ཐུན་བཞི་བའི་ཆོས་ཁྲིད།

ཉི་མ་བརྒྱ་ལ་ཡང་དང་ཡང་དུ་བསྐྱར་ཏེ་བཤད་པའི་བློ་སྦྱོང་གི་ཆོས་ཞེས་པ་འདི། བརྒྱ་ཚར་སྟོང་ཚར་ཞིག་བཏོན་ན་ཡང་སྣོད་མཐིལ་མེད་ཀྱི་ནང་དུ་ཆུ་བླུགས་པ་དང་འདྲ་བར། རྒྱུད་ལ་ཆགས་རྒྱུ་གཅིག་ཀྱང་དཀོན་པ་ནི་རང་རྒྱུད་ལ་དཔག་ནའང་ཤེས་ཐུབ་ཅིང་། འོན་ཀྱང་འདི་མེད་ན་ཐར་ལམ་ཙམ་ཡང་མི་ཟིན་པའི་ཕྱིར་ན། འདི་བསྐྱུར་བ་བློས་མི་ཐོངས་པར་ཉིན་བཞིན་ཡང་ཟེར་བྱས་ཏེ། ལས་ཅན་དང་ཐུག་ན་ཕན་རེ་ཐོགས་སྲིད། སྟོང་གི་ནང་ནས་བརྒྱ་ཐམ་པ། བརྒྱ་ཡི་ནང་ནས་བཅུ་ལ་ཕན་ཐོགས་ན་སྨྲོས་མ་དགོས། སྟོང་ཕྲག་གཅིག་གི་ནང་ནས་བཅུ་ཐམ་པའི་རྒྱུད་ལ་ངེས་འབྱུང་རྣམ་དག་ཅིག་སྐྱེས་ཏེ། རང་རྒྱུད་ཆོས་དང་འདྲེས་ནས། སྒྲུབ་ལ་འབྲས་བུ་ཐོན་པ་ཞིག་བྱུང་ན་ཡིད་ཚིམ་ཆོག་པ་ཞིག་རེད། ས་ཆ་ཨ་མདོའི་ཡུལ་ལ་མདོ་དབུས་ཁམས་གསུམ་གྱི་མི་སྣ་ཆོས་ཞུ་བ་མང་བོ་ཞིག་ལ་ཆོས་ཤིག་བཤད་པའི་ལོ་དེར། བརྒྱ་ཉིས་བརྒྱ་ཙམ་ཞིག་ནི་ཆོས་རྣམ་དག་བསྒྲུབ་མཁན། དེའི་ནང་གི་བཅུ་ཐམ་པ་ཙམ་ཞིག་སྒྲུབ་ལ་རྩེ་གཅིག་གཞོལ་བའི་ཉམས་ལེན་པ་རེད་ཡོད་ས་ཡོད་བསམ་ཆོག་དུས། དུས་སྙིགས་མར་རྒྱལ་བའི་མཛད་པ་ཞིག་འགྲུབ་སོང་སྙམ་པ་ཡིན། དེས་ན་བློ་སྦྱོང་གི་སྐོར་འདི་ཉིན་རེ་ལ་བསྐྱར་ཟློས་རེ་བྱེད་བཞིན་ཡོད། དལ་འབྱོར་རྙེད་དཀའ་ཡིན་པ་རེད། གཞན་མ་བསམ་པར་མིའི་ལུས་རྟེན་བླངས་པ་རྐྱང་པ་འཛམ་གླིང་ས་གཞིའི་གོ་ལ་ཆུང་ཆུང་འདིའི་སྟེང་དུ་ཡོད་པའི། ད་ཡོད་ཀྱི་མི་གྲངས་དུང་ཕྱུར་བདུན་ཅུའི་ནང་ལ་བལྟས་བཞག་ན། དམ་པའི་ཆོས་ལ་དད་པ་ཉུང་ཉུང་རེད། དལ་འབྱོར་ཚང་པའི་ཆོས་པ་ངོ་མ་དེ་བས་ཀྱང་ཉུང་བ་རིག་བཞིན་འདུག་པ་འདི་རེད། ཚེ་མི་རྟག་པར་ཁ་སང་གི་ཐོག་ལ་དེ་རིང་མེད་པ་དང་། སང་ཉིན་ང་གསོན་པོའི་མི་ཞིག་ཡིན་རྒྱུ་རེད་ཟེར་ན་ཟེར་ཐག་མི་ཆོད་པ་དང་། སང་ཉིན་གྱི་རྒྱབ་ལ་སང་ཉིན་མང་ཡང་། སང་ཉིན་ཞིག་ལ་རང་ཉིད་མེད་འགྲོ་ཤག་ཤག་ཡིན། དེ་མེད་དུས་གཏན་མེད་རེད་མི་འགྲོ་བ་ལས་ཀྱི་རྗེས་སུ་འབྲངས་དགོས། ཕྱི་མ་གར་སྐྱེས་ད་ལྟའི་ལས་ལ་ལྟོས་ཞེས་གསུངས་པ་ཡིན། འཁོར་བ་གང་ལ་སྐྱེས་ན་སྡུག་བསྔལ་གྱི་གནས་ཤ་སྟག་རེད། གང་ལ་སྐྱེས་ཀྱང་སྡུག་བསྔལ་གསུམ་ལས་མི་འདའ་བ་ཡིན། ད་ལྟའི་ལས་འདི་ལ་བལྟས་ན་ལུས་ཡག་པ་རྒྱུ་མེད་ཀྱི་འབྲས་བུ་ཞིག་དཀའ་བ་ཡིན། དབང་མེད་ལུགས་ལ་བསམ་ན། འཁོར་བའི་སེམས་ཅན་འདི་ལས་ཀྱི་གཞན་དབང་ཅན་ཡིན། འོན་ཀྱང་འདང་ཞིབ་ཀྱིས་བརྒྱབ་ན། དབང་མེད་ངོ་མ་ཞིག་ཀྱང་མ་རེད། དེ་མིན་ལུགས་ལ་བསམ་བློ་བཏང་ན། བདེ་སྡུག་ཅི་བྱེད་རང་གི་ལག་ན་ཡོད་པ་ཞིག་ཡིན། ལས་ཀྱི་བསྐོས་ཐང་ཅན་རེད་སྙམ་ན་ཡང་། ལས་ཞེས་པ་འདི་མིང་དང་དོན་མཚུངས་པ་ལས་ཡོང་བ་ཞིག་ཡིན་ལ། དེ་ཡང་གཞན་གྱི་ལས་གཞན་ལ་བཀལ་བཏང་བ་ཞིག་མ་ཡིན། རང་གིས་ལས་པ་དེ་རང་ལ་སྨིན་པ་ཤ་ཏག་ཡིན་པས། བདེ་སྡུག་ཅི་བྱེད་རང་གི་ལག་ན་མེད་རྒྱུ་ཞིག་མ་རེད། ཡར་འགྲོ་མར་འགྲོ་གཉིས་ཀྱི་ས་མཚམས། རྟ་ཁ་སྲབ་ཀྱིས་གང་ལ་བསྒྱུར་རང་གི་ལག་ན་ཡོད་དུས། ལམ་གསུམ་འདུས་པའི་འདུས་མདོ་འདི་ནས། ཁ་གང་ལ་བསྐོར་བའི་གདམས་ཀ་དང་། རང་ལུས་འདོམ་གང་གྲུ་བཞི་ལ་དགྱེ་སྒུར་གཉིས་ཀ་རང་ལག་ན་ཡོད་དུས་ངོ་མ་དེ་ད་རེས་རེད་ཡོད་པས། སྡུག་གི་སྣེ་མོ་འཛིན་ཏེ་དེའི་ལམ་ལ་ཞུགས་ན་འཁོར་བའི་སེམས་ཅན་མང་ཆེ་བ་ལམ་དེ་ནས་འགྲོ་བཞིན་ཡོད་པ་རེད། དེ་ན་རྒྱལ་ཁ་ཆེ་བ་ཞིག་ཡོད་ནས་ཐེམས་མི་འཐེམ་བྱེད་རྒྱུ་ཞིག་ཡིན་ན། ད་འཇིག་རྟེན་མི་ནག་གི་ཁྱིམ་པ་ཕོ་མོ་སྐྱ་སྒོག་སྔོ་སྒོག་ཆ་ཁས་སྔར་ཞིག་ནས་བླངས་འགྲོ་ཚར་ནས། ད་སྐལ་བ་ཞིག་ལྷག་ཨེ་ཡོད་ཤེས་ས་མེད་སྙམ་རྒྱུ་དེ་འདྲ་ཞིག་ཡིན་ནི་རེད། དེས་ན་དེ་ཆ་གའི་རྗེས་དེད་ནས་སོང་ན་དེ་དག་དང་འདྲ་བ་ཞིག་མ་གཏོགས་ཡོད་པ་མ་རེད། མི་དགེའི་སྡིག་ལས་ཤ་ཏག་བསྒྲུབས་ན་ཚེ་སྟོད་པས་ཚེ་སྨད་སྡུག་པ་དང་། ཚེ་སྨད་པས་བར་དོའི་སྐབས་སྡུག་པ་དང་། དེ་བས་ད་རུང་ཚེ་ཕྱི་མར་ངན་སོང་གི་སྡུག་བསྔལ་མྱོང་དུས་སྡུག་པ་ཡིན། སྡུག་པ་དེ་མཐོང་ཆོས་མྱོང་གྲུབ་ཡིན། ད་སྐྱིད་ཀྱི་མགོ་འཛིན་སའི་ལམ་སྣེར་ཞུགས་བསམ་ན། སངས་རྒྱས་བཅོམ་ལྡན་འདས་བྱོན་ཚུན་ཆད་ཀྱི་རྒྱལ་དང་དེ་སྲས་ཀྱི་དམ་པ་གོང་མ་ཚོའི་རྣམ་ཐར་ལ་མཇལ། འུ་ཅག་གི་བརྒྱུད་པའི་བླ་མ་གོང་མ་ཚོའི་རྣམ་ཐར་ལ་མཇལ་ཏེ་དེ་དག་གི་རྗེས་སུ་ཞུགས། དེ་དག་གི་རྗེས་སུ་བསླབ་ན། དང་པོ་མ་གོམས་པའི་སྐབས་སུ་ཆོས་ཕྱིར་དཀའ་སྤྱད་བཟོད་པའི་བཟོད་པ་ཡི་སྟོབས་ཞན་པ་དང་། དེའི་ཐོག་ལ་གུས་རྟག་སྦྱོར་བའི་བརྩོན་འགྲུས་ཀྱི་གོ་ཆ་སྲ་མོ་ཞིག་མེད་པའི་སྐབས་སུ་དཀའ་སྣང་སྡུག་སྣང་ཅུང་ཟད་རེ་ཡོད་སྲིད་ཀྱང་། མཐར་གྱིས་གོམས་སོང་བ་ཡིན་ན། སྐྱིད་པའི་ཉི་མ་ནང་གི་བདེ་སྐྱིད་དེ་སེམས་ལས་རྙེད་དགོས་པས། ལས་དགེ་སྒྲུབ་སྡིག་སྤོང་གི་སྒོ་ནས་དལ་འབྱོར་གྱི་སྙིང་བོ་ལེན་ལུགས་ལ་སྐྱེས་བུ་ཆུང་འབྲིང་ཆེ་གསུམ་གྱི་ལམ། སྐྱེས་བུ་ཆེན་པོའི་ལམ་ནས་ཡིན་ན་རིང་ལམ་མཚན་ཉིད་ཐེག་པ་དང་། ཉེ་ལམ་རྡོ་རྗེའི་ཐེག་པ། དེ་ལ་ཡང་ནང་གསེས་ཀྱི་དབྱེ་བས་ཕྱེས་ཡོང་ན། དེའི་ནང་གི་རིང་ལམ་ཀྲི་ཡོག་སྡེ་གསུམ། ཉེ་ལམ་མ་ཧཱ་དང་ཨ་ནུ། མྱུར་ལམ་ཨ་ཏི་རྫོགས་པ་ཆེན་པོ། ད་རུང་དེའི་ནང་གི་ཤིན་ཏུ་མྱུར་ལམ་ཡང་གསང་མན་ངག་གི་ལམ་འདི་ནས། ལོ་དང་ཟླ་བ་ཁ་གྲངས་ཀྱི་དུས་ཚོད་ཐུང་ཐུང་ལ། འཇའ་ལུས་འཕོ་བ་ཆེན་པོའི་སྐུ་བརྙེས་ཏེ་ཚེ་འདིའི་སྟེང་ནས་ལུས་འདི་མི་བོར་བའམ་ལུས་འདི་བསྐྱུར་མི་དགོས་པར་སངས་རྒྱས་ཐུབ་པ། མཐའ་ཡས་སེམས་ཅན་གྱི་གཞན་དོན་འབྱུང་བར་བྱེད་རྒྱུའི་ལམ་སྣེ་རང་ལག་ལ་ཡོད་པས་མི་ཚད་པར། གདམས་ངག་སྒོར་བསྐྱལ་བྱེད་པའི་སྐལ་བ་བཟང་བོ་མངོན་དུ་གྱུར་པའི་དུས་སྐབས་རང་རེ་ལ་ཚེས་ཡོད་ཅིང་། བདག་ཅག་གི་སྟོན་པས་ཆོས་འཁོར་དང་པོ་བསྐོར་བའི་གནས་སྐབས་སུ་བདེན་བཞི་བཞི་ལྡབས་སུ་སྤྲོས་ནས་གསུངས་པ་ཡིན། སྡུག་བསྔལ་ཤེས་པར་བྱ་གསུངས་པ་དེས་འཁོར་བའི་སྡུག་བསྔལ་དེ་ཤེས་སུ་བཅུག་ནས། ཀུན་འབྱུང་སྤོང་བར་བྱ་ཞེས་ལས་རྒྱུ་འབྲས་ཀྱི་རྣམ་གཞག་ངེས་པ་འདི་ཉིད། བདེན་བཞིའི་རིམ་པའི་སྒྲོམ་གཞི་ཐུབ་པའི་བསྟན་པ་སྐས་ཀྱི་གདང་བུ་ལྟ་བུའི་འགྲོས་དང་ཡང་མཐུན་པར་བསྟན་པ་དང་། ལྟ་བ་བཀར་བཏགས་ཀྱི་ཕྱག་རྒྱ་བཞི་རྟེན་འབྲེལ་སྙིང་བོའི་ནང་དུ་བསྡུས་ནས། ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དི་མ་ཧཱ་ཤྲ་མ་ཎཿགསུངས་པ་དེས་བསྟན་པ་ཡིན། དེའི་དོན་བོད་སྐད་ལ་ཚུར་བསྒྱུར་ན། ཆོས་རྣམས་ཐམས་ཅད་རྒྱུ་ལས་བྱུང་བ་དང་། །དེ་ཡི་རྒྱུ་དང་དེ་འགོག་གང་ཡིན་པ། །དེ་བཞིན་གཤེགས་པ་ཉིད་ཀྱིས་བཀའ་བསྩལ་པ། །དེ་སྐད་གསུངས་པའི་ཚུལ་ཅན་དགེ་སྦྱོང་ཆེ། །ཞེས་པ་སྟེ། ཤེས་བྱ་འཁོར་འདས་ལམ་གསུམ་གྱི་རྟེན་ཅིང་འབྲེལ་འབྱུང་གིས་བསྡུས་པའི་ཆོས་ཤིག་ཡོད་ཚད་པོ་ཐམས་ཅད་རྒྱུ་ལས་བྱུང་བ་ཡིན། རྒྱུ་ཀུན་འབྱུང་གི་བདེན་པ། འབྲས་བུ་སྡུག་བསྔལ་གྱི་བདེན་པ་གཉིས་ཀ་འཁོར་བའི་རྒྱུ་འབྲས་དང་། རྒྱུ་ལམ་གྱི་བདེན་པ་དང་འབྲས་བུ་འགོག་པའི་བདེན་པ་གཉིས་ཀ་མྱང་འདས་ཀྱི་རྒྱུ་འབྲས་ཡིན། མི་འདོད་རྒྱུ་བོ་སྡུག་བསྔལ་ཡིན་ན་ཡང་། སྡུག་བསྔལ་འབྲས་བུ་ཡིན་པས་ན་འབྲས་བུ་བཀག་ནས་འགོག་མི་ཐུབ། སྡུག་བསྔལ་དེའི་རྒྱུ་བཙལ་ནས་དེ་འགོག་དགོས། དཔེར་ན། དུག་འཐུང་ནས་ནད་འབྱུང་བ་དེ་བཀག་ནས་འགོག་མི་ཐུབ་པ་ལྟ་བུ་དང་། དུག་འཐུང་བ་བཀག་ན་ནད་ཀྱི་གཞི་དེ་ཆོད་པ་བཞིན་དུ་རྒྱུ་ཀུན་འབྱུང་ལས་ཉོན་བག་ཆགས་དང་བཅས་པ་ཐམས་ཅད་བཀག་པས་དེའི་འབྲས་བུ་ཁམས་གསུམ་འཁོར་བའི་སྡུག་བསྔལ་ཕྲ་རགས་རིགས་ཀྱི་སྒྲིབ་པའི་སྤང་བྱ་མཐའ་དག་སྤངས་ཏེ། གཉིས་ལ་མི་གནས་པའི་ཡེ་ཤེས་ཐོབ་ནས་མངོན་འཚང་རྒྱ་བ་ཡིན། སྐྱེས་བུ་ཆུང་ངུའི་ལམ་ལ་ཞུགས་ན་ངན་སོང་གསུམ་པོའི་སྡུག་བསྔལ་དེ་ཤེས། དེ་ལས་ཐར་བའི་མཐོ་རིས་ལྷ་མིའི་གོ་འཕང་དེ་དོན་གཉེར་གྱི་ཆེད་དུ་མི་དགེ་བཅུ་སྤངས། དགེ་བ་བཅུ་བསྒྲུབས། དེའི་སྟེང་དུ་མི་གཡོ་བའི་ལས་བསམ་གཏན་གཟུགས་མེད་བརྒྱད་པོའི་ཏིང་འཛིན་བསྒོམས་ནས་ལྷ་མིའི་གོ་འཕང་ཐོབ་པ་རེད། ཡིན་ན་ཡང་། ལས་དགེ་བས་མི་དགེ་བ་བཀག་པ་ཙམ་ཞིག་མ་གཏོགས། རྒྱུ་ཉོན་མོངས་བཀག་མ་ཐུབ་པས་དུག་རོ་ཡི་རྩ་བ་འདྲ་བོ་དེ་མ་ཆོད་པས་ནད་རོ་ཕྱིར་འཕར་ངེས་ཡིན། སྐྱེས་བུ་འབྲིང་དང་ཆེན་པོ་གཉིས་ཀྱིས། སྲིད་པ་ཁམས་གསུམ་འཁོར་བ་རིགས་དྲུག་པོ་ལས་བློ་ལྡོག་ནས། འཁོར་བ་རྒྱུ་འབྲས་གཉིས་ཀ་སྤངས་པའི་མྱང་འདས་བསྒྲུབ་བྱར་བྱེད་པ་རེད། དེ་ལ་ཁྱད་པར་ཅི་ཞིག་ཡོད་པ་ཡིན་ཞེ་ན། བདེན་བཞི་བགྱི་བ་དང་བཅས་པ་དང་། བགྱི་བ་མ་མཆིས་པ་གཉིས་སུ་གསུངས་པ་སྟེ། བྱ་བ་ཆ་ཚང་དང་མ་ཚང་ངམ་ཡོངས་སུ་རྫོགས་དང་མ་རྫོགས་ཀྱི་ཁྱད་པར་ཡོད་པར་གསུངས་པ་ལྟ་བུ་ཞིག་ཡིན། ཉན་ཐོས་དང་རང་རྒྱལ་གཉིས་ཀས་ཉོན་མོངས་ཅན་མ་ཡིན་པའི་མ་རིག་པ་ལྷན་སྐྱེས་ཀྱི་ཆ་དང་། ཡིད་ཀྱི་རང་བཞིན་ཅན་གྱི་ལུས་དང་། ཟག་མེད་ཀྱི་ལས། བསམ་གྱིས་མི་ཁྱབ་པའི་འཆི་འཕོ་ལ་སོགས་པ། རྟེན་འབྲེལ་ཕྲ་བའི་སྡུག་བསྔལ་དེ་མ་ཤེས་པའི་རྐྱེན་གྱིས་སྡུག་བསྔལ་ཤེས་པ་དེ་བགྱི་བ་དང་བཅས་པ་ད་རུང་ལས་རྔ་ལུས་ནས་ཡོད་པ་དང་། ཀུན་འབྱུང་སྤོང་བར་བྱ་བའི་ཐད་ནས་ཀྱང་། ལས་དང་ཉོན་སྒྲིབ་སྤང་རུང་ཤེས་སྒྲིབ་ཆ་ཚང་མ་སྤངས་པས། ཀུན་འབྱུང་སྤང་བར་བྱ་བ་དེ་ཡང་བགྱི་བ་དང་བཅས་པ་ད་རུང་ལས་རྒྱུ་ལྷག་ནས་བསྡད་ཡོད་པ་དང་། ད་འགོག་ལམ་གཉིས་ཀ་རེད། ལམ་རྒྱུད་ལ་བསྟེན་པར་བྱ་བའི་ཐད་ནས་ཀྱང་། གང་ཟག་གི་བདག་མེད་རྟོགས་ན་ཡང་ཆོས་ཀྱི་བདག་མེད་ཆ་ཚང་བ་མ་རྟོགས་པས་ཡང་ལམ་བགྱི་བ་དང་བཅས་པ། འགོག་པ་མངོན་དུ་བྱ་བའི་ཐད་ནས་ཀྱང་། ཉན་ཐོས་དགྲ་བཅོམ་གྱི་གོ་འཕང་ཐོབ་ན་ཡང་། སངས་རྒྱས་ཀྱི་འོད་ཟེར་གྱི་སྟོབས་ཀྱིས་འགོག་པའི་སྙོམས་འཇུག་ལས་ཡར་བསླངས་ནས། ད་གཟོད་ཐེག་པ་ཆེན་པོར་སེམས་བསྐྱེད་དེ་སངས་རྒྱས་ཀྱི་གོ་འཕང་བསྒྲུབ་དགོས་པས་ན། ད་འགོག་པ་ཡང་བགྱི་བ་དང་བཅས་པ་ཡིན་གསུངས་པ་རེད། བགྱི་བ་མ་མཆིས་པ་ལམ་ཡོངས་སུ་ཚང་བ་དེ་གང་ཡིན་ན། སྐྱེས་བུ་ཆེན་པོའི་ལམ་འཁོར་བ་མཐའ་དག་དང་རང་ཉིད་ཞི་བདེར་སྦྱོར་བའི་ཉན་རང་ལས་ཀྱང་བློ་ལྡོག་པས་ན། སྡུག་བསྔལ་ཤེས་པར་བྱ་བ་བགྱི་བ་མ་མཆིས་པ། ཀུན་འབྱུང་ལས་ཉོན་སྒྲིབ་གཉིས་བག་ཆགས་དང་བཅས་པ་སྤང་བྱར་བཟུང་བས་ན། ཀུན་འབྱུང་སྤང་བར་བྱ་བ་ཡང་བགྱི་བ་མ་མཆིས་པ། ལམ་བདེན་བདག་མེད་རྟོགས་པའི་ཤེས་རབ་ཆོས་ཐམས་ཅད་ཀྱི་གནས་ལུགས་དོན་དམ་བདེན་པའི་རང་བཞིན་ཅན་གྱི་ལམ་རྒྱུད་ལ་བསྟེན་པ་དེ་ཡང་བགྱི་བ་མ་མཆིས་པ། འགོག་པ་མངོན་དུ་བྱ་བའི་ཚུལ་ཡིན་ན། འབྲས་བུ་སངས་རྒྱས་ཆོས་གཟུགས་ཀྱི་སྐུ་གཉིས་ཀ་ཐོབ་རྒྱུ་བོའི་ཕན་ན་འཐོབ་བྱ་གཞན་མེད་པ་ཡིན་པས་ན། འགོག་པ་མངོན་དུ་བྱ་བ་ཡང་བགྱི་བ་མ་མཆིས་པ་དེ་ལྟར་ཡིན་ལ། དེ་ལས་ཀྱང་ཁྱད་པར་དུ་ཕྱེས་པ། སྲིད་ཞིའི་མཐའ་གཉིས་ཀ་ལས་བློ་ལྡོག་པའི་ངེས་འབྱུང་ཆེན་པོ་དེས་ཀུན་ནས་བསླངས་ཏེ། རིང་ལམ་མཚན་ཉིད་ཐེག་པ་དང་ཉེ་ལམ་སྔགས་ཀྱི་ཐེག་པ་འོག་མ་རྣམས་ཀྱི་སྡོམ་པས་རྒྱུད་བསྡམ། བསམ་གཟུགས་བརྒྱད་དང་སྔགས་ཀྱི་བསྐྱེད་རྫོགས་སྒོམ་པ་དེ་ཐམས་ཅད། གོང་མའི་ངོས་ནས་བསམ་གཏན་གྱི་ཡན་ལག་ཙམ་ཞིག་ཡིན་ན། དེའི་སྟེང་དུ་ཆེན་པོ་གསུམ་གྱི་ལྟ་བ་རྟོགས་པ་ཤེས་རབ་ཡིན་པ་རེད། ཐེག་པ་བརྒྱད་པོ་དེ་རྟོག་པས་བཏགས་པའི་འདིའི་ལམ་ཡིན་ན། དེ་ཐམས་ཅད་སྤྲོས་པ་ཅན་ཡིན་ལ། ཨ་ཏི་རྫོགས་པ་ཆེན་པོ་སྤྲོས་བྲལ་ཀ་དག་གི་ལྟ་བ་གཅིག་པུའི་རང་ངོ་བསྐྱངས་ནས། བཟང་རྟོག་ངན་རྟོག་ཐམས་ཅད་ཡེ་ཤེས་ཆེན་པོ་གཅིག་གི་ཀློང་དུ་གྲོལ་ཏེ། ལས་ཉོན་ཤེས་བྱ་བག་ཆགས་དང་བཅས་པའི་སྒྲིབ་པ་ཕྲ་རགས་ཐམས་ཅད་བཅོམ་ནས། སངས་རྒྱས་ཆོས་ཀྱི་སྐུ་ཐོབ་པ་དང་། དེ་ལས་གཟུགས་སྐུ་འགགས་མེད་ལོངས་སྐུ་དང་སྤྲུལ་སྐུ་གཉིས་ཀྱིས་གང་ལ་གང་གིས་འདུལ་བའི་འགྲོ་བའི་དོན་མཛད་པ་ཡིན་པས་བདེན་བཞིའི་རྣམ་གཞག་གི་སྤྱི་སྒྲོམ་དེ་དེ་འདྲ་ཞིག་རེད། དེ་ལྟར་ཡིན་པ་དེ་ངེས་པར་བྱས་ནས་སྤང་བྱ་མི་དགེ་བའི་ལས། ལས་ཀུན་ནས་སློང་བར་བྱེད་པའི་དུག་གསུམ་ངོ་བོ་ཉིད་ཀྱི་མི་དགེ་བ་དང། དེས་ཀུན་ནས་བསླང་ཡོང་བའི་མཚུངས་ལྡན་གྱི་མི་དགེ་བ་མཐའ་དག་སྤོང་། བསྒྲུབ་བྱ་དགེ་བའི་ལས་མ་ཆགས་མི་སྡང་གཏི་མུག་མེད་པའི་དགེ་བཅུ་དང་། མི་དགེ་བཅུ་སྤོང་གི་ཚུལ་ཁྲིམས་ལ་སོགས་པ་ལས་ཀྱི་རྣམ་གྲངས་མཐའ་ཡས་པ་གཞུང་དང་མན་ངག་ལས་འབྱུང་བ་བཞིན་ཡིན། མདོར་ན་ཐམས་ཅད་ལས་ཀྱི་རང་བཞིན་ཡིན་པ་རེད། ལས་མ་བྱས་པ་དང་མི་འཕྲད་པ། བྱས་པ་ཆུད་མི་ཟ་བ། གཞན་གྱིས་བྱས་པ་གཞན་ལ་མི་སྨིན་པ། བྱེད་པོ་རང་ཉིད་ཀྱི་ཟིན་པའི་ཕུང་བོ་འབའ་ཞིག་ལ་སྨིན་པ་རྟེན་ཅིང་འབྲེལ་བར་འབྱུང་བ་སྟོང་པ་ཉིད་ཀྱི་རང་བཞིན། སྟོང་རྟེན་འབྱུང་དབྱེ་བསལ་མེད་པ་དེ་ལྟ་བུའི་བདེན་བཞི་དེ་ཡང་རྟེན་འབྲེལ་ཡིན། དེ་གང་ནས་བྱུང་ན་དོན་དམ་བདེན་པ་ལས་བྱུང་། ཆོས་ཉིད་ཀྱི་ངོ་བོ་ཀ་ནས་དག་པའི་བདེན་པ་དེ་ལས། ཀུན་རྫོབ་རྒྱུ་འབྲས་བསླུ་བ་མེད་པའི་ཆོས་ཐམས་ཅད་དེ་དཔེར་ན་འབྱུང་ལུགས་དེ་ཅི་ལྟར་འབྱུང་བ་ཡིན་ན། ནམ་མཁའ་ལས་སྤྲིན་འབྱུང་བ་ལྟ་བུ་ཡིན། དེ་ལྟར་ཀུན་རྫོབ་ཀྱི་ཆོས་ཐམས་ཅད་འབྱུང་བས་ན། མེད་ན་མི་འབྱུང་གི་རྒྱུ་འབྲས་ཡིན་པ་མ་གཏོགས་། བསྐྱེད་བྱ་སྐྱེད་བྱེད་ཀྱི་རྒྱུ་འབྲས་མཚན་ཉིད་པ་མིན། དེ་ལྟ་བུའི་བདེན་གཉིས་ཀྱི་དབང་དུ་བྱས་པའི་ཤེས་རབ་དེས་ལྟ་བ་ནམ་མཁའ་བས་མཐོ་ཡང་། ལས་རྒྱུ་འབྲས་བག་ཕྱེ་ལས་ཀྱང་ཞིབ་པར། དྲན་ཤེས་བཞིན་བག་ཡོད་གསུམ་དང་མ་བྲལ་བའི་ཐབས་ཤེས་རྣམ་པར་དག་པས་བདེན་གཉིས་ཟུང་འཇུག་གི་སྒོ་ནས་སྐུ་གཉིས་ཟུང་འཇུག་ཐོབ་པ་ཡིན་པས་ལས་འབྲས་རྣམ་གཞག་སྐོར་གྱི་སྣེ་མོ་ཙམ་ཞིག་ཐུགས་གསོས་དྲན་སྐུལ་ཞུས་པ་དང་བཅས་ཏེ། ད་སྐབས་བབས་གང་ཞིག་གསན་པར་བྱ་བ་དེ་འོད་གསལ་རྫོགས་པ་ཆེན་པོའི་ཁྲེགས་ཆོད་ལྟ་བའི་གླུ་དབྱངས་ས་ལམ་མ་ལུས་མྱུར་དུ་བགྲོད་པའི་རྩལ་ལྡན་མཁའ་ལྡིང་གཤོག་རླབས་ཞེས་བྱ་བ་འདི་ཉིད་འཆད་ཉན་བྱེད་པའི་སྐབས་ཡིན། ད་རང་རེ་འཁོར་བའི་སྡུག་བསྔལ་གྱིས་ཡིད་དབྱུང་ནས། གཏན་བདེ་ཐར་བ་དམ་པའི་ལམ་མཆོག་ལ་རང་གཞན་འགོད་འདོད་ཀྱི་ལམ་འཚོལ་བའམ་ལམ་ལ་ཞུགས་པའི་གང་ཟག་ཡིན། དེ་ཡིན་ན་ལམ་ལ་རིང་ལམ། ཉེ་ལམ། མྱུར་ལམ། ཤིན་ཏུ་མྱུར་ལམ་གྱི་རིམ་པས་རྫོགས་པའི་སངས་རྒྱས་ཀྱི་འབྲས་བུར་བསྙེག་པའི་རིམ་པ་མང་པོ་ཡོད་པའི་ནང་ནས། ཤིན་ཏུ་མྱུར་ལམ་འོད་གསལ་རྫོགས་པ་ཆེན་པོའི་ལམ་ལ་ཞུགས་ཏེ། ཚེ་གཅིག་གི་ལུས་འདིའི་སྟེང་ནས་མ་སེམས་ཅན་ཐམས་ཅད་རྫོགས་པའི་བྱང་ཆུབ་ལ་བཀོད་ཐུབ་པའི་ནུས་པ་ཅན་ཞིག་བྱེད་འདང་ཡིན། དེ་ཡང་ལམ་ཤིན་ཏུ་མྱུར་ལམ་རྫོགས་ཆེན་གྱི་ལམ་ལ་ཞུགས་དུས། ལམ་འོག་མའི་རིགས་བསྐྱུར་ཆོག་པ་དང་དེ་ཚོ་དང་འབྲེལ་བ་གཏན་ནས་མེད་པ་ཞིག་བྱེད་པའི་འདང་དང་། ཁྱད་པར་དུ་སྔགས་ལམ་མྱུར་ལམ་རེད། མདོ་ལམ་དེ་བས་འགྲོས་བུལ་བ་ཡིན་སྙམ་ནས་མདོ་སྔགས་ལམ་གྱི་འགྲོ་ཕྱོགས་དང་ངོ་བོ་ཐ་དད་དུ་བཟུང་ན་ནོར་བ་ཡིན། དེའི་སྟབས་ཀྱིས་འདི་ནས་ལྟ་བ་མཁའ་ལྡིང་གཤོག་རླབས་ཀྱི་ཐོག་མའི་མཚན་གྱི་ཞལ་བྱང་འགོད་དུས་ཤིག་ནས་ལམ་མ་ལུས་མྱུར་དུ་བགྲོད་པ་ཞེས། མ་ལུས་ཞེས་པའི་ཚིག་གི་གསལ་ཁ་ཞིག་ཆེད་དུ་བསྣན་ནས་གསུངས་པ་ཡིན། མདོ་སྔགས་གཉིས་ཀ་བགྲོད་གཅིག་གི་ལམ། མཐར་ཐུག་ཐེག་གཅིག་ལ་གྲུབ་པའི་སྙིང་དོན། ཕྱིན་དྲུག་བསྡུ་དངོས་བཞིའི་སྤྱོད་པས་རང་གཞན་གྱི་དོན་གཉིས་རྫོགས་སྨིན་སྦྱངས་པས་མཐར་ཕྱིན་པ་བྱེད་དགོས་པར་འདྲ་ལ། ཐབས་ཀྱི་ཁྱད་པར་དུ་བྱས་པ་སྔགས་ཀྱི་ལམ་ཡིན་པས། དེ་མ་ཀའི་ཉན་ཐོས་ཐེག་པ་ནས་མདོ་སྔགས་ལམ་གྱི་རིམ་པའི་གནད་ཐམས་ཅད་ཡོངས་སུ་རྫོགས་ཤིང་གཅིག་ཏུ་འདུས་པ་ལ་རྫོགས་པ་ཆེན་པོ་ཞུ་བ་ཡིན། དེ་ཡང་ཟབ་དང་རྒྱ་ཆེའི་སྒོ་ནས་བསྟན་ཚུལ་མང་ནའང་། འདི་ནས་རྫོགས་པ་ཆེན་པོ་དེ་མེད་པ་སྟོང་ཆད་ཀྱི་ལྟ་བ་ཧད་པོ་ཞིག་མ་ཡིན་པར་གསལ་སྟོང་ཟུང་དུ་འཇུག་པ། དབྱིངས་དང་ཡེ་ཤེས་དབྱེར་མེད། གཞི་ལམ་འབྲས་བུའི་གནད་ཐམས་ཅད་འདུས་པའི་ལྟ་བའི་རང་ངོ་སྤྲད་པ་གཙོ་བོར་རྩལ་འདོན་མཛད་དེ་བསྟན་པའི་རྣལ་འབྱོར་ཉམས་ཀྱི་གླུ་དབྱངས་ཐོལ་བྱུང་རྡོ་རྗེའི་དོ་ཧར་བཞེངས་པ་ཞིག་ཡིན། འོ་ན་འདིས་ལྟ་བ་ལས་སྒོམ་པ་མ་བསྟན་པའོ་སྙམ་ན། རིག་པ་དང་ཞབས་སུ་ལྡན་པ་ཞེས་གསུངས་པ་ལྟར་དུ། མི་ཞིག་གིས་གོམ་པ་བླངས་ཏེ་མདུན་ཕྱོགས་འདོད་པའི་ས་རུ་འགྲོ་དགོས་ན། མིག་གིས་རྐང་བའི་བརྫི་ས་ལ་བལྟས་བཞིན་དུ་བརྟན་པོར་བརྫིས་ནས་འགྲོ་དགོས་པ་དང་འདྲ་བར་ལྟ་བའི་གཞི་གདན་གྱི་སྟེང་ནས་སྒོམ་པ་དང་སྤྱོད་པ་ནས་འབྲས་བུ་ལ་བསྙེག་རྒྱུ་ཡིན། བླ་མེད་ཐུན་མོང་གི་ལམ་ནས་བཤད་ན། ལྟ་སྒོམ་སྤྱོད་པ་དབང་དང་དཀྱིལ་འཁོར་ལ་སོགས་པ་གསུངས་པ་རེད། ལྟ་བའི་ངེས་པ་རྙེད་པའི་སྟེང་དེ་ནས་སྒོམ་པ་དང་སྤྱོད་པ། དཀྱིལ་འཁོར་དབང་དང་དམ་ཚིག སྒྲུབ་པ་མཆོད་པ་འཕྲིན་ལས་སྔགས་དང་ཕྱག་རྒྱ་སྟེ་སྔགས་ཀྱི་དེ་ཉིད་བཅུའི་རིམ་པ་མདོར་ན་ཐུབ་པའི་བསྟན་པ་སྐས་ཀྱི་གདང་བུ་ལྟ་བུར་རིམ་ཅན་ཆ་ཚང་དོན་འདུས་ཀྱིས་མན་ངག་འདི་ཉིད་འཆད་བཞིན་པའི་ཐོག་མར་དགེ་བ་ཀླད་ཀྱི་དོན་སོང་ནས། བར་དུ་དགེ་བ་གཞུང་དོན་ལས་ཀྱང་། དོ་ཞག་འུ་ཚོས་དུག་ལྔ་རང་གྲོལ་གྱི་ངོ་སྤྲོད་སོང་བའི་མཚམས་ནས། དེ་རིང་ཚོགས་དྲུག་རང་གྲོལ་གྱི་ངོ་སྤྲོད་ལ་ཐུག་པ་རེད། མིག་རྣ་སྣ་ལྕེ་ལུས་ཡིད་ཀྱི་དབང་བོ་དྲུག་ལ། གཟུགས་སྒྲ་དྲི་རོ་རེག་དང་ཆོས་ཀྱི་ཚོགས་དྲུག་དེ། བཟང་ངན་བདེ་སྡུག་ཡིད་འོང་ཡིད་མི་འོང་གང་ཤར་ན་ཡང་། ཐམས་ཅད་སྟོང་བའི་རང་བཞིན་དུ་གཏན་ལ་ཕབ་ཅིང་ངོ་སྤྲོད་པ་སྟེ། ཨེ་མ་ཧོ། ད་ཡང་སྙིང་དང་འདྲ་བའི་བུ་རྣམས་ཉོན། །ཞེས་མཚམས་སྦྱར་ནས། ཚོགས་དྲུག་རེ་རེ་བཞིན་དུ་གསུངས་པའི་དང་པོ་རེག་བྱ་ནི། གོས་ལ་སོགས་པའི་འཇམ་པོ་ལུས་ལ་དྲིལ། །འཇམ་མོ་སྙམ་པའི་རང་གི་སེམས་ལ་ལྟོས། །རེ་བ་ལ་སོགས་རྩུབ་མོ་ལུས་ལ་དྲིལ། །རྩུབ་བོ་སྙམ་པའི་རང་གི་སེམས་ལ་ལྟོས། །བལྟས་ཚེ་གཉིས་ཀ་སྟོང་པར་རོ་མཉམ་མོ། །ཞེས་གསུངས་ཏེ། གོས་ལ་སོགས་པའི་འཇམ་རྩུབ་དང་། ཚ་གྲང་དང་བསིལ་དྲོད་སྙོམས་མི་སྙོམས། ད་རུང་ཆེ་ས་ནས་བཤད་དེ་ཡོང་ན་གཡས་ནས་དྲི་བཟང་བོའི་བྱུག་པས་བྱུགས་ནས་བསྐུ་མཉེ་བྱས། གཡོན་ནས་ཤ་གྲི་ཡིས་བཅད་པའི་བར་དུ་བསྒོམས་ནས། དེའི་རེག་བྱ་འཇམ་རྩུབ་བདེ་སྡུག་གི་ངོ་བོ་ཉམས་སུ་མྱོང་མཁན་སེམས་ལ་བལྟས་ན། དེ་གཉིས་ཀ་སྟོང་པར་རོ་མཉམ་པར་མཐོང་བ་དེ་རེག་སྣང་སྟོང་པ་རང་གྲོལ་གྱི་ངོ་སྤྲོད་ཡིན་ནོ་ཞེས་པ་དང་། གཉིས་པ་གཟུགས་ནི། གསེར་སྐུ་ལ་སོགས་མཛེས་པའི་གཟུགས་ལ་ལྟོས། །མཛེས་སོ་སྙམ་པའི་རང་གི་སེམས་ལ་ལྟོས། །སྦལ་བ་ལ་སོགས་མི་མཛེས་གཟུགས་ལ་ལྟོས། །མི་མཛེས་སྙམ་པའི་རང་གི་སེམས་ལ་ལྟོས། །བལྟས་ཚེ་གཉིས་ཀ་སྟོང་པར་རོ་མཉམ་མོ། །ཞེས་གསུངས་ན། མཛེས་མི་མཛེས་ཀྱི་སྣང་བ་འདི་ཡང་རྟོག་བཏགས་ཡིན་པས་ན། གཅིག་ལ་མཛེས་པར་སྣང་བ་དེ་ཐམས་ཅད་ལ་མཛེས་པར་སྣང་བའི་ངེས་པ་ཡོད་པ་མ་ཡིན། མཛེས་མི་མཛེས་སུ་བརྟག་མཁན་དང་དཔྱད་མཁན་དེ་ཡང་སེམས་ཡིན་པས། དེ་ལྟར་སྣང་བའི་སེམས་ཀྱི་ངོ་བོ་ལ་ལྟོས་དང། མཛེས་མི་མཛེས་ཀྱི་སེམས་གཉིས་ཀ་སྟོང་པ་ཡིན་པར་རོ་མཉམ། གྲོལ་བ་གཅིག་ཏུ་གྱུར་བ་དེ་གཟུགས་སྣང་སྟོང་པ་རང་གྲོལ་གྱི་ངོ་སྤྲོད་ཡིན་གསུངས་པ་དང་། གསུམ་པ་རོ་ནི། བུ་རམ་ལ་སོགས་ཞིམ་པོ་ཁ་རུ་ཟོ། །མངར་རོ་སྙམ་པའི་རང་གི་སེམས་ལ་ལྟོས། །བཅའ་སྒ་ལ་སོགས་ཁ་རུ་མྱངས་ནས་ཀྱང་། །ཞེས་གསུངས་པ་སྟེ། འདི་བཅའ་སྒའི་ཡི་གེ་འདི་ཨ་མདོའི་ཕྱོགས་ནས་འདི་ལྟར་འབྲི་གི། ཁམས་ཕྱོགས་འདྲ་ཞིག་ཡིན་ན། ས་སྐ་བཏགས་སྐ་ཡ་བཏགས་སྐྱ་བྲི་བ་ཡིན། བཅའ་སྒ་མི་ཟེར་ཞིང་། སྒ་སྐྱ་སྒ་སྨུག་སྒ་སེར་ལ་སོགས་པའི་རྣམ་གྲངས་ཀྱིས་བཤད་རྒྱུ་ཞིག་རེད། ཁ་ཁ་སྙམ་པའི་རང་གི་སེམས་ལ་ལྟོས། །བལྟས་ཚེ་གཉིས་ཀ་སྟོང་པར་རོ་མཉམ་མོ། །ཞེས་གསུངས་ཏེ། མངར་སྐྱུར་ཁ་ཁ་ལན་ཚྭ་ལ་སོགས་པའི་རོ་དྲུག་གི་ནང་ནས། གང་རང་གི་ཁ་ལ་ཞིམ་སྣང་གི་ཚོར་བ་ཅན་དང་། འགའ་རེ་མི་ཞིམ་པར་སྙམ་པའི་སེམས་དེ་གཉིས་ཀྱི་ངོ་བོ་ལ་བལྟས་ནས་ཞིབ་བསྡུར་ཞིག་བྱས་ཡོང་ན་དེ་གཉིས་ཀ་གཞི་མེད་སྟོང་པ་བར་སྣང་གི་སྨུག་སྤྲིན་འདྲ་འདྲ། སྟོང་བའི་ངང་ལས་ཤར་བ་ཡིན་ན་སྟོང་བའི་ངང་ལ་ཡལ་འགྲོ་བ་ཞིག་གང་ལ་བལྟས་ན་དེའི་ཚེ་སྟོང་བར་རོ་མཉམ་པ་དེ་རོ་སྣང་སྟོང་བའི་ངོ་སྤྲོད་ཡིན་གསུངས་པའོ། །བཞི་བ་དྲི་ནི། ཙན་དན་སྤོས་སོགས་དྲི་ནི་ཞིམ་པོར་སྣོམས། །ཞིམ་མོ་སྙམ་པའི་རང་གི་སེམས་ལ་ལྟོས། །ཤིང་ཀུན་སྒོག་པ་ལ་སོགས་དྲི་ངན་སྣོམས། །མི་ཞིམ་སྙམ་པའི་རང་གི་སེམས་ལ་ལྟོས། །བལྟས་ཚེ་གཉིས་ཀ་སྟོང་པར་རོ་མཉམ་མོ། །ལྔ་བ་སྒྲ་ནི། དྲིལ་བུ་པི་ཝང་གླིང་བུའི་སྒྲ་ལ་ཉོན། །སྙན་ནོ་སྙམ་པའི་རང་གི་སེམས་ལ་ལྟོས། །རྡོ་དང་ཐལ་མོ་རྡོབ་ལ་སྒྲ་ལ་ཉོན། །མི་སྙན་སྙམ་པའི་རང་གི་སེམས་ལ་ལྟོས། །བལྟས་ཚེ་གཉིས་ཀ་སྟོང་པར་རོ་མཉམ་མོ། །ཞེས་གསུངས་ཏེ། སྙན་མི་སྙན་འདི་ཡང་གཅིག་ཏུ་མ་ངེས་པ། སེམས་ལ་སྣང་ཕྱོགས་ཤིག་ཡིན། སྙན་བསམ་དུས་ཀྱི་སེམས་དང་མི་སྙན་བསམ་དུས་ཀྱི་སེམས་གཉིས་ཀྱི་ངོ་བོ་ལ་ཅེར་གྱིས་བལྟས་ཡོང་ན། སྒྲ་ཁོ་རང་གཞི་མེད་སྟོང་པ་དང་། སྙན་དང་མི་སྙན་པའི་རྟོག་པ་འཆར་རྒྱུ་དེ་ཡང་། དངོས་མེད་ནམ་མཁའི་འཇའ་གཟུགས་འདྲ་འདྲ། ལར་མ་གཞི་གང་སྣང་གང་ཤར་དེ་ཐམས་ཅད་སྟོང་པ་ཡིན་པས་ན། ཅིར་ཡང་ཤར། གང་ཡང་སྣང་བ་ཡོད་པ་དེ་ཉིད་སྟོང་པར་གྲུབ་ཅིང་སྣང་སྟོང་འབྲལ་མི་ཤེས་པའི་སྒྲ་སྣང་སྟོང་པ་རང་གྲོལ་གྱི་ངོ་སྤྲོད་ཡིན་ནོ། །དེ་ནས་ཡིད་ཀྱི་ཡུལ་དུ་གྱུར་པའི་ཆོས་བདེ་སྡུག་གི་སེམས་ཚོར་གཉིས་ཀྱི་སྟེང་ནས་འཕྲོ་རིམ་འཕྲོར་གསུངས་འདུག ཁྱེད་རྣམས་གླིང་བཞིའི་ཁམས་ལ་དབང་བསྒྱུར་བའི། །འཁོར་ལོས་བསྒྱུར་རྒྱལ་ཞིག་ཏུ་སྐྱེས་ནས་ཀྱང་། །བཙུན་མོ་བློན་པོ་མང་པོའི་འཁོར་གྱིས་བསྐོར། །རིན་ཆེན་སྣ་ལྔ་ལས་གྲུབ་ཁང་པ་ན། །རོ་བརྒྱ་ལྡན་པའི་ཁ་ཟས་ཟ་བར་བསྒོམ། །དེ་འདྲའི་སྣང་བ་སེམས་ལ་ཤར་བའི་ཚེ། །བདེའོ་སྙམ་པའི་རང་གི་སེམས་ལ་ལྟོས། །ཞེས་གསུངས་ན། ལ་ལའི་བདེ་བ་ལ་ལའི་སྡུག་བསྔལ་ཡིན་པས་གཅིག་ཏུ་ངེས་པ་ཡོད་པ་མ་རེད། འོན་ཀྱང་སོ་སྐྱེ་ཕལ་བ་ཞིག་གིས། འཁོར་བསྒྱུར་ཙམ་ཞིག་མིན་ཡང་ཁོ་རང་ནད་མེད་ལུས་བདེ་སེམས་བདེ། རང་གི་ཚོད་ཀྱི་སྟོབས་འབྱོར་ལོངས་སྤྱོད་ཕུན་སུམ་ཚོགས་སྐབས་དགའ་སྣང་ཤར་བ་ཡིན། དེ་དུས་དགའ་བདེའི་སྣང་བ་སེམས་ལ་ཤར་ཡོང་དུས། སེམས་ཁོ་ཡི་ངོ་བོ་ལ་ཅེར་གྱིས་ཅིག་ལྟོས་དང་དགའ་སྣང་རང་བཞིན་མེད་པ་དགའ་སྣང་སྟོང་པ་རང་གྲོལ་དུ་ངོ་འཕྲོད་འགྲོ། ཡང་དེ་བཞིན་དུ། ཁྱེད་རྣམས་དབུལ་པོ་འཁོར་གཡོག་གཅིག་ཀྱང་མེད། །གྱང་ར་ཞིག་པོ་ཞིག་ཏུ་མལ་བཅས་ནས། །སྟེང་ནས་ཆར་བབས་འོག་ནས་སས་བརླན་ཞིང་། །ལུས་ལ་མཛེ་སོགས་ནད་སྣ་མང་པོས་བཏབ། །རྐང་ལག་ཆད་ནས་སྡུག་བསྔལ་དུ་མ་ཡིས། །མནར་ནས་སྡུག་བསྔལ་མྱོང་བ་ཞིག་ཏུ་བསྒོམ། །དེ་འདྲའི་སྣང་བ་ཡིད་ལ་ཤར་བའི་ཚེ། །སྡུག་གོ་སྙམ་པའི་རང་གི་སེམས་ལ་ལྟོས། །བལྟས་ཚེ་བདེ་སྡུག་སྟོང་པར་རོ་མཉམ་མོ། །ཞེས་གསུངས། ད་གོང་གི་འབྱོར་བ་ཕུན་སུམ་ཚོགས་པར་བདེ་སྣང་ཡོད་པ་དེའི་ལྡོག་ཟླ། འཁོར་མེད་པ། རོགས་པ་མེད་པ། གྲོགས་བྱེད་པའི་གཡོག་དང་གཉེན་བཤེས་ཀྱིས་བོར། ཐ་ན་འདུག་སའི་ཁང་ལུ་དང་སྦྲ་གུར་ཙམ་ཡང་མེད་པའི་གྱང་ར་ཐེད་པོ་ཞིག་གི་ཁུག་ཅིག་ན་ཁྱི་ལྡོམ་ཉམ་ཐག་ཆ་ཅིག་དང་ལྷན་དུ། སྟེང་ན་གྲང་རེག་ཚ་གདུང་དང་ལྷགས་རླུང་ཆར་ཆུ་སྐྱོབ་པའི་ཁེབས་མེད། འོག་ན་གདན་དང་ཁྲི་འབོལ་མ་དགོས་ས་རློན་འགོག་བྱེད་ཀྱི་གདན་འདིང་རྒྱུ་མེད་པར་མི་ཚད། ཁར་ཟས་མེད། རྒྱབ་གོས་མེད། དེའི་སྟེང་དུ་ནད་དང་ན་ཚ། ད་མཛེ་ཟེར་ན་ཀླུ་ནད་བཅོས་སུ་མི་རུང་བའི་ནད་ཅིག་ལ་སྔོན་ཆད་ངོས་འཛིན་པ་རེད། ད་རུང་དེང་སང་སྔར་མ་གྲགས་པའི་དུས་ནད་མང་པོ་བཅོས་ཐབས་མེད་པ་ཅི་འདྲ་འདྲ་ཡོད་འདུག དེ་འདྲ་ཕོག་ནས་ལུས་སེམས་གཉིས་ཀ་སྡུག་བསྔལ་དྲག་པོས་མནར་བཞིན་ཡོད་པའི་ཉམས་ལ་ཞོག་ཅིག་ཅེས་པའོ། །སྤྱིར་ན་སྒོམ་གྱི་རིགས་འདི་དེ་འདྲ་ཡིན་དར་རོ། །དེ་འདྲ་ཡིན་དགོས་པ་རེད་སྙམ་པའི་ཡམ་མེ་ཡོམ་མེ་ཞིག་གི་ངང་ལ་བཞག་སྟེ་དེས་ཆོག་རྒྱུ་མི་བྱེད་པར། རང་སྟེང་ངོ་མ་ནས་མྱོང་བཞིན་ཡོད་པ་ཇི་མ་ཇི་བཞིན་དུ་སེམས་ཐོག་ཏུ་ལེན་དགོས། སེམས་ཀྱི་འགྱུར་བ་འདིའི་སྟེང་ནས་ལུས་ངག་ལ་འགྱུར་བ་ཐེབས་ནས་སྒོ་གསུམ་རྡོ་རྗེ་གསུམ་གྱི་རང་བཞིན་ཡེ་ནས་ཡིན་པ་དེ་མངོན་དུ་གྱུར་དགོས་པ་ཡིན། འུ་ཚོས་དཔེ་དུས་རྒྱུན་འཇོག་འདུག་པའི་དར་གྱི་ངོ་བོ་ཆུ་ཡིན་ཡང་། འཁྲུལ་སྣང་འཁྱག་རླུང་གིས་བསྡམས་པ་དེ་ངོ་བོ་རང་ཐོག་ཏུ་ཆུ་ལ་འགྱུར་དགོས་ན་ལྷགས་རླུང་ཞི་བའི་དྲོད་རླངས་ལ་བརྟེན་དགོས་པ་ལྟ་བུ་ཡིན། སྡུག་བསྔལ་གྱི་ཚོར་བ་དྲག་པོ་ལུས་ཐོག་ལ་བྱུང་བ་མིན་ཡང་། སེམས་ཀྱིས་ཡིད་མི་བདེ་བ་ཚབས་ཆེན་ཉམས་སུ་མྱོང་བའི་དུས་སུ་སྡུག་གོ་སྙམ་པའི་རང་གི་སེམས་ལ་ལྟོས་དང་། ངོ་བོ་སྟོང་པའི་རང་བཞིན་སྡུག་སྣང་སྟོང་པ་རང་གྲོལ་དུ་ངོ་རང་ཐོག་ནས་འཕྲོད་ཡོང་ཡིན་ཞེས་པའོ། །དེ་ལྟར་ཚོགས་དྲུག་སོ་སོ་ནས་སྟོང་པར་ངོ་སྤྲོད་པ་སོང་ནས། ད་འདི་ནས་དོན་བསྡུས་ཏེ་གསུངས་པ་ནི། འདི་ལྟར་ཚོགས་དྲུག་སྟོང་པར་ཤེས་ནས་ཀྱང་། །ཕྱིན་ཆད་ཚོགས་དྲུག་བཟང་ངན་གང་ཤར་ཚེ། །ངོ་སྤྲོད་འདི་བཞིན་དཔྱད་པ་མི་དགོས་ཏེ། །གཞི་མེད་ཡེ་གྲོལ་སྟོང་པ་ཡིན་པའི་ཕྱིར། །ཤར་ཙམ་ཉིད་ནས་རྗེས་སུ་མི་འབྲང་བར། །སེམས་ཉིད་ངང་དུ་རང་སར་གློད་ལ་ཞོག །རང་གྲོལ་ཉིད་དུ་འགྲོ་བར་ཐེ་ཚོམ་མེད། །ཅེས་གསུངས་ཏེ། གོང་ནས་གསུངས་པ་ནང་བཞིན་དུ་ཚོགས་དྲུག་རེ་རེ་བཞིན་དུ་སྟོང་པར་ཤེས་སོང་བ་ན། ཕྱིན་ཆད་ནམ་ཡིན་ནའང་དཔྱད་སྒོམ་དང་འཇོག་སྒོམ་སྤེལ་མར་བྱེད་མི་དགོས་པར་གང་སྣང་གང་ཤར་ཐམས་ཅད་གཞི་མེད་ཡེ་གྲོལ་སྟོང་པའི་རང་ངོ་དེ་ལས་མ་འདས་པར་ཤེས་སོང་དུས། གང་ཤར་སེམས་ཀྱི་ཡོ་ལང་ཤར་ཙམ་ཉིད་ནས་གྲོལ་བ། ཤར་བ་དང་གྲོལ་བ་དུས་མཉམ་པའི་རང་གྲོལ་ཆོས་སྐུའི་དགོངས་པ་ལས་མི་འདའ་བའི་དོན་མངོན་དུ་འགྱུར་བ་ཡིན་ནོ། །འདི་ནི་ཚོགས་དྲུག་རང་གྲོལ་ངོ་སྤྲོད་དོ། །ཞེས་པས་སྤྱིའི་དོན་བསྡུས་ནས། འདི་ནས་འཕྲོ་གནས་གཉིས་མེད་གསུམ་གྱི་ངོ་སྤྲོད་འབྱུང་བ་ཡིན། གོང་གི་དེ་ཡུལ་གཙོ་བོར་བྱས་པ་དང་ད་འདི་ཡུལ་ཅན་གཙོ་བོར་བྱས་པར་གོ་དགོས། ཨེ་མ་ཧོ། ད་ཡང་རིགས་ཀྱི་བུ་རྣམས་ལེགས་པར་ཉོན། །ཞེས་མཚམས་སྦྱར་བ་དང་། དོན་ཆེན་ལེགས་པར་ཉན་ནས་ཡིད་ལ་འཛིན་དགོས་པའི་གསལ་འདེབས་དང་བཅས་ཏེ་ནང་གསེས་རྣམ་པ་གསུམ་སྟེ། གནས་པ་སེམས་ཀྱི་ངོ་སྤྲོད་དང་གཅིག འཕྲོ་བ་རོལ་བའི་ངོ་སྤྲོད་དང་གཉིས། འཕྲོ་གནས་གཉིས་མེད་ཀྱི་ངོ་སྤྲོད་དང་གསུམ་ལས། དང་པོ་གནས་པ་སེམས་ཀྱི་ངོ་སྤྲོད་ནི། ཁྱེད་རྣམས་རང་སེམས་གློད་ལ་རང་བབས་སུ། །ཞོག་ལ་ཇི་ལྟར་གནས་པའི་ཚུལ་ལ་ལྟོས། །བལྟས་ཚེ་རིག་པའི་ངང་ལ་གནས་པའི་ཕྱིར། །གནས་ཀྱང་སྟོང་པ་རིག་པའི་ངང་ཡིན་པས། །སྐལ་ལྡན་སེམས་ཀྱི་བུ་རྣམས་ཤེས་པར་གྱིས། །ཞེས་གསུངས་ཏེ། རྒྱན་དང་རོལ་བཞེས་པའི་ཚིག་ཞིག་ཡོད་པ་འདི་རྫོགས་ཆེན་སེམས་སྡེའི་ཆོས་སྐད་རེད། འདི་ནས་སྡེ་གསུམ་དགོངས་པའི་རང་གནད་གཅིག་ལ་དྲིལ་ནས་སྟོན་པའི་སྐབས་ཡིན། རང་བབས་གློད་ལ་བཞག་ནས་གནས་པའི་རང་ངོ་ལ་བལྟས་ཡོང་ན། གསལ་གདངས་རིག་པའི་དྭངས་ཆའམ་ངར་ཆ་དང་ལྡན་དགོས། སྟོང་རྐྱང་ལུང་མ་བསྟན་དང་། ཞི་གནས་གསལ་འཛིན་ཅན། ཡིད་དཔྱོད་ཀྱི་ལྷག་མཐོང་གསུམ་པོ་དེ་རྫོགས་ཆེན་གྱི་ཕྱོགས་ལ་ཉེ་བ་མ་ཡིན། གནས་པ་སེམས་ཀྱི་རྒྱན་དུ་ངོ་སྤྲོད་དོ། །ཞེས་དོན་བསྡུས་ནས་ད་འཕྲོ་བ་སེམས་ཀྱི་རོལ་བར་ངོ་སྤྲད་པ་ནི། རྣམ་རྟོག་སྤྲོས་ལ་ཇི་ལྟར་འཕྲོ་ཚུལ་ལ། །ལྟོས་དང་སྟོང་གསལ་རིག་པའི་ངང་ཉིད་ལས། །ཅུང་ཟད་ཙམ་ཡང་གཡོ་བ་མེད་པའི་ཕྱིར། །འཕྲོ་ཡང་སྟོང་པ་རིག་པའི་ངང་ཡིན་པས། །སྐལ་ལྡན་རིགས་ཀྱི་བུ་རྣམས་ཤེས་པར་གྱིས། །ཞེས་གསུངས་ཏེ། ད་འཕྲོ་བ་སེམས་སམ་སེམས་ཉིད་རིག་པའི་ཡེ་ཤེས་ཀྱི་རོལ་བ་ཡིན། རྒྱན་དང་རོལ་བ་རྩལ་ལ་སོགས་པ་ཇི་ལྟར་ཤར་བསྡད་ཀྱང་རིག་པ་གཅིག་ལས་མ་གཡོས་པས། རྟོག་ཚོགས་གང་ཤར་བཟང་ངན་སྤང་བླང་མེད་པར་རིག་པ་སྟོང་གསལ་འགགས་མེད་ཀྱི་རིག་ཆ་རྗེན་པའི་ངང་ལ་ཞོག་དང་དེ་ནི། འཕྲོ་བ་སེམས་ཀྱི་རོལ་བར་ངོ་སྤྲོད་དོ། །ཞེས་དོན་བསྡུས་ནས། ད་འཕྲོ་གནས་གཉིས་སུ་མེད་པར་ངོ་སྤྲོད་པ་ནི། དཔེར་ན་རྒྱ་མཚོར་རྦ་རླབས་ཅི་ཤར་ཡང་། །རྒྱ་མཚོ་ཉིད་ལས་ཅུང་ཟད་མ་གཡོས་ལྟར། །སེམས་ནི་གནས་སམ་འགྱུ་ཡང་རིག་སྟོང་ངང་། །ཅུང་ཟད་ཙམ་ཡང་གཡོ་བ་མེད་པའི་ཕྱིར། །གང་ལྟར་གནས་ཀྱང་རིག་པའི་ངང་ཡིན་ཞོག །གང་ལྟར་ཤར་ཡང་རིག་པའི་གདངས་ཡིན་ཞོག །སེམས་ནི་གནས་ན་སྒོམ་ནི་ཡིན་པར་འདོད། །འཕྲོ་ན་སྒོམ་ནི་མིན་པར་འདོད་པ་དེ། །གནས་འགྱུ་གཉིས་ཀྱི་རང་མཚང་མ་ཤེས་པར། །གནས་འགྱུ་རིག་གསུམ་གཅིག་ཏུ་མ་འདྲེས་རྟགས། །དེ་ཕྱིར་སྐལ་ལྡན་སེམས་ཀྱི་བུ་མཆོག་ཀུན། །གནས་རུང་འགྱུ་རུང་རིག་པའི་ངང་ཡིན་པས། །འདི་རྣམས་སྔོན་ལ་ཐུགས་སུ་ཆུད་ནས་ཀྱང་། །གནས་འགྱུ་རིག་གསུམ་གཅིག་ཏུ་ཉམས་སུ་ལོངས། །ཞེས་གསུངས། སྤྱིར་འདི་ནས་གནས་འགྱུ་རིག་གསུམ་ཞེས་པ་འདི་ཕྱག་ཆེན་གྱི་ཆོས་སྐད་རྫོགས་ཆེན་དང་ཡང་སྦྲེལ་ནས་བཤད་དུ་རུང་བ་ཞིག་རེད། གནས་པ་དང་འགྱུ་བ་གཉིས་ཀ་རྒྱ་མཚོ་རླུང་གིས་སྒུལ་ནས་རླབས་ཡོད་པ་དང་མེད་པ་ལ་དཔེ་བཞག་པ་ཡིན་པས། གཉིས་ཀའང་རྒྱ་མཚོ་ལས་མ་གཡོས་པ་བཞིན་དུ། གནས་འགྱུ་གཉིས་ཀའི་དུས་སུའང་རིག་པ་གཅིག་གིས་ཁྱབ་པ་ལ་གོ་དགོས། དེ་མ་ངེས་དུས་ཉམས་ལེན་ཆ་གཉིས་སུ་སོང་ནས། ཐུན་གྱི་ནང་གི་སྒོམ་ཆེན་དེ་ཐུན་མཚམས་སུ་ཐོན་དུས་ཐ་མལ་པ་ལས་ཀྱང་ཐ་ཆད་པ་ཞིག་ཏུ་སོང་དུས་སྒོམ་ལུགས་ཀྱིས་མ་ཉན་པ་རེད། གནས་པ་དེ་རྟོག་མེད་སྟོང་རྐྱང་ཞིག་གི་ངང་དུ་ཅི་འདྲ་གནས་ཀྱང་དེ་ལ་དགོས་པ་མེད་དེ། གསལ་སྟོང་རིག་པའི་ངར་དང་མི་ལྡན་ན། །ཡུན་རིང་གནས་པ་དུད་འགྲོའི་ནང་ན་ཡོད། །ཅེས་གསུངས་པ་ཡིན། ཆོས་ཉིད་རང་ཐོག་ལ་གནས་འགྱུ་རིག་གསུམ་གཅིག་གིས་ངོ་སྤྲད་རྒྱུ་འདི་རྣམ་རྟོག་ཡེ་ཤེས་སུ་འཆར་བའི་མན་ངག་གལ་ཆེན་ཡིན་ནོ། །འཕྲོ་གནས་གཉིས་སུ་མེད་པར་ངོ་སྤྲོད་དོ། །ཞེས་དོན་བསྡུས་ནས། ལྟ་བ་སྟོང་པ་གཅིག་ཏུ་ལ་བཟླ་བར་བསྟན་པ་སྟེ་ལྟ་བའི་ངོ་སྤྲོད་ཀྱི་འགག་དོན་བསྡུ་བའི་ཆོས་ཚན་ཞིག་སྟེ། ཨེ་མ་ཧོ། སྐལ་པར་ལྡན་པའི་སེམས་ཀྱི་བུ་གཅིག་པོ། །ཁྱེད་རྣམས་མ་ཡེངས་དལ་ལེ་རྣ་བས་ཉོན། །གླུ་བ་བྱ་བཏང་ཚོགས་དྲུག་རང་གྲོལ་ངས། །གླུ་དབྱངས་སྙན་མོ་གངས་དཀར་སེམས་ལ་ཞོག །གསུངས་ནས་མཚམས་སྦྱར་ཏེ། དང་པོ་འདི་ནས་མར་རྒྱུ་མཚན་བརྗོད་པས་མདོར་བསྟན་པ་ནི། ཆོས་རྣམས་ཐམས་ཅད་རོ་གཅིག་སྟོང་པ་རུ། །གཏན་ལ་ཕེབས་ན་འཁོར་འདས་སྤང་བླང་བྲལ། །དགྲ་དང་གཉེན་དུ་འཛིན་པའི་འཁྲུལ་བ་འཇིག །བདག་གཞན་གཉིས་སུ་འཛིན་པའི་སྣང་བ་མེད། །ཐམས་ཅད་རོ་གཅིག་སྟོང་པར་རྟོགས་ཕྱིར་རོ། །ཞེས་ལན་ཚྭ་ཐམས་ཅད་རོ་གཅིག་པ་བཞིན་དུ། འཁོར་འདས་སྣང་བཏགས་ཀྱི་ཆོས་ཐམས་ཅད་སྟོང་པ་ཡིན་པར་རོ་གཅིག་པའི་རྒྱུ་མཚན་དེས། འཁོར་འདས་ལ་སྤང་བླང་དང་དགྲ་གཉེན་ལ་དགའ་སྡུག་སོགས་འཇིག་ཅིང་ཤིག་པར་མདོར་བསྟན་པའོ། །དེ་ནས་རྒྱས་པར་བཤད་པ་ནི། རྒྱས་བཤད་མདོ་འགག་བསྡུ་ན་འདི་ཡིན་ཏེ། །ཐེག་པའི་ཡང་རྩེ་རྫོགས་པ་ཆེན་པོ་རུ། །འཁོར་བ་མྱང་འདས་ཐམས་ཅད་གཞི་རྩ་བྲལ། །ཡེ་ནས་སངས་རྒྱས་ཆོས་སྐུར་རོ་གཅིག་གོ །ཇི་ལྟར་ཆོས་སྐུར་རོ་གཅིག་པ་ནི། རྫོགས་ཆེན་ངང་ལ་ལྷ་འདྲེ་གཉིས་སུ་མེད། །རྫོགས་ཆེན་ཡུལ་ལ་སངས་རྒྱས་སེམས་ཅན་མེད། །རྫོགས་ཆེན་གཞི་ལ་བཟང་དང་ངན་པ་མེད། །རྫོགས་ཆེན་ལམ་ལ་ཉེ་དང་རིང་བ་མེད། །རྫོགས་ཆེན་འབྲས་བུར་ཐོབ་དང་མ་ཐོབ་མེད། །རྫོགས་ཆེན་ཆོས་ལ་སྤྱོད་དང་མི་སྤྱོད་མེད། །རྫོགས་ཆེན་དོན་ལ་སྒོམ་དང་མི་བསྒོམ་མེད། །ཅེས་གསུངས་ཏེ། རང་རིག་ཆོས་སྐུའི་དོན་མ་རྟོགས་པར་སྒོ་གསུམ་གྱི་འབད་རྩོལ་ཆོས་སྤྱོད་ལྟར་སྣང་བ་ཙམ་ཞིག་ཅི་འདྲ་བྱས་ཀྱང་། འཆིང་བའི་རྒྱ་མདུད་ཡར་ལྷག་བྱེད་པ་ཞིག་མ་གཏོགས་མེད་པར་སླར་ཡང་འཆིང་བ་སྟེ། གསེར་སྒྲོག་ཐག་སྒྲོག་གང་གིས་བཅིངས་ཀྱང་འཆིང་བར་མཉམ་པའི་འཆིང་བྱེད་ལ་འགྲོ་བ་དང་། འདུས་བྱས་ཡིན་པས་བུམ་པ་འཇིག་པའི་ཆོས་ཅན་ཡིན་པ་ལྟར་དུ་མ་བྱས་རང་སོར་བཞག་ན་འཇིག་མེད་འགྱུར་བ་མེད་པའི་ཆོས་ཉིད་མཐོང་བ་དང་། རྫོགས་ཆེན་གཞི་ལམ་འབྲས་གསུམ་བཟང་ངན་སྤང་བླང་རེ་དོགས་ཀྱི་མཐའ་ལས་འདས་པ་ཡིན་ཞེས་གསུངས་པ་ཡིན། དེ་ལྟར་རྟོགས་དུས་ཅི་འདྲ་ཞིག་ཡིན་ན། རྫོགས་ཆེན་རྒྱལ་པོའི་ལྟ་བ་དེ་བཞིན་གནས། །དེ་འདྲའི་རྫོགས་ཆེན་ལྟ་བ་རྟོགས་པའི་ཚེ། །སྒོ་གསུམ་ཕྲ་རགས་རྟོག་པ་ཀུན་ཞི་ནས། །དཔེར་ན་བལ་ལ་ཆུ་བཏབ་ཇི་བཞིན་དུ། །སྒོ་གསུམ་ཞི་ཞིང་དུལ་བའི་ངང་ལ་གནས། །བདེ་གསལ་མི་རྟོག་ཏིང་འཛིན་སྐྱེ་བ་དང་། །དེ་ལྟར་མ་རྟོགས་འཁོར་འཁྱམས་འགྲོ་ཀུན་ལ། །མ་ཡིས་བུ་གཅིག་དག་ལ་བརྩེ་བ་ལྟར། །བཅོས་མིན་སྙིང་རྗེ་སྐྱེ་བ་རྫོགས་ཆེན་གྱི། །ལྟ་བའི་ཁྱད་ཆོས་ཡིན་པའང་ཤེས་པར་གྱིས། །ཞེས་གསུངས། ད་རྫོགས་ཆེན་ལྟ་བའི་རྒྱལ་པོའི་ངང་ལ་གནས་ནས་ལྟ་དོན་རྟོགས་པའི་སྐབས་སུ། སྒོ་གསུམ་དང་འབྲེལ་བའི་ཐ་མལ་འཁྲུལ་བའི་རྟོག་པ་མར་ལ་ཞི་ནས་བལ་མགོར་ཆུ་བཏབ་པ་བཞིན་དུ་ང་རྒྱལ་དང་མཐོ་སྙེག གདུག་རྩུབ་དང་ཆགས་སྡང་མེད་པར། ཕྱི་རྟགས་ལ་སྒོ་གསུམ་ཞི་དུལ་ཅན། ནང་རྟགས་ལ་བདེ་གསལ་མི་རྟོག་པའི་ཏིང་འཛིན་སྐྱེ་རྒྱུ་དང་། ཁྱད་པར་དུ་སྟོང་ཉིད་སྙིང་རྗེའི་སྙིང་པོ་ཅན་མེ་དང་ཚ་བ། ཆུ་དང་བརླན་གཤེར་འབྲལ་མི་ཤེས་པ་ལྟ་བུའི་སྙིང་རྗེའི་ཤུགས་ཡར་ལ་འཕེལ་ནས། སྔར་ལས་ལྷག་པར་སྙིང་རྗེ་ཇེ་ཆེར་སོང་ནས་འགྲོ་བ་ཡོངས་ལ་མ་ཡིས་བུ་བཞིན་དུ་སྙོམས་པའི་སྙིང་རྗེ་ཁྱད་པར་ཅན་སྐྱེ་རྒྱུ་དེ། རྫོགས་ཆེན་ལྟ་བ་རྟོགས་པའི་ཁྱད་ཆོས་ཡིན་ནོ། །འདི་ལ་ནོར་ས་ཡོད་པ་བསྟན་པ་ནི། ཐམས་ཅད་སྟོང་པ་ཉིད་དུ་ཐག་བཅད་ནས། །དགེ་སྤོང་སྡིག་ལ་འཛེམ་མེད་སྤྱད་གྱུར་ན། །ནག་པོ་ཁ་འབྱམས་བདུད་ཀྱི་ལྟ་བ་སྟེ། །དེ་འདྲའི་བདུད་ལྟའི་དབང་དུ་མ་ཤོར་གཅེས། །ཞེས་ཨོ་རྒྱན་ཆེན་པོས། ལྟ་བ་ནམ་མཁའ་བས་མཐོ་ཡང་། ལས་རྒྱུ་འབྲས་བག་ཕྱེ་བས་ཞིབ་པར་གྱིས་གསུངས་བཞིན་དུ། ལྟ་བ་དཔའ་དགོས་ཀྱང་སྤྱོད་པ་སྡར་དགོས། ལྟ་ཕྱོགས་སུ་སྤྱོད་པ་མ་ཤོར་གསུངས་པ་ལྟ་བུ་སྟེ། མདོར་ན་དད་དང་སྙིང་རྗེ་ཇེ་ཆེ་ཡིན་མིན་གྱིས་དབྱེ་བ་འབྱེད་རྒྱུའི་དོན་དེ་གསུངས་པ་རེད། འདི་རྣམས་རྫོགས་པ་ཆེན་པོའི་ངོ་སྤྲོད་དོ། །ཞེས་འཕྲལ་གྱི་དོན་བསྡུས་ནས། ལྟ་བའི་ངོ་སྤྲོད་ཀྱི་སྤྱིའི་དོན་བསྡུ་ནི། ངོ་སྤྲོད་འདི་རྣམས་ཤིན་ཏུ་གལ་ཆེ་སྟེ། །ཕྱི་རོལ་ཀུན་རྫོབ་སྣང་གྲགས་ཆོས་རྣམས་ཀུན། །ཐམས་ཅད་སྟོང་པ་ཉིད་དུ་མ་རྟོགས་པར། །ལྟ་བ་སྒོམ་ན་སྙམ་ཡང་ཅི་ཞིག་བསྒོམ། །དེ་ཡི་ཕྱིར་ན་དང་པོ་འདི་ལྟར་དུ། །རེས་འགའ་བླ་མར་གསོལ་བ་འདེབས་ཀྱིན་ལྟོས། །རེས་འགའ་གློད་ཀྱིན་བསྒྲིམས་ཀྱིན་ལེགས་པར་ལྟོས། །དེའི་ཚེ་དྲོད་རྟགས་འདི་འདྲ་འཆར་ཡོང་བ་སྟེ། དེ་ལྟར་བལྟས་ཚེ་སེམས་ལ་དགའ་བ་དང་། །ཐམས་ཅད་སྟོང་པ་ཉིད་དུ་ལམ་ལམ་དུ། །ཤར་ནས་ཕྱི་རོལ་སྣང་བའི་ཡུལ་རྣམས་ལ། །ལག་པས་རེག་ཀྱང་འཛིན་རྒྱུ་མེད་སྙམ་དང་། །ལྟ་བ་འདི་ཉིད་ངེས་པར་ཡིན་པར་འདུག །སྙམ་པའི་ངེས་ཤེས་གཏིང་ཚུགས་སྐྱེ་བར་ངེས། །དེ་དུས་ལྟ་བའི་ངེས་ཤེས་རྙེད་པ་ཡིན། །འཛིན་པས་མ་བསླད་འཛིན་མེད་ངང་ལ་གློད། །ངོ་སྤྲོད་ཐེབས་ནས་ཉམས་སུ་མ་ལོན་ཀྱང་། །འཆི་ཚེ་བར་དོར་འཇིགས་སྐྲག་ཅི་བྱུང་ཡང་། །ཐམས་ཅད་རང་སྣང་སྟོང་པའི་རང་གཟུགས་སུ། །ཤེས་ནས་ཀ་དག་གཞི་ལ་འཚང་རྒྱའོ། །དེས་ངོ་སྤྲོད་ཐེབས་པའི་ཕན་ཡོན་དང་དགོས་པ་གཉིས་ཀ་བསྟན་ནས། ངོ་སྤྲོད་མ་ཐེབས་པའི་སྐྱོན་གོང་གི་དེ་ལས་ལྡོག་པ་ཅི་ཞིག་ཡོད་སྙམ་ན། ངོ་སྤྲོད་མ་ཐེབས་ཉམས་སུ་ལེན་པ་དེ། །དཔེར་ན་ཚེས་པ་གཅིག་ནས་འཕྱུགས་པ་ན། །བཅོ་ལྔའི་བར་དུ་འཕྱུགས་པ་ཇི་བཞིན་ནོ། །ཀུན་རྫོབ་ཆོས་རྣམས་ཐམས་ཅད་བདེན་མེད་དུ། །མ་རྟོགས་སྟོང་ཉིད་རྟོགས་ཟེར་རྫུན་ཆེན་ཡིན། །དེས་ན་ངོ་སྤྲོད་འདི་བཞིན་དང་པོའི་དུས། །བླ་མའི་དྲུང་དུ་སྡོད་ལ་གནས་ལུགས་ཀྱི། །སྟེང་དུ་གཏན་ལ་ཕོབས་དང་གོལ་ས་མེད། །དེའི་ཕྱིར་སྐལ་ལྡན་བུ་རྣམས་སྙིང་ལ་ཆོངས། །ཞེས་གསུངས་ན། འདི་ཐམས་ཅད་པོ་དང་པོར་ངོ་རང་ཐོག་ཏུ་འཕྲོད། དེ་ནས་བར་དུ་ཐག་གཅིག་ཐོག་ཏུ་བཅད། ཐ་མར་གདེངས་གྲོལ་ཐོག་ཏུ་བཅའ་བའི་དགའ་རབ་རྡོ་རྗེའི་ཚིག་གསུམ་གནད་དུ་བརྡེག་པའི་མན་ངག་ལ་གཞིར་བཟུང་། དེའི་འཕྲོར་ཤྲཱི་སིངྷའི་ཆོས་ཟད་ཀ་དག་ཆེན་པོར་ལ་བཟླ་བ་དང་། བྱ་བྲལ་ཟང་ཐལ་རྗེན་པར་འགག་བསྡམ་པ་དང་། ཡོངས་གྲོལ་མཉམ་པར་ཆེན་པོར་ཆིངས་སུ་བཅིང་སྟེ། དེའི་སྟེང་དུ་ཛྙ་ན་སཱུ་ཏྲའི་བཞག་ཐབས་རྣམ་པ་བཞིའི་མན་ངག་ཚོ་ལ་བསྟུན་ན། རང་གནས་ཆོས་སྐུའི་དགོངས་པ་ཡེ་ཤེས་སུམ་ལྡན་གྱི་བདག་ཉིད། སློབ་དཔོན་པདྨ་ཀཱ་རས་བསྟན་པའི་ངོ་བོ་རང་བཞིན་ཐུགས་རྗེའི་བདག་ཉིད་ཅན། ཡེ་བབས་རང་བཞག་གི་གནས་ལུགས་སྣང་བ་ཕྱིར་མ་ཆད། འཛིན་པ་ནང་དུ་མ་ཞུགས། བར་དུ་སྒོམ་འཛིན་གྱི་གཉེན་པོ་མ་སླེབས་པའི། གདོད་ནས་རང་བཞིན་རྣམ་དག་ཏུ་ཡོད་པའི་རིག་པ་བློ་འདས་འཛིན་མེད་ཀྱི་ངང་བསྐྱངས་པ་ཡིན་ན་བསྒོམ་བྱ་མ་འཁྲུལ་བའི་རྫོགས་ཆེན་ཡིན་པར་གསུངས་ཤིང་། ཉམས་རྟོགས་ཀྱི་ཡོན་ཏན་ཅུང་ཟད་ཅིག་སྐྱེས་ཡོང་དུས་ང་རྒྱལ་གྱིས་ཁེངས་བར་འདུག་ན་གོང་མའི་ཡོན་ཏན་དྲན་པར་བྱོས། ཚེ་འདིར་ཆགས་ན་མི་རྟག་པ་སྒོམས། ཉམས་ལ་ཞེན་པ་ཡོད་ན་མར་ལ་བཤིག་ནས་སྒོམས། བྱམས་སྙིང་རྗེ་མེད་ན་འགྲོ་དྲུག་ཕ་མ་ཡིན་པར་སྒོམས། རིག་པས་རྐྱེན་མི་ཐུབ་པ་དེ་འདྲ་བྱུང་ན་རྐྱེན་སྣང་བསྲེས་ནས་སྒོམས། ཤར་གྲོལ་རྟོག་པ་ལ་འབྱམས་པར་ཕྱོགས་ན་ཡང་ཞི་གནས་སྒོམས། ཡང་ངང་དྭངས་བདེ་ཆགས་ལ་འབྱམས་པར་འདུག་ན་སྣང་བ་གཟེངས་སུ་བསྟོད་རྣམ་རྟོག་སྣ་ཚོགས་སུ་སྤྲོས་ནས་ཤར་གྲོལ་འཛིན་མེད་ལ་སྦྱོངས་དང་གེགས་སེལ་ཡོང་གསུངས་ཤིང་། ལས་དང་པོ་བས་ངེས་ཤེས་མི་སྐྱེ་བའི་དུས་སུ་དཔྱད་སྒོམ་བྱེད་པ་དང་། ངེས་ཤེས་མ་ཉམས་པའི་སྐབས་སུ་འཇོག་སྒོམ་བྱེད་པ་དེ་འདྲའི་མན་ངག་ཡོད་པ་ཡིན། མདོར་ན་ཐོག་མར་ངོ་འཕྲོད་རྒྱུ་གནད་ཆེ་བ་དང་། ངོ་འཕྲོད་ཚར་དུས་དེའི་ངང་ལ་བཞག་ན་སྒོམ་དེ་མྱོང་སྟོབས་ཀྱིས་ཤར་བ་ཡིན་པས། དེའི་འོད་གསལ་དེ་ངོས་ཟིན་དུས་བཤད་པ་བརྒྱ་བས་མྱོང་བ་གཅིག་གིས་ལྷག་པ་ཡིན། དེའི་གོ་མྱོང་རྟོགས་པའི་རིམ་པ་དེ་བརྒྱུད་ན། ལམ་སྟེགས་ཀྱི་ཡོན་ཏན་རྒྱུད་ཞི་དུལ་དང་སྙིང་རྗེ་ཆེ་བ་ལ་སོགས་པ་གོང་ནས་གསུངས་པ་ལྟར་འབྱུང་བ་ཡིན། དེ་ཡན་གྱིས་ལྟ་བ་གཙོ་བོར་བསྟན་ནས་འདི་ནས་སྒོམ་པ་གཙོ་བོར་བསྟན་པ་ཡིན་ནམ་སྙམ། སྤྱིར་ན་ལྟ་སྒོམ་སྤྱོད་འབྲས་གཅིག་ལ་གཅིག་འབྲེལ་རེད། ཁྱད་པར་དུ་མན་ངག་མྱོང་ཁྲིད་ལ་མཐའ་གཅིག་ཏུ་ས་བཅད་ཀྱི་དབྱེ་མཚམས་གཅོད་མི་དགོས། ཨེ་མ་ཧོ། ད་ཡང་སྐལ་ལྡན་རིགས་ཀྱི་བུ་རྣམས་ཉོན། །དེ་ལྟར་ལྟ་བའི་གནས་ལུགས་ཁོང་ཆུད་ནས། །འཁོར་ཡུལ་ཆགས་སྡང་འབྲེལ་ཐག་རྦད་ཀྱིས་ཆོད། །ཅེས་གསུངས་ན། རབ་ཤེས་རབ་ཅན་གྱིས་གནས་ལུགས་ལྟ་བའི་ཐོག་ནས་ངོ་འཕྲོད་དེ་ཐག་ཆོད་པ་དང་། བརྩོན་འགྲུས་ཅན་གྱིས་ཉམས་ལེན་སྒོམ་པའི་ངང་བསྐྱངས་པ་ལ། འཁོར་བར་འཁྲུལ་སྣང་གི་ཆགས་ཞེན་དང་སྡང་ཟུག་བྱེད་སའི་ཡུལ། གྲོང་ཡུལ་བདུད་ཀྱི་བཙོན་ར་དང་འབྲེལ་ཐག་བཅད་དེ་བློ་ཐག་རང་གིས་བཅད། སྣ་ཐག་མགོར་བཟེད་དེ་མི་མེད་དབེན་པའི་རི་ཁྲོད་གང་ནས་དམ་པ་གོང་མའི་ཉམས་རྟོགས་ཀྱི་ཡོན་ཏན་བརྙེས་ས་ཞིག་ལ་སོང་ནས་བསྡད་དེ་བསྒོམ་དགོས་པར་གསུངས་པ་སྟེ། ཁྱིམ་ན་གནས་པ་ཞིག་ལ་མཚོན་ན་དྲིན་ཆེ་བའི་ཕ་མ་དང་གཉེན་བཤེས། མཛའ་བརྩེའི་བུ་ཚ་དང་མཐུན་གྲོགས་ལ་སོགས་པ་ཡོད་ཅིང་། ཁྱིམ་ནས་བུད་དེ་དགོན་པའི་གྲྭ་ས་འགྲིམས་པ་ཞིག་ལ་མཚོན་ན། གྲྭ་རོགས་གྲོགས་མཆེད་སྤུན་སྲིང་གཉེན་ཉེ་དང་འབྲལ་མི་དོ་ས་ལོས་ཡོད་ཀྱང་། མི་འབྲལ་པར་འདི་ལྟར་ཆགས་སྡང་ལས་འབྲེལ་གྱི་གཡེང་བའི་ནང་ནས། ཉིན་འགར་སྡུག་མཉམ་མྱོང་བྱས་པའི་མཚམས་སུ། ཉིན་ཞིག་གློ་བུར་དུ་འཆི་ནས་རང་དབང་མེད་པར་ཕྱི་མའི་ཡུལ་ལ་འགྲོ་རན་དུས་ཁ་མི་ཐོར་ཟེར་ས་ཡོད་པ་མ་ཡིན། དེ་བས་བློ་ལག་ན་ཡོད། རང་དབང་རང་ལག་ན་ཡོད་དུས། རང་གཞན་གཉིས་ཀའི་དོན་དག་ལ་དམ་པའི་ཆོས་རྣམ་དག་ཅིག དེ་ཡང་མིང་ཙམ་མ་ཡིན་པ་དོན་གྱིས་འགྲུབ་པ་ཞིག་བྱས་ན། འབྲལ་མེད་ཚེ་རབས་གཏན་དུ་ཞིང་དག་པ་ཞིག་གམ་དེ་མིན་ན་ཡེ་ཤེས་གཅིག་གི་རང་སྣང་ལ། ཟག་མེད་ཀྱི་དགའ་བས་བདེ་ཞིང་སྐྱིད་པ་འདུ་འབྲལ་མེད་པ་ཞིག་མཉམ་དུ་སྐྱོང་ཆོག་པ་ལ་བསམ་ནས་ཕུགས་དང་ཡུན་གྱི་འདང་ཕོག་དགོས་པ་ཡིན། རིག་འཛིན་གང་ཤར་རང་གྲོལ་གྱིས། ཕ་ཡུལ་རྒྱལ་ཁམས་ཀྱི་ཕྱོགས་མེད། །དགོན་གཞིས་ངེས་མེད་ཀྱི་རི་ཁྲོད། །ཉེ་འབྲེལ་རིགས་དྲུག་གི་སེམས་ཅན། །ཡན་པ་བློ་བདེ་ཞིག་སྐྱིད་པ། །གསུངས་ས་དེ་རེད། རི་ཁྲོད་དབེན་གནས་ཡིན་ཡང། ཡང་གྲོགས་གཅིག་གཉིས་ལ་སོགས་མང་པོ་ཞིག་འཚོགས་བཞག་ན་རྣམ་གཡེང་འདུ་འཛི་རང་ཤུགས་ཀྱིས་འཁོར་ཡོང་བ་རེད། གང་ནས་ཡེངས་ན་ཡེངས་པ་རེད། སློབ་དཔོན་ཨ་བ་དྷི་ཏིས། མང་པོ་རྟག་ཏུ་འཐབ་འགྱུར་ཏེ་གསུངས་ཡོད་པ་རེད། མི་མང་པོ་ཞིག་མཉམ་དུ་བསྡད་དུས། ཡུན་རིང་ན་གཅིག་གིས་གཅིག་ལ་བླ་བཙག་རྒྱུ་དྲན། གཅིག་གིས་གཅིག་གི་སྐྱོན་མཐོང་། དེའི་རྐྱེན་གྱིས་འཁོན་ཞིང་འཐབ། གཉིས་པོ་དག་ནི་འགྲན་ཟླར་འགྱུར་གསུངས་པ་རེད། བླ་མ་འདྲ་འདྲ་གཉིས། དགོན་པ་འདྲ་འདྲ་གཉིས། ཁྱིམ་མཚེས་འདྲ་འདྲ་གཉིས་མཉམ་དུ་ཡུན་རིང་ལ་སྡད་ན། དེའི་ནང་ན་ཆགས་སྡང་ཕྲག་དོག་མ་ཞི་བ་འདྲ་ཡོད་ན་ནམ་ཞིག་འགྲན་ཟླར་འགྱུར་བ་རེད། གཞོན་ནུ་མ་ཡི་གདུ་བུ་བཞིན། །གཅིག་པུར་རྣམ་པར་རྒྱུ་བར་བྱ། །གསུངས་ཡོད་པ་རེད། གཞོན་ནུ་མས་ལག་གདུབ་གཉིས་མཉམ་དུ་དྲངས་ན་ཧྲོག་སྒྲ་དང་ཁྲོག་སྒྲ་གྲགས་ཡོང་ནི་རེད། གཅིག་ཁེར་རུ་མ་སྒྲ་མེད་རྣམ་པར་ཞི་བ་ཡིན་པས་ན། གཅིག་པུར་ནགས་ཀྱི་གསེབ་དང་རི་སུལ་དུ། །གནས་དབེན་པ་གཅིག་པུས་དབེན་པའི་མིང་ཡོད་པ་མ་ཡིན་པས། ལུས་ཀྱི་བྱ་རྩོལ་ཐོངས་ལ་རྣལ་མར་སྡོད། །ངག་གིས་སྨྲ་བརྗོད་ཆོད་ལ་བརྗོད་མེད་ཀྱིས། །སེམས་ནི་ནམ་མཁའ་བསམ་པའི་ཡུལ་ལས་འདས། །དེ་ཡི་ངང་ལ་བཏང་བཞག་མེད་པར་གློད། །ཅེས་སྒོ་གསུམ་དབེན་པ་བསྟེན་པ་དང་མཉམ་དུ་སེམས་ཀྱི་བཞག་ཐབས་བསྟན་ཏེ། བཞག་ཐབས་དེ་ལ་བཞག་པའི་བསམ་གཏན་སྒོམ་སྐྱོན་མེད་དེ་ཅི་འདྲ་ཞིག་ཡིན་ཞེ་ན། སེམས་ལ་གཏད་སོ་མེད་ན་ལྟ་བ་ཡིན། །བསྒོམ་དུ་མེད་པའི་ངང་ལ་གནས་པར་གྱིས། །ཐོབ་མེད་རྫོགས་ཆེན་འབྲས་བུ་འཐོབ་པར་མཛོད། །ཅེས་མདོར་བསྟན་པ་སྟེ། གཏད་མེད་ཀློང་ཆེན་གྱི་དགོངས་པ་ཇི་འདྲ་ཞིག་ཡིན་ན། ཡེ་བཞག་བཅོས་བསླད་དང་བྲལ་བ་སྒོམ་མེད་རྫོགས་ཆེན་གྱི་སྒོམ་པར་གནས་ན། གཞི་ནས་ཐོབ་མེད་རྫོགས་ཆེན་གྱི་འབྲས་བུ་སྤང་བླང་རེ་དོགས་དང་བྲལ་བ་ཐོབ་པ་ཡིན་པས་དེ་ལྟར་མཛོད་ཅེས་པའོ། །དེའི་དོན་རྒྱས་པར་བཤད་པ་ནི། དེ་ཡང་ལྟ་བར་མཉམ་པར་འཇོག་པའི་ཚེ། །འདི་ལྟར་རིག་པའི་ངང་ལ་འཇོག་སྙམ་དང་། །བྱིང་རྒོད་དབང་དུ་ཤོར་འགྲོ་སྙམ་བྱེད་ཀྱི། །རྟོག་པའི་དྲྭ་བ་གང་གིས་མི་བཅིངས་པར། །དམིགས་གཏད་ཆོས་མེད་ཧར་སང་རྒྱ་ཡན་ངང་། །ཟང་ཐལ་ཁ་ཡན་ཉིད་དུ་གློད་ལ་ཞོག །བློ་ཡི་ཆོས་ཀྱིས་བློ་འདས་དོན་མི་མཐོང་། །བྱས་པའི་ཆོས་ཀྱིས་བྱར་མེད་སར་མི་སླེབས། །བློ་འདས་བྱར་མེད་དོན་དེ་ཐོབ་འདོད་ན། །བཅོས་བསླད་མ་བྱེད་རིག་པ་གཅེར་བུར་ཞོག །ཅེས་གསུངས། ལྟ་བ་རང་བྱུང་གི་ཡེ་ཤེས་ལ་མཉམ་པར་འཇོག་པའི་དུས། གཞན་བྱུང་རྟོག་དཔྱོད་དང་འདྲེས་པའི་ལྟ་སྒོམ་དང་བསྲེས་ནས་སྒོམ་གོ་ཆོད་པ་མ་རེད། རིག་པ་ལམ་བྱེད་རྫོགས་ཆེན་གྱི་སྐབས་སུ། ཐད་ཀའི་རིག་པ་སྤྲོས་པ་ཀུན་དང་བྲལ་བ། བྱར་མེད་བྱས་ཆོས་ལས་འདས་པ་དེ་ཉིད། ཡེ་ནས་སངས་རྒྱས་སུ་གྲུབ་ཟིན་པས་ན། རང་བཞིན་གསལ་འགྲིབ་མེད་པ་ཉི་མའི་སྙིང་པོ་འདྲ་དེའི་ངང་དེར་བཞག་དུས། ཟུར་ཞིག་ནས་རྟོག་པའི་དྲྭ་བར་འཆིང་བྱེད་ཀྱི་ཐག་པ་དམིགས་གཏད་ཅན་ཞིག་བཙལ་འདུག་དགོས་པ་མ་ཡིན་ལ། དེས་ན་སྣ་ཚོགས་སྤྲོས་པའི་སྒྲིབ་བྱེད་ཀྱི་གོས་སྐོན་མི་འདུག་པར་རིག་པ་ཟང་ཐལ་རྗེན་པ་གཅེར་བུ་དེ་ལྷང་ལ་ཕུད་ནས་བཅས་བཅོས་མེད་པར་ཞོགས་ལ་ཐོངས་ཞེས་པའོ། །དེ་ལྟར་བཞག་ནས། གཟུང་འཛིན་ཀུན་བྲལ་ལྟ་བའི་མཆོག་ཡིན་ནོ། །སྤང་བླང་མེད་པ་སྒོམ་པའི་མཆོག་ཡིན་ནོ། །བྱ་རྩོལ་ལས་འདས་སྤྱོད་པའི་མཆོག་ཡིན་ནོ། །རེ་མེད་རང་གནས་འབྲས་བུའི་མཆོག་ཡིན་ནོ། །ཞེས་གསུངས་ཏེ། གཟུང་དང་འཛིན་པ་གཉིས་འཛིན་གྱི་སྒྲོག་ལས་གྲོལ་བ་དེ་ལྟ་བའི་མཆོག་དང་། བཟང་ངན་སྤང་བླང་མེད་པ་ཕྱོགས་ཡན་མཉམ་པ་ཆེན་པོར་གནས་པ་དེ་སྒོམ་པའི་མཆོག འདི་བྱ་འདི་བྱེད་བློའི་འཛིན་རྩོལ་ལས་འདས་སོང་བ་ནི་སྤྱོད་པའི་མཆོག རེ་དོགས་ཉམ་ང་དང་བྲལ་བ་རང་གནས་ཆོས་ཉིད་ཀྱི་དགོངས་པ་ལས་མི་གཡོ་བ་འབྲས་བུའི་མཆོག་ཡིན་གསུངས་ནས་ལྟ་སྒོམ་སྤྱོད་འབྲས་གསུམ་པོ་ངོས་བཟུང་ནས་། བལྟས་པས་མི་མཐོང་ལྟ་བའི་འཚོལ་འཕྲོ་ཞོག །བསྒོམས་པས་མི་རྙེད་དྲན་འཛིན་དམིགས་གཏད་དོར། །སྤྱོད་པས་མི་འགྲུབ་སྒྱུ་མར་འཛིན་པ་ཐོངས། །བཙལ་བས་མི་རྙེད་འབྲས་བུའི་རེ་བ་བོར། །ཞེས་གསུངས་ཏེ། རྫོགས་ཆེན་གྱི་ལྟ་བ་དེ་སེམས་ཀྱིས་བཙལ་ནས་རྙེད་འོང་རྒྱུ་ཞིག་དང་། ཆེད་འཛིན་གྱི་སྒོམ་པས་བསྒོམས་ནས་གོམས་ཡོང་རྒྱུ་ཞིག བཅོས་མའི་སྤྱོད་པས་བསྒྲུབས་ནས་འགྲུབ་ཡོང་རྒྱུ་དེ་འདྲ་མིན། ཡང་རེ་བ་དང་དོགས་པས་བཅིངས་པའི་འབྲས་བུ་ཞིག་ཀྱང་ག་ཤེད་ཅིག་ནས་ཐོབ་ཡོང་རྒྱུ་ཞིག་ཀྱང་མེད་ཅེས་ལྟ་སྒོམ་སྤྱོད་འབྲས་ཀྱི་འཕྲང་བསལ་བ་ཡིན། དེས་ན་ཇི་ལྟར་བྱེད་དགོས་པ་རེད་ཟེར་ན། ད་ལྟའི་ཤེས་པ་བཟོ་མེད་ལྷུག་པ་ལ། །ཕྱོགས་རིས་མ་བྱེད་འཛིན་པས་མ་བསླད་ཅིག །ཅེས་གསུངས་དུས། ཕྱི་རོལ་ཡུལ་སྣང་ཙམ་དུ་ཡང་སྣ་ཚོགས་སྣང་བ་ཇི་ལྟར་སྣང་ཡང་སེམས་ཀྱིས་དེ་ལྟར་མི་འཛིན་ཞིང་། མི་འཛིན་པ་ཙམ་དུ་ཡང་མི་འཆང་བར། ད་ལྟའི་ཤེས་པ་བཅོས་བསླད་དང་བྲལ་བ་ཤར་གནས་གང་ཡིན་གྱི་ཐོག་ཏུ་བཅས་བཅོས་སྤང་གཉེན་མེད་པར་ཞོག་ལ་ཞོག་དང་གང་སྣང་ཆོས་ཉིད་ཀྱི་ཀློང་དུ་འགྱུར་བ་ཡིན་ཞེས་གདམས་པ་དེ་ལྟར་གནང་བ་ཡིན། དེ་ལྟར་ཕྱོགས་འཛིན་གྱིས་མ་བསླད་པ་དེ་ལྟ་སྒོམ་སྤྱོད་འབྲས་ཀྱི་རྩེ་མོ་དང་མཆོག་ཡིན་ལུགས་ནི། ད་ལྟའི་རིག་པ་དངོས་མེད་གསལ་བ་འདི། །འདི་ཀ་ལྟ་བ་ཀུན་གྱི་ཡང་རྩེ་ཡིན། །དམིགས་གཏད་ཁྱབ་གདལ་བློ་དང་བྲལ་བ་འདི། །འདི་ཀ་སྒོམ་པ་ཀུན་གྱི་ཡང་རྩེ་ཡིན། །མ་བཅོས་འཛིན་མེད་ལྷུག་པར་བཞག་པ་འདི། །འདི་ཀ་སྤྱོད་པ་ཀུན་གྱི་ཡང་རྩེ་ཡིན། །མ་བཙལ་ཡེ་ནས་ལྷུན་གྱིས་གྲུབ་པ་འདི། །འདི་ཀ་འབྲས་བུ་ཀུན་གྱི་ཡང་རྩེ་ཡིན། །ལྟ་བའི་སྙིང་པོ་སྟོང་གསལ་འཛིན་མེད་ལྟོས། །སྒོམ་པའི་སྙིང་པོ་རང་གྲོལ་འཛིན་མེད་སྐྱོངས། །སྤྱོད་པའི་སྙིང་པོ་ཚོགས་དྲུག་ལྷུག་པར་ཞོག །འབྲས་བུའི་སྙིང་པོ་རེ་དོགས་ཞིག་པ་ཡིན། །མུ་མཐའ་བྲལ་ན་ལྟ་བའི་རྒྱལ་པོ་མཆོག །གཟའ་གཏད་བྲལ་ན་སྒོམ་པའི་རྒྱལ་པོ་མཆོག །བླང་དོར་བྲལ་ན་སྤྱོད་པའི་རྒྱལ་པོ་མཆོག །རེ་དོགས་བྲལ་ན་འབྲས་བུའི་རྒྱལ་པོ་མཆོག །ཅེས་གསུངས། ཐ་མལ་གྱི་ཤེས་པའམ་ཐད་ཀའི་ཡེ་ཤེས། ད་ལྟའི་རིག་པ་སྟོང་གསལ་འཛིན་པ་དང་བྲལ་བ། རྒྱར་ཆད་པ་དང་ཕྱོགས་སུ་ལྷུང་བ་མེད་པ། སྣང་ཆ་ནས་རྨི་ལམ་སྒྱུ་མ་ལྟ་བུའི་རོལ་བར་ཤར་བསྡད་ཀྱང་། སྟོང་ཆ་ནས་སྤྲོས་པའི་མཐའ་ཐམས་ཅད་དང་བྲལ་བ། དཔེ་བཞག་ན་ནམ་མཁའ་ལྟ་བུའི་ཆོས་ཉིད། དགོངས་པའི་གནས་ལུགས་རང་ངོ་ཤེས་པ་དེ་ལྟ་བའི་རྩེ་མོ་དང་། མཆོག་ཏུ་གྱུར་པ་ལྟ་བའི་རྒྱལ་པོ། ཁྱབ་གདལ་བློ་འདས་ཆེན་པོ་རང་གྲོལ་འཛིན་མེད་ངང་མདངས་ཀ་དག་གི་དགོངས་པར་གནས་པ་དེ་སྒོམ་པའི་མཆོག་དང་། མ་བཅོས་འཛིན་མེད་ཚོགས་དྲུག་ཡན་ལ་བོར་བ་གཉིས་མེད་ཡོངས་གྲོལ་གྱི་སྤྱོད་པའི་མཆོག་ཡིན། མ་བཅོས་ལྷུན་གྲུབ་རེ་དོགས་ཐད་ཀར་ཞིག་པ། མཉམ་རྫོགས་ཟང་ཐལ་ཆེན་པོའི་དགོངས་པ་ལས་མི་གཡོ་བ་དེ། འབྲས་བུའི་རྩེ་མོའམ་མཆོག་དང་རྒྱལ་པོ་ཡིན་པའི་ཆིངས་ཀྱིས་བཅིངས་ནས་བསྟན་པའོ། །བལྟ་རུ་མེད་ཀྱིས་ལྟ་བའི་དམིགས་གཏད་དོར། །བསྒོམ་དུ་མེད་ཀྱིས་གང་བྱུང་གང་བདེར་ཐོངས། །སྤྱད་དུ་མེད་ཀྱིས་དགག་སྒྲུབ་སྤང་བླང་ཁྲོལ། །འཐོབ་རྒྱུ་མེད་ཀྱིས་འབྲས་བུའི་རེ་བ་བོར། །གང་ཡིན་ཡིན་གྱིས་ཆེད་འཛིན་མ་བྱེད་ཅིག །འདི་ཡིན་མེད་ཀྱིས་དགག་སྒྲུབ་མ་བྱེད་ཅིག །གཟའ་གཏད་མེད་ཀྱིས་ཕྱོགས་རིས་མ་བྱེད་ཅིག །ཅེས་གསུངས་ཏེ། བལྟར་མེད་རིག་པ་བློ་འདས་ཀྱི་ཆོས་ལ། སྒོ་གསུམ་རྩོལ་སྒྲུབ་ཀྱི་ངལ་བ་བྱས་ནས་བལྟ་དགོས་སྙམ་པའི་ལྟ་བའི་དམིགས་གཏད་དེ་དོར། སྒོམ་མེད་ལ་དེ་བཞིན་དུ་སྒོམ་བྱ་ཅན་དུ་འཆོས་མ་འདུག སྤྱད་མེད་ཀྱི་སྤྱོད་པ་ལ་དགག་སྒྲུབ་བླང་དོར་ཞོག་ལ་ཐོངས། འཐོབ་བྱ་མཐར་ཐུག་གི་འབྲས་བུ་ལ་རེ་བའི་འཛིན་ཞེན་སྐྱུར་ལ། གང་ཡིན་ཡིན་པར་ཞོག གང་མིན་མིན་པར་ཞོག་ལ་ཐོངས། དགག་སྒྲུབ་བཅོས་བསླད་དང་གཟའ་གཏད་ཞེན་འཛིན་ཅན་གྱི་ཕྱོགས་དང་རིས་སུ་བཅད་པ་བོར་ནས། བྱར་མེད་ཆེན་པོའི་རྣལ་འབྱོར་གྱི་ངང་ལ་བཞག་བྱ་འཇོག་བྱེད་དང་བྲལ་བར་ཞོག་ཅེས་བྱར་མེད་ཀྱི་དགོངས་པའི་འགག་བསྡམས་པའོ། །འདི་ནས་མཐར་ཐུག་སྙིང་པོའི་ལམ་ཁྱེར་བསྟན་པ་ནི། གདོད་ནས་དག་པའི་རང་རིག་རང་གསལ་ལ། །བསམ་ཡུལ་བློ་ལས་འདས་པས་བལྟ་རུ་མེད། །ངོ་བོ་གཞི་ནས་བྲལ་བས་བསྒོམ་དུ་མེད། །རང་གྲོལ་མཐའ་ལས་འདས་པས་སྤྱད་དུ་མེད། །རྩོལ་སྒྲུབ་ཞེན་པ་ལས་འདས་འབྲས་བུ་མེད། །ངོ་བོ་སྟོང་ཉིད་ཡིན་པས་སྤང་ཐོབ་མེད། །རང་བཞིན་གསལ་སྟོང་ཡིན་པས་རྩོལ་སྒྲུབ་ཞིག །ཐུགས་རྗེ་འགགས་མེད་ཡིན་པས་ཕྱོགས་རིས་མེད། །གང་ལྟར་ཤར་ཡང་དེ་ལྟར་མ་འཛིན་ཅིག །རྣལ་འབྱོར་ཤེས་པ་ནམ་མཁའི་བྱ་ལམ་འདྲ། །བྱ་རྗེས་སྔ་མ་འགགས་ནས་མི་མཐོང་ལྟར། །དྲན་བསམ་སྔ་མ་འགག་ཅིང་མཐོང་བ་མེད། །དེ་ལ་རྗེས་བསྙེགས་འཛིན་པས་མ་མཐུད་ཅིག །བྱ་རྗེས་ཕྱི་མ་མ་འོངས་དངོས་མེད་ལྟར། །དྲན་བསམ་ཕྱི་མས་བསུ་མ་མ་བྱེད་ཅིག །བྱ་རྗེས་ད་ལྟ་ཁ་དོག་དབྱིབས་མེད་ལྟར། །ད་ལྟའི་དྲན་བསམ་ཐ་མལ་རང་འགྲོས་ལ། །འདི་ཞེས་གཉེན་པོས་བཅོས་བསླད་མ་བྱེད་ཅིག །ཇི་ལྟར་ཤར་ཡང་དེ་ལྟར་མ་འཛིན་ཅིག །འདི་ནི་མཐར་ཐུག་སྙིང་པོའི་ལམ་ཁྱེར་ཡིན། །ཞེས་གསུངས་ཏེ། གདོད་ནས་དག་པ་རིག་པ་སྟོང་གསལ་བློ་ལས་འདས་པ། གཞི་དང་རྩ་བ་བྲལ་བ། རང་གྲོལ་རྩོལ་སྒྲུབ་ལས་འདས་པ་ནི། ངོ་བོ་སྟོང་ཉིད་ཡིན་པས་ན་གང་སྣང་སྤང་ཐོབ་དང་བྲལ་བ་ཡིན། རང་བཞིན་གསལ་སྟོང་ཡིན་པས་ན་ཅི་ཤར་ལ་རྩོལ་སྒྲུབ་བྱེད་མི་དགོས་བྱར་མེད་པས་བྱ་རུ་མི་བཏུབ། ཐུགས་རྗེ་འགགས་མེད་ཅི་ཤར་རིག་སྟོང་རྗེན་པ་ལ་ཕྱོགས་རིས་གྱི་ཡུལ་ཞིག་མེད། དེས་ན་གང་ལྟར་ཤར་ཡང་དེ་ལྟར་འཛིན་རྒྱུ་མེད་པའི་དཔེ་ཇི་འདྲ་ཞིག་བཞག་པ་ཡིན་ན་ནམ་མཁའི་བྱ་ལམ་འདྲ་བ་ཞིག་ཡིན། བྱ་ལམ་སྔོན་རྗེས་བར་གསུམ་དང་དྲན་བསམ་སྔོན་རྗེས་བར་གསུམ་གཉིས་ཀ་འདྲ་བ་ཡིན། རྣལ་འབྱོར་མཁའ་མཉམ་གྱི་དགོངས་པ་བྱ་བྲལ་ནམ་མཁའི་ཁོར་ཡུག་ལྟ་བུ་ཞིག་ཡིན་ན། རྩལ་སྣང་གློ་བུར་གྱི་བྱ་རྗེས་ལ་རྗེས་སྙེག་ཡོང་རྒྱུ་མེད་པ་བཞིན་དུ་མ་བཅོས་མཉམ་པ་ཆེན་པོར་བཞག་ནས། ཇི་ལྟར་ཤར་ཡང་དེ་ལྟར་མ་འཛིན་ཞེས་གདམས་པ་ཚིག་གཅིག་ཏུ་མཐར་ཐུག་གི་འགག་བསྡམས་པའི་སྙིང་པོ་དོན་གྱི་ལམ་ཁྱེར་གྱི་མན་ངག་ཏུ་བསྟན་པའོ། །མ་སྒོམ་མངོན་སུམ་སྣང་བའི་ལྟ་སྒོམ་སྤྱོད་འབྲས་ཀྱི་གདམས་པ་བསྟན་པ་ནི། གང་ལྟར་ཤར་ཡང་དེ་ལྟར་མ་བཟུང་ན། །ཉོན་མོངས་རང་ཡལ་ཡེ་ཤེས་ཆེན་པོ་ཡིན། །སྐྱེ་མེད་བསམ་འདས་ཡེ་གྲོལ་ལྟ་བ་སྟེ། །ནན་ཏན་བྱས་ན་བལྟ་རྒྱུ་མེད་པ་ལགས། །རང་བབས་ལྷོད་ཆགས་རང་གནས་བསྒོམ་པ་སྟེ། །ནན་ཏན་བྱས་ན་བསྒོམ་རྒྱུ་མེད་པ་ལགས། །སྤང་བླང་གཉིས་མེད་སྒྱུ་མའི་སྤྱོད་པ་སྟེ། །ནན་ཏན་བྱས་ན་སྤྱོད་རྒྱུ་མེད་པ་ལགས། །རེ་དོགས་གཉིས་མེད་འབྲས་བུའི་རང་བཞིན་སྟེ། །ནན་ཏན་བྱས་ན་འབྲས་བུ་མེད་པ་ལགས། །ཞེས་གསུངས་ན། ཉོན་མོངས་རྣམ་རྟོག་རང་ཡལ་བྱ་ལམ་རྗེས་མེད། སྐྱེ་མེད་བསམ་ཡུལ་ལས་འདས་པའི་ཡེ་གྲོལ་ཆེན་པོ་ཡིན་པ་དེར། བྱས་ཆོས་བྱ་རྩོལ་གྱིས་ཇི་འདྲའི་ནན་ཏན་མཐར་ཆགས་ཤིག་བྱས་ནས་བལྟས་ཀྱང་། བལྟར་མེད་ཀྱི་རིག་པ་སྤྱི་བླུགས་ཀྱི་ལྟ་བ་ལ། བལྟ་ཡོང་རྒྱུའི་བལྟ་བྱ་ཞིག་དང་། མཐོང་བཞག་རྒྱུའི་མཐོང་བའི་མཐོང་འབྲས་ཤིག་མེད། ལྟ་བ་བལྟར་མེད་དེའི་ངང་ལ་རང་བབས་ཀྱིས་ལྷོད་ཀྱིས་རྒྱུན་ཆགས་པར་འཇོག་རྒྱུ་ཕན་སྒོམ་པ་ལ་ནན་ཏན་བྱས་ཡོང་ས་ཞིག་དང་། སྤང་བླང་དགག་སྒྲུབ་དང་བྲལ་བའི་སྤྱོད་པ་རེ་དོགས་གཉིས་འཛིན་ལས་འདས་པའི་འབྲས་བུ་ལ་ནན་ཏན་བྱས་ཀྱང་། བྱིས་པས་བྱེ་མའི་མཁར་ལས་བྱས་པ་འདྲ་འདྲ་ཡིན་པའི་ཕྱིར་ན། བྱར་མེད་ཆེན་པོའི་རྣལ་འབྱོར་ལ་ལ་བཟླ་བར་བསྟན་པ་རེད། ད་འདི་ནས་ངོ་མཚར་བའི་རྒྱལ་བའི་དགོངས་པ་རང་གནས་མངོན་སུམ་དུ་མཐོང་བའི་བློ་བདེའི་གཟེངས་སུ་བསྟོད་པ་ནི། དུས་གསུམ་རྩ་བ་བྲལ་བའི་སེམས་ཉིད་འདི། །མ་བསྒོམ་མངོན་སུམ་སྣང་བ་བློ་རེ་བདེ། །ཐོག་མ་ཐ་མ་རང་བཞིན་དག་པའི་ཆོས། །ཡེ་གྲོལ་ཡོངས་གྲོལ་འབད་རྩོལ་ཞིག་པ་མཚར། །ཐ་མལ་ཤེས་པ་བཟོ་མེད་ལྷུག་པ་འདི། །རྒྱལ་བའི་དགོངས་པ་མཐའ་བྲལ་ཀློང་ཡངས་ཡིན། །ཞེས་གསུངས་ཏེ། དུས་གསུམ་གཞི་རྩ་བྲལ་བའི་སེམས་ཉིད། དུས་གསུམ་དུས་ལས་འདས་པ། བཞི་ཆ་སུམ་བྲལ་གྱི་རིག་པ། སྐད་ཅིག་མ་གསུངས་རྒྱུ་ཞིག་ཡོད་པ་དེ། གཞི་གྲོལ་ཡངས་པ་ཆེན་པོ་ཡིན་པ་རེད། དེ་ལྟ་བུའི་གཞི་གྲོལ་ཡངས་པ་ཆེན་པོའི་དོན་དེ། མ་སྤངས་ཡོངས་རྫོགས་བཞི་ཆ་སུམ་བྲལ་གྱི་དགོངས་པ་ཟེར་ན། གསུམ་ལས་འདས་པའི་བཞི་བའི་ཆ་གསུངས་པ་རེད། གཞི་གྲོལ་ཡངས་པ་ཟེར་དུས་ག་གཞི་རེད། གཞི་མེད་ཆེན་པོའམ་གཞི་གྲོལ་ཡངས་པ་ཆེན་པོ་མ་སྤངས་ཡོངས་རྫོགས་སུ་གྲོལ་ནས་མ་སྒོམ་མངོན་སུམ་དུ་མཐོང་བ་དེ། རྣལ་འབྱོར་གཞི་བདེའི་སྟེང་དུ་བློ་བདེ་རྒྱུན་མི་ཆད་པ་དང་། ཐོག་མཐའ་དབུས་དང་བྲལ་བ་ཆོས་རྣམས་ཀུན་གྱི་རང་བཞིན་དག་ཅིང་ཡེ་གྲོལ་བཅིང་གྲོལ་ལ། ཡོངས་གྲོལ་གྱི་འབད་རྩོལ་ཞིག་མ་དགོས་པ་དེ་ལ་ངོ་མཚར་རོ། །ཐ་མལ་གྱི་ཤེས་པ་འདི་སྤུ་མ་བརྗེས་མདོག་མ་བསྒྱུར། བར་བཟོ་མེད་རང་སར་བཞག་པས་ཆོག་རྒྱུ་འདི། རྒྱལ་བའི་ངེས་དོན་གྱི་དགོངས་པ་མཐའ་དང་བྲལ་བ་ཡིན་པས་ན་ཕྱོགས་སུ་མ་ལྷུང་། ཀློང་ཡངས་པ་ཡིན་པས་ན་རྒྱར་མ་ཆད་པ་འདི་ཉིད་ཡིན་པར་གནད་ངེས་པའི་སྒོ་ནས་འགག་བསྡུས་པའོ། །དེ་ནས་མ་ཡེངས་མི་སྒོམ་ངང་བཞག་རྒྱུན་གྱི་རྣལ་འབྱོར་གྱིས་འགྲུབ་པར་དོན་བསྡུ་བ་ནི། དེ་ཡང་འབད་པས་དཔྱད་ཅིང་བསྒོམས་པ་ཡིས། །སེམས་ཉིད་གནས་ལུགས་གཉུག་མ་མཐོང་མི་འགྱུར། །མ་བསམས་མ་དཔྱད་ཐ་མལ་ཆོས་ཉིད་ལ། །བསྒོམ་དང་མི་བསྒོམ་ཡེངས་དང་མ་ཡེངས་མེད། །མ་བསྒོམས་ལྷུག་པས་མང་པོ་གྲོལ་བ་ཡིན། །གྲོལ་དང་མ་གྲོལ་དོན་ལ་གཉིས་སུ་མེད། །གནས་ལུགས་ཤེས་ན་རྩོལ་མེད་བློ་བདེའོ། །རྟོག་མེད་འདོད་པའི་རྟོག་པས་བཅིངས་པ་ན། །རྣམ་རྟོག་ལངས་ནས་ཕྱོགས་བཅུར་འགྲོ་བར་བརྩོན། །འགྲོ་འོང་མེད་པའི་རིག་པའི་གཤིས་ཐོག་ཏུ། །ཁ་ཡན་གློད་ནས་རང་ཡན་བཞག་པ་ན། །མི་གཡོ་རི་བོ་བཞིན་དུ་བརྟན་པར་གནས། །གོ་ལྡོག་འགྲོས་འདི་བུ་རྣམས་ཤེས་པར་གྱིས། །ཞེས་གསུངས་ཏེ། འཁོར་བ་དང་མྱང་འདས་ཀྱིས་བསྡུས་པའི་ཆོས་ཐམས་ཅད་པོ་དེ། གནས་ལུགས་གཤིས་ཀྱི་བཞུགས་ཚུལ་གྱི་ངོས་ནས་གཞལ་འོང་བ་ཡིན་ན། ཐམས་ཅད་བཟང་ངན་མེད་པར་ཡེ་སྟོང་བསམ་བརྗོད་ལས་འདས་པའི་དབྱིངས་སུ་གྲོལ་བའི་གྲོལ་ཟིན་པ་ཞིག་ལ་བློས་དཔྱད་སེམས་ཀྱིས་སྒོམ་པས་ཅི་འདྲའི་འབད་པ་བྱས་ཀྱང་། སེམས་ཉིད་དོན་གྱི་གནས་ལུགས་གཉུག་མའི་རང་བཞིན་མཐོང་རྒྱུར་ཐག་ཇེ་རིང་མ་གཏོགས་འགྲོ་རྒྱུ་མེད་དེ། རྒྱལ་བ་ཀློང་ཆེན་པས། མ་བྱེད་མ་བྱེད་རྩོལ་ཞིང་སྒྲུབ་མ་བྱེད། །མ་ལྟ་མ་ལྟ་ཡིད་ཀྱི་ཆོས་མ་ལྟ། །མ་བསྒོམས་མ་བསྒོམས་བློ་ཡི་ཆོས་མ་བསྒོམས། །མ་དཔྱད་མ་དཔྱད་ཡུལ་སེམས་རྗེས་མ་དཔྱད། །ལ་སོགས་པ་གསུངས་པ་ལྟར་དུ། བསམ་དུ་མེད་པའི་ཆོས་ཉིད་ཀྱི་དོན་ལ། སེམས་ཀྱིས་མ་བསམ་བྱ་ལམ་གྱི་རྗེས་དེད་པ་འདྲ་ཞིག་ཡིན། དཔྱད་དུ་མེད་པའི་རིག་སྟོང་ཀ་དག་གི་ཆོས་ལ་བློས་དཔྱད་པས་དཔྱད་ནས་དཔོག་འོང་རྒྱུ་ཞིག་མེད། ནམ་མཁའ་འདོམ་ལ་འཇལ་བ་འདྲ་ཞིག་ཡིན། ཆོས་ཉིད་རྣལ་མའི་དོན་སྒོམ་མེད་ཡེངས་མེད་ཡིན་པས་ན། དེ་ལྟར་རང་བཞག་བྱས་བཞག་དུས་གྲོལ་བར་གྱུར་པ་སྔར་ཡང་མང་བ་ཡིན་པས་དེ་ལྟ་བུའི་རང་བཞག་གི་ངང་དུ་ཞོག གྲོལ་དང་མ་གྲོལ་དོན་ལ་གཉིས་མེད་ཀྱི་དོན་དུ་བལྟ་བྱ་ལྟ་བྱེད་དང་བྲལ་བ་ཡིན་པས། གནས་ལུགས་བྱ་རྩོལ་དང་བྲལ་བའི་རང་བཞིན་གྱི་གནད་དེ་ཤེས་སོང་ན། རྩོལ་མེད་རང་བཞག་གི་བབས་ཀྱིས་འགྲུབ་པར་བློ་བདེ་བྱ་རྩོལ་ལྷུན་གྲུབ་གྱི་གདེང་རྙེད་པ་ཡིན་མ་གཏོགས་རྣམ་རྟོག་འཕྲོ་འདུའི་འབད་པས་གར་སླེབས་མེད་ས་ལ། རྣམ་རྟོག་འདོད་ཞེན་ཞིག་གིས་ཡིད་དཔྱོད་ཀྱི་བློའི་རི་མོ་བཟང་པོ་ཡག་པ་ཞིག་གི་རྗེས་འདེད་བྱེད་དུས་ཇི་ལྟར་བྱས་ཀྱང་སྐད་ཅིག་མི་འདུག་པར་སྤྲིན་ཁ་འཚུབས་པ་ལྟ་བུའི་རྣམ་རྟོག་སྣ་ཚོགས་ཀྱིས་རང་གིས་རང་འཆིང་ནས། སྲིན་བུའི་ཁ་ཆུའི་དར་སྐུད་ཀྱིས་སྲིན་བུ་རང་ཉིད་འཆིང་བ་ལྟ་བུ་ལས་མ་འདས་པ་ཡིན་པར་ཤེས་པར་གྱིས་ཤིག འགྲོ་འོང་མེད་པའི་གཤིས་ཐོག་ལ། གཟུང་འཛིན་བྲལ་བའི་དྲི་མེད་སེམས་ཀྱི་ཆོས་ཉིད་ཁ་ཡན་རང་སར་གློད་ལ་ཞོག་དང་། ཆུ་སྣོད་ཀྱི་ཟླ་གཟུགས་དེ་དཀྲུགས་ན་མི་མཐོང་བཞག་ན་མཐོང་བ་དང་འདྲ་བར་གོ་ལྡོག་ནས་བྱས་ན་མི་ཟིན་བསྐྱུར་ན་ཟིན་པའི་གནད་དེ་མཐོང་ནས། མི་གཡོ་བ་བརྟན་པ་རི་རྒྱལ་ལྟར་དུ་གཡོ་འགུལ་མེད་པའི་འགྱུར་མེད་རིག་པའི་རང་གཤིས་དེ་ལས་གཡོ་བར་མི་འགྱུར་རོ། །མི་གཡོ་སྤྲོས་དང་བྲལ་བའི་རིག་པ་དེ་བལྟས་ན་མི་མཐོང་གློད་ན་མཐོང་རྒྱུ་ཞིག་ཡིན། དེ་ནི་བལྟ་བྱ་ལྟ་བྱེད་དང་བྲལ་བའི་གནད་ཀྱིས་རེད། རྒྱལ་བ་ཀློང་ཆེན་པས། རིག་པ་འཁྲུལ་དང་མ་འཁྲུལ་གྱི་མིང་དོན་ལས་འདས་པ་གསུང་སྐབས། མན་ངག་གི་སྙིང་པོ་གསུམ་དང་། ལྟ་བའི་བཞག་ཐབས་གསུམ་དང་། སྤྱོད་པ་ཆགས་མེད་རང་གྲོལ་གྱི་གནད་གསུམ་རྣམས་གསུངས་པ་ཡིན། མན་ངག་གི་སྙིང་བོ་གསུམ་ནི། ངོ་བོ་རང་བཞིན་ཐུགས་རྗེ་གསུམ། ལྟ་བའི་བཞག་ཐབས་ཕྱི་སྣང་བ་ཅོག་བཞག ནང་འགྱུ་བ་ཅོག་བཞག གསང་བ་རིག་པ་ཅོག་བཞག་གསུམ་ལ་འདུ། སྤྱོད་པ་ཆགས་མེད་རང་གྲོལ་གྱི་གནད་གསུམ་དེ་གང་ཡིན་ན། སྣང་བ་ཅེར་གྲོལ། འགྱུ་བ་རང་གྲོལ། རིག་པ་ཡེ་གྲོལ་དེ་ལྟར་གསུངས་པ་རེད། ད་དུངཡེ་ཡོད་ཆིག་ཆོད་ཀྱི་སྒོམ་པ་བཞི་ལ་སོགས་པ་ཆོས་ཀྱི་རྣམ་གྲངས་བཅུ་དྲུག་གི་ཐོག་ནས་དབྱེ་བ་དང་བཅས་པས་བསྟན་ཡོད་པ་ཡིན། མཐར་འགག་དོན་རིག་པ་རང་བབས་རྟོག་མེད་ཀྱི་སྐྱེལ་ས་ངོ་མ་དེ། ངོ་བོ་ཀ་དག རང་བཞིན་ལྷུན་གྲུབ་ཏུ་གནས་པ། རྟག་དང་ཆད་པའི་མཐའ་ལས་འདས་པ་ཞིག་ལ་གཏུག་ཡོད་པ་ཡིན། འདི་ཚོ་ཆོས་ཟད་མིང་མེད་ཆེན་པོར་ཕུ་ཐག་ཆོད་པའི་བློ་བདེ་ཁོང་ནས་འཆར་བའི་རྣལ་འབྱོར་བ་མཆོག་གི་སྤྱོད་ཡུལ་ཏེ། ཀློང་ཆེན་པས། འདིར་རྡོ་རྗེ་གད་མོ་བཅུ་གཉིས་ཀྱི་དོན་རང་གི་རྒྱུད་ལ་སྐྱེས་པ་སྙམ་བྱེད་དོ་ཞེས་ཉམས་རྟོགས་མཐོན་པོའི་དགོངས་ཉམས། རང་རེའི་སོ་སོ་སྐྱེ་བོ་བྱིས་པའི་བསམ་ངོ་ལས་ན་མ་འཕར་པ་ཞིག་གིས་བལྟས་ན། སྨོན་པའི་ཡུལ་ཙམ་ཞིག་ཏུ་གྱུར་པ་དེ་འདྲ་གསུངས་ཡོད་པ་རེད། རིག་པ་རང་ཤར་གྱི་རྒྱུད་ཀྱི་ནང་ནས་རྡོ་རྗེ་གད་མོ་བཅུ་གཉིས་དང་། རྒྱུ་འབྲས་ལ་བཟླ་བའི་ཚིག་ཆེན་བརྒྱད་རྣམས་གསུངས་ཤིང་། འོན་ཀྱང་འདི་ཅན་པོའི་ཐད་ཀ་ནས་དྲང་ངེས་ཀྱི་ཤན་ཡག་པ་ཞིག་འབྱེད་དགོས། དེ་མ་ཕྱེས་པར་རྒྱུ་འབྲས་ངེས་དོན་དུ་སེམས་པ་འགའ་རེས། རང་བཞིན་དག་པའི་ཆོས་ལ་ཐེ་ཚོམ་ཟ་བ་ཡང་འབྱུང་བ་ཡིན། འདིའི་གོ་དོན་གསལ་འབྱེད་བྱེད་རྒྱུ་ཤིན་ཏུ་ནས་ཀྱང་གལ་གནད་ཆེ་བ་རེད། རྫོགས་ཆེན་སྒོམ་པའི་རྣལ་འབྱོར་བ་གསར་རྙིང་ཐམས་ཅད་ལ་ལྟ་བ་སྤྱོད་པ་གཉིས་ཀྱི་བར་ལག་སྦྲེལ་སྤྱད་ལ་གལ་ཆེ་བར་སྙམ། དེས་ན་དེའི་སྐོར་དེ་འདི་ནས་རགས་བསྡུས་ཤིག་བཤད་ན་སྙམ་པ་ཡིན། རྡོ་རྗེ་གད་མོ་ཆེན་པོ་བཅུ་གཉིས་ཞེས་པ་དེ་ཆོས་ཉིད་ཡིད་དཔྱོད་ལས་འདས་པའི་དོན་དེ་ཉིད། རྒྱུད་ཀྱི་ནང་ནས་སྟོན་པས་སྡུད་པ་པོ་ལ་ཅིག་ཅར་དུ་ངོ་སྤྲད་པའི་ཚུལ་གྱིས་བསྟན་པ་ཞིག་རེད། འོན་ཀྱང་དེ་ལྟར་སྟོན་པའི་དུས་དེ་ཙམ་ཉིད་ནས། བསྟན་བྱ་དང་སྟོན་བྱེད་རང་བཞིན་གྱིས་མ་གྲུབ་པར། ཆོས་ཉིད་གཅིག་གི་ཀློང་ལས་མི་འདའ་བ་སྟེ། སྡུད་པ་པོ་ང་ཆོས་ཀྱང་ང་། །ཞེས་གསུངས་པ་རེད། སྡུད་པ་པོའང་སྟོན་པ་དང་རྒྱུད་ཐ་དད་དུ་མ་གྲུབ་པ་ཡིན་པའི་ཕྱིར་ན། རང་གི་དགོངས་ཉམས་ངོ་མཚར་གྱི་གད་མོར་བསྒྲགས་པ་ཞིག་རེད། གད་མོ་ཆེན་མོ་གད་རྒྱངས་ཆེ། །རྡོ་རྗེ་གད་མོ་ཆེར་སྒྲོག་པ། །ཞེས་འཇམ་དཔལ་སྒྱུ་འཕྲུལ་དྲྭ་བ་ལས་གསུངས་པ་ལྟར་དུ་ཆེ་བའི་གད་མོ་ཆེན་པོ་ཡིན། རིག་པ་རང་བྱུང་གི་ཡེ་ཤེས་སྐྱེ་འགག་སྤྲོས་མཚན་ལས་འདས་ཤིང་། འཕོ་འགྱུར་བྲི་གང་དང་བྲལ་བའི་གཤིས་ཀྱི་བཞུགས་ཚུལ་ངོ་མ་དེ། ཆོས་ཟད་ཀ་དག་གི་རང་གཤིས། དེ་བཞིན་གཤེགས་པ་ཉིད་ཀྱི་ཐུགས་ཀྱི་གསང་བ་ཟབ་མོ་དེ་ཉིད་མཚོན་བྱེད་ལ་བསྒྲགས་འོང་བ་ཞིག་ཡིན། དེ་ལྟར་ཡིན་པ་དེའི་ཕྱིར་ན་གད་མོ་ཆེན་པོ་ཡིན་སྤྱད་ཅི་ཕྱིར་རེད་ཟེར་ན། སྲིད་གསུམ་འཇིག་ཅིང་བརླག་པར་བྱེད་པའི་སྒྲ་སྐད། སྲིད་པ་མིང་མེད་དུ་བྱེད་པའི་སྒྲ་དབྱངས་ཤིག་ཀྱང་ཡིན། ཡང་ངོ་མཚར་བའི་ཚིག་ཆེན་བརྒྱད་ལ་མཚོན་ན། ཁམས་གསུམ་སེམས་ཅན་བསད་པ་དང་ཕར་ཕྱིན་བཅུ་ལ་རྟག་ཏུ་སྤྱད་པའི་གང་ཟག་གཉིས་ལ་ཁྱད་པར་མེད་པར་ལྟར་གསུངས་ཡོད། འདི་གོ་དུས་བློ་ཆུང་གི་རྣ་བ་གས་འགྲོ་བ་རེད། ཆོས་ཉིད་དོན་གྱི་གནས་ལུགས་དངོས་རྟོགས་པ་ན་གཤིས་ལ་དགེ་སྡིག་མ་གྲུབ་པའི་གཏན་ཚིགས་དཔེ་ཡིས་མཚོན་པར་བྱེད་པའི་གསུང་ཞིག་ཡིན། ཚོགས་བརྒྱད་འཁོར་བའི་ཆོས་ཀྱིས་མ་བཏང་བའི་གང་ཟག་རང་རྒྱུད་ལྡན་ཞིག་གིས་ཁམས་གསུམ་སེམས་ཅན་དུས་གཅིག་ལ་བསད་པ་དང་། དེ་ལས་ལྡོག་པའི་དགེ་བ་དེ་ཙམ་ཞིག་སྒྲུབ་པ་གཉིས་ཀ་ཁྱད་པར་མེད་ཅེས་རྒྱུ་འབྲས་ཆད་པའམ་མེད་པར་བསྟན་པ་རེད། དེ་ཡིན་དུས་དེ་སྒྲ་ཇི་བཞིན་པར་བཟུང་རྒྱུ་ཡོད་པ་མིན་པས། རྒྱུ་འབྲས་ཆད་པའམ་མེད་པར་བསྟན་པ་མ་རེད། དགེ་སྡིག་རྣམ་རྟོག་གིས་བཟོས་པ་ཡིན་པས་ན་ཆོས་ཅན་ཡིན། དེའི་ཆོས་ཉིད་རྣམ་རྟོག་དང་བྲལ་བ་མ་འཁྲུལ་བའི་གཤིས་ལ་དགེ་སྡིག་བླང་དོར་དུ་མ་གྲུབ་པ་ཡིན། དེ་ལྟ་བུའི་ཆོས་ཉིད་དེ་ཇི་བཞིན་དུ་རྟོགས་པའི་སྐབས་སུ། ལམ་བདེན་སྤངས་པའི་ཕྱིར་ན། རྣམ་ཤེས་ཚོགས་བརྒྱད་དང་བཅས་པའི་དགེ་སྡིག་རྒྱུ་འབྲས་ལ་མི་ལྟོས་ཞེས་གསུངས་པ་རེད། དཔེ་སྡིག་པ་དག་ལུགས་ལ་བསམ་བློ་བཏང་ན། སྡིག་པ་དག་ཚུལ་འདྲ་མི་འདྲ་མང་པོ་ཡོད། སྡིག་པ་དེ་མྱོང་བས་དག་པ། བཤགས་པས་དག་པ། གཉེན་པོས་དག་པ་ཟེར་རྒྱུའི་དག་ལུགས་ཀྱི་ཁྱད་པར་ཡོད་པ་རེད། ཆོས་ཉིད་དོན་དམ་གྱི་གནས་ལུགས་རྗེན་པའམ་ཆོས་ཉིད་དོན་དམ་གྱི་གནས་ལུགས་ཇི་བཞིན་པ་དེ་དེ་བཞིན་པར་རྟོགས་སོང་དུས། དེ་རྟོགས་སོང་བའི་ཟག་མེད་ཀྱི་དགེ་རྩ་དེས་ཕུང་པོ་ལྔ་དང་ཚོགས་བརྒྱད་རང་བཞིན་གྱིས་དག་སོང་དུས། ཀུན་གཞིའི་སྟེང་ན་ལས་སྔ་མས་བཞག་པའི་བག་ཆགས་ཟད་སོང་ནས། དགེ་སྡིག་ལ་རྟེན་གཞི་མེད་སོང་བ་རེད། དེའི་ཕྱིར་ན་སྟོང་ཉིད་རྟོགས་ཏེ་སྣང་སེམས་རོ་གཅིག་ཏུ་འདྲེས་པའི་གང་ཟག་གིས། ད་ལྟ་བསད་ན་ད་ལྟ་གསོ་ནུས་པ་དེ་འདྲ་འབྱུང་བ་རེད། དེ་ཅན་པོའི་ངོ་ཁ་ལ་དགེ་སྡིག་རང་བཞིན་གྱིས་གྲུབ་པ་ཞིག་མེད་ཅེས་གསུངས་པ་ཡིན། དེས་ན་རྡོ་རྗེ་གད་མོ་བཅུ་གཉིས་དང་ངོ་མཚར་བའི་ཚིག་དོན་བརྒྱད་པོ་འདི་ཚོའི་གོ་བ་དེ་ཇི་ལྟར་བྱས་ནས་ལེན་དགོས་པ་རེད་ཟེར་ན། ཕྱོགས་གཅིག་ནས་གཤིས་ཆོས་ཉིད་ལ་དགེ་སྡིག་མ་གྲུབ་པར་བསྟན་པའི་གོ་དོན་ངེས་དོན་གྱི་ལེན་ལུགས་ཤིག་དང་ཕྱོགས་གཅིག་ནས་ཁམས་གསུམ་སེམས་ཅན་བསད་པ་དང་ཕར་ཕྱིན་བཅུ་དེ་དང་མཉམ་པར་སྒྲུབ་པ་གཉིས་ཀ་ཁྱད་མེད་རོ་མཉམ། ཆོས་ཉིད་ཀྱི་དོན་དེ་ལྟར་མ་རྟོགས་པའི་གང་ཟག་གིས་དེ་འདྲ་ཞིག་གི་ཚད་ལ་མ་བརྒྱབ་ཀྱི་བར། རྒྱུ་འབྲས་དགེ་སྡིག་གི་བླང་དོར་ཕྲ་ཞིབ་ཀྱིས་བསྲུང་དགོས་པར་གསུངས་པའི་དྲང་བའི་དོན་ཞིག་སྟེ། སློབ་དཔོན་ཆེན་པོས། ལར་ལྟ་བ་ནམ་མཁའ་བས་མཐོ་ཡང་། ལས་རྒྱུ་འབྲས་བག་ཕྱེ་བས་ཞིབ་དགོས། ཞེས་གསུངས་པ་ལྟར་དུ་གོ་བ་ཕྱོགས་གཉིས་རང་གི་རྒྱུད་ཚོད་དང་བསྟུན་ནས་ལེན་དགོས་པ་ཡིན། དེ་ལྟར་མདོ་བཤད་པའི་སྐབས་སུ་དྲང་ངེས་ལྡེམ་དགོངས་དང་། སྔགས་བཤད་པའི་སྐབས་སུ་མཐའ་དྲུག་ཚུལ་བཞིས་གཏན་ལ་མ་ཕབ་ན་རྟོན་པ་རྣམ་བཞི་གོ་ལྡོག་ལ་གྱུར་འགྲོ་བ་རེད། རྟོན་པ་རྣམ་བཞི་གོ་ལྡོག་ལ་གྱུར་སོང་ན་དོན་ལ་མི་རྟོན་ཚིག་ལ་རྟོན་པ་ཞིག་དང་། དོན་དམ་ལ་མི་རྟོན་ཀུན་རྫོབ་ལ་རྟོན་པ་དང་། ངེས་དོན་ལ་མི་རྟོན་དྲང་དོན་ལ་རྟོན་པ། དེ་དུས་ཡེ་ཤེས་ལ་མི་རྟོན་རྣམ་ཤེས་ལ་རྟོན་སོང་ན། ཁ་བཤད་སྟོང་ལྟ་ལ་ལོག ཡིད་བྱེད་གོ་ཡུལ་ལ་ལུས་ནས། ལམ་མིན་གྱི་གཡང་ས་སྟུག་པོ་ལས་སྐྱོབ་ཐབས་དཀའ་བ་དེ་འདྲའི་ས་ལ་ཐོན་པ་ཡིན། བདག་ཅག་གི་སྟོན་པས་བཀའ་འཁོར་ལོ་དང་པོའི་སྐབས་སུ་སྡུག་བསྔལ་ཤེས་པར་བྱ། ཀུན་འབྱུང་སྤང་པར་བྱ། འགོག་པ་མངོན་དུ་བྱ། ལམ་རྒྱུད་ལ་བསྟེན་པར་བྱ་གསུངས་པ་དང་། འཁོར་ལོ་བར་བའི་སྐབས་སུ་སྡུག་བསྔལ་བ་དང་ཀུན་འབྱུང་བ་དང་འགོག་པ་དང་། ལམ་མེད། ཡེ་ཤེས་མེད། ཐོབ་པ་མེད། མ་ཐོབ་པ་ཡང་མེད་དོ་ཞེས་གསུངས་པ་དེའི་དྲང་ངེས་ཀྱིས་དབྱེ་བ་མ་ཕྱེས་ན་འགལ་བ་ལྟག་སྤྲོད་སྤོང་ཐུབ་པ་མ་རེད་ལ། དེའི་བར་གྱི་ཡང་དག་པའི་ལམ་ཡང་རྙེད་པ་མ་རེད། གང་ཟག་བློ་ཆུང་ལ་དང་པོར་ངེས་དོན་ལ་མི་རྟོན་པར་དྲང་དོན་རྟོན་དགོས་སྤྱད་ཀྱང་དེས་རེད། དེས་ན་གྲོལ་དང་མ་གྲོལ་གཉིས་སུ་མེད་པའི་དོན་རྡོ་རྗེ་གད་མོའི་རང་སྒྲ་ལ། སོ་སྐྱེའི་བློ་ན་མ་འཕར་བའི་ཚོད་ཀྱིས་ད་ལྟ་སྨོན་པའི་གནས་ཙམ་དུ་གྱུར་པ་དེ་འདྲ་རེད། འོན་ཀྱང་སེམས་ཅན་འཁྲུལ་བའི་སྐབས་སུ་ཡང་། ཆོས་ཅན་སེམས་ཀྱི་ཆོས་ཉིད་ཡེ་ནས་འདུས་མ་བྱས་པ། སྐུ་གསུམ་འདུས་པའི་བདག་ཉིད་ཡེ་ཤེས་སུམ་ལྡན་དུ་བཞུགས་པ་དང་སྐད་ཅིག་ཙམ་ཡང་འབྲལ་མ་མྱོང་ན། ད་རེས་དབུལ་བོའི་རང་ཁྱིམ་གྱི་གསེར་གཏེར་རང་ལ་ཡོད་པར་མཐོང་བའི་ཐོག་དེ་ནས། རིག་པ་སྐྱེ་འགག་འགྲོ་འོང་དང་བྲལ་བའི་ཆོས་ཉིད་ལ། གོ་མྱོང་རྟོགས་པ་སྐྱེས་པའི་རིམ་པ་འདི་བརྒྱུད་ན། མ་སྒོམ་མངོན་འཚང་རྒྱ་བའི་མྱུར་ལམ་རང་ལག་ཏུ་ཡོད་པའི་གནད་ཀྱིས། ཀུན་མཁྱེན་འཇིགས་གླིང་གིས། སྙིང་རུས་གནད་དུ་སྨིན་པ་ཁྱོད་ཀྱིས་མཛོད། །གདམས་ངག་ཟབ་དགུའི་བདུད་རྩི་ཁོ་བོས་སྟེར། །ཚེ་དང་སྒྲུབ་པ་མཉམ་པའི་རྟེན་འབྲེལ་ཞིག །འགྲིག་ན་ཕྱི་མའི་འགྲོ་ས་པདྨས་སྟོན། །ཞེས་གསུངས་པ་བཞིན་དུ་ཀུན་མཁྱེན་ཡབ་སྲས་བརྒྱུད་པ་དང་བཅས་པའི་མན་ངག་ཟབ་དགུའི་ཉིང་བཅུད། བྱིན་རླབས་ཀྱི་དྲོད་རླངས་མ་ཡལ་བ་ཚོ་ཉམས་ལེན་གྱི་མཐིལ་ལ་བཟུང་ན། ཚེ་འདི་ནམ་འཆི་ཆ་མེད་ཡིན་པ་ལ། །རྟག་ཆགས་ཞེན་པར་བཟུང་བས་གཏན་འདུན་ཉེས། །སྐྱིད་སྡུག་དགྲ་གཉེན་རྣམ་རྟོག་ཡལ་བཅུག་ན། །སྐྱིད་པོའི་རྩ་བ་མ་བྱས་ལྷུན་གྲུབ་ཡིན། །ཞེས་གསུངས་པ་ལྟ་བུ་ཡིན། ཉམས་ལེན་མི་ཚེ་ལ་དྲིལ་དུས་ས་ཐག་རིང་གི་བཤུལ་ལམ་བརྒྱུད་པ་འདྲ་བ། མཚམས་རེར་ང་འདྲ་བས་ཐུབ་རྒྱུ་ཞིག་ཡིན་ནམ་སྙམ་པའི་ཐེ་ཚོམ་དང་། སྐབས་རེར་སྔར་དང་མི་འདྲ་བར་རྒྱུད་འགྱུར་བའི་ཁྱད་པར་རེ་འདུག་གོ་སྙམ་པའི་དགའ་སྡུག་འདྲ་མི་འདྲ་ཡོང་ན་ཡང་། རེ་དོགས་དགའ་སྡུག་གི་རྣམ་རྟོག་ཐམས་ཅད་བོར་དུ་བཅུག་ནས། གང་ཤར་ཆོས་སྐུའི་ཡོ་ལང་དུ་སྐྱངས་ཤིང་། ཅིར་སྣང་ལམ་གྱི་བོགས་འདོན་ལ་བསྒྱུར་ཏེ། དད་གུས་མོས་པ་འགྱུར་བ་མེད་པར་བྱས་ན་འཕྱུགས་འགྲོ་ས་ཞིག་ཡོད་པ་མ་ཡིན། འདི་ལ་བསྒོམ་རྒྱུ་རྡུལ་ཙམ་མི་དམིགས་ཀྱང་། །ཡེངས་མེད་དྲན་པས་ཟིན་པ་རབ་ཏུ་གཅེས། །ཞེས་དོན་བསྡུས་པའོ། །ད་ཡང་ཁྲེགས་ཆོད་ལྟ་བའི་གནད་འགག་རིག་པ་རྗེན་པའི་གསལ་འདེབས་རྡོ་རྗེ་མགུར་དབྱངས་སུ་ལེན་པ་ནི། །ཨེ་མ་ཧོ། ད་ཡང་སྐལ་ལྡན་བུ་རྣམས་ཚུར་ཉོན་དང་། །ཕྱི་ཡུལ་མེད་སྣང་སྟོང་པའི་རང་གཟུགས་འདི། །ཡེ་སྟོང་ཆུ་ཟླ་འདྲ་བས་སྦྱང་མི་དགོས། །ནང་གི་དྲན་རྟོག་རང་ཡལ་རྗེས་མེད་པས། །འབད་རྩོལ་གཉེན་པོ་དེ་ལ་འཇུག་མི་དགོས། །སྣང་སེམས་ཡེ་གྲོལ་ལྷུག་པའི་ཡེ་ཤེས་ལ། །སྤང་བླང་རེ་དོགས་གང་གིའང་སྒྲོ་མི་འདོགས། །རིག་པ་ཟང་ཀ་གཅེར་བུ་འདི་ཉིད་ལ། །ཡིད་དཔྱོད་སྤྲོས་པའི་གོན་པ་མ་བསྐོན་པར། །ཤིགས་སེ་ཁྲས་སེ་བུན་ནེ་རྗེས་མེད་དུ། །རིས་མེད་མཉམ་པ་ཆེན་པོར་གློད་ལ་ཞོག །ཅེས་གསུངས་ཏེ། འདི་རིག་པ་རང་སྣང་གི་བློ་ཅན་ལ་སྲིད་གསུམ་ཀ་དག་གི་དགོངས་པའི་ངོ་སྤྲོད་ཀྱི་བཞག་ཐབས་ཤིག་བསྟན་པ་སྟེ། ཕྱི་ཡུལ་མེད་ཡུལ་སྣང་སྟོང་པའི་རང་གཟུགས་འདི། ཡེ་ནས་སྟོང་པ་ཆུ་ནང་གི་ཟླ་བའི་གཟུགས་བརྙན་འདྲ་ཞིག་ཡིན་པས་ན། ཁོ་རང་ཡིན་པ་ཡིན་ཐོག་ལ་བཞག་བཏང་རྒྱུ་མ་གཏོགས་པར། མི་སྟོང་པ་ཞིག་སྟོང་པར་སྦྱངས་འདུག་མི་དགོས། སྣང་སེམས་དྲན་རྟོག་སྣ་ཚོགས་སུ་ཤར་ཤར་འདྲ་བ་འདི་རང་ཡལ་རྗེས་མེད་བར་སྣང་གི་བསེར་བུ་དང་ནམ་མཁའི་བྱ་ལམ་འདྲ་བ་ཞིག་རེད། ཆུ་མ་སྒུལ་བཞག་ན་རང་དྭངས་ཡིན་པའི་དཔེ་ལྟར་འབད་རྩོལ་བྱས་ནས་དྲན་རྟོག་གང་ཤར་ལ་བཟོ་འཅོས་འདུག་མི་དགོས་པ་སྟེ། སྣང་སེམས་གཉིས་ཀ་ཡེ་ནས་གྲོལ་བས་ལྷུག་པ་བཅོས་མི་དགོས་པའི་རང་བྱུང་གི་ཡེ་ཤེས་དེ་ལ་སྤང་བླང་བཟང་ངན་རེ་དོགས་མང་པོ་ཞིག་གསར་དུ་བསྣན་ནས། མེད་པ་ལ་ཡོད་པར་བཏགས་པ་སྒྲོ་འདོགས་མ་བྱེད་ཅེས་པའོ། །སྒྲོ་འདོགས་ཞེས་པའི་ཐ་སྙད་འདི་མདའ་མོ་ལ་བྱ་སྒྲོ་བཏགས་པ་ལྟ་བུའི་དཔེ་ཡིས་གསུངས་པའི་ཚིག་གྲུབ་ཅིག་རེད། རིག་པ་ཟང་ཀ་ཞེས་པ་སྟེ་ཟང་ཀ་ཟང་མ་གཉིས་ཀ་དོན་གཅིག་རེད། མ་བཅོས་མ་བསྒྱུར་བའི་རིག་པ་ཇི་ལྟར་ཡིན་པ་དེ་བཞིན་དུ་རིག་པ་རྗེན་པ་གཅེར་བུ་འདི་ཉིད་ལ་ཡིད་དཔྱོད་བློ་ཞེན་ཅན་གྱིས་འདི་འདྲ་ཡིན་དགོས། དེ་འདྲ་ཡིན་མི་ཉན། དེ་ཡིན་པ་རེད་སྙམ་པའི་རང་བཟོའི་བཟང་རློམ་གྱིས་ཡར་ལ་ཇེ་ཡག་ཏུ་བཏང་བ། སྤྲོས་མེད་ལ་སྤྲོས་པའི་གོས་མ་བསྐོན་པར། ཤིགས་སེ་ཁྲེས་སེ་ཞེས་པ་སྟེ། དེ་ཡང་ཤིགས་སེ་ཞེས་པ་ནི་རང་མདངས་ཀ་དག་ཏུ་རྗེན་ལ་ཕུད་པར་བྱས་ན། ངང་མདངས་རང་ཤུགས་ཀྱིས་ཤར་བའི་ལྷན་ནེ་བ་ཞིག ཁྲེས་སེ་ཞེས་པ་ནི་མ་བཅོས་སོ་མ་ལ་ཅོག་གེར་བཞག་ན་ཁྲེས་སེ་འདུག་པའི་ལྷང་ངེ་བ་ཞིག བུན་ནེ་བ་ཞེས་པ་ནི་གཞི་མེད་ཟང་ཐལ་དུ་གྱུར་པ་ཚིག་ལས་འདས་པའི་མ་བཅོས་ལྷམ་མེར་ཡོད་པ་ཞིག རྗེས་མེད་རང་ཡལ། རིས་མེད་མཉམ་པ། ཡེ་སངས་ཕྱམ་གདལ་ཆེན་པོར་མདོར་ན་རང་བབས་སུ་གློད་ལ་ཞོག་ཅེས་པའོ། །དེས་ལྟ་བ་གཞག་ཐབས་དང་སྦྲེལ་ཏེ་བསྟན་པ་ཡིན། སྒོམ་པ་ངོ་སྤྲོད་ཀྱིས་བསྟན་པ་ནི། དེ་ཡི་ངང་ལ་དྲན་བསམ་ཅི་ཤར་ཡང་། །རིས་མེད་རང་བྱུང་རིག་པའི་རང་གདངས་སུ། །ཤེས་པར་གྱིས་ལ་རྗེས་ནི་མི་བསྙེགས་པར། །སྣང་སེམས་ཁྲལ་མ་ཁྲོལ་དང་སངས་མ་སངས། །འལ་མ་འོལ་གྱི་ཆོས་ཉིད་ཡོ་ལངས་སུ། །རྒྱ་ཕྱམ་ཉིད་དུ་བཏང་ན་ཀུན་བཟང་གི །དགོངས་པའི་ཀློང་དུ་ད་ལྟ་སླེབས་པ་ཡིན། །ཞེས་གསུངས་ཏེ། དེ་ལྟར་འཁོར་འདས་རིས་མེད་སྣང་སེམས་གཉིས་མེད་ཀྱི་ངང་ལ་བཞག་པའི་གནས་སྐབས་སུ་ཚོགས་དྲུག་གི་སྣང་བ་འགག་མི་དགོས། གང་ཤར་རང་བྱུང་རིག་པའི་རང་མདངས་ལ། ཤེས་དང་ཤེས་བྱ་གཉིས་མེད་ཀྱིས་སྔར་རྗེས་མི་བཅད། ཕྱིས་མདུན་མི་བསུ། ད་ལྟའི་ཤེས་ངོར་ལྟ་བའི་རྣམ་རྟོག་གི་རྩིས་གྲངས་འདེབས་པ་ཡང་མ་ཡིན་པ་ནི་སྣང་སེམས་ཁྲལ་མ་ཁྲོལ་མ་ལ་སོགས་པས་བསྟན་པ་ཡིན། ད་སྔོན་རང་གསལ་རྗེན་པའི་ཆོས་སྐུ་ཟེར་རྒྱུ་དེ་མི་འདྲ་བའི་མཚར་བོ་ཞིག་ཁ་ཁ་ན་ཡོད་སྣང་ཤར་རྒྱུ་དེ། ད་བལྟས་ཡོང་ན་ཁྲལ་མ་ཁྲོལ། སངས་མ་སངས། འལ་མ་འོལ་ཞེས་པ་སྟེ། གཞི་མེད་ཀྱིས་ཁྲལ་མ་ཁྲོལ། རྟེན་མེད་ཀྱིས་སངས་མ་སངས། ངོས་བཟུང་དང་བྲལ་བས་འལ་མ་འོལ། ད་དུང་ཀུན་མཁྱེན་ཆེན་པོས་ཕྱལ་སངས། སྟོང་ཡལ། རིས་མེད་ལ་སོགས་པ་དེ་འདྲ་གསུངས་པ་སྟེ། གཉེན་པོའི་གཟེབ་ཀྱིས་མི་འཆིང་བའི་ཕྱལ་སངས། ཡེ་སངས་ཀ་ནས་དག་པས་སྟོང་ཡལ། ཕྱོགས་དང་འཛིན་པ་བྲལ་བས་རིས་མེད་ཅེས་གསུངས་པ་ཡིན། རྣལ་འབྱོར་ཉམས་རྟོགས་མཐོན་པོའི་གོ་འཕང་ལ་གཤེགས་ནི་ཚོས་སོ་སོ་རང་རིག་གི་རིག་བྱ། ཐ་སྙད་ཚིག་ལས་འདས་པ་དེ་རྗེས་འཇུག་ལ་མིའི་ཚིག་གི་ཟོལ་གྱིས་གསུངས་པ་དེ། ཕྱོགས་ཙམ་མ་གཏོགས་སྒྲ་ཚིག་བསམ་ཡུལ་ལས་འདས་པ་དེ་འུ་གུས་སྒྲ་ཚིག་བསམ་བརྗོད་ལ་བརྟེན་ནས་ཅི་ལྟར་བཀྲོལ། སྒྲ་ཚིག་ངོ་མ་བཀྲོལ་དགོས་ན་ཕྱོགས་ཙམ་མཚོན་བྱེད་ལ་བཤད་པ་མ་གཏོགས་མཚོན་ཐུབ་པ་མ་རེད། དེ་ལྟ་བུའི་རྒྱ་ཡན་ཕྱམ་གདལ་ཆོས་སྐུའི་དགོངས་པ་ཆེན་པོར་ངང་བཞག་གིས་བཞག་བཏང་ན། འབྲས་བུ་མཐར་ཐུག་ཞིག་ལ་བལྟ་མི་དགོས་པར་ཀུན་བཟང་དགོངས་པའི་ཀློང་ལ། དུས་ད་ལྟ་ནས་སླེབས་པ་སྟེ་འབྲས་བུ་ཕྱི་དུས་ལ་མི་རེ་བ་ཡིན་གསུངས་པའོ། །རྫོགས་པ་ཆེན་པོ་ཡེ་གྲོལ་ལྷུན་གྲུབ་ཀྱི། །སྣ་ཚོགས་རང་གྲོལ་རྣལ་འབྱོར་དེ་ལ་ཟེར། །མ་ཕྱིན་ན་ཡང་སངས་རྒྱས་ས་རུ་སླེབས། །མ་བསྒྲུབས་ན་ཡང་འབྲས་བུ་ལྷུན་གྱིས་གྲུབ། །མ་སྤངས་བཞིན་དུ་ཉོན་མོངས་རང་སར་དག །བླ་མ་དམ་པའི་དགོངས་པ་དང་མཉམ་མོ། །རྗེས་སུ་སྙོགས་སོ་ལས་རྣམས་ཟིན་པའོ། །གནད་འདི་ཡིན་པས་བུ་རྣམས་ཤེས་པར་གྱིས། །ཕ་རྒན་ཆོས་ཀྱི་རྒྱལ་པོའི་བཀའ་དྲིན་གྱིས། །བྱ་བྲལ་ལྷུན་གྱིས་གྲུབ་པའི་དགོངས་པ་རུ། །ཚོགས་དྲུག་རང་གྲོལ་ད་རེས་སླེབས་པའོ། །ཞེས་གསུངས་ཏེ། རྫོགས་པ་ཆེན་པོ་ཡེ་གྲོལ་ལྷུན་གྲུབ་ཏུ་ལྷུན་གྱིས་གྲུབ་གྲུབ་པར་ཡོད་པ་ལ། ཡང་གྲོལ་གྱི་ཁུར་བོ་འགེལ་འདུག་མི་དགོས་པར་ཤེས་དང་ཤེས་བྱ་གཉིས་མེད་ལ། སྣང་སེམས་འཁོར་འདས་རོ་མཉམ་དུ་ཡིན་པ་ལ་ཡིན་པར་གྱུར་པ་ལ། སྣ་ཚོགས་རང་གྲོལ་གྱི་རྣལ་འབྱོར་མིང་དང་དོན་མཐུན་པ་དེ་ལ་ཟེར་ཆོག་པ་ཡིན། དེ་ཅི་འདྲ་ཡིན་ཟེར་ན་མ་ཕྱིན་ནའང་སངས་རྒྱས་ཀྱི་ས་ལ་རང་གནས་ཀྱི་དགོངས་པ་རང་ངོ་ཤེས་ནས་སླེབས་ཡོད་པ་དང་། མ་བསྒྲུབས་ན་ཡང་འབྲས་བུ་ལྷུན་གྲུབ་བྱར་མེད་ཅོག་བཞག་བྱས་པའི་ཡེ་གྲོལ་ལྷུན་གྲུབ་ཏུ་གྱུར་བ་དང་། མ་སྤངས་བཞིན་དུ་ཉོན་མོངས་ལྔ་རང་སར་དག་པ་ཡེ་ཤེས་ལྔ་རྫོགས་ཀྱི་ཕ་རོལ་ན། ཉོན་མོངས་ཟེར་རྒྱུའི་མིང་ཙམ་ཡང་མ་གྲུབ་པ། མཚོན་བྱ་དོན་གྱི་བླ་མ་དམ་པ། དུས་གསུམ་སངས་རྒྱས་ཐམས་ཅད་ཀྱི་ཐུགས་དང་མི་གཉིས་པའི་དགོངས་པ་དང་མཉམ་པའམ་དགོངས་ཀློང་དང་འདྲེས་པ་འདིས། མཚོན་བྱེད་རྟགས་ཀྱི་བླ་མ་གདུལ་བྱའི་སྣང་ངོར་མིའི་གཟུགས་སུ་བྱོན་པ་དེ་ཉིད་ཀྱི་ཞབས་རྗེས་བསྙེགས་པའི་དོན་སྒོ་ལ་རྗེས་ཟིན་ནས་ཞབས་རྗེས་སྙེག་ཐུབ་སོང་། དེ་སྙོག་པའི་གནད་ཀྱི་རྩ་བ་དེ་རྫོགས་ཆེན་ཡེ་གྲོལ་ལྷུན་གྲུབ་ཀྱི་དགོངས་པའི་གནད་འདི་ཡིན། ཁོང་གི་རྗེས་སུ་འཇུག་པའི་ཤེས་རབ་སྐལ་ལྡན་གྱི་སློབ་བུ་དག་གིས་ཀྱང་དེ་བཞིན་དུ་ཤེས་པར་གྱིས་ཞེས་གསུངས། ཕ་རྒན་ཆོས་ཀྱི་རྒྱལ་པོ་ནི་ཆོས་རྒྱལ་ངག་གི་དབང་བོ་ཡིན་པ་རེད། དེའི་བཀའ་དྲིན་གྱིས་རྫོགས་ཆེན་བྱ་བྲལ་ལྷུན་གྲུབ་ཀྱི་དགོངས་པའི་རྒྱལ་ས་ལ་ཁོང་ཚོགས་དྲུག་རང་གྲོལ་ད་རེས་སླེབས་སོང་ཞེས་པའོ། །རྗེ་ཆོས་རྒྱལ་ངག་གི་དབང་པོས་སྨིན་བྱེད་ཀྱི་དབང་བསྐུར་པའི་སྐབས་སུ་ཚོགས་དྲུག་རང་གྲོལ་ཞེས་བཏགས་པ་རེད། ཀུན་མཁྱེན་ཆོས་རྗེས། ཀློང་ཡངས་ཀློང་ཡངས་ཀློང་ཆེན་ཡངས་པའི་ངང་། །ཀློང་ཆེན་རབ་འབྱམས་ཀློང་གསལ་ཀློང་འབྱམས་པས། །ཀློང་གཅིག་གཉིས་མེད་བདེ་ཀློང་འཁྱིལ་བ་འདི། །སྣ་ཚོགས་རང་གྲོལ་ཆོས་ཉིད་ཟད་སར་ཕྱིན། །ཞེས་གསུངས་ཡོད། ཀུན་མཁྱེན་ཆེན་པོའི་མཚན་གྱི་རྣམ་གྲངས་གཞན་ཞིག་ལ་སྣ་ཚོགས་རང་གྲོལ་ཞུ་བ་རེད། ད་འདི་ཚོའི་བསྟན་དོན་འགྲོས་གཅིག་པ་ཡིན། འགྲོས་གཅིག་པ་ལོས་ཡིན། ཀུན་མཁྱེན་བླ་མའི་གཞུང་ལ་གཞིར་བཟུང་བ་འདིའི་མཇུག་ན་བསྟན་ཡོད་པ་ལྟར་རེད། འདི་ནས་གོལ་ཤོར་གྱི་འཕྲང་སྒྲོལ་བ་དང་བཅས་ཏེ་ལྟ་སྒོམ་སྤྱོད་འབྲས་ཀྱི་གནད་བསྟན་ཡོད་འདུག གནད་འདི་ཡིན་ཡང་ལ་ལས་མ་གོ་འདུག །ཇི་ལྟར་མ་གོ་བ་ནི། ཐམས་ཅད་ཡེ་ཟིན་འདུག་སྟེ་ཡང་བྱེད་དོ། །ལས་དང་པོ་བ་ནོར་བའི་སྐྱེ་བོ་ལམ་ནོར་དུ་ཇི་ལྟར་འཕྱན་པ་ནི། ཡེ་གྲོལ་ཉིད་དུ་འདུག་སྟེ་ཡང་དགྲོལ་ལོ། །ཡེ་བཞག་ཉིད་དུ་འདུག་སྟེ་ཡང་འཇོག་གོ །ཡེ་སྒོམ་ཉིད་དུ་འདུག་སྟེ་ཡང་བསྒོམ་མོ། །ཡེ་ལྟོས་ཉིད་དུ་འདུག་སྟེ་ཡང་བལྟའོ། །ཡེ་བགྲོད་ཉིད་དུ་འདུག་སྟེ་ཡང་བགྲོད་དོ། །ཟེར་ནས་ཡིད་དཔྱོད་ལྟ་བར་རེ་བའི་མིས། །ཐོས་ཀྱང་ཚིག་རོ་གོ་ཡང་རྣམ་རྟོག་གོ །རྟོགས་ཀྱང་ཕོ་ཚོད་བསྒོམས་ཀྱང་བློས་བྱས་སོ། །དཔྱད་ཀྱང་གཉིས་འཛིན་བསྒྲུབས་ཀྱང་འཁོར་བའོ། །ཆོས་ཉིད་ཡིད་དཔྱོད་མཁན་གྱི་མི་དེ་ལ། །རྫོགས་ཆེན་སྙིང་ཐིག་ལས་འབྲེལ་མེད་པར་ངེས། །ཞེས་གསུངས། ཚིག་རྗེས་འབྲངས་ནས་ཡིད་དཔྱོད་ཀྱིས་དོན་གྱི་ཕྱོགས་འཛོལ་ནས་བྱར་མེད་བྱས་ཆོས་ལ་བསྒྱུར་བ། དཔེ་ན་རྟ་ལས་བབས་ཏེ་བོང་བུར་ཞོན་པ་བཞིན་དུ་ཡིད་དཔྱོད་ཀྱི་བློ་ཡི་སྤྲོས་པ་དེས་ནམ་མཁའ་འདོམ་ལ་འཇལ་ལྟར་དུ་རྣམ་རྟོག་འཁྲུལ་བ་གཉིས་འཛིན་གྱི་གཟེབ་ནས་མ་གྲོལ་བ་ཡིན་པས་ན། ཐོག་མེད་ནས་གོམས་པའི་རྨོངས་པའི་མུན་ཆེན་ད་དུང་སྙིང་ལ་གནས་པས། གང་ནས་དཔྱད་ཅིང་བརྟག་བསམ་ཞིང་བརྗོད་ན་ཡང་། ཡིད་དཔྱོད་བློའི་ར་བ་ཆུང་ཆུང་གི་ཕན་ལ་མི་འགྲོ་བ་ནི། རེ་ཞིག་ད་རུང་རྫོགས་ཆེན་སྙིང་ཐིག་གི་གདམས་པའི་ཡང་ཟབ་ཀྱི་ཉིང་ཁུ་སྟོན་པའི་ལས་འབྲེལ་མེད་པར་ངེས་པའོ་ཞེས་པའོ། །དེ་ལྟ་བུའི་གོལ་ཤོར་ནོར་འཕྲང་གི་འགག་སྒྲོལ་ནི། བྱ་བྱེད་མི་དགོས་བྱས་པས་ཟིན་པ་མེད། །བྱ་དང་མི་བྱའི་རྩིས་ལས་འདས་པའོ། །བསྒོམ་མེད་བསྒོམ་པ་ལས་འདས་བསྒོམས་ཀྱང་འཕུང་། །བལྟར་མེད་ལྟ་བ་ལས་འདས་གང་ལ་བལྟ། །བཙལ་མེད་བཙལ་བ་ལས་འདས་རྙེད་པ་མེད། །འདི་ལྟར་རིག་པ་ཟང་མ་ཐལ་བྱུང་དུ། །འདུག་སྟེ་བཤད་ཀྱང་མི་ཉན་མི་དེ་ལ། །རྫོགས་ཆེན་ལས་འབྲེལ་མེད་པ་དགོད་རེ་བྲོ། །གང་ལ་བལྟས་ཀྱང་ཀ་དག་ཀློང་ཆེན་གྱི། །དགོངས་པར་ཤར་བས་འཁོར་འདས་གཉིས་སུ་མེད། །དེ་འདྲའི་དགོངས་པ་གླུ་རུ་བླངས་པ་ལ། །དུས་གསུམ་རྒྱལ་བ་དགྱེས་པར་གདོན་མི་ཟ། །འོ་ན་ཕྱི་རོལ་འཁྲུལ་བའི་སྣང་ཡུལ་དུ། །རང་སར་ཡན་དུ་བཅུག་ནས་སླར་ལ་ཡང་། །འཁྲུལ་བར་མི་འགྲོའམ་ཞེས་བརྗོད་གྱུར་ན། །ཐ་མལ་མི་ཡིས་བདག་ཏུ་བཟུང་བས་འཁྲུལ། །རྣལ་འབྱོར་པ་ཡིས་གཞི་མེད་རྩ་བྲལ་དུ། །ཤེས་པས་བཅོས་བསླད་བླང་དོར་མི་བྱེད་པར། །རང་བབས་འཛིན་མེད་བཞག་པས་མི་འཁྲུལ་ལོ། །ཞེས་གསུངས་ཏེ། བྱ་བྱེད་རྩོལ་སྒྲུབ་ལས་འདས་བྱར་མེད་ཀུན་བཟང་གི་དགོངས་པ་ཀློང་དུ་གྱུར་ནས་ཇི་བཞིན་བསྙེགས་ཚར་དུས་དེ་ལ་གོལ་ཤོར་ནོར་ས་ཞིག་ཡོད་པ་མ་ཡིན། དཔེར་ན་ཐོན་དགོས་སའི་ས་ལ་ཐོན་ཚར་དུས་ལམ་ནོར་དུ་ཨེ་འགྲོ་བསམ་དགོས་པ་མ་ཡིན་ཞིང་མ་ཐོན་གོང་གི་མི་ཐོན་འདུག་ཚེ་ལ་ལམ་ནོར་བ་ཡོད་ཆོག་པ་ལྟ་བུ་ཞིག་ཡིན། དེ་བཞིན་དུ་རྫོགས་ཆེན་ཡེ་གྲོལ་ལྷུན་གྲུབ་ལ་བྱ་བྱེད་བྱས་ཆོས་ཀྱི་རྩོལ་སྒྲུབ་དང་སྒོམ་མེད་སྒོམ་པའི་མཚན་འཛིན། བལྟར་མེད་ལ་ལྟ་བའི་རྩོལ་བ་ལ་སོགས་པ་གཉིས་མེད་ཀྱི་དོན་ལ་གཉིས་འཛིན་གྱི་བྱེད་པ་ཞུགས་བཞག་དུས། དེ་རང་ལ་བཞག་ནས་གཞན་དུ་བཙལ་བཞིན་ཡོད་པས། དེ་འདྲ་བ་ལ་རྫོགས་པ་ཆེན་པོ་ལ་སྔ་འདྲེས་གཅིག་གིས་ཉེ་རུ་མི་འགྲོ་བར་གསུངས་ཤིང་། དེ་ཅན་པོ་གླེན་པ་ཧོན་ལོག་གྱེན་ལ་འགྲོ་ཟེར་ནས་ཐུར་ལ་ཁ་འཁོར་ནས་འགྲོ་བ་ལ་མཚམས་རེར་དགོད་བྲོ་བ་ཡང་འཆོར་འདུག་ཞེས་པ་དང་། མདོར་ན་གང་ལ་བལྟས་གང་ནས་བརྟགས་ཤིང་དཔྱད་ཀྱང་། ཀ་དག་ཀློང་ཆེན་ཡེ་ཟིན་རྩོལ་སྒྲུབ་བྲལ་བའི་གནས་ལུགས་འཁོར་འདས་གཉིས་མེད་ཆོས་ཟད་རྒྱ་གྲོལ་གྱི་དགོངས་པར་འདི་ལྟར་གླུར་བླངས་པ་ལ། དབྱིངས་ནས་དུས་གསུམ་རྒྱལ་བས་ཨ་ལ་ལ་ཧོ་ཞེས་ངོ་མཚར་བའི་བཞད་སྒྲ་དང་བཅས་ཏེ། དགྱེས་པའི་འཛུམ་མདངས་ཕྱུངས་བཞིན་ཡོད་པར་གདོན་མི་ཟ་ཞེས་རྒྱལ་བ་དགྱེས་པའི་ལམ་བཟང་འཁྲུལ་མེད་དུ་བསྟན་པའི་ཞར་ལ་འདི་ནས་དོགས་སློང་ཞིག་བཀོད་པ་ནི། འོ་ན་མ་བཅོས་རང་སར་འཁྲུལ་སྣང་ལ་ཡན་དུ་ཡོད་ཐོག་ལ། ད་རུང་ཡན་དུ་བཅུག་ནས་མ་བཅོས་བསྐྱུར་ན་འཁྲུལ་བར་མི་འགྲོའམ་སྙམ་ན། ཐ་མ་ཐ་མལ་ངོ་མ་ལ་བཟུང་བ་ན་འཁྲུལ་ལོས་འགྲོ་ཡང་། འདི་ཐ་མལ་མ་བཅོས་པའི་དོན་ཏེ། ཐ་མལ་ལ་འཁྲུལ་འབྱམས་སུ་ཐོངས་ཤོག་གསུངས་པ་མ་ཡིན་པར་བཅོས་ཤིང་བཅོས། བསྒྱུར་ཅིང་བསྒྱུར་ནས། ཆུ་དཀྲུགས་ཏེ་རྙོག་པ་ལྟར་དུ་གནས་ལུགས་ཀྱི་རང་གཤིས་རང་བབས་ཀྱིས་མ་བཞག་པར། གཟུང་བྱ་འཛིན་བྱེད་ཀྱི་ཡིད་སེམས་སུ་འཁྲུལ་ནས་གནས་དོན་ལུས་སུ་ཤར་བ་ཡིན། འདིའི་སྐབས་ཀྱི་ཐ་མལ་མ་ཡེངས་མི་སྒོམ་པར་ཡེངས་མེད་འཛིན་པ་བྲལ་བའི་གཤིས་ནམ་མཁའ་ལྟ་བུར་འཇོག་དགོས་པ་ཡིན། སེམས་ཅན་ཐ་ཤལ་བ་མི་ལ་སོགས་པའི་བདག་འཛིན་གྱིས་འཁྲུལ་ལ། རྣལ་འབྱོར་བས་གཞི་མེད་རྩ་བྲལ་གྱི་གནས་ལུགས་ཤེས་ནས། འཛིན་མེད་རང་བབས་སུ་བཞག་བཞག་དུས་མ་འཁྲུལ་བ་ཡིན་ཞེས་པའོ། །དེ་ལྟ་བུའི་མ་འཁྲུལ་དོན་གྱི་གནད་དེ་ཟིན་ན། གོལ་ཤོར་ནོར་ས་མེད་པར་བསྟན་ནས། སླར་ཡང་འཕྲང་བསལ་བའི་ངོ་སྤྲད་པ་གསུངསཔ་ནི། འདི་ལ་གོལ་ས་ཨེ་ཡོད་བརྗོད་གྱུར་ན། །འདི་ལ་གོལ་ས་ནོར་ས་གཅིག་ཀྱང་མེད། །གོལ་ས་ཞེན་ཅིང་ཆགས་ན་ཡོད་པ་ཡིན། །གང་ཤར་ཉིད་ལ་འཛིན་པ་མེད་པ་ནི། །གོལ་སར་ལྟུང་རྒྱུ་ཞིག་ནི་ག་ལ་འོངས། །འོན་ཀྱང་རིག་པ་ཡུལ་ལ་འཆར་དུས་སུ། །གང་ཤར་རྣམ་པར་རྟོག་པའི་ངོ་བོ་ལ། །ལྟ་བ་དེ་ཉིད་བསྒོམ་དུ་འདོད་པ་མིན། །དེ་ཡི་དུས་ཀྱི་རིག་པ་ས་ལེ་བ། །རྗེན་པའི་ཆ་དེ་ཕྱལ་ལེ་སྐྱོང་བའོ། །དེ་ཡང་རིག་པ་འཕྲོ་འདུ་མེད་པ་རུ། །གནས་པའི་དུས་ཀྱི་གནས་ཆའི་མི་རྟོག་པ། །དེ་ཉིད་སྒོམ་གྱི་དངོས་གཞི་མ་ཡིན་ཏེ། །དེ་ཡི་དུས་ཀྱི་ཧྲིག་གེ་སང་ངེ་བའི། །གསལ་དྭངས་ངར་ཆ་དེ་ཉིད་སྐྱོང་བའོ། །གནད་འདི་མ་གོ་འཆར་གནས་གཉིས་ཀ་ལ། །བལྟ་བ་དེ་ཉིད་སྒོམ་པའི་ངོ་བོ་ཡིན། །སྙམ་ན་འཁྲུལ་བར་འགྱུར་རོ་སྙིང་གི་བུ། །གནས་པ་ཙམ་ནི་བསམ་གཏན་ལྷ་དང་འདྲ། །འཆར་བ་ཙམ་ནི་ཐ་མལ་རྟོག་པ་འདྲ། །དེ་ལ་བསྒོམས་ཀྱང་སངས་རྒྱས་འཐོབ་མི་འགྱུར། །ཞེས་གསུངས། ཀུན་བཟང་ས་ལ་མི་བཟང་གཅིག་ཀྱང་མེད་ཅེས་གསུངས་པས། གོང་ནས་བཤད་པ་ལྟ་བུའི་ཀུན་བཟང་དགོངས་པའི་གཏན་སྲིད་ད་ལྟ་ནས་ཟིན་སོང་དུས། ཁྱུང་མཁའ་ལྡིང་ནམ་མཁའ་ནས་འཕུར་ན་གཡང་ལ་ལྷུང་དོགས་མེད་པ་དང་འདྲ་བར་གོལ་ས་ཡོད་པ་མ་ཡིན་ཡང་ཞེན་ཅིང་ཆགས་སོང་ན་གོལ་ཤོར་ནོར་ས་ཚང་མ་ཡོད་པ་རེད། ཀུན་གཞིའི་རྣམ་ཤེས་དང་བཅས་པའི་སེམས་དང་། ཉོན་ཡིད་ཡིད་ཤེས་དང་བཅས་པའི་ཡིད། སྒོ་ལྔ་སོ་སོར་ཞེན་པའི་རྣམ་རྟོག་དང་བྲལ་བ། འོད་གསལ་ཡེ་ཤེས་ཀྱི་ཏིང་འཛིན་ལས་མི་གཡོ་ཞིང་དེའི་རྣམ་པ་མ་དོར་བའི་ཡེངས་འཁྲུལ་འཛིན་པ་དང་བྲལ་བ་དེ་ཐུགས་རྗེའི་གསང་བ་ཡིན་པར་གསུངས་ཤིང་། སེམས་དང་བྲལ་བའི་བསམ་གཏན་གྱི་བག་ཆགས་རང་ཟད་སུ་སོང་བས་གཟུགས་ཁམས་ལ་སྐྱེ་བའི་གནས་མེད། ཡིད་རྟོག་མེད་རྩེ་གཅིག་པ་དང་ཡང་བྲལ་སོང་བས་གཟུགས་མེད་དུ་སྐྱེ་བའི་མཐའ་སྟོང་པ་དང་། རྟོག་བཅས་གཟུང་འཛིན་དང་བྲལ་བས་འདོད་ཁམས་ལ་སྐྱེ་བའི་གནས་མ་ཡོད་པ་སྟེ། བསམ་གཏན་བཞི་དང་འགོག་པའི་ཡེ་ཤེས་རྣམ་པར་མི་རྟོག་པ་སྤང་གཉེན་རང་གི་ངོ་བོ་ཆ་དང་བཅས་པ་རང་དག་ལ་སོང་དུས་རིག་པའི་གོལ་ས་སེམས་དང་དེར་འཛིན་གྱི་བག་ཆགས་དག་པ་ཡིན། སེམས་འགག་ནས་ཡེ་ཤེས་མི་གཡོ་ཞིང་། སྣང་རིག་འཛིན་མེད་ཆེན་པོར་ལ་བཟླ་བ་དེ་གསང་བ་སྙིང་ཐིག་གི་དགོངས་པ་མཐར་ཐུག་ཡིན་ཞེས་པའོ། །དེས་ན་རྣམ་རྟོག་ངོ་ཤེས་པ་དང་རིག་པ་ངོ་ཤེས་པ་གཉིས་ཀ་གཅིག་མིན་ལ། རྣམ་རྟོག་གི་ངོར་བལྟ་བ་དེའང་སྒོམ་སྐྱོན་ཡིན། བལྟ་བྱ་ལྟ་བྱེད་དང་བྲལ་བར་བཞག་ཚེ། དེ་དུས་ཀྱི་རིག་པ་ལ་ངོ་བོ་ངོས་བཟུང་མེད་རུང་། གསལ་སྟོང་བརྗོད་མེད་རང་ངོ་རང་གིས་རིག་པ། རིག་བྱ་རིག་བྱེད་གཉིས་སུ་མེད་པ། རང་གསལ་འཛིན་མེད། གནས་ཆ་ནས་ཡར་ལ་སད། འགྱུ་ཆ་ལ་མ་ཤར་བའི་ཟང་ཐལ་རྗེན་པའི་ངོ་བོ་ས་ལེ་རྗེན་ནེ་སྟེ། གསལ་ས་ལེ་བ། གང་གིས་ཀྱང་མ་བསྒྲིབས་པ་རྗེན་ཡེ་རེ་བ། གཟུང་འཛིན་དང་བྲལ་བའི་ཆ་དེ་ཕྱལ་ལེ་བའམ་ཤར་བ་མཉམ་བརྡལ་རྗེན་པ་སྟེ། དེ་ཉིད་བར་མེད་དུ་བསྐྱང་དགོས། གནས་དུས་ཀྱི་མི་རྟོག་པ་མུན་ནེ་བ་དེ་ཡང་རྫོགས་ཆེན་གྱི་སྒོམ་ངོ་མ་མིན། དེ་དུས་ཀྱི་ཧྲིག་གེ་བ། ཟང་ཐལ་ལེ་བ། སང་ངེ་བ་ལ་སྒྲིབ་པ་མེད་པར་གསལ་གདངས་ངར་དང་བཅས་པ་ཁོང་ནས་འཆར་གསུངས་ཡོད་པས། དེ་ལྟ་བུའི་ཞི་ལྷག་ཟུང་འབྲེལ་གྱི་ཉམས་ལེན་གྱིས་ཟང་ཐལ་རིག་པའི་ཡེ་ཤེས་རྗེན་ལ་ཕུད་དུས། སྤྲིན་མེད་ཡེ་དག་གི་ནམ་མཁའི་ཁམས་ལ་བལྟས་པ་དང་འདྲ་བར་གཤིས་ལ་འཁོར་བ་ཞེས་པ་ཞིག་ཡེ་ནས་ཡོད་མ་མྱོང་བའི་གནས་ལུགས་ཀྱི་རང་ངོ་མཐོང་ནས་སྲིད་གསུམ་ཀ་དག་གི་དགོངས་པ་དྲི་མེད་རྣམ་དག་ཆེན་པོ་མངོན་དུ་གྱུར་པ་ཡིན། གནད་འདི་མ་གོ་བར་འཆར་གནས་གཉིས་ཀ་ལ་ལྟ་འདུག་པ་དེ་ནི་བསྒོམས་ཀྱང་སངས་རྒྱས་འཐོབ་རྒྱུ་མེད་པའི་འཁོར་བའི་སེམས་ཡིན། རྒྱུ་དེར་འབྲས་བུ་དེ་དང་འདྲ་བ་ཞིག་མ་གཏོགས་ཡོད་དོན་ཡོད་པ་མ་ཡིན་ཞེས་པ་དང་། ཀུན་མཁྱེན་འཇིགས་གླིང་གིས་ཀྱང་། སེམས་གསལ་སྟོང་ཞི་གནས་འཛིན་པ་ཅན། །ཡིད་རྟོག་དཔྱོད་ཀྱི་ལྷག་མཐོང་གཡོ་འཕྲུལ་པོ། །དབྱིངས་ལུང་མ་བསྟན་གྱི་བྱར་མེད་གསུམ། །འདི་གསུམ་པོ་རྫོགས་ཆེན་ཁྱུ་ནས་བུད། །ཅེས་དང་། སྒོམ་དྲན་འཛིན་གཉེན་པོའི་འཆིང་བ་དང་། །བློ་ཆེད་འཛིན་བྱས་པའི་སྟོང་ཉམས་ཅན། །བློ་གོལ་ཡུལ་འདྲེས་པའི་རྗེས་འདེབས་གསུམ། །ཁྱོད་གསུམ་ཡང་རྫོགས་ཆེན་ཁྱུད་ནས་བུད། །ཅེས་པ་དང་། སེམས་འདུ་ཤེས་བྲེང་པོའི་ལྟ་སྒོམ་དང་། །བློ་གོ་རར་འཐུམ་པའི་ཉམས་ཞེན་དང་། །ཡིད་མྱོང་ཤེས་དྲི་མས་སྦགས་དེ་གསུམ། །ཁྱོད་གསུམ་ཡང་རྫོགས་ཆེན་ཁྱུད་ནས་བུད། །ཅེས་པ་སྟེ་མདོར་ན་གསུམ་གསུམ་དགུ་ཡིས་རྫོགས་ཆེན་གྱི་ཁྱུ་ནས་ཕུད་ཡོད་པ་ཡིན། མདོར་བསྡུས་ན་བཅས་བཅོས་མེད་པར་སྟོང་ས་ལེར། ཡང་ཁྲོལ་ལེར་ཡེངས་མེད་འཛིན་མེད་དུ་བསྐྱང་དགོས་པ་ཡིན། འདི་ནས་དོན་བསྡུས་ནས་གསུངས་པ་ནི། མདོར་ན་གང་གི་དུས་སུའང་རིག་པའི་ཆ། །རྗེན་པ་ཟང་ཐལ་ཤེལ་གོང་འདྲ་བ་དེ། །ཀློང་དུ་མ་གྱུར་བར་དུ་ས་ལེར་སྐྱོངས། །གྱུར་ནས་དེ་ཡི་ངང་ལ་འབྲལ་མེད་གྱིས། །ཁྲེགས་ཆོད་ལྟ་བའི་གནད་འགག་རིག་པ་ནི། །རྗེན་ལ་ཕུད་ནས་ས་ལེར་སྐྱོང་བ་ལ། །ཟེར་བས་གནད་འདི་ཁོ་ན་གལ་ཆེ་སྟེ། །འདི་ནི་ཚིག་བརྒྱའི་མདོ་འགགས་ཡིན་པས་ན། །སྐལ་ལྡན་སྙིང་གི་བུ་རྣམས་ཤེས་པར་གྱིས། །ཞེས་གསུངས་ཏེ། མདོ་ཚུར་བསྡུས་ན་འཆར་གནས་གང་གི་དུས་སུའང་། རིག་ཆ་མ་འགགས། གསལ་གདངས་ངར་དང་བཅས་པ། ཟང་ཐལ་རྗེན་པ། ཤེལ་གོང་དྭངས་པ་འདྲ་བ་ཞིག་ཡོད་པ་དེའི་ངང་དང་མི་འབྲལ་བ་གྱིས། བསྒོམ་པ་མི་གཙོ་གོམས་པ་གཙོ། གོམས་པ་ཀློང་དུ་གྱུར་ན་སྒོམ་པའི་མཆོག་ཡིན་པར་གསུངས་པས། ནམ་ཞིག་ཀློང་དུ་གྱུར་དུས་རིག་པའི་ཆོས་ཉིད་དེ་བཞིན་ཉིད་དེའི་ངང་ལ། ཆོས་ཅན་རང་ངོས་སྟོང་པ་དང་། ཆོས་ཉིད་གཞན་ངོས་སྟོང་པ་ཟེར་འདུག་རྒྱུའི་བློས་བཀོད་ཀྱི་གྲུབ་མཐའ། མདོ་ཕྱོགས་ཀྱི་ལྟ་བ་ཐམས་ཅད་ཚུགས་མི་ཐུབ་པར། རང་གྲོལ་རྗེས་མེད་དུ་ཞིག་ནས། ཡུལ་སྣང་རིག་པའི་ངོ་ལ་མི་འགག་ཅིང་། རིག་པ་ཡུལ་ཐོག་ལ་མི་འདྲེས་པར་རྗེན་ལ་བུད་པ་ཡིན། དེ་བུད་དུས་གཟུང་འཛིན་འཁོར་བའི་སྣང་ཞེན་ཐམས་ཅད། ཆུ་ལ་རི་མོ་བྲིས་པ་དང་འདྲ་བར་སྤོང་གཉེན་རང་གྲོལ་ལ་བུད་འགྲོ་བ་ཡིན་ཞེས་གསུངས་ཤིང་། སྤྱིར་རིག་པ་ཞེས་པ་ཙམ་གྱི་གོ་དོན་གཅིག་པ་མ་རེད། འདིའི་སྐབས་ལ་གོ་དོན་གྱི་བརྡར་ཤ་འབྱེད་རྒྱུ་ཞིག་ལ། རྗེ་རིན་པོ་ཆེའི་ལམ་རིམ་གྱི་ནང་ན། གང་དག་སེམས་མི་རྟོག་པར་གནས་པའི་རིག་པའི་གསལ་ཆའི་ངར་མེད་པ་ཞི་གནས་དང་། གསལ་ཆའི་ངར་ཡོད་པ་ལྷག་མཐོང་དུ་འདོད་པ་རྣམས་མི་རིགས་ཏེ་གསུངས་ནས། སྒྲུབ་བྱེད་ཀྱི་ལུང་གིས་གསལ་བར་མཛད་ཡོད་ཀྱང་། རིག་པ་ཟེར་ཚད་པོ་རིག་པ་གཅིག་མ་ཡིན། ཚིག་གཅིག་ཀྱང་དོན་ཁ་ཁ་ཡིན། སྐབས་སོ་སོའི་ཆོས་སྐད་དང་སྦྱར་དགོས་པ་རེད། དེ་རྫོགས་ཆེན་བཤད་པའི་སྐབས་མ་རེད། གསལ་ཞིང་རིག་པ་སེམས་ཀྱི་མཚན་ཉིད་ཅན་པོའི་རིག་པ་དེ་ལ་གསུངས་པ་རེད། ཇི་ལྟར་གསུངས་པ་རེད་ཟེར་ན། དེའི་གོང་ངོ་མ་དེ་ན་ཤེར་ཕྱིན་མན་ངག་དང་ས་སྡེའི་དགོངས་པ་དང་མཐུན་པར་སྒོམ་རིམ་བར་བའི་ལུང་ཞིག་དྲངས་ནས། ཤིན་ཏུ་སྦྱངས་པ་དང་ལྡན་པའི་སེམས་ཉིད་ལ་གནས་པ་ནི་ཞི་གནས་ཞེས་བྱ། ཞི་གནས་དེ་ཉིད་ལ་གནས་པའི་ཚེ་ན་དེ་ཁོ་ན་ཉིད་ལ་རྣམ་པར་དཔྱོད་པ་གང་ཡིན་པ་དེ་ནི་ལྷག་མཐོང་ཡིན་པར་གསུངས་ཤིང་། དེ་ཁོ་ན་ཉིད་དེ་གང་ཡིན་པ་རེད་ཟེར་ན་དེ་ནི་རྫོགས་ཆེན་སྐབས་ཀྱི་རིག་པ་རང་བྱུང་གི་ཡེ་ཤེས། སྔགས་བླ་མེད་ཀྱི་ཆོས་སྐད་ལ་སེམས་ཀྱི་རྡོ་རྗེ་དང་། གཉུག་མ་དོན་གྱི་ཡེ་ཤེས་ལ་སོགས་པའི་ཐ་སྙད་ཀྱིས་ཁྱད་པར་དུ་བྱེད་པ་དེ་ཡིན། དེ་བཞིན་དུ་ཡང་ས་སྐྱ་པཎ་ཆེན་གྱིས། ལྟ་དེ་སྤྲོས་པ་ཅན་དུ་འགྱུར་ལ་སོགས་པ་འདི་ཚོ་ཐམས་ཅད། དགོངས་པའི་གནད་གསང་ལེན་ཤེས་ན་མཁས་པའི་རྣམ་བཤད་དང་གྲུབ་པའི་ཉམས་མྱོང་ཐམས་ཅད་ཕྱོགས་གཅིག་ཏུ་འབབ་ཡོད་པ་རེད། གངས་ལྗོངས་འཇམ་དབྱངས་རྣམ་གསུམ་གྱི་གསུང་ལ་འགལ་འདུ་ཞིག་གང་ནས་ཡོང་སྟེ་འགལ་འདུ་ལྷག་པ་མ་རེད། ཡིན་ན་ཡང་གཞུང་གང་བཤད་ནའང་། རང་ལུགས་བཞིན་དུ་བཀྲལ་ཅིང་གཏན་ལ་ཕབས་ཏེ། མཐར་རང་རྒྱུད་ཉམས་ལེན་གྱི་གདམས་པ་གནད་གཅིག་ཏུ་དྲིལ་ནས། རྒྱུད་མ་རུངས་ཉོན་མོངས་ཀྱིས་འཁྲུལ་བའི་ཀུན་རྟོག་འདིའི་ནད་ཐོག་གི་སྨན་རེད་སོང་དུས་དེས་ཆོག་པ་ཡིན། ཐོས་བསམ་གང་བྱས་དེ་སྒོམ་པ་ཉམས་ལེན་གྱི་གནད་དུ་བསྡུས་པ་དེ་ཉིད་བཅུད་དུ་དྲིལ་ཏེ། རང་ཉམས་ལ་ཕན་ནུས་ལྡན་སོང་ན་གང་ཟག་སྐལ་ལྡན་བློ་ཆེན་འདི་ནས་སྙིང་གི་བུ་རྣམས་དེ་ལྟར་ཤེས་པར་གྱིས་གསུངས་ས་དེ་ཡིན་སྙམ། དེ་ཡན་ཆད་ཀྱིས་ལྟ་སྒོམ་སྤྱོད་གསུམ་གྱི་གནད་གཙོ་བོར་བསྟན་པ་ཡིན། དེ་རིང་འུ་ཚོས་སྐལ་ལྡན་སྙིང་གི་བུ་རྣམས་ཤེས་པར་གྱིས་ཞེས་པའི་མཚམས་འདི་ནས་བཞག་སྟེ། ཆོས་ཁྲིད་རྗེས་མར་འབྲས་བུ་གཙོ་བོར་སྟོན་པ་མི་ནོར་བའི་ཐིག་ཆེན་བཞི་དང་། མི་འགྱུར་བའི་གཟེར་ཆེན་བཞི་ལ་སོགས་པ་ནས། ཀ་དག་ཁྲེགས་ཆོད་ཀྱི་དོན་བསྟན་པའི་མན་ངག་འདིའི་གཞུང་རེ་ཞིག་མཇུག་འདྲིལ་ས་ལ་ཐོན་རྩིས་བྱེད་གི་ཡོད་པ་རེད། དེ་འདྲ་ཡིན་དུས་ཞབས་དཀར་ཚོགས་དྲུག་རང་གྲོལ་ཚང་གིས་འདི་ནས་ཚིགས་ལྷུ་རེའི་མགོ་ལ་ཨེ་མ་ཧོ་ཞེས་པའི་ངོ་མཚར་བའི་ཚིག་རེ་རེ་རེ་རེ་སྦྱར་ནས། དེ་དང་མཉམ་དུ་སྐལ་ལྡན་སྙིང་གི་བུ་གསུངས་ནས་བོས་ཏེ། ཁྱེད་ཅག་གིས་ཅིག་ཉོན་དང། ཁོང་གིས་གདམས་པ་མན་ངག་གི་གསང་བའི་ཚིག་ཟབ་མོ་ཞིག་སྙིང་གཏམ་སྙིང་གི་བཅུད་དུ་མ་སྦས་ལྷུག་པོར་བཤད་ནས་ཁྱེད་ཅག་ལ་སྟོན་ཞེས་གསུངས་པ་རེད། དེ་ཡང་འདི་མ་མཐོང་རྒྱང་གི་གཏམ་རྒྱུད། ལྷ་ཡུལ་ལྷ་ཡི་ལོངས་སྤྱོད་ཀྱི་ལྷ་སྒྲུང་བཤད་པ་འདྲ་འདྲ་ཡིན་པ་མ་རེད། གང་ཟག་རེ་རེའི་རྒྱུད་ན་རེ་རེ་ཡོད་པའི་རིན་ཆེན་ནོར་བུའི་གཏེར་མཛོད་ཅིག་དང་འདྲ་བ། རང་ལ་ཡོད་པ་རང་གིས་མ་ཤེས་པར་ཁ་ཕྱི་ལ་འཁོར་ནས། ཕྱི་ནས་བདེ་སྐྱིད་ཅེས་པ་དངོས་པོའི་ལོངས་སྤྱོད་ཅིག་གིས་བསྒྲུབ་རྒྱུ་ཡོད་སྣང་ཤར་ནས་ལམ་ལོག་པར་གཞོན་ནས་རྒ་བའི་བར་ལ་སོང་ཞིང་། ད་རྒས་ནས་འཆི་ས་ལ་ཐུག་ནས་འཆི་ས་མིན་པར་འགྲོ་ས་མེད་པའི་ལམ་སྣེ་ཟད་ས་ལ་ཐུག་ནས་ཡོད་འདུག་ཨ་རོགས་ཚོ། དེ་ནས་ད་རུང་དེ་བཞིན་དུ་ལོང་འགྲོས་བྱས་ཏེ་སྨྱོ་ལྡིང་གཟའ་ལྡིང་མ་བྱེད། སྔུན་ན་ཡོད་པའི་མཐའ་མགོའི་གཡང་ས་ནས་ལྷུང་ཆས་རེད། ཁ་ཚུར་འཁོར་ནས་འདིར་ཤོག་དང་རང་གཞན་འདི་ཕྱིའི་དོན་ཆེན་གྱི་གླེང་མོལ་ཞིག་འདི་ནས་བྱེད། ནང་རང་གི་སེམས་ཉིད་ཀྱི་སྟེང་ནས་གཏན་བདེའི་གཞི་རྩ་ཚུགས་པའི་གནད་གསང་རྩ་ཆེན་ཞིག་ཁྱོད་ལ་བསྟན་པར་བྱ། བདེ་སྐྱིད་གསར་བའི་སྒོ་འཕར་གྱི་ལྡེ་མིག་ཅིག་ཁྱོད་ལ་གཏད་དོ་ཞེས་གསུངས་པ་ཡིན། བདེ་སྐྱིད་ཕྱི་ནས་རྙེད་རྒྱུ་མེད་པའི་ཁོ་ཐག་དེ་སྔའི་འབད་པ་བྱས་པ་དེ་ལས་རང་རོགས་ཚང་མས་ཤེས་པ་རེད། ནང་སེམས་ཀྱི་ཟག་མེད་ཀྱི་བདེ་བ་རྙེད་སོང་བ་ཡིན་ན་གང་སྣང་དག་པའི་སྣང་བ་དང་། མི་བདེའི་སྡུག་བསྔལ་གྱི་མིང་ཙམ་ཡང་མེད་པ་ཞིག་ལ་འགྱུར་བ་ནི། སེམས་འདིའི་སྦྱོང་བརྡར་གྱི་ཐོག་ནས་རང་གིས་རྙེད་དགོས་པ་དེ་བསྟན་པ་ཡིན། རྫོགས་པའི་སངས་རྒྱས་ཐམས་ཅད་ཀྱིས་སྒོམ་བརྒྱབ་ནས་སངས་རྒྱས་ཐོབ་སོང་བ་རེད། སྔོན་བྱོན་གྲུབ་པའི་རིག་འཛིན་ཐམས་ཅད་ཀྱིས་ཀྱང་སྒོམ་བརྒྱབ་ནས་གྲུབ་པ་ཐོབ་སོང་བ་རེད། རྗེ་བཙུན་མི་ལ་རས་པའི་རྣམ་ཐར་ལ་རང་རོགས་ཚང་མས་བལྟས་མྱོང་བ་རེད། ཁོང་གིས་ཀྱང་སྒོམ་བརྒྱབ་ནས་གྲུབ་པ་ཐོབ་སོང་བ་རེད། རྗེ་བཙུན་མི་ལ་རས་པ་དང་པོ་ཁྱིམ་ན་ཡོད་སྐབས། ཅི་འདྲ་འདྲའི་མི་རྟ་མང་པོ་ཞིག་བསད་པ་རེད། དེ་ནས་ངེས་པར་འབྱུང་ནས་མཚན་ལྡན་བླ་མའི་ཟབ་ཁྲིད་གདམས་པ་ལ་བརྟེན་ཏེ། བརྩོན་འགྲུས་དྲག་པོ་མདུང་ཐུང་སྙིང་ཀར་ཚད་ཀྱང་ཕྱིར་བཀྱེད་མེད་པའི་སྟེང་ནས་སྒྲུབ་ལ་སྙིང་རུས་མཛད་དེ་སྒོམ་བརྒྱབ་ནས་གྲུབ་པ་ཐོབ་སོང་བ་རེད། མི་སོ་སོ་ལ་མིང་གི་ཆེ་ཆུང་ཡོད་དང་། ཐོབ་ཀྱི་མཐོ་དམན་དང་། ལོངས་སྤྱོད་འབྱོར་བའི་འཁོས་ཀ་བཟང་ཞན་ཡོད་པ་དང་། དེ་བཞིན་དུ་རིགས་རྒྱུད་ཕོ་མོ་ལ་སོགས་པ་སྣ་ཚོགས་ཡིན་ཡང་། སངས་རྒྱས་རུང་འཁོར་བ་སྤང་རུང་གི་གཞི་རྒྱུད་བདེ་བཤེགས་སྙིང་པོ་ཡོད་ལུགས་གཅིག་པ་ཡིན་ལ། དེ་ཡང་བཟང་ངན་མེད་པར་སུས་བསྒོམས་ན་དེ་སངས་རྒྱས་འགྲོ་བ་རེད། སུས་ཞེན་ཅིང་ཆགས་ནས་ཞེན་ཆགས་ཀྱི་ཨ་འཐས་སོང་བ་ཡིན་ན་དེ་འཁོར་བར་འཁྱམས་འགྲོ་བ་རེད། ད་སྒོམ་རྒྱག་རྒྱུ་འདི་ལ་རྒྱུ་འགྲོ་མི་དགོས། ཟས་ཚགས་མི་འགྲོ། ཞབས་དཀར་ཚང་གིས་ངོ་མཚར་བའི་ཚིག་གི་སྣ་དྲངས་ནས་མ་གཏོགས་གསུངས་མི་བྲ་རྒྱུ། ངོ་མཚར་གྱི་དོན་རྨད་དུ་བྱུང་བ་དེ་གསུངས་དུས་འོ་ཅག་གིས་ཤ་རྩ་ཞིག་རྔུལ་བའི་དཀའ་ལས་རྒྱག་མི་དགོས་པར་ལོངས་སུ་སྤྱོད་ཆོག་པ་རེད། སྒོམ་ཟེར་ན་སྐྱིད་པའི་ལོངས་སྤྱོད་ཟག་མེད་ཀྱི་བདེ་བ། སེམས་ཀྱི་བདུད་རྩིའི་རོ་བཅུད་ཅིག་མྱངས་པ་རེད། དེས་ན་ཐམས་ཅད་ཀྱིས་སྒོམ་རྒྱག་དགོས་པ་རེད། དབེན་པའི་རི་ནས་བསྒོམ་ན་བཟང་པ་རེད། ཁྱད་པར་དུ་དམ་པས་བྱིན་གྱིས་བརླབས་པ་ཏིང་འཛིན་རང་ཤུགས་ལ་སྐྱེས་པའི་ས་ཆ་ཡོད་པ་རེད། དེ་ཚོ་ནས་བསྒོམ་ན་བཟང་བ་རེད། རེད་ཀྱང་འདི་འདྲ་མང་པོ་ཚོགས་པའི་དགེ་འདུན་འདུས་པའི་བཞུགས་གྲལ་ནས། འདུས་པ་མང་ཚོགས་དང་མཉམ་དུ་བསྒོམས་ན་དགེ་འདུན་འདུས་པའི་བྱིན་རླབས་རྐྱང་བས་ཀྱང་ཉམས་རྟོགས་ཀྱི་ཡོན་ཏན་མ་སྐྱེས་པ་སྐྱེད། སྐྱེས་པ་ན་འཕར་བའི་ནུས་སྟོབས་ཀྱི་ཁྱད་པར་བསམ་གྱིས་ཅི་ལ་ཁྱབ། འདི་འདྲའི་མཐུན་རྐྱེན་འཛོམ་རྒྱུ་ཡང་། ནམ་ཡིན་ན་འཛོམ་རྒྱུ་དཀའ་མོ་ཡིན། འདི་ལ་ཐུག་རྒྱུ་དཀའ་བ་རེད། མཇལ་རྒྱུ་དཀོན་པ་རེད། བྱ་བརྒྱ་འུར་རྡོ་གཅིག་གིས་དཀྲོགས་པ་དང་འདྲ་བར་རྫོགས་པའི་སངས་རྒྱས་ཀྱི་ས་ལ་ཁྱུ་འདེད་བྱེད་གསུངས་རྒྱུ་ཞིག་དང་། ཚོམ་བུ་འབུམ་དང་བཅས་པ་མངོན་སངས་རྒྱས་པའི་ལོ་རྒྱུས་དང་། ཡང་ཚོམ་བུ་ཚོགས་སྒྲུབ་ཚོའི་སྐབས་ལ་དྲོད་ཉུལ་བ་དང་། ནམ་ཚོད་འཛིན་པའི་བྱ་དང་། ཁ་བཞོ་ཡི་མཛོ་མོ་ནས་བཟུང་སྟེ། རིག་འཛིན་གྱི་ས་ལ་འཁོད་རབས་དང་བཀོད་རབས་ཀྱི་ལོ་རྒྱུས་དེ་ཚོ་གཞི་མེད་ཅིག་ཅི་ལ་ཡིན། གསང་སྔགས་གསར་རྙིང་གི་རིས་སུ་མ་ཆད་པའི་གྲུབ་བརྙེས་རིག་འཛིན་གོང་མ་རྣམ་པའི་དགོངས་སྤྱོད། མ་སྒོམ་མངོན་སངས་རྒྱ་བའི་མྱུར་ལམ་ལ་སུས་སྐུར་བ་འདེབས་ཐུབ། སློབ་དཔོན་དབྱིག་གཉེན་གྱི་མདོའི་ཞལ་འདོན་གསུང་བཞིན་ཡོད་པ། ཉིན་ལྟར་གདུང་གསེབ་ཀྱི་ཕུག་རོན་ཞིག་གིས་གོ་བའི་བྱིན་རླབས་ཀྱིས། ཕུག་རོན་གྱིས་མི་རིང་བར་བདེ་འགྲོའི་ལུས་རྟེན་ཐོབ་པས་མ་ཚད་བདེན་པ་མཐོང་རབས་ཀྱི་ལོ་རྒྱུས་ཡོད་པ་དང་། གསང་སྔགས་བཤད་རྒྱུད་དང་སྙན་བརྒྱུད་ཀྱི་གདམས་པ་ཟབ་མོ་མན་ངག་ལག་ཁྲིད་ལ་སྒོམ་བཞིན་ཡོད་དུས་དེའི་གྲལ་ལ་བསྡད་པ་ཙམ་ཞིག་གི་ཕན་ཡོན་གྱི་མཐའ་སུས་བཟུང་ཤེས། གོང་གི་ལོ་རྒྱུས་དེ་ཚོ་དུས་བསྐལ་བ་བཟང་དུས་ཀྱི་སྐད་ཆ་ཞིག་རེད། གནའ་དུས་དང་དེང་སང་འདྲ་བ་མ་རེད་བསམ་རྒྱུ་མེད་པར། དེ་རིང་ཁ་སང་དུས་ཚོད་སྙིགས་མའི་སྐབས་ཡིན་ཡང་། ཆོས་སྤྱི་ཡི་བྱིན་རླབས་སུམ་ཆ་ཡལ་བའི་དུས་འདིར། མུན་པ་ཅི་ཙམ་ནག་ན་མར་མེ་དེ་ཙམ་གསལ་བའི་དཔེ་བཞིན་དུ་གསང་སྔགས་ཟབ་དོན་གྱི་བྱིན་རླབས་ལྷག་པར་མྱུར་བའི་དུས་ཡིན་གསུངས་པ་ཡིན། དེས་ན་སྤྲོ་བ་སྐྱེད་ཤིག་དང་སེམས་ཀྱིས་ཐུབ་ན་རིག་འཛིན་གྱི་ཚོགས་གྲལ་རེད། མཉམ་བཞག་ཐུན་རེ་རེའི་དུས་ཚོད་སྐར་ཆ་རེ་རེ་ཡང་གསེར་དང་དངུལ་གྱི་རིན་ཐང་གིས་གཞལ་ཐབས་མེད་པའི་གོ་སྐབས་བཟང་པོ་ཚེས་པའི་དུས་ཚོད་རེད། འདི་བཞིན་དུ་དམ་ཚིག་གཙང་མ་ཞིག་མཐར་ཕྱིན་པ་ཡིན་ན། ཕྱི་མར་ཚོམ་བུ་གཅིག་ཏུ་མངོན་འཚང་རྒྱ་བའི་རྟེན་འབྲེལ་ཡོད་པ་རེད། སྒོམ་རྒྱག་རྒྱུ་འདི་ལ་དཀའ་སྣང་དང་མི་བདེ་བའི་སྣང་བ་ཤར་འདུག་པ་འདི། གཅིག་ན་སྒོམ་རྒྱག་མི་ཤེས་པ་དང་། གཉིས་སུ་མ་ལོབས་པས་ཡིན་པ་རེད། འདི་སླ་མོ་ཡིན་པའི་ཚོད་ཀྱིས་སྒོམ་མི་དགོས་པ་དང་འདྲ་བས། རྩོལ་མེད་རང་བཞག་གི་སྒོམ་ལ་སླ་ཆེས་ནས་ཕར་རྒྱབ་ལ་མཆོངས་སོང་བའང་ཡོད་པ་རེད། དེ་ནི་སླ་བས་ཡིད་མ་ཆེས་ནས་སེམས་ཀྱི་གསང་གནད་ངོ་མ་འཛིན་མ་ཤེས་པས་ཡིན་པ་རེད། ལུས་སེམས་གཉིས་ཀ་རང་བབས་སུ་བཞག་ནས་རང་ངོ་མ་བཅོས་པར་བསྐྱང་རྒྱུ་དེ་ལ་རྫོགས་ཆེན་གྱི་སྒོམ་གྱི་གནད་མང་ཤོས་འདུ་བ་ཡིན། དེ་ལ་དཀའ་ལས་ཤིག་མི་དགོས་པ་རེད། རྣམ་རྟོག་གཅིག་རྔ་གཅིག་མཐུད་ཀྱིས་དུས་གསུམ་གྱི་སྔོན་བསུ་རྗེས་དཔྱོད་མང་པོ་ཞིག་བྱེད་འདུག་དགོས། བྱ་བཞག་མང་པོའི་སེམས་ཁུར་དེ་སྤྲིན་ཁ་འཚུབས་པ་འདྲ་ཞིག་དགོས་ན་དེའི་དཀའ་བ་རེད། དཀའ་ནས་འགའ་རེས་མ་བཟོད་པར་རང་སྲོག་ལྕེབས་པ་ཡང་ཡོད་པ་ཡིན། བྱ་བྱེད་སེམས་ཀྱི་ཁུར་བོ་ཐམས་ཅད་ཕོག་ནས། མཉམ་བཞག་གཡོ་བ་མེད་པའི་བསམ་གཏན་གྱི་ངང་ལ་གནས་རྒྱུ་འདི། ཐོག་མེད་ཀྱི་དུས་ནས་ངལ་བ་བརྒྱ་ཕྲག་གིས་དཀའ་ནས་ཐང་ཆད་པའི་སེམས་ཀྱི་ངལ་གསོ་ས་ཞིག་ཡིན་པ་རེད། འོན་ཀྱང་ཐོག་མེད་ནས་གོམས་སོང་བའི་བག་ཆགས་ངན་པའི་ཤུལ་ལ་ཤོར་ནས་སྒོམ་རྒྱག་ཚེ་རྣམ་རྟོག་འདི་མི་ཆོད་པ་དེ་དཀའའོ་སྙམ་ན། དེ་ཡང་རང་གིས་རང་ལ་དཀའ་ལས་ཀྱི་ཁུར་བོ་མི་དགོས་རྒྱུ་ཞིག་འགེལ་བཞིན་ཡོད་པ་རེད། མི་གསོན་པོ་ལ་རྣམ་རྟོག་མི་སྐྱེས་ས་གང་ནས་འགྲོ། རྣམ་རྟོག་སྐྱེས་ཀྱང་སྐྱོན་པ་མ་ཡིན། རྣམ་རྟོག་ཆོས་ཉིད་ཀྱི་རྩལ་རེད། སྐྱེ་ན་སྐྱེས་སར་ཞོག མ་སྐྱེས་ན་མི་སྐྱེས་སར་ཞོག གནས་ན་ཆོས་ཉིད་ཀྱི་ངོ་བོ་ཡིན་པ་རེད། འཕྲོས་ན་ཡེ་ཤེས་ཀྱི་རོལ་རྩལ་རེད། རྣམ་རྟོག་ལ་རྗེས་མཐུད་མ་བྱེད། རྗེས་དེད་སོང་ན་ཆུ་འཁྱག་རོམ་ལ་འགྱུར་བ་དང་འདྲ་བར་འཁྲུལ་བར་འགྱུར་བ་ཡིན། རང་གར་ཞོག་དང་རང་གྲོལ་དུ་འགྱུར་འགྲོ་བ་རེད། ཆོས་ཉིད་རང་བབས་ཀྱི་ངང་ལ། རྩོལ་མེད་དུ་རང་བཞག་བྱས་དུས་རྣམ་རྟོག་ཟེར་རྒྱུའི་བཙོག་པ་ཞིག་ཟུར་ན་ལྷག་ནས་བསྡད་ཡོད་པ་མ་རེད། རྣམ་རྟོག་ལ་བཙོག་བལྟས་བྱས་ཏེ་དེ་བཀག་རྒྱུའི་འབད་པ་བྱེད་མ་དགོས་དུས་དེ་སླ་གི་དེ་ཅི་མི་དཀའ་གི བརྡ་ཤེས་པའི་ཐ་སྙད་ལས་དང་པོ་བ་ལ་གོ་བརྡ་སྤྲོད་རྒྱུའི་དོན་དུ། སྣང་ཚུལ་གྱི་དབང་དུ་བྱས་ཏེ། ཆོས་ཅན་དང་ཆོས་ཉིད། འཁྲུལ་དང་མ་འཁྲུལ་བ་ཞེས། ལྡོག་ཆ་རེ་རེ་ནས་བཤད་པ་མ་གཏོགས། གནས་ཚུལ་དབང་བཙན་དུ་བྱས་པ་ཡིན་ན། གཉིས་ཆོས་ཀྱི་མཚན་མ་ཡེ་ནས་མ་གྲུབ་པ་ཟུང་འཇུག་རོ་མཉམ་ཆེན་པོ། སྤྲོས་བྲལ་ཐིག་ལེ་ཉག་གཅིག་གི་ཀློང་དུ་ལ་བཟླ་བའི་ནང་ལ་མ་འདུས་པ་ཞིག་ཡོད་པ་མ་རེད། དག་སྣང་དང་མོས་གུས་ལྡན་པའི་ལས་ཅན། དབང་བཞི་བའི་ཡེ་ཤེས་བྱིན་རླབས་འཕོ་བའི་སྟོབས་ཀྱིས་ངོ་འཕྲོད་པ་ཞིག་གིས། འབད་མེད་ཡེངས་པ་མེད་པའི་རྩོལ་བྲལ་ཆུ་བོ་རྒྱུན་གྱི་རྣལ་འབྱོར་དུ་འཇོག་པ་ལ་མི་ཤེས་རྒྱུ་ཞིག་མེད་པའི་སྟབས་ཀྱིས་འདི་ཉིད་ཤེས་ན་བ་གླང་རྫི་ཡང་གྲོལ་ཞེས་གསུངས་ཤིང་། ཤེས་བྱའི་ཡུལ་ཆེ་བས་སྤྲོས་ལ་འཆེལ་སོང་བ་ཡིན་ན་མིང་པཎྜི་ཏ་ཡིན་ཡང་ཕན་ཐོགས་མེད་པས། འདི་ཉིད་མ་ཤེས་པཎྜི་ཏ་ཡང་འཁྲུལ། །ཞེས་གསུངས་པ་ཡིན། དེ་ལ་པཎྜི་ཏ་ཡང་འཁྲུལ་ན་རང་གའོ་སྙམ་ནས་ཁྲེལ་དུ་མེད་དེ། ཚིག་ལ་མཁས་ན་མཁས་པ་མ་ཡིན་ཏེ། །མི་གཡོ་དོན་ལ་མཁས་ན་མཁས་པ་ཡིན། །ཞེས་གསུངས་པའི་ཕྱིར་ན། དོན་ལ་མཁས་པ་མིན་པས་ན་མིང་གི་པཎྜི་ཏ་ཞེས་གོང་ནས་གསལ་ཁ་སྟོན་པ་ཡིན། ཐོས་པ་ཆེ་བ་ཞེས་པ་དེ་ཡང་མང་པོ་ཞིག་ཐོས་མྱོང་བ་ཞིག་ལ་ཟེར་བ་མིན་པར་གང་ཞིག་ཐོས་པ་དེ་ཉིད་རང་རྒྱུད་དུ་སྦྱར་ནས་ཉོན་མོངས་པའི་སྨན་ལ་སོང་བ་ཞིག་ལ་གསུངས་པ་ཡིན་པས་ན། འདིར་བཞུགས་རྣམ་པ་ཐམས་ཅད་ཀྱིས་ཐུགས་ཀྱི་ཞུམ་པ་སྤོངས་ལ་སྤྲོ་སེམས་སྤོབས་ཉམས་དང་ལྡན་པའི་ཐུགས་དམ་ཉམས་ལེན་ལ་འབད་པ་མཛོད་དང་། ཐུན་རེར་སྒོམ་པ་དང་སྐར་ཆ་རེ་རེར་སྒོམ་པའི་ཕན་ཡོན་ཡང་ཚོགས་བསགས་སྒྲིབ་སྦྱངས་ཕལ་གྱིས་དོ་ཟླ་ཡོད་པ་མ་ཡིན། རང་རེའི་ཐེངས་འདིའི་མཉམ་དུ་ཆོས་ལ་སྤྱོད་པའི་དུས་ཚོད་ཀྱི་ཕྱེད་ཀའི་རིང་ས་སོང་ཟིན་ནས་ད་ཐག་ཐུང་སའི་ཉི་མ་རྡོག་མ་ཁ་ཤས་ལས་མེད་པས་བར་ཆད་ཀྱི་འཚེ་བ་མེད་པའི་སྔོན་འཆར་བཞིན་དུ་ཡོངས་སུ་འགྲུབ་ལ་ཉེ་བ་ཡིན། འདི་ནི་ས་འདིའི་བསྟན་འཛིན་འགན་བཞེས་པ་སྡེ་དང་བཅས་པའི་ཐུགས་ཤུགས་ནུས་པའི་རྐྱེན་དང་། སྔོན་རྗེས་ཐོག་བར་མཐའ་གསུམ་གྱི་སྐུ་ཚེགས་འོ་བརྒྱལ་མང་པོ་བརྒྱུད་དེ་བྱུང་བའི་གྲུབ་འབྲས་ཡིན་ལ། འདིར་བཞུགས་ཚང་མ་སྐུ་ཁམས་བདེ་ཐང་གི་ངང་ནས་ཆོས་མཛད་ལེགས་གྲུབ་ཀྱི་མཛད་པ་མཐར་ཕྱིན་ཏེ་ཐག་རིང་ནས་ཕེབས་པ་ཚོ་རང་ཡུལ་གཞིས་ལ་བདེ་འབྱོར་ཡོང་བའི་ཐུགས་འགན་རང་རང་གི་ངོས་ནས་བཞེས་མཛོད་ཅེས་ཞུ་བ་ཡིན། ཆོས་ཁྲིད་རྗེས་མ་ལ་མཇལ་ཡོང་། ད་དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ། རང་གཞན་གྱིས་དུས་གསུམ་བསགས་པའི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡམས་པའི་མཐུས། ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་དམ་པ་གང་ན་སུ་བཞུགས་ཐམས་ཅད་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱད་དེ། མཐར་ཐུག་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པའི་ཕྱིར། རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག།

ཐུན་ལྔ་བའི་ཆོས་ཁྲིད།

ཆོས་པ་ཆོས་སྒོར་ཞུགས་པའི་ཐོག་བར་མཐའ་གསུམ་ལ་བློ་ལྡོག་རྣམ་བཞིའི་དམིགས་པ་དང་ནམ་ཡང་འབྲལ་མི་རུང་བའི་སྐོར་དེ་ཆོས་དུང་ནམ་བུས་ལ་བཤད་པ་དང་། དེ་ལས་ཁྱད་པར་དུ་ལས་རྒྱུ་འབྲས་དཀར་ནག་དགེ་སྡིག་གི་སྐོར་འདི་སྤྱིར་གནད་ཆེ་ཞིིང་། ཡང་སྒོས་དེང་སང་གི་དུས་འདིར་གནད་ཆེ་བ་སྟེ། དེ་ཡང་ཇི་ལྟར་ཞེ་ན། འུ་ཚོ་བོད་ཀྱི་ས་ཆ་ནས་མང་ཆེ་བ་ཞིག་གིས་ཚེ་འདི་ཕྱི་ལས་རྒྱུ་འབྲས་ཁས་ལེན་ཞིང་། འོན་ཀྱང་དེའི་ངེས་ཤེས་ཡང་དག་དེ་གཏིང་ནས་མ་འཁྲུངས་ཞིང་རང་རྒྱུད་ཉམས་ལེན་གྱིས་གནད་དང་སྦྱར་མ་ཐུབ་པ་ནི་ནད་དང་སྨན་གཉིས་ཀ་མ་འཕྲོད་པ་དང་འདྲ་བར་ཆགས་པས། དཀར་ནག་དགེ་སྡིག་གི་བླང་དོར་ཕྲ་ཞིབ་ཏུ་མ་ནུས་པར་འདིར་སྣང་འཁོར་བའི་བྱ་བཞག་སྙིང་མེད་ཆུའི་ལྦུ་བ་ལྟ་བུ་འདི་ལ་མགོ་འཁོར་ནས་དོན་ཆེན་གཏན་གྱི་བྱ་བ་དང་། དོན་ཆུང་ཚེ་འདིའི་མནོག་ཆུང་གི་བདེ་བ་གཉིས་ཀ་བརྗེ་བཞིན་ཡོད་པ་འདི་ནི། གནད་ངོ་མ་མ་ཤེས་པར་ཀླད་ཅིག་ལོག་ཡོད་པའི་རྟགས་ཡིན། སོ་སོ་སྐྱེ་བོ་ཡིན་པའི་ཕྱིར་ན་སྡིག་པ་མི་དགེ་བའི་ལས་བསམ་སྦྱོར་གཉིས་ཀས་བསྒྲུབ་མི་ཤོར་བ་ག་ལ་སྲིད། ལྟུང་བ་འབྱུང་བའི་སྒོ་གཙོ་བོ་གཅིག་དེ་མི་ཤེས་རྨོངས་པའི་གཞན་དབང་དུ་སོང་བས་ལོས་ཡིན། ལས་ཞེས་པ་དེ་ནི་སྣ་ཚོགས་པ་སྒྱུ་མའི་འཕྲུལ་འཁོར་དང་འདྲ་བའི་རྣམ་གྲངས་མང་པོ་ཅན་ཞིག་ཡིན་པས། མཐོང་ཆོས་མྱོང་འགྱུར་གྱི་ལས། སྐྱེས་ནས་མྱོང་འགྱུར་གྱི་ལས། ལན་གྲངས་གཞན་ལ་མྱོང་འགྱུར་གྱི་ལས་ལ་སོགས་པ་སྟེ། དེ་དག་ཀྱང་རང་དགར་མི་བམ། མི་རུལ། མེད་པར་མི་འགྱུར་བ་ལ་སོགས་པ་རྣམ་གྲངས་བསམ་གྱིས་མི་ཁྱབ་པ་ཡོད་པ་ཡིན། འོན་ཀྱང་ལས་དེ་དག་གང་ཡིན་ཡང་གཉེན་པོ་སྟོབས་བཞིས་བཤགས་པ་བྱས་ན། བཤགས་པའི་སྟོབས་དེས་ཉི་མས་བ་མོ་བཞུས་པ་དང་འདྲ་བར་ཇེ་སྲབ་ཏུ་འགྲོ་བ་དང་། བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེས་ན། ཉི་མས་མུན་པ་བསལ་བ་དང་འདྲ་བར་སྡིག་པ་རང་དག་ལ་འགྲོ་བ་ཡིན། དེ་བཞིན་དུ་སྟོང་པ་ཉིད་ལ་བློ་བཞག་པའི་ཉམས་ལེན་སྒོམ་པའི་ཐབས་ཀྱི་མན་ངག་ཟབ་མོ་དང་འཕྲད་སོང་བ་ཡིན་ན། ཚེ་འདིའི་སྟེང་ནས་སྲིད་རྩ་དྲུངས་ནས་འབྱིན་ཏེ། རང་གཞན་དོན་གཉིས་འགྲུབ་པའི་གཏན་སྲིད་ཟིན་ནས་ལས་དགེ་སྡིག་གི་ཕན་གནོད་མེད་པའི་སར་ཡང་ཕྱིན་ཏུ་ཡོད་པ་ཡིན། དེ་ཡང་དོན་དམ་དཔྱོད་པའི་རིག་ངོ་ན་ལས་རང་བཞིན་གྱིས་མ་གྲུབ་པ་ཡིན་པས་ཡིན་ཏེ། བཅོམ་ལྡན་འདས་ཀྱིས་མདོ་སྡེ་ལས། ལས་ནི་རྣམ་པར་རྟོག་པ་ལས་འབྱུང་གི་རྣམ་པར་མི་རྟོག་པས་ནི་མ་ཡིན་ནོ་ཞེས་གསུངས་པ་ཡིན། དེ་ལྟ་བུའི་རྒྱུ་འབྲས་ཀྱི་འགྲོས་དེ་ངེས་པའི་སྟེང་དེ་ནས། བློ་ལྡོག་སྔོན་མ་དལ་འབྱོར་རྙེད་དཀའ་དང་ཚེ་མི་རྟག་གཉིས་ཀས་ཚེ་འདི་ལས་བློ་ལྡོག བློ་ལྡོག་ཕྱི་མ་འཁོར་བའི་ཉེས་དམིགས་དང་ལས་རྒྱུ་འབྲས་གཉིས་ཀས་ཚེ་ཕྱི་མ་ལས་བློ་ལྡོག་སྟེ། བློ་ལྡོག་རྣམ་བཞིས་འཁོར་བ་ལས་བློ་ལྡོག་པའམ་འཁོར་བ་ལས་བློ་ལོག་པ་སྟེ། འཁོར་བ་ལ་ཞེན་ལོག་ཤུགས་དྲག་སྐྱེས་པའི་དེ་མ་ཐག་ཏུ་འདི་ནས་བྲོས་ཏེ་འདི་ན་ཐར་དགོས་སོ་སྙམ་པའི་གང་དུ་བྲོས་ས་ཐར་བ་འཚོལ་བ་དེ་གནད་ཀྱི་སྙིང་པོ་ཡིན་ལ། དེས་ན་ཐར་བའི་ངོས་ཟིན་དགོས་པ་ཡིན། འོ་ན་ཐར་བ་ལ་རྣམ་གྲངས་ཅི་འདྲ་ཞིག་ཡོད་ཅེ་ན། ཐར་བ་བྱང་ཆུབ་གསུམ་སྟེ། ཉན་ཐོས་དགྲ་བཅོམ། རང་རྒྱལ་དགྲ་བཅོམ། སངས་རྒྱས་ཀྱི་བྱང་ཆུབ་སྲིད་ཞི་གཉིས་ཀྱི་མཐའ་ལ་མི་གནས་པ་གང་ཡིན་པ་དེ་ཉིད་དང་གསུམ་ཡིན། དེ་དག་ལས་གང་ཡིན་གཅིག་གདམ་དགོས་པས། དེ་ཡང་གདམ་རྒྱུ་ལག་ན་ཡོད་དུས་གང་ལེགས་པ་དེ་མི་གདམ་པར་ངན་ཤོས་དེ་ཅི་ལ་གདམ། དེས་ན་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་དེ་གདམ་དགོས་པ་ཡིན། ཉན་རང་གཉིས་ཀའི་འབྲས་བུ་ཞིག་ཐོབ་ན། རང་ཉིད་ཁམས་གསུམ་འཁོར་བའི་སྡུག་བསྔལ་དང་བྲལ་བའི་ཞི་བ་ཕྱོགས་གཅིག་པ་ཞིག་ཐོབ་པ་ཡིན་ཡང་། དོན་དངོས་སུ་རང་དོན་གཞན་དོན་གཉིས་ཀ་བཟང་བོ་ངོ་མ་ཞིག་མ་འགྲུབ་པ་སྟེ། དེ་ཡང་རང་ཅི་འདྲ་རོགས་ཀྱིས་སྡུག་བསྔལ་མྱོང་བཞིན་ཡོད་པས། སེམས་ཅན་ནི་གྲངས་མེད་པ་བརྗོད་ཀྱིས་མི་ལངས་པ་ཞིག་ཡིན་ཕྱིར་དེ་འདྲ་མང་པོ་ཞིག་མ་དགོས་སེམས་ཅན་བརྒྱ་ཚོ་སྟོང་ཚོ་ཙམ་རེ་ལའང་ཕན་བསྒྲུབ་རྒྱུ་བསྐྱུར་ནས་རང་གཅིག་པུ་བདེ་ཐབས་འཚོལ་བ་དེ་དམ་པའི་ཆོས་ལུགས་མིན་པས་མ་ཚད་འཇིག་རྟེན་མྱི་ལུགས་ལ་ཡང་ཐ་མའི་ལས་ཤིག་ལས་མ་འདས། ལུས་གྲངས་མེད་དེ་སྔོན་བླངས་པའི་ཕ་མ་ཐམས་ཅད་ཚེ་འདིའི་ཕ་མ་དང་ཁྱད་པར་མེད་ཅིང་། ཐེག་དམན་ཉན་རང་གི་ལམ་ལ་ཞུགས་ནས་དེའི་འབྲས་བུ་ཐོབ་པ་དེས་གཞན་དོན་རྒྱ་ཆེན་ཞིག་མི་འགྲུབ་པས་མ་ཚད། རང་དོན་ལ་ཡང་སྤངས་རྟོགས་མཐར་ཕྱིན་པ་རྫོགས་པའི་སངས་རྒྱས་ཀྱི་ཡོན་ཏན་དང་འདྲ་བ་ཐོབ་མེད་པ་ཡིན། དེ་མི་ཐོབ་པའི་རྐྱེན་དེ་གང་ནས་བྱུང་བ་ཡིན་ན་ངེས་འབྱུང་གི་བསམ་པ་ཁྱད་པར་བ་ད་ཞག་བཤད་པའི་ངེས་འབྱུང་ཆེན་པོས་མ་ཟིན་ཞིང་། སྟོང་ཉིད་ཉི་ཚེ་བ་ཞིག་ལས་མ་རྟོགས་པ་དང་། བྱང་ཆུབ་སེམས་ཀྱིས་མ་ཟིན་པའི་དབང་གིས་ཡིན། དེས་ན་དོན་དུ་གཉེར་བྱ་མ་ནོར་བ་ནི་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ཡིན་པར་ཤེས་ཤིང་། ཐོབ་བྱ་མཆོག་ཏུ་གྱུར་པ་དེ་རྫོགས་པའི་སངས་རྒྱས་ཀྱི་གོ་འཕང་ཡིན་པ་ཤེས་པ་ཙམ་གྱིས་མི་ཆོག་པར་ཁ་ཡོད་ལག་ཏུ་ཡོད་པ་ཞིག་གི་ཐོག་ནས་ཚེ་སྐྱེ་བ་མང་པོར་མི་འགོར་བར་རང་ཉིད་ཀྱིས་མངོན་དུ་འགྱུར་བ་དེ་ལ་གཞི་ཞིག་བྱས་པའི་འདུན་མ་གཏན་ལེགས་གཏན་ཉེས་ཀྱི་ལམ་སྣེ་ལ་ཐོན་ཡོད་པ་ཡིན། ད་ལྟའི་རང་རེ་ལ་ཁ་ཚུར་བསྐོར་ན་མདོ་སྔགས་ཚང་ལ་མ་ནོར་བའི་ལམ་བཟང་གང་ལ་ཞུགས་ན་ཞུགས་ཆོག་ཆོག་གི་འདོད་དགུའི་ལོངས་སྤྱོད་འཛོམས་པའི་ཡང་མཛོད་ཀྱི་ནང་དུ་ཐོན་སོང་བ་དང་ཁྱད་མེད་པའི་མཐུན་རྐྱེན་ཚོགས་པ་འདི་ནི་རང་ཉིད་ཀྱི་དལ་འབྱོར་ལྡན་པའི་ལུས་རྟེན་རིན་ཐང་ཆེ་བའི་ངེས་པ་ཡང་སྐྱར་དུ་རྙེད་དུ་ཡོད་པ་ཡིན། ཐར་བ་མཆོག་གི་ཕན་ཡོན་རྫོགས་པའི་སངས་རྒྱས་ཀྱི་གོ་འཕང་ཐོབ་ན་རང་གཞན་སེམས་ཅན་ཐམས་ཅད་ཀྱི་དོན་འབད་མེད་ལྷུན་གྲུབ་ཏུ་འབྱུང་བ་རུ་འདུག་ལ། དེ་ཡང་འོད་གསལ་རྫོགས་པ་ཆེན་པོའི་ལམ་འདི་ནས་ཚེ་གཅིག་མི་ལུས་འདིའི་སྟེང་ནས་ཐོབ་པར་འདུག་སྙམ་པའི་དགའ་བ་དང་བཅས་པའི་རེ་བ་དེ་མཐོ་ས་ལ་འཇོག་དགོས་ཤིང་། དང་པོ་ཉིད་ནས་མིག་གིས་དམའ་བལྟས་བྱས་ནས་སེམས་ཀྱིས་དམན་ལམ་ལ་སྙེག་པར་བྱེད་ན། ལྷུང་ས་བབ་གདན་ཡང་དེ་འདྲ་ཞིག་ལས་གང་ན་ཡོད། ཡང་ལྟ་བས་མཐོ་ས་ལ་སྙེག་ནའང་སྤྱོད་པས་དམན་ལམ་ནས་ཡར་བརྟེན་ནས་མ་བལྟས་ན། ལྟ་བ་དེ་མཐོ་ཆེས་སྤྱོད་པ་དེ་དམའ་ཆེས་སོང་བའི་ལྟ་སྤྱོད་ཆ་མི་མཚུངས་པ་ལ། སྒོམ་པ་བཟང་པོ་ཞིག་དང་འབྲས་བུ་བཟང་པོ་ཞིག་ཀྱང་ལོགས་ནས་ཡོད་དཀའ་བ་སྟེ། རྒྱུ་འབྲས་མི་བསླུ་བར་བྱེད་པ་གཅིག་པའི་ཕྱིར་ན་རྒྱུ་དེ་ལ་མ་ལྟོས་པའི་འབྲས་བུ་ཞིག་འབྱུང་ག་ལ་འབྱུང་། དེས་ན་མདོ་ལམ་གྱི་ས་བཅུ་ལམ་ལྔའི་འགྲོས་ཀྱིས་བཤད་པའམ། སྔགས་ལམ་གྱི་བསྐྱེད་རྫོགས་རིམ་པ་གཉིས་ཀྱི་རིག་འཛིན་རྣམ་བཞིའི་བགྲོད་ལམ་ནས་བཤད་པའམ། འོད་གསལ་རྫོགས་པ་ཆེན་པོའི་འབད་མེད་གཞི་གྲོལ་ཀ་དག་རིག་སྟོང་རྗེན་པ་བསལ་བཞག་དང་བྲལ་བའི་ཡེ་ཤེས་ཀྱི་ལམ་ནས་བཤད་པ་གང་ཡིན་ཡང་གཉིས་ལ་མི་གནས་པའི་རྫོགས་པའི་བྱང་ཆུབ་སྐུ་བཞི་ཡེ་ཤེས་ལྔའི་བདག་ཉིད་མངོན་དུ་བྱེད་པ་དེ་འབྲས་བུ་རུ་བཞེད་པ་ནི་གཅིག་ཏུ་མཐུན་ཞིང་། དེ་མཐུན་ན་མངོན་པར་རྫོགས་པ་འཚང་རྒྱ་བ་ལ་སྙིང་རྗེ་གཞུ་ལྟ་བུ་ཞིག ཤེས་རབ་མདའ་ལྟ་བུ་ཞིག ཐབས་ལ་མཁས་པ་སྐྱེས་བུ་མདའ་རྩལ་དང་ལྡན་པ་གསུམ་ལ་དཔེ་བྱས་ནས་དེ་དག་ཚོགས་དགོས་པར་གསུངས་ཤིང་། ད་རེས་དལ་འབྱོར་མི་ལུས་ཐོབ་ཅིང་། མཚན་ལྡན་གྱི་བླ་མ་དང་མཇལ་བ་ཡང་ཡིན་ཏེ། དད་པས་མོས་པའི་ངོ་ཁ་ན་སངས་རྒྱས་སྤྲུལ་བའི་སྐུ་རྟག་ཏུ་བཞུགས་པའི་མ་ཚད་པར་བརྒྱུད་གསུམ་བླ་མའི་བྱིན་རླབས་ཞུགས་སའི་རྟེན་དེ་སོ་སྐྱེའི་བླ་མ་ཡིན་ཡང་རང་གི་དད་པས་ཁྱོག་ན་སངས་རྒྱས་དངོས་བྱོན་གྱི་བྱིན་རླབས་ཐོབ་ཐུབ་པ་ཡིན་པའི་ཕྱིར། གདམས་ངག་གི་བདུད་རྩི་ཐོབ་ནས་ཀུན་བཟང་ཆོས་སྐུའི་བསྟན་པ་ལ་ཞུགས་པའི་སྐལ་བ་དང་ལྡན་ཏེ་སྨིན་གྲོལ་གདམས་པའི་གསང་མཛོད་ལ་ཅི་དགའ་དགར་ལོངས་སྤྱད་ན་ཆོག་པའི་བསྐལ་བ་འདི་འདྲ་ཞིག་ལ་འཁེལ་ནས་སངས་རྒྱས་ལས་ཀྱང་འཕྲད་པར་དཀའ་བ་གསང་ཆེན་འོད་གསལ་རྫོགས་པ་ཆེན་པོའི་ཆོས་དང་འཕྲད་ཡོད་དུས་འདིར། པདྨ་ཅན་གྱི་མཚོ་ལ་ངང་བ་དང་དྲི་ཞིམ་པདྨའི་ཚལ་ལ་བུང་བ་རྒྱུ་བ་བཞིན་དུ་དུས་ཚོད་སྔ་དྲོ་དང་ཕྱི་དྲོ་སྐར་ཆ་ཙམ་ལ་ཡང་བརྩོན་ལེན་གྱི་སྟེང་ནས་དགའ་སྤྲོ་དང་བཅས་ཏེ་འདིར་འཇུག་རན་པ་ཡིན། རིང་ལམ་རྒྱུའི་ཐེག་པས་བསྐལ་བ་གྲངས་མེད་མང་པོར་རྫོགས་སྨིན་སྦྱངས་པ་རྒྱ་མཚོ་ལྟ་བུ་མཐར་ཕྱིན་དགོས་པ་ཡིན་པས། དེ་ནི་འུ་ཚོ་སྔ་ཕྱི་དྲོའི་སྒོམ་ཐུན་རེ་རེའི་རྒྱུན་བསྲིང་མི་ཐུབ་པ་ཞིག་ལ་དཀའ་ཞིང་། ཉེ་ལམ་སྔགས་སྤྱི་ལ་མཚོན་ན་མཚན་བཅས་དང་མཚན་མེད་ཀྱི་རྣལ་འབྱོར་བསྒོམས་ནས་སྐྱེ་བ་བཅུ་དྲུག་གམ་མི་ཚེ་བདུན་ནམ་གསུམ་གྱིས་སངས་རྒྱས་འགྲུབ་པར་གསུངས་ཡོད་པ་དེ་ཡང་ཤིན་ཏུ་མྱུར་ལམ་འདི་ལ་བསྡུར་ཡོང་ན་མི་ཐུང་བ་ཡིན། མ་ཧཱ་ཨ་ནུ་གཉིས་ཀའི་སྨིན་གྲོལ་བསྐྱེད་རྫོགས་རང་ལམ་བཞིན་དུ་དེ་མཐར་ཕྱིན་ན། ཚེ་གཅིག་གིས་སངས་རྒྱས་འགྲུབ་གསུངས་ཀྱང་། བསྐྱེད་རིམ་གྱི་གསལ་སྣང་དང་རྫོགས་རིམ་གྱི་ཏིང་འཛིན་གཅིག་ཀྱང་མི་ནུས་པ་ཞིག་གིས་དེ་ཡང་འགྲུབ་ཐབས་མེད་ཅིང་། འོད་གསལ་རྫོགས་པ་ཆེན་པོ་འབད་མེད་གཞི་གྲོལ་གྱི་ལམ། ཀ་དག་རིག་པའི་རང་ངོ་རྗེན་ལ་ཕུད་པའི་རིག་སྟོང་སྐྱེ་འགག་དང་བྲལ་བ་འདིའི་ངང་བསྐྱང་ཐུབ་རྒྱུ་ན། འོག་མའི་ཐེག་པ་ཐམས་ཅད་ཀྱི་ལམ་གནད་ཀྱི་སྙིང་བོ་འདིར་འདུས་པ་ཡིན། དེ་ཇི་ལྟར་འདུས་པ་ཡིན་ན། སེམས་དང་ཡིད་དང་རྣམ་ཤེས་གསུམ་མེད་པའི་ཏིང་ངེ་འཛིན་ལ་གནས་པ་ཡིན། དེ་ལ་སེམས་དང་ཡིད་དང་རྣམ་ཤེས་གསུམ་ཟེར་དུས། སེམས་ནི་ཀུན་གཞིའི་རྣམ་ཤེས། ཡིད་ནི་ཉོན་ཡིད། རྣམ་ཤེས་ནི་སྒོ་ལྔའི་རྣམ་ཤེས་ཏེ། དེ་དག་དང་བྲལ་བའི་ཏིང་འཛིན་ལ་གནས་དུས་ཀུན་རྟོག་འཕྲོ་འདུ་མེད་པ་ཡིས་འདོད་པའི་ཁམས་ཀྱི་སེམས་ལས་ལོག་པ་དང་། གསལ་བ་དང་གསལ་བར་འཇོག་མཁན་གྱི་སེམས་མེད་པ་ཡིན་པས་ན་གཟུགས་ཀྱི་ཁམས་ཀྱི་སེམས་ལོག དྭངས་གསལ་སྤྲོས་པ་ཀུན་བྲལ་རང་བྱུང་གི་ཡེ་ཤེས་ཀྱིས་གཟུགས་མེད་ཁམས་ཀྱི་སེམས་ལས་ལོག་སྟེ་ཀུན་གཞི་ཚོགས་བརྒྱད་དང་བཅས་ཏེ་ཁམས་གསུམ་གྱི་སེམས་ལས་རྣམ་པར་གྲོལ་བའི་ཡེ་ཤེས་བརྙེས་པ་ཡིན་པས་སངས་རྒྱས་ཀྱི་ས་ཞེས་བྱ་བ་གཞན་ནས་འཚོལ་དུ་མེད་པ་ཡིན། འོད་གསལ་རིག་པའི་ཡེ་ཤེས་ཀྱི་ཐོག་ལ་གནས་དུས་གང་ཟག་དང་ཆོས་ཀྱི་བདག་འཛིན་མེད་པས་ན་ཉན་རང་བྱང་སེམས་གསུམ་གྱི་ལྟ་དགོངས་དེའི་ནང་དུ་འདུས་པ་ཡིན། སྒོ་གསུམ་དྲི་མེད་ཀྱི་གཙང་སྦྲར་སྤྱོད་པ་ཀྲི་ཡོག་སྡེ་གསུམ་གྱི་ཡེ་ཤེས་དྲི་མེད་གསུམ་ཡང་འདུས་ཤིང་། སྣང་རིག་གཉིས་མེད་ཟུང་འཇུག་དང་གསུམ་པོ་འདུས་པའི་རྟོགས་པའི་ཏིང་འཛིན་ཁྱད་པར་ཅན་མངོན་དུ་བྱས་པས་ན་ནང་རྒྱུད་སྡེ་གསུམ་གྱི་དགོངས་པ་ཡང་འདུས་པ་དེས་ན་འོག་མའི་བློ་སྐྱོན་མེད་པའི་ཉམས་ལེན་ཏིང་ངེ་འཛིན་དང་རྟོགས་པའི་ཡོན་ཏན་གྱི་ཆ་ཐམས་ཅད་འདིར་འདུས་པས་ན་ཡོངས་རྫོགས་ཀྱི་ཐེག་པ་ཞེས་པའི་དོན་རིགས་པས་གྲུབ་པ་ཡིན། ཡང་སྒོས་སུ་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་ལམ་ནས་སྣང་བཞིའི་རྩལ་འབྱོངས་ན། ཀ་དག་སྟོང་བའི་འོད་གསལ་དང་ལྷུན་གྲུབ་སྣང་བའི་འོད་གསལ་ཟུང་དུ་འཇུག་ནས་རགས་ལུས་རྡུལ་ཕྲན་དུ་དེངས་པའམ་འོད་ལུས་འཕོ་ཆེན་གྱི་སྐུར་བཞེངས་པའི་སངས་རྒྱས་ཀྱི་དགོངས་པ་སྐུ་དང་ཡེ་ཤེས་གཉིས་སུ་མེད་པའམ་སྐུ་དང་ཡེ་ཤེས་འདུ་འབྲལ་མེད་པའི་དོན་སྐད་ཅིག་གཅིག་གིས་ཚང་བར་ནུས་པའི་ཐར་བ་མཆོག་གི་གོ་འཕང་ལ་སྙེག་ཐུབ་པ་ཡིན། དེ་ལྟར་བྱེད་པ་ལ་གཞི་བདེ་གཤེགས་སྙིང་པོ་རང་ལ་ཚང་བའི་ཐོག་ནས། རྐྱེན་དགེ་བའི་བཤེས་གཉེན་མཚན་ཉིད་དང་ལྡན་པ་བསྟེན་ཏེ། ཐབས་དེ་ཡི་གདམས་པའི་མན་ངག་ཉམས་ལེན་གྱི་གནད་དུ་འཛིན་པ་ནི་བློ་སྦྱོང་རྣམ་བཞིས་བློ་སྦྱོང་བའི་དོན་སྒོ་ཡིན་པའི་སྒོ་ནས་དངོས་གཞི་ཉམས་ལེན་གྱི་གནད་ཀྱི་སྙིང་བོར་འཛིན་ལུགས་ཀྱི་ཕྱོགས་ཤིག དོན་གཉིས་ལྷུན་གྲུབ་ཀྱི་བསམ་པ་ཡིད་བཞིན་དུ་འགྲུབ་པའི་ཐར་བ་དམ་པའི་ཕན་ཡོན་སྐོར་ནས་མདོ་ཙམ་ཞིག་ཞུས་ཏེ། སྐབས་སུ་བབ་པ་གང་ཞིག་གསན་པར་བྱ་བ་བསྐྱེད་རྫོགས་ལ་མི་ལྟོས་པར་སེམས་ཉིད་ཡེ་ནས་སངས་རྒྱས་པའི་རང་བཞིན་དུ་བསྟན་པ། རྫོགས་པ་ཆེན་པོ་ཀ་དག་ཁྲེགས་ཆོད་ཀྱི་དགོངས་པ། སློབ་དཔོན་པདྨ་ཀ་ར་དང་རྒྱལ་བ་ཀློང་ཆེན་པ་ལ་སོགས་པ་སྔར་བྱོན་དགོངས་པ་བརྡ་དང་སྙན་བརྒྱུད་ཀྱི་བརྒྱུད་གསུམ་རིག་འཛིན་བླ་མའི་དགོངས་བཅུད་མན་ངག་ཏུ་ཚུར་བསྡུས་ཤིང་དེ་ཉིད་ཞིབ་པར་བཀྲལ་བ་ཞབས་དཀར་བ་ཚོགས་དྲུག་རང་གྲོལ་གྱི་གསུང་། འོད་གསལ་རྫོགས་པ་ཆེན་པོ་ཁྲེགས་ཆོད་ལྟ་བའི་གླུ་དབྱངས་ལམ་མ་ལུས་མྱུར་དུ་བགྲོད་པའི་རྩལ་ལྡན་མཁའ་ལྡིང་གཤོག་རླབས་འདི་ཉིད་འཆད་ཉན་གྱི་སྐབས་ལས་འདིའི་ཐོག་མར་དགེ་བ་ཀླད་ཀྱི་དོན་སོང་ཞིང་། བར་དུ་དགེ་བ་གཞུང་གི་དོན་ལས་ཀྱང་སྐལ་ལྡན་ལས་ཅན། ཐུན་མིན་དང་ཐུན་མོང་གི་ངོ་སྐལ་ལ་གཙོ་བོར་བསྟན་པའི་ཁྲིད་རིམ་མང་དག་ལྟ་བ་གཙོ་བོར་བསྟན་པའི་སྒོ་ནས་སོང་བས་མ་ཚད། ཆོས་ཁྲིད་སྔོན་མ་ལ་སྒོམ་པ་གཙོ་བོར་བསྟན་པའི་མན་ངག་ལས་གང་ཞིག་གོམས་པར་བྱ་ཞིང་དེའི་ངང་ལ་གནས་པའི་ལྟ་དོན། ལྟ་སྒོམ་སྤྱོད་འབྲས་བཞི་བོ་དང་སྦྲེལ་ཏེ་ཁྲེགས་ཆོད་ལྟ་བའི་གནད་རིག་པ་རྗེན་ལ་ཕུད་པ། འདི་ནི་ཚིག་བརྒྱའི་མདོ་འགགས་ཡིན་པས་ན། །སྐལ་ལྡན་སྙིང་གི་བུ་རྣམས་ཤེས་པར་གྱིས། །གསུངས་ཏེ་གདམས་པར་མཛད་པ་ཡིན་པས། འདིའི་དོན་དེ་དབང་རྣོན་རིག་པ་རང་སྣང་གི་བློ་ཅན་གྱི་སྤྱོད་ཡུལ་དུ་གྱུར་པ་གསང་འཛིན་དགའ་རབ་དཔའ་བོའི་དངོས་སློབ། རྒྱ་ནག་པོའི་སློབ་དཔོན་ཤྲཱི་སེངྷ་ཡིས་སློབ་དཔོན་པདྨ་ཀ་རཿལ་བརྡ་ཐབས་རྩལ་གྱི་རིག་པའི་དབང་ཆེན་བསྐུར་ཏེ། དཔོན་སློབ་དགོངས་པ་མཉམ་པར་གྱུར་པའི་ཚུལ་བསྟན་པ་དེ་ཉིད་ཀྱི་དགོངས་པའི་རྗེས་སུ་འབྲངས་ཏེ་བཤད་ན། ཆོས་ཟད་ཀ་དག་ཆེན་པོར་ལ་བཟླ་བ། བྱ་བྲལ་ཟང་ཐལ་རྗེན་པར་འགག་བསྡམས་པ། ཡོངས་གྲོལ་མཉམ་པ་ཆེན་པོར་ཆིངས་སུ་བཅིང་བ་དང་གསུམ་གྱིས་རྫོགས་ཆེན་ཀ་དག་ཁྲེགས་ཆོད་ཀྱི་དགོངས་པ་འུབས་སུ་བསྡུས་པ་ཡིན་པས། རིག་པ་ཤར་ཡང་མཐའ་གྲོལ་དུ་སོང་བའི་རང་གསལ་རྗེན་པ་མཚན་རྟོག་གི་སྤྲོས་པས་བསླད་མ་ཞུགས་ཤིང་། ངན་རྟོག་ཏུ་ཤར་ཡང་རང་སངས་སུ་རྗེན་ནེ་ཡིན་པ། བཟང་རྟོག་ཏུ་ཤར་ཡང་མཐའ་གྲོལ་དུ་སིང་ངེ་ཡོད་པ། རང་ས་ན་གནས་ཀྱང་བར་མེད་དུ་ཧ་རེ་ཡོད་པ་དེ་ཉིད། གཉེན་པོས་མ་བསྒྱུར། རྐྱེན་སྣ་ཚོགས་ཀྱི་སྐྱོན་དང་བསླད་པས་མ་ཞུགས་པ་སྟེ། སྤང་གཉེན་གཉིས་ཀ་ལ་མ་ཞུགས་པའི་རིག་ཆ་དེ་ཟང་ཐལ་རྗེན་པའི་ཆོས་སྐུ་ཡིན་པར་བསྟན་པ་ཡིན། འདི་ནས་ཀྱང་ཞབས་དཀར་ཚང་གིས། ཀློང་ཆེན་པའི་ཚིག་དོན་མཛོད་ཀྱི་ཚིག་ངོ་མ་ཚིགས་བཅད་ཡིན་མིན་གྱི་ཁྱད་པར་ཙམ་མ་གཏོགས་སྒྲ་དོན་མ་འགྱུར་བར་བསྟན་ཡོད་འདུག ཚིག་དོན་མཛོད་ཀྱི་ནང་ན། རིག་པ་འཕྲོ་འདུ་མེད་པར་གནས་པའི་དུས་ན་གནས་ཆའི་མི་རྟོག་པ་དེ་སྒོམ་དུ་འདོད་པ་མ་ཡིན། ཞེས་གསུངས་པ་དང་། འོ་ན་གང་ཡིན་པ་རེད་ཟེར་ན། འདིའི་དུས་ཀྱི་རིག་གེ་སིང་ངེ་བའི་གསལ་དྭངས་ཀྱི་རིག་པ་རྗེན་པ་དེ་མ་ཡེངས་པར་ཕྱལ་ལེ་སྐྱོང་བའོ། །ཞེས་རིག་གེར་སིང་ངེ་བའི་གསལ་དྭངས་ཀྱི་རིག་པ་རྗེན་པ་དེ་བསྐྱང་དགོས་པར་གསུངས་པ་དང་། ཡང་རིག་པ་ཡུལ་ལ་འཆར་དུས་གང་ཤར་ལ་ལྟ་བ་དེ་སྒོམ་དུ་ཡོད་པ་མ་ཡིན། དེའི་དུས་ཀྱི་རིག་པ་གསལ་རྗེན་རྗེན་པའི་ཆ་དེ་མ་ཡེངས་པར་སྐྱོང་པའོ། །ཞེས་རིག་པ་ཡུལ་ལ་འཆར་དུས་ཀྱི་གང་ཤར་ལྟ་བ་དེ་སྒོམ་མིན་པར་དེ་དུས་ཀྱི་རིག་པ་རང་གསལ་རྗེན་པའི་ཆ་དེ་བསྐྱང་དགོས། གནད་འདི་མ་གོ་ན་སེམས་གནས་པ་ཙམ་བསམ་གཏན་གྱི་ལྷ་དང་འདྲ་ལ། འཆར་བ་ཙམ་ཐ་མལ་གྱི་རྟོག་པ་དང་འདྲ་བས་དེ་ལ་བསྒོམས་ཀྱང་སངས་རྒྱས་ཐོབ་རེ་སྐན་ནོ་ཞེས་ཀློང་ཆེན་པས་འགག་མཛད་ཡོད་པ་སྟེ་ངེད་ཚོའི་ཁ་སྐད་བྱས་ན་མནའ་བསྐྱལ་བ་རེད། འདི་ནས་ཀྱང་དེ་བཞིན་དུ་གསུངས་པ་ཡིན། དེ་ལྟར་བྱ་བྲལ་ཟང་ཐལ་རྗེན་པར་འགག་བསྡམ་པའི་སྐབས་དང་འབྲེལ་ཏེ། དེ་རིང་གོལ་ཤོར་གྱི་འཕྲང་ལས་སྒྲོལ་བ་སྤྱོད་པ་གཙོ་བོར་སྟོན་པ། ཐིག་ཆེན་བཞི་དང་། གཟེར་བཞི་དང་། ཟད་སར་སྐྱོལ་བ་བཞི་སོགས་རིམ་པར་བསྟན་པའི་དང་པོ་ཐིག་ཆེན་བཞི་བསྟན་པ་ནི། ཨེ་མ་ཧོ། ད་ཡང་སེམས་ཀྱི་བུ་རྣམས་གུས་པས་ཉོན། །ནོར་ས་མེད་པའི་ཐིག་ཆེན་བཞི་བསྟན་པ། །ལྟ་བ་ནོར་ས་མེད་པའི་ཐིག་ཆེན་ནི། །ད་ལྟའི་ཤེས་པ་ས་ལེ་འདི་ཀ་ཡིན། །གསལ་ལ་མི་ནོར་བས་ན་ཐིག་ཅེས་བྱ། །སྒོམ་པ་ནོར་ས་མེད་པའི་ཐིག་ཆེན་ནི། །ད་ལྟའི་ཤེས་པ་ས་ལེ་འདི་ཀ་ཡིན། །གསལ་ལ་མི་ནོར་བས་ན་ཐིག་ཅེས་བྱ། །སྤྱོད་པ་ནོར་ས་མེད་པའི་ཐིག་ཆེན་ནི། །ད་ལྟའི་ཤེས་པ་ས་ལེ་འདི་ཀ་ཡིན། །གསལ་ལ་མི་ནོར་བས་ན་ཐིག་ཅེས་བྱ། །འབྲས་བུ་ནོར་ས་མེད་པའི་ཐིག་ཆེན་ནི། །ད་ལྟའི་ཤེས་པ་ས་ལེ་འདི་ཀ་ཡིན། །གསལ་ལ་མི་ནོར་བས་ན་ཐིག་ཅེས་བྱ། །ཞེས་གསུངས་ཏེ། ཐིག་ཅིག་གིས་མཚམས་ཤིག་བཅད་ན་མཚམས་གསལ་བོར་འབྱེད་ཅིང་ཕྱེད་པ་བཞིན་དུ་རྫོགས་ཆེན་སྙིང་ཐིག་གི་ལྟ་སྒོམ་སྤྱོད་འབྲས་བཞི་བོ་དེ་ད་ལྟའི་རིག་པ་རྗེན་པ་རང་གསལ་འཕོ་འགྱུར་དང་བྲལ་བ་འདིའི་ཁོངས་སུ་འདུས་ཤིང་འདི་གཅིག་པུ་ལ་ཚང་བ་ཡིན། ད་ལྟའི་ཤེས་པ་ཟང་ཐལ་ཤེལ་གོང་ལྟ་བུ་ས་ལེ་བ་དེ་ཀློང་དུ་གྱུར་པ་དེའི་ངང་སྐྱོངས་དང་གསལ་ལ་མི་ནོར་བ་སྟེ། ནོར་འོང་ས་གཞན་དང་མི་འདྲེས་པས་ན་ནོར་ས་མེད་པའི་ཐིག་ཡིན་ནོ་ཞེས་པའོ། །སློབ་དཔོན་ཆེན་པོའི་གཅེར་མཐོང་རང་གྲོལ་གྱི་ནང་ནའང་ཚིག་འདི་དག་ཇི་མ་ཇི་བཞིན་དུ་གསུངས་པ་ཡོད་འདུག དེ་ཡིས་ནོར་ས་མེད་པའི་ཐིག་ཆེན་བཞི་བསྟན་པའོ། །དེ་ནས་འགྱུར་བ་མེད་པའི་གཟེར་ཆེན་བཞི་བསྟན་པ་ནི། མི་འགྱུར་བ་ཡི་གཟེར་ཆེན་བཞི་བསྟན་པ། །ལྟ་བ་འགྱུར་བ་མེད་པའི་གཟེར་ཆེན་ནི། །ད་ལྟའི་ཤེས་པ་ས་ལེ་འདི་ཀ་ཡིན། །དུས་གསུམ་བརྟན་པའི་ཕྱིར་ན་གཟེར་ཞེས་བྱ། །སྒོམ་པ་འགྱུར་བ་མེད་པའི་གཟེར་ཆེན་ནི། །ད་ལྟའི་ཤེས་པ་ས་ལེ་འདི་ཀ་ཡིན། །དུས་གསུམ་བརྟན་པའི་ཕྱིར་ན་གཟེར་ཞེས་བྱ། །སྤྱོད་པ་འགྱུར་བ་མེད་པའི་གཟེར་ཆེན་ནི། །ད་ལྟའི་ཤེས་པ་ས་ལེ་འདི་ཀ་ཡིན། །དུས་གསུམ་བརྟན་པའི་ཕྱིར་ན་གཟེར་ཞེས་བྱ། །འབྲས་བུ་འགྱུར་བ་མེད་པའི་གཟེར་ཆེན་ནི། །ད་ལྟའི་ཤེས་པ་ས་ལེ་འདི་ཀ་ཡིན། །དུས་གསུམ་བརྟན་པའི་ཕྱིར་ན་གཟེར་ཞེས་བྱ། །ཞེས་གསུངས་པ་ཡིན་ན། གཟེར་ཞེས་པ་ནི་འཛེར་ཞེས་པའི་དོན་དག་རེད། འཛེར་མ་གདབ་ན་འགྱུར་བ་མེད་པར་བརྟན་པོ་བྱེད་པ་དེའི་མཚུངས་ཆོས་ཀྱིས་གསུངས་པ་ཡིན། སློབ་དཔོན་ཤྲཱི་སེངྷ་ལ་དགའ་རབ་རྡོ་རྗེས་འདས་རྗེས་ཚིག་གསུམ་གནད་དུ་བརྡེག་པའི་མན་ངག་བབ་པ་རེད། སློབ་དཔོན་འཇམ་དཔལ་བཤེས་གཉེན་ལ་ཤྲཱི་སེངྷས་འདས་རྗེས་གཟེར་བུ་བདུན་པ་བབ་པ་རེད། ཀུན་མཁྱེན་ཀློང་ཆེན་པའི་ཆོས་དབྱིངས་མཛོད་ཀྱི་ལེའུ་བཅུ་གཅིག་པ་ལས་ཅཐུག་ཕྲད་རང་སར་གྲོལ་བའི་གནམ་གཟེར་དང་། རྐྱེན་ངན་རིག་པའི་རྩལ་སྦྱོང་དུ་བསྟན་པའི་གནམ་གཟེར། སྤང་གཉེན་གཞི་ལས་སངས་བའི་གནམ་གཟེར་ལ་སོགས་པ་ནས་ཀུན་མཉམ་ཡངས་པ་ཆེན་པོའི་གནམ་གཟེར་གྱི་བར་དུ་གནམ་གཟེར་བཅུ་གཅིག་གིས་ཅི་སྣང་མཁའ་མཉམ་དག་པར་བསྟན་པ་ཡིན། དེ་བཞིན་དུ་འདི་ནས་ཀྱང་ལྟ་སྒོམ་སྤྱོད་འབྲས་བཞི་ལ་གཟེར་གཅིག་གིས་ཀུན་ལ་ཐེབས་པའི་ད་ལྟའི་ཤེས་པ་རང་གསལ་ས་ལེ་བ། ཡེ་སྟོང་རྩ་བ་དང་བྲལ་བ་རང་གནས་ཡེ་ཤེས་ཀྱི་ངོ་བོ། རྒྱལ་མཆོག་ཀུན་ཏུ་བཟང་བོའི་རོལ་བར་ལ་བཟླ་བ་ནི་ཆོས་སྐུ་རང་མལ་དུ་རང་ངོ་ཤེས་པའི་རང་བྱུང་གི་ཡེ་ཤེས་འདི་ཀ་ཡིན། འདི་ནི་དུས་གསུམ་ཀུན་ཏུ་འགྱུར་བ་མེད་པ་ཡིན། ཇི་ལྟར་འགྱུར་བ་མེད་པ་ཡིན་ན་གཟུང་འཛིན་དང་དུས་གསུམ་གྱི་འབྲེལ་ཐག་ཆད་པའི་ཕྱིར་ན་དུས་གསུམ་ཀུན་ཏུ་འགྱུར་བ་མེད་པ་ཡིན། འགྱུར་མེད་བརྟན་པ་ཡིན་པ་དེའི་ཕྱིར་ན་འདི་ཉིད་གཅིག་པུ་ལྟ་སྒོམ་སྤྱོད་འབྲས་ཐམས་ཅད་ཀྱི་མི་འགྱུར་བའི་གཟེར་དུ་བཏབ་པའོ། །ཟད་སར་འཁྱོལ་བ་བཞི་བསྟན་པ་ལས་དང་པོ་ལྟ་བ་ཟད་སར་འཁྱོལ་བ་ནི། ལྟ་བ་མི་མཐུན་རྒྱ་ཆེ་གྲངས་མང་ཡང་། །ད་ལྟའི་རང་རིག་རང་བྱུང་ཡེ་ཤེས་ལ། །བལྟ་བྱ་དང་ནི་ལྟ་བྱེད་གཉིས་སུ་མེད། །ལྟ་བ་མ་བལྟ་ལྟ་བའི་མཁན་པོ་ཚོལ། །ལྟ་བའི་མཁན་པོ་བཙལ་བས་མ་རྙེད་ན། །དེའི་ཚེ་ལྟ་བ་ཟད་སར་འཁྱོལ་བ་ཡིན། །ལྟ་བ་བལྟ་རྒྱུ་ཅི་ཡང་མེད་པ་ལ། །ཡེ་མེད་སྟོང་ཆད་ཧད་པོར་མ་སོང་བར། །ད་ལྟའི་ཤེས་པ་མ་བཅོས་ས་ལེ་བ། །རྫོགས་པ་ཆེན་པོའི་ལྟ་བ་དེ་ཀ་ཡིན། །ཞེས་གསུངས་ཏེ། སྤྱིར་ན་ལྟ་བ་ཞེས་པ་ནི་གཞལ་བྱའི་ཡུལ་གང་ཞིག་ལ་ཤེས་རབ་ཀྱིས་སྒྲོ་འདོགས་བཅད་དེ་མཐའ་གཅིག་ཏུ་ངེས་པར་འཛིན་པའི་བློ་ཞིག་ལ་ལྟ་བ་ཟེར་བ་རེད། འོན་ཀྱང་མ་རྟོགས། ལོག་རྟོག ཕྱོགས་རྟོགས། ཡང་དག་ཉིད་དུ་མ་རྟོགས་པའི་དབང་གིས་འཇིག་རྟེན་དང་འཇིག་རྟེན་ལས་འདས་པའི་ལྟ་བ་སྣ་ཚོགས་དང་། དེ་དང་འདྲ་བའི་ཐེག་པ་སྣ་ཚོགས་བློའི་སྤྲོས་པ་དང་གྲངས་མཉམ་པར་བཞག་ཆོག་པ་ཡིན། སྔ་འགྱུར་བའི་ཆོས་སྐད་ལ་ཡུལ་ཆོས་དབྱིངས་གཅིག་གི་ཡུལ་ཅན་སོ་སོའི་ཁྱད་པར་གྱིས་ཆོས་ཅན་ལྟ་བའི་ལྟ་བ་དང་། ཆོས་ཉིད་ལྟ་བའི་ལྟ་བ་དང་། རང་རིག་ལྟ་བའི་ལྟ་བ་གསུམ་གྱི་གསུང་སྲོལ་ཡོད་པ་ཡིན། སྐབས་འདི་ནས་ཐུན་མོང་མ་ཡིན་པ་ཡུལ་ཅན་རིག་པའི་ཡེ་ཤེས་ཀྱི་ངོས་ནས་སྣང་སྲིད་འཁོར་འདས་ཀྱིས་བསྡུས་པའི་ཆོས། ཕྱི་སྣ་ཚོགས་སུ་སྣང་བ་ཐམས་ཅད་མཐའ་བྲལ་གཞི་མེད་དུ་སྣང་བ་ཙམ་མ་གཏོགས་པར་ཡོད་མ་མྱོང་། མེད་མ་མྱོང་། བདེན་མ་མྱོང་། རྫུན་མ་མྱོང་། གཞི་མེད་ཡེ་སངས་ཡིན་པས་ན་བླང་དོར་གྱི་ཆོས་ཤིག་ཏུ་མ་གྲུབ་ལ། ནང་རང་སེམས་སྐྱེ་འགག་གི་ཡུལ་དུ་མ་གྲུབ་པས་ན་ངོ་བོ་ངོས་བཟུང་གི་མཐའ་ལས་འདས་པ་ཡིན། ལྟ་སྒོམ་སྤྱོད་པ་བརྒྱུད་དེ་འཐོབ་ཡོང་བའི་ཆོས་ཤིག་མི་དམིགས་ཤིང་མཁའ་གསལ་ཀློང་ཆེན་ཡངས་པའི་དོན་ལས་མ་གཡོས་པས་ན། ལྟ་བའི་མཁན་པོ་བཙལ་བས་མ་རྙེད་པ་དེ་ཚེ་ལྟ་བ་ཟད་སར་འཁྱོལ་བ་ཡིན་པར་གསུངས་པའོ། །རྫོགས་པ་ཆེན་པོའི་སྐབས་ཀྱི་ཟད་དང་མེད་དང་སྟོང་ཞེས་པའི་ཐ་སྙད་འདི་ཚོ་ངོ་མས་ཟད་དེ་མེད་དེ་ཕྱང་ཆད་རེད་སོང་བ་ཞིག་ལ་གོ་རྒྱུ་མ་ཡིན། འོ་ན་ཡོད་ཅེས་པའི་དོན་ཡིན་ནམ་སྙམ་ན་དེ་ཡང་མ་ཡིན་པར་འདི་ནི་ཐ་སྙད་ལས་འདས་པའི་ཚིག་ཅེས་བྱའོ། །ཆོས་ཅན་གྱི་སྣང་བ་ཆོས་ཉིད་ལ་ཐིམ་ནས་ཆོས་ཉིད་གང་དུ་ཡང་བསམ་བརྗོད་མེད་པ་རུ་གྱུར་དུས་ཆོས་ཉིད་ཟད་ཅེས་པ་དང་གོ་ཕྱོགས་གཅིག་པའོ། །མཐའ་བྲལ་ཆོས་ཉིད་ཀྱི་ལྟ་བ་ལ་བལྟ་བྱ་དང་ལྟ་བྱེད་མེད་ཟེར་དུས་ཡེ་མེད་སྟོང་ཆད་ཧད་པོ་ལ་མ་གོ་མ་གཏོགས་དེར་གོ་སོང་ན། ཐར་བ་ནག་པོའི་གོ་ནོར་དུ་སོང་བ་བཞིན་དུ་གཞི་ལྟ་བ་ནོར་བས་སྒོམ་པ་ནོར་བ་དང་། སྒོམ་པ་ནོར་བས་སྤྱོད་པ་ཡང་འཕྱུགས་ཏེ་མཐའ་འབྲས་རུ་ཏྲར་གོལ་བའི་རྣམ་ཐར་ལ་འགྲོ་བ་ཡིན། དེ་ལྟར་མ་སོང་བར་ད་ལྟའི་ཤེས་པ་རིག་སྟོང་སྐྱེ་འགགས་མེད་པ་སྟོང་གསལ་འཕོ་འགྱུར་དང་བྲལ་བ་གཅིག་མཆོག་གི་རྒྱལ་པོ་མ་བཅོས་ས་ལེ་སེང་ངེ་བ་འདི་ཉིད་རྫོགས་པོ་ཆེན་པོའི་ལྟ་བ་ཡིན་པས་དེ་ཀ་རང་གི་ཐོག་ཏུ་ཐག་ཆོད་ཅེས་གསུངས་པའོ། །སྒོམ་པ་ནི། སྒོམ་པ་མི་མཐུན་རྒྱ་ཆེ་གྲངས་མང་ཡང་། །ད་ལྟའི་ཐ་མལ་ཤེས་པ་ཟང་ཐལ་ལ། །བསྒོམ་བྱ་དང་ནི་སྒོམ་བྱེད་གཉིས་སུ་མེད། །བསྒོམ་པ་མ་སྒོམས་སྒོམ་པའི་མཁན་པོ་ཚོལ། །སྒོམ་པའི་མཁན་པོ་བཙལ་བས་མ་རྙེད་ན། །དེའི་ཚེ་སྒོམ་པ་ཟད་སར་འཁྱོལ་བ་ཡིན། །སྒོམ་པ་བསྒོམ་རྒྱུ་ཅི་ཡང་མེད་པ་ལ། །བྱིང་རྒོད་འཐིབས་རྨུགས་དབང་དུ་མ་སོང་བར། །ད་ལྟའི་ཤེས་པ་མ་བཅོས་རང་གསལ་ལ། །མ་བཅོས་མཉམ་པར་འཇོག་པ་བསྒོམ་པ་ཡིན། །ཞེས་གསུངས་ཏེ། ད་ལྟ་བ་རྒྱ་ཆེ་གྲངས་མང་ཡོད་པ་བཞིན་དུ་སྒོམ་པ་ཡང་མི་མཐུན་པར་དེ་བཞིན་དུ་མང་པོ་ཡོད་ཀྱང་། རྫོགས་ཆེན་བྱ་བྲལ་ལྷུན་གྲུབ་ལ་ད་ལྟའི་ཤེས་པའམ་རིག་པ་གསལ་སྟོང་འཛིན་མེད་ཀྱི་ཟང་ཐལ་དེའི་ངང་བསྐྱང་དགོས་པ་དེ་ལས་བསྒོམ་བྱ་དང་སྒོམ་བྱེད་གཉིས་སུ་ཕྱེད་ཡོང་རྒྱུ་ཡོད་པ་ཞིག་མིན། སྒོམ་པ་ཕྱི་ནས་མ་འཚོལ་བར་སྒོམ་མཁན་ནང་ནས་ཚོལ་དང་སྒོམ་པའི་ཕུགས་དེ་ནས་ཆོད་ཡོང་བ་ཡིན། ཚོགས་དྲུག་གི་ཡུལ་ཐོག་ལ་ཕར་ལ་འཆར་འཆར་འདྲ་དེ་དང་། རང་གནས་ཀྱི་ཤེས་པ་ནང་དུ་གནས་གནས་འདྲ་དེ་གང་ཡིན་ཡང་། རིག་ཆ་རང་གསལ་རྗེན་ལ་བུད་པ་འདི་ཟང་ཐལ་རྗེན་པའི་ཆོས་སྐུ་ཡིན། སེམས་འདི་འཕྲོ་བའམ་གནས་པའམ་འགྱུ་བ་གང་གི་སྐབས་ཡིན་ཡང་རིག་པ་རང་གསལ་འགགས་མེད་དང་འབྲལ་བ་སྐད་ཅིག་ཀྱང་མི་སྲིད་ལ། དེའི་ཕ་རོལ་ནས་སྒོམ་པའི་མཁན་པོ་ཞིག་བཙལ་ཏེ་མ་རྙེད་དུས་དེའི་ཚེ་སྒོམ་པ་ཟད་སར་འཁྱོལ་ཏེ་ཕུ་ཐག་དེ་ནས་ཆོད་སོང་བ་ཡིན། སྤྱིར་རྫོགས་པ་ཆེན་པོའི་ཆོས་ཉིད་ཡེ་ཟད་ཀྱི་སྒོམ་པ་ལ་བསྒོམ་བྱའི་དམིགས་གཏད་མཚན་མ་ཅན་ཅི་ཡང་མེད་པ་ལ་བྱིང་བ་དང་རྨུན་པ་རྨུགས་ཤིང་འཐིབས་པ་རྒོད་པ་དང་འཕྲོ་བ་ལ་སོགས་པ་དང་། ཁྱད་པར་དུ་འཐིབས་རྨུགས་ཀྱི་དབང་དུ་མ་སོང་བར་རིག་པའི་དྭངས་ཡར་བཏོན་ནས་མཚམས་རེར་ཕཊ་སྒྲ་དྲག་པོ་དང་བཅས་ཏེ། ད་ལྟའི་ཤེས་པ་སེམས་ཕྲ་བ་རང་བཞིན་ལུང་མ་བསྟན་ལྟ་བུའི་རྨུགས་འཐིབས་རྟོག་མེད་ཀྱི་ཤེས་པ་དང་། ཁ་ཧང་སོང་བ་དང་། མགོ་ལ་རྡོས་བརྒྱབ་པ་ལྟ་བུའི་ཅི་དྲན་འདི་དྲན་མེད་པར་རེད་སོང་བ་དེ་འདྲ་མ་ཡིན་པར་ཡུལ་མེད་ཀྱི་ཤེས་པ་གཟུང་འཛིན་དང་བྲལ་བ། གསལ་བའི་ཆ་ནས་ཤེས་པ་ཞིག་ཡིན་པར་འདྲ་བ་ལ་འཛིན་མེད་ཀྱི་ཆ་ནས་སེམས་ཀྱང་མིན་པ། གོ་མཁན་དང་ཚོར་མཁན་གྱི་སྣང་བ་འདི་མ་འགགས་པ། སྣང་ལུགས་ཅི་འདྲ་ཞིག་རེད་ཟེར་ན་ཡུལ་རྗེས་སུ་ཕར་མ་འབྲངས་བས་མེ་ལོང་ངོ་ལ་གཟུགས་བརྙན་ཤར་བ་དང་འདྲ་བའི་རིག་པའི་དྭངས་ཆ་ལ་འཆར་ཆར་ཤར་བ་དེ་ལ་རིག་པའམ་ད་ལྟའི་ཤེས་པ་ཞེས་གསུངས་པ་ཡིན། ད་ལྟ་ཞེས་པ་ནི་ཐ་མལ་མ་བཅོས་པའི་དོན་ཐད་ཀའམ་སོ་ན་ཡོད་པ་དེ་ཉིད་ཀྱི་དོན་དང་། ཡེ་ནས་གནས་པས་ཡེ་ཞེས་བྱ། །རང་བཞིན་ཤེས་པས་ཤེས་ཞེས་བྱ། །ཞེས་པ་ནི་ཡེ་ཤེས་ཀྱི་ངེས་ཚིག་རེད། དེ་ལྟ་བུའི་ད་ལྟའི་ཤེས་པ་མ་བཅོས་རང་གསལ་ལ་མ་བཅོས་མཉམ་པར་འཇོག་པ་ནི་སྒོམ་པ་ཡིན་པ་དང་། མ་བཅོས་མ་བཅོས་གཉིས་གསུངས་པ་ནི་གཞི་མ་བཅོས་པ་ལ་ལམ་མ་བཅོས་པར་སྒོམ་ཡོང་དུས་འབྲས་བུ་མ་བཅོས་ལྷུན་གྱིས་གྲུབ་པའི་སར་བསྙེག་པའི་དོན་ནོ། །མ་བཅོས་བཟོ་མེད་ཀྱི་རང་བྱུང་གི་ཡེ་ཤེས་ཟེར་དུས་རང་བྱུང་ཞེས་པའི་དོན་དེ་ཇི་ལྟར་ཡིན་སྙམ་ན། ཡེ་ཤེས་ཡིན་པ་གང་ཞིག གཞན་བྱུང་ངམ་རྒྱུ་བྱུང་མིན་པའི་ཆ་ནས་རང་བྱུང་ཡེ་ཤེས་ཞེས་བཏགས་པ་ཡིན། དེས་ན་དེ་རང་ལས་སྐྱེས་པའམ་བྱུང་བ་ཡིན་ནམ་ཟེར་ན། མ་ཡིན་ནོ། །དེ་ཅིའི་ཕྱིར་ཞེ་ན། མ་སྐྱེས་པའི་ཕྱིར་ཟེར་བ་ལས་མ་འདས། འོ་ན་མ་སྐྱེས་ན་ཡོད་པར་མི་རིགས་སོ་ཟེར་ན། དངོས་པོ་ལ་དེ་ལྟར་བརྗོད་རིགས་ཀྱང་དངོས་པོ་མ་ཡིན་པ་ལ་ཚིག་དེས་གནོད་པ་མ་ཡིན་ཏེ། དཔེ་ན་ནམ་མཁའ་བཞིན་ནོ་ཞེས་བརྗོད་ཆོག་པ་ཡིན། ནམ་མཁའ་འདུས་མ་བྱས་པ་ལ་ཡོད་པའི་ཐ་སྙད་འཇོག་མི་རིགས་ཟེར་ན། ནམ་མཁའ་སོགས་ཆོས་ཀྱི་ཁམས་མ་ཡིན་ནམ། ཆོས་ཀྱི་ཁམས་ཡིན་ན་ཆོས་ཀྱི་སྐྱེ་མཆེད་ཀྱི་གཟུགས་སུ་གྲུབ་ལ། ནམ་མཁའ་དང་བུམ་སོགས་ཐམས་ཅད་སྟོང་བའི་དབྱིངས་ལས་གྲུབ་པ་ཡིན་པས་ན། མཐར་གཏུགས་ན་ཐམས་ཅད་སྟོང་གཟུགས་ཡིན་པར་གྲུབ་པ་པ་ཡིན། མ་བཅོས་མཉམ་པར་འཇོག་པ་སྒོམ་པ་ཡིན་ཞེས་པ་འདི་ཡན་ཆད་ཀྱིས་སྒོམ་པ་བསྟན་ཏེ། སྤྱོད་པ་ཟད་སར་འཁྱོལ་བ་བསྟན་པ་ནི། སྤྱོད་པ་མི་མཐུན་རྒྱ་ཆེ་གྲངས་མང་ཡང་། །རང་རིག་ཡེ་ཤེས་ཐིག་ལེ་ཉག་གཅིག་ལ། །སྤྱད་བྱ་དང་ནི་སྤྱོད་བྱེད་གཉིས་སུ་མེད། །སྤྱོད་པ་མ་སྤྱོད་སྤྱོད་པའི་མཁན་པོ་ཚོལ། །སྤྱོད་པའི་མཁན་པོ་བཙལ་བས་མ་རྙེད་ན། །དེའི་ཚེ་སྤྱོད་པ་ཟད་སར་འཁྱོལ་བ་ཡིན། །སྤྱོད་པ་སྤྱོད་རྒྱུ་ཅི་ཡང་མེད་པ་ལ། །བག་ཆགས་འཁྲུལ་བའི་དབང་དུ་མ་སོང་བས། །ད་ལྟའི་ཤེས་པ་མ་བཅོས་རང་གསལ་ལ། །བཅོས་བསླད་བླང་དོར་གང་ཡང་མི་བྱེད་པ། །དེ་ག་རྣམ་པར་དག་པའི་སྤྱོད་པ་ཡིན། །ཞེས་གསུངས་ཏེ། སྤྱིར་ན་ཐེག་པ་སོ་སོ་ལ་སྤྱོད་པའི་རྣམ་གྲངས་བསྟན་པ་མང་ཞིང་། རྫོགས་ཆེན་ཐུན་མོང་གི་གདུལ་བྱ་ལ་ཡང་སྤྱོད་པའི་རྣམ་གྲངས་ཉེར་གཅིག་གམ་ཐུན་མིན་སྤྱོད་པའི་རྒྱལ་པོ་བདུན་ལ་སོགས་པས་གསུངས་པ་ཡིན། འོན་ཀྱང་ཞེན་མེད་གཞི་གྲོལ། གཅིག་ཆོག་སྤྱོད་པའི་རྒྱལ་པོ། རང་རིག་ཀུན་ཁྱབ་ཀྱི་ཡེ་ཤེས། ཆོས་དབྱིངས་ཐིག་ལེ་ཉག་གཅིག དབྱིངས་དང་རིག་པ་གཉིས་སུ་མེད་པའི་ངོ་བོ་ལ་མ་འདུས་པ་ཞིག་མེད་པ་ཡིན་པས་ན། དེ་ལ་སྤྱད་བྱ་དང་སྤྱོད་བྱེད་ཐ་དད་པ་གཉིས་སུ་དབྱེ་ཡོང་རྒྱུ་ཞིག་མེད་ལ། ཡོད་དང་མེད་སྤྱོད་པ་མ་བཙལ་བར་སྤྱོད་མཁན་ཁོ་རང་འཚོལ་དང་སྤྱོད་པའི་མཁན་པོ་ཞིག་སྟོང་གསུམ་ཐགས་སུ་བཏགས་ནས་བཙལ་ཀྱང་མ་རྙེད་ན་མ་རྙེད་པ་དེ་རྙེད་པའི་མཆོག་ཡིན། དེ་དུས་སྤྱོད་པ་ཟད་སར་འཁྱོལ་ནས་སྐྱེ་མེད་ཀྱི་ངང་དུ་འགགས་མེད་དུ་ཡལ་སོང་བ་ཡིན། འདི་ལ་གྲོལ་ཞེས་ཐ་སྙད་བཏགས་ན་ཡང་ཆོག་ལ། དེའི་ཕྱིར་སྤྱོད་པ་སྤྱད་ཡོང་རྒྱུ་ཅི་ཡང་མེད་པ་ལ་བག་ཆགས་འཁྲུལ་བའི་ངན་གོམས་ཀྱི་དབང་དུ་མ་མངགས་པར་ད་ལྟའི་ཤེས་པ་མ་བཅོས་རིག་པ་རང་གསལ་ལ་བཅོས་བསླད་ཀྱི་བཟོ་བཅོས་སོགས་བླང་དོར་གང་ཡང་མི་བྱེད་པར་རང་སར་ཞོགས་དང་དེ་ཉིད་རྣམ་པར་དག་པའི་སྤྱོད་པའོ་ཞེས་པའོ། །འབྲས་བུ་ཟད་སར་འཁྱོལ་བ་བསྟན་པ་ནི། འབྲས་བུ་མི་མཐུན་རྒྱ་ཆེ་གྲངས་མང་ཡང་། །རང་གི་སྐུ་གསུམ་རྩོལ་མེད་ལྷུན་གྲུབ་ལ། །བསྒྲུབ་བྱ་དང་ནི་སྒྲུབ་བྱེད་གཉིས་སུ་མེད། །འབྲས་བུ་མ་སྒྲུབས་སྒྲུབ་པའི་མཁན་པོ་ཚོལ། །འབྲས་བུ་སྒྲུབ་མཁན་བཙལ་བས་མ་རྙེད་ན། །དེའི་ཚེ་འབྲས་བུ་ཟད་སར་འཁྱོལ་བ་ཡིན། །འབྲས་བུ་བསྒྲུབ་རྒྱུ་ཅི་ཡང་མེད་པ་ལ། །བླང་དོར་རེ་དོགས་དབང་དུ་མ་སོང་བར། །ད་ལྟའི་ཤེས་རིག་རང་གསལ་ལྷུན་གྲུབ་ཉིད། །མངོན་གྱུར་སྐུ་གསུམ་རང་གསལ་སྟོང་པ་ཉིད། །ཡེ་སངས་རྒྱས་པའི་འབྲས་བུ་དེ་ཉིད་དོ། །ཞེས་གསུངས། འབྲས་བུ་མི་མཐུན་རྒྱ་ཆེན་གྲངས་མང་གང་བཤད་ཀྱང་འབྲས་བུ་གཞན་བྱུང་བཙལ་ནས་རྙེད་ཡོང་རྒྱུ་ཞིག་མེད་པས་འབྲས་བུ་སྐུ་གསུམ་རང་རིག་རྩོལ་མེད་ལྷུན་གྲུབ་ཏུ་རང་ལ་ཚང་བ་ཡིན། ཇི་ལྟར་ཚང་ན་རིག་པའི་ངོ་བོ་ཅི་ཡང་མ་གྲུབ་པའི་སྟོང་སིང་ངེ་བ་བརྗོད་བྲལ་སེམས་དང་ངག་གི་ཡུལ་ལས་འདས་སོང་བ་འདི་ངོ་བོ་སྟོང་པ་ཆོས་སྐུ་དང་། རང་བཞིན་མ་འགགས་འཁོར་འདས་ཀུན་ཏུ་རང་གསལ་ལ་འཆར་བ་འདི་རང་བཞིན་གསལ་བ་ལོངས་སྤྱོད་རྫོགས་སྐུ་དང་། རིག་པའི་ཆོ་འཕྲུལ་ཅི་ཡང་འཆར་བ་ཐུགས་རྗེ་ཀུན་ཁྱབ་སྤྲུལ་བའི་སྐུ་ཡིན་པས་དེར་བསྒྲུབ་བྱ་དང་སྒྲུབ་བྱེད་གཉིས་སུ་མེད་པས་ན། འབྲས་བུ་མ་བསྒྲུབས་སྒྲུབ་པའི་མཁན་པོ་ཚོལ་དང་སྒྲུབ་མཁན་བཙལ་ནས་རྙེད་རྒྱུ་མེད་པ་འདི་མ་བསྒྲུབས་རང་ལ་ཡོད་པའི་འབྲས་བུ་ཡིན། དེའི་ཚེ་རིག་པ་ཟད་སར་འཁྱོལ་ནས་འབྲས་བུ་བསྒྲུབ་རྒྱུ་ཅི་ཡང་མེད་པས་མ་གྲུབ་པར་རིག་སྟོང་དབྱེར་མེད་ཀྱི་སར་ཐོན་པ་ཡིན། འབྲས་བུ་གཞན་བྱུང་ཞིག་ཟུར་ནས་བསྒྲུབ་རྒྱུ་མེད་པ་ལ་བླང་དོར་རེ་དོགས་ཀྱི་དབང་དུ་མ་སོང་བར་ད་ལྟའི་ཤེས་རིག་རང་གསལ་སྐུ་གསུམ་ལྷུན་གྲུབ་མངོན་དུ་གྱུར་པ་དེ་ཉིད་ཀྱི་ཕན་ན་ཡེ་སངས་རྒྱས་པའི་འབྲས་བུ་ཞིག་ལོགས་ནས་མེད་པས་དེ་ཉིད་དུ་ཐག་ཆོད་པར་གྱིས་ཤིག་ཅེས་པའོ། །འདིར་ལྟ་སྒོམ་སྤྱོད་གསུམ་གནས་ལུགས་དང་ཆོས་སྐུ་འབྲས་བུ་བཅས་ཀྱི་ཀློང་གྱུར་དྲུག་གི་རྟགས་ཚད་བསྟན་པས་དོན་བསྡུ་བ་ནི། ཨེ་མ་ཧོ། ད་ཡང་རིགས་ཀྱི་བུ་རྣམས་ལེགས་པར་ཉོན། །དེ་ལྟར་དང་པོ་ཡེངས་མེད་བསྐྱངས་པ་ན། །བར་དུ་ཡན་པར་བཏང་ཡང་དོན་ཐོག་ནས། །ཐ་མལ་བཏང་ཡང་འགྲོ་འོང་མེད་པའོ། །ཞེས་གསུངས་ཏེ། དེ་ཡང་ཞེས་པ་འདི་དག་ངས་ད་ཡང་ཞེས་འདོན་པ་ཡིན། རྣལ་འབྱོར་པ་ལས་དང་པོ་བ་ཞིག་གིས་དང་པོ་འདུ་བྱེད་ཀྱི་དྲན་པས་ཡེངས་མེད་དུ་བསྐྱངས་པ་ཡིན་ལ། དེ་ལྟར་བསྐྱངས་པ་ན་རིམ་གྱིས་བར་དུ་རྩོལ་མེད་ངང་བཞག་གིས་ཁ་ཡན་བར་མེད་དུ་གང་ཤར་རིག་སྟོང་རྗེན་པ། ཅི་འགྱུ་ཆོས་སྐུའི་རྒྱལ་པོའི་རྩལ་ལ་བཏང་ཡང་། དོན་གྱི་ཐོག་ནས་ཐ་མལ་ཆོས་ཉིད་ཀྱི་དྲན་པ་དྲན་བྱ་དང་དྲན་བྱེད་གཉིས་སུ་མེད་པ་རིན་པོ་ཆེའི་གསེར་གླིང་དུ་ཐོན་སོང་བ་ཡིན་ན་ས་རྡོ་ཕལ་བ་བཙལ་ཀྱང་རྙེད་རྒྱུ་མེད་པ་དང་འདྲ་བར་རིག་པ་སྟོང་གསལ་མཁའ་ལ་ཉི་ཟླ་ཤར་བ་ལྟ་བུའི་འགྲོ་འོང་གཉིས་མེད་ཀྱི་ངང་ལ་གནས་པའོ། །དེའི་རྟགས་དང་ཚད་བསྟན་པ་ནི། སྣང་དང་སྟོང་པ་གཉིས་ཀ་དབྱེར་མེད་ན། །དེའི་ཚེ་ལྟ་བ་ཀློང་དུ་གྱུར་པ་ཡིན། །ཞེས་པ་སྟེ། སྣང་བ་ཕྱོགས་སུ་མ་ཆད། སྟོང་པ་ཡན་གར་དུ་མ་གྲུབ་པས་སྣང་བ་མཚན་མ་རུ་གྲུབ་པ་མེད་བཞིན་དུ་སྣ་ཚོགས་སུ་སྣང་ཞིང་། སྟོང་པ་ལོགས་སུ་གྲུབ་པ་མེད་བཞིན་དུ་མཐའ་དབུས་ཀུན་ཁྱབ་ཏུ་བརྡལ་བའི་སྣང་སྟོང་དབྱེར་མེད་བློ་འདས་ཆོས་སྐུའི་དགོངས་པ་མངོན་དུ་གྱུར་སོང་བ་ཡིན་ན་ལྟ་བ་ཀློང་དུ་གྱུར་པའོ། །རྨི་ལམ་ཉིན་པར་གཉིས་ཀ་ཁྱད་མེད་ན། །དེའི་ཚེ་སྒོམ་པ་ཀློང་དུ་གྱུར་པ་ཡིན། །ཞེས་པ་སྟེ། ཉིན་མོ་ཉམས་ལེན་རེ་ལ་འབད་ནའང་མཚན་མོ་གཏི་མུག་གཉིད་ཀྱི་དབང་ལ་ཤོར་སོང་བ་ལྟ་བུ་མ་ཡིན་པར་ཉིན་མཚན་འོད་གསལ་གྱི་འཁོར་ལོ་གཅིག་ཏུ་འདྲེས་ནས། ཆོས་ཉིད་ཀྱི་ཏིང་ངེ་འཛིན་གསལ་བཞག་འགྲོ་འོང་དང་བྲལ་བར་གནས་ཐུབ་པ་ཡིན་ན་དེ་ནི་སྒོམ་པ་ཀློང་དུ་གྱུར་པ་ཡིན། སྤྱིར་ན་མི་ཚེའི་ཕྱེད་ཀ་ཕལ་ཆེར་གཉིད་ཀྱིས་དུས་འདའ་བཞིན་ཡོད་ཅིང་། མཚན་མོར་གཏི་མུག་རོ་ཉལ་ལ་དུད་འགྲོ་བྱོལ་སོང་ཞིག་གི་སྟངས་ཀ་མི་བྱེད་པར་གཉིད་འོད་གསལ་གྱི་རྣལ་འབྱོར་ལ་སྦྱང་བ་ནི་གལ་ཆེ་བ་སྟེ། གཉིད་དང་འཆི་བ་གཉིས་ཀ་ཕྲ་རགས་མ་གཏོགས་འདྲ་བར་གསུངས་པས། མཚན་མོ་གཉིད་ཀྱི་རྣལ་འབྱོར་ལ་བསྒོམ་རྒྱུ་དེ་བྱང་ཆུབ་སྒྲུབ་པའི་གང་ཟག་ལ་གལ་ཆེ་ཕྱིར། སློབ་དཔོན་ཆེན་པོའི་བར་དོ་དྲུག་གི་ཁྲིད་ཡིག་གི་ནང་དུ་རྨི་ལམ་བར་དོ་ཁྲིད་རྐང་གཅིག་ཏུ་བཞག་པ་ཡང་དགོས་དོན་དེ་ལ་གཟིགས་པ་ཡིན། བདེ་དང་སྡུག་བསྔལ་གཉིས་ཀ་ཁྱད་མེད་ན། །དེའི་ཚེ་སྤྱོད་པ་ཀློང་དུ་གྱུར་པ་ཡིན། །ཞེས་གསུངས་ཏེ། གཉིས་སྣང་གི་འཛིན་པ་མ་ཞིག་པ་ཡི་ཚེ་འདི་ལ་བདེ་སྡུག་གི་དབྱེ་བ་ཡོད་པ་ཡིན། གཞོགས་གཅིག་ནས་བསྐུ་མཉེ་བྱས་པ་དང་གཞོགས་གཅིག་ནས་ཤ་གྲི་ཡིས་བཅད་པ་གཉིས་ཀ་ཚོར་བ་འདྲ་བ་ནི་དཀའ་ཡང་། སྤྱོད་པ་མས་རིམ་ནས་བསླབ་དགོས་པ་ཡིན་པས་ན་ཉམ་ང་བག་ཚ་མེད་པའི་སྣང་བ་དབང་བསྒྱུར་གྱི་སྤྱོད་པ་སྤང་བླང་གཉིས་འཛིན་གྱི་དགག་སྒྲུབ་དེ་རིམ་གྱིས་རིམ་གྱིས་བསྒོམས་ནས་ཞིག་སོང་བ་ཡིན་ན་བདེ་སྡུག་ཁྱད་མེད་དུ་མཐོང་བའི་སྤྱོད་པ་ཀློང་གྱུར་གྱི་སྐབས་ཡིན་ནོ། །འདི་དང་ཕྱི་མ་གཉིས་ཀ་ཁྱད་མེད་ན། །དེའི་ཚེ་གནས་ལུགས་ཀློང་དུ་གྱུར་པ་ཡིན། །གསུངས་ན། རྣལ་འབྱོར་པ་གོམས་པ་རབ་ལ་བུ་ཆུང་ལྟ་བུའི་འཆི་ལུགས་ཞེས་པ་ཤི་དང་མ་ཤི་ལ་རེ་དོགས་དང་རྩིས་གདབ་མེད་པ་སྟེ། ཚེ་འདི་དང་ཕྱི་མ་གཉིས་ཀ་ཁྱད་མེད་པར་ཐམས་ཅད་ཆོས་ཉིད་གཅིག་གི་གཞི་ཀློང་དུ་ཐིམ་སོང་བ་ཡིན་ན། དེ་ཚེ་གནས་ལུགས་དོན་གྱི་བཞུགས་ཚུལ་ཁ་བཤད་ཙམ་མིན་པར་དོན་གྱིས་མངོན་དུ་གྱུར་པའམ་ཀློང་དུ་གྱུར་པ་ཡིན། འཆི་ཆོས་ཀྱི་གདམས་པ་གནད་ལ་འཁེལ་བ་ཞིག་མེད་ན་འཆི་བ་ཟེར་རྒྱུ་དེ་ལ་རང་གཞན་སུ་ཡིན་ཡང་སྐྲག་ཀྱང་། འཆི་ཆོས་ཀྱི་གདམས་པ་གནད་ལ་འཁེལ་བ་ཞིག་ཡོད་ན་འཆི་བ་ལ་སྐྲག་དགོས་པ་མ་ཡིན། འཆི་ཆོས་རྣལ་མ་ཞིག་གྲུབ་ཡོད་ན་འཆི་བ་དེ་ཐར་བའི་སྒོ་ཆེན་དང་། མྱ་ངན་ལས་འདས་པའི་སྒོ་ཡང་འཆི་བ་ཡིན། ལུས་ཟེར་བ་མིང་དང་དོན་མཚུངས་པ་ཤུལ་ལ་ལུས་རྒྱུ་ཅན་མི་གཙང་བའི་རྫས་ཀྱི་བདག་ཉིད་ནད་གདོན་མི་འདོད་ཐམས་ཅད་ཀྱི་གཞི་མ་འདི་ཕར་ལ་བསྐྱུར་ནས་འོད་ལུས་དྭངས་མ་ཡེ་ཤེས་ཀྱི་སྙིང་བོ་ཅན་ཞིག་བླངས་ནས། སེམས་ཅན་གཞན་ལ་ཕན་འདོགས་པ་དེས་མི་དགའ་བར་འཁོར་ངན་བཙོན་ཁང་འདྲ་བ་འདིའི་ནང་དུ་བསྡད་ནས་རང་སྡུག་རོགས་སྡུག་རང་གཞན་མཉམ་སྡུག་བྱས་ནས་ཅི་བྱེད། ད་ངེས་འབྱུང་རྒྱུད་ལ་འབྱོངས་པ་དེ་བྱ་འདབ་ཆགས་དུ་བས་བདུག་ན་འཕུར་འདོད་ཡོད་པ་འདྲ་ཞིག་ཡོད་དགོས་པ་ཡིན། དེའི་སྟེང་དུ་གནས་ལུགས་རྟོགས་པའི་གདེངས་ཤིག་ཡོད་བཞག་ན་འཆི་བ་ལ་དེ་ཙམ་ཞིག་སྐྲག་དགོས་པ་མ་ཡིན་ནོ། །སེམས་དང་ནམ་མཁའ་གཉིས་ཀ་ཁྱད་མེད་ན། །དེའི་ཚེ་ཆོས་སྐུ་ཀློང་དུ་གྱུར་པ་ཡིན། །ཞེས་གསུངས་ན། སེམས་ཉིད་ཆོས་སྐུའི་ངོ་བོ་སྟོང་གསལ་མཐའ་དབུས་དང་བྲལ་བ་ཕྱི་རོལ་དཔེ་ཡི་ནམ་མཁའ་བཞིན་དུ་དྭངས་གསལ་གཡོ་བ་མེད་པ། རྒྱ་གར་ཡང་མ་ཆད། ཕྱོགས་གང་དུ་ཡང་མ་ལྷུང་བ། སྣང་སེམས་གཉིས་མེད་ཤེས་དང་ཤེས་བྱ་རོ་གཅིག་པ་མཁའ་མཉམ་ནམ་མཁའ་ལྟ་བུའི་རྟོགས་གོམས་མངོན་དུ་གྱུར་པ་དེའི་ཚེ་ན་མ་བཅོས་སྤྲོས་དང་བྲལ་བ་རང་གནས་ཀྱི་ཆོས་སྐུ་ཀློང་དུ་གྱུར་པ་ཡིན་ནོ། །རང་སེམས་སངས་རྒྱས་གཉིས་ཀ་ཁྱད་མེད་ན། །དེའི་ཚེ་འབྲས་བུ་ཀློང་དུ་གྱུར་པ་ཡིན། །ཞེས་གསུངས། རང་སེམས་ཀྱི་རིག་པའི་ངོ་བོ་དེ་ཡེ་ཤེས་སུམ་ལྡན་གྱི་བདག་ཉིད་དེ་ཉིད། ཀུན་ཏུ་བཟང་པོ་སངས་རྒྱས་པའི་ཚེ་ན་བཟང་དུ་མ་སོང་ཞིང་། ཁམས་གསུམ་སེམས་ཅན་འཁོར་བར་འཁྲུལ་བའི་སྐབས་ན་ངན་དུ་མ་སོང་བའི་མི་འགྱུར་ཀ་ནས་དག་པའི་ཡེ་ཤེས། ངང་དྭངས་སྤྲོས་པ་དང་བྲལ་བ། སྤང་བླང་འཛིན་རྩོལ་ལས་འདས་པ་འདི་ལས་གཞན་པའི་སངས་རྒྱས་ལོགས་ན་མེད་པ། ཨིན་དྲ་བྷུ་ཏིའི་ཡང་དག་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །ཞེས་གསུངས་པ་བཞིན་དུ་མངོན་དུ་གྱུར་ཏེ། རང་སེམས་སངས་རྒྱས་གཉིས་ཀ་ལ་ཁྱད་པར་མེད་པ་གྱུར་པའི་དུས་སུ་འབྲས་བུ་ཀློང་དུ་གྱུར་པའོ། །དེའི་ཡན་ཆད་ཀྱིས་གོལ་ཤོར་ནོར་བའི་འཕྲང་ལས་སྒྲོལ་ཞིང་རྣལ་འབྱོར་ལམ་གྱི་གོམས་པའི་རྟགས་ཚད་བསྟན་པ་དང་བཅས་པ་སོང་བའོ། །ལྟ་སྒོམ་སྤྱོད་འབྲས་གང་གི་ཐད་ནས་ཇི་ལྟར་བཤད་ཀྱང་གཙོ་བོ་ལྟ་བས་ཐག་ཆོད་པའི་སྟེང་དུ་སྒོམ་པས་ངང་བསྐྱངས་ནས། གོམས་པ་ཀློང་དུ་གྱུར་པའི་དུས་སུ་དགག་སྒྲུབ་མེད་པའི་སྤྱོད་པ་དང་། རེ་དོགས་བྲལ་བའི་འབྲས་བུ་རང་ཤུགས་ཀྱིས་འབྱུང་བ་ཡིན་པས། ལྟ་བས་ཐག་བཅད་པ་ལྟར་དུ་མི་བསྒོམ་པའི་སྒོམ་པ་ཆེན་པོ། སྒོམ་དུ་ཅི་ཡང་མེད་པ་ལ་ཡེངས་སུ་སྐད་ཅིག་ཀྱང་མི་འགྲོ་བར་སྒོམ་པའི་བོགས་དེ་ཉིད་སྤྱོད་པས་དབྱུང་དུས། ཕྱོགས་རིས་མེད་པའི་དད་པ་དང་ཉེ་རིང་མེད་པའི་སྙིང་རྗེ་སྔར་མེད་ཅིག་ཤུགས་འབྱུང་ལ་འཆར་ཡོང་བ་ཡིན། དེ་དུས་ལྟ་སྒོམ་སྤྱོད་པ་གང་ཐད་ནས་གོལ་འཕྱུགས་ནོར་གསུམ་མེད་པའི་འབྲས་བུ་རེ་དོགས་བྲལ་བའི་སྐུ་གསུམ་ཆོས་སྐུའི་རྒྱལ་ས་བསྙེགས་པ་ལས་ཐོན་འགྲོ་ས་གཞན་ཞིག་མེད་པའོ། །དེའི་ཡན་ཆད་ཀྱིས་རྒྱས་པ་དང་འབྲིང་བོའི་བཤད་ཚུལ་གྱིས་ཐུན་མོང་དང་ཐུན་མིན་གྱི་རྫོགས་པ་ཆེན་པོའི་སྣོད་དུ་གྱུར་པའི་གདུལ་བྱའི་བློ་དང་འཚམས་པར་བསྟན་པའོ། །ད་ནི་བསྡུས་པའི་ཚུལ་གྱིས་སླར་ཡང་གདུལ་བྱ་ཐུན་མོང་གི་བློ་ཅན་ལ་རྣལ་འབྱོར་གྱི་ཉམས་ལེན་གནད་ཚང་བར་བསྟན་པ་ནི། ཨེ་མ་ཧོ། ད་དུང་རིགས་ཀྱི་བུ་རྣམས་བདག་ལ་གསོན། །ཞེས་སྙན་གསན་དབབ་པའི་སྐུལ་མས་མཚམས་སྦྱར་ཏེ། གདོས་བཅས་ལུས་འདི་ཆུ་ཟླ་ལྟར་དུ་ལྟོས། །ངག་གི་སྨྲ་བརྗོད་བྲག་ཆ་བཞིན་དུ་ཟློས། །སེམས་ཀྱི་རྟོག་ཚོགས་རང་སར་སངས་སུ་ཆུག །སྣང་གྲགས་ཆོས་རྣམས་ཐམས་ཅད་སྒྱུ་མ་དང་། །སྨིག་རྒྱུ་རྨི་ལམ་གཟུགས་བརྙན་ཆུ་ཟླ་དང་། །དྲི་ཟའི་གྲོང་ཁྱེར་མིག་ཡོར་སྤྲུལ་བ་དང་། །ཆུ་བུར་བྲག་ཆ་བཞིན་དུ་འཛིན་མེད་སྤྱོད། །སྤྱོད་ལམ་ཐམས་ཅད་དེ་ཡི་ངང་ནས་གྱིས། །ཞེས་གསུངས་ན། གཟུགས་ཕུང་གདོས་བཅས་ཀྱི་ལུས་འབྱུང་བཞི་ཚོགས་པའི་གཡར་བོ་ཅ་ལག་ལྟ་བུ་འདིའི་རང་བཞིན་ནི་འཇིག་པའི་ཆོས་ཅན་མི་བརྟན་གཡོ་བ་སྙིང་མེད་ཆུ་ཟླ་ལྟ་བུ་སོགས་སྒྱུ་མའི་དཔེ་བརྒྱད་བསྟན་པ་སྟེ། སྒྱུ་མ་ངལ་གསོ་ལས་འདིའི་དོན་རྒྱས་པར་བཤད་ཡོད། མི་བརྟན་གཡོ་བ་སྙིང་མེད་ཆུ་ཡི་ཟླ་བ་ལྟ་བུ། ངག་གི་སྨྲ་བརྗོད་བྲག་ཅའི་སྒྲ་སྐད་འདྲ་བ། སེམས་ཀྱི་རྟོག་ཚོགས་ཀྱང་རང་ཡལ་རང་སངས་རྗེས་མེད་དུ་མངག་པ་དང་། འདི་ལྟར་སྣང་ཞིང་སྲིད་པའི་ཆོས་ཐམས་ཅད་སླུ་བྱེད་སྒྱུ་མའི་སྤྲུལ་བ། མེད་བཞིན་དུ་སྣང་བ་སྨིག་རྒྱུའི་ཆུ། འཁྲུལ་ལས་ཉིང་འཁྲུལ་དུ་ཤར་བ་རྨི་ལམ་སྣ་ཚོགས། རྐྱེན་གྱིས་སྣང་བ་གཟུགས་བརྙན་དུ་ཤར་བ། ད་རུང་དྲི་ཟའི་གྲོང་ཁྱེར། མིག་ཡོར། སྤྲུལ་བ། ཆུ་བུར་ལ་སོགས་པ་དེ་ལྟར་སྣང་བ་སྒྱུ་མའི་དཔེ་བརྒྱད་ཀྱིས་སྙིང་པོ་མེད་པར་བསྟན་པ་བཞིན་དུ་མ་ཆགས་འཛིན་མེད་ཀྱི་སྤྱོད་པ། དེ་ཡང་ཐེངས་གཅིག་ལ་དྲན་པ་དང་སྐོར་གཅིག་ལ་ཅིག་གཟབ་ཁུལ་བྱས་པ་ཙམ་ཞིག་མ་ཡིན་པར་དྲན་པ། ཤེས་བཞིན། བག་ཡོད་པ་གསུམ་གྱིས་རྣལ་འབྱོར་དེ་ཉིད་སྤྱོད་ལམ་དང་མི་འབྲལ་བ་བྱེད་དགོས་པ་སྟེ། མི་བརྗེད་པའི་དྲན་པ་དང་། མི་གཡེངས་པའི་ཤེས་བཞིན། ཉེས་སྤྱོད་ལ་འཛེམ་པའི་བག་ཡོད་པ་བཅས་ཀྱིས་རྣལ་འབྱོར་བའི་སྤྱོད་ལམ་ཐམས་ཅད་ཆོས་དང་མཐུན་པར་བྱེད་དགོས་ནི་རྒྱུན་གྱི་སྤྱོད་ལམ་མོ། །ཉམས་ལེན་སྒོམ་དུ་དྲིལ་དུས་ཇི་ལྟར་བྱེད་དགོས་པ་ནི། ཐུན་མཚམས་མ་གཅོད་ཉིན་མཚན་ཁོར་ཡུག་སྤྲོད། །དྲན་བསམ་བཅོས་བསླད་མ་བྱེད་རང་བབས་ངང་། །རང་མདངས་རང་གྲོལ་འཛིན་མེད་གསལ་སྟོང་དུ། །བདེན་མེད་བསྒོམ་མེད་རྩོལ་མེད་རྗེས་མེད་ཞོག །སྔར་འདས་རྣམ་པར་རྟོག་པ་ཐམས་ཅད་ཀྱང་། །བྱ་ལམ་ནམ་མཁར་རྗེས་མེད་ལྟར་དུ་ཞོག །ད་ལྟའི་ཤེས་པ་རྡུལ་བྲལ་བར་སྣང་ལྟར། །མ་འོངས་རྟོག་པ་རང་འཐག་ཆུ་བཅད་ལྟར། །ཁྲིག་གེར་གློད་ལ་བཟོ་བཅོས་མི་བྱེད་པར། །རང་བབས་རྒྱ་ཡན་ངང་དུ་ལྷུག་པར་ཞོག །ཕྲ་རགས་རྟོག་པ་དུག་གསུམ་དུག་ལྔ་སོགས། །ཁང་སྟོང་རྐུན་མ་སླེབས་པ་ལྟར་དུ་ཞོག །ཚོགས་དྲུག་ཡུལ་སྣང་ཐམས་ཅད་རྗེས་མེད་དུ། །སྒྱུ་མའི་གྲོང་ཁྱེར་ཞིག་པ་ལྟར་དུ་ཞོག །ཅེས་གསུངས་ཏེ། སྤྱིར་ན་མཉམ་རྗེས་དབྱེར་མེད་དུ་གྱུར་པ་དེ་མི་སློབ་པའི་ས་ལ་ཐོན་པའི་སྐབས་སུ་མ་གཏོགས་མེད་ལ། འོན་ཀྱང་ལམ་ལྔ་རིམ་བརྒྱུད་ཀྱིས་བསླབས་ཏེ་མི་སློབ་པའི་སར་ཕྱིན་དགོས་པས་མི་ཚད་པར་འཕགས་པའི་ཡེ་ཤེས་སོ་སོ་སྐྱེ་བོ་རང་དུས་ནས་རྣམ་པ་ཆ་འདྲ་ལམ་དུ་བྱས་ཏེ་མངོན་དུ་འགྱུར་བ་དེ་སྔགས་ཀྱི་ཁྱད་ཆོས་ཡིན། རྫོགས་པ་ཆེན་པོའི་སྤྲོས་མེད་ཀྱི་རྣལ་འབྱོར་བས་ཉིན་མཚན་འོད་གསལ་གྱི་འཁོར་ལོ་ལ་བར་མེད་དུ་སྒོམ་པའི་སྐབས་སུ་ཐུན་དང་ཐུན་མཚམས་ཐམས་ཅད་ལ་ཐུན་གྱི་ཉམས་ལེན་དང་མི་འབྲལ་བཞིན་དུ་དྲན་བསམ་རང་ག་བ་གང་ཤར་གང་འགྱུ་ཅི་གནས་ཐམས་ཅད་རང་བབས་བཅོས་བསླད་མེད་པའི་ངང་དུ་རང་དྭངས་ཀྱི་རོལ་བ་ཅི་ཤར་རང་གྲོལ་འཛིན་མེད་གསལ་སྟོང་དུ་ཤར་བའི་ཐོག་དེར་བདེན་མེད། སྒོམ་མེད། རྩོལ་མེད། རྗེས་མེད་ཅེས་མེད་བཞི་ཡིས་རིམ་གྱིས་བསྟན་པ་ནི། བདེན་མེད་རྟེན་འབྱུང་སྒྱུ་མའི་རང་གཟུགས་ཅན་གྱི་སྣང་སེམས་ཀྱི་ཆོས་འདི་དག་ཐམས་ཅད་མེད་བཞིན་དུ་འཁྲུལ་ངོར་སྣང་བ་ཡིན་ཡང་། དེའི་སྟོང་པ་ལ་མཆོག་འཛིན་གྱི་ལྟ་བའི་གོལ་སར་མི་ལྡང་བ་དང་། འདི་སྒོམ་ཟེར་བའི་དམིགས་གཏད་ཅན་ཞིག་བསྒོམ་རྒྱུ་མེད་ཀྱང་ཡེངས་སུ་སྐད་ཅིག་ཀྱང་མི་འགྲོ་བའི་སྒོམ་མེད་ཆུ་ཆེན་གྱི་གཞུང་ལ་རྒྱུན་ཆད་མེད་པ་དང་འདྲ་བའི་ཆུ་བོ་རྒྱུན་གྱི་རྣལ་འབྱོར་དེ་ལ། ཆེད་དུ་རྩོལ་བ་མེད་པར་རང་བཞག་གནས་ལུགས་ཀྱི་རང་འགྲོས་བསྐྱངས་ཏེ་རྗེས་མེད་རང་གྲོལ་ཆེན་པོའི་ཕྱོགས་ལ་གང་ཤར་ཤར་དུ་ཆུག་ལ་གང་སྣང་སྣང་དུ་ཆུག་ལ་ཐོངས། དུས་གསུམ་གྱི་རྟོག་ཚོགས་ཀྱི་སྔར་རྗེས་བཅད་ནས་སྔུན་གྱི་རྣམ་རྟོག་གི་རྗེས་སུ་མ་འབྲང་། ཕྱིས་མདུན་མ་འོངས་པའི་མདུན་ཚུར་ལ་མ་བསུ། ད་ལྟའི་ཤེས་པ་བཟོ་མེད་ཀྱི་ངང་ལ་སེམས་ཉིད་རིག་མདངས་འགག་མེད་ཁྲིག་གེའམ་ཧྲིག་གེ་བ་སྟེ། ཧྲིག་གེ་བ་ལ་ཟང་ཐལ་ལེ། །ཟང་མ་ཐལ་བྱུང་བརྗོད་དུ་མེད། །ཅེས་གསུངས་པ་ལྟར་དུ་རང་བབས་རྒྱ་ཡན་གྱི་ངང་ལ་ལྷུག་པ་མ་བཅོས་པར་བཞག་པ་དེའི་དུས་སུ་ཉོན་མོངས་རྣམ་རྟོག་ཕྲ་རགས་གང་ཤར་ཐམས་ཅད་ཁང་སྟོང་གི་ནང་དུ་རྐུན་མ་ཐོན་ཚེ་རྐུན་མ་ལ་འཐོབ་འགྲོ་རྒྱུ་ཞིག་དང་ཁང་སྟོང་ལ་ཤོར་འགྲོ་རྒྱུ་ཞིག་མེད་པའི་དཔེ་བཞིན་དུ་ཚོགས་དྲུག་ཡུལ་སྣང་གང་ཤར་ཐམས་ཅད་སྣང་བ་སྣང་ཐོག་ནས་གྲོལ་བ་དང་འགྱུ་བ་འགྱུ་ཐོག་ནས་གྲོལ་བ་ཡིན། རྗེས་མེད་སྒྱུ་མའི་གྲོང་ཁྱེར་ཞིག་པ་ལྟ་བུ་ཞིག་གིས་རེ་དོགས་མེད་པའི་ངང་ལ་ཞོགས་ཞེས་གསུངས་པའོ། །དེ་ལྟར་ཉམས་སུ་བླངས་པའི་འཛིན་མེད་ཀ་དག་ཆེན་པོར་ལ་བཟླ་ཚུལ་བསྟན་པ་ནི། མདོར་ན་སྐྱེ་འགག་གནས་གསུམ་གཞི་ལམ་འབྲས། །ལྟ་སྒོམ་སྤྱོད་འབྲས་དུས་གནས་བརྗོད་ཚིག་དང་། །བཞག་བྱ་འཇོག་བྱེད་དགྲོལ་བྱ་འགྲོལ་བྱེད་སོགས། །རང་གསལ་རེས་མེད་འཛིན་རྩོལ་སྤང་བླང་མེད། །རྒྱ་མཚོ་ཆེན་པོར་ཆུ་ཕྲན་ཐིམ་པ་ལྟར། །ཆོས་ཀུན་སེམས་ཀྱི་དབྱིངས་སུ་ཀ་དག་པར། །བློ་གདེང་བཅའ་ཞིང་འཛིན་མེད་ལ་བཟླའོ། །ཞེས་གསུངས་ཏེ། ཉམས་ལེན་གནད་དུ་དྲིལ་ཏེ་མདོ་འགག་བསྡུས་ཏེ་བརྗོད་ན། སྐྱེ་འགག་གནས་གསུམ་བྲལ་བའི་ཆོས་ཉིད་གཤིས་ཀྱི་བཞུགས་ཚུལ་གྱི་སྟེང་ནས་བཤད་ནའང་འདྲ། གཞི་ལམ་འབྲས་བུའི་རྣམ་གཞག་གིས་འཁོར་འདས་ཀྱི་ཆོས་ཀུན་གཏན་ལ་ཕབས་ན་ཡང་འདྲ། དུས་གང་དུ་གནས་གང་ནས་བརྗོད་ཚིག་ཅི་ཞིག་གིས་ཇི་ལྟར་བཤད་པ་དང་། སེམས་གནས་ཀྱི་བཞག་བྱ་འཇོག་བྱེད་གྲོལ་ལུགས་ཀྱི་དགྲོལ་བྱ་འགྲོལ་བྱེད་ལ་སོགས་པ་གནད་སྣ་ཚོགས་ཀྱིས་གང་ནས་བཤད་ཀྱང་ཐག་གཅིག་ཐོག་ཏུ་བཅད་ནས་ལ་བཟླ་ས་ནི། རིག་པ་རྗེན་པ་རང་གསལ་འཛིན་མེད་སྟོང་བའི་ཕྱོགས་སུ་བཅད་ནས་གསལ་བའི་རིས་སུ་འཛིན་ཡོང་རྒྱུ་མེད་པ། གང་ཤར་འཛིན་རྩོལ་དང་ཅི་ཤར་སྤང་བླང་མེད་པ་དཔེར་ན་རྒྱ་མཚོ་ཆེན་པོ་ལ་ས་གཞིའི་ཆུ་ཕྲན་ཐིམ་པ་དང་འདྲ་བར་བྱུང་ཡང་རྒྱ་མཚོའི་ནང་ནས་བྱུང་། ཐིམ་ཡང་རྒྱ་མཚོའི་ནང་ལ་ཐིམ་པ་ལྟར་དུ་དབྱིངས་ཀ་དག་སེམས་ཀྱི་ཆོས་ཉིད་གང་ཡིན་པ་དེའི་ངང་དུ་རེ་དོགས་འཛིན་པའི་ཆོས་ཀུན་དེ་མི་དམིགས་པར་རང་སར་དག་བྱ་དག་བྱེད་དང་བྲལ་ནས་རང་དག་ཏུ་འགྲོ་བའི་བློ་གདེང་ཉམས་ལེན་གྱི་མཐིལ་སོ་དེ་ལ་བཅའ་ཞིང་འཛིན་མེད་ལ་བཟླའོ་འམ་ཐག་བཅད་དོ་ཞེས་པའོ། །ལས་དང་པོ་བ་ལ་རྣམ་རྟོག་རང་སར་གྲོལ་བའི་གདམས་པ་གནང་བ་ནི། དེ་ལྟར་བསྒོམས་ཚེ་རྣམ་རྟོག་མང་འཕྲོས་ཀྱང་། །སྒོམ་ནི་མ་འོང་སྙམ་ནས་སྡུག་མི་དགོས། །སེམས་ནི་འཕྲོ་ཡང་སྟོང་ལ་གནས་ཀྱང་སྟོང་། །གང་ལྟར་ཤར་ཡང་རིག་པའི་ངང་ཡིན་པས། །དགག་སྒྲུབ་བླང་དོར་གང་ཡང་མི་བྱེད་པར། །མ་བཅོས་གཉུག་མའི་ངང་དུ་གློད་ལ་ཞོག །དེ་ཡིས་རྣམ་རྟོག་རང་སར་གྲོལ་བར་ངེས། །ཞེས་གསུངས་པ་སྟེ། དེ་སྔོན་ཐོག་མེད་ནས་ད་ལྟའི་བར་རམ་སྐྱེས་ནས་ད་ལྟའི་བར་དུ་ཕར་ཕྱི་ལ་ཁ་འཁོར་ཏེ་གཞན་ལ་ལྟ་བ་ལས། རང་ལ་ཚུར་འཁོར་བ་དང་། ཁྱད་པར་ནང་གི་སེམས་ཀྱི་རང་གཤིས་ལ་བལྟས་མ་མྱོང་བ་ནི་རྟ་རྒོད་འཕྲལ་བཟུང་བྱས་པ་དང་འདྲ་བར་ཚུར་སེམས་ཐོག་ཏུ་བཞག་ནས་ལྟ་བའི་དང་པོའི་སྐབས་སུ་སྒོམ་ཞིག་བརྒྱབ་པ་ཡིན་ཡང་རྣམ་རྟོག་ཇེ་མང་དུ་ཕྱིན་འདུག་སྙམ་པ་ལྟ་བུ་ཞིག་ཡོང་བ་ཡིན། དེ་ནི་བསྒོམས་ནས་རྣམ་རྟོག་ཇེ་མང་དུ་སོང་བ་མ་ཡིན་པར་དུས་རྒྱུན་དུ་འཁྲུལ་འབྱམས་རྣམ་རྟོག་གི་རྒྱུན་སྣ་ཚོགས་དེ་སྤྲིན་ཁ་འཚུབས་པ་ལྟ་བུ་ཞིག་ཡིན་པ་དེ་ད་རེས་ཁ་ནང་ལ་ཚུར་འཁོར་ནས་བལྟས་དུས་མཐོང་ཡོང་བས་ཡིན། དེའི་སྐབས་སུ་སྒོམ་མི་ཡོང་བར་འདུག་སྙམ་ནས་སྡུག་མི་དགོས་གསུངས་པ་ཡིན། ཅི་ཕྱིར་སྡུག་མི་དགོས་སྙམ་ན། ས་ཐག་རིང་གི་ལམ་ལ་བགྲོད་པ་དང་འདྲ་བར་སེམས་འགྱུ་འཕྲོ་དགའ་སྡུག་གི་རང་འགྲོས་འདྲ་དང་མི་འདྲ་ལ་ཐུག་ཏུ་ཡོད་པ་ཡིན་པས་རྣམ་རྟོག་ལ་བཙོག་བལྟས་བྱས་ཏེ་བཀག་མི་དགོས་སོ། །སེམས་འཕྲོ་ཡང་སྟོང་གསལ་འཛིན་པ་དང་བྲལ་ཞིང་། གནས་ཀྱང་དེ་བཞིན་དུ་སྟོང་གསལ་འཛིན་པ་དང་བྲལ་བ་ཡིན། གང་ལྟར་ཤར་ཇི་ལྟར་སེམས་ན་ཡང་རིག་པ་ཀ་དག་གི་ངང་ལས་མ་གཡོས་པ་ཡིན་པས་ན། འཕྲོ་བ་དགག་རྒྱུ་དང་གནས་པ་བསྒྲུབ་རྒྱུ་དང་། བཟང་པོ་ཚུར་ལ་བླང་རྒྱུ་དང་། ངན་པ་ཕར་ལ་འདོར་རྒྱུ་སོགས་སྤང་བླང་དགག་སྒྲུབ་འདོར་ལེན་གང་ཡང་མི་བྱེད་པར་རང་བབས་མ་བཅོས་གཉུག་མའམ་རྣལ་མའི་དོན་ཡེ་ཇི་བཞིན་པ་དེ་བཞིན་དུ་ངང་ལ་རང་བབས་སུ་གློད་ནས་ཞོགས་དང་། གདམས་ངག་དེ་ཡིས་རྣམ་རྟོག་གང་ཤར་རང་སར་རང་གྲོལ་དུ་འགྱུར་བར་ངེས་ཞེས་གསུངས་པའོ། །ལས་དང་པོ་བ་ལ་སླར་ཡང་བོགས་འདོན་སེམས་ཀྱི་གེགས་སེལ་རྣམ་རྟོག་ཨར་གཏོད་དུ་གསུངས་པ་ནི། བློ་དམན་སྐྱེ་བོ་ངང་ལ་མི་གནས་ན། །ངོ་སྤྲོད་སྐབས་བཞིན་དཔྱད་འཇོག་སྤེལ་མ་གྱིས། །ཡང་ན་འདི་བཞིན་རྣམ་རྟོག་ཨར་ལ་གཏོད། །དགོས་སམ་མི་དགོས་རྣམ་རྟོག་བསླངས་ནས་ཀྱང་། །གཅིག་རྗེས་གཅིག་མཐུད་རྣམ་པ་སྣ་ཚོགས་པ། །རང་སེམས་སུན་རག་བར་དུ་སྤྲོས་ནས་ཀྱང་། །དེ་ནས་མི་འདོད་ཚེ་ན་གློད་ལ་ཞོག །ཅེས་གསུངས་ཏེ། སྤྱིར་རྫོགས་པ་ཆེན་པོའི་ཆོས་ཀྱི་སྣོད་ལྡན་གྱི་སློབ་མ་དེ་གཞན་དང་བསྡུར་ན་དབང་རབ་ཡིན་ན་ཡང་། དེ་ལ་དབང་པོ་རྣོ་རྟུལ་གྱི་ཁྱད་པར་གཏན་ནས་མེད་པ་མ་ཡིན་པར་སྔར་ཡང་ལན་མང་བཟླས་པ་ལྟ་བུའི་ཅུང་ཟད་སྣང་བ་ལྐོག་གྱུར་གྱི་རིགས་ཅན་བློ་དམན་སྐྱེ་བོ་དེ་འདྲ་བས་རིག་པའི་ངང་སྐྱོང་སྐབས་སུ་ངང་ལ་ཇི་བཞིན་གནས་པ་མ་ཤེས་པར། ཡང་ན་ངོ་སྤྲོད་ཚིག་ལ་འཆེལ་ནས་གནད་ངོ་མ་མ་གོ་བའམ། ཡང་ན་བསྒྲིམས་ཆེ་སོང་བས་ཡིན་ནའང་ཐང་བས། ངོ་སྤྲོད་ཀྱི་གནད་རྣམས་ཀྱི་ཚིག་རྗེས་སུ་དོན་དྲན་པར་བྱས་ནས། དཔྱད་སྒོམ་དང་འཇོག་སྒོམ་གཉིས་ཀ་སྤེལ་མ་འདྲ་འདྲེས་བྱས་ན་དགའ་འམ། ཡང་ན་རྣམ་རྟོག་ཨར་གཏད་ཀྱི་གདམས་པ་ལ་བརྟེན་ན་དགའ་འདུག་གམ། དེ་ཡང་དགོས་མི་དགོས་རྣམ་རྟོག་བཟང་ངན་ཐམས་ཅད་དང་པོར་ཡར་བསླངས་ནས་སུན་མ་ཡོང་གི་བར་དུ་སྤྲོས་ནས་དྲན་པར་གྱིས་ཤིག བར་ཞིག་ལ་དྲན་ཚོད་མེད་དེ་རྨུས་ནས་དྲན་མི་བསམ་མི་འདོད་པ་རུ་སོང་དུས་དེའི་ཐོག་ཏུ་གློད་ནས་ཞོགས་དང་རིག་པ་འཕྲོ་འདུ་མེད་པའི་རང་གཤིས་དེའི་ཕན་དུ་འགྲོ་ས་ཡོད་པ་མ་ཡིན་ནོ། །ཡང་སེམས་མི་བདེ་ཞིང་རིག་པ་མི་དྭངས་པ། རྐྱེན་འདི་ཡིན་གྱི་ངེས་པ་མེད་པའི་གདོན་བགེགས་ཀྱི་འཚེ་བ་དང་། ཁྱད་པར་དུ་དེང་སང་རྒྱལ་གདོན་གྱིས་འཚེ་བ་བྱེད་པའི་དུས་ཆོས་བྱེད་པ་ལ་རྒྱལ་འགོང་སྙིང་ལ་ཞུགས་དུས་ཡིན་པས་དེ་ལ་སོགས་པའི་གེགས་སེལ་ལ་འདི་ཟབ་པ་ཡིན་ནོ། །ཡང་ན་སྙིང་དབུས་མཚན་ལྡན་བླ་མ་བསྒོམ། །དེ་ལ་སེམས་ནི་ཡུན་རིང་བཟུང་ནས་ཀྱང་། །དེ་རྗེས་འཛིན་མེད་རིག་པའི་ངང་ལ་ཞོག །ཅེས་གསུངས་ན། བླ་མ་སྒོམ་པ་འདི་སྤྱིར་ན་ཉམས་ལེན་ཐམས་ཅད་ཀྱི་སྙིང་པོ་ཡིན་པ་སྟེ། བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །བསྐལ་བ་སྟོང་གི་སངས་རྒྱས་ཀྱང་། །བླ་མ་དག་ལ་བརྟེན་ནས་བྱུང་། །ཞེས་པ་དང་། བླ་མའི་སྣང་བ་མ་བྲལ་ན། །སངས་རྒྱས་རྣམས་དང་འབྲལ་མེད་གནས། །ཞེས་གསུངས་པས། བླ་མའི་རྣལ་འབྱོར་བསྒོམས་ནས་བླ་མ་དང་ཐུགས་ཡིད་དབྱེར་མེད་དུ་བསྲེ་བ་འདི་ལས་ལྷག་པའི་ཆོས་གནད་ཆེན་ཞིག་རྒྱལ་བའི་ལྗགས་ཀྱིས་ཀྱང་གསུང་དུ་མེད་ལ། གེགས་སེལ་དང་ཉམས་ལེན་གང་གི་སྐབས་སུ་ཡིན་ཡང་མཚན་ཉིད་ཀུན་ལྡན་གྱི་དབང་ཁྲིད་མན་ངག་ཐོབ་པ་དང་། ཁྱད་པར་དུ་རང་སེམས་ཆོས་སྐུར་ངོ་སྤྲད་པའི་རྩ་བའི་བླ་མ་དེ་ཉིད་སྙིང་ཙིཏྟ་རིན་པོ་ཆེའི་གུར་ཁང་ན་འདབ་བརྒྱད་པདྨའི་སྟེང་དུ་སྐུ་གཟི་མདངས་ལྷམ་མེར་བཞུགས་ཡོད་པར་བསྒོམས་པའི་མཚན་བཅས་ཀྱི་སྒོམ་པས་སེམས་དེ་ལ་གཏད་པ་ཡུན་རིང་དུ་བཟུང་ནས། དེ་རྗེས་སུ་འཛིན་མེད་རིག་སྟོང་རྗེན་པ་དམིགས་བསམ་སྤྲོ་བསྡུ་དང་བྲལ་བའི་བླ་མའི་ཐུགས་དང་དབྱེར་མེད་དུ་ཞོགས་དང་། དེ་ལ་ཡང་ཡང་གོམས་ན་དེས་ཞི་མི་ཐུབ་པའི་སྒོམ་གེགས་ཤིག་མེད་དོ། །ཡང་སྒོམ་སྐྱོན་བྱིང་རྒོད་གང་ཡང་རུང་བའི་དབང་དུ་འདུག་སྙམ་ན། ཡང་ན་སྙིང་གི་དབུས་སུ་ཐིག་ལེ་བསྒོམ། །དེ་ཉིད་མར་ལ་བབས་ནས་དབང་ཆེན་གྱི། །ས་གཞིར་ཐུག་རག་བར་དུ་སོང་བར་བསམ། །དེ་ཡིས་འཕྲོ་རྒོད་རྦད་ཀྱིས་ཆོད་པར་ངེས། །རྒོད་པ་ཆོད་ཚེ་རིག་པའི་ངང་ལ་ཞོག །བྱིང་བ་ཆེ་ན་ལྟ་སྟངས་ངར་བསྐྱེད་ལ། །རིག་པ་རྗེན་པར་ཕུད་ནས་ས་ལེར་སྐྱོངས། །ཡང་ན་རང་གི་སེམས་ཉིད་ཐིག་ལེ་རུ། །དམིགས་ལ་ངག་ནས་ཕཊ་སྒྲ་བརྗོད་མ་ཐག །ཚངས་བུག་ནས་ཐོན་དཔག་ཆེན་མདའ་འཕངས་ལྟར། །སོང་ནས་མཁའ་ལ་ཁྲུག་གིས་འདྲེས་པར་བསམ། །དེ་ནས་ནམ་མཁའི་མཚན་ཉིད་ཡིད་ལ་གྱིས། །དེ་ཡིས་བྱིང་བ་མི་སངས་མི་སྲིད་དོ། །བྱིང་བ་སངས་ཚེ་འཛིན་མེད་ངང་ལ་ཞོག །འདི་རྣམས་ཞལ་ཤེས་ཡིན་པས་ཤེས་པར་གྱིས། །རྟོག་མེད་འདོད་པའི་རྟོག་པས་མ་བཅིངས་པར། །རིག་པ་རྒྱ་བསྐྱེད་དཔངས་བསྟོད་ཕྱལ་ཡས་སུ། །ཐོངས་ལ་གུ་ཡངས་ཡན་པ་བློ་བདེ་གྱིས། །ཞེས་གསུངས། བླ་མ་སྙིང་དབུས་སུ་སྒོམ་པ་ནི་གེགས་སེལ་ཀུན་གྱི་མཆོག་དང་། བྱིན་རླབས་ཀུན་གྱི་རྩ་བ་ཡིན་ཡང་། མོས་གུས་དང་འདུན་པ་ཡིས་དེ་ཙམ་ཞིག་མ་ཐུབ་ནས་གེགས་སེལ་མི་ཐུབ་པ་ལྟ་བུ་བྱུང་ན། ཡང་ཞལ་ཤེས་ཀྱི་མན་ངག་གཞན་དག་ནི་སྙིང་དབུས་སུ་ཐིག་ལེ་གསལ་འཚེར་ཞིག་རིག་པའི་ངོ་བོར་བསྒོམས་ནས་དེ་ཉིད་མར་ལ་བབས་ནས་ས་རིམ་པ་དགུའི་མར་ཞབས་དབང་ཆེན་གསེར་གྱི་ས་གཞི་ལ་ཐུག་རག་གི་བར་དུ་སོང་བར་བསམས་ན། དེས་རྣམ་རྟོག་འཁྲུལ་བ་དང་རྒོད་པའི་གེགས་ཐམས་ཅད་རྦད་ཀྱིས་སམ་རྩད་ནས་ཆོད་ངེས་པ་ཡིན། རྒོད་པ་ཆོད་དུས་ཀྱི་སྐབས་དེའི་ཚེ་ན་རིག་པ་རང་གསལ་གྱི་ངང་ལ་ཡང་མཉམ་པར་ཞོགས་ཤིག ཡང་བྱིང་བ་ཆེ་ན་ལྟ་སྟངས་ཀྱིས་ངར་བསྐྱེད་པའམ་རིག་པ་ཧུར་ཕྱུངས་ནས་རིག་པ་རྗེན་པ་སྒྲིབ་བྱེད་མེད་པའི་ངང་དུ་གསལ་ས་ལེར་སྐྱོང་པའམ། ཡང་ན་རང་གི་སེམས་ཉིད་དེ་ཡང་ཐིག་ལེར་གསལ་བཏབ་པ་གོང་བཞིན་དུ་འོད་ཀྱི་རྣམ་པར་བསྒོམས་ནས་དམིགས་པ་ཡང་ཐིག་ལེ་དེ་ལ་གཏད་ནས། ཐབས་ཤེས་འབྲེལ་བའི་ཕཊ་སྒྲ་སྟེ་ཕ་ཡིག་དང་ཊ་ཡིག་གཉིས་གཟུང་འཛིན་རྩད་ནས་གཅོད་བྱེད་ཀྱི་ཕཊ་ཡིག་ཏུ་གྲུབ་པའི་ཕཊ་སྒྲ་དྲག་ལ་ཐུང་བ་བརྗོད་པའི་དེ་མ་ཐག་ཏུ་སེམས་ཉིད་རིག་པའི་ངོ་བོ་ཐིག་ལེའི་རྣམ་པ་དེ་ཉིད་སྤྱི་བོའི་ཚངས་པའི་བུ་ག་ནས་ཐོན་ཏེ་དཔག་ཆེན་ནམ་རྩལ་ཆེན་གྱད་ཀྱིས་མདའ་འཕངས་ན་ཕྱིར་མི་ལྡོག་པ་དང་འདྲ་བར་ཕྱི་རོལ་ནམ་མཁའི་དབྱིངས་སུ་ཁྲུག་གིས་སམ་ཁྲུག་གཅིག་ཏུ་དབྱེ་རུ་མེད་པར་འདྲེས་པར་བསམ་མོ། །དེ་ནས་སྟོང་གསལ་མཐའ་དབུས་བྲལ་བའི་ནམ་མཁའི་མཚན་ཉིད་ཡིད་ལ་བྱེད་ན་བྱིང་བ་མི་སངས་པ་ཞིག་མི་སྲིད་དོ། །བྱིང་བ་སངས་དུས་ཀྱི་སྐབས་དེའི་ཚེ་ན་འཛིན་མེད་རང་དྭངས་ཀྱི་ངང་ལ་བཞག་ནས་ཉམས་ལེན་སྐྱོན་མེད་ཀྱི་རྒྱུན་སྐྱོང་བར་བྱའོ། །འདི་དག་ནི་བྱིང་རྒོད་ཨར་ལ་གཏད་པའི་མན་ངག་ཞལ་ཤེས་སམ་བླ་མའི་ཞལ་རྒྱུན་ཡིན་པས་ན་དེ་ལྟར་ཤེས་པར་གྱིས་ཤིག མི་རྟོག་ཏིང་འཛིན་གྱི་ངང་ལ་གནས་དུས་རྟོག་མེད་བསྒྲུབ་འདོད་ཀྱི་རྟོག་པས་བཅིང་བར་མི་བྱེད་པ་དང་། ཐན་ཐུན་གུ་དོག་གི་བློ་སྣ་ཞིག་ལ་གཏད་པར་མི་བྱེད་པར་རིག་པ་རྒྱ་བསྐྱེད་དཔངས་བསྟོད། ཕྱོགས་སུ་མ་ལྷུང་བའི་ཡངས་དོག་བྲལ་བའི་ཕྱལ་ཡས་མཉམ་པ་མཐའ་ཡས་པར་ཐོངས་དང་གུ་ཡངས་བློ་བདེ་ཡན་པ་རང་ཤུགས་སུ་འཆར་རོ། །ངའི་བླ་མ་འཇིགས་མེད་ཡོན་ཏན་མགོན་པོས། བུ་ཞེན་པ་ཟད་ན་རྟོགས་པ་ཡིན། །ཆེད་འཛིན་ཟད་ན་གནས་ལུགས་ཡིན། །ཐམས་ཅད་ཆོས་ཉིད་ཆེན་པོ་རུ། །དབྱེ་བསལ་མེད་ན་དེ་ཀས་ཆོག །ཅེས་གསུངས་པ་ལྟ་བུའོ། །ཞི་གནས་སྒོ་ཅན་གྱི་ཉམས་ལེན་གཙོ་བོར་བཟུང་བའི་ལམ་རྟགས་ཀྱི་ཚད་གསུངས་པ་ནི། དང་པོ་རྣམ་རྟོག་གཅོང་རོང་ཆུ་དང་འདྲ། །བར་དུ་ཆུ་བོ་གངྒཱ་དལ་བབས་འདྲ། །ཐ་མ་ཆུ་རྣམས་རྒྱ་མཚོ་རོ་གཅིག་ལྟར། །འོད་གསལ་མ་བུ་མཇལ་བའི་ངང་ལ་གནས། །གསུངས་པ་སྟེ། གཡོ་ཐོབ་གོམས་བརྟན་མཐར་ཕྱིན་པའི་ཉམས་ལྔ་རིམ་པར་འབྱུང་བ་རྣམས་འདིར་གསུམ་དུ་བསྡུས་ནས་གསུངས་པ་ཡིན། ལྔ་རུ་དབྱེ་དུས་གཡོ་བའི་ཉམས་དེ་རི་གཟར་གྱི་རྦབ་ཆུ་ལྟ་བུ། ཐོབ་པའི་ཉམས་དེ་ལུང་ཁུང་དོག་མོའི་ཆུ་ལྟ་བུ། གོམས་པའི་ཉམས་དེ་ཆུ་ཀླུང་ཆེན་པོ་ལྟ་བུ། བརྟན་པའི་ཉམས་དེ་རྒྱ་མཚོ་རླུང་གིས་མ་བསྐྱོད་པ་ལྟ་བུ། མཐར་ཕྱིན་པའི་ཉམས་དེ་རི་རྒྱལ་ལྟ་བུ་གཡོ་འགུལ་མེད་པ་སྟེ། དེ་ལྟར་གསུངས་ན་ཡང་། འདིར་ཞི་ལྷག་ཟུང་འཇུག་གི་སྒོ་ནས་མཐར་རྣམ་རྟོག་ཆོས་ཉིད་དུ་གྲོལ་བ་འོད་གསལ་མ་བུ་མཇལ་བ་ལ་བཞག་ན། ཀ་དག་ཁྲེགས་ཆོད་ཀྱི་དགོངས་པ་དང་བསྟུན་ཏེ་སྣང་བཞི་ལུགས་ལྡོག་ལ་འཆར་བའི་བཞེད་པ་དང་བསྟུན་ནས་གསུངས་པའོ། །ཡུམ་དོན་ཤེར་ཕྱིན་གྱི་དགོངས་པ་བདུད་བཞི་ཅིག་ཅར་དུ་གཅོད་པ་རོ་སྙོམས་ཐོག་བརྫིས་ཀྱི་རྣལ་འབྱོར་ལམ་གྱི་བོགས་འདོན་དུ་བསྟན་པ་ནི། ཁྱད་པར་ནད་གདོན་ཆོ་འཕྲུལ་ཅི་བྱུང་ཡང་། །བཅས་བཅོས་རིམ་གྲོ་གང་ཡང་མི་བྱེད་པར། །འདི་ལྟར་རོ་སྙོམས་ཐོག་བརྫིས་སྤྱོད་པ་གྱིས། །ཞེས་མདོར་བསྟན་པའོ། །ནགས་དང་དུར་ཁྲོད་མཚོ་གླིང་སྐྱེད་མོའི་ཚལ། །བྲག་ཕུག་ཁང་སྟོང་ཤིང་གཅིག་དྲུང་ལ་སོགས། །འཇིགས་ཤིང་ཉམ་ངའི་གནས་སུ་སོང་ནས་ཀྱང་། །རང་ལུས་སྣོད་བཅུད་སྣང་སྲིད་བདུད་རྩིར་བསྒྱུར། །ཕྱོགས་བཅུའི་རྒྱལ་བ་སྲས་བཅས་ཐམས་ཅད་མཆོད། །དེ་རྣམས་མཉེས་ནས་བརྩེ་བའི་རྣམ་འགྱུར་གྱིས། །འོད་དུ་ཞུ་ནས་འཁོར་འདས་ཐམས་ཅད་ཀུན། །འོད་གསལ་བདུད་རྩིས་ཡོངས་སུ་གང་བར་དམིགས། །ཡོན་ཏན་མགྲོན་གྱུར་དམ་ཅན་ཆོས་སྐྱོང་དང་། །སྙིང་རྗེའི་ཞིང་མཆོག་རིགས་དྲུག་སེམས་ཅན་དང་། །ལན་ཆགས་གདོན་བགེགས་འབྱུང་པོ་ཐམས་ཅད་དང་། །ནམ་མཁའི་མཐའ་དང་མཉམ་པའི་འགྲོ་བ་ཀུན། །མྱོང་གྲོལ་བདུད་རྩིས་ཚིམས་པར་བྱས་ནས་ཀྱང་། །འཁོར་འདས་རོ་གཅིག་སེམས་སུ་ཐག་བཅད་ལ། །སེམས་ཉིད་མ་བཅོས་ཆོས་སྐུའི་ངང་ཉིད་ནས། །འགྲོ་དང་འདུག་དང་མཆོངས་དང་རྒྱུག་པ་དང་། །སྨྲ་དང་དགོད་དང་ངུ་དང་གླུ་ལེན་དང་། །བཅགས་དང་དཀྲུག་ལོག་སྨྱོན་པའི་སྤྱོད་པ་བྱ། །ཞེས་གསུངས་ཏེ། ནགས་དང་དུར་ཁྲོད། ཤིང་གཅིག་གི་དྲུང་ལ་སོགས་པ་འདྲེ་དང་སྲིན་པོ་གནས་ས་དང་། ཐེའུ་རང་དང་སྲིན་མོ་སོགས་རྒྱུ་ཞིང་གནས་པའི་ས་དེར་སོང་ནས་མི་ཕོད་པ་ལ་ཐོག་བརྫིས། མ་ལབ་སྒྲོན་གྱིས། ཕུང་བོ་གཟན་བསྐྱུར་གདམས་པ་འདི། །ཨ་མ་ཇོ་མོའི་ཆོས་ལུགས་ཡིན། །ཞེས་གསུངས་པ་ལྟར་དུ་རང་ལུས་མཆོད་སྦྱིན་གྱི་བདུད་རྩི་རུ་བསྒྱུར་ནས་ཟག་མེད་འདོད་ཡོན་གྱི་མཆོད་པ་ཡིས་དཀོན་མཆོག་སྲི་ཞུའི་མགྲོན་ཕྱོགས་བཅུའི་རྒྱལ་བ་སྲས་བཅས་ཡར་ལ་མཆོད། ཐུགས་མཉེས་པས་འོད་དུ་ཞུ་བའི་བྱིན་རླབས་ལས་འཁོར་འདས་ཐམས་ཅད་འོད་གསལ་ཡེ་ཤེས་ཀྱི་བདུད་རྩིས་ཁྱབ་པར་བྱས། ཡོན་ཏན་གྱི་མགྲོན་དུ་གྱུར་པའི་དཔལ་མགོན་སྲུང་མ་དམ་ཅན་རྒྱ་མཚོའི་ཚོགས་དང་བཅས་པ་དང་། སྙིང་རྗེའི་མགྲོན་གྱུར་རིགས་དྲུག་གི་སེམས་ཅན་དང་། ལན་ཆགས་ཀྱི་མགྲོན་བདག་པོ་བདག་མོ་འབྱུང་བོའི་རིགས་སུ་གྱུར་པ་དང་། གཞན་ཡང་མཁའ་མཉམ་རིགས་དྲུག་གི་སེམས་ཅན་ཐམས་ཅད། མྱོང་གྲོལ་བདུད་རྩི་མཆོད་སྦྱིན་གྱི་རྫས་ཅི་ཡང་འབྱུང་བའི་འདོད་དགུར་འཕྲུལ་བ། དེ་ཡང་ངོ་བོ་ཟག་མེད་ཡེ་ཤེས་ཀྱི་བདུད་རྩི་ཡིན་པ་ལ་རྣམ་པ་འདོད་ཡོན་སྣ་ཚོགས་སུ་གྱུར་པ་དེ་ལྟ་བུས་ཚིམས་པར་དམིགས་ནས། དེ་ལྟར་སྣང་བའི་འཁོར་འདས་ཐམས་ཅད་སེམས་ཉིད་གཅིག་པུའི་ཆོ་འཕྲུལ་དུ་ཐག་བཅད་དེ། རྣལ་འབྱོར་བརྟུལ་ཞུགས་ཀྱི་སྤྱོད་པ་གང་ཤར་ཅི་དྲན་ཐམས་ཅད་བཅས་བཅོས་མེད་པར་འགྲོ་འདུག་མཆོང་རྒྱུག་དང་། སྨྲ་རྒྱུ་དགོད་རྒྱུ་ངུ་རྒྱུ་གླུ་ལེན་ལ་སོགས་པ་ཕར་ལ་བལྟས་ན་སྨྱོན་པ་ཞིག་དང་མཚུངས་པ་སྟེ། སྤྱོད་པའི་རྒྱལ་པོ་བདུན་གྱི་སྐབས་སུ་དང་པོ་ཐི་བྱ་ཚང་འཇུག་གི་སྤྱོད་པ། དེ་ནས་རི་དྭགས་ལྟ་བུའི་སྤྱོད་པ། དེ་ནས་ལྐུག་པ་ལྟ་བུའི་སྤྱོད་པ། དེ་ནས་ཉམས་རྟོགས་དང་བསྟུན་ནས་འབྲེལ་མེད་བྱུང་རྒྱལ་གྱི་སྤྱོད་པ་སྨྱོན་པ་ལྟ་བུ་དང་། གཙང་དམེའི་བཟང་ངན་མེད་པ་ཁྱི་ཕག་ལྟ་བུའི་སྤྱོད་པ་དག་ལ་བརྒྱུད་ནས། མཐར་ཡ་ང་བག་ཚ་མེད་པ་རི་དྭགས་ཀྱི་རྒྱལ་པོ་སེང་གེ་ལྟ་བུའི་སྤྱོད་པ་འབྱུང་བ་ཡིན། རྣལ་འབྱོར་པ་སྣང་བ་དབང་བསྒྱུར་གྱི་སྤྱོད་པ་བསྐྱངས་པས་ནི་བསད་པ་གསོ་ནུས་ཤིང་། གཞན་གྱི་མ་དད་པ་བསྒྱུར་ཐུབ་པ་དང་། རྫུ་འཕྲུལ་འགྲུབ་ཅིང་རིག་པ་ཆོས་ཉིད་དུ་ཤར་བའི་དབང་གིས་ཕྱིའི་ས་ཆུ་མེ་རླུང་ལ་སོགས་པའི་དངོས་པོ་གང་ལའང་དབང་བསྒྱུར་ནུས་པ་དེ་འདྲ་འབྱུང་བ་ལས་ཐམས་ཅད་པོ་ལ་སྙིང་འགྲས་སློང་འདུག་མཁན་ཞིག་ག་ལ་ཡིན། དེས་ན་དེ་འདྲ་ཞིག་མ་ཐུབ་ཀྱི་བར་དུ་ཞི་དུལ་ལྷོད་ཆགས་ཀྱི་སྤྱོད་པ་བསྐྱངས་ནས་གཞན་རྒྱུད་འདུལ་ཐུབ་ས་ཨེ་འདུག་དེ་རང་རྒྱུད་ཐུལ་ཡོད་མེད་ལ་ལྟ་ཞོར་བྱེད་པ་ནི་གནད་ཆེའོ། །གཉན་ས་བཅད་ནས་རི་ཁྲོད་དུར་ཁྲོད་གངས་ཁྲོད་ལ་སོགས་པར་གཅིག་པུར་འགྲིམ་པ་འདི་དག་ནི་རིག་པ་བརྟུལ་ཞུགས་ཀྱིས་བོགས་འདོན་པ་ལ་ཕན་པ་ཆེ་བའི་གདམས་པའོ། །མཐར་ནི་ཞི་ཞིང་བདེ་བའི་ངང་ལ་འདུག །མཚན་དུས་རང་བབས་བདེ་བར་ཉལ་ནས་ཀྱང་། །དེ་ལྟར་ཉིན་པར་སྤྱོད་པ་སྐྱོང་བའི་མཚན་དུས་ལ་ཉམས་ལེན་དེ་ཉིད་རྣལ་དུ་ཕབས་ནས་བདེ་བར་ཉལ་ནས་ཀྱང་། དྲན་བསམ་འཕྲོ་འདུའི་རྣམ་རྟོག་ཀུན་བྲལ་ཏེ། །སྐྱེ་མེད་དྲན་རྫོགས་གཉུག་མའི་ངང་ལ་ཉལ། །ཞེས་གསུངས་ཏེ། དེ་ཡང་སྨྱོ་སྤྱོད་འབའ་ཞིག་བྱེད་དུ་མེད་པར་རུ་ཤན་གྱི་སྤྱོད་པའི་མཇུག་ཏུ་རྣལ་དབབ་དགོས་པ་བཞིན་དུ་མཐར་གཡོ་མེད་ཞི་ཞིང་བདེ་བའི་ངང་ལ་འདུག་པ་དང་། མཚན་མོར་རང་བབས་བདེ་ལུགས་སུ་ཉལ་ཏེ་དྲན་བསམ་འཕྲོ་འདུའི་རྣམ་རྟོག་རགས་པ་ཐམས་ཅད་དང་བྲལ་བར་སྐྱེ་མེད་དོན་གྱི་གནས་ལུགས། དྲན་གྲོལ་ཡེ་རྫོགས་ཀྱི་གཉུག་མ་བདེ་ཆེན་བརྡལ་བའི་རང་གཤིས་སུ་བག་ཕབས་ནས་ཉོལ་ཞེས་པའོ། །དེ་ལྟར་བྱས་ན་ནད་གདོན་རང་ཞི་ནས། །ལྟ་སྒོམ་བོགས་འབྱིན་རྟོགས་པ་ནམ་མཁའ་འདྲ། །སྒོམ་པ་རང་གསལ་སྤྱོད་པ་བུ་ཆུང་འདྲ། །གཟའ་གཏད་ཀུན་བྲལ་ངང་གིས་སྨྱོན་པ་འདྲ། །བདག་གཞན་གཉིས་མེད་འཕགས་པའི་གང་ཟག་འདྲ། །ཅི་སྨྲ་འཛིན་མེད་བྲག་ཆའི་སྒྲ་དབྱངས་འདྲ། །གང་ལའང་ཆགས་མེད་འདབ་ཆགས་མཁའ་ལྡིང་འདྲ། །ཡ་ང་བག་ཚ་མེད་པའི་སེང་གེ་འདྲ། །ཐམས་ཅད་ཡེ་གྲོལ་མཁའ་ལ་སྤྲིན་དྭངས་འདྲ། །དེ་འདྲའི་རྣལ་འབྱོར་བདེ་གཤེགས་རིག་འཛིན་དངོས། །དད་བརྒྱའི་སྤྱི་བོས་བཏུད་ནས་ཕྱག་བྱའི་འོས། །ཡིད་བཞིན་ནོར་བུ་བས་ཀྱང་ཆེས་ལྷག་གོ། ཞེས་པ་སྟེ། དེ་ལྟར་ན་ལྟ་བ་འཁོར་འདས་མཉམ་ཉིད། སྒོམ་པ་ཡེ་གྲོལ་རང་གསལ། སྤྱོད་པ་ཆགས་མེད་ཞེན་བྲལ་གྱི་རོ་སྙོམས་བརྟུལ་ཞུགས་ཀྱི་སྤྱོད་པ་བསྐྱངས་བ་དང་བཅས་ཏེ། ལྟ་སྒོམ་བོགས་འབྱིན་གྱི་རྩལ་སྦྱོང་བྱེད་ཡོང་དུས་ལྟ་བའི་གདེང་དེ་ཉིད་ཟིན་ནས་རྟོགས་པ་ནམ་མཁའ་དང་འདྲ་བའི་རྒྱ་ཆད་ཕྱོགས་ལྷུང་མེད་པ། སྒོམ་པ་ཉིན་མཚན་རེས་མེད་དུ་རང་གསལ་སྐུ་གསུམ་གྱི་རིག་པ་ལས་མི་འདའ་བ། སྤྱོད་པ་ཕལ་བའི་མི་ལས་འདས་པས་ན་འཛིན་བྲལ་ཞེན་ཆགས་མེད་པ་བུ་ཆུང་ལྟ་བུར་རྩིས་གདབ་མེད་པ་ཞིག རྟོགས་པའི་རྩལ་དེ་ཉིད་སྙིང་རྗེ་ལ་འབྱོངས་ནས་མཐའ་ཡས་སེམས་ཅན་ཐམས་ཅད་བརྩེ་བས་མ་བཏང་བའི་ཆ་ནས་བདག་བས་གཞན་གཅེས་འབྱུང་བ་འཕགས་པ་སར་གནས་ཀྱི་སེམས་དཔའ་དང་འདྲ་བ། དབང་བཞིའི་ཡེ་ཤེས་རྒྱུད་ལ་ཞུགས་ཏེ་བུམ་པའི་དབང་གིས་ལུས་དག་པས་སྤྲོས་བཅས་ཀྱི་ཡེ་ཤེས་རང་ལུགས་སུ་ཤར། ངག་གིས་ཅི་ཞིག་སྨྲས་ཀྱང་རབ་ཏུ་སྤྲོས་མེད་སྨྲ་བྱའི་ཡུལ་ལས་འདས་པའི་ཡེ་ཤེས་ལ་དབང་འབྱོར་སོང་བས་དེར་འཛིན་མེད་བྲག་ཅའི་སྒྲ་དབྱངས་ལྟ་བུ་རུ་འགྱུར། གསང་བའི་དབང་གིས་ལས་དག་པས་སྤྲོས་མེད་ཀྱི་དབང་ལས་གང་ལའང་ཆགས་ཞེན་མེད་པའི་ཡེ་ཤེས་རང་ལུགས་སུ་ཤར་བ་ཉམ་ང་མེད་པ་འདབ་ཆགས་མཁའ་ལྡིང་ལྟ་བུ་དང་། ཤེས་རབ་ཡེ་ཤེས་ཀྱི་དབང་ཐོབ་སོང་བའི་དབང་གིས་ཤིན་ཏུ་སྤྲོས་མེད་ཀྱི་ཡེ་ཤེས་རང་སྣང་རང་གྲོལ་ལ་དབང་སྟེ་ཉམ་ང་དང་བག་ཚ་མེད་པ་འཇིགས་མེད་དཔའ་བའི་གདེང་རྙེད་པ་སེང་གེ་འདྲ་བ། ཚིག་དབང་རིན་པོ་ཆེས་རབ་ཏུ་སྤྲོས་མེད་ཀྱི་ཡེ་ཤེས་རང་བྱུང་དུ་ཤར་ཏེ་གང་སྣང་གང་ཤར་ཐམས་ཅད་ཡེ་གྲོལ་མཁའ་ལ་སྤྲིན་དེངས་པ་དང་འདྲ་བའི་དྭངས་གསལ་ཐོགས་མེད་ཀ་དག་དགོངས་པའི་ཡེ་ཤེས་བརྙེས་པའི་གང་ཟག་དེ་ནི་བདེ་བའི་ལམ་ནས་བདེ་བའི་འབྲས་བུར་གཤེགས་པའི་བདེ་གཤེགས། རིག་པ་ཡེ་ཤེས་ཀྱི་བརྟུལ་ཞུགས་འཛིན་པའམ་རིག་པ་ཡེ་ཤེས་ཀྱི་དོན་ཇི་བཞིན་པར་རྣལ་དུ་འབྱོར་ནས་འཛིན་པའི་རིག་འཛིན་ཏེ། རིག་འཛིན་འདི་ལ་དབྱེ་བ་མང་ན་ཡང་། རིག་འཛིན་བཞིའི་དབང་དུ་བྱས་ན། རྣམ་སྨིན་རིག་འཛིན། ཚེ་དབང་རིག་འཛིན། ཕྱག་ཆེན་རིག་འཛིན། ལྷུན་གྲུབ་རིག་འཛིན་དང་བཞི་རེད། རིག་འཛིན་བཞི་འདི་ལ་རང་ལུགས་ཀུན་མཁྱེན་ཆེན་པོའི་བཞེད་པ་ལྟར་ན། ལུས་རྣམ་སྨིན་གྱི་གཟུགས་ལ་གནས་པ་ཡིན་ཡང་ལུས་རྒྱ་འདི་དང་བྲལ་བ་དང་ཕྱག་རྒྱ་ཆེན་པོའི་སྐུ་ཐོབ་པ་དེ་རྣམ་སྨིན་རིག་འཛིན་དང་། སློབ་པའི་ལམ་ནས་ལུས་དེ་ཡིས་སངས་རྒྱས་ཀྱི་སར་སྦྱོར་བའི་ཟག་མེད་ཀྱི་ཡེ་ཤེས་ཀྱི་གཟིགས་པ་ལྡན་པ་དེ་ཚེ་དབང་རིག་འཛིན་དང་། སློབ་ལམ་ཁྱད་པར་ཅན་ཞིག་ནས་རང་ལུས་ལྷར་གྱུར་ཏེ་སངས་རྒྱས་དང་མཛད་པ་ཆ་འདྲ་བ་མཐའ་འབྲས་དངོས་མ་ཐོབ་པ་དེ་ཕྱག་ཆེན་རིག་འཛིན་དང་། སྤངས་རྟོགས་མཐར་ཕྱིན་པའི་མི་སློབ་ལམ་མངོན་དུ་མཛད་པ་དེ་ལྷུན་གྲུབ་རིག་འཛིན་ལ་བཞེད་པ་ཡིན། བཀའ་སྡེ་ཟུར་བའི་བཞེད་སྲོལ་དང་ཁྱད་པར་གྱི་བཤད་ཚུལ་ཅུང་ཙམ་ཡོད་ཀྱང་དོན་ལ་ཁྱད་པར་མི་ཆེ། དེ་འདྲའི་གང་ཟག་ཁྱད་འཕགས་དེ་ཉིད་དུས་འདི་འདྲ་ཞིག་ལ་མཇལ་དུ་ཡོད་ན་རྣམ་གསུམ་དད་པས་མ་ཚད་པར་ཕྱིར་མི་ལྡོག་པའི་དད་པས་ཁྱད་པར་དུ་བྱས་པའི་དང་བ་བརྒྱ་ཕྲག་དང་ལྡན་པས། གུས་པའི་ཕྱག་གིས་གང་ཞབས་སྤྱི་བོར་ལེན་པར་འོས། ཡིད་བཞིན་ནོར་བུ་བས་ཀྱང་ཆེས་ལྷག་པ། ཚེ་འདི་དང་ཕྱི་མའི་རང་གཞན་ཐམས་ཅད་ཀྱི་གནས་སྐབས་དང་མཐར་ཐུག་གི་དོན་གཉིས་ལྷུན་གྱིས་གྲུབ་པའི་བཤེས་གཉེན་ཆེན་པོ་ཡིན་ནོ། །དེ་ཡན་ཆད་ཀྱིས་ལྟ་སྒོམ་སྤྱོད་པ་དང་བཅས་པའི་ལམ་གནད་ཀྱི་གདམས་པ་བསྟན་པའོ། །འབྲས་བུ་བསྟན་པ་ནི། ཨེ་མ་ཧོ། ད་ཡང་སྐལ་ལྡན་བྱ་བཏང་གླུ་ལ་ཉོན། །ཞེས་མཚམས་སྦྱར་ནས། མཐའ་འབྲས་ཆོས་སྐུའི་དབྱིངས་ལས་ལོངས་སྐུར་ཤར་ནས་གང་འདུལ་སྤྲུལ་བར་སྣང་བའི་ཕྱིར་ན། ཁ་སྦྱོར་ཡན་ལག་བདུན་ལྡན་ལོངས་སྐུ་རྒྱལ་བ་རིགས་ལྔ་ཡང་སེམས་ཉིད་རིག་པའི་ངོ་བོ་རང་ལ་གནས་པ་འདི་ལས་གཞན་དུ་མ་གྲུབ་པ་མངོན་དུ་འགྱུར་ཚུལ་གསུང་བ་ནི། རྣམ་སྣང་ཕྱི་ན་མེད་དེ་ནང་ན་ཡོད། །སེམས་ཉིད་སྤྲོས་དང་བྲལ་བ་ཆོས་དབྱིངས་ངང་། །གཏི་མུག་རང་སར་དག་པའི་ངོ་བོ་ཉིད། །བཅོམ་ལྡན་རྣམ་པར་སྣང་མཛད་དངོས་ཡིན་ནོ། །ཞེས་གསུངས་ན། རིག་པའི་ཡེ་ཤེས་ལ་སྐུ་ལྔ། ཡེ་ཤེས་ལྔ། འོད་ལྔ་ལ་སོགས་པ་ཚང་པས་ན་མ་དག་པའི་གནས་སྐབས་སུ་ཉོན་མོངས་ལྔ་དང་ཕུང་པོ་ལྔ། འབྱུང་བ་ལྔ་ལ་སོགས་པར་སྣང་བ་དེ་སྙིང་པོའི་ཡེ་ཤེས་མངོན་གྱུར་དག་པའི་སྐབས་སུ་སྐུ་ལྔ་ཡེ་ཤེས་ལྔ་ལ་སོགས་པར་མངོན་དུ་སྣང་བ་ཡིན། དེའི་ཕྱིར་ན་རྣམ་པར་སྣང་མཛད་ཕྱི་ནས་བཙལ་ཏེ་རྙེད་མེད་པར་ནང་རང་གི་རིག་པ་འདི་ཡིན། རིག་པ་སེམས་ཉིད་ཀྱི་ངོ་བོ་སྤྲོས་པའི་མཐའ་ཐམས་ཅད་དང་བྲལ་བ་དེ་ཆོས་དབྱིངས་ཡེ་ཤེས་ཏེ། དེ་ཡང་ཉོན་མོངས་གཏི་མུག་རང་སར་དག་པའི་ངོ་བོ་དེ་ཉིད་ལས་གཞན་དུ་གྱུར་པ་ཞིག་མ་ཡིན་པས་ན་བཅོམ་ལྡན་རྣམ་པར་སྣང་མཛད་དངོས་ནི་རིག་པ་འདིའོ། །རྡོར་སེམས་ཕྱི་ན་མེད་དེ་ནང་ན་ཡོད། །རིག་རྩལ་འཆར་གཞི་མ་འགགས་མེ་ལོང་ངང་། །ཞེ་སྡང་རང་སར་དག་པའི་ངོ་བོ་ཉིད། །བཅོམ་ལྡན་རྡོ་རྗེ་སེམས་དཔའ་དངོས་ཡིན་ནོ། །ཞེས་གསུངས་ཏེ། བཅོམ་ལྡན་འདས་མི་བསྐྱོད་པའམ་རྡོ་རྗེ་སེམས་དཔའ་ཡང་དེ་བཞིན་དུ་ཕྱི་ན་མེད་པར་ནང་ན་ཡོད། རིག་པའི་རང་རྩལ་ལ་ཆོས་སྤྱི་དང་རང་གི་གཟུགས་བརྙན་གསལ་བ་མེ་ལོང་ལྟ་བུའི་ཡེ་ཤེས་ཏེ། ཞེ་སྡང་རང་སར་དག་པ་མེ་ལོང་ལྟ་བུའི་ཡེ་ཤེས་དང་དེའི་ངོ་བོ་ཉིད་ཀྱི་ངང་དུ་གནས་པ་འདི་བཅོམ་ལྡན་རྡོ་རྗེ་སེམས་དཔའ་དངོས་ཡིན་ནོ། །རིན་འབྱུང་ཕྱི་ན་མེད་དེ་ནང་ན་ཡོད། །བླང་དོར་དགག་སྒྲུབ་མེད་པ་མཉམ་ཉིད་ངང་། །ང་རྒྱལ་རང་སར་དག་པའི་ངོ་བོ་ཉིད། །བཅོམ་ལྡན་རིན་ཆེན་འབྱུང་ལྡན་དངོས་ཡིན་ནོ། །འོད་དཔག་ཕྱི་ན་མེད་དེ་ནང་ན་ཡོད། །བདེ་སྟོང་དབྱིངས་སུ་ནུབ་པ་སོར་རྟོག་ངང་། །འདོད་ཆགས་རང་སར་དག་པའི་ངོ་བོ་ཉིད། །བཅོམ་ལྡན་འོད་དཔག་མེད་པ་དངོས་ཡིན་ནོ། །དོན་གྲུབ་ཕྱི་ན་མེད་དེ་ནང་ན་ཡོད། །རིག་པ་ཐལ་བྱུང་རང་གྲོལ་བྱ་གྲུབ་ངང་། །ཕྲག་དོག་རང་སར་དག་པའི་ངོ་བོ་ཉིད། །བཅོམ་ལྡན་དོན་ཡོད་གྲུབ་པ་དངོས་ཡིན་ནོ། །ཞེས་གསུངས་ཏེ། རིག་པ་ཡོན་ཏན་ཡེ་ལྡན་ཉམས་སུ་བླངས་པས་ན་མངོན་དུ་གྱུར་ཏེ་བཅོམ་ལྡན་རིན་ཆེན་འབྱུང་ལྡན་ང་རྒྱལ་རང་སར་དག་པ་བླང་དོར་དགག་སྒྲུབ་མེད་པའི་མཉམ་ཉིད་ཡེ་ཤེས་ཀྱི་ངང་ལ་གནས་པ་དེ་ཉིད་དང་། བཅོམ་ལྡན་སྣང་བ་མཐའ་ཡས་སམ་འོད་དཔག་མེད་རིག་པའི་ཡེ་ཤེས་འོད་སྣང་མཐའ་ཡས་པ་དེ་ཉིད་ཀྱང་དེ་བཞིན་དུ་འདོད་ཆགས་རང་སར་དག་པ་སོར་རྟོག་ཡེ་ཤེས་ཀྱི་ངང་ལ་གནས་པ་དང་། བཅོམ་ལྡན་དོན་ཡོད་གྲུབ་པ་དོན་གཉིས་ལྷུན་གྲུབ་ཀྱི་སྐུར་བྱུང་བ་དེ་ཡང་ཕྲག་དོག་རང་སར་དག་པ་ཐོགས་རྡུགས་མེད་པ་བྱ་གྲུབ་ཡེ་ཤེས་ཀྱི་ངང་ལ་གནས་པ་སྟེ། མདོར་ན་ཐམས་ཅད་རིག་པའི་ངོ་བོར་གཅིག་ལ་རྫོགས་པ་ཡིན་པས་ན་བཅོམ་ལྡན་རིན་འབྱུང་། སྣང་མཐའ། དོན་གྲུབ་ཐམས་ཅད་ཀྱང་ཕྱི་ན་མི་བཞུགས་པར་ནང་ན་བཞུགས། ནང་རིག་པའི་ངོ་བོ་གཅིག་པུ་འདི་རྒྱལ་བ་རིགས་ལྔ་ཡིན་པར་བསྟན་པའོ། །ཆོས་ཚན་ཐམས་ཅད་ཀྱི་མཐའ་མ་འབད་མེད་ཡེ་ནས་གྲོལ་བ་གདོད་མའི་གྲོལ་ས་བསྟན་པ་ནི། ཨེ་མ་ཧོ། ད་ཡང་སྐལ་ལྡན་སེམས་ཀྱི་བུ་གཅིག་པོ། །དགའ་ཞིང་སྤྲོ་བས་རྡོ་རྗེའི་གླུ་ལ་ཉོན། །ཞེས་བསྐུལ་ཏེ། དེ་ལྟར་རྟོགས་ན་སྣང་སྲིད་ཐམས་ཅད་ཀུན། །གདམས་ངག་དཔེ་ཆ་དོན་གྱི་དཀྱིལ་འཁོར་ཡིན། །ཞེས་གཞི་འཛིན་པ་དཀྱིལ་འཁོར། དབང་དང་དམ་ཚིག ཉམས་ལེན་སྒྲུབ་མཆོད་འཕྲིན་ལས། ཐབས་སྔགས་དང་ཕྱག་རྒྱས་བསྡུས་པའི་སྔགས་ཀྱི་དེ་ཉིད་བཅུ་ལ་སོགས་པ་འདི་ལ་ཚང་བར་མདོར་བསྟན་པའོ། །དེ་རྒྱས་པར་བཤད་པ་ནི། སྣང་བ་དཀར་དམར་སྣ་ཚོགས་ཤོག་བུ་ལ། །རང་བྱུང་ཡེ་ཤེས་རིག་པའི་སྨྱུ་གུ་ཡིས། །གཞི་མེད་ཡེ་གྲོལ་འཛིན་མེད་ཡི་གེ་བྲིས། །སྣང་སྟོང་གཉིས་མེད་ངང་དུ་དཔེ་བལྟ་བྱོས། །ཞེས་གསུངས་ཏེ། འདི་ལྟར་སྣང་བའི་སྣང་སྲིད་སྣོད་བཅུད་སྣ་ཚོགས་སུ་སྣང་བ་མ་འདྲེས་པར་སོ་སོར་སྣང་བ་དཀར་དམར་གྱི་ཤོག་བུའི་ཐོག་ཏུ་རང་བྱུང་གི་རིག་པ་དྭངས་གསལ་འགགས་མེད་ཀྱི་སྨྱུ་གུ་ཡིས། ཐམས་ཅད་གཞི་མེད་ཡེ་གྲོལ་འཛིན་མེད་སྣང་ཤེས་རོ་མཉམ་གྱི་ཡི་གེའི་གར་སྟབས་སྣ་ཚོགས་སུ་བསྒྱུར་ཏེ་བྲིས་དུས། སྣང་བ་དང་སྟོང་པ་གཉིས་སུ་མེད་པའི་གནས་ལུགས་གཤིས་ཀྱི་བཞུགས་ཚུལ་ཇི་ལྟར་ཡིན་པ་དེ་བཞིན་མཐོང་བའི་དཔེ་བལྟས་བྱོས་ཞེས་པའོ། །ཉམས་རྟོགས་མཐོན་པོའི་རྟོགས་པའི་གདེང་ཚོད་ལ་ཐོན་པའི་གསུང་འབྲས་བུ་འཆད་པའི་སྐབས་ནས་བྱུང་བ་སྟེ། དོ་ཞག་འུ་ཚོས་ཆོས་ཁྲིད་སྔོན་མ་ཞིག་གི་ཞར་ལ་བཤད་པའི་རྒྱུད་ཀྱི་རྡོ་རྗེའི་གད་མོ་ཆེན་པོ་བཅུ་གཉིས་དང་། ངོ་མཚར་བའི་ཚིག་ཆེན་བརྒྱད་ནི། རྒྱུད་ཀྱི་སྟོན་པ་རང་གིས་རང་ཉིད་ཀྱི་དགོངས་པ་ཇི་ལྟར་ཡིན་པ་དེ་ལྟར་རྡོ་རྗེའི་གད་མོ་ཆེན་པོ་ངོ་མཚར་བའི་ཚིག ཆོས་ཉིད་གསང་བ་ཆེན་པོའི་ངེས་དོན་སྒྲ་ཇི་བཞིན་པར་བསྟན་པ་སྟེ། འདི་ནི་ཕ་དང་མ་ནི་གསད་བྱ་སྟེ་ལ་སོགས་པ་དགོངས་པ་ཅན་གྱི་གསུང་ལྡེམ་དགོངས་ཀྱིས་བསྟན་པ་ལྟ་བུ་མ་ཡིན་ལ། འོན་ཀྱང་འདི་ཉིད་བློ་དམན་དེའི་སྤྱོད་ཡུལ་དུ་མ་གྱུར་པ་ཞིག་གིས་ཆོས་ཉིད་གཤིས་ཀྱི་བཞུགས་ཚུལ་གྱི་དོན་སྤྱི་ཙམ་ཞིག་གོ་བས་དཔོག་པར་བྱས་ཏེ་ལྟ་བས་ཐག་ཆོད་པ་ལ། དེ་དང་རྣམ་པ་ཆ་འདྲ་བའི་ལམ་ལ་སྒོམ་པས་གོམས་པར་བྱས་ཚེ་ཡིད་དཔྱོད་ཙམ་དུ་མ་སོང་བར་མྱོང་བ་ཅུང་ཟད་ཅིག་ཐོབ་པ་ཡིན་ན། རྟོགས་པ་མངོན་གྱུར་གྱི་གདེང་ཞིག་འཐོབ་ཏུ་ཡོད་པའི་རེ་བ་ཡོད་སོང་བ་རེད། རེ་བ་དེའི་སྟེང་ནས་ནམ་ཞིག་རྟོགས་པ་མངོན་གྱུར་གྱི་འབྲས་བུ་ཐོབ་དུས། རྡོ་རྗེ་གད་མོ་ཆེན་པོའི་རང་སྐད་སྒྲ་ཇི་བཞིན་པའི་གད་རྒྱངས་ཀློང་ཆེན་པ་དང་ཞབས་དཀར་ཚང་སོགས་ཀྱི་སྟངས་ཀ་བྱས་ཏེ་རང་གིས་སྒྲོག་ཆོག་པའི་དུས་བཀག་ཚེས་པ་ཡིན། དེའི་བར་དུ་སྨོན་པའི་ཡུལ་ཙམ་ཞིག་བྱས་ཏེ། འདི་ཆོས་ཉིད་དོན་གྱི་གནས་ལུགས་ཇི་བཞིན་པར་མངོན་དུ་གྱུར་ཏེ་རྟོགས་པའི་དུས་སུ་གཤིས་ལ་དགེ་སྡིག་མ་གྲུབ་པས་ཁམས་གསུམ་སེམས་ཅན་བསད་པ་དང་ཕར་ཕྱིན་བཅུར་རྟག་ཏུ་སྤྱད་པ་གཉིས་ཀ་འདྲ་འདྲ་ཡིན་ཡང་། ཚོགས་བརྒྱད་འཁོར་བའི་ཆོས་ཀྱིས་མ་བཏང་པའི་གང་ཟག་སོ་སོ་སྐྱེ་བོ་རང་རྒྱུད་ལྡན་ཞིག་གིས་ཁམས་གསུམ་སེམས་ཅན་ཐམས་ཅད་བསད་པ་དང་ཕར་ཕྱིན་བཅུའི་དགེ་བ་ལ་རྟག་ཏུ་སྤྱད་པ་གཉིས་ཀ་འདྲ་འདྲ་ཡིན་གསུངས་ཏེ་རྒྱུ་འབྲས་ཆད་པའམ་མེད་པར་བསྟན་པ་མ་ཡིན། དེས་ན་རྟོགས་པ་ཀློང་དུ་གྱུར་ནས་ཕུང་ལྔ་ཚོགས་བརྒྱད་དང་བཅས་པའི་འཁོར་བའི་ཆོས་རང་དག་རེད་སོང་ཚེ་ལས་དགེ་སྡིག་བག་ཆགས་རྟེན་གཞི་དང་བཅས་པ་ཟད་སོང་བས་ན་གཤིས་ཆོས་ཉིད་དོན་གྱི་ངོ་བོ་ལ་དགེ་སྡིག་མཚན་མའི་ཆོས་མེད་པའི་ངེས་དོན་གྱི་གོ་བ་ཞིག་དང་། དེ་ལྟར་མངོན་དུ་མ་གྱུར་པའི་རིང་ལ་རྒྱུ་འབྲས་ཕྲ་ཞིང་ཕྲ་བ་ནས་ཞིབ་དགོས་ཤིང་། ནམ་ཞིག་སྤང་བླང་རེ་དོགས་བྲལ་བའི་འབྲས་བུ་སྒྲ་ཇི་བཞིན་པར་དྲངས་པའི་དྲང་དོན་གྱི་ངོས་ཤིག་དང་གཉིས་ཀྱི་གོ་བ་ལོན་པའི་ཐོག་ནས་ལྟ་བ་མཐོ་དགོས་ཏེ། ཐེག་དགུའི་ཡང་རྩེ་ངེས་དོན་འབྲས་བུ་ཐུས་ཀ་གཏན་ལ་འབེབས་སྐབས་ཡིན་པ་དང་། སྤྱོད་པ་ཞིབ་དགོས་ཏེ། རབ་ཏུ་དམའ་བའི་ས་ཐེག་དགུའི་ལམ་གྱི་འཇུག་ངོགས་དང་པོ་དད་དང་ངེས་འབྱུང་དང་། ལམ་གྱི་རྨང་གཞི་སྐྱབས་འགྲོ་ནས་བརྩམས་ཏེ་རང་རྒྱུད་དག་ཐེར་བྱེད་ཞོར་དུ་མ་ཡོང་ན། མི་མགོ་བསྐོར་ན་བསྐོར་ཆུང་ཡིན་ཏེ། གཞན་ཐམས་ཅད་ཀྱིས་འུ་གུས་ཅི་ཟེར་ཨེ་ཉན་ཅི་ཤེས། འོན་ཀྱང་རང་མགོ་བསྐོར་ན་བསྐོར་ཆེན་ཡིན་ཏེ། ཚེ་རབས་གཏན་དུ་ལམ་ལོག་ལ་མགོ་འཁོར་བར་ཕྱོགས་ནས་འདུག་སྙམ་པའི་གོ་དོན་དེ་འདྲ་ཞིག་ཡོད་དགོས་པ་ལས། དམ་པའི་གཞུང་ལ་ཐོས་བསམ་བྱེད་པའི་དོན་སྒོ་དེ་དེའི་གནས་ཚུལ་རྒྱུས་ལོན་ལ་ཞིབ་འཇུག་བྱེད་པར་ཡོང་བ་དང་། བླ་མས་ཆོས་བཤད་ཀྱི་ཁྲིད་ལ་ཉན་ནས་བླ་མས་ཅི་ཟེར་གྱི་རྒྱུགས་ལེན་ལ་ཡོང་བ་ཡང་མ་ཡིན་པར་ཆོས་ཞུས་ནས་གདམས་ངག་ཉན་པའི་ཡོང་སྒོ་རང་ཉིད་ལ་འདི་ཐོབ་བྱུང་བསམ་རྒྱུ་ཞིག་ལོན་དགོས་པ་ཡིན་པས་དེའི་ཐད་ཀྱི་གོ་དོན་དེ་འདྲ་འབྱུང་བ་ཡིན་ནོ། །སྟོང་གསུམ་ཐམས་ཅད་ལྷུན་གྲུབ་དཀྱིལ་འཁོར་ལ། །ཆར་ཆུ་རང་བབས་ཆུ་ཡིས་ཆག་ཆག་གདབ། །ལམ་སྲང་རང་བཞིན་ཐིག་ཆེན་གདབ་པ་དང་། །རྐང་པའི་རྗེས་ནི་ཁ་དོག་རྡུལ་ཚོན་རིས། །རང་ལུས་སྣང་སྟོང་ཡི་དམ་ལྷ་ཡི་སྐུ། །སྨྲ་བརྗོད་གྲགས་སྟོང་རྡོ་རྗེའི་བཟླས་པ་དང་། །དྲན་བསམ་འཛིན་མེད་རང་གྲོལ་ལྷ་ཡི་ཐུགས། །ཡན་ལག་འགུལ་བསྐྱོད་ཐམས་ཅད་ཕྱག་རྒྱའོ། །བཟའ་དང་བཏུང་བ་ཆོས་ཉིད་མཆོད་པ་དང་། །གཟུགས་སུ་སྣང་བ་ཐམས་ཅད་ལྷ་ཡི་སྐུ། །སྒྲ་ཆེན་བརྗོད་པ་ཐམས་ཅད་རོལ་མོ་ཉིད། །བསྲུང་མེད་ཉམས་མེད་རང་བབས་དམ་ཚིག་གོ། དེ་འདྲའི་རྣལ་འབྱོར་པ་ཡིས་ཅི་བྱས་ཀྱང་། །འོད་གསལ་ཆོས་ཉིད་ངང་ལ་གདམས་ངག་དང་། །བསྐྱེད་རིམ་དམ་ཚིག་དང་བཅས་རྫོགས་པས་ན། །འབད་རྩོལ་རྒྱུ་འབྲས་ཆོས་ལ་བརྟེན་མི་དགོས། །འབད་མེད་དངོས་གྲུབ་ཡ་མཚན་རྨད་པོ་ཆེ། །མྱུར་དུ་ཐོབ་པ་རྫོགས་པ་ཆེན་པོ་ཡི། །ཁྱད་ཆོས་ཡིན་ནོ་སྐལ་ལྡན་སྙིང་གི་བུ། །ཞེས་གསུངས་ཏེ། སྤྱིར་ན་འཁོར་འདས་ཀྱི་ཆོས་རྣམས་རྣལ་འབྱོར་པའི་ལུས་སེམས་ལ་ཚང་ཏེ། ཐབས་དང་ཤེས་རབ་ཀྱི་ཆར་ཕ་དང་མ། ཆོས་སྐུ་བྱང་ཆུབ་ཀྱི་ཆར་འཕེན་པ་ལས་ཀྱི་རླུང་། རིགས་ལྔ་ཡེ་གདངས་ཀྱི་ཆར་འབྱུང་ལྔའི་ས་བོན་ལ་སོགས་པ་ནས། སྐྱེས་པ་སྤྲུལ་སྐུ། གནས་པ་ལོངས་སྐུ། ཤི་བ་ཆོས་སྐུ་སྟོང་པའི་ཆར་ཤར་བས། འགྲོ་བ་རྣམས་ཡེ་ནས་གཞི་ལམ་འབྲས་བུ་བགྲོད་ནས་གྲོལ་བའི་ཚུལ་དང་། ཡང་སྒོས་སུ་འཁྲུལ་བ་ལྡོག་ཚུལ་དང་སྦྱར་ན། ལུས་ནི་གཞི། ཕྱིའི་སྣང་ཆ་གཞི་སྣང་ལྷུན་གྲུབ། ན་བ་ངོ་འཕྲོད་པའི་རྟོགས་པ། རྒས་པ་བདེན་ཞེན་གྱི་འཁྲུལ་བ་སངས་པ། ཤི་བ་རང་ངོ་ཤེས་དུས་ནང་དབྱིངས་ཀ་དག་གི་ས་ལ་མཐར་ཕྱིན་པའི་ཆ་མཚོན་པའོ། །འདི་དག་གཞི་ལ་ཚང་བས་དབང་དང་གདམས་ངག་ངོ་སྤྲད་ནས། ལམ་བསྒོམས་པས་གྲོལ་བ་འགྲུབ་ཅིང་འཐད་དོ། །གཞི་ལ་ཡེ་ཚང་དུ་ཡོད་པ་དེ་ལམ་གྱིས་དེ་བཞིན་དུ་བསྟན་ནས། འབྲས་བུ་དེ་ཉིད་མངོན་དུ་གྱུར་པ་ནི་གཞི་འབྲས་དབྱེར་མེད་དོ། །དེའི་ཕྱིར་ན་འཁོར་འདས་གཞི་ལམ་འབྲས་གསུམ་གྱི་ཆོས་ཐམས་ཅད་སེམས་ཉིད་རིག་པའི་ངོ་བོ་ལ་རྫོགས་པ་ཡིན། དེས་ན་རྣལ་འབྱོར་པའི་ལམ་གོམས་པ་མངོན་དུ་གྱུར་ནས་རང་གནས་ཀྱི་ཡེ་ཤེས་ལ་སྒྲིབ་བྱེད་ཀྱི་དྲི་མ་དག་དུས། སྟོང་གསུམ་འཇིག་རྟེན་གྱི་ཁམས་ཐམས་ཅད་མ་བྱས་ལྷུན་གྲུབ་ཀྱི་དག་པའི་དཀྱིལ་འཁོར་དུ་བཞེངས་པའི་ཆར་ཆུ་རང་བབས་ཀྱི་ཆུ་ཡིས་དཀྱིལ་འཁོར་སྒྲུབ་གཞི་ལ་ཆག་ཆག་གདབ་པ་དང་། ལམ་སྲང་བཞི་མདོ་བརྒྱད་མདོ་ཐམས་ཅད་དཀྱིལ་འཁོར་གྱི་ཐིག དེའི་སྟེང་དུ་སོང་ཚད་ཀྱི་རྐང་རྗེས་ཐམས་ཅད་རྡུལ་ཚོན་གྱི་རི་མོ། འགྲོ་མཁན་གྱི་རང་ལུས་སྣང་སྟོང་གཉིས་མེད་ཀྱི་ཡི་དམ་ལྷ་སྐུ། ངག་གི་སྨྲ་བརྗོད་སྒྲ་གྲགས་ཐམས་ཅད་གྲགས་སྟོང་རྡོ་རྗེའི་བཟླས་པ། སེམས་ཀྱིས་བསམ་ཚད་དྲན་ཚད་དྲན་བསམ་འཛིན་མེད་རང་གྲོལ་ཡི་དམ་ལྷ་ཡི་ཐུགས། ཁས་བཤད་ཚད་སྔགས། ལུས་ཀྱི་ཡན་ལག་འགུལ་སྐྱོད་ཅི་བྱས་པ་ཐམས་ཅད་རྡོ་རྗེའི་གར་དང་ཕྱག་རྒྱ། བཟའ་བཏུང་ཅི་བྱས་ཐམས་ཅད་ཚོགས་ཀྱི་འཁོར་ལོ་ཟག་མེད་ཆོས་ཉིད་ཀྱི་མཆོད་པ། གཟུགས་སྣང་ཐམས་ཅད་ལྷ་སྐུ། སྒྲ་ཆེན་བརྗོད་པ་ཐམས་ཅད་རོལ་མོའི་སྒྲ་དབྱངས། འདའ་ཉམ་སྲུང་མཚམས་མེད་པ་རང་བབས་ཀྱི་དམ་ཚིག་གོ་ཞེས་རྫོགས་ཚིག་གིས་མཐའ་བསྡུས་པའོ། །དེ་དག་ནི་རྒྱུད་མུ་ཏིག་ཕྲེང་བ་ལས། རིག་པ་ཉིད་ལ་འདི་ལྟ་སྟེ། །ཉི་མ་ཟླ་བ་ཤེས་རབ་ཐབས། །སྐྱེས་པ་གཞི་ལ་བུད་མེད་ལམ། །ལ་སོགས་པས་རང་སྣང་རིག་པའི་ངོ་ཁ་ལ་འཁོར་འདས་ཀྱི་ཆོས་མ་ཚང་བ་མེད་པ་དང་། དག་པ་རྣལ་འབྱོར་པ་ཡི་ངོ་ཁ་ལ་ཐམས་ཅད་མ་སྤངས་ཡོངས་རྫོགས་ཀྱི་དག་པ་ལྷ་སྔགས་ཀྱི་ཆོས་ཉིད་ཀྱི་དཀྱིལ་འཁོར་མཐའ་ཀླས་འབྱམས་ཀླས་པའི་ཁྱད་པར་རྒྱུད་གཞན་དང་བཅས་པས་ལན་གཅིག་མིན་པར་ཞིབ་པར་བསྟན་ཡོད་ལ། འདི་ནས་དེ་ལྟར་རྟོགས་པའི་རྣལ་འབྱོར་བ་ཡིས་ཅི་བྱས་གང་བྱེད། གང་སྣང་ཅི་ཤར་ཐམས་ཅད་འོད་གསལ་ཆོས་ཉིད་ཀྱི་ངང་ལ་གནས་པས་ན་འབད་རྩོལ་རྒྱུ་འབྲས་ཀྱི་ཆོས་ཉི་ཚེ་བ་ཞིག་དང་ཐུན་མོང་གི་སྤྲོས་པ་ལ་ལྟོས་མི་དགོས་པར་ཐམས་ཅད་འབད་མེད་མཆོག་གི་དངོས་གྲུབ་ཡ་མཚན་རྨད་བྱུང་གི་ཆོས་སུ་གྲུབ་པ་འདི་རྫོགས་པ་ཆེན་པོའི་ཁྱད་ཆོས་ཡིན། དེ་ལྟར་ཡིན་པ་ཤེས་སམ། དེ་བཞིན་ཕྱག་ལེན་ལ་ཐེབས་པར་གྱིས་ཤིག་སྐལ་ལྡན་སྙིང་གི་བུ་ཞེས་གལ་ཆེན་གྱི་དོན་ལ་ནན་གྱིས་ཞུ་འབོད་མཛད་པའོ། །རྣལ་འབྱོར་པ་རབ་འབྲིང་ཐ་གསུམ་གྱི་གྲོལ་ཚད་བསྟན་པ་ནི། དེ་ལྟར་ངེས་པར་ཉམས་སུ་བླང་གྱུར་ན། །སྤྲིན་རྣམས་ནམ་མཁའི་ངང་ལ་ཡལ་བ་བཞིན། །འཁོར་འདས་རྟོག་ཚོགས་གདོད་མའི་གཞི་ལ་དག །ཉི་མའི་དཀྱིལ་འཁོར་སྒྲིབ་མེད་གསལ་བ་བཞིན། །རང་རིག་འོད་གསལ་ཆོས་སྐུ་མངོན་གྱུར་ནས། །བསད་པ་གསོ་ནུས་གསང་བ་གོ་ནུས་ཤིང་། །རྫུ་འཕྲུལ་སྣ་ཚོགས་བསྟན་ནས་འགྲོ་བ་འདུལ། །ས་ལམ་ཡོན་ཏན་མ་ལུས་རབ་རྫོགས་ནས། །གང་ཟག་དབང་པོ་རབ་རྣམས་ཚེ་འདིར་གྲོལ། །འབྲིང་ནི་འཆི་ཁར་ཐ་མ་བར་དོ་རུ། །ཀ་དག་གཞི་ལ་གྲོལ་ནས་ནང་དབྱིངས་སུ། །སྐུ་གསུམ་ཡེ་ཤེས་འབྲལ་མེད་རྟག་བཞུགས་ནས། །གང་ལ་གང་འདུལ་སྤྲུལ་པ་བཀྱེ་ནས་ཀྱང་། །འགྲོ་དོན་རྒྱུན་མི་འཆད་པར་མཛད་པའོ། །ཚིག་དོན་འདི་རྣམས་ཡིད་ལ་ཟུངས་ཤིག་དང་། །སྐྱིད་པའི་ཉི་མ་ནང་ནས་འཆར་བར་ངེས། །ཞེས་གསུངས་ཏེ། གོང་ནས་གསུངས་པའི་ལྟ་སྒོམ་སྤྱོད་པ་གཞི་ལམ་འབྲས་གསུམ་གྱི་རྣམ་གཞག རྫོགས་ཆེན་རྒྱུད་ལུང་མན་ངག་ནས་ཇི་ལྟར་འབྱུང་བ་འདིར་ཡང་བསྟན་པ་བཞིན་དུ་ཉམས་སུ་བླངས་པ་ཡིན་ན། ཚོགས་གཉིས་ངང་གིས་རྫོགས་པ་དང་མཉམ་དུ་སྒྲིབ་གཉིས་རང་བཞིན་གྱིས་དག་སྟེ། སྤྲིན་བྱུང་ཡང་ནམ་མཁའི་ངང་ནས་བྱུང་ལ་ཐིམ་ཡང་ནམ་མཁའི་ངང་ལ་ཐིམ་ནས་ཡལ་བ་བཞིན་དུ་འཁོར་འདས་ཀྱི་སྣང་བ་དང་རྟོག་ཚོགས་ཐམས་ཅད་གདོད་མའི་ཀ་དག་གི་གཞི་ལས་བྱུང་ཞིང་གཞི་རུ་དག་སྟེ། ཉི་མའི་དཀྱིལ་འཁོར་ལ་སྒྲིབ་པས་གོས་མ་མྱོང་བ་ལྟར་དུ་ཡེ་ནས་སྒྲིབ་མེད་རང་རིག་འོད་གསལ་གྱི་ཆོས་སྐུ་མངོན་དུ་གྱུར་པ་དང་ཆབས་ཅིག་ཏུ་ཀུན་གྱི་མཐོང་ཆོས་ལ་ཡང་བསད་པ་ཡར་ལ་གསོ་ནུས་ཤིང་། ལྐོག་གྱུར་གསང་བའི་སྒྲ་ཡང་གོ་ཞིང་ཐོས་ཐུབ་པས་མ་ཚད་རྫུ་འཕྲུལ་སྣ་ཚོགས་དང་། ཁྱད་པར་དུ་གཞན་སེམས་ཤེས་པའི་མངོན་ཤེས་ཀྱིས་གང་འདུལ་གྱི་ཆོས་བསྟན་ནས་འགྲོ་བ་འདུལ་ཐུབ་པ་དང་། དེ་བཞིན་དུ་ས་དང་ལམ་གྱི་ཡོན་ཏན་ཐུན་མོང་དང་ཐུན་མོང་མ་ཡིན་པ་ཐམས་ཅད་རྫོགས་པ་ཡིན་ནོ། །ཁྱད་པར་དུ་ཁྲེགས་ཆོད་དང་ཐོད་རྒལ་ཐུན་མོང་གི་ལམ་ནས་དབྱིངས་རིག་གནད་དུ་གཟིར་བའི་དུས་སུ་ཤིན་ཏུ་གཅེས་པའི་ཏིང་འཛིན་རྣམ་གསུམ་གྱི་སྒྲོམ་ནས་རྟགས་ཚད་ངེས་པའི་ཡོན་ཏན་འབྱུང་བ་ཡིན། དེ་དག་ནི་ཅོག་བཞག་ཆེན་པོའི་ཏིང་འཛིན་དང་། ཐོག་བབས་ཆེན་པོའི་ཏིང་འཛིན་དང་། རྒྱས་འདེབས་ཆེན་པོའི་ཏིང་འཛིན་གསུམ་སྟེ། ཅོག་བཞག་ཆེན་པོའི་ཏིང་འཛིན་ལ་གོམས་པའི་དུས་སུ་སྔར་མ་མཐོང་བའི་ཆོས་ཀྱང་རང་ཤེས་སུ་འགྱུར་བ་དང་། ཏིང་ངེ་འཛིན་གྱི་རྣམ་གྲངས་མང་པོ་རང་ཤུགས་ཀྱིས་འཆར་བ་དང་། འཇིག་རྟེན་གྱི་བྱ་བ་ལ་བློ་མི་འཇུག་པ་དང་། སངས་རྒྱས་བྱང་སེམས་ཀྱི་ཞལ་མཐོང་བ་དང་། སྔར་མེད་ཀྱི་སྙིང་རྗེ་ཆེན་པོ་རྒྱུད་ལ་འདྲོངས་པ་ཡིན་ནོ། །ཐོག་བབས་ཆེན་པོའི་ཏིང་འཛིན་ལ་གོམས་སོང་དུས་སྣང་བ་སྒྱུ་མར་འབྱོངས་ནས་སྲིད་པའི་འདོད་ཡོན་ལ་ཞེན་པ་བྲལ་བ་དང་། རིག་པ་རྗེན་ལ་བུད་དེ་རྟོགས་པ་མཆོག་ཏུ་གསལ་བ་དང་། དགོངས་པ་ཆོས་ཉིད་དང་འདྲེས་པས་ན་མི་རྟོག་པའི་ཏིང་འཛིན་སྐྱེ་བ་དང་། ཤེས་རབ་རང་བྱུང་དུ་ཤར་ནས་ཚིག་དོན་གྱི་ཀློང་རང་བརྡོལ་དུ་འབྱུང་བ་ཡིན་ནོ། །རྒྱས་འདེབས་ཆེན་པོའི་ཏིང་འཛིན་གྱི་གོམས་ཚད་མཐར་ཕྱིན་ན་སྣང་བ་འོད་གསལ་དུ་ཤར་ཏེ་ཉིན་མཚན་ཆོས་ཉིད་དུ་གནས་པ་ཡིན་ནོ། །ཁྲེགས་ཆོད་གཅིག་པུའི་གོམས་ཚད་ཀྱང་སྣང་བ་གང་ཤར་དང་རང་ལུས་རྡུལ་ཕྲན་ཆ་མེད་ལ་མཐོང་སྟེ། འབྱུང་བཞིའི་རྡུལ་ཕྲན་དག་སོང་བའི་སྟོབས་ཀྱིས་སྤྱན་དང་མངོན་ཤེས་ལ་དབང་འབྱོར་ནས་ཚེ་འདི་ཉིད་ལ་གྲོལ་བ་ཡིན། ཁྲེགས་ཆོད་གོམས་སྟོབས་ཀྱིས་སྐྲ་སེན་མ་གཏོགས་ཤུལ་དུ་མི་ལུས་པ་སྟེ། རང་རེའི་ཁ་སྐད་ལ་འཇའ་ལུས་གྲུབ་སོང་ཟེར་འདུག་པ་དེ་གཞུང་གི་ནང་ནས་བཤད་ན་ལུས་རྡུལ་ཕྲན་དུ་དེངས་པ་འདི་ཡིན། འཆི་སྲིད་ཆོས་སྐུའི་འོད་གསལ་ཤར་དུས་གྲོལ་བ་ཚུན་ཆད་དེ་ཚེ་འདི་ཉིད་ལ་གྲོལ་བ་དང་། འབྲིང་ཆོས་ཉིད་བར་དོར་གྲོལ་བ་དང་། ཐ་མ་སྲིད་པ་བར་དོར་རང་བཞིན་སྤྲུལ་བའི་ཞིང་དུ་དབུགས་འབྱིན་པ་ནི་སྙིང་ཐིག་གི་དགོངས་པའོ། །ཀ་དག་གི་གཞི་ལ་གྲོལ་བ་འདིའི་གོ་དོན་ཞིབ་ཕྲ་བྱས་ནས་ལེན་དགོས། གཞི་ལས་གཞི་སྣང་ཤར་བའི་གནས་སྐབས་ན་ཐམས་ཅད་ལྷུན་གྲུབ་ཀྱི་ཞིང་སྣང། སྣང་སྲིད་འོད་དང་སྐུ་ལ་ཤར་བ་ཡིན། དེའི་ངོ་བོའི་རྩལ་ལས་ལོངས་སྐུའི་སྣང་བ་དང་། ཡོན་ཏན་གྱི་རྩལ་ལས་རང་བཞིན་སྤྲུལ་སྐུའི་ཞིང་སྣང་། ཐུགས་རྗེའི་རྩལ་ལས་འཁོར་བའི་སྒོ་ཡང་རྨི་ལམ་ལྟར་དུ་རང་སྣང་ལ་ཤར་བ་ཡིན། དེ་དག་ཇི་ལྟར་སྣང་ཡང་འཁྲུལ་མ་འཁྲུལ་གང་དུ་ཡང་གྲུབ་པ་ཞིག་མ་ཡིན། རང་ངོ་ཤེས་ན་གྲོལ་རྐྱེན་བྱེད་པའི་ཆ་ནས་གྲོལ་གཞི་དང་། མ་ཤེས་ན་འཁྲུལ་རྐྱེན་བྱེད་པའི་ཆ་ནས་འཁྲུལ་གཞི་ཞེས་སུ་བཏགས་པ་ཡིན། དེས་ན་གཞི་སྣང་འདི་གྲོལ་གཞི་དང་། ཀ་དག་དེ་གྲོལ་ས་ཡིན། གདོད་མའི་གཞི་དབྱིངས་འཁོར་འདས་གང་དུ་ཡང་མ་ཕྱེད་པ་དེའི་ཐོག་ནས་གྲོལ་ཟེར་རྒྱུ་མ་ཡིན། གཞི་འབྲས་དབྱེར་མེད་པའི་ཀ་དག་གི་ནང་དབྱིངས་ལ་འཁྱིལ་བ་དེ་ཅི་འདྲ་ཞིག་ཡིན་ན། དཔེ་བསེ་ཤིང་གི་འབྲས་བུ་ལྟ་བུ་སླར་མི་ལྡོག་པའམ། དངུལ་ཆུ་དུག་འདོན་བྱས་པ་དང་འདྲ་བར་སླར་གནོད་པར་མི་འགྱུར་བ་ཀ་དག་གི་དབྱིངས་ལས་ཕྱི་གསལ་གདངས་ལ་འཕྲོས་ཏེ་གཟུགས་སྐུ་གཉིས་ཀྱིས་འགྲོ་བའི་དོན་བྱེད་པ་དེ་འདྲ་ཞིག་ཏུ་གསུངས་སོ། །ཚིག་དོན་འདི་དག་གོ་ལོ་ཐོས་ལོར་མ་བསྐྱུར་པར་ཡིད་ལ་ཟུངས། རྒྱུད་ལ་སྦྱར་ནས་ཉམས་སུ་ལོངས་ཤིག་དང་། རང་གཞན་དོན་གཉིས་འགྲུབ་པའི་སྐྱིད་པའི་ཉི་མ་ཞིག་ནང་ནས་འཆར་བར་ངེས་ཞེས་པའི་གདམས་པ་དང་བཅས་ཏེ་བར་དུ་དགེ་བ་གཞུང་དོན་ཆ་ཚང་སོང་བའོ། །ཐ་མར་དགེ་བ་མཇུག་དོན་ཇི་ལྟར་བརྩམས་པ། རྡོ་རྗེའི་གླུ་འདི་སུས་ཇི་ལྟར་ནམ་དུ་ལེན་ཚུལ་དང་བཅས་ཏེ་མཐར་ཕྱིན་པར་བྱ་བ་ལས། དང་པོ་མཛད་པ་པོའི་མཚན་དང་བཅས་པས་ངེས་པར་མཛད་པ་ནི། དེ་འདྲའི་དགོངས་པ་གླུ་རུ་ལེན་མཁན་དེ། །བྱ་བཏང་ཚོགས་དྲུག་རང་གྲོལ་ཡིན་པར་སྣང་། །ཞེས་པས་བསྟན་ཏེ། དེ་འདྲའི་ཀུན་བཟང་རྒྱལ་བའི་དགོངས་པ་རྫོགས་ཆེན་ཁྲེགས་ཆོད་ཀྱི་མན་ངག ལྟ་བའི་གླུ་དབྱངས་ངང་དྭངས་དོ་ཧ་ཡི་ཚུལ་དུ་ལེན་མཁན་ནི། སྒོ་གསུམ་འཇིག་རྟེན་གྱི་བྱ་བ་བཏང་བའི་རྣལ་འབྱོར་པ་ཚོགས་དྲུག་རང་གྲོལ་ཡིན་པར་སྣང་ངོ་སྟེ། དོན་རྒྱལ་བའི་དགོངས་པ་དེ་ཉིད། རྐྱེན་ཁོང་ལ་བརྟེན་པའི་ཆོས་སྐུའི་མཆོད་སྡོང་གསར་བ་ཞིག་སྐལ་ལྡན་གདུལ་བྱའི་འགྲོ་ངོར་སྣང་བ་ཡིན་ཞེས་པའོ། །དགེ་བ་རྫོགས་བྱང་དུ་བསྔོ་བ་ནི། དགེ་འདིས་སྐལ་ལྡན་གདུལ་བྱ་མང་པོ་ཡིས། །མ་རིག་ཉོན་མོངས་རྟོག་པའི་དྲི་མ་ཀུན། །ཀ་དག་གདོད་མའི་དབྱིངས་སུ་མྱུར་དག་ནས། །འབྲས་བུ་ཚེ་འདི་ཉིད་ལ་ཐོབ་པར་ཤོག །ཅེས་གསུངས་ཏེ། འདི་ལྟར་བསྟན་པའི་དགེ་བ་འདིས། ལས་དང་སྐལ་བ་ལྡན་པའི་མ་འོངས་ཕྱིས་འབྱུང་གི་གདུལ་བྱ་ཤིན་ཏུ་མང་པོ་ཞིག མ་རིག་སྲིད་རྩའི་གདོན་གྱིས་བཏབ་པའི་ལས་ཉོན་དུ་མས་བསྐྱེད་ཅིང་འཁྲུལ་བར་འཕྱན་པའི་སྡུག་བསྔལ་སྣ་ཚོགས་མྱོང་བའི་འགྲོ་བ་ཀུན་རྟོག་གི་དྲི་མས་སྒྲིབ་པ་དེ་དག་གི་ཀུན་རྟོག་གི་དྲི་མ་ཀུན་དག་ནས་མ་འཁྲུལ་གཞི་ཡི་གནས་ལུགས་རང་གནས་རིག་པའི་རང་ཞལ་དེ་ཉིད་མཇལ་ཏེ། ཀ་དག་གདོད་མའི་ནང་དབྱིངས་སུ་གཞོན་ནུ་བུམ་པའི་སྐུ་རུ་འཆར་བའི་འབྲས་བུ་ཚེ་འདིའམ་ཚེ་དེ་ཉིད་ལ་ཐོབ་པར་ཤོག་ཅེས་པའོ། །ཅེས་འོད་གསལ་རྫོགས་པ་ཆེན་པོའི་ཁྲེགས་ཆོད་ལྟ་བའི་གླུ་དབྱངས་ས་ལམ་མྱུར་དུ་བགྲོད་པའི་རྩལ་ལྡན་མཁའ་ལྡིང་གཤོག་རླབས་ཞེས་བྱ་བ་འདི་ནི་ཨོ་རྒྱན་རིན་པོ་ཆེས་མཛད་ཅིང་གྲུབ་ཐོབ་ཀརྨ་གླིང་བས་གཏེར་ནས་བཏོན་པའི་རིག་པ་གཅེར་མཐོང་གི་ངོ་སྤྲོད། ཀུན་མཁྱེན་ཀློང་ཆེན་པའི་མཛོད་བདུན་དང་། ངལ་གསོ་སྐོར་གསུམ་གྱི་རང་འགྲེལ་ཤིང་རྟ་རྣམ་དག ཤིང་རྟ་བཟང་པོ། ཤིང་རྟ་ཆེན་པོ་སྟེ་ཤིང་རྟ་རྣམ་གསུམ། རྫོགས་ཆེན་རྒྱབ་ཆོས་ཁྲེགས་ཆོད་རྒྱབ་ཡིག་ནམ་མཁའ་དྲི་མེད་ལ་སོགས་པ་ནམ་མཁའ་སྐོར་གསུམ། སྤྲིན་ཕུང་སྐོར་གསུམ་ལས་ཟབ་དོན་རྒྱ་མཚོའི་སྤྲིན་ཕུང་། གཞན་ཡང་རྫོགས་ཆེན་མཁའ་འགྲོའི་སྙིང་ཐིག ཁྲིད་ཡིག་སངས་རྒྱས་ལག་བཅངས་སོགས་རྙིང་མའི་གཏེར་ཆེན་ཐམས་ཅད་ཀྱི་གཏེར་ཆོས་ལ་བླ་རྫོགས་ཐུགས་གསུམ་པོ་མི་ཚང་བ་ཞིག་མེད་པས་གཏེར་ཁ་དུ་མའི་རྫོགས་ཆེན་མང་པོ་ལ་གཞི་བྱས། བླ་མའི་མན་ངག་དང་རང་གི་ཉམས་མྱོང་གིས་ཟུར་བརྒྱན་ཏེ་དད་ལྡན་གྱི་སློབ་མ་མང་པོ་ལ་ཕན་ཕྱིར༧བྱ་བཏང་ཚོགས་དྲུག་རང་གྲོལ་གྱིས་སྨྲས་པའོ། །འདིས་ཀྱང་བསྟན་པ་དང་སེམས་ཅན་ལ་ཕན་པ་དཔག་ཏུ་མེད་པ་ཐོགས་པའི་རྒྱུར་གྱུར་ཅིག་ཅེས་མཛད་བྱང་སྨོན་ལམ་དང་བཅས་ཏེ། རྡོ་རྗེའི་གླུ་འདི་ནི་ཇི་ལྟར་སུས་ལེན་པའི་ཚུལ་ཐར་པ་དོན་དུ་གཉེར་བའི་སྐལ་ལྡན་ཀུན་ལ་ཕན་ཕྱིར་བླངས་པ་ཡིན་པས། ལེན་པའི་དུས་ནི་རྣལ་འབྱོར་པས་ལྟ་བ་སྐྱོང་བའི་དུས་སུ་ལེན་པའོ། །ལེན་ལུགས་ཇི་ལྟར་ལེན་དགོས་པ་ཡིན་ན་ནི་རིག་འཛིན་ཤྲཱི་སེང་ཧའི་ཞལ་ནས། སངས་རྒྱས་ཀྱི་ཐུགས་ཁྱབ་གདལ་དུ་གནས། སེམས་ཅན་གྱི་རིག་པ་དུམ་བུར་གནས། ནམ་མཁའ་ལྟར་རྒྱ་བསྐྱེད་པ་བོགས་ཆེའོ། །ཞེས་གསུངས་པ་ལྟར་རིག་པ་ནམ་མཁའ་ལྟར་རྒྱ་ཆེར་བསྐྱེད་དཔངས་བསྟོད་ཕྱལ་ཡས་སུ་བཏང་ནས་སེམས་ཉིད་ཁྱབ་གདལ་ཡངས་པའི་ངང་ནས་རྡོ་རྗེའི་གླུ་འདི་འཐེན་དང་ལྟ་སྒོམ་བོགས་འཐོན་པའོ།། །།དེ་ཡན་ཆད་ཀྱིས་ལྟ་བ་མཁའ་ལྡིང་གཤོག་རླབས་ཀྱི་ཐེངས་འདིའི་འཆད་ཉན་ཡོངས་སུ་གྲུབ་ཏེ། དེ་རིང་གི་ཕྱི་དྲོ་ཡི་ཁྲིད་སྦྱང་འདི་ཐེངས་འདིའི་ཁྲེགས་ཆོད་ཀྱི་ཁྲིད་སྦྱང་འདུས་པ་མཉམ་འཚོགས་བྱེད་པའི་རྗེས་མ་ཡིན། ད་རུང་སང་ཉིན་ཕྱི་དྲོ་དང་གནངས་ཉིན་གྱི་ཉིན་ཧྲིལ་བོ་ལ་ཁྲེགས་ཆོད་བསྒོམ་རྒྱུ་ཡིན་ཡང་། སྤྱོད་པའི་བོགས་འདོན་དང་སྦྲེལ་ནས་ཉི་མ་དེ་གཉིས་ཀ་ལ་རང་རང་ཁ་ཁ་སོ་སོས་གྲོང་ཡུལ་དང་། རི་སུལ། ནགས་ཀྱི་གསེང་སོགས་ནས་གཅིག་པུའམ་གཉིས་གསུམ་ལས་མི་མང་བས་བསྒོམས་ན་སྙམ། ཁ་སང་རིག་ངོ་སྤྲད་པའི་སྐབས་ཤིག་ལ། འགའ་རེས་ཕུར་བསྙེན་དུང་ཕྱུར་འདོན་པ་ཡིན་གསུངས་རྒྱུའི་ཁས་ལེན་དང་། འགའ་རེས་ལོ་གསུམ་ལ་སྐུ་མཚམས་སུ་བཞུགས་རྒྱུ་སོགས་ཀྱི་དགེ་སྦྱོར་གྱི་ཁས་ལེན་མང་པོ་མཛད་མཁན་ཡོད་འདུག དེའི་རིགས་ཀྱིས་རང་རང་གི་སྡེ་ཁག་ནས་ཐོ་འགོད་རེ་མཛད་ནས་སྤྲད་ཡོང་ན། དེའི་ཐོ་དེ་ཁྱེར་སོང་ནས་འདུས་པ་མང་ཚོགས་ཕོན་ཆེན་ཡོད་དུས་སྙན་ལམ་ལ་བསྒྲགས་ན། གཅིག་ན་དགེ་སྐུལ་ལྕག་འདེབས་དང་། གཉིས་སུ་ཡི་རང་གི་དགེ་བ་ཞིག་རྒྱུད་ལ་ཞོག་འདུག་སྙམ་ནས་དུས་རྒྱུན་དེ་འདྲ་བྱས་པ་ཡིན། དེ་ཚོ་ཐུགས་ཉམས་ལ་ཞོག དེ་རིང་འདིའི་མཚམས་ནས་གཅོད་ཡུལ་མཁའ་འགྲོའི་གད་རྒྱངས་ཀྱི་ལུང་ཞིག་འདོན་རྒྱུ་བྱེད།༼མཁའ་འགྲོའི་གད་རྒྱངས་ཀྱི་ལུང་གསུངས།༽མཁའ་འགྲོའི་གད་རྒྱངས་འདི་ངས་ཁྲིད་བྱས་ཏེ་བཤད་མྱོང་བའི་ཟེར་སྡེར་ཞིག་ཀྱང་ཡོད་ས་ཡོད། དེ་ཚོ་ལ་གསན་ན་ཚིག་རེ་བཞིན་དུ་བརྡ་འགྲོལ་ལམ་ཅུང་ཟད་ཙམ་བཀྲལ་བའི་ཉམས་ཡིན། ཁྱད་པར་དུ་ལས་དང་པོ་བ་ལ་དམིགས་ནས་གོ་དོན་རེ་སེམས་ལ་འཁོར་བའི་ཕན་ཐོགས་རེ་འབྱུང་འདང་བྱས་པ་ཡིན། དེ་ལ་སོགས་པ་ངས་བཤད་བསྡད་པ་མང་ཤོས་ཤིག་འདི་རྣམ་པས་སྒྲ་བཤུས་བྱས་ནས་ཡི་གེར་ཕབ་ཡོད་པ་ཡིན། ངས་ཡང་ལྟ་བྱེད་མ་མྱོང་བས་ཇི་འདྲ་ཡོད་མི་ཤེས་ཀྱང་། གང་ལྟར་དེང་སང་གི་ཡིག་རིགས་དེབ་ལ་འཁོད་པ་ཐམས་ཅད་མི་ཚང་མའི་ལག་ལ་འགྲོ་བཞིན་ཡོད་པས། ངས་གསང་སྔགས་བཤད་ནས་ཡོད་པས་ཁྱོད་ཀྱིས་བལྟ་མི་ཆོག་ཟེར་ས་མི་ལོན་པའི་དུས་རེད། དེའི་མ་ཚད་པར་གསང་སྔགས་ཀྱི་རྒྱུད་སྡེའི་དཔེ་ཚོགས་ཚང་མ་ཚོང་རའི་ཁྲོམ་ཅོག་གི་སྒང་ན་བཤམས་ཡོད་དུས་ཡིན། འདིའི་ཕྱོགས་ལ་ཞིབ་འཇུག་ཅིག་བྱས་ཏེ་བསམ་བློ་བཏང་ན། ཡི་གེ་འདིར་བལྟས་ནས་དོན་ཟབ་ཐམས་ཅད་རྟོགས་སོང་ན་ནི། དོན་དམ་ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོ་མཐོང་བ། དེ་ཡང་དད་དང་དག་སྣང་ལྷན་སྐྱེས་སུ་ཚང་བ་རྟོགས་ལྡན་དོན་གྱི་བླ་མའི་རང་ཞལ་མཇལ་ནས་བྱིན་རླབས་རང་ཞུགས། སྔོན་ལས་འབྲེལ་ཡོད་པའི་འཕྲོ་སད་པ་ཡིན་ངེས་སྙམ། གལ་ཏེ་མ་རྟོགས་ཚིག་དང་ཡི་གེའི་གཟུགས་བརྙན་ཙམ་དུ་གྱུར་ན་ནི་རང་གསང་ཐབས་ཀྱིས་ཆོད་པ་ཡིན་པ་དང་། ཆོས་ལ་དབང་ཟ་མི་ཟའི་འདུ་ཤེས་ཙམ་ཡང་མེད་ལ་ཡིག་འབྲུ་མིག་སྔར་ལ་ཤར་བ་ཙམ་མ་གཏོགས་དོན་གྱི་སྐོར་ལ་རྟོག་དཔྱོད་གཞན་མ་ཞུགས་ན་དེ་གསང་སྔགས་གཟི་ལུམ་གྱིས་སྤྱོད་པ་ཅན་ལ་མ་ཐེ་བ་ཡིན་ནམ་སྙམ། གང་ལྟར་ཡང་ངའི་ཡི་གེ་ལ་མོས་པ་ཅན། མ་མཐོང་ཡུལ་དུས་ཀྱིས་བསྐལ་བའི་གྲོགས་པོ་ཚོ་ཐམས་ཅད་ཀྱིས། ང་དང་ཐུག་ནས་ངས་བཤད་པ་དང་འདྲ་བའི་འདུ་ཤེས་འཇོག་ཆོག་པ་དང་། དེ་ལ་རྟོག་དཔྱོད་བྱེད་པ་དག་ནི་ང་དང་ཁ་བརྡ་བྱས་པ་ལྟ་བུ་ཡིན་པ་དང་། འདི་དག་གིས་ཕན་རེ་ཐོགས་འགྲོ་ས་དེ་འདྲ་ཡོད་སྲིད་ན་དེ་ནི་ངའི་ཆེས་ཉེ་བའི་ཆོས་གྲོགས་སུ་བརྩི་ཆོག་པ་དང་། ཡང་གཟུར་གནས་བློ་གྲོས་དང་ལྡན་པ་དེང་སང་དཀོན་པའི་དུས་འདིར། འདི་ལ་སྡང་ཞེན་གྱིས་སྒྲོ་སྐུར་དང་ཐ་ན་སྨོད་ཅིང་བཤུང་བར་བྱེད་པ་ཡང་ཡོད་སྲིད་པས་དེ་ཐམས་ཅད་ཀྱང་སླད་མར་བྱམས་དང་སྙིང་རྗེས་བསྐྱང་སའི་ཡུལ་ལ་མ་ཁྱབ་པ་མེད་པ་སྟེ། ངས་དུས་རྒྱུན་སྨོན་ལམ་ཅི་ཞིག་བྱེད་བཞིན་ཡོད་ན། བདག་མཐོང་ཐོས་དང་དྲན་རེག་གི་འགྲོ་བ། ང་བླ་མར་བཟུང་ནས་དད་པ་བྱེད་མཁན་དང་། བདག་ལ་དགྲ་བོར་བརྩིས་ཏེ་སྨོད་སྡིགས་བྱེད་མཁན་ཚུན་ཆད། བཟང་ངན་ལས་ཀྱིས་འབྲེལ་བའི་མཁའ་དང་ས་ལ་རྒྱུ་བའི་སྲོག་ཆགས་ཡན་ཆད། ཐ་ན་ང་ལ་ཟས་ཀྱི་འདུ་ཤེས་བཞག་ནས་ཟ་མཁན་གྱི་འབུ་སྦྲང་ཕྲ་མོ་ཡན་ཆད་ཐམས་ཅད་བདེ་ནས་བདེ་བར་འགོད་པའི་ལྷག་བསམ་སེམས་ཀྱིས་སྨོན་འདུན་རེ་བྱེད་པའི་ཁུལ་ཡིན་པས། འདིར་ཡོད་ཐམས་ཅད་ནི་དངོས་སུ་དུས་ཀྱི་ཐ་མར་ཆོས་ཀྱི་གྲུ་ཆེན་པོ་ལ་མཉམ་དུ་ཞུགས་པའི་དོན་མཐུན་གྱི་གྲོགས་པོ་ཏག་ཏག་ཀྱང་ཡིན་པའི་དབང་གིས་ངས་བཤད་པ་བྲིས་པ་ཐམས་ཅད་ལ་ཁྱེད་རྣམ་པ་འདིར་ཡོད་ཐམས་ཅད་ཀྱིས་གཟིགས་ཆོག་རྒྱུ་དང་གསན་ཆོག་རྒྱུ་ཡིན། འདིའི་ད་ལྟ་འཆད་བཞིན་པའི་རྫོགས་ཆེན་ཁྲེགས་ཆོད་དང་ཐོད་རྒལ་འདི་ཚོ་སྙིང་ཐིག་གོང་འོག་གི་གནད་བསྡུས་པ། ཚུར་གོ་བདེར་བྱས་ཏེ་འཕྲལ་སྐད་དུ་བཀྲལ་བཞག་པའི་མན་ངག་ཡིན་པས་ན། འདི་ལ་འཆད་ཉན་མཉམ་དུ་ཚར་དུས་ངས་བཤད་པ་གཞན་ཐམས་ཅད་ཀྱང་དེ་ལས་མ་འདས་པ་ཏག་ཏག་ཡིན། གཞན་ཡང་ངས་བཤད་པ་བྲིས་པ་ཚོའི་ནང་ན་ལེགས་པའི་ཆ་རེ་གལ་ཏེ་ཡོད་སྲིད་ན་ནི། བརྒྱུད་པའི་བླ་མ་གོང་མའི་ཐུགས་བསྐྱེད་ཀྱི་མཐུ་ལས་བྱུང་བ་ཡིན་པ་དང་། དེ་ལ་ནོར་དང་མ་ཚང་འགལ་བའི་རིགས་མང་རྒྱུ་རེད། དེ་ནི་བདག་བློ་སོ་སྐྱེའི་ས་ལས་མ་འཕགས་པའི་རང་རྒྱུས་དང་སྦྲེལ་ནས་འཆད་བཞིན་ཡོད་པའི་ལྡོག་ཕྱོགས་ཀྱི་བསླབ་བྱ་རུ་འཛིན་པའི་སྨོན་པ་རེ་འདུན་གཉིས་ཀ་མཉམ་དུ་བྱེད་བཞིན་ཡོད། ཡང་སང་ཉིན་ཐོད་རྒལ་གྱི་ཁྲིད་བཤད་པའི་བར་ལ་མཇལ་ཡོང་། ད་དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ། རང་གཞན་གྱིས་དུས་གསུམ་བསགས་པའི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡམས་པའི་མཐུས། ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་དམ་པ་གང་ན་སུ་བཞུགས་ཐམས་ཅད་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱད་དེ་མཐར་ཐུག་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པའི་ཕྱིར་དུ། རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །འཕགས་པའི་རི་ངོགས་དབེན་ཞིང་ཉམས་དགའ་བར། །རིག་དང་མངོན་ཤེས་ཏིང་འཛིན་འགྲུབ་གྱུར་ནས། །དོན་གཉིས་ལྷུན་གྲུབ་བདེ་ཆེན་མཁའ་དབྱིངས་སུ། །ཚེ་འདི་ཉིད་ལ་ཕྱིན་པར་མཛད་དུ་གསོལ། །གཅིག་པུར་བསྲན་ཚུགས་སྒྲུབ་ལ་བརྩོན་པ་དང་། །ཚེ་འདིའི་ཕྱོགས་སུ་སྐད་ཅིག་མི་གཡེངས་ཤིང་། །གོང་མའི་རྗེས་སྙོག་དངོས་གྲུབ་མཐར་ཕྱིན་ནས། །རྟག་ཏུ་བླ་མ་མཉེས་པར་མཛད་དུ་གསོལ། །དམ་ཚིག་སྡོམ་པ་ཉམས་ཆགས་མེད་པ་དང་། །ལྟ་སྒོམ་སྤྱོད་འབྲས་མ་ནོར་དོན་རྟོགས་ནས། །ཉིན་མཚན་འོད་གསལ་ངང་ལས་མི་གཡོ་ཞིང་། །རང་གཞན་དོན་གཉིས་འགྲུབ་པར་མཛད་དུ་གསོལ། །སྣང་སྲིད་རྣམ་དག་བསྐྱེད་རྫོགས་མཐར་ཕྱིན་ནས། །མཁའ་འགྲོ་དམ་ཅན་སྤྲིན་བཞིན་འཐིབས་ནས་ཀྱང་། །དངོས་གྲུབ་རྣམ་གཉིས་ཆར་བཞིན་འབབ་པ་དང་། །འཕྲིན་ལས་རྣམ་བཞི་འགྲུབ་པར་མཛད་དུ་གསོལ། །དག་སྣང་མོས་གུས་ཕྱོགས་མེད་འཆར་བ་དང་། །བྱམས་དང་སྙིང་རྗེ་རྒྱུན་ཆད་མེད་པ་དང་། །ལྟ་སྒོམ་ཉམས་རྟོགས་ཡོན་ཏན་འབར་བ་དང་། །འགྲོ་དོན་ཕྱོགས་མེད་འགྲུབ་པར་མཛད་དུ་གསོལ། །དེང་ནས་བདག་ཀྱང་ནགས་ཚལ་མེ་ཏོག་ཅན། །སྐྱེ་བོས་སྟོང་ཞིང་འབབ་ཆུའི་སྒྲ་གྲགས་ལ། །དབེན་ཞིང་ཡིད་འོང་བྲག་རིའི་དྲུང་འདུག་སྟེ། །དུས་བཞིར་སྙིང་བོ་མེད་ཅེས་སེམས་པ་ཡི། །དགེ་བ་རྒྱན་གྱུར་འཇིག་རྟེན་མིས་བསྐྲུན་པ། །ཀུན་ལས་ཆེས་མཆོག་བདུད་རྩི་ཐོབ་གྱུར་ཅིང་། །མི་རྟག་སྟོང་བའི་སྒྲ་ཆེན་སྒྲོག་པར་ཤོག །སྨན་ཤིང་མེ་ཏོག་ཤང་ཤོང་མཛེས་པ་དེར། །ཆོས་ཚུལ་ཞི་བ་སྤྲིན་གྱི་བླ་བྲེ་ཅན། །རིག་འཛིན་རྒྱལ་བའི་གསེར་གྱི་གློག་འགྱུ་བས། །ཚེ་གཅིག་འོད་གསལ་སྙིང་བོ་འགྲུབ་པར་ཤོག །ཐར་བའི་ཁང་བཟང་རིན་ཆེན་ཕོ་བྲང་ནས། །ཆོས་ཚུལ་ཞི་བ་རྔ་སྒྲའི་དབྱངས་གྲགས་པས། །མ་ལུས་འགྲོ་ཀུན་མ་རིག་གཉིད་སངས་ཏེ། །གདོད་མའི་ས་ལ་མངོན་པར་བྱང་ཆུབ་ཤོག །སྐྱོ་བས་སེམས་པའི་རང་བཞིན་གསལ་བ་ཅན། །ཞི་བའི་ནགས་སུ་གཅིག་པུར་འགྲོ་འདོད་ནས། །སྙིང་ནས་སྨོན་པའི་ཚིག་གི་དབྱངས་སྨྲས་པ། །མོས་གུས་དག་པས་མྱུར་དུ་འགྲུབ་པར་ཤོག །ཆོས་ཚུལ་འདི་ཡང་ཉི་ཟླའི་དཀྱིལ་འཁོར་བཞིན། །ཕྱོགས་བཅུ་མཐའ་གྲུ་ཀུན་ཏུ་གྲགས་གྱུར་ཏེ། །བློ་གྲོས་པད་མོ་རབ་ཏུ་རྒྱས་བྱེད་ཅིང་། །སངས་རྒྱས་བསྟན་པ་དར་ཞིང་རྒྱས་པར་ཤོག །གཙུག་ལག་ཁང་རྣམས་ཀློག་པ་དང་། །ཁ་ཏོན་གྱིས་བརྒྱན་ལེགས་གནས་ཤིང་། །རྟག་ཏུ་དགེ་འདུན་མཐུན་པ་དང་། །དགེ་འདུན་དོན་ཡང་འགྲུབ་པར་ཤོག །ཧྲཱིཿ སྔོན་ཚེ་དེ་བཞིན་གཤེགས་པ་གཙུག་ཏོར་ཅན། །འཕགས་པའི་ཡུལ་དུ་གྲུབ་ཆེན་ཀུ་ཀུ་རི། །ཁ་བ་ཅན་དུ་དཔལ་ལྡན་ཐང་པ་ཞེས། །པདྨ་རིག་འཛིན་ཞབས་ལ་གསོལ་བ་འདེབས། །བསྟན་པ་ཡུན་རིང་གནས་པའི་བཀྲ་ཤིས་ཤོག །ཐུབ་བསྟན་མཛེས་པའི་རྒྱན་གཅིག་ཀློང་ཆེན་པ། །བཤད་སྒྲུབ་བསྟན་པའི་མངའ་བདག་འཇིགས་མེད་གླིང་། །མཚུངས་མེད་བླ་མའི་བསྟན་པ་སྲིད་མཐའི་བར། །བཤད་སྒྲུབ་ཐོས་བསམ་སྒོམ་པས་འཛིན་གྱུར་ཅིག །དཔལ་ལྡན་མཁས་གྲུབ་བྱེ་བའི་གཙུག་གི་རྒྱན། །མདོ་སྔགས་ལུང་རྟོགས་བསྟན་པའི་ཤིང་རྟ་ཆེ། །འཇིགས་བྲལ་སྔ་འགྱུར་རྒྱལ་བ་རྫོགས་ཆེན་པ། །ཤྲཱི་སེང་ཆོས་གྲྭའི་བསྟན་པ་རྒྱས་གྱུར་ཅིག །གངས་རི་ར་བས་བསྐོར་བའི་སོགས། སྐར་མ་རབ་རིབ་མར་མེ་དང་། །སྒྱུ་མ་ཟིལ་བ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་ལྟ།།

དགེའོ། །དགེའོ། །དགེའོ།། །།