ཐུན་དང་པོའི་ཆོས་ཁྲིད།

ཨ༔བདག་ཉིད་ཐ་མལ་སྤྱི་བོ་རུ༔

པད་དཀར་ཟླ་བའི་གདན་གྱི་དབུས༔

ཧཱུྃ་ལས་བླ་མ་རྡོ་རྗེ་སེམས༔

དཀར་གསལ་ལོངས་སྤྱོད་རྫོགས་པའི་སྐུ༔

རྡོ་རྗེ་དྲིལ་འཛིན་སྙེམས་མ་འཁྲིལ༔

ཁྱོད་ལ་སྐྱབས་གསོལ་སྡིག་པ་སྦྱོང༔

འགྱོད་སེམས་དྲག་པོས་མཐོལ་ལོ་བཤགས༔

ཕྱིན་ཆད་སྲོག་ལ་བབས་ཀྱང་སྡོམ༔

ཁྱོད་ཐུགས་ཟླ་བ་རྒྱས་པའི་སྟེང༔

ཧཱུྃ་ཡིག་མཐའ་མར་སྔགས་ཀྱིས་བསྐོར༔

བཟླས་པ་སྔགས་ཀྱིས་རྒྱུད་བསྐུལ་བས༔

ཡབ་ཡུམ་བདེ་རོལ་སྦྱོར་མཚམས་ནས༔

བདུད་རྩི་བྱང་ཆུབ་སེམས་ཀྱི་སྤྲིན༔

ག་བུར་རྡུལ་ལྟར་འཛག་པ་ཡིས༔

བདག་དང་ཁམས་གསུམ་སེམས་ཅན་གྱི༔

ལས་དང་ཉོན་མོངས་སྡུག་བསྔལ་རྒྱུ༔

ནད་གདོན་སྡིག་སྒྲིབ་ཉེས་ལྟུང་གྲིབ༔

མ་ལུས་བྱང་བར་མཛད་དུ་གསོལ༔

ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ། ཏིཥྛ་དྲྀ་ཌོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཾ་ཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ། བཛྲ་མ་མེ་མུཉྩ། བཛྲི་བྷ་ཝ། མ་ཧཱ་ས་མ་ཡ་ས་ཏྭ་ཨཿ

མགོན་པོ་བདག་ནི་མི་ཤེས་རྨོངས་པ་ཡིསཿ

དམ་ཚིག་ལས་ནི་འགལ་ཞིང་ཉམསཿ

བླ་མ་མགོན་པོས་སྐྱབས་མཛོད་ཅིགཿ

གཙོ་བོ་རྡོ་རྗེ་འཛིན་པ་སྟེཿ

ཐུགས་རྗེ་ཆེན་པོའི་བདག་ཉིད་ཅནཿ

འགྲོ་བའི་གཙོ་ལ་བདག་སྐྱབས་མཆིཿ

སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ༔ སྡིག་པ་དང་སྒྲིབ་པ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ༔ རྡོ་རྗེ་སེམས་དཔའ་དགྱེས་བཞིན་འཛུམ་པ་དང་བཅས་པས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ་ཞེས་གནང་བ་བྱིན་ཞིང་འོད་དུ་ཞུ་ནས་རང་ལ་ཐིམ་པའི་རྐྱེན་ལས་རང་ཉིད་ཀྱང་རྡོ་རྗེ་སེམས་དཔའ་སྣང་སྟོང་མེ་ལོང་ནང་གི་གཟུགས་བརྙན་ལྟ་བུར་གྱུར་པའི་ཐུགས་སྲོག་ཧཱུྃ་གི་མཐའ་མར་ཡི་གེ་འབྲུ་བཞི་བོ་གསལ་བ་ལས་འོད་ཟེར་འཕྲོས། ཁམས་གསུམ་སྣོད་བཅུད་དང་བཅས་པ་རྡོར་སེམས་རིགས་ལྔའི་རྟེན་དང་བརྟེན་པའི་རང་བཞིན་དུ་སངས་རྒྱས་པར་གྱུར། ཨོཾ་བཛྲ་ས་ཏྭ་ཧཱུྃ༔ དགེ་བ་འདི་ཡིས་མྱུར་དུ་བདག །རྡོ་རྗེ་སེམས་དཔའ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །རྡོ་རྗེ་སེམས་དཔའ་ཁྱེད་སྐུ་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཁྱེད་ཀྱི་མཚན་མཆོག་བཟང་བོ་ཅི་འདྲ་བ། །དེ་འདྲ་ཁོ་ནར་བདག་སོགས་འགྱུར་བར་ཤོག །བླ་མ་དང་མགོན་པོ་འཇམ་དཔལ་དབྱངས་ལ་ཕྱག་འཚལ་ལོ། །གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བས། །ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན། །གང་དག་སྲིད་པའི་བཙོན་རར་མ་རིག་མུན་འཐུམས་སྡུག་བསྔལ་གྱིས་གཟིར་བས། །འགྲོ་ཚོགས་ཀུན་ལ་བུ་གཅིག་ལྟར་བརྩེ་ཡན་ལག་དྲུག་ཅུའི་དབྱངས་ལྡན་གསུང་། །འབྲུག་ལྟར་ཆེར་སྒྲོག་ཉོན་མོངས་གཉིད་སློང་ལས་ཀྱི་ལྕགས་སྒྲོག་འགྲོལ་མཛད་ཅིང་། །མ་རིག་མུན་སེལ་སྡུག་བསྔལ་མྱུ་གུ་ཇི་སྙེད་གཅོད་མཛད་རལ་གྲི་བསྣམས། །གདོད་ནས་དག་ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་ཐུ་བོའི་སྐུ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་འཇམ་དཔལ་དབྱངས་ལ་འདུད། །བརྩེ་ལྡན་ཁྱེད་ཀྱི་མཁྱེན་རབ་འོད་ཟེར་གྱིས། །བདག་བློའི་གཏི་མུག་མུན་པ་རབ་བསལ་ནས། །བཀའ་དང་བསྟན་བཅོས་གཞུང་ལུགས་རྟོགས་པ་ཡི། །བློ་གྲོས་སྤོབས་པའི་སྣང་བ་སྐྱེད་དུ་གསོལ། །དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་ཁྱབ་བདག བཀའ་དྲིན་མཚུངས་ཟླ་མ་མཆིས་པ། དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ། གང་གི་ཞལ་བཟང་ལྟ་བས་མི་ངོམས་གེ་སར་འཛུམ་པའི་མདངས་བཀྲ་ཞིང་། །མཚན་དཔེའི་གཟི་འོད་ཟེའུ་འབྲུ་གསལ་བས་འགྲོ་ཀུན་མིག་གི་བདུད་རྩིར་གྱུར། །ཐུགས་རྗེའི་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པའི། །ཐུབ་དབང་པདྨ་དཀར་པོའི་ཞབས་པད་དེ་རིང་བདག་བློའི་ཡིད་མཚོར་སྐྱོངས། །བདེ་བ་ཅན་ན་འོད་དཔག་མེད་དེ་རི་བོ་ཏ་ལར་སྤྱན་རས་གཟིགས། །འཛམ་བུའི་གླིང་འདིར་པདྨ་རྒྱལ་པོ་འགྲོ་ལ་ཐ་དད་སྣང་གྱུར་ཀྱང་། །སྐུ་གསུམ་མཛད་པའི་ངོ་བོ་གཅིག་སྟེ་དཔལ་ལྡན་སངས་རྒྱས་པདྨ་སྐྱེས། །གངས་ལྗོངས་འགྲོ་ལ་ལྷག་པར་བརྩེ་བའི་ཐུགས་བརྩེའི་འོད་ཟེར་ཅན་ལ་འདུད། །འཛམ་གླིང་མཛེས་པའི་རྒྱན་དྲུག་མཆོག་གཉིས་དང་། །ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང་། །ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས། །འཁོར་འདས་ཆོས་སྐུར་རྟོགས་པའི་ཀློང་ཆེན་པ། །དྲི་མེད་འོད་ཟེར་ཞབས་ལ་གསོལ་བ་འདེབས། །ཤེས་བྱ་ཀུན་མཁྱེན་འགྲོ་ལ་རྗེས་བརྩེའི་གཏེར། །དྲི་མེད་འོད་ཟེར་ཡང་སྤྲུལ་ཐུགས་གཏེར་མཛོད། །འོད་གསལ་ཀློང་ཆེན་ནམ་མཁའི་རྣལ་འབྱོར་བ། །འཇིགས་མེད་གླིང་བའི་ཞབས་ལ་གསོལ་བ་འདེབས། །དུས་གསུམ་ཀུན་མཁྱེན་པདྨ་འབྱུང་གནས་ཀྱིས། །ཟབ་གཏེར་བདག་པོར་མངའ་གསོལ་འཁོར་ལོས་བསྒྱུར། །སངས་རྒྱས་གླིང་བའི་ཡང་སྤྲུལ་སྦས་ཚུལ་འཆང་། །ཀུན་བཟང་གཞན་ཕན་ཞབས་ལ་གསོལ་བ་འདེབས། །འཕགས་པ་འཇིག་རྟེན་དབང་ཕྱུག་ཐུགས་རྗེའི་འཕྲུལ། །འགྲོ་བ་ཐར་གླིང་བགྲོད་པའི་དེད་དཔོན་མཆོག །འབྲེལ་ཚད་དོན་ལྡན་ཀློང་ཆེན་རྣལ་འབྱོར་བ། །འཇིགས་མེད་རྒྱལ་བའི་མྱུ་གུར་གསོལ་བ་འདེབས། །དུས་གསུམ་རྒྱལ་བའི་སྤྱི་གཟུགས་པདྨ་འབྱུང་། །འཇའ་ལུས་རྡོ་རྗེའི་སྐུ་བརྙེས་བཱི་མ་ལ། །དབྱེར་མེད་ཐུགས་རྗེ་གཅིག་བསྡུས་སྤྲུལ་བའི་སྐུ། །མི་འགྱུར་ནམ་མཁའི་རྡོ་རྗེར་གསོལ་བ་འདེབས། །ཨོ་རྒྱན་རིག་འཛིན་ཆེན་པོའི་རིང་ལུགས་ཀྱི། །བཤད་སྒྲུབ་བསྟན་པའི་རྒྱལ་མཚན་འཛིན་མཛད་ཅིང་། །ཡོན་ཏན་ནོར་བུའི་མཛོད་མངའ་ཆོས་ཀྱི་རྗེ། །དཔལ་ལྡན་བླ་མའི་ཞབས་ལ་གསོལ་བ་འདེབས། །འཕགས་ཡུལ་མཁས་པའི་དབང་ཕྱུག་ཟླ་བ་གྲགས། །གངས་ལྗོངས་འཇམ་དཔལ་དབྱངས་དངོས་ཀུན་མཁྱེན་རྗེ། །དབྱེར་མེད་ཐུགས་རྗེ་ཡས་སྤྲུལ་དགེ་བའི་བཤེས། །གཞན་ཕན་ཆོས་ཀྱི་སྣང་བར་གསོལ་བ་འདེབས། །བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས། །སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས། །གདོད་མའི་མགོན་པོ་མི་ཡི་རྫུར་ཞུགས་པ། །འཇིགས་མེད་ཡོན་ཏན་མགོན་པོར་གསོལ་བ་འདེབས། །དགོངས་བརྒྱུད་རྟོགས་པ་འཕོ་བར་བྱིན་གྱིས་རློབས། །ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །རང་སེམས་ཆོས་སྐུར་མངོན་སུམ་སྟོན་མཛད་པ། །རྩ་བའི་བླ་མ་མཆོག་ལ་གསོལ་བ་འདེབས། །བདག་གཞན་འགྲོ་བའི་བློ་སྣ་ཆོས་ལ་སྒྱུར། །གང་ཞིག་གསེར་མཆོག་རང་བཞིན་རི་རབ་ལ་གནས་མནྡ་ར་དང་ལྷར་བཅས་གནོད་སྦྱིན་དང་། །གདེངས་ཀ་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་། །གངས་ཅན་རིར་ནི་དཔལ་གྱིས་རོལ་ཞིང་རབ་ཏུ་དགའ་བའི་རིག་པ་འཛིན་པ་གང་ཡིན་པ། །དེ་དག་ཐམས་ཅད་ཐར་བ་དམ་པའི་སྒོར་གྱུར་ཐུབ་པའི་གསུང་མཉན་ཕྱིར་ན་འདིར་གཤེགས་ཤིག །གང་དག་ཕྱོགས་བཅུའི་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་དམ་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག །ནམ་མཁའི་མཐས་གཏུགས་འཇིག་རྟེན་ཐམས་ཅད་ན། །ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན། །གྲུལ་བུམ་མིའམ་ཅི་དང་ལྟོ་འཕྱེ་སོགས། །རྫུ་འཕྲུལ་ཡིད་ལྡན་ཐམས་ཅད་འདིར་ཤོག་ཅིག །བསྐལ་བ་སྟོང་དུ་ཐོས་པར་རབ་དཀའ་ཞིང་། །གང་ཞིག་ཐོས་ན་གཏན་དུ་བདེ་བྱེད་པ། །བདེ་གཤེགས་གསུང་སྙན་བདུད་རྩི་ཆོས་ཀྱི་སྒྲ། །བདག་གིས་སྦྱིན་གྱིས་དད་ཅིང་གུས་པས་ཉོན། །གང་ཞིག་གཏན་གྱི་སྐྱབས་གནས་མཆོག་གྱུར་པ། །དཀོན་མཆོག་གསུམ་གྱི་ཡོན་ཏན་བསམ་མི་ཁྱབ། །དེ་ལ་དད་བྱས་རྣམ་སྨིན་ཡང་དེ་བཞིན་ཏེ། །བསྐལ་བ་བྱེ་བ་ཁྲག་ཁྲིག་བགྲངས་ན་ཡང་། །དཀོན་མཆོག་མཚན་ཐོས་ཙམ་ཡང་རྙེད་དཀའ་ཞིང་། །རྣམ་པར་གྲོལ་བ་རིན་ཆེན་སྣ་ཚོགས་དང་། །ཟབ་མོ་རྒྱལ་བའི་བཀའ་འདི་གུས་པས་ཉོན། །ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་ཆོས་འདི་འགྱུར་བར་ཤོག ༈ །རང་རེ་སྔར་བསགས་ཀྱི་ལས་དང་སྨོན་ལམ་གཅིག་ཏུ་མཐུན་པའི་དགེ་འདུན་འདུས་པའི་སྡེ་རབ་སྔགས་འདི་འདྲའི་མང་བོ་ཞིག་ས་ཆ་འདི་རུ་ཆོས་གཅིག་གིས་མཉམ་དུ་བསྡུས་པ་ཡིན་པས། ངས་ཐོག་མར་ཁྱེད་ཆོས་གྲོགས་མཆེད་ལྕམ་ཚང་མ་ལ་ཆོས་ཀྱི་ཤུགས་ཀྱིས་སྤྲོ་བའི་མདངས་དང་བཅས་ཏེ། སེམས་ཁོང་གི་ཆེས་ཉེ་བའི་གཏམ་གྱིས་ཁམས་བདེའི་འཚམས་འདྲི་ཞིག་གུས་ལུགས་ཀྱིས་ཞུ་བ་དང་ཆབས་ཅིག་ཏུ། ཆོས་དང་འབྲེལ་བའི་གཏམ་གྱི་འདུན་མ་གླེང་ཕྱོགས་ནས་མགོ་བཟུང་སྟེ་ཆོས་འཆད་ཉན་ལ་འཇུག་པར་བྱ། རང་རེ་འདིར་བཞུགས་ཚང་མ་སྐྱེས་པའི་ས་ཕྱོགས་ཁ་ཁ་ཡིན་པས། ས་ཆ་ཡུལ་ལུང་མི་གཅིག་པར་མ་ཟད་སྐད་ལུགས་དང་། གོམས་གཤིས་སོགས་གང་ཐད་ནས་ཅུང་ཟད་མི་འདྲ་ས་ཡོད་པ་ནི། མདོ་དབུས་ཁམས་གསུམ་གྱི་མི་སྣ་ཚོགས་ས་ལ་ཡོད་ངེས་པ་ཞིག་ཡིན། འོན་ཀྱང་འདྲ་ས་གང་ནས་འདྲ་བ་རེད་ཟེར་ན། བོད་ཆོས་ལྡན་གྱི་ས་ཆའི་མི་ཡིན་པ་དང་། ཆུང་དུས་ནས་དད་མོས་དམ་པའི་ལྷ་ཆོས་ལ་བྱེད་པའི་རིགས་རྒྱུད་ཡིན་པ་དང། ད་དུང་གཅིག་མཚུངས་ངོ་མ་དེ་གང་ཡིན་ཞེ་ན། བདེ་བ་འདོད་ཅིང་སྡུག་བསྔལ་མི་འདོད་པར་མ་ཟད། བདེ་བ་དོན་གཉེར་གྱི་ཆེད་དུ་ཉིན་མཚན་ལོ་དང་ཟླ་བའི་དུས་ཚོད་སྐྱེལ་བཞིན་ཡོད་པའི་ཆ་ནས། སེམས་ཅན་སྲོག་དང་ལྡན་པ་ཤེས་པ་སོ་ན་གནས་པ་ཞིག་ཡིན་ཚད་གཅིག་མཚུངས་ཡིན། རང་རེ་འདིར་ཡོད་ཀྱི་གྲལ་དུ་ལོ་ན་རྒན་གྲས་ལ་ཐོན་ཡོད་པ་དང་། མ་ཚད་གཞོན་དར་གྱི་ན་ཚོད་ཅན་ཡང་ཡོད་ཕྱིར། རྒན་དར་གཞོན་གསུམ་ལ་མ་ལྟོས་པར་ཚང་མས་རང་རང་གི་ཚེ་སྟོད་ཀྱི་དུས་ཚོད་ནམ་ཟླ་འདས་པའི་ཕྱོགས་སུ་སོང་བ་ལ་ཕྱིར་བལྟས་ཤིག་བྱས་ཏེ། རང་རང་གི་ངོས་ནས་ད་སྔའི་མི་ཚེའི་ཕྱོགས་སྡོམ་ཞིག་བརྒྱབ་ན། འཇིག་རྟེན་ཚེ་འདིའི་སྣང་བ་སྐྱིད་མ་སྡུག་འདི་མིག་མདུན་དུ་ཤར་ཏེ། དབྱར་རེའི་རྒྱབ་ཏུ་དགུན་རེ་ཚེས་ནས་ལོ་གཅིག་འཁོར་བའི་ལོ་གསར་མི་ཉུང་བ་ཞིག་དེ་སྔོན་བྱས་པ་ཡིན། དེ་ནི་མི་རང་རང་གི་ཚེ་ཚད་ལོ་ཅི་ཙམ་ཡོད་པ་དེ་ལས། དེའི་གྲངས་ཀའི་ཚོད་ཅིག་འདས་ཟིན་པ་ཡིན། དེ་ལྟར་བསམ་བློ་ཞིག་བཏང་ན། ཆུང་བྱིས་པ་བསམ་མེད་ཀྱི་དུས་སུ་ཕ་མས་གཉོར་སྐྱོང་བྱེད་སྐབས་དོན་ཆེན་མཐའ་རིང་གི་བྱ་བའི་འགྲོས་ལ་བསམ་བློ་གཏོང་མི་ཤེས། འོན་ཀྱང་རྒྱུག་ཐུབ་འགྲོ་ཐུབ་ཀྱི་དུས་སུ། འགའ་རེ་ཡིག་རྩིས་ཀློག་འདོན་སློབ་སའི་གྲྭ་རེ་ལ་བཞག་ནས། རང་རང་གི་ཚོད་ཀྱི་བྱ་ལས་རེ་ལ་འཇུས་ཡོད་པ་ཡིན། དེ་རིང་ཁ་སང་འདིའི་ནང་གི་རྒན་གཞོན་གཉིས་ཀའི་བར་ན་ཡོད་པ་ལོ་གྲངས་སུམ་ཅུ་བཞི་བཅུའི་ལོ་ཚད་བརྒལ་ཏེ་ལྔ་བཅུ་དྲུག་ཅུ་ལ་ཐག་དེ་ཙམ་མི་རིང་བ་རྣམ་པས་འདང་རེ་བརྒྱབ་ན། དམ་པའི་སྐྱེས་ཆེན་མཚན་གྱིས་གྲགས་པ་དང་། མ་གྲགས་པ་ཚོ་ཕར་ཕུད་ཤུལ་གྱི་ཕལ་བའི་སྐྱེ་བོ་མང་ཆེ་བའི་མི་ཚེའི་དུས་ཚོད་དེ་ད་ལྟ་བལྟས་ན་ཅི་འདྲའི་མང་པོ་ཞིག་འདས་སོང་བར་འདུག་ཨང་སྙམ་པ་ཞིག་ཡོང་བ་ཡིན། དུས་དེ་དག་གི་རིང་ལ་དོན་དངོས་སུ་རང་གཞན་འདི་ཕྱིར་ཕན་པའི་དོན་ཆེན་ཅི་ཞིག་འགྲུབ་འདུག་བལྟས་ནས་ཕྱིར་འདང་ཞིག་བརྒྱབ་ན། ཆོས་པ་ཞིག་གི་མིང་བཟུང་ནས་དགེ་འདུན་འདུས་པའི་བཞུགས་གྲལ་རེ་ན་ཡོད་པར་མ་ཟད། གྲལ་མགོ་གྲལ་སྟོད་རེ་ལའང་བསྙེགས་ནས་བསྡད་པ་ཡིན། འོན་ཀྱང་དོན་ངོ་མའི་ནང་ཉམས་ལ་ཐུག་དུས། གལ་ཏེ་སང་ཉིན་གྱི་ཉི་མ་མགོ་ལ་འཆར་རྒྱུ་མེད་པར་དོ་དགོང་ཤི་རན་པ་ཡིན་ན། ཕྱི་མར་འཁོར་བ་ངན་སོང་ལ་མི་ལྷུང་བར་བདེ་ཞིང་སྐྱིད་པའི་གནས་འདི་དང་འདི་ལ་འདི་ལྟར་བྱས་ནས་འགྲོ་ཆོག་ཆོག་ཡིན་སྙམ་པའི་བྱ་བ་ཚགས་སུ་ཚུད་ཨེ་ཡོད་དང་། རེ་ཞིང་ལྟོས་པའི་ཁྱིམ་མི་ཉེ་འཁོར་ཡིན་ནའང་འདྲ། གྲྭ་བུ་སློབ་ཡིན་ནའང་འདྲ། མདོར་ན་ཁོར་ཡུག་དང་བཅས་པ་འདི་བཞིན་འབྲེལ་ཚད་ཀྱི་རོགས་ལ་ཕན་རེ་ཐོགས་པའི་བྱ་བའི་ཤུལ་བཞག་ཅི་ཞིག་འགྲུབ་ཡོད་པར་འདུག་ལ་སོགས་པ་དེ་ཚོ་ལ་བསམ་བློ་ཞིག་མི་གཏོང་ཐབས་མེད་ཡིན་པས། མི་ཞིག་ཡིན་ན་འདང་ཞིག་རྒྱག་རྒྱུའི་བསམ་བློ་འཁོར་བ་ཡིན། དེའི་སྟེང་དུ་རྣམ་དཔྱོད་ཀྱི་ནུས་པས་ལེགས་ཉེས་བཟང་ངན་དཔྱད་ཞིབ་ཐེངས་ཤིག་བྱེད་པ་ལ། གང་ཟག་ཕལ་བ་ཞིག་ལ་མཚོན་ན། ཉིན་མཚན་རྣམ་གཡེང་གིས་འདས། སྐྱིད་མེད་སྡུག་གི་ཁུར་བོ། རང་དབང་རང་གིས་སྤྱོད་མི་ཤེས་པའི་ལས་མཐའ། བྲག་རོང་གཡང་གཟར་མཐོན་པོ་ཞིག་གི་འཐའ་འགོ་ནས་མར་ལྕེབས་རྩིས་བྱེད་པ་ལྟ་བུའི་ཉེན་ཁ་ཅན་གྱི་དུས་ལ་ཐོན་ནས་ཡོད་པའི་མཚང་དེ་རིག་སོང་བ་ཡིན། བཟང་ངན་གང་ཡིན་རུང་འདས་པའི་དུས་ཚོད་སོང་ཚར་བས་དེ་རྗེས་དྲན་བྱས་ཀྱང་ཚུར་ཡོང་རྒྱུ་མེད་པར། འདས་པའི་དུས་ཀྱི་མི་ཚེའི་འགྲོ་ལམ་གྱི་སྐྱིད་སྡུག་བཟང་ངན་གང་བྱུང་ཡིད་ཀྱི་སྣང་བརྙན་ལ། དེ་དེ་དྲན་པའི་ཡུལ་དུ་འགྱུར་བ་ཡིན། དེ་དག་གི་མྱོང་བ་དེ་བེད་ཅིག་སྤྱད་ནས་ཕྱིན་ཆད་ད་སོ་མ་གཏད་སའི་མདུན་གྱི་འགྲོ་ལམ་བརྒྱུད་དུས་བཟང་ངན་ཚད་འཇོག་གི་དཔེ་མཚོན་ཞིག་དང་། ཉམས་མྱོང་དངོས་མའི་སློབ་གཞིའི་འདྲ་དཔེ་ཞིག་ལ་གཟུང་རྒྱུའི་གོ་བཅད་ཆོག་པ་ཡིན་པས་གོ་བཅད་དགོས་པ་ཡིན། འུ་ཚོས་དམ་པའི་ལྷ་ཆོས་རེ་བསྒྲུབས་ནས་འགྲུབ་ཀྱང་ཡོད་སྙམ་པ་འདྲ་རེ་ཡོད་ནའང་། དེ་ཡང་ཕྱི་ནས་བལྟ་སའི་གཟུགས་བརྙན་ཙམ་ལས་དོན་དུ་བསྒྲུབ་བྱའི་ཆོས་ངོ་མ་དེའི་ཕྱོགས་ལ་སོང་མེད་པ་ཡིན་ན། དེ་དགེ་སྡིག་གང་གི་ཕྱོགས་སུ་གཏོགས་པའང་འབྱེད་དཀའ་བར་མ་ཟད་འཁོར་བ་འགྲུབ་པའི་ལས་ཀྱི་སྣོན་མ་ཙམ་ལས་མ་འཕགས་པར་ཡང་འགྱུར་ངེས་པ་ཡིན། དེས་ན་ཆོས་ནི་དམ་ཆོས་རྫོགས་པ་ཆེན་པོ་ཐེག་པ་དགུ་ཡི་རྩེ་རྒྱལ། ཨ་ཏི་ཡོ་ག་འབྲས་བུའི་ཐེག་པ་ཡིན་ཟེར་བ་ལྟར་དུ་ཆོས་ཀྱི་ངོས་ནས་ཡིན་ཡང་ཡིན་ལ། འོན་ཀྱང་གང་ཟག་གི་ངོས་ནས་ཆོས་དེ་ཇི་བཞིན་འགྲུབ་པའི་མཐུན་རྐྱེན་ཚོགས་མེད་ན་ཆོས་བཟང་ཡང་ཕན་ཐོགས་མི་ཆེའོ། །ཆོས་ཐེག་པ་ཀུན་གྱི་རྩེ་མོ་ལ་ཁའི་ལབ་ཙེ་མཐོན་པོ་རི་རྩེར་ཡོད་པ་ཡིན་ཡང་། གང་ཟག་རང་གི་རྒྱུད་ཚོད་དེ་དམའ་མོ། ད་དུང་ཡང་ལུང་ཁོག་ཆུ་བོའི་གཞུང་གི་འཁོར་ངན་གྱི་ཆགས་སྡང་རྨོངས་གསུམ་གྱི་འདམ་རྫབ་ནང་ནས་ཡར་མ་ཐར་བར་འཕག་འཚག་བྱེད་ཀྱིན་ཡོད་ན། མགོ་མཐོ་ས་ལ་བཏགས་རུང་། སྐེ་དམའ་ས་ནས་ཆད། ཅེས་པའི་གཏམ་དཔེ་ལས་མ་འདས་པས་དེ་ནི་གང་ཟག་སྒེར་གྱི་རང་སྐྱོན་ཡིན། དེ་འདྲ་ཡིན་ཚེ་ཆོས་མ་ཞུའི་སྔོན་ལ་ཆོས་ཀྱི་སྣོད་རང་རྒྱུད་ལ་བྱི་དོར་དང་གཙང་སྦྲ་བྱེད་རྒྱུ་དེ་གལ་ཆེ་བ་ནི། གསང་སྔགས་སེང་གེའི་འོ་མ་འདྲ། །རིན་ཆེན་གསེར་སྣོད་མ་ལགས་པའི། །སྣོད་གཞན་ཕལ་བར་བླུགས་གྱུར་ན། །སྣོད་ཀྱང་ཆག་ལ་བཅུད་ཀྱང་ཟགས། །ཞེས་གསུངས་པ་ལྟར་ཡིན། དེས་ན་གསང་སྔགས་འབྲས་བུའི་ཐེག་པ་མ་ཟད། ཐུན་མོང་རྒྱུའི་ཐེག་པ་ཐེག་དམན་ཉན་རང་གི་ལམ་ལ་ཞུགས་དགོས་ཀྱང་རང་རྒྱུད་སྣོད་ཀྱི་མཐུན་རྐྱེན་མ་ཚོགས་ཐབས་མེད་ཡིན་པ་སྟེ། འཁོར་བ་ངེས་འབྱུང་གི་ཀུན་སློང་ཞིག་མེད་ན། ཐེག་དམན་སོ་ཐར་གྱི་སྡོམ་པ་ཡང་མི་ཐོབ་ལ། སྡོམ་པས་རྒྱུད་མ་བསྡམས་པ་ལ་ཏིང་ངེ་འཛིན་མི་སྐྱེ་ཞིང་། ཏིང་འཛིན་མེད་ན་ཤེས་རབ་མེད་པས་ཐུན་མོང་ཐར་བའི་ལམ་སྣེ་ཙམ་ཡང་ཟིན་དཀའ་ཞིང་། སྤྱིར་ན་འུ་ཅག་གི་ཆོས་བརྒྱུད་འདི་དང་། ཁྱད་པར་དུ་ངས་ཆོས་ཚིག་བཞི་པའི་ཚིགས་སུ་བཅད་པ་ཙམ་ཞིག་ལས་མ་བཤད་ན་ཡང་། དང་པོའི་མགོ་ལ་འཇོག་རྒྱུ་དང་རྩ་བའི་གནད་དུ་འཛིན་རྒྱུ་དེ་བློ་སྦྱོང་གི་ཆོས་འདི་ཡིན། ཀུན་མཁྱེན་ཆོས་རྗེའི་ཤིང་རྟ་རྣམ་དག་དུ། མངོན་ཤེས་མི་ལྡན་གཞན་དོན་མི་ནུས་པས། །རང་དོན་ལྷུར་བླངས་ཡིད་ཀྱིས་གཞན་དོན་བསམ། །རྣམ་གཡེང་འདུ་འཛི་བདུད་ཀྱི་བསླུ་བྲིད་འདིས། །རང་སེམས་མ་བསླུས་སྒྲུབ་ལ་འབད་པ་གཅེས། །ཞེས་གསུངས་ནས་ཞལ་གདམས་གནང་བ་ཡིན། རང་དོན་ཡང་ཚགས་ཚུད་མེད་པའི་གང་ཟག་ང་ལྟ་བུས་གཞན་དོན་ཆོས་བཤད་བྱེད་རྒྱུ་འདི་དུས་ལ་མ་བབ་པ། ཚོད་ལ་མ་རན་པའི་བྱ་ལས་ཤིག་ཡིན། འོན་ཀྱང་སྐྱེ་སྔ་ཕྱིའི་དུས་རབས་ཀྱི་རྒྱུ་ལེན་ཞིག་གིས། བསྟན་པའི་འཕེལ་འགྲིབ་དར་ནུབ་ཀྱི་འཕོ་འགྱུར་འདི་འདྲའི་སྐབས་སུ་ཆོས་བརྒྱུད་འཛིན་སྲུང་སྤེལ་བའི་སྐལ་བ་ཞིག་ལྡན་པའམ། དེ་འདྲའི་ལས་ཁུར་ཞིག་ཐོག་ལ་བབས་སོང་བ་ཡིན་པས། གོང་ནས་གསུངས་པ་ལྟར་དུ་གཞན་རྒྱུད་བརྟགས་པའི་མངོན་ཤེས་མེད་པའི་མིས་ཆོས་བཤད་པའི་ཁུར་བླངས་དུས་གཞན་རྒྱུད་དཔོག་ཐབས་མེད་པས་ཚུལ་བཞིན་ཆོས་དང་མཐུན་པ་ཞིག་བཤད་དཀའ་བ་ཡིན་མོད། འོན་ཀྱང་རང་རྒྱུད་རང་ལ་ལྐོག་ཏུ་མ་གྱུར་བ་ཡིན་པས། རང་རྒྱུད་རང་གིས་ཤེས་པ་དེ་ལ་གཞི་བཟུང་སྟེ། རང་དཔེ་རོགས་ལ་བསྟན་ནས་བཤད་པ་ནི་དེ་ལས་ཐབས་མེད་ཀྱི་ཐབས་ལ་བརྟེན་པ་རེད། དེས་ན་བློ་སྦྱོང་བཤད་པའི་སྐབས་སུ་བློ་ལྡོག་རྣམ་བཞིའི་ཐོག་མར་དལ་འབྱོར་རྙེད་དཀའ་བཞག་ནས་གསུང་སྲོལ་ཡོད་པ་ཞིག་ཡིན། དེའི་ཐད་དུ་ངས་ནི་དལ་འབྱོར་ཚང་བའི་མི་ལུས་རིན་པོ་ཆེ་ལྟ་བུ་དེའི་རྣམ་གྲངས་བརྩི་ཤེས་པའི་སྔོན་དུ་དང་པོར་རང་ཉིད་ཀྱི་མི་ཚེའི་རིན་ཐང་ཤེས་པའམ། རང་གིས་རང་ལ་གཅེས་པའི་ཚུལ་དེ་ཤེས་པ་གལ་ཆེ་བར་སེམས་པ་ཡིན། གཅེས་པ་རང་སྲོག་ལ་མི་གཅེས་པའི་སྲོག་ལྡན་ཞིག་མེད་ལ། འཛམ་གླིང་གི་རྒྱུ་ནོར་ལས་རང་གི་སྲོག་འདི་གལ་ཆེ་བ་ཡིན། སྲོག་མེད་ན་རྒྱུ་ཡིས་ཅི་བྱེད། སྲོག་བརྟེན་སའི་རྟེན་གཞི་ལུས་འདི་ཡིན་ལ། ལུས་སེམས་གཉིས་ཀ་ཉི་མ་འགའ་ཞིག་ལ་ཁ་མ་འཐོར་བའི་སྐབས་འདི་ལ་གསོན་པོའི་མི་ཞེས་ཟེར་བ་ཡིན། ལུས་འདི་ནི་ནམ་ཞག་ཕུགས་སུ་ཡུན་རིང་ལ་བརྟན་པའི་བློ་གཏད་ཡོད་ས་ཞིག་ཇི་ལྟར་བྱས་ཀྱང་མིན་པས། འཛམ་གླིང་གི་རྒྱུ་ནོར་ལས་གཅེས་པའི་སྲོག་གི་རིན་ཐང་ལུས་འདི་དང་འབྲེལ་ནས་བསྡད་ཡོད་པ་འདི་ནམ་འབྲལ་རང་གིས་ཀྱང་མི་ཤེས་ཤིང་། ཕུགས་ཡུན་རིང་ལ་ཇི་ལྟར་བྱས་ཀྱང་མི་བརྟན་པ། དེ་འདྲའི་མི་ཚེ་ཐུང་ཐུང་རིན་ཆེན་གསེར་ལས་རིན་གོང་ཆེ་བའི་དུས་ཚོད་སྐར་ཆ་ཕྱིན་ཆད་ལག་ལ་ཡོང་རྒྱུ་མེད་པ་འདི། བྱ་བཞག་ཙག་གི་ཙིག་གི་རེ་དང་། ཆ་ངི་ཆུང་ངི་ཞིག་ལ་ད་དུང་མགོ་འཁོར་ནས་དོན་ཆེན་ངོ་མ་དེ་ཤོར་དུ་བཅུག་སྟེ། ལ་ཁའི་རི་དྭགས་ཤི་ཤི་བྱེད་དགོས་དུས། མི་ཚེའི་དུས་ཚོད་རིན་ཐང་ཅན་དེའི་རིན་ཐང་མ་ལོན་པར་འཕྲོ་བརླག་ཏུ་ཤོར་བ་ཡིན། དེའི་མིང་ལ་ཁྲིད་ཡིག་རྣམས་སུ་དལ་འབྱོར་སྟོང་ལོག་ཅེས་གསུངས་པ་ཡིན། དོན་ངོ་མས་བཤད་ན། ལ་ཁའི་རི་དྭགས་དང་སྒོ་ཁའི་ཕྱུགས་ཟོག་རྣམས་ལས་བཟང་བའི་ཁྱད་པར་མ་ཐོན་པ་ཡིན། དེ་ཚོས་ཀྱང་མ་ཤིའི་བར་དུ་རྩྭ་བཟའ་ཆུ་འཐུང་གི་འཚོ་ཐབས་ཙམ་རེ་བྱེད་ཤེས་པ་རེད། ཤི་ཕན་ཆད་རང་དང་གཞན་གྱི་དོན་ནི་འུ་ཚོས་ཀྱང་འགྲུབ་མེད་པས། རྩྭ་བཟའ་བ་དང་ཟས་བཟའ་བ་ནི་འགྲོ་བ་སོ་སོའི་འདུ་ཤེས་འཁྲུལ་སྣང་གི་སྣང་ཤེས་མ་འདྲ་བ་ཙམ་ལས་དོན་གྱིས་ཡུན་རིང་བོར་ཕུགས་འདང་མ་ཕོག་ན་ནི་གཅིག་མཚུངས་རེད། ལེགས་ན་ཐར་བའི་གྲུ་གཟིངས་ལུས་འདི་ཡིན། །ཉེས་ན་འཁོར་བའི་གཏིང་རྡོ་ལུས་འདི་ཡིན། །ཞེས་གསུངས་པ་ཡིན་པས། རང་གཅེས་པའི་གཅེས་ལུགས་ཤེས་པའི་སྟེང་ནས་མི་ཚེའི་རིན་ཐང་འཚོལ་བ་ལ། གཞི་ཆོས་གཞུང་དང་བསྟུན་ཏེ་དལ་བ་བརྒྱད་དང་འབྱོར་བ་བཅུ་རང་ཉིད་ལ་ཚང་ཡོད་མེད་ཀྱི་དབྱེ་ཞིབ་དེ་ཆོས་སྒྲུབ་པའི་ཐོག་མ་ཉིད་ནས་གཟུང་དགོས་པ་རེད། དེ་ཡང་དལ་བརྒྱད་བྲལ་བའི་སྒོ་ནས་བཞག་རྒྱུ་དང་། འབྱོར་བཅུ་ལྡན་པའི་སྒོ་ནས་འཇོག་པ་ཡིན། དལ་བརྒྱད་ཚང་བ་ལ་འབྱོར་བཅུ་ཚང་བས་མ་ཁྱབ་ཀྱང་། འབྱོར་བཅུ་ཚང་བ་ལ་དལ་བརྒྱད་ཚང་བས་ཁྱབ་པ་ཡིན། ད་རེས་ངན་སོང་གསུམ་ལ་མ་སྐྱེས་ཤིང་། ལྷ་ཚེ་རིང་པོ་ལའང་མ་སྐྱེས་ན་ཡང་། ཀླ་ཀློའི་ལྟ་བས་ཤེས་རྒྱུད་བརླམས་ཡོད་མེད་དང་། རང་རྒྱུད་ལོག་ལྟས་བསླད་ཡོད་མེད་དེ་ཚོ་ལ་རང་གིས་རང་ལ་དག་ཐེར་བྱེད་དགོས་སའི་གཞི་ཆེན་པོ་ཞིག་ཡིན་པ་རེད། དཀོན་མཆོག་གསུམ་ལ་དད་ལོག་དངོས་སུ་བྱས་མེད་རུང་། རྒྱུ་འབྲས་ཡིད་ཆེས་ཀྱི་ཡང་དག་པའི་དམིགས་རྣམ་གདིང་གི་ངེས་པ་འདི་རེད་བསམ་རྒྱུ་ཞིག་རྙེད་མེད་པ་ཡིན་ན། ལོག་ལྟ་ཅན་མ་ཡིན་པའི་གྲས་ལ་འཇོག་དཀའ་བ་ཡིན། གཞན་འབྱོར་གྱི་ཐད་ནས་ཕལ་ཆེར་ཚང་ནས་བསྡད་ཡོད་ཀྱང་། རང་འབྱོར་གྱི་ཐད་འདི་ནས། ལས་མཐའ་མ་ལོག་པ་དང་བསྟན་ལ་དད་པ་དག་ཚང་ཡོད་ཟེར་ན་ཡང་རང་རྒྱུགས་རང་ལ་འཕྲོད་དཀའ་སྟེ། དེ་ཅིའི་ཕྱིར་ཟེར་ན། བྱ་བ་མི་བདེན་སྤྱོད་པས་ཤེས། ཟེར་བ་ལྟར་དུ་རྣམ་གཡེང་འཇིག་རྟེན་གྱི་བྱ་བཞག་ལ་ཤོར་བའི་དབང་གིས། ཕྱི་བཤོལ་དེ་དམ་པའི་ལྷ་ཆོས་བསྒྲུབ་རྒྱུ་ལ་བྱས་ཏེ། དུས་ཚོད་བཟང་ས་ཡག་ས་ཡོད་ཚད་ཀྱིས་འཇིག་རྟེན་གྱི་བྱ་བཞག་བསྒྲུབས་ནས། རྒྱུ་ཟས་བེད་སྤྱོད་ཀྱི་ལྷག་མས་ཚོགས་བསགས་ཀྱི་ཁྲལ་སོད་ཅིག་བྱེད་རྒྱུ་བྱུང་དུས། དལ་འབྱོར་བཟང་བོ་ཞིག་མ་ཚང་བའི་དོ་ལོ་གཡུ་ལ་བརྫུས་པ་ལྟ་བུའི་མཚང་དེ་བུད་པ་ཡིན། དོན་མདོ་རྩ་བཤད་ན། ཆོས་པ་ངོ་མ་ཞིག་བྱེད་དགོས་དུས་སྔོན་འགྲོ་བློ་ལྡོག་རྣམ་བཞིའི་བློ་འབྱོངས་བའི་ཐོག་ནས་ལམ་ལོག་པ་ལས་ལྡོག་པའི་དཀོན་མཆོག་རིན་པོ་ཆེ་རྣམ་པ་གསུམ་ལ་སྐྱབས་སུ་འགྲོ་བའི་རྨང་གཞི་ཞོག ལམ་དམན་པ་ལས་ལྡོག་པའི་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད། དེ་ཡང་སྐྱེས་ལ་མི་ཉམས་པའི་སེམས་བསྐྱེད་རང་རྒྱུད་ན་ཡོད་པ་དང་། དེའི་སྟེང་དུ་མཚན་ཉིད་ལྡན་པའི་བླ་མ་ཞིག་བསྟེན་ནས། སྨིན་བྱེད་དབང་བཞིས་རྒྱུད་སྨིན། གྲོལ་བྱེད་གདམས་པས་རང་རྒྱུད་གྲོལ་ཏེ་ཟུང་འཇུག་སྐུ་བཞིའི་ཡེ་ཤེས་དེ་མྱུར་ལམ་ཟབ་མོའི་ཐབས་ལ་བརྟེན་ནས་ཚེ་འདིར་མངོན་དུ་བྱེད་པ་དེ་ལྟ་བུའི་བརྩོན་སེམས་དང་འདུ་ཤེས་མ་བྲལ་བར་དམ་པའི་ཆོས་ཤིག་བསྒྲུབ་ན་འགྲུབ་རྒྱུ་ཡོད་པ་དེའི་ཕྱིར། མགོ་ནས་གསང་སྔགས་ཟབ་མོའི་དམ་ཆོས་ཟབ་ཁྲིད་གསན་པའི་ཀུན་སློང་དང་ཀུན་སྤྱོད་ཀྱི་ཐད་ནས་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་། མ་སེམས་ཅན་ཐམས་ཅད་བྱང་ཆུབ་ཆེན་པོ་ལ་འགོད་རྒྱུ་དང་། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་། སྣང་སྤྱོད་དག་པ་རབ་འབྱམས་ཀྱི་འཁོར་ལོར་བསམ་པ་དང་མ་བྲལ་བས་གསན་རྒྱུ་དེ་ཐུགས་ཉམས་ལ་འཇོག་དགོས། འདིར་སྐབས་སུ་བབས་པ་གང་ཞིག་འཆད་ཉན་བྱ་བ། ཞབས་དཀར་བ་ཚོགས་དྲུག་རང་གྲོལ་གྱི་གསུང་། རྫོགས་པ་ཆེན་པོ་ཀ་དག་ཁྲེགས་ཆོད་དང་། ལྷུན་གྲུབ་ཐོད་རྒལ་གྱི་རིམ་པ་གཉིས་ལས། ཐོག་མར་ཁྲེགས་ཆོད་ལྟ་བའི་གླུ་དབྱངས་ཞེས་དོན་གྱིས་ཡོངས་སུ་གྲགས་པའི་མཚན་སྙན། མཁའ་ལྡིང་གཤོག་རླབས་ཞེས་བྱ་བ་དེ་ཉིད་འཆད་པའི་སྐབས་ལ་སླེབས་པ་ཡིན། འདི་འཆད་པ་ལ། བཤད་བྱའི་ཡན་ལག་བཤད་པ་དང་། བཤད་བྱ་དངོས་བཤད་པ་གཉིས། དེ་ལས་དང་པོ་བཤད་བྱའི་ཡན་ལག་བཤད་པ་ལ། བཤད་མཁན་སློབ་དཔོན་གྱི་བཤད་ལུགས། ཉན་མཁན་སློབ་མའི་ཉན་སྟངས། དེ་གཉིས་ཀྱིས་འཆད་ཉན་ཡང་དག་པ་ཞིག་ཅི་ལྟར་བྱེད་པའི་སྐོར་དང་གསུམ་ལ་འདུ། སློབ་དཔོན་ཟེར་ཚད་པོ་གཅིག་མཚུངས་ཡིན་པར་མ་ངེས། སློབ་དཔོན་ལ་རྣམ་གྲངས་ཡོད་དེ། སྔོན་གྱི་སློབ་དཔོན་སངས་རྒྱས་དང་དགྲ་བཅོམ་པ་པཎྜི་ཏ་རྣམས་ཡིན། ད་ལྟའི་རྗེས་འཇུག་དག་དེ་རྣམ་པའི་རྗེས་སུ་འཇུག་དགོས་པ་ཡིན་པས། སློབ་དཔོན་སངས་རྒྱས་ཀྱིས་ཆོས་གསུངས་དུས་སངས་རྒྱས་ལ་དབང་བཅུའི་དབང་དང་ལྡན་པ་དང་། སྟོབས་བཅུའི་སྟོབས་མངའ་ཞིང་སྤྱན་དང་མངོན་ཤེས་རྫུ་འཕྲུལ་ཐམས་ཅད་ལ་ཐོགས་པ་མེད་པ་ཡིན་པས། སྐུ་རྫུ་འཕྲུལ་གྱི་ཆོ་འཕྲུལ། ཐུགས་ཀུན་ཏུ་སྤྱོད་པའི་ཆོ་འཕྲུལ། གསུང་རྗེས་སུ་བསྟན་པའི་ཆོ་འཕྲུལ་གསུམ་གྱིས་གདུལ་བྱ་འཁོར་དུ་མ་འདུས་པ་བསྡུས་ཤིང་། འདུས་པ་ཡིད་ཆེས་པར་མཛད་དེ། གདུལ་བྱའི་བློ་དང་དབང་པོ་བག་ལ་ཉལ་དང་བཅས་པ་མཁྱེན་པའི་ཐོག་ནས་གང་ལ་གང་གིས་འདུལ་བའི་ཆོས་དེ་གསུང་དབྱངས་ཡན་ལག་དྲུག་ཅུས་གསུངས་པ་ཡིན། སློབ་དཔོན་དགྲ་བཅོམ་པ་ཞིག་ཡིན་ན་དག་པ་གསུམ་གྱི་སྒོ་ནས་འཆད་པ་ཡིན། དགྲ་བཅོམ་པ་ལ་གཞན་སེམས་མཁྱེན་པའི་མངོན་ཤེས་ཡོད། དག་པ་དང་པོ་དེ་ཉན་པ་པོའི་སྣོད་དག་པར་བྱེད་པ་དང་། དག་པ་གཉིས་པ་དེ་དགྲ་བཅོམ་པ་ཟེར་དུས་ཆགས་སོགས་ཉོན་མོངས་ཀྱི་སྒྲིབ་པ་ལས་གྲོལ་ཟིན་པ་ཡིན་པས། ཆགས་སོགས་ཉོན་མོངས་དང་མ་འདྲེས་པར་བཤད་པའི་ངག་ཚིག་དྲི་མེད་བརྡ་དག་སྙན་པའི་དབྱངས་ཀྱིས་འཆད། དག་པ་གསུམ་པ་དེ་མི་བརྗེད་པའི་དྲན་པའི་གཟུངས་ཀྱིས་ཡོངས་འཛིན་རྫོགས་པའི་སངས་རྒྱས་ཀྱིས་ཇི་ལྟར་གསུངས་པ་དེ་ལྟར་དུ་ཚིག་ལ་ལྷག་ཆད་དང་དོན་ལ་ནོར་འཁྲུལ་མེད་པར་བཤད་ཐུབ་པ་ཡིན། སློབ་དཔོན་པཎྜི་ཏས་ཆོས་ཇི་ལྟར་འཆད་པ་ཡིིན་ཟེར་ན། དམ་པའི་ཆོས་འདིའི་འབྱུང་ཁུངས་རྒྱ་གར་འཕགས་པའི་ཡུལ་ན་སྔར་སངས་རྒྱས་ཀྱི་བསྟན་པ་ཉི་མ་ཤར་བ་འདྲ་ཞིག་ཡོད་དུས་སུ་ཡོངས་སུ་གྲགས་པའི་གཙུག་ལག་ཁང་རྣམ་པ་གཉིས་ཡོད་པ་ལས། དཔལ་ན་ལེནྡྲའི་གཙུག་ལག་ཁང་ན་བཞུགས་པའི་པཎྜི་ཏ་ཚོས་འཆད་ཚུལ་ཞིག་དང་། བི་ཀྲ་མ་ཤཱི་ལའི་གཙུག་ལག་ཁང་ན་བཞུགས་པའི་པཎྜི་ཏ་རྣམས་ཀྱིས་འཆད་ཚུལ་ཞིག་དང་གཉིས་ཡོད་པ་ལས། འུ་གུ་དུས་ཐ་མའི་སོ་སོ་སྐྱེ་བོ་ཡིན་པས། བསྟན་པ་སྤྱི་དང་བྱེ་བྲག་ཉམས་དམའ་བའི་སྐབས་འདིར་བསྟན་པ་ལྷག་བསམ་བཅངས་པས་གསོ་བའི་ཆོས་བརྒྱུད་མཐུད་པའི་གང་ཟག་ཅིག་གིས། ལྷག་བསམ་དད་མོས་བཅངས་པ་གཙོར་བཟུང་གི་ཐོག་ནས། ཆོས་བཤད་དུས་བཤད་མཁན་སོ་སྐྱེ་ཐ་མལ་པ་ཡིན་ཡང་། བཤད་རྒྱུ་ཆོས་ཡིན་པའི་སྟབས་ཀྱིས་སྔར་གྱི་འཆད་སྲོལ་དང་སྒོ་མ་བསྟུན་ཐབས་མེད་ཡིན་པས། དཔལ་ན་ལེནྡྲའི་གཙུག་ལག་ཁང་གི་པཎྜི་ཏ་རྣམས་ཀྱི་འཆད་ཚུལ་གཙོ་བོར་བྱས་ནས་དེའི་རྗེས་སུ་འབྲངས་པའི་དབང་དུ་བཏང་ན། རྩིས་མགོ་ཡན་ལག་ལྔའི་སྒོ་ནས་བཤད་དགོས་པ་ཡིན། གང་འཆད་བྱའི་ཆོས་དང་མཛད་པ་པོ་སུས་མཛད་པ་ཡིན། ལུང་གང་ནས་བཏུས་པ་ཡིན། ཕྱོགས་གང་ལ་གཏོགས་པ་ཡིན། དབུ་ནས་ཞབས་སུ་བསྡུས་པའི་དོན་གང་ཡིན། དགོས་ཆེད་སུའི་དོན་ལ་མཛད། དེ་དག་གི་སྐོར་ནས་བཤད་དགོས་པས། དང་པོ་མཛད་པ་པོ་སུས་མཛད་ཀྱི་སྐོར་ནས། ཐོག་མར་ཞབས་དཀར་ཚང་གི་རྣམ་ཐར་རགས་བསྡུས་ཤིག་མ་ཤེས་པ་ཚོར་གསར་སྟོན་ཞིག་དང་། ཤེས་པ་ཚོར་གསལ་འདེབས་ཤིག་བྱེད་རྒྱུ་དེ་དགོས་དོན་རྒྱུ་མཚན་དང་འབྲེལ་བ་རེད། སྤྱིར་ན་དམ་པའི་སྐྱེས་བུའི་རྣམ་ཐར་དེ་ཐུན་མོང་ཐུན་མིན་གྱི་གདུལ་བྱའི་ངོ་ལ་ཕྱི་ནང་གསང་བ་གསུམ་དུ་ཕྱེས་ནས་བཤད་ལུགས་ཡོད་ཀྱང་། ཡོངས་གྲགས་ཐུན་མོང་གི་གདུལ་བྱའི་མཐུན་སྣང་ལ་གྲུབ་པ་ཕྱིའི་རྣམ་ཐར་ལ་ནང་འཇིག་རྟེན་ཕལ་བའི་བསམ་སྤྱོད་ལས་བརྒལ་བའི་ཐོས་བརྩོན་སྒྲུབ་པ་ཉམས་ལེན་མཛད་ཅིང་། སྒྲུབ་འབྲས་མངོན་དུ་གྱུར་བའི་རང་གཞན་དོན་གཉིས་སྒྲུབ་ཚུལ་དང་བཅས་ཏེ། འདིའི་མཛད་པ་པོའི་ཆེ་བའི་ཡོན་ཏན་མཚོན་པའི་སྟེང་ནས་དང་ཞིང་དད་པའི་མོས་པ་དང་འདུན་པས་འདིའི་གཞུང་དོན་འཆད་ཉན་ལ་འཇུག་ཐུབ་པའི་གནད་དེ་ཟིན་དགོས་པ་ཡིན། མཛད་པ་པོ་དེ་ལ་ཡིད་ཆེས་ཀྱི་དད་པ་ཡོད་པའི་སྟེང་དེ་ནས་གང་མཛད་པའི་ཆོས་ལ་མོས་གུས་རང་འཁྲུངས་ཀྱི་གདུང་བ་ཞིག་སྐྱེས་འོང་དུས། ཚིག་བརྒྱུད་མིང་དང་ཡི་གེར་ཤར་བ་དེ། དོན་བརྒྱུད་སྐྱེས་བུའི་སྙིང་ལ་ཞུགས་ནས། ཉམས་རྟོགས་མ་སྐྱེས་པ་གསར་དུ་སྐྱེས་ཤིང་། སྐྱེས་ཟིན་པ་དེ་གོང་འཕེལ་ལ་འགྱུར་ཐུབ་རྒྱུའི་རེ་བ་ཡོད་པ་ཡིན། དེ་ལྟ་ཡིན་ན་ཞབས་དཀར་ཚོགས་དྲུག་རང་གྲོལ་གྱི་སྐུ་འཁྲུངས་ཡུལ་ནི། བོད་གངས་ཅན་གྱི་ལྗོངས་འདིར་ཆོལ་ཁ་རྣམ་པ་གསུམ་དུ་ཕྱེས་པའི་མདོ་སྨད་རྟའི་ཆོལ་ཁའི་ད་ལྟ་རང་རེ་ཡོད་ས་དང་ས་ཁད་ཐག་ཉེ་བའི་རེབ་ཀོང་གསེར་སྨུག་ལྗོངས་ལ་འཁྲུངས་པ་རེད། དེ་ཡང་ཁམས་གསུམ་ཆོས་ཀྱི་རྒྱལ་པོ་རྒྱལ་བ་ཙོང་ཁ་པ་འཁྲུངས་ཡུལ་གྱི་ཙོང་ཁའི་སྐྱེས་རིའི་ལྷོ་ཕྱོགས་ས་ཆ། རེབ་ཀོང་གི་གྲུབ་པ་འཐོབ་པའི་གནས་བརྒྱད་དང་། ཤར་རྒྱལ་བ་སྐལ་ལྡན་རྒྱ་མཚོའི་སྒྲུབ་གནས་དག་དང་འབྲེལ་བའི། ས་མིང་ལ་ཞོ་འོང་ལ་ཁ་ཟེར་ཞིང་། ཞོ་འོང་ལ་ཁའི་སྡེ་བ་གཉན་རྒྱ་ཞེས་པའི་གྲོང་སྡེ་དེར། སྐྱེད་ཡབ་དེ་སུ་ཡིན་ན། སྔགས་འཆང་རྡོ་རྗེ་རྣམ་རྒྱལ་དང་། སྐྱེད་ཡུམ་དེ་དམ་གཙང་ཟེར་བའི་རུས་རྒྱུད་ལས་མཆེད་པ་མིང་ལ་བཀྲ་ཤིས་བརྩེགས་ཞེས་པ་བུ་ཚབ་བུ་མོས་བཟུང་བ་དེ་འདྲའི་རིགས་རུས་ཚ་རྒྱུད་ལ་འཁྲུངས་པ་ཞིག་ཡིན། འདི་བ་ཚང་བཀའ་མདོ་རྒྱུད་ཀྱི་ལུང་གིས་ཟིན་པའི་དམ་པའི་སྐྱེས་བུ་ཡིན་པ་རེད། མཚན་དང་དོན་གྱི་ཐད་ནས་ལུང་གིས་ཟིན་པའི་ལུང་མང་ཡང་། གཙོ་བོ་གཏེར་ཕྱོགས་ནས་གཏེར་སྟོན་བདུད་འདུལ་རྡོ་རྗེའི་བསྟན་པ་སྤྱི་ལུང་གི་ནང་ན། དཔལ་གྱི་རྡོ་རྗེ་ཤར་གྱི་ཕྱོགས་སུ་འཕུར། །རང་གྲོལ་མིང་ཅན་ཡང་དག་དོན་ལ་མཁས། །གསུངས་པ་ལ་སོགས་པས་ཁོང་གི་མཛད་འཕྲིན་གྱི་ཚིག་ཟིན་དང་བཅས་ཏེ་གསལ་བོར་བསྟན་ཡོད་པ་རེད། རང་རེའི་ཆོས་རྒྱུད་འདིའི་དབང་དུ་བཏང་ན་ཡང་གྲུབ་དབང་རྫོགས་ཆེན་པ་ཀུན་བཟང་གཞན་ཕན་གྱི་ལུང་བསྟན་ལ་སོགས་པར་ལན་གཅིག་མ་ཡིན་པར་འབྱུང་ཞིང་། ཞིབ་རྒྱས་སུ་ནི་ཞབས་དཀར་ཁོང་ཉིད་ཀྱི་གསུང་འབུམ་དེབ་དང་པོ་རུ། ཚིགས་བཅད་ལྷུག་གཉིས་ཀྱིས་སྐབས་བཅོ་ལྔ་ཙམ་གྱི་སྡེ་ཚན་དུ་ཕྱེས་ནས་གསུངས་ཡོད་པ་ལྟར་དུ་ཡིན་ལ། གཙོ་བོ་བླ་མ་བསྟེན་ཚུལ་དང་སྒྲུབ་པ་མཛད་ཚུལ། དེའི་འཕྲོར་གདུལ་བྱ་བསྐྱངས་ཚུལ་དེ་དག་ཡིན། དེའི་ནང་ནས་འཁྲུངས་ཡུལ་དུ་མ་ཟད་མཚོ་སྙིང་མ་ཧཱ་དེ་ཝ་དང་། ཨ་མྱེས་རྨ་ཆེན། བྲག་དཀར་སྤྲེལ་རྫོང་རྣམས་སུ་སྒྲུབ་པ་མཛད་ཚུལ་དང་། ད་དུང་དབུས་གཙང་དང་མངའ་རིས། ལ་དྭགས་ཀྱི་ཕྱོགས་ནས་སྒྲུབ་པ་དང་འགྲོ་དོན་མཛད་ཚུལ་ཡང་མང་ཞིང་། སྟོད་ན་གྲགས་ཆེ་བ་གངས་དཀར་ཏེ་སེ་སེང་གདོང་དཀར་མོ་སྐུའི་གནས། བར་ན་ཁུངས་བཙུན་པ་ལ་ཕྱིའི་སྟག་གདོང་ཁྲ་མོ་གསུང་གི་གནས། སྨད་ན་འགྲན་ཟླ་ཐམས་ཅད་དང་བྲལ་བ་ཙ་རི་ཕག་གདོང་ནག་མོ་ཐུགས་ཀྱི་གནས། ད་དུང་བལ་ཡུལ་དང་དབུས་གཙང་ནས་རང་དོན་ཚགས་ཚུད་ཀྱིས་སྒྲུབ་པ་མཛད། གཞན་དོན་ལྷུར་ལེན་གྱིས་བསྟན་པ་དང་སེམས་ཅན་ལ་སྨན་པའི་འཕྲིན་ལས་བསྐྱངས་ཚུལ་ཧ་ཅང་མང་པོ་ཞིབ་རྒྱས་ཀྱིས་མགུར་འབུམ་དང་འབྲེལ་ནས་གསུངས་ཡོད་པ་ལྟར་དུ་རེད། འདིའི་འཁྲུངས་ཚོད་དེ་དུས་རབས་བཅུ་བདུན་པའི་ནང་ཡིན་དགོས་ལ། ལྕགས་མོ་གླང་གི་ལོ་༼༡༧༨༡༽ལ་འཁྲུངས་གསུངས་པ་རེད། བོད་རབ་བྱུང་བཅུ་གསུམ་པའི་དྲུག་ཅུ་སྐོར་དེར་འཁྲུངས་པ་ཡིན། ད་ལོ་རབ་བྱུང་བཅུ་བདུན་པའི་ཤིང་མོ་ལུག་གི་ལོ་འདིའི་བར་ལ་ལོ་ངོ་མཐོང་སུམ་བརྒྱ་ལ་མ་ཚང་བ་དེ་རེད། ཁོང་གིས་ཕྱི་རབས་ཀྱི་གདུལ་བྱའི་འགྲོ་དོན་དང་གདུལ་བྱའི་ངོ་སྐལ་ལ་བཞག་པའི་གསུང་འབུམ་པོད་བཅུ་གྲངས་ཞིག་ད་ལྟ་དེབ་ཏུ་བསྒྲིགས་དུས་དེབ་ཕྲེང་བཅུ་གཅིག་ཙམ་ཞིག་ལ་བསྒྲིགས་པ་སྤྱི་དང་། ཁྱད་པར་དུ་དེའི་ནང་གི་ངོ་མཚར་སྤྲུལ་བའི་གླེགས་བམ། རྒྱལ་སྲས་སྤྲུལ་བའི་གླེགས་བམ། ཡ་མཚན་སྤྲུལ་བའི་གླེགས་བམ་ལ་སོགས་པ་སྤྲུལ་བའི་གླེགས་བམ་རྣམ་བརྒྱད་དང་། ཐེག་དགུའི་ཡང་རྩེ་རྫོགས་ཆེན་ཨ་ཏིའི་ལྟ་སྒོམ་སྤྱོད་གསུམ་དང་འབྲས་བུའི་མན་ངག་རྩལ་འདོན་མཛད་པ་ད་ལྟ་འཆད་བཞིན་པའི་ཆོས་ཚན་འདི་ཉིད་ཡིན། འདི་ཐུན་མིན་གྱི་ཁྱད་ཆོས་ཅན་ཡིན། མཛད་པ་པོ་སུས་མཛད་པའི་སྐོར་གྱི་རྣམ་ཐར་དང་འབྲེལ་ནས་བཤད་ཀྱིན་ཡོད་ན། ཁོང་ཚང་ཆུང་དུས་ཁྱིམ་ན་ཡོད་སྐབས་ཀྱི་མཚན་ལ་ངག་དབང་བཀྲ་ཤིས་ཞུ་བ་ཡིན། ཁྱིམ་ནས་ཁྱིམ་མེད་པར་རབ་ཏུ་བྱུང་དུས་ཀྱི་མཚན་ལ་བྱམས་པ་བཀྲ་ཤིས་ཞུ། གསང་སྔགས་དབང་སྐུར་གྱི་མཚན་ལ་ཚོགས་དྲུག་རང་གྲོལ་ཞུ། དེ་ལྟ་བུའི་མཛད་པ་པོ་དེ་ཉིད་ཀྱིས་གང་མཛད་པ་ལྟ་བའི་གླུ་དབྱངས་མཁའ་ལྡིང་གཤོག་རླབས་འདི་དང་ཐོད་རྒལ་གཉིས་ཀ་ལུང་གང་ལས་བཏུས་པ་ཡིན་ན། གངས་རིའི་ལྗོངས་འདིའི་རྫོགས་ཆེན་བསྟན་པའི་ཤིང་རྟ་བ་ཆེན་པོ་བསྟན་ལ་སྟོན་པ་གཉིས་པ་ལྟ་བུའི་རྒྱལ་བ་ཀློང་ཆེན་པ་ཡབ་སྲས་ཀྱི་གསུང་། ཀུན་ཏུ་བཟང་པོའི་ཐུགས་བཅུད་པད་འབྱུང་དང་བཱི་མ་ལའི་བཀའ་སྲོལ་ལས་བྱུང་བ་མཐའ་དག་དང་། ཁྱད་པར་དུ་མཁའ་ལྡིང་གཤོག་རླབས་འདི་གུ་རུ་རིན་པོ་ཆེའི་གཅེར་མཐོང་རང་གྲོལ་ལ་གཞི་མཛད་ནས། སྡེ་གསུམ་དགོངས་པ་གཅིག་ཏུ་འདུས་པའི་ཀློང་ཆེན་རྒྱལ་བ་ཡབ་སྲས་ཀྱི་མན་ངག་གིས་ཟུར་བརྒྱན་ཏེ་གསུངས་པ་ཞིག་རེད། འདི་ཕྱོགས་གང་དུ་གཏོགས་པ་ཡིན་ཟེར་ན། ཐེག་ཆེན་གསང་བ་སྔགས་ལ་ཐུན་མོང་རྒྱུད་སྡེ་བཞིར་ཕྱེས་པའི་སྔགས་བླ་མེད། ཐུན་མིན་དྲུག་ཏུ་དབྱེ་བའི་ནང་རྒྱུད་ཨ་ཏི་ཡོ་གར་གཏོགས་པ་དང་། འདིའི་དབུ་ནས་ཞབས་སུ་བསྡུས་པའི་དོན་གང་ཡིན་ན། རྫོགས་ཆེན་སེམས་ཀློང་མན་ངག་སྡེའི་ལྟ་བ་གཙོར་འདོན་གྱི་ཐོག་ནས་གཞི་ལམ་ལྟ་སྒོམ་སྤྱོད་འབྲས་ཀྱི་རྣམ་གཞག་ཀྱང་རྒྱས་པར་བཀྲལ་དུ་རུང་བའི་དོན་ཅན་ཞིག་རེད། འདི་དགོས་ཆེད་སུའི་དོན་དུ་མཛད་པ་ཡིན་ན། སྤྱིར་ཐེག་པ་འདིས་གདུལ་བར་བྱ་བའི་ལས་ཅན་སྤྱི་དང་། ཁྱད་པར་དུ་ཐོས་བསམ་སྦྱང་བ་རྒྱ་ཆེར་སྔོན་དུ་མ་སོང་བའི་རིགས་ཅན་ཡིན་ཡང་། ཚིག་གོ་སླ་ཞིང་དོན་ཡིད་ལ་འཇགས་བདེ་བ་མཆོག་དམན་ཀུན་གྱི་ཡི་གར་རྒྱུ་བ་ནི་འདིའི་གསུང་གི་ཁྱད་ཆོས་ཡིན། དེ་ལྟར་ན་རིག་པ་རང་སྣང་གི་བློ་ཅན་དང་སྣང་བ་ཡུལ་གྱི་བློ་ཅན་གྱི་རྫོགས་ཆེན་ཐུན་མོང་དང་ཐུན་མིན་གྱི་གདུལ་བྱ་ཐམས་ཅད་གྲོལ་བར་བྱེད་པའི་ཆོས་ཚུལ་ཞིག་ཡིན་ཞེས་བཤད་དགོས། དེ་ནི་ཆོས་བཤད་མཁན་སློབ་དཔོན་གྱིས་ཇི་ལྟར་འཆད་ཚུལ་དང་འབྲེལ་བའི་ཚུལ་ཡིན། ད་ཉན་མཁན་སློབ་མས་ཇི་ལྟར་ཉན་དགོས་པ་རེད་ཟེར་ན། སྤྱིར་ཆོས་ཉན་པའི་ཀུན་སློང་དང་ཀུན་སྤྱོད་སྔར་མགོ་ནས་ཀྱང་ཞུས་པ་ཡིན་ལ། ཁྱད་པར་དུ་ཐེག་ཆེན་བྱང་ཆུབ་མཆོག་ཏུ་ཐུགས་བསྐྱེད་པ་དང་མི་འབྲལ་བ། ཡང་སྒོས་ཐབས་ཀྱི་ཁྱད་པར་དུ་བྱས་པ་གསང་བ་སྔགས་ཀྱི་ཀུན་སློང་སྣོད་བཅུད་དག་པ་རབ་འབྱམས་ཞིང་དང་གཞལ་ཡས་ཁང་། གཟུགས་སྣང་སྐུ། སྒྲ་གྲགས་གསུང་། དྲན་རྟོག་ཐུགས། དེ་ཡང་རྣལ་འབྱོར་བ་གོམས་པ་ཅན་ཚོ་གང་སྣང་དགག་སྒྲུབ་མེད་པའི་ཐོག་ཏུ་ཡེངས་མེད་འཛིན་པ་དང་བྲལ་བའི་མ་འཁྲུལ་དོན་གྱི་གནས་ལུགས་ཀྱི་ངང་སྐྱོང་བ་དང་མི་འབྲལ་བར་གསན་དགོས་པ་དང་། སྤང་བླང་གི་ཀུན་སྤྱོད་ཀྱི་ཐད་དུ་དམ་པའི་ཆོས་གྲལ་ལ་ཞུགས་ནས་ཆོས་གསན་དུས། དད་ཅིང་གུས་པའི་ཡིད་ཀྱིས་རང་ཉིད་ནད་པ། ཆོས་ལ་སྨན་ལ་སོགས་པའི་འདུ་ཤེས་བཞི་བསྟེན། དེའི་སྟེང་ནས་སྣོད་ཀྱི་སྐྱོན་གསུམ། དྲི་མ་དྲུག མི་འཛིན་པ་ལྔ་ལ་སོགས་པ་སྤངས་ནས་གསན་དགོས། མདོར་ན་ཆོས་འཆད་མཁན་ཉན་མཁན་ཚང་མས་ཕ་རོལ་ཏུ་ཕྱིན་པ་དྲུག་ཚང་བའི་སྒོ་ནས་ཆོས་གསན་དགོས་པ་ནི་མཁྱེན་བཞིན་པ་ལྟར་དུ་རེད། དེ་ལྟ་བུའི་བཟང་པོའི་ཀུན་སློང་ཀུན་སྤྱོད་དང་ལྡན་པས་དཔོན་སློབ་གཉིས་ཀས་ཆོས་འཆད་ཉན་ཇི་ལྟར་བགྱི་བའི་ཚུལ་འདི་ལ། ཆིངས་ལྔའམ་གསུམ་གྱིས་བཅིངས་ནས་བཤད་དགོས་པ་དེ་སྤྱི་འགྲོས་རེད། ཆིངས་ལྔ་འདི་མཚན་དོན་དང་འབྲེལ་བའི་བཤད་ཚུལ་ཡོད་ཀྱང་། འདི་གཞུང་དོན་སྤྱི་དང་མི་འབྲེལ་བ་ཞིག་ཡིན་པ་མ་རེད། དེ་གཞུང་དོན་ལུས་དངོས་དང་སྦྲེལ་ན། རྣམ་བཤད་རིག་པའི་ལུང་། དགོས་པ་བསྡུས་པའི་དོན་བཅས་ལ་སོགས་པའི་བསྟན་དོན་ལྟར་དུ་འཆད་ན། ཆིངས་ལྔའི་དང་པོ་དགོས་དོན་ནི། སྤྱིར་སེམས་ཅན་ཐམས་ཅད་སངས་རྒྱས་ཀྱི་སྙིང་བོ་ཅན་དྲི་མ་འབྲལ་རུང་དང་ཡོན་ཏན་མངོན་དུ་འགྱུར་རུང་ཅན་ཡིན་པས། འཁྲུལ་བར་འཕྱན་པའི་འགྲོ་བ་མཐའ་དག་གིས་མ་འཁྲུལ་དོན་གྱི་གནས་ལུགས་རྟོགས་ནས་མངོན་འཚང་རྒྱ་བའི་དགོས་པ་དང་ཁྱད་པར་དུ་དབང་རྣོན་རྫོགས་ཆེན་གྱི་གདུལ་བྱས་ཚེ་འདིར་གྲོལ་བ་མངོན་འགྱུར་ཐོབ་པའི་དགོས་པ་དང་། གཉིས་པ་བསྡུས་དོན་ནི། འདིས་རྫོགས་ཆེན་གཞི་ལམ་འབྲས་གསུམ་ལྟ་སྒོམ་སྤྱོད་པའི་གནད་ཐམས་ཅད་བསྡུས་པ་དང་། གསུམ་པ་ཚིག་གི་དོན་ནི། རྗོད་བྱེད་མིང་དང་ཚིག་ཏུ་བསྡེབས་པས་བརྗོད་བྱ་རྫོགས་ཆེན་སྡེ་གསུམ་གྱི་མན་ངག་གོ་བདེར་བསྟན་པ་དང་། བཞི་བ་མཚམས་སྦྱོར་ནི། གོང་འོག་གི་བརྗོད་བྱ་རྗོད་བྱེད་དང་བཅས་པ་གོ་མ་འཁྲུགས་པར་བསྟན་པ་དང་། ལྔ་བ་བརྒལ་ལན་ནི། རྗོགས་ཆེན་ལྟ་བའི་ཡང་རྩེའི་སྒྲ་ཆེན་པོ་སེང་གེའི་ངར་སྐད་ལྟ་བུ་དེས་ལྟ་བ་དམན་པ་དང་ངན་པའི་རི་དྭགས་ཀྱི་ཚོགས་ཐམས་ཅད། དེའི་རྔམ་ཟིལ་གྱིས་རང་ཤུགས་ལ་སྤ་བཀོང་བར་བྱེད་པའོ། །གཞན་ཡང་ཆིངས་ཆེན་པོ་གསུམ་གྱི་ཐད་ནས་བཤད་ནའང་། དཀྱུས་ཀྱི་ས་གཅོད། ཚིག་གི་འབྲུ་མནན། སྐབས་ཀྱི་མཇུག་བསྡུ་བ་གསུམ་པོ་དེ་སྟག་མོའི་མཆོངས་སྟབས་དང་། རུས་སྦལ་གྱི་ནུར་འགྲོས་དང་། སེང་གེའི་འགྱིང་སྟབས་གསུམ་ལ་དཔེ་བཞག་ནས་བསྟན་པ་ཇི་བཞིན་དུ་འདིར་བཤད་པའི་ཚིག་ཚོགས་ལ་མཚོན་ན། ཨ་བྲའི་གོམ་པ་སྤོས་པ་འདྲ་བས་བསྟན་བྱའི་དོན་གྱི་ས་མ་ཆོད་པ་མིན་པས་དཀྱུས་ཀྱི་ས་གཅོད་པ་སྟག་མོ་མཆོང་སྟབས་ལྟ་བུ། ཡང་རགས་བཤད་སྤོམ་ཡུགས་སུ་བཤད་ནས་དོན་གྱི་གནད་བོར་བ་དེ་འདྲ་མ་ཡིན་པས་གཞུང་དོན་ཚིག་གི་འབྲུ་མནན་པ་རུས་སྦལ་གྱི་ནུར་འགྲོས་ལྟ་བུ། ཡང་སྐབས་དོན་གོང་འོག་གི་མཚམས་མི་འབྱེད་པ་ན་རེ་ནུར་རེ་འཐག་ངན་པས་གྲུ་གུ་འཐག་པ་འདྲ་འདྲ་ཞིག་མ་ཡིན་པར་བར་སྐབས་ཀྱི་མཇུག་བསྡུ་བ་སེང་གེའི་འགྱིང་སྟབས་ལྟ་བུ་སྟེ། དེ་ལྟ་བུའི་གཞན་འགྲན་མེད་པའི་ཉམས་དང་ལྡན་པ་ཡང་འདི་ལ་ཚང་། དེ་ལྟར་ན་འདིའི་བཤད་བྱ་དངོས་དེ་བཤད་པ་ལ། འདི་ཉིད་ནི་དེ་བཞིན་གཤེགས་པའི་ངེས་དོན་སྙིང་པོའི་བཀའ་ཡི་སྦས་དོན་ཡང་འབྱེད་གྱི་ཆོས་སྐོར་ཡིན་ལ། འོ་ན་དེ་བཞིན་གཤེགས་པའི་བཀའ་དེ་ཅི་འདྲ་ཞིག་ཡིན་པ་རེད་ཟེར་ན། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ་ལ་སོགས་པ། སྐྱོན་ཟད་ཡོན་ཏན་ཚོགས་པའི་རང་བཞིན་ཅན་ཞིག་ཡིན་པ་ལྟར་དུ། འདི་ཡང་ཐོག་མར་དགེ་བ་བར་དུ་དགེ་བ་ཐ་མར་དགེ་བའི་ཆིངས་ཆེན་པོ་གསུམ་གྱིས་བཅིངས་ནས་བཤད་དགོས་པ་ཡིན། དེའི་དང་པོ་ཐོག་མར་དགེ་བ་ཀླད་ཀྱི་དོན་ལ། མཚན་སྨོས་པ་དང་། མཆོད་པར་བརྗོད་པ། རྩོམ་པར་དམ་བཅའ་བ་དང་གསུམ་ཡོད་པ་ལས་དང་པོ་མཚན་སྨོས་པ་ནི། འོད་གསལ་རྫོགས་པ་ཆེན་པོའི་ཁྲེགས་ཆོད་ལྟ་བའི་གླུ་དབྱངས་ས་ལམ་མ་ལུས་མྱུར་དུ་བགྲོད་པའི་རྩལ་ལྡན་མཁའ་ལྡིང་གཤོག་རླབས་ཞེས་བྱ་བ་བཞུགས་སོ། །ཞེས་པའི་དབུའི་ཞལ་བྱང་འདིས་བསྟན་པ་རེད། མཚན་དང་དོན་གཉིས་ཀ་འབྲེལ་བའི་མཚན་གསལ་ཁ་ཅན་གྱི་དབུའི་ཞལ་བྱང་འདི། དབང་རྣོན་ཤེས་རབ་ཅན་ཞིག་གིས་འདིའི་མཚན་མཐོང་ཐོས་བྱུང་བ་ཙམ་གྱིས་གཞུང་དོན་ཡོངས་རྫོགས་གཏན་ལ་འབེབས་ཐུབ་པ་དང་། དབང་འབྲིང་རྣམ་འབྱེད་ཀྱི་ཤེས་རབ་མ་སྨིན་པ་ཞིག་གིས་ཀྱང་། ཐེག་པ་ཆེ་ཆུང་མདོ་དང་སྔགས་ཀྱི་ཕྱོགས་གང་ལ་གཏོགས་པ་ཡིན། ལམ་མྱུར་བུལ་ཇི་འདྲའི་གྲས་ཡིན་པ་ཧ་ལམ་ཤེས་རྒྱུ་དང་། ཤིན་ཏུ་དབང་རྟུལ་ཐ་མར་གྱུར་བ་ཞིག་ཡིན་རུང་། མིང་དོན་འབྲེལ་བ་འདིའི་སྟེང་ནས་གླེགས་བམ་དང་ཆོས་ཚན་བཙལ་བདེ་བའི་དགོས་པ་དེ་འདྲ་ཡོད་པ་རེད། རང་རེས་ཐེངས་འདིར་སྨིན་ཁྲིད་ཀྱི་ཚུལ་གྱིས་རྫོགས་ཆེན་དོན་ཁྲིད་ལག་ཁྲིད་དང་སྦྲེལ་ནས་བཤད་པའི་སྐབས་ཡིན་པས། འདི་ལུང་འདོན་པ་ལྟར་ཤར་འདོན་བྱས་པས་མི་ཆོག་ལ། མོས་ཁྲིད་བརྒྱབ་བྱུང་འཕངས་བྱུང་ཙམ་ཞིག་དང་བཤད་བྱུང་ཐོབ་བྱུང་ཞེས་པའི་མིང་ཡོད་དོན་མེད་ཀྱི་ས་ཁོངས་ཤིག་བཟུང་བས་ཀྱང་མི་ཆོག དེས་མ་ཆོག་ཚེ་ད་ཅི་འདྲ་བྱེད་དགོས་ཟེར་ན། སྔ་འགྱུར་བཀའ་བབས་ཀྱི་ཆུ་བོ་བཞི་དང་སྦྲེལ་ཏེ། ཚང་མ་ཁ་ཚང་བ་ཞིག་བྱས་ཏེ་བཤད་དགོས་པ་རེད། དེ་དགོས་ན་སྨིན་བྱེད་དབང་གིས་ཆུ་བོ་སྐུར་ཐབས་ངོ་སྤྲོད་དང་བཅས་པས་རྒྱུད་སྨིན་པར་བྱེད་དགོས་པས། ཁྲེགས་ཆོད་ཐོད་རྒལ་གཉིས་ཀྱི་དངོས་གཞིའི་ཁྲིད་ཀྱི་མཚམས་འདི་ནས། རྫོགས་ཆེན་སྙིང་ཐིག་གོང་མའི་དབང་བསྐུར་དགོས་པ་རེད། ལ་ལས་སྔར་དང་པོ་ཐོན་པའི་ཕྱི་ཉིན་ལ་དབང་བསྐུར་ཟིན་པ་མ་ཡིན་ནམ། ཉིན་རྟག་པར་དབང་རེ་ཡོད་པ་ཅི་ཞིག་ཡིན་སྙམ་ན། དབང་ཟེར་ཚད་གཅིག་ཡིན་པ་མ་རེད། རྣམ་གྲངས་མང་པོ་ཡོད། ཉིན་དེར་དང་པོར་ཁྲོམ་དབང་བྱས་ནས་བསྐུར་རྒྱུ་དེ་མདོ་སྔགས་རྒྱུད་སྡེ་ཐུན་མོང་དང་འབྲེལ་བའི་ཚེ་དབང་ཞིག་རེད། དེའི་རྗེས་ནས་དགེ་འདུན་པའི་སྡེ་ལ་གཅིག་བསྐུར་བ་དེ། བླ་མེད་ཐུན་མོང་གི་རྫོགས་རིམ་དང་འབྲེལ་བའི་རྩ་ཐིག་རླུང་གསུམ་གྱི་རྣལ་འབྱོར། ཁྱད་པར་དུ་ཐབས་ལམ་དང་གཙོ་ཆེར་འབྲེལ་བའི་ཞུ་བདེ་འབར་འཛག་གི་ཉམས་ལེན་བདེ་སྟོང་གི་ཡེ་ཤེས་སྐྱེད་པའི་སྨིན་བྱེད་དུ་མ་རྒྱུད་ཨ་ནུའི་བསྐྱེད་ཆོག་དང་འབྲེལ་བའི་ཡུམ་ཀ་བདེ་ཆེན་རྒྱལ་མོའི་དབང་བསྐུར་བ་རེད། ད་རྫོགས་པ་ཆེན་པོ་རྒྱུད་འབུམ་ཕྲག་དྲུག་ཅུ་རྩ་བཞིའི་དགོངས་དོན་གསང་ཆེན་བཅུ་བདུན་རྒྱུད་ཀྱི་ཉིང་བཅུད་ཟབ་པ་པོད་བཞིར་དྲིལ་ནས། ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་དམར་ཁྲིད་ཞབས་དཀར་བའི་གསུང་ལ་གཞིར་བྱས་ནས་རྫོགས་ཆེན་ཀློང་ཆེན་སྙིང་ཐིག་གི་ཁྲིད་ཆེན་གྱི་ལུགས་སུ་བྱས་ཏེ་བཤད་པའི་སྐབས་འདིར། དེའི་རང་ལམ་གྱི་དབང་སྟེ་དབང་བཞི་བ་ཚིག་དབང་རིན་པོ་ཆེ་ཞེས་པ་སྤྲོས་བཅས། སྤྲོས་མེད། ཤིན་ཏུ་སྤྲོས་མེད། རབ་ཏུ་སྤྲོས་མེད་ཅེས་པའི་འོག་མའི་དབང་བཀའ་ཐམས་ཅད་ཡར་ལྡན་དུ་རྫོགས་པའི་སྨིན་བྱེད་ཟབ་མོའི་དབང་འདི་མ་ཐོབ་པར། གྲོལ་བྱེད་ཁྲིད་ཀྱི་རིམ་པ་བཤད་རུང་བ་མ་ཡིན། དཔེར་ན་ཆང་བསྙལ་བའི་མི་ཡིས་ནས་ལ་ཕབས་མ་བཏབ་པར་ཆང་བསྙལ་མི་རུང་པ་དང་འདྲ་འདྲ་ཡིན། དབང་དེ་ཡང་སྔོན་གྱི་སྐབས་ཤིག་ལ་ཐོབ་མྱོང་བ་དང་། རྗེས་ནས་ཞུ་ཡོང་ཞེས་པའི་ཕྱིས་འཇོག་གིས་མི་ཆོག་པས། དང་པོར་དབང་བསྐུར་ནས། དབང་གི་དམ་ཚིག་མ་ཉམས་པའི་སྟེང་དུ་ཁྲིད་བཤད་ན་འབྲེལ་ཆགས་པར་མ་ཟད་དོན་དང་ལྡན་པ་ཞིག་ཡོང་བ་རེད། དེ་ལ་སྙིང་ཐིག་གི་མ་གཉིས་བུ་གཉིས་བཅས་ཡ་བཞིའི་དབང་དེ་ངས་སྐབས་རེར་ཆ་ཚང་བྱས་ཏེ་འདོན་གྱིན་ཡོད། སྐབས་རེར་འདོན་རེས་འདྲ་ཞིག་བྱེད་བཞིན་ཡོད། དེ་ལྟ་ན་ད་ལོ་ཀུན་ཀྱི་ཡང་ཏིག་ཟབ་མོ་ཡང་ཏིག་གི་དབང་དེ་བཏོན་ན་སྙམ་པ་ཡིན། སྨིན་བྱེད་དབང་བཞིའི་ཆུ་བོ་སྐུར་ཐབས་ངོ་སྤྲོད་དང་བཅས་པས་རྒྱུད་སྨིན་པར་བྱས་པའི་རྗེས་སུ། དཀྱུས་བཤད་གཞུང་གི་ཆུ་བོ་འགྲེལ་ཊིཀ་སྟོང་ཐུན་དང་བཅས་པ་དང་། ཉམས་ལེན་གདམས་པའི་ཆུ་བོ་དམར་ཁྲིད་གནད་བྱང་དང་བཅས་པ་གཉིས་སྦྲེལ་ནས། གང་སྨིན་པ་དེ་ཉིད་གྲོལ་བར་བྱེད་པའི་ཐབས་དང་ལྡན་པ། རྒྱུད་དང་ལུང་དང་མན་ངག་གསུམ་པོ་ལ་གཞི་བཅོལ་ནས། སེམས་ལས་འདས་པའི་ཆོས་ཉིད་དོན་གྱི་བཞུགས་ཚུལ་རྫོགས་ཆེན་ཡེ་གདལ་གཏིང་མཐའ་མེད་པའི་དོན་རང་ངོ་རང་ཤེས་སུ་ངོ་སྤྲད་ནས་འཕྲོད་པར་བྱེད་དགོས་པ་ཡིན། དེ་དང་མཉམ་དུ་ཕྱག་བཞེས་འཕྲིན་སྒྲུབ་ཀྱི་ཆུ་བོ་ལས་ཀྱི་ཁ་ཚར་དང་བཅས་པ་ཞེས་གསུངས་ཏེ། རྒྱུད་སྡེ་དང་སྒྲུབ་སྡེ་ཁོག་གཅིག་གི་འབྲེལ་བར་རང་ཤུགས་ཀྱིས་གྲུབ་ཡོང་། དེ་ལྟ་བུའི་རྒྱུད་སྒྲུབ་ཐབས་དང་འབྲེལ་མ་ནུས་པ་ཡིན་ན་དགོངས་པ་མི་འགྱུར་བའི་གཟེར་མེད་པ་ཡིན་པས། གཟེར་གཞན་གསུམ་པོའི་ལྟ་དགོངས་ཏིང་འཛིན་དང་བཅས་པ་དེ་གཞི་མེད་ཀྱི་འབྲས་བུ་རྨང་མེད་པའི་རྩིག་པ་མིང་ཙམ་ཞིག་ལ་འགྱུར་འགྲོ། དེ་ལྟར་ན་འདིའི་མཚན་དོན་བཀྲལ་བ་ལ་ཐོག་མར་འོད་གསལ་ཞེས་པའི་ཐ་སྙད་འདི། སྒྲ་འདྲ་བ་ཙམ་ཞིག་ནི་སྔགས་བླ་མེད་ཀྱི་ཐུན་མོང་གི་རྫོགས་རིམ་ཆོས་དྲུག་གི་སྐབས་སུ། ལམ་གྱི་སྙིང་པོ་འོད་གསལ་ཞེས་འབྱུང་ངོ་། །འོན་ཀྱང་འོད་གསལ་ལ་གཞི་ལམ་འབྲས་བུའི་འོད་གསལ། དཔེ་དང་དོན་གྱི་འོད་གསལ་སོགས་ཀྱི་ཁྱད་པར་ཡོད་པ་ཡིན། འོད་གསལ་ཟེར་རྒྱུ་དེ་བདེན་སྟོང་མེད་དགག་གི་ཆ། བདེ་གསལ་མི་རྟོག་པའི་ཉམས་ཞེན་འཛིན་པ་ཅན་ཞིག་མ་ཡིན་པར་སེམས་ཀྱི་ཆོས་ཉིད་རང་བྱུང་གི་ཡེ་ཤེས་ལ་འདི་ནས་འོད་གསལ་རྫོགས་པ་ཆེན་པོར་གསུངས་པ་རེད། དབྱིངས་རང་བཞིན་གྱིས་འོད་གསལ་བའི་ཆ་ནས་འོད་གསལ་དང་། སྟོང་རྐྱང་ཕྱང་ཆད་མིན་པའི་ཆ་ནས་རང་བྱུང་ཡེ་ཤེས་གསུངས་པ་རེད། འདི་ཡེ་ཤེས་ཐམས་ཅད་ཀྱི་འཆར་གཞི་ཡིན་པས་ན་གསལ་ལ་འཛིན་པ་མེད་པ། སྟོང་ལ་རང་བབས་གསལ་བ། སྟོང་བའི་རང་མདངས་འགགས་མེད། དཔེ་དོན་འབྲེལ་བའི་འོད་གསལ་ལ་གོ་དགོས་པ་ཡིན། དེའི་སྟབས་ཀྱིས་ཁྲེགས་ཆོད་ཀ་དག་སྟོང་བའི་འོད་གསལ་དང་། ཐོད་རྒལ་ལྷུན་གྲུབ་སྣང་བའི་འོད་གསལ་ཞེས་པའི་བརྡ་ཆད་དེ་བྱུང་བ་ཡིན། འདི་གནས་ལུགས་ལ་ཟློ་བའི་སྐབས་དང་སྣང་ཚུལ་ཤན་འབྱེད་པའི་སྐབས་སོ་སོར་ཕྱེས་ཏེ་བཤད་དགོས་པ་ནི་གནད་ཡིན། འོན་ཀྱང་དོན་ལ་གཅིག་དང་ཐ་དད། སྣང་དང་སྟོང་བ། གཟུང་དང་འཛིན་པའི་བཟང་ངན་སོགས་ཀྱི་སྤྲོས་མཐའ་ཐམས་ཅད་ལས་གྲོལ་བ། མཉམ་ཉིད་ཡེ་རྫོགས་ཆེན་པོ་གཅིག་གི་ངང་དུ་འཁོར་འདས་ཀྱི་ཆོས་ཀུན་རྫོགས་ཤིང་ཚང་ལ་འདུས་པས་ན་རྫོགས་པ་ཆེན་པོ་ཞེས་གསུངས་པ་ཡིན། འདི་ཆོས་ཐམས་ཅད་ཀྱི་གནས་ལུགས་མཐར་ཐུག་ཡིན། འདིའི་ངོ་བོ་ལ་དབྱེ་བསྡུ་མི་དམིགས་ན་ཡང་བརྟེན་ཆོས་ལ་ལྟོས་ཏེ་སྒྲས་བརྗོད་རིགས་ཀྱི་སྒོ་ནས་དབྱེ་ན། རྫོགས་ཆེན་གཞི་ལམ་འབྲས་གསུམ་གྱི་རྣམ་གཞག་ཡོད། འོན་ཀྱང་། འདི་མཐར་ཐུག་འབྲས་བུའི་གནས་སྐབས་ལ་འཁོར་བ་ཟད་ཙམ་གྱི་མྱང་འདས་ཤིག་མ་ཡིན་པར་གཞི་དུས་ནས་ཇི་ལྟར་ཡིན་པ་དེ་ལྟར་འབྲས་དུས་སུ་ཡང་ཡོན་ཏན་ཡེ་ལྡན་མངོན་དུ་གྱུར་པ་ཡིན། དཔེར་ན། རལ་གྲི་ཚད་ལྡན་ཞིག་ལ་གཅོད་པའི་རྣོ་ངར་གྱི་ཡོན་ཏན་ཡོད་ཀྱང་། ཤུབས་ནས་མ་ཕྱུང་ན་མི་མངོན་པ་དང་། མེ་ལོང་དྭངས་མོ་ལ་གཟུགས་བརྙན་ཤར་བའི་ནུས་པ་དང་ཡོན་ཏན་ཡོད་ཀྱང་སྒྲོམ་གྱི་ནང་ནས་མ་ཕུད་ན་མི་གསལ། དེ་བཞིན་དུ་ནོར་བུ་དག་མ་ལ་འོད་དང་འདོད་འབྱུང་གི་ཡོན་ཏན་ཡོད་ཀྱང་འདམ་རྙོགས་ཁྲོད་དུ་ཡོད་དུས་དེའི་ཡོན་ཏན་མངོན་མི་ཐུབ་པ་དང་། སྒྲིབ་བྱེད་སོ་སོ་དང་བྲལ་དུས་ཇི་བཞིན་དུ་སྣང་བ་ལྟར་དུ། འདིའི་བྲལ་གཞི་བྲལ་འབྲས་ཀྱི་སྟེང་ནས་བཤད་ན། བརྗོད་བྱ་དོན་གྱི་རྫོགས་ཆེན་ཟེར་རྒྱུ་དེ་དག་པ་ཉིས་ལྡན་དུ་བསྒྲུབས་པ་དང་ཡང་འགལ་བ་མིན་ལ། གདུལ་བྱ་དབང་རྣོན་ཡིན་ཡང་། དེའི་ནང་ན་རྣོ་རྟུལ་ལ་ཁྱད་པར་གཏན་ནས་མེད་པ་ཞིག་མིན་པའི་སྟབས་ཀྱིས། རྗོད་བྱེད་ཚིག་གི་རྫོགས་ཆེན་རྒྱུད་འབུམ་ཕྲག་དྲུག་ཅུ་རྩ་བཞིའི་ལུང་དང་མན་ངག་གིས་ཀྱང་དེ་དང་མཐུན་པའི་རྣམ་གྲངས་ཀྱིས་བསྡུས་ཏེ་བསྟན་པ་ལས་སེམས་ཀློང་མན་ངག་གི་སྡེ་གསུམ་གྱི་བསྟན་དོན་སྙིང་པོ་ཚུར་བསྡུས་ན། ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་ཉམས་ལེན་ལམ་གྱི་རིམ་པ། ཀ་ལྷུན་དབྱེར་མེད་པ་འདིར་འདུས་པ་ཡིན། དེ་ཡང་ཐ་སྙད་བརྡ་དང་ཚིག་གིས་བཤད་དགོས་པ་ཡིན་པས་ན་ངོ་བོ་གཅིག་ལ་ལྡོག་པས་མཚོན་ཚུལ་གྱིས་ཚིག་གི་རིམ་པས་རིམ་ཅན་དུ་བཤད་པ་ལས། འདི་ནས་དང་པོར་འཆད་བྱ་ཁྲེགས་ཆོད་ལྟ་བའི་གླུ་དབྱངས་ཡིན། གཟུང་འཛིན་གྱི་སྤྲོས་པ་ཐམས་ཅད་རྩྭ་དྲེས་མའི་ཐག་པ་མེས་འཚིག་པ་བཞིན་དུ་ཁྲེགས་ཀྱིས་སམ་ཐད་ཀར་ཆོད་པས་ན་ཁྲེགས་ཆོད་གསུངས་པ་རེད། དེ་ལྟ་བུའི་རིག་པ་རང་བྱུང་གི་ཡེ་ཤེས། སངས་རྒྱས་ཐམས་ཅད་ཀྱི་ཡེ་ཤེས་མཐར་ཐུག་གང་ཡིན་པ་དེ་ཉིད། རིག་པ་རང་སྣང་གི་བློ་ཅན་གྱི་རྣལ་འབྱོར་བའི་ངོར་སྣང་ཚུལ་ལ་དག་མ་དག་ཅི་ཞིག་སྣང་རུང་། ངོ་བོ་འཁོར་འདས་མིང་མེད་དུ་ཡེ་དག་ཡིན་པས་ན། ཐ་མལ་གྱི་སྣང་བ་འདི་དག་སྤུ་མ་བརྗེས་མདོག་མ་འགྱུར་བར་སངས་རྒྱས་སུ་གནས་པ་ཡིན་པས་ན། གང་སྣང་དག་པར་ཤར་བའི་ལྟ་དགོངས་མཐོན་པོ་ཅན་གྱི་རྣལ་འབྱོར་བས། རང་གི་དགོངས་ཉམས་དང་མཐུན་པའི་ལྟ་བའི་གླུ་དབྱངས། རིན་པོ་ཆེ་སྤུངས་པའི་རྒྱུད་ལ་སོགས་པར་འབྱུང་བའི་རྡོ་རྗེའི་གད་མོ་ཆེན་པོ་བཅུ་གཉིས་བསྒྲགས་པ་ལྟར། རྟོགས་པའི་གླུ། རྡོ་རྗེའི་དོ་ཧ་བཅད་ལྷུག་སྤེལ་མ་ལ་སོགས་པའི་ཚིག་དང་སྦྱར་ནས་གསུངས་སྲོལ་ཡོད་པ་རེད། དེ་ལས་འདི་ལྟ་བའི་གདེང་འགྲོས་དང་མཐུན་པའི་དབྱངས་ཀྱི་ངག་གདངས་སུ་འགུགས་པའི་གླུ་དང་མགུར་གང་བཏགས་ཀྱང་ཆོག དཔལ་ལྡན་ས་ར་ཧའི་ཉམས་སྣང་གི་རྟོགས་རྒྱུད་ཐམས་ཅད་རྡོ་རྗེའི་གླུའམ་དོ་ཧ་ཡིས་གསུངས་ཡོད་པ་རེད། འདི་བ་ཚང་གིས་ཀྱང་ཉིད་ཀྱི་གསུང་ལས། རྣལ་འབྱོར་ཚོགས་དྲུག་རང་གྲོལ་ང་། །སྐྱིད་སྡུག་གཉིས་ཀྱི་གང་བྱུང་ཡང་། །གླུ་དབྱངས་འཐེན་པ་རང་གཤིས་ཡིན། །ཅེས་གསུངས་པ་ཡིན། དེའི་ཕྱིར་ན། འདི་ལ་ཡང་ཁྲེགས་ཆོད་ལྟ་བའི་གླུ་དབྱངས་ཞེས་གསུངས་པ་དང་། ལམ་མ་ལུས་མྱུར་དུ་བགྲོད་པའི་རྩལ་ལྡན་མཁའ་ལྡིང་གཤོག་རླབས་བཞུགས་སོ་གསུངས་པ་ནི། རྫོགས་ཆེན་གཞི་ལམ་འབྲས་གསུམ་སྟེ། གཞི་ཀ་དག་དང་ལྷུན་གྲུབ། ལམ་ཁྲེགས་ཆོད་དང་ཐོད་རྒལ། འབྲས་བུ་སྐུ་དང་ཡེ་ཤེས་རྣམས་ཡིན་ལ། མ་ལུས་ཞེས་པའི་ཚིག་འདིས་གོང་གི་རྫོགས་པ་ཆེན་པོའི་མཚན་དོན་ཚིག་གི་བསྟན་དོན་ལྟར། དེ་ནི་མ་ཀིའི་ཉན་ཐོས་ཐེག་པ་ནས་ཡ་ཀའི་གསང་བ་སྔགས་ཀྱི་ཐེག་པའི་བར་གྱི་ཟབ་དང་རྒྱ་ཆེ་བ་རྒྱལ་བས་ཆོས་སྒོ་ཇི་སྙེད་པ་ཞིག་བསྟན་པའི་ཉིང་བཅུད། དབྱིངས་རིག་དབྱེར་མེད་རྫོགས་པ་ཆེན་པོའི་ངང་དུ་མ་འདུས་མ་ཚང་བ་མེད་ཅིང་། དེ་ཉིད་སྲིད་ཞི་ཀུན་ཁྱབ་ཀྱི་ཡེ་ཤེས་ཡིན་པས་ན་ཆེན་པོར་གསུངས་པ་དང་། དེ་ལྟ་བུའི་ལམ་མ་ལུས་པའི་གནད་འདུས་པ་མྱུར་དུ་བགྲོད་པའི་ལམ། མཐར་ཐུག་འཐོབ་བྱའི་གོ་འཕང་གཏད་ས་དང་ཐོན་སའི་དམིགས་འབེན་གཅིག་ཡིན་ནའང་། བགྲོད་བྱེད་ཕྱུགས་དང་གླང་པོ་ཉི་ཟླའི་འགྲོས་ཁྱད་སོགས་ཀྱི་དཔེ་ལྟར་ཡོད་པ་ཡིན་པས། ཚེ་གཅིག་ལོ་དང་ཟླ་བ་ལ་སོགས་པའི་དུས་ཐུང་ཐུང་ལ་བསྐལ་མང་ཐོག་མེད་ཀྱི་དུས་ནས་མ་རྙེད་པའི་བྱང་ཆུབ་ཀྱི་བདེ་ལམ་འབྲས་བུ་མཐར་ཐུག་ལ་སྙེག་ཐུབ་པ། སྒྲོན་མེ་གཅིག་གིས་ལོ་སྟོང་མུན་པ་བསལ། །ཞེས་པ་བཞིན་དུ་ལམ་མ་ལུས་མྱུར་དུ་བགྲོད་ཅེས་པ་འདིས་གཙོ་བོར་བྱེད་ལས་བསྟན་པ་རེད། འདིའི་འབྲེལ་སྒྲ་འདིས་དཔེ་དང་འབྲེལ་བའི་དཔེ་རྩལ་ལྡན་མཁའ་ལྡིང་གཤོག་རླབས་མཚུངས་ཆོས་སུ་སྦྱར་ནས་བསྟན་ཡོད་པ་ཡིན། མཁའ་ལྡིང་གསུངས་པ་ནི་སྟོབས་ལྡན་བྱ་རྒྱལ་ཁྱུང་ཆེན་ལ་གསུངས་པ་རེད། སྟོབས་ལྡན་བྱ་རྒྱལ་ཁྱུང་ཆེན་དེ་ནམ་མཁའ་ལ་ཡར་འཕུར་ནས་རྩལ་གྱིས་བྱ་ལམ་མཐོན་པོར་སྙོག་བཞིན་ཡོད་དུས། དེ་ལ་ཁྱད་ཆོས་བཞི་དང་ལྡན་པ་སྟེ། གཅིག་དེ་རྩལ་གྱིས་བྱ་ལམ་མཐོན་པོར་སྙེག་ཐུབ་པ་རེད། གཉིས་དེ་ས་གཞི་རི་ཀླུང་ཐམས་ཅད་ཁོབས་འོག་ཏུ་འདུས་པ་རེད། གསུམ་པ་དེ་དམའ་ས་གཞིའི་དངོས་པོ་ཡིན་ཡང་མ་འདྲེས་པར་རིག་ཐུབ། བཞི་བ་དེ་གཡང་རོང་བྲག་གཟར་ལ་ལྷུང་དོགས་ཀྱི་ཉམ་ང་ཡོད་པ་མ་རེད། དཔེ་དེ་བཞིན་དུ་རྫོགས་པ་ཆེན་པོ་ཐེག་རྩེའི་འབྲས་བུའི་ཐེག་པ་ལྟ་བ་མཐོ་ལ། ལྟ་དོན་སྒོམ་པར་དྲིལ་བའི་གནས་སྐབས་ན། ཐེག་བརྒྱད་འོག་མའི་འཕགས་ཆོས་ཞར་ལ་ཚང་ཞིང་། དེ་དང་མཉམ་དུ་ལྟ་བ་མཐོ་ཡང་སྤྱོད་པ་ཞིབ་མོ། ལས་འབྲས་ཕྲ་ཞིང་ཕྲ་བ་ནས་ཞིབ་པའི་སྤྱོད་པ་དག་པའི་ཐོག་ཏུ། རྫོགས་ཆེན་རིག་པ་རང་བྱུང་གི་ཡེ་ཤེས་བཅོས་བསླད་རེ་དོགས་བཟོ་བཅོས་ཀྱི་གཟེབ་དང་བྲལ་བའི་རྗེན་ལ་བུད་དུས། གོལ་དོགས་དང་ནོར་དོགས། ཤོར་དོགས་ཀྱི་འཕྲང་ཡོད་པ་མ་རེད། ཀུན་བཟང་ས་ལ་མི་བཟང་གཅིག་མེད་པས། །བཟང་ངན་མེད་པར་ཀུན་ཏུ་བཟང་པོར་གཅིག །ཅེས་གསུངས་པ་དང་འདྲ་བ་ཡིན། དེ་ལྟ་བུའི་རྒྱུད་ཀྱི་དགོངས་དོན། ལུང་གི་མདོར་རྩ། མན་ངག་གི་སྙིང་བོར་དྲིལ་བའི་ཡི་གེ་མཁའ་ལྡིང་གཤོག་རླབས་ཞེས་བྱ་བ་འདི་ན་བཞུགས་སོ། །ཞེས་བརྗོད་བྱ་དོན་གྱི་ལུས་རྣམ་གཞག་མཚན་གྱིས་གསལ་བར་བསྟན་པའི་མན་ངག་གི་མཚན་བརྡ་བྱང་རྟགས་ཀྱི་རི་མོ་གཞན་དང་མི་ནོར་བའི་མཚན་མར་བཀོད་པ་རེད། དེས་འུ་ཚོས་མཚན་སྨོས་པ་དང་མཚན་དོན་འགྲེལ་བ་སོང་ནས། ད་མཆོད་པར་བརྗོད་པ་ལ་ཐོག་མར། ཕྱག་མཛད་པ་འབྱུང་རྒྱུ་འདི་མདོ་རྒྱུད་སྤྱི་བབས་དང་བསྟུན་ཏེ། ན་མོ་གུ་རུ་བྷྱཿ ཞེས་བླ་མ་ལ་ཕྱག་འཚལ་བ་ཡིན། བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །བསྐལ་བ་སྟོང་གི་སངས་རྒྱས་ཀྱང་། །བླ་མ་དག་ལ་བརྟེན་ནས་བྱུང་། །གསུངས་པ་ལྟར་དུ་བྱིན་རླབས་ཀྱི་རྩ་བ་བླ་མ། དེ་ཡང་མཚོན་བྱ་དོན་གྱི་བླ་མ་སེམས་ཉིད་ཆོས་སྐུའི་ངོ་བོ་དང་དབྱེར་མ་མཆིས་པ་དེ་ཉིད་ལ་རང་ངོ་རང་གིས་ཤེས་པའི་ལྟ་བའི་དད་ཕྱག་འཚལ་བ་རེད། མ་ཚད་འདིར་སཾ་སྐྲི་ཏའི་སྐད་ཀྱིས་སྨོས་པ་ཙམ་ཡང་ཆོས་ཁུངས་བཙུན་ཞིང་བྱིན་རླབས་འཇུག་པའི་དགོས་དབང་། མདོ་དང་རྒྱུད་སྡེ། བཀའ་དང་བསྟན་བཅོས་སྤྱིའི་འགྱུར་ཕྱག་དང་བསྟུན་ཞིང་མཐུན་པ་ཞིག་ཀྱང་ཡིན། དེ་ནས་ཚིག་ཤོ་ལོ་ཀ་གསུམ་གྱིས་ཁོང་ཉིད་ཀྱི་བླ་མ་གསུམ་གྱི་མཚན་སྒྲ་དང་སྦྱར་ཏེ་མཆོད་པར་བརྗོད་པ་ལས་དང་པོ་ནི། ཀུན་གསལ་མཁྱེན་བརྩེའི་རྟ་བདུན་དཀྱིལ་འཁོར་ལས། །ཚད་མེད་ཐུགས་རྗེའི་འོད་ཟེར་རབ་སྤྲོས་ནས། །ཁམས་གསུམ་འགྲོ་བའི་མ་རིག་མུན་པ་ཀུན། །དུས་གཅིག་སེལ་མཛད་ཆོས་ཀྱི་རྒྱལ་པོར་འདུད། །ཅེས་གསུངས་ཏེ། འདིའི་མཆོད་བརྗོད་ཀྱི་ཡུལ་འདི་ཞབས་དཀར་ཚང་གི་ཐུན་མོང་མ་ཡིན་པའི་རྩ་བའི་བླ་མ། ས་ཆ་སོག་པོའི་ཡུལ་གྱི་དེའི་སྐབས་སུ་སྟོབས་ཀྱིས་མངའ་དབང་བསྒྱུར་བ་གསུངས་ཏེ་ཆེ་བསྟོད་མཛད་པའི་དཔོན་ཚང་ཏཱ་ལེ་ཏེའི་ཆིང་ཝང་ངག་དབང་དར་རྒྱས་དཔལ་བཟང་པོ་ཆོས་རྒྱལ་ངག་གི་དབང་པོ་དེ་ཉིད་ཡིན། འདི་གཟུགས་ཅན་གྱི་རྒྱན་དུ་དྲངས་ཏེ། ཁོང་གི་དགོངས་ཀློང་ཀུན་གསལ་ནམ་མཁའི་དབྱིངས་ནས་མཁྱེན་དང་བརྩེ་བའི་ཉི་མ་ཤར་ཏེ། ཚད་མེད་པའི་ཐུགས་རྗེ་འོད་ཟེར་མཐའ་ཡས་མུ་མེད་ལ་རབ་ཏུའམ་འགོག་པ་མེད་པར་སྤྲོས་ནས། སྣང་དང་མི་སྣང་ཕྱེད་སྣང་གི་ཁམས་གསུམ་མཐའ་ཀླས་འགྲོ་བའི་ཚོགས་པ་དེ་རྒྱལ་བའི་ཡེ་ཤེས་ཀྱི་འཕྲིན་ལས་ཆེན་པོས་མ་བཏང་ཞིང་། སྲིད་རྩ་མ་རིག་གི་གདོན་ཆེན་དེ་ཐུགས་རྗེ་རིག་པའི་ཡེ་ཤེས་གཅིག་གི་སྣང་བ་ཆེན་པོས་དངོས་བརྒྱུད་ཤུགས་གསུམ་ནས་སེལ་བར་མཛད་པ། ཡོན་ཏན་སངས་རྒྱས་ཀུན་དང་མཉམ་ན་ཡང་། །བཀའ་དྲིན་སངས་རྒྱས་ལས་ཀྱང་ལྷག་པའི་མགོན། །གསུངས་པ་བཞིན་དུ། ཐོག་མར་བུམ་དབང་དང་འབྲེལ་བའི་བསྐྱེད་རིམ་ལྷའི་ཁྲིད། དེ་ནས་གསང་དབང་དང་འབྲེལ་བའི་རྩ་རླུང་གཏུམ་མོའི་ཁྲིད། དེ་རྗེས་ཤེས་རབ་ཡེ་ཤེས་ཀྱི་དབང་དང་འབྲེལ་བའི་བདེ་སྟོང་ཕྱག་རྒྱའི་ཁྲིད། དེའི་མཐར་ཚིག་དབང་རིན་པོ་ཆེ་དང་འབྲེལ་བའི་ཁྲེགས་ཆོད་ཐོད་རྒལ་གྱི་ཁྲིད། རྗེས་གནང་བཀའ་སྲུང་དང་བཅས་པའི་དབང་ཆ་ཚང་གནང་བར་མ་ཟད། དུས་རྒྱུན་ཉིན་རེ་བཞིན་དུ་དབང་བཞི་དང་འབྲེལ་བའི་ཉམས་ལེན་གྱི་གནད་དང་གདམས་པ་བུམ་པ་གང་བྱོའི་ཚུལ་དུ་གནང་བའི་བཀའ་དྲིན་སུམ་ལྡན་གྱི་བླ་མ་ཡིན་ཚུལ་རྣམ་ཐར་ནང་དུ་འཁོད་ཡོད་པ་ལྟར་རེད། དེའི་ཕྱིར་ན་དེ་ཉིད་ལ་གུས་འདུད་དང་བཅས་པའི་ཕྱག་དང་པོས་བཏུད་ཅིང་མཆོད་པར་བརྗོད་ནས། མཆོད་བརྗོད་གཉིས་པ་སྔགས་འཆང་རྡོ་རྗེ་ལ་འདུད་ཅེས་པ་འདི་ནི། རིགས་ཡབ་མཚོ་འདུའི་མཁན་ཆེན་སྔགས་འཆང་རྡོ་རྗེ་རྣམ་རྒྱལ་ཡིན་པ་སྟེ། དེ་ཡང་སྐུ་གསུང་ཐུགས་ཀྱི་རྣམ་པར་འཕྲུལ་བ་སྒོ་གསུམ་གྱི་བྱེད་པ་ཅན་ལ་མཐུན་སྣང་དུ་སྐུ་གསུང་ཐུགས་སྐྱེད་བྱེད་ཀྱི་ཡབ་ལ་བརྟེན་ནས་སྐུ་གསུང་ཐུགས་ཀྱི་རྨད་བྱུང་ཁྱད་འཕགས་ཀྱི་ཡོན་ཏན་གྲུབ་པ་ཡིན་པས་ན། ཐུགས་ཀྱི་ཡབ་ཆོས་རྒྱལ་ངག་གི་དབང་པོ་དང་། སྐུའི་ཡབ་སྔགས་འཆང་རྡོ་རྗེ་རྣམ་རྒྱལ་ཡིན་པས། གཉིས་པ་དེ་ལ་མཆོད་པར་བརྗོད་ནི། སྟོང་གསལ་ཆོས་སྐུའི་ལྷ་ལམ་ཡངས་པའི་ངོས། །བྱམས་དང་བརྩེ་བའི་ཆུ་འཛིན་རབ་འཁྲིགས་ནས། །སྐལ་བར་ལྡན་པའི་གདུལ་བྱའི་འཛིན་མ་ལ། །ཆོས་ཆར་འབེབས་མཁས་སྔགས་འཆང་རྡོ་རྗེར་འདུད། །ཅེས་གསུངས་ཏེ། འདི་ཆོས་སྐུའི་མཁའ་ལམ་དུ་ལོངས་སྐུའི་མཁྱེན་བརྩེའི་སྤྲིན་ཆེན་འཁྲིགས་ཏེ། གང་འདུལ་སྐལ་ལྡན་གྱི་འགྲོ་ངོ་ལ། གང་འདོད་ཆོས་ཀྱི་གྲུ་ཆར་གྱིས་ཚིམས་པར་མཛད་མཁས་པ་གང་དེའི་ཞེས་མཆོད་པར་བརྗོད་པའོ། །གསུམ་པ་འཇམ་དབྱངས་རྒྱ་མཚོ་ལ་མཆོད་པར་བརྗོད་པ་སྟེ། ཁོང་ནི་ཞབས་དཀར་ཚང་འཁྲུངས་སའི་ཡུལ་ཕྱོགས་དེའི་རྩ་བའི་བླ་མ་ཀུན་གྱིས་གཙུག་གི་ནོར་བུར་བཀུར་ས། ཞབས་དཀར་ཚང་ལའང་ཆོས་དང་གདམས་ངག་གི་གསུང་གི་བདུད་རྩིས་བསྐྱངས་ནས་གསུང་སྲས་སུ་སྐྱེད་སྲིང་བར་གནང་བའི་བཀའ་དྲིན་ཅན་ཡིན་པས་ན། མཆོད་བརྗོད་གསུམ་པ་ནི། ལྟ་བའི་གྲུ་དབུས་ལྷག་བསམ་དར་ཆེན་འཕྱར། །བརྩོན་འགྲུས་རླུང་གིས་བསྐྱོད་ནས་སྲིད་མཚོ་རུ། །བྱིངས་པའི་འགྲོ་རྣམས་སྐུ་གསུམ་ནོར་བུའི་གླིང་། །འགོད་མཛད་དེད་དཔོན་འཇམ་དབྱངས་རྒྱ་མཚོར་འདུད། །ཅེས་གསུངས་ཏེ། འདི་སྲིད་པའི་རྒྱ་མཚོ་ཕ་མཐའ་ཡས་པ་ལས། ལྟ་བ་གསང་སྔགས་ཀྱི་ལྟ་དགོངས་མཐོན་པོ་ལ། སྤྱོད་པ་རྒྱལ་བའི་སྲས་ཀྱི་ཕྱིན་དྲུག་གི་མཛད་པ། ལྷག་བསམ་བྱང་ཆུབ་སེམས་ཀྱི་དགོངས་སྤྱོད་དང་མི་འབྲལ་བཞིན་དུ་ཐབས་དང་ཤེས་རབ་སྣང་བཅས་སྣང་མེད་ཀྱི་ཚོགས་གཉིས་གྲུ་གཟིངས་བརྩོན་པའི་རླུང་གིས་བསྐུལ་ཏེ། འཁོར་བ་སྡུག་བསྔལ་གྱི་སྲིད་མཚོར་བྱིངས་ཤིང་ནུབ་པའི་འགྲོ་བ་རྣམས། རྣམ་མཁྱེན་ཐར་བའི་འགྲམ་ངོགས་སྐུ་གསུམ་ནོར་བུའི་གླིང་དུ་འགོད་ཅིང་ཁྲིད་པར་མཛད་པའི་དོན་ཅན་གྱི་མཆོད་པར་བརྗོད་པ་ཞིག་སྟེ། འདིའི་མཆོད་བརྗོད་ཚན་པ་གསུམ་འདི། ཉི་མ། སྦྲང་ཆར། གྲུ་ཆེན་གསུམ་གྱི་གཟུགས་སུ་བཀོད་དེ་མཁྱེན་བརྩེ་ནུས་གསུམ་དང་། སྐུ་གསུང་ཐུགས་གསུམ་སྦྱར་ནས་གསུངས་པའོ། །དེས་མཆོད་བརྗོད་བསྟན་ནས། གསུམ་པ་རྩོམ་པར་དམ་བཅའ་བ་ནི། དེ་གསུམ་མཁྱེན་བརྩེ་རྟ་བདུན་དཀྱིལ་འཁོར་ལས། །འཕྲོས་པའི་བྱིན་རླབས་ནུས་མཐུའི་ཚ་བའི་ཟེར། །སྐལ་ལྡན་བྱ་བཏང་པད་དཀར་བདག་ལ་ཕོག །རིག་པའི་ཁ་ཕྱེ་ཉམས་རྟོགས་འདབ་སྟོང་བཞད། །བདག་བློའི་གེ་སར་ལྟོ་བར་ལེགས་འཁྱིལ་བའི། །ལྟ་བའི་གླུ་དབྱངས་མྱོང་གྲོལ་བདུད་རྩིའི་བཅུད། །སྐལ་ལྡན་སློབ་མ་རྐང་དྲུག་ཚོགས་ལ་འབུལ། །ངོམས་པ་མེད་པར་གུས་པའི་ཡིད་ཀྱིས་རོལ། །ཅེས་གསུངས་པ་སྟེ། གོང་ནས་མཆོད་པར་བརྗོད་མ་ཐག་པའི་བླ་མ་དེ་གསུམ་གྱི་མཁྱེན་དང་བརྩེ་བའི་ཡེ་ཤེས་ཉི་མའི་དཀྱིལ་འཁོར་ལྟ་བུ་ལས། བྱིན་རླབས་ནུས་པའི་ཚ་དྲོད་མ་ཉམས་པའི་འོད་ཟེར་འཕྲོས་པ་དེ། ཁོང་སྐལ་བ་བཟང་པོ་དང་ལྡན་པའི་ལས་ཅན་བྱ་བྲལ་བ་པད་མ་དཀར་པོ་ལྟ་བུའི་བདག་ལ་ཕོག་ནས། ཉི་འོད་ཀྱིས་པད་མོ་བཞད་པ་ལྟར་དུ་ཁོང་གི་རིག་པའི་ཁ་ཕྱེས་ནས་ཉམས་དང་རྟོགས་པའི་ཡོན་ཏན་གྱི་འདབ་མ་སྟོང་ཕྲག་བཞད་ཅིང་བཀྲ་བར་གྱུར་ཏོ། །འདིའི་རིག་པ་ཞེས་པ་ནི་རང་བྱུང་རིག་པའི་ཡེ་ཤེས་ཀྱི་རྩལ་ཁ་ཕྱེ་བའམ་དེ་ཉིད་སྒྲིབ་བྱེད་དང་བྲལ་ནས་མངོན་དུ་གྱུར་བ་ལ་གོ་དགོས་པ་ཡིན། རང་དོན་སྒྲུབ་པ་ཉམས་ལེན་གྱི་སྟོབས་ཀྱིས་ཉམས་རྟོགས་ཀྱི་ཡོན་ཏན་ནང་ནས་རྒྱས་ཏེ་ཚགས་སུ་ཚུད་པའི་རྗེས་འདིར། གཞན་དོན་འཕྲིན་ལས་ཀྱི་མཛད་པས་གདུལ་བྱའི་རེ་འདོད་སྐོང་བ་ལ། ཁོང་གི་བདག་བློ་པདྨའི་ཟེའུ་འབྲུའི་ལྟོ་བའི་སྙིང་བཅུད་དུ་ལེགས་པར་འཁྱིལ་ཞིང་ཐུགས་རྒྱུད་བཀང་བའི་མཛོད་དེ་ལས་ལྟ་བའི་གླུ་དབྱངས་གཙོར་འདོན་བྱས་ཤིང་། སྒོམ་པ་སྤྱོད་འབྲས་དང་བཅས་པའི་འཁོར་བའི་གཅོང་ནད་འཇོམས་པའི་འཆི་སོས་བདུད་རྩིའི་བཅུད་སྦྲང་རྩི་ལྟ་བུ་དེ། སྐལ་ལྡན་སློབ་མ་རྐང་དྲུག་གི་བུང་བ་ལྟ་བུ་ཁོང་ལ་ལྟོས་པའི་ལས་ཅན་གྱི་གདུལ་བྱ་བྱུང་དང་འབྱུང་འགྱུར་ཐམས་ཅད་ལ། རང་རང་དང་མཐུན་པའི་བགོ་སྐལ་དུ་འབུལ་བ་ཡིན་པས། ཚིམས་པར་གྱིས་ལ་ངོམས་པ་མེད་པར་གུས་དང་དད་པའི་བསམ་སྤྱོད་ཀྱིས་འདི་ལ་རོལ། ཞེས་རྩོམ་པར་དམ་བཅའ་བ་སྐལ་ལྡན་ཆོས་ལ་སྐུལ་བའི་གཏམ་དང་བཅས་བསྟན་པའོ། །འདིའི་ཤུགས་ལ་བརྒྱུད་པ་གསུམ་གྱི་ཆོས་ཀྱི་འབྱུང་ཁུངས་བསྟན་པ་སྤྱི་དང་བྱེ་བྲག་གི་བབས་ཚུལ་ཡང་གོ་བར་བྱ་བ་ཤུགས་ལ་བསྟན་པ་ཡིན། དེས་ཐོག་མར་དགེ་བ་ཀླད་ཀྱི་དོན་སོང་ནས། གཉིས་པ་བར་དུ་དགེ་བ་གཞུང་དོན་ལ། ལེ་ཚན་ཉི་ཤུ་རྩ་གསུམ་གྱིས་ལྟ་བ་སྒོམ་པ་སྤྱོད་པ་སྟེ། དེ་ཡང་གཞི་ལམ་འབྲས་གསུམ་གྱི་རྣམ་གཞག་གི་འགྲོས་དང་། རྫོགས་པ་ཆེན་པོའི་གདུལ་བྱ་དབང་པོ་རྣོ་རྟུལ་འབྲིང་གསུམ་དང་མཐུན་པའི་སེམས་ཀློང་མན་ངག་སྡེའི་དགོངས་པ་བསྟར་ཆགས་དང་འདྲེས་མའི་ཚུལ་གྱིས། གཙོ་བོར་ཐོས་བསམ་སྦྱོང་པ་རྒྱ་ཆེར་སྔོན་དུ་མ་སོང་བའི་གང་ཟག་གི་བློ་དང་འཚམས་པར་གསེབ་ཚག་གི་སྒོ་ནས་བསྟན་པ་ལས། དང་པོ་དེ་གཞི་རྒྱུད་བདེ་གཤེགས་སྙིང་པོ་ཡེ་ནས་རང་ལ་གནས་པའི་ཚུལ་བསྟན་པ་ནི། ཨེ་མ་ཧོ། བྱ་བཏང་གུ་ཡངས་ཡན་པ་བློ་བདེ་ངས། །ས་ལམ་མ་ལུས་མྱུར་དུ་བགྲོད་བྱེད་པའི། །ལྟ་བའི་གླུ་དབྱངས་མཁའ་ལྡིང་གཤོག་རླབས་ལེན། །སྐལ་ལྡན་སེམས་ཀྱི་བུ་རྣམས་ལྷན་ནེར་ཉོན། །ཞེས་མཚམས་སྦྱར་བ་སྟེ། འཇིག་རྟེན་འཁོར་བའི་བྲེལ་ཟིང་གི་བྱ་བ་བཏང་བས་གུ་ཡངས་པ། གཏད་མེད་རྒྱ་ཡན་གྱི་རིག་པ་ལ་རང་བྱན་ཆུད་པས་ན་བློ་བདེ་བ། རྣལ་འབྱོར་བརྟུལ་ཞུགས་སྤྱོད་པའི་གདེང་དང་ལྡན་པ་ཁོང་གིས། རྫོགས་པ་ཆེན་པོའི་ལྟ་བ་བསྟན་པའི་ཐོག་མར་ཨེ་མ་ཧོ་ཞེས་ངོ་མཚར་བའི་ཚིག་གིས་མགོ་བླངས་ནས། ཅིའི་ཕྱིར་ངོ་མཚར་བ་ནི་གཤམ་ནས་འབྱུང་མ་རག་པ་ངོ་མཚར་རྣམ་པ་བདུན་གྱིས་ངོ་མཚར་བར་བསྟན་པ་སྟེ། འཁོར་འདས་གཉིས་ལ་འབྲུག་གི་སྒྲ་བཞིན་དུ། །ཡོངས་གྲགས་སངས་རྒྱས་ཟེར་བའི་སྒྲ་བོ་ཆེ། །ཞེས་དེས་གང་ལ་ངོ་མཚར་བའི་གཞི་བསྟན་པ་སྟེ། སངས་རྒྱས་ནི། མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ཡང་བློ་རྒྱས་ཕྱིར། །བློ་གྲོས་པད་མོའི་འདབ་ལྟར་རྒྱས། །ཞེས་གསུངས་པ་མ་ཡིན་ནམ། སྤངས་རྟོགས་ཀྱི་ཡོན་ཏན་མཐར་ཕྱིན་དུས་སངས་རྒྱས་ཞེས་བྱ་བ་ཡིན་པས། འགྲོ་དྲུག་སེམས་ཅན་རྒྱུད་ལ་རྟག་བཞུགས་ནས། །སྐད་ཅིག་ཙམ་ཡང་གཡེལ་མེད་འགྲོགས་འདི་མཚར། །ཞེས་གསུངས་པའི་མཚར་ལུགས་དང་པོ་དེ་ཇི་ལྟར་སྙམ་ན། སློབ་དཔོན་སངས་རྒྱས་གཉིས་པ་པདྨ་འབྱུང་གནས་ཀྱི་མན་ངག་ལྟ་ཕྲེང་དུ། ཆོས་ཐམས་ཅད་གཟུགས་བརྙན་གྱི་དཀྱིལ་འཁོར་དུ་འཚང་རྒྱ་བའི་ལྟ་བ་བཤད་པའི་སྐབས་དེར། རང་བཞིན་སངས་རྒྱས་དང་། རྟོགས་པའི་སངས་རྒྱས་དང་། གྲུབ་པའི་སངས་རྒྱས་ཞེས་པའི་དབྱེ་བ་མཛད་ནས་གསུངས་ཡོད། དེ་ལས་རང་བཞིན་སངས་རྒྱས་ལ་སྐྱེ་བ་རྒྱུའི་སངས་རྒྱས་དང་། སྐྱེ་བ་རྟེན་པའི་སངས་རྒྱས་དང་། སྐྱེ་བ་མངོན་པར་གྲུབ་པའི་སངས་རྒྱས་གསུམ་དུ་དབྱེ་བ་ཕྱེས་ཡོད་ཅིང་། དེ་ལ་སྐྱེ་བ་རྒྱུའི་སངས་རྒྱས་ནི། ལུས་སེམས་འགྲུབ་པའི་རྒྱུ་དང་། སྐྱེ་བ་རྟེན་པའི་སངས་རྒྱས་ནི། ཕ་མ་གཉིས་ཀྱི་ལུས་དང་སེམས་ཀྱི་ཁམས། སྐྱེ་བ་མངོན་པར་གྲུབ་པའི་སངས་རྒྱས་ནི། རང་གི་ལུས་མངོན་པར་གྲུབ་པ་འདི་ཉིད་ཀྱི་སྐབས་ལ་བཞག་པ་དང་། ད་དུང་རྟོགས་པའི་སངས་རྒྱས་ནི་དེ་ལྟར་རྟོགས་པའི་རིག་འཛིན་གྱི་ས་ལ་གནས་པ་རྣམས་དང་། གྲུབ་པའི་སངས་རྒྱས་ནི་དེ་ཉིད་མངོན་དུ་གཟིགས་པར་གྱུར་པ་ལ་བཞག་པ་སྟེ། འདི་དག་གིས་རང་བཞིན་དང་གནས་སྐབས་ཀྱི་བྱེ་བྲག་ཕྱེས་ནས་དེ་ལྟར་གསུངས་ཡོད། དེས་ན་འདིའི་དགོངས་པ་དང་སྦྱར་ན་སངས་མ་རྒྱས་པའི་ཆོས་རྡུལ་ཙམ་ཡང་མི་དམིགས་མོད། འོན་ཀྱང་ཁྱད་པར་དང་དབྱེ་བ་མེད་པ་ཞིག་ག་ལ་ཡིན། མ་རྟོགས་པ་དང་། རྟོགས་པར་བྱ་བ། མ་གོམས་པ་དང་། གོམས་པར་བྱ་བའི་ཁྱད་ཡོད་པའི་ཕྱིར་ན་སངས་རྒྱས་ཀྱི་ས་མངོན་དུ་འགྱུར་བའི་བློ་སྦྱང་དགོས་པ་ཡིན། འོ་ན་སེམས་ཅན་ལ་སངས་རྒྱས་ཇི་ལྟར་བཏགས་པ་ཡིན། འགྲོ་དྲུག་སེམས་ཅན་གྱི་རྒྱུད་ན་སངས་རྒྱས་རྟག་ཏུ་བཞུགས་པར་མ་ཟད་སྐད་ཅིག་ཙམ་ཡང་དབྱེ་བ་མེད་ལུགས་ཇི་ལྟར་ཡིན་ཟེར་ན། སྤྱིར་རྫོགས་པ་ཆེན་པོ་བཤད་དུས་གཞིའི་བཞུགས་ཚུལ་ཐོག་མ་ཉིད་ནས་ཤེས་དགོས། གཞི་དང་འཁྲུལ་ཚུལ་ཁྱབ་ཚུལ་དང་། །གནས་དང་ལམ་དང་སྒོ་དང་ཡུལ། །ཉམས་ལེན་ཚུལ་དང་བར་མ་དོ། །གྲོལ་ས་ཉིད་དང་བཅུ་གཅིག་གོ །ཞེས་པ་འདིས་རྫོགས་པ་ཆེན་པོའི་གཞི་ལམ་འབྲས་གསུམ་དང་ལྟ་སྒོམ་སྤྱོད་པ་ཡོངས་རྫོགས་བསྡུས་ནས་བསྟན་ཡོད། དེ་ཡིན་ན་ཡེ་ཐོག་གཞི་ཡི་འོད་གསལ་གདོད་མའི་གནས་ལུགས་མཐར་ཐུག་དེ་ཆོས་ཐམས་ཅད་ཀྱི་ཆོས་ཉིད་མཐར་ཐུག་ཀྱང་ཡིན། དེའི་ངང་ནས་འཁོར་འདས་ཀྱི་སྣང་བ་ཐམས་ཅད་འཆར་བཞིན་ཡོད་ནའང་། ཤར་དུས་ཉིད་ནས་དེ་ལས་སྐད་ཅིག་ཀྱང་གཡོས་མ་མྱོང་ཞིང་། དེ་ལས་འདས་པའི་ཆོས་གཞན་ཞིག་སྲིད་པ་མ་ཡིན། འདི་ནི་མཐར་ཐུག་གི་གྲོལ་སའང་ཡིན་པས། གནས་ལུགས་དོན་དམ་པའི་ཆོས་སྐུ་ཡང་འདི་ལ་བརྗོད་ཅིང་། སྒྲིབ་གཉིས་གློ་བུར་བའི་བག་ཆགས་དང་བཅས་པ་དག་ནས། དག་པ་ཉིས་ལྡན་ཐེག་པ་མཆོག་གི་འགོག་བདེན་མཐར་ཐུག་གི་དུས་སུ་འདི་ལ་ངོ་བོ་ཉིད་སྐུ་ཞེས་གསུངས་པ་ཡིན། དེ་ལྟ་བུའི་གཞི་དེ་ལ་གྲོལ་བ་ཞེས་པ་དང་འཁྲུལ་བ་ཞེས་པའི་ཁྱད་གཉིས་མེད་པའི་ཕྱིར་ན། རང་བཞིན་མཉམ་པ་ཆེན་པོ་ཡང་ཡིན། གཞི་དེར་སྤྲོས་པའི་མཚན་མ་རྡུལ་ཆ་ཙམ་ཡང་མ་དམིགས་པས་ན་ཀ་དག་དང་། སྟོང་རྐྱང་ནམ་མཁའ་འདྲ་བའི་ཕྱང་ཆད་མིན་པར་རང་གསལ་རིས་མེད་རྒྱར་ཆད་པ་དང་ཕྱོགས་སུ་ལྷུང་བ་མེད་པའི་ཕྱིར་ན་ལྷུན་གྲུབ་དང་། འཁོར་འདས་ཀྱི་སྣང་བ་ཐམས་ཅད་ཀྱི་འབྱུང་གནས་ཡིན་པས་ན་ཐུགས་རྗེ་ཀུན་ཁྱབ་ཅེས་གསུངས་པ་ཡིན། གཞི་ཡེ་ཤེས་སུམ་ལྡན་ངོ་བོ་སྟོང་། རང་བཞིན་གསལ། ཐུགས་རྗེ་ཀུན་ཁྱབ་ཀྱི་བདག་ཉིད་ཅན་དེ་ལྟ་བུའི་ཚུལ་གྱིས་གྲུབ་པ་ཡིན། དེ་འདྲའི་གཞི་དབྱིངས་འོད་གསལ་ཆེན་པོ་དེ་ལས་རྣམ་པ་ཀུན་ཏུ་གཡོ་མི་སྲིད་བཞིན་དུ་རྩལ་སྣང་འཁོར་འདས་ཀྱི་སྣང་བ་ཅིར་ཡང་འཆར་རུང་བ་ཡིན། མ་རྟོགས་འཁོར་བར་འཁྱམས་དུས་གཟུང་འཛིན་གྱི་སྣང་བ་སྣ་ཚོགས་དང་། གཉིས་སྣང་བདག་གཞན་བདེ་སྡུག་བཟང་ངན་སོགས་སུ་ཤར་བ་དང་། རྟོགས་པ་མྱང་འདས་སམ་རྣམ་བྱང་གི་དུས་སུ་ཆོས་ཉིད་རང་བཞིན་བབས་ཀྱི་བཞུགས་ཚུལ་རྟོགས་ན། སྣང་བ་སྣ་ཚོགས་ཅི་ཞིག་སྣང་ཡང་གདོད་ནས་རྣམ་གྲོལ་གཉིས་མེད་མཉམ་པ་ཆེན་པོ་སངས་རྒྱས་པའི་རང་བཞིན་ལས་མ་འདས་པར་འཆར་བ་ཡིན། དེའི་ཕྱིར་ན་ཆོས་ཉིད་རང་བཞིན་རྣམ་དག་གི་གནས་ལུགས་རྟོགས་པའི་དབང་དུ་བྱས་ན། སྣང་བ་རྣམ་དག་ཐམས་ཅད་སངས་རྒྱས་ཀྱི་རང་བཞིན་དུ་མ་འཁྲུལ་བ་ཆོས་ཉིད་ཀྱི་རིག་པ་བསླུ་མེད་ཀྱིས་གཏན་ལ་ཕེབས་ཤིང་གྲུབ་པ་ཡིན། གཉིས་སྣང་འཁྲུལ་བ་ཅན་གྱི་བློས་གཞལ་ན་དེ་འདྲ་ཞིག་མིན་ཡང་། གཉིས་སྣང་འཁྲུལ་བའི་བློས་གཞལ་བ་དེས་གཉིས་མེད་དག་པའི་བློ་ལ་མི་གནོད། རྣམ་ཤེས་ལ་མི་རྟོན་ཡེ་ཤེས་ལ་རྟོན་པ་ནི་ཚད་མར་གྱུར་བའི་སྐྱེས་བུའི་ལུང་ཡིན་པས་ན། སངས་རྒྱས་སེམས་ཅན་གྱི་རྒྱུད་ལ་རྟག་ཏུ་བཞུགས་ནས་སྐད་ཅིག་ཀྱང་འབྲལ་མ་མྱོང་བ་ནི། རང་གར་ཁྱད་མཚར་བ་ཙམ་མ་ཡིན་པར་ངོ་མཚར་ཡ་མཚན་རྨད་བྱུང་གི་གནས་ཡིན་པས་ན། འདི་དག་བཤད་པའི་ཐོག་མ་ཉིད་ནས་ཨེ་མ་ཧོ་ཞེས་ངོ་མཚར་བའི་ཚིག་རེ་སྦྱར་བའོ། །ངོ་མཚར་གཉིས་པ་ནི། སངས་རྒྱས་རང་ལ་ཡོད་པར་མ་ཤེས་པར། །ཕྱི་རོལ་གཞན་དུ་སངས་རྒྱས་བཙལ་བ་མཚར། །ཞེས་གསུངས་ཏེ། འདི་མཚར་བའི་ཚིག་ཆེན་གཉིས་པ་ཡིན། སེམས་ཅན་ཞེས་པའི་ཅན་གྱི་སྒྲ་སྦྱར་བ་ནི་ཅན་ལྡན་གཉིས་ཀ་བདག་པོའི་སྒྲ་ཡིན་ཕྱིར། སེམས་ཡོད་པ་དེ་ལ་སེམས་ཅན་ཞེས་སུ་གྲགས་པ་ཡིན་པས། ཆོས་ཅན་སེམས་ཀྱི་ཆོས་ཉིད་ཡེ་ནས་སངས་རྒྱས་པའི་རང་བཞིན་ཡིན་བཞིན་དུ། སེམས་ཅན་ཀྱིས་སངས་རྒྱས་རང་ལ་ཡོད་པ་མ་ཤེས་པར་རྒྱལ་བུ་རྐང་འཁྱམས་ལ་སོང་བ་ལྟ་བུ་སྟེ། དེ་ཡང་རྒྱལ་བུ་རྒྱལ་ས་རུ་བསྡད་ཀྱང་རུང་མ་བསྡད་ཀྱང་རུང་རྒྱལ་བུ་ཡིན་པ་ལ་བསྒྱུར་བར་བྱར་མེད་ཀྱང་། རྒྱལ་ས་ནས་མ་བསྡད་པར་ཐང་འཁྱམས་ཀྱི་སྐབས་སུ་རྐང་འཁྱམས་སྤྲང་པོའི་རྣམ་པར་གྱུར་སོང་བ་དེ་ཕྱིར་རྒྱལ་སར་འཁོད་ན་རྒྱལ་སྲིད་ལ་མངའ་དབང་བསྒྱུར་ཆོག་ཅིང་། དེ་དང་ཐང་འཁྱམས་ཀྱི་སྐབས་གཉིས་ཀའི་ངོ་བོ་འགྱུར་ཡོད་པ་མིན། སྔར་ཇི་བཞིན་ཕྱིས་དེ་བཞིན་ཡིན་ཡང་། རྣམ་པའི་སྣང་ཚུལ་ཐ་དད་ཡིན། རང་ཉིད་རྒྱལ་བུ་ཡིན་པར་མ་ཤེས་པར་སྤྲང་འཁྱམས་ལ་སོང་དུས་སྤྲང་འཁྱམས་ཀྱི་རྣམ་པ་ལས་མ་འདས་པ་བཞིན་དུ། རང་ལ་ཡོད་བཞིན་ཕྱི་ནས་སངས་རྒྱས་འཚོལ་བ་འདིའི་མཚར་བའི་མཚར་ལུགས་ནི། ཁྲེལ་བའི་གཏམ་བསྟིང་ཚིག་གིས་སྨད་པར་བྱས་ནས་གསུངས་པ་ཞིག་རེད། རང་སེམས་ཅན་ཡིན་ན་སེམས་ཅན་ལ་ཡོད་རྒྱུ་སེམས་ཡིན་ལ། སེམས་ལ་རྣམ་ཤེས་ཚོགས་བརྒྱད་ཡོད་ཅིང་། རྣམ་ཤེས་ཡེ་ཤེས་གཉིས་ཀ་གཅིག་མིན་པས་ན་བཟང་ངན་གཉིས་འདུས་ཀྱི་ཕུང་གསུམ་པ་ཞིག་གྲུབ་བམ་ཞེ་ན། རྣལ་འབྱོར་བའི་ཉམས་ལེན་ལམ་ལ་གོམས་སྟོབས་ཀྱིས་སེམས་ཀྱི་ཆོས་ཉིད་ཡེ་ནས་འདུ་འབྲལ་མེད་པར་གནས་པ་དེ་རྟོགས་ཤིང་གོམས་པའི་དུས་སུ། དེའི་ངོར་རྣམ་ཤེས་ཚོགས་བརྒྱད་རང་མཚན་པ་རྡུལ་ཆ་ཙམ་ཡང་ཡོད་པ་མ་རེད། རྣམ་ཤེས་ཁོ་རང་ཡེ་ཤེས་སུ་འཆར་བ་དང་། ཆོས་ཐམས་ཅད་ཀྱང་དེ་བཞིན་དུ་དག་པར་འཆར་གྱིན་ཡོད། དེ་ཡང་། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་གྲུབ་དགེ་འདུན་ཉིད། །ཡིན་ཕྱིར་རང་གི་སེམས་ནི་མཆོག །ཅེས་གསུངས་པ་ཡིན། མིང་རྫོགས་ཆེན་དོན་ལ་སེམས་ལམ་དུ་བྱེད་པ་ཞིག་ཡིན་ནས་བཟུང་སྟེ། སེམས་ཚོགས་བརྒྱད་ཐ་མལ་པའི་རྣམ་པར་འཛིན་རྒྱུ་ཞིག་མ་གཏོགས་པར་དེ་ལ་ཆོས་ཉིད་མི་སྣང་བ་ཡིན་པའི་དབང་གིས། དེ་འདྲ་བས་སེམས་ཉིད་འོད་གསལ་འདུས་མ་བྱས་པ་དེ་ཕྱོགས་གང་ན་ཡོད་པའི་རྗེས་ཙམ་ཞིག་ཀྱང་མི་རྙེད་ཅེས་པའོ། །གསལ་དྭངས་ཉི་མའི་སྙིང་པོ་ཇི་བཞིན་དུ། །མངོན་སུམ་གསལ་ཀྱང་མཐོང་མཁན་ཉུང་བ་མཚར། །ཞེས་གསུངས་ཏེ། འདི་མཚར་བའི་ཚིག་ཆེན་གསུམ་པ་ཡིན། རང་ལ་ཡེ་ནས་ཡོད་པའི་སེམས་ཉིད་ཆོས་སྐུའི་སྙིང་པོ་རང་བཞིན་འོད་གསལ་བའི་ཡེ་ཤེས་དེ་ཉིད། ལྟ་ཤེས་མཁན་མཐོང་ཐུབ་པ་ཞིག་གིས་བལྟས་ན་གསལ་ཞིང་དྭངས་ལ་བསྒྲིབས་པ་མེད་པ་སྟེ། དཔེར་ན་ཉི་མའི་སྙིང་པོ་ལ་མུན་པ་མི་གནས་པ་བཞིན་དུ་སྒྲིབ་པའི་དྲི་མ་དང་ཡེ་ནས་མ་འདྲེས་ཤིང་། གཟི་བྱིན་ཉི་མ་འབུམ་གྱི་བཀྲག་མདངས་དང་ལྡན་པར་མངོན་སུམ་དག་ཅིང་གཞན་ལ་མི་ལྟོས་པར་གསལ་བ་ཡིན་ན་ཡང་། སྐལ་ལྡན་ཤེས་རབ་ཀྱི་མིག་ཅན་བསོད་ནམས་བསགས་པ་སྔོན་སོང་དག་གིས་མ་གཏོགས་མི་མཐོང་བ་དེ་ཡང་མཚར་རོ་ཞེས་པའོ། །རྣལ་འབྱོར་པ་ཞིག་གིས་ལུས་མི་གཡོ་བ་ཆོས་བདུན་རི་རྒྱལ་ལྟ་བུའི་བཞུགས་སྟངས་བྱས། དབང་པོ་མི་གཡོ་བ་མཚོ་ལ་གཟའ་སྐར་ཤར་བ་འདྲ་ཞིག་བྱས། སེམས་མི་གཡོ་བ་སྤྲོས་པའི་མཐའ་ཐམས་ཅད་དང་བྲལ་བར་བྱས་ནས་བཞག་དུས། ཀུན་མཁྱེན་རྒྱལ་བ་ཀློང་ཆེན་པས། གཟུང་དང་འཛིན་པ་མི་དམིགས་ཆོས་ཀྱི་སྐུ། །དྲི་མེད་འོད་གསལ་ཉི་མའི་སྙིང་པོ་ནི། །བདེ་གསལ་མི་རྟོག་མཐའ་དབུས་མེད་པ་འཆར། །ཞེས་གསུངས་པ་ལྟར་དུ། དམིགས་བསམ་ཐམས་ཅད་ཆོས་ཉིད་ཀྱི་ངང་ལས་མ་འདས་པར་འཇོག་པར་བྱེད་དུས། ཀུན་རྟོག་ཆོས་དབྱིངས་ལ་ཐིམ། གཟུང་འཛིན་རང་ཞིག་ལ་སོང་ནས། འོད་གསལ་རྫོགས་པ་ཆེན་པོའི་བདེ་གསལ་མི་རྟོག་པའི་ཉམས་དང་བཅས་པའི་རང་བྱུང་ལྷན་ཅིག་སྐྱེས་པའི་ཡེ་ཤེས་ཤར་ཏེ། དྭངས་གསལ་གཡོ་མེད་མི་རྟོག་ཆོས་སྐུའི་དགོངས་པ་ནང་ནས་འཆར་རོ། །ཕ་མ་མེད་པའི་རང་སེམས་སངས་རྒྱས་ཉིད། །སྐྱེ་མ་མྱོང་ཞིང་འཆི་རྒྱུ་མེད་པ་མཚར། །ཞེས་གསུངས་ཏེ། ཐེག་པ་ཆེན་པོའི་བསྟན་བཅོས་རྒྱུད་བླ་མ་ལས། སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཞེས་གསུངས་པས། ནམ་མཁའ་སྐྱེ་མ་མྱོང་ཞིང་འཆི་རྒྱུ་མེད་པ་བཞིན་དུ་སེམས་ཀྱི་རང་བཞིན་ནམ་ཆོས་ཉིད་ཕ་མ་མེད་པར་རང་བྱུང་ཡེ་ནས་གནས་པ། དེ་ཡང་ཉི་མཁའ་བཞིན་དུ་སྟོང་གསལ་མཐའ་དབུས་དང་བྲལ་བ་སྐྱེ་འཆི་བགྲེས་རྒུད་ལས་འདས་པ་ཡིན་པས་ན། ངོ་མཚར་བར་བསྟན་པའོ། །སྒྱུ་འཕྲུལ་གསང་སྙིང་དུ། ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་པ་ལ་སོགས་པའི་བསྟན་དོན་ཡང་དེ་ཡིན་པའོ། །དེས་ན། གནས་ལུགས་རང་བྱུང་གི་ཡེ་ཤེས་རྫོགས་པ་ཆེན་པོའི་དོན་ཇི་བཞིན་དུ་མ་རྟོགས་ན། སེམས་ཀྱིས་སངས་རྒྱས་པ་མིན། འོ་ན་སེམས་ཀྱིས་ཐོས་བསམ་སྒོམ་པའི་རིམ་པར་བརྒྱུད་ནས་ལམ་ལ་སྦྱངས་ཏེ་མཐར་སངས་རྒྱས་འཐོབ་པར་བྱ་དགོས་པ་མ་ཡིན་ནམ། དེ་ལྟར་མིན་ན་ལམ་དང་ཐེག་པ་ཐམས་ཅད་བསྟན་པ་དོན་མེད་དོ་ཞེ་ན། གདུལ་བྱའི་སྐྱེ་བོའི་བློ་དང་མོས་པ། ཁམས་དབང་བསམ་པ་སྣ་ཚོགས་ཡིན་པས་ན། དྲང་དོན་ཐེག་པའི་རིམ་པ་སྣ་ཚོགས་ཤིག་བསྟན་པ་དེ་ཡང་མེད་ཐབས་མེད་པ་ཡིན་ལ། འོན་ཀྱང་འདིས་འདེགས་པའི་ཐེག་པ་ཐམས་ཅད་འདིར་འདེགས་པའི་ཐབས་དང་ལམ་འདི་འདེགས་པའི་ཆེད་དུ་ཡིན་པས་ན། མཐར་ཐུག་ངེས་དོན་ཡེ་ཤེས་ལམ་བྱེད་རྫོགས་པ་ཆེན་པོའི་དོན་རིག་པ་རང་བྱུང་གི་ཡེ་ཤེས་མ་རྟོགས་པར་འཚང་རྒྱ་བ་ཞིག་མི་སྲིད་པ་དེའི་ཕྱིར་ན་ཕ་མཐའ་མེད་པའི་རང་སེམས་སངས་རྒྱས་ཡིན་ལ། འདི་སྐྱེ་མ་མྱོང་ཞིང་འཆི་རྒྱུ་མེད་པའི་རྒྱུ་མཚན་ཅི་ལྟར་ན། ཡེ་ཤེས་དེ་སེམས་ཀྱི་ཆོས་ཉིད་ཡིན་པ་མ་གཏོགས་སེམས་ལས་བྱུང་བ་ཞིག་མ་ཡིན་ལ། དངོས་པོ་ཐམས་ཅད་ཀྱི་གནས་ལུགས་སྟོང་པ་ཉིད་དེ། དངོས་པོའི་གནས་ལུགས་ཡིན་པ་ལས་དངོས་པོ་ལས་བྱུང་བ་ཞིག་ག་ལ་ཡིན། སྟོང་ཉིད་རྟོགས་དང་མ་རྟོགས་ཆོས་ཉིད་མཐོང་དང་མ་མཐོང་ཞེས་པ་དེ་ཡང་གཞི་ཆོས་ཉིད་རང་གི་ཐོག་ནས་འཇོག་པ་མ་རེད། གཞི་ནི་རྟོགས་པར་བྱ་བ་ཁོ་ན་ཉིད་དུ་གནས་པ་ཡིན། གཞི་ལས་གཞི་སྣང་ཤར་དུས་སུ་རྟོགས་ཏེ་གྲོལ་བ་དང་མ་རྟོགས་ཏེ་འཁྲུལ་བ་བྱུང་། དེ་ལ་ལྟོས་ནས་སེམས་ཅན་དང་སངས་རྒྱས་ཞེས་པའི་ཐ་སྙད་བྱུང་བ་ནི་གནས་ཚུལ་དང་སྣང་ཚུལ་ཙམ་ཞིག་ཡིན། འདིའི་རྟོགས་མ་རྟོགས་འདི་རྟོགས་བྱེད་ཡིད་ཀྱི་རྣམ་ཤེས་ཀྱིས་གཞིར་གནས་སེམས་ཀྱི་ཆོས་ཉིད་རྟོགས་དུས་རྟོགས་བྱ་སེམས་ཀྱི་ཆོས་ཉིད་ནི་ཡིད་ཡིན་མི་དགོས་ལ། སེམས་ཉིད་སྐྱེ་མེད་དུ་རྟོགས་དུས་སྐྱེ་མེད་ལས་ཐ་དད་པའི་ཡིད་དང་རྣམ་ཤེས་ཀྱི་ཆ་ཞིག་ཤུལ་ལ་ལྷག་ཡོད་པ་མ་ཡིན། གསལ་རིག་འགགས་མེད་རང་གསལ་སྣང་སྟོང་ཟུང་འཇུག་གི་ངོ་བོ་དེ་ལ་སེམས་ཀྱི་ཆོས་ཉིད་ཅེས་ཟེར་བ་རེད། བདེ་སྡུག་སྣ་ཚོགས་ཇི་ལྟར་མྱོང་ན་ཡང་། །བཟང་དང་ངན་དུ་ཅུང་ཟད་མི་འགྲོ་མཚར། །ཞེས་གསུངས། འདི་མཚར་བའི་ཚིག་ཆེན་ལྔ་བ་ཡིན། སེམས་སམ་བློ་དང་ཡིད་སོགས་གང་བརྗོད་ཀྱང་བདེ་སྡུག་སྣ་ཚོགས་ཀྱི་སྣང་བ་ཅན། ཁྱད་པར་དུ་འཁོར་བས་བསྡུས་པའི་སྣང་ཚུལ་ཐམས་ཅད་ནི་སྡུག་བསྔལ་གསུམ་གྱིས་མ་བཏང་བ་ཞིག་རེད། སྒོམ་བྱེད་ཀྱི་བློ་དེ་ཡང་ཡུལ་དབང་ཤེས་གསུམ་ཚོགས་པ་ལས་སྐྱེ་དགོས་པ་ཞིག་ཡིན་ཕྱིར། སྐྱེ་འགག་ཅན་ལས་མ་འདས་པས་ན་ལམ་འདུས་བྱས་བདེ་སྡུག་སྣ་ཚོགས་ཀྱི་སྣང་བ་ཅན་ཡིན་ན་ཡང་། གཞི་ཆོས་ཉིད་རང་གི་ངོས་ནས་དངོས་ཡོད་དངོས་མེད། འདུས་བྱས་འདུས་མ་བྱས་ཀྱི་ཐ་སྙད་ལས་རིང་དུ་འདས་པའི་སོ་སོ་རང་གིས་རིག་པར་བྱ་བ། དུས་གསུམ་ཀུན་ཏུ་འཕོ་འགྱུར་མེད་པ། བཟང་ངན་གང་དུ་ཡང་འགྱུར་བ་མེད་པ། མགོན་པོ་བྱམས་པས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་ལྟ་བུ་ཡིན་ལ། འུ་ཅག་གིས་འདི་ལྟར་དལ་དལ་དག་དག་གིས་འདོན་བཞིན་ཡོད་དུས་ཀྱི་ལྡེབ་གྲངས་འགྲོ་ལུགས་ལ་བལྟས་ན་དུས་ཚོད་ཀྱིས་འདང་བཞིན་མེད་པ་འདྲ་བ་ཞིག་རེད། དུས་ཚོད་ཀྱི་འཆར་གཞིའི་ཚད་ལ་འགྲུབ་རྒྱུ་བྱས་ནས་འདོན་དགོས་པ་ཡིན། འདི་ཡན་ཆད་མཚར་བའི་ཚིག་ཆེན་ལྔ་ཡིས་ཀ་དག་སྟོང་བའི་ཡེ་ཤེས་གཙོར་འདོན་མཛད་པ་དང་། འདི་ནས་ལྷུན་གྲུབ་སྣང་བའི་འོད་གསལ་དང་སྒོ་བསྟུན་ཏེ་གསུངས་པ་ནི། མ་སྐྱེས་གདོད་ནས་དག་པའི་སེམས་ཉིད་འདི། །མ་བཅོས་ཡེ་ནས་ལྷུན་གྱིས་གྲུབ་པ་མཚར། །ཞེས་གསུངས་ཏེ། སྤྱིར་ན་ཀ་དག་ལྷུན་གྲུབ་དབྱེར་མི་ཕྱེད་པ། ཟུང་འཇུག་ངོ་བོ་གཅིག་པའི་བདག་ཉིད། ཀ་དག་ཡིན་པས་ན་ལྷུན་གྲུབ་དང་། ལྷུན་གྲུབ་ཡིན་པའི་ཕྱིར་ན་ཀ་དག་ཏུ་གནས་པ་ཡིན་པ་དང། འདིའི་ཐད་ཀའི་གོ་དོན་གཞིའི་ཆོས་ཉིད་འཕོ་འགྱུར་དང་བྲལ་བར་སྦྱར་ན། མ་སྐྱེས་མ་འགགས་གཟོད་མ་ཉིད་ནས་ཡེ་དག་གི་སེམས་ཉིད་འགྱུར་བ་མེད་པ་འདི། སུས་ཀྱང་མེད་པ་ཡོད་པ་རུ་གསར་དུ་མ་བྱས་ཤིང་། མ་ཡིན་པ་ཞིག་ལ་ཡིན་པར་བཟོ་བཅོས་མ་བྱས་པར། ཡེ་ནས་ཇི་ལྟར་ཡིན་པ་དེ་བཞིན་དུ་ལྷུན་གྱིས་གྲུབ་ཡོད་པ་འདི་ངོ་མཚར་རོ་ཞེས་པའོ། །དེ་ལྟ་བུའི་ཀ་ནས་དག་ཅིང་ལྷུན་གྱིས་གྲུབ་པའི་ཆོས་ཉིད་རང་བྱུང་གི་ཡེ་ཤེས་དེ་བཅིང་བ་མེད་པས་སླར་འགྲོལ་མི་དགོས་པའི་ཡེ་གྲོལ་ཡིན་པའི་ངོ་མཚར་གྱི་ཚིག་ཐ་མ་ནི། རང་བཞིན་ཡེ་ནས་གྲོལ་བའི་རང་རིག་ཉིད། །གང་བྱུང་གང་བདེར་བཞག་པས་གྲོལ་བ་མཚར། །ཞེས་གསུངས་ཏེ། རང་བཞིན་ཡེ་ནས་གྲོལ་ཞེས་པའི་ཡེ་ཚིག་དེས་ཅི་ཞིག་བསྟན་ཟེར་ན། ཡེ་ཞེས་པ་ནི་ཁྱབ་པའམ་བྱས་པ་དང་རྩོལ་བ་མེད་པའི་དོན་ཅན་ཞིག་ཡིན་ལ། ཡེ་ཐོག་མ་ཐ་མ་མེད་པའི་དུས་ནས་གང་ནས་ཀྱང་མ་བྱུང་གང་དུ་ཡང་མི་གནས། གར་ཡང་མ་སོང་ཅིའི་ངོ་བོ་ཡང་མ་གྲུབ་པའི་འཆིང་གྲོལ་གྱི་ཡུལ་ལས་འདས་པའི་རང་རིག་ཡེ་ཤེས། ཡེ་ནས་རྟག་ཆད་ལ་སོགས་མཐའ་བརྒྱད་ཀྱི་སྤྲོས་པ་ཐམས་ཅད་ལས་འདས་པར་གནས་པ་དེ་ཉིད། གང་བྱུང་གང་བདེར་རང་བབས་སུ་བཞག་པར་བྱས་དུས་ཡེ་གྲོལ་ཏེ། གྲོལ་གྲོལ་ཁར་ཡོད་པ་ནི་དཔེར་ན་གསེར་དང་པོ་ཉིད་ནས་སེར་པོ་ཡིན་པ་ལ། གསར་དུ་སེར་བོར་བསྒྱུར་མི་དགོས་པ་ལྟ་བུའོ། །དེ་ཡན་ཆད་ཀྱིས་གཞི་རྒྱུད་བདེ་གཤེགས་སྙིང་པོ་ཡེ་ནས་འགྱུར་བ་མེད་པ་སངས་རྒྱས་རང་ལ་གནས་པའི་དོན་དེ་ཉིད་ངོ་མཚར་གྱི་ཚིག་ཆེན་བདུན་གྱིས་བསྟན་པའི་རིམ་པ་དེ་སོང་ནས། ད་ནི་གཞི་དེ་ལས་གཞི་སྣང་གྲོལ་འཁྲུལ་བྱུང་ལུགས་དང་འབྲེལ་བའི་དངོས་གཞི་རྫོགས་ཆེན་རིག་པ་ངོ་སྤྲོད་ཀྱི་སྔོན་འགྲོ། སེམས་ཀྱི་མཚང་བཙལ་བ་ལ་སོགས་པས་སེམས་ཀྱི་རྩད་བཅད་བསྟན་པ་ནི། ཨེ་མ་ཧོ། སྐལ་ལྡན་རིགས་ཀྱི་བུ་རྣམས་མ་ཡེངས་ཉོན། །ཞེས་དེ་ལྟར་མཚམས་སྦྱར་ནས། དཔེ་དོན་གྱི་རིམ་པ་མང་པོ་གཅིག་ལ་གཅིག་མཐུད་ཀྱིས་སྦྲེལ་བའི་མུ་འབྲེལ་གྱིས་སེམས་ཀྱི་རྩད་བཅད་པ་མུ་མཐུད་དུ་བསྟན་པ་སྟེ། དུས་གསུམ་རྒྱལ་བ་མ་ལུས་ཐམས་ཅད་ཀྱིས། །ཆོས་ཕུང་བརྒྱད་ཁྲི་བཞི་སྟོང་ལ་སོགས་པའི། །གསུང་རབ་ནམ་མཁའི་མཐའ་མཉམ་དཔག་མེད་ཀྱང་། །དོན་ལ་རང་སེམས་རྟོགས་ཕྱིར་གསུངས་པ་ལས། །གཞན་དུ་ཅི་ཡང་རྒྱལ་བས་གསུངས་པ་མེད། །ཅེས་གསུངས་ཏེ། དུས་གསུམ་དུ་གཤེགས་བཞུགས་བྱོན་དང་འབྱོན་འགྱུར་གྱི་རྒྱལ་བ་མ་ལུས་པའི་མཛད་པ་འཕྲིན་ལས་ཐམས་ཅད། སེམས་ཅན་གྱི་གཞན་དོན་གཅིག་པུ་ལ་འདུས་ཤིང་། དེ་ཡང་མ་འཁྲུལ་དོན་གྱི་གནས་ལུགས་ལ་འགྲོ་ཀུན་སྦྱར་ནས། འཁྲུལ་བ་ཀ་ནས་དག འཁོར་བ་རྨང་ནས་བཤིག སྡུག་བསྔལ་རྩད་ནས་གཞོམས་པའི་ཐབས་ཉག་གཅིག་ལ་འདུས་པས་ན་ཉོན་མོངས་དུག་གསུམ་ཆ་མཉམ་དང་བཅས་པ་འདུལ་བའི་གཉེན་པོ་རུ། འདུལ་མངོན་མདོ་སྡེའི་སྡེ་སྣོད་གསུམ་དང་། རིག་འཛིན་སྔགས་ཀྱི་རྒྱུད་སྡེ་དང་བཞིའི་ཁོངས་སུ་འདུས་པའི་གསུང་རབ་ནམ་མཁའི་མཐའ་མཉམ། ཟབ་ཅིང་རྒྱ་ཆེའི་ཆོས་ཚུལ་ཇི་ཙམ་ཡོད་པ་དེ་དག་ཐམས་ཅད་ཀྱི་དོན་ཚུར་བསྡུ་ན། རང་སེམས་སྐད་ཅིག་མ་འདིའི་སྟེང་ནས་འཁོར་འདས་གྲོལ་འཁྲུལ་གྱི་དབྱེ་མཚམས་འབྱེད་བྱེད་དུས་འགའ་རེ་ལ་དངོས། འགའ་རེ་ལ་བརྒྱུད། འགའ་རེ་ལ་ཤུགས་ནས་བསྟན་པ་སྟེ། མདོར་ན་རང་སེམས་ཆོས་ཉིད་ཀྱི་ངོ་བོ་མ་འཁྲུལ་འདུས་མ་བྱས་པའི་རང་བཞིན་དེ་ཉིད་རྟོགས་བྱེད་ཀྱི་ཐབས་མ་ཡིན་པ་ཞིག་དྲང་ངེས་གང་དུའང་མེད་ལ། དེ་ལས་གཞན་དུ་གྱུར་བ་ཞིག་རྒྱལ་བ་རྫོགས་པའི་སངས་རྒྱས་ཐམས་ཅད་ཀྱིས་སྔར་མ་གསུངས་ཤིང་། རྗེས་ནས་ཀྱང་གསུང་པར་མི་འགྱུར་རོ་ཞེས་པའོ། །དེའི་ཚུལ་དཔེ་ཡི་སྒོ་ནས་བསྟན་པ་ནི། དཔེར་ན་སྡོང་པོའི་རྩ་བ་གཅིག་བཅད་ན། །ཡལ་ག་ལོ་མ་ཁྲི་འབུམ་དུས་གཅིག་བསྐམ། །དེ་བཞིན་སེམས་ཀྱི་རྩ་བ་གཅིག་བཅད་ན། །གཟུང་འཛིན་ལ་སོགས་འཁོར་བའི་ལོ་འདབ་བསྐམ། །ཞེས་གསུངས་ཏེ། འོག་མའི་ཐེག་པས་བླང་དོར་འབད་བྱས་ཀྱང་། །བསྐལ་བར་མི་འགྲུབ་ཚི་ཆད་ནད་དུ་ཆེ། །ཞེས་རྒྱལ་བ་ཀློང་ཆེན་པས་གསུངས་པ་ལྟར་དུ། མདོ་སྔགས་འོག་མའི་ཐེག་པའི་རང་ལམ་ནས་རང་རང་སོ་སོ་ལ་ཁྱད་ཆོས་རེ་ཡོད་ནའང་། འགའ་རེ་ནི་རྒྱུའི་ཐེག་པ་འབྲས་བུ་གཞན་བྱུང་ལ་བསྒུག་དགོས་པ་དང་། འགའ་རེ་ནི་འབྲས་བུའི་ཐེག་པར་གཏོགས་པ་ཡིན་ཡང་། ལམ་གནད་ཆ་མ་ཚང་ཞིང་ལམ་གྱི་གནད་དངོས་མ་ཟིན་པས་གདམས་པ་ཆིག་ཆོད་ཀྱི་འགྲོ་ལུགས་མིན་པའི་སྟབས་ཀྱིས། ཡལ་ག་ལོ་མ་བཅད་དུས་སྡོང་བོ་ཤུལ་མེད་མི་ཐུབ་པ་དང་། སྡོང་རྒན་གྱི་རྩ་བ་བཅད་ན་ཡལ་ག་ལོ་མ་ཁྲི་འབུམ་རང་ཤུགས་ཀྱིས་བསྐམ་འགྲོ་པའི་དཔེ་ཡིས། ཉོན་མོངས་ཕྱོགས་རེའི་གཉེན་པོ་སྤོང་བསྒྱུར་ལམ་བྱེད་ལ་སོགས་པ་དེ་དག་གིས་ཕྱོགས་རེའི་མགོ་གནོན་ཙམ་ཞིག་ལས་མི་ནུས་པ་དང་། ཉོན་མོངས་ཡེ་ཤེས་སུ་དག སེམས་ཉིད་ཆོས་སྐུར་གྲོལ་བའི་གནད་འདི་ཡིས་ནི། གཟུང་འཛིན་རང་ཞིགའཁོར་བ་ཀ་དག སྲིད་པ་མིང་ཙམ་ཡོད་མེད་མཐའ་འདས་སུ་གྲོལ་བར་བསྟན་པའོ་ཞེས་གྲངས་ཀྱི་སྟེང་ནས་གསུངས་སོ། །དུས་ཀྱི་སྟེང་ནས་གསུངས་པ་ནི། ཁང་སྟོང་མུན་པ་ལོ་སྟོང་ལོན་པ་ཡང་། །སྒྲོན་མེས་སྐད་ཅིག་ཉིད་ལ་སེལ་བ་བཞིན། །རང་སེམས་འོད་གསལ་རྟོགས་པའི་སྐད་ཅིག་ལ། །བསྐལ་པ་གྲངས་མེད་བསགས་པའི་སྡིག་སྒྲིབ་འདག །ཅེས་གསུངས་ཏེ། དོན་དམ་ལྷན་ཅིག་སྐྱེས་པའི་ཡེ་ཤེས་བརྙེས་པ་ནི་ཚོགས་བསགས་སྒྲིབ་པ་སྦྱངས་པའི་ལག་རྗེས་ཡིན་པས་མདོ་སྔགས་འོག་མའི་ལམ་ཐམས་ཅད་ནས་བསྟན་པ་མཐའ་དག་ཀྱང་ས་གཞིའི་ཆུ་ཀླུང་ཐམས་ཅད་རྒྱ་མཚོར་བཞུར་བ་བཞིན་དུ། རྣམ་པ་ཐམས་ཅད་མཁྱེན་པའི་ཡེ་ཤེས་བརྙེས་པའི་ཐབས་དང་ལམ་ལས་མ་འདས་པ་ཡིན། འོན་ཀྱང་ཐབས་དང་ཤེས་རབ་ཁྱད་པར་ཅན་གྱིས་ཟིན་མ་ཟིན་གྱི་དབང་གིས་ལོ་སྟོང་ལོན་པའི་ཁང་སྟོང་གི་མུན་ནག་རྒས་པ་དེ། སྒྲོན་མེ་གཅིག་ཚད་ཙམ་གྱིས་སྐད་ཅིག་དེ་ཉིད་ལ་མུན་པ་མཐའ་དག་སེལ་བ་དང་མཚུངས་པར། རང་སེམས་ཡེ་ནས་དག་པའི་འོད་གསལ་རང་བྱུང་གི་ཡེ་ཤེས་རང་ངོ་ཤེས་པའི་སྐད་ཅིག་དེ་ཉིད་ལ། ཟག་མེད་རང་ངོ་ཤེས་པའི་དགེ་ཚོགས་རླབས་ཆེན་དེའི་སྟོབས་ཀྱིས། བསྐལ་བ་གྲངས་མེད་ལ་བསགས་པའི་སྡིག་སྒྲིབ་དག་པར་བསྟན་པའི་ཤུགས་ལ། མུན་པ་སེལ་བའི་རྗེས་ཐོག་ཏུ་སྣང་བ་ལོགས་ནས་བཙལ་མི་དགོས་པ་དང་འདྲ་བར་ཚོགས་གཉིས་རྫོགས་པ་དང་མཉམ་དུ་སྐུ་གཉིས་ཐོབ་པར་བསྟན་པའོ། །དེ་ལྟར་ཡིན་པའི་རྒྱུ་མཚན་དཔེས་བསྟན་པ་ནི། གསལ་དྭངས་ཉི་མའི་སྙིང་པོའི་རང་བཞིན་དེ། །བསྐལ་པ་སྟོང་གི་མུན་པས་སྒྲིབ་མི་ནུས། །དེ་བཞིན་རང་སེམས་སྙིང་པོའི་འོད་གསལ་དེ། །བསྐལ་བར་འཁྲུལ་བས་སྒྲིབ་པར་མི་ནུས་སོ། །ཞེས་གསུངས། ཉི་མ་སྤྲིན་གྱིས་བསྒྲིབས་སོང་སྙམ་པ་ནི་རྒྱང་རིང་ཕྱི་ཚུལ་གྱི་མཐོང་སྣང་ཙམ་ཞིག་ཡིན་པ་མ་གཏོགས། དོན་དངོས་སུ་ཉི་མའི་སྙིང་བོའམ་ཉི་མའི་དཀྱིལ་འཁོར་སྤྲིན་གྱིས་སྒྲིབ་ག་ལ་ཐུབ། ད་དུང་དེ་ལས་ཀྱང་མི་སྲིད་པ་ཞིག་ནི་སྣང་བྱེད་ཀྱི་དཀྱིལ་འཁོར་གསལ་དྭངས་ཉི་མའི་སྙིང་པོ་མུན་པ་སེལ་བའི་གཉེན་གཅིག་པུ་དེ། མུན་པས་བསྒྲིབས་མི་སྲིད་པ་བཞིན་དུ། རང་སེམས་དག་པའི་ཆོས་ཉིད་ཡེ་ནས་འོད་གསལ་བའི་སྙིང་པོར་གྱུར་བ་དེ་ཉིད། བསྐལ་བ་ནས་བསྐལ་བའི་བར་ཇི་འདྲའི་ཡུན་རིང་གི་འཁྲུལ་བ་མྱོང་ན་ཡང་། འོད་གསལ་གྱི་སྙིང་པོ་ལ་འཁྲུལ་བས་གོས་མ་མྱོང་བ་ཡིན་པའི་སྟབས་ཀྱིས། འོད་གསལ་གྱི་གཤིས་ལ་འཁྲུལ་བ་ཞུགས་མ་མྱོང་ཞེས་པའོ། །དཔེ་གཞན་གྱི་སྒོ་ནས་བསྟན་པ་ནི། ནམ་མཁའི་རང་བཞིན་མདོག་དབྱིབས་ཚད་ལས་འདས། །དཀར་ནག་སྤྲིན་གྱིས་གོས་པར་མི་འགྱུར་ལྟར། །སེམས་ཀྱི་རང་བཞིན་མདོག་དབྱིབས་ཚད་ལས་འདས། །དགེ་སྡིག་དཀར་ནག་ཆོས་ཀྱིས་གོས་མི་འགྱུར། །ཞེས་གསུངས་ཏེ། བར་སྣང་སྟོང་པ་གོ་འབྱེད་པའི་ཆ་ཕྱོགས་མཐས་གཏུགས་པ་མེད་པ་འདི་ལ་ནམ་མཁའ་ཞེས་སུ་བཏགས་ཤིང་། དེ་ལ་འདིའི་རང་བཞིན་འདི་དང་འདི་འདྲའོ་ཞེས་དབྱིབས་དང་ཁ་དོག་རྒྱ་ཁྱོན་གྲངས་ཚད་གཅིག་གིས་ཀྱང་གཞལ་མི་ནུས་པ་དང་། ནམ་མཁའ་འདི་ལ་སྤྲིན་ཆར་དང་སེར་བ། ཐོག་འབྲུག་གློག་གསུམ་འཇའ་འོད་གུར་ཁང་ལ་སོགས་པ། སྤྲིན་དཀར་ནག་མ་ཟད་ཅི་ཞིག་ཤར་ཞིང་འཁྲིགས་ཀྱང་ནམ་མཁའ་ལ་རྡུལ་ཆ་ཙམ་ཞིག་གོས་པར་མི་འགྱུར་བ་དང་། ཕན་གནོད་དང་དགའ་སྡུག་བྱེད་མི་ཐུབ་པ་བཞིན་དུ། སེམས་ཀྱི་རང་བཞིན་ནམ་ཆོས་ཉིད་འགྱུར་བ་མེད་པའི་འོད་གསལ་དེའི་གཤིས་ལ་དགེ་སྡིག་དཀར་ནག་གི་ཆོས་གང་གིས་ཀྱང་གོས་པར་མི་འགྱུར་ལ། དེ་དང་རྫོགས་པ་ཆེན་པོའི་ངོ་མཚར་བའི་གསང་ཚིག་གམ་ངོ་མཚར་བའི་ཚིག་ཆེན་བདུན་ནམ་བརྒྱད་རྒྱུད་ལས་གསུངས་པ་ལས། སེམས་ཅན་བྱེ་བའི་སྲོག་བཅད་པ་དང་། ཕར་ཕྱིན་བཅུ་རྟག་ཏུ་སྤྱད་པའི་གང་ཟག་གཉིས་ལ་ཁྱད་པར་རྡུལ་ཙམ་མེད། དེ་ནི་རང་རིག་འགྱུར་མེད་སྐྱེ་ཤི་དང་བྲལ་བའི་གནད་ཀྱིས་ཡིན་ཞེས་པ་མཚུངས་པ་ཡིན་ནོ། །གཤིས་ལ་དེ་ལྟར་ཡིན་པ་ཙམ་གྱིས་ལམ་རང་གནད་ཉམས་སུ་མ་བླངས་ན་མི་གྲོལ་བར་བསྟན་པ་ནི། དཔེར་ན་འོ་མ་མར་གྱི་རྒྱུ་ཡིན་ཡང་། །མ་སྐྲོག་བར་དུ་མར་ནི་མི་འབྱུང་ལྟར། །འགྲོ་ཀུན་བདེར་གཤེགས་སྙིང་པོའི་རྒྱུ་ཡིན་ཡང་། །ཉམས་སུ་མ་བླངས་སེམས་ཅན་སངས་མ་རྒྱས། །འདི་ཉིད་ཉམས་སུ་བླངས་ན་ཀུན་གྲོལ་ཏེ། །དབང་པོ་རྣམས་ལ་རྣོ་རྟུལ་ཁྱད་པར་མེད། །ཉམས་སུ་བླངས་ན་བ་གླང་རྫི་ཡང་གྲོལ། །ཞེས་གསུངས་ཏེ། སེམས་ཅན་གྱི་རིགས་སུ་གྱུར་ཚད། ཐ་ན་སྲིན་བུ་པདྨ་ཡན་ཆད་ལ་གཞི་རྒྱུད་བདེ་གཤེགས་སྙིང་པོས་ཏིལ་ལ་མར་གྱིས་ཁྱབ་པ་བཞིན་དུ་ཁྱབ་པས་ན། འཁོར་བའི་སེམས་ཅན་ཐམས་ཅད་པོ་འཚང་རྒྱ་རུང་ཡིན་ལ། འོན་ཀྱང་དཔེར་ན་འོ་མ་མར་གྱི་རྒྱུ་ཡིན་ཡང་དཀྲོགས་ནས་འོ་མ་བསྲུབས་པའི་བྱ་བ་དེ་མ་བརྒྱུད་ན་མར་མངོན་དུ་མི་འབྱུང་བ་དང་འདྲ་བར། འདིའི་རང་ལམ་ཉམས་སུ་བླངས་ན་ཐམས་ཅད་གྲོལ་ནས་འཁོར་བའི་འཆིང་བ་ལས་ཐར་བ་ཡིན། དེ་ལ་ཚེ་འདིར་རིགས་ལམ་སྦྱངས་པ་སྔོན་སོང་ལ་སོགས་པའི་ཤེས་ཡོན་སྣ་རེ་ཙམ་ཡོད་མེད་ཀྱི་དབང་བོ་རྣོ་རྟུལ་ལ་ཁྱད་པར་ཅི་ཡང་མེད་པས། ཉམས་སུ་བླངས་ན་བླུན་པོའི་ཚད་ལ་འཇོག་པའི་བ་ལང་རྫི་ཡིན་ཡང་དད་དང་དམ་ཚིག་མ་འགྱུར་པར་ཚུལ་བཞིན་ལམ་འདིར་ཞུགས་ན་གྲོལ་བ་ཡིན་ནོ་ཞེས་པའོ། །མངོན་སུམ་རང་སེམས་འོད་གསལ་དོན་རྟོགས་ན། །ཁ་བཤད་མཁས་པ་འདི་ལ་མི་དགོས་ཏེ། །བུ་རམ་རང་གི་ཁ་རུ་ཟོས་པའི་ཚེ། །བུ་རམ་རོ་བཤད་མི་དགོས་ཇི་བཞིན་ནོ། །འདི་ཉིད་མ་རྟོགས་པཎྜི་ཏ་ཡང་འཁྲུལ། །ཐེག་དགུའི་བཤད་པ་ཡོངས་ལ་མཁས་གྱུར་ཀྱང་། །མ་མཐོང་རྒྱང་གི་གཏམ་རྒྱུད་བཤད་པ་བཞིན། །སངས་རྒྱས་ས་ལ་གནམ་ས་བས་ཀྱང་རིང་། །ཞེས་གསུངས་ཏེ། སྒྲ་གཅན་འཛིན་གྱིས་ཡུམ་བསྟོད་ལས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མ་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱུར། ཞེས་གསུངས་པ་བཞིན་དུ། རྫོགས་པ་ཆེན་པོ་དང་ཡུམ་ཤེར་ཕྱིན་གཉིས་ཀ་དོན་གཅིག་མིང་གི་རྣམ་གྲངས། སྨྲ་བསམ་བརྗོད་པ་བྲལ་བའི་སོ་སོ་རང་རིག་གི་ཡེ་ཤེས། རང་སེམས་འོད་གསལ་གྱི་དོན་དེ་སྨྲ་བསམ་བརྗོད་པ་ལས་འདས་པས་ན། དོན་མ་རྟོགས་པར་ཁ་བཤད་མཁས་པ་ཡོད་ཀྱང་འདི་མི་ཤོད་ལ། གལ་ཏེ་མངོན་སུམ་དུ་རང་སེམས་འོད་གསལ་གྱི་དོན་དེ་རྟོགས་ན་ཁ་བཤད་མཁས་པ་འདི་ལ་མི་དགོས་ཏེ་དཔེར་ན་བུ་རམ་རང་གིས་ཟོས་ནས་རོ་མྱོང་ཚེ་གཞན་གྱིས་དེའི་རོ་བྲོ་བ་བཤད་པ་ལ་ལྟོས་མི་དགོས་པ་ལྟ་བུ་ཡིན། འདིའི་དོན་ཚུལ་བཞིན་དུ་མཐོང་ནས་ཇི་བཞིན་དུ་རྟོགས་མེད་ན། མིང་ལ་པཎྜི་ཏ་མ་ཟད་ཡང་ཌི་ཏ་ཡིན་ཡང་འཁྲུལ་བ་ལས་འདའ་ཐུབ་མེད་པས་ན་ཐེག་པ་དགུའི་ཁ་བཤད་ཀྱི་བཤད་ཡམ་སྟོང་པ་ལ་ཅི་ཙམ་མཁས་ཀྱང་མ་མཐོང་རྒྱང་གི་གཏམ་རྒྱུད། དངོས་མཐོང་མ་ཡིན་པར་ཐོས་དོན་ཙམ་ཡིན། ཐོས་པའི་དོན་བསྐྱར་ཟློས་བྱེད་པ་ནི་ཁ་བའི་འོག་གི་ཅ་ལག་འབའ་འབུར་ལ་ཚོད་འཇོག་བྱས་པ་ལྟ་བུ་དང་། ལོང་བས་ཕྱོགས་འཚོལ་བ་ལྟ་བུ་ལས་མ་འདས་པས་ན་སངས་རྒྱས་ཐོབ་པ་ལ་ད་དུང་གནམ་ས་ལྟ་བུའི་བར་ཐག་ཡོད་པའོ་ཞེས་པ་དང་། ཡང་དག་རང་སེམས་འོད་གསལ་མ་རྟོགས་ན། །བསྐལ་པའི་བར་དུ་ཚུལ་ཁྲིམས་བསྲུངས་པ་དང་། །ཡུན་རིང་བར་དུ་བཟོད་པ་བསྒོམས་བྱས་ཀྱང་། །ཁམས་གསུམ་འཁོར་བའི་གནས་ནས་མི་འཕགས་པས། །དེའི་ཕྱིར་འབད་པས་སེམས་ཀྱི་རྩད་གཅོད་གྱིས། །ཞེས་གསུངས་ཏེ། རང་སེམས་འོད་གསལ་དོན་གྱི་བཞུགས་ཚུལ་དེ་ཉིད་ཇི་བཞིན་ཡིན་པ་དེ་བཞིན་ཡང་དག་ཇི་བཞིན་ཉིད་དུ་མ་རྟོགས་ཤིང་སེམས་ཉིད་ཆོས་སྐུའི་རང་ཞལ་མངོན་སུམ་དུ་མཐོང་མེད་ན། དེ་ལས་གཞན་པའི་སྦྱིན་ཚུལ་བཟོད་བརྩོན་ལ་སོགས་པ་ཇི་འདྲའི་ཡུན་རིང་དུས་བསྐལ་བའི་བར་དུ་འབད་ཀྱང་དམུས་ལོང་ཁྱུ་ཞིག་གིས་ལམ་གོ་ཨེ་ཆོད་ལྟ་བ་དང་མཚུངས་པར་ཁམས་གསུམ་འཁོར་བའི་གནས་ནས་གོམ་གང་མི་འཕགས། དེ་འདྲའི་རིགས་དེ་དག་ཐམས་ཅད་འཁོར་བ་འགྲུབ་བྱེད་ཀྱི་ལས་ཤིག་ལས་འདའ་མེད། རང་སེམས་དོན་གྱི་གནས་ལུགས་རྟོགས་པའི་དོན་གྱི་སྙིང་པོ་དང་ལྡན་པ་ཡིན་ན། ཚོགས་ཆེན་སྐད་ཅིག་གིས་འདུམ་ཏེ་འཁོར་བའི་གནས་ལས་གྲོལ་བ་ཡིན་པའི་རྒྱུ་མཚན་དེའི་ཕྱིར་ན། འབད་པ་ཆེན་པོས་བརྩོན་འགྲུས་བྱེད་ས་མ་ནོར་བ་ནི་སེམས་ཀྱི་དེ་ཉིད་མཐོང་བ་འདི་ཡིན་པས་དེ་ལ་འབད་པ་གྱིས་ཤིག་ཅེས་པའོ། །ཕྱི་རབས་ཀྱི་རྗེས་འཇུག་ལ་གདམས་པ་གནང་བ་དང་བཅས་ཏེ། དེ་ཡན་ཆད་ཀྱིས་སེམས་ཀྱི་རྩད་བཅད་དང་མཚང་བཙལ་བའི་ཁྲིད་རིམ་སོང་ནས། ངོ་སྤྲོད་དངོས་གཞི་ཐུན་མོང་གི་སྔོན་འགྲོ་སེམས་ཀྱི་བྱུང་གནས་འགྲོ་གསུམ་འཚོལ་བ་དེ་ཉིད་བསྟན་པ་ནི། ཨེ་མ་ཧོ། ད་ཡང་སྐལ་ལྡན་བུ་མཆོག་ཀུན་གྱིས་ཉོན། །རང་གི་སེམས་ཀྱི་རྩད་བརྡར་མ་ཆོད་ན། །དགེ་སྦྱོར་གང་བྱས་གནད་དུ་མི་འགྲོ་སྟེ། །དཔེར་ན་འབེན་ནི་དྲུང་དུ་བཞག་ནས་ཀྱང་། །མདའ་ནི་ཐག་རིང་ཕྱོགས་སུ་འཕེན་དང་མཚུངས། །རྐུན་མ་རང་གི་ཁྱིམ་དུ་བཞག་ནས་ཀྱང་། །རྩད་གཅོད་དྲག་པོ་ཕྱི་རུ་བྱེད་དང་མཚུངས། །འདྲེ་ནི་ཤར་སྒོའི་ཕྱོགས་སུ་བཞག་ནས་ཀྱང་། །གླུད་ནི་ནུབ་ཀྱི་ཕྱོགས་སུ་གཏོང་དང་མཚུངས། །དབུལ་པོའི་སྒྱེད་རྡོ་གསེར་དུ་མ་ཤེས་པར། །གཞན་ནས་སློང་མོ་བྱེད་པ་ཇི་བཞིན་ནོ། །དེས་ན་རང་གི་སེམས་ཀྱི་རྩད་བརྡར་རྣམས། །འདི་བཞིན་ཆོད་ཅིག་སྐལ་ལྡན་སྙིང་གི་བུ། །ཞེས་གསུངས་ཏེ། སེམས་འཚོལ་གྱི་ཕྱོགས་བསྟན་པ་སྟེ། མདོ་ལམ་ནས་བསྐལ་བ་གྲངས་མེད་མང་པོའི་སྦྱངས་པ་དགོས་པ་དེ་ལ་མི་ལྟོས་པར། སྔགས་མཚན་བཅས་ཀྱི་ཐབས་ཁྱད་པར་ཅན་གྱིས་ཡུན་རིང་མི་ཚེ་འགའ་རེར་གནད་དུ་བསྣུན་ནས་འཐོབ་པར་བྱ་རྒྱུའི་ཡེ་ཤེས་དེ་ཉིད། རྫོགས་ཆེན་གྱི་ལམ་ནས་བླ་མའི་མན་ངག་གིས་ངོ་འཕྲོད་པ་ཙམ་གྱིས་གནས་ལུགས་མངོན་དུ་གྱུར་པའི་ས་ལ་གཤེགས་པ་ནི་སེམས་ཀྱི་གནད་གསང་ཤེས་དང་མི་ཤེས་ལ་ཐུག་ཅིང་། དེའི་གནད་ཀྱི་གསང་དེ་མ་ཤེས་ན་འཕྲུལ་འཁོར་ཨ་མའི་གནད་གསང་མ་ཤེས་པར་ཡན་ལག་གི་འཕྲུལ་འཁོར་ལ་གཙོ་བོ་ཡིན་སྣང་ཤར་བ་དང་འདྲ་བར། མགོ་འཁོར་ནས་དགེ་སྦྱོར་གང་བྱས་གནད་དུ་མི་འགྲོ་བ་ནི་འབེན་ཐག་ཉེར་བཞག་ནས་མདའ་ཐག་རིང་ལ་འཕངས་པ་དང་། རྐུན་མ་རང་ཁྱིམ་ལ་བཞག་ནས་རྩད་གཅོད་ཕྱི་ཚོར་བྱས་པ་དང་། འདྲེ་ཤར་ཕྱོགས་བཞག་ནས་གླུད་ནུབ་ཏུ་འཕངས་པ་དང་འདྲ་བར་གནད་ཐོག་ཏུ་མི་འགྲོ་བ་ཡིན། རང་ལ་ཡོད་པའི་སེམས་ཉིད་ཆོས་སྐུའི་ངོ་བོ་རང་གི་སེམས་འདིའི་སྟེང་ནས་རྩད་ཅིག་ཆོད་དང་རྙེད་སྒོ་ཆེན་པོ་ཞིག་དེ་ན་ཡོད་དེ། དཔེར་ན་དབུལ་བོ་ཚང་གི་སྒྱེད་རྡོ་དེ་གསེར་ཁོ་ན་ཡིན་པ་མ་ཤེས་པར་ཚེ་གཅིག་ལ་དབུལ་བོའི་སྡུག་བསྔལ་ལས་མ་ཐར་བ་དེ། ཤེས་མ་ཐག་ཏུ་དབུལ་བོ་མ་ཡིན་པར་ཕྱུག་པོར་འགྱུར་བ་དང་། དེ་དངོས་སུ་བླངས་ནས་ལོངས་སུ་སྤྱད་ན་འབྱོར་བ་ཕུན་སུམ་ཚོགས་པ་དང་འདྲ་བར། སེམས་ལས་སངས་རྒྱས་རྙེད་དུས་སྐྱབས་གནས་གཞན་དུ་འཚོལ་མ་དགོས་པ་ཡིན། དོན་ཆེན་དང་དོན་ཆུང་མ་ནོར་བར་འདི་བཞིན་དུ་བླ་མའི་མན་ངག་གདམས་པའི་ཉིང་ཁུ་རུ་བསྟེན་ནས་སེམས་ཀྱི་རྩད་བརྡར་ཆོད་ཅེས་པའོ། །བྱུང་གནས་འགྲོ་གསུམ་འཚོལ་ལུགས་དངོས་ནི། སེམས་ཞེས་བྱ་བའི་རིག་རིག་འགྱུ་འགྱུ་པོ། །བདས་ན་མི་ཟིན་ཡལ་ཡལ་བན་བུན་པོ། །བཞག་ན་མི་སྡོད་ཚུབ་ཚུབ་ཡེར་ཡེར་པོ། །འདི་ཞེས་མཚོན་མེད་སྟོང་པ་ཕྱང་ཆད་པོ། །བདེ་སྡུག་སྣ་ཚོགས་མྱོང་མཁན་རང་གི་སེམས། །དང་པོ་འདི་ནི་བྱུང་ས་གང་ནས་བྱུང་། །ཕྱི་ཡི་སྣང་བ་རི་བྲག་ཆུ་ཤིང་དང་། །ནམ་མཁའི་རླུང་སོགས་རྟེན་བཅས་རྟེན་མེད་པ། །གང་ལས་བྱུང་ངམ་འདྲི་ཞིང་རྩད་བརྡར་ཆོད། །ཡང་ན་ཕ་མ་གཉིས་ཀྱི་ཁུ་ཁྲག་ལས། །བྱུང་ངམ་སྙམ་ན་ཇི་ལྟར་བྱུང་ཚུལ་དཔྱོད། །ཅེས་གསུངས་ཏེ། སེམས་ཞེས་པ་མེད་ཙམ་ཡོད་ཙམ་སྣང་ཙམ་ལས་གཞི་མེད་ཡིན་པའི་སེམས། ཡུལ་རིག་པར་བྱེད་ཅིང་རྣམ་རྟོག་འདྲ་དང་མི་འདྲ་འགྱུ་བའི་འགྱུ་དྲན་གྱི་ཤེས་པ། རྗེས་དེད་ནས་བདས་ན་ཟིན་རྒྱུ་མེད་པ་ཞིག བཞག་བཞག་ན་བཞག་ས་ལ་མི་འདུག་པ། འཚབ་འཚུབ་ཀྱི་བློ་སྣ་མང་པོ་ཅན་འདི་མི་དྲན་བསམ་རྒྱུ་མེད་པ། འདི་བཟུང་ནས་འདི་རེད་ཟེར་ནས་སྟོན་དགོས་ན་སྟོང་པ་ཕྱང་ཆད་བཟུང་ས་འཛིན་ས་ཞིག་མེད་པ་འདྲ་བ། ཐོག་མེད་ནས་ད་ལྟའི་བར་དུ་འཁོར་བའི་གནས་འདི་ནས་བདེ་སྡུག་བར་མ་སྣ་ཚོགས་མྱོང་མཁན་གྱི་སེམས་འདི། དོན་དངོས་སུ་ཡོད་པར་འདུག་གམ་མེད་པར་འདུག མེད་པ་ཞིག་ཡིན་ན་མི་གསོན་པོ་དེ་བེམ་པོ་ས་རྡོ་ཤིང་གསུམ་དང་མི་འདྲ་བ་གང་གིས་ཡིན། ཡོད་རྒྱུ་ཞིག་ཡིན་ཚེ་དང་པོ་གང་ནས་བྱུང་འདུག བར་དུ་གང་ན་གནས་པ་ཡིན། ཐ་མར་གང་དུ་སོང་བ་བརྟག་ན། དང་པོ་ཕྱིའི་ས་རྡོ་རི་བྲག་ཆུ་ཤིང་ནམ་མཁའི་ཁམས་ལ་སོགས་པ་གང་ལས་ཀྱང་འདི་བྱུང་ཚུལ་སྟོན་རྒྱུ་མེད་པ་དང་། ནང་ཕ་མའི་རྒྱུ་རྐྱེན་ལས་ལུས་བསྐྱེད་ཀྱང་སེམས་འདི་ལྟར་བྱུང་ངོ་སྙམ་པ་དང་རྙེད་རྒྱུ་ཨེ་ཡོད་ཞིབ་ཏུ་ལྟོས་ལ་རྟོག་ཅིང་དཔྱོད་པར་གྱིས་ཞེས་པའོ། །དེ་ལྟར་དཔྱད་པས་བྱུང་ས་མ་རྙེད་ཚེ། །བར་དུ་ད་ལྟ་རང་ལུས་སྟོད་སྨད་དང་། །དབང་པོ་དོན་སྙིང་ལ་སོགས་གང་ལ་གནས། །སྙིང་ལ་གནས་ན་མགོ་མཇུག་གང་ན་གནས། །དབྱིབས་དང་ཁ་དོག་ལ་སོགས་ཇི་ལྟར་འདུག །ཅེས་གསུངས་ན། དེ་ལྟར་བྱུང་ས་མ་རྙེད་ཀྱང་ད་དུང་མེད་ཅེས་ཟེར་ཐག་མི་ཆོད་པ་འདི། བར་དུ་གནས་ས་རང་ལུས་འདི་ལ་ངེས་པར་ཡོད་ངེས་སོ་སྙམ་ན། དེ་ལྟ་ན་མགོ་ལུས་སྟོད་སྨད་བར་གསུམ་དབང་པོ་ལྔ་དང་། དོན་ལྔ་སྣོད་དྲུག་གང་ལ་གནས། དེ་ལས་སྙིང་ལ་ལོས་གནས་སྙམ་ན། སྙིང་གི་སྟོད་སྨད་བར་གསུམ་ཕྱི་ནང་གང་ན་གནས་འདུག དེང་སང་ཀླད་པ་ལ་གནས་སོ་བསམ་མཁན་མང་རྒྱུ་རེད། འོན་ན་ཀླད་པ་ཚོ་རུ་བགོས་ན་གང་གི་ཕྱོགས་ན་ཡོད་འདུག །གལ་ཏེ་གནས་ས་རིག་དུས་གནས་མཁན་རྙེད་སོང་བ་ཡིན་པས། དེའི་དབྱིབས་དང་ཁ་དོག་ཅི་འདྲ་ཞིག་ཡིན་པའང་བཤད་དུ་ཡོད་པར་གྱིས་ཞེས་པའོ། །ལེགས་པར་དཔྱོད་ལ་གནས་ས་མ་རྙེད་ཚེ། །ཐ་མར་འགྲོ་དུས་ཡུལ་གྱི་དབང་པོའི་སྒོ། །གང་ནས་འགྲོ་དང་ཕྱི་རོལ་ཡུལ་རྣམས་སུ། །ཡུད་ཙམ་ཉིད་ལ་སླེབ་པའི་དུས་དེ་རུ། །ལུས་ཀྱིས་ཕྱིན་ནམ་སེམས་ཉིད་ཁོ་ནས་ཕྱིན། །ལུས་སེམས་ཚོགས་པས་ཕྱིན་སོགས་རྩད་བརྡར་ཆོད། །ཅེས་གསུངས་ཏེ། དང་པོ་བྱུང་ས་མ་རྙེད་ཅིང་བར་དུ་གནས་སའང་མ་རྙེད་ན། ཐ་མར་འདིར་བུད་སོང་ཟེར་རྒྱུ་ཞིག་ཀྱང་རྙེད་དཀའ་ཡང་། སེམས་ཡུལ་ཐོག་ལ་འཕྲོས་སོ་སྙམ་པའི་ཤེས་པ་དེ་ཡུལ་གྱི་ཐོག་གང་ལ། དབང་པོའི་སྒོ་གང་ནས། ཚུལ་ཇི་ལྟར་བུད་སོང་བ་དང་། ཡུལ་ཐོག་ལ་སོང་དུས་ལུས་པོ་སོང་ངམ་སེམས་ཁོ་རང་རྐྱང་བ་སོང་། དེ་མིན་ལུས་སེམས་གཉིས་ཀ་ཚོགས་བཞིན་བུད་སོང་སོགས་རྟོག་ཅིང་དཔྱོད་ཅེས་པའོ། །དེ་ཡང་ཉོན་མོངས་རྣམ་རྟོག་སྐྱེ་བའི་ཚེ། །དང་པོ་གང་ནས་སྐྱེས་དང་ད་ལྟའི་དུས། །གང་ལ་གནས་དང་མདོག་དབྱིབས་ཨེ་འདུག་ལྟོས། །ཐ་མར་རང་སར་ཞི་ནས་ཡལ་བའི་ཚེ། །གང་དུ་ཡལ་ནས་འགྲོ་སོགས་རྩད་བརྡར་ཆོད། །འཆི་བའི་ཚེ་ན་ཇི་ལྟར་བྱས་ནས་འགྲོ། །ཞིབ་ཏུ་དཔྱོད་ལ་སྐྱེ་འཆི་འགྲོ་འོང་དང་། །དངོས་བཟུང་བྲལ་བའི་སྟོང་སངས་བརྗོད་མེད་དུ། །ངེས་པར་གཏན་ལ་མ་ཕེབས་བར་དུ་དཔྱོད། །ཅེས་གསུངས་ཏེ། ཁྱད་པར་དུ་ཉོན་མོངས་དང་རྣམ་རྟོག་དྲག་པོ་འཆར་བདོ་བའི་ཚེ་ན། དེ་བཙལ་བར་སླའམ། དེ་དུས་དང་པོར་གང་ནས་བྱུང་སོང་། ད་ལྟར་གང་ན་གནས་ཡོད་འདུག ཡོད་ན་མདོག་དབྱིབས་ཇི་འདྲ་ཞིག་རེད། ཁྱད་པར་དུ་ཐ་མར་ཉོན་མོངས་རྣམ་རྟོག་རང་ཞི་ལ་ཡལ་འགྲོ་བའི་དུས་སུ་གང་ལ་ཇི་ལྟར་ཡལ་སོང་། ཡང་སྒོས་ཤི་བའི་དུས་སུ་སེམས་དེ་ཇི་ལྟར་བྱས་ནས་གང་ལ་བུད་འགྲོ་བ་རེད་འདུག་སོགས་ཞིབ་ཏུ་བརྟགས་ཤིང་དཔྱད་པ་གྱིས་ཤིག ཐ་མར་འདི་རྙེད་བྱུང་ཟེར་རྒྱུ་མེད་པ་ཞིག་ཏུ་གྱུར་སོང་བ་ཡིན་ན། ད་རུང་དེས་མི་ཆོག་པར་ཟེར་རྒྱུ་མ་རྙེད་ཟེར་ཐག་མི་ཆོད་པ་དེའི་ངོ་བོ་དེ་ཇི་འདྲ་ཞིག་འདུག སྐྱེ་འཆི་འགྲོ་འོང་ཐམས་ཅད་འདི་རེད་ཟེར་རྒྱུ་མེད་པའི་སྟོང་སངས་བརྗོད་མེད་དུ་ཐག་ཆོད་པའི་ཆོད་ལུགས་འདི་ལྟར་རེད་ཟེར་རྒྱུ་ཞིག་གཏན་ལ་ཡང་དག་པར་མ་ཕེབས་ཀྱི་བར་དུ་དཔྱད་པར་གྱིས་ཞེས་གསུངས་པའོ། །གཞན་གྱི་དཔེ་དང་ཁ་བཤད་སྐམ་པོ་ཡིས། །སྟོང་པ་ཉིད་ཡིན་ཟེར་བས་མི་ཕན་ཏེ། །དཔེར་ན་སྟག་ཡོད་ཟེར་བའི་ས་ཆ་རུ། །གཞན་གྱིས་སྟག་ནི་མེད་པར་བརྗོད་ན་ཡང་། །རང་ཉིད་དེ་ལ་ཡིད་ཆེས་མི་སྐྱེ་བར། །ཡིད་གཉིས་ཐེ་ཚོམ་ཟ་བ་ཇི་བཞིན་ནོ། །རང་གི་སེམས་ཀྱི་རྩ་བ་རང་ཉིད་ཀྱིས། །ཞིབ་ཏུ་བཅད་ནས་གཏན་ལ་ཕབ་པའི་ཚེ། །དཔེར་ན་སྟག་ཡོད་ཟེར་བའི་ལུང་པ་དེར། །རང་ཉིད་སོང་ནས་ཕུ་མདོ་ཐམས་ཅད་དུ། །སྟག་ནི་ཨེ་ཡོད་རྩད་བརྡར་བཅད་གྱུར་ན། །མ་རྙེད་ཚེ་ན་རང་ཉིད་ཡིད་ཆེས་ཏེ། །ཕྱིན་ཆད་ས་དེར་སྟག་ཡོད་སྙམ་པ་ཡི། །ཡིད་གཉིས་ཐེ་ཚོམ་མེད་པ་ཇི་བཞིན་ནོ། །ཞེས་གསུངས་ཏེ། འདི་ལྟར་བྱས་ནས་སེམས་ཀྱི་བྱུང་གནས་འགྲོ་གསུམ་བཙལ་འོང་དུས། སེམས་འདི་ལྟར་བྱུང་སྟེ་འདི་ལ་བུད་སོང་ཞེས་པ་ཞིག་སྟོན་རྒྱུ་མེད་ཅིང་། མེད་པའི་ཡལ་ས་ཡལ་ཁོངས་ཀྱང་བཤད་རྒྱུ་མ་རྙེད་དུས་གཞན་གྱི་ཁ་ལ་ཉན་ནས་སྟོང་པ་ཉིད་རེད་ཅེས་པས་མི་འོང་བ་ནི། དཔེར་ན་གཞན་གྱིས་ག་ཤེད་ཅིག་ན་སྟག་མི་གཟན་ཡོད་འདུག་ངས་མཐོང་ངོ་ཞེས་སྨྲས་ཀྱང་ཨེ་བདེན་ཅི་ཤེས། ཡང་གཅིག་གིས་མི་འདུག་མེད་པ་ངས་མཐོང་ངོ་ཞེ་ན་དེ་ཡང་ཨེ་བདེན་ཅི་ཤེས། ཡོད་མེད་གཉིས་ཀ་གང་ཡིན་རང་གིས་མཐོང་ན་ཡིད་ཆེས་པ་དང་འདྲ་བར་སེམས་ཀྱི་བྱུང་གནས་འགྲོ་གསུམ་རང་གིས་རྩད་བརྡར་ཆོད་ཅེས་གསུངས་པའོ། །དེ་རིང་གི་ཆོས་ཁྲིད་དང་པོ་འདི། ཡིད་གཉིས་ཐེ་ཚོམ་མེད་པ་ཇི་བཞིན་ནོ། །ཞེས་གསུངས་སའི་མཚམས་སུ་བཞག་ནས། དེ་རིང་ཕྱི་དྲོ་དང་སང་ཉིན་གྱི་ཐུན་ཐམས་ཅད་ལ་ཁྱེད་རྣམ་པས་རང་རང་གང་མོས་ཀྱི་ས་ཆ་དབེན་ས་རི་ཡི་ངོས། ཤིང་གི་བསིལ་གྲིབ། ཁང་བའི་བྱ་འདབ། རླུང་ཁའི་དྲི་ཟུར་ལ་སོགས་པ་རང་གང་བདེའི་ས་ལ་སོང་ནས། སེམས་ཀྱི་བྱུང་གནས་འགྲོ་གསུམ་ཚོལ་ལ་ཤོག ཡོད་ན་ཡོད་ལུགས་འདི་ལྟར་རེད། མེད་ན་མེད་ཁུངས་འདི་ལྟར་ཡིན་ཟེར་རྒྱུ་ཞིག་རྙེད་དགོས་པ་ཡིན། དེ་ཡང་རང་གིས་ངེས་པ་ཞིག་རྙེད་དགོས་པ་ལས་གཞན་ཟེར་རྗེས་བརྗོད་ཁྱོད་ཀྱིས་ཅི་ལྟར་ཟེར་རྒྱུ་ཡིན་ངས་ཀྱང་དེ་ལྟར་ཟེར་དགོས་ཞེས་པས་མི་འོང་། སྔར་གོང་ནས་བཤད་པ་སྟེ། ཆོས་བཤད་བྱུང་། ཐོབ་བྱུང་། དུས་ཚོད་ཀྱང་ཡུན་རིང་ཞིག་འགོར་མ་སོང་། ཡུན་ཐུང་སོང་། ངས་འཇིག་རྟེན་གྱི་བྱ་བ་གནད་ཆེན་འདི་ཚོ་དང་དེ་ཚོ་བསྒྲུབ་རྒྱུ་ལ་དལ་འགོར་བྱས་མ་བྱུང་། བཟང་བྱུང་སྙམ་ནས་ཐོབ་ཡིག་ཅིག་བསགས་ཏེ་བརྒྱུགས་སོང་བ་ཙམ་གྱིས་ནི། གལ་འགག་ཆེ་བའི་ཉི་མ་ཞིག་ཐོན་དུས་དོན་གྱི་ཐོབ་རྟགས་དང་། ཉམས་མྱོང་གི་ལག་རྗེས་ཤིག་མེད་ན་མིང་གི་ཐོབ་ཡིག་ཤོག་ཐོག་གི་རི་མོ་ཡིས་གོ་མི་ཆོད། ཆོས་ཐོས་པ་མང་ལ་སྒོམ་པ་ཉུང་བ་དེ་ཆོས་དྲེད་ལ་འགྲོ་བྱེད་ཀྱི་རྒྱུ་དངོས་ཡིན་པ་དེས་ན་ཆོས་མ་བཤད་ན་མ་བཤད་པ་དང་། མ་ཞུས་ན་མ་ཞུས་པ་ལས་འཆད་ཉན་ཞིག་གི་དབུ་ཞིག་འཛིན་ནས་བཟུང་སྟེ་ཚུལ་དང་མཐུན་པ་ཚད་དང་ལྡན་པ་ཞིག་མ་ཐོན་བར་དུ་ཨེ་ཐོན་མི་ཐོན་བལྟ་དགོས། ཁྲིད་ཞེས་པའི་དོན་ནི། ལོང་བའི་ལག་མགོ་ནས་བཟུང་སྟེ་ཐོན་དགོས་སའི་ས་ལ་མ་ཐོན་གྱི་བར་དུ་ལམ་ཁྲིད་བྱེད་པ་འདྲ་བ་ཞིག་ལ་ཁྲིད་ཟེར་བ་ཡིན། ཁྲིད་ལ་ཁྲིད་སྦྱང་བྱེད་དགོས། བྱིས་པ་ལ་གོམ་པ་ལེན་ལུགས་བསླབ་པའི་སྐབས་སུ། མི་ཆེན་གྱིས་ལག་མགོ་ནས་འཐེན་ཏེ་ཡར་སློང་དགོས་ཤིང་བྱིས་པ་རང་གིས་ཀྱང་གོམ་པ་ཨེ་ཆོས་བལྟ་དགོས་པ་ལྟར། ཁྲིད་བཤད་དུས་གོ་ལོ་ཐོས་ལོ་རྐྱང་བས་ཕན་ཐོགས་ཡོད་པ་མ་རེད། ཚིག་ཐོག་གི་ཡིག་འབྲུའི་གོ་དོན་ཙམ་རེ་སུ་ཡིན་ཡང་ཁྲོལ་བ་ཡིན། བསམ་དོན་སྒོམ་པའི་གནད་ལ་སྦྱོར་བར་བྱེད་པ་ལ་ཁྲིད་སྦྱང་ཟེར་བས། ངས་རྫོགས་ཆེན་བཤད་དུས་མཚན་ཉིད་ཐེག་པའི་དཔེ་ཁྲིད་བྱེད་སྟངས་ཀྱིས་སྐྱོར་སྦྱང་གི་དཔྱད་གླེང་བྱེད་དུ་འཇུག་པ་མིན། ཡིད་དཔྱོད་སེམས་ཀྱི་སྤྲོས་པས་ད་ལྟའི་བར་དུ་ཡུལ་རྗེས་སུ་འབྲངས་ན་ཡང་། བྱ་ལོང་ནམ་མཁའི་མཐའ་ལ་ཐོན་དུ་མེད་པར་གཤོག་རྩལ་ཉམས་པ་ལྟ་བུ་ཡིན་པས། སྤྲོས་པའི་མཐའ་སྤྲོས་མེད་དང་། བརྗོད་པའི་མཐའ་བརྗོད་མེད། དམིགས་བསམ་གྱི་མཐའ་དེ་དམིགས་མེད་དུ་སྦྱོར་སྟངས་ལ་སྦྱོང་དགོས་པས། ཐོག་མར་འདུག་སྟངས་ནས་མགོ་བཟུང་སྟེ། ཤེས་རུང་མ་ཤེས་རུང་། ཅི་སྒོམ་འདི་སྒོམ་ཡོད་རུང་མེད་རུང་། རང་སེམས་དབང་དུ་བསྡུས་ཏེ་བསྒོམ་དགོས། སྒོམ་གྱི་ཐོག་མར་སྒོམ་མཁན་བཙལ་དགོས། དེ་རིང་སྒོམ་མཁན་འཚོལ་བའི་ཁྲིད་སྦྱང་ཡིན། དེ་རིང་སེམས་ཀྱི་བྱུང་གནས་འགྲོ་གསུམ་བཙལ་བའི་སྐབས་འདིར། ཐོག་མེད་ནས་ད་ལྟའི་བར་དུ་འཁྲུལ་བའི་སེམས་དེ་ཅི་འདྲ་ཞིག་རེད་འདུག མ་འཁྲུལ་སེམས་དོན་གྱི་གནད་ལ་ལྟ་མཁན་དེ་སུ་རེད། གང་ན་ཇི་ལྟར་བྱས་ནས་ཡོད་འདུག སྔོན་ནས་ད་ལྟའི་བར་དུ་ཁ་ནང་ལ་མ་འཁོར་པར་ཕྱི་ལ་འཁོར་ཏེ། ཕྱིའི་ཡུལ་སྣང་གི་ལྟད་མོ་ཕར་བལྟས་རྒྱང་གི་ཆོས་བརྒྱ་ལ་བལྟས་པ་ཡིན་པས། ད་ནི་ལྟ་མ་མྱོང་བའི་ནང་གི་རང་སེམས་ལ་ཚུར་བསྐོར་ཏེ། ཚུར་བལྟས་སེམས་ཀྱི་ཆོས་གཅིག་པོ་དེ་རིག་དགོས་པ་ཡིན། དེང་སང་འཇིག་རྟེན་ཐོག་གི་ཚན་རིག་པས་ཕྱི་ཚུལ་གཟུགས་ཀྱི་གནས་ལུགས་ཅུང་ཟད་ཕྲ་བའི་བར་དུ་བརྟག་ཞིབ་བྱས་ཡོད་ཀྱང་། ནང་ཚུལ་ཤེས་པའི་གནས་ལུགས་གཏན་ལ་འབེབས་པ་དང་། ཤེས་དང་ཤེས་བྱའི་ཆོས་ཉིད་ཀྱི་ཐད་ནས་ལོ་རིམ་དང་པོའི་སློབ་ཆུང་གི་སྦྱངས་འབྲས་ཙམ་ལ་ཡང་ཐོན་ཡོད་པ་མ་ཡིན། དེ་ལ་ཐུག་དུས་ལྐོག་གྱུར་སེམས་ཀྱི་གསང་བ་ཟེར་ནས་ཚིག་མཚམས་འཇོག་འགྲོ་བ་མ་གཏོགས། དེའི་ཡན་ལ་ཐོན་ཡོད་པ་མ་རེད། དེར་མ་ཐོན་པ་དེ་ཅི་ཞིག་རེད་ཟེར་ན། ཡེ་གསང་ཐབས་ཀྱིས་ཆོད་པའི་ས་མཚམས་བརྒལ་མ་ནུས་པས་རེད། དེས་ན་སྤྱི་ཚོགས་ཚན་རིག་ཁང་གི་ཚན་རིག་གིས་ཞིབ་འཇུག་མ་ནུས་པ། ཤར་ནུབ་མགོ་སེར་མགོ་ནག་གི་མི་ཡིས་འཕྲུལ་ཆས་སྣ་ཚོགས་བེད་སྤྱད་ཀྱང་མ་མཐོང་བའི་ནང་རང་སེམས་འཁོར་འདས་བདེ་སྡུག་གི་རྩ་བ་འདིའི་གནད་གསང་རྟོགས་ཐབས་དང་། སྔར་གངས་ལྗོངས་ས་མཐོའི་ཐོག་འདི་ནས་རི་ཕུག་དང་བྲག་ཁུང་ནས་སྐྲ་སེན་མ་གཏོགས་ཤུལ་དུ་མི་ལྷག་པར་འཇའ་ལུས་འོད་སྐུར་གྲོལ་བ་དེ་དག གདོས་བཅས་འབྱུང་བའི་སྙིགས་མ་དེ་དྭངས་མ་འོད་དུ་གྱུར་དུས། སྔར་ཡོད་རྣམ་ཤེས་ཚོགས་དྲུག་གི་འགྱུར་བ་དང་དབང་པོ་ཐམས་ཅད་ཇི་ལྟར་བྱས་ནས་གཞན་ཞིག་ཏུ་གྱུར་པ་དང་། ལུས་འདི་ནི་འབྱུང་བཞིའི་རྡུལ་ཕྲན་ཚོགས་པ་ཞིག་ཏེ། དེ་ཡང་འབུ་སྲིན་ཕྲ་མོའི་གྲོང་ཁྱེར་ཞིག་ཡིན་པའི་ར་སྤྲོད་ཙམ་དེང་དུས་ཀྱི་གསོ་རིག་པ་ཚོས་ཀྱང་ཐུབ་ན་ཡང་། འཇའ་ལུས་འོད་ལ་དེངས་ནས་ཁྱད་པར་འཕོ་ཆེན་གྱི་སྐུ་ལ་གཤེགས་དུས་ལུས་ཀྱི་སྲིན་བུ་ནས་བཟུང་སྟེ་རང་སྣང་གཞན་སྣང་གིས་བསྡུས་པའི་སེམས་ཅན་མང་པོ་ཞིག་འཁྲུལ་སྣང་ལས་ཉོན་གྱི་གཞན་དབང་ལས་གྲོལ་བར་བྱེད་པའི་གནད་གསང་དེ་གང་ལ་ཐུག་འདུག ལྷ་ཡོད་སྨྲ་བས་ལྷ་ཡོད་པར་སྨྲ་བ་དང་། ལྷ་མེད་སྨྲ་བས་ལྷ་མེད་པར་བརྗོད་ཀྱང་བླ་ལ་ཤེས་བྱའི་མཐའ་རྒྱ་ཐམས་ཅད་རང་སེམས་གཅིག་པུའི་སྟེང་ནས་ཉལ་སའི་ནང་འདུག་བཞིན་དུ་ཐག་བཅད་དགོས་པ་ཡིན། ཁྲིད་སྦྱང་ཞག་བརྒྱའི་སྐབས་སུ་སེམས་ཀྱི་བྱུང་གནས་འགྲོ་གསུམ་བཙལ་རྒྱུ་རྐྱང་བ་ལ་བདུན་ཕྲག་འགའ་རེ་དགོས་པ་ཡིན་ཡང་། ད་རེས་ཀྱི་ཟླ་ཁྲིད་ཐུང་ཐུང་འདི་ལ་སྔ་ཕྱི་དྲོའི་ཐུན་བཞི་ལས་དུས་ཚོད་ཀྱིས་མི་འདང་བ་རེད། སྔོན་འགྲོ་དངོས་གཞི་ཚང་མ་ལ་ད་རེས་ཁྲིད་སྦྱང་ཐུང་ཐུང་འདི་ཡིས་སྔར་མེད་ཀྱི་བོགས་འདི་ཐོན་བྱུང་བསམ་པ་ཞིག་དང་། སྐྱེད་འདི་བརྒྱབ་བྱུང་བསམ་རྒྱུ་ཞིག་ཨེ་ཡོད་མི་ཤེས་ཀྱང་། ཕྱིན་ཆད་འདི་ལྟར་བྱས་ནས་ཐུན་ཆོད་ཟེར་བའི་མཛུབ་མོས་རི་སྟོན་གྱི་འགྲོ་ཕྱོགས་ཤིག་བསྟན་པ་ཡིན། དེའང་གཅིག་ཡིན་ན་དུས་ཚོད་ཐུང་ཡང་དགེ་འདུན་འདུས་པའི་བྱིན་རླབས་ཀྱིས་དུས་རྒྱུན་རང་གཅིག་པུའི་ཉམས་ལེན་དང་འདྲ་རྒྱུ་མ་རེད་སྙམ། ས་ཆ་འདི་ལ་མཚོན་ན་སྔར་ཆོས་དབྱིངས་སྟོབས་ལྡན་རྡོ་རྗེ། ཞབས་དཀར་ཚོགས་དྲུག་རང་གྲོལ། དགུ་རོང་སྣ་ཚོགས་རང་གྲོལ་ལ་སོགས་པས་རྫོགས་པ་ཆེན་པོའི་ཆོས་གསུངས་ཤིང་གྲུབ་པའི་ཞབས་རྗེས་དང་ཕྱག་རྗེས་བཀོད་ས་ཡིན་པས། ཉམས་རྟོགས་ཀྱི་ཕ་ཕོག་གསར་བ་རྙེད་པ་ལ་ཡིད་ཆེས་མཛད་ཆོག་པ་ཡིན། འུ་བུའི་ཆོས་ཁྲིད་འདི་ལ་སྔོན་འཆར་ལྟར་དུ་བྱས་ན་ད་དུང་ཉི་མ་ཉི་ཤུ་ཙམ་ཞིག་ཡོད་ཀྱང་། གཞན་དབང་སྟབས་བསྟུན་མ་བྱས་ཐབས་མེད་ཡིན་པས་ན། ཡུལ་གྱི་རྒྱལ་པོའི་ཁྲིམས་དང་ས་ཆ་སོ་སོའི་སྒེར་ཁྲིམས་ཀྱི་དབང་གིས་གལ་ཏེ་དུས་ཚོད་རིང་དྲགས་སོང་བ་སོགས་བཤད་ཡོང་ནའང་གནད་འགག་མི་ཆེ་སྟེ་ཁྲེགས་ཆོད་ཙམ་ཞིག་ཁྲིད་སྦྱང་དང་བཅས་པ་གྲུབ་སོང་ན་ཡང་ཆོས་ཚན་གཅིག་ཆ་ཚང་སོང་བ་རེད། གང་ལྟར་ཁྲིད་རྐང་གཅིག་ཙམ་ལས་མ་སོང་ན་ཡང་གཅིག་པོ་དེ་མགོ་སྔ་ཚང་བ་ཞིག་བྱེད་དགོས། མདོ་དབུས་ཁམས་གསུམ་གྱི་མི་སྣ་འདི་འདྲའི་མང་པོ་ཞིག་ཆོས་ཕྱིར་དཀའ་སྤྱད་མཛད་ནས་ཆེད་གཏད་ཀྱིས་འདི་ལྟར་ཕེབས་ཡོང་ན། སྡེ་གླིང་རུ་ཉིན་ཉིན་མི་འཛོམས་གི རྟ་རག་དཀར་ཉིན་ཉིན་མི་རྒྱུག་གི འདི་ཡང་མ་མཐོང་ཕྱི་རབས་ཀྱི་གྲོགས་པོ་ཚོར་བཞག་པའི་བྱུང་རིམ་ལོ་རྒྱུས་ཀྱི་མཚན་རྟགས། སྔར་མེད་ཀྱི་སྣང་བརྙན་གསར་བ་ཞིག་ཏུ་འགྱུར་བ་ཡིན། དོན་དངོས་སུ་ང་ལྟ་བུ་ལ་མཚོན་ན་ཆོས་རྫོགས་ཆེན་བཤད་པའི་བླ་མ་ཚུལ་ལྡན་ཞིག་གི་མཚན་ཉིད་ཚང་བ་ལྟ་ཅི། སློབ་མ་སྣོད་ལྡན་ཞིག་གི་ཆུ་ཚད་ཀྱང་ཚང་དཀའ་ཡང་། ཆོས་བརྒྱུད་འདི་ལ་བསྐོས་ཤིང་དམ་པ་གོང་མས་ཐུགས་གཏད་པ་དང་། དུས་འདིའི་ཆོས་རྒྱུན་མཐུད་པའི་ལས་ཁུར་རང་ཤུགས་ཀྱིས་ཐོག་ལ་བབས་པ་ཡིན་ཕྱིར། བཟོ་མ་ཤེས་བཟོ་བོའི་བཟོ་སྟངས། མགར་མ་ཤེས་མགར་བའི་འདུག་སྟངས་ཤིག་བྱེད་དགོས་སོང་བ་ཡིན། དེའང་དགོས་དོན་གཙོ་བོ་རྣམ་པ་སོ་སོ་ལ་སྔར་མེད་ཀྱི་རྟོགས་པ་རེ་རྒྱུད་ལ་འཁྲུངས་ཐབས་ཐོན་རྒྱུ་དེ་གནད་རེད། དེས་ན་རང་རོགས་ཚང་མས་ཆོས་འདི་དང་འཕྲད་པར་དཀའ་བ་དང་། འཕྲད་དུས་ཉམས་ལེན་གྱི་གནད་རེ་མ་ཟིན་ན་སྤྱིར་དལ་འབྱོར་སྟོང་ལོག སྒོས་གྲལ་འདྲ་འདྲའི་ནང་ནས་བགོས་སྐལ་ཆད་པ་ཡིན་པ་སྟེ། གང་ཟག་རང་གི་སྒེར་དོན། བསྟན་པ་སྤྱི་ཡི་སྒོས་དོན། དྲིན་ཆེན་ཕ་མའི་དྲིན་ལན། མ་སེམས་ཅན་གྱི་འགྲོ་དོན། གནད་བརྒྱ་གཅིག་འདུས་འདི་ལ་ཚང་བའི་ཐུགས་བསམ་བཞེས་ཕྱོགས་ཀྱི་གནད་ངོ་མ་མི་འཆོར་བའི་ཐུགས་གསོའི་དྲན་སྐུལ་ཞུས་པ་དང་བཅས་ཏེ། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ། རང་གཞན་གྱིས་དུས་གསུམ་བསགས་པའི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡམས་པའི་མཐུས། ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་དམ་པ་གང་ན་སུ་བཞུགས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱད་དེ། མཐར་ཐུག་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པའི་ཕྱིར། རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག།