་གཅིག་ལ་བསྙེགས་མེད་ཀྱང་། རྩེ་གཅིག་ཡན་གྱི་རྟགས་ཚད། གོ་བས་མི་ཚད་མྱོང་བ་ཞིག་ཐོན་དགོས་པ་ཞིག་ཡིན། གང་ལྟར་བཤད་ཀྱང་དད་དང་མོས་གུས་མ་ཞན་ན་དད་པའི་ཞིང་ས་ལ་དགེ་བའི་མྱུ་གུ་སྨིན་ཅིང་། དེ་ཡང་ཐུན་མིན་རྫོགས་ཆེན་གྱི་ལམ་ཡིན་ཕྱིར་ལམ་ཞུགས་ཕལ་བ་བརྒྱ་ཡིས་དོ་ཟླ་ཡོད་རྒྱུ་མ་རེད། ཡིན་ན་ཡང་ཆོས་རྩ་ཆེན་ཡིན་བརྒྱུད་པ་བཟང་པོ་ཡིན་སྙམ་ནས་གློ་བ་དགའ། སྣང་བ་སྤྲོ། སྤོབས་པ་མཐོ་བ་ཙམ་རྐྱང་པས་མི་ཆོག་པས། ཆོས་གྲོགས་གསར་རྙིང་སུ་དང་གང་ཡིན་ན་ཉམས་ལེན་སྙིང་པོ་གནད་ལ་སྨིན་པ་ཞིག་འགོར་འགྱངས་མི་བྱེད་པར་ཡོང་བའི་ཆེད་དུ། བློ་སྦྱོང་འདི་ལ་ཡང་འབད་སྐྱར་འབད་ཅིག་གྱིས་དང་། བློ་སྦྱོང་གིས་བློ་འབྱོངས་ཡོད་ན་ཇ་དལ་འཐུང་བྱས་ནས་འདུག་ཕོད་ཐབས་ཤིག་གང་ན་ཡོད། བྲག་ཧར་མ་ཁང་རྩེག་སྟོང་ཕྲག་མང་པོ་ཡོད་ས་ཞིག་ནས་མར་ལྷུང་ནས། འོག་གི་དུག་མཚོའི་ནང་ལ་མ་ཐོན་པའི་སྔོན་དེར་རྫུ་འཕྲུལ་ཅན་ཞིག་འཕུར་ཡོང་ནས་ལག་མགོ་ལ་འཐམ་དུ་བཅུག་ན་མི་འཐམ་པ་ཞིག་མི་སྲིད་པ་བཞིན་དུ། འུ་ཚོ་སོ་སྐྱེ་ཐ་མལ་པ་ལས་ངན་གྱི་རྒྱུ་བྱས་ལུས་ངན་གྱིས་སྡུག་བསྔལ་མྱོང་བཞིན་པའི་ཐོག་འདི་ལ། སྔར་སོང་བསོད་ནམས་ཆ་མཐུན་གྱིས་ཟག་བཅས་དགེ་བའི་ལས་བསགས་ནས། ད་རེས་མཐོ་རིས་ཀྱི་མི་ལུས་འདི་བླངས་པ་རེད། འདིའི་ཐོག་ནས་ཐར་བའི་ལམ་སྣེ་ཞིག་ཟིན་མ་ཐུབ་ན། བསམ་ཚད་མི་དགེ་བ། བྱས་ཚད་སྡིག་པ། བཤད་ཚད་གཞན་སྐྱོན། ཐམས་ཅད་འཇིག་རྟེན་ཆོས་བརྒྱད་ལས་མ་འདས་པ་ཞིག་གིས། སྐྱེ་གནས་བཟང་པོ་དང་ལུས་རྟེན་ལེགས་པ་ཞིག་ཕྱི་ནས་རྙེད་པར་དཀའ་བའི་སྐྱེ་རྟགས་རང་གིས་རང་ལ་བཤད་ཤེས་པ་ཡིན། སྐྱེ་བ་རྗེས་མ་ཟེར་རྒྱུ་ཞིག་ཡོད་པས་དགའ་དང་མེད་པས་དགའ་ཞེས་དྲིས་ནས་གདམ་ཀ་བྱེད་ཆོག་རྒྱུ་ཞིག་ཡིན་ན་མེད་ན་དགའ་ཟེར་ངེས་ཀྱང་། དེ་ཡོད་པ་ནི་རྒྱུ་འབྲས་རྟེན་འབྱུང་གི་གཤིས་དང་། རང་གི་རིགས་པས་བརྟགས་ཤིང་དཔྱད་ན་ཡང་གྲུབ་པའི་སྒོ་ནས་ཤེས་རྒྱུ་ཞིག་ཡིན་པ་ནི། ལན་གྲངས་མང་པོར་བསྲེགས་བཅད་བརྡར་གསུམ་གྱིས་ཉམས་ཞིབ་བརྒྱུད་ཚར་བ་ཞིག་རེད། དེས་ན་འདི་འདྲའི་ཡག་ཉེས་ཅན་གྱི་ས་ཚོད། ཉམས་ལེན་རྣམ་དག་ཐུན་ཁེ་རུ་ཞིག་གིས་ཀྱང་ཕྱིན་ཆད་སྐྱེ་ཤིའི་འཁོར་བ་རྩི་ཚོད་མེད་རྒྱུ་ཞིག་གི་ཁ་བསྒྱུར་བ་ལ་ཕན་གནོད་ཆེན་པོ་གཏུག་པའི་སྐབས་འདིར། རང་གཞན་འདི་ཕྱིའི་དོན་ཆེན་འགྲུབ་རྒྱུ་ལ་ལོ་མང་པོའི་ཕྱག་སྐོར་སྒྲིབ་སྦྱོང་དང་། རྒྱ་ཆེན་པོའི་སྤྲོས་པ་ཅན་གྱི་མཆོད་པ་སྨོན་ལམ་བས་ཐུན་ཐུང་ཐུང་ཞིག་གིས་ཆོད་སྒོ་ཆེ་བའི་དངོས་གཞིའི་ཉམས་ལེན་ལ་མི་འབད་པར། འཁྲུལ་སྣང་འཇིག་རྟེན་གྱི་བྱ་གཞག་མ་དགོས་དགེ་སྦྱོར་ཞ་གི་ཞི་གིའི་གཟུགས་བརྙན་དག་ལ་མ་དག་ཅིག་ལ་འཇུག་པས་ཅི་བྱེད་བསམ་དགོས་པ་ཡིན། དང་པོ་བྱིས་པའི་དུས་སུ་བསམ་ངོགས་མ་ཟིན་ནས་ལུས་པ་དང་། དེ་ནས་ན་གཞོན་ཡིན་པའི་དུས་སུ་གྲོགས་ངན་མིན་ཡང་གྲོགས་བཟང་ངོ་མ་དང་མ་ཐུག་ནས་རྣམ་གཡེང་གི་ངང་ནས་ཀྱང་ལོ་ཟླ་ཕོན་ཆེན་ཟད་ཅིང་། མ་འོངས་རྒས་ནས་ལུས་སེམས་གཉིས་ཀ་རྒུད་པའི་དུས་སུ་འགྲུབ་ཡོང་རྒྱུ་ཞིག་མེད་པ་ནི་ཕར་བལྟས་ཚུར་གསལ་ཡིན་ལ། ད་ལྟ་རང་དབང་རང་ལག་ལ་ཡོད། ལུས་སེམས་གཉིས་ཀྱི་སྟོབས་མ་ཞན། དབང་པོ་རྣམ་རིག་གསལ་བའི་དུས་སུ་ཉམས་ལེན་ཞིག་མ་བྱས་ན་ད་ནམ་བྱེད་ཡོང་། འདུག་གྲབས་མ་བྱེད་འགྲོ་གྲབས་གྱིས། འཆི་བ་ད་ཐོན་ན་གདོང་ལེན་གྱི་ལག་ཆ་འདི་ཡོད་བསམ་རྒྱུ་ཞིག་མེད་དུས། འདུག་གྲབས་བྱས་ཀྱང་དགུན་ཁའི་དར་ཐོག་ལ་མཁར་རྩིག་པ་དང་འདྲ་བར་ཡུན་རིང་འདུག་འདེང་མེད་པ་ནི་ཞེ་ལ་ངེས་ངེས་སུ་ཡོད་པས། བྱ་བ་ལྷུས་ཐིངས་པའི་ཆགས་འཆར་གཞི་ཞོག་པ་ཞིག་རེད་མེད་པ་ཡིན། ཡང་སྒོས་རང་རང་གི་ལོ་ནམ་ཟླའི་ཚོད་ཀྱིས་དགུན་གྱི་ཉི་མ་ལོག་ཚར་ནས་དཔྱིད་ཟླ་དང་པོར་ཚེས་རྒྱུ་ལ་ཡུན་རིང་ཞིག་མེད་པའི་ཚོད་ལ་ཐོན་པ། དཔྱིད་ཁའི་ས་དྲོད་དྲོས་རྒྱུ་ལ་ཡུན་མེད་དུས་དར་ཐོག་ལ་མཁར་ཞིག་བརྩིགས་པ་བྱས་ན་བློ་གཏད་མེད་པ་དང་གཉིས་སུ་མ་མཆིས་ཤིང་། དེ་ཡང་མི་ཚེ་གཅིག་གི་མགོ་མཐའ་རྟག་པའི་ཚོད་ཀྱི་སྐད་ཆ་རེད། འདུས་བྱས་ཀྱི་ཆོས་ལ་རྟག་བརྟན་མེད་ལུགས་ལ་བསམ་ན། བཀའ་གདམས་པའི་དགེ་བའི་བཤེས་གཉེན་ཚོས་དོ་དགོང་མར་གཟིམས་ནས་སང་ཉིན་ཡར་བཞེངས་ཏེ་གསོལ་ཇ་གསོལ་རྒྱུའི་གྲ་སྒྲིག་མཛད་མི་དར་བ་ཡིན། ང་ཚོས་མི་རྟག་པ་ཡིན་ཡང་ང་སང་ཉིན་ཤི་མེད་པའི་ཁག་འཁུར་ཤི་ཡོད་རྒྱུ་མ་རེད་སྙམ་པར་བྱེད་ཀྱང་། སང་ཉིན་གྱི་རྒྱབ་ལ་སང་ཉིན་ཡོད་པས་ཟད་པ་མེད་ཅིང་། ནམ་ཞིག་སང་ཉིན་ཚེས་ལོང་མེད་པར་ཤི་ནས་ཡོད་ཤག་ཤག་རེད། དེ་ལྟ་བུའི་སང་ཉིན་དེ་ནམ་ཡིན་པ་དང་། སང་ཉིན་དུ་ཞིག་གི་འཕྲོ་ལ་ང་འཆི་བ་ཡིན་མི་ཤེས་ཤིང་། མི་ཚོས་དེའི་ཕྱོགས་ལ་བསམ་བློ་གཏོང་མ་ཕོད་པས་མི་ཤེས་ཁུལ་བྱས་ནས་རང་གིས་རང་ལ་ཤེས་བཞིན་དུ་མགོ་གཡོག་བཞིན་ཡོད་པ་རེད། དེ་བས་འགྲོ་གྲབས་སྔོན་ལ་གྱིས་ཤོག ད་ལྟ་ཤི་ཡང་ཞེ་བློ་བདེ་བ་ཞིག་གྱིས་ཤོག་དང་འདུག་རྒྱུ་ཡོད་ནའང་སྐྱིད་རེད། ཉིན་རེ་བསྡད་ཀྱང་རང་གཞན་གྱི་དོན་རེད། འདུག་རྒྱུ་མེད་ནའང་སྐྱིད་རེད། སྡུག་བདེན་ཉེར་ལེན་གྱི་ཕུང་པོ་མི་འདོད་སྣ་དགུའི་འབྱུང་གནས་མི་གཙང་བའི་རང་བཞིན་འདི་བསྐྱུར་ནས་སེམས་ཉིད་ཀློང་ཆེན་གྱི་མཁའ་ལ་བྱ་རྒོད་པོའི་ནམ་འཕང་བཅད་པ་བཞིན་དུ་འགྲོ་བ་ལས་སྐྱིད་ཅིག་གང་ན་ཡོད། དེས་ན་ཆོས་ཟབ་པའི་ཚོད་ཀྱི་གདམས་པ་འཕྲད་ཆོག་མ་ཡིན་ན་ཡང་ཉམས་ལེན་གནད་ལ་ཁེལ་བའི་སྙིང་རུས་དཀའ་སྤྱད་རང་གིས་བརྒྱུད་ལོས་དགོས་མ་གཏོགས། ཐེག་པ་འོག་མའི་ལམ་ནས་འབད་པ་ཅི་འདྲ་དགོས་འདུག ཐེག་རྩེའི་རྫོགས་ཆེན་གྱི་ལམ་ནས་འབད་པ་མི་དགོས་པ་ཞིག་ཡོད་པ་མ་རེད། འབད་མེད་མ་སྒོམ་སངས་རྒྱས་ཞེས་གསུངས་དུས་ནས་ཀྱང་། ཐུན་མོང་གི་འབད་པ་ལས་འདས་པའི་ཤིན་ཏུ་རྟོགས་དཀའ་བའི་འབད་པ་ལས་འདས་པའི་འབད་པ་ཞིག་གི་སྟོབས་བསྐྱེད་དགོས་པ་ནི་དོན་གྱིས་བསྟན་པ་རེད། དེས་ན་རྙེད་དཀའི་ཆོས་དང་འཕྲད་པའི་སྤྲོ་བ་དང་། སྐད་ཅིག་ཐང་ལྷོད་མེད་པའི་བརྩོན་པ་ཤུགས་དྲག བརྩོན་གང་དགེ་ལ་སྤྲོ་བའི་འཇུག་པ། ལེ་ལོ་དང་སྙོམ་ལས་སྒྱིད་ལུག་སོགས་ཀྱིས་མི་ཕིགས་པའི་གོ་ཆ་སྲ་མོ་ཞིག་བགོ་བ་དང་བཅས་ཏེ། གང་ཞིག་གསན་པར་བྱ་བ་ཆོས་དབྱིངས་རིན་པོ་ཆེའི་མཛོད་ཀྱི་འགྲེལ་བ་ལུང་གི་གཏེར་མཛོད་འདི་ཉིད་ལས། ཐོག་མར་དགེ་བ་ཀླད་ཀྱི་དོན་སོང་ནས། བར་དུ་དགེ་བ་གཞུང་གི་དོན་ལས་ལེའུ་ལྔ་བ་རྩོལ་སྒྲུབ་རྒྱུ་འབྲས་ལས་འདས་པར་བསྟན་པའི་ལེའུ་ལས། ཁ་རྩང་རྒྱུ་འབྲས་བྱ་རྩོལ་ལས་འདས་པར་བསྟན་པའི་ལེའུ་འདིའི་ས་བཅད་དང་པོ། བྱ་རྩོལ་རྒྱུ་འབྲས་ལས་འདས་པའི་དོན་དང་དཔེ་བསྟན་པ་དང་། ས་བཅད་གཉིས་པ་འོག་མའི་ཐེག་པ་གོལ་སྒྲིབ་ཏུ་བསྟན་པ་ནང་གསེས་དང་བཅས་པ་དང་། གསུམ་པ་རང་བྱུང་གི་ཡེ་ཤེས་དང་གཞན་བྱུང་གི་རྟོག་ཚོགས་འབྱེད་པའི་དབྱེ་བ་མཇུག་སྡུད་དང་བཅས་པ་བསྟན་པ་རྣམས་སོང་ནས། དེ་རིང་ཇི་ལྟར་སྣང་ཡང་སྒྱུ་མའི་རྩེད་མོ་ཙམ་ལས་དོན་ལ་གོས་པ་མེད་པའི་གནད་དེ་ཉིད་བསྟན་པ་སྟེ།

༼ང༽བཞི་བ་རྟོགས་པའི་རྣལ་འབྱོར་པ་ལ་འགྱུ་འཕྲོར་སྣང་བ་དང་ཡུལ་སྣང་སྒྱུ་མའི་རྩེད་མོ་ཙམ་ལས་གོས་པ་མེད་པའི་གནད་བསྟན་པ།

དེ་ལ་རྟོགས་པའི་རྣལ་འབྱོར་པ་ལ་འགྱུ་འཕྲོར་སྣང་བ་དང་ཡུལ་སྣང་སྒྱུ་མའི་རྩེད་མོ་ཙམ་ལས་གོས་པ་མེད་པའི་གནད་བསྟན་པ་དངོས་དང་། རིག་པའི་ངོ་བོ་ཡུལ་འདས་ནམ་མཁའ་ལྟ་བུར་བསྟན་པ། ས་ལམ་སྦྱང་བགྲོད་མེད་པ་ལ་སོགས་པ་ཡང་ཤེས་པར་བྱ་བ་གདམས་པ་དང་གསུམ་ལས།

ཀ༽དང་པོ་རྟོགས་པའི་རྣལ་འབྱོར་པ་ལ་འགྱུ་འཕྲོར་སྣང་བ་དང་ཡུལ་སྣང་སྒྱུ་མའི་རྩེད་མོ་ཙམ་ལས་གོས་པ་མེད་པའི་གནད་བསྟན་པ་དངོས།

ད་ནི་རྟོགས་པའི་རྣལ་འབྱོར་པ་ལ་འགྱུ་འཕྲོར་སྣང་བ་དང་ཡུལ་སྣང་སྒྱུ་མའི་རྩེད་མོ་ཙམ་ལས་གོས་པ་མེད་པའི་གནད་ནི།

གང་ནས་མ་འོངས་གང་དུ་མ་སོང་ལ།།

གར་ཡང་མི་གནས་ཆོས་ཉིད་ཀློང་ཆེན་དུ།།

རྟོགས་པས་ཁམས་གསུམ་ཡོངས་གྲོལ་དགོངས་པ་ཞེས།།

ཨ་ཏི་ལྷུན་གྲུབ་རྡོ་རྗེ་སྙིང་པོའི་ལུང་།།

ཀུན་བཟང་ཡངས་པ་ཆེན་པོའི་ཀློང་ནས་ཤར།།

ཞེས་གསུངས་ཏེ། རྫོགས་པ་ཆེན་པོ་འདིའི་དོན་རྗེན་པར་རྟོགས་པའི་རྣལ་འབྱོར་པ་ལ། རིག་པ་ཟང་མ་རྗེན་པར་སོང་བས། ཡུལ་སྣང་རིག་པའི་ངོ་ལ་ཚུར་སྣང་ཡང་། རིག་པ་སྣང་བའི་ཡུལ་ཐོག་ཏུ་ཕར་མི་འཆོར་བས། གཟུང་འཛིན་འཁོར་བའི་རྩ་བ་སྟོངས་ཏེ། རིག་པ་ཟང་ཀ་རྗེན་ལ་སངས་ཏེ། ཡུལ་ཐོག་ཏུ་མ་ཤོར་བའི་རྟགས་སུ་སྣང་བ་ལ་ཆགས་ཞེན་དང་དགག་སྒྲུབ་གང་ཡང་མེད་པའི་ཕྱིར་རོ། །འཁོར་བ་མྱང་འདས་སུ་གྲོལ་བས་ཆོས་སྐུ་ཟང་ཐལ་དུ་ཤར་བ་ཞེས་བྱ་སྟེ། རྫོགས་པ་ཆེན་པོའི་བསྟན་དོན་གྱི་སྙིང་པོ་ནི་རིག་པ་ཉག་གཅིག་ཡིན་ལ། རིག་པ་རྗེན་ལ་བུད་པའི་རྣལ་འབྱོར་པས་རྫོགས་པ་ཆེན་པོའི་དོན་རྗེན་པར་རྟོགས་པ་ཡིན་ཞིང་། ཡུལ་མེད་རིག་པ་རྗེན་པ་དེ་ཇི་ལྟ་བུ་ཞིག་ཅེ་ན། དངུལ་ཆུ་དཀར་མོ་ས་ལ་ལྷུང་ཡང་རྡུལ་གྱིས་མ་གོས་པ་བཞིན་དུ། ཡུལ་སྣང་རིག་པའི་ངོ་བོར་ཚུར་མ་འདྲེས་པར་འཆར་ན་ཡང་། རིག་པ་སྣང་བའི་ཡུལ་ཐོག་ལ་ཕར་འཁོར་བའི་རྣམ་རྟོག་ལྟར་དུ་འཆོར་དུ་མེད་པས་འཁོར་བ་མྱང་འདས་སུ་གྲོལ་ཞིང་། དེ་ཅིའི་ཕྱིར་ཞེ་ན། འཁོར་བའི་རྩ་བ་གཟུང་འཛིན་གཉིས་ཀ་ཡིན་ལ། དེ་གཉིས་ཆོས་ལས་འདས་པའི་རིག་པ་ཟང་མ་རྗེན་པ་ཉག་གཅིག་གི་ཀློང་དུ་དྲིལ་དུས་ཟང་ཐལ་ཆོས་སྐུའི་དགོངས་པ་བརྙེས་པ་ཡིན། དེ་རིགས་པས་སྒྲུབ་པ་ནི། གཟུང་འཛིན་འཁོར་བའི་རྩ་བ་སྟོངས་ཏེ། ཅིའི་ཕྱིར་ཞེ་ན། རིག་པ་ཟང་ཀ་རྗེན་ལ་བུད་དེ་ཡུལ་ཐོག་ཏུ་མ་ཤོར་བའི་ཕྱིར། གྲུབ་སྟེ། ཡུལ་ཐོག་ཏུ་མ་ཤོར་བའི་རྟགས་སུ་སྣང་བ་ལ་དགག་སྒྲུབ་དང་ཆགས་ཞེན་གང་ཡང་མེད་པའི་ཕྱིར་རོ། །ཞེས་སོ། །དེའི་རྒྱབ་རྟེན་གྱི་ལུང་ནི། རིན་པོ་ཆེ་སྤུངས་པ་ལས། འབྲས་བུ་ཆོས་སྐུ་སྟོང་ཉིད་ལ། །དངོས་པོ་ཟད་པ་ཡ་མཚན་ཆེ། །དངོས་མེད་ཡེ་ཤེས་ཟང་ཐལ་ལ། །གཟུང་བ་མེད་པ་ཡ་མཚན་ཆེ། །ཞེས་སོ། །འདིའི་དུས་སུ་སྣང་སྲིད་རྒྱ་གྲོལ་ལ་སོང་བས་གང་སྣང་རྟོགས་པར་གྲོལ་ཏེ། ཁམས་གསུམ་ཡོངས་གྲོལ་གྱི་དགོངས་པ་ཞེས་བྱ། འཁོར་བ་ཡོད་མ་མྱོང་དུ་རྟོགས་པས། སྲིད་གསུམ་ཀ་དག་གི་དགོངས་པ་ཞེས་བྱ། སྣང་བརྟགས་ཐམས་ཅད་བདེན་མེད་དུ་ཤིག་ཤིག་རྟོགས་པས་གྲོང་ཁྱེར་རྒྱུན་གཅོད་ཀྱི་ལྟ་བ་ཞེས་བྱ་སྟེ། རྒྱུད་དེ་ཉིད་ལས། སྣོད་བཅུད་ཡོད་ཐོས་སྣང་བ་འདི། །བརྟགས་པས་རང་བཞིན་མེད་པར་ཡང་། །གྲོང་ཁྱེར་རྒྱུན་གཅོད་ལྟ་བར་ནི། །ཡེ་ནས་འདུག་པ་མ་མཐོང་བ། །དབང་པོ་རྣམས་ཀྱི་སྒོ་འགགས་སམ། །ཞེས་པ་ལེགས་པར་མཐོང་ཞིང་རྟོགས་པའོ། །ཡུལ་སྣང་སྤང་ལེན་ལས་འདས་པའི་རྣལ་འབྱོར་པའི་ངོར་འཁོར་འདས་ཀྱི་སྣང་བ་ཤར་དུས་ཉིད་ནས་རིག་པ་ལ་གོས་པ་མེད་པ། དཔེར་ན་མེ་ལོང་གཡའ་དག་པའི་ངོས་དེ་གཟུགས་བརྙན་གང་དུའང་མ་གྲུབ་ལ། གང་ལྟར་ཡང་འཆར་བའི་གཞི་བྱེད་པ་བཞིན་དུ། རིག་པ་མེ་ལོང་དྭངས་པ་ལྟ་བུ་དེ་ཡང་གང་དུའང་མ་གྲུབ་ལ། གང་ལྟར་འཆར་བའི་གཞི་ལ། འཁོར་འདས་ཀྱི་སྣང་བ་ཤར་དུས་ཉིད་ནས། གང་ནས་མ་འོངས། གང་དུ་མ་སོང་། གར་ཡང་མི་གནས་པའི་ཆོས་ཉིད་འགྲོ་འོང་གནས་གསུམ་དང་བྲལ་བའི་ཀློང་ཆེན་ཡངས་པ་ལས་མ་འདས་པར་རྟོགས་པས། འགྱུ་འཕྲོ་སྣང་བ་དང་ཡུལ་སྣང་ཇི་ལྟར་ཤར་ཡང་གནད་ཤེས་པས་སྒྱུ་མའི་རྩེད་མོར་བལྟས་པ་ལྟ་བུ་ལས་མ་འདས་སོ། །ཀློང་ཆེན་པའི་སྒྱུ་མ་ངལ་གསོ་ལས། གདོད་ནས་དག་པས་སྒྱུ་མ་ལྟ་བུ་ལ། །མེད་བཞིན་སྣང་བས་སྒྱུ་མ་ཉིད་དང་མཚུངས། །རྐྱེན་ལས་སྐྱེས་ཕྱིར་སྒྱུ་མ་དང་འདྲ་ཞིང་། །བསླུ་ཞིང་འཇིག་པ་སྒྱུ་མ་ལྟ་བུ་ཞེས། །འཁོར་བའི་འཁྲུལ་སྣང་སྒྱུ་མར་གཏན་ལ་ཕབ། །ཅེས་གསུངས་ཤིང་། དེ་ལྟར་རྟོགས་པའི་རྣལ་འབྱོར་པས་བལྟས་ཚེ་མ་གྲོལ་བ་ཞིག་གང་ཡང་མེད་པར་ཡེ་དང་མ་ནས་བཅིངས་གྲོལ་གཉིས་ཀ་ལས་འདས་པ་གཞིི་མེད་རང་སྣང་རྨི་ལམ་སྒྱུ་མ་ནམ་མཁའ་ལྟ་བུའི་རང་བཞིན་དུ་མཐོང་ནས། སྣང་སྲིད་ཐམས་ཅད་འཆིང་བའི་རྒྱ་ལས་གྲོལ་བའི་མ་གྲོལ་བ་མེད་པའི་རྟོགས་པ་མཆོག་ལ་གྲོལ་ཏེ། མངལ་གྱི་གྲོང་ཁྱེར་རྒྱུན་ཆོད་ནས་ཕྱིན་ཆད་ཁམས་གསུམ་འཁོར་བར་མི་ལྡོག་པས་ཁམས་གསུམ་ཡོངས་གྲོལ་གྱི་དགོངས་པ་ཞེས་བྱ་ལ། དེ་ལྟར་འཁོར་བ་ཞེས་པའི་འཆིང་བ་དང་མྱང་འདས་ཞེས་པའི་གྲོལ་བ་ཅན་ཞིག་མེད་པར་གཞི་ཀ་དག་འཁོར་འདས་གང་དུ་ཡང་མ་གྲུབ་པ་ལ། ལམ་ཀ་དག་དགོངས་པའི་གནད་རྟོགས་ནས། འབྲས་བུ་ཀ་དག་གཞི་འབྲས་དབྱེར་མེད་པའི་ཚད་དུ་ཕྱིན་དུས། སྲིད་གསུམ་ཀ་དག་གི་དགོངས་པ་མངོན་དུ་གྱུར་པའོ། །དེའི་དུས་སུ། ཕྱི་ཆོས་ཅན་ལ་བལྟས་པས་རང་བཞིན་མེད་པར་མཐོང་ནས་ཀུན་རྫོབ་ཀྱི་སྣང་བ་གཞི་མེད་ཡང་དག་ལ་སོང་། ལས་དང་བག་ཆགས་མེད་པའི་གདེང་རྙེད། ནང་ཆོས་ཉིད་ལ་བལྟས་ཡོང་དུས་རང་བཞིན་མེད་པའི་དོན་ཡེ་ཤེས་ཀྱི་མིག་གིས་མཐོང་ནས་ཆོས་ཟད་ཀྱི་ངང་ལ་བློ་བདེ། གསང་བ་རིག་པ་ལ་བལྟས་པས་དབྱིངས་རིག་དབྱེར་མེད་དུ་མཐོང་ནས། འཁོར་འདས་སྣང་བརྟགས་ཐམས་ཅད་བདེན་མེད་སྒྱུ་མའི་རོལ་རྩེད་དུ་མཐོང་ཞིང་ལྟ་བ་ནི་ལྟ་བ་གྲོང་ཁྱེར་རྒྱུན་གཅོད་དོ།།

ཁ༽གཉིས་པ་རིག་པའི་ངོ་བོ་ཡུལ་འདས་ནམ་མཁའ་ལྟ་བུར་བསྟན་པ།

རིག་པའི་ངོ་བོ་ཡུལ་འདས་ནམ་མཁའ་ལྟ་བུར་བསྟན་པ་ནི།

རྣམ་དག་བྱང་ཆུབ་སེམས་ཀྱི་ངོ་བོ་ལ།།

ལྟ་བའི་ཡུལ་མེད་ལྟ་བའི་ཆོས་སུ་མེད།།

བལྟ་བར་བྱ་དང་བྱེད་པ་རྡུལ་ཙམ་མེད།།

སྒོམ་པའི་བློ་མེད་བསྒོམ་བྱའི་ཆོས་ཀྱང་མེད།།

སྤྱད་དང་སྤྱོད་པ་གཉིས་མེད་ལྷུན་གྲུབ་པས།།

བསྒྲུབ་པར་བྱ་བའི་འབྲས་བུ་རྡུལ་ཙམ་མེད།།

ཅེས་གསུངས་ཏེ། དེ་ཡང་ཚིག་རྐང་དང་པོ་གཉིས་ཀྱིས་ལྟ་སྒོམ་སྤྱོད་འབྲས་ཀྱི་གཞི་རིག་པ་རྣམ་དག་བྱང་ཆུབ་ཀྱི་སེམས་ཡུལ་འདས་ནམ་མཁའ་ལྟ་བུ་དེ་ཆོས་ཅན་དུ་བཀོད་དེ། དེ་ནས་ཚིག་རྐང་བཞི་བོ་རེ་རེ་བཞིན་དུ། ལྟ་སྒོམ་སྤྱོད་འབྲས་བཞི་བོ་ལས་འདས་པ་དེ་ཉིད་གཏན་ཚིགས་རྣམ་པ་གསུམ་གྱིས་གཏན་ལ་ཕབ་པ་འགྲེལ་བས་གསལ་བར་གསུངས་པ་ནི། ལྟ་སྒོམ་སྤྱོད་འབྲས་ནི་རིག་པའི་སྟེང་དུ་བྱེད་ན། བྱེད་དུས་ཀྱི་རིག་པ་དེ་ཉིད་ངོ་བོ་མེད་པས་ཀྱང་དེ་དག་ཏུ་བྱར་མེད་པ་ཉིད་དང་། ཕན་ཚུན་རྫས་འགལ་བས་ཀྱང་། སྐད་ཅིག་ལ་བྱ་བྱེད་དུ་མ་གྲུབ་པ་ཉིད་དང་། རང་རིག་ཆོས་སྐུ་གྲུབ་ཟིན་པས་ཀྱང་ལྟ་སྒོམ་སྤྱོད་འབྲས་ལ་དོན་མེད་པའི་གཏན་ཚིགས་གསུམ་གྱིས། རིག་པ་ལྟ་སྒོམ་སྤྱོད་འབྲས་ལས་འདས་པར་བསྟན་ཏེ། ལུང་གིས་བཀྲལ་བ་ནི། སེང་གེ་རྩལ་རྫོགས་ལས། རིག་པ་མ་བསྒོམས་ལྷུན་གྲུབ་ལ། །སྒོམ་པ་བྱས་པས་ང་མི་རྙེད། །རང་བྱུང་ཡེ་ནས་བཅོས་མེད་ལ། །སྤྱོད་པ་སྤྱད་པས་ང་མི་མཐོང་། །ཆོས་སྐུ་ཡེ་ནས་མཐའ་བྲལ་ལ། །ལྟ་བ་བལྟས་པས་ང་མི་མཐོང་། །ཞེས་པ་དང་། ཀློང་དྲུག་པ་ལས། ཀུན་བཟང་ང་ལ་ལྟ་བ་མེད། །ལྟ་བ་མེད་ཕྱིར་སྣང་བ་ཟད། །དེ་བཞིན་སྒོམ་པ་ཉིད་ཀྱང་མེད། །སྒོམ་པ་མེད་ཕྱིར་དྲན་པ་འགགས། །སྤྱོད་པ་ཞེས་ནི་བརྗོད་དུ་མེད། །སྤྱོད་པ་མེད་ཕྱིར་ལུས་འབྱུང་ཟད། །ཅེས་པ་དང་། རང་ཤར་ལས། རྫོགས་ཆེན་ཨ་ཏི་ཡོ་ག་ལ། །ལྟ་དང་སྒོམ་དང་སྤྱོད་པ་མེད། །ལེགས་པར་བསྟན་གྱིས་ཡིད་ལ་ཟུངས། །བསྒྲུབ་མེད་རྩལ་སྤྲུགས་སྨོན་པ་མེད་པ་ཡི། །བྱར་མེད་ལྷུན་རྫོགས་སྔ་མ་དེ་ཉིད་དོན། །བྱ་བ་དང་ནི་བྱེད་པ་ག་ལ་ཡོད། །སྤྱོད་པ་མེད་པའི་ཆོས་ཉིད་རང་བྱུང་འདི། །གང་གི་ཕྱོགས་སུ་མ་ལྷུང་ནམ་མཁའ་བཞིན། །ཡོད་པ་མ་ཡིན་སྟོང་པ་གཅིག་པུ་ཉིད། །མེད་པ་མ་ཡིན་ཡང་དག་བདེ་བའི་སྐུ། །བྱས་པ་མ་ཡིན་རང་བྱུང་རྟོག་མེད་ཉིད། །རྫོགས་ཆེན་ཨ་ཏི་ཡོ་ག་ལ། །སྒོམ་པའི་ཆོས་ཉིད་ག་ལ་ཡོད། །བཏང་དང་བཞག་པ་མེད་པའི་ཆོས། །སྒོམ་དང་མ་བསྒོམས་མཐའ་ལས་གྲོལ། །འཛིན་མེད་སེམས་ཀྱི་དྲི་མ་ཅི། །ཡང་དག་རིག་པ་དྲི་མ་མེད། །དྲི་མེད་དག་པའི་ཆོས་སྐུ་ལ། །སྒོམ་དང་བསྒོམ་པར་བྱ་བ་མེད། །བསྒོམས་པས་ཡང་དག་ཉིད་མི་རྙེད། །རྙེད་ན་རང་རིག་མེད་པར་འགྱུར། །ཅི་ཕྱིར་རང་རིག་ཡེ་ཤེས་ལ། །ཡེངས་དང་མ་ཡེངས་མེད་པའི་ཕྱིར། །གང་ལ་འཛིན་པ་ཡོད་པ་ལ། །རང་བྱུང་ཡེ་ཤེས་ཡོད་མ་ཡིན། །གལ་ཏེ་རང་བྱུང་ཡེ་ཤེས་ཉིད། །སྒོམ་པའི་དབང་དུ་གྱུར་པའི་ཕྱིར། །ཡེ་ཤེས་དམ་བཅའ་འགལ་བར་འགྱུར། །དེ་ཕྱིར་རྫོགས་ཆེན་ཨ་ཏི་ལ། །བསྒོམས་པས་དོན་མི་མཐོང་བར་བཤད། །རྫོགས་ཆེན་ཨ་ཏི་ཡོ་ག་ལ། །ལྟ་བ་ཉིད་ལ་བལྟ་རུ་མེད། །བལྟ་བ་སེམས་ཀྱི་དྲི་མ་ཡིན། །དྲི་མེད་དག་པའི་ཆོས་ཉིད་ལ། །བལྟ་བྱ་ལྟ་བྱེད་གཉིས་དང་བྲལ། །ལྟ་བ་ཉིད་ལ་བལྟ་རུ་མེད། །ཅི་ཕྱིར་བལྟ་བ་ཡོད་གྱུར་ན། །རིག་པའི་སྒྲོན་མ་མེད་པར་འགྱུར། །དེ་ཕྱིར་རྫོགས་ཆེན་ཨ་ཏི་ལ། །ལྟ་བ་འཛིན་པའི་ཆོས་ཉིད་མེད། །རྫོགས་ཆེན་ཨ་ཏི་ཡོ་ག་ལ། །འབྲས་བུ་བསྒྲུབ་ཏུ་མེད་པར་གསུངས། །འབྲས་བུ་བྱས་མེད་རང་བྱུང་ཉིད། །རྟོག་མེད་ས་ལ་དེ་བཞིན་གཤེགས། །ཡེ་ཤེས་དག་སྣང་ཆེན་པོ་ལ། །འཛིན་མེད་རང་གདངས་གསལ་བའི་ཕྱིར། །གལ་ཏེ་འབྲས་བུ་ཡོད་པ་ན། །སངས་རྒྱས་མེད་པ་ཉིད་དུ་འགྱུར། །རང་བྱུང་རྩོལ་བ་མེད་པའི་ཕྱིར། །འབྲས་བུ་བྱས་པའི་ཆོས་ཉིད་དེ། །བྱས་པ་གང་དང་གང་ཡོད་པ། །འཇིག་པའི་ཆོས་ཉིད་ཡིན་པའི་ཕྱིར། །དེ་ཕྱིར་འབྲས་བུ་བསྒྲུབ་ཏུ་མེད། །ཅེས་སོ། །ནམ་མཁའ་གཅིག་གི་ཀློང་ནས་སྣོད་བཅུད་འདི་དག་ཐམས་ཅད། དང་པོ་རང་སྣང་། བར་དུ་རང་གནས། ཐ་མ་རང་ཞིག་ཏུ་སོང་ན་ཡང་། ཐོག་བར་མཐའ་གསུམ་དུ་ནམ་མཁའི་ངང་ལས་མ་གཡོས་པ་བཞིན་དུ། ཆོས་ཐམས་ཅད་རིག་པའི་ཀློང་ནས་དང་པོར་ཤར། བར་དུ་རིག་པའི་ཀློང་དུ་གནས། ཐ་མར་རིག་པའི་ཀློང་དུ་གྲོལ་ཡང་། ཐམས་ཅད་རིག་སྟོང་བྱང་ཆུབ་ཀྱི་སེམས་རྣམ་དག་ནམ་མཁའ་ལྟ་བུ་ལས་མ་གཡོས་པས། ཕྱི་ཡུལ་ལྔ་དང་ནང་ཤར་གྲོལ་གྱི་སེམས་དང་བཅས་པ་ཐམས་ཅད་རང་བྱུང་གི་ཡེ་ཤེས་སུ་ཡེ་སྟོང་གདོད་ནས་དག་པའི་ཆིངས་ཀྱིས་བཅིངས་སོང་དུས། ལྟ་སྒོམ་སྤྱོད་འབྲས་ལས་འདས་པའི་ཡེ་སྟོང་རྩ་བྲལ་ཀུན་ཏུ་བཟང་པོའི་ཀློང་དུ་འདུས་པར་འགག་བསྡམས་པའོ།།

ག༽གསུམ་པ་ས་ལམ་སྦྱང་བགྲོད་མེད་པ་ལ་སོགས་པ་ཡང་ཤེས་པར་བྱ་བ་གདམས་པ།

དེ་བཞིན་དུ་ས་ལ་སྦྱང་དུ་མེད་པ་ལ་སོགས་པ་ཡང་ཤེས་པར་བྱ་སྟེ།

མེད་པའི་ཆོས་ལ་བགྲོད་པའི་ས་མེད་པས།།

ཕྱིན་པར་བྱ་བའི་ལམ་ཡང་ཡེ་ནས་མེད།།

འོད་གསལ་ཐིག་ལེ་ཆེན་པོར་གྲུབ་ཟིན་པས།།

རྣམ་རྟོག་འཕྲོ་འདུས་བསྐྱེད་པའི་དཀྱིལ་འཁོར་དང་།།

སྔགས་དང་ཁ་ཏོན་དབང་དང་དམ་ཚིག་མེད།།

རིམ་སྡུད་ལ་སོགས་མི་དམིགས་རྫོགས་རིམ་མེད།།

ཡེ་ནས་གྲུབ་ཟིན་སྐུ་དང་ཡེ་ཤེས་ལ།།

འདུས་བྱས་གློ་བུར་རྐྱེན་བྱུང་རྒྱུ་འབྲས་མེད།།

འདི་དག་ཡོད་ན་རང་བྱུང་ཡེ་ཤེས་མིན།།

འདུས་བྱས་ཉིད་ཕྱིར་འཇིག་པ་ཉིད་དང་ནི།།

ལྷུན་གྲུབ་འདུས་མ་བྱས་ཞེས་གང་སླད་མཚོན།།

ཞེས་གསུངས་ཏེ། རིག་པ་ངོ་བོ་ཉིད་མེད་པའི་ཕྱིར་དང་། དེ་ཉིད་ལ་བྱ་བྱེད་རྫས་འགལ་བའི་ཕྱིར་དང་། ཡེ་ནས་ལྷུན་གྱིས་གྲུབ་ཟིན་པའི་ཕྱིར་ན། ས་སྦྱང་བ་དང་། ལམ་བགྲོད་པ་དང་། དཀྱིལ་འཁོར་བསྐྱེད་པ་དང་། དབང་བསྐུར་བ་དང་། ལམ་བསྒོམ་པ་དང་། དམ་ཚིག་བསྲུང་བ་དང་། ཕྲིན་ལས་བསྒྲུབ་པ་ལ་སོགས་པ་བྱར་མེད་དེ། ཡེ་ནས་ལྷུན་གྲུབ་ལ་བསྐྱར་ནས་བསྒྲུབ་མི་དགོས་པའི་ཕྱིར་རོ། །དགོས་ན་ལྷུན་གྲུབ་འདུས་མ་བྱས་ཀྱི་ཐ་སྙད་དུ་མི་རུང་བ་དང་། ཆོས་སྐུ་འཇིག་པར་ཐལ་ཏེ་འདུས་བྱས་ཡིན་པའི་ཕྱིར་ཏེ། རྒྱུ་དང་རྐྱེན་གྱིས་བྱས་པ་ཡིན་པའི་ཕྱིར་རོ། །སེང་གེ་རྩལ་རྫོགས་ལས། སྐྱེ་མེད་དོན་ལས་འདའ་མེད་ལ། །དམ་ཚིག་བསྲུངས་པས་སངས་མི་རྒྱ། །དཀྱིལ་འཁོར་ཡེ་ནས་རང་གནས་ལ། །དཀྱིལ་འཁོར་བྲིས་པས་ལྷ་མི་མཐོང་། །ཕྱག་རྒྱ་མ་བསྒྱུར་ཡེ་རྫོགས་ལ། །རྩོལ་བའི་ཕྱག་རྒྱས་དངོས་གྲུབ་ཡལ། །སྙིང་པོ་ཡེ་ནས་རང་གསལ་ལ། །སྙིང་པོ་བཟླས་པས་ས་བོན་རུལ། །གཞལ་ཡས་ཡེ་ནས་རང་རྫོགས་ལ། །གཞལ་ཡས་བསྐྱེད་པས་རང་སྣང་སྟོར། །ཐུགས་རྗེའི་འོད་ཟེར་རང་ཤར་ལ། །ཆ་ལུགས་བསྒོམས་པས་རང་དོན་ཡལ། །མ་བསྐྱེད་ལྷུན་གྱིས་རྫོགས་པ་ལ། །བསྐྱེད་རིམ་སྤྱན་འདྲེན་བྱ་མི་དགོས། །རྩོལ་བའི་མཆོད་བསྟོད་ལྷ་མི་དགྱེས། །ཆོས་སྐུ་འཛིན་མེད་ཟང་ཐལ་ལ། །མཚན་མའི་སྒོམ་པས་དོན་མི་རྙེད། །ཅེས་པ་དང་། ཀུན་བྱེད་ལས། ལྟ་བ་བསྒོམ་དུ་མེད་པར་བསྟན་པ་ཡིན། །དམ་ཚིག་བསྲུང་དུ་མེད་པར་བསྟན་པ་ཡིན། །འཕྲིན་ལས་བརྩལ་དུ་མེད་པར་བསྟན་པ་ཡིན། །ལམ་ལ་བགྲོད་དུ་མེད་པར་བསྟན་པ་ཡིན། །གནས་ས་དཔྱད་དུ་མེད་པར་བསྟན་པ་ཡིན། །ཡེ་ཤེས་མི་རྟོག་སྤྱོད་པ་མེད་པ་ཡིན། །ཆོས་ཉིད་ཇི་བཞིན་བཅོས་སུ་མེད་པ་ཡིན། །ཞེས་སོ། །རྫོགས་པ་ཆེན་པོའི་སྡེ་གསུམ་གྱི་དགོངས་པའི་མཐར་ཐུག་གི་སྙིང་པོའི་དོན། དམ་ཚིག་གི་མདོ་ཆིངས་རྡོ་རྗེའི་ཆིངས་བཞི་ལ་བསྡུས་ནས་བསྟན་པ་ནི། མེད་པ་ཕྱལ་བ་ལྷུན་གྲུབ་གཅིག་པུ་བཞི་ལས། ཆོས་ཐམས་ཅད་རང་བཞིན་མེད་པ། ཡེ་ནས་ལྷུན་གྱིས་གྲུབ་པ། རྒྱ་ཆད་ཕྱོགས་སུ་ལྷུང་བ་མེད་པས་ཕྱལ་བ། རང་བྱུང་གི་ཡེ་ཤེས་གཅིག་པུའི་ངང་ལ་འདུས་པས་དེར་བསྡུ་བ་དང་དམ་ཚིག་རྣམ་པ་བཞིའི་ཆིངས་ཀྱིས་བཅིངས་ནས་གཏན་ལ་ཕབ་པའོ། །དེ་ཡང་འགལ་བ་ཅན་མིན་ཏེ། ངོ་བོ་ཉིད་མེད་པས་ཡེ་ནས་ལྷུན་གྱིས་གྲུབ་ཟིན་པ་དང་། གྲུབ་ཟིན་ཡིན་པས་ཕྱལ་བ། ཕྱལ་བ་ཐིག་ལེ་ཉག་གཅིག་ལ་འདུས་པ་རྣམས་རིག་པ་གཅིག་གིས་ཁྱབ་པའི་ཕྱིར་ན། མེད་པའི་ཆོས་ལ་བགྲོད་པའི་ས་མེད་པ་དང་། དེ་བཞིན་དུ་ཕྱིན་པར་བྱ་བའི་ལམ་ཡང་ཡེ་ནས་མེད་ཅེས་གཏན་ཚིགས་གསུམ་གྱིས་གཏན་ལ་ཕབ་པ་ཡིན། མེད་པའི་ཕྱིར་ན་བྱར་མེད་པས་ལྟ་བའི་གནད་བཀྲོལ། ལྷུན་གྱིས་གྲུབ་པའི་ཕྱིར་ན་བསྐྱར་ནས་སྒྲུབ་མི་དགོས་པས་སྒོམ་པའི་འགག་བསྡམས། ལྟ་སྒོམ་ཕྱོགས་སུ་མ་ལྷུང་བའི་ཡངས་ཆེན་བྱ་བའི་སྤྱོད་པའི་ཆིངས་ཀྱིས་བཅིངས་ནས། ཐམས་ཅད་དོན་རང་བྱུང་ཡེ་ཤེས་གཅིག་གི་ངང་དུ་འདུས་པའི་ལ་བཟླ་བ་དང་བཞི་བོ་གཅིག་འདུས་སུ་བསྟན་པ་ཡིན། དེའི་ཕྱིར་ན་ཐེག་པ་འོག་མའི་ལྟ་སྒོམ་སེམས་ལམ་བྱེད་ལས་འདས་པའི་རིག་པའི་རང་ངོ་གང་དུ་ཡང་མ་གྲུབ་པས། དེ་ལ་ལྟ་སྒོམ་སྤྱོད་འབྲས་ཀྱི་ཆོས་དང་སྦྱངས་བགྲོད་ཀྱི་ས་ལམ། མཚན་བཅས་ཀྱི་བསྐྱེད་རྫོགས། དམིགས་བཅས་ཀྱི་དམ་ཚིག བསྒྲུབ་བྱའི་འཕྲིན་ལས་ལ་སོགས་པ་རང་བཞིན་བཅུ་ཡི་རྩོལ་ཞིང་བསྒྲུབ་པ་དགོས་པ་མིན་ཏེ། དེ་དགོས་ན་ལྷུན་གྲུབ་འདུས་མ་བྱས་སུ་མི་འགྲུབ་ཅིང་། དེ་མ་འགྲུབ་དུས་ཆོས་སྐུ་རྒྱུ་རྐྱེན་གྱིས་བྱས་པའི་འདུས་བྱས་སུ་འགྱུར་བ་ལ་སོགས་པ་མདོ་སྔགས་ཀུན་དང་འགལ་བའི་སྐྱོན་མང་པོ་ལྡོག་མེད་དུ་འབབ་པ་ཡིན་ནོ།།

༼ཅ༽ལྔ་བ་དེ་དག་གི་དོན་རྒྱུ་འབྲས་རྩོལ་སྒྲུབ་ལས་འདས་པར་བསྡུ་བ།

ད་ནི་དེ་དག་གི་དོན་རྒྱུ་འབྲས་རྩོལ་སྒྲུབ་ལས་འདས་པར་བསྡུ་བ་ནི།

དེ་ཕྱིར་དོན་དམ་དབྱིངས་ཀྱི་ངོ་བོ་ལ།།

རྒྱུ་འབྲས་ལས་འདས་རང་བཞིན་རྣམ་བཅུ་མེད།།

རྩོལ་དང་བསྒྲུབ་མེད་སེམས་ཉིད་རྣལ་མའི་དོན།།

ཡོད་མེད་སྤྲོས་ཀུན་ཞི་བར་མཁྱེན་འཚལ་ལོ།།

ཞེས་གསུངས་ཏེ། གཤིས་རང་བྱུང་གི་ཡེ་ཤེས་གང་དུའང་མ་གྲུབ་པའི་ཕྱིར། རང་བཞིན་བཅུའི་རྒྱུ་འབྲས་རྩོལ་སྒྲུབ་ཀྱིས་བཟང་དུ་བྱར་མེད། འཁོར་བའི་ཆོས་ཀྱིས་ངན་པར་བྱར་མེད་པས། ནམ་མཁའ་ལྟར་ཡོད་མེད་སྤྲོས་པ་དང་བྲལ་བའི་ངོ་བོ་ཐིག་ལེ་ཉག་གཅིག་ཏུ་གནས་པ་དེ་དབང་པོ་ཡང་རབ་རྣམས་ཀྱིས་ཤེས་པར་བྱ་སྟེ། ཀུན་བྱེད་ལས། བསྐལ་པ་དཔག་ཏུ་མེད་པའི་སྔོན་རོལ་ནས། །ཀུན་བྱེད་བྱང་ཆུབ་ང་ལ་དད་པ་ཡིས། །ལས་དང་སྐལ་ལྡན་ཤིན་ཏུ་རྣལ་འབྱོར་པ། །ལྟ་བ་བསྒོམ་མེད་དམ་ཚིག་བསྲུང་དུ་མེད། །འཕྲིན་ལས་བརྩལ་མེད་ལམ་ལ་བགྲོད་དུ་མེད། །ས་ལ་སྦྱང་མེད་རྒྱུ་དང་འབྲས་བུ་མེད། །དོན་དམ་དང་ནི་ཀུན་རྫོབ་རྣམ་གཉིས་མེད། །བསྒོམ་ཞིང་བསྒྲུབ་ཏུ་མེད་པར་མཐོང་བ་དང་། །སེམས་བསྐྱེད་མེད་ཅིང་གཉེན་པོ་མི་མཐོང་བ། །ཀུན་བྱེད་སེམས་ཀྱི་རང་བཞིན་མཐོང་བ་ཡིས། །དེ་ལྟ་བུ་ཡི་དགོས་ཆེད་བསྟན་པ་ཡིན། །ཞེས་པ་དང་། རང་ཤར་ལས། ང་ཡི་སྐུ་ལ་ཐམས་ཅད་རྫོགས། །ང་ཡི་གསུང་ལ་ཐམས་ཅད་རོལ། །ང་ཡི་ཐུགས་ལ་ཐམས་ཅད་རྟོགས། །ང་ཡི་ཡོན་ཏན་ཅིར་ཡང་སྣང་། །ང་ཡི་ཕྲིན་ལས་མ་བཙལ་རྙེད། །ང་ཡི་ལྟ་བ་ཐིག་ལེའི་སྐུ། །ང་ཡི་སྒོམ་པ་བློ་ལས་གྲོལ། །ང་ཡི་སྤྱོད་པ་ཡུལ་ལས་འདས། །ང་ཡི་འབྲས་བུ་གཅིག་པའི་ས། །ང་ཡི་དམ་ཚིག་བསྲུང་དུ་མེད། །ང་ཡི་དབང་ལ་བསྐུར་ཐོབ་མེད། །ང་ནི་དུར་ཁྲོད་ཆེན་པོ་སྟེ། །སངས་རྒྱས་སེམས་ཅན་ཀུན་གྱི་དུར། །ང་ཡི་བྱིན་རླབས་ཆེན་པོ་ལས། །དུས་གསུམ་སངས་རྒྱས་ཐམས་ཅད་འབྱུང་། །ཞེས་སོ། །གནས་ལུགས་རིན་པོ་ཆེའི་མཛོད་ལས། རང་བྱུང་ཡེ་ཤེས་ཁོང་ནས་ཤར་བ་དང་། །རྒྱུ་འབྲས་མཚན་མའི་མུན་པ་སངས་པ་དང་། །དགེ་སྡིག་སྤྲིན་ཚོགས་གང་ཡང་མེད་པས་ན། །ཆོས་དབྱིངས་ནམ་མཁའི་དོན་དམ་ཉི་མ་ཤར། །འདི་ནི་མཐར་ཐུག་དོན་གྱི་ལ་བཟླ་སྟེ། །མེད་པའི་རང་བཞིན་བཅུ་ཡིས་གཏན་ལ་ཕབ། །རྒྱུ་འབྲས་ཐེག་པ་ཀུན་ལས་ཁྱད་པར་འཕགས། །ཞེས་གསུངས་པ་ལྟར་དུ། གོང་ནས་རྒྱུ་འབྲས་རྩོལ་སྒྲུབ་ལས་འདས་པ་གཏན་ལ་ཕབ་པ་དེའི་ཕྱིར་ན། དོན་དམ་དབྱིངས་ཀྱི་ངོ་བོ་གཤིས་རང་བྱུང་གི་ཡེ་ཤེས་ཉིད་གང་དུ་ཡང་མ་གྲུབ་ཅིང་རྒྱུ་འབྲས་ལས་འདས་པའི་ཕྱིར་ན། བཟང་ངན་རྒྱུ་འབྲས་ཀྱིས་རྩོལ་སྒྲུབ་བྱར་མེད་པས་བཟང་པོའི་ཕན་མ་བཏགས་ཤིང་ངན་པས་གནོད་མ་སྐྱེལ་བའི་རང་བྱུང་གི་དབྱིངས་ནམ་མཁའ་ལྟ་བུ་ལ། རྒྱུ་འབྲས་རྩོལ་སྒྲུབ་མཚན་མོའི་མུན་ནག་ལྟ་བུ་དེ་སངས་ནས་དགེ་སྡིག་ཆོས་ཀྱི་སྤྲིན་ཚོགས་ཡར་སོང་དུས། ཆོས་དབྱིངས་དོན་གྱི་ནམ་མཁའ་ལ་འོད་གསལ་སྙིང་པོའི་ཉི་མ་ཤར་བ་ཡིན་ནོ། །དེའི་ཕྱིར་ན་སངས་རྒྱས་ནི་སེམས་ཅན་ཀུན་གྱི་དུར་དང་དུས་གསུམ་སངས་རྒྱས་ཐམས་ཅད་ཀྱི་འབྱུང་བའི་གནས་སོ། །ལེའུའི་མཚན་བརྗོད་པས་མཇུག་བསྡུ་བ་ནི། ཆོས་དབྱིངས་རིན་པོ་ཆེའི་མཛོད་ལས། རྩོལ་སྒྲུབ་རྒྱུ་འབྲས་ལས་འདས་པར་བསྟན་པ་སྟེ། ལེའུ་ལྔ་པའི་འགྲེལ་པའོ།། །།

ཐམས་ཅད་བྱང་ཆུབ་ཀྱི་སེམས་སུ་འདུས་པར་བསྟན་པ་སྟེ་ལེའུ་དྲུག་པའི་འགྲེལ་པ།

དེ་ལྟར་གོང་དུ་རིག་པའི་རང་བཞིན་རྩོལ་སྒྲུབ་ལས་འདས་པའི་རྣམ་དག་ཆེན་པོར་གཏན་ལ་ཕབ་ནས་ལེའུ་དྲུག་པ་རིག་པ་བྱང་ཆུབ་སེམས་ངོ་བོ་ཉིད་ཀྱིས་དག་པ་ལ་ཆོས་ཐམས་ཅད་འདུས་པར་བསྟན་པ་འདི་ལ་ས་བཅད་བཞི་སྟེ། དང་པོ་ཆོས་ཐམས་ཅད་རང་བྱུང་བྱང་ཆུབ་ཀྱི་སེམས་སུ་འདུས་ཚུལ་བསྟན་པ་དང་། གཉིས་པ་ཆོས་ཐམས་ཅད་རྩོལ་སྒྲུབ་མེད་པར་བསྟན་པ་དང་། གསུམ་པ་རིག་པ་བྱང་ཆུབ་ཀྱི་སེམས་སུ་ཐེག་པ་ཐམས་ཅད་འདུས་པར་བསྟན་པ་དང་། བཞི་བ་ལེའུའི་དོན་བསྡུ་བ་དང་བཅས་པའོ།།

༼ཀ༽དང་པོ་ཆོས་ཐམས་ཅད་བྱང་ཆུབ་སེམས་སུ་འདུས་ཚུལ་བསྟན་པ།

དེ་ལ། ཆོས་ཉིད་མ་སྐྱེས་པའི་ངང་དུ་ཐམས་ཅད་འདུས་པར་བསྟན་པ་དང་། ཆོས་ཅན་ཇི་ལྟར་སྣང་ཡང་རིག་པའི་ངང་དུ་འདུས་པར་བསྟན་པ་དང་། ཐམས་ཅད་འདུས་ལ་མ་གཡོས་པའི་དཔེ་ཉེ་བར་དགོད་པ་དང་། དོན་བསྡུ་བ་དང་བཞི་ལས།

༼ཀ དང་པོ་ཆོས་ཉིད་མ་སྐྱེས་པའི་ངང་དུ་ཐམས་ཅད་འདུས་པར་བསྟན་པ།

དེ་ལྟར་རིག་པ་ངོ་བོ་ཉིད་ཀྱི་དག་པ་ལ་ཆོས་ཐམས་ཅད་འདུས་པར་བསྟན་པ་ལས། རེ་ཞིག་ཆོས་ཉིད་དེ་བཞིན་ཉིད་དུ་རིས་མཐུན་པས་མ་སྐྱེས་པའི་ངང་དུ་ཐམས་ཅད་འདུས་པར་བསྟན་པ་ནི།

ཉི་མའི་སྙིང་པོར་འོད་རྣམས་འདུས་པ་ལྟར།།

ཆོས་ཀུན་རྩ་བ་བྱང་ཆུབ་སེམས་སུ་འདུས།།

སྣང་སྲིད་སྣོད་བཅུད་མ་དག་འཁྲུལ་བ་ཡང་།།

གང་བྱུང་རྟེན་དང་གནས་པའི་དབྱིངས་བརྟགས་པས།།

གཞི་མེད་ཡེ་གྲོལ་སེམས་ཀྱི་ངང་དུ་འདུས།།

ཆོས་ཉིད་ཡེ་ཀློང་ཡངས་པ་ཆེན་པོའི་ངང་།།

འཁྲུལ་དང་མ་འཁྲུལ་མིང་དོན་འདས་པར་འདུས།།

ཞེས་གསུངས་ཏེ། ཉི་མའི་དཀྱིལ་འཁོར་དུ་འོད་ཟེར་འདུས་པ་ལྟར་སྣང་སྲིད་ཀྱི་ཆོས་ཐམས་ཅད་རྩ་བ་བྱང་ཆུབ་ཀྱི་སེམས་སུ་འདུས་པ་དེ་ཡང་། དཔྱད་ན་འཁོར་འདས་རྨི་ལམ་གྱི་ངོ་བོ་ཉིད་འདིའི་བྱུང་ས་དང་གནས་ས་དང་འགྲོ་ས་བརྟགས་པས། འཁོར་འདས་མ་གྲུབ་པས་ཀྱང་བྱུང་གནས་འགྲོ་གསུམ་དུ་མ་གྲུབ་ལ། བྱུང་གནས་འགྲོ་གསུམ་མ་གྲུབ་པས་ཀྱང་འཁོར་འདས་མ་གྲུབ་ལ། རྟེན་གཞིའམ་དབྱིངས་བྱང་ཆུབ་ཀྱི་སེམས་ཞེས་བྱ་བ་ཡང་ངོ་བོ་ངོས་གཟུང་དུ་མ་གྲུབ་པས་ན། ཐམས་ཅད་ཆོས་ཉིད་ནམ་མཁའ་ལྟ་བུ་ལས་གཞན་མེད་པ་དེ་ལ་ཆོས་ཉིད་དུ་འདུས་པ་ཞེས་ཐ་སྙད་བཏགས་ཀྱང་། འདུས་པ་དང་འདུས་ཆོས་གཞི་མེད། རྟེན་ས་མེད་པར་ཤེས་པར་བྱ་སྟེ། ཀུན་བྱེད་ལས། ཇི་ལྟར་སྣང་བའི་ཆོས་རྣམས་ཀུན། །འདུས་པའི་ཕྱིར་ན་སྙིང་པོར་བཤད། །ཇི་ལྟར་སྣང་བའི་ཆོས་རྣམས་ཀུན། །སྐྱེ་བའི་ཕྱིར་ན་ས་བོན་ཡིན། །ཇི་ལྟར་སྣང་བའི་ཆོས་རྣམས་ཀུན། །འབྱུང་བའི་ཕྱིར་ན་རྒྱུ་ཡང་ཡིན། །ཇི་ལྟར་སྣང་བའི་ཆོས་རྣམས་ཀྱི། །ཡན་ལག་འབྱུང་བས་སྡོང་པོ་ཡིན། །ཇི་ལྟར་སྣང་བའི་ཆོས་རྣམས་ཀུན། །ངང་ལ་གནས་པས་གཞི་མ་ཡིན། །ཇི་ལྟར་སྣང་བའི་ཆོས་རྣམས་ཀུན། །ང་ཡིན་པས་ན་རྩ་བར་བཤད། །ཅེས་པ་དང་། དགོངས་པ་དོན་གྱི་འདུས་པ་ནི། །ཀུན་བྱེད་རྒྱལ་པོའི་རང་བཞིན་ལས། །སྐྱེ་བ་མེད་པར་བསྟན་པ་བཞིན། །ཆོས་རྣམས་ཀུན་ལ་སྐྱེ་མེད་པས། །སྐྱེ་མེད་ཆོས་ཉིད་འདུས་པར་བསྟན། །ཞེས་པ་དང་། རང་ཤར་ལས། དམིགས་པའི་ཡུལ་བྲལ་རང་བཞིན་ཆོས་རྣམས་ཀུན། །བཙལ་བའི་སེམས་མེད་ཡེ་ཤེས་དབྱིངས་སུ་འདུས། །ཞེས་སོ། །ཉི་མའི་འོད་ཟེར་གྱིས་གླིང་བཞི་ཀུན་ལ་ཁྱབ་ན་ཡང་། འོད་ཐམས་ཅད་ཉི་མའི་དཀྱིལ་འཁོར་གྱི་སྙིང་པོ་དངོས་ལས་བྱུང་བས་ན་བྱུང་ས་དེར་འདུས་པ་ལྟར་དུ། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རྩ་བ་བྱང་ཆུབ་ཀྱི་སེམས་ཀུན་བྱེད་འཁོར་འདས་ཀུན་གྱི་བྱེད་པོ་དེར་འདུས་ཤིང་། དེ་ལྟར་དེ་ཡང་ཚིག་གིས་བརྗོད་པ་ཙམ་ལས་བྱུང་ས་དངོས་ཤིག་བསྟན་དུ་མེད་དེ། འདུས་པ་དེ་ལ་བརྟགས་ཤིང་དཔྱད་ན་འཁྲུལ་བ་རྨི་ལམ་གྱི་སྣང་ཚུལ་ལྟ་བུ་འདི་ཁོ་རང་མ་གྲུབ་པའི་ཕྱིར་ན། བྱུང་ས་མ་གྲུབ་ཅིང་། བྱུང་ས་མེད་ན་གནས་ས་དང་འགྲོ་ས་དེ་བས་ཀྱང་ག་ལ་ཡོད། དེ་ལྟར་བྱུང་རྒྱུའི་འཁོར་བ་མ་གྲུབ་ན་དེ་ལས་འདས་པ་ཡང་ཅི་ལ་གྲུབ། དེ་ལྟར་བརྟེན་པའམ་བྱུང་རྒྱུའི་འཁོར་འདས་མ་གྲུབ་དུས། རྟེན་གཞིའམ་འབྱུང་ཁུངས་ཀྱི་དབྱིངས་བྱང་ཆུབ་ཀྱི་སེམས་དེ་ཡང་བརྟགས་ན་ངོ་བོ་ངོས་བཟུང་མེད་པས་ཆོས་ཐམས་ཅད་ཆོས་ཉིད་ནམ་མཁའ་ལྟ་བུ་ཞིག་གི་ངང་ལས་མཛུ་གུ་བཙུགས་ས་གཞན་མ་རྙེད་པ་ལ། ཆོས་ཉིད་གཅིག་ཏུ་འདུས་ཞེས་ཐ་སྙད་བྱས་པ་ཙམ་ལས་དོན་དུ་མ་གྲུབ་པས་མ་ཚད། མིང་ཡང་མ་གྲུབ་པའི་ཆོས་ཉིད་ཡེ་ཀློང་ཡངས་པ་ཆེན་པོའི་ངང་ལ་འཁྲུལ་མ་འཁྲུལ་གྱི་མིང་དང་དོན་གཉིས་ཀ་ལས་འདས་པར་འདུས་ཤིང་། འདུས་ཞེས་པའང་ཟད་པའམ་མེད་པའི་དོན་དང་གཅིག་པ་སྟེ། རིག་པ་ཆོས་ཟད་རྗེན་པ་འདི་ཉིད་ཆོས་སྐུ་རང་མལ་གྱི་དགོངས་པ་ཆོས་ཐམས་ཅད་ཀྱི་ཟད་པ་ཆོས་ཟད་ཀ་དག་ཆེན་པོས་ཏེ། ཆོས་ཐམས་ཅད་ཀྱང་མཐར་ཐུག་འདིར་ཟད། འདི་ཡང་ཆོས་ཞེས་མིང་དུ་ཟད་དེ་མཚོན་བརྗོད་ལས་འདས་པར་ཕུ་ཐག་ཆོད་པས། དེ་ཉིད་རྟོགས་པས་རྣལ་འབྱོར་པ་ལ་གཏད་མེད་ཡོངས་གྲོལ་གྱི་དགོངས་པ་སྔ་ཕྱི་དུས་གསུམ་གྱི་སངས་རྒྱས་དང་། རྣལ་འབྱོར་པ་ཐམས་ཅད་དང་རྟོགས་པ་དབྱིངས་གཅིག་པས་ཕྱོགས་བྲལ་རྒྱ་གྲོལ་རང་ཡན་དུ་ཤར་བར་བསྟན་པའོ།།

༼ཁ གཉིས་པ་ཆོས་ཅན་ཇི་ལྟར་སྣང་བའང་རྨི་ལམ་གཉིད་ཀྱི་ངང་དུ་འདུས་པ་ལྟར་རིག་པའི་ངང་དུ་འདུས་པར་བསྟན་པ།

ཆོས་ཅན་ཇི་ལྟར་སྣང་བའང་རྨི་ལམ་གཉིད་ཀྱི་ངང་དུ་འདུས་པ་ལྟར་རིག་པའི་ངང་དུ་འདུས་པར་བསྟན་པ་ནི།

དག་པའི་རང་སྣང་སྐུ་དང་ཞིང་ཁམས་དང་།།

ཡེ་ཤེས་ཕྲིན་ལས་ངོ་མཚར་རོལ་བ་ཡང་།།

རང་བྱུང་ངང་ལ་འདུ་འབྲལ་མེད་པར་འདུས།།

སྣང་སྲིད་འཁོར་འདས་ཀུན་འདུས་བྱང་ཆུབ་སེམས།།

ཉི་མཁའ་བཞིན་དུ་སྟོང་གསལ་འདུས་མ་བྱས།།

གདོད་ནས་རང་བྱུང་ཡེ་ཀློང་ཡངས་པ་ཡིན།།

ཞེས་གསུངས་ཏེ། དག་པ་སངས་རྒྱས་ཀྱི་སྣང་བ་དང་། མ་དག་པ་སེམས་ཅན་གྱི་འཁྲུལ་སྣང་ཐམས་ཅད་ཀྱང་རང་རང་གི་རིག་པའི་ངང་དུ་འདུས་པའི་ཕྱིར། རིག་པ་བྱང་ཆུབ་ཀྱི་སེམས་སུ་མ་འདུས་པའི་ཆོས་མེད་ལ། རིག་པ་དེ་ནི་ཉི་མ་ལྟར་ལྷུན་གྱིས་གྲུབ་ལ་ངང་གིས་འོད་གསལ་ཞིང་། ནམ་མཁའ་ལྟར་སྟོང་ལ་བདག་མེད་པ་སྟེ། རང་བྱུང་གི་ཡེ་ཤེས་གདོད་མའི་ཆོས་སྐུ་ཇི་བཞིན་པའི་སངས་རྒྱས་ཞེས་བྱའོ། །ཀུན་བྱེད་ལས། ཀུན་ལས་འདས་པའི་ཆོས་ཉིད་བྱང་ཆུབ་སེམས། །བྱང་ཆུབ་སེམས་ནི་ཆོས་ཀུན་སྙིང་པོ་ཡིན། །བྱང་ཆུབ་སེམས་ནི་ཆོས་ཀུན་རྩ་བ་ཡིན། །རྩ་བ་ཡིན་པས་ཐམས་ཅད་དོན་ཡང་འདུས། །ཞེས་པ་དང་། ང་ནི་ཆོས་ཀུན་རང་བཞིན་ཡིན་པ་སྟེ། །ང་ཡི་རང་བཞིན་ལས་ནི་ཆོས་གཞན་མེད། །སྟོན་པ་སྐུ་གསུམ་ང་ཡི་རང་བཞིན་ཡིན། །དུས་གསུམ་སངས་རྒྱས་ང་ཡི་རང་བཞིན་ཡིན། །བྱང་ཆུབ་སེམས་དཔའ་ང་ཡི་རང་བཞིན་ཡིན། །རྣལ་འབྱོར་རྣམ་བཞི་ང་ཡི་རང་བཞིན་ཡིན། །འདོད་ཁམས་གཟུགས་ཁམས་གཟུགས་མེད་ཁམས་གསུམ་ཡང་། །ཀུན་བྱེད་ང་ཡི་རང་བཞིན་བསྟན་པ་ཡིན། །འབྱུང་ཆེན་ལྔ་ཡང་ང་ཡི་རང་བཞིན་ཡིན། །རྒྱུད་དྲུག་སེམས་ཅན་ང་ཡི་རང་བཞིན་ཡིན། །སྣང་བ་ཐམས་ཅད་ང་ཡི་རང་བཞིན་ཡིན། །སྲིད་པ་ཐམས་ཅད་ང་ཡི་རང་བཞིན་ཡིན། །སྣོད་བཅུད་ཐམས་ཅད་ང་ཡི་རང་བཞིན་ཡིན། །ང་ཡི་རང་བཞིན་ལས་ནི་གཞན་མེད་པས། །ཆོས་རྣམས་ཀུན་གྱི་རྩ་བ་ང་ལ་འདུས། །ཞེས་སོ། །སྐུ་གསུམ་དག་པའི་རང་སྣང་སངས་རྒྱས་ཀྱི་སྣང་བ། སྐུ་དང་། ཞིང་ཁམས། ཡེ་ཤེས། འཕྲིན་ལས་ལ་སོགས་པའི་ངོ་མཚར་གྱི་རོལ་བ་དང་། འགྲོ་དྲུག་རང་སྣང་གི་ཆོས་མ་དག་འཁྲུལ་བའི་སྣང་བ་ཐམས་ཅད་ཀྱང་། རང་བྱུང་རིག་པ་རང་ལ་ཡོད་པའི་བྱང་ཆུབ་ཀྱི་སེམས་དེའི་ངང་དུ་མ་འདུས་པ་མེད་པར་འདུས་ཤིང་། འདུས་པའི་ཚུལ་དཔེར་ན་ཉི་མ་ལྟར་འོད་ཟེར་རང་ཆས་སུ་ལྷུན་གྱིས་གྲུབ་ཅིང་ངང་གིས་འོད་གསལ་བ་དང་། ནམ་མཁའ་ལྟར་སྟོང་ཞིང་བདག་མེད་སྤྲོས་པ་ཀུན་དང་བྲལ་བས་མཚོན་བྱ་མཚོན་བྱེད་ཀྱི་ཆོས་ལས་འདས་པ་སྟེ། དཔེ་དེ་གཉིས་ཀས་མཚོན་པའི་ཆོས་དེ་གང་ཡིན་ན། སྟོང་གསལ་ཀ་དག་ཆེན་པོ་གདོད་ནས་འགྱུར་བ་མེད་པ་ཡེ་ཀློང་ཡངས་པ། རང་བྱུང་གི་ཡེ་ཤེས་ཆོས་སྐུ་ཇི་བཞིན་པའི་སངས་རྒྱས་ཀུན་འདུས་ཀུན་ལས་འདས་པར་བསྟན་པའོ།།

༼ག གསུམ་པ་ཀློང་ཆེན་སེམས་ཀྱི་རང་བཞིན་བསྟན་པ།

ཀློང་ཆེན་སེམས་ཀྱི་རང་བཞིན་བསྟན་པ་ནི།

སེམས་ཉིད་ཀློང་ཆེན་འགྱུར་མེད་ནམ་མཁའི་ངང་།།

རོལ་བ་ངེས་མེད་བྱང་ཆུབ་སེམས་ཀྱི་རྩལ།།

འཁོར་འདས་ཐེག་པ་ཀུན་ལ་དབང་བསྒྱུར་བས།།

བྱར་མེད་གཅིག་གིས་ཐམས་ཅད་ཟིལ་གྱིས་མནན།།

མཐའ་རུ་གྱུར་པའི་ཡུལ་གཞན་ལོགས་ན་མེད།།

ཆོས་ཉིད་བྱང་ཆུབ་སེམས་ལས་གར་མ་གཡོས།།

ཞེས་གསུངས་ཏེ། ནམ་མཁའི་ཀློང་ནི་སྣང་སྲིད་སྣོད་བཅུད་ཀུན་གྱི་རྟེན་དང་དབྱིངས་ཡིན་པས་ཀུན་ལ་གོ་འབྱེད་པར་མངའ་དབང་བསྒྱུར་བ་ལྟར། ཆོས་ཉིད་བྱང་ཆུབ་ཀྱི་སེམས་ཀྱང་འཁོར་འདས་ཀུན་གྱི་དབྱིངས་རུམ་ཡིན་པས་མངའ་དབང་བསྒྱུར་བ་སྟེ། ཐམས་ཅད་གདལ་བ་ཆེན་པོའི་ཀློང་ལས་གང་དུའང་གཡོས་པ་མེད་པ་ཉིད། ཀུན་གྱི་སྔོན་ནས་ཡངས་པ་ཆོས་ཉིད་ཀྱི་ཀློང་དུ་ཡེ་ནས་གནས་པ་སྟེ། རང་ཤར་ལས། ནམ་མཁའ་མེད་པའི་སྔོན་རོལ་ན། །ནམ་མཁའི་མཚན་ཉིད་ཡེ་ནས་མེད། །ཆོས་ཉིད་མེད་པའི་སྔོན་རོལ་ན། །ཆོས་ཅན་མཚན་མའི་མིང་ཡང་མེད། །སངས་རྒྱས་མེད་པའི་སྔོན་རོལ་ན། །སེམས་ཅན་མཚན་མ་ཡེ་ནས་མེད། །མྱ་ངན་འདས་པའི་སྔོན་རོལ་ན། །འཁོར་བ་བྱ་བ་ཡེ་ནས་མེད། །དེ་ཕྱིར་སངས་རྒྱས་ཐམས་ཅད་ཀྱི། །རྗེ་བཙུན་དམ་པ་ང་ཡིན་ནོ། །འབྱུང་བ་ལྔ་བས་ང་ཉིད་ཆེ། །འབྱུང་བ་བས་ཀྱང་ང་སྔར་བྱུང་། །སངས་རྒྱས་བས་ཀྱང་ང་སྔར་རྒྱས། །ང་ནི་ཡང་དག་བདེ་བའི་སྐུ། །ང་ཡི་ངང་འདིར་ཐམས་ཅད་རྫོགས། །ཞེས་པ་དང་། ཀུན་བྱེད་ལས། ལྷུན་གྲུབ་ཆོས་ཉིད་ཡངས་པའི་སྙིང་པོ་ནི། །མ་གཡོས་མི་གཡོ་གཡོ་བར་མི་འགྱུར་ཏེ། །སྣང་སྲིད་སྣོད་བཅུད་ཀུན་འདུས་ཆོས་ཉིད་ཀློང་། །ལྷུན་གྱིས་གྲུབ་པ་བྱ་བྱེད་ཀུན་དང་བྲལ། །ཞེས་སོ། །སེམས་ཉིད་ཀློང་ཆེན་འགྱུར་མེད་འདི་ནམ་མཁའི་དཔེ་ཡིས་མཚོན་ནས་བསྟན་པ་ལས། དཔེ་ནམ་མཁའི་ཀློང་ནི་བར་སྣང་སྟོང་པ་གོ་འབྱེད་པའི་ཆ་སྟེ། འདིས་སྣོད་བཅུད་རྟེན་དང་བརྟེན་པ་བཅས་པ་ཆགས་པའི་གཞིའམ་རྟེན་དང་། དབྱིངས་འདིས་སྣོད་བཅུད་ཀུན་ལ་མ་ཁྱབ་པ་མེད་པར་མངའ་དབང་བསྒྱུར་བ་བཞིན་དུ། ཆོས་ཐམས་ཅད་ཀྱི་ཆོས་ཉིད་རིག་པ་བྱང་ཆུབ་ཀྱི་སེམས། སེམས་ཉིད་ཀློང་ཆེན་འགྱུར་བ་མེད་པ་དེ་ཡང་འཁོར་འདས་ཐམས་ཅད་ཀྱི་དབྱིངས་རུམ་ཡིན། དེ་མེད་ན་འཁོར་འདས་སུ་སྣང་དུ་མི་རུང་བས་འཁོར་འདས་ཐེག་པ་ཐམས་ཅད་ལ་མངའ་དབང་སྒྱུར་བ་པོ་ཡིན་པས། བྱར་མེད་བྱང་ཆུབ་ཀྱི་སེམས་གཅིག་གིས་ཐམས་ཅད་ཟིལ་གྱིས་གནོན་པའམ་དབང་དུ་བྱས་ཤིང་། འཁོར་འདས་ཐམས་ཅད་ལ་གདལ་བ་ཆེན་པོའི་ཚུལ་གྱིས་ཁྱབ་པའི་ཀློང་འདི། འཁོར་འདས་ཀུན་གྱི་སྔོན་རོལ་ནས་འགྱུར་མེད་ནམ་མཁའ་ལྟ་བུའི་ཀློང་ངམ་དབྱིངས་ལས་གར་ཡང་མ་གཡོས་པ་སྟེ། ནམ་མཁའ་མེད་པའི་སྔོན་ལ་ནམ་མཁའི་མཚན་ཉིད་མེད་པ་དང་འདྲ་བར། ཆོས་ཉིད་མེད་པའི་སྔོན་རོལ་དུ་ཆོས་ཅན་མཚན་མའི་མིང་ཡང་མེད་ཅིང་། དེ་བཞིན་དུ་སངས་རྒྱས་མེད་པའི་སྔོན་རོལ་དུ་སེམས་ཅན་མེད། མྱང་འདས་མེད་པའི་སྔོན་རོལ་དུ་འཁོར་བ་མེད། དེ་མེད་པས་ཆོས་ཉིད་བསམ་གྱིས་མི་ཁྱབ་པའི་རིག་པས། འཁོར་འདས་ཀུན་གྱི་སྔོན་རོལ་ན་ཐོག་མའི་སངས་རྒྱས་འོག་མི་འགྱུར་བ་སངས་རྒྱས་ཀུན་གྱི་རྗེ་བཙུན། སངས་རྒྱས་ཀུན་ལ་ལམ་སྟོན་པ་པོར་བྱོན་པ་རྒྱུད་རང་ཤར་དང་ཀུན་བྱེད་ཀྱི་ལུང་གིས་གྲུབ་ཅིང་། དེ་ལྟ་བུའི་མ་གཡོས་མི་གཡོ་གཡོ་བ་མི་འགྱུར་བའི་ཀུན་འདུས་ཆོས་ཉིད་གཅིག་གིས་ཀློང་དུ་བྱ་བྱེད་དང་བྲལ་བའི་ལྷུན་གྲུབ་ཀྱི་བདག་ཉིད་ཅན་དེ་ལ་མི་བཟང་བ་ཡི་ཆོས་མེད་པས་ན་ཀུན་ཏུ་བཟང་པོ་ཞེས་བྱའོ།།

༼ང བཞི་བ་ཐམས་ཅད་འདུས་ལ་མ་གཡོས་པའི་དཔེ་ཉེ་བར་དགོད་པས་དོན་བསྡུ་བ།

ཐམས་ཅད་འདུས་ལ་མ་གཡོས་པའི་དཔེ་ཉེ་བར་དགོད་པ་ནི།

ཐམས་ཅད་ཀུན་བཟང་ལྷུན་གྲུབ་གཅིག་ཤར་བས།།

མ་ལུས་ཀུན་འདུས་འགྲན་ཟླ་བྲལ་བའི་མཆོག།

ཆེ་བའི་ཆེ་བ་ཀུན་བཟང་ཆོས་ཀྱི་དབྱིངས།།

རྒྱལ་པོ་ལྟ་བུར་ཐམས་ཅད་ཀུན་འདུས་པས།།

འཁོར་འདས་ཀུན་ལ་དབང་བསྒྱུར་གར་མ་གཡོས།།

ཞེས་གསུངས་ཏེ། རྒྱལ་པོ་རང་གི་ཕོ་བྲང་ལས་མ་གཡོས་པའི་མངའ་འོག་ཏུ་ཡུལ་འབངས་ཀུན་འདུས་པ་ལྟར། རིག་པ་ཆོས་ཉིད་ལས་མ་གཡོས་པའི་ངང་འདིར་འཁོར་འདས་ཀུན་འདུས་པ་སྟེ། རྫོགས་པ་སྤྱི་ཆིངས་ལས། མཁའ་མཉམ་བྱང་ཆུབ་སེམས་ཀྱི་ཀློང་ཆེན་དུ། །མ་ལུས་ཆོས་ཀུན་འདུས་ཏེ་རྒྱལ་པོ་འདྲ། །ཀུན་ལ་དབང་བསྒྱུར་མི་གཡོ་མཉམ་པའི་ཀློང་། །རང་བྱུང་ཡེ་ཤེས་ཡེ་ནས་འཕོ་འགྱུར་མེད། །ཅེས་སོ། །ཐམས་ཅད་བྱང་ཆུབ་ཀྱི་སེམས་ཀྱིས་བྱས་ཤིང་སེམས་ལས་ཤར་ཡང་། སེམས་ཉིད་སུས་ཀྱང་མ་བྱས་ཏེ་བྱ་བྱེད་ཐམས་ཅད་ལས་འདས་པས་བྱ་མི་དགོས་པར་བསྟན་པ་ནི། ཀུན་བྱེད་ལས། བྱང་ཆུབ་སེམས་ཀྱིས་ཀུན་བྱས་གཅིག་མ་བྱས། །ཀུན་བྱས་བྱང་ཆུབ་ཉིད་ཀྱི་རང་བཞིན་བྱས། །གཅིག་མ་བྱས་པ་ཉིད་ལ་བྱ་མི་དགོས། །ཞེས་སོ། །གོང་ནས་སེམས་ཉིད་ཀློང་ཆེན་འགྱུར་མེད་ཀྱི་ངང་ལ་འཁོར་འདས་ཐམས་ཅད་མ་འདུས་པ་མེད་ཅིང་། ཐམས་ཅད་ཀུན་འདུས་གཡོ་མེད་ཀུན་གྱི་སྔོན་རོལ་དུ་སངས་རྒྱས་པ་ཀུན་ཏུ་བཟང་པོའི་ཆོས་ཀྱི་དབྱིངས་དེར་ཐམས་ཅད་འདུས་ལ་མ་གཡོས་པའི་དཔེ་བཀོད་དུས། རྒྱལ་པོ་ཆེན་པོ་མངའ་ཐང་རྒྱས་ཤིང་ཆབ་སྲིད་བརྟན་ལ་ཕོ་བྲང་དུ་གཡོ་བ་མེད་པར་ཆེ་བའི་ཡོན་ཏན་གྱིས་བརྗིད་པའི་གནས་སྐབས་སུ་ཡུལ་སྡེ་འབངས་མི་ཐམས་ཅད་མངའ་འོག་ཏུ་འདུས་པ་ལྟར་དུ། ཐམས་ཅད་ཀུན་བཟང་ཆོས་ཉིད་གཡོ་བ་མེད་པ་འདུ་འབྲལ་མེད་པའི་དབྱིངས་མཆོག་རབ་འབྱམས། ཆེ་བའི་ཆེ་བ་ཀུན་བཟང་ཆོས་ཀྱི་དབྱིངས་སམ་རིག་པ་ཆོས་ཉིད་ཀྱི་ངང་ལས་མ་གཡོས་པར་དེའི་ངང་དུ་འཁོར་འདས་ཐམས་ཅད་འདུས་པ་ཡིན་ཞེས། སེམས་ཉིད་ཀློང་ཆེན་གཅིག་གི་ངང་ལ་འཁོར་འདས་ཆོས་ཀུན་འདུས་པར་དོན་བསྡུས་པའོ།།

༼ཁ༽ཆོས་ཐམས་ཅད་རྩོལ་སྒྲུབ་མེད་པར་བསྟན་པ།

ས་བཅད་གཉིས་པ་ཆོས་ཐམས་ཅད་རྩོལ་སྒྲུབ་མེད་པར་བསྟན་པ་དེ་ལ། ཆོས་ཐམས་ཅད་རང་བཞིན་མཉམ་ཉིད་ཡིན་པས་རྩོལ་སྒྲུབ་མེད་པར་བསྟན་པ་དང་། དབྱིངས་ལས་ཤར་བ་ཉིད་ཀྱིས་ཀྱང་རྩོལ་སྒྲུབ་མེད་པར་བསྟན་པ་དང་། རྒྱུ་འབྲས་རྩོལ་སྒྲུབ་ལས་འདས་པས་དོན་བསྡུ་བ་དང་གསུམ་ལས།

༼ཀ དང་པོ་ཆོས་ཐམས་ཅད་རང་བཞིན་མཉམ་པ་ཡིན་པས་བཟང་ངན་དང་རྩོལ་སྒྲུབ་མེད་པར་བསྟན་པ།

ཆོས་ཐམས་ཅད་རང་བཞིན་མཉམ་པ་ཡིན་པས་བཟང་ངན་དང་རྩོལ་སྒྲུབ་མེད་པར་བསྟན་པ་ནི།

ཐམས་ཅད་ཀུན་བཟང་མི་བཟང་གཅིག་མེད་པས།།

བཟང་ངན་མེད་པར་ཀུན་ཏུ་བཟང་པོར་གཅིག།

གྲུབ་དང་མ་གྲུབ་ཐམས་ཅད་དབྱིངས་གཅིག་པས།།

ཐམས་ཅད་ལྷུན་གྲུབ་མི་གཡོ་མཉམ་པར་གཅིག།

ཅེས་གསུངས་ཏེ། ཆོས་ཐམས་ཅད་སྣང་མཉམ་རང་བཞིན་སྟོང་གཟུགས་ཀྱི་རོལ་བ་ཡིན་པས་ཀྱང་བཟང་ངན་དང་རྩོལ་སྒྲུབ་མེད་པར་གཅིག་ལ། སྟོང་མཉམ་གཞི་མེད་ནམ་མཁའ་ལྟར་དག་པས་ཀྱང་བཟང་ངན་དང་བླང་དོར་མེད་པར་གཅིག་ཅིང་། རང་བྱུང་ཡེ་ཤེས་ཀྱི་ངང་ན་མཉམ་པས་ཀྱང་བཟང་ངན་དང་ཕྱོགས་རིས་མེད་པར་གཅིག་པ་སྟེ། ཡུམ་ཆེན་མོ་ལས། ཆོས་ཐམས་ཅད་མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ་ཞེས་པ་དང་། ཀུན་བྱེད་ལས། ཆོས་ཀུན་ནམ་མཁའི་མཚན་ཉིད་དེ། །ནམ་མཁའི་མཚན་ཉིད་དེ་བཞིན་ཉིད། །སྐུ་གསུམ་མཚན་ཉིད་དེ་བཞིན་གནས། །ཐམས་ཅད་དེ་བཞིན་ཉིད་དུ་གནས། །ཇི་ལྟར་སྣང་བའི་ཆོས་ཀུན་ནི། །ཇི་བཞིན་པ་ལས་བཅོས་སུ་མེད། །བཟང་ངན་བླང་དོར་མེད་པའོ། །ཞེས་སོ། །ཐམས་ཅད་གཅིག་གི་ནང་དུ་འདུས་པ་ཡིན་པས་གཅིག་བཟང་དུས་ཐམས་ཅད་མི་བཟང་བ་མེད་པར་བཟང་བར་གྲུབ་ཅིང་། དེ་གྲུབ་ན་འཁོར་འདས་ཐམས་ཅད་ལ་མི་བཟང་བ་གཅིག་ཀྱང་མེད་པ་ཡིན། ཅིའི་ཕྱིར་ཞེ་ན། ཐམས་ཅད་དབྱིངས་གཅིག་ཆོས་དབྱིངས་ཀུན་ཏུ་བཟང་པོར་འདུས་པ་བསྟན་པ་ཡིན་པ་དེས་ན། གྲུབ་དང་མ་གྲུབ་བཟང་དང་ངན་པ་མེད་པར་གཅིག་པས་ན། ལྷུན་གྲུབ་ཡིན་པས་ཐམས་ཅད་ཚང་བ་ཡིན་ཞིང་། མི་གཡོ་མཉམ་པས་གཅིག་ཏུ་འདུས་ཤིང་། གཅིག་རྒྱུ་དེ་ཡང་རྩོལ་སྒྲུབ་མེད་པས་དང་། བླང་དོར་མེད་པས་དང་། ཕྱོགས་རིས་མེད་པས་གཅིག་པའོ། །དེ་ཡང་སྣང་མཉམ་རང་བཞིན་སྟོང་པ་བཟང་ངན་དང་རྩོལ་སྒྲུབ་མེད་པས་གཅིག་པ་དང་། སྟོང་མཉམ་གཞི་མེད་མཁའ་ལྟར་དག་པས་བླང་དོར་མེད་པར་གཅིག་པ་དང་། སྟོང་གཞི་རང་བྱུང་གི་ཡེ་ཤེས་རིག་པའི་ངང་དུ་མཉམ་པས་ཀྱང་ཕྱོགས་རིས་མེད་པར་གཅིག་པ་སྟེ། མཉམ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་དང་། ཇི་བཞིན་གནས་པ་དེ་བཞིན་ཉིད་ཀྱི་སྐུ་གསུམ་འདུས་པའི་མཚན་ཉིད་ལས་བཟང་ངན་བླང་དོར་གྱི་ཆོས་སུ་མེད་པར་བསྟན་པའོ།།

༼ཁ གཉིས་པ་དབྱིངས་ལས་ཤར་བ་ཉིད་ཀྱིས་རྩོལ་སྒྲུབ་ལས་འདས་པར་བསྟན་པ།

དབྱིངས་ལས་ཤར་བ་ཉིད་ཀྱིས་རྩོལ་སྒྲུབ་ལས་འདས་པར་བསྟན་པ་ནི།

གཅིག་ལས་ཀུན་ཤར་མ་ལུས་ཆོས་ཀྱི་དབྱིངས།།

བྱར་མེད་ངང་ལ་བསྒྲུབ་མེད་བརྩལ་དུ་མེད།།

རྩོལ་སྒྲུབ་རང་གི་དབྱིངས་ལས་གཞན་མེད་པས།།

གང་ནས་རྩོལ་ཞིང་གང་དུ་སྒྲུབ་པར་བྱེད།།

ཅེས་གསུངས་ཏེ། ཇི་ལྟར་རྨི་ལམ་ན་རྩོལ་སྒྲུབ་བྱེད་པ་དག་ཨ་ཐང་ཡང་དོན་མེད་ལ་མལ་གཅིག་ལས་མ་གཡོས་ཤིང་བྱ་བ་ཅུང་ཟད་ཀྱང་བྱས་པ་དང་ཟིན་པ་མེད་པ་ལྟར། ད་ལྟར་སྤང་གཉེན་གྱི་རྩོལ་སྒྲུབ་བྱེད་པ་ཡང་དེ་དང་འདྲ་སྟེ། རིག་པའི་ངང་ཙམ་ལས་གཞན་མེད་ལ། བྱས་པ་དང་ཟིན་པའང་ཅུང་ཟད་ཀྱང་མེད་དེ་རིག་པ་ཉིད་ཀྱི་ངང་ཙམ་ལས་མ་གཡོས་པའི་ཕྱིར་དང་། ཟླ་བ་རྒྱལ་མཚན་གྱི་བློ་རྒྱ་ལྟར་མེད་པ་གསལ་སྣང་ལ་དོན་དུ་ཞེན་པས་འཁྲུལ་བ་ཙམ་མ་གཏོགས་པ། ཆོས་ཉིད་ལ་རྡུལ་ཆ་ཙམ་ཡང་རེག་པ་དང་ཉེ་བ་མེད་པའོ། །དེའི་ཕྱིར་སེམས་ཉིད་ནམ་མཁའ་ལྟ་བུ་ལ་རྩོལ་སྒྲུབ་བྱར་མེད་དེ། རྒྱུ་འབྲས་ཀྱིས་བསྒྱུར་དུ་མེད་པའི་ཕྱིར་རོ། །རང་བྱུང་གི་ཡེ་ཤེས་ཀུན་གྱི་གཞིར་གནས་པས། ཆོས་ཀུན་དེ་ལས་ཤར་ཡང་། དེ་ཉིད་དགེ་སྡིག་གི་མཐའ་ལས་འདས་པ་ཉིད། ཐལ་འགྱུར་ལས། གནས་ལུགས་འདུག་ཚུལ་འདི་ལྟ་བུ། །བཤད་ན་ཉན་ཐོས་རང་སངས་རྒྱས། །རབ་ཏུ་སྐྲག་སྟེ་བརྒྱལ་བར་འགྱུར། །དེས་ན་མཆོག་ཏུ་གསང་བར་བྱ། །བཏགས་པ་མེད་པའི་ཆོས་རྣམས་ནི། །བྱུང་ས་མེད་པས་གཞི་ཞེས་བྱ། །དེ་ལ་གནས་པ་མེད་པའི་ཕྱིར། །དངོས་དང་སྟོང་པ་གང་མི་གནས། །གསལ་དང་མུན་པ་སྲིད་འབྱུང་མིན། །འགྲོ་འོང་སྲིད་མཐའ་མེད་ཕྱིར་རོ། །འབད་ཅིང་རྩོལ་བས་མ་བཅིངས་པས། །ཟང་མ་ཉིད་དང་ཐལ་བྱུང་ངོ་། །རྒྱ་ཆད་ཕྱོགས་ལྷུང་མེད་པའི་ཕྱིར། །དགེ་དང་སྡིག་པའང་གྲུབ་པ་མེད། །དགེ་སྡིག་གཉིས་ཀ་སེལ་ཕྱིར་རོ། །འཁོར་དང་འདས་པར་མི་གནས་པས། །ཆོས་ཉིད་སྟོང་པ་ཀུན་ཁྱབ་ཕྱིར། །ཡེ་ཤེས་རང་ངོར་གནས་པ་ལ། །གསུམ་གྱི་ཚུལ་དུ་དབྱེར་མེད་དོ། །ཞེས་པ་དང་། རྩལ་རྫོགས་ལས། རང་རིག་ཡེ་ནས་འགྱུར་མེད་པས། །དགེ་སྡིག་གཉིས་ཀྱིས་ང་མི་སྒྲིབ། །རང་བྱུང་རྒྱུ་རྐྱེན་མེད་པ་ལ། །འདུས་བྱས་ཆོས་སྤྱོད་བྱ་མི་དགོས། །ཞེས་སོ། །ནོར་བུ་བེེཌཱུརྱ་གཅིག་དེ་ཉིད་ཉི་མ་དང་ཟླ་བའི་རྐྱེན་སོ་སོ་ལ་བརྟེན་ནས་ཉི་མ་ཤར་ན་མེ་འབྱུང་བ་དང་། ཟླ་བ་ཤར་ན་ཆུ་འབྱུང་བ་ལྟར་དུ། རིག་པ་རང་བྱུང་གི་ཡེ་ཤེས་གཅིག་ཉིད་འདི་ལས་ངོ་ཤེས་ན་མྱ་ངན་ལས་འདས་པའི་སྣང་བ་དང་མ་ཤེས་ན་འཁོར་བའི་སྣང་བ་ཤར་ཞིང་། འོན་ཀྱང་དོན་རིག་པ་གཅིག་གི་འཆར་ཚུལ་ལས་ངོ་བོ་ཐ་དད་ལ་གཡོས་པ་མེད་པ་ཡིན། ཆོས་དབྱིངས་བྱར་མེད་གཅིག་གི་ངང་ལས་ཤར་བ་ལ་བྱས་ནས་ཟིན་པ་དང་། བསྒྲུབས་ནས་གྲུབ་པ་དང་། དེ་བཞིན་དུ་བཙལ་ནས་རྙེད་པ་དང་། རྩོལ་སྒྲུབ་ཀྱིས་འགྲུབ་ཏུ་མེད་པར་དེ་ལས་འདས་པ་ནི་འགྲེལ་བས། རྨི་ལམ་གྱི་རྩོལ་སྒྲུབ་ཨ་ཐང་ཆད་ཀྱང་དོན་མེད་མལ་ས་གཅིག་གི་ནང་གི་སེམས་ཀྱི་འཁྲུལ་སྣང་ཙམ་ལས། བྱས་ནས་འགྲུབ་རྒྱུ་དང་ཟིན་རྒྱུ་མེད་པ་བཞིན་དུ། ཆོས་དབྱིངས་ཀྱི་ངོ་བོ་མཐོང་བའང་རྩོལ་སྒྲུབ་ཀྱིས་བསྒྲུབ་ཏུ་མེད། རྩོལ་སྒྲུབ་བྱེད་པ་ཁོ་རང་ཡང་ཆོས་དབྱིངས་ལས་མ་འདས་པ་ཡིན་པས་གང་ལ་རྩོལ་ཞིང་གང་དུ་ཅི་ཞིག་སྒྲུབ་པར་བྱེད། ཡིད་དཔྱོད་བློ་ཡིས་ཇི་ལྟར་རྩོལ་ཞིང་བསྒྲུབས་ཀྱང་ཆོས་ཉིད་ཀྱི་དོན་དང་སྐད་ཅིག་རྡུལ་ཆ་ཙམ་གྱི་ཉེ་བ་མེད་ལ། སེམས་ཉིད་ནམ་མཁའ་ལྟ་བུ་ཡིན་པས་ནམ་མཁའ་ལ་བསྒྱུར་དུ་མེད་པ་བཞིན་དུ་སེམས་ཉིད་ལ་རྒྱུ་འབྲས་རྩོལ་སྒྲུབ་ཀྱིས་ཀྱང་བསྒྱུར་དུ་མེད། ཆོས་ཀུན་དེ་ལས་ཤར་ཡང་དེ་ཉིད་གཅིག་ལས་ཀྱང་མ་ཤར་ལ། རང་བྱུང་ཡེ་ཤེས་ལས་ཐམས་ཅད་བྱུང་ཡང་རང་བྱུང་ཡེ་ཤེས་ཉིད་གང་ལས་ཀྱང་མ་བྱུང་བ་དེས་ན་མ་བྱུང་མ་སྐྱེས་ནམ་མཁའ་ལྟ་བུ་དགེ་སྡིག་སྐྱོན་ཡོན་ཀུན་ལས་འདས་པར་བསྟན་པའོ།།

༼ག གསུམ་པ་དེའི་ཕྱིར་རྒྱུ་འབྲས་རྩོལ་སྒྲུབ་ལས་འདས་པས་དོན་བསྡུ་བ།

དེའི་ཕྱིར་རྒྱུ་འབྲས་རྩོལ་སྒྲུབ་ལས་འདས་པ་ནི།

བཙལ་བའི་ཡུལ་མེད་བསྒོམས་པས་མཐོང་བ་མེད།།

བསྒྲུབ་པའི་གནས་མེད་གཞན་ནས་འོང་བ་མེད།།

འགྲོ་འོང་མེད་པས་མཉམ་ཉིད་ཆོས་ཀྱི་སྐུ།།

ལྷུན་རྫོགས་ཐིག་ལེ་ཆེན་པོའི་དབྱིངས་སུ་འདུས།།

ཞེས་གསུངས། སེམས་ཉིད་ནམ་མཁའ་ལྟ་བུའི་ངོ་བོ་ནི་དབྱིངས་ཐིག་ལེ་ཉག་གཅིག་སྟེ། དེའི་ངང་དུ་ཆོས་ཐམས་ཅད་འདུས་པས་རང་བཞིན་བཅུ་ལ་སོགས་པས་བཙལ་དུ་མེད་པ་ནི། ཆོས་ཀྱི་དབྱིངས་མུ་མཐའ་དང་བྲལ་བ་སྟེ། ཀུན་བྱེད་ལས། ཀུན་གྱི་སྙིང་པོ་བྱང་ཆུབ་སེམས་འདི་ནི། །ཡེ་ནས་རང་གི་རང་བཞིན་ལྷུན་གྲུབ་པས། །རང་བཞིན་བཅུ་ཡིས་བརྩལ་ཞིང་བསྒྲུབ་མི་དགོས། །ང་ཡི་རང་བཞིན་ཀུན་དཔེ་ནམ་མཁའ་འདྲ། །ནམ་མཁའ་དག་ལས་ཀུན་ཀྱང་རྩོལ་མི་བྱེད། །ནམ་མཁའ་དག་ལ་ཀུན་གྱིས་བརྩལ་བྱ་རུ། །ནམ་མཁའ་ཀུན་ཀྱང་རྩོལ་སྒྲུབ་ཀུན་ལས་འདས། །དེ་བཞིན་ཀུན་བྱེད་སྙིང་པོ་བྱང་ཆུབ་སེམས། །ང་ནི་སྤྱོད་ཡུལ་ཀུན་ལས་འདས་པའི་ཕྱིར། །ང་ལ་བལྟར་མེད་ཡེ་ནས་བསྒོམ་དུ་མེད། །དེ་བཞིན་རང་བཞིན་བཅུ་པོ་དེས་ཀྱང་ནི། །འདས་པ་ང་ལ་བྱ་རུ་ཡོད་མ་ཡིན། །རྒྱུ་དང་འབྲས་བུའི་ཐེག་པ་ཅན་རྣམས་ཀྱིས། །རང་བཞིན་བཅུ་ཡིས་ང་ལ་བཙལ་བྱས་ན། །ང་དང་ང་ཡི་རང་བཞིན་མཐོང་འདོད་པ། །མཁའ་ལ་གོམ་བོར་ས་ལ་ལྷུང་བ་བཞིན། །རང་བཞིན་བཅུ་པོས་བགྲོད་པས་ལྟུང་བར་འགྱུར། །ང་ཡི་རང་བཞིན་ངེས་པར་ཁུངས་བསྟན་པ། །ང་ནི་སྤྱོད་ཡུལ་ཀུན་ལས་འདས་པའི་ཕྱིར། །ལྟ་བ་བསྒོམ་དུ་མེད་པ་དེ་བཞིན་དུ། །རང་བཞིན་བཅུ་ལ་དེ་བཞིན་དོན་མེད་ཀྱིས། །རང་བཞིན་བཅུ་ལ་དོན་ཡོད་མ་རྟོགས་ཤིག །ང་ནི་བལྟས་པས་མཐོང་བའི་ཡུལ་མེད་པས། །ལྟ་བར་མ་བྱེད་དེ་བཞིན་ཉིད་དུ་ཞོག །ཅེས་སོ། །རིག་པ་བྱང་ཆུབ་ཀྱི་སེམས་ཉིད་དེ་བཙལ་བའི་ཡུལ་མེད་ལ་བཙལ་བས་རྙེད་ཡོང་རྒྱུ་ཞིག་ཀྱང་མེད། བསྒོམ་བྱ་སྒོམ་བྱེད་མེད་པའི་ཕྱིར་ན་བསྒོམས་པས་མཐོང་བ་མེད་པ་ཡིན། དེ་བཞིན་དུ་བསྒྲུབ་པའི་གནས་མེད་ཅིང་། གཞན་ནས་འོང་བ་མེད་པས་ན་འགྲོ་འོང་མེད་པས་མཉམ་ཉིད་ཆོས་ཀྱི་སྐུ་རུ་གོང་ནས་ཀྱང་གཏན་ལ་ཕབ་པ་ཡིན། དེ་ལྟར་ཡིན་པའི་རྒྱུ་མཚན་ནི། སེམས་ཉིད་སྤྲོས་མཚན་ཀུན་དང་བྲལ་བ་ནམ་མཁའ་ལྟ་བུའི་ངོ་བོ་ནི་ཆོས་དབྱིངས་ཐིག་ལེ་ཉག་གཅིག་ལ་འདུས་པས་སོ། །ལྷུན་རྫོགས་ནི་སྣང་སྲིད་འཁོར་འདས་ཀྱི་ཆོས་ཐམས་ཅད་རིག་པ་གཅིག་གི་ངང་དུ་མ་རྫོགས་པ་མེད་པ་དང་། ཐིག་ལེ་ཆེན་པོའི་དབྱིངས་སུ་འདུས་པ་ནི་དེ་ལས་གཞན་དུ་ཆོས་ཤིག་མི་སྲིད་པ་སྟེ། དེ་ཡང་ཆོས་ཐམས་ཅད་རིག་པའི་ངང་ལས་ཤར་བས། དང་པོ་ཤར་བའང་རིག་པ་གཅིག་གིས་བཅིངས་པ་དང་། ད་ལྟར་སྣ་ཚོགས་སུ་སྣང་བའི་དུས་ཉིད་ནས་ཀྱང་། རིག་པའི་ངང་ལས་གཞན་དུ་མ་གཡོས་པས་སྣང་བ་རང་བྱུང་རིག་པའི་ཀློང་གིས་བཅིངས་པ་དང་། ཆོས་ཐམས་ཅད་མཐར་རིག་པའི་ངང་དུ་བཟློག་ཅིང་དེ་ལས་གཞན་དུ་འགྲོ་ས་མེད་པས་གྲོལ་བའང་རིག་པའི་དབྱིངས་གཅིག་ལས་མ་འདས། ཆོས་དབྱིངས་ཀུན་ཁྱབ་ཐིག་ལེ་ཉག་གཅིག་དེའི་ངོ་བོ་ནི་བསམ་བརྗོད་སྤྲོས་པ་ཀུན་གྱི་ཡུལ་ལས་འདས་པ་ནམ་མཁའ་ལྟར་ཡེ་ནས་དེ་ལྟར་གནས་ཤིང་འགྱུར་བ་མེད་པས་ན། ཆོས་དབྱིངས་མུ་མཐའ་མེད་པ་ལ་བྱ་ལོང་གིས་ནམ་མཁའི་མཐའ་འཚོལ་བ་བཞིན་དུ་ཐེག་བརྒྱད་བློ་ཡི་གྲུབ་མཐས་རྩོལ་ཞིང་ངལ་བའི་ཆོས་བཅུ་ལ་སོགས་པས་བསྒྲུབས་པ་ནི་དོན་མེད་པའོ་ཞེས་རང་བྱུང་ཡེ་ཤེས་ཀྱི་ངོ་བོ་རྒྱུ་འབྲས་རྩོལ་སྒྲུབ་ལས་འདས་པར་བསྟན་ནས་དོན་བསྡུས་པའོ།།

༼ག༽གསུམ་པ་རིག་པ་བྱང་ཆུབ་ཀྱི་སེམས་སུ་ཐེག་པ་ཀུན་འདུས་པར་བསྟན་པ།

དེ་ལ་ཐེག་པ་ཆུང་འབྲིང་ཆེ་གསུམ་གྱི་འདུས་ཚུལ་སོ་སོར་བསྟན་པ་གསུམ་ལས།

༼ཀ དང་པོ་ཆུང་ངུ་གསུམ་གྱི་འདུས་ཚུལ་བསྟན་པ།

ད་ནི་རིག་པ་བྱང་ཆུབ་ཀྱི་སེམས་སུ་ཐེག་པ་ཀུན་འདུས་པར་བསྟན་པ་ལས། ཆུང་ངུ་གསུམ་གྱི་འདུས་ཚུལ་ནི།

ཉན་ཐོས་རང་རྒྱལ་བྱང་ཆུབ་སེམས་དཔའི་ལུང་།།

བདག་དང་བདག་གི་མེད་པར་ཐག་བཅད་ནས།།

སྤྲོས་བྲལ་ནམ་མཁའ་ལྟ་བུར་དགོངས་དོན་གཅིག།

ཨ་ཏི་མཆོག་གསང་རྣལ་འབྱོར་ཆེན་པོའི་ལུང་།།

བདག་གཞན་དབྱེར་མེད་ཡངས་པའི་ནམ་མཁའ་ལ།།

རང་བྱུང་ཡེ་ཤེས་ཇི་བཞིན་རྣལ་འཇོག་པས།།

དགོངས་དོན་དེ་ཀུན་སྙིང་པོའི་མཆོག་འདིར་འདུས།།

ཞེས་གསུངས་ཏེ། ཉན་ཐོས་ཀྱི་ལྟ་བ་ཕྱི་ནང་གི་ཆོས་ཐམས་ཅད་གང་ཟག་གི་བདག་མེད་པ་ནམ་མཁའ་ལྟར་འདོད་པ་དང་། རང་སངས་རྒྱས་ནི་དེའི་སྟེང་དུ་ཆོས་ཀྱི་ཕྱེད་གཟུང་བ་མེད་པ་དང་། བྱང་ཆུབ་སེམས་དཔའི་ནི་འཛིན་པ་དང་གཟུང་བ་སྟེ་ཆོས་དང་། གང་ཟག་གི་བདག་མེད་པ་ནམ་མཁའི་རང་བཞིན་དུ་འདོད་དེ། ཕྱིར་མི་ལྡོག་པ་འཁོར་ལོའི་མདོ་ལས། མ་རིག་ནམ་མཁའ་ཇི་བཞིན་དུ། །ཆོས་རྣམས་ཐམས་ཅད་མཚན་ཉིད་མེད། །ཅེས་སོ། །དེ་ལྟར་རྟོགས་པ་དེ་ཡང་། རྫོགས་པ་ཆེན་པོ་རང་བྱུང་གི་ཡེ་ཤེས་སུ་སྟོང་གསལ་རང་བྱུང་གི་ཡེ་ཤེས་ནམ་མཁའི་ངོ་བོ་ཉིད་དུ་འདུས་པས་ཆོས་ཀུན་གྱི་དེ་བཞིན་ཉིད་འདུས་པའི་ཕྱིར་དགོངས་པ་འདིར་འདུས་པ་སྟེ། ཀུན་བྱེད་ལས། ཀུན་བྱེད་བྱང་ཆུབ་སེམས་ཀྱི་རང་བཞིན་དུ། །མ་ལུས་ཀུན་འདུས་མཁའ་ལྟར་སྤྲོས་དང་བྲལ། །ཞེས་སོ། །སྤྱིར་ན་ཐེག་པའི་རྣམ་གྲངས་ནི་གདུལ་བྱའི་བསམ་པ་དང་མོས་པ་བཞིིན་དུ་མཐའ་ཡས་པ་ཞིག་ཡོད་པ་ཡིན་ལ། འོན་ཀྱང་རིགས་བསྡུ་ན་ནང་པ་སངས་རྒྱས་པའི་ཐེག་རིམ་དེ་སྔ་འགྱུར་རང་ལུགས་ལ་གསུམ་ཚན་གསུམ་གྱིས་དགུ་རུ་ཕྱེ་བ་སྟེ། དེ་ཡང་ཆུང་སྐོར་གསུམ་ཉན་རང་བྱང་སེམས་གསུམ་ལས། ཉན་ཐོས་བྱེ་བྲག་སྨྲ་བས་ཆོས་ཐམས་ཅད་ཤེས་བྱ་གཞི་ལྔར་བསྡུས་ཏེ། འདུས་བྱས་ཀྱི་ཕྱོགས་ཐམས་ཅད་ཆ་མེད་གཉིས་སུ་བཤིག་ནས། དེའི་སྟེང་དུ་གང་ཟག་གི་བདག་མེད་པར་རྟོགས་ཏེ། རང་ལམ་གྱི་བདེན་བཞི་རྟོགས་པ་དང་མཐུན་པའི་ལྟ་སྒོམ་སྤྱོད་པ་བརྒྱུད་ནས་གནས་སྐབས་ལམ་གྱུར་གྱི་འབྲས་བུ་བདུན་དང་། མཐར་ཐུག་ཁམས་གསུམ་གྱི་ཀུན་སྦྱོར་ཟད་པའི་དགྲ་བཅོམ་ཐོབ་པའོ། །མདོ་སྡེ་པ་ཡང་དེ་དང་ཕྱོགས་འདྲ་ཞིང་། རང་རྒྱལ་གྱི་ཐེག་པས་དེའི་སྟེང་དུ་ཆོས་ཀྱི་བདག་མེད་ལས་གཟུང་བ་གཟུགས་ཀྱི་ཕྱོགས་བདེན་མེད་དུ་ཤེས་པའི་བདག་མེད་ཕྱེད་དང་གཉིས་རྟོགས་པ་དང་། ཐེག་ཆེན་བྱང་ཆུབ་སེམས་དཔའི་ཐེག་པ་ལ་ཡང་དབུ་སེམས་གཉིས་ལས། སེམས་ཙམ་པས་ཀུན་བརྟགས་གཞན་དབང་ཡོངས་གྲུབ་གསུམ་གྱིས་ཆོས་ཐམས་ཅད་གཏན་ལ་ཕབ་ཅིང་། བདག་གཉིས་ཀྱིས་སྟོང་པའི་ཆོས་དབྱིངས་གཟུང་འཛིན་གཉིས་མེད་ཀྱི་ཤེས་པ་དེ་ཉིད་གནས་ལུགས་སུ་འཛིན་པ་དང་། དབུ་མ་པ་ལ་ཡང་ནང་གསེས་ཀྱི་དབྱེ་བ་ཡོད་ཀྱང་སྤྱིར་སྣང་སྟོང་ངོ་བོ་ཉིད་ཀྱིས་འདུ་འབྲལ་མེད་པའི་ཆོས་དབྱིངས་སྤྲོས་པ་ཀུན་བྲལ། བདེན་གཉིས་དབྱེར་མེད་མཉམ་བཞག་ནམ་མཁའ་ལྟ་བུ་དང་རྗེས་ཐོབ་སྒྱུ་མ་ལྟ་བུ་རུ་བཞེད་པ་ཡིན་ལ། མཐར་ཐུག་དེ་དག་ཐམས་ཅད་རིག་པ་རང་གནས་ཀྱི་ཡེ་ཤེས་སྟོང་གསལ་ནམ་མཁའི་ངོ་བོ་རུ་མ་འདུས་པ་ཞིག་མེད་ལ། ཕྱི་ནང་གཟུང་ཡུལ་རྡུལ་ཕྲན་ཆ་མེད་སྟོང་པ་དེ་ཡང་རིག་པའི་ངང་དུ་རང་སྣང་ལ། ནང་སེམས་ཀྱང་སྐད་ཅིག་ཆ་མེད་སྟོང་པར་རང་ཡལ་རྗེས་མེད་དུ་རིག་པར་སངས་ལ། གཉིས་ཀ་ཡེ་སྟོང་རྩ་བྲལ་ནམ་མཁའ་ལྟར་དག་པ་དེ་ཡང་རིག་པའི་ངང་ལ་དག་པའོ།།

༼ཁ གཉིས་པ་འབྲིང་པོ་གསུམ་འདུས་པ་བསྟན་པ།

འབྲིང་པོ་གསུམ་འདུས་པ་ཡང་།

ཀྲཱི་ཡ་ཨུ་པ་ཡོ་ག་རིགས་གསུམ་ཡང་།།

བདག་དང་ལྷ་དང་ཏིང་འཛིན་མཆོད་སྤྲིན་ལས།།

སྒོ་གསུམ་རྣམ་དག་དངོས་གྲུབ་འདོད་པར་གཅིག།

རྡོ་རྗེ་རྩེ་མོ་ལུང་རྒྱལ་གསང་བ་ཡང་།།

སྣང་གྲགས་རིག་པ་རྣམ་དག་ཡེ་ནས་ལྷ།།

སྒོ་གསུམ་རྣམ་དག་དངོས་གྲུབ་མངོན་གྱུར་པས།།

དགོངས་པ་དེ་ཀུན་སྙིང་པོའི་མཆོག་འདིར་འདུས།།

ཞེས་གསུངས། ཀྲཱི་ཡ་ཏན་ཏྲ་སྟེ་བྱ་བའི་རྒྱུད་ཀྱི་ལུགས་ཀྱིས། བདག་བྲན་དང་ལྷ་རྗེའི་ཚུལ་དུ་བསམས་ཏེ། མཆོད་པ་དང་བསྟོད་པ་ལ་སོགས་པས་དངོས་གྲུབ་འདོད་ལ། ཨུ་པ་ཡ་ཏན་ཏྲ་སྟེ་སྤྱོད་པའི་རྒྱུད་དུ་བདག་དམ་ཚིག་པའི་མདུན་དུ་ལྷ་ཡེ་ཤེས་པ་བསྐྱེད་ནས་དངོས་གྲུབ་འདོད་པ་དང་། ཡོ་ག་ཏན་ཏྲ་སྟེ་རྣལ་འབྱོར་གྱི་རྒྱུད་དུ་དམ་ཚིག་པའི་དཀྱིལ་འཁོར་དུ་ལྷ་ཡེ་ཤེས་པ་བསྟིམས་ནས་མཆོད་པ་དང་བསྟོད་པ་ལ་སོགས་པས་དངོས་གྲུབ་འདོད་པ་སྟེ། དེ་དག་ཀྱང་སྒོ་གསུམ་གྱི་དྲི་མ་དག་པ་དང་། དངོས་གྲུབ་སྒྲུབ་པར་གཅིག་པ་ལ། འདིར་ཆོས་ཐམས་ཅད་དཀྱིལ་འཁོར་དུ་སངས་རྒྱས་པའི་ངང་ནས་དག་མཉམ་བྱང་ཆུབ་སེམས་སུ་ཤེས་པ་དེར་དེ་དག་གི་དགོངས་པ་འདུ་བ་སྟེ། ཀུན་བྱེད་ལས། རང་བྱུང་སྙིང་པོ་མཆོག་གི་དཀྱིལ་འཁོར་ལས། །སྒོ་གསུམ་ལྷུག་པ་ཇི་བཞིན་ངང་བཞག་ན། །ཀུན་བྱེད་ང་ཡི་དགོངས་པར་ལྷུན་གྱིས་གྲུབ། །ཅེས་སོ། །འབྲིང་སྐོར་གསུམ་སྔགས་ཕྱི་བ་ཀྲཱི་ཡོག་སྡེ་གསུམ་གྱིས་ཆོས་ཐམས་ཅད་དོན་དམ་པར་རང་བཞིན་གྱིས་དག་པའི་སྟོང་པ་ཉིད་དེ་མཐའ་བཞི་དང་བྲལ་ཞིང་ལྷའི་ངོ་བོར་སྦྱོར་བའི་སྐུ་གསུང་ཐུགས་ཀྱི་མཚན་མ་ལམ་དུ་བྱེད་པས། དེའི་ཐབས་བསྒྲུབས་ནས་གནས་སྐབས་དང་མཐར་ཐུག་གི་ཐུན་མོང་དང་མཆོག་གི་དངོས་གྲུབ་བསྒྲུབ་པ་ཡིན། དེ་ལས་ཀྲཱི་ཡ་བྱ་རྒྱུད་པས་བདག་དང་ལྷ་རྗེ་དང་ཁོལ་གྱི་ཚུལ་གྱིས་དག་པ་རྣམ་པ་གསུམ་གྱི་སྒོ་ནས་འཇུག་པ་དང་། ཨུ་པ་སྤྱོད་རྒྱུད་པས་བདག་མདུན་སྤུན་གྲོགས་ཀྱི་ཚུལ་གྱིས་བསྐྱེད་བཟླས་ཏིང་འཛིན་གྱི་སྒོ་ནས་དངོས་གྲུབ་ནོད་པར་འདོད་པ་དང་། ཡོ་ག་རྣལ་འབྱོར་གྱི་རྒྱུད་ཀྱིས་དོན་དམ་མཐའ་བྲལ་གྱི་དབྱིངས་སུ་ཆོས་ཐམས་ཅད་མཉམ་པ་ཡིན་ན་ཡང་། ཀུན་རྫོབ་བསླུ་མེད་ཀྱི་སྣང་ཚུལ་ལ་དམ་ཡེ་གཉིས་མེད་ཀྱི་བཟླས་སྒོམ་ལ་བརྟེན་ནས་ཕྱག་རྒྱ་བཞི་ཡི་ཚུལ་གྱིས་དངོས་གྲུབ་སྒྲུབ་པ་སྟེ། དེ་ཐམས་ཅད་ཀྱིས་ཀྱང་མ་དག་འཁོར་བའི་སྒོ་གསུམ་གྱི་དྲི་མ་དག་པའི་ཆེད་དང་། སྒྲིབ་གཉིས་བག་ཆགས་དང་བཅས་པ་དག་པའི་དངོས་གྲུབ་དེ་ཉིད་མངོན་དུ་བྱེད་པར་འདོད་པ་ལ་གཅིག་པས། ཨ་ཏི་རྫོགས་པ་ཆེན་པོའི་ཡེ་ནས་རིག་པ་ཡེ་ཤེས་ཀྱི་རྩལ་སྣང་ལྷའི་དཀྱིལ་འཁོར་གཅིག་ཏུ་རྫོགས་པའི་མཉམ་ཉིད་བདེ་ཀློང་ཆེན་པོའི་ངང་དུ་དེ་ཐམས་ཅད་ཀྱང་མ་འདུས་པ་མེད་པར་འདུས་པའོ།།

༼ག གསུམ་པ་ཆེན་པོ་གསུམ་ཡང་རྫོགས་པར་བསྟན་པ།

ཆེན་པོ་གསུམ་ཡང་རྫོགས་ཏེ།

མ་ཧཱ་ཨ་ནུ་ཨ་ཏི་རིམ་གསུམ་ཡང་།།

སྣང་སྲིད་སྣོད་བཅུད་ལྷ་དང་ལྷ་མོའི་ཞིང་།།

དབྱིངས་དང་ཡེ་ཤེས་དབྱེར་མེད་རྣམ་དག་པས།།

ཆོས་ཉིད་མི་གཡོ་རང་བྱུང་ཡེ་ཤེས་འདོད།།

མཆོག་གསང་རབ་འདིར་ཐམས་ཅད་རྣམ་དག་པས།།

མ་བྱས་གཞལ་ཡས་ཡེ་ཀློང་བདེ་བའི་ཞིང་།།

ཕྱི་དང་ནང་མེད་ཀུན་ཁྱབ་གདལ་བ་ལས།།

བླང་དོར་བྱ་བརྩལ་མཚན་མའི་ཆོས་མེད་པར།།

ཐམས་ཅད་ཡེ་འབྱམས་ཆོས་སྐུའི་ཀློང་ཡངས་པས།།

དགོངས་པ་དེ་ཀུན་གསང་ཆེན་སྙིང་པོར་འདུས།།

ཞེས་གསུངས་ཏེ། མ་ཧཱ་ཡོ་ག་ཏན་ཏྲ་སྟེ་རྣལ་འབྱོར་ཆེན་པོ་ཕའི་རྒྱུད་དང་ཨ་ནུ་ཡོ་ག་ཏན་ཏྲ་སྟེ་རྣལ་འབྱོར་མའི་རྒྱུད་གཉིས་ནི། གཞིའི་དཀྱིལ་འཁོར་རིག་པ་དང་། ལམ་གྱི་དཀྱིལ་འཁོར་སྣོད་བཅུད་ལྷ་དང་གཞལ་ཡས་ཁང་དུ་གསལ་བས། དབྱིངས་དང་ཡེ་ཤེས་ཐབས་དང་ཤེས་རབ་འདུ་འབྲལ་མེད་པར་ཉམས་སུ་བླངས་པས། འབྲས་བུ་བྱང་ཆུབ་མཆོག་གི་དཀྱིལ་འཁོར་ཐོབ་པར་འདོད་ལ། ཨ་ཏི་རྫོགས་པ་ཆེན་པོར་ཡང་ཐམས་ཅད་ཡེ་ནས་སངས་རྒྱས་པའི་དཀྱིལ་འཁོར་དུ་ཤེས་པས། བླང་དོར་བཅོས་བསླད་མེད་པའི་དགོངས་པ་ཆོས་ཉིད་ལས་མི་གཡོ་བས། རིག་པ་གཞི་ཐོག་ཏུ་ཕེབས་པར་འདོད་པ་དེར་དོན་གྱི་སྙིང་པོ་འདུ་བའི་ཕྱིར་གསང་ཆེན་དོན་གྱི་ཐེག་པ་སྟེ། རྩལ་རྫོགས་ལས། སྐུ་ཡི་དཀྱིལ་འཁོར་ཇི་སྙེད་པ། །ཐམས་ཅད་མ་ལུས་སྣང་བར་གསལ། །གསུང་གི་དཀྱིལ་འཁོར་ཇི་སྙེད་པ། །ཐམས་ཅད་མ་ལུས་གྲག་པར་སྟོན། །ཐུགས་ཀྱི་དཀྱིལ་འཁོར་ཇི་སྙེད་པ། །ཐམས་ཅད་མ་ལུས་རྟོག་པ་སངས། །སྐུ་དང་གསུང་དང་རྡོ་རྗེའི་ཐུགས། །སྣང་བ་མེད་ལས་ཐམས་ཅད་སྣང་། །ཞེས་པ་དང་། ཀུན་བྱེད་ལས། མ་བཅོས་རྣལ་དུ་གཞག་པའི་དཀྱིལ་འཁོར་གསུམ། །མ་བཀོད་དུས་གཅིག་རྫོགས་པའི་དོན་རྟོགས་པས། །ལྷུན་གྲུབ་སྙིང་པོའི་དོན་ལ་འཇུག་པར་བྱེད། །ཅེས་སོ། །ཆེ་སྐོར་གསུམ་ནང་རྒྱུད་སྡེ་གསུམ་ལས་ཕ་རྒྱུད་མ་ཧཱ་ཡོ་ག་ཡིས་ཏིང་འཛིན་གསུམ་གྱིས་ཁོག་ཕུབ་ཅིང་། བསྐྱེད་རིམ་ཐབས་ཀྱི་རིམ་པར་གཙོ་བོར་བྱས་ནས་སྣོད་བཅུད་ལྷ་དང་གཞལ་ཡས་དཀྱིལ་འཁོར་གསུམ་གྱི་ངོ་བོར་ཆོས་རྣམས་འདུས་པར་བྱས་པའི་ངང་ནས་མཚན་བཅས་དང་མཚན་མེད་ཀྱི་རྫོགས་རིམ་ལ་འཇུག་པ་དང་། མ་རྒྱུད་ཨ་ནུ་ཡོ་གས་དབྱིངས་དང་ཡེ་ཤེས་ཐབས་དང་ཤེས་རབ་གཉིས་མེད་དང་། ཁྱད་པར་དུ་རྫོགས་རིམ་ཤེས་རབ་གཙོར་བྱེད་ཀྱི་ཞི་བདེ་ལྷན་སྐྱེས་ཀྱི་ཡེ་ཤེས་རྩལ་འདོན་གྱིས་འབྲས་བུ་བྱང་ཆུབ་སྒྲུབ་པ་དང་། གཉིས་མེད་རྒྱུད་སྡེ་ཨ་ཏི་ཡོ་གས་རིག་པ་ཡེ་ཤེས་ཀྱི་རྩལ་སྣང་དེ་ཡེ་ནས་ལྷའི་དཀྱིལ་འཁོར་དུ་རྫོགས་པའི་ཡེ་ཤེས་ཉིད་ལ་དབང་སྒྱུར་བ་ཡིན་པས། བླང་དོར་བྱ་རྩོལ་གྱི་མཚན་མའི་ཆོས་ལས་རིང་དུ་འདས་པ་ཡིན་པས་ན་དགོངས་པ་མི་གཡོ་པའི་རིག་པའི་གཞི་ཀློང་ཆེན་པོར་ཕེབས་པ་ཐམས་ཅད་དོན་གྱིས་སྙིང་པོ་རིག་པ་བྱང་ཆུབ་ཀྱི་སེམས་མ་བཅོས་རྣལ་བཞག་གི་ཆོས་ཉིད་ཆེན་པོ་འདིའི་དབྱིངས་གཅིག་གི་ངང་དུ་མ་འདུས་པ་མེད་དོ།།

༼ང༽བཞི་བ་ཐམས་ཅད་བྱང་ཆུབ་ཀྱི་སེམས་སུ་འདུས་ཤིང་རྫོགས་པར་དོན་བསྡུ་བ།

ད་ནི་ཐམས་ཅད་བྱང་ཆུབ་ཀྱི་སེམས་སུ་འདུས་ཤིང་རྫོགས་པར་དོན་བསྡུ་བ་ནི།

གཅིག་རྫོགས་ཀུན་རྫོགས་ཆོས་ཀུན་འདུས་པའི་ཀློང་།།

ཡེ་བབས་རང་གསལ་ལྷུན་གྲུབ་ཆེན་པོར་འདུས།།

ཞེས་གསུངས་ཏེ། ཐམས་ཅད་བྱང་ཆུབ་སེམས་སུ་རྫོགས་པ་དེ་ཡང་གཅིག་རྫོགས་རིག་པའི་ངང་དུ་རྫོགས་པ། གཉིས་རྫོགས་སེམས་ཀྱི་བྱས་པར་རྫོགས་པ། ཀུན་རྫོགས་གང་ཡང་སྣང་བས་ཕུན་སུམ་ཚོགས་པར་རྫོགས་པ་སྟེ། ཀུན་བྱེད་ལས། འདི་ལ་མ་རྫོགས་གང་ཡང་མེད། །གཅིག་རྫོགས་གཉིས་རྫོགས་ཀུན་རྫོགས་པས། །བྱ་བ་ཕུན་སུམ་ཚོགས་པར་བྱེད། །གཅིག་རྫོགས་བྱང་ཆུབ་སེམས་སུ་རྫོགས། །གཉིས་རྫོགས་སེམས་ཀྱི་བྱས་པར་རྫོགས། །ཀུན་རྫོགས་ཕུན་སུམ་ཚོགས་པར་རྫོགས། །གཅིག་ལ་རྫོགས་པའི་ལུང་འདི་ཡིས། །སངས་རྒྱས་དགོངས་པ་འདི་ལ་གནས། །ཀུན་རྫོགས་པ་ཡི་དོན་འདི་ཡིས། །ཐམས་ཅད་ཕུན་སུམ་ཚོགས་པར་བྱེད། །ཅེས་སོ། །དེ་ལྟར་རྟོགས་པའི་རྣལ་འབྱོར་པ་ལ་བསྔགས་པ་ནི། རྩལ་རྫོགས་ལས། སངས་རྒྱས་བདེན་པ་མཐོང་ན་རྒྱལ་བའི་སྲས། །རྟོགས་པ་ཁོང་དུ་ཆུད་ན་ནམ་ཡང་བདེ། །ཞེས་པ་དང་། སྔ་མ་ལས། བྱར་མེད་འདི་ལ་གང་གནས་པ། །ལུས་འདི་གང་ཟག་ལྷ་མི་ཡང་། །དགོངས་པ་ཆོས་ཉིད་སངས་རྒྱས་ཡིན། །ཞེས་སོ། །འཁོར་འདས་ཀྱི་ཆོས་ཐམས་ཅད་རིག་པ་བྱང་ཆུབ་ཀྱི་སེམས་སུ་འདུས་ཤིང་རྫོགས་པའི་ཚུལ་ནི། གཅིག་རིག་པའི་ངང་དུ་རྫོགས་པ་སྟེ། དང་པོ་ཉིད་ནས་ཆོས་ཐམས་ཅད་རིག་པའི་ངང་དུ་རྫོགས་ཤིང་ཅི་སྣང་རིག་པའི་ངང་ལས་སྣང་བ་དང་། མཐར་རིག་པའི་ངང་དུ་བཟློག་ཅིང་གྲོལ་ཏེ། ནམ་མཁར་སྤྲིན་རྣམས་དེངས་པའི་དཔེ་ལྟར་རིག་སྟོང་ཆོས་སྐུའི་དབྱིངས་སུ་ཟད་པ་ཆོས་ཉིད་ཆེན་པོར་བཅིང་བ་དང་། གཉིས་རྫོགས་སེམས་ཀྱི་བྱས་པར་རྫོགས་ཏེ། སྣང་སྲིད་སྣོད་བཅུད་ཐམས་ཅད་རིག་པ་བྱང་ཆུབ་ཀྱི་སེམས་ལས་བྱུང་བས་འཛིན་པའི་སེམས་ཀྱང་རང་ཡལ་རྗེས་མེད། གང་དུ་ཡལ་སའི་གཞི་དེར་རིག་པ་ཉིད་ཀྱང་ཀ་དག་ནམ་མཁའ་ལྟ་བུ་རྫོགས་དུས། ཕྱི་སྣང་བ་སྣ་ཚོགས། ནང་སེམས་ཀྱི་འཕྲོ་འདུ། གསང་བ་རིག་པའི་འཕྲོ་འདུ་ཐམས་ཅད་ཡེ་བབས་རང་གསལ་གྱི་ལྷུན་གྲུབ་ཆེན་པོ་འཁོར་འདས་སྣང་དུས་ཉིད་ནས་འཁོར་བ་མ་གྲུབ་པས་འཁོར་བ་སྤང་དུ་མེད་ཅིང་མྱ་ངན་ལས་འདས་པ་བསྒྲུབ་དུ་མེད་པའི་གཤིས་བྱ་རྩོལ་དང་བྲལ་བ་ཡིན་པས་ཆོས་ཟད་བློ་ཟད་དུ་ཕྱམ་གདལ་བའོ། །ལེའུའི་མཚན་ནི། ཆོས་དབྱིངས་རིན་པོ་ཆེའི་མཛོད་ལས། ཐམས་ཅད་བྱང་ཆུབ་ཀྱི་སེམས་སུ་འདུས་པར་བསྟན་པ་སྟེ། ལེའུ་དྲུག་པའི་འགྲེལ་པའོ།། །།ཆུ་ཚོད་ཀྱི་མཚམས་ལ་ཐོན་ནས་འདུག་དེ་རིང་གི་ཆོས་མཚམས་འདི་ནས་གཞག་རྒྱུ་བྱེད། སང་ཉིན་ལེའུ་བདུན་པ་ཆོས་ཐམས་ཅད་བྱང་ཆུབ་ཀྱི་སེམས་སུ་ཡེ་ནས་ལྷུན་གྱིས་གྲུབ་པར་བསྟན་པའི་ལེའུ་ནས་བཤད་རྒྱུ་བྱེད། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་འཁྲུག་རྩོད་ཐམས་ཅད་རྒྱུན་ཆད། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་དང་། བདག་ཅག་རྣམས་ཀྱི་ཚེ་འདིའི་ཕ་མ་གཉིས་དང་། དགྲ་བགེགས་གཉིས་ཀྱི་གཙོ་བྱས་པའི་བཟང་འབྲེལ་ངན་འབྲེལ་ཐོགས་པའི་མཐའ་ཡས་སེམས་ཅན་ཐམས་ཅད་མཐར་ཐུག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པ་དང་། དེ་མ་ཐོབ་ཀྱི་བར་དུ་ཡང་མཐོ་རིས་ཡོན་ཏན་བདུན་དང་ལྡན་པའི་ལུས་རྟེན་ཁྱད་པར་ཅན་ཞིག་རྙེད་ནས་ཐེག་པ་ཆེན་པོའི་ཆོས་ལ་ཚུལ་བཞིན་དུ་སྤྱོད་པའི་སྐལ་བ་དང་ལྡན་པའི་ཕྱིར་དུ་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་རླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག།