ཐུན་གཉིས་པའི་ཆོས་ཁྲིད།

དེ་རིང་ཡང་ཉི་མ་ཚ་བས་བསིལ་འོག་ཏུ་མེད་པ་དག་གིས་དབུ་གདུགས་ཕུབ་ན་ཆོག་ཅེས་གནང་བ་བྱིན་པ་ཡིན། དམ་པའི་ལྷ་ཆོས་རྣམ་དག་ཅིག་བསྒྲུབས་ཏེ་ཚེ་འདིའི་སྟེང་ནས་ཆོས་སྒྲུབ་པའི་དོན་གྱི་སྙིང་བོ་ཞིག་ལག་ཏུ་ལོན་པར་བྱེད་བསམ་མཁན་ཞིག་གིས་ཆོས་གང་ཟབ་ཀྱི་དངོས་གཞི་གདམས་ཁྲིད་ལ་འཇུག་པ་གནད་ཆེ་ཡང་། དེའི་སྔོན་འགྲོ་རྨང་གཞིའི་གཞིན་གདན་དེ་བརྟན་པོ་ཞིག་ཞོག་རྒྱུ་གནད་དེ་བས་ཀྱང་ཆེ་བ་ཡིན། སྔོན་འགྲོའི་རྨང་གཞི་དེ་བརྟན་པོ་ཞིག་ཞོག་མེད་ན། དངོས་གཞིའི་ཆོས་གཞུག་ཤོར་ནས་མཐའ་མར་གཅིག་ཀྱང་རྒྱུད་ན་མེད་པར་ཤི་རན་དུས་སྐྱབས་གནས་གཞན་ནས་འཚོལ་འདུག་དགོས་པ་ཞིག་ཡོང་བ་ཡིན། དེའི་མི་ཚད་ལས་མཐའ་ལོག་པ། ནགས་མཐའི་མི་རྒོད་ལ་དཔེ་འཇོག་ས་སྟེ། དེ་ཡང་མིའི་གྲལ་དུ་མེད་པའང་བརྗོད་དུ་མེད་དེ་མིའི་ཡན་གྱི་ལྷ་ལའང་ལོག་ལྟ་བྱེད་ཤེས་ཤིང་། སྟོན་པ་སངས་རྒྱས་འཇིག་རྟེན་ན་ཟླ་མེད་པའི་འདྲེན་པ་ཆེན་པོར་བྱོན་པ་སྐྱོན་ཀུན་ཟད་ཡོན་ཏན་ཀུན་ལྡན་ལའང་སྐྱོན་བཏགས་འདང་བྱེད་མཁན། མིའི་གྲལ་དུ་ཡོད་པའང་བརྗོད་དུ་མེད་དེ་ཡང་དག་ལྟ་ལ་དད་ཅིང་རྒྱུ་འབྲས་ཕྲ་ཞིབ་ཁས་ལེན་པའི་རྟག་ཞིབ་ཀྱི་རྣམ་དཔྱོད་དང་། འདི་ཕྱིའི་རྒྱང་ཐག་མཐོང་བྱེད་ཀྱི་མིག་སྒོ་ཡོད་པ་ཕར་ཞོག རང་ཉིད་འཇིག་རྟེན་འདིའི་སྟེང་ནས་འཚོ་བའི་སྐབས་ཀྱི་ནང་སེམས་ཁམས་ཀྱི་བདེ་སྐྱིད་ཙམ་ཡང་བསྒྲུབ་མི་ཤེས་ཤིང་། སྣང་བ་མ་དག་པའི་སྣང་ངོ་ལ་སྣང་ཚད་ལོག་པ་ཤ་སྟག་ཏུ་མཐོང་བ་ཞིག་ཏུ་འགྱུར་མི་སྲིད་པ་མ་ཡིན། དེ་དག་ནི་བློ་སྦྱོང་གི་ཆོས་ཀྱིས་བློ་མ་འབྱོངས་ཤིང་། ཐོས་པ་རྒྱུད་ལ་མ་སྦྱར་བས་ཆོས་དང་རང་རྒྱུད་གཉིས་ཀ་ཐ་དད་དུ་སོང་སྟེ། གཞུང་ལུགས་གང་བལྟས་གདམས་པར་ཤར་བའི་ཉམས་ལེན་རང་རྒྱུད་ལ་སྦྱར་བའི་གནད་ཀྱི་སྙིང་བོ་མ་ཟིན་པའི་རིགས་འདི་དག་མང་ཆེ་བ་ཐོས་པ་གོ་ཡུལ་ལ་ཤོར། ཐོས་དོན་བསམ་པས་རྒྱུད་ལ་མ་འབྱོར་བའི་རིགས་ལ་འབྱུང་འདུག་པ་ནི་མཐོང་ཆོས་བལྟས་ན་ཤེས་རྒྱུ་ཅན་ཞིག་ཡིན་པ་དེས་ན། བློ་ལྡོག་རྣམ་བཞིས་ཚེ་འདི་དང་ཕྱི་མ་ལས་བློ་ལྡོག གཞན་ཕན་བྱང་ཆུབ་སེམས་ཀྱིས་རང་འདོད་ཡིད་བྱེད་ལས་བློ་ལྡོག་པའམ་བློ་ལོག་པ། ཞེན་ལོག་མཁྲིས་ནད་ཅན་ལ་སྣུམ་ཟན་བྱིན་པ་འདྲ་ཞིག་གི་ཚད་དུ་འཁྱོལ་བ་ཡིན་ན། དངོས་གཞིའི་ཉམས་ལེན་གནད་ལ་འཁེལ་བ་ཞིག་འབྱུང་བ་ཡིན་པས། ངས་ཀྱང་ཆོས་དུང་ནམ་བུས་ལ་སྔོན་འགྲོ་ཏག་ཏག་བཤད་ནས་འདུག་སྙམ་པ་ཞིག་འབྱུང་བ་ནི། བློ་སྦྱོང་གི་སྐོར་འདི་རང་ཉིད་དཔེ་དང་མཚན་གཞིར་བཞག་ནས་བཤད་པར་ཡིན་པ་སྔོན་ནས་ཞུས་པ་ལྟར་དུ་རེད། རང་གཅེས་པར་འཛིན་སའི་རྩ་བ་སྲོག་ཞེས་པའི་དམར་ཐང་ཅན། དེ་བརྟེན་སའི་འབྱུང་བཞིའི་ཕུང་བོ། ལུས་སེམས་ཚོགས་པའི་ང་ཟེར་སའི་གདགས་གཞི་འདི་ལ་གཅེས་པ་ཀུན་གྱི་མཆོག་ཏུ་འདི་བརྩི་བ་ཡིན། འདིའི་རིན་ཐང་ངོ་མ་འདི་དང་ཕྱི་མ། ཚེ་རབས་ཚེ་རྒྱུད་ཐམས་ཅད་ལ་འདི་བཞིན་སེམས་ཀྱི་རྒྱུན་དང་འགྲོགས་པའི་ལུས་གང་བླངས་ཐམས་ཅད་བདེ་ཞིང་སྐྱིད་པའི་ཆེད། ཚེ་སྐྱེ་བ་རེ་ལའང་ཕ་མ་གཉེན་གྲོགས། སྡེ་དང་ཡུལ་འཁོར། ད་རུང་ཕར་དེད་ན་སྲོག་ལྡན་ཐམས་ཅད་སྐྱིད་འདོད་སྡུག་ལ་མི་འཚེར་བ་གཅིག་ཀྱང་མེད་པས་ན་རང་ཕན་རོགས་ཀྱང་སྐྱོབ་པའི་དོན་ཞིག་ཨེ་སྒྲུབ་དང་ཨེ་འགྲུབ་དེ་ད་རེས་ཀྱི་ལུས་རྟེན་འདི་ལ་ཐུག་གོ་སྙམ་པའི་དལ་འབྱོར་ཚང་བའི་ལུས་ཀྱི་རིན་ཐང་དེ་ཤེས་དགོས། དེ་ཡང་སྐབས་ཤིག་ཐེངས་ཤིག་ལ་ཚོགས་པ་ཙམ་གྱིས་མི་ཕན་པའི་ཚུལ། ཀུན་མཁྱེན་ཆོས་རྗེའི་མན་ངག་ལས་བྱུང་བའི་འཕྲལ་བྱུང་རྐྱེན་གྱིས་མི་ཁོམ་པ་བརྒྱད་དང་། རིས་ཆད་བློ་ཡིས་མི་ཁོམ་པ་བརྒྱད་སོགས་ད་ལྟ་མེད་ན་ད་ལྟ་འབྱུང་སླ་བ་དང་། ད་ལྟ་ཚང་ཡང་རྐྱེན་གློ་བུར་བ་ཞིག་ལ་བརྟེན་ནས་ད་ལྟ་མི་ཚང་བར་འགྱུར་འགྲོ་བའང་ཡོད་པའི་རྒྱུ་མཚན་དེའི་ཕྱིར་ན། རྒྱུ་ནོར་དཀོན་པོ་ཕྱི་ནས་འཚོལ་བའི་ཟང་ཟིང་གི་ནོར་ལ་སེམས་ཀྱིས་ཆགས་ཞེན་བྱེད་པ་བྱིས་པ་ཆུང་ཆུང་གིས་སེར་རའི་རིལ་བུ་ལ་ནོར་བུའི་འདུ་ཤེས་ཀྱིས་མགོ་འཁོར་བ་ལྟ་བུའི་བྱིས་པ་ལས་ཀྱང་བྱིས་པ། སོ་སོའི་སྐྱེ་བོའི་བསམ་སྤྱོད་ཡིན་པ་ལ་ཨང་སྙམ་ནས་ཤེས་པར་བྱེད་དགོས་པས་མ་ཚད། དལ་འབྱོར་རྙེད་དཀའ་འདི་རང་གི་ལུས་ཀྱི་ཁྲིད་ཡིན་པས་དལ་འབྱོར་དེ་སྔོན་མ་ཚོགས་ན་ད་ཚོགས་པར་བྱེད་ཅིང་། ཚོགས་ཡོད་ན་མི་ཉམས་པར་བསྲུངས་ཏེ་དལ་འབྱོར་རིན་ཆེན་ཚོགས་པའི་དུས་འདིར་བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་ནས། མཐའ་ཡས་སེམས་ཅན་ཐམས་ཅད་ཕན་བདེར་འགོད་པའི་ནུས་པ་བསྒྲུབ་དགོས་སྙམ་པའི་སེམས་བརྟན་པོ་མདུང་ཐུང་བྲང་ཁར་ཚད་ཀྱང་ཕྱིར་མི་ལྡོག་པ་ཞིག་ཡོད་དགོས་པ་ཡིན། ད་སྔ་ཡན་ཆད་ལ་མི་ཚེའི་ནམ་ཟླ་སོང་བ་ལ་ཕྱིར་དྲན་ཞིག་བྱེད་ན། རྒྱུ་འབྲས་ལ་ཡིད་མ་ཆེས་ཤིང་དམ་པའི་ཆོས་ལ་བློ་ཁ་གཏན་ནས་མ་ཕྱོགས་པས་ཆོས་མ་འགྲུབ་པར་ལུས་པ་ཞིག་མ་ཡིན་པར། དེ་རིང་མིན་ལ་སང་ཉིན་ཡིན། ད་ལོར་བསྡད་ནས་སང་ཕོད་བྱེད་ཆོག བྱ་བ་གལ་ཆེན་ཡས་དང་མས་ཚང་མ་འགྲུབ་དུས་དེའི་འཕྲོར་བྱེད་དགོས་སྙམ་ནས། ད་རང་གཞན་སུ་ཡིན་ཡང་ཚེ་མི་རྟག་པ་འདིའི་ཚོད་མ་ཐེང་། འཆི་བདག་གཤིན་རྗེའི་ཞགས་ཀ་ནམ་ཐེབས་ཀྱི་ཚོད་ལ་རྩིས་བཤེར་དང་འདང་དེ་ཙམ་ཞིག་མ་ཕོག་པ་དེས་གོས་པའི་གྲིབ་ཀྱིས་མང་ཆེ་བ་ཆོས་མེད་ལག་སྟོང་འདི་མེད་ཚེ་འདིའི་བསགས་པའི་ནོར་དང་འགྲོགས་ཐབས་མེད་ཅིང་། ཕྱི་མེད་དགེ་བའི་བསགས་སྦྱངས་སྔོན་སོང་ལ་རེ་ས་མེད་པས་ཤི་ཁར་འགྱོད་ཀྱང་ཕན་ཐོགས་མེད་པ་དེ་འདྲའི་ས་ཚོད་ལ་ཐུག་མཁན་མང་ཆེ་བ་སྟེ། ཕར་བལྟས་ལ་མཐོང་དུ་ཡོད་པ་ཡིན། དེ་ཅི་ཞིག་གིས་ལན་སོང་བ་ཡིན་ཞེ་ན། ལོང་མེད་རྒྱུད་ལ་མ་སྐྱེས། མི་གཞན་དག་ཤི་རྒྱུ་ཡོད་ཀྱང་རང་ཤི་རྒྱུ་མེད་སྣང་ཙམ་ཞིག་མ་ཤར་ནའང་། ད་རུང་ཡང་མི་ཤི སང་ཕོད་ག་ལ་ཤི་སྙམ་པའི་འདུ་ཤེས་དེ་ཏག་ཏག་ད་ལོ་ཡང་འཛིན། སང་ཕོད་ཀྱང་འཛིན་ནས་མཐའ་དེ་ལ་གཏུགས་སོང་བ་ཡིན། རང་ཉིད་རྒན་དར་གཞོན་གསུམ་གྱི་དུས་ཚོད་ཀྱིས་ན་ཚོད་འགྱུར་བཞིན་ཡོད་པའི་མཚང་མ་མཐོང་བ་ཡིན། རང་ཉིད་ཀྱི་དེ་ལོའི་འདྲ་པར་ཞིག་དང་ད་གཉིས་བསྡུར་ན། འགྱུར་སོང་ནས་སྔར་གྱི་དེ་ངོ་མི་ཤེས་སར་ཐོན་ཡོད་ཀྱང་། ད་རུང་ཡང་མི་ཤི་བའི་ཆ་བཞག་ནས་ལོ་གཅིག་ལ་འདུག་པའི་ཚེ་མེད་ཀྱང་ལོ་བརྒྱ་ཐམ་པ་ལ་མི་ཤི་བ་ཤེས་ནས་ལོས་ཡོད་སྙམ་པ་ལྟ་བུ་ཞིག་གིས་འཇིག་རྟེན་ཚེ་འདིའི་བྱ་གཞག་དང་ཆོས་བརྒྱད་དཀར་ནག་ཁྲ་གསུམ་གྱིས་བསླུས་ནས། དལ་འབྱོར་གྱི་རིན་ཐང་ཤོར་བའི་ཕམ་ཉེས་ཐམས་ཅད་ཀྱི་རྩ་བ་ནི་རྟག་འཛིན་བྱེད་རྒྱུ་འདི་ལ་ཐུག་པ་རེད། ཚེ་མི་རྟག་པའི་ཁྲིད་འདི་ཚོར་བསམ་བློ་ཞིག་བཏང་ན། ཕྱི་སྣོད་ཀྱི་འཇིག་རྟེན་མི་རྟག བསྐལ་བ་ཆགས་གནས་འཇིག་གསུམ་གྱི་རིམ་པ་བརྒྱུད་བཞིན་ཡོད། ནང་བཅུད་ཀྱི་སེམས་ཅན་མི་རྟག་ནམ་འཆི་ཆ་མེད་དང་། འཆི་རྐྱེན་ངེས་མེད་ཡིན་པར་གསུངས་གོ་ཞིང་ཐོས་པས་མ་ཚད། བཤད་དགོས་ཚེ་ཡང་བཤད་ཤེས་པའི་ཁ་བྱང་ཁུར་ནས་ཡོད་ཀྱང་། རྒྱུད་ལ་མི་འབྱོར་བ་ནི་ཡང་ཐོས་པ་ཁ་ཕྱིར་བལྟས་ཀྱིས་གོ་ཡུལ་ལ་ཤོར་བའི་དྲེད་པོ་ཆོས་རྒྱུས་མཁན་ཞེས་པ། འཆི་བདག་གི་ཕོ་ཉ་ཟུར་དུ་ཐོན་མ་བྱུང་གི་བར་དུ་སྐྲག་མི་ཤེས་པ་སྟེ། དོན་ངོ་མའི་ཐོག་ནས་བཤད་ན། བླུན་ཆེས་ནས་བླུན་པོ་ཟོག་གི་ཟླ་བོ་ལ་ཕལ་ཆེར་འགྲོ་རྩིས་བྱེད་པ་ཡིན། རྒྱ་ཡ་པོས་བཤའ་ཟོག་ར་བའི་ནང་ལ་བཙུད་ནས་ཡོད་དུས། དུད་འགྲོ་བྱོལ་སོང་གི་སྐེ་གཅད་རྒྱུ་ཡིན་པ་ཁོ་ཚོས་ག་ལ་ཤེས། ཤེས་རུང་བྲོས་ས་གབ་ཁུང་མི་ལོན་པའི་ཚད་ལ་ཐོན་པ་རེད། འུ་ཚོས་མཐོ་རིས་མི་ཡི་ལུས་རྟེན་ཞིག་བླངས་པས། རྟེན་མཆོག་དམན་གྱི་ཐད་ནས་དུད་འགྲོའི་ལུས་རྟེན་ལས་དགའ་བ། སྨྲ་ཤེས་དོན་གོ རྣམ་དཔྱོད་རིག་པ་གྲུང་པོ་ཅན་ཡིན་ལ། ལུས་ཅན་ཐམས་ཅད་འཆི་བ་ལས་མི་འདའ་བས་ཤི་དགོས་པའི་ཐད་ནས་བཤའ་ཟོག་བཤས་རའི་ནང་དུ་ཚུད་པ་དང་གཅིག་པ་ཡིན། འོན་ཀྱང་འུ་ཚོས་མཐོ་རིས་ཀྱི་མིའི་རྣམ་དཔྱོད་བེད་སྤྱད་དེ་ད་རེས་ལན་གཅིག་གི་འཆི་བ་ལས་ལྡོག་ཐབས་མེད་ཀྱང་། ཕྱིན་ཆད་གཏན་དུ་འཆི་བའི་སྡུག་བསྔལ་འདི་མྱང་མི་དགོས་པའི་ཆེད་དུ་ད་རེས་ཤི་དུས་འཁོར་བ་ངན་སོང་གི་སྡུག་བསྔལ་མི་མྱོང་བའི་ཐབས་དེ་དགོས་འདུག་སྙམ་ནས། བཙལ་ཆོག་པ་རེད་ལ་བཙལ་དགོས་པ་ཡང་རེད། དེ་མིན་པར་གསོན་ཚེ་ལ་ཟ་ཉལ་འགྲོ་འདུག་མིན་པ་མ་ཤེས་པར་ཟོག་ཉལ་ཉལ་ཟོག་ལངས་ལངས་ཏག་ཏག་གིས་འདས་ན་ཤི་དུས་ཀྱང་ཕལ་ཆེར་ཟོག་ཤི་ཤི་བྱས་ཏེ་གཟེར་རྒོད་ཅིག་དང་ལྷན་དུ་རྐང་ར་ལག་ར་བྱས་ནས་ཤི་དགོས་པའམ། ཡ་ན་གཡང་ས་དང་གཅན་གཟན་མཚོན་ཆ་སོགས་ལ་ལྕེབས་ཏེ་ཤི་དགོས་པ་ཡིན། མདོར་ན་མི་ཚེ་བྱ་བའི་མཇུག་སྡོམ་དེ་འཆི་བས་བརྒྱབ་སྟེ་དབུགས་རྔ་བསྡུ་བའི་སྐབས་སུ་ཕན་པའི་འབྲས་བུ་ཡོད་པ་ཁེ་རུ་མ་ཞིག་ཀྱང་མེད་པའི་ཐོག་ལ། སྡུག་སྡིག་པ་རི་རབ་འདྲ་ཞིག་དང་འགྲོགས་ནས་ཐར་མེད་མུན་ནག་གི་དོང་རིང་གཏིང་ཆེན་ཞིག་ལ། ཡར་ཐར་མེད་པར་བུད་མི་འགྲོ་བའི་ལམ་གཞན་ཞིག་སྔུན་ན་མ་ཡོད་པ་ཡིན། འདང་དེ་ཚོ་ལ་བརྒྱབ་ན། འཆི་བ་ཞེས་པ་ནི་ཐམས་ཅད་ཀྱིས་མིང་ཙམ་ཡང་བཟུང་ན་མི་འདོད་པའི་འཇིགས་རྔམ་ཆེན་པོ་ཡིན་ཡང་། བསྒྲུབ་ཤེས་པའི་དམ་པའི་ལྷ་ཆོས་ལ་ཞུགས། གདམས་པ་ཟབ་མོའི་ཉམས་ལེན་གྱི་དྲོད་ཚད་བརྙེས་པ་ཞིག་རང་གིས་རང་ལ་བྱས་ན། འཆི་བ་སྐྱིད་པའི་སྒོ་ཆེན། ཞིང་དག་པ་ལ་འགྲོ་སའི་ལམ་སྣེ་རུ་འཛིན་ཆོག་པ་རེད། ད་རུང་སྐྱེས་བུ་ཡང་རབ། དབང་རྣོན་ཤེས་རབ་ཁྱད་འཕགས་ཀྱི་རྩལ་སྟོབས་ལྡན་པ་ཞིག་ཡིན་ན་ཆོས་རྫོགས་པ་ཆེན་པོ་འདིའི་ཟབ་ཁྲིད་གདམས་པའི་མྱུར་ལམ་ལ་བརྟེན་ཏེ་ཤི་མི་དགོས་པར་ཚེ་འདིའི་སྟེང་དུ་ཀ་དག་ཁྲེགས་ཆོད་ཀྱི་ཉམས་ལེན་བསྐྱངས་ནས་ལུས་རྡུལ་ཕྲན་དུ་དེངས་ནས། སྐྲ་སེན་ཞིག་མ་གཏོགས་ཤུལ་དུ་ལྷག་མི་འདུག་ཟེར་རྒྱུ་ཅན་གྱི་འཇའ་ལུས་འགྲུབ་པ་དང་། ལྷུན་གྲུབ་ཐོད་རྒལ་གྱི་ཉམས་ལེན་གདེང་དུ་གྱུར་པ་ཡིན་ན། དེ་ཚེ་འདིའི་ཐོག་ནས་སྣང་བཞི་མཐར་ཕྱིན་ནས། ལུས་འདི་མ་སྤངས་པར་འོད་ལུས་འཕོ་ཆེན་གྱི་སྐུར་བཞེངས་ནས་རྟེན་འདིའི་ཐོག་ནས་འཁོར་བ་མ་སྟོངས་ཀྱི་བར་དུ་སེམས་ཅན་གྱི་འགྲོ་དོན་རྒྱུན་མི་འཆད་པ་བྱེད་ཆོག་པ་དེ་འདྲ་ཡིན་ལ། དེ་ཡང་གཅིག་ལ་དབང་ན་གཅིག་ལ་མི་དབང་བ་དེ་འདྲ་མ་ཡིན་པར། བརྩོན་འགྲུས་སྙིང་སྟོབས་སུ་ལ་ཡོད་ན་གང་ཟག་རང་གིས་ཐུབ་ན་ཆོས་གདམས་པ་ཡིས་ལག་མི་ཐོགས་པའི་གདམས་ཟབ་བདུད་རྩིའི་ཐིགས་པ། འཁོར་བའི་གཅོང་ནད་འབྱིན་པའི་སྨན་གཅིག་ཆོག ཐར་བའི་སྲོག་རྩ་མཐུད་པའི་གསོས་མཆོག་གྱུར། འདི་འདྲ་དང་འཕྲད་དུས་མི་ཚེ་དོན་ལྡན་དུ་བྱས་ཏེ། ཐར་བའི་ལམ་སྣ་ཟིན། རང་གཞན་གཉིས་ཀྱི་དོན་འགྲུབ། གཏན་གྱི་འདུན་མ་མ་འཆུགས་པར། གང་བྱེད་ཅི་བྱེད་ཐམས་ཅད་དམ་པའི་ཆོས་དང་མཐུན་པ། མདོར་ན་བྱང་ཆུབ་སྒྲུབ་པའི་ལུས་རྟེན་ཁྱད་པར་ཅན་འདི་དོན་མེད་ཆུད་ཟོས་ལ་མི་འགྲོ་བར་ཐར་ལམ་འཚོལ་རྒྱུ་དེ་རང་དྲིན་རང་ལ་ཆེ་བའི་བྱ་བ། ཐང་ལྷོད་སྐད་ཅིག་ཙམ་ལ་ཡང་ཤོར་འགྲོ་མི་ཉན་པས། དམ་པའི་ཆོས་སྒྲུབ་པའི་ཐོག་མར་དེ་ལྟ་བུའི་སེམས་ཤིག་སྐྱེད་དགོས་པས་མ་ཚད་པར། ཐོག་བར་མཐའ་མ་གསུམ་པོ་ལ་འབྲལ་མི་རུང་བ་ཡིན། དེ་ལྟ་བུའི་བློ་སྦྱོང་རྒྱུད་ལ་འབྱོར་བ་དང་བཅས་པའི་ཐེག་ཆེན་མདོ་སྔགས་ཀྱི་དམ་ཆོས་གསན་བསམ་སྒོམ་སྒྲུབ་གང་གི་སྐབས་ཡིན་ནའང་། དགེ་རྩ་ཐབས་ཀྱིས་ཟིན་པའི་སྦྱོར་བ་སེམས་བསྐྱེད་དམ་པ། དགེ་རྩ་རྐྱེན་གྱིས་མི་ཤིགས་པར་བྱེད་པ་དངོས་གཞི་དམིགས་མེད་དམ་པ། དགེ་རྩ་གོང་ནས་གོང་དུ་འཕེལ་བར་བྱེད་པ་མཇུག་བསྔོ་བ་དམ་པ་གསུམ་པོ་དང་མི་འབྲལ་བའི་སྟེང་ནས། བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དང་། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་དེ་དག་ཀྱང་རང་ཤུགས་ཀྱིས་ཚང་བ་ཞིག་བྱས་ཏེ། ཆོས་གསན་པའི་ཀུན་སྤྱོད་དག་ཀྱང་མདོ་རྒྱུད་བཀའ་དང་བསྟན་བཅོས་དག་ལས་ཇི་ལྟར་འབྱུང་བ་བཞིན་དུ་ཚོགས་པར་བྱས་ཏེ་ཆོས་གསན་དགོས་པ་ཡིན། སོ་སྐྱེས་ཐ་མལ་བ་ཞིག་ལ་མཚོན་ན་ཆོས་ཁྲིད་རེའི་སྐབས་སུ་དེ་ལྟར་དགོས་པ་ཡིན་ཟེར་དུས། ངོ་མས་དེ་ལྟར་དགོས་སོ་སྙམ་ཁུལ་བྱེད་ཀྱང་། རྣམ་པར་ཤེས་པ་ལས་སུ་མི་རུང་བ་དེ་སེམས་ཅན་གྱི་ཆོས་ཉིད་ཡིན་པས། དེའི་ཐོག་ལ་བདེན་པ་ནི་ལས་སླ་བ་ཞིག་མ་ཡིན་རུང་། གོམས་ན་སླ་བར་མི་འགྱུར་བའི་དངོས་པོ་སྲིད་ན་ཡོད་པ་མ་པས། ཆུང་རིམ་ནས་བཅོས་ན་ཆེ་རིམ་གྱིས་གོམས་ནས་རྒྱུད་འཆོས་ཐུབ་པ་མ་གཏོགས། དེ་སྔོན་བཞིན་བདག་མེད་དུ་འཕངས་ན་རང་རྒྱུད་བཟང་བོའི་ཕྱོགས་ལ་འགྱུར་བ་ལོ་བརྒྱ་སོང་ཡང་ཡོད་པ་མ་ཡིན། དེ་ལྟ་བུའི་ཐུགས་བསམ་འདང་རྒྱག་དང་བཅས་ཏེ། སྐབས་ཀྱི་འཆད་བྱ་གང་ཡིན་ན། ཞབས་དཀར་ཚོགས་དྲུག་རང་གྲོལ་གྱི་འོད་གསལ་རྫོགས་པ་ཆེན་པོའི་ཁྲེགས་ཆོད་ལྟ་བའི་གླུ་དབྱངས་ས་ལམ་མ་ལུས་མྱུར་དུ་བགྲོད་པའི་རྩལ་ལྡན་མཁའ་ལྡིང་གཤོག་རླབས་འདི་ཉིད་འཆད་བཞིན་པའི་སྐབས་ལས། ཉིན་དང་པོར་བཤད་བྱའི་ཡན་ལག་བཤད་པ་དང་འདིའི་ཐོག་མར་དགེ་བ་ཀླད་ཀྱི་དོན་བཤད་ཅིང་། བར་དུ་དགེ་བ་གཞུང་གི་དོན་ལས་ཀྱང་གཞི་རྒྱུད་བདེ་གཤེགས་སྙིང་པོས་འཁོར་འདས་ཀུན་ལ་ཁྱབ་པའི་ངོ་མཚར་ཚིག་བདུན་གྱིས་བསྟན་པ་དང་། མ་རྟོགས་འཁྲུལ་བའི་དུས་ན་སེམས་ཞེས་སུ་བཏགས་པ་འདིའི་མཚང་བཙལ། དེའི་རྩད་བཅད། སེམས་ཀྱི་བྱུང་གནས་འགྲོ་གསུམ་འཚོལ་བ་ཡན་གྱི་གདམས་པ་སོང་ནས། སེམས་ཀྱི་བྱུང་གནས་འགྲོ་གསུམ་འཚོལ་བ་དེའི་ཁྲིད་སྦྱང་ཡང་ལག་ཁྲིད་ཀྱི་ཚུལ་དུ་ཉི་མ་གཅིག་གཉིས་ཤིག་ལ་མཛད་པ་ཡིན། དེ་རིང་དངོས་གཞི་སེམས་ཀྱི་ངོ་སྤྲོད་ལ་ཐུག་པ་ཡིན། འདི་ལ་སེམས་ངོ་སྤྲོད་ཟེར་རྒྱུ་ཞིག་དང་། རིག་ངོ་སྤྲད་ཟེར་རྒྱུ་ཞིག་གི་ཐ་སྙད་གཉིས་ཀྱི་བཤད་སྲོལ་ཞིག་འུ་ཚོའི་ངག་རྒྱུན་ན་ཡོད་པ་འདི་དོན་གཅིག་ཡིན་པར་བཤད་ནའང་ཆོག་སྟེ། སེམས་ངོ་སྤྲད་ཟེར་ན་སེམས་འཁྲུལ་བ་མངོན་ལ་བུད་བུད་ཁར་ཡོད་པ་འདིའི་མ་འཁྲུལ་སེམས་ཉིད་ཀྱི་ངོ་བོ་རིག་པའི་ཡེ་ཤེས་ཡིན་པས་སེམས་ངོ་རིག་ངོ་གང་སྤྲད་ཀྱང་དོན་གཅིག་ཏུ་འབབ་ཅིང་། གཉིས་ཡིན་པའི་དབང་དུ་བཏང་ན། ངོ་སྤྲད་རྒྱུ་ཆོས་སྐུའི་ཡེ་ཤེས་གཅིག་ཡིན་ཡང་སྤྲད་ཡུལ་གདུལ་བྱའི་ངོས་ནས། རྫོགས་ཆེན་གྱི་གདུལ་བྱ་སྤྱིར་དབང་པོ་རྣོན་པོ་ཚོགས་བསགས་པ་སྔོན་སོང་ཅན་ཤ་སྟག་ཡིན་པ་ལ། དེའི་ནང་ན་རྣོ་རྟུལ་གྱི་ཁྱད་པར་གཏན་ནས་མེད་པ་ཞིག་ཀྱང་མིན་པའི་སྟབས་ཀྱིས། སྣང་བ་ཡུལ་གྱི་བློ་ཅན་ལ་སེམས་ངོ་སྤྲད་པ་དང་། རིག་པ་རང་སྣང་གི་བློ་ཅན་ལ་རིག་ངོ་སྤྲད་པ་ཞེས་བརྗོད་ནའང་དོན་དང་མཐུན་པ་ཡིན། འདི་ནས་ཀྱང་དེ་བཞིན་དུ་ངོ་སྤྲོད་ཚུལ་རིམ་དང་རིམ་མིན་གྱིས་འབྱུང་བས། དང་པོ་ལྟ་བ་མཁའ་ལྡིང་གཤོག་རླབས་མཚན་དང་དོན་རྗེས་སུ་འབྲེལ་བ་སྟེ། རྫོགས་ཆེན་ལྟ་བ་ཡས་བབས་ཁྱུང་མཁའ་ལྡིང་དཔག་བསམ་གྱི་ཤིང་རྩེར་བབས་པ་བཞིན་དུ་ལྟ་བ་ཡེ་གྲོལ་ཀ་དག་གི་རང་བཞིན་གཏན་ལ་ཕབ་པ་དང་། འཁྲུལ་བ་གཏན་ལ་ཕབ་པའི་ངོ་སྤྲོད་གཉིས་ཀྱིས་གཞི་བཏིང་ནས། རིག་པ་རང་སྣང་གི་བློ་ཅན་ལ་དངོས་གཞིའི་ལྟ་བའི་རང་ངོ་སྤྲད་པ་ལས། དང་པོ་རང་བཞིན་གཏན་ལ་ཕབ་པའི་ངོ་སྤྲོད་ནི། ཨེ་མ་ཧོ། ད་ཡང་སྐལ་ལྡན་བུ་རྣམས་ཚུར་ཉོན་དང་། །ཁྱེད་རྣམས་དེ་ལྟར་བརྟགས་ཤིང་དཔྱད་པའི་ཚེ། །སེམས་ཞེས་མཛུབ་མོ་བཙུགས་ནས་འདི་ཡིན་ཞེས། །དངོས་པོར་གྲུབ་པ་རྡུལ་ཙམ་མ་རྙེད་ཚེ། །མ་རྙེད་པ་དེ་རྙེད་པའི་མཆོག་ཡིན་ནོ། །ཞེས་མདོར་བསྟན་ནས། འོ་སྐོལ་སེམས་ལ་དང་པོ་བྱུང་ས་མེད། །ཡེ་ནས་སྟོང་པས་ངོ་བོ་ངོས་བཟུང་མེད། །བར་དུ་གནས་ས་དབྱིབས་དང་ཁ་དོག་མེད། །ཐ་མར་འགྲོར་མེད་འདིར་སོང་རྗེས་མེད་དེ། །འགྱུ་བ་སྟོང་འགྱུ་སྟོང་པ་སྟོང་སྣང་ཡིན། །ཞེས་གསུངས་ཏེ། འཁོར་འདས་གཉིས་ཀྱི་རྩ་བ་སེམས་འདི་ལ་ཐུག་ཡོད་པས་ན་འདིའི་རྩད་བརྡར་དེ་ཙམ་ཞིག་མ་ཆོད་བཞིན་དུ་དགེ་སྦྱོར་གྱི་གཟུགས་བརྙན་ཆེ་ཆུང་དང་། མིང་ཆེ་ཆུང་ཅི་ཞིག་བཏགས་ནས་བྱེད་ཀྱང་། དོན་མེད་ཀྱི་ལམ་ལོག་མིན་ཡང་དྲང་ལམ་ཉེ་ལམ་མིན་པའི་གནད་དེ་བསྟན་ནས། སེམས་བཙལ་བའི་སྐབས་སུ་དང་པོ་བྱུང་ས་ཕྱི་ཡུལ་ནང་ལུས་གང་ལ་བཙལ་ན་ཡང་མ་རྙེད། དང་པོར་བྱུང་ས་མ་རྙེད་པའི་སེམས་དེ་བར་དུ་གནས་ས་འདི་ན་ཡོད་འདུག་སྙམ་པ་ཞིག ཡང་ཕྱི་ནང་བར་གསུམ་ནས་མ་རྙེད། དང་པོ་གར་ཡོང་མེད་ཅིང་བར་དུ་གནས་ས་བསྟན་དུ་མེད་པ་དེ་མཐའ་མར་འགྲོ་ས་ཡང་ཅི་ལ་རྙེད་དེ་མ་རྙེད། བྱུང་གནས་འགྲོ་གསུམ་གྱི་ཐད་ནས་ཡོད་པ་རེད་ཟེར་ནས་མཛུབ་གུ་འཛུགས་ས་ཡང་མེད་ལ། མེད་པ་རི་བོང་གི་རྭ་དང་མོ་གཤམ་གྱི་བུ་ལྟར་ཡིན་པར་བརྗོད་དགོས་ན་སེམས་མེད་ས་རྡོ་ཞིག་དང་ཡང་མི་འདྲ་བའི་ཕྱིར་ན། ཡོད་མེད་གཉིས་ལས་འདི་ཡིན་ཟེར་ནས་ཐག་གཅོད་དགོས་ན་ཟེར་ཐག་མི་ཆོད་པ། ཅི་ཟེར་འདི་ཟེར་མེད་ས་ལ་ཐོན་པ་འདི་བཙལ་མཁན་ཞན་ནས་མ་རྙེད་པ་མ་ཡིན་པར། བཙལ་རྒྱུ་ཁོ་རང་དེ་འདྲ་ཞིག་ཡིན་པ་དེའི་རང་བཞིན་མཐོང་བ་ཡིན་ཕྱིར་མ་རྙེད་པ་དེ་རྙེད་པའི་མཆོག་ཡིན། དེའི་ཕྱིར་ན་འགྱུ་བ་སྟོང་འགྱུ་སྟོང་པ་རང་སྣང་ཡིན་པར་གསུངས་ཤིང་། བྱུང་གནས་འགྲོ་གསུམ་གྱིས་ཕྱི་ཡུལ་གྱི་སྟེང་ནས་གཞི་མེད་རྩ་བྲལ་དུ་གཏན་ལ་ཕབ་ནས། དངོས་གཞི་ཡུལ་ཅན་སེམས་ཀྱི་རང་བཞིན་གཏན་ལ་ཕབ་པའི་ངོ་སྤྲོད་དངོས་དེ་ངོ་བོ་རང་བཞིན་ཐུགས་རྗེ་ཡེ་ཤེས་སུམ་ལྡན་གྱིས་གསུངས་ལ། འདིའི་མན་ཆད་དུ་གཞི་ལམ་འབྲས་གསུམ་གང་གི་ཐད་ནས་བཤད་ཀྱང་སྐུ་གསུམ་ཡེ་ཤེས་སུམ་ལྡན་གྱི་དབྱིངས་རིག་འདུ་འབྲལ་མེད་པའི་སྒྲོམ་གཞི་ལས་མི་འདའ་བར་གསུངས་པ་ཡིན། སེམས་ཉིད་འདི་ནི་དང་པོ་རྒྱུས་མ་བསྐྱེད། །ཐ་མ་ཕྱི་རོལ་རྐྱེན་གྱིས་འདི་མི་འཇིག །འཕེལ་དང་འགྲིབ་དང་གང་སྟོང་འདི་ལ་མེད། །འཁོར་འདས་ཡོངས་ལ་ཁྱབ་པས་ཕྱོགས་རིས་མེད། །འདི་ཞེས་མི་མཚོན་ཅིར་ཡང་འགགས་མེད་འཆར། །ཅིར་ཡང་མ་གྲུབ་ཡོད་མེད་མཐའ་ལས་འདས། །འགྲོ་འོང་མེད་ཅིང་སྐྱེ་འཆི་གསལ་འགྲིབ་མེད། །ཅེས་གསུངས་ཏེ། ཆོས་ཅན་སེམས་ཀྱི་ཆོས་ཉིད་དེ་དང་པོ་རྒྱུ་ཡིས་བསྐྱེད་མ་མྱོང་བའི་རང་བྱུང་ཡེ་ཤེས་ཡིན་པས། སེམས་དང་པོ་གང་ནས་བྱུང་བའི་བྱུང་ཁུངས་མི་རྙེད་པ་དེ་སྐྱེ་བ་མེད་པ་ཆོས་སྐུ་གཏན་ལ་ཕབ་པ་ཡིན། ཐ་མ་ཕྱི་རོལ་གྱི་རྐྱེན་ཅི་ཞིག་གིས་ཀྱང་འདི་འཇིག་མི་ཐུབ་པ་སྟོང་ཉིད་གཞོམ་གཞིག་དང་བྲལ་བ། རྡོ་རྗེའི་དཔེ་ཡིས་མཚོན་བྱ་ཡིན་པས་སེམས་མཐའ་མར་འགྲོ་ས་རྙེད་དུ་མེད་ཅིང་། བྱུང་ས་འགྲོ་ས་མེད་པའི་སེམས་དེ་བར་དུ་གནས་ས་དེ་བས་ཀྱང་རྙེད་དུ་མེད་པའི་སྟབས་ཀྱིས་འགགས་མེད་རང་ཤར་གྱི་གཟུགས་སྐུ་རྣམ་གཉིས་མཚོན་པ་ཡིན། དེའི་ཕྱིར་འདི་ལ་འཕེལ་འགྲིབ། གང་སྟོང་། འགྲོ་འོང་། སྐྱེ་འཆི། གསལ་འགྲིབ་མེད་པར་རིག་རྒྱུ་དེས། ཡོད་མེད་སོགས་ཀྱི་མཐའ་ལས་འདས་པའི་ཟབ་མོ་བརྒྱད་ལྡན་གྱི་ལྟ་བ་ཀློང་དུ་གྱུར་པ་ལ་ཉེ་བཞིན་ཡོད་པའི་རྟགས་མངོན་དུ་གྱུར་པའོ། །དེ་ཉིད་དཔེ་ཡིས་བསྟན་པ་ནི། སེམས་ཀྱི་རང་བཞིན་དྲི་མེད་ཤེལ་གོང་བཞིན། །ངོ་བོ་སྟོང་པ་རང་བཞིན་གསལ་བ་དང་། །ཐུགས་རྗེ་འགག་པ་མེད་པར་ས་ལེར་གནས། །འཁོར་བའི་སྐྱོན་གྱིས་ཅི་ཡང་མ་གོས་ཏེ། །སེམས་ཉིད་ཡེ་ནས་སངས་རྒྱས་ཡིན་པར་ངེས། །ཞེས་གསུངས་ཏེ། རྫོགས་པ་ཆེན་པོའི་དཔེ་དོན་རྟགས་ཀྱི་ངེས་པའི་མཚོན་དཔེར་བཤད་སྐབས་དཔེ་རྡོ་རྗེ་སེམས་དཔའི་མེ་ལོང་ངམ་ཤེལ་རྡོ་དང་རིན་ཆེན་ཟུར་བརྒྱད་ལ་སོགས་ཀྱིས་མཚོན་པ་ཁར་སང་དབང་གི་སྐབས་སུ་བཤད་འདུག་རྒྱུ་དེས། མཚོན་བྱ་དོན་གྱི་གནས་ལུགས་ཇི་ལྟར་མཚོན་པ་རེད་ཟེར་ན། ཤེལ་གྱི་གོང་བུ་དེ་ཕྱི་ནང་ཟང་ཐལ་ཡིན་ནི་རེད། འདི་ཞེས་མཚོན་ཐབས་དང་བྲལ་བ་ཅིའི་ངོ་བོར་ཡང་མ་གྲུབ་པའི་རྒྱུ་མཚན་དེས་ངོ་བོ་སྟོང་པ་ཆོས་སྐུ་མཚོན། ཅང་མེད་སྟོང་པ་ཕྱང་ཆད་མ་ཡིན་པར་རང་བཞིན་གསལ་བ་དེའི་གདངས་འཆར་རུང་འགགས་མེད་ཀྱི་རང་བཞིན་འདིས་གསལ་བ་ལོངས་སྐུ་མཚོན། རྐྱེན་ཉི་འོད་སོགས་དང་འཕྲད་ན་འོད་ལྔའི་ཁ་དོག་མ་འདྲེས་པར་འཆར་རུང་གིས་ཐུགས་རྗེ་ཀུན་ཁྱབ་བམ་འགགས་མེད་ཀྱི་སྤྲུལ་སྐུ་མཚོན་པ་སྟེ། ད་ལྟ་གཞི་དུས་ནས་སེམས་ཉིད་ཀྱི་སྐུ་གསུམ་ཡེ་ཤེས་སུམ་ལྡན་ལ་འཕོ་འགྱུར་བྲི་གང་དང་བྲལ་བར་བཞུགས་པར་བསྟན་པའོ། །དེའི་དོན་བསྡུ་བ་ནི། འདི་ནི་གཞི་ཡི་སེམས་ཉིད་གནས་ལུགས་ཀྱི། །རང་བཞིན་གཏན་ལ་ཕབ་པའི་ངོ་སྤྲོད་དོ། །ཞེས་གཞི་ཀ་དག གཞིར་གནས་ཡེ་ཤེས་སུམ་ལྡན། ངོ་བོ་སྟོང་པ་ཆོས་སྐུ། ཆོས་སྐུ་གདོད་ནས་དག་པའི་ངོ་བོའི་སྐུར་བཞུགས་ཀྱང་། སྐུ་གསུམ་འདུ་འབྲལ་མེད་པའི་འཆར་གཞིར་གནས་པ་ཙམ་མ་གཏོགས་མཚན་མ་རིས་ཅན་གྱི་ཞལ་ཕྱག་ཏུ་གྲུབ་པ་ཅུང་ཟད་ཀྱང་ཡོད་པ་མ་ཡིན། རང་བཞིན་གསལ་བ་ལོངས་སྐུ། མཚན་ཉིད་འཛིན་པའི་འོད་ལྔར་བཞུགས་ཀྱང་། ཁ་དོག་རིས་ཅན་དུ་གྲུབ་པ་གཅིག་ཀྱང་ཡོད་པ་མ་ཡིན། ཐུགས་རྗེ་རིག་པ་སྤྲུལ་སྐུ་ཀུན་ཁྱབ་རིག་པའི་ཡེ་ཤེས་སུ་བཞུགས་པའི་མཁྱེན་ཆ་འགག་པ་མེད་ཀྱང་། ཡུལ་ཡུལ་ཅན་བྱ་བྱེད་ཀྱི་རྣམ་པར་གྲུབ་པ་ཞིག་ནམ་ཡང་མ་ཡིན། རང་བཞིན་གཏན་ལ་ཕབ་པའི་ངོ་སྤྲོད་སོང་ནས། གཞི་ལས་གཞི་སྣང་ཤར་བའི་གནས་སྐབས་ཀྱི་འཁྲུལ་བ་གཏན་ལ་ཕབ་པའི་ངོ་སྤྲོད་ལ། ཡེ་ཐོག་གཞི་ཡི་གནས་ལུགས། དེ་ལས་གཞི་སྣང་བྱུང་བ། ཀུན་ཏུ་བཟང་པོའི་གྲོལ་ཚུལ། ཁམས་གསུམ་སེམས་ཅན་གྱི་འཁྲུལ་ལུགས། ཡང་བསྐྱར་འཁྲུལ་བ་གཞི་ལ་དག་ཚུལ་སོགས་མང་ཡང་། འདིའི་མན་ངག་འདི་རྣལ་འབྱོར་ཀུ་ས་ལུའི་མན་ངག་ཆུ་འབབ་གསེབ་ཚག་ཏུ་སྟོན་པའི་ལུགས་མ་འདྲེས་ཡོངས་རྫོགས་གར་བབ་བབ་ཏུ་སྟོན་པའི་མན་ངག་ཡིན། འདིའི་དགོས་པ་ཅི་ཞིག་ཡིན་ན་དབང་བོ་རྣོ་འབྲིང་རྟུལ་གསུམ་ཐུན་མོང་ལ་ཕན་པ་གཙོ་བོར་འཛིན་པར་མཛད་པ། མཐའ་གཅིག་ཏུ་རྟོག་གེའི་བསྟན་བཅོས་ལྟར་དུ་ཚིག་ལ་བསྒྲིམས་པ་མ་ཡིན་པར་དོན་གསལ་རྗེན་དུ་སྟོན་པའི་མན་ངག་ཟབ་མོ་གྲོང་བའི་ཕལ་སྐད་ཀྱིས་ཀྱང་གོ་ཐུབ་པ་ཐུན་མིན་གྱི་ཁྱད་ཆོས་ལྡན་པའོ། །ཨེ་མ་ཧོ། ད་ཡང་སྐལ་ལྡན་སེམས་ཀྱི་བུ་རྣམས་ཉོན། །དང་པོ་ཆོས་སྐུ་ཀུན་ཏུ་བཟང་པོ་ཡིས། །བསྒོམ་པ་རྡུལ་ཙམ་མ་བྱས་གྲོལ་ཚུལ་དང་། །འགྲོ་བ་དྲུག་གིས་མི་དགེ་སྡིག་པའི་ལས། །སྤུ་ཙམ་མ་བྱས་འཁོར་བར་འཁྱམས་ཚུལ་ནི། །ཞེས་མདོར་བསྟན་ནས། ཡེ་ཐོག་དང་པོ་ཀུན་གྱི་སྔོན་རོལ་ཏུ། །འཁོར་འདས་མིང་མེད་གདོད་མའི་གཞི་ལ་གནས། །དེ་དུས་རིག་པ་གཞི་ནས་འཕགས་ཚུལ་ནི། །ཤེལ་ལ་ཉི་ཕོག་རང་འོད་ཕྱིར་གསལ་ལྟར། །རིག་པའི་ཡེ་ཤེས་སྲོག་རླུང་གིས་བསྐྱོད་ནས། །གཞོན་ནུ་བུམ་པ་སྐུ་ཡི་རྒྱ་རལ་ཏེ། །ལྷུན་གྲུབ་འོད་གསལ་སྐུ་དང་ཡེ་ཤེས་ཀྱི། །ཞིང་ཁམས་མཁའ་ལ་ཉི་ཤར་བཞིན་དུ་གསལ། །ཞེས་གསུངས་ཏེ། གདོད་མ་གཤིས་ཀྱི་བཞུགས་ཚུལ་རང་ངོ་རྗེན་པར་རྟོགས་པའི་རྣལ་འབྱོར་པ་ལ། རྒྱུད་ཚིག་རྡོ་རྗེ་གད་མོ་བཅུ་གཉིས་ཀྱི་ནང་ནས། ཀྱེ་གསུང་གི་རྡོ་རྗེ་སྐུ་གསུམ་སྟོང་པ་ཆེན་པོ་ཡེ་རྫོགས་ཀྱི་འབྲས་བུ་ལ་ལྟོས་དང་། དུས་གསུམ་འདུ་འབྲལ་མེད་པ་ངོ་མཚར། ཕ་རོལ་ཏུ་ཕྱིན་པ་དྲུག་མ་སྤྱད་པར་ཚོགས་རྣམས་དུས་གཅིག་ལ་རྫོགས་པ་ཧ་ཧ། ཞེས་གསུངས་ཡོད། ཆོས་སྐུ་ཀུན་ཏུ་བཟང་པོས་རྟོགས་ནས་གྲོལ་ཚུལ་དང་། འགྲོ་དྲུག་ཁམས་གསུམ་གྱི་སེམས་ཅན་འཁོར་བར་འཁྱམས་པའི་གཞི་དེ་གང་ནས་ཡོང་ན། གཞི་གཅིག་ལམ་གཉིས་འབྲས་བུ་གཉིས། །ཞེས་གསུངས་པ་ལྟར་དུ། རྟོགས་ཏེ་སངས་རྒྱས་མ་བྱུང་། མ་རྟོགས་ཏེ་སེམས་ཅན་མ་བྱུང་བའི་ཡེ་ཐོག་གདོད་མའི་གཞི་ཡི་གནས་སྐབས་ན། སྨྲ་བསམ་བརྗོད་འདས་ཆེན་པོ། ཡོད་མེད་སོགས་ཀྱི་མཐའ་ཐམས་ཅད་ལས་འདས་པ་ཞིག་ཡིན། དེའི་ངོ་བོ་ཀ་དག རང་བཞིན་ལྷུན་གྲུབ། ངོ་བོ་ཀ་དག་ཡིན་པས་ཡོད་པ་རྟག་པའི་མཐའ་དང་བྲལ་ཏེ་དངོས་པོ་དང་མཚན་མའི་ཆོས་སུ་མ་གྲུབ། རང་བཞིན་ལྷུན་གྲུབ་ཡིན་པས་མེད་པ་ཆད་པའི་མཐའ་ལས་འདས་པའི་འོད་གསལ་ཆོས་ཉིད་རྣམ་དག་ཡིན། འདི་སྤྱི་གཞི་གཅིག་ལ་གྲོལ་གཞི་དང་འཁྲུལ་གཞིའི་ལམ་གཉིས་སུ་གྱེས་ཏེ་འཁོར་བ་དང་མྱང་འདས་ཀྱི་འབྲས་བུ་གཉིས། གཞི་ལ་མེད་བཞིན་དུ་སྣང་བ་ཡིན། འདིའི་སྤྱི་གཞི་ཞེས་པ་ནི་དབྱིངས་གདོད་མའི་དབྱེ་གཞི་གཅིག་ལ། དབྱེ་བ་ཕྱེས་ན་བརྒྱད་དུ་ཡོད་པ་སྟེ། ངོ་བོ་རང་བཞིན་ཐུགས་རྗེ་གསུམ། དེའི་སྟེང་ལ་ངང་དང་རང་བཞིན་བདག་ཉིད་གསུམ་གྱིས་དྲུག དེའི་ཁ་ལ་ཀ་དག་དང་ལྷུན་གྲུབ་བཞག་ན་བརྒྱད་ཀྱི་བདག་ཉིད་ཡིན། དེ་ཡང་བརྗོད་གཞི་ཐམས་ཅད་དང་བྲལ་བ་ངོ་བོ་ཀ་དག ཅིར་སྣང་ཡོངས་སུ་རྫོགས་པ་དེ་རང་བཞིན་ལྷུན་གྲུབ། རང་ཤར་འགག་པ་མེད་པ་ཐུགས་རྗེ་ཀུན་ཁྱབ་གསུམ། དེ་ཉིད་ཤུགས་ལས་འབྱུང་བ་ངང་དང་། མ་བཅོས་ཀུན་ཏུ་སྣང་བ་རང་བཞིན། ཁྱབ་བརྡལ་འཁོར་འདས་ཐམས་ཅད་འུབ་ཆུབ་པ་ལ་བདག་ཉིད་དུ་གསུངས་པ་དང་དྲུག ཡེ་ནས་དྲི་མ་རང་དག་ཀ་དག་དང་བདུན། སྣ་ཚོགས་འབྱུང་བ་འགགས་མེད་ལྷུན་གྲུབ་དང་བརྒྱད་དོ། །འདི་རིག་པ་དངོས་མེད་ལ་ལྟོས་ན་ངོ་བོ་ཀ་དག་གི་ཡེ་ཤེས་བསམ་ངོ་བྲལ་བ་ཞིག་ཡིན་ཀྱང་། རང་བཞིན་ལྷུན་གྲུབ་ལ་ལྟོས་ཏེ་ཡེ་ཤེས་གཏིང་གསལ་དུ་ཡེ་གདངས་ཀྱི་རྣམ་པར་གནས་པ་ཡིན། རྫོགས་པ་ཆེན་པོའི་ལུགས་ལ་གཞི་སྐྱོན་མེད་ཀ་དག་ལྷུན་གྲུབ་གཉིས་མེད་ཅེས་གསུངས་པ་འདི། གཞི་འབྲས་ལ་མ་རིག་པ་མི་ལྡན་པའི་ཆ་ནས་ཀ་དག་ཏུ་བཏགས་པ་དང་། གཞི་འབྲས་ཀྱིས་མ་རིག་པ་མ་སྤངས་པའི་ཆ་ནས་ལྷུན་གྲུབ་ཏུ་བཏགས་པ་རེད་མ་གཏོགས། དོན་དུ་གཞི་འབྲས་གཉིས་ལ་མ་རིག་པ་མ་སྤངས་ལ་མི་ལྡན་པར་ལྟ་བ་གོང་མཐུན་པ་ཡིན། འདི་ལ་སྟོང་ཉིད་དང་། སྤྲོས་བྲལ། གཉུག་མ། ཀ་དག ཡེ་གྲོལ་ཞེས་པའི་ཐ་སྙད་དང་ཆོས་སྐད་འདི་དག་ལ་མཚོན་ན། སྟོང་ཉིད་ཅེས་པ་ནི་ཅིར་ཡང་མ་གྲུབ་པའི་ཆ་ནས་གསུངས་པ་དང་། ངོ་བོར་ངོས་གཟུང་མེད་པས་ན་སྤྲོས་བྲལ་དང་། ཆོས་ཐམས་ཅད་ཀྱི་རང་བཞིན་ཡེ་ནས་དེ་ལྟར་གནས་པས་ན་གཉུག་མ་དང་། བློ་དྲི་མས་གོས་མ་མྱོང་བས་ན་ཀ་དག་དང་། ཉམས་ཀྱི་ཞེན་པ་སོགས་ཀྱིས་མ་བཅིངས་པས་ཡེ་གྲོལ་ཞེས་དེ་འདྲའི་འགྲེལ་བཤད་བྱེད་པ་ཡིན། ནང་གསལ་སྐུ་དང་ཡེ་ཤེས་སོགས་ཀྱི་འཆར་གཞི་ལ་ཐིམ་ལ་མ་རྨུགས་པར་བཞུགས་ཀྱང་། དེ་ཉིད་ཕྱིར་གསལ་མིན་པ་ཅིའི་ཕྱིར་ཞེ་ན། ནང་གསལ་གཞོན་ནུ་བུམ་སྐུའི་སྦུབས་ལ། ཕྱི་རྒྱ་མ་རལ་བར་བཞུགས་ཡོད་པས་ན་ནང་ཤེལ་རང་གི་ངོ་བོར་ཡོད་དུས་ལྟ་བུ་དང་། ཕྱི་གསལ་སྐུ་གསུང་ཐུགས་ཡོན་ཏན་འཕྲིན་ལས་དང་། གཞན་ཡང་ཡེ་ཤེས་ལྔ་དང་འོད་ལྔ་སོགས་ལྔ་ཚན་མང་པོའི་བདག་ཉིད་དུ་ཤར་བ་ཕྱི་གསལ་ཏེ། ཤེལ་ལ་ཉི་འོད་ཕོག་པ་ལྟ་བུ་ཡིན། རྩ་བ་ངོ་མ་ཤེས་རབ་སྲོག་ཏུ་གྱུར་པའི་རླུང་གིས་བསྐྱོད་དེ་གཞོན་ནུའི་བུམ་སྐུའི་ཁ་རྒྱ་རལ་ནས་ལྷུན་གྲུབ་སྒོ་བརྒྱད་ཀྱི་སྣང་བ། སྐུ་དང་ཡེ་ཤེས་དག་དང་མ་དག་གི་ཞིང་དང་གདུལ་བྱ་རང་སྣང་ལ་ཤར་བའི་གནས་སྐབས་སུ། རིག་དང་མ་རིག་གི་དབང་གིས་གྲོལ་འཁྲུལ་གཉིས་བྱུང་བའོ། །ཀུན་ཏུ་བཟང་པོའི་གྲོལ་ཚུལ་ནི། དེ་དུས་ཆོས་སྐུ་ཀུན་ཏུ་བཟང་པོ་ཡིས། །རང་སྣང་ཡིན་པར་ཤེས་པས་སྐད་ཅིག་ལ། །ཕྱིར་གསལ་སྐུ་དང་ཡེ་ཤེས་ནང་དུ་ཐིམ། །ཀ་དག་གདོད་མའི་གཞི་ལ་སངས་རྒྱས་སོ། །ཞེས་གསུངས་ཏེ། དེ་དུས་ཞེས་པ་ཀ་དག་ལས་ལྷུན་གྲུབ་ཏུ་ཤར་དུས་སམ། གཞི་ལས་གཞི་སྣང་དུ་ཤར་དུས་ལ་གསུངས་པ་ཡིན། འདིའི་ཐད་ན་རྒྱལ་བ་ཀློང་ཆེན་པའི་ཐུན་མིན་གནད་ཀྱི་གསང་བ། རང་ལུགས་གཞན་དང་མ་འདྲེས་པའི་འཇོག་མཚམས་ཡོད་པ་ནི། ཀུན་མཁྱེན་འཇིགས་གླིང་གིས། སྤྲིན་བྲལ་མཁའ་བཞིན་དྭངས་པའི་ཀ་དག་ལས། །ལྷུན་གྲུབ་གཡོ་བ་འཆར་ཚུལ་བརྒྱད་དུ་ཤར། །འདི་ནི་འཁོར་འདས་འབྲེལ་བའི་སྒོ་འཕར་ཏེ། །ཐེག་རྩེ་ཤིན་ཏུ་རྣལ་འབྱོར་རྒྱུད་སྡེ་དང་། །མན་ངག་ལྡེ་མིག་གངས་ལྡན་རི་ཡི་ལྗོངས། །དྲི་མེད་འོད་ཟེར་སྟོང་ལྡན་གཅིག་གིས་ཕྱེ། །ཞེས་གསུངས་པ་ལྟར་དུ། ནང་གསལ་གཞོན་ནུ་བུམ་སྐུ་ཤིན་ཏུ་ཕྲ་བའི་ཡེ་ཤེས་ཀྱི་རླུང་ལྔའི་སྙིང་བོ། ངོ་བོ་སྐུ། རང་བཞིན་གསུང་། ཐུགས་རྗེ་རིག་པའི་བདག་ཉིད་དུ་གནས་པ་དེ། སྲོག་རླུང་ཡན་ལག་བཞི་ལྡན་གྱིས་བསྐྱོད་དུས། ལྷུན་གྲུབ་སྒོ་བརྒྱད་ཀྱི་སྣང་བ་ཤར་ལུགས་བརྒྱད་ཀྱིས་ཤར་ཞིང་། ཐིམ་ལུགས་བརྒྱད་ཀྱིས་ཐིམ་པའི་སྐབས་སུ། ཀུན་ཏུ་བཟང་པོར་ཇི་ལྟར་གྲོལ་ན། གཞི་ལས་འཕགས། རང་ངོར་སྣང་། བྱེ་བྲག་ཕྱེད། ཕྱེད་ཐོག་ནས་གྲོལ་བ་སོགས་ཀྱི་ཀུན་བཟང་ཆོས་དྲུག་གིས་འཁྲུལ་བ་སངས། ཡེ་ཤེས་རྒྱས། ཟག་མེད་རང་ངོ་ཤེས་པའི་དགེ་ཚོགས་དེ་ཡིས་ངོ་བོ་ཡེ་སངས་རྒྱས་པ་ལ་རྟོགས་པས་ཡང་སངས་རྒྱས་སོང་བ་ཡིན། དེ་ལྟར་སངས་རྒྱས་ནས་རང་སྣང་ཀ་དག་ལ་ཐིམ་སྟེ། གཞི་འབྲས་བུར་སྨིན་ནས། གཞི་འབྲས་དབྱེར་མེད་ཀྱི་ས་ལ་ཀུན་གྱི་སྔ་རོལ་ཏུ་སངས་རྒྱས་པའི་གདོད་མའི་མགོན་པོ་འོད་མི་འགྱུར་བ་ཆེན་པོ་རུ་སངས་རྒྱས་པ་ཡིན། ཀུན་བཟང་ཆོས་དྲུག་ནི་གོང་ནས་བཤད་རྒྱུའི་གཞི་ལས་འཕགས། རང་ངོར་སྣང་། བྱེ་བྲག་ཕྱེད། ཕྱེད་ཐོག་ཏུ་གྲོལ་བ་དང་། གཞན་རྐྱེན་ལ་མི་ལྟོས་པ་དང་། རང་སར་གནས་པ་སྟེ་དྲུག་ཡིན། དེས་ཀུན་ཏུ་བཟང་པོར་གྲོལ་ཚུལ་བསྟན་ནས། ཁམས་གསུམ་སེམས་ཅན་འཁྲུལ་ཚུལ་ནི། འོ་སྐོལ་རྣམས་ཀྱིས་རང་བཞིན་ལྷུན་གྲུབ་ཀྱི། །སྣང་བ་རང་གདངས་ཡིན་པར་མ་ཤེས་པས། །ཤེས་པ་དྲན་མེད་འཐོམ་མེ་བ་དེ་ཉིད། །དེ་ལ་ལྷན་ཅིག་སྐྱེས་པའི་མ་རིག་ཟེར། །དེ་ནས་གཞི་སྣང་འོད་གསལ་དེ་ཉིད་ལ། །གཉིས་སུ་འཛིན་པའི་ཤེས་པ་སྐྱེས་པ་དེ། །ཀུན་ཏུ་བརྟགས་པའི་མ་རིག་པ་ཞེས་ཟེར། །མ་རིག་གཉིས་འཛིན་སྦུབས་སུ་དེ་དུས་ཚུད། །དེ་ནས་བག་ཆགས་རིམ་བཞིན་རྒྱས་ནས་ཀྱང་། །འཁོར་བའི་བྱ་བ་འདི་རྣམས་ཐམས་ཅད་བྱུང་། །དེ་ནས་ཉོན་མོངས་དུག་གསུམ་དུག་ལྔ་དང་། །བརྒྱད་ཁྲི་བཞི་སྟོང་ལ་སོགས་རྒྱས་ནས་ཀྱང་། །འཁོར་བའི་གནས་སུ་ཟོ་ཆུའི་ཁྱུད་མོ་བཞིན། །འཁོར་ཞིང་བདེ་སྡུག་ད་ལྟའི་བར་དེར་མྱངས། །ཞེས་གསུངས་ཏེ། འོ་སྐོལ་ཞེས་པ་རང་རེའི་སེམས་ཅན་ཐམས་ཅད་ཀྱིས་གཞི་སྣང་ལྷུན་གྲུབ་སྒོ་བརྒྱད་ཤར་སྐབས། རང་སྣང་ཡིན་པ་མ་ཤེས་པར། རང་སྣང་ལ་གཞན་དུ་བཟུང་། ཐོ་ཡོར་ལ་མིར་འཁྲུལ། ཐག་ཁྲར་སྦྲུལ་དུ་སྣང་བ་འདྲ་ཞིག་གིས་གཟུང་འཛིན་གཉིས་ཀ་རྒྱང་ཆད་དུ་སོང་། ང་དང་ང་ཡིར་བཟུང་བས་འཁྲུལ་སོང་བ་རེད། ཀུན་བཟང་སྨོན་ལམ་གྱི་ནང་དུ། ཤེས་པ་དྲན་མེད་འཐོམ་མེ་བ། །དེ་ག་མ་རིག་འཁྲུལ་བའི་རྒྱུ། །ཞེས་གསུངས་པ་བཞིན་དུ་རང་ངོ་མ་ཤེས་པ་ལ་ལྟོས་ཏེ་མ་རིག་གསུམ་མཚུངས་ལྡན་དུ་ཤར་བ་རེད། ཐོག་མའི་གཞི་ལ་འཁྲུལ་བ་མེད་ཀྱང་གཞི་སྣང་དེ་ཉིད་ཀྱི་རང་ངོ་མ་རིག་པ་ནི་རྩ་བ་རྒྱུ་བདག་ཉིད་གཅིག་པུའི་མ་རིག་པ་དང་། དེའི་སྐྱོད་བྱེད་ཀྱི་ཤེས་པ་ཕྲ་མོ་དེ་ནུས་པ་ཇེ་ཆེར་སོང་ནས་རང་ངོ་མ་ཤེས་པའི་ལྡོག་ཆ་དེ་ལྷན་ཅིག་སྐྱེས་པའི་མ་རིག་པ་དང་། དེའི་སྟེང་དུ་ཡུལ་འོད་ལྔའི་སྣང་བ་ཇེ་རགས་ལ་སོང་བདག་གཞན་གཉིས་སྣང་གི་མིང་དོན་མང་པོ་ཞིག་གི་བདག་རྟོག་གི་ཆར་སོང་བ་ལ་ཀུན་ཏུ་བཏགས་པའི་མ་རིག་པ་ཞེས་པ་དེ་འགྲུབ་པ་ཡིན། དེ་ལྟ་བུའི་རྒྱུའི་རྐྱེན་མ་རིག་པ་གསུམ་པོ་འཚོགས་ཤིང་འདུས་ནས། དཔེར་ན་མིག་དང་གཟུགས་དང་མིག་ཤེས་གསུམ་པོ་ཚོགས་ཡོང་དུས་མིག་གིས་འདུས་ཏེ་རེག་པའི་རྐྱེན་གྱིས་ཚོར་བ་བྱུང་བ་ལྟར་དུ། དེ་ལས་དམིགས་རྐྱེན། བདག་རྐྱེན། དེ་མ་ཐག་རྐྱེན་དང་བཞི་བོ་བྱུང་ནས་དམིགས་པ་མ་དག་པའི་སྟོབས་དེ་ལས་རྒྱུ་ཉོན་མོངས་དུག་གསུམ་དུག་ལྔ་ནས་བརྒྱད་ཁྲི་བཞི་སྟོང་གི་བར་དུ་བྱུང་སྟེ། ཀུན་འབྱུང་ལས་དང་ཉོན་མོངས་པའི་སྟོབས་དེ་ཡིས་ཁམས་གསུམ་འཁོར་བའི་རྒྱུ་འབྲས་སུ་གྲུབ་སྟེ། ཟོ་ཆུའི་ཁྱུད་མོ་དང་འགལ་མེའི་འཁོར་ལོའི་དཔེ་བཞིན་དུ་ཐོག་མཐའ་དབུས་མེད་དུ་འཁོར་བའི་འཁོར་ལོར་འཁོར་ནས་ཁམས་གསུམ་རིགས་དྲུག་གི་སྡུག་བསྔལ་ད་ལྟའི་བར་དུ་མྱངས་པ་འདི་ཡིན་ནོ། །རྒྱས་པར་འདོད་ན་ཀུན་མཁྱེན་ཐེག་མཆོག་མཛོད། །ཟབ་དོན་རྒྱ་མཚོའི་སྤྲིན་ཕུང་སོགས་ལ་ལྟོས། །ཞེས་གསུངས་ཏེ། འཁོར་འདས་གཉིས་ཀ་རིག་པའི་ཆོས་ཉིད་དུ་གཅིག་ཅིང་། དེའི་གྲོལ་འཁྲུལ་གཞི་དང་གཞི་སྣང་གི་གནད་ལ་ཐུག་པས། ཐོག་མར་འཁྲུལ་ལུགས། ལམ་ཉམས་སུ་ལེན་སྟངས། བར་དོའི་གནས་སྐབས་སུ་གྲོལ་ལུགས་ཐམས་ཅད་ཀྱི་གནད་ཤེས་རྒྱུ་གལ་ཆེ་བ་ཡིན། འདིའི་སྐོར་ཞིབ་ཏུ་ཤེས་དགོས་ན། རྒྱལ་བ་ཀློང་ཆེན་པའི་མཛོད་བདུན་གྱི་ནང་གི་ཐེག་མཆོག་མཛོད་དང་། སྤྲིན་ཕུང་སྐོར་གསུམ་ནང་གི་ཟབ་དོན་རྒྱ་མཚོའི་སྤྲིན་ཕུང་སོགས་ལ་ལྟོས་དང་ཤེས་ཞེས་ཞལ་འཕངས་པ་རེད། གཞིའི་བཞུགས་ཚུལ་འདི་མ་ཤེས་ན་རྫོགས་པ་ཆེན་པོ་བཤད་དགོས་ལར་ནས་ཡོད་པ་མ་ཡིན། དེ་ཡང་ཀ་དག་གསུམ་དང་ལྷུན་གྲུབ་གསུམ་ལ་སོགས་པ་མཁས་པའི་གསུངས་ཚུལ་སོ་སོ་ནས་དཔྱིས་ཕྱིན་པའི་གནད་ཀྱི་གོ་དོན་གྱིས་བརྡར་ཤ་གཅོད་དགོས་པ་ཡིན། མན་ངག་ལ་བཟླའི་སྐབས་སུ་ཤན་འབྱེད་ཞིབ་མོའི་སྤྲོས་པ་མི་དགོས་སོ། །ད་ནི་བླ་མའི་མན་ངག་ཟབ་མོ་ཡིས། །འཁྲུལ་བའི་རང་མཚང་ཐམས་ཅད་རིག་ནས་ཀྱང་། །རང་སེམས་སངས་རྒྱས་རང་ངོ་མཐོང་བ་ཡིན། །གདོད་མའི་མགོན་པོའི་རང་ཞལ་མཇལ་བ་ཡིན། །ཀུན་ཏུ་བཟང་པོར་སྐལ་བ་མཉམ་པ་ཡིན། །སྙིང་ནས་དགའ་བ་སྒོམས་ཤིག་སེམས་ཀྱི་བུ། །ཞེས་གསུངས་ཏེ། གསང་སྔགས་ཟབ་མོའི་རྒྱུད་དོན་བྱིས་པ་སོ་སོ་སྐྱེ་བོས་ཐད་ཀར་རྟོགས་དགོས་ན། གབ་སྦས་གསང་བ་ཟབ་མོའི་དོན་ཐམས་ཅད་རྒྱུད་དཀྲུགས། ལུང་གཅུས། མན་ངག་ཐོར་བའི་ཚུལ་དུ་བཞུགས་པ་ཡིན་ན། གསང་སྔགས་བསམ་གྱིས་མི་ཁྱབ་པའི་རྒྱུད་སྡེའི་མཚན་བྱང་ཙམ་ཡང་ཡུན་ཐུང་མི་ཚེའི་ཉི་མ་ཐུང་ཐུང་ཞིག་ལ་མཇལ་འདོད་ཡོད་ཀྱང་མཇལ་ཙམ་ཡང་ཐུབ་དཀའ་ན། དོན་རྟོགས་པ་དེ་བས་ཀྱང་ཕར་ཚད་རེད། དེས་ན་བཅུད་བསྡུས་བླ་མའི་མན་ངག ཀུན་མཁྱེན་གོང་འོག་གི་གདམས་པ་ཡིད་བཞིན་ནོར་བུའི་གཏེར་མཛོད་ལྟ་བུ་རང་རེའི་བགོ་སྐལ་དུ་གྱུར་པ་ལས། གོང་ནས་སེམས་དོན་འཁྲུལ་བའི་རྩ་བ་རྩད་བཅད་དེ། མ་འཁྲུལ་དོན་གྱི་གནས་ལུགས་ལྟ་བས་གཏན་ལ་ཕེབས་པ་བཞིན་དུ། འཁྲུལ་དང་མ་འཁྲུལ་གྱི་མིང་དོན་ལས་འདས་སོང་བའི་རང་སེམས་རིག་པའི་ངོ་བོ་སེམས་ཉིད་ཆོས་སྐུའི་ཡེ་ཤེས། རང་ལ་ཡོད་པ་རང་ངོ་མཐོང་ན་ཀུན་ཏུ་བཟང་པོ་ཆོས་དྲུག་གིས་གྲོལ་བ་བཞིན་དུ། སྐྱོན་མ་སྤངས་ཀ་ནས་དག འཁྲུལ་བ་མ་སྤངས་གནས་སུ་དག་སྟེ། ལྷུན་གྲུབ་རང་ངོས་ནས་མཁྱེན་པ་དང་བརྩེ་བའི་ཡེ་ཤེས་ཀྱི་ཡོན་ཏན་རྒྱས་ཏེ། ཐོག་མའི་ཀུན་བཟང་དང་སྐལ་བ་མཉམ་པའི་མཐར་ཐུག་གི་འབྲས་བུར་སྙེག་ཐུབ་པ་རེད། གང་ཟག་སོ་སོའི་ལམ་སྦྱངས་ཚུལ་གྱི་རིམ་པས་དབང་པོ་ཐ་དད་པ་ཡིན་ཡང་མཐའ་འབྲས་དག་པ་ཉིས་ལྡན་གྱི་ཆོས་སྐུ་ཀ་དག་རིན་པོ་ཆེ་གསང་བའི་སྦུབས་ན་ངོ་བོ་གཅིག་ཏུ་འཆར་ལུགས་དེ་ལྟར་ཡིན་པ་རེད། སྣོད་ཐ་དད་ཀྱི་ནང་གི་ནམ་མཁའ་དབྱིངས་གཅིག་ཏུ་འདུ་བ་དང་། ཆུ་བོ་ཐ་དད་རྒྱ་མཚོ་ཆེན་པོར་རོ་གཅིག་པའི་དཔེ་ཡིས་བསྟན་ཡོད་པའོ། །སྐབས་ཀྱི་དོན་བསྡུ་བ་ནི། འཁྲུལ་བ་གཏན་ལ་ཕབ་པའི་ངོ་སྤྲོད་དོ། །ཞེས་པ་འདིས་བསྟན་པའོ། །རིག་པ་རང་སྣང་གི་བློ་ཅན་གྱི་གདུལ་བྱ་ལ་དངོས་གཞི་གནས་ལུགས་དོན་གྱི་ངོ་སྤྲོད་བསྟན་པ་ནི། ཨེ་མ་ཧོ། ད་ཡང་སྐལ་ལྡན་སྙིང་གི་བུ་རྣམས་ཉོན། །སེམས་ཞེས་བྱ་བའི་ཡོངས་གྲགས་སྒྲ་བོ་ཆེ། །ཡོད་ནི་གཅིག་ཀྱང་ཡོད་པ་མ་ཡིན་ཏེ། །འབྱུང་ནི་འཁོར་འདས་བདེ་སྡུག་སྣ་ཚོགས་འབྱུང་། །འདོད་ནི་ཐེག་པའི་རྣམ་གྲངས་མང་དུ་ཡོད། །མིང་ནི་བསམ་གྱིས་མི་ཁྱབ་སོ་སོར་བཏགས། །ཞེས་མདོར་བསྟན་པ་ཏེ། ཨེ་མ་ཧོ་ཞེས་ངོ་མཚར་བའི་རྡོ་རྗེའི་ཚིག་རེས་མགོ་ལེན་མཛད་དེ། ད་ཡང་ལས་དང་སྐལ་བར་ལྡན་ཞིང་སྔར་བསགས་བསོད་ནམས་དང་སྔོན་སྦྱངས་ལས་འཕྲོའི་དབང་གིས། རྫོགས་པ་ཆེན་པོ་ཀ་དག་རང་གནས་ཀྱི་ཆོས་སྐུའི་དགོངས་པ་ཅར་ཕོག་ཏུ་ངོ་སྤྲོད་པའི་ཆོས་གདམས་པ་ཟབ་མོ་འདི་ལ་ངོམས་མེད་དུ་ལོངས་སུ་སྤྱོད་པའི་སྐལ་བ་བཟང་པོ་དང་ལྡན་པའི་སྙིང་གི་བུའམ་ཐུགས་ཀྱི་སྲས་རྣམས་ཞེས། ཁར་སང་དབང་གི་སྐབས་སུ། ཁྱོད་སུ་ཡིན་ཟེར་དུས། སྐལ་ལྡན་སེམས་ཀྱི་བུ་གཅིག་པོ་ལགས། ཞེས་རྗེས་ཟློས་བྱས་པ་ལྟར་དུ། སྙིང་གི་བུའམ་ཐུགས་ཀྱི་སྲས་ཁྱེད་རྣམ་པས་མ་ཡེངས་རྣ་བ་གླགས་ཏེ་ཉོན་དང་། གནམ་ས་གཉིས་ཀའི་བར་འདི་ན་འཁོར་འདས་གཉིས་ཀྱི་ནང་ལ་མ་འདུས་པའི་ཆོས་ཤིག་མེད་ཅིང་། དེ་ཡང་རྩ་བ་སེམས་ལ་ཐུག་པ་ཡིན་པས། སེམས་ཡོད་ཐམས་ཅད་ལ་སེམས་ཅན་ཟེར་བ་ཡིན་ལ། སེམས་ཡོད་པའི་དབང་གིས་སེམས་ཅན་ཞེས་ཐོགས་པས་མ་ཚད། སེམས་འཁྲུལ་བ་འདིའི་དབང་གིས་སྡུག་བསྔལ་ཡང་མྱོང་བ་རེད། ད་སྔ་ཉི་མའི་ཡན་ཆད་ལ། ཕར་བལྟས་རྒྱང་གི་ཆོས་ལ་བལྟས་ཀྱང་། བལྟས་ཏེ་མཐའ་རྒྱ་ཆོད་རྒྱུ་མེད་པའི་དཀའ་ལས་བརྒྱབ་པ་བས། ད་ཚུར་བལྟས་རང་གི་སེམས་ཚུར་ལ་རྩད་ཅིག་བཅད་ན། སེམས་ཞེས་པ་ཡོངས་ལ་གྲགས་པའི་སྐད་གྲགས་ཆེན་པོ། ངོ་མས་ཉམས་ལ་བཅར་བཞག་ན། སྔར་སེམས་ཀྱི་བྱུང་གནས་འགྲོ་གསུམ་བཙལ་དུས་རྙེད་དུ་མེད་པ་ལྟར་དུ། ཡོད་ནི་གཅིག་ཀྱང་འདི་རེད་ཟེར་ས་ཞིག་མེད་པ་ལ། འདི་དོན་མ་རྟོགས་པར་མེད་པ་ལ་ཡོད་པར་བཟུང་ན། འཁྲུལ་སྣང་འཁོར་འདས་བདེ་སྡུག་གི་སྣང་བ་སྣ་ཚོགས། རིགས་དྲུག་གི་སེམས་ཅན་སོ་སོ་ལ་མཐོང་སྣང་སྣ་ཚོགས་ཡོད་པ་འདི་བྱུང་བ་ཡིན། འདིའི་ཆོས་ཅན་སེམས་ཀྱི་ཆོས་ཉིད་གཏན་ལ་འབེབས་སྟངས་ཀྱི་ཁྱད་པར་གྱིས་ཐེག་པའི་རྣམ་གྲངས་མང་དུ་འདོད་ཅིང་། དེ་ཡང་རྒྱལ་བས་གདུལ་བྱའི་ཁམས་དབང་མོས་པར་བསྟུན་པའི་འདུལ་ཐབས་ཆོས་ཀྱི་རྣམ་གྲངས་རྣམས་ནི་དེའི་ལམ་སྟེགས་སུ་གྱུར་པ་ཡང་ཡིན་པས། ཐེག་པ་སོ་སོའི་འདོད་གཞུང་གི་མིང་བསམ་གྱིས་མི་ཁྱབ་པ་སོ་སོར་བཏགས་པ་དེ། ཇི་སྲིད་སེམས་ཀྱི་འཇུག་པ་མ་ཟད་པར། །བསམ་ཡས་ཐེག་པའི་གྲུབ་མཐར་ཐུག་པ་མེད། །ཅེས་གསུངས་པ་ལྟ་བུའོ། །དེས་མདོར་བསྟན་ནས། རྒྱས་པར་བཤད་པ་ནི། སོ་སོ་སྐྱེ་བོ་རྣམས་ཀྱིས་ང་ཡང་ཟེར། །མུ་སྟེགས་ལ་ལས་བདག་ཅེས་མིང་དུ་བཏགས། །ཉན་ཐོས་པ་ཡིས་གང་ཟག་བདག་མེད་ཟེར། །སེམས་ཙམ་པ་ཡིས་སེམས་ཞེས་མིང་དུ་བཏགས། །ལ་ལས་ཤེས་རབ་ཕ་རོལ་ཕྱིན་པ་ཟེར། །ལ་ལས་བདེ་གཤེགས་སྙིང་པོ་མིང་དུ་བཏགས། །ལ་ལས་ཕྱག་རྒྱ་ཆེན་པོ་མིང་དུ་བཏགས། །ལ་ལས་དབུ་མ་ཞེས་པའི་མིང་དུ་བཏགས། །ལ་ལས་ཐིག་ལེ་ཉག་གཅིག་མིང་དུ་བཏགས། །ལ་ལས་ཆོས་ཀྱི་དབྱིངས་ཞེས་མིང་དུ་བཏགས། །ལ་ལས་ཀུན་གཞི་ཞེས་པ་མིང་དུ་བཏགས། །ལ་ལས་ཐ་མལ་ཤེས་པ་མིང་དུ་བཏགས། །མིང་ནི་བསམ་གྱིས་མི་ཁྱབ་ཅི་བཏགས་ཀྱང་། །དོན་ལ་འདི་ཉིད་ཡིན་པར་ཤེས་པར་གྱིས། །ཞེས་གསུངས་ཏེ། སོ་སོའི་སྐྱེ་བོ་མ་རིག་འཁྲུལ་བའི་གཞན་དབང་དུ་སོང་བ་ཚང་མས་ང་དང་ང་ཡིར་འཛིན་པའི་ངར་འཛིན་གྱི་སེམས་འདིས། ཐོག་མེད་ནས་མཐའ་མེད་ཀྱི་བར་དུ་འཁྲུལ་ནས་སྲིད་རྩ་ངར་འཛིན་གྱི་རྩ་བ་ཆོད་མེད་པས། ནམ་མཁའི་ཁམས་ནས་འབྲུག་སྒྲ་ཆེན་པོའི་ཚག་གློག་ཅིག་བྱས་ན་ངའི་མགོ་ལ་ཐོག་ཅིག་བརྒྱབ་ཨེ་ཡོང་ན་སྙམ་པ་དང་། མཚན་རྨི་ལམ་ཉིང་འཁྲུལ་གྱི་སྐབས་སུ་ཡང་ང་གཡང་ས་གཟར་མོ་ཞིག་ནས་ལྷུང་རྩིས་བྱེད་པ་དང་། ང་ཆུ་ཆེན་གཙང་པོ་ཞིག་གིས་འཁུར་རྩིས་བྱེད་པ་ལ་སོགས་པའི་བག་ཆགས་ཆེན་པོ། དཔལ་ལྡན་ཟླ་བ་གྲགས་པས། དང་པོ་ང་ཞེས་བདག་ལ་ཞེན་གྱུར་ཅིང་། །བདག་གི་འདི་ཞེས་དངོས་ལ་ཆགས་བསྐྱེད་པ། །ཟོ་ཆུན་འཕྱན་ལྟར་རང་དབང་མེད་པ་ཡི། །ཞེས་གསུངས་པ་ལྟར་དུ་གྲུབ་མཐར་བློ་མ་ཞུགས་པའི་སེམས་ཅན་དག་གིས་ང་ཞེས་ཟེར་བ་དང། མུ་སྟེགས་པ་ལ་རྩ་བ་རྟག་ཆད་ལས་འཕྲོས་པའི་ལྟ་ལོག་སུམ་བརྒྱ་དྲུག་ཅུ་ལ་སོགས་པའི་རྣམ་གཞག་ཡོད་པའི་མུ་སྟེགས་པ་བསྟན་པ་འདི་ལས་ཕྱི་རོལ་དུ་གྱུར་པའི་རིགས། འདིར་མུར་ཐུག་དང་། མུ་སྟེགས། ཕྱལ་བ་པ། རྒྱང་འཕེན་པ་སོགས་སྤྱི་དང་བྱེ་བྲག་གི་མིང་གི་ཁྱད་པར་དང་། སོ་སོའི་གྲུབ་མཐའི་འདོད་གཞུང་ཡང་ཡོད་ལ། ལ་ལ་ཞེས་ཆད་པར་སྨྲ་བ་རྒྱང་འཕེན་པ་ཕར་ཕུད་ཤུལ་གྱི་ཀུན་བཏགས་ཀྱི་བདག་རྟག་པ་དང་དབང་ཕྱུག་རྟག་པ་རང་དབང་ཅན་དུ་འདོད་པ་སྟེ། མདོར་ན་མ་རིག་པ་དང་མཚུངས་ལྡན་གྱི་ལྟ་བ་ཅན་དང་། ནང་པ་ལ་མཚོན་ན། ཐེག་པ་ཆེ་ཆུང་གི་གྲུབ་མཐའ་སྡེ་བཞི་ཡོད་པའི་ཉན་ཐོས་པ་ལའང་བྱེ་མདོའི་ཁྱད་པར་དང་། བྱེ་སྨྲ་ལའང་ནང་ཚན་གྱིས་སོ་སོའི་འདོད་པའི་འཇོག་མཚམས་མི་མཐུན་པ་ཡོད་ཀྱང་། མདོར་བསྡུས་ན་ཉན་ཐོས་པ་ཡིས་གཟུང་འཛིན་རགས་པའི་ཆ་བཤིག་ནས་རྡུལ་དང་སྐད་ཅིག་བདེན་པར་ཁས་ལེན་ཅིང་གང་ཟག་གི་བདག་མེད་ཇི་བཞིན་རྟོགས་ཡོད་པ་དང་། གཟུང་བའི་རྡུལ་འཛིན་ཀྱང་བཤིགས་ནས་བདག་མེད་ཕྱེད་དང་གཉིས་རྟོགས་ཀྱི་རང་རྒྱལ་ཡང་འདིའི་ཤུགས་ཀྱིས་གོ་བར་འགྱུར་བ་དང་། དེ་ལས་ཁྱད་པར་དུ་འཕགས་པའི་ཐེག་ཆེན་སེམས་ཙམ་པས། ཕྱི་རོལ་སྣང་བ་འདི་དག་སེམས་ལས་བྱུང་བ་དང་། གཟུང་འཛིན་གཉིས་སྟོང་གི་ཤེས་པ་རང་རིག་རང་གསལ་ཙམ་གྱི་སེམས་ཤིག་ཡོད་པར་འདོད་པའི་སེམས་ཙམ་པ་ཞེས་བཏགས་པ་དང་། དབུ་མ་པས་རང་རིག་བདེན་པར་འཛིན་པ་དེ་ཡང་བཤིགས་ནས། ཤེས་བྱའི་ཁོངས་ན་བདེན་གྲུབ་ཀྱི་ཆོས་རྡུལ་ཙམ་མེད་པ་དེ་ལྟར་རྟོགས་ནས། ཀུན་རྫོབ་སྒྱུ་མ་ལྟ་བུ། དོན་དམ་བརྗོད་མེད་སྟོང་ཉིད། བདེན་གཉིས་དབྱེར་མི་ཕྱེད་པའི་ཟུང་འཇུག་ཤེས་རབ་ཀྱི་ཕ་རོལ་ཏུ་ཕྱིན་པར་སྦྱོར་བར་བྱེད་པ་དང་། བཀའ་བར་བས་རྣམ་ཐར་སུམ་ལྡན་ཟབ་མོ་སྟོང་ཉིད་ཀྱི་རྣམ་གཞག་གཏན་ལ་ཕབ་པ་ཡིན་པ་དང་། ཐ་མས་རྒྱ་ཆེ་བའི་རང་བཞིན། ཁྱད་པར་མདོ་སྔགས་མཚམས་འཛིན་གྱི་དགོངས་གནད་བདེ་གཤེགས་སྙིང་བོའི་མཚན་གྱིས་གསལ་བར་མཛད་པ་ཡིན་ཏེ། ཀུན་མཁྱེན་འཇིགས་གླིང་གིས། རྒྱལ་བའི་འཁོར་ལོ་བར་བ་རྣམ་ཐར་གསུམ། །བསྟན་བྱའི་ངོ་བོ་སོ་སོ་རང་རིག་ཉིད། །སེམས་ཅན་ཁམས་ལ་བདེ་གཤེགས་སྙིང་བོ་རུ། །རང་བཞིན་བཞུགས་ལ་རྫོགས་པ་ཆེན་པོར་གྲགས། །ཞེས་གསུངས་པ་ལྟ་བུ་ཡིན། འདི་ལ་ལ་ལས་ཕྱག་རྒྱ་ཆེན་པོ་དང་། ལ་ལས་དབུ་མ་ཆེན་པོ་ཞེས་པའི་མིང་དེ་ཇི་ལྟར་བཏགས་པ་ཡིན་ན། ཆོས་ཅན་གང་ཤར་གྱི་སྣང་བ་ལ་ཆོས་ཉིད་ཀྱི་ཕྱག་རྒྱས་འདེབས་ཤིང་སྣང་རིག་ངོས་བཟུང་དང་བྲལ་བ་གསལ་སྟོང་ཟུང་འཇུག་ཏུ་སྐྱེལ་བ་དེ་ཕྱག་ཆེན་གྱི་ལུགས་རེད། ཕྱག་ཆེན་པ་འདིར་ནང་གསེས་སུ་གནས་ལུགས་ཕྱག་རྒྱ་ཆེན་པོ་ཞེས་མདོ་ལུགས་སུ་བཞེད་པ་དྭགས་བརྒྱུད་དང་། བདེ་སྟོང་ཕྱག་རྒྱ་ཆེན་པོ་ཞེས་སྔགས་ལུགས་ཀྱི་དབང་ལས་བྱུང་བའི་ཡེ་ཤེས་ལ་གཙོ་བོར་འཛིན་པ་རྗེ་མར་བའི་བཀའ་བབས། མདོར་ན་སྦྱོར་དྲུག་དང་རིམ་ལྔ། ལམ་འབྲས་ལ་སོགས་པ་དབང་ལས་བྱུང་བའི་ཡེ་ཤེས་ཕྱག་རྒྱ་ཆེན་པོར་བཞེད་པ་ཐམས་ཅད་འདི་ལ་འདུས་པ་ཡིན། དབུ་མ་ལའང་ཐལ་རང་ལ་སོགས་པའི་དབྱེ་བ་མང་ཡང་། ཟུང་འཇུག་རབ་ཏུ་མི་གནས་པའི་དབུ་མས་སྣང་སྟོང་ངོ་བོ་ཉིད་ཀྱིས་འདུ་འབྲལ་མེད་པའི་ཆོས་དབྱིངས་སྤྲོས་པ་ཀུན་བྲལ། སོ་སོ་རང་རིག་གི་སྤྱོད་ཡུལ་དུ་གྱུར་པ། བདེན་གཉིས་དབྱེར་མེད་མཐའ་བྲལ་ཆོས་དབྱིངས་ཆེན་པོར་གཏན་ལ་འབེབ་པ་ཡིན། འདི་ནས་དབུ་མ་ཞེས་པ་དེ་ཤན་འབྱེད་ལམ་གྱི་དབུ་མ་དང་། དངོས་གཞི་མཉམ་བཞག་གི་དབུ་མ་གཉིས་ལས་གཙོ་ཆེར་ཕྱི་མར་གོ་དགོས་ཤིང་། དེ་ལྟར་ན་ཀུན་བཟླུམས་ཐིག་ལེ་ཉག་གཅིག ཆོས་དབྱིངས་སྤྲོས་པ་ཀུན་བྲལ། སྔགས་རྒྱུད་འགའ་རེ་ནས་འདི་ལ་ཀུན་གཞི་རྒྱུའི་རྒྱུད་ཅེས་ཀུན་གཞིའི་སྒྲས་བསྙད་ས་དང་། རྫོགས་ཆེན་གྱི་སྐབས་སོ་སོ་ནས་ཐ་མལ་གྱི་ཤེས་པ་ལ་སོགས་པ་གསུངས་པ་སྟེ། སོགས་ཁོངས་ན་ཅི་ཞིག་ཡོད་པ་རེད་ཟེར་ན། གཉུག་མའི་སེམས། རང་བྱུང་གི་ཡེ་ཤེས་ལ་སོགས་པ་མང་ཞིང་། མིང་ལ་གང་བཏགས་ན་ཡང་། དོན་འདི་རེད་ཅེས་མཚམས་སྦྱར་ནས། དངོས་གཞིའི་གནས་ལུགས་དོན་གྱི་ངོ་སྤྲོད་ངོ་མ་དེ་གསུངས་ཡིན། ད་རེས་འུ་གུས་ཁྲིད་སྟངས་འདི་ལུང་རྒྱུན་ཙམ་དང་། ཁྲིད་མ་ལུང་། མོས་ཁྲིད་ཙམ་མ་ཡིན་པར། སྨིན་ཁྲིད་ལག་ཁྲིད་ཀྱི་ཕྱག་ལེན་བྱེད་པ་ཡིན་པས། རྫོགས་ཆེན་རིག་པ་ངོ་སྤྲོད་འདི་ལ། དད་པ་ཅན་ལ་བྱིན་བརྒྱུད་བརྡ་ཐབས་ཀྱིས་ངོ་སྤྲོད་པ་ཞིག་དང་། ཤེས་རབ་ཅན་ལ་ལྟ་བ་གཏན་ལ་ཕབ་ནས་ངོ་སྤྲོད་པ་ཞིག ཉམས་མྱོང་ཅན་ལ་སྒོམ་པ་ལག་ལེན་གྱི་སྟེང་ནས་ངོ་སྤྲད་པའི་སྤྲོད་ལུགས་ཡོད་པ་ལས། ཐམས་ཅད་ཚང་བའི་རང་ལུགས་བརྒྱུད་པའི་ཕྱག་བཞེས་མ་ཉམས་པ་ཇི་བཞིན་དུ་ཕྱག་ལེན་ལ་ཐེབས་པ་བྱ་པའི་དང་པོར་ངས་འདི་ནས། ཌ་དྲིལ་སྙན་པའི་སྒྲ་དབྱངས་དང་བཅས་ཏེ་བརྒྱུད་གསུམ་དགོངས་བརྡ་སྙན་བརྒྱུད་ཀྱི་བྱིན་འབེབས་ཤིག་བཏོན་ནས། ཐབས་ཤེས་ཟུང་འབྲེལ་གྱི་ཕཊ་སྒྲ་དང་སྦྲགས་ནས་བརྗོད་མེད་དོན་གྱི་ཡེ་ཤེས་ཀྱི་བྱིན་ཆེན། སྙིང་དབུས་མི་ཤིགས་པའི་ཐིག་ལེར་ཕབ་པ་དང་བསྟུན་ནས། འདིའི་ངོ་སྤྲོད་ཀྱི་ཚིག་འདི་འདོན་རྒྱུ་ཡིན། དེའི་ཚེ་རྣམ་པ་ཐམས་ཅད་ཀྱིས་ངོ་སྤྲོད་ཀྱི་སྐབས་འདིར་ཕྱག་གཉིས་ཀ་སྤྱི་བོར་མ་རེག་པའི་ཐལ་མོ་ཞིག་སྦྱར་ནས། རྐང་མཐིལ་གཉིས་མདུན་དུ་སྤྲད་པའི་མི་འགྱུར་རྡོ་རྗེའི་བཞུགས་སྟངས་མཛོད། དེའི་ཚེ་ཕྱག་དཔེ་ལ་གཟིགས་མི་དགོས།༼བླ་མས་ཌ་དྲིལ་དང་བཅས།༽

ཨེ་མ་ཧོ༔ རྒྱ་ཆད་ཕྱོགས་ལྷུང་བྲལ་བའི་ཞིང་ཁམས་ནས༔

དང་པོའི་སངས་རྒྱས་ཆོས་སྐུ་ཀུན་ཏུ་བཟང༔

ལོངས་སྐུ་ཆུ་ཟླའི་རོལ་རྩལ་རྡོ་རྗེ་སེམས༔

སྤྲུལ་སྐུ་མཚན་རྫོགས་དགའ་རབ་རྡོ་རྗེ་ལ༔

གསོལ་བ་འདེབས་སོ་བྱིན་རླབས་དབང་བསྐུར་སྩོལ༔

ཤྲཱི་སིངྷ་དོན་དམ་ཆོས་ཀྱི་མཛོད༔

འཇམ་དཔལ་བཤེས་གཉེན་ཐེག་དགུའི་འཁོར་ལོས་བསྒྱུར༔

ཛྙཱ་ན་སུ་ཏྲ་པཎ་ཆེན་བཱི་མ་ལར༔

གསོལ་བ་འདེབས་སོ་གྲོལ་བྱེད་ལམ་སྣ་སྟོན༔

འཛམ་བུའི་གླིང་གི་རྒྱན་གཅིག་པདྨ་འབྱུང༔

ངེས་པར་ཐུགས་ཀྱི་སྲས་མཆོག་རྗེ་འབངས་གྲོགས༔

ཐུགས་གཏེར་རྒྱ་མཚོའི་བརྡ་གྲོལ་ཀློང་ཆེན་ཞབས༔

མཁའ་འགྲོའི་དབྱིངས་མཛོད་བཀའ་བབས་འཇིགས་མེད་གླིང༔

གསོལ་བ་འདེབས་སོ་འབྲས་བུ་ཐོབ་གྲོལ་སྩོལ༔

ཆོས་ཀྱི་བདག་པོ་བྱང་ཆུབ་རྡོ་རྗེ་ཞབས༔

གྲུབ་བརྙེས་འཇིགས་མེད་རྒྱལ་བའི་མྱུ་གུ་དང༔

སྤྲུལ་བའི་སྐུ་མཆོག་མི་འགྱུར་ནམ་མཁའི་མཚན༔

ཨོ་རྒྱན་བསྟན་འཛིན་གཞན་ཕན་སྣང་བའི་ཞབས༔

འཁོར་ལོའི་མགོན་པོ་གུ་ཎ་ནཱ་ཐ་རྗེར༔

གསོལ་བ་འདེབས་སོ་གནས་ལུགས་རང་ཞལ་སྟོན༔

སྐུ་གསུང་ཐུགས་དང་ཡོན་ཏན་ཕྲིན་ལས་ཀྱིས༔

དེང་འདིར་སྐལ་ལྡན་རྣམས་ལ་བྱིན་རླབས་པས༔

ཕྱི་ནང་སྒྱུ་འཕྲུལ་དྲྭ་བའི་འཁོར་ལོར་ཤར༔

སྒྲ་གྲགས་མི་ཤིགས་རྡོ་རྗེའི་དབྱིངས་སུ་སྨིན༔

ཀ་དག་རིག་པ་གདོད་མའི་ལྷུམས་སུ་ཞུགས༔

ལྷུན་གྲུབ་སྣང་བ་རྣམ་བཞིའི་རྩལ་རྫོགས་ནས༔

ཚེ་གཅིག་འཇའ་ལུས་རྡོ་རྗེའི་སྲོག་འགྲུབ་ཤོག༔

ཚེ་གཅིག་འཇའ་ལུས་རྡོ་རྗེའི་སྲོག་འགྲུབ་ཤོག༔

བཛྲ་ཀཱ་ཡ་ཝཀྐ་ཙིཏྟ་ག་ན་ཀརྨ་སརྦ་སིདྡྷི་ཕ་ལ་ཧཱུཾ།

ཨ་ཨ་ཨ།

ཕཊཿསེམས་གང་ཡིན།

ཕཊཿསེམས་གང་ཡིན།

ཕཊཿསེམས་གང་ཡིན།

འདིའི་མཚམས་ནས་ངོ་སྤྲོད་ཀྱི་ཚིག་རྡོ་རྗེའི་གསུང་ངས་མར་ཤར་འདོན་བྱེད་པ་ཡིན། ཁྱེད་རྣམ་པའི་ཕྱག་གིས་ངལ་ཞིག་གསོ་དགོས་ན་གསོས། འདི་མི་འགྱུར་རྡོ་རྗེའི་བཞུགས་སྟངས་ཡིན། དབང་གི་སྐབས་སུ་བཞུགས་སྟངས་འདི་དགོས་པས། ཁྱེད་རྣམ་པས་བཞུགས་སྟངས་དེའི་སྒོ་ནས་སྤྱི་བོར་མ་རེག་པའི་ཐལ་མོ་གྱེན་ལ་སྦྱར་ནས་རྐང་མཐིལ་གཉིས་ཁ་སྦྱར་ཏེ་བཞུགས་རྒྱུ་གྱིས། ཁྱེད་རྣམས་སེམས་ཉིད་རང་སར་གློད་ལ་ཞོག །བཞག་དུས་ཐ་མལ་ཤེས་པ་རྗེན་ནེ་བ། །བལྟས་པས་མཐོང་རྒྱུ་མེད་པའི་ས་ལེ་བ། །རིག་པ་མངོན་སུམ་ས་ལེ་ཧྲིག་གེ་བ། །ཅིར་ཡང་མ་གྲུབ་སྟོང་ཞིང་སེང་ངེ་བ། །གསལ་སྟོང་གཉིས་སུ་མེད་པའི་ཡེ་རེ་བ། །རྟག་པ་མ་ཡིན་ཅིར་ཡང་གྲུབ་པ་མེད། །ཆད་པ་མ་ཡིན་ས་ལེ་ཧྲིག་གེ་བ། །གཅིག་པུ་མ་ཡིན་དུ་མ་རིག་ཅིང་གསལ། །དུ་མ་མ་ཡིན་དབྱེར་མེད་རོ་གཅིག་པ། །གཞན་ན་མེད་དེ་རང་རིག་འདི་ཉིད་དོ། །སྙིང་དབུས་བཞུགས་པའི་གདོད་མའི་མགོན་པོའི་ཞལ། །མངོན་སུམ་ད་ལྟའི་དུས་འདིར་མཐོང་བ་ཡིན། །འདི་དང་འབྲལ་མེད་གྱིས་ཤིག་སྙིང་གི་བུ། །འདི་མིན་གཞན་ལས་ལྷག་པ་སུས་འདོད་པ། །གླང་པོ་རྙེད་ཀྱང་རྗེས་འཚོལ་ཇི་བཞིན་དུ། །སྟོང་གསུམ་ཐམས་ཅད་ཐགས་སུ་བཏགས་ན་ཡང་། །སངས་རྒྱས་མིང་ཙམ་རྙེད་པར་མི་སྲིད་དོ། །དེ་ནས་རང་ལུགས་སུ་བདེ་བར་བཞུགས་ནས་ཕྱག་དཔེ་ལ་གཟིགས། ཕྱག་དཔེའི་ངོ་སྤྲོད་ཀྱི་མཚམས་ཀྱི་ཁྱེད་རྣམས་སེམས་ཉིད་རང་སར་གློད་ལ་ཞོག་གསུངས་ས་དེ་ནས་མར་ལ་གཟིགས་དང་། ངོ་སྤྲོད་ཀྱི་ཚིག་ཚང་མ་ཚིག་དོན་སྦྲེལ་ནས་ཡང་ཞིབ་ཀྱིས་མགོ་ནས་མར་ཚར་གཅིག་འགྲོ་རྒྱུ་བྱེད། དང་པོ་ཁྱེད་རྣམས་སེམས་ཉིད་རང་སར་གློད་ལ་ཞོག་གསུངས་རྒྱུ་འདིས་བཞག་ཐབས་བསྟན་པ་ཡིན། འདིའི་སེམས་ཞེས་པ་འདི་ཆོས་ཅན་སེམས་སུ་སྣང་བ་རྣམ་རྟོག་འཕྲོ་འདུར་སྣང་བའི་སེམས་དེ་ཉིད་ཀྱིས་ཞེས་པ་ནི་སེམས་ཀྱི་ཆོས་ཉིད་གསུངས་པ་མ་ཡིན་པར། སེམས་དེ་ཉིད་ཀྱིས་འདས་པའི་རྗེས་མ་གཅོད། མ་འོངས་པའི་མདུན་མ་བསུ། ད་ལྟའི་རྣམ་རྟོག་གང་ཤར་སྐྱེ་འགག་གྲངས་སུ་འདེབས་ནས་རྩིས་བརྒྱབ་པ་ལྟར་ཡང་མ་ཡིན་པར། བཅས་བཅོས་མེད་པར་རང་སར་རང་བབས་སུ་གློད་དེ་ཞོག་ལ་ཐོངས། དེ་ལྟར་གློད་པས། ཐ་མལ་ཤེས་པ་ཞེས་པ་ནི་ཐ་མལ་བའི་འཁྲུལ་ཤེས་ལ་གསུངས་པ་མ་ཡིན་པར། མ་བཅོས་ཐ་མལ་རང་བབས་ཐད་ཀའི་སོ་ན་ཡོད་པའི་རང་གནས་པའི་ཡེ་ཤེས་ལ་གསུངས་པ་དང་། རྗེན་ནེ་བ་ཞེས་པ་ནི་མ་བཅོས་ཐ་མལ་གྱི་རིག་པ་རང་སེམས་རིག་པའི་ཡེ་ཤེས་དེ། གཟུང་འཛིན་གྱི་སེམས་དང་གཉིས་ཀ་འདྲེས་དགོས་ན་འདྲེས་ཐབས་མེད་པའི་རྗེན་པ་ཞིག་ཡིན་པར་བསྟན་པ་ཡིན། བལྟས་པས་མཐོང་རྒྱུ་མེད་པའི་ས་ལེ་བ་ཞེས་པ་ནི། སྟོང་གསལ་འགག་པ་མེད་པའི་ཡེ་ཤེས་དེ་བལྟས་པས་མི་མཐོང་ལ། བཞག་ན་གསལ་ཡོང་ཞེས་པ་སྟེ། དེ་ཇི་ལྟར་ཡིན་ན། ཅིའི་ངོ་བོར་ཡང་མ་གྲུབ་པའི་ངོ་བོ་སྟོང་སང་ངེ་བ་ལ་བལྟས་པས་མི་མཐོང་། བཞག་བཞག་ན་སྟོང་པ་ཕྱང་ཆད་ཀྱང་མ་ཡིན་པས་འོད་གསལ་འདུས་མ་བྱས་པའི་ཆོས་ཉིད་ས་ལེར་གསལ་བ་ཡིན། རིག་པ་མངོན་སུམ་ས་ལེ་ཧྲིག་གེ་བ། །ཅིར་ཡང་མ་གྲུབ་སྟོང་ཞིང་སེང་ངེ་བ། །གསལ་སྟོང་གཉིས་སུ་མེད་པའི་ཡེ་རེ་བ། །ཞེས་པའི་ཚིག་རྐང་གསུམ་འདིས། གསལ་བ་དང་གཅིག སྟོང་པ་དང་གཉིས། གཉིས་མེད་ཀྱི་ཡེ་ཤེས་ཚང་མ་གཞི་གཅིག་ཏུ་འདུས་པའི་ངོ་བོ། ངོ་བོ་གཅིག་པའི་ལྡོག་ཆ་ནས་བསྟན་པ་ཡིན། ཚིག་སྔོན་མས་གསལ་བ་ཡབ་ཀྱི་རང་བཞིན་གསལ་སྟོང་རིག་པའི་རྡོ་རྗེ་ཆོས་སྐུ་ཀུན་ཏུ་བཟང་པོ་དང་། ཚིག་བར་བས་སྟོང་ཆ་ཡུམ་གྱི་ངོ་བོ་སྟོང་གསལ་མཐའ་དབུས་དང་བྲལ་བ་ཆོས་དབྱིངས་ཀུན་ཏུ་བཟང་མོ། ཚིག་མཐའ་མས་དབྱིངས་རིག་དབྱེར་མེད་འཁོར་འདས་སྣོད་བཅུད་སྲིད་ཞི་ཀུན་ལ་ཁྱབ་པའི་སྲིད་དང་ཞི་བ་འཁོར་འདས་ཀུན་ལ་ཁྱབ་པའི་ཆོས་ཉིད་ཟུང་འཇུག་ཀུན་ཁྱབ་ཀྱི་ཡེ་ཤེས་བསྟན་པ་ཡིན། འདིའི་ཧྲིག་གེ་བ་དང་། སེང་ངེ་བ། ཡེ་རེ་བ་ཚང་མ་བརྗོད་མེད་ཀྱི་དོན། བརྗོད་མེད་དོན་གྱི་ཡེ་ཤེས་མི་ཚིག་གིས་བརྗོད་པའི་སྒྲ་ཡིས་མཚོན་ཐབས་བྲལ་བ་དེ་བརྡ་ཙམ་གྱིས་སྟོན་དགོས་དུས་ཧྲིག་གེ་བ། སེང་ངེ་བ། ཡེ་རེ་བ། དེ་ལྟར་གསུངས་དགོས་པ་ཡིན། ཕྱོགས་ཙམ་མཚོན་བྱེད་ཀྱི་ཚིག་རེད། ཧྲིག་གེ་བ་གསལ་བ་དང་། སེང་ངེ་བ་སྟོང་པ། ཡེ་རེ་བ་རྗེན་པའི་དོན་ཅན་ཞིག་ཡིན། རྟག་པ་མ་ཡིན་ཅིར་ཡང་གྲུབ་པ་མེད། །ཆད་པ་མ་ཡིན་ས་ལེ་ཧྲིག་གེ་བ། །གཅིག་པུ་མ་ཡིན་དུ་མ་རིག་ཅིང་གསལ། །དུ་མ་མ་ཡིན་དབྱེར་མེད་རོ་གཅིག་པ། །ཞེས་པའི་ཚིག་རྐང་བཞི་འདིས་རང་བྱུང་རིག་པའི་ཡེ་ཤེས་ཡེ་ནས་མཐའ་དབུས་བཅིངས་གྲོལ་མེད་པར་རང་ལ་གནས་པ་དེ་རྟག་ཆད་གཅིག་དང་དུ་མ་ལ་སོགས་པའི་སྤྲོས་པའི་མཐའ་ཐམས་ཅད་ལས་གྲོལ་བར་བསྟན་པ་ཡིན། འདི་མུ་སྟེགས་པའི་བདག་ལྟ་བུའི་རྟག་པ་མ་ཡིན། ཅིར་ཡང་མ་གྲུབ་པ་སྟོང་བའི་སྒྲ་ཡིས་མཚོན་པ་དང་། ཆད་པ་མ་ཡིན་རང་བཞིན་འོད་གསལ་བ། གསལ་ལུགས་ས་ལེ་ཧྲིག་གེ་རིག་སྟོང་དབྱེར་མེད་པ། གཅིག་པུ་མ་ཡིན་སྣོད་བཅུད་ཀུན་ལ་ཁྱབ་པའི་ཡེ་ཤེས་ལྷུན་གྲུབ་ཕྱོགས་མེད་དུ་རིག་ཅིང་གསལ་བ། དུ་མ་ཡང་མ་ཡིན་ཤེས་དང་ཤེས་བྱ་དབྱེར་མེད་དུ་མ་རོ་གཅིག་པར་བསྟན་པ་ཡིན། དེ་ལྟར་ན་སྟོང་པ་ཤེས་རབ་བརྗོད་དུ་མེད་པའི་དབྱིངས་དང་སྣང་བ་ཐབས་རིག་པའི་ཡེ་ཤེས་གཉིས་ཀ་གདོད་ནས་འདུ་འབྲལ་མེད་པར་རོ་གཅིག་པ་ནི་དབྱིངས་རིག་གཅིག་པའི་གཞི་མཐུན་བདེན་གྲུབ་ཅིག་ལ་གོ་དགོས་པ་མ་ཡིན། གཉིས་མེད་གཅིག་དང་ཐ་དད་ཀྱི་སྒྲོ་འདོགས་མཚན་མ་ཐམས་ཅད་ལས་འདས་པ་ཁས་ལེན་ཀུན་བྲལ་ཞིག་ལ་ཡེ་ཤེས་རྫོགས་པ་ཆེན་པོ་ཞེས་གསུངས་པ་ཡིན། དེ་ཡང་ག་ཤེད་ཐག་རིང་ཞིག་ནས་ངལ་བ་ཆེན་པོ་ཞིག་བྱས་ནས་བཙལ་ཏེ་རྙེད་དགོས་རྒྱུ་ཞིག་མ་ཡིན་པར། གཞན་ན་མེད་དེ་རང་རིག་འདི་ཉིད་དོ། །སྙིང་དབུས་བཞུགས་པའི་གདོད་མའི་མགོན་པོའི་ཞལ། །མངོན་སུམ་ད་ལྟའི་དུས་འདིར་མཐོང་བ་ཡིན། །འདི་དང་འབྲལ་མེད་གྱིས་ཤིག་སྙིང་གི་བུ། །ཞེས་གསུངས་པའི་གཞན་ན་མེད་པའི་རང་རིག་ཅེས་པ་འདི་ལ་སྒྲས་བརྗོད་རིགས་ཀྱི་སྒོ་ནས་དབྱེ་བ་ཕྱེས་ཡོང་ན་གོང་ནས་བཤད་པ་ལྟ་བུའི་ཐེག་པའི་རྣམ་གྲངས་ལྟར་མཐའ་ཡས་པ་སྟེ། མི་གནས་པའི་ཡེ་ཤེས། གདོད་ནས་རྣམ་གྲོལ། ལྷག་པའི་བདེན་པ་དབྱེར་མེད། འདའ་ཀ་ཐུགས་ཀྱི་ཡེ་ཤེས། བདེ་ཆེན་བྱང་ཆུབ་ཀྱི་སེམས། ཐིག་ལེ་ཉག་གཅིག རིག་པ་ཆོས་སྐུའི་ཡེ་ཤེས་ལ་སོགས་པ་གང་ཟེར་ན་དོན་ལ་གཞི་འབྲས་དབྱེར་མེད་ཆོས་སྐུ་ཐིག་ལེ་ཉག་གཅིག དེ་ཁོ་ན་ཉིད་དེ་ཡིན། དེ་ཉིད་མི་ཤིགས་གཉུག་མའི་ཕུང་ཁམས་སྐྱེ་མཆེད་ཀྱི་དྭངས་མའི་སྙིང་དབུས་ཙིཏྟ་རིན་ཆེན་གྱི་ཕོ་བྲང་ན། ཡེ་ནས་འདུ་འབྲལ་མེད་པར་བཞུགས་པའི་ཡེ་གྲོལ་གདོད་མའི་མགོན་པོའི་རང་ཞལ། དེ་རིང་བླ་མའི་མན་ངག་དང་གདམས་པའི་ཟབ་ཁྱད། བརྒྱུད་པའི་བྱིན་རླབས་འཕོ་བ་དང་བཅས་པས། མངོན་སུམ་ཅར་ཕོག་ཏུ་ངོ་སྤྲད་ནས་ངོས་ཟིན་ཏེ་དུས་འདིར་མཐོང་བ་ཡིན་ན། ངོ་རང་ཐོག་ཏུ་སྤྲད་པ་འདི་ཉིད་ལ་ཐག་གཅིག་ཐོག་ཏུ་བཅད་དེ། འདི་དང་འབྲལ་བ་མེད། སྒོམ་དུ་མེད་ལ་ཡེངས་སུ་མེད་པའི་གནད་འདི་དང་མ་འབྲལ་བ་གྱིས་ལ་ཉམས་སུ་ལོངས་ཤིག་དང་། གྲོལ་བ་མངོན་གྱུར་དག་པ་ཉིས་ལྡན་གྱི་སངས་རྒྱས་དེ་རང་ལས་རྙེད་པས། འདི་མིན་པ་གཞན་དུ་འཚོལ་བའི་ངལ་བ་མི་དགོས་སྐལ་ལྡན་སྙིང་གི་བུ་ཞེས་ནན་གྱིས་སྐུལ་ཏེ་གདམས་པར་མཛད་པ་ཡིན། འདི་མིན་གཞན་ལས་ལྷག་པ་སུས་འདོད་པ། །གླང་པོ་རྙེད་ཀྱང་རྗེས་འཚོལ་ཇི་བཞིན་དུ། །སྟོང་གསུམ་ཐམས་ཅད་ཐགས་སུ་བཏགས་ན་ཡང་། །སངས་རྒྱས་མིང་ཙམ་རྙེད་པར་མི་སྲིད་དོ། །ཞེས་པ་ནི་རང་གནས་ཆོས་སྐུའི་ཡེ་ཤེས་རྒྱུ་ལས་མ་བྱུང་བའི་འབྲས་བུ། གཟུང་འཛིན་སེམས་ལས་འདས་པ། ལུང་ལས་མ་བྱུང་བར་རང་གི་རིག་པས་ངེས་པ་དོན་གྱི་ཡེ་ཤེས། རང་བྱུང་ཡེ་ཤེས་རང་ལ་གནས་པ་མངོན་སུམ་མཐོང་བ་འདིས། ད་དུང་ཡིད་མི་ཚིམ་པར་ཟུར་ཞིག་ན་དེ་བས་ཡག་ཅིག་གམ་དེ་བས་མཛེས་ཤིག་ཡོད་སྣང་ཤར་ནས། འཚོལ་བར་སོང་ན་གླང་པོ་རྙེད་བཞིན་དུ་ད་དུང་གླང་པོའི་རྗེས་འཚོལ་ནས་བཙལ་བ་དང་འདྲ་བར་དོན་མེད་ལམ་ལོག་ལ་འཁྱར་ནས་ཡོད་པས་རང་གནས་ཀྱི་ཡེ་ཤེས། རང་བཞག་གི་ཆོས་སྐུ། ཡེ་ནས་རང་ལ་གནས་པ་འདིའི་ཕན་དུ། སྟོང་གསུམ་ཐམས་ཅད་ཐགས་མཁན་གྱིས་ཐགས་འཐག་དུས་རྒྱུ་སྤུན་རེ་རེ་བཞིན་དུ་ཞིབ་ཆ་བྱས་པ་ལྟ་བུས་ཞིབ་ཏུ་བཙལ་ཀྱང་འདི་ལས་གཞན་པའི་སངས་རྒྱས་ཀྱི་མིང་ཙམ་ཡང་སྔར་མ་རྙེད། ད་ལྟ་མི་རྙེད། ཕྱིས་སུ་རྙེད་པར་མི་འགྱུར་རོ་ཞེས་པའོ། །དེ་ནས་དོན་བསྡུ་བ་ནི། དངོས་གཞིའི་གནས་ལུགས་དོན་གྱི་ངོ་སྤྲོད་དོ། །ཞེས་དེ་ཡན་གྱིས་རིག་པ་རང་སྣང་གི་བློ་ཅན་གྱི་དབང་དུ་བྱས་པའི་ལྟ་བ་རང་ངོ་སྤྲད་པ་སོང་ངོ། །དེ་ནས་དཔེ་དང་དོན་གྱིས་མཚོན་པའི་སྐུ་ལྔ་ཡེ་ཤེས་ལྔ་སོགས་རིག་པ་གཅིག་ལ་ཚང་ཚུལ་གྱི་ངོ་སྤྲོད་བསྟན་པ་ནི། ཨེ་མ་ཧོ། ད་ཡང་རིགས་ཀྱི་བུ་རྣམས་ལེགས་པར་ཉོན། །ད་ལྟའི་རང་རིག་རང་གསལ་འདི་ཉིད་ལ། །སྐུ་གསུམ་ངོ་བོ་རང་བཞིན་ཐུགས་རྗེ་དང་། །སྐུ་ལྔ་ཡེ་ཤེས་ལྔ་སོགས་ཐམས་ཅད་ཚང་། །ཞེས་མདོར་བསྟན། རྒྱས་པར་བཤད་པ་ནི། རིག་པའི་ངོ་བོ་ཁ་དོག་དབྱིབས་ལ་སོགས། །ཅིར་ཡང་མ་གྲུབ་སྟོང་པ་ཆོས་ཀྱི་སྐུ། །སྟོང་པའི་རང་གདངས་གསལ་བ་ལོངས་སྐུའོ། །སྣ་ཚོགས་འཆར་གཞི་མ་འགགས་སྤྲུལ་པའི་སྐུ། །ཞེས་སྐུ་གསུམ་རིག་པ་གཅིག་ལ་ཚང་ཚུལ་བསྟན་པ་སྟེ། སེམས་ཉིད་ངོ་བོ་སྟོང་པ་སྐྱེ་བ་མེད་པའི་ཆོས་ཉིད། རིག་པའི་ཡེ་ཤེས་དབྱིབས་ཁ་དོག་གཟུགས་དང་མཚན་མ་ཅིའི་ངོ་བོར་ཡང་མ་གྲུབ་པ། བསལ་བྱ་ཕར་ལ་བསལ་བར་བྱ་བ་ཞིག་དང་། བཞག་བྱ་ཚུར་ལ་འཇོག་པར་བྱ་བའི་དེ་འདྲ་ཡག་ལས་དང་གཙང་བཟོ་བྱེད་མི་དགོས་པ། ངོ་བོ་གྲུབ་བསལ་མཚན་མའི་ཆོས་ལས་རིང་དུ་འདས་ཤིང་ཆོས་སྐུ་སྤྲོས་པ་དང་བྲལ་བ། དེའི་སྟོང་བའི་རང་གདངས་འགགས་མེད་ངང་གིས་གསལ་བ་དེ་ཉིད་ལོངས་སྐུ་དང་། དེ་ལས་སྣ་ཚོགས་འཆར་གཞི་མ་འགགས་ལྷུན་གྲུབ་ཐུགས་རྗེའི་རོལ་རྩལ་ཅིར་ཡང་འཆར་ཞིང་། གང་དུ་ཡང་སྣང་རུང་གང་ཡིན་པ་དེ་ཉིད་སྣ་ཚོགས་ངགཉིས་མེད་སྤྲུལ་བའི་སྐུ། དེ་ཉིད་དཔེ་ཡིས་བསྟན་པ་ནི། དེ་རྣམས་མཚོན་པའི་དཔེ་ནི་འདི་དང་འདྲ། །ཞེས་མཚམས་སྦྱར་ཏེ། ཤེལ་གྱི་མེ་ལོང་ཆོས་ཀྱི་སྐུ་དང་མཚུངས། །རང་བཞིན་དྭངས་ཤིང་གསལ་བ་ལོངས་སྐུའི་མཚོན། །གཟུགས་བརྙན་འཆར་གཞི་མ་འགགས་སྤྲུལ་སྐུའི་དཔེ། །ཞེས་པ་འདི་དཔེ་རྡོ་རྗེ་སེམས་དཔའི་མེ་ལོང་དྭངས་ཤེལ་གཅིག་གིས་བསྟན་པ་སྟེ། གསལ་སྒྲིབ་མེད་པར་དྭངས་པ་ཆོས་སྐུའི་དཔེ། གདངས་འཆར་རུང་དུ་གསལ་བ་ལོངས་སྐུའི་དཔེ། རྐྱེན་དང་འཕྲད་ན་གཟུགས་བརྙན་འཆར་གཞི་མ་འགགས་པ་སྤྲུལ་སྐུའི་དཔེའོ། །དཔེ་དེ་ཡིས་མཚོན་པའི་དོན་ནི། འགྲོ་རྣམས་སེམས་ཉིད་ཡེ་ནས་སྐུ་གསུམ་དུ། །གནས་པ་ཡིན་ཏེ་རང་ངོ་ཤེས་ནུས་ན། །འགྲོ་བ་རྣམས་ཀྱིས་སྒོམ་པ་རྡུལ་ཙམ་ཡང་། །བྱ་མི་དགོས་ཏེ་དུས་གཅིག་འཚང་རྒྱའོ། །ཞེས་གསུངས་ཏེ། འགྲོ་ཀུན་བདེ་གཤེགས་སྙིང་པོས་མ་ཁྱབ་པ་མེད་པས་འགྲོ་བ་རྣམས་ཀྱི་སེམས་ཉིད་ལ་ཡེ་ནས་སྐུ་གསུམ་ཚང་བ་ཡིན། ཚང་ལུགས་ཇི་ལྟར་ཡིན་ན། རྒྱུད་བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །ཅེས་གསུངས་པའི་དོན་དང་གཅིག་པ་དང་། འོན་ཀྱང་གློ་བུར་དྲི་མས་བསྒྲིབས་ནས་འཁྲུལ་བ་གཞི་མེད་རྨི་ལམ་གྱི་སྣང་བ་ལྟ་བུ་འདི་བྱུང་བ་ཡིན། གནས་ཚུལ་ལ་ཡེ་ནས་འགྱུར་མ་མྱོང་བ་སྐུ་གསུམ་རང་ཆས་སུ་ཡོད་བཞིན་དུ། འདིའི་རང་ངོ་ནམ་ཤེས་ནུས་ན་དེ་དུས་རང་ངོ་ཤེས་པའི་ཟག་མེད་དགེ་ཚོགས་ཀྱི་སྟོབས་དེ་ཡིས། འགྲོ་བས་སྒོམ་པ་རྡུལ་ཙམ་ཡང་བྱ་མི་དགོས་པར་དུས་གཅིག་ལ་འཚང་རྒྱ་བ། གཉིད་སད་དུས་རྨི་ལམ་སངས་བ་ལྟར་དུ་འཁྲུལ་བ་དག་ཚེ་མ་འཁྲུལ་མཁྱེན་པའི་ཡེ་ཤེས་མངའ་བརྙེས་ནས་དག་པ་གཉིས་ལྡན་མངོན་དུ་གྱུར་པ་ཡིན། མངོན་སུམ་མཛུབ་ཚུགས་ཀྱིས་ངོ་སྤྲད་པའི་གནས་སྐབས་ན། སྐུ་གསུམ་སོ་སོ་རིམ་ཅན་དུ་བཤད་ཀྱང་། དོན་ལ་ཐ་མི་དད་པའི་ཚུལ་ནན་གྱིས་ད་དུང་བསྐྱར་དུ་གདམས་པ་ནི། སྐུ་གསུམ་ངོ་སྤྲོད་ཐ་དད་བསྟན་པ་ནི། །དོན་ལ་དབྱིངས་གཅིག་མ་གཏོགས་ཐ་དད་དུ། །བཟུང་ནས་འཁྲུལ་བར་མ་འགྲོ་སྙིང་གི་བུ། །ཞེས་པས་བསྟན་ཏེ། འདི་ནས་རིག་པའི་ཡེ་ཤེས་དེ་ཉིད་གསལ་སྟོང་འཛིན་མེད་ཆེན་པོར་ལ་བཟླ་བའི་རིམ་པ་བསྟན་པ་ནི། སྐུ་གསུམ་ཡེ་ནས་སྟོང་པ་ཀ་དག་སྟེ། །གསལ་སྟོང་ཟུང་འཇུག་ངོ་བོ་གཅིག་པ་རུ། །ཤེས་པར་གྱིས་ལ་འཛིན་མེད་ངང་ལ་སྤྱོད། །ངོ་བོ་རང་བཞིན་ཐུགས་རྗེ་གསུམ་པོ་ཡང་། །ཆོས་སྐུ་ལོངས་སྐུ་སྤྲུལ་སྐུ་ཉིད་དང་མཚུངས། །གསུམ་ཀ་གསལ་སྟོང་ཟུང་འཇུག་ཆེན་པོ་རུ། །ཤེས་པར་གྱིས་ལ་འཛིན་མེད་ངང་ལ་སྤྱོད། །ཅེས་གསུངས་ཏེ། སྟོང་ཞིང་གསལ་ལ་འགགས་པ་མེད་པའི་ལྡོག་ཆ་སོ་སོ་ནས་སྐུ་གསུམ་དུ་ཕྱེས་ཏེ་བཤད་ཀྱང་། དོན་ལ་སྐུ་གསུམ་དབྱེར་མེད་གཅིག་ལ་ཚང་བ། སྐུ་གསུམ་པོའི་ངོ་བོ་སྟོང་པ་ཡིན་པས་ཀ་དག ཀ་དག་སྤྲོས་པ་དང་བྲལ་བའི་རྒྱུ་མཚན་གྱིས་ལྷུན་གྲུབ་འཆར་གདངས་མ་འགགས། གསལ་སྟོང་ཟུང་འཇུག་ཏུ་ཤེས་པར་གྱིས་ལ་འཛིན་མེད་ངང་ལ་ཡེངས་མེད་ཁྲོལ་གྱིས་སྤྱོད་པའི་བོགས་འབྱིན་གྱིས་ལ་བཟླ་བར་གྱིས་ཤིག དེ་བཞིན་དུ་ངོ་བོ་རང་བཞིན་ཐུགས་རྗེའི་ཡེ་ཤེས་གསུམ་པོ་ཡང་། ཆོས་ལོངས་སྤྲུལ་གསུམ་གཞི་གཅིག་ལ་ཚང་བ་བཞིན་དུ་གཞི་འཛིན་པའི་ཡེ་ཤེས་ལའང་ཡེ་ཤེས་གསུམ་པོ་འདུས་པས་ན། གསལ་སྟོང་ཟུང་འཇུག་ཆེན་པོར་འཛིན་མེད་ངང་ལ་ཡེངས་མེད་བབས་ཀྱིས་སྤྱོད་པའི་བག་ཡངས་དང་ལ་བཟླ་གྱིས་ཤིག་ཅེས་པའོ། །འདི་ནས་སྐུ་ལྔ་ཡེ་ཤེས་ལྔ་ཡི་ངོ་སྤྲོད་ནི། དེ་ཡང་རང་བྱུང་རིག་པའི་ཡེ་ཤེས་འདི། །ཅིར་ཡང་སྣང་བས་རྣམ་པར་སྣང་མཛད་སྐུ། །འགྱུར་བ་མེད་པས་མི་བསྐྱོད་རྡོ་རྗེའི་སྐུ། །མཐའ་དབུས་མེད་པས་སྣང་བ་མཐའ་ཡས་སྐུ། །མཆོག་དང་ཐུན་མོང་དངོས་གྲུབ་ཀུན་འབྱུང་བ། །ནོར་བུ་འདྲ་བས་རིན་ཆེན་འབྱུང་ལྡན་སྐུ། །དོན་ཀུན་འགྲུབ་པས་དོན་ཡོད་གྲུབ་པའི་སྐུ། །དེ་རྣམས་རིག་པའི་རྩལ་ལས་ལོགས་ན་མེད། །ཅེས་རིགས་ལྔ་བསྟན། ཡེ་ཤེས་ལྔ་ཇི་ལྟར་བསྟན་ན། རིག་པའི་ཡེ་ཤེས་ངོ་བོ་མ་འགགས་པར། །མངོན་སུམ་གསལ་བས་མེ་ལོང་ཡེ་ཤེས་སོ། །ཀུན་ལ་ཁྱབ་པས་མཉམ་ཉིད་ཡེ་ཤེས་སོ། །རྩལ་ལས་སྣ་ཚོགས་འཆར་བས་སོར་རྟོག་གོ། དོན་ཀུན་འགྲུབ་པས་བྱ་གྲུབ་ཡེ་ཤེས་སོ། །དེ་དག་རྣམས་ཀྱི་ངོ་བོ་ཀ་དག་ཏུ། །འདུས་པས་ཆོས་ཀྱི་དབྱིངས་ཀྱི་ཡེ་ཤེས་སོ། །དེ་རྣམས་ཐམས་ཅད་རང་གི་རིག་རྩལ་ལས། །ལོགས་ན་གྲུབ་པ་རྡུལ་ཙམ་མེད་པའོ། །ཞེས་གསུངས་ན། སྐུ་ལྔ་ཡེ་ཤེས་ལྔ་ཡི་ངོ་སྤྲོད་འདི་ཞིབ་ཏུ་བཀྲལ་ན། དེ་ཡང་རང་ལ་ཡེ་ནས་སྐད་ཅིག་ཀྱང་འབྲལ་མ་མྱོང་བར་གནས་པའི་རང་བྱུང་གི་རིག་པ། མ་བཅོས་སེམས་ཀྱི་ཆོས་ཉིད་འདི་སྐུ་ལྔ་ཡེ་ཤེས་ལྔར་རང་བཞིན་གྱིས་གྲུབ་པ་ཡིན། ཇི་ལྟར་ཡིན་ན། རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་སྐུའི་རིགས། སྐུའི་མཚན་དཔེའི་འོད་དུ་གསལ་བའི་བདག་ཉིད་ཅིར་ཡང་སྣང་བས་ན་རྣམ་པར་སྣང་མཛད་དང་། མི་བསྐྱོད་པ་ཐུགས་ཀྱི་རིགས་ཡིན། རིག་པ་སྤྲོས་བྲལ་ཀ་དག་གི་ངོ་བོའི་ལྡོག་ཆ་ནས་བཟང་ངན་འཕོ་འགྱུར་དང་བྲལ་བ་ཡིན་པས་ན་འགྱུར་བ་མེད་པས་མི་བསྐྱོད་རྡོ་རྗེའི་སྐུ། འོད་སྣང་མཐའ་ཡས་ཡོན་ཏན་མཐའ་ཡས་ཚད་མེད་པའི་བསྒྲུབ་གཞི་ཡིན་པས་ཡེ་ཤེས་ཀྱི་སྣང་བ་མཐའ་དབུས་མེད་པར་ཁྱབ་པར་བརྡལ་བས་ན་ཡེ་ཤེས་སྣང་བ་མཐའ་ཡས་ཀྱི་སྐུ། རིན་ཆེན་འབྱུང་ལྡན་འདི་ཡོན་ཏན་གྱི་རིགས་ཡིན་པས། ཡོན་ཏན་རིན་པོ་ཆེ་འདོད་རྒུ་འབྱུང་བ་ནོར་བུ་དང་འདྲ་བ་ཡིན་པས་ན་རིན་ཆེན་འབྱུང་ལྡན། དོན་ཡོད་གྲུབ་པ་འཕྲིན་ལས་ཀྱི་རིགས་ཏེ། འབད་ཅིང་རྩོལ་བ་མེད་པར་རང་བྱུང་ལྷུན་གྱིས་གྲུབ་པའི་ཡེ་ཤེས་རང་ལ་རྫོགས་ཡོད་པས་ན་དོན་ཀུན་གྲུབ་པའམ་དོན་ཡོད་གྲུབ་པའི་སྐུ། དེ་ལྟར་སྐུ་ལྔར་དབྱེ་བ་རྣམས་ཀྱང་ངོ་བོ་གཅིག་ལས་གདངས་སམ་མདངས་སྣ་ཚོགས་སུ་ཤར་ཏེ། རིག་པའི་རྩལ་ལས་ལོགས་སམ་ཟུར་ཞིག་ན་ཐ་དད་དུ་གྲུབ་པ་མེད་པ་དང་། དེ་བཞིན་དུ་མཚན་ཉིད་འཛིན་པའི་ཡེ་ཤེས་ལྔ་ཡང་འདི་ལ་ལྷུན་གྱིས་གྲུབ་སྟེ་ཚང་བ་ནི་རིག་པའི་ཡེ་ཤེས་ཀྱི་ངོ་བོ་སྒྲིབ་བྲལ་ཆོས་ཀུན་གསལ་བས་མཁྱེན་ཆ་མ་འགགས་པར་མངོན་སུམ་མ་འདྲེས་གསལ་བས་ན་མེ་ལོང་ཡེ་ཤེས། སྲིད་ཞི་ཀུན་ལ་ཁྱབ་པའི་ཡེ་ཤེས་ཆེན་པོ་དེས་ཤེས་དང་ཤེས་བྱ་ཐམས་ཅད་རོ་གཅིག་དབྱེར་མེད་དུ་སྣོད་བཅུད་སྣང་སྲིད་ཀུན་ལ་ཁྱབ་པ་ཡིན་པས་ན་མཉམ་ཉིད་ཡེ་ཤེས། བྱེ་བྲག་རྩལ་ལས་སྣ་ཚོགས་འཆར་བས་ན་སོ་སོར་རྟོག་པའི་ཡེ་ཤེས། མ་བཙལ་ལྷུན་འགྲུབ་འབད་པ་མེད་པར་འཕྲིན་ལས་ཀྱི་དོན་ཀུན་འགྲུབ་པ་ཡིན་པས་ན་བྱ་གྲུབ་ཡེ་ཤེས། དེ་ལྟར་སྣང་བའི་ཡེ་ཤེས་དེ་དག་རྣམས་ཀྱི་ངོ་བོ་ཡེ་སྟོང་རྩ་བ་དང་བྲལ་བ། ཀ་དག་དབྱིངས་ཆེན་གཅིག་ཏུ་འདུས་པ་ཡིན་པས་ན་ཆོས་ཀྱི་དབྱིངས་ཀྱི་ཡེ་ཤེས་སོ། །ཡང་ཡེ་ཤེས་ལྔ་བོ་དེ་རྣམས་ཐམས་ཅད་ཅེས་རྣམས་དང་ཐམས་ཅད་ཅེས་པའི་མང་ཚིག་གཉིས་བསྟུད་མར་བརྗོད་པ་དེ་ཚིག་རྐང་ཁ་མ་གང་བས་བསྣན་པའི་ཟློས་སྐྱོན་ཅན་མ་རེད། ཡེ་ཤེས་ལྔ་བོ་དེ་རྣམས་དང་དེ་ལས་འཕྲོས་པའི་རྒྱལ་བའི་ཡེ་ཤེས་ཚད་མེད་པ་ཐམས་ཅད་ཀྱང་ཞེས་པའི་གོ་དོན་ཅན་ཡིན། རིག་པ་དང་གཉིས་སུ་མ་མཆིས་པའི་མདངས་ནང་གསལ་དང་གདངས་ཕྱི་གསལ། དེ་ལས་འཕྲོས་པའི་རྩལ་དང་རོལ་བའི་འཆར་ཚུལ་ལས། ལོགས་ན་གྲུབ་པ་རྡུལ་ཆ་ཙམ་ཞིག་མེད་པའོ་ཞེས་མེད་པར་ཐག་བཅད་དེ་བསྟན་པའོ། །ཡང་སྐུ་གཅིག སྐུ་གཉིས། སྐུ་གསུམ། སྐུ་བཞི། སྐུ་ལྔ། སྐུ་བརྒྱ། སྐུ་སྟོང་། རིགས་བརྒྱ་རིགས་སྟོང་བྱེ་བྲག་ས་ཡའི་ཞིང་གི་རྡུལ་སྙེད་དུ་སྣང་བ། མཐའ་ཡས་སྒྱུ་འཕྲུལ་དྲྭ་བའི་རོལ་བར་སྣང་བའི་སྐུ་དང་ཡེ་ཤེས་ཐམས་ཅད་ཀྱང་གཅིག་ཏུ་བསྡུས་ན་གཅིག་ལ་ཚང་བ་དེ་མངོན་སུམ་མཛུབ་མོ་བཙུགས་ནས་མཛུབ་ཚུགས་ཀྱིས་ངོ་སྤྲད་པ་དེ་ཉིད་བསྟན་པ་ནི། སྐུ་གསུམ་ངོ་བོ་རང་བཞིན་ཐུགས་རྗེ་དང་། །སྐུ་ལྔ་ཡེ་ཤེས་ལྔ་བོ་གཅིག་ཆར་དུ། །མངོན་སུམ་མཛུབ་མོ་བཙུགས་ནས་ངོ་སྤྲོད་ན། །ད་ལྟའི་ཤེས་པ་བཟོ་བཅོས་མ་བྱས་པ། །རྐྱེན་གྱིས་མ་བསྒྱུར་འཛིན་པས་མ་བསླད་པའི། །རིག་པ་ས་ལེ་ཧྲིག་གེ་འདི་ཀ་ཡིན། །དུས་གསུམ་སངས་རྒྱས་ཐམས་ཅད་འདི་ལས་བྱུང་། །འདི་ནི་དུས་གསུམ་སངས་རྒྱས་ཐུགས་ཡིན་པས། །འདི་དང་འབྲལ་མེད་གྱིས་ཤིག་སྐལ་ལྡན་ཀུན། །ཞེས་གདམས་པ་སྟེ། སྐུ་རྣམས་ཀུན་གྱི་འཕྲོ་གཞི། དུས་གསུམ་སངས་རྒྱས་ཀུན་གྱི་ཐུགས་དང་གཉིས་སུ་མེད་པ་དེ་ཆོས་ཀྱི་སྐུ་ཡིན། དེ་ཉིད་སྐུ་གསུམ་དུ་ཤར་བ་དེ་གང་ཡིན་ན། ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་ཀུན་ཁྱབ་སྤྲུལ་སྐུ་གསུམ་དང་། སྐུ་བཞིར་ཕྱེས་ན་སྐུ་གསུམ་དང་ངོ་བོ་ཉིད་སྐུ་ཡིས་བཞི་རེད། ད་དུང་སྐུ་ལྔར་ཕྱེས་ན། དབྱིངས་ནང་གསལ་གྱི་སྐུ་གསུམ་དང་ཕྱི་གསལ་གྱི་སྐུ་གཉིས་ཀྱིས་ལྔ་རུ་བརྩི་བ་སྟེ། འབྲས་ཆོས་ཐམས་ཅད་མ་འདྲེས་པར་མངོན་པ་མངོན་པར་བྱང་ཆུབ་ཀྱི་སྐུ་དང་། དབྱིངས་དང་ཡེ་ཤེས་གཉིས་མེད་ཡེ་ནས་འགྱུར་བ་མེད་པ་མི་འགྱུར་རྡོ་རྗེའི་སྐུ་དང་ཆོས་ཀྱི་སྐུ་སྟེ་ནང་གསལ་གྱི་སྐུ་གསུམ་དང་། ཕྱི་གསལ་གྱི་སྐུ་ལོངས་སྐུ་དང་སྤྲུལ་སྐུ་སྟེ་གཟུགས་སྐུ་རྣམ་པ་གཉིས་ཀྱིས་ལྔ། དེ་ཡང་སྐུ་གསུམ་གྱི་ནང་དུ་མ་འདུས་པ་མེད་པ་ཡིན། དེ་བཞིན་དུ་རིགས་བརྒྱ་རིགས་སྟོང་བསམ་གྱིས་མི་ཁྱབ་པ་ཐམས་ཅད་ཀྱང་དེར་འདུས་པ་དང་། གོང་ནས་བཤད་མ་ཐག་པའི་ཡེ་ཤེས་ལྔ་བོ་ཡང་གཞིར་གནས་ཀྱི་ཡེ་ཤེས་ངོ་བོ་རང་བཞིན་ཐུགས་རྗེ་གསུམ་ལ་འདུས་པས་མི་ཚད། ངོ་བོ་གཅིག་ལ་ཚང་བའི་ཡེ་ཤེས་གཅིག་ལ་འདུས་པ་ཡང་ཡིན། སྐུ་དང་ཡེ་ཤེས་དེ་དག་ཐམས་ཅད་གཅིག་ཏུ་འདུས་པའི་རང་གནས་ཀྱི་ཡེ་ཤེས་དེ་ཉིད་མངོན་སུམ་ལ་མཛུབ་མོ་བཙུགས་ནས་ཉིན་དཀར་དཀར་མོར་མིག་ལྡན་ལ་གཟུགས་བསྟན་པ་ལྟར་དུ་བསྟན་ན། ད་ལྟའི་སེམས་ཉིད་ཁ་ནང་དུ་ཚུར་གཅིག་འཁོར་ཏེ་འཁོར་མ་ཐག་པའི་ཤེས་པ། ཡག་ལས་དང་བཟོ་བཅོས་གཅིག་ཀྱང་མ་བྱས་པ། དེ་ཡང་ཕྱིའི་རྐྱེན་གྱིས་མ་བསྒྱུར་ནང་འཛིན་པ་དང་ཞེན་པས་མ་བསླད་པའི་རིག་པ་སེམས་ཀྱི་ཆོས་ཉིད། ས་ལེ། ཧྲིག་གེ སྟོང་གསལ་འགགས་མེད་འདི་ཀ་ཡིན་ནོ། །ཚིག་དང་ཡིད་དཔྱོད་ལ་མི་ལྟོས་པར་མངོན་སུམ་རང་ཐོག་ལ་ངོ་སྤྲད་པ་འདི། འདས་པའི་སངས་རྒྱས་ཐམས་ཅད་ཀྱི་གཤེགས་ཤུལ་གྱི་ཞབས་རྗེས་དང་། མ་འོངས་པའི་སངས་རྒྱས་ཐམས་ཅད་ཀྱི་བསྒྲུབ་བྱ་འདི་ལ་མ་ལྟོས་པར་སངས་རྒྱ་ཐབས་ཤིག་མེད་ཅིང་། ད་ལྟའི་སངས་རྒྱས་ཐམས་ཅད་ཀྱི་བགྲོད་གཅིག་གི་ལམ་སྟེ། ལམ་གཅིག་པུ་འདི་མིན་གཞན་གྱི་བགྲོད་ལམ་མེད་པ། ལམ་ཞེས་པའི་བརྡ་རུ་བཏགས་པ་ཡིན་ཡང་། དོན་ལ་འབྲས་བུ་སངས་རྒྱས་ཀྱི་ཐུགས་ཡིན་པ། དེ་ཉིད་ལས་དེ་ལྟར་ཡིན་པས་ན་འདི་ཉིད་རང་ལ་ཡོད་པ་ད་སྔ་མ་ཤེས་པ། དཔེར་ན་རྒྱལ་བུས་རྒྱལ་ས་དོར་ནས་ཐང་འཁྱམས་ལ་སོང་བ་ལྟར་དུ་འཁྲུལ་སོང་བ་ཡིན་པས། ད་མ་འཁྲུལ་དོན་གྱི་གནས་ལུགས་རང་ལ་ཡོད་པའི་སངས་རྒྱས་ཀྱི་རྒྱལ་ཐབས་ཆེན་པོ་ལ་རང་དབང་རང་གིས་བསྒྱུར་ཏེ། འདི་དང་འབྲལ་མེད་གྱིས་ཤིག་སྐལ་ལྡན་ལས་ཅན་ཀུན་ཞེས་གདམས་པར་མཛད་པ་ཡིན། འདིའི་སྐབས་ཀྱི་ད་ལྟའི་ཤེས་པ་ཞེས་གསུངས་པའི་ཚིག་འདི་གང་ངོ་སྤྲད་བྱ་འདི་དང་འབྲལ་མེད་བྱེད་རྒྱུ་དེ་ཡིན། འདིའི་ཐད་ལ་བསམ་བློ་ཞིག་བཏང་ན། ད་ལྟའི་ཤེས་པ་དང་ཐ་མལ་གྱི་ཤེས་པ་ཞེས་པ་འདི་དག སེམས་ཉིད་ཆོས་སྐུའི་ངོ་བོ་སེམས་རྣམ་རྟོག་བཅོས་མའི་བཟོ་བཅོས་ཀྱིས་མ་བསླད་པར་རང་བཞག་གི་སྐབས་སུ་རང་བབས་ལ་གནས་པ་དེ་ལ་གསུངས་ཤིང་། ལས་དང་པོ་བས་མ་བཅོས་བཟོ་མེད་དུ་འཇོག་དགོས་བསམ་མཁན་དེ་སེམས་ཡིན། སེམས་ཟེར་ན་བློ་རེད། བློ་ཀུན་རྫོབ་འཁྲུལ་བ་བསླུ་བའི་ཆོས་ཅན་ཡིན་པས། འདི་ཇི་ལྟར་ཡིན་སྙམ་ན། བློའམ་ཡིད་ཀྱིས་སྟོང་ཉིད་དང་ནམ་མཁའ་ལ་སོགས་པ་འདུས་མ་བྱས་སྒོམ་པའི་སྐབས་སུ། བློ་དེ་ཉིད་དེའི་རྣམ་ལྡན་དུ་འཆར་ཆོག་པ་ཡིན། དེའི་རྣམ་ལྡན་དུ་འཆར་བ་ནི་བློའི་རྣམ་པ་ཙམ་ཞིག་ཡིན་པ་མ་གཏོགས། དོན་འདུས་མ་བྱས་དང་གཉིས་ཀ་འདྲེས་འགྲོ་རྒྱུ་ཞིག་མ་ཡིན། འོན་ཀྱང་བློས་དེ་ལྟར་བཟུང་བ་ལ་དེ་དང་དེར་རྟོགས་པའི་ཐ་སྙད་འཇུག་པ་བཞིན་དུ་བསལ་བཞག་བྲལ་བའི་སྟོང་གསལ་འགགས་མེད་ཆ་འདྲ་བ་ཞིག་ཤར་བ་ཡིན། དེ་དོན་གྱི་ཡེ་ཤེས་ངོ་མ་མ་ཡིན་ན་ཡང་། དེ་ལ་བརྟེན་ཏེ་རིམ་གྱིས་གོམས་སོང་ན་དོན་གྱི་ཡེ་ཤེས་སུ་འཕོ་ཐུབ་པ་ཡིན། དེ་ཇི་ལྟར་བཤད་པ་ཡིན་ཞེ་ན། བློ་འདུས་བྱས་དང་སྟོང་ཉིད་འདུས་མ་བྱས་གཉིས་ཀ་རྫས་མི་འདྲ་བ་ཕན་ཚུན་སྤང་འགལ་ཡིན་པ་གཉིས་ཆུ་ལ་ཆུ་བསྲེས་པ་འདྲ་ཞིག་བྱས་ནས་འདྲེས་པ་མི་མཐད་པ་ཡིན། འོ་ན་འཁྲུལ་བ་མ་འཁྲུལ་བ་དང་སེམས་ཅན་སངས་རྒྱས་སུ་འགྱུར་ཇི་ལྟར་རུང་སྙམ་ན། འདུས་བྱས་དང་འདུས་མ་བྱས། འཁྲུལ་བ་དང་མ་འཁྲུལ་བ། སེམས་ཅན་དང་སངས་རྒྱས་སུ་འཇོག་པའི་གཉིས་ཆོས་ཐམས་ཅད་ཐ་དད་པར་སྣང་བ་འདི་དག་རྟོག་པའི་དབང་གིས་དེ་དང་དེར་བཞག་པ་ཡིན། མ་འཁྲུལ་དོན་གྱི་གནས་ལུགས་ཆོས་ཐམས་ཅད་ཀྱི་དོན་རང་གི་ངོ་བོས་དེ་ལྟར་གྲུབ་པ་ཞིག་སྲིད་པ་མ་ཡིན། གནས་ལུགས་དེ་ཁོ་ན་ཉིད་ཆོས་དབྱིངས་རང་བཞིན་གྱིས་འོད་གསལ་བ་དེ་ལས་གཞན་དུ་གྱུར་པའི་ཆོས་རྡུལ་ཙམ་མེད་པར་རྟོགས་པའི་དུས་སུ། ཤེས་དང་ཤེས་བྱ་གཉིས་མེད། ཡུལ་དང་ཡུལ་ཅན་རོ་གཅིག ཡུལ་ཆོས་དབྱིངས་ཟེར་རྒྱུ་ཞིག་དང་ཡུལ་ཅན་རིག་པའི་ཡེ་ཤེས་ཞེས་པ་ཐ་དད་དུ་མེད་པར་འདྲེས་པར་སྣང་བ་སྟེ་གནས་ཚུལ་དང་སྣང་ཚུལ་མཐུན་པར་སྣང་བའི་ཆ་དེ་ལ་འདྲེས་ཞེས་པའི་ཐ་སྙད་བཏགས་པ་ཙམ་ཞིག་ཡིན། ཆོས་དབྱིངས་རང་བཞིན་འོད་གསལ་བ་ཞེས་པ་འདི་གདོད་མ་ནས་མཐའ་མའི་བར་དུ་དེ་ལྟར་ཡིན་ལ། དེ་ལྟ་བུའི་ཆོས་དབྱིངས་འཕོ་འགྱུར་བྲི་གང་དང་བྲལ་བ། སྐྱེ་འགགས་མེད་པའི་གནད་དེ་རིག་དུས་ཡིད་དཔྱོད་འདུས་བྱས་ཀྱི་བློ་ཞེས་པ་ལོགས་སུ་བཙོག་པ་མི་ལོ་བ་ཞིག་ལུས་ནས་བསྡད་ཡོད་པ་མ་ཡིན། དོན་གྱི་གནས་ལུགས་རྟོགས་བྱ་ཆོས་དབྱིངས་རང་བཞིན་གྱིས་འོད་གསལ་བའམ་རང་བྱུང་གི་ཡེ་ཤེས་རང་ལ་གནས་པ་དེ་ཅི་འདྲ་ཞིག་ཡིན་ན་དེ་ཁོ་ན་ཉིད་དེ་ཉིད་ཡིན་པ་ལ་གནས་ལུགས་རྫོགས་པ་ཆེན་པོ་ཡང་དེ་ཡིན། དེ་ངོ་སྤྲོད་པའི་ཐབས་ལམ་ལ་རྫོགས་ཆེན་གྱི་ལམ་ཞེས་བཏགས་པ་ཙམ་ཡིན་པའི་གོ་དོན་དེ་ལྟར་ཡིན། འདི་ནས་ཞར་ལ་ཐེ་ཚོམ་གྱི་འཕྲང་བསལ་བ་འབྱུང་བ་ནི། མ་བཅོས་རང་གསལ་འདི་ཀ་ཡིན་པ་ལ། །རང་སེམས་སངས་རྒྱས་མ་མཐོང་ཅི་ལ་ཟེར། །འདི་ལ་བསྒོམ་རྒྱུ་ཅི་ཡང་མེད་པ་ལ། །བསྒོམ་རྒྱུ་མ་བྱུང་བྱ་བ་ཅི་ལ་ཟེར། །རིག་པ་མངོན་སུམ་འདི་ཀ་ཡིན་པ་ལ། །རང་སེམས་མ་རྙེད་བྱ་བ་ཅི་ལ་ཟེར། །གསལ་ཧྲིག་རྒྱུན་ཆད་མེད་པ་འདི་ཀ་ཡིན། །སེམས་ངོ་མ་མཐོང་བྱ་བ་ཅི་ལ་ཟེར། །འདི་ལ་བྱ་རྒྱུ་རྡུལ་ཙམ་མེད་པ་ལ། །བྱས་པས་མ་བྱུང་བྱ་བ་ཅི་ལ་ཟེར། །གནས་དང་མི་གནས་གཉིས་སུ་མེད་པ་ལ། །གནས་སུ་མ་གཏུབ་བྱ་བ་ཅི་ལ་ཟེར། །རང་རིག་སྐུ་གསུམ་རྩོལ་མེད་ལྷུན་གྲུབ་ལ། །བསྒྲུབས་པས་མ་འགྲུབ་བྱ་བ་ཅི་ལ་ཟེར། །བྱར་མེད་ཅོག་གེར་བཞག་པས་ཆོག་པ་ལ། །དེ་ལ་མི་ནུས་བྱ་བ་ཅི་ལ་ཟེར། །རྟོག་པ་ཤར་གྲོལ་དུས་མཉམ་ཡིན་པ་ལ། །གཉེན་པོ་མ་བྱུང་བྱ་བ་ཅི་ལ་ཟེར། །ད་ལྟའི་ཤེས་པ་འདི་ཀ་ཡིན་པ་ལ། །འདི་ལ་མི་ཤེས་བྱ་བ་ཅི་ལ་ཟེར། །ཞེས་གསུངས་ཏེ། འུ་ཚོས་ལྡེབས་གྲངས་ཚད་ཐོག་ལ་འགྲོ་དགོས་པས་ཤིན་ཏུ་དལ་སྐྱོན་རྒྱུ་མེད་པར་ཅུང་ཟད་མགྱོགས་འདོན་བྱེད་དགོས་འདུག མ་བཅོས་རང་བབས་སུ་བཞག་ན་རང་གསལ་ཡིན་པ། བཅོས་ཤིང་བསྒྱུར་བ་བྱས་ན་ཕྱིར་ཕྱིར་བསྒྲིབས་འགྲོ་བའི་ད་ལྟའི་བཟོ་མེད་ཀྱི་ཤེས་པ་འདི་མ་གཏོགས་པའི་སངས་རྒྱས་ཤིག་ལོགས་ནས་མཐོང་ཡོང་རྒྱུ་མེད། འདིའི་ངང་དུ་བཟོ་མེད་རང་བབས་སུ་འཇོག་པའི་ཕན་ཆད་ལ་སྒོམ་ཡོང་རྒྱུ་ཞིག་ཀྱང་མེད། མངོན་སུམ་རིག་པ་འདིའི་ཕན་དུ་མི་རྙེད་རྒྱུ་ཞིག་ཀྱང་མེད། དེ་ཡང་གསལ་སྟོང་བརྗོད་བྲལ་འདིའི་ཕན་དུ་རིག་ཡོང་རྒྱུ་མེད། འདི་བྱ་བྱེད་རྩོལ་སྒྲུབ་ཀྱི་ཡུལ་མིན། རྟོག་པ་ཤར་གྲོལ་དུས་མཉམ་ཆུ་ལ་རི་མོ་བྲིས་པ་དེ་ཉིད་དུ་འབྲི་ཞིག་དུས་མཉམ་པ་ལྟ་བུ་དང་། བཅིངས་པ་ཡེ་ནས་མེད་པས་གྲོལ་བ་ཟུར་ནས་འཚོལ་མི་དགོས། ཐད་ཀར་སོ་ན་གནས་པའི་རིག་པ་ཡེ་ཤེས་ལ་མི་ཤེས་ཡོང་རྒྱུ་ཞིག་ཀྱང་ག་ལ་ཡོད་ཅེས་པའོ། །འདི་ནས་རིག་པ་ཐུག་ཕྲད་རང་གྲོལ་ཅོག་བཞག་བཞི་དང་། དམ་ཚིག་གི་མདོ་ཆིངས་བཞིའི་སྒོ་ནས་བསྟན་ཡོད་པ་ནི། ཨེ་མ་ཧོ། ད་ཡང་སྐལ་ལྡན་བུ་རྣམས་གུས་པས་གསོན། །ཞེས་མཚམས་སྦྱར་ཏེ། ཅེར་གྱིས་ལྟོས་ལ་ཕྱམ་གྱིས་བཞག་པ་བཞིའི་སྟེང་ནས་ཅོག་བཞག་བཞི་འཕྲོ་འཕྲོར་བསྟན་པ་ནི། རང་སེམས་དངོས་མེད་ནམ་མཁའ་སྟོང་པ་འདྲ། །འདྲའམ་མི་འདྲ་སྐལ་ལྡན་བུ་རྣམས་ཀུན། །བལྟ་རུ་མེད་པའི་ཚུལ་དུ་རང་སེམས་ལ། །ཅེར་གྱིས་ལྟོས་ལ་ཕྱམ་གྱིས་ཞོག་དང་ཤེས། །ཞེས་གསུངས་ཏེ། འདི་ལྟ་བ་རི་བོ་ཅོག་བཞག་རེད། ལྟ་བ་རི་བོ་ཅོག་བཞག་གིས་སེམས་ཉིད་རིག་པ་ནམ་མཁའ་ལྟར་སྟོང་གསལ་འགགས་མེད་ལ་བལྟར་མེད་ཀྱིས་ལྟ་བའི་ཚུལ་དུ་ངང་ལས་རིག་པ་ཉིད་གཡོ་མེད་ཅེར་བཞག་གྱིས་དང་། ཤེས་དང་ཤེས་མཁན་གཉིས་སུ་མེད་པར་ཤེས་ཡོང་ཞེས་པའོ། །སྟོང་པ་ཕྱང་ཆད་དག་ཀྱང་མ་ཡིན་པར། །རང་རིག་ཡེ་ཤེས་ཡེ་ནས་གསལ་བར་ངེས། །རང་བྱུང་རང་གསལ་ཉི་མའི་སྙིང་པོ་འདྲ། །འདྲའམ་མི་འདྲ་རང་གི་སེམས་ཉིད་ལ། །ཅེར་གྱིས་ལྟོས་ལ་ཕྱམ་གྱིས་ཞོག་དང་ཤེས། །འདི་སྒོམ་པ་རྒྱ་མཚོ་ཅོག་བཞག་སྟེ། སྒོམ་པ་རྒྱ་མཚོ་ཅོག་བཞག་གིས་སྟོང་པ་ཕྱང་ཆད་མ་ཡིན་ཡང་ཚོགས་དྲུག་འཛིན་པའི་བཟོ་རྒྱ་མི་བསྐྱེད་པར་རྒྱ་མཚོ་རླབས་ཀྱིས་མ་བསྒུལ་འདྲ་ཞིག་གི་ཤེས་པའི་དྭངས་ཐོན་དང་རང་བྱུང་རང་གསལ། དཔེ་བཞག་ན་ཉི་མའི་སྙིང་པོ་ཡེ་ནས་སྒྲིབ་པས་གོས་མ་མྱོང་བ་དེར་ཅེར་བཞག་གྱིས་དང་ངང་གནས་ཀྱིས་ཤེས་ཡོང་ཞེས་པའོ། །རྣམ་རྟོག་འགྱུ་དྲན་ངོས་བཟུང་མེད་པར་ངེས། །འགྱུ་བ་ངེས་མེད་བར་སྣང་བསེར་བུ་འདྲ། །འདྲའམ་མི་འདྲ་རང་གི་སེམས་ཉིད་ལ། །ཅེར་གྱིས་ལྟོས་ལ་ཕྱམ་གྱིས་ཞོག་དང་ཤེས། །ཞེས་པ་ནི། སྤྱོད་པ་མན་ངག་ཅོག་བཞག་གིས་རྣམ་རྟོག་འགྱུ་དྲན་གྱི་ངོས་བཟུང་མེད་པ་སྒོ་གསུམ་ཐོག་བབས་ལ་གློད་ནས་བཞག་དུས་ལྟ་སྒོམ་གྱི་ཤུབས་ནས་བུད་པའི་ཡེ་ཤེས་རང་གསལ་རྗེན་པ། གནས་པ་དང་འགྱུ་བའི་བར་ལག་འགྱེལ་ནས་རང་ཡལ་རྗེས་མེད། དཔེ་བཞག་ན་བར་སྣང་གི་བསེར་བུ་ལྟ་བུར་ཅེར་བཞག་ཅར་ཕོག་གིས་སྐྱོངས་དང་རང་ངོ་རྗེན་ལ་བུད་པ་ཤེས་ཡོང་ཞེས་པའོ། །ཅིར་སྣང་ཐམས་ཅད་རང་སྣང་ཡིན་པར་ངེས། །གང་སྣང་ཐམས་ཅད་མེ་ལོང་གཟུགས་བརྙན་འདྲ། །འདྲའམ་མི་འདྲ་རང་གི་སེམས་ཉིད་ལ། །ཅེར་གྱིས་ལྟོས་ལ་ཕྱམ་གྱིས་ཞོག་དང་ཤེས། །ཞེས་པ་ནི། འབྲས་བུ་མ་བཅོས་ཅོག་བཞག་རེད། འབྲས་བུ་མ་བཅོས་ཅོག་བཞག་གིས་ཅི་སྣང་རང་སྣང་གི་ཆོས་ཐམས་ཅད་གང་སྣང་མེ་ལོང་གི་གཟུགས་བརྙན་ལྟར་དུ། ཡུལ་ལྔ་རང་བབས་སུ་བཞག་བཞག་དུས། ནང་རང་གསལ་རྗེན་པ་རེ་དོགས་གདིང་ནས་བྲལ་བའི་ཐེ་ཚོམ་ནང་ནས་ཆོད་སོང་དུས་སེམས་ཉིད་ཆོས་སྐུ་རང་ཞལ་མངོན་སུམ་སྒྲིབ་མེད་དུ་མཐོང་བ། ཡང་ཅེར་གྱིས་ལྟོས་ལ་ཕྱམ་གྱིས་ཞོག་དང་ཤེས་ཡོང་ཞེས་པའོ། །རང་གནས་ཀྱི་ཡེ་ཤེས་རང་བབས་སུ་བཞག་པའི་གནད་ལ་དྲིལ་ནས་བསྟན་པ་རེད། འདི་ནས་མེད་དང་ཕྱལ་བ་ལྷུན་གྲུབ་གཅིག་པུའི་རྫོགས་ཆེན་ཡེ་སྲུང་འདའ་ཉམས་མེད་པའི་དམ་ཚིག་རྣམ་པ་བཞིའི་སྒྲོམ་ལས་འཆད་པ་སྟེ། འདི་ལྟ་བ་སྒོམ་པ་སྤྱོད་པ་དམ་ཚིག་འབྲས་བུ་དང་ལྔའི་ཚིག་ཟིན་གྱིས་བསྟན་པ་སྟེ། སེམས་ལས་མ་གཏོགས་གཞན་ལ་ཆོས་མེད་པས། །ལྟ་བ་བལྟ་རྒྱུ་གཞན་ན་ཆོས་མེད་དོ། །སེམས་ལས་མ་གཏོགས་གཞན་ན་ཆོས་མེད་པས། །སྒོམ་པ་བསྒོམ་རྒྱུ་གཞན་ན་ཆོས་མེད་དོ། །སེམས་ལས་མ་གཏོགས་གཞན་ན་ཆོས་མེད་པས། །སྤྱོད་པ་སྤྱོད་རྒྱུ་གཞན་ན་ཆོས་མེད་དོ། །སེམས་ལས་མ་གཏོགས་གཞན་ན་ཆོས་མེད་པས། །དམ་ཚིག་བསྲུང་རྒྱུ་གཞན་ན་ཆོས་མེད་དོ། །སེམས་ལས་མ་གཏོགས་གཞན་ན་ཆོས་མེད་པས། །འབྲས་བུ་བསྒྲུབ་རྒྱུ་གཞན་ན་ཆོས་མེད་དོ། །ཞེས། ལྟ་བ། སྒོམ་པ། སྤྱོད་པ། དམ་ཚིག འབྲས་བུ་དང་ལྔ་ཡིས་བསྟན་པ་ཡིན། རྒྱལ་བ་ཀློང་ཆེན་པས། མེད་པ་གསལ་སྣང་སྒྱུ་མའི་རང་བཞིན་དུ། །ད་ལྟ་ཉིད་ནས་སྨྲ་བསམ་བརྗོད་ལས་འདས། །དེ་ཕྱིར་སེམས་ལ་སྣང་བའི་ཆོས་རྣམས་ཀུན། །སྣང་དུས་ཉིད་ནས་མེད་པར་ཤེས་པར་བྱ། །ཞེས་གསུངས་པ་ལྟར་དུ། ཉི་མའི་འོད་ཟེར་ལ་ཉི་མར་བཏགས་བཞག་པ་བཞིན་དུ་རིག་པ་རང་བྱུང་གི་ཡེ་ཤེས་ལ་སེམས་ཞེས་བཏགས་པ། སྟོང་གསལ་གཞི་མེད་ཡེ་དག་འདི་ལས་གཞན་ཞིག་ན་ལྟ་བ་བལྟ་རྒྱུ། སྒོམ་པ་བསྒོམ་རྒྱུ་ལ་སོགས་པ་མེད་པའི་རང་ངོའི་འདུག་ཚུལ་ཇི་བཞིན་ཤེས་ན། འདིས་འཁོར་བའི་གཡང་ས་ཆོད། བཟང་ངན་དལ་ཁོད་སྙོམས། གོལ་སྒྲིབ་གཞི་མེད་ལ་སོང་ནས། སྲིད་གསུམ་བརྡར་ཤ་ཆོད་པའི་མན་ངག་ཀྱང་འདི་ཉིད་ཡིན་པ་སྟེ། དེས་མེད་པ་བསྟན་པ་ཡིན། གཉིས་པ་ཕྱལ་བ་བསྟན་པ་ནི། ཡང་ལྟོས་ཡང་ལྟོས་རང་གི་སེམས་ལ་ལྟོས། །ཕྱི་རོལ་ནམ་མཁའི་ཁམས་ལ་སེམས་ཐོངས་ལ། །རང་སེམས་ཉིད་ལ་འགྲོ་འོང་ཨེ་འདུག་ལྟོས། །བལྟས་ཚེ་འགྲོ་འོང་སེམས་ལ་མི་གདའ་ན། །ནང་གི་རང་གི་སེམས་ལ་ཚུར་ལྟོས་ལ། །རྟོག་པ་འཕྲོ་བའི་འཕྲོ་མཁན་ཨེ་འདུག་ལྟོས། །རྟོག་པ་འཕྲོ་བའི་འཕྲོ་མཁན་མི་གདའ་ན། །སེམས་ལ་ཁ་དོག་དབྱིབས་སོགས་ཨེ་འདུག་ལྟོས། །ཁ་དོག་དབྱིབས་མེད་སྟོང་པར་ཐུག་པའི་ཚེ། །སྟོང་པ་ཉིད་ལ་མཐའ་དབུས་ཨེ་འདུག་ལྟོས། །མཐའ་དབུས་མེད་ཚེ་ཕྱི་ནང་ཨེ་འདུག་ལྟོས། །ཕྱི་དང་ནང་མེད་རིག་པ་མཁའ་ལྟར་ཡངས། །ཟང་ངེ་ཐལ་ལེར་རྒྱ་ཆད་ཕྱོགས་ལྷུང་བྲལ། །ཞེས་གསུངས་ཏེ། འདིས་ཕྱལ་བ་གཏན་ལ་ཕབ་པ་ཡིན། སེམས་ཀྱི་འགྲོ་འོང་འཕྲོ་བ་དང་གནས་པ། ཁ་དོག་དང་དབྱིབས་ལ་བརྟག་ཅིང་དཔྱད་དུས། སྟོང་ཉིད་མཐའ་དབུས་བྲལ་བའི་རིག་པ་ཕྱམས་ཕྱལ། ཕྱི་ནང་མེད་པར་གཏན་ལ་འབེབ་རྒྱུ་འདི་སྔོན་འགྲོ་བྱུང་གནས་འགྲོ་གསུམ་དང་འདྲ་བ་མ་ཡིན་ཏེ། དེ་ནི་ཡུལ་གྱི་སྟེང་ནས་དཔྱད་པ་བཏང་བ་དང་། འདི་ཡུལ་ཅན་གྱི་སྟེང་ནས་རྩད་བརྡར་བཅད་པ་རེད། གོང་ནས་ཀྱང་བཤད་པ་ཡིན། དང་པོར་འགྲོ་འོང་མེད་པར་བསྟན་རྒྱུ་འདིས་གཞི་ཕྱལ་བ་གཟུང་འཛིན་རིས་མེད་ནམ་མཁའ་ལྟ་བུ་བསྟན་པ་དང་། གཉིས་པ་རྟོག་པ་འཕྲོ་མཁན་མེད་པ་འདིས་ཅི་ཞིག་བསྟན་པ་ཡིན་ན། ལམ་ཕྱལ་བ་བྱ་རྩོལ་གཉིས་མེད་དམིགས་བསམ་འཛིན་པ་དང་བྲལ་བ་བསྟན་པ་དང་། གསུམ་པ་སེམས་ལ་ཁ་དོག་དང་དབྱིབས་མེད་པས་སྟོང་ཉིད་མཐའ་དབུས་དང་བྲལ་བ་གཏན་ལ་འབེབ་པ་འདིས་འབྲས་བུ་ཕྱལ་བ། རེ་དོགས་དང་འཕོ་འགྱུར་མེད་པར་བསྟན་ནས་གཞི་ལམ་འབྲས་གསུམ་གྱི་སྒོ་ནས་ཕྱལ་བ་བསྟན་པ་ཡིན། དེ་ཐམས་ཅད་ཀྱི་མཇུག་ཏུ་ཕྱི་ནང་བར་མེད་རྒྱ་ཆད་ཕྱོགས་ལྷུང་དང་བྲལ་བའི་རིག་པ་ཟང་ཐལ་མཁའ་ལྟར་ཡངས་པར་བསྟན་པ་འདིས། དབྱིངས་ཕྱལ་བ་སྣང་བ་རིག་པ་ལས་མ་གཡོས་པར་རྒྱ་གྲོལ་ཕྱལ་བ་བྱར་མེད་ཀྱི་ཆོས་ཉིད་དེ་བསྟན་པ་ཡིན། དེ་ཇི་ལྟར་ཡིན་ན། ཚོགས་དྲུག་ཟིལ་གནོན་ལས། འཁོར་འདས་ཐེག་པ་ཀུན་ལ་དབང་བསྒྱུར་བ། །བྱར་མེད་གཅིག་གིས་ཐམས་ཅད་ཟིལ་གྱིས་གནོན། །མཐའ་རུ་གྱུར་བའི་ཡུལ་གཞན་ལོགས་ན་མེད། །བྱར་མེད་གཅིག་གི་ཀློང་ལས་གར་མ་གཡོས། །བྱ་བྲལ་ཀུན་ཏུ་བཟང་པོའི་ཀློང་ཉིད་དོ། །ཞེས་པ་དེའི་ལུང་དོན་ལྟར་དུ་ཡིན་ནོ། །མེད་དང་ཕྱལ་བ་གཉིས་ཀ་སོང་ནས་གསུམ་པ་ལྷུན་གྲུབ་ནི། རང་རིག་ཁྱབ་གདལ་ཀློང་ཆེན་ཡངས་པའི་ངང་། །འཁོར་འདས་ཆོས་རྣམས་བར་སྣང་འཇའ་ཚོན་བཞིན། །སྣ་ཚོགས་སྣང་ཡང་སེམས་ཀྱི་རོལ་པ་སྟེ། །རང་རིག་གཡོ་མེད་ངང་ལས་ཕར་ལྟོས་དང་། །ཆོས་རྣམས་ཐམས་ཅད་སྒྱུ་མ་ཆུ་ཟླ་བཞིན། །སྣང་སྟོང་སོ་སོར་དབྱེ་བར་མི་ནུས་སོ། །ཞེས་གསུངས་ཏེ། གཞི་རིག་པ་དེ་ཁྱབ་གདལ་ཀློང་ཡངས། སྟོང་གསལ་ལྷུན་གྲུབ་ཆེན་པོ་ཡིན་པ་ལས། གཞི་སྣང་འཁོར་འདས་སྣང་སྲིད་དུ་སྣང་བའི་ཆོས་རྣམས་སྣ་ཚོགས་མ་འདྲེས་བར་སྣང་གི་འཇའ་ཚོན་བཞིན་དུ་སོ་སོར་བཀྲ་ན་ཡང་། དབྱིངས་གཅིག་བཟང་ངན་མེད་པར་གཞིའི་སྐུ་གསུམ་ངོ་བོ་གཅིག་གི་སྣང་སྟོང་སྒྱུ་མ་ཆུ་ཟླའི་རོལ་གར། ལྷུན་གྲུབ་རིག་པ་གཅིག་གི་ཆོ་འཕྲུལ་ཡིན་པ་དེ་བསྟན་པ་ཡིན་ནོ། །གཅིག་པུ་ནི། རིག་པའི་ངང་ལ་འཁོར་འདས་གཉིས་སུ་མེད། །རང་རིག་གཡོ་མེད་ངང་ལས་ཕར་ལྟོས་དང་། །འཁོར་འདས་ཆོས་རྣམས་མེ་ལོང་གཟུགས་བརྙན་བཞིན། །ཇི་ལྟར་སྣང་ཡང་གདོད་ནས་ཡོད་མ་མྱོང་། །འཁོར་འདས་མིང་མེད་ཐམས་ཅད་ཆོས་སྐུ་ཡིན། །ཁམས་གསུམ་འཁོར་བར་འཁྱམས་པའི་འགྲོ་ཀུན་གྱིས། །ཡེ་ནས་འཁོར་འདས་ཆོས་ཀུན་མཉམ་ཉིད་དུ། །གནས་པའི་ཡེ་ཤེས་རང་ངོ་མ་རྟོགས་པར། །གཉིས་འཛིན་འཁྲུལ་བའི་དབང་གིས་སོ་སོར་བཟུང་། །གཉིས་མེད་དོན་ལ་གཉིས་འཛིན་ཕྱིར་མ་གྲོལ། །ཞེས་གསུངས་པ་ཡིན་ན། དཔེ་བཞག་ན་ནོར་བུ་བཻ་ཌཱུརྱ་གཅིག་དེ་རྐྱེན་ཉི་ཟླ་སོ་སོར་ཤར་བའི་དབང་གིས་མེ་ཆུ་སོ་སོའི་འབྱུང་ཁུངས་ལ་ཤར་བ་བཞིན་དུ་རིག་པ་གཅིག་གི་ངང་ནས་འཁོར་འདས་ལ་ཤར་བ་ནི། དོན་ལ་རིག་པ་གཅིག་གི་རོལ་བའི་འཆར་ཚུལ་ཡིན། དེ་ཡིན་མིན་རང་རིག་ཡོད་མེད་ཀྱི་ངང་ནས་བལྟས་ཡོང་དུས། གཟུགས་བརྙན་སྣ་ཚོགས་སྣང་ཡང་མེ་ལོང་གཅིག་ལ་ཚུད་པ་བཞིན་དུ་ཆོས་ཐམས་ཅད་མེད་པ་གསལ་སྣང་། གཉིས་འཛིན་འཁྲུལ་བའི་དབང་གིས་རབ་རིབ་ཅན་གྱི་སྐྲ་ཤད་ལྟ་བུ་རུ་སྣང་བ་ཡིན་པས་ན། ད་འཁོར་འདས་མིང་མེད་ཡིན་ཞིང་ཡེ་སྟོང་མཉམ་པ་ཆེན་པོ་ཡིན་པ་དེ། ཡང་སྟོང་མཁའ་ལྟར་སྟོང་གསལ་སྤྲོས་བྲལ་དུ་མཐོང་དུས། སྣང་སྟོང་རིས་དང་བར་མཚམས་གཉིས་སུ་མེད་པའི་གཉིས་མེད་ཐིག་ལེ་ཉག་གཅིག གྲྭ་ཟུར་དང་བྲལ་བའི་ཆོས་དབྱིངས་ངང་དུ་རྩ་བ་གཅིག་པར་བསྟན་པ་ཡིན། དེ་དོན་མ་རྟོགས་པར་གཉིས་མེད་ལ་གཉིས་སུ་བཟུང་བས་རང་གིས་རང་འཆིང་ནས་མ་གྲོལ་བའོ་ཞེས་པའོ། །གདམས་པའི་མདོ་ཆིངས་ཀྱིས་སླར་ཡང་བསྐྱར་ཏེ་དོན་བསྡུ་བ་ནི། ཀུན་གྱིས་རང་སེམས་འཁོར་འདས་དབྱེར་མེད་ལ། །སྤང་བླང་འདོར་ལེན་བྱས་པས་འཁོར་བར་འཁྱམས། །རང་རིག་སྐུ་གསུམ་རྩོལ་མེད་ལྷུན་གྲུབ་ལས། །འདི་མིན་ཐག་རིང་གཞན་དུ་འགྲོ་ཐབས་ཀྱི། །ས་ལམ་བཙལ་ནས་བླུན་རྨོངས་འགྲོ་བ་ཀུན། །སངས་རྒྱས་ས་ལ་སླེབས་པའི་དུས་མ་བྱུང་། །གང་སྣང་ཐམས་ཅད་རང་སྣང་ཡིན་པར་ངེས། །རང་རིག་གཡོ་མེད་ངང་ནས་ཕར་ལྟོས་དང་། །སྣང་ཞིང་སྲིད་པ་ཐམས་ཅད་གཟུགས་བརྙན་འདྲ། །སྣང་སྟོང་གྲགས་སྟོང་རང་བཞིན་ཡེ་ནས་སྟོང་། །དེ་ལྟར་ལྟ་མཁན་སེམས་ལ་ཚུར་ལྟོས་དང་། །དྲན་རྟོག་རང་ཡལ་སྟོང་པ་ནམ་མཁའ་འདྲ། །སྤྲོས་མེད་སྤྲོས་བྲལ་སྨྲ་བསམ་བརྗོད་ལས་འདས། །གང་སྣང་ཐམས་ཅད་སེམས་ཀྱི་ཆོ་འཕྲུལ་ཏེ། །ཆོ་འཕྲུལ་ཐམས་ཅད་གཞི་མེད་སྟོང་པ་ཡིན། །ཐམས་ཅད་རང་གི་སེམས་སུ་རྟོགས་གྱུར་ན། །མཐོང་སྣང་ཐམས་ཅད་སྟོང་པ་ཆོས་སྐུ་ཡིན། །སྣང་བས་མི་འཆིང་ཞེན་པས་འཆིང་བ་ཡིན། །ཞེན་ཆགས་འཁྲུལ་བ་ཆོད་ཅིག་སྙིང་གི་བུ། །ཞེས་གསུངས་ཏེ། རྒྱལ་བ་ཀློང་ཆེན་པས། རང་བྱུང་རིག་པ་དོན་དམ་ཉི་མ་ལ། །དགེ་སྡིག་དཀར་ནག་གཉིས་ཀའི་སྤྲིན་གྱིས་བསྒྲིབས། བླང་དོར་འབད་རྩོལ་ཞེན་པའི་གློག་གིས་གདུངས། །བདེ་སྡུག་འཁྲུལ་སྣང་ཆར་གྱི་རྒྱུན་བབས་པས། །འཁོར་བའི་ས་བོན་འགྲོ་དྲུག་ལོ་འདབ་རྒྱས། །ཀྱེ་མ་ཉམ་ཐག་འགྲོ་དྲུག་སྙིང་རེ་རྗེ། །ཞེས་གསུངས་པ་ལྟར་དུ་སེམས་ཅན་ཐམས་ཅད་ཀྱིས་རང་སེམས་འཁོར་འདས་དབྱེར་མེད་མ་རྟོགས་པས་མི་ཚད། འོག་མའི་ལམ་དང་ཐེག་པ་ཀུན་གྱིས་ཀྱང་གཉིས་སུ་འཛིན་པའི་འཆིང་ཐག་མ་དོར་བས། བཟང་ངན། དགག་སྒྲུབ། འདོར་ལེན་ཏག་ཏག་བྱས་ནས་འཁོར་བར་འཁྱམས་པ་ཡིན། རང་གནས་ཀྱི་རིག་པ་སྐུ་གསུམ་ངོ་བོ་གཅིག་ལ་ཚང་བའི་རྩོལ་མེད་ལྷུན་འགྲུབ་རང་ལ་བཞག་སྟེ། གླང་པོ་ཁྱིམ་དུ་བཞག་ནས་གླང་རྗེས་ནགས་སུ་འཚོལ་བ་དང་འདྲ་བའི་ས་ལམ་འབད་པས། ཐག་རིང་གཞན་ཞིག་ནས་འཚོལ་བའི་འགྲོ་བ་ཐམས་ཅད་སངས་རྒྱས་ཀྱི་སར་སླེབས་རྒྱུའི་དུས་ཤིག་གང་ནས་འབྱུང་། གང་སྣང་ཐམས་ཅད་རང་སྣང་ཡིན་པས་ཤར་བ་ཕྱིར་ཤར་ཀྱང་འཆར་གཞི་ནང་ལ་ཡོད་པ་ཡིན། ཕར་བལྟས་ན་རང་རིག་གཡོ་མེད་ཀྱི་དུས། སྣང་སྲིད་ཐམས་ཅད་དེའི་གཟུགས་བརྙན་ཡིན་པ་ལྟ་བུ་དེ་ཤེས་ཡོང་། ཕར་བལྟས་རྒྱང་གི་ཆོས་ཐམས་ཅད་གཞི་མེད་རྩ་བྲལ། གཟུགས་སུ་སྣང་བ་སྣང་སྟོང་། སྒྲ་རུ་གྲགས་པ་གྲགས་སྟོང་། དེ་བཞིན་མྱོང་ཚོར་ཐམས་ཅད་རང་བཞིན་ཡེ་ནས་སྟོང་པ། ལྟ་མཁན་རང་གི་སེམས་ལ་ཚུར་ལྟོས་དང། དངོས་མེད་ནམ་མཁའ་འདྲ་འདྲ། སྤྲོས་མེད་སྤྲོས་པ་དང་ཡེ་ནས་བྲལ་བ། སྨྲ་བསམ་བརྗོད་པའི་ཡུལ་ཀུན་ལས་འདས་སོང་བ། གང་སྣང་ཐམས་ཅད་སེམས་ཀྱི་ཆོ་འཕྲུལ། ཆོ་འཕྲུལ་དེ་ནི་གཞི་མེད་སྟོང་པ། མདོར་ན་ཐམས་ཅད་རང་གི་སེམས་ལ་ཐུག་ཡོད་པ་ཤེས་ཡོང་། དེ་ཤེས་ནས་རྟོགས་པར་གྱུར་ན། ད་སྣང་བས་ཅི་ཡང་མི་སྐྱོན། དབང་བོ་དྭངས་མའི་ཡོན་ཏན་ལས་སྤྱན་དང་མངོན་ཤེས་འཆར་ཡོང་། འཆིང་སྤྱད་པོ་སྣང་བས་འཆིང་བ་མིན། གང་གིས་འཆིང་བ་ཡིན་ན། ཞེན་པས་འཆིང་བ་ཡིན། ཞེན་ན་ཁམས་གསུམ་འཁོར་བའི་གནས་ལ་འཆིང་བ་ཡིན། རྗེ་བཙུན་ཏཻ་ལོ་པས། བུ་སྣང་བས་མི་འཆིང་ཞེན་པས་འཆིང་། །ཞེན་པ་ཆོད་ཅིག་ནཱ་རོ་བ། །ཞེས་གསུངས་པ་ལྟར་ཡིན་པས། ཞེན་ཆགས་འཁྲུལ་བ་ཆོད་ཅིག་སྙིང་གི་བུ། །ཞེས་གནད་བརྒྱ་གཅིག་འདུས་ཀྱི་གདམས་པ་གནང་བའོ། །དེའི་ཡན་ཆད་ཀྱིས་རིག་པ་རང་སྣང་གི་བློ་ཅན་ལ་གཙོ་བོར་བྱས་པའི་ངོ་སྤྲོད། གེགས་སེལ། བོགས་འདོན་དང་བཅས་པའི་གདམས་ཁྲིད་བསྟན་པ་སོང་ནས། དེ་རིང་ཞེན་ཆགས་འཁྲུལ་བ་ཆོད་ཅིག་སྙིང་གི་བུ་ཞེས་པའི་མཚམས་འདི་ནས་བཞག་དགོས། འདི་ནས་བཞག་སྟེ་ཆོས་ཁྲིད་རྗེས་མ་སྣང་བ་ཡུལ་གྱི་བློ་ཅན་གྱི་གདུལ་བྱ་གཙོ་བོར་བྱས་པའི་ངོ་སྤྲོད་ལ་སོགས་པ་ནས་བཤད་རྒྱུ་བྱེད། འོ་སྐོལ་ཚོས་ད་རེས་ཀྱི་ཁྲེགས་ཆོད་ཀྱི་ཁྲིད་འདི་སྤྱིར་བཏང་གི་ཁྲིད་སྦྱང་ཉི་མ་ཧྲིལ་བོ་གསུམ་འདྲ་ཞིག་དང་། དེ་རིང་ཕྱི་དྲོའི་ཁྲིད་སྦྱང་ཐུན་གཅིག་གི་ཆ་ཡི་དུས་ཚོད་ཡོད་ནི་རེད། འདི་བཞིན་རྒྱུན་དུ་ཐུན་བཞི་ཆགས་མེད་མ་རེད་ནའང་ཐུན་གཉིས་རེའམ། ཇི་ལྟར་བྲེལ་བ་ཆེ་ནའང་ཐུན་རེ་མ་ཆགས་པ་བྱེད་པ་ནས་མགོ་བཙུགས་ཏེ། ཐུན་དང་ཐུན་མཚམས་ཐམས་ཅད་ལ། འདིའི་སྒོམ་མེད་མཉམ་བཞག་མ་བཅོས་པའི་སྒོམ་དང་འབྲལ་མེད་བྱེད་དགོས། ལས་དང་པོ་བ་ཞིག་ལ་རྣམ་གཡེང་མེད་པའི་དབེན་པའི་གནས་ནས་བསྒོམས་ནས་བརྟན་པ་ཐོབ་ཏུ་འཇུག་དགོས། རང་ལ་ཡོད་པའི་རིག་པ་དེ་ཉིད་དང་པོ་ངོ་ཤེས། ངོ་ཤེས་པ་དེའི་ངང་ལ་གནས། གནས་པའི་རྩལ་རྫོགས། དེར་བརྟན་པ་ཐོབ་སོང་དུས་སྣང་སྤྱོད་ཐམས་ཅད་རིག་པ་རང་གནས་ཀྱི་ངང་དང་མ་བྲལ་བར་ཡེངས་པ་མེད་པ་རེད་དུས་སྣང་རིག་ངེས་མེད་ཀྱི་བརྟུལ་ཞུགས་ཀྱིས་བོགས་འདོན་བྱེད་པའི་ས་ཚོད་ལ་ཐོན་པ་ཡིན། དང་པོ་ཐོས་པ་འཚོལ་བ་བུང་བ་ཚང་འཚོལ་ལྟ་བུའི་སྤྱོད་པ་ལས་མཐར་རིག་པ་བརྟུལ་ཞུགས་ཀྱི་སྤྱོད་པ་གང་ལ་ཡང་ཉམ་ང་བག་ཚ་མེད་པ་སེངྒེ་ལྟ་བུའི་བར་དུ་འབྱུང་བ་ཡིན། ལས་དང་པོ་བ་གསར་བ་ངོ་མ་ཚོས་དཔྱད་སྒོམ་དང་འཇོག་སྒོམ་གཉིས་ཀ་སྤེལ་མ་གྱིས། ད་ངོ་མས་བཤད་ན། ལྟ་བའི་དཔྱད་པ་རྫོགས་མཚམས་ནས་རིག་ངོ་སྤྲོད་དགོས་པཡིན་ཡང་། དད་ཅིང་མོས་པ་དབང་བཙན་དུ་བྱས་ཏེ། ཅིག་ཅར་བ་ཏག་ཏག་མིན་རུང་། རྫོགས་ཆེན་གྱི་གདུལ་བྱ་མང་ཆེ་བ་དབང་རྣོན་ལ་འཇོག་པའི་སྟབས་ཀྱིས་ངོ་སྤྲོད་བྱས་པ་རེད། ད་ཡུན་ཐུང་གྲངས་མང་ལ་བསྒོམ་དགོས་པ་ཡིན། ཡུན་ཐུང་ན་གེགས་མི་འཇུག་པ་ལ་ཕན་ཐོགས་ཡོད་པ་ཡིན། གྲངས་མང་ན་གོམས་པ་བརྟན་རྒྱུ་ལ་ཕན་ཐོགས་ཡོད་པ་རེད། ཉམས་ལེན་པ་རྙིང་བ་ཅུང་ཟད་ཉམས་མྱོང་གི་གོ་བ་རེ་ཡོད་པ་ཚོས་རིག་པའི་གསལ་ཆ་འདོན་རྒྱུ་དེ་གཙོ་ཆེ། བདེ་གསལ་མི་རྟོག་པའི་ཉམས་ལ་ཞེན་པ་མ་བྱེད། རིག་པ་རྗེན་ལ་ཕུད། ཁྱད་པར་དུ་ཅི་ཡིན་འདི་ཡིན་མེད་པའི་མི་རྟོག་རྟིང་པོ་ལྕགས་མཁར་སྒོ་མེད་ཀྱི་ནང་ན་འཐུམ་མ་ཤོར། ཐམས་ཅད་ཀྱིས་སེམས་དང་རིག་པ་གང་ཡིན་དེ་འདུས་བྱས་དང་འདུས་མ་བྱས་ཀྱིས་ཤེས་པ་རེད། ལོ་གསུམ་ལ་འདིའི་ཉམས་ལེན་གྱི་དམ་མཚམས་བཅད་རྒྱ་བྱེད་པའི་ཁས་ལེན་བྱེད་དགོས། དེ་མ་བྱས་ན་འདི་མི་ཐོབ་ཟེར་བ་དེ་ཡང་སྒོམ་ལ་བརྟན་པ་འཐོབ་པའི་ཆེད་དུ་ཡིན། ཆོས་བཤད་མཁན་ངའི་དོན་དག་མ་ཡིན་པར་ཁྲིད་གསན་མཁན་ཁྱེད་རང་གིས་བརྩོན་འགྲུས་རྩོམ་པའི་མཐུན་རྐྱེན་དུ་ཡེངས་མ་ལམ་ལ་གཞན་རྐྱེན་གྱི་དབང་དུ་མི་ཤོར་བའི་རོགས་དོན་བརྒྱབ་པ་ཡིན། རྫོགས་པ་ཆེན་པོ་སྒོམ་མེད་ཡིན་པས། ཆེད་འཛིན་དམིགས་གཏད་ཅན་གྱི་སྒོམ་པ་མ་ཡིན་པར་གཏད་མེད་ཡོངས་གྲོལ་གྱི་ངང་ལ་ལ་བཟླ་བའི་མན་ངག་ཡིན་ནི་རེད། གུ་རུ་རིན་པོ་ཆེས། སྒོམ་དུ་མེད་ཀྱང་ཀློང་དུ་ཚུད་རྒྱུ་ཡོད་པར་གསུངས་པས་བརྩོན་པ་བསྐྱེད་དགོས། བློ་འཁྲུལ་བའི་ངན་གོམས་ཀྱི་བག་ཆགས་ཟེར་རྒྱུ་འདི་ཤུགས་དྲག་པ་རེད། འཁྲུལ་ཡུན་རིང་། འཁྲུལ་ཚབས་ཆེ་བ་འདི་སླ་མོ་ངོ་མ་ཞིག་ལ་ཁ་ལོན་ཟེར་ན་ཡང་དཀའ་བ་ཡིན། དོ་ཞག་ལ་བཤད་བཞིན་དུ་དང་པོར་རང་གིས་རང་གཅེས་ཤེས་པའི་འདང་རྒྱག་ལ་ཞོག དེ་ལྟར་ཟེར་ཡོང་དུས་དེ་ཁྱོད་ཀྱིས་སློབ་འདུག་མི་དགོས། གཞན་གཅེས་འཛིན་བྱེད་རྒྱུ་བོ་མི་ཐུབ་པ་མ་གཏོགས། རང་གཅེས་འཛིན་ནི་མ་བསླབ་ན་ཡང་ལྷན་སྐྱེས་ཀྱིས་ཤེས་པ་ཡིན་ལོས་ཟེར་ཀྱང་། དེ་ཡང་ཕྱོགས་གཅིག་ནས་བཤད་ན་དེ་ལྟར་ཡིན་ཡང་། ཕྱོགས་གཞན་ཞིག་ནས་བཤད་ཡོང་ན་རང་གཅེས་འཛིན་ངོ་མ་ཞིག་བྱེད་མ་ཤེས་པའི་སྒྲུབ་བྱེད་ལ་འགྲོ་བ་ཡིན། ད་ངར་འཛིན་རྨོངས་པའི་གཞན་དབང་དུ་སོང་། བདེ་འདོད་སྡུག་བསྔལ་གྱི་རྒྱུ་སྒྲུབ་བཞིན་ཡོད་པ་དེ་རང་གཅེས་མ་ཤེས་པ་མིན་ན་ཅི་ཞིག་ཡིན། དེའི་སྟབས་ཀྱིས་སངས་རྒྱས་བཅོམ་ལྡན་འདས་ཀྱིས་སྐྱེས་བུ་ཆུང་ངུའི་ལམ་མངོན་མཐོ་སྒྲུབ་བྱེད་ཀྱི་གསུང་རབ་ཡན་ལག་དང་བཅས་པ། དད་པ་རྣམ་དག་སྐྱེས་བུ་ཆུང་ངུའི་ལམ་བསྟན་པ་རེད། དེ་ཡང་འཁོར་བའི་གནས་ལམ་གསུམ་ཐོག་མཐའ་དབུས་མེད་ལས་མ་ཐར་བ་ཡིན་པས་ན། གནས་སྐབས་ཀྱི་ལམ་སྟེགས་ཙམ་ཞིག་མ་གཏོགས། སྡུག་བསྔལ་གསུམ་མམ་འདུ་བྱེད་ཀྱི་སྡུག་བསྔལ་ལས་རྣམ་པ་ཀུན་ཏུ་མ་བཏང་བ་ཡིན་པའི་ཕྱིར་ན། དེའི་འཕྲོར་ངེས་ལེགས་ཐར་བའི་ལམ་མམ་ངེས་འབྱུང་རྣམ་དག་སྐྱེས་བུ་འབྲིང་གི་ལམ་བསྟན་པ་ཡིན། དེ་ཡང་ཞི་བ་ཕྱོགས་གཅིག་པ་མི་གནས་པའི་མྱ་ངན་ལས་འདས་པའི་ལམ་ཡང་དག་མ་ཡིན་པས་ན། བྱང་སེམས་རྣམ་དག་སྐྱེས་བུ་ཆེན་པོའི་ལམ། མདོ་དང་སྔགས་ཀྱིས་བསྡུས་པའི་ཞི་བསིལ་དམ་པའི་ཆོས་བསྟན། དེ་འདྲ་བྱས་ནས་གདུལ་བྱ་གང་ལ་གང་འདུལ་གྱིས་གསུངས་ནས། མཐར་རྩོལ་མེད་འབྲས་བུའི་ཐེག་པ། ཐེག་པ་ཀུན་གྱི་ས་གཞིའི་ཆུ་ཕྲན་ཐམས་ཅད་མ་བསྡུས་གཅིག་ལ་འདུས་པའི་རྒྱ་མཚོ་ཆེན་པོ་ལྟ་བུའི་རྫོགས་པ་ཆེན་པོ་ལ་གཞོལ་ཞིང་འབབ་པར་འགྱུར་བ་དེ་འདྲ་ཡིན་པར་མདོ་རྒྱུད་ཐམས་ཅད་ནས། སངས་རྒྱས་བཅོམ་ལྡན་འདས་ཀྱིས་བསྟན་པ་ཡིན། དེའི་ཕྱིར་ན་རྫོགས་པ་ཆེན་པོའི་གདུལ་བྱ་ཤིན་ཏུ་དབང་རྣོན་སྔར་བསགས་བསོད་ནམས་དང་ལས་འབྲེལ་གྱི་སྟོབས་དང་དད་དང་མོས་པས་ཁྱོག་ཅིང་། ཚེ་འདིའི་སྦྱངས་པ་སྟོབས་གྱུར་གྱི་དབང་རྣོན་ལས་འཕགས་པའི་སྐལ་ལྡན་ཡིན་རུང་། སོ་སོའི་ཁམས་དབང་མོས་པ་དང་གོམས་པ་སྟོབས་སུ་གྱུར་མ་གྱུར་གྱི་དབང་གིས་ཁྱད་པར་ཡོད་པ་ལ་བསམ་བློ་གཏོང་མི་དགོས་རྒྱུ་ཞིག་མ་ཡིན། འདི་བཤད་དུས་ལྟ་དགོངས་མཐོན་པོའི་ཏིང་འཛིན་ལྟར་དུ་བཤད་དགོས་པ་རེད། མ་བཤད་ན་ཐེག་མཆོག་རྫོགས་པ་ཆེན་པོའི་སེངྒེའི་སྒྲ་དབྱངས་ཀྱི་བསྟན་ཚོད་དང་འགལ་འགྲོ་བ་ཡིན། འོན་ཀྱང་ཅུང་ཟད་སྣང་བ་ལྐོག་གྱུར་གྱི་རིགས་ཅན་གྱི་རིམ་འཇུག་བློ་སྦྱོང་གི་རྨང་གཞི་ལ་སྐྱེས་བུ་ཆུང་འབྲིང་གི་ལམ་ནས་ཡར་ལྡན་དུ་རྫོགས་ཚུལ་ལ་སྦྱང་བས་དགའ་མི་དགའ་སོགས་རང་རང་གི་བློ་དང་མ་བསྡུར་ཐབས་མེད་ལ་ཐུག་པ་ཡིན། ཆོས་པ་རྙིང་བ་ཚོས་རང་གི་ཉམས་མྱོང་གི་ཚོད་ལ་བསྡུར་དགོས། དེ་ལྟར་མ་བྱས་ཚེ་གང་ཟག་སོ་སོ་བློ་དང་བསམ་པ་གཅིག་འདྲ་འདྲ་ཏག་ཏག་མིན་པ་ནི་མཐོང་ཆོས་མྱོང་གྲུབ་ཡིན། གང་ལྟར་བློ་མཆོག་དམན་ཐམས་ཅད་ཀྱིས་སྒོམ་རྒྱག་དགོས། སྒོམ་མ་བརྒྱབ་པར་ཐར་བ་དང་གྲོལ་བ་ཞིག་འཐོབ་རྒྱུ་ཡོད་པ་མ་རེད། དམིགས་གཏད་མཚན་མ་ཅན་ཞིག་སྒོམ་དགོས་ན་དེ་ཅུང་ཙམ་སླ་བར་འདུག བསམ་བློ་གཏོང་སའི་གཞི་འདྲ་ཞིག་ཡོད་སོང་བ་རེད། དམིགས་མེད་བསམ་བརྗོད་དང་བྲལ་བའི་ངང་ལ་ཞོག་ཟེར་དུས་ཅི་བཞག་འདི་བཞག་མི་འདུག་སྙམ་ན། དེ་མ་ལོབས་པས་ཡིན། སླ་བ་དང་བདེ་བའི་ཐོག་ལ་ཞོག་ཟེར་དུས་མི་བདེའོ་མི་སླའོ་སྙམ་ནས་རྩུབ་རེག་ཅན་ཏེ། ཚོར་བ་རྩུབ་མོ་ཅན་ལ་བདེ་སྣང་དང་སླ་སྣང་ཤར་བ་ནི་དཔེར་ན། ཁུར་བོ་ཆེན་པོ་ཞིག་ཁུར་ཁུར་ནས་སོང་སོང་བའི་ནམ་ཞིག་ཁུར་ལོབས་སུ་སོང་བས་ཁུར་བོ་མེད་ཚེ་འགྲོ་མི་ཤེས་པ་བཞིན་དུ་དཀའ་སླ་དང་བདེ་སྡུག་གོ་ནོར་བ་ཡིན། ཐམས་ཅད་ཀྱིས་ཐུན་བསྡམ་དུས། ལུས་ཀྱིས་རྣམ་སྣང་ཆོས་བདུན་དང་པོར་བཅའ་དགོས། དབང་རྣོན་འགའ་རེ་ལུས་གནད་ཁྱད་པར་ཅན་དུ་འཆོས་པ་ཙམ་གྱིས་ཀྱང་གྲོལ་བར་གྱུར་འང་ཡོད་པ་ཡིན། འཇམ་དཔལ་མཚན་བརྗོད་དང་ཤིན་ཏུ་རྨད་བྱུང་གི་རྒྱུད་གཉིས་ཀ་ལས་ཚིག་གཅིག་དབྱངས་གཅིག་གིས། །རྡོ་རྗེ་དཀྱིལ་ཀྲུང་རྫོགས་སངས་རྒྱས། །ཞེས་གསུངས་པས། ལུས་ཀྱི་བྱེད་བཅིངས་འདི་དག་གི་སྟོབས་ཀྱིས་སྔགས་བླ་མེད་ཐུན་མོང་གི་རྫོགས་རིམ་དང་སྒོ་བསྟུན་ན་ཡང་། རླུང་བཅུ་རང་མལ་དུ་བཅིངས་ནས་ལམ་གྱི་མངོན་རྟོགས་རྫོགས་ཏེ་འཚང་རྒྱ་བར་གསུངས་ཤིང་། འདི་ལ་རྣམ་སྣང་ཆོས་བདུན་ཅིའི་གསུངས་སྙམ་ན། ལུས་ཀྱི་བྱེད་བཅིངས་འདི་དག་རྣམ་སྣང་གངས་ཅན་མཚོའི་བཞུགས་སྟངས་དང་འདྲ་བས་སམ། ཡང་ན་གཟུགས་ཕུང་གི་ཆོས་ཉིད་དམ་རང་བཞིན་རྣམ་སྣང་གི་བོར་བཞུགས་པའི་རྒྱུ་མཚན་གྱིས་སམ། ཡང་ན་དག་བྱ་གཟུགས་ཕུང་ངམ་ལུས་ཀྱི་ཆོས་དེ། དག་བྱེད་རྣམ་སྣང་ཆོས་བདུན་གྱིས་དག་ཚུལ་རླུང་བཅུ་དབྱིངས་སུ་དག་ནས། དག་འབྲས་རྣམ་སྣང་གི་གོ་འཕང་ཡོངས་སུ་ཐོབ་པ་སོགས་དག་བྱ་དག་བྱེད་དག་འབྲས་དང་སྦྱར་ནས་གསུངས་པའང་ཡོད། འདིའི་བྱེད་བཅིངས་ཀྱི་ཆ་ཤས་རེ་རེ་ནས་བགྲང་ན་བདུན་ཡོད་པས་རྣམ་སྣང་ཆོས་བདུན་དུ་གྲགས་པ་ཡིན། རྣམ་སྣང་ཆོས་བདུན་གྱི་དང་པོ་རྐང་པ་གཉིས་ཀྱིས་རྡོ་རྗེའི་དཀྱིལ་ཀྲུང་བཅའ་དགོས། མང་ཆེ་བས་ཤེས་པ་རེད་ཀྱང་གསར་བ་ཚོ་ལ་ཟེར་བ་ཡིན། གལ་ཏེ་རྡོར་དཀྱིལ་བཅའ་མ་ཐུབ་ཀྱང་བཞུགས་སྟངས་ཟུག་རྔུ་མེད་པ་ཞིག་དགོས་གསུངས་པ་ཡིན་པས་ཕྱེད་དཀྱིལ་བདེ་མོ་ཞིག་བཅས་ནས་བསྡད་ནའང་ཆོག་པ་ཡིན། སྒལ་ཚིགས་མདའ་ལྟར་དུ་དྲང་མོར་ཡར་ལ་བསྲང་དགོས་པ་རེད། དཔུང་བ་གཉིས་ལྷོད་དེ་བརྒྱང་དགོས། མགྲིན་པ་ཨེམ་ཙམ་སྒུར་གསུངས། ལྕེ་རྩེ་ཡ་རྐན་ལ་གཏད་དེ་མིག་གིས་ཟིམ་བུས་མདུན་ཐད་དུ་གཏད་མེད་དུ་བལྟ་དགོས། དེར་རྒྱུ་མཚན་ཡོད་པ་ཡིན་གཏད་མེད་ཟེར་དུས་མིག་ཕྱེས་ནས་བསྡད་ཡོད་དུས་ཅིག་རིག་ལོས་ཡོང་རིག་ཡོང་དུས་ཡུལ་དེའི་རྗེས་སུ་མི་འབྲངས་པར་ཆེད་འཛིན་མ་བྱེད་གསུངས་པའི་དོན་ཡིན། གཏད་མེད་དུ་ལྟོས་ཞེས་པ་ནི་མིག་བཙུམ་པར་མི་བྱ་ཞེས་པའི་དོན་ཡིན། མིག་གི་ལྟ་སྟངས་སྣ་རྩེར་ལྟ་བ་དང་གཉའ་ཤིང་གང་ལ་ལྟ་བ་གཉིས་འབྱུང་ཡང་། དེ་གཉིས་ཀ་འགལ་བ་ཅན་མ་རེད། ཕྱི་མའི་ཤུགས་ལས་སྔ་མ་ཐོན་པའང་གསུངས་ས་ཡོད། ཆོས་བདུན་སྤྱིར་བཏང་བ་དང་ཁྱད་པར་གང་ཡོད་ན། རྫོགས་པ་ཆེན་པོ་ཀློང་ཆེན་སྙིང་ཐིག་གི་མན་ངག་སྡེའི་ཉམས་ལེན་གྱི་སྐབས་སུ་དབུགས་ཁ་ནས་མངགས་དགོས། སོ་མཆུ་མ་རེག་ཙམ་གྱིས་ཁ་མི་གདང་ཞིང་བཙུམ་པ་ཡང་མ་ཡིན་པའི་བར་ནས་དབུགས་ཀྱི་རྒྱུ་བ་དེ་རང་གིས་ཀྱང་མི་ཚོར་བ་ཙམ་བྱས་ཏེ་དལ་མོར་དབུགས་མངགས་དགོས་པ་ཡིན། དེ་ལ་རྒྱུ་མཚན་ཅི་ཡོད་པ་རེད་ཟེར་ན་རླུང་ཐད་ཀར་གློ་བའི་ནང་དུ་སོང་ནས་རིག་གདངས་སྙིང་གའི་རིག་པའི་མ་ལ་ཐིམ་པའི་དགོས་པ་ཁྱད་པར་ཅན་དང་ལྡན་པ་ཡིན། དོ་ཞག་འུ་ཚོས་རྩ་རླུང་གི་སྐབས་སུ་དབུགས་སྣ་ནང་ནས་བཏང་བ་ཡིན་ཡང་། རྫོགས་རིམ་ཐུན་མོང་དང་སྒོ་བསྟུན་ནས། རོ་རྐྱང་གི་རླུང་དབུ་མར་འཛུད་ཐབས་བཤད་པ་ཡིན། འདིའི་སྐབས་སུ་ལག་པ་གཉིས་ཀ་མཉམ་གཞག་མིན། ལག་པའི་ཐལ་མོ་གཉིས་ཀྱིས་གཡས་གཡོན་སོ་སོའི་པུས་མོ་གཉིས་བཀབ་སྟེ་རྒྱལ་བ་ཀློང་ཆེན་པའི་བཞུགས་སྟངས་ལྟར་དུ་བྱེད་དགོས། འདིར་སེམས་ཉིད་ངལ་གསོའི་བཞུགས་སྟངས་ཟེར་སྲོལ་ཡོད་ཀྱང་། དོན་ངོ་མའི་ཐོག་ནས་བཤད་ན་ངལ་གསོ་ཡེ་ཤེས་ཀྱི་བཞུགས་སྟངས་ཡིན། འདིར་དགོས་པ་ཅི་ཞིག་ཡོད་པ་རེད་ཟེར་ན། བྱིང་བའི་གེགས་སེལ་དང་། གསལ་བའི་བོགས་འདོན། གསལ་ཆ་རྩལ་འདོན་བྱེད་པའི་ཐབས་ཤིག་ཡིན། འཕགས་པ་སེམས་ཉིད་ངལ་གསོའི་བཞུགས་སྟངས་ངོ་མ་གང་རེད་ཟེར་ན། ཀུན་མཁྱེན་འཇིགས་གླིང་གི་བཞུགས་སྟངས་བྲིས་ཆ་ཚོའི་ནང་དུ་ཡོད་པ་དེ་ཡིན། གང་ལྟར་ཡང་སྒོམ་སྦྱངས་དུས་དང་པོ་ལུས་ཀྱི་འདུག་སྟངས་དང་སེམས་ཀྱི་བཞག་ཐབས་ནས་མགོ་བཙུགས་ནས་སྦྱང་དགོས་པ་རེད། གང་བསྒོམ་བྱའི་སྙིང་དོན་ཅི་ཡིན་པ་གོང་ནས་ལན་གྲངས་དུ་མས་གསུངས་པ་བཞིན་དུ། འཁོར་འདས་ཞེས་པ་ཐ་སྙད་ཚིག་རྡོག་མ་གཉིས་ཡིན་ན་ཡང་། དེའི་ཁོངས་སུ་ཤེས་བྱའི་ཆོས་ཐམས་ཅད་གཏན་ལ་ཕེབས་པ་དེ་ཉིད་འདུས་ཡོད་པ་ཡིན། དེ་ལྟར་གཏན་ལ་འབེབ་དགོས་པ་ཡིན་ན་རྩ་བ་སེམས་ཀྱི་གནད་གསང་འདིར་ཐུག་པས། སློབ་དཔོན་པདྨས་ཀྱང་། འདི་ཉིད་ཤེས་ན་བ་གླང་རྫི་ཡང་གྲོལ། །འདི་ཉིད་མ་ཤེས་པཎྜི་ཏ་ཡང་འཁྲུལ། །ཞེས་གསུངས་པས་འདི་ཉིད་གཅིག་པུ་གཏན་ལ་འབེབས་པ་ལ། རྒྱལ་བ་རྫོགས་པའི་སངས་རྒྱས་ཀྱིས་ཆོས་སྒོ་བརྒྱད་ཁྲི་བཞི་སྟོང་གསུངས་པ་ཡིན། ཆོས་ཁམས་དགེ་བ་འདུས་མ་བྱས་པ་འདིར་ལ་ལས་མ་ཆགས་འཕགས་རིགས་ཞེས་མིང་བཏགས། ལ་ལས་ཀུན་གཞི། ལ་ལས་དེ་བཞིན་ཉིད། འགའ་ཡིས་གཉུག་མའི་སེམས། འགའ་ཡིས་མཁའ་ཁྱབ་མཁའ་ཡི་རྡོ་རྗེ། འགའ་རེས་བྱང་ཆུབ་ཀྱི་སེམས། ཀུན་ཏུ་བཟང་མོའི་ཀློང་། རང་བྱུང་གི་རིག་པའི་ཡེ་ཤེས་ལ་སོགས་པ་མང་པོ་བཏགས་པ་རེད། གང་བཏགས་ཀྱང་དོན་ལ་སེམས་ཉིད་སྨྲ་བསམ་བརྗོད་མེད། སྤྲོས་པ་ཐམས་ཅད་དང་བྲལ་བ། ཡོད་པ་མ་ཡིན་རྒྱལ་བས་འདི་མ་གཟིགས། །མེད་པ་མ་ཡིན་འཁོར་འདས་ཀུན་གྱི་གཞི། །ཞེས་གསུངས་པ་དེ་ཉིད། ཡར་སངས་རྒྱས་ཀྱི་སྐབས་སུ་བཟང་དུ་མ་སོང་། མར་སེམས་ཅན་གྱི་སྐབས་སུ་ངན་དུ་མ་སོང་བས། རྟག་མི་རྟག་གཉིས་ཀྱི་མཐའ་ལས་འདས་པའི་རྟག་པ་ཆེན་པོ། འདུས་བྱས་མ་བྱས་ལ་སོགས་པའི་གཉིས་ཆོས་མཚན་མ་ཅན་གྱི་ཆོས་ཐམས་ཅད་ལས་རིང་དུ་འདས་པའི་འདུས་མ་བྱས་ཆེན་པོའི་སྒྲ་ཡིས་བསྙད་པ། དོན་དུ་ཡེ་གྲོལ་ཆོས་སྐུའི་རིག་པ། སྟོང་གསལ་འགག་པ་མེད་པ། རྒྱ་གར་ཡང་མ་ཆད། ཕྱོགས་གང་དུ་ཡང་མ་ལྷུང་བའི་ངོ་བོ་སྟོང་རང་བཞིན་གསལ། ཐུགས་རྗེ་འགག་པ་མེད་པའི་ཡེ་ཤེས་སུམ་ལྡན་དུ་ནམ་ཡང་བཞུགས་པ་དེ་ཉིད། དབུ་ཕྱག་རྫོགས་གསུམ་གྱིས་ལྟ་བའི་སྐྱེལ་སོ་མཐར་ཐུག་ཏུ་བཟུང་སྟེ། གདམས་པའི་ལམ་གནད་གཅིག་ལ་དྲིལ་ཐུབ་དགོས་པ་ཡིན། གོང་ནས་རྟག་པ་ཆེན་པོ་དང་འདུས་མ་བྱས་ཆེན་པོ་ཡིས་རྗོད་ཡོང་དུས། འདི་ནི་ཕྱི་རོལ་བའི་གཙང་བདེ་རྟག་པའི་བདག་དང་ཕྱོགས་མཚུངས་པར་མི་འདུག་གམ་སྙམ་ན། ཚུར་མཐོང་བྱིས་བློའི་ཡུལ་ལས་ཕ་རོལ་བསྐལ་དོན་དུ་གྱུར་པའི་ཆོས་བཞི་ཡོད་པ་ནི། གཙང་བདེ་བདག་རྟག་དམ་པའི་ཕ་རོལ་ཏུ་ཕྱིན་པ་ཡིན། དེའི་ལུང་ཁུངས་གང་ཡིན་ན། མགོན་པོ་བྱམས་པས་རྒྱུད་བླ་མར། གཙང་བདག་བདེ་བ་རྟག་ཉིད་ཕྱིར། །ཡོན་ཏན་ཕ་རོལ་ཕྱིན་པ་འབྲས། །ཞེས་དང་། ད་རུང་མཚན་བརྗོད་ལས། རང་བཞིན་གྱིས་དག་དག་པའི་དག །ཐོག་མ་མེད་ནས་སྤྲོས་མེད་བདག །ཅེས་གསུངས་པ་དང་དོན་གཅིག་ཡིན། དེ་ལྟ་བུའི་དབུ་ཕྱག་རྫོགས་གསུམ་གྱི་གདམས་པའི་སྐྱེལ་སོ་མཐར་ཐུག་དེ་ཉིད། ངོ་སྤྲོད་ཚུལ་ནི་གོང་ནས་འུ་ཚོས་ལག་ལེན་བྱས་པ་བཞིན་དུ། ཤེས་རབ་ཅན་ལ་ལྟ་ཐོག་ནས་ངོ་སྤྲོད་པ་དང་། ཉམས་མྱོང་ཅན་ལ་སྒོམ་ཐོག་ནས་ངོ་སྤྲོད་པ། དད་པ་ཅན་ལ་བྱིན་རླབས་འཕོ་བའི་སྟོབས་ཀྱིས་ངོ་སྤྲོད་པའི་སྤྲོད་ལུགས་ཡོད་པ་ཡིན། ཀུན་གྱི་རྩ་བ་གང་ལ་ཐུག་ན། རྟོགས་པ་སྐྱེས་པ་བླ་མའི་བྱིན་རླབས་དང་། བྱིན་རླབས་སྐྱེས་པ་མོས་གུས་ཀྱི་རྟེན་འབྲེལ་ལ་རག་ལས་པས། བྱིན་བརྒྱུད་རྟོགས་པའི་ཕ་ཕོག་བཙན་ཐབས་སུ་འཕོ་རྒྱུ་འདི་ལ་ཐུག་ཡོད་པ་ཡིན། དེའི་ཕྱིར་ན་དམ་པའི་བཤེས་གཉེན་མཚན་ཉིད་དང་ལྡན་པ་ཞིག་བཙལ་ནས། དང་པོ་གཞུང་ལུགས་ཐམས་ཅད་གདམས་པར་ཤར་དགོས་པས་མ་ཚད། བར་དུ་གདམས་པའི་གནད་ཀུན་གཅིག་ཏུ་ཚུར་བསྡུས་ནས། ཐ་མར་གདམས་པའི་བཅུད་འདྲིལ་ཚིག་གཅིག་གི་ཐོག་ལ་ཐག་བཅད་ནས། མཉམ་རྗེས་ཐུན་དང་ཐུན་མཚམས་ཐམས་ཅད་དུ་ཉམས་ལེན་གྱི་གནད་དེ་དང་མི་འབྲལ་བའི་ཐོག་ནས། ཆོས་སྤྱོད་སྤྱོད་ལམ་ལ་བསྲེ། གདམས་པ་རང་རྒྱུད་དུ་འདྲེས་པ་ཞིག་གིས་ཧ་ཅང་དམ་ཆེས་པ་ཡང་མ་ཡིན། ཧ་ཅང་ལྷོད་ཆེས་པ་ཡང་མ་ཡིན་པའི་མཐའ་གཉིས་སུ་མ་ལྷུང་བར། ཆོས་ཉིད་རང་བབས་རང་འགྲོས་ཀྱི་ལྟ་སྒོམ་སྤྱོད་པའི་མཐའ་ལ་དབྱུང་དགོས། ང་ལྟ་བུ་ཞིག་ལ་མཚོན་ན་འདྲ་ལ་མ་ཡིན་པའི་ཁ་བཤད། ལྟ་སྒོམ་རང་ལ་མེད་པའི་རྒྱང་གི་གཏམ་སྙན། འོན་པ་རོལ་མོ་མཁན་གྱིས་སྒྲ་སྙན་འཁྲོལ་བའི་དཔེར་བཞག་པ་དེ་ལྟ་བུ་ཞིག་ཡིན་ཡང་། སྔར་གྱི་དམ་པ་གོང་མ་སངས་རྒྱས་དངོས་བྱོན་ཚོའི་ཞབས་རྗེས་རེ་ཟིན་པའི་ཐུགས་བསྐྱེད་སྨོན་ལམ་གྱི་མཐུ་བསམ་གྱིས་ཅི་ཁྱབ། དེ་བཞིན་གཤེགས་པའི་མཐུ་ལས་ཤིང་དང་པདྨོ་ཆུ་ཀླུང་སོགས་ལས་ཀྱང་ཆོས་ཀྱི་སྒྲ་འབྱུང་དུ་རུང་བ་ཡིན་པས། ནམ་མཁའི་ཉི་མ་ལ་ཚ་ཤུགས་ཡོད། ས་གཞིའི་རྩྭ་སྐམ་འབར་མ་རག་པ་ཡིན་ཡང་། བར་དེ་ན་མེ་ཤེལ་ཞིག་བརྒྱུད་དགོས་པ་ལྟ་བུའི་ཚུལ་བྱས་ཏེ། མོས་གུས་ཅན་ལ་བེད་རེ་ཆོད་འགྲོ་བ་ཨེ་ཡིན་ནམ་སྙམ་བཞིན་ཡོད། སྒོམ་བྱེད་དུས་ཐོག་མར་ལུས་ཀྱི་འདུག་སྟངས་དང་སེམས་ཀྱི་གཞག་སྟངས་གཉིས་གལ་ཆེ་ཞེས་པ་ཡིན། རྫོགས་ཆེན་གྱི་སྒོམ་པ་མ་བཅོས་རང་བཞག་ཡིན་ཡང་། བཅོས་མ་ལ་བརྟེན་ཏེ་མ་བཅོས་པ་རྒྱུད་ལ་སྐྱེས་དགོས། ལུས་ཀྱི་འདུག་སྟངས་དང་སེམས་ཀྱི་བཞག་ཐབས་ཙམ་ཞིག་མ་བཅོས་པའི་ཐབས་མ་ཡོད་པས་འཆོས་དགོས། དངོས་གཞི་མཉམ་བཞག་ཀྱང་། དང་པོ་འདུ་བྱེད་ཀྱི་དྲན་པ་ནས། རིམ་གྱིས་རྩོལ་མེད་ཀྱི་དྲན་པ་སོགས་ལ་གོམས་སྟོབས་ཀྱིས་འགྱུར་རྒྱུ་ཡིན། དང་པོ་རྟེན་ལུས་ཀྱི་འདུག་སྟངས་ནས་མགོ་བཙུགས་ན། བར་དུ་བརྟེན་པའི་ཡེ་ཤེས་ཀྱི་རང་སྟོབས་རྒྱས་ཡོང་དུས། དེས་ལུས་ཀྱི་སྤྱོད་ལམ་གང་བྱས་ཆོས་ཉིད་ཀྱི་སྣང་སྤྱོད་ལ་འགྱུར་བའི་དགོས་དོན་དེ་འདྲ་ངེས་དགོས། མདོར་ན་ཐུན་བསྡམ་དུས་ལུས་ཀྱི་འདུག་སྟངས་དང་སེམས་ཀྱི་བཞག་སྟངས་གལ་ཆེ་ཟེར་བ་རེད། ལུས་ཀྱི་འདུག་སྟངས་རྣམ་སྣང་ཆོས་བདུན་བཅའ་དགོས་པ་གོང་དུ་བཤད་མ་ཐག་པ་ལྟར་རེད། སེམས་ཀྱི་བཞག་ཐབས་ཅི་ལྟར་དགོས་ན། མན་ངག་གཞུང་ནས་ཀྱང་གསུངས་པ་ལྟར་དུ། འདས་པའི་རྣམ་རྟོག་གི་རྗེས་མ་བཅད། མ་འོངས་པའི་རྣམ་རྟོག་གི་སྔུན་མ་བསུ། ད་ལྟའི་རྣམ་རྟོག་གི་ངོ་ལ་ཡང་མི་བལྟ་བར་ལུས་སེམས་གཉིས་ཀ་ལྷོད་དེ་ཞོག་དང་། དེ་ལྟ་བུའི་ལུས་ཀྱི་འདུག་སྟངས་དང་སེམས་ཀྱི་བཞག་ཐབས་དེའི་ནང་ལ་མི་གཡོ་སུམ་ལྡན་གྱི་གནད་ཀྱང་འདུས་ཡོད་པ་ཡིན། མི་གཡོ་སུམ་ལྡན་ཟེར་ན། ལུས་མི་གཡོ་བ་རི་རྒྱལ་ལྟ་བུ། དབང་བོ་མི་གཡོ་བ་མཚོ་ལ་གཟའ་སྐར་ཤར་བ་ལྟ་བུ། སེམས་ཉིད་མི་གཡོ་བ་ནམ་མཁའ་སྤྲིན་བྲལ་ལྟ་བུ་སྟེ། ལུས་མི་གཡོ་བ་རི་རྒྱལ་ལྟ་བུ་ནི་སྒོམ་རྒྱབ་དུས་ལུས་ཚུགས་དྲང་པོ་བྱས་ཏེ་བསྲང་དགོས། ལུས་དྲང་ན་རྩ་དྲང་བ་དང་། རྩ་དྲང་ན་རླུང་དྲང་། རླུང་དྲང་ན་སེམས་ལས་སུ་རུང་བ་ཡིན། དབང་བོ་མི་གཡོ་བ་མཚོ་ལ་གཟའ་སྐར་ཤར་བ་ལྟ་བུ་ནི་དབང་བོ་སྒོ་ལྔ་ཕྱིའི་ཡུལ་གྱི་རྗེས་སུ་འབྲངས་ནས་ཡུལ་ལ་དཔྱད་ར་མི་བྱེད་ཅིང་། ནང་དུའང་མི་སྡུད་པར་དྭངས་སྟོན་ནས་འཇོག་དགོས། ཁྱད་པར་དུ་མིག་འོད་གསལ་འཆར་བའི་སྒོ་ཡིན་པས་ཚབ་ཚུབ་མེད་པར་གཏད་མེད་དུ་འཇོག་དགོས། སྙིང་ཐིག་གི་ལུགས་ལ་མིག་བཙུམ་རྒྱུ་གཏན་ནས་མ་ཡིན། སེམས་ཉིད་མི་གཡོ་བ་ནམ་མཁའ་སྤྲིན་བྲལ་ལྟ་བུའི་དྭངས་ཆ་སྐྱོང་དགོས། རིག་ངོ་སྤྲད་ཟེར་བའི་རིག་པ་དེ་ཆོས་ཅན་སེམས་ཀྱི་ཆོས་ཉིད་སེམས་ལས་འདས་པའི་ཡེ་ཤེས་དེ་ལ་རིག་པ་ཞེས་གསུངས་པ་ཡིན། ངས་རིག་ངོ་ལ་བལྟ་དགོས་སོ་སྙམ་པ་དེ་སེམས་ཡིན། དེའི་ཕུགས་དེད་ནས་སོང་ན་རིག་པ་ལ་ཐུག་འགྲོ་བ་ཡིན། དཔེ་བཞག་ན་རྦ་རླབས་དང་རྒྱ་མཚོ་ལྟར་ཡིན་པ་རེད། སེམས་རྣམ་རྟོག་གི་འཁྲུལ་བའི་དབང་དུ་མ་སོང་ན་སེམས་ཉིད་རིག་པའི་ངོ་བོའི་ཐོག་ཏུ་སོང་ནས། དེའི་སྐབས་སུ་སེམས་ཟེར་བའི་སྡུག་པོ་ཞིག་ཁ་ཁ་ན་ལྷག་ཡོང་རྒྱུ་ཡོད་པ་མ་ཡིན། རྒྱ་མཚོ་རླུང་གིས་མ་བསྒུལ་པར་རྦ་རླབས་རྒྱ་མཚོ་ལ་ཐིམ་སོང་དུས་རྦ་རླབས་ཟུར་ན་ལྷག་མེད་པ་དང་གཅིག་མཚུངས་རེད། དེ་ལྟ་བུའི་རིག་པའི་ངོ་བོ་བསྐྱང་དགོས་སོ་སྙམ་ནས་ཁ་ནང་དུ་འཁོར་མ་ཐག་པའི་ཚོགས་དྲུག་གི་སྣང་བ་མ་འགག་པའི་ཐ་མལ་གྱི་ཤེས་པ་སྟེ། ཤེས་པ་འདི་ལ་དབྱེ་བ་ཕྱེས་ན་དགེ་མི་དགེ་ལུང་མ་བསྟན་གྱི་རྣམ་རྟོག་གསུམ་ཡོད་པ་ལས། དེ་མ་ཡིན་པའི་མ་བཅོས་རང་བབས་སུ་བཞག་བཞག་དུས་བཅོས་བསླད་དང་བྲལ་བ། སྟོང་སང་ངེ། གསལ་ལྷང་ངེ། རྗེན་ཡེ་རེ། ཟང་མ་ཐལ་བྱུང་། བརྗོད་དུ་མེད་པ་ཞིག་ཡོད་པ་དེ་རིག་པ་ཡིན། རིག་པ་སེམས་ལས་འདས་པ་ཡིན་པས་ན་སེམས་ཀྱིས་རིག་པ་མི་མཐོང་། འོ་ན་སུས་རིག་པ་ཡིན་ཞེ་ན་རིག་པ་རང་གིས་རང་རིག་པ་ཡིན། དེ་ལྟར་བཤད་དུས། རྟོག་གེ་བའི་རིགས་འདི་ལ་རྣམ་རྟོག་གི་སྣེ་གཉིས་མ་ཞིག་ཤར་རྒྱུ་ཡོད་པས། འོ་ན་རལ་གྲིས་རང་གིས་སོ་གཅོད་པ་ཐལ་བ་སོགས་སེམས་ཙམ་པ་ལ་བརྗོད་འདུག་རྒྱུ་དེ་དང་འདྲའོ་སྙམ་ངེས། དེ་ལྟ་བུའི་གུ་དོག་གི་རིགས་ལམ་གྱིས་འདི་ནས་ས་ཆོད་པ་མ་ཡིན། རིག་རྩལ་ཤེས་རབ་ཀྱི་རྣམ་ཆར་ཤར་བའི་རྩལ་གྱིས་རང་གི་ངོ་བོ་གཞི་ཐིམ་མམ་ནང་འདྲེས་ཀྱི་ཚུལ་གྱིས་མཐོང་བའམ་རྩལ་ངོ་བོའི་དབྱིངས་དང་རོ་གཅིག་པའི་སྣང་ཚུལ་མངོན་དུ་གྱུར་པ་ལ་བརྡ་ཤེས་པའི་ཐ་སྙད་དུ་རིག་ཅེས་བཞག་པ་ཡིན། སྤྱིར་ན་རིག་པ་ལ་གཞི་ངོ་བོའི་རིག་པ་ཞེས་པ་ཞིག་དང་། རྩལ་ཐུགས་རྗེའི་རིག་པ་ཞེས་པ་ཞིག་གི་རྣམ་དབྱེ་ཡོད། གཞི་དང་གཞི་སྣང་གི་རིག་པ་གང་ཡིན་ཡང་ངོ་བོ་རང་བཞིན་ཐུགས་རྗེ་ཡེ་ཤེས་སུམ་ལྡན་ཡིན། འོན་ཀྱང་རིག་པ་ཡིན་ན་གཞི་དང་གཞི་སྣང་གི་རིག་པ་མ་གཏོགས་མེད་པས་ཁྱབ་པ་མ་ཡིན། འོ་ན་གང་ཡོད་ཞོག་དང་ཟེར་ན། གྲོལ་ས་ལྷུན་གྲུབ་ཀྱི་རིག་པ་དེ་གཞི་མ་རེད་ལ་གཞི་སྣང་ཡང་མ་རེད། གཞི་སྣང་ཡོངས་སུ་ཐིམ་པའི་རིག་པ་རེད། འདིའི་རྫོགས་ཆེན་གྱི་སྐབས་ཀྱི་རིག་པ་འདིའི་སྤྱི་ལྡོག་ནས་བཤད་ཡོང་ན་མ་རིག་པའི་བག་ཆགས་ཕྲ་མོ་དང་བཅས་པ་ཟད་པར་སྤོང་བྱེད་དམ་སྤངས་པའི་འབྲས་བུ་གཉིས་ཀྱི་བསྒྲུབ་གཞི་གཅིག་པོ་དེ་ཡིན། འདིའི་རྣམ་པའི་ལྡོག་ཆ་ནས་བཤད་ཡོང་ན་ངོ་བོ་སྟོང་པ་གཞི་ལས་མ་གཡོས་པའི་རིག་པ་དེ་སྟོང་པ་རིག་པའི་སྙིང་བོ་ཅན། སྟོང་གསལ་དབྱེར་མེད་ཀྱི་རང་བཞིན་ཅན་ཞིག་ཡིན། རང་བཞིན་གསལ་བ་མདངས་ནང་གསལ་གྱི་རིག་པ་དེ་གསལ་བ་རིག་པའི་སྙིང་བོ་ཅན་གསལ་སྟོང་དབྱེར་མེད་ཡིན། ཐུགས་རྗེ་ཀུན་ཁྱབ་གདངས་ཕྱི་གསལ་གྱི་རིག་པ་དེ་རིག་པ་སྟོང་བའི་སྙིང་བོ་ཅན་རིག་སྟོང་དབྱེར་མེད་ཡིན་པ་དེ་འདྲ་རེད། སྐབས་དོན་རིག་པའི་རང་ངོ་རང་གིས་ཤེས་པའི་རིག་རྩལ་ཤེས་རབ་ཀྱི་རྣམ་ཆར་ཤར་བའི་ཐུགས་རྗེའི་རིག་པ་དེ། དང་པོ་གཞི་ལས་གཞི་སྣང་ལ་གཡོ་དུས་ཤེས་རབ་སྲོག་ཏུ་གྱུར་པའི་རླུང་ལྔ་ཞེས་པ་ཤིན་ཏུ་ཕྲ་བའི་རླུང་ཞིག་གིས་ཕྱིར་གསལ་དུ་བསྐུལ་ནས་སད་པ་བྱས་པ་ཡིན། ད་ལྟ་ཡང་དེ་ཉིད་ལམ་དུ་བྱས་ཏེ་རིག་པ་རང་གི་རང་གཤིས་ལ་བཞག་ན། དང་པོ་ཞིག་ནས་གཉུག་མའི་རང་གཤིས་ལ་རང་ཤུགས་ཀྱིས་ཡོད་པའི་མཁྱེན་ཆ། ཤེས་རབ་སྲོག་ཏུ་གྱུར་པའི་རླུང་ལྔ་ཞེས་པ་བླ་མེད་ཐུན་མོང་གི་རྫོགས་རིམ་གྱི་ཆོས་སྐད་བྱས་ན་རླུང་འོད་ཟེར་ལྔ་བས་གཏིང་ནས་གཡོ་བར་བྱས་ཏེ་སྤྲོས་ཡོང་བ་ཞིག་ཡིན་པའི་ཕྱིར་ན། ད་ཕྱིར་དེའི་ངོ་བོ་མི་རྟོག་པའི་དབྱིངས་ལ་འཇུག་སླ་བས་མི་ཚད་པར་འཇུག་སྟོབས་ལྷག་ཏུ་ཆེ་བ་རེད། དེས་ན་ཐུགས་རྗེའི་རིག་རྩལ་དང་སེམས་ཀྱི་རྣམ་རྟོག་གཉིས་ལ་ཅི་ཞིག་གི་ཁྱད་པར་ཡོད་ཅེ་ན། སེམས་ནི་ཡུལ་རྗེས་སུ་འབྲངས་མཁན་ཞིག་སྟེ། ཡུལ་མེད་ན་རྣམ་རྟོག་འཆར་ཁ་མི་ཉན་པ་ཡིན། ངས་གཏན་ནས་དྲན་བྱ་མིན་པ་ཞིག་དྲན་ནོ་ཟེར་ནས་དྲན་ཐབས་མེད་པ་ཡིན། ཐུགས་རྗེའི་རིག་རྩལ་ནི་ཁ་ཕྱིར་བལྟས་གཟུང་འཛིན་གྱི་རྗེས་སུ་མི་འབྲངས་པ། སྣང་བ་སྣ་ཚོགས་སུ་སྣང་ཡང་། ཅི་སྣང་ཅི་ཤར་ཐམས་ཅད་ཡུལ་རྗེས་སུ་ཕར་འབྲངས་ནས་ཤར་བ་མ་ཡིན་པར། མེ་ལོང་གི་ངོར་གཟུགས་བརྙན་ཤར་བ་ལྟར་དུ་རིག་པའི་ཀློང་དུ་ཚུར་མཉམ་གདལ་དུ་ཤར་བ་ཞིག་ཡིན། རང་སྣང་གཞན་སྣང་དུ་བཟུང་བའི་རྨོངས་པ་དེ་ལ་ཞུགས་མ་མྱོང་བས་ན་ངོ་བོའི་དབྱིངས་ཀྱི་ཐོག་ཏུ་ལྷག་མཐོང་གི་ཏིང་འཛིན་ནམ་ཤེས་རབ་ལྷག་པར་གསལ་སྣང་བརྟན་པ་དཔེར་ན་སྒྲོན་མེ་རླུང་གིས་མི་སྐྱོད་པ་ལྟ་བུ་ཞིག་འབྱུང་བ་ཡིན། དེ་ལྟ་བུའི་གསལ་སྣང་ཐོན་པ་དེ་ཡང་གསལ་བ་དམིགས་གཏད་ཅན་མིན་པ་དང་། རིག་པ་རང་གནས་ཀྱི་བསམ་གཏན་ཡིན་པས་ན་བརྗོད་མེད་ཟང་ཐལ་དམིགས་གཏད་དང་བྲལ་བའི་རིག་པའི་དབྱིངས་དེར་ལྷག་པར་དུ་འདྲེས་བདེ་ཞིང་འདྲེས་སྟོབས་ཆེ་བ་ཞིག་ཡིན། རིག་པའི་ངོ་བོ་དེ་བཅོས་བསླད་དང་བྲལ་བ། སྟོང་སང་ངེ་། གསལ་ལྷང་ངེ་། རྗེན་ཡེ་རེ་ཟང་མ་ཐལ་བྱུང་བརྗོད་དུ་མེད་པ་ཞིག་ཡིན། ཁ་ནང་དུ་འཁོར་མ་ཐག་པར་ཡོད་པ་དེ་རེད། རིག་པའི་ངོ་བོ་དེ་ཅིར་ཡང་མ་གྲུབ་པ་ཞིག་ཡིན་པས་ན། དེའི་གོ་བརྡ་སྤྲོད་བྱེད་ལ་སྟོང་སང་ངེ་ཞེས་བརྗོད་པ་ཡིན། དེ་དང་ཅུང་ཟད་དོན་གྱིས་ཐག་ཉེ་གི་བསམས་ནས་དེ་ལྟར་བརྗོད་པ་ཡིན། ཡང་སྟོང་པ་ཕྱང་ཆད་ཅིག་ལ་གོ་བ་ལེན་འགྲོ་ངེས་ཆེ་སྙམ་ནས། རྨུན་ཞིང་འཐིབས་པ་མ་ཡིན་པར་འཁོར་འདས་ཀུན་ལ་རང་གསལ་བའི་ཆ་ནས་གསལ་ལྷང་ངེར་ཡོད་པ་ཞིག་ཡིན་ཞེས་བཤད་པ་རེད། དངུལ་ཆུ་དཀར་མོ་ས་ཐོག་ཏུ་ལྷུང་ན་རྡུལ་མི་འགོས་པ་བཞིན་དུ་རིག་པའི་གཤིས་ལ་མཚན་མའི་སྤྲོས་པས་མ་གོས་པས་ན་རྗེན་པ་ཞེས་བརྗོད་པ་ཡིན། རྣམ་རྟོག་དང་ཉོན་མོངས་གང་ཡང་རིག་པའི་ངང་ལ་མི་ཆགས་ཤིང་དེར་ཐོགས་ཡོང་ས་དང་གནས་ཡོང་ས་ཞིག་མེད་པ་ཡིན་པས་ཟང་མ་ཐལ་བྱུང་། རིག་པ་འདི་འདྲ་ཞིག་རེད་ཅེས་ཟེར་དགོས་པ་ཡིན་ན་ཟེར་རྒྱུ་མེད་པ་སྨྲ་བརྗོད་ཀྱི་ཡུལ་ལས་འདས་སོང་བ་ཞིག་ཡིན་པས་ན་བརྗོད་དུ་མེད་པ། བརྗོད་དུ་མེད་པའི་དོན་དེ་བསམ་དུ་མེད་པའང་ཡིན་ཤག་ཤག་རེད། དེས་ན་རིག་ཐོག་ཏུ་བཞག་དུས་འདི་སྒོམ་ཞེས་པའི་ངོ་བོ་ངོས་བཟུང་མེད་རུང་། གསལ་སྟོང་བརྗོད་མེད་འདི་མིན་ན་ཅི་ཡིན་སྙམ་པའི་ཐེ་ཚོམ་ནང་ནས་ཆོད་པ་ཞིག་ཤར་ཡོང་རྒྱུ་དེ་རིག་པ་ཡིན་ནི་རེད། དེའི་གསལ་སྟོང་བརྗོད་མེད་དེའི་ངང་ལ་བཞག་ནས་དེའི་ངང་མ་ཤོར་དུས་ཆོག་པ་ཡིན། འོན་ཀྱང་ཐུ་མོ་ཞིག་སྒོམ་བཞིན་ཡོད་དོ་སྙམ་པའི་ཆེད་འཛིན་གྱི་ཞེན་པ་ཡང་ཡོད་རུང་བ་མ་ཡིན། དེ་མི་རུང་བའི་སྟབས་ཀྱིས་སྤྲིན་དཀར་ནག་གཉིས་ཀ་སྒྲིབ་བྱེད་ཀྱི་དཔེ་ལ་འདིའི་ཐད་ནས་བཞག་པ་རེད། རང་ངོ་རང་གིས་ཤེས་རྒྱུ་དེ་ཤེས་རྒྱུ་དང་ཤེས་མཁན་གཉིས་མེད་པ་ཞིག་ཡིན། སེམས་ཞེས་པ་འདི་ཡང་ན་གནས་པ་ཞིག ཡང་མིན་ན་འཕྲོ་བ་ཞིག་རེད། དེ་གཉིས་ཀའི་ཐོག་ནས་རིག་པ་ངོ་སྤྲོད་ཐབས་ཡོད་པ་རེད། ཡོད་པའི་རྒྱུ་མཚན་གང་གི་སྐབས་ཡིན་ཡང་རིག་པ་འབྲལ་མེད་དུ་ཡོད་པས་ཡིན། འོན་ཀྱང་ལས་དང་པོ་བ་ལ་ཅུང་ཟད་འཕྲོད་སླ་བའི་གནས་འགྱུ་གཉིས་ཀྱི་བར་ནས་ངོ་སྤྲད་ན། གནས་ཆ་མི་རྟོག་པ་རྟིང་པོ་དེ་ལས་ཡར་སད། འགྱུ་ཆ་རྣམ་རྟོག་ཕྲ་རགས་སུ་ཤར་བ་ཡང་མ་ཡིན་པའི་རང་བབས་རང་སོར་བཞག་པའི་ཤེས་པ། ཡུལ་རྗེས་སུ་ཕར་མི་འབྲངས་པའི་ཆ་ནས་སེམས་ཀྱང་མིན་ལ། མེ་ལོང་གི་ངོར་གཟུགས་བརྙན་ཤར་བ་དང་འདྲ་བར་ཚུར་ཚོགས་དྲུག་མ་འགག་པར་ཤར་བ་ལ། བདག་འཛིན་ཞེན་པ་དང་བྲལ་བའི་སྟོང་གསལ་འགགས་མེད་རང་ཤར་ཡིན་པའི་ཆ་ནས་ཤེས་པ་ཞིག་ཀྱང་ཡིན་པ་ལྟ་བུ། སྣང་ཡུལ་མ་འགགས་པར་ཆུ་ནང་གི་ཟླ་གཟུགས་ལྟར་ཤར་ཡང་། སེམས་ཀྱང་མིན་པའི་སེམས་ཉིད་འཛིན་མེད་སྟོང་ཞིང་གསལ་བ་བཅོས་བསླད་མེད་པ་ཞིག་ཡོད་རྒྱུ་བོ་དེའི་མིང་ལ་རིག་པ་ཟེར་ནི་རེད། དེ་ལྟ་བུའི་རིག་པ་སྟོང་གསལ་འཛིན་མེད་དེ་ལ་སྐུ་བཞི་ཚང་ཞིང་། རྫོགས་པ་ཆེན་པོའི་ལྟ་སྒོམ་སྤྱོད་གསུམ་གཞི་ལམ་འབྲས་གསུམ་གྱི་གནད་ཐམས་ཅད་དེའི་ནང་ལ་འདུས་པ་ཡིན། རིག་པའི་ངོ་བོ་ཅིར་ཡང་མ་གྲུབ་པའི་སྟོང་སེང་ངེ་བ་བརྗོད་བྲལ་སེམས་དང་ངག་གི་ཡུལ་ལས་འདས་པ་སྨྲ་བསམ་བརྗོད་མེད་དེ་ངོ་བོ་སྟོང་པ་ཆོས་སྐུ་ཡིན། སྟོང་པ་ཕྱང་ཆད་མ་ཡིན་པར་རང་བཞིན་མ་འགགས་འཁོར་འདས་ཀུན་ཏུ་རང་གསལ་བ་རང་བཞིན་གསལ་བ་ལོངས་སྤྱོད་རྫོགས་སྐུ་ཡིན། རིག་སྟོང་འཆར་བ་མ་འགག་པ་རིག་པའི་ཆོ་འཕྲུལ་ཅི་ཡང་འཆར་བ་དེ་ཐུགས་རྗེ་ཀུན་ཁྱབ་སྤྲུལ་བའི་སྐུ་ཡིན། དེ་གསུམ་པོ་ངོ་བོ་དབྱེར་མེད་སྒྲ་རྟོག་གི་ཡུལ་ལས་འདས་པ་ངོ་བོ་ཉིད་སྐུ་དང་། རང་རིག་ཅི་ཡང་མ་གྲུབ་པ་མཁའ་ལྟར་དག་པ་དབྱིངས་རིག་སྟོང་དབྱེར་མེད་གང་ཡིན་པ་དེ་ཆོས་སྐུ་ཐིག་ལེ་ཉག་གཅིག་ཡིན། གོང་ནས་བཤད་པ་ལྟར་ཉིན་དཀར་དཀར་མོ་ལ་མིག་ལྡན་གྱིས་གཟུགས་ལ་བལྟས་པ་ལྟར་རིག་པའི་རང་ངོ་ཤེས་པ་དེ་ལྟ་བ། དེའི་ངང་མི་ཤོར་བར་རང་བབས་སུ་འཇོག་པ་ནི་སྒོམ་པ། དེའི་བོགས་འདོན་གྱི་ཆེད་དུ་ཆགས་མེད་ཞེན་བྲལ་གྱི་རྩལ་སྦྱོང་བྱེད་པ་ནི་སྤྱོད་པ། རེ་དོགས་བཟང་ངན་མེད་པའི་རོ་མཉམ་གྱི་རང་ས་ཟིན་པ་ལ་འབྲས་བུ་ཞེས་གསུངས་པ་ཡིན། རིག་པ་རང་བྱུང་གི་ཡེ་ཤེས་བཅོས་བསླད་དང་བྲལ་བ་རང་ཐོག་ནས་ངོ་ཤེས་པ་དེ་ངོ་རང་ཐོག་ཏུ་སྤྲད་པ་ཡིན། དེ་ཆོས་སྐུ་བློ་འདས་ཀྱི་དགོངས་པ་ལས་མི་གཡོ་བ་ཤེས་ཤིང་ཐག་གཅོད་པ་དེ་ཐག་གཅིག་ཐོག་ཏུ་བཅད་པ་ཡིན། ངང་དྭངས་སྤྲོས་པ་དང་བྲལ་བ་དེའི་ངང་ལ་བཞག་དུས་སྤང་བླང་ཐམས་ཅད་ནམ་མཁའི་བྱ་རྗེས་ལྟར་འཛིན་རྩོལ་མེད་པར་འགྲོ་བ་ནི་གདེང་གྲོལ་ཐོག་ཏུ་བཅའ་བ་ཡིན། དེ་ལྟར་མཉམ་པར་བཞག་དུས་དྭངས་ལ་མི་གཡོ་བ་རྒྱ་མཚོ་རླབས་ཀྱིས་མ་བསྒུལ་བ་ལྟར་སེམས་རྣམ་རྟོག་གི་སྤྲོས་པ་ཞི་བའི་ཆ་ཞི་གནས་དང་། གསལ་གདངས་ངར་དང་བཅས་པའི་རིག་པ་སྟོང་གསལ་འགགས་མེད་དུ་ཤར་བའི་ཆ་ལྷག་མཐོང་ཡིན། དེ་ལྟ་བུའི་ཞི་ལྷག་ཟུང་དུ་འཇུག་པའི་རིག་ངོ་བསྐྱངས་ཏེ་བདེ་གསལ་མི་རྟོག་པའི་ཉམས་གང་ཤར་ནའང་དེ་ལ་ཞེན་པ་དང་འཛིན་པ་མ་ཞུགས་པར་སྒོམ་དགོས། ད་རུང་འདི་ལ་གཞི་ལམ་འབྲས་གསུམ་ཡང་ཚང་བ་ཡིན། གཞི་རིག་པ་རང་ལ་ཡེ་ནས་གནས་པ་དེ། ལམ་བླ་མའི་མན་ངག་གིས་དེ་ཉིད་ཀྱི་ངང་ལ་གཡོ་བ་མེད་པར་གནས་པར་སྒོམ་དུས། འབྲས་བུ་རིག་ཐོག་ཏུ་འཁོར་འདས་མཉམ་ཉིད་ཡེ་གྲོལ་ལ་ཡང་གྲོལ་གྱི་དག་པ་ཉིས་ལྡན་དུ་མངོན་དུ་འགྱུར་ཐུབ་པ་དེ་ལྟ་བུའི་གཞི་ལམ་འབྲས་གསུམ་ཡང་ཚང་ནི་རེད། མདོར་ན་ཞེན་པ་དང་འཛིན་པ་མ་ཞུགས་པར་རང་གྲོལ་རྗེན་པར་སོང་དུས། རིག་པ་རྗེན་པ་ལ་ཡང་ལས་ཡང་བཅོས་ཀྱི་ཉམས་ཞེན་གྱི་སྤྲོས་པའི་ཤུན་པ་མ་བསྐོན་དང་། གཞན་གྱི་གོལ་ས་ནོར་ས་ཞིག་ཡོད་པ་མ་ཡིན། ཐག་དེའི་ཐོག་ཏུ་གཅད་དགོས་པ་ལས་དེ་བས་ཡག་ཅིག་དང་དེ་བས་མཛེས་ཤིག་ཡོད་རྒྱུ་རེད། ང་ལ་རིག་པ་ཨེ་ཡོད་ཀྱང་ཅི་ཤེས། ཡོད་ནའང་ལས་སླ་མོ་ཞིག་གིས་ལོན་རྒྱུ་མ་རེད་སྙམ་ན། གླང་པོ་ཁྱིམ་དུ་བཞག་ནས་གླང་རྗེས་ནགས་སུ་འཚོལ་བ་གོང་དུ་གསུངས་པ་ལྟ་བུ་དང་། སླ་བས་ཡིད་མ་ཆེས་པ་སེམས་ཀྱི་གསང་། །བླ་མའི་མན་ངག་སྟོབས་ཀྱིས་མཐོང་བར་ཤོག །ཅེས་པ་དེའི་ཐོག་ཏུ་ཐོན་པ་རེད། དེ་ལྟ་བུའི་གུ་ཡངས་ཡན་པ་བློ་བདེའི་ཐོག་ནས། ལྟ་བ་མཐོན་པོའི་སྟོང་སྐད་ཀྱིས་འུར་དེ་རྒྱག་སྔ་མི་བྱེད་པར། སྤྱོད་པ་ཞིབ་མོའི་རྒྱུ་འབྲས་ཕྲ་ཞིང་ཕྲ་བ་ནས་སྤང་བླང་འདོར་ལེན་བྱས་ནས། ཐེག་ཆེན་ཐུན་མོང་གི་ཆོས་སྐད་ལྟར་དུ་བྱས་ན་ཡང་། མཉམ་བཞག་ནམ་མཁའ་ལྟ་བུ་དང་། རྗེས་ཐོབ་སྒྱུ་མ་ལྟ་བུ་གཉིས་ཀ་དང་པོ་རེས་འཇོག་ཏུ་འབྱུང་ཞིང་། གོམས་ནས་ཟུང་འཇུག་ཏུ་ཤར་དགོས་པ་རེད། མདོར་ན་དྲན་དང་ཤེས་བཞིན་བག་ཡོད་གསུམ་དང་མ་བྲལ་བར། མལ་ན་ལུས། ལུས་ན་སེམས། སེམས་ན་ལྷོད་ཡོད་པ། གང་སྣང་ལྟ་བའི་ལམ་ཁྱེར་དང་། གང་ཤར་སྤྱོད་པའི་བོགས་འདོན་ལ་འགྲོ་བ་ཞིག་བྱེད་དགོས། ཞེན་འཛིན་ཆེ་བ་ལྟ་བའི་གེགས་ཡིན། ཡེངས་པ་ཆེ་བ་སྒོམ་པའི་གེགས་ཡིན། ཚུལ་ཁྲིམས་འཆལ་བ་སྤྱོད་པའི་གེགས་ཡིན། གེགས་དེ་ཚོ་དང་བྲལ་བའི་ནང་རྐྱེན་རང་གིས་ཚང་བ་ཞིག་བྱས་ན། ཕྱི་རྐྱེན་གྱི་གེགས་དང་འཚེ་བ་མཐུན་རྐྱེན་དུ་འགྲོ་ནས། བློ་ཆོས་སུ་འགྲོ། ཆོས་ལམ་དུ་འགྲོ། ལམ་གྱི་འཁྲུལ་བ་སེལ། འཁྲུལ་བ་ཡེ་ཤེས་སུ་འཆར་བའི་སྨོན་ལམ་ཡོངས་སུ་འགྲུབ་སྟེ་ཕྱོགས་ལས་རྣམ་རྒྱལ་གྱི་བརྟུལ་ཞུགས་མཐར་ཕྱིན་དུ་ཡོད་པ་ཡིན། འོན་ཀྱང་དུས་སྙིགས་མའི་གང་ཟག་ཚིག་དང་གྲགས་པའི་རྗེས་སུ་འབྲངས་རྒྱུར་དགའ་མཁན་ཏག་ཏག་མང་བ་ཡིན་པས། གསང་བ་ཆེན་པོའི་མན་ངག་གི་གནད་ཅིག་བསྟན་པ་བས་ལྷ་མཐོང་འདྲེ་མཐོང་བཤད་ན་མགུ་སླ་ཡང་། དོན་བཞིན་དུ་གཏམ་སྟོན་ཞིང་། ཆོས་བཞིན་དུ་གདུལ་བྱ་སྐྱོང་མཁན་གྱི་དགེ་སྦྱོང་ཆོས་སྨྲ་བ་ཞིག་གི་ངང་ཚུལ་ལ་སྨོན་པའི་འུ་གུ་ཉམ་ཆུང་གྱི་ནས་འཚོ་བའི་ཆོས་པ་ཕལ་བ་སྤྱིར་བཏང་བ་ཞིག་ལ་དེ་འདྲའི་ཁ་སྟབས་དང་སྤྱོད་ཡུལ་མ་ལྡན་སོང་བའོ། །དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ། རང་གཞན་གྱིས་དུས་གསུམ་བསགས་པའི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡམས་པའི་མཐུས། ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་དམ་པ་གང་ན་སུ་བཞུགས་ཐམས་ཅད་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱད་དེ། མཐར་ཐུག་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པའི་ཕྱིར། རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག། ༈ ཡཱ ཁ་སང་ཞིག་ལ་དབང་གི་སྐབས་སུ་འགའ་རེས་དངོས་རྫས་ཀྱི་འབུལ་བ་འདྲ་རེ་འཇོག་གིན་བསྡད་ཟིག སྒོར་མོ་དང་ཁ་བཏགས་དང་སྔགས་མང་གི་དོ་དམ་པས་དེའི་སྐབས་ལ་མཛད་གིན་ཡོད་ནི་རེད། དེའི་ཕྱོགས་སྡོམ་རྗེས་ནས་བྱེད་རྒྱུ་རེད་ཀྱང་། ཁ་སང་གི་དངོས་འབུལ་ཙ་གེ་ཙིག་གེ་ཚོ་ད་སུའི་ཡིན་པ་མི་ཤེས་ཀྱང་། དགུ་རོང་ཚང་གིས་དུང་ཤན་མ་ཆ་ཞིག་ཕུལ་ཡོད་གི ཆོས་དུང་རྟེན་འབྲེལ་བཟང་པོ་ཡིན་པ་རེད། དེ་ངས་བླངས་ནས་ཕྱིར་གོས་དཀར་ལྕང་ལོ་ཅན་གྱི་སྡེ་ཚོགས་ཀྱི་མཐོ་རིམ་ནང་བསྟན་སློབ་གླིང་གི་ས་བོན་ཞིག་བཞག་པ་དེ་ལ་ཕྱིར་ཕུལ་བ་ཡིན། ད་དེང་སང་གི་བཤད་ལུགས་བྱས་ན། སྔགས་པའི་ནང་བསྟན་སློབ་གླིང་འདི་མེད་པ་ནས་ཡོད་པར་གྱུར། ཆུང་བ་ནས་ཆེ་བར་འཕེལ་རྒྱས་གཏོང་རན་གྱི་དུས་ལ་བབས་པ་རེད། གཅིག་དེ་སྣེ་ཁྲིད་ཀྱི་ནུས་པ་དང་། གཉིས་དེ་ན་གཞོན་གྱི་ཕྱི་རབས་པ་སྔགས་མང་རང་གི་མང་པོ་གཅིག་མཐུན་གྱི་སྟོབས་ཤུགས་ལ་རག་ལས་ཀིན་ཡོད་ནི་རེད། ད་ལྟ་ཧ་ཅང་མི་མངོན་པའི་སྟོབས་ཤུགས་ཕྲ་མོ་ས་བོན་གྱི་ནུས་པ་འདི་རྒྱུ་རྐྱེན་ཚོགས་ན་ཡར་ནར་སོན་ནས། ལོ་འདབ་དང་མེ་ཏོག་ཕྱོགས་བཅུར་རྒྱས་ཐུབ་ནི་རེད། ངས་དོ་ཞག་ཉིན་ཞིག་བཤད་ནི་ཅན་པོ། འདིའི་སློབ་གླིང་འདི་རྒྱལ་ཡོངས་ཀྱི་རང་བཞིན་ཅན་ནས་རྒྱལ་སྤྱིའི་རང་བཞིན་གྱི་སློབ་གླིང་ཆེན་པོ་ཞིག་ལ་འགྱུར་རྒྱུའི་མདུན་ལྗོངས་ཡོད་ནི་རེད་ཅེས་བཤད་པ་ཡིན། ངོ་མས་བཤད་ན། དེ་རིང་ཁ་སང་གཟུགས་སུ་མ་གྲུབ་པའི་རིག་གནས་ཀྱི་ཤུལ་བཞག་ཟེར་དུས། རིན་ཐང་ཆེ་བར་འཛམ་བུ་གླིང་གི་མི་ཡིས་བརྩི་གིན་ཡོད་པས། ས་འདི་ལ་དེའི་ཆད་པ་ཁ་སྐོང་མ་ཐུབ་པ་དེ་མི་རིགས་རིག་གནས་ཀྱི་བྱ་བ་སྒྲུབ་མཁན་ཞིག་ལ་མཚོན་ན་ཞན་ཆ་ཡིན་ནི་རེད། ས་འདིར་ཐོལ་སྐྱེས་ཀྱི་མི་བྱ་བ་དེའི་ཕྱོགས་ལ་གཏད་པའི་འགན་དབང་ཅན་ཞིག་ལ་མཚོན་ན། མ་འོངས་ཕྱི་རབས་ཀྱི་མིས་བལྟས་ཡོང་ན་ཞབས་འདྲེན་ནས་ནག་ཉེས་ལ་བརྩི་རྒྱུ་རེད་སྲིད་རྒྱུ་རེད་བསམ་རྒྱུ་དེ་འདྲ་ཞིག་ཡིན་པ་རེད། སྔགས་པའི་སློབ་གླིང་ནི་སུས་བཙུགས་བཞག་ནའང་ཆོག་ཆོག་རྒྱུ་རེད་ཀྱང་། ས་འདིར་སྔར་གྱི་ལོ་རྒྱུས་ཀྱི་ཐོག་ནས་ཕུར་ཐོགས་སྟོང་དང་དགུ་བརྒྱའི་ལྟེ་གནས། ད་ཡོད་དེ་བས་ཀྱང་མང་བའི་སྔགས་མང་གི་ནུས་པ་འདི་ལྟར་ཐོར་བུར་ཁ་གྲམ་ནས་གཅིག་གྱུར་མ་ཐུབ་པར་སྔགས་སྡེའི་དབུ་འཕང་འདི་ལྟར་ཉམས་ཞན་དུ་འགྲོ་གིན་ཡོད་པ་དེ་འདྲའི་དུས་ཚོད་ལ་འཁེལ་བ་རེད། གཅན་ཚ་རྫོང་ཟེར་རྒྱུ་འདི་མདའ་མོའི་སྐད་གྲགས་ཡོད་སའི་རྫོང་རེད། མདའ་སུས་འཕངས་ན་ལོས་ཆོག་ཀྱང་། ས་འདི་ན་ཁྱད་འཕགས་ཀྱི་ལོ་རྒྱུས་ཡོད་པ་དེའི་ལོ་རྒྱུས་རྩལ་འདོན་གྱིས་དངོས་ཡོད་ཀྱི་གནས་ཚུལ་ལ་རིན་ཐང་སྔོགས་ཐུབ་ཡོད་པ་བཞིན་དུ་དེ་ལས་ཀྱང་རིན་ཐང་ཆེ་བའི་སྔགས་གྲྭ་ཡི་ནུས་རྒྱུའི་འབྱུང་ཁུངས་ཤིག་ཡོད་པ་འདི་བསྔོག་འདོན་ཐུབ་རྒྱུ་ཡིན་ན། ས་གནས་མི་རིགས་ཀྱི་ལས་སྐལ་དང་དབང་ཐང་ལ་ཡང་འགྱུར་ལྡོག་ཆེན་པོ་ཞིག་གཏོང་སའི་ས་ཁོངས་མདུན་ན་གནས་པ་རེད། གང་ལྟར་ཡང་ཆོས་དུང་རྟེན་འབྲེལ་གྱིས་ཕྱིར་བཞེས། སང་གནངས་ད་རུང་རིག་ངོ་སྤྲད་དགོས་ས་དང་། ཐོད་རྒལ་རིག་པའི་རྩལ་དབང་གི་དོད་པོ་ཞིག་ཀྱང་ཡོད་པས། དེ་ཚོའི་སྐབས་ལ་འབུལ་བའི་རིགས་ཁྱེར་མ་ཡོང་། གནའ་ལོ་ཆེན་བེེ་རོ་ཙ་ན་ཡིས། ལོ་བརྒྱད་ལོན་ནས་ལྔ་བཅུ་རྩ་བཞིའི་བར་དུ་དཀའ་བ་སྣ་ཚོགས་སྤྱད་དེ་རྒྱ་ཆོས་བོད་ལ་དྲངས་ཡོང་དུས། རྒྱལ་པོ་ཁྲི་སྲོང་ལྡེ་བཙན་གྱིས། ཆིབས་པ་མཚལ་ལུ་སྨུག་པོ་ལ་ཁྲ་བོ་སྟག་གི་སྒ་ཆས་སྤྲས་ཏེ་ཕུལ་ནས། ཁྱེད་ཀྱིས་རྫོགས་ཆེན་སེམས་སྡེ་ཤོད་ཟེར་དུས། བེེ་རོ་ཙ་ན་ཡིས། ལྟ་བའི་རྒྱལ་པོ་ནམ་མཁའ་ཆེ། །དུད་འགྲོའི་རྒྱལ་པོ་རྟར་མི་འཚོང་། །དུད་འགྲོའི་རྒྱལ་པོ་རྟར་འཚོང་ན། །དུས་གསུམ་རྒྱལ་བའི་ཐུགས་ཀྱིས་ཁྲེལ། །ཞེས་གསུངས་པ་བཞིན་དུ་དུས་ཐ་མའི་གནས་སྐབས་འདི་ནས་རྫོགས་པ་ཆེན་པོའི་ཆོས་རྒྱུན་གཙང་མ་ཞིག་མཐུད་རྒྱུའི་སྐལ་བ་ལྡན་པ་ནི། རང་ངོས་ནས་བསྟན་ལ་ལྷག་བསམ་དག་པའི་སྲི་ཞུ་མ་ཆུང་བ་ཞིག་འགྲུབ་པའི་འདང་ཡོད་བཞིན་དུ། དེའི་ཟུར་ནས་ནོར་རྫས་ཤིག་གི་རིན་ཞིག་ཅི་ལ་ལེན་ཏེ། ངས་གནའ་ཞིག་ལ་རྩོམ་ཡིག་ཅིག་བྲིས་པའི་ནང་ན། ལས་དང་སྐལ་བ་མཆོག་ཏུ་མ་ལྡན་ན། །གདམས་ངག་ཟོང་དུ་མ་འཚོང་སྐུ་ཚེ་རིང་། །དུས་བབས་དགོས་གནད་ཤིན་ཏུ་མ་ཆེ་ན། །མཐའ་མི་ཁྲི་ལ་མ་འདོན་བོད་མིའི་རྒྱུད། །ཟེར་བ་ཞིག་འབྲི་མཁན་དེ་ང་ཡིན་ནི་རེད། རང་ཚིག་སྔོན་མ་སྔུན་ན་བཤད་པ་ལ། སུན་འབྱིན་ལག་རྗེས་ཕྱི་མས་བྱེད་ཐབས་ཡོད་པ་མ་རེད། ཁྱེད་ཆོས་གྲོགས་ཞལ་གྲངས་སྟོང་ཕྲག་གསུམ་ལྷག་ཡོད་པ་རྣམས་ཀྱིས་ལོ་གསུམ་ལ་མཚམས་ཀྱི་བཅད་རྒྱ་བྱས་ནས་རྫོགས་པ་ཆེན་པོའི་ཆོས་ལ་ཉམས་ལེན་མཛད་པའི་དམ་བཅའ་མཛད་པ་འདིའི་ཡན་གྱི་སྒྲུབ་པའི་མཆོད་པ་དང་མནྜལ་ཞིག་མི་དགོས་གི། དགེ་འདུན་པ་སྟོང་ཕྲག་གསུམ་གྱིས་ལོ་གསུམ་ལ་ཉམས་ལེན་དེ་གང་ཟག་གཅིག་ལ་རྩིས་ཤིག་བརྒྱབ་བཏང་ན། མི་གཅིག་གིས་ལོ་སྟོང་ཕྲག་དགུ་ལ་རྫོགས་ཆེན་ཉམས་ལེན་གྱི་མཚམས་ལ་བསྡད་པ་དང་གཅིག་རེད། འདི་ཆུང་ཆུང་ཞིག་མ་རེད། དེ་ཡིན་དུས། བསྟན་པ་དར་ཞིང་བསྟན་འཛིན་སྐྱེས་བུའི་སྐུ་ཚེ་བརྟན་པའི་ཆེད་དང་། རང་གཞན་སེམས་ཅན་ཐམས་ཅད་གནས་སྐབས་དང་མཐར་ཐུག་གི་བདེ་བའི་རྒྱུར་བསྔོས་ན་བསྔོ་རིན་ཡོད་པའི་དགེ་རྩ་རླབས་ཆེན་ཞིག་ཀྱང་རེད་སྙམ་པ་ཡིན། དེ་བཞིན་དུ་ཁྱེད་རྣམ་པས་ཀྱང་ཞལ་བཞེས་དོན་ལ་གནས་པར་མཛད་རྒྱུ་ནི་བོད་སྒང་པའི་ལྟད་མོའི་ཡུལ་ཡིན་པ་མ་ཟད་འཛམ་གླིང་གི་མི་ཚོགས་མི་ཉུང་བ་ཞིག་ལ་ཤུགས་རྐྱེན་ཐེབས་པའི་གཏམ་དོན་གསར་བ་ཞིག་ཏུ་ཡང་འགྱུར་ངེས་པས་དེ་ལྟར་དུ་ཐུགས་བཞག་མཛོད་ཞུ་རྒྱུ་དེ་ཡིན།།