བདེ་སྟོང་རླུང་རྫོགས་ཀྱི་ཟབ་ཁྲིད་ལྷན་སྐྱེས་ཡེ་ཤེས་རྒྱ་མ་ཚོའི་འཇུག་ངོགས།

ཀློང་ཆེན་སྙིང་ཐིག་གི་བདེ་སྟོང་རླུང་གི་རྫོགས་རིམ་ཡན་ལག་གེགས་སེལ་དང་བཅས་པའི་ཟབ་ཁྲིད་ལྷན་སྐྱེས་ཡེ་ཤེས་རྒྱ་མཚོའི་འཇུག་ངོགས་ཞེས་བྱ་བ་བཞུགས་སོ།།

ཐུབ་བསྟན་མདོ་སྔགས་གཞུང་བརྒྱའི་དཀའ་གནད་ཀུན།།

ཇི་བཞིན་འཆད་ལ་རྡོ་རྗེའི་ལྗགས་མངའ་བ།།

རྒྱལ་དབང་པདྨའི་རྒྱལ་ཚབ་ཡིད་བཞིན་ནོར།།

ཁྱབ་བདག་བླ་མ་བདག་སྙིང་དཔྱིད་དུ་བསུ།།

བསྐལ་སྔོན་བྱང་ཆུབ་རྒྱལ་བ་ཉི་མའི་ཟེར།།

བསྟན་འགྲོའི་ལེགས་ཚོགས་པདྨོ་བཞད་པའི་གཉེན།།

ཐུགས་རྗེའི་རང་གཟུགས་མི་ཡི་རྣམ་རོལ་གར།།

སྐྱབས་མཆོག་བླ་མ་འགྲོ་བའི་མུན་སེལ་མགོན།།

གང་ཐུགས་མཁྱེན་རབ་མ་དྲོས་མཚོ་ཆེན་ལས།།

ལེགས་བྱུང་མདོ་སྔགས་གཞུང་བཟང་ཁ་འབབ་ཀླུང་།།

མན་ངག་ཟབ་ཁྲིད་ཞལ་ཤེས་རིན་ཆེན་སྙིང་།།

ཇི་བཞིན་ཡི་གེར་བཀོད་ལ་གནང་བ་སྩོལ།།

དེ་ཡང་བོད་རབ་བྱུང་བཅུ་བདུན་པའི་ཤིང་མོ་ལུག་གི་ལོར་མཚོ་སྔོན་ཁྲི་ཤོར་རྒྱལ་མོའི་གནས་འདུས་དང་ཁེལ་བའི་དུས་ཚེས་ཁྱད་པར་ཅན་དེར། ཡུལ་མདོ་སྨད་ཕྱོགས་ཀྱི་སྔ་འགྱུར་རྙིང་མ་པའི་ཆོས་སྡེ་ཕུར་ཐོགས་སྟོང་དང་དགུ་བརྒྱའི་གདན་སའི་སྔགས་རིགས་གོས་དཀར་ལྕང་ལོའི་སྡེ་དང་རིས་སུ་མ་ཆད་པའི་མཁན་སྤྲུལ་འདུས་པ་རྒྱ་མཚོ་སྤྱི། ཁྱད་པར་དུ་གྲུབ་ཐོབ་དཔལ་ཆེན་ནམ་མཁའ་འཇིགས་མེད་ཀྱི་རྣམ་རོལ་ངེས་པ་དོན་གྱི་བསྟན་འཛིན་གྱི་སྐྱེས་ཆེན་དགུ་སྤྲུལ་པདྨ་འཇིགས་བྲལ་ཟིལ་གནོན་རོལ་བའི་རྡོ་རྗེའམ་དགུ་རོང་མཆོག་སྤྲུལ་བསྟན་འཛིན་རིན་པོ་ཆེས་ཡང་ཡང་གསོལ་བ་བཏབ་པའི་ངོར། ༧སྐྱབས་རྗེ་ཁྱབ་བདག་རྫོགས་ཆེན་པ་པདྨ་སྐལ་བཟང་རིན་པོ་ཆེ་མཆོག་གིས། མདོ་སྨད་རེབ་ཀོང་རིག་པ་འབྱུང་བའི་གྲོང་ཁྱེར་གྱི་ཉེ་འགྲམ་རྨ་ཀླུང་གཡང་ཁུག་དགུ་བ། བོད་ཀྱི་མཁས་པ་མི་གསུམ་དང་ལྷ་ལུང་དཔལ་གྱི་རྡོ་རྗེ། བླ་ཆེན་དགོངས་པ་རབ་གསལ། རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེ་སོགས་སྐྱེས་ཆེན་མང་པོས་ཞབས་ཀྱིས་བཅགས་ཤིང་བྱིན་གྱི་བརླབས་པའི་གནས་ཕུན་སུམ་ཚོགས་པ། དགུ་རོང་དགོན་གསང་ཆེན་རྡོ་རྗེ་གླིང་ཟིལ་གནོན་པདྨ་དབང་སྡུད་རྣམ་པར་རྒྱལ་བའི་ཕོ་བྲང་དུ། དགེ་འདུན་འདུས་པའི་སྡེ་གཉིས་ཀྱི་མཚོན་པའི་སློབ་ཚོགས་སྟོང་ཕྲག་དུ་མ་ལ་ལེགས་པར་བསྩལ་བའི་ཆོས་ནི་འདི་སྐད་དུ།

༈ དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་མངའ་བདག བཀའ་དྲིན་མཚུངས་ཟླ་མ་མཆིས་པ། དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་བསུ་མཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ།།

ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས།།

གཞན་གྱིས་མི་ཐུབ་བདུད་ཀྱི་དཔུང་འཇོམས་པ།།

གསེར་གྱི་ལྷུན་པོ་ལྟ་བུར་བརྗིད་པའི་སྐུ།།

ཤཱཀྱའི་རྒྱལ་པོ་དེ་ལ་མགོས་ཕྱག་འཚལ།།

དྲི་མེད་མཚོ་གླིང་པདྨའི་སྡོང་པོའི་རྩེར།།

རྒྱལ་བའི་རྣམ་སྤྲུལ་རང་བྱུང་ལྷུན་གྱིས་གྲུབ།།

མཚན་རྫོགས་དཔེ་བྱད་ཡོན་ཏན་མཚུངས་འབར་བ།།

པདྨ་འབྱུང་གནས་བདག་བློའི་པད་མཚོར་སྐྱོངས།།

འཛམ་གླིང་མཛེས་པའི་རྒྱན་དྲུག་མཆོག་གཉིས་དང་།།

ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང་།།

ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས།།

འཁོར་འདས་ཆོས་སྐུར་རྟོགས་པའི་ཀློང་ཆེན་པ།།

དྲི་མེད་འོད་ཟེར་ཞབས་ལ་གསོལ་བ་འདེབས།།

ཤེས་བྱ་ཀུན་མཁྱེན་འགྲོ་ལ་རྗེས་བརྩེའི་གཏེར།།

དྲི་མེད་འོད་ཟེར་ཡང་སྤྲུལ་ཐུགས་གཏེར་མཛོད།།

འོད་གསལ་ཀློང་ཆེན་ནམ་མཁའི་རྣལ་འབྱོར་བ།།

འཇིགས་མེད་གླིང་པའི་ཞབས་ལ་གསོལ་བ་འདེབས།།

བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས།།

སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས།།

གདོད་མའི་མགོན་པོ་མི་ཡི་རྫུར་ཞུགས་པ།།

འཇིགས་མེད་ཡོན་ཏན་མགོན་པོར་གསོལ་བ་འདེབས།།

དགོངས་རྒྱུད་རྟོགས་པ་འཕོ་བར་བྱིན་གྱིས་རློབས།།

ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས།།

དུས་གསུམ་སངས་རྒྱས་ཀུན་གྱི་ངོ་བོ་ཉིད།།

རང་སེམས་ཆོས་སྐུར་མངོན་སུམ་སྟོན་མཛད་པ།།

རྩ་བའི་བླ་མ་མཆོག་ལ་གསོལ་བ་འདེབས།།

བདག་གཞན་འགྲོ་བའི་བློ་སྣ་ཆོས་ལ་སྒྱུར།།

གང་དག་ཕྱོགས་བཅུ་སྟོང་གི་འཇིག་རྟེན་ན།།

བདེ་གཤེགས་སློབ་མར་གྱུར་པ་གང་སུ་དག།

དེང་འདིར་དམ་པའི་ཆོས་ཀྱི་ཆར་འབེབས་ཀྱི།།

གསན་པར་འདོད་པ་ཐམས་ཅད་འདིར་གཤེགས་ཤིག།

ནམ་མཁའི་མཐས་གཏུགས་འཇིག་རྟེན་ཐམས་ཅད་ན།།

ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན།།

གྲུལ་བུམ་མིའམ་ཅི་དང་ལྟོ་འཕྱེ་སོགས།།

རྫུ་འཕྲུལ་ཡིད་ལྡན་ཐམས་ཅད་འདིར་ཤོག་ཅིག།

ལྷ་ཡི་སྐད་དང་ཀླུ་དང་གནོད་སྦྱིན་སྐད།།

གྲུལ་བུམ་དག་དང་མི་ཡི་སྐད་རྣམས་དང་།།

འགྲོ་བ་ཀུན་གྱི་སྒྲ་རྣམས་ཇི་ཙམ་པར།།

ཐམས་ཅད་སྐད་དུ་ཆོས་འདི་འགྱུར་བར་ཤོག།

མཚམས་སྦྱོར་ཞལ་གདམས།

༈ ནམ་མཁས་གར་ཁྱབ་སེམས་ཅན་གྱིས་ཁྱབ། སེམས་ཅན་གྱིས་གར་ཁྱབ་ལ་ལས་སྣང་སྡུག་བསྔལ་གྱིས་ཁྱབ། ནམ་མཁའ་ལ་མཐའ་མེད་པ་བཞིན་དུ་སེམས་ཅན་ལ་མཐའ་མེད་ཅིང་། དེའི་ལས་སྣང་སྡུག་བསྔལ་སྣ་ཚོགས་དེ་བས་ཀྱང་མཐའ་མེད་པ་ཡིན་ན། དེ་ལྟ་བུའི་མཁའ་མཉམ་གྱི་སེམས་ཅན་ཐམས་ཅད་རང་ཅི་འདྲ་རོགས་དེ་འདྲའི་དཔེ་ལྟར། བདེ་བ་འདོད་ཅིང་སྡུག་བསྔལ་མི་འདོད་པ་གཅིག་མཚུངས་ཡིན་ཡང་། རང་བཞིན་རྨོངས་པའི་སེམས་ཅན་ལོང་བ་ལམ་ལོག་ལ་འཁྱམས་པ་ལྟ་བུ་ཐམས་ཅད་ཀྱིས་བདེ་འདོད་བདེ་བའི་རྒྱུ་སྒྲུབ་མི་ཤེས། དེ་ལས་ལྡོག་སྟེ་མེ་ཆེ་ཐོག་ལ་ཤིང་བསྣན་པ་ལྟ་བུའི་སྡུག་བསྔལ་གྱི་རྒྱུ་མི་དགེ་བ་ཁོ་ནར་སྤྱོད་ནས། སྡུག་བསྔལ་མི་འདོད་ཀྱང་དེའི་རྒྱུ་སྤང་དགོས་རྒྱུའི་མི་དགེ་བ་སྤོང་མི་ཤེས། བློ་ངན་གོམས་ཀྱི་བག་ཆགས་ཆུ་རྒྱུན་ཐུར་ལ་བརྒྱུག་པ་ལྟ་བུའི་ངན་གཤིས་ཀྱི་རྗེས་ལ་འབད་པ་བྱེད་མི་དགོས་པར་སྙེག་གིན་ཡོད་ན། དེ་འདྲའི་ཕ་མར་གྱུར་པའི་སེམས་ཅན་ལས་ཉོན་སྡུག་བསྔལ་གྱི་གཞན་དབང་ཅན་ལམ་ལོག་མགོ་རྨོངས་དུ་གྱུར་པ་འདི་དག་ཐམས་ཅད་སྙིང་རེ་རྗེ། སྙིང་རྗེ་བ་དེ་ཁ་ཟེར་དང་རྗེས་ཟློས་ཀྱི་ལད་མོ་ཙམ་གྱིས་མི་ཡོང་བར། ཚེ་འདིའི་མ་དྲིན་མོ་ཆེ་དེ་ཉིད་སྔོན་འདི་ནས་སྐེ་བཅད་སྙིང་བླངས་གསོན་པོའི་ཁོག་ཁྲག་ལག་པས་བཅུས་སོང་བ་ཡིན་ན་ཤ་ཚ་རྒྱུ་ཨེ་རེད། སྙིང་རེ་རྗེ་རྒྱུ་ཨེ་རེད། དེ་ལྟར་བསམ་བློ་བཏང་ན། དེ་བཞིན་སེམས་ཅན་ཐམས་ཅད་རང་རེ་ཀུན་གྱི་མར་བྱས་པ་འབའ་ཞིག་ཡིན་ནི་རེད། མར་བྱས་པ་ཡང་ལན་རེ་ཙམ་གྱིས་མི་ཚད་པར། ལན་གྲངས་ཀྱི་ཐད་ནས་བསམ་བློ་བཏང་ན་ས་ཆེན་པོའི་རྡུལ་གྲངས་ལས་མང་བ་དེ་རྒྱལ་བ་བདེན་པར་སྨྲ་བའི་ལུང་ལས་ཚད་མར་གྲུབ་ཡོད་ནི་རེད། དེ་ལྟར་བཤད་ན་གནའ་མི་ཚོས་དེ་འདྲ་ཟེར་དར་མོད། རྒྱལ་བ་བདེན་པར་སྨྲ་བ་ཡིན་པ་ལུང་ཚད་མ་གཞན་ཟེར་རྗེས་བརྗོད་མ་ཡིན་པར་ཅི་ལྟར་ཤེས་ཟེར་ན། ཁྱད་པར་འཕགས་བསྟོད་ཀྱི་ནང་ནས་གསུངས་པ་ལྟར། སངས་རྒྱས་བདག་གི་གཉེན་ཡིན་ནི་མ་རེད། མི་སྟེགས་གཞན་དག་བདག་གི་དགྲ་མ་རེད་མོད། སྟོང་རྟེན་འབྱུང་ལན་བརྒྱར་བརྟགས་ཀྱང་བསླུ་བ་མི་སྲིད་པའི་བདེན་པ་གཉིས་ཀྱི་རྣམ་བཞག་གིས། འཁོར་འདས་ཤེས་བྱའི་ཆོས་ཐམས་ཅད་གཏན་ལ་ཕབ་པའི་གཙོ་བོའི་དོན་ལ་མི་བསླུ་བའི་རིག་པ་དེས་རྒྱལ་བ་བདེན་པར་སྨྲ་བ་ཡིན་པར་གྲུབ་པ་རེད། དེའི་མི་ཚད་པར་ཞིབ་མོའི་བློས་བརྟག་ཅིང་དཔྱད། རང་རེ་ང་ཞེས་གདག་སའི་གདག་གཞི་ཕུང་པོ་ལྔས་བསྡུས་པའི་སེམས་དང་། ལུས་འདི་ཡི་རིགས་རྒྱུན་དང་རྫས་རྒྱུན་གྱིས་དེད་ནས་བརྟག་ཅིང་ཞིབ་པར་དཔྱད་སོང་ན་ཡང་སྐྱེས་བུའི་ཡར་མཐའ་ཐུག་མེད། མངལ་ནས་སྐྱེས་པའི་གྲངས་ཚད་ཀྱི་ཕ་མ་རྫོགས་མེད་ཅིག་ཡོད་པ་དེ་རིག་པས་ཀྱང་གྲུབ་པ་དེ་ལྟར་ཡིན། ད་ལྟའི་མ་དང་ཁྱད་མེད་པར་ཁམས་གསུམ་རིགས་དྲུག་གི་གནས་ན་དབང་མེད་ཀྱིས་འཁོར་ཞིང་ཉམས་ཐག་སྡུག་བསྔལ་མྱོང་བའི་སེམས་ཅན་འདི་དག་ལ། རྒྱལ་སྲས་ཞི་བ་ལྷས་གསུངས་པ་ལྟར། བདག་སྙིང་རྡོ་འམ་ལྕགས་ཀྱི་གོང་བུ་འདྲ་འདྲ་ཞིག་མིན་ན་དེ་སྙིང་མི་རྗེ་རང་དབང་གང་ན་ཡོད་བསམ་རྒྱུ་ཡིན། སྙིང་རྗེ་བ་གཅིག་པུའི་མི་འོངས་པས། དེས་ན་ཅི་དགོས་པ་རེད་ཅེ་ན། དེ་བས་ཤེས་རབ་ཟབ་མོས་ཐབས་ལམ་རྣམ་པར་དག་པ་ཐར་བ་ཡང་དག་གི་ལམ་ཞིག་བཙལ་དགོས། དེ་བཙལ་རྒྱུ་ལ་ཁ་ཙམ་ཞིག་མ་ཡིན་པར་ལག་ངོ་མས་རྒྱུད་ཐོག་ལ་ཁེལ་ཐུབ་པའི་དམ་ཆོས་གཤའ་མ་ཞིག་བསྒྲུབ་ཏེ། ལུས་རྟེན་འདིའི་སྟེང་ནས་མ་རྒན་སེམས་ཅན་དེ་དག་ལ་ཕན་ཐོག་ནུས་པ་ཅན་ཞིག་བྱ་དགོས། སྟོབས་བཅུའི་སྟོབས་ཡོད་པ། དབང་བཅུའི་དབང་མངའ་བ། དེ་ཡང་སྲིད་དང་ཞི་བ་གཉིས་ཀའི་མཐར་མ་ལྷུང་པར་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་བསྒྲུབ་རྒྱུ་དེ་སྤྱིར་ལམ་མཆོག་མ་ནོར་བ་ཡིན། དགོས་ཁྱད་པར་ཅན་ད་རེས་དལ་རྟེན་འབྱོར་བས་བརྒྱན་པའི་ལུས་རྟེན་འདི་ཐོབ། ཆོས་སྒྲུབ་པའི་མཐུན་རྐྱེན་ཚོགས་ཡོད་པའི་དུས་འདིར། བྱ་བ་བརྒྱ་སྟོང་གི་ནང་ནས་དོན་ཆེན་རང་གཞན་འདི་ཕྱི་གཉིས་ཀ་ལ་ཕན་པ་དེར་མ་འབད་པར། ད་རུང་ཁ་གདངས་ནས་ཧང་སང་སྟེ་ལུག་འགྲོ་འགྲོ་ལྟར་གཅིག་རྗེས་གཅིག་གི་དེད་ནས་འཁོར་གི་བསྡད་ན། ཚེ་འདིའི་ཟ་ཉལ་ཙམ་ཞིག་དུད་འགྲོས་ཀྱང་སྒྲུབ་བཞིན་ཡོད་པས། དེའི་ཡན་ཞིག་མ་འགྲུབ་ན་མྱི་མ་རེད་དུད་འགྲོ་ཞིག་རེད། དུད་འགྲོ་ནགས་ཀྱི་མྱི་རྒོད་ལས་ཁྱད་འབྱེད་ཀྱི་དབྱེ་ཆོས་གཞན་ཞིག་མ་ཡོད་པས། དེ་འདྲ་ཡིན་ན་འདིར་ཡོད་ལས་དང་པོ་པ་ཚོས་འདང་འདི་ལྟར་རྒྱོབས་དང་། ཐེག་ཆེན་མདོ་སྔགས་ཀྱི་དམ་ཆོས་ཞུ་སྐབས། ཐེག་ཆེན་ལམ་གྱི་གཞུང་ཤིང་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་། སྙིང་རྗེས་སེམས་ཅན་ལ་དམིགས་པ་དང་ཤེས་རབ་གྱིས་རྫོགས་བྱང་ལ་དམིགས་པ་སྟེ་ཟུར་གཉིས་པོའམ་དོན་གཉིས་པོ་ཚང་པའི་སེམས་བསྐྱེད་དང་ལྡན་དགོས། དེའི་སྟེང་དུ་གསང་བ་སྔགས་ཀྱི་ཀུན་སློང་འཁོར་འདས་མཉམ་པ་ཆེན་པོ་སྣང་སྲིད་གཞིར་བཞུགས་ཡེ་ནས་ཡིན་པ་ལ། དེ་ལྟར་ཡིན་པར་ཤེས་པའི་གཞིར་བཞེངས་དག་པ་རབ་འབྱམས་ཀྱི་དཀྱིལ་འཁོར། གནས་དུས་སྟོན་འཁོར་ཆོས་བཅས་ཕུན་སུམ་ཚོགས་པ་ལྔ་གསལ་བཞིན། མདོ་རྒྱུད་བསྟན་བཅོས་དག་ལས་ཇི་ལྟར་འབྱུང་བ་བཞིན་དུ་ཀུན་སྤྱོད་རྣམ་པར་དག་པ་དང་བཅས་པས་ཆོས་གསན་དགོས། གང་ཞིག་གསན་པར་བྱ་བའི་ཆོས་ཀྱི་རིམ་པ་ལ་བསམ་བློ་བཏང་ན། ད་རེས་ཐེངས་འདིའི་ཆོས་ཁྲིད་ཀྱི་གཙོ་བོ་ཞབས་དཀར་ཚང་གི་གསུང་ཁྲེགས་ཐོད་གཉིས་པོ་འདི་ཡིན། འདི་རྫོགས་ཆེན་དངོས་གཞིའི་ཁྲིད་ཀྱི་འགྲོས་ལྟར་དུ་ལོ་འདིའི་རྫོགས་ཆེན་དངོས་གཞིའི་ཁྲིད་ཆེན་གྱི་ཚབ་ཏུ་བཤད་ཀྱིན་ཡོད་པས། དེའི་སྔོན་དུ་འགྲོ་བའི་ཆོས་ལ་སྔགས་བླ་མེད་ཐུན་མོང་གི་བསྐྱེད་རྫོགས་ཀྱི་རིམ་པ་དེ་འབྱུང་བ་རེད། རྩ་རླུང་འདི་སྔོན་འགྲོའི་ལམ་གྱི་ཆ་ལག་ཙམ་དང་དེའི་ས་ཁུངས་ཙམ་འཛིན་བྱེད་མ་གཏོགས་གཙོ་བོའི་ཉམས་ལེན་གྱི་གནད་ལ་འཛིན་གྱིན་ཡོད་པ་མ་རེད། སྔགས་གསར་རྙིང་ཐུན་མོང་གི་རིམ་ལྔ་སྦྱོར་དྲུག་ཆོས་དྲུག་ལ་སོགས་པའི་རྫོགས་རིམ་གྱི་དབྱེ་བ་མང་པོ་ཞིག་ཡོད་ཀྱང་། རང་ལུགས་ལ་གཙོ་བོ་སྒྱུ་ལུས་དང་། འོད་གསལ། གཏུམ་མོ་གསུམ་དུ་གཙིགས་སུ་བཟུང་པ་ཡིན་ན། དེ་ཡང་ཐུན་མིན་དབང་བཞིའི་སྒྲོམ་ལས་མི་འདའ་བར་བུམ་དབང་གིས་ལུས་ལྷ་སྐུར་སྨིན། གསང་ཤེར་གཉིས་ཀྱིས་སྲོག་རྩོལ་རླུང་གི་སྦྱོར་བ་དང་མཐུན་པའི་གཏུམ་མོའི་འབར་འཛག་ལ་བརྟེན་ནས། སྟོང་བཞིས་དྲངས་བའི་དགའ་བཞིའི་ཡེ་ཤེས་བསྐྱེད་གིན་ཡོད་ལ། ཁྱད་པར་དུ་དབང་གསུམ་པའི་སྐབས་ཀྱི་མཚོན་བྱེད་དཔེའི་ཡེ་ཤེས་དེས་གང་མཚོན་པ་འོད་གསལ་མཆོག་ཏུ་མི་འགྱུར་བ་ལྷན་སྐྱེས་ཀྱི་བདེ་བ་ཆེན་པོ། མཚོན་བྱ་དོན་གྱི་ཡེ་ཤེས་དབང་བཞི་བའི་མཐར་ཐུག་ལ་མངོན་དུ་འགྱུར་བྱ་གང་ཡིན་པ་དེ་ཉིད་ཉམས་ལེན་གྱི་གཙོ་བོ་བྱེད་ཀྱིན་ཡོད་པ་རེད། དེ་ཡིན་པ་ནི་རྒྱུ་འབྲས་བྱེད་པ་མཐུན་པའི་ལམ་ནས་གཞི་འབྲས་དབྱེར་མེད་པའི་གནས་ལུགས་དག་ཐོབ་བྲལ་པའི་སེམས་སངས་རྒྱས་ལ་མངོན་དུ་བྱ་དགོས་པ་རེད། དེ་ལྟར་དཔེ་དང་དོན་གྱི་ཡེ་ཤེས་གཉིས་ཀ་དཔེ་བཞག་ན་ཆུ་ཟླས་ཟླ་གཟུགས་མཚོན་པའི་དཔེ་དོན། ཆོས་ཅན་དང་ཆོས་ཉིད་ཀྱི་འབྲེལ་བ་ཡང་གྲུབ་པ་ཞིག་ཡིན། རྫོགས་ཆེན་ཆོས་ཉིད་ལམ་བྱེད་ཀྱི་སྐབས་ལ་རྟ་ཞོན་ནས་བོང་བུར་མི་རེ་བ་ལྟ་བུ་ཡིན། ཡིན་ན་ཡང་དབང་བཞི་བའི་ཡེ་ཤེས་གནས་ལུགས་དོན་གྱི་རང་ཞལ་དེ་ཉིད་མངོན་དུ་བྱེད་པའི་འགྲོ་ལམ་ལ་བསམ་བློ་བཏང་ན། ཐབས་ལམ་དང་གྲོལ་ལམ་སྟེ་ཐབས་གྲོལ་ཀྱི་ལམ་གཉིས་ཡོད་པའི་ནང་གི་ཐབས་ལམ་པ་གཙོ་བོ་བྱས་པའི་ཉམས་ལེན་གྱི་དགོས་མཁོར་དམིགས་ནས། ཀློང་སྙིང་རང་གཞུང་གི་དགོངས་པའི་གསང་མཛོད་ལས་བྱུང་བ་འདི་ཚོ་ལ་རྫོགས་རིམ་གཞན་ལས་འཕགས་པའི་ཐུན་མིན་གྱི་ཁྱད་ཆོས་ཡོད་པས། གཏེར་ཁ་གཞན་དང་ཡིག་ཆ་གཞན་གྱི་བསྲེ་ལྷད་མ་འདྲེས་པའི་སྟེང་ནས་ཁྲིད་འཆར་རེད། སྤྱིར་བཤད་ན་རྫོགས་རིམ་ཞེས་པ་ཚང་མ་གཅིག་ཡིན་ནི་མ་རེད། རྫོགས་རིམ་ལ་ཁྱད་པར་དང་དབྱེ་བ་ཕྱེས་ཡོང་ན་ལྔར་དབྱེ་རྒྱུ་ཡོད། གང་ཡིན་ན། ལྷའི་རྫོགས་རིམ། བྱང་ཆུབ་སེམས་ཀྱི་རྫོགས་རིམ། རྩའི་རྫོགས་རིམ། རླུང་གི་རྫོགས་རིམ། ཐིག་ལེའི་རྫོགས་རིམ་དང་ལྔ་རེད། བསྐྱེད་རིམ་ལ་བརྟེན་པ་ལྷའི་རྫོགས་རིམ། བསྐྱེད་རྫོགས་དབྱེར་མེད་དུ་ཤེས་པའི་རྣལ་འབྱོར་པ་ཞིག་གིས་བསྐྱེད་རིམ་གསལ་ཡང་རྫོགས་རིམ་གྱི་གནད་ཚང་མ་དེར་འདུས་ཡོད་པ་ཡིན། དེ་ནི་བསྐྱེད་རྫོགས་དབྱེར་མེད་དུ་ཤེས་པས་རེད། སེམས་ཉིད་ལ་བརྟེན་པ་བྱང་ཆུབ་སེམས་ཀྱི་རྫོགས་རིམ་ཟེར་བ་དེ། འོད་གསལ་རིག་པའི་ཡེ་ཤེས་ལ་གནད་དུ་བསྣུན་པས་དོན་གྱི་ཡེ་ཤེས་དེ་ཉིད་ལམ་དུ་ཤེས་སོང་དུས། དཔེའི་ཡེ་ཤེས་ལ་གོང་ནས་བཤད་པ་ལྟར་དུ་ཆེད་ཐང་དུ་འཛིན་མི་དགོས། རྫོགས་པ་ཆེན་པོ་འདི་རྫོགས་རིམ་ཐམས་ཅད་ཀྱི་རྒྱལ་པོ་ཡིན། རྫོགས་རིམ་གྱི་རྒྱལ་པོ་ཅི་ལྟར་ཡིན་པ་རེད་ཅེ་ན། གང་དུ་རྫོགས་པའི་གཞི་ཡིན། གཞན་ཐམས་ཅད་དེར་རྫོགས་བྱེད་ཀྱི་ཐབས་རེད། ཐབས་དང་ཐབས་བྱུང་གི་ཁྱད་པར་ཡོད་པས་ན། ཨ་ཏི་ཡོ་ག་འབྲས་བུའི་ཐེག་པ་ལས་གསང་ཆེན་མན་ངག་སྡེ་འདི་འབྲས་བུའི་ཐུས་ཀ་ཡིན་པ་ཚིག་གིས་བཞག་པ་ཙམ་མ་ཡིན་པར་དོན་གྱིས་གྲུབ་ཅིང་བསྔགས་པ་ཡིན་པ་ནི། རྒྱལ་པོས་རྒྱལ་སྲིད་ཟིན་སོང་ན་འབངས་འཁོར་མངའ་འོག་ལ་ངང་གིས་འདུས་པ་ལྟ་བུ་ཡིན་ནོ། །དེའི་ཕྱིར་རྫོགས་པ་ཆེན་པོའི་སྐབས་ཀྱི་མི་གཡོ་རྣམ་པ་གསུམ་དང་། གཟིགས་སྟངས་གསུམ་དང་བཞུགས་སྟངས་རྣམ་གསུམ་སོགས་ལ་ཡང་ལུས་ལ་བརྟེན་པ་རྩའི་རྫོགས་རིམ་འདུས་རྒྱུ་དང་། རྩ་རླུང་སྒོམ་པ་ཕལ་བའི་སྐབས་དང་མི་འདྲ་བར། མན་ངག་སྡེའི་སྐབས་ལ་རླུང་དབུ་མར་མི་སྡུད་པར་རང་བཞག་གི་གནད་ཁྱད་པར་ཅན་ཞིག་བསྐྱངས་ཤེས་ནས་དེར་གོམས་ན། ལས་རླུང་ཐམས་ཅད་རང་སར་དྭངས་ནས་ཡེ་ཤེས་ཀྱི་རླུང་དང་རིག་པ་དེ་ཉིད་ཇེ་ཆེ་དང་ཇེ་འཕེལ་ལ་སོང་ན། མཐར་ཐུག་ལས་རླུང་དེ་ཡེ་ཤེས་ཀྱི་ཁམས་སུ་གནས་འགྱུར་བ་ཡིན། རྩ་གནས་བྱེ་བྲག་ཏུ་དམིགས་མེད་རྩོལ་བཅས་ལ་མི་ལྟོས་པ་རེད། དེས་སྟབས་ཀྱིས་དབུགས་ལ་བརྟེན་པ་རླུང་གི་རྫོགས་རིམ་ཡང་སྦུད་པ་དགང་སྟོང་གི་རྩོལ་བ་རྩུབ་མོ་ཅན་གྱི་རླུང་ལ་བརྟེན་ནི་མ་རེད། བཅུད་ལ་བརྟེན་པ་ཐིག་ལེའི་རྫོགས་རིམ་རེད། དེ་ཡང་ཀུན་རྫོབ་རྒྱུའི་ཐིག་ལེ་དེ་ཐབས་ཀྱི་རང་བཞིན་ཟག་བཅས་ཀྱི་བདེ་བའི་བདག་ཉིད་ཅན་དང་། དོན་དམ་ཡེ་ཤེས་ཀྱི་ཐིག་ལེ་དེ་ཤེས་རབ་ཀྱི་རང་བཞིན་ཟག་མེད་ཀྱི་བདེ་བའི་བདག་ཉིད་ཅན་ཞིག་ཡིན། ཀུན་རྫོབ་རྒྱུའི་ཐིག་ལེ་དེར་བརྟེན་ནས་ཐུན་མོང་གི་དངོས་གྲུབ་ཕྲན་ཚགས་རེ་དང་སེམས་གནས་ཀྱི་ཏིང་འཛིན་ཙམ་རེ་ལམ་དུ་བྱེད་ཐུབ་པ་རེད། རེད་དེ་དོན་དམ་འོད་གསལ་ཀྱི་ཐིག་ལེ་ལྟ་བུའི་མཆོག་གི་དངོས་གྲུབ་སངས་རྒྱས་ཆོས་སྐུ་འགྲུབ་རྒྱུ་དང་ནི། ཡེ་ཤེས་རང་བབས་ཀྱི་བསམ་གཏན་མངོན་དུ་བྱེད་པ་དང་བསྡུར་ཡོང་ན། དེར་ཆ་ཙམ་ཞིག་ཡང་ཉེ་གི་ཡོད་ནི་མ་རེད། དེས་སྟབས་ཀྱིས་རྫོགས་ཆེན་དོན་གྱི་མན་ངག་གི་ལུགས་འདི་ལ། ཀུན་རྫོབ་ཀྱི་ཐིག་ལེ་ལ་ལམ་གྱི་ངོ་བོ་མིན་པའི་དབང་གིས་དོན་དམ་གྱི་ཐིག་ལེ་ལ་བརྟེན་ནས་འོད་གསལ་གྱི་རིམ་པ་གཙོ་བོ་མཛད་པ་རེད། འོ་ན་སྐབས་འདིའི་འཆད་བྱའི་ཀློང་ཆེན་སྙིང་ཐིག་གི་ཆོས་སྡེ་ལས་འདིའི་སྐོར་ཅིའི་ཕྱིར་འབྱུང་བ་རེད་ཟེར་ན། ཀུན་རྫོབ་ཀྱི་ཐིག་ལེ་ལ་ཧ་ཅང་ཞེན་པའི་སྐལ་དམན་རྗེས་སུ་འཛིན་པའི་ཐབས་ཀྱི་འཇུག་སྒོ་མ་མ་འགགས་པའི་བྱེ་བྲག་ཞིག་ལ་བཞག་ནས། ཕྱིས་སུ་དོན་དམ་གྱི་ཐིག་ལེ་དེ་ཉིད་ལ་སྦྱོར་བའི་ཐབས་ཡིན་པས་རང་རེའི་ཁྲིད་རྒྱུན་གྱི་ཕྱག་བཞེས་ལ། ལམ་དངོས་མ་ཡིན་པས་ཉམས་ལེན་གྱི་ཐབས་འགའ་རེ་རབ་བྱུང་བཙུན་པའི་སྡེ་ཡིས་རྒྱུན་དུ་ཕལ་ཆེར་བཏང་སྙོམས་སུ་བཞག་གི་ཡོད་པ་རེད། འདིའི་སྐོར་ཞིབ་ཏུ་མཁྱེན་པར་དགོངས་ན་ཚིག་དོན་མཛོད་ཀྱི་རྡོ་རྗེའི་གནས་ལྔ་བར་གཟིགས་དང་གསལ། འོ་ན་འདི་ཅིའི་ཕྱིར་བཤད་པ་ཡིན་ཟེར་ན། གཅིག་ན་ཁྲིད་བཤད་དུས་རགས་བཤད་སྤོམ་ཡུགས་སུ་མ་སོང་བར། ལམ་གྱི་རིམ་པ་ཆ་ཚང་ཞིང་དེ་ཡང་འོག་མ་འོག་མའི་དངོས་གཞི་དེ་གོང་མ་གོང་མའི་སྔོན་འགྲོར་འགྲོ་བའི་ཤེས་བྱེད་དང་། རྣམ་པ་གཅིག་ཏུ་ན་གདུལ་བྱ་ཆགས་ཅན་ལ་དགོངས་པའི་ཐབས་ལམ་ཡང་གྲོལ་ལམ་གྱི་གོང་དེ་ན་འཛིན་འོས་པ་དང་། ཁྱད་པར་དུ་གནས་འདི་སྔགས་རིག་པ་འཛིན་པ་གོས་དཀར་ལྕང་ལོ་ཅན་གྱི་སྡེ་ཚོགས་འདུས་པའི་ལྟེ་བའི་ས་གནད་ཅིག་ཡིན་པར་དམིགས་ནས། ཆེད་གཏད་ཀྱིས་ད་ལོ་འདི་ནས་རྩ་རླུང་གི་འཁྲུལ་འཁོར་སྦྱང་རྒྱུའི་དུས་ཚོད་ཀྱང་གང་ལ་གང་འཚམས་ཞིག་བཀོད་སྒྲིག་བྱས་ཡོད་པ་ཡིན། རྩ་རླུང་ཐིག་ལེ་གསུམ་པོ་དེ་གཅིག་ལ་གཅིག་བརྟེན་ཡིན། སྔོན་ལ་རླུང་དང་གཏུམ་མོར་སྦྱངས་ཤིང་འབྱོང་དགོས་རྒྱུའི་རིམ་པ་ཡིན་པ་རེད། ཡིན་ནའང་རླུང་དང་གཏུམ་མོའི་རིམ་པ་ཡང་གཞུང་ལས་འབྱུང་བ་ལྟར་དུ་ཞིབ་པར་འདིའི་རྒྱབ་ཡིག་གང་དག་ལ་བལྟ་དགོས་པ་རེད་ཟེར་ན། རྣམ་མཁྱེན་ཤིང་རྟ་དང་ངལ་གསོ་སྐོར་གསུམ། ཡིད་བཞིན་མཛོད་ཀྱི་སྨད་ཆའི་ཕྱོགས། དོན་ཁྲིད་ཟབ་དོན་རྡོ་རྗེའི་སྙིང་པོ་སོགས་ལ་གཏུགས་དགོས་རྒྱུ་དེ་འདྲ་རེད། བདེ་སྟོང་རླུང་གི་རྫོགས་རིམ་སྙན་བརྒྱུད་ཤོག་དྲིལ་ཡིད་བཞིན་ནོར་བུ་དང་སྦས་དོན་ཐབས་ལམ་མ་བསྒོམ་སངས་རྒྱས་གཉིས་ཀ་མཚམས་རེར་རེས་མོས་བྱས་ནས་འདོན་གྱིན་ཡོད་པ་རེད། འདིའི་འཕྲུལ་འཁོར་ལག་ཁྲིད་ཀྱི་ཐད་ནས་གཞུང་མན་ངག་ལ་གཏུགས་ནས། ད་དུང་བརྒྱུད་པའི་ཕྱག་བཞེས་མ་ནོར་བར་བརྟག་བཅོས་རིམ་པ་བཞིན་དུ་དགོས་པ་ཡང་ཡོད་སྲིད་རྒྱུ་རེད། ཐོག་མར་གཏུམ་མོའི་གསོལ་འདེབས་འདིར་གཟིགས།

༼ཨོཾ༽ ཆོས་ཚན་དང་པོ་གཏུམ་མོའི་གསོལ་འདེབས་རྡོ་རྗེའི་ཚིག་རྐང་།

༄༅། །ཀློང་ཆེན་སྙིང་གི་ཐིག་ལེ་ལས་གཏུམ་མོའི་གསོལ་འདེབས་རྡོ་རྗེའི་ཚིག་རྐང་བཞུགས།

ཨེ་མ་ཧོ། དག་པ་རབ་འབྱམས་དབུ་མའི་གྲོང་ཁྱེར་ན། །སེམས་ཀྱི་རྡོ་རྗེ་ཆོས་སྐུའི་ངོ་བོ་ཉིད། །ཕུང་པོ་ཁམས་དང་སྐྱེ་མཆེད་གདན་གསུམ་ལྷའི། །རྣམ་རོལ་རྩ་བརྒྱུད་བླ་མར་གསོལ་བ་འདེབས། །སོགས་ཀྱིས་བསྟན། ཨེ་མ་ཧོ་ཞེས་ངོ་མཚར་བའི་ཚིག་གིས་སྣ་དྲངས་ཏེ་གང་ལ་ངོ་མཚར་ན། གསང་ཆེན་སྔགས་ཀྱི་ཐེག་པའི་ཁྱད་ཆོས་ཁྱད་པར་ཅན་གྱི་ལམ་ལ་ངོ་མཚར་བའི་ཚིག་དང་བཅས་ཏེ། དག་པ་རབ་འབྱམས་དབུ་མའི་གྲོང་ཁྱེར་ན་ཞེས་གསུངས་རྒྱུ་དེ། རྟེན་རང་ལུས་རྡོ་རྗེ་ཕུང་པོའི་གྲོང་ཁྱེར། དེ་ལས་རྩ་དབུ་མ་ཡེ་ཤེས་ཀྱི་གཞལ་ཡས་ཁང་ན། སེམས་ཀྱི་རྡོ་རྗེ་ཆོས་སྐུའི་ངོ་བོ་ཉིད། ཆོས་ཅན་སེམས་ཀྱི་ཆོས་ཉིད་དེ་མི་ཤིགས་མི་འགྱུར་གཞོམ་གཞིག་དང་བྲལ་བའི་རྡོ་རྗེའི་ཆོས་མཚུངས་སུ་སྦྱར་སའི་སྟོང་བ་ཆོས་སྐུའི་ངོ་བོ་དེ་ཉིད་ལས། གསལ་མདངས་རང་བཞིན་ལོངས་སྐུར་ཤར་བ་དེ་མ་འགགས་ཐུགས་རྗེ་སྤྲུལ་སྐུའི་རོལ་གར་དུ་སྣང་ནས་རྩ་རླུང་ཐིག་ལེའི་བདག་ཉིད། ཕུང་པོ་ཁམས་དང་སྐྱེ་མཆེད་གདན་གསུམ་ལྷའི་རྣམ་རོལ་ཞེས། ཕུང་པོ་ཁམས་དང་སྐྱེ་མཆེད་དེ་གདན་གསུམ་ཚང་བའི་ལྷ་ཡི་རྣམ་རོལ་ཏུ་ཤར་བའི་ངོ་བོ་རང་བཞིན་ཐུགས་རྗེ་དཀྱིལ་འཁོར་ལས་འདའ་བ་མེད་པའི་རྩ་བ་དང་བརྒྱུད་པར་བཅས་པའི་བླ་མ་རྣམས་ལ་གསོལ་བ་འདེབས། ཞེས་ཚིག་རྐང་དང་པོ་འདིས་གཞི་ལམ་འབྲས་གསུམ་གྱི་ནང་ནས་གཞི་བསྟན་པ་རེད། རླུང་སེམས་དབྱེར་མེད་ཞི་བདེའི་ཙནྜ་ལཱི། །འཁོར་ལོ་ལྔ་ཡི་དཔའ་བོ་མཁའ་འགྲོའི་གྲོང་། །ཚོགས་ཀྱི་འཁོར་ལོའི་འདུ་བས་མཉེས་བྱས་ནས། །དབང་དང་དགའ་བཞིའི་ཡེ་ཤེས་རོས་གང་ཤོག །ཞེས་གསུངས་རྒྱུ་འདིས་ལམ་བསྟན་པ་རེད། རླུང་སེམས་དབྱེར་མེད་ཞུ་བདེའི་ཙནྜ་ལཱི་ཞེས། སྲོག་དང་རྩོལ་བའི་རྣལ་འབྱོར་གྱིས་རླུང་སེམས་དབྱེར་མེད་ཡས་བབས་དང་མས་བརྟན་གྱི་སྦྱོར་བས་སྤྱི་བོའི་ཧཾ་ཡིག་རི་བོང་འཛིན་པ་དེ་ལྟེ་བའི་ཨ་ཐུང་སྒྲ་གཅན་གྱི་མེས་བཞུ་བའི་ཞུ་བདེའི་ཡེ་ཤེས་བདེ་སྟོང་གཉིས་མེད་ཀྱི་རོ་དེས། སྤྱི་མགྲིན་སྙིང་ལྟེ་གསང་བ་དང་བཅས་པའི་རྩ་གསུམ་འཁོར་ལོ་ལྔ་ཡི་དཔའ་བོ་མཁའ་འགྲོའི་གྲོང་ཞེས་གསུངས་ན། རྩ་གསུམ་འཁོར་ལོ་ལྔ་ཡན་ལག་དང་བཅས་པ་དཔའ་བོ་མཁའ་འགྲོའི་གནས་ཡུལ་ཉེར་བཞིའི་གྲོང་ཁྱེར་ན། ཚོགས་ཀྱི་འཁོར་ལོའི་འདུ་བས་མཉེས་བྱས་ཞེས། ཚོགས་ཀྱི་འཁོར་ལོའི་འདུ་བ་ཆེན་པོས་དེ་དག་མཉེས་པར་བྱས་ནས་དབང་དང་དགའ་བཞིའི་ཡེ་ཤེས་རོས་གང་ཤོག་གསུངས་པ་རེད། དེ་དང་ཆབས་གཅིག་ཏུ་བུམ་དབང་། གསང་དབང་། ཤེར་དབང་། ཚིག་དབང་དང་བཅས་པའི་དབང་བཞི་དང་། དགའ་བ་མཆོག་དགའ་ལ་སོགས་པའི་དགའ་བཞིའི་ཡེ་ཤེས་ཀྱི་རོས་གང་བར་ཤོག་ཅེས་ལམ་བསྟན། ཁྱད་པར་མཆོག་གི་གཏུམ་མོས་འཁོར་ལོ་བཞིའི། །རླུང་སེམས་ལས་རུང་དྷཱིུ་ཏིའི་རྩ་མདུད་རྣམས། །ཚོགས་དང་སྦྱོར་མཐོང་སྒོམ་པའི་ལམ་དུ་གྲོལ། །ས་བཅུའི་རྒྱུན་མཐར་གཙུག་ཏོར་རྩེན་སྨིན་ཤོག། ཅེས་གསུངས་པ་འདིས་འབྲས་བུ་བསྟན་པ་རེད། ཁྱད་པར་མཆོག་གི་གཏུམ་མོ་ཞེས་གསུངས་པ་དེ་གང་རེད་ཅེ་ན། མི་རྟོག་པའི་ཡེ་ཤེས་རྒྱུད་ལ་སྐྱེས་པ་དེ་ཉིད་རེད། དེ་ལ་བརྟེན་ནས་འཁོར་ལོ་བཞིའི་རླུང་སེམས་ལས་སུ་རུང་། ལས་རླུང་དབྱིངས་སུ་དག་སྟེ་ཡེ་རླུང་དབུ་མར་ཚུད་པ་ལ་བརྟེན་ནས་དྷཱིུ་ཏིའི་རྩ་མདུད་རྣམས་གྲོལ་བའི་རིམ་པ་དང་བསྟུན་ནས། ཚོགས་དང་སྦྱོར་མཐོང་སྒོམ་པའི་ལམ་དུ་གྲོལ་ཏེ་ས་བཅུའི་རྒྱུན་གྱི་མཐའ་མ་ན་གཙུག་ཏོར་རྩེར་སྨིན་ཤོག་ཅེས་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པར་ཤོག་ཅེས་གསུངས་པ་རེད། ཉོན་མོངས་རླུང་སེམས་འཁོར་བའི་རང་བཞིན་ནི། །རྣམ་གྲོལ་ཞི་བ་ཡེ་ཤེས་རླུང་མཆོག་གིས། །རང་དབང་གྱུར་ལས་རྩ་ཁམས་ཡི་གེའི་སྤྲིན། །འཁོར་ལོ་ཚོགས་ཆེན་ས་ལ་ལྷུན་རྫོགས་ཤོག །ཅེས་པ་འདིས་གཞི་འབྲས་དབྱེར་མེད་མཐར་ཐུག་གི་གྲོལ་ས་སྨོན་ལམ་དང་འབྲེལ་ནས་བསྟན་པ་རེད། དེ་ལྟར་ཉོན་མོངས་དང་རླུང་སེམས་ལས་འཁྲུལ་སྣང་འཁོར་བར་ཤར་བའི་སྣང་ཚུལ་གྱི་རང་བཞིན་ནི། གདོད་ནས་རྣམ་པར་གྲོལ་བ་གནས་ཚུལ་གདོད་ནས་དག་པ་ཞི་བ་ཡེ་ཤེས་ཀྱི་རླུང་མཆོག་དེ་ཉིད་དབང་དུ་བྱས་ཏེ་རང་དབང་དུ་གྱུར་བ་ལས་རྩ་ཁམས་ཐམས་ཅད་ཡི་གེའི་སྤྲིན་དུ་དག་ནས། འཁོར་ལོ་ཚོགས་ཆེན་ཞེས་གསུངས་ན་མ་ཆགས་པདྨ་ཅན་ནས་འཁོར་ལོ་ཚོགས་ཆེན་གྱི་ས་ལྷུན་གྱིས་རྫོགས་པར་ཤོག ཅེས་འདིས་གཞི་འབྲས་དབྱེར་མེད་མཐར་ཐུག་གི་གྲོལ་ས་བསྟན་པ་རེད། ས་མ་ཡ་ཞེས་དམ་ཚིག་གི་རྒྱ་རེད། རྫོགས་རིམ་ལམ་གྱི་མདོ་ཆིངས་ཀུན། །རྡོ་རྗེ་ཚིག་རྐང་འདིས་གྲོལ་བྱེད། །རྒྱ་རྒྱ་རྒྱ། རྡོ་རྗེ་ཚིག་རྐང་འདི་ཡིས་རྫོགས་རིམ་ལམ་གྱི་མདོ་ཆིངས་ཐོག་མ་འགྲོལ་ཐུབ་ཅེས་གསུངས་པ་རེད། རྫོགས་རིམ་གྱི་ལམ་ཐམས་ཅད་ཀྱི་རྩ་བ་ཡིག་ཆ་འདིའི་ཀྱང་ཆོག་གོ། ཟབ་རྒྱ། སྦས་རྒྱ། གསང་རྒྱ་ཞེས་རྒྱ་གསུམ་གྱིས་མནན་ནས་རྒྱ་རྒྱ་རྒྱ་ཞེས་གསུངས། དེ་ནས་ཆོས་ཚན་གཉིས་པ།

༼ཨཱཿ༽ ཆོས་ཚན་གཉིས་པ་སྙན་རྒྱུད་ཤོག་དྲིལ་ཡིད་བཞིན་ནོར་བུ།

༂ ཀློང་ཆེན་སྙིང་གི་ཐིག་ལེ་ལས་བདེ་སྟོང་རླུང་གི་རྫོགས་རིམ་སྙན་རྒྱུད་ཤོག་དྲིལ་ཡིད་བཞིན་ནོར་བུ་བཞུགས༔

རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་མཛོད་ལས་བདེ་སྟོང་གི་ཡེ་ཤེས་བསྐྱེད་པའི་རླུང་གི་རྫོགས་རིམ། སྙན་རྒྱུད་ཅེས་གསུངས་པ་དཔེ་རྒྱུད་མ་ཡིན་པའི་སྙན་རྒྱུད་ཤོག་དྲིལ་དུ་བཀོད་པ། འདིའི་བྱེད་ལས་དང་མཐུན་པའི་མཚན་ལ་ཡིད་བཞིན་ནོར་བུ་བཞུགས་ཞེས་སོ། །ཀུན་བཟང་གདོད་མའི་ཀློང་ལ་ཕྱག་འཚལ་ལོ༔ ཞེས་གསུངས་ཏེ། དེ་ཡིས་གཞི་འབྲས་དབྱེར་མེད་པའི་བདག་ཉིད་རང་རིག་དོན་གྱི་གནས་ལུགས། ཆོས་ཉིད་གདོད་མའི་ཀློང་། དེ་གང་ཡིན་ན་ཕྱོགས་བཅུ་དུས་གསུམ་རྒྱལ་བ་ཐམས་ཅད་ཀྱི་ཡབ་བམ་སངས་རྒྱས་ཐམས་ཅད་ལ་ལམ་སྟོན་པ་པོ། ཐོག་མའི་ཀུན་བཟང་འོད་མི་འགྱུར་བ་དང་པོའི་སངས་རྒྱས་གང་ཡིན་པ་དེ་ཉིད་ཀྱི་དགོངས་པ་མི་འགྱུར་བའི་ཀློང་ལ་ཕྱག་འཚལ་ནས། མ་འོངས་དུས་ཀྱི་སེམས་ཅན་རྣམས༔ ཚེ་དང་བསོད་ནམས་ལོངས་སྤྱོད་དབུལ༔ སྒྲུབ་པའི་ལོང་མེད་སྙིང་རུས་ཆུང༔ དེ་ཚེ་སྐུ་གསུམ་བཞུགས་སྟངས་ལ༔ བརྟེན་ནས་འོད་གསལ་རྫོགས་ཆེན་དོན༔ རྩོལ་མེད་ལྟ་བུའི་ལོང་མེད་ན༔ ཞེས་མ་འོངས་ཕྱི་མའི་དུས་སྙིགས་མའི་སྐབས་ཀྱི་སེམས་ཅན་གདུལ་བྱ་བསོད་ནམས་དང་སྐལ་བ་དམན་པའི་རིགས་ཅན་དམ་ཆོས་སྒྲུབ་པའི་ཁོམ་ལོང་མེད། ཡོད་ཀྱང་བདུད་ཀྱིས་བར་ཆད་མང་། དེས་མི་ཚད་བློ་ཆུང་བས་སྒྲུབ་ཚུགས་འཛིན་པའི་སྙིང་རུས་ཆུང་བའི་རིགས་ཅན་དེ་དག་གིས། སྐུ་གསུམ་ཞེས་པ་གང་ཡིན་ན་ཆོས་ལོངས་སྤྲུལ་གསུམ་གྱི་བཞུགས་སྟངས་དང་གཟིགས་སྟངས་ལ་བརྟེན་ནས་ཟབ་ལས་ཆེས་ཟབ་ཀྱི་ཆོས་གསང་ཆེན་མན་ངག་སྡེའི། འོད་གསལ་རྫོགས་ཆེན་གྱི་རྩོལ་མེད་འབྲས་བུ་ཐེག་པའི་བསྟན་དོན་མཐར་ཐུག་སྐུ་གསུམ་འབྲས་བུའི་ཐོབ་བྱར་མི་རེ་བར། སྐུ་གསུམ་ལམ་སྣང་དུ་བྱས་ནས་སྣང་བཞི་མཐར་ཕྱིན་ཆོས་ཟད་གདོད་མའི་སར་སྐྱེ་བའི་རྩོལ་མེད་ཐོད་རྒལ་གྱི་ལམ་ཀ་དག་དང་ལྷུན་གྲུབ་ཟུང་དུ་འཇུག་པ། ཀ་དག་སྟོང་བའི་འོད་གསལ་དང་ལྷུན་གྲུབ་སྣང་བའི་འོད་གསལ་ཟུང་འབྲེལ་གྱི་དགོངས་པ་ཉམས་སུ་ལེན་རྒྱུའི་སྐལ་བ་མཆོག་དང་མ་ལྡན་ན་ཞེས་གསུངས་པ་རེད། གནད་ལ་བརྟེན་པའི་ཐབས་ཀྱི་ལམ༔ རླུང་སེམས་དབྱེར་མེད་ངེས་པའི་གནད༔ བདུན་ཕྲག་གསུམ་གྱིས་འཁོར་བ་ལ༔ མི་ལྡོག་ལམ་རྟགས་ཡོན་ཏན་ཀུན༔ མངོན་གྱུར་སྙན་བརྒྱུད་ཟབ་མོའི་ཆོས༔ རྡོ་རྗེ་སེམས་དཔའི་གསང་ལམ་ཆེ༔ འདི་ལས་གཞན་དུ་ངས་མ་བཤདཿ བདེན་རྫུན་ལག་ཏུ་ལོང་ལ་ལྟོས༔ ཞེས་གནད་ལ་བརྟེན་པའི་ཐབས་ཀྱི་ལམ་ཞེས་གསུངས་ན། གནད་གང་ཡིན་ན་གནད་རྩ་རླུང་ཐིག་ལེ་ལ་བརྟེན་པའི་གསུངས་པ་རེད། ཐབས་ཀྱི་ལམ་ཟེར་བ་དེ། ཐབས་ལམ་དང་གྲོལ་ལམ་ཀྱི་ཟླ་ཕྱེ་བའི་ཐབས་ལམ་དམིགས་སུ་བཀར་བ་མ་ཡིན་པར། ཐབས་དང་ཐབས་བྱུང་གིས་ཟླས་ཕྱེ་བའི་ཐབས་ཀྱི་ལམ་འདི་བསྟན་པ་ཡིན་ཞེས་གསུངས་པ་རེད། འདི་མྱུར་ལམ་ཡིན་པར་བསྟན་པའི་བརྡ་ཆད་ལ་རླུང་སེམས་ལས་སུ་རུང་ནས་འཁོར་བ་ལ་ལྡོག་མི་དགོས་པའི་ལམ་རྟགས་ཀྱི་ཡོན་ཏན་བརྙེས་པར་བྱེད་པའི་སྙན་བརྒྱུད་ཀྱི་གདམ་པ་ཟབ་མོ་ཡིན་ལ། དེ་ཡིན་པའི་རྟགས་ལ་བདུན་ཕྲག་གསུམ་གྱི་འཁོར་བ་ལ་ཕྱིར་ལྡོག་མི་དགོས། གང་ཟག་དབང་རྣོན་གྱི་ཆོས་རྡོ་རྗེ་སེམས་དཔའི་གསང་ལམ་འདི་ལས་ཟབ་པ་ཁོང་གིས་མ་བཤད། ཨེ་བདེན་མི་བདེན་བདེན་རྫུན་ལག་ལ་ལོངས་དང་ཤེས་ནི་རེད་ཅེས་གསུངས། འདི་དབང་རྣོན་ལ་སྒྲ་ཇི་བཞིན་པ་དང་རིམ་གྱིས་པ་ལ་ཡང་དམིགས་པ་མཆོག་ལ་བརྟེན་པའི་རྣམ་པས་བག་ཆགས་ཁྱད་པར་ཅན་འདི་རྒྱུད་ལ་བཞག་པ་ལ་དགོངས་ཏེ་དེ་ལྟར་གསུངས་པ་རེད། དེ་ལྟར་འཆད་པར་དམ་བཅས་ནས། གཅིག་ལས་གཉིས་སུ་སྤེལ་བས་ན༔ དམ་ཚིག་ཉམས་པས་དམྱལ་བར་ལྟུང༔ ཁྱད་པར་ཁ་མཁས་ཁོང་གནག་ཅིང༔ གཡོ་སྒྱུས་བླ་མའི་ངོ་སྲུང་བའི༔ དྲེད་པོ་ཆོས་ཀྱི་རྒྱུས་ཅན་ལ༔ གདམས་པ་འདི་ནི་རླུང་ཕྱོགས་ཙམ༔ བསྟན་ཀྱང་སྲོག་གི་གཤེད་མར་བྱེད༔ དེ་ཕྱིར་སྙིང་ལས་གཅེས་པར་ཟུང༔ ས་མ་ཡ༔ འདི་སྙན་བརྒྱུད་ཀྱི་གདམས་པ་ཡིན། སྤྱིར་ན་གཅིག་ལས་གཉིས་སུ་མི་སྤེལ་བ་ཆིག་བརྒྱུད་ཀྱི་གདམས་པ་ཟབ་མོ་ཡིན། ཁྱད་པར་དུ་ཁ་མཁས་ཁོག་ནག་གཡོ་རྒྱུས་ཟོལ་སྦྱོར་ལ་མཁས་པའི་དྲེད་པོ་ཆོས་རྒྱུས་ཅན་ལ་ཡང་དགོས་འདི་བསྟན་མི་ཉན། གསང་བ་མི་སྲུང་བར་དམ་ཚིག་ཉམས་པའི་རིགས་ཅན་གང་ཟག་ཐ་ཤལ་བ་དེ་འདྲ་ལ་སྙན་རྒྱུད་ཟབ་མོའི་གདམས་པ་འདི་བསྟན་བཞག་ན། སྟོན་པ་པོ་རང་ཉིད་ཀྱི་སྲོག་གི་གཤེད་མར་འགྱུར་བ། རྒྱུ་མཚན་དེའི་ཕྱིར་ན་ཕྱི་རབས་པ་རྒྱུད་འཛིན་ལས་ཅན་ཐམས་ཅད་ཀྱིས་གདམས་པ་འདི་ཉིད་སྙིང་ནས་གཅེས་པར་ཟུངས་ཞེས་གསུངས་ནས། ས་མ་ཡ་དམ་ཚིག་གི་རྒྱས་ཚིག་མཇུག་མནན་པ་ཡིན། སྐལ་ལྡན་སྙིང་འདྲའི་བུ་ལ་གཏད་དགོས་པའི་གོ་དོན་འདི་ཤུགས་ལ་འབྱུང་བ་རེད། ཤིན་ཏུ་སྣོད་དང་ལྡན་པའི་དབང་རབ་སྐལ་ལྡན་ལས་ཅན་ནམ་རྫོགས་ཆེན་ཨ་ཏིའི་ཟབ་ཁྲིད་བྱེད་ཆོག་སའི་སློབ་མ་ལ། གདམས་ངག་རྒྱུན་མི་ཆད་པའི་དགོས་པ་ལ་མང་པོར་སྤེལ་ཞིང་ཆིག་བརྒྱུད་ཀྱི་བྱིན་རླབས་མི་ཉམས་པས་བརྒྱུད་པའི་བབས་སྲོལ་དེད་དགོས་པ་རེད། འདི་ལ་སྔོན་འགྲོ་དངོས་གཞི་རྗེས་དགོས་པ་བསྟན་པ་དང་གསུམ་གྱི་ཆིངས་ཀྱིས་བསྟན་པ་ལས།

དང་པོ་ཉམས་ལེན་གྱི་སྔོན་འགྲོ།

དང་པོ་ཉམས་ལེན་གྱི་སྔོན་འགྲོ་ནི། དང་པོ་མར་ལས་ཧར་ལངས་ཏེ༔ ལྟོ་སྟོང་རླུང་རིག་དྭངས་པའི་ཚེ༔ སྔོན་འགྲོ་སྤྱི་དང་ཁྱད་པར་དུ༔ བླ་མའི་རྣལ་འབྱོར་གནད་དུ་བསྣུན༔ མོས་གུས་གདུང་ཞིང་དབང་བཞི་བླང༔ རྫོགས་ཆེན་སྒོམ་པའི་རྣལ་འབྱོར་པ་ཞིག་གིས་དུས་བཞིའི་མཉམ་སྦྱོར་གྱི་གདམ་པ་ཉམས་སུ་ལེན་དགོས། དེ་ལ་ཉིན་མོ་སྣང་བ་རྒྱ་ཡིས་འདེབས་པ། སྲོད་ལ་དབང་པོ་གནད་དུ་བསྡུ་བ། ནམ་གུང་ཤེས་བྱ་བུམ་པར་འཇུག་པ། ཐོ་རེངས་ཡེ་ཤེས་གསལ་བར་བྱེད་པ་དང་བཞིའི་ནང་ནས། ཐོ་རེངས་ཀྱི་སྐབས་ལ་བབས་དུས་རིག་པ་རང་གསལ་ལ་བཞག་པའི་སྐབས་དང་བསྟུན་ནས། ལྟོ་སྟོང་རླུང་རིག་དྭངས་སུ་བཅུག་ནས་སྙིང་དབུས་ཀྱི་ཨ་དཀར་དེ་སྤྱི་བོའི་ནམ་མཁར་རྒྱང་ཀྱིས་ཐོན་པའམ། སྙིང་དབུས་པདྨ་འདབ་བརྒྱད་ཀྱི་དཀྱིལ་ན་རང་སེམས་ཆོས་ཉིད་ཀྱི་ངོ་བོ་དྲིན་ཅན་རྩ་བའི་བླ་མ་དང་གཉིས་སུ་མེད་པར། མདང་ནུབ་འོད་གསལ་སྦུབས་འཇུག་གི་སྙིང་དབུས་སུ་མར་བསྡུས་པ་དེ་སྤྱི་བོར་ཡར་བྱོན་ནས་དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐྱབས་གནས་གཅིག་ཆོག་གི་ངོ་བོར་བཞུགས་པ་ལ། མོས་གུས་བླ་མའི་རྣལ་འབྱོར་གནད་དུ་བསྣུན་ནས་ལམ་དབང་བླངས་ཐུགས་ཡིད་བསྲེས། དངོས་གཞི་རླུང་གི་རྫོགས་རིམ་སྒོམ་པ་རེད།

གཉིས་པ་དངོས་གཞི།

དངོས་གཞི་ལུས་གནད་དྲང་པོར་བསྲང༔ རང་ཉིད་རིག་འཛིན་རྡོ་རྗེ་ཆོས༔ སྔོ་སྐྱ་ཞལ་གཅིག་ཕྱག་གཉིས་པ༔ བརྐྱངས་བསྐུམས་འདོར་སྟབས་ཞི་མ་ཁྲོ༔ རྣལ་འབྱོར་དམར་མོ་གྲི་ཐོད་ཅན༔ དང་འཁྲིལ་རྡོར་དྲིལ་བསྣོལ་ཐབས་སྦྱོར༔ ཡབ་ཡུམ་གཉིས་སུ་མེད་པ་ཡི༔ ཞེས་པ་ལ་སོགས་པ་ནི། སྔར་བླ་མའི་རྣལ་འབྱོར་གྱི་སྐབས་ལ་རྡོ་རྗེ་རྣལ་འབྱོར་མར་གསལ་བ་དེ་ཉིད་གནས་འགྱུར་ཏེ་རང་ཉིད་རིག་འཛིན་རྡོ་རྗེས་ཆོས་ལ་སྒོམ། ཅི་འདྲ་ཞིག་སྒོམ་དགོས་ཞེ་ན་སྐུ་མདོག་སྔོ་སྐྱ་ཞལ་གཅིག་ཕྱག་གཉིས་པ་ཞབས་བརྐྱངས་བསྐུམས་དཔའ་བོའི་འདོར་སྟབས་ཅན། ཞལ་དང་སྐུའི་ཉམས་ཞི་མ་ཁྲོ། དེ་འདྲའི་རྣམ་པ་ཅན་ཞིག་བསྒོམས་ནས། ཡབ་རང་ཉིད་དང་རྣམ་པ་འདྲ་བའི་རྣལ་འབྱོར་དམར་མོ་ཕྱག་ན་གྲི་གུག་དང་ཐོད་པ་འཛིན་པ། དེ་དང་འཁྲིལ་སྦྱོར་གྱིས་ཡབ་ཀྱི་ཕྱག་གཉིས་ཀའི་རྡོར་དྲིལ་འཛིན་པ་བསྣོལ་སྟབས་ཀྱིས་སྦྱོར་ཞིང་འཁྱུད་པ། དེ་ལྟ་བུའི་ཡབ་ཡུམ་གཉིས་སུ་མེད་པ་ཡི་ཞེས་གསུངས་རྒྱུ་འདི་ཡན་ཆོད་ཀྱིས་ལུས་ཀྱི་དམིགས་གནད་བསྟན་པ་རེད། སྐུ་དབུས་དྲང་པོར་རྩ་དབུ་མ༔ མཚན་ཉིད་བཞི་ལྡན་ཆོས་ཀྱི་སྐུ༔ གཡས་གཡོན་རོ་རྐྱང་ལོངས་སྤྲུལ་གཉིས༔ ལྟེ་འོག་དབུ་མའི་མར་སྣ་ལ༔ རོལ་རྐྱང་རྣམ་གཉིས་ཆུད་པ་ཡི༔ ཡར་སྣ་ལྟག་པ་ནས་གུག་སྟེ༔ སྣ་བུག་གཉིས་སུ་ཧ་རེ་ཟུག༔ དབུ་མའི་ཡར་སྣ་ཁ་འཁྱིལ༔ ཞེས་དེ་མན་ཆོད་བརྡ་ཡིག་གིས་བསྟན། སྐུ་དབུས་དྲང་པོར་རྩ་དབུ་མ་ཞེས་གསུངས་ན་སྐུ་དབུས་དྲང་པོ་ལ་རྩ་གསུམ་ཀ་བའི་ཚུལ་དུ་ཆགས་པར་སྒོམ་དགོས། རྩ་དབུ་མ་དེ་མཚན་ཉིད་བཞི་ལྡན་ཞིག་དུ་གསུངས། མཚན་ཉིད་བཞི་བོ་གང་རེད་ཟེར་ན། དྲང་བ་ཆུ་ཤིང་གི་སྡོང་པོ་ལྟ་བུ། སྟོང་བ་ཤོག་གུ་ཁོག་སྟོང་ལྟ་བུ། གསལ་བ་ཏིལ་གྱི་མར་མེ་ལྟ་བུ། སྲབ་པ་པདྨའི་འདབ་མ་འདྲ་བ། དེ་ལྟ་བུའི་བཞི་ལྡན་ནམ་ལྔ་ལྡན་གྱི་ཆོས་ཀྱི་སྐུ་ཡི་རྩ། གཡས་གཡོན་རོ་རྐྱང་ལོངས་སྤྲུལ་གཉིས་ཞེས་པ་ནི། གཡས་གཡོན་རོ་མ་དང་རྐྱང་མ་གཉིས་ཀ་ལོངས་སྐུ་དང་སྤྲུལ་སྐུའི་རྩ་གཉིས། ལྟེ་འོག་དབུ་མའི་མར་སྣ་ལ་ཞེས་པ་རྩ་གསུམ་གྱི་འདུས་མདོ་ལ་རོ་རྐྱང་རྣམ་གཉིས་དབུ་མར་ཆུད་པ་དེ་ཡི་གེ་ཆ་ཡི་རྣམ་པ་ལྟ་བུ་ཡིན། དབུ་ཅན་གྱི་ཆ་ཡིག་གི་རྣམ་པ་ལྟ་བུ། ཡར་སྣ་ལྟག་པ་ནས་གུག་སྟེ་ཞེས་གསུངས་པ་རོ་རྐྱང་གི་ཡར་སྣ་དེ་ལྟག་པ་ནས་ཐུར་ལ་གུག་སྟེ་སྣ་བུག་གཉིས་སུ་ཧ་རེ་ཟུག་ཡོད་པ། དབུ་མའི་ཡར་སྣ་ཞེས་བརྡ་ཡིག་གིས་བསྟན་དོན་ལྟར་འོག་ཏུ་ཟླུམ་ཞིང་འཁྱིལ་ཡོད་པ་དེ་ཞལ་ཤེས་ཡིན། རོ་རྐྱང་གཉིས་ནས་ལས་ཀྱི་རླུང༔ གཡས་གཡོན་རེས་མོས་བདུན་བདུན་འབུད༔ ཉོན་མོངས་ལྔ་དང་འབྱུང་བ་ལྔར༔ བརྟེན་པའི་རླུང་དུག་སངས་ཀྱིས་ཐོན༔ རྩ་སྦུབས་སྐྱོན་དང་བྲལ་བར་སེམས༔ དེ་ནས་ཧ་ཞེས་དབུགས་བཏང་ལ༔ ངལ་གསོ་ཤེས་པ་རྣལ་དུ་ཕབ༔ རྩ་རོ་མ་དང་རྐྱང་མ་གཉིས་ནས་ལས་ཀྱི་རླུང་གཡས་གཡོན་རེས་མོས་བདུན་བདུན་དུ་རླུང་རོ་འབུད་ནས་ཉོན་མོང་ལྔ་དང་འབྱུང་བ་ལྔར་བརྟེན་པའི་དུག་རླུང་སངས་ཀྱིས་ཐོན་པར་བསམ་ནས། རྩ་སྦུབས་སྐྱོན་དང་བྲལ་བར་བསམ། དེ་སྣོད་བཀྲུ་བཤལ་བྱས་པ་དང་མཚུངས་པ་རེད། དེ་ནས་ཧ་ཞེས་དབུགས་བཏང་ལཿ ངལ་གསོ་ཤེས་པ་རྣལ་དུ་ཕབཿ འདི་ཅི་ལྟར་གསུངས་པ་དེ་བཞིན་དུ་གོ་བ་ལེན་ཆོག་པ་ཡིན། དེ་ཡན་ཆོད་ཀྱིས་རླུང་གི་དམིགས་གནད་བསྟན་པ་རེད། འདི་ན་ཟེར་རྒྱུ་ཞིག་ཡོད་རྒྱུ་འདི་མན་ཆོད་ཀྱི་མན་ངག་པྲ་ཁྲིད་ཀྱི་ཟབ་མོའི་དངོས་གཞིའི་གནད་བསྟན་པ་རེད། དེ་ནས་སྙིང་གུར་སྨུག་པོའི་དབུས༔ ཀུན་བཟང་མཐིང་ཀ་མཉམ་བཞག་ཅན༔ ཆེ་ཆུང་སྲན་མ་ཙམ་པ་ལ༔ སྐྱེ་མཆེད་ཤིན་ཏུ་དྭངས་པར་གསལ༔ དེ་ཡི་ཐུགས་ཀར་འོད་ལྔའི་ཐིག༔ ཟླུམ་པོར་འཁྱིལ་བའི་ནང་ཁོངས་སུ༔ དྭངས་གསལ་སྐྱེ་མེད་ གསལ་འཚེར་སྤུ་ཡིས་བྲིས་ལྟར་གསལ༔ ཞེས་གསུངས་ན་ད་པྲ་ཁྲིད་ཟབ་མོའི་དངོས་གཞི་ངོ་མ་འདི་ནས་མར་ཅི་ལྟར་གསུངས་པ་རེད་ཅེ་ན། དེ་ནས་སྙིང་གུར་ཞེས་པ་སྙིང་འཕྱོང་གུར་སྨུག་པོ་རིན་ཆེན་ཟུར་བརྒྱད་པ་ལྟ་བུའི་དབུས་སུ། ཀུན་བཟང་མཐིང་ཀ་མཉམ་བཞག་ཅན་ཆེ་ཆུང་སྲན་མ་ཙམ་པ་ལ་སྐྱེ་མཆེན་ཤིན་ཏུ་དྭངས་པར་ཞེས་པ་ཟབ་ཅིང་ཕྲ་བའི་དོན་རེད། དེ་ཡི་ཐུགས་ཀར་ཡེ་ཤེས་ལྔ་ཡི་རང་བཞིན་གྱི་འོད་ལྔའི་ཐིག་ལེ་ཟླུམ་པོར་འཁྱིལ་བའི་ནང་ཁོངས་ན། དྭངས་གསལ་སྐྱེ་མེད་སྲོག་གི་སྙིང་པོ་ཡི་གེ་ཨ་ཡིག་ལ་གོ་དགོས། གསལ་འཚེར་སྤུ་ཡིས་བྲིས་པ་ལྟར་དུ་གསལ། འདི་ནས་ཉམས་ལེན་ལག་ལེན་གྱི་གནད་ངོ་མ་བསྟན་པ་ཡིན་ནོ། །དེ་ནས་སྦྱོར་བ་བཞི་ལྡན་གྱིས༔ གནད་དང་ལྡན་པས་རླུང་རྔུབས་ལ༔ རོ་རྐྱང་ལམ་བརྒྱུད་སྙིང་དབུས་བསྐྱལ༔ ངླ་ཁ་རཱུ་ཌྷྱ་ཅུང་ཟད་བྱས་ཏེ༔ རླུང་ཡིག་རིག་པ་གཅིག་ཏུ་དྲིལ༔ ཞལ་ཤེས་གནད་དང་ལྡན་པ་ཡིས༔ རླུང་ཁུག་བརྒྱའམ་བདུན་ཅུ་འམ༔ སུམ་ཅུ་ལ་སོགས་ཐུན་རེར་འབད༔ དེ་ནས་སྦྱོར་བ་བཞི་ལྡན་ཞེས་པ་གང་ཡིན་ན། དགུག དགང་། གཞིལ། གཏོང་རྣམས་རེད། གནད་དང་ལྡན་པས་རླུང་རྔུབས་ལ་ཞེས་པ་དེ་ལྟ་བུའི་གནད་དང་ལྡན་པས་རླུང་འདི་སྣ་ཡིས་རྔུབས་རྒྱུ་ཡིན། འདི་རྫོགས་རིམ་སྤྱི་ཡི་འགྲོ་ལུགས་ལྟར་དུ་རླུང་རོ་སྦྱང་ནས་འབྱིན་འཇུག་བྱེད་དགོས། རོ་རྐྱང་གི་ལམ་བརྒྱུད། དབུ་མར་ཞུགས་ནས་སྙིང་དབུས་ལ་བསྐྱེད་དགོས། ཅུང་ཟད་ནང་དུ་ཞེས་གསུངས་པ་གཙོ་བོ་ཞལ་ཤེས་ཡིན། རླུང་ཡིག་རིག་པ་གཅིག་ཏུ་དྲིལ་ཞེས་གསུངས་ནས་རླུང་དང་ཨ་ཡིག་རིག་པ་དང་གསུམ་པོ་དེ་གཅིག་ཏུ་དྲིལ་དགོས་པ་ཡིན། ཞལ་ཤེས་གནད་དང་ལྡན་པ་ཡིས་ཞེས་གསུངས་ན་གེགས་སེལ་ལ་སོགས་པ་བླ་མའི་ཞལ་རྒྱུན་གྱི་ཞལ་ཤེས་མན་ངག་གི་གནད་དང་ལྡན་པ་ཡིས། འདིའི་དངོས་གཞིའི་ཉམས་ལེན་ལ་དགོས་གལ་ཆེ་བའི་རླུང་གི་རྣལ་འབྱོར་ལ་བསླབ་དུས། བསླབ་ཚུལ་ལྔ་ཡོད་པ་ཡིན། གྲངས་ལ་བསླབ་པ་དང་གཅིག འགྲོ་འོང་ལ་བསླབ་པ་དང་གཉིས། དབྱིབས་ལ་བསླབ་པ་དང་གསུམ། ཁ་དོག་ལ་བསླབ་པ་དང་བཞི། དེའི་འཕྲོར་རླུང་བུམ་པར་ཞུགས་པའི་མན་ངག་དང་ལྔ་གསུངས་ཡོད། སྤྱིར་བཤད་ན་སྐྱེས་བུ་དར་ལ་བབས་པ་ནད་མེད་ཞིག་གིས་ཉིན་ཞག་ཕྲུག་གཅིག་ལ་ཉི་ཁྲི་ཆིག་སྟོང་དྲུག་བརྒྱའི་རླུང་གི་དབུགས་རྒྱུ་བ་ཡིན། སྐབས་ཐོབ་ཀྱི་བཞུགས་སྟངས་དང་བསྟུན་ཏེ་སེམས་མ་ཡེངས་པར་བཞག་ན། རྣམ་རྟོག་འཕྲོ་བ་ཇེ་ཉུང་ལ་སོང་དུས་རླུང་ཇེ་དལ་དུ་སོང་ནས་གྲངས་ཇེ་ཉུང་ལ་འགྲོ་གིན་ཡོད། དམིགས་པ་གནད་དུ་བསྣུན་ནས་བྱང་སོང་ན་ཐ་མར་རླུང་གི་འགྲོ་འོང་ཆད་ནས་ཤེས་པ་གར་གཏད་ལ་སྡོད། ལས་རླུང་ཟད་པས་རྣམ་རྟོག་ཟད། རྣམ་རྟོག་ཟད་པས་སྣང་བ་ཟད། དེ་དུས་རྣམ་པར་མི་རྟོག་པའི་ཡེ་ཤེས་ཀྱི་ངང་ལ་ཡུན་རིང་ནས་བར་སྐབས་རྒྱུན་དུ་གནས་ཐུབ་པར་མ་ཟད་ཇི་བཞིན་འབྱུང་སོང་དུས་ཆུ་ལ་མི་བྱིངས་པར་ནམ་མཁའ་ལ་བྱ་བཞིན་དུ་འཕུར་ནུས་པ་སོགས་པའི་གྲུབ་པའི་རྟགས་ཀྱང་འབྱུང་། དེ་བཞིན་དུ་རླུང་གི་འགྲོ་འོང་སོགས་ལ་བསླབ་ནས་ཐ་མར་རླུང་བུམ་ཅན་ལ་བསླབ་ན་ལུས་ཁ་ཟས་ལས་གྲོལ། སེམས་བདེ་སྟོང་ཏུ་གྲོལ། རིག་པ་རྣམ་རྟོག་ལས་གྲོལ། དེ་འདྲའི་གྲོལ་བ་གསུམ་གྱི་རྟགས་འབྱུང་། མཐར་ཟག་པ་ཐམས་ཅད་ལས་གྲོལ་བ་འབྱུང་བ་དེ་འདྲ་ཡིན། རླུང་ཁུག་བརྒྱའམ་བདུན་ཅུ་ཐམ༔ སུམ་ཅུ་ལ་སོགས་ཐུན་རེར་འབད༔ ཞེས་འདི་ནས་གེགས་སེལ་བསྟན་པ་ཡིན་ནོ། །མན་ངག་གནད་དང་མི་ལྡན་ན༔ སྲོག་རྩར་ལས་ཀྱི་རླུང་ཞུགས་ནས༔ སྨྱོ་བའི་ཉེན་ཡོད་ཁེ་ཉེན་ཆེ༔ གནད་དུ་སོང་ན་སྲོག་ཐུར་གྱི༔ རླུང་གཉིས་གཅིག་ཏུ་འདྲེས་གྱུར་ནས༔ དབུ་མར་ཞུགས་ནས་ཐིམ་གསུམ་གྱི༔ རང་རྩལ་རྫོགས་པའི་རྟེན་འབྲེལ་ལས༔ བུམ་ཅན་རིལ་བ་ཞབས་ཚགས་ཅན༔ མངོན་དུ་སྣང་ཞིང་འོག་རླུང་ལ༔ བཤང་བའི་དྲི་མ་མི་འབྱུང་ཞིང༔ ཞེས་པ་ལ་སོགས་པས་བསྟན། མན་ངག་གི་གནད་དང་མི་ལྡན་པར་འོལ་ཚོད་སྤྱི་བརྟོལ་གྱིས་གསང་བ་ལ་ཅི་མི་སྙམ་པའི་སྤྱོད་ཀྱིན་བསྡད་པ་ཡིན་ན། སྲོག་རྩ་ལ་ལས་ཀྱི་རླུང་ཞུགས། དམ་ཚིག་ཉམས་ནས་བཀའ་ཡིས་ཆད་པ་ཕོག་ཏེ་སྨྱོ་བའི་ཉེན་ཁ་ཡང་ཡོད་ལ་ཁེ་ཉེན་ཆེ་བས་གཟོབས་གསུངས་པ་རེད། གནད་དུ་སོང་ནས་མཐུན་རྐྱེན་ཡོངས་སུ་ཚོགས་སོང་ན། སྲོག་དང་ཐུར་སེལ་གྱི་རླུང་གཉིས་ཀ་གཅིག་ཏུ་འདྲེས་པར་གྱུར་ནས། ཐུན་རེ་རེའི་དང་པོའི་སྐབས་སུ་རླུང་ཁུག་པ་བརྒྱ་རེ་ཙམ་རེ་དང་། དེ་ནས་བར་སྐབས་དེ་ལས་ཉུང་བདུན་ཅུ་ཙམ་རེ་དང་མཐར་སུམ་ཅུ། ཡང་མཐར་དེ་ལས་ཀྱང་ཉུང་བར་འགྱུར་ཞིང་ནང་དུ་འཛིན་པའི་འབད་པ་གྱིས་གསུངས་པ་རེད། རླུང་དབུ་མར་ཞུགས་གནས་ཐིམ་གསུམ་བརྒྱུད་དགོས་པ་ཡིན། དེ་ལྟར་དང་པོ་རླུང་དབུ་མར་ཞུགས། དེ་ནས་གནས། དེ་ནས་ཐིམ། དབུ་མར་ཞུགས་གནས་ཐིམ་གསུམ་གྱི་རིམ་པ་དེ་ལྟར་བརྒྱུད། རང་རྩལ་རྫོགས་པའི་རྟེན་འབྲེལ་ལས༔ བུམ་ཅན་རིལ་པ་ཞབས་ཚགས་ཅན༔ ཞེས་པ། འདི་ཡང་རྩ་མདུད་མས་རིམ་ལས་གྲོལ་བ་རེད། བུམ་ཅན་རིལ་པ་ཞབས་ཚགས་ཅན་མངོན་དུ་སྣང་ཞིང་འོག་རླུང་ལ་བཤང་བའི་དྲི་མ་མི་འབྱུང་བ་དང་དྲི་ཆུ་ཆུ་གཙང་ལྟར་འབབ་པ་ལ་སོགས༔པ་ལམ་རྟགས་འབྱུང་། ལས་རླུང་དག་ནས་ཡེ་རླུང་ལ་འཁྱིལ་དགོས་པ་རེད། རྩ་འདབ་གོང་ནས་བཤད་པ་ལྟར་མས་རིམ་ནས་གྲོལ་བ་ཡིན་པས། ཁྱར་པར་དུ་ལྟེ་བའི་རྩ་མདུད་གྲོལ༔ དང་པོའི་ས་ཡི་རྟོག་པ་འཆར༔ ཞེས་གསུངས་ན། རྩ་མདུད་གཉིས་གཉིས་གྲོལ་བ་དང་མཉམ་དུ་ས་ཡི་ཁྱད་པར་རེ་མཐོང་གི་ཡོད་པ་རེད། མངོན་སུམ་སྣང་བ་ལྷུག་པར་མཐོང༔ ཞེས་གསུངས། ས་དང་པོར་ཆོས་ཉིད་མངོན་སུམ་མཐོང་ལམ་གྱི་བདེན་པ་རྟོགས་པ་རེད། འདི་ལ་ཐེ་ཚོམ་འགའ་ཡང་མེད༔ ས་མ་ཡ༔ ཞེས་གསུངས་ནས་རྒྱ་ཡིས་བཏབ། དེ་ཡིས་དངོས་གཞི་བསྟན། རྗེས་དགོས་པ་དང་ཕན་ཡོན་གསུང་པ་ནི།

གསུམ་པ་དགོས་པ་དང་ཕན་ཡོན།

འདི་ནི་རྫོགས་རིམ་ཀུན་གྱི་བཅུད༔ དབུ་མར་ཡེ་ཤེས་རླུང་ཟིན་པས༔ གཏུམ་མོའི་ནང་ནས་ཡང་རྩེ་ཡིན༔ ཞེས་གསུངས། འདི་ནི་བླ་མེད་ཐུན་མོང་གི་རྫོགས་རིམ་ཀུན་གྱི་བཅུད་དམ་སྙིང་པོའི་ཡང་བཅུད་ལྟ་བུ་ཞིག་ཡིན། རྩ་དབུ་མར་ལས་རླུང་དག་ནས་ཡེ་ཤེས་ཀྱི་རླུང་ཟིན་པའི་རྒྱུ་མཚན་གྱིས་གཏུམ་མོའི་ནང་ནས་ཡང་རྩེ་འདི་ཡིན། ཞེས་སོ། །སེམས་ཉིད་ཆོས་སྐུར་གནས་དག་པས༔ འོད་གསལ་ཀུན་གྱི་རྒྱལ་པོར་འགྱུར༔ ཞེས་པས་གཏུམ་མོའི་ཡང་རྩེ་ཡིན། འོད་གསལ་གྱི་རྒྱལ་པོ་ཡིན་ཞེས་གསུངས། དེའི་སྐབས་སུ་རྩ་སྤྲུལ་སྐུར་དག རླུང་ལོངས་སྐུར་རྫོགས། ཐིག་ལེ་ཆོས་སྐུར་སྨིན་ནས་སེམས་ཉིད་ཆོས་སྐུར་གནས་དག་པ་ཡིན་པས་ན། འོད་གསལ་སྒོམ་པའི་ལམ་ཀུན་གྱི་རྒྱལ་པོར་འགྱུར་ཞེས་གསུངས། སྣང་བའི་རྫུན་ཕུགས་རྡིབ་པ་ཡིས༔ སྒྱུ་མ་མ་བཅོས་རང་ལ་ཤར༔ ཞེས་དེ་ཡིས་སྒྱུ་ལུས་བསྟན་པ་རེད། དེའི་ཚེ་འཁྲུལ་སྣང་རང་སར་གྲོལ་ནས་སྣང་བའི་རྫུན་ཕུགས་རྡིབ་སོང་དུས་དངོས་སྣང་སྒྱུ་མའི་སྣང་ཚུལ་མ་བཅོས་རང་ལ་ཤར་བ་ཡིན་པས་སྒྱུ་ལུས་འབྱུང་བ་རེད། གར་ཤར་རྣམ་རྟོག་མ་ཡན་པ༔ རྨི་ལམ་ཀླུངས་ཚུད་སྤྲུལ་བསྒྱུར་ནུས༔ ཞེས་གསུངས་བ་འདིས་རྨི་ལམ་བསྟན། རྨི་ལམ་ཡན་པར་མ་ཤོར་བར་རྨི་ལམ་ལམ་དུ་ལྷོང་ནས་ཀློང་དུ་ཚུད་དེ་སྤྲུལ་བསྒྱུར་ནུས་པ་དེ་འདྲའི་རང་དབང་ཐོབ་པ་འབྱུང་གསུངས། ཐ་མལ་རྣམ་རྟོག་ཡེ་ཤེས་སུ༔ འཕོས་པའི་འཕོ་བའི་ཡང་རྩེ་ཡང་ཡིན༔ ཞེས་ཐ་མལ་བའི་འཁྲུལ་བའི་རྣམ་རྟོག་དག་པ་ཡེ་ཤེས་སུ་གོ་འཕོས་སོང་བས་ན་འདི་འཕོ་བའི་ཡང་རྩེ་ཡང་ཡིན་ལ། སྒོ་གསུམ་རྡོ་རྗེ་གསུམ་ལྡན་གྱི༔ གྲོང་དུ་འཇུག་པས་གྲོང་འཇུག་མཆོག༔ གསང་སྔགས་ཀུན་གྱི་འབྲས་བུ་ཡིན༔ ཞེས་སྒོ་གསུམ་སྐུ་གསུང་ཐུགས་གསུམ་རྡོ་རྗེ་གསུམ་ལྡན་གྱི་རྡོ་རྗེ་ཕུང་པོའི་གྲོང་ཁྱེར་དུ་འཇུག་པས་ན་གྲོང་འཇུག་གི་མཆོག་ཀྱང་འདི་ཡིན། མདོར་ན་འདི་ནི་གསང་སྔགས་བསྐྱེད་རྫོགས་ཀུན་གྱི་འབྲས་བུ་ཡིན་ཞེས་གསུངས་སོ། །ས་མ་ཡ༔ འདི་ལམ་གྱི་སྙིང་པོ་འོད་གསལ། ལམ་གྱི་གཞི་མ་སྒྱུ་ལུས། ལམ་གྱི་དྲོད་ཚད་རྨི་ལམ། ལམ་གྱི་བློ་ཆོད་འཕོ་བ་སོགས་ཡིན་གསུངས་ཏེ། ལམ་གྱི་བསུ་མ་བར་དོ་རང་ཤུགས་ཀྱིས་ཆོད་པ་ཤུགས་ལ་བསྟན། དེ་ཡིས་རྫོགས་རིམ་ཆོས་དྲུག་ནང་ནས་ལམ་གྱི་རྩ་བ་གཏུམ་མོའི་ཟུར་དུ་ས་བཅད་གཉིས་པ་བཞག་ནས་གསུངས་པ་དེ་ཡིན་ནོ། །

༼ཧཱུྃ༽ ཆོས་ཚན་གསུམ་པ་འབར་འཛག་དྲོད་ཀྱི་རྣལ་འབྱོར།

བདེ་སྟོང་རླུང་གི་རྫོགས་རིམ་ལས༔ དེའི་ནང་གསེས་འབར་འཛག་དྲོད་ཀྱི་རྣལ་འབྱོར་ནི༔ ཞེས་ཉམས་ལེན་སྲང་དུ་འཛུད་དུས་ཐོ་རེངས་ཀྱི་ཐ་མ་ལ་བདེ་སྟོང་དང་གཏུམ་མོ་སྒོམས་གསུངས་པ། འདིའི་གནད་ཁྲིད་ཡིག་གཞུང་ནས་འབྱུང་བ་ལྟར་དུ་ཡིན། ད་རེས་རྫོགས་ཆེན་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་ཁྲིད་ཆེན་གྱི་ཡན་ལག་ཙམ་དུ་སོང་བས་ན་འདི་ནས་རྒྱས་བཤད་དགོས་པའི་སྐབས་མ་རེད། སྤྱིར་རླུང་གནད་དུ་འཆུན་ནས་ཐིག་ལེ་དག་དགོས་པ་རེད། དེ་གཉིས་ཀ་ཡང་རྩ་ལ་བརྟེན་དགོས་པ་ཡིན་པས་ན་རྡོ་རྗེ་ལུས་ཀྱི་རྩ་ཐིག་རླུང་གསུམ་པོ་འབྱོང་རྒྱུ་གལ་ཆེན་ཡིན་གསུངས། རྩ་རླུང་གི་འཕྲུལ་འཁོར་གནད་ཆེ་མོད། དང་པོ་རླུང་འབྱོང་རྒྱུ་གནད་ཆེ། ཡིན་ན་ཡང་ལག་ཁྲིད་བརྒྱུད་པའི་ཕྱག་སྲོལ་མི་ཉམས་པའི་ཆེད་དུ་འདིའི་འཕྲུལ་འཁོར་རང་ལུགས་ཀྱི་བརྒྱུད་པའི་ལག་ལེན་ལྟར་དུ་བསྐྱར་གསོ་བྱས་པ་ཡིན། འདིའི་རྐང་པ་ཚུགས་ཕན་ཆད་ནས་རླུང་དམིགས་ལ་བསླབ་རྒྱུ་གནད་ཆེན་རེད། རྩ་རླུང་ཞག་བརྒྱ་ལ་བཞུགས་མཁན་ཡིན་ན་ཕྱེད་ཀ་རླུང་གི་རྣལ་འབྱོར་དང་གཏུམ་མོའི་རྣལ་འབྱོར་ལ་བསླབ་རྒྱུ་གལ་ཆེན་ཡིན་པ་སྔར་ཡང་བཤད་མྱོང་བ་ཡིན་ནོ། །རྩ་གསུམ་སྔ་མ་ཇི་བཞིན་ལ༔ དབུ་མའི་ཡར་སྣར་ཧེ་རུ་ཀ༔ དཀར་ཆ་ཧཾ་ཡིག་རང་བཞིན་ལ༔ ནར་སྣར་དམར་ཆ་གནམ་ཞལ་མ༔ ཨ་ཤད་འོད་ཀྱི་རྣམ་པར་གསལ༔ རོ་རྐྱང་གཉིས་ནས་རླུང་རྔུབས་ཏེ༔ ལྟེ་བའི་གནམ་ཞལ་སྦར་བ་ལས༔ ཤེས་རབ་ཡེ་ཤེས་ལྷབ་ཀྱིས་འབར༔ ཞེས་གསུངས་ཏེ། རྩ་གསུམ་སྔ་མ་ཇི་བཞིན་རྣལ་འབྱོར་པའི་རྡོ་རྗེ་ལུས་ཀྱི་དབུས་དྲང་པོ་ན་རྟེན་སྲོག་རྩོལ་ལ་བརྟེན་པའི། བརྟེན་པ་ཡེ་ཤེས་ཀྱི་འོད་རྩ་ཞིག་ཡིན་པས། དབུ་མ་མཐིང་སྐྱ་དབུས་སུ་མདའ་སྨྱུག་དྲང་པོར་བསྲིང་པ་ལྟ་བུའི་དྲང་སེ་ཡོད་པའི། ལྟེ་འོག་ནས་སྤྱི་གཙུག་གི་བར་ལ་ཟུག གཡས་གཡོན་ན་རོ་རྐྱང་གཉིས་ཀ་ཡོད། རོ་རྐྱང་གཉིས་ཀ་ཕོ་མོའི་རྟེན་གྱི་ཁྱད་པར་གྱིས་གོ་ལྡོག་ནས་ཡོད། སྐྱེས་པར་གཡས་རོ་མ་དཀར། གཡོན་རྐྱང་མ་དམར་བའི་རང་བཞིན་གསལ་བཏབ་པ་གོང་ནས་གསུངས་པ་ལྟར་དང་། བུད་མེད་ལ་དེ་ལས་གོ་ལྡོག་པ་བཞིན་དུ་གསལ་བ། དེ་ལ་དབུ་མའི་ཡར་སྣར་ཧེ་རུ་ཀ་ཞེས་གསུངས་ན། དབུ་མའི་ཡར་སྣར་ཐབས་མཆོག་ཧེ་རུ་ཀའི་ངོ་བོ་དཀར་ཆ་ཧཾ་ཡིག་གི་རང་བཞིན་ཅན་ལ། དབུ་མའི་མར་སྣ་དམར་ཆ་ཤེས་རབ་ཀྱི་རང་བཞིན་ཡུམ་གནམ་ཞལ་དབྱིངས་ཀྱི་དབང་ཕྱུག་མ་མཚོན་པའི་ཨ་ཤད་འོད་ཀྱི་རྣམ་པར་གསལ་གསུངས། ཨ་ཤད་འདི་སྤྱིར་བཏང་གི་ཨ་ཕྱིས་ཤུལ་གྱི་མཐའ་ལ་ཤད་ཀྱི་རྣམ་པ་ལྟ་བུ་ཞིག་གནས་པ་དེ་ཉིད་ཀྱི་རྩེ་མོ་གྱེན་དུ་བསྟན་ནས་འོད་ཀྱི་རྣམ་པར་གསལ་བ་ལ། འདིའི་སྐབས་ལ་སྣ་བུག་གཉིས་ནས་རླུང་འབྱིན་འཇུག་བྱེད་དགོས། རོ་རྐྱང་གཉིས་ནས་རླུང་རྔུབས་ཏེ་ཞེས་གསུངས་དོན་དེ་ཡིས་རེད། ལྟེ་བའི་གནམ་ཞལ་སྦར་བ་ལས་ཞེས་གསུངས་བ་དེ་ལྟེ་བའི་ཨ་ཤད་ཡུམ་གནམ་ཞལ་དབྱིངས་ཕྱུག་མར་ཞུགས་པ་ལས། ཤེས་རབ་ཀྱི་མེ་སྦར་བ་ལས་ཤེས་རབ་ཡེ་ཤེས་ཀྱི་མེ་ལྕེ་དེ་ཉིད་ལྷབ་ཀྱིས་འབར་ཡོང་དུས། དེ་ཡང་ངོ་བོ་བདེ་བ་ལ༔ རང་བཞིན་གསལ་ཞིང་རྣམ་པ་ཚ༔ རྩེ་མོ་རྣོ་ལ་འཁྱུག་པ་ཡིས༔ ལྟེ་བའི་རྩ་འཁོར་ཡོངས་གང་ཞིང༔ བདེ་དྲོད་གློ་བུར་སྐྱེས་པར་བསམ༔ ཞེས་པ་ནི། ཡེ་ཤེས་ཀྱི་མེ་དེ་ཡང་ངོ་བོ་བདེ་བ་ཡིན་པ་ལ་བདེ་བའི་རང་བཞིན་རྨུན་པ་མ་ཡིན་པར། གསལ་ཞིང་ཚ་བའི་རྣམ་པ་ཅན། མེའི་རྩེ་མོ་དེ་ཉིད་རྣོ་ལ་འཁྱུག་པ་ཡིས་ལྟེ་བ་སྤྲུལ་བའི་འཁོར་ལོའི་རྩ་འཁོར་ཡོངས་སུ་རྫོགས་པ་གང་ཞིང་། བདེ་དྲོད་སྔར་བས་ཇེ་ཆེར་འབར་བས་གློ་བུར་དུ་སྐྱེས་པར་བསམ་དགོས། དེ་བཞིན་ཆོས་ཀྱི་འཁོར་ལོ་དང༔ ལོངས་སྤྱོད་བདེ་ཆེན་འཁོར་ལོ་སོགས༔ སོ་སོའི་གནས་སུ་རླུང་ཁུག་ནི༔ ཉེར་གཅིག་བདུན་སོགས་གོང་དང་མཚུངས༔ ཞེས་པ་ནི། ལྟེ་བའི་མི་ཚད་པར་དེ་བཞིན་དུ་སྙིང་ཀ་ཆོས་ཀྱི་འཁོར་ལོ་དང་མགྲིན་པ་ལོངས་སྤྱོད་ཀྱི་འཁོར་ལོ། ད་རུང་གསང་གནས་བདེ་ཆེན་འཁོར་ལོ་སོགས་རྩ་འཁོར་བཞི་འམ་ལྔ་སོ་སོའི་གནས་སུ་འབྱིན་འཇུག་གནས་གསུམ་གྱི་རླུང་ཁུག་ནི་ཉེར་གཅིག་དང་བདུན་སོགས་ཇེ་དལ་ཇེ་གནས་ཡིན་པ་གོང་དང་མཚུངས་པ་རེད། དེ་ནས་སྤྱི་བོའི་ཧཾ་ཡིག་ལ༔ མེ་ལྕེས་རེག་པ་ཙམ་གྱིས་ནི༔ བདེ་བ་གཡོས་ཤིང་ཐིག་ལེ་ཞུ༔ ཞུན་གྱིས་མར་མེ་འཐིགས་པ་ལྟར༔ སྤྱི་བོའི་རྩ་འདབ་ཐམས་ཅད་ཁེངས༔ ཞེས་གསུངས་པ་ནི། དེ་ནས་མཐར་སྤྱི་བོའི་ཧཾ་ཡིག་ལ་མེ་ལྕེས་རེག་པ་ཙམ་གྱིས་བདེ་བ་སྔར་ལས་ཆེ་བར་གཡོས་ཤིང་ཐིག་ལེ་ཞུ་ནས། ཞུན་གྱི་མར་མེ་ཞུ་ནས་ཐིགས་པ་ལྟར་དུ་ཐིག་ལེའི་སྤྱི་བོའི་རྩ་འདབས་ཐམས་ཅད་ཁེངས་པར་སྒོམ་དགོས། རྩ་ཁམས་དཔའ་བོ་ཌཱཀྐི་ནཱི༔ ཏིལ་གང་ཕྱུར་བ་ལྟ་བུ་ལ༔ བདེ་སྟོང་བདུད་རྩིའི་མཆོད་པ་ཕུལ༔ སྤྱི་བོའི་རྩ་ཁམས་དཔའ་བོ་དང་ཌཱཀྐི་སྟེ། མཁའ་འགྲོ་མའི་ཚོགས་ཏིལ་གང་ཕྱུར་བ་ལྟ་བུ་དཔག་ཏུ་མེད་པར་ཡོད་པ་ལ་བདེ་སྟོང་གཉིས་སུ་མེད་པའི་ཡེ་ཤེས་ཀྱི་བདུད་རྩིས་མཆོད་པ་ཕུལ་ནས་དེ་དག་མཉེས་པར་བྱས་ཏེ། ཚོགས་གཉིས་རྫོགས་ཤིང་སྒྲིབ་གཉིས་བྱང༔ བུམ་དབང་མངོན་དུ་ཐོབ་བྱས་ཏེ༔ དགའ་བའི་ཡེ་ཤེས་སྐྱེས་པར་བསམ༔ ཞེས་གསུངས་ན།དེ་ལྟར་མཆོད་པ་ཕུལ་བའི་མཐུས་བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་ཤིང་། ཉོན་ཤེས་བགས་ཆགས་དང་བཅས་པའི་སྒྲིབ་གཉིས་བྱང་བའི་འགོ་ཚུགས་ཏེ། དབང་བཞིའི་ནང་ནས་བུམ་དབང་མངོན་དུ་ཐོབ་པར་བྱས་ཏེ། དགའ་བ་བཞིའི་ནང་ནས་དགའ་བའི་ཡེ་ཤེས་སྐྱེས་པར་བསམ། དེ་བཞིན་མགྲིན་པ་སྙིང་ག་དང༔ ལྟེ་བ་ལ་ཡང་གོང་བཞིན་དུ༔ རིག་པ་སྒྲེ་ཞིང་གསང་དབང་དང༔ ཤེས་རབ་ཡེ་ཤེས་བཞི་པའི་དབང༔ རིམ་བཞིན་མངོན་དུ་ཐོབ་བྱས་ཤིང༔ མཆོག་དགའ་ཁྱད་པར་ལྷན་སྐྱེས་ཀྱི༔ ཡེ་ཤེས་ཉམས་སུ་མྱོང་བར་བསམ༔ དེ་བཞིན་ཞེས་གསུངས་པ་སྤྱི་བོ་དེ་བཞིན་མགྲིན་པ་དང་། སྙིང་ཀ་དང་ལྟེ་བའི་རྩ་འཁོར་ལ་ཡང་། གོང་ནས་གསུངས་པ་བཞིན་རིག་པ་སྒྲེ་ཤེས་དགོས་པ་རེད་ཅེས་གསུངས་པས། རིག་པ་སྒྲེ་ཞིང་གསང་དབང་དང་། ཤེས་རབ་ཡེ་ཤེས་དང་བཞི་པའི་དབང་སྟེ། དང་པོ་རྩ་འདབ་ཐམས་ཅད་ཁེངས། རྩ་ཁམས་དེའི་དཔའ་བོ་མཁའ་འགྲོ་ཐམས་ཅད་མཆོད། ཚོགས་གཉིས་གང་འཚམས་རྫོགས། སྒྲིབ་གཉིས་གང་འཚམས་དག་ནས་མགྲིན་པར་གསང་དབང་། སྙིང་ཀར་ཤེར་དབང་། ལྟེ་བར་ཚིག་དབང་དེ་དག་རིམ་བཞིན་མངོན་དུ་ཐོབ་པར་བྱས་ཤིང་། མཆོག་དགའ་ཁྱད་པར་ལྷན་སྐྱེས་ཀྱི། །ཞེས་གསུངས་ན་མགྲིན་པར་མཆོག་དགའ། སྙིང་ཀར་ཁྱད་པར་གྱི་དགའ་བ། ལྟེ་བར་ལྷན་སྐྱེས་ཀྱི་དགའ་བ་དང་བཅས་པའི་དགའ་བཞིའི་ཡེ་ཤེས་ཉམས་སུ་མྱོང་བར་བསམ་ཞེས་གསུངས། དེ་ནས་རྩ་གསུམ་འདུས་མདོ་རུ༔ དྭངས་མ་ཨ་ཤད་ལ་ཕོག་ཚེ༔ སྣུམ་ཁོལ་བདུད་རྩི་བླུགས་པ་བཞིན༔ མེ་དང་བདུད་རྩི་གཉིས་མེད་འབར༔ རིག་པ་རྩལ་གྱི་དབང་ཆེན་ཐོབ༔ ཅེས་པས། དེ་ནས་ལྟེ་འོག་གི་རྩ་གསུམ་གྱི་འདུས་མདོ་རུ་བོད་ཡིག་དབུ་ཅན་གྱི་ཆ་ཁོག་སྨད་ལྟ་བུ་ཟེར་བ་དེར་བདུད་རྩིའི་དྭངས་མ་ཨ་ཤད་ལ་ཕོག་པའི་ཚེ། དཔེར་ན་སྣུམ་ཁོལ་མའི་ནང་དུ་བདུད་རྩིའམ་ཆང་བླུག་པ་བཞིན་དུ། མེ་དང་བདུད་རྩི་གཉིས་མེད་དུ་ཤིན་ཏུ་ཆེར་འབར་ཏེ་དབང་བཞི་པ་ལས་ཀྱང་ཁྱད་པར་དུ་གྱུར་བའི་རིག་པ་རྩལ་གྱི་དབང་ཆེན་ཐོབ་པ་ལ་གོ་དགོས། སྣང་སྲིད་ཐམས་ཅད་མེ་ཡིས་ཁེངས༔ སྣོད་དང་བཅུད་དུ་འཛིན་པ་ཡི༔ རྣམ་རྟོག་བག་ཆགས་ཐམས་ཅད་བསྲེག༔ དེ་ནས་སྣང་སྲིད་བརྟན་གཡོ་ཐམས་ཅད་ཡེ་ཤེས་ཀྱི་མེ་ལྕེ་དེ་ཡིས་ཁེངས་ནས། སྣོད་དང་བཅུད་དུ་འཛིན་པ་ཡི་ཐ་མལ་གྱི་རྣམ་རྟོག་ཞེན་འཛིན་བག་ཆགས་དང་བཅས་པ་ཐམས་ཅད་ཤུལ་མེད་དུ་བསྲེགས་ནས། མཐར་ནི་རང་ལུས་མེ་དང་བཅས༔ ཇེ་ཆུང་ཇེ་ཆུང་སྤྲོས་བྲལ་ངང༔ བསྡུས་ལ་གསལ་སྟོང་ངང་དུ་བཞག༔ ཞེས་པས། དེའི་མཐར་རང་ལུས་མེ་དང་བཅས་པ་ཡང་ཇེ་ཆུང་ཇེ་ཆུང་། སྤྲོལ་བྲལ་དམིགས་བསམ་བརྗོད་མེད་ཀྱི་ངང་ལ་རྫོགས་རིམ་ཆེན་པོའི་དབྱིངས་སུ་བསྡུས་ལ་གསལ་སྟོང་འཛིན་མེད་ཀྱི་ངང་དུ་ཞོག་ཅེས་གསུངས། གེགས་སེལ་ཧ་སྤྲུགས་བརྡབ་ཆུང་དང༔ ངལ་གསོ་ཤེས་རིག་རྣལ་དུ་དབབ༔ ཞེས་གསུངས་ཏེ། གེགས་འདྲ་བྱུང་ན་ཧ་སྤྲུགས་དང་བརྡབ་ཆུང་བྱ་བ་དང་ཤེས་པ་རང་བབས་མ་བཅོས་པའི་ངང་དུ་ངལ་གསོས་ནས། ཤེས་རིག་རང་མལ་ལ་རྣལ་དུ་དབབ་དགོས། འདི་ལྟར་རྣལ་དུ་ཕེབས་གྱུར་ན༔ བདེ་དྲོད་མེ་འབར་གོས་མི་དགོས༔ འབྱུང་བ་ལྔ་ལ་རང་དབང་སྒྱུར༔ ཞེས་གསུངས་ཏེ། འདི་ལྟར་དུ་ལག་ལེན་ལ་ཐེབས་ནས་སྦྱངས་པའི་རིམ་པ་ཇི་བཞིན་དུ་མ་ནོར་པར་རྣལ་དུ་ཕེབས་སོང་བ་ཡིན་ན། བདེ་དྲོད་མེ་འབར་ཞེས་ལུས་ལ་བདེ་དྲོད་མེ་ལྟར་དུ་འབར་ནས་གྲང་བའི་དུས་སུའང་གོས་མི་དགོས། འབྱུང་བ་ལྔ་ལ་རང་དབང་བསྒྱུར་ཏེ་ས་ལ་འཛུལ་ཞིང་རི་བྲག་ལ་ཐོགས་པ་མེད་པ། ཆུ་ལ་ཉ་ལྟར་དུ་འཕྱོ་ཞིང་མེས་མི་འཚིག རླུང་ལྟར་མགྱོགས་ཤིང་མི་སྣང་ནམ་མཁའི་རང་བཞིན་དུ་སྤྲུལ་བསྒྱུར་ནུས་པ་དེ་འདྲ་ཡོང་བ་ཡིན་ནོ། །མ་དག་ལས་ཀྱི་རླུང་དག་པས༔ སྤྱན་དང་མངོན་ཤེས་ལ་སོགས་ཐོབ༔ ཐུན་མོང་ཡོན་ཏན་བསམ་མི་ཁྱབ༔ མངོན་ཞེན་སྐྱེས་ན་རུ་ཏྲར་གོལ༔ ཞེས་མ་དག་པའི་ལས་ཀྱི་རླུང་ཐམས་ཅད་དག་སོང་དུས། དག་པ་ཡེ་ཤེས་ཀྱི་རླུང་གི་སྟོབས་དེ་ཆེས་ཆེར་ཡར་འཕེལ་ནས། དེའི་ཡོན་ཏན་དེ་ནི་སྤྱན་དང་མངོན་ཤེས་ལ་སོགས་ཀྱི་གྲུབ་པ་ཐོབ་པ་ཡིན། ཐུན་མོང་གི་ཡོན་ཏན་བསམ་གྱིས་མི་ཁྱབ། དེའི་ཚེ་གྲུབ་རྟགས་དེ་ཚོར་མཚན་མར་བཟུང་ནས་མཆོག་འཛིན་གྱི་མངོན་ཞེན་སྐྱེས་ན་རུ་ཏྲར་གོལ་འགྲོའོ། །ཅི་ཕྱིར་འབྲས་བུའི་ཡོན་ཏན་ནི༔ སྤངས་རྟོགས་མཐའ་རུ་ཕྱིན་པའི་དབྱིངས༔ ཆོས་ཟད་བློ་འདས་ཆེན་པོ་སྟེ༔ དེ་ཕྱིར་དེ་དག་ལམ་རྟགས་ཀྱི༔ ཡོན་ཏན་ཙམ་ལས་ས་ཟིན་མེད༔ ཅེས་པས་ཅིའི་ཕྱིར་ཞེ་ན། མངོན་ཞེན་སྐྱེས་བཏང་ན་རུ་ཏྲར་གོལ་འགྲོ་བའི་རྒྱུ་མཚན་ཅི་རེད་ཅེ་ན། འབྲས་བུའི་ཡོན་ཏན་མཐར་ཐུག་པ་གང་ཡིན་ཞེ་ན། སྤངས་རྟོགས་མཐའ་རུ་ཕྱིན་པའི་དབྱིངས་ཞེས་གསུངས་པས། སྤངས་དང་རྟོགས་པའི་ཡོན་ཏན་མཐའ་རུ་ཕྱིན་པའི་ཆོས་ཀྱི་དབྱིངས་ལ་གོ་བ་རེད། དེ་ནམ་ཐོབ་ན་བློ་ཟད་ཆོས་འདས་ཆེན་པོའི་སར་ཕྱིར་པའི་སྐབས་ཡིན། དེ་ཕྱིར་དེ་དག་ལམ་རྟགས་ཀྱི་ཞེས་པས། གོང་ནས་སྨོས་མ་ཐག་པའི་ཐུན་མོང་གི་གྲུབ་རྟགས་དེ་དག་ལམ་རྟགས་ཀྱི་ཡོན་ཏན་ཙམ་ལས་མཐར་ཐུག་གི་འབྲས་བུའི་གཞི་བཅོལ་སའི་ས་ཟིན་མེད་པས་བློ་གཏད་མེད་ཅེས་གསུངས་པ་རེད། སྤངས་ཐོབ་བྲལ་བའི་རྫོགས་ཆེན་ནི༔ ཆོས་རྣམས་ཀུན་གྱི་གྲོལ་སའོ༔ ཞེས་སྤངས་ཐོབ་དང་བྲལ་བའི་རྫོགས་པ་ཆེན་པོའི་ཆོས་ནི་རྫོགས་རིམ་ཀུན་གྱི་མཐར་ཐུག་པ་དབྱིངས་དང་ཡེ་ཤེས་གཉིས་མེད། ཆོས་རྣམས་ཀུན་གྱི་གྲོལ་ས་གཞི་འབྲས་དབྱེར་མེད་པའི་སར་ཕྱིན་པའོ། །ས་མ་ཡ༔ ཞེས་གསང་བ་དམ་ཚིག་གི་རྒྱས་སླར་ཡང་མནན་ཏེ། ཇི་ལྟར་མཁའ་འགྲོའི་གསང་མཛོད་ལས་བརྡ་བསྒྱུར་མཛད་ཚུལ་ནི། འདི་ལྟར་སྲོག་རྩོལ་རླུང་གི་གནད༔ བརྒྱ་ཕྲག་འདུས་པའི་ཡང་ཟབ་བཅུད༔ སྙིང་མཛོད་སྨུག་པོ་ཀློང་གི་སྒྲོམ༔ སྐུ་གདུང་འབར་བའི་བརྡའ་རིས་ཅན༔ ཞེས་འདི་ལྟར་གདམ་པའི་མན་ངག་འདི་ནི་སྲོག་དང་རྩོལ་བའི་རླུང་གི་གནད་གྱི་ལམ་བརྒྱ་ཕྲག་གི་སྙིང་པོ་ཐམས་ཅད་འདུས་པའི་ཡང་ཟབ་ཀྱི་བཅུད་ཡིན། གཏེར་ཁ་གསར་རྙིང་མང་པོ་ནས་སྲོག་རྩོལ་གྱི་རླུང་གི་གནད་འདི་བཤད་པ་མང་པོ་ཡོད་དེ། ཐམས་ཅད་ཀྱི་བཅུད་འདི་ལ་འདུས། འདི་བརྡ་ཕྲན་ཕལ་བ་དང་མི་འདྲ་བ་ཡིན་པས་ན་སྙིང་མཛོད་སྨུག་པོ་ཀློང་གི་སྒྲོམ། སྐུ་གདུང་འབར་བའི་བརྡའ་རིས་ཅན་ཞེས་སྙིང་པོའི་ཡང་ཞེན་ཀྱི་བརྡ་རིས་ཅན་ཡིན་གསུངས་པ་རེད། མཁའ་འགྲོའི་ཐུགས་གསང་ནམ་མཁའ་མཛོད༔ གཏེར་བཅུད་འདུས་པའི་ཕོ་བྲང་ནས༔ བརྡ་ཚིག་རྡོ་རྗེའི་དབྱིངས་སུ་བསྒྱུར༔ ཞེས་གཏེར་བདག་ཡེ་ཤེས་ཀྱི་མཁའ་འགྲོའི་ཐུགས་གསང་། ཟད་མེད་ནམ་མཁའ་མཛོད་ཀྱི་གཏེར་བཅུད་འདུས་པའི་ཕོ་བྲང་གང་ཡིན་པ་དེ་ནས་སྤྱན་དྲངས་ཏེ། ཁོང་གིས་བརྡ་ཚིག་རྡོ་རྗེའི་དབྱངས་སུ་བསྒྱུར་ནས་གོ་བར་བྱས་པ་ཡིན་གསུངས་པ་རེད། སྐལ་ལྡན་འགའ་ཡི་སྤྱོད་ཡུལ་ལས༔ གཞན་དུ་མ་ཡིན་དམ་ཚིག་རྒྱ༔ སྙིང་འདྲ་གཅིག་ལས་ཤོར་ར་རེ༔ ཞེས་སྐལ་ལྡན་འགའ་ཡི་སྤྱོད་ཡུལ་མ་གཏོགས་ཐམས་ཅད་ཀྱི་སྤྱོད་ཡུལ་མིན། གཞན་སྣོད་ཡིན་མིན་གཉིས་ཀྱི་སྤྱོད་ཡུལ་མ་ཡིན་པས་དམ་ཚིག་གི་རྒྱ་གཅིག་གིས་མི་ཚད་རིམ་པ་མང་པོས་མནན་ཏེ་སྙིང་འདྲ་གཅིག་ལས་ཤོར་ར་རེ་ཞེས། སྙིང་དང་འདྲ་བའི་སྐལ་ལྡན་གྱི་བུ་མཆོག་གཅིག་ལས་གཉིས་པར་ཤོར་ར་རེ། ཤོར་འགྲོ་ཉེན་ཆེའོ་ཞེས་འགག་མཛད་པ་རེད། ཡང་བསྐྱར་ནན་གྱིས་མནའ་ཐོ་ཡིས་བགག་སྟེ། འདི་དང་རྫོགས་ཆེན་མ་བུ་གསུམ༔ ཉམས་སུ་བླངས་ནས་མ་གྲོལ་ན༔ པདྨས་བསླུས་སོ་ཕྱི་རབས་རྣམས༔ ཞེས་འདི་དང་རྫོགས་ཆེན་མ་བུ་གཉིས་ཏེ་གསུམ་པོ་གསུངས་པ། འདི་བུ་ལྟ་བུ་ཡིན་པར་ཆག་བཞག་ན་རྫོགས་ཆེན་ཁྲེགས་ཆོད་ཐོད་རྒལ་གཉིས་མ་ལྟ་བུ་ཡིན་ལ། འདི་དག་སྔོན་རྗེས་ཀྱི་རིམ་པ་ལྟར་དུ་རྫོགས་ཆེན་མ་བུ་གསུམ་ཞེས་པར་འགྲེལ་ཆོག ཉམས་སུ་བླངས་ནས་མ་གྲོལ་ན་བདག་ཉིད་པདྨ་འབྱུང་གནས་ཁོང་གིས་བསླུས་པ་ཡིན་ཕྱི་རབས་ཀྱི་རྗེས་འཇུག་རྣམས་དེ་བས་ཡིད་ཆེས་པར་གྱིས་གསུངས་པ་རེད། འདིས་ཀྱང་རྫོགས་རིམ་ཀུན་གྱི་མཐར་ཐུག་གི་སྐྱེལ་སོ་དེ་རྫོགས་པ་ཆེན་པོ་ལ་ཐུག་པ་གོ་ཐུབ་པ་ཡིན་ནོ། །ལས་འཕྲོ་ཅན་གྱི་དཔལ་དུ་ཤོག༔ ཅེས་རྫོགས་ཆེན་བརྒྱུད་པ་དགུ་ལྡན་གྱི་ནང་གི་ཤོག་སེར་ཚིག་གི་རྒྱ། ལས་འཕྲོ་གཏེར་གྱི་རྒྱ་ཡི་རྣམ་པ་དང་བཅས་ཏེ། སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ དཔལ་སྔགས་ཀྱི་སྲུང་མས་དམ་ཉམས་བཀའ་རྐུན་ལོག་སྲེད་ཅན་གྱི་ལག་ཏུ་མ་བཏང་ཞིག༔ གལ་ཏེ་བཏང་ན་རཀྐན༔སྟེ། དམྱལ་མེ་བཟོད་དཀའ་ཞེས། དམྱལ་བར་སྐྱེ་བ་རེད་ཅེས་དམྱལ་མེས་བཟོད་དཀའི་ཐ་ཚིག་གིས་རྫོགས་པར་བྱས་པ་ཡིན་ནོ། །དེ་ནི་ཆོས་ཚན་གསུམ་པ་ཡིན།

༼སྭཱ༽ ཆོས་ཚན་བཞི་པ་གཏུམ་མོའི་འབར་འཛག་ཡིག་ཆུང་།

༃ ཀློང་ཆེན་སྙིང་གི་ཐིག་ལེ་ལས་གཏུམ་མོའི་འབར་འཛག་ཡིག་ཆུང་བཞུགས།

འབར་འཛག་སྙན་བརྒྱུད་ཞལ་ཤེས་ལ།

དང་པོ་རྩ་གནས་བྱིན་བརླབ་ནི། རྩ་དབུ་མ་སྟོང་གསལ་གྱི་ཡར་སྣེ་རྒྱ་སྐར་ཁ་ཕྱེ་བ་ལྟ་བུའི་ནང་ཀུན་བཟང་ཡབ་ཡུམ་མགྲིན་པ་ཡན་ཆད་ཐོན་པ་ནས་མས་རིམ་རྩ་བའི་བླ་མའི་བར་བརྒྱུད་པའི་གསོལ་འདེབས་ནང་བཞིན་ཐོ་བརྩེགས་སུ་གསལ། རྩ་དབུ་མ་ཡེ་ཤེས་ཀྱི་རྩ་གོང་ནས་ཞུས་པ་ལྟ་བུའི་སྟོང་གསལ་འོད་ཀྱི་རྣམ་པ་ཅན་གྱི་ཡར་སྣེ་སྤྱི་བོའི་རྒྱ་མཐོང་གི་རྒྱ་སྐར་ཁ་ཕྱེ་བ་ལྟ་བུའི་ནང་ན། ཐམས་ཅད་ཀྱི་ཐོག་མར་ཀུན་ཏུ་བཟང་པོ་ཡུམ་ཀུན་ཏུ་བཟང་མོ་སྐུ་མདོག་དཀར་མོ་ཅན་དང་འཁྲིལ་བའི་ཀུན་བཟང་ཡབ་ཡུམ་གྱི་སྐུའི་མགྲིན་པ་ཡན་ཆད་རྒྱ་མཐོང་གི་ཁར་ཐོན་པ་ཙམ་ནས། མས་རིམ་བཞིན་དུ་དེའི་འོག་ཏུ་རིག་འཛིན་བརྒྱུད་པ་ནས་རང་གི་རྩ་བའི་བླ་མའི་བར་བརྒྱུད་པའི་གསོལ་འདེབས་ནང་བཞིན་དུ། ཐོ་བརྩེགས་སུ་གཅིག་གི་གདན་ཁྲི་ལ་གཅིག་གི་དབུ་མ་རེག་ཙམ་བརྩེགས་མར་གསལ་བཞིན། དག་པ་རབ་འབྱམས་དབུ་མའི་གྲོང་ཁྱེར་ན། །སེམས་ཀྱི་རྡོ་རྗེ་ཆོས་སྐུ་ངོ་བོ་ཉིད། །ཅེས་པ་ལ་སོགས་པའི་གསོལ་འདེབས་མོས་གུས་དྲག་པོ་བྱས་རྗེས་བླ་མ་རྣམས་རིམ་གྱིས་འོད་དུ་ཞུ་ཐིག་ལེ་དམར་པོ་གཅིག་ཏུ་གྱུར་པའི་ནང་ཁོངས་ཨ་ཤད་ཀྱི་རྣམ་པ་གསལ་ཙམ་དང་། སྤྱི་བོར་ཧཾ་ཡིག་མགོ་གྱེན་བསྟན་བསྒོམ། ཞེས་གསུངས་ན། གསོལ་འདེབས་དང་དད་པ་ཡིས་བ་སྤུ་གཡོ་བའི་མོས་གུས་དྲག་པོ་ཞིག་ཐུན་མོང་མ་ཡིན་པ་ཞིག་བྱས་པའི་རྗེས་སུ། རང་གི་མོས་གུས་ཀྱི་སྟོབས་ཀྱིས་བླ་མའི་ཐུགས་རྗེ་ཞུགས་ནས་འོད་དུ་ཞུ་སྟེ་ཐིག་ལེ་དམར་པོ་ཞིག་ཏུ་གྱུར་པའི་ཐིག་ལེ་དེའི་ནང་ཁོངས་ཨ་ཤད་ཀྱི་རྣམ་པ་གསལ་ཙམ་དང་། གོང་ནས་ཞུས་པ་ལྟར་དུ་ཨ་འདི་ལ། ཨ་གཏུམ་ཟེར་བ་ཞིག་དང་། ཨ་ཐུང་ཟེར་བ་ཞིག ཨ་ཤད་ཟེར་བ་ཞིག་བཅས་གསུམ་གྱི་དབྱེ་བ་གསུངས་ཡོད་ནི་རེད། ཨ་གཏུམ་ཞེས་པ་ཨ་ཡིག་ཆ་ཚང་བརྒྱ་བྱིན་གྱི་མིག་གིས་བརྒྱན་པ་དེ་ལ་གསུངས་པ་དང་། ཨ་ཐུང་ནི་ཨ་ཡིག་གི་ཁོག་སྨད་གྲུ་གསུམ་གྱེན་བསྟན་ལ་གསུངས་པ་དང་། ཨ་ཤད་ཅེས་པ་ཨའི་མཐའ་མའི་ཤད་ཀྱི་རྣམ་པ། དེ་ཡང་འགོ་ཐུར་བསྟན་རྩེ་མོ་རྣོ་ས་གྱེན་བསྟན་དེ་འདྲ་ཞིག་ལ་གསུངས་པ་ཡིན། སྤྱི་བོར་ཧཾ་ཡིག་དང་པོའི་སྐབས་སུ་མགོ་གྱེན་བསྟན་ལ་བསྒོམ། རོ་རྐྱང་གཉིས་ནས་རླུང་རྔུབས་ཕྲུ་མ་ཕུས་བརྒྱངས་པ་བཞིན་དུ་དབུ་མའི་མས་སྣར་ཞུགས། རོ་མ་དང་རྐྱང་མ་གཉིས་ནས་རླུང་རྔུབས་ཏེ་རྩ་རོ་རྐྱང་གཉིས་ཀ་ཕྲུ་མ་ཕུས་བརྒྱངས་པའམ་རྒྱུ་སྟོང་དབུགས་ཀྱིས་བརྒྱངས་པ་ལྟར་དུ་རླུང་དབུ་མའི་མས་སྣར་སུམ་མདོ་ཆ་ཡིག་གི་རྣམ་པ་ལྟ་བུ་ནས། ལྟེ་འོག་སོར་བཞིའི་མཚམས་ཀྱི་རྩ་དབུ་རྐྱང་རོ་གསུམ་འབྲེལ་མཚམས་ཀྱི་ཡི་གེ་ཆ་ཡིག་གི་འཕོང་ལྟ་བུ་ཞིག་ཡིན་པ་གོང་ནས་ཀྱང་ཞུས་པ་ཡིན། རོ་རྐྱང་གཉིས་ཀྱི་ལམ་དེར་བརྒྱུད་ནས་རླུང་དབུ་མའི་མས་སྣ་ནས་ཞུགས་ཏེ་ཐིག་དམར་ཨ་ཤད་ཅན་ལ་ཕོག་པས་བྱིན་རླབས་ཡེ་ཤེས་ཀྱི་མེ་ལྕེ་ལྷབ་ཀྱིས་འབར། དེ་ཡང་མཚན་ཉིད་བཞི་ལྡན་ཞིག་དགོས་པ་སྟེ། མེའི་ངོ་བོ་བདེ་བ་ཡི་གཅིག རེག་བྱ་ཚ་བ་ཡི་གཉིས། རྣམ་པ་གསལ་བ་ཡི་གསུམ། རྩེ་མོ་ཤེས་རབ་ཀྱི་རང་བཞིན་རྣོ་ལ་འཁྱུག་པ་སྟེ། དེ་འདྲའི་མཚན་ཉིད་བཞི་ལྡན་དུ་འབར་བས་གནས་ཚུལ་དང་མཐུན་པའི་རྩ་ནང་ཐམས་ཅད་དཔའ་པོ་མཁའ་འགྲོའི་གྲོང་ཁྱེར་དུ་ཁྱབ་པའི་རྩ་ནང་ཐམས་ཅད་དུ་ཡེ་ཤེས་ཀྱི་མེ་ལྕེས་ཁྱབ། འདིའི་སྐབས་སུ་རླུང་གི་ཕོ་སྐོར་ཅུང་ཟད་བྱ་གསུངས་རྒྱུ་དེ་དམིགས་བསལ་གྱི་ཞལ་ཤེས་རེད། རིམ་བཞིན་ལྟེ་བ་སྤྲུལ་བའི་འཁོར་ལོ་ནས་སྤྱི་བོ་བདེ་ཆེན་གྱི་འཁོར་ལོའི་བར་གྱི་རྩ་གཙོ་བོ་གསུམ་དང་། རྩ་འདབ་ཐམས་ཅད་དུ་ཞུགས་གསུངས་ནི་རེད། ལྟེ་བ་སྤྲུལ་བའི་འཁོར་ལོ་རྩ་འདབས་དྲུག་ཅུ་རེ་གཉིས་ཡིན། སྙིང་ཀ་ཆོས་ཀྱི་འཁོར་ལོ་རྩ་འདབས་བརྒྱད་དེ་སྤྱི་འགྲོས་ལྟར་དུ་རེད། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབས་བཅུ་དྲུག སྤྱི་བོ་བདེ་ཆེན་གྱི་འཁོར་ལོ་རྩ་འདབས་སོ་གཉིས་བཅས་པ་བརྒྱུད་ནས། ལུས་རྡོ་རྗེ་ཕུང་པོའི་གྲོང་ཁྱེར་གྱི་རྩ་ཕྲན་སྟོང་ཕྲག་བདུན་ཅུ་རྩ་གཉིས་ལ་སོགས་པར་ཁྱབ་པ་དེ་འདྲ་ཡིན་ནི་རེད། སྤྱི་བོའི་ཧཾ་ཡབ་ཧེ་རུ་ཀའི་ངོ་བོ་དང་། ལྟེ་འོག་གི་མེ་ཉིད་ཡུམ་གྱི་ངོ་བོར་གྱུར་པ་ཡབ་ཡུམ་གཉིས་རེག་པ་འཕྲོད་པས་ཞུ་བདེའི་ཉམས་རྒྱས། ཧཾ་ཡིག་ལས་འོད་ཟེར་མུ་མཐའ་མེད་པར་འཕྲོས། ཕྱོགས་བཅུའི་རྒྱལ་བ་སྲས་དང་བཅས་པ་མཆོད། ཐུགས་བདེ་སྟོང་གི་རོས་ཚིམ། མཁྱེན་བརྩེ་ནུས་གསུམ་གྱི་ཡོན་ཏན་དང་བྱིན་རླབས་དངོས་གྲུབ་ཐམས་ཅད་བསྡུས། ཧཾ་ཡིག་ལས་འོད་ཟེར་ཁ་དོག་སྣ་ཚོགས་པ་ཞིག་མཐའ་ཡས་མུ་མེད་པར་འཕྲོས། ཕྱོགས་བཅུ་དུས་གསུམ་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་མཆོད། རྒྱལ་བ་སྲས་དང་བཅས་པ་དེ་དག་གི་ཐུགས་བདེ་སྟོང་ཟག་མེད་ཀྱི་བདེ་བའི་རོས་ཚིམ་པས་ཐུགས་མཁྱེན་པའི་ཡེ་ཤེས། བརྩེ་བའི་ཐུགས་རྗེ། སྐྱོབ་པའི་ནུས་མཐུ་གསུམ་གྱི་ཡོན་ཏན་དང་བྱིན་རླབས་དངོས་གྲུབ་ཐམས་ཅད་ཚུར་ལ་བསྡུས་ཏེ། ཡང་འཕྲོས་འབྱུང་བ་ལྔའི་དྭངས་བཅུད་དང་སྣོད་བཅུད་ཀྱི་བཀྲག་མདངས་གཟི་བྱིན་ཀྱང་ལྷན་ཅིག་བསྡུས་ཏེ་གསུངས་ན། ཡང་འོད་ཟེར་དེ་འཕྲོས་ཏེ་འབྱུང་བ་ལྔ་ཡི་དྭངས་བཅུད་བརྟན་པ་སྣོད། གཡོ་བ་བཅུད་ཀྱི་བཀྲག་མདངས་གཟི་བྱིན་ཀྱང་ལྷན་ཅིག་ལ་བསྡུས་ཏེ་ཧཾ་ཡིག་ལ་ཐིམ་པའི་རྐྱེན་གྱིས་ཧཾ་ཡིག་མགོ་བོ་གྱེན་ལ་བསྟན་པ་དེ་མགོ་མཇུག་ཧྲིལ་གྱིས་ལྡོག་ནས། ཞུ་བདེ་འབར་འཛག་གི་ཉམས་རྒྱས་གསུངས་ན། ཞི་བའི་བདེ་བ་འབར་འཛག་གི་ཉམས་རབ་ཏུ་རྒྱས་ཏེ། ད་འདི་ཡས་བབས་ཀྱི་དགའ་བ་བཞི་དང་སྦྲགས་ནས་དབང་བཞི་ལེན་པའི་དམིགས་པ་ཞིག་རེད། འདི་ཚོ་ཐབས་གྲོལ་གྱི་ལམ་གང་གི་སྐབས་ཡིན་ནའང་མེད་མི་རུང་བའི་རྫོགས་རིམ་གལ་ཆེན་ཡིན་ནི་རེད། དེ་ནས་གོང་གི་འབར་འཛག་དྲོད་ཀྱི་རྣལ་འབྱོར་དང་འདྲ་བར་སྤྱོ་བོ་བདེ་ཆེན་གྱི་འཁོར་ལོ་ན་སངས་རྒྱས་རྣམ་པར་སྣང་མཛད་དང་། ཡུམ་ནམ་མཁའ་དབྱིངས་ཕྱུག་མ་ལ་སོགས་ཏེ་བུདྷ་རིགས་ཀྱི་དཔའ་བོ་དང་རྣལ་འབྱོར་མའི་ཚོགས་ཏིལ་གྱི་གང་བུ་ཁ་བྱེ་བ་ལྟར་བཞུགས་པ་ལ་བདེ་སྟོང་བདུད་རྩིའི་མཆོད་པ་ཕུལ། ཚོགས་རྫོགས། སྒྲིབ་པ་དག དམ་ཚིག་ཉམས་ཆག་བསྐངས། དབང་བཞིའི་ནང་གི་བུམ་པའི་དབང་ཐོབ། དགའ་བ་བཞིའི་ཡེ་ཤེས་རྒྱུད་ལ་སྐྱེས་པར་བསམ། དགའ་བ་བཞི་ཞེས་པ་དགའ་བ། མཆོག་དགའ། ཁྱད་པར་གྱི་དགའ་བ། ལྷན་ཅིག་སྐྱེས་དགའ་སྟེ་བཞི་བོ་རེད། དགའ་བའི་ཡེ་ཤེས་རྒྱུད་ལ་སྐྱེས་པར་བསམ་གསུངས་ནི་རེད། ཤར་ཕྱོགས་ཀྱི་སངས་རྒྱས་རྣམ་པར་སྣང་མཛད་ལ་ཞལ་བཞེས་གནང་རྒྱུ་དེ་ཀུན་མཁྱེན་ཀློང་ཆེན་པས་ཐུན་མིན་གྱི་རང་ལུགས་ཀྱང་རེད། ཡང་མགྲིན་པར་བབས། སངས་རྒྱས་སྣང་བ་མཐའ་ཡས་དང་། ཡུམ་གོས་དཀར་མོ་ལ་སོགས་ཏེ་པདྨའི་རིགས་ཀྱི་དཔའ་བོ་དང་རྣལ་འབྱོར་མ་ལ་མཆོད་པ་འབུལ་ཚུལ་སྔར་དང་འདྲ། གསུངས་ནི་རེད། བདེ་སྟོང་གི་བདུད་རྩིའི་མཆོད་པ་འབུལ། ཚོགས་རྫོགས། སྒྲིབ་པ་དག དམ་ཚིག་ཉམས་ཆག་བསྐངས་ནས། དབང་བཞིའི་ནང་ནས་གསང་དབང་ཐོབ་པའི་སྐབས་སུ། དགའ་བ་བཞིའི་ནང་ནས་མཆོག་དགའི་ཡེ་ཤེས་རྒྱུད་ལ་སྐྱེས་པར་བསམ། ཡང་སྙིང་ཀར་བབས། ཡེ་ཤེས་ཀྱི་བདུད་རྩི་དེ་ཉིད་སྙིང་ཀར་བབས། སངས་རྒྱས་མི་བསྐྱོད་པ་དང་ཡུམ་མཱ་མ་ཀཱི་ལ་སོགས་རྡོ་རྗེའི་རིགས་ཀྱི་དཔའ་བོ་རྣལ་འབྱོར་མ་ལ་སོགས། མཆོད་ཚུལ་སྔར་དང་འདྲ། ཡང་བདེ་སྟོང་བདུད་རྩིའི་མཆོད་པ་ཕུལ་ནས། ཚོགས་རྫོགས་སྒྲིབ་པ་དག དམ་ཚིག་ཉམས་ཆག་བསྐངས། དབང་བཞིའི་ནང་གི་ཤེས་རབ་ཡེ་ཤེས་ཀྱི་དབང་ཐོབ། དགའ་བཞིའི་ནང་གི་ཁྱད་པར་གྱི་དགའ་བའི་ཡེ་ཤེས་རྒྱུད་ལ་སྐྱེས་པར་བསམ། ཡང་ལྟེ་བར་བབས། རིན་ཆེན་འབྱུང་ལྡན་དང་། ཡུམ་སངས་རྒྱས་སྤྱན་མ་ལ་སོགས་ཏེ་རིན་ཆེན་རིགས་ཀྱི་དཔའ་བོ་དང་རྣལ་འབྱོར་མ། མཆོད་ཚུལ་གོང་དང་འདྲ། དབང་བཞི་ཐོབ། ལྷན་ཅིག་སྐྱེས་དགའི་ཡེ་ཤེས་རྒྱུད་ལ་སྐྱེས་བར་བསམ། ཡང་གསང་གནས་སུ་བབས། སངས་རྒྱས་དོན་ཡོད་གྲུབ་པ་དང་། ཡུམ་དམ་ཚིག་སྒྲོལ་མ་ལ་སོགས་ཏེ་ལས་ཀྱི་རིགས་ཀྱི་དཔའ་བོ་དང་རྣལ་འབྱོར་མའི་ཚོགས་མཆོད། ཚོགས་རྫོགས། སྒྲིབ་པ་དག དམ་ཚིག་ཉམས་ཆག་བསྐངས། དེ་ནས་འདིའི་སྐབས་རིག་པའི་རྩལ་དབང་ཐོབ་གསུངས་ནི་རེད། ཀུན་རྟོག་དང་ལས་རླུང་གི་གཡོ་གདངས་མར་ལ་ཞུ་སོང་དུས་དེ་དང་མཉམ་དུ་འོད་གསལ་གྱི་ནུས་པ་ཡར་ལ་ཇེ་ཆེར་ཡོང་རྒྱུ་ཆོས་ཉིད་ཡིན་ནི་རེད། རིག་པའི་རྩལ་དབང་གི་ནང་གསལ་འབྲས་ཆོས་ཀྱི་ཡོན་ཏན་ད་ལྟ་ནས་རང་ལ་རང་ཆས་སུ་བཞུགས་པ་དེ། གཏན་ལ་དེ་ཉིད་ཕབས་ནི་ཡིན་ན། དེས་ཟབ་གནད་ངོ་ཤེས་བཞིན་པར་འདིའི་དམིགས་གནད་ལམ་དུ་ལྷོང་ནུས་ན། དེ་སྙིང་ཀ་གཞོན་ནུ་བུམ་སྐུའི་སྟེང་ན་དབྱིངས་ཐིག་རིག་གསུམ་གྱི་བསྡུས་པའི་རྡོ་རྗེ་གསུམ་གྱི་བསྐྱེད་བྱེད་ཀྱི་ནུས་པ་གཞི་ལ་ཡོད་རྒྱུ་དེ་མངོན་དུ་གྱུར་ནས། མི་ཤིགས་འོད་ལྔའི་དྭངས་མའི་ལང་ཚོ་ལྷག་པར་བཀྲག་མདངས་འབར་བར་བྱེད་ཀྱིན་ཡོད། དེའི་ཕྱིར་ན་རྫོགས་ཆེན་མ་བུ་དང་འདིར་འབྲེལ་བ། བླ་མེད་ཐུན་མོང་གི་རྫོགས་རིམ་ལས་ཁྱད་པར་འཕགས་པའི་འཕགས་ཆོས་བསྟན་ནི་རེད། བསམ་གྱིས་མི་ཁྱབ་པའི་ཡེ་ཤེས་རྒྱུད་ལ་སྐྱེས་པར་བསམ། ཞེས་པ་སྟེ། སོ་སོའི་སྐྱེ་བོའི་སེམས་དེ་རྟོག་པའི་ཡུལ་ལས་འདས་སོང་བའི་བསམ་གྱིས་མི་ཁྱབ་པའི་བརྗོད་པ་དང་བྲལ་བའི་ཡེ་ཤེས་ཆེན་པོ་དེ་ཉིད་རྒྱུད་ལ་སྐྱེས་པར་བསམ། དམིགས་པའི་གནད་འདི་ཁོང་དུ་ཆུད་ན་ཞེས། གོང་དུ་བཤད་མ་ཐག་པའི་དམིགས་པའི་གནད་འདི་དག་ཁོང་དུ་ཆུད་ནས་ལག་ལེན་ཡོང་ནས་ཉམས་སུ་ལོན་ནི་ཡིན་ན། ནང་དང་གསང་བའི་སྦྱིན་སྲེག་ཀྱང་འདི་ཡིན། ཚོགས་འཁོར་ཀྱང་འདི་ཡིན། བསོད་ནམས་བསག་ཐབས་ཀྱང་འདི་ལས་ཟབ་པ་མེད། དེ་ལྟར་ན་དམིགས་བཅས་བསོད་ནམས་ཀྱི་ཚོགས་ལ་བརྟེན་ཏེ་དམིགས་མེད་ཡེ་ཤེས་ཀྱི་ཚོགས་རང་ཤུགས་ཀྱིས་རྫོགས་ནི་ཡིན་པས་ན། དོན་གྱི་ལྷན་ཅིག་སྐྱེས་པའི་ཡེ་ཤེས་མཐོང་བའི་རྒྱུར་འགྱུར་བས། དོན་དམ་པར་དཀྱིལ་འཁོར་དུ་འཇུག་པ་དང་ཞེས། དོན་དམ་པར་རམ་དོན་གྱིས་བཤད་སོང་ན་དཀྱིལ་འཁོར་དུ་འཇུག་པ་དང་དབང་ལེན་པ་ཡང་འདི་ཡིན། གསང་སྔགས་ཀྱི་དེ་ཉིད་བཅུ་བོ་དེ་འདི་ལ་མ་ཚང་པ་མེད་གསུངས་ནི་རེད། འདི་ལ་མན་ངག་གནད་ཀྱི་ཞལ་ཤེས་སྦས་དོན་ཡང་འབྱེད་ཀྱི་འཇུག་གི་ཚུར་ལ་དམིགས་པ་ཁྱད་པར་ཅན་འཛིན་ལུགས། དེ་ལས་ཧཾ་ཡིག་དེ་ཉིད་བླ་མ་སངས་རྒྱས་ཐམས་ཅད་འདུས་པར་ཤེས་པའི་མོས་གུས་དང་། གཏུམ་མོའི་མེ་དེ་ཉིད་ཀྱང་སངས་རྒྱས་ཐམས་ཅད་ཀྱི་བྱིན་རླབས་འདུས་པའི་ཕྲིན་ལས་སུ་ཤེས་དགོས་པ་དེ་གནད་ཡིན་གསུངས་ནི་རེད། རང་གར་མེ་འབར་བ་ཞིག་སྒོམ་པས་མི་ཡོང་གསུངས་ནི་རེད། དེ་ཐུན་མོང་ལས་ཁྱད་པར་དུ་འཕགས་པའི། ཐུན་མིན་རྫོགས་ཆེན་ལམ་གྱི་ཆ་ལག་དགོས་ཆོས་གནད་ཀྱི་ཆེ་བ་འདི་དམིགས་བསལ་གྱིས་བསྟན་ནི་རེད། དེ་གསང་སྔགས་ལམ་མྱུར་བ་དང་ཐབས་ཟབ་པའི་ངེས་ཤེས་རྒྱུད་ལ་བརྟན་ཅིང་ཐེ་ཚོམ་མེད་པ་རྣམས་ལ་དངོས་གྲུབ་མྱུར་བ་སྔགས་ཀྱི་ཁྱད་ཆོས་ཡིན་ནོ། །དེ་མིན་ན་དངོས་གྲུབ་འགྲུབ་རྒྱུ་མེད་གསུངས་ནི་རེད། དད་པ་མེད་ཅིང་ཐེ་ཚོམ་བྱས་ན་དངོས་གྲུབ་མི་འབྱུང་བ་ཤུགས་བསྟན་ཡིན་ནི་རེད། རྗེས་ལ་མེ་དང་དབུ་མ་ཆེ་བསྐྱེད་ཆུང་བསྐྱེད་རེས་མོས་ཡང་ཡང་བྱ་བས་ཆེན་པོར་གྱུར་པའི་ཚེ་གསུངས་ནི་རེད། མེ་དང་དབུ་མའི་དམིགས་པ་དེ་ཚོ་རྩལ་སྦྱངས་ནས་མཚམས་རེར་རྒྱ་ཆེན་པོ་བསྒོམ་ཆོག་ནི་རེད། དབུ་མའི་ཞེས་ཡུལ་ཁམས་སྟོང་གསུམ་གང་བ། མཚམས་རེར་ཤིན་ཏུ་ཕྲ་བ་རྣལ་འབྱོར་དམིགས་པས་བསྒྱུར་ནས་ཆེན་པོ་སྒོམ་པའི་ཚེ་སྟོང་ཁམས་ཐམས་ཅད་མེས་གང་སྟེ་བར་ཆད་གདོན་བགེགས་རྣམ་རྟོག་བག་ཆགས་ལས་ཉོན་དང་བཅས་པ་གཞོལ་ཐུལ་གྱིས་ཚིག་པར་བསམ། ཆུང་ཆུང་ལ་ཕྲ་མོ་བྱས་ནས་བསྒོམ་དུས། རེས་འགའ་དབུ་མ་མེ་དང་བཅས་པ་ཇེ་ཆུང་རྟ་རྔ་བརྒྱར་གཤགས་པའི་ཆ་ཙམ་ཇེ་ཕྲར་བསྒོམ་ལ་རིག་པའི་རྩལ་སྦྱང་། མཐར་ཐམས་ཅད་མཚན་མེད་ཀྱི་རྫོགས་རིམ། མི་དམིགས་པ་རྫོགས་རིམ་ཐམས་ཅད་ཀྱི་རྒྱལ་པོ་རྫོགས་ཆེན་གྱི་ལྟ་བའི་ངང་བསྐྱངས་བ་དེའི་ཐོག་ཏུ་བསྡུས་ཏེ་དགེ་བ་བསྔོ་བར་བྱའོ།། །།

༼ཧཱ༽ ཆོས་ཚན་ལྔ་བ་རིག་འཛིན་འཁྲུལ་འཁོར་སྦས་དོན་གསལ་བ།

ཀློང་ཆེན་སྙིང་གི་ཐིག་ལེ་ལས་རིག་འཛིན་འཁྲུལ་འཁོར་སྦས་དོན་གསལ་བ་བཞུགས།།

རྡོ་རྗེ་ཕུང་པོའི་གྲོང་ཁྱེར་དང་འབྲེལ་བའི་གདན་གསུམ་ལྷའི་འཁོར་ལོ་ལ་ཕྱག་འཚལ་ལོ། །གདན་གསུམ་ཚང་བའི་དཀྱིལ་འཁོར་ཞེས་པ་དེ་གོང་ལྟར་དུ། རྡོ་རྗེའི་ལུས་ཕུང་ཁམས་སྐྱེ་མཆེད་ཀྱི་བདག་ཉིད་འདི་འཁྲུལ་ངོར་མ་བརྟག་གདོས་བཅས་ཀྱི་རྣམ་པར་སྣང་བ་ཡིན་ན་ཡང་། དོན་དུ་གནས་ཡུལ་ཉེར་བཞིའི་དཔའ་བོ་མཁའ་འགྲོའི་གྲོང་ཁྱེར། དེ་ཅི་ལྟར་ཡིན་ན་ཕུང་ཁམས་གཤེགས་པ་གཤེགས་མ། དབང་ཡུལ་སེམས་དཔའ་སེམས་མ། ཡན་ལག་ཁྲོ་བོ་ཁྲོ་མོའི་རང་བཞིན་དུ་གདན་གསུམ་ཞེས་པ། གདན་གཅིག་ཏུ་འཛོམས་པའི་གདན་གསུམ་ལྷའི་འཁོར་ལོ་བརྗོད་བྱའི་དོན་གྱི་དེ་ཉིད་རིག་པའི་ལྟ་བའི་བརྡ་ཕྱག་འཚལ་བ་ཡིན་ནི་རེད། དེ་ལྟ་བུའི་ལྟ་བའི་བརྡ་ཕྱག་འཚལ་བ་སྔོན་དུ་སོང་ནས། ཐབས་གྲོལ་ལམ་གྱི་རིམ་པ་དང་འབྲེལ་བའི་སྦས་དོན་གབ་པའི་གནད་བྱང་། གབ་དོན་གསལ་བར་བྱེད་པའི་མན་ངག འཁྲུལ་འཁོར་བྱེད་རྩོལ་ལག་ལེན་གྱི་མན་ངག་རྩལ་འདོན་མཛད་པའི་དགོས་དོན་འདི་ནས་མར་ལ་སྡོམ་གྱིས་བསྟན་ཡོད། མ་བསྒོམ་སངས་རྒྱས་གཅིག་ཤོས་ལས་རྒྱའི་ལམ་གྱི་མཆོག །རྟེན་འབྲེལ་ལུས་ལ་བསྒྲིགས་པས་རྟོགས་པ་སེམས་ལ་འཆར། །འདིའི་མ་བསྒོམ་སངས་རྒྱས་གཅིག་ཤོས་ལས་རྒྱའི་ལམ་གྱི་མཆོག་ཅེས་པ་ནི། འདིའི་ལས་རྒྱ་གསུངས་རྒྱུ་དེ་མཐའ་གཅིག་ཏུ་དངོས་རིགས་ལས་ཀྱི་ཕྱག་རྒྱ་ལ་གོ་མི་དགོས། ཡིད་རིག་ཆོས་ཀྱི་ཕྱག་རྒྱ་དང་། གཏུམ་མོ་དམ་ཚིག་གི་ཕྱག་རྒྱ་བསྒོམ་པས་སྟོང་ཉིད་ཕྱག་རྒྱ་ཆེན་པོའི་བདེ་སྟོང་དབྱེར་མེད་ཀྱི་གྲུབ་མཐར་སྙེག་ཐུབ་ནི་རེད། ཁྱད་པར་དུ་དགའ་བཞིའི་ནང་གི་ཕྱི་མའི་ཡེ་ཤེས་གྱིས་རྩ་ཡི་འགྲོས་དག རླུང་གི་རྒྱུ་བ་ཐིམ། ཐིག་ལེ་འགྲོས་ཡེ་ཤེས་སུ་འཆར་བསྡད་ཏེ་ཐུགས་རྡོ་རྗེ་ཆོས་སྐུ་འགྲུབ་པའི་རྒྱུ་བྱེད་རྒྱུ་དེ་འདིའི་གནད་ཀྱི་གོ་བ་ཡིན་པས་དེ་འདྲའི་གོ་བ་ལོན་དགོས་ནི་རེད། རིག་འཛིན་འཁྲུལ་འཁོར་ཉེར་བཞིའི་འཁྲུལ་འཁོར་ལ་གོམས་སོང་དུས། ད་ལྟ་རྟེན་འབྲེལ་ལུས་ལ་བསྒྲིག་པ་དེ་མཐར་རྟེན་ལས་ཀྱི་བྱེད་རྩོལ་གྱིས་བརྟེན་པ་སེམས་ཀྱི་སྒྲིབ་པ་བྱང་ནས། ཐབས་ཁྱད་པར་ཅན་ལ་བརྟེན་ཏེ་རྩ་རླུང་ཐིག་ལེའི་འགྲོས་ཐིམ་ནས་རྟོག་པ་ཁྱད་པར་ཅན་རྒྱུད་ལ་འཆར་བར་བྱེད་པ་དེ་སྤྱིར་བསྟན་ནི་རེད། འུ་ཅག་གི་ད་རེས་འཁྲུལ་འཁོར་སྐབས་ལ་ལོ་ལོན་དང་རྐང་ལག་མི་བདེ་ནི་ཚོས་འཁྲུལ་འཁོར་ཨེ་ཕོག་མ་བལྟ། སྐུ་ལུས་ལ་རྡབས་སྐྱོན་འབྱུང་ཡོང་། འོན་ཀྱང་དེའི་གྲལ་ལ་ཞུགས་ན་བག་ཆགས་བཟང་པོ་འཇོག་རྒྱུའི་ཕན་ཐོགས་འབྱུང་ནི་རེད། ལུས་ཀྱི་འཁྲུལ་འཁོར་གནད་དུ་ཆུན་པ་ཞིག་མ་ནུས་ན་ཡང་རླུང་དང་གཏུམ་མོ་ལ་སྦྱོངས། ཁྱད་པར་དུ་གོང་ནས་གསུངས་རྒྱུའི་ལྔ་བ་བུམ་ཅན་འཛིན་རྒྱུ་འདི་ཚོ་གནད་ཀྱི་དོན་པོ་ལ་ཞོགས་དང་། རྫོགས་ཆེན་དངོས་གཞིའི་ཉམས་ལེན་གྱི་བོགས་འདོན་གྱི་གྲོགས་ཀྱང་ཡིན་ནི་རེད། བྱེ་བྲག་འཁྲུལ་འཁོར་སོ་སོའི་སྡོམ་དགོས་གནད་དང་བཅས་པ་འདི་ནས་མར་ལ་བསྟན་ཡོད། སྲོག་རྩོལ་གནད་དུ་ཚུད་པས་གནས་པའི་རྩ་ཁ་བྱེ། །རླུང་དང་འཁྲུལ་འཁོར་འབྲེལ་བས་རྩ་མདུད་རང་སར་གྲོལ། །ཐེམ་བུའི་མན་ངག་ཤེས་ན་བཀོད་པ་བྱང་སེམས་རྒྱས། །རྡོ་རྗེ་དབའ་རླབས་ལ་བརྟེན་འབྲས་བུའི་དེ་ཉིད་མཐོང་། །གནད་ལས་གནད་དུ་གྱུར་པའི་ཐབས་ཀྱི་གནད་མཆོག་ཡིན། །ཞེས་པས་མདོར་བསྟན་ནས། འདིའི་མན་ངག་ཆིངས་ཀྱིས་བཅིངས་ནས་བཤད་ན། རྟེན་ལུས་ལ་བརྟེན་པ་སེམས་གནས་ཤིང་། ཆོས་ཅན་སེམས་ཀྱི་ཆོས་ཉིད་ཡེ་ཤེས་ཡིན། ལུས་འདི་རྩ་རླུང་ཐིག་ལེའི་རང་བཞིན་ཅན་ཡིན་པས་འདིའི་འཁྲུལ་འཁོར་གྱི་བཤད་པས་གནས་ཤིང་འཁུམ་པའི་རྩ་ཁ་ཕྱེ་ཡོང་བ། རྩ་མདུད་ཐམས་ཅད་རང་སར་གྲོལ་འགྲོ་བ། རྩ་གནས་ཀྱི་བྱང་སེམས་རྒྱས། བྱང་སེམས་ཀྱིས་འཕོ་བ་དག་ནས་འབྲས་བུ་དེ་ཉིད་མཐོང་དགོས། སྲོག་དང་རྩོལ་བ་གཉིས་ཀྱི་རྩ་ཁ་ཕྱེས་སུ་བཅུག རླུང་དང་འཁྲུལ་འཁོར་མ་འབྲེལ་ན་རྩ་རླུང་གི་མྱིང་མེད་པས། དེ་གཉིས་འབྲེལ་བས་ན་རྩ་མདུད་རང་སར་གྲོལ་བ་ཡིན། འོག་ནས་འབྱུང་བས་ཐེམ་བུའི་མན་ངག་དང་རྡོ་རྗེ་རྦ་རླབས་ཚོས་གཏུམ་མོ་དང་འབྲེལ་བའི་བྱང་སེམས་འཕེལ་ཞིང་དག་པའི་བྱེད་ལས་ཀྱིས་ཐར་ལམ་གྱི་ཁྱད་འཕགས་ཀྱིས་ཁྱད་ཆོས་སྡོམ་གྱི་མདོར་བསྟན་ནི་རེད། རྒྱས་པར་བསྟན་ན་འདི་རེད། འདི་ལ་སྔོན་འགྲོ། དངོས་གཞི། རྗེས་གསུམ་ལས། དང་པོ་ནི།

དང་པོ་སྔོན་འགྲོ།

བྱང་ཆུབ་ཏུ་སེམས་བསྐྱེད་པ་སྔོན་དུ་འགྲོ་བས་གསུངས་ནི་རེད། ནམ་མཁའི་མཐའ་མཉམ་ཀྱི་སེམས་ཅན་གྱི་དོན་དུ་སྦས་དོན་ཟབ་མོའི་མན་ངག་ཉམས་སུ་ལེན་པར་བགྱིའོ་སྙམ་པའི་སེམས་བསྐྱེད་པ་སྔོན་དུ་སོང་སྟེ། བླ་མའི་རྣལ་འབྱོར་སྒོམ་ཞེས། རྫོགས་ཆེན་ཉམས་ལེན་གྱི་སྤྱི་འགྲོས་ལྟར་བླ་མའི་རྣལ་འབྱོར་སྒོམ་ཏེ་རྒྱས་བསྡུས་གང་རུང་ལ་མ་ལྟོས་པའི་སྒོ་ནས་ཐུགས་ཡིད་དབྱེར་མེད་བསྲེས། གསོལ་བ་སྙིང་ནས་བཏབ་ལ་ཞེས། གསོལ་བ་སྙིང་ནས་ཅི་ལྟར་འདེབས་དགོས་རེད་ཟེར་ན་སྙིང་རུས་པའི་གཏིང་ནས་གསོལ་བ་ཕུར་ཚུགས་སུ་བཏབ་ལ། སྤང་སྲ་མོ་ལ་བེ་ཕུར་གདབ་ན་ཚུར་ལ་ཕུད་རྒྱུ་མེད་པ་ལྟ་བུ། སྲ་མོ་བརྟན་པོ་ཞིག་བཏབ་ལ། དེ་རིང་གདབ་ཡོད་ན་སང་ཉིན་མེད་ནི་ཅན་པོ་གནང་ཉིན་དེ་བས་ཀྱང་བཏབ་མེད་པ་ཅན་པོ་མ་ཡིན་པར། ལམ་དབང་གི་དབང་བཞི་བླངས་རྗེས་རླུང་བུམ་ཅན་ལ་གནད་དུ་བསྣུན་པའོ། །གསུངས་ནི་རེད། ལམ་དབང་བླངས་བའི་དེ་མ་ཐག་ཏུ་བླ་མའི་ཐུགས་དང་རང་སེམས་དབྱེར་མེད་དུ་བསྲེས་ནས། འཇམ་རླུང་བུམ་པ་ཅན་བཟུང་ནས་མཉམ་པར་བཞག་པ་སྔོན་དུ་འགྲོ་བས། གཉིས་པ་ལ་རྣམ་པ་ཉི་ཤུས་བྱང་ཆུབ་པའི་དོན་གྱིས་རྩ་ཚིག་ཉི་ཤུས་བདག་ཉིད་ཅན་ལ་གསུངས་ནི་རེད། རྩ་ཚིག་ངོ་མ་དེ་ཉི་ཤུའི་བདག་ཉིད་ཅན་ཡིན། དེ་ལ་འབྲེལ་བའི་རྟེན་ལུས་ཀྱི་གེགས་སེལ་དང་། བརྟེན་པ་ཆོས་ཉིད་ཀྱི་གནད་ཁྱད་པར་ཅན་གཅིག་གིས་ལྷག་པའི་དོན་རྡོ་རྗེའི་ཚིག་གིས་འཁྲུལ་འཁོར་ཉེར་བཞིའི་དོན་རྡོ་རྗེ་ཚིག་གིས་བཅིངས་པ་ལྷུག་པར་དགྲོལ་བ་ལ་དཔའ་བོ་མཁའ་འགྲོའི་ཚོགས་ཀྱིས་གནང་བ་སྩལ་དུ་གསོལ། རྣམ་པ་ཉི་ཤུས་བྱང་ཆུབ་པའི་བདག་ཉིད་ལས་རྟེན་ལུས་དང་བརྟེན་པ་ཆོས་ཉིིད་ཀྱི་གནད་ཁྱད་པར་ཅན་གཅིག་གིས་ལྷག་པ་གེགས་སེལ་དབའ་རླབས་གཉིས་ཀ་གཅིག་ཏུ་བསྡམས་པ་དེ་རེད།

༼༡ རྡོ་རྗེ་སྐྱིལ་ཀྲུང་།

རྡོ་རྗེའི་སྐྱིལ་ཀྲུང་ནི། ཉེར་བཞིའི་ནང་གི་དང་པོ་རེད། རྡོ་རྗེ་སྐྱིལ་ཀྲུང་གིས་ལུས་ཀྱི་རྩ་ཕྲན་སྟོང་ཕྲག་བདུན་ཅུ་རྩ་གཉིས་པོ་སྟབས་གཅིག་ཏུ་འཆང་ཞིང་རྩ་ཁམས་ལས་སུ་རུང་བར་བྱེད་ནི་རེད། རྡོ་རྗེ་སྐྱིལ་ཀྲུང་བཅའ་ལུགས་ཅི་ལྟར་དགོས་ནི་རེད་ཟེར་ན། རྣམ་པར་སྣང་མཛད་ཀྱི་ཆོས་བདུན་ཚང་བའི་ངང་ནས་གསུངས་པའི་རྣམ་སྣང་ཆོས་བདུན་ནི། རྐང་པ་རྡོ་རྗེའི་སྐྱིལ་ཀྲུང་། སྒལ་ཚིག་མདའ་ལྟར་དུ་དྲང་པོར་བྱེད་པ། དཔུང་བ་ལྷོད་དེ་བརྒྱངས་པ། ལྕེ་རྩེ་ཡ་རྐན་ལ་སྦྱར་བ། མིག་གིས་མདའ་གང་ལ་བལྟ་བ། མགྲིན་པ་ཨེན་ཙམ་སྒུར་བ་བཅས་རེད། ལག་པ་གཉིས་དམིགས་བསལ་གྱིས་མཐེ་བོང་གཉིས་ནང་དུ་བཀུགས་ཏེ་རྡོ་རྗེ་ཁུ་ཚུར་གཉིས་པུས་མོའི་སྟེང་དུ་བཞག་པའི་འཆུན་བཙལ་ཐོག འཆུན་ཟེར་རྒྱུ་བོ་ཅི་རེད་ཟེར་ན། གྲིམ་བཅའ་ཐོན་པ་ཞིག་ལ་ཟེར་ནི་རེད། ཁུ་ཚུར་བརླ་སྟེང་ནས་གསུངས་ན། ཁུ་ཚུར་གཉིས་ཀ་བརླ་གཉིས་ཀའི་སྟེང་ནས་སྟྭ་ཟུར་ཏེ་ལུས་པོའི་གདོང་ཟུར་ལ་ཉེ་བའི་སོ་སོའི་ཕྱོགས་ལ་བྲད་པ་མཆན་ལ་བསྐོར་ཏེ་གསུངས་ན། བྲད་ཅིང་བྱུག་པ་སླར་མཆན་ལ་བསྐོར་ཏེ་དེའི་འཕྲོར་གྲུ་མོ་གྱེན་ལ་བཏེག་པ་ལན་གསུམ་གྱི་མཐར། ཁུ་ཚུར་བསྐོར་རྒྱངས་དང་ཁུ་ཚུར་ནང་སྐོར་གྱི་སྐོར་རྒྱངས་དང་བཅས་པའི་གྲུ་མོ་བགྲད་སྡིགས་མཛུབ་ཕྱིར་བསྟན་གསུངས་པ་རེད། གྲུ་མོ་བགྲད་སྡིགས་མཛུབ་གྱི་སྒོ་ནས་མཛུབ་མོ་ཕྱིར་བསྟན་བསྣོལ་བ་དེ་འདྲའི་མྱུར་སྟབས་ཀྱི་སྤྱི་བོར་འཇོག་པ་དང་། དེ་འཕྲལ་དུ་ཡང་མཁྱུད་ཚུལ་དང་བཅས་པའི་སེ་གོལ་གཏོགས་པ་དེ་འདྲའི་ལན་གསུམ་བསྟུད་མར་བྱེད་དགོས་གསུངས་ནི་རེད། རྡོ་རྗེའི་སྐྱིལ་ཀྲུང་གི་མིང་གིས་མཚོན་པའི་སྐྱིལ་ཀྲུང་གཙོ་གནད་ལ་བཟུང་བའི་འཁྲུལ་འཁོར་དང་པོ་རེད། འདིས་ཡན་ལག་གི་ནད་སེལ་དེ་འདྲ་གསུངས་ཡོད།

༼༢ སྐུ་མཉེ།

གཉིས་པ་སྐུ་མཉེ་ཡིན་ནི་རེད། སྐུ་མཉེ་ཡིས་ཅི་ཞིག་ལ་ཕན་ཐོགས་ཡོད་ནི་རེད་ཟེར་ན། ལུས་ལ་བདེ་དྲོད་རང་བཞིན་གྱིས་འཕེལ་ཞིང་ལུས་རྒྱས་ཁམས་བརྟས་པར་བྱེད་ནི་རེད། དེ་ཡང་སྐུ་མཉེ་ནི་ཁུ་ཚུར་བསྐོར་རྒྱངས་དང་བཅས་ཏེ་གསུངས་ན། གོང་བཞིན་དུ་ཁུ་ཚུར་སྐོར་རྒྱངས་དང་བཅས་ཏེ་ལྟག་པ་དགྱེ་བའི་གདོང་ཐད་ལས་གསུངས་ནི་རེད། ལྟག་པ་ཡར་རྒྱབ་ལོགས་ལ་ཅུང་ཟད་དགྱེ་བའི་གདོང་བའི་ཐད་ལས་མི་དམའ་བར་ལག་པའི་ཐལ་མོའི་རྟིང་པ་གཉིས་ཀ་རྡབ་པའི་ཐག་སྒྲ་དང་བཅས་པར་བསྣོལ་ནས། གྲུ་མོའི་གྲུམ་འཆའ་བཏོན་ནས་འཆུན་བཙལ་ནས་ཨ་བ་དྲག་ཏུ་བཉེ་ཞིང་གཙུབ་ཤིང་གཙུབ་པ་ལས་བྱུང་བའི་མེ་དྲོད་ལྟ་བུ་དྲོད་མིག་ནས་རིམ་པར་མགོ་ལུས་ཀྱི་ཆ་ཤས་ཀུན་ལ་ཁྱབ་པར་འཕུར། དེ་གཉིས་པ་སྐུ་མཉེ་ཡིན་ནི་རེད།

༼༣ སོར་བསྣོལ།

གསུམ་པ་སོར་བསྣོལ་རེད། སོར་བསྣོལ་ནི་རྡོ་རྗེ་ལུས་ཀྱི་རྩ་ཁམས་ཡེ་ནས་ཡི་གེར་གནས་པ་དེ་ཉིད་དག་ཅིང་སྦྱང་བར་བྱེད་པའི་བྱེད་ལས་ཅན་ཞིག་རེད། གསུམ་པ་སོར་བསྣོལ་ནི། ཁུ་ཚུར་བསྐོར་རྒྱངས་ལས་ཐག་སྒྲ་དང་བཅས་ཐལ་སྦྱར་སོར་མོ་རྣམས་བསྣོལ་བའི་རྟིང་གསུངས། ཁུ་ཚུར་བསྐོར་རྒྱངས་སྔར་བཞིན་བྱས་པ་ལས་ཐག་སྒྲ་དང་བཅས་མི་འདྲ་ས་གང་ཡོད་ནི་རེད་ཟེར་ན། ཐལ་སྦྱར་སོར་མོ་རྣམས་བསྣོལ་བའི་རྟིང་པ་ཁ་ཕྱེ་ནས་ལག་པའི་གྲུ་མོ་གཉིས་ཀ་རྒྱངས། ངག་ནས་ཨ་ཞེས་བསྒྲགས་པ་དང་ལྷན་དུ་ཐལ་སྦྱར་བྲང་ལ་བརྡབ། ཡང་ངག་ནས་ཀ་ཞེས་ཐལ་སྦྱར་དེ་གཉིས་ཁ་ཕྱིར་ལ་བསྟན་ནས་ཐད་ཀར་རྒྱངས་གསུངས་ན། མདུན་དུ་ཐད་ཀར་རྒྱངས། ཡང་ངག་ནས་ཙ་ཞེས་ནང་བསྟན་དུ་རྒྱངས། ཊ་ཞེས་བྲང་ལ་བརྡབ། ཏ་ཞེས་ཁ་ཕྱིར་བསྟན་དུ་རྒྱངས། པ་ཞེས་ནང་བསྟན་དུ་རྒྱངས། ཡ་ཞེས་བྲང་ལ་བརྡབ། ཤ་ཞེས་ཕྱིར་བསྟན་དུ་རྒྱངས། ཨ་ཧཾ་ཞེས་ནང་བསྟན་དུ་རྒྱངས། ཨ་ཀ་ཙ་ཊ་ཏ་པ་ཡ་ཤ་ཨ་ཧཾ། ཞེས་བརྗོད། འདི་སོར་བསྣོལ་རེད། འདི་སྲོག་རྩོལ་ལོག་པའི་གེགས་སེལ་ཀྱང་ཡིན་ནི་རེད།

༼༤ དཔུང་གཅུས།

བཞི་པ་དཔུང་གཅུས་ནི། དཔུང་གཅུས་ཀྱི་རིགས་འདི་གཉིས་ཀས་རླུང་ལོག་པ་རང་མལ་དུ་སོར་ཆུད་པར་བྱེད་གསུངས་ཡོད། དཔུང་གཅུས་ནི་ཁུ་ཚུར་སྐོར་རྒྱངས་པུས་མོ་སོ་སོའི་སྟེང་དུ་གསུངས་ན། པུས་མོ་གཡས་གཡོན་སོ་སོའི་སྟེང་དུ་ཡར་ལ་སྒྲེང་ནས་དཔུང་པ་གཉིས་ཀ་གཟེངས་བསྟོད་པ་པུས་མོ་གོ་ལྡོག་གི་གསུངས་ནི་རེད། དཔུང་པ་གཡས་པུས་མོ་གཡོན་དང་ནི། དཔུང་པ་གཡོན་པུས་མོ་གཡས་ཀྱི་སྟེང་ལ་གོ་ལྡོག་གི་སྟེང་རྨྱང་བ་ལན་གསུམ་རེའི་མཐར་ཁུ་ཚུར་སྐོར་རྒྱངས་རྩ་འདར་ཐོན་པ་གསུམ་དང་། དེ་དང་མཉམ་དུ་ཡང་མགྲིན་པ་ཁྲུང་ཁྲུང་ལྟར་སྒྲེང་ཞིང་སྒྱུར་བའི་སྟབས་བྱེད་པ་དེ་འདྲ་ཡང་རྩ་འདར་ཐོན་པ་ལན་གསུམ་གསུངས། རྩ་འདར་ཐོན་པ་ཟེར་ན་རྩའི་གྲུམ་ཆ་ཐོན་པ་ཞིག་ལ་ཟེར་ནི་རེད། བཞི་པ་དཔུང་གཅུས་ཀྱིས་དཔུང་བའི་ནད་སེལ་གསུངས་ནི་རེད།

༼༥ བྱ་དཔུང་།

ལྔ་པ་བྱ་དཔུང་ནི་གསུངས་ནི་རེད། འདི་ལ་བྱ་རྒོད་དཔུང་སྟངས་ཡང་ཟེར། འདིར་ཚིག་བསྡུས་བཞག་ནི་རེད། ཁུ་ཚུར་སྐོར་རྒྱངས་ལས་སྙིང་ཁར་རྒྱབ་སྤྲོད་བྱས་པ་གསུངས་ནི་རེད། ཁུ་ཚུར་སྐོར་རྒྱངས་ཀྱི་ཐོག་ནས་སྙིང་ཁར་ཁུ་ཚུར་རྒྱབ་སྤྲོད་བྱེད་པ་ཕྱི་རོལ་ཏུ་རྡོ་འཕེན་པ་བཞིན་དུ་ཤེད་བསྐྱེད་ནས་འཕང་ཡོང་དུས། ནམ་མཁའ་ལ་འཕུར་སྟངས་ལན་གསུམ་གྱི་རྗེས་འཕོངས་མཐོ་གང་ཙམ་བཏེག་པའི་འབེབ་ཆུང་གསུམ་གྱི་རྗེས་མར་འབའ་ཧ་ཧ་ཞེས་དཀྲུགས། འདིར་འབའ་དཀྲུགས་ཞིག་དགོས། འདིས་ཀྱང་སྲོག་རྩོལ་ལོག་པའི་གེགས་སེལ་འགྲོ་གསུངས་ནི་རེད། འདིའི་མན་ཆད་ནས་གྲུབ་པའི་རིག་འཛིན་མཆོག་བརྒྱད་ཀྱི་སྟངས་སྟབས་བརྒྱད་འབྱུང་། འདིའི་སྟངས་སྟབས་བརྒྱད་འདི་ལ་ཕན་ཐོགས་ཅི་ཡོད་ཟེར་ན། དངོས་ཞེན་ལྷ་སྐུར་དག ཞེན་འཛིན་རང་སར་དྭངས། འཁྲུལ་བའི་རྩ་བརྡར་གཅོད་ནི་རེད། རིག་འཛིན་མཆོག་བརྒྱད་པོ་མཁྱེན་བཞིན་པ་ལྟར་དུ། ཧཱུཾ་ཀཱ་ར། འཇམ་དཔལ་བཤེས་གཉེན། ནཱ་གཱ་རྫུ་ནའམ་ཀླུ་སྒྲུབ་སྙིང་པོ། པྲ་བྷ་ཧསྟི། དྷ་ན་སཾ་སྐྲྀ། བི་མ་མི་ཏྲ། ཤཱནྟིང་གརྦྷ། གུཧྱེ་ཙནྡྲ། དེ་དག་རེད། དེ་རྣམ་པའི་སྟངས་སྟབས་རིམ་པ་བཞིན་དུ་འབྱུང་བ་ལས།

༼༦ དཔུང་བསྣོལ།

དང་པོ་ཧཱུཾ་ཆེན་ཀཱ་རའི་སྟངས་སྟབས་ཀྱི་དྲུག་པ་དཔུང་བསྣོལ་ནི། མྱུར་སྟབས་ཀྱིས་ཡར་ལངས་ཏེ་ལུས་དྲང་པོར་བསྲང་ནས། ཁུ་ཚུར་བསྐོར་རྒྱངས་ལས་ཐལ་མོ་གཡོན་པས་དཔུང་པ་གཡས་ལ་དགབ། གཡས་པས་གཡོན་ལ་དགབ་ཅིང་བསྡམ་དགོས་ནི་རེད། གྲུ་མོ་རྒྱངས། ལུས་བྱིང་པོ་གཡས་གཅུས་གཡོན་གཅུས་ཞེས། ལུས་བྱིང་པོའམ་ལུས་ཀུན་ཟེར་ནི་རེད། གཡས་གཅུས་གཡོན་གཅུས་རྒྱབ་ལོགས་མཐོང་མཐོང་གསུངས་ནི་རེད། རྒྱབ་ལོགས་མཐོང་གི་མཐོང་གི་བསམ་རྒྱུའི་མ་མཐོང་གི་བར་དུ་ཤེད་ཀྱིས་གཅུད་པ་དེ་འདྲ་བ་ལན་གསུམ་རེའི་མཐར་ཧཱུཾ་ཀཱ་རའི་རྒྱ་དེ་གཡས་པའི་རྟིང་པ་ཟེར་ན། རྐང་པ་གཡས་པའི་རྟིང་པ་ས་ལ་བཙུགས་ནས་པུས་མོ་བསྲང་། ཡང་རྐང་པ་གཡོན་པ་བསྐུམས་སྟབས་སུ་ས་ལ་བཞག་པའི་དོར་སྟབས་ཟེར་ན་གོམས་པའི་སྟབས་ཀྱིས་དོར་སྟབས་དང་བཅས་ཕྱོགས་ཀྱི་ཁུ་ཚུར་སྐོར་རྒྱངས་ལས་སྡིགས་མཛུབ་དང་བཅས། འདི་སྡིགས་མཛུབ་ཕྱིར་བསྟན་ཡིན་ནི་རེད། སྡིགས་མཛུབ་དང་བཅས་པའི་ལྟ་སྟངས་ནམ་མཁའ་ལ་ཤེད་ཀྱིས་སྒྲེང་། ཡང་རྐང་པ་བསྐུམས་ཕྱོགས་ཀྱི་བསྐུམས་ཡོད་པའི་ཕྱོགས་ཀྱི་གྲུ་མོ་རྒྱངས་པའི་སྡིགས་མཛུབ་དཀུ་ལ་མ་རེག་པ་གསུངས་ན། དཀུ་ཞེས་པ་ནི་རྐེད་པ་ལ་གསུངས་ནི་རེད། མ་རེག་ཙམ་པ་གཡས་གཡོན་དུ་གསུམ་རེའི་མཐར། ཁུ་ཚུར་གཟེངས་བསྟོད་པ་དང་བཅས་ཅུང་ཟད་འཕར་སྟངས་ལས་རྐང་པ་བགྲད་ཆུང་ཐོག་བགྲད་འབེབ་ལན་གསུམ་གསུངས་ནི་རེད། དེ་ཧཱུཾ་ཀཱ་རའི་རྒྱ་རེད། འདིས་གཙོ་བོ་རྐེད་པའི་ནད་སེལ། ལུས་ཀྱི་གེགས་སེལ་གྱི་ཐོག་ནས་བཤད་ན་དེ་འདྲ་གསུངས་ཡོད་ནི་རེད།

༼༧ བྲང་འཐེན།

འཇམ་དཔལ་བཤེས་གཉེན་གྱི་སྟངས་སྟབས་རེད། བདུན་པ་བྲང་འཐེན་ནི། ཁུ་ཚུར་གྱེན་བསྟན་ཐུར་ལ་ཤེད་ཀྱིས་སྦུབ་པ་དང་བཅས་སྒུར་ཏེ། རྐང་པ་གཤིབས་པའི་བྲང་ས་སོ་སོ་ནས་ཤེད་བསྐྱེད་པའི་འཐེན་སྟངས་མཆན་རྡེབ་དང་བཅས་མཐར་ལ་ལུས་བསྲང་ནས། ལག་པ་གཉིས་ཀྱི་ཁུ་ཚུར་དཔུང་མགོར་འཐེན་ནས་དཔུང་མགོ་སོ་སོའི་ཐད་ཀྱི་ནམ་མཁའ་ཁུ་ཚུར་གྱིས་བརྟོལ་བ་ལྟར་སྒྲེང་བ་གསུམ་གྱི་མཐར། འཇམ་དཔལ་བཤེས་གཉེན་གྱི་རྒྱ་ཁུ་ཚུར་བསྐོར་རྒྱངས་ལས་རྐང་པ་གཡས་བཏེག་པའི་སྟངས་སྟབས་དང་བསྟུན་ཏེ་སྡིགས་མཛུབ་དང་བཅས་པའི་ལྟ་སྟངས་ནམ་མཁའ་ལ་སྒྲེང་ཞིང་། བསྐུམས་ཕྱོགས་ཀྱི་གྲུ་མོ་རྒྱངས་པའི་སྡིགས་མཛུབ་སྤྱི་བོར་འཇོག དེ་འདྲ་ཇི་ལྟ་བ་གཡོན་ཕྱོགས་དང་སྤེལ་བ་གཡས་གཡོན་གྱི་ལྟ་སྟངས་གསུམ་རེའི་མཐར། སྒུར་སྟངས་ཀྱིས་རྐང་པའི་བྲང་ས་ནས་སྔ་མ་ལྟར་གྱེན་དུ་འཐེན་པའི་མོད་ལ་འབེབས་པའི་སྒུར་འབེབ་གསུམ་གསུངས་ནི་རེད། དེ་འཇམ་དཔལ་བཤེས་གཉེན་ནམ་མཉྫུ་ཤྲཱིེའི་རྒྱ་རེད། འདིས་ལུས་ཀྱི་གེགས་སེལ་གྱི་སྐབས་ལ་ཆུ་རྒྱུས་ཀྱི་ནད་སེལ་རབས་དེ་འདྲ་གསུངས་ཡོད་ཐལ།

༼༨ གཞུ་འགེངས།

ད་ཀླུ་སྒྲུབ་སྙིང་པོའི་སྟངས་སྟབས་རེད། བརྒྱད་པ་གཞུ་འགེངས་ནི། གཞུ་འགེངས་ཇི་ལྟར་གསུངས་ནི་རེད་ཟེར་ན། གྱད་ཀྱིས་གཞུ་འགེངས་བའི་ངང་ཚུལ་ཅན་གྱི་སྟངས་སྟབས་ཞིག་ཡིན་ནི་རེད། ལངས་ཏེ་ཁུ་ཚུར་སྐོར་རྒྱངས། ལངས་ཏེ་ཁུ་ཚུར་ཅི་ལྟར་སྐོར་དགོས་ནི་རེད་ཟེར་ན། མཁྲིག་མ་གཉིས་ཀས་མཆན་བསྐོར་གྱི་ཁུ་ཚུར་སྐོར་རྒྱངས་སྔོན་འགྲོས་གཞུ་རྒྱུད་ཤིན་ཏུ་སྲ་བའི་འཐེན་སྟངས་མཐར་མཆན་རྡེབ་དང་གསུངས་ནི་རེད། གཞུ་རྒྱུད་རེས་མོས་ཀྱི་འཐེན་དགོས་ནི་རེད། མདའ་ཕྱོགས་ཡང་རྒྱངས་ཐོག་འཐེན་སྟངས་སྔ་མ་ལྟར་བྱ་བ་གསུམ་དང་། གཡོན་ཕྱོགས་ལའང་དེ་བཞིན་ལན་གསུམ་སོང་ནས། ནཱ་གཱ་རྫུ་ནའི་རྒྱ་གྲུ་མོ་གཉིས་བགྲད་པའི་རྟ་རྒྱ་སྤྱི་བོར་བཞག་ནས་ལུས་ཀྱི་རོ་སྟོད་དཀྲུགས་པ་དང་སྦྲགས་འཚེར་སྐད་ཐོན་པའི་ཧི་སྒྲ་དབུགས་ཐེངས་གཅིག་ལ་བསྟུད་པ་གསུམ་གྱི་མཐར། ཁུ་ཚུར་བསྐོར་རྒྱངས་དང་བཅས་སྔར་བཞིན་འབེབས་ཆེན་གསུམ་གསུངས་ནི་རེད།

༼༩ རི་འཕུལ།

དགུ་བ་རི་འཕུལ་ནི། འདི་པྲ་བྷ་ཧསྟིའི་སྟངས་སྟབས་ཡིན་ནི་རེད། སྐྱིལ་ཀྲུང་ལས་ཁུ་ཚུར་གདོང་རྒྱངས་ཐོག་གསུངས་ནི་རེད། འདི་ཡང་མཆུན་བཙལ་ཏེ་ལག་ངར་གཉིས་ཀྱིས་མདུན་རི་འཕུལ་བ་ལྟ་བུའི། མདུན་ཕྱོགས་ན་རི་བོ་འཕུལ་བ་ལྟ་བུའི་ཤེད་བསྐྱེད་ལན་གསུམ་དང་། པྲ་བྷ་ཧསྟིའི་རྒྱ། གྲུ་མོ་རྒྱངས་པའི་ཐལ་མོ་ཆུ་སྲིན་རྣམ་རོལ་གྱི་ཕྱག་རྒྱ་ཡི་སྒོ་ནས་ཆོས་འབྱུང་གི་རྒྱ་དང་བཅས་པའི་ནང་ཧ་སྒྲ་གསུམ་བསྟུད། མར་དབུགས་ཐེངས་གཅིག་ཏུ་དྲག་ལ་བཅད་ཐོན་པ་གསུམ་གྱི་མཐར་བར་འབེབས་ལན་གསུམ་རྒྱག་དགོས།

༼༡༠ དགྱེ་དགུ།

དེའི་འཕྲོར་དྷ་ན་སཾ་སྐྲྀའི་རྒྱའམ་སྟངས་སྟབས་ཡིན་ནི་རེད། བཅུ་པ་དགྱེ་དགུ་ནི། ལངས་ཏེ་ཁུ་ཚུར་སྦུབ་རྒྱངས་ཐོག་རྐང་པའི་བྲང་ས་སོ་སོ་ནས་འཐེན་སྟངས་མཆན་རྡེབ་དང་བཅས་ཁུ་ཚུར་གཉིས་རྒྱབ་ཏུ་སྒྲེང་ཞིང་། སྐེད་སྐབས་བཅག་པ་བཞིན་དུ་གསུངས་ནི་རེད། ལུས་ཡར་ལ་བསྲང་སྟེ་སྐེད་སྐབས་བཅག་པ་བཞིན་དུ་རྒྱབ་ཏུ་དགྱེ་བ་དང་མདུན་དུ་དགུ་བ་སྤེལ་བ་གསུམ་གྱི་རྗེས་སུ། འཆུན་བཙལ་ནས། དྷ་ན་སཾ་སྐྲྀའི་རྒྱ། རྐང་པ་གཡས་གོམ་སྟབས་སུ་དོར་བའི་རྟིང་པ་ས་ལ་བཙུགས་ནས་ལུས་ཀྱི་རོ་སྨད་གཅུད་གསུངས་ན་ལུས་ཀྱི་རོ་སྨད་གཅུད་ལ་བོར་དགོས་ནི་རེད། ལག་གཡས་ཡར་གཟེངས་བསྟོད་དེ་ཐོད་རྔའམ་ཌཱ་མ་རུ་ཁྲོལ་ཚུལ་གྱི་ཕྱོགས་ལ་རོ་སྟོད་ཀྱང་གཅུ་ཞིང་། ལག་པ་ཅིག་ཤོས་ཀྱི་ཞེས་པ་གཡོན་གྱི་སྡིགས་མཛུབ་ཡང་ཐུར་བསྟན་སྟྭ་ཟུར་རམ་ལུས་ཀྱི་གདོང་ཟུར་གྱི་དཔྱི་མགོའི་ཐད་དུ་ཤེད་ཀྱིས་བརྐྱངས་པ་དང་། དེ་བཞིན་དུ་གཡོན་གྱིས་གོང་ལྟར་བྱ་བའང་སྤེལ་བ་གསུམ་རེའི་མཐར། འདིར་སྒུར་འབེབས་ལན་གསུམ་བྱ་གསུངས་ནི་རེད། འདིས་མཁལ་སྐེད་ཀྱི་ནད་སེལ་གསུངས་ནི་རེད།

༼༡༡ རྡོ་རྗེའི་འདུག་སྟངས།

དེའི་འཕྲོར་བཱི་མ་ལའི་ཕྱག་རྒྱ་རེད། བཅུ་གཅིག་པ་རྡོ་རྗེའི་འདུག་སྟངས་ནི། དང་པོར་རྡོ་རྗེའི་འདུག་སྟངས་བྱས་ནས་འདུག་དགོས་ནི་རེད། ལངས་ཏེ་ཁུ་ཚུར་སྐོར་རྒྱངས་ཐོག་ལུས་དྲང་པོར་བསྲང་། རྐང་པའི་པུས་མོ་གཉིས་བགྲད་ཅིང་རྟིང་པ་གཉིས་མ་རེག་ཙམ་ནས་སྦོ་དང་སོར་མོ་ས་ལ་བཙུགས། ཐལ་མོ་ནང་བསྟན་ལས་ལག་པའི་ཁུ་ཚུར་གྱི་མཐེའུ་ཆུང་གཉིས་ལུ་གུ་རྒྱུད་དུ་སྦྲེལ། མཛུབ་མོ་གཉིས་རྩེ་སྤྲད་པ་ཐུར་ཏུ་བསྟན་ནས་སྤྱི་གཙུག་ལ་རེག་ཅིང་གསུངས་ན། ཐུར་དུ་བསྟན་པ་དེ་ཉིད་ཀྱིས་སྤྱི་གཙུག་ལ་རེག་ཅིང་བཞག་པ་དང་བཅས་པས། གྲུ་མོ་གཉིས་ཐད་ཀར་རྒྱངས་ཏེ། སྣ་རྩེར་སློབ་དཔོན་མི་མ་ལའི་ཆོས་ཀྱི་ཕྱག་རྒྱ་ཨ་དཀར་པོ་ཆུ་ཤེལ་ལྟར་འཚེར་བ་ལ་རིག་པ་གཏད་ནས། དབུགས་ཐེངས་གཅིག་ལ་ཨ་ལྔ་ཚར་བརྗོད་པ་དང་མཉམ་དུ་སྐེད་པ་ཉེག་ཉེག་བྱས་པ་ལྟར་ལན་གསུམ་གྱི་མཐར། ཁུ་ཚུར་གདོང་རྒྱངས་དང་རྐང་པ་བགྲད་ཆུང་ཐོག རྐང་ལག་སོ་སོར་ཐད་ཀར་བསྣོལ་བའི་གཅུས་འབེབས་གསུམ།

༼༡༢ ལག་བསྣོལ།

བཅུ་གཉིས་པ་ལག་བསྣོལ་ནི། འདི་ཤཱནྟིང་གརྦྷའི་རྒྱ་ཡིན། ལངས་ཏེ་ཁུ་ཚུར་བསྐོར་རྒྱངས་ཐོག་གསུངས་ནི་རེད། ཡང་མྱུར་སྟབས་ཀྱིས་ལངས་ཏེ་ལག་པའི་ཁུ་ཚུར་བསྐོར་རྒྱངས་བྱས་ཐོག སྡིགས་མཛུབ་ཕྱིར་བསྟན་གྱི་མཁྲིག་མ་བསྣོལ་བ་སྤྱི་བོར་བཞག་ནས་གྲུ་མོ་རྒྱངས་པའི་དེ་མ་ཐག ཤཱནྟིང་གརྦྷའི་རྒྱ། ཐལ་མོ་རྒྱབ་སྤྲོད་ཀྱིས་སོར་མོ་རྣམས་ཤེད་ཀྱིས་ཕྲལ་ཏེ་སོ་སོར་རྩེ་སྤྲད་པའི་འཁོར་ལོའི་རྒྱ་སྙིང་གར་རེས་མོས་གྱིས་སྤེལ་དགོས་ནི་རེད། སྤེལ་བ་ལན་གསུམ་གྱི་མཐར་བགྲད་འབེབ་གསུམ།

༼༡༣ མེ་རླུང་ཁ་སྦྱོར།

བཅུ་གསུམ་པ་མེ་རླུང་ཁ་སྦྱོར་ནི། འདི་གུཧྱ་ཙནྡྲའི་རྒྱ་རེད། འདི་མེ་རླུང་ཁ་སྦྱོར་གྱི་འདྲེན་སྟངས་ཟེར་རྒྱུ་བོ་རེད། འདིའི་སྐབས་ལ་ལྟེ་བའི་རླུང་དེ་འོག་ཏུ་མར་མནན་དགོས་ནི་རེད། ལངས་ཏེ་ཁུ་ཚུར་བསྐོར་རྒྱངས་ལས་ཅུང་ཟད་སྒུར་ཏེ་ཧཱུཾ་ཞེས་ཐུར་སེལ་ལྟེ་འོག་ཏུ་མནན། གུཧྱ་ཙནྡྲའི་རྒྱ། ལག་གཉིས་སྡིགས་མཛུབ་རྒྱབ་སྤྲོད་ལས་བརྐྱངས་པ་བཞི་པོ་ལུག་རྒྱུད་དུ་སྦྲེལ་བ་ས་ལ་རེག་ནས། ལག་ངར་སྒྲེང་ཞིང་དགྱེ་བ་དང་མཉམ་དུ་སྟོང་འདྲེན་བྱེད་ཅིང་མིག་གྱེན་དུ་སྒྲིལ་ནས་ལུས་བསྲང་མི་ཐུབ་པ་དང་ཡང་ཧུ་ཞེས་སྔ་མ་ཇི་ལྟ་བའི་འདྲེན་དང་བཅས་དགྱེ་དགུ་སྤེལ་བ་གསུམ་གྱི་རྗེས་བགྲད་འབེབས་གསུམ། འདིའི་བཅུ་གཉིས་པ་དང་བཅུ་གསུམ་པའི་ས་བཅད་གཉིས་པོ་གོ་ལྡོག་པ་འདི་ཞལ་ཤེས་ཡིན་ཀྱང་མོས་པས་སྤྱོད་པ་རྣམས་ལ་མ་ངེས་སོ། །མཐའ་གཅིག་ཏུ་གོ་ལྡོག་དགོས་པས་ངེས་པ་མེད་གསུངས་ནི་རེད། འདིས་མ་ཞུ་བ་དང་ཕོ་བའི་ནད་སེལ་དེ་འདྲ་གེགས་སེལ་ནང་དུ་གསུངས་ཡོད།

༼༡༤ གླང་ཆེན་ཧུ་འདྲེན།

བཅུ་བཞི་པ་གླང་ཆེན་ཧུ་འདྲེན་ནི། གླང་ཆེན་ཧུ་འདྲེན་ནི་ལངས་ཏེ་ཁུ་ཚུར་བསྐོར་རྒྱངས་ཐོག་རླུང་གནད་ཡིག་ཆུང་བཞིན་ལ། མིག་གཉིས་སྤྱི་བོར་ཡར་གཏད་ནས། དཔྱང་ཐག་སྟོང་འདྲེན་གྱི་ཐེམ་བུ་ཟེར་རྒྱུ་དེ་ཡིན་ནི་རེད། འདི་ལ་ཡིད་ཀྱི་རླུང་སྟོང་འདྲེན་བྱས་ནས་ལྟེ་བར་བསྐྱིལ་དགོས་ནི་རེད། ཁུ་ཚུར་གཉིས་སྟྭ་ཟུར་དུ་ཤད་དེ་བརྐྱངས་ནས་མཐིལ་བཞི་གསུངས་ན། རྐང་ལག་གི་མཐིལ་བཞི་བོ་ས་ལ་བཙུགས་ཏེ། ཧུ་ཞེས་རིང་པོ་དྲངས་པའི་ཡིད་ཀྱིས་སྟོང་འདྲེན་ཐོག་མགོ་ཅོག་ལན་གསུམ་གསུངས་ན། མགོ་ལྟག་པ་ལ་ཅོག་ཅོག་ལན་གསུམ་གྱི་རྗེས་ལ་སྒུར་འབེབས་གསུམ་གསུངས་ནི་རེད།

༼༡༥སེངྒེ་རལ་རྔོམ།

བཅོ་ལྔ་པ་སེངྒེ་རལ་རྔོམ་ནི། ཀུན་མཁྱེན་ངག་བསྟོད་ལས། མཁྱེན་བརྩེ་ནུས་མཐུའི་གདོང་བཞི་རྔོམ། །ཞེས་པ་ལྟར། འདི་མི་ལངས་པར་བསྡད་བཞིན་པ་ལས་རྐང་པའི་རྟིང་པ་གཉིས་ས་ལ་བཙུགས། ལག་པ་ཡང་པུས་མོ་བགྲད་སྟབས་རོང་ངེར་བྱས་པའི་ནང་དུ་ཁུ་ཚུར་ལྷོད་ཆ་ཅན་གྱི་མཁྲིག་མ་གཉིས་ཀ་ས་ལ་བཞག མཐིལ་བཞི་བོ་ས་ལ་བཞག་ནི་རེད། རོ་སྟོད་གཟེངས་བསྟོད་པས་གདོང་ལྔའི་ཐ་སྙད་ཚང་གསུངས་ནི་རེད། སེངྒེ་ལ་གདོང་ལྔའི་དབང་པོ་ཞེས་མངོན་བརྗོད་ཀྱི་མིང་བཞིན་དུ་འདི་ལ་གདོང་ལྔ་ཚང་། ཨ་ཧཾ་ཞེས་འདི་སྲོག་རྩོལ་གྱི་གོ་ལྡོག་པའི་ཐེམ་བུ་ཟེར་རྒྱུ་བོ་ཡིན་ནི་རེད། མདུན་རླུང་ཅུང་ཟད་འཆུན་བཙལ་བ་དང་བཅས་ཏེ་རྒྱབ་རླུང་ཡིད་ཀྱི་ཡར་འཐེན་ནས་ཨ་ཧཾ་གི་སྒྲ་དང་བཅས་མཉམ་དུ་སྟོང་འདྲེན་བྱེད་དགོས་ནི་རེད། ཨ་ཧཾ་ཞེས་རླུང་གནད་ངེས་པར་བྱས་ནས་མགོ་རྩལ་མཇིང་པ་ལ་བསྐུར་བ་དལ་བུས་སྐོར་རྗེས་རལ་པ་གསིག་པའི་ཚུལ་གྱིས་རྒྱབ་ལོགས་སུ་བལྟ་རེས་ལན་གསུམ་རེའི་རྗེས་སུ་སྒུར་འབེབས་གསུམ་གསུངས་ནི་རེད།

༼༡༦ གྱི་ལིང་ཁྲེ་འགྲེམས།

བཅུ་དྲུག་པ་གྱི་ལིང་ཁྲེ་འགྲེམས་ནི། ཡང་མི་ལངས་པར་བསྡད་བཞིན་པ་ལས་གན་རྐྱལ་ལོག་པའི་ལག་གཉིས་ཀྱི་གྲུ་མོ་བགྲད་པའི་ཐལ་མོ་སྙིང་ཀར་སྦྱར། པུས་མོ་རོང་ངེར་བྱས། པུས་མོ་གྱེན་ལ་རོང་ངེར་བྱས་ལ། འདི་ཨུར་མོ་ཁ་ཡན་གྱི་ཐེམ་བུ་ཡིན། རླུང་ཕྱིར་ལ་འཐེན་ནས་འོག་སྒོ་གཉིས་ཁ་ཡན་དུ་བཞག་ནས་འཆུན་བཙལ་དགོས་ཁུ། འདིའི་སྐབས་ལ་བར་རླུང་ཐད་ཀར་རྒྱངས་པ་དང་རིག་པ་སྤྱི་བོའི་ཚངས་དབུགས་ལ་ཡར་གཏད་དགོས་ནི་རེད། འགྲེ་ལྡོག་ལན་གསུམ་དང་། དེ་མ་ཐག་མཐིལ་བཞི་ས་ལ་བཙུགས་ནས་སྒུར་བའི་ཧ་དཀྲུགས་དང་སྦྲགས་གཞི་དཀྲུགས་ལན་གསུམ་གྱི་རྗེས། ཧར་གྱིས་ལངས་ཁུ་ཚུར་བསྐོར་རྒྱངས་ཐོག་འབེབས་ཆེན་གསུམ།

༼༡༧ རྨ་བྱ་བྱ་རྨྱང་།

བཅུ་བདུན་པ་རྨ་བྱ་བྱ་རྨྱང་ནི། འབེབས་སྟན་ཁར་ཆུ་ལ་རྐྱལ་བ་ལྟར་། ལུས་ཁ་སྦུབས་ནས་ཆུ་ལ་རྐྱལ་བ་ལྟར་དུ་བྱ་དགོས་ནི་རེད། འདི་བགྲམ་ཆེན་བུམ་པའི་ཐེམ་བུ་ཟེར་བ་དེ་ཡིན་ནི་རེད། རླུང་ནང་དུ་རྔུབས་ནས་འོག་ཏུ་མནན་དགོས། ཐད་ཀར་རྒྱངས་ཡོང་དུས་ལས་ཀྱི་སྨད་ཐམས་ཅད་ལ་རླུང་གིས་ཁྱབ་པར་བྱེད་དགོས་ནི་རེད། ཁུ་ཚུར་ནང་བསྐོར་གྱི་ལག་པའི་གྲུ་མོ་གཉིས་བྲང་འོག་ཏུ་བཞག་པའི་ལག་མཐིལ་ས་ལ་སྦྱར། རྐང་པ་གཉིས་ཤད་དེ་རྨྱང་ཟེར་ན། ཕར་ལ་བརྒྱངས་དགོས་ནི་རེད། ཨོལ་ཀོ་བཏེག་སྟེ་གསུངས་ན། ཨོལ་ཀོའམ་མ་ནེ་ཡར་བཀྱགས་ཏེ་མཇིང་པའམ་སྐེ་ཡར་སྒྲེང་བ་ནས་བཟུང་ལུས་དང་ཡན་ལག་ཉིང་ལག་ཐམས་ཅད་ཀྱི་ཆ་ནས་འཆུན་བཙལ་ཏེ་རྨྱང་བ་ལན་གསུམ་དང་། ཡང་ཁུ་ཚུར་སྐོར་བཞིན་དུ་རྒྱབ་ལོགས་ཀྱི་དཔྱི་མགོའི་ཤ་བོ་ཆེར་སྦྱར། འཇིང་པ་སྒྲེང་ནས་ལུས་ཐམས་ཅད་ལ་འཆུན་བཙལ་བ་གསུམ་གྱི་རྗེས། རྐང་པ་བགྲད་ཆུང་གི་འབེབས་གསུམ། གསུངས་ནི་རེད།

༼༡༨ ཤང་ཤང་གཤོག་འགྱུར།

བཅོ་བརྒྱད་པ་ཤང་ཤང་གཤོག་འགྱུར་ནི། ཤང་ཤང་གཤོག་འགྱུར་འདི་རྡོ་རྗེ་རྒྱ་གྲམ་གྱི་ཐེམ་བུ་ཡིན་ནི་རེད། རླུང་ནང་དུ་བཞག་ནས་ཕྱོགས་མཉམ་པར་འཆུན་བཙལ་དགོས། ལངས་ཏེ་ཁུ་ཚུར་སྐོར་རྒྱངས་ཐོག་རྐང་པ་གཡས་པའི་བྲང་ས་ནས་ལག་པ་གཡོན་པའི་མཁྲིག་མའི་རྒྱབ་ཀྱིས་བཏེག སྐེད་པ་བསྲང་གང་ཐུབ་ཐོག་གཡས་པའི་ཁུ་ཚུར་གྱིས་གཡོན་པའི་གྲུ་མོའི་ཐད་ནས་དཔུང་པ་དང་ལག་ངར་སྒྲེང་བཞིན་པའི་འཆུན་གྱིས་རོ་སྟོད་རྒྱབ་ལ་གཅུས་འཆུས་ནེ་ཙོའི་གཤོག་འགྱུར་བཞིན་སྐོར་བ་གསུམ་དང་དེ་བཞིན་རྐང་ལག་གོ་ལྡོག་པ་གསུམ་གྱི་རྗེས་ཁུ་ཚུར་སྐོར་རྒྱངས་ཐོག་རྐང་པ་གཡོན་ཕྱོགས་ཀྱི་སྐྱིལ་སྟངས་སྔོན་ལ་འགྲོ་བའི་རྡོར་འབེབས་གསུམ།

༼༡༩ དབུ་མ་འཛུགས་སྐོར།

བཅུ་དགུ་པ་དབུ་མ་འཛུགས་སྐོར་ནི། འདིས་ལུས་ཀྱི་རྩ་ཕྲན་ཐམས་ཅད་ཀྱི་རླུང་ཀུན་སྙོམ་པར་བྱེད་ནི་རེད། རྩ་ཕྲན་གྱི་རླུང་ཐམས་ཅད་ཀུན་འདར་མར་སྡུད་པར་བྱེད་པ་ཡིན་པས་ན་འདི་ལ་དབུ་མ་འཛུགས་སྐོར་ཟེར་ནི་རེད། ལངས་འདུག་གི་ཕྱོགས་གཉིས་གང་བདེ་ལས་གསུངས་ནི་རེད། འདི་འཁོར་ལོ་ཁ་སྦྱོར་གྱི་ཐེམ་བུ་ཡིན་ནི་རེད། མཁལ་མ་ཁ་སྦྱར་ནས་རླུང་དབུ་མའི་ནང་འཛུགས་དགོས་ནི་རེད། མཁལ་མ་གཉིས་ཁ་སྦྱར་དབུ་མ་ཇེ་ཕྲར་བསླབ་པ་གསུམ་གྱི་མཐར། གཡས་གཡོན་དུ་གཅུས་བསྐོར་དང་གྱེན་འཐེན་སྤེལ་བ་གསུམ་རེའི་རྗེས། སྒུར་འབེབས་གསུམ་དང་བགྲད་འབེབས་གསུམ།

༼༢༠ ཛ་ལནྡྷ་ར།

ཉི་ཤུ་པ་ཛ་ལནྡྷ་ར་ནི། འདིས་རླུང་ཐམས་ཅད་སྡུད་ཅིང་གཙུག་ཏོར་ནམ་མཁའི་འཁོར་ལོ་ཡེ་ཤེས་ཀྱི་དབྱིངས་སུ་འཆང་བར་བྱེད། ཛ་ལནྡྷ་ར་ནི་ཁུ་ཚུར་བསྐོར་རྒྱངས་ཐོག རྐང་མཐིལ་གཡས་པ་པུས་་མོ་གཡོན་པའི་སྟེང་དུ་སྦྱར། ལག་པ་གཉིས་སྒྱིད་ཁུང་གི་སྟེང་འོག་ནས་འཁྱུད་དེ་ཐལ་མོ་ཐག་སྒྲ་དང་བཅས་སྦྱར། རོ་སྟོད་ཅུང་ཟད་བསྲངས་ཏེ་མགོ་བོ་གཡོན་སྐོར་གསུམ་གྱི་ཚེ་དམིགས་པ་སྦྱི་བོའི་ཧཾ་ལ་གཏོད། དེ་བཞིན་དུ་རྐང་ལག་མགོ་གསུམ་གོ་ལྡོག་ལན་གསུམ་གྱི་མཐར་བགྲད་འབེབས་གསུམ། དེའི་ཡན་ཆོད་གྱི་རྣམ་པ་ཉི་ཤུའི་བྱང་ཆུབ་པའི་འཁྲུལ་འཁོར་ཉི་ཤུ་སོང་ཟིན་ནི་རེད། ད་ཉེར་གཅིག་པ་རྟེན་ལུས་ཀྱི་གེགས་སེལ་དང་བརྟེན་པ་ཆོས་ཉིད་ཀྱི་གནད་ཁྱད་པར་ཅན་གབ་ཏེ་བསྟན་པ་གཉིས་ཀ་གསུངས་ནི་རེད།

༼༢༡ གེགས་སེལ་རྡོ་རྗེ་དབའ་རླབས།

དང་པོ་གེགས་སེལ།

ཉེར་གཅིག་པ་ལ་གེགས་སེལ་དང་། རྡོ་རྗེ་དབའ་རླབས་གཉིས་ལས། དང་པོ་གེགས་སེལ་ལ་ནང་གསེས་ཀྱི་བྲབ་པ། གཞིལ་བ། ཞགས་འཕེན། གླིང་བཞི་སྡུད་པ་བཞི་ཡོད་ནི་རེད།

༡ བྲབ་པ།

དེའི་ནང་གི་དང་པོ་དོན་བཞིའི་བྲབ་པ་ནི། བསྡད་བཞིན་པ་ལས་ཁུ་ཚུར་གདོང་རྒྱངས་དང་བཅས་གན་རྐྱལ་དུ་བྱས་ལ་རྐང་ལག་ཤད་དེ་བརྐྱང་། བྲབ་པ་ནི། ཐལ་ལྕག་གིས་དཔུང་བ་གཡས་གཡོན་ནུ་མ་གཉིས། མཆན་ཁུང་གཉིས། མཁལ་ཁུང་གཉིས་སུ་བྲབས།

༢ གཞིལ་བ།

གཞིལ་བ་ནི། མཆན་རྡེབ་དང་བཅས་ཁུ་ཚུར་གཉིས་སྟྭ་ཟུར་དུ་ཤད་པ་གསུམ། དེ་བཞིན་དུ་རྐང་མཐིལ་གཉིས་ཀྱིས་བརླ་སྟེང་དུ་བྲབ་ཅིང་། པུས་སྟེང་ནས་ངར་པའི་གཞུང་ལ་བྱུག་པ་ལྟར་ཤད་ནས་གཞིལ།

༣ ཞགས་འཕེན།

ཞགས་འཕེན་ནི། ཉལ་བཞིན་པ་ལས་རྐང་ལག་གཡས་པ་གཉིས་འཕེན་སྡུད་དྲག་པོ་ལན་གསུམ་དང་། དེ་བཞིན་གཡོན་པ་གསུམ་བརྗེ་སྟེ། གང་གི་ཚེ་ཡང་ལག་པ་ཅིག་ཤོས་ཞགས་སྡོགས་ཀྱི་ཚུལ་དང་།

༤ གླིང་བཞི་སྡུད་པ།

གླིང་བཞི་སྡུད་པ་ནི། རྐང་ལག་ཐམས་ཅད་ནམ་མཁའ་ལ་སྒྲེང་བའི་ཤུགས་ཀྱིས་འཕར་སྟངས་ལན་གསུམ་གྱི་རྗེས་སྐྱིལ་ཀྲུང་དང་བཅས་འབའ་དཀྲུག་གསུམ་གྱིས་རྫོགས་པའོ། །དེ་དག་ནི་སྒྲ་ཇི་བཞིན་པ་རེད་དེ་དེའི་འཕྲོར་ཁྲིད་དཔོན་བསྟན་འཛིན་དགྲ་ལྷ་ཚང་གིས་རིམ་པ་བཞིན་དུ་ལག་ཁྲིད་བྱེད་ནི་རེད། འདི་ནས་བར་སྐབས་ཀྱི་ཚིགས་སུ་བཅད་པས་རྩ་རླུང་གི་འཁྲུལ་འཁོར་འདི་ལ་དམིགས་པའི་གནད་དང་མ་ལྡན་ན་འཁྲུལ་འཁོར་གཅིག་པུའི་གོ་མི་ཆོད་པར་མ་ཟད། འཆུན་དང་དག་སྦྱོར་དེ་ཚོ་གལ་ཆེ་བར་གདམས་པ་དང་ནི། རྩ་རླུང་ཐིག་ལེ་ལས་སུ་རུང་སོང་བ་ཡིན་ན་ས་ལམ་གྱི་ཡོན་ཏན་བརྙེས་པ་དང། འདི་ལ་དད་ཅིང་འདུན་པ་སྟོབས་སུ་སྦྱོར་ནས་འབད་པ་བྱེད་དགོས། སྔགས་ཀྱི་བསྟན་པ་མ་ནུབ་པའི་རྟགས་འདི་ལ་འདི་ལ་འཇུག་པ་ཙམ་ཡང་དགའ་བར་འོས་པའི་གནས་ཡིན་དེ་ཚོ་གསུངས་ཡོད་ནི་རེད། རྣམ་འགྱུར་མང་ཡང་འཆུན་དང་མི་ལྡན་ན། །འབོལ་སྟན་སྟེང་དུ་བྱ་མཁན་དྲངས་པ་དངོས། །དག་སྦྱོར་མེད་པའི་དུད་འགྲོའི་ལུས་འགྱུར་ཡང་། །ངན་འགྲོའི་ལམ་ལ་རྟེན་འབྲེལ་སྒྲིག་པ་བཞིན། །དེ་ཕྱིར་རྟེན་འབྱུང་བྱེད་ལས་འབྲས་གསུམ་ཀའི། །དོན་ལ་རྟོན་ཅིང་སྟོང་པ་གཞིའི་འོད་གསལ། །ཉམས་སུ་མྱོང་བ་རྡོ་རྗེ་ཐེག་པའི་ལམ། །ཡིན་པར་ངེས་ཤེས་སྐྱེས་པ་ཙམ་བྱུང་ཡང་། །སྔགས་ཀྱི་གཟུགས་བརྙན་ཡོད་སྙམ་དགའ་བ་སྐྱེས། །དམིགས་པ་དང་འདུན་པ། དག་སྦྱོར་སོགས་ཅིི་ཡང་མེད་ནི་ཞིག་གིས་དུད་འགྲོའི་སྟངས་སྟབས་བྱས་ན་རྟེན་འབྲེལ་ལོག་པའི་རྒྱུ་ཡིན་པའང་བསྟན་འདུག མ་མཐར་ཡང་དད་པ་དག་སྣང་གི་སྒོ་ནས་འཇུག་དགོས་ནི་རེད། འདི་ནས་འཁྲུལ་འཁོར་དེ་དག་གི་དགོས་པ་དང་ནི་འཁྲུལ་སེལ་དོགས་གཅོད་དང་བཅས་པ་འབྱུང་གི། དེ་ཡང་རྟེན་ཅིང་འབྲེལ་འབྱུང་གི་སྒོ་ནས་རྡོ་རྗེའི་སྐྱིལ་མོ་ཀྲུང་གིས་རྩ་ཕྲན་སྟོང་ཕྲག་བདུན་ཅུ་རྩ་གཉིས་པོ་སྟབས་གཅིག་ཏུ་འཆིང་། སྐུ་མཉེས་བདེ་དྲོད་འབར། སོར་བསྣོལ་གྱིས་རྩ་ཁམས་ཡི་གེར་སྦྱོང་། དཔུང་པའི་སྟངས་གཉིས་ཀྱིས་རླུང་རང་མལ་དུ་གསོད། དཔུང་བའི་སྟངས་གཉིས་ཟེར་ན་སྟངས་སྟབས་ཀྱི་སྟངས་རེད། སྟབས་གཉིས་ཟེར་ན་སྟངས་སྟབས་ཀྱི་སྟབས་རེད་ཁྱད་པར་མེད། རིག་འཛིན་གྱི་སྟངས་སྟབས་བརྒྱད་ཀྱིས་དངོས་ཞེན་ལྷ་སྐུར་གསལ། དམ་ཚིག་འཁྲུལ་འཁོར་ལྔས་རིགས་ལྔའི་དངོས་གྲུབ་ཐོབ། དབུ་མ་འཛུགས་སྐོར་གྱིས་རྩ་ཕྲན་ཐམས་ཅད་ཀུན་ད་མར་སྡུད། ཛ་ལནྡྷ་རས་རླུང་ཐམས་ཅད་གཙུར་ཏོར་ཡེ་ཤེས་ཀྱི་འཁོར་ལོར་འཆིང་། བྱེད་ལས་ཀྱི་སྒོ་ནས་རླུང་གིས་རྩ་ཁ་འབྱེད། འཁྲུལ་འཁོར་གྱིས་རྩ་མདུད་འགྲོལ། ཐེམ་བུས་ཐིག་ལེའི་གེགས་སེལ་བའི་ཕྱིར་རླུང་དང་འཁྲུལ་འཁོར་ཡ་མ་བྲལ་བ། དེ་ཡང་ལུས་བསྲང་བ་དང་། གཅུད་པ་དང་། དགྱེ་རྒུར་དང་། ཡན་ལག་བརྐྱང་བསྐུམ་དང་། སྡིགས་མཛུབ་ལ་སོགས་པ་གང་གི་ཐད་དུའང་དབྱིག་པས་སྲད་བུ་གཅུད་པ་ལྟར་སོར་ཚིགས་ཡན་ཆད་ལ་འཆུན་འཐོན་པར་ཆ་ཆ་ནས་སྒྲིམས་ཤིང་། གཅུ་བ་དང་། གཅུད་པ་མ་ནོར་བ། ལུས་སྤྲུགས་དང་རྩ་འདར་མ་ནོར་བ། ལྟ་སྟངས་དང་སྟངས་སྟབས་མ་ནོར་བ། ཁུ་ཚུར་དང་སྡིགས་མཛུབ་མ་ནོར་བ། བྲབ་པ་དང་གཞིལ་བ་མ་ནོར་བ་གནད་ཡིན་ལ། དེ་ལྟར་རྩ་རླུང་ཐིག་ལེའི་འཁྲུལ་འཁོར་གྱི་གནད་ལ་སྦྱངས་བའི་འབྲས་བུའི་སྒོ་ནས་བརྗོད་ན། རྩ་རླུང་ཐིག་ལེ་ལས་སུ་རུང་བས་དབུ་མར་ཞུགས་གནས་ཐིམ་གསུམ་གྱི་ཡོན་ཏན་ལས་རྩ་མདུད་ཉི་ཤུ་རྩ་གཅིག་པོ་གྲོལ་ཞིང་། དུས་སྦྱོར་བཅུ་གཉིས་ཀྱི་རླུང་དག་པས་ས་ལམ་གྱི་ཡོན་ཏན་རྗེས་དཔག་ལ་མ་ལྟོས་པར་བཙན་ཐབས་སུ་བགྲོད་ནས་ཁ་སྦྱོར་ཡན་ལག་བདུན་ལྡན་གྱི་སྐུ་མངོན་དུ་བྱེད་པའི་ཕྱིར་ཐབས་ཀྱི་ལམ་ཞེས་བྱའོ། །དེ་ཡན་ཆོད་ཀྱི་གེགས་སེལ་བསྟན་ནས། ཉེར་གཅིག་པ་ལ་དོན་ཚན་གཉིས་ཡོད་པས་ནང་ཚན།

གཉིས་པ་རྡོ་རྗེ་དབའ་རླབས།

གཉིས་པ་རྡོ་རྗེ་དབའ་རླབས་ནི། འདི་དབང་གི་སྐབས་ལ་དབའ་རླབས་ཀྱི་རྩ་ལྟེམས་ཞིང་གནས་ལུགས་མི་རྟོག་པའི་ཡེ་ཤེས་ངོ་སྤྲོད་མཛད་པ་དེ་ཉིད་རེད། སང་གནང་དབང་གི་སྐབས་ལ་འདི་དག་འབྱུང་ནི་རེད། ཆོས་ཉིད་ཀྱི་གནས་ལུགས་རླུང་སེམས་ཀྱིས་བསླད་པ་དང་བྲལ་བར་མངོན་སུམ་དུ་མཐོང་བའི་མན་ངག་ཡིན་ཏེ། ཐལ་འགྱུར་ལས། ལྟེམས་པས་འགགས་ལ་བཙིར་བས་འཆིང་། །མནན་པས་གནད་ལ་གཅུད་པས་གསལ། །ཞེས་པའི་དོན་བར་རླུང་བུམ་པ་ཅན་དང་སྦྲགས་རིག་པ་ཆོས་ཉིད་ཀྱི་དོན་ལ་བཞག་ཅིང་། སྟེང་རླུང་མནན། འོག་རླུང་བསྡམ། བར་རླུང་ལྟེ་བར་རླུང་བུམ་ཅན་བཟུང་བ་དང་བཅས་ཏེ་རིག་པ་སྟོང་གསལ་འགག་མེད་གཉིས་སྣང་གི་སྤྲོས་པ་མཐའ་དག་དང་བྲལ་བའི་ངང་ལ་རང་བབས་གཡོ་མེད་ཀྱིས་བཞག་ཅིང། དབའ་རླབས་ཀྱི་མན་ངག་བཞི་པོ་བླ་མའི་ཞལ་ལས་ཤེས་པར་བྱས་ནས། མན་ངག་བཞི་པོ་འདི་གང་རེད་ཟེར་ན། ལྟེམས། བཙིར། མནན། གཅུད་བཞི་བོ་དེ་དག་རེད། འདི་དག་གི་ཐབས་ལ་བརྟེན་དེ་སྟོང་བཞིའི་དྲངས་དགའ་བཞིའི་ཡེ་ཤེས་འཆར་བ་དང་ཁྱད་པར་དུ་དབའ་རླབས་ཀྱི་རྐྱེན་ལ་བརྟེན་པའམ་བདེ་སྟོང་གིས་དྲངས་པ་གང་ཅན་པོ་ཡིན་ན་ཡང་། དཔེས་མཚོན་པའི་ལྷན་སྐྱེས་ཀྱི་ཡེ་ཤེས་ཉམས་སུ་མྱོང་བ་ཡིན་ནི་རེད། རླུང་སེམས་འདུ་ཚུལ་བཞི་ལས། དུ་བ་དང་སྨིག་རྒྱུ་ལ་སོགས་པའི་རྟགས་སྣང་ཕྲ་མོ་དང་བཅས་གསུངས་ནས། ས་ཆུ་ལ་ཐིམ་པས་སྨིག་རྒྱུ་དང་། ཆུ་མེ་ལ་ཐིམ་པས་དུ་བ། མེ་རླུང་ལ་ཐིམ་པའི་ནམ་མཁར་སྣང་བ་དང་བཅས་རྣམ་ཤེས་སྣང་བ་ལ་ཐིམ་གསུངས་ནི་རེད། རྣམ་ཤེས་སྣང་བ་ལ་ཐིམ་གྲབ་བྱས་ནས་མར་མེ་ལྟ་བུའི་སྣང་བ་དང་། ཐིམ་པ་དངོས་ཀྱི་སྐབས་སུ་སྟོང་བའི་ཡེ་ཤེས་ཀྱི་སྣང་བ་འཆར་ནི་རེད། དེ་ལྟར་རྣམ་ཤེས་སྣང་བ་ལ་ཐིམ་ནས་ཡུལ་ལྔའི་རྟོགས་པ་འགགས་པའི་མཚོན་དཔེ་ནི་སྟོན་ཁའི་ནམ་མཁའ་ལ་ཟླ་འོད་ཤར་བ་ལྟ་བུའོ། །དེའི་ཚེ་འཆིང་བའི་ཐབས་ཀྱིས་སྣང་བ་མཆེད་པར་ཐིམ་པས་ཡུལ་ཕྲ་བའི་རྟོག་པའང་འགགས་པའི་མཚོན་དཔེ་ནི་སྟོན་གནམ་རྙོག་བྲལ་ལ་ཉི་གཞོན་ཤར་བ་ལྟ་བུའོ། །དེ་ལ་གནས་པའི་ཐབས་ཀྱིས་མཆེད་པ་ཉེར་ཐོབ་ལ་ཐིམ་པས་རྟོག་པ་ཤིན་ཏུ་ཕྲ་བའང་འགགས་པའི་མཚོན་དཔེ་སྟོན་གྱི་ནམ་མཁའ་གཡའ་དག་པ་མཚམས་ཀྱི་སྨག་གིས་སློངས་པ་ལྟ་བུ་ནག་ལམ་པའི་སྣང་བ་དང་བཅས་ཏེ་དྲན་པ་ཉམས། དེ་ཉིད་གཅུད་པའི་ཐབས་ཀྱིས་ཉེར་ཐོབ་འོད་གསལ་ལ་ཐིམ་པས་ཆོས་དབྱིངས་སྤྲོས་པ་དང་བྲལ་བ་རང་གསལ་བའི་མཚོན་དཔེ་ནི་སྟོན་གནམ་སློང་བྱེད་ཀྱི་རྐྱེན་གསུམ་དང་བྲལ་བ་ཐོ་རེངས་ཀྱི་ཐུན་དང་པོ་ལྟ་བུ་སྟེ། དེ་ལྟར་ན་ལྟེམས་པས་རྣམ་རྟོག་རེག་པ་འགགས་ཅིང་། བཙིར་བས་ཕྲ་བའམ་འཆིང་བ་དང་ནི། མནན་པས་རྟོག་མེད་ལ་གནས་པ་དང་། གཅུད་པས་ཐབས་ཀྱི་རང་སར་སྤྲོས་པ་དང་བྲལ་བར་འཆར་གྱིན་ཡོད་ནི་རེད། དེ་ཡང་ལྟེམས་པས་རྣམ་ཤེས་སྣང་བ་ལ་ཐིམ་དུས། སྟོན་ནམ་ཟླ་འོད་ཀྱི་སླངས་བ་ལྟ་བུ་དང་ནི། འཆིང་བའི་སྟོབས་ཀྱིས་སྣང་བ་མཆེད་པ་ལ་ཐིམ་པས་སྟོན་གནམ་ལ་ཉི་གཞོན་ཤར་བ་ལྟ་བུ། གཞན་ནས་སྟོན་གནམ་ཟླ་འོད་ཀྱིས་སློངས་བ་ལྟ་བུ་གསུངས་རྒྱུ་དང་གནད་ཕལ་ཆེར་གཅིག་ནི་རེད། མནན་པས་མཆེད་པ་ཉེར་ཐོབ་ལ་ཐིམ་དུས་སྟོན་ནམ་སྨག་གིས་སློངས་བ་ལ་དཔེ་འཇོག་གི་འདུག་རྒྱུ་དེ་ཡིན་ནི་རེད། འདི་ངོ་མ་བཤད་ན་མཆེད་པ་ཐོབ་པ་ལ་ཐིམ་ཟེར་རྒྱུ་ཅན་པོ་ཡིན་ནི་རེད། དེའི་འཕྲོར་བཞི་བ་དེ་གཅུད་པའི་ཐབས་ཀྱིས་ཐོབ་པ་ཉེར་ཐོབ་ལ་ཐིམ་པའམ་ཉེར་ཐོབ་འོད་གསལ་ལ་ཐིམ་པའི་སྐབས་སུ། ཆོས་དབྱིངས་སྤྲོས་པ་དང་བྲལ་བ་སྟོན་ནམ་སློང་བྱེད་ཀྱི་རྐྱེན་གསུམ་དང་བྲལ་བ་ལྟ་བུའི་འོད་གསལ་བསམ་བརྗོད་ལས་འདས་པའི་ཡེ་ཤེས་བརྙེས་ནི་རེད། དེ་ནས་རེག་པའི་ཐིམ་རིམ་གྱི་རྟགས་ལ་དུ་བ་སྨིག་རྒྱུ་སོགས་ཤར་ནས། ཕྲ་བའི་ཐིམ་རིམ་སྣང་མཆེད་ཐོབ་གསུམ་གྱི་རིམ་པ་བཞིན་དུག་གསུམ་གྱི་ཀུན་རྟོག་བརྒྱད་ཅུ་རླུང་གིས་གཞོམ་པ་དང་བཅས་པ་དེ་འགགས་སོང་དུས། འོད་གསལ་བསམ་གྱིས་མི་ཁྱབ་པའི་དཔེའི་ཡེ་ཤེས་འཆར་ནི་རེད། འདི་ལྟ་བུའི་འོད་གསལ་གྱི་སྦྱང་བ་ལ་གོམས་སོང་ན། མཚོན་བྱེད་དཔེའི་ཡེ་ཤེས་ཀྱིས་མཚོན་བྱ་དོན་གྱི་གནས་ལུགས་རྟོགས་ཏེ་བརྗོད་མེད་དོན་གྱི་ཡེ་ཤེས་འཆར་ཐུབ་པ་ཡོང་ནི་རེད། དེ་ཡང་སྟོང་གཞི་དང་སྦྱར་ན་འདི་རེད། རླུང་ངམ་རྣམ་ཤེས་སྣང་བ་ལ་ཐིམ་དུས་རིམ་བཞིན་སྟོང་བ་དང་། སྣང་བ་མཆེད་པ་ལ་ཐིམ་དུས་ཤིན་ཏུ་སྟོང་བ། མཆེད་པ་ཉེར་ཐོབ་ལ་ཐིམ་དུས་སྟོང་པ་ཆེན་པོ། ཉེར་ཐོབ་འོད་གསལ་ལ་འདྲེས་དུས་ཐམས་ཅད་སྟོང་པའང་ཟེར་ན་ཆོག་ནི་རེད། སྟོང་པ་ཆེན་པོའམ་ཡང་ན་རབ་ཏུ་སྟོང་པ་ཟེར་དུས་ཡོད་ནི་རེད། ཞེས་བྱ་སྟེ་གསུངས་ནི་རེད། ཕྱི་མ་ནི་ཞེས་པ་འདི་རབ་ཏུ་སྟོང་པ་ཅན་པོ་དེ་རེད། གཞི་གནས་ཀྱི་ཡེ་ཤེས་འཆི་བ་འོད་གསལ་གྱི་ངོ་བོ་ཉིད་ཡིན་པས་གསུངས་ན། དུས་གསུམ་སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པ་འཆི་བ་འོད་གསལ་གྱི་ངོ་བོ་གཞིའི་འོད་གསལ་གྱི་ངོ་བོར་འཆར་བ་ཡིན་པས་ན་དེ་ཉིད་དབའ་རླབས་ཀྱི་རྐྱེན་གྱིས་གསལ་བར་བྱས་པའམ། བདེ་སྟོང་གིས་དྲངས་པའི་ལྷན་སྐྱེ་གང་ཡིན་ཡང་འདྲ་སྟེ་གཏིང་གསལ་གཞོན་ནུ་བུམ་པའི་དཔེའི་གསུངས་ན། གཏིང་གསལ་ལམ་ནང་གསལ་འདི་ཤིན་ཏུ་ཕྲ་བའི་ཡེ་ཤེས་ལ་གོ་ནི་རེད། གཞོན་ནུ་བུམ་པ་སྐུའི་དཔེ་བཞག་ནས་དཔེའི་ཡེ་ཤེས་ཀྱི་ངང་དུ་ད་ལྟ་བཅོས་བསླད་མེད་པར་མཉམ་པར་འཇོག་པ་ལ་ཡུན་རིང་དུ་གོམས་པ་དེ་ཉིད་སད་དུས་ཀྱི་གསུངས་ན། འདི་སད་རྨི་གཉིད་འཐུག་སྙོམས་འཇུག་སྟེ་གནས་སྐབས་བཞིའི་སྐབས་ཡིན་པས། དེའི་ནང་ནས་སད་དུས་ཀྱི་ཆོས་སྐུའི་བསྲེ་བ་དང་མཚམས་སྦྱར་བ་ནི་གནད་དམ་པའོ། །འདི་ནི་རྟོགས་པ་ལ་མྱོང་བ་ཅུང་ཟད་ཐོན་པའི་གང་ཟག་རྣམས་ཀྱིས་གོ་མྱོང་རྟོགས་གསུམ་གྱི་ནང་ནས་རྟོགས་པ་ལ་མྱོང་བ་ཅུང་ཟད་ཐོན་པའི་གང་ཟག་རྣམས་ཀྱི་ཉམས་སུ་བླང་བྱ་ལས། ལས་དང་པོ་པའི་གང་ཟག་ལ་བསྟན་བྱ་མ་ཡིན་པས། ཟབ་མི་ཟབ་ཀྱི་ཐད་ལ་དེ་འདྲ་ཡིན་གསུངས་ནི་རེད། འདིའི་ཐད་ཀྱི་འཕྲོས་གཏམ་ཞིག་ཞུས་ནི་ཡིན་ན། སྔགས་མཚན་བཅས་ཐུན་མོང་པའི་ལམ་ནས་རླུང་དབུ་མར་འཛུད་ནས། དཔེའི་ཡེ་ཤེས་ཀྱིས་དོན་གྱི་ཡེ་ཤེས་ལ་འདྲེན་རྒྱུ་འདི་ལ་གྲོལ་ལམ་བླ་མའི་མན་ངག་རྫོགས་པ་ཆེན་པོའི་མན་ངག་ལ་བསྟེན་དགོས་ནི་རེད། སྣང་སེམས་འཕོ་བའི་བག་ཆགས་ཤེས་སྒྲིབ་ཕྲ་བ་རྡོ་རྗེ་ལྟ་བུའི་ཏིང་འཛིན་གྱིས་བཅོམ་བྱ་དེ། མཐའ་གཅིག་ཏུ་གསང་སྔགས་ཐབས་ལམ་ལ་མ་བརྟེན་པར་མི་འགྲུབ་པ་ཞིག་ཡིན་ནི་མ་རེད། དེ་ནི་དོན་གྱིས་འོད་གསལ་མཐར་ཐུག་དེ་གང་ཡིན་ན་དབང་བཞི་བའི་སྐབས་ཀྱི་རྟོགས་དོན། དེ་རིག་པ་རྩལ་གྱི་དབང་ཆེན་གྱི་ཁྱད་པར་དུ་ཕྱེས་པའི་དོན་གྱི་འོད་གསལ། རིག་སྟོང་སྤྲོས་པ་དང་བྲལ་བ་དབྱིངས་དང་ཡེ་ཤེས་དབྱེར་མེད་ཀྱི་ངོ་བོར་རྗེན་གྱེར་དུ་མཐོང་བ་དེ་ཡིན་ནི་རེད་མོད། དེ་ལྟ་བུའི་མཐོང་བྱ་མཐོང་བྱེད་དང་བྲལ་བར་མཐོང་བ། མ་མཐོང་བའི་མཐོང་བ་ཆེན་པོ། ཤེས་དང་ཤེས་བྱ་རོ་གཅིག་པའི་བདག་ཉིད་དེ་ཉིད། མཚོན་བྱ་དོན་གྱི་ཡེ་ཤེས་དངོས་དེའི་ཚབ་དེ་མཚོན་བྱེད་དཔེའི་ཡེ་ཤེས་ཞིག་གི་ཡོང་ནི་མ་རེད། རླུང་དབུ་མར་ཞུགས་པ་ཙམ་གྱི་ཡེ་ཤེས་ངོས་ཟིན་དཀའ་ནི་རེད། དེ་མ་ཟིན་དུས་རླུང་དབུ་མར་ཞུགས་ཀྱང་ཕན་ཐོགས་མ་བྱུང་ནི་རེད། ཅི་ལྟར་ཕན་ཐོགས་མ་བྱུང་ནི་རེད་ཟེར་ན། དོན་གྱི་འོད་གསལ་མཚོན་པའི་སྒོར་མ་གྱུར་པས་རྩ་རླུང་ཐིག་ལེའི་འཇུ་འདུལ་ཅི་ཞིག་བྱས་ཀྱང་། ཟག་བཅས་འཇིག་རྟེན་པའི་ལམ་ལས་འདའ་ཐུབ་གི་ཡོད་ནི་མ་རེད། ལུས་ཀྱི་སྟངས་སྟབས་བྱེད་ཚུལ་དང་ནི་རྩ་རླུང་རང་ག་མའི་འགྲོས་ཙམ་ཞིག་ཕྱི་རོལ་པ་ལ་ཡང་ཡོད་ནི་རེད། དེང་སང་གང་ན་ཡིན་ན་རྒྱ་གར་གྱི་ཕྱི་རོལ་བའི་ལུགས་ལས་དར་ཡོང་བའི་ཡོ་ག་ཟེར་རྒྱུ་ཞིག་དར་གི་ཡིན་ན། ཡོ་ག་ཟེར་བའི་མིང་བཏགས་པ་འདི་ལ་སོགས་པ་མང་ནི་རེད་དེ། ཡང་དག་གི་ལམ་ལ་བསྙེག་ཐུབ་པ་མ་ཡིན། དེ་ཚོ་ཡང་རྩ་རླུང་གི་བྱེད་རྩོལ་དགོས་ནི་རེད། གོང་ནས་ཉེར་ཐོབ་འོད་གསལ་ལ་འདྲེས་གསུངས་རྒྱུའི་སྟོང་གཞིའི་མཐར་ཐུག་གི་སྐབས་དེ། ཀུན་གཞི་ཆོས་དབྱིངས་ལ་སད་པ་དང་གཉིས་ཀ་གཅིག་རེད། རྟོགས་མེད་རང་གསལ་ཡུལ་དང་འདྲེས་པ་ཙམ་ཞིག་ཀུན་གཞི་རྣམ་ཤེས་ཀྱི་མཚན་ཉིད་ཀྱང་ཡིན་ནི་རེད། ཀུན་གཞི་རྣམ་ཤེས་ཀྱི་མཚན་ཉིད་ཞོགས་ཟེར་ན། གསལ་ཞིང་རིག་པ་སེམས་ཀྱི་མཚན་ཉིད་ཇི་ལྟར་བྱས་ཀྱང་ཡིན་ནི་རེད། ཀུན་གཞི་ཆོས་དབྱིངས་ལ་སད་པ་དེར་ཆ་རྐྱེན་གང་ཚོགས་དགོས་ནི་རེད་ཟེར་ན། ཆ་རྐྱེན་གསུམ་ཚོགས་དགོས་ནི་རེད། རྟོག་མེད་རང་གསལ་དེའི་ངང་ལས་མཐོང་ཡུལ་རགས་པ་གཟུགས་སུ་འཆར་བ་ལ་སོགས་པའི་དབང་ཤེས་ལྔ་ལས་རང་ལོག་དགོས། དེ་གཅིག་རེད། དགག་སྒྲུབ་ཆགས་སྡང་ལ་རྟོག་པ་དེ་ཉོན་ཡིད་ཡིན་ནི་རེད། དེ་ལས་འདའ་དགོས་པ་དང་གཉིས་རེད། འཐིབ་ཅིང་རྨོངས་པ་ཅན་གྱི་སྒྲིབ་ལུང་མ་བསྟན་ཀུན་གཞི་ཡིན་ནི་རེད། དེ་ལས་སད་དགོས། དེ་ལྟར་སད་པའི་མཚན་ཉིད་དེ་འདི་དང་འདི་ལྟ་བུ་ཞིག་རེད་ཟེར་ནས་ངེས་ཤེས་ཀྱི་འཛིན་སྟངས། རང་སའི་སྒྲིབ་པ་རྔམ་པོ་ཆེ་དེ་དང་བྲལ་དགོས་ནི་རེད། དེ་དང་གསུམ་ཡིན་ནི་རེད། དེ་གསུམ་པོ་ཚོགས་ན་ཡེ་ཤེས་སུམ་ལྡན་རེད། ངོ་བོ་གཅིག་ལ་ལྡོག་ཆའི་དབྱེ་བའི་རང་རྩལ་མ་འགགས་པ་དེ། རྒྱལ་བའི་གསུངས་བའི་སོ་སོ་རང་རིག་པའི་ཡེ་ཤེས་ཡིན་ནི་རེད། དེའི་ཕྱིར་ན་འདིའི་དོན་ཤིན་ཏུ་རྟོགས་གོམས་མཐར་ཕྱིན་པའི་རྣལ་འབྱོར་མཉམ་བཞག་གི་སྤྱོད་ཡུལ་ཡིན་པས་སྟབས་ཀྱིས། ཀུན་གྱི་སྤྱོད་ཡུལ་དུ་མ་གྱུར་པ་ཡིན་པས་ན་གང་ཟག་ཐུན་མོང་པ་ཐམས་ཅད་ཀྱི་དབའ་རླབས་དང་བདེ་སྟོང་གི་དྲངས་དགའ་བཞིའི་ཡེ་ཤེས་ཉམས་འོག་ཏུ་མ་ཆུད་ན། ཅི་ལྟར་དགོས་ནི་རེད་ཟེར་ན། གོང་གི་གེགས་སེལ་མཇུག་ཏུ་གསུངས་པའི་འཇམ་རླུང་ཡུན་རིང་དུ་བཟུང་ནས། འཇམ་རླུང་བུམ་པ་ཅན་ཡུན་རིང་དུ་བཟུང་ནས་རྣམ་པར་མི་རྟོག་པའི་གཏུམ་མོ། རྣམ་པར་མི་རྟོག་པའི་གཏུམ་མོ་ཞེས་པ་ནི། གཏུམ་མོ་ལ་ནང་གསེས་ཀྱི་དབྱེ་བ་ཡོད་པའི་ནང་གི་མཆོག་གི་གཏུམ་པོ་ཟེར་བ་དེ་རེད། དེ་ལ་འདྲིས་པར་བྱ་བ་ནི་ཀུན་ལ་གཅེས་སོ། །རྩ་རླུང་ཐིག་ལེའི་ལམ་གང་ཡིན་ན་ཡང་ཐུན་ཐམས་ཅད་ཀྱི་མཇུག་ལ། འཇམ་རླུང་དང་སྦྲགས་ནས་རྣམ་པར་མི་རྟོག་པའི་གཏུམ་མོ་གསུངས་ན། རང་བཞིན་འོད་གསལ་བའི་ཆོས་ཉིད་ལ་མཉམ་པར་འཇོག་རྒྱུ་དེ་གནད་ཡིན་པར་གསུངས་ནི་རེད། དེ་ལྟར་གསུངས་ནས་ཆེད་དུ་གདམས་པ་ནི། གསུམ་པ་རྗེས་ཀྱི་རིམ་པ་བསྔོ་བ་སྨོན་ལམ་སྤྱི་དང་ཁྱད་པར། ཉོན་མོངས་རླུང་སེམས་འཁོར་བའི་རང་བཞིན་ནི། །ཞེས་པའི་པའི་ཤློོ་ཀ་གཅིག་པུ་གང་མང་འདོན་པར་བྱའོ། །ཞེས་པའང་ལྷོ་རྒྱུད་དུ་བསྟན་པའི་བ་དན་འཛིན་པའི་བུ་ཨབྷཱ་ཡའི་ངོར་མཁའ་འགྲོའི་གསང་མཛོད་ཀྱི་བདག་པོ་རང་བྱུང་རྡོ་རྗེས་སོ།། །། དེ་རིང་གི་ཆོས་ཁྲིད་འདི་འདྲ་ཞིག་ནས་མཚམས་འཇོག་དགོས་ནི་རེད། དེའི་འཕྲོར་བླ་སྤྲུལ་རྣམ་པས་ང་ཆོས་ཁྲིད་ལ་ཕར་འགྲོ་ཚུར་འགྲོ་ལ་བསུ་སྐྱེལ་མཛད་མི་དགོས། བླ་མ་བསུ་དང་སྐྱེལ་ལ་སོགས་པ་ཡང་དག་བླངས་པ་བརྟེན་པ་སངས་རྒྱས་ཀྱི་མཚན་དཔེ་འགྲུབ་པའི་རྒྱུ་ཡིན་ནའང་། ངས་ནི་ཆོས་རྒྱུན་ཙམ་ཞིག་སྤེལ་བའི་ཆ་མངག་པ་ཞིག་གིས་ཆ་འཕྲིན་སྤྲད་རྒྱུའི་བྱ་བ་ཞིག་དང་ཆོས་དུང་ཞིག་གི་ཚབ་བྱེད་གི་ཡོད་པས། ཁྱེད་རྣམ་པའི་མོས་གུས་ཀྱིས་རྒྱལ་བའི་བྱིན་རླབས་ཁྱི་སོ་ལ་རང་བསྲེལ་གྱི་དཔེས་འདྲེན་གི་ཡོད་སྲིད་ཀྱང་། ང་ནི་སོ་སྐྱེས་ཐ་མལ་པ་ཡིན་པས་ན་ཆོས་ཁྲིད་གྲོལ་རྗེས་ཐམས་ཅད་ཆོས་གྲོགས་ལས་ང་རང་བླ་མ་ཡིན་བསམ་རྒྱུའི་འདང་ཞིག་ལར་མ་རྩ་མེད། དེས་སྟབས་ཀྱིས་ངའི་སེམས་ཅན་ལ་ཕར་ཕན་མི་ཐོགས་གི། ཕན་བཏག་རྒྱུའི་ནུས་པ་རང་ལ་མི་འདུག དུས་སྙིགས་མའི་སྐབས་འདིར་ཚུར་ལ་ཕན་ཐོགས་ནི་རེ་ཡང་ཅུང་དཀའ་རྒྱུ་རེད། རང་གིས་འཇོན་ན་ཆོས་བླ་མ་དེས་ཡན་དུ་དགོས་ས་མེད་བསམ་ནས་མི་གྲལ་ནས་བུད་ནི་ཡིན་ཟེར་ནས་ལོ་བཅུ་གྲངས་བུད་སོང་ནི་རེད། མྱི་དང་ངག་བསྲེ་ནི་མིན་ཟེར་ནས་ལོ་འགའ་རེ་སོང་ཡོད་ནི་རེད་དེ། དམ་བཅའ་མི་བརྟན་པའི་མྱི་ཡིས། མྱི་ངོ་མ་ལྕོགས་ནས་འདི་ལྟར་མང་པོའི་ཚོགས་གསེབ་ལ་ཐོན་འདུག་དགོས་ནི་ཞིག་རེད་སོང་ནི་རེད། ཡིན་ནའང་ཚེ་རབས་ཀུན་ཏུ་དམ་པའི་ཆོས་འཛིན་རྒྱུའི་སྨོན་ལམ་དེ་སྨོན་ལམ་ཐམས་ཅད་ཀྱི་མཆོག་ལ་འཛིན་གི་ཡོད། མདོར་ན་དགེ་འདུན་འདུས་པ་བརྒྱ་སྟོང་ལ་དུས་ཀྱི་མཐའ་མར་ཆོས་ཀྱི་ལེགས་སྐྱེས་ཞིག་འབུལ་རྒྱུ་འདི་ཡང་བསྟན་པ་མི་ནུབ་འཕེལ་རྒྱས་ཀྱི་རྒྱུར་འགྲོ་བའི་སྨོན་ལམ་རེ་རྒྱག་བཞིན་པ་ཡིན། ང་གཞིས་ན་ཡོད་དུས་གསང་སྔགས་ཀྱི་དབང་སྐུར་སྐབས་ཁྲི་ཐོག་ལ་ཆོས་ཀྱི་ཆེ་བ་འདོན་ཕྱིར་འདུག་གིན་ཡོད། དེ་མ་གཏོགས་རྒྱུན་གྱི་ཆོས་ཁྲིད་ལ་འབོལ་གདན་རེའི་སྟེང་དུ་བསྡད་ནས་བཤད་རྒྱུ་དེ་ངའི་སྲོལ་ཡིན་ཏེ། འདི་ལྟར་ཕྱོགས་གཞན་ལ་ཐོན་དུས་ས་ཁོངས་ལ་སོགས་པའི་སྟབས་བདེ་ཞན་གྱིས་གཅིག་འདྲ་འདྲ་དག་དག་མི་ཡོང་ཁུ། དེ་ཅི་ཟེར་གོ་ནི་རེད་ཞེ་ན། ཁྱེད་བླ་སྤྲུལ་རྣམ་པས་ཉིན་ལྟར་ང་ཕར་ཚུར་བསུ་སྐྱེལ་མ་མཛད། ཁྱེད་རྣམ་པས་ཕྱག་ལས་མཛད་པ་གཞན་དག་གི་གོ་མ་བཀག་ཞུ་བ་ཡིན། ང་རང་ལར་ཆེན་པོ་ཞིག་གཞི་ནས་མིན། ཆེ་ཆེ་བྱེད་རྒྱུར་གོམས་མེད། ཁྱེད་རྣམ་པས་ཆེ་བཀྱག་མཛད་དུས་དོགས་མི་བདེ་བའི་སྣང་བ་འདྲ་ཞིག་འཆར་གི། ཅི་ལྟར་བྱས་ཀྱང་ཆེན་པོ་ཞིག་གནའ་དུས་རབས་སྔོན་མའི་དུས་དཀྱིལ་དུ། ཚང་མ་ཡོངས་རྫོགས་རྭ་བཅད་ནས་རུམ་ལ་བཅུག སྣ་ཕུག་ནས་རྡང་ལ་བཏགས་ཚར་ནི་རེད། ང་ལྟ་བུ་བླ་མིང་རེ་ཐོགས་ནི་བོད་ལ་བརྒྱ་ཐམ་པ་དགོས་ན་སྟོང་ཡོད་ནི་རེད། སྟོང་དགོས་ན་ཁྲི་ཡོད་ནི་རེད། རང་རང་གི་ས་ཚོད་ནས་བསྡད་ན་དེ་འཛའ་ནི་རེད་བསམ་ནི་ཡིན། དེའི་འཕྲོར་དེང་སང་ནམ་ཟླ་དབྱར་ཁ་དྲོ་བའི་དུས་རེད། ས་ཆ་འདི་བོད་ཁུལ་གྱི་ནང་ནས་གཤོང་ས་ཅུང་ཟད་དྲོ་ས་འདྲ་ཞིག་རེད་མོད་དེ། སྤྱིར་དེང་སང་སྣོད་བཅུད་ཀྱི་རྟེན་འབྲེལ་འཆུག་ནས་ནས་འབྱུང་བ་སྒང་གཤོངས་ལ་ལོག་ནས། དྲོ་དུས་དྲོ་ཆེ། འཁྱག་དུས་འཁྱག་ཆེ་རྒྱུ་དེ་འཛམ་གླིང་སྤྱི་ལ་ཡོང་གོ་ནི་རེད། རྣམ་པ་ཚོས་རང་རང་གི་འཕྲོད་བསྟེན་དང་བཞེས་ཕྱོགས་ལ་རང་རང་གིས་གཟབ་གཟབ་མཛོད། སྤྱིར་ན་ལུགས་ཟུང་འདུན་མ་ལེགས་པའི་བྱ་བ་གང་བསྒྲུབ་དགོས་ན་ལུས་ཁམས་བདེ་ཐང་གནད་ཆེ་ནི་རེད། ཁྱད་པར་ཕྱོགས་ཀྱི་ཆོས་ཞུ་བ་ཚོས་དབུ་ཐོན་ལམ་ཡག་ལ་རང་ཡུལ་གཞིས་ལ་འཁོར་རྒྱུའི་ཆེད་དུ། རང་གི་འཚོ་སྐྱོང་ལ་ལྟ་རྟོགས་རང་གིས་མཛོད་ཞུས་ནི་ཡིན། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་དང་ཡོད་པའི་དགེ་རྩ་ཐམས་ཅད་གཅིག་ཏུ་བསྡུས་ཤིང་། བཟླུམས་ཏེ། བསྡམས་ནས་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་པའི་རྒྱུ་བྱས། བསྟན་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན་ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱད་དེ། མཐར་ཐུག་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པའི་ཕྱིར་དུ། རྗེ་བཙུན་འཇམ་པའི་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ།། །།

བསོད་ནམས་འདི་ཡིས་ཐམས་ཅད་གཟིགས་པ་ཉིད།།

ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་།།

སྐྱེ་རྒ་ན་འཆིའི་རྦ་རླབསའཁྲུགས་པ་ཡི།།

སྲིད་པའི་མཚོ་ལས་འགྲོ་བ་སྒྲོལ་བར་ཤོག།

འཇམ་དཔལ་དཔའ་བོས་ཇི་ལྟར་མཁྱེན་པ་དང་།།

ཀུན་ཏུ་བཟང་པོ་དེ་ཡང་དེ་བཞིན་ཏེ།།

དེ་དག་ཀུན་གྱི་རྗེས་སུ་བདག་སློབ་ཅིང་།།

དགེ་བ་འདི་དག་ཐམས་ཅད་རབ་ཏུ་བསྔོ།།

ཆོས་ཚུལ་འདི་ཡང་ཉི་ཟླའི་དཀྱིལ་འཁོར་བཞིན།།

ཕྱོགས་བཅུ་ཐ་གྲུ་ཀུན་ཏུ་གྲགས་གྱུར་ཏེ།།

བློ་གྲོས་པདྨོ་རབ་ཏུ་རྒྱས་བྱེད་ཅིང་།།

སངས་རྒྱས་བསྟན་པ་དར་ཞིང་རྒྱས་པར་ཤོག།

ཧྲཱི། སྔོན་ཚེ་དེ་བཞིན་གཤེགས་པ་གཙུག་ཏོར་ཅན།།

འཕགས་པའི་ཡུལ་དུ་གྲུབ་ཆེན་ཀུ་ཀུ་རི།།

ཁ་བ་ཅན་དུ་དཔལ་ལྡན་ཐང་པ་ཞེས།།

པདྨ་རིག་འཛིན་ཞབས་ལ་གསོལ་བ་འདེབས།།

བསྟན་པ་ཡུན་རིང་གནས་པའི་བཀྲ་ཤིས་ཤོག།

ཐུབ་བསྟན་མཛེས་པའི་རྒྱན་གཅིག་ཀློང་ཆེན་པ།།

བཤད་སྒྲུབ་བསྟན་པའི་མངའ་བདག་འཇིག་མེད་གླིང་།།

མཚུངས་མེད་བླ་མའི་བསྟན་པར་སྲིད་མཐའི་བར།།

བཤད་སྒྲུབ་ཐོས་བསམ་སྒོམ་པས་འཛིན་གྱུར་ཅིག།

དཔལ་ལྡན་མཁས་གྲུབ་བྱེ་བའི་གཙུག་གི་རྒྱན།།

མདོ་སྔགས་ལུང་རྟོགས་བསྟན་པའི་ཤིང་རྟ་ཆེ།།

འཇིགས་བྲལ་སྔ་འགྱུར་རྒྱལ་བ་རྫོགས་ཆེན་པ།།

ཤྲཱི་སེང་ཆོས་གྲྭའི་བསྟན་པ་རྒྱས་གྱུར་ཅིག།

གངས་རིའི་ར་བས་སོགས།

སྐར་མ་རབ་རིམ་མར་མེ་དང་།།

སྒྱུ་མ་ཟིལ་བ་ཆུ་བུར་དང་།།

རྨི་ལམ་གློག་དང་སྤྲིན་ལྟ་བུར།།

འདུས་བྱས་ཆོས་རྣམས་དེ་ལྟར་བལྟ།།

དེ་ལྟར་ཟབ་ལས་ཆེས་ཟབ་མན་ངག་བཅུད།།

ཇི་བཞིན་བཀོད་ལ་བློ་ཡི་མཐུ་དབེན་པའི།།

ནོངས་པ་གང་མཆིས་བླ་མ་ལྷ་ལ་བཤགས།།

དགེ་ཚོགས་བླ་མའི་ཞབས་པད་བརྟན་ཕྱིར་བསྔོ།།

དེ་ལྟར་ཀློང་ཆེན་སྙིང་ཐིག་གི་བདེ་སྟོང་རླུང་གི་རྫོགས་རིམ་དང་། ཡན་ལག་གཏུམ་མོ་འབར་འཛག་གེགས་སེལ་རིག་འཛིན་འཁྲུལ་འཁོར་བཅས་ཀྱི་ཟབ་ཁྲིད་ལྷན་སྐྱེས་ཡེ་ཤེས་རྒྱ་མཚོའི་འཇུག་ངོགས་ཞེས་བྱ་བ་འདི་ནི་མགོན་པོ་གང་གི་ལེགས་བཤད་བདུད་རྩི་འཐུང་བ་ལ་སྐལ་བ་མི་དམན་པའི་སློབ་མིང་ཙམ་འཛིན་པ་པདྨ་ནམ་མཁའ་འཇིགས་བྲལ་གྱིས་རབ་རྒྱན་མེ་བྱ་ལོའི་མགོ་ཟླ་བའི་དམར་ཕྱོགས་དགའ་བ་གསུམ་པའི་ཉིན་རྒྱ་ནག་སྤོས་ལྡན་གྲོང་ཁྱེར་དུ་གསུང་སྒྲ་ཇི་བཞིན་ཡི་གེར་བཀོད་པའོ།། །།